1 Ni-Korintu ây

¹ Miy mi Pawlu, mi nit yey ’naasim Fay, ha mi tâa nit Yeesu Kristu tèerriya kà yey yiɗi Fay gi, ’mèmsa ni Sostenes kor worro, ² ot kèpfa dunde, dun nit ta Fay kimje a Korintu, un nit ây tâage ɓetkumya a gin Yeesu Kristu, ye ’naasunu ha un tâa nit della ta wàa, ’mèmsa ni nit ây tâage koo u hâ ’naase nîir Yeesu Kristu Nitcoorra waw, ni Nitcoorra worro gi. ³ Nge Fay Too worro, ni Yeesu Kristu Nitcoorra aw hîinu mbâr waw ni tâam mbâri! ⁴ Mi gàarre mbew di Fay ngam wun koo ningàa, a yèk mbâr wàa kpàanu a gin Yeesu Kristu gi. ⁵ Ngam a gin Yeesu Kristu un kpàa bèebi pî, koo a yèk hâ, koo a cèngnum jàk hâ. ⁶ Kà yey yèk seedamku Kristu gòyrre kpèw a tîim wun, ⁷ cen hîir Jungci Delliya tâa un kpàa ba gi, ye tâa un waarre lòta Yeesu Kristu Nitcoorra worro. ⁸ Ey gò ge gòynunu ɗa ha mgbàr gbèeni, gun tâa ni yèk kana a hak wun ba a unji wàa ge ii kiita gi. ⁹ Fay gòyrre a yèk wàa, ey ’naasunuge ha un ’mèmsi kpolo ni Hàm wàa, Yeesu Kristu Nitcoorra worro. ¹⁰ Amma un kor ta mum, mi mgbèngnurre ni nîir Yeesu Kristu Nitcoorra worro, ha un yèe yèk kpolo, ta ɗòlnjum e tâa a tîim wun ba, amma un ’mèmsi a dànda kpolo, ni raknjum a jày kpolo. ¹¹ Un kor ta mum, a nit Kolowe ây aw kàlimge, tilètnjum dii a tîim wun. ¹² Jày gàami kà yey, ngam koo wuna a tîim wun yèerre ’nang. Nit yey gàarre «miy mi nit Pawlu ɗi», nit kana gàarre «miy mi nit Apollo ɗi», nit kana gàarre «miy mi nit Piyèr ɗi», nit kana ɗa gàarre «miy mi nit Kristu ɗi». ¹³ Mba Kristu ɗòlnji hak wàa cuk yi? Koo aw gbalim dim dim di Pawlu a minjum kpiiri ngam wun yi? Koo un kpàa baptisma ni nîir mum yi? ¹⁴ Mi gàarre mbew di Fay, ngam mi ii baptisma koo di wuna a tîim wun ba, sey di Kirispu ni Gayu, ¹⁵ ngam ta nirri kpolo e gàa, kpàa baptisma ni nîir mum ba. ¹⁶ Amma mi ɓaysi ɗa, mi iiwrra baptisma di Estefanas ni nit àay rra wàa. Hòm go di yey, mi cèngni to mi iiwrra go baptisma di nit kana ba. ¹⁷ Kristu ti tèem iirra baptisma ba, amma tèem ha mi sak Yèk Kâwrra, ti tâa ni còycum a yèk nirri ba, ngam ta wurra Kristu a minjum kpiiri e tâa ɓa hû go ba. ¹⁸ Ngam sakta yèk wurra Kristu a minjum kpiiri, kà ray tâa daw da nit ây gbeegi gi. Amma a gin worro dot nit ây saage gi, yèk maan mbinum Fay ɗi. ¹⁹ Ngam gàa a defterre Fay: Gbee gim gbeesifa còycum nit ây còyci gi, kpi gim kpiwfa cèngnum jàk nit ây cèngni jày gi. ²⁰ U hâ tâa ni còycum ya? U hâ tâa ni cèngnum yèk defterre ya? U hâ tâa nit mbinda hàanjum yèy a tîim yòot nit ây tâarra yey ya? Fay inuge di còycum kparri gi e tâa ray. ²¹ Ye tâa kparri ni còycum wàa ti cèngni còycum Fay ba, Fay yiɗige e saani daw da nit ây goosu gi, ni ray a sakta yèy. ²² A ni-Yude ây aw gunde lònum jàk kayeefi, a ni-Girèk ây ngaa aw kàmde còycum. ²³ Amma orro ot sakɗe yèk Kristu gbaluwan a minjum kpiiri gi. Da ni-Yude ây tâa daw yèk timgbòlnji, da nit ây èege yèk Fay tâa daw yèk ray, ²⁴ amma da nit ây tâage ’naasumya, koo ni-Yude ây ɗi, koo yòot ni-riiy ây kana ɗi, Kristu tâage mbinum Fay ni còycum Fay ngam waw. ²⁵ Ngam rak Fay hòme còycum da còycum nit ây, nûurra Fay hòme kpèw kpèw di kpèw kpèw nirri. ²⁶ Un kor ta mum, raptuwan di hak wun a ye ’naasunu Fay gi, un cen ni nit còycum ây dèy a tîim wun kà nit ây kana ba, un cen ni nit mbinum ây dèy ba, un cen ni tiròom ây dèy ba. ²⁷ Amma Fay carre rak kparri, ha e mòosini daw lawsam da nit còycum ây, carre nûurra kparri, ha e mòosini daw lawsam da nit kpèw kpèw ây. ²⁸ Fay carre jày tâa aw ’misurre a kparri ba, ni jày wâskin a nit ây, ni jày tâage ɓa hû go, ha e inu di jày ’misin a nit ây e tâa jàk ɓa hû go, ²⁹ ngam koo wuna ta e ’misi hak wàa a ɗàm kpees Fay ba. ³⁰ Amma ey ’mèmsunu ni Yeesu Kristu, iiwe e tâa còycum worro. Yeesu gi hîigina gòyrra ɗèm, ni tâarra nit della ta wàa di Fay, ni sàasum a jàk maarra, ³¹ ha e tâa kà yey gàa defterre Fay: Nit yey râani hak wàa gi, sey e râani ngam Nitcoorra.

¹ Un kor ta mum, ye dàama a gin wun, mi dàara ni mbinum yèy koo ni còycum dèy, ha mi saknu yèk seedamku Fay ba. ² Ye tâami nà a tîim wun, mi yiɗi cèngnum jàk kana ba, sey yèk Yeesu Kristu gbaluwan a minjum kpiiri gi. ³ Ye tâami nà a tîim wun, mi dii dàngdiya, ni tolnji, ni timalni isi dèy. ⁴ Ye kàlnjim jày, saknim Yèk Kâwrra, ti tâa ni yèk còycum nirri koo ni tirûfni ba, amma a lònum Jungci Fay ɗi ni mbinum wàa, ⁵ ngam ta goosum wun e gòy a còycum nirri ba, amma e gòy a mbinum Fay. ⁶ Orro ot yèerre ni còycum a tîim nit goosum ây getke gi, ti tâa ni còycum yey ange a kparri gi, koo a gin wûun ây a kparri gaw gbee gi ba, ⁷ amma ot yèerre yèk còycum Fay fûuge gi, yey carre diga ɗàa mbangsi kparri ba, ngam ’mita worro. ⁸ Cen nirri a tîim wûun ây tâarra kòsòng gi cèngni còycum maan ba. Ngam to aw cèngni go ngin, gaw gbalu ngin di Nitcoorra ni ’mita wàa a minjum kpiiri ba. ⁹ Amma gàa a defterre Fay: Jàk yey tâa nis nirri ti haa rapta ba, tuy ɗa ti haa rakta ba, ti haa lekta a tinîir nirri ba, jàk maan Fay mbangsi ngam nit ây yiɗu gi. ¹⁰ Fay lònina jàk yey ni Jungci wàa, ngam Jungci gatɗe jày pî, koo jàk Fay tâage yengdiya gi. ¹¹ Wun ɗi a tîim nit ây, cèngni jày tâage a tinîir nit kana ya? Sey jungci yey tâage a tinîir nit maan cèngni gi. Hû go ɗa cen nirri cèngni jày tâage a mîis Fay ba, sey Jungci Fay. ¹² Orro ot kpàa jungci kparri ba, amma Jungci yey anga a gin Fay ɗi, ngam ha ot cèngni jày hîina Fay a mbâr wàa. ¹³ Yèk ây gi ot yèerre, ti tâa kà yey kàlnji nit còycum ba, amma kà yey kàlnji Jungci Fay. Ot yèerre yèk Jungci yey da nit ây tâage ni Jungci maan gi. ¹⁴ Nirri ni hak wàa ge ngor jày gàa Jungci Fay ba, ngam jàk ray ɗi a gin wàa, ge kpàaw cèngnum ba, sey ni Jungci Fay cè ge cèngni. ¹⁵ Nit yey tâage ni Jungci Fay getnjurre di jày pî, amma dey cen nirri ge getnju koo a yèk hâ ba. ¹⁶ Ngam nirri ge cèngni jàk dànda Tooy Ɓèl, ha e tâa nit raknjum wàa ba. Amma orro ot dii ni jàk dànda Kristu.

¹ Un kor ta mum, mi kpàanu yèerra kà nit ây tâage ni Jungci Fay ba, amma kà nit ây tâage ni dànda jàk kparri, kà hàm kaa ây a goosum di Kristu. ² Mi njoosunu mboom. Mi hîinu nàam ba, ngam gun kpàaw riirra ba. Ha kòsòng ɗa gun kpàaw riirra ba, ³ ngam ha niyey un tâa kà nit kparri ây. Ye tâa ngèeri ni tilètnjum dii a tîim wun, naa un dii a kparri, un dikɗe ɗa kà nit kparri ây naa? ⁴ Ngam nirri kpolo gàarre: Miy mi nit Pawlu ɗi. Nit kana ngaa gàarre: Miy mi nit Apollo ɗi. Kà yey un tâarre kà nit kparri ây ba yi? ⁵ Wun tâage Apollo ya? Wun tâage Pawlu ya? Aw a nit tèerra tèem Fay ɗi, a gin nit ây raknu yèy, goosunu gi. Koo wuna tèerre kà yey hîiw Nitcoorra gi. ⁶ Miy mi còge, Apollo njoosige, amma Fay ’misu di jàk còkta maan. ⁷ Hû go koo nit còkta, koo nit njoosum aw get ba, sey Fay Tooy ’misum di jàk còkta gi. ⁸ Nit còkta ni nit njoosum pî aw aw tâa kpolo, amma koo wuna kpàa ge kpàa bèeb loca tèem wàa. ⁹ Ngam orro ot nit tèenjum ɗi ni Fay, un un hèmna Fay ɗi, un jàk jâarra wàa ɗi. ¹⁰ A mbâr yey hîim Fay gi, mi tare bàanji kà nit yey mbinge jâarra. Nit kana jâarre a woy tata mum. Amma koo wuna sey e ii hakkilo kày ge jâa gi. ¹¹ Cen nirri ge kpàaw tata jàk jâarra kana ba, sey yey tâage tatiya gi, Yeesu Kristu gi. ¹² To nirri jâa go a tata maan ni kangeerri, koo ni sarrdi, koo ni gòok delliya, koo ni kpiiri, koo ni bàsi, koo ni sàmsi, ¹³ tèem wàa koo di wuna lò ge lòt a unji kiita. Ngam ni ebi lò ge lòrri, ebi kà ge kàlni tèem wàa koo di wuna kày tâa gi. ¹⁴ To tèem nit kana gòy go, ti ak ba gi, ey kpàa ge kpàa bèeb loca tèem wàa. ¹⁵ To tèem nit kana ak go, bèeb tèem wàa gbee ge gbee. Amma ey ni hak wàa saa ge saa ni dakkèrr kà nirri saage a ebi. ¹⁶ Un cèngni, un un àay Fay ɗi ba yi? Jungci Fay tâanjirre ni un ba yi? ¹⁷ To nirri mboysi go àay Fay, Fay gbee ge gbeesu di nit maan, ngam àay Fay dii delliya. Un tâage àay maan. ¹⁸ Ta koo wuna e rûfsi hak wàa ba. To nit kana a tîim wun dànde go, dii ni còycum a tâam kparri yey gi, sey e ir ray ngam ha e tâa nit còycumya takundi. ¹⁹ Còycum kparri ray ɗi a ɗàm kpees Fay. Ngam gàa a defterre wàa: Mòorre da nit ây tâage còycumya a gâra waw. ²⁰ Gàa bak: Tooy Ɓèl cèngni jàk dànda nit ây tâage còycumya, jàk ɓa hû go ɗi. ²¹ Kà yey ta nirri e râani hak wàa ngam nit kana ba. Ngam jàk ây pî woy wun ɗi, ²² koo Pawlu, koo Apollo, koo Piyèr, koo kparri, koo gûyrra, koo wurra, koo jàk ây tâage niyey, koo jàk ây gaw dàara gi. A jàk ây gi pî woy wun ɗi, ²³ amma un un nit ta Kristu ɗi, Kristu ngaa Hàm Fay ɗi.

¹ Hû go raptin dorro kà nit tèerra tèem Kristu, kà nit faarra jàk ta Fay tâage fûurriya gi. ² Jày kàmin a gin nit faarra jày gi, gesi e mòo tèem wàa mbâra. ³ Miy mi dànde, jàk luusiya ɗi, nge un un hiitim go, koo kiita nit ây mòom go gi. Miy ɗa gim hiitisi hak mum ba. ⁴ Ngam mi cèngni koo jâ a hak mum ba, amma yey ti lòni nge miy mi dii ɗèm ba. Nitcoorra tâage nit hiitum mum. ⁵ Hû go ta un hiitu di nirri ni hâtnjum ba, ɗoko Nitcoorra e dàara gi. Ey lò ge lòni a kayang jày tâage fûurriya a kulpi, lò ge lòni ɗa jàk dànda a tinîir nit ây. Kà yey koo wuna kpàa ge kpàa ɓòlmum wàa a gin Fay. ⁶ Un kor ta mum, ngam wun yèenim yèk ây gi a hak mum ni hak Apollo ɗa, ngam ha un èngni a gin worro jày yiɗi gàarra yèk yey: Ta nirri e hòm a jày tâage kètiya gi ba. Hû go ta koo wuna e ’misi hak wàa ngam nit kpolo, e luusu di nit kana ba. ⁷ Wun gàagum dum, mu hòmi daw da nit ây kana ya? Ji tâagum dum, tâa ti tâa a gin Fay ngormu ba ya? Amma ye tâa mu ngore, ngam jâ ’misum hak wey mu gàa, mu ngor koo jâ ba ya? ⁸ Un un ole, un dii ni bèebi. Un ire wûun ây, ti tâa ni orro ba. To un tâa go wûun ây, ndika orro ɗa ot tâa wûun ây ni un! ⁹ Ngam mi dànde, Fay luusina dorro dot nit ây tèe dot Yeesu gi, iina u daarri kà nit ây kpàage kiita wurra, ot ire jàk raptum a kparri, a nis malayka ây ni nis nit ây ɗa. ¹⁰ Orro ot rak ây ɗi yèk Kristu, amma un un nit còycum ây ɗi a gin wàa. Orro ot dii ni dàngda isi, amma un un dii ni kpèw kpèw. Dun aw ’misunurre, amma dorro aw luusinarre. ¹¹ Ha kòsòng orro ot nit fek ây ɗi, sòo ɓòynarre, ot èerre lurra, aw lutkinarre, àay cenna ba. ¹² Orro ot hâtɗe tèerra tèem ni kàn worro. Ye maasinan gi, ot mbârsi dawrre. Ye ɗàanan ɗàari gi, ot èfɗe tinîir worro. ¹³ Ye yèenan yèk àyrriya, ot goosi dawrre ni yèk mbâra. Ot dii kà jàk ây ɓètfan a kparri lang. A gin nit ây pî ot dii kà jàk ây a bûuri ha kòsòng. ¹⁴ Mi kèrfa dunde jàk ây gi, ti tâa ngam mi mòosunu lawsam ba, amma mi yèefa dunde kà hàm ta mum yiɗim dun gi. ¹⁵ To nit kàlnjum ây ujinè ra diinu go a yèk Kristu, koo hû go un cen ni tooy ây dèy ba. Ngam miy tâage too wun kpolo a gin Kristu, ye saknim dun Yèk Kâwrra gi. ¹⁶ Hû go mi waanurre, furrin dikri mum! ¹⁷ Yòo maan mi tèefa dun Timote, nit tèerra tèem mbâra, ngorge yèk Nitcoorra a gin mum, mi yiɗuge kà hàm mum. Ey ɓa ge ɓaysunu yèk dikri mum a ot Yeesu Kristu, kà yey kàlnjim miy koo u hâ a gin kimjum nit ây. ¹⁸ A nit ây kana aw ’misirra hak waw aw gàarre, gim haasifa dikta a gin wun ba. ¹⁹ Amma di gim difa a gin wun yaale, to Nitcoorra yiɗi go gi. Hû go cè gim cèngni mbinum waw da nit ây ’misi hay, naa yèk waw gbè. ²⁰ Ngam wûun Fay ti lòt a yèerra yèy ba, amma a mbinum ɗi. ²¹ Kà yiɗunu ya? Mi difa a gin wun ni tiluni yi, koo ni yiide fetkum tinîiri yi?

¹ Aw gàarre, yèk kûurra ni kin kana dii a tîim wun. Yèy kà yey cen koo a tîim nit ây èege yèk Fay ba, ha nirri e at kin too wàa gi. ² Amma un un ’misirre hak wun! Ndika un umi, un yuunufa di nit mbita jàk yey a tîim wun! ³ Ngam miy mi cenda a tîim wun ni isi ba, amma jàk dànda mum tâanjirre ni un. Mi hiitu mgban di nit mbita jày kà yey, tâa mu gàa mi dii a tîim wun. ⁴ Mi gàanurre ni nîir Yeesu Nitcoorra, ye kimjim ni un ni jàk dànda mum a mbinum Yeesu Nitcoorra worro gi, ⁵ sey un hîiw di nit yey a kàn Seyɗan ngam is wàa e gbee, ha jungci wàa e saa a unji Nitcoorra! ⁶ Râanum hak wun ti del ba. Un cèngni, nge njàngna càa fâasi mûta jày pî ba yi? ⁷ Yuunifan njàngna yey tâage mgbantiya a tîim wun, ha un tâa mûta jàk fûuya. Amma takundi njàngna cennu ba, ye tâa Kristu tâage mgbâay Paska worro, aw gûuwe. ⁸ Hû go rri go, dàan ot ii daprum naa ni njàngna mgbantiya tâage ni tèem makta, ni kperrem, amma ni tàat ɓetkumya tàat takundi, njàngna cen. ⁹ Mi kèrfa dun nà mgban a ɗerrewol mum, ta un ’mèmsi ni nit ây iirge njeenu ba. ¹⁰ Ye yèenim dun kà yey, mi dàn ta un ’mèmsi koo jâ ni nit iirra njeenu ây a kparri gi ba, koo ni nit ngèergum ngèer ây, koo ni nit ngorgum jàk ây, koo ni nit ây futke yèk mâri ba. To tâa go ngin kà yey, gesi ngin un yuu a kparri. ¹¹ Amma jàk yey gàamfa dun gi, nge to nirri yiɗi go aw ’naasu kor goosum, amma tâarre go nit iirranjeenu, koo nit ngèergum ngèeri, koo nit futa yèk mâri, koo tinjàmrum nit ây, koo nit râmrum mbàl, koo nit ngorgum jàk ây, ta un ’mèmsi ni ey ba, ta un riinji ni ey ɗa ba. ¹² - ¹³ Ji tâagimda dim, gim @hiiti daw da nit ây tâa aw lek a tîim worro ba ya? Fay ey ge hiiti daw. Gesi un un hiiti daw da nit ây tâage a tîim wun ba yi? Yuunufan a tîim wun di nit makta gi!

¹ To nirri kpolo a tîim wun dii go ni yèk kiita a gin kor kana, kà ge ’maa yèk maan a ɗàm kpees nit ây tâa aw goosu di Fay ba ya? Ndika e ’maaw a gin nit goosum ây. ² Koo un cèngni, nit goosum ây gaw hiiti kparri ba yi? To un gun hiiti go kparri gi, un get hiitum yèk kaa ba yi? ³ Un cèngni ɗa, orro got hiiti malayka ây ba yi, sakko yèk kparri gi yi? ⁴ Hû go to kiita ây diinu go a yèk kparri, sey un ii daw da nit ây luusiya dàaga a kimjum, aw tâa nit hiitum wun. ⁵ Mi yèefa dunde yèk yey, ngam ha lawsam e mòonu. Cen nirri tâage nit còycum koo kpolo a tîim wun, ge mbin raknjum yèk kana a tîim kor ây ba yi? ⁶ Amma kor kana kor goosum ’maarre kiita di kor wàa, a ɗàm kpees nit ây tâa aw goosu di Fay ba. ⁷ Takundi, un gbeeye orri, ngam kor goosum ’maawrre di kor goosum kana a kiita. Ndika un èf tinîiri, to nirri mbitnu go jàk maarra. Ndika un èf tinîiri, to nirri ngosunu go jày. ⁸ Takundi, un tèerre tèem makta, un ngosirre jày koo di kor wun! ⁹ Un cèngni, nge nit ây tèege tèem makta gaw kpàa lekta a wûun Fay ba. Ta un rûfsi hak wun ba! Koo nit ây mboysiri sapri ây, koo nit ây cooge mâri, koo nit ây iige njeenu, koo nit ây kûunjiri nihun ni nihun, nikin ni nikin, ¹⁰ koo a oor ây, koo a nit ngèer ây, koo nit ây râmri daw mbàl, koo nit ây jàmri da nit ây kana, koo nit ây ngorgi jày, aw gaw kpàa lekta a wûun Fay ba. ¹¹ A nit ây kana a tîim wun aw mbiirirre nà mgban kà yey. Amma kòsòng un un dii kòliya, un dii ɓetkumya, un kpàa gòyrra ɗèm ni nîir Yeesu Kristu Nitcoorra, ni Jungci Fak worro. ¹² Orri dii ha mi mbir jày pî. Amma jày pî ti tâa delliya ba. Orri dii ha mi mbir jày pî, amma ta mi tâa sàay jàk maan ba. ¹³ Tiriici dii ngam himni, himni ngaa ngam tiriici, amma Fay gbee ge gbeesifa ɗa pî. Isi ti tâa ngam iinum njeenu ba, amma ngam Nitcoorra, Nitcoorra ngaa ngam isi. ¹⁴ Fay gûysuge di Nitcoorra gi, gû ge gûysina dorro ɗa ni mbinum wàa. ¹⁵ Un cèngni nge is wun woy Kristu ɗi ba yi? Koo mi at jàk Kristu, mi hîiw di kin tikàm toonji yi? Ge tâa hû go ba sam! ¹⁶ Un cèngni, nge nit yey ’mèmsi ni kin tikàm toonji gi, aw ire isi kpolo ba yi? Ngam defterre Fay gàaye: Aw ɗa cuk i gaw ir isi kpolo. ¹⁷ Amma nit yey ’mèmsi ni Nitcoorra, aw tâa jungci kpolo. ¹⁸ Woofan iirra njeenu! Jàk maarra kana pî mbire nirri gi, ti tâa a is wàa ba. Amma nit yey iige njeenu gi, mbire jàk maarra a is wàa. ¹⁹ Un cèngni nge is wun tâage àay Jungci Delliya yey hîinu Fay gi ba yi? Un un tâasi jàk maan ni hak wun ba. ²⁰ Un dii sàasumya ni sàar àyrriya. Ngam maan ’misuwan di Fay ni is wun!

¹ A yèk yey kèrma un gi, mi gàanurre: Dele to nirri jal go a gin nikin ba. ² Amma ngam yèk njeenu, ndika koo wuna nihun e tâa ni kin wàa, nikin ngaa e tâa ni maa wàa. ³ Sey nihun e suusu fòon di kin wàa, nikin ɗa e suusu fòon di maa wàa. ⁴ Nikin cen ni mbinum a is wàa ba, sey maa wàa. Kà yey ɗa nihun cen ni mbinum a is wàa ba, sey kin wàa. ⁵ Ta un èeninji is wun ba, sey to un raknji go a yèk maan ngam unji càa, ha un rîi kpèw a waarra Fay. A dat maan un ’mèmsisi, ngam ta Seyɗan e rûfnu a èca mòosum hak wun ba. ⁶ Mi gàa kà yey ngam ha mi kàlnunu orri kày gun tèe gi, ti tâa yèk mgbèngda ba. ⁷ Miy mi yiɗi, a nit ây pî aw tâa kà mum. Amma koo wuna dii ni hîir wàa kà yey kpàa a mbâr Fay gi, nirri kpolo kà yey, nit kana kà woy yey go. ⁸ Mi gàa dawrre da nit ây tâa aw haa ata kin ba, ni kin wurra ây: To aw tâa go kà mum cen ata kin gi, mbâri ɗi ngam waw. ⁹ Amma to gaw kpàaw go mòosum hak waw ba, sey aw at kin, kin wurra ây ɗa aw dik a àay nihun. Ngam ata kin hòme di siisum tinîiri a gayam. ¹⁰ Mi gàa dawrre da nit ây atke kin, ti tâa miy gàagi daw kà yey ba, amma Nitcoorra gàagi daw, ta nikin e ɗòlnji ni maa wàa ba. ¹¹ Amma to ey ɗòlnji go ni maa wàa, sey e tâa ey kpolo wàa, maa cen, koo e raknjisi ni maa wàa. Hû go ɗa nihun ta e ɗòlnji ni kin wàa ba. ¹² Mi gàa dawrre da ngirra nit ây kana a tîim wun, ti tâa Nitcoorra gàagi daw ba: To nihun tâa go nit goosum, dii ni kin yey tâa ti goosi yèk Fay ba, to kin wàa yiɗi go e tâanji ni ey, ta e mànu ba. ¹³ Hû go ɗa to nikin tâa go kin goosum, dii ni maa yey tâa ti goosi yèk Fay ba, to maa wàa yiɗi go e tâanji ni ey, ta e woowfa ba. ¹⁴ Ngam maa yey tâa ti goosi yèk Fay ba, dii ɓetkumya ngam goosum kin wàa. Hû go ɗa kin yey tâa ti goosi yèk Fay ba, dii ɓetkumya ngam goosum maa wàa. To ti tâa go ngin hû go ba, a hàm ta waw tâa gaw tâa ngin ’miskumya a ɗàm kpees Fay. Amma kà yey aw dii ɓetkumya. ¹⁵ To nit èca goosum yèk Fay yiɗi go ɗòlnjum ni nit yey goose gi, sey aw ɗòlnji. Nit goosum nihun koo nikin aw cen ni ndakcu a tâam maan ba, amma Fay ’naasi daw a tâam mbâri. ¹⁶ Ngam muy mu nikin, kà gum cèngni to gum saanu go di maa wey ya? Koo muy mu nihun ɗa, kà gum cèngni, to gum saanu go di kin wey ya? ¹⁷ Sey koo wuna e tâa tâam yey hîiw Nitcoorra, kà yey ’naasu Fay gi. Hû go gàami daw da nit kimjum ây a riiy ây pî. ¹⁸ To Fay ’naasu go di nit rrèpnumya, sey nit maan e tâa rrèpnumya. To Fay ’naasu go di nit yey tâa ti rrèpni ba, ta nit maan e rrèpni ba. ¹⁹ Rrèpnum koo tâarra cen rrèpnum ti get koo jâ ba, sey futa yèk mgbèngda Fay. ²⁰ Sey koo wuna e tâa tâam wàa kà yey ’naasu Fay gi. ²¹ To tâa go Fay ’naasum ye tâamu nà sàa gi, ta e àyum ba. Amma to mu kpàa go tâarra tiròom, ndika mu tâa tiròom. ²² Ngam to Nitcoorra ’naasu go di nirri a tâam sàay, nit maan dii tiròom a gin Nitcoorra. To ’naasu go di nirri a tâam tiròom, nit maan sàay Kristu Nitcoorra ɗi. ²³ Un dii sàasumya ni sàar àyrriya. Ta un tâa sàay nit ây ba! ²⁴ Un kor ta mum, sey koo wuna e tâa a ɗàm kpees Fay tâam yey ’naasu nà gi. ²⁵ A hak sapri ây ni lor ây tâa aw ii àay ba, yèk mgbèngda Nitcoorra cenim ngam waw ba. Amma mi lònirre kà yey dànmi a tinîir mum, kà nit yey kpàage ’maton a gin Nitcoorra, tâage nit mbâra. ²⁶ Mi dànde mbâra ɗi ngam yèk ’màar tâarra yey gi, ha nirri e tâa kày tâa nà gi. ²⁷ To muy mu tâa go ni kin, ta mu mànu ba. To kin cenum go ba, ta mu kàm kin mu at ba. ²⁸ Amma to mu at go kin gi, mu mbir jàk maarra ba. To sapri dik go àay nihun, ti mbir jàk maarra ba. Amma a nit ây atnje gi, aw dii ni ’màari a jàk kparri. Miy mi yiɗi mi atnjirra dun ’màar maan. ²⁹ E rri yey jày gàanim dun gi kor ta mum: Unji luuye. Diga niyey a nit ây atke kin, sey aw tâa mu gàa kin ceni daw ba. ³⁰ A nit ây umge gi, sey aw tâa mu gàa aw um ba. A nit ây tâage ni kâwum tinîiri, sey aw tâa mu gàa kâwum ceni daw ba. A nit ây sàage jày, sey aw tâa mu gàa aw sàa jày ba. ³¹ A nit ây mbangse jày ni jàk kparri, sey aw tâa mu gàa aw mbangsi jày ba. Ngam kparri ni jàk ây tâage a farra gi lòo gaw lòo. ³² Mi yiɗi, un loosi tinîir wun ba. Nit yey tâa ti at kin ba, ey dànde a gin Nitcoorra, ha e kâwsu di Nitcoorra. ³³ Amma nit yey atke kin gi, ey dànde a jàk kparri, ha e kâwsu di kin wàa. ³⁴ Hû go dànda wàa mîinji cuk. Kin yey tâage maa cenu ba, koo sapri, ey dànde a gin Nitcoorra, ha is wàa e tâa ɓet ɓet, ni jungci wàa ɗa. Amma kin yey dòoge a àay ni-hun, ey dànde a jàk kparri, ha e kâwsu di maa wàa. ³⁵ Mi gàanu kà yey yèk tâam mbâr wun, ti tâa titokri toksimda dun ba, amma ngam un tâa kà yey gesi gi, ha un mòo tèem Nitcoorra ni tinîiri kpolo. ³⁶ To nirri dànde go, ti tèe mbâra a hak sapri wàa ba ye njanggu dòorra a àay nihun, ngam yer wàa hòme, to orri dii go, ndika e tèe jày gesi gi, e woow di sapri wàa e dòo àay nihun. Ey ti mbiru jàk maarra ba. ³⁷ Amma nit yey mòose tinîir wàa kpèw gi, ti tâa ni ndakcu a hak wàa ba, to mbinum diiw go a jày yiɗi gi, dàn go a tinîir wàa, e woow di sapri e tâa sapriya, mbâra tèeye. ³⁸ Hû go nit yey woogu di sapri wàa e dòo àay nihun gi, tèe mbâra. Amma nit yey tâa ti hîi sapri wàa a àay nihun ba, ey tèe mbâra hòmuge di nit yey hîige sapri wàa gi. ³⁹ Nikin dii ’mèmdiya a gin maa wàa ye tâa maa wàa dii beengiya gi. Amma to maa wàa wut go, ey dii tiròom e dòo di nit yey yiɗi gi, sey e dòo di nit yey goose yèk Nitcoorra gbè. ⁴⁰ Amma to ey tâa go kpolo wàa, kâwum hò ge hòmu. Kà yey dànmi a tinîir mum. Miy mi dànde, Jungci Fay dii a gin mum.

¹ A yèk joot gûurra a mâri, ot cèngni, nge orro pî ot dii ni cèngnum jày. Cèngnum jày ’misinirre hay di nirri, amma yiide mgbaanjurre di nirri. ² To nirri dànde go cèngni jày, ey ti haa cèngnum jày kà yey gesi nirri e cèngni ba. ³ Amma to nirri yiɗu go di Fay, Fay cèngnu di nit maan. ⁴ A yèk riirra joot yey gûun a mâri gi, ot cèngni, mâri cen a kparri ba, cen Fak kana ba, sey Fay kpolo gbè. ⁵ Ngam koo jàk ây dii go a faktiturum ni deesi, înin daw fak ây, kà yey tâa jàk coorra ây ni nit coorra ây dèy gi, ⁶ orro Fay kpolo tâagina, Tooy Ɓèl, a gin wàa ana jày pî. Ngam wàa tâana, ni Nitcoorra kpolo, Yeesu Kristu, nit yey jày pî tâage ni ey gi, orro ɗa ot dii ngam wàa. ⁷ Amma cèngnum jàk maan cen a gin nit ây pî ba. Ngam a nit ây kana aw rûu ni tèem mâri ha kòsòng, aw riirre joot yey gûun a mâri, aw cèngsi nge jàk hîirra di mâri ɗi. Dànjum tinîir waw dàngge, ’miskige. ⁸ Tiriici ge gòynina mbâra a ɗàm kpees Fay ba. To ot woofa go riirra jàk kana, jày ge âyrra dot ba. To ot riirre go ɗa, jày ge iisirra dot ba. ⁹ Amma iin hakkilo, ngam ta tèem wun a tâam tiròom e ir timgbòlnji a gin nit ây tâage dàngdiya gi ba! ¹⁰ To nirri rabum go mu tâarre a àay mâri mu rii tiriici, dum nit yey cèngni yèk maan, ge kpèwsu dànjum tinîir wàa dàngdiya, ha e rii joot yey gûun a mâri gi ba yi? ¹¹ Kor yey tâage dàngdiya, tâa Kristu wurre ngam wàa gi, gbee ge gbee ngam cèngnum wey. ¹² Amma ye tâa un mbitɗe jàk maarra a gin kor goosum ây, un àysi daw dànjum tinîir waw tâage dàngdiya gi, un mbitɗe jàk maarra a gin Kristu. ¹³ Ngam maan to tiriici iiwrre go timgbòlnji di kor mum, gim haasirra riirra jooci ba ha tâam timgbàri, ngam ta mi iiw timgbòlnji di kor mum ba.

¹ Miy mi tiròom ɗi ba yi? Mi nit yey tèem Yeesu ɗi ba yi? Mi rabu di Yeesu Nitcoorra worro ba yi? Ti tâa un tâage tèem mum a gin Nitcoorra ba yi? ² To a nit ây kana aw raptim go kà nit yey tèem Yeesu ɗi ba, a gin wun mi nit yey tèem Yeesu ɗi. Ngam un tâage jàk ticèngsunum tèem mum a gin Nitcoorra. ³ Tèem mum kàlni jày gim goosi da nit ây yiigim gi. ⁴ Orri cenna, ha ot ngor jàk riirra ni jàk njoorra ba yi? ⁵ Orri cenna, ha ot at kin goosum yèk Fay ot gîtnji ni ey ba yi? Ngam kà yey mbirin a nit ây kana tèe daw Yeesu gi, ni kaa rra wàa di Nitcoorra, ni Piyèr ɗa. ⁶ Koo miy ni Barnaba orro cuk gbè, orri cenna ha ot woofa tèerra tèem ngam kpàarra tiriici ba yi? ⁷ Sooje hâ jingsi bèeb tumri ni hak wàa ya? Wun ge còk hèmna, ge rii jày nîige a hèmna maan ba ya? Hàm faat hâ ge faa naay, ge njoo mboom naay ba ya? ⁸ Mi yèerre yèk yey kà yèk nirri yi? Ti tâa yèk mgbèngda gàagi kà yey ba yi? ⁹ Ngam dii kètiya a yèk mgbèngda Muusa, gàa: Ta mu leknurra ti ’mûugum a mgbelyèy di gusi a fòorra tirri ba. Fay yèerre yèk yey a hak gusi gbè yi? ¹⁰ Ti yèe ngam hak worro ba yi? Takundi, ngam hak worro yèeye, dii kètiya kà yey. Ngam nit bata sey e bar ni dànda a jày ge kpàa a hèmna wàa gi, nit fòorra tirri ɗa sey e fòo ni dànda a jày ge kpàa woy wàa. ¹¹ Ye tâa ot còge jàk Jungci, ge tâana jàk ɓèl to ot rip go jàk kparri a gin wun gi yi? ¹² To a nit ây kana aw dii go ni mbinum kà yey a hak wun, orro got hòmi daw ba yi? Amma ot tèe ni mbinum yey ba, ot èfɗe tinîir worro a jày pî, ngam ta ot njang Yèk Kâwrra Kristu ba. ¹³ Un cèngni, nge nit ây tèege tèem a àay Fay aw kpàarre tiriit waw a àay Fay ba yi, ni nit ây tèege tèem gûurra jàk gurfum aw kpàarrarre woy waw a jày gûun gi ba yi? ¹⁴ Kà yey Nitcoorra gàa ɗa da nit ây sake Yèk Kàwrra, gesi aw kpàa a tèem maan jày gaw gûyni ni erra gi. ¹⁵ Amma miy mi haa tèerra kà yey ba, mi kèr ɗa yèk yey ha mi kpàa ot mbita kà yey ba. Hòmim della to mi wut go, ni nirri e iiw di jàk râanum mum kà jàk ɓa hû go gi. ¹⁶ A sakta Yèk Kâwrra jàk râanum cenim ba. Ngam tâami ni ndakcu a hak mum ha mi sak Yèk Kâwrra. ’Màari waamde, to mi sak go Yèk Kâwrra gi ba. ¹⁷ To mi tèerre go ni yiide tinîiri, bèeb loca mum diimi a tèem maan. Amma to mi tèerre go yiide tinîiri cenim ba, mi tèerre kà sàay gbè. ¹⁸ Ji tâagim bèeb loca tèem mum ya? Tâam a sakta Yèk Kâwrra kà jàk hîirra ɓa hû go, to mi woofa go mbita kà yey gàan gesi a hak nit sakta Yèk Kâwrra e mbir gi. ¹⁹ Ngam koo ye tâa miy mi tiròom ɗi a gin nit ây pî, mi ii hak mum sàay nit ây pî, ngam ha mi kpàa nit ây dèy a tîim waw. ²⁰ Mi ire kà ni-Yude a gin ni-Yude ây, mi ire kà nit yèk mgbèngda a gin nit ây tâage ni yèk mgbèngda, ngam ha mi kpàa daw, koo ye tâa miy mi nit yèk mgbèngda ɗi ba. ²¹ Mi ire kà nit èca yèk mgbèngda a gin nit ây èege yèk mgbèngda, ngam ha mi kpàa daw. Amma mi tâa nit èca yèk mgbèngda Fay ba, mi dii ni yèk mgbèngda Kristu. ²² Mi ire kà nit dàngdiya a gin nit ây tâage dàngdiya, ngam ha mi kpàa daw. Mi ire koo nit jâ a gin nit ây pî, ngam koo kày ya mi saani daw da nit ây kana. ²³ Mi tèerre jàk ây pî ngam Yèk Kâwrra, ngam ha mi ir nit ’mèmsum a yèk maan. ²⁴ Un cèngni nge nit ây ’nòoge ’nòori ngam kpàarra jày, aw pî aw ’nòorre ba yi? Amma sey nirri kpolo sòrge gi ey getke kpàarra jàk hîiri. Ngam maan ’nòon, ha un kpàa jàk hîir maan. ²⁵ Koo wun yiɗi go e hòmu ’nòorra ’nòori di nit kana, ey mòosirre hak wàa a jày pî. A nit ây gi aw mbitɗe kà yey ngam ha aw kpàa jàk hîir waw, tikangni hak yey ge lòo gi. Amma orro ot mbitɗe hûy ngam tikangni hak yey tâa ge lòo ba. ²⁶ Ngam maan mi ’nòorre ɓa hû go ba, mi tâa kà nit luta yey lutke a hiski ba, ²⁷ amma mi riisurre ’màari di is mum, mi leknu tèem yey yiɗim e tèe gi, ngam ta mi nit sakta yèk Fay da nit ây kana aw kpàam mi get ba.

¹ Un kor ta mum, mi yiɗi mi ɓaysunu yèk wosom ta worro. Aw pî aw dikɗe nà ni Muusa u fur titurum Tooy Ɓèl, aw pî aw yewe nà a sòo ɓèl. ² Aw pî aw kpàaye baptisma, a ye ’mèmsin ni Muusa a titurum ni a sòo ɓèl gi. ³ Aw pî aw riiye tiriit Jungci kpolo, ⁴ mûsa waw pî aw njooye njoor Jungci kpolo, ngam aw njoo sòo a kpata Jungci futki daw gi, kpata maan Kristu ɗi. ⁵ Amma dikri nit ây dèy a tîim waw ti delu di Fay ba, de ɓàri daw a tîim nûri. ⁶ A jàk ây gi aw ire jàk kàlnum a gin worro, ngam ta ot lek a gayam makta kà nit ây maan ba. ⁷ Ta un tâa nit coorra mâr ây kà yey tâan a nit ây kana a tîim waw ba, kà yey tâa kètiya a defterre Fay, gàa: A nit ây aw tâa ton ngam aw rii aw njoo, a dat maan de anin aw yûu yûma. ⁸ Ta ot ii njeenu kà nit ây kana a tîim waw iige njeenu ba, ha yaan wurrin a nit ây ujinè ra cuk sàm taan a unji kpolo gi. ⁹ Ta ot rûfu di Nitcoorra kà nit ây kana a tîim waw rûfku nà ba, ha a jòoy ây de numrin daw de wurrin. ¹⁰ Ta un hûungi kà nit ây kana a tîim waw hûungin nà ba, ha malayka wurra de ɓàari daw. ¹¹ A jàk ây maan kpèrri dawge, ha e tâa jàk lònum da nit ây kana. Dii kètiya ngam e mgbèngna dot nit ây hèerra dot gbèerra kparri gi. ¹² Ngam maan nit yey dànge gòyrre gi, sey e faasi hak wàa ta e yaa ba. ¹³ Un kpàa jàk rûfta kana ba, sey woy yey nirri ge mbin èfta tinîiri gi. Fay Fak mbâri ɗi, ge woonu jàk rûfta e hòmu di kpèw kpèw wun ba, amma to un lek go a jàk rûfta, ey ge mbangsunu ot saarra, ha un kpàa èfta tinîiri a jàk maan. ¹⁴ Hû go nit yiɗum ta mum, faasin hak wun a coorra mâri! ¹⁵ Mi yèenurre, mu gàa nit ây tâage ni hakkilo. Dànin ni hak wun a jàk yey yèemi gi! ¹⁶ Tinjooni mbâr yey ngotna ni gàarra mbew di Fay, ti tâa ’mèmsum ni njîim Kristu ba yi? Tàat yey cèena gi, ti tâa ’mèmsum ni is Kristu ba yi? ¹⁷ Tàat maan kpolo ɗi. Hû go orro, koo ye tâa ot mûuye, ot is kpolo ɗi, ngam orro pî ot ’mèmsirre a tàat kpolo. ¹⁸ Raptin daw da ni-Israyel ây a tâam waw! Naa a nit ây riige joot yey gûun a àay Fay gi, aw ’mèmsi ni gin gûurra jàk gurfum maan naa? ¹⁹ Ɗo ji yiɗim gàarra ya? Joot yey gûun a mâri gi, jàk ɓèl ɗi yi? Koo mâri gi jàk ɓèl ɗi yi? ²⁰ Oow! Amma jày gûun a nit ây cooge mâri gi, aw gûurre da tindòom makta ây, ti tâa di Fay ba. Mi yiɗi un ’mèmsi ni tindòom makta ây ba. ²¹ Gun kpàaw njoorra ni kop Nitcoorra, ni kop tindòom ây ɗa cuk ba. Gun kpàaw riirra tiriit Nitcoorra, ni tiriit tindòom ây ɗa cuk ba. ²² Koo ot mbitɗe hûy ha Nitcoorra e an ngèeri yi? Mba ot dànde, got hòmu dey kpèw kpèw yi? ²³ Orri dii ha ot mbir jày pî. Amma jày pî ti tâa delliya ba. Orri dii ha ot mbir jày pî, amma ti tâa jày pî ge mgbaanjina a goosum ba. ²⁴ Koo wuna ta e kàm jày ge delu di hak wàa ba, amma sey e kàm jày ge delu di nit kana. ²⁵ Riin jooci pî sàanu a luumu gi, ta un ngûmji yèk maan ba ngam yèk dànjum tinîiri. ²⁶ Ngam deesi ni jày mûuge a farra pî, woy Fay Tooy Ɓèl ɗi. ²⁷ To nit èca yèk Fay ’naasunu go riirra tiriici, un yiɗi go dikta gi, digin. Riin koo jâ iin a ɗàm kpees wun, ta un ngûmji ba yèk dànjum tinîiri. ²⁸ Amma to nirri gàanu go «yey joot mâri ɗi», ta un rii ba yèk nit yey kàlgunu gi, ni yèk dànjum tinîiri ɗa. ²⁹ Ti tâa yèk dànjum tinîir wey gàami ba, amma dànjum tinîir nit kana. Ngam jâ gim woo yèk dànjum tinîir nit kana e hiitim tâam tiròom mum ya? ³⁰ To mi riirre go ni gàarra mbew di Fay, ngam jâ gaw yèem a jàk yey riimi ni gàarra mbew di Fay gi ya? ³¹ Hû go mbirin jày pî ngam ’misum nîir Fay, koo un riirre go, koo un njoorre go, koo un tèerre go tèem. ³² Tâan un ii daw timgbòlnji da ni-Yude ây, koo da yòot ni-riiy ây kana, koo da nit ta Fay kimje gi ba. ³³ Mbirin kà mum, ye tâa mi mbire jày pî ngam e del daw da nit ây pî. Mi kàmde jày ge delu di hak mum ba, amma jày ge deli daw da nit ây dèy, ngam ha aw saa.

¹ Furrin tèerra tèem mum, kà yey furri miy tèerra tèem Kristu! ² Mi ɓòlmunurre, ngam un ɓaysimde koo ningàa pî, un futɗe yèk mgbèngda yey hîim dun gi. ³ Amma mi yiɗi un cèngni, nge hak nihun pî Kristu ɗi, hak nikin @ngaanihun ɗi, hak Kristu ɗa Fay ɗi. ⁴ Koo wuna nihun to waarre go Fay, koo lònirre yèk Fay, kupti go hak wàa, mòosirre lawsam di hak wàa gi. ⁵ Amma koo wuna nikin to waarre go Fay, koo lònirre yèk Fay, jàk kuptum cen a hak wàa gi, mòosirre lawsam di hak wàa, tâa mu gàa kin hak cayrriya ɗi. ⁶ To nikin kupti go hak wàa ba, sey e sàrru di gimsi hak wàa ɗa. Amma to tâaw go lawsam sàta koo cayrra gimsi hak wàa gi, sey e kupti hak wàa. ⁷ Di nihun ti gesu ha e kupti hak wàa ba, ngam ey rèenji ni Fay, ni ’mita Fay. Amma nikin, ’mita wàa ana a gin maa wàa. ⁸ Ngam nihun ti ana a gin nikin ba, amma nikin ana a gin nihun. ⁹ Nihun ɗa ti tâa mbangsumya ngam nikin ba, amma nikin tâage mbangsumya ngam nihun. ¹⁰ Ngam maan gesu di nikin, e kupti hak wàa ha e kàlni mbinum maa wàa gi yèk malayka ây. ¹¹ Nihun koo nikin aw kpolo waw aw get a ɗàm kpees Nitcoorra ba, sey aw ɗa cuk aw ’mèmsi go. ¹² Kà yey nikin ana a gin nihun gi, hû go ɗa nihun e kpàa a gin nikin, amma aw pî aw ana a gin Fay. ¹³ Dànin un ni hak wun, to del go ha nikin e waa Fay, jàk kuptum cen a hak wàa gi! ¹⁴ Naa a jàk ây mbangse Fay a deesi aw kàlninarre, jàk lawsam ɗi di nihun, to woo go gimsi hak wàa yâktiya gi naa? ¹⁵ Amma to nikin woo go gimsi hak wàa yâktiya gi, jàk mbâra ɗi, ngam kpàa gimsi hay yâktiya kà jàk kuptum a gin wàa. ¹⁶ To nirri yiɗi go hàanjum yèk yey, sey e cèngni, koo orro koo nit ta Fay kimje gi, ot cen ni hàar kana kà yey ba. ¹⁷ E rri yey mi yèenurre a jàk ây gi, gim kpàanu ɓòlmum ba. Ngam kimjum wun ti tâa mbâra ba, amma jàk mboysum ɗi. ¹⁸ Màrra mi rage, a ye kimjunu gi, ɗòlnjum dii a tîim wun. Mi ngore jàk ây kana ’nang ’nang a yèk maan. ¹⁹ Yèk futa ot ây ’nang ’nang sey e tâa a tîim wun, ngam ha nit ây gòyge mbâra aw lòrri. ²⁰ Un kimjirre go a gin tikpolo, ti tâa takundi ngam riirra tiriit Nitcoorra ba. ²¹ Ngam un riirre go tiriit wun, koo wuna ɗaa riirra woy wàa. Nit kana fey àyurre, nit kana ngaa mbàl râmurre. ²² Un cen ni àay, ha un rii un njoo a farra ba yi? Un un luusirre kimjum nit ta Fay yi? Koo un mòosi dawrre lawsam da nit èca ây yi? Ji gim gàanu ya? Gim ɓòlmunu yi? Oow, a jàk yey gi gim kpàanu ɓòlmum ba! ²³ Jàk yey kàlnjim dun nà, a gin Nitcoorra kpàama. Yeesu Nitcoorra a tuma yey mòowan ni gâra gi, arre tàarri, ²⁴ de gàa mbew di Fay, de cèenje de gàa: Yey tâage is mum, dii hîirriya ngam wun. Mbirin kà yey ngam un ɓaysinimi! ²⁵ Hû go ɗa de arre kop njooni a dat riirra tiriici, de gàa: Kop yey tâage jàk wasta fûuya, ge gbèe ni njîim mum gi. Koo ningàa njoonu ya, mbirin kà yey ngam un ɓaysinimi. ²⁶ Ngam koo ningàa riinu tàat yey, njoonu a kop yey ya, un cèngninirre yèk wurra Nitcoorra, ha mgbàr yey ge ira gi. ²⁷ Ngam maan to nirri riirre go tàarri gi, koo njoorre go a kop Nitcoorra kày tâa ti gesi ba gi, mbire jàk maarra a is Nitcoorra ni njîim wàa ɗa. ²⁸ Amma sey nirri e dànji ɗà a tinîir wàa, ha e rii tàarri gi, e njoo a kop tinjooni gi. ²⁹ To nirri riirre go, njoorre go cen ɓaysum yèk is Nitcoorra, kiita riiye njooye a hak wàa. ³⁰ Ngam maan a nit ây dèy a tîim wun aw dii ni is dàngdiya, aw dii àyciya. A nit ây kana ɗa aw wurre. ³¹ To orro ot hiitisirre go hak worro, got kpàa kiita ba. ³² Amma ye tâa Nitcoorra hiitina gi, ey ûunina ɗa, ngam ta kiita e kpàana ni kparri ba. ³³ Hû go un kor ta mum, un kimjirre go riirra tiriit Nitcoorra, sey un waanji a tîim wun. ³⁴ To fey àyu go di nirri, sey e rii a àay wàa, ngam ta kimjum wun e ’maara dun kiita ba. Ye gim difa a gin wun, kà gim kàlnu ngirra yèk kana ɗa.

¹ Un kor ta mum, mi yiɗi un cèngni yèk hîir ây hîi Jungci Delliya gi. ² Ngam un cèngni, a ye tâanu nit èca yèk Fay, aw nàrri dun nà aw ’maanu a gin mâr muukaw ây. ³ Ngam maan mi kàlnurre, nge koo wun tâage ni Jungci Fay, ge gàa «Yeesu e tâa maasumya» ba. Hû go ɗa sey nit yey tâage ni Jungci Delliya gi kpàa ge kpàa gàarra «Yeesu tâage Nitcoorra». ⁴ E rri yey hîir ây hîi Jungci Delliya gi aw dii ’nang ’nang, amma Jungci kpolo ɗi. ⁵ A tèem mgbaanjum ây aw dii ’nang ’nang, amma Nitcoorra dii kpolo, kàlnarre tèem maan gi. ⁶ Mbita jàk ây aw dii ’nang ’nang, amma Fay dii kpolo, mbitɗe jày pî koo a gin wuna. ⁷ Koo a gin wun lòni Jungci Delliya gi, ey kpàa kà yey ngam mgbaanjum da nit ây kana. ⁸ Ngam Jungci Delliya hîi di nit kpolo yèerra yèk còycum, Jungci maan ɗa hîige di nit kana yèerra yèk cèngnum jày. ⁹ Jungci maan bak hîi di nit kana goosum, di nit kana ngaa ndòosum àyci, ¹⁰ di nit kana tèerra jàk kayeefi, di nit kana lònum yèk Fay, di nit kana getnjunum jungci makta ây ni Jungci Delliya, di nit kana ngaa yèerra ni yèk ni-riiy ây ’nang ’nang, di nit kana ɗa inum yèk ây gi. ¹¹ Amma jàk ây gi pî Jungci kpolo nà tèege, hîige hîir wàa ’nang ’nang koo di wuna kà yey yiɗe gi. ¹² Kà yey tâa isi kpolo dii ni jàk ây dèy, a jàk ây gi pî koo ye tâa aw mûuye aw ire isi kpolo, hû go tâa ɗa ni is Kristu. ¹³ Ngam orro pî ye kpàana baptisma gi, Jungci kpolo nà ’mèmsina a isi kpolo, ot ni-Yude ây, ni yòot ni-riiy ây kana, ni sàay ây, ni tiròom ây. Orro pî ot njooye a Jungci kpolo. ¹⁴ Isi ɗa ti gòy ni jày kpolo ba, amma ni jàk ây dèy. ¹⁵ To nay gàa go «ye tâa mi kàn ɗi ba, mi ’mèmsi a isi ba», koo hû go a isi tâaye. ¹⁶ To tuy gàa go «ye tâa mi nisi ɗi ba, mi ’mèmsi a isi ba», koo hû go a isi tâaye. ¹⁷ To isi pî tâa go ngin nisi, ni jâ ge kpàa rakta ya? To isi pî tâa go ngin tuy gi, ni jâ ge kpàa dâarra jày ya? ¹⁸ Fay ii daw da jàk ây gi a isi, koo jàk hâ ni gin tâam wàa kà yey yiɗe gi. ¹⁹ To isi pî tâa go ngin ni jày kpolo gbè, isi kà ge tâa ya? ²⁰ A jàk ây ’nang ’nang aw dii dèy, amma isi ɗi kpolo. ²¹ Nisi ge kpàaw gàarra di kàn «mi cen ni gayam wey» ba. Hû go ɗa hay ge kpàaw gàarra di nay «mi cen ni gayam wey» ba. ²² Ngam hayye a jàk ây a isi tâage mu gàa aw luuye gi, a jàk mbâr ây ɗi, aw mgbaanjirre. ²³ A jàk ây tâage a is worro mu gàa a jàk ɓèl ây ɗi ba, daw hòmna faarra. A jàk ây a is worro mòosina lawsam gi, daw butna ni jày hòmge della. ²⁴ Amma a jàk ây tâage delliya a isi aw cen ni gayam, ha ot mbit daw kà yey ba. Fay ’mèmsige isi e tâa kpolo, hîi daw ’mita da jàk ây hòmge luurra, ²⁵ ngam ta ɗòlnjum e tâa a isi ba, amma a jàk ây gi aw tâa ni dànda kpolo, aw mgbaanjirre a tîim waw. ²⁶ To àyurre go di jàk kpolo a isi, a jàk ây pî a isi aw àynjirre ni ey. To jàk kpolo a isi kpàa go ’misum, a jàk ây pî a isi aw kâwnjirre ni ey. ²⁷ Un pî un is Kristu ɗi, koo wuna jày kpolo ɗi a is wàa. ²⁸ Fay ii daw da nit kimjum ây màrra nit tèerra ây, cukti nit lònum ây, taanti nit kàlnjum ây, a dat maan nit tèerra jàk kayeefi ây, ni nit ây kpàage hîir ndòosum àyci, ni nit mgbaanjum ây, ni nit tiɗàm kpees ây, ni nit ây yèege ni yèk ni-riiy ây ’nang ’nang. ²⁹ Koo a nit ây pî a nit tèerra ây ɗi yi? Koo a nit ây pî a nit lònum ây ɗi yi? Koo a nit ây pî a nit kàlnjum ây ɗi yi? Koo a nit ây pî a nit tèerra jàk kayeefi ây ɗi yi? ³⁰ A nit ây pî aw dii ni hîir ndòosum àyci yi? Koo a nit ây pî aw yèerre ni yèk ni-riiy ây ’nang ’nang yi? Koo a nit ây pî aw inirre yèk ây gi yi? Oow, ti tâa hû go ba. ³¹ Amma sey un kàm hîir ây woy hòmge ’mita gi! Kòsòng mi kâlnunurre ot yey hòmge pî.

¹ To nirri yèerre go ni yèk nit ây pî koo ni yèk malayka ây, amma yiide cenu ba, tâa ge tâa kà titefki dûuge gi, koo kà tindàam gbala. ² To nirri kpàa go lònum yèk Fay, to cèngni go yèk ây fûuge gi pî, to dii go ni cèngnum jàk ây pî, koo dii go ni goosum ha e hèeni gopri ây, amma yiide cenu ba, tâa ge tâa jàk ɓa hû go. ³ To nirri hîi go jàk ta wàa pî da nit èca ây, koo hîi go is wàa aw aksi gi, amma yiide cenu ba, ge mbiruwa jàk mbâra koo jâ ba. ⁴ Amma to nirri dii go ni yiide, ey èfɗe tinîiri, tèerre mbâri, ge ngèr ngèeri ba, ge râani ba, ge ’misi hay ba. ⁵ To nirri dii go ni yiide, ge tèe tèem lawsam ba, ge kàm jàk hak wàa ba, ge an ngòlòm ba, ge mòosi yèk maarra ba, ⁶ ge kâwsi tinîir wàa a tèem makta ba, amma rakɗe kâwum a yèk takundi. ⁷ To nirri dii go ni yiide, ey èfɗe tinîiri a jày pî, gòyrre ni goosum di Fay a jày pî, dii@ni jàk dànda a jày pî, ûunirre hak wàa a jày pî. ⁸ Yiide ti lòorre ba sam ha tâam timgbàri. Amma koo yèk lònum ây, koo yèerra ni yèk ni-riiy ây ’nang ’nang, koo cèngnum jày pî lòo ge lòo. ⁹ Ngam orro ot dii ni cèngnum càa càa, ot lònirre yèk Fay càa càa gbè. ¹⁰ Amma ye ge dàara jàk getiya, jày tâage càa càa gi, gbee ge gbee. ¹¹ A ye tâami nà hàm, mi yèerre kà hàm, mi dànde kà hàm, mi getnjirre jày kà hàm. Amma ye tâami nit ɓèl, mi woofage yèk tâam hàm. ¹² Kòsòng ot raptirre jày kà raptum a darrugal bir bir, amma a ɗàm kpeesi ra got rabi nisi ni nisi. Kòsòng mi cèngnirre jày càa càa, amma a ɗàm kpeesi cè gim cèngni jày pî mbâriya kà yey Fay cèngnim gi. ¹³ Goosum, ni jàk dànda, ni yiide aw dii tâarre koo ningàa. Amma ji hòmge ’mita pî, yiide.

¹ Kàmin yiide, hârin ɗa kpàarra hîir ây hîi Jungci Delliya gi, hayye lònum yèk Fay! ² Nit yey yèege ni yèk ni-riiy ây ’nang ’nang, ti yèerre da nit ây ba amma di Fay, ngam koo wuna ge rak yèk wàa ba. Ey yèerre yèk fûurriya ni Jungci Delliya. ³ Amma nit yey lòni yèk Fay gi, yèerre da nit ây, ngam ha e mgbaanji daw dikta ɗàm kpeesi a goosum, e rûusi daw. ⁴ Nit yey yèege ni yèk ni-riiy ây ’nang ’nang, mgbaanjurre di hak wàa. Amma nit yey lòni yèk Fay gi, mgbaanjirre da nit kimjum ây. ⁵ Mi yiɗige ha un pî un yèe ni yèk ni-riiy ây ’nang ’nang, amma jày hòmim yiɗum gi, nge un lòni yèk Fay. Nit yey lòni yèk Fay gi, ey hòmu ’mita di nit yey yèege ni yèk ni-riiy ây ’nang ’nang, sey to ini go yèk yey yèe gi ni yèk ni-riiy ây ’nang ’nang nà, ngam ha nit kimjum ây aw kpàa jày ge mgbaanji daw dikta ɗàm kpeesi a goosum. ⁶ Un kor ta mum, to mi difa go a gin wun, mi yèerre go ni yèk ni-riiy ây ’nang ’nang, ji gim mgbaanjunu ya, ye tâa mi yèenu koo ni lònum jày, koo ni cèngnum jày, koo ni lònum yèk Fay, koo ni kàlnjum jày ba? ⁷ Koo jàk ây èege jungci, dûuge gi kà tiwela ni tindingnding, to aw mîinji go dûurra gûn waw ’nang ’nang ba, nirri kà ge kpàaw cèngsum jày urin ni jày taan gi ya? ⁸ Malla to ti uta dûurre go gbukruruk, wun ge an ngam dikta a bàpri ya? ⁹ Hû go un ɗa a yèerra ni yèk ni-riiy ây ’nang ’nang, to un yèerre go ni yèk yey gese nirri e rak gi ba, kà ge kpàaw cèngnum jày yèenu gi ya? Ngam ra ge rak yèk maan kà hiski. ¹⁰ A yèk ni-riiy ây aw dii mûsi jày a kparri, amma koo yèk hâ sakɗe jày yiɗi gàarra. ¹¹ To mi cèngni go jày gàa yèk ni-riiy kana ba, nit yey yèegim gi tâa ge tâam kà ray, miy ɗa tâa gim tâaw kà ray. ¹² Hû go un ɗa, to un yiɗi go kpàarra hîir ây hîi Jungci Delliya gi, kàmin mgbaanjum da nit kimjum ây ha aw iisirra dikta ɗàm kpeesi a goosum. ¹³ Ngam maan to nirri yèerre go ni yèk ni-riiy kana, sey e waa Fay, ngam ha e kpàa inum yèk maan. ¹⁴ To mi waarre go Fay ni yèk ni-riiy kana, jungci mum waarre, amma dànda mum ti tèe jày a farra ba. ¹⁵ Ɗo kà gim mbir ya? Waa gim waa Fay ni jungci, waa gim waa ɗa ni dànda mum. Kâa gim kâa ndûu ’misum Fay ni jungci, kâa gim kâa ndûu maan ni dànda mum ɗa. ¹⁶ Ngam to mu waarre go, mu ’misini nîir Fay ni jungci, nit yey tâage a farra ɗaage lekta fûuya, kà ge kpàa gàarra «Amen» a waar wey gi ya? Ngam ti cèngni jày gàami gi ba. ¹⁷ Koo waar wey del go, nit kana ge kpàa jàk mgbaanjum a farra ba. ¹⁸ Miy mi gàarre mbew di Fay, ngam mi hòmnu dun pî yèerra ni yèk ni-riiy ây ’nang ’nang. ¹⁹ Amma a tîim nit kimjum ây gi, mi hòme yiɗum yèerra yèk ây kèrèw ragin gi ha mi cèngnini daw da nit ây kana, ni yèerra yèk ây ujinè ra ni yèk ni-riiy ây ’nang ’nang. ²⁰ Un kor ta mum, ta un tâa kà hàm ây a dànda wun ba, amma tâan kà nit ɓèl ây! Sey a tèerra tèem makta un tâa kà hàm ây. ²¹ E rri yey jày gàa Fay a defterre wàa: Yèe gim yèe da nit ây gi ni yèk ni-riiy ây kana, ni mgbelyèk nit ây kana. Amma koo hû go gaw ragim ba. ²² Yèerra ni yèk ni-riiy ây ’nang ’nang dii jàk kàlnum da nit ây èege goosum di Fay, naa ngam nit ây goose gi. Amma lònum yèk Fay dii jàk kàlnum da nit goosum ây, naa ngam nit ây èege goosum gi. ²³ To un kimji go a gin tikpolo, un pî un yèerre go ni yèk ni-riiy ây ’nang ’nang, a nit ây leke a gin wun koo nit fûu ây koo nit ây èege goosum gi, gaw gàa un doogige ba yi? ²⁴ Amma to un pî un lònirre go yèk Fay, nit èca goosum koo nit fûuya lekfa go a gin wun, un kà gun kàlu jàk maarra wàa, un hiituwa, ²⁵ jàk fûurra a tinîir wàa lò ge lòrri, ûu ge ûuni tiigi wàa a deesi e coo Fay, e gàa: Takundi, Fay tâanjirre ni un. ²⁶ Un kor ta mum, kà ge tâa jàk ây gi ya? A ye gun kimji gi, sey koo wuna e tâa ni tèem wàa, nit kpolo e kâa ndûu ’misum Fay, nit kana e kàlnji jày, nit yey e lòni yèy, nit kana ngaa e yèe ni yèk ni-riiy ây ’nang ’nang, nit kana ɗa e ini yèk maan. Jày pî sey e mgbaanji da nit kimjum ây dikta ɗàm kpeesi a goosum. ²⁷ To yèerra ni yèk ni-riiy ây ’nang ’nang tâa go, sey aw yèe kpolo kpolo, ta nit yèerra ây aw hòm cuk koo taan ba, sey nit kana ngaa e ini yèk maan. ²⁸ Amma to nit inum yèk maan cenda go ba, sey nit yèerra ni yèk ni-riiy kana e tâa baak baak a tîim nit kimjum ây. Ndika e yèe di hak wàa, ni Fay. ²⁹ A lònum yèk Fay, sey a nit ây cuk koo taan aw yèe, a nit ây kana ngaa aw roonju yèk maan. ³⁰ To nit kana a tîim nit ây kimje gi kpàa go ɗa yèk lònum, sey nit yey ɗaage yèerra màrra e tâa baak baak. ³¹ Un pî kpàa gun kpàa orri un lòni yèk Fay, amma sey un yèe kpolo kpolo, ngam ha a nit ây pî aw èngni jày, aw kpàa kpèwsum. ³² Jungci nit ây lòni yèk Fay gi dii ûunumya a yèk lònum. ³³ Ngam Fay ti tâa Fak jamjum jày ba, amma Fak tâam mbâri ɗi. Kà yey tâa koo u hâ pî a gin kimjum nit della ta wàa di Fay, ³⁴ sey a nikin ây aw tâa baak baak a kimjum wun ɗa. Ngam aw kpàa orri ha aw yèe yèy ba. Sey aw ûuni hak waw kà yey gàa yèk mgbèngda Fay. ³⁵ To aw yiɗi go cèngnum yèk kana mbâra, sey aw gun yèk maan da maa rra waw a àay. Ngam dii lawsam di nikin, ha e yèe yèy a tîim nit kimjum ây. ³⁶ A gin wun yuura yèk Fay yi? Koo a gin wun gbè kpèrra yi? ³⁷ To nirri dàn go ey nit lònum yèk Fay ɗi, koo nit kpàarra hîir Jungci Delliya ɗi gi, sey e cèngni, yèk yey kèrmifa dun gi, yèk mgbèngda Fay ɗi. ³⁸ Amma to nirri ngor go yèk maan ba, un ɗa ta un ngoru ba. ³⁹ Hû go un kor ta mum, hârin ha un kpàa lònum yèk Fay! Ta un njang yèerra ni yèk ni-riiy ây ’nang ’nang ba. ⁴⁰ Amma mbirin jày pî mbâra kà yey gese gi.

¹ Un kor ta mum, mi ɓaysunurre Yèk Kâwrra yey saknim dun nà, ngotnu gi. Un gòyrre a yèk maan. ² Ni erra gun saa, to un mòorre go jày pî kà yey saknim dun gi. To naa hû go ba, goosum wun tâa ɓa hû go. ³ E rri yey mi saknu nà jày ngormi gi, tâage jàk màrra: Kristu wurre ngam jàk maarra worro, kà yey gàa defterre Fay. ⁴ Aw siptuge. A unji taanti ey gûysige, kà yey gàa defterre Fay. ⁵ Ey lòrrurrage di Piyèr, a dat maan lòtɗa dawge da lor ta wàa ra sàm cuk. ⁶ Lòtɗa dawge da kor ây a unji kpolo, ji gaw hòm temèrre kèrèw. Mûsa waw aw gûyrre ha niyey, amma a nit ây kana a tîim waw aw wurre. ⁷ A dat maan lòrrurrage di Yakuba, lòtɗa dawge da nit tèerra ta wàa pî. ⁸ A gbèeni lòta wàa a gin nit ây, lòrrimdage dim ɗa mu gàa mi hàm kpàarra a cot jòsti ɗi. ⁹ Mi hòm daw luurra da nit tèerra ta wàa pî, mi get aw înim nit tèerra wàa ba, ngam mi ɗàa daw nà ɗàari da nit ta Fay kimje gi. ¹⁰ Amma ni mbâr Fay tâami tâam yey gi. Mbâr wàa a hak mum ti ir ɓa hû go ba. Mi hòm daw tèerra tèem da nit tèerra ta Kristu pî, ti tâa miy ni kpèw kpèw mum ba, amma mbâr Fay tâanji ni miy. ¹¹ Hû go yèk Kristu, koo an go a gin mum koo a gin waw, e rri yey jày sakna, goosunu gi. ¹² Ye tâa ot sakɗe yèk Kristu gûysige a wurra gi, kà gàan a nit ây kana a tîim wun, gûysum a wurra cen gi ba ya? ¹³ To gûysum a wurra cen go ngin, ɗo Kristu ɗa ti gûysi ngin ba. ¹⁴ Amma to Kristu ti gûysi go ngin ba, sakta yèk worro tâa ge tâa ngin ɓa hû go, goosum wun ɗa tâa ge tâa ngin ɓa hû go. ¹⁵ Kpàa gaw kpàana ngin kà yey orro ot nit seedum yèk rèeng ây ɗi a gin Fay, ngam ot seedige ot sage a hak Fay, ey gûysuge di Kristu. To yèk yey tâa go ngin takundi, nge gûysum a wurra cen gi, ngin Fay ti gûysu di Kristu ba. ¹⁶ To a nit ây wutke gi gaw gûysi go ngin ba, ɗo Kristu ɗa ti gûysi ngin ba. ¹⁷ Amma to Kristu ti gûysi go ngin ba, goosum wun tâa ge tâa ngin ɓa hû go, tâa gun tâa ngin bak ni jàk maarra wun cen yaafum ha kòsòng. ¹⁸ To Kristu ti gûysi go ngin ba, a nit ây goosu wutke gi, aw ɗa gbee gaw gbee ngin. ¹⁹ To jàk dànda worro a gin Kristu tâa go ngin ngam gûyrra a kparri gi gbè, orro hò got hòm daw ngin da nit ây pî a tâam fòon. ²⁰ Amma takundi, Kristu gûysige a wurra. Ey tâage nit gûysum màrra a tîim nit ây wutke gi. ²¹ Ngam kà yey wurra dàara a kparri ni nirri kpolo gi, hû go ɗa gûysum a wurra dàarage ni nirri kpolo. ²² Kày wurrin a nit ây pî ni Adam, hû go ɗa aw pî kpàa gaw kpàasi gûyrra ni Kristu. ²³ Koo wuna kpàa ge kpàa gûysum a futnji wàa: Màrra Kristu gûysige, a dat maan a nit ta wàa gû gaw gûysi a ye ge dàara gi. ²⁴ A dat maan tâa ge tâa unji gbèeni, ye ge gbeesi Kristu tâam wûun pî, ni mbinum pî, ni kpèw kpèw pî a deesi, ha e hîisu wûun di Fay Tooy Ɓèl. ²⁵ Sey Kristu e wûuni ha Fay e ii nit yiir ây pî a gin nafta nak wàa. ²⁶ Jàk yiirra yey gbeese u gbèeni gi, e tâage wurra. ²⁷ Ngam dii kètiya a defterre Fay: Jày pî ûunumya ɗi a nak wàa. Amma ye gàa «jày pî ûunumya ɗi gi», ti sak a hak Fay ba, ngam ey ûunurra jày pî di Kristu. ²⁸ Ye ge tâa jày pî ûunumya a gin Kristu gi, ey ɗa ûu ge ûuni hak wàa a gin Fay ûunurra jày pî, ngam ha Fay e wûuni a jày pî. ²⁹ To tâa go ngin takundi, nge nit ây wutke gi gaw gûysi ba, kà ge tâa yèk nit ây ngorge baptisma ngam nit ây wutke gi ya? Ngam jâ gaw ngor baptisma kà yey gi, to gûysum a wurra cen go ba ya? ³⁰ Ngam jâ orro ɗa leknina hak worro koo ningàa a gin tâa wurra ya? ³¹ Un kor ta mum, takundi kà yey râanim yèk wun a gin Yeesu Kristu Nitcoorra worro gi, unji pî mi kèlle wucu! ³² Ye tâa mu gàa ni yèk nirri katnjim ni jàk nûr ây a Efesu, ji gim kpàarra ya? To a nit ây wutke gi gaw gûysi go ba gi, sey ot mbir kà yey gàa yèk kana: Dàan ot rii ot njoo, ngam ni ndamji wu got wurri. ³³ Ta un rûfsi hak wun ba, ngam «tâanjum ni nit makta ây mbo ge mboysi dikri mbâra». ³⁴ Mûyin a dànda wun, tâan kà yey gese gi, ta un tèe jàk maarra ba! Ngam a nit ây kana aw cèngni Fay ba. Mi yèerre yèk yey ngam lawsam wun. ³⁵ Nit kana gu ge gun: Amma a nit ây wutke gi, kà gaw gûysi ya? Ni is hâ gaw kpàasi gûyrra ya? ³⁶ Mu ray ɗi! Jày còkmu a deesi, siptum gi, ge tâa jàk gûyrra ba, sey to ɗàa go wucu. ³⁷ Jàk yey còkmu a deesi, siptum gi, yòoci ɗi gbè, koo yòot tirri koo yòot jàk kana, ti tâa fur jàk yey ge ɓuk gi ba. ³⁸ Fay ey hîi ge hîiw fur jàk maan kà yey yiɗe gi, koo di yòot hâ pî fur wàa. ³⁹ Jooci pî ti tâa kpolo ba. Joot nirri dii ’nang ni joot jàk tinak ây, ni joot jooy ây, ni joot cîit ây ɗa. ⁴⁰ A jàk ây a faktiturum aw dii ni mbangsum waw, a jàk ây a deesi ɗa aw dii ni mbangsum waw. Amma della jàk ây a faktiturum dii ’nang ni della jàk ây a deesi. ⁴¹ Della unji dii ’nang ni della corri, ni della tibiskum ây. Della tibiskum ây ɗa aw ’nangjirre a tîim waw. ⁴² Kà yey tâa ɗa yèk gûysum nit ây a wurra. Is yey siptin gi raarriya ɗi. Is yey ge gûysi gi cen raarra ɗi. ⁴³ Is yey siptin gi jàk njengji ɗi, dàngdiya. Is yey ge gûysi gi jàk ’mita ɗi, kpèw. ⁴⁴ Is yey siptin gi is nirri ɗi. Is yey ge gûysi gi is jungci ɗi. To is nirri dii go, is jungci dii ɗa. ⁴⁵ Gàa a defterre Fay: Adam nit màrra ire is nirri beengiya. Amma Adam daarri kà gàarra Kristu ire Jungci hîirra gûysum a wurra. ⁴⁶ Nit jungci ti dàara màrra ba, amma nit isi. A dat maan furra nit jungci. ⁴⁷ Nit màrra ane a deesi, dii mbangsumya ni râktâm deesi. Nit cukti ana a faktiturum. ⁴⁸ Kà yey tâa nit yey ange a deesi gi, hû go tâan ɗa nit dees ây. Kà yey tâa nit yey anga a faktiturum gi, hû go tâan ɗa nit faktiturum ây. ⁴⁹ Kà yey rèenjina ni nit yey ange a deesi gi, hû go got rèenji ɗa ni nit yey anga a faktiturum. ⁵⁰ Un kor ta mum, e rri yey jày gàam gi: Is yey tâage ni jooci ni njîim gi, ge kpàa jàk koyrra a wûun Fay ba. Jàk raarra ɗa ge kpàa koyrra jày a jàk cen raarra ba. ⁵¹ E rri yey mi lònunurre yèk fûurriya: Ti tâa orro pî got wut ba, amma is worro pî bu ge bunji. ⁵² Ngam a ye ge ur ti uta woy gbèeni, a nit ây wutke gi gû gaw gûysi yaale kà jèmda nisi, ha aw tâa ni is cen raarra. Orro ɗa is worro bu ge bunji. ⁵³ Sey jàk raarra gi e mgbap jày tâa ge raa ba, sey jàk yey ge wut gi e mgbap jàk yey tâa ge wut ba. ⁵⁴ Ye ge tâa jàk raarra ge mgbap jày tâa ge raa ba gi, ni jàk wuta ɗa ge mgbap jày tâa ge wut ba gi, yèk defterre Fay gbèe ge gbèe ye gàa: Sunda hòmuge di wurra. Wurra gbeeye. ⁵⁵ Wurra, u hâ tâa sunum wey ya? Wurra, u hâ tâa titapni wey ya? ⁵⁶ Titapni wurra, jàk maarra tâage. Mbinum jàk maarra, yèk mgbèngda tâage. ⁵⁷ Amma ot gàawrre mbew di Fay, ye tâa ey hîigina sunda ni Yeesu Kristu Nitcoorra worro. ⁵⁸ Ngam maan un kor ta mum yiɗim dun gi, gòyin kpèw, ta un yûu ba, hârin dèy a tèerra tèem Nitcoorra koo ningàa, ye tâa un cèngni, nge loca tèem wun a gin Nitcoorra ge tâa jàk ɓa hû go ba.

¹ E rri yey mi yèenurre a yèk kimjum seede ngam nit della ta Fay tâage a Yerusalem gi. Mbirin un ɗa kà yey gàami daw da nit kimjum ây a Galatiya. ² A unji màrra a asaweerre pî, sey koo wuna a tîim wun e ii seede yey ge kpàa hîirra gi, ngam ye gim difa gi, seede maan e tâa sàynjumya mgban. ³ Ye gim kpètfa a gin wun, tèe gim tèeni ni ɗerrewol da nit ây catnu gi, ngam aw ’maa hîir wun a Yerusalem. ⁴ To del go gi, miy ɗa di gim diknji ni aw. ⁵ Mi hòmfa go a dees Makedoniya, di gim difa a gin wun. Ngam ye gim yew ɗà a dees Makedoniya. ⁶ Mi yiɗi tâanjum ni un càa, mba ha cot ngisim e gbèe. Hû go kpàa gun kpàam ɗa ista a gin dikmi gi. ⁷ Ngam a dikta wooy yey mi yiɗi mi rapnu a hòmda gbè ba, amma mi dànde tâanjum ni un unji càa, to Nitcoorra hîi go orri. ⁸ Tâa gim tâa ay gi a Efesu ha daprum Pentikosta. ⁹ Ngam nin ɓèl faarige a ɗàm kpees mum, ha mi tèe tèem mbâra, koo ye tâa a nit yiir ây aw dii dèy gi. ¹⁰ To Timote kpètfa go, ngoruwan mbâra, ta e tâa ni tolnji a tîim wun ba. Ngam ey ɗa tèerre tèem Nitcoorra kà miy. ¹¹ Ta koo wuna e luusu ba, amma isuwan mbâra ha e ira a gin mum. Ngam mi waawrre e kpèrra ni kor goosum ây. ¹² Apollo kor mum, mi waawe dey dèy, ha e difa a gin wun ni kor ây, amma ey yiɗi e difa kòsòng gi ba. To kpàa go orri a ɗàm kpeesi càa, di ge difa. ¹³ Amma un, mûyin, gòyin mbâra a goosum, mòon tinîiri kà nihun ây, tâan kpèw! ¹⁴ Jày tèenu lang, tèen ni yiide! ¹⁵ Un kor ta mum, un cèngni Estefanas ni nit àay rra wàa aw a nit goosum màrra ây ɗi a dees Akaya, aw lekni hak waw a tèerra tèem mgbaanjum da nit della ta Fay. ¹⁶ Mi waanurre, ha un rak daw tuy da nit ây gi, ni nit ây kana pî hârge tèerra tèem ni aw. ¹⁷ Estefanas, ni Fortinatu, ni Akayikus ye kpèrran a gin mum, tinîir mum kâwimde, ngam dikta waw ay gi hîim jày âygimda a gin wun gi. ¹⁸ Aw wuysinim tinîir mum ni tinîir wun ɗa. Hû go coon daw da nit ây kà yey gi! ¹⁹ A nit kimjum ây tâage a dees Asiya aw kèpfa dunde. Akila ni Piriskilla ’mèmsa ni nit ây kimje a àay waw gi, aw kèpfa dunde dèy a nîir Nitcoorra. ²⁰ A kor ây pî tâage ay gi aw kèpfa dunde. Kèpnjin a tîim wun ni tikapni kor goosum ây! ²¹ E rri yey miy Pawlu kèrgifa kèpri yey ni kàn mum. ²² To nirri ti yiɗu go di Nitcoorra ba, sey e tâa maasumya. Amen, Nitcoorra worro, dàara! ²³ Mbâr Yeesu Nitcoorra e tâanji ni un! ²⁴ Yiide mum tâanjirre ni un pî a nîir Yeesu Kristu.