Tumri Nittèerra ây

Tumri Nittèerra ây

¹ Tewfil, nit mbâr mum, mi kère nà a defterre mum woy màrra jày mbire Yeesu ni jày kàlnje pî, diga ɗaarra, ² ha a unji yey Fay naansu a faktiturum. Ɗoko e naasi, de kàl daw jày ni mbinum Jungci Delliya da nit ây carre aw tâa kà nit tèerra ta wàa gi. ³ A dat wurra wàa ey lòtɗa dawge gûysige, ni kàlnum ’nang ’nang. Unji ra naan lòtɗa dawrre, yèe dawrre yèk wûun Fay. ⁴ Mgbàr kana aw riinjirre ni ey, de gàa daw: Ta un hèesi a Yerusalem ba, amma waan jày gàa dun Tooy Ɓèl, kà yey raknu nà mgban. ⁵ Ngam Yuhanna iirra dun nà baptisma ni sòo gbè, amma a dat unji càa kpàa gun kpàa baptisma ni Jungci Delliya. ⁶ A ye kimjin ni Yeesu de gunuwan: Nitcoorra, mgbàr yey gum hîisi wûun da ni-Israyel ây yi? ⁷ Yeesu de goosi de gàa daw: Ti tâa un ha un cèngni mgbàr maan ni unji maan ba. Sey Tooy Ɓèl iige ni mbinum wàa. ⁸ Amma un kpàa gun kpàa mbinum mgbàr yey ge dàara Jungci Delliya a gin wun. Tâa gun tâa nit seedum ta mum a Yerusalem, ni dees Yude pî, ni Samariya ha a gbèeni deesi lang. ⁹ A ye gàa daw kà yey, de naase a faktiturum a nis waw. Titurum de arruwa ha aw rapsurra ba. ¹⁰ Aw toolirre u faktiturum a gin taye gi. E rri yey a nit ây cuk aw mgbapɗe lurra burriya, aw gòyrre a gin waw. ¹¹ A nit ây nà cuk gi de gàan: Un ni-Galile ây, ngam jâ un gòyrre ti, un toolirre nis wun u faktiturum ya? Yeesu gi naase a faktiturum, woo dunge, i ge isa kà yey rapnu tayrre a faktiturum gi. ¹² A lor ta Yeesu de anan a gopri korrom, de koyran a Yerusalem. Gopri maan dii gaarra a Yerusalem, kilomèeta kpolo. ¹³ A ye kpèsin a farra, de naan a àay tinjoknjum u fay a gin tâam waw. Aw tâa Piyèr, ni Yuhanna, ni Yakuba, ni Andere, ni Filip, ni Toma, ni Bartolomi, ni Matta, ni Yakuba hàm Alfa, ni Simon nit yiɗum dees wàa, ni Yuda hàm Yakuba. ¹⁴ Aw waarre Fay ni raknjum koo ningàa. Aw kimjirre ni nikin ây, ni Mariya nuu wàa di Yeesu, ni kaa rra wàa di Yeesu ɗa. ¹⁵ Unji kana a kor goosum ây aw kimjige a nit ây gaw kpèt temèrre kpolo ni ra cuk. Piyèr de ane de gàa: ¹⁶ Un kor ta mum, jày gàa defterre Fay kpèrre, Jungci Delliya yèe nà mgban ni Dawda a hak Yuda, nge nit maan i ge ir nit tiɗàm kpeesi da nit mòorra Yeesu. ¹⁷ Yuda dii nà a tîim worro. Ey ɗa kpàa nà tèenjum ni orro. ¹⁸ Nit yey sàaye hèmna ni seede jàk maarra wàa, yey jingguwan gi. Yaaye ticip lingiya, himni wàa ɓarre, gbuurra wàa tuuye. ¹⁹ A ni-Yerusalem pî aw rage yèk maan, ha de înuwan nîir hèmna nà Hakeldama, kà gàarra hèmna njîim. ²⁰ Yèk yey ɗa dii kètiya a defterre Ndûu, gàa: Nge àay wàa e ir âwa, nirri ge tâa a farra ba. Kètiya ɗi bak: Nge nit kana e at tèem wàa. ²¹ - ²² Kà yey sey nit kana e ’mèmsi ni orro, ngam e tâa nit seedum a yèk gûysum Yeesu Nitcoorra. Ey ndika e tâa nirri kpolo a tîim worro, a woy diknjina nà ni orro unji pî, a ye gîtna nà ni Yeesu Nitcoorra, diga Yuhanna ɗaa iirra baptisma ha mgbàr yey ane Yeesu a tîim worro, naase a faktiturum gi. ²³ De gòynin nit ây cuk, kpolo Yosef înuwan Barsaba ’naasuwan ɗa Yustu, nit cukti ngaa Mattiyas. ²⁴ De ’mèmsin pî aw waa Fay. De gàan: Nitcoorra, mu cèngni tinîir nit ây pî, kàlnina nirri carrum a tîim waw cuk gi, ²⁵ ngam e koyrra tâam Yuda ni nîir tèem wàa woy yey woofa Yuda, ha e dik a gin dikta wàa. ²⁶ De haan saasa a tîim waw ngam cèngnum. Mattiyas de yuu a saasa. Hû go aw sagu a tîim nit ây tèe daw Yeesu ra sàm kpolo, ha aw tâasi ra sàm cuk.

¹ Unji daprum yey înin Pentikosta ye kpèrre, aw pî aw kimjige a gin tikpolo. ² Kòsòng jàk dûurra de ana kà hiski ɓèl a faktiturum, lege a àay, mûuye a gin tâan gi pî. ³ De rabin rèeng ây aw ɗòlnjige kà rèeng ebi, citɗa dawrre. De tâa a hak waw kpolo kpolo pî. ⁴ Tinîir waw pî mûu ni Jungci Delliya. Aw ɗaa yèerra ni yèk kana ’nang ’nang, kà yey hîi daw Jungci Delliya aw yèeni gi. ⁵ A ni-Yude ây tâage a Yerusalem, anga nà mgban a riiy ây pî, aw nit tolla Fay ɗi. ⁶ Ye ragin dûurra maan, de dàaran pî aw kimji a gin tikpolo. De kpul daw jungci isi, koo wuna rakɗe yèk wàa, ngam a nit goosum ây aw yèenjirre koo ni yèk riiy hâ. ⁷ De naa daw hay de tâa daw ’nang, de gàan: A nit yèerra ây gi aw tâa ni-Galile ây ba yi? ⁸ Kà kà rakna orro pî yèerra yèk yey koo wuna kà yèk riiy wàa ya? ⁹ Orro ot ni-Partiya ây, ni-Mediya ây, ni-Elamiya ây, ni nit ây tâage a Mesopotamiya, ni Yude, ni Kapadokiya, ni Pontus, ni Asiya, ¹⁰ ni Firigiya, ni Pamfiliya, ni Ejip, ni ngirra Libiya tâage gaarra a Kirene, ni nit ây anga a Roma. ¹¹ Dorro aw kpàana a tîim ni-Yude ây, a nit ây kana aw futɗe hàar ni-Yude ây, ni ni-Kereta ây ɗa, ni ni-Arab ây. Orro pî ot rakɗe, aw yèerre ni yèk worro ’nang ’nang yèk tèem Fay ’mirre gi. ¹² De naa daw hay dèy, ha aw cèngni jày gaw dàn ba. De gàanjin a tîim waw: Ji mbirge kà yey gi ya? ¹³ A nit ây kana de wâskin daw de gàan: Mbàl ràmgi daw! ¹⁴ Piyèr de ane ni nit ây tèe daw Yeesu ra sàm kpolo. De ɗaa yèerra ɓàng da mûsa nit ây, de gàa daw: Un ni-Yude ây, ni un pî tâage a Yerusalem, raksin yèk yey, iin tuy a yèk mum! ¹⁵ A nit ây gi mbàl ti ràmi dawrre kà yey dànnu ba, ngam unji ɗà ti naa ba. ¹⁶ Amma jàk yey dii kà yey gàa nà Joyel nit lònum yèk Fay. ¹⁷ Fay gàaye: Jàk yey tâa ge tâa a mgbàr gbèeni. Hîi gim hîi Jungci mum e yeski a gin nit ây pî. A hàm ta wun, a hàm nihun ây ni hàm nikin ây, kpàa gaw kpàa lònum jày ge mbir a ɗàm kpeesi gi. A lor ta wun ra gaw rap jày ni jungci waw. Ndaram à ge ày da nit wàrfi ây. ¹⁸ Mgbàr maan hîi gim hîi Jungci mum koo a gin sàay rra mum, da nihun ây ni nikin ây. Lò gaw lòni jày ge mbir a ɗàm kpeesi gi. ¹⁹ Lò gim lòni kayeefi ’nang ’nang a faktiturum, ni kàlnum jàk ây a deesi: njîim, ni ebi, ni tufki ɓèl. ²⁰ Unji i ge ir kulpi, corri ngaa kà njîim, ɗoko unji Nitcoorra e dàara gi, unji ɓèl ni ’mita. ²¹ Tâa ge tâa koo wun ’naase nîir Nitcoorra, kpàa ge kpàa saarra. ²² Piyèr de gàasirra bak: Un ni-Israyel ây, raksin yèk yey: Fay lòni dunge seedamku a gin Yeesu ni-Nasaret, ni mbinum tèem ’nang ’nang, ni kayeefi ây, ni kàlnum jàk ây. Hû go mbire Fay a gin wàa, a tîim wun, kà yey cèngnunu gi. ²³ A gin wàa Fay gbèesige dànda wàa ni cata, woo dunge nit yey. Un un gbalu a minjum kpiiri, un ɓàruge ni kàn nit ây èege yèk Fay. ²⁴ Amma Fay gûysuge, yuunu a ’màar wurra, ngam ta ti gesu wurra e mòow ba. ²⁵ Dawda gàa a hak wàa kà yey: Mi rapɗe Nitcoorra a ɗàm kpees mum koo ningàa, ey tâarre a riina mum, ngam ta mi mal ba. ²⁶ Yòo jày kâwse tinîir mum dèy. Mîrngi mum ngaa iirre tijaga. Is mum ɗa wu ge wuysi a loca ni dànda jàk mbâri. ²⁷ Ngam muy gum woo jungci mum a gin tâam nit ây wutke gi ba. Hîi gum hîi orri di nit della wey, ta e raa a wurra wàa ba. ²⁸ Muy mu kàlnim ot gûyrra. Mûu gi mûunim tinîir mum kâwrriya a ɗàm kpees wey. ²⁹ Piyèr de gàasirra bak: Un kor ta mum, mi gerre mi yèenu tolnji cen a yèk Dawda wosom gi. Ey wurre aw siptuge, geb wàa dii ha niyey a tîim worro. ³⁰ Ey tâage nà nit lònum yèk Fay, cèngnige Fay hàawrrage ni tihàani, ii ge ii nirri kpolo a yòot wàa, e tâa a gbaat wûun wàa. ³¹ Dawda rabe nà mgban a ɗàm kpeesi. De yèe yèk gûysum Kristu, de gàa: Fay ti woow a gin tâam nit ây wutke gi ba. Is wàa ngaa ti raa ba. ³² Fay gûysuge di Yeesu gi. Orro pî ot nit seedum ây ɗi a yèk yey. ³³ Ye naase a riina Fay, kpàa a gin Too wàa Jungci Delliya yey gàa nà ge hîiw gi. Jungci maan de citna kà yey raknu, rapnu ɗa. ³⁴ Dawda ey ti naasi a faktiturum ba, amma gàaye: Tooy Ɓèl gàa di Nitcoorra mum: Tâa a cewci riina mum, ³⁵ ha mi ii nit yiir ta wey gin nafta nak wey! ³⁶ Hû go ndika ni-Israyel ây pî aw cèngni takundi ɗi, Yeesu yey gbalu un a minjum kpiiri, Fay iiwe Nitcoorra, iiwe ɗa Kristu. ³⁷ A ye ragin yèk yey, de ’nun daw tinîiri kpòt. De gunuwan di Piyèr ni nit ây kana tèe daw Yeesu gi: Un kor ta worro, kà got mbir ya? ³⁸ Piyèr de gàa daw: Inin tinîir wun, koo wuna e ngor baptisma ni nîir Yeesu Kristu, ngam ha jàk maarra wàa e tâa yaafumya, ha Fay e hîinu Jungci Delliya! ³⁹ Ngam yèk mòonjum kàn ni Fay diinu ni hàm ta wun, ni nit ây tâage kpâarriya. Fay Tooy Ɓèl ’naa ge ’naasi daw. ⁴⁰ Piyèr de mgbèng daw dèy ni yèy ’nang ’nang, de gàa daw: Yuunsin hak wun a yòot nit rèeng ây gi! ⁴¹ A nit ây mûsi jày aw goosi yèk Piyèr, aw ngore baptisma. A unji maan aw iisirra nit ây ujinè taan. ⁴² Aw pî aw futɗe a kàlnjum yèk nit ây tèe daw Yeesu. Aw futɗe ɗa a kûngda tàarri, ni waarra Fay. Aw pî aw ’mèmsi ni tinîiri kpolo. ⁴³ Tolnji Fay mòo da nit ây pî. A nit ây tèe daw Yeesu gi aw tèerre kayeefi ây ni kàlnum jàk ây dèy. ⁴⁴ A nit ây pî goosu di Fay aw tâanjirre mbâra, aw ’mèmsi jàk ta waw pî a gin kpolo. ⁴⁵ Aw sàangi hèmna waw, ni àay, ni jày tâagi daw gi. Aw mîinji a tîim waw, koo wuna a gayam wàa. ⁴⁶ Unji pî aw mòorre kimjum a àay Fay ni tinîiri kpolo. Aw kûngde tàarri, aw riinjirre a àay rra waw ni kâwrum, ni ɗotkum tinîiri. ⁴⁷ Aw ’misirre nîir Fay. A nit ây pî aw yiɗi dawrre. Koo ningàa Nitcoorra iisirra dawrre nit goosum ây a ’mèmsum waw.

¹ Unji mbona Piyèr ni Yuhanna aw naarre waarra a àay Fay saa’i maan. ² Nit wuta nay diga himni nuu wàa tâa a nin àay Fay, înuwan nin delliya. Aw ’maawrarre aw iiw a farra unji pî, ngam ha e waargi seede da nit ây leke a àay Fay. ³ Ye rabe Piyèr ni Yuhanna aw lekɗe a farra, de waa daw seede. ⁴ De gobuwan teng teng. Piyèr de gàaw: Gopna! ⁵ Nit yey de gop daw ni hakkilo, ey dànde kpàa ge kpàa jày a kàn waw. ⁶ Ɗo Piyèr de gàaw: Seede cenim ba. Amma jàk yey tâagim gi, hîi gim hîimu. Mi gàamde: Ni nîir Yeesu Kristu ni-Nasaret, an mu digi! ⁷ De mòow a kàn riina de gòynuwa. Kòsòng nak nirri nà ni kòpti ta wàa ire kpèw. ⁸ De ane kat de gòye. De ɗaa dikta. De leknjin ni aw a àay Fay. Dikɗe, ɓutɗe, ’misirre nîir Fay. ⁹ Mûsa nit ây pî aw rabu dikɗe, ’misirre nîir Fay. ¹⁰ De cèngsuwan ey tâarre nà a nin delliya, e waargi jày. De tâa daw ’nang, de kpul daw jungci isi a jàk yey mbirgu gi. ¹¹ Nit wuta nay nà aw mòonji pèn ni Piyèr, ni Yuhanna. Ngam tâa daw ’nang da nit ây, aw ’nòorarre a gin waw a minjum àay Fay înin àay Salomu. ¹² Piyèr ye rabe jàk yey, de ɗaa yèerra yèy da mûsa nit ây de gàa: Un ni-Israyel ây, kà tâanu ’nang a jàk yey ya? Ngam jâ un gopnarre, kà gàarra orro ni kpèw kpèw worro, koo ni coorra Fay mbirgu ot di nit yey ha e digi ya? ¹³ Fak Abraham ni Isak ni Yakob, Fak wosom ta worro ’misuge di hàm wàa Yeesu. Un un ’maawe a kiita un hàwuge a ɗàm kpees Pilatu, koo ye tâa ey yiɗi ngin e woowa. ¹⁴ Un hàwe nit della, nit mbâri. Amma un waawe di Pilatu e yuununu nit ɓàrgum nirri. ¹⁵ Un ɓàre wûun jungci. Ey Fay gûysuge a wurra. Orro ot nit seedum ây ɗi a jàk yey. ¹⁶ Ye tâa e goosu a nîir Yeesu, nîir maan hîigu kpèw kpèw di nit yey rapnu, cèngnu un gi. Ni goosum yey a nîir Yeesu, hîigu ndòosum pî a ɗàm kpees wun. ¹⁷ Un kor ta mum, mi cèngni ray mbirgunu kà nit ɓèl ta wun, ha de mbitnu jàk maan. ¹⁸ Amma koo hu go Fay gbèesige yèk nit lònum ây pî yèen nà mgban, nge Kristu wàa rii ge rii ’màari dèy. ¹⁹ Mi gàanurre: Inin tinîir wun, bunjin jungci wun, ngam ha Fay e yaafunu jàk maarra! ²⁰ Hû go Tooy Ɓèl hîi ge hîinu mgbàr wèmji. Tèe ge tèera dun Kristu iiw nà diga mgban gi, Yeesu ɗi. ²¹ Dey gese e tâa a faktiturum, kòsòng ha mgbàr mbangsusum jày pî, kà yey gàa nà Fay ni yèk nit ta wàa, lòni yèk wàa diga ɗaarra jày pî gi. ²² Muusa gàa nà: Fay Tooy Ɓèl gò ge gòyni nit lònum yèy kà woy mum a tîim nit ta wun. Raguwan jày ge yèenu pî! ²³ Koo wun tâa ti ragu di nit lònum yèk yey gi ba, sey aw gbeesu a tîim nit ta mum. ²⁴ A nit ây pî lòni nà yèk Fay, diga Samuyel ni nit futa ây a dat wàa, aw yèe yèk mgbàr yey ɗa. ²⁵ Un nit kpolo ɗi ni nit lònum ây, un ’mèmsi ni wosom ta wun a yèk yey wasi daw Fay gi. Gàaw nà di Abraham: A yòot wey a nit dees ây pî kpàa gaw kpàa mbâri. ²⁶ Hû go Fay gòyni dun màrra lor wàa, tèewra ngam ha e hîinu mbâri, a ita koo wuna a ot kperrem wàa.

¹ Piyèr ni Yuhanna ye yèen bak da nit ây, a nit daprum ây, ni nit ɓèl waw da nit waatum àay Fay, ni ni-Saduki ây de dàaran. ² De ngòli daw dèy, ngam a nit ây tèe daw Yeesu gi cuk aw kàlnjirre da nit ây, aw sak dawrre yèk gûysum Yeesu a wurra, kà gàarra a nit ây gû gaw gûysi ɗa. ³ De mòon daw, de leknin daw a kultuma ngam mbona ciiye, ha ni ndamji gaw ii daw kiita. ⁴ Koo hû go a nit ây dèy rake gi aw goosige, mûsa nihun ây kpèrre ujinè kèrèw. ⁵ Ni ndamji a nit ɓèl ta waw da ni-Yude ây, ni toonji ây, ni nit còycum ây ɗa aw kimjige a Yerusalem. ⁶ Aw tâa a farra ɗa ni Hannas nit ɓèl daprum, ni Kayafas, ni Yuhanna, ni Aleksanda, ni yòot nit ɓèl ta waw da nit daprum ây pî. ⁷ De ’maaran Piyèr ni Yuhanna, de gòynin daw a tîim. De gunin daw: Ni mbinum hâ koo ni nîir wun mbitnu jàk yey ya? ⁸ Piyèr mûuye ni Jungci Delliya a tinîir wàa, de gàa daw: Un nit ɓèl ây, ni toonji ây, ⁹ un gunnarre niyey ngam tèem mbâri tèena di nit àyci, kày mbire ha ndòoye. ¹⁰ Ndika un pî, ni ni-Yude ây un cèngni, nit àyci yey dii a ɗàm kpees wun gi, ndòoye ni mbinum a nîir Yeesu Kristu ni-Nasaret, nit yey gbalnu un a minjum kpiiri, Fay gûysuge. ¹¹ Ey tâa kà gòok yey un nit jâarra àay ’màktifa un ngam un yiɗu ba, gòok maan irge gòok tigòyni àay. ¹² Saarra kana cen, sey a gin Yeesu gbè. Nîir kana ɗa cen a deesi Fay hîiw di nirri, ha ot kpàa saanum ni erra ba. ¹³ De tâa daw ’nang da nit ɓèl raknjum ây, a ye rabin Piyèr ni Yuhanna aw yèerre tolnji cen. Aw cèngnige, a nit ây gi cuk aw mbin kèta ɗerrewol ba, aw cèngni jày ɗa dèy ba. Aw cèngsi dawge, a nit tâanjum ni Yeesu ɗi. ¹⁴ A ye rabin nit àyci nà ndòoye, gòynjirre ni nit ây tèe daw Yeesu cuk gi a farra, aw kpàa ɓoorra koo jâ ba. ¹⁵ De gàan daw aw yuu a gbaa. De yèenjin a tîim waw, ¹⁶ de gàan: Kà got mbit daw da nit ây gi ya? Ngam a ni-Yerusalem ây pî aw cèngni mbâra, kayeefi ɓèl mbire ni kàn nit ây gi. Orro got kpàaw hàanjum a jàk yey ba. ¹⁷ Amma ngam ta yèk yey e iisirra yeskum a tîim nit ây, sey ot njang daw, ta aw yèe di nirri ni nîir Yeesu ba. ¹⁸ De ’naasin daw aw isa. De njanggin daw de gàan: Ta un haasirra yèerra koo kàlnjum a nîir nit maan ba sam! ¹⁹ Amma Piyèr ni Yuhanna de goosin daw de gàan: Dànin un ni hak wun, to gesi go ot raknu tuy e hòm rakta di Fay. ²⁰ Orro got kpàa tâarra baak baak a jàk yey rapna ni jàk yey rakna gi ba. ²¹ A nit ɓèl raknjum ây de iisirran daw kpânda, de woon da nit ây cuk aw tayi. Aw kpàa orri kày gaw hiiti daw ba, ngam a nit ây pî aw ’misi nîir Fay a jàk yey mbirin gi. ²² Nit yey kpàage ndòosum ni kayeefi, yer wàa hòme yeri ra naan. ²³ Ye woon di Piyèr ni Yuhanna gi, de koyran a gin nit ta waw. De sagin daw jày pî gàan a nit ɓèl ta waw da nit daprum ây, ni toonji ây. ²⁴ A nit goosum ây ye ragin kà yey, de ’mèmsin tinîiri kpolo, de waan Fay de gàan: Tooy Ɓèl, mu wûun ɗi a jày pî, muy mbangse faktiturum ni deesi, ni càng sòo, ni jày tâage a farra pî. ²⁵ Muy mu yèe ni Jungci wey a gin wosom worro Dawda, nit tèem wey, de gàa: Ngam jâ a nit ây èege yèk Fay aw ande hàngàngàng ya? Ngam jâ mûsa nit ây aw yiɗi mbita jây ɓa hû go ya? ²⁶ A wûun ây a deesi aw ane, a nit tiɗàm kpees ây ɗa aw kimji kpolo ngam haarra gbàaci a gin Tooy Ɓèl ni Kristu wàa. ²⁷ Takundi, a riiy yey koo Herode, ni Pontu Pilatu, ni nit ây èege yèk Fay, ni yòot ni-Israyel ây pî aw kimja gbàaci a gin Yeesu, lor wey delliya catmu gi. ²⁸ Hû go aw gbèesi jàk yey mbangsum mgban ni mbinum, ni dànda wey gi. ²⁹ Yow, Tooy Ɓèl, gop kpânda waw, hîi da sàay rra wey aw yèe yèk wey tolnji cen! ³⁰ Pat kàn wey ngam ndòosum àyci, ni kàlnum jàk ây ni kayeefi ây aw mbiri ni nîir Yeesu, lor wey delliya gi! ³¹ Ye gbèen waarra Fay kà yey, a gin tâam waw de yûuye. Tinîir waw pî mûu ni Jungci Delliya. Aw yèerre yèk Fay tolnji cen. ³² Mûsa nit ây goosu di Fay aw raknjirre, aw dii ni tinîiri kpolo, ni jungci kpolo. Jày tâagi daw gi, nirri kpolo ti gàa woy wàa ɗi gbè ba. Amma aw ’mèmsi bèeb waw pî. ³³ A nit ây aw lòni seedamku ni kpèw kpèw dèy, a yèk gûysum Yeesu Nitcoorra. Fay mbârsi daw dèy koo di wuna. ³⁴ Nit kana cen ni èca jày a tîim waw ba. A nit ây tâage ni hèmna koo àay aw sàani pî. Aw ’maara seede maan kpàan gi, ³⁵ aw ii a ɗàm kpees nit ây tèe daw Yeesu. Aw mîinji seede gi a tîim waw pî, koo wuna a gayam wàa. ³⁶ Nirri kpolo a yòot Lewi, kpàawan a dees Kipru nîir wàa Yosef, dii a tîim waw. A nit ây tèe daw Yeesu aw înurre ɗa Barnaba, kà gàarra nit kpèwsum tinîir nirri. ³⁷ Ey ngaa sàani hèmna wàa, ’maara seede yey kpàa gi, ii a ɗàm kpees nit ây tèe daw Yeesu gi.

¹ Nit kana nîir wàa Ananiya, ni kin wàa Safira aw ɗa aw sàani hèmna waw. ² Ey raknji ni kin wàa, ha e woorra a seede yey kpàa gi ngam hak wàa. De ’maara woy ngirra, e ii a ɗàm kpees nit ây tèe daw Yeesu. ³ Amma Piyèr de gàaw: Ananiya, ngam jâ Seyɗan mûu a tinîir wey, ha rèenggum rèeng di Jungci Delliya, ha fûunum ngirra seede hèmna wey ya? ⁴ A ye tâa ɗà mu sàani ba, ni a ye sàanum gi ɗa, ti tâa woy wey, mu mbini tèerra jày yiɗum ni erra ba yi? Kà kà dànum a tinîir wey, ha mu mbir kà yey ya? Di Fay rèenggum, mu rèeng da nit ây ba! ⁵ Ananiya ye rage yèk yey, de yaa kpum, de wurre. Tolnji ɓèl mòo daw da nit rakta jàk yey pî. ⁶ A lor ây a farra de anin, de forguwan, de ’maawan aw siptuwa. ⁷ Njamdi taan ye hòme, kin wàa ngaa dàarage, de lekfa. Ti cèngni jày mbirge nà ba. ⁸ Piyèr de gunuwa: Seede kà yey sàanunu hèmna wun gi yi? De goose: Eeye, hû go ɗi. ⁹ Piyèr de gàaw: Kà kà raknjunu ha un haaw rûfta di Jungci Nitcoorra ya? Aw rri yey a nit ây sipti maa wey, gaarra a nin, ’maa gaw ’maam dum ɗa! ¹⁰ Kòsòng de yaa kpum a ɗàm kpees Piyèr, de wurre. A lor ây de lekfan, de kpàawan wurre. De ’maawan aw siptu a cewci maa wàa. ¹¹ Tolnji ɓèl mòo dawge da nit kimjum ây lang, ni nit ây pî rake yèk yey. ¹² A nit ây tèe daw Yeesu aw lònirre jàk ây dèy ni kayeefi a tîim nit ây. A nit goosum ây pî aw ’mèmsige ni tinîiri kpolo, aw kimjirre a minjum àay Fay înuwan àay Salomu. ¹³ A nit ây kana aw haa gàarra gaw ’mèmsi ni aw ba. Amma aw pî aw coo dawrre. ¹⁴ A nit ây goosu di Nitcoorra aw iisirrarre dèy, a nihun ây ni nikin ây. ¹⁵ Aw yuuna nit àyci ây, aw tokra daw ni aari ni jingi a orri, ngam a ye ge hòm Piyèr, bingi wàa butɗa go koo mâa go di nit kana a tîim waw. ¹⁶ A mûsa ni-riiy ây tâage a cewci Yerusalem ɗa aw tokrarre nit àyci ây, aw ’maara nit ây riisi daw tindòom ’màari. Koo wuna kpàa ndòosum. ¹⁷ Nit ɓèl daprum de anin ni nit tâanjum ta wàa pî. Aw futɗe a kàlnjum yèk ni-Saduki ây. Aw tâarre ni ngèeri. ¹⁸ De mòon da nit ây tèe daw Yeesu gi, de leknin daw a kultuma ɓèl. ¹⁹ Amma ni tuma malayka Nitcoorra de dàara, de faare tifanji ây a kultuma, de yuuni daw de gàa: ²⁰ Digin un gòy a àay Fay, un yèe da nit ây yèk jungci fûuya! ²¹ Aw rage. Ndamji ye kayge de legin a àay Fay, de kàlnjin yèy. Amma nit ɓèl daprum ni nit tâanjum ta wàa aw kimji nit ɓèl raknjum ây a tîim ni-Israyel ây pî. De tèen da lor ây a kultuma, aw ’maara daw da nit ây tèe daw Yeesu gi. ²² A lor ây ye kpèrrin a kultuma, aw kpàarra daw a farra ba. De irin, de sagin yèk maan. ²³ De gàan: Ot kpàaye kultuma fantumya kpèp. A nit waatum ây aw dii a nin. Amma ye faarina, ot kpàarra koo nirri u mîisi ba. ²⁴ Nit ɓèl waw da nit waatum àay fay, ni nit ɓèl ta waw da nit daprum ây ye ragin yèk yey, lawsam mòo dawge, aw cèngni ji ge mbir a yèk yey ba. ²⁵ Nirri de kpèrra de gàa daw: Aw rri yey a nit ây leknunu a kultuma nà, aw gòyrre a àay Fay, aw kàlnjirre da nit ây. ²⁶ Nit ɓèl waw da nit waatum àay Fay de taynji ni nit ta wàa a farra. De ’maaran nit ây tèe daw Yeesu gi ni hakkilo, ngam aw tole da nit ây ta aw còo daw ni gòoy ba. ²⁷ De ’maaran de gòynin daw a ɗàm kpees nit ɓèl raknjum ây. Nit ɓèl daprum de gàa daw: ²⁸ Ot njang dunge dèy diga mgban, ta un kàlnju di nirri a nîir Yeesu nit maan gi ba. Amma un mûuni riiy Yerusalem ni kàlnjum wun. Un gàarre, un ’maara dot njîim nit maan a hak worro. ²⁹ Piyèr ni nit tèerra kana de goosin de gàan: Ndika rakta di Fay hòme rakta di nirri. ³⁰ Fak wosom ta worro gûysuge di Yeesu, nit yey ɓàtnu un ni gbalcu a kpiiri gi. ³¹ Dey Fay aanjuge a riina wàa, e tâa wûun ni Nitsaanum, ngam ha e hîi da ni-Israyel ây aw kpàa ot inum tinîiri, ni yaafum jàk maarra waw. ³² Orro ot nit seedum ây ɗi a jàk ây gi. Hû go ɗa yèk seedum dii a gin Jungci Delliya, yey hîi Fay da nit ây coogu gi. ³³ Ye ragin yèk yey, de ngòl daw. Aw yiɗi aw ɓàt daw da nit ây tèe daw Yeesu gi. ³⁴ Amma nirri kpolo a tîim nit ɓèl raknjum ây, ni-Farisa nîir wàa Gamaliyel de ane. Ey nit kàlnjum yèk mgbèngda Muusa ɗi, a nit ây pî aw ’misurre. De gàa aw yuuni da nit ây tèe daw Yeesu gi a gbaa càa. ³⁵ De yèe de gàa daw: Un ni-Israyel ây, faasin hak wun a jàk yey gàanu un mbit daw da nit ây gi! ³⁶ Ngam ti tâa mgban ba, Tehudas ane, de kàlni hak wàa de gàa ey nit ɓèl ɗi. A nit ây kpèrre temèrre naan aw ’mèmsi ni ey. Amma aw ɓàruge. Nit futa ta wàa aw yeski pî kpolo kpolo, aw gbeeye. ³⁷ A dat nit yey, Yuda ni-Galile de ane mgbàr kèta nîir nit ây, de arre a nit ây aw furruwa. Dey ɗa aw gbeesuge. A nit ta wàa ngaa pî aw yeskige. ³⁸ Hû go mi gàanurre: Woon daw da nit ây gi aw tayi. To dànda waw ni tèem yey ana go a gin nirri, lòo ge lòo. ³⁹ Amma to ana go a gin Fay, gun kpàa lòosum ba. Ta e tâa un haarre gbàaci ni Fay ba! A nit ɓèl raknjum ây de ngorin yèk Gamaliyel nà. ⁴⁰ De ’naasisin da nit ây tèe daw Yeesu, de lutkin daw. De njanggin daw, ta aw yèesirra ni nîir Yeesu ba. De woon daw. ⁴¹ De yuun a gin nit ɓèl raknjum ây ni tinîir kâwrriya, ngam aw gerre a ɗàm kpees Fay riirra ’màari yèk nîir Yeesu. ⁴² Unji pî aw futɗe kàlnjum a àay Fay ni a àay nit ây, aw sakɗe yèk Yeesu Kristu.

¹ Mgbàr maan a ye iisirran mûurra a nit futa ta Yeesu, hûungum ane a tîim nit ây yèege yèk Girèk, a hak nit dees Yude ây. Aw gàaye, aw kpòofa dawge da kin wurra ây a hîirra tiriici unji pî. ² A nit ây tèe daw Yeesu ra sàm cuk de ’naasin da nit futa ta Yeesu pî aw kimja. De gàan daw: Ti del ot woofa yèerra yèk Fay ngam tèerra tèem tiriici ba. ³ Hû go un kor ta mum, carrin nit ây jòròs a tîim wun, a nit ây tâage ni yèk mbâra a hak waw, mûuge ni Jungci Delliya, ni còycum ɗa, ha ot ii daw a tèem yey. ⁴ Amma orro fu got fut a waarra Fay ni tèem sakta yèy. ⁵ Yèk yey del daw da nit kimjum ây pî. De carrin Estefanu nit yey tinîir wàa mûu ni goosum, ni Jungci Delliya. De carrin ɗa Filip, ni Porokorus, ni Nikanor, ni Timon, ni Pamenas, ni Nikola ni-Antakiya, ’mèmsi nà mgban ni ni-Yude ây. ⁶ De gòynin daw a ɗàm kpees nit ây tèe daw Yeesu, de iin daw kàn a hay, de waan Fay ngam waw. ⁷ Yèk Fay dikɗe ɗàm kpeesi. A nit futa ta Yeesu aw iisirra mûurra dèy a Yerusalem. Mûsa nit daprum ây ɗa aw rage tuy aw goosige. ⁸ Mbâri ni mbinum Fay mûu a gin Estefanu. E tèeye kayeefi ɓèl ây, ni lònum jày a tîim nit ây. ⁹ A nit ây a àay kimjum yuuge a sàay, de anin ni ni-Kirene ây, ni ni-Aleksandariya ây, ni ni-Kilikiya ây, ni ni-Asiya ây ɗa. Aw pî aw ane hàanjum yèy ni Estefanu. ¹⁰ Amma aw get gòyrra a ɗàm kpees yèk wàa ba, a còycum Jungci Delliya hîigu gi. ¹¹ De yèen da nit ây kana ni fûucu ha aw gàa: Ot rage nit yey yèerre yèk maasum a gin Muusa ni gin Fay. ¹² De cuynin da nit ây, ni toonji ây, ni nit còycum ây. De dàaran a gin Estefanu, de mòowan de ’maawan a gin nit ɓèl raknjum ây. ¹³ De gòynin nit ây gaw seedi yèk rèeng, aw gàa: Nit yey ti woo yèerra yèk maasum a della àay Fay, ni a yèk mgbèngda Muusa ba. ¹⁴ Ot ragu gàaye, nge Yeesu ni-Nasaret aa ge aasifa àay Fay, i ge ini hàar yey hîina Muusa gi. ¹⁵ A nit ɓèl raknjum ây pî a ye gobuwan di Estefanu teng teng, de rabin tiigi wàa rèenji ni tiigi malayka.

¹ Nit ɓèl daprum de gunuwa: Yèk yey hû go ɗi yi? ² Estefanu de ɗaa yèerra yèy de gàa: Un kor ta mum, ni toonji ây pî, raksin! Fay a ’mita wàa lòrrurra di Abraham ye tâa nà a dees Mesopotamiya, ɗoko e tay a Karan gi. ³ De gàaw: Yuu a tîim kor ta wey, ni dees wey, tay a dees yey gim kàlnum gi! ⁴ Abraham de yuu a dees ni-Kaldiya ây, de dige e tâa a Karan. Too wàa ye wurre, Fay de ’maawra a dees yey tâanu gi. ⁵ Fay ti hîiw jàk koyrra a dees yey koo càa, koo kà gin nafta nay ba. Amma de yèew yèk mòonjum kàn, ey kpàa ge kpàa jàk koyrra a farra a ɗàm kpeesi, ha yòot ta wàa aw koyrra a dat wàa, koo ye tâa mgbàr maan hàm cenu ba. ⁶ Fay gàawe: A yòot ta wey tâa gaw tâa a riiy kana. Ii gaw ii daw sàay, rii gaw riisi daw ’màari yeri temèrre naan. ⁷ De gàa bak: Hii gim hiiti da nit dees maan iigi daw sàay gi. A dat maan yuu gaw yuu, ha aw isa ay aw daprimi. ⁸ Fay de gbèese yèk wàa ni mòonjum kàn. Jàk kàlnum yèk yey dii rrèpnum hàm nihun. Kà yey Abraham kpàa Isak. De rrèpnuwa a ye kpèrre unji nan nan. Isak ngaa de kpàa Yakob. Yakob de kpàa wosom ta worro ra sàm cuk. ⁹ A wosom ây nà de ngèeruwan di Yosef, de sàanuwan a dees Ejip. Amma Fay tâanji ni ey, ¹⁰ saanu a ’màar wàa pî. De hîiw di Yosef tâam mbâri, ni còycum a ɗàm kpees Farong wûun Ejip. Farong de iiw nit ɓèl a dees maan ni àay wàa pî. ¹¹ Fek ɓèl iiye a Ejip ni dees Kanana pî. ’Màari tâaye dèy, ha a wosom ta worro aw kpàa jàk riirra ba. ¹² Yakob ye rage tirri dii a Ejip, de tèe wosom ta worro. ¹³ Ye isin nak cukti, Yosef de lòne hak wàa a gin ɓèl ta wàa. Hû go ɗa Farong cèngni kor ta Yosef. ¹⁴ Yosef de tèe aw ’naasa Yakob too wàa, ni kor ta wàa pî. Aw tâa nirri ra jòròs sàm kèrèw. ¹⁵ Yakob de dige a Ejip. A farra wurrin ni wosom ta worro. ¹⁶ De koynin wurra waw a Sikem, de siptin daw a geb yey sàa Abraham ni seede dèy a gin hàm ta Hemo a Sikem gi. ¹⁷ Amma ye kpèrre kà yey gàa nà Fay a gin Abraham, yòot nit ây gi aw iisirra mûurra a Ejip, ¹⁸ ha wûun kana de koyrra a Ejip, ti cèngni yèk Yosef ba. ¹⁹ Ey de ii gâra da nit ta worro. De riisi daw ’màari, de ndak daw aw ’màktifa hàm ta waw a nûri, ha aw wurri. ²⁰ Mgbàr maan aw kpàa Muusa. Ey hàm delliya ɗi a ɗàm kpees Fay. Aw âwsuge a àay corri taan. ²¹ A ye iifan a nûri, sapri Farong de kpàaw, de arru de mòowha e ’mit kà hàm wàa. ²² De kàlnjuwan còycum ni-Ejip ây pî. Ey dii ni mbinum a yèerra yèy ni tèem wàa pî. ²³ Muusa ye kpèrre yeri ra naan, de dàne a tinîir wàa, e dik e gop kor ta wàa, ni-Israyel ây. ²⁴ De rabe ni-Ejip kpolo hawrrarre di nit wàa ni-Israyel, de lekɗa de kànsurra di nirri riisu ’màari nà, de ɓàru di nit maan. ²⁵ Ey dàne, a nit ta wàa gaw cèngni, Fay saa ge saani daw ni ey, amma aw cèngni hû go ba. ²⁶ Ni ndamji de rabe nit ta wàa cuk aw haarre gbàaci. De ɓaanji daw de gàa: Un nit kpolo ɗi, ngam jâ haanu ya? ²⁷ Amma nit yey riisu ’màari di kor wàa de tusu di Muusa, de gàaw: Wun iigum wûun koo nit hiitum worro ya? ²⁸ Mu gàarre mu ɓàrim kà yey ɓàrmu ni-Ejip ninjaay yi? ²⁹ A yèk yey Muusa de ’nòo, de tâa ni-wooy a dees Madiyan. A farra de kpàa hàm nihun ây cuk. ³⁰ A ye gbèe yeri ra naan, ey dii a kpàang gopri Sina a tîim nûri. Malayka de lòrrurra a goosum ebi a waas cikci. ³¹ Muusa ye rabe jàk lòta yey, de tâaw ’nang. De hèerra gaarra ngam gopta, de rage gûn Tooy Ɓèl gàawrre: ³² Miy tâage Fay, Fak wosom ta wey, Fak Abraham ni Isak ni Yakob! Muusa de male jak jak, de tole gopta. ³³ Tooy Ɓèl de gàaw: Botfa naan a nak wey! Ngam a gin yey gòymu gi, dees coorra ɗi. ³⁴ Miy mi rabe ’màar nit ta mum a dees Ejip. Mi rage tibakni waw. De cirma mi saani daw. Dàara, mi tèem a Ejip! ³⁵ Estefanu de gàa bak: Muusa nit yey a ni-Israyel hàwuwan gi, gàawan «wun iigum nit ɓèl ni nit hiitum worro ya», dey gàaw Fay e tâa wûun waw ni nit saanum waw. De tèew ni kàn malayka yey lòtkurra a waas cikci gi. ³⁶ Muusa yuuni da nit ta wàa a dees Ejip ni tèerra tèem kayeefi ây, ha aw hòme a sîirra ɓèl înuwan Sòo Caliya, ha ye tâan a tîim nûri yeri ra naan. ³⁷ Ey gàagi daw ɗa: Fay ii ge ii dun nit lònum yèy kà mum a tîim nit ta wun. ³⁸ A ye kimjin a nûri nà, Muusa tâage a tîim wosom ta worro ni malayka, a yèenjum ni ey a gopri Sina gi. Ey kpàa yèk gûyrra, ha e kàl dot. ³⁹ Amma a wosom ta worro aw yiɗi aw coow ba. Aw hàwuge, aw insi tinîir waw a Ejip. ⁴⁰ De gàawan di Arong: Mbangsina mâri e ɗàa dot kpeesi. Ot cèngni jày mbirgu di Muusa, nit yey yuunina a dees Ejip gi ba. ⁴¹ Hû go de mbangsin mâri kà hàm naay, de ’maaran jàk hîirra, de hîin di mâr maan. Jày tèen ni kàn waw del dawge. ⁴² Fay de ini nis wàa, de woo daw aw dapri a jàk ây a faktiturum, kà yey gàa a defterre nit ây lòni yèk wàa gi: Un ni-Israyel ây, un hîim jàk hîiri ni jàk gurfum a tîim nûri yeri ra naan gi ba yi? ⁴³ Un un tokrage àay mâr Molok, ni jày kà tibiskum ni mâr Romfa, jàk yey mbangsunu ngam ûurra, un coowa. Ngam yèk yey ’maa gim ’maanu kpâarriya ha a ɗàm kpees Babilon. ⁴⁴ A wosom ta worro aw dii ni àay seedamku Fay a tîim nûri. Aw mbangsige kà yey gàa Fay di Muusa, rèenjige kà woy yey rabe gi. ⁴⁵ A wosom ta worro aw arre àay maan, aw ’maara ni Yosuwa, ha de leknin a dees nit ây èege yèk Fay, a dees nit ây màni daw Fay a ɗàm kpees wosom ta worro gi. Aay maan dii a farra ha mgbàr Dawda. ⁴⁶ Dawda kpàa mbâri a ɗàm kpees Fay. De waaw orri e jâaw gin tâa di Fak Yakob. ⁴⁷ Amma hàm wàa Salomu ey jâagu àay maan. ⁴⁸ Fay ni ’mita wàa ti tâarre a àay jâarra ni kàn nirri ba, kà yey gàa nà nit lònum yèk wàa: Tooy Ɓèl gàaye: ⁴⁹ Gin tâam wûun mum dii a faktiturum, deesi ngaa tâa gin nafta nak mum. Aay jâ gun jâam dim ya? U hâ tâa gin wuysum mum ya? ⁵⁰ Ti tâa miy ni kàn mum tèege jàk yey pî ba yi? ⁵¹ Estefanu de gàa bak: Un nit ndèkta hay, tinîir wun ni tuk wun dii kà nit ây èege yèk Fay! Un hàwrre Jungci Delliya koo ningàa. Un mbitɗe kà yey mbirin a wosom ta wun! ⁵² Wun dii a tîim nit ây lòni nà yèk Fay, a wosom ta wun aw ɗàa daw ɗàari ba ya? Aw ɓàre da nit ây kàlge nà yèk nit ɗèm ge dàara gi. Dey un mòowe ni gâra, un ɓàruge. ⁵³ Un kpàaye yèk mgbèngda yey hîinu malayka ây, amma un fut yèk maan ba. ⁵⁴ A nit ɓèl raknjum ây ye ragin yèk yey, ngòlòm mûu a tinîir waw. De numsin mgbelyèy. ⁵⁵ Estefanu ey mûu ni Jungci Delliya, gopɗe a faktiturum teng teng, de rabe Fay ni ’mita wàa, Yeesu gòyrre a riina wàa. ⁵⁶ De gàa: E rri yey mi rabe faktiturum faarige, Hàm nirri gòyrre a riina Fay. ⁵⁷ Amma aw de bimin ni tibimni ɓèl, de wubin tuk waw. De ’mèmsin pî, de yaawrran gbi. ⁵⁸ De yuunuwan a dat àay ây, de aaruwan ni gòok ây. A nit seedum ây de borrin lurra waw, aw ii a gin lori nîir wàa Sawlu. ⁵⁹ De aaruwan di Estefanu ni gòok ây. Ey de waa Fay de gàa: Yeesu Nitcoorra, ngor jungci mum! ⁶⁰ Ye yaa ni gbeski, de bime ɓàng de gàa: Nitcoorra, ta mu sak jàk maarra yey a hak waw ba! Ye gbèe gàarra kà yey, de wurre. Amma ɓàta Estefanu delu di Sawlu.

¹ Mgbàr maan ɗàar ɓèl kpèrra daw da nit kimjum ây a Yerusalem. Aw pî aw yeskige a dees Yude ni Samariya. Sey a nit ây tèe daw Yeesu gi gbè aw ngaske. ² A nit ây tolge Fay aw siptige Estefanu, aw ume wurra wàa dèy. ³ Amma Sawlu kàmde gbeesum da nit kimjum ây. Lekɗe àay ni àay, e mòo nihun ây ni nikin ây, ha e lekni daw a kultuma. ⁴ A nit ây yeske ngam ɗàari gi, aw taye koo u hâ aw sakɗe Yèk Kâwrra. ⁵ Filip dige a riiy ɓèl a Samariya, e sak daw yèk Kristu da nit ây a riiy maan. ⁶ Mûsa nit ây pî ye rabin kayeefi ây tèe Filip gi, de iin tuk waw a yèk wàa. ⁷ Ngam a tindòom ây dèy aw yuu ni tibimni ɓèl a gin nit ây. A nit wuta is ây, ni nit èskum ây dèy aw kpàa ndòosum. ⁸ A nit ây a riiy maan aw dii ni tinîir kâwrra dèy. ⁹ Nit kana tâa nà mgban a riiy maan, nîir wàa Simon. Ey iirre hiila, ha de kpul daw jungci isi da ni-Samariya ây. Gàaye ni hak wàa, ey nit ɓèl ɗi. ¹⁰ Aw pî diga hàm ây ni nit wàrfi ây aw tolurre, de gàan: Nit yey lòni kpèw kpèw Fay înuwan mbinum ɓèl. ¹¹ A nit ây aw iiwe hakkilo, ngam tèe nà hiila mgban, kpulsi dawge jungci isi. ¹² Amma Filip a ye sak daw yèk wûun Fay ni nîir Yeesu Kristu, a nihun ây ni nikin ây de goosin, de ngorin baptisma. ¹³ Simon ey ngaa goosige, de kpàa baptisma. De ’mèmse ni Filip, de tâaw ’nang dèy a rapta lònum jàk ây ni kayeefi ɓèl ây tèe gi. ¹⁴ A nit ây tèe daw Yeesu tâage a Yerusalem, ye ragin a ni-Samariya ây aw ngore yèk Fay, de tèefan daw Piyèr ni Yuhanna. ¹⁵ Aw ye kpèrrin a Samariya, de waan Fay ngam nit goosum ây ha aw kpàa Jungci Delliya. ¹⁶ Ngam Jungci Delliya ɗà cir a gin waw ba. Sey ni nîir Yeesu Nitcoorra gbè kpàan nà baptisma. ¹⁷ Piyèr ni Yuhanna de iin kàn waw a hak nit goosum ây, de kpàan Jungci Delliya. ¹⁸ Simon ye rabe, aw kpàa Jungci Delliya ni iirra kàn nit ây tèe daw Yeesu gi, de hîi seede di Piyèr ni Yuhanna, ¹⁹ de gàa: Hîimdan dim ngaa mbinum yey, ngam to mi ii go kàn a hak nirri, e kpàa Jungci Delliya. ²⁰ Amma Piyèr de gàaw: Gbee ni seede wey ɗa, ngam mu dàne hîir Fay dii jàk sàarra ni seede! ²¹ Mu cen ni jàk mîinjum koo ni jàk koyrra a yèk yey ba! Ngam tinîir wey ti gòy ti a ɗàm kpees Fay ba. ²² Sey mu ini tinîiri a tèem makta wey, mu waa di Nitcoorra, to ge yaafum go a jàk dànda wey gi! ²³ Ngam mi kpàaye, mu dii ni tinîir ɗalla, ni ti’mèmni jàk maarra. ²⁴ Simon de goosi de gàa: Waawan di Nitcoorra, ngam ta jàk yey gàanu gi e kpèrrim koo kpolo ba! ²⁵ A nit ây tèe daw Yeesu cuk, a dat ye iin seedamku ni yèerra yèk Nitcoorra, de koyin a Yerusalem. A hòmda a orri aw sakɗe Yèk Kâwrra a riiy ni-Samariya ây dèy. ²⁶ Malayka Nitcoorra de gàaw di Filip: An mu dik a cewci fombina a ot yey anga a Yerusalem dike ha a Gaja, ot maan tîim nûri ɗi. ²⁷ Filip de ane kat de dige. Ye kpèrre a farra, nirri de hòmurra, nit ɓèl waatum bèebi a àay Kandake wûun nikin a dees Etiyopiya. Ey nit cuptiya ɗi. Taye nà a Yerusalem daprum a àay Fay. ²⁸ Ey koyrarre, tâa a jàk nàta ni kpisi, janggirre a defterre Isaya nit lònum yèk Fay. ²⁹ Jungci Delliya de gàaw di Filip: Dik mu hèewrra a jàk nàta maan! ³⁰ Filip de ’nòora, de hèera a gin jàk nàta, de rage ni-Etiyopiya janggirre a defterre Isaya nà. De gunu: Mu rakɗe mbâra jày janggum gi yi? ³¹ Nit maan de goosi de gàaw: Kà kà gim rak to nirri ti kàlnjim go ba ya? De gàaw di Filip: Naara a jàk nàta ot tâanji ay! ³² A aya yey jangge a defterre gi gàarre: Ey dii kà hàm mgbâay ’maan a gin gûurra. Dii kà hàm mgbâay baak baak, ti taasi a ɗàm kpees nit gûurra gimsi wàa ba, ti hàangi mgbelyèk wàa ba. ³³ A ûunum hak wàa kiita wàa arre. Wun ge sak yèk nit ta wàa ya? Ngam aw arre jungci wàa a deesi. ³⁴ Ni-Etiyopiya nà de gunu di Filip, de gàaw: Mi waamde kàlim, a hak wun yèe nit lònum yèk yey gi ya? A hak wàa naa, koo a hak nit kana? ³⁵ Filip de goose, de ɗaa yèerra a aya maan, de sagu yèk Yeesu. ³⁶ A ye digin a ɗàm kpeesi, de kpèrrin a sòo. Nirri nà de gàa: E rri yey sòo. Ji ge njanggim kpàarra baptisma ya? ( ³⁷ Filip de gàaw: To mu goosi go ni tinîiri kpolo, orri tâaye. Nit maan de gàa: Mi goosige, Yeesu Kristu Hàm Fay ɗi.) ³⁸ Ni-Etiyopiya nà de gòyni tinàni wàa ni kpisi. Ey ni Filip de cirin a gin tâa sòo. Filip de iiwrra baptisma. ³⁹ A ye naan a sòo, Jungci Nitcoorra de arru di Filip, ha nit maan ti haasu rapta ba. Amma futɗe ot wàa ni kâwum tinîiri. ⁴⁰ Filip lòrre a riiy Ajotu. Ye hòme a orri, de sage Yèk Kâwrra a riiy ây pî, ha de kpèrre a riiy Kaysariya.

¹ Sawlu ey ti haa woorra tolsum koo ɓàta da nit futa ta Yeesu ba. De dige a gin nit ɓèl daprum. ² De gunu ɗerrewol ây, e dikni a Damasku a gin nit ây a àay gin kimjum, ngam ha e kpàa orri e mòo da nit ây futke ot Yeesu, e ’mèm e ’maa daw a Yerusalem, nihun ây koo nikin ây. ³ A dikta a orri ye hèera a Damasku, yooge yooge kayang ana a faktiturum, de mgbaawa. ⁴ De yaa a deesi, de rage gûn gàawrarre: Sawlu Sawlu, ngam jâ ɗàam dim ɗàari ya? ⁵ De goosi de gune: Mu wun ɗi ya, Nitcoorra? De gàaw: Miy mi Yeesu ɗi, di nit yey ɗàamu gi. ⁶ An mu lek a riiy yey! A farra kà gim kàlum jày gum mbir gi. ⁷ A nit taynjum ta wàa di Sawlu aw tâa ɗong, aw ɓoo koo jâ ba. Aw rage gûn, amma aw rap nirri ba. ⁸ De ane a deesi. De hàye nis wàa, amma ti finurre ba. De nàrruwan ni nàcu a kàn, de ’maawan a Damasku. ⁹ Unji taan ti rapɗe koo jâ ba, ti riirre ba, ti njoorre ba. ¹⁰ Nit kana dii a Damasku nîir wàa Ananiya, nit futa Yeesu. Nitcoorra de yèew ni àyrra ndaram, de gàaw: Ananiya! De goose: Miy rri yey, Nitcoorra. ¹¹ Nitcoorra de gàaw: An mu dik a ot yey înuwan Ot ’Nâara. Mu gun a àay Yuda nirri nîir wàa Sawlu ni-Tarsu. E rri yey waarre Fay, ¹² rabe ni ndaram nirri nîir wàa Ananiya lekfarre a gin wàa, e banggurra kàn ngam e ɓelsi nis wàa. ¹³ Ananiya de gàa: Tooy Ɓèl, mi rage nak mûsi jày maarra yey pî mbire nit maan da nit ta wey a Yerusalem. ¹⁴ Ey kpàara orri a gin nit ɓèl ta waw da nit daprum ây, ha e dàara ay e mòo da nit ây ’naase nîir wey. ¹⁵ Amma Nitcoorra de gàaw: Digi, mi catkuwa e tâa kà titèeni tèem mum, ha e ’maa nîir mum a gin nit dees ây kana, ni wûun ɓèl ây, ni ni-Israyel ây. ¹⁶ Kà gim kàlnu kày ge rii ’màari dèy ngam nîir mum. ¹⁷ Ananiya de dige, e lek a àay maan. De banggurra kàn di Sawlu a hay, de gàaw: Sawlu kor mum, Yeesu Nitcoorra lòtkumda a ot yey dàama gi, ey tèegima ngam ha mu ɓelsi nisi, ha tinîir wey e mûu ni Jungci Delliya. ¹⁸ Kòsòng jày kà pòong de yaara a nis wàa. Nis wàa de ɓetkise. Sawlu de ane, de kpàa baptisma. ¹⁹ De rii tiriici, de kpàase kpèw kpèw. De tâanjin ni nit futa ta Yeesu a Damasku unji ’nang ’nang. ²⁰ Kòsòng Sawlu de ɗaa sakta yèk Yeesu tâage Hàm Fay, a àay gin kimjum ây. ²¹ De tâa daw ’nang da nit rakta ây pî, de gàan: Nit yey ey gbeese da nit ây ’naase nîir Yeesu, tâage a Yerusalem gi ba yi? Ey dàaga ay gi ha e mòo da nit ây maan, e ’maa daw a gin nit ɓèl ta waw da nit daprum ây ba yi? ²² Amma Sawlu iisirra kpèwsum a yèk wàa, de kàlnji daw da ni-Yude ây nge Yeesu ey Kristu ɗi, ha de tâa daw dàp ràràp. ²³ A dat unji ây dèy a ni-Yude ây a farra de kimjin aw raknji, ha aw ɓàru di Sawlu. ²⁴ Amma ey rage yèk waw. Unji ni tuma aw faawrre a orri, ngam yuurre go a riiy maan, aw ɓàruwa. ²⁵ Amma a nit futa ta Yeesu de arruwan ni tuma, aw cinu ni gàngna a jâarra bàanji a dat àay ây, e ’nòo. ²⁶ Sawlu ye kpèrre a Yerusalem, de haawe ’mèmsum ni nit futa ta Yeesu. Amma aw pî aw toluge, aw ngor nge ey ire nit futa Yeesu ba. ²⁷ Barnaba de arru de ’maaw a gin nit ây tèe daw Yeesu. De kàli daw yèk Sawlu rabe Nitcoorra a orri, rage yèk wàa. De kàl daw ɗa, Sawlu sage yèk Fay a nîir Yeesu tolnji cen a Damasku. ²⁸ Sawlu de diknje ni nit ây tèe daw Yeesu gi a àay ây a Yerusalem, ey sakɗe yèy a nîir Yeesu tolnji cen. ²⁹ De hàanjin yèy ni ni-Yude ây yèege yèk Girèk. De kàmin orri aw ɓàruwa. ³⁰ A kor ta wàa ye ragin yèk maan, de ’maawan a riiy Kaysariya. De hòmnuwan a Tarsu. ³¹ A nit kimjum ây a dees Yude, ni dees Galile, ni dees Samariya pî aw wuysige a ɗàari. Aw dii ni tolnji Fay. Aw iisirrarre mûurra, ngam Jungci Delliya mgbaanji dawrre. ³² Piyèr ye gîre a riiy ây pî, unji kana de dige a gin nit goosum ây a Lidda. ³³ De kpàa nirri a farra, nîir wàa Eneya, kûurre àyci wuta isi yeri nan nan. ³⁴ Piyèr de gàaw: Eneya, Yeesu Kristu ndòosumde. An mu kat jingi wey! De ane. ³⁵ A ni-Lidda ây ni ni-Saron ây ye rabuwan di Eneya gîtɗe, de inin tinîir waw a gin Nitcoorra. ³⁶ Kin kana dii a Yoppe futɗe ot Yeesu, nîir wàa Tabita kà gàarra Sâri. Ey tèerre tèem mbâri dèy, hîirre jày da nit èca ây. ³⁷ Mgbàr kana àyci de mòowa, de wurre. De poowan sòo, de iiwan is wàa a àay tinjoknjum. ³⁸ A nit futa ta Yeesu a riiy maan de ragin Piyèr dii a Lidda. Lidda dii gaarra ni Yoppe. De tèefan nit ây cuk a gin wàa. De waawan e dàara, ta e tòora ba. ³⁹ Piyèr de ane e taynji ni aw. Ye kpèrrin, de naanuwan a àay tinjoknjum a gin tâa wurra nà. A kin wurra ây aw gòyrre a farra aw umde, aw kàlnurre lurra ây jim daw Tabita ye tâa nà ti wut ba. ⁴⁰ De yuuni daw pî u gbaa. De gbâyge ni gbeski e waa Fay. De dûra a gin wurra nà de gàa: Tabita, ani! De ɓelse nis wàa. De rabu di Piyèr, de ane e tâa ton. ⁴¹ Piyèr de mòow a kàn, de aanju e gòy ti. De ’naase da nit goosum ây ni kin wurra ây nà, de kàlni daw Tabita gûysige. ⁴² Yèk maan yeske a Yoppe pî. A nit ây dèy aw goosu di Nitcoorra. ⁴³ Piyèr tâaye unji mûsi jày a Yoppe, a àay Simon nit munda kûu.

¹ Nit kana dii a Kaysariya nîir wàa Korneliyu, nit ɓèl waw da sooje ây temèrre, aw ’naasi dawrre ni-Italiya ây. ² Ey nit coorra ɗi, tolle Fay ni nit àay rra wàa pî, hîirre hîiri dèy da nit ây, waarre Fay koo ningàa. ³ Mgbàr kana unji mbona de rabe jày ni ndaram. Malayka Fay lekfarre a gin wàa, gàawrre: Korneliyu! ⁴ De gobu di malayka ni tolnji, de gunu: Ji mbirge ya, Nitcoorra? Malayka de gàaw: Waarum wey ni hîir ta wey kpèrre a ɗàm kpees Fay, de ɓaysum. ⁵ Tèe nit ây a Yoppe a gin Simon înuwan Piyèr, aw gàaw e dàara. ⁶ Nit maan dii a àay Simon nit munda kûu, gaarra a sòo ɓèl. ⁷ Malayka yèegurra gi ye taye, Korneliyu de ’naase a tîim nit ta wàa lor ây cuk, ni sooje kpolo tolge Fay. ⁸ De kàl daw jày pî mbirge gi, de tèe daw a Yoppe. ⁹ Unji kana a nit ta Korneliyu ye hèeran a Yoppe, Piyèr naaye a fak àay e waa Fay. Unji kpèrre a tîim hay. ¹⁰ Fey àyuge, yiɗi riirra tiriici. Ye tâa aw dòorarre a àay, de rabe jày ni ndaram. ¹¹ Faktiturum faarige. Jày kà godo ɓèl cirarre a deesi ni mòocu a cewci naan. ¹² A jàk ây pî tâage ni nay naan, ni jòoy ây, ni jooy ây pî aw dii a farra. ¹³ De rage gûn gàawrre: Piyèr, an mu gûu mu rii! ¹⁴ Amma Piyèr de gàa: Oow, Nitcoorra, ngam mi haa riirra jày pî tâage maktiya, ni joot yey coon a ni-Yude ây gi ba. ¹⁵ Gûn de gàasurra bak: Jày delse Fay, ta mu raptu kà jàk makta ba. ¹⁶ Jàk yey mbire hû go nak taan. A dat maan godo ɓèl nà ni jàk ây pî tâage a farra, de naase a faktiturum. ¹⁷ Piyèr de dàni a jàk yey rabe gi, ɗaa e cèngni jày yiɗi gàarra ba. E rri yey a nit ây tèera Korneliyu gi aw kpèrra a gbaa, aw gunde àay Simon nit munda kûu. ¹⁸ De ’naasin aw gun, to ay tâa go Simon înu wan Piyèr gi. ¹⁹ Piyèr dànde bak a jàk yey rabe nà. Jungci Delliya de gàaw: E rri yey a nit ây taan aw kàmumde a gbaa. ²⁰ An mu cir, mu diknji ni aw, ta mu hàanji ba. Ngam miy tèega daw. ²¹ Piyèr de cira a gin nit ây maan, de gàa daw: Miy tâage nit yey kàmnu gi. Yèk ji dàara un ya? ²² De goosin de gàan: Korneliyu tèega dorro, nit ɓèl sooje ây, nit ɗèm ɗi, tolle Fay, a ni-Yude ây pî aw yèerre mbâra a hak wàa. Malayka Fay gàawe, e ’naasum mu difa a àay wàa, ha e rak yèy a gin wey. ²³ Piyèr de lekni daw a àay, e hîi daw gin kûurra. Ni ndamji de taynjin ni aw, ni kor goosum ây kana tâage a Yoppe gi. ²⁴ Ndamji yey go de kpèrrin a Kaysariya. Korneliyu waa dawrre, ’naasa nit gbaa rra wàa ni soob ta wàa aw kimji a àay. ²⁵ Piyèr ye hèera, Korneliyu de kûunjufa aw kpàanji a orri. De gbâyge e coowa. ²⁶ Amma Piyèr de aanju de gàaw: An mu gòyi, ngam miy mi nirri ɗi ɗa kà muy. ²⁷ Ye yèenjin yèy ni Korneliyu, de lege a àay, de kpàa nit ây dèy aw dii a farra. ²⁸ De ɗaa yèerra yèy de gàa daw: Un cèngnige, orri cen di ni-Yude e ’mèmsi ni ni-riiy kana, ha e lek a àay wàa ba. Amma Fay kàlnimge, ta mi gàa koo di wuna ey nit makta ɗi ba. ²⁹ Hû go mi dàarage a gin wun, mi tòora ba. Mi gunnurre: Ngam jâ ’naasim un ya? ³⁰ Korneliyu de goosi de gàaw: Unji naan ɗi niyey, unji mbona kà yey gi, mi waarre Fay a àay mum. E rri yey nirri gòye a ɗàm kpees mum ni lurra di el di el. ³¹ De gàam: Korneliyu, Fay rage waarum wey, ɓaysi hîirra hîir ta wey ngam wàa. ³² Tèe a Yoppe, aw ’naasa Simon înuwan Piyèr e dàara. Ey dii a àay Simon nit munda kûu, gaarra a sòo ɓèl. ³³ Kà yey de kîrimfa tèerra a gin wey, mu mbire mbâra ye dàama gi. Orro pî ot tâarre a ɗàm kpees Fay, ha mu kàlna jày lang gàam Fay gi. ³⁴ Piyèr de sage yèy de gàa: Kà yey mi cèngni takundi, Fay ti rapti nis nit ây ’nang ’nang ba. ³⁵ Amma koo a riiy hâ, nirri tolu go di Fay, tèe go jàk mbâri, ey kâwguwa. ³⁶ Un cèngni yèk yey Fay tèega da ni-Israyel ây, hîi daw Yèk Kâwrra ni raknjum a gin Yeesu Kristu. Yeesu tâage Nitcoorra da nit ây pî. ³⁷ Un rage jày pî mbirge a dees Yude. Ɗaage a Galile ni iirra baptisma, yey sage Yuhanna a yèerra yèk wàa. ³⁸ Fay mbârsu di Yeesu ni-Nasaret ni Jungci Delliya, ni mbinum. Ey gîre koo u hâ e mbir jàk mbâri, e ndòosi da nit ây pî riisi daw Seyɗan ’màari, ngam Fay tâanjirre ni ey. ³⁹ Orro ot nit seedum ây ɗi a jàk yey pî mbirge a dees Yude ni Yerusalem. Aw ɓàruge di Yeesu ni gbalcu a minjum kpiiri. ⁴⁰ Amma unji taanti Fay gûysuge, hîiwe mbinum e lòni hak wàa. ⁴¹ Ti lòt mgbàr maan a gin nit ây pî ba, amma a gin nit seedum ây carri nà Fay mgban, orro ot nit ây riinje, njoonje ni ey a dat gûysum wàa a wurra. ⁴² Gàana ot sak da nit ây ot kàl daw, nge Fay iiwe dey nit hiitum da nit beengiya ây ni nit wutiya ây. ⁴³ A nit ây lòni nà yèk Fay aw seedurre, nge koo wun goosu go, kpàa ge kpàa yaafum jàk maarra wàa ni nîir Yeesu. ⁴⁴ Piyèr ye yèe bak, Jungci Delliya de cira a gin nit ây pî rake yèk wàa. ⁴⁵ A nit goosum ây a yòot ni-Yude ây dàaga ni Piyèr de tâa daw ’nang, ngam Fay hîi Jungci Delliya da nit ây èege yèk wàa. ⁴⁶ Ngam aw rage ɗa, a nit ây maan yèerre ni yèk kana ’nang ’nang, aw ’misirre nîir Fay. Piyèr de gàa: ⁴⁷ Nirri ge èeni daw iirra baptisma da nit ây gi yi? Ngam aw aw kpàa Jungci Delliya kà yey kpàan nà orro. ⁴⁸ De gàa daw aw ngor baptisma ni nîir Yeesu Kristu. De ngorin. De waawan e tâanji ni aw unji càa.

¹ A nit ây tèe daw Yeesu, ni kor goosum ây tâage a dees Yude aw rage, a nit ây èege nà yèk Fay ngaa aw ngore yèk wàa. ² Piyèr ye dàara a Yerusalem, a nit goosum ây kana a yòot ni-Yude ây aw lètnji ni ey, ³ aw gàawe: Kà lekmu a tîim nit ây tâa aw rrèpni ba, mu riinji ni aw ya? ⁴ Piyèr de sak daw yèk maan pî ni futnjum, de gàa: ⁵ Mi tâarre nà a Yoppe. Ye waami Fay, de rapmi jày ni àyrra ndaram. Jày kà godo ɓèl ana a faktiturum, cirarre a gin mum ni mòocu a cewci naan. ⁶ Ye gopmi mbâra, de kpàami jàk ây tâage ni nay naan, ni joot nûr ây, ni jòoy ây, ni jooy ây a farra. ⁷ De rakmi gûn gàamde: Piyèr, an mu gûu mu rii! ⁸ De gàami: Oow, Nitcoorra, mi haa riirra jày tâage maktiya, ni joot coorra ba. ⁹ Gûn de yèesima a faktiturum nak cukti, gàa: Jày delse Fay, ta mu raptu kà jàk makta ba. ¹⁰ Mbire kà yey nak taan. Jàk maan pî de naase a faktiturum. ¹¹ Kòsòng a nit ây taan anga a riiy Kaysariya, tèeran daw a gin mum, aw gòyrre a nin àay yey tâami gi. ¹² Jungci Delliya gàame: An mu taynji ni aw, ta mu hàanji a tinîir wey ba! De taynjina ni kor goosum ây yira, de lekna a àay nit maan. ¹³ Ey de sakna kày rabe malayka gòyge a àay wàa, gàaw: Tèe da nit ây a Yoppe, aw ’naasa Simon înuwan Piyèr e dàara. ¹⁴ Nit yey kà ge kàlum yèk yey ge saanum, dum ni nit àay rra wey pî. ¹⁵ Ye ɗaami yèerra yèy, Jungci Delliya de cira a gin waw, kà yey cira nà mgban a gin worro. ¹⁶ De ɓaysim yèk Nitcoorra gàaye: Yuhanna iirra dun nà baptisma gbè, amma un kpàa gun kpàa baptisma maan ni Jungci Delliya. ¹⁷ To tâa go Fay hîi daw hîir kpolo kà yey hîina dorro, a ye goosina di Yeesu Kristu Nitcoorra gi, miy mi wun ɗi, ha mi njang di Fay ya? ¹⁸ A ni-Yude ây ye ragin yèk yey, de tâan ɗong de ’misin nîir Fay, de gàan: Hû go Fay hîi da nit ây èege nà yèk wàa ɗa aw ini tinîir waw, aw kpàa gûyrra! ¹⁹ Ɗàarra ɗàar yey anga a ɓàta Estefanu yeskini da nit goosum ây. Aw dige ha aw kpèrre a Fenikiya, ni Kipru, ni Antakiya. De yèen yèk Fay da ni-Yude ây gbè. ²⁰ A nit ây kana a tîim waw, aw yòot ni-Kipru ây ni yòot ni-Kirene ây ɗi, ye dàaran a Antakiya, de sagin Yèk Kâwrra yèk Yeesu Nitcoorra da yòot ni-riiy ây kana ɗa. ²¹ Nitcoorra patɗa dawrre kàn, tâanjirre ni aw. Mûsa nit ây dèy aw goosige, aw ini tinîir waw a gin Nitcoorra. ²² Yèk maan kpèrre a tuk nit kimjum ây a Yerusalem. De tèen Barnaba e dik a Antakiya. ²³ Ey ye kpèrre, de rabe mbâr Fay a tîim nit ây, de delu dèy. De mgbèng daw, ta aw woofa yèk Nitcoorra ba, amma aw fut ni tinîiri kpolo. ²⁴ Ey nit mbâra ɗi, tinîir wàa mûu ni goosum, ni Jungci Delliya. A nit ây dèy aw furre di Nitcoorra, aw iisirrarre mûurra. ²⁵ Barnaba de taye kàmda Sawlu a Tarsu. ²⁶ Ye kpàaw gi, de ’maawrra a Antakiya. Aw tâanji ni nit kimjum ây a farra yeri kpolo, aw kàlnji dawge da mûsa nit ây a farra yeri kpolo, aw kàlnji dawge da mûsa nit ây dèy. A Antakiya ɗaan daw înda nit ta Kristu da nit ây futke Yeesu gi. ²⁷ A nit ây lòni yèk Fay tâage a Yerusalem, aw dàara a Antakiya. ²⁸ Nirri kpolo dii a tîim waw, nîir wàa Agabu. De ane e lòni yèy ni Jungci Delliya de gàa: Fek ɓèl ii ge ii a deesi lang. Fek maan iiye a yer Kalawdu, Kaysara wûun ɓèl. ²⁹ A nit futa ta Yeesu aw raknjige, koo wuna e hîi hîiri kày ge mbin gi, ngam aw mgbaanji da kor goosum ây tâage a dees Yude. ³⁰ De mbirin kà yey, de tèenin jàk maan a kàn Barnaba ni Sawlu, aw ’maa a gin toonji nit kimjum ây a dees Yude.

¹ Mgbàr maan Herode wûun ni-Yude ây riisi dawrre ’màari da nit goosum ây kana. ² De ɓàre Yakuba ɓèl wàa di Yuhanna ni ɓet ɓèl. ³ Ye cèngni, yèk yey del dawge da ni-Yude ây, de tèe aw mòowra Piyèr gi ɗa. Unji daprum Paska ɗi. ⁴ De leknu a kultuma, de ii sooje ây ’nang ’nang naan aw faawa. Dàni e ’maawra, e kàlni daw da nit ây a dat daprum Paska. ⁵ Hû go aw faarre di Piyèr a kultuma. Amma a nit kimjum ây aw waarre Fay ngam wàa, woorra cen. ⁶ Herode gàarre e ’maawra di Piyèr a ɗàm kpees nit ây. Ni tuma maan Piyèr kûurre a tîim sooje ây cuk. Aw ’mèmuge ni yuma titefki cuk. A sooje ây kana aw dii a nin kultuma, aw faarre. ⁷ E rri yey malayka Nitcoorra gòyrre a gin wàa. Kayang kayngige a mîis àay. De mâaw di Piyèr a ɓuurra, de mûysuwa. De gàaw: An kat mu gòyi! Yuma titefki yey ’mèmnuwan gi de pate a kàn wàa, de yaaye. ⁸ Malayka de gàaw: Cîisi njàal a kpàang, leknisi naan wey! De mbire hû go. De gàaw bak: Mgbapsi lurra wey, mu furrimi! ⁹ Piyèr de furruwa, de yuun. Ti cèngni, jày mbirgu malayka gi nge takundi ɗi ba. Ey dàne ndaram àyguwa. ¹⁰ A ye hòmran a gin sooje màrra ni cukti, de dàaran a nin gbèeni mbangsumya ni titefki. Nin maan de faare ni hak wàa. De yuun a gbaa. Ye yewin orri kpolo, malayka de woowa. ¹¹ Piyèr ye kpàase hakkilo wàa, de gàa: Takundi mi cèngni, Nitcoorra tèega malayka wàa e saanim a kàn Herode, ni kàn ni-Yude ây a jày gàan aw mbirim gi. ¹² Ye cèngsi kà yey, de dige a àay Mariya nuu wàa di Yuhanna înuwan Marku. A farra a nit ây dèy aw kimjige, aw waarre Fay. ¹³ De taa a nin ɓeeri. Sapri dii a àay maan nîir wàa Rode, de hèera a nin e cèngni wun ɗi go. ¹⁴ Ye cèngsi gûn Piyèr ɗi, kâwruge ha de hènte faarum nin. De ire kènu a àay, de kàl daw Piyèr dii a gbaa. ¹⁵ De gàawan: Mu ray ɗi! Amma ey gòyrre kpèw a yèk maan. De gàawan: Ey ɗi ba, jungci wàa ɗi. ¹⁶ Piyèr ti woofa taarra a nin ba. A ye faaruwan gi, de rabuwan de kpul daw jungci isi. ¹⁷ Ey de patfa daw kàn ha aw tâa baak baak. De sagi daw kày yuunu Nitcoorra a kultuma. De gàa: Kàluwan yèk yey di Yakuba, ni kor ây kana ɗa! De yuu e dik a gin kana. ¹⁸ Ndamji ye kayge, a sooje ây faage kultuma de yûunjin dèy, de gunjin: Kày mbire Piyèr gi ya? ¹⁹ Herode ye kàmu, tâa ti kpàaw ba, de gun daw da sooje ây yèk Piyèr. De gàa, aw dik aw ɓàt daw da sooje ây maan. Ey de ane a dees Yude, e dik a Kaysariya, e tâa a farra. ²⁰ Herode dii ni ngòlòm a gin ni-Tiiru ây ni ni-Sidon ây. Amma aw de raknjan aw dàara a gin wàa. De yèen mbâriya di Balastu nit faarra àay wûun, ha aw kàm raknjusum ni Herode. Ngam dees waw kpàarre jàk riirra a dees wàa. ²¹ Unji yey gàa daw gi, Herode de mgbabe lurra wûun de tâa a gbaaci. De yèe yèy da nit ây ni gûn ɓèl. ²² A nit ây de bimin de gàan: Yey kam gûn Fay ɗi, gûn nirri ɗi ba! ²³ Kòsòng malayka Nitcoorra de lurru di Herode, ngam ey ti coo Fay ba. Fûy de riiwa de wurre. ²⁴ Amma yèk Fay yeskige, iisirrarre dikta ɗàm kpeesi. ²⁵ Barnaba ni Sawlu ye gbèen tèem waw a Yerusalem, de isin de arrin Yuhanna înuwan Marku, e diknji ni aw.

¹ A nit ây lòni yèk Fay, ni nit kàlnjum ây aw dii a tîim nit kimjum ây a Antakiya: Barnaba, ni Simeyon înuwan Niger kà gàarra nit yiriya, ni Lukiyu ni-Kirene, ni Manayen nit ’mitnjum ni Herode wûun ɓèl, ni Sawlu. ² A ye kimjin aw waa Fay, aw coo riirra tiriici, Jungci Delliya de gàa: Hîimin Barnaba ni Sawlu, aw dik a tèem yey ’naasim daw gi. ³ De coon bak riirra tiriici, aw waa Fay. De banggirran daw kàn a hay, de wasnjin aw tayi. ⁴ Hû go Barnaba ni Sawlu ye tâa Jungci Delliya tèegi daw gi, de tayin a Selukiya, aw lek a koombowal a farra. De digin a Kipru, dees yey tâage a tîim sòo gi. ⁵ Ye kpèrrin a Salamin a dees maan, de sagin yèk Fay a àay gin kimjum ta waw da ni-Yude ây. Yuhanna tâanjirre ni aw, mgbaanji dawrre. ⁶ De gîrin a dees maan pî, ha de kpèrrin a Pafos. A farra de kpàan ni-Yude nit dîw, nit lònum yèk rèeng, nîir wàa Bar-Yeesu. ⁷ Dii a àay Sergiyu Pawlu, ngomna dees maan. Nit yey dii ni hakkilo. Ey yiɗige e rak yèk Fay. De ’naase Barnaba ni Sawlu, aw dàa aw saguwa. ⁸ Amma Elima kà gàarra nit dîw ni yèk Girèk, dii nit yiir waw, kàme orri e hèenifa goosum yèk Fay a tinîir ngomna nà. ⁹ Sawlu înuwan ngaa Pawlu mûu ni Jungci Delliya a tinîir wàa, de iiw ni-si teng teng di nit dîw nà, ¹⁰ de gàaw: Muy mu mûu ni rèeng, ni gâra maktiya pî, mu hàm Seyɗan ɗi, mu yiirre yèk ɗèm, gum woofa mboysum ot Nitcoorra tâage gòyrriya ti ba yi? ¹¹ E rri yey Nitcoorra lè ge lèrrum, mu râa, tâa ge tâa càa gum rap unji ba! Kòsòng kulpi de kuptu di nit maan, de gîre e kàm nirri e nàrruwa. ¹² Ngomna ye rabe jàk yey mbirge gi, de goose, ngam mbinum yèk Nitcoorra tâawe ’nang. ¹³ Pawlu ni nit ta wàa de anin a Pafos, de legin a koombowal aw dik a Perge a dees Pamfiliya. Yuhanna de ɗòlnji ni aw, de ire a Yerusalem. ¹⁴ Amma aw ye anan a Perge, de digin a Antakiya a dees Pisidiya. A unji wuysum de legin a àay gin kimjum, aw tâa a farra. ¹⁵ Ye gbèen janggum defterre yèk mgbèngda Muusa, ni defterre yèk nit lònum ây, a nit ɓèl ây a àay gin kimjum de tèefan a gin waw, de gàan: Un kor ta worro, yèk mbâra diinu go un yèe da nit ây, yèen! ¹⁶ Pawlu de ane, de parre kàn de gàa: Un ni-Israyel ây ni nit ây tolge Fay, raksin! ¹⁷ Fak ni-Israyel ây catki da wosom ta worro, ’misi daw da nit ta wàa ye tâan nà a dees Ejip. Yuuni daw ni mbinum kàn wàa. ¹⁸ Efe tinîir wàa a ye gîrin a nûri yeri ra naan. ¹⁹ Ey lòosi yòot ni-Kanana ây jòròs, de hîi dees maan da nit ta wàa, aw koyrra ngam yeri temèrre naan ni ra kèrèw. ²⁰ A dat maan de hîi daw nit hiitum ây ha yer Samuyel nit lònum yèk Fay. ²¹ Ye gungin wûun ɓèl, Fay de hîi daw Sawul hàm Kis a yòot ni-Benyamin. De tâa wûun yeri ra naan. ²² Fay de bosu wûun di Sawul, de hîi daw Dawda e tâa wûun waw. Dey Fay seedi a hak wàa, gàaye: Mi kpàa Dawda hàm Yessa, nit yey gesim a tinîir mum, tèe ge tèe jày yiɗim pî. ²³ A yòot nit yey Fay tèera Yeesu da ni-Israyel ây, e tâa Nitsaanum, kà yey gàa daw nà mgban. ²⁴ A ye tâa ɗà e dàara ba, Yuhanna kàl daw da ni-Israyel ây pî aw ini tinîir waw, aw ngor baptisma. ²⁵ A gbèerra tèem wàa Yuhanna de gàa: Kày dànnu mi wun ɗi ya? Mi tâa nit yey dànnu gi ba, amma e rri yey nit kana dàararre a dat mum. Miy mi get, mi ûu mi bot naan wàa ba. ²⁶ Pawlu de gàasirra: Un kor ta mum a yòot Abraham, ni un nit ây tolge Fay, a gin worro tèera Fay yèk saarra yey! ²⁷ A nit ây tâage a Yerusalem, ni wûun ta waw aw cèngnu di Yeesu ba, ngam aw rak mbâra yèk nit lònum ây ba, yey janggin a unji wuysum koo ningàa, amma aw gbèesi yèk yey ye hiituwan di Yeesu. ²⁸ Koo ye tâa aw kpàa yèk makta ha aw ɓàru ba, de waan di Pilatu e ɓàruwa. ²⁹ A ye gbèesin jày pî gàa mgban a hak wàa a defterre Fay, de cinuwam a minjum kpiiri, de siptuwan a gebi. ³⁰ Amma Fay gûysuge a tîim nit ây wutke gi. ³¹ Unji mûsi jày lòtɗa dawrre da nit tâanjum ta wàa mgban a dees Galile ha Yerusalem. A nit ây maan a nit seedum ta wàa ɗi a gin ni-Israyel ây. ³² Orro ngaa ot ’maara dun Yèk Kâwrra, yey yèe Fay ni yèk mòonjum kàn da wosom ta worro. ³³ Ye gûysu di Yeesu, de gbèese yèk yey a hak worro, dot hàm ta nit mòonjum kàn gi. Kà yey kère a defterre Ndûu a faslowol cuk, Fay gàa: Muy mu hàm mum ɗi, mi kpàame unji yey. ³⁴ Fay gàa mgban, gû ge gûysuwa a tîim nit ây wutke gi, ta e raa ba. Gàa: Hîi gim hîinu mbârsum delliya ge tâa koo ningàa, yey yèemi yèk mòonjum kàn ni Dawda gi. ³⁵ Hû go de gàa bak a gin kana: Gum woo di nit wev e raa ba. ³⁶ Dawda tèe jày yiɗi Fay a yer wàa, a dat maan de wurre. Aw siptuge a tîim geb too rra wàa, is wàa raaye. ³⁷ Amma nit yey Fay gûysuge, is wàa ti raa ba. ³⁸ - ³⁹ Kà yey kor ta mum, sey un cèngni, ni nîir Yeesu gi aw sakɗe yèk yaafum jàk maarra. Koo wun goosu go, ge kpàa gòyrra ɗèm a jàk yey pî tâa nà un kpàa gòynum hak wun ɗèm a yèk mgbèngda Muusa gi ba. ⁴⁰ Sey un ii hakkilo, ngam ta jàk yey yèen a nit lònum ây e kpèt dun ba, ye gàan ni yèk Fay: ⁴¹ Gobin, un nit wâskum jày pî, tolin, yeskin! Ngam tèe gim tèe jày a mgbàr tâam wun, tâa gun ngor ba sam, koo nirri kàlnu go gi. ⁴² Pawlu ni Barnaba de yuun a àay gin kimjum. A nit ây de waan daw, aw yèesirra kà yey a unji wuysum kana. ⁴³ Ye yeskin, a ni-Yude ây dèy ni nit ây leksi daw gi aw furru di Pawlu ni Barnaba. Aw ngaa de ndòorin daw, ha aw fut a mbâr Fay. ⁴⁴ Unji wuysum ye kpèrra, a ni-riiy ây maan ɓèle aw kimjige, aw rak yèk Fay. ⁴⁵ A ni-Yude ây kana ye rabin mûsa nit ây dèy a farra, de anin ngèeri, de hàanjin a jày yèe Pawlu gi, de maasin yèk maan. ⁴⁶ Koo hû go Pawlu ni Barnaba aw yèerre tolnji cen, de gàan: Gesi mgban un un ɗàa rakta yèk Fay. Amma ngam un gbòsfa yèk yey, un gàa ni hak wun un get kpàarra gûyrra tâam timgbàri ba, hû go ot itɗe a gin nit ây èege yèk Fay. ⁴⁷ Ngam kà yey mgbèngna Nitcoorra, gàa: Mi iimi mu tâa kayang da nit ây èege yèk mum, ngam mu tâa nit hîirra ot saarra ha a gbèeni deesi. ⁴⁸ A nit ây èege yèk Fay ye ragin kà yey, tinîir waw kâwri dawge, de ’misin yèk Nitcoorra. A nit ây pî tâage kpà kpà gûyrra tâam timgbàri gi, aw goosige. ⁴⁹ Yèk Nitcoorra yeskige a dees maan pî. ⁵⁰ Amma a ni-Yude ây de cuynin da nikin tiròom ây tolge Fay, ni nit ɓèl ây a riiy maan. De anin ɗàari di Pawlu ni Barnaba, de mànin daw a riiy waw. ⁵¹ A nit ây cuk gi de gbòsɗan daw sèerrèm nak waw (kà gàarra aw woo daw da ni-riiy yey ni kiita). De digin a Ikoniya. ⁵² A nit futa ta Yeesu a Antakiya aw mûu ni kâwrum a tinîiri, ni Jungci Delliya ɗa.

¹ Pawlu ni Barnaba ye kpèrrin a Ikoniya, de legin bak a àay gin kimjum ni-Yude ây. De yèen yèk Fay. A ni-Yude ây ni yòot ni-riiy ây kana dèy de goosin. ² Amma a ni-Yude ây tâa aw goosi ba, de anin yèy a gin nit ây èege yèk Fay, de mboysin daw hakkilo, ha aw dàn maarriya a gin kor ây. ³ Koo hû go Pawlu ni Barnaba aw tâa unji dèy a farra. Aw yèerre tolnji cen, ngam aw cèngnu di Nitcoorra. Ey kàlni mbâr wàa a yèk waw, hîi daw mbinum aw lòni jày ni kayeefi ây. ⁴ A nit ây a riiy maan aw mîinji cuk. A nit ây kana aw ’mèmsi ni ni-Yude ây, a nit ây kana ngaa aw ’mèmsi ni nit ây tèe daw Yeesu. ⁵ A nit ây èege yèk Fay, ni ni-Yude ây de raknjan ni nit ɓèl ta waw, aw ɗàa daw ɗàari da nit ây tèe daw Yeesu gi, ha aw còori daw ni gòoy. ⁶ Pawlu ni Barnaba ye ragin yèk maan, de ’nòon a Listira ni Derbe, ni riiy ây kana tâage a dees Likawniya. ⁷ De sagin Yèk Kâwrra a farra. ⁸ Nirri dii a Listira, nit wuta nay diga himni nuu wàa, ti haa dikta dikri ba. ⁹ De rage jày yèe Pawlu. Pawlu ngaa de gobu teng teng, de rabu dii ni goosum ha àyci wàa e ndòo. ¹⁰ De yèe ɓàng, de gàaw di nit àyci maan: An mu gòy sèna! De ane, de ɓure de gîre. ¹¹ Mûsa nit ây ye rabin jày tèe Pawlu gi, de bimin de gàan ni yèk riiy waw: A mâr ây aw dàarage, aw rèenji ni nirri. ¹² De ’naasuwan di Barnaba Jewus, Pawlu ngaa Hermes, ngam ey tâa nit tiɗàm kpeesi a yèerra yèy. ¹³ Nit daprum a àay Jewus, àay mâr maan dii a lekni riiy, de ’maara gus ây ni bista jày, e ii a nin riiy maan. Yiɗi ni nit ây pî aw gûu daw gusi da nit ây tèe daw Yeesu cuk gi. ¹⁴ Amma Pawlu ni Barnaba ye ragin kà yey, de ngòli daw de ngasin lurra waw, de ’nòon aw lek a tîim nit ây. ¹⁵ De bimin de gàan: Un nit ây, ji mbitnu kà yey gi ya? Orro ngaa ot nit ây ɗi kà un! Ot kàl dunde Yèk Kâwrra ngam un woofa jàk ɓa hû go, ha un ir a gin Fak beengiya. Ey mbangse faktiturum, ni deesi, ni càng sòo ni jày tâage a farra pî. ¹⁶ Mgbàr kana Fay woo daw da nit ây a èca yèk wàa, aw fut ot waw. ¹⁷ Amma koo hû go ti woofa seedum hak wàa ni tèerra jàk mbâri ba. Ey hîinu jày diga faktiturum, buun, ni yer oca, ni tiriici dèy, kâwsi dunge tinîiri. ¹⁸ A nit ây kèle ngin gûucu gus ây maan, amma Pawlu ni Barnaba aw njang dawge ni yèerra kà yey. ¹⁹ A ni-Yude ây anga a Antakiya ni Ikoniya, de dàaran aw rûfi mûsa nit ây, ha de aaruwan di Pawlu ni gòok ây. De nàrruwan a dat àay ây, ngam aw dàne ey wurre. ²⁰ Amma a nit futa ta Yeesu ye dàan aw mgbaaw gi, Pawlu de ane, de leksi a riiy maan. Ni ndamji de taynjin ni Barnaba a Derbe. ²¹ Ye sagin Yèk Kâwrra a riiy maan, de iin nit futa ta Yeesu dèy. A dat maan de irin a Listira, ni Antakiya a dees Pisidiya. ²² De iisirran kpèwsum tinîiri da nit futa ta Yeesu. De mgbènggin daw aw mòo a goosum, de gàan daw: Sey ni riirra ’màari dèy got lek a wûun Fay. ²³ De carrin nit ây, aw ii daw toonji nit kimjum ây a riiy ’nang ’nang. De waarran daw Fay, de coon riirra tiriici. De woon daw aw tâa a kàn Nitcoorra yey goosuwan gi. ²⁴ Pawlu ni Barnaba de hòmin a dees Pisidiya, de digin a dees Pamfiliya. ²⁵ A dat ye yèen yèk Fay a Perge, de cirin a Attaliya. ²⁶ A farra de legin a koombowal, aw dik a Antakiya. A riiy maan aw woo daw nà mgban aw dik ni mbâr Fay, ngam aw tèe a tèem yey gbèesan gi. ²⁷ Ye kpèrran gi, de kimjin nit futa ta Yeesu, de sagin daw jày pî tèenji Fay ni aw, kày faari Fay orri da nit èca yèk wàa, ha aw ngaa aw goosi. ²⁸ Aw tâanji ni nit futa ta Yeesu unji mûsi jày a farra.

¹ A nit ây kana anga a dees Yude de dàan, aw kàlnji da kor goosum ây. De gàan: Sey un rrèpni, un mòo hàar Muusa. To naa hû go ba, gun kpàa saarra ba. ² Pawlu ni Barnaba de lètnjin ni aw dèy, de hàanjin yèy. Ngam maan a nit goosum ây a farra de raknjin aw tèe Pawlu ni Barnaba, ni nit ây kana, ha aw dik a Yerusalem a gin nit ây tèe daw Yeesu gi, ni toonji nit kimjum ây, ngam yèenjum a yèk yey. ³ Hû go a nit kimjum ây aw isni dawge. A nit tayrra ây ye hòmin a dees Feniki ni Samariya, de sagin da kor goosum ây yèk nit ây èege yèk Fay, kày inin tinîir waw a gin Nitcoorra. Ye ragin kà yey, de kâwsi daw tinîiri dèy. ⁴ Ye kpèrrin a Yerusalem, a nit kimjum ây ni toonji ta waw, ni nit ây tèe daw Yeesu de ngorin daw mbâra. Pawlu ni nit ta wàa de sagin jày pî tèenji Fay ni aw. ⁵ Amma a nit ây kana tâage a ot ni-Farisa ây irge nit goosum di Fay gi, de anin yèy de gàan: Ndika aw rrèpni daw da ni-riiy ây kana pî, aw mgbèng daw aw fut hàar Muusa. ⁶ A nit ây tèe daw Yeesu gi, ni toonji nit goosum ây de kimjin aw raknji a yèk yey. ⁷ A dat hàanjum dèy, Piyèr de ane de gàa daw: Un kor ta mum, un cèngni, Fay carrim dim a tîim wun diga mgban ngam mi sak Yèk Kâwrra da nit ây èege yèk wàa, ha aw ngaa aw rak aw goosu. ⁸ Fay ey cèngni tinîir nirri, ii seedamku a hak waw ye hîi daw Jungci Delliya, kà yey hîina dorro ɗa. ⁹ Ti ii daw ’nang ’nang ni orro ba, ye ɓetkini daw tinîiri ni goosum waw gi. ¹⁰ Kà yey ɗi go, ngam jâ kàmnu yèy di Fay ni toksum titokri a hak nit futa ta Yeesu ya? Titokri maan koo orro ni too rra worro ot kpàaw tokta ba. ¹¹ Amma orro ot goosirre, ot saaye ni mbâr Yeesu Nitcoorra, kà yey saan aw ɗa. ¹² A nit kimjum ây pî de tâan baak baak. De raksin di Barnaba ni Pawlu, ye sagin jày pî tèenje Fay ni aw, ni lònum jày ni kayeefi ây a tîim nit ây èege yèk wàa. ¹³ Ye gbèesin yèerra kà yey, Yakuba de ane de gàa: Un kor ta mum, raksimin! ¹⁴ Simon saknage, diga màrra Fay kàme da nit ây èege yèk wàa, e kpàa nit ta wàa a tîim waw. ¹⁵ Hû go getnji ni yèk nit lònum ây tâage kètiya, ¹⁶ Fay gàa: A dat maan i gim ira, mi mbangsisi àay Dawda yey yaage gi. Jâa gim jâasi âwa maan, mi gòynisi, ¹⁷ ngam ha ngirra nit ây aw kàmu di Nitcoorra, ha a yòot ni-riiy ây kana ɗa ’naasim daw gi aw tâa nit ta mum, aw kàmimi. ¹⁸ Hû go gàa Nitcoorra, ey mbire jàk yey, cèngnunu di nirri diga mgban. ¹⁹ Yakuba de gàa bak: Kà yey mi dànde, ta ot ndagi daw jày da nit ây èege yèk Fay, irga a gin wàa ba. ²⁰ Amma ndika ot kèrfa daw, ot mgbèng daw aw woofa riirra joot mâri, aw woofa njeenu, ni riirra joot hèwrriya, ni njîim. ²¹ Ngam diga mgban a nit sakta yèk Muusa aw dii koo a riiy hâ, aw janggirre yèk Fay a àay gin kimjum ây unji wuysum pî. ²² Yèk yey del dawge da nit ây tèe daw Yeesu gi, ni toonji ây, ni nit kimjum ây pî. De carrin nit ây kana a tîim waw, aw tèe daw ni Pawlu ni Barnaba aw dik a Antakiya. De carrin ɗa Yuda înuwan Barsabba, ni Silas. Aw dii a tîim nit tiɗàm kpees waw da kor goosum ây. ²³ De hîin ɗerrewol a kàn waw, kère kà yey: Orro ot kor ta wun, ni nit ây tèe daw Yeesu, ni toonji ây ot kèpfa dunde, dun kor goosum ây a tîim nit ây èege yèk Fay, tâage a Antakiya, ni Siriya, ni Kilikiya gi. ²⁴ Ot rage yèk nit ây kana aw difage a gin wun, aw tolsunu ha yèk waw ’nunsunu tinîir wun. Amma orro ot hîi daw orri ha aw mbir kà yey ba. ²⁵ Ngam maan ot raknji ni tinîiri kpolo, de catna nit ây ot tèefa daw a gin wun, ni Barnaba ni Pawlu, aw tâa nit ây yiɗi orro gi. ²⁶ Aw hîi jungci waw ngam nîir Yeesu Kristu, Nitcoorra worro. ²⁷ Ot tèefa dun ɗa Yuda ni Silas. Aw ngaa sa gaw saknu ni yèy. ²⁸ Ngam kà yey delu di Jungci Delliya ni orro ɗa, ta ot iisirra dun toksum jàk bûtiya kana ba, sey jàk yey de gun furri: ²⁹ Woofan riirra joot mâri, ni njîim, ni joot hèwrriya, ni iirra njeenu. Un faasi go hak wun a jàk ây gi, tèe gun tèe mbâriya. Tâan mbâra! ³⁰ Ye wasnjin gi, a nit ây maan de digin a Antakiya. A farra de kimjin nit futa ta Yeesu, de hîin daw ɗerrewol maan. ³¹ A ye janggin yèk yey, del daw da nit ây pî, kâwsi tinîir waw. ³² Yuda ni Silas, aw nit lònum yèk Fay ɗi, aw kàli daw yèy dèy, aw kpèwsi daw tinîiri da kor goosum ây. ³³ Ye tâan a farra unji ’nang ’nang, a kor ây de wasin daw mbâra, de isin a gin nit ây tèega daw gi. ( ³⁴ Amma Silas yiɗi tâarra a farra.) ³⁵ Pawlu ni Barnaba ngaa aw tâa a Antakiya. Aw ni nit ây kana dèy aw sakɗe, aw kàlnjirre yèk Nitcoorra. ³⁶ A dat unji ’nang ’nang Pawlu de gàaw di Barnaba: Dàa ot ir, ot gopsa daw da kor ây a riiy ây pî sakna yèk Nitcoorra, ot rapɗa daw kày tâan go. ³⁷ Barnaba yiɗi aw diknji ni Yuhanna înuwan Marku. ³⁸ Amma Pawlu dàne, ti del aw diknji ni ey ba. De gàa: Ngam ey ire, woofa dotke a Pamfiliya, ti diknjisi ni orro a tèerra tèem ba. ³⁹ Lètnjum ii dèy a tîim waw, ha de ɗòlnjin. Barnaba de arre Marku aw taynji ni ey, de legin a koombowal aw dik a Kipru. ⁴⁰ Amma Pawlu de carre Silas, aw diknji. A kor goosum ây de wasin daw, aw woo daw a mbâr Nitcoorra. ⁴¹ De tayin aw hòm a Siriya ni Kilikiya, aw kpèwsi tinîiri da nit kimjum ây.

¹ Aw dàarage a Derbe ni Listira. Pawlu de kpàaw di nit futa Yeesu a farra, nîir wàa Timote, nuu wàa sàni-Yude dii ni goosum di Fay, amma too wàa ni-Girèk ɗi. ² A kor goosum ây tâage a Listira ni Ikoniya aw yèerre mbâra a hak wàa. ³ Pawlu yiɗi aw diknji ni ey. De arru, de rrèpnuwa yèk ni-Yude ây tâage a dees maan. Ngam aw pî aw cèngni, too wàa ni-Girèk ɗi. ⁴ A ye hòmin a riiy ây ’nang ’nang, de hîin da nit futa ta Yeesu yèk mgbèngda yey kèrin a nit ây tèedaw Yeesu gi, ni toonji nit kimjum ây tâage a Yerusalem, ngam ha aw fut yèk maan. ⁵ A nit kimjum ây aw iisirra kpèw kpèw a goosum waw. Unji pî aw iisirrarre mûurra. ⁶ Ye tâa Jungci Delliya njanggi daw sakta yèk Fay a Asiya, de hòmin a dees Firigiya ni Galatiya. ⁷ De hèeran a Misiya, de yiɗin aw dik a Bitiniya. Amma Jungci Yeesu ti hîi daw orri ba. ⁸ De hòmin a cewci Misiya, de dàaran a Torowas. ⁹ Ndaram de àyu di Pawlu ni tuma. Ni-Makedoniya gòyrre, de waawa de gàa: Dàara ay a Makedoniya, mu mgbaanjina! ¹⁰ A dat ndaram maan de yiɗina ot yew a Makedoniya, ngam ot cèngni, Fay ’naasina ot sak daw Yèk Kâwrra a farra. ¹¹ Hû go de anna a Torowas, de dikna ni koombowal ’nâar a Samotaraki. Ni ndamji de kpètna a Neyapolis. ¹² A ye anna a farra, de tayna a Filippe. Riiy maan dii riiy màrra woy ɓèl a dees Makedoniya, gin titâam ni-Roma ây. De tâana a farra unji càa. ¹³ Unji wuysum de yuuna a dat àay ây a taga sîirra. Ot dàne, a farra dii gin tiwaarra Fay da ni-Yude ây. De tâana ot yèe da nikin ây kimje a farra. ¹⁴ Nikin kana dii a tîim waw coorre Fay, nîir wàa Lidiya anga a Tiyatira, kin tisàangum jàk joorra woy cal delliya. Ye rage yèk Pawlu, Nitcoorra de dàngsu tinîir wàa, ha e ii hakkilo a yèk maan. ¹⁵ De kpàa baptisma ni nit àay rra wàa. De waana de gàa: To un dàn go mi ire nit goosum di Nitcoorra, cirin a àay mum un tâa a farra. De ndakna ha de lekna a àay wàa. ¹⁶ Mgbàr kana ot dikɗe a gin waarra Fay, de kpàanjina ni sapri ti asrum sîwsi, dii ni tindòom makta, ’maara bèebi dèy da nit ta wàa ni sîwsi maan. ¹⁷ De furru di Pawlu ni orro. De bimre e gàa: A nit ây gi aw dii nit tèerra tèem Fay hòmge pî, tâage a faktiturum, aw kàlnunu ot saarra! ¹⁸ Mbire kà yey unji mûsi jày. De ngòlu di Pawlu, de dûre de gàaw di tindòom nà: Ni nîir Yeesu Kristu mi gàamde, yuu a gin wàa! Tindòom nà de yuu yaale. ¹⁹ A nit ta wàa di sapri maan ye rabin, ot tikpàani bèeb waw gbeeye, de mòon Pawlu ni Silas, de nàrrin daw a luumu a ɗàm kpees wûun ây. ²⁰ De ’maan daw a gin nit hiitum ây de gàan: A ni-Yude ây gi aw yûuskirre da ni-riiy worro. ²¹ Aw kàlnarre dot ni-Roma ây a hàar ây tâa ti gesi, ha ot ngor ot fut ba! ²² A mûsa nit ây de ’mèmsin, de andan daw. A nit hiitum ây ngaa de ngasuwan lurra di Pawlu ni Silas, de gàan aw lèf daw ni timbii. ²³ Ye lèfin daw tilèfni dèy, de leknin daw a kultuma, de gàan di nit ɓèl a àay kultuma, e faa daw mbâra. ²⁴ Nit ɓèl nà ye rage kà yey, de lekni daw a àay kultuma woy tîim, de gbali daw nak waw a kpiiri. ²⁵ Ni tîim tuma Pawlu ni Silas de waan Fay, aw ’misu ni kâarra ndûu. A nit ây tâage a farra aw raksi dawrre. ²⁶ Yooge yooge deesi de yûu ni tigòyni àay kultuma pî. A tifantunum nin ây pî aw faarige, ti’mèmni nit ây pî patige. ²⁷ Nit ɓèl a àay kultuma ye mûye, de rabe nin ây pî aw faarige. De nduu ɓet ɓèl ha e ɓàsi hak wàa, ngam dàne a nit kultuma ây aw ’nòoye. ²⁸ Amma Pawlu de bime ɓàng de gàaw: Ta mu mbisi koo jâ di is wey ba! Ngam orro pî ot tâa ay gi. ²⁹ Nit ɓèl nà de ’naase aw ’maawra ebi, de ’nòo e lekfa a àay ni timalni. De yaa a ɗàm kpees Pawlu ni Silas. ³⁰ De yuuni daw a gbaa, de gun daw: Un nit coorra ây, ji gim mbir ha mi kpàa saanum jungci mum ya? ³¹ De gàawan: Goosi di Yeesu Nitcoorra, saa gum saa muy ni nit àay rra wey. ³² Aw saguge yèk Fay, ni nit ây pî tâage a àay wàa. ³³ Nit ɓèl nà de arre Pawlu ni Silas ni tuma maan, de kòl daw nuki waw. De iiwrran baptisma yaale ni nit ta wàa pî. ³⁴ De naani daw a àay wàa, de hîi daw tiriici, dii ni kâwum tinîiri ni nit àay rra wàa, ngam goosuge di Fay. ³⁵ Ndamji ye kayge, a nit hiitum ây de tèeran sooje ây de gàan: Woon daw da nit ây nà aw tayi! ³⁶ Nit ɓèl kultuma nà de kàlu yèk maan di Pawlu de gàa: A nit hiitum ây aw gàara mi woonu. Hû go yuun, un tay mbâra! ³⁷ Amma Pawlu de gàa da sooje ây: Aw lèfna a nis nit ây, cen iirra kiita, dorro ni-Roma ây, aw leknina a kultuma. Kòsòng aw woonarre ot tay ni fûucu yi? Ge tâa hû go ba, sey aw dàara ni hak waw aw yuunina! ³⁸ A sooje ây de digin aw sak yèk yey da nit hiitum ây. Aw ngaa aw tole ye ragin, a ni-Roma ây ɗi gi. ³⁹ De dàaran aw waa daw ni waacu. De yuunin daw de gàan, aw tay aw woofa riiy yey. ⁴⁰ Ye yuun a kultuma, de digin a àay Lidiya. De kpàanjin ni kor goosum ây, de mgbènggin daw aw gòy kpèw. De tayin.

¹ Ye hòmin a Amfipolis ni Apolloni, de kpèrrin a Tessaloniki. Aay gin kimjum ni-Yude ây dii a farra. ² Kà rûurra wàa Pawlu de lege a àay gin kimjum. Unji wuysum ây taan de yèenjin a yèk defterre Fay ni ni-Yude ây. ³ De lòni daw yèk Kristu, dàarage e rii ’màari, e gûysi a wurra. De gàa daw: Yeesu yey saknim dun gi, Kristu ɗi. ⁴ A nit ây kana a tîim waw aw ngore, aw ’mèmsi ni Pawlu ni Silas. Hû go mûsa ni-Girèk ây cooge Fay, ni nikin ɓèl ây dèy aw ngore yèk yey. ⁵ A ni-Yude ây de iin ngèeri, de arrin tigîtnjum ây maktiya, de ’mèmsin ni aw, de yûusin da mûsa nit ây, ha de anin ɗàari a riiy maan pî. De digin aw mgbaa àay Yason, ngam aw kàm Pawlu ni Silas, aw yuuna daw a gin nit ây. ⁶ Ye tâa aw kpàa ba, de nàrran Yason ni kor goosum ây kana a gin nit tiɗàm kpees ây a riiy maan. De bimin de gàan: A nit ây gi a nit yûuskum kparri ɗi lang. E rri yey aw dàara ay gi ɗa. ⁷ Yason ngot dawge a àay wàa. Aw pî aw yewe yèk mgbèngda Kaysara wûun ɓèl. Aw gàa, wûun kana dii, aw înurre Yeesu. ⁸ A yèk yey kpul daw jungci isi da mûsa nit ây, ni nit ɓèl ây a riiy maan. ⁹ De ndaguwan di Yason ni nit ây kana, aw jing seede ha aw woo daw. ¹⁰ Ni tuma maan a kor goosum ây de arrin Pawlu ni Silas, de gàan daw aw tay a Bereya. Ye kpèrrin a farra, de legin a àay gin kimjum ni-Yude ây. ¹¹ A ni-Bereya ây gi aw hòm daw ni della tinîiri da ni-Tessaloniki ây. De ngorin yèk Fay ni yiide mbâra. Aw janggirre a defterre Fay unji pî, ngam cèngnum jày gàa Pawlu takundi ɗi go. ¹² Hû go a nit ây dèy a tîim waw aw goosige, aw dii ni-Girèk ây, ni nikin ɓèl ây, ni nihun ây dèy. ¹³ A ni-Yude ây a Tessaloniki ye ragin, Pawlu sage yèk Fay a Bereya ɗa, de dàaran a farra aw yûusi da mûsa nit ây ni anda yèy. ¹⁴ A kor goosum ây de tèewan di Pawlu yaale, e dik a sòo ɓèl. Amma Silas ni Timote de tâan a Bereya. ¹⁵ A nit isnum ây di Pawlu de ’maawan ha Atena. De iran ni yèk yey gàarra daw Pawlu, aw kàl di Silas ni Timote, ha aw furrufa a Atena digèrrige. ¹⁶ Pawlu de waa daw a Atena. Ye rabe riiy maan mûu ni àay mâr ây dèy gi, de ngòlu a tinîir wàa. ¹⁷ De yèenjirre ni ni-Yude ây, ni nit ây cooge Fay a àay gin kimjum. Yèenjirre ɗa unji pî, koo ni wun kpàanji ni ey a luumu. ¹⁸ A nit kàlnjum ây kana futke ot ni-Epikuriya ây ni ot ni-Sitoki ây ɗa, de anin yèy ni ey. A nit ây kana a tîim waw de gàan: Jàk ji yiɗi yèerra tigbaarkum yèy gi ya? A nit ây kana ngaa de gàan: Nit yey tâa mu gàa nit kàlnjum yèk mâr ni-riiy ây kana. Aw yèe kà yey, ngam Pawlu sak dawge yèk Yeesu, ni gûysum wàa a wurra. ¹⁹ De arruwan aw naanu a Areyopag a gin yey kimjin nit raknjum ây, de gàawan: Kpàa got kpàa rakta yèk kàlnjum fûuya yi? ²⁰ Ngam mu ’maara yèy a tuk worro, tâa ot haa rakta ba. Ot yiɗi ot cèngni yèk yey jày yiɗi go gàarra gi. ²¹ A ni-Atena ây pî ni ni-wooy ây a tîim waw, yèk fûuya dii go aw yiɗi sakta koo rakta, gaw woofa tèerra tèem kana pî. ²² Pawlu de ane e gòy a tîim waw a Areyopag, de gàa: Un ni-Atena ây, mi kpàanuge, un un nit coorra mâr ây ɗi dèy. ²³ Ye gîrmi a riiy yey, mi gobe a àay gin coorra wun ’nang ’nang, de kpàami àay gin hîirra hîiri dii ni kèta kà yey: Di Fak yey tâa ot cèngnu ba. Woy yey coonu un gi tâa un cèngni ba, dey saknim dun. ²⁴ Fak yey mbangse kparri ni jày tâage a farra pî, ey tâage wûun faktiturum ni deesi, ge tâa a àay jâarra ni kàn nirri ba. ²⁵ Ey cen ni gayam, ha nirri e tèewrra tèem koo jâ ba. Amma hîirre koo di wuna gûyrra ni tiyîngni, ni jày pî. ²⁶ Yòot nit ây a kparri pî aw ana a gin nirri kpolo mbangsu Fay gi, ha aw kupti deesi lang. Fay ngaa gòyni mgban mgbàr gbèeni jàk ây, ey mîinji daw da nit ây gin tâam waw koo u hâ. ²⁷ Mbire kà yey ha aw kàmuwa, mba gaw ragu go, gaw kpàaw go, ngam ti kpâa koo ni wuna a tîim worro ba. ²⁸ Ngam wàa gûyna, dikna, tâana. Kà yey yèe nà nirri kpolo a tîim nit ta wun mbangse yèy, gàa: Orro ngaa ot yòot Fay ɗi. ²⁹ Ngam orro ot yòot ta wàa ɗi, ti gesi ot dàn ey tâa kà mâr timbangsum ni kangeerri, koo sarrdi, koo gòoy ba. Ti tâa kà jàk tèerra ni mbinum, koo ni dànda nirri ba. ³⁰ Fay woofa sakta mgbàr èca cèngnum jày da nit ây, amma kòsòng kàl dawrre pî koo u hâ, aw lòni jàk maarra waw aw ini tinîir waw. ³¹ Carre unji yey ge hiiti daw ɗèm da nit ây a deesi lang, ni kàn nit yey gòyni gi. Lònige seedamku da nit ây pî, ye gûysu di nit maan a wurra gi. ³² Ye ragin Pawlu yèerre yèk gûysum a wurra, a nit ây kana de wâskuwan. A nit ây kana ngaa de gàan: Ot yiɗi ot raksumda mgbàr kana bak a yèk yey gi. ³³ Hû go de yuu a tîim waw de taye. ³⁴ Amma a nit ây kana aw ’mèmsi ni ey aw goosige. Aw dii Diyonis nit raknjum a Areyopag, ni nikin nîir wàa Damaris, ni nit ây kana ɗa.

¹ A dat maan Pawlu ane, de dige a Korintu. ² De kpàaw di ni-Yude kana, nîir wàa Akila aw kpàawe a Pontus, ni kin wàa Piriskilla. Mgbàr kana aw ana a dees Italiya, ngam Kalawdu, Kaysara wûun ɓèl, màngi da ni-Yude ây pî aw yuu a Roma. Pawlu de cire a àay waw. ³ Aw tèerre tèem jimda jàk joorra. Ye tâa Pawlu ɗa mbine tèem yey, de tâanjin ni aw ha aw tèe tèem maan. ⁴ A unji wuysum pî ey yèenjirre ni nit ây a àay gin kimjum, cèngnini dawrre jày da ni-Yude ây, ni ni-Girèk ây ɗa. ⁵ Silas ni Timote de anan a dees Makedoniya, de dàaran a gin Pawlu aw mgbaanjuwa. Ey mòorre sakta yèy da ni-Yude ây, seedi dawrre Yeesu tâage Kristu. ⁶ De hàwin yèk wàa de maasuwan. Pawlu de kpiwrra daw sèerrèm lurra wàa, de gàa daw: Jày mbitnu gi, a hak wun ge koyra. Miy mi cenda a yèk maan ba. Diga niyey mi itɗe a gin nit ây èege yèk Fay. ⁷ De yuu a farra, de lege a àay Titiyu înuwan Yustu, nit tolla Fay ɗi. Aay wàa dii a cewci àay gin kimjum. ⁸ Kirispu wûun a àay gin kimjum de goosu di Nitcoorra, ni nit àay rra wàa pî. A ni-Korintu ây dèy rake yèk Pawlu, aw goosige, aw kpàa baptisma. ⁹ Ni tuma Nitcoorra de yèewrra di Pawlu ni ndaram de gàaw: Ta mu tol ba, amma yèe mu woofa ba, ¹⁰ ngam mi tâanjirre ni muy. Cen nirri ge an e mbirum koo jâ ba. Ngam a nit ta mum aw dii dèy a riiy yey. ¹¹ Pawlu de tâa a Korintu yeri kpolo ni corri yira, kàlnji dawrre yèk Fay da nit ây. ¹² Mgbàr maan Galliyo tâage ngomna a dees Akaya. A ni-Yude ây de ’mèmsin tinîiri kpolo, de mòowan di Pawlu, de ’maawan a kiita a gin Galliyo. ¹³ De gàan: Nit yey ndòorgirre da nit ây aw coo Fay, kà yey tâa ti getnji ni yèk mgbèngda worro ba. ¹⁴ Pawlu ye gàa e yèe yèk hak wàa, Galliyo de gàa da ni-Yude ây: To jàk yey tâa go maktiya koo mboysum jàk kana, ra gim raksunu dun ni-Yude ây. ¹⁵ Amma to tâa go hàanjum yèy a yèk kàlnjum, koo yèk nirri, koo a yèk mgbèngda wun, sey un ni hak wun un hawa. Miy gim tâa nit hiitum a jày kà yey ba. ¹⁶ De màn daw a kiita. ¹⁷ Aw pî de mòon Sostenes wûun a àay gin kimjum ni-Yude ây, de lurruwan a ɗàm kpees Galliyo ni gbaat kiita wàa. Amma Galliyo ti ɓoo koo jâ ba. ¹⁸ Pawlu tâasirra bak unji mûsi jày a Korintu. De was daw da kor ây, de legin a koombowal ni Piriskilla ni Akila, aw dik a Siriya. Pawlu caye nà hak wàa a Kenkereya, ngam hàaye nà tihàani. ¹⁹ Ye kpèrrin a Efesu, de woo daw da nit diknjum ta wàa. De lege a àay gin kimjum, e yèenji ni ni-Yude ây. ²⁰ De waawan, e tâasirra ni aw bak. Amma ey hàwe. ²¹ De was daw de gàa: I gim isa a gin wun to Fay hîim go orri. De ane a Efesu e dik ni koombowal. ²² De cire a Kaysariya. De dige a Yerusalem e kèp daw da nit kimjum ây. A dat maan de koyse a Antakiya. ²³ Ye tâa a farra unji càa, de ane e gîsi bak a dees Galatiya ni Firigiya. De kpèwsi daw tinîiri da nit futa ta Yeesu pî. ²⁴ Ni-Yude kana nîir wàa Apollos, aw kpàawe a Aleksandariya, dàarage a Efesu. Ey nit kâwsum yèy ɗi, cèngnige defterre Fay mbâra. ²⁵ Dey aw èngnunu ot Nitcoorra. Ey dii ni tinîir hèmdiya, yèerre kàlnji dawrre da nit ây ot Yeesu mbâra, koo ye tâa baptisma Yuhanna cèngni gbè. ²⁶ Ey ɗaa yèerra a àay gin kimjum tolnji cen. Piriskilla ni Akila ye raguwan, de arruwan aw kàlnju ot Fay, ha hòmu di woy cèngnum mgban. ²⁷ De yiɗi dikta a Akaya. A kor goosum ây de kpèwsuwan tinîiri, de kèrin ɗerrewol aw hîiw, e ’maa da nit futa ta Yeesu a Korintu, ha aw ngoru mbâra a tîim waw. Ey ngaa ye kpèrre a farra, de mgbaanji daw dèy da nit ây goose ngam mbâr Fay gi. ²⁸ Ngam ni cèngnum ’nang ’nang kàl daw da ni-Yude ây yèk Fay fûurra cen, lòni daw a defterre ây Yeesu tâage Kristu.

¹ Apollos ye tâa a Korintu gi, Pawlu dige a Efesu ot gbòosi. De kpàa nit futa ây kana a farra. ² De gun daw: A ye goosunu di Fay gi, un kpàa Jungci Delliya yi? De gàawan: Oow, ot haa rakta jày tâage go Jungci Delliya gi ba. ³ Pawlu de gun daw: Baptisma hâ kpàanu ya? De gàan: Baptisma Yuhanna. ⁴ De gàa daw: Yuhanna ii baptisma da nit ây ini tinîir waw, kàl dawge aw goosu di nit yey ge dàara a dat wàa, nit maan Yeesu ɗi. ⁵ Ye ragin kà yey, de ngorin baptisma ni nîir Yeesu Nitcoorra. ⁶ Pawlu de iirra daw kàn. Jungci Delliya de cirra a gin waw. De lònin yèy, de yèen ni yèk ni-riiy ây ’nang ’nang. ⁷ A nit ây maan aw tâa jày ge ii ra sàm cuk. ⁸ Pawlu de lege a àay gin kimjum, sak dawrre yèy tolnji cen corri taan, cèngnini dawrre jày tâage wûun Fay. ⁹ Amma a nit ây kana aw dii ni tinîir ndèktiya, de hàwin goosum, de maasin ot Nitcoorra a ɗàm kpees nit ây. Pawlu de woo daw, de ɗòle nit futa ây aw tâanji ni ey, sak dawrre yèk Fay unji pî a àay Tiranu. ¹⁰ Futɗe mbita kà yey yeri cuk, ha a nit ây a dees Asiya lang aw rage yèk Nitcoorra. Aw a ni-Yude ây ɗi, ni ni-riiy ây kana. ¹¹ Fay tèe jày tâa nirri ti haa rapta ba ni kàn Pawlu, ¹² ha de arrin tipini dòorròm, koo lurra yey mâagirra a is wàa, de ’maaran da nit àyci ây, ha aw ndòosi. A tindòom makta ây ngaa aw yuu a gin nit ây. ¹³ A ni-Yude ây kana gîtnji a riiy ’nang ’nang, aw yuuni tindòom ây da nit ây, aw dii a farra. De haawan ’naasum nîir Yeesu Nitcoorra a gin nit tindòom ây, de gàan: Mi gàamde ni nîir Yeesu yey sakre Pawlu gi, yuu! ¹⁴ A lor ây jòròs mbire kà yey, aw tâa lor ta Sikewa ni-Yude, nit ɓèl daprum. ¹⁵ Amma tindòom kana de gàa daw: Yeesu ni Pawlu mi cèngni dawge, amma un un wun ɗi ya? ¹⁶ Nit yey tâage ni jungci tindòom nà de anda daw, de sun daw de riisi daw ’màari, ha de ’nòon a àay nit maan isi kpong, ni nuki ây. ¹⁷ A ni-Yude ây, ni ni-riiy ây kana tâage a Efesu ye ragin jàk yey mbirge gi, tolnji de mòo daw pî, de ’misin nîir Yeesu Nitcoorra. ¹⁸ Mûsa nit ây de goosuwan, de dàaran aw kàl tèem jàk maarra waw. ¹⁹ A nit ây dèy iirre nà hiila, de ’maaran defterre ta waw, aw aksifa ni ebi a ɗàm kpees nit ây pî. A nit ây kana de sagin seede defterre ây maan, de kpàawan jày ge ii seede sarrdi ujinè ra kèrèw. ²⁰ Hû go yèk Nitcoorra ’mirre, dikɗe ɗàm kpeesi ni mbinum, ni kpèw kpèw. ²¹ A dat gbèerra jàk yey Pawlu dàne a tinîir wàa, e hòm a dees Makedoniya ni Akaya, e dik a Yerusalem. De gàa: A dat ye gim dik a farra, sey mi kpèt ɗa a Roma. ²² De tèefa da nit tèenjum ta wàa cuk, Timote ni Erastu, a dees Makedoniya. Amma ey de tâasirra bak a dees Asiya unji càa. ²³ Mgbàr maan yèy ane dèy ngam ot Yeesu. ²⁴ Nit kana dii a Efesu, nîir wàa Demetiyu, dòosirre hàm àay mâr Artemis ni sarrdi. Tèem maan ’maara dawrre bèebi dèy da nit dòosum sarrdi ây kana. ²⁵ De kimji daw da nit ây pî tèege tèem maan, ni nit mòonjum ta waw, de gàa daw: Kor ta mum, ni tèem yey kpàanina bèebi! ²⁶ Un rapɗe, un rakɗe ɗa, kày ndòorgirre Pawlu da nit ây dèy, e ini daw a ot wàa, a Efesu ɗi gbè ba, amma ngasɗa càa a Asiya pî, gàarre jàk mbangsum ni kàn ti tâa Fak takundi ba. ²⁷ Hû go ti tâa tèem worro mboyse gbè ba, amma àay gin coorra mâr Artemis ko ge koyrra jàk ɓa hû go. ’Mita mâr yey coon a Asiya ni deesi lang gbee ge gbee. ²⁸ Ye ragin kà yey, a nit ây de mûun ni ngòlòm. De bimin de gàan: Artemis ni-Efesu ây mâr ɓèl ɗi! ²⁹ Anda yèk yey yeski a riiy maan pî. Aw gîtnjirre. Ye mòon Gayu ni Aristarku, a ni-Makedoniya ây ɗi diknji nà ni Pawlu, a nit ây pî de ’nòon ni aw a àay gin yûurra yûma. ³⁰ Pawlu ngaa yiɗi ngin e lek a farra, amma a nit futa ta Yeesu de njangguwan. ³¹ A nit ɓèl ây kana a tîim ni-Asiya ây, soob ta wàa di Pawlu, de tèefan yèy de gàawan, ta e dik a gin yûurra yûma ba. ³² Tâa daw dàpràràp da nit ây kimje a farra. A nit ây kana de bimin aw gàa hûy, a nit ây kana ngaa aw gàa ’nang. Hû go a nit ây dèy aw cèngni jày kimjin gi ba. ³³ A ni-Yude ây de gàawan di Aleksanda e yèe yèy, de hòmnuwan a ɗàm kpeesi. Ey de parre kàn, yiɗi e yèe yèy ngam hak ni-Yude ây. ³⁴ Mûsa nit ây ye cèngsuwan ey ni-Yude ɗi, de ’mèmsin gûn kpolo, de bimin ha jày ge ii njamdi cuk, de gàan: Artemis ni-Efesu ây mâr ɓèl ɗi! ³⁵ Nit kèta yèk wûun a riiy maan de rûusi daw da nit ây, de gàa: Un ni-Efesu ây, wun tâa ti cèngni, riiy Efesu ey faage àay gin coorra mâr Artemis ni ’mita wàa cirga a faktiturum ba ya? ³⁶ To tâa go kà yey, nirri ge kpàaw hàanjum ba, gesi ngin un tâa baak baak, ta un mbir koo jâ ni râmjum gi ba. ³⁷ Un ’maara daw da nit ây gi, amma aw aw tâa nit mboysum àay mâri, koo nit maasum jàk coorra worro ba. ³⁸ To yèk kiita diiw go di Demetiyu ni nit tèenjum ta wàa, unji kiita dàa ge dàara. A nit hiitum ây ɗa aw tâaye, ha aw yèe daw yèk kiita waw. ³⁹ To un tâa go ni yèk kana bak, raknjin yèk maan a ye gun kimji ni nit ɓèl ta wun. ⁴⁰ Ngam yèk yey ange unji yey, gerre ha ot kpàa kiita a hak worro. To nirri gunna go a anda yèk yey, got kpàaw sakta ngam jâ mbitna kà yey ba. ⁴¹ A dat yèerra kà yey, de woo daw da nit ây aw koyi.

¹ Ye gbèe anda yèy pî, Pawlu de kimji da nit futa ta Yeesu. De mgbèng daw a yèk mbâri, de was daw. De ane e dik a dees Makedoniya. ² A ye hòme a dees maan, de mgbèng daw da nit futa ta Yeesu ni yèy dèy. De kpèrre a dees Girèk, ³ de tâa a farra corri taan. Ye dàne dikta a Siriya ni koombowal de rage, a ni-Yude ây aw yiɗi aw ɓàru a farra. Hû go de isa e mòo ot Makedoniya. ⁴ Sopataru hàm Piru ni-Bereya, Aristarku ni Sekundu aw a ni-Tessaloniki ây ɗi, Gayu anga a Derbe, Timote, Ticiku ni Torofimu aw cuk a ni-Asiya ây ɗi, aw pî aw diknji ɗa ni Pawlu. ⁵ De ɗàanan kpeesi ngam aw waana a Torowas. ⁶ A dat daprum Paska de lekna koombowal a Filippe. A unji kèti de kpètna a Torowas, de kpàanjina ni aw. De tâana unji jòròs a farra. ⁷ Unji màrra a asaweerre de kimjina ngam kûngda tàarri. Pawlu de yèe yèy dèy ha tîim tuma, ngam gàarre e tay ndamji maan. ⁸ A pittirla ây aw dii dèy a àay tinjoknjum a gin yey kimjina gi. ⁹ Lor kana nîir wàa Ewtiku tâa a nin. Ye tâa Pawlu yâksige yèerra yèy, nistikûum mòowe. Lor maan de kûu nistikûum yengdiya, de yaara tigbaaya a àay tinjoknjum taanti. De ciran, aw kpàaw wurre. ¹⁰ Pawlu de ûurra, de dunggu hîw de gàa: Ta un tol ba! Ngam jungci wàa ti yuu ba. ¹¹ Pawlu de naase, de kûnggin tàarri ni nit ây, de rii tiriici. De iisirra yèerra yèy ha ndamji de kayge. De ane de taye. ¹² Amma aw ’maara lor yey yaage nà, beengiya ɗi. De kâwri daw tinîir nit kimjum ây pî. ¹³ Orro ot ɗàaw kpeesi di Pawlu, ot dige ni koombowal. De mòona ot Asso, ngam ha ot arru di Pawlu a farra. Gàa nà kà yey, ey dàne nà dikta ni nay. ¹⁴ Ye kpàanjina a Asso, de ’mèmsina ni Pawlu a koombowal. De dikna a Mitilene. ¹⁵ De anna a farra, ha de kpètna a ɗàm kpees Kiyos ni ndamji. Unji cukti ot dàara a Samo. Unji taanti de citna a Miletu. ¹⁶ Ngam Pawlu dàne hòmda a Efesu, ti yiɗi e tòo a dees Asiya ba. Ràmjirre dikta, ngam ha unji Pentikosta e kpèt a Yerusalem, to ge kpàa go orri. ¹⁷ De tèe aw ’naasa da toonji nit kimjum ây tâage a Efesu, aw dàara a Miletu. ¹⁸ Ye dàaran aw kpàanji gi, Pawlu de ɗaa daw yèerra yèy de gàa: Un cèngni kày tâami a ɗàm kpees wun koo ningàa pî, diga unji yey dàama a dees Asiya ha niyey gi. ¹⁹ Mi tèerre tèem Nitcoorra ni ûunum hay, ni ti umni, mi riirre ’màari ɗa ngam ɗàar ni-Yude ây. ²⁰ Un cèngni ɗa, mi fûununu koo jâ a jàk yey ge mgbaanjunu dun pî ba. Mi saknuge, mi kàlnjunuge a gbaa ni àay ây. ²¹ Mi kàl daw da ni-Yude ây ni yòot ni-riiy ây kana, aw ini tinîir waw a gin Fay, aw goosu di Yeesu Nitcoorra worro. ²² Niyey mi dikɗe a Yerusalem kà yey ndagim jungci, mi cèngni jày ge kpàam a farra ba. ²³ Jungci Delliya kàlimde, gàarre, nge a riiy ây pî ti ’mèmni a kultuma, ni riirra ’màari waamde. ²⁴ Amma mi raptu di jungci mum kà jàk ɓa hû go, sey mi gbèesi tèem mum yey ngormi a gin Yeesu Nitcoorra gi, ha mi sak Yèk Kâwrra mbâr Fay. ²⁵ A tîim wun gîrmi nà, mi kàl dunge yèk wûun Fay. Kòsòng mi cèngni, un pî gun rapsirra nis mum ba. ²⁶ Hû go mi seedunurre niyey, nirri kpolo a tîim wun gbee go, kiita wàa cen a hak mum ba. ²⁷ Ngam mi kàlnuge, mi lònunu jày pî dàne Fay e mbir gi, mi fûununu koo jâ ba. ²⁸ Faasin hak wun, ni tikukri yey Jungci Delliya iinu hàm faaci, ha un faa nit ta Fay, sàasi daw ni njîim Hàm wàa gi. ²⁹ Mi cèngni, a dat tayrra mum a nit makta ây kà jàk timòorgum ây le gaw lek a tîim wun, gaw woo mboysum tikukri gi ba. ³⁰ Koo a tîim wun a nit ây kana a gaw ani, aw yèe yèk rèeng, ngam aw rûfri da nit goosum ây aw fut daw. ³¹ Ngam maan faasin! Ɓaysin yèk mum, mi woofa mgbèngda di nirri kpolo a tîim wun ba a yeri taan, tuma ni unji ni umda rîsim. ³² Kòsòng mi woonurre a kàn Fay ni yèk mbâr wàa. Ey tâage ni mbinum e kpèwsunu, e hîi jàk koyrra da nit ây irge nit ta wàa gi. ³³ Miy mi nit yiɗum seede, koo kangeerri, koo lurra nirri ɗi ba. ³⁴ Un cèngni, ni kàn mum yey tèemi tèem, ha kpàana tiriici ni jàk ây kana, ni nit tâanjum ta mum. ³⁵ Mi kàlnunu jày pî. Tèen kà yey, gesi un mgbaanji da nit èca ây. Ɓaysin yèk Yeesu Nitcoorra, gàa nà: Hîirra hòmge kâwsum tinîiri ni ngota. ³⁶ Pawlu ye gbèe yèerra kà yey, de gbâyge e waa Fay ni aw pî. ³⁷ A nit ây pî tâage a farra de umin, de dûngguwan di Pawlu a gûn, de wasuwan. ³⁸ Tinîir waw iisirra àyrra ngam yèk yey yèe, nge gaw haasurra rapta nis wàa ba. De isnuwan ha a koombowal.

¹ Ye woona daw, de dikna ni koombowal ’nâar a Kos. Ni ndamji de kpètna a Rodos. A farra de anna ot dik ha Patara. ² A Patara de kpàana koombowal yey ge dik a Feniki, de lekna a farra, de dikna ɗàm kpeesi. ³ Ye rapna Kipru, de woofa ot dees maan cewci mgbaala, de hòmna ot dik a Siriya. De citna a Tiiru, ngam ay a nit ây yuu gaw yuuni titokri a koombowal. ⁴ A farra de kpàana nit futa ta Yeesu, de tâanjina ni aw unji jòròs. Aw de lònuwan yèy di Pawlu ni Jungci Delliya, de gàawan, ta e dik a Yerusalem ba. ⁵ Ye hòme asaweerre maan, de yuuna ot dik ɗàm kpeesi. Aw pî ni kin ta waw, ni hàm ta waw aw isnina ha a dat àay ây. De gbâygina a taga sòo, ot waa Fay. ⁶ De wasnjina ni aw, de lekna a koombowal. Aw ngaa de koyin. ⁷ De anna a Tiiru ot dik a Potolemayi. Kà yey gbèena dikta wooy ni koombowal. De kèpna da kor ây a farra, de tâanjina ni aw unji kpolo. ⁸ Ni ndamji de dikna a Kaysariya. De citna a àay Filip, nit sakta Yèk Kâwrra a tîim nit ây jòròs carrin nà mgban a Yerusalem. De tâanjina ni ey. ⁹ Nit maan dii ni sapri ta wàa naan, aw dik a àay nihun ba, aw lònirre yèk Fay. ¹⁰ Ye tâana a farra unji càa, nit lònum yèk Fay ana a dees Yude nîir wàa Agabu, ¹¹ de dàara a gin worro. De arre jàal kpàang Pawlu, de ’mèmsi nak wàa ni kàn wàa, de gàa: E rri yey jày gàa Jungci Delliya: A ni-Yude ây a Yerusalem ’mè gaw ’mèmu hûy di nit njàal yey, hîi gaw hîiw a kàn nit ây èege yèk Fay. ¹² Ye rakna kà yey, orro ni nit ây tâage a farra ot njanggu di Pawlu, ta e dik a Yerusalem gi ba. ¹³ Amma ey de gàa: Ji mbitnu kà yey un umde, un ’nunsimde tinîir mum ya? Miy mi hîi hak mum naa ngam ’mèmda gbè, amma ha mi wut a Yerusalem ngam nîir Yeesu Nitcoorra. ¹⁴ Pawlu ye hàwe tinjangni worro, de woowfa orro de gàana: Nge jày yiɗi Nitcoorra e mbiri! ¹⁵ A dat unji maan de mâtna jàk ta worro, de dikna a Yerusalem. ¹⁶ A nit ây kana futku di Yeesu tâage a Kaysariya, ngaa aw diknji ni orro. De ’maanan a àay Manason ni-Kipru, ngam ot cir a àay wàa. Nit maan nit futa Yeesu ɗi diga mgban. ¹⁷ Ye kpètna a Yerusalem, a kor goosum ây de ngotna ni tinîir kâwrra. ¹⁸ Ni ndamji de lekna ni Pawlu a gin Yakuba. A toonji ta waw da nit kimjum ây pî aw kimjige a farra. ¹⁹ Pawlu de kèbi daw, de sak daw kpolo kpolo jày pî mbire Fay a tèerra tèem wàa a tîim nit ây èege yèk Fay gi. ²⁰ Ye ragin yèk yey, de ’misin nîir Fay. De gàawan di Pawlu: Kor worro, mu kpàa ni-Yude ây ujinè dèy irin nit goosum ây. Aw pî aw mòo pèn a yèk mgbèngda Muusa. ²¹ A nit ây kana aw gàaye, mu kàlnji dawrre da ni-Yude ây pî tâage a tîim nit ây èege yèk Fay, aw woofa yèk mgbèngda Muusa. Aw gàa mu gàa dawrre ɗa, ta aw rrèpni da hàm ta waw ba, ta aw fut ɗa a hàar ni-Yude ây ba. ²² Kà got mbir ya? Koo kàya ra gaw rak mu dàarage. ²³ Hû go mbir kà yey got gàam gi. E rri yey a nit ây naan aw hàa tihàani a hak waw. ²⁴ Arri daw mu ’mèmsi ni aw, mu ɓetkini hak wey. Jing daw seede, ha aw kpàa aw cay hak waw. Hû go a nit ây pî cè gaw cèngni, jày gàan nà a hak wey ɓa hû go ɗi, amma muy mu futɗe mbâra, mu mòorre yèk mgbèngda. ²⁵ Orro ot raknji, ot kèrfa daw da nit ây èege yèk Fay irge nit goosum ây gi, aw woofa riirra jàk mâri, ni njîim, ni jàk hèwrriya, ni njeenu ɗa. ²⁶ Pawlu de arre nit ây maan ni ndamji. De leknjin a àay Fay, aw ɓetkini hak waw. Pawlu de kàl daw unji gbèerra ɓetkunum kà gàarra unji yey koo wuna ge hîi hîiri di Fay gi. ²⁷ A unji jòsti, unji ɓetkum kèle gbèecu, a ni-Yude ây anga a dees Asiya ye rabuwan di Pawlu a àay Fay, de kutnjin a tîim nit ây pî, de mòowan rè, ²⁸ de bimin de gàan: Un ni-Israyel ây, mgbaanjinan! E rri yey nit kàlnjum jàk makta da nit ta worro, ni a yèk mgbèngda, ni a àay Fay ɗa. Yèe kà yey koo u hâ da nit ây pî. Lekni ɗa da yòot ni-riiy ây kana a àay Fay, maasi della àay yey gi! ²⁹ Ngam a ni-Yude ây aw rabu nà di Pawlu, gîtɗe a tîim àay ây ni Torofimu anga a Efesu. Aw dàne, Pawlu leknu di nit maan a àay Fay. ³⁰ Riiy pî aw yûunjige, a nit ây de ’nòoran a cewci pî. De mòowan di Pawlu, de nàrruwan aw yuunu a àay Fay. De fantifan nin ây a àay maan yaale. ³¹ Ye gàan aw ɓàru di Pawlu, yèk maan kpèrre a gin wûun sooje ây. De gàawan, riiy Yerusalem pî aw ane gbàaci. ³² De ane yaale, de arre sooje ây ni nit ɓèl ta waw. De lamran aw ’nòo a gin mûsa nit ây nà. Ye rabin da sooje ây ni wûun waw, de woofan luta di Pawlu. ³³ Wûun sooje de hèewrra, de mòowa. De gàa da sooje ây, aw ’mèmuwa ni jàk titefki cuk. De gune, ey wun ɗi ya, ji mbire ya. ³⁴ A nit ây tâage a farra de bimin aw gàa hûy, a nit ây kana ngaa aw gàa ’nang. Wûun sooje ye tâa ti rak yèk takundi ba, de gàa aw ’maaw di Pawlu a àay waw. ³⁵ Ye kpèrrin a tinaani àay, a sooje ây de tokuwan ni tokcu, ngam mûsa nit ây aw tusnjirre a farra dèy. ³⁶ A nit ây futkifa u daarri, de bimin de gàan: Ɓàruwan! ³⁷ Ye gàan aw leknu di Pawlu a àay sooje ây, de gunu di wûun sooje: Hîi gum hîim orri mi yèem jày yi? De goosi de gàaw: Mu mbine yèerra yèk Girèk gi yi? ³⁸ To tâa go kà yey, muy mu ni-Ejip ɗi ba, yey ange ɗàari mgbàr yey hòmge, yuuni tiɓàrgum nit ây ujinè naan a nûri. ³⁹ Pawlu de gàaw: Miy mi ni-Yude ɗi, hàm ni-riiy Tarsu a dees Kilikiya. Riiy maan riiy fûurriya ɗi ba. Mi waamde mu hîim orri, mi yèe yèy da nit ây. ⁴⁰ Ye hîiw orri, Pawlu de gòye a tinaani àay, de parre kàn a gin nit ây. Mûsa nit ây de tâan ɗong. De yèe daw ɓàng ni yèk ni-Hebra, de gàa:

¹ Un kor ta mum ni too rra mum, raksin ha mi goosi yèk hak mum! ² Ye ragin yèerre ni yèk riiy waw, de iisirran tâarra baak baak. Pawlu de gàa: ³ Miy mi ni-Yude ɗi, aw kpàame a Tarsu a dees Kilikiya, amma mi ’mirre ay a Yerusalem. Gamaliyel ey kàlnjim yèk mgbèngda too rra worro, mi èngni jày pî ni hakkilo. Miy nit futa yèk Fay ni kpèw kpèw ɗi, kà yey tâanu un pî unji yey. ⁴ Mi ɗàa nà ɗàari ha wurra da nit ây futke a ot Yeesu, mi ’mèmi da nihun ây ni nikin ây, mi lekni daw a kultuma. ⁵ A nit ɓèl ta waw da nit daprum ây, ni toonji ây pî kpàa gaw kpàa seedum a hak mum. Ngam mi ngore ɗerrewol a kàn waw, yey kèrin da kor ta worro a Damasku. De dikmi ha mi mòo da nit futa ta Yeesu tâage a farra, mi ’maara daw a Yerusalem aw hiiti daw. ⁶ Ye tâami a orri mi hèera a Damasku, unji a tîim hay yooge yooge kayang ɓèl ana a faktiturum, kaygi mgbaame. ⁷ De yaami a deesi, de rakmi gûn gàamarre: Sawlu Sawlu, ngam jâ ɗàm dim ɗàari ya? ⁸ De gunmi: Mu wun ɗi ya, Nitcoorra? De gàama: Miy tâage Yeesu ni-Nasaret, di nit yey ɗàamu ɗàari gi. ⁹ A nit ây tâanji ni miy aw rabe kayang, amma aw rak gûn nit yey yèegima gi ba. ¹⁰ De gunmi: Ji gim mbir ya, Nitcoorra? De gàama: An mu dik a Damasku! A farra kà gaw kàlum jày gesi mu mbir gi. ¹¹ Ye tâa ti finimde ba ngam kayngum kayang nà râasim nisi, a nit tâanjum ta mum de nàrrimin ni nàcu, ha ot lek a Damasku. ¹² Nirri dii a farra nîir wàa Ananiya, coorre yèk mgbèngda Fay. A ni-Yude ây lang tâage a riiy maan aw yèerre mbâra a hak wàa. ¹³ De dàara a gin mum, de gòye de gàam: Sawlu kor mum, ɓelsi! De toolim nis mum, de rapmi yaale. ¹⁴ De gàa: Fak wosom ta worro catkum mgban, ha mu cèngni jày pî yiɗi ey, ha mu rabu di nit ɗèm, mu rak yèy a gin wàa. ¹⁵ Ngam tâa gum tâa nit seedum wàa a gin nit ây pî, mu kàl daw jày rapmu gi, rakmu gi ɗa. ¹⁶ Ji waam kà yey ya? An mu ngor baptisma, mu ɓetki a jàk maarra wey ni ’naasum nîir nit ɗèm gi. ¹⁷ Pawlu de gàa: Ye koyma a Yerusalem, de lekmi a àay Fay mi waa waari, de rapmi Nitcoorra ni ndaram. ¹⁸ De gàam: An kènu, mu yuu a Yerusalem digèrrige, ngam a ni-riiy ây gi gaw ngor seedamku wey a hak mum ba! ¹⁹ De gàami: Nitcoorra, aw aw cèngni nà, miy ’mèmge nit goosum ta wey a àay gin kimjum pî, mi lekni daw a kultuma, mi lutki dawge ɗa. ²⁰ A ye ɓàrin Estefanu nit seedum wey, miy ɗa mi gòyrre a farra, mi waatirre lurra waw da nit ây ɓàrgu gi. Ɓàta maan kâwrimge. ²¹ Nitcoorra de gàam: An mu digi, tèe gim tèem kpâarriya a gin nit ây èege yèk Fay! ²² A nit ây aw raguge di Pawlu ha kpèrre a yèk yey. De bimin de gàan: Gbeesifan nit yey, ti gesi e gûy ba! ²³ A ye bimin tibimni kà yey, de ɓòtin hak waw, de yòon sèesèm. ²⁴ Wûun sooje de gàa daw aw lèfu ni timbii, ha e sak yèy ngam jâ a nit ây bimin kà yey a hak wàa gi. ²⁵ Ye ’mèmuwan aw lèfu gi, Pawlu de gàa di nit ɓèl sooje ây gòyge a farra: Un kpàa orri un lèfu di ni-Roma cen iirra kiita yi? ²⁶ Nit ɓèl sooje ye rage yèk yey, de dige a gin wûun waw, de gàaw: Kà gum mbiru di nit yey ya? Ngam ey ni-Roma ɗi! ²⁷ Wûun sooje nà de dàara a gin Pawlu, de gunu: Kàlim, muy mu ni-Roma ɗi go. De goosi de gàaw: Eeye, mi ni-Roma ɗi. ²⁸ Wûun sooje gi de gàaw: Ni seede dèy sàami tâarra ni-Roma. Pawlu de gàaw: Miy aw kpàame a tâam yey. ²⁹ A nit ây gàage aw lutku gi, de woowfan yaale. Wûun sooje ngaa tole, ye cèngni Pawlu ni-Roma ɗi gi. Ngam ey ’mèmguwa. ³⁰ Ni ndamji wûun sooje yiɗi e cèngni mbâra, ngam jâ a ni-Yude ây ’maaran yèy a hak Pawlu ya. De patuwa, de gàa da nit ɓèl ta waw da nit daprum ây, ni nit raknjum ây pî aw kimji. De ’maawra di Pawlu, de gòynu a tîim waw.

¹ Pawlu ii dawrre nisi teng teng da nit ɓèl raknjum ây, de gàa: Un kor ta mum, miy ni tinîir burriya tâami a ɗàm kpees Fay ha niyey. ² Ananiya nit ɓèl daprum de gàa da nit ây gòyge a farra, aw lurru a mgbelyèy. ³ Pawlu de gàaw: Fay lu ge lurrum dum ngaa, muy mu nit tâarra kà ara tikpongjiya, lòtiya ni jàk burriya! Muy mu tâa ton ngam mu hiitimi kà yey gàa yèk mgbèngda Fay. Amma mu yewe yèk mgbèngda, ye gàamu daw aw lurrim gi. ⁴ A nit ây gòyge a cewci wàa de gàawan: Mu njàmde nit ɓèl daprum wàa di Fay yi? ⁵ Pawlu de gàa: Un kor ta mum, mi cèngni nge ey nit ɓèl daprum ɗi ba. Ngam gàa a defterre Fay: Ta mu maasi nit tiɗàm kpees yòot wey ba. ⁶ Ye tâa Pawlu cèngnige, a nit ây kana aw a ni-Saduki ây ɗi, de bime ɓàng a tîim nit ɓèl raknjum ây: Un kor ta mum, miy mi ni-Farisa ɗi, mi hàm ni-Farisa ɗi ɗa. Aw leknim a kiita ngam yèk dànda a gûysum a wurra gi! ⁷ Ye gàa kà yey, hàanjum yèy dèy de ane a tîim ni-Farisa ây ni ni-Saduki ây. A nit ây kimje a farra de mîinjin ’nang ’nang cuk. ⁸ Ngam a ni-Saduki ây aw gàa nà gûysum a wurra cen, koo malayka, koo jungci. Amma a ni-Farisa ây aw goosirre a yèk maan pî. ⁹ Yèy de iisirra anda dèy. A nit còycum ây kana a tîim ni-Farisa ây de gòyin aw hàanji, de gàan: Ot kpàa maarra koo jâ a gin nit yey ba. Mba jungci koo malayka yèegurra ya? ¹⁰ Gbaarra yèy ye iisirra anda, wûun sooje de tole nge gaw bulnju di Pawlu, de gàa da sooje ây aw dik, aw arru ni kpèw kpèw a tîim waw, aw ’maawra a àay waw. ¹¹ Ni tuma maan Nitcoorra de lòrrurra di Pawlu de gàaw: Mòo tinîiri, ngam kà yey seedim dim ay a Yerusalem, hû go gesi mu seedim a Roma ɗa. ¹² Ndamji ye kayge, a ni-Yude ây kana de ’mèmsin gûn kpolo, de hàan hàari a hak waw de gàan, gaw rii tiriici ba gaw njoo sòo ba, sey aw ɓàru go di Pawlu. ¹³ A nit ây raknje kà yey aw hòme ra naan. ¹⁴ De digin a gin nit ɓèl ta waw da nit daprum ây, ni toonji ây, de gàan: Ot hàa hàari a hak worro, got rii jày ba, sey ot ɓàru go di Pawlu. ¹⁵ Hû go un ni nit ɓèl raknjum ây, gunin di wûun sooje e ’maara dun Pawlu a gin wun, kà gàarra un yiɗi kàmda yèk hak wàa bak kày tâa go. Orro ngaa ot mbangsige, ɗoko e hèera ot ɓàruwa. ¹⁶ Hàm say wàa di Pawlu ye rage gâra waw, de dige e lek a àay sooje ây, ngam e kàlu yèk maan di Pawlu. ¹⁷ Pawlu de ’naase nirri kpolo a tîim ɓèl sooje ây, de gàaw: ’Maaw di lor yey a gin wûun sooje, ngam yiɗi e kàlu jày. ¹⁸ Ɓèl sooje nà de arruwa de ’maaw a gin wûun waw, de gàaw: Pawlu nit kultuma nà ’naasim, e waam mi ’maawra di lor yey a gin wey. Ey yiɗi e kàlum jày. ¹⁹ Wûun sooje de mòow di lori nà a kàn, de digin aw tâa aw kpolo waw, de gunuwa: Yèk jâ gàam mu kàlim ya? ²⁰ De goosi de gàa: A ni-Yude ây aw raknjige, ngam aw waam dum mu ’maafa daw Pawlu ni ndamji a gin nit ɓèl raknjum ây, mu gàa aw yiɗi cèngnum yèk wàa bak ni takundi. ²¹ Amma muy, ta mu ngor ba sam! Ngam a nit ây a tîim waw gaw hòm ra naan, aw fûu aw waawrre di Pawlu. Aw hàa hàari a hak waw, gaw rii jày ba, gaw njoo sòo ba sey aw ɓàru go. Kòsòng aw waarre aw rak, mu hîi daw orri. ²² Wûun sooje de mgbènggu di lori nà, ta e sak koo jâ di nirri a yèk yey ba, de woow e koy. ²³ De ’naase nit ây cuk a tîim ɓèl sooje ây, de gàa daw: Kimjin sooje ây temèrre cuk, ni nit ɗata kpis ây ra jòròs, ni nit mòorra ɓaal ây temèrre cuk, ngam ha aw dik a Kaysariya ni tuma. ²⁴ Kàmin kpis ây ngam aw naanu ɗa di Pawlu, ha aw ’maaw mbâra a gin Feliku ngomna. ²⁵ De kère ɗa ɗerrewol kà yey: ²⁶ Miy Kalawdu Lisiya, mi kèbumfarre Feliku ngomna, nit coorra! ²⁷ Nit yey a ni-Yude ây mòogu, aw kèle ɓàcu. De dikmi ni sooje ta mum mi ngosuwa. De rakmi ey ni-Roma ɗi. ²⁸ De yiɗimi mi cèngni, ngam jâ a ni-Yude ây ’maaran yèy a hak wàa ya. De ’maami di nit yey a gin nit raknjum ta waw. ²⁹ Mi kpàa aw ii yèk hak wàa ngam hàanjum a yèk mgbengda waw. Amma yèk maan ti get aw ɓàru koo aw leknu a kultuma ba. ³⁰ Ye rakmi aw iirre gâra a hak nit yey, de tèemifa yaale a gin wey. Mi kàle ɗa da nit ’maarra yèk hak wàa, aw yèe yèk waw a ɗàm kpees wey. Yèk mum gbèeye. ³¹ A sooje ây de ragin yèk wûun waw, de arrin Pawlu, de ’maawan ni tuma a Antipatiris. ³² Ni ndamji a sooje ây dike ni nay de koyin. De woon nit naarra kpis ây aw dik ɗàm kpeesi ni Pawlu. ³³ A nit ây kpètke a Kaysariya de hîin ɗerrewol di ngomna, de gòynuwan di Pawlu a ɗàm kpees wàa. ³⁴ Ye gbèe janggum ɗerrewol maan, de gune a dees hâ ana nit yey ya. Ye rage ey ni-dees Kilikiya ɗi, ³⁵ de gàaw di Pawlu: Lò gim lòni yèk wey a ye gaw dàara a nit ây ’maaga yèk hak wey gi. De hîi orri aw faaw a àay Herode.

¹ A dat unji kèrèw, Ananiya nit ɓèl daprum de dàara ni toonji ây, ni nit mbinda yèy nîir wàa Tertullu. De ’maaran yèk Pawlu a gin Feliku ngomna. ² Ye ’naasuwan di Pawlu, Tertullu de ɗaa yèerra yèy de gàa: Feliku nit ɓèl, ot tâarre tâam mbâri, ngam muy mu mòorre riiy yey mbâra ni mbangsum jàk ây da nit dees yey gi. ³ Orro ot gàamde mbew koo ningàa, koo u hâ a jàk yey kpàana a kàn wey. ⁴ Amma ngam ta mi iisumda loosum ba, mi waamde ndògòn, mu raksi a yèk worro càa. ⁵ Ngam ot kpàawe nit yey mboysirre da nit ây, aanjirre yèy dèy a tîim ni-Yude ây tâage a deesi lang. Ey nit tiɗàm kpees waw ɗi da nit ây futke ot ni-Nasaret ây. ⁶ Ey yiɗi maasum della àay Fay. Hû go ot mòowe. (Ot yiɗi ngin ot hiitu kà yey gàa yèk mgbèngda worro. ⁷ Amma Lisiya wûun sooje ây de dàara e ngosu ni kpèw kpèw a kàn worro. ⁸ De gàa da nit ây ’maaga yèk wàa aw dàara a gin wey.) To mu gunu go di nit yey, muy ni hak wey kpàa gum kpàa cèngnum yèk yey pî ’maara ot gi. ⁹ A ni-Yude ây kana aw ’mèmsi a yèk maan, de gàan: Yèk yey hû go tâaye. ¹⁰ Ngomna de hîiw orri di Pawlu e yèe. Pawlu de gàa: Ngam mi cèngni, muy mu ngomna, mu nit hiitum ɗi da nit ây a dees yey gi diga yeri dèy, yèe gim yèe yèk hak mum ni tinîir kâwrriya. ¹¹ Muy ni hak wey kpàa gum kpàa cèngnum, ti hòm unji ra sàm cuk diga ye dikmi waarra Fay a Yerusalem gi ba. ¹² Aw kpàam mi hàanjirre yèy di nirri, koo mi yûusirre da nit ây a àay Fay ba, koo a àay gin kimjum, koo a riiy ɓèl gi ba. ¹³ A nit ây gi gaw kpàa gòynum a yèk yey ’maaran a hak mum ba. ¹⁴ Amma jàk yey lònim a ɗàm kpees wey gi, mi futɗe ot fûuya yey gàan ot mboyrriya ɗi gi, mi dapru di Fak too rra mum, mi goosi a yèk mgbèngda Muusa ni yèk nit lònum ây pî tâage kètiya gi. ¹⁵ Mi dii ni jàk dànda a yèk Fay, kà yey ngorin aw ɗa, nge gûysum a wurra dii daw da nit mbâr ây ni nit makta ây. ¹⁶ Hû go mi hâtɗe tâarra ni tinîir burriya koo ningàa, a ɗàm kpees Fay ni gin nit ây pî. ¹⁷ Pawlu de gàa bak: A dat yeri ’nang ’nang mi cenda a Yerusalem ba. De isimi a farra ngam mi ’maa jàk mgbaanjunum da nit ta mum, mi hîi hîiri ɗa di Fay. ¹⁸ Ye kpàamin a àay Fay, mi gbèe hîirra hîiri, mi ɓetkini hak mum, aw kpàam ni mûsa nit ây a farra ba, mi mbir koo jâ ge yûusi da nit ây ba. ¹⁹ A ni-Yude ây kana anga a dees Asiya aw dii nà a farra. Aw tâa go ni yèy, ndika aw aw ’maara yèk maan a ɗàm kpees wey. ²⁰ Koo a nit ây tâage ay gi, sey aw kàl maarra jày kpàamin nà a ɗàm kpees nit ɓèl raknjum ây gi, ²¹ ti tâa go ngam yèk yey ba, ye bimmi a tîim waw mi gàa: Yèk gûysum a wurra, aw hiitimde unji yey a ɗàm kpees wun! ²² Feliku ngaa cèngni yèk ot Yeesu mbâra, de woo jàk maan ngam mgbàr kana, de gàa daw: Lisiya wûun sooje ye ge dàara, dànda mum gbèe ge gbèe a yèk wun. ²³ De hîi orri di nit ɓèl sooje ây e faaw di Pawlu a kultuma, amma e atnjufa a ’màar wàa, ta e njang daw da kor ta Pawlu aw dàara aw mgbaanju gi ba. ²⁴ A dat unji càa Feliku de dàaran ni kin wàa sàni-Yude. De tèe aw ’naasu di Pawlu ngam e kàli daw yèk goosum di Yeesu Kristu. ²⁵ Ye tâa Pawlu kàl dawrre yèk gòyrra ɗèm a ɗàm kpees Fay, ni yèk mòosum hay, ni yèk kiita ɓèl ge dàara gi, Feliku de tole de gàaw: Kòsòng gerre, tayi! Mgbàr kana mi kpàa go orri, ’naa gim ’naasum. ²⁶ Dàne ɗa, Pawlu hîi ge hîiw seede ngam e woowa. Hû go de ’naasu nak mûsi jày ngam aw haa feeri. ²⁷ Yeri cuk ye hòme, Porkiyu Festu de koyrra ngomna a dat Feliku. Feliku yiɗige e kâwsi tinîir ni-Yude ây, de woow di Pawlu a kultuma.

¹ Tâa unji taan a dat ye kpèrra Festu a dees maan. De ana a Kaysariya e dik a Yerusalem. ² A farra a nit ɓèl ta waw da nit daprum ây, ni toonji ni-Yude ây de ’maaran yèk Pawlu a gin wàa. De waawan, ³ de gàan: Mbitna jàk mbâri, tèera dot Pawlu ay a Yerusalem. Ngam a nit ây maan aw yiɗi aw wobu di Pawlu a orri, ha aw ɓàruwa. ⁴ Amma Festu de gàa, aw faaw a kultuma a Kaysariya, ey ngaa kèle koycu a farra. ⁵ De gàa bak: Hû go sey a nit ɓèl ây a tîim wun aw diknji ni miy. To yèk makta tâa go a hak nit yey, sey un ’maara yèk maan. ⁶ Festu de tâa a tîim waw unji nan nan koo unji ra gbè, de koye a Kaysariya. Ni ndamji de ɗaa iirra kiita. De gàa aw ’maawra di Pawlu. ⁷ Ye kpèrra a ɗàm kpees gbaat kiita, a ni-Yude ây dàaga a Yerusalem de mgbaawan, de ’maaran yèk ndèktiya a hak wàa, koo ye tâa aw kpàa gòynum takundi a yèk waw ba. ⁸ Amma Pawlu de goosi yèk hak wàa de gàa: Mi mbir jàk maarra a yèk mgbèngda ni-Yude ây, koo a àay Fay, koo a gin Kaysara ba. ⁹ Amma Festu yiɗi e mbir jàk mbâra a nis ni-Yude ây, de gunu di Pawlu: Mu yiɗi dikta a Yerusalem, mi hiitum a farra a yèk yey yi? ¹⁰ Pawlu de goosi de gàa: Mi gòye ay a ɗàm kpees kiita Kaysara. Mi yiɗi ey hiitimi. Mi mbir maarra koo jâ da ni-Yude ây ba, kà yey cèngnum muy ni hak wey. ¹¹ To mi yew go a yèk mgbèngda, koo mi mbir go jàk maarra kana getke aw ɓàrimi, mi hàw wuta ba. Amma to yèk yey ’maaran a hak mum ti tâa go takundi ba, koo wuna ge kpàam hîirra a kàn waw ba. Mi yiɗi Kaysara e hiitimi. ¹² Festu ye yèe ni nit raknjum ta wàa, de goosi de gàa: Mu gàa kiita wey e tâa a gin Kaysara. Hû go di gum dik a gin wàa. ¹³ A dat unji càa Agaripa wûun ni-Yude ây, ni Bernike de dàaran a Kaysariya ngam aw kèbu di Festu. ¹⁴ Ye tâan a farra unji càa, Festu de sagu yèk Pawlu di wûun ni-Yude ây, de gàa: Nit kana dii ay gi, Feliku woowfa a kultuma. ¹⁵ A ye tâama a Yerusalem gi, a nit ɓèl ta waw da nit daprum ây ni toonji ni-Yude ây, aw ’maara yèy a hak nit yey, aw waam mi yaanu a kiita. ¹⁶ De gàami daw: Ti tâa hàar ni-Roma ây ba, aw iiw kiita di nirri, sonaa ɗà aw ’mèmsu ni nit ây ’maaga yèy a hak wàa nisi nisi, ha e kpàa goosum ni hak wàa a yèk yey ’maaran gi. ¹⁷ Hû go ye dàanja orro pî ay gi, mi tòo a yèk yey ba. Ni ndamji de tâami mi ii kiita. De gàami aw ’maawra di nit maan. ¹⁸ A nit ây ’maaga yèy a hak wàa ye gòyin a ɗàm kpees mum, aw ’maara yèk makta kà yey dànmi gi ba. ¹⁹ Aw hàanjirre yèy gbè ni ey a hàar waw, ni yèk nit kana nîir wàa Yeesu, wurre. Pawlu de gàa, nit maan gûyrre bak. ²⁰ Dim ngaa yèk yey tâami dàpràràp. De gunmi di Pawlu, to yiɗi go dikta a Yerusalem ngam aw hiitu a farra a yèk yey. ²¹ Amma Pawlu de gàa aw faaw ay gi, ha Kaysara e gbèesi yèk wàa. De gàami aw woow a kultuma ha mi tèew a gin Kaysara. ²² Agaripa de gàaw di Festu: Miy ngaa mi yiɗi mi ragu di nit yey. Festu de gàaw: Ni ndamji ra gum raguwa. ²³ Ndamji maan Agaripa de dàaran ni Bernike a ’mita waw, de legin a àay ɓèl ni wûun sooje ây, ni nit tiɗàm kpees ây a riiy maan. Festu de gàa aw ’maawra di Pawlu. ²⁴ De gàa: Wûun Agaripa, ni un nit ây tâage ay gi, un rabu di nit yey a ni-Yude ây pî aw loosim ni yèk hak wàa gi, a Yerusalem ni ay gi ɗa, aw bime aw gàa, ti gesi e gûy ba. ²⁵ Miy mi kpàawe, ti mbir jày getke aw ɓàru ba. Ey ni hak wàa yiɗi aw hiitu a gin Kaysara. De dànmi, mi tèewfa a gin wàa. ²⁶ Amma mi cèngni mbâra jày gim kèrufa a yèk hak nit yey di Kaysara nit coorra mum ba. Hû go de ’maama dey a ɗàm kpees wun, hayye a gin wey Agaripa wûun ni-Yude ây, ngam a dat ye got gunu gi, mi kpàa jày gim kèri. ²⁷ Ngam mi dàne, tèerra nirri ’mèmdiya cen kàlnum yèk hak wàa gi, ge dik mbâra ba.

¹ Agaripa de gàaw di Pawlu: Mu kpàa orri mu yèe yèk hak wey. Pawlu de parre kàn wàa, de goose yèk hak wàa de gàa: ² Agaripa wûun, tinîir mum kâwrimde, ngam niyey mi kpàa orri a ɗàm kpees wey, mi goosi a jàk yey ’maaran ni-Yude ây a hak mum gi. ³ Ngam muy mu cèngni hàar ni-Yude ây mbâra, ni jày pî hàanjin a tîim waw gi. Hû go mi waamde, raksi mbâra, ta mu loo ba. ⁴ A ni-Yude ây pî aw cèngni dikri mum diga lori, ye tâami a tîim nit ta mum a Yerusalem gi. ⁵ A nit cèngnum ta mum diga mgban see gaw seedi a hak mum, kày furrimi a ot hàar worro woy hòmge mbèerum, kày ’mèmsim ni ni-Farisa ây. ⁶ Ni-yey aw hiitimde ngam jàk dànda a yèk mòonjum kàn, yey yèe Fay ni wosom ta worro. ⁷ A yòot nit ta worro ra sàm cuk aw dànde kpèta a gbèeni a yèk mòonjum kàn maan, ni futa a daprum di Fay tuma ni unji. Wûun, ngam jàk dànda a yèk yey a ni-Yude ây de ’maaman a kiita. ⁸ Ngam jâ kpâanu goosum, nge Fay ge gûysi da nit ây wutke gi ya? ⁹ Miy mi dàni nà, sey mi yii nîir Yeesu ni-Nasaret ni mbita jày ’nang ’nang dèy. ¹⁰ Hû go mbirmi a Yerusalem. Ye kpàami orri a gin nit ɓèl ta waw da nit daprum ây, mi fanti daw da nit goosum ây dèy a kultuma. Ye iin daw kiita wurra, mi raknji ni nit hiitum ây. ¹¹ Mi ndagi daw ni riisum ’màari nak mûsi jày a àay gin kimjum ây pî, ha aw yèe yèk maarriya a ot Yeesu. Ngòlòm mòomi dèy, mi ɗàa daw ɗàari ha riiy ây kana ɗa. ¹² Kà yey de dikmi a Damasku, ye kpàami orri ni mbinum ɗa a gin nit ɓèl ta waw da nit daprum ây. ¹³ Wûun, unji a tîim hay a ye dikna a orri, de rapmi kayang ana a faktiturum, hòme kayngum di unji, mgbaanage ni nit ây diknji nà ni miy. ¹⁴ De yaana pî a deesi, de rakmi gûn yèemarre ni yèk Hebra, gàamde: Sawlu Sawlu, ngam jâ ɗàam dim ɗàari ya? Tâamde àyrriya kà naay gòyge a ɗàm kpees pètki suu nit wàa, ye hàwim dim gi. ¹⁵ De goosim de gunmi: Mu wun ɗi ya, Nitcoorra? Nitcoorra de gàam: Mi Yeesu ɗi, di nit yey ɗàamu ɗàari gi. ¹⁶ Amma an mu gòy! Mi lòrrimda kà yey, ngam mi iim nit tèerra tèem mum ni nit seedum mum a jàk yey rapmu gi, ni jàk yey gim kàlnum gi. ¹⁷ Saa gim saanum a kàn ni-Yude ây, koo a kàn ni-riiy ây kana gim tèem gi ɗa. ¹⁸ Mi tèemde ngam mu ɓelsi daw nisi, ha mu yuuni daw a kulpi, mu ’maa daw a kayang, mu njeli daw a kàn Seyɗan, mu insa daw a gin Fay, ha aw kpàa yaafum jàk maarra waw, ni jàk koyrra a tîim nit ây goose a nîir mum, irge nit ta Fay gi. ¹⁹ Kà yey Agaripa wûun, mi hàw goosum a jàk yey lòtkima a faktiturum ba. ²⁰ Amma mi kàl daw da nit ây yèk inum tinîiri, màrra a Damasku ni Yerusalem, a dat maan da ni-dees Yude ây ni nit ây èege yèk Fay ɗa. Mi gàa daw aw ir a gin Fay, aw lòni tèem yey ge getnji ni inum tinîir waw gi. ²¹ Ngam yèk yey a ni-Yude ây de mòomin a àay Fay, aw kèlim ɓàcu. ²² Amma Fay mgbaanjimge, mi gòyrre ha unji yey, mi seedirre yèk maan da hàm ây ni nit ɓèl ây, gim gàa jàk kana ba, sey yèk yey yèen nà nit lònum ây ni Muusa e gbèe, ²³ ye gàan, gesi Kristu e rii ’màari, e tâa nit màrra a tîim nit gûysum ây a wurra, e sak yèk kayang yèk saanum da ni-Yude ây, ni nit ây èege yèk wàa. ²⁴ Pawlu ye goosi yèk hak wàa kà yey, Festu de bime de gàa: Pawlu, mu gerre mu doogi, cèngnum wey dèy inumge kà tidoogum! ²⁵ Pawlu de gàaw: Mi doogi ba, Festu nit ɓèl, amma mi yèerre yèk takundi mbâra ni hakkilo. ²⁶ Ngam wûun ɓèl cèngni yèk maan, de yèemi nà tolnji cen a gin wàa. Mi cèngni mbâra, cen jày fûugu a yèk ây gi ba, ngam jàk ây gi pî ti mbir ni fûucu ba. ²⁷ Agaripa, mu goosi yèk nit lònum ây yi? Mi cèngni mu goosirre. ²⁸ Agaripa de gàaw di Pawlu: Ngase càa, ha mu ndòorim mu inim nit Kristu! ²⁹ Pawlu de gàaw: Mi waarre Fay, nge koo ngase càa koo dèy, naa muy kpolo wey gbè amma koo wun rakim unji yey gi, ey ngaa e tâa kà mum, sey ti ’mèmni yey gbè ta aw ’mèmu ba. ³⁰ Wûun de anin ni ngomna, ni Bernike, ni nit tâanjum ta waw, ³¹ de yuun aw yèenji a tîim waw de gàan: Nit yey ti mbir koo jày getke aw ɓàruwa, koo aw leknu a kultuma ba. ³² Agaripa de gàaw di Festu: Nit yey woowo ge tâaw ngin, to ti yiɗi go ngin aw hiitu a gin Kaysara gi ba.

¹ Ye raknjin ha ot tay ni koombowal a dees Italiya, de hîin Pawlu ni nit ây kana tâage ’mèmdiya a kàn nit ɓèl ta sooje ta Kaysara, înuwan Yuliyu. ² De lekna a koombowal yey anga a Adaramiti, yiɗi dikta a riiy ây a Asiya gi. De tâanjina ɗa ni Aristarku ni-Makedoniya anga a Tessaloniki. ³ Ni ndamji de citna a Sidon. Yuliyu de mòow di Pawlu mbâra, de woow e gîr a gin soob ta wàa, ha aw mbirurra jày gaygu go. ⁴ Ye anna a farra, de futna a cewci dees Kipru, ngam hiski wâarre a ɗàm kpees worro. ⁵ Ye yewna a sòo ɓèl, de hòmna a Kilikiya ni Pamfiliya, de kpètna a dees Likiya. ⁶ A farra nit ɓèl sooje ây ye kpàa koombowal kana, anga a Aleksandariya dikɗe a dees Italiya, de leknina a koombowal maan. ⁷ Ye dikna càa càa unji mûsi jày, ni ’màari dèy hòmna a riiy Kinidu. Ye tâa hiski ti woona ot dik ɗàm kpeesi ba, de dikna cewci Kereta, ot hòm a Salmone. ⁸ Ni ’màari hòmna ni koombowal, ha de kpètna a riiy yey înuwan gin tigòynum mbâriya, tâage gaarra a riiy Lasaya gi. ⁹ Unji dèy hòmna a dikta wooy maan, ha cot riirra ’màari a dikta ni koombowal kpàana a orri. Unji coorra tiriit ni-Yude ây ɗa hòme. Pawlu de yèe daw yèy, ¹⁰ de gàa: Un nit diknjum ta mum, tàmde ’màari ni mboyrra jày kpàa ge kpàana, to ot dik go ɗàm kpeesi gi, ti tâa a jàk titokri ni koombowal gbè ba, amma a jungci worro ɗa pî. ¹¹ Amma nit ɓèl sooje ây rage yèk nit kuta koombowal ni wûun koombowal, ti ngor yèk yey yèe Pawlu gi ba. ¹² Ngam riiy maan ti del tâarra a cot iiy a farra ba. A door nit ây kana aw raknji aw an a farra, mba gaw kpèt go a Fenika dees Kereta aw ɓel a farra. Riiy yey tâage gin tigòynum koombowal ây, ha aw fûu a anda hiski cewci riina ni cewci mgbaala a lekni unji. ¹³ Hiski cewci fombina ye wâa càa càa, de dànin aw kpàa dikta kà yey yiɗin gi, de ufin tigòyni koombowal, de digin a cewci dees Kereta. ¹⁴ A dat maan càa hiski ɓèl de ana a dees maan, a cewci mgbaala u ɓani unji. ¹⁵ Ye dènggu di koombowal, de àye kuta, de woona hiski e gînuwa. ¹⁶ Ye hòmna a dees kaa a tîim sòo înuwan Kalawda, ot mòosi koombowal woy kaa ni ’màari. ¹⁷ De naanin a koombowal woy ɓèl. De mbirin ni gâra, de kpingtuwan di koombowal pî ni yuma. Ngam aw tole, mba koombowal ge ’nòo a gin tâa sòo ti yeng ba cewci Sirti, de karrin lurra titusni koombowal, aw woow hiski e ’maaw càa càa. ¹⁸ Ye tâa hiski riisina ’màari dèy, ni ndamji de ’màktifan titokri ây kana a sòo. ¹⁹ A dat unji kana, de ’màktifan aw ni kàn waw titèeni tèem koombowal a sòo ɗa. ²⁰ Ye tâa nak mûsi jày unji ni tibiskum ây aw finde ba, hiski ɗa ti woofa wâarra ba, dànda worro got saa kam lòoye. ²¹ Ye tâa ɗa nak mûsi jày aw rii tiriici ba, Pawlu de ane de gàa daw: Gesi mgban un rak yèk mum ye gàami nà, ta un ana a Kereta ba. To ot ana go ngin ba, got kpàa ’màari ni mboyrra jày kà yey ba. ²² Amma koo ye tâa hûy, mi waanurre, mòon tinîir wun, ngam nirri koo kpolo ge gbee a tîim wun ba, sey koombowal gbè. ²³ Ni tuma malayka Fak yey furrim gi, tèemi tèem wàa, ey dàara a gin mum, ²⁴ de gàam: Pawlu, ta mu tol ba! Gò gum gòy a ɗàm kpees Kaysara. Fay hîime nit ây tâanji ni muy a koombowal pî, gaw wut ba. ²⁵ Hû go mòon tinîir wun! Mi ngori yèk Fay, jàk maan tâa ge tâa kà yey gàam gi. ²⁶ Amma hiski tu ge tusna ni koombowal a dees kana a tîim sòo. ²⁷ A tuma ra sàm naanti hiski gînarre bak a sòo Adiriya. Ni tîim tuma a nit koombowal ây de dànin aw hèerra a deesi. ²⁸ De gerruwan yengda sòo, de kpàawan mèeta ra taan sàm jòròs. Ye digin ɗàm kpeesi càa, de gerruwan bak, de kpàawan yengda maan mèeta ra cuk sàm nan nan. ²⁹ Ngam aw tole ta koombowal e dèng a gòoy a mîis sòo ba, de cinin tigòyni ây naan u daarri ha koombowal e gòyi. De waan ndamji e kaygi. ³⁰ A nit ây tèege tèem a koombowal de haawan ’nòorra, aw cini koombowal woy kaa a sòo ha aw saani. De iin gâra, mu gàa aw cini tigòyni ây kana a ɗàm kpees koombowal. ³¹ Amma Pawlu de gàa da sooje ây ni nit ɓèl waw: To naa aw tâa go a koombowal ba, gun kpàa saarra ba. ³² A sooje ây de gûufan yuma yey mòoge koombowal woy kaa, aw woofa e yaa. ³³ Ndamji ye gàa e kaygi, Pawlu de waa daw pî aw rii tiriici, de gàa: Niyey kpèrre unji ra sàm naan, un waarre un woofa riirra tiriici. ³⁴ Hû go mi gàanurre un rii jày, ngam ha is wun e tâa ni kpèw kpèw a saarra wun. Cen gimsi hak nirri ge gbee koo kpolo a tîim wun ba. ³⁵ Ye gàa kà yey, de arre tàarri, de gàa mbew di Fay a ɗàm kpees nit ây pî. De cèenje de riiye. ³⁶ Ye rabin kà yey, de kpèwsi daw tinîiri pî de riin. ³⁷ Ot nit ây pî tâage a koombowal ot kpèrre temèrre cuk ni ra jòròs sàm yira. ³⁸ Ye riin olin gi, de atnjifan tirri a koombowal, de ’màktifan a sòo. ³⁹ Ye kayge, aw cèngsi dees maan ba. Amma de rabin gbòosi a sòo. Deesi lòrre ni kaksoori. De gàan, to gaw kpàa go aw naani koombowal a farra. ⁴⁰ De gûufan yuma tigòyni ây, de woofan daw a sòo. De njelin tikutni koombowal, de gòynin lurra titusni koombowal woy ɗàm kpeesi cewci hiski, de mòon cewci kaksoori nà. ⁴¹ Amma koombowal de dèngge a kaksoori a mîis sòo, pètki wàa de ròle gbèp, ti yûurre ba. Cewci kpàang de ɗaa kpakta, ngam sòo yûusurre dèy. ⁴² A sooje ây de gàan aw ɓàrfa da nit ây faan gi, ngam ta nirri kpolo a tîim waw e naa a sòo e ’nòo ba. ⁴³ Amma nit ɓèl sooje ây yiɗige e saanu di Pawlu, de njang daw a dànda waw. De gàa da nit ây mbingi sòo aw ɗàa cita a sòo, aw yew a taga. ⁴⁴ A nit ây kana ngaa aw futfa dawrre, aw mòo kpakta kpiiri, koo ni jàk kana a koombowal aw yewni. Kà yey kpàan saarra aw pî a taga sòo.

¹ Ye saana kà yey gi, de kàlnan nîir deesi a tîim sòo maan Malta înuwan. ² A nit ây tâage a farra aw mbitna mbâri dèy. De yeen ebi, de gàanan ot awi, ngam buun yaarre, ngisim suurre. ³ Pawlu ye kimja tiyen e ii a ebi, jòoy de yuura ye mâaw ebi, de numu di Pawlu a kàn. ⁴ A nit ây a dees maan, ye rabin jòoy numuge a kàn, de yèenjin a tîim waw de gàan: Nit yey tiɓàrgum nirri ɗi. Koo ye tâa saa a sòo, Fay ti woow e gûy ba. ⁵ Amma Pawlu de gbòsfa jòoy nà a ebi, ti mbiru koo jâ ba. ⁶ A nit ây de dànin fu ge furruwa, koo e yaa yaale e wurri. Amma ye waan dèy, de rabin jày ti mbiru ba. De inin dànda waw de gàan, ey mâri ɗi. ⁷ Nit ɓèl dii a dees maan, ni hèmna ni jày dèy, nîir wàa Publiyu. Nit yey ngotna mbâra a àay wàa. De tâana a farra unji taan. ⁸ Ye tâa too wàa di Publiyu kûurre àyci mâarra isi, ni tinjèr himni ɗa, Pawlu de lekfa a gin wàa de waa Fay. De banggurra ni kàn, de ndòosuwa. ⁹ Ye mbire kà yey, a nit àyci ây kana de dàaran a gin Pawlu. De ndòosi daw. ¹⁰ Aw ngaa aw ’misinage, aw tèe jày ’nang ’nang ngam worro. Ye anna a farra, de hîinan jày ge getna pî. ¹¹ Ye tâana a farra corri taan, de anna ot tay ni koombowal kana anga a Aleksandariya, înuwan mâr tifeebi. Koombowal yey tâa nà ni iiy a dees maan a tîim sòo. ¹² Ye kpètna a Siraku, de tâana a farra unji taan. ¹³ De anna, de dòlna ot dik a Regiyu. A dat unji kpolo hiski fombina wâaye. Hû go a unji cukti de kpètna a Potiyoli. ¹⁴ Ot kpàa kor goosum ây a farra. De waawan ot tâanji ni aw unji jòròs. A dat maan de dikna a Roma. ¹⁵ A kor goosum ây tâage a Roma ye ragin yèk worro, de dàaran ot kpàanji a luumu Appiyu, a àay ây taan gin cita ni-wooy ây. Pawlu ye rabi daw gi, de kpèwsu tinîiri de gàa mbew di Fay. ¹⁶ Ye kpètna a Roma, de hîiwan orri di Pawlu e tâa ey kpolo wàa, ni sooje yey faagu gi gbè. ¹⁷ A dat unji taan, Pawlu de ’naase da nit ɓèl ni-Yude ây tâage a farra, aw dàara a gin wàa. Ye kimjan gi, de gàa daw: Un kor ta mum, mi mbir makta koo jâ da nit ta worro, ni a hàar wosom ta worro ba. Koo hû go aw ’mèmim a Yerusalem, aw hîimi a kàn ni-Roma ây. ¹⁸ Aw ye gunimin yèk hak mum, aw yiɗi aw woomi, ngam aw kpàa jàk makta a hak mum ha aw ɓàrim ba. ¹⁹ Amma a ni-Yude ây ye hàanjin yèk maan gi, de kàmmi kiita a gin Kaysara. Koo kà yey mi yiɗi mi ’maara yèk kiita a hak nit ta mum ba. ²⁰ Yòo jày de ’naasim dun, ha mi rapnu mi yèenji ni un. Ngam a jàk dànda ni-Israyel ây de tâami ’mèmdiya ni titefki yey gi. ²¹ De gàawan: Ot haa kpàarra ɗerrewol a gin ni-Yude ây yèk hak wey ba. Koo nirri kpolo a tîim kor ây ti dàara ay, e sakna yèk makta a hak wey ba. ²² Amma ot yiɗi mu kàlna yèk dànda wey, ot ragi. Ngam ot cèngnige, yèk ot maan aw hàanjige koo u hâ. ²³ De raknjin ni Pawlu, aw dàara unji kana. A nit ây dèy de kimjan a gin wàa. Diga ndamji ha mbona ey saki dawrre yèk wûun Fay, cèngnini dawrre yèk Yeesu ni kàlla a yèk mgbèngda Muusa, ni yèk nit lònum ây. ²⁴ A nit ây kana aw goosige a yèk yey yèe daw gi. A nit ây kana de hàwin. ²⁵ Ye tâa aw raknji a tîim waw ba, de tayin a dat yèk yey yèe daw Pawlu, ye gàa daw: Takundi kàle Jungci Delliya a gin too rra wun ni yèk Isaya nit lònum, ²⁶ gàaw nà kà yey: Dik a gin nit ây gi, mu gàa daw: A rakta ra gun ragi, amma gun cèngni yèk yey ba. A gopta go gun gobi, amma gun kpàa jày ba. ²⁷ Ngam tinîir nit ây gi ndège, tuk waw ngaa gbukrige. Aw burre nis waw ngam ta aw rap ba, ta aw rak ni tuk waw ba, ta aw cèngsi ni tinîir waw ba, ha aw ira a gin mum mi ndòosi daw ba. ²⁸ Pawlu de gàa bak: Cèngnin, yèk saarra yey anga a gin Fay! Ey tèefa da nit ây èege yèk wàa. Aw gaw ragi! ( ²⁹ Ye gbèe yèerra kà yey, a ni-Yude ây de tayin. Aw hàanjirre dèy a tîim waw.) ³⁰ Pawlu tâa yeri cuk a àay yey cire, jingge ni seede gi. Ey ngotɗe nit ây pî dàaga a gin wàa. ³¹ Kàli dawrre yèk wûun Fay, kàlnji dawrre yèk Yeesu Kristu Nitcoorra tolnji cen, njangda cen.