2 Ni-Tessaloniki ây

2 Ni-Tessaloniki ây

¹ Miy mi Pawlu, ni Silas, ni Timote ot kèpfa dunde dun nit ây kimje a Tessaloniki, tâage nit ta wàa di Fay Tooy Ɓèl worro ni Yeesu Kristu Nitcoorra gi. ² Nge Fay Tooy Ɓèl ni Yeesu Kristu Nitcoorra aw hîinu mbâr waw ni tâam mbâri! ³ Un kor ta worro, sey ot gàaw mbew di Fay ngam wun koo ningàa kà yey gese gi, ngam goosum wun ’mitɗe dèy, koo yiide wuna ɗa iisirrarre a tîim wun. ⁴ Hû go ot râanirre yèk wun a gin nit ta Fay kimje a riiy ây pî, ngam èfta tinîir wun, ni goosum wun a ɗàar ây ni riirra ’màar ây kpàanu dèy gi. ⁵ A jàk ây gi aw tâage jàk kàlnum a kiita Fay tâage ɗèm gi, ngam un un gerre lekta a wûun Fay, yey riinu ’màari ngam maan gi. ⁶ Fay Fak ɗèm ɗi, ha e kànsi daw ’màari da nit ây riisunu ’màari gi. ⁷ Un ngaa un tirii ’màar ây gi kpàa gun kpàa wuysum ni orro, ye ge lòrra Yeesu Nitcoorra a faktiturum ni malayka ây tâage mbinum wàa gi. ⁸ Lò ge lòrra a eb yeerriya, e ii daw kiita da nit ây tâa aw cèngnu di Fay ba, tâa aw rak tuy a Yèk Kâwrra Yeesu Nitcoorra worro ba. ⁹ Aw gi rii gaw rii ’màar kiita a gin gbeerra tâam timgbàri, kpâarriya ni Nitcoorra, ni ’mita mbinum wàa. ¹⁰ Mbi ge mbir hû go a ye ge dàara gi, ha a nit ta wàa aw ’misuwa, ha e tâa daw ’nang da nit goosum ây pî a unji maan. Un tâa gun tâanji ni aw, ngam un goosige yèk seedamku worro. ¹¹ Kà yey ot waawrre di Fak worro ngam wun koo ningàa, ha e saknu un gerre a gûyrra yey ’naasunu gi. Ot waawrre, ha e mûununu a yiɗum jàk mbâri, e mûununu a tèem goosum wun ni mbinum wàa. ¹² Hû go nîir Yeesu Nitcoorra worro e ’mit a tîim wun, un ngaa un ’mit a gin wàa ngam mbâr wàa ni mbâr Fak worro.

¹ Un kor ta worro, ot waanurre a yèk unji dàarra Nitcoorra worro, ni kimjum worro a gin wàa, ² ta dànda wun e yûusunu digèrrige ba. Ta tinîiri e tolnu ba, ye gun rak unji dàarra Nitcoorra hèerage. Ta un ngor ba, koo nirri lòni go jày ni jungci, koo gòy go a yèk kana koo a ɗerrewol kana, gàan ana a gin worro gi. ³ To nirri rûfnu go jày, ta un goosu ba. Ngam unji maan ge kpèrra ba, sey ɗà a nit ây aw woofa yèk goosum, sey nit yiirra yèk mgbèngda, hàm gbeerra e lòrri. ⁴ Ey a ge an ni yèy a jày pî ’naasin a nit ây ni nîir Fay, ni jày coon gi, ha e tâa a àay Fay, e gàa ni hak wàa ey tâage Fay. ⁵ Un ɓaysi yèk maan saknim dun nà, ye tâami a tîim wun ba yi? ⁶ Kà yey un cèngnige jày njanggu dàarra di nit maan. Ge kpàa lòta ba, sey unji wàa kpèrra go gi. ⁷ Yiirra yèk mgbèngda tèerre ni fûucu koo kòsòng. Amma ge lòt ba, sey nit yey njanggu gi e hèesi. ⁸ A dat maan nit yiirra yèk mgbèngda lò ge lòrri. Yeesu Nitcoorra ɓà ge ɓàru ni tiyîngni mgbelyèk wàa, gbee ge gbeesi ni ’mita a lòta wàa. ⁹ Dàarra nit yey tâa ge tâa tèem Seyɗan. Lò ge lòni jàk ây dèy ni mbinum, ni kayeefi rèeng ây, ¹⁰ e rûfni koo ni tirûfni makta hâ da nit ây gaw gbee gi, ngam aw hàwe yiɗum yèk takundi yey ge saani daw gi. ¹¹ Hû go Fay tèera daw jàk rûfrum ni mbinum dèy, ha aw goosi yèk rèeng. ¹² Kà yey a nit ây pî tâa aw goosi yèk takundi ba, amma tèem makta delgi daw gi, kpàa gaw kpàa kiita. ¹³ Amma orro sey ot gàa mbew di Fay ngam wun koo ningàa, un kor ta worro yiɗi dun Nitcoorra gi. Ngam diga ɗaarra Fay catnuge ha un saa, ye tâa Jungci Delliya ɓetkunurre, un goosi yèk takundi gi. ¹⁴ Fay ’naasunu kà yey ni Yèk Kâwrra yey ’maafa ot dun gi, ha un kpàa ’mèmsum a ’mita Yeesu Kristu Nitcoorra worro. ¹⁵ Hû go un kor ta worro, gòyin kpèw, mòon yèk mgbèngda ây kàlnji ot dun gi, koo ni yèy koo ni ɗerrewol worro. ¹⁶ Nge Yeesu Kristu Nitcoorra worro ni hak wàa, ni Fay Tooy Ɓèl worro yiɗi dot gi, hîigina ni mbâr wàa kpèwsum tinîiri tâam timgbàri, ni jàk dànda mbâri gi, ¹⁷ aw suusunu tinîir wun, aw kpèwsunu a tèerra tèem mbâri ni yèerra yèy ɗa pî!

¹ Un kor ta worro, yèk kana ngasnage. Waan Fay ngam worro, ha yèk Nitcoorra e yeski koo u hâ, ha a nit ây aw ’misi yèk maan, kà yey tâa mgban a tîim wun, ² waan ha ot saa a kàn nit makta ây ni nit kperrem ây. Ngam ti tâa a nit ây pî goosi ba. ³ Amma Nitcoorra gòyge mbâra a yèk wàa, kpè ge kpèwsunu, kpâa ge kpâanunu a jàk makta. ⁴ Ot iirre dànda tinîir worro a gin Nitcoorra ngam wun, ha un tèe jày kà yey gàana ot dun gi, un tèe hû go ɗa a ɗàm kpeesi. ⁵ Nitcoorra e gòynunu tinîir wun ha un yiɗu di Fay, un èf tinîir wun kà yey tâa a gin Kristu gi. ⁶ Un kor ta worro, ot yèenurre ni nîir Yeesu Nitcoorra, ɗòlnjin ni kor ây pî tâage ni taski, tâa aw goosi yèk mgbèngda worro ba. ⁷ Ngam un ni hak wun un cèngni, gesi un fut dikri worro, ngam orro ot tàa nà ni taski a tîim wun ba. ⁸ Ot rii tiriici a kàn nirri ɓa hû go ba, amma a hâta ni loca ot tèerre nà tuma ni unji, ngam ta ot loosu koo di wuna a tîim wun ba. ⁹ Ot mbire kà yey, ti tâa ngam ot kpàa orri a gin wun un hîina jày ba, amma ngam ot kàlni hak worro a gin wun ha un futna. ¹⁰ Ye tâanjina nà ni un gi, ot gàanu kà yey: To nirri ti yiɗi go tèerra tèem ba, ta e rii jày ɗa ba. ¹¹ Ngam ot rakɗe yèk nit ây kana a tîim wun, aw dii ni taski, aw tèerre tèem ba, amma aw lekɗe a yèk nit ây kana. ¹² Da nit ây kà yey ot yèe dawrre, ot mgbèng dawrre ni nîir Yeesu Kristu Nitcoorra worro, aw tèe tèem waw unji pî, ha aw kpàa tiriici ni kàn waw. ¹³ Amma un kor ta worro, ta un loo a tèerra tèem mbâri ba! ¹⁴ To nirri ti rak go tuy a yèk worro a ɗerrewol yey gi ba, raptuwan nisi di nit maan, ta un ’mèmsi ni ey ba, ha lawsam e mòowa. ¹⁵ Amma ta un yiiw ba, sey un yèew kà yey gun yèew di kor wun gi. ¹⁶ Nge Nitcoorra nit tâam mbâri ey ni hak wàa e hîinu tâam mbâri koo kà ya koo ningàa. E tâanji ni un pî! ¹⁷ Miy mi Pawlu miy kèrge kèpri yey ni kàn mum. E rri yey kày tâa ticèngsunum ɗerrewol ta mum pî. E rri yey kày kèrmi. ¹⁸ Mbâr Yeesu Kristu Nitcoorra worro e tâanji ni un pî!