Ọwhulenya

Iwhe Jisọsu Kuráyisutu Goshiru Jọnu lẹ

ỌWHULENYA

¹Ọ waa bụ ọwhulenya, Chileke shi l’ẹka Jisọsu Kuráyisutu goshi ndu l’ejeru Chileke ozhi. Ọwhulenya-a b’e gude goshi iwhe l’ẹte a-nọhe ọdu ntaa, ya anwụkota. Jisọsu Kuráyisutu bẹ zhiru ojozhi-imigwe iya t’o je egoshi Jọnu, bụ onye ozhi iya iwhe ono g’ọ ha, nke ọwhu l’aa-marụ iya. ²Ọo iwhe lile, Jọnu whụru b’ọ tụkoru g’ọ ha kfukota. Ọ bụru l’ẹkwo-ọ l’ẹka-a bẹ Jọnu deshikotaru okfu ono, Chileke kfuru. Iwhe lile ono bẹ bụkota ọkpobe okfu, Jisọsu Kuráyisutu ono goshikotaru iya. ³Ẹhu-ụtso bẹ Chileke nụru iwhe bụ onye l’agụ ẹkwo-ọ, e deru okfu, e kfuchiru Chileke. Ẹhu-ụtso bẹ Chileke nụkwaruwho ndu nụru iya nụ; ngabẹ iya nchị; eme iya eme. Lẹ nteke iwhe lile-e l’e-mekota bẹ dụakwa ntse.

Jọnu l’ekele chọchi ẹsaa

⁴Ọo mbẹdua, bụ Jọnu bẹ l’ekele unubẹ chọchi ẹsaa ono, dụkota l’alị Éshiya ekele.

T’eze-iwhe-ọma mẹe ẹhu ọdu guu, shi l’ẹka Chileke bụru nke unu. Mbụ Chileke ono, bụ onye nọ ndzụ; bụru onye shihawaaro nọdutahawaa tẹmenu mgboko dụ; tẹmenu ọ bụru iya bụ onye ono, l’a-bya nụ ono. T’eze-iwhe-ọma, shi iya l’ẹka mẹkwawho ọwhu shi l’ẹka Ume ẹsaa, shi l’ẹka Chileke bụru nke unu jeyewaro, mbụ Ume ẹsaa ono, l’anọduje l’atatiwhu oshi-eze Chileke. ⁵Eze-iwhe-ọma mẹe ẹhu ọdu guu ono shikwawho l’ẹka Jisọsu Kuráyisutu, mbụ onye l’akfụshije ike l’iwhe lile, l’ookfuru. Ọo ya bụ onye mbụ, Chileke meru; o shi l’ọnwu teta nọdu ndzụ; ọ bụkwaru iya whọ bẹ bụ onye l’achịkota iwhe lile, bụ ndu eze lẹ mgboko-o.

Ọo ya bụ onye l’eyejezhiewho anyi obu; ọ bụru obu ono, o yeru anyi bẹ meru; ọ nwụ-chiaru anyi ọnwu, anyi gẹge anwụ; ọ bụkwaruwho mmee ya b’o gude tọshia anyi l’ẹgbu ono, iwhe-dụ-ẹji shi kee anyi. ⁶Ọ bya emee anyi; anyi bụru eze; mekwaawho anyi; anyi bụru ndu l’agbajẹ ẹja nụ Chileke, mbụ ndu l’ejeru Chileke, bụkwawho Nna iya ozhi. T’ajaja mẹe ike bụkotaru nke Jisọsu jeye lẹ tututu-mịmimi. O noo g’ọ dụ.

⁷Unu lekwawho l’ọ nọokwaa l’urwukpu abya. Madzụ lile l’e-gudekota ẹnya whẹ whụ iya. Ndu lile ono, nmarụ iya arwa bẹ l’a-whụkwa iya whọ. Mba lile, dụ l’eli-mgboko-o bẹ l’a-ryakọta ejo ẹkwa l’okfu ẹhu iya. O noo iwhe l’e-me nu ndono-o. O noo g’ọ dụ.

⁸Chileke, bụ Onye-Nwe-Ọha bẹ l’ekfu sụ: “Ọo Mu bụ Álụfa bụru Oméga, mbụ onye ono, nọ ndzụ, bụru onye shikwawho eshi nkeshi nọduta tẹmenu mgboko dụ, bụru onye ono, l’abya nụ ono; ọo mu bụ Ọkalibe-kakọta-ike.”

Jọnu whụru Jisọsu Kuráyisutu l’ọwhulenya

⁹Ọo mbẹdua bẹ bụ Jọnu, bụkwawho nwanna unu, mbụ onye mu l’unu tụkoru bụru ndu whẹ lẹ Jisọsu tụgbaru bụru nnanụ, ọ bụkwanuru iya meru mu l’unu l’agbajẹ mgba ejekota iwhe-ọtsulanu lile, anyi l’eje; tẹmenu mu l’unu tụko bụru ndu Chileke bụ eze lẹ ndzụ whẹ. Mu l’unu l’agbajẹkwawho mgba nwụ-gbua iwhe l’obu. O nweru nteke ọbu, a kpụtaru mu je edobe lẹ Pátụmosu, bụ alị mini gbawheru mgburumgburu, nkele ọo lẹ mu l’ekfu okfu Chileke mẹkwawho nkele mu l’ekfuru madzụ lile nke ọkpobe iwhe ono, okfu Jisọsu Kuráyisutu goshiru mu. ¹⁰Ọ bya ebe ujiku lanụ ọbu, bụ mbọku Sọnde; Ume Chileke bya ejizhia mu who ẹhu; mu whụlahaa awhụ. Mu l’awhụ awhụ ono; bya anụa olu ọbu, l’adazhiawho ikike ikike g’ọo opyi-ọku l’ụzo azụ mu. ¹¹Olu ono sụ mu: “Jọnu! Dekotagezhikwaa iwhe lile-e, ị bya l’awhụ l’ẹkwo. I -degee ya; gụ ezhilahuru iya chọchi ẹsaa-a, mu bya l’a-gụshi. Chọchi ẹsaa ọbu, l’ii-zhilahuru iya bụ chọchi Éfesọsu mẹe chọchi Suména mẹe chọchi Pégamọmu mẹe chọchi Tayatáyira mẹe chọchi Sádisu mẹe chọchi Filadélufiya mẹe chọchi Leyodisíya.”

¹²Mu bya aghaa ẹnya l’azụ tẹ mu whụada onye ono, l’ekfu eyeru mu. Mu bya aghaa ẹnya ono mu whụa oryọku ẹsaa. Oryọku ẹsaa ono bụkota mkpọla-ododo b’e gudegee mee ya. ¹³L’echilabọ oryọku ẹsaa ono b’o nweru onye kfụru iya nụ, dụ-zhiawho g’ọo Abụbu Ndiwhe. O yee uwe mkpẹelanu. Ọ bya egudekwawho ajị, e gude mkpọla-ododo mee, gude kebuta uwe iya ono l’ume. ¹⁴Ẹgbushi, dụ iya l’ishi bẹ l’achazhiawho degedege g’ọo ẹji atụru, kweru ọcha ụcha, mbụ ọ chagezhiaru chaa g’ọo eberugo. Ẹnya iya dụ-zhiawho g’ọo iwhoro ọku, l’enwu enwu. ¹⁵Ọkpa iya whẹ ẹbo l’egbuzhiawho zhịizhii g’ọo mkpụrumkpu igwe, l’ama ụma, a hụru l’ọku jeye ọ chaa acha, mbụ hụta iya jeye o gbuchafu. Ọ bya ekfua okfu; olu iya l’aadalẹwho g’ọo ẹka eze mini l’awhụ gbudugbudu. ¹⁶Ọ chịru kpokponde ẹsaa l’ẹka-ụtara iya. Ogu-ịgba, l’atsụ nkọ iwhu labọ shi iya l’ọnu afụta. Iwhu onye ono l’egbuzhiawho zaazaa g’ọo iwhu ẹnyanwu nteke ẹnyanwu lwarụ l’ishi. ¹⁷Mu whụa ya, mu daa kpube iwhu lẹ mgboro ọkpa iya; dabuzhiaruwho g’ọo onye nwụhuru anwụhu. Ọ bya abyabẹ mu ẹka-ụtara iya asụje mu: “Ba atsụshi egvu, ọo mbẹdua bụ Onye Ivurụzo bụru Onye Ikpazụ. ¹⁸Ọo mbẹdua bụ onye nọ ndzụ tututu-mịmimi. Abyabya, mu shi bya lẹ mbụ bụkwa tẹ mu bya anwụhu; mu nwụhukwa ọbu. Ọle lekwa lẹ ntaa bẹ mu nọokwa ndzụ tututu-mịmimi. L’irigodo, l’eegudeje tụhaa ẹka ọnwu nọ mẹe ọwhu l’eegudeje tụhaa alị-maa bẹ kwa mu gudekota iya. ¹⁹Iwhe l’ii-me ntaa bụ: iwhe lile-e, ị whụkotawaru-a bẹ l’ii-de l’ẹkwo. I -degele iya who, gụ edee iwhe ọwhu l’egoshi g’iwhe dụ dụ nta-a, tẹmenu gụ edede iwhe ọwhu l’e-mekwanu lẹ mgbe l’iwhu. ²⁰A bya abya lẹ kpokponde ẹsaa-a, mu chị l’ẹka-ụtara mẹe oryọku ẹsaa ono, e gude mkpọla-ododo mee, bẹ mu bya l’a-karu ghu iwhe o nochiru ẹnya iya. Lẹ kpokponde ẹsaa ono bẹ nochiru ẹnya ojozhi-imigwe, mbụ ojozhi-imigwe, l’anọje elekotagee chọchi ẹsaa ono. Oryọku ẹsaa ono nochia ẹnya chọchi ẹsaa ono.”

Ozhi, Kuráyisutu zhiru chọchi Éfesọsu

¹“Ọ waa iwhe l’ii-de nụ ojozhi, l’eleta chọchi Éfesọsu ẹnya. Sụ iya agha:

Ọ waa bụ ozhi o zhiru t’e zhia ghu, mbụ onye ono, chị kpokponde ẹsaa l’ẹka-ụtara, ejekwawho ije l’echilabọ oryọku ẹsaa, e gude mkpọla-ododo. ²Sụa, mu makọtakwaru-a iwhe lile, unu l’anọje eme g’ọ ha. Lẹ mu makwarụ-a gẹ unu l’eseshibe anya ike mẹe lẹge unu l’atabejeru iwhe nshi. Mu makwarụ-a l’unu te ekwejedu tẹ ndu ejo ememe shita ẹka unu nọ. Unu datakọtaakwaru ndu lile ono, sụru lẹ whẹ bụ ndụ-ishi-ozhi, l’ẹbe abụkwanu lẹ whẹ bụ iya. Unu shiwaa nno bya amarụ lẹ whẹ ta abụdu iya, l’ọo ejire bẹ whẹ l’adzụ. ³Mu makwarụ-a l’unu l’atajẹru iwhe nshi, l’unu jewaru iwhe-ọtsulanu l’okfu ẹka mu jeshia ya ike, unu ta akpọ laa azụ.

⁴Ọle o nwekwaruwho ọrwu, mu whụtaru unu l’ẹhu. Ọrwu ọbu, mu whụtaru unu ọbu bụ l’ọ tọ bụhedu gẹ unu shi yebe mu obu lẹ mbụ, bụ gẹ unu yeru mu iya nta-a. ⁵Ọ kwa iya whọ bụ, t’unu nyatakwawhọ ẹka ono, unu jeberu, unu shiswee ụzo ono. Unu dakwawhọ onwunu ụta iwhe ono, dụ ẹji, unu l’eme; ghaa umere lwakfuta Chileke; bya emelahaa iwhe ono, unu shihawaa eme lẹ mbụlembu ono; ọdua bẹ mu l’a-byakfutakwa unu. Mu -byakwanụ; mu ewofu oryọku nke unu l’ẹka ọ dụ; t’a gbahalẹkwawho l’unu darụ onwunu ụta. ⁶Ọle ọbu g’ọ dụlekwaa, iwhe ọwhu mu hatarụ unu bụ l’ejo iwhe ono, whẹ l’eme mbụ ndu ono, l’eekuje ọgbo Nị́kolasu bẹ unu kpọru ashị gẹ mbẹdua kpọru iya.

⁷T’onye ụzo-nchị dụ ngabẹkwawho nchị, nụa iwhe-e, Ume Chileke, l’ekfuru iwhe bụ chọchi gẹ chọchi ha. Ọ kwa onye l’alwụje ọgu ono lwụta bẹ mu l’e-kwe t’o ria akpụru oshi ono, l’emeje t’a nọdugburu ndzụ, mbụ oshi ono, gvuru l’ogboduwhu Chileke.

Ozhi, Kuráyisutu zhiru chọchi Suména

⁸“Ọ waa iwhe ọwhu l’ii-dekwawho l’ẹkwo nụ ojozhi, l’eleta chọchi Suména ẹnya. Sụ iya agha:

Ọ waa bụ ozhi o zhiru t’e zhia ghu, mbụ onye ono bụ iya bụ Onye Ivurụzo, bụkwaruwho Onye Ikpazụ, mbụ onye ono nwụhuru nụ, e megee o shi l’ọnwu gbalihu. ⁹Sụa, mu makwarụ l’unu nọ l’iwhe-ọtsulanu. Mu makwarụwho l’unu bụ ndu ụkpa, ọle a -kpọbe iya kfude bẹ unu bụkwa ndu nweru iwhe ọkpobe enwenwe l’imigwe. Mu makwarụ-a nke ekfubyishi ono, ndu ejire ono, sụru lẹ whẹ bụ ndu Ju l’anọje ekfubyishi unu. Ọ dụ g’ọ bụ ndu ono ta abụkwa ndu Ju ilile. Iwhe whẹ bụ-chia kwa ndu l’edzukoje; abarụ Sétanu ẹja. ¹⁰Unu byakwa l’eje iwhe-ọtsulanu ntaa, ọle t’unu ba atsụkwa iya egvu. Unu lekwa lẹ Oshifutuswe bẹ l’a-hakwarụ unu chịta je atụshia mkpọro nke ọwhu l’ee-shikwanu ẹka ono data unu. Adata ọbu, l’aa-data unu ọbu bụ l’unu l’a-nọ l’iwhe-ọtsulanu jeye abalị iri agaa. Ọle, unu nọdulekwa mu whọ l’ẹka gẹ unu nọ iya; nọshia ya ike, mbụkwa eberu e je l’emeta unu iwhe-ọtsulanu ono nke ọwhu ishi unu l’a-la iya. Unu nọdulekwa mu whọ l’ẹka g’unu nọ iya; l’ee-megee bẹ mu l’e-kpubekwaa unu okpu-eze, l’e-goshi l’unu lwụwaru ọgu ono lwụta. Okpu-eze ono bụ ndzụ tututu-mịmimi.

¹¹T’onye ụzo-nchị dụ ngabẹkwawho nchị; nụa iwhe-e, Ume Chileke, l’ekfuru iwhe bụ chọchi gẹ chọchi ha. Ọ kwa onye l’alwụje ọgu ono lwụta bẹ bụ onye l’aata abyaa l’e-kwe t’ọnwu nke ugbo labọ ono gbua.

Ozhi, Kuráyisutu zhiru chọchi Pégamọnu

¹²“Ọ waa iwhe ọwhu l’ii-de nụ ojozhi, l’eleta chọchi Pégamọnu ẹnya. Sụ iya agha:

Ọ waa bụ ozhi o zhiru t’e zhia ghu, mbụ onye ono, gude ogu-ịgba ono, l’atsụ nkọ iwhu labọ. ¹³Sụa, mu makwarụ-a ẹka unu bu, mbụ l’unu bu l’ẹka ono, Sétanu l’achị. Ọle unu chịlekwarua ụkfu kwẹe l’ẹwha mu. Unu ta agọ l’unu te ekwehedu lẹ nkemu; lụfu-gee lẹ nteke ono, e gburu Ántipasu, nkele ọo l’ọ kfụru l’edzudzu-ọha, kfua l’ọo mu bẹ ya nọ l’ẹka. Ántipasu ono shi nno goshi lẹ ya gbarụ tẹ mu gude ire iya ẹka; mbụ ọ bụkwaru l’echilabọ unu bẹ iwhe ono nwụru l’ẹka ono, Sétanu bụ ebubu ono. ¹⁴Ọle o nwekwaru ụnwu iwhe olemole, bụ ọrwu, mu whụtaru unu l’ẹhu. O nwekwaru ndu harụ nọdu l’ime unu; eme ejo iwhe whẹ nwụtaru l’ẹka Bélamu. Ọ kwa Bélamu ono bẹ zhiru onye eze ono, ẹwha iya bụ Bélaku lẹ nteke ndụ-ichee ono ụzo, l’oo-shi duwhua ụnwu Ízurẹlu; duru whẹ ye l’ome iwhe-dụ-ẹji. O mee ụnwu Ízurẹlu, whẹ rilahaa iwhe a gbarụ ẹja l’agwa; mekwaa whẹ whọ; whẹ wata anọ awharwụshi onwowhe whẹ l’ụnwanyi. ¹⁵O nokwawho g’o nweru ndu nọ l’echilabọ unu l’etso iwhe ndu ono, l’eekuje ọgbo Nị́kolasu l’ezhi. Ndu ọgbo Nị́kolasu ono bụkwawho ndu l’eme ejo iwhe g’ọo Bélamu. ¹⁶Ọ kwa iya whọ bụ t’unu dakwawhọ onwunu ụta; ghaa umere lwakfuta Chileke, sefu ẹka l’iwhe-dụ-ẹji ono g’ọ ha. Ọdumeka bẹ mu l’a-byakfutaakwa unu ẹgwegwa ẹgweregwa. Mu -byakwanụ abya, mu egude ogu-ịgba ono, shi mu l’ọnu lwụshi ndu ono, l’eme ẹgube iwhe ono ọgu.

¹⁷T’onye ụzo-nchị dụ ngabẹkwawho nchị; nụa iwhe-e Ume Chileke, l’ekfuru iwhe bụ chọchi gẹ chọchi ha. Ọ kwa onye l’alwụje ọgu ono lwụta bẹ mu l’a-harụ nri ono, Chileke domiru edomi l’imigwe nụ. Nri ono bụ mana bẹ l’eekuje iya. Mu l’a-nụkwawho onye ono ẹwhuru, l’acha ụcha, e deru ẹwha ọwhuu. Ẹwha ọwhuu ono ta adụdu onye marụ iya nụ, ta agbahalẹwho onye ọbu, a nụru iya.

Ozhi, Kuráyisutu zhiru chọchi Tayatáyira

¹⁸“Ọ waa iwhe ọwhu l’ii-dekwanu nụ ojozhi, l’eleta chọchi Tayatáyira ẹnya. Sụ iya agha:

Ọ waa bụ ozhi o zhiru t’e zhia ghu, mbụ Nwa Chileke, bụ iya bụ onye ono, ẹnya dụ-zhiawho g’ọo iwhoro ọku, l’enwu enwu, bụkwaruwho onye ono, ọkpa iya whẹ ẹbo l’egbuzhiawho zhịizhii g’ọo mkpụrumkpu igwe, l’ama ụma, e huchachagezhiaru; o gbuchafu. ¹⁹Sụa, mu makọtakwaru-a iwhe lile, unu l’anọje eme g’ọ ha, marụ lẹge unu gude yebe ndu ọdo obu, makwarụwho l’unu nọdukwa mu-a l’ẹka g’unu nọ iya, makwarụwho lẹge unu gude ejeshiberu mu ozhi ike mẹe lẹge unu l’egudeje ataberu iwhe g’iwhe ha nshi. Mu makwarụ-a l’iwhe ọwhu unu l’eme ntaa bẹ danyikotaru ọwhu unu shi eme lẹ mbụ.

²⁰Ọle o nwekwaruwho ọrwu, mu whụtaru unu l’ẹhu. Ọrwu ọbu, mu whụtaru unu bụ l’unu harụ tẹ nwanyị ono, bụ Jézebẹlu nọdu l’echilabọ unu. L’ejo nwanyị ono bẹ l’asụje lẹ ya l’ekfuchiru Chileke okfu, ọle iwhe l’ọonoje ezhi ndu l’ejeru mu ozhi bụlewho ejire. Ọ bụru iwhe ono, l’ọonoje ezhi whẹ ono bẹ l’oogudeje dota whẹ ye tẹ whẹ wharwụshije onwowhe whẹ l’ụnwanyi, l’oogudejekwa iya who eme tẹ whẹ rije iwhe a gbarụ ẹja l’agwa. ²¹Mu haakwaru iya ụzo nọo ọdu, t’o gude daa onwiya ụta iwhe-dụ-ẹji ono, l’oome; ghaa umere lwakfuta Chileke, ọle o to kwedu daa onwiya ụta haa ụrwu-alị ono l’ọorwu. ²²O noo iwhe meru mu bya l’eme iya t’ọ zẹe l’ẹhu-ba-dụ-mma. Ndu ono, whẹ l’iya l’anọje eriwhe ogori ono bẹ mu l’e-me; whẹ ejee ejo iwhe-ọtsulanu, parụ ẹka; m’ọ -bụru lẹ whẹ ta adadụ onwowhe ụta iwhe-dụ-ẹji ono whẹ l’eme, haa otso yẹbe nwanyị ono. ²³Ụnwu iya gẹ whẹ ha bẹ mu l’e-gude mgbu-ọnwu je egbushigezhia kpamụ kpamụ. Ọ kwanụ iya bụ nke ọwhu iwhe bụkota chọchi gẹ chọchi ha l’a-makwanụ l’ọo mbẹdua bụ onye ono, l’enyoje uche madzụ; nyoo obu iya, marụ iwhe dụ iya l’ego. Mu l’a-nụkota-gezhia unu g’unu ha iwhe gbarụ unu l’ẹhu l’ẹhu. Onyenọnu bẹ mu l’a-nụ iwhe lẹge iwhe o megbaberu dụ dụ. ²⁴A bya abya l’unubẹ ndu ọwhu bukwawho lẹ Tayatáyira; unubẹdua te ekwedu ye ẹka l’ejo iwhe ono, ndu ono l’ezhi. Unubẹdua bụ ndu ọwhu l’ẹte amaa iwhe ono, o nweru ndu l’ahajẹru sụ l’ọo iwhe e domigeeru edomi lẹ nke ẹhu Sétanu. Unubẹdua ta adụhekwa iwhe ọdo, mu l’asụkwadu t’unu mee. ²⁵G’ọ dụlee, t’unu chịkwaru ẹka labọ kwẹe l’iwhe ono, bụwaa nke unu kpachịshikwaa ya ike jeye nteke mu l’a-bya ọdo.

²⁶Ọ kwa onye l’alwụje ọgu ono lwụta mẹe onye l’eme iwhe mu kfuru, mbụ onye l’emezhia ya who jeye lẹ mgbe ikpazụ; o nokwa onye mu l’e-ye ike l’ẹka t’ọ bụru onye ishi; l’achị mba lile. ²⁷Ọlewho lẹge Nna mu yeru mu ike l’ẹka; bụ gẹ mu l’e-yekwa whẹ whọ ike l’ẹka; whẹ egude oshi-igwe gude achị mba lile lẹge eze l’achịje mkpụkpu iya, nke ọwhu whẹ l’e-me mba lile ono, whẹ adụ g’ọo ite ụrwa, a tụkporu; tsua ya yọgiri-yọgiri. ²⁸Ndu ono, mu yeru ike ono l’ẹka bẹ mu l’a-nụfukwaawho kpokponde mbọ-muchi.

²⁹T’onye ụzo-nchị dụ ngabẹkwawho nchị, nụa iwhe-e, Ume Chileke l’ekfuru iwhe bụ chọchi gẹ chọchi ha.

Ozhi, Kuráyisutu zhiru chọchi Sádisu

¹“Ọ waa iwhe ọwhu l’ii-de nụ ojozhi, l’eleta chọchi Sádisu ẹnya. Sụ iya agha:

Ọ waa bụ ozhi o zhiru t’e zhia ghu, mbụ onye ono, bụ iya gude Ume ẹsaa Chileke ono, gudekwawho kpokponde ẹsaa whọ. Sụa, mu makọtakwaru-a iwhe lile, unu l’anọje eme g’ọ ha. L’aanọjenu eku unu ndu nọ ndzụ, ọle unu bụ ndu nwụhuru anwụhu. ²O wuduakwaru nwanshị ntaa; iwhe ọbu, unu nweru anwụnyi-hurwee ẹnya. Ọo ya bụ, unu lwutehukwawho nwụru ẹnya; kwabẹru iya ẹnya nke ọwhu l’ọo-gbakerehu. Mu daleekwaru unu; whụwaa l’iwhe lile, unu meru ta adụdu ọwhu unu metawaru nke ọwhu o dzuru oke l’iwhu Chileke mu. ³Ọo ya bụ, t’unu nyatakwawhọ ozhi-ọma ono, unu nụru lẹ nchị unu, unu kwetakwa iya whọ. Unu kfụkwaruwho kfụshia ike l’iwhe ozhi-ọma ono l’ekfu. Unu adakwaawho onwunu ụta iwhe ono, dụ ẹji, unu l’eme; ghaa umere lwakfuta Chileke. Ọ -bụkwaru l’unu te elwutehudu nwụru ẹnya, bẹ mu l’e-melekwa unu lẹ nzirizẹhu byakfuta unu, mbụ byalẹwho g’ọo onye oshi l’ẹte adụa onye l’amajẹ nteke l’ọobya. Ọo ya bụ l’unu ta abyadụ l’ama oge nteke mu l’a-byakfuta unu.

⁴Ọle, o nwekwaru-a nwakpụru ụmadzu olemole, unu lẹ whẹ nọ lẹ Sádisu l’ẹka ono, bụ ndu l’ete emerwushia onwowhe. Ọo ndu ono bẹ l’e-ye uwe ọcha; mu lẹ whẹ eburu eburu nkele whẹ goshiwaru l’o noo iwhe rwuberu whẹ nụ ndono. ⁵Ọ kwa onye l’alwụje ọgu ono lwụta bẹ Chileke l’e-yebe uwe ọcha ono. Onye ono bẹ mu l’a-byakwaa l’a-kachafụ ẹwha iya l’ẹkwo ẹka, e deshiru ẹwha ndu nọ ndzụ tututu-mịmimi. Mu l’a-kfụru l’iwhu Nna mu mẹe l’iwhu ndu ojozhi iya, nọ l’imigwe, kfua ya hoohaa sụ l’onye ono bẹ bụkwa onye nọ mu l’ẹka. ⁶T’onye ụzo-nchị dụ ngabẹkwawho nchị nụa iwhe Ume Chileke l’ekfuru iwhe bụ chọchi gẹ chọchi ha.

Ozhi, Kuráyisutu zhiru chọchi Filadélufiya

⁷“Ọ waa iwhe ọwhu l’ii-de nụ ojozhi, l’eleta chọchi Filadélufiya ẹnya. Sụ iya agha:

Ọ waa bụ ozhi o zhiru t’e zhia ghu, mbụ onye ono, dụ nsọ, bụ iya bụ onye ono bụ iya bụ ọkpobe onye ire-lanụ ọbu. Onye ono, bụ iya gude irigodo eze ono, bụ Dévidi; onye bụ iya l’abụje: ọ -gụhawaa ụzo, ọ tọ dụhedu onye ọdo, fụru guchia ya; nteke bụ l’ọo aguchi b’o guchiru iya, ọ tọ dụhedu onye ọdo, fụru gụhaa ya. ⁸Sụa, mu makọtakwaru-a iwhe lile, unu l’anọje eme g’ọ ha. Lee lẹ mu gụhaakwaru ụzo gheberu unu ọnu; ọ tọ dụkwa onye fụru guchia ya. Mu makwarụ-a l’ike ta akwatadu dụ unu, ọle unu kfụlekwarua kfụshia ike l’okfu ono, mu kfuru; emekwa iya who eme, unu ta agọfujeru l’unu ta abụhedu ndu nke mu. ⁹Lee ndu ono, l’edzukobeje abarụ Sétanu ẹja, mbụ ndu ono, l’anọje adzụ-whe ejire sụ lẹ whẹ bụ ndu Ju, lẹ whẹ ba abụkwa iya nu, ndu ono bẹ mu l’e-me, whẹ abya ebyishi ikpere l’alị l’atatiwhu unu; baarụ unu ẹja. O noo gẹ mu l’e-shi mee: whẹ amarụ lẹ mu yeru unu obu. ¹⁰L’o nwekwaru nteke iwhe-ọtsulanu l’e-be dakfuta ndu bụ lẹ mgboko kpaa-whuu. Iwhe-ọtsulanu ono bụ iwhe l’a-datakọta madzụ lile. Nteke iwhe-ọtsulanu ono byarụ bẹ mu l’a-kwachikwaa unu, t’ọ bọ dụ iwhe l’e-me unu. O noo nkele unu doberu obu l’ozhi ono, mu zhiru unu; bụ iya bụ t’unu kfụkwaru kfụshia ike, unu atajẹru iwhe lile nshi. ¹¹Mu ta anọhekwa ọdu nta-a; mu abya. Unu chịkwaru ẹka labọ kwẹe l’iwhe ono, bụwaa nke unu kpachịshia ya ike, mbụ t’ọ bọ dụ onye l’a-nyịchata unu okpu-eze ono, Chileke l’e-gude bua unu obunggo bụ iya bụ ndzụ tututu-mịmimi. ¹²Ọ kwa onye ono, l’alwụje ọgu ono lwụta bẹ mu l’e-me, ya adụ g’ọo itso lanụ l’itso, gude eze-ụlo Chileke mu. Ya abụru ẹka ono bẹ onye ọbu l’a-nọgbuwaruro jeyewaro lẹ tututu-mịmimi. Mu abya edee ya ẹwha Chileke mu ono l’ọnu iwhu; dekwaa ya who ẹwha nke obodo Chileke mu ono bụ iya bụ Jerúsalẹmu ọ̀whúú. Obodo ono bụ l’imigwe ẹka, Chileke mu ono nọ bẹ l’oo-shi bya. Mu l’e-dekwawho ẹwha ọ̀whúú mu l’atatiwhu onye ono. ¹³T’onye ụzo-nchị dụ ngabẹkwawho nchị; nụa iwhe-e Ume Chileke l’ekfuru iwhe bụ chọchi gẹ chọchi ha.

Ozhi, Kuráyisutu zhiru chọchi Leyodisíya

¹⁴“Ọ waa iwhe ọwhu l’ii-de nụ ojozhi, l’eleta chọchi Leyodisíya ẹnya. Sụ iya agha:

Ọ waa bụ ozhi o zhiru t’e zhia ghu, mbụ onye ono, ẹwha iya bụ: O noo g’ọ dụ, mbụ onye ono, ọ gbarụ nke t’e gude ire iya ẹka l’iwhe lile, l’ookfuru anyi, bụru iya bụ onye kfuru anyi ọkpobe-okfu Chileke, bụkwaru iya whọ bụ onye iwhe lile, Chileke meru dobe lẹ mgboko-o shi l’ẹka iya. ¹⁵Sụa, mu makọtakwaru-a iwhe lile, unu l’anọje eme g’ọ ha. Mu makwarụ-a l’unu ta akọkahudu ibe iya ọwhu unu tso etso, l’unu te egudedu obu unu g’ọ ha etso mu, unu ta adụhunu ike gbafụ ọnu sụ l’unu ta amahẹkwa onye mu bụ. Ha! Ọ gọ dụkwanu mu ree ọ -bụ l’unu kfụru l’ọkpa lanụ sụ l’unu gude obu unu g’ọ ha etso mu; ọwhu bụ l’unu ta abụdu nke mu. ¹⁶Ọo ya bụ, eshi-ọwhu unu l’ẹte akfụaru l’unu gude obu unu g’ọ ha etso mu, unu ta akfụru l’unu ta abụdu nke mu bẹ mu l’a-jịkakwa unu l’owhu l’owhu. ¹⁷Unu l’anọje ekfu l’unu nweru iwhe, l’unu nweru iwhe; ekfukwawho l’iwhe kwebukwaaru unu; woo tọ dụ-zhia iwhe ụko iya dụru unu. Nshọo unu, unu ta amadụroo l’unu gbarụ nke t’a kụjeru unu nshọ, unu bụru ndu mkpẹgu, unu l’atsọ ishi; agbakwawhọ ọto. ¹⁸Ọo ya bụ l’ọdu, mu l’adụ unu bụ t’unu byachia bya azụta mbẹdua mkpọla-ododo, a hụwaru l’ọku gude mee ya, ọ dụ ree, mkpaba ta adụhe iya nggẹ o mee unu t’unu bụru ndu nweru iwhe. Unu abyakwawhọ bya anmata mu uwe ọcha yeje, t’unu ba agbahẹ ọto nke ọwhu iwhere l’a-dụ-buhukwanu unu. Unu azụtakwa mu whọ ọgvu-ẹnya, tee l’ẹnya ono nggẹ unu whụlahaa ụzo. ¹⁹L’ọ kwa iwhe bụ ndu mu yeru obu bẹ mu l’abajẹru mba, hụ̀a whẹ àhụ̀hù nggẹ whẹ marụ iwhe. Ọ kwa iya whọ bụ, t’unu gudenu obu unu g’ọ ha meje iwhe ono, mu kfuru ono, unu dadụa onwunu ụta; haa ome iwhe-dụ-ẹji, unu l’emegbabe lwakfuta Chileke. ²⁰Unu lekwawho lẹ mu kfụkwaru l’ọnu-ụlo akụ ẹka l’ụzo. Onye -nụru olu mu, gụhaaru mu ụzo, mu abata. Mu l’onye ono eyeko ẹka ria nri, onye ria nke ibe iya, onye eria nke ibe iya.

²¹Ọ kwa onye ono l’alwụje ọgu ono lwụta bẹ mu l’e-kwe t’ọ nọkube mu l’oshi-eze mu, bụnua gẹ mbẹdua lwụru lwụta; mu nọkube Nna mu l’oshi-eze nkiya. ²²T’onye ụzo-nchị dụ ngabẹkwawho nchị, nụa iwhe Ume Chileke l’ekfuru iwhe bụ chọchi gẹ chọchi ha.”

Ọbaru Chileke ẹja l’imigwe

¹Ọo ya bụ, o noo gvụlewho, mu bya elee ẹnya ọdo, whụa ụzo, gheru ọnu l’imigwe.

Olu mbụ whọ, mu shi anụhawaa, mbụ olu ono, l’ada g’ọo opyi-ọku; sụ mu: “Nyibataduwho bya ẹka-a; byadụwho tẹ mu goshigezhia ghu iwhe l’e-mekota lẹ mgbe l’iwhu.” ²E jia ekfu-a, Ume Chileke bya ejizhia mu whọ ẹhu kpimu. O noo ya, mu bya elee ẹnya, o nweru oshi-eze, dụ l’imigwe l’ẹka ono. O nwekwaruwho onye nọdu iya nụ. ³Onye ono, nọ l’oshi-eze ono bẹ iwhu iya l’egbuzhiawho zaazaa g’ọo ẹwhuru jasupa; iwhu onye ono l’egbukwawho zaazaa g’ọo ẹwhuru ono, l’anọje eke uswe uswe, bụ kánílìyánù. Iwhe duwheru oshi-eze ono mgburumgburu bụ evu-mini, l’ekelewho oyii oyii g’ọo ẹgube ẹwhuru emeraludu. ⁴O nweru oshi-eze ụkporo l’ẹno ọdo, dụ-wheru oshi-eze ono mgburumgburu. Ndu bụ ọgurenya ụkporo l’ẹno nọdu-gee l’oshi-eze ono. Whẹ yegbagezhia uwe, l’acha pelepele l’ẹhu l’ẹhu. Whẹ kpugekwaaruwho okpu-eze, e gude mkpọla-ododo mee l’ishi. ⁵Ebemu-igwe l’eshijelewho l’ẹka ono, oshi-eze ono dụ awalẹwho whoo! Whoo! Mu l’anụkwawho olu-okfu, shigee l’ẹka ono. Igweli l’edekwawho edede shikwawho l’ẹka ono agba egbe-igwe. Ọku ogọwa ẹsaa dụkwawho l’atatiwhu oshi-eze ono, enwukaa jajaja bụ iya bụ Ume ẹsaa nke Chileke ono. ⁶Iwhe ọdo, dụfukwaawho l’atatiwhu oshi-eze ono bụ iwhe ọbu, dụ g’ọo eze-ẹnyimu, l’awhụ onyo g’ọo iwhe e gude onyo mee.

L’echilabọ oshi-eze ono b’o nweru iwhe ẹno, nọ-gee ndzụ, nọ iya nụ. Iwhe ono bẹ nowhekwaruwho oshi-eze ono mgburumgburu. Iwhe ẹno ono bẹ tụkoleruwho ẹhu iya g’ẹhu iya ha mokashia ẹnya iwhu m’azụ. ⁷Nke mbụ l’iwhe ono, nọ-gee ndzụ ono bẹ dụlewho g’ọo oduu-gburu-agụ; nke ẹbo dụlewho g’ọo nwa oke-eswi; nke ẹto bẹ nwelewho iwhu, dụ g’ọo nke madzụ; ọwhu kwe iya ẹno bẹ dụlewho g’ọo ugo, l’ewhe l’eli. ⁸Iwhe ẹno ono, nọ-gee ndzụ ono bẹ nwegbagezhiaru akwẹka ishii ishii l’ẹhu l’ẹhu. Ọ kwawhọ ẹnya ẹnya bẹ tụkoru akwẹka whẹ ono g’ọ ha narụ, l’elikoru iya mẹe l’ime iya. Whẹ l’agụkotaje egvu eswe l’ẹnyashi asụje:

“Ọ dụ nsọ; ọ dụ nsọ; ọ dụ nsọ;

Mbụ Onye-Nwe-Ọha ono, bụ Chileke,

Onye bụ iya bụ Ọkalibe-kakọta-ike.

Ọo ya bụ Chileke ono, shihawaa eshi nkeshi nọduta tẹmenu mgboko dụ,

ọ bụru onye nọ ndzụ nta-a,

ọ bụkwaru iya whọ bụ onye ono, l’abya nụ ono.”

⁹Iwhe ono, nọ-gee ndzụ bẹ l’agụ egvu ajalẹwho onye ono, nọdu l’oshi-eze ono, bụ iya bụ onye ono, nọ ndzụ tututu-mịmimi ono; whẹ l’agụ egvu ono gude akwẹe ya ugvu, gude iya etu iya ẹwha. L’ọobuje nteke bụ nteke whẹ gụleruwho egvu ono, ¹⁰ndu bụ ọgurenya ụkporo l’ẹno ono adakọta kpube iwhu l’alị l’atatiwhu onye ono, nọ l’oshi-eze ono, bya abaarụ yẹbe onye ono, nọ ndzụ tututu-mịmimi ono ẹja. Whẹ ekpushia okpu-eze whẹ wụshi l’iwhu oshi-eze ono asụje:

¹¹“Ọo ghu bụ Onye-nwe-anyi, bụru Chileke anyi.

Ọ gbarụ nke t’a jaa ghu ajaja, gụa eria ugvu,

l’ọo ghu kakọta iwhe lile ike.

O noo nkele ọo gụbedua keru iwhe lile dobe.

Ọ kwawhọ l’ọ dụ ghu l’uche meru g’o gude whẹ dụ,

bụru iwhe e keru dobe.”

Nwatụru Chileke ono yẹle ẹkwo ono, a gwọru agwọ

¹Tọ dụ iya bụ lẹ mu abya awhụa l’o nweru ẹkwo, a gwọru agwọgwo, o gude l’ẹka mbụ onye ono, nọ l’oshi-eze ono. Ẹkwo ono b’e deru iwhe, iwhu m’azụ. A whuchia ya, gude iwhe-ọhubama ẹsaa nyachishia ya. ²Mu bya awhụa ojozhi-imigwe lanụ, e yeru ike, ha shii l’ẹka gẹ l’ọorya iya arya asụje: “?Oo onye bẹ l’a-sụ lẹ ya tụru onwiya ẹkpu; lẹ ya gbarụ nke tẹ ya nyashịa iwhe-ọhubama ono, e gude nyachishia ẹkwo ono, a gwọru agwọgwo ono; ?ọo onye l’a-bya atụhaa ya?” ³Ọle ọ tọ dụkwa m’ọo onye lanụ l’imigwe, ọdua l’ọo l’eliwhe, ọdua l’ọo l’ime alị, dụ ike tụhaa ẹkwo ono, a gwọru agwọgwo ono, nke ewhoroo i le iya ẹnya l’ime. ⁴Mu ryagezhia ẹkwa ryabaa ya whọ, nkele ọ tọ dụdu onye gbarụ nke t’ọ tụhaa ẹkwo ono; nke ewhoroo i le iya ẹnya l’ime. ⁵Tọ dụ iya bụ l’onye lanụ lẹ ndu bụ ọgurenya ono asụ mu: “Ba aryashi ẹkwa. Leenu; Onye ono, ẹwha iya bụ Oduu ono, shi l’ikfu Juda, mbụ o-shi-l’eri Dévidi, bẹ lwụakwaru ọgu ono lwụta. Ọo ya bụ onye l’a-dụ ike tụhaa ẹkwo ono, a gwọru agwọgwo ono, nyashịa ya iwhe-ọhubama ẹsaa ono, e gude nyachishia ya.”

⁶O noo ya, mu bya awhụa Nwatụru ono g’ọ kfụru lẹ mgbakụ oshi-eze ono yẹle iwhe ẹno whọ, nọ-gee ndzụ. Ọ kfụ-zhiaruwho l’atatiwhu ndu bụ ọgurenya ụkporo l’ẹno ono. Nwatụru ono bẹ dụ-zhiawho g’e gbujehawaru iya ro gude gbaa ẹja. Nwatụru ono bẹ furu mpu ẹsaa, mokwaawho ẹnya ẹsaa, bụ iwhe nọ-chigeeru ẹnya Ume ẹsaa Chileke, mbụ Ume ẹsaa, Chileke zhikashiwaru tẹ whẹ jekashihu dzuru mgboko g’ọ ha. ⁷Nwatụru ono bya ejekfu onye ono, nọdu l’oshi-eze ono, je anata iya ẹkwo ono agwọgwo ono ọ pa l’ẹka-ụtara. ⁸Ọ natalẹwho ẹkwo ono, iwhe ẹno ono, nọ-gee ndzụ mẹe ndu bụ ọgurenya ụkporo l’ẹno whọ, bya adakọta kpube iwhu l’atatiwhu Nwatụru ono, baarụ iya ẹja. Ndu bụ ọgurenya ono bẹ tụkoru pagbaaru eze une l’ẹhu l’ẹhu; gudegekwaawho eze efere, e gude mkpọla-ododo kpụa. Iwhe jiru ya nụ bụ isẹnsu ono, ẹnwuru iya l’anọje eshi kwẹkwekwe. Ẹnwuru isẹnsu ono bẹ nochiru ẹnya ekfukfu ono, ụnwu Chileke l’anọje ekfu anụ Chileke. ⁹Ndu bụ ọgurenya ono tụko agụ egvu ọ̀whúú asụje:

“Ọo ghu bụ onye gbarụ nke t’i wota ẹkwo ono,

nyashịa ya iwhe-ọhubama ono, e gude nyachishia ya.

E gburu ghu egbu, i gudewaa mmee ghu gbatarụ Chileke madzụ,

mbụ ndu shi l’ikfu g’ikfu ha,

mẹe ndu shikota l’iwhe bụkota okfu-alị l’ekfu ekfu, dụkota lẹ mgboko mẹe lẹ mkpụkpu gẹ mkpụkpu ha,

mẹe lẹ mba gẹ mba ha l’eli-mgboko-o.

¹⁰I mewaru whẹ, whẹ bụkotaru eze,

mekwaa whẹ whọ, whẹ bụkotaru ndu l’agba ẹja anụ Chileke anyi.

Ọ bụru whẹ l’a-nọ achị ndu mgboko.”

¹¹Ọo ya bụ, mu bya awhụa ojozhi-imigwe, ha l’igweligwe. Mu l’anụkwawho olu whẹ. Ojozhi-imigwe ono kakwa ụnukurunu ụnukurunu ugbo olemole; whẹ hatarụ l’igwe, nke ọwhu l’ọodua onye fụru gụta whẹ l’ọgu. Gẹ whẹ hakọta, whẹ l’iwhe ẹno ono, nọ-gee ndzụ mẹe ndu bụ ọgurenya whọ kfụ-whe oshi-eze ono mgburumgburu. ¹²Whẹ l’agụ egvu kwata wolia olu asụje:

“Nwatụru ono, e gburu t’ọ bụru ẹja ọha ono

b’ọ gbakwarụ nke t’e mee t’ike lile lwa iya l’ẹka,

ya atụko iwhe lile nweru, ya enwekotaru mmamagụ,

ya abụru onye ishi iwhe lile; t’a kwabẹ iya ugvu, jaa ya ajaja!

T’a jaa ya ajaja, t’a gọru ọnu nụ iya.”

¹³Mu nụa g’iwhe bụkota iwhe Chileke keru eke dobe l’imigwe mẹe ọwhu o keru dobe lẹ mgboko mẹe ọwhu o keru dobe l’ime alị mẹe ọwhu o keru dobe l’eze-ẹnyimu, mu nụa gẹ whẹ tụkoru agụ egvu asụje:

“Ọnu ọma lile, l’aagọ agọ mẹe ugvu g’ugvu ha,

mẹe ajaja mẹe ọbu onye ishi iwhe lile,

tụko bụkotaru nke ghu,

gụbe onye ono, nọdu l’oshi-eze ono,

ya abụkwaruwho nke Nwatụru ono jeyewaro lẹ tututu-mịmimi.”

¹⁴Iwhe ẹno ono, nọ-gee ndzụ ono tụko zụa: “O noo g’ọo dụ-oo!” Ndu bụ ọgurenya ụkporo l’ẹno ono dakọta kfube iwhu l’alị, baarụ onye ono, nọ l’oshi-eze ono ẹja, bakwaaru whọ Nwatụru whọ.

Iwhe ọhubama, e gude nyachishia ẹkwo ono

¹Tọ dụ iya bụ lẹ mu abya awhụa gẹ Nwatụru ono byabya anyafụ nke mbụ l’iwhe-ọhubama ẹsaa ono, e gude nyachishia ẹkwo ono. Mu nụa gẹ nnanụ l’iwhe ẹno ono, nọ-gee ndzụ gude olu, dụlewho g’ọo egbe-igwe sụ: “Ngwaa!” ²Mu bya elee ẹnya, whụa ịnya, l’acha ụcha. Onye nokoru iya l’eli agba bẹ gudewho ube, l’eegudeje agba akfụ. Onye ono b’e kpuberu okpu-eze l’ishi. O gude ịnya ono gbagbụa jeshia ọgu, o jeshia ọlwu ndu ọhogu iya gẹ l’ọolwujehawa whẹ.

³Nwatụru ono byakwa bya anyafụ iwhe-ọhubama nke ẹbo l’iwhe ono, e gude nyachishia ẹkwo ono. Mu nụkwaa gẹ nke ẹbo l’iwhe ẹno ono, nọ-gee ndzụ sụru: “Ngwaa!” ⁴Ịnya ọdo lụfutakwa. Ịnya ono l’ekelewho uswe uswe g’ọo ọku. A bya eworu ogu-ịgba, parụ ẹka nụ onye nokoru iya l’eli. E zhi iya t’o je emee tẹ ndu mgboko lwụshije ibe whẹ ọgu, t’o mee tẹ ndiwhe gbushije onwowhe nke ọwhu ẹhu ọdu guu l’ẹte adụhe lẹ mgboko.

⁵Nwatụru ono byakwa anyafụ iwhe-ọhubama ono nke ẹto. Mu nụa gẹ nke ẹto l’iwhe ono, nọ-gee ndzụ sụru: “Ngwaa!” Mu bya elee ẹnya, whụa ịnya, l’eji hụnyihunyi. Onye nokoru iya l’eli parụ iwhe l’eegudeje atụ ẹrwa iwhe. ⁶Mu nụa iwhe dụ g’ọo olu-okfu, shi l’echilabọ iwhe ẹno ono, nọ-gee ndzụ gẹ l’ookfuje asụ: “Iwhe l’erekwa ire nke ọwhu witi, l’ee-gude aswa ozhi ujiku lanụ wụta bụ onye lanụ bẹ l’oo-ji ẹwho. Balị, e gude aswa ozhi ujiku lanụ wụta bụru ụmadzu ẹto bẹ l’oo-ji ẹwho. Ọle t’e be emebyikwa mmanụ yẹle mmẹe emebyi.”

⁷Nwatụru ono byakwa anyafụ iwhe-ọhubama ono nke ẹno. Mu nụa gẹ nke ẹno l’iwhe ono, nọ-gee ndzụ sụru: “Ngwaa!” ⁸Mu bya elee ẹnya, whụa ịnya, nweru enwe g’ọo odzu. Onye nọdu iya l’eli bụru Anwụhu. Alị-maa l’etso iya l’azụ. A bya ekee mgboko uzhi ẹno, woru nnanụ ye whẹ l’ẹka, sụ tẹ whẹ gude ogu-ịgba mẹe mkpẹgu mẹe mgbu-ọnwu mẹe anụ-ẹworo megbushia iwhe lile, bukota l’uzhi lanụ ono.

⁹Tọ dụ iya bụ lẹ Nwatụru ono abya anyakafụkwa iwhe-ọhubama ono ọwhu kwe iya ise. Mu bya awhụa ẹnya-mgbẹja Chileke l’ẹka ono. Iwhe jizhiaruwho mkpula ẹka ono bụru maa ndu ono, e gburu l’ike nkele whẹ kwetaru iwhe okfu Chileke kfuru mẹe nkele whẹ shi anọje eme egoshi lẹ whẹ bụ ndu nke Chileke. ¹⁰Whẹ tụko gẹ whẹ ha ryagbabẹ ọrya, ryashịa ya ike sụ: “Onye-Nwe-Ọha-ee! Ọo ghu bẹ bụ onye dụ nsọ, ọ bụkwaru ghu whọ bụ onye l’emeje iwhe g’i kfuru iya. ?O zhia anyi nọ-beedaa agha, tẹhenu gụ ekua ndu bu l’eliwhe, kpaa ishi iwhe anyi meru whẹ, gwata whẹ ụgwo egbugbu-a, whẹ gburu anyi?” ¹¹Tọ dụ iya bụ, a bya ekekashiaru whẹ uwe mkpẹelanu, l’achakaa pelepele. A sụ whẹ: “Unu nọdukwadu tụtajero ume, unu l’atụta. Unu taa nshi, ngabẹfua nwanshị, l’unu teke edzudua. Unu tụtajekwaduro ume jeye nteke unu l’e-dzu edzu. L’ọ kwa g’e gburu unubẹdua, bụ g’e gbujekwawho igweligwe ndu ọdo l’eliwhe, mbụ ndu bụkwawho ụnwunna unu, bụkwawho ndu l’ejeru Chileke ozhi lẹge unubẹdua jeru iya.”

¹²Mu byakwa awhụ gẹ Nwatụru ono nyafụru iwhe-ọhubama ono nke ishii, alị wata ọnma oke jijiji anmashi iya ike, ẹnyanwu jikputa jide g’ọo unyi-nwite-ọku. Ọwhube ọnwa l’owhu ghọkota, kehu yorokoto g’ọo mmee. ¹³Ọwhube kpokponde, dụ l’igwe l’aadashịkaa l’alị g’ọo figu, l’erishihu akpụru iya ndu ọwhu dụkwadu l’okurutuu, mbụ gẹ l’ọodaje mẹ oke whẹrewhere l’ewhe, anma iya yika yika. ¹⁴Igweli gwọo onwiya gẹ l’aagwọje ute gwọfu; a whụ-beru iya. Iwhe bụkota ugvu, dụ l’ẹka lile mẹe alị, mini sowheru mgburumgburu b’a tụko-gezhiaru wofukota l’ẹka whẹ shihawaa dụkota. ¹⁵Tọ dụ iya bụ l’iwhe bụkota-gezhia ndu eze nke eliwhe mẹe ndu bụ oke-amadụ whẹ mẹe ndu ishi ndu ojọgu mẹe ndu nweru iwhe mẹe ndu okpẹhu dụ mẹwaro madzụ lile kpaa-whuu, ohu l’amadụ, tụko je edomishikota onwowhe l’ime ọgba mẹe lẹ mkpula ẹwhuru l’ẹka ugvu dụ. ¹⁶Whẹ l’aryakukaa ugvu ono mẹe ẹwhuru ono asụje: “Byiko, unu daa tụpyabenu anyi, domia anyi t’onye ono, nọdu l’oshi-eze ono ba awhụ anyi mẹe t’oke-ẹhu-eghughu Nwatụru ono be erwu anyi l’ẹhu. ¹⁷O noo lẹ mbọku ọbu, oke-ẹhu-eghughu onye ono, nọ l’oshi-eze ono mẹe nke Nwatụru ono l’a-dakfu ndiwhe bẹ rwuwaru nu; tẹ ?ndẹkwanu rọo onye l’a-dụ ike kfụru kpọ iya iwhu?”

Igweligwe ndu Ízurẹlu, e meru ọhubama l’iwhu

¹E megelewho, mu bya awhụa ojozhi-imigwe, dụ ẹno, gẹ whẹ kfụru lẹ mgboko l’uzhi ẹka ẹno ono, igwe beru, alị beru. Ojozhi ẹno ono segudegee whẹrewhere, l’eshije l’uzhi ẹka ẹno ono ewhe t’o bo whehe lẹ mgboko. Tọ dụhe whẹrewhere, l’ewhe lẹ mgboko, to whe l’alị; to whe lẹ mini; to whe l’eli oshi. ²Mu bya awhụa ojozhi-imigwe ọdo g’o shi l’ụzo ẹka ẹnyanwu l’awatajẹ eje abya. Ojozhi ono bẹ gude iwhe shi l’ẹka Chileke ono, nọ ndzụ, mbụ iwhe l’ee-gude eme iwhe-ọhubama l’ẹhu. Ọ bya aryaa ya ryashịa ya ike sụ ndu ojozhi-imigwe ẹno whọ, Chileke zhiru tẹ whẹ je emebyishia eliwhe, mebyishia mini, ³sụ whẹ: “T’unu beke emebyidekwaa mgboko, unu eje emebyiwaa mini, unu eje emebyiwaa oshi. Iwhe mbụ, anyi l’e-vuada ụzo mee kwa t’anyi vuadaru ụzo mee iwhe bụ ndu lile, l’ejeru Chileke anyi ozhi iwhe-ọhubama l’egedegede ọnu iwhu.” ⁴A kọo ụmadzu ole, e meru iwhe-ọhubama, mu nụa: whẹ dụ ụnu madzụ ụkporo ugbo iri l’ẹsato. Ndu ono shi l’ikfu g’ikfu ha l’alị Ízurẹlu g’ọ hakọta.

⁵Ndu, e meru ọhubama ono

l’ẹnya ikfu Juda dụ

ụnu ụnu ugbo ụkporo l’ụnu iri.

Ndu nke ikfu Rúbẹnu dụ

ụnu ụnu ugbo ụkporo l’ụnu iri.

Ndu nke ikfu Gadu dụ

ụnu ụnu ugbo ụkporo l’ụnu iri.

⁶Ndu nke ikfu Asha dụ

ụnu ụnu ugbo ụkporo l’ụnu iri.

Ndu nke ikfu Náfutali dụ

ụnu ụnu ugbo ụkporo l’ụnu iri.

Ndu nke ikfu Manáse dụ

ụnu ụnu ugbo ụkporo l’ụnu iri.

⁷Ndu nke ikfu Símiyọnu dụ

ụnu ụnu ugbo ụkporo l’ụnu iri.

Ndu nke ikfu Lívayi dụ

ụnu ụnu ugbo ụkporo l’ụnu iri.

Ndu nke ikfu Ísaka dụ

ụnu ụnu ugbo ụkporo l’ụnu iri.

⁸Ndu nke ikfu Zébulọnu dụ

ụnu ụnu ugbo ụkporo l’ụnu iri.

Ndu nke ikfu Jósẹfu dụ

ụnu ụnu ugbo ụkporo l’ụnu iri.

Ndu nke ikfu Bénjaminu dụ

ụnu ụnu ugbo ụkporo l’ụnu iri.

Igweligwe ndu ọdo, bụ agụta-l’ọgu

⁹E megee, mu bya elee ẹnya, whụa igweligwe madzụ, nmarụ ẹkfurekfu nke bụ l’o to nwedu madzụ igbalekọma, fụru gụta whẹ l’ọgu. Ndu ono bụ ndu shikotagezhia lẹ mba gẹ mba ha, dụ lẹ mgboko, shi l’ikfu g’ikfu ha lẹ mgboko-o, shi lẹ mkpụkpu gẹ mkpụkpu ha, shikota l’iwhe bụkota okfu-alị, l’eekfu ekfu, dụkota lẹ mgboko-o. Whẹ tụkota gẹ whẹ ha yekota uwe mkpẹelanu, l’achakaa pelepele. Whẹ tụko gẹ whẹ ha kfụ-geeru l’iwhu oshi-eze ono mẹe l’iwhu Nwatụru ono, pageeru igu-nkfụ l’ẹka. ¹⁰Whẹ tụko ryaa ya aryarya, ryashịa ya ike asụje: “Adzọdzo ono, a dzọru anyi bẹ bụkwa l’ẹka Chileke anyi b’o shi, mbụ Chileke ono, bụ iya nọ l’oshi-eze ono. Adzọdzo ono bẹ shikwawho l’ẹka Nwatụru ono.” ¹¹Ndu ojozhi-imigwe gẹ whẹ ha tụko bya akfụ-whe oshi-eze ono mgburumgburu mẹe ndu bụ ọgurenya whọ mẹe iwhe ẹno ono, nọ-gee ndzụ. Ndu ojozhi-imigwe ono gẹ whẹ ha bya adaa, kpubegee iwhu l’alị l’atatiwhu oshi-eze ono, baarụ Chileke ẹja. ¹²Asụje: “O noo g’ọ dụ ndono. Ọnu ọma lile, l’aagọ agọ mẹe ajaja mẹe mmamagụ mẹe ekele mẹe ugvu gẹ ugvu ha mẹe ike mẹe ọkpu-ẹhu; t’iwhe lile ono tụko bụkotaru nke Chileke anyi jeye lẹ tututu-mịmimi. O noo g’ọo dụ-oo.”

¹³O noo ya, onye lanụ lẹ ndu bụ ọgurenya ono bya eku mu, sụ mu: ?Ọ dụ ghu g’ọo ndu ole bẹ ndu ono, e yegeeru uwe mkpẹelanu, l’acha pelepele ono bụ? ?Ọ dụ ghu g’ọo awee bẹ whẹ shi?

¹⁴Mu sụ iya: “Nwoke ibe mu mẹ mu ta amakwa ndu ọbu, kanụru mu ndu whẹ bu.”

Ọ sụ mu: “Ndu-a gẹ whẹ hakọta kwa ndu shigezhia l’ejo oke iwhe-ọtsulanu ono fụta. Whẹ gudewaa mmee Nwatụru ono saa uwe mkpẹelanu whẹ ono, l’ọocha pelepele nno. ¹⁵O noo iwhe meru whẹ nọdu l’iwhu oshi-eze Chileke abarụ iya ẹja: eswe l’ẹnyashi l’ime eze-ụlo iya. Ọo onye ono, nọ l’oshi-eze ono bẹ l’a-nọkubeje whẹ, eche whẹ t’ọ bọ dụ iwhe l’e-me whẹ. ¹⁶Ẹgu ta abyakwa l’agụbaa whẹ, ẹgu-mini ta agụbahee whẹ. Anwụ ta abyahẹkwa l’echi whẹ ọdo, tọ dụ-zhia okpomọku iwhe ọdo, bya l’e-kpo whẹ. ¹⁷O noo lẹ Nwatụru ono, nọ l’echilabọ oshi-eze ono bẹ l’a-nọ-zhiawho eleta whẹ ẹnya g’ọo onye l’eche atụru, letaru atụru iya ẹnya. Ọo ya l’e-duje whẹ eje l’ẹka mini, l’anụ ndzụ futaru. Chileke l’e-huchagezhia whẹ ẹnya-mini ẹkwa l’ẹnya.”

Iwhe ọhubama nke ẹsaa, e gude nyachia ẹkwo ono

¹Tọ dụ iya bụ lẹ Nwatụru ono abya anyafụlewho iwhe-ọhubama ono nke ẹsaa, e gude nyachia ẹkwo ono, ẹka lile bụru kpii rịgbidingu l’imigwe, jeye iwhe ha g’ọo nkerẹbo awa lanụ gaa. ²Ọo ya bụ, mu bya awhụa ojozhi-imigwe ẹsaa ono, l’akfụjeru l’iwhu Chileke. A bya anụ whẹ opyi-ọku ẹsaa.

³O noo ya, ojozhi-imigwe ọdo bya akfụru l’ẹnya-mgbẹja Chileke. Iwhe, ọ pa l’ẹka bụ efere, e gude mkpọla-ododo mee, bụ iwhe l’eeyeje ụ̀nwù-isẹnsu akpọ ọku. Ẹnya-mgbẹja ono bẹ bụ mkpọla-ododo b’e gude mee ya. Ọo ya bụ, a bya anụ ojozhi ono isẹnsu, ha l’igweligwe t’ọ gwakọbe ẹnwuru isẹnsu ono l’ekfukfu ono, ndu nke Chileke l’anọje ekfu anụ Chileke ono, t’ọ tụko kpụje tụlaa jekfu Chileke. Ụnwu isẹnsu ono yẹle ekfukfu ono, l’eekfuje anụ Chileke, tụko bụru ngwo-ẹja, ojozhi-imigwe ono gude abarụ Chileke ẹja l’iwhu oshi-eze Chileke ono. ⁴Ẹnwuru isẹnsu ono yẹle ekfukfu, ụnwu Chileke l’ekfu anụ Chileke shi l’ẹka, ojozhi ono kfụru l’ekpolewho tụmibe ala l’iwhu Chileke. ⁵Ọo ya bụ, ojozhi ono bya avọta ọku l’ẹnya-mgbẹja Chileke ono, vọ-jia efere ono avọ-ji, wota iya tụa l’eliwhe. Mgboko swọkobe. Igweli l’ede edede, agbakwawhọ egbe-igwe, l’ọorya iwhe dụ iya l’ọnu, l’ọowakwawho ebemu whoo whoo, alị nmahụkota jijiji.

Opyi-ọku

⁶Ọo ya bụ, ojozhi-imigwe ẹsaa ono, chị opyi-ọku ẹsaa ono, kwakọbe ẹhu nke tẹ whẹ bya awata oogbu opyi-ọku ono.

⁷Ojozhi nke ivurụzo bya egbua opyi-ọku nkiya. Aka-mini mẹe ọku, a gwakọberu mmee l’achị-zhiawho gbadagbada g’ọo mini l’eliwhe. Nkerẹto eliwhe kepyata ọku; ọku ono kepyatakwawho nkerẹto oshi, dụ lẹ mgboko. O kepyatakota iwhe bụ ẹswa oyii.

⁸Ojozhi nke ẹbo bya egbua opyi-ọku nkiya. A pata iwhe ọbu, dụ g’ọo eze ugvu, l’enwu ọku whuruwhuru chee l’eze-ẹnyimu, dụ lẹ mgboko l’owhu. Nkerẹto eze-ẹnyimu ghọo bụkotaru mmee. ⁹Nkerẹto iwhe lile, nọ ndzụ, bu lẹ mini nwụshihukota, nkerẹto iwhe lile, bụkota ụgbo-mini mebyishihukota.

¹⁰Ojozhi nke ẹto bya egbua opyi-ọku nkiya. Eze kpokponde shi l’imigwe bya adaa. Kpokponde ono bẹ l’enwu ọku whuruwhuru, g’ọo ọku ogọwa. Ọ dalẹkwawho dalaje l’iwhe bụ nkerẹto iwhe lile, bụ mini mẹe iwhe bụkota ẹka mini futaru. ¹¹Ẹwha kpokponde ono bụ Age. Nkerẹto iwhe lile, bụ mini, dụ lẹ mgboko gbanwee tsọlahaa ilu g’ọo age. Igweligwe ndu ngụtaru mini ono, bụkwanu ndu nọ lẹ mgboko-o nwụshihu. Iwhe kpakwanụru iya bụru lẹ mini ono l’atsọ ilu.

¹²Ojozhi nke ẹno bya egbua opyi-ọku nkiya. E chia iwhe lẹ nkerẹto ẹnyanwu mẹe lẹ nke ọnwa mẹe lẹ nkerẹto kpokponde; ọo ya bụ, nkerẹto iwhoro uzhi iwhe ẹto ono ghọo bụru ẹkpuroochi. Nkerẹto eswe bụru iwhe iwhoro l’erwuhee ẹka; ọ bụkwaruwho nno bụ g’ọ dakfuru ọwhube ẹnyashi, mbụ o kee onwiya uzhi ẹto, uzhi lanụ kabaa ọgba tsụrikiti.

¹³Mu bya elee ẹnya, whụa ugo lanụ gẹ l’oowhe l’akpamigwe, arya iya arya, aryashi iya ike asụje: “Nshọo ụnwu-eliwhe! Nshọo ụnwu-eliwhe! Nshọo ụnwu-eliwhe! Áwhụ l’a-dakfutabukwaa ndiwhe mẹe ojozhi ẹto-ọ, wuduru ntaa gbulewho opyi-ọku nke whẹ.”

¹Ojozhi-imigwe nke ise bya egbua opyi-ọku nkiya. Mu whụa kpokponde, shihawaro l’igwe daa l’alị. A bya eworu irigodo, l’ee-gudeje tụhaa ẹka, l’eeshije enyiba l’iduma-maa, nụ kpokponde ono. ²Ọ bya atụhaa ẹka, l’eeshije nyiba l’iduma-maa ono. Iduma ono watalẹkwawho okposhi ẹnwuru-ọku tụlaa g’ọo ẹka, a kpọberu icheku. Ẹnwuru ọku ono rwachia ẹnyanwu mẹe whẹrewhere, mee ya ọ wata ọgba ọochi. ³Ọo ya bụ, igubelendoke shi l’ẹnwuru-ọku ono zefuta, zebata lẹ mgboko. Igube ono b’e yeru ike l’ẹka tẹ whẹ gbajẹ agbagba g’ọo akpị. ⁴A sụru igube ono t’o bo mebyikwa ẹswa, dụ l’eliwhe, t’o mebyi oshi, tọ dụ-zhia iwhe futaru l’alị gvuru lẹ mgboko, mbụ-zhia iwhe ẹkwo dụ ọwhu l’oo-mebyi. L’ọo lẹ ndu l’ọonuje áwhụ bụlewho ndu ono, l’ete emee iwhe-ọhubama nke Chileke ono l’egedege iwhu. ⁵Igube ono b’e zhiru t’ọ nụa ndiwhe áwhụ ọnwa ise, ọle t’o bo gbukwa whẹ egbu. Mmekpa-ẹhu, l’oo-mekpa ndiwhe bẹ ẹhuka iya l’a-halẹwho g’ọo ẹhuka ẹka akpị gbarụ madzụ. ⁶Nteke ono bẹ ndiwhe l’a-nọ achọ anwụhu achọ, ọle whẹ ta abyadụ l’a-whụ iya. Ẹgu tẹ whẹ nwụhu l’a-nọ agụ whẹ, anwụhu agbalaa l’ẹka whẹ nọ.

⁷Igube ono bẹ bụ: eele iya ẹnya, ya adụ-zhiawho g’ọo ịnya, e dozhiwaru nke ogude eje ọgu. Iwhe dụ-gee ya l’ishi bẹ dụ-gee g’ọo okpu-eze, e gude mkpọla-ododo mee, ọwhube iwhu iya dụ-gee g’ọo iwhu madzụ. ⁸Ẹgbushi, dụ whẹ l’ishi bẹ hagelewho ogologo ogologo g’ọo ẹgbushi ụnwanyi. Eze, dụ whẹ l’ọnu dụ-gezhiawho g’ọo eze oduu. ⁹Whẹ yeru iwhe l’ume, gude gbobuta obu whẹ g’ọo uwe igwe ndu ojọgu. Whẹ l’ewhe ewhe, ụda akwẹka whẹ aadalẹwho g’ọo ụda tụroku-ịnya, ha l’igweligwe, ịnya, ha l’igweligwe kpụ eje ọgu. ¹⁰Igube ono nwegeeru ụda, whẹ l’egudeje agba agba g’ọo akpị. Ẹka ike dụ whẹ, bụkwanu iya bụ ike ono, whẹ l’e-gudeje anụ madzụ áwhụ jeye ọnwa ise ono agaa, bụkwaru l’ụda whẹ ono b’ọ dụkota. ¹¹Ojozhi-imigwe ono, bụkwanu iya bẹ iduma-maa ono dụ l’ẹka bẹ bụ iya bụ eze whẹ. Ẹwha ojozhi ono l’okfu Híburu bụ Abádọnu; a bya l’okfu Giríku ẹwha iya ono bụ Apọ́liyonu bụ iya bụ Onye-Emebyi.

¹²Tọ dụ iya bụ l’iwhe-ọtsulanu nke mbụ agaa. O wudukwaro uzhi iwhe-ọtsulanu labọ ọdo.

¹³Ojozhi-imigwe nke ishii bya egbua opyi-ọku nkiya. Mu nụa olu-okfu, l’eekfu lẹ mgburẹku ẹno l’ẹnya-mgbẹja ono, e gude mkpọla-ododo mee, dụ l’atatiwhu Chileke. ¹⁴Olu ono sụ ojozhi nke ishii ono, bụ iya gude opyi-ọku ono: “Tọshishia ojozhi-imigwe ẹno ono, e keru ẹgbu dobe l’agụga ẹnyimu Yufurétisu ono.” ¹⁵Ọo ya bụ, e wehaa ojozhi ẹno ono. Iwhe e shizhiawho dobeta whẹ ngabẹtaru bụ tẹ whẹ mee iwhe ono, a sụru tẹ whẹ mee oge nteke ono gẹdegede, l’awa ono gẹdegede, lẹ mbọku ono gẹdegede, l’ọnwa ono gẹdegede, l’awha ono gẹdegede. Iwhe ọbu, a sụru tẹ whẹ mee bụ tẹ whẹ je egbukota nkerẹto ndu lile, bu lẹ mgboko. ¹⁶A sụ mu lẹ ndụ-ọgu ono, ndu ọwhu nọ l’eli ịnya bẹ dụ ndekurunde ụkporo iri. ¹⁷Mu whụa ndu ono, l’agba ịnya ono l’ọwhulenya ono, whụkwaawho ịnya ọbu, whẹ l’agba, uwe igwe, ndu ono yegeeru l’obu bẹ l’ekelewho uswe uswe g’ọo ọku, ekelewho oyii oyii, ekekwawho ododo. Ishi ịnya whẹ ono dụ-gee g’ọo ishi oduu. Ore whuruwhuru ọku mẹe ẹnwuru-ọku mẹe nshị-egbe shi whẹ l’ọnu afụshi. ¹⁸Ọ bụru uzhi nchịkarehu ẹto ono bụ iya bụ ore whuruwhuru ọku mẹe ẹnwuru-ọku mẹe nshị-egbe bẹ whẹ gude gbushia nkerẹto madzụ, dụ lẹ mgboko. ¹⁹Ẹka ike dụ ịnya ono, bụkwanu iya bụ ike ọbu, l’oogudeje eme ire bẹ bụ l’ọnu iya mẹe lẹ mgbọdzu iya. Mgbọdzu iya ono bẹ dụkota g’ọo agwọ, o nwegeeru ishi. Ọo ishi ono bẹ whẹ l’egudeje emerwu madzụ ẹhu.

²⁰Ọle ndiwhe ta adakwawhọ onwowhe ụta, haa ome iwhe-dụ-ẹji lwakfuta Chileke, mbụ nwa ndu ọwhu nchịkarehu ono gbuwhodoru. Whẹ ta ahakwa ome ejo iwhe whẹ l’eme, whẹ ta aha ọbaru ọgvu whẹ mẹe iwhe a pyịru apyị ẹja, mbụ iwhe ono, whẹ gudegee mkpọla-ododo mẹe mkpọla-ọcha mẹe ope kpụa mẹe ọwhu whẹ pyịtaru l’ẹwhuru mẹe l’oshi. Mbụ iwhe tụkotaru bụru iwhe l’ẹte awhụ ụzo, t’ọ nụ iwhe, t’o je ije. ²¹Whẹ ta adakwa onwowhe ụta, haa ome iwhe-dụ-ẹji, lwakfuta Chileke, whẹ ta aha ogbu madzụ, whẹ ta aha ọda lẹ mgbashị, whẹ ta aha ọwharwushi onwowhe whẹ l’ụnwanyi, whẹ ta aha ozhi oshi.

Ojozhi-imigwe, gude nwa-ẹkwo, a gwọru agwọ

¹Tọ dụ iya bụ lẹ mu awhụa ojozhi-imigwe ọdo, e yeru ike, ha shii l’ẹka g’o shi l’imigwe alwazeta lẹ mgboko. Urwukpu sowhe iya mgburumgburu. Evu-mini dụ iya l’ishi. Iwhu iya l’egbu zaazaa g’ọo ẹnyanwu. Ọwhube ọkpa iya whẹ ẹbo dụkota g’ọo ọku, l’enwu enwu. Ọku ono kpụlewho nmororo g’ọo ikegede oshi, ha g’ọo gụnu. ²O nweru whọ nwa ẹkwo agwọgwo, ha nwanshị, a tụharu atụha, o gude l’ẹka iya. Ọ dzọbe ọkpa ẹka-ụtara iya l’eli eze-ẹnyimu, dzọbe nke ẹka-ịcha l’eli-mgboko. ³Ọ bya echia mkpu, chishia ya ike. Ọrya iya dụlewho g’ọo oduu l’agbọ ụja. O chilewho mkpu ono, egbe-igwe ẹsaa ono gbadẹ, kfude yederu iya. ⁴Mu l’emekwadua tẹ mu bya edee iwhe egbe-igwe ẹsaa ono kfuru, mu bya anụa olu-okfu, shi l’imigwe, sụru: “Iwhe ono, egbe-igwe ẹsaa ono kfuru ta abụkwa iwhe l’ịi-wata edede. Tọ bọ dụbukwaa onye l’ii-kfuru iwhe ono, i nụru.”

⁵Tọ dụ iya bụ l’ojozhi ono, mu whụru, kfụru l’eli eze-ẹnyimu kfụkwaruwho l’eli-mgboko, bya ewolia ẹka-ụtara iya imeli, ⁶gude ẹwha Chileke ria nte, mbụ Chileke ono, bụ onye ono, ndzụ iya bụ ndzụ tututu-mịmimi; bụ iya keru igweli mẹe iwhe lile, dụ iya nụ, kee eliwhe mẹe iwhe lile, dụ iya nụ, kee eze-ẹnyimu mẹe iwhe lile, dụkota iya nụ; o gude iya ria nte l’o ruwaru nteke Chileke l’e-me iwhe ọ tụberu. ⁷Sụ: “Ọ kwa nteke ojozhi ọwhu kwe ẹsaa ono gbuleruwho opyi-ọku nkiya bẹ Chileke l’e-medzukota iwhe ono, ọ rịhawaruro arị, kwachia l’obu iya. Iwhe ono b’o kfukotahawaru ndu lile, shi ejeru iya ozhi, bụ iya bụ ndu l’ekfuchiru iya.”

⁸Olu okfu ono, e gudehawaa shi l’imigwe kfuru yeru mu ono bya ekfuru yeru mu ọdo sụ mu: “Je anata nwa ẹkwo ono, a tụharu atụha, o gude mbụ ojozhi ono, kfụru l’eli eze-ẹnyimu, kfụkwaruwho l’eli-mgboko.”

⁹Tọ dụ iya bụ lẹ mu abya atụgbua jekfu ojozhi ono, je asụ iya t’ọ nụ mu nwa ẹkwo ono. Ọ sụ mu: “Narụ iya taa. Ị -tagele iya who bẹ l’ọo-tsọkwa ghu ilu jeye l’akịryewho, ọle nteke l’ịita iya ata bẹ l’ọo-nọkwa nụ atsọ ghu rẹngu-rẹngu l’ọnu g’ọo mmanụ-ẹnwu.”

¹⁰Mu bya anata ojozhi ono nwa ẹkwo ono taa. Nteke mu l’ata iya bẹ l’ọotso-zhia mu whọ rẹngu-rẹngu l’ọnu g’ọo mmanụ-ẹnwu. Mu tagele iya who, ọ tsọ-zhia mu whọ ilu jeye l’akịryewho. ¹¹O nokwa iya, a sụkwa mu whọ: “T’o bọ dụkwa iwhe l’e-me t’ị ba akfụfuaru ọdo l’edzudzu-ọha, goshifua ndiwhe iwhe lile, Chileke pyawaru dobe, ya l’e-me l’igweligwe mkpụkpu, dụ lẹ mgboko mẹe mba lile, mẹe ikfu mẹe ndu eze.”

Ụmadzu labọ, l’arya okfu Chileke aryarya

¹Ọo ya bụ, a bya eworu ogọwa lanụ, dụ g’ọo oshi, l’eegudeje atụ iwhe nụ mu. A sụ mu: “Gbalihu, je atụa eze-ụlo Chileke mẹe ime mkpu ẹka ono, ẹnya-mgbẹja Chileke dụ, gụ agụa ndu l’abarụ Chileke ẹja l’ime eze-ụlo ono ọgu. ²Ọle ba atụkwa echi ogboduwhu ẹka ono, duwhetaru eze-ụlo ono mgburumgburu. Sụ mu tẹ mu hakwaa ẹka onona, l’ọ kwa ndu mba, l’ẹte amaa Chileke b’e doberu iya. Obodo ono, dụ nsọ ono bẹ ndu mba ono l’e-gude ọkpa dzọo pyaapyaa ụkporo ọnwa ugbo labọ l’ọnwa labọ. ³O noo nteke mu l’e-ye ụmadzu labọ, l’a-nọ ekfuchiru mu. Ụmadzu labọ ono l’e-yegee uwe, l’e-goshi l’awhụ jịru whẹ obu. Ya abụru ujiku ụnu ẹto l’ujiku ụkporo ẹto bẹ whẹ l’e-gude zhikotagezhia ozhi, Chileke zhiru whẹ.”

⁴Ụmadzu labọ ono, l’ekfuchiru Chileke bẹ bụ oshi ólivu labọ ono mẹe oryọku labọ ono, gvuru l’iwhu Onye-Nwe-Ọha ono, nwe mgboko. ⁵O -nweru onye jeru tẹ ya meka whẹ iwhe, ọku eshi whẹ l’ọnu fụta, bya ekepyashia onye ono, kepyashikwaawho ndu whẹ l’iya l’achị ejo idzu ono. Mbụ ndu ono, bụwaa ọhogu whẹ ono. Sụa, iwhe bụ onye jeru tẹ ya meka whẹ iwhe bẹ l’ẹte ahakwa t’e be egude ọku ono, shi whẹ l’ọnu kegbua ya. ⁶E yeru whẹ ike l’ẹka nke ọwhu whẹ l’a-dụ ike guchia akpamigwe, nke ọwhu igweli l’ẹte abyaa l’a-tada mini nteke ono, whẹ l’a-nọkwadu ekfuchiru Chileke ono. E yekwawho whẹbe ụmadzu labọ ono ike l’ẹka tẹ whẹ dụje ike mee tẹ mini ghọkota mmee mẹe tẹ whẹ lọjeru nchịkarehu, dụ-zhia whẹ whọ ree tụ ndiwhe nteke bụ nteke dụje whẹbe ụmadzu labọ ono ree.

⁷Nteke whẹ zhigeleruwho ozhi ono, Chileke zhiru whẹ tẹ whẹ bya ezhia, bẹ ejo-anụ-ẹgbudu ono, l’e-shi l’ime iduma-maa ono fụta, l’a-bya alwụshi whẹbe ụmadzu labọ ono ọgu. Ya alwụ-gbua whẹ gbushia whẹ. ⁸Odzu whẹ awụshiru l’echilabọ eze obodo ono, bụ ẹka ono, a kpọpyaberu Onye-nwe-whẹ-nụ l’oswebe jeye ọ nwụhu. Ẹwha mkpụkpu, e gude a nma ẹtu ẹhu obodo ono bụ Sódomu yẹle Íjiputu. ⁹Odzu ụmadzu labọ ono bẹ l’eete ekwekwa t’e lia eli. Ndu shi lẹ mkpụkpu gẹ mkpụkpu ha, dụ l’iche l’iche lẹ mgboko-o mẹe ndu ikfu g’ikfu ha, dụ l’iche l’iche mẹe ndu shikota l’iwhe bụkota okfu-alị, l’eekfu ekfu, dụ lẹ mgboko mẹe ndu shi mba lile, dụkota lẹ mgboko l’a-wụkotaru bya, bya awhụ odzu whẹ. Ya abụru nno bụ gẹ l’aa-whụ-zhiawho odzu whẹ ono ujiku ẹto lẹ mkpirikpi. ¹⁰Iwhe bụ ndu bu lẹ mgboko-o bẹ ẹhu l’a-nọ atsọ ụtso l’e gburu ụmadzu labọ ono, l’ekfuchiru Chileke. Whẹ eria oge, gwota iwhe jeeru ibe whẹ ẹbyii l’e gburu ụmadzu labọ ono, l’ekfuchiru Chileke, mbụ ndu ono, shi meta madzụ ejo iwhe l’ẹhu. ¹¹Nteke ono, mu whụru iwhe ono l’ọwhulenya ono, mu bya awhụa l’abalị ẹto lẹ mkpirikpi bẹ galẹruwho, Chileke kuru ume-ndzụ ye whẹ l’ẹhu, mee ụmadzu labọ ono, l’ekfuchiru iya, whẹ teta nọdu ndzụ ọdo gbalihugee. Ndu lile, whụru iwhe nwụru nụ tsụhu egvu, atsụshi iya ike. ¹²Ọo ya bụ, ụmadzu labọ ono, l’ekfuchiru Chileke nụa olu-okfu, e kfushiru ike shi l’imigwe, sụru whẹ: “Unu bata l’ime ẹka-a.” Ndu ọhogu whẹ ono l’ele whẹ gẹ whẹ nọ l’urwukpu, abahụ l’imigwe. ¹³Nteke onowho, alị wata ọnma jijiji. Obodo ono kee ụzo iri, ụzo lanụ yifukota. Ndu ọwhu alị ọnma jijiji ono gburu egbu dụ ụnu madzụ iri l’ẹsaa l’ụmadzu ụkporo iri. Ndu ọwhu wuduru nụ tsụhu egvu, jaa Chileke ono, bụ iya l’achị imigwe.

¹⁴Iwhe-ọtsulanu nke ẹbo ono gaa. Ọle lekwa l’ọwhu kwe iya ẹto l’abyaakwa.

Opyi-ọku ono nke ẹsaa

¹⁵Tọ dụ iya bụ, ojozhi-imigwe nke ẹsaa bya egbua opyi-ọku nkiya. O nweru ikorokfu, swọtoberu l’imigwe ono, l’ekfukaa asụje: “Lẹ ntaa bẹ ike nke ọobu-eze l’eli-mgboko bụakwa nke Chileke anyi, mẹe nke Kuráyisutu iya ono. Ọo-bụgburu eze, chị-zhiawho jeye lẹ tututu-mịmimi.” ¹⁶Ndu bụ ọgurenya ụkporo l’ẹno ono, nọdu-gee l’oshi-eze who, dụkota l’iwhu Chileke dagee kpubegee iwhu l’alị, baarụ Chileke ẹja. ¹⁷Whẹ gụde egvu asụje:

“Anyi l’ekele ghu ekele Onye-Nwe-Ọha,

bụ Chileke, bụ Ọkalibe-kakọta-ike.

Onye bụ Chileke, nọ ndzụ,

bụru onye shikwawho eshi nkeshi ono nọduta.

Anyi l’ekele ghu l’i goshiwaru ọha l’eze ike ghu ono, parụ ẹka apaa.

I goshiakwaruwho ntaa l’ọo gụbedua bụ eze l’achịkota iwhe lile.

¹⁸Lẹ ndu mba lile ono, l’ẹte abụa ndu nke ghu,

kwefuakwaru ghu ike.

Ọle o rwuwaru nteke gụbedua l’e-goshi

oke-ẹhu-eghughu nke ghu,

mẹe nteke l’ii-kpe ndu nwụhuru anwụhu ikpe,

mẹkwawho nteke l’ii-bu ndu ozhi ghu gẹ whẹ ha

obunggo ozhi, whẹ jeru ghu, mbụ ndu l’ekfuchiru ghu,

mẹwaro iwhe bụ ndibe ghu gẹ whẹ hakọta,

mẹkota iwhe bụ ndu ị dụru lẹ nsọ gẹ whẹ hakọta, onye ukfu l’onye nta.

O rwuakwawho nteke l’ii-mebyi ndu ono, l’emebyi mgboko.”

¹⁹Ọo ya bụ, a gụhaa eze-ụlo Chileke ono, dụ l’imigwe, mu whụa igbe-ọgbandzu ono, shi Chileke l’ẹka l’ime eze-ụlo ono. Igweli l’awa ebemu whoo whoo, aryakwawho iwhe dụ iya l’ọnu, ede ede, agbakwawhọ egbe-igwe. Alị nmahụkota jijiji. Igweli l’atụ oke aka-mini.

Nwanyị ono yẹle ejo-oke-agiyi ono

¹A nọnyaa, oke iwhe-ọhubama, dụ biribiri wata ememe l’imigwe. O nweru nwanyị lanụ ọbu, yeru ẹnyanwu gẹ l’eeyeje uwe. Ọ kfụru akfụru l’eli ọnwa. Kpokponde iri l’ẹbo b’o kpu l’ishi g’ọo onye kpu okpu-eze. ²Nwanyị ono bẹ dụ ime, ẹwho kaakwa iya nke ezeda. Ime l’eme iya emeshi iya ike. Ime nwata ono metabe iya nke ọwhu ọ ryashịaru ẹkwa.

³Iwhe ọhubama ọdo watakwa ememe l’imigwe. Ọ bụru ejo-oke-agiyi bẹ fụtaru nụ. Ejo-oke-agiyi ono l’eke uswe uswe; o nweru ishi ẹsaa, fua mpu iri, kpugeeru okpu-eze l’ishi iya ono whẹ ẹsaa l’ẹhu l’ẹhu. ⁴O gude ọdzu iya chikoshigee nkerẹto kpokponde lile, dụ l’igwe, ọ dashikọta l’alị. Ọ bya akfụru nwanyị ono, l’eme tẹ ya zeda l’atatiwhu nke ọwhu bụ: o bebe anwụ-tsuta nwata ọbu, tẹ ya pata iya lwee. ⁵Nwanyị ono bya ezeda, nwụa nwata-nwoke. Ọo nwata nwoke ono bụ iya bụ onye l’ee-bekochaa bụru eze, gude oshi-igwe achịkota mba lile l’eli-mgboko-o lẹge eze l’achịje mkpụkpu iya. Tọ dụ iya bụ, a bya ezhikota nwata ono kuru jekfushia Chileke l’ẹka ono, oshi-eze iya ono dụ. ⁶Nwanyị ono gbalaa gbaba l’echi-ẹgu. L’echi-ẹgu ẹka ono bẹ Chileke memawaru iya ẹka l’oo-bu; aa-nụ iya nri jeye ụnu ujiku ẹto l’ujiku ụkporo ẹto agaa.

⁷Iwhe ono nwụ-gelewho, ọgu da l’imigwe l’ẹka ono. Máyikelu mẹe ndu ojozhi, tso iya l’azụ l’alwụshi ejo-oke-agiyi ono ọgu. Ejo-oke-agiyi ono yẹle ndu ojozhi nkiya wọta ọgu ono. ⁸Máyikelu whẹ lwugbua ejo-oke-agiyi ono yẹle ndu ojozhi iya nkele ike ta akwatadu dụ whẹ. A lwugbua whẹ ono, to dụhe ẹka e kweru tẹ whẹ nọdu l’imigwe. ⁹A chịfu ejo-oke-agiyi ono l’imigwe. Ọ kwa-a ejo-oke-agiyi ono bẹ bụ agwọ nteke ndụ-ichee whọ. Ọo ya bụ onye ọbu, bụ Oshifutuswe, bụru Sétanu, bu iya bụ onye ọbu, l’anọje eduwhu ndiwhe l’owhu. A chịfu iya l’imigwe l’ẹka ono chịdata iya lẹ mgboko yẹle ndu ojozhi iya gẹ whẹ ha.

¹⁰Mu nụa mkpu, l’eechi l’imigwe sụ: “Ọ nwụakwaru nta-a. Chileke dzọokwaru anyi ọbu. Chileke goshiwaru ntaa l’ọo ya l’achị iwhe lile. Lẹ ntaa bẹ Onye Ndzọta ono, Chileke zhiru ọ bya bẹ goshiwaru ike iya. A chịfuwaru onye mgbamụ ono, shi anọje agbawhe ụnwunna anyi whẹ mgbamụ eswe l’ẹnyashi l’iwhu Chileke. ¹¹Ọ bụru mmee Nwatụru ono bẹ ụnwunna anyi whẹ gude lwugbua Sétanu ono; iwhe ọdo, whẹ gudefukwawho lwugbua ya bụru ekfukfu ono whẹ l’akfụjeru l’edzudzu-ọha kfua ọkpobe-okfu nke Chileke ono. O noo lẹ whẹ swefuru ẹnya lẹ ndzụ whẹ, sụ l’ọ bụru anwụhu whẹ anwụhu iya. ¹²Ọo ya bụ, tẹ gụbe imigwe tee ẹswa; tẹ ndu bu l’ime ghu tụkokwawho tee ẹswa. Ọle ọbu, nshọkwanu gụbe eliwhe l’owhu, nshọo gụbe eze-ẹnyimu, o noo nkele Oshifutuswe ono bẹ gudeekwaa ẹhu-eghughu lwakfuta unu. O noo l’ọ marụ l’oge nkiya ta abahẹdu nwishi nta-a.”

¹³Nteke ejo-oke-agiyi ono whụru l’a chịfuwaru iya l’imigwe chịdatawa iya lẹ mgboko, ọ chịlahaa nta nwanyị ono, nwụru nwata-nwoke who. ¹⁴A bya achẹe nwanyị ono akwẹka labọ eze ugo who, t’o gude wheje ewhe nahụ ejo-oke-agiyi ono, wheba l’echi-ẹgu ẹka ono, o bu, bụ ẹka l’ọo-nọdu, a nụ iya nri. Ẹka ono b’o buru awha ẹto lẹ mkpirikpi, ejo agwọ ono ta adụhe ike dụ iwhe ọdo, o jeru iya ememe. ¹⁵Tọ dụ iya bụ l’ejo agwọ ono awata ọgbo mini l’ọnu. Mini ono l’asọ gborogboro g’ọo eze ẹbonyi. Iwhe l’oomekwanu bụru tẹ mini ono bya utso, kpota nwanyị ono. ¹⁶Alị yeru nwanyị ono ẹka. Iwhe alị meru bụ l’ọ sarụ ọnu, mini ono, shi ejo-oke-agiyi ono l’ọnu wụla-je iya, ọ mịchatakota iya. ¹⁷Ejo-oke-agiyi ono tụfuru nwanyị ono ẹhu-eghughu. Ọ lụfushia tụgbua jeshia ọlwushi ụnwu nwanyị ono ndu ọwhu wuduru nụ ọgu. Ndu ọbu, l’ooje ọlwushi ọgu ọbu bụ ndu doberu obu l’iwhe Chileke sụru t’e mejee mẹe ndu kfụru kfụshia ike l’ọkpobe-okfu ono, Jisọsu meru a marụ. ¹⁸Tọ dụ iya bụ l’ejo-oke-agiyi ono eje akfụru l’agụga eze-ẹnyimu.

Ejo anụ-ẹgbudu labọ, nnanụ shi lẹ mini, nnanụ shi l’alị

¹Tọ dụ iya bụ, mu whụa ejo-anụ-ẹgbudu g’o shi l’eze-ẹnyimu ono fụta. Ejo-anụ-ẹgbudu ono furu mpu iri, nweru ishi ẹsaa. O kpugeeru okpu-eze lẹ mpu iya ono l’ẹhu l’ẹhu whẹ iri. Ọwhube l’ishi iya ono g’ọ ha b’e degbagezhiaru ẹwha, l’ekfubyishi Chileke ekfubyishi. ²Ejo-anụ-ẹgbudu ono, mu whụru bẹ dụ-zhiawho g’ọo agụ-nwoghu. Ọkpa iya bẹ dụ-zhiawho g’ọo ọkpa ejo-nkụta-ọswa. Ọwhube ọnu iya dụ g’ọo nke oduu-gburu-agụ. Ejo-oke-agiyi who bya eworu ike, shi bụru ike nkiya ye ejo-anụ-ẹgbudu ono, shi lẹ mini ono fụta l’ẹka, bya eworu oshi-eze iya nụkwa iya whọ, haarụ iya ẹhu t’o mejezhiawho gẹ sọru iya. ³Ishi iya ono nnanụ, mbụ ejo-anụ-ẹgbudu ono bẹ ichi ọnya dụkwa. Ọnya ono kebekwaru lẹ ya gẹge egbu iya nteke e gburu iyẹ ya. Ọle ọnya ono kpọhuwaru. Ejo-anụ-ẹgbudu ono dụ mgboko owhu biribiri. Ndiwhe l’owhu wutsokotaru iya. ⁴Ndiwhe gẹ whẹ ha balahaaru ejo-oke-agiyi ono ẹja, nkele o yewaru ejo-anụ-ẹgbudu ono ike iya l’ẹka. Whẹ l’abakwarụwho ejo-anụ-ẹgbudu ono ẹja asụje: “?Ndẹe onye ọdo, dụ g’ọo ejo anụ-ẹgbudu-a? ?Ndẹe onye l’a-dụ ike lwụshi iya ọgu?”

⁵A haa ejo-anụ-ẹgbudu ono t’o kfuje g’ọnu ha iya, ajakpọshi onwiya gude nno ekfubyishi Chileke; a hakwaaru iya whọ ẹhu t’o mekotagezhia iwhe sọru iya l’ime ọnwa ụkporo ugbo labọ l’ọnwa labọ. ⁶Ọ wata anọ ewhu Chileke iwhu, ekfubyishi ẹwha iya, ekfubyishikwawho ẹka ono, Chileke bu mẹkota-gezhia ndu ọwhu bu l’imigwe. ⁷Chileke haa ya t’ọ lwụshi ndu nke yẹbe Chileke ono ọgu lwugbua whẹ. A nụru iya ike, l’oome gẹ sọru iya nụ. L’oomeje ndiwhe, mbụ ikfu g’ikfu ha mẹe mkpụkpu gẹ mkpụkpu ha mẹe ndu shikota l’iwhe bụkota okfu-alị, l’eekfu ekfu lẹ mgboko-o, mẹkota-gezhia iwhe bụ mba gẹ mba ha, dụ lẹ mgboko-o, l’oomeje whẹ, whẹ eme iwhe ọ sụru tẹ whẹ mee. ⁸Iwhe bụ madzụ, bu lẹ mgboko-o kpaa-whuu l’a-bakọtaru ejo-anụ-ẹgbudu ono ẹja. Mbụ ọlekwawho ndu lile, l’ete edee ẹwha whẹ l’ẹkwo Nwatụru ono, e gburu l’iswi ẹhu ọha, mbụ ẹkwo ono, e deshiru ẹwha ndu l’a-nọ ndzụ tututu-mịmimi, bẹ bụ ndu l’a-nọ abarụ ejo-anụ-ẹgbudu ono ẹja ọbu.

⁹Onye ụzo-nchị dụ ngabẹkwawho nchị nụa ya. ¹⁰Iwhe bụ onye Chileke tụru ẹka l’aa-tụ mkpọro, ta adụkwa g’e meru t’a tụ iya mkpọro. Iwhe bụ onye Chileke tụru ẹka l’ee-gbu lẹ mma, ọ tọ dụkwa g’e meru t’ọ bọ bụ mma bẹ l’ee-gude gbua onye ọbu. Ọ kwa iya bụ, l’ụnwu Chileke goshifutaje lẹ whẹ bụ ndu l’ata nshi nọdu Chileke l’ẹka gẹ whẹ nọdu iyẹ ya, nọshia ya ike.

¹¹Mu byakwawhọ awhụa ejo-anụ-ẹgbudu ọdo g’o shi l’ime alị emifuta. Anụ ono bẹ furu mpu labọ, hagee g’ọo nke nwatụru. Ejo-anụ-ẹgbudu ono l’ekfu okfu; okfu iya dụ-zhiawho g’ọo nke ejo-oke-agiyi. ¹²Ọ bya egude ike ejo-anụ-ẹgbudu mbụ whọ melahaa iwhe sọru iya l’iwhu ejo-anụ-ẹgbudu nke mbụ ono. Ọ bya emee ndu mgboko gẹ whẹ ha, whẹ balahaaru ejo-anụ-ẹgbudu nke mbụ whọ ẹja, mbụ ejo anụ ono ọnya, e shi gbua ya l’ishi gẹge egbu nteke ọbu, e gburu iyẹ ya, ọle ọ kpọhuwaru. ¹³Ejo-anụ-ẹgbudu nke ẹbo ono l’emeshilewho oke iwhe-awhụrulenya, dụ iche iche. Mbụ l’oomekajee mee ọku, ya eshi l’igweli bya adaa l’alị l’iwhu ndiwhe. ¹⁴O gude oke iwhe-awhụrulenya ono, a harụ iya l’oomeshikaa l’iwhu ejo-anụ-ẹgbudu mbụ whọ, duwhua iwhe bụkota madzụ lile, bu lẹ mgboko. Ọ sụ ndiwhe tẹ whẹ kpụaru ejo-anụ-ẹgbudu mbụ whọ ntẹkpe, bajẹru iya ẹja, mbụ ejo-anụ-ẹgbudu mbụ whọ, e gburu mma, o megelee nyaa. ¹⁵A haarụ ejo-anụ-ẹgbudu nke ẹbo ono ụzo t’o kuru ume nụ ntẹkpe ono, a kpụru nụ ejo-anụ-ẹgbudu nke mbụ whọ; t’o kuru ume nụ iya, nke ọwhu ntẹkpe ono l’a-dụje ike kfua okfu, ya emee t’e gbushia ndu l’ete ekwee baarụ yẹbe ntẹkpe ono ẹja. ¹⁶Ejo-anụ-ẹgbudu nke ẹbo ono kebuta madzụ lile, onye ukfu l’onye nta, ndu ụkpa mẹe oke-amadụ whẹ, ohu l’amadụ. O kebuta madzụ lile, a tụko whẹ mekota iwhe-ọhubama l’ẹka-ụtara mẹe l’egedege ọnu iwhu, ¹⁷nke ọwhu bụ l’ọ tọ dụdu onye l’azụ aswa, tọ dụ onye l’ere nke erere, gbahalẹwho l’e meru onye ọbu iwhe-ọhubama ono. Iwhe ọhubama ọbu bẹ bụ ẹwha ejo-anụ-ẹgbudu ono, ọdo bụ ọgu ono, nọdu ọnodu ẹwha iya.

¹⁸Ọo l’ẹka-a b’ọ gbarụ nke tẹ madzụ goshi lẹ ya marụ ágụ. T’onye nweru agụgu-ishi chọ-vuwaro iwhe ọgu ono, nochiru ẹnya ẹwha ejo-anụ-ẹgbudu ono bụ, o noo l’ọgu ono bẹ nochikwaruwho ẹnya ẹwha madzụ. Ọgu ọbu bụ “666” bụ iya bụ ụnu l’ụkporo iri l’ụkporo ẹto l’ishii.

Egvu, ndu a gbatarụ l’agụ

¹Mu bya elee ẹnya, whụa Nwatụru ono g’ọ kfụru l’ugvu Záyọnu. Ndu kfụkube iya l’ẹka ono dụ ụnu madzụ ụkporo ugbo iri l’ẹsato. Ndu ono bẹ bụ ndu, e dekotaru ẹwha Nwatụru ono l’iwhu, dekwaa ya who ẹwha nke Nna iya. ²Mu bya nụa olu-okfu, a nọ l’imigwe kfua. Olu-okfu ono l’adazhiawho g’ọo ẹka, eze mini l’awhụ gbudugbudu, l’ọo datakwawhọ g’ọo ẹka, igweli l’ede ede, agba egbe-igwe, l’ọodakwawho g’ọo une bẹ ndu marụ ọkpo une gudegbaa eze une akpọ. ³Igweligwe ndu ọbu bẹ kfụru l’iwhu oshi-eze who mẹe l’iwhu iwhe ẹno whọ, nọ-gee ndzụ mẹe l’iwhu ndu bụ ọgurenya ono, whẹ kfụru l’ẹka ono agụ egvu ọwhuu. Tọ dụ onye ọdo, fụru nke ọnwuta egvu ono, ta agbahalẹwho whẹbe ụnu madzụ ụkporo ugbo iri l’ẹsato ono, bụkwanu ndu a gbatawaru l’eliwhe. ⁴Ndu ono gẹ whẹ ha bẹ bụkota ndu l’ete emerwuje onwowhe emerwu lẹ nwanyị. Ndu doberu onwowhe ọga g’ọo nwamgbọko, yẹle nwoke l’eteke azẹbua. Ọo ndu ono bẹ l’anọjelewho awụ etso Nwatụru ono, eje iwhe bụ ẹka l’ooje. Ndu ono bụ ndu, a gbafụtawaru l’ẹka ndiwhe nọ, mee whẹ: whẹ dụ g’ọo ẹja, a gbarụ nụ Chileke yẹle Nwatụru ono. ⁵Whẹ bụ ndu l’adụa onye l’a-sụ lẹ whẹ dzụjeru ejire, tọ dụ-zhia ẹka, iwhe ụta dụ whẹ l’ẹhu.

Ojozhi-imigwe ẹto

⁶Mu whụa ojozhi-imigwe ọdo, l’ewhekwaro l’oroke imeli imeli l’akpamigwe. O gude ozhi-ọma, l’ẹte abyaa l’abụ-buhu ọkpobe-okfu abụ-buhu jeye lẹ tututu-mịmimi. Ozhi-ọma ono bẹ l’ooje ezhikotagezhia ndiwhe l’owhu, bụ iya bụ mba gẹ mba ha, dụkota lẹ mgboko mẹe ikfu gẹ ikfu ha mẹe iwhe bụ ndu shikota l’okfu-alị lile, dụkota lẹ mgboko mẹe mkpụkpu gẹ mkpụkpu ha, dukota l’eli-mgboko-o. ⁷Ojozhi ono l’aarya iya arya, aryashi iya ike asụje: “Unu tsụje Chileke egvu. Unu kwabẹjekwa iya ugvu. Lẹ nteke l’oo-kpe ndiwhe ikpe bẹ beekwaru. Unu bajẹkwaaru Chileke ẹja, l’ọ kwa iya bẹ meru igweli, mee alị, mee eze-ẹnyimu, mekwaawho iwhe bụkota ẹka-mini futaru.”

⁸Ojozhi ọdo, kwe ọwhu ẹbo bya ewhetsoru nke mbụ ono asụje: “Ike gvụakwaru Bábyilọnu! Ike gvụakwaaru Bábyilọnu! Obodo ono, a marụ ẹwha iya bẹ ike gvụakwaru nta-a. Mbụ obodo ono, chewaru mba lile mmẹe ya ono, bụ oke-ẹhu-eghughu Chileke, ọwhu Chileke l’a-tụfuru iya nkele oori ogori.”

⁹Ojozhi-imigwe ọdo, kwe ndu ọwhu ẹto bya ewhetsoru whẹ, aryakwa iya whọ arya, aryashi iya ike asụje: “Iwhe bụ onye l’abarụ ejo-anụ-ẹgbudu whọ ẹja, l’abarụ iya ntẹkpe iya; iwhe bụ onye kweru t’e mee ya iwhe-ọhubama l’egedege ọnu iwhu, ọdua ọ bụru l’ẹka, ¹⁰onye ọbu bẹ Chileke l’a-nmakwa ikpe. Iwhe-ọtsulanu, onye ọbu l’e-je mẹe ikpe, l’aa-nma iya l’e-gbuzhiawho onye ono gworigwori g’ọo onye ngụru mmẹe, l’aata agwaa agwa. Onye ono ta abyakwa l’a-gbala oke-ẹhu-eghughu Chileke. Ee-gude ore whuruwhuru ọku yẹle nshị-egbe nụa onye ono awhụ l’iwhu ndu ojozhi-imigwe, dụ nsọ mẹe l’iwhu Nwatụru ono. ¹¹Ẹnwuru-ọku, ọku ono, l’ee-gude nụa ndu ono awhụ bẹ l’a-nọlewho ekpo tụmibe ala oroke-imeli-imeli jeye lẹ tututu-mịmimi. A ta abyazhidua l’a-ha whẹ tẹ whẹ tụta ume m’ọo nteke lanụ, eswe l’ẹnyashi, mbụ ndu ono, l’abajẹru ejo-anụ-ẹgbudu ono ẹja, abakwarụ iya whọ ntẹkpe iya, mẹe iwhe bụ ndu kwezhiaru, o mee whẹ iwhe-ọhubama ono l’egoshi ẹwha ejo-anụ-ẹgbudu ono.”

¹²Ọ kwa iya bụ l’ụnwu Chileke goshifutaje lẹ whẹ bụ ndu l’atajẹ nshi, mbụ ndu l’anọje eme iwhe Chileke kfuru, bụru ndu nọdu l’ẹka Jisọsu.

¹³Mu nụa olu-okfu, a nọ l’imigwe kfua sụ: “Dee iwhe-e l’ẹkwo. Ẹhu-ụtso bụ nke ndu l’a-nwụhu watazhiawho ntaa tụgburu, mbụ ndu l’a-nwụhu nkele ọo lẹ whẹ woru onwowhe ye Onye-Nwe-Ọha l’ẹka.”

Ume Chileke nalita iya zụa mgbede sụ: “Ọo g’ọo dụ. Ẹhu l’a-nọ atsọ whẹ ụtso l’ezhi, o noo l’ozhi, whẹ jeru bẹ whẹ jefuwaru l’ishi, a tụtawaa ume; e jekwanu l’e-bu whẹ obunggo ozhi ono, whẹ jeru.”

Aakpata ndiwhe g’ọo onye l’akpata iwhe e meberu l’alị

¹⁴Mu bya elee ẹnya, whụa urwukpu ọcha. Mu whụa onye nọdu anọdu l’urwukpu ọcha ono. Onye ono, nọdu iya nụ dụ-zhiawho g’ọo madzụ. Onye ono bẹ kpu okpu-eze, e gude mkpọla-ododo mee, ọ parụwho mma, l’atsụ nkọ l’ẹka. ¹⁵Ojozhi-imigwe ọdo shi l’eze-ụlo Chileke lụfuta, bya aryaku onye ono, nọ l’eli urwukpu ọcha ono sụ iya: “Gude mma ghu ono wata ọkpata iwhe e meberu l’alị, l’ọ gbabewaru nteke l’aa-kpata iya. Ebebenu mẹe iwhe e meberu l’alị lẹ mgboko bẹ kashịakwaru dụwaa nke akpata.” ¹⁶Tọ dụ iya bụ l’onye ono, nọ l’eli urwukpu ono ewota mma iya ono tụa l’eli-mgboko, mma ono kpata ndiwhe gẹ l’aakpatajẹ iwhe e meberu l’alị.

¹⁷O nwekwaruwho ojozhi-imigwe ọdo, shikwawho l’eze-ụlo Chileke ono lụfuta, mbụ eze-ụlo ono, dụ l’imigwe. Yẹbedua byadẹkwawho gude mma, l’atsụ nkọ.

¹⁸Ojozhi-imigwe ọdo, shikwawho l’ime ẹka ono, ẹnya-mgbẹja Chileke ono dụ fụta. Ọo ya b’e zhiru t’o gude ọku mebyia mgboko. Ọ bya ekua onye ono, gude mma, l’atsụ nkọ whọ oku kushia ye ya ike sụ: “Gude mma ghu ono, l’atsụ nkọ je egbutachaa mebyi vayịnu ono, dụ lẹ mgbabu vayịnu.” ¹⁹Tọ dụ iya bụ l’ojozhi ono ewota mma iya ono tụa l’eli-mgboko. Mma ono tụko mebyi vayịnu gbutachaa je achịru iya ye l’ẹka l’aadzọshije mmẹe l’akpụru vayịnu. Iwhe ono bụkwa ẹtu, l’e-goshi eze oke-ẹhu-eghughu Chileke. ²⁰A bya adzọshia mmẹe lẹ mebyi vayịnu ono l’ẹka l’aadzọshije iya l’azụ obodo ono. Mmẹe ono bụru mmee madzụ. Mmee, a dzọfutaru l’ẹka ono bẹ l’asọlekwawho gborogboro g’ọo ọnu-iyi. Mmee ono bẹ sọkwaru sọ-rwukwaa ẹka, ha ogologo g’ọo manyịru ụkporo iri. Ọ byakwawhọ utso, hatabe omilomi nke ọwhu l’ọo-nọ ebe ịnya l’olu mẹe ịnya rwuba iya.

Ojozhi-imigwe, gudegee nchịkarehu nke ikpazụ

¹Tọ dụ iya bụ, mu bya awhụa oke iwhe-ọhubama ọdo, l’eme l’imigwe, bụ ọwhu kpọru gẹ l’aa-nọ atụ ọnu iya. Mu whụru ojozhi-imigwe ẹsaa, gude uzhi nchịkarehu ẹsaa. Nchịkarehu ono bẹ bụ nchịkarehu nke ikpazụ, Chileke l’e-me tẹ ndiwhe jee. Nteke uzhi nchịkarehu ẹsaa ono galẹruwho, oke-ẹhu-eghughu Chileke agvụ.

²Mu whụkwaawho iwhe dụ g’ọo eze-ẹnyimu, l’egbu ngerengere gẹ-woo l’ọo onyo yẹle ọku, l’enwu enwu b’a gwakọberu iya. Mu whụkwaawho ndu lwugbuwaru ejo-anụ-ẹgbudu whọ yẹle ntẹkpe iya ono. Ndu ono bụkwawho ndu jịkawaru lẹ whẹ ta akwabẹdu ọgu ono, nochiru ẹnya ẹwha ejo anụ ono ugvu. Whẹ kfụru kfụkube eze-ẹnyimu ono, dụ g’ọo onyo. Whẹ pageeru eze une, Chileke nụ-geeru whẹ. ³Whẹ l’agụ egvu Mósisu, bụ nwozhi Chileke, mbụ egvu ono, bụkwawho egvu Nwatụru ono. Whẹ l’agụ iya asụje:

“Gụbe Chileke, bụ Ọkalibe-kakọta-ike;

iwhe lile, i meshigbaberu bẹ parụ ẹka,

dụkwawho biribiri.

Ọo gụbedua bụ eze, l’achị mba lile.

Ụzo ghu bẹ kfụru nhamụnha, bụru ọkpobe ụzo. ⁴Onye-Nwe-Ọha, ?ndẹ-zhia onye l’a-sụ

lẹ ya ta atsụdu ghu egvu?

?Ọo onye ha nke asụ lẹ ya l’a-sa ọnu sụ

lẹ ya ta akwabẹdu ẹwha ghu ugvu?

Ọo gụbedua kpụ bụ onye dụ nsọ.

Mba lile bẹ l’a-bya abaarụ ghu ẹja.

O noo lẹ madzụ lile bẹ whụkotawaru l’iwhe lile, l’iime bẹ dụkota chịriri.”

⁵E megekwaa, mu bya elee ẹnya ọdo. Mu whụa eze-ụlo Chileke g’a gụharu ime iya agụha, mbụ ime ẹka ono, ọ dụ mbụ ụlo ono, e gude ẹkwa mee, bụ Chileke b’o shi l’ẹka, mbụ ụlo-ẹkwa ono, nochiru ẹnya ọgbandzu, shi Chileke l’ẹka. ⁶Ojozhi-imigwe ẹsaa ono, bụ whẹ gude nchịkarehu ẹsaa ono, shi l’eze-ụlo Chileke lụfuta. Whẹ yegeeru uwe ọcha, l’achakaa pelepele, mbụ chageeru ụcha egbuwaa zaazaa. Whẹ gude ajị, e meru lẹ mkpọla-ododo kebutagee ya l’ume. ⁷Ọo ya bụ, onye lanụ l’iwhe ẹno ono, nọ-gee ndzụ, nụ ojozhi ẹsaa ono efere ẹsaa, e gude mkpọla-ododo mee. Iwhe e yejishiru l’efere ono g’ọ ha bẹ bụ oke-ẹhu-eghughu Chileke. Mbụ Chileke ono, nọ ndzụ tututu-mịmimi. ⁸Ẹnwuru ọku kposhilewho ji ụlo ono kpimu nkele ọdu-biribiri Chileke mẹe ike Chileke ono bẹ dụ l’ẹka ono. Tọ dụhe onye dụ ike bahụ l’ime ụlo ono jeye nteke uzhi nchịkarehu ẹsaa whọ ojozhi ẹsaa whọ gude megeedaru.

Efere, e yejishiru oke-ẹhu-eghughu Chileke

¹Tọ dụ iya bụ lẹ mu anụa olu-okfu, e shi l’ime eze-ụlo Chileke ono chia g’e chiru mkpu sụ ojozhi ẹsaa ono: “Unu je ewota efere ẹsaa ono, e yejishiru oke-ẹhu-eghughu Chileke je ewhoo ya olu lẹ mgboko owhu.”

²Ojozhi-imigwe nke mbụ bya ewota efere nkiya je ewhoo ya olu lẹ mgboko. Ejo ọnya, l’aba akpa l’ọkpu, balahaa ndu lile ono, e meru iwhe-ọhubama ejo-anụ-ẹgbudu whọ mẹe ndu l’abarụ ntẹkpe iya ẹja.

³Ojozhi-imigwe nke ẹbo bya ewota efere nkiya je ewhoo ya olu l’eze-ẹnyimu. Mini, dụ l’eze-ẹnyimu ghọo mmee, dụlewho g’ọo mmee onye nwụhuru anwụhu. Iwhe bụ-zhia iwhe nọ ndzụ, bu l’ime mini ono nwụshihukota.

⁴Ojozhi-imigwe nke ẹto bya ewota efere nkiya je ewhoo ya olu l’ọnu-iyi gẹ ọnu-iyi ha mẹe ẹka lile, bụ ẹka, mini futaru g’ọ ha. Mini ghọo tụko bụkotaru mmee. ⁵Mu nụa gẹ ojozhi-imigwe, bụ iya l’eche iwhe lile, bụ mini eche sụru: “Gụbe Onye ono, dụ nsọ, gụbe Onye ono, nọ ndzụ, bụru Onye shi eshi nkeshi nọduta; ị bụ onye l’ekpe ikpe nhamụnha. ⁶Lẹ ndiwhe ono, bụ whẹ gbushiru ndu nke ghu, gbukwaawho ndu l’ekfuchiru ghu l’echilabọ whẹ, mbụ gbushia whẹ ghakaa mmee whẹ, b’i cheekwaru mmee whẹ ngụa. Iwhe ono, i meru ndiwhe, bụ iwhe gbarụ whẹ nụ ndono.” ⁷O noo ya, mu nụa olu-okfu, a nọdu l’ẹnya-mgbẹja Chileke ekfu, mbụ ẹka ono, l’aakpọje ụ̀nwù-isẹnsu ọku l’imigwe. Olu ono l’asụje: “Ọo g’ọo dụ. Gụbe Onye-Nwe-Ọha, bụ Chileke, bụ Ọkalibe-kakọta-ike, ikpe, i kperu ụnwu-eliwhe bẹ bụ ọkpobe ikpe, bụru ikpe, kfụru nhamụnha.”

⁸Ojozhi-imigwe nke ẹno bya eje ewota efere nkiya, whoo ya olu l’ẹnyanwu. E mee ẹnyanwu, okpomọku iya rebushilahaa madzụ anụ, nke ọwhu l’oomeje madzụ: ya adụ g’ọo iwhe a hụberu l’ọku. ⁹Ejo okpomọku iya ono rebushilahaa ndiwhe anụ, whẹ wata anọ ekfubyishi ẹwha Chileke ono, bụ iya kweru t’e wokfuta whẹ nchịkarehu ono. Ọle whẹ te ekwekwanu m’ọo daa onwowhe ụta, haa ome iwhe-dụ-ẹji, lwakfuta Chileke bya akwabẹje iya ugvu.

¹⁰Ojozhi-imigwe ono nke ise bya ewota efere nkiya, whoo ya olu l’oshi-eze ejo-anụ-ẹgbudu ono. Ọochi bụru kpurumu, bya agbachikota ndu lile ono, kwetaru t’ejo-anụ-ẹgbudu ono bụru eze whẹ. Ndiwhe taa ẹrwu l’ire nke ejo iwhe-ọtsulanu ono, parụ ẹka, whẹ l’eje. ¹¹Whẹ l’ekfubyishi Chileke ono, bụ l’igwe nke iwhe ẹhu ụwhu ono, whẹ l’eje mẹe nke ejo ọnya ono, l’aba whẹ nụ. Ọle whẹ te ekwekwanu m’ọo daa onwowhe ụta, haa ome iwhe-dụ-ẹji, lwakfuta Chileke, parụ ejo iwhe ono, whẹ l’eme haa.

¹²Ojozhi-imigwe nke ishii bya ewota efere nkiya, whoo ya olu l’eze ẹbonyi. Mini, dụ iya nụ tahụkota nke ọwhu echi-ụzo l’a-dụ iya, nke ọwhu ndu eze ono, l’e-shi l’ụzo ẹnyanwu-awata l’a-ghajajẹ iya dafụta azụ iya ọwa. ¹³Mu bya awhụa ọgvu ẹto, dụ-gee g’ọo ẹwo gẹ whẹ l’afụtakaa. Nnanụ shi l’ọnu ejo-oke-agiyi ono fụta, nnanụ shi l’ọnu nke ejo-anụ-ẹgbudu ono fụta, nnanụ shikwawho l’ọnu nke onye ono, gude ụgho eduwhushi ndiwhe sụ l’ọo Chileke bẹ ya l’ekfuchiru. ¹⁴Ọgvu ẹto ono bẹ shikota l’ẹka Sétanu. Whẹ l’emekaa iwhe-awhụrulenya. Whẹ jekfukota ndu eze ndiwhe l’owhu je achịkobe whẹ ẹka lanụ nke ọgu, whẹ nọdu kwabẹru mbọku ono, Chileke ono bụ iya bụ Ọkalibe-kakọta-ike l’e-goshi ndiwhe onye ya bụ.

¹⁵Jisọsu sụkwaru: “Unu lekwawho l’ọ kwa gẹ abyabya onye oshi l’emeje madzụ lẹ nzirizẹhu; bụ gẹ ya l’e-me unu lẹ nzirizẹhu bya. Ẹhu-ụtso bụ nke onye ono, nwụ ẹnya; letakwawho uwe iya ẹnya nke ọwhu onye ọbu l’ẹte agba ọto ejewhe mbọku ono nggẹ iwhere ta adụ yẹbe onye ono.”

¹⁶Ọgvu ẹto ono, shi l’ẹka Sétanu bya emee ndu eze nke mgboko gẹ whẹ ha; whẹ bya akpakọo l’ẹka lanụ ọbu, l’eekuje Amagẹ́donu l’okfu Híburu.

¹⁷Ọo ya bụ, ojozhi-imigwe nke ẹsaa bya ewota efere nkiya; whoo ya ọlu lẹ whẹrewhere. O nweru olu-okfu, shi l’oshi-eze, dụ l’ime eze-ụlo Chileke chia mkpu sụ: “E mewaru iya nta-a.” ¹⁸Igweli walahaa ebemu whoo whoo. Igweli ono l’edekwawho ede; agba egbe-igwe; aryakwawho iwhe dụ iya l’ọnu. Alị l’anma jijiji. Ẹgube alị ọnma jijiji ono tẹke anmabụkwaa lẹ mgboko eshi nkeshi madzụ fụtaru. ¹⁹Obodo ono, a marụ ẹwha iya, bụ Bábyilọnu bukahu onwiya ụzo ẹto. Obodo lile ọdo, dụkota l’eli-mgboko dakashịhukota bụru iwhe iyi yitaru. Chileke tẹke anyazọkwaa obodo ono, a marụ ẹwha iya, bụ Bábyilọnu mẹe ejo iwhe ono, obodo ono nọdu megbabe. Chileke meru obodo ono; ọ ngụa mmẹe l’eze omogo, e yejiru oke-ẹhu-eghughu nke yẹbe Chileke eyeji bụ iya bụ ikpe ọ nmarụ iya. ²⁰Iwhe bụkota alị, mini gbawheru mgburumgburu mishihukota. Iwhe lile, bụ ugvu ta adụhe ọwhu a whụbakwaduaru ilile. ²¹Eze aka-mini, l’anyịkaa dụkuu g’ọo ẹwhuru-uswe shigee l’igweli alwa bẹrebere l’alị; atugbushi ụnwu-eliwhe. Ndiwhe l’ekfubyishi Chileke nkele eze aka-mini ono l’a-nụ whẹ awhụ. O noo lẹ nchịkarehu, aka-mini ono wokfutaru whẹ kpọru gẹ l’aa-nọ atụ ọnu iya.

Eze-nwanyị ọkpara ono, bụ Bábyilọnu

¹Tọ dụ iya bụ l’onye lanụ lẹ ndu ojozhi ẹsaa ono, shi gude efere ẹsaa whọ abyakfuta mu bya asụ mu: “Bya tẹ mu je egoshi ghu gẹ l’ee-gude nma eze-nwanyị ọkpara ono ikpe, mbụ obodo ono, dụ l’ẹka ọnu-iyi ha l’igweligwe. ²Lẹ ndu eze, l’achị mgboko bẹ whẹ l’iya zẹkota-geekwaa. L’iwhe bụ ụrwu-alị, ndiwhe l’owhu yẹle obodo ono rwụkotaru l’emekwa whẹ l’ẹnya g’ọo mmẹe.”

³Ọo ya bụ, Ume Chileke byakwa bya eji mu ẹhu kpimu. Ojozhi ono bya eduta mu jeshia l’echi-ẹgu. O noo ẹka, mu nọdu, whụa nwanyị, nokoru l’eli ejo-anụ-ẹgbudu, l’eke uswe uswe. E dekashia ẹwha l’ẹhu ejo-anụ-ẹgbudu ono, l’ekfubyishi Chileke. Ejo-anụ-ẹgbudu ono bẹ nwe ishi ẹsaa, fua mpu iri. ⁴Nwanyị ono gude uwe-mkpẹelanu, l’eke uswe uswe kwaa onwiya ngwa ree. Iwhe ọdo, o gudekwawho memaa onwiya emema bụru iwhe e meru lẹ mkpọla-ododo, ọ gbageeru echi, l’ere ire l’ẹka, doo onwiya aka, l’ere ire l’olu. Iwhe ọ pa l’ẹka bụru omogo, e gude mkpọla-ododo mee. Iwhe jiru omogo ono bụru ejo akpamara mẹe ahụma, shi l’ụrwali, nwanyị ono l’arwụgbabe. ⁵L’egedege ọnu iwhu iya b’e deru ẹwha iya. Ẹwha iya ono dụkwa omilomi. Ẹwha ọbu, e deru bụ: “Bábyilọnu ono, a marụ ẹwha iya, mbụ ne iwhe bụkota ndu l’agba ọkpara mẹe iwhe bụkota ndu l’eme ahụma lẹ mgboko.” ⁶Mu bya elee ẹnya, whụ gẹ nwanyị ono ngụta-geeru mmee madzụ l’oome iya l’ẹnya. Ndu ọbu, ọ ngụru mmee whẹ bụ ndu nke Chileke ono, e gburu l’ike, nkele ọo lẹ whẹ kwetaru l’ọo Jisọsu bụ Onye-nwe-whẹ nụ.

Nteke ono, mu whụleruwho eze-nwanyị ọkpara ono, ọ tụfu mu ẹhu g’iwhe l’atụfuje iya madzụ. ⁷Ojozhi-imigwe ono sụ mu: “?Ndẹe iwhe meru ọ tụfu ghu ẹhu? Sụ mu tẹ mu gebe tẹ ya karụ mu iwhe dụ nwanyị ono l’ẹhu, bụ iwhe l’ẹte abụa ọha marụ iya mẹe iwhe dụ l’ẹhu ejo-anụ-ẹgbudu ono, nwe ishi ẹsaa, fua mpu iri, bụ iya bẹ nwanyị ono nọ-koru l’eli iya. ⁸L’ejo-anụ-ẹgbudu ono, ị whụru nno b’o nwekwaru nteke o shi nọdu ndzụ, ọle ọ tọ nọhekwa ndzụ ntaa. O wuduakwaru-a nwanshị nta-a, ya eshi l’iduma-maa ono nyifuta, bya alaa l’iyi. Ndu lile ono, bu l’eliwhe bụ iya bụ ndu ọwhu e shiroo eshi nteke Chileke meru mgboko-o, t’e de ẹwha whẹ l’ẹkwo e deshiru ẹwha ndu l’a-nọ ndzụ tututu-mịmimi; ndu ono gẹ whẹ ha bẹ l’ọo-tụfukota ẹhu mẹ whẹ whụlewho ejo-anụ-ẹgbudu ono, o noo nkele o shi nọdu ndzụ, ọle ntaa bẹ l’ọoto nọhedua ndzụ. Ọle oo-bekwaa nọdu ndzụ ọdo.

⁹“O noo bụru iwhe gbarụ tẹ madzụ goshi lẹ ya nweru uche; ya l’arịje iwhe arị nggẹ o doo ya ẹnya. L’ishi ẹsaa ono bẹ nochiru ẹnya ugvu ẹsaa, nwanyị ono nọdu anọdu l’eli iya. Iwhe ọdo, o nochifuaru ẹnya iya bụ ndu eze ẹsaa. ¹⁰Ụmadzu ise lẹ ndu eze ẹsaa ono ta anọhekwa. Onye lanụ l’ime whẹ bẹ nọkwadu, onye lanụ tẹke afụtadua. Nteke ọ fụtaleruwho bẹ l’aa-ha iya, ya anọdu kpọo ụkfu nwanshị. ¹¹A bya abya l’ọwhube ejo-anụ-ẹgbudu ono, shi nọdu ndzụ, tọ nọhe iya ntaa, yẹbedua bẹ bụ onye eze ọwhu kwe whẹ ẹsato, ọle yẹle ndu eze ẹsaa ọwhu bẹ nọkwaa l’oshi lanụ, o jekwaa l’e-megee laa l’iyi.

¹²“Mpu iri ono, ị whụru bẹ nochiru ẹnya ndu eze iri, bụkwanu ndu eze ọwhu l’eteke ezhia tẹ whẹ bya achịlahaa ndiwhe. Ee-me: whẹ l’ejo-anụ-ẹgbudu ono, ike adụ whẹ shii, nke ọwhu whẹ l’ejo-anụ-ẹgbudu ono l’a-gba mgba chịa ndiwhe awa lanụ kpụ. ¹³Ndu eze ono bẹ obu whẹ l’a-bụkotaje nnanụ. Whẹ l’e-wota ike whẹ mẹe abụbu ono, whẹ bụ eze ye ejo-anụ-ẹgbudu ono l’ẹka. ¹⁴Whẹ l’a-tụko gẹ whẹ ha swiko ike nnanụ, lwụshi Nwatụru Chileke ono ọgu. Ọle Nwatụru ono l’a-lwugbulekwa whẹ-e. O noo l’ọo ya bụ Onye-Nwe-Ọha, kakọta iwhe lile ọdo, bụ ndụ-nwe-ọha, bụkwaruwho eze, kakọta iwhe lile ọdo, bụ ndu eze. Ndu lile ono, Chileke kuru họta ono, mbụ ndu ono, nọpyabe iya l’ẹka, l’a-lwugbukwa whẹ whọ.”

¹⁵O nokwa iya, ojozhi-imigwe ono sụ mu: “Ị whụwaru mini ono, nwanyị ọkpara ono nọdu anọdu, mini ono bẹ nochiru ẹnya mkpụkpu lile, nochia ẹnya ikpoto madzụ, nochia ẹnya mba lile mẹe iwhe bụkota okfu-alị l’eekfu ekfu, dụkota lẹ mgboko. ¹⁶L’ejo-anụ-ẹgbudu ono mẹe mpu iri ono, ị whụru bẹ bụ ndu l’a-kpọ nwanyị ọkpara ono ashị. Whẹ l’a-natagezhia ya iwhe bụ iwhe o nwe enwe g’ọ ha, ya agbarụ ọto daburu. Whẹ l’e-rikwawho anụ iya, gude ọku kepyashia ya. ¹⁷O noo l’ọo Chileke bẹ yeru whẹ ẹgube ọriri ono l’obu, t’ọ gụje whẹ ẹgu tẹ whẹ medzukota iwhe yẹbe Chileke tụberu bụ iya bụ tẹ ndu ono swiko ike, t’obu bụru whẹ nnanụ. Nke ọwhu whẹ l’e-wota abụbu ono, whẹ bụ eze, ye ejo-anụ-ẹgbudu ono l’ẹka t’ọ bụru eze, gude ẹka ike chịje whẹ jeye nteke iwhe Chileke kfuru l’a-vụkota.

¹⁸“Nwanyị ono, ị whụru bẹ bụ iya bụ obodo ono, a marụ ẹwha iya, mbụ obodo ono, bụ iya l’achị iwhe bụkota eze nke ndiwhe l’owhu.”

Obodo ono, a marụ ẹwha iya, bụ Bábyilọnu bẹ ike gvụwaru

¹E megee, mu bya awhụa ojozhi-imigwe ọdo, shi l’igwe whezeta. Ojozhi-imigwe ono bẹ Chileke yeru ike l’ẹka, zhi iya ozhi. Ojozhi ono nwua vaa, mee eliwhe owhu l’oochi whorowhoro. ²Ọ ryaa ya arya ryashịa ya ike sụ: “Ike gvụakwaru Bábyilọnu! Ike gvụakwaru Bábyilọnu! Obodo ono, a marụ ẹwha iya, bụ Bábyilọnu bẹ ike gvụakwaru ntaa. Ntaa b’ọ bụakwa ẹka mkpakọ iwhe lile, bụkota Oshifutuswe kwarụ uwhu. Ọ bụkwaru whọ ẹka ndu ojozhi Sétanu gẹ whẹ ha bukota mẹkota iwhe lile, bụ ẹnu njọ ọrya mẹe ẹnu lile, ndiwhe kpọru ashị bụkota ẹka ono bẹ whẹ je akwaa okpu buru. ³O noo lẹ mba lile, nọkota lẹ mgboko-o bẹ ngụwaru mmẹe ya ono bụ iya bụ ụrwu-alị ono, nwanyị ono l’arwụ. Ndu eze, l’achị ndiwhe bẹ whẹ l’iya zẹkota-geekwaa. Ndu lile, l’agba oke nghọ lẹ mgboko mgburumgburu bẹ shiakwa l’ẹku ono, nwanyị ono nweru, kpọru gẹ l’aa-nọ atụ ọnu iya, bahụ, bụ-geeru eze.”

⁴Tọ dụ iya bụ lẹ mu anụkwaa olu ọdo, shi l’imigwe sụ:

“Ndu nke mu, unu fụta nwanyị ono,

bụ Bábyilọnu l’ẹhu.

Nggẹ unu te eye ẹka l’ome ejo iwhe l’oome,

Ọdumeka bẹ unu l’iya l’a-gba mgba lẹ

nchịkarehu, l’a-byakfuta iya.

⁵L’iwhe-dụ-ẹji, l’oomegbabe kụkobekwaru l’eli l’eli

jeye ọ ha l’eli g’ọo ugvu, je etsu ishi l’igwe,

tẹmenu Chileke nyatakwarụ-a ejo ememe,

nwanyị ono l’emeje g’ọ hakọta.

⁶T’e mee ya g’o meru ndu ọdo,

t’a kfụa ya ụgwo nkfụlabo l’iwhe ono,

o megbaberu ndu ọdo,

t’e gude mmẹe l’eme l’ẹnya ugbo labọ

g’ọo nkiya gbajiaru iya omogo ono,

o gude gbẹe ndu ọdo t’ọ ngụa

⁷T’a gwaa ya ọchi, nụa ya áwhụ,

ha g’ọo ajaja ono, ọ jarụ onwiya,

yẹle ẹku ono, nyịberu ọtu ọnu iya,

ọ kparụ swibe onwiya.

T’e mee ye ya nno, o noo lẹ o nweru nteke

o shi anọje etu onwiya asụje:

‘Ntaa bẹ mu nọduwaa bụru eze-nwanyị l’achị ndiwhe.

Lẹ mu ta abụkwa nwa-mbunu.

Mu ta abyahụnu l’atsọ áwhụ.’

⁸O noo iwhe meru nchịkarehu lile ono,

dụ ngabẹru iya je l’a-byakfutakota iya ujiku lanụ,

bụ iya bụ áwhụ mẹe mgbu-ọnwu mẹe mkpẹgu.

Ọo ọku l’e-kegbu iya.

O noo l’ọo Onye-Nwe-Ọha, bụ Chileke,

onye ike iya parụ ẹka bẹ bụ iya nmarụ iya ikpe.”

⁹Ọo ya bụ l’eze ndiwhe ono, whẹ l’iya shi azẹje ono, ndu ono, whẹ l’iya l’atụkoje emekaa ejo iwhe l’agụ whẹ nụ ono, ndu ono l’a-rya ẹkwa iya, áwhụ eji whẹ obu l’okfu ẹhu iya mẹ whẹ -whụlewho g’ẹnwuru-ọku kpolihuru l’obodo ono g’ọku l’adzụpyashi iya. ¹⁰Whẹ l’a-kfụruro l’ụzo otẹnya ele iwhe l’anwụru obodo ono, nkele whẹ l’a-nọkwanu atsụ egvu áwhụ ono, l’aanụ iya. Whẹ akfụruro otẹnya sụ: “Oowa! Tẹ njọ gbakwaa ẹgbudu! Iwhe ọwa ta adụkwa nke ekfukfu. M’ọo gụbe Bábyilọnu-a, bụ obodo, a marụ ẹwha ghu, a makọtaru l’ị bụ obodo, shihuru ike, b’e gudewawho awa lanụ nma ikpe, nke ghu gvụ g’ọ gvụru ẹgube-ẹ.”

¹¹Ndu l’agba nghọ lẹ mgboko-o bẹ l’a-ryakwawhọ ejo ẹkwa nke whẹ, tsọo áwhụ ẹhu obodo ono nkele ọ tọ dụhedu onye l’a-zụjekwadu ngwa-aswa whẹ nta-a. ¹²L’ọ tọ dụhedu onye l’azụje whẹ mkpọla-ododo whẹ mẹe mkpọla-ọcha mẹwaro ogbu ngerengere ẹwhuru whẹ, bụ ẹwhuru, l’ere ire, tọ dụhe onye l’azụ whẹ aka whẹ. To dụhe onye l’azụje whẹ ẹkwa ọcha whẹ mẹe ẹkwa uswe uswe whẹ mẹe kpọngu-kpọngu whẹ mẹe faragidi uswe uswe mẹwaro ụnwu oshi, l’eshi mkpọ, whẹ l’erekaa ere mẹ-gee iwhe lile, e gude ọkpu-enyi meshia mẹe iwhe e gude oshi mee, vu aswa mẹe owhu, e meru l’ope mẹe ọwhu, e meru l’igwe mẹe ẹwhuru-egbe mabụlu, l’eegudeje eme ụlo. ¹³Mẹ-gewaro ẹkwo-owhe ọbu, l’eegudeje mee owhe t’ọ tsọje ụtso, bụ sinamọnu mẹe ụnwu iwhe ọdo, bụkota iwhe l’anọje eshi mkpọ g’ọo senti mẹe isẹnsu mẹe mẹru mẹe furankisẹnsu mẹe mmẹe mẹe mmanụ nri mẹe ụturutuu-witi mẹe witi l’onwiya mẹe eswi mẹe atụru mẹe ịnya mẹe ụgbo-ịnya mẹe ohu, mbụkwa je akpaa lẹ madzụ gẹdegede. ¹⁴Ndu nghọ ono l’asụje obodo ono: “Alịkwa mu iya, ntaa bẹ iwhe bụ akpụru oshi ono ẹgu iya shi anọje agụ ghu ono bẹ l’ẹte adụhekwaa. Ẹku ono, i shi kpaa swibe onwoghu bẹ yifuakwaru nta-a, iwhe lile, bụ iwhe l’atsọje ghu ụtso, bụkwaruwho iwhe l’ama ghu ụma bẹ gvụakwaru nụ, mbụ tọ hẹkwa l’ị bya l’a-whụ iya ọdo ilile.” ¹⁵Ndu nghọ ono, shi agbatajẹ nghọ iwhe lile je eree l’obodo ono, rita iya oke urwu bẹ l’a-kfụ-geeru iya otẹnya nkele áwhụ ono l’aanụ obodo ono l’eye whẹ egvu. Whẹ l’a-rya ejo ẹkwa, tsọo áwhụ asụje: ¹⁶“Oowa! Tẹ njọ gbakwaa ẹgbudu! Iwhe ọwa ta adụkwa nke ekfukfu. Gụbe obodo-o, a marụ ẹwha ghu bẹ shi eyeje uwe ọcha, weru ẹkwa uswe uswe mẹe faragidi uswe uswe gude kwamaa onwoghu ngwa akwama. Iwhe ọdo, gụbe obodo-o shikwawho egudejefua memaa onwoghu bụ iwhe e meru lẹ mkpọla-ododo, gụ edoo onwoghu echi, l’ere ire l’ẹka, doo onwoghu aka l’olu. ¹⁷M’ọ wawhọ awa lanụ kpụ b’e gudewaa mee ẹku ghu ọbu g’ọ ha, ọ bụru iwhe iyi yitaru g’o yitaru iya ẹgube-ẹ.”

Iwhe bụ-zhia ndu ụgbo mini gẹ whẹ ha mẹkota-gee iwhe bụ ndu l’egudeje ụgbo eje iwhe whẹ l’eje mẹe ndu l’anga ụgbo mẹe ndu l’egudejekwawho ụgbo tsoru eze-ẹnyimu agba nghọ bẹ kfụkota-geeru otẹnya, ¹⁸ele ẹnwuru-ọku ọku ono, l’adzụ obodo ono. Whẹ echia sụ: “Eshi nkeshi bụ gụnu tẹke adụbukwaa obodo deru ude, a maberu ẹwha iya lẹge a marụ ẹwha obodo-o.” ¹⁹Whẹ ekpota ivovonyi ghaa onwowhe l’ishi. Whẹ echi mkpu arya ẹkwa, atsọ áwhụ sụ: “Oowa! Tẹ njọ gbakwaa ẹgbudu! Iwhe ọwa ta adụkwa nke ekfukfu. ?M’ọo gụbe obodo-o, a marụ ẹwha ghu bẹ dụ ẹgube-ẹ! Mbụ gụbe obodo-o, bụ l’ẹku ono, i kparụ, kpọru gẹ l’aa-nọ atụ ọnu iya bẹ ndu lile, nweru ụgbo, e gude tsoru eze-ẹnyimu, agba nghọ shikota bahụ, bụru eze. M’ọ wawhọ awa lanụ kpụ b’e gudewaa mee ghu, ị bụru iwhe iyi yitaru, g’o yitaru ghu ẹgube-ẹ.” ²⁰Ndu bu l’imigwe, unu teje ẹswa, l’obodo ono, a marụ ẹwha iya bẹ yifuwaru. T’unubẹ ndu bụ nke Chileke tejekwawho ẹswa, tẹ ndụ-ishi-ozhi mẹe ndu l’ekfuchiru Chileke tejekwawho ẹswa. Unu teje ẹswa lẹ Chileke bẹ nmawarụ iya ikpe ejo iwhe ono, o meru unu.

²¹O noo ya, Ojozhi-imigwe lanụ, ọkpehu dụ bya apalia eze-ẹwhuru ọbu, ha shii g’ọo ẹwhuru uswe, palia ya chee l’ime eze-ẹnyimu sụ: “O noo gẹ l’ee-gude ọkpehu, chee Bábyilọnu ono, bụ obodo, a marụ ẹwha iya l’ẹka, l’ẹte adụhee onye bya l’awhụbaa ya ọdo. ²²A ta abyahẹkwa l’anụbaa ụda nkwa l’ime gụbe obodo ono ọdo ilile. T’a byahẹ l’agụ egvu l’ime ghu ọdo. Opu ịnya yẹle opu ishi ono, shi anọje ada l’ime ghu, ta abyahẹkwawho l’a-da iya ọdo ilile. Ọ tọ dụ-zhihekwaa o-me-nka, l’emeje nka, a bya l’a-whụbaa l’ime ghu ọdo. T’a byahẹ l’anụbaa ụda ọtumu nri l’ime ghu ọdo. ²³Iwhoro ọku oryọku ta abyahẹ l’emebaa jaa l’ime ghu ọdo ilile. Ta byahẹ l’anụbaa ya uzere nke l’eekee nwanyị, ọdua l’ọo nke l’a lụtaru nwanyị nke ọwhuu. O noo lẹ ndu nghọ ono, shi buru l’ime ghu agba nghọ bẹ bụ ndu e shi marụ ẹwha whẹ lẹ mgboko-o. I gudewaa ọda lẹ mgbashị duwhushia mba lile gẹ whẹ ha. ²⁴Tẹmenukwawho ọ bụru l’ime obodo ono b’a whụru mmee ndu nkfuchiru Chileke mẹe mmee ndu ọdo, bụ ndu nke Chileke mẹe mmee iwhe bụkota ndu lile ọdo, e gburu egbu l’eliwhe-e.”

¹O noo nwụ-gelewho, mu nụa iwhe ọdo, l’ada l’imigwe. L’ọoda-zhiawho g’ọo olu egvu, a ha l’igweligwe agụ. Iwhe whẹ l’agụ bụru:

“T’ajaja bụru nke Chileke.

Lẹ adzọdzo, mẹe ugvu, mẹe ọkpehu

bụkwa Chileke bẹ nwekota iya g’ọ ha.

²L’ikpe, ọ nmarụ ndu mgboko bẹ

bụkwa ọkpobe ikpe, rwuberu whẹ nụ,

ikpe ono kfụkwaruwho nhamụnha.

Ọ nmarụ eze-nwanyị ọkpara whọ ikpe,

mbụ nwanyị ono, gude akfụna ono,

l’ọogba mee mgboko, ọ bụru iwhe iyi yitaru.

Chileke bẹ gwataakwarụ iya ụgwo mmee

ndu nkiya ono, o gbushiru,

ọchi whẹ tukoru iya l’ishi.”

³Whẹ gụkwaa egvu ono ọdo sụ:

“T’ajaja bụru nke Chileke-o!

Ẹnwuru ọku shi l’obodo ono, ọku

l’adzụpyashi l’ekpolewho tụmibe ala l’imigwe.

O noo gẹ l’ọo-nọ-zhiawho ekpo jeye lẹ tututu-mịmimi!”

⁴Ndu bụ ọgurenya ụkporo l’ẹno ono mẹe iwhe ẹno ono, nọ-gee ndzụ dagee kpubegee iwhu l’alị, baarụ Chileke ẹja, mbụ Chileke ono, nọ l’oshi-eze ono. Whẹ sụ:

“O nokwa g’ọ dụ-o.

T’ajaja bụru nke Chileke.”

Ẹswa nwanyị, a lụru nke ọwhuu

⁵O nweru olu-okfu, shi l’oshi-eze ono sụ: “Unu jaa Chileke ajaja unubẹ iwhe bụ ndu lile, l’ejeru Chileke ozhi. Unu kele Chileke unubẹ ndu l’atsụ iya egvu g’unu ha: onye ukfu l’onye nta!” ⁶Tọ dụ iya bụ lẹ mu anụa olu egvu, a ha l’igweligwe agụ. Olu-egvu ono bẹ l’adalẹwho g’ọo ẹwhu eze mini, l’awhụ gbudugbudu, l’ọodakwawho g’ọo ẹka igweli l’arya ọrya. Iwhe whẹ l’agụ bụru:

“T’ajaja bụru nke Chileke!

O noo nkele Onye-nwe-anyi,

bụ Chileke ono, bụ Ọkalibe-kakọta-ike

bẹ goshiakwaru ntaa lẹ ya bụ eze l’achị iwhe lile!

⁷T’ẹhu tsọ anyi ụtso, t’anyi teje ẹswa teshi iya ike,

t’anyi jakwaa ya whọ ajaja nke ọdu-biribiri iya.

Lẹ ntaa b’o rwuakwaru nteke onye ono,

bụ Nwatụru Chileke ono l’a-lụ nwanyị.

Nwanyị ọbu, l’ọobya alụlu bẹ kwaakwarụ

onwiya ngwa ngabẹru iya.

⁸Chileke kwewaru tẹ nwanyị ono yee

uwe ọcha, l’acha pelepele, l’ẹte adụa ẹka e

merwuru iya emerwu.”

Uwe ọcha ono bụ umere, kfụru nhamụnha, ụnwu Chileke l’eme.

⁹Tọ dụ iya bụ l’ojozhi-imigwe ono asụ mu: “Dee iwhe-e l’ẹkwo: Ẹhu-ụtso bẹ bụ nke ndu e kuru tẹ whẹ lịru lẹ ndu l’e-ri nri ẹswa-nwanyị ono, Nwatụru Chileke l’eje alụlu.” O kfugee nno, ọ sụkwa mu whọ: “Okfu ono bụkwa Chileke gude ọnu iya kfua ya, tẹmenu Chileke ono bụru onye l’ẹte adzụje ejire.”

¹⁰Tọ dụ iya bụ, mu bya adaa kpube iwhu l’alị nke tẹ mu bya abaarụ ojozhi-imigwe ono ẹja. Ọ sụ mu: “Awa! Be ejekwa ememe! M’ọ kwa gẹ gụbedua gụ l’ụnwunna ghu bụ ndu l’ejeru Chileke ozhi bụ gẹ yẹbedua bụkwawho onye l’ejeru Chileke ozhi, mbụ ụnwunna ghu ono, bụ whẹ bẹ Jisọsu goshiru ọkpobe-okfu nkiya. Bachiaru Chileke ẹja.”

Ọkpobe okfu ono, Jisọsu goshiru anyi bẹ shi l’ẹka Ume Chileke, bụ iya l’emeje tẹ madzụ kfuchijeru Chileke.

Onye nọ l’eli ịnya ọcha

¹¹Mu bya awhụa gẹ igweli gụharu; gheru ọnu. Mu whụa ịnya ọcha, nọ iya nụ. O nwekwaruwho onye nọ l’eli ịnya ono. Ẹwha onye ono, nọ l’eli ịnya ono bụ Onye-l’akfụshije-ike-l’iwhe-okfuru, mẹe Ọkpobe Okfu. Ookpeje ikpe l’ụzo, dụ chịriri, alwụkwawho ọgu l’ụzo, dụ chịriri. ¹²Ẹnya iya l’ekelewho g’ọo iwhoro ọku, l’enwu enwu. O kpuru okpu-eze, ha l’igweligwe l’ishi iya. O nwekwaruwho ẹwha, e deru iya l’ẹhu. Ẹwha ono ta adụdu onye ọdo, marụ iya, ta agbahalẹwho yẹbedua. ¹³Uwe ugwẹhu, o yeru b’a tsẹru lẹ mmee. Ẹwha onye ọbu bụ “Okfu Chileke ono.” ¹⁴Iwhe bụ amị, nọ l’imigwe gudekotagezhia uwe ọcha, l’acha pelepele; l’eete emerwua emerwu gude kwaa onwowhe ngwa. Whẹ tụko gẹ whẹ ha nọdu-gee l’eli ịnya ọcha; awụ etso onye ono, nọ l’eli ịnya ọcha ono. ¹⁵Iwhe shi onye ono l’ọnu lụfuta bụ ogu-ịgba, l’atsụ nkọ, bụ mma whẹ l’e-gude lwugbua iwhe bụ mba lile, dụ lẹ mgboko. Onye ono abya abụru eze whẹ, gude oshi-igwe achị whẹ lẹge eze l’achịje mkpụkpu iya. Ọo ya l’a-dzọshi mmẹe vayịnu l’ẹka ono, laadzọshije mmẹe l’akpụru vayịnu. Iwhe ono bụ ẹtu, l’egoshi eze oke-ẹhu-eghughu nke Chileke, bụ Ọkalibe-kakọta-ike. ¹⁶E dee ẹwha iya l’uwe o yeru; dekwaa ya who l’ụtakfu iya. Ẹwha iya ọbu bụ: “Eze, kakọta iwhe lile ọdo, bụ ndu eze mẹe Onye-Nwe-Ọha, kakọta iwhe lile ọdo, bụ ndụ-nwe-ọha.”

¹⁷Mu bya awhụa ojozhi-imigwe, kfụru l’ime ẹnyanwu. O chia mkpu; gude kukota iwhe lile, bụ ẹnu, l’ewhe l’akpamigwe oku sụ: “T’unu g’unu ha whegezhia bya edzukobe, ria eriri, darụ unu. Eriri ono bẹ bụ Chileke b’o shi l’ẹka. ¹⁸Unu bya avụa anụ ndu eze mẹe anụ ndu ishi ojọgu mẹe anụ ndu ojọgu mẹe anụ ịnya mẹe anụ ndu ono, l’agba ịnya ono mẹe anụ ndiwhe l’owhu: ohu l’amadụ; ndu ukfu lẹ ndu nta.”

¹⁹Mu bya awhụa ejo-anụ-ẹgbudu whọ mẹe ndu eze nke ndiwhe l’owhu gẹ whẹ chịtawaru ndu ojọgu whẹ dọkobe ẹka lanụ nke tẹ whẹ bya alwụshi onye ono, nọ l’eli ịnya ọcha ono ọgu yẹle ndu amị iya. ²⁰A kpụta ejo-anụ-ẹgbudu ono lẹ ndzụ. E gudekwawho onye ono, l’egudeje ụgho eduwhushi ndiwhe, adzụ ejire sụ lẹ ya bụ onye l’ekfuchiru Chileke, l’ẹbe abụ l’ọ bụ iya. Ọo ya bẹ bụ onye ono, shi abụje: ọ -nọdu ejo-anụ-ẹgbudu ono l’iwhu, ya emeshi iwhe-awhụrulenya, bụ iya b’o gude ghọta ndu ono, kweru t’e mee whẹ iwhe-ọhubama nke ejo-anụ-ẹgbudu ono mẹe ndu ono, shi abarụ ntẹkpe iya ẹja. A kpụta onye ụgho ono, sụru lẹ ya l’ekfuchiru Chileke, kpụta ejo-anụ-ẹgbudu ono lẹ ndzụ je achịru ye l’eze-iduma, bụ ọku nshị-egbe l’enwu iya tawhu tawhu. ²¹A bya egude ogu-ịgba nke onye ono, nokoru l’eli ịnya ọcha ono, mbụ ogu-ịgba ono, shi iya l’ọnu afụta; a bya egude iya tụko ndu ọwhu wudurunu gbushikota. Iwhe bụ ẹnu, dụ lẹ mgboko-o dzukoo, bya avụa anụ whẹ kpata kpata, rijishia ẹwho.

Ụnu awha labọ l’awha ụkporo ugbo iri

¹Ọo ya bụ, mu bya awhụa ojozhi, shi l’imigwe abya. O gude irigodo iduma-maa ono l’ẹka; gudekwawho gwọgirigwo, parụ ẹka. ²Ọ bya azụlekwawho ejo-oke-agiyi ono gburumu, mbụ agwọ, nteke ndụ-ichee ono bụ iya bụ Oshifutuswe, bụru iya bụ Sétanu. Ojozhi-imigwe ono bya azụ-gude iya; kee ya ẹgbu. Ẹgbu ono bẹ l’ọo-nọ-zhiawho jeye ụnu awha labọ l’awha ụkporo ugbo iri agaa. ³Ojozhi-imigwe ono parụ iya chee l’ime iduma-maa ono. O chegee ye ya; ọ guchia ya; tuchia ya ree-ree-ree nke ọwhu l’ọodua onye fụru ụka tụhaa ya tẹ ejo-oke-agiyi ono fụta bya etsoru duwhushia ndu mba lile lẹge o shi anọjehawaa eduwhushi whẹ. Mbụ t’ọ nọdu l’ẹka ono jeye nteke ụnu awha labọ l’awha ụkporo ugbo iri ono l’a-gageeda. Nteke ọ gageleruwho, e wehaa ya t’ọ kpaa ntụsaru-ẹhu; nọo nwanshị.

⁴O noo ya, mu bya awhụa oshi-eze oshi-eze mẹe ndu nọ iya nụ. Ndu ono bẹ bụ ndu a họtaru tẹ whẹ kpeje ikpe. Mu whụkwaawho maa ndu lile, a kfugburu akfugbu nkele ọo lẹ whẹ kfụru l’edzudzu-ọha, kfua l’ọo Jisọsu bụ Onye-Nwe-Ọha, ndu shi anọje arya okfu Chileke arya. Ọo whẹbedua bụ ndu ono, l’ete ekwee baarụ ejo-anụ-ẹgbudu whọ ẹja, whẹ te ekwe baarụ iya ntẹkpe yẹbe ejo-anụ-ẹgbudu ono, whẹ te ekwekwawho t’e mee whẹ iwhe-ọhubama nke ejo-anụ-ẹgbudu ono l’iwhu, whẹ te ekwe t’e mee whẹ iya l’ẹka. Whẹ tetagewaru nọdu ndzụ, whẹ lẹ Kuráyisutu tụko bụru eze, chịa ụnu awha labọ l’awha ụkporo ugbo iri. ⁵Eteta ono, ndu ono, a kfugburu akfugbu tetaru bụ eteta nke ivurụzo, Chileke meru madzụ, o teta nọdu ndzụ. Ọle ndu ọdo, wuduru lẹ ndu ono, nwụhuru anwụhu, ta adụhekwa onye ọwhu tetakwaduru nu jeye ụnu awha labọ l’awha ụkporo ugbo iri ono gagee. ⁶Ẹhu-ụtso l’a-bụ nke onye ono, l’e-tso lẹ ndu ivurụzo ono, Chileke l’e-me, whẹ eshi l’ọnwu teta nọdu ndzụ. O noo lẹ ndu ono b’a họtaru tẹ whẹ lẹ Chileke buru l’ẹka lanụ. Ndu ono bẹ ọnwu nke n-nwụlabo l’enwehedua ike l’ẹka whẹ nọ. Whẹ l’a-bụ ndu l’agbajẹ ẹja nụ Chileke; bụkwaruwho ndu l’agba ẹja nke Kuráyisutu. Whẹ lẹ Kuráyisutu l’a-tụko bụru eze, chịa mgboko ụnu awha labọ l’awha ụkporo ugbo iri.

A lwugburu Sétanu

⁷Nteke ụnu awha labọ l’awha ụkporo ugbo iri ono gvụleruwho; a tọfu Sétanu l’ẹgbu ono, e keru iya wehaa ya, ya afụta lẹ mkpọro ono, a tụru iya. ⁸Nteke ono, ya alụfuta shi l’ẹka ono byatashia oduwhushi ndu mba lile, dụkota lẹ mgboko mgburumgburu bụ iya bụ Gọgu mẹe Mégọgu. Ya akpakọbe whẹ ẹka lanụ tẹ whẹ kwakọbe nke ọgu. Ndu bụ: e -jeshia whẹ ọogu ọgu, whẹ ahakwa g’ọo ẹja, dụ l’alị. ⁹Mu l’awhụ awhụ ono, whụa gẹ ndu ono l’adzọnga-whe lẹ whorokoto mgboko-o, whẹ je anọ-whegee ẹka ono, ndu nke Chileke dọru mgburumgburu; nọ-whekwawho obodo ono, Chileke yeru obu. Ọle ọku shizhiawho l’eligwe enwu whuruwhuru, bya atụko whẹ kegbushikota. ¹⁰A bya ewota Oshifutuswe ono, bụ iya l’anọje eduwhushi whẹ, bya eworu chee lẹ eze-iduma ono, bụ ọku nshị-egbe l’enwu iya tawhu tawhu bụ iya bụ ẹka, ejo-anụ-ẹgbudu whọ mẹe onye ụgho whọ, sụru lẹ ya l’ekfuchiru Chileke nọ. Ọ bụru ẹka ono bẹ whẹ l’a-nọdu, aa-nụ whẹ kpakụduu: eswe l’ẹnyashi jeye lẹ tututu-mịmimi.

Ikpe Ikpazụ

¹¹Tọ dụ iya bụ lẹ mu abya awhụa eze oshi-eze, l’acha ụcha, whụkwaawho onye nọ iya nụ. Alị yẹle igweli vụta ọso, gbafụ iya l’iwhu gbalaa. Tọ dụhe ẹka, a whụru, alị ono yẹle igweli ono l’a-nọdu. ¹²Mu whụkwaawho iwhe bụ ndu lile, nwụhuru anwụhu: ndu ukfu lẹ ndu nta gẹ whẹ kfụ-geeru l’atatiwhu oshi-eze ono. O nwegeeru ẹkwo, a tụhashi-geeru atụhashi. Ẹkwo ono b’e deshikotaru iwhe lile, onyenọnu mejezhiaru lẹ mgboko. A byakwawhọ bya atụhaa ẹkwo ọdo. Onona b’e deshiru ẹwha ndu l’a-nọ ndzụ tututu-mịmimi. Ọ bụru iwhe e deru l’ẹkwo ono b’e gude ekpe onyenọnu ikpe lẹge iwhe onyenọnu meru dụ dụ. ¹³Eze-ẹnyimu bya achịfuta-gezhia iwhe bụ ndu mini rijezhiaru. Anwụhu yẹle alị-maa chịfutakwawho ndu ọwhu nwụhukotaru anwụhu. A tụko whẹ gẹ whẹ ha kpee ikpe l’ẹhu l’ẹhu. E kpee onyenọnu ikpe lẹge iwhe o meru dụ dụ. ¹⁴A bya e wota mgbu-ọnwu, wota alị-maa chịru ye l’eze-iduma ono, ọku l’enwu tawhu tawhu. Ọo eze-iduma ono, ọku ono l’enwu tawhu tawhu bẹ bụ ọnwu n-nwụlabo. ¹⁵Iwhe bụ onye l’ẹte awhụa ẹwha iya l’ẹkwo e deshiru ẹwha ndu l’a-nọdu ndzụ tututu-mịmimi bẹ l’eewotaje chee l’eze-iduma ono, ọku l’enwu tawhu tawhu.

Imigwe ọ̀whúú yẹle alị ọ̀whúú

¹Tọ dụ iya bụ, mu bya awhụa igweli ọ̀whúú yẹle alị ọ̀whúú nkele igweli ọwhuna, shihawaa dụ nụ ta adụhedu, alị ọwhu shikwawho dụ ta adụhekwawho. Eze-ẹnyimu ta adụhekwawho. ²Mu bya awhụa obodo ono, dụ nsọ bụ iya bụ Jerúsalẹmu ọ̀whúú. Mu whụa ya g’o shi l’imigwe ẹka, Chileke nọ alwazeta l’alị. E memagezhia ya l’ọoma g’ọo nwanyị, a bya l’ekee ji nke ọ̀whúú, mbụ nwanyị, a kwamawarụ ngwa gẹ l’ọo-dụ, ji iya eduta iya. ³Mu nụa olu-okfu, a nọdu l’oshi-eze ono chia g’e chiru mkpu sụ: “Unu lee ibe Chileke ndọwa! Ntaa bẹ Chileke byakwaa l’a-nọdu swiru madzụ eswiru. Ntaa bụakwa ẹka madzụ bu bẹ Chileke l’e-bu, madzụ abụru ndibe iya. Chileke l’onwiya l’e-swiru whẹ eswiru; bụru Chileke whẹ. ⁴Oo-huchagezhia whẹ ẹnya-mini ẹkwa l’ẹnya. Ọnwu ta adụhedu ọdo, ọtso-awhụ ta abyahẹ l’a-dụ, ta abyahẹ l’aryabaa ẹkwa; tọ dụhe iwhe bya l’emebaa madzụ ẹhuka. O noo l’iwhe lile ono, shi dụkota bẹ gvụwaru.”

⁵Tọ dụ iya bụ l’onye ono, nọdu l’oshi-eze ono asụ: “Lenu, lẹ ntaa bẹ mu l’emewaa iwhe lile t’ọ bụkotaru iwhe ọ̀whúú.” Ọ sụkwawho: “Tụko okfu-a dekota l’ẹkwo, o noo l’ọ bụkota ọkpobe-okfu, bụkwaruwho okfu, gbarụ t’e gude iya ẹka.” ⁶Ọ bya asụkwa mu whọ: “E mekotageekwaru iwhe lile. Ọo mụbe Chileke bụ Álụfa bụru Oméga ọbu; mbụ l’ọo mu bụ mgbube-ishi iwhe lile, bụru ẹka iwhe lile sụru ishi. Iwhe bụ-zhia onye ẹgu-mini l’agụ bẹ mu l’e-kee mini ẹwoma. Ẹka mini ono, mu l’e-kee onye ono shi bụkwa l’ẹka, mini, l’a-nụje ndzụ tututu-mịmimi futaru. ⁷Ọ kwa onye l’alwụje ọgu ono lwụta bẹ mu l’e-meru iwhe ọma-a: Mu l’a-bụ Chileke onye ono, onye ono a-bụru nwa nke mụbe Chileke. ⁸Ọle ọwhube ndu ono, bụ ndu l’atsụ egvu ẹnya ono mẹe ndu ono, l’ẹte akfụshije ike l’iwhe whẹ kfuru mẹe ndu tsonyaaru Chileke, whẹ tsuwhu azụ mẹe ndu l’egbu madzụ mẹe ndu l’akpa lẹ nwanyị mẹe ndu l’ada lẹ mgbashị mẹe ndu l’agwa iwhe mẹe ndu l’adzụ ejire gẹ whẹ ha, ndu onona bẹ iwhe dụ swiru whẹ nụ bụkwa eze-iduma ono, ọku mẹe nshị-egbe l’enwu tawhu tawhu bụ iya bụ ọnwu n-nwụlabo.”

Jerúsalẹmu ọ̀whúú

⁹Tọ dụ iya bụ, ojozhi-imigwe lanụ l’ime ojozhi ẹsaa whọ, shi chịru efere ẹsaa ono, uzhi nchịkarehu ẹsaa ikpazụ ono dụ byakfuta mu bya asụ mu: “Bya tẹ mu je goshi ghu nwanyị ọ̀whúú ọbu, bya l’ala ji bụ iya bụ nyee Nwatụru Chileke ono.” ¹⁰Ume Chileke bya ejizhia mu whọ ẹhu kpimu. Ojozhi-imigwe who bya eduta mu je enyikota eze ugvu ọbu, ha l’eli g’ọo gụnu. O je egoshi mu obodo ono, dụ nsọ, bụ Jerúsalẹmu g’o shi l’imigwe ẹka Chileke nọ alwazeta l’alị. ¹¹Ogbu-zaazaa nke Chileke mee ya: l’oogbulewho ngerengere. Iwhoro iya l’egbulewho zaazaa g’ọo nke ẹwhuru ọbu, kakọta ovu aswa, mbụ iwhoro iya ngashịa g’ọo iwhoro ẹwhuru ọbu, l’eke uswe uswe, l’eekuje jasupa. Ẹwhuru ono l’anọje ama ụma, awhụ onyo. ¹²Obodo ono b’e gude mgbodo tuwheta mgburumgburu. Mgbodo ono ha l’eli mebyi shii. E bua ya ọnuzo ẹka, l’ee-shije abahụ iya ụzo iri l’ẹbo. E ye ndu ojozhi-imigwe iri l’ẹbo tẹ whẹ cheje ọnuzo ono whẹ iri l’ẹbo eche. L’ọnuzo ono whẹ iri l’ẹbo b’e degbagezhiaru ẹwha ikfu iri l’ẹbo ono, dụ lẹ Ízurẹlu l’ẹhu l’ẹhu. ¹³E bugeeru ọnuzo ẹka ono, l’eeshije abahụ iya ẹto ẹto l’ẹka lanụ. L’ụzo ẹka ọwhu gharụ iwhu l’ụzo ẹnyanwu-awata; b’e buru ọnuzo ono ẹto. E bua ẹto yeru ụzo ẹnyanwu-arịba, bua ẹto l’ụzo isheli; bua ẹto l’ụzo ọhali. ¹⁴Ọ bụru ẹwhuru iri l’ẹbo b’e gude tụa ukfu mgbodo ono mgburumgburu. Ẹwhuru ono whẹ iri l’ẹbo b’e deshiru ẹwha ndụ-ishi-ozhi iri l’ẹbo ono, mbụ ndụ-ishi-ozhi Nwatụru Chileke ono.

¹⁵Ojozhi-imigwe ono, shi ekfu eyeru mu gudewho iwhe ọbu, e gude mkpọla-ododo mee, dụ g’ọo ogugumara. Iwhe ono, dụ g’ọo ogugumara bẹ bụ iwhe l’eegudeje atụ iwhe. Ojozhi ono l’emekwanu tẹ ya bya atụa obodo ono; marụ gẹ ogologo iya yẹle uswe iya ha. Ya atụkwaawho ọnuzo iya ono mẹwaro mgbodo ono, e gude tuwheta iya mgburumgburu. ¹⁶Obodo ono bẹ nwe mgburẹku ẹno, halẹwho ẹnya nhamụnha. Ojozhi ono bya egude iwhe iya ono, dụ g’ọo ogugumara tụa obodo ono. Ogologo iya yẹle ọsa iya mẹe eli iya halẹwho ẹnya nhamụnha. Iwhe ọ dụ l’ogologo bụleruwho ụnu manyịru ugbo ẹto lẹ manyịru ụkporo iri l’ise. ¹⁷Ọ byakwawhọ bya atụa mgbodo iya. Igbidigbi mgbodo ono dụlewho nha-ọkpa ụkporo ugbo labọ lẹ nha-ọkpa ẹsato lẹge madzụ l’atụjekwa-o. O noo gẹ ojozhi-imigwe ono tụru iya. ¹⁸Iwhe e gude tụa mgbodo ono bụ ẹwhuru uswe uswe ono, l’eekuje jasupa. Ọwhube obodo ono l’onwiya bụ mkpọla-ododo b’e gude mee ya, megezhia ya l’ọowhu onyo. ¹⁹Ọwhube ukfu mgbodo ono b’e gudegee ẹwhuru, dụ-gee l’iche l’iche, l’ereshi ire ike l’egbukaa ngerengere memaa ya: l’ọoma ụma. Ẹwhuru ono

nke mbụ bụ jasupa,

nke ẹbo bụru sáfàyà,

nke ẹto bụru Yágètù,

nke ẹno bụru Yémèràlùdù,

²⁰nke ise bụru Yónìkùsù,

nke ishii bụru kánílìyánù,

nke ẹsaa bụru kìrị́sòlàyìtù,

nke ẹsato bụru berilu,

nke tete bụru topazu,

nke iri bụru kìrísòpùràsù,

nke iri lẹ nnanụ bụru jasintu,

nke iri l’ẹbo bụru Yámítìsùtù.

²¹Ọnuzo ono whẹ iri l’ẹbo bụru aka iri l’ẹbo, l’ereshi ire ike b’e gude mee ya. Ọnuzo ono whẹ iri l’ẹbo l’ẹhu l’ẹhu bụkotaru aka lanụ bẹ l’eegudeje mee nnanụ. Ọma oji ime obodo ono, bụru mkpọla, guru egu b’e gude mee ya; megezhia ya: l’ọowhu onyo.

²²Mu ta awhụkwa eze-ụlo Chileke l’ime obodo ono, o noo l’ọo Onye-Nwe-Ọha, bụ Chileke bụ iya bụ Ọkalibe-kakọta-ike bẹ yẹle Nwatụru ono bụwaa eze-ụlo Chileke nke obodo ono. ²³Obodo ono bẹ mkpa iwhoro anwụ yẹle ọnwa l’ẹte adụhekwaaru, o noo l’ọo ogbu-zaazaa nke Chileke bẹ l’echiru whẹ, ọwhube Nwatụru ono bụru iwhoro, e gude awhụ ụzo. ²⁴Ọo iwhoro shi l’obodo ono bẹ mba lile l’e-gude nọdu ndzụ. Iwhe bụkota ndu eze, nọkota lẹ mgboko-o evukoo ọdu-biribiri whẹ vubata l’ime obodo ono. ²⁵Ọnuzo ẹka, l’eeshije abata l’obodo ono l’e-ghekotajeru ọnu nteke nteke. Ọ tọ dụ-zhikwaa nteke a bya l’a-gụ-chije iya agụ-chi nkele ẹnyashi ta abyadụ l’a-dụ l’ẹka ono. ²⁶Ọha lile, dụ l’eliwhe-e bẹ l’a-tụko ọdu-biribiri, whẹ nwe enwe vukoo bya akụbe l’obodo ono, whẹ akwabẹkwawho obodo ono ugvu. ²⁷Ọle o to nwekwanu ejo iwhe bya l’a-bahụ l’obodo ono. Onye meru ahụma mẹe onye ejire bẹ l’ete ekwekwa t’ọ bahụ iya. Ndu l’a-bahụ iya kpụ bụlekwawho ndu ono, e deru ẹwha whẹ l’ẹkwo Nwatụru ono, bụkwanu ẹka, e deshiru ẹwha ndu l’a-nọ ndzụ tututu-mịmimi.

¹Tọ dụ iya bụ, ojozhi-imigwe ono byakwawhọ bya egoshi mu ọnu-iyi ọbu bụ iya bụ mini ọbu, l’anụje ndzụ tututu-mịmimi. Mini ono dozhiawho rịsaa, awhụ onyo. Ẹka mini ono shi asọfuta bụ l’oshi-eze Chileke yẹle nke Nwatụru ono. ²Mini ono l’asọ l’echi oji obodo ono. Oshi, l’anụje ndzụ tututu-mịmimi gvuru l’agụga ọnu-iyi ono ọwa mẹe l’agụga iya ọwhu. Oshi ono l’amịje mebyi ugbo iri l’ẹbo awha gẹ awha ha. Ọomije mebyi l’ọnwa l’ọnwa. Ọo oshi ono bẹ l’aakpatajẹ ẹkwo iya, gude mebe mba lile ọgvu l’iwhe l’eme whẹ nụ, whẹ emehu. ³Ọ tọ dụdu iwhe Chileke tụru ọnu, byakwadụ l’anọdu l’ime obodo ono.

Iwhe l’a-dụ l’obodo ono bụ oshi-eze Chileke yẹle nke Nwatụru ono. Ndu l’ejeru iya ozhi l’a-nọ abarụ iya ẹja. ⁴Ndu lile ono, l’ejeru iya ozhi ono l’a-whụ iya iwhu l’iwhu. Ẹwha iya bẹ l’ee-degee whẹ l’egedege ọnu iwhu. ⁵Ẹnyashi ta adụhedu ọdo. Mkpa iwhoro ọku oryọku ta adụhe; mkpa iwhoro anwụ ta adụhe ọdo. O noo lẹ Onye-Nwe-Ọha, bụ Chileke l’onwiya bụ iwhoro l’echiru whẹ. Whẹbedua l’a-bụ eze; chịa jeye lẹ tututu-mịmimi.

Abyabya Jisọsu

⁶Ọo ya bụ, ojozhi-imigwe ono sụ mu: “Okfu lile-e bụkotakwa ọkpobe-okfu, bụkwaruwho okfu, gbarụ t’e gude iya ẹka. Lẹ Onye-Nwe-Ọha, bụ Chileke, bụ iya bẹ l’anụje ndu l’ekfuchiru iya nu Ume iya bẹ zhiakwaruwho ojozhi-imigwe t’ọ bya egoshi ndu l’ejeru yẹbe Onye-Nwe-Ọha ono ozhi iwhe l’ẹte anọhe ọdu ntaa, ya emee.”

⁷Jisọsu sụkwaru: “Lekwaawho: lẹ mu l’abyaakwa ntaa ntaa. Ẹhu-ụtso bụ nke onye l’emeje iwhe lile-e, e deru l’ẹkwo-ọ, bụ ẹkwo, e deshiru iwhe lile, e kfuchiru mụbe Jisọsu Kuráyisutu!”

⁸Mbẹdua, bụ Jọnu l’ishi onwomu bẹ bụ onye nụkotaru iwhe lile-e lẹ nchị mu, whụa ya l’ẹnya. Mu nụ-gele iya whọ lẹ nchị ono, whụ-gele iya who l’ẹnya ono, mu bya adaa kpube iwhu l’alị l’iwhu ojozhi-imigwe ono, l’egoshi mu iwhe ono, nke tẹ mu bya abaarụ iya ẹja. ⁹Ọ sụ mu: “Awa! Be ejekwa ememe.” Sụ mu: “M’ọ kwa gẹ gụbedua gụ l’ụnwunna ghu bụ ndu l’ejeru Chileke ozhi bụ gẹ yẹbedua bụkwawho onye l’ejeru Chileke ozhi, mbụ ụnwunna ghu ọbu, bụhukwaa ndu ono, l’ekfuchiru Chileke mẹe ndu lile ọdo, l’emeje iwhe ẹkwo-ọ kfuru. Ọo Chileke bẹ l’ịi-bachiaru ẹja.” ¹⁰Jisọsu sụ mu: “Tọ bọ dụkwa okfu lile-e, e deshiru l’ẹkwo-ọ, ọwhu l’ii-domi edomi m’ọo nnanụ. Lẹ nteke iwhe lile-e l’e-mekota bẹ dụakwaa ntse. ¹¹T’iwhe bụ onye l’eme ejo-iwhe, mejelekwawho ejo-iwhe l’oome tụgburu. T’onye umere iya l’eshi nshi; t’onye ọbu mejelekwawho umere ono, l’eshi nshi tụgburu. Ọle tẹ ndu ọwhu dụ chịriri l’iwhu Chileke, gudelekwawho ẹka whẹ gẹ whẹ gude iya tụgburu. T’onye ọwhu doberu onwiya nsọ dobegbukwaruwho onwiya nsọ g’o doberu iya.

¹²“Mu sụru agha-a, mu l’abyaakwaa ntaa ntaa. Mu -byata, bẹ mu l’e-gude iwhe obunggo, mu l’e-gude bua onyenọnu nggo lẹge iwhe o meru dụ dụ. ¹³Sụ, ọ kwa mbẹdua bụ Álụfa bụru Oméga. Ọo mu bụ Ivurụzo iwhe lile, bụru mu bẹ iwhe lile jeberu kfụshi, mbụ l’ọo mu bụ mgbube-ishi iwhe lile, bụru mu bụ ẹka iwhe lile sụru ishi.”

¹⁴Ẹhu-ụtso bụ nke ndu l’asajẹ uwe mkpẹelanu whẹ; ya acha pelepele. Ọo ndu ono bẹ l’ee-kwe tẹ whẹ wota akpụru, ọ mịtaru mbụ oshi ono, l’a-nụ ndzụ tututu-mịmimi taa. Ọ bụru ndu ono bẹ l’ee-kwe tẹ whẹ shia ọnuzo ghata; bahụ l’ime obodo ono, Chileke nọ. ¹⁵Ọle ọwhube ndu ono, bụ nkụta-ụrwali mẹe ndu lile ono, l’ada lẹ mgbashị mẹe iwhe bụ ndu l’awharwụ onwowhe whẹ l’ụnwanyi mẹe ndu l’egbu madzụ mẹe ndu l’anọje agwawhe iwhe mẹe ndu ono, l’abụje aa -dzụ ejire; ya atsọ whẹ ụtso; whẹbedua adzụkwawho ejire l’onwowhe; ndu ono gẹ whẹ hakọta ta abyadụ l’a-bahụ l’obodo ono. Ọo l’azụ iya bẹ whẹ l’a-nọdu. ¹⁶“L’ọ kwa yẹbe Jisọsu l’ishi onwiya bẹ zhiru ojozhi-imigwe iya t’ọ bya emee iwhe bụ unubẹ chọchi t’unu makọtaru iwhe lile-e. Ya bụ eri Dévidi; bụkwaruwho o-shi-l’ẹpa iya. Ya bụkwaruwho Kpokponde-Mbọ-muchi ono, l’anọje eke zhịizhii.”

¹⁷Ume Chileke ono mẹe nwanyị ọ̀whúú ono tụko sụ: “Bya-o!”

T’iwhe bụ onye nụjeru iwhe-e sụkwawho: “Bya-o!”

T’iwhe bụ onye ẹgu-mini l’agụ t’onye ọbu bya; t’iwhe bụ onye ọ dụ uwhere abyabya; t’onye ọbu byakwa t’e kee ya mini ono, l’anụje ndzụ tututu-mịmimi. Mini ono bẹ l’ee-kekwa onye ono ẹwoma.

Mkpochi-ishi iya

¹⁸Mbẹdua, bụ Jọnu bẹ l’alọ iwhe bụ onye l’anụ okfu lile, e deru l’ẹkwo-ọ ẹka lẹ nchị, mbụ l’ẹkwo, e deru iwhe lile, e kfuchiru Chileke. Iwhe bụ onye yekwaru iwhe l’iwhe-e, e deru l’ẹkwo-ọ bẹ Chileke l’e-yekwakwaru iwhe l’iwhe bụkota nchịkarehu-a, e kfukotaru okfu iya l’ẹkwo-ọ; tụko iya g’ọ ha byabẹ onye ono l’ishi. ¹⁹Nteke bụ l’ọ -dụ onye wofuru iwhe l’ẹkwo-ọ, e deru iwhe lile, e kfuchiru Chileke, bẹ Chileke l’e-wofu oke-iwhe nke onye ono l’akpụru, ọ mịtaru mbụ oshi ono, l’anụje ndzụ tututu-mịmimi, mbụ oshi ono e kfuru okfu iya l’ẹkwo-ọ, ya ewofukwawho oke-iwhe onye ono l’obodo ono, dụ nsọ, bụkwawho iwhe e kfuru okfu iya l’ẹkwo-ọ. ²⁰Ọo onye ono, meru t’a marụ iwhe lile-e, bụkota ọkpobe-okfu sụru: “Ee! Mu l’abyaakwa ntaa ntaa.”

O noo g’ọ dụ. Byiko byanụ-o, Onye-Nwe-Ọha, bụ Jisọsu!

²¹Tẹ Onye-Nwe-Ọha, bụ Jisọsu meeru unu g’unu ha eze-iwhe-ọma. O noo g’ọ dụ.