1 Timote

¹ Miy mi Pawlu, mi nit yey tèem Yeesu Kristu kà yey gàa Fay Tooy saanum worro, ni Yeesu Kristu tâage jàk dànda worro gi, ² mi kèbumfarre Timote, hàm takundi mum a yèk goosum. Nge Fay Tooy ni Yeesu Kristu Nitcoorra worro aw hîim mbâr waw, ni ’maton, ni tâam mbâri! ³ A ye tayim a dees Makedoniya mi gàami nà, mu tâa bak a Efesu, ngam ha mu njang daw da nit ây kana kàlnji yèk rèeng gi, ⁴ mu gàa daw, ta aw gatki yèk saga ni-Yude ây, ta aw yèergi yèk yòot nit ây gbèeni cen gi ba. Ngam jàk ây gi ’maa gaw ’maara hàanjum yèy, gaw mgbaanji koo jâ a jày yiɗi Fay ba, yey ge saanu di nirri a goosum gi. ⁵ Gbèeni tèem yèk mgbèngda tâage yiide, anga a tinîir ɓetkumya ni dànjum mbâra, ni goosum takundi cen rèeng gi. ⁶ A nit ây kana aw gbeeye orri a yèk maan, aw jòle a yèk ɓa hû go. ⁷ Aw yiɗi tâarra nit kàlnjum yèk mgbèngda, koo ye tâa aw cèngni jày yèen mbâra ba, koo jày gàan ni gòyrra kpèw ɗa ba. ⁸ Amma orro ot cèngni, yèk mgbèngda delliya ɗi to nirri tèenirre go kày gesi gi, ⁹ to ɓaysirre go, yèk mgbèngda ti tâa ngam nit ây gòyge ɗèm ba, amma dii ngam nit makta ây, ni nit ây tâa aw rakɗe tuy ba, ni nit ây hàanje Fay, ni nit ây tèege jàk maarra, ni nit ây tâa aw coorre Fay koo jày tâage delliya gi ba, ni nit ây ɓàari too rra waw koo nuu rra waw, ni nit ây ɓàari nirri, ¹⁰ ni ngam nit ây iire njeenu, ni nit ây kûunjiri nihun ni nihun, ni nit ây sàangi sàay ây, ni nit ây rèengri rèeng, ni nit ây hàari tihàani yèk rèeng, ni koo wun yewge a yèk kàlnjum takundi gi. ¹¹ Yèk kàlnjum yey ana a Yèk Kâwrra hîimin ha mi sak gi; Yèk Kâwrra Fak mbârsum ni ’mita wàa. ¹² Mi gàarre mbew di Yeesu Kristu Nitcoorra worro kpèwsim gi, ngam ey raptim kà nit mbâra, de iim ha mi tèe tèem wàa, ¹³ dim nit yey maasi nà mgban nîir wàa gi, ɗàage nà ɗàari da nit goosum ta wàa, tâage nà ngàskiya gi. Amma mi kpàa ’maton a gin wàa, ngam mi tèe nà jàk ây gi a èca cèngnum ni èca goosum. ¹⁴ Yeesu Kristu Nitcoorra worro ey hîimi gbaarra mbâr wàa, ’mèmsa ni goosum, ni yiide yey tâagina a gin wàa gi. ¹⁵ Yey tâage yèk takundi, getke ha koo wuna e ngor gi: Yeesu Kristu dàarage a kparri, ngam ha e saani da nit ây tèege jàk maarra. Miy mi hòm daw tèerra jàk maarra a tîim waw pî. ¹⁶ Amma mi kpàa ’maton a gin Yeesu Kristu. De lòne èfta tinîir wàa pî a gin mum tâage nit mbita jàk maarra hòmgi daw lang gi, ha mi tâa jàk kàlnum da nit ây gaw goosi nîir wàa, aw kpàa gûyrra tâam timgbàri gi. ¹⁷ Coorra ni ’mita e tâa di Fay kpolo koo ningàa, tâa ge gbèe ba gi, tâa nirri ge rabu ba, wûunde tâam timgbàri ha tâam timgbàri. ¹⁸ Timote hàm mum, mi wasumde jàk ây, getnji ni yèk yey lònin nà mgban a hak wey gi, ngam ha mu haani gbàat mbâra ni yèk ây gi. ¹⁹ Sey mu mòo goosum ni dànjum tinîir mbâra. A nit ây kana woogifa dànjum tinîir mbâra gi, aw gbeesi goosum waw. ²⁰ A tîim waw dii Himinayu ni Aleksanda. Mi woo daw a kàn Seyɗan, ngam ha aw èngni kà yey, aw woofa maasum nîir Fay.

¹ Màrra mi mgbèngnu, un lòni di Fay jàk gunda, ni waarra, ni kàmda yèk nit kana, ni gàarra mbew ngam nit ây pî, ² ngam wûun ây, ni nit ɓèl ây, ha ot kpàa tâarra mbâra cen yèk kana, ot tâa nit ây tolge Fay, ot tâa mbâra a nis nit ây. ³ Kà yey dele, dii kâwrriya a ɗàm kpees Fay Tooy saanum worro. ⁴ Ey yiɗi ha nit ây pî aw saa, aw kpèt a cèngnum yèk takundi. ⁵ Ngam Fay dii kpolo. Nirri kpolo tâarre nit raknjum a tîim Fay ni nit ây, Yeesu Kristu ɗi, ⁶ yey hîige hak wàa ha e sàasi da nit ây pî aw tâa tiròom. Hû go ey lòne yèk Fay a mgbàr yey getke gi. ⁷ Ngam maan Fay de iimi mi tâa nit kàlla yèk yey, ni nit tèerra. Mi yèerre takundi, mi rèengde ba, mi kàlnjirre yèk goosum ni yèk takundi da nit ây èege yèk Fay. ⁸ Mi yiɗi, a nihun ây aw waa Fay koo u hâ pî, aw aanji kàn ta waw ni tinîir ɓet ɓet, cen ngòlnji, cen hàanjum. ⁹ Mi yiɗi ɗa, ha nikin ây aw mgbap lurra kày gesi gi ni hakkilo, cen ɗèpsum. Della waw ta e tâa ni ndàta hay, koo ni jàk kangeerri, koo ni tiɗoon ây, koo ni jàk mgbapta yey àyge sàari ba, ¹⁰ amma ni tèem mbâri, kà yey gesi da nikin ây yiɗi aw lòni tolnji Fay, aw coow gi. ¹¹ Sey nikin e èngni jày ni tâarra baak baak, ni rakta tuy. ¹² Mi hîiw orri di nikin e kàlnji jày ba. Ta e ii hak wàa e hòmu di nihun ba, sey e tâa baak baak. ¹³ Ngam Fay mbangsi màrra Adam, a dat maan Hawa. ¹⁴ Adam ɗa ti ngor jàk rûfta Seyɗan ba, amma kin wàa kîrge ngota, yewge yèk Fay. ¹⁵ Amma nikin saa ge saa ni kpàarra hàm ây, to gòyrre go a goosum, ni yiide, ni tâam delliya, ’mèmsa ni hakkilo gi.

¹ To nirri kàm go tâarra nit tiɗàm kpeesi, ey kàme tèem mbâra. ² Sey nit tiɗàm kpees waw da nit kimjum ây e tâa nirri cen yèk kana a hak wàa, e tâa ni kin kpolo, nit dànda tèes, nit hakkilo, nit mbâri, nit ngota ni-wooy ây, nit mbinda kàlnjum. ³ Ta e tâa nit râmrum mbàl koo nit hàargum gbàaci ba, amma e tâa nit mgbergum yèy. Ta e tâa nit lètnjurum koo nit yiɗum seede ba. ⁴ Sey e tâa nit yey mbinge mòorra nit àay rra wàa mbâra, e tâa ni hàm ây rake tuy, tâage mbâra a nis nit ây. ⁵ Ngam nit tiɗàm kpeesi to mbin go mòorra nit àay rra wàa ba, kà ge mbin faarra da nit ta Fay kimje gi ya? ⁶ Ta e tâa ɗa nit fûuya a goosum di Fay ba, ngam ta e ’misi hak wàa, ha e yaa a kiita Seyɗan ba. ⁷ Sey e tâa ni seedamku mbâra a gin nit ây tâa aw dàara a kimjum ba, ngam ta aw yèe yèk makta a hak wàa, ha e lek a tidokri Seyɗan ba. ⁸ Hû go nit tèem mgbaanjum ây a tîim nit kimjum ây ɗa sey aw tâa mbâra a nis nit ây, ta aw tâa nit yèk cuk cuk ba, ta aw njoorgi mbàl dèy ba, ta aw tâa nit yiɗum kpàarra jày ni tèem makta ba. ⁹ Sey aw mòo yèk yey tâage nà fûurriya a goosum gi ni dànjum tinîir burriya. ¹⁰ Amma ɗà sey aw gerri daw, ngam to yèk kana cen go a hak waw ba, a dat maan aw mòo tèem mgbaanjum gi. ¹¹ Hû go ɗa kin ta waw sey aw tâa mbâra a nis nit ây, ta aw cîinji yèy ba, aw tâa ni dànda tèes, aw tâa kin mbâr ây a jày pî. ¹² A nit tèem mgbaanjum ây sey aw tâa nirri ni kin kpolo, aw mbin mòorra hàm ta waw ni nit àay rra waw mbâra. ¹³ Ngam nit tèem mgbaanjum ây tèege tèem waw mbâra, aw kpèrre ni hak waw a gin gòyrra mbâra, kpàa gaw kpàa yèerra jày pî tolnji cen a goosum a nîir Yeesu Kristu. ¹⁴ Mi dànde, di gim difa a gin wey ɗàm kpeesi càa. Amma mi kèrumfarre yèk ây gi, ¹⁵ ngam to mi tòofa go dikta, ha mu cèngni jày gesi mu mbir a tîim mûsa nit kimjum ây tâage nit ta Fak beengiya, tâage kpiir tigòyni yèk takundi ni gin tata wàa gi. ¹⁶ Fûurra yèk Fay gi dii ’mitiya, takundi, nirri ge kpàaw hàanjum ba: Ey lòrre ni isi, tâaye ɗèm ni Jungci Delliya, lòtɗa dawge da malayka ây, tâaye kàlliya a gin nit dees ây, aw goosuge a kparri, Fay naansuge a ’mita wàa.

¹ Jungci Delliya gàa takundi, nge a mgbàr gbèeni a nit ây kana woo gaw woofa yèk goosum, fu gaw fut da jungci tirûfrum ây, ni yèk kàlnjum tindòom ây. ² Fu gaw fut da nit tibiw ây rèengri yèk rèeng, tâage dànjum tinîir waw wutiya, mu gàa jàk kpèfrum ni titefki nîige a ebi. ³ A nit ây gi aw njangde ata kin, aw kàl dawrre aw woofa riirra tiriit ây kana mbangse Fay, ngam nit goosum ây cèngni yèk takundi gi, ngo gaw ngor ni gàarra mbew. ⁴ A jàk ây mbangse Fay pî delliya ɗi, cen jày tâage ha nirri e hàw ba, to ngotɗe go ni gàarra mbew gi. ⁵ Ngam yèk Fay ni waarra Fay ɗa delsirre jàk maan. ⁶ To mu kàl dawrre go yèk ây gi da kor ây, tâa gum tâa nit mbâra a tèerra tèem Yeesu Kristu, ye tâa yèk goosum ni yèk kàlnjum mbâra tâagum tiriit wey, futmu gi. ⁷ Amma sey mu hàw saga ni-Yude ây tâage raya, delgi daw da mâynji kin ây gi. Hâsi hak wey a tolla Fay! ⁸ Ngam hâsum isi jàk della càa ɗi. Amma tolla Fay jàk della ɗi koo a jâ pî, dii ni jàk wasta yèk gûyrra a tâarra yey ha ɗàm kpeesi. ⁹ Yèk yey takundi ɗi, getke ha koo wuna e ngor gi. ¹⁰ Ngam maan ot hâtɗe ni riirra ’màari a tèerra tèem, ye tâa ot ii jàk dànda worro a gin Fak beengiya, tâage Tooy saanum nit ây pî hayye da nit ây goosu gi. ¹¹ Yèe yèk ây gi pî, kàlnji daw ɗa. ¹² Ta koo wun e luusum a tâam lor wey ba, amma tâa kà jàk kàlnum da nit goosum ây, a yèerra yèy, ni dikta dikri, ni yiide, ni goosum, ni tâarra ɓet ɓet. ¹³ Ii kpèw kpèw wey a janggunum da nit ây, ni mgbèngda yèy, ni kàlnjum jày, ha ye gim difa gi. ¹⁴ Ta mu woofa lònum hîir Jungci Delliya ba, yey kpàam a yèk lònum ni iirra kàn toonji nit goosum ây gi. ¹⁵ Dàn a jàk yey, tèeni ni erra, ngam ha iisum wey a dikta ɗàm kpeesi e lòt a gin nit ây pî. ¹⁶ Faasi hak wey, ni yèk kàlnjum ɗa, mu rûu a yèk maan. Ngam to mu tèerre go kà yey, saa gum saani hak wey ni nit ây rakum gi ɗa.

¹ Ta mu kpânu di toonji ba, amma mu yèewrra mu gàa di too wey. Da lor ây yèe daw mu gàa da kor ta wey, ² di mâynji kin mu gàa di nuu wey, da sapri ây ɗa mu yèe daw ni yèk ɓet ɓet pî mu gàa da say rra wey. ³ Coo da kin wurra ây tâage kin wurra ây takundi gi. ⁴ Amma to kin wurra dii go ni hàm ây koo ni hàm hàm ta wàa, sey a hàm ây aw èngni tèerra tèem a tolnji Fay da nit gbaa rra waw, aw insi mbâri di nuu waw ni nuu way waw, ngam kà yey dii kâwrriya a ɗàm kpees Fay. ⁵ Kin wurra takundi tâage kpolo wàa gi, ey ii jàk dànda wàa a gin Fay, gunde mgbaanjum wàa, waawrre tuma ni unji. ⁶ Amma kin wurra yey kàmge kâwsum hak wàa gi, ey wurre koo ye tâa dii beengiya. ⁷ Sey mu mgbèng daw yèk ây gi, ngam ha aw tâa cen yèk kana a hak waw. ⁸ To nirri kpâani dawrre go nisi da nit ta wàa koo da nit àay rra wàa, ey hàanji a goosum, hòm daw makta da nit ây tâa aw goosu di Fay ba. ⁹ Kèr nîir kin wurra to kpèt go yeri ra yira, to tâa go nà ni maa kpolo gi, ¹⁰ to lònirre go tèem mbâra, ɗir go nà a hàm ây, ngor go da ni-wooy ây, kòle go nay da nit della ta Fay, mgbaanji daw go da nit ây riige ’màari, to futɗe go tèerra tèem mbâra gi pî. ¹¹ Amma hàw kèta nîir kin wurra ây tâage sapriya, ngam to aw siisi go tinîiri, woo gaw woofa coorra yèk Kristu, aw yiɗi diksum di nit kana. ¹² Hû go aw leknirre hak waw a kiita, aw woofage goosum waw woy màrra. ¹³ Aw ɗa aw èngnirre tâam ɓa hû go, aw gîtɗe a àay ây. Ti tâa tâam ɓa hû go gbè ba, amma aw ire ticîinjum yèy, aw lekri yèk ây, aw yèerre jày tâa ti gesi aw yèe ba. ¹⁴ Kà yey mi yiɗi, a kin wurra ây tâage sapriya aw diksi di nit kana, aw kpàa a hàm ây, aw mòo tèem àay waw, ngam ta aw woo orri da nit yiir ây aw yèe yèk makta ba. ¹⁵ Ngam a kin ây kana a tîim kin wurra ây gi aw gbeeye orri aw furre Seyɗan. ¹⁶ Amma to kin goosum dii go ni kin wurra ây a gbaa wàa, sey e mgbaanji daw, ta e toksirra daw tèem maan da nit kimjum ây ba, ngam ha aw kpàa mgbaanjum da kin wurra ây tâage kin wurra ây takundi. ¹⁷ A toonji nit kimjum ây tèege tèem waw mbâra gi, daw gesi un jing daw diɓoɓo, hayye to aw loo go a sakta yèy, ni kàlnjum jày. ¹⁸ Ngam gàa a defterre Fay: Ta mu leknurra timûugum a mgbel@yèy di gusi a fòorra tirri ba. Aw gàa ɗa: Nit tèerra tèem gesi e kpàa bèeb tèem wàa. ¹⁹ Ta mu ngor to aw ’maara go yèk makta a hak toonji nit kimjum ây ba, sey to nit seedum ây cuk koo taan aw seedi go yèk maan. ²⁰ Da nit ây mbirge jàk maarra, sey mu yèe daw a ɗàm kpees nit kimjum ây pî, ngam ha nit ây kana ɗa aw toli. ²¹ Mi hàamde a ɗàm kpees Fay ni Yeesu Kristu, ni malayka ây catiya: Mòo yèk ây gi pî cen hàanjum, ta mu tèe tèem wey ni raptum nis nit ây ’nang ’nang ba. ²² Ta mu kîr iirra kàn a hak nirri ba, ngam ta mu ’mèmsi a jàk maarra nit ây kana ba. Faasi hak wey mu tâa ɓetkumya. ²³ Ta mu njoo sòo gbè ba, sey mu njoo mbàl timgbokcum càa ngam àyci himni wey, ni yèk dàngda is wey dàngrum mgbàr kana ’nang ’nang. ²⁴ Jàk maarra nit ây kana lòtɗe ɗoko kiita e ii gi, amma a gin nit ây kana lò ge lòt a dat kiita. ²⁵ Hû go ɗa tèem mbâra lòtɗe a nis nit ây. Koo tèem kana tòo go lòta, ge tâa fûurriya ba.

¹ A sàay ây tâage a ti ’mèmni gi pî, sey aw rapti daw da nit ɓèl ta waw aw getke coorra, ngam ta nîir Fay ni yèk kàlnjum wàa e tâa maasumya ba. ² A sàay ây tâage ni nit ɓèl ây goose yèk Fay gi, ta aw luusi daw ba ye tâa aw a kor ây ɗi gi, amma sey aw hòm daw tèerra mbâra, ngam a nit ɓèl ta waw gi a nit goosum ây ɗi, aw ɗa aw kàmde mbita jàk mbâri. Sey mu kàlnji daw, mu sagi daw yèk ây gi. ³ To nirri kàlnjirre go yèk kana, mòorre go yèk takundi, yèk Yeesu Kristu Nitcoorra worro, ni yèk tolnji Fak worro ba, ⁴ ey ’misirre hak wàa, ti cèngni koo jâ ba. Kàmde jàk kana ba, sey gatkum yèk ây, ni hàanjum a gin yey ge ana gbokri gi, ni tilètnjum, ni maasum, ni dànda maktiya, ⁵ ni hàanjum yèy a tîim nit ây tâage ni dànda waw mboyrriya, gbeege yèk takundi gi. Aw aw dànde, tolla Fay gi gin kpàarra jày ɗi. ⁶ Takundi, tolla Fay gi gin kpàarra jày ɗi dèy, to ’mèmsi go ni suurra tinîiri. ⁷ Ngam ot lekra ni jày a kparri ba, hû go ɗa got kpàaw yuurra ni jày a kparri gi ba. ⁸ To tiriici diina go ni jàk buta, getna kà yey. ⁹ Amma a nit ây kàmge bèebi dèy, le gaw lek a jàk rûfta, ni tidokri a gayam dèy tâage tâam ray ni tâam makta, yey ge yaani da nit ây a fòon ni gbeerra gi. ¹⁰ Ngam yiɗum seede e tâage sisi tèem makta pî. A nit ây kana aw dii ni gayam maan, ha aw gbeeye orri aw woofage goosum waw, aw lekni hak waw a jàk àyrra ây dèy. ¹¹ Amma muy mu nit Fay, ’nòo jàk ây gi! Fut tâarra ɗèm, ni tolnji Fay, ni goosum, ni yiide, ni èfta tinîiri, ni fetkum tinîiri. ¹² Haa gbàat mbâra a goosum, mu mòo gûyrra tâam timgbàri yey diimu ’naasumya ngam maan, ye lònum yèk hak wey mbâra a ɗàm kpees nit seedum ây dèy gi. ¹³ Mi mgbènggumde a ɗàm kpees Fay Tooy gûynum jày pî, ni Yeesu Kristu nit yey seede yèk hak wàa mbâra a gin Pontiyu Pilatu, ¹⁴ furri yèk mgbèngda gi, e tâa mbâriya ɓet ɓet ha a mgbàr lòta Yeesu Kristu Nitcoorra worro. ¹⁵ Fak mbâri, Tooy Ɓèl kpolo tâage wûun da wûun ây, Tooy coorra da nit coorra ây, ey lò ge lònu di Yeesu Kristu a mgbàr yey gòyni gi. ¹⁶ Ey kpolo wàa tâage Tooy tâam timgbàri, ge wut ba sam, dii a kayang a gin yey tâa nirri ge hèewrra ba, cen nirri haagu rapta ba, koo wuna ɗa ge kpàaw rapta ba. Dey tâa coorra ni mbinum tâam timgbàri! Amen. ¹⁷ Mgbèng daw da nit bèeb ây tâarra yey ta aw ’misi hak waw ba, ta aw ii jàk dànda waw a bèeb yey ge lòo gi ba, amma aw ii a gin Fay, hîigina gbaarra jày pî ngam ot ragu kâwum maan gi. ¹⁸ Mgbèng daw aw tèe jàk mbâri, aw tâa ni tèem della ây dèy, aw tâa nit hîirra hîir ây, aw mîinji jàk ta waw ni nit ây kana. ¹⁹ Kà yey aw kimjirre yèk hak waw bèeb mbâra takundi ngam unji kana ge dàara gi, ha aw ngor gûyrra yey tâage gûyrra takundi. ²⁰ Timote, mòo jàk yey hîiman gi! Jèmfa, woofa yèk ây tâage ɓa hû go tâa ti getnji ni yèk Fay ba gi, ni yèk hàanjum ây rèenggin cèngnum jày gi. ²¹ Ngam a nit ây kana gàagi ni hak waw aw dii ni yèk cèngnum maan gi, aw gbeeye ot goosum. Mbâr Fay e tâanji ni un!