Egvu Sólomọnu

Ẹkwo

EGVU SÓLOMỌNU

¹Egvu kagezhia ree l’iwhe bụ egvu, a gụru agụgu, bụ egvu ọwhu Sólomọnu gụru.

Nwanyị ono sụ:

²Haa, ọ dụkwa mu nke t’ị bya etsutsua mu ọnu.

Nkele n-yemobu ghu kakwa mmẹe oome ẹhu-ụtso.

³Mmanụ senti, i huru bẹ l’eshikwa mkpọ shii.

Ẹwha ghu ngakọtaru ẹka lile

g’ọo ẹka mmanụ senti wụshihuru.

Ọo iwhe ono meru g’o gude

ụnwumgboko yee ghu obu.

⁴Duta mu, t’anyi lịru lụfu-shia,

t’anyi tụgbu-kebekwa ẹgwegwa.

Eze bẹ dubatawaru mu l’ụlo iya,

ẹka anyi l’a-nọdu ẹhu atsọo anyi ụtso,

anyi etee ẹswa l’ẹka ị nọ,

bụru ẹka anyi l’a-nọdu tụko jaa

n-yemobu ghu ajaja karia gẹ l’aajajẹ mmẹe.

Ọ gbarụwhoo t’ụnwumgboko yeje ghu obu.

⁵Unubẹ ụnwada Jerúsalẹmu,

a amakwarụ-a lẹ mu l’eji uji,

ọle mu dụkwanu ugvu l’ẹnya.

Mu jitabekwaru uji g’ọo ụlo-ẹkwa ndu Keda,

ọle mu dụkwanu ugvu l’ẹnya

g’ọo ẹkwa, e geru l’ụlo Sólomọnu.

⁶Unu be elenukakwa mu

whoriwhori l’ọo lẹ mu l’eji uji;

mbụ l’ọo l’anwụ chiwaru mu jeye mu jikputa!

Ọo l’ẹhu l’eghu unwune mu eghu l’ẹka mu nọ

bẹ meru g’o gude whẹ nwuru mu yee,

tẹ mu je anọduje l’ozhi

mgbabu vayịnu ntekenteke.

Ọ bụru iwhe ono meru g’o gude

tọ dụ nteke ụzo dụjeru mu nke ooleta onwomu ẹnya.

⁷Gụbe onye mu yeru obu, kanụru mu ẹka l’iicheje atụru ghu.

?Ọo awe bụ ọdu atụru ghu,

mbụ ẹka whẹ l’adọshije atụta ume l’echi-eswe?

Tẹ mu be ejeshi anọdu

aghawhe g’ọo nwanyị ọkpara l’ọdu atụru ndu ọdo.

Nwoke ono sụ:

⁸Gụbe nwanyị bụ ghu kakọta

ọma ụma l’iwhe bụ ụnwanyi l’owhu,

Ọ -bụru l’ị tị madụ ụzo,

tsopyabelewho owere atụru ono,

je eche ụnwu eghu ghu lẹ

mgboro mkpuukpu ono, ndu ono, l’eche atụru ono.

⁹Iwhe mu l’a-tụru eyeru gụbe

onye ono, dụ mu l’obu ono,

bụ ada-ịnya, l’akpụje ụgbo-ịnya Fero.

¹⁰Iwhe i yeru lẹ nchị bẹ meru asa ghu l’ọoma ụma.

Ịyagba, i doru l’olu bẹ kwekwaru ghu ekwekwe shii.

¹¹Anyi l’e-metaru ghu ịyagba mkpọla-ododo,

a tụwhashiru mkpọla-ọcha paapaa.

Nwanyị ono sụ:

¹²Nteke eze shi eri nri lẹ teburu iya,

bẹ mkpọ mmanụ nadụ, mu huru ngashịru.

¹³Onye ono, mu yeru obu dụ mu g’ọo ụnwu mẹru,

l’eshi mkpọ, mu tukoberu l’obu.

¹⁴Onye ono dụ mu l’obu dụkwa

mu whọ g’ọo ọjokfutu igu oshi

hena l’eshi mkpọ, shi lẹ mgbabu ndu Enu-gedi.

Nwoke ono sụ:

¹⁵Gụbe onye ono mu yeru obu,

iwhe l’ịimakwanu l’ọo ụma!

Sụa, ịimalewho ọkpobe ụma.

Ẹnya ghu dụlewho g’ọo nke ndo.

Nwanyị ono sụ:

¹⁶Gụbe onye mu yeru obu,

iwhe l’ịimabukwaa l’ọo ụma nwoke!

Sụa, iwhe ị dụkwanu l’ọo ugvu!

Ẹka anyi l’azẹje azẹe dụ gayii.

Nwoke ono sụ:

¹⁷Osweru anyi gude gbaa uko anyi bu oshi sida.

Oshi, anyi gude swebushia ya

eswebushi bụru oshi payịnu.

¹Mu dụkwa g’ọo fụlawa, nwuru kfụu lẹ nsụda Sharọnu,

mbụ g’ọo nkashị-iyi, dụ-gee lẹ nsụda nsụda.

²Ọo gẹ nkashị-iyi l’adụje m’ọ nọdu l’echilabọ ogvu,

o noo g’onye ono, dụ mu l’obu

ono dụ l’ẹka ụnwumgboko nọ.

Nwanyị ono sụ:

³Ọ kwa g’oshi ọmi l’adụje m’o

gvuru l’ẹka oshi ọdo gvugeeru l’ọswa,

bụ g’onye ono, mu yeru obu dụ

l’echilabọ unwokorọbya ọdo.

Ọoduje mu ree tẹ mu nọdu l’aguguru iya ntekenteke,

akpụru iya l’anọjekwawho akụ mmẹe l’azụ ishi.

⁴O dutaru mu je l’ụlo ẹka l’eeri eriri angụ angụngu.

Ẹkwa-ọhubama, o gude gbochita mu bụ n-yemobu.

⁵Gudenu akpụru vayịnu,

a mịkporu nkụ gbẹe mu ọkpu-ike.

Gụ egudekwawho ụdara mee tẹ mu rwọkota ume.

Nkele obu, mu yeru ghu meru, meji l’atọfu mu atọfu.

⁶O yeru mu ẹka-ịcha iya l’olu,

bya egude ẹka-ụtara iya rwụkota mu arwụkota.

⁷Unubẹ ụnwada Jerúsalẹmu, mu l’aryọ unu aryọ t’unu gude

ẹwha Atsụ mẹe ẹwha Ele kweta mu ụkwa

l’unu ta abyadụ l’a-kpatsu n-yemobu

jeye nteke l’ọo-bya l’onwiya.

⁸Ngabẹdawho! Ọ kwa olu onye

mu yeru obu bẹ mu l’anụ nno!

Ọ kwa iya l’eje abya ẹgube whọ,

lekwa iya gẹ l’ọokfu karagidingu karagidingu

akfụghashi eze ugvu mẹe nke nshịi eje abya.

⁹Onye mu yeru obu dụkwa

g’ọo atsụ, bya adụ g’ọo nwa ele nshịi.

Lekwa g’ọ kụparu l’azụ mgbodo ụlo anyi,

pyokafu ẹnya lẹ windo ele kpakpakpa,

mbụ rịfu ẹnya lẹ nwantufu,

dụ l’ụlo anyi ele mu whoriwhori.

¹⁰Onye mu yeru obu sụkwaru mu:

“Gbashi agbashi gụbe onye dụ mu l’obu,

gụbe onye dụ mu ugvu, gbalihu tsoru mu.

¹¹Nkele nteke oyi l’atsụje ghataakwarụ,

Udzumini laakwarụ, mini buhuwaa.

¹²Oshi l’atụshiakwa igu lẹ mgboko.

Oge okwe mgbe bẹ gbabekwaru nụ.

Nwoguji-ede l’aryakwaa l’alị anyi.

¹³Oshi figu bẹ watakwaru ọmi mebyi.

Igu oshi vayịnu tụru bẹ mkpọ

iya ngakọtaakwaru ẹka lile.

Gụbe onye dụ mu l’obu gbashi.

Gụbe onye dụ mu ugvu, gbashi tsoru mu.”

Nwoke ono sụ:

¹⁴Gụbe ndo mu ono, nọ lẹ mgbawa ẹwhuru,

mbụ gụbe onye woharu onwoghu l’azụ ugvu,

Byiko goshinu mu atatiwhu ghu.

Tẹ mu nụnu olu okfu ghu.

Nkele olu okfu ghu l’atsọje mu ụtso.

Atatiwhu ghu l’adụje mu ugvu.

¹⁵Guderu anyi awuru ono ntaa.

Mbụ ụnwu awuru ono, l’emebyishi vayịnu ono,

ntaa, mgbabu vayịnu anyi l’atụshi igu.

Nwanyị ono sụ:

¹⁶Onye mu yeru obu bụ nkemu, mbẹdua bụru nkiya,

mbụ onye ono, l’echeje atụru iya l’ẹka nkashị-iyi dụ-gee,

¹⁷jeye l’ụzo urwẹnyashi, nteke inyonyo l’esehuwa ẹka.

Dakọbekwa, gụbe onye ono mu yeru obu byakfuta mu;

kfụru karagidingu karagidingu

ẹgube ono, atsụ m’ọ bụ nwa ele nshịi l’anọje akfụ

l’ugvu, dụ kpọkoro kpọkoro.

¹L’ẹnyanshi bẹ mu l’azẹkotaje

l’iwhe-azẹe mu achọ onye mu yeru obu.

Ọle mu chọru iya eli chọo ya alị; mu ta awhụ iya.

²Ntaa bẹ mu l’a-gbashi tsoru ọma mkpụkpu,

tụko ọma gbororo echi-ụzo mẹe nggamgbo jegbakota.

Mu l’achọo onye ono, mu yeru obu ono.

O noo bụ gẹ mu lekotaru ẹnya iya, mu ta awhụ iya.

³Mu lẹ ndu nche abalị dzudaru,

nteke whẹ tsoru ọma mkpụkpu ejewhe.

Mu jịa whẹ sụ: “?Unu levuru mu

ẹnya onye whọ, mu yeru obu whọ?”

⁴Mu ghatalẹwho jeliberu nwanshị,

onye ono, mu yeru obu ono bụru whẹrekete.

Mu wọru iya chịi, mu te ekwe iya ahaha,

Mu kpụa ya jeye mu kpụ-rwua ya ụlo ne mu,

mbụ kpụ-rwua ya ime mkpu onye parụ ẹwho ime mu.

⁵Unubẹ ụnwada Jerúsalẹmu, mu l’aryọ unu aryọ t’unu gude

ẹwha Atsụ mẹe nke Ele kweta mu ụkwa

l’unu ta akpatsudu n-yemobu

jeye nteke l’ọo-bya l’onwiya.

⁶?Oo onye shi l’echi-ẹgu eje abya ẹgube whọ,

g’ọo ẹka ẹnwuru ọku l’akpụ tụlatula?

Mbụ onye a gbarụ mẹru yẹle isẹnsu,

e gude iwhe l’eshi kwẹkwekwe, ndu l’agba nghọ l’ere mee.

⁷Leenu-o! Ọ kwa iwhe Sólomọnu

l’azẹje azẹe b’a pa abya ẹgube whọ!

Ndu l’awụ etso iya nụ dụ ụkporo ndu ojọgu ugbo ẹto,

a gụtaru l’iwhe bụ ndu mkparawa nọ lẹ Ízurẹlu.

⁸Whẹ tụko gẹ whẹ ha tukotaru nkogo,

whẹ bụkotaru ndu ọgu doru ẹnya.

Onyenọnu l’ime whẹ bẹ tu nkogo iya l’ukfu,

shi nno kwakọbe ẹhu m’ọ gvụ

iwhe-ntsumegvu, dụ l’ẹnyashi.

⁹Eze Sólomọnu metaru onwiya

iwhe l’eegudeje apa yẹbe eze agada erwu alị.

Oshi, o gude mee ya bụ oshi, shi l’ugvu ugvu Libanọnu.

¹⁰Ọkpa iya bụ mkpọla-ọcha b’o gude mekota iya.

Ẹka l’eebewhubeje ebewhube b’a rwụru mkpọla-ododo.

Ẹka, l’aanọduje anọdu b’e kwekotaru ẹkwa ododo.

Ime iya b’a tọru ẹkwa, l’amaa ụma,

bụ ẹkwa ụnwada Jerúsalẹmu kweru

gude goshi n-yemobu whẹ.

¹¹Unu wụfuta-o, unubẹ ụnwada Záyọnu,

bya awhụ ẹka eze Sólomọnu kpu okpu-eze iya,

mbụ okpu-eze ono, ne iya

kpuberu iya mbọku ono, ọ lụru nwanyị,

bụ mbọku ono, ẹhu tsọru iya ntụmatu.

Nwoke ono sụ:

¹Iwhe ị dụkwanu l’ọo ugvu, gụbe onye ono dụ mu l’obu!

Iwhe ị dụkwanu l’ọo ugvu!

Ẹnya ghu ono, i whuchitaru ẹkwa

ono dụlewho g’ọo nke ndo

Ẹgbushi dụ ghu l’ishi l’eji g’ọo ẹka

eghu dzeberu awụ-zeta l’ugvu Giledu.

²Eze ghu l’acha pelepele g’ọo igwe atụru,

e bushiru ẹji nke ọwhuu,

whẹ tụko shi l’ẹka a sachashịru whẹ ẹhu awụfuta.

Whẹ tụko chịru ụnwu ẹbo-ẹbo,

tọ dụ m’ọo nnanụ, gba ẹka nwa.

³Ogboromọnu ghu whẹ labọ

bẹ nwuru kfụu g’ọo oghu uswe-uswe.

Ọnu ghu l’onwiya dụkwawho ugvu, ama ntụmatu.

Agbagba-nchị ghu,

i whuchitaru ẹkwa dụ g’ọo ụdara,

e gbujahuru ẹbo.

⁴Olu ghu tụchiru ogologo g’ọo ụlo eli Dévidi,

ẹka l’eedobeje ngwọgu.

Ọo lẹ mgbodo iya b’e kobegeeru

iwhe l’eegudeje ezeru ndzụ l’ọgu, dụ ụnu labọ l’ụkporo iri.

Ndu bụ dike-ọgu l’egudeje iya ezeru ndzụ l’ọgu.

⁵Ẹra ghu whẹ labọ dụ g’ọo ụnwu umoro labọ.

Mbụ l’ọ dụ g’ọo ụnwu umoro, a chịru ẹbo,

bụlewho ẹka nkashị-iyi dụ bẹ l’ọonoje akpawhe nri.

⁶Mu l’e-je anọdu lẹ yẹbe ugvu

ono, mmanụ mẹru dụ iya l’eshi mkpọ,

mbụ lẹ mu l’e-je anọdu lẹ

yẹbe nwopu ugvu ono isẹnsu dụ iya nụ l’eshi kwẹkwekwe,

jeye ẹnyanwu arịba l’ishi, nteke inyonyo iwhe l’ẹte adụhee.

⁷Gụbe onye ono dụ mu l’obu,

iwhe ị bụlewho shi l’ishi rwua

l’ọbochi-ọkpa bụ nwọmarima.

O to nwedu ẹka ọrwu dụ ghu l’ẹhu ilile.

⁸Gụbe nwanyị, mu lụru nke ọwhuu,

shi l’ugvu ugvu Libanọnu tsoru mu t’anyi je.

Byiko shinu l’ugvu ugvu Libanọnu tsoru mu t’anyi je.

Ngwa, shinu l’eli ugvu Amana gbazhita.

Shiro l’ọnunu-swọngu-swọngu

ugvu Seniru yẹle ugvu Hemọnu lụfuta.

Nkele ẹka ono bụ ọdu oduu-gburu-agụ,

mbụ l’ọo ugvu ẹka agụ l’edomishije onwowhe.

⁹I riru mu obu, gụbe nwanyị mu lụru nke ọ̀whúú,

bya abụru nwune mu nwanyị.

Ẹnya, i leru mu ugbo lanụ yẹle iwhe-olu, ị nya l’olu,

b’i gudelewho hata mu meji.

¹⁰Lewaro gẹ n-yemobu ghu

l’atsọ-be ụtso, nwune mu nwanyị,

mbụ gụbe nwanyị, mu lụru nke ọ̀whúú.

N-yemobu ghu kakwa mmẹe ọtso ụtso shii.

Ọ bụkwaruwho nno bụ gẹ mkpọ mmanụ senti, i huru

kakọtakwawho mmanụ ọdo ooshi mkpọ.

¹¹Gụbe nwanyị, mu lụru nke ọ̀whúú,

okfu, l’eshije ghu l’ọnu l’anọje

atsọ g’ọo mmanụ-ẹnwu, shi l’ụbakala-ẹnwu atada.

Ire ghu bụ mini ẹra-eswi yẹle mmanụ-ẹnwu jiru iya.

Uwe ghu l’eshi kwẹkwekwe g’ọo ugvu ugvu Libanọnu.

¹²Gụbe nwune mu nwanyị,

mbụ gụbe nwanyị, mu lụru nke ọ̀whúú,

ị dụlewho g’ọo mgbabu, a tụ-chiru atụ-chi.

Ị dụ g’ọo nwogvu, l’anwụshi mini, e kpuberu iwhe,

mbụ g’ọo ọgba-mini, a guchiru aguchi.

¹³Iwhe jiru mgbabu ghu ono bụ itorokuma,

l’amịshi akpụru, kagezhia ree.

Oshi hena mẹe nadụ jikwawho mgbabu ghu ono eji.

¹⁴Oshi nadụ mẹe oshi safarọnu bẹ dụ iya,

Oshi kalamọsu mẹe oshi sinamọnu dụkwa iya whọ,

Oshi isẹnsu, dụ iche iche gvuru iya,

Oshi mẹru mẹe oshi Alowe

mẹkota oshi, l’eegudeje eme

iwhe l’eshi mkpọ gvukwaru iya whọ.

¹⁵Ị bụ ọgba-mini, dụ l’ime mgbabu,

ị bụru wẹlu-mini, l’anụ ndzụ,

bụkwaruwho iyi, shi l’ugvu ugvu Libanọnu asọshi.

Nwanyị ono sụ:

¹⁶Gụbe whẹrewhere shi l’ụzo isheli tehu etehu.

Watanụ ewhewhe, gụbe

whẹrewhere ọwhu shi l’ụzo ọhuda.

Unu awata ewhewhe lẹ mgbabu mu-a,

Nke ọwhu mkpọ iya l’a-tụko mgboko vọo kfurukfuru!

Byiko batanụ lẹ mgbabu ghu gụbe onye mu yeru obu,

bya awọta mebyi dụ iya ree taa.

Nwoke ono sụ:

¹Nwune mu nwanyị,

mbụ gụbe nwanyị mu lụru nke ọ̀whúú,

mu bataakwarụ lẹ mgbabu mu ọbu.

Mu hekowaru ụ̀nwù mẹru mu,

mẹwaro ụ̀nwù ọdo l’eshikaa kwẹkwekwe.

Mu mịakwaru mmanụ-ẹnwu mu yẹle ụbakala iya.

Mmẹe mu yẹle mini-ẹra-eswi mu bẹ mu ngụakwaru.

Unu ria ngụa, unubẹ ndu ọnya mu.

Unu ngụa ngụta ike unu,

unubẹ ndu ono yeru onwunu obu.

Nwanyị ono sụ:

²Mu l’eku mgbẹnya, obu mu nwụru ẹnya.

Ngabẹedaa nchị! Ọ kwa onye

mu yeru obu l’akụ ẹka lẹ mgbo asụje:

“Gụhaaru mu ụzo nwune mu

nwanyị; ọ-dụ-mu-l’obu;

asa-mpete mu; onye nkemu l’ete enwee ẹgbazhi.

Iji jikwaru mu ishi ejiji.

Ẹgbushi mu bẹ iji, darụ l’ẹnyashi

meekwaru ọ bụru mini nkụchi.”

³Mu yefuakwaru uwe mu eyefu.

?Ọo tẹ mu bya eyewhu iya azụ ọdo tọo?

Mu gudekwaa mini kwọo ọkpa mu akwọkwo.

?Ọo tẹ mu bya adzọo ya l’alị ọdo tọo?

⁴Onye ono, mu yeru obu ono

pyokafu ẹka lẹ mgbakụ mgbo.

Gẹ mu whụru ẹka iya ono bẹ ẹhu kpẹnehuru mu,

Nkele obu iya dụhawaa mbụ eme mu.

⁵Gẹ mu zhilihuru tẹ mu gụhaaru

onye ono, mu yeru obu ụzo,

bẹ mmanụ mẹru ngụguru mu ẹka.

Mmanụ mẹru l’anwụkota mu fụkofuko l’ẹka,

gẹ mu zụru ẹka l’iwhe l’egudeje agụha mgbo ono.

⁶Mu bya agụhaaru onye mu yeru obu ono ụzo,

ọle mu bya l’agụha-deshiwa iya, ọ dakọbewaa tụgburu.

Atụgburu iya ono meru, meji tọfu mu.

Mu chọo ya eli chọo ya alị, mu ta awhụ iya.

Mu kua ya eli kua ya alị, mu te ekuvu iya.

⁷Ndu nọ lẹ nche l’abalị ono

bẹ whụru mu nteke whẹ l’ejewhe l’ọma mkpụkpu,

whẹ gude mu chia mu whukuwhuku,

jeye ẹhu mu bụkotaru ọnya.

Ndu nche ono l’eche mgbodo mkpụkpu ono

bẹ guderu mu yeta mu uwe mu.

⁸Unubẹ ụnwada Jerúsalẹmu,

mu l’aryọ unu aryọ;

unu -whụa onye ono, mu yeru obu ono,

unu ezhia ya l’eghoro iya l’egbukwa mu egbugbu.

Ụnwada Jerúsalẹmu sụ:

⁹Gụbe nwanyị ọwhu ụma nkiya

kakọta nke ụnwanyi ọdo ree,

karụ anyi iwhe onye ono,

i yeru obu ono gude ka ndu ọdo,

meru g’o gude ị nọdu aryọ anyi ẹgube aryọryo ono.

Nwanyị ono sụ:

¹⁰Onye ono mu yeru obu ono

neru zhịrikiti, egbu zhịizhii.

Ụnukurunu madzụ dzukobe

bẹ yẹbedua l’agbajẹlewho iche.

¹¹Ishi iya dụ g’ọo ọkpobe

mkpọla-ododo, a nụcharu anụcha.

Ẹgbushi iya wụ-zeta awụ-zeta g’ọo nza ịnya,

ejilewho kpaaluu g’ọo egbe-nwọku.

¹²Ẹnya iya dụ g’ọo ẹnya ndo, beru l’agụga mini.

Ọo asa-nwoke neru zhịrikiti g’ọo

onye aghụru ẹhu lẹ mini-ẹra-eswi.

Ọ nọdu sachia onwiya ree.

¹³Agbagba-nchị iya whẹ ẹbo

dụlewho g’ọo ẹka e meru okporo,

dzashịa ya iwhe l’amịje iwhe l’eshi kwẹkwekwe.

Ogboromọnu iya dụ g’ọo

nkashị-iyi, l’asọshi mmanụ mẹru.

¹⁴Oshi-ẹka iya dụ g’ọo mkpọla-ododo,

a kpụru ọ dụ mgburumgburu,

gude ẹwhuru, l’eegbu zaazaa mee ya ọ dụ ugvu l’ẹnya.

Ẹhu iya l’akwọ mụrumuru g’ọo

ọkpu-enyi, e hucharu ehucha,

gude ẹwhuru vu oke aswa,

bụ safaya mee ọ dụ ugvu l’ẹnya.

¹⁵Oshi-ọkpa iya kfụru gborokoto

g’ọo itso, e gude ẹwhuru egbe mee,

mbụ ọwhu a kfụberu l’eli ntọlali mkpọla-ododo.

Ụgbugba ẹhu iya kpụru rọgbodongu

g’ọo ugvu ugvu Libanọnu;

bya ama g’ọo oshi sida, dụ iya nụ.

¹⁶Olu okfu iya l’anọje atsọ g’ọo mmanụ-ẹnwu.

Ọo lẹwho l’ọodu oole ẹnya shi l’ishi rwua l’ọbochi-ọkpa iya.

Unubẹ ụnwada Jerúsalẹmu,

ọ kwa ẹgube ono bụ g’onye ono mu yeru obu gbarụ,

mbụ ọnya mu ono.

Ụnwada Jerúsalẹmu sụ:

¹?Ọo awe bẹ onye, ono i yeru obu ọbu jeru,

gụbe nwanyị, kagezhia ọma ụma l’iwhe bụ ụnwanyi?

?Ọo ụzo awe b’o cheberu,

nke ọwhu anyi l’a-chọ-bude ghu iya?

Nwanyị ono sụ:

²Onye ono mu yeru obu jeru lẹ mgbabu iya,

mbụ l’ẹka ọ dzashịru iwhe l’eshije mkpọ.

O jeru oche atụru iya lẹ mgbabu ono,

mẹe tẹ ya mekoo igu nkashị-iyi.

³Mu bụ nke onye ono mu yeru obu,

Onye ono mu yeru obu bụru nkemu.

Ooche atụru iya l’ẹka nkashị-iyi dụ.

Nwoke ono sụ:

⁴Gụbe onye dụ mu l’obu, ịima ụma g’ọo mkpụkpu Tiza;

mbụ l’ị dụ ugvu l’ẹnya g’ọo Jerúsalẹmu.

Ị dụ egvu g’ọo ndu ojọgu, pa ẹkwa-ọgu whẹ.

⁵Byiko wofu ẹnya ghu l’ẹka mu nọ,

nkele oomeje ẹhu anashịhu mu.

Ẹgbushi dụ ghu l’ishi l’eji g’ọo ẹka eghu dzeberu

awụ-zeta l’ugvu Giledu.

⁶Eze ghu l’acha pelepele g’ọo ẹka igwe atụru,

shi l’ẹka a shachashịru whẹ ẹhu awụfuta.

Whẹ chị-geeru ụnwu ẹbo-ẹbo.

Ọ tọ dụdu m’ọo nnanụ gba ẹka nwa.

⁷Agbagba-nchị ghu ono, i whuchiru ẹkwa ono

dụlewho g’ọo akpụru itorokuma, e gbujahuru ẹbo.

⁸Unyomu eze bẹ dụ ụkporo ugbo ẹto,

ụnwanyi ọwhu, l’ọoto ọlua l’ọkpoku nwanyị

dụ ụkporo ugbo ẹno,

ọwhube ụnwumgboko bụru agụta agụta.

⁹Obenu lẹ gụbe ndo mu,

gụbe onye nkemu ono, l’ete enwee ẹgbazhi,

ị gbarụ iche, bya atụba ne ghu l’ẹnya,

onye ọrwu l’ẹte adụa l’ẹhu l’ẹnya ne, nwụru iya nụ.

Ụnwumgboko whụru iya, whẹ kua ya onye ẹhu-ụtso dụ.

Ndu bụ eze-nwanyị mẹe ụnwanyi l’ẹte alụa l’ọkpoku nwanyị

jakwarụ iya whọ ajaja.

¹⁰?Oo onye dụ g’ọo iwhoro chi-asahụ ono?

?Oo onye l’enwu ẹnya demudemu g’ọo ọnwa ono?

?Oo onye l’eke zhịizhii g’ọo ẹnyanwu ono?

?Oo onye dụ biribiri g’ọo ndu ojọgu, chị ẹkwa-ọgu ono?

¹¹Mu jeru lẹ mgbabu ẹka, a dzashịru oshi ọmi

tẹ mu je agbawhe iwhe l’eyeshi

mmebyi nke ọ̀whúú lẹ nsụda ono,

mu amawarụro oshi vayịnu l’emeshiwaa nzịrizaa,

marụ itorokuma l’atụwaa igu.

¹²Iwhe ono bya l’edo mu ẹnya,

égò mu gbẹe nọduwanu l’ụgbo-ịnya onye eze ono,

ndibe mu gude dulataru mu nwamgbọko mu ono.

¹³Dawhu azụ! Dawhu azụ, gụbe nwanyị Shulamu!

Dawhu azụ! Dawhu azụ t’anyi leeda ghu ẹnya!

?Ọo gụnu meru iwhe unu l’ele

nwanyị Shulamu whoriwhori ono

g’ọo onye, l’ele gẹ ndu Mahanayimu l’eme l’ẹka whẹ l’ete egvu?

¹Ada eze, iwhe akpọkpa, i yeru

l’ọkpa kwekwanuru ghu l’ọo ekwekwe.

Nkwo ọkpa ghu l’ama g’ọo aka vuu oke ọnu aswa

Mbụ g’ọo aka onye marụ ome nka meru.

²Mkpurotubo ghu wekoleruwho mgburumgburu g’ọo mbo,

mbụ mbo, mmẹe vayịnu l’ẹte agvụje agvụgvu.

Ẹwho ghu dụlewho g’ọo witi, a kụberu o nyiru g’ọo ikpo,

bya edowhee ya nkashị-iyi, l’ama ụma mgburumgburu.

³Ẹra ghu whẹ labọ dụlewho g’ọo ụnwu umoro labọ.

Mbụ g’ọo ụnwu umoro, a chịru ẹbo.

⁴Olu ghu tụchiru ogologo g’ọo ụlo-eli, e meru l’ọkpu-enyi.

Ẹnya ghu doru rịsaa g’ọo okpuru mkpụkpu Hẹshibonu,

mbụ ono, dụkube ọnuzo Batu-rabimu.

Imi tụpyiru ghu g’ọo ụlo-eli Libanọnu,

mbụ ụlo-eli ono cheru iwhu lẹ mkpụkpu Damásukọsu.

⁵Ishi ghu meru l’ịima g’ọo ugvu Kamẹlu.

Ẹgbushi dụ ghu l’ishi l’eke ododo.

Iwhe eze l’eje rwụhuru ẹka l’oole ẹgbushi ghu

g’a swịngashiru iya l’ọoma ntụmatu.

⁶Lewaro gẹ gụbe onye dụ mu

l’obu dụ-be ugvu, bya adụ mma.

Ị bụ nwamgbọko, dụ mma oole ẹnya!

⁷L’ụgbugba ghu b’ị kfụru gbarara g’ọo akparakpa.

Ẹra ghu jọkfu-geeru ajọkfuru.

⁸Mu sụru agha:

“Mu l’e-nyihu eli akparakpa ono je enwota iya ẹkfu.”

T’ẹra ghu jọkfukwaru g’ọo akpụru vayịnu.

Tẹ mkpọ ume dụkwa kwẹkwekwe mkpọ nkfụ-ẹru.

⁹T’ọnu ghu tsọkwa g’ọo akụru mmẹe l’ẹte agwaa mini.

Nwanyị ono sụ:

T’ọ bụbukwaaru onye ono, mu yeru obu l’a-ngụ mmẹe ono.

T’ọ tọlewho nwẹhu sọru sọba

mịa mu ụgbonu yẹle eze pyọmu pyọmu.

¹⁰Ọ kwa onye ono mu yeru obu ono bẹ mu bụ nkiya.

Mu bụkwaruwho onye l’anọje agụ iya ẹgu.

¹¹Byanụ gụbe onye ono, mu yeru obu t’anyi je l’ime obodo.

T’anyi je aradụ l’uwhu-mba.

¹²T’anyi nmaa ẹwa l’ụtsu jeeda lẹ mgbabu vayịnu,

je amarụ oshi vayịnu ọ tụwaru igu.

Mbụ t’anyi maadarụ mẹ igu iya jashịkotawaru.

Anyi amakwarụwho mẹ oshi

itorokuma tụshiwaru igu nkiya.

Ọo ẹka ono bẹ mu l’a-nọdu goshi ghu lẹ mu yeru ghu obu.

¹³Oshi mandureku bẹ l’eshikwa mkpọ.

Mu doberu akpụru oshi dụ-gee ugvu l’ẹnya

l’ẹka anyi l’e-wotaje iya nteke ọ gụru anyi,

Mbụ lẹ mu doberu gụbe onye ono mu yeru obu

akpụru oshi ọ̀whúú yẹle akahụ iya dụ iche iche.

¹Nggẹ l’ị bụ nwune mu nwoke,

nggẹ l’ị ngụru ẹra ne mu,

mẹ mu etsutsukwaa ghu ọnu

nteke ono mu whụru ghu l’echi-ụzo,

ọ tọ dụdu onye gẹge agbọru mu ụja.

²Mu gege edutakwa ghu dubata l’ụlo ne mu,

bụ iya bụ onye zhiru mu iwhe,

chebe ghu ọkpobe mmẹe t’ị ngụa,

mbụ mmẹe, shi l’igu itorokuma.

³Ẹka-ịcha ghu b’i gege eworu ye mu l’olu,

bya egude ẹka-ụtara ghu rụkota mu.

⁴Unubẹ ụnwada Jerúsalẹmu,

mu l’aryọ unu aryọ t’unu kweta mu ụkwa

l’unu ta akpatsudu n-yemobu jeye nteke l’ọo-bya l’onwiya.

Ndiwhe sụ:

⁵?Oo onye bẹ shi l’echi-ẹgu eje abya ẹgube whọ,

yẹle onye o yeru obu gbarụ ẹka?

Nwanyị ono sụ:

Ọ kwa l’ukfu ụdara b’ị zẹe, mu bya akutsuta ghu.

Ọo l’ẹka ono bẹ ne ghu tsụtaru ime ghu.

Mbụ l’ọo l’ẹka ono bẹ ime watarụ iya ememe ọ nwụa ghu.

⁶Mee mu iwhe ọhubama dobe onwoghu l’obu,

mee mu rọo iwhe ọhubama gbarụ l’ẹka.

Nkele n-yemobu bẹ ọkpehu dụkwa g’ọo anwụhu.

Okoowhoo dụ iya nụ dụkwa

g’ọo ilu l’ẹte aryọ-butaje aryọ-buta,

Ọonoje enwu tawhutawhu g’ọo ire ọku.

Ọonoje enwu g’ọo ire-ọku l’ere whuruwhuru.

⁷Eze mini ta adụkwa ike anmanyị n-yemobu.

Ọchi-ọku minu ta asụ iya ekpota.

Ọ -bụru lẹ madzụ gude iwhe lile o nweru g’ọ ha

eme tẹ ya zụa n-yemobu,

bụkwa ewenu bẹ l’ọoja onwiya.

Unwune nwanyị ono sụ:

⁸Anyi nwekwaru nwune nwanyị,

Ọle ẹra ta adụdua ya l’obu.

?Ọo gụnu bẹ anyi l’e-meru nwune anyi ono

mbọku nwoke l’a-kpa ishi iya?

⁹Ọ -bụ l’o shihuru ike g’ọo mgbodo,

mẹ anyi akwaa ya mkpọla-ọcha nkwatankwa l’ẹhu.

Nteke bụkwanu l’o gheru ọnu g’ọo ọnuzo,

anyi egude ụgbo oshi sida gụ-chia ya agụ-chi.

Nwanyị ono sụ:

¹⁰Mu shihuru ike g’ọo mgbodo.

Ẹra mu tụko kfụru tẹterete g’ọo ụlo-eli.

Onye mu yeru obu bẹ maakwarụ

lẹ mu l’iya -nọdu bẹ ẹhu l’adụje iya guu.

¹¹Sólomọnu nweru mgbabu vayịnu lẹ Bálu-hamọnu,

bya eworu iya ye l’ẹka ndu l’a-nọ akfụ iya ụgwo.

Iwhe ndu ono l’ẹhu l’ẹhu l’e-wotajeru iya l’aswa

akpụru vayịnu ono bụ

mkpọla-ọcha, dụ ụnu shẹkelu

ugbo labọ l’ụkporo shẹkelu iri.

¹²Ọle mgbabu vayịnu nkemu bụ mu nwe iya l’ẹka mu.

Ọ bụru ẹgube ọ dụ mu ree bẹ mu l’e-me iya.

Gụbe Sólomọnu, ọ kwa gụbedua

l’e-nweru ụnu shẹkelu mkpọla-ọcha ugbo labọ

l’ụkporo shẹkelu iri l’iwhe e retaru lẹ vayịnu ono.

Mkpọla-ọcha, dụ ụkporo shẹkelu ugbo iri abụru nke ndu

l’eletaje akpụru vayịnu ono ẹnya.

Nwoke ono sụ:

¹³Gụbe onye ono, bu lẹ mgbabu ono,

ọnya mu whẹ bẹ ngabẹkwaru nchị tẹ whẹ nụa olu ghu.

Tẹ mu nụada olu-okfu ghu ọbu.

Nwanyị ono sụ:

¹⁴Byiko gụbe onye mu yeru obu

kfụkwaa karagidingu karagidingu byakfuta mu,

ẹgube ono atsụ m’ọ bụ nwa ele nshịi l’akfụje

l’ugvu, a kụshiru iwhe l’eshi mkpọ.