Táyitọsu

Ẹkwo-Ozhi, Pọlu Deru Nụ

TÁYITỌSU

¹Ẹkwo-ozhi-a bẹ shi l’ẹka mbẹdua bụ Pọlu, bụ onye l’ejeru Chileke ozhi, bụkwaruwho onye-ishi-ozhi Jisọsu Kuráyisutu.

Chileke họtaru mu, zhi mu tẹ mu bya emee tẹ ndu Chileke họtaru, mbụ ndu ono, wowaru onwowhe ye iya l’ẹka, tẹ mu bya emee whẹ tẹ whẹ kabaa ọnoshi ike. Mu emekwaawho tẹ whẹ marụ iwhe bụ ọkpobe-okfu nke Chileke, bụ iya l’e-me tẹ ndzụ whẹ dụ lẹge Chileke chọru iya. ²O noo l’anyi tụkoru ele ẹnya ndzụ tututu-mịmimi. Ndzụ tututu-mịmimi ono bẹ Chileke, bụ onye l’ẹte adzụje ejire kfuhaakwaruro lẹ ya l’a-nụ anyi tẹmenu mgboko dụ. ³O belekwawho lẹ mgbe iya, Chileke bụ onye ndzọta anyi mee t’e shi l’ozhi-ọma iya marụ ndzụ ono, o kweru ụkwa iya. Ozhi-ọma iya ono b’o wotaru ye mu l’ẹka sụ tẹ mu tọkashiaru iya ndiwhe t’o doo whẹ ẹnya.

⁴Mu l’edekwanu ẹkwo-ọ anụ ghu Táyitọsu. Ị bụ ọkpobe nwa mu nkele i kwetaru gẹ mbẹdua kwetaru l’ọo Jisọsu bụ Onye-Nwe-Ọha.

Tẹ Chileke, bụ Nna mẹe Kuráyisutu Jisọsu, bụkwawho Onye Ndzọta anyi meeru ghu eze-iwhe-ọma, nụkwa ghu whọ ẹhu ọdu guu.

Ozhi Táyitọsu lẹ Kirítu

⁵L’iwhe meru mu haa ghu l’alị Kirítu bụ t’i dozhia iwhe wuduru nu mẹe t’ị gụa ndu l’a-bụ ọgurenya chọchi lẹ mkpụkpu lẹ mkpụkpu lẹge mu kfuhawaru ghu iya. ⁶Tẹ ndu ọbu, l’ịi-gụ tẹ whẹ bụru ọgurenya chọchi bụkwaru ndu l’aata amarụ ejo ẹka, ndu ono abụru ndu l’alụkaa nwanyị nnanụ nnanụ kpụ. Tẹ ndu ọbu bụkwaru ndu ụnwegirima whẹ wowaru onwowhe ye Kuráyisutu l’ẹka, whẹ abụru ndu l’aata amarụ ụnwu whẹ ẹka lẹ whẹ bụ akpa-aghaka; ụnwegirima whẹ ono ba abụkwawho ọ-karia-ẹka whẹ. ⁷L’onye ishi chọchi bụfutajekwa onye l’ete emeje iwhe l’aa-ta iya ụta nkeshi ọ bụwa iya bẹ bụ onye ishi, l’eleta ozhi Chileke ẹnya. Onye ono bụfutaje onye l’ẹte abụa idzu-chị-l’obu iya, tọ bụhunu onye obu-ọku, tọ bụhunu onye l’angụtaje mmẹe, ya eme iya l’ẹnya, tọ bụhunu o-chi-gbaa; t’onye ono ba abụkwawho onye l’anọje achọ urwu l’ụzo, l’ẹte akfụaru nhamụnha. ⁸Onye ọbu bụfutaje onye bụ ọ-kwa-ẹbyii, bụru onye iwhe dụ ree l’adụje ree, onye uche iya dzuru oke, onye dụ chịriri, onye umere iya l’egoshi l’ọ bụwho onye dụru Chileke nsọ, ya abụkwaruwho onye gude onwiya ẹka. ⁹Onye ono bụfutaje onye kfụshiru ike l’okfu ono, a marụ l’ọ gbarụ t’e gude iya ẹka lẹge e zhiru iye ya, nke ọwhu l’ọo-dụ ike gude anọ ezhi ọkpobe iwhe ono dụa ndu ọdo obu, dụshia whẹ iya ike, tẹhenu ya egoshikwawho ndu jịkaru iwhe ono, l’oozhi ẹka whẹ jeberu, ọ nahụ whẹ.

¹⁰O noo l’o nweru ndu ha l’igweligwe, bụ ndu kwefuru ike, ndu l’ekfu mkpọkoro okfu gude aghọta ndu ọdo l’ụgho, kelekele nke ndu Ju, bụwaa ndu nke Kuráyisutu. ¹¹T’a kpọ-bujeru okfu ye ẹgube ndu ono l’ọnu, nkele whẹ l’egudeje ozhi iwhe, whẹ l’ẹtege anọ ezhi, gude chịkashia uwhu l’owhu gẹ l’ee-shi tẹ whẹ rita urwu, mbụ ndu iwhere gvụru l’iwhu. ¹²L’onye lanụ lẹ ndu Kirítu, bụ onye whẹ sụru l’ọo ọ-chịru-ọ-kaa bẹ sụkwaru: “Ndu Kirítu gẹ whẹ ha bẹ shizhiakwawho eshi ụtsu bụtaru utuwhuruku whẹ, whẹ bụru ejo-anụ-ẹgbudu, mbụ ndu ẹnyiru, ẹkpiri l’egbu egbu.” ¹³Iwhe ono, nwoke ono kfuru bụru ọkpobe-okfu; ọo ya bụ, t’ị bashịaru ndu nke Kuráyisutu mba ike, nke ọwhu ekwekwe whẹ kweru l’a-bụ ọkpobe iya. ¹⁴Tẹ whẹ ba angakwa nchị l’akọ-iwhe ndu Ju, whẹ ta anga nchị l’iwu ono, ndu ono jịkaru ọkpobe-okfu ono tụru l’onwowhe. ¹⁵Ndu obu whẹ dụ iwhoro l’ẹka Chileke nọ ta adụkwa iwhe whẹ l’asọ, obenu lẹ ndu merwushiru onwowhe emerwushi, mbụ ndu l’ete ekwetaa nke Kuráyisutu ta adụkwa iwhe l’ẹte abụjeru whẹ nsọ nsọ. Ọriri whẹ rwụhuru arwụhu, ejo iwhe ta awajẹhe whẹ obu mini. ¹⁶Whẹ l’anọje ekfu l’ọnu lẹ whẹ marụ Chileke, ọle whẹ l’egudejekwanu umere whẹ egoshi lẹ whẹ ta amadụ iya. Whẹ bụ ndu meru ahụma, whẹ buru ekfu-ba-anụ whẹ, whẹ bụkwaruwho ọ-ga-lẹ-mkpa whẹ, l’ẹte adụa iwhe dụ ree ọwhu whẹ l’a-dụ ike eme.

Ọkpobe okfu, l’anụje ọkpobe ndzụ

¹Ọle ọbu, gụbedua l’onwoghu, t’iwhe l’iizhije yẹle ọkpobe-okfu, l’eezhi ezhi, l’anụje ọkpobe ndzụ dagbalẹkwawho. ²Zhia unwoke ọgurenya t’ẹnya doo whẹ rịsaa, whẹ emeje umere l’egoshi l’ọ gbarụ t’e yejeru whẹ ugvu; tẹ whẹ sedeje onwowhe; tẹ ekweta, whẹ kwetaru nke Kuráyisutu, mẹe oye obu, mẹe ọta-nshi whẹ buru ọkpobe iya. ³Gụ akarụ ụnwanyi ọgurenya tẹ whẹ meje umere, l’egoshi lẹ Chileke dụru whẹ lẹ nsọ; tẹ whẹ ba abụkwa ndu asụlasu; whẹ ta ngụnukaje mmẹe bụwaru-a nwohuta mmẹe; iwhe whẹ l’e-mechia bụ tẹ whẹ zhije iwhe dụ ree. ⁴Ọo ya bụkwanu whẹ eshi nno zụa ụnwanyi ọwhu bụkwadu ụnwogbaga tẹ whẹ yeje ji whẹ obu; whẹ eyekwa iya whọ ụnwegirima whẹ; ⁵whẹ azụkwaa whẹ whọ tẹ whẹ nweru uche, dobe onwowhe ọga; whẹ eletaje ụlo whẹ ẹnya; whẹ abụru odomodoo, bụru ndu l’anụru ji whẹ okfu nggẹ t’e kwobe iswi ẹhu whẹ kfubyishilahaa okfu Chileke ekfubyishi.

⁶Gụ ekfukwaruwho ọwhube unwokorọbya tẹ whẹ sedeje onwowhe. ⁷G’ọ dụle-zhia, gụbedua l’onwoghu l’a-bụ onye l’e-letaje ẹnya eme umere ọma; ọdo bụ, nteke l’iizhije iwhe, gbanwụjee iwhu gude ire-lanụ zhije iya ọkpobe ezhizhi. ⁸Kfuje okfu, nweru ishi, mbụ okfu l’ẹte agha agha, nke ọwhu l’ii-gudekwanu nno meru iwhe iwhere nụ ndu okfu ghu; eshi-ọwhu l’ọ tọ dụhenua iwhe whẹ marụ, bụ ejo-iwhe, whẹ l’e-gude ekfurwushi anyi.

⁹Kfujeru ndu bụ ohu tẹ whẹ nụjeeru ndu gbarụ whẹ nụ okfu; t’iwhe lile, bụ iwhe whẹ l’eme bụjeru iwhe l’a-dụ ndu gbarụ whẹ nụ mma l’obu; tẹ whẹ ba awọjekwa whẹ okfu; ¹⁰whẹ te emejehunu ẹka ntubu. Tẹ whẹ gbechia goshije lẹ whẹ bụ ndu gbarụ t’e gude ire whẹ ẹka ọkpobe egude l’iwhe lile. Ọo ya bụkwanu nke ọwhu whẹ l’e-gudekota umere whẹ g’ọ ha kutsee iwhe ono, l’eezhi ezhi, shi l’ẹka Chileke, mbụ Chileke bụ iya bụ Onye Ndzọta anyi.

¹¹O noo lẹ Chileke bẹ goshiru eze-iwhe-ọma iya, bụ iya bụ eze-iwhe-ọma, l’oo-gude dzọta madzụ lile. ¹²Eze-iwhe-ọma ono bẹ l’ezhi anyi g’anyi l’e-shi haa ọnodu ndzụ ọwhu anyi l’ete egudee akwabẹ Chileke ugvu mẹe g’anyi l’e-shi haa ẹgu ejo iwhe nke mgboko. Mbụ eze-iwhe-ọma ọwhu l’ezhi anyi g’anyi l’e-shije sede onwanyị, bụru ndu dụ chịriri, eyeru Chileke ugvu lẹ mgboko-o. ¹³Anyi nọduakwaa kwabẹru mbọku ẹhu-ụtso ono, bụ iya bẹ anyi l’ele ẹnya iya. Ọo mbọku ono bẹ l’ee-goshi ọdu-biribiri Ọkalibe, bụ Chileke ono, bụ Onye Ndzọta anyi bụ iya bụ Jisọsu Kuráyisutu. ¹⁴Jisọsu ono gude onwiya gbaa ẹja l’iswi ẹhu anyi nggẹ ya shi nno gbata anyi l’ẹka iwhe-dụ-ẹji mẹe tẹ ya saa obu anyi t’anyi bụru nkiya, mee anyi ndibe iya; ndu l’ọonoje ewhe uwhere tẹ whẹ mee iwhe dụ ree.

¹⁵Sụa, tụko iwhe ono kfushia, gụ egudekwa iya who anmashịru madzụ ọkwa ike, gudekwa iya who goshije madzụ ẹka o mesweru, gụ egude iya duwhu iya azụ. Tọ bọ dụkwaa onye l’a-kpọ ghu ẹbo l’afụ.

Umere gbarụ ndu nke Kuráyisutu

¹Nyatajẹru whẹ sụ whẹ tẹ whẹ nọduje l’ẹka ndu ishi, l’achị nụ mẹe ndu l’ekfu iwhe l’eme nu; tẹ whẹ nọduje whẹ l’ẹka meje iwhe whẹ sụru tẹ whẹ mee; tẹ whẹ bụru ndu kwageberu akwagebe nke oje ozhi, dụ ree. ²T’ọ bọ dụkwa onye whẹ l’e-kfujeru ejo okfu; tẹ whẹ ba aswọjekwa ụswo; tẹ whẹ bụru ndu obu-ọma; tẹ whẹ mejeeru madzụ lile odoo. ³L’anyịbedua l’onwanyi nwekwaru nteke anyi shi bụru ndu eswe; ndu l’ẹte adụa onye whẹ l’anụru okfu; ndu e dusweru ụzo nke Kuráyisutu; ndu shi bụru nwohuta ẹgu ejo iwhe l’anọje agụkaa madzụ mẹe ohu ẹkpiri iwhe dụ-gee iche iche. Iwhe anyi shi adụje l’ọzo iya mbọku-mbọku bụleruwho ejo ọriri mẹe ẹnya-kfụrukfuru; anyi shi dụ madzụ ashị; madzụ ibe anyi dụkwawho anyi ashị. ⁴Ọ bya ebenu nteke Chileke, bụ Onye Ndzọta anyi goshiru anyi obu-ọma iya mẹe lẹge o yeberu anyi obu, ⁵ọ dzọta anyi. Adzọta ono, ọ dzọru anyi ta abụkwa woo l’ọo iwhe-ọma, anyi gude ẹka anyi meta. Ọlekwawho obu-imiko b’o meru anyi. Adzọta ono bẹ shi l’asasa, ọ sarụ obu anyi tẹ Ume-Dụ-Nsọ mee anyi t’anyi bụru ndu a nwụru ọdo, ya emekwaawho ndzụ anyi t’ọ bụru ndzụ ọwhuu. ⁶Chileke bẹ kwatazhiaru shi l’ẹka Jisọsu, bụ Onye Ndzọta anyi nụ anyi Ume-Dụ-Nsọ ono ọkpobe anụnu, ⁷nggẹ anyi bụru ndu o gude eze-iwhe-ọma iya gụa lẹ ndu dụ chịriri l’iwhu iya mẹe ndu l’e-keta ndzụ tututu-mịmimi, bụ iya bụ iwhe anyi l’ele ẹnya iya. ⁸Okfu-a bẹ bụkwa okfu, e gude ẹka. Iwhe mu l’eme tẹ mu kfuru ghu bụ t’i kfua ya kfushia ya ike, nke ọwhu ndu wowaru onwowhe ye Chileke l’ẹka l’e-lepyabe ẹnya, ye ẹhu l’ome iwhe dụ ree. Iwhe-e bẹ bụkota iwhe dụ ree ọkpobe adụdu, bụkwaruwho iwhe l’a-kwọ madzụ. ⁹Ọle-a, zelajeeru ntụtego, l’ẹte adụa iwhe ọ patarụ, gụ ezelajeeru ntụtego ndzekfu-ndzekfu ẹwha, shi lẹ ndụ-ichee, gụ ezelaaru ọswo ụswo mẹwaro ọba mba nke iwhe shi l’iwu. Ẹgube ntụtego ono bụkotakwa iwhe l’adụa iwhe ọ bụ, tẹmenu urwu ta adụkwa iya whọ. ¹⁰Tẹ gụ l’onye l’ebukataje ọgbo lẹ chọchi ba adụkwa iwhe unu l’e-megbajekwadu m’ị -nmawarụ iya ọkwa iya ugbo lanụ, ọbu ugbo labọ, ụzo te eshi iya. ¹¹Makwarụ l’ẹgube onye ono bẹ ọriri iya gbajọhuwaru agbajọhu; onye ono l’emewaa iwhe-dụ-ẹji gude anma onwiya ikpe.

Iwhe Táyitọsu l’e-meje bẹ Pọlu gude akpochi ẹkwo-ozhi-a ishi

¹²Mu -zhilewho Átẹmasu m’ọ bụ Tíkikọsu ọ bya ibe ghu, kebekwa ẹhu byakfuta mu lẹ Nịkópolisu ẹgwegwa, nkele ọo ẹka ono bẹ mu tụru ọnu lẹ mu l’a-nọdu lẹ nteke oyi l’atsụje l’abya nụ-a. ¹³Dufu Zínasu nke lọya mẹe Apọ́losu tẹ whẹ tụgbua ije whẹ. Nụkwa whẹ iwhe mkpa iya dụ whẹ, nggẹ t’ọ bọ dụ iwhe ụko iya l’a-dụru whẹ. ¹⁴Mee tẹ ụnwunna anyi whẹ nwụta gẹ whẹ l’e-shije gude anya iwhe dụ ree, whẹ l’ese dzọjee ndu ọdo lẹ mkpa, kparụ whẹ nụ. Ọ -bụru lẹ whẹ te emedu iya nno, tẹ whẹ makwarụ l’anya ọbu, whẹ seru bụ anya ọla l’iyi.

¹⁵Iwhe bụ ndu mu lẹ whẹ nọ l’ẹka-a l’ajịkwa ghu rọo gẹ whẹ ha. Jịaru anyi ndu anyi yeru obu, ndu anyi lẹ whẹ tụkoru kweta nke Onye-Nwe-Ọha.

Tẹ Chileke meeru unu eze-iwhe-ọma g’unu ha.