1 Yuhanna

¹ Ot kèrfa dunde a yèk gûyrra yey tâage diga ɗaarra, yey rakna, rapna gopna ni nis worro, bangna ni kàn worro gi. ² Gûyrra maan lòrre, ot rabe. Hû go ot seedirre, ot saknurre yèk gûyrra tâam timgbàri, tâage a gin Tooy Ɓèl. Gûyrra gi lòrre a gin worro. ³ Jàk yey rapna gi, rakna gi ot saknurre dun ɗa, ha un ’mèmsi ni orro. Ngam orro ot ’mèmsi ni Tooy Ɓèl, ni Hàm wàa Yeesu Kristu. ⁴ Ot kèrfa dunde jàk ây gi, ngam ha kâwum e mûu a tinîir worro. ⁵ E rri yey jày rakna a gin Yeesu gi ot saknurre: Fay tâage kayang, kulpi cen a gin wàa koo càa ba. ⁶ To ot gàa go ot ’mèmsirre ni Fay, amma ot dikɗe a kulpi, hû go ot rèengde rèeng, ot tèerre jàk takundi ba. ⁷ Amma to ot dikɗe go a kayang kà yey tâa Fay a kayang gi, ot ’mèmsirre a tîim worro, njîim Yeesu Hàm wàa ɗa kòlnarre jàk maarra pî. ⁸ To ot gàarre go, jàk maarra cenna ba, ot rûfsirre hak worro, ot cen ni takundi ba. ⁹ Amma to ot lòni go jàk maarra worro, Fay Tooy ɗèm ɗi gòyrre a yèk wàa, yaa ge yaafina jàk maarra, kò ge kòlna a tèem makta pî èege gòyrra ɗèm gi. ¹⁰ To ot gàarre go ot mbir jàk maarra ba, ot inu di Fay tirèengrum rèeng, yèk wàa cen a tinîir worro ba.

¹ Un hàm ta mum, mi kèrfa dunde jàk ây gi, ngam ta un mbir jàk maarra ba. Amma to nirri mbir go jàk maarra, ot dii ni Yeesu Kristu nit ɗèm, tâagina nit mgbaanjum a gin Tooy Ɓèl. ² Ey tâage nit yey jingge jàk maarra worro ni wurra wàa gi, ti tâa ngam jàk maarra worro gbè ba, amma ngam jàk maarra nit ây tâage a deesi lang gi. ³ To ot futɗe go yèk mgbèngda Fay, cè got cèngni kà yey, orro ot cèngnuge. ⁴ Nit yey gàage «mi cèngnuge», amma ti fut yèk mgbèngda wàa ba, ey nit rèeng ɗi, takundi cenu ba. ⁵ Amma nit yey futke yèk wàa gi, takundi nit maan tèe jày pî a yiɗum di Fay. Kà yey got cèngni, ot ’mèmsi ni Fay. ⁶ Nit yey gàage «mi ’mèmsi ni Fay» gi, sey e dik ɗa kà yey dige Yeesu. ⁷ Un nit ây yiɗim dun gi, ti tâa yèk mgbèngda fûuya kèrmifa dun ba, amma yèk mgbèngda mgbanti ɗi, yey kpàanu nà diga màrra, yèk mgbèngda yey raknu gi ɗi. ⁸ Koo hû go ɗa mi kèrfa dunde yèk mgbèngda fûuya. Takundi maan lòrre a gin Kristu ni gin wun ɗa, ngam kulpi hòmde, kayang takundi kayngirre kòsòng. ⁹ Nit yey gàage dikɗe a kayang, amma yiirre kor wàa gi, ey dii bak a kulpi. ¹⁰ Nit yey yiɗe kor wàa gi, ey tâarre a kayang, cen jàk mgbòlla tâage a gin wàa, ge yaanu di nit kana ba. ¹¹ Amma nit yey yiige kor wàa gi, ey tâarre a kulpi, dikɗe ɗa a kulpi. Ti cèngni a gin dige ba, ngam kulpi râasuge nis wàa. ¹² Mi kèrfa dunde dun hàm ây, ngam jàk maarra wun yaafige yèk nîir Kristu. ¹³ Mi kèrfa dunde dun tooy ây, ngam un cèngnuge di nit yey tâage diga ɗaarra gi. Mi kèrfa dunde dun lor ây, ngam un sunuge di Tooy mamji. ¹⁴ Mi kèrfa dunde dun hàm ây, ngam un cèngnuge di Tooy Ɓèl. Mi kèrfa dunde dun tooy ây, ngam un cèngnuge di nit yey tâage diga ɗaarra gi. Mi kèrfa dunde dun lor ây, ngam un gòyrre kpèw. Yèk Fay tâarre a tinîir wun, un sunuge di Tooy mamji. ¹⁵ Ta un yiɗi kparri koo jày tâage a farra ba. To nirri yiɗi go kparri gi, ge yiɗu di Tooy Ɓèl ba. ¹⁶ Ngam jày pî tâage a kparri gi, jàk gayrum isi ɗi ni jàk gayrum nisi, ni râanum jàk ây, ti ana a gin Tooy Ɓèl ba, amma ana a kparri. ¹⁷ Kparri ni jày gayri daw da nit ây gi pî, lòo ge lòo. Amma nit yey tèege jày yiɗi Fay gi, tâa ge tâa tâam timgbàri. ¹⁸ Un hàm ây, mgbàr gbèeni kpèrrarre. Nit yiir Kristu dàa ge dàara kà yey raknu nà gi. Koo kòsòng a nit yiir ta Kristu aw dii dèy. Hû go ot cèngni, mgbàr gbèeni kpèrrarre. ¹⁹ Aw aw tâanjirre nà ni orro, amma aw tâa nit ta worro ba. Ngam to aw tâa go ngin nit ta worro, nga gaw ngas ngin ni orro. Amma aw yuuye a tîim worro, ngam ha aw lòt aw pî aw tâa nit ta worro ba. ²⁰ Un un kpàa Jungci Delliya a gin Kristu, un pî un cèngni yèk takundi. ²¹ Mi kèrfa dunde, naa ngam un èe cèngnum takundi, amma ngam un cèngnige takundi gi. Un cèngni ɗa, yèk rèeng ge ana a takundi ba. ²² Wun tâage nit rèengrum yèk rèeng gi ya, to naa nit yey gàage Yeesu ti tâa Kristu ba? Ey tâage nit yiir Kristu, ey hàanju di Tooy Ɓèl ni Hàm wàa ɗa. ²³ Koo wun hàanju di Hàm wàa ya, ti ’mèmsi ni Tooy Ɓèl ba. Nit yey seedi ni hak wàa yèk Hàm gi, ’mèmsi ni Tooy Ɓèl. ²⁴ Yèk yey raknu diga màrra gi, ndika e tâa a tinîir wun. Yèk maan to tâarre go a tinîir wun, un ɗa tâa gun tâanji ni Hàm, ni Tooy Ɓèl. ²⁵ Yey tâage yèk mòonjum kàn gàana Kristu, ge hîina gûyrra tâam timgbàri. ²⁶ Mi kèrfa dunde yèk ây gi ngam nit ây kàmge aw rûfnu gi. ²⁷ Amma Kristu hîinu Jungci wàa gi, tâarre a gin wun. Un cen ni gayam ha nirri e kàlnjunu jày ba. Kà yey kàlnjunu Jungci wàa a jàk ây pî gi, takundi ɗi, ti tâa yèk rèeng ba. Goosin yèk yey kàlnjunu Jungci wàa, un tâanji ni Kristu. ²⁸ Un hàm ta mum, tâanjin ni ey, ngam ha ot gòy a ɗàm kpees wàa tolnji cen lawsam cen, a ye ge lòrra a mgbàr dàarra wàa. ²⁹ To un cèngni go, Kristu nit ɗèm ɗi, cè gun cèngni ɗa, koo wun tèege tèem ɗèm gi, ey hàm Fay ɗi.

¹ Raptuwan kày yiɗi dot Tooy dèy gi, ha de kpàana înda di hak worro hàm ta Fay! Hû go tâana ɗa. Ngam a nit kparri ây aw cèngnu di Fay ba, aw cèngnina ɗa ba. ² Un nit ây yiɗim dun gi, kòsòng ot hàm ta Fay ɗi, amma tâam worro ti lòt kày got tâa go ba. Amma ot cèngni, ye ge lòrra Kristu, rèe got rèenji ni ey. Ra got rabu kày tâa gi. ³ Koo wun tâage ni dànda yey a gin Kristu gi, e ɓetkini hak wàa kà yey tâa Kristu ɓetkumya gi. ⁴ Koo wun mbirge jàk maarra ya, yewe a yèk mgbèngda, ngam jàk maarra tâage yewrra a yèk mgbèngda. ⁵ Un cèngni, Yeesu Kristu lòrrage ngam e dàa e atfa jàk maarra da nit ây. Dey jàk maarra cenu ba. ⁶ Nit yey ’mèmse ni ey gi, ge mbir jàk maarra ba. Amma nit yey mbirge jàk maarra gi, ti rabu ba, ti cèngnu ba. ⁷ Un hàm ta mum, ta un woo nirri e rûfnu ba! Nit yey tèege tèem ɗèm gi, nit ɗèm ɗi kà yey tâa Yeesu nit ɗèm. ⁸ Amma nit yey mbirge jàk maarra gi, ey nit Seyɗan ɗi, ngam Seyɗan tâage timbirgum jàk maarra diga ɗaarra. Yòo maan Hàm Fay de dàara, ha e gbeesifa tèem Seyɗan. ⁹ Koo wun tâage hàm Fay ya, ge mbir jàk maarra ba, ngam gûyrra wàa ana a gin Fay. Ge kpàaw mbita jàk maarra ba, ngam ey hàm Fay ɗi. ¹⁰ Koo wun tâa ti tèe tèem gòyrra ɗèm a ɗàm kpees Fay ba, to yiɗi go ɗa kor wàa ba, ey nit Fay ɗi ba. Kà yey lòrrin a hàm ta Fay ni hàm ta Seyɗan. ¹¹ Sey ot yiɗinji a tîim worro, kà yey tâa yèk yey raknu nà diga màrra gi! ¹² Ta ot tâa kà Kaynu tâage nit Seyɗan, ɓàrge kaa wàa gi ba. Ngam jâ ɓàruwa? Ngam tèem wàa maktiya ɗi, amma tèem kaa wàa ɗèm ɗi. ¹³ Un kor ta mum, ta e tâanu ’nang ba, to a nit ây a kparri aw yiinu go gi. ¹⁴ Ot cèngni, ot saa a wurra, ot lege a gûyrra. Ot cèngni kà yey, ngam ot yiɗi daw da kor ta worro. Nit yey tâa yiide cenu ba, dii tâarre a wurra. ¹⁵ Koo wun yiige kor wàa ya, ey nit ɓàta nirri ɗi. Un cèngni, cen nit ɓàta nirri ge kpàa gûyrra tâam timgbàri ba. ¹⁶ Ot cèngni kày tâa yiide, ngam Yeesu hîi hak wàa e wut ngam worro. Gesi orro ɗa ot hîi hak worro ngam kor ta worro. ¹⁷ Nit yey tâage ni bèebi a kparri gi, to rap go di kor wàa èege jày, amma ti yiɗi e hîiw jày ba, kà ge yiɗu di Fay a tinîir wàa ya? ¹⁸ Un hàm ta mum, ta ot yiɗi da nit ây ni yèk kâwrra a mgbelyèy gbè ba, amma ni tèerra tèem, ni takundi ɗa. ¹⁹ To ot yiɗirre go kà yey, cè got cèngni ot dii a takundi, ot suusirre tinîir worro a ɗàm kpees Fay. ²⁰ Ngam koo tinîir worro yaanina go a kiita, ot cèngni, Fay hòmu ’mita di tinîir worro, ey cèngni jày pî. ²¹ Hû go un nit ây yiɗim dun gi, to tinîir worro ti yaanina go a kiita ba, ot dii ni gòyrra tolnji cen a ɗàm kpees Fay. ²² Koo ji waana a gin wàa ya, kpàa got kpàa, ngam ot futɗe yèk mgbàngda wàa, ot tèe jày ge delu gi. ²³ Sey ot goosi nîir Hàm wàa Yeesu Kristu, ot yiɗinji ɗa a tîim worro kà yey gàana Kristu gi. Hû go tâa yèk mgbèngda Fay. ²⁴ Nit yey futke yèk mgbèngda wàa gi, tâarre a gin wàa, Fay ɗa tâarre a gin nit maan. Ot cèngni, ey tâarre a gin worro, ngam Jungci yey hîina gi.

¹ Un nit ây yiɗim dun gi, ta un goosi yèk jungci ây pî yèen a nit ây gi ba! Amma gerruwan to jungci ây gi ana go a gin Fay, ngam a nit ây dèy lòni yèk rèeng gi aw gîtɗe a deesi. ² E rri yey kày gun cèngsu di Jungci Fay: Koo jungci hâ seedi Yeesu Kristu dàarage ni is nirri gi, jungci maan anga a gin Fay. ³ Jungci yey tâa ti seedini Yeesu dàara ni is nirri ba, jungci maan ti ana a gin Fay ba. Ey tâage jungci nit yiir Kristu, yey raknu nà ge dàara gi. Koo kòsòng nit maan dii mgban a deesi. ⁴ Un hàm ta mum, un un nit ta Fay ɗi, un suni daw da nit ây lòni yèk rèeng gi. Ngam jungci yey tâage a gin wun, hòme ’mita di jungci yey tâage a gin nit kparri ây gi. ⁵ Ye tâa aw a nit kparri ây ɗi, aw yèerre yèk kparri. A nit ây tèege tèem kparri aw ragi dawrre. ⁶ Orro ot nit ta Fay ɗi. Nit yey cèngnu di Fay gi, ra ge rak yèk worro. Nit yey tâa nit Fay ɗi ba, ge rak yèk worro ba. Kà yey got cèngsi jungci takundi, ni jungci tirûfrum nirri. ⁷ Un nit ây yiɗim dun gi, yiɗinjin a tîim wun, ngam yiide ana a gin Fay. Koo wun tâage ni yiide ya, ey hàm Fay ɗi, cèngnu di Fay ɗa. ⁸ Nit yey tâage yiide ti cenu ba, ey ti cèngni Fay ba, ngam Fay tâage yiide. ⁹ E rri yey kày lòrre yiide Fay a gin worro: Fay tèera Hàm wàa kpolo a deesi, ha ot gûy ngam wàa. ¹⁰ Yey tâage yiide, naa orro yiɗu di Fay, amma ey yiɗina dorro. De tèera Hàm wàa, ngam e jing jàk maarra worro ni wurra wàa. ¹¹ Un nit ây yiɗim dun gi, ye tâa Fay yiɗina kà yey, gesi orro ɗa ot yiɗinji a tîim worro. ¹² Cen nirri haage rapta Fay ba. To ot yiɗinji go a tîim worro, Fay tâanjirre ni orro, yiide wàa gerre a tîim worro. ¹³ Ey hîina Jungci wàa. Kà yey ot cèngni, ot tâanjirre ni Fay, ey ngaa tâanjirre ni orro. ¹⁴ Ot rabe, ot seedirre ɗa, Tooy Ɓèl tèera Hàm wàa ngam e tâa nit saanum kparri. ¹⁵ Nit yey seedi Yeesu tâage Hàm Fay gi, Fay tâanjirre ni ey, ey ngaa tâanjirre ni Fay. ¹⁶ Ot cèngnige, ot goosirre ɗa nge Fay yiɗinarre. Fay tâage yiide. Ni yey tâage ni yiide gi, tâanjirre ni Fay. Fay ngaa tâanjirre ni ey. ¹⁷ To ot tèe go jày pî a yiide, kpàa got kpàa gòyrra tolnji cen a unji kiita. Ngam tâam worro a deesi gi rèenji ni tâam Yeesu Kristu. ¹⁸ Tolnji cen a yiide ba. Yiide yey getke gi mànfarre tolnji, ngam tolnji ana a yèk kiita. Nit yey tâage ni tolnji gi, yiide wàa ti get ba. ¹⁹ Orro ot yiɗirre, ngam Fay ɗàagina yiɗum. ²⁰ To nirri gàa go «mi yiɗurre di Fay», amma yiirre kor wàa, ey nit rèeng ɗi. Ngam to ti yiɗu go di kor wàa rabe gi ba, kà ge kpàaw yiɗum di Fay tâa ti rabu ba ya? ²¹ Nit yey yiɗu di Fay gi, sey e yiɗi kor wàa ɗa. Kà yey gàa yèk mgbèngda yey hîina Kristu gi.

¹ Koo wun goosi Yeesu tâage Kristu gi, ey hàm Fay ɗi. Koo wun yiɗi tooy ya, yi ge yiɗi hàm ta wàa ɗa. ² To ot yiɗu go di Fay, ot tèerre go kà yey gàa yèk mgbèngda wàa gi, cè got cèngni nge ot yiɗi dawrre da hàm ta wàa. ³ Ot yiɗu di Fay, to ot futɗe go yèk mgbèngda wàa. Yèk mgbèngda wàa ɗa ti ày ba. ⁴ Ngam koo wun tâage hàm Fay ya, su ge sun kparri. Ni goosum worro orro ot sunde kparri. ⁵ Wun sunge kparri ya, sonaa nit yey goose Yeesu tâage Hàm Fay gi? ⁶ Yeesu Kristu ey tâage nit yey dàaga ni sòo baptisma wàa, ni njîim wurra wàa gi. Ti dàara ni sòo gbè ba, amma ni njîim ɗa. Jungci Delliya ii seedamku yèk maan takundi ɗi, ngam ey tâage takundi. ⁷ Jàk seedum ây aw dii taan: ⁸ Jungci Delliya, ni sòo, ni njîim ɗa aw taan pî aw ’mèmsi kpolo. ⁹ Orro ot ngotɗe yèk seedamku nit ây, amma seedamku Fay hòmge ’mita. E tâage seedamku yey ii a hak Hàm wàa gi. ¹⁰ Nit yey goosu di Hàm wàa gi, dii ni seedamku yey a tinîir wàa. Nit yey tâa ti goosu di Fay ba, inu di Fay Fak rèeng, ngam ti ngor yèk seedamku yey ii Fay a hak Hàm wàa gi ba. ¹¹ Fay hîina gûyrra tâam timgbàri. Gûyrra yey dii a gin Hàm wàa. Hû go tâa yèk seedamku maan. ¹² Nit yey ’mèmse ni Hàm Fay gi, dii ni gûyrra. Nit yey tâa ti ’mèmsi ni Hàm Fay ba, gûyrra ɗa cenu ba. ¹³ Mi kèrfa dunde jàk ây gi, dun nit ây goose nîir Hàm Fay, ngam ha un cèngni, un dii ni gûyrra tâam timgbàri. ¹⁴ Gòyrra tolnji cen diina a ɗàm kpees Fay, ngam to ot waawrre go jày kà yey yiɗi ey gi, ra ge rakna. ¹⁵ To ot cèngni go raknarre jày waaw ot gi, ot cèngni ɗa kpàa got kpàa jày waaw ot gi. ¹⁶ To nirri rap go di kor wàa mbitɗe jàk maarra yey tâa ge leknu a wurra ba, sey e waa Fay, ha e hîiw gûyrra di kor wàa mbirge jàk maarra tâa ge leknu a wurra ba gi. Amma jàk maarra kana tâaye, le ge leknu di nirri a wurra. Mi gàanu un waa Fay ngam jàk maarra maan ba. ¹⁷ Tèerra tèem èca gòyrra ɗèm pî, jàk maarra ɗi. Amma jàk maarra kana dii tâa ge leknu di nirri a wurra ba. ¹⁸ Ot cèngni, koo wun tâage hàm Fay ya, ge mbir jàk maarra ba. Hàm Fay faawrre, Tooy mamji ge mâaw ba. ¹⁹ Ot cèngni, ot nit ta Fay ɗi. Amma kparri lang dii a mbinum Tooy mamji. ²⁰ Ot cèngni ɗa, Hàm Fay dàarage, hîina còycum ngam ha ot cèngsi Fak takundi. Orro a gin Fak takundi tâana, a gin Hàm wàa Yeesu Kristu. Kristu tâage Fak takundi ni gûyrra tâam timgbàri. ²¹ Hàm ta mum, faasin hak wun a yèk mâr ây!