Romu

Ẹkwo-Ozhi, Pọlu Deru Nụ Ndu

ROMU

¹Ẹkwo-ozhi-a bẹ shi l’ẹka mụbe Pọlu, onye l’ejeru Jisọsu Kuráyisutu ozhi, bụkwaruwho onye Chileke kuru tẹ mu bụru onye-ishi-ozhi ono, bụkwaruwho onye Chileke họtaru tẹ mu bya ezhia ozhi-ọma iya ono, vụwaru nụ. ²Ozhi-ọma ono bẹ bụ iwhe Chileke shihawaa l’ọnu ndu nkfuchiru nkiya kwehawaa ụkwa iya nteke tehawaruro ẹnya, tẹmenu e dehaakwa iya whọ l’ẹkwo Okfu Chileke. ³Ozhi-ọma ono bẹ bụ nke Nwa iya bụ iya bụ Onye-nwe-anyi Jisọsu Kuráyisutu. A -bya l’abụbu, Jisọsu ono bụ madzụ bụ l’a nwụru iya ọ bụru onye shi l’eri Dévidi. ⁴Chileke bẹ shi l’ike ọwhu o gude mee ya, o shi l’ọnwu teta nọdu ndzụ egoshi l’ọ bụ Nwa iya. Ọ ya bụ Jisọsu Kuráyisutu, bụ Onye-nwe-anyi. ⁵Ọo ya bẹ bụ onye Chileke shi l’ẹka iya meeru mụbe Pọlu eze-iwhe-ọma ono bụ iya bụ nke tẹ mu bụru onye-ishi-ozhi; duru ndu ọha, shikota ẹka lile lẹ mgboko-o mgburumgburu duba l’ụzo whẹ l’e-shi kweta mejee iwhe e deru l’ẹkwo Okfu Chileke nggẹ e shi nno kutsee ẹwha Kuráyisutu. ⁶Gẹ mu l’edu ndiwhe l’owhu ono, bẹ unubẹ ndu Romu lịkwa iya whọ, mbụ unubẹ ndu Chileke kuru t’unu bụru nke Jisọsu Kuráyisutu.

⁷Ọo ya bụ lẹ mu l’ede ẹkwo-ọ anụ unu g’unu hakọta lẹ Romu, mbụ unubẹ ndu Chileke yeru obu; kua unu t’unu bụru ndibe iya: Tẹ Chileke bụ Nna yẹle Onye-Nwe-Ọha, bụ Jisọsu Kuráyisutu meeru unu eze-iwhe-ọma, mekwaawho t’unu buru guu.

Pọlu l’ekfu nke ooje Romu

⁸Iwhe bụ-zhiadanu mbụ bụ lẹ mu shi Jisọsu Kuráyisutu l’ẹka ekeleru unu Chileke g’unu ha, o noo nkele e kfukotaru nke ekwekwe, unu kweru nke Chileke l’eliwhe mgburumgburu. ⁹Ọ kwa Chileke marụ lẹ mu l’anọje ekfuru iya okfu ẹhu unu eswe l’ẹnyashi mẹ mu l’ekfu anụ iya. Ọo Chileke ono bẹ mu gude obu mu g’ọ ha ejeru ozhi nke anọ ezhi ozhi-ọma nke Nwa iya ono, bu Jisọsu. ¹⁰Mu l’anọje ekfu anụ iya sụ t’o gudenu obu-ọma iya; mee tẹ mu kabẹ kpata ụzo bya agbawhee unu. ¹¹O noo l’ọogu mu agụshi mu ike tẹ mu l’unu whụ nke ọwhu mu l’e-me t’iwhe ọma ọwhu shi l’ẹka Ume-Dụ-Nsọ rwube unu ẹka. Ọo ya bụ, mu eshi l’abyabya ono, mu l’a-bya mee t’obu shihu unu ike. ¹²Mbụ lẹ-a, l’iwhe mu l’ekfu bụ l’ekwekwe, unu kweru l’e-me t’obu shihu mu ike, ekwekwe nke mu emekwaawho t’obu shihu unu ike. Ọo ya bụ anyi eshi nno yetaru onwanyị ẹka.

¹³Iwhe unu l’a-malẹwho ụnwunna mu bụ lẹ nteke nteke bẹ mu l’asụje lẹ mu l’abyawaa unu agbawhe, ọle eshi nkeshi ono byeye ntaa b’o nwekwaruwho iwhe l’akpọshije mu abyabya. Mu l’atụbeje lẹ mu l’a-bya nggẹ mu harụ ndu ụzo iya nke unu kfuta yeru Kuráyisutu gẹ mu l’ekfutakwa iya whọ l’ọhamoha ọdo, l’ẹte abụa ndu Ju. ¹⁴Mu jikwa onyemonye ụgwo ozhi ozhi-ọma ono. Mu ji iya ndu Girísu, jiru iya ndu l’abụa ndu Girísu. Mu ji iya ndu marụ ẹkwo, jikwaru iya whọ ndu l’ẹte amaa ẹkwo. ¹⁵O noo iwhe meru l’ọwho mu l’obu awhọshi mu iya ike, tẹ mu byakwawhọ bya ezhia unubẹ ndu ọwhu nọ lẹ Romu ozhi-ọma ono.

Ike ọwhu Chileke gude adzọ ndiwhe

¹⁶O noo l’iwhere ozhi-ọma ono, mu l’ezhi ono ta adụkwa mu. Ọ kwa ozhi-ọma ono bẹ bụ ike ọwhu Chileke gude adzọ iwhe bụkota ndu woru onwowhe ye Kuráyisutu l’ẹka. O gude iya vuru ụzo adzọ ndu Ju, ndu ọwhu l’ẹte abụa ndu Ju tsota whẹ. ¹⁷Nkele ọ kwa ozhi-ọma ono bẹ Chileke gude egoshi gẹ ndiwhe l’e-shi dụ chịriri l’iwhu iya. Gẹ ndiwhe l’e-shi dụ chịriri l’iwhu iya ono te enwekwa iwhe ọ bụ gbahaa eworu onwonye ye Kuráyisutu l’ẹka, kweta nkiya wata l’ishi jeye l’ikpazụ. Ọo ya bụ g’e deru iya l’ẹkwo Okfu Chileke sụ: “Onye woru onwiya ye Chileke l’ẹka, shi nno dobe onwiya chịriri l’iwhu Chileke, bẹ l’a-nọdukwa ọkpobe ndzụ.”

Ndiwhe l’owhu bẹ ikpe Chileke nmakwarụ

¹⁸Ọ bụru iya meru g’o gude Chileke shiwaa l’imigwe goshi gẹ ya l’e-gudekwanu oke-ẹhu-eghughu iya mee ndiwhe, mbụ oke-ẹhu-eghughu, l’eghu iya lẹ ndiwhe kpọru yẹbe Chileke ẹbo l’afụ, eme ejo ememe. Whẹ egude ejo ememe ono, whẹ l’eme arwụshi ọkpobe-okfu ono arwụshi. Chileke l’a-gwakwanụ whẹ ọchi. ¹⁹O noo l’iwhe bụ iwhe gbarụ madzụ nke t’ọ marụ iya lẹ nke Chileke bẹ dabukotaru ẹba l’iwhu madzụ ono, o noo l’ọo Chileke bẹ goshiru whẹ iya l’onwiya. ²⁰Eshi nkeshi nteke Chileke meru mgboko-o, bẹ madzụ shiwaa l’iwhe Chileke meshiru marụ ẹgube onye Chileke ono bụ, mbụ l’ẹte awhụdu iya l’ẹnya. A makwarụ-a l’ẹte awhụdu iya ẹnya, ọle madzụ gudewaa uche iya marweta l’ike Chileke, nyịberu anyịbe ta agvụdu agvụ, tẹmenu ọ bụru yẹbedua gẹdegede bẹ bụ Chileke. Ọo ya bụ lẹ whẹ ta agọfuhedu. ²¹Lẹ madzụ bẹ machakwarụa lẹ Chileke dụ, l’o rwuberu erwube t’a kwabẹje iya ugvu, keleje iya ekele, ọle whẹ ta akwabẹdu iya ugvu l’ọo ya bụ Chileke; whẹ te ekeleje iya ekele nke iwhe l’oomeje. Iwhe whẹ gbechia mee nụ bụ l’ego swekotaru whẹ, sweta whẹ nke ọwhu ọriri whẹ bụwaa iwhe mmaanụ. Ọ bụwaru irogiri jiru whẹ obu, tọ dụhe iwhe l’edojekwadu whẹ ẹnya, nke ọwhu obu whẹ gbawarụ nụ tsụrikiti. ²²Whẹ gude lẹ whẹ sụru lẹ whẹ marụ iwhe jeye whẹ kabaarọ ọbu ndu irogiri. ²³Whẹ wota ugvu, ẹ gẹge akwabẹ Chileke ono l’a-nọdugburu ndzụ jeyewaro, ye l’azụ balahaaru ntẹkpe ẹja, mbụ ntẹkpe, e megeeru ọ dụ g’ọo madzụ, l’ẹte adụa gẹ l’ọono-bejeru, dụ g’ọo ẹnu, l’ewhe l’eli, dụ g’ọo anụ, dụ g’ọo agwọ.

²⁴O noo iwhe meru Chileke pakwanụru whẹ haa, whẹ melahaa ejo-ememe, bụ iwhe l’agụ obu whẹ. Whẹ wata ome ejo umere l’eshi nshi. Whẹ l’ibe whẹ gudelahaa ẹhu whẹ emerwushi onwowhe. ²⁵Madzụ wata anọ abaarụ iwhe Chileke meru eme ẹja, akwabẹ iya ugvu, haa Chileke ono, bụ iya meshiru iwhe ono, mbụ onye bụ iya b’o rwuberu t’anyi tuje ẹwha jeye lẹ tututu-mịmimi. O noo g’ọ dụ. Ọo ya bụ lẹ madzụ woru iwhe bụ ọkpobe-okfu nke Chileke ye l’azụ kweta iwhe bụ ejire.

²⁶O noo iwhe meru Chileke parụ madzụ haa whẹ l’eebu mbukerebu, eme iwhe dụ oyi-oyi. Mbụ nke t’ụnwanyi whẹ hajẹe anọ ejekfu unwoke, bụ iwhe Chileke keru whẹ keturu, jekfulahaa ụnwanyi ibe whẹ. ²⁷O nokwawho gẹ ọwhube unwoke whẹ harụ anọ ejekfu ụnwanyi, bụ iwhe gbarụ whẹ nụ, ẹgu tẹ whẹ jekfu unwoke ibe whẹ l’aanọje enwu whẹ whuruwhuru l’ẹhu g’ọo ọku. Nwoke yẹle nwoke ibe iya awata azẹze. Whẹ watanụ anọ eri urwu, gbarụ ọriri whẹ ono, sweshihuru whẹ nụ ono l’ẹhu whẹ.

²⁸Eshi-ọwhu ndiwhe jịkaru lẹ whẹ ta amadụ iwhe bụ ọkpobe-okfu lẹ nke Chileke, Chileke panụru whẹ haa, whẹ l’anọje arị ọriri l’ete enwee ishi, watanụ anọ eme iwhe l’ẹte agbaa whẹ nụ. ²⁹Mbụ tọ dụ-zhia ẹgube ejo-ememe mẹe iwhe l’ẹte adụa chịriri, whẹ l’ete eme, nke ọwhu l’oobushi whẹ l’imi. Whẹ l’eebu mbukerebu, ana iwhe l’ẹte abụa nke whẹ, edoberu ibe whẹ obu mgbashị. Ẹnya-kfụrukfuru paa whẹ ẹka l’ẹhu, whẹ l’egbu ọchi, esewhe okfu, aghọ-whe ụgho, emewhe iwhe ashị, asụ-whekwawho asụlasu. ³⁰Whẹ l’ekfuru ibe whẹ okfu-azụ, bụru ndu Chileke dụ ashị, ndu l’egudeje obu-ọku eme ibe whẹ iwhe iwhere, bụru ndu l’evu ishi lẹ mkpokfu mẹe ndu l’etse etsetse. Iwhe whẹ l’anọje arị bụleruwho gẹ whẹ l’e-me mee ejo-iwhe, whẹ te ekweje ome iwhe ne lẹ nna whẹ kfuru whẹ. ³¹Whẹ bụ ndu l’ewotaje iwhe dụ ree gụbe iya ejo-iwhe, whẹ azụa sụ l’ejo-iwhe bụ iwhe dụ ree, ya eje adụkwanu iwhe whẹ kwetaru ụkwa lẹ whẹ l’eme ọwhu whẹ l’eleje nvọ. Whẹ te enwedu obu-ọma l’ẹka ibe whẹ nọ, tọ hẹ l’ọ dụ onye whẹ l’awhụjeru imiko. ³²Whẹ bụ ndu magezhirua l’ime obu whẹ iwhe bụ uche Chileke; makwarụwho lẹ ndu l’eme ẹgube iwhe ono bẹ yẹbe Chileke l’a-nma ikpe ọnwu, bụ iwhe rwuberu whẹ nụ. Whẹ machaarụ iya nno, whẹ l’emekwa iya who. Ọ tọ bụlekwaa lẹ whẹ l’eme iya l’onwowhe, whẹ l’egbejekwaa zụa nkwe lẹ ndu l’eme nno, bẹ bụ ree bẹ whẹ l’eme.

Ikpe Chileke nmarụ onyemonye

¹O noo iwhe meru mu sụ ghu l’ị ti gọfukwa gụbe onye ọwhu l’anma onye ọdo ikpe l’obu, e -behuduru, ?ị bụru onye. Ọo iwhe ono, l’iikfu l’ime obu ghu l’onye ọdo meru ẹji, sụ l’ikpe iya nmarụ iya, b’i gudekwawho ọnu ghu anma onwoghu ikpe. O noo lẹ gụbedua, l’ekpe ikpe bẹ l’emekwawho iwhe ono gẹdegede, l’ịinma onye ọdo ikpe iya. ²Ịi-sụkwa mu rọ l’iwhe anyi marụ bụ lẹ gẹ Chileke gude ekpe ikpe gude anma ndu l’eme ẹgube iwhe ono ikpe bẹ kfụru nhamụnha. ³Gụbe nwamadẹka, ?ị nọdu sụ lẹ nteke l’ịinmaje ndu l’eme ẹgube iwhe ono ikpe, gụbedua l’emekwa iya who l’ishi onwoghu, ?ị nọdu sụ gẹ l’ịi-nahụ ikpe nke Chileke? ⁴?Tọo odoo ono, parụ ẹka apaa, Chileke l’eme b’i gude akpọ ẹbo-ẹbo l’afụ? ?L’ịiri lẹ Chileke bụ onye eswe, nke l’ọobuje madzụ mee ya iwhe-dụ-ẹji, ya aparụ onye ọbu haa, tẹmenu l’ọonoje atarụ iwhe nshi shii? ?Tị madụ l’iwhe Chileke l’ekwobeje emeru ghu odoo ono bụ, l’oome t’ị daa onwoghu ụta, ghaa umere, haa ome iwhe-dụ-ẹji lwakfuta iya. ⁵Ọle ntaa b’i nweru ejo obu, kwefu ike t’odoo ono, Chileke l’eme be eme t’ị daa onwoghu ụta, ghaa umere. Ọo ya bụ l’ime t’iwhe-ọtsulanu nkeghu ka shii mbọku ikpe ono, Chileke l’e-goshi oke-ẹhu-eghughu iya, goshi gẹ ikpe nkiya dụ, bụ iya bụ ikpe ono, kfụru nhamụnha. ⁶O noo mbọku, Chileke l’e-bu onyenọnu obunggo rwuberu iwhe o meru. ⁷Ndu ọwhu tarụ nshi eme iwhe-ọma, kebeshia ẹhu ike achọ tẹ Chileke jaa whẹ ama, kwabẹ whẹ ugvu, bẹ l’ọo-nụ ndzụ tututu-mịmimi, mbụ ndu keberu ẹhu achọ ndzụ ọwhu whẹ l’ẹte anwụhubahee anwụhu. ⁸Ọle ọwhube ndu ono, bụ whẹ kwefuru ike ono, ndu l’ete eyeje ọnu yeru ọkpobe-okfu ono, ọ bụ-chiaru iwhe l’akfụaru nhamụnha bẹ whẹ gbee etso, ndu ono bẹ Chileke l’a-tụfuru oke-ẹhu-eghughu iya, parụ ẹka. ⁹Iwhe bụ ndu lile, l’emezhia iwhe bụ ejo-iwhe, bẹ ọtsu-egvu l’a-byakfuta, Chileke emee whẹ: whẹ ejee iwhe-ọtsulanu. Oo-vu ụzo dabẹ iya ndu Ju l’ẹhu, tẹmenu ya erwube ndu ọwhu l’ẹte abụa ndu Ju. ¹⁰Ọle onye ono, bụwhoo onye l’eme iwhe dụ ree bẹ Chileke l’a-ja ama, kwabẹ iya ugvu, mee ya ẹhu adụ iya guu jeye lẹ tututu-mịmimi. Oo-vu ụzo meeru iya ndu Ju; ndu ọwhu l’ẹte abụa ndu Ju etsota nteke ono. ¹¹O noo lẹ Chileke ta adụdu onye l’oole ẹnya l’iwhu.

¹²Iwhe bụ-zhia onyemonye, l’ẹte amaa iwu Mósisu, onye ono mee iwhe-dụ-ẹji bẹ Chileke l’a-nmakwa ikpe, whẹ alakwaawho l’iyi, e -behuduru whẹ ta ama iwu ono. Iwhe bụ ndu Ju lile, bụ ndu marụ iwu ono, whẹ l’eme iwhe-dụ-ẹji, bẹ Chileke l’e-gudekwawho iwu ono nma ikpe. ¹³L’ọ tọ bụkwa ndu l’anụje iwu ono bẹ bụ ndu dụ chịriri l’iwhu Chileke. Ọ kwa ndu l’eme iwhe iwu sụru t’e meje bẹ bụ ndu Chileke l’a-gụ lẹ ndu dụ chịriri. ¹⁴Lẹ nteke ọ -bụ lẹ ndu ọwhu l’ẹte abụa ndu Ju, bụ iya bụ ndu l’amaa iwu Mósisu, gbee egudeje ori-l’ichicho whẹ eme iwhe iwu sụru t’e mee, ọ kwa iya-a bụ lẹ whẹ l’egoshi lẹ whẹ marụ iwhe gbarụ whẹ l’ememe, mbụkwa e -behuduru whẹ ta ama iwu Mósisu. ¹⁵Umere whẹ l’egoshi l’iwhe iwu kfuru bẹ Chileke dewaru whẹ l’obu. Mbụ ọriri whẹ l’egoshikwa whẹ iya whọ, eshi-ọwhu ọriri whẹ l’anọje anma whẹ ikpe, l’ọohajekwaruwho aharu whẹ enge l’ugbo lanụ. ¹⁶Mbọku ono, Chileke l’e-kpe ikpe ono bẹ l’oo-shi l’ẹka Kuráyisutu Jisọsu kpee madzụ ikpe iwhe madzụ l’arịje domia l’ime obu iya. O noo iwhe ozhi-ọma ono, mu l’anọje ezhi ono kfuru.

Ndu Ju whẹ l’iwu Mósisu

¹⁷A bya l’ẹhu nke gụbedua, bụ onye Ju; iitu onwoghu onye Ju, woru obu dobe l’iwu unu, gude ọnodu unu lẹ Chileke anga ụnga. ¹⁸Ị marụ iwhe bụ uche Chileke, ebebenu iwu iya l’egoshi ghu iwhe rwuberu ghu l’ememe mẹe iwhe l’ete erwubee ghu l’ememe. ¹⁹Ị marwetaru l’ị bụ onye l’edu ndu l’atsọ ishi, ị bụru iwhoro nke ndu nọ l’ẹkpuroochi. ²⁰Ị bụru onye l’akpozhiru ndu l’eme eswe ụzo, bụru onye l’ezhi ndu Ju iwhe g’ọo ụnwegirima. O dowaru ghu ẹnya l’ị marụ iwu Chileke, bụ iya bụ l’i shi tụkota ọkpobe iwhe gbarụ madzụ l’amama lẹ nke Chileke tụko makọtaru. ²¹Ọo ya bụ, eshi-ọwhu l’ịinoje ezhi ndu ọdo, ?ọo gụnu meru iwhe l’iitii zhije onwoghu? Gụbe onye l’arya iya arya sụ t’e be ezhijeshi oshi, ?ti zhidunu oshi l’onwoghu? ²²Mu sụru gụbe onye l’ekfu sụ t’e be erijeshi ogori, ?ti ridunu ogori l’ishi onwoghu? Gụbe onye ono, l’akpọru agwa tuu ?ti jejedunu ozhita iwhe e doberu l’eze-ụlo ẹja? ²³Gụbe onye l’anga ụnga lẹ Chileke tụru iwu doberu ghu ?tịi nọjedunu emebyishi iwu ọbu, gude iya eme Chileke iwhe iwhere? ²⁴L’e dekwaru l’ẹkwo Okfu Chileke sụ: “Ndu ọha ọdo, l’ẹte abụa ndu Ju bẹ l’ekfurwushi Chileke, ọ bụru umere unubẹ ndu Ju kpatarụ iya.”

²⁵Urwu dụ l’obu ugvu bẹ bụ ezhi-okfu, ọle ọlekwawho m’ọ -bụru l’iimeje-e iwhe iwu sụru t’e mejee. Ọle nteke bụ l’ịinoje emebyishi iwu, bẹ gụ l’onye l’ete ebua ugvu nọkwaa l’oshi lanụ. ²⁶O nokwawho g’ọ dụ onye l’ete ebua ugvu. Onye l’ete ebua ugvu l’emewaa iwhe iwu kfuru bẹ Chileke l’a-gụkwa whọ l’onye buru ugvu. ²⁷Ọo ya bụ lẹ ndu l’ẹte abụa ndu Ju ono, bụ ndu l’ete ebua ugvu, bẹ l’a-nma gụbe onye Ju ikpe. Unubẹdua, bụ ndu Ju nweru iwu ono, e deru l’ẹkwo, tẹmenu unu l’emebyikwawho iwu. ²⁸Iwhe bụ l’a bụ ọkpobe onye Ju ta abụkwa onye ndiwhe sụru l’ọo bụ iya. L’e buru ugvu l’anụ-ẹhu ta abụkwa ọkpobe obu ugvu. ²⁹Iwhe bụ l’a bụ ọkpobe onye Ju bẹ bụ onye bụ iya nụ l’ime onwiya. Obu ugvu ọwhu bụ ọkpobe iya bụkwa ọwhu l’eebu l’ime obu onwonye. Obu ugvu ọwhu dụ ree l’iwhu Chileke ta abụkwa ọwhu e buru nke l’ọo iwhe e deru l’ẹkwo iwu; ọ kwa ugvu, Ume Chileke buru madzụ l’ime obu onye ọbu bẹ bụ ọkpobe iya. Ẹgube onye ono ta abụhekwaro madzụ l’ajajẹ iya ajaja iya; ọo Chileke bẹ l’ajajẹ iya.

¹Sụa, ?ọ kwanụ gụnu bẹ onye Ju gude ka onye l’ẹte abụa onye Ju mma? ?Ndẹkwanu urwu, dụ l’obu ugvu? ²Ọ kwatarụ baa urwu, ha shii. Ọ tọ dụkwa ụzo urwu l’eshia dụ iya. Ọwhu bụ-zhiadanu nke mbụ bụ l’ọo ndu Ju bẹ Chileke woru okfu, shi iya l’ọnu ye l’ẹka. ³A makwarụ-a lẹ whẹ harụ bụru ndu l’ẹte agbaa t’e gude ire whẹ ẹka nteke ono. Ọle ọbu, ?e ge gude lẹ whẹ dụ nno sụ lẹ Chileke ta agbahẹdu t’e gude ire iya ẹka? ⁴Tẹ njọ jekwa ezhi! T’e goshijechia lẹ Chileke bụlewho onye ire-lanụ nteke nteke g’ọ bụ iya; e -behuduru madzụ l’owhu je l’a-bụlewho ndu ntuwhu-ire. Ọo ya bụ iwhe ọbu, e deru l’ẹkwo Okfu Chileke sụ:

“Ọo okfu ghu Chileke bẹ

l’ee-shi goshi l’ị bụ onye dụ chịriri,

ọ tọ dụdu nteke e kuru ghu ikpe t’i kpefu.”

⁵Nteke ọ bụ l’ọo l’anyi ta agbadụ t’e gude ire anyi ẹka l’emeje t’a whụ gẹ Chileke gbaberu t’e gude ire iya ẹka, ?ọo hụnu gụnu bẹ anyi l’e-kfu ntaa? Anyi l’a-sụ lẹ Chileke meru ejo-iwhe l’ọ kpabẹru anyi oke-ẹhu-eghughu iya? Mu l’ajịakwaa ajị-a gẹ ndiwhe ọdo l’anọje ajị iya nta-a. ⁶?Anyi l’a-sụ lẹ Chileke meru ejo-iwhe? Tẹ njọ jekwa ezhi! Ọ -bụ l’ọ dụ nno mẹ, ?ndẹhunu gẹ Chileke gege eme bụru onye l’e-kpe ndiwhe ikpe?

⁷Iwhe mu l’ekfu bụ: nteke ọ -bụ l’anyi bụ ndu l’atuwhu ire atuwhu, ọ bụru ntuwhu-ire ono l’emeje t’a kabaa ọmaru lẹ Chileke bụ onye ire-lanụ, ya emekwaawho t’a jaa ya ajaja, ?ndẹhunu g’e meru Chileke je l’a-nma anyi ikpe l’anyi l’eme iwhe-dụ-ẹji? ⁸Ndẹkwanu g’e meru anyi ta asụ t’anyi meenaro ejo-iwhe nggẹ nke ọma afụta? O nweru ndu l’anọje ekfubyishi mu, ebo mu ibo, sụ lẹ mu sụru t’e meje iwhe-dụ-ẹji nggẹ nke ọma eshi iya fụta. Ndu ono bẹ Chileke l’a-nma ikpe, kfụru nhamụnha.

Ọ tọ dụdu m’ọo onye lanụ, dụ chịriri l’iwhu Chileke

⁹?Ntaa-e? ?O fụtaru l’ọnodu nke anyịbedua, bụ ndu Ju bya aka nke ndu ọdo, l’ẹte abụa ndu Ju mma t’ọo gụnu? Wawakwa! Anyi ta akazhikwaa whẹ mma ilile. Iwhe anyi goshiru bụ l’anyịbe ndu Ju mẹe ndu l’ẹte abụa ndu Ju bẹ tụkoru bụru ndu iwhe-dụ-ẹji wọru chịi l’ẹkpiri. ¹⁰Ọo ya-a bẹ bụ iwhe ọbu, e deru l’ẹkwo Okfu Chileke sụ:

“Ọ tọ dụkwa m’ọo onye lanụ, dụ chịriri l’iwhu Chileke.

¹¹Tọ dụ-zhia m’ọo onye lanụ, nweru uche,

tọ dụ onye l’eseba tẹ ya marụ Chileke.

¹²Onyenọnu gbẹwaru Chileke azụ.

Whẹ tụkowaru gẹ whẹ ha yifukota.

Ọ tọ dụkwa onye ọwhu l’eme iwhe kfụru nhamụnha,

t’ọ ka mma l’ọo onye lanụ.

¹³“Okfu, l’eshije whẹ l’ọnu fụta l’anọje eshi nshi g’ọo ilu, gheru ọnu.

Ire whẹ bẹ whẹ l’egudeje eduwhushi ibe whẹ.”

Okfu, shi whẹ l’ọnu bẹ l’egbu

madzụ g’ọo ẹrwu ejo agwọ.

¹⁴“Iwhe jiru whẹ ọnu bụ owhu

iwhu yẹle okfu, shi l’obu mgbashị.”

¹⁵“Ogbu madzụ ta atajẹru whẹ l’ẹka ike,

mbụ lẹ whẹ l’akwagebeje akwagebe iya.

¹⁶Ụzo, whẹ l’eshi l’abụje kpurupyata.

Umere whẹ abụru áwhụ tsọ ndu ọdo.

¹⁷Whẹ ta amadụ iwhe l’emeje tẹ nchị dụ ndoo.”

¹⁸“Whẹ te eme ele Chileke ilile ilile.”

¹⁹Iwhe ọwhu ka anyi odo ẹnya bụ l’iwhe lile, e deru l’ẹkwo iwu Chileke bẹ bụ ndu ono, a tụru iwu ono nụ, b’e deru iya deturu. Ọo ya bụ, nggẹ tọ dụ onye l’a-gọfu; ọnu abụru onyenọnu kpụrukujingu, mẹfua nke ọwhu onyemonye l’e-shi nno bụru onye ikpe nmarụ l’iwhu Chileke. ²⁰Iwhe meru ọ dụ nno bụkwa l’ọ tọ dụdu onye l’a-sụ lẹ ya l’e-gude ome iwhe iwu kfuru bụru onye dụ chịriri l’iwhu Chileke, eshi-ọwhu iwhe iwu l’emeje bụ l’oomeje tẹ madzụ marụ lẹ ya mewaru iwhe-dụ-ẹji.

Iwhe Chileke meru

²¹Ọle ntaa bẹ iwhe ono, ẹkwo iwu mẹe ndu nkfuchiru Chileke kfuru mewaru. Chileke bẹ mewaru iwhe rwuberu yẹbe onye dụ chịriri. O goshiwaru gẹ ndiwhe l’e-shi dobe onwowhe chịriri l’iwhu iya. Ọ tọ bụhekwa iwu b’o gudekwadu eme iya. ²²Ọo gụjewaa ndiwhe lẹ ndu dụ chịriri l’iwhu iya, m’ọ -bụru-a lẹ whẹ woru onwowhe ye l’ẹka Jisọsu Kuráyisutu kpụ. Iwhe bụ-zhia onye wowaru onwiya ye Kuráyisutu l’ẹka bẹ l’ọoguje lẹ ndu dụ chịriri. Ọ tọ dụkwa onye l’ọogufuje iya m’ọo nnanụ. ²³O noo lẹ madzụ lile mewaru iwhe-dụ-ẹji, shi nno nafụ onwowhe ugvu ka l’ugvu, Chileke meru tẹ ya kwabẹ whẹ. ²⁴Ọle Chileke bẹ gude obu-imiko meeru onyemonye eze-iwhe-ọma nata whẹ g’ọo ndu dụ chịriri. Iwhe ono bẹ bụlewho iwhe-ọma, Chileke meru anyi. Iwhe meru ọ bụru iwhe-ọma Chileke meeru iya anyi bụ lẹ Chileke shiwaa l’ẹka Kuráyisutu Jisọsu gbata anyi l’iwhe-dụ-ẹji, wọru anyi chịi l’ẹkpiri. ²⁵Chileke goshiru Kuráyisutu l’edzudzu-ọha t’ọ bụru ẹja, e gude kfụa ụgwo iwhe-dụ-ẹji ndiwhe meru. Ọ bụru mmee ono, Kuráyisutu gbashiru nteke ono, ọ nwụhuru ono bẹ Chileke kwoberu iswi iya agụru madzụ nvụ l’iwhe-dụ-ẹji, o metaru, mbụkwa ndu woru onwowhe ye Kuráyisutu ono l’ẹka. Chileke shi nno mee tẹ ya goshi lẹ ya dụ chịriri. Lẹ nteke ndụ-ichee bẹ Chileke shi abụje onye meru iwhe-dụ-ẹji, ya atalẹkwaa nshi wofu ẹnya. ²⁶Ọle ntaa b’o goshiru gẹ ya l’e-shije eme ndiwhe tẹ whẹ bụru ndu dụ chịriri, o noo lẹ yẹbedua l’onwiya l’eme tẹ ya goshi lẹ ya dụ chịriri, bụkwaruwho onye l’emeje t’iwhe bụ ndu lile, woru onwowhe ye Jisọsu l’ẹka; tẹ whẹ bụru ndu dụ chịriri l’iwhu yẹbe Chileke ono.

²⁷Sụa, ?o nwekwaduru-a onye nweru iwhe l’oo-gude anga ụnga l’iwhu Chileke nta-a? Ọ tọ dụ-zhidua. ?Ọ bụru gụnu meru ọ dụ nno? ?Tọo woo l’ọo iwhe-ọma, anyi metaru l’onwanyi bẹ Chileke l’ele? Wawakwa! Ọ kwa oworu onwanyi ye Kuráyisutu l’ẹka kpụ bẹ l’oole. ²⁸O noo l’iwhe anyi mabeleruwho bụ lẹ Chileke l’agụjekwawho madzụ lẹ ndu dụ chịriri kpụ, m’ọ -bụru l’onye ono woru onwiya ye Kuráyisutu l’ẹka. Ọ tọ gụjekwa iya nkele ọo lẹ madzụ l’eme iwhe iwu kfuru. ²⁹?Tọo woo: lẹ Chileke bẹ bụlewho Chileke ndu Ju kpụ? ?Tọ bụhedu Chileke nke ndu ọwhu l’ẹte abụa ndu Ju? Waawa! Ọ bụkwawho Chileke nke ndu ọwhu l’ẹte abụa ndu Ju. ³⁰Ọlekwawho Chileke lanụ kpụ bẹ dụ nụ. Ọo Chileke lanụ ono bẹ l’agụje ndu Ju, woru onwowhe ye Kuráyisutu l’ẹka lẹ ndu dụ chịriri; ọ bụkwaru iya whọ bẹ l’agụje ndu l’ẹte abụa ndu Ju, wokwaruwho onwowhe ye Kuráyisutu l’ẹka lẹ ndu dụ onwowhe chịriri. ³¹Nteke bụ l’anyi sụru l’ọlewho oworu onwonye ye Kuráyisutu l’ẹka kpụ bẹ Chileke l’ele, ?ọ fụtaru l’anyi wotanuru iwu ono eme gẹ-woo l’ọ tọ dụdu iwhe ọ bụ? Tụswekwa! Iwhe anyi gbechia eme bụkwa t’iwu ono vuru ọkpobe ire.

Iwhe Ébirihamu meru

¹?Ndẹnu g’ọ nwụru nnajị-ochee anyi, bụ Ébirihamu? ²Lẹ nggẹ l’ọo iwhe ọ bụ l’ọo iwhe-ọma, Ébirihamu metaru meru g’o gude Chileke gụa ya l’onye dụ chịriri l’iwhu yẹbe Chileke mẹ ya e nweru iwhe o gogo gude anga ụnga. Ọle ọ tọ dụkwanu iwhe o gude anga ụnga l’iwhu Chileke. ³O noo iwhe ọbu, e deru l’ẹkwo Okfu Chileke sụ: “Ébirihamu woru onwiya ye Chileke l’ẹka, Chileke gụaru iyẹ ya l’ọdu chịriri.” ⁴Sụa, mẹ onye jeru ozhi bẹ l’ẹte asụjekwa l’ụgwo a kfụru iya l’ozhi ono, o jeru ono bẹ bụ iwhe a nụru iya ẹwoma, gbahaa l’ọo ụgwo rwuberu iya nụ b’a kfụru iya. ⁵Obenu lẹ nteke ọ dụ onye woru onwiya ye Chileke l’ẹka, onye ono ta atuchobehe obu l’ọo iwhe-ọma, ya gude ẹka iya meta bẹ Chileke l’e-kwobe gụa ya l’onye dụ chịriri, bẹ Chileke l’e-kwobekwa nkele onye ono woru onwiya ye iya l’ẹka gụa ya l’onye dụ chịriri, mbụ Chileke ono, l’emeje ndu meru iwhe-dụ-ẹji tẹ whẹ bụru ndu dụ chịriri. ⁶Ọ kwawhọ iwhe dụ nno bẹ Dévidi kwoberu ekfu nteke ono, o kfuru okfu gbaa ọkpa l’ẹhu-ụtso nke nwoke ọwhu Chileke l’agụta l’onye dụ chịriri, l’ẹbe abụ l’ọo l’onye ono gude ẹka iya meta tẹ Chileke nata iya. ⁷Ọ sụru:

“Ẹhu-ụtso bụ nke ndu Chileke

gụru nvụ l’iwhe whẹ mesweru iya,

mbụ ndu Chileke safụkotawaru

iwhe-dụ-ẹji, whẹ metagbaberu.

⁸Ẹhu-ụtso bụ nke nwoke, ọwhu

Onye-Nwe-Ọha l’ẹte agụkoru

iwhe-dụ-ẹji, onye ọbu l’eme iya ilile.”

⁹?Ọ dụ g’ọ lẹwho ndu buru ugvu nwẹka whẹ bẹ Chileke l’ekfu l’ẹka-a t’ẹhu tsọo ụtso kpụ? Tẹ ndu l’ete ebua ugvu lị iya-a? Anyi kfuhaakwaru sụ: “Ébirihamu woru onwiya ye Chileke l’ẹka, Chileke gụaru iyẹ ya l’ọdu chịriri.” ¹⁰?Ọo nteke ole b’ọ gụru iyẹ ya? ?Ọ gụru iyẹ ya nteke l’ootoko bua ugvu, tọo g’o buadaru ugvu? Ọ gụadaru iyẹ ya t’a nọ anọ t’o bua ugvu. ¹¹Ugvu ono, o buru gbekwaa bụru iwhe-ọhubama, goshiru lẹ Chileke bẹ gụadaru iya l’onye dụ chịriri, nkele o woru onwiya ye iya l’ẹka nteke l’ootoko bua ugvu. Ọo ya bụ nggẹ Ébirihamu abụru nna iwhe lile, bụ-gezhia ndu woru onwowhe ye Chileke l’ẹka, mbụ ndu Chileke gụru lẹ ndu dụ chịriri, l’ẹbe abụ lẹ whẹ buru ugvu. ¹²Ọ bụkwaruwho nna ndu buru ugvu, ọle ọ tọ kwa l’ọo lẹ whẹ buru ugvu bẹ kpatarụ ọ bụru nna whẹ; iwhe meru ọ bụru nna whẹ bẹ bụkwa lẹ whẹ l’etso ẹka Ébirihamu ono, woru onwiya ye Chileke l’ẹka tẹmenu t’o bua ugvu.

Ọwhu bụ ishi bụ eworu onwonye ye Chileke l’ẹka

¹³Chileke kweru Ébirihamu yẹle ẹpa iya ụkwa sụ whẹ l’ọo whẹ l’e-nwe mgboko-o. Ọ tọ kwa l’ọo lẹ Ébirihamu meru iwhe iwu kfuru meru o kweta iya ụkwa iwhe ono. Iwhe meru Chileke kweta iya ụkwa iwhe ono kwa l’ọo l’o woru onwiya ye Chileke l’ẹka. Ọ bụkwanuru l’o woru onwiya ye Chileke l’ẹka meru Chileke gụaru iyẹ ya l’ọdu chịriri. ¹⁴Sụa, nggẹ l’ọo iwhe bụ l’ọo ndu l’eme iwhe iwu kfuru bẹ l’e-nwe mgboko ono, Chileke kweru ụkwa iya mẹ oworu onwonye ye Chileke l’ẹka abụkwaru iwhe barụ l’alị, mẹ ụkwa iwhe ọwhu Chileke kweru tege evuhekwanu ire. ¹⁵O noo l’iwhe iwu l’emejelewho bụ l’ọokpataje tẹ Chileke tụfuru ndiwhe oke-ẹhu-eghughu iya. L’ọ kwa nteke a marụ l’iwu dụ b’a marụ l’eemesweje iwhe iwu kfuru.

¹⁶O noo g’o gude iwhe ono, Chileke kweru ụkwa iya bụru iwhe shi l’oworu onwonye ye iya l’ẹka, gẹ l’ee-shi t’ọ bụru iwhe shi l’eze-iwhe-ọma, l’oome. E shiwaro nno ụkwa iwhe ono abụru iwhe Chileke kweshiru ike doberu iwhe lile, bụ ẹpa Ébirihamu. Ọ tọ bụhekwa ndu l’emeje iwhe iwu sụru t’e meje kpụ. Chileke dobekwaru iya who iwhe bụ ndu woru onwowhe ye iya l’ẹka g’ọo Ébirihamu. O noo l’ọo Ébirihamu bẹ bụ nnajị anyịbe ndu woru onwanyị ye Chileke l’ẹka g’anyi hakọta kpamụ. ¹⁷Bụ iya bụ iwhe ọbu, e deru l’ẹkwo Okfu Chileke sụ: “Mu mewaru ghu t’ị bụru nnajị mba, ha l’igweligwe.” Ọo ya bụ lẹ Ébirihamu bụ nna anyi l’iwhu Chileke, bụ onye o woru onwiya ye l’ẹka, mbụ Chileke, l’emeje ndu nwụhuru anwụhu tẹ whẹ nọdu ndzụ ọdo; l’oomejekwawho iwhe l’eshihawaa dụ nụ, ya abya adụ. ¹⁸Ébirihamu woru onwiya ye Chileke l’ẹka, nọdu ele ẹnya iwhe nteke l’ọotoo dụa iwhe o kede ẹka ele ẹnya iwhe ono. Ọo ya bụ, ọ bụru nnajị mba, ha l’igweligwe, bụru iya-a bụ iwhe ọbu, e deru l’ẹkwo Okfu Chileke sụ: “Ẹpa ghu l’a-halẹwho l’igweligwe g’ọo kpokponde, dụ l’igwe.” ¹⁹Nteke ono bẹ Ébirihamu gbaakwarụ iwhe rwukwaru ụkporo awha ugbo ise eshi a nwụru iya. Ọ marụ lẹ ya ta adụhedu ike eye ime. Ọle ọ tọ dụkwa nteke o kwenyaaru nke Chileke, ọ kpọru laa azụ sụ lẹ ya bụwanu akabaraka nwoke nnajị ochee, tọ dụ nteke ọ bya arịde nke nyee ya ono, bụ Séra, l’ẹte atsụ ime. ²⁰Ọ tọ dụkwa nteke obu bọjeru iya ẹbo l’iwhe ono, Chileke kweru iya ụkwa iya, o noo l’o to nwedu nteke o kwenyajeeru nke Chileke, t’o kweshihe iya ike. O gude anọ akwabẹ Chileke ugvu kabaa okweshi nke Chileke ike. ²¹O doru iya ẹnya ọkpobe edodo lẹ Chileke fụru mekota iwhe ono, o kweru iya ụkwa iya. ²²O noo iwhe meru Chileke gụaru iya eworu ono, oworu onwiya ye iya l’ẹka l’ọdu chịriri. ²³Ọ tọ kwa iswi ẹhu Ébirihamu nwẹkiya b’e kwoberu dee iwhe ono, e deru sụ: “Chileke gụru iyẹ ya l’ọdu chịriri.” ²⁴Ọ kwa l’iswi ẹhu anyịbedua b’e kwobekwaruwho dee ya, mbụ anyịbe ndu Chileke l’e-megee gụta l’anyi bụ ndu dụ chịriri; mbụ ndu woru onwowhe ye Chileke l’ẹka, bụ iya bụ onye meru Onye-Nwe-Ọha, bụ Jisọsu, o shi l’ọnwu teta nọdu ndzụ. ²⁵Jisọsu ono bẹ Chileke harụ, o gude onwiya gbaa ẹja ọha nwụhu, nke ọwhu l’ọo-safụ iwhe-dụ-ẹji, anyi megbaberu. Chileke bya emee ya o shi l’ọnwu teta nọdu ndzụ gẹ l’ee-shi tẹ ya gụa anyi lẹ ndu dụ chịriri.

Ọdu lẹ mma onye lẹ Chileke

¹Ọo ya bụ lẹ Chileke gụwaru anyi lẹ ndu dụ chịriri, nkele ọo l’anyi woru onwanyị ye iya l’ẹka. Ntaa bẹ anyi shiwaa l’ẹka Onye-Nwe-anyi Jisọsu Kuráyisutu, buwaru guu l’ọnodu anyi lẹ Chileke. ²Ọo Jisọsu Kuráyisutu ono bẹ shi l’ekwekwe, anyi kweru nkiya duba anyi l’eze-iwhe-ọma ọwaa, anyi gude nọdu ndzụ-a. Ẹhu l’anọje atsọ anyi l’anyi l’ele ẹnya l’anyi lẹ Chileke l’e-megee gba mgba l’ọdu-biribiri iya. ³Ọ tọ lẹkwaa ono kpụ bẹ ẹhu l’ekwobeje atsọ anyi ụtso. Ẹhu l’anọjekwawho atsọ anyi ụtso mẹ anyi l’eje iwhe-ọtsulanu, nkele anyi whụwaru l’ọo l’iwhe-ọtsulanu bẹ anyi l’eshije nwụta ọta-nshi. ⁴Ọ bụkwaru ọta-nshi l’emeje t’anyi shihu ike nteke iwhe adata byarụ. Anyi eshi nno kabaa ọkfushi ike l’iwhe anyi l’ele ẹnya iya. ⁵Mbụ mẹ ole-ẹnya-iwhe ono, anyi l’ele ono te emebyijekwa anyi iwhu. Iwhe mekwaru t’o mebyije anyi iwhu bụ lẹ Chileke l’onwiya mewaru t’anyi marụ l’ime obu anyi gẹ ya yeberu anyi obu. Ụzo, o shi mee t’anyi marụ iya bụ l’ọ nụru anyi Ume-Dụ-Nsọ. Ọ bụru Ume-Dụ-Nsọ ono l’emeje t’anyi marụ n-yemobu Chileke ono.

⁶L’ọ kwarọo nteke ono, l’ẹte adụa ike, dụ anyi nke oome iwhe dụ ree l’iwhu Chileke, bẹ Kuráyisutu byarụ bya anwụhu l’iswi ẹhu ndu l’ẹte atsụ egvu Chileke. Iwhe ono bụkwaru nteke Chileke tụberu l’oo-me b’o meru. ⁷Ọ kwatakwarụ atsụ l’ẹhu gẹ l’ee-shi whụa onye l’a-tụ ishi iya l’iswi ẹhu onye dụ chịriri. Ọle a -chọde iya achọ b’e -kele ẹhu, a whụkwa-a onye l’a-dụ ike tụa ishi iya l’iswi onye ọma. ⁸Obenu lẹ Kuráyisutu bẹ nwụhuru l’iswi ẹhu anyi nteke anyi bụkwadu ndu l’eme iwhe-dụ-ẹji, shi nno goshi lẹ Chileke bẹ yenukaru anyi obu. ⁹Ọo ya bụ l’eshi ọwhu Chileke shiwaa lẹ mmee, Jisọsu gbashịru gụa anyi lẹ ndu dụ chịriri l’iwhu iya, bẹ l’ọo-kabakwaanụ adụ ike shi l’ẹka Kuráyisutu ono dzọfuta anyi nggẹ ya ta atụfuru anyi oke-ẹhu-eghughu iya. ¹⁰Sụ, eshi-ọwhu anyi shi bụru ọhogu Chileke; Chileke bya eshiwa l’anwụhu ono, Nwa iya nwụhuru mewaa, anyi bụru ọnya iya, bẹ ntaa anyi bụwaa ọnya iya-a bẹ ndzụ Kuráyisutu, dụ anyi l’ẹhu l’e-gbekwaanu kabaanụ ọdzofuta anyi l’oke-ẹhu-eghughu Chileke. ¹¹Ọle ọ tọ bụledua ono nwẹkiya, anyi l’etekwawho ẹswa l’ọnodu anyi lẹ Chileke dụ mma. Iwhe ono bụru iwhe shi l’ẹka Jisọsu Kuráyisutu, bụ iya mewaru, anyi bụru ọnya Chileke nta-a.

Ádamu mẹe Kuráyisutu

¹²Sụa, ọ kwa nwoke lanụ bẹ iwhe-dụ-ẹji shi l’ẹka bata lẹ mgboko. Ọnwu shikwawho l’ẹka iwhe-dụ-ẹji ono batakwawhọ lẹ mgboko. Ọo ya bụ, ọnwu shiwaro nno nọdu swiru madzụ, nkele madzụ lile mewaru iwhe-dụ-ẹji. ¹³Iwhe-dụ-ẹji bẹ dzuakwaru mgboko tẹmenu iwu bya. Ọle iwhe-dụ-ẹji bẹ l’ẹte agụtajedu l’ọo iwhe-dụ-ẹji l’ẹka l’aatụa iwu dobe. ¹⁴Ọle ọnwu shilekwaa l’ọgbo nke Ádamu whẹ gbua ndiwhe jeye l’ọgbo nke Mósisu. O gbugekwaaru gbua ndu l’ete emeswee iwu ono lẹge Ádamu mesweru iya.

Ádamu l’onwiya bụ inyonyo onye ọwhu l’e-be bya, bụ iya bụ Kuráyisutu. ¹⁵Ọle iwhe-ọma nke Chileke bẹ l’aata atụkwaru eyeru iwhe-dụ-ẹji ọwhu Ádamu meru. Iwhe o gude dụ iche pakwarụ ẹka. Lẹ Ádamu meru iwhe-dụ-ẹji. A ha l’igweligwe nwụhu, nkele ọo l’o meru iwhe-dụ-ẹji ono. Obekwanu lẹ Chileke bẹ mewaru ndu ha l’igwe eze-iwhe-ọma. Eze-iwhe-ọma ono yẹle iwhe-ọma shi l’ẹka iya, bụ iya bụ nwoke lanụ ono, bụ Jisọsu Kuráyisutu bẹ nyịberu anyịbe. ¹⁶Ọ nyịberu anyịbe nke ọwhu iwhe-ọma ono kwatarụ dangoo iwhe-dụ-ẹji ono, nwoke lanụ ono, bụ Ádamu meru. O noo nkele ikpe, Chileke kperu l’iwhe-dụ-ẹji ono, nwoke lanụ ono meru bẹ nmakọtaru ndiwhe l’owhu. Ọle iwhe-ọma ọwhu Chileke meru bẹ nyịberu iwhe-dụ-ẹji ha l’urwu. Ọ bụru iwhe-ọma ono bẹ meru l’ọoguje ndiwhe lẹ ndu dụ chịriri. ¹⁷Sụ l’ọo iwhe-dụ-ẹji, nwoke lanụ meru bẹ ọnwu shi l’ẹka nwoke lanụ ono chịlahaa g’ọo eze. Ọle anyi shiwaa l’ẹka Jisọsu Kuráyisutu nata iwhe kabaa shii. Iwhe bụ-zhia ndu natarụ eze-iwhe-ọma nke Chileke ono, nyịberu anyịbe mẹe iwhe-ọma, bụ iya bụ ọdu chịriri; iwhe bụ ndu ono l’e-shi l’ẹka onye lanụ ono, bụ Jisọsu Kuráyisutu nọdu ndzụ tsoru iya bụru eze achị.

¹⁸Ọo ya bụ, l’ọo g’emeswe lanụ, Ádamu mesweru kpatarụ iwhe Chileke nmakọtaru onyenọnu ikpe, bụkwawho gẹ Chileke shi l’ọdu chịriri ono, Kuráyisutu dụ mee t’ikpe kalẹru onyemonye tẹ ndzụ dụ whẹ. ¹⁹Nkele ọo gẹ nwoke lanụ ono meru iwhe Chileke sụru t’o bo mekwa, e shi nno Chileke nmakọta madzụ lile ikpe, bụkwawho g’e gude l’onye lanụ ọwhu meru iwhe Chileke sụru t’o mee, Chileke gụa igweligwe madzụ lẹ ndu dụ chịriri l’iwhu iya.

²⁰Iwhe meru e megee tụa iwu dobe bụkwa t’a kabaa ọmaru g’iwhe-dụ-ẹji habe shii. Ọle ọo nteke a kabaa ọma g’iwhe-dụ-ẹji habe shii bẹ eze-iwhe-ọma nke Chileke l’a-kabaa shii ọkpobe akaka. ²¹Ọo mgbu-ọnwu bẹ iwhe-dụ-ẹji gude egoshi lẹ ya l’erenuka ire. Ọ nokwawho g’ọ bụ ọdu chịriri bẹ eze-iwhe-ọma nke Chileke shi egoshi gẹ yẹbedua l’erebe ire. Ọ bụru ọdu chịriri ono, shi l’ẹka Onye-nwe-anyi Jisọsu Kuráyisutu ono l’edu anyi eduba lẹ ndzụ tututu-mịmimi.

A bya l’iwhe-dụ-ẹji bẹ anyi nwụhuru anwụhu

¹Sụa, ?anyi l’e-yezhia ọnu oye agha ntaa? ?Tọo woo: l’anyi l’a-nọ eme iwhe-dụ-ẹji nggẹ eze-iwhe-ọma nke Chileke akabaa shii? ²Tụswekwa! Ọ tọ dụkwa nno. L’a -bya l’iwhe-dụ-ẹji bẹ anyi nwụhuakwaru anwụhu. ?Ndẹhunu g’iwhe-dụ-ẹji l’e-me gudekwadu-a ndzụ anyi? ³E shiwaa lẹ baputizimu, e meru anyi, anyi lẹ Kuráyisutu Jisọsu tụgba bụru nnanụ. Ọ kwa iya bẹ mu l’ajị sụ: ?Unu ta amadụ l’ọo baputizimu ono bẹ woru anyi tụgbabe l’anwụhu ono, Kuráyisutu nwụhuru? ⁴Lẹ nteke ono, e meru anyi baputizimu ono bẹ anyi l’iya tụkookwaru nwụhukota; a tụkota anyi l’iya likota eli. Ọo ya bụ lẹ-a, ọo gẹ Kuráyisutu gude eze ike nke Nna ono, dụ biribiri shi l’ọnwu gbalihu nọdu ndzụ, bụkwawho g’anyi l’a-dụ ike nọdu ndzụ ọwhuu.

⁵Sụa, ọ -bụru l’anyi lẹ Kuráyisutu tụgbaru bụru nnanụ l’ẹgube ọnwu ononalanụ ọ nwụru, ọ kwa iya bụ lẹ Chileke l’e-me t’anyi shi l’ọnwu teta g’o meru yẹbedua, anyi l’iya anọdu ndzụ ọwhuu. ⁶Ọwhu ka anyi odo ẹnya bụ lẹ-a; l’e wotaru akahụ iwhe anyi shi bụru je atụko yẹle Kuráyisutu kpọpyabekota l’eli oswebe; ọo ya bụkwanu nggẹ e mebyia ike ejo obu ono, anyi shi nweru nteke ono, bụlewho iwhe-dụ-ẹji bẹ anyi shi marụ, nggẹ anyi ta abụhe ohu iwhe-dụ-ẹji. ⁷L’ọ kwa nteke madzụ nwụhuru bẹ yẹle ike oome iwhe-dụ-ẹji gbarụ buhu. ⁸Sụ, nteke ọ bụkwanu l’anyi lẹ Kuráyisutu bẹ tụgbaru nwụhu, bẹ anyi marụ l’anyi l’iya l’a-tụkokwawho nọdu ndzụ. ⁹O noo l’iwhe doru anyi ẹnya bụ l’eshi Chileke meru tẹ Kuráyisutu shi l’ọnwu teta nọdu ndzụ, bẹ l’ọoto nwụhuhedu ọdo. Anwụhu ta afụhedu kabaa ya ike ọdo. ¹⁰Anwụhu ọwhu ọ nwụhuru, bụ l’ọ nwụhuru ugbo lanụ kpụ nggẹ ya mee iwhe-dụ-ẹji eriri. Ndzụ ọwhu ọ nọdu ntaa bụakwaru tẹ yẹle Chileke bụru nnanụ jeyewaro ya. ¹¹O nokwawho g’unu l’a-gụje onwunu l’unu bụ ndu nwụhuru anwụhu m’a bya l’ẹka iwhe-dụ-ẹji dụ. Ọle eshi unu lẹ Kuráyisutu Jisọsu tụgbawaru bụru nnanụ, bẹ bụwaa Chileke bẹ unu nọduru ndzụ.

¹²Unu be ekwekwa t’iwhe-dụ-ẹji bụru iwhe l’a-nọ achị unu g’ọo eze l’ẹhu unu ọwa-a, bụ ẹhu ọwhu l’a-nwụhu anwụhu, nke ọwhu l’oomeje unu t’unu mee ejo-iwhe l’agụ unu. ¹³T’unu be ekwekwa tọ dụ iwhe dụ unu l’ẹhu g’ọ halẹkwaa nwanshị, unu l’e-woru haarụ iwhe-dụ-ẹji t’ọ bụru iwhe l’oo-gude ejekfu iwhe-dụ-chịriri ọgu. Iwhe unu l’e-gbechia mee bụ, t’unu pakọtaru onwunu haarụ Chileke; l’unu bụwaa ndu shiwaa l’ọnwu teta bya anọdu ndzụ. Ọo ya bụkwanu nggẹ Chileke egudekwanu unu alwụ ọgu iwhe-dụ-chịriri. ¹⁴Iwhe-dụ-ẹji ta afụhedu ka unu ike, eshi-ọwhu iwu l’ete ekehee unu ẹgbu; o noo lẹ ntaa bẹ Chileke gudewaa eze-iwhe-ọma iya tọo unu l’uli nke iwu ono.

Anyi ta abụhedu ohu iwhe-dụ-ẹji

¹⁵Sụa, ?ọ fụtaru l’anyi l’a-nọduwaro eme iwhe-dụ-ẹji, nkele ọo l’eze-iwhe-ọma nke Chileke tọwaru anyi l’uli; iwu ono te ekehe anyi ẹgbu? Tụswekwa! ¹⁶Unu ta amahaadaa lẹ nteke unu woru onwunu tọgboru madzụ melahaa iwhe o kfuru gẹ-woo l’unu bụ ohu iya, bẹ unu bụwaa ohu onye ọbu, unu l’anụru okfu. Nteke bụ l’ọo iwhe-dụ-ẹji bẹ unu tụru onwunu tọgboru bụru ohu iya, unu anwụhukwanu anwụhu, bụkwanu iwhe tso iwhe-dụ-ẹji. Nteke ọ bụkwanu l’unu dobeleruwho onwunu l’unu l’a-nọ emeje iwhe Chileke kfuru, ọo ya bụ ya agụkwanua unu lẹ ndu dụ chịriri l’iwhu iya. ¹⁷O nweru nteke unu shi bụru nwohuta iwhe-dụ-ẹji. Ọle mu l’ekele Chileke ekele lẹ ntaa bẹ unu gudewaa obu unu g’ọ ha eme iwhe bụ ọkpobe-okfu ono lẹge e zhiru iya unu. ¹⁸Eshi-ọwhu a tọwaru unu l’uli, iwhe-dụ-ẹji shi kee unu bẹ unu bụwaa ohu nke ọdu chịriri. ¹⁹Mu gudeekwaa ẹhu nwohuta yẹle onye-nwe-iya-nụ anmarụ unu ẹtu, ọdua bẹ iwhe mu l’ekfu l’ete edokwa unu ẹnya. Nteke mbụ bẹ unu shi tụru onwunu tọgboru ejo umere, l’eshi nshi mẹe oyemi ẹka l’ome iwhe l’ẹte adụa chịriri, nnta gẹ l’ee-shi t’iwhe-dụ-ẹji tsajẹ nwune. O nokwawho g’unu l’a-tụru onwunu g’ọ ha tọgboru oome iwhe-dụ-chịriri nggẹ ndzụ unu abụkotaru nke Chileke.

²⁰Nteke unu shi bụru ohu iwhe-dụ-ẹji, bẹ bụkwa iwhe-dụ-ẹji ono shi bụru onye-nwe-unu. Ọ tọ bụkwa ọdu chịriri. ²¹?Ndẹhunu iwhe bụ urwu, unu ritaru l’iwhe-dụ-ẹji ono, unu shi eme ono? Mbụ iwhe ono, iwhere iya bya bya adụ unu ntaa ono? Ẹka ọ sụ-chiru ishi mbụ iwhe ono bẹ bụkwa anwụhu. ²²Ọle ntaa b’a tọwaru unu l’uli, iwhe-dụ-ẹji shi kee unu, unu bụwaa ohu nke Chileke. Urwu, unu ritaru iya bụru lẹ ndzụ unu bụkota nke Chileke. Ẹka onoya sụberu ishi nkiya bụru lẹ ndzụ tututu-mịmimi. ²³O noo nkele ụgwo oome iwhe-dụ-ẹji l’akfụje madzụ bụ ọnwu. Obenu l’iwhe ọma, Chileke l’a-nụ bụ ndzụ tututu-mịmimi ọwhu shi l’ẹka Onye-nwe-anyi Jisọsu Kuráyisutu.

Ẹtu iwhe l’emeje mẹ ji nwanyị nwụhu

¹Sụa, ụnwunna mu, ọ kwa unu bẹ mu l’ekfuru ntaa, mbụ unubẹ ndu tụkoru marụ iwu. ?Unu ta amadụ l’ọo nteke madzụ nọ ndzụ bẹ iwu ono l’abụje onye-nwe-iya-nụ. Onye ọbu -nwụhuwaa, iwu ono ta abụhedu iya. ²Unu gudenu nwanyị, l’alụ ji gee ya. Ekemu-alị bụ lẹ nwanyị, l’alụ ji nọfutaje l’ẹka ji iya jeye nteke ji iya l’a-nọ-be. Ọle nteke a bya anọnyaa ji iya ono nwụhu, bẹ nwanyị ono nwewaa onwiya. Iwu ono, shi sedepyabe iya ta adụhedu iwhe ọ bụkwadu. ³Bụ iya bụ lẹ nteke ono, ji iya nọkwadu ndzụ, o -je alụta ji ọdo, a sụ l’ọo ogori bẹ l’oori, nteke ọ -bụ lẹ ji iya nwụhuru, ya abụru nwanyị, e doberu nke okee ji. Ọ tọ dụhedu iwu, segude iya nteke ono. Ọ tọ bụhedu iya ori ogori, m’o -je alụta ji ọdo. ⁴Sụa, o nokwawho g’ọ dụ l’ẹhu unu ndono ụnwunna mu. Ọo iwu shi bụru ji unu, ọle unu lẹ Kuráyisutu tụkowaru nwụhu. Ọo ya bụ l’eshi ọwhu unu nwụhuwaru bẹ iwu l’ẹte abụhekwa ji unu. Mbụ l’ọ tọ dụhekwa iwhe unu l’iya jigba. E megekwaa, unu byakwa anọdu-whu ndzụ azụ ọdo nteke ono, Kuráyisutu tetaru nọdu ndzụ ono. Ntaa bẹ bụakwa onye ono shi l’ọnwu teta nọdu ndzụ ono bẹ bụ ji unu, nke ọwhu anyi l’a-nọdu ndzụ, dụ nhamụnha mejee iwhe dụ Chileke ree. ⁵O noo lẹ nteke ono, anyi nọdukwadu ndzụ ono, anyi shi nọdu eme g’ọ gụru anyi ono, bẹ ẹgu ejo-iwhe ono meru anyi t’anyi meje iwhe-dụ-ẹji. Ọ bụru iwu ono bẹ meru t’ẹgu ome iwhe-dụ-ẹji ono nwuje anyi whuruwhuru l’ẹhu. Iwhe l’ọolotajekwanu tukobe madzụ mbụ ome iwhe-dụ-ẹji bụru ọnwu. ⁶Ọle ntaa bẹ Chileke mewaru anyi t’ọ bọ dụhe iwhe anyi l’iwu l’ejigbazhia ilile. Anyi nwụhuwaru nahụ iwhe ono, shi kee anyi ẹgbu ono. Ọo ya bụ l’anyi nọwaa ndzụ ọwhuu, ọwhu shi l’ẹka Ume-Dụ-Nsọ; ejeru Chileke ozhi. Anyi te etsohedu akahụ ụzo ono, bụ iya bụ iwu ono, e deru l’ẹkwo ono gude eje ozhi ono.

Iwu yẹle iwhe-dụ-ẹji

⁷?Ọo hụnu gụnu bẹ l’e-kfu ntaa? Anyi l’a-sụ l’iwu ono l’onwiya bẹ bụ iwhe-dụ-ẹji tọo gụnu? Tụswekwa, anyi te ekfukwa nno. Ọle mu tẹge amadụ iwhe bụ iwhe-dụ-ẹji, nggẹ l’ọo iwhe iwu l’ẹte adụa. Ọo iwu ono meru, mu marụ iya. Mu tẹge amakwa iwhe ọbu bụ oke-ẹnya, nggẹ ọ -bụ l’iwu ono ta asụ: “T’e be enwekwa oke-ẹnya.” ⁸Iwhe-dụ-ẹji bẹ shi l’iwu ono, sụru t’e be enweshi oke-ẹnya kpata ụzo kpatsushia mu iwhe bụkota ẹgu ejo-iwhe, dụ l’iche l’iche. O noo l’ẹka l’ẹte atụa iwu dobe bẹ ẹgu oome iwhe-dụ-ẹji bụkwa iwhe nwụhuru anwụhu. ⁹O nweru nteke mu shi nọdu mu ta ama nke iwu ono, sụru t’e be enweshi oke-ẹnya. Ọ bya ebe nteke iwu ono byalẹruwho; iwhe-dụ-ẹji tetakwa gbakerehu; ¹⁰iwu ono nmakwanụa mu ikpe ọnwu. Ọ bụru iwu ono gẹdegede, bụ iwu gege egoshi mu ụzo ndzụ tututu-mịmimi gbee nmaa mu ikpe ọnwu. ¹¹O noo l’iwhe-dụ-ẹji bẹ kpatarụ ụzo gude iwu ono ghogbua mu l’ụgho, shi l’ẹka iwu ono gbua mu.

¹²Ọo ya bụ l’iwu ono g’ọ ha bẹ shikota Chileke l’ẹka, iwhe ono, e deru l’iwu ono shikwawho Chileke l’ẹka; bụkwaruwho iwhe-dụ-chịriri, bụru iwhe dụ ree. ¹³?Ọo ya bụnu l’ọo iwhe ono, dụ ree ono gbẹenu bya akpatarụ mbẹdua anwụhu? Tụswekwa, ọ tọ bụkwa iya. Ọo iwhe-dụ-ẹji bẹ gude iwhe ono, dụ ree kpatarụ mu anwụhu, nggẹ e shi nno t’a whụ-dzuru iwhe-dụ-ẹji, marụ l’ọo iwhe-dụ-ẹji. Ọo ya bụ lẹ Chileke bẹ shi l’iwhe e deru l’iwu eme t’iwhe-dụ-ẹji goshikota lẹge yẹbe iwhe-dụ-ẹji dụta-be oyi oyi.

Iwhe labọ, l’akpa ẹnya l’ẹhu madzụ

¹⁴Iwhe anyi marụ bụ l’iwu shi l’ẹka Ume Chileke, ọle mbẹdua bẹ bụ madzụ mmaanụ bụ iya bụ onye, iwhe-dụ-ẹji gbarụ gẹ l’aagbajẹ ohu. ¹⁵Umere mu l’ishi onwomu l’agbachijekwa mu ẹnya, o noo lẹ mu te emejedu iwhe dụ mu nke tẹ mu mee ya. Iwhe mu l’agbejechia mee bẹ bụ iwhe dụ mu ashị ememe. ¹⁶Sụ, eshi-ọwhu iwhe mu l’egbejechia eme bụ iwhe mu marụ l’ọ tọ dụdu mu ree; ọo ya bụ l’oogoshi lẹ mu kwetaru l’iwu dụ ree. ¹⁷Ọo ya bụ l’e -kfude iya ekfu nta-a, ọ tọ bụkwa mbẹdua l’eme iwhe ono, dụ mu ẹji ono. Iwhe l’eme iya nụ bụkwa iwhe-dụ-ẹji ono, buwa mu ebu l’ẹhu ono. ¹⁸L’iwhe ọwhu mu marụ bụ l’ọ tọ dụ-zhidua iwhe dụ ree, dụ mu l’obu ilile ilile, bụ iya bụ l’ọ bụ ẹgube madzụ ono, mu shi bụru nteke ono mu shi anọje eme iwhe-dụ-ẹji, l’agụgbabe mu. Mu l’emeje tẹ mu mee iwhe dụ mu ree ememe, ọle mu ta adụjedu ike mee ya. ¹⁹Iwhe meru iya bụru lẹ mu te emejedu iwhe dụ ree, dụ mu nke tẹ mu mee ya. Ọlewho ẹjo iya ono, l’ẹte adụa nke tẹ mu mee ya ono bẹ mu l’emeje. ²⁰Sụ, l’ọ -bụru l’iwhe mu l’egbeje eme bẹ bụ iwhe ọwhu l’adụa mu ree, bẹ kwa iya bụ l’e -kfude iya ekfu, bẹ l’ọotoo bụkwaa mbẹdua l’anọje eme iwhe ono, dụ mu ẹji ono. Iwhe l’eme iya nụ bẹ bụ iwhe-dụ-ẹji ono, buwa mu ebu l’ẹhu.

²¹Ọo ya bụ, mu shiwaro nno marụ l’ọo waa g’iwhe mgboko dụ; l’ọo nteke mu l’eme tẹ mu mee iwhe dụ ree, ya abụleruwho ẹjo iya l’agbabajẹ mu l’ẹka. ²²L’ime onwo nke mu bẹ iwu nke Chileke l’akwatajẹkwa atsọ mu ụtso l’obu. ²³Ọle mu whụru iwu ọdo, dụkwaro iche, l’anọje achọ ụzo l’ẹhu mu. Iwu onona bẹ yẹle iwu ọwhu dụ mu ree l’uche who l’anọje akpa ẹnya. Iwu onona, dụ iche who l’atụje mu mkpọro kpụru nụ iwhe-dụ-ẹji, bụ ọwhu bu ebu l’ẹhu mu atụru mu iwu. ²⁴Nshọbukwaa mu nshọ! Alakwaa mu. ?O zhia onye bẹ l’a-dzọ mu l’ọnodu ọwa, mu nọ ntaa-ee? Ntaa bẹ iwhe swiru mu nụ bụakwa anwụhu. ²⁵Mu l’ekele Chileke ekele. Mu shi l’ẹka Jisọsu Kuráyisutu bụ Onye-nwe-anyi, bụ iya dzọru mu l’ọnodu ono ekele iya. Ọo ya bụ lẹ mbẹdua l’onwomu gudewaa uche mu kwe lẹ mu l’a-nọje eme iwhe iwu ono, shi l’ẹka Chileke sụru t’e mee. Obenu l’obu ẹgube madzụ ono, mu shi bụru nteke mu shi anọje eme ejo-iwhe l’agụgbabe mu, l’anọje enwu mu eye tẹ mu meje iwhe iwu nke iwhe-dụ-ẹji sụru t’e mejee.

Ume, l’anụ ndzụ ọwhuu

¹Ọo ya bụ lẹ ntaa bẹ l’ọoto dụhedua ikpe, Chileke bya l’a-nmakwadụ ndu whẹ lẹ Kuráyisutu Jisọsu tụgbaru bụru nnanụ. ²O noo l’iwu nke Ume Chileke l’atụru mu ntaa bẹ bụ ike, l’eshije l’ẹka Kuráyisutu Jisọsu duru madzụ bahụ l’ụzo ndzụ. Ọo ike ono bẹ tọfuru mu l’ike nke iwu ono, bụ iya l’eshije l’iwhe-dụ-ẹji duru madzụ ye l’ọnwu. ³Iwhe iwu ono l’ẹte adụje ike mee nkele ọo lẹ madzụ ta adụjedu ike mee iwhe iwu kfuru, bẹ Chileke mekotawaru. O yewaru Nwa iya gẹdegede, ọ bya abụru madzụ, nweru anụ-ẹhu, iwhe-dụ-ẹji l’aanọje eme tẹ ya kpata iya ụzo l’ẹhu g’ọo ẹhu nke anyi. Nwa iya ono bya egude onwiya gbaa ẹja ọha, safụ anyi iwhe-dụ-ẹji, anyi meru; shiwaro nno mebyia ike nke iwhe-dụ-ẹji. Chileke shi l’ẹhu ono, Kuráyisutu nweru ono nma iwhe-dụ-ẹji ikpe. ⁴Iwhe Chileke kwoberu mee iwhe ono bụ nggẹ anyi dụ ike mekota iwhe ono, kfụru nhamụnha ono, iwu sụru t’e mee. O noo lẹ ntaa bẹ bụwaa Ume Chileke bẹ l’edu anyi lẹ ndzụ anyi, ọ tọ bụhedu ẹgube madzụ ono, anyi shi bụru nteke anyi shi anọje eme ejo-iwhe l’agụ anyi bẹ l’edu anyi. ⁵Ndu l’eme iwhe ẹgube madzụ ono, whẹ shi bụru sụru tẹ whẹ mee, bẹ bụlewho gẹ whẹ l’e-me mee iwhe dụ whẹ ree bẹ bụ iwhe whẹ dụ l’ọzo iya. Ndu ọwhu l’emekwanu iwhe Ume Chileke sụru tẹ whẹ mee, bụru gẹ whẹ l’e-me mee iwhe dụ Chileke ree bẹ whẹ l’anọje eseba. ⁶L’anọ ese anya t’e mejee iwhe dụ Ume Chileke ree, bẹ bụkwa ndzụ bụru ẹhu-guu. Ọle ọno l’ọzo anọ eme iwhe l’agụ ẹgube madzụ, anyi shi bụru nteke anyi shi anọje eme ejo-iwhe l’agụ anyi, bẹ bụ anwụhu bụ urwu, l’eeritaje iya. ⁷Ọ bụru iwhe ono bẹ meru, onye nọlewho l’ọzo anọ eme iwhe l’agụ ẹgube obu iya ono bụru ọhogu Chileke. O to mejedu iwhe iwu Chileke kfuru, mbụ tọ hẹkwa l’onye ono l’a-dụ ike eme iya ememe owhu. ⁸Ndu ono, l’emeje iwhe l’agụgbabe whẹ ta afụkwa mee iwhe dụ Chileke ree.

⁹Ọle unubẹdua te emejedu uche unu. Ọ waa iwhe Ume-Dụ-Nsọ l’ekfu bẹ unu l’eme, mbụkwa m’ọ -bụruwho lẹ Ume nke Chileke buwhoo unu ebubu l’ẹhu. Iwhe bụ onye l’ete enwee Ume ono, Kuráyisutu l’anụje ono l’ẹhu iya, ta abụkwa onye nkiya. ¹⁰A makwarụ l’unu l’a-nwụhu, nkele ọo l’unu meswewaru. Ọle ọ -bụru lẹ Ume nke Kuráyisutu bẹ bua unu ebubu l’ẹhu bẹ Ume ono bụakwa ndzụ, nke l’ọo lẹ Chileke gụwaru unu lẹ ndu dụ chịriri. ¹¹Nteke ọ -bụ lẹ Ume Chileke ono, meru tẹ Jisọsu shi l’ọnwu teta, nọdu ndzụ bu l’ime unu, ọo ya bụ lẹ yẹbedua, meru tẹ Kuráyisutu Jisọsu ono shi l’ọnwu teta nọdu ndzụ l’e-mekwawho t’ẹhu unu ono, bụ ọwhu l’a-nwụhu anwụhu nọdu ndzụ. Chileke l’e-shi l’ẹka Ume-Dụ-Nsọ ono bu unu l’ẹhu mee iwhe ono.

¹²Ọo ya bụ ụnwunna mu, o nweru iwhe gbarụ anyi l’ememe. Ọle iwhe ono, gbarụ anyi l’ememe ta abụkwa t’anyi mejee iwhe l’agụ ẹgube obu ono, anyi shi nweru who. ¹³Lẹ nteke unu l’eme iwhe shigee l’uche-obu unu bẹ unu l’a-nwụhukwa anwụhu. O bewho lẹ nteke unu shi l’ẹka Ume-Dụ-Nsọ kpapyaa umere ono, shi l’uche unu ono ishi; t’ọ bụru iwhe nwụhuru anwụhu, ọo ya bụ unu anọdu ndzụ. ¹⁴L’ọ kwa iwhe bụ ndu lile, kweru tẹ Ume Chileke bụru onye l’a-nọ edu whẹ nụ bụ ụnwu Chileke. ¹⁵Lẹ Ume-Dụ-Nsọ, Chileke nụru unu ta abụkwa Ume, l’e-me t’unu bụru ohu l’iwhu Chileke, ọdua l’ọo t’unu bya atsụlahaa egvu ọdo. Iwhe Ume ono l’emejechia bụ l’oomeje unu t’unu bụru ụnwu Chileke. Eshi-ọwhu Ume ono bu anyi ebubu l’ẹhu, bẹ anyi l’ekuje Chileke: “Nna! Nna!” ¹⁶Ọo Ume Chileke ono bẹ l’emeje t’o doo anyi ẹnya l’obu anyi lẹ ntaa bẹ anyi bụwaa ụnwu Chileke. ¹⁷Ọo ya bụ l’ọ -bụru l’anyi bụwaa ụnwu iya, ọo ya bẹ bụ l’anyi bụwaa ndu Chileke l’a-nụ iwhe o kweru ụnwu iya ụkwa iya. Ọo-nụ anyi iwhe ono, ọ nụwaru Kuráyisutu. Nkele ọ bụru l’anyi lẹ Kuráyisutu gba mgba eje iwhe-ọtsulanu bẹ Chileke l’ee-megekwaa mee t’anyi gbarụ mgba l’ọdu-biribiri nke Kuráyisutu.

Ọdu-biribiri ọwhu dụ l’iwhu

¹⁸Iwhe doru mu ẹnya bụ l’iwhe-ọtsulanu ọwaa, anyi l’eje ntaa ta asụkwanu m’ọo gẹ l’ee-woru iya tụru yeru ọdu-biribiri, Chileke l’e-megee dobe anyi. ¹⁹L’iwhe lile, Chileke meru eme bẹ l’ọonma anmanma l’ẹhu tẹ whẹ whụ nteke Chileke l’e-goshi ụnwu iya ọdu-biribiri ono. ²⁰Iwhe meru iya bụkwaru l’iwhe lile ono, Chileke meru eme b’ọ tụru ọnu t’ọ tụko bụru iwhe larụ l’iyi. Ọ tọ lẹkwaa l’ọo iwhe lile, Chileke meru ememe meru iwhe-dụ-ẹji l’onwiya, ọ kwa iwhe tso ikpe, Chileke nmarụ madzụ lẹ madzụ mesweru. Ọle Chileke mekwaruwho t’iwhe lile ono, o meru eme ono leje ẹnya, ²¹l’ujiku lanụ bẹ ya l’a-gbuwhu ọnu ono, ya tụru iya sụ t’o rekashihu. Ya abya emee nteke ono t’iwhe lile ba abụhe ohu iwhe-dụ-ẹji, t’ọ bahụ-chia l’ọdu-biribiri nke ụnwu yẹbe Chileke. ²²Iwhe anyi marụ bụ l’iwhe lile, Chileke meru eme bẹ l’atsụkaa ude iwhe-ọtsulanu g’ọo nwanyị, ime l’eme mbụkwa byeye nta-a. ²³Ọle ọ tọ bụlekwaa iwhe Chileke meru eme nwẹkiya. Anyịbedua l’onwanyi bụ ndu nweru Ume Chileke l’ime onwanyị, mbụ Ume, Chileke yeru anyi l’ẹhu gude egoshi lẹ ya l’ee-megee meeru anyi iwhe ono, o kweru anyi ụkwa iya; anyịbedua l’atsụkwawho ude l’ime onwanyị, g’anyi l’elekwawho ẹnya lẹ Chileke l’e-goshi lẹ ya natawaru anyi t’anyi bụru ụnwu iya, bụ iya bụ nteke Chileke l’a-gbata ẹhu anyi l’owhu. ²⁴Chileke dzọtawaru anyi, ọle ọo ndzọta ono bẹ anyi l’elekwadu ẹnya nteke l’oo-dzu oke. Nggẹ l’ọo iwhe l’iwhe ono, anyi l’ele ẹnya iya rwubewaru anyi ẹka, m’ọ tọ dụhekwa iwhe anyi gẹge asụ l’o noo iwhe anyi l’ele ẹnya iya. ?Ọo onye nọduje elewhe ẹnya iwhe o gbee natawaa? ²⁵Nteke bụ l’anyi tẹke anatadụa iwhe ono, anyi l’ele ẹnya iya, ọo ya bụ anyi anmẹe anmẹe leje ẹnya iya.

²⁶O nokwawho gẹ Ume Chileke l’anọje eyeru anyi ẹka, nkele ike ta adụdu anyi nke ọta-nshi; ebebe tọ hẹnu m’ọo l’anyi marụ gẹ l’eekfuje nụ Chileke lẹge ọ gbarụ t’anyi kfuje nụ iya. Ọo ya bụ l’ọo Ume Chileke l’onwiya l’egudeje ude ọwhu bụlewho yẹbedua marụ iwhe l’ookfu ekfu anụru anyi Chileke. ²⁷Ọo Chileke ono, bụ yẹbedua l’enyoje obu madzụ bẹ mawarụ iwhe bụ uche nke Ume-Dụ-Nsọ, o noo lẹ Ume-Dụ-Nsọ l’anọje ekfu anụ Chileke l’okfu ẹhu ụnwu Chileke lẹge ọ dụ Chileke ree.

²⁸Anyi marụ l’iwhe lile, l’anọje emekota l’ẹhu ndu yeru Chileke obu bẹ l’anọje emekota nke ọwhu l’ọo-dụru whẹ lẹ ree, mbụ ndu lile ono, Chileke kuru lẹge ọ tụberu. ²⁹Ishi iya bụru lẹ Chileke bẹ mahawarụ ndu ọwhu bụ ndu nkiya tẹmenu mgboko-o dụ, mbụ ọ họtahawaa whẹ tẹ whẹ bụru ndu l’a-dụ gẹ Nwa iya dụ, tẹ Nwa iya ono bụru ọgurenya whẹ m’a gụdekwanu ụnwunna iya l’owhu. ³⁰Ọo ndu Chileke họtawaru b’o kuru. Ọ bụru ndu ono, o kuru b’ọ gụru lẹ ndu dụ chịriri. Ọ bụru ndu ono, ọ gụru lẹ ndu dụ chịriri ono b’o dobewaru l’ọdu-biribiri iya.

Ọ tọ dụdu iwhe l’akpọshi tẹ Kuráyisutu be eye anyi obu

³¹?Anyi l’e-yezhia ọnu oye agha l’iwhe ono ntaa? Ọ -bụru lẹ Chileke nọdu swiru anyi, ?ọo onye fụru ụka mekata anyi? ³²Chileke ta alọ-whukwa Nwa iya azụ. O dukwaru iya ye t’ọ bya anwụchiaru anyi g’anyi ha ọnwu. Eshi-ọwhu Chileke shi nno nụ anyi Nwa iya, ?o zhia ẹgube iwhe gụnu bẹ l’ooto shidu Nwa iya ono l’ẹka nụ anyi ẹwoma? ³³?Ndẹe onye ha nke asụ lẹ ya l’eku ndu ono, Chileke họtaru ikpe? Ọ tọ dụkwa. Gẹ Chileke ọbu l’onwiya gbẹ mewaa t’ikpe ba anmahẹ whẹ. ³⁴?Ọo onye ha nke ọonma whẹ ikpe? Ọ tọ dụkwa. O noo lẹ Kuráyisutu Jisọsu l’onwiya bẹ bụ onye kwoberu iswi ẹhu whẹ nwụhu. Ọ tọ bụlekwaa ono kpụ; ọwhu kakọtanu bụkwa l’o shi l’ọnwu teta nọdu ndzụ, je anọdu l’ẹka-ụtara Chileke ekfu anụru anyi Chileke. ³⁵?Ọ dụ-zhia iwhe ha nke akpọshi tẹ Kuráyisutu be eyehe anyi obu? ?Ọo iwhe-ọtsulanu ha nke akpọshi iya. ?Tọo oke mkpa, ?ọo mkpamẹhu, ?tọo mkpẹgu, ?tọo ba awhụ iwhe weru l’ukfu, ?tọo iwhe ọlo ishi onwonye alọlo, ?tọo l’e gburu anyi lẹ mma ha nke ememe iya. ³⁶Ọ dụkwa-a g’ọo iwhe e deru l’ẹkwo Okfu Chileke sụ:

“Ọo l’iswi ẹhu ghu bẹ ọnwu

l’anọje eme t’iya gbua anyi mbọku-mbọku.

Aanọje eme anyi g’ọo atụru, a chịtaru eje egbushi.”

³⁷Ọ tọ dụdu iwhe fụru ọkposhi tẹ Kuráyisutu be eyehe anyi obu. O noo l’iwhe lile ono l’e-mekota, ọle anyi l’eshije l’ẹka onye ono, yeru anyi obu kakọta iya ike, mee ya eriri. ³⁸L’ọwhu ka mu odo ẹnya bụ l’ọ tọ dụdu iwhe l’a-dụ ike akpọshi t’o bo yehe anyi obu, o yeru anyi; anwụhu ta afụkwa kpọshia ya, ndzụ ta afụ kpọshia ya, ndu ojozhi-imigwe mẹe ndu l’ekfu iwhe l’aanụ l’imigwe ta afụkwa iya, tọ dụ iwhe dụ nta-a, ọdua l’ọo ọwhu l’e-megee dụ nụ fụru kpọshia ya, tọ dụ ike fụru iya nụ. ³⁹Igwe ta afụkwa iya, alị ta afụ iya. Ọ tọ dụdu iwhe bụ iwhe Chileke meru eme, fụru gẹ l’ọo-nafụ anyi oye obu ono, Chileke shi l’ẹka Onye-nwe-anyi Kuráyisutu Jisọsu ye anyi.

Chileke lẹ ndu ọ họtaru

¹Iwhe mu l’ekfu bẹ bụkwa ọkpobe-okfu. Mu bụ onye nke Kuráyisutu, ọ tọ kwa ejire bẹ mu l’adzụ. Ume-Dụ-Nsọ bu mu ebubu l’ime obu, l’ọonoje eme tẹ obu mu marwetaje iwhe gbarụ iya nụ. Ọ bụru obu mu ono meru t’o doo mu ẹnya lẹ mu ta adzụdu ejire. ²Áwhụ l’ejije mu obu, tọ dụ nteke l’ọoto nọje atsụ mu l’ẹhu, nke ọwhu l’oorwuje mu l’anụ ojii, ³mẹ mu nyata ndu nke mu, ndu mu lẹ whẹ bụ mmee lanụ. Ọoduje mu nke t’a sụ lẹ mu bụ onye Chileke tụru ọnu tẹ mu lẹ Kuráyisutu ba atụgbahe, m’ọ -bụru l’ọ noo iwhe l’a-dzọ whẹ. ⁴Ọo whẹ bụ ụnwu Ízurẹlu, ọ bụru whẹ bẹ Chileke họtaru tẹ whẹ bụru ụnwu iya. Ọ bụru whẹ b’o goshiru ọdu-biribiri iya. Ọo whẹ b’o kweshiru ụkwa iwhe ya l’e-meru whẹ tukobe l’ọgbandzu whẹ l’iya ono, ọ bụkwaru whẹ whọ b’ọ tụru iwu nụ. Ọo whẹ b’o goshiru gẹ whẹ l’a-bajẹru iya ẹja, ọ bụkwaru whẹ whọ b’ọ nụru iwhe o kweshiru whẹ ụkwa iya. ⁵Whẹ shi l’ẹpa ochechochee anyi whẹ, tẹmenu Kuráyisutu l’onwiya bụru eri whẹ m’a -bya l’abụbu ọ bụ madzụ. T’e tuje Chileke ono kangokotaru iwhe lile ẹwha jeye lẹ tututu-mịmimi. O noo g’ọ dụ.

⁶Sụa, iwhe mu l’ekfu ta abụkwa woo, l’iwhe ono, Chileke kfuru nno bẹ bụwaa iwhe barụ l’alị, o noo l’ọ tọ bụgbabekwaro iwhe shi lẹ Ízurẹlu bụ ọkpobe Ízurẹlu. ⁷Tọ bụ gẹ whẹ ha bụkota ọkpobe ụnwu Ébirihamu, nke l’ọo lẹ whẹ shi l’ẹpa iya. L’iwhe Chileke kfuru Ébirihamu bẹ bụkwa l’ọ sụru iya: “Ọ kwa ndu shi l’eri Áyiziku bẹ bụ ndu l’a-bụ ụnwu ghu kpụ.” ⁸Iwhe iwhe ono l’egoshi bụ l’ọ tọ bụdu iwhe bụ ndu, a nwụru anwụnwu mmaanụ bẹ bụ ụnwu Chileke. Ọo ndu Chileke kweru Ébirihamu ụkwa l’ọo-nwụta bẹ bụ ndu, l’aagụ eye l’ọkpobe ụnwu Ébirihamu. ⁹Lẹge Chileke gude kweta Ébirihamu ụkwa iwhe ono bụ l’ọ sụru iya: “Ẹgube ntaa akele bẹ mu l’a-dawhu azụ, Séra anwụta nwata-nwoke.”

¹⁰Tọ bụlekwaa l’ọo ono kpụ. Ọ kwawhọ nno bụ g’ọ dụ l’ẹhu ụnwu Ribẹka whẹ ẹbo ndono. Whẹ shi lẹ nna lanụ, bụ iya bụ Áyiziku, bụ nna anyi ono, shi lẹ ndụ-ichee. ¹¹Ọle tẹmenu t’a nwụa whẹ, bẹ Chileke zhihawaru Ribẹka ozhi ẹhu ụnwegirima ono; mbụ nteke l’ọotoko duzhiduaro iwhe ụnwegirima ono dzuwaru ememe ilile; ọwhu l’a-bụkwa lẹ whẹ meru ree, m’ọbu lẹ whẹ meru ẹji. Ọ kwanụru gẹ l’ee-shi tẹ ahọta ono, Chileke họtaru onye lanụ bụleruwho lẹge ọ tụbehawaru iya l’uche iya, ¹²bẹ meru iwhe ọ sụru Ribẹka: “Onye nke ọgurenya l’ụnwu ghu ono l’a-nọje ejeru nke nwata ozhi.” Ọo ya bụ lẹ ndu ọwhu Chileke họtaru b’ọ họtaru lẹge ọ tụberu iya l’uche iya. Iwhe o kwoberu họta whẹ ta abụkwa woo: l’ọo nke ree, whẹ metaru l’onwowhe. ¹³Ọo ya bụ iwhe ọbu, e deru l’ẹkwo Okfu Chileke lẹ Chileke sụru: “Jékọpu bẹ mu yeru obu, ọwhube Isọ dụkwanu mu ashị.”

¹⁴?Anyi l’e-yezhia ọnu oye agha ntaa. ?Anyi l’a-sụ lẹ Chileke te emedu iwhe dụ ree? Anyi te ekfukwa nno ilile. ¹⁵O noo l’ọ sụru Mósisu: “Ọo onye ọ dụ mu nke tẹ mu meeru eze iwhe-ọma bẹ mu l’e-meru iya. Onye ọ dụ mu nke tẹ mu whụaru imiko bẹ mu l’a-whụaru iya.” ¹⁶Ọo ya bụ l’ọ lẹwho obu-imiko bẹ Chileke l’egudeje ahọta madzụ. Ọ tọ bụkwa uche madzụ, ọdua l’ọo iwhe onye ọbu metaru l’ike nke ẹka iya bẹ l’ọogu eye. ¹⁷O noo l’ẹkwo Okfu Chileke kfuru sụ lẹ Chileke sụru Fero: “Iwhe mu kwoberu mee ghu eze, ta akwa iwhe ọdo, gbahaa tẹ mu gude ghu goshi g’ike mu habe, mẹfua nke ọwhu ndiwhe l’owhu l’e-shi nno marụ onye mu bụ.” ¹⁸Ọo ya bụ lẹ Chileke l’emejeru madzụ gẹ yẹbe Chileke tụberu l’uche iya. O nweru ndu l’ọowhujeru imiko, o nweru ndu ọwhu l’ọokpo-chije obu whẹ.

Ẹhu-eghughu mẹe obu-imiko nke Chileke

¹⁹A makwarụ-a l’onye lanụ l’ime unu l’a-gbashi jị mu sụ mu: “Ọ -bụru l’o noo g’ọ dụ ndono, ?ọ nwụhunua agha o gude Chileke l’anọjekwawho ata madzụ ụta? ?Chileke -tụbewaa l’ọo waa iwhe l’oo-me, ?onye hakwadu nke egboberu iya?” ²⁰Ọle gụbe nwa madzụ ọwhu l’a-sụ l’iwhe Chileke meru ta adụdu ree, ?ị bụ gụnu? Ite, a kpụru l’ụrwa ta ajịjekwa onye ọbu, kpụru iya sụ iya: “Ọ nwụru agha meru ị kpụa mu g’ị kpụru mu-a?” ²¹?Tọ dụ ọ-kpụ-ite bẹ marụ gẹ dụ iya mma, l’oo-me ụrwa, e gude akpụ ite. Mbụ, ?ọ -sọ iya lẹ ya l’e-gude ọga ụrwa lanụ kpụa ite labọ tẹ nnanụ bụru ite, gheru eghe, l’eeyeje iwhe a zụru oke aswa, ọwhu abụru ite l’ee-gudeje eme iwhe ọdo ?tọo kpụdu iya?

²²?L’ị sụkwanu aghaa, m’ọ -bụru l’ọo Chileke l’eme ẹgube iwhe ono? O nweru ndu, Chileke meru tẹ ya gude goshi oke-ẹhu-eghughu iya mẹe g’ike nkiya beru. A makwarụ-a lẹ ndu ono ghawaru g’o gogo gudewaa oke-ẹhu-eghughu iya mebyia whẹ, ọle ọotakwaduru whẹ nshi shii. ²³O nwekwanuru ndu ọwhu Chileke gude eme tẹ ya goshi l’ọdu-biribiri nkiya te enwedu ẹtu. Ndu onona b’ọ whụru imiko, bụ whẹ bụ ndu ono, ọ tụbehawaru lẹ yẹle whẹ l’a-gbarụ mgba l’ọdu-biribiri nkiya ono. ²⁴Mbụ ọ bụkwaru anyịbedua bụ ndu ọwhu ọbu, ọ whụru imiko ọbu. Ọ tọ bụlekwaa lẹ ndu Ju kpụ b’o shi họta anyi, o shikwawho l’echilabọ ndu ọha ọdo, l’ẹte abụa ndu Ju họta anyi. ²⁵Ọ bụru iwhe ono b’o kfuru l’ẹkwo Hosíya sụ:

“Ndu ono, l’eshia bụru ndibe mu

bẹ mu l’ee-bekochaa kua ‘ndibe mu.’

Mba ono, mu l’eshia ye obu,

bẹ mu l’ee-bekochaa kua ‘mba, mu yeru obu.’

²⁶Tẹmenu ọ bụru lẹ nhamụnha ẹka ono, e shi sụ whẹ

l’unu ta abụdu ndibe mụbe Chileke,

bẹ l’aa-nọdu kua whẹ ụnwu

Chileke ọwhu nọ ndzụ.”

²⁷Tẹmenu Ayizáya onye nkfuchiru Chileke chikwaawho okfu ẹhu ndu Ízurẹlu lẹ mkpu sụ: “Ụnwu Ízurẹlu hahụkwadu m’e -beru whẹ ha g’ọo ẹja, dụ l’alị b’ọ kwawhọ nwa ndu ọwhu l’ẹte abaa nwishi bẹ l’aa-dzọfuta. ²⁸O noo nkele Onye-Nwe-Ọha bẹ l’e-mekota iwhe lile o kfuru ndiwhe. Oo-mekota iya ẹgwegwa, mee ya ree-ree-ree lẹge l’ọo-dụ.” ²⁹Ọ dụkwawho g’ọo iwhe ono, Ayizáya kfuhawaruro tẹmenu o mee sụ: “Ọ tọ bụ-zhia lẹ Onye-Nwe-Ọha, bụ Onye-ishi-igwe-ọgu te ekwedu t’eri anyi tọhu mẹ anyi agvụakwa g’ọo Sódomu, mbụ mẹ ya emee anyi iwhe o meru Gọmóra.”

Ụkfu l’akpọpyashi ndu Ízurẹlu ọkpa

³⁰?Anyi l’e-yezhia ọnu oye agha ntaa? Ẹka anyi l’a-sụbe iya ishi bụ agha; lẹ ndu ono l’ẹte abụa ndu Ju l’ete eshia kebe ẹhu eseba tẹ Chileke gụa whẹ lẹ ndu dụ chịriri bẹ Chileke gụakwaru lẹ ndu dụ chịriri l’iwhu iya, nkele ọo lẹ whẹ woru onwowhe ye Kuráyisutu l’ẹka. ³¹Ọle ọwhube ndu Ízurẹlu, bụ ndu keberu ẹhu eme iwhe iwu kfuru, nke ọwhu Chileke l’a-gụ whẹ lẹ ndu dụ chịriri, ta adụkwa ike mekota iya. ³²?Ọ bụkwanuru gụnu bẹ kparụ iya? Iwhe kparụ iya nụ bụru lẹ whẹ te esebadu tẹ Chileke kwobe lẹ whẹ woru onwowhe ye iya l’ẹka gụa whẹ lẹ ndu dụ chịriri. Whẹ gbee gudechia iwhe whẹ gude ike nke ẹka whẹ meta eseba. Whẹ shi nno vukota ẹwhuru ono, ọ bụru ụkfu akpọpyashi whẹ ọkpa. ³³Ọo ya bụ iwhe ono, e deru l’ẹkwo Okfu Chileke lẹ Chileke sụru:

“Unu leedawho! Mu wowaru ẹwhuru,

l’a-nọ akpọpyashi ndiwhe ọkpa tọgbo lẹ Záyọnu,

mbụ eze-ẹwhuru, whẹ l’e-vukota daa iko.

Ọle onye woru onwiya ye l’ẹka onye ono,

bụ iya bụ ẹwhuru ono ta

abyakwa l’akwa iya nzhimanụ.”

¹Ụnwunna mu, iwhe dụ mu ree l’obu, bya abụru iya bụ iwhe mu l’anọje ekfu anụ Chileke t’o meeru iya ndu alị mu ono, bụ ndu Ju bụ: t’ọ dzọfuta whẹ. ²L’iwhe ọwhu mu marwetaru bụ l’ọ kwatarụ agụ whẹ ọkpobe agụgu tẹ whẹ meje uche Chileke. O noo bẹ mu kabẹkwa agbarụ whẹ ọdzori iya. Ọle gẹ whẹ gude eme iya bẹ whẹ l’ete egudedua ọkpobe mmamagụ eme iya. ³Eshi-ọwhu whẹ l’ẹte amaa gẹ Chileke l’eshije mee madzụ onye dụ chịriri, bẹ iwhe whẹ l’achọ bụ tẹ whẹ tsoru ụzo nke ẹka whẹ meta iwhe Chileke l’a-gụta whẹ lẹ ndu dụ chịriri. Whẹ shigee nno jịka anọje eme iwhe bụ uche Chileke. ⁴Lẹ Kuráyisutu bẹ meekwaru t’iwu ba abụhe ụzo, Chileke shi agụ madzụ l’onye dụ chịriri, ọo ya bụ t’iwhe bụkota ndu wochiaru onwowhe ye Kuráyisutu l’ẹka bụru ndu Chileke l’a-gụ lẹ ndu dụ chịriri.

Chileke l’a-dzọfuta onye kweru nke Kuráyisutu

⁵Ọ wakwa gẹ Mósisu deru lẹ nke ndu l’eme tẹ Chileke gụa whẹ lẹ ndu dụ chịriri mẹ whẹ mee iwhe iwu kfuru ndọwa; “Ọ sụru l’onye l’emekotaje iwhe iwu kfuru l’e-gudekwa iya who nọdu ndzụ.” ⁶Ọle ọwaa iwhe e deru l’ẹkwo Okfu Chileke l’ọo ụzo Chileke l’e-shi gụa ndu woru onwowhe ye Kuráyisutu l’ẹka lẹ ndu dụ chịriri l’iwhu yẹbe Chileke ono. E deru sụ: “T’ọ bọ dụkwa nteke l’ii-je ọori sụ: ?Ọo onye l’a-dụ ike laa l’imigwe, mbụ je ekuzeta Kuráyisutu?” ⁷Tọ dụhunu nteke l’ịiri sụ: “Ọo onye l’e-nyizeta nyiba l’alị-maa, mbụ shi l’alị-maa kufuta Kuráyisutu?” ⁸Sụ, ?ọo gụnu b’e deru? Iwhe e deru bụ l’a sụru agha: “Okfu Chileke nọ ghu ntse. Ọ bụru iya bụ iwhe ị kpụ l’ọnu, ọ bụkwaru iya whọ bẹ l’ịi-nọje arị l’obu ghu.” Ọo ya bẹ bụ ozhi-ọma ọbu, anyi l’ezhi ọbu, bụ iya bụ l’onye Chileke natarụ bẹ bụ onye woru onwiya ye Kuráyisutu l’ẹka. ⁹Nteke ọ -bụ l’i gude ọnu ghu kfua ya kfushia ya ike l’ẹka ndu ọdo nọ l’ọo Kuráyisutu bụ Onye-Nwe-Ọha ọbu; gude obu ghu g’ọ ha kweta lẹ Chileke meru iya, o shi l’ọnwu teta nọdu ndzụ, bẹ Jisọsu ọbu l’a-dzọfutakwa ghu. ¹⁰O noo nkele onye gude obu iya g’ọ ha woru onwiya ye Kuráyisutu l’ẹka, bẹ Chileke l’a-gụ onye ono l’onye dụ chịriri, tẹmenu onye gude ọnu iya kfua ya l’ẹka ndu ọdo nọ bẹ Kuráyisutu l’a-dzọfutakwawho. ¹¹O noo l’e dekwaru l’ẹkwo Okfu Chileke sụ: “Onye bụ onye woru onwiya ye iya l’ẹka ta abyakwa l’akwa iya nzhimanụ.” ¹²Nke t’a bya abọkahude madzụ ẹbo ta adụhedu. L’onye ọwhu bụ onye Ju, woo: onye ọwhu bụru onye Girísu ta adụhekwa, o noo l’ọ kwawhọ Onye-Nwe-Ọha lanụ ono bẹ bụ Onye-Nwe-whẹ-nụ gẹ whẹ ha. Iwhe bụkota ndu l’ekfu anụ iya bẹ l’oomejeru eze-iwhe-ọma, parụ ẹka apaa. ¹³O noo l’e dekwaru iya whọ sụ: “Iwhe bụ onye l’abarụ Onye-Nwe-Ọha ẹja bẹ l’ọo-dzọfuta.”

¹⁴?Ndẹhunu gẹ whẹ l’eshikwanu abarụ iya ẹja mẹ whẹ evuada ụzo woru onwowhe ye iya l’ẹka? ?Tẹ ndẹkwanu gẹ whẹ l’e-me woru onwowhe ye iya l’ẹka mẹ whẹ tẹke anụbua ẹka l’eekfu okfu iya? ?Tẹ ndẹkwanu gẹ whẹ l’e-shi nụa okfu iya ọbu m’ọ -bụru l’ọ tọ dụdu ndu l’ezhi ozhi-ọma ono? ¹⁵?Ndẹkwanu gẹ ndu ozhi-ọma l’e-shi je ezhilahaa ozhi-ọma m’ọ -bụdua l’e zhiru whẹ tẹ whẹ je ezhia ya? Ọ kwa iya bẹ bụ iwhe meru iwhe e deru l’ẹkwo Okfu Chileke sụ: “G’ẹhu l’anọbukwaa atsọ whẹ lẹ nke ndu ono, l’ezhi ozhi-ọma ono.” ¹⁶Ọle ọ tọ bụ-gekwa ndu lile, e zhiru ozhi-ọma ono gẹ whẹ ha bẹ kwetaru iya nụ. O noo lẹ Ayizáya kfukwaru sụ: “Onye-Nwe-Ọha, ?ọ hụnu onye bẹ kwetaru iwhe ọ nụru anyi l’ọnu?” ¹⁷Ọo ya bụ l’eworu onwonye ye l’ẹka Kuráyisutu shi l’ọnuta ozhi-ọma ono. Ozhi-ọma ono bụkwanuru ozhi-ọma, shi l’okfu nke Kuráyisutu.

¹⁸A bya l’ẹhu ndu Ízurẹlu, mu l’ajị sụ: “?Ọo anụnu bẹ whẹ l’ẹte anụdua ozhi-ọma ono tọo gụnu?” Waawakwa! Whẹ nụchachaaru iya-a, o noo l’iwhe e deru l’ẹkwo Okfu Chileke bẹ sụru:

“Ndu l’ezhi ozhi-ọma ono chiru okfu Chileke lẹ mkpu,

mbụ okfu whẹ ngakọta eliwhe mgburumgburu

jeye l’ẹka igwe beru alị beru.”

¹⁹Iwhe ọdo, mu l’ajị bụ: “?Ọ fụtaru l’ozhi-ọma ono te eshidu doo ndu Ízurẹlu ẹnya tọo gụnu?” Lẹ nke mbụ bụ lẹ Mósisu l’onwiya yewaru ọnu l’iwhe ono, mu jịru onoya l’ẹka o deru lẹ Chileke sụru agha:

“Mụbe Chileke l’e-gude mba, l’abụa Ọkpobe mba

meru okoowhoo ye unu l’ẹhu.

Mu egude mba, l’eme irogiri gude kpatsua unu iwe.”

²⁰Tẹmenu Ayizáya kabakwaa ya nụ okfushi ike, l’ọ tọgbokwaru iya l’ebedebe nteke ono, o deru sụ lẹ Chileke sụru:

“O gbekwanu bụru ndu l’ete

eshia achọ mụbe Chileke bẹ mu harụ, whẹ whụa mu.

Ọ bụru ndu l’ete eshia ajị ajị mu

bẹ mu goshiru onwomu.”

²¹Ọ byakwanụ l’okfu ẹhu nke ndu Ízurẹlu, o gbee sụ: “O to nwezhidua nteke mu l’ẹte amachịje ẹka cheberu ndu ono, jịkaru iwhe mu l’ekfu, kwefuru mu ike lẹ whẹ ta adawhudu azụ byakfuta mu.”

Chileke ta atụkokwa ndu Ízurẹlu gẹ whẹ ha jịkakota

¹Tẹ mu jịkwaa ajị ọdo: ?Ọo ajịka bẹ Chileke jịkawaru ndu nkiya? Tụswekwa! Ọ tọ jịkakwa whẹ. Lẹ mbẹdua l’onwomu bụkwa onye Ízurẹlu, mu shi l’ẹpa Ébirihamu, bụkwaruwho onye ọzo-ụlo Bénjaminu. ²Chileke ta ajịkakwa ndu nkiya, bụ ndu o vu ụzo họtahawaa. Unu ta amadụ iwhe e deru l’ẹkwo Okfu Chileke, mbụ lẹge Eláyija gude chia Chileke ichi ẹhu ndu Ízurẹlu. Ọ sụru Chileke: ³“Onye-Nwe-Ọha; ị whụwaru gẹ whẹ tụkoru ndu nkfuchiru ghu gbushigee, nwutsushia ẹnya-mgbẹja ghu, ọ bụwaru mbẹdua nwẹka mu bẹ whọduru nụ, whẹ l’emekwawho tẹ whẹ gbufua mu.” ⁴Ọle, ?unu marụ gẹ Chileke yeru iye ya ọnu? Ọ sụru iya: “Eláyija, ?tị madụ lẹ mu doberu iwhe ha g’ọo ụnu madzụ ugbo iri l’ẹsaa l’ụmadzu ụkporo ugbo iri, bụ ndu l’ẹte ewotabua ikpere whẹ byishiru Bálu lẹ whẹ l’abarụ iya ẹja?” ⁵Sụ, l’o nokwawho g’ọ dụ nta-a. O nwekwaru-a nwa ndu ọwhu Chileke gude eze-iwhe-ọma ono, l’oome harụ họta. ⁶Chileke gude eze-iwhe-ọma ono, l’oome họta whẹ. Ọ tọ bụkwa nke iwhe whẹ gude ike nke ẹka whẹ meta b’o kwoberu họta whẹ. Nggẹ l’ọo iwhe bụ l’ọo iwhe whẹ gude ike nke ẹka whẹ meta b’o kwoberu họta whẹ mẹ eze-iwhe-ọma ono, Chileke meru tẹge abụhekwa eze-iwhe-ọma.

⁷Sụa, ?ọo awe bẹ anyi l’a-kpochi okfu ono ishi nta-a? Ẹka anyi l’akpochi iya ishi bụ l’ọ tọ bụdu ndu Ízurẹlu l’owhu bẹ whụkotaru iwhe whẹ l’achọ. Ọlewho nwa ndu onona, Chileke họtaru bẹ iwhe whẹ l’achọ rwuberu ẹka. Ndu ọwhu gẹ whẹ ha bẹ Chileke meru nchị chishihu; kpochishia whẹ obu, ⁸bụ iya bụ iwhe ọbu, e deru l’ẹkwo Okfu Chileke sụ: “Ume, Chileke yeru whẹ l’ẹhu bẹ nmarụ whẹ nswe, mee whẹ tọ dụhe iwhe whẹ l’e-gudeje ẹnya whẹ whụa, tọ dụhe iwhe whẹ l’e-gudeje nchị whẹ nụa, mbụkwa byeye ntanụ-a, dụ ẹgube-ẹ.” ⁹Dévidi dekwaawho sụ:

“T’oge ono, whẹ l’eri bụkwaru

etse, l’ee-gude nmata whẹ gẹ l’aanmatajẹ ẹnu.

Ya abụkwaruwho ọnya, whẹ l’a-daba,

ya abụkwaruwho iwhe l’e-me tẹ whẹ daa,

t’a gwata whẹ ụgwo iwhe whẹ meru.

¹⁰T’ẹnya gbakwaa whẹ ọochi, t’ọ bọ dụ iwhe whẹ l’a-whụ.

Tẹ whẹ jetakwa iwhe-ọtsulanu họo akfụ jeyewaro ya.”

¹¹Mu byakwa ajịa ọdo sụ: Ndu Ízurẹlu ?whẹ kabẹ vukota iwhe nke ọwhu whẹ darwuru alị, whẹ ta adụhe ike gbalihu? Tụswekwa! Ọ tọ dụkwa nno. Ọo ọkpa ono, whẹ hasweru bẹ meru g’o gude Chileke wata anọ adzọfuta ndu ọwhu l’ẹte abụa ndu Ju, nggẹ e shi nno t’ọwhube ndu Ízurẹlu kolahaa okoowhoo. ¹²Ọo emeswe ono, ndu Ju mesweru meru g’o gude urwu kwata gbaarụ ndiwhe l’owhu. Iwhe ono, bụ iyi yia whẹ gbee bụru iwhe meru t’urwu kwata gbaarụ ndu l’ẹte abụa ndu Ju. Sụ mẹ urwu l’a-kwatakwa kabaanụ shii ọkpobe akaka mẹ ndu Ízurẹlu gẹ whẹ ha dawhu azụ lwakfuta Chileke.

Chileke l’a-dzọfutakwawho ndu l’ẹte abụa ndu Ju

¹³Ntaa bụkwa unubẹ ndu ọwhu l’ẹte abụa ndu Ju bẹ mu l’ekfu eyeru. Sụa, mu l’eme t’unu marụ lẹ Chileke mewaru tẹ mu bụru onye-ishi-ozhi, t’ọ bụru mbẹdua l’anọje ezhi ndu l’ẹte abụa ndu Ju ozhi-ọma ono. Eshi-ọwhu ọ dụ nno, bẹ ozhi ono, mu l’eje ono l’anọje eme mu t’ẹhu tsọ mu ụtso, ¹⁴nke ọwhu bụ Chileke -kwenu, mu egudeje iya eme ndu alị mu, bụ ndu Ju tẹ whẹ kojeru unu okoowhoo, nggẹ mu shi nno harụ whẹ dzọfuta. ¹⁵Nkele ọ kwa nteke whẹ jịkaru Chileke bẹ Chileke gbee mee tẹ yẹle ndiwhe dụ lẹ mma. Sụa, ?ọo gụnu l’e-mekwanu mẹ Chileke natalẹ whẹ whọ ọdo? Iwhe l’e-me bụ lẹ ndu nwụhuru anwụhu l’e-shi l’ọnwu teta nọdu ndzụ ọdo.

¹⁶Iwhe ọdo, unu l’a-ma bụ l’e -wotawaa iwhe mbụ, a wabatarụ l’ishi buredi woru nụ Chileke gude gbaarụ iya ẹja bẹ ishi buredi ono l’owhu bụkotaakwa nke Chileke. O nokwawho g’ọ dụ ndono l’oshi. Nteke bụ l’ọgbaragbu-oshi bụ nke Chileke bẹ ẹkali iya l’owhu bụkotakwawho nke Chileke. ¹⁷Sụa, lẹ ndu Ju bẹ dụkwa g’ọo oshi ólivu uwhu, a harụ ẹkali iya kwashịbota. Unubẹdua, l’ẹte abụa ndu Ju bẹ dụ g’ọo ẹkali ólivu ẹgu, e wotaru bya akakfụbe l’ẹka, a kwafụru ẹkali nke uwhu whọ; a kakfụbe iya, o teta nọdu ndzụ. Ntaa bẹ unu shiwaa l’ọgbaragbu ólivu nke uwhu whọ, amịtaje mini gude nọdu ndzụ. ¹⁸Ọo ya bụ t’unu be ejekwa ọsu l’ọ tọ dụdu iwhe ẹkali iya ọwhu, a kwashịru whọ bụ. Mu sụru: ?Ọo gụnu bẹ unu l’e-kwobe eku onwunu? Unu nyatakwa l’ọ tọ kwa unu sede ọgbaragbu-oshi ono, l’ọ chia ọgbaragbu-oshi ono bẹ sede unu.

¹⁹Ịi-gbẹenu sụ: “A kwafụwaru ẹkali oshi ono nke ọwhu l’aa-kakfụbe gụbedua.” ²⁰O noo bụkwaru ezhi-okfu. Ọle iwhe meru a kwashịa ya kwa lẹ whẹ te ekwedu woru onwowhe ye Kuráyisutu l’ẹka. A byakwanụ akakfụbe unubẹdua, unu kfushia ike nke l’ọo l’unu woru onwunu ye iya l’ẹka. Ọo ya bụ t’unu be egudekwa iya tsee etsetse. Unu kwabẹ-chikwaru onwunu ẹnya. ²¹Chileke ta ahakwa ndu Ju ono, bụ whẹ dụ g’ọo ọkpobe ẹkali oshi ono, ọwhu shi l’uwhu whọ nke ẹwoma. Ọo ya bụ, ọ -bụru l’ọ tọ hadụ whẹ ẹwoma, ?o chianu unubẹdua bẹ l’ọo-bya ahaa ẹwoma. ²²O nowaro iwhe unu l’e-gude whụa lẹ Chileke bụ odomodoo, unu awhụkwawho l’oomeje madzụ iwhe kpanganga. O meru ndu jịkaru iya nụ iwhe kpanganga. O mekwanuaru gụbedua odoo, mbụkwa m’ọ -bụru l’i -kweru nọpyabe l’odoo ọbu, o meru ghu, ọdumeka b’o kwafụjekwa ghu g’ọ kwafụru ndu ọwhu. ²³Nteke bụ lẹ ndu Ju ta ajịkagbuduru eze-iwhe-ọma nke Chileke bẹ Chileke l’e-wolekwaru whẹ-e dobewhu azụ l’ẹka whẹ shihawaa nọdu, o noo lẹ Chileke l’a-dụ ike wowhu whẹ azụ l’ọnodu mbụ whẹ ono. ²⁴Lewaro ya, unubẹ ndu-a l’ẹte abụa ndu Ju, dụ g’ọo ẹkali oshi ólivu ẹgu. A bya akwata unu l’ẹka ono woru je akakfụbe l’oshi ólivu nke uwhu whọ, mbụ ọ bụru iwhe e meru gẹ l’ete emejehawaa iwhe. Ọwhube ndu Ju dụkwanu g’ọo ẹkali ólivu uwhu. Ọo ya bụ l’ọo-kabakwaanụ Chileke ntse ewota ẹkali ono, o shi kwafụ whọ kakfụbe l’oshi, ẹkali oshi ono, shihawaa kakfụru.

Chileke l’a-dzọ ndu Ízurẹlu l’owhu

²⁵Ụnwunna mu, o nweru iwhe bụ ọkpobe-okfu, unu l’ẹtẹke amahaa, mu l’eme t’unu marụ nggẹ unu te ejeje ọri l’unu manụkaru iwhe. Iwhe unu l’a-ma bụ l’ọ tọ bụkwa gẹ ndu Ízurẹlu bụ ndu ejo obu ntaa bụ gẹ whẹ l’a-bụgbuwaru iya rọ jeyewaro. Nteke ejo obu whẹ ono l’a-nọ-be bụkwa nteke ndu l’ẹte abụa ndu Ju, Chileke họtaru l’a-tụkowaa dawhuchaa azụ lwakfuta iya. ²⁶Ọo ya bụ nteke ono, a tụko iwhe bụ Ízurẹlu l’owhu dzọo, bụ iya bụ iwhe e deru l’ẹkwo Okfu Chileke sụ:

“Onye Ndzọta l’e-shi lẹ Záyọnu bya.

Ọo-tụko ejo ememe, ụnwu

Jékọpu shi eme wofukota whẹ l’ẹhu.”

²⁷Chileke kfua sụ:

“Ọ wakwa ọgbandzu, l’e-shi mu l’ẹka ndọwa,

mu l’a-gụkotaru whẹ nvụ l’iwhe-dụ-ẹji, whẹ mekotaru.”

²⁸A -bya lẹ nke ozhi-ọma ono b’ọ gbẹkwaa bụru iwhe ekweru kweru unu lẹ whẹ bụ ọhogu Chileke, nkele whẹ jịkaru ozhi-ọma ono. Ọle, a -bya lẹ nke ahọta ono, Chileke họtaru ndu Ju bẹ whẹ bụkwa ndu Chileke yeru obu l’iswi ẹhu ndụ-ichee anyi whẹ. ²⁹Lẹ Chileke ta agbanwejekwa iwhe ọ rịwaru nke ememe l’ẹhu ndu, ọ họtaru tẹ whẹ bụru ndu nkiya, mbụ ndu ọ họtaru mewaru whẹ iwhe-ọma. ³⁰L’unubẹ ndu l’ẹte abụa ndu Ju shikwa bụru ndu l’ete ekweje eme iwhe Chileke kfuru, ọle ntaa bẹ Chileke whụru unu imiko, nkele ọo lẹ ndu Ju te ekwedu ome iwhe o kfuru. ³¹O nokwaa g’ọ dụ ndu Ju ndono. Ntaa bẹ whẹ l’ete ekwekwaa ome iwhe Chileke kfuru, nggẹ Chileke awhụaru whẹ imiko g’ọ whụru iya unubẹdua. ³²Ọo ya bụ lẹ Chileke harụ onyemonye tẹ whẹ be ekweshi ome iwhe ya kfuru nggẹ ya whụaru onyemonye imiko.

Ọ tọ dụdu onye makọtaru gẹ Chileke dụ-be biribiri

³³Ha! Gẹ Chileke dụ-be biribiri. Ọ tọ dụkwa onye marụ gẹ l’ọo-tụ ọnu ọkwa-ẹnya nkiya. Mmamagụ nkiya te enwe ẹtu. Ọ tọ dụkwa onye fụru gẹ l’ọo-ma iwhe Chileke tụberu; tọ dụ onye fụru gẹ ogoshi ụzo, Chileke l’eshije eme iwhe iya. ³⁴Ọ dụkwaa g’ọo iwhe okfu Chileke kfuru sụ:

“?O zhia onye marụ uche Onye-Nwe-Ọha?

?O zhia onye bẹ sụjeru iya l’ọ waa iwhe l’oo-me?

³⁵?O zhia onye nụjeru iya iwhe,

ọwhu l’abụ l’onye ọbu l’a-sụ iya

t’o jekwa akfụa ya ụgwo iwhe iya?”

³⁶Ọo ya meru iwhe lile. Ọ bụkwaru iya whọ bẹ iwhe lile shi l’ẹka iya dụ; ọ bụkwaru iya whọ bẹ iwhe lile dụ dụ-turu. T’ọja-ama bụru nke Chileke jeye lẹ tututu-mịmimi. O noo g’ọ dụ.

O jeru Chileke ozhi l’ọno ndzụ

¹Ọo ya bụ, ụnwunna mu, eshi-ọwhu Chileke l’awhụru anyi imiko ọwhu ha nno bẹ mu l’aryọkwa unu sụ, t’unu woru onwunu nụ Chileke ọkpobe anụnu. Unu bụru iwhe nọ ndzụ, unu gude gbaarụ Chileke ẹja, mbụ iwhe unu doberu Chileke nsọ, bụkwaruwho iwhe dụ Chileke ree. O noo iwhe bụ ọkpobe ọbaru Chileke ẹja ndono. Ọ bụru ono bụ iwhe rwuberu iya nụ. ²Unu be ekwehekwa t’a kwakọta unu ye t’unu meje lẹge ụnwu-eliwhe l’anọje eme. Iwhe unu l’e-mechia bụ t’unu haarụ Chileke onwunu t’ọ bụru iya, l’anọje agbanwe obu unu; t’uche unu bụru iwhe ọwhuu nke ọwhu unu l’a-dụje ike marụ iwhe bụ uche Chileke, bụ iya bụ iwhe dụ iya ree, bụru iwhe ọ natarụ, bụkwaruwho iwhe l’ẹte adụa ẹka ọrwu dụ iya.

³Iwhe mu kwoberu ekfuru unu iwhe-e, mu l’abya ekfukfu kwa lẹ Chileke bẹ mewaru mu eze-iwhe-ọma; mu l’ekfuru iya unu g’unu ha sụ, t’unu ba arịjekwa l’unu ha g’unu l’ahaa. Iwhe unu l’e-mejechia bụ t’unu dojee ẹnya ndo majẹru iwhe unu l’arị. Chileke bẹ nụakwaru onyenọnu lẹge unu ha oke iwhe-ọma nkiya, bụ iwhe-ọma, shikwanu l’ekwekwe, unu kweru nkiya. O noo iwhe l’e-goshije onyenọnu iwhe l’ọo-nọ arịru onwiya ndono. ⁴L’o nokwa g’ọ dụ l’ẹhu madzụ ndono, l’ogwẹhu lanụ l’enweje ibẹhu, ha l’igweligwe, whẹ atụko emekota iwhe dụ l’iche l’iche. ⁵O nokwawho g’anyi ha l’igweligwe, ọle anyi shiwa l’atụgba ono, anyi lẹ Kuráyisutu tụgbaru bya abụru ogwẹhu lanụ. Ntaa bẹ anyi dụ g’ọo ibẹka ẹhu dụ l’iche l’iche, ọwhu nọnu ya eme t’ibẹka iya nkiya dzua oke. ⁶Anyi nwegbaaru iwhe-ọma, Chileke meru nụ anyi l’ẹhu l’ẹhu, onyenọnu b’ọ nụleruwho iwhe-ọma ono lẹge eze-iwhe-ọma nke onye ọbu ha. Ntaa bụkwa t’anyi gudeje eze-iwhe-ọma ono mee iwhe lẹge ọ gbarụ. Nteke ọ bụ l’ọ -dụ onye Chileke meru iwhe-ọma nke t’onye ọbu kfuchịjeru iya, t’onye ọbu kfuchijekwaru iya lẹge o goshiru iye ya l’ekwekwe, o kweru. ⁷Nteke ọ -bụ onye Chileke meru iwhe-ọma nke t’o jejeru chọchi ozhi, t’onye ono yekwaru chọchi ẹka. Nteke ọ -bụ onye Chileke gụru l’ozhi iwhe, t’onye ọbu zhijekwa iya. ⁸Nteke ọ -dụ onye ọwhu o yeru t’onye ọbu dụjee obu, t’onye ono nọdulekwawho l’ọdu madzụ obu. T’onye, lanụ ibe iya iwhe gudejekwa obu-iwhoro nụ iya onye ọbu. T’onye nọ l’ishi kebejekwa ẹhu jeshia ozhi ike. T’onye l’awhụru onye ọdo imiko gudejekwa ẹhu-ụtso whụaru iyẹ ya.

⁹Yekwa madzụ ibe ghu obu ọkpobe eyeye. Unu jijekwaru ụba yeru ejo-iwhe, gudepyabeshia ẹka l’ome iwhe bụ iwhe-ọma. ¹⁰T’onyenọnu yeje ibe iya obu ọkpobe eyeye gude goshi l’unu tụkoru bụru ụnwunna lanụ. T’onyenọnu kajẹkwa ọkwabe ibe iya ugvu amamẹ onwiya. ¹¹Unu jeshijekwaa ozhi ike t’unu ba abụkwa ndu ẹnyiru. Unu hakwaa tẹ Ume-Dụ-Nsọ meje unu ire l’ẹhu, shi nno mee t’ojeru Onye-Nwe-Ọha ozhi whọje unu l’obu. ¹²T’iwhe ono, unu l’ele ẹnya iya ono mejee t’ẹhu tsọo unu ụtso. Unu atajẹkwawho nshi mẹ unu l’eje iwhe-ọtsulanu. T’unu ba atugbejekwa ẹka l’anọ ekfu anụ Chileke. ¹³Unu eyeru ibe unu, unu lẹ whẹ tụkoru bụru ndu nke Chileke ẹka lẹ mkpa, dụru whẹ nụ. Unu ekebeje ẹhu kwaarụ ndu byarụ ibe unu ẹbyii.

¹⁴Unu gọjeru ọnu nụ ndu l’akpa unu ẹhu. Unu sụje Chileke t’o meeru whẹ ree, t’ọ bọ tụ-whukwa whẹ l’ọnu. ¹⁵Ndu ọdo l’aswa ẹswa, t’unu tsokwaru whẹ swaa ẹswa ọbu, nteke bụ l’ọo ẹkwa bẹ ndu ọdo l’arya, unu tsokwaru whẹ ryajẹ iya. ¹⁶T’uche unu l’ibe unu bụjeru nnanụ. T’unu be edobejekwa onwunu g’unu l’ahaa. Iwhe unu l’e-mechia bụ t’unu lẹ ndu ẹnya lwarụ alị megbaje iwhe. Unu ba anọjekwa eme g’unu bụ nwọmaru-ọ-machaa whẹ.

¹⁷Unu be egudejekwa ejo-iwhe gwata madzụ ụgwo ejo-iwhe onye ọbu meru unu, iwhe unu l’e-mechia bụ t’unu kebeje ẹhu meje iwhe madzụ lile l’a-ma l’ọo iwhe dụ ree. ¹⁸Unu kebe ẹhu meje t’unu l’onyenọnu dụ lẹ mma l’iwhe bụ iwhe unubẹdua l’onwunu l’eme eme. ¹⁹Ndu mu yeru obu, unu ba agwatajẹkwa ụgwo iwhe e meru unu-o. Unu hajẹkwaa tẹ Chileke gude oke-ẹhu-eghughu nkiya gwata onye ọbu ụgwo iwhe ọbu, o meru unu. L’e dekwaru l’ẹkwo Okfu Chileke lẹ Chileke bẹ sụru: “Ọo mụbe Chileke b’ọ dụ l’ẹka mbụ ọgwata ụgwo iwhe. Ọo mbẹdua l’a-kfụ ụgwo. O nokwa iwhe Onye-Nwe-Ọha l’ekfu ndono.” ²⁰Iwhe unu l’e-mejechia bụ: ẹgu -gụtaje onye gụ l’iya dụ l’okfu, nụ iya nri. Nteke ẹgu-mini l’agụ iya, chọoru iya mini t’ọ ngụa. Lẹ nteke l’iime nno bẹ bụ iwhere bẹ l’iimeta ekpu iya l’ishi, iwhe ono ahụ̀a ya ọku l’ẹhu. ²¹Unu be ekwejekwa t’ejo-iwhe mee unu eriri. Iwhe unu l’e-mejechia kwa t’unu gudeje iwhe-ọma lwụa ejo-iwhe.

Onye nke Kuráyisutu yẹle ndu govumenti

¹T’onyenọnu mejekwa iwhe bụ iwhe ndu govumenti sụru t’e mee. O noo l’ọ tọ dụdu govumenti, bụ iya nọnyaaru bụru govumenti, l’ẹbe abụ l’ọo Chileke bẹ doberu iya nụ, ọ bụkwaru Chileke bẹ yeru ndu ọwhu l’achị achị nta-a. ²Ọo ya bụ l’onye jịkaru lẹ ya te emedu iwhe govumenti kfuru bẹ bụkwa ndu ishi, Chileke yeru bẹ onye ono jịkaru. Ndu l’emekwanu iwhe dụ nno bẹ l’eseko ikpe ekpu onwowhe l’ishi. ³Lẹ ndu l’eme iwhe dụ chịriri ta atsụjekwa ndu govumenti egvu. Ọo ndu l’eme iwhe-dụ-ẹji bẹ l’anọje atsụ ndu ishi egvu. Nteke bụ l’ọ dụ ghu nke tị ba atsụjeshi onye ishi, l’achị nụ egvu, ọo ya bụ t’i mejekwa iwhe dụ chịriri, gụ awhụ l’onye ishi l’e-gbee jaa ghu ama nke iwhe i meru. ⁴O noo l’onye ishi ono, l’achị nụ bụkwa onye ozhi Chileke; iwhe l’ooje bụru iwhe l’a-dụru ghu lẹ mma. Ọle nteke i mekwanuru iwhe l’ẹte adụa ree, tsụjekwa iya egvu, o noo l’ẹte anọnyakwaa ye iya t’ọ hụjee madzụ ahụhu. Ọo onye ozhi Chileke, bụkwaruwho onye l’ahụ ndu l’eme ejo-iwhe ahụhu gude egoshi oke-ẹhu-eghughu Chileke. ⁵O noo iwhe meru unu je l’emeje iwhe ndu govumenti sụru t’unu mejee. Ọ tọ bụlekwaa t’unu mee ya gbalaarụ oke-ẹhu-eghughu Chileke, iwhe mu l’ekfu bụkwa t’unu meje iwhe unu marụ l’obu unu l’ọo iwhe gbarụ unu l’ememe.

⁶O nokwawho iwhe meru unu je l’a-kfụje okpoga akịriko. O noo lẹ ndu govumenti bẹ bụ Chileke bẹ whẹ l’ejeru ozhi, whẹ l’anọje eme tẹ whẹ jee ya lẹge ọ gbarụ. ⁷O noo iwhe meru unu je l’emejeru whẹ iwhe rwuberu whẹ nụ. Onye o rwuberu t’unu tua akịriko nụ, unu tụa ya nụ onye ọbu, onye o rwuberu t’unu tụa ụtu aswa nụ, unu atụa ya nụ onye ọbu, onye ọ gbarụ l’oyeru ẹso, unu eyeru onye ọbu ẹso, onye ọ gbarụ l’ọkwabe ugvu, unu kwabẹ onye ọbu ugvu. Unu mejeeru onyemonye iwhe rwuberu iya nụ.

Oye madzụ ibe ghu obu

⁸T’ọ bọ dụkwa iwhe unu l’e-jije madzụ ụgwo iya t’a gụfulewho ụgwo iwhe lanụ ono, unu ji ono bụ iya bụ t’unu ye ibe unu obu. Onye yeru ibe iya obu mekotaakwaru iwhe Chileke tụru l’iwu t’e mejee. ⁹O noo l’iwu ono g’ọ hakọta bụ iya bụ, be erikwa ogori, ti gbu ọchi, ti zhita oshi, ti nwe oke-ẹnya mẹwaro ụnwu iwu lile ọdo lịkota iya nụ, iwu ono g’ọ hakọta bẹ tụkoru je achịru ishi swọkfube l’iwu lanụ-a bụ iya bụ: “T’i ye madzụ ibe ghu obu g’i yeru iya onwoghu.” ¹⁰Onye yeru madzụ ibe iya obu te emejekwa iya iwhe-dụ-ẹji. O noo g’o gude oye ibe ghu obu bụru omekota iwhe iwu kfuru.

Kwakọbe nke abyabya Kuráyisutu

¹¹Sụa, iwhe mefuaru g’o gude unu je l’atụkoje iwhe lile ono eme bụkwa lẹge ntaa gbarụ, mbụ l’o rwuwaru nteke unu l’e-shi lẹ mgbẹnya tehu. O noo lẹ ntaa bẹ nteke ono l’aa-dzọfuta anyi kaakwa ntse ntse amamẹ lẹge o shi tebe ẹnya nteke ono, anyi beberu woru onwanyị ye Kuráyisutu l’ẹka. ¹²O teekwaru ẹnya abalị darụ ẹbo; chi-asahu dụakwa ntse. Ọo ya bụ, unu t’anyi dochanu iwhe l’eeme l’ẹkpuruoochi, kwaa onwanyị ngwọgu ọwhu anyi l’e-gude alwụ ọgu l’iwhoro. ¹³T’anyi watanụ ome umere, gbarụ anyi l’ememe l’iwhoro eswe. T’anyi haa anọ eri angụ-sweshi onwanyị iwhu, haa ọngunuka mmẹe. T’anyi docha ọkpa lẹ nwanyị mẹe ọkpa lẹ nwoke, mewaro ejo umere ọdo. Anyi ahakwaawhọ osewhe okfu, haa oke-ẹnya. ¹⁴Iwhe unu l’e-mechia bụ t’unu tụkolewho umere Onye-Nwe-Ọha, bụ Jisọsu Kuráyisutu g’ọ ha meje. T’unu ba ahakwa ọbu ẹgube madzụ ono, unu shi bụru t’ọ kpata unu ụzo l’ẹhu, mee unu t’unu meje iwhe l’agụ iya nụ.

Ba atụrwushikwa madzụ ibe ghu

¹Onye kwetawaru l’ọo Jisọsu Kuráyisutu bụ Onye-Nwe-Ọha, toko shihua ike l’ekwekwe, o kweru, t’unu hajẹkwaa ya t’unu l’iya nọdu. Ọle t’unu l’iya be ejekwa ọtu ẹgo l’iwhe ọ sụru l’ọ waa g’ọ dụ ndọwa. ²O nweru ndu l’ẹte adụa iwhe whẹ l’asọ nsọ eriri. Ọle onye who ekwekwe iya l’ẹteke eshihua ike who bẹ l’atsụkwadu egvu, a -nọnyaa ya ria ẹgube iwhe ono, ọ buru iya ome iwhe-dụ-ẹji. Iwhe l’oorije abụleruwho ẹba owhe. ³Ọo ya bụ, t’onye whọ l’ẹte adụa iwhe l’ọoso nsọ eriri ba akpọkwa onye ọwhu ẹbo-ẹbo l’afụ l’o too ridu gẹ ya l’eri. Onye ọwhu bụlewho ẹba owhe bẹ l’oorije, eje atụrwushikwa onye ọwhu l’adụa iwhe l’ọoso nsọ. Iwhe meru g’o gude tọo tụrwushi iya bụ lẹ Chileke nataakwarụwho yẹbedua. ⁴?Ọo onye b’ị bụ? Nke t’ọ bụru onye l’ejeru onye ọdo ozhi bẹ l’ịi-nọ atụrwushi. Ọo Onye-nwe-iya-nụ bẹ l’a-nma iya ikpe mẹ l’oome ẹji, nteke bụ l’oome ree, ya ajaa ya l’oome ree. Ọle onye ozhi ono l’a-nọkwaa eme ree; o noo lẹ Onye-nwe-iya-nụ bẹ ha gẹ l’oo-me iya t’o meje ree.

⁵O nweru onye l’e-dobelewho ujiku lanụ sụ l’o noo mbọku ọwhu kagezhia ya lẹ mkpa karụ mbọku ndu ọwhu; o nweru onye l’a-sụkwanu lẹ mbọku ta adụdu ọwhu ka ibe iya mkpa. T’onyenọnu kfụleruwho l’ọwhu ọ kfụru kfụshia ya ike. ⁶Onye rịru l’o nweru mbọku ọwhu ka ibe iya mkpa, bẹ l’eme iya gude akwabẹ Onye-Nwe-Ọha ugvu. Onye ọwhu l’adụa iwhe l’ọoso nsọ eriri l’erikwa iya who gude akwabẹ Onye-Nwe-Ọha ugvu. O noo l’onye ono bẹ l’ekelejeeda Onye-Nwe-Ọha ekele tẹmenu ya eride iya. Onye ọwhu nweru iwhe l’ọosuje lẹ ya te eridu l’emekwa iya whọ gude akwabẹ Onye-Nwe-Ọha ugvu, ekelejekwawho Chileke ekele nke nwa ndu ọwhu ya l’erije. ⁷Ọ tọ dụkwa g’anyi ha onye ọwhu nọdu ndzụ nọdu-turu onwiya, tọ dụ onye l’anwụhu anwụhu nwụhu-turu onwiya. ⁸Anyi -nọdu ndzụ bẹ bụkwa Onye-Nwe-Ọha bẹ anyi nọdu-turu iya. Nteke bụ l’ọo anwụhu bẹ anyi nwụhuru bẹ kwawhọ Onye-Nwe-Ọha bẹ anyi l’anwụhu alakfu. Ọo ya bụ l’anyi bụ nke Onye-Nwe-Ọha mẹ anyi nọ ndzụ mẹ anyi nwụhuru anwụhu. ⁹O noo lẹ Kuráyisutu bẹ nwụhu-geeru, ọ bya anọdu ndzụ ọdo, nke ọwhu l’ọo-bụ Onye-Nwe-Ọha ndu nwụhuru anwụhu mẹe nke ndu nọ ndzụ. ¹⁰Sụa, gụbe nwamadẹka, ?ndẹnu g’o gude l’ịiturwushi nwanna ghu? Ọdo bụ: ?ọ nwụru agha o gude l’ịikpo iya ẹbo-ẹbo l’afụ? ?Tị madụ l’anyi lile l’ee-bekochaa kfụru l’iwhu Chileke, onye bụ iya l’e-kpekota anyi ikpe? ¹¹O noo l’e deru l’ẹkwo Okfu Chileke sụ lẹ Chileke sụru:

“Mu vuru-a ishi mu gẹ mu vu iya,

bẹ onyenọnu l’e-megee

byishikotaru mu ikpere l’alị whuzeru mu,

gude goshi l’ọo mu kakọta ike.

Onyenọnu l’e-mekochakwaa kfua

sụ l’ọo mụbe Chileke bẹ bụ Chileke.”

¹²Ọo ya bụ l’onyenọnu lẹ g’anyi ha l’ẹhu l’ẹhu bẹ l’a-kfụru l’iwhu Chileke doo iwhe anyi shi meta l’eli-mgboko-o.

Ba akpatakwa tẹ nwanna ghu mee iwhe-dụ-ẹji

¹³Ọo ya bụ t’anyi ba atụrwushijekwa ibe anyi. Iwhe anyi l’e-mechia bụ t’anyi kfua ya kfupyaa ya akụ l’anyi ta abụjedu ụkfu kpọpyashia nwanna anyi ọkpa, ọdua l’ọo t’anyi meta iwhe l’e-me iya t’o mee iwhe-dụ-ẹji. ¹⁴Eshi-ọwhu mu lẹ Onye-Nwe-Ọha, bụ Jisọsu tụgbaru bụru nnanụ, bẹ iwhe ka mu odo ẹnya bụ l’ọ tọ dụdu iwhe l’eeri eri ọwhu mu l’asọkwadu nsọ eriri. Ọle nteke ọ bụ l’o nweru onye kfuru sụ l’iwhe dụ ẹgube-ẹ bẹ ya l’asọkwa nsọ, ọo ya bụ iwhe ono abụru iwhe l’aasọ nsọ l’ẹhu nke onye ono kwa. ¹⁵Nteke ọ bụ l’ọo iwhe eriri b’i gude mekata nwanna ghu; ọo ya bụ l’i tii mehedu iwhe l’egoshi l’i yeru iya obu. Ọo ya bụ, t’iwhe l’iiri l’ọnu ghu ba akpatakwa tẹ nwanna ghu ono, Kuráyisutu nwuchiru ọnwu laa l’iyi. ¹⁶Ọo ya bụ t’unu be ekwekwa t’iwhe ono, unu sụru l’ọo iwhe dụ ree ono vuta ejo ẹwha. ¹⁷L’iwhe bụ lẹ Chileke bụ eze ta abụkwa ọnu orimori, tọ bụ angụngu angụngu b’ọ bụ. Iwhe bụ lẹ Chileke bụ eze bẹ kwa ọdu chịriri, mẹe nchị ọdu ndoo, mẹe ẹhu-ụtso ọwhu shi l’ẹka Ume-Dụ-Nsọ. ¹⁸Onye bụ onye l’ejeru Kuráyisutu ozhi l’ụzo dụ nno bẹ l’eme iwhe dụ Chileke ree, emekwawho iwhe dụ ndiwhe ree.

¹⁹Ọo ya bụ, t’anyi whubelewho iwhu meje iwhe ono, l’emeje t’a dụ l’odoo, mbụ iwhe ono, l’a-nọ eme t’ibe unu kfụshia ike l’ekwekwe, whẹ kweru nke Chileke. ²⁰Be ekwobekwa nke iwhe l’iiri l’ọnu ghu mebyia iwhe Chileke l’eme. Ọ tọ dụkwa iwhe bụ iwhe l’eeri eri dụ ọwhu dụ nke ọoso nsọ l’iwhu Chileke. Obenu l’iwhe-dụ-ẹji bụ tẹ madzụ gude iwhe l’oori l’ọnu mee tẹ ndu ọdo mee iwhe-dụ-ẹji. ²¹Ọ kachikwaa mma t’ị ba atashị anụ, tị ngụ mmẹe, tọ dụ-zhia iwhe ọdo, l’ii-je ememe, bụ iwhe l’a-gbẹe mee tẹ nwanna ghu mee iwhe-dụ-ẹji. ²²Iwhe i kweru, iwhe i kweru l’iwhe ono, e kfushiru ono tọ bụleruwho iwhe dụru gụ lẹ Chileke. Onye ẹhu l’atsọ ụtso bụkwa onye meru iwhe ọ rịru l’ọ dụ ree ememe, tọ dụ nteke obu iya l’ata iya ụta l’a marụ mẹ ya te eje ememe. ²³Ọle nteke bụ l’obu madzụ l’ata iya ụta l’iwhe l’ọo-bya eriri, ọ kwa iya bụ lẹ Chileke l’a-nma onye ono ikpe m’o -ria ya, o noo l’iwhe l’oome ta abụdu nno bụ g’ọ dụ iya l’obu. Iwhe bụ iwhe madzụ l’eme, obu iya ta asụ iya l’ọ dụa ree, b’ọ bụakwa onye ọbu ome iwhe-dụ-ẹji m’o -mee ya.

Ọwota ẹka Jisọsu Kuráyisutu

¹Anyịbe ndu kwetawaru nke Chileke, obu shihuwa anyi ike l’a-nọ atarụ ndu ọwhu ekwekwe whẹ l’eteke eshihua ike nshi, eyeru whẹ ẹka l’iwhe bụ ẹka l’ọotsu whẹ l’ẹhu. Tọ bọ bụlekwawho ẹhu anyi ẹhu anyi bẹ anyi l’emeje. ²O chia t’onyenọnu lẹge anyi ha meje iwhe dụ nwanna iya ree bụ iya bụ iwhe l’a-dụru iya lẹ ree. Ọo ya bụ nggẹ obu akabakwanụa ya oshihu ike l’iwhe nke Chileke. ³O noo lẹ Kuráyisutu ta abụkwa ẹhu iya ẹhu iya b’o shi emeje. Iwhe meru nụ bụlewho iwhe ono, e deru l’ẹkwo Okfu Chileke deturu iya sụ: “Iwhe bụkota ejo-iwhe e kfuru ghu bẹ mbẹdua vutakotaru ọnwu iya.” ⁴L’iwhe lile, e deru nteke ndụ-ichee b’e dekwaru t’o zhia anyi iwhe. Oozhije anyi t’anyi taa nshi, l’ọoduje anyi obu nke ọwhu anyi l’a-dụ ike takeru ele ẹnya iwhe Chileke kweru anyi ụkwa iya. ⁵Tẹ Chileke ono, bụ iya l’emeje t’anyi taarụ iwhe nshi, bụru iya, l’adụje anyi obu mee t’unu gude otso ẹka Kuráyisutu Jisọsu t’obu bụru unu nnanụ. ⁶Ọo ya bụ, nggẹ unu tụko g’unu ha nmagba gude obu lanụ, gudekwawho olu lanụ aja Chileke ajaja, mbụ Chileke bụ iya bụ Nna nke Onye-nwe-anyi Jisọsu Kuráyisutu.

Ozhi-ọma bụ nke ndiwhe l’owhu

⁷Ọo ya bụ t’unu hajẹe t’unu l’ibe unu tụgba lẹge Kuráyisutu hakwarụwho unu l’iya tụgba, nggẹ e shikwanu nno jaa Chileke ajaja. ⁸L’iwhe mu l’ekfu bẹ bụ, lẹ Kuráyisutu bẹ byarụ bya abụru onye ozhi ndu Ju, nnta gẹ l’ee-shi tẹ ya mee t’iwhe ono, Chileke kweru ndụ-ichee anyi whẹ ụkwa iya ono vụkota. Ọo ya bụ nke ọwhu l’oo-shi nno goshi lẹ Chileke bụ onye ire-lanụ, l’emeje iwhe o kfuru. ⁹Iwhe ọ byakwarụwho bụ nggẹ ndu l’ẹte abụa ndu Ju jaa Chileke ajaja, l’ọowhunukaru whẹ imiko, bụ iya bụ iwhe ọbu, e deru l’ẹkwo Okfu Chileke sụ:

“Ọo ya meru g’o gude mu je l’etu

ghu ẹwha l’echilabọ ndu l’ẹte abụa ndu Ju.

Mu egude ẹwha ghu agụ egvu gude aja ghu ajaja.”

¹⁰E dekwaawho sụ:

“Unubẹ ndu l’ẹte abụa ndu Ju,

t’unu lẹ ndu Chileke họtaru tụkokwa tee ẹswa!”

¹¹A sụkwawho ọdo:

“Unubẹ ndu l’ẹte abụa ndu Ju,

unu jaa Onye-Nwe-Ọha ajaja g’unu ha.

Ndiwhe l’owhu, unu jaa ya ajaja!”

¹²Ayizáya byakwawhọ bya ekfua sụ:

“Onye shi l’ẹpa Jesi bẹ l’a-bya!

Ọo ya l’e-tsefuta bya abụru eze

iwhe bụ ndu l’ẹte abụa ndu Ju,

ọ bụru iya bụ onye whẹ l’a-nọ ele ẹnya iya.”

¹³Tẹ Chileke ono, bụ onye l’emeje t’anyi leje ẹnya iwhe o kweru anyi ụkwa iya mee t’ẹhu-ụtso unu dzua oke, ya emekwaawho t’unu buru guu g’unu ha, nkele unu kweru nkiya. Ọo ya bụkwanu nke ọwhu unu l’e-gude ike nke Ume-Dụ-Nsọ kabaarọ ole-ẹnya-iwhe ono, Chileke kweru ụkwa iya.

Iwhe meru Pọlu dee ẹkwo-ozhi-a g’o deru iya-a

¹⁴Ụnwunna mu, unubẹdua bẹ mu maakwarụ majia unu ẹnya, l’iwhe unu marụ bụlewho ome iwhe dụ ree, l’unu marụ iwhe bụ uche Chileke marụ iya nke ọwhu unu dzuru g’unu l’a-nọ akpozhiru ibe unu ụzo. ¹⁵Ọle o nwekwaruwho nwiwhe mu l’eme tẹ mu harụ nyatachaarụ unu. Ọ bụru iwhe ono meru g’o gude o nweru ẹka mu l’ahajẹru kfua iwhe ono kfushia ya ike ọkpobe ekfukfu l’iwhe ono, mu deru unu ono. Mu dee ya nno, mu ta atsụ egvu, o noo lẹ Chileke bẹ kwabẹwaru mu ugvu ha shii, ¹⁶mee mu tẹ mu bụru onye ozhi Kuráyisutu Jisọsu; je ezhia ndu l’ẹte abụa ndu Ju ozhi. Mu l’eje ozhi rwuberu onye l’agbajẹ ẹja nụ Chileke l’ozhi ozhi-ọma ono, shi l’ẹka Chileke. Ọo ya bụ nke ọwhu ndu l’ẹte abụa ndu Ju l’a-bụ ẹja, Chileke l’a-nata, whẹ abụkwaruwho iwhe Ume-Dụ-Nsọ l’e-me t’ọ bụru iwhe e doberu Chileke nsọ. ¹⁷Ọo ya bụ lẹ mu l’a-nọ etu onwomu ẹwha ozhi, mu l’ejeru Chileke eshi mu lẹ Kuráyisutu Jisọsu tụgbawaru bụru nnanụ. ¹⁸Ọ tọ dụkwa iwhe mu l’atụ ama ekfukfu; t’a gụfulewho iwhe ono, Kuráyisutu shi mu l’ẹka mee, bụ iya bụ l’o meru tẹ ndu l’ẹte abụa ndu Ju bya abụru ndu l’eme iwhe Chileke kfuru. Iwhe ono bẹ Kuráyisutu gude okfu-ọnu mu mẹe iwhe mu l’eme ememe mee, ọ dụ nno. ¹⁹O gudekwawho ike nke anọ eme iwhe-awhụrulenya, dụkota biribiri mẹe ike nke Ume-Dụ-Nsọ gude mee ya. Ọo ya meru g’o gude mu l’anọjelewho arya ozhi-ọma nke Kuráyisutu aryarya l’ẹka lile watazhiawho lẹ Jerúsalẹmu gudezhia ya who jeye mu rwua Ilirikumu. ²⁰Iwhe lanụ, l’anọjelewho awhọshi mu ike l’obu bụru tẹ mu je ekfua okfu Chileke, ọle ọ tọ bụkwa tẹ mu je iya ekfukfu l’ẹka a mahawarụ nke Kuráyisutu, t’ọ bọ bụkwa woo: lẹ mu gbee gbashi je atụlahaa ụlo l’eli-ụlo, onye ọdo gbuberu egbube. ²¹Ọ dụa g’ọo iwhe e deru l’ẹkwo Okfu Chileke sụ:

“Ndu lile ono l’ẹteke akọtabuaru

akọ iya bẹ l’e-gudekwaa ẹnya whẹ whụ.

Ndu l’ẹteke anụbua akọ iya,

bẹ akọ ẹhu iya l’e-dokwawho ẹnya.”

Pọlu l’eje tẹ yẹle ndu Romu jịa

²²Ọo iwhe ono meru g’o gude o nweru iwhe kpọshiwaru mu ugbo olemole tẹ mu ba abya nke unu. ²³Ọle ntaa bẹ eshi-ọwhu mu jekotawaru iwhe gbarụ mu l’ejeje l’uswetuma iya ọwa-a, tẹmenu mu nọwaa nụ awha olemole mu shi meta gẹ mu l’e-me bya tẹ mu l’unu jịa, ²⁴bẹ mu l’arịkwa lẹ mu l’a-dụ ike mee ya nta-a. Mu l’arị lẹ mu l’a-bata mẹ mu jedelewho Supénu. Mu l’unu kpọ-gee nwụkfu nwanshị gude t’obu shihu mu ike, unu eduwa mu roo ije, tẹ mu jeshia ẹka ono. ²⁵Ọ -bụru nke ntaa bẹ bụkwaa ndu nke Chileke lẹ Jerúsalẹmu bẹ mu gude iwhe ewojeru tẹ whẹ mee ẹka l’atsụ whẹ l’ẹhu. ²⁶Lẹ ndu nke Kuráyisutu lẹ Masedóniya mẹe Akáya bẹ chịri idzu tụa iwhe t’a nụ ndu nke Chileke lẹ Jerúsalẹmu, ndu ọwhu l’adụa g’ọ harụ whẹ. ²⁷Whẹ tụkwaru obu whẹ ama nụ iwhe ono. Mbụ e -kfude iya ekfu bẹ unu marụ l’ọ dụwaa g’ọo ụgwo whẹ jiru iya ndu nke Chileke lẹ Jerúsalẹmu, lẹ nteke ọ bụ lẹ ndu l’ẹte abụa ndu Ju bẹ whẹ lẹ ndu bụ ndu Ju gba mgba l’iwhe ọma, shi l’ẹka Ume-Dụ-Nsọ ono, Kuráyisutu meru nụ ndu Ju ono, ọo ya bụ l’ọ gbarụ tẹ whẹ gude ẹku whẹ, whẹ kpatarụ gude yeru ndu Ju ono ẹka. ²⁸Nteke mu je ezhigelewho ozhi ono je anụle whẹ whọ okpoga ono, a tụtaru whẹ, bẹ mu l’e-shiakwaro jeshia Supénu, mu eshiwaro bata nteke ono. ²⁹Ọwhu mu marụ bụ lẹ nteke mu byarụ bẹ mu l’e-me t’iwhe ọma, shi l’ẹka Kuráyisutu dzua oke l’ẹka unu nọ.

³⁰Ụnwunna mu, mu l’aryọ unu sụ t’unu kwobe iswi ẹhu Onye-nwe-anyi Jisọsu Kuráyisutu mẹe nke oye obu ọwhu shi Ume Chileke l’ẹka lwụ-bude mu ọgu ono, kfuje nụ Chileke l’iswi ẹhu mu, ³¹tẹ Chileke be ekwekwa tẹ ndu ono, jịkaru ozhi-ọma ono l’alị Judíya fụaru mu l’ụzo mẹfua t’iwhe ono, mu gude eje dụkwawho ndu nke Chileke lẹ Jerúsalẹmu ree anata. ³²Ọo ya bụ, ọ -bụru uche Chileke, mu egude ẹhu-ụtso byakfuta unu, t’anyi nọta nke ọwhu l’ọo-bụwa mu rọo odzuta ike. ³³Tẹ Chileke ono, bụ iya l’emeje t’anyi bụru guu swiru unu. O noo g’ọ dụ.

Pọlu l’ekelekota ndu ọ marụ l’ẹhu l’ẹhu

¹Mu l’eme t’unu marụ nwanna anyi nwanyị, bụ Fibi, onye nọ lẹ Kenkiríya ejeru chọchi dụ l’ẹka ono ozhi. ²Unu kwobe iswi ẹhu Onye-nwe-anyi nata iya ọkpobe anata lẹge ọ gbarụ ndu nke Chileke l’ememe. Unu yeru iya ẹka l’iwhe bụ-zhia iwhe mkpa iya dụ iya l’ẹka unu nọ, l’o yekwaru ikpoto madzụ ẹka mbụkwa je akpaa lẹ mbẹdua l’ishi onwomu.

³Unu keleru mu Prisíla yẹle Akwị́la ndu anyi lẹ whẹ tụkoru ejeru Kuráyisutu Jisọsu ozhi; ⁴ndu kwoberu iswi ẹhu mu lọo ishi whẹ alọlo. Ọ tọ bụlekwa mu-a l’ekele whẹ nwẹka mu, nke iwhe whẹ meru unu. Iwhe bụ chọchi lile, dụ l’alị ndu l’ẹte abụa ndu Ju kpaa-whuu bẹ l’ekelekwa whẹ whọ. ⁵O nokwawho gẹ unu l’e-keleru mu chọchi ono, l’edzukobeje l’ibe whẹ.

Unu kelekwaru mu roo Epenítọsu, bụ ọkpobe ọnya mu, mu yeru obu, ọo ya bẹ bụ onye vugezhia ụzo woru onwiya ye l’ẹka Kuráyisutu lẹ Éshiya. ⁶Unu kelekwaru mu who Méri, onye jeru unu ozhi jeshia ya ike. ⁷Unu ekelekwawho Andurọ́nikosu yẹle Júniyasu; ndu mu lẹ whẹ bụ ndu Ju lanụ, bụkwawho ndu mu lẹ whẹ shi tụko nọdu lẹ mkpọro. Whẹ bụ ndu kwatarụ dụru madzụ lile lẹ nsọ l’ẹka ndụ-ishi-ozhi nọ, tẹmenu whẹ vuru mu ụzo bụru ndu nke Kuráyisutu.

⁸Unu kelekwaru mu whọ Ámpuliyatọsu, bụ ọnya mu, mu yeru obu; onye mu l’iya tụkoru nọdu Onye-Nwe-Ọha l’ẹka. ⁹Unu keleru mu Ubánọsu onye anyi l’iya tụkoru ejeru Kuráyisutu ozhi lanụ mẹkwawho onye ono, mu yeru obu, bụ Sutákisu. ¹⁰Unu kelekwawho Apẹ́lisu onye gudewaa umere iya goshi lẹ ya kfụshiru ike l’ekwekwe, ya kwetaru nke Kuráyisutu. Unu ekelekwawho ndu ibe Arisutọ́bulosu. ¹¹Unu kelekwawho Heródiyọnu onye mu l’iya tụkoru bụru ndu Ju. Unu ekelekwawho ndu bu l’ibe Nasị́sosu; ndu nọwaa l’ẹka Onye-Nwe-Ọha.

¹²Unu kelekwawho Tirayisfína yẹle Tirayifọ́sa; ndu l’ejeru Kuráyisutu ozhi kwata ejeshi iya ike, unu ekelekwaru mu who onye mu yeru obu, bụ Pésisu, bụ onye jewaru Kuráyisutu ozhi jeshia ya ike. ¹³Unu ekelekwawho Rúfọsu, bụ onye ono, gbarụ iche l’ojeshi ozhi nke Onye-Nwe-Ọha ike. Unu kelekwaru mu who ne iya, dụhukwawho g’ọ bụwaa ne mu. ¹⁴Unu kelekwaru mu who Asínkiritọsu, Fulẹ́gonu, Hémisu, Páturobasu, Hẹ́masu, mẹwaro ụnwunna anyi ọdo, whẹ lẹ whẹ tụkoru nọdu l’ẹka ono. ¹⁵Unu kelekwaru mu who Fịlológosu, Júliya, Níriyọsu, mẹe nwune iya nke nwanyị, mẹe Ọlímpasu mẹwaro iwhe lile bụ ndu nke Chileke whẹ lẹ whẹ tụkoru nọdu l’ẹka ono.

¹⁶Unu kelejekwa ibe unu ekele tsutsua whẹ ọnu. Ndu nke Kuráyisutu, nọkota lẹ chọchi gẹ chọchi ha l’ekelekota unu.

Iwhe unu l’e-meje

¹⁷Ụnwunna mu, mu l’aryọkwa unu aryọ sụ t’unu letakwa ẹnya mẹ l’ọgvukwa ndu ono l’anọje eme t’unu nweru ekwo; ndu l’egudeje nno akpakashị iwhe chọchi kwetaru l’ọo ọkpobe-okfu. Iwhe whẹ l’anọje eme bẹ yẹle iwhe ono, e zhiru unu l’ete ebukojekwa ishi. Unu jikwaru ụba yeru whẹ. ¹⁸O noo lẹ ndu l’eme ẹgube iwhe ono ta abụkwa Onye-nwe-anyi Kuráyisutu bẹ whẹ l’ejeru ozhi, ọ kwa iwhe ẹkpiri iya dụ whẹ bẹ whẹ l’ese anya iya. Whẹ l’eteje unu tee mmanụ l’okfu gude ire-mẹchemeche edusweshi ndu l’ẹte amaa iwhe bụ ejo iwhe ụzo. ¹⁹Ọ tọ dụkwa onye l’ẹteke anụa lẹge unu gude egoshibe g’unu l’emebe iwhe ozhi-ọma ono kfuru. Ọ bụru iwhe ono meru g’o gude ẹhu l’a-nọje atsọ mu ụtso. Ọle ọ dụkwanu nggẹ l’ọ dụ g’e shi unu l’egudeje mmamagụ majẹru iwhe bụ iwhe dụ ree, sefukwanu ẹka l’iwhe l’adụa ree. ²⁰Chileke bụ iya bụ onye nchị-ọdu-ndoo shi l’ẹka l’e-mekwa ẹgwegwa mebyia ike Sétanu. Chileke ọbu ẹgbee mee nteke ono t’unu dzọpyashia Sétanu l’ọkpa. Tẹ Onye-nwe-anyi Jisọsu Kuráyisutu mekwaaru unu eze-iwhe-ọma.

²¹Tímoti, bụ onye mu l’iya tụkoru eje ozhi bẹ l’ekelekwaro unu. Lúsiyọsu, mẹe Jésọnu, mẹe Sosípeta whẹ, ndu mu lẹ whẹ tụkoru bụru ndu Ju l’ekele unu.

²²Mbẹdua, bụ Téshiyọsu, l’ederu Pọlu ozhi, l’oozhi l’ẹkwo-ọ, bụkwaruwho onye unu l’iya shi l’ẹka Kuráyisutu tụgba bụru nnanụ l’ekelekwawho unu.

²³Gáyosu, onye mu bu l’ibe iya, ọ bụru l’ibe iya bẹ chọchi owhu l’edzukoje, yẹbedua l’ekelekwawho unu-o. O nokwawho gẹ Ẹrásutosu, mbụ onye ọwa-a, bụ iya l’edobejeru ọha okpoga whẹ l’ekelekwawho unu yẹle nwanna anyi, bụ Kwọ́tosu.

²⁴Tẹ Onye-nwe-anyi Jisọsu Kuráyisutu meeru unu g’unu hakọta eze-iwhe-ọma.

Ajaja Chileke, Pọlu gude akpochi ozhi iya ishi

²⁵T’anyi jaa Chileke ajaja, l’ọo ya l’a-dụ ike mee t’unu kfụru kfụshia ike l’ekwekwe, unu kweru nkiya. Ọ bụru ozhi-ọma ono, mu l’ezhi ono bẹ l’oo-gude eme t’unu kfụshia ike ọbu, mbụ ozhi-ọma ono, l’ekfu okfu ẹhu Jisọsu Kuráyisutu, egoshikwawho iwhe ono, Chileke shi lẹ mbụ domita edomi eshi nkeshi nteke l’aamaa. ²⁶Ọ bụru iwhe ono b’o gbee bya emee nta-a, a marụ. Ntaa bẹ ọkpobe-okfu ono bẹ shiwaa l’iwhe ndu nkfuchiru Chileke deru bahụ g’ọo ite, a nụ-dzuru iya. Ntaa bẹ Chileke, l’ẹte adụa nteke l’aa-sụ l’o noo nteke, o shi, tọ dụ nteke l’aa-sụ l’o noo nteke l’ọo-nọ-be, zhikwaru e woru ọkpobe-okfu ono mee ọhamoha gẹ whẹ ha, whẹ madzuru iya, nke ọwhu l’ee-kwetadzuru emeje iwhe ọ sụru t’e mee. ²⁷T’e shi l’ẹka Jisọsu Kuráyisutu jaa Chileke ajaja, mbụ onye lanụ ono, bụ yẹbedua nwẹkiya bụ Chileke, ọ bụru iya nwẹkiya nwe mmamagụ. T’a jaa ya ajaja jeye lẹ tututu-mịmimi! O noo g’ọ dụ.