2 Ni-Korintu ây

¹ Miy mi Pawlu, mi nit yey tèem Yeesu Kristu kà yey yiɗi Fay gi, ni Timote kor worro, ot kèpfa dunde dun nit ta Fay kimje a Korintu, ’mèmsa ni nit della ta wàa tâage a dees Akaya lang. ² Nge Fay Too worro, ni Yeesu Kristu Nitcoorra aw hîinu mbâr waw ni tâam mbâri! ³ Dàan ot ’misu di Fay Tooy Yeesu Kristu Nitcoorra worro, Tooy ’maton dèy, Tooy kpèwsum a jày pî! ⁴ Ey kpèwsinarre a riirra ’màar worro pî, ha orro ɗa ot kpàa kpèwsum ni kpèwsum yey kpàana a gin Fay gi da nit ây kana riige koo ’màar hâ. ⁵ Kà yey ’mèmsina a ’màar Kristu dèy gi, hû go kpàana ɗa kpèwsum dèy a gin wàa. ⁶ Ot riirre go ’màari, tâa kà yey ngam ha un kpàa kpèwsum ni saarra. Ot kpàarre go kpèwsum, tâa kà yey ngam ha un ɗa un kpàa kpèwsum, un èf tinîir wun a ’màar ây gun rii kà yey riina orro gi. ⁷ Jàk dànda worro dii kpèw a hak wun, ngam ot cèngni, kà yey ’mèmsunu ni orro a riirra ’màari, hû go gun ’mèmsi ɗa a kpèwsum yey kpàana gi. ⁸ Un kor ta worro, ot yiɗi un cèngni yèk ’màar yey kpàagina a dees Asiya. Ngam ’màar maan àye dèy ha hòmna kpèw kpèw worro, ot woofa dànda nge got gûy gi. ⁹ Orro ni hak worro ot dànde nà, ot kpàa kiita wurra mgban. Amma mbire kà yey, ngam ta ot ii jàk dànda tinîir worro a hak worro ba, amma ot ii a gin Fay Tooy gûysum da nit ây wutke gi. ¹⁰ Ey Tooy saanina a wurra kà yey gi, saaninarre ha kòsòng. Ot iirre jàk dànda worro a gin wàa, nge saa ge saanina bak, ¹¹ ye tâa un ɗa un mgbaanjinarre ni waarra Fay ngam worro. Hû go a nit ây dèy gàa gaw gàa mbew di Fay yèk worro, ngam mbâr yey kpàana a waarra waar ây dèy gi. ¹² Orro got kpàa râanum hak worro ba yi? Ngam dànjum tinîir worro kàlnarre, nge dikri yey dikna a kparri hayye a gin wun gi, e tâage ɓetkumya ni tinîir takundi hîi Fay gi. Dikri maan ti tâa ni còycum isi ba amma ni mbâr wàa. ¹³ Jày kèrfa ot dun a ɗerrewol gi, ti tâa yèk kana ba, sey jàk yey janggunu, raknu a farra. Mi dànde cè gun cèngni mbâra yèk yey, ¹⁴ ye tâa un ɗaarre cèngnum càa càa, nge orro tâa got tâa jàk râanum wun, un ngaa tâa gun tâa jàk râanum worro a unji dàarra Yeesu Nitcoorra worro. ¹⁵ Ye tâa mi cèngni mbâra a yèk yey gi, mi yiɗi ɗà mi diksi a gin wun, ngam ha un kpàa mbâr cukti, ¹⁶ mi dàni nà jòlla a gin wun a dikta mum a dees Makedoniya, mi dàni nà a ita ɗa mi ira a gin wun, ha un isim a dees Yude. ¹⁷ Ye yiɗim kà yey, mi tèerre tèem èca hakkilo yi? Malla mi dànde kà dànda nirri ha mi jamji gàarra eeye eeye ni oowo oowo yi? ¹⁸ Kà yey tâa Fay mòorre yèk wàa mbâra gi, hû go yèk worro ɗa a gin wun ti jamji gàarra eeye ni oowo ba. ¹⁹ Ngam Yeesu Kristu Hàm Fay yey sakna ot dun gi, miy ni Silas ni Timote, ti dàara ngam e jamji gàarra eeye ni oowo ba, amma ey tâage eeye a yèk Fay. ²⁰ Ey tâage eeye a yèk ây pî yèe Fay ni mòonjum kàn gi. Kà yey ot gàarre Amen ni ey ha ot ’misunu di Fay. ²¹ Fay ey gòynina dorro ni un a gin Kristu, catkina, ²² iigirra dot ticèngsunum, hîigina Jungci Delliya a tinîir worro kà jàk màrra a jàk ây got kpàa gi. ²³ Mi gàarre ni nîir Fay Tooy seedum jungci mum, mi woofage diksum a gin wun a Korintu, ngam mi atnjirra dun ’màari gi. ²⁴ Orro ot kàm ot wûunda dun a goosum ba, amma ot nit mgbaanjum ta wun ɗi a kâwum wun. Ngam a goosum wun un gòyrre kpèw.

¹ Kà yey dànsim ni hak mum, gim diksifa a gin wun ba, ngam ta mi àysunu tinîir wun bak ba. ² Ngam to mi àysunu go tinîiri gi, wun ge kâwsim tinîir mum, sonaa nit yey kpàage àyrra tinîiri gi ba ya? ³ Yòo maan mi kèrfa dun nà kà yey, ngam to mi kpètfa go a gin wun, ta mi kpàa àyrra tinîiri a gin nit ây gesi ngin aw hîim kâwum gi ba. Ngam mi cèngni mbâra a hak wun pî, nge kâwum mum tâage ɗa kâwum wun. ⁴ Mi kèrfa dun nà yèk maan ni riirra ’màari, ni àyrra tinîiri, ni umda rîsim dèy, ti tâa ngam mi àysunu tinîiri ba, amma ngam un cèngni kày yiɗim dun dèy gi. ⁵ To nit kana tâa go nit àysum tinîiri, ti tâa dim àyse ba, amma dun pî àysunu, koo àysi daw go da nit ây kana a tîim wun, ngam ta mi hàw yèk takundi ba. ⁶ Tiyèeni nit ây dèy a tîim wun kpàa nit maan gi, gerruge. ⁷ Amma kòsòng ndika un yaafu un kpèwsu tinîir wàa, ta un iisurra ngòlnji ha e ’maaw a gbeesum hakkilo wàa ba. ⁸ Hû go mi waanurre, un kàlnu yiide. ⁹ Mi kèrfa dun nà yèk maan ngam ha mi getnu, mi cèngni to un rakɗe go tuy a yèk mum pî gi. ¹⁰ To un yaafu go di nirri, miy ɗa yaa gim yaafuwa. Ngam to mi yaafu go di nirri jày getke mi yaafu gi, mi mbitɗe kà yey ngam wun a ɗàm kpees Kristu, ¹¹ ngam ta Seyɗan e sunna ba, ye tâa orro ot cèngni gâra ta wàa. ¹² Ye kpèrrim a Torowas ngam sakta Yèk Kâwrra yey anga a gin Kristu gi, Nitcoorra hîimi ot mbâra ngam tèerra tèem. ¹³ Amma mi kpàa suunji a tinîir mum ba, ngam mi kpàaw di Titus kor mum a farra ba. Kà yey de wasmi daw da ni-Torowas ây, de dikmi a dees Makedoniya. ¹⁴ Ot gàarre mbew di Fay, ’maagina ni Kristu kà nit sunda ây a ɗàm kpees nit ây koo ningàa, lònirre mgbirgum cèngnum wàa koo u hâ. ¹⁵ Orro ot jàk mgbirgum Kristu ɗi a gin Fay, ngam nit ây saage gi ni nit ây gbeege gi. ¹⁶ Ngam nit ây gbeege gi orro ot dii kà jàk mgbirgum ây a wurra, ha aw wurri. Ngam nit ây saage gi orro ot dii kà jàk mgbirgum ây a gûyrra, ha aw gûyi. Wun getke a tèerra tèem kà yey ya? ¹⁷ Orro ɗi, ngam ot tâa kà nit ây kana dèy sàange yèk Fay gi ba, amma kà nit ây tèe daw gi ɗi, ot yèerre a ɗàm kpees Fay ni tinîir takundi, ot nit ây ’mèmse ni Kristu gi.

¹ Ye tâa ot yèerre kà yey, ot ɗaasirre râanum hak worro yi? Koo gayam ɗerrewol gòynum diina kà nit ây kana, kà gàarra ɗerrewol anda a gin wun, koo woy tèenum a gin wun yi? ² Un tâage ɗerrewol gòynum worro kètiya a tinîir worro, ɗerrewol yey kpàan cèngnum a nit ây pî, aw janggirre. ³ Lòtiya ɗi nge un tâage ɗerrewol Kristu, kètiya ni kàn worro ti tâa ni jàk yiriya ba amma ni Jungci Fak beengiya, ti tâa kètiya a gòok tifalap ba amma a mîis tinîiri. ⁴ Ot kpàa cèngnum mbâra kà yey a gin Fay ni Yeesu Kristu. ⁵ Orro ot get ni hak worro ha ot gàa jàk kana ana a gin worro ba, amma jày got get mbita gi ana a gin Fay. ⁶ Ey getnina ha ot tâa nit tèerra tèem a jàk wasta fûuya, ti tâa ni jàk kèta ba amma ni Jungci Delliya. Ngam jàk kèta ɓàtɗe nirri, amma Jungci gûynurre. ⁷ Tèem ɓàta di nirri kètiya ɗi a gòok tifalap ây dii nà ni ’mita Fay. A ni-Israyel ây aw kpàaw raptum nis wàa di Muusa ba yèk ’mita a nis wàa ge lòo gi. ⁸ To tèem maan tâa go ni ’mita Fay, sakko kà ge tâa tèem Jungci ni ’mita Fay gi ya? ⁹ Ngam to tâa go tèem yaanum a kiita dii nà ni ’mita Fay, sakko kà ge tâa tèem gòynum ɗèm ge hòmu ’mita dèy ba ya? ¹⁰ ’Mita yey tâage mgban gi, getnji koo jâ ni ’mita ɓèl a tâarra yey gi ba. ¹¹ Ngam to tâa go jàk lòorra dii nà ni ’mita gi, sakko kà ge tâa jàk tâarra koo ningàa ge hòmu ’mita ba ya? ¹² Ye tâa ot dii ni jàk dànda kà yey gi, ot yèerre tolnji cen. ¹³ Orro ot tâa kà Muusa ba butke nà tiigi wàa, e njang daw da ni-Israyel ây ngam ta aw rap lòorra ’mita maan ba. ¹⁴ Amma jàk dànda nit ây gi ndège. Ha niyey dànda waw burre ni jàk buta a ye janggin defterre jàk wasta mgbanti gi. Jàk buta maan ge tâa daw atiya ba, sey ni Kristu nit yey gbèese jàk wasta mgbanti gi. ¹⁵ Ha kòsòng jàk buta gi yisi daw tinîir waw yiriya, a ye janggin yèk mgbèngda Muusa gi. ¹⁶ Amma gàarre a defterre Fay: To nirri ira go a gin Tooy Ɓèl, jàk buta tâa ge tâa atiya a gin wàa. ¹⁷ Tooy Ɓèl tâage Jungci. A gin tâa Jungci Tooy Ɓèl gi, a farra dii tâam tiròom. ¹⁸ Orro pî tâage nis worro faarumya gi, ot raptirre ’mita Nitcoorra kà raptum a darrugal, ot inirre jàk tirèenjum ni Nitcoorra, ha ’mita wàa e tâa ’mita worro. Kà yey tèe Nitcoorra ni Jungci wàa.

¹ Ngam maan orro ot nit ây kpàage tèem yey a ’maton Fay gi, ot tâa ni tinîir tolnji ba. ² Ot woofage tèem lawsam fûurriya, got dik a tèem gâra ba, got mboysi ɗa yèk Fay ba, amma ot lònirre yèk takundi. Hû go ot gòynirre hak worro a gin dànjum tinîir nit ây a ɗàm kpees Fay. ³ Amma to Yèk Kâwrra yey sakna gi tâa go fûurriya, dii fûurriya gbè da nit gbeerra ây. ⁴ Da nit ây gi Seyɗan wûun tâarra yey yisifa daw dànda waw èege goosum gi, ngam ta kayang Yèk Kâwrra yèege yèk ’mita Kristu tâage tirèenjunum Fay gi e fin daw ba. ⁵ Ngam orro ot sakɗe yèk hak worro ba, amma yèk Yeesu Kristu tâage Nitcoorra gi. Orro ngaa ot sàay rra wun ɗi ngam nîir wàa. ⁶ Fay gàage «kayang e fin a tîim kulpi» gi, ey finsina tinîir worro, ha ot cèngni kayang ’mita wàa finge a nis Kristu gi. ⁷ Amma ot nit ây tâage ni bèeb yey delliya gi, ot dii mu gàa taang ây gbuurriya, ngam mbinum ɓèl gi e lòt ana a gin Fay, ti tâa a gin worro ba. ⁸ Orro ot riirre koo ’màar hâ, amma ot gbee ba. A jàk ây aw kpulsinarre jungci isi, amma tinîir worro ti ’nun ba. ⁹ Aw ɗàanarre ɗàari, amma Fay ti woofa dot ba. Aw lutkinarre, amma ot wut ba. ¹⁰ Koo ningàa ot tokɗe wurra Yeesu a is worro, ngam ha gûyrra wàa e lòt a is worro ɗa. ¹¹ Koo ningàa ot nit ây gûyge gi ot dii gaarra a wurra ngam Yeesu, ngam ha gûyrra wàa e lòt a is worro ge wut gi. ¹² Kà yey wurra tèerre a hak worro, amma a hak wun gi gûyrra tèerre. ¹³ Orro ot tâa ni jungci goosum kpolo kà nit kèta yèk yey gàage: Mi goosige, ngam maan de yèemi. Hû go orro ɗa ot goosu di Fay, ngam maan de yèena. ¹⁴ Ot cèngni nge Tooy Ɓèl gûysu di Yeesu Nitcoorra a wurra gi, gû ge gûysina dorro ɗa ni ey, gò ge gòynina ni un a ɗàm kpees wàa. ¹⁵ A jàk ây gi pî aw mbire kà yey ngam wun, ngam ha mbâr Fay e iisirra yeskum, ha a nit ây gàage mbew di Fay gi ɗa aw iisirra mûurra, aw ’misu a ’mita wàa. ¹⁶ Ngam maan orro ot tâa ni tinîir tolnji ba. Koo ye tâa is worro gbeerre gi, jungci yey kpàana a gin Fay insinarre fûuya unji pî. ¹⁷ Kòsòng ot riirre ’màar yey tâa ti ày dèy ba unji càa, amma mbangsinarre gbaarra ’mita tâam timgbàri, hòmu dèy di ’màar yey riina gi. ¹⁸ Orro ot iirre hakkilo worro a jày rabe nirri ba, amma a jày tâa nirri ti rap ba gi. Ngam jày rabe nirri gi tâarrarre sey unji càa, amma jày tâa nirri ti rap ba gi, tâa ge tâam timgbàri.

¹ Ot cèngni nge àay worro tâanina kòsòng a deesi gi, kà gàarra is worro, to yaa go gi, ot dii ni àay kana a gin Fay. Ey mbangsina àay maan ni hak wàa a faktiturum ngam tâarra tâam timgbàri a farra. ² A tâam worro kòsòng ot bakɗe, ngam ot yiɗi dèy ha àay yey tâagina a faktiturum e butna is worro. ³ To tâa go butnarre gi, gaw kpàana isi kpong a ɗàm kpees Fay ba. ⁴ Ngam ot nit ây tâage a àay is yey ot bakɗe mu gàa nit tokta titokri ây bûtiya, ot yiɗi aw botfa dot is deesi gi ba, amma aw mgbapsina is faktiturum, ngam ha gûyrra e miru di jày ge wutki. ⁵ Fay ey iigina ha ot cèngni jày kà yey, hîigina Jungci wàa kà jàk màrra a jàk ây got kpàa gi. ⁶ Ngam maan ot mòorre tinîiri koo ningàa. Ot cèngni a ye tâana bak a is yey gi, ot kpâanji ni Nitcoorra, ⁷ ot dikɗe dikri worro a goosum, ti tâa a jày rapna gi ba. ⁸ Ot mòorre tinîiri, ot hòme yiɗum ot woofa is worro, ha ot tâanji ni Nitcoorra. ⁹ Kà yey ot kàmde dèy ot delu di Nitcoorra, koo ot tâarre go a is yey, koo ot woowfa go gi. ¹⁰ Ngam gesina dorro pî ot gòy a ɗàm kpees Kristu a gbaat kiita wàa, ha koo wuna e kpàa bèeb tèem wàa kà yey tèe a tâam wàa ni isi gi, koo tèem mbâri ɗi, koo tèem makta ɗi. ¹¹ Ye tâa ot cèngni kày gesi ot tolu di Nitcoorra, takundi ot ndòori dawrre da nit ây, amma Fay cèngnina mbâra. Mi dànde, un ɗa un cèngnina a mîis tinîir wun. ¹² A yèk yey ot ɗaasi ha ot gòynisi hak worro a gin wun ba, amma ot hîinurre orri un râani hak wun ngam worro, ngam ha un kpàa daw goosum yèy da nit ây râani hak waw yèk jày rabe nirri gi, tâa ti tâa a tinîiri ba. ¹³ Takundi, to orro ot rak ây ɗi go, ot tâarre kà yey ngam Fay. Amma to ot dii go ni hakkilo, ot tâarre kà yey ngam wun. ¹⁴ Ngam yiide Kristu ndaknarre dot nit ây cèngni mbâra, ey nirri kpolo wurre ngam nit ây pî, kà gàarra aw pî aw ’mèmsi a wurra wàa. ¹⁵ Ey wurre ngam nit ây pî, ngam ha a nit ây gûyge gi gaw gûy ngam hak waw ba amma ngam ey wutke gi, gûyse yèk waw gi. ¹⁶ Kà yey got cèngsusu koo di wuna a isi gbè ba. Koo ye tâa ot cèngnu nà mgban di Kristu a isi, kòsòng ot cèngsu kà yey ba. ¹⁷ To nirri ’mèmsi go ni Kristu, ey nit mbangsum fûuya ɗi. Jàk mgbanti gi hòme, e rri yey jày pî ire fûuya. ¹⁸ Fay mbire jàk ây gi pî, raknjisi hak wàa ni orro yèk Kristu, hîina tèem sakta yèk raknjusum nit ây ni ey. ¹⁹ Ngam Fay tâage a gin Kristu, raknjisi hak wàa ni nit ây pî a kparri, ti sak daw jàk maarra waw ba, ey waskina yèk raknjusum. ²⁰ Hû go orro ot nit gòynum yèk Kristu ɗi, Fay ɗa ’naasunu ni gûn worro ye gàana ot dun gi: Ot waanurre ni nîir Kristu, ngorin raknjusum ni Fay! ²¹ Fay iiwe di nit yey tâa ti cèngni jàk maarra ba, e tâa nit tokta jàk maarra ngam worro, ngam ha ot kpàa ɗèm Fay a gin wàa.

¹ Orro ot nit tèerra tèem Fay ɗi ot waanurre, ta un woo mbâr wàa kpàanu gi e tâa jàk ɓa hû go ba. ² Ngam gàarre a defterre wàa: A mgbàr mbâri mi ragumge, a unji saarra mi mgbaanjumge. Kòsòng tâage mgbàr ngota mbâr Fay, e rri yey kòsòng unji saarra gi! ³ Orro a tèem worro gi ot iinu jàk timgbòlnji koo jâ ba, ngam ta aw yèeri yèk makta a tèem yey ba. ⁴ Amma a jày pî ot gòynirre hak worro orro ot nit tèerra tèem Fay ɗi, koo a èfta tinîiri dèy, koo a riirra ’màari, koo a tâarra a tâam fòon, koo a jàk àyrriya, ⁵ koo a tiluni, koo a tâarra a kultuma, koo a anda yèy, koo a tèem loca, koo a èca kûurra nistikûum, koo a àyrra fey. ⁶ Ot gòyrre a jàk ây gi pî ni tâam ɓet ɓet, ni cèngnum jày, ni èfta tinîiri, ni mgbergum yèy, ni tèerra tèem ni Jungci Delliya, ni yiide cen tibiw, ⁷ ni yèerra yèk takundi, ni tèerra tèem ni mbinum Fay. Ot tèenirre ni jàk bàpri ây kpàana a ɗèm Fay gi, koo ngam tapnum, koo ngam njangnum. ⁸ Ot gòyrre kpèw koo aw coonarre go, koo aw luusinarre go, koo aw yèenarre go yèk makta, koo aw yèenarre go yèk mbâra. Aw raptinarre kà nit rûfrum ây, koo ye tâa orro ot nit takundi ây ɗi gi. ⁹ Aw raptinarre kà nit ây tâa ot cèngni daw ba, koo ye tâa ot dii cèngnumya a gin nit ây pî. Aw raptinarre kà nit wuta ây, koo ye tâa ot gûyrre gi. Aw haarra dotɗe, amma aw ɓàtna ba. ¹⁰ Ot rèerre kà nit ây ày daw tinîiri, amma ot dii ni kâwum. Ot rèerre kà nit èca ây, amma ot hîi dawrre bèebi da nit ây dèy. Ot rèerre kà nit ây tâage aw cen ni jày koo càa ba, amma ot dii ni jàk ây pî. ¹¹ Un ni-Korintu ây, ot faarige mgbelyèk worro ot yèenurre koo jâ pî, tinîir worro ngaa yâayirre ngam wun. ¹² Orro ot fanti dun tinîir worro ba, amma un un fantina tinîir wun. ¹³ Mi yèenurre mu gàa un hàm ta mum ɗi, mbirin dot ɗa kà yey mbitna ot dun gi, yâayinin tinîir wun! ¹⁴ Ta un ’mèmsi a dikri kpolo ni nit ây èege goosum gi ba. Kà ge getnji tèem ɗèm ni tèem makta gi ya? Kà ge ’mèmsi kayang ni kulpi gi ya? ¹⁵ Kà ge raknji Kristu ni Beliyar Seyɗan gi ya? Ji ge tâanji daw da nit goosum di Fay ni nirri tâa ti goosi gi ba ya? ¹⁶ Kà ge getnji àay Fay ni àay mâri gi ya? Ngam orro ot àay Fak beengiya ɗi, kà yey gàa a defterre wàa: Tâa gim tâanji ni un, gî gim gîr a tîim wun, tâa gim tâa Fak wun, un ngaa tâa gun tâa nit ta mum. ¹⁷ Ngam maan Tooy Ɓèl de gàa: Yuun a tîim waw, ɗòlnjin ni aw, ta un bang ɗa jàk ’miskumya ba. Kà yey miy ngo gim ngotnu. ¹⁸ Tâa gim tâa Too wun, un ɗa tâa gun tâa hàm ta mum, hàm nihun ây ni hàm nikin ây. Hû go gàa Tooy Ɓèl tâage ni mbinum a jày pî gi.

¹ Un nit ây yiɗina gi, ye tâa orro ot dii ni yèk ây a yèk mòonjum kàn kà yey, dàan ot ɓetini hak worro a ’miskum isi koo a ’miskum jungci, ot gbèesi tâarra delliya a tolnji Fay. ² Faarinan tinîir wun! Orro ot mbir jàk makta koo di wuna ba, ot mboysu koo di wuna ba, ot iiw burma koo di wuna ba. ³ Ti tâa ngam mi yaanunu a kiita gàam kà yey ba. Ngam mi ɗaanu nà gàarra nge un dii a tinîir worro, koo ot wutnjirre go ni un, koo ot gûynjirre go ni un. ⁴ Mi mòorre tinîiri dèy yèk wun, mi râanirre dèy yèk hak wun. Koo a ’màar hâriina gi pî mi mûu ni suunji tinîiri, kâwum iisimdarre ɗa dèy. ⁵ A ye kpètna a dees Makedoniya gi, is worro ti kpàa wuysum ba, amma ot riiye ’màari cewci pî, ot dii ni tilètnjum ni nit ây, ot dii ni tolnji a mîis tinîiri. ⁶ Amma Fay Tooy suusum tinîir nit ây ûuni daw jàk àyrra gi, ey suusinage tinîir worro a kpèta Titus. ⁷ Ot kpàa suusum tinîir worro a yèk kpèta wàa gbè ba, amma a yèk yey gàana kày kpàa suunji a gin wun gi ɗa, kày yiɗunu un rabim gi, kày tâanu ni àyrra tinîiri a jày mbirge gi, kày kàmnu gòynum yèk mum a ɗàm kpees nit ây. Hû go kâwum iisimda dèy. ⁸ Ngam koo ye tâa ɗerrewol mum àysunuge tinîiri gi, ti tiisim kòsòng ba. Mgban tiisimge nà, ngam mi kpàaye ɗerrewol maan àysunu tinîiri unji càa. ⁹ Amma kòsòng tinîir mum kâwimde, ti tâa ngam mi àysunu tinîiri ba, amma ngam àyrra tinîir wun ’maanu a lònum jàk maarra wun. Ayrra tinîir wun tâaye kà yey yiɗi Fay gi. Orro ot mboysunu koo jâ ba. ¹⁰ Ngam àysum tinîiri tèe Fay gi ’maa ge ’maa a inum tinîiri, a saarra yey tâa ge tiisu di nirri ba. Amma àysum tinîiri kà yey tâa a kparri gi, ’maarre a wurra. ¹¹ E rri yey àyrra tinîir wun tâage kà yey yiɗi Fay gi tèeye jày dèy, ’maanu a hâta dèy, a goosum yèk hak wun, ni ngòlnji a jàk maarra wun, ni tolnji dèy, ni yiɗum dèy ha un rabimi, ni rîirra kpèw dèy a hiitum jàk maarra. Hû go un lòni hak wun a jày pî un dii ɓet ɓet a yèk maan. ¹² Ye kèrmifa dun ɗerrewol maan, ti tâa ngam nit yey mbirge jàk makta koo ngam nit yey riige ’màari a jàk makta gi ba, amma ngam hâta yey tâagunu ngam worro gi e lòt a ɗàm kpees Fay. ¹³ Ngam maan ot kpàa suusum tinîir worro. Ji hòmge di yey, tinîir worro ɗa kâwna dèy a kâwum Titus, ngam jungci is wàa kpàa wuysum a gin wun pî. ¹⁴ Ngam ye tâa mi râanige yèk wun a gin wàa gi, un mòosim lawsam ba. Amma kà yey tâa jày pî yèena a gin wun takundi ɗi, hû go ɗa râanum yey râanina a gin wàa takundi ɗi. ¹⁵ Yiide wàa ngam wun iisirrage ’mita, ye tâa ɓaysirre yèk rakta tuk wun, kà yey ngoru un ɗa ni tolnji ni timalni isi gi. ¹⁶ Mi dii ni kâwum, ngam mi kpàa iirra dànda tinîir mum a gin wun a jày pî.

¹ Un kor ta mum, ot yiɗi un cèngni kày lòni Fay mbâr wàa a gin nit kimjum ây a dees Makedoniya. ² Ngam koo ye tâa ’màar ây dèy gerri dawge, kâwum tinîir waw ’mirre, ha aw hîiye hîiri dèy ni ɓèlla ni kàn patiya a èca waw èen gi. ³ Mi seedirre a hak waw, aw hîi ni yiide tinîiri kà yey mbinin gi, ha hòmige di mbinum waw. ⁴ Aw waanage dèy ha aw kpàa orri aw ’mèmsi a hîirra hîiri, ngam mgbaanjum danit della ta wàa di Fay tâage a Yerusalem gi. ⁵ Jày tèen gi hòme ɗa di jàk yey dànna orro, ngam aw hîiye hak waw màrra a gin Nitcoorra, a dat maan a gin worro kà yey yiɗi Fay. ⁶ Ngam maan de waana di Titus e difa a gin wun, ha e dik ɗàm kpeesi ni tèerra tèem yey ɗaa nà gi, ha e gbèesinji ni un a tèem hîirra hîiri. ⁷ Ot yiɗi un yâayi a tèem hîirra hîiri gi kà yey yâayunu a jày pî, koo a goosum, koo a yèerra yèy, koo a cèngnum jày, koo a rîirra kpèw kpèw, koo a yiide wun ngam worro. ⁸ Mi gàanu yèk yey kà yèk mgbèngda ba, amma mi kàlnunurre kày rîin kpèw a nit ây kana, ngam ha mi gerru takundi di yiide wun. ⁹ Un cèngni mbâr Yeesu Kristu Nitcoorra worro, nge ey koo ye tâa nit bèebi ɗi gi ire nit èca ngam wun, ngam ha e inunu nit bèeb ây ni èca wàa. ¹⁰ E rri yey mi kàlnurre jàk dànda mum a yèk yey: Dele to un mòo go tèem yey ɗaanu diga yer yey hòmge gi, ti tâa a tèerra gbè ba, amma ni yiɗum tinîiri ɗa. ¹¹ Kòsòng gbèesin tèem maan tèenu gi, ngam kà yey tâa nà yiɗum wun mbâra, gbèesum maan ɗa e tâa kà yey mbinnu gi. ¹² Ngam to nirri yiɗi go hîirra jày ni tinîir mbâra, de ge delu di Fay ni hîir wàa a jày tâagu gi, naa a jàk yey èegu gi. ¹³ Ta un rii fòon ngam un mgbaanji daw da nit ây kana a gayam waw ba, amma un getnji titenten ni aw. ¹⁴ Ye tâa kòsong un dii ni jày dèy, mgbaanjin daw da nit ây ây daw jày gi. To mgbàr kana jày ây dun go, amma aw aw dii go ni jày dèy, kpàa gaw kpàanu mgbaanjum ɗa. Hû go tâa gaw tâa titenten ni un. ¹⁵ Ngam gàarre a defterre Fay: Nit yey kimje jày dèy gi, ti gbaatu ba. Nit yey kimje jày càa gi, jày âyu ba. ¹⁶ Ot gàarre mbew di Fay hîigu rîirra kpèw di Titus ngam wun, kà yey orro ɗa ot dii ni rîirra kpèw ngam wun gi. ¹⁷ Ngam ngore waar worro, mûu ɗa ni yiide a tinîir wàa, ha ey ni hak wàa yiɗi e difa a gin wun. ¹⁸ Ot tèewe ɗa ni ey kor yey kpàage ɓolmum a gin nit kimjum ây pî, ngam yèk tèem wàa a sakta Yèk Kâwrra. ¹⁹ Ti tâa ɓòlmum kpàa gbè ba, amma a nit kimjum ây aw carruge ni iirra kàn, ha e diknji ni orro a tèem hîir yey tèena ngam ’mita Nitcoorra ni yiɗum tinîir worro gi. ²⁰ Kà yey got njang daw da nit ây, ta aw yèerina yèy a yèk tèem worro a hîir yey dèy got ’maa gi ba. ²¹ Ngam ot kàmde jày tâage mbâra naa a ɗàm kpees Nitcoorra gbè, amma a ɗàm kpees nit ây ɗa. ²² Ot tèenji daw ni aw kor worro kana, nit yey kpàana orri ha gerru ot nak mûsi jày, kàlnirre hak wàa koo ningàa ey nit rîirra kpèw ɗi gi. Kòsòng iisirra rîirra kpèw, ye tâa ii dànda tinîir wàa pî a gin wun. ²³ Titus ey nit ’mèmsum ɗi ni miy a tèerra tèem ngam wun. A kor ây kana cuk tèefan daw nit kimjum ây gi, aw a nit tèerra tèem ây ɗi ngam ’mita Kristu. ²⁴ Hû go kàlnin daw yiide wun, ha un lòni a ɗàm kpees nit kimjum ây nge râanum worro a hak wun gi ti tâa ɓa hû go ba.

¹ A yèk tèem mgbaanjum da nit della ta wàa di Fay tâage a Yerusalem gi, gayam ti cenim ha mi kèrfa dun yèk maan ba. ² Ngam mi cèngni yèk yiɗum tinîir wun mbâra, de râanim yèk maan a gin ni-Makedoniya ây mi gàa: A ni-Akaya ây aw mbangsi ngam tèem mgbaanjum diga yer yey hòmge gi. Hû go yèk hâta wun kpèwsi daw da nit ây dèy a tîim waw. ³ Amma mi tèefa daw da kor goosum ây gi a gin wun, ngam ta râanum worro a hak wun a yèk yey e tâa ɓa hû go ba, amma ha un mbangsi a tèem maan kà yey gàami nà gi. ⁴ Ngam to a ni-Makedoniya ây aw diknjifa go ni miy gi, aw kpàanu go un mbangsi a tèem maan ba, lawsam mòo ge mòona a dànda worro mbâra a hak wun gi, ta mi yèe kan yèk lawsam wun ba. ⁵ Kà yey mi dàne, gesi mi waa daw da kor ây gi aw ɗàafa dikta a gin wun, aw gbèesi kimjum hîir mbâr yey gàanu diga mgban un hîi gi, ngam a kpèta mum e tâa mbangsumya kà hîir mbâri, naa ni gbokri. ⁶ E rri yey jày ɓaysim dun gi: Nit yey còke càa, ri ge rip càa. Nit yey còke dèy, ri ge rip dèy. ⁷ Sey koo wuna e hîi kày dàne a tinîir wàa, ta e tâa ni ngòlnji a tinîiri koo ni ndakcu ba, ngam Fay yiɗi nit yey hîige ni kâwum tinîiri gi. ⁸ Fay dii ni mbinum e hîinu koo mbâr hâ dèy ni ɓèlla, ha un kpàa jày pî a gayam wun koo ningàa, ha e ngasɗa dun ɗa ngam tèenum tèem mbâri pî. ⁹ Gàarre kà yey a defterre wàa: Ey mîinjige hîir ây, hîiye da nit èca ây. Ɗèm wàa tâa ge tâa koo ningàa. ¹⁰ Fay Tooy hîige yòoci di nit còkta ni tàarri ngam riirra gi, hîi ge hîinu dun ɗa yòot ây pî a gayam wun, mûu ge mûusu dèy, ii ge iisirra dun jàk repta ây a gòyrra wun ɗèm gi. ¹¹ Hîi ge hîinu koo bèeb hâ, ha un kpàa hîirra hîiri koo ningàa, ha a nit ây dèy aw gàa mbew di Fay ngam yèk hîir wun got ’maafa daw gi. ¹² Ngam tèem mgbaanjum yey tèenu a ɗàm kpees Fay gi, ge gbèesi fòon waw da nit della ta wàa di Fay a Yerusalem gbè ba, amma ’maa ge ’maa ɗa da nit ây dèy a gàarra mbew di Fay. ¹³ To un kàlnirre go hak wun mbâra a tèem yey, a nit della ta wàa di Fay ’mi gaw ’misi nîir wàa ngam yèk rakta tuk wun a lònum Yèk Kâwrra Kristu, ngam tèem mgbaanjum wun ni tinîir mbâra a gin waw ni nit ây kana ɗa. ¹⁴ Aw waa gaw waa Fay ngam wun, lu gaw luknu nisi yèk mbâr Fay hîinu a gbaarra mbâr wàa gi. ¹⁵ Dàan ot gàaw mbew di Fay ngam hîir wàa, yey tâa nirri ge kpàaw yèerra ba gi.

¹ Miy mi Pawlu ni hak mum mi waanurre ni fetkum tinîir Kristu, ni mgbergum wàa, mi nit yey gàan a nit ây mi nit ûunum hay ɗi a ye tâam a tîim wun, amma mi nit mòorra tinîiri ɗi a ye kpâanjim ni un gi, ² mi waanurre, ta un ndagim ngam mi yèe ni mòorra tinîiri ba, kà yey dànimi mi mbit daw cen tolnji da nit ây gàage ot dikɗe kà yey yiɗi isi gi. ³ Ngam koo ye tâa ot dikɗe kà yey yiɗi isi gi, ot haarre ni jàk isi ba. ⁴ A jàk bàpri ây haanina gbàaci ni erra gi aw tâa jàk isi ba, amma mbinum Fay ɗi ngam yaanum jàk jâarra mgbòktiya. Ot yaanifarre gâra nit ây ni jàk bàpri ây gi, ⁵ ot yaanifarre ɗa jàk ’misunum hay tâa ti getnji ni cèngnum Fay ba, ot ’mèmde jàk dànda nirri pî ha ot ’maaw a rakta tuy di Kristu. ⁶ Ot kèlle ot iiw kiita koo di wuna hàwge rakta tuy, a ye gun kpèt a rakta tuy mbâra gi. ⁷ Raptin jày tâage a ɗàm kpees wun gi! To nirri dànde go ni hak wàa ey nit Kristu ɗi, sey e cèngni ɗa, orro ot nit ta Kristu ɗi kà ey. ⁸ Ngam lawsam ge mòom ba, koo mi hòmnirra go râanum càa a mbinum yey hîina Nitcoorra gi, dii ngam ot mgbaanjunu dikta ɗàm kpeesi a goosum, ti tâa ngam ot mboysunu ba. ⁹ Mi yiɗi nge e tâa mi tolsunurre ni ɗerrewol ta mum ba. ¹⁰ Ngam aw gàarre, a ɗerrewol ta mum aw ndège aw dii ni kpèw kpèw, amma a tâam mum ni isi a ɗàm kpees nit ây mi dii dàngdiya, mgbelyèk mum ngaa cen ni mbinum a yèerra yèy ba. ¹¹ A nit ây gàage kà yey gi sey aw cèngni, kà yey yèena a ɗerrewol ây gi ye tâana kpâarriya, hû go got mbir ɗa a ye got tâa a tîim wun. ¹² To got tol iirra hak worro titenten ni nit ây gòyni hak waw, koo rèenjunum hak worro ni aw gi. Ngam ye tâa aw aw cèngni jày ba, aw getɗe hak waw ni tigeni waw, aw rèenjirre hak waw aw ni hak waw. ¹³ Amma orro ot râanirre hak worro ha e hòm a tigeni gi ba, ot râanirre gbè a ’mîik yey hîina Fay ni tigeni wàa, ha kpètfa ot a gin wun ni tèem worro gi. ¹⁴ Orro got hòm a ’mîik tèem worro ba. To ot kpètfa go ngin a gin wun ba, tâa ge tâa ngin kà yey. Amma takundi ot kpètfa ha a gin wun ni sakta Yèk Kâwrra Kristu. ¹⁵ Hû go râanum worro ti hòm a tigeni gi ba, got râani ni loca tèem nit ây kana ba. Amma ot dànde, goosum wun ii ge iisirra ’mita, ha ot kpàa tèerra tèem yey hòmge ’mita a tîim wun gi, tâa ge hòm a ’mîik worro ba. ¹⁶ Kà yey kpàa got kpàa sakta Yèk Kâwrra ha a riiy ây a ɗàm kpees riiy wun, ngam ta ot râani hak worro ni tèem nit ây a ’mîik kana ba. ¹⁷ Amma gàa a defterre Fay: Nit yey yiɗi e râani hak wàa gi, sey e râani yèk Nitcoorra. ¹⁸ Ngam ti tâa nit yey gòyni hak wàa ey gòye mbâra ba, amma sey di nit yey gòynu Nitcoorra gi.

¹ Gesi un woom mi yèerra dun ni yèk ray càa. Ndògòn, hîimin orri! ² Mi yiɗunurre ni ngèer yey anga a gin Fay gi, mi kàmde mi hîinu a gin maa kpolo tâage Kristu, kà sapri tâa ti cèngni is nihun ba tâage ɓet ɓet gi. ³ Amma mi tolle, mba dànda wun mbo ge mboyi, un woofa ’mèmsum ni Kristu ni tinîir mbâra, kà yey rûfu nà jòoy di Hawa ni gâra gi. ⁴ Ngam to nirri dàara go e sak yèk Yeesu kana tâa ot sak ba gi, to un kpàa go ngota Jungci kana tâa un ngor nà ba, to un kpàa go ngota Yèk Kâwrra kana tâa un ngor nà ba, ngo gun ngor yaale. ⁵ Miy mi dànde, mi hòm daw luurra da nit ɓèl tèerra ây koo a jâ ba. ⁶ Koo ye tâa mi mbin yèerra yèy mbâra ba, amma a cèngnum jày mi tâa hû go ba. Ot lònunu kà yey a jày pî koo ningàa. ⁷ Malla mi mbire jàk maarra ye luusim hak mum ngam ha mi aanjunu gi yi? Oow, mi yèerre Yèk Kâwrra Fay saknim dun gi kà hîiri. ⁸ Mi ngore bèeb tèem a gin nit kimjum ây kana, tâa mu gàa mi ngosi dawge jày dèy, ngam ha mi tèe tèem a gin wun. ⁹ A ye tâama nà a gin wun ye âyim jày gi, mi loosu koo di wuna ba. Ngam a kor ây dàaga a dees Makedoniya aw mûunim a jày âygim nà gi. Mi faasi hak mum a jày pî ngam ta mi loosunu ba, faa gim faasi hak mum kà yey bak. ¹⁰ Mi gàarre ni takundi Kristu tâage a gin mum gi, nge koo wuna a dees Akaya ge njanggim râanum mum kà yey ba. ¹¹ Ngam jâ yèemi kà yey ya? Mba mi yiɗunu ba yi? Fay cèngni to mi yiɗunu go ba. ¹² Amma kà yey mbirmi gi, mbi gim mbir a ɗàm kpeesi ɗa, ngam ha mi atnjifa daw gâra nit ây yiɗi yèk gâra gi, ha a jày râanin gi aw kpàa daw aw tèerre tèem kà orro. ¹³ Ngam a nit ây gi aw a nit rèeng ây ɗi, aw tèerre tèem burma, aw rèenjinirre hak waw ni nit tèerra ta Kristu. ¹⁴ Jàk yey ti tâa jàk tâarra ’nang ba, ngam Seyɗan ɗa rèenjinirre hak wàa kà malayka kayang. ¹⁵ Hù go jàk ɓèl ɗi ba, to a nit tèem ta wàa di Seyɗan aw rèenjinirre go hak waw kà nit ây tèege tèem ɗèm. Kà yey tâa tèem waw gi, hû go ge tâa ɗa gbèeni waw. ¹⁶ Mi gàarre bak, ta nirri e raptim kà ray ba. Amma to un raptimde go kà yey, sey un ngorim mu gàa mi ray ɗi, ngam ha miy ɗa mi kpàa râanum hak mum càa. ¹⁷ Jày gim yèe gi, ti tâa kà yey yiɗi Nitcoorra ba. Yèe gim yèe mu gàa mi ray ɗi, ye tâa mi lekni hak mum a râanum gi. ¹⁸ Kà yey râanin nit ây dèy a yèk isi gi, miy ɗa râa gim râani. ¹⁹ Ngam un un nit còycum ây ɗi un woo daw ni kâwum tinîiri da nit ây tâage raya gi aw yèe. ²⁰ Un woowrre di nirri, to inunurre go sàay, koo riinurre go jày, koo mòonurre go, koo ’misirre go hak wàa, koo lòsnurre go a kpalnga. ²¹ Mi yèerre yèk yey ni lawsam, mi gàarre: A tèem kà yey orro ot nit dàngdiya ây ɗi. Amma to nirri tol go râanum hak wàa a jày ba, miy ɗa gim tol râanum hak mum ba. Mi yèerre mu gàa mi ray ɗi. ²² Aw a ni-Hebra ây ɗi yi? Miy ɗa mi ni-Hebra ɗi. Aw a ni-Israyel ây ɗi yi? Miy ɗa mi ni-Israyel ɗi. Aw a yòot ta Abraham ɗi yi? Miy ɗa mi yòot Abraham ɗi. ²³ Aw a nit ây tèege tèem Kristu ɗi yi? Miy ɗa mi nit tèerra tèem Kristu ɗi, mi hòm dawge. Amma mi yèerre yèk yey mu gàa tidoogum. Mi hòm daw loca a tèerra tèem, mi hòm daw lekta a kultuma, mi hòm daw kpàarra tiluni, nak mûsi jày mi tâarre nà gaarra a wurra. ²⁴ Nak kèrèw a ni-Yude ây lèfimin tilèfni nde ra taan sàm ngaskàm kpolo. ²⁵ Nak taan a nit ây lutkimin tiluni, aw còomi ni gòoy nay kpolo. Nak taan koombowal tuusim a sòo, mgbàr kana mi tâa nà a mîis sòo tuma ni unji. ²⁶ A dikta wooy mum, nak mûsi jày mi lekni hak mum a àyrra yewrra sîirra ɓèl ây, kèl mi lek a kàn nit ây ngorge jày, kèl mi lek a kàn yòot ta mum ni-Yude ây, ni kàn nit ây èege yèk Fay. Mi lekni hak mum a tîim mûsa nit ây a riiy ɓèl, mi lekni hak mum ɗa a tâam àyrriya a tîim nûri, ni dikri àyrriya a sòo ɓèl. Kèl mi lek a gâra kor rèeng ây. ²⁷ Mi rii ’màari a tèerra tèem dèy ni loca, ni èca kûurra nistikûum nak mûsi jày, ni àyrra fey, ni ɓòyrra sòo, ni èca tiriici, ni suurra ngisim, ni èca lurra. ²⁸ Unji pî a nit ây aw looskimde, mi dànjirre yèk nit kimjum ây pî koo ningàa, cen yèerra yèk ây kana gi. ²⁹ To nirri tâa go dàngdiya, miy ɗa gim ir dàngdiya ba yi? To nirri mgbòl go gi, miy ɗa jày ge àyim ba yi? ³⁰ To gesi go mi râani hak mum gi, râa gim râani ni jàk yey tâagim dàngdiya gi. ³¹ Fay Tooy Yeesu Nitcoorra worro, Tooy yey gese ot ’misu tâam timgbàri gi, ey cèngni mi rèengde rèeng ba. ³² A ye tâami a Damasku gi, ngomna wûun Aresta faarre nà riiy maan lang ngam e mòomi. ³³ Amma aw cinim ni gàngna a kpongna jâarra bàanji, de saami a kàn wàa.

¹ Gesi mi râani bak hak mum, koo ye tâa ti del ba gi. Mi yiɗi mi yèe kòsòng jàk àyrra ndaram ni yèk jàk lòta yey rabim a gin Nitcoorra gi. ² Mi cèngni nit Kristu, fiwnuwan ha faktiturum taanti diga yeri ra sàm naan. Mi cèngni to jàk maan tâa go takundi ni isi koo kà àyrra ndaram ba. Sey Fay gbè cèngni. ³ Mi cèngni nge nit maan aw fiwnu ha a Paradi. Mi cèngni bak to jàk maan tâa go takundi ni isi koo kà àyrra ndaram ba. Sey Fay gbè cèngni. ⁴ A farra rage yèk ây tâa nirri ge kpàaw yèerra ba, tâa ti gesi nirri e yèe ba. ⁵ Mi râanirre ngam maan, amma ngam hak mum gim râani ba, sey ni jàk ây tâagim dàngdiya gi. ⁶ To mi yiɗi go ngin râanum gi, gim tâa ngin ray ba, ngam jày gim gàa gi takundi ɗi. Amma mi woofa râanum hak mum, ngam ta nirri e dàn a hak mum ha e hòmu di jày rabe a gin mum, koo rage a gin mum gi ba. ⁷ Amma ngam ta mi ’misi hak mum yèk jàk lòta ɓèl ây rabim gi ba, Fay de iimda jàk àyrriya a is mum, tâa mu gàa hîiwe orri di malayka Seyɗan e cubim, ngam ta mi ’misi hak mum ba. ⁸ Mi waawe di Nitcoorra nak taan, ngam ha e atnjimfa jàk àyrra maan. ⁹ Amma Nitcoorra de gàam: Woo mbâr mum e gerrum a jày gaygum gi, ngam mbinum mum mûurre a gin wey a ye tâamu dàngdiya gi. Hû go de hòmim yiɗum a tinîir mum mi râani yèk jàk ây tâagim dàngdiya, ngam ha mbinum Kristu e tâa a hak mum. ¹⁰ Ngam maan mi kâwsirre tinîir mum a jàk ây tâagim dàngdiya gi, a tinjàmni ây, a fòon, a ɗàar ây, a jàk ây àyrriya riimi ngam yèk Kristu. Ngam a ye tâami dàngdiya gi, mi dii kpèw. ¹¹ Mi yèeye kà ray, ye tâa un ndakimi a mbita kà yey. Gesi ngin un gòyni yèk mum, ngam koo ye tâa mi get koo jâ ba, mi hòm daw luurra da nit ɓèl tèerra ây ba. ¹² Ni èfta tinîiri dèy mi tèeye jàk ây a tîim wun, lòni nge miy mi nit yey tèem Yeesu ɗi gi, mi tèeye tèem jàk lònum ây ni kayeefi ây, ni tèem mbinum. ¹³ Ni jàk jâ hòmnu un luurra da nit kimjum ây kana, sonaa ye woomfa dun loosum ba ya? Yaafimin jàk makta yey! ¹⁴ E rri yey mi kèlfa dikta a gin wun nak taanti, gim loosunu ba. Mi kàmde jàk ta wun ba, amma sey hak wun. Ngam ti gesi a hàm ây aw ɗit daw da too rra waw ni nuu rra waw ba, amma a tooy ây ni nuu ây gaw ɗit daw da hàm ta waw. ¹⁵ Mi yiɗi a tinîir mum ha mi hîi jàk ta mum pî, koo hak mum ngam mi mgbaanjunu. Amma ye tâa mi iisirra dunde yiɗum gi, yiide wun ngam mum a ge atnji yi? ¹⁶ Un cèngni nge mi loosunu koo a jâ ba, amma un gàarre mi nit faarra ray ɗi, nge mi mòonu hakkilo wun ni gâra. ¹⁷ Koo nit kana a tîim nit ây tèemfa a gin wun gi, arra dun jày ni burma e koynima yi? ¹⁸ Mi waawe nà di Titus e diknjifa ni kor kana a gin wun. Gàa gun gàa, Titus tèenu tèem burma yi? Miy mi diknjirre ni ey a dànda kpolo ba yi, koo ot mòorre ot kpolo ba yi? ¹⁹ Mba un dànde diga mgban ot goosirre yèk hak worro a gin wun yi? Ti tâa hû go ba, amma ot yèerre kà nit ta Kristu a ɗàm kpees Fay. Un nit ây yiɗina ot gi, ot yèerre jàk ây gi pî ngam ot mgbaanjunu dikta ɗàm kpeesi a goosum. ²⁰ Mi tolle ye gim difa a gin wun gi, mba gim kpàanu kà yey yiɗim ba, un ɗa gun kpàam kà yey yiɗunu ba. Mi tolle mba kpàa gim kpàa tilètnjum, ni ngèeri, ni ngòlnji, ni tihàanjum, ni njeerra yèk makta, ni yèk tiyaynjurum, ni ’misum hay, ni anda yèy a tîim wun. ²¹ Ye gim difa a gin wun, mba Fak mum ûu ge ûunim a ɗàm kpees wun, kpàa gim kpàa àyrra tinîiri yèk nit ây dèy mbirgiri jàk maarra diga mgban, hàwge inum tinîir waw a tèem ’miskum, ni njeenu, ni haanum tuy.

¹ Mi kèle mi difa a gin wun nak taanti. Yèy pî gò ge gòy a yèk nit seedum ây cuk koo taan, kà yey gàa a defterre Fay gi. ² Mi gàa dawrre da nit ây mbirgiri jàk maarra diga mgban, ni nit ây pî hàanje gi, kà yey gàami daw nà a ye tâanjim ni un nak cukti, mi gàafa dawrre bak kòsòng ye tâami kpâarriya gi: Mi difa go, gim gop daw ni ’maton ba. ³ Ye tâa un yiɗirre cèngnum nge Kristu yèera dunde ni mgbelyèk mum, kpàa gun kpàaw ey ti tâa dàngdiya a tîim wun ba, amma dii kpèw. ⁴ Aw gbaluge nà a minjum kpiiri ngam dàngda wàa, amma gûyrre ni mbinum Fay. A ’mèmsum worro ni ey orro ɗa ot dii dàngdiya, amma a tèerra tèem worro a gin wun gi gû got gûy ni ey a mbinum Fay. ⁵ Gerrin hak wun, un gobu to un gûyrre go a goosum! Koo un cèngni nge Kristu tâarre a tinîir wun ba yi? To naa hû go ba, gun gòy ngin mbâra a goosum ba. ⁶ Amma mi dànde, cè gun cèngni nge orro ot èe gòyrra mbâra a goosum ba. ⁷ Ot waarre Fay ngam ta un tèe jàk makta koo jâ ba, naa ngam orro ot lòt ot nit gòyrra mbâra ɗi, amma ngam un tèe jàk mbâri, koo tâa ge tâa go orro ot lòtɗe kà nit ây èege gòyrra mbâra a goosum gi. ⁸ Ngam got kpàa tèerra jày ha ot hàanji takundi gi ba, amma sey ngam takundi gbè. ⁹ Ot kâwsirre tinîiri a ye tâana orro dàngdiya, a ye tâanu un kpèw gi. A waar worro ɗa ot waawrre di Fay, ha e mbangsunu un tâa getiya. ¹⁰ Ngam maan de kèrmifa yèk ây gi a ye tâami kpâarriya, ngam ye gim tâanji ni un gi, ta mi tèe ni yèk ndèkta a mbinum yey hîim Nitcoorra gi ba. Mi kpàa mbinum maan ngam mi mgbaanjunu dikta ɗàm kpeesi a goosum, ti tâa ngam mi gbeesunu ba. ¹¹ Jày ngaskirra gi un kor ta mum, kâwsin tinîir wun, mbangsin hak wun un tâa getiya, ngorin yèk mgbèngda ây, ’mèmsin dànda wun kpolo, raknjin ha un tâanji mbâra a tîim wun! Hû go Fak yiide Fak tâam mbâri tâa ge tâanji ni un. ¹² Kèpnjin a tîim wun ni tikapni kor goosum ây! A nit della ta wàa di Fay pî aw kèpfa dunde. ¹³ Mbâr Yeesu Kristu Nitcoorra, ni yiide Fay, ni ’mèmsum Jungci Delliya e tâanji ni un pî!