Rutu

Ẹkwo

RUTU

Nawomi yẹle Rutu

¹Nteke ndu ọgbo-ikpe shi achị ndu Ízurẹlu bẹ mkpẹgu byarụ l’alị ono. Nteke ono b’o nweru nwoke lanụ, bụ onye mkpụkpu Bẹ́tulehemu, dụ l’alị ndu Juda. Nwoke ono duta nyee ya mẹe ụnwegirima iya unwoke labọ, whẹ lashia alị ndu Moabu je abụru mbyambya. ²Ẹwha nwoke ono bụ Elimẹleku, ẹwha nyee ya bụru Nawomi, ẹwha ụnwegirima iya unwoke labọ ono bụru Mahụlonu yẹle Kiliyọnu. Whẹ bụ ẹpa Ifurata, shi lẹ mkpụkpu Bẹ́tulehemu nke alị Juda. Whẹ tụgburu lashia alị ndu Moabu je eburu l’ẹka ono.

³A nọtanyaa, Elimẹleku, bụ ji Nawomi bya anwụhu, haa nwanyị ono yẹle ụnwegirima iya unwoke labọ ono. ⁴Ụnwegirima unwoke labọ ono bya alụkota ụnwanyi ndu Moabu. Nyee onye lanụ l’aza Ọpa, nyee onye ọwhua l’aza Rutu. Obe iwhe rwuru awha iri, whẹ bu l’ẹka ono, ⁵Mahụlonu yẹle Kiliyọnu bya anwụshihu. Nawomi gbarụ ẹka nkele ụnwegirima iya unwoke labọ ono nwụshihuru, ji iya nwụhukwawho.

⁶Ọ nọdu l’alị ndu Moabu nụa lẹ Onye-Nwe-Ọha bẹ gbatawaru ndibe whẹ, bya emewa tẹ whẹ nweru nri. Tọ dụ iya bụ, Nawomi duta unyomu ụnwu iya, whẹ gbalihu l’alị ndu Moabu tụgbua, ọ bụru whẹ alala. ⁷Ọ palihu l’ẹka ono, o shi buru, duta unyomu ụnwu iya ono whẹ labọ tụgburu echi-ụzo, whẹ l’e-shi larwua alị ndu Juda.

⁸O noo ya, Nawomi bya asụ unyomu ụnwu iya ono whẹ labọ: “Unu dawhu azụ tụgbua lakfu ne unu l’ẹhu l’ẹhu. Tẹ Onye-Nwe-Ọha meeru unu iwhe-ọma ẹgube ono, unu meru iya ndu ọwhu nwụhuwaru anwụhu mẹe mbẹdua. ⁹Tẹ Onye-Nwe-Ọha dobekwa unu l’ẹka meji l’a-nmakfuru unu anmakfuru l’ibe nwoke ọdo, unu l’a-lụ l’ẹhu l’ẹhu.”

Nawomi tsutsua whẹ ọnu. Whẹ chikpoo ẹkwa ¹⁰sụ iya: “Wawa, anyi l’e-tso ghu lakfushia ndibe unu.”

¹¹Obenu lẹ Nawomi sụru whẹ: “Ụnwu mu, unu dawhu rọ azụ. ?Unu l’a-bya etsoru mu lẹbe ọbu lẹ mu l’a-nwụtakwadu unwoke ọdo tẹ whẹ fụta bụru ji unu? ¹²Ụnwu mu, unu dawhu azụ lashia ibe unu, o noo nkele nka mu ghatawarụ gẹ mu l’alụta ji ọdo. Ọ -bụru tẹ mu bya asụ lẹ mu levuru ẹnya lẹ mu l’a-lụta ji l’ẹnyashi-a bya anwụshia unwoke, ¹³?unu l’a-nọdulewho jeye tẹ whẹ vushia? ?Unu l’a-nọdu-zhiawho l’unu l’angarụ whẹ, haa ọolu ji? Waawa ụnwu mu. Ọ kakwa mu atsụtsu karụ unubẹdua nkele Onye-Nwe-Ọha bẹ ngụfuwaru ẹka iya daa mu l’ẹhu.”

¹⁴Whẹ chikpoo ẹkwa ọdo. Ọpa tsutsua nniko iya ọnu sụ iya t’ọ tọkwehu. Obenu lẹ Rutu bẹ gbakụshiru nniko iya ono, bụ Nawomi ẹka ike.

¹⁵Nawomi sụ iya: “Lekwa nyee nwune ji ghu gẹ l’ọolakfuwaa ndibe whẹ, alakfuwaa agwa whẹ. Tsokwaru iya lashia.”

¹⁶Obenu lẹ Rutu bẹ yeru iya ọnu sụ: “Ba aryọshi mu aryọ tẹ mu haa ghu, m’ọkwanu tẹ mu haa ghu etsotso dawhu azụ lashia ibe anyi. Ọo ẹka i cheberu bẹ mu l’e-chebe, ọ bụru ẹka i jeberu buru bẹ mu l’e-buru. Ndibe unu l’a-bụru ndibe mu, Chileke ghu abụru Chileke nkemu. ¹⁷Ẹka ị nwụhuru bẹ mu l’a-nwụhu, ọ bụru ẹka ọbu bẹ l’ee-li mu. Tẹ Onye-Nwe-Ọha nụa mu awhụ, mbụ mee mu ọ-ka-njọ m’ọ dụ iwhe ọdo, kewafuru mu lẹ ghu gbahaa anwụhu!” ¹⁸Nawomi bya awhụ lẹ Rutu bẹ kfuwaru iya kepya ya akụ lẹ ya l’e-tso iya ala, ọ ha ya, t’ọ dụhe iwhe ọdo o kfuru iya.

¹⁹Ọo ya bụ, whẹ labọ kwasẹru jeye whẹ jerwua Bẹ́tulehemu. Nteke whẹ batarụ lẹ Bẹ́tulehemu, mkpụkpu ono l’owhu whụhu ẹwhu l’iswi ẹhu whẹ. Ụnwanyi l’ebukaa mkpu asụje: “?Ị sụ l’ọo Nawomi bẹ dụ ẹgube-ẹ?”

²⁰Ọ sụ whẹ: “Ndu mu, unu haa mu oku Nawomi. Unu kujechia mu ‘Mara’ nkele Ọkalibe-Kakọta-Ike bẹ mewaru ndzụ mu, ọ bụru nwọtso-ilu. ²¹Nteke mu l’atụgburu bẹ ẹka jiru mu eji, ọle Onye-Nwe-Ọha bẹ gbabẹwaru mu ẹka duwhu mu azụ. ?Unu l’e-shi agha eku mu Nawomi l’ẹka Onye-Nwe-Ọha nụwaru mu chịikfuu? Mbụ lẹ Ọkalibe-Kakọta-Ike bẹ wokfutaru mu ejo ụdudu.”

²²O noo ya bụ lẹ Nawomi eshi l’alị ndu Moabu lwata. Yẹle Rutu, bụ nyee nwa iya, mbụ nwanyị Moabu bẹ lị lwa. Nteke whẹ lwarwutaru Bẹ́tulehemu bụ g’a watawaru obu balị.

Rutu yẹle Bóazu l’edzuda

¹O noo ya, Nawomi bẹ nweru nwoke lanụ bụ onye abụbu ji iya Elimẹleku, mbụ onye yẹle Elimẹleku bụ ẹnya-uwhu lanụ. Nwoke ọbu nweru iwhe shii, bụru oke amadụ. Ẹwha iya bụ Bóazu.

²O rwua ujiku lanụ, Rutu, nwanyị Moabu sụ Nawomi: “Hanụa tẹ mu jee l’ẹgu ẹka a kpatawaru iwhe je akpaa akpa. Mbụ tẹ mu marụ, o nweru onye l’e-kwe haa mu tẹ mu kpaa mkpakwa balị l’ẹgu iya.”

Nawomi sụ iya: “Ada mu, jeshia.” ³Ọ bya atụgburu jeshia ọkpa akpa l’ẹgu, l’ootso ndu l’emeta iwhe e meberu l’alị ono l’azụ l’azụ akpa mkpakwa iya. Ọ dafụta l’ọo l’ẹgu nke Bóazu, bụ onye ẹnya-uwhu Elimẹleku b’o jeru.

⁴Ọ bụleruwho nteke ono bẹ Bóazu shi lẹ Bẹ́tulehemu bụru whẹrekete. Ọ bya ekele ndu ono, l’emeta iwhe e meberu l’alị ono sụ whẹ: “Tẹ Onye-Nwe-Ọha swiru unu ọkpobe eswiru!”

Whẹ sụ iya: “Tẹ Onye-Nwe-Ọha gọoru ghu ọnu-ọma.”

⁵Tọ dụ iya bụ, Bóazu bya ajịa onye l’ejeru iya ozhi, bụkwa iya whọ bụ onye ishi ndu ono, l’emeta iwhe e meberu l’alị ono sụ iya: “?Ọo nwamgbọko ibe onye bẹ dụ ẹgube whọ?”

⁶Onye ozhi iya ono bụ iya bụ onye ishi ndu ono, l’emeta iwhe ono, e meberu l’alị ono sụ iya: “Ọo nwamgbọko, shi Moabu, onye yẹle Nawomi lị shi l’alị ndu Moabu lwa. ⁷Ọ byarụ bya asụ: ‘Byiko, hanụa tẹ mu tsoje ndu-a, l’ebu balị-a l’azụ l’azụ akpa mkpakwa iya, ekpoko ndu ọwhu rishihuru erishihu l’ime iya ndu ọwhu e sweshiru esweshi.’ Ọ kwa iya bụ l’ọ bya. Eshi ụtsu, ọ byarụ bẹ l’ooto sefudua ẹka esefu l’ọrwu byeye ntaa. T’a gụfu-zhiawho nwume, ọ tụtaru nwanshị lẹ nwụlo-ẹgu.”

Rutu l’atụba Bóazu l’ẹnya

⁸Bóazu bya asụ Rutu: “Ada mu, gebe nchị: Be ejekwa l’iije mkpakwa balị l’ẹgu onye ọdo, gụ eje alụfukwa alụfu l’ẹka-a. Nọpyabelekwawho l’ẹka-a, gụ akpakụbeje ụnwumgboko, l’ejeru mu ozhi. ⁹T’ẹnya ghu tsụlekwaruwho l’ẹka whẹ l’ebu balị ono. Gụ etso ụnwumgboko ono l’azụ l’azụ. Mu kfuakwaru unwokorọbya-a tẹ whẹ ba anọnyakwaa chọo ghu okfu. Nteke ẹgu mini gụtaru ghu, gụ eje je angụta iya l’ite ono, unwokorọbya ono, sejishiru mini sụbe.”

¹⁰O noo ya, Rutu daa kpube iwhu l’alị sụ iya: “?Ndẹ-zhia gẹ mu meru tụba-kebe ghu l’ẹnya ẹgube ọwa, nke anyata mu, lẹ mụbe onye ọha ọdo?” ¹¹Bóazu sụ iya: “A kọkotakwaru mu iwhe lile, i shi metaru nniko ghu nkele ji ghu nwụhuru mẹe lẹ g’i gude haa nna ghu yẹle ne ghu mẹe alị ẹka a nwụru ghu anwụ lwakfutashia ndu l’ịitii mahawaa. ¹²Tẹ Onye-Nwe-Ọha bua ghu obunggo iwhe ono, i meru. Tẹ Onye-Nwe-Ọha, bụ Chileke nke Ízurẹlu, mbụ onye ono, ị gbabaru lẹ mkpula akwẹka iya bya anọdu ezeru ndzụ kfụa ghu ụgwo iya kfụ-dzua ghu iya akfụ-dzu!”

¹³Rutu bya asụ: “Onye-nwe-mu nụ, tẹ mu tụbalekwa ghu whọ l’ẹnya ẹgube ono, mu tụbaru ghu iya jeyewaro. O noo nkele ị dụwaru mu obu, bya ekfuwaru okfu njima nụ mụbe nwozhi ghu nwanyị, l’ẹka mu l’ẹte adụkwa nụ g’ọo ẹka ụnwumgboko, l’ejeru ghu ozhi dzọru ọkpa m’ọo onye lanụ.”

¹⁴Ọ bya agbabe l’ori nri, Bóazu sụ iya: “Kpịlitaru ẹka bya eria nri. Narụ buredi tsutaje lẹ mmẹe taa.” Ọo ya bụ, o je anọkube ndu ono, l’ebu balị ono. Bóazu wezhiaru iya balị, a hụru ahụ, ọ tata ike iya jeye ẹwho ji iya, uwhudu whudukwaduro. ¹⁵O megee bya agbalihu tẹ ya je akpakwaa mkpakwa balị, l’ọokpakwa; Bóazu kfuru unwokorọbya iya sụ: “Unu hakwaa ya t’ọ kpatajẹ balị ono l’ẹka ọ whọru ishi, t’unu ba agbọkwa iya mgbọjo. ¹⁶Iwhe unu l’e-mechia bụ t’unu harụ jịshiaru iya ọwhu unu swewaru esweswe t’o kpokoo. Unu ba abakwarụ iya mba.”

¹⁷Ọo ya bụ, Rutu nọdu l’ẹgu akpakwazhiawho mkpakwa balị ono jeye urwẹnyashi bya. Ọ bya echishia akpụru balị ono, ọwhu ọ kpakwataru, o ji efere nkwẹka. ¹⁸O vulia ya, ọ bụru iya ọbahu l’ime mkpụkpu. Ọ larwua bya egoshi nniko iya gẹ ọwhu ọ kpatarụ habe. Ọ bya ewofutakwawho nri whọ, o ritaru riwhodo eriwhodo woru nụ nniko iya ono. ¹⁹Nniko iya ono sụ iya: “?Ọo awe b’i jeru mkpakwa ntanụ? ?Ọo awe b’i jeru ọkpa akpa ọwa? T’onye ọwhu natarụ ghu ẹgube ọwa bụkwaru onye a gọru ọnu-ọma nụ!”

Tọ dụ iya bụ, Rutu bya akọoru nniko iya ono nke onye ya nọdu kpaa mkpakwa akpụru balị ono sụ iya: “Ẹwha onye mu jeru l’ẹgu iya ntanụ bụ Bóazu.”

²⁰Nawomi sụ nyee nwa iya ono: “Tẹ Onye-Nwe-Ọha gọoru onye ọbu ọnu-ọma! Mbụ Onye-Nwe-Ọha, bụ onye l’ẹte egoshibuhuje ndu nọ ndzụ mẹe ndu nwụhuwaru anwụhu lẹ ya yeru whẹ obu. Nwoke ono bẹ anyi l’iya bụkwa abụbu, o tsokwa lẹ ndu anyi lẹ whẹ bụ ọkpobe abụbu.”

²¹Rutu, nwanyị ono, shi Moabu sụ iya: “Iwhe ọdo, o kfufuaru mu bụ tẹ mu kụje ndu l’ejeru iya ozhi ẹhu jeye nteke whẹ l’e-buge balị iya ọbu.”

²²Nawomi sụ nyee nwa iya ono, bụ Rutu: “Ada mu; ọ kakwarụ ghu mma, t’i tsoje ụnwumgboko, l’ejeru iya ozhi nkele i -jee l’ẹgu onye ọdo bẹ l’aa-chọ ghu okfu.”

²³Tọ dụ iya bụ, Rutu wata ọku ụnwumgboko ono, l’ejeru Bóazu ozhi ẹhu, o tsoru whẹ akpa mkpakwa balị jeye e bugee balị mẹe witi. Rutu yẹle nniko iya ono buru gẹ whẹ bu.

Rutu jekfuru Bóazu l’ẹka l’eechishi balị

¹O be ujiku lanụ, Nawomi, bụ nniko Rutu sụ iya: “Ada mu, mu byakwa l’eleru ghu ẹnya ji, l’a-lụ ghu nụ, bụ onye l’e-me t’obu rwua ghu alị, bụru onye l’e-leta ghu ẹnya. ²Ntaa b’o dowaru ghu ẹnya lẹ Bóazu bẹ anyi l’iya bụ ọkpobe abụbu, mbụ onye ono, gụ l’ụnwumgboko, l’ejeru iya ozhi shi tsoru achịko balị iya. L’ẹnyashi ntanụ bẹ l’ọo-nọ awhụchashi mkpaba lẹ balị iya l’ẹka ono, l’aanọje echishi balị. ³Iwhe l’ii-me bụ t’i je aghụa ẹhu, gụ ehua mmanụ-mbeleke, chịta uwe ghu ọwhu kagezhia ree yee, tụgburu jeshia ẹka ono, l’eechishije balị ono. Ọle be emekwa t’ọ marụ l’ị nọ l’ẹka ono jeye ya erigezhia nri, bya ngụa iwhe-angụngu. ⁴Lezhita ẹnya ree marụ ẹka ọ zẹe azẹe. Nteke o kuleruwho mgbẹnya, gụ atụgbua je awhụliberu iya iwhe l’ụzo ọkpa zẹkube iya. Ọo-karu ghu-a iwhe l’ii-me.”

⁵Rutu sụ iya: “Iwhe lile, ị sụru tẹ mu mee bẹ mu l’e-mekotagezhia g’ọ ha.” ⁶Ọo ya bụ, ọ tụgburu jeshia ẹka ono, l’eechishije balị ono je emekota iwhe ono, nniko iya sụru iya t’o mee g’ọ ha.

⁷Nteke Bóazu rigeeru nri, bya ngụa iwhe-angụngu bẹ ẹhu kpẹneshihuru iya, ọ tụgbua je azẹ-zhita l’iku ẹka ono, a kụberu balị. Rutu tọ nwẹhu pyaa apyapya je awhụliberu iya iwhe l’ụzo ọkpa zẹkube iya. ⁸O rwua lẹ nderi, Bóazu lubirihu, ghaa aghagha, bya awhụ lẹ nwanyị zẹe ya l’ụzo ọkpa.

⁹Ọ jịa sụ: “?Ị bụ onye?”

Ọ sụ: “Ọo mu bụ Rutu, nwanyị l’ejeru ghu ozhi, lụpyabenu mụbe onye ozhi ghu nkele ị bụ abụbu anyi, gbarụ t’o leta anyi ẹnya.”

¹⁰Ọ sụ iya: “Tẹ Onye-Nwe-Ọha gọoru ghu ọnu-ọma, ada mu. Ree ọwa kakwa ọwhu i vuhawaa ụzo mee shii nkele ị tị kpadụ ishi t’i whetsoru unwokoro nweru iwhe mẹe unwokoro darụ ụkpa. ¹¹Ada mu; ba atsụshi egvu, mu l’e-mekotaru ghu iwhe ị sụru tẹ mu meeru ghu nkele ndu mkpụkpu anyi l’owhu makọtawaru l’ị bụ nwanyị, umere iya dụ ree. ¹²Ọo ezhi-okfu b’i kfuru lẹ mu l’unu bụ ọkpobe abụbu. Obenu l’o nweru abụbu ọdo, unu l’iya ka abụlitaru karụ mbẹdua. ¹³Nọdu l’ẹka-a l’ẹnyashi-a t’a fụta ụtsu, tẹ mu marụ, ọ -bụru l’ọ bụ obu onye ono t’o meeru ghu iwhe gbarụ tẹ abụbu madzụ meeru iya, b’ọ dụkwa ree t’o mee ya. Nteke bụ l’ọ tọ chọdu tẹ ya meeru ghu iwhe gbarụ tẹ abụbu madzụ meeru iya, ọo ya bụ, lẹ Onye-Nwe-Ọha vuru-a ishi iya g’o vu iya, bẹ mu l’e-meru ghu iya. Zẹe nwandoo t’a fụta ụtsu.”

¹⁴O noo ya, Rutu zẹe ya l’ụzo ọkpa jeye a fụta l’ụtsu. Chi tẹke asahụ-ree nteke madzụ l’a-whụ ibe iya hụbe iya ama, Rutu gbalihu. O noo nkele Bóazu bẹ kfuru iya sụ t’o bo mekwa tẹ madzụ marụ lẹ nwanyị byarụ ẹka ono l’eechishije akpụru balị.

¹⁵Bóazu bya asụ iya: “Tọfuta ẹkwa ono, i gude whụ-kpua onwoghu ono tụsaa ya atụsa.” Ọ bya atụsaa ya, Bóazu gude iwhe l’atụje balị tụta iya ishii yeru iya l’ẹkwa ono; kekobe iya bo iya. Ọ tụgbua bahụ l’ime mkpụkpu.

¹⁶Nteke Rutu lakfuru nniko iya, bụ Nawomi, ọ jịa ya sụ: “Ada mu, ?ndẹe g’i jezhiaru iya?” Tọ dụ iya bụ, Rutu bya akọkotaru iya iwhe nwoke ono meru iya g’ọ ha, ¹⁷sụkwa iya whọ, l’o gude iwhe tụta balị-a ugbo ishii nụ iya sụ tẹ ya ba agbashi ẹka lakfu nniko iya.

¹⁸Nawomi bya asụ iya: “Takwaa nshi ada mu, t’ị marụ iwhe l’e-bekochaa mee nkele Bóazu ta abyadụ l’a-nmakfuru anmakfuru jeye ya awhụ ishi iya ntanụ.”

Bóazu lụru Rutu

¹O noo ya, Bóazu bya atụgburu jeshia ọnu-abata mkpụkpu ono je anọ-zeta l’ẹka ono. Ọ bya l’eledeshia ẹnya, abụbu abụlitaru whẹ ono, o kfujeru Rutu okfu iya l’ejewa abya. Ọo ya bụ, Bóazu kua ya oku sụ iya: “Ọnya mu bya bya anọdu anọdu l’ẹka-a.” Ọo ya bụ, ọ tụgburu jekfushia ya je anọ-zeta.

²Bóazu bya ekua unwoke iri, bụ ndu bụ ọgurenya mkpụkpu ono sụ whẹ: “Unu bya anọdu anọdu l’ẹka.” Whẹ bya anọdu. ³Tọ dụ iya bụ, ọ sụ abụbu whẹ ono: “?Ọ kwa l’ị marụ Nawomi, bụ onye ono shi alị ndu Moabu lwa? Ọobyakwa tẹ ya ree alị abụbu anyi Elimẹleku. ⁴Mu rịa l’ọ dụ ree tẹ mu mee t’ị marụ, ekfukwawho t’ị zụa alị ono. Ọ -bụru l’ị chọru alị ono, ọo ya bụ t’ị nọdu l’iwhu ndu-a, nọ l’ẹka-a mẹe l’iwhu ndu bụ ọgurenya anyi-a zụa ya. Ọ -bụru l’ọo agbata bẹ l’ịi-gbata iya, gụ agbata iya. Nteke bụ l’ị tịi gbatadu iya, gụ akarụ mu tẹ mu marụ nkele ọ tọ dụdu onye ọdo, ọ gbarụ l’agbata iya, t’a gụfu-zhiawho gụbedua; mbẹdua l’etsona ghu-a.”

Abụbu whẹ ono bya asụ: “Mu l’a-gbata iya-a.”

⁵Bóazu sụ iya: “Ọ dụ mma, ị -zụa alị ono l’ẹka Nawomi bẹ l’ịi-lụpyabekwawho Rutu, mbụ nwanyị-mbunu ono, shi Moabu nke ọwhu l’ọo-nwụta ụnwu, l’a-bya enweru alị ono t’ẹwha onye ono, nwụhuwaru be echihu.”

⁶Abụbu whẹ ono sụ: “Ọ -dụnu nno bẹ mu l’ẹte agbatadu alị ono nkele mu -gbata iya bẹ mu tseberu oke-alị mu l’ọnu ogu. Gbatachia ya gụbedua lẹ mu ta agbatadu.”

⁷Omelalị ndu Ízurẹlu l’oge ndụ-ichee shi abụje, ọ -bụru l’o nweru onye l’eme tẹ ya gbata iwhe agbata m’ọ bụ tẹ ya gbanweta iwhe agbanweta l’ẹka onye ọdo, iwhe l’eegudeje mee ya t’o shihu ike bụ l’onye ono l’eyetaje akpọkpa iya woru nụ onye ọwhua t’o gude. O noo ụzo, e shi egudeje eme t’iwhe vuru ire l’alị ndu Ízurẹlu.

⁸Ọo ya bụ, abụbu whẹ ono bya eyefuta akpọkpa iya sụ Bóazu: “Zụa ya rọ gụbedua.”

⁹Tọ dụ iya bụ, Bóazu bya asụ ndu bụ ọgurenya ono mẹe ndu nọkota l’ẹka ono sụ whẹ: “Ntanụ-a bẹ unu bụwaa ndu ẹka-ebe lẹ mu zụwaru Nawomi iwhe lile, bụ nke Elimẹleku mẹe nke Kiliyọnu mẹe nke Mahụlonu. ¹⁰O nokwawho gẹ mu lụpyaberu Rutu, bụ nwanyị-mbunu, shi Moabu, mbụ nyee Mahụlonu nke ọwhu l’oo-doberu nwoke ono, nwụhuru anwụhu ono akọ; t’ẹwha iya ba atọhu atọhu l’ọzo-ụlo ụnwunna iya mẹe lẹ mkpụkpu, a nwụru iya anwụ. Unu bụwaa ndu ẹka-ebe ntanụ-a.”

¹¹Tọ dụ iya bụ, ndu bụ ọgurenya ono mẹe ndu ono, nọkota l’ọnu ẹka ono tụko zụa mgbede sụ: “Anyi bụ ndu ẹka-ebe. Tẹ Onye-Nwe-Ọha mekwaa nwanyị ono, l’abata ibe ghu t’ọ dụ g’ọo Réchẹlu yẹle Lii, ndu bụ whẹ metakotaru ọzo-ụlo ndu Ízurẹlu. Bụkwaru onye ẹka atụtu l’alị Ifurata, gụ abụru onye a marụ ẹwha iya lẹ mkpụkpu Bẹ́tulehemu. ¹²T’ụnwegirima, Onye-Nwe-Ọha l’e-shi l’ẹka nwọgbaga-a nụ ghu mekwa t’ọzo-ụlo ghu dụ g’ọo nke Pẹ́rezu ono, Tama nwụtaru Juda.”

Eri Dévidi

¹³Ọo ya bụ, Bóazu duta Rutu, ọ bụru nyee ya. O jekfu iya azẹe, Onye-Nwe-Ọha bya emee ọ tsụta ime nwụa nwa nwoke. ¹⁴Ụnwanyi kfulahaaru Nawomi sụ: “T’ajaja bụru nke Onye-Nwe-Ọha, onye meru t’i nweru abụbu, l’e-leta ghu ẹnya. Tẹ nwata ono bụkwaru onye a hụberu ama l’alị Ízurẹlu. ¹⁵Nyee nwa ghu bẹ yeru ghu obu, bya emewaru ghu iwhe ụnwegirima unwoke ẹsaa l’ẹtege emeru ghu. Ntaa b’ọ nwụtawaru ghu nwanwa, bụ onye l’e-me t’i tsefu nwẹpa, bya abụru onye l’e-le ghu nka.”

¹⁶Tọ dụ iya bụ, Nawomi bya ekuta nwata ono tụa l’ụtakfu, ọ bụwaru iya rọ l’ehe iya. ¹⁷Ụnwanyi obutobu whẹ bya asụje: “A nwụwaru Nawomi nwa nwoke.” Whẹ gụa ya Óbẹdu. Óbẹdu ono megee bụru nna Jesi, Jesi megee bụru nna Dévidi.

¹⁸Ọ waa bụ eri Pẹ́rezu:

Pẹ́rezu bụ nna Hẹzuronu,

¹⁹Hẹzuronu bụru nna Ramu,

Ramu bụru nna Amínadabu,

²⁰Amínadabu bụru nna Nahụshonu,

Nahụshonu bụru nna Sálụmonu,

²¹Sálụmonu bụru nna Bóazu,

Bóazu bụru nna Óbẹdu,

²²Óbẹdu bụru nna Jesi,

Jesi bụru nna Dévidi.