Zakaráya

Ẹkwo

ZAKARÁYA

Onye Nkfuchiru Chileke

Onye-Nwe-Ọha l’eku ndu Ízurẹlu tẹ whẹ lwakfutawhu iya azụ

¹L’ọnwa ẹsato l’awha kwe Daríyọsu awha labọ, ọ watarụ ọbu eze ndu Peshiya, bẹ Onye-Nwe-Ọha kfuru okfu yeru onye nkfuchiru iya bụ Zakaráya nwa Berekaya, mbụ nwanwa Ido. Ọ sụru iya agha: ²“Onye-Nwe-Ọha bẹ ẹhu ghuru eghu shii l’ẹka ndụ-ichee unu nọ. ³Ọo ya bụ, je akarụ whẹ l’ọ waa iwhe mụbe Onye-Nwe-Ọha bụ Onye-ishi-igwe-ọgu l’ekfu: ‘Unu lwakfutawhu mu azụ’; o noo iwhe Onye-Nwe-Ọha bụ Onye-ishi-igwe-ọgu l’ekfu ndono; ‘nke ọwhu mu l’a-lwakfutawhu unubẹdua azụ,’ o noo iwhe Onye-Nwe-Ọha bụ Onye-ishi-igwe-ọgu l’ekfu ndono. ⁴Unu ba adụkwa g’ọo ndụ-ichee unu whẹ, mbụ ndu ono, ndu nkfuchiru ọwhu gbahawarụ nụ ryarụ iya aryarya sụ whẹ l’ọ waa iwhe Onye-Nwe-Ọha bụ Onye-ishi-igwe-ọgu l’ekfu ndọwa: ‘Unu shi l’ejo ndzụ ono unu l’ebu fụta, unu esefu ẹka l’ome ejo-iwhe.’ Ọle whẹ swọ-chileru-a akụ lẹ nchị jịka lẹ whẹ ta angadụru iya nchị. O nokwa iwhe Onye-Nwe-Ọha l’ekfu ndono. ⁵Ndụ-ichee unu whẹ ọbu, ?whẹ nọ l’awe ntaa? Ndu nkfuchiru Chileke, ?whẹ l’anọgbuwaru rọo ndzụ tọo? ⁶Okfu lile, mu kfuru whẹ mẹe iwhe mu tọru whẹ ọkpa iya, bụ iwhe mu tụru nụ ndu ozhi mu ono bụ ndu nkfuchiru Chileke, ?too megedua vụa l’ẹhu ndụ-ichee unu whẹ ono tọo? Nteke ono whẹ kwaa nzhimanụ sụ: ‘Onye-Nwe-Ọha bụ Onye-ishi-igwe-ọgu meekwaru anyi iwhe ọ tụberu tẹ ya mee anyi, mbụ l’o meru yeru anyi lẹge umere anyi mẹe iwhe anyi l’eme dụ.’ ”

Ọwhulenya Zakaráya whụru l’ẹhu nwoke, l’agba ịnya

⁷O be g’ọnwa iri lẹ nnanụ bụ iya bụ ọnwa Shebatu dụ l’ụkporo abalị l’abalị ẹno l’awha kwe Daríyọsu awha labọ ọ watarụ ọbu eze; Onye-Nwe-Ọha kfuru yeru onye nkfuchiru Chileke ono bụ Zakaráya nwa Berekaya, mbụ nwanwa Ido. Zakaráya bya asụ: ⁸L’ẹnyashi bẹ mu whụru ọwhulenya, mu nọdu l’ime ọwhulenya ono whụa nwoke l’agba ịnya, l’eke uswe-uswe! Ọ kfụru lẹ mgbakụ oshi mịyituru, gvugeeru l’ẹka ọbu dụ lẹ nkulahu. L’ụzo azụ iya bẹ ịnya dụ l’iche l’iche kfụru, mbụ ịnya l’eke uswe-uswe mẹe ịnya l’acha mmanụ mmanụ mẹe ịnya l’acha ụcha.

⁹Mu jịa sụ: “Onye-nwe-mu nụ ?ọ waa bụ olekwa?”

Ojozhi-imigwe, l’ekfu eyeru mu sụ mu: “Mu l’e-goshi ghu iwhe whẹ bụ.”

¹⁰Ọo ya bụ, nwoke ono, kfụru lẹ mgbakụ oshi mịyituru ono bya eyee ọnu sụ: “nya ono bụkwa iwhe Onye-Nwe-Ọha zhiru t’ọ bya aghajẹ mgboko ngvudangvu.”

¹¹Whẹ bya ekfuru yeru Ojozhi-imigwe ono shi l’ẹka Onye-Nwe-Ọha, shi kfụru lẹ mgbakụ oshi mịyituru ono sụ iya: “Anyi tụkookwaru mgboko ghakọta vulavula; mgboko l’owhu bẹ dakwarụ gbẹe, nchị dụwa whẹ ndoo.”

¹²Nteke ono Ojozhi-imigwe ono shi l’ẹka Onye-Nwe-Ọha bya asụ: Oowaa, Onye-Nwe-Ọha bụ Onye-ishi-igwe-ọgu ?ọo nteke ole bẹ l’ịino-beru tẹmenu gụ awhụaru Jerúsalẹmu mẹe mkpụkpu, dụkota l’alị Juda imiko? Mbụ ndu ono i tukoshiru ẹhu-eghughu ghu eshi ụkporo awha ugbo ẹto l’awha iri ntaa? ¹³O noo ya, Onye-Nwe-Ọha bya ekfuru okfu njima mẹe okfu ndụmu-obu yeru Ojozhi-imigwe ono shi ekfu eyeru mu. ¹⁴Ojozhi-imigwe ono, shi ekfu eyeru mu sụ mu tẹ mu ryakaa okfu ono aryaka sụ l’ọ waa iwhe Onye-Nwe-Ọha bụ Onye-ishi-igwe-ọgu l’ekfu ndọwa: Okoowhoo gbuakwaru mu egbu l’okfu ẹhu mkpụkpu Jerúsalẹmu yẹle ugvu Záyọnu. ¹⁵Ẹhu l’eghukwa mu damụdamu l’ẹka mba gẹ mba ha ọdo nọ, bụ ndu l’akpa lẹ ntụsaru-ẹhu. Nteke mbụ bẹ ẹhu shi eghu mu eghu nwanshị nwanshị, ọle ndu mba gẹ mba ha ono bẹ bya emee iwhe-ọtsulanu ndibe mu kabaa njọ.

¹⁶“Ọo ya bụ l’ọ waa iwhe Onye-Nwe-Ọha l’ekfu ndọwa: ‘Mu l’a-lwakfutawhu Jerúsalẹmu azụ bya emeeru iya obu-imiko. Eze ụlo mu bẹ l’aa-tụ-whu azụ l’ẹka ono, e gude eri, l’eegudeje atụ iwhe atụ̀tù gude tụa Jerúsalẹmu.’ O nokwa iwhe Onye-Nwe-Ọha l’ekfu ndono.

¹⁷“Ryakabaa ya aryaka sụ l’ọ waa iwhe Onye-Nwe-Ọha bụ Onye-ishi-igwe-ọgu l’ekfu ndọwa: ‘Lẹ mkpụkpu iya bẹ iwhe lile l’a-bya abụru ụpete ọdo, Onye-Nwe-Ọha adụa Záyọnu obu ọdo, ya ahọta-whu Jerúsalẹmu azụ ọdo.’ ”

Mpu ẹno yẹle ụmadzu ẹno, l’eme nka

¹⁸Mu bya apalia ẹnya lee bya awhụa mpu ẹno. ¹⁹Mu bya ajịa Ojozhi-Imigwe ono shi ekfu eyeru mu sụ: “?Ọ waa bụ olekwa?”

Ọ sụ mu: “Ọ kwa iya bụ mpu, dụkashiru ndu Juda mẹe ndu Ízurẹlu mẹe ndu Jerúsalẹmu nnanụ nnanụ.”

²⁰Onye-Nwe-Ọha bya egoshi mu ụmadzu ẹno, l’eme nka. ²¹Mu jịa sụ: “?Ọo gụnu bẹ ndu-a l’abya ememe?”

Ọ sụ mu: “Mpu ono bẹ dụkashiru ndu Juda nnanụ nnanụ mee whẹ t’ọ dụ onye jeru ọwhafuta ishi, ọle ndu-a, l’eme nka-a bẹ byarụ tẹ whẹ yee whẹ egvu chikwoshia mba gẹ mba ha mpu whẹ, mbụ mpu ono, whẹ mabẹru gụgugu gude adụkashi ndu alị Juda.”

Ọwhulenya Zakaráya whụru l’ẹhu nwoke, gude eri l’eegudeje atụ iwhe atụtu

¹Mu bya apalia ẹnya whụ nwoke ọbu; iwhe ọ chị l’ẹka bụru eri, l’eegudeje atụ iwhe atụtu. ²Mu jịa ya sụ: “?Ọo awe bẹ l’iije?”

Ọ sụ mu: “Mu l’ejekwa tẹ mu tụa iwhe lẹ Jerúsalẹmu marụ g’uswe iya yẹle ogologo iya hatabe.”

³Ojozhi-imigwe ono, shi ekfu eyeru mu bya atụgburu lụfu; Ojozhi-imigwe ọdo jekfu iya ⁴je asụ iya: “Gude ntụtu ọso gbakfu nwokorọbya ono, chị eri ono, l’eegudeje atụ iwhe atụtu ono je asụ iya lẹ Jerúsalẹmu bẹ l’e-megekwaa bụru obodo igweligwe madzụ mẹe élwù l’e-buru atsụ iya rụkfurukfu, nke ọwhu bụ lẹ mgbodo, a tụ-wheru iya mgburumgburu bẹ l’ee-nwukafu enwukafu. ⁵Onye-Nwe-Ọha l’onwiya l’a-bụ ọku kpụa g’ọo mgbodo nọ-whee mkpụkpu ono mgburumgburu gude gbochita iya, ya anọdu l’ime iya egbu zaazaa.” O nokwa iwhe Onye-Nwe-Ọha l’ekfu ndono.

Ndu a kpụru lẹ ndzụ b’e kuwhuru azụ tẹ whẹ lwa

⁶Onye-Nwe-Ọha l’ekfu sụ: “Shẹe! Shẹe! Unu gbafụta l’alị ndu ụzo isheli ono, unu je anọdu ono, mbụ ẹka ono mu chịkashiru unu dobe unu tụko ẹka lile dzuru. O nokwa iwhe Onye-Nwe-Ọha l’ekfu ndono. ⁷Shẹe! Unu gbalaa lashia Záyọnu, unubẹ ndu ono bu lẹ Bábyilọnu, ⁸nkele ọ waa iwhe Onye-Nwe-Ọha bụ Onye-ishi-igwe-ọgu l’ekfu ndọwa: ‘Onye l’akpa unu ẹka bụkwa nwanggiri-ẹnya mu bẹ l’ọokpa ẹka.’ ” Onye ono, dụ ugvu bya ezhia mu ozhi tẹ mu je ezhia ndu mba ono, vụru arya ndibe unu l’akpaa lẹ ya sụru agha: ⁹“Mu l’e-byi whẹ ẹka l’ẹhu; ndu ono, shi bụru ohu whẹ ono avụa arya whẹ l’akpaa. Nteke ono unu amarụ l’ọo Onye-Nwe-Ọha bụ Onye-ishi-igwe-ọgu zhiru mu tẹ mu bya.

¹⁰“Gụa egvu, ẹhu atsọo ghu rịkporikpo gụbe nwada Záyọnu nkele ntaa bẹ mu l’abyawaa tẹ mu buru eburu l’echilabọ unu. O nokwa iwhe Onye-Nwe-Ọha l’ekfu ndono. ¹¹Nteke ono bẹ ikpoto mba l’a-wukfuta mụbe Onye-Nwe-Ọha tẹ mu lẹ whẹ tụgba bụru nnanụ, whẹ abụru ndibe mu. Mu eburu eburu l’echilabọ unu, unu amarụ l’ọo Onye-Nwe-Ọha bụ Onye-ishi-igwe-ọgu bẹ zhiru mu tẹ mu byakfuta unu. ¹²Onye-Nwe-Ọha l’e-wota Juda t’ọ bụru oke-iwhe, o nweru l’alị ono, dụ nsọ, ya abya ahọta-whu Jerúsalẹmu azụ ọdo. ¹³Tẹ madzụ l’owhu daa kfụkfurukfuu l’iwhu Onye-Nwe-Ọha nkele o shiwaa l’ẹka ono, o bu, dụ nsọ ono ngulihu eje abya.”

Ọwhulenya, Zakaráya whụru l’ẹhu Jóshuwa, bụ onye ishi ndu l’agbajẹ ẹja nụ Chileke

¹Tọ dụ iya bụ, Onye-Nwe-Ọha bya egoshi mu Jóshuwa bụ onye ishi ndu l’agbajẹ ẹja nụ Chileke g’ọ kfụru l’iwhu Ojozhi imigwe, shi l’ẹka Onye-Nwe-Ọha; Sétanu kfụru iya l’ụzo ẹka-ụtara atukobe iya okfu l’ishi. ²Onye-Nwe-Ọha bya asụ Sétanu: “Sétanu! Tẹ Onye-Nwe-Ọha bakwaarụ ghu mba. Tẹ Onye-Nwe-Ọha ono, bụ iya họtaru Jerúsalẹmu bakwaarụ ghu mba! Tị madụ lẹ nwoke-e ya nụ bẹ bụ otsebere-nkụ, a lọfutaru l’ọku.”

³Uwe Jóshuwa ye l’ẹhu kfụru l’iwhu Ojozhi-imigwe ono bẹ inyi sọkoru nnanụ. ⁴Ojozhi-imigwe ono sụ ndu kfụru iya l’iwhu: “T’unu yefu iya uwe ono, inyi sọkoru nnanụ ono.” Ọ ghachi sụ Jóshuwa: “Leduwho, mu wofuakwaru ghu ejo-iwhe, i metagbaberu l’ẹhu; ntaa bẹ mu bya l’eye ghu uwe, l’egbu temutemu.”

⁵O noo ya, mu sụ ndu mu l’ezhije ozhi tẹ whẹ wota okpu-ẹkwa, l’ama ụma kpube Jóshuwa l’ishi. Ọo ya bụ, whẹ bya ekpube iya okpu-ẹkwa, l’ama ụma woru uwe, l’ama ụma yee ya. Ojozhi-imigwe ono shi l’ẹka Onye-Nwe-Ọha kfụruwho l’ẹka ono.

⁶Ojozhi-imigwe ono shi l’ẹka Onye-Nwe-Ọha ono bya ekfuru yeru Jóshuwa sụ iya: ⁷“Ọ waa iwhe Onye-Nwe-Ọha bụ Onye-ishi-igwe-ọgu l’ekfu ndọwa: ‘Ọ -bụru l’ii-tsoru ụzo mbẹdua, l’edobe nsọ mu, bẹ l’ịi-bụkwa onye ishi l’ụlo mu; ọma ogboduwhu ụlo mu adụ ghu l’ẹka, mu anụ ghu mgbahẹka t’i tsojeru ndu Ojozhi-imigwe-e, kfụru l’ẹka-a byajẹ l’iwhu mu. ⁸Ngabẹ nchị Jóshuwa, bụ onye ishi ndu l’agbajẹ ẹja nụ Chileke, gụ lẹ ndu l’agbajẹ ẹja nụ Chileke ibe ghu ono, nọdu ghu l’iwhu, mbụ ndu ono, l’egoshi iwhe dụ ree l’e-me lẹ mgbe l’iwhu: Sụ-a, mu l’e-me t’onye ozhi mu ono ẹwha iya bụ Ẹkali-oshi fụta iwhe. ⁹Lekwa ẹwhuru, mu tọgboru l’iwhu Jóshuwa, mbụ ẹwhuru lanụ, moru ẹnya ẹsaa. Mu l’e-de iya iwhe l’eli, o nokwa iwhe Onye-Nwe-Ọha bụ Onye-ishi-igwe-ọgu l’ekfu ndono. Ujiku lanụ bẹ mu l’e-wofu iwhe-dụ-ẹji, ndu alị-a megbaberu. ¹⁰Mbọku ono bẹ onyenọnu l’ime unu l’e-ku ibe iya oku t’ọ bya t’unu yọkobe onwunu lẹ mkpula vayịnu unu yẹle mkpula figu unu. O nokwa iwhe Onye-Nwe-Ọha bụ Onye-ishi-igwe-ọgu l’ekfu ndono.’ ”

Ọwhulenya, Zakaráya whụru lẹ nke iwhe l’aatukobeje oryọku

¹O noo ya, Ojozhi-imigwe ono shi ekfu eyeru mu bya abya ọdo bya etee mu g’ọo onye e teru lẹ mgbẹnya. ²Ọ jịa mu sụ: “?Ọo gụnu b’ị whụru?”

Mu sụ iya lẹ mu leru ẹnya, iwhe mu whụru bụru iwhe e meru lẹ mkpọla-ododo, l’aatukobeje oryọku, iwhe tukoru iya l’eli bụru ochi l’eeyeje mmanụ oryọku, oryọku, a tukoberu iya dụ ẹsaa, oryọku ono nweru ụzo ẹsaa, l’aagajẹ iya oghu. ³Iwhe gvuru lẹ mgboro iwhe ono, l’aatukobeje oryọku ono bụ oshi ólivu labọ; nnanụ bẹ gvuru l’ẹka-ụtara ochi ono, nnanụ gvuru iya l’ẹka-ịcha. ⁴Mu bya ajịa Ojozhi-imigwe ono shi ekfu eyeru mu sụ iya: “?Ọo gụnu dụ nno onye-nwe-mu nụ?”

⁵Ojozhi-imigwe ono shi ekfu eyeru mu bya eyeeru mu ọnu sụ: “?Tị madụ iwhe iwhe ono bụ?”

Mu sụ iya: “Mu ta amakwa iwhe ọ bụ onye-nwe-mu nụ.”

⁶Tọ dụ iya bụ, ọ sụ mu: “Ọ waa bụ okfu Onye-Nwe-Ọha l’ekfu eyeru Zerúbabelu: ‘E te emekwa iya l’ọkpehu, t’e me iya l’ike; ọ kwa Ume mụbe Onye-Nwe-Ọha b’e gude eme iya.’ O nokwa iwhe Onye-Nwe-Ọha bụ Onye-ishi-igwe-ọgu l’ekfu ndono. ⁷Gụbe eze ugvu ono, nọ-chiru ụzo, ?ị bụ gụnu? L’iwhu Zerúbabelu bẹ l’aa-rwazekota ghu arwaze, gụ abya adụ barịkiti. Zerúbabelu l’e-dobe ẹwhuru mkpochi-ishi iya; a tụlahaa ụzu sụ: ‘Eze-iwhe-ọma emeeru iya-o! Eze-iwhe-ọma emeeru iya-o!’ ”

⁸Okfu Onye-Nwe-Ọha bya erwua mu nchị sụ: ⁹“Zerúbabelu bụ iya gude ẹka iya gbube ukfu eze-ụlo Chileke-e ya nụ, ọ bụru iya l’e-gudekwawho ẹka iya tụfu iya l’ishi. Nteke ono unu amarụ l’ọo Onye-Nwe-Ọha, bụ Onye-ishi-igwe-ọgu zhiru mu tẹ mu byakfuta unu.

¹⁰“Iwhe l’oo-me ntaa habekwaa nwahabe l’ẹnya ndu madzụ. Ọle ẹhu l’a-tsọ whẹ ụtso mẹ whẹ -whụlewho ẹwhuru, Zerúbabelu gude atụ ụlo ono l’ẹka iya.

“A bya l’oryọku ẹsaa whọ; oryọku ẹsaa ono bụkwa ẹnya Onye-Nwe-Ọha, tụkoru mgboko l’owhu elekota.”

¹¹Mu bya ajịa Ojozhi-imigwe ono sụ iya: “?Ọo gụnu bẹ oshi ólivu labọ ono, gvuru l’ẹka-ụtara mẹe l’ẹka-ịcha iwhe ono, l’aatukobeje oryọku ono fụtaru?” ¹²Mu jịkwa ọdo sụ: “?Ọo gụnu b’ọ fụtaru mbụ ẹkali oshi ólivu labọ ono dụ lẹ mgboro uji labọ ono, e meru lẹ mkpọla-ododo, mbụ ẹka ono, l’eeshije amịshi mmanụ?”

¹³O yeeru mu ọnu sụ mu: “?Tị madụ iwhe iwhe ono bụ?”

Mu sụ iya: “Mu ta amakwa onye-nwe-mu nụ.”

¹⁴Ọ sụ mu: “Iwhe ono nọ-chiru ẹnya ụmadzu labọ ono a wụru mmanụ l’ishi tẹ whẹ jeeru Onye-Nwe-Ọha, bụ onye nwe mgboko ozhi.”

Ọwhulenya ẹkwo, l’ewhe ewhe

¹Mu bya apalikwaa ẹnya ọdo whụa ẹkwo a gwọru agwọgwo gẹ l’oowhe l’imeli! ²Ojozhi-imigwe ono sụ mu: “?Ọo gụnu b’ị whụru?”

Mu yeeru iya ọnu sụ: “Mu whụru ẹkwo-agwọgwo, l’ewhe l’imeli; ogologo iya bẹ dụ nji-ẹka ụkporo, ọsa iya dụ nji-ẹka iri.”

³Ọ sụ mu: “Iwhe dụ l’ẹkwo ono bụkwa ọnu, Chileke tụru dobe l’alị mgburumgburu. Azụ ẹkwo ono nnanụ bẹ sụru lẹ ndu l’ezhi oshi gẹ whẹ ha l’a-tọhu, azụ lanụ ọwhu sụ lẹ ndu ono, l’akpapyabẹje iwhe whẹ meru gụa ẹnwa l’a-tọhukwawho. ⁴Mu l’e-zhifu ntụmonu ono t’o kpuba l’ụlo ndu oshi mẹe l’ụlo ndu ono, l’akpapyabẹje iwhe whẹ meru gude ẹwha mu gụa ẹnwa. O nokwa iwhe Onye-Nwe-Ọha l’ekfu ndono. Ntụmonu ono l’e-je akụkee ike l’ụlo ndu ono zaa ya l’ẹza je akpaa l’oshi, e gude kụa ụlo ono mẹe ẹwhuru e gude tụa ya.”

Ọwhulenya, Zakaráya whụru l’ẹhu nwanyị, nọ lẹ nkata

⁵Ojozhi-imigwe ono shi ekfu eyeru mu fụta bya asụ mu: “Palia ẹnya apali whụ iwhe l’eje abya.”

⁶Mu jịa ya sụ: “?Ọo gụnu ndono?”

O sụ mu: “Ọ kwa nkata, l’eegudeje aatụ iwhe bẹ l’eje abya nno.” Ọ sụkwawho ọdo: “Nkata ono nọ-chiru ẹnya ejo-iwhe, l’eemegbabe l’alị-a gbaa mgburumgburu.”

⁷A bya ekpulia igbidigbi okfu nkata ono, mu whụa nwanyị nọdu anọdu l’ime nkata ono.

⁸Ojozhi-imigwe ono sụ mu: “Nwanyị ono bẹ nọ-chiru ẹnya ejo-ememe.” Ọ bya enwubawhu iya azụ l’ime nkata ono bya eworu igbidigbi okfu nkata ono kpuchiwhu iya azụ. ⁹Mu bya apalia ẹnya whụa ụnwanyi labọ, l’ewhe pẹe abya ụzo ẹka mu nọ. Whẹ l’ewhe ajịkaa akwẹka puka puka, akwẹka whẹ dụlewho g’ọo akwẹka eze-ọku-eswi-ụda. Whẹ bya adzụ-lia nkata ono whegburu mgbakụ alị yẹle igwe.

¹⁰Tọ dụ iya bụ, mu sụ Ojozhi-imigwe ono shi ekfu eyeru mu ono sụ iya: “?Ọo awe bẹ whẹ pahụnu nkata ono eje?”

¹¹Ọ sụ mu: “Whẹ pa iya eje alị Shịna tẹ whẹ je atụaru iya ụlo. Whẹ tụ-gelewho ụlo ono, whẹ emeta iwhe l’aa-tukobe nkata ono l’ẹka ono.”

Ọwhulenya ụgbo-ịnya ẹno

¹Mu bya apalikwaawho ẹnya ọdo whụ ụgbo-ịnya ẹno gẹ whẹ shi lẹ mgbakụ ugvu labọ ekpushi. Ugvu ono bụ ugvu ope. ²Ụgbo-ịnya nke mbụ bụ ịnya, l’ekekaa uswe-uswe bẹ lọkpu iya nụ, nke ẹbo bụru ịnya, l’ejikaa uji bẹ lọkpu iya nụ, ³nke ẹto bụru ịnya, l’achakaa ụcha bẹ lọkpu iya nụ, nke ẹno bụru ịnya, tụkashiru iwhe l’ẹhu bẹ lọkpu iya nụ. Ịnya ono g’ọ ha bẹ nwekotaru ọkpehu. ⁴Mu bya ajịa Ojozhi-imigwe ono shi ekfu eyeru mu ono sụ iya: “?Ọo gụnu bẹ iwhe ono fụtaru Onye-nwe-mu nụ?”

⁵Ojozhi-imigwe ono bya eyeeru mu ọnu sụ mu: “Ọ kwa whẹrewhere, l’eshije lẹ mgburẹku ẹno nke mgboko ewhe bẹ whẹ bụ. O zhiawhọ ntaa ntaa bẹ whẹ shi l’iwhu onye nwe mgboko l’owhu fụta. ⁶Ịnya ọwhu l’ejikaa uji bẹ lọkpu ụgbo nkiya chebe ụzo isheli. Ịnya ọwhu l’achakaa ụcha lọkpuru nkiya chebe ụzo ẹnyanwu-arịba, ịnya ọwhu tụkashiru iwhe l’ẹhu lọkpuru nkiya chebe ụzo ọhuda.”

⁷Ịnya ono wụfuta kwojilahaa tẹ whẹ je etsoru mgboko l’owhu ghajẹ vulavula. Ojozhi-imigwe ono sụ whẹ: “Unu tụgburu je aghawheje lẹ mgboko.” Whẹ tụgburu je awata aghawhe lẹ mgboko. ⁸Tọ dụ iya bụ, Ojozhi-imigwe ono ryaku mu sụ: “Leenu, ịnya ọwhu tụgburu ụzo isheli meekwaru t’obu jizeta mu l’alị isheli.”

Okpu-eze e kpuberu Jóshuwa

⁹Onye-Nwe-Ọha bya ekfuru okfu yeru mu sụ: ¹⁰“Nata mkpọla-ọcha yẹle mkpọla-ododo l’ẹka Heludayi mẹe Tobayija mẹe Jedaya, bụ ndu shi lẹ Bábyilọnu, bụ ẹka e shi kpụa whẹ lẹ ndzụ lwa. Gudekwawho ujiku lanụ ono jee ibe Josáya nwa Zéfanaya. ¹¹Mkpọla-ọcha ono yẹle mkpọla-ododo ono bẹ l’ịi-nata gude mee okpu-eze kpube onye ishi ndu l’agbajẹ ẹja nụ Chileke, bụ Jóshuwa nwa Jehozadaku l’ishi. ¹²Gụ asụ iya lẹ Onye-Nwe-Ọha, bụ Onye-ishi-igwe-ọgu bẹ sụru agha: ‘Lee nwoke ọbu ẹwha iya bụ Ekalị-Oshi. Oo-shi l’ẹka ọ kakfụru mokashihu je atụkwaa eze-ụlo Onye-Nwe-Ọha. ¹³Ọo yẹbedua l’a-tụkwa eze-ụlo Onye-Nwe-Ọha, ya anata ugvu, rwuberu onye eze, ya anọdu l’oshi-eze iya chịlahaa. Onye l’agbajẹ ẹja nụ Chileke l’a-nọkubekwa oshi-eze iya ono nchị adụ whẹ labọ doo.’ ¹⁴Okpu-eze ono bẹ l’ee-dobe l’eze-ụlo Onye-Nwe-Ọha t’ọ bụru iwhe l’ee-gudeje nyata Heludayi mẹe Tobayija mẹe Jedaya mẹe Josáya nwa Zéfanaya.”

¹⁵“Ndu bu otẹnya l’a-bya eyeta ẹka t’a tụa eze-ụlo Onye-Nwe-Ọha ono. Nteke ono bẹ unu l’a-ma l’ọo Onye-Nwe-Ọha, bụ Onye-ishi-igwe-ọgu bẹ zhiru mu tẹ mu byakfuta unu. Iwhe ono l’e-mekotakwa mẹ unu lezhita ẹnya anụru Onye-Nwe-Ọha, bụ Chileke unu okfu.”

Onye-Nwe-Ọha jịkaru ọswi ẹgu l’erwua l’ọhu ẹwho

¹L’ime awha kwe Daríyọsu awha ẹno ọ watarụ ọbu eze, be Onye-Nwe-Ọha kfuru okfu yeru Zakaráya l’abalị ẹno l’ọnwa tete, bụ ọnwa Kisilevu.7:1 Kisilevu bụ ọnwa tete l’ọgu awha ndu Híburu.²Nteke ono bẹ ndu Bẹtelu zhiwaru Shareza yẹle Regemu-mẹleku mẹe ndibe whẹ ọdo tẹ whẹ je aryọta iwhe-ọma l’ẹka Onye-Nwe-Ọha, ³yẹle tẹ whẹ jịta ndu l’agbajẹ ẹja l’eze-ụlo Onye-Nwe-Ọha bụ Onye-ishi-igwe-ọgu mẹe ndu nkfuchiru Chileke sụ whẹ: “?Mu l’a-tsọ áwhụ swịa ẹgu l’ọnwa ise ẹgube ono, mu shi meta iya eshi awha olemole ntaa?”

⁴Ọ kwa iya bụ lẹ Onye-Nwe-Ọha bụ Onye-ishi-igwe-ọgu abya ekfuru okfu yeru mu sụ mu agha: ⁵“Kfuru ndu alị-a gẹ whẹ ha mẹe ndu l’agbajẹ ẹja nụ Chileke sụ whẹ agha: ‘Ẹgu ono unu l’aswịje, tsọo áwhụ l’ọnwa ise mẹe l’ọnwa ẹsaa, eshi ụkporo awha ugbo ẹto l’awha iri ntaa, bẹ bụ nke mmaka; ọ tọ bụkwa mbẹdua bẹ unu l’aswị-turu iya. ⁶Ọdo bụ l’iwhe-eriri mẹe iwhe angụngu ono, unu l’anọje eri angụ bụkwa nke ẹhu unu. ⁷Ọ kwa iya bụ okfu ọbu, Onye-Nwe-Ọha shi l’ọnu ndu nkfuchiru iya kfua l’oge ndụ-ichee nteke ono, Jerúsalẹmu yẹle mkpụkpu, nọ-wheru iya mgburumgburu shi bụru ẹka madzụ bu ebu, bụru ẹka iwhe bụ ụpete, mbụ nteke ono, madzụ shi bugeeru l’echi-ẹgu ọhuda mẹe l’ọkpa-ugvu, dụ l’ụzo ẹnyanwu-arịba.’ ”

⁸Onye-Nwe-Ọha byakwa ekfuru okfu yeru Zakaráya sụ: ⁹“Ọ waa bụ iwhe Onye-Nwe-Ọha bụ Onye-ishi-igwe-ọgu l’ekfu: ‘Unu dobejekwa ire-lanụ l’iwhe unu l’eme eme, unu egoshije obu-ọma yẹle obu-imiko l’ẹka ndu ọdo nọ. ¹⁰Unu ba anọjekwa akpapyashị nwanyị-mbunu mẹe nwa-nwogbee mẹe onye byarụ abyabya yẹle onye ụkpa ishi, ya adụjekwa onye l’agbarụ ibe iya ejo égò l’ime obu iya.’

¹¹“Ọle whẹ te ekwedu ngabẹ nchị, whẹ nyalahaa mgbaaku woru iwhe swọ-chishia nchị tẹ whẹ ba anụ iwhe ono. ¹²Whẹ meru obu whẹ ọ nmaa mkpigbi g’ọo ẹwhuru, jịka lẹ whẹ ta angadụ nchị l’iwhe iwu l’ezhi, mẹe l’okfu ono, Onye-Nwe-Ọha, bụ Onye-ishi-igwe-ọgu shi l’ẹka Ume nkiya kfuru nụ whẹ, mbụ ọwhu o shi l’ọnu ndu nkfuchiru Chileke ọwhu, gbarụ nteke ndụ-ichee kfua. Ọ bụru iwhe ono meru Onye-Nwe-Ọha bụ Onye-ishi-igwe-ọgu vọru oke ẹhu-eghughu tukoshi whẹ. ¹³Eshi-ọwhu mu kuru whẹ oku whẹ ta angabẹru mu nchị, whẹbedua l’e-kukwa mu whọ oku, mu ta angadụru whẹ nchị, o nokwa iwhe Onye-Nwe-Ọha bụ Onye-ishi-igwe-ọgu l’ekfu ndono. ¹⁴Mu gude uburu-aga zhikashia whẹ nnanụ nnanụ, whẹ dzuru mba gẹ mba ha, whẹ l’ẹte amahawaa. Alị ono bya abụru ẹka whẹ parụ haa ọ bụru ochuwhu, tọ dụhe onye l’anọjekwadu eje eje alwa alwa l’ime iya. Ẹguru alị ono bẹ whẹ meru ọ bụru ochuwhu.”

Onye-Nwe-Ọha l’ekwe ụkwa lẹ ya l’e-dobewhu Jerúsalẹmu azụ l’ọnodu iya

¹Onye-Nwe-Ọha, bụ Onye-ishi-igwe-ọgu bya ekfuru okfu yeru mu. ²Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Okoowhoo gbuakwaru mu egbu l’okfu ẹhu Záyọnu, okoowhoo ẹhu iya bẹ l’enwukwa mu whuruwhuru l’ẹhu.” ³Ọ waa iwhe Onye-Nwe-Ọha l’ekfu ndọwa: “Mu l’a-lwawhuta azụ lẹ Záyọnu, mu l’e-buru eburu lẹ Jerúsalẹmu. E kulahaa Jerúsalẹmu Obodo ire-lanụ, kulahaa ugvu nke Onye-Nwe-Ọha bụ Onye-ishi-igwe-ọgu Ugvu, dụ Nsọ.” ⁴Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Unwoke ọgurenya mẹe ụnwanyi nochee l’a-wata adọkobe ọdo l’ọma nggamgbo Jerúsalẹmu, onyenọnu apageeru mkpụru ọgurenya iya l’ẹka. ⁵Unwokoro l’ụnwumgboko l’a-nọ atsụ rụkfurukfu l’ọma mkpụkpu ono egvu egvuregvu.”

⁶Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Iwhe ono l’a-dụkwa biribiri l’ẹnya ndu whọduru nụ nteke ono, obenu l’ọ tọ dụdu biribiri l’ẹnya nke mbẹdua.” O nokwa iwhe Onye-Nwe-Ọha, bụ Onye-ishi-igwe-ọgu l’ekfu ndono. ⁷Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Mu l’a-dzọfuta ndibe mu l’ẹka ndu alị ụzo ẹnyanwu-awata mẹe l’ẹka ndu alị ụzo ẹnyanwu-arịba. ⁸Mu l’e-dulatawhu whẹ azụ tẹ whẹ bya eburu lẹ nhamụnha Jerúsalẹmu. Whẹ abụru ndibe mu, mu abụru Chileke whẹ l’ire-lanụ mẹe l’ụzo dụ chịriri.”

⁹Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Unubẹ ndu l’anụ okfu-a ntanụ, bụ okfu ono, ndu nkfuchiru Chileke shi nteke e gbuberu ukfu ụlo Onye-Nwe-Ọha-a bụ Onye-ishi-igwe-ọgu kfuta; t’ẹka ba atsụkwa unu mmẹe nggẹ a tụa eze-ụlo ono tụfu iya l’ishi. ¹⁰Tẹmenu a wata ọtu ukfu ụlo ono bẹ l’eete eshidua akfụje madzụ ụgwo-ozhi ọwhu l’eewhoro anụmanu, tọ dụroo onye shi akpajẹ lẹ ntụsaru-ẹhu l’iswi ọhogu nkele mu shi mee onyenọnu t’ọ bụru ọgu dụru ibe iya. ¹¹Obenu lẹ ntaa ọwa bẹ mu l’abyahẹkwaa l’e-me ndu ọwhu whọduru nụ gẹ mu meru ndu nke mbụ ono. O nokwa iwhe Onye-Nwe-Ọha bụ Onye-ishi-igwe-ọgu l’ekfu ndono. ¹²Whẹ l’e-gude ẹhu guu mebe iwhe l’alị, vayịnu eyelahaa mebyi, alị emetalahaa iwhe, igweli achịlahaa mini. Iwhe ono g’ọ ha bẹ mu l’e-doberu ndu ono whọduru nụ t’ọ bụru nkewhe. ¹³Ọ kwa ẹgube ono mba lile shi egudeje unubẹ ọzo-ụlo Juda mẹe ọzo-ụlo Ízurẹlu atụ lẹ ntọnu, o nokwa gẹ mu l’a-dzọfuta unu ndono, unu abụru ndu a gọru ọnu-ọma nụ. Unu ba atsụkwa egvu, ẹka eje atsụkwa unu mmẹe.”

¹⁴Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Ọ kwa ẹgube ono mu shi tubua lẹ mu l’eme unu ejo-iwhe nteke ono, nnajị unu whẹ kpatsuru mu oke ẹhu-eghughu, obu te ekwe jizeta mu, o nokwa iwhe Onye-Nwe-Ọha bụ Onye-ishi-igwe-ọgu l’ekfu ndono; ¹⁵o nokwawho gẹ mu tubuwaru ntaa lẹ mu l’e-meru ndu Jerúsalẹmu yẹle ọnu-ụlo Juda ree. Unu ba atsụshi egvu. ¹⁶Ọ waa bụ iwhe unu l’e-mejezhiawho: Unu kfujee ire-lanụ l’ẹka ibe unu nọ, unu ekpeje ikpe kfụru nhamụnha l’ụlo-ikpe unu, mbụ ikpe ọwhu l’emeje tẹ nchị dụ ndoo. ¹⁷Unu ba agbajẹkwaru madzụ ibe unu ejo égò l’ime obu unu, unu eje akpapyabẹjekwa iwhe unu meru gụa ẹnwa. Iwhe lile ono bẹ mu kpọkotakwaru ashị. O nokwa iwhe Onye-Nwe-Ọha l’ekfu ndono.”

¹⁸Onye-Nwe-Ọha, bụ Onye-ishi-igwe-ọgu bya ekfuru okfu yeru mu ọdo. ¹⁹Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Unu wota ẹgu ono, unu l’aswịje l’ọnwa ẹno mẹe l’ọnwa ise mẹe l’ọnwa ẹsaa mẹe l’ọnwa iri, mee ya t’ọ bụru unu oge ẹhu-ụtso mẹe oge ote ẹswa, t’ọ bụru ori oge ẹhu-ụtso l’ẹhu ọzo-ụlo Juda. Iwhe unu l’e-me bụ; t’unu yee ire-lanụ obu yẹle nchị-ọdu-ndoo.”

²⁰Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Lẹ mgbe l’iwhu bẹ ndu ha l’igweligwe l’e-shigee lẹ mkpụkpu ha l’igweligwe awụ abya Jerúsalẹmu. ²¹Ndu bu lẹ mkpụkpu ọdo l’a-gbalihu je asụ ndu ọdo: ‘Unu bya t’anyi kpakọ dzebe je aryọo Onye-Nwe-Ọha t’o meeru anyi iwhe-ọma, unu bya t’anyi kpakọ je achọo Onye-Nwe-Ọha bụ Onye-ishi-igwe-ọgu. Mbẹmua l’e-jeshiakwa.’ ²²Ikpoto madzụ mẹe mba nweru ọkpehu l’a-wụru bya ọcho Onye-Nwe-Ọha bụ Onye-ishi-igwe-ọgu lẹ Jerúsalẹmu, whẹ abyakwawhọ tẹ whẹ ryọo ya t’o meeru whẹ iwhe-ọma.” ²³Ọ waa iwhe Onye-Nwe-Ọha bụ Onye-ishi-igwe-ọgu l’ekfu: “Nteke ono bẹ ụmadzu iri, shi lẹ mba ọdo, l’ekfukaa okfu alị dụ l’iche l’iche l’a-byajẹ alọta ẹka jịkfu jịkfu l’uwe onye Ju asụje iya: ‘Tẹ anyi tsoru ghu l’anyi nụru lẹ Chileke swiru unu eswiru.’ ”

Ikpe l’ee-kpe ndu ọhogu Ízurẹlu

¹Ọ waa bụ okfu, Onye-Nwe-Ọha kfuru l’eli ishi alị Hadụraku; okfu ono jekwawho l’a-tukoru Damásukọsu l’ishi. O noo l’ẹnya Onye-Nwe-Ọha bẹ dụ l’ẹhu ụnwu-eliwhe ẹgube ono ọ dụ l’ẹhu ikfu Ízurẹlu. ²Ẹnya iya bẹ dụ l’ẹhu obodo Hámatu, bụ obodo, whẹ l’alị Hadụraku narụ ọnu-ẹgu, dụ l’ẹhu obodo Taya, bya adụkwawho l’ẹhu obodo Sáyịdonu, t’a gụfukwaro lẹ whẹ marụ ome nka shii. ³Obodo Taya gudeekwa mgbodo tụ-whee onwiya mgburumgburu. Mkpọla-ọcha b’ọ kụberu o nyiru g’ọo ẹja, kụbe mkpọla-ododo o nyiru g’ọo ikpọzu, dụ l’agụga echi-ụzo. ⁴Obenu lẹ Onye-Nwe-Ọha bẹ l’a-nafụ iya iwhe ono, o nweru, nwuru ẹku iya ye l’eze-ẹnyimu. Ọku adzụa obodo ono dzụfu l’ishi.

⁵Obodo Ashikelọnu l’a-whụ iwhe ono, egvu aba iya; obodo Gaza awhụkwa ya whọ taa kpọkpo-kpọroro l’iwhe-ọtsulanu. O nokwawho gẹ l’ọo-dụ obodo Ẹkuronu ndono; iwhe o shi ele ẹnya iya l’a-bụru iya nke mmaanụ. Onye eze nke Obodo Gaza l’a-nwụhu anwụhu, ọwhube Ashikelọnu abụru ẹka madzụ l’ẹte ebuhe ebubu. ⁶Ndu l’e-buru lẹ Ashịdodu bụ ndu a nakọru ụtu mmee nwụa, ekuku ono, ndu Fílistiya l’eku onwowhe abụru kperemu. ⁷Mu l’e-me t’ọnu whẹ ba akpajẹhe l’anụ-mmee, whẹ ahaa ori nri, l’aasọ nsọ. Ndu wuduru l’ime iya l’a-bụru nke Chileke anyi, ya adụ g’ọo ẹkali ikfu Juda, Ẹkuronu abya adụ gọo ndu Jebusu. ⁸Ọle mu l’a-nọ-whe ụlo mu mgburumgburu chelahaa ya nche t’ọ bọ dụhe onye l’e-buru fafafa bata iya, ya adụhe onye l’akpapyashịjekwadu ndibe mu ishi nkele mu gudewaa ẹnya mu whẹ ẹbo-ẹbo whụkotawaa gẹ l’ọonwuru ndibe mu.

Abyabya eze Záyọnu

⁹Gụbe nwada Záyọnu, tee ẹswa teshia ya ike!

Gụbe nwada Jerúsalẹmu, tụa ụzu ẹhu-ụtso!

Lekwa onye bụ eze ghu gẹ l’ooje abyakfuta ghu.

Ọ bụ onye dụ chịriri, bụru onye l’adzọje madzụ.

O wozeru onwiya alị, nokoru l’eli nkakfụ-ịgara eje abya,

mbụ l’ọ nọ l’eli nwa nkakfụ-ịgara.

¹⁰Mu l’e-wofu ụgbo-ịnya-ọgu l’alị Ífuremu,

wofu ịnya-ọgu lẹ Jerúsalẹmu,

wofukwawho ụta e gude alwụ ọgu.

Onye eze unu ono l’a-rya iya

aryarya sụ tẹ mba lile buru l’ẹhu guu.

Alị-eze iya l’e-shi l’eze-ẹnyimu

ọwa sechia lụfu l’eze-ẹnyimu ọdo,

shikwawhọ l’ẹnyimu Yufurétisu

nọo jeye l’ẹka mgboko beru.

Odobewhu ndibe Chileke azụ l’ọnodu whẹ

¹¹“A -bya l’ẹka gụbedua nọ, mu l’e-kwobe iswi ọgbandzu

ono mu lẹ ghu gude mmee-anụ gbaa, haa ndibe ghu ono,

nọ lẹ mkpọro iduma, mini l’adụa ono

tẹ whẹ nweru onwowhe.

¹²Unu lawhu azụ lẹ agbarara unu,

unubẹ ndu mkpọro ono, ẹnya tọru l’ụzo.

Iwhe mu l’ekfuru unu ntanụ bụ

l’iwhe lile bẹ mu l’e-me t’ọ

lwadzukotaru unu nkwere labọ.

¹³O noo lẹ mu l’e-kwe Juda g’ọo onye kweru ube,

mu emee Ífuremu t’ọ bụru akfụ e gude agba iya.

Mu l’a-kpatsu unwoke Záyọnu

tẹ whẹ bụru ọgu swiru unwoke Giríku.

Mbụ lẹ mu l’e-me tẹ whẹ dụ g’ọo

ogu-ịgba, ndu ojọgu gude alwụ ọgu l’ẹhu whẹ.”

¹⁴Nteke ono bẹ Onye-Nwe-Ọha l’a-whẹshihuru ndibe iya,

ya atụfu akfụ iya whaa g’ọo ebemu-igwe.

Nnajị-Ọha, bụ Onye-Nwe-Ọha l’e-gbu opu-ọgu,

ya anọdu l’oke whẹrewhere,

shi l’ụzo ọhuda adzọnga ije adzọnga.

¹⁵Onye-Nwe-Ọha, bụ

Onye-ishi-igwe-ọgu l’e-gbobuta ndibe iya.

Whẹ emebyishia iwhe ndu

mgbẹka ono, bụ ndu ọhogu whẹ, lwụ-gbua whẹ.

Whẹ l’a-tụ ụzu g’ọo ndu mmẹe l’atsụ.

Whẹ ewhekaa mmee ndu ọhogu

whẹ ono, ya asọkoo ẹka lile

g’ọo mmee anụ, e gburu gude gwaa iwhe.

¹⁶Mbọku ono bẹ Onye-Nwe-Ọha bụ Chileke whẹ

l’a-dzọfuta whẹ,

nkele whẹ bụ atụru iya bụru ndibe iya.

Whẹ l’a-nọ enwu ẹnya demudemu l’alị ono g’ọo okpu-eze,

e gude ẹwhuru, l’enwu ẹnya

demudemu memaa emema.

¹⁷Alị ono dụnukakwa ree bụru iwhe manụkaru ụma.

Ereshi alị ono l’e-me t’ụnwu-okorọbya deru yọkoo,

mmẹe ọ̀whúú emekwaawho

t’ụnwu-ada nwụa ọnu-ọchi.

Onye-Nwe-Ọha l’a-nwụberu ndu Juda ẹnya

¹Unu ryọo Onye-Nwe-Ọha t’o mee tẹ mini ishi awha chịaru unu. Ọ kwa Onye-Nwe-Ọha l’emeje tẹ igweli chaa achacha. Ọ bụru iya l’emeje tẹ mini meeru ụnwu eliwhe yẹshiyeshi, bya emee t’iwhe onyenọnu kọru l’okfu jaa ajaja dụkota nonwu nonwu. ²Madzụ l’ejeje njịta l’ọgvu mẹe l’ẹka ndu l’agba ẹja. Obenu l’iwhe whẹ l’ekfujeru whẹ bụkota ejire, tẹmenu okfu whẹ bụru ọga-lẹ-mkpa okfu. Ụwhodu bụ ndu l’akọwa nrọ l’ụzo ụgho; obu, whẹ l’adụje madzụ bụ iwhe-iwhoro. O noo g’o gude madzụ whukashihu nọdu l’iwhe-ọtsulanu g’ọo atụru, l’enwee onye l’eche iya nụ.

³“Ẹhu l’eghukwa mu damụdamu l’ẹka ndu l’eche atụru ono nọ; mu jekwanu l’a-nụ ndu ishi ono awhụ. O noo lẹ Onye-Nwe-Ọha, bụ Onye-ishi-igwe-ọgu l’a-nwụberu atụru iya whẹ ẹnya bụ iya bụ ọzo-ụlo Juda, mee whẹ tẹ whẹ dụ g’ọo ịnya-ọgu, dụ ugvu l’ẹnya. ⁴Ọo lẹ Juda bẹ ẹwhuru gude ụlo l’e-shi fụta, ọ bụru iya bẹ nturu, gude ụlo-ẹkwa l’e-shi fụta, ọ bụru iya bẹ ube e gude alwụ ọgu l’e-shi fụta, ọ bụru iya bẹ ndu ishi, dụ l’iche l’iche l’e-shi fụta. ⁵Ndu Juda l’a-jịko bụru ndu ike dụ. Whẹ l’e-gude ọkpa dzọo ndu ọhogu whẹ gbụdugbudu l’ẹpoto dụ l’echi-ụzo. Whẹ alwụa ọgu gbakaa ndu gude ịnya alwụ ọgu nkele Onye-Nwe-Ọha swiru whẹ eswiru.

⁶“Mu l’e-me t’ọzo-ụlo Juda shihu ike,

mu adzọo ọzo-ụlo Jósẹfu.

Mu l’e-me tẹ whẹ lawhu azụ l’ọnodu whẹ,

nkele imiko whẹ dụ mu.

Whẹ abya adụ g’ọo ndu mu l’ẹte eshia jịka ajịka,

nkele ọo Mu bụ Onye-Nwe-Ọha bụ Chileke whẹ;

mu je l’a-zajẹ whẹ oku.

⁷Ndu Ífuremu l’a-bụ ndu ike dụ,

ẹswa eji whẹ obu g’ọo ndu ngụru mmẹe.

Ụnwu whẹ l’a-whụ iya tee ẹswa,

obu atsọlahaa whẹ rịkporikpo

l’iwhe Onye-Nwe-Ọha meru.

⁸Mu l’e-gude okpurọswa kukobe whẹ.

Ishi iya bụ lẹ mu l’a-gbafụta whẹ,

whẹ abya aha l’igweligwe gẹ whẹ shihawaa ha.

⁹A makwarụ-a lẹ mu chịkashiru

whẹ, whẹ dzuru mba gẹ mba ha,

ọle whẹ l’a-nọdule l’alị teru ẹnya nyata mu.

Whẹ l’ụnwegirima whẹ l’a-tụko wafụ lwatashia.

¹⁰Mu l’e-shi lẹ Íjiputu dulata whẹ,

mu eshi lẹ Asiriya rwukobe whẹ,

chịru whẹ je edobe l’alị Giledu

mẹe l’ugvu ugvu Libanọnu,

jeye nteke ẹka ono l’ete edzuhe whẹ anọdu.

¹¹Whẹ l’a-da eze-ẹnyimu iwhe-ọtsulanu,

mu emee t’akpara mini iya lwazeta,

ogbu-mini ẹnyimu Nayịlu atahụkota atahụ.

Ekuku ono, ndu Asiriya shi eku

onwowhe l’a-bụ iwhe e wozeru alị,

mgbọro ono, shi bụru ike ndu

Íjiputu abụru whuchakangu.

¹²Mu l’e-me, ike adụ ndibe mu l’ẹka Onye-Nwe-Ọha nọ,

whẹ egude ẹwha mu adzọnga mgboko.”

O nokwa iwhe Onye-Nwe-Ọha l’ekfu ndono.

¹Gụbe ugvu Libanọnu, gụfu ụzo ghu ghebe ọnu

nke ọwhu ọku l’e-kepyashi oshi sida ghu ekepyashi!

²Gụbe oshi payịnu, ryaa ẹkwa tsọo kụrukuru,

nkele oshi sida bẹ whọfuwaru bya adaa.

Oshi ono, bụ oshi dụ-gee biribiri bẹ lakọtawaru l’iswi.

Gụbe achị ono gvuru l’alị

Báshanu, ryaa ẹkwa tsọo kụrukuru,

nkele oke ọswa b’a sụkashiwaru.

³Ngabẹdawho nchị lẹ mkpu ndu l’eche atụru l’akpọ,

nkele ẹka ono whẹ l’echeje atụru b’e mebyishigewaru.

Ngabẹdawho nchị l’ụja ono ụnwu oduu-gburu-agụ l’agbọ,

nkele oke ẹtsukala ono nọ l’agụga

ẹnyimu Jọ́danu b’e mewaru o gheru karawhongu.

Uzhi ụmadzu labọ, l’eche atụru

⁴Onye-Nwe-Ọha bụ Chileke mu bẹ sụru agha: “Unu wata oche atụru ono e doberu nke egbugbu t’ọ tajia ẹwho. ⁵Ndu ono, l’abyajẹ azụa ya, l’azụje iya gbua egbu, a haa whẹ ẹwoma. Ndu ọwhu l’ere anụ iya ere nọdu whẹ asụ: ‘T’ajaja bụkwaru nke Onye-Nwe-Ọha, o noo l’anyi nwewaa iwhe.’ Ndu l’eche atụru ono te enwedu obu-imiko l’ẹka atụru ono nọ. ⁶Ọo ya bụ lẹ mu ta abyahẹdu l’a-whụru ndu bu l’alị-a imiko ọdo. O nokwa iwhe Onye-Nwe-Ọha l’ekfu ndono. Mu l’e-me tẹ madzụ daba ibe iya l’ẹka, mee tẹ madzụ daba l’ẹka onye eze iya. Whẹ egwee mgboko aryaka-eryune, ọ tọ dụdu onye mu l’a-dzọta l’ẹka whẹ.”

⁷Ọo ya bụ, mu bya awata oche atụru ono e doberu nke egbugbu. Ndu mu l’echeru iya bụ ndu l’eme nke atụru. Mu nweru mkpụru labọ, mu gude eme nke atụru ono. Mkpụru ono nnanụ bẹ mu gụru Iwhe-Ọma, gụa ọwhunalanu Atụgbabe. Mu bya awata oche atụru ono. ⁸O nweru ụmadzu ẹto ọdo, mu lẹ whẹ tụkoru eche atụru ono bụ ndu kpọru mu ashị. Ụmadzu ẹto ono bẹ mu chigburu l’ime ọnwa lanụ nkele mu ta adụdu ike gudepyabe onwomu l’ẹka whẹ nọ. ⁹Mu ghachi bya asụ atụru ono sụ iya: “Mu te echehekwa unu ọdo. Tẹ ndu ọwhu l’a-nwụhu nụ nwụhukwa, ndu ọwhu l’a-la l’iswi alaa ya, ndu ọwhu wuduru eria anụ ibe whẹ.” ¹⁰Mu bya apata mkpụru mu ono, l’aza Iwhe-Ọma nyajihu ẹbo gude mebyia ọgbandzu, mu lẹ ndiwhe l’owhu gbarụ. ¹¹Ọo ya bụ, mu nọdu mbọku ono mebyia ọgbandzu ono. Ndu ono, l’eme nke atụru ono, bụ ndu l’ele mu l’ẹnya bebe marụ l’ọo Onye-Nwe-Ọha bẹ gude iwhe ono, mu meru nno ekfu okfu. ¹²Mu sụ whẹ: “Ọ -bụru l’ọ dụ unu ree, unu akfụa mu ụgwo mu, nteke l’ọodua unu egudekwa iya roo.” Whẹ bya akfụa mu ụkporo mkpọla-ọcha lẹ mkpọla-ọcha iri.

¹³Tọ dụ iya bụ, Onye-Nwe-Ọha sụ mu: “Je eye okpoga ono l’ẹka l’eeyeje okpoga, mbụ igbidi okpoga ono, whẹ sụru l’ọo iwhe aswa iya ha g’ọo ya.” Mu kwee chịta ụkporo mkpọla-ọcha lẹ mkpọla-ọcha iri ono je eye l’ẹka l’eeyeje okpoga l’eze-ụlo Onye-Nwe-Ọha. ¹⁴Mu byakwawhọ anyajia mkpụru mu nke ẹbo ono, l’aza Atụgbabe, shi nno mebyia abụbu ono Juda yẹle Ízurẹlu bụ nwune.

¹⁵Onye-Nwe-Ọha bya asụ mu: “Ngwa chilia ngwa-ọru ọdo je abụbaaru onye l’eche atụru. Nke ugbo iya-a bẹ l’ịi-bụru ọ-ga-lẹ-mkpa. ¹⁶O noo lẹ ntaa bẹ mu bya l’ewofuta onye l’eche atụru l’alị-a, bụ onye l’ẹte abyaa l’a-kpa ishi atụru ọwhu l’ala l’iswi, tọ bya l’achọ ndu ọwhu l’etuwhahu etuwhahu, tọ bya l’emebe ndu ọwhu iwhe mekaru ọgvu, tọ bya l’anụ ndu ọwhu ẹhu gbashịru ike nri. Iwhe l’a-bụru ẹhu iya bụ tẹ ya taa anụ ndu ọwhu gbarụ ẹba, aswọshi whẹ akụ-ọkpa. ¹⁷Nshọbukwa ọga-lẹ-mkpa onye l’eche atụru ono, mbụ onye ono, l’apajẹru atụru ono haa! T’ogu-ịgba yebufukwa iya ẹka mẹe ẹnya ẹka-ụtara! T’ẹka iya l’owhu nwụhukotakwa anwụhu, ishi abyarụ iya l’ẹnya ẹka-ụtara!”

Ndu ọhogu Jerúsalẹmu bẹ l’aa-la l’iyi

¹Ọ waa bụ okfu, Onye-Nwe-Ọha l’ekfu l’eli ishi ndu Ízurẹlu. Onye-Nwe-Ọha ono, bụ iya tụsaru akpamigwe atụsa, bụru iya tụru ukfu mgboko bya eye madzụ ume l’ẹhu bẹ sụru agha: ²“Leenu, mu bya l’e-me Jerúsalẹmu t’ọ bụru ntiko mmẹe, ndu buwheru iya mgburumgburu l’a-ngụtaje ada bẹbeji. Whẹ l’e-yebuta Juda, yebutakwawho Jerúsalẹmu. ³Nteke ono bẹ mu l’e-me Jerúsalẹmu t’ọ bụru agbụgaragbu ẹwhuru l’ẹhu mba gẹ mba ha. Mba jeru iya apali l’e-buta onwiya ejo ebuta. Mba lile, nọ lẹ mgboko l’a-kpakọ akpakọ bya etso iya ọgu. ⁴Nteke ono bẹ mu l’e-me tẹ ịnya-ọgu tsụlahaa egvu, mee t’ọgvu byarụ ndu l’agba iya nụ. O nokwa iwhe Onye-Nwe-Ọha l’ekfu ndono. Mu l’e-me tẹ ịnya ndiwhe kpukota ishi. Obenu l’ọzo-ụlo ndu Juda bẹ mu l’a-nwụberu ẹnya. ⁵Nteke ono bẹ ndu ishi ndu Juda l’a-nọ ekfukaa l’ime onwowhe sụ: ‘Ọkpehu, dụ ndu bu lẹ Jerúsalẹmu bẹ shikwa l’ẹka Onye-Nwe-Ọha bụ Onye-ishi-igwe-ọgu, bụ Chileke whẹ.’

⁶“Nteke ono bẹ mu l’e-me ndu ishi ndu Juda tẹ whẹ chaa gbarara g’ọo mbeji e shiberu l’ọku, l’ata kfụkfukfu, mbụ g’ọo ọku, l’aba whowhowho l’ẹswa ereshi. Whẹ ekegbushia ndu nọ-wheru whẹ mgburumgburu l’ụzo ẹka-ụtara mẹe l’ụzo ẹka-ịcha. Ndu Jerúsalẹmu anọdulekwaa gẹ whẹ nọ l’alị whẹ, ya eje adụ iwhe l’e-me whẹ nụ.

⁷“Ndu Onye-Nwe-Ọha l’e-vu ụzo dzọta bụ ndu Juda, nke ọwhu ugvu, l’aa-kwabẹ ọzo-ụlo Dévidi yẹle ndu bu lẹ Jerúsalẹmu ta akadụ nke ndu Juda shii. ⁸Nteke ono bẹ Onye-Nwe-Ọha l’e-gbobuta ndu bu lẹ Jerúsalẹmu, onye kagee arwụhu l’ime whẹ l’e-nwe ọkpehu g’ọo Dévidi, ọzo-ụlo Dévidi awata whẹ edudu g’ọo Chileke, mbụ g’ọo ndu o vutaru ụzo mbụ Ojozhi imigwe shi l’ẹka Onye-Nwe-Ọha. ⁹Nteke ono bẹ iwhe mu l’a-nọ achọkashi ụzo iya bụ gẹ mu l’e-shi mebyishia mba l’etso Jerúsalẹmu ọgu.

¹⁰“Ọzo-ụlo Dévidi mẹe ndu bu lẹ Jerúsalẹmu bẹ mu l’a-wụru ume eze-iwhe-ọma mẹe nke okfu anụ Chileke nke ọwhu whẹ l’a-palije ẹnya lee onye ono whẹ nmarụ arwa, whẹ awata ọrya ẹkwa iya g’ọo onye l’arya ẹkwa nwa lanụ o nweru, gbabuhuru nwụhu, mbụ whẹ atsọru iya gbụdagbuda g’ọo onye ọkpara iya nwụhuru. ¹¹Nteke ono bẹ ụzu-ẹkwa l’a-swọtobe lẹ Jerúsalẹmu g’ọo ụzu-ẹkwa, a tụru l’iswi Hedadu Rimọnu ono, dụ lẹ barịkiti alị Megido. ¹²Ẹkwa l’a-swọtobe l’alị ono, a rya iya l’uwhu l’uwhu. Ẹnya-uwhu ndu ọzo-ụlo Dévidi l’a-nọ arya nkewhe, unyomu whẹ arya, ẹnya-uwhu ndu ọzo-ụlo Nétanu arya nkewhe, unyomu whẹ arya. ¹³Ẹnya-uwhu ndu ọzo-ụlo Lívayi arya nkewhe, unyomu whẹ arya, ẹnya-uwhu ndu ọzo-ụlo Shimeyi arya nkewhe, unyomu whẹ arya. ¹⁴Ẹnya-uwhu ndu ọwhunalanu gẹ whẹ ha, mbụ l’ẹnya-uwhu nọnu l’a-nọ arya nkewhe, unyomu whẹ arya.

Ọsafu iwhe-dụ-ẹji

¹“Nteke ono bẹ l’aa-gụharu ọzo-ụlo Dévidi yẹle ndu bu lẹ Jerúsalẹmu ẹnya-mgba-mini ghebe iya ọnu t’ọ safụ whẹ iwhe-dụ-ẹji yẹle mmerwu, dụ whẹ l’ẹhu. ²Nteke ono bẹ mu l’e-hufu ẹwha agwa, nọ l’alị ono nke ọwhu l’ẹte anyatajẹhe iya anyata ọdo. O nokwa iwhe Onye-Nwe-Ọha bụ Onye-ishi-igwe-ọgu l’ekfu ndono. Ndu ono, sụru lẹ whẹ bụ ndu nkfuchiru Chileke bẹ mu l’e-wofu, wofu ejo maa bu l’alị ono. ³O nweru onye -fụtaru sụ lẹ ya bụ onye nkfuchiru Chileke, nna iya lẹ ne iya bụ iya bụ ndu nwụru iya nụ asụ iya: ‘Ịi-nwụhukwa, o noo nkele i gude ẹwha Onye-Nwe-Ọha adzụ ejire.’ Onye ọbu nmata ẹka kfuchilahaaru Chileke, tẹ nna iya lẹ ne iya bụ ndu nwụru iya nụ nmagbua ya. ⁴O rwulewho nteke ono bẹ iwhere l’e-gudeje onye sụru lẹ ya bụ onye nkfuchiru Chileke l’ụdu iwhe l’ọo-nọ awhụkaa lẹ nkfuchiru iya ọbu. Oo-yebuhu uwe ẹji ẹji ono o gude eduwhushi madzụ sụ lẹ ya l’ekfuchiru Chileke. ⁵Iwhe l’oo-gbechia wata ekfukfu bụ lẹ ya ta abụkwa onye nkfuchiru Chileke, lẹ ya bụkwa onye l’akọ okfu. Ọ bụru omebe iwhe l’alị bẹ ya gude buru eshi nteke ya bụ nwokoro. ⁶O nweru onye jịru iya sụ iya: ‘?Ọnya ọwa, tụkoru ghu okpurukpu narụ bụ gụnu?’ Ya asụ iya: ‘Ọ kwa ẹka e mekaru mu iwhe l’ibe ọnya mu.’

Onye l’eche atụru b’e chiru iwhe, atụru iya gbakashịhu

⁷“Gụbe ogu-ịgba, zhilihu je etso onye ono l’eche atụru mu ono ọgu, je etso onye ono, nọ mu ntse ọgu.” O nokwa iwhe Onye-Nwe-Ọha bụ Onye-ishi-igwe-ọgu l’ekfu ndono. “Je ataa ishi onye nche atụru ono, t’atụru ono gbakashịhu. Mbẹdua l’a-tụfu ẹka daa ndu nke nshịi l’ẹhu. ⁸L’alị ono mgburumgburu, e -kee ndu bu iya nụ uzhi ẹto, uzhi labọ bẹ l’ee-gbukota egbu, uzhi lanụ l’ime nkerẹto ono awhọdu. O nokwa iwhe Onye-Nwe-Ọha l’ekfu ndono. ⁹Uzhi lanụ l’ime nkere ẹto ono bẹ mu l’e-kporu ye l’ọku nụchaa whẹ anụcha gẹ l’aanụchaje mkpọla-ọcha, bya adata whẹ gẹ l’aadatajẹ mkpọla-ododo. Ndu ono l’e-ku ẹwha mu, mu aza whẹ oku. Mu l’a-sụ lẹ whẹ bụ ndibe mu, whẹbedua asụ lẹ mụbe Onye-Nwe-Ọha bụ Chileke whẹ.”

Onye-Nwe-Ọha l’abya tẹ ya bụru eze

¹Lekwa lẹ mbọku Onye-Nwe-Ọha l’e-kpe ikpe l’abyaakwa, mbụ mbọku, l’ee-gwo arya unubẹ ndu Jerúsalẹmu tụtua, nọdu l’iwhu unu kee ya. ²O noo lẹ mu l’e-rwuta mba gẹ mba ha, whẹ awụru bya ọgu lẹ Jerúsalẹmu. Whẹ alwụa obodo unu lwụta, gwoo arya dụ l’ụlo unu tụtua, gude ụnwanyi unu l’ike whaa kutukutu. Nkere ẹbo ndu obodo ono bẹ l’aa-kpụ lẹ ndzụ, ọle ndu ọwhu wuduru nụ ta adụdu onye bya l’e-dufu whẹ edufu l’obodo ono. ³Nteke ono bẹ Onye-Nwe-Ọha l’e-je alwụshi mba gẹ mba ha ono ọgu ẹgube ono, ọolwujehawaa l’oge ọgu. ⁴Mbọku ono bẹ l’ọo-kfụru gẹdemu l’eli ugvu ólivu ono, dụ chebe iwhu l’ụzo ẹnyanwu-awata Jerúsalẹmu. Ugvu Ólivu ono eshi l’ụzo ẹnyanwu-awata kekahu ẹbo jeye l’ụzo ẹnyanwu-arịba, oke nsụda, nweru ogbu anọkahu iya l’echilabọ, ibẹka ugvu ono nnanụ akpọliberu laa ụzo isheli, ibẹka lanụ akpọliberu laa ụzo ọhuda. ⁵Unu l’e-shi lẹ nsụda ugvu mu ono rebe ọso gbalaa nkele nsụda ugvu mu ono l’a-nọ jeye lẹ Ázelu. Unu l’a-gba ọso g’unu gbajẹru iya l’alị ọnma jijiji ono, mejeru nteke Uzáya bụ eze ndu Juda. O noo nteke Onye-Nwe-Ọha bụ Chileke mu yẹle ndu nkiya l’a-lị bya ndono.

⁶Mbọku ono bẹ iwhoro ta adụdu, oyi ta atsụ. ⁷Mbọku ono l’e-likolewho ọnu. Eswe ta adụdu, ẹnyashi ta adụ, iwhoro l’a-dụkota mẹe l’ẹnyashi. Onye marụ gẹ mbọku ono l’a-dụ dụ bụ Onye-Nwe-Ọha.

⁸Mbọku ono bẹ mini, l’anụ ndzụ l’e-shi lẹ Jerúsalẹmu asọshi. Nkere lanụ asọru laa eze-ẹnyimu ọwhu dụ l’ụzo ẹnyanwu-awata, nkere lanụ asọru laa eze-ẹnyimu ọwhu dụ l’ụzo ẹnyanwu-arịba, ọo-nọ asọ l’udzumini asọ l’ọnanwu. ⁹Onye-Nwe-Ọha abya abụru eze, l’achị mgboko l’owhu. Nteke ono bẹ Onye-Nwe-Ọha bẹ bụ Onye-Nwe-Ọha ono, ọ bụ bẹ l’ọo-bụru, ẹwha iya abụru iwhe ọ bụ.

¹⁰Alị ono g’ọ ha bẹ l’aa-rwazekota arwaze ya eshi lẹ Geba dụ barịkitii jeye lẹ Rimọnu, dụ l’ụzo ọhuda Jerúsalẹmu. Ọle Jerúsalẹmu l’a-sụru gẹdee tsefu ha l’imeli imeli, shi l’ọnoguzo Bénjaminu nọo jeye l’akahụ ọnoguzo, mbụ jeye l’ọnoguzo Mgburẹku, bya eshikwawho l’ụlo-eli Hananẹlu nọo jeye l’ẹka l’aapyịshijeru onye eze mmẹe l’akpụru vayịnu. ¹¹Jerúsalẹmu abya abụru ẹka madzụ bu ebu. Ọla l’iswi ta abyadụ l’abatabaa ya ọdo. Ndu madzụ eburu iya nwee ntụsaru-ẹhu, ọ tọ dụdu iwhe l’e-me whẹ.

¹²Ọ waa bụ nchịkarehu, Onye-Nwe-Ọha l’e-wota doberu mba, tsoru Jerúsalẹmu ọgu: Whẹ l’a-nọdu ndzụ anụ, dụ whẹ l’ẹhu ereshihu ereshihu, akpụru-ẹnya adụ whẹ l’ukuku ẹnya ereshihu, ire adụ whẹ l’ọnu reshihu.

¹³Nteke ono bẹ Onye-Nwe-Ọha l’e-me iwhe ọotsu egvu abyakfuta whẹ, onyenọnu eje awọru ibe iya l’ẹka, whẹ alwụkfuru ọgu. ¹⁴Ndu Juda l’a-lwụ ọgu ẹhu Jerúsalẹmu. A tụko ẹku, ndu mba, buwheru whẹ mgburumgburu kparụ gwotakota, mbụ mkpọla-ododo, mbụ mkpọla-ọcha mẹe ẹkwa bẹ l’ee-gwotakota gwoo ya nke etsutsu.

¹⁵Ọ bụru ụdu nchịkarehu ono bẹ l’ee-wokfuta ịnya mmaanụ mẹe ịnya-mulu mẹe ịnya-kamẹlu mẹe nkakfụ-ịgara mẹe iwhe bụ anụ nọ l’ọdu-ọgu ndu ọhogu ono.

¹⁶E megee, ndu wafụru l’ẹka mba gẹ mba ha ono, tsoru Jerúsalẹmu ọgu ejejee Jerúsalẹmu awha g’awha ha je abaarụ Eze, bụ Onye-Nwe-Ọha bụ Onye-ishi-igwe-ọgu ẹja, whẹ erikwaawho oge Ime-mkpu. ¹⁷Mba nọ lẹ mgboko-o l’ẹte ejee Jerúsalẹmu je abaarụ Eze ono, bụ Onye-Nwe-Ọha bụ Onye-ishi-igwe-ọgu ẹja, bẹ mini l’a-byakwaa l’a-chịru whẹ. ¹⁸Ọ -bụru lẹ mba Íjiputu te ejedu je emee oke iya nke whẹ, Onye-Nwe-Ọha ewokfuta whẹ ẹgube nchịkarehu ono, o doberu mba gẹ mba ha ono, jịkaru lẹ whẹ te ejedu ori oge Ime-mkpu ono. ¹⁹Ọo ya bụ áwhụ, l’aa-nụ ndu Íjiputu yẹle mba gẹ mba ha, l’ete ejee Jerúsalẹmu je eria oge Ime-mkpu ono.

²⁰O -rwulewho nteke ono bẹ iwhe l’ee-dekota l’ọku-mgbịrigba, a nyabẹru ịnya l’olu bụ: Ọ dụru Onye-Nwe-Ọha lẹ nsọ. Ite oshi iwhe dụ l’eze-ụlo Chileke bẹ l’e-dobeje nsọ g’ọo ochi ono, l’adụje l’ẹnya-mgbẹja. ²¹Iwhe bụ ite oshi iwhe dụkota lẹ Jerúsalẹmu mẹe lẹ Juda l’a-dụkotaru Onye-Nwe-Ọha, bụ Onye-ishi-igwe-ọgu lẹ nsọ. Ndu byarụ ọgwa Chileke l’a-patajẹ ite ono gude shia anụ whẹ gburu gude agwa Chileke ọbu. Nteke ono bẹ ndu l’agba nghọ ta anọhedu ọdo l’ụlo Onye-Nwe-Ọha, bụ Onye-ishi-igwe-ọgu.