Ni-Kolossi ây
11 Miy mi Pawlu, mi nit yey tèem Yeesu Kristu kà yey yiɗi Fay, ni Timote kor worro 2 ot kèpfa dunde, dun nit della ta wàa di Fay, dun kor ta worro goosu di Kristu, tâage a Kolossi gi. Nge Fay Too worro e hîinu mbâr wàa ni tâam mbâri! 3 Ot gàawrre mbew di Fay Tooy Yeesu Kristu Nitcoorra worro koo ningàa, a waar worro ngam wun gi. 4 Ot rage yèk goosum wun di Yeesu Kristu, ni yèk yiide wun tâagunu a gin nit della ta wàa di Fay pî. 5 Un mbitɗe hûy ngam jàk dànda yey ii Fay a faktiturum ngam wun, yey raknu nà mgban a yèk takundi, a Yèk Kâwrra gi. 6 Yèk maan kpèrre a gin wun, kà yey kpèrri a gin nit ây a deesi lang. Tâtɗe koo u hâ, repɗe. Mbitɗe kà yey a gin wun ɗa, diga unji yey raknu yèk maan, cèngnunu mbâr Fay takundi gi. 7 Kà yey èngnunu ɗa a gin Epafra, nit tèenjum ni orro yiɗu ot gi. Ey nit tèem Kristu ɗi nit tèem mbâra, tèerre ngam wun. 8 Ey kàlna yèk yiide wun tèe Jungci Delliya gi. 9 Ngam maan orro ngaa diga mgbàr yey rakna yèk wun, ot loorre a waarra Fay ngam wun ba, ot gunurre ha un mûu ni cèngnum jày yiɗi ey gi, a còycum ni rakta yey anga a Jungci wàa. 10 Hû go dikri wun ge ge gesi a ɗàm kpees Nitcoorra, un delu a jày pî, un rep jàk repta a tèem mbâri pî, un iisirra cèngnum di Fay. 11 Ot waarre Fay ngam e kpèwsunu a kpèw kpèw pî, ni mbinum ’mita wàa, ha un èf tinîir wun un gòy a jày pî, 12 ha un gàaw mbew di Fay Tooy ni kâwum tinîiri. Ey mbirgina ha ot ’mèmsi a jàk koyrra nit della ta wàa, a tâam kayang. 13 Ey saanina a mbinum kulpi, ’maagina a wûun Hàm wàa yiɗu gi. 14 A gin nit yey kpàana sàasum, ni yaafum jàk maarra worro. 15 Ey rèenji ni Fay tâa nirri ti raburre ba, ey tâage màrra a ɗàm kpees jàk mbangsum pî. 16 Ni ey Fay mbangse jàk ây pî tâage a faktiturum ni deesi, jày rabin a nit ây gi ni jày tâa aw rapɗe ba, tâam wûun ây, ni nit ɓèl ây, ni nit tiɗàm kpees ây, ni nit mbinum ây. Jày pî ni ey mbangse, mbangsi ngam wàa ɗa. 17 Ey tâage màrra a jày pî. A gin wàa gòye jày pî. 18 Ey tâage hak isi tâage nit kimjum ây, nit ɗaarra jungci, nit màrra a gûysum a wurra, ngam ha e tâa nit tiɗàm kpeesi a jày pî. 19 Ngam delu di Fay, nge jày mûuge pî a gin wàa e tâa a gin Hàm wàa. 20 Ni ey Fay raknjisini hak wàa a jày pî, jày tâage koo a deesi, koo a faktiturum. Raknjisini jày pî ni njîim Hàm wàa, wutke a minjum kpiiri gi. 21 Un ɗa un kpâanji nà mgban ni Fay, un tâa nà nit yiir ta wàa a dànda wun, a tèerra tèem makta. 22 Amma ngam wurra Hàm wàa, wurra ni isi, Fay raknjisi kòsòng ni un, ha e gòynunu un tâa delliya, ɓet ɓet, yèk kana cen a ɗàm kpees wàa. 23 Hû go sey un mòo mbâra a goosum, gòyin kpèw a ot maan, ta un hèenifa jàk dànda wun tâagunu a Yèk Kâwrra yey raknu gi ba. Yèk yey tâa saktiya a gin nit ây tâage a deesi lang. Mi Pawlu mi ire nit tèerra tèem a yèk maan. 24 Kòsòng tinîir mum kâwimde a ’màar ây riimi ngam wun gi. Ni is mum mi mûunirre a jày âygirra a ’màar Kristu, ngam nit kimjum ây tâage is wàa. 25 Miy mi ire nit tèem a tîim nit kimjum ây, a tèem yey hîim Fay ngam wun ha mi yèe yèk wàa pî kày gese gi. 26 Yèk yey tâage nà fûurriya, kupte gi diga ɗaarra yeri ni nit ây, amma kòsòng Fay lòni a gin nit della ta wàa. 27 Yiɗige e cèngnini daw, kày tâa gbaarra a ’mita yèk fûurriya yey a tîim nit ây èege yèk wàa. Yèk yey, Kristu tâage a tinîir wun. E hîinu jàk dànda a ’mita Fay. 28 Yèk wàa di Kristu gi de sakna, ot yèerre ot kàlnjirre koo di wuna a còycum pî, ngam ha ot gòyni koo wuna pî e tâa getiya ni Kristu a ɗàm kpees Fay. 29 Ngam maan mi hâtɗe ni riirra ’màari, a tèem yey kpèwsinim Kristu ni mbinum wàa tèege a gin mum gi.
21 Mi yiɗi un cèngni, kày ’mirre kpàksum gbàat yey haami ngam wun ni ni-Lawdikiya ây, ’mèmsa ni nit ây lang tâa aw haa rapta nis mum ba. 2 Mi hâtɗe ngam tinîir waw e gòyi, ha aw ’mèmsi a yiide, ha cèngnum jày ni còycum ɗa e mûu a gin waw, aw rak mbâra yèk Fay tâage nà fûurriya gi, e tâage Kristu. 3 A gin wàa dii gbaarra còycum ni cèngnum jày pî. 4 Mi gàanu kà yey, ngam ta koo wuna e rèengnu ni rûfrum jàk ây ba. 5 Ngam koo mi kpâanji go ni un ni isi gi, mi tâanjirre ni un ni dànda mum. Tinîir mum kâwimde, ye kpàami tâam wun mbâra, ni gòyrra wun kpèw a goosum di Kristu. 6 Kày ngotnu Yeesu Kristu Nitcoorra gi, hû go diknjin ni ey, 7 tâan kà jàk gaktiya, un jâa a gin wàa, un gòy a goosum kà yey èngnunu gi, un iisirra gàarra mbew! 8 Faasin hak wun, ta nirri e mòonu ni kàlnjum jày, ni rûfrum jàk ɓa hû go anga a hàar nit ây, a yèk jàk mbinum ây a kparri tâa ti getnji ni yèk Kristu ba! 9 Ngam mûurra jàk Fay pî dii tâarre takundi a is Kristu. 10 Un dii mûunumya ni jày pî a gin Kristu. Ey tâage hak waw da wûun ây ni jàk mbinum ây pî. 11 A ’mèmsum ni ey un dii rrèpnumya ni rrèpnum yey tâa aw tèe ni kàn ba, amma ni rrèpnum yey anga a gin wàa, tâage bota is jàk maarra. 12 Ye kpàanu baptisma gi, un siptinji ni Kristu, un gûysi ɗa ni ey a goosum yey mbire Fay, gûysu di Kristu a wurra gi. 13 Un ɗa ye tâanu wutiya a tèerra jàk maarra, ye tâa un kpàa rrèpnum a gin Kristu ba, Fay gûysunu ni ey, yaafina jàk maarra pî. 14 Ey mboysifage ɗerrewol kiri worro, yey yèegi nà a hak worro ni yèk mgbèngda ây gi. Hèenifage jàk kèta maan, gbalfage a minjum kpiiri. 15 Ye bosi daw da tiɗàm kpees ây ni jàk mbinum ây, de lòni a nis nit ây, ey sun daw pî ni Kristu Hàm wàa. 16 Hû go ta un woo nirri e hiitunu a yèk tiriici, koo a yèk jàk njoorra, koo a yèk unji daprum, koo a yèk lòta corri, koo a yèk unji wuysum ba. 17 Yèk ây gi pî bingi jày ge dàara gi ɗi gbè, amma takundi gi Kristu tâage. 18 Ta nirri e ɗòlnjunu ni jày kpàanu gi ba, ye tâa tinîir wàa delu a ûunum hay ni coorra malayka ây, ey futɗe a jày lòtkurra rabe gi, ’misirre hak wàa ɓa hû go a dànda wàa kà nirri. 19 Ey ti futɗe Kristu ba. Kristu gi tâage hay, a gin ’mèmsi isi lang ni tulnji ây ni rîsi ây, riisi daw, ha isi e ’mit kà yey yiɗi Fay. 20 Ye tâa un wutnji ni Kristu, un woofa yèk jàk mbinum ây a kparri gi, ngam jâ tâanu kà nit kparri ây, ngotnu yèk hàar nit ây gi ya? 21 Ngam aw gàarre: Ta mu at jàk yey ba, ta mu haaw jàk yey ba, ta mu bangda ba. 22 A jàk ây gi pî jàk tèerra nit ây ɗi, a dat maan gbee ge gbee. Yèk maan ana a yèk mgbèngda nit ây ni yèk kàlnjum waw. 23 A yèk ây gi aw în dawrre yèk còycum, a daprum ni ûunum hay kà yey yiɗin aw, ni riisum ’màari a isi. Amma ti tâa jàk mbâra ba, sey jàk kâwsum is waw ɗi gbè.
31 Ye tâa un gûysi ni Kristu, kàmin jàk ây tâage a fak titurum, a gin tâa ey gi, tâarre a riina Fay. 2 Iin tinîir wun a jàk ây tâage a faktiturum, naa a jàk ây tâage a deesi gi. 3 Ngam un wurre mgban, gûyrra wun tâa fûurriya ni Kristu a gin Fay. 4 Ye ge lòrra Kristu, nit yey tâage gûyrra worro gi, un ɗa lò gun lòrra ni ey a ’mita wàa. 5 Ngam maan ɓàrfan jàk ây tâage jàk kparri a tinîir wun gi, tâage njeenu, ni tèem ’miskumya, ni yiɗum jàk ây, ni gayrum jàk makta, ni rèbèm jày tâage kà coorra mâri gi. 6 Ngòlnji Fay kpè ge kpètɗa da nit ây mbirge jàk ây gi. 7 Kà yey diknu nà mgban, ye tâanu nà a jàk ây gi. 8 Amma kòsòng woofan ngòlnji, ni anda yèy, ni tèem makta, ni maasum nîir Fay, ni yèerra yèk makta. 9 Ta un rèengji yèk rèeng a tîim wun ba, ye tâa un botfa nit mgbanti ni tèem wàa gi, 10 un mgbapɗe nit fûuya, insirre fûuya kà yey rèenje ni Fay mbangsu gi, ha un kpèt a cèngnum jày pî. 11 Hû go censirra ’nang a tîim nit yèerra yèk Girèk, ni ni-Yude, ni nit rrèpnumya, ni nit èca rrèpnum, ni ni-riiy kana, ni nit ray, ni sàay, ni tiròom ba. Sey Kristu gbè tâage pî, tâage a jày pî. 12 Ngam un nit della ta wàa ɗi di Fay, ey catnuge yiɗunuge, tâan ni ’maton, ni mgbergum yèy, ni ûunum hay, ni fetkum tinîiri, ni èfta tinîiri. 13 To nirri dii go ni yèy a gin nit kana, sey un èfnji tinîiri, un yaafinji a tîim wun. Yaafinjin kà yey yaafunu Nitcoorra gi! 14 Ji hòmge da jàk ây gi pî, mòon yiide tâage ti ’mèmni yey ge lòni jàk getiya gi. 15 Woon tâam mbâr Kristu e tâa wûun a tinîir wun! Fay ’naasunuge a isi kpolo ngam tâarra a mbâr maan. Mòon gàarra mbew! 16 Woon yèk Kristu ni mûurra mbâr wàa e yâayirra a tinîir wun! Kàlnjinjin, mgbèngjin a tîim wun ni còycum pî. ’Misin Fay ni kâarra ndûu, ni ndûu Jungci. Kâan ni gàarra mbew a tinîiri. 17 Mbirin jày pî yèenu, tèenu gi ni nîir Yeesu Nitcoorra, un gàa mbew di Fay Tooy a nîir wàa. 18 Un nikin ây, ûunin hak wun a gin maa rra wun kày gesi a ɗàm kpees Nitcoorra! 19 Un nihun ây, yiɗin kin ta wun, ta un kpân daw ba. 20 Un hàm ây, ragin daw tuy da too rra wun ni nuu rra wun a jày pî, ngam kà yey dele a ɗàm kpees Nitcoorra. 21 Un tooy ây, ta un aanji daw ngòlòm da hàm ta wun ha aw tol ba. 22 Un sàay ây, ragin daw tuy a jày pî da nit ɓèl ta wun tâage a deesi gi, naa ni tèerra a nis waw kày ge del daw gi, amma ni tinîir mbâri kà nit ây tolge Nitcoorra. 23 Koo ji gun tèe gi, tèen ni tinîiri pî ngam Nitcoorra, naa ngam nit ây, 24 ye tâa un cèngni, kpàa gun kpàa bèeb tèem wun, jàk koyrra a gin Nitcoorra. Ngam un tèerre tèem Kristu Nitcoorra gi. 25 Amma nit yey tèege jàk makta, ey ngo ge ngosi kày tèe gi. Ngam Fay ti raptirre nis nit ây ’nang ’nang ba.
41 Un nit ɓèl ây, mòon sàay rra wun mbâra kày gesi gi! Ngam un cèngni, un ɗa un dii ni nit ɓèl a faktiturum. 2 Rîin a waarra Fay, mûyin a gàarra mbew di Fay! 3 Waan ngam worro ɗa, ha Fay e faarina orri ot yèe yèk Kristu tâage nà fûurriya, tâami a kultuma ngam maan gi. 4 Waan Fay ha mi lòni yèk wàa kày gese mi yèe gi. 5 Digin ni còycum a ɗàm kpees nit ây tâa aw cèngni Fay ba. Ta un woo unji mbâra e hòm ɓa hû go ba! 6 Sey yèk wun e tâa kâwrriya koo ningàa, un yèe mbâra, ngam ha un cèngni kày gun goosi yèy da nit ây pî. 7 Ticiku kor yey yiɗu ot gi, tâage nit tèem mbâra, sàay Nitcoorra ɗi ni miy, sa ge saknu yèk mum pî. 8 Ngam maan ni tèewfarre a gin wun, ha un cèngni tâam worro tâana ay gi, ha e suusunu tinîir wun. 9 Onesimu kor mbâra yiɗu ot gi, nit yey anga a gin wun, diknjifarre ni Ticiku. Aw sa gaw saknu jày mbirge ay gi pî. 10 Aristarku nit kultuma ni miy kèpfa dunde. Marku hàm kaa too wàa di Barnaba ɗa kèpfa dunde, a gin nit yey raknu yèy gi. Difa go a gin wun, ngoruwan mbâra! 11 Yeesu ɗa înuwan Yustu kèpfa dunde. Aw taan gbè rrèpni a tîim nit ây tèenji ni miy ngam wûun Fay gi, aw suusim tinîir mum. 12 Epafra nit wun ɗa, sàay Yeesu Kristu, kèpfa dunde. Ey rîirre kpèw a waarra Fay ngam wun, ha un tâa getiya, un gòy ni cèngnum mbâra a jày pî yiɗi Fay gi. 13 Mi seedirre a hak wàa, ey hâtɗe dèy ngam wun ni ni-Lawdikiya ây, ni ni-Hiyorapoli ây. 14 Luka nit ndòosum yiɗu ot gi, ni Demas ɗa aw kèpfa dunde. 15 Kèbin daw da kor goosum ây a Lawdikiya, ni Nimfa ɗa, ni nit kimjum ây a àay wàa gi. 16 Un gbèesi go janggum ɗerrewol yey a tîim wun, ’maan a gin nit kimjum ây tâage a Lawdikiya, aw janggi ɗa. Un ngaa janggin ɗerrewol ni-Lawdikiya ây. 17 Gàawan di Arkippu, e faasi hak wàa a tèem yey ngore a gin Nitcoorra gi, ha e tèe mbâra. 18 E rri yey kèpri, miy mi Pawlu kèrgi ni kàn mum. Ɓaysin yèk tâam mum a kultuma. Mbâr Fay e tâanji ni un!