Zéfanaya

Ẹkwo

ZÉFANAYA

Onye Nkfuchiru Chileke

¹Ọ waa okfu Onye-Nwe-Ọha kfuru yeru Zéfanaya nwa Kushi ndọwa. Kushi bụ nwa Gédaliya, Gédaliya bụru nwa Amaríya, Amaríya bụru nwa Hezekáya. Nteke o kfuru iya okfu ono bụ nteke Josáya nwa Amọnu shi bụru eze ndu Juda.

Onye-Nwe-Ọha l’a-nụ mgboko awhụ

²“Mu l’a-tụko iwhe lile mee ọzara-l’ukpo, t’ọ bọ dụhe ọwhu l’a-dụkwadu lẹ mgboko. O nokwa iwhe Onye-Nwe-Ọha l’ekfu ndono. ³Madzụ yẹle anụmanu bẹ mu l’e-me ọzara-l’ukpo. Mu emee ẹnu l’ewhe l’eli yẹle ẹma bu lẹ mini ọzara-l’ukpo. Ndu ejo-ememe bẹ mu l’e-me tẹ whẹ vukota iwhe daa kpọo mkpofu-nchị, bya emee tẹ madzụ tọhu lẹ mgboko.” O nokwa iwhe Onye-Nwe-Ọha l’ekfu ndono.

⁴“Mu l’a-machịkwa ẹka daa Juda l’ẹhu whẹ lẹ ndu bu lẹ Jerúsalẹmu l’owhu. Iwhe bụ ndu whuduru nụ lẹ ndu l’abarụ Bálu ẹja bẹ mu l’e-me tẹ whẹ chihukota l’alị-a, ẹwha ntẹkpe whẹ echihu, ndu l’agwajẹ iya nụ echihu, ⁵ndu l’anọduje l’ọma okpotsu-ụlo abarụ ẹnyanwu ẹja yẹle kpokponde mẹe ọnwa echihukota mẹkwawho ndu ono l’abajẹru Onye-Nwe-Ọha ẹja gude ẹwha iya agụ ẹnwa, bya egudekwawho ẹwha Molẹku agụ ẹnwa, ⁶ndu ono, gbakụtawaru Onye-Nwe-Ọha azụ echihu, mbụ ndu ono, l’ẹte achọje Onye-Nwe-Ọha, whẹ te ejekfuje iya njịta.

⁷“Unu dakwaa kfụkfurukfu l’iwhu Nnajị-Ọha, bụ Onye-Nwe-Ọha nkele mbọku Onye-Nwe-Ọha l’e-kpe ikpe tẹekwaru l’ụkfu. Onye-Nwe-Ọha bẹ kwakọbekwaru anụ, l’oo-gbu egbu. Ndu o kuru lẹ nri b’o dobekwaru nsọ. ⁸Mbọku ono Onye-Nwe-Ọha l’e-gbu anụ iya ono bẹ mụbe Onye-Nwe-Ọha l’a-nụ ndu ono, bụ ishi áwhụ yẹle ụnwegirima ibe eze mẹe iwhe bụ-zhia ndu l’eme umere ndu ọha ọdo. ⁹Mbọku ono bẹ mu l’a-tụko ndu ono nụa áwhụ, bụ iya bụ ndu ono, l’engeghataje ẹka a gbarụ ogodoo engeghata l’ọnu-abata, mbụ ndu ono, bụ iwhe-kpanganga yẹle ụgho bẹ whẹ dojiru l’ụlo onye-nwe-whẹ nụ.”

¹⁰Onye-Nwe-Ọha l’ekfu sụ: “Mbọku ono bẹ ụzu-ẹkwa l’a-tụ lẹ Ọnoguzo Ẹma, mkpu akpọo lẹ Ẹgu Ọ̀whúú, ugvu g’ugvu ha atụko ahaka ẹnu kpowa kpowa. ¹¹Unu ryaa ẹkwa tsọo kụrukuru, unubẹ ndu bukube aswa nkele ndu l’agba nghọ b’e gbukotawaru, mbụ lẹ ndu gude okpoga agba nghọ bẹ bụkotawaa kpurupyata.

¹²“O noo nteke mu l’e-ye ọku l’oryọku gvua Jerúsalẹmu choli choli. Mu anụa ndu vutawaru tsụa onwowhe l’ẹnya áwhụ, mbụ ndu ono, dọru chịriri g’ọo ike mmẹe; ndu l’anọje ekfu l’ime obu whẹ sụ l’ọ tọ dụdu iwhe Onye-Nwe-Ọha bya l’e-me whẹ; l’o too medu mma too me njọ. ¹³Ndu ono bẹ l’aa-vụ ẹku whẹ l’akpaa, ụlo whẹ ezekposhihu. Whẹ l’a-tụ ụlo, ọle whẹ te ebudu iya ebu. Whẹ akọo mgbu vayịnu, ọle whẹ ta angụdu mmẹe shi iya nụ.”

¹⁴Oke mbọku ono, Onye-Nwe-Ọha l’e-kpe ikpe bẹ dụakwa ntse, ọ dụwa ntse; ọobya-kebekwa ẹgwegwa. Ụtumu, l’a-kpọ mbọku nke Onye-Nwe-Ọha ono l’a-dụkwa ejo ẹji. Ndu ike dụ l’ọgu l’e-chikwa oji-l’ẹka-tọgbo. ¹⁵Mbọku ono l’a-bụ mbọku oke ẹhu-eghughu nke Chileke. Mbọku ono l’a-bụru mbọku oke iwhe-ọtsulanu yẹle oke ntsọmawhu. Mbọku ono abụru mbọku ọla-l’iswi yẹle kpurupyata. Mbọku ono l’a-gbakọta ẹkpuroochi, igweli ekpukota ekpukpu. Mbọku ono bẹ urwukpu l’a-sọ-kputa ẹka lile, ẹka lile agbakọta tsụrirkiti. ¹⁶Mbọku ono bẹ opu-ọgu l’a-sọshihu, mkpu-ọgu adashịhu lẹ mkpụkpu ono, a tụ-wheru mgbodo mgburumgburu mẹe l’ụlo-eli ewhekerewhe ono, dụ iya nụ.

¹⁷“Mu l’e-wokfuta madzụ iwhe-ọtsulanu nke ọwhu whẹ l’e-je dakirishi dakirishi g’ọo onye ishi guderu. O noo nkele whẹ mewaru Onye-Nwe-Ọha iwhe-dụ-ẹji. Aa-ghakashị mmee whẹ g’ọo onye ghakaru ẹja, a tụkaa anụ whẹ nnanụ nnanụ g’ọo onye tụkaru nshị.

¹⁸“Mkpọla-ọcha whẹ mẹe mkpọla-ododo whẹ ta adụkwa ike anafụta whẹ mbọku ono, Onye-Nwe-Ọha l’e-goshi oke ẹhu-eghughu iya. Ọku nke okoowhoo ya bẹ l’a-tụko mgboko l’owhu rechafu. Oo-mee t’iwhe, bukota lẹ mgboko l’owhu tọhu ntọhu lanụ.”

Aaryọ tẹ nzhimanụ lwa azụ

¹Unu dzukobe; unu dzukobe; unubẹ mba ono iwhere gvụru l’iwhu, ²tẹmenu oge nteke ono erwua, mbụ tẹmenu mbọku ono ezhia whawhawha zhikota unu g’ọo ẹswa ereshi, tẹmenu ọta chịchichi ẹhu-eghughu Onye-Nwe-Ọha atukoshi unu, mbụ tẹmenu mbọku oke ẹhu-eghughu nke Onye-Nwe-Ọha abyapyabẹ unu. ³Unu chọkwaa Onye-Nwe-Ọha, unubẹ ndu alị-a, bụ ndu wozetaru onwunu alị, mbụ unubẹ ndu ono, l’emeje iwhe ọ sụru t’e mee. Unu chọkwaa ụzo ọdu-chịriri, unu achọo ụzo owozeta onwonye alị, ikekwe bẹ Onye-Nwe-Ọha l’e-kpuchita unu mẹ o rwulewho mbọku ono l’oo-goshi oke ẹhu-eghughu iya.

Ee-mebyishi mba buwheru ndu Ízurẹlu mgburumgburu

⁴Ee-megee tsukashihu lẹ mkpụkpu Gaza, ẹgbara akfụa lẹ mkpụkpu Ashikelọnu. Ndu Ashịdodu bẹ l’ee-gude echilabọ eswe chịfu, a vụa mkpụkpu Ẹkuronu l’ọgvu. ⁵Nshọbukwa unubẹ ndu bu l’agụga eze-ẹnyimu, mbụ unubẹ ndu mba Keretu. Okfu Onye-Nwe-Ọha nmaakwarụ unubẹ ndu Kenanu, bụ iya bụ ndu alị Fílistiya. Onye-Nwe-Ọha l’e-me, unu abụru ọzara-l’ukpo, ya adụhe onye l’a-whọkwadu lẹ ndu bu iya nụ. ⁶Sụa alị ono, dụ l’agụga eze-ẹnyimu ono bẹ l’e-megekwa bụru ẹka élwù l’a-ta nri; ya abụru ọdu ndu l’eche atụru bụru ẹka atụru l’adọshije. ⁷Alị ono, dụ l’agụga eze-ẹnyimu ono bẹ bụ nwa ndu wafụru nụ l’ọzo-ụlo Juda l’e-bekochaa nweru iya, ọ bụru ẹka ono bẹ whẹ l’e-cheje élwù whẹ. Ya abụru l’ụlo ndu Ashikelọnu bẹ whẹ l’e-jeje azẹe mẹ ọochi byalẹwho. Onye-Nwe-Ọha, bụ Chileke whẹ ejeje agbawhe whẹ nkele oo-me tẹ whẹ lwawhu azụ l’ọnodu whẹ.

⁸“Mu nụakwaru ọnu ndu Moabu kọru unu yẹle iwhu ndu Amọnu whuru unu. Mbụ ọnu ono whẹ kọru ndibe mu, gude ọnya ekemeke kfubyishia alị whẹ. ⁹Ọo ya bụ l’ọ waa iwhe Onye-Nwe-Ọha bụ Onye-ishi-igwe-ọgu bụru Chileke nke Ízurẹlu l’ekfu ndọwa: Mu vuru-a ishi mu gẹ mu vu iya, bẹ Moabu l’e-bechakwa dụ g’ọo Sódomu, Amọnu adụ g’ọo Gọmóra; ọo-bụ ẹgbudu yẹle iduma-mmaswị bụru ochuwhu jeye lẹ gbururu. Ndu whuduru nụ lẹ ndibe mụbe Onye-Nwe-Ọha l’a-vụ arya whẹ avụ. Ndu wafụru nụ lẹ mba nkemu bẹ alị whẹ l’a-bụru oke-iwhe whẹ.”

¹⁰Ọo iwhe ono bụ urwu, whẹ l’e-rita l’ekuku ono, whẹ l’eku onwowhe nkele ọo ndibe Onye-Nwe-Ọha, bụ Onye-ishi-igwe-ọgu bẹ whẹ kọru ọnu, nyarụ ekemeke kpua. ¹¹Onye-Nwe-Ọha l’e-me iwhe l’a-dụ whẹ egvu. Ọo-lọpyashi agwa mgboko-o alọpyashi. Onye nọ l’ẹka ọ nọ abalahaaru iya ẹja mẹe iwhe bụ mba ono eze-ẹnyimu sọ-wheru asọ-whe.

¹²“O nokwawho g’ọ dụ unu, mbụ unubẹ ndu Itiyópiya, ọ kwa ogu-ịgba Onye-Nwe-Ọha bẹ l’ee-gude whụa unu awhụwhu.”

¹³Ọo-machị ẹka iya daa ndu isheli l’ẹhu, mee ndu Asiriya tẹ whẹ bụru ọzara-l’ukpo. Oo-me mkpụkpu Nínive t’ọ bụru ẹka ẹgbara kfụru, mbụ t’ọ bụru ẹka kpọru gbengu g’ọo echi-ẹgu alị ọkponku. ¹⁴Ọo-bụru ọdu ikpoto élwù yẹle anụ ẹgbudu, dụ l’iche l’iche. Mgbashị-ujiku yẹle udukufuku akpaa ẹkfunu l’ishi itso dụ iya nụ. Ọrya whẹ bẹ ụkporo iya l’e-meje lẹ windo, ikpọzu akụru l’ọnu-ụlo l’ọnu-ụlo, o noo nkele ẹka ono, e gude oshi sida mee bẹ l’ee-me t’o gheru karawhongu. ¹⁵O nokwa gẹ l’ọo-nwụru eze mkpụkpu ono, bụ mkpụkpu ono shi tsụa onwiya l’ẹnya akpa lẹ ntusarẹhu, mbụ mkpụkpu ono shi asụje; l’ọo yẹbedua kpụ l’ọ tọ dụhedu mkpụkpu ọdo l’a-tụru iya nụ. Ọle, lewaro g’ọ bụ-be ẹka ẹgbara kfụru. Lewaro g’ọ bụ-be ẹka ụnwu anụ ẹgbudu kwarụ uwhu buru. Iwhe bụ onye ghataru iya nụ l’a-nmajẹ ọtsa whuwheeru iya ishi.

Gẹ l’ọo-dụru Jerúsalẹmu lẹ mgbe l’iwhu

¹Nshọbukwa mkpụkpu ono, kwefuru ike, mbụ mkpụkpu, mmerwu dụ l’ẹhu bụru mkpụkpu, l’eme madzụ mmegbu! ²Ọ tọ dụdu onye l’ọonujeru okfu, t’o kweje nata ụzo a kpọ-zhiru iya. Ọ tọ dakobejedu Onye-Nwe-Ọha, tọ kpakụbe Chileke ntse. ³Ndu ishi, l’achị iya nụ bụkotakwa oduu, l’aba hanyị-hanyị. Ndu ọgbo-ikpe, l’achị lẹ mkpụkpu ono bụkotaru ágụ́, l’akpa l’abalị, l’adụa iwhe l’ọohaje tẹ chi sakfu. ⁴Ndu nkfuchiru Chileke, nọ iya nụ bụkota ọdu-ọwhu-ọheru-ụkwa, bya abụru ọghele. Ndu l’agbajẹ ẹja nụ Chileke l’ime iya bẹ merwushiwaru iwhe dụ nsọ, whẹ bụru ọmarụ-iwu-aada-iwu whẹ. ⁵Onye-Nwe-Ọha, bụ onye dụ chịriri nọkwa l’ime mkpụkpu ono. O to mejedu iwhe l’adụa ree. L’ụtsu g’ụtsu ha bẹ l’oo-goshije lẹ ya bụ onye ikpe iya kfụru nhamụnha. Ọ tọ dụdu chi-asahu, ọ nahụjeru iya. Ọle ndu l’adụa chịriri ta amajẹdu iwhe bụ iwhere ọgvu l’iwhu.

⁶“Mu mewaru tẹ mba gẹ mba ha chihu. Eze ụlo-mgbochi whẹ bẹ bụkotawaa mkpọkoro ụlo. Echi-ụzo whẹ bẹ mu meekwaru o chihukota nke ọwhu bụ l’ọ tọ dụhedu onye l’aghajẹkwadu iya. Mkpụkpu whẹ l’owhu bẹ ẹgbara kfụwaru, ọ bụru ẹka madzụ l’ebuhee ebu, mbụ l’ọ tọ dụdu onye bu iya nụ. ⁷Mu gbekwanu sụ lẹ mkpụkpu ono tsụfutaje mu egvu, mbụ l’ọo-nabata ahụhu, a hụru iya. Nke ọwhu ẹka whẹ bu l’ẹte abụru ẹka e mebyishiru emebyishi shi nno nụa whẹ awhụ. Obenu l’iwhe l’anọje enwuka whẹ l’obu bụ ome mkparwụ l’iwhe lile, whẹ l’eme ememe”.

⁸Onye-Nwe-Ọha l’ekfu sụ: “Unu nmẹe anmẹe ngabẹru mu jeye mbọku mu l’e-zhilihu bya agbaa unu ẹka-ebe, iwhe unu meru. Iwhe mu kpeburu bụ lẹ mu l’a-chịkobe mba gẹ mba ha l’ẹka lanụ, rwukobe alị-eze dụ iche iche l’ẹka lanụ, wụ-kpushi whẹ oghu-damụdamu mu l’ẹhu, woru okpomọku nke ẹhu eghughu mu g’ọ ha byabẹ whẹ l’ẹhu. Nkele mgboko l’owhu bẹ bụ ọku, shi l’okowhoo oke ẹhu-eghughu mu l’e-repyashi iya.

⁹“Nteke ono bẹ mu l’a-gbanwe olu-okfu ndiwhe t’o gua egugu, nke ọwhu whẹ l’a-tụko akpọ-ku ẹwha Onye-Nwe-Ọha, gude obu lanụ abarụ iya ẹja. ¹⁰Ee-shije l’azụ ẹnyimu Itiyópiya egwo iwhe abya mu anụnu, mbụ ndu ono, l’anọje ekfu anụ mu, bụ ndibe mu ono a chịkashiru nnanụ nnanụ. ¹¹O -rwua mbọku ono bẹ l’eete emedu ghu iwhe-iwhere lẹ nke iwhe ono, i meru gude kwefuru Onye-Nwe-Ọha ike. O noo nkele nteke ono bẹ mu l’e-wofu ndu ono, gude ekuku ete ẹswa l’ime unu. Unu ekubuhu onwunu eku l’ugvu mu ono dụ nsọ. ¹²Ẹgube ndu mu l’a-ha l’ime unu bụ ndu wozetaru onwowhe alị mẹe ndu dụ agu, mbụ ndu ono gbabaru l’ime Onye-Nwe-Ọha je anọdu ezeru ndzụ. ¹³Ndu whọduru nụ lẹ Ízurẹlu bẹ l’ete emehedu iwhe l’adụa ree ọdo. Whẹ ta abya l’a-dzụ ejire ọdo, t’a bya l’a-whụ whẹ ụgho l’ọnu ọdo. Whẹ l’e-rije nri zẹe pyakọo onwowhe, ọ tọ dụdu onye bya l’e-ye whẹ egvu.”

Egvu ẹhu-ụtso

¹⁴Gụa egvu ẹhu-ụtso gụbe nwada Záyọnu!

Gụbe Ízurẹlu tụa ụzu ẹhu-ụtso!

T’ẹhu tsọo ghu ụtso, gude obu ghu g’ọ ha tee ẹswa,

gụbe nwada Jerúsalẹmu.

¹⁵Ikpe ono, shi nmaa unu bẹ

Onye-Nwe-Ọha tukofuwaru unu l’ẹhu.

Ọ chị-whuwaru ndu ọhogu unu azụ.

Onye-Nwe-Ọha bụ eze l’ẹka gụbe Ízurẹlu nọ,

ọ tọ dụdu ejo-iwhe, egvu iya bya l’a-tsụbaa ghu ọdo.

¹⁶Oorwuwaa mbọku, l’aa-sụ Jerúsalẹmu:

“Gụbe Záyọnu, t’egvu ba atsụkwa ghu.

Be ekwekwa t’ẹka kụda ghu.

¹⁷Onye-Nwe-Ọha, bụ Chileke

unu bẹ nọkwa l’echilabọ unu.

Ọ bụ onye ojọgu, sụru gẹ l’ọo-dụ ike dzọta unu.

Oo-te ẹswa nweru obu ụtso l’ẹhu unu.

Oo-gude n-yemobu mee t’ẹhu jia unu dẹe.

Oo-gude egvu ẹhu-ụtso tee ẹswa l’iswi ẹhu unu.”

¹⁸“Mbọku, e doberu ọnu ori-oge;

bẹ mụbe Onye-Nwe-Ọha l’e-wofuru unu ẹhu-ụwhu,

mu ekofu unu ejo iwhe-iwhere l’ẹhu.

¹⁹Sụa, nteke ono bẹ mu l’a-kẹe

ndu l’akpa unu ẹhu ọrwu l’ẹhu,

mu adzọfuta ndu darụ ngvụru.

Mu l’a-chịkobe ndu ono, shi kpawhuhu akpawhuhu,

mee tẹ whẹ bụru ndu l’aaja ama,

mẹe ndu a marụ ẹwha whẹ,

l’iwhe bụ alị ono, e shi eme whẹ iwhe iwhere ono.

²⁰Nteke ono bẹ mu l’e-kulatawhu unu azụ l’ibe unu.

Nteke ono bẹ mu l’a-chịkobe unu l’ẹka lanụ.

Mu l’e-me t’unu nweru ẹwha nweru ajaja

l’echilabọ ndu mgboko l’owhu

nteke ono, mu l’e-dobewhu unu azụ l’ọnodu unu.

Mu l’e-me iya, ya agbaa unu l’iwhu.”

O nokwa iwhe Onye-Nwe-Ọha l’ekfu ndono.