1 Piyèr

1 Piyèr

¹ Miy mi Piyèr mi nit yey tèem Yeesu Kristu gi, mi kèpfa dunde un nit ây cat dun Fay, tâage ni-wooy ây a kparri, yeske a dees Pontus, ni Galatiya, ni Kapadokiya, ni Asiya, ni Bitiniya. ² Fay Tooy Ɓèl catnuge kà yey tâa dànda wàa diga màrra gi, delsunu ni Jungci wàa, ha un rak tuy di Yeesu Kristu, un kpàa mèsta njîim wàa. Fay e hîinu mbâr wàa ni tâam mbâri dèy ni ɓèlla! ³ ’Mita e tâaw di Fay Tooy Yeesu Kristu Nitcoorra worro, insina fûuya ni gûysum di Yeesu Kristu a wurra gi! Hû go ot dii ni jàk dànda beengiya, ⁴ ot dii ni jàk koyrra yey iina Fay a faktiturum. Jàk koyrra maan ge raa ba, ge ’miski ba, ge yûk ba. ⁵ Ye tâa un goosu di Fay, ey faanurre ni mbinum wàa, ha saarra yey mbangse e lòt a mgbàr gbèeni gi. ⁶ Kâwsin tinîir wun a yèk maan, koo ye tâa gesi kòsòng un kpàa àyrra tinîiri a riirra ’màar ây ’nang ’nang unji càa. ⁷ A ’màar ây gi tâa gaw tâa tigeni a goosum wun, ha e hòmu della di kangeerri ge lòo gi yey gerruwan ni ebi, ha un kpàa ɓòlmum, ni ’mita, ni coorra a unji yey ge lòrra Yeesu Kristu gi. ⁸ Un yiɗurre dey koo ye tâa un rabu ba, un goosurre koo ye tâa un rabu kòsòng ba, un kâwsirre tinîir wun ni kâwum yey tâa nirri ge kpàaw yèerra ba, mûuge ni ’mita gi. ⁹ Ngam ngo gun ngor gbèeni goosum wun, tâage saanum jungci wun. ¹⁰ A nit lònum ây lòni nà mgban yèk mbâr Fay a hak wun gi, aw kàmde nà aw gatkirre a defterre yèk saarra maan. ¹¹ Aw kàmde nà cèngnum, unji hâ ni jàk jâ ge mbir jàk yey kàlni Jungci Kristu tèege a gin waw gi. Jungci gi ɗàa daw kàlla ’màar ây ge rii Kristu, ni ’mita yey ge futwa a dat maan gi. ¹² Fay lòni daw nge yèk yey kpàan gi, ti tâa ngam hak waw ba amma ngam wun ɗi. Yèk maan un kpàa kòsòng, ye tâa a nit sakta ây aw saknurre Yèk Kâwrra ni mbinum Jungci Delliya tâage tèerriya diga faktiturum gi. Yèk maan koo a malayka ây ɗa aw yiɗirre aw cèngni. ¹³ Ngam maan iin hakkilo wun kpèw, waatin mbâra, un gòyni jàk dànda wun pî a mbâr yey gun kpàa a unji lòta Yeesu Kristu. ¹⁴ Tâan hàm ta Fay rake tuy gi, ta un insi hak wun a dikri yey diknu nà mgban, ni gayrum jàk ây a èca cèngnum jày gi ba. ¹⁵ Amma tâan delliya a ɗàm kpees Fay ni dikri wun pî, kà yey tâa Tooy Ɓèl delliya ’naasunu gi. ¹⁶ Dii kètiya a defterre Fay, gàa: Tâan delliya a ɗàm kpees mum, ngam miy mi dii delliya. ¹⁷ To un ’naasirre go «Tooy» di Fak yey tâa ti raptirre nis nit ây ’nang ’nang ba, hiitirre koo di wuna kày tâa tèem wàa gi, hû go sey ni tolnji a ɗàm kpees wàa, un dik dikri wun a tâam yey tâanu ni-wooy ây a deesi gi. ¹⁸ Un cèngni, un dii sàasumya a dikri yey diknu nà ɓa hû go a hàar wosom ta wun, ti tâa ni jày ge lòo kà sarrdi koo kangeerri gi ba, ¹⁹ amma ni sàar njîim Kristu àyrriya, tâage kà njîim hàm mgbâay ɓet ɓet, yèk kana cen a hak wàa gi. ²⁰ Fay carru mgban di Kristu kà yey ɗoko mbangse kparri, amma sey kòsòng a mgbàr gbèeni lòrra ngam wun. ²¹ Ngam Kristu un goosu di Fay, gûysu a wurra gi hîigu ’mita, ha goosum wun ni jàk dànda wun e tâa a gin Fay. ²² Un dii ɓetkumya ni rakta tuy a yèk takundi, ngam ha un kpàa yiɗum kor ây cen tibiw gi. Hû go yiɗinjin a tîim wun dèy ni tinîiri kpolo! ²³ Un ire nit fûuya naa ni yòot yey ge raa gi, amma ni yòot yey tâa ge raa ba, ni yèk Fay tâage beengiya tâage tâam timgbàri gi. ²⁴ Ngam gàa a defterre Fay: A nit ây pî aw dii kà bàsi. ’Mita waw pî dii kà bista jày. Bàsi yûkɗe, bista jày yaarirre, ²⁵ amma yèk Nitcoorra tâarre tâam timgbàri. Yèk maan tâage Yèk Kâwrra yey raknu gi.

¹ Hû go woofan tèem makta pî, ni gâra pî, ni tibiw, ni ngèeri, ni njeerra yèk makta pî! ² Tâan kà hàm ây kpàan daw kòsòng gi, un yiɗi mboom takundi, mboom yèk Fay, ngam ha un ’mit ni erra un saa, ³ ye tâa un haawe mgbergum Nitcoorra, kà yey gàa nà a defterre Fay gi. ⁴ Dàaran a gin Nitcoorra! Ey tâage gòok beengiya yey ’màktufan a nit ây gi, amma dii catiya, ’mitiya a gin Fay. ⁵ Dàaran ha un ɗa un tâa gòok ây beengiya, un ’mèmsi a jâanum àay Jungci Delliya, un tâa nit daprum ta Fay delliya, un ’maa jàk gurfum ây ni Jungci Delliya a ɗàm kpees Fay, dii ngotiya ngam Yeesu Kristu gi. ⁶ Ngam gàa a defterre Fay: E rri yey mi iirre gòok tigòyni àay tâage catiya ’mitiya, a Siyona. Nit yey goosu gi, lawsam ge mòow ba. ⁷ - ⁸ Gòok maan tâanu jàk ’mitiya dun nit ây goose gi. Amma gòok yey a nit jâarra ây ’màktifa irge gòok tigòyni àay gi, de tâa daw gòok timgbòlnji ni kpata yaanum da nit ây tâa aw goosi ba. Aw mgbòlle ngam aw ii tuy a yèk Fay ba. De tâan hû go. ⁹ Amma un tâage yòot catiya, nit daprum ta wûun, nit ây delliya getke tâarra nit ta Fay, ha un sak tèem mbâr Fak yey ’naasunu ye tâanu nà a kulpi, ha un lek a kayang wàa delge dèy gi. ¹⁰ Mgban un un tâa nà nit ta Fay ba, amma kòsòng un nit ta wàa ɗi. Mgban un cèngni nà ’maton Fay ba, amma kòsòng un kpàa ’maton wàa. ¹¹ Un nit ây yiɗim dun gi tâage kà ni-wooy ây kà nit leksum ây a deesi gi, mi waanurre, woofan gayrum jàk isi haage gbàaci a tinîir wun. ¹² Digin dikri mbâra a tîim nit ây èege yèk Fay, ngam koo ye tâa aw gàanu un nit tèerra tèem makta ây ɗi gi, aw rap tèem wun mbâra, ha aw ’misi Fay a unji gbèeni. ¹³ Uunin hak wun a tèem nit ɓèl ây pî yèk Nitcoorra! Coowan di Kaysara wûun ɓèl, hòmge mbinum koo di wuna. ¹⁴ Coowan di ngomna, ye tâa Kaysara tèegu gi ngam iirra kiita da nit ây tèege tèem makta, ngam ɓòlmum da nit ây tèege tèem mbâra. ¹⁵ Fay yiɗi ɗa, un njang daw yèerra yèk èca cèngnum jày da nit rak ây ni tèerra tèem mbâri. ¹⁶ Tâan kà tiròom ây, amma ta un ii tâam tiròom wun tibuni tèem makta ba! Tâan kà sàay rra Fay! ¹⁷ Coon da nit ây pî, yiɗin daw da kor ây, tolin di Fay, coowan di Kaysara! ¹⁸ Un nit tèerra tèem ây, ûunin hak wun a gin nit ɓèl ta wun ni tolnji, naa da nit mbâr ây ni nit mgbergum yèk ây gbè, amma da nit ây ndèk daw hakkilo gi ɗa. ¹⁹ Dele to nirri èf go tinîir wàa yèk Fay, e rii ’màar yey tâa ti gesu e rii ba gi. ²⁰ Mbâr hâ gun kpàa, to un rii go ’màari, aw cupnu go ngam jàk maarra wun tèenu gi ya? Amma to un èf go tinîir wun a riirra ’màari yèk tèem mbâri tèenu gi, kà yey dele a ɗàm kpees Fay. ²¹ Fay ’naasunu a jàk ây gi, ngam Kristu ɗa rii ’màari ngam wun, woonu orri ha un fut nak wàa. ²² Ey ti tèe jàk maarra ba, yèk rèeng ti haa yuurra a mgbelyèk wàa ba. ²³ Ye njàmruwan gi, ti njàmsi ba. Ye riisuwan ’màari gi, ti kpân daw ba, amma hîi hak wàa di Tooy hiitum ge hiiti ni ɗèm gi. ²⁴ Ni is wàa toge jàk maarra worro, naani a minjum kpiiri, ngam ha jàk maarra worro e tâa wutiya, ot gûy a gòyrra ɗèm. Ni nuki tilèfni wàa kpàana ndòosum. ²⁵ Ngam mgban ot dii nà kà mgbâay gbeerra ây, amma kòsòng ot ira a gin nit yey tâage hàm faat worro, ni nit waatum worro gi.

¹ Un nikin ây ɗa, sey un ûuni hak wun a gin maa rra wun, ngam to nit kana a tîim waw ii go tuy a yèk Fay ba, ge kpàa e kpèt a goosum ngam dikri wun, koo cen yèerra yèy. ² Go ge gop dikri wun ɓetkumya a tolnji Fay. ³ Ta della wun e tâa ni lèerra tilèem a dat isi, koo ni ndàta hay, koo ni iirra jàk kangeerri, koo ni mgbapta lurra delliya ba, ⁴ amma e tâa a tinîir wun, ni dànda yey tâa ge gbee ba gi, tâage fetkum tinîiri ni tâarra baak baak, e tâage ’mitiya a ɗàm kpees Fay. ⁵ Ngam kà yey lèen nà tilèem mgban a nikin ây tâage delliya a ɗàm kpees Fay, iige jàk dànda waw a gin wàa gi. Aw ûuni nà hak waw a gin maa rra waw, ⁶ kà Sara raku tuy di Abraham, ’naasu «nit coorra» gi. To un tèerre go kòsòng jàk mbâri, un woo go jày e tolsunu a mbita kà yey ba, hû go un tâage hàm ta Sara. ⁷ Un nihun ây ɗa ɓaysin, a kin ta wun aw a yòot dàngda is ây ɗi. Gobin daw mbâra, ngam aw ’mèmsi ni un a kpàarra jàk koyrra jungci a mbâr Fay. Mbirin kà yey, ngam ta jày e njang waar wun a ɗàm kpees Fay ba! ⁸ A gbèeni yèk ây gi pî, tâan ni dànda kpolo, raknjin ’màar ta wun ni kâwum wun, yiɗinjin a tîim wun kà kor ây, tâan ni ’maton, ûunin hay! ⁹ Ta un insi tèem makta ni tèem makta, koo tinjàmni ni tinjàmni ba, amma mbârsin daw da nit ây gi ni waarra Fay, ngam Fay ’naasunu un kpàa mbâr wàa, e tâagunu jàk koyrra gi. ¹⁰ Hû go gàa a defterre wàa: Nit yey yiɗi kâwum a gûyrra wàa, yiɗi e rap unji mbâr ây gi, sey e woofa yèerra yèk makta, ta mgbelyèk wàa e yèesirra yèk rèeng ba. ¹¹ Sey e ir e woofa jàk makta, e tèe jàk mbâri, sey e kàm tâam mbâri, e furri. ¹² Ngam nis Tooy Ɓèl dii rapti dawrre da nit ây gòyge ɗèm. Tuk wàa dii faarumya ngam rakta waar waw. Amma ey ini mârngi wàa a gin nit ây tèege tèem makta. ¹³ Wun ge mbitnu jàk makta, to un rîi go kpèw a tèerra jàk mbâri gi ya? ¹⁴ Amma un dii ni kâwum, koo un rii go ’màari yèk gòyrra ɗèm. Ta un tol daw ba, ta un woo daw aw yûusunu a tâam wun ba. ¹⁵ Coon di Kristu e tâa Nitcoorra a tinîir wun! Goosin yèy koo ningàa, to nirri gunnu go jày a yèk dànda wun gi. ¹⁶ Amma goosin daw ni fetkum tinîiri, ni coorra, un tâa ni dànjum tinîir mbâra, ngam ha lawsam e mòo daw da nit ây maasunu yèk dikri wun mbâra a gin Kristu gi. ¹⁷ Ngam hòme della, to Fay yiɗi go kà yey, nirri e rii ’màari yèk tèerra jàk mbâri, ni riirra ’màari ngam tèerra jàk makta. ¹⁸ Ɓaysin, Kristu wurre nak kpolo ngam jàk maarra nit ây, ey nit ɗèm ɗi wurre ngam nit ây èege gòyrra ɗèm, ha e ’maana a gin Fay. Aw ɓàru isi, amma Fay gûysu ni Jungci. ¹⁹ Ni Jungci gi dige e sak daw Yèk Kâwrra da jungci ây tâage a tâam ’mèmdiya, ²⁰ da jungci nit ây tâa nà aw ragu mgban tuy di Fay ba, ye èfe tinîiri waati daw a unji Nuhu mgbàr mbangsum koombowal ɓèl gi. A farra sey a nit ây càa nan nan gbè saage a sòo. ²¹ Saarra maan tâage jàk lònum a saarra yey kpàanu ni baptisma kòsòng gi, ti tâa ni kòlla jàk ’miskum a isi ba, amma ni waarra di Fay ha e hîinu dànjum tinîir mbâra. Yèk saarra gi tâa hû go ngam Yeesu Kristu gûysige a wurra. ²² Ey naaye a faktiturum, tâarre a riina Fay, wûunde a hak malayka ây, ni jàk mbinum ây kana ni jàk kpèw kpèw ây pî.

¹ Ye tâa Kristu rii ’màari a isi, sey un ɗa un ’mèmsi hak wun a dànda kpolo ni ey. Ngam nit yey riige ’màari a isi gi, ɗòlnji ni jàk maarra. ² Hû go a ngirra yer wun ta un fusi bak a jàk ây gayru di nirri ba, amma a jày yiɗi Fay. ³ Ngam mgban a unji ây hòmge dèy gi, un tèerre nà kà yey yiɗin a nit ây èege yèk Fay, un dii nà a haanum tuy, ni gayrum jàk ây, ni râmrum mbàl, ni mòorgum oca, ni njoorgum njoori dèy, ni coorra maktiya a tèem mâr ây. ⁴ Kòsòng tâa dawrre ’nang da nit ây gi, ngam un diknjisi ni aw a gbaatum tâam waw maktiya gi ba. Hû go aw maasunurre. ⁵ A nit ây gi goo gaw goosi yèk hak waw a ɗàm kpees Tooy mbangse e hiiti daw da nit beengiya ây ni nit ây wutke gi. ⁶ Ngam maan Yèk Kâwrra dii ɗa saktiya da nit ây wutke gi, ngam koo ye tâa aw dii hiitumya kà nit ây pî a isi, gaw gûy ni Jungci Delliya kà yey yiɗe Fay gi. ⁷ Gbèeni jày pî hèerage. Hû go iin hakkilo, waatin mbâra ha un kpàa waarra Fay. ⁸ Amma ji hòmge di yey, yiɗinjin a tîim wun dèy ni tinîiri kpolo, ngam yiide butɗe jàk maarra dèy. ⁹ Tâan nit ngotnjum ây a tîim wun, cen hûungum! ¹⁰ Koo wuna sey e tèe tèem mgbaanjum a tîim wun a hîir yey kpàa gi, kà nit faarra mbâra a hîir ây ’nang ’nang hîi Fay gi. ¹¹ To nirri yèerre go yèy, sey e tâa kà yèk Fay. To nirri tèerre go tèem mgbaanjum, sey e mbir ni kpèw kpèw yey hîiw Fay gi, ngam ha Fay e tâa ’misumya a jày pî ni Yeesu Kristu, nit yey tâage ni ’mita ni mbinum tâam timgbàri ha tâam timgbàri gi. Amen. ¹² Un nit ây yiɗim dun gi, ta e tâanu ’nang a riirra ’màar yey mâage kà ebi gi ba! Ta un raptu kà jày tâa ti gesi e mbir gi ba. ¹³ Amma kâwsin tinîiri, ye tâa un ’mèmsi a ’màar Kristu gi, ngam ha un ii tijaga a mgbàr lòta ’mita wàa. ¹⁴ Kâwum diinu, to aw njàmrunu go yèk nîir Kristu, ngam Jungci Fay Jungci ’mitiya dii tâarre a hak wun. ¹⁵ Ta nirri a tîim wun e rii ’màari yèk ɓàta nirri, koo yèk oorra oori, koo yèk tèerra tèem makta, koo yèk lekrum yèk ây ba. ¹⁶ Amma to nirri rii go ’màari ngam ey nit futa Kristu ɗi gi, ta e ii lawsam ba, ndika e ’misi Fay yèk nîir Kristu, ngam ey dii ni nîir maan. ¹⁷ Unji gerre ha kiita e ɗaa iirra da nit ta Fay. Amma to ot kpàa go kiita maan màrra, kà ge tâa gbèeni waw da nit ây hàwge rakta tuy a Yèk Kâwrra wàa di Fay ya? ¹⁸ Ngam gàa a defterre wàa: To nit gòyrra ɗèm saa go ni ndakèrr, kà ge tâa ni nit hàanjum di Fay, ni nit tèerra jàk maarra gi ya? ¹⁹ Hû go a nit ây riige ’màari kà yey yiɗi Fay gi, sey a tèerra jàk mbâri aw ii dànda tinîir waw a gin wàa, Tooy mbangsum jàk ây gi, gòyrre a yèk wàa.

¹ Miy mi toonji nit kimjum ây, mi nit seedum a ’màar Kristu, mi nit ’mèmsum a ’mita yey ge lòt gi ɗi, mi mgbèngnurre dun toonji nit kimjum ây ɗa, mi gàanurre: ² Faan tikukri Fay tâagunu hîirriya gi, faan daw ni yiide tinîiri kà yey yiɗi Fay, ta un ndak daw ba, ta un yiɗi kpàarra jày ba, amma faan daw ni tinîiri pî! ³ Ta un tâarra daw tâam wûun da nit ta wun ba, amma tâan kà jàk kàlnum da tikukri ây gi. ⁴ Hû go kpàa gun kpàa tikangni hak ’mita yey tâa ge mgbanti ba, a ye ge lòrra wûun waw da hàm faat ây gi. ⁵ Un lor ây ɗa, ragin daw tuy da toonji ây! Un pî ûuninjin hay a tîim wun ha un mgbaanjiri, ngam Fay njanggi dawrre da nit ây ’misi hay, amma hîi dawrre mbâr wàa da nit ây ûuni hay gi. ⁶ Ngam maan ûunin hak wun a kpèw kpèw kàn Fay, ngam ha e aanjunu a mgbàr yey gese gi. ⁷ Iin loca dànda tinîir wun pî a gin wàa, ngam ey faanurre. ⁸ Waatin mbâra, mûyin! Ngam Seyɗan nit yiir wun gîtɗe kà tidîisi guske gi, kàmge nirri ha e tufi. ⁹ Gòyin a gin wàa ni mòorra kpèw a goosum, ɓaysin a kor ta wun tâage a kparri lang gi aw ɗa aw riirre ’màari kà yey. ¹⁰ A dat ye riinu ’màari unji càa, Fay tâage ni mbâri pî, ’naasunu ni Kristu a ’mita wàa tâam timgbàri gi, ey ni hak wàa mba ge mbangsunu pî, e kpèwsunu, e gòynunu, e rîinunu. ¹¹ A gin wàa tâa mbinum tâam timgbàri ha tâam timgbàri! Amen. ¹² Mi kèrfa dun yèk yey càa ni kàn Silas, kor mbâra kà yey dàni miy gi. Mi mgbèngnurre mi seedunurre, yey tâage mbâr Fay takundi. Gòyin kpèw a mbâr maan! ¹³ A nit kimjum ây a Babilon tâage catiya kà un gi, aw kèpfa dunde, ’mèmsa ni Marku hàm mum ɗa. ¹⁴ Kèpnjin ni tikapni yiide. Tâam mbâri e tâanji ni un pî tâage nit ta Kristu gi!