1 Ni-Tessaloniki ây

1 Ni-Tessaloniki ây

¹ Miy mi Pawlu, ni Silas, ni Timote ot kèpfa dunde dun nit ây kimje a Tessaloniki, tâage nit ta wàa di Fay Tooy ni Yeesu Kristu Nitcoorra gi. Nge mbâr waw ni tâam mbâri e tâanji ni un! ² Ot gàarre mbew di Fay koo ningàa ngam wun pî. Unji pî ot ɓaysunurre a waarra waar worro. ³ Ot ɓaysirre a ɗàm kpees Fay Too worro yèk goosum wun lòne tèerra tèem, ni yèk yiide wun lòne rîirra kpèw, ni yèk jàk dànda wun tâagunu ni èfta tinîiri a gin Yeesu Kristu Nitcoorra worro gi. ⁴ Ot cèngnige, un kor ta worro, Fay yiɗunuge, catnuge ngam un tâa nit ta wàa. ⁵ Ngam ot saknu Yèk Kâwrra ni yèerra yèy gbè ba, amma ni mbinum, ni mgbaanjum Jungci Delliya, ni mòorra mbâra a goosum. Un cèngni kày tèena orro a tîim wun ngam mbâr wun. ⁶ Un un furre dikri worro, un futɗe di Yeesu Nitcoorra ɗa, ye ngotnu yèk Fay ni kâwum yey hîi Jungci Delliya gi, koo ye riinu ’màari. ⁷ Hû go un ire kà jàk kàlnum da nit goosum ây pî tâage a dees Makedoniya ni Akaya. ⁸ Ngam yèk Nitcoorra tèeye tèem dèy a gin wun, ti tâa a Makedoniya ni Akaya gbè ba, amma yèk goosum wun di Fay yeskige koo u hâ. Kà yey gayam cenna ha ot kàl yèk wun da nit ây kana ba. ⁹ Ngam a nit ây ’maaga yèy pî aw sage kày ngotnu un dot mbâra, ye difa ot a gin wun, kày woofa un tèem mâr ây, kày inunu tinîir wun a gin Fay, ngam un tèe tèem Fak beengiya, Fak takundi gi. ¹⁰ Un waatirre dàarra Hàm wàa diga faktiturum, tâage Yeesu gûysu a wurra, saanina a ngòlnji Fay ge dàara gi.

¹ Un kor ta worro, un ni hak wun un cèngnige, ye difa ot a gin wun, tèem worro ti tâa ɓa hû go ba. ² Un cèngni ɗa, ot rii nà ’màari a Filippi, aw ɗàana ɗàari a farra. Amma koo hû go Fak worro hîinage mòorra tinîiri, ha ot saknu Yèk Kâwrra wàa ni tihàanjum dèy. ³ Ngam sakta yèk worro ti tâa yèy anga a yèk rèeng, koo a tèem ’miskum, koo a gâra ba. ⁴ Amma ot yèerre kà yey yiɗi Fay, ngam ey rapna ot gerre sakta Yèk Kâwrra, de hîina yèk maan. Hû go ot yèerre ngam kâwsum di nirri ba, amma ha ot kâwsu di Fay. Ey cèngni tinîir worro. ⁵ Orro ot haa yèerra ha ot kâwsi tuk nirri ba, kà yey cèngnunu gi. Ot dàara ot ii gâra kpàarra jày ba, Fay seedirre jàk yey. ⁶ Orro ot kàm ha a nit ây aw ’misina ba, koo a gin wun, koo a gin nit ây kana ba, ⁷ koo ye tâa got kpàa iirra hak worro kà nit ɓèl ây, ngam ot nit ây tèena Kristu ɗi gi. Amma ot mgbergirre yèk worro a tîim wun, kà kin ɗirge hàm wàa. ⁸ Un lukna nisi, gesina ha ot hîinu naa Yèk Kâwrra Fay gbè, amma jungci is worro ɗa. Ngam ot yiɗunuge. ⁹ Un kor ta worro, un ɓaysirre yèk hâta tèem worro ni loca worro tuma ni unji, ngam ot yiɗi ot loosu koo di nirri kpolo a tîim wun ba, ye tâana a tîim wun ot saknu Yèk Kâwrra Fay gi. ¹⁰ Un un seedirre, ni Fay ɗa, tâam worro a tîim wun un nit ây goose gi ɓetkumya ɗi, ɗèm ɗi, cen yèk kana a hak worro. ¹¹ Un cèngni, ot mbire koo di wuna a tîim wun kà tooy mbirge da hàm ta wàa. ¹² Ot rûusunuge, ot ndèksunuge. Ot mgbèngnuge un dik kày gesi a ɗàm kpees Fay, ’naasunu a wûun wàa ni ’mita wàa gi. ¹³ Hû go ot woofa gàarra mbew di Fay ba. Ye ’maafa ot yèk Fay a gin wun, un rage, un ngor kà yèk nirri ba, amma kà yèk Fay. Takundi yèk Fay ɗi tèege a tîim wun, dun nit ây goosu gi. ¹⁴ Un kor ta worro, un furre da nit ta wàa di Fay ni Yeesu Kristu, kimje a dees Yude gi. Ngam un ɗa un rii ’màari a tîim nit ta wun kà yey riin aw ɗa ’màari a tîim nit ta waw ni-Yude ây, ¹⁵ a ni-Yude ây ɓàrge Yeesu Nitcoorra, ni nit ây lòni nà yèk Fay gi. Aw mànna dorro ɗa. Tèem waw ti delu di Fay ba, aw a nit yiirra nit ây ɗi pî. ¹⁶ Aw njangna sakta yèk saarra da nit ây èege yèk wàa. Hû go jàk maarra waw iisirrarre mûurra koo ningàa. Amma ngòlnji Fay tèksi dawge mgban. ¹⁷ Un kor ta worro, ye tâa ot ɗòlnji ni un unji càa ni nisi, amma ni tinîiri ot ɗòlnji ba, gaynarre dèy ha ot hâtɗe kàmda orri ngam ot rapnu. ¹⁸ Kà yey ot yiɗi ot isifa a gin wun, miy mi Pawlu mi haawe unji ’nang ’nang, amma Seyɗan njangnage orri. ¹⁹ Ji tâagina jàk dànda worro, ni jàk kâwsum tinîiri, ni jàk ’misunum hak worro gi ya? Naa un ɗi a ɗàm kpees Yeesu Nitcoorra worro, ye ge dàara gi naa? ²⁰ Ngam un tâagina ’mita worro ni kâwum tinîir worro.

¹ Ye tâa a dat maan ot kpàa èfta tinîiri ba, ot dàne ndika ot tâa kpolo worro a Atena. ² De tèefa ot Timote, kor worro, nit tèenjum tèem Fay ni orro a sakta Yèk Kâwrra Kristu, ha e gòynunu a goosum wun, e kpèwsunu tinîiri. ³ Ngam ta aw yûusu koo di wuna a tîim wun a riirra ’màar ây gi ba. Un cèngni, gesina ot rii ’màari. ⁴ Ye tâanjina nà ni un gi, ot kàlnuge nà mgban, gaw ɗàana ɗàari. Un cèngnige, jàk maan kpèrra kà yey. ⁵ Ngam maan ye tâa mi kpàa èfta tinîir mum ba, de tèemifa Timote, ha mi cèngni yèk goosum wun. Ngam mi tole, mba Seyɗan rûfnu go, ha loca tèem worro e tâa ɓa hû go gi. ⁶ Amma kòsòng Timote ye ana a gin wun, koyra gi, saknage yèk kâwrra a goosum wun, ni yiide wun. Saknage ɗa, un ɓaysinarre mbâra koo ningàa, un yiɗi un rapna kà yey yiɗina orro ɗa ot rapnu gi. ⁷ Hû go un kor ta worro, goosum wun kpèwsinage tinîiri a fòon, ni ’màar yey riina gi pî. ⁸ Orro ot gûyrre, ye tâa un un gòyrre kpèw a gin Nitcoorra gi. ⁹ Got kpàa ot ini mbew yey ge gerru di Fay ba, a kâwum yey pî kâwsina tinîiri ngam wun a ɗàm kpees wàa. ¹⁰ Tuma ni unji ot rîirre kpèw a waarra Fay, ha ot rap nis wun, ha ot iisirra dun jày âygirra a goosum wun. ¹¹ Nge Fay Too worro ni hak wàa, ni Yeesu Nitcoorra worro aw hîina orri ot irfa a gin wun! ¹² Nitcoorra e hîinu ’mita un ’mirri, e iisirra dun yiide a tîim wun ni gin nit ây pî, kà yey yiɗina ot dun gi. ¹³ E kpèwsunu tinîiri, ha un tâa delliya a ɗàm kpees Fay Too worro cen jàk maarra, a mgbàr yey ge ira Yeesu Nitcoorra worro ni mûsa nit della ta wàa gi.

¹ Un kor ta worro, yèk kana ngas dotke. Orro ot kàlnuge, kày gesi dikri wun e delu di Fay. Koo ye tâa un mbitɗe hû go, ot waanurre ot mgbèngnurre ni nîir Yeesu Nitcoorra, un iisirra dikta ɗàm kpeesi ɗàm kpeesi a dikri maan. ² Ngam un cèngni yèk mgbèngda Yeesu Nitcoorra, yey kàlna ot dun gi. ³ Fay yiɗi un ɓetkini hak wun, un woofa njeenu. ⁴ Koo wuna a tîim wun sey e cèngni, kày ge at kin, aw lòni tâam delliya a nis nit ây, ⁵ naa a gbaarra gayam, kà yey mbirin a nit ây tâa aw cèngni Fay ba. ⁶ Ta nirri a tîim wun e yew, e mbiru jàk maarra ni gâra di kor wàa ba. Ngam Nitcoorra kà ge kànsi jàk ây gi pî, kà yey kàlna ot dun, yèenu ot dun mgban gi. ⁷ Fay ti ’naasina ot tâa ’miskumya a ɗàm kpees wàa ba, amma ’naasina ot tâa delliya. ⁸ Hû go to nirri hàw go yèk yey, ti tâa di nirri hàwe ba, amma hàwu di Fay hîigunu Jungci Delliya gi. ⁹ Amma a yèk yiide a tîim kor goosum ây, ot cen ni gayam ha ot kèrfa dun jày ba. Ngam un ni hak wun un èngni a gin Fay, gesi un yiɗinji a tîim wun. ¹⁰ Un kàlnirre yiide kà yey da kor ta wun tâage a dees Makedoniya lang. Amma un kor ta worro ot gàanurre, iisirran mbita kà yey, un dik ɗàm kpeesi ɗàm kpeesi. ¹¹ Hârin tâarra mbâra a tîim nit ây, iin nis wun a jàk ta wun, tèen tèem ni hak wun kà yey mgbèngna ot dun gi. ¹² Hû go tâa gun tâa mbâriya a nis nit ây tâa aw cèngni yèk Fay ba, gun tâa ni gayam a jàk kàn nirri ba. ¹³ Un kor ta worro, ot yiɗi un èe cèngnum yèk nit ây wutke gi ba, ngam ta tinîiri e àynu kà nit ây kana, tâa aw cen ni jàk dànda a yèk maan ba. ¹⁴ Ngam ot goosirre, Yeesu wurre gûysige. Hû go ot goosi ɗa, nge a nit ây goosu wutke gi, Fay gû ge gûysi daw e koyni daw ni ey. ¹⁵ E rri yey ot kàlnurre kà yey gàa nà Nitcoorra: Ot nit ây tâage beengiya, ngaske a mgbàr dàarra Nitcoorra gi, got ɗàa daw anda da nit ây wutke gi ba. ¹⁶ A unji maan Nitcoorra ni hak wàa a ge ana a faktiturum, a rakta tibimni ni gûn ɓèl waw da malayka ây, ni rakta ti uta Fay. A nit ây goosu di Kristu wutke gi, ɗàa gaw ɗàa anda. ¹⁷ A dat maan ot nit ây got ngas beengiya gi, orro ngaa a gaw atna ot ’mèmsi ni aw a titurum, ha ot kpàanji ni Nitcoorra u fay. Kà yey tâa got tâanji ni ey tâam timgbàri. ¹⁸ Rûunjin ni yèk ây gi a tîim wun!

¹ Un kor ta worro, un cen ni gayam, ha ot kèrfa dun jày a yèk mgbàr maan ni unji maan ge mbir jàk ây gi ba. ² Ngam un ni hak wun un cèngni mbâra, unji Nitcoorra dàa ge dàara kà oori ni tuma. ³ A nit ây aw gàarre go «jày pî dii mbâra, gòyrre kpèw», gbeerra kpè ge kpèt daw yaale, kà àyrra hàm di kin himni a ye ge kpàa gi, gaw saa ba sam. ⁴ Amma un kor ta worro, un cen a kulpi ha unji maan e kpètɗa dun kà oori ba. ⁵ Un pî un hàm kayang ây ɗi, un hàm unji ɗi. Orro ot cen a tuma, koo a kulpi ba. ⁶ Hû go ta ot kûu kà nit ây kana ba, amma dàan ot mûyi, ta ot tâa kà nit râmda mbàl ba. ⁷ Ngam a nit ây kûuge gi, ni tuma kûun. A nit ây râmi daw mbàl gi, ni tuma râmi daw. ⁸ Amma orro ot nit unji ɗi, ta ot tâa kà nit râmda mbàl ba. Dàan ot mgbap goosum ni yiide kà lurra titefki, ot kupti jàk dànda a saarra kà darrhak titefki. ⁹ Ngam Fay ti iina ha ot kpàa ngòlnji wàa ba, amma ot kpàa saarra a gin Yeesu Kristu Nitcoorra worro. ¹⁰ Ey wurre ngam worro, ngam ha ot gûy ni ey, koo ot tâa go wutiya, koo beengiya a ye ge dàara gi. ¹¹ Hû go kpèwsinjin tinîiri a tîim wun, nit kpolo e mgbaanju di nit kana a goosum, kà yey mbitnu nà mgban gi. ¹² Amma mi waanurre un kor ta worro, coon da nit ây hârge ni tèerra tèem a tîim wun, ni nit ây ɗàagunu kpeesi a yèk Nitcoorra, mgbènggunu gi. ¹³ Coon daw dèy ni yiide ngam tèem waw. Tâanjin mbâra a tîim wun! ¹⁴ Un kor ta worro ot kàlnurre, mgbènggin daw da nit taski ây, kpèwsin daw da nit tolnji ây, mgbaanjin daw da nit ây tâage dàngdiya gi, èfin tinîir wun a gin nit ây pî. ¹⁵ Faasin hak wun, ngam ta koo wuna e insu maarra di nit kana mbirgu maarra ba. Amma kàmin tèerra tèem mbâra koo ningàa a tîim wun, ni gin nit ây pî. ¹⁶ Tâan ni tinîir kâwrra koo ningàa! ¹⁷ Waan Fay cen woorra! ¹⁸ Gàan mbew di Fay koo a jâ pî. Ngam kà yey yiɗi Fay un mbiri, un nit ây ’mèmse ni Yeesu Kristu gi. ¹⁹ Ta un kûysifa Jungci Delliya ba. ²⁰ Ta un luusi yèk nit lònum yèy ba. ²¹ Amma gerrin jày pî, mòon jày tâage mbâra gi. ²² Faasin hak wun a jày pî tâage jàk makta gi! ²³ Fak mbâri ey ni hak wàa e ɓetkununu a tâam wun lang! Dànda wun, ni jungci wun, ni is wun pî e tâa faarriya, cen yèk kana a unji yey ge dàara Yeesu Kristu Nitcoorra worro. ²⁴ Fay ’naasunu gi, Fak gòyrra mbâra a yèk wàa ɗi, tèe ge tèera dun kà yey. ²⁵ Un kor ây, waan Fay ngam worro! ²⁶ Kèbin da kor ây pî ni tikapni kor goosum ây! ²⁷ Mi waanurre ni nîir Nitcoorra, janggin ɗerrewol yey a gin kor goosum ây pî. ²⁸ Mbâr Yeesu Kristu Nitcoorra worro e tâanji ni un!