2 Piyèr
11 Miy mi Simon Piyèr, mi sàay Yeesu Kristu tèem gi ɗi, mi kèpfa dunde dun nit ây ngorge goosum titenten ni orro a ɗèm Fak worro ni Yeesu Kristu Nitsaanum. 2 Ye tâa un cèngnu di Fay ni Yeesu Kristu Nitcoorra worro gi, mi waarre aw hîinu mbâr waw ni tâam mbâri dèy ni ɓèlla. 3 Nitcoorra hîina ni kpèw kpèw wàa diga faktiturum jày pî gaygina a tâam worro tâana a ’mèmsum ni ey gi, cèngninina Tooy ’naasina a ’mita wàa ni mbinum wàa. 4 Ni mbinum wàa ni ’mita gi hîina yèk ây ni mòonjum kàn tâage mbâriya hòmge ’mita, ngam ha ot kpàa saarra a gayrum jàk ây gaw gbeesu di nirri, tâage a kparri gi, ot ’mèmsi a tâam Fay. 5 Ngam maan hârin dèy, ha un iisirra dikri mbâra a goosum wun, un iisirra cèngnum jày a dikri mbâra, 6 un iisirra mòosum hay a cèngnum jày, un iisirra èfta tinîiri a mòosum hay, un iisirra tolla Fay a èfta tinîiri, 7 un iisirra yiɗum kor ây a tolla Fay, un iisirra yiɗum nit ây pî a yiɗum kor ây. 8 A jàk ây gi to aw tâa go a gin wun, aw iisirrarre go ’mita, gun èe tèerra tèem ni repta jày a cèngnum di Yeesu Kristu Nitcoorra worro ba. 9 Amma nit yey èege jàk ây gi, rapɗe mbâra ba, tâa mu gàa râay ɗi a cèngnum di Nitcoorra, hènti ɓetkum jàk maarra wàa mbire mgban gi. 10 Hû go un kor ta mum, hârin dèy ha un gòyni ’naasum wun ’naasunu Fay gi, ni cata yey catnu gi. Ngam to un mbitɗe go kà yey, gun yaa a jàk maarra ba. 11 Kà yey gun kpàa wàrngum ot lekta a wûun Yeesu Kristu Nitcoorra worro tâage Nitsaanum, a wûun wàa tâam timgbàri gi. 12 Ngam maan mi ɓaysunurre yèk ây gi koo ningàa, koo ye tâa un cèngni diga mgban, un gòyrre a takundi yey kpàanu gi. 13 Amma mi dànde, ye tâami bak a tâam yey a kparri, tèem mum ɗi ha mi mûysunu, mi ɓaysunu jàk ây gi, 14 ye tâa mi cèngni, wurra mum hèera gaarra kà yey lònimda Yeesu Kristu Nitcoorra worro gi. 15 Hû go mi hâtɗe, ha un kpàa ɓaysum yèk ây gi koo ningàa a dat wurra mum. 16 Ye kàlna ot dun yèk dàarra Yeesu Kristu Nitcoorra worro a mbinum wàa gi, ot fut saga nit ây tâage ni gâra ba, amma orro ot nit ây seedi ’mita wàa ɗi. 17 Ey kpàa coorra ni ’mita a gin Fay, ye ana gûn a gbaat Fay ’mitiya, cira a gin wàa, gàa: Yey hàm mbâr mum ɗi, mi yiɗurre, kâwsimde tinîiri. 18 Orro ot rage gûn maan anga a faktiturum, ye tâanjina ni ey a gopri delliya gi. 19 Hû go ot hòme gòyrra kpèw a yèk nit lònum ây. Un mbitɗe mbâra, to un ii go hakkilo wun a yèk maan tâage kà pittirla kaynge a gin yiriya, ha unji e ɓarra, ha tibiskum ndam ndamji e fin a tinîir wun. 20 Màrra sey un cèngni yèk yey: Cen nirri ge kpàa lònum ni hak wàa yèk mòonjum kàn tâage a defterre Fay gi ba. 21 Ngam yèk mòonjum kàn gi ti haara anda a yiɗum nirri ba, amma a nit ây yèege yèk yey ragin a gin Fay gi. Jungci Delliya paagi daw aw yèe kà yey.
21 A nit lònum yèk rèeng ây aw ane nà mgban a tîim ni-Israyel ây. Hû go ɗa a nit kàlnjum yèk rèeng ây gaw tâa a tîim wun. Le gaw lekni yèk futa ot kana ge ’maa a gin gbeerra gi. Hàa gaw hàanju koo di Nitcoorra sàasi daw gi. Hû go gaw nàrra gbeerra kènu a hak waw. 2 A nit ây dèy fu gaw fut ot waw ot haanum tuy. Ngam yèk tèem waw kà yey gi a nit ây maa gaw maasi ot takundi. 3 A yiɗum kpàarra jày rii gaw riinu ni yèk burma mbangsin gi. Amma kiita waw ti kpâa ba, gbeerra waw ge tòo ba. 4 Ngam koo da malayka ây mbirge jàk maarra gi Fay ti woo daw ba, amma ’màkti daw a gòok kulpi yiriya, cîi daw aw tâa a farra ha unji iirra kiita. 5 Ti woo ɗa jàk kparri ây tâage nà mgban ba, ye ’màara mûurra sòo ɓèl a kparri nit ây hàanju gi. Sey di Nuhu nit sakta yèk gòyrra ɗèm, dey saanu ni nit ây kana jòròs. 6 Di riiy Sodom ni Gomorra ɗa Fay yaani daw a kiita gbeerra, aksi daw ni ebi, ngam aw tâa jàk kàlnum da yòot nit ây gaw hàw yèk wàa gi. 7 Saanu gbè di Ludu nit gòyrra ɗèm, riige ’màari yèk dikri nit ây maktiya haani tuy gi. 8 Ngam ey nit ɗèm ɗi dii nà a tîim waw. Unji pî ye rabe ni nis wàa, rage ni tuy ɗa tèem waw maktiya tèen a èca yèk mgbèngda, de àysu dèy a tinîir wàa tâagu ɗèm gi. 9 Hû go Tooy Ɓèl cèngni kày ge saani daw da nit ây tolgu gi a ’màar jàk rûfta. Amma da nit ây èege gòyrra ɗèm gi faa dawrre ’mèmdiya ha unji iirra kiita. 10 Sakkoma ge mbir daw kà yey da nit ây futke gayrum is waw ’miskumya, hàanje wûun Fay gi. Aw a nit kàlnjum yèk rèeng ɗi, aw coorra koo jâ ba, aw ’misirre hak waw, aw tolle maasum jàk ’mita ây a faktiturum ba. 11 Koo a malayka ây hòmge daw kpèw ni mbinum gi, gaw yèe yèk maasum da jàk ’mita ây a faktiturum a ɗàm kpees Tooy Ɓèl ba. 12 Amma a nit ây gi aw dii kà jàk nûr ây tâa aw cèngni jày ba, ɓasin ngam aw mòorgi daw aw ɓàri daw. Aw gi aw maasirre jày tâa aw cèngni ba. Gbee gaw gbee kà jàk nûr ây, 13 kpàa gaw kpàa kiita ngam bèeb tèem waw maktiya. Koo ni unji del daw mûunum gbaarra jàk gayam a is waw, aw a jàk ’miskum ây ni jàk lawsam ây ɗi a riinjum ni un, ye tâa aw râanirre gayam is waw gi. 14 Nis waw mûu ni gayam njeenu, aw tòorre mbita jàk maarra ba. Aw rûfri dawrre ni gâra da nit ây tâage dàngdiya gi. Tinîir waw dii rûunumya a gayrum kpàarra jàk ây, aw a nit lètiya ây ɗi. 15 Ye tâa aw woofa ot takundi, aw yeskige, aw mòo ot Balaama hàm Beyor, nit yey yiɗe kpàarra bèeb tèem makta gi, 16 amma kpàa tilèni a jàk maarra wàa a yewrra yèk mgbèngda. Wamde ye yèewrra ni gûn nirri, de njanggu rak wàa rak nit lònum gi. 17 A nit ây gi aw dii kà nis sòo kòyrre gi, kà titurum ây tus daw hiski. Gin tâam kulpi hòmge yita gi waa dawrre. 18 Aw yèerre yèk ɓèl ây tâage ɓa hû go. Ni yèk gayrum jày a isi aw rûfri dawrre ni gâra da nit ây kana saaga kòsòng a tîim nit ây tâage a jàk rûfrum gi. 19 Aw sak dawrre yèk tâam tiròom, amma aw ni hak waw a sàay ây ɗi a jàk gbeesum. Ngam koo wuna ge ir sàay wàa di jày sungu gi. 20 To a nit ây gi aw saa go nà a jàk ’miskum ây a kparri ngam aw cèngnu di Tooy Ɓèl ni Yeesu Kristu Nitsaanum, amma a dat maan aw dii bak rûftiya a jàk ’miskum ây gi, gbèeni tâam waw hò ge hòm maarra di tâam waw woy màrra. 21 Ndika aw haa ngin cèngnum ot ɗèm gi ba, ye tâa aw cèngnige amma aw ire, aw woofa yèk mgbèngda delliya tâagi daw hîirriya gi. 22 Takundi, aw getnji ni yèk rèenjum yèy gàage: Dun riise guta wàa. Gàa bak: Gicim poowan sòo gi ’nòorre e bèpsi a bòmji.
31 Un kor ây yiɗim dun gi, e rri yey mi kèrfa dunde ɗerrewol cukti, ha mi mûysunu a dànda wun mbâra, mi ɓaysununu a kàlnjum mum. 2 Mi yiɗi un ɓaysi yèk ây ɗàan yèerra nit lònum ta Fay diga mgban gi, ni yèk mgbèngda Nitcoorra, Nitsaanum, kàlin dun nit ây tèe daw Yeesu gi. 3 Màrra sey un cèngni yèk yey: A mgbàr gbèeni a nit wâskum ây dike a jày gayri daw gi, a gaw an ni wâskum, 4 gàa gaw gàa: U hâ tâa dàarra Nitcoorra yèeni ni yèk mòonjum kàn gi ya? Ngam a too rra worro aw wurre, amma jày pî dii tâarre kà woy mgban, ti bunji ba diga mbangsum kparri. 5 Aw hàwe ɓaysum, nge faktiturum tâage nà diga mgban, deesi ngaa lòrra nà a sòo, gòyrre a sòo ni yèk Fay gi. 6 Ni yèk maan ɗa kparri mgban gi gbee nà ni mûurra sòo ɓèl. 7 Ni yèk maan bak faktiturum ni deesi kòsòng gi aw gòyrre, aw dii waatumya ngam eb unji kiita ni gbeesum nit ây hàanju di Fay gi. 8 Un kor ây yiɗim dun gi, ta un hènti yèk yey ba: A ɗàm kpees Tooy Ɓèl unji kpolo dii mu gàa yeri ujinèerre, yeri ujinèerre dii mu gàa unji kpolo. 9 Tooy Ɓèl tòorre a jày yèe ni mòonjum kàn gi ba, kà yey dànin a nit ây kana. Amma ey èfɗe tinîir wàa yèk wun, ngam ti yiɗi koo wuna e gbee ba, sey a nit ây pî aw kpèt a inum tinîir waw. 10 Amma unji Nitcoorra dàa ge dàara kà oori. Mgbàr maan faktiturum gbee ge gbee ni dûurra ɓèl, a jàk mbinum ây a kparri hè gaw hèr ni mâarra ebi, deesi ngaa ni jàk ây tâage a farra gaw haasirra daw kpàarra ba. 11 Ye tâa a jàk ây gi pî gbee ge gbee kà yey, hòmu gesum un dik dikri wun delliya a tolnji Fay, 12 un waarre unji Fay un hânarre dàarra wàa, unji yey ge gbee faktiturum ni ebi, gaw hèr jàk mbinum ây a kparri ni mâarra ebi gi. 13 A yèk yey yèe Fay ni mòonjum kàn, ot waarre faktiturum fûuya ni dees fûuya a gin yey ge tâa tâam ɗèm gi. 14 Ngam maan un kor ây yiɗim dun gi, ye tâa un waarre jàk ây gi, hârin un tâa ɓet ɓet cen yèk kana a ɗàm kpees wàa ba, un tâa a tâam mbâri ni ey. 15 Raptin èfta tinîir Tooy Ɓèl e tâage saarra wun! Kà yey kèrnu Pawlu ɗa, kor worro yiɗu ot gi, a còycum yey kpàa gi. 16 Yèerre yèk ây gi a ɗerrewol ta wàa pî. Amma a gin kana ’nang ’nang àyrre rakta. A nit ây tâa aw èngni jày ba tâage dàngdiya, aw inirre yèk ây kpâage rakta, kà yey mbirin ni yèk defterre ây kana ɗa. Hû go aw mbangsirre gbeesum hak waw. 17 Un kor ây yiɗim dun gi, ye tâa un ɗàa cèngnum yèk ây gi, faasin hak wun ta nit makta ây tâage a jàk rûfrum aw nàtnu, ha un yaa a gòyrra wun kpèw ba. 18 Amma ’mirrin a mbâr Yeesu Kristu Nitcoorra tâage Nitsaanum worro gi, un iisirra cèngnum! ’Mita e tâaw kòsòng ha a unji tâam timgbàri!