2 Timote

¹ Miy mi Pawlu, mi nit yey tèem Yeesu Kristu kà yey yiɗi Fay, ha mi sak yèk gûyrra yey tâagina ni mòonjum kàn a gin Yeesu Kristu gi, ² mi kèbumfarre dum Timote, hàm mum yiɗum dum gi. Nge Fay Tooy ni Yeesu Kristu Nitcoorra worro aw hîimu mbâr waw, ni ’maton, ni tâam mbâri! ³ Mi gàarre mbew di Fay, furrim diga wosom ta mum ni dànjum tinîir burriya, tèemi tèem wàa gi, ye ɓaysim yèk wey a waarra Fay koo ningàa tuma ni unji. ⁴ Mi ɓaysirre rîsim wey, mi yiɗi dèy mi rabumu, ngam ha kâwum e mûu a tinîir mum. ⁵ Mi ɓaysirre ɗa goosum yey tâage a gin wey takundi cen rèeng gi, yey tâage nà màrra a gin nuu way wey înuwan Loyis, ni nuu wey Ewnike. Mi cèngni mbâra, goosum maan dii a gin wey ɗa kòsòng. ⁶ Ngam maan mi ɓaysumde, sey mu hengsi hîir Fay yey tâage a gin wey diga ye iim kàn mum a gin wey gi. ⁷ Ngam Fay ti hîina jungci tolnji ba, amma jungci kpèw kpèw, ni yiide, ni hakkilo. ⁸ Hû go ta mu ii lawsam a seedunum yèk Nitcoorra worro ba, ta mu ii lawsam ɗa a gin mum ba, ye tâam ay a kultuma ngam wàa gi. Amma sey mu lekni hak wey a sakta Yèk Kâwrra, kà yey hîim Fay kpèw kpèw gi. ⁹ Ey saaninage, ’naasinage ha ot tâa nit ta wàa, ti tâa ngam tèem worro tèena gi ba, amma ngam ey yiɗe nà kà yey a mbâr wàa, de hîina ni Yeesu Kristu diga kparri ɗà ti ɗaa ba. ¹⁰ Amma kòsòng mbâr maan lòrrage a lòta Yeesu Kristu nit saanum worro, nit yey gbeesifa wurra, ’maaga gûyrra cen raarra a kayang ni Yèk Kâwrra gi. ¹¹ A Yèk Kâwrra gi Fay de iim mi tâa nit sakta, ni nit tèerra, ni nit kàlnjum. ¹² Ngam maan riimi ’màar yey gi. Amma lawsam ge mòom ba, ngam mi cèngni di wun goosim gi. Mi cèngni mbâra, ey ge mbin e faam jày kpàam a gin wàa gi ha a unji gbèeni. ¹³ A yèk ây takundi rakmu a gin mum sey e tâam tigetnjunum. Mòo yèk ây gi a goosum, ni yiide yey tâage a gin Yeesu Kristu. ¹⁴ Faa yèk mbâra hîiman gi, ye tâa Jungci Delliya tâage a gin worro mgbaanjumde gi. ¹⁵ Muy mu cèngni, nge nit ây pî tâage a Asiya aw woomfage. A tîim waw dii Figelu ni Hermogenes. ¹⁶ Nitcoorra e hîi mbâr wàa da nit àay rra Onesiforus, ngam ey suusimge tinîir mum nak mûsi jày, ti ii lawsam a ti ’mèmni mum ba, ¹⁷ amma ye kpèrra ay a Roma gi, de hârim kàmda ha de kpàasimi. ¹⁸ Nitcoorra e waaw di Tooy Ɓèl, ha e hîiw mbâr wàa di Onesiforus a unji gbèeni. Muy mu cèngni mbâra ɗa tèem yey tèe pî a Efesu.

¹ Muy mu hàm mum, kpèwsi hak wey ni mbâr yey tâage a gin Yeesu Kristu. ² Jàk yey rakmu a gin mum a ɗàm kpees nit seedum ây dèy gi, hîi daw da nit mbâr ây getke kàlnjum jàk yey da nit ây kana ɗa. ³ Lekni hak wey a ’màar ây kà nit bàpri mbâra a gin Yeesu Kristu! ⁴ Nit bàpri to lek go a bàpri, ge kàmjiri jày ge mgbàani is wàa ba, ngam ey yiɗi e delu di nit ɓèl wàa catku gi. ⁵ To nirri ’nòonjirre go ni nit ây a ’nòori gi, ge kpàa tikangni hak sunda ba, sey to fut go ot mgbèngda. ⁶ Nit bata hèmna looge a tèem, gesi e kpàa woy wàa màrra a jày nîige gi. ⁷ Dànji a yèk ây yèem dum gi! Nitcoorra hîi ge hîim cèngnum a jày pî. ⁸ Ɓaysiri Yeesu Kristu anga a yòot Dawda, gûyse a tîim nit ây wutke gi! Hû go gàa Yèk Kâwrra yey sagim, ⁹ riimi ’màari ngam maan gi, ha de tâam ay a kultuma ’mèmdiya ni yuma titefki kà nit mbita jàk maarra. Amma yèk Fay ge tâa ’mèmdiya ba. ¹⁰ Hû go mi èfɗe tinîir mum a jày pî, ngam ha a nit ây carri daw Fay aw ɗa aw kpàa saarra yey tâage a gin Yeesu Kristu gi, ’mèmsa ni ’mita tâam timgbàri. ¹¹ Yèk yey yèk takundi ɗi: To ot wut go ni ey, gû got gûy ni ey ɗa. ¹² To ot èfɗe go tinîiri ni ey, wûu got wûuni ni ey ɗa. To orro ot hàlu go, ey ɗa hà ge hàlna. ¹³ Koo orro ot gòyrre go mbâra ba, ey gòyrre mbâra, ngam ey ge kpàaw hàlla hak wàa ba. ¹⁴ Ɓaysini daw pî yèk ây gi, hàa daw a ɗàm kpees Fay, ta aw lètnji yèy a tîim waw a jày tâa ge mgbaanji daw ba, amma ge mboysi da nit rakta ây gi. ¹⁵ Hâr ha mu gòyni hak wey e tâa getiya a ɗàm kpees Fay, mu tâa kà nit tèem cen lawsam a tèem wàa, tâage nit sakta mbâra a yèk takundi gi. ¹⁶ Jèmfa yèk ây tâa aw del ba gi, tâage yèk ɓa hû go, ngam a nit ây mòoge yèk ây kà yey, ii gaw iisirra hàanjum di Fay. ¹⁷ Yèk waw riirre kà nuki. A tîim waw ɗa dii Himinayu ni Filetu. ¹⁸ Aw gbeeye ot takundi, aw gàarre, nge gûysum a wurra gi hòme mgban. Aw inirre goosum waw da nit ây kana u daarri. ¹⁹ Amma jày tare Fay gi gòyrre ge yaa ba, dii ni ticèngsunum kètiya kà yey: Tooy Ɓèl cèngni da nit ta wàa. Hû go ɗa: Koo wun gàage ey nit wàa ɗi di Tooy Ɓèl, sey e kpâa a tèem makta. ²⁰ A àay ɓèl a jàk mbangsum ây aw dii cuk. Woy yey dii mbangsumya ni kangeerri koo ni sarrdi, woy kana ni kpiiri koo ni bàanji. Woy yey dii ngam tèenum tèem della, woy kana ngam kîta tèenum tèem. ²¹ To nirri ɓetkini go hak wàa a jàk ây tâa ti del ba gi, tâa ge tâa titèeni tèem della ɓet ɓet yey ge gerru di nit ɓèl wàa, e ngoru a tèerra tèem mbâra pî. ²² Amma muy, woofa gayam lori! Fut gòyrra ɗèm, ni goosum, ni yiide, ni tâam mbâri, ’mèmsa ni nit ây ’naasi nîir Nitcoorra ni tinîir ɓetkumya gi. ²³ Sey mu kpâa a gatkum yèk ray ni yèk dànjum kà hàm ây, ye tâa mu cèngni jàk ây gi ’maa ge ’maara tilètnjum. ²⁴ Ti gesi sàay Nitcoorra e tâa nit lètnjum ba, amma sey e tâa nit mgbergum yèy a gin nit ây pî, e tâa nit mbinda kàlnjum, nit èfta tinîiri. ²⁵ Sey e yèe daw ni fetkum tinîiri da nit ây hàanjiri gi, mba Fay ge hîi daw go orri aw ini tinîir waw, aw cèngni yèk takundi, ²⁶ ha aw kpàasi dànda waw tèes, aw saa a tidokri Seyɗan, yey mòogi daw ngam aw fut jày yiɗi gi.

¹ Amma muy sey mu cèngni, ye ge hèera gbèerra kparri gi, tâa ge tâa mgbàr ndèktiya. ² A nit ây yi gaw yiɗi hak waw, yi gaw yiɗi seede, ɗè gaw ɗèpsi tiɗèpsum, ’mi gaw ’misi hak waw, maa gaw maasi nîir Fay, gaw rak tuy da nit gbaa rra waw ba, gaw gàa mbew ba, gaw coo Fay ba, ³ èe gaw èe yiide, tinîir waw yi ge yiri, cîi gaw cîinji yèk ây, gaw mòosi hak waw ba, tâa gaw tâa ngàskiya, yii gaw yii jàk mbâri, ⁴ mòo gaw mòori da nit ây ni gâra, tèe gaw tèe jày ni râmjum, râa gaw râani hak waw, hò gaw hòm yiɗum jàk kâwum ni yiɗum Fay. ⁵ Lò gaw lòni hak waw kà nit ây tolge Fay, amma hàa gaw hàanji mbinum wàa. Sey mu kpâanji ni nit ây gi! ⁶ A nit ây kana a tîim waw le gaw lekri a àay ây, ngam aw rûfri da nikin ây tâage dàngdiya, toke jàk maarra, futkiri a gayam ’nang ’nang gi. ⁷ A nikin ây gi aw yiɗiri èngnum yèk fûuya koo ningàa, amma gaw kpàa kpèta a cèngnum yèk takundi ba. ⁸ Kày Yannes ni Yambere anin ni yèy a gin Muusa, hû go ɗa a nit ây gi aw ande ni yèy a yèk takundi, aw dii ni dànda mboyrriya, aw get a goosum ba. ⁹ Amma aw gaw kpàa dikta ɗàm kpeesi dèy ba, ngam èca còycum waw lò ge lòt a gin nit ây pî, kày lòrre nà èca còycum waw da Yannes ni Yambere gi. ¹⁰ Amma muy mu furre yèk kàlnjum mum, ni dikri mum, ni dànda mum, ni goosum mum, ni èfta tinîir mum, ni yiide mum, ni gòyrra tinîir mum. ¹¹ Mu cèngni ɗa ɗàar ta mum, ni ’màar ta mum kày kpèrrim nà a Antakiya, ni Ikoniya, ni Listira. Kayto, a ’màar ây gi riimi gi! Amma Nitcoorra saanimge koo a ’màar hâ. ¹² Hû go ɗa koo wun yiɗi gòyrra ni tolnji Fay a ’mèmsum ni Yeesu Kristu gi, ɗàa gaw ɗàaw ɗàari. ¹³ Amma a nit makta ây ni nit rèeng ây ii gaw iisirra dikta ɗàm kpeesi a jàk maarra, rû gaw rûf da nit ây kana, a nit ây ɗa rû gaw rûfi daw. ¹⁴ Muy sey mu gòy a jày èngnum gi goosum ni ngota mbâra, ye tâa mu cèngni a gin nit yey èngnum gi. ¹⁵ Diga a tâam hàm wey mu cèngni defterre yèk Fay, yey ge kpàam còycunum, e ’maam a saarra tâage goosum di Yeesu Kristu. ¹⁶ Jày tâage kètiya pî a defterre gi, Fay yèege, dele ngam kàlnjum, ni lònum jàk maarra, ni nàta tinîiri, ni ’maarra a gin gòyrra ɗèm, ¹⁷ ngam ha nit Fay e tâa getiya, mbangse ngam tèem mbâri pî.

¹ Mi hàamde a ɗàm kpees Fay, ni Yeesu Kristu nit yey ge hiiti daw da nit ây tâage beengiya ni nit ây wutke gi. Mi hàamde ɗa a dàarra wàa a kparri, ni wûun wàa: ² Sak yèk Fay, gòy a kàlla yèk maan koo a unji mbâra, koo a unji makta. Ni èfta tinîiri pî a kàlnjum mu lòni da nit ây jàk maarra waw, mu yèe daw mu mgbèng daw. ³ Ngam unji dàa ge dàara, ha a nit ây gaw kpàaw èfta tinîiri a yèk kàlnjum takundi ba, amma ki gaw kimji nit kàlnjum ây dèy a gin waw kà yey yiɗin gi, ngam ha aw kâwsi daw tuk waw. ⁴ Woo gaw woofa rakta yèk takundi gi, i gaw ini tuk waw a saga nit ây ’nang ’nang. ⁵ Amma muy, tâa nit dànda tèes a jày pî, ngor riirra ’màari, tèe tèem sakta Yèk Kâwrra, fut tèerra mbâra a tèem yey hîim Fay gi. ⁶ Unji hèerage, ha njîim mum e tuu kà hîiri a ɗàm kpees Fay, wurra mum tâa gaarra. ⁷ Mi haaye gbàat mbâra, mi gbèesi ’nòorra ’nòor mum, mi gòye mbâra a goosum di Fay. ⁸ Jày ngaske gi kòsòng, aw waanimde tikangni hay a gòyrra ɗèm, yey ge hîim Nitcoorra nit hiitum ɗèm a unji gbèeni gi, ge hîim dim gbè ba, amma ni nit ây pî waage ni yiide a dàarra wàa gi. ⁹ Dàara kènu a gin mum, ta mu tòora ba! ¹⁰ Ngam Demas woomfage, ye tâa ey yiɗige jàk kparri tâarra yey, dige a Tessaloniki. Kerèske ngaa dige a Galatiya, Titus ɗa dige a Dalmatiya. ¹¹ Luka ey kpolo wàa tâanji ni miy. Arra Marku un dàanja, ngam ey dele ha e mgbaanjimi. ¹² Mi tèewfa di Ticiku a Efesu. ¹³ Mu dàararre go, ’maamra lurra ngisim yey wooma a Torowas a kàn Karpus gi, ni defterre ây ɗa hayye ɗerreeji ây tâage mbangsumya ni kûu gi. ¹⁴ Aleksanda nit tefki mbirim jàk maarra dèy. Fay hii ge hiituwa kày tâa tèem wàa. ¹⁵ Muy ɗa faasi hak wey a gin wàa, ngam ey hàanjige yèk worro dèy. ¹⁶ Ye goosim yèk hak mum màrra gi, cen nirri mgbaanjim ba, aw pî aw woomfage. Nge ta Fay e sak yèk maan a hak waw ba! ¹⁷ Amma Nitcoorra mgbaanjimge kpèwsimge, ngam mi kpàaye sakta Yèk Kâwrra ha gbèeni, a nit ây pî èege yèk Fay aw rage yèk maan. Nitcoorra saanimge a mgbelyèk tidîisi. ¹⁸ Nitcoorra saa ge saanim a tèem makta pî, ’maa ge ’maam mbâra a wûun wâa a faktiturum. ’Mita e tâaw tâam timgbàri ha tâam timgbàri! Amen. ¹⁹ Kèp daw da Piriskilla, ni Akila, ni nit àay rra Onesiforus. ²⁰ Erastu tâarre bak a Korintu. Di Torofimu mi woowe a Miletu, ngam àyci mòowe. ²¹ Dàara kènu ɗoko cot ngisim e ii gi! Ewbulu, ni Pudes, ni Linus, ni Kalawdiya, ni kor ây ɗa pî aw kèbumfarre. ²² Nitcoorra e tâanji ni muy! Mbâr Fay e tâanji ni un!