Ni-Efesu ây

Ni-Efesu ây

¹ Miy mi Pawlu, mi nit yey tèem Yeesu Kristu kà yey yiɗi Fay, mi kèpfa dunde dun nit della ta wàa di Fay tâage a Efesu, un nit ây goosu di Yeesu Kristu gi. ² Nge Fay Too worro ni Yeesu Kristu Nitcoorra, aw hîinu mbâr waw ni tâam mbâri! ³ ’Mita e tâaw di Fay, Too wàa di Yeesu Kristu Nitcoorra worro, mbârsina ni mbâr Jungci Delliya pî a faktiturum ni Yeesu Kristu gi! ⁴ Ngam Fay catkina mgban a gin Kristu, ɗoko mbangse kparri, ha ot tâa nit della ta wàa cen jàk maarra a ɗàm kpees wàa. ⁵ A yiide wàa gbèesi mgban dànda wàa, ha ot ir hàm ta wàa yèk Yeesu Kristu. Ey yiɗe kà yey ngam deluge, ⁶ ha ot ’misi ’mita mbâr wàa. Hîigina mbâr maan ɓa hû go ni Kristu Hàm wàa yiɗu gi. ⁷ Ngam wurra Yeesu Kristu kpàana sàasum ni njîim wàa, yaafum jàk maarra worro. Kà yey Fay lònina gbaarra mbâr wàa, ⁸ gbaasina dèy ni ɓèlla ni còycum pî, ni hakkilo pî. ⁹ Ey cèngnina jày tâage nà fûurriya a yiɗum wàa. Ngam a yiɗum wàa carre mgban e mbir ni Yeesu Kristu kày delu gi. ¹⁰ Yiɗige e tèe jàk maan a kpèta mgbàr ây, ngam ha e ’mèmsi jàk ây pî tâage a faktiturum ni deesi a gin Kristu, e tâa hak waw. ¹¹ A gin wàa kpàana ɗa jàk koyrra, ot nit ây tâage mgban catiya a gin Fay a dànda wàa gi. Ey tèerre jày pî kà yey dàni a yiɗum wàa. ¹² Yiɗige e kpàa a gin worro ’misum a ’mita wàa, ot nit ây ɗàage iirra jàk dànda worro a gin Kristu gi. ¹³ Un ɗa ye raknu Yèk Kâwrra saanum wun yèk takundi, goosunu di Kristu, Fay de iirra dun ticèngsunum, de hîinu Jungci Delliya a yèk mòonjum kàn. ¹⁴ Jungci Delliya gi tâagina jàk màrra a kpàarra jàk koyrra worro, ot nit ta Fay got saa gi, ha ot ’misi ’mita wàa. ¹⁵ Ngam maan miy ɗa, ye rakmi yèk goosum wun di Yeesu Nitcoorra, ni yèk yiide wun tâagunu a gin nit della ta wàa di Fay pî, ¹⁶ mi loorre a gàarra mbew di Fay ngam wun ba. Mi ɓaysunurre a waar mum. ¹⁷ Mi waarre ngam Fak Yeesu Kristu Nitcoorra worro, Tooy ’mita, e hîinu còycum, e lònunu kày gun cèngnu gi, ¹⁸ e kayngunu a mîis tinîir wun, ha un cèngni jày tâagunu a jàk dànda yey ’naasunu gi, ni jày tâage gbaarra a ’mita jàk koyrra yey ge hîi daw da nit della ta wàa, ¹⁹ ni jày tâage ’mita mbinum wàa a gin worro, dot nit ây goosu gi. Mbinum maan ɗa tèe ni kpèw kpèw dèy, ²⁰ ye gûysu Fay di Kristu a wurra gi, de iiw a riina wàa a faktiturum. ²¹ A farra Kristu tâage hak waw da tiɗàm kpees ây, ni mbinum ây, ni kpèw kpèw ây, ni jàk ɓèl ây, ni koo nîir hâ ’naasin pî naa tâarra yey gi gbè, amma a mgbàr yey ge dàara gi ɗa. ²² Fay kûuni jàk ây pî a nak Kristu. Ye tâa ey tâage a jày pî, Fay de iiw e tâa hak waw da nit kimjum ây pî. ²³ Aw tâage is wàa di Kristu. Ey dii mûunumya a gin waw, mûunirre koo jâ pî a jày pî.

¹ Mgban un dii nà wutiya, ngam un ragu tuy di Fay ba, ngam un mbire jàk maarra. ² Mgbàr maan un dikɗe nà kà yey digin a nit kparri ây gi, un rakɗe nà tuy di wûun jàk mbinum ây u fay, di tindòom yey tèege kòsòng a tîim nit ây tâa aw ragurre tuy di Fay ba. ³ Orro pî ot dii nà kà nit ây gi, ot futɗe nà gayrum jàk is worro, ot tèerre nà jày yiɗi is worro ni jàk dànda worro. A tâam worro hû go ot hàm ây ɗi a ngòlnji Fay kà nit ây kana ɗa. ⁴ Amma Fay a gbaarra ’maton wàa, ni yiide wàa dèy yiɗina ni erra gi, ⁵ de gûysina dorro ni un ɗa ’mèmsa ni Kristu, ye tâa orro ot dii nà wutiya ngam jàk maarra worro. Ɓaysin, ni mbâr Fay saanu! ⁶ A ’mèmsum ni Kristu Fay de gûysina ni ey, de iina ot wûunji ni ey a faktiturum. ⁷ Hû go Fay yiɗi e kàlni gbaarra a ’mita mbâr wàa, a mgbàr yey ge dàara gi pî. Yiɗi e kàlni ni mgbergum wàa tâagina a gin Yeesu Kristu gi. ⁸ Ngam a mbâr Fay saanu ni goosum. Saarra yey ti tâa ni tèem wun ba, amma hîir Fay ɗi. ⁹ Saarra maan ti tâa ni tèerra tèem ba, ngam ta koo wuna e ’misi hak wàa ba. ¹⁰ Orro ot titèem ta wàa ɗi di Fay, mbangsina a ’mèmsum ni Yeesu Kristu, ha ot tèe tèem mbâri, ye ii mgban ngam ot dik a farra gi. ¹¹ Ngam maan ɓaysin, aw kpàanu nà mgban a tîim nit ây èege yèk Fay. A nit ây gàan daw nit rrèpnum ây, rrèpnum yey tèen ni kàn a is waw gi, aw ’naasunu nit èca rrèpnum ây. ¹² Mgbàr maan un kpâanji nà ni Kristu, un ’mèmsi ɗa a tîim ni-Israyel ây ba, un dii nà ni-wooy ây a jàk wasta ây hîi daw Fay ni mòonjum kàn da nit ta wàa gi. Un dii nà a kparri gi jàk dànda cen, Fay cen. ¹³ Amma kòsòng ye tâa un ’mèmsi ni Yeesu Kristu, un dii gaarra ni ey ngam wurra wàa, un nit ây tâage nà mgban kpâarriya gi. ¹⁴ Ngam Kristu raknjina a tâam mbâri. Inina kpolo dot ni-Yude ây ni nit ây èege nà yèk Fay, ye tâa ni wurra wàa yaasifa njèrra yey mîinjina a tîim, iigina nà nit yiir ây gi. ¹⁵ Ni wurra wàa yaasifa yèk mgbèngda tâage ni wasta yèk ây ’nang ’nang, ngam ha e ’mèmsi daw da yòot nit ây cuk gi, e mbangsi daw nit fûuya kpolo. Hû go mbangse tâam mbâri a tîim waw. ¹⁶ Ni wurra wàa a minjum kpiiri raknjisina ni Fay, dot yòot nit ây irge isi kpolo tâage nà mgban cuk gi. Ey atkifa jàk yiiri a tîim. ¹⁷ Ye dàara Kristu gi, saknu Yèk Kâwrra tâam mbâri dun nit ây tâage nà kpâarriya, ni ot nit ây tâagirra nà gaarra gi. ¹⁸ Ngam yèk wàa ot yòot nit ây cuk gi ot kpàa lekta a gin Tooy Bèl ni Jungci kpolo. ¹⁹ Hû go un nit ây èege nà yèk Fay, un censirra ni-wooy ây koo ni-riiy ây kana ba, amma un ’mèmsi a tâam nit della ta wàa di Fay, un nit àay rra wàa ɗi ɗa. ²⁰ Un dii jàk jâarra a jày tarin nit tèerra ây ni nit ây lòni yèk Fay. Yeesu Kristu ni hak wàa tâage gòok tigòyni jàk jâarra maan. ²¹ Jàk jâarra pî ’mèmse a gin wàa, iisirrarre ’mita ha e tâa àay della di Fay. ²² A gin Kristu un nit ây èege nà yèk Fay ɗa un ’mèmsi a jàk jâarra maan, ha un ɗa un ir àay gin titâam wàa di Fay, e tâarra a farra ni Jungci wàa.

¹ Ngam maan miy Pawlu mi nit yey leknimin a kultuma yèk Yeesu Kristu ngam wun, un nit ây èege nà yèk Fay gi, mi waarre Fay ngam hak wun. ² Takundi, un un rage yèk tèem mum yey hîim Fay a mbâr wàa, ha mi tèe ngam wun. ³ Ni lònum jày cèngninim dànda wàa fûurriya, kà yey ɗàamifa dun kèta càa gi. ⁴ Un janggirre go yèk maan, kpàa gun kpàa ɓaysum jàk cèngnum mum a yèk Yeesu Kristu tâage nà fûurriya gi. ⁵ Mgbàr kana yèk fûurriya gi ti tâa cèngnumya a gin nit ây ba, kà yey lòni Fay kòsòng ni Jungci wàa da nit tèerra ây ni nit lònum ây, tâage nit della ta wàa gi. ⁶ E rri yey jày gàa yèk yey tâage nà fûurriya gi: A gin Yeesu Kristu ni Yèk Kawrra, a nit ây èege nà yèk Fay aw ’mèmsi ni ni-Yude ây a jàk koyrra yey hîi Fay gi, aw dii isi kpolo, aw ’mèmsi ni aw a yèk mòonjum kàn. ⁷ Mi nit tèerra tèem ɗi a sakta Yèk Kâwrra ngam mbâr Fay, hîigim a tèerra ni mbinum wàa gi. ⁸ Miy nit yey hòmge luurra a tîim nit della ta wàa di Fay pî, mi kpàa mbâr wàa ha mi sak yèk gbaarra mbâr Kristu da nit ây èege yèk Fay, ⁹ ha mi cèngnini daw da nit ây pî jày tâage dànda Fay fûurriya, fûuge diga ɗaarra jày pî a gin Fay Tooy mbangsum jày pî, ¹⁰ ngam ha kòsòng a nit kimjum ây aw cèngnini daw jàk kana ’nang ’nang a còycum Fay da tiɗàm kpees ây, ni jàk mbinum ây a faktiturum. ¹¹ Diga ɗaarra jày pî Fay yiɗige kà yey a dànda wàa, de tèe jàk maan ni Yeesu Kristu Nitcoorra worro. ¹² Ot goosu go di Yeesu Kristu gi, kpàa got kpàa lekta a gin Fay ni dànda tinîir worro pî, tolnji cen. ¹³ Hû go mi waanurre, èfin tinîiri yèk ’màar mum riimi ngam wun gi, ’maa ge ’maara dun jàk ’mita. ¹⁴ Ngam maan mi gbâygirre a ɗàm kpees Tooy Bèl. ¹⁵ A ni-gbaa ây pî a faktiturum ni deesi aw kpàa nîiri a gin wàa. ¹⁶ Mi waawrre, ngam e kpèwsunu tinîiri ni Jungci wàa a gbaarra ’mita wàa, ¹⁷ ha a goosum wun Kristu e tâa a mîis tinîir wun, ha un tâa gaktiya, rîirriya a yiide. ¹⁸ Mi waawrre di Tooy Ɓèl, ngam un kpàa cèngnum ni nit della ta wàa pî jày tâage kpàklum, ni yâkta, ni yengda, ni ’mita a yiide Kristu gi, ¹⁹ ha un cèngni mbâra yiide wàa hòmge cèngnum koo jàk hâ pî, ngam un mûuni ni jày mûuge a gin Fay pî. ²⁰ Fay tâage ni mbinum e mbir jày hòmge dèy di jày waana, koo di jày dànna gi pî, ge mbir ni kpèw kpèw tèe a tîim worro gi, ²¹ e tâa ni ’mita a gin nit kimjum ây ni gin Yeesu Kristu, koo ningàa tâam timgbàri ha tâam timgbàri! Amen.

¹ Hû go miy mi nit yey leknimin a kultuma ngam Nitcoorra mi waanurre, digin kà yey gese a jày yiɗi Fay ye ’naasunu gi, ² un ûuni hay, un tâa ni fetkum tinîiri, un èfnji tinîiri a tîim wun ni yiide. ³ Hârin un mòo a ’mèmsum yey hîinu Jungci Delliya gi, un ’mèmsi ni ti ’mèmni tâam mbâri. ⁴ Ngam isi dii kpolo, Jungci Delliya ngaa dii kpolo. Hû go ɗa jàk dànda dii kpolo a gin ’naasunu Fay gi. ⁵ Nitcoorra dii kpolo, goosum dii kpolo, baptisma ngaa dii kpolo. ⁶ Fay dii kpolo Tooy nit ây pî, wûunge da nit ây pî, tèeni ni nit ây pî, tâage a gin nit ây pî. ⁷ Amma koo wuna a tîim worro kpàa hîir wàa a mbâr Fay, a tigeni hîir Kristu. ⁸ Ngam gàarre a defterre Fay: Ye naa u fay gi, de ’maani ni nit ây ’mèmdiya, de hîira hîir ây da nit ây. ⁹ Ji yiɗi gàarra yèk naarra wàa ya? Ti gàa ɗà ɗàara cita ha a yengji deesi gi ba yi? ¹⁰ Nit yey cirga gi, ey tâage ɗa nit yey naase gi a hak faktiturum ây pî, ngam ha e mûuni jày pî a tâam wàa. ¹¹ Ey hîigi daw da nit ây kana aw tâa nit tèerra ây, da nit ây kana aw tâa nit ây gaw lòni yèk wàa, da nit ây kana aw tâa nit ây gaw sak Yèk Kàwrra, da nit ây kana aw tâa hàm faat waw da nit kimjum ây, da nit ây kana ngaa aw tâa nit kàlnjum ây. ¹² Hîi daw da nit ây kà yey, ngam mbangsum da nit della ta wàa di Fay aw get a tèerra tèem mgbaanjum, ngam ’misunum nit ây tâage is Kristu gi, ¹³ ha orro pî ot kpèt a goosum kpolo, ni cèngnum di Hàm Fay, ha ot ir @ni-toonji ây, ot kpèt a geta yer worro a mûurra mbâr Kristu. ¹⁴ Hû go got tâasirra hàm ây ba, yûusi daw kèlmum sòo ni hiski a kàlnjum ’nang ’nang anga a gâra nit ây, ni rèeng rûfrum waw gi ba, ¹⁵ amma ot yèerre yèk takundi ni yiide, ha ot ’mit a jày pî a gin Kristu tâage hay gi. ¹⁶ A gin wàa ’mèmse isi pî, gòyrre ni tulnji ây ni jàk ây pî, ye tâa koo jàk hâ tèerre tèem wàa kà yey gesu gi. Hû go isi pî iisirrarre ’mita ni yiide. ¹⁷ Ngam maan mi gàanurre ni nîir Nitcoorra, ta un diksirra bak kà nit ây èege yèk Fay ba, dike a dànda waw raya tâage ɓa hû go gi. ¹⁸ Dànda waw dii yiriya. Aw kpâanji ni jungci Fay, ngam èca cèngnum waw anga a tinîir waw ndèktiya gi. ¹⁹ Ye tâa lawsam waw lòoyige, aw lekni hak waw a haanum tuy, ha aw tèe jàk ’miskum pî ni gayrum jàk ây. ²⁰ Amma un un èngni kà yey a yèk Yeesu Kristu gi ba. ²¹ To un rak go yèk wàa ni yèk kàlnjum wàa, getnji ni takundi a gin wàa gi, ²² kà yey un cèngnige, sey un woofa dikri wun màrra, un botfa nit mgbanti a hak wun leke a gbeerra ni rûfrum gayam is wàa gi, ²³ un insi dànda tinîir wun fûuya, ²⁴ un mgbabi nit fûuya yey mbangsu Fay a rèenjum ni ey gi, tâage ni gòyrra ɗèm, ni tâam delliya a takundi. ²⁵ Ngam maan woofan yèk rèeng, koo wuna e yèe yèk takundi ni nit tâanjum wàa, ngam orro ot jàk ây ɗi a is kpolo. ²⁶ To un an go ni ngòlnji, faasin hak wun ta un yaa a jàk maarra ba. Ta un tâa ni ngòlnji maan ha unji e lek ba. ²⁷ Ta un hîiw orri di Seyɗan ba. ²⁸ Nit oorgum jày ta e haasirra oorra ba, amma ndika e tèe tèem mbâra ni kàn wàa, ha e kpàa jày ge hîi da nit èca ây gi ɗa. ²⁹ Ta yèk makta e yuu a mgbelyèk wun ba, amma yèen yèk mbâra kày gesi e mgbaanji daw da nit ây, ha e hîi daw mbâri da nit rakta ây. ³⁰ Ta un aanju ngòlnji di Jungci Fay Jungci Delliya gi ba, a gin yey kpàanu ticèngsunum ge gòynunu a unji saarra wun gi. ³¹ Woofan tinîir ɗalliya, ni anda yèy, ni ngòlnji, ni bimrum yèk ây, ni maasum yèy, ’mèmsa ni tèem ây pî tâage maktiya gi. ³² Irin nit ây tâage ni mgbergum yèy, ni ’nàpkum tinîiri a tîim wun, un yaafinji kà yey yaafunu Fay a gin Kristu.

¹ Tâan nit futa ta Fay, un mbir kà yey mbire ey, un hàm ây yiɗi dun gi. ² Digin dikri wun ni yiide, kà yey yiɗunu Kristu, hîige hak wàa ngam worro kà hîir jàk gurfum delgu di Fay gi. ³ Amma yèk njeenu, ni tèem ’miskumya, ni gayrum jàk ây ta un yèe a tîim wun ba sam. Ngam kà yey gesi daw da nit della ta wàa di Fay. ⁴ Ti gesi ɗa yèk njengji, ni yèk ray, ni yèk ’miskumya e tâa a tîim wun ba, amma ndika gàarra mbew di Fay. ⁵ Sey un cèngni, koo wun tâage nit iirra njeenu, koo nit tèem ’miskumya, koo nit gayrum jàk ây, koo nit coorra mâri, ge lek a wûun yey wûuni Kristu ni Fay ba sam. ⁶ Ta nirri e rûfnu ni yèk ɓa hû go ba! Ngam maan ngòlnji Fay dàararre da nit ây tâa aw ragu tuy ba. ⁷ Ta un ’mèmsi ni nit ây gi ba! ⁸ Ngam mgban un dii nà a kulpi, amma kòsòng un tâarre a kayang Nitcoorra. Hû go digin kà nit ây tâage a kayang! ⁹ Ngam kayang repɗe a jày pî tâage mbâra, ni ɗèm, ni takundi. ¹⁰ Getnjuwan jây pî to delu go di Nitcoorra. ¹¹ Ta un ’mèmsi a tèem kulpi èege jàk repta gi ba, amma ndika lònum tèem ây gi a kayang. ¹² Ngam jày tèen a nit ây ni fûucu gi jàk lawsam ɗi, koo a yèerra gi ɗa. ¹³ Amma kayang lònirre jày pî, ngam jàk ây pî tâage lònumya gi kayang ɗi. ¹⁴ Ngam maan gàarriya ɗi: Mu nit kûurra gi, mûyi mu an a tîim nit ây wutke gi, Kristu e kayngumda! ¹⁵ Faasin hak wun mbâra a dikri wun diknu gi. Ta un tâa kà rak ây ba, amma kà nit ây tâage còycumya. ¹⁶ Ta un woo unji mbâra e hòm ɓa hû go ba, ngam tâarra yey gi maktiya ɗi. ¹⁷ Ngam maan ta un tâa kà nit ây èege cèngnum jày ba, amma cèngnin jày yiɗi Nitcoorra gi! ¹⁸ Ta un tâa nit râmda mbàl ba, yey ge mboysu tâam wàa di nirri gi, amma tâan mûunumya ni Jungci Delliya. ¹⁹ Hû go un yèenji a tîim wun ni ndûu ây, ni ndûu ’misunum Fay, ni ndûu Jungci Delliya, un kâa un ’misini nîir Nitcoorra a tinîir wun. ²⁰ Hû go ɗa un gàa mbew di Fay Tooy Bèl koo ningàa ngam jày pî, a nîir Yeesu Kristu Nitcoorra worro, ²¹ un coonji a tîim wun a tolnji Kristu. ²² Un nikin ây, ragin daw tuy da maa rra wun kà yey raknu di Nitcoorra gi. ²³ Ngam nihun tâage hak nikin kà yey tâa Kristu hak nit kimjum ây, tâage is wàa gi. Ey tâage nit saanum waw. ²⁴ Hû go a nikin ây sey aw ragi daw tuy da maa rra waw a jày pî, kà yey raguwan nit kimjum ây di Kristu. ²⁵ Un nihun ây, yiɗin kin ta wun, kà yey yiɗe Kristu nit kimjum ây gi. Hîige hak wàa ngam waw, ²⁶ ngam ha e ɓetkini daw, a ye kòl daw ni sòo. ni yèk wàa gi ɗa, ²⁷ ha e gòyni daw a ɗàm kpees wàa aw tâa ni ’mita, cen jàk ’miskum koo fetki jày koo jàk kana ba, aw tâa nit della ây cen jàk maarra. ²⁸ Hû go gesi a nihun ây aw yiɗi kin ta waw kà yey yiɗin is waw. Nit yey yiɗe kin wàa gi, hak wàa yiɗe. ²⁹ Ngam cen nirri haagirra yiirra is wàa ba, amma riisurre, faawrre ni hakkilo, kà yey mbire Kristu da nit kimjum ây tâage is wàa gi. ³⁰ Ngam orro ot jàk ây ɗi a is wàa. ³¹ Defterre Fay gàa: Kà yey nihun woo ge woofa too wàa ni nuu wàa, e ’mèmsi ni kin wàa, aw ɗa cuk i gaw ir isi kpolo. ³² Yèk yey yèk fûurriya ɗi. Mi yèerre yèk maan a gin Kristu ni nit kimjum ây. ³³ Amma un ɗa, gesi koo wuna a tîim wun e yiɗi kin wàa kà yey yiɗi hak wàa. Nikin ngaa sey e coow di maa wàa.

¹ Un hàm ây, ragin daw tuy da too rra wun ni nuu rra wun! Ngam kà yey gesi a ɗàm kpees Nitcoorra. ² «Coo too wey ni nuu wey», e tâage yèk mgbèngda màrra yèege a yèk mòonjum kàn, ³ gàa «ngam ha mu kpàa kâwum a tâam wey, ha yer wey e yâk a deesi gi». ⁴ Un tooy ây ɗa, ta un aanji daw ngòlòm da hàm ta wun ba, amma nàrrin daw ni rûunum ni mgbèngda a yèk Nitcoorra. ⁵ Un sàay ây, ragin daw tuy da nit ɓèl ta wun a deesi gi, ni tolnji ni timalni, ni tinîir mbâri, mu gàa un tèewrrarre go di Kristu gi, ⁶ naa ni tèerra a nis waw kày ge del daw, amma kà sàay rra Kristu tèege ni tinîir waw pî jày yiɗi Fay gi. ⁷ Tèen tèem wun ni kâwum tinîiri, mu gàa un tèewrrarre go di Nitcoorra, naa da nit ây. ⁸ Ɓaysin, koo wuna koo sàay ɗi koo tiròom ɗi, to tèe go jàk mbâri, kpàa ge kpàa bèeb tèem wàa a gin Nitcoorra. ⁹ Un nit ɓèl ây, mbirin daw ɗa mbâri da sàay rra wun, ta un ngakɗa daw ba. Ɓaysin, Nitcoorra wun diinu kpolo a faktiturum ni aw, ti raptirre nis nit ây ’nang ’nang ba. ¹⁰ Yèk kana ngasimdage: Tâan kpèw a gin Nitcoorra, ni kpèw kpèw mbinum wàa. ¹¹ Mgbabin jàk bàpri ây hîinu Fay gi, ha un kpàa gòyrra a gin Seyɗan ni gâra ta wàa. ¹² Ngam tapnjum bàpri worro ti tâa ni nirri ba, amma ni tiɗàm kpees ây, ni jàk mbinum ây, ni wûun ây a kulpi gi, ni tindòom makta ây a faktiturum. ¹³ Ngam maan arrin jàk bàpri ta Fay, ha un kpàa gòyrra kpèw a unji makta, ye gun gbèesi tapnjum pî gi. ¹⁴ Hû go mbangsin un cîi kpàang wun ni takundi, un mgbap lurra titefki tâage gòyrra ɗèm, ¹⁵ un lekni naan un tâa mbangsumya a sakta Yèk Kâwrra tâam mbâri. ¹⁶ Ji hòmge da jàk ây gi pî, sey un at kirngi tâage goosum. Ni erra gun kpàa mòonum ndof hengsum ây lakra Tooy mamji gi. ¹⁷ Iin darrhak titefki tâage saarra, arrin ɓet ɓèl Jungci Delliya tâage yèk Fay. ¹⁸ Mbirin jàk ây gi pî ni waarra Fay, un gun mgbaanjum wàa koo ningàa ni Jungci Delliya. Waatin un rîi kpèw a waar maan ngam nit della ta wàa di Fay pî. ¹⁹ Waan Fay ngam mum ɗa, ha e hîim yèk yey gesi mi yèe gi, mi cèngnini daw tolnji cen yèk fûurriya a Yèk Kâwrra. ²⁰ Mi nit gòynum ɗi a yèk maan, koo ye tâam a kultuma gi. Hû go waan Fay, ngam ha mi kpàa yèerra Yèk Kâwrra kày gese gi tolnji cen. ²¹ Ticiku kor worro yiɗumya, mòoge mbâra a tèerra tèem mgbaanjum a gin Nitcoorra, kà ge kàlnu jày pî, ngam ha un cèngni ɗa yèk mum kày tâami gi. ²² Mi tèewfarre a gin wun yèk maan, ngam ha un cèngni yèk worro kày tâana gi, ha e suusunu tinîir wun ɗa. ²³ Fay Tooy Ɓèl ni Yeesu Kristu Nitcoorra worro, aw hîi daw da kor goosum ây pî tâam mbâri, ni yiide, ni goosum! ²⁴ Mbâr Fay e tâa ni nit ây pî yiɗi Yeesu Kristu Nitcoorra worro ni yiide tâam timgbàri gi!