Ẹkwo
EGVU-ỌMA
11Ẹhu-ụtso bụ nke onye l’ete ekweje
oome iwhe ndu ejo-ememe sụru t’o mee,
too tsoje ndu l’eme iwhe-dụ-ẹji eme iwhe whẹ l’eme,
tọ tụjeru ike yeru ndu l’ekua Chileke iwhe.
2Mbụ onye ono, bụ-chia iwu
Onye-Nwe-Ọha bẹ l’adụje iya ree.
L’ọonoje anwụ iwu Onye-Nwe-Ọha ono
g’ọo onye l’anwụ ẹkwo, arị iya l’ọriri, eswe l’ẹnyashi.
3Onye ono bẹ dụa g’ọo oshi, e yeru l’agụga ọnu-iyi,
l’ọonoje eye mmebyi l’oge iya,
ẹkwo iya ta atụgboshihuje atụgboshihu.
Iwhe lile, l’oome l’abụjeru iya akpụto-l’ọboroto.
4Ọle ọ tọ dụ nno bẹ l’ọodujeru ndu ejo-ememe.
Whẹbedua dụa g’ọo ẹswa ereshi,
whẹrewhere l’anọje ewhekashi ewhekashi.
5Ọo ya bụ lẹ ndu ejo-ememe
ta adụdu ike atakeru kfụru l’ikpe Chileke,
Chileke ta abya l’edobe ndu l’eme
iwhe-dụ-ẹji l’ẹka ndu dụ chịriri nọ.
6O noo nkele Onye-Nwe-Ọha
l’anọje eduzhi ndu dụ chịriri ụzo.
Ọle ụzo ọwhu ndu ejo-ememe
l’etso bẹ l’e-me, whẹ abụru kpurupyata.
21?Ọo gụnu meru iwhe ndu mba
lile l’achị ejo idzu nke
okwefuru Onye-Nwe-Ọha ike?
?Ọo gụnu meru iwhe ndiwhe
l’achị idzu iwhokiriwho?
2Ndu eze, l’achị mgboko kwakọbe-geeru nke ọgu,
ọwhube ndu ishi dzukobegekwawho
tẹ whẹ kpọshia iwhe Onye-Nwe-Ọha l’eme,
mẹkwawho tẹ whẹ kpọshia iwhe onye nkiya ono,
ọ wụru mmanụ l’ishi t’ọ bụru eze l’eme.
3Whẹ sụru: “Unu t’anyi nyakashịa mkpọro ono,
whẹ gude tụgbabe anyi.
Unu t’anyi gbabushia ẹgbirigba ono,
whẹ gude kee anyi ẹgbu.”
4Ọle ọo ọchi bẹ onye ono, nọ
l’oshi-eze l’imigwe l’achị whẹ,
mbụ l’ọo ọchi bẹ l’oozhi Onye-Nwe-Ọha.
5Oo-gude ẹhu-eghughu baarụ whẹ mba,
gude oke ẹhu-eghughu iya mee tẹ whẹ tsụhu egvu.
6Onye-Nwe-Ọha bya asụ whẹ:
“Mu gudewaa ẹka mu dobe onye eze ono, mu họtaru,
t’ọ nọdu l’ugvu Záyọnu, bụ ugvu ono, e doberu mu nsọ.”
7Onye eze ọbu, ọ họtaru ọbu sụ:
“Mu l’a-ryakwa iwhe Onye-Nwe-Ọha kfuru aryarya.
O noo nkele Onye-Nwe-Ọha bẹ sụwaru mu l’ọo mu bụ
Nwa nwoke yẹbe Onye-Nwe-Ọha,
wata ntanụ-a bẹ ya bụakwa Nna, nwụru mu nụ.
8Mu l’e-woru ndu mba lile nụ ghu t’ọ bụru oke-iwhe ghu.
Mu eworu mgboko l’owhu nụ ghu t’i woru,
m’ọ bụru l’ị -sụru tẹ mu nụ ghu iya.
9Ọo l’ẹka-ike bẹ l’ii-gude achị whẹ,
tsua whẹ yọgiri-yọgiri g’ọo ite ụrwa.”
10Ọo ya bụ, unubẹ ndu bụ eze, unu kwabẹkwa ẹnya.
Unubẹ ndu ishi, l’achị
mgboko-o, unu ngabẹkwa nchị
l’ọkwa ono, l’aanmarụ unu.
11Unu gudekwa ntsụ-megvu
wata anọ ejeru Onye-Nwe-Ọha ozhi.
Unu egude ẹhu-anmanma tee ẹswa.
12Unu whuzeta tsutsua Nwa nwoke iya ono ọnu
l’ọkpa, a nọnyaa ẹhu ghulahaa ya eghu, o mee t’unu nwụa
ọnwu kporokoto, nkele ọ kwa nwiwhe, ha nwanshị
bẹ l’akpatsuje iya ẹhu-eghughu.
Ẹhu-ụtso bụ nke ndu gbakfuru
iya nụ tẹ whẹ zee ndzụ.
3Egvu-ọma, Dévidi deru nteke l’ọogbalaru nwa iya Abụsalomu
1Oowaa Onye-Nwe-Ọha,
ndu mu dụ ashị paakwarụ l’igweligwe.
Ndu wulihuru etso mu okfu bụkwa agụta agụta.
2Ndu l’ekfu lẹ Chileke ta
nafụtadu mu pakwawhọ l’igweligwe.
3Ọle ọbu Onye-Nwe-Ọha, ọ kwa
ghu bụ onye l’egbobutaje mu nụ.
Ọo ghu bụ onye l’emeje t’a kwabẹ mu ugvu, ọ bụru ghu
l’emeje tẹ mu palia ishi apali.
4Mu woliru olu mu ryaku Onye-Nwe-Ọha.
O shi l’ugvu ono, o doberu nsọ za mu oku.
5Mu l’azẹje azẹe kuru mgbẹnya; mu l’ekuje teta,
o noo l’ọo Onye-Nwe-Ọha bẹ gude ndzụ mu.
6Igweligwe ndu ono, kwagabegeeru onwowhe
nọ-whee mu mgburumgburu bẹ mu l’ẹte atsụdu egvu
7Onye-Nwe-Ọha, kwolihuro dzọfuta mu.
Gbashinu dzọfuta mu rọ gụbe Chileke mu.
Hụ̀a ndu ọhogu mu àhụ̀hù
nke ọwhu ike l’ẹte adụhe whẹ.
8Ọo gụbe Onye-Nwe-Ọha l’adzọfutaje madzụ.
Gọnuru ọnu-ọma ghu nụ ndu nke ghu.
4Egvu-ọma, Dévidi deru nụ onye ishi egvu, t’a kpọru une ye iya
1Zaa mu oku nteke mu kuru ghu,
byiko Chileke mu, onye dụ chịriri.
I meru ẹhu dụ mu whororo nteke
iwhe shi atsụ mu lanụ.
Byiko, whụaru mu imiko, nụa rọo
ekfukfu mu l’ekfu anụ ghu.
2?Ọo nteke ole bẹ unubẹ
ụnwu-eliwhe l’a-ha ogude ugvu,
a kwabẹru mu eme nwẹda, ọolo-swi-lẹ-nshọku?
?Ọo nteke ole bẹ unu l’e-yeberu obu l’iwhe mmaanụ,
mbụ woru onwunu haarụ iwhe l’abụa ọkpobe iwhe?
3Ọle ọwhu unu l’a-marụ bụ lẹ Onye-Nwe-Ọha
họtawaru ndu yeru iya obu doberu onwiya.
Nteke mu kuru Onye-Nwe-Ọha oku bẹ l’ọozajekwa mu.
4Ẹhu -ghudeje unu eghu t’unu be
ekwekwa t’ẹhu-eghughu ono
kpata t’unu mee iwhe-dụ-ẹji.
Nteke unu zẹe azẹe l’iwhe-azẹe
unu, unu tọ nwẹhu rịa okfu ono arịri, unu adaa jii.
5Tẹ ngwo-ẹja, unu l’e-gwoje nụ Chileke
bụkwaru ngwo-ẹja, dụ iya ree.
Unu adawhubeje Onye-Nwe-Ọha.
6Ikpoto madzụ l’asụje: “Byiko
Onye-Nwe-Ọha, mebanuaru anyi iwhe-ọma.
Menua t’iwhe dụru anyi lẹ ree.”
7Ẹhu-ụtso ọwhu i yeru mu l’obu
kakwa ọwhu l’anọje atsọ whẹ,
mẹe iwhe whẹ meberu l’alị whẹ mehu ree-ree-ree.
8Mu l’a-zẹe azẹe, pyakọo
onwomu kuru mgbẹnya l’ẹhu-guu,
nkele ọo gụbe Onye-Nwe-Ọha kpụ
l’emeje tẹ mu marụ l’ọ tọ dụdu iwhe bya l’eme mu nụ.
5Egvu-ọma, Dévidi deru nụ onye ishi egvu; t’a whụru opu ye iya
1Jiko Onye-Nwe-Ọha, ngabẹnu
nchị nụa olu mu, t’ude, mu l’atsụ rwunua ghu lẹ nchị!
2Gụbe Chileke mu, bụ Eze mu,
ngabẹnu nchị nụa mkpu, mu l’echi echiku ghu.
O noo nkele ọo ghu bẹ mu l’ekfu anụ.
3Gụbe Onye-Nwe-Ọha,
l’ụtsu mbọku mbọku bẹ l’ịinuje olu mu.
L’ụtsu mbọku mbọku bẹ mu
l’ewojeru mkpa mu doo giriri l’iwhu ghu,
nọdu ngabẹru ghu t’i meeru mu iya.
4Chileke, ị tị bụdu onye ejo-ememe l’adụje ree.
I ti kwejedu tẹ ndu l’eme ejo-ememe nọdu l’ẹka ị nọ.
5Ndu l’eku onwowhe lẹ gẹ whẹ
l’ahaa ta adụdu ike akfụru ghu l’iwhu.
Iwhe bụ ndu l’eme iwhe l’adụa ree b’ị kpọkotaru ashị.
6Ndu l’atuwhu ntuwhu bẹ l’iimeje tẹ whẹ bụru kpurupyata.
Ndu l’egbu ọchi yẹle ndu l’aghọ
ụgho bẹ gụbe Onye-Nwe-Ọha l’anọje akpọha akpọha.
7Ọle mbẹdua l’a-byajẹ l’ụlo ghu, eshi-ọwhu i yeru mu obu.
Mu l’e-gudeje ọtsu egvu,
ghaa iwhu l’eze-ụlo ghu, dụ nsọ, baarụ ghu ẹja.
8Jiko Onye-Nwe-Ọha, gudenu
nke l’ị bụ onye dụ chịriri duzhia
mu ụzo, m’ọgvu ndu ọhogu mu.
Gụ emee t’ụzo, l’ịicho tẹ mu shia doo mu ẹnya.
9Ọ tọ dụdu okfu, shi whẹ l’ọnu
m’ọo nnanụ, dụ ọwhu e gude ẹka.
Iwhe jiru whẹ obu bụ emebyi.
Ire whẹ bẹ whẹ l’egudeje
ajakpọshi ibe whẹ, ọle iwhe dụ
whẹ l’ime obu l’anọje eshi nshi g’ọo ilu, gheru ọnu.
10Nmanụa whẹ ikpe iwhe-dụ-ẹji
whẹ meru, byiko Chileke.
T’idzu, whẹ chịru nmakwa whẹ g’ọo ọnya.
Chịfukota whẹ, o noo nkele
iwhe-dụ-ẹji whẹ megbaberu bẹ panụkawaru l’igweligwe,
tẹmenu whẹ l’anọje ekwefuru ghu ike.
11Ọle t’ẹhu tsọkwaa ndu
l’agbabajẹ l’ime ghu je anọdu zeeru ndzụ ụtso.
Tẹ whẹ gụjekwa egvu ẹhu-ụtso ntekenteke.
Gbochita whẹ Chileke.
T’iwhe bụ ndu yeru ẹwha ghu obu tekwaa ẹswa.
12O noo nkele ọo gụbe Onye-Nwe-Ọha
l’agọjeru ọnu-ọma nụ ndu dụ chịriri.
L’iigudeje l’ọo lẹ whẹ dụ ghu l’obu gbochita whẹ.
6Egvu-ọma, Dévidi deru nụ onye ishi egvu, t’e gude olu l’ede edede gụa ya, a kpọru une ye iya
1Jiko Onye-Nwe-Ọha,
be egudekwa ẹhu-eghughu baarụ mu mba.
Be egudekwa oke ẹhu-eghughu nkeghu hụ̀a mu àhụ̀hù!
2Jiko Onye-Nwe-Ọha, whụaru
mu rọ imiko nkele ike gvụwaru mu.
Jiko Onye-Nwe-Ọha, menua tẹ mu
ka mma, o noo nkele ẹhu l’awhụkota mu awhụwhu.
3Meji l’atọfukwa mu atọfu.
Gụbe Onye-Nwe-Ọha, ?ọ zhia
nteke ole bẹ l’ịi-gbaru mu mkpu?
4Lwawhuta azụ Onye-Nwe-Ọha, bya agbafụta ndzụ mu.
Gude iswi n-yemobu ghu ono,
bụ onwe agvụgvu dzọo mu rọ!
5Nkele onye nwụhuru anwụhu ta anyatajẹhedu ghu.
?Oo onye shije l’alị-maa ekele ghu ekele?
6Mu tsụakwaru ude jeye ike dụ ẹbo gvụ mu.
Ẹnyashi mbọku mbọku bẹ mu
l’azẹje azẹe, kwakọta ẹkwa mkpụrudumulanu.
Ọ tọ dụdu mbọku, a nọghajeru,
ẹnya-mini, shi mu l’ẹnya ta sọ l’iwhe mu l’atukobeje ishi.
7Áwhụ, tsọru mu nụ mewaru, mu kwaa ẹkwa kwata ishi.
O mewaru, ẹnya kochishia mu ekochishi.
Ọ bụru iwhe ndu mu dụ ashị kpatarụ.
8Unu jekwa njere unu, unubẹ ndu ono, l’eme ejo-iwhe,
nkele Onye-Nwe-Ọha nụwaru mkpu ẹkwa mu.
9Onye-Nwe-Ọha bẹ nụwaru iwhe mu sụru t’o meeru mu.
Ekfukfu, mu kfuru nụ iya bẹ rwuwaru iya lẹ nchị.
10T’e kpukwaa ndu ọhogu mu
iwhu lẹ ntụ, tẹ meji tọfukwa whẹ.
Tẹ whẹ nyịgobe, gude iwhere lawhu azụ.
7Egvu áwhụ, Dévidi gụru nụ Onye-Nwe-Ọha lẹ nke iwhe Kushi, bụ o-shi-l’ẹpa Bénjaminu kfuru
1Gụbe Onye-Nwe-Ọha, bụ Chileke mu,
ọ kwa l’ime ghu bẹ mu gbabaru tẹ mu zee ndzụ.
Dzọfuta nụ mu l’ẹka ndu l’achị nta mu, jiko nafụta mu rọ ya.
2A nọnyaa, whẹ gude mu
labushia anụ mu nwịrinwiri g’ọo onye agụ dzugburu,
l’ẹbe ọdu onye ọdo mu nweru, l’a-gbarụ mu mkpu.
3Gụbe Onye-Nwe-Ọha, bụ Chileke mu,
t’a gụfukwa, l’o nweru iwhe
l’akfụaru nhamụnha, mu mejeru,
4m’ọ -bụ l’o nweru onye okfu l’adụaru mu l’iya,
mu mejeru ejo-iwhe, ọdua lẹ mu natajẹru ndu
ọhogu mu iwhe whẹ l’ọkpu-ẹhu,
l’ọ bọ dụ iwhe kpatarụ iya nụ,
5ọo ya bụ, tẹ ndu ọhogu mu ono
chịa mu gude, dzọo mu tọlitoli,
woru ugvu ono, l’aakwabẹje mu gwọo lẹ ntụ.
6Gụbe Onye-Nwe-Ọha, gude
ẹhu-eghughu zhilihu.
Gbalihu nụ, nọ-chia ndu ọhogu mu
ono ụzo, gude ẹhu-eghughu achị mu ọso ụzo.
Kwolihuro Onye-Nwe-Ọha
nkele ọ kwa gụbedua bẹ tụru iwu sụ tẹ
ndiwhe kpeje ikpe, kfụru nhamụnha.
7Chịkobenu ndu mba gẹ mba ha,
bụ ndu dzukoberu nụ tẹ whẹ
gbaa ghu mgburumgburu.
Gụ anọdu l’oshi-eze ghu l’imeli bụru onye ishi whẹ.
8Ọo gụbe Onye-Nwe-Ọha bụ
onye l’e-kpe ndu ono ikpe.
Onye-Nwe-Ọha, gude nụ nkele mu
dụ chịriri, t’ọ dụ ẹka, ụta dụ mu l’ẹhu haarụ mu enge.
9Gụbe Chileke, bụ onye dụ chịriri,
gụbe onye l’enyochaje ime obu
madzụ yẹle iwhe dụ iya l’ọriri,
byiko menua t’o buhu, mbụ iwhe
kpanganga ono, ndu ejo-ememe l’anọje eme.
Mee tẹ ndu, dụ chịriri kfụru shihu ike.
10Chileke bụ onye l’egbochitaje mu nụ.
Ọo yẹbedua l’adzọfutaje ndu obu whẹ gụru iwhoro.
11Chileke bụ onye l’ekpeje ikpe,
kfụru nhamụnha, ọ bụru onye
l’egoshije, ndu ejo-ememe oke
ẹhu-eghughu iya mbọku mbọku.
12O -lenyaa ẹnya tẹ nzhimanụ lwa
onye ejo-ememe azụ, tọ dụ,
ya eworu mma iya baa ababa.
Ya esetakwawho ụta iya jịjiji kwabẹru iya.
13O mewaru ejo ngwọgu iya dobe,
bya edozhikotawa akfụ iya, l’o gbukaa ngere ngere.
14Lewaro gẹ ejo-iwhe jiru ndu ejo-ememe obu kpimu.
Ejo-ememe ono, jiru whẹ obu bụ ẹregede.
Iwhe l’e-shi l’ẹregede ono fụta bụru ntuwhu-ire.
15Whẹ tụru iduma, gvumia ya
egvumi, ọle ọo whẹbedua
l’e-megee daba l’iduma ono, whẹ tụru.
16Ẹregede ono, whẹ l’agba
l’e-megee dawhuru whẹ azụ,
bya adakoru whẹ l’ishi.
Iwhe kpanganga, whẹ meru
ndu ọdo l’a-lwawhukwaru whẹ whọ azụ.
17Mbẹdua l’a-nọdulewho ekele
Onye-Nwe-Ọha ekele, nkele ọ bụ onye dụ chịriri.
Mu agụa egvu tua onye ono, bụ
Ọkalibe-Kangokotaru-Nu ono ẹwha.
8Egvu-ọma, Dévidi deru nụ onye ishi egvu, t’e gudeje ngwa egvu, l’eekuje gítitu gụa ya
1Gụbe Onye-Nwe-Ọha, bụ Onye-ukfu-l’ọha,
g’ẹwha ghu habekwanu shii lẹ mgboko l’owhu.
I meru ọ-dụ-biribiri ghu, ọ ghaa imigwe.
2I mewaru ụnwegirima nshịi mẹe
ndu, l’angụ ẹra, whẹ wata ghu ọja ama,
l’ọgvu ndu ọhogu ghu,
shi nno mee t’ọnu bụru ndu
ọhogu ghu mẹe ndu l’eme tẹ whẹ
gwata ghu ụgwo iwhe shọngu.
3Nteke mu leru ẹnya l’igwe
l’owhu, whụ iwhe i gude
mkpụshi-ẹka ghu meshia, mbụ
ọnwa yẹle kpokponde, bụ-gee iwhe i meshiru dobe,
4mu ajịlahaa sụ: “?Ọo zhia gụnu
bẹ madzụ bụ, nke t’i rivuje iya l’ọriri?
?Ọo zhia gụnu bẹ nwa madzụ bụ nke t’i letaje iya ẹnya?”
5I meru iya, iwhe ojozhi-imigwe
gude ka iya shii ta aha g’ọo inyi-nvọ.
I kwabẹru iya ugvu, mee ya o
nweru ẹnya lẹge l’eemeje onye eze.
6I nụru iya ike t’o letaje iwhe lile,
i meru ememe ẹnya, bya
emekwaawho t’iwhe lile nọdukota iya lẹ mkpula,
7mbụ l’i meru tẹ atụru yẹle eghu
mẹe eswi, mẹe anụ-ẹgbudu gẹ whẹ hakọta,
8mẹe ẹnu, l’ewhe l’eli mẹe ẹma,
bu lẹ mini, mẹwaro iwhe lile,
bu lẹ mini gẹ whẹ ha nọdukota iya lẹ mkpula.
9Gụbe Onye-Nwe-Ọha, bụ Onye-ukfu-l’ọha,
g’ẹwha ghu habekwanu shii lẹ mgboko l’owhu.
9Egvu-ọma, Dévidi deru nụ onye ishi egvu, t’e gude olu egvu, l’eekuje “Ọrya Ẹkwa Nwa” gụa ya
1Gụbe Onye-Nwe-Ọha, mu
l’e-gude obu mu g’ọ ha ekele ghu ekele.
Mu l’e-kfukashịje iwhe dụ biribiri,
l’iimeshigbabe ekfukashi.
2Ẹhu l’a-nọ atsọ mu ụtso,
mu egude ghu ete ẹswa.
Mu l’a-gụje egvu tua ghu ẹwha,
gụbe Ọkalibe-Kangokotaru-Nu.
3Ndu ọhogu mu bẹ whụru ghu nụ,
whẹ nyịgobe tsuwhu azụ.
Whẹ vukotawaru iwhe daa nwụshihu.
4O noo nkele i mewaru mu iwhe
gbarụ mu nụ, i kperu ikpe,
kfụru nhamụnha, kperu iya yeru mu.
Ị nọdu l’oshi-eze ghu kpee ikpe, kfụru chịriri.
5Ị bawarụ ndu mba l’ẹte amaa Chileke mba,
mee ndu l’eme ejo-ememe, whẹ bụru kpurupyata.
I mewaru t’ẹwha whẹ chịhu achịhu jeye lẹ tututu-mịmimi.
6Ndu ọhogu anyi bẹ nkewhe gvụakwaru.
Mkpụkpu whẹ b’ị vụwaru
l’ọgbaragbu, ọkpu whẹ kpọhuwaa.
7Onye-Nwe-Ọha bụ eze jeye lẹ tututu-mịmimi.
O mewaru oshi-eze iya ono ọ
kfụru gamụ, nke ọwhu l’ọo-nọdu iya kpee ikpe.
8Oo-kpe ndu mgboko ikpe, dụ chịriri.
Ikpe iya l’akfụjeru nhamụnha.
9Onye-Nwe-Ọha bụ
a-gbaba-e-zeeru-ndzụ ndu l’aakpa ẹhu.
Ndu iwhe-ọtsulanu byarụ
l’agbabajẹkwa iya whọ l’ẹka je edomia onwowhe.
10Iwhe bụ ndu marụ ghu nụ bụ ghu bẹ whẹ dawhuberu,
nkele gụbe Onye-Nwe-Ọha ta
ahabụdua ndu l’achọ ụzo ghu.
11Unu gụa egvu gude jaa
Onye-Nwe-Ọha ono, bu lẹ Záyọnu ajaja.
Unu ryakashịaru ndu mba lile
iwhe lile ono, o megbaberu.
12O noo nkele yẹbe onye ono,
l’agwatajẹ ụgwo ọchi bẹ nyatakwaru whẹ-ẹ.
Ndu iwhe-ọtsulanu byarụ -chia
mkpu bẹ l’ọoto nyazọjekwa whẹ anyazọ.
13Gụbe Onye-Nwe-Ọha, whụaru mu rọ imiko.
Lewaro ẹgube ndu ọhogu mu l’akpabe mu ẹhu.
Nafụtanu mu l’ẹka ọnwu ono.
14Ọo ya bụ nggẹ mu anọdu l’ẹka
l’eeshije abahụ lẹ Záyọnu jaa ghu ajaja,
tekwaawho ẹswa l’ị dzọfutaru mu.
15Ndu mba gẹ mba ha bẹ
dalahụwaru l’ime iduma, whẹ gude ẹka whẹ tụa.
Whẹ nmakwaawhọ l’ọnya, whẹ kweberu l’onwowhe.
16Iwhe e gude marụ Onye-Nwe-Ọha bụ ikpe,
kfụru nhamụnha l’ookpeje.
Ndu l’eme ejo-ememe bẹ ejo-iwhe,
whẹ l’eme l’abụjeru ọnya nmata whẹ.
17Ndu l’eme ejo-ememe bẹ l’a-bụru
maa, mbụ lẹ mba gẹ mba ha,
nyọharu Chileke bẹ l’ee-nwukwaru ye l’alị-maa.
18Ọle ndu l’adụa g’ọ harụ whẹ bẹ l’a ta nyọhakwa jeyewaro.
Iwhe ndu ụkpa l’ele ẹnya iya lẹ
Onye-Nwe-Ọha l’e-meru whẹ ta
abyakwa l’a-gba whẹ l’azụ ẹka jeye lẹ gbururu.
19Zhilihu gụbe Onye-Nwe-Ọha,
t’ọ bọ bụ madzụ l’agbẹe ka ghu ike.
T’e kpee ndu mba lile ikpe l’iwhu ghu.
20Jiko Onye-Nwe-Ọha,
yenua whẹ egvu, nke ọwhu ndu
mba lile ono l’a-ma l’ọo madzụ mmaanụ bẹ whẹ bụ.
101Gụbe Onye-Nwe-Ọha, ?ndẹnu iwhe meru i je akfụru otẹnya?
?Ndẹnu iwhe meru i domia
onwoghu nteke iwhe-ọtsulanu byarụ?
2Ndu ejo-ememe l’egudeje oku
onwowhe gẹ whẹ l’ahaa achị nta ndu ụkpa.
T’ejo idzu, whẹ chịru doberu ndu ọdo bụkwaru ọnya nma whẹ.
3Iwhe ndu ejo-ememe l’egudeje
anga l’ụnga bụ ejo iwhe l’agụ obu whẹ.
Whẹ l’anọje ekutse ndu ẹnyumi ekutse,
gbee ekfubyishi Onye-Nwe-Ọha ekfubyishi.
4Ndu ejo-ememe l’egude oku
onwowhe gẹ whẹ l’ahaa jịka ọcho Chileke.
Whẹ ta arị-vujedu Chileke l’ọriri ilile.
5Iwhe lile, whẹ l’eme l’anọjelewho agbarụ whẹ bẹrebere.
Ụzo, Chileke l’eshije ekpe ikpe l’agbachije whẹ ẹnya.
Whẹ l’anọje anyarụ ndu ọhogu whẹ ekemeke.
6Iwhe whẹ l’arịje l’ime obu whẹ bụ lẹ whẹ bụ enwubata enwubata,
lẹ whẹ ta abyadụ l’e-je iwhe ẹhuka.
7Iwhe jiru whẹ ọnu ebushihu
ebushihu bụ owhu iwhu mẹe ụgho,
mẹe ọna ejo nkemu.
Iwhe l’ebejeru whẹ eberu l’ọnu
bụleruwho ejo okfu yẹle okfu erehu.
8Whẹ l’anmakpugejeeru lẹ mgboro mkpụkpu.
Ọ bụru l’ẹka ono, whẹ domiru onwowhe kwabẹru ndu
l’a-daba whẹ l’ẹka ono bẹ whẹ
l’anọduje egbushi ndu l’adụa iwhe whẹ meru.
9Ọo gẹ oduu-gburu-agụ l’edomije
onwiya egbushi ụnwu-anụ ọdo bụ
gẹ whẹ l’edomije onwowhe kwabẹru ndu ụkpa.
Nteke whẹ nmataru whẹ, whẹ akpụru whẹ lashia.
10Ndu nmalahụru whẹ l’ẹka bẹ whẹ
l’egweje ryaaryaa jeye whẹ akụrwua ẹnya.
Whẹ l’egudeje ọkpehu whẹ kụa ndu ụkpa ono pyaapyaa.
11Whẹ l’arịje lẹ Chileke nyazọwaru
iwhe lile, whẹ meru, mbụ lẹ Chileke
bẹ gbakụtawaru iya azụ, tọ bya
l’aghabaa ẹnya l’azụ whụ iwhe ono, whẹ l’eme ono.
12Gụbe Onye-Nwe-Ọha, gbalihunu agbalihu.
Gụbe Chileke, palinua ẹka ghu apali mee whẹ ivu l’ẹhu.
Ba anyazọkwa ndu ono, l’aakpa ẹhu ono anyazọ.
13?Ndẹnu g’ọ nwụru ndu
ejo-ememe l’anọje ekfubyishi Chileke?
?Ọo gụnu meru whẹ l’arịje lẹ
Chileke ta adụdu iwhe l’oome whẹ?
14Ọle ịiwhukotaje iwhe lile.
Ịiwhuje ndu nọ lẹ nsogbu yẹle ndu l’agụ áwhụ.
Ị tị chịjeduru ẹka ye l’iwhu ụtakfu.
Ọo l’ẹka ghu bẹ ndu ụkpa yeru ndzụ whẹ.
Ọ bụru ghu l’agbatajẹru ndu nna whẹ l’anọhee.
15Gbakwoo ndu ejo-ememe mẹe
ndu l’eme ejo-iwhe ẹka nafụ whẹ ike.
Vọkwaa ejo-iwhe lile, whẹ l’eme.
Ba adụkwa ọwhu l’ịi-ha m’ọo nnanụ.
16Ọo Onye-Nwe-Ọha bụ Eze jeye lẹ tututu-mịmimi.
Ndu ọha ọdo l’a-bụru
kpurupyata l’alị Onye-Nwe-Ọha.
17Gụbe Onye-Nwe-Ọha,
iwhe ndu dụ guu kfuru yeru ghu b’ị nụwaru.
Ọo gụbedua l’emeje t’obu shihu
whẹ ike, l’ịinujekwawho olu whẹ.
18Haarụ ndu nna whẹ l’anọhee
mẹe ndu l’aakpa ẹhu enge,
nke ọwhu ụnwu eliwhe l’a-ha whẹ ọkpapyashi ishi.
11Egvu, Dévidi deru nụ onye ishi egvu
1Mu woru onwomu ye Onye-Nwe-Ọha l’ẹka.
?Ndẹnu iwhe meru unu sụ
tẹ mu whee pẹe g’ọo ẹnu je
edomia onwomu l’ẹka ugvu dụ?
2Lẹ ndu ejo-ememe woharu
onwowhe seta akfụ whẹ
jịjiji tẹ whẹ gbaa ndu obu gụru iwhoro.
3Eshi-ọwhu e mebyishiwaru iwu,
bụ itso gude mkpụkpu,
?oo gụnu b’a sụru t’onye dụ chịriri mebaa ọdo?
4Onye-Nwe-Ọha nọkwa l’eze-ụlo iya, dụ nsọ.
Ẹka oshi-eze iya dụ bụ l’imigwe.
Ọ bụru l’ẹka ono bẹ l’ọonoduje
ele iwhe l’eeme lẹ mgboko.
Ẹnya iya l’atụkoje ụnwu eliwhe l’owhu nyogbakota.
5Onye-Nwe-Ọha l’enyochajekwawho
ndu-dụ-chịriri mẹe ndu ejo-ememe enyocha.
Ndu bụ ome iwhe-kpanganga
l’adụje whẹ ree bẹ l’adụjekwa iya ashị.
6Ndu ejo-ememe ono bẹ
l’oo-megee chịaru icheku-ọku,
mẹe ọku-nshegbe ọchi mini.
Ọ bụru ẹjo whẹrewhere, l’ekpo ọku
bẹ l’oo-kpukpushi whẹ gude nụa whẹ chịikfuu.
7O noo lẹ Onye-Nwe-Ọha bụ
onye dụ chịriri, ndu l’eme iwhe
kfụru nhamụnha l’adụje iya ree.
Ndu obu whẹ gụru iwhoro
l’e-megee whụa iwhu iya.
12Egvu-ọma, Dévidi deru nụ onye ishi egvu, t’e gude olu, l’ede edede gụa ya
1Gụbe Onye-Nwe-Ọha, gbatanụru anyi mkpu eyemẹka,
lẹ ndu nke Chileke bẹ gvụakwaru.
Ọ tọ dụhedu ẹka l’aawhụkwadu ndu ire-lanụ.
2Onyenọnu l’anọje adzụru ibe iya ejire.
Whẹ l’anọje ajakpọshi madzụ gude eduwhushi whẹ.
3Gụbe Onye-Nwe-Ọha, menua
t’ọnu bụru whẹ shọngu,
mbụ ndu ono, l’anọje ajakpọshi
madzụ ibe whẹ, mẹe ndu ono, l’egudeje ire eke tụhaa.
4Mbụ ndu ono, l’asụje lẹ whẹ
marụ gẹ whẹ l’e-dobe ọnu kfua
okfu, whẹ enweta iwhe whẹ
chọru, mbụ lẹ whẹ l’e-kfu g’ọnu
ha whẹ, ọ tọ dụdu onye l’a-sụ
whẹ l’ọ waa iwhe whẹ l’e-me ndọwa.
5Onye-Nwe-Ọha bya eyeeru whẹ ọnu sụ:
“Mkpamẹhu ono, l’akpa
ndu-ụkpa, mẹe ude ono,
ndu l’adụa g’ọ harụ whẹ l’atsụ,
bẹ mu bya l’e-kwobe iya gbalihu ntaa.
Mu bya l’e-gbochita whẹ, bụ
iwhe ọbu whẹ l’ele ẹnya iya.”
6Iwhe Onye-Nwe-Ọha kfuru te enwedu ntụpo.
Okfu iya ono dụ g’ọo ọkpobe
mkpọla-ọcha, a hụru l’ọku-ụzu
ugbo ẹsaa t’o gbuchafu egbuchafu.
7Gụbe Onye-Nwe-Ọha;
gbochitakwa anyi, chekwakwaa anyi
ntekenteke t’ẹka ndu ejo-ememe be erwu anyi l’ẹhu.
8Ndu ejo-ememe ono tụkokwaru ẹka lile nọdu.
Ọ bụleruwho ejo-iwhe be ụnwu eliwhe l’anọje ekutse.
13Egvu, Dévidi deru nụ onye ishi egvu
1Gụbe Onye-Nwe-Ọha, ?Ọo nteke
ole bẹ l’ịi-nyọha-beru mu g’ị nyọharu mu-a?
?Ịi-nyọhawaru mu rọo jeyewaro?
?Ọo nteke ole bẹ l’ii-wofube ẹnya l’ẹka mu nọ?
2?Ọo nteke ole bẹ mu l’a-rịnyaa
ọriri iwhe mu l’eme rị-beru?
?Ọo agha bẹ l’aa-nọ-beru
áwhụ agvụ mu l’obu eswe l’ẹnyashi ẹgube ọwa-a?
?Ọo nteke ole bẹ ndu ọhogu
mu l’a-tụ-beru okoo kpua mu?
3Ghanụa ẹnya l’ẹka mu nọ, gụbe
Onye-Nwe-Ọha, bụ Chileke mu, yeeru mu ọnu.
Menua tẹ mu whụ ụzo, a nọnyaa mu nwụhu.
4Mẹ ndu ọhogu mu l’a-sụkwa lẹ
whẹ mekputawaru mu, ndu mu
dụ ashị etee ẹswa lẹ mu dawarụ.
5Ọle ọo n-yemobu ghu, l’enwee eberu bẹ mu dakoberu.
Mu l’aswa ẹswa l’ime obu mu, o noo lẹ mu marụ l’ịi-dzọfuta mu.
6Mu l’a-nọ agụ egvu anụ Onye-Nwe-Ọha,
o noo l’oomenukaru mu ree.
14Egvu, Dévidi deru nụ onye ishi egvu
1Ndu l’enwee uche l’arịje l’ime obu whẹ lẹ Chileke ta adụdu.
Whẹ rwụwaru alị kpaa ntụ l’ẹnya,
mewaa iwhe Chileke kpọru ashị.
Ọ tọ dụdu m’ọo onye lanụ l’eme iwhe dụ ree.
2Onye-Nwe-Ọha shi l’imigwe
ele ụnwu eliwhe ẹnya lẹ
mgboko-o tẹ ya marụ, ?o nweru onye marụ ágụ?
Mbụ tẹ ya marụ, ?o nweru onye l’achọ yẹbe Chileke?
3Ọle onyenọnu l’ime whẹ hawarụ ọkpobe ụzo jewhuhu.
Whẹ mebyishihuwaru gẹ whẹ ha.
Ọ tọ dụdu t’ọ ka mma l’ọo onye lanụ, l’eme iwhe dụ ree.
4?Ọo lẹ ndu ono, l’eme ejo-iwhe
ono te enwedu mgbamego tọo,
mbụ ndu ono, l’anọje erigbu ndu
nkemu erigbu g’ọo ndu l’eri nri,
whẹ bụru ndu l’ẹte akpọ-kuje Onye-Nwe-Ọha?
5Ọo l’ẹka l’aa-nụ whẹ áwhụ bẹ
Onye-Nwe-Ọha l’a-nọdu yee whẹ ejo egvu,
o noo lẹ Chileke bẹ tụru ike yeru ndu dụ chịriri.
6Ọobuje, onye ụkpa tọ-gee ẹtomu
iwhe ya l’e-me, unubẹ ndu ejo-ememe akpọshia ya.
Ọle Onye-Nwe-Ọha bụ iya
l’egbochitaje iya t’ọ bọ dụ iwhe l’e-me iya.
7Haa, a sụkwanu, e shi lẹ Záyọnu bya adzọfuta ndu Ízurẹlu.
Nteke Onye-Nwe-Ọha
l’e-dobewhu ndibe iya azụ
l’ọnodu whẹ, bẹ Jékọpu l’e-te
ẹswa, ẹhu atsọo Ízurẹlu ụtso.
15Egvu-ọma, Dévidi deru
1Gụbe Onye-Nwe-Ọha, ?ọo onye l’e-buru l’eze-ụlo ghu?
?Ọo onye, dụ ọdu-agha l’e-buru l’ugvu ghu, dụ nsọ?
2Ọ kwa onye l’ẹte enwee ẹka ụta
dụ iya l’ẹhu, bụru onye l’anọje
eme iwhe dụ chịriri, mbụ onye
l’ekfuje ire-lanụ, shi iya l’obu.
3Ọ kwa onye l’ẹte ekfujeru ibe iya
okfu-azụ, bụru onye l’ẹte emeje
ibe iya ẹji, too kfubyishije madzụ ibe iya.
4Ọ kwa onye l’adụa iwhe ọ gụberu ndu Chileke jịkaru.
Ọle ọwhube ndu l’atsụ
egvu Onye-Nwe-Ọha bẹ l’ọokwabeje ugvu,
onye l’abụje, o -ribua lẹ nte l’iya
l’e-me iwhe, ya emee iwhe ọbu,
o -beru o je m’ọo l’e-mekata iya.
5Ọ kwa onye bụ, o -jee madzụ
ụgwo, o too ledu ẹnya
ọnwurunwa, to rije n-wọlazu
gude gbaa ẹka-ebe gbagide onye l’adụa iwhe o meru.
Ẹgube onye l’eme nno bẹ l’aata
abyadụa l’e-nwubata enwubata.
16Egvu-ọma, Dévidi deru
1Gbobuta mu gụbe Chileke,
o noo lẹ mu gbabaru l’ime ghu tẹ mu zeeru ndzụ.
2Mu sụru Onye-Nwe-Ọha: “Ọo ghu bụ Onye-Nwe-mu nụ.
Iwhe lile, dụ ree, mu nweru bụ ghu b’o shi l’ẹka.”
3A bya lẹ ndu dụru Chileke nsọ,
l’alị-a, ọo whẹ bụ ndu dụ ugvu,
ọ bụru whẹ kakọta mu ọdu ree l’obu.
4Ndu bụ agwa bẹ whẹ hatarụ
etsotso, bẹ iwhe-ọtsulehu whẹ l’anọlewho aka shii eje eje.
Mu ta abyadụ l’e-gbu anụ gbashịru
agwa ono mmee ya, mu ta abya
l’a-nọnyaa gude ọnu mu ọwa-a akpọ agwa ono mkpoku.
5Onye-Nwe-Ọha, ọo ghu bụ
oke-iwhe mu ketaru, ọo ghu bụ
mkpakọ lẹ n-whuko nkemu,
mbụ l’ọo gụbedua bẹ iwhe mu l’e-megee bụru dụ l’ẹka.
6Iwhe lile Onye-Nwe-Ọha gụru ọgu nụ mu dụkota ree,
ọwhu bụ ezhi-okfu bụ l’ọ dụ ree
ọkpobe adụdu mbụ oke, ọ hẹru mu.
7Mu l’aja Onye-Nwe-Ọha ama,
o noo l’ọo ya bẹ l’akpọ-zhiru mu ụzo iwhe mu l’eme.
Ọobuje, o -rwua l’ẹnyashi, obu mu ezhilahaa mu iwhe.
8Mu l’arịtaje lẹ Onye-Nwe-Ọha bẹ mu l’iya nọ ntekenteke.
Eshi-ọwhu ọ nọ mu l’ẹka-ụtara,
bẹ mu bụ enwubata enwubata.
9Ọo ya meru g’o gude obu l’atsọ mu ụtso,
nchịchochi ria mu ẹfonu, mu l’akpa lẹ ntụsaru-ẹhu.
10Mkpata iya bụ lẹ mu marụ l’ị tịi hadụ mu l’alị-maa.
Ị tịi hadụ onye nkeghu, dụ nsọ t’o rehu erehu.
11I goshiwaru mu ụzo ndzụ.
Anọno, ị nọ mu ntse l’emeje t’ẹhu-ụtso mu dzua oke.
Anọdu, mu nọdu l’ẹka-ụtara ghu je
l’e-me mu ẹhu-ụtso jeye lẹ gbururu.
17Ekfukfu, Dévidi kfuru nụ Chileke
1Gụbe Onye-Nwe-Ọha, nụkwaa
olu mu, nteke mu sụru ghu t’i meeru mu iwhe dụ chịriri.
Ngabẹnu nchị nụa ẹkwa, mu l’aryaku ghu.
Gbebenu nchị nụa ekfukfu, mu
l’ekfu anụ ghu, ọwhu l’abụa ntuwhu l’eregede.
2Byiko, byanụ ahaaru mu enge!
Lee ya ẹnya, goshi l’iswi dụ mu mma.
3O -beru, i nyochaa mu obu; bya elee mu ule l’ẹnyashi.
O -beru, i gude ọku dalee mu adale,
ọ tọ dụkwa iwhe-dụ-ẹji, ị bya l’a-whụ mu l’ẹhu.
Mu kfuwaru iya kepyaa ya akụ, l’ejo okfu
ta abyadụ l’eshi mu l’ọnu fụta.
4Mu te emedu gẹ ndu ọdo l’eme.
Mbẹdu-ọwa l’emeje iwhe i kfuru,
mbụ lẹ mu l’ejijeru ụba yeru ndu emebyi.
5Ọ lẹwho ụzo ghu bẹ mu l’anọje
etso, ọkpa te echifujedu mu echifu.
6Mu l’akpọ-ku ghu, gụbe Chileke, o noo l’ịi-za mu.
Gbobenu nchị, nụa iwhe mu l’ekfu anụ ghu.
7Byiko, menua tẹ mu whụ
n-yemobu ghu ono, dụ biribiri,
gụbe onye l’abụje, ndu -gbabarụ l’ime ghu je ezeeru ndzụ,
gụ egude ike ghu dzọfuta whẹ l’ẹka ndu ọhogu whẹ.
8Jịfunuru mu ejo-iwhe l’ụzo gẹ
l’aajịfuje iwhe l’adaba l’akpụru ẹnya.
Kpuchinua mu lẹ mkpula akwẹka
ghu gẹ ọku l’ekpuchije ụnwu iya,
9nke ọwhu ẹka ndu ejo-ememe l’ete erwu mu l’ẹhu,
mbụ ndu ọhogu mu ono,
nọ-wheru mu mgburumgburu adzọba tẹ whẹ gbua mu.
10Imiko madzụ ta adụjedu whẹ,
whẹ l’anọje ekfu iwhe ka ọnu whẹ.
11Ntaa l’abụje; ẹka mu shiru, whẹ
etsopyaa mu, nọ-whee mu
mgburumgburu, kwabẹ tẹ whẹ nwutsua mu.
12Whẹ dụ g’ọo oduu, ẹgu l’agụ, kwabẹru anụ, l’oo-gbu,
g’ọo nwa oduu, geparu egeparu
achọ iwhe l’eshita iya ụzo iwhu.
13Zhilihunu gụbe Onye-Nwe-Ọha fụru whẹ, lwugbua whẹ.
Gudenu ogu-ịgba ghu nafụta
ndzụ mu l’ẹka ndu ejo-ememe ono.
14Gudenu ike ghu dzọo mu l’ẹka whẹ, gụbe Onye-Nwe-Ọha
mbụ l’ẹka ndu ono, bụ lẹ
mgboko-o bẹ obunggo whẹ jeberu,
mbụ ndu ono, ị nụru ẹku ghu
nke etsutsu, nke ọwhu ụnwu whẹ, m’ọo ụnwu nwanwa whẹ
l’e-nwe iwhe, nweru iya
nke anyịnyi.
15Ọle mbẹdua l’a-whụ ghu atatiwhu,
o noo lẹ mu dụ chịriri.
Mu tehulewho bẹ obu l’a-tsọ mu ụtso,
o noo nkele mu l’a-whụ ụgbugba ghu.
18Egvu, Dévidi, bụ onye ozhi Onye-Nwe-Ọha deru nụ onye ishi egvu
Egvu-a b’ọ gụru gude kele Onye-Nwe-Ọha mbọku, ọ nafụtaru iya l’ẹka ndu ọhogu iya swịikpamu, ọ kagezhia nke Sọlu
1Mu yeru ghu obu, gụbe Onye-Nwe-Ọha.
Ọo ghu bụ ike mu.
2Ọo Onye-Nwe-Ọha bụ
eze-ẹwhuru nkemu,
bụru ụlo-ozeru-ndzụ mu,
bụkwaru iya whọ l’anafụtaje mu.
Ọo Chileke mu bụ oke-ẹwhuru mu,
mu l’agbabajẹ je ezeeru ndzụ.
Ọo ya l’egbochitaje mu, bụru iya
l’egudeje ọkpehu iya dzọo mu.
Ọo ya bụ ụlo, shihuru ike, mu
l’agbabajẹ je edomia onwomu.
3Ọo Onye-Nwe-Ọha ono, bụ onye
ọ gbarụ t’a jaa ajaja bẹ mu
l’akpọ-kuje, ya adzọfuta mu l’ẹka ndu ọhogu mu.
4Anwụhu bẹ tụwaru mu kpakparị l’olu.
Ọ-la-l’iswi sọ-kputawaa mu g’ọo utso.
5Alị-maa bẹ tụwaru mu kpakparị l’olu.
Anwụhu gbabẹwaru mu ọnya.
6Nteke mu l’eje iwhe-ọtsulanu
bẹ mu kpọ-kuru Onye-Nwe-Ọha.
Mu ryakuru Chileke mu t’ọ gbatarụ mu.
Ọ nọdu l’eze-ụlo iya nụa olu mu.
Mkpu-ẹkwa, mu chikuru iya rwua ya lẹ nchị.
7O noo ya, mgboko tehu nmẹkenmeke, nmahụ jijiji.
Ọkpa ugvu nọnu nmawokota
anmawo, tekota nmẹkenmeke,
nkele Onye-Nwe-Ọha bẹ ẹhu l’eghu eghu.
8Ẹnwuru ọku shi iya l’imi l’ekpo tụtutu.
Ọku, shi iya l’ọnu l’enwu tawhutawhu.
Icheku-ọku, shi iya nụ l’ata kfụkfukfu.
9Ọ dọjahu akpamigwe tarakata, gbazeta.
Urwukpu, gbarụ tsụrikiti nọdu iya lẹ mkpula ọkpa.
10Ọ nọdu l’eli cherubu whefu.
Ọ bụru l’akwẹka whẹrewhere b’o begoru ewhe pẹepee.
11O gude ẹkpuroochi kpuchia onwiya,
mbụ l’urwukpu, mini jiru ejiji
bẹ nọ-wheru iya mgburumgburu.
12Urwukpu mẹe aka-mini
mẹe icheku-ọku, l’ata
kfụkfukfu shi l’ogbu-zaazaa ya agụshihu.
13O noo ya, Onye-Nwe-Ọha shi l’akpamigwe gbaa
egbe-igwe tarara, a nụa olu onye ono, bụ
Ọkalibe-Kangokotaru-Nu, bya
awhụa aka-mini mẹe icheku-ọku, l’ata kfụkfukfu.
14Ọ gbarụ akfụ iya gude chịkaa ndu ọhogu iya.
Ọo ebemu-igwe b’ọ waru whoo,
whẹ tsu l’ọso gbakashịhu.
15Gụbe Onye-Nwe-Ọha zhiru
ume whaa baarụ ndu ọhogu
ghu mba, eze ẹnyimu kekahu
ẹbo, a whụkota akpakpamara alị iya ẹnya,
ntọlali mgboko daburu ebedere-badara.
16Onye-Nwe-Ọha shi l’imigwe tụfu ẹka zụ mu gburumu,
gụfuta mu l’ogbu-mini.
17Ọ nafụtaru mu l’ẹka ọhogu mu, ọkpehu l’anya kfụukfuu,
nafụta mu l’ẹka ndu mu dụ ashị,
o noo nkele whẹ kariru mu ẹka.
18Mbọku ono, mu nọ
l’iwhe-ọtsulanu bẹ whẹ yebutaru mu,
ọle Onye-Nwe-Ọha bụ agbarike mu.
19O kutaru mu dobe l’ẹka ẹhu l’a-bụru mu whororo.
Ọ nafụtaru mu l’ọgu nkele mu dụ iya l’obu.
20Onye-Nwe-Ọha buru mu obunggo nkele mu dụ chịriri.
O buru mu obunggo nkele ẹka mu dụ ọcha.
21O noo nkele ọ lẹwho ụzo,
Onye-Nwe-Ọha tọru bẹ mu l’anọje etso;
mu ta agbẹjeduru Chileke azụ, shi nno mee ejo-ememe.
22Nsọ Onye-Nwe-Ọha g’ọ ha bẹ mu
nwụbekotaru ẹnya eme iya ememe;
mu ta agbẹjedu azụ l’iwhe ọ sụru t’e mee.
23Ọ tọ dụ-zhidua ẹka ụta dụ mu l’ẹhu l’iwhu iya.
Mu sefukotaru ẹka mu l’iwhe dụ ẹji.
24Ọo ya bụ lẹ Onye-Nwe-Ọha buru
mu obunggo nkele mu dụ chịriri.
O buru mu obunggo nkele ẹka mu dụ ọcha l’ẹnya nkiya.
25Ndu yeru ghu obu bẹ l’iigoshije l’i yeru whẹ obu.
Ndu ụta l’adụa l’ẹhu bẹ l’iitii
mejedu iwhe l’aa-ta gụbe Onye-Nwe-Ọha ụta.
26Ndu obu whẹ gụru iwhoro bẹ l’iidobejeru obu iwhoro.
Ọle ndu ntuwhu bẹ l’iigbagbuje l’akọ.
27Ndu wozeru onwowhe alị bẹ l’ịinafutaje,
ọle ndu l’eku onwowhe gẹ whẹ l’ahaa bẹ l’iiwozeje alị.
28Ọo gụbe Onye-Nwe-Ọha l’eyejeru mu ọku l’oryọku mu.
L’iimeje t’iwhoro dụru mu l’ẹka gbarụ ẹkpuroochi.
29Mu l’a-dụ ike shi l’ẹka l’iiyeru mu tso ikpoto ndu ojọgu ọgu.
Mgbodo e gude tuwhee
mkpụkpu whẹ mgburumgburu
bẹ mu l’a-dụ ike nyia,
nkeshi ọwhu
ọbu mu lẹ Chileke bẹ lị nụ.
30Chileke-e, mu l’etso bẹ iwhe l’oome dụkota ree.
Okfu yẹbe Onye-Nwe-Ọha bẹ ntụpo l’adụdua ilile.
Oogbochitaje ndu gbabaru l’ime iya je anọdu ezeru ndzụ.
31?Oo onye ole ọdo bụbaa Chileke, m’a gụfu Onye-Nwe-Ọha?
?Oo onye ole ọdo bụbaa eze-ẹwhuru, m’a gụfu Chileke anyi?
32Ọo Chileke l’emeje t’ike dụ mu.
Ọ bụru iya l’emeje tẹ ntụpo ba adụ l’ụzo, mu l’eshi.
33Oomeje, mu eme kọrokoro g’ọo mgbada,
mbụ l’oomeje, mu akfụru kfụshia ike l’eli ugvu.
34Ọ zụru mu, mu marụ ẹnya ọgu,
nke ọwhu bụ l’ọ tọ dụdu m’o beru
ọ bụru akfụ, e kweru l’igwe, mu l’ẹte adụje ike gbaa.
35Ọo ghu Onye-Nwe-Ọha
l’egbochitaje mu, shi ẹgube ono adzọ mu.
Ọ bụru ike ghu bẹ l’iigudeje gbẹe mu ọkpu-ike.
Ọo ẹka, l’iiyeru mu meru, mu bụru oke amadụ.
36Iimeje ụzo mu, ya aha ọsa
nke ọwhu ọkpa l’ete echifu mu.
37Mu chịru ndu ọhogu mu jeye ẹka mu kfube whẹ.
Mu ta atsuwhudu azụ jeye nteke mu lakọtaru whẹ l’iyi.
38Mu chiru whẹ pyaapyaa, nke bụ
lẹ whẹ te nwedu agbashi ọdo.
Whẹ dashịru gbaagbaa lẹ mkpula ọkpa mu.
39Ọo ghu kwarụ mu ike l’ẹhu, mu gude jee ọgu.
I mee tẹ ndu ọhogu mu huaru mu ọnu l’alị.
40Ndu ọhogu mu b’i meru, whẹ
chee iwhu ichewhu gbalaa.
Ndu kpọru mu ashị b’i meru, mu gbushikota.
41Whẹ chiru mkpu t’a gbatarụ whẹ, tọ dụ onye dzọru whẹ nụ.
Whẹ ryakuru Onye-Nwe-Ọha, t’o yeru whẹ ọnu.
42Mu gweru whẹ ryaaryaa
mee whẹ, whẹ dụ g’ọo udzu-ẹja, whẹrewhere whekashiru.
Mu gude ọkpa nmaa whẹ
agbịdigba g’ọo ẹpoto, dụ l’echi-ụzo.
43Ị nafụtaru mu l’ẹka ndu l’etso
mu ọgu, mee mu, mu bụru
onye ishi mba lile, nke ọwhu ndu
mu l’eshia marụ bya alwakọta mu lẹ mkpula.
44Ọo anụnu, whẹ gude nchị whẹ nụa mẹka mu,
whẹ watalẹkwawho ome iwhe mu kfuru.
Ndu shi eshishi wata anọ ewhuzeru mu ishi l’alị.
45Meji bẹ tọfuru ndu ono, shi
eshishi, whẹ l’eshije l’ẹka whẹ
kwamiru onwowhe ezeru ndzụ,
whụru kwekwekwe byakfuta mu.
46Onye-Nwe-Ọha nọkwa ndzụ,
t’ọja-ama bụru nke yẹbe eze ẹwhuru mu ono.
T’e kutsee Chileke, bụ onye ono, l’adzọfutaje mu nụ.
47Ọo Chileke l’agwatajẹ ụgwo iwhe ndu ọhogu mu meru mu.
O meru, ụnwu eliwhe nọdu mu lẹ mkpula.
48Ọonafutaje mu l’ẹka ndu ọhogu mu.
Oowolije mu eli, woghaa ndu ọhogu mu.
Ọonafutaje mu l’ẹka ndu l’eme iwhe kpanganga.
49O noo g’o gude mu je l’a-kfụru l’iwhu mba gẹ mba ha
jaa gụbe Onye-Nwe-Ọha ajaja,
Mu l’e-gude egvu jaa ẹwha ghu ajaja.
50Onye eze, ọ họtaru bẹ l’oomeje t’ọ lwụ-gbua l’ọgu.
N-yemobu iya bẹ l’ọonoje egoshi onye ọ wụru mmanụ l’ishi,
bụ Dévidi mẹe eri iya jeye lẹ tututu-mịmimi.
19Egvu-ọma, Dévidi deru nụ onye ishi egvu
1Igwe l’owhu l’atụ ọnu gẹ Chileke dụ-be biribiri.
Akpamigwe l’egoshi gẹ l’oomebe nka.
2Ụboku g’ụboku ha l’atụ ọnu iya;
ẹnyashi g’ẹnyashi ha l’emeje t’a kabaa ya amarụ.
3A ta anụdu olu okfu whẹ.
Tọ dụ iwhe whẹ l’ekfu, l’aanụ lẹ nchị.
4Ọle olu whẹ tụkoru eliwhe l’owhu jegba.
Ozhi, whẹ l’ezhi ngakọta eliwhe mgburumgburu jeye ẹka igwe beru alị beru.
Ọo Chileke tụru ụlo doberu ẹnyanwu l’imigwe.
5Ẹnyanwu l’eshije l’ụlo iya ono
kpufuta g’ọo nwoke, lụru nwanyị nke ọwhuu.
Ẹhu l’atsọ iya g’ọo mkparawa, ike dụ l’eje ọtu ẹgo ọso.
6Ọowafutaje l’akpamigwe ishi
lanụ, ya ejee jeye l’ishi iya ọwhu.
Ọ tọ dụdu iwhe l’a-sụ lẹ ya nọ l’ẹka
okpomọku iya l’ẹte erwu iya l’ẹhu.
7Iwu Onye-Nwe-Ọha dụkota ree.
Oomeje t’obu shihu madzụ ike.
Iwhe Onye-Nwe-Ọha sụru t’e meje ta angadụ anganga.
Oomeje t’onye l’ẹte amarweta iwhe kabaa ọmaru iwhe.
8Iwhe Onye-Nwe-Ọha tọru ọkpa iya kfụkwaru nhamụnha.
Oomeje t’obu tsọ madzụ ụtso.
Iwhe Onye-Nwe-Ọha sụru t’e meje doru rịsaa.
Oomeje madzụ t’ọ whụ-rweta ụzo ree.
9Ọtsu Onye-Nwe-Ọha egvu bụ iwhe dụ ree.
O je l’anọ jeye lẹ gbururu.
Nsọ, Onye-Nwe-Ọha doberu bụ ezhi-okfu.
Ọ kfụkotaru ọto kpamụ.
10Ọ ka mkpọla-ododo ovu ọnu aswa,
mbụ ọkpobe mkpọla-ododo.
Ọ tsọhaa mmanụ-ẹnwu l’ụtso,
mbụ mmanụ-ẹnwu, shi l’ụbakala-ẹnwu.
11Ọonoduje alọ mụbe onye ozhi ghu ẹka lẹ nchị.
Obunggo dụru iya onye l’anọje eme iwhe o kfuru.
12Ọle ọbu, ?ọo onye l’amajẹ nteke ya l’eme iwhe-dụ-ẹji?
Byiko, sachafụkwa mu iwhe-dụ-ẹji, mu meru l’amaga ama.
13Yetaru mụbe onye ozhi ghu ẹka byiko,
tẹ mu ba akwabẹje ẹnya mee iwhe-dụ-ẹji.
Be ekwekwa t’iwhe-dụ-ẹji kpụta mu lẹ ndzụ.
Ọo ya bụ nke ọwhu mu
l’a-dụkota ree, l’a haarụ mu enge
lẹ mu te emeswejedu gụbe Onye-Nwe-Ọha.
14Jiko Onye-Nwe-Ọha, t’okfu,
shi mu l’ọnu mẹe iwhe mu l’arị
l’ime obu mu dụje ghu rọo ree,
nkele ọo ghu bụ oke-ẹwhuru mu,
bụkwaruwho onye l’agbafụtaje mu nụ.
20Egvu-ọma, Dévidi deru nụ onye ishi egvu
1Tẹ Onye-Nwe-Ọha nụkwaa olu
ghu nteke iwhe-ọtsulanu byarụ ghu.
Tẹ Chileke nke Jékọpu byiko gbochitakwa ghu.
2T’o shikwa l’ụlo iya, dụ nsọ bya agbaarụ ghu mkpu.
T’o shikwa lẹ Záyọnu bya eyetaru ghu ẹka.
3T’ọ nyatakwa iwhe lile, i sweru ẹnya nụ iya.
T’ọ natakwa ẹja ọkpokota-iwhe-ọku, ị gbarụ nụ iya.
4T’ọ nụkwa ghu iwhe dụ ghu l’obu.
T’o mekwaa t’iwhe, ị tụberu gaa chịriri werere.
5Anyi l’a-tụ okoo mẹ anyi nụlewho l’ẹka nkeghu kangoru.
Anyi achiliaru Chileke anyi ẹkwa-ọhubama.
Tẹ Onye-Nwe-Ọha mekwaaru ghu iwhe lile, ị ryọkotaru iya.
6Ntaa bẹ mu mawarụ lẹ
Onye-Nwe-Ọha l’adzọfutaje onye nkiya, ọ wụru mmanụ l’ishi.
Ooshije l’imigwe ono, dụ nsọ za iya oku.
Ọ bụru ike iya bẹ l’oogudeje mee t’ẹka onye ono kangoo.
7O nweru ndu l’achịjeru ụkfu kwẹe l’ụgbo-ịnya.
O nwekwaruwho ndu ọwhu
l’akpọjeru obu ye l’ịnya-ọgu whẹ.
Ọle anyịbedua bụ l’ẹwha
Onye-Nwe-Ọha, bụ Chileke anyi bẹ anyi dakoberu.
8Whẹbedua l’e-vukota iwhe dashịa,
ọle anyịbedua l’a-kfụru kfụshia ike.
9Onye-Nwe-Ọha, menua t’ẹka onye eze anyi kangoo!
Gụ anụjee olu anyi nteke anyi ryakuru ghu.
21Egvu-ọma, Dévidi deru nụ onye ishi egvu
1Gụbe Onye-Nwe-Ọha, ẹhu l’atsọ
eze ụtso l’ọkpehu ghu parụ ẹka.
Lewaro ẹgube ẹswa, l’oote l’ọo l’i meru, ọ lwụ-gbua l’ọgu.
2I meleru iya whọ iwhe dụ iya l’obu.
Ọ tọ dụdu iwhe ọ sarụ ọnu sụ t’i meeru iya, l’iitii meeru iya.
3I gude iwhe-ọma, nyịberu anyịbe
gbata iya ndzuta, bya ekpube iya
okpu-eze, e gude ọkpobe mkpọla-ododo mee l’ishi.
4O kfuru ghu okfu ndzụ, ị nụlekwa
iye ya whọ, mbụ mee tẹ ndzụ iya
bụru gbururu jeye lẹ gbururu.
5Alwụ-gbu ono, i meru,
ọ lwụ-gbua l’ọgu bẹ meru,
l’aakwabẹ iya ugvu, parụ ẹka apaa.
I meru iya, ọ dụ biribiri, l’egbu zaazaa.
6Mbụ, l’ị gọwaru iya ọnu-ọma, l’a-nọwaro jeye lẹ gbururu,
mekwaawho t’ẹhu tsọje iya ụtso, o noo nkele ị nọ swiru iya.
7Eshi-ọwhu eze dakoberu Onye-Nwe-Ọha,
Ọkalibe-Kangokotaru-Nu ye iya obu,
bẹ l’aa-ta abyakwaa l’e-nwubata iya enwubata.
8Ẹka ghu l’a-kpakọta ndu ọhogu ghu gẹ whẹ hakọta.
Ndu ị dụ ashị bẹ l’ii-gude ike ghu zụa kfụu.
9Nteke l’ii-me t’a whụ ghu bẹ l’ịi-hụ whẹ l’ọku, l’enwu gidigidi,
Onye-Nwe-Ọha l’a-tukoshi whẹ oke ẹhu-eghughu iya,
ọku iya atụko whẹ dzụkota.
10Ii-me t’ẹpa whẹ chihu lẹ mgboko-o l’owhu;
mekwaawho; ụnwu whẹ abụru kpurupyata.
11Ọ -bụru lẹ whẹ chịru ghu
ejo idzu, m’ọ bụ rịaru ghu ejo ọriri,
ọ tọ dụdu ọwhu bya l’e-nweru ishi.
12Nkele ii-me tẹ whẹ ye ọkpa l’ọso,
m’i setalewho akfụ ghu kịkiki t’ị gbaa whẹ.
13Gụbe Onye-Nwe-Ọha, t’e kutsee
ghu l’ọkpehu parụ ghu ẹka.
Anyịbedua l’a-nọ agụ egvu etu ghu ẹwha l’ike dụnuka ghu.
22Egvu-ọma, Dévidi deru nụ onye ishi egvu, t’e gude olu egvu, l’eekuje “Ele Ishi-ụtsu” gụa ya
1Chileke mu, Chileke mu,
?ọo gụnu meru g’o gude ị haa mu nkụnyi mu?
?Ọo gụnu meru g’o gude i je anọdu
mu otẹnya, haa mu adzọfuta?
I je anọdu t’ị ba anụ ude, mu l’atsụ?
2Gụbe Chileke mu, eswe l’ẹnyashi bẹ mu l’aryakuje ghu,
ole ị tịi zajẹdu mu, obenu lẹ mu ta
anọnyajedua dobe ọnu ndoo.
3Ị dụlekwaa nsọ g’ị dụ iya,
mbụ gụbe onye eze, ndu Ízurẹlu l’anọje aja ajaja.
4Ọo ghu bẹ nna anyi whẹ dakoberu,
Whẹ dakoberu ghu, ị nafụta whẹ.
5Whẹ ryakuru ghu, ị dzọo whẹ.
Whẹ dakoberu ghu, ti kpu whẹ iwhu lẹ ntụ.
6Ọle mbẹdua bụ mgbashiride, mu ta abụdu madzụ.
Ụnwu eliwhe l’egudeje mu eme iwhe ọchi,
t’ọ dụ iwhe madzụ gụberu mu.
7Iwhe bụ ndu whụru mu nụ l’anọje aja mu ewenu,
anyarụ mu eze, ekwe l’ishi l’ishi achị mu ọchi, sụ:
8“Ọ kwa l’ọ sụru l’ọo Onye-Nwe-Ọha bẹ ya dakoberu.
Ngwa, tẹ Onye-Nwe-Ọha ọbu nafụtanu iya.
T’ọ gbafụtanu iya, eshi-ọwhu ọ sụru
lẹ ya dụ Onye-Nwe-Ọha l’obu.”
9Ọle ọ kwa ghu-a kufutaru mu
l’ẹwho ne mu, bụru ghu meru, mu
dakobe ghu, nkeshi nteke mu l’angụkwadu ẹra.
10A nwụru mu bya ekuru mu ye ghu l’ẹka.
Eshi nteke mu nọ l’ẹwho ne mu b’ị bụhawaa Chileke mu.
11Ba anọdukwa mu otẹnya nkele nsogbu nọkwa mu ndẹende.
Mu te enwe onye l’a-gbarụ mu mkpu.
12Ndu ọhogu bẹ nọ-wheru mu
mgburumgburu g’ọo igweligwe oke-eswi.
Whẹ gbarụ mu mgburumgburu g’ọo
oke-eswi ndu Báshanu, l’eme ẹnu.
13Whẹ sageeru mu ọnu whalaa
l’abyakfuta mu g’ọo oduu, l’agbọ
ụja ejekfu anụ, l’oo-gbu taa.
14Nke mu gvụakwaru g’ọo mini, a wụshiru awụshi.
Ọkpu mu gbụghashihu, tọ dụ ọwhu dzekfuru l’ibe iya.
Ntaa bẹ meji tọfuwaru mu, ọ zawaru nza g’ọo ẹ̀bà-eke.
15Ike gvụwaru mu; ụvo ta adụhe mu.
Ire nyakụwaru mu l’akpo.
Ị tọgbowaru mu l’ivovonyi tẹ mu nwụhu.
16Nkụta nọ-whewaru mu mgburumgburu.
Ikpoto ndu l’eme
ejo-iwhe gbawhewaa mu
mgburumgburu, kpọ-fushia mu ẹka yẹle ọkpa.
17Ntaa bẹ ẹgara l’agụwa mu ọgu.
Ndiwhe tụkowaa chịru ẹnya wụbe mu, ele mu shishishi.
18Whẹ l’eke uwe mu l’onwowhe l’onwowhe,
a bya l’ọwhube uwe ọwhu mu l’eyeje l’ẹhu,
whẹ l’atụ ido tẹ whẹ marụ onye l’a-chịta iya nụ.
19Byiko, gụbe Onye-Nwe-Ọha, ba anọdukwa mu otẹnya.
Gụbe mkpakọ ike, mu nweru,
bya ẹgwegwa bya agbaarụ mu mkpu.
20Nafụta ndzụ mu t’e be egude
ogu-ịgba whụa mu awhụwhu.
Nafụtaro mkpakọ iwhe ono,
mu nweru ono, bụ ndzụ mu, tẹ nkụta ba atakashị iya.
21Jiko, dzọfutanu mu l’ọnu oduu-gburu-agụ,
mẹe lẹ mgbaku mpu atsụ.
Eshi-ọwhu ị zawaru mu oku,
22bẹ mu l’a-rya ẹwha ghu aryarya
t’ụnwunna mu whẹ nụ-dzuru iya.
Mu anọdu l’edzudzu-ọha jaa ghu ajaja.
23Unubẹ ndu l’atsụ egvu
Onye-Nwe-Ọha, unu jaa ya ajaja!
G’unu ha bụru ẹpa Jékọpu, unu kwabẹje iya ugvu!
Unubẹ ẹpa Ízurẹlu l’owhu, unu bajẹru iya ẹja!
24Nkele onye iwhe-ọtsulanu byarụ
bẹ l’ooto legbujedu l’ẹnya,
ọ tọo gbangojedu onye
iwhe-ọtsulanu byakfutaru, tọ gbẹjeru iya azụ,
ọonuje-chia olu, o gude chiku
iya lẹ mkpu t’o yeru iya ẹka.
25Mu l’a-nọdu l’edzudzu-ọha jaa
ghu ajaja nke iwhe i meru.
Ọo l’iwhu ndu l’atsụ egvu ghu bẹ
mu l’a-nọdu mekota iwhe mu riburu lẹ nte ememe.
26Ndu ụkpa bẹ l’e-riji ẹwho.
Ndu l’achọ Onye-Nwe-Ọha bẹ l’a-ja iya ajaja.
“Tẹ ndzụ unu bụkwaru ojeru-ojeru!”
27Mgboko l’owhu jeye ẹka o jeberu
l’e-megee nyata iwhe nwụru nụ.
Whẹ adakọbe lwakfuta Onye-Nwe-Ọha.
Mbụ, l’iwhe bụ ikfu, dụkota
lẹ mba gẹ mba ha bẹ l’e-megee bya abakọtaru iya ẹja.
28O noo nkele ọo Onye-Nwe-Ọha
bẹ iwhe lile kụru ishi l’ẹka,
ọ bụru iya l’achịkota ndu mba lile.
29Iwhe bụ ndu nweru iwhe lẹ
mgboko-o bẹ l’e-bechakwaa bakwaaru iya whọ ẹja.
Madzụ l’owhu, bụ ẹja mmaanụ
l’e-megee gbua ikpere l’atatiwhu
iya, mbụ madzụ ono, l’a-nwụhu anwụhu.
30Ọgbo, nọ l’iwhu l’e-jeru iya ozhi.
Ọgbo, l’a-bya nụ bẹ l’aa-kọru akọ Onye-Nwe-Ọha.
31Aa-ryarụ iya ndu l’ẹteke anwụa
lẹ Onye-Nwe-Ọha dụ chịriri.
Ọ bụru iya bẹ tụkoru iwhe ono g’ọ ha mekota.
23Egvu-ọma, Dévidi deru
1Onye-Nwe-Ọha l’eche mu g’ọo onye l’eche atụru.
Ọ tọ dụdu iwhe ụko iya bya l’a-dụru mu.
2Oomeje tẹ mu zẹ-zhita dzuta ike l’ẹka irwu ẹwu dụ.
Ọonoje edu mu eje l’agụga mini, deru gẹe.
3Oomejekwawho t’obu guzeta mu.
Ụzo, kfụru ọto bẹ l’oodujeru mu shia l’ọgvu ẹwha iya.
4O -behuduru ọ bụru ụzo, dụ lẹ
nsụda, gbarụ tsụrikiti bẹ mu l’eshi,
ọ tọ dụdu ejo-iwhe, mu l’atsụ
egvu iya, nkele gụbe Onye-Nwe-Ọha bẹ swiru mu eswiru.
Mkpụru ghu mẹe oshi-ọpa-l’ẹka ghu l’adụje mu obu.
5Iigwoshijeru mu nri l’iwhu ndu ọhogu mu tẹ mu ria.
Iiteje mu mmanụ, l’eshi mkpọ l’ishi.
Omogo mu bẹ l’iimeje, ya eji
godogodo ebushihu ebushihu.
6Ọ lẹwho iwhe-ọma yẹle n-yemobu Onye-Nwe-Ọha l’a-nọdu etso mu
jeye gẹ mu l’a-nọ-beru.
Mu ebuleruwho eburu l’ụlo Onye-Nwe-Ọha jeye lẹ gbururu.
24Egvu-ọma, Dévidi deru
1Mgboko yẹle iwhe dụkota iya nụ
bụkotakwa nke Onye-Nwe-Ọha,
mbụ eliwhe l’owhu mẹe ndu, bu iya nụ.
2Nkele ọo l’eli eze-ẹnyimu b’ọ tụru ukfu iya, bya emee ya,
ọ kpọru akpọru l’eli ẹnyimu ime-alị.
3?Oo onye l’a-dụ ike nyihu ugvu Onye-Nwe-Ọha?
?Oo onye l’a-dụ ike kfụru l’ẹka o doberu nsọ?
4Ọo onye ẹka iya dụ ọcha,
bụru onye obu gụru iwhoro,
onye l’ete ewojeru obu iya zhiberu
iwhe-eswe, to gudeje ụgho gụa ẹnwa.
5Onye ono bẹ Onye-Nwe-Ọha l’a-gọru ọnu-ọma nụ,
Chileke ono, bụ onye l’adzọje iya nụ ahaaru iya enge.
6O noo g’ọgbo, l’achọ ghu nụ
l’adụje ndonoya, mbụ ndu l’achọ tẹ
whẹ whụ iwhu gụbe Chileke nke Jékọpu.
7Unu gụhashia ọnoguzo ono t’o gheru ọnu.
Unu gụhashia mgbo ndụ-ichee ono
t’o gheru ọnu, nke ọwhu eze, dụ biribiri l’a-bata.
8?Oo onye bụ-zhia eze, dụ biribiri ọbu?
Ọo Onye-Nwe-Ọha, bu onye nwe ike mẹe ọkpehu,
mbụ Onye-Nwe-Ọha onye ike dụ l’ọgu.
9Unu gụhashia ọnoguzo ono t’o gheru ọnu.
Unu gụhashia mgbo ndụ-ichee ono
t’o gheru ọnu, nke ọwhu eze, dụ biribiri l’a-bata.
10?Oo onye bụ-zhia eze, dụ biribiri ọbu?
Ọo Onye-Nwe-Ọha, bụ iya bụ
Onye-ishi-igwe-ọgu bụ eze, dụ biribiri ọbu.
25Egvu, Dévidi deru
1Ọo gụbe Onye-Nwe-Ọha bẹ mu
gude obu mu g’ọ ha ekfu anụ.
2Ọ bụru gụbe Chileke mu bẹ mu dakoberu.
Be ekwekwa t’e kpua mu iwhu lẹ ntụ.
Be ekwekwa tẹ ndu ọhogu mu tụru okoo kpua mu.
3Ọ tọ dụ-zhidua onye ẹnya dụ
l’ẹka ị nọ, a bya l’e-kpu iwhu lẹ ntụ.
Ọle ndu l’eme ụgho l’ẹnya-ọcha bẹ l’ee-kpu iwhu lẹ ntụ.
4Gụbe Onye-Nwe-Ọha, goshinu mu ụzo ghu,
zhinua mu ụzo ghu t’o doo mu ẹnya ree,
5dua mu tẹ mu meje okfu ghu ono, bụ mebyi okfu,
gụ ezhia mu iwhe l’onwoghu,
nkele ọo ghu bụ Chileke, l’adzọje mu nụ.
Ọ bụru l’ẹka ị nọ bẹ ẹnya mu l’adụje ntekenteke.
6Jiko Onye-Nwe-Ọha, nyatakwa
obu-imiko ghu yẹle n-yemobu ghu, shi ghu l’edenwede.
7Ba anyatakwa iwhe-dụ-ẹji, mu megbaberu l’okorọbya.
Gụ eje anyatakwa emeswe, mu shi anọje emeswe ghu.
Gudenu iswi n-yemobu ghu nyata mu
nkele i dụ ree gụbe Onye-Nwe-Ọha.
8Onye-Nwe-Ọha dụ ree, bụru onye obu gụru iwhoro.
Ọo iwhe ono meru g’o gude
l’oozhije ndu l’eme iwhe-dụ-ẹji ụzo yẹbe Onye-Nwe-Ọha.
9Ndu wozeru onwowhe alị l’iwhu
iya bẹ l’ọonoje edu tẹ whẹ mee iwhe kfụru nhamụnha.
L’ọonoje ezhi whẹ ụzo iya.
10Iwhe lile Onye-Nwe-Ọha l’eme
bẹ l’oogoshije lẹ ya nweru
n-yemobu, bụru o-me-g’o-kfuru
l’ẹhu ndu l’eme iwhe ọgbandzu iya
kfuru, mẹe l’ẹhu ndu l’eme iwhe ọ sụru t’e meje.
11A makwarụ-a l’ejo-iwhe, mu meru parụ ẹka.
Ọle ọbu Onye-Nwe-Ọha,
jiko gudenu iswi ẹwha ghu gụaru mu rọ nvụ.
12?Oo onye bụ onye l’atsụ egvu Onye-Nwe-Ọha?
Onye ono bẹ l’ọo-kpoọ-zhiru ụzo, gbarụ iya l’eshishi.
13Onye ono bẹ ẹka l’a-bụru
akpụto-l’ọboroto ntekenteke, ẹpa iya enweru alị ono.
14Ndu Onye-Nwe-Ọha kpọru obu yeru bụ ndu l’atsụ iya egvu.
Ọ bụru ndu ono bẹ l’oomeje
tẹ whẹ marụ ọgbandzu whẹ l’iya.
15Ẹnya mu bụlewho lẹ Onye-Nwe-Ọha bẹ l’ọoduje,
nkele ọ bụ l’iya whọ kpụ bụ onye l’a-dụ ike dzọfu mu l’ọnya.
16Ghaaru mu iwhu, whụaru mu rọ
imiko, nkele mu nọ nkụnyi mu, áwhụ byakwarụ mu whọ.
17Iwhe l’atsụ mu l’ẹhu paakwarụ l’igweligwe.
Dzọo mu rọo l’iwhe-ọtsulanu ono, mu l’eje.
18Lenua ẹnya l’awhụ ono, byarụ mu nụ mẹe ejo ọnodu, mu nọ.
Gụaru mu nvụ l’iwhe-dụ-ẹji lile, mu meru g’ọ ha.
19Lewaro gẹ ndu ọhogu mu habe l’igwe.
Lewaro ẹnya whụ gẹ mu dụ-be whẹ ejo ashị.
20Chejenu mu nche, byiko nafụta mu rọo;
t’e be ekpu mu iwhu lẹ ntụ,
nkele ọo l’ime ghu bẹ mu nọ, ezeru ndzụ.
21T’iwhe, l’a-nọdu echekwa mu nụ
bụru lẹ mu bụ onye l’ẹte amarụ ejo ẹka,
mẹe lẹ mu l’eme iwhe kfụru
nhamụnha, nkele ọo l’ẹka ị nọ bẹ ẹnya mu nọ.
22Jiko Chileke, gbafụtanu ndu
Ízurẹlu l’iwhe-ọtsulanu, whẹ l’ejekota g’ọ ha.
26Egvu-ọma, Dévidi deru
1Haarụ mu rọ enge jiko Onye-Nwe-Ọha,
nkele mu ta abụdu onye l’aamarụ ejo ẹka.
Ọo ghu bẹ mu dakoberu Onye-Nwe-Ọha,
ọ tọ dụdu nteke obu bọjeru mu ẹbo.
2Dalee mu Onye-Nwe-Ọha. Nyochaa mu.
Lerwee mu ẹnya elerwe l’ime obu mẹe lẹ mgbamego mu.
3O noo lẹ mu ta anyazọjedu obu,
i yeru mu anyazọ; mu l’anọje eme iwhe i kfuru.
4Mu lẹ ndu l’eme ụgho ta anọgbajekwa.
Mu l’iwe-l’obu-ọchi-l’ọnu-eze whẹ ta atụ ọli.
5Ọtu ọli lẹ ndu l’eme ejo-iwhe bẹ mu kpọru ashị.
Mu lẹ ndu ejo-ememe ta anọgbaru.
6Mu l’akwọje ẹka gude goshi l’iswi
dụ mu mma, bya ejewhee
ẹnya-mgbẹja gụbe Onye-Nwe-Ọha mgburumgburu,
7agụshi egvu ike gude ekele ghu,
ekfukashi iwhe dụ biribiri, l’ịinoje eme.
8Ụlo gụbe Onye-Nwe-Ọha bẹ mu
yeru obu, mbụ ẹka ono, o-gbu-zaazaa ghu dụ.
9Be emekobekwa mu lẹ ndu l’eme iwhe-dụ-ẹji ọzara-l’ukpo.
Be edobekwa mu lẹ ndu l’egbu ọchi l’oshi lanụ,
10mbụ ndu bụlewho ejo-iwhe bẹ
whẹ marụ ememe, ọ bụru oori n-wọlazu bẹ whẹ marụ kpụ.
11Ọle mbẹdua bẹ l’ẹte amadụru ejo ẹka ilile ilile.
Ọo ya bụ, gudenu obu imiko dụ ghu nụ gbafụta mu.
12Mu kfụru l’ẹka ọkpa rwuru mu alị.
Mu je l’anọdu l’edzudu-ọha jaa Onye-Nwe-Ọha ajaja.
27Egvu-ọma, Dévidi deru
1Ọo Onye-Nwe-Ọha bụ iwhoro,
dụru mu nụ; ọ bụru iya bẹ l’adzọje mu nụ.
?Oo onye bẹ mu l’a-nọ atsụ egvu?
Ọo Onye-Nwe-Ọha bụ ụlo-ozeru-ndzụ mu.
?Oo onye bẹ mu l’a-nọ atsụ egvu?
2Nteke ndu l’eme ejo-iwhe,
mbụ ndu ọhogu mu mẹe ndu
mu dụ ashị zeru gidigidi wụ-kfuta mu
tẹ whẹ vụa anụ mu avụ, bẹ whẹ l’e-vukota iwhe daa.
3O -beru ndu ojọgu nọ-whee mu mgburumgburu,
obu ta abyadụ l’e-te mu ete.
O -beru ndu ọhogu mu wulihu m’ọo
tsoo mu ọgu, mu adakobelekwaa Onye-Nwe-Ọha.
4Ọo iwhe lanụ bẹ mu l’aryọ Onye-Nwe-Ọha.
Ọ bụru iwhe ono bẹ mu l’achọ.
Iwhe ọbu bụ tẹ mu nọdu l’ụlo
Onye-Nwe-Ọha jeye gẹ mu l’a-nọ-beru lẹ mgboko-o,
tẹ mu nọdu l’iya whụje gẹ Onye-Nwe-Ọha dụ-be ugvu,
mu anọdukwawho l’eze-ụlo iya ono akpatajẹ iya ishi iwhe.
5Nkele mbọku, iwhe-ọtsulanu
byarụ mu bẹ l’oo-gbochita mu.
Ya edomia mu l’ime m̀kpù-ẹkwa iya,
bya akfụbe mu l’eli ẹwhuru, ha l’eli
ẹka l’ọodua iwhe bya l’e-me mu nụ.
6Ọo ya bụ lẹ mu l’e-mekputa
ndu ọhogu mu, nọ-wheru mu mgburumgburu.
Mu l’a-nọdu l’ụlo-ẹkwa Chileke
gude ọotu okoo gbarụ ẹja nụ Onye-Nwe-Ọha;
gụa egvu, kụa nkwa gude tua ya ẹwha.
7Jiko Onye-Nwe-Ọha, nụnua olu mu nteke mu ryakuru ghu.
Whụaru mu imiko, zaa mu rọo oku.
8Iwhe obu mu l’ekfuru mu bụ tẹ mu chọo iwhu ghu.
Ọ bụru iwhu gụbe Onye-Nwe-Ọha ono bẹ mu l’achọ ẹgube-ẹ.
9Ba agbẹkwaru mu azụ.
Be egudekwa ẹhu-eghughu ghu nwufu mụbe onye ozhi ghu,
nkele ọo ghu bụ onye shi nke eshi yetaru mu ẹka.
Ba ajịkakwa mu, gụ eje apakwarụ mu haa, gụbe Chileke, bụ onye l’adzọje mu nụ.
10O -beru m’ọo ne mu lẹ nna mu
je l’a-jịka mu, bẹ Onye-Nwe-Ọha l’anatalẹkwa mu-a.
11Zhia mu ụzo ghu, jiko Onye-Nwe-Ọha.
Dunuru mu shia ụzo, kfụru
nhamụnha m’ọgvu ndu l’akpa mu ẹhu.
12Ba ahakwa mu tẹ ndu ọhogu mu mee mu gẹ dụ whẹ ree,
nkele ndu ejo ẹka-ebe wulihuru
ebo mu ibo, anarụ mu ejo nkemu.
13Ọle ọwhu doru mu ẹnya bụ
lẹ mu l’a-nọdu ndzụ whụ iwhe dụ ree, shi Onye-Nwe-Ọha l’ẹka.
14Nọdu ngabẹru Onye-Nwe-Ọha.
Shihulewho ike, gude ẹka l’obu
nọdu ngabẹru Onye-Nwe-Ọha.
28Egvu-ọma, Dévidi deru
1Ọo ghu bẹ mu l’akpọ-ku gụbe
Onye-Nwe-Ọha, bụ oke-ẹwhuru nkemu.
Ba agbakwa mu nkụchi.
O noo nkele ị -nọ-kirishia gba mu
nkụchi, bẹ mu lẹ ndu tawarụ ẹja l’a-bụkwaru iwhe lanụ.
2Nụaro mkpu, mu l’echiku ghu
t’i yeru mu ẹka, ẹgube-ẹ mu chiliru
ẹka mabẹ l’ụzo Ẹka-kakọta-ọdu-nsọ ghu ono.
3Ba atụkokwa mu lẹ ndu ejo-ememe lọo wurururu,
mbụ ndu l’anọje eme ejo-iwhe;
ndu l’anọduje ekfu l’olu odoo,
ọle iwhe dụ whẹ l’obu bụ mgbashị.
4Kfụa whẹ ụgwo iwhe whẹ meru,
yẹle ụgwo ejo-iwhe, whẹ megbaberu.
Kfụa whẹ ụgwo iwhe whẹ gude ẹka whẹ meta.
Gụ ewota iwhe gbarụ whẹ nụ wowhutaru whẹ azụ.
5Eshi-ọwhu l’ọodua iwhe whẹ
gụberu ozhi, Onye-Nwe-Ọha jegbaberu;
tọ dụ iwhe gụberu iwhe Onye-Nwe-Ọha meru l’ẹka iya,
bẹ l’oo-gude ẹka iya dọjashia whẹ adọjashi.
Ọ tọ byadụ l’a-nyakwobaa whẹ anyakwo ọdo.
6Unu tua Onye-Nwe-Ọha ẹwha,
o noo lẹ ọ nụru ẹkwa, mu ryakuru iya sụ t’ọ whụaru mu imiko.
7Ọo Onye-Nwe-Ọha bụ ike mu, bụru iya l’egbochitaje mu.
Ọ bụru iya bẹ mu gude obu mu dakobe, l’ooyejeru mu ẹka.
Mu l’anọje ete ẹswa l’ime obu mu.
Mu l’a-gụ egvu gude kele iya ekele.
8Ọo Onye-Nwe-Ọha bụ ike ndu nkiya,
bụru ụlo-ozeru-ndzụ onye o teru mmanụ l’ishi.
9Dzọfutanu ndibe ghu, gọnuru
ọnu-ọma nụ ndu ono bụ oke-iwhe ghu.
Chejenu whẹ eche g’ọo onye l’eche
atụru, gụ eheru whẹ eheru jeye lẹ gbururu.
29Egvu-ọma, Dévidi deru
1Unubẹ ụnwu imigwe, unu kwabẹ Onye-Nwe-Ọha ugvu.
Unu kfua g’ọkpehu iya habe shii.
2Unu kwabẹ Onye-Nwe-Ọha ugvu, gbarụ ẹwha iya.
Unu baarụ Onye-Nwe-Ọha ẹja,
gude goshi l’ọ dụ nsọ bya adụ biribiri.
3Olu Onye-Nwe-Ọha bẹ ude iya ngashịru l’eze-ẹnyimu.
Ọo Chileke ono, dụ biribiri l’atụ egbe-igwe.
Onye-Nwe-Ọha l’atụ egbe-igwe l’eli eze-ẹnyimu.
4Olu Onye-Nwe-Ọha bẹ ọkpehu dụkwa,
olu Onye-Nwe-Ọha bẹ l’ada kpaa kpaa.
5Olu Onye-Nwe-Ọha l’aryajashịje oshi sida,
mbụ lẹ Onye-Nwe-Ọha
l’agbajashịje oshi sida, dụ l’ugvu ugvu Libanọnu nwịrinwiri.
6Oomeje ugvu ugvu Libanọnu ya
anmahụ jijiji g’ọo nweswi l’akfụ nkfụ.
Oomejekwawho ugvu ugvu
Siriyọnu, ya anmahụ jijiji g’ọo nwa atsụ, l’akpọ ẹnwuda.
7Olu Onye-Nwe-Ọha l’awajẹ whoo g’ọo ebemu-igwe.
8Olu Onye-Nwe-Ọha l’emeje t’echi-ẹgu nmahụ jijiji.
Onye-Nwe-Ọha l’emeje t’echi-ẹgu Kádẹshi nmahụ jijiji.
9Olu Onye-Nwe-Ọha l’anmajẹ achị yikayika.
Ọojishije mkpẹekwo l’ọswa; ọswa ọbu egheru karawhongu.
Madzụ lile, nọ l’ime eze-ụlo iya
l’ebuje mkpu; sụ: “Onye-Nwe-Ọha dụ biribiri!”
10Onye-Nwe-Ọha nọ l’oshi-eze iya, utso nọdu iya lẹ mkpula.
Onye-Nwe-Ọha l’a-bụ eze jeye lẹ tututu-mịmimi.
11Onye-Nwe-Ọha l’emeje t’ike dụ ndibe iya.
Onye-Nwe-Ọha l’agọjeru ọnu-ọma nke ẹhu-guu nụ ndibe iya.
30Egvu-ọma, Dévidi deru
A gụru iya gude woru eze-ụlo Chileke ye Chileke l’ẹka
1Mu l’a-nọ ekutse gụbe Onye-Nwe-Ọha ekutse,
o noo l’ọo ghu bẹ kufutaru mu l’ime nsụ.
I ti kwedu tẹ ndu ọhogu mu nmaa mu ụzu nchịchochi.
2Gụbe Onye-Nwe-Ọha, bụ Chileke mu,
mu ryakuru ghu t’ị gbatarụ mu.
Ị bya emee mu, mu mehu.
3Gụbe Onye-Nwe-Ọha, ọo ghu kufutaru mu l’ime alị-maa.
I meru tẹ mu ba abụ onye tarụ ẹja.
4Unu gụa egvu gude tua
Onye-Nwe-Ọha ẹwha, unubẹ ndu yeru iya obu.
Unu kele iya ekele, l’ẹwha iya dụ nsọ.
5Ẹhu te eghujedu iya eghu nọo ọdu.
Ọle obu-ọma iya l’anọje jeye nteke madzụ nọ-beru.
Ẹnya-mini ẹkwa l’agbajẹ madzụ l’ẹnyashi,
o be l’ụtsu, ẹswa eria ya ẹfonu.
6Nteke ẹhu dụ mu guu bẹ mu sụru:
“Ọ tọ dụdu iwhe bya l’e-nwubata mu nụ.”
7Gụbe Onye-Nwe-Ọha, nteke mu shi dụ ghu l’obu,
b’i meru, mu kfụru gẹdemu g’ọo ugvu.
Ọle nteke i woharu mu iwhu bẹ meji tọfuru mu.
8Ọo gụbe Onye-Nwe-Ọha bẹ mu ryakuru.
Ọ bụru gụbe Onye-Nwe-Ọha bẹ
mu sụru t’i whụaru mu imiko.
9Mu sụru: “?Ọo urwu gụnu bẹ anwụhu mu l’a-baru ghu?
Mbụ ?ndẹnu urwu, l’ii-rita iya m’a tụa mu ẹja?
?Ọo udzu-ẹja l’a-wata ghu ọja ama?
?Ọo ya l’aryakashị l’ị bụ o-meru-g’o-kfuru.
10Jiko Onye-Nwe-Ọha; nụaro olu mu, whụaru mu imiko.
Jiko Onye-Nwe-Ọha, yeru mu rọo ẹka.”
11Ẹkwa, mu ryarụ b’i gbanweru
mee, ọ bụru mu ote egvu ẹhu-ụtso.
I yefuru mu uwe-áwhụ, mu yeru, bya eyee mu ẹhu-ụtso g’ọo uwe.
12Iwhe ono bụleruwho gẹ l’ee-shi
t’obu mu gụlahaa egvu tua ghu
ẹwha, t’ọ bọ nọhe nggujingguji.
Gụbe Onye-Nwe-Ọha, bụ Chileke mu;
ọo ghu bẹ mu l’e-kele jeye lẹ gbururu.
31Egvu-ọma, Dévidi deru nụ onye ishi egvu
1Oo l’ime gụbe Onye-Nwe-Ọha bẹ mu gbabaru je ezeru ndzụ.
Be ekwekwa t’e kpua mu iwhu lẹ ntụ.
Gudenu nke l’ị bụ onye dụ chịriri nafụta mu.
2Gbebenuru mu nchị.
Bya ẹgwegwa bya agbafụta mu.
Bụru mu oke-ẹwhuru, mu l’a-gbabajẹ
je ezeeru ndzụ, mbụ ụlo-ozeru-ndzụ, l’a-dzọfuta mu.
3Eshi-ọwhu ọ bụ ghu bụ oke-ẹwhuru nkemu,
bụru ụlo-ozeru-ndzụ nkemu,
dunua mu l’onwoghu, kpọzhinuaru mu ụzo, m’ọgvu ẹwha ghu.
4Be ekwekwa tẹ mu shia ụzo ẹka, whẹ kweberu mu ọnya,
nkele ọo ghu bụ a-gbaba-e-zeeru-ndzụ mu.
5Mu yeru ghu ume mu l’ẹka.
Gbafụtanu mu, jiko Onye-Nwe-Ọha,
gụbe Chileke, bụ o-me-g’o-kfuru.
6Whẹ l’adụje mu ashị, mbụ ndu
woru obu whẹ zhiberu ọla l’iswi ono, bụ agwa.
Onye mbẹdua dakoberu bụ Onye-Nwe-Ọha.
7Mu l’e-te ẹswa, ẹhu atsọo mu ụtso
l’i yeru mu obu, o noo l’ị whụru
iwhe-ọtsulanu, mu jeru, ị marụ
l’ọkfukfu shi egbu mu egbugbu.
8I tii woduru mu ye l’ẹka ndu ọhogu mu.
Iwhe i mechiaru bụ l’i kufutaru mu
je edobe l’ẹka mu nọ tụsaa ẹhu.
9Jiko Onye-Nwe-Ọha, whụnuaru
mu imiko, nkele mu nọ l’oke mkpamẹhu.
Mu ryatawaru ẹkwa jeye mu l’awhụ rabaraba,
o mekwaawho, ike gvụshikota mu ree-ree-ree.
10Áwhụ gbuakwaru mu.
Mu tsụtawaa ude, kahụ l’ọkpehu.
Ike gvụkotaru mu nkele mu menukawaru ejo-iwhe.
Ọkpu, dụ mu l’ẹhu l’erilewho nvụrukpo eje eje.
11Ndu ọhogu mu gẹ whẹ ha
mewaru, mu bụru onye ndu
obutobu mu l’akpọ ẹbo-ẹbo l’afụ.
Ndu mu lẹ whẹ l’eshi ọnya bẹ l’atsụkawaa mu egvu.
Iwhe bụ ndu whụru mu lẹ
gbororo echi-ụzo l’anọje agbarụ mu ọso.
12Whẹ nyọhakotawaru mu gẹ
l’aanyọhaje onye nwụhuru anwụhu,
mbụ mu dụwaa g’ọo ite, tụkposhihuru atụkposhihu.
13Nkele mu nụwaru okfu-azụ, ikpoto madzụ l’ekfuru mu.
Ntaa ta adụdu ẹka mu nọ t’egvu ba anọdu atsụ mu.
Whẹ l’anọje achịru mu ejo idzu.
Iwhe whẹ tụberu bụ tẹ whẹ wofu ndzụ mu.
14Ọle ọo ghu bẹ mu dakoberu gụbe Onye-Nwe-Ọha.
Mu sụru: “Ọo ghu bụ Chileke mu.”
15Gẹ mu l’a-nọ-beru l’eliwhe-e bụ ghu b’ọ dụ l’ẹka.
Nafụtanu mu l’ẹka ndu ọhogu mu mẹe l’ẹka ndu l’achị mu nụ.
16Lenua mụbe onye ozhi ghu ẹnya-ọma.
Gudero n-yemobu ghu dzọfuta mu.
17Jiko Onye-Nwe-Ọha,
be ekwekwa t’e kpua mu iwhu lẹ ntụ,
nkele mu chikuwaru ghu lẹ mkpu.
Ọo ndu ejo-ememe ono bẹ l’ee-kpuchia iwhu lẹ ntụ,
t’ọnu je abụru whẹ kpụrukujingu l’alị-maa.
18T’ọnu ono, whẹ gude adzụ
ore-whuruwhuru ono bụru whẹ shọtokongu,
nkele whẹ l’egudeje oku onwowhe
gẹ whẹ l’ahaa, mẹe ọkpo madzụ
ẹbo-ẹbo l’afụ, ekfubyishi ndu dụ chịriri.
19Haa, g’ọ-dụ-ree ghu habebukwaa shii,
mbụ ree ono, i kwakọberu ndu l’atsụ egvu ghu ono.
Ọ bụru l’iwhu ụnwu eliwhe bẹ
l’ịi-kfụru, meeru ndu gbabaru l’ime ghu ezeru ndzụ ree ono.
20Ọo l’ẹka ị nọ bẹ l’iidomije whẹ
t’ejo idzu, ụnwu eliwhe chịru ba avụ.
Ọ bụru l’ibe ghu bẹ l’iidobeje whẹ,
t’ejo okfu be erwu whẹ l’ẹhu.
21T’e tua Onye-Nwe-Ọha ẹwha,
nkele o goshiru mu n-yemobu iya ono, dụ biribiri
nteke mu nọ lẹ mkpụkpu, ọhogu nọ-wheru mgburumgburu.
22Mu chia mkpu sụ: “Ewhuhu mu-o!”
Ị nụlekwa-a mkpu, mu chikuru
ghu; ị bya agbaarụ mu mkpu.
23Unu ye Onye-Nwe-Ọha obu,
unubẹ ndu nsọ lile nke Chileke,
lẹ ndu Onye-Nwe-Ọha l’eletaje ẹnya
bụkwa ndu bụ o-me-g’o-kfuru.
Ọle ndu l’eku onwowhe gẹ whẹ l’ahaa
bẹ l’ọokfuje ụgwo iwhe whẹ l’eme kfurwua whẹ iya l’ishi.
24Unu shihulekwawho ike gude ẹka
l’obu, unubẹ ndu ẹnya dụ lẹ Onye-Nwe-Ọha.
32Ẹ́vù, Dévidi kwarụ
1Ẹhu-ụtso bụ nke onye Chileke
gụru nvụ l’emeswe, o mesweru
iya, mbụ onye Onye-Nwe-Ọha safụru iwhe-dụ-ẹji o meru.
2Ẹhu-ụtso bụ nke ndu Onye-Nwe-Ọha l’ẹte agụkoru
iwhe-dụ-ẹji whẹ meru, mbụ ndu ntuwhu l’adụa l’ẹhu.
3Nteke mu l’ẹteke adụshia iwhe
mu meru bẹ ọkpu, dụ mu l’ẹhu
shilewho erikashihu erikashihu.
Iwhe kparụ iya nụ bụru ude, mu shi anọje atsụ mbọku mbọku.
4Nkele eswe l’ẹnyashi bẹ l’ịinoduje ada mu ejo ẹka l’ẹhu.
I shi ẹgube ono mịchatakota
nwike, dụ mu nụ, g’ọo onye okpomọku ọnanwu guderu.
5Tọ dụ iya bụ, mu bya emee, ị marụ iwhe-dụ-ẹji, mu meru.
Tọ dụ ejo-iwhe, mu meru, dụ
ọwhu mu domiru ghu edomi.
Mu sụru: “Mu l’a-kọshiru
Onye-Nwe-Ọha emeswe ono, mu mesweru.”
Ọo ya bụ, ị bya agụaru mu nvụ l’ejo-iwhe, mu meshiru.
6Ọo ya bụ, t’iwhe bụ ndu l’eme
iwhe dụ gụbe Chileke ree
kfuje nụ ghu nteke whẹ nọ lẹ mkpa,
nke ọwhu bụ nteke
iwhe-ọtsulanu ono byalẹruwho g’ọo utso,
o to rwudu whẹ l’ẹhu.
7Ọo ghu bụ ẹka mu l’agbabajẹ je edomia onwomu.
Ọ bụru ghu l’a-nọdu eleta mu ẹnya
t’iwhe-ọtsulanu ba adakfuta mu,
gude egvu, e gude atụ okoo gbaa mu mgburumgburu.
8Ọo mu l’a-nọdu atụ-zhiru ghu ẹka,
ezhikwa ghu whọ ụzo, l’ii-shi.
Mu l’a-nọ agbazhiru ghu, eletakwa ghu whọ ẹnya.
9Ba adụkwa g’ọo ịnya, gụ eje adụ
g’ọo ịnya-mulu, nkele whẹ ta amadụ onwowhe ẹka-ịcha.
Iwhe l’eegudeje aagọ whẹ bụ nkwebe mẹe odogoro.
Ọ -bụa l’i meru iya nno bẹ l’ịitii gọtadu whẹ.
10Ndu ejo-ememe l’anọje eje iwhe-ẹhuka, ha l’igweligwe.
Ọle onye dakoberu Onye-Nwe-Ọha bẹ n-yemobu
iya l’anọ-wheje mgburumgburu.
11T’iwhe, Onye-Nwe-Ọha l’anọje
eme mee t’ẹhu tsọo unu ụtso,
unu etekwaawho ẹswa, unubẹ ndu dụ chịriri.
Unu gụa egvu ẹhu-ụtso, unubẹ ndu obu gụru iwhoro.
331Unu gude ẹhu-ụtso gụa egvu nụ
Onye-Nwe-Ọha, unubẹ ndu dụ chịriri.
Ọ gbarụ tẹ ndu obu gụru iwhoro jajẹ iya ama.
2Unu kpọo une gude kele Onye-Nwe-Ọha ekele.
Unu gude ogumogu gụaru iya egvu, l’atsọ ụtso.
3Unu gụa egvu ọwhuu nụ iya.
Unu kụ-rwee ya akụ-rwe, unu atụaru iya ụzu ẹhu-ụtso.
4Nkele okfu Onye-Nwe-Ọha
kfụru nhamụnha, l’ooreje g’o kfuru iya.
Onye-Nwe-Ọha bụ o-me-g’o-kfuru l’iwhe lile, l’oome.
5Iwhe l’adụje Onye-Nwe-Ọha
ree bụ ikpe, kfụru nhamụnha mẹe ọ-dụ-chịriri.
N-yemobu Onye-Nwe-Ọha bẹ jiru mgboko.
6Ọo okfu, shi Onye-Nwe-Ọha l’ọnu b’o gude mee igwe.
Ọ bụru ume, ọ tụru atụtu b’o gude
mee iwhe lile, dụkota iya nụ.
7Ọ bya enwua mini, dụ l’ẹnyimu
ẹka ọ kpụa orogbodo kụru l’ẹka lanụ.
Eze-ẹnyimu b’ọ wụru ye l’iwhe sụbe.
8T’eliwhe l’owhu tsụje Onye-Nwe-Ọha egvu.
T’iwhe bụ ndu nọ lẹ mgboko l’owhu kwabẹ iya ugvu.
9O noo nkele ọo okfu b’o kfuru l’ọnu, mgboko dụ.
Ọ tụa iwu, iwhe lile dụkota.
10Onye-Nwe-Ọha l’emeje t’idzu,
ndu mba gẹ mba ha chịru bụru iwhe mmaanụ.
Iwhe ndiwhe tụberu ememe bẹ l’ọokposhije.
11Ọle idzu ọwhu Onye-Nwe-Ọha
chịru l’adụje lẹ g’ọ chịru iya jeye lẹ gbururu.
Iwhe ọ tụberu nke ememe bẹ
l’oomeje, shi l’ọgbo rwua l’ọgbo.
12Ẹhu-ụtso bụ nke ndu mba ono,
Onye-Nwe-Ọha bụ Chileke whẹ,
mbụ ndu ọ họtaru, whẹ bụru oke-iwhe nkiya.
13Onye-Nwe-Ọha l’anọje l’imigwe
lee ẹnya l’eliwhe whụkota ụnwu eliwhe l’owhu.
14Ọonoje l’ẹka, o bu l’imigwe
whụkota ndu bu lẹ mgboko gẹ whẹ ha.
15Ọo yẹbedua meru ọriri nụ madzụ
iwhe lile, whẹ l’emekota l’edoje iya ẹnya.
16Eze ta alwụjedu ọgu lwụ-gbua,
nke l’ọ chị igweligwe ndu ojọgu.
Onye ike dụ ta bụ ọkpehu iya bẹ l’oogudeje nahụ.
17Ịnya-ọgu bụ iwhe mmaanụ, ọ tọo dzọfutadu madzụ l’ẹgu ọgu.
Ike dụkwa iya m’ọo ọdu agha, ọ tọo dzọdu ndzụ.
18Ọle ẹnya Onye-Nwe-Ọha dụkwa l’ẹhu ndu l’atsụ iya egvu,
mbụ ndu ono, ẹnya dụ lẹ n-yemobu iya,
19nke ọwhu l’ọo-nafụta ndzụ whẹ
l’ọnu ọnwu, dobe whẹ ndzụ nteke ẹjo ẹgu byarụ.
20Anyi nọwaa ngabẹru
Onye-Nwe-Ọha, nkele ọo ya bụ
onye l’eyejeru anyi ẹka,
bụkwaruwho onye l’egbochitaje anyi.
21Oomeje t’obu tsọo anyi ụtso,
nkele ọo ẹwha iya, dụ nsọ bẹ anyi dakoberu.
22Gụbe Onye-Nwe-Ọha; byiko goshinu l’i yeru anyi obu,
eshi-ọwhu ọ bụ ghu bẹ anyi ngabẹru.
34Egvu, Dévidi deru nteke ọ kwabẹru ẹnya melahaa g’ọo onye ọgvu l’iwhu Ábyimelẹku, Ábyimelẹku chịfu iya
1Mu l’a-nọje etu Onye-Nwe-Ọha ẹwha ntekenteke.
Ọ tọ dụdu nteke mu bya l’ajabuhu iya ajaja.
2Ọo Onye-Nwe-Ọha bẹ mu gude anga l’ụnga.
Ndu l’aakpa ẹhu -nụle iya whọ, ẹhu atsọo whẹ ụtso.
3Bya t’anyi tụko tụa ọnu gẹ Onye-Nwe-Ọha paberu ẹka,
mbụ t’anyi tụko kutsee ẹwha iya.
4Mu ryakuru Onye-Nwe-Ọha,
ọ za mu, bya emee, mu tsụ-buhu egvu.
5Ndu l’ele ẹnya iya bẹ l’oomeje t’ọnu-ọchi nwụa,
ọ tọ dụdu nteke iwhere bya l’e-me whẹ.
6Mụbe onye-e l’adụa g’ọ harụ mu
chiru mkpu, Onye-Nwe-Ọha za mu oku,
bya adzọfutakota mu l’iwhe-ọtsulanu, mu l’eje g’ọ ha.
7Ojozhi-imigwe ọwhu shi l’ẹka Onye-Nwe-Ọha l’anọ-wheje
ndu l’atsụ egvu Onye-Nwe-Ọha mgburumgburu.
Ọodzoje whẹ ntekenteke.
8Unu dalee Onye-Nwe-Ọha, unu awhụ l’ọ dụ ree.
Ẹhu-ụtso bụ nke ndu gbabaru iya l’ime je ezeeru ndzụ.
9Unu tsụje Onye-Nwe-Ọha egvu,
unubẹ ndu nsọ nke Onye-Nwe-Ọha,
lẹ ndu l’atsụ iya egvu ta adụkwa iwhe ụko iya l’adụjeru whẹ.
10Oduu-gburu-agụ nwegeeru mkpa; ẹgu l’anọje agụkaa whẹ,
ọle ndu l’achọ Onye-Nwe-Ọha
bẹ ụko iwhe-ọma l’a-byadụa l’adụru.
11Unu byaada-a, unubẹ ụnwegirima mu, bya angabẹru mu nchị,
tẹ mu zhia unu gẹ l’aatsụje Onye-Nwe-Ọha egvu.
12Iwhe bụ onye l’ọogu ẹgu tẹ ndzụ iya kpọliberu,
mbọku mbọku abụru iya nke ọma,
13t’onye ọbu wofukwa ọnu l’ejo iwhe, haa ọdzu ejire.
14Gbẹeru ome ejo-iwhe azụ, melahaa iwhe dụ ree.
Kebeje ẹhu chọo iwhe bụ: i -mee ya, nchị adụ ndoo.
I -chọ-vule iya whọ; ba atugbekwa iya ẹka.
15Onye-Nwe-Ọha bẹ ẹnya iya dụ l’ẹhu ndu dụ chịriri,
o nokwawho gẹ l’ọongabeje nchị l’ẹkwa,
whẹ l’aryaku iya.
16Ọle ọwhube ndu yeru ẹka l’ome
ejo-iwhe bẹ Onye-Nwe-Ọha l’ẹte
elejedu ẹnya-ọma, nke ọwhu ẹwha whẹ l’a-tọhu lẹ mgboko.
17Ndu dụ chịriri l’abụje, whẹ -ryaku Onye-Nwe-Ọha ya aza whẹ,
bya anafụta whẹ l’iwhe-ọtsulanu, whẹ l’eje g’ọ ha.
18Onye-Nwe-Ọha l’anọkubeje ndu ụzo chiru.
Ndu obu kfuwahuru ekfuwahu
l’ọnodu, whẹ nọ bẹ l’ọodzofutaje.
19Onye dụ chịriri l’ejeje iwhe-ọtsulanu, ha l’igweligwe,
ọle Onye-Nwe-Ọha l’anafụtaje iya
l’iwhe-ọtsulanu ono g’ọ hakọta.
20Ọkpu, dụ iya l’ẹhu bẹ l’ọonwubejeru ẹnya.
Ọ tọ dụkwa m’ọo ọkpu lanụ, dụ
iya l’ẹhu a bya l’akukwo akukwo.
21Ọle onye ejo-ememe bụ ejo-iwhe ono, l’oo-me l’e-gbu iya.
Ndu kpọru ndu dụ chịriri ashị bẹ l’aa-nma ikpe.
22Onye-Nwe-Ọha l’agbafụtaje ndzụ ndu l’ejeru iya ozhi.
Ọ tọ dụdu m’ọo onye lanụ,
gbabaru l’ime iya je anọdu ezeru ndzụ, a bya l’a-nma ikpe.
35Egvu, Dévidi deru
1Jiko Onye-Nwe-Ọha, tso ndu l’e-tso mu okfu okfu.
Tsokwaawho ndu l’etso mu ọgu ọgu.
2Gbalihu, chịta ngwọgu mẹe iwhe
l’eegudeje egbochita onwonye
l’ọgu, gude gbaarụ mu mkpu.
3Palia arwa ghu, gude kwachia ndu l’achị mu nụ ụzo.
Sụnu mu l’ịi-dzọfuta mu.
4T’e mekwaru iwhe-iwhere nụ
ndu l’achọ ndzụ mu, t’e kpukwaa whẹ iwhu l’oguri.
T’a chiwhukwa whẹ azụ, mbụ ndu
l’achịru mu ejo idzu. T’a tụkwaa whẹ ẹyerebeke.
5Tẹ whẹ dụkwa g’ọo ẹswa balị, whẹrewhere whekashiru
nteke ojozhi-imigwe, shi l’ẹka
Onye-Nwe-Ọha l’a-nọ achị-whu whẹ achị-whu.
6T’ụzo whẹ tsoru gbakọtakwa
ẹkpuroochi, chijekwawho ẹturu wụrukutuku.
Nteke ojozhi-imigwe, shi l’ẹka
Onye-Nwe-Ọha l’a-nọ achị whẹ ọkpa-balịbali.
7Eshi-ọwhu l’ọodua iwhe mu meru
whẹ, whẹ je agbabẹru mu ọnya,
whẹ gvukwaawho iduma doberu mu
tẹ mu daba lẹ bọ dụ iwhe mu meru whẹ,
8t’ọla-liswi zụkwa whẹ gburumu.
T’ọnya, whẹ gbabẹru l’onwowhe nmatakwa whẹ.
Tẹ whẹ nwulahukwa l’iduma whẹ
tụru, shi nno bụru kpurupyata.
9Ọo ya bụ nggẹ mu etee ẹswa l’ime Onye-Nwe-Ọha.
Ẹhu awata mu ọtso ụtso l’ọ dzọtaru mu.
10Mu l’e-gude obu mu g’ọ ha sụ:
“Ọ zhia onye dụ g’ọo gụbe Onye-Nwe-Ọha?
Ọo ghu l’adzọfutaje ndu ụkpa l’ẹka ndu kariru whẹ ẹka.
Mbụ l’ịinafutaje ndu ụkpa mẹe
ndu l’adụa lẹ g’ọ harụ whẹ l’ẹka ndu l’ana whẹ nfụ.”
11Ndu ejo-ekebe wulihuru ebo mu ibo.
Whẹ tụko iwhe mu l’ẹte amaa ishi iya l’ẹmi iya, bobe mu.
12Whẹ gude ejo-iwhe kfụa mu
ụgwo iwhe-ọma, mu meru whẹ,
shi nno meru ike-ọogvu nụ mu.
13Ọle nteke ẹhu l’adụa whẹ mma bẹ mu wotaru uwe-áwhụ yee,
bya ewozeta obu alị; aswị ẹgu ekfu anụ Onye-Nwe-Ọha.
14Mu tsoru aghawhe arya ẹkwa
gẹ-woo l’ọo ọnya mu, ọdua l’ọo
nwune mu bẹ ẹhu-ba-dụ-mma zuguderu.
Mu nọdu-zhiawho dẹe ẹka l’agba
g’ọo onye l’arya ẹkwa ne iya.
15Ọle nteke iwhe-ẹhuka byarụ mu,
bẹ whẹ swiwheru mu
mgburumgburu, aja mu ewenu,
mbụ ndu ono, mu l’ẹte amaa, gude ejo-okfu asa mu ọsa ẹkfu.
16Ndu ono, merwushiwaru
onwowhe l’iwhu Onye-Nwe-Ọha
l’aja mu ewenu, whẹ l’atarụ mu ikireze.
17Gụbe Onye-Nwe-Ọha, ?oo zhia
nteke ole bẹ l’ii-jipyaberu
onwoghu elezhiaru iya whọ anyi l’ẹnya?
Dzọfutanu ndzụ mu; a nọnyaa whẹ taa anụ mu l’oyii.
Dzọfutaro mkpakọ iwhe ono,
mu nweru ono, bụ ndzụ mu tẹ
oduu-gburu-agụ whẹ ono ba dzụjashi iya.
18Ọo l’edzudzu-ọha bẹ mu l’a-nọdu
kele ghu ekele, mbụ lẹ mu l’a-nọdu
l’echilabọ igwe-ọha jaa ghu ajaja.
19Be ekwekwa tẹ ndu ọhogu mu nmaa mu ụzu nchịchochi,
mbụ ndu kpọru mu ashị, lẹ ba adụ iwhe mu meru whẹ.
Be ekwekwa tẹ ndu ono, mu dụ ashị
lẹ ba adụ iwhe mu meru whẹ ono kụaru mu hụu.
20Nkele whẹ te ekfujedu okfu njima;
iwhe whẹ l’anọje-chia l’idzu
iya bụ gẹ whẹ l’e-shi ghọoru ndu dụ guu l’alị-a ụgho.
21Whẹ sarụ ọnu whalaa wata mu obo ibo sụ:
“Ẹhee! Ẹhee! Anyi gudewaa ẹnya anyi whụa iwhe i meru.”
22Ọle gụbe Onye-Nwe-Ọha whụnuru-a iwhe lile ono.
Byiko, ba agbakwa nkụchi; gụ aanọdukwa mu otẹnya!
23Tehu etehu, zhilihuro bya adzọo mu!
Gbaarụ mu ọdzori, jiko Onye-Nwe-Ọha, bụ Chileke mu!
24Gudenu ọ-dụ-chịriri nkeghu
haarụ mu rọo enge, jiko Onye-Nwe-Ọha, bụ Chileke mu!
Be ekwekwa tẹ whẹ nmaa mu ụzu nchịchochi!
25Be ekwekwa tẹ whẹ rịa l’obu whẹ sụ:
“Ẹhee; anyi chọ-vuwaru iwhe anyi l’achọ.”
Ọdua l’ọo tẹ whẹ sụ: “Ntaa bẹ anyi lewaru iya olwe wọo.”
26T’iwhe bụ ndu l’anma mu ụzu
nchịchochi ejo-iwhe, byarụ mu nụ
bụkwaru ndu l’ee-meru iwhere nụ bya atụ whẹ ẹyerebeke.
T’iwhere mẹe ewenu jikwa ndu ono,
l’eku onwowhe gẹ whẹ l’ahaa iwhu.
27Tẹ ndu l’ele ẹnya t’a haarụ mu
enge gụa egvu ẹhu-ụtso tee ẹswa!
T’iwhe, whẹ l’a-kpụjeru l’ọnu
bụlekwaruwho: “T’a tụa ọnu
Onye-Nwe-Ọha l’ọ parụ ẹka,
mbụ Onye-Nwe-Ọha ono, l’ọoduje
ree mẹe onye ozhi iya buru guu.”
28Ọo ya bụ, mu egude ọnu mu kfua nke ọ-dụ-chịriri nkeghu.
Ọ bụkwaruwho ẹgube ono bẹ mu
l’a-nọ aja ghu ama mbọku mbọku.
36Egvu, Dévidi, bụ onye l’ejeru Onye-Nwe-Ọha ozhi deru nụ onye ishi egvu
1Ọo iwhe-dụ-ẹji l’anọje ekfu okfu l’ime obu onye ejo-ememe.
Iwhe l’ọonoje arị bụ lẹ mkpa
t’iya tsụ Chileke egvu ta adụdu iya.
2Iwhe kparụ iya nụ bụ l’ọonoje
ajakpọshi onwiya,
mbụ l’ọojata-beje onwiya, nke bụ
l’ọoto whụjedu ejo-iwhe, l’oome kpọ iya ashị.
3Okfu, l’eshije iya l’ọnu bụ okfu, l’adụa ree mẹe ụgho.
O too mejedu g’ọo onye marụ ágụ.
To meje iwhe dụ ree.
4Ọozeje l’iwhe-azẹe ya rịkobe ejo-iwhe, l’oo-me.
Iwhe bụ ụrwehu iya bụlewho ome iwhe-dụ-ẹji.
Ọ tọ whụjedu iwhe-dụ-ẹji jịka iya ememe.
5Gụbe Onye-Nwe-Ọha, n-yemobu
nkeghu tụkokwaru imigwe l’owhu gvua kfurukfuru.
O-me-g’o-kfuru, ị bụ rwugeeru akpamigwe.
6Ọ-dụ-chịriri nkeghu tseru rigorigo g’ọo ugvu, parụ mebyi ẹka.
Ikpe ghu tụa omilomi g’ọo eze ẹnyimu-ime-alị.
Gụbe Onye-Nwe-Ọha, ọo ghu tụkoru
madzụ mẹe anụ-ẹgbudu dobe ndzụ.
7Lewaro gẹ n-yemobu ghu vube oke ọnu aswa.
Ọo iwhe ono meru g’o gude
ụnwu eliwhe gbaba lẹ mkpula
akwẹka ghu je anọdu ezeru ndzụ.
8Whẹ l’anọje l’ụlo ghu eri
gwọogwoo lẹ nri, kụru iya nụ,
l’iimeje tẹ whẹ ngụa mini l’ẹnyimu ẹhu-ụtso nkeghu.
9O noo nkele ọo l’ẹka ị nọ bẹ ndzụ futaru.
Ọ bụru l’ẹka iwhoro nkeghu dụ bẹ anyi l’a-nọdu whụ iwhoro.
10Byiko yelekwawho ndu marụ ghu nụ obu lẹ g’i yeru whẹ iya.
Gụ adụlekwawho chịriri lẹ g’ị
dụ iya l’ẹka ndu obu whẹ gụru iwhoro nọ.
11Be ekwekwa tẹ ndu l’eku
onwowhe gẹ whẹ l’ahaa dzọpyata mu ọkpa.
Be ekwekwa tẹ ndu ejo-ememe gude ẹka whẹ nwufu mu.
12Lewaro gẹ ndu l’eme ejo-iwhe dageeru gbaagbaa wụshiru,
whẹ ta adụhe ike gbashi agbashi.
37Egvu-Ọma, Dévidi deru
1Be enwejekwaru ndu l’eme ejo-iwhe ẹnya-ụwhu.
Be enwejekwaru ndu l’adụa chịriri ẹnya-kfụrukfuru.
2O noo nkele ọ tọ dụkwa gẹ
l’aa-nọ-beru, whẹ atụgboshihu
g’ọo ẹwu, tọ dụkwawho gẹ
l’aa-nọ-beru, whẹ akpọshihu nkụ g’ọo irwu oshi.
3Dakobe Onye-Nwe-Ọha; meje iwhe dụ ree.
Buru l’alị ono bụru o-me-g’o-kfuru.
4T’ẹhu-ụtso ghu bụkwaru lẹ Onye-Nwe-Ọha,
ndụge ọ nụkwanu ghu iwhe l’agụ ghu nụ.
5Wotagezhia onwoghu g’ị ha ye Onye-Nwe-Ọha l’ẹka.
Dakobe iya, l’oo-meru ghu-a iwhe gbarụ ghu nụ.
6Oo-me t’ọ-dụ-chịriri nkeghu nwua
whoo g’ọo iwhoro, mbụ lẹ Onye-Nwe-Ọha l’a-gbarụ ghu
ọdzori, mee t’iswi-ọdu-mma ghu
gbua zaa g’ọo ẹnyanwu, keru l’ishi.
7Daa jii l’iwhu Onye-Nwe-Ọha, taa nshi ngabẹru iya.
Be enwejekwa ẹnya-ụwhu nteke
iwhe l’agarụ ndu ọdo lẹ ree, mbụ
nteke ejo-idzu, ndu ejo-ememe chịru l’eje gẹ whẹ chịru iya.
8Ba avụjekwa ọvuma; t’ẹhu be ghujekwa ghu eghu.
Be enwejekwa ẹnya-ụwhu,
o noo nkele oodubaje madzụ l’ome ejo-iwhe.
9Ndu l’eme ejo-iwhe bẹ l’ee-me tẹ whẹ chịhu,
Ọle ọo ndu chịru ẹnya yeru Onye-Nwe-Ọha bẹ l’e-nweru mgboko.
10Ọ tọ dụdu gẹ l’a nọ-beru, e mee tẹ ndu ejo-ememe ba anọhe.
Ị -chọo whẹ nta chọo imo, ị tịi whụdu whẹ.
11Ọo ndu dụ guu l’e-megee nweru mgboko-o ya nụ,
whẹ enwekwaruwho ẹhu-guu, nweru iya nke etsutsu iya.
12Ndu ejo-ememe l’achịjeru ndu dụ
chịriri ejo idzu, atarụ whẹ ikireze kịkiki.
13Ọle ọo ọchi bẹ Onye-Nwe-Ọha l’anọje achị whẹ,
o noo nkele ọ marụ lẹ nteke l’aa-la whẹ l’iyi l’abyawaa.
14Ndu ejo-ememe mịtaru ogu-ịgba whẹ,
bya eseta akfụ whẹ jịjiji,
tẹ whẹ gbushia ndu ụkpa mẹe ndu
l’adụa g’ọ harụ whẹ,
mẹe tẹ whẹ gbushia ndu l’eme iwhe kfụru nhamụnha.
15Ọle ndu ejo-ememe ono bụ
ogu-ịgba whẹ ono bẹ l’ee-megee gude nmafua whẹ ikpobu,
e je l’a-nyakwoshi akfụ whẹ ono wụshi.
16Lẹ madzụ bẹ nweru iwhe l’ẹte
abaa nwishi, bụru onye dụ chịriri
bẹ kakwa ree, karụ lẹ madzụ bẹ
nweru iwhe shii bụru onye ejo-ememe.
17Ndu ejo-ememe bẹ l’aa-nafụ iwhe whẹ gude akpa ike,
ọle Onye-Nwe-Ọha bụ agbarike ndu dụ chịriri.
18Ndu ụta l’adụa lẹ ndzụ whẹ bẹ
Onye-Nwe-Ọha gụru ndzụ whẹ ọgu chịru l’ẹka.
Oke-iwhe whẹ l’a-nọ jeye lẹ tututu-mịmimi.
19Nteke iwhe-ọtsulanu byarụ bẹ
iwhe ta abyadụ l’atsụ whẹ l’anụ,
mkpẹgu -byalẹwho bẹ whẹ l’e-nweru
nri, nweru iya nke etsutsu iya.
20Ọle ndu ejo-ememe l’a-bụru kpurupyata.
Ndu ọhogu Onye-Nwe-Ọha l’a-dụ
g’ọo ashị-boke mgbogoro-ẹwhuru
bụ ọ-baru-ụba, eyege mmebyi.
21Ndu ejo-ememe l’abụje, whẹ -jita ụgwo, whẹ eria ya.
Ọle ndu dụ chịriri bụ o-me-ịyaa.
22Ọo ndu Onye-Nwe-Ọha gọru
ọnu-ọma nụ l’e-nweru mgboko-o,
ọle ndu ọ tụkwanuru ọnu bẹ l’a-chịhu achịhu.
23Onye l’eme iwhe dụ Onye-Nwe-Ọha ree bẹ l’ọonoduje
akpọ-zhiru gẹ l’oo-shije aha ọkpa.
Oomeje t’onye ọbu kfụru kfụshia ike.
24Ụkfu -kpọo ya m’ọo, bẹ l’ọo-tọo darwukwa alị,
o noo nkele Onye-Nwe-Ọha bẹ kparụ iya sede.
25Mu shikwa nteke mu bụ nwata
nọwaa byeye mu bụru ọgurenya
ntaa, ọle mu tẹke awhụbukwaa ẹka
Onye-Nwe-Ọha parụ onye dụ chịriri parụ haa,
ọdua l’ọo ẹka ụnwu iya l’aryọ aryọ nri.
26Onye dụ chịriri l’abụje
o-me-l’uko, l’oojeje ndu ọdo ụgwo.
Ụnwu iya l’a-bụru ọnu-ọma dụru iya.
27Gbẹeru ome ejo-iwhe azụ, watachia ome iwhe dụ ree,
ọo ya bụ, gụ eburu l’alị-a jeye lẹ gbururu.
28Onye-Nwe-Ọha bẹ iwhe kfụru nhamụnha l’adụje ree.
Ọ tọo hajẹdu ndu yeru iya obu ẹka.
Ọokwa-chije whẹ akwachi jeye lẹ gbururu,
ọle ẹpa ndu ejo-ememe bẹ l’oo-me tẹ whẹ chịhu.
29Ndu-dụ-chịriri l’e-bechaa nweru
alị-a, buru iya jeye lẹ tututu-mịmimi.
30Okfu, l’eshije onye dụ chịriri l’ọnu fụta bụ okfu mmamagụ.
Iwhe l’eshije iya l’ire bụru iwhe kfụru ọto.
31Iwhe l’adụje iya l’obu ntekenteke bụ iwu Chileke iya.
Ọ tọo haswejedu ọkpa l’ememe iya.
32Ndu ejo-ememe l’ejeje ewohaa
onwowhe kwabẹru ndu dụ chịriri,
achọkashi ụzo, whẹ l’e-shi mee tẹ ishi whẹ whuhu.
33Ọle Onye-Nwe-Ọha te ekwedu tẹ whẹ daba whẹ l’ẹka.
A ta abyadụ l’anma ndu dụ chịriri
ikpe, m’a kpụru whẹ bya l’ụlo-ikpe.
34Nọdu ngabẹru Onye-Nwe-Ọha; tsoje ụzo iya.
Ọo ya l’e-kutse ghu mee ghu t’i woru alị-a.
Ii-gude ẹnya ghu whụ nteke l’ee-me tẹ ndu ejo-ememe chịhu.
35Mu whụbuwaru onye ejo-ememe, obu tarụ mini gẹ l’oovu
pulapula g’ọo oshi, ẹhu dụ guu, jakashịhuru ajakashịhu.
36Ọle ọ tọ dụdu g’a nọ-beru, ọ nwụhu; t’ọ nọhe.
Mu chọo ya nta chọo ya imo; mu ta awhụ iya.
37Lenua ndu ụta l’adụa l’ẹhu ẹnya,
mbụ gbunua ndu obu whẹ gụru iwhoro nke,
whụ lẹ ndu l’eme tẹ nchị dụ ndoo bẹ l’e-dobe akọ.
38Ọle ndu l’emeswe Onye-Nwe-Ọha
bẹ l’ee-me whẹ abụru kpurupyata,
Iwhe bụ o-shi-l’eri ndu ejo-ememe bẹ l’ee-me tẹ whẹ chịhu.
39Ọo Onye-Nwe-Ọha l’adzọfutaje ndu dụ chịriri.
Ọo ya l’abụje agbarike whẹ mẹ whẹ l’eje iwhe-ọtsulanu.
40Mbụ lẹ Onye-Nwe-Ọha l’eyejeru whẹ ẹka nafụta whẹ.
Ọonafutaje whẹ l’ẹka ndu
ejo-ememe, shi nno dzọfuta whẹ,
o noo nkele whẹ gbabaru l’ime iya je ezeeru ndzụ.
38Egvu-ọma, Dévidi gụru gude nyatarụ Onye-Nwe-Ọha iwhe
1Gụbe Onye-Nwe-Ọha,
be egudekwa ọvuma baarụ mu mba,
be egudekwa oke ẹhu-eghughu ghu hụ̀a mu àhụ̀hù!
2Nkele akfụ nkeghu kumiru mu ekumi l’ẹhu.
Ị daakwaru mu ejo ẹka l’ẹhu.
3Ẹhu-eghughu ghu meru, to nwe ẹka ẹhu dụ mu mma.
Iwhe-dụ-ẹji, mu metagbaberu
bẹ meru ọkpu ria mu nvụrukpo.
4Nkele ejo-iwhe, mu meshiru rikputaakwaru mu ẹhu.
Ọonyi-be ẹrwa nke ọwhu bụ lẹ mu ta adụdu ike vuru iya.
5Ọnya, l’aba mu nụ rehuru erehu, l’ooshikwawho roo.
Iwhe kparụ iya nụ bụru eswe eswe, mu meru.
6Mu nọwaa nke tsụyoo, dẹe ẹka l’agba
agụ áwhụ mkpụrudumulanu.
7Okpurukpu l’emeshi mu ẹhuka ike,
mbụ l’ọ tọ dụdu ẹka ẹhu dụ mu mma, m’ọo ẹka lanụ.
8Ụvo ta adụhekwa mu, ume ta adụhe mu.
Obu te egvuduru mu egvuru, o mee, mu l’atsụshi ude ike.
9Gụbe Onye-Nwe-Ọha; iwhe lile, l’agụ mu nụ b’ị makọtaru.
Ude, mu l’atsụ bẹ l’eete emeduru ghu lẹ mpya.
10Obu l’etsu mu owhe, ike ta adụhedu mu ilile.
Mu l’awhụwaa inyoki-inyoki.
11Ndu ọnya mu mẹe ndu mu lẹ whẹ l’atụ ọli l’agbawa mu nkupe.
Ọ bụru iwhe-ọtsulanu ono,
dakfutaru mu nụ bẹ kparụ iya nụ.
Ndu mu lẹ whẹ bụ abụbu nọdu mu otẹnya.
12Ndu l’achọ ụzo, whẹ l’e-shi gbua mu bẹ gbabẹru mu ọnya.
Ndu tụberu tẹ whẹ meka mu iwhe
l’achị idzu gẹ mu l’e-shi laa l’iyi.
Ọ lẹwho idzu gẹ whẹ l’e-shi ghọo
ụgho bẹ whẹ l’anọje achị eswe l’ẹnyashi.
13Mbẹdua dụkwa g’ọo onye l’ada nkụchi, l’adụa iwhe l’ọonuje.
Mu dụkwawhoo g’ọo onye l’ẹte
ekfu okfu, l’adụa okfu, l’eshije iya l’ọnu.
14Mu dụwaa g’ọo onye l’eekfu okfu eyeru, too ye ọnu,
nkele ọ tọ dụdu iwhe l’eekfu, ọ nụru.
15Gụbe Onye-Nwe-Ọha, mu nọduwaa ngabẹru ghu.
Ọ bụru gụbe Onye-Nwe-Ọha,
bụ Chileke mu bẹ l’a-za mu oku, mu l’eku ghu.
16Mu sụru: “Be ekwekwa tẹ whẹ nmaa mu ụzu nchịchochi,
m’ọ bụ tẹ whẹ kuje onwowhe
gẹ whẹ l’ahaa nteke ọkpa chiswarahuru mu.”
17O noo nkele mu l’angawa anganga
achọ adada, ẹhu l’awhụ mu ụwhu ntekenteke.
18Mu l’ekfushiwaa ejo-iwhe, mu meshiru.
Iwhe-dụ-ẹji, mu metagbaberu l’atsụkwa mu l’ẹhu.
19Ndu, bụ ndu ọhogu mu pakwarụ ẹka, shihu ike,
ndu kpọru mu ashị lẹ bọ
dụ iwhe mu meru whẹ pakwaawhọ l’igweligwe.
20Ndu l’egudeje iwhe dụ ẹji kfụa
mu ụgwo iwhe-ọma, mu meru
whẹ bẹ l’ekfubushi mu nụ nkele mu l’anọje eme iwhe dụ ree.
21Ba apakwarụ mu haa gụbe Onye-Nwe-Ọha.
Gụbe Chileke nkemu, ba nọdukwa mu otẹnya.
22Gbatakwaru mu ẹgwegwa,
gụbe Onye-Nwe-Ọha, bụ onye ndzọfuta mu.
39Egvu-ọma, Dévidi deru nụ onye ishi egvu, bụ Jedutunu
1Mu sụru agha: “Mu l’a-
kwachafụ ẹnya gẹ mu shi eme umere,
tẹ mu be egude ọnu mu kfuta iwhe-dụ-ẹji.
Mu l’akwa ire mu ngga mẹ ndu ejo-ememe nọkube mu.”
2Nteke mu kpọru ẹka l’ọnu
nọdu nggujingguji, tẹ mu be ekfu
t’ọ ka mma l’ọo iwhe dụ ree, bẹ
iwhe-ọtsulanu mu l’akajẹlee shii eje.
3A nọnyaa, obu kfuwahude mu
ekfuwahu, mbụ mu rịnyaa ya,
ọ gbanwuhu mu l’ẹhu g’ọo ọku,
mu sanụa ọnu wata okfu okfu sụ:
4“Gụbe Onye-Nwe-Ọha, menua mu
tẹ mu marụ gẹ mu l’a-nọ-beru.
Menua tẹ mu marụ gẹ mbọku l’e-beru, mu anwụhu.
Menua tẹ mu marụ gẹ ndzụ mu dụ-be mkpirikpi.
5I meru ndzụ mu, ọ dụ mkpirishi.
Gẹ ndzụ mu l’a-nọ-beru ta adụdu iwhe ọ bụ l’iwhu ghu.
Ndzụ onyenọnu tụkoleruwho dụ g’ọo uwhere-ọnu.
6Madzụ bẹ bụ inyonyo mmaanụ
ẹgube ono, l’ọonoje aghawhe nno.
Kpanga kpanga, l’ọonoje eme bụlewho t’ọ bụru.
Ọokpaje ẹku kụbe, ọle ọ tọ makwanụ onye l’e-megee ria ya.
7Ntaa Onye-Nwe-Ọha, ?ọo zhia gụnu bẹ mu l’ele ẹnya iya?
Ọ kwa ghu bẹ mu l’ele ẹnya l’ẹka.
8Nafụta mu l’emeswe, mu mesweru!
Be ekwekwa tẹ ndu l’eme eswe chịa mu ọchi!
9Mu shi kpọo ẹka l’agba nọ-kirishia,
o noo nkele ọo gụbedua bẹ iwhe ono,
l’anwụkotaru mu nụ ono shi l’ẹka.
10Ba ahụ̀henu mu àhụ̀hù-a,
l’ịihù mu, o noo l’ike l’agvụakwa
mu l’iwhe l’iime mu.
11Ịibajeru madzụ mba, hụ̀a ya àhụ̀hù l’iwhe-dụ-ẹji, l’oome.
Ịitakashije iwhe dụ ree, onye ono nweru g’ọo ẹka-mkpu.
Ndzụ onyemonye tụkoleruwho dụ g’ọo uwhere-ọnu.
12Nụa ekfukfu, mu l’ekfu anụ ghu gụbe Onye-Nwe-Ọha.
Ngabẹnu nchị lẹ mkpu, mu l’echiku ghu.
Ba agbakwa nkụchi t’ị ba anụ ẹkwa, mu l’arya ekpu ghu.
Nkele mu bụ onye ije, lwakfutaru
ghu nụ ẹgube ono, ndụ-ichee anyi whẹ shikwawho bụru.
13Byiko hafụa mu rọo nke ọwhu
mu l’a-kabẹ nweru nwa ẹhu-ụtso
m’ọo nwujiku lanụ, tẹmenu mu alashiwaro maa.”
40Egvu-ọma, Dévidi deru nụ onye ishi egvu
1Mu talẹruwho nshi ngabẹru Onye-Nwe-Ọha,
jeye nteke ọ gharụ mu iwhu; bya anụa olu mu.
2O kufuta mu l’iduma maa,
mbụ l’o kufutaru mu l’ime ẹpoto, l’echi ẹturu.
Ọ bya edobe mu l’ẹka ọkpa rwuru mu alị mu,
mee mu, mu kfụru kfụshia ike.
3O yeru mu egvu ọwhuu l’ọnu,
mbụ egvu, e gude aja Chileke anyi ama.
Ikpoto madzụ l’a-whụ iwhe
meru nụ, whẹ eyelahaaru Chileke ẹso,
whẹ awata bya adakobe Onye-Nwe-Ọha.
4Ẹhu-ụtso bụ nke onye bụlewho
Onye-Nwe-Ọha b’ọ dakoberu,
onye ẹnya iya l’adụa l’ẹka ndu l’eku onwowhe eku nọ,
mbụ onye ẹnya iya l’adụa l’ẹka ndu l’eme nke ọgvu nọ.
5Gụbe Onye-Nwe-Ọha, bụ Chileke mu,
iwhe dụ biribiri, i meshiru bẹ hanụkakwa l’igweligwe.
Iwhe dụ ree, ị tụberu t’i meeru anyi,
ta adụdu onye sụru gẹ l’ọo-gushiru ghu iya.
Mu -jeshia ya agụgu nnanụ nnanụ bẹ l’ọo-bụ agụta agụta.
6Iwhe l’agụ ghu nụ ta abụkwa t’a
gwajẹ ghu agwagwa,
ọdua l’ọo gwotaru ghu ngwo-ẹja,
ọ chia ụzo-nchị b’ị harụ mu.
Ngwo-ẹja ọkpokota-iwhe-ọku
mẹe ngwo-ẹja iwhe-dụ-ẹji ta adụdu ọwhu ị jịru ajị iya.
7Ọo ya bụ, mu sụ: “Lee mu ndọwa Chileke.
Mu byawarụ tẹ mu mee iwhe e deru l’okfu ẹhu mu lẹ Ẹkwo Iwu.
8Gụbe Chileke mu, iwhe dụ-zhia
mu whọ ree bụ tẹ mu mee iwhe dụ ghu l’uche.
Iwu ghu l’adụjele mu whọ l’obu ntekenteke.”
9Mu gudewaa ọnu mu ryaa
ọ-dụ-chịriri ghu aryarya l’ẹka ọha-l’eze dzuru edzudzu.
Gụbe Onye-Nwe-Ọha, ị marụ lẹ mu
ta takpụbejedu ọnu atakpụbe.
10Mu te ezojedu ọnu anọ ekfu
l’ị dụ chịriri, mu ta sumijedu iya l’ime obu mu.
Mu l’ekfukashije l’ị bụ o-me-g’o-kfuru, bụru onye ndzọta.
Lẹ g’i gude yebe madzụ obu mẹe
lẹ g’i gude bụru onye ire-lanụ bẹ mu l’ẹte ahajẹdu ọnu aha.
11Gụbe Onye-Nwe-Ọha, byiko
ba ahabụkwaa mu ọwhuru imiko.
Tẹ n-yemobu ghu mẹe ire-lanụ ghu
ono chekwajekwa mu ẹhu ntekenteke.
12Iwhe-ọtsulanu, bụ agụta agụta bẹ
nọ-whewaru mu mgburumgburu.
Iwhe-dụ-ẹji, mu metagbaberu
rikputaakwaru mu ẹhu,
nke ọwhu bụ lẹ mu ta adụhedu ike awhụfu ụzo.
Ọ ka ẹgbushi, dụ mu l’ishi l’igweligwe.
Ntaa bẹ mu l’amakwaa gẹ mu l’e-me iya.
13Gụbe Onye-Nwe-Ọha, t’ọ bụnuru uche ghu t’ị dzọo mu.
Bya ẹgwegwa bya eyeru mu ẹka; jiko Onye-Nwe-Ọha.
14T’iwhe bụ ndu l’achọ gẹ whẹ
l’e-me kpawhua ishi mu bụkwaru
ndu l’ee-me iwhe iwhere; t’a tụkwaa whẹ ẹyerebeke.
Chekwaa ndu l’agbarụ mu ejo iwhu égò ichiwhu.
T’iwhere ji whẹ iwhu.
15T’e meru iwhe-iwhere nụ
ndu l’akụru mu hụu, t’ẹhu sụkwa whẹ kọo.
16T’iwhe bụ ndu l’achọ ghu nụ bụru ndu ẹhu l’a-tsọ ụtso.
Whẹ anọdu ghu l’ẹka tee ẹswa.
T’iwhe whẹ l’a-kpụru l’ọnu ekfu
ntekenteke, mbụ ndu ọ dụ nke
t’ị dzọfuta whẹ bụru lẹ Onye-Nwe-Ọha bẹ parụ ẹka.
17Ọle mbẹdua bụ onye ụkpa,
bụkwaruwho onye l’adụa g’ọ harụ iya,
ọle Onye-Nwe-Ọha l’arịlee ọriri ẹhu mu.
Ọo ghu bụ onye l’eyejeru mu ẹka; ọ bụru ghu l’adzọje mu ndzụ.
Byiko Chileke mu, ba kpọkwa ụkfu.
41Egvu-ọma, Dévidi deru nụ onye ishi egvu
1Ẹhu-ụtso bụ nke onye l’anọje eme aarịta ndu ụkpa,
Onye-Nwe-Ọha l’a-nafụta iya mẹe iwhe-ọtsulanu byarụ iya.
2Onye-Nwe-Ọha l’e-gbochita iya, dobe iya ndzụ.
Ọo-gọru iya ọnu-ọma l’eliwhe.
O too nwuduru iya eye tẹ ndu ọhogu iya mee ya gẹ dụ whẹ ree.
3Onye-Nwe-Ọha l’a-gbẹe ya
ọkpu-ike mẹe ẹhu adụa ya mma,
mee ya t’o mehu l’ẹhu l’eme iya nụ.
4Mu sụru: Gụbe Onye-Nwe-Ọha, whụnuaru mu imiko.
Mu mewaru iwhe-dụ-ẹji, shi nno
meswee ghu, jiko menua t’ẹhu l’eme mu nụ mehu.
5Ndu ọhogu mu l’anọje ekfu ejo okfu ekfugide mu, sụ:
“?Ọo nteke ole bẹ l’ọo-nwụhu, t’a nyazọo ya?”
6Ụwhodu l’abụje whẹ -bya mu ajịji,
whẹ ekfuru mu okfu, l’ẹte erwuje whẹ ọhu-ẹwho.
Iwhe whẹ l’abyajẹ bụ tẹ whẹ nụta
akọ dụ ẹji l’ẹhu mu, whẹ egude iya lụfu je awata agbasa.
7Ndu lile, kpọru mu ashị l’anọje
adzụ-whe whatawhata ekfutoshi mu.
Ọo lẹwho t’ọ tsụru mu bẹ whẹ l’anọje arị.
8Whẹ l’asụje: “Tụswekwa! Ọ kwa ejo ẹhu l’eme iya.
Ẹhu l’eme iya nụ bẹ l’ọoto wakwa l’iya ọdo.”
9Onye bụ ẹguru ọnya mu,
bụkwaruwho onye mu tụkwaseru obu mu,
mbụ onye mu l’iya shi erigba nri,
bẹ dakọberu jelahaa t’ọ tsụru mu.
10Ọlobu, gụbe Onye-Nwe-Ọha, whụaru mu rọo imiko.
Menua tẹ mu gbakerehu,
nke ọwhu mu l’a-kfụ whẹ ụgwo iwhe-e, whẹ l’eme mu.
11Eshi-ọwhu l’iitii kwee tẹ
ndu ọhogu mu lwukpua mu,
bẹ mu malẹruwho lẹ mu dụ ghu l’obu.
12Eshi-ọwhu ụta l’adụa mu l’ẹhu
bẹ l’ii-gbagide mu tẹ mu ba ada,
gụ emee tẹ mu nọdu l’atatiwhu ghu jeye lẹ tututu-mịmimi.
13T’e tua Onye-Nwe-Ọha ẹwha,
mbụ Chileke nke ndu Ízurẹlu, shi lẹ gbururu jeye lẹ gbururu.
O noo g’ọ dụ. T’ọ dụ nno.
42Ẹ́vù, a kwarụ nụ onye ishi egvu tẹ Ụnwu Kora gụa
1Ọo ẹgube ono, ne ele l’anọje atụ
hẹehee achọ ngele, l’asọ
gborogboro, l’ọo-ngụ mini,
bụkwawho g’obu mu l’atụ hẹehee achọ gụbe Chileke.
2Ẹkpiri Chileke, mbụ Chileke,
nọ ndzụ l’akpọ obu mu jegiri-jegiri.
?Ọo zhia nteke ole bẹ mu l’e-je anọdu
l’iwhu Chileke baarụ iya ẹja?
3Ẹnya-mini bụ nri eswe l’ẹnyashi mu.
Ntekenteke bẹ ndiwhe l’ajịje mu sụ: “?Ọo awe bẹ Chileke ghu nọ?”
4Ntaa, mu tụkoru iwhe dụ mu
l’obu ekfushi, bẹ mu nyatarụ gẹ
mu shi edujeru igwe-ọha,
anyi awụ gidigidi eje l’ụlo Chileke,
azụ egvu ẹhu-ụtso
mẹe egvu ekele l’echilabọ igwe-ọha ono,
byarụ ori oge.
5?Ọo gụnu meru, mu nọdu tsụyoo?
?Ọo gụnu meru, obu l’achị mu whoowhoo?
Ọo Chileke bẹ ẹnya mu dụ l’ẹka ọ nọ,
nkele mu l’e-megee kele iya ekele,
mbụ onye bụ iya l’adzọfutaje mu nụ,
6bụkwaruwho Chileke mu.
Mu nọdu tsụyoo.
O noo iwhe meru g’o gude mu
nọdu lẹ mgboro Jọ́danu nyata ghu,
mbụ l’alị Hemọnu l’eli ugvu Miza.
7Ogbu-mini l’akpọ mkpu ekpu ogbu-mini ibe iya.
Akpara-mini ghu mẹe
gborogboro, l’ọoso sọ-kputawaru mu.
8L’eswe bẹ Onye-Nwe-Ọha
l’egoshije mu n-yemobu iya.
O -be l’ẹnyashi bụ egvu nkiya bẹ
mu l’akpụjeru l’ọnu, mbụ ekfukfu,
mu l’ekfuje anụ Chileke, onye bụ iya gude ndzụ mu.
9Mu sụru Chileke, bụ eze-ẹwhuru nkemu:
“?Ndẹhunu iwhe meru g’o gude ị nyọhaa mu?
?Ọo gụnu kparụ iwhe ndu ọhogu
mu l’akpa mu ẹhu, mu tsoru agụ-whe áwhụ?”
10Ndu ọhogu mu l’akụru mu hụu
sụ: “?Ọo awe bẹ Chileke ghu nọ?”
Iwhe ono, whẹ l’anọje ekfuru
mu ono tụkowaa mu ọkpu gwee ryaaryaa.
11?Ọo gụnu meru, mu nọdu tsụyoo?
?Ọo gụnu meru, obu l’etsu mu owhe?
Ọo Chileke bẹ ẹnya mu dụ l’ẹka ọ nọ,
nkele mu l’e-megee kele iya ekele,
mbụ onye bụ iya l’adzọfutaje mu
nụ, bụkwaruwho Chileke mu.
431Hanụaru mu enge, byiko Chileke,
gbanụaru mu ọdzori,
gụ anafụta mu l’ẹka ndu ono, l’ẹte eyee ghu obu.
Gbafụta mu l’ẹka ndu ụgho mẹe ndu l’ẹte adụa chịriri.
2Eshi-ọwhu ọ bụ gụbedua, bụ Chileke bụ agbarike mu,
?ndẹhunu g’ọ gude ị jịka mu?
?Ọo gụnu kparụ iwhe ndu ọhogu
mu l’akpa mu ẹhu, mu tsoru agụ-whe áwhụ?
3Byiko, zhinua iwhoro nkeghu
mẹe ire-lanụ ghu t’ọ bụru whẹ l’a-nọ edu mu.
Tẹ whẹ dua mu durwua ugvu
nkeghu ono dụ nsọ, mbụ tẹ whẹ
durwua mu ẹka ono, i bu gẹdegede.
4O noo nteke mu l’a-bya
l’ẹnya-mgbẹja nke gụbe Chileke,
byakfuta Chileke ono, bụ ishi
ẹhu-ụtso mu, bụru onye mu l’ete ẹswa iya.
Mu l’a-kpọ une gude kele ghu ekele
gụbe Chileke, bụ Chileke mu.
5?Ọo gụnu meru, mu nọdu tsụyoo?
?Ọo gụnu meru, obu l’etsu mu owhe?
Ọo Chileke bẹ ẹnya mu dụ l’ẹka ọ nọ,
nkele mu l’e-megee kele iya ekele,
mbụ onye bụ iya l’adzọfutaje mu nụ,
bụkwaruwho Chileke mu.
44Ẹ́vù, a kwarụ nụ onye ishi egvu tẹ Ụnwu Kora gụa
1Gụbe Chileke, anyi gudewaa nchị anyi nụa;
nna anyi ochee whẹ bẹ kọwaru
anyi iwhe i megbaberu l’oge
nkewhe lẹ nteke ndụ-ichee.
2Ọo ghu gude ọkpehu ghu
chịshia ndu ọha ọdo l’alị whẹ,
dzabẹ nna anyi ochee whẹ l’alị ono.
Ndu ha l’igweligwe b’ị kụru pyaapyaa,
ọle nna anyi ochee whẹ b’i meru tẹ whẹ l’asọ pulapula.
3Ọ tọ dụ ogu-ịgba whẹ bẹ whẹ gude lwụta alị ono,
tọ bụ ọkpehu whẹ bẹ whẹ gude lwụ-gbua.
Ọo l’ike ghu mẹe l’ọkpehu ghu,
mẹe eswiru ono, i swiru whẹ bẹ whẹ gude lwụ-gbua,
o noo nkele i yeru whẹ obu.
4Ọo gụbedua bụ eze mu, bụru Chileke mu.
Ọ ghu kfuru iya mee ya amịmu
t’ụnwu Jékọpu lwụ-gbua l’ọgu.
5Ọo l’ẹka ghu bẹ anyi l’anọduje
chiwhu ndu ọhogu anyi azụ.
Ọ bụru ẹwha ghu bẹ anyi l’egudeje
dzọo ndu wulihuru etso anyi okfu pyaapyaa.
6Mu ta achịduru ụkfu kwẹe l’akfụ, mu chị;
mu marụ l’ogu-ịgba mu ta adzọdu mu.
7Ọle ọo ike nkeghu bẹ anyi gude
lwụ-gbua ndu ọhogu anyi.
Ndu kpọru anyi ashị b’i meru iwhe iwhere nụ.
8Ọo Chileke bẹ anyi l’egudeje
anga l’ụnga mbọku mbọku.
Ọ bụru gụbe Chileke bẹ anyi
l’e-kele ekele jeye lẹ tututu-mịmimi.
9Ọle ntaa b’ị jịkawaru anyi, bya ekpua anyi iwhu lẹ ntụ.
I tii tsojehedu ndu ojọgu anyi eje ọgu.
10Ị harụ ndu ọhogu anyi, whẹ chiwhu anyi azụ,
ndu kpọru anyi ashị bya atụko ẹku anyi kwaa l’ọkwata.
11Ị parụ anyi haa g’ọo atụru, e doberu nke egbushi.
Ị chịkashia anyi tụkaa nnanụ nnanụ l’alị ndu ọhamoha.
12I reshiwaru ndu nkeghu ọsuru-tọ-ọsu,
I reshia whẹ, lẹ bọ bụ l’i ritaru urwu l’ishi whẹ.
13I mewaru, ndu buwheru anyi
mgburumgburu l’akọ anyi ajịcha.
Ndu nọ-wheru anyi
mgburumgburu l’anọje
ekfubyishi anyi, achị anyi ọchi.
14I mewaru, anyi bụru iwhe ndu ọha ọdo l’atụ lẹ ntọnu,
bụru ndu bụ: a -nyata whẹ, e whuwhee ishi.
15Mbọku mbọku bẹ l’aanọje eme mu iwhe-iwhere.
Iwhere ono l’ejije mu iwhu pyịmu.
16O noo nkele ndu ọhogu mu,
mẹe ndu l’eme tẹ whẹ gwata
mu ụgwo-iwhe, e meru whẹ,
l’anọje akọ mu ajịcha,
ekfutoshikwa mu whọ.
17Iwhe lile-e mekotaru l’ẹhu anyi,
lẹ bọ bụ l’anyi nyọhajeru ghu.
Anyi te emebyije ọgbandzu anyi lẹ ghu.
18Obu anyi ta alụfujedu l’ẹka ị nọ.
Anyi ta atọje ẹtomu t’anyi oshiswe ụzo ghu.
19Ọle i gweru anyi ryaaryaa l’ẹka nkụta-ọswa bu.
I bya egude tsụrikiti ẹkpuroochi kpuchia anyi.
20Ọ -bụ l’anyi nyọharu Chileke
anyi, bya abalahaaru agwa ndu ọha ọdo ẹja,
21?ọo lẹ Chileke tẹ g’achọfutadu
iya tọo, eshi-ọwhu ọ makọtaru
iwhe e domiru edomi, dụ madzụ l’obu?
22Ọle ọbu, ọo l’iswi ẹhu ghu
bẹ l’ọoto dụdua nteke ọnwu
l’ẹte anọje eme t’o gbua anyi,
l’aanọje eme anyi g’ọo atụru,
a chịtaru eje egbushi.
23Gụbe Onye-Nwe-Ọha; tehu etehu!
?Ndẹhunu iwhe meru g’o gude i je l’anọdu eku mgbẹnya?
Tehu etehu, ba ajịkashi anyi jeye lẹ gbururu!
24?Ndẹhunu iwhe meru g’o gude ị gbẹeru anyi azụ?
?Ndẹhunu iwhe meru g’o gude
ị nyọhaa iwhe-ọtsulanu, anyi
l’eje, nyọhakwaawho l’aakpa anyi ẹhu?
25E mewaru, anyi daa, nmaa
ẹwho l’alị, nke ọwhu bụ l’ishi hatawarụ anyi ẹja.
26Gbalihu yeru anyi ẹka!
Gudero iswi n-yemobu ghu gbafụta anyi.
45Ẹ́vù, a kwarụ nụ onye ishi egvu tẹ Ụnwu Kora gụa, t’e gude olu egvu, l’eekuje “Nkashị-iyi” gụa ya, egvu ẹswa-nwanyị
1Nteke mu l’ede egvua, l’aa-gụru onye eze anyi
bẹ iwhe jiru mu obu godogodo bụ okfu ọma.
Ire l’egwo mu ngwo g’ọo
mkpara-ẹkwo onye marụ ode ẹkwo ree.
2Ị kakọta madzụ, a nwụru anwụnwu ọma ụma.
Okfu njima bẹ jiru ghu ọnu ejiji,
o noo g’o gude Chileke gọoru
ghu ọnu-ọma. Ọnu-ọma ono je
l’e-shi lẹ gbururu nọo jeye lẹ gbururu.
3Gụbe O-gbua-o-turu-ugo, wota ogu-ịgba ghu kee l’ukfu.
Yee onwoghu ọ-dụ-biribiri
yẹle ogbu-zaazaa g’ọo onye yeru uwe.
4Nọdu l’ụgbo-ịnya ghu, gudekwa
ọ-dụ-ugvu ghu gbaa
wugowugo, je alwụaru ire-lanụ ọgu
gụ alwụaru owoze onwonye alị yẹle ọ-dụ-chịriri ọgu.
Gude ike ghu mee iwhe dụ egvu.
5T’akfụ ghu, l’atsụ nkọ mejelewho
tsụrumu l’obu ndu ọhogu gụbe eze.
Tẹ ndu mba lile dajẹkwaa kpurumu l’iwhu ghu.
6Gụbe Chileke, ọo g’ị bụ eze ntaa
bụ gẹ l’ịi-bụ-zhia ya whọ jeye lẹ tututu-mịmimi.
Ọo ikpe, kfụru ọto b’i gude achị ẹka, ị bụ eze.
7Ome iwhe dụ chịriri l’adụje ghu
ree, ome ejo-ememe l’adụjekwanu ghu ashị.
O noo g’o gude Chileke ono, bụ Chileke ghu họta ghu,
mee ghu, ẹhu l’atsọ ghu ụtso,
mbụ ẹhu-ụtso ọwhu kwatarụ ka nke ibe ghu shii.
8Uwe ghu bẹ mkpọ mẹru mẹe
alowe mẹe kasiya tụkoru vọo kfurukfuru.
Une, e shi l’ụlo gụbe eze akpọ
l’emeje t’ẹhu tsọo ghu ụtso;
mbụ ụlo-ibe eze, e gude ọkpu-enyi memashia ememashi.
9Ụnwanyi ibe ghu, l’aakwabẹ
ugvu hakwaru bụru ụnwada eze.
Ọo l’ẹka-ụtara ghu bẹ eze-nwanyị kfụru.
Iwhe o yeru l’ẹhu bụ iwhe e
meru lẹ mkpọla-ododo shi alị Ofi.
10Ngabẹ nchị gụbe ada-eze.
Byiko, rịkwaa iwhe-e, mu l’abya ekfukfu-a arịri.
Nyọhakota ndibe unu mẹe ndu ibe nna ghu whẹ.
11L’ụma, l’ịima mekwaaru, l’ịigu eze ẹgu.
Eshi-ọwhu ọ bụ iya bụ onye
nwe ghu nụ; whuzejekwaru iya.
12Ndu Taya l’a-byakwa bya anyako ghu iwhe.
Ndu ẹka-ji-ẹku emelahaaru ghu
ree, gẹ l’ee-shi tẹ whẹ dụ ghu l’obu.
13Ada-eze bẹ nọ l’ogbu-zaazaa ya, e duba iya l’ụlo.
Uwe iya b’e gude oghu mkpọla-ododo kwee.
14O yeru ẹguru uwe, l’ama ụma; e duru iya dujeru eze.
Ụnwumgboko ibe iya l’awụ etso iya l’azụ.
Whẹbedua bẹ l’eedukwawho edujeru eze.
15Ẹhu l’atsọ whẹ ụtso, whẹ l’ete
ẹswa g’e du whẹ abahụ l’ibe eze.
16Gụbe eze, ọo ụnwu ghu
l’a-nọ-chi ẹnya nna ghu oche whẹ.
Ọ bụru whẹ bẹ l’ii-me tẹ whẹ
wata achịchi lẹ mgboko kpaa-whuu.
17Mu l’e-me t’a ba anyọhahe
ẹwha ghu anyọha shi l’ọgbo rwua l’ọgbo.
O noo gẹ l’ee-shi; ndu mba lile aja
ghu ama jeye lẹ tututu-mịmimi.
46Egvu, e deru nụ onye ishi egvu tẹ Ụnwu Kora gude olu ụnwumgboko gụa
1Ọo Chileke bẹ bụ onye anyi
nọ l’ẹka ezeru ndzụ, ọ bụru iya bụ ike anyi.
Ọokwakobeje ntekenteke t’o yeru
anyi ẹka mẹ anyi l’eje iwhe-ọtsulanu.
2Ọo ya kpatarụ egvu ta abya
l’atsụ anyi m’ọo ilile m’o -beru
mgboko l’owhu chikpohu,
m’o -beru ugvu zee; nwulahu l’eze-ẹnyimu.
3O -beru m’ọo mini, dụ iya nụ
l’awhụ oke ẹwhu abya kụlakula,
nke ọwhu ugvu lile l’anmakaa
jijiji, bẹ egvu ta abyadụ l’a-tsụ anyi m’ọo ilile.
4O nweru ẹnyimu ọwhu dụ nụ.
Mini, shi iya nụ l’emeje t’ẹhu
tsọo mkpụkpu Chileke ụtso,
mbụ ẹka dụ nsọ, Ọkalibe-Kangokotaru-Nu bu.
5Chileke nọkwa lẹ mkpụkpu ono,
ọ tọ dụdu iwhe bya l’e-nwubata iya enwubata.
Chi -bya l’asahụ, Chileke abyawaa bya agbaarụ iya mkpu.
6Mba gẹ mba ha bẹ gbahụru yaba yaba,
alị-eze g’alị-eze ha dagezhia tsua ọnu l’alị.
Ọo ọrya bẹ Chileke ryaarụ,
mgboko rwuhukota erwuhu.
7Onye-Nwe-Ọha, bụ Onye-ishi-igwe-ọgu bẹ
nọkwa swiru anyi.
Ọ kwa Chileke nke Jékọpu bụ onye anyi nọ l’ẹka ezeru ndzụ.
8Byanụ awhụ iwhe Onye-Nwe-Ọha meru.
Bya awhụ lẹ g’o meru, mgboko bụru kpurupyata.
9Oogboje ọgu l’ẹka mgboko beru.
Ọogba-jishije akfụ, ya emebyishia arwa,
ya akpọkotakwawho ụgbo-ịnya ọku.
10Ọ sụru: “Unu nọdu ndoo,
nggẹ unu amarụ l’ọo mbẹdua bụ Chileke.
Ndu ọha ọdo l’a-tụ ọnu mu lẹ mụbe Chileke parụ ẹka,
aa-tụ ọnu mu lẹ mgboko kpaa-whuu lẹ mu parụ ẹka.”
11Onye-Nwe-Ọha, bụ Onye-ishi-igwe-ọgu
bẹ nọkwa swiru anyi.
Ọ kwa Chileke nke Jékọpu bụ onye anyi nọ l’ẹka ezeru ndzụ.
47Egvu, e deru nụ onye ishi egvu tẹ Ụnwu Kora gụa
1Unu kụa ẹka, unubẹ ụnwu eliwhe l’owhu.
Unu gude egvu ẹhu-ụtso tụaru Chileke okoo.
2O noo nkele Onye-Nwe-Ọha, bụ
Ọkalibe-Kangokotaru-Nu gbarụ t’a tsụje iya egvu.
Nkele ọo yẹbedua bụ ọkalibe eze,
l’achịkota ndiwhe kpaa-whuu.
3O meru t’anyi lwụ-gbua ndiwhe,
mee tẹ ndu ọha ọdo nọdu anyi lẹ mkpula.
4Ọo yẹbedua họtaru anyi alị, anyi
bu, mbụ alị ono, Jékọpu, bụ
onye Chileke yeru obu l’egudeje eku onwiya eku.
5Chileke bẹ palihuwaru jeshia
l’oshi-eze iya, gẹ ndiwhe l’atụru
yẹbe Onye-Nwe-Ọha okoo egburu iya opu-ike.
6Unu gụa egvu gude jaa Chileke ajaja. Unu jaa ya ajaja.
Unu gụa egvu gude jaa eze anyi ajaja. Unu jaa ya ajaja.
7Nkele ọo Chileke bụ eze ndu mgboko kpaa-whuu.
Unu kwaa ẹ́vù gude jaa ya ajaja.
8Ọo Chileke bụ eze, l’achị ndu mba nọnu.
Ọ nọ l’oshi-eze iya, dụ nsọ.
9Ndu nweru ẹnya l’eliwhe dzukookwaru
ẹgube ono whẹ l’edzukoje
mbụ ndu nke Chileke nke Ébirihamu,
nkele ndu eze, l’egbochitaje
ụnwu eliwhe bụkwa Chileke nwe whẹ.
Ọ kwa Chileke bẹ kangokotaru nụ.
48Egvu-ọma, Ụnwu Kora gụru
1Onye-Nwe-Ọha parụ ẹka apaa.
T’a jakwaa ya whọ ajaja, rwuberu iya nụ
l’obodo nke Chileke anyi, mbụ l’ugvu ono, dụ nsọ.
2Obodo ono l’ama ụma shii l’eli ugvu ono.
Ọo ya bụ ẹhu-ụtso mgboko kpaa-whuu.
Ugvu Záyọnu nọ l’ụzo isheli
mkpụkpu Jerúsalẹmu, bụ
mkpụkpu Onye Eze, parụ ẹka.
3Chileke nọwaa l’ụlo-ozeru-ndzụ mkpụkpu ono.
O mewaru t’a marụ l’ọo yẹbedua bụ a -gbabe, e zeru ndzụ.
4Nteke ndu eze chịkoberu ndu
ojọgu whẹ wụru bya tẹ whẹ tsoo mkpụkpu ono ọgu,
5whẹ byarwutalewho bya ebu iya
iwhu, ọ tụfu whẹ ẹhu, egvu tsụhu whẹ, whẹ gbalashịa.
6Egvu, guderu whẹ l’ẹka ono
tsụru whẹ l’ẹhu g’ọo nwanyị, ime l’eme.
7I larụ whẹ l’iyi gẹ whẹrewhere,
shi l’ụzo ẹnyanwu-awata l’alajẹ ụgbo-mini Tashishi.
8Anyi nụru iya lẹ nchị, bya awhụ
iya l’ẹnya, l’obodo ono, bụ nke
Onye-Nwe-Ọha, bụ Onye-ishi-igwe-ọgu,
bụ iya bụ obodo Chileke anyi ono,
bẹ Chileke mewaru, ọ kfụru chịmu jeye lẹ gbururu.
9Anyi l’anọduje l’ime eze-ụlo
gụbe Chileke arị nke n-yemobu ghu.
10Gụbe Chileke, ọo g’ẹwha ghu
ngakọtaru ẹka lile, bụ gẹ l’aanọje
aja ghu jeye ẹka igwe beru, alị beru.
Ọo ikpe, kfụru nhamụnha b’i gude achị.
11Ẹhu l’atsọ ugvu Záyọnu ụtso, mkpụkpu Juda l’ete ẹswa.
Iwhe kparụ iya nụ bụru gẹ l’iigudeje ekpe ikpe.
12Unu jegbakota ọma Záyọnu.
Unu jewhee ya mgburumgburu.
Unu gụa ụlo-eli, o nweru ọgu.
13Unu gbukotakwa nke lẹ
mgbodo, e gude tuwheta iya mgburumgburu.
Unu lerwekwaawho ẹnya l’ụlo-ozeru-ndzụ, nọkota ya nụ.
Ọo ya bụ nggẹ unu akọoru iya ọgbo ọwhu nọ l’iwhu.
14O noo nkele Chileke-e l’a-bụru
Chileke anyi jeye lẹ tututu-mịmimi.
Ọ bụru iya l’a-nọ edu anyi jeye g’anyi l’a-nọ-beru.
49Egvu-ọma, e deru nụ onye ishi egvu tẹ Ụnwu Kora gụa
1Unubẹ ndiwhe, unu nụkwaa iwhe-e.
Unu ngabẹkwa nchị, unubẹ ndu bu lẹ mgboko-o.
2Tẹ ndu ukfu mẹe ndu nta ngabẹ nchị.
Tẹ ndu nweru iwhe mẹe ndu ụkpa ngabẹ nchị.
3Okfu, shi mu l’ọnu l’a-bụ okfu onye, marụ ágụ.
Iwhe mu rịru l’obu l’emeje t’iwhe doo madzụ ẹnya.
4Tẹ mu bya egbobe nchị l’okfu-ẹtu.
Mu akpọo une gude kọshia iwhe ẹtu ono, fụtaru.
5?Ọo zhia gụnu l’a-kpata t’egvu
tsụa mu mbọku iwhe-ọtsulanu
byarụ, nteke ndu mu dụ ashị
nọ-wheru mu mgburumgburu;
6mbụ ndu ono, bụlewho l’ẹku,
whẹ kpatarụ bẹ whẹ keru ike
yeru, ọ bụru iwhe whẹ setaru l’anya
bẹ whẹ gude eku onwowhe gẹ whẹ l’ahaa.
7Ọle ọ tọ dụkwa madzụ
igbalekọma, l’a-dụ ike agbafụta ibe iya,
tọ dụ onye l’a-dụ ike akfụ
Chileke aswa ishi madzụ ibe iya.
8O noo l’iwhe e gude agbata ndzụ madzụ pakwarụ ẹka.
Ọ tọ dụkwa iwhe madzụ bya l’a-kfụ t’o dzua aswa iya.
9Ọ tọ nwedu ụgwo, l’ọo-kfụ nọdu ndzụ tututu-mịmimi,
ya a-nwụhuhe anwụhu ọdo.
10Onyenọnu whụwaru lẹ ndu
mmamagụ l’anwụhu-gejee,
ndu eswe mẹe ndu l’eme jolajola l’anwụhujekwawho.
Gẹ whẹ ha l’atụkoje ẹku whẹ haarụ ndu ọdo.
11Ọo ilu whẹ l’a-bụ ụlo, whẹ l’e-bu jeye lẹ tututu-mịmimi,
ẹka ono bẹ whẹ l’e-bu gburu jeye lẹ gbururu,
t’agụfukwaro lẹ whẹ shi
nwegeeru oke-alị, whẹ gụshi-geeru ẹwha whẹ.
12Ẹku, madzụ nweru ta akpọshidu iya anwụhu.
Ọ bụ-a g’anụ-ẹgbudu l’anwụhuje bụ gẹ madzụ l’a-nwụhu.
13Whụwaro gẹ l’ọodakfuje ndu
bụ onwowhe bẹ whẹ kpọru obu
ye, mẹe gẹ l’ọonwujeru ndu
l’awụ etso whẹ nụ, mbụ ndu
bụlewho iwhe whẹ kfuru l’adụje whẹ ree.
14Iwhe l’ee-megee mee whẹ nụ bụ
lẹ whẹ l’a-nwụshihu g’ọo atụru.
Ọ bụru ọnwu l’a-kpa whẹ nri l’ẹhu.
Ndu dụ chịriri l’a-bụru ishi achị whẹ, m’o be l’ụtsu.
Ogwẹhu whẹ ono l’e-rekashihu
m’e shilewho l’ẹguru ụlo whẹ ono parụ whẹ je adẹe l’ilu.
15Ọle mbẹdua bẹ Chileke
l’a-gbafụta tẹ mu ba abahụ
l’alị-maa, o noo nkele oo-megee kuta mu dokube onwiya.
16Ọ -bụru lẹ madzụ nọnyaaru bya enweru iwhe shii,
nke ọwhu ndiwhe watarụ iya
ọkwabe ugvu, t’egvu ba atsụjekwa ghu.
17O noo nkele ọ tọ dụdu ọwhu l’oo-gude ala m’ọ nwụhu.
Ugvu iya ọbu te etsokwa iya whọ ala l’ilu.
18Ọo ezhi-okfu lẹ nteke ọ nọ ndzụ
b’o shi gụkobe onwiya lẹ ndu a
gọru ọnu, ndiwhe shikwawho ajajẹ iya ama
l’ọ bụ onye ẹka atụtu.
19Ọle oo-megee lakfu ndụ-ichee ya whẹ l’alị-maa,
ẹka l’ẹte abyaa l’awhụ iwhoro.
20Onye nweru iwhe, t’ọ ma iwhe
bụ-a g’anụ-ẹgbudu l’anwụhuje
bụ gẹ l’oo-bekochaa nwụhu.
50Egvu-ọma, Asafu deru
1Ọ kwa Ọkalibe, bụ Chileke,
bụ Onye-Nwe-Ọha l’ekfu okfu-a.
Ooku mgboko l’owhu oku, shi
l’ụzo ẹnyanwu-awata rwua l’ụzo ẹnyanwu-arịba.
2Chileke nọ lẹ Záyọnu egbu
zaazaa, mbụ lẹ Záyọnu ono, bụ obodo l’amashị ụma ike.
3Chileke anyi l’abyaakwaa,
ọle ọ tọ nọdu nggujingguji abya.
Ọku, l’ata chịchichi vutaru iya ụzo.
Oke whẹrewhere nọ-whee ya mgburumgburu.
4Ooku igwe, eku alị, tẹ whẹ bya abụru ndu ẹka-ebe iya,
tẹ whẹ bya anọdu whụ gẹ ya gude ekpe ndu nkiya ikpe.
5“Unu chịkoberu mu ndu bụ nkemu gẹ whẹ ha;
ndu mu lẹ whẹ gude ngwo-ẹja gbaa ndzụ.”
6Imigwe l’atụje ọnu gẹ Chileke
dụ-be chịriri, nkele Chileke l’onwiya bụ O-kpe-ikpe.
7“Ndu mu, unu ngabẹ nchị,
tẹ mu kfuru okfu yeru unu.
Tẹ mu gbaa unubẹ ndu Ízurẹlu ọku ejo iwhe unu meru.
Ọ kwa mụbe Chileke bụ Chileke unu.
8Ọ tọ bụkwa nke ngwo-ẹja, unu l’egwoje anụ mu, ọdua
l’ọo nke mgbẹja ọkpokota-iwhe-ọku,
unu l’agbajẹru mu bẹ mu l’abarụ unu mba iya, nkele ono
bẹ unu l’anọje emekota l’o rwuberu iya.
9Ọ tọ bụkwa eswi, nọ l’ụwoko unu bẹ mu chọru bya.
Tọ bụ eghu unu, kụru lẹ mkpu bẹ mu l’ele ẹnya iya,
10nkele anụ lile, nọkota l’ọswa bụkota nkemu, eswi, dọru
l’ụnukurunu ugvu bụkwaru mu whọo nwe iya.
11Ẹnu, l’ewhe l’eli bẹ mu makọtaru gẹ whẹ ha,
anụ-ẹgbudu l’owhu bụkotaru iwhe mu.
12Ọ -bụ l’ọo ẹgu l’agụ mu mẹ mu tege abyakfutakwa unu,
nkele ọo mbẹdua nwekota
mgboko-o kpaa-whuu mẹe iwhe dụ iya nụ.
13?Unu rịru lẹ mu l’atajẹ anụ eswi?
?T’unu doberu sụ lẹ mu l’angụje mmee eghu?
14Ngwo-ẹja, unu l’a-nụje mụbe Chileke
bụ t’unu keleje mu ekele.
Unu emekotaje iwhe unu riburu
lẹ nte l’unu l’e-meru mụbe Ọkalibe-Kangokotaru-Nu.
15Unu -kua mu oku nteke iwhe-ọtsulanu byarụ unu,
mu anafụta unu, ọo ya bụ nggẹ unu akwabẹje mu ugvu.”
16Ọle onye ejo-ememe bẹ Chileke
sụru: “?Ndẹnu iwhe meru g’o
gude l’ịinoje agụ iwu mu ọgu egvu?
?Ndẹnu iwhe meru g’o gude
l’iigudeje ọnu ghu kfukuta ọgbandzu mu?
17L’ẹka ị jịkaru sụ tẹ mu ba alọshi
ghu ẹka lẹ nchị, woru okfu mu g’ọ ha ye l’azụ.
18Ị -whụa onye oshi, gụ ejekfu
iya, gụ l’iya abụru ọnya, gụ lẹ
ndu l’eri ogori l’atụkwawho ọli.
19Iwhe l’eshije ghu l’ọnu bụlewho
ejo-okfu, ụgho bụwaru iwhe kwọru ghu ẹhu.
20Ị -nọdu, gụ ekfutoshi nwune ghu.
Ọ bụru nwune ghu nwoke, gụ
l’iya shi l’ẹwho lanụ bẹ l’ịinoje ekfuru okfu-azụ.
21Iwhe lile ono b’i mekotaru, mu nọdule-ẹ nggujingguji.
I gbee dobewanu sụ lẹ mu lẹ ghu bụ iwhe lanụ.
Ọle mu l’a-bakwanụru ghu mba iya,
gbaa ghu ọku iya l’iwhu l’iwhu.”
22“Unu ngabẹ nchị l’iwhe-e,
mu l’abya ekfukfu-a, unubẹ ndu nyọharu mụbe Chileke.
Ọdua mu alajashịa unu nwịrinwiri,
l’ẹbe ọbụ l’ọ dụ onye sụru gẹ l’ọonafuta unu.
23Onye, bụ ekele bụ ngwo-ẹja ọwhu l’ọonu Chileke
bẹ bụ iya l’akwabẹ mụbe Chileke ugvu.
Ọ bụru onye, dụ chịriri bẹ mu
l’e-goshi lẹ mụbe Chileke l’adzọfutaje madzụ.”
51Egvu-ọma, Dévidi deru nụ onye ishi egvu
Nteke o deru iya bụ g’onye nkfuchiru Chileke, bụ Nétanu byageeru ibe iya bya ekfuaru iya l’o meru ẹji l’o jekfuru Betu-sheba azẹe
1Whụnuaru mu imiko, jiko Onye-Nwe-Ọha,
eshi-ọwhu n-yemobu ghu l’enwee eberu.
Eshi-ọwhu obu-imiko ghu ha
shinene huchafunu emeswe, mu mesweru ghu.
2Safụkotanu mu ejo-iwhe, mu
megbaberu g’ọ ha, huchafunu
mu iwhe-dụ-ẹji, mu mekotaru ghu.
3Nkele mu marụ gẹ mu mesweberu ghu.
Mu ta anyọhadu iwhe-dụ-ẹji mu meru anyọha.
4Ọo kwa gụbedua gẹdegede
bẹ mu meru iwhe-dụ-ẹji melwu,
mu meru iwhe, bụ ejo-iwhe l’ẹnya nkeghu.
Ọo ya bụ l’iswi dụ ghu mma l’ikpe, ị nmarụ mu,
ụta ta adụ ghu iya l’ikpe, i kperu mu.
5Sụa, mu shikwa eshi nteke a
nwụru mu bụtaru onye l’eme ejo-iwhe.
Mu shiroo nteke ne mu tsụtaru ime
mu bụtaru onye l’eme iwhe-dụ-ẹji.
6Iwhe l’iile ẹnya iya lẹ ndzụ madzụ bụ ire-lanụ.
Zhinua mu mmamagụ nkeghu
t’ọ dụ mu l’ime ime obu.
7Gude ịsopu saa mu asasa tẹ mu be enwe mmerwu.
Saa mu tẹ mu ka eberugo ọcha ụcha.
8Mee mu tẹ mu nweru ẹhu ụtso,
tee ẹswa, nke ọwhu mụbe onye
ono, i gwepyashiru ọkpu egwepyashi l’e-te ẹswa.
9Wocha iwhu tị ba awhụ
iwhe-dụ-ẹji ono, mu metagbaberu.
Hufukota ejo-iwhe, mu megbaberu.
10Byiko Chileke, kenuru obu
gụru iwhoro nụ mu, gụ eworu ume ọwhuu ye mu l’ẹhu
nke ọwhu mu l’a-nọ anụru ghu okfu.
11Ba achịfukwa mu l’atatiwhu ghu.
Gụ eje anafụkwa mu Ume-Dụ-Nsọ nkeghu.
12Nụ-whunu mu ẹhu-ụtso ono azụ.
Mbụ ẹhu-ụtso ono, shi l’adzọfuta ono, ị dzọfutaru mu.
Mee t’ome uche ghu wheje mu
uwhere, nke ọwhu mu l’a-nọpyabe ghu l’ẹka.
13Ọo ya bụ ndụge mu ezhia
ndu l’anọje emeswe ghu nụ ụzo ghu.
Ndu l’eme iwhe-dụ-ẹji l’adakọbe lwakfuta ghu.
14Dzọfuta mu l’ikpe ọchi, mu gburu, byiko Chileke.
Ọo ghu bụ Chileke, l’adzọfutaje mu nụ.
Ọo ya bụ ndụge mu egude
ẹhu-ụtso gụa egvu, sụ l’ị dụ chịriri.
15Gụbe Onye-Nwe-Ọha, kụhaa mu ọnu
nke ọwhu mu l’a-ja ghu ajaja.
16Ọ -bụ l’ọo ngwo-ẹja bẹ l’iile
ẹnya iya mẹ mu egwokwaru iya nụ ghu.
Ọle ngwo-ẹja m’o -beru ọ bụru ngwo-ẹja
ọkpokota-iwhe-ọku te emekwa t’ẹhu tsọo ghu ụtso.
17Ngwo-ẹja ọwhu Chileke
l’anatajẹ bẹ bụ áwhụ-ooji-obu
nke iwhe dụ ẹji, madzụ meru.
Onye áwhụ jiru obu l’iwhe dụ ẹji,
o meru, nzhimanụ lwa iya azụ
bẹ gụbe Chileke l’ẹte akpọjekwa ẹbo-ẹbo l’afụ.
18Menua Záyọnu t’ọ jakerehu,
eshi-ọwhu ọ dụ ghu l’obu.
Tụkwanua mgbodo Jerúsalẹmu.
19Ọo ya bụ ndụge a wata anọ
egworu ghu ngwo-ẹja, dụ
chịriri, a gbalahaarụ ghu mgbẹja ọkpokota-iwhe-ọku,
gbulahaaru ghu oke-eswi l’ẹnya-mgbẹja ghu.
52Ẹ́vù, Dévidi kwarụ nụ onye ishi egvu
Nteke ọ kwarụ iya bụ nteke Dowẹgu, onye Edọmu bya agbaarụ Sọlu ama sụ iya lẹ Dévidi nọ l’ibe Ahimẹleku
1Gụbe oke dụ ike, ?ndẹhunu
iwhe meru g’o gude i gude
oome ejo-iwhe eku onwoghu eku?
?Tị madụ lẹ n-yemobu Chileke l’a-nọ jeye lẹ gbururu?
2Iwhe l’ịinoje atọ ẹtomu iya bụlewho ejo-iwhe.
Ire ghu l’atsụ nkọ g’ọo akwọ, a barụ ababa.
Iwhe lile, l’iime bụkota ụgho.
3Ị ka oye ejo-iwhe obu amamẹ iwhe dụ ree.
Ọdzu ejire ka ghu ree amamẹ okfu ire-lanụ.
4Iwhe i yeru obu bụ okfurwushi
madzụ, gụbe onye ono, l’adzugbu onwoghu l’ejire.
5Sụa, Chileke l’e-mebyishikwa
ghu, mee ghu gụ abụru
kpukpuru-swoo jeyewaroya.
Ọo-wọru ghu chịi, tụfu ghu
atụfu l’ibe ghu, l’oo-wheta ghu
ewheta whefu g’ọo ẹwu l’alị ndu nọ ndzụ.
6Ndu dụ chịriri l’a-whụ iya tsụhu
egvu, whẹ achịa ya ọchi sụ:
7“Unu lewaro, onye ọwa-a bụ
onye jịkaru lẹ ya te emedu Chileke agbarike iya.
Ọo l’ẹku ono, o nweru nke be
enwehe ọdo b’o keru ike yeru.
Oogudekwawho ejo-iwhe,
l’ọonoje emeshi eko dzụdzudzu.”
8Ọo lẹ mbẹdua bẹ dụ g’ọo oshi
ólivu, dụ nonwu-nonwu nọdu l’ime eze-ụlo Chileke.
Mu l’a-chịru ụkfu kwẹe lẹ
n-yemobu Chileke jeye lẹ tututu-mịmimi.
9Mu l’a-nọdu ekele ghu ekele
jeye lẹ gbururu, l’iwhe i meru.
Mu l’a-nọdulewho nwandoo ele
ghu ẹnya l’ẹka, nkele ẹwha ghu dụ ree.
Mu l’a-nọdukwawho l’iwhu ndu nkeghu tua ghu ẹwha.
53Ẹ́vù, Dévidi kwarụ nụ onye ishi egvu, t’e gude olu áwhụ gụa ya
1Ndu eswe l’arịje l’ime obu whẹ lẹ Chileke ta adụdu.
Whẹ mebyishiwaru onwowhe.
Iwhe whẹ l’eme bụ akpamara,
ọ tọ dụdu m’ọo onye lanụ l’ime whẹ l’eme iwhe dụ ree.
2Chileke bẹ shi l’imigwe pazhita
ẹnya lee ụnwu eliwhe, tẹ ya
madaarụ ?o nweru onye ọwhu marụ iwhe?
Mbụ tẹ ya maadarụ ?o nweru onye
ọwhu l’achọ yẹbe Chileke?
3Ọle gẹ whẹ ha tụkowaru haa ụzo jewhuhu.
Whẹ tụkowaru gẹ whẹ ha mebyishihukota.
Ọ tọ dụdu t’ọ ka mma l’ọo onye lanụ l’eme iwhe dụ ree.
4Ọ dụkwa gẹ ndu ono, l’eme
ejo-iwhe ono te enwedu uche,
mbụ ndu ono, l’anọje eri ndu
nkemu g’ọo onye l’eri nri, whẹ te
ekfuje anụ mụbe Chileke ilile.
5Ndu ono bẹ ọtsu egvu guderu,
l’ẹka iwhe ọotsu egvu l’adụa.
Chileke l’a-tụkashi ọkpu ndu ono,
l’etso ghu ọgu nnanụ nnanụ.
I meru iwhe-iwhere kpua whẹ,
o noo nkele Chileke bẹ jịkaru whẹ.
6Ọ dụ mu nke t’e shi lẹ Záyọnu
bya adzọfuta ndu Ízurẹlu.
Jékọpu l’e-te ẹswa, ẹhu atsọo Ízurẹlu ụtso
mẹ Chileke melewho tẹ ndu
nkiya, a kpụru lẹ ndzụ lwawhu azụ.
54Ẹ́vù, Dévidi kwarụ nụ onye ishi egvu; t’a kpọru unu ye iya
Nteke ọ kwarụ iya bụ gẹ ndu Zifu byarụ bya asụ Sọlu lẹ Dévidi domikwaru onwiya l’echilabọ whẹ
1Gude ike ghu dzọfuta mu gụbe Chileke.
Gụ egude ọkpehu ghu haarụ mu enge.
2Nụnua ekfukfu, mu l’ekfu anụ ghu, gụbe Chileke.
Ngabẹnu nchị l’iwhe mu l’ekfu.
3Nkele o-shi-awe, o-shi-awe whẹ bẹ l’etso mu ọgu.
Ndu ejo-obu l’achọ mu egbugbu, mbụ ndu ono,
l’ẹte adụa iwhe whẹ kuru Chileke, m’ọo nnanụ.
4Ọle ọo Chileke bụ onye l’eyejeru mu ẹka.
Ọo Onye-Nwe-Ọha bụ onye gude ndzụ mu.
5Tẹ Chileke mekwaa t’ejo-iwhe,
ndu ọhogu mu meru mu dawhuru whẹ azụ.
Tẹ Chileke lakwaa whẹ l’iyi shi nno
goshi l’ọ bụ o-me-g’o-kfuru.
6Mu l’e-gude ẹhu-ụtso gwotaru ghu ngwo-ẹja.
Mu l’a-bya ekele ghu ekele
gụbe Onye-Nwe-Ọha nkele ị dụ ree.
7Ọo ghu dzọfutaru mu
l’iwhe-ẹhuka lile, byakfutaru mu nụ.
Mu gudewaa ẹnya mu whụ g’a
lwụ-gburu ndu ọhogu mu whẹ.
55Ẹ́vù, Dévidi kwarụ nụ onye ishi egvu, t’a kpọru une ye iya
1Gụbe Chileke, nụaro ekfukfu, mu l’ekfu anụ ghu.
Ba agbakwa mu nkụchi l’iwhe mu l’aryọ ghu.
2Ngabẹru mu nchị, zaa mu oku, mu l’eku ghu.
Ọriri l’echije mu ẹhu, meji ta
anmakfujeru mu anmakfuru,
3nteke mu nụru olu ndu
ọhogu mu, mẹe nteke ndu
ejo-ememe ryarụ mu daa gude yee mu egvu.
Whẹ l’ewokfuta mu nsogbu,
whẹ l’egudeje ẹhu-eghughu ekfubyishi mu.
4Obu l’achị mu whoo whoo,
anwụhu l’eye mu egvu.
5Egvu l’atsụshi mu ike, ẹhu l’anma mu jijiji.
Ishi l’anyịko mu anyịko.
6Iwhe mu kfuru bụ: l’ọ dụ mu
nke tẹ mu kpaa ẹba g’ọo ndo,
whehu je achọo ẹka mu l’a-nọdu tụta ume,
7mbụ whemihu ewhemihu je eburu l’echi-ẹgu,
8mu gẹge emekebe ẹgwegwa whefu
je achọo ẹka lanụ, mu l’a-nọdu ezeru ndzụ,
shi nno lụfu l’oke whẹrewhere-ẹ mẹe l’oke akpara-mini-a.
9Byiko, Onye-Nwe-Ọha,
mebyishinua iwhe ndu ono,
l’eme ejo-ememe ono tụberu nke ememe.
Ghasweshinua whẹ olu-okfu aghasweshi.
Nkele iwhe mu whụru lẹ mkpụkpu ono
bụ iwhe-kpanganga yẹle esemokfu.
10Eswe l’ẹnyashi bẹ whẹ l’agba
mgbodo mkpụkpu ono gorogoro,
Iwhe jiru ime mkpụkpu ono
bụlewho ejo-iwhe yẹle nsogbu.
11Ndu emebyi bẹ bụ whẹ nọ l’ime mkpụkpu ono,
mmegide yẹle ụgho ta agvụ iya agvụgvu.
12Ọ -bụ l’ọo ọhogu mu l’ekfuru
mu gẹ mu l’adụa, mẹ mu atagbukwaa ya lẹ nshi.
Ọ -bụ l’ọo onye mu dụ ashị bẹ
l’ekeru mu tụhaa, mẹ mu
edomikwaaru iya onwomu.
13Ọle ọo gụbe onye mu l’iya bụ
iwhe lanụ, onye mu l’iya l’atụ ọli, bụru ẹguru ọnya mu,
14mbụ gụbe onye mu l’iya
l’edzupyashi idzu, l’atsọ ụtso,
onye mu l’iya l’atụkoje nọdu l’eze-ụlo Chileke abarụ iya ẹja.
15T’ọnwu byakwa egbua ndu ọhogu mu.
T’e likwaa whẹ l’ọno ndzụ.
Nkele ejo-iwhe kwawaru
nkwatankwa l’ime obu whẹ.
16Ọle mbẹdua bụ Chileke bẹ mu l’aryaku,
Yẹbe Onye-Nwe-Ọha l’e-megee dzọfuta mu.
17L’urwẹnyashi mẹe l’ụtsu mẹe
l’eswe bẹ mu l’egudeje olu áwhụ echiku iya lẹ mkpu.
O je l’a-nụ olu mu.
18Ọo-gbafụta mu l’ọgu ono, mu
l’alwụ, t’ọ bọ dụ iwhe l’e-me mu nụ.
Ndu ọhogu mu hakwa m’ọo l’igwe
ọha agha bẹ l’ọo-gbafụtale mu-a.
19Chileke, bụ onye shi l’edenwede
nọduta l’oshi-eze iya bẹ l’a-nụ
olu mu, nụa whẹ chịikfuu,
eshi-ọwhu whẹ jịkaru ọgha umere, whẹ ta atsụ Chileke egvu.
20Onye mu l’iya shi atụ ọli tsoru
ndu whẹ l’iya l’eshi ọnya ọgu,
shi nno mebyia ọgbandzu, whẹ l’iya gbarụ.
21Okfu, shi iya l’ọnu dụ bẹlebele
g’ọo mmanụ ụko, ọle iwhe jiru iya obu bụ ndụmashi.
Okfu iya l’atụ atụtu g’ọo mmanụ
ụrwazhi, ọle ọotsu nkọ g’ọo nkogo.
22Unu tụko iwhe l’atsụ unu l’ẹhu
ye Onye-Nwe-Ọha l’ẹka,
Oo-gudeshia unu ike.
Ọ tọ byadụ l’e-kwe tẹ ndu-dụ-chịriri daa.
23Ọle ọo gụbe Chileke l’a-chịta
ndu l’eme ejo-ememe chịru ye
l’ime ilu, ẹka whẹ l’a-nọdu reshihu.
Ndu l’egbu ọchi mẹe ndu
ntuwhu-ire bẹ l’ẹte anọfudu ndzụ l’ishi.
Ọle mbẹdua bẹ bụ ghu bẹ mu dakoberu.
56Egvu-ọma, Dévidi deru nụ onye ishi egvu; t’e gude olu egvu, l’eekuje “Ndo Beru lẹ Achị, Nọ Otẹnya” gụa ya
Nteke o deru iya bụ gẹ ndu Fílistiya guderu lẹ Gatu
1Gụbe Chileke, whụaru mu rọo imiko,
nkele ndu madzụ l’achịkwa mu kpakekpake.
Mbọku, fụtaru l’igwe bẹ ndu
ọhogu mu l’akabajẹe mu ọkpa ẹhu.
2Mbọku mbọku bẹ ndu ọhogu
mu l’anọje achị mu kpakekpake.
Ndu l’eku onwowhe gẹ whẹ l’ahaa
bẹ ha l’urwu etso mu ọgu.
3Egvu -wata mu atsụtsu, bụ ghu bẹ mu l’adakobeje.
4Ọo Chileke ono, mu l’anọje
aja okfu iya ajaja ono bẹ mu dakoberu.
Mu ta abyadụ l’atsụ egvu.
?Ọo gụnu bẹ madzụ mmaanụ l’a-dụ ike mee mu.
5Ntekenteke bẹ whẹ l’ewojeru
okfu mu ghaa ịgharawhu.
Iwhe l’abụjelewho ọriri whẹ bụ
gẹ whẹ l’e-shi mee mu ejo-iwhe.
6Whẹ dzukoberu bya edomishia onwowhe.
Whẹ l’anọje ege ẹka mu dzọru
ọkpa ngge, tẹ whẹ gude geta mu ishi.
7Byiko Chileke, be ekwekwa tẹ whẹ laa ẹwoma.
Gudenu oke ẹhu-eghughu ghu
chitsushia ndu ono gẹ whẹ ha.
8Ị mawarụ gẹ iwhe ono l’atsụ-be mu l’ẹhu.
Ị mawarụ gẹ mu ryaberu ẹkwa.
?Tị tụkodunua iwhe lile ono dekota l’ẹkwo ghu?
9Mu -ryakule ghu whọ bẹ ndu
ọhogu mu l’a-dakọbe tsuwhu azụ.
Ọwhu doru mu ẹnya bụ lẹ Chileke nọ l’ẹka iya nkemu.
10Ọo Chileke ono, mu l’anọje aja okfu iya ama,
mbụ Onye-Nwe-Ọha ono, mu l’anọje aja okfu iya ajaja,
11ọo Chileke ono bẹ mu dakoberu.
Mu ta abyadụ l’atsụ egvu.
?Ndẹ-zhia iwhe madzụ mmaanụ l’a-dụ ike mee mu?
12Gụbe Chileke, iwhe mu riburu lẹ nte lẹ mu l’e-meru ghu
bẹ mu mefutajekwa.
Mu l’a-bya egworu ngwo-ẹja ekele nụ ghu.
13O noo nkele ị nafụtaru ndzụ mu
l’ẹka ọnwu, bya emekwaawho
tẹ mu be evukota iwhe daa iko.
Ọo ya bụ nke ọwhu mu l’a-dzọ ije
l’iwhu Chileke l’ẹka iwhoro dụru ndu nọ ndzụ.
57Egvu-ọma, Dévidi deru nụ onye ishi egvu; ishi egvu iya bụ “Be emekwa tẹ mu laa l’iyi”
Nteke o deru iya bụ nteke ọ nahụru Sọlu gbala, je anọdu l’ime ọgba
1Gụbe Chileke, whụaru mu imiko.
Byiko, whụaru mu rọo imiko.
Nkele ọo l’ẹka ghu bẹ mu nọ ezeru ndzụ.
Mu l’a-nọdu lẹ mkpula oke akwẹka ghu ezeru ndzụ,
jeye nteke ejo-iwhe-ẹhuka-a, byarụ mu nụ l’a-gvụkota.
2Mu l’aryaku Chileke, bụ
Ọkalibe-Kangokotaru-Nu,
mbụ Chileke, l’atụkoje iwhe lile mekotaru mu.
3Oo-shi l’imigwe zhia t’a bya adzọfuta mu,
bya emeru iwhe iwhere nụ
ndu ono, l’achị mu kpakekpake.
Chileke l’e-goshi mu l’o yeru mu obu,
bụru onye l’akfụshi ike l’iwhe o kfuru.
4Mu nọ l’echilabọ oduu-gburu-agụ,
mu zẹkwa l’echilabọ anụ-ẹgbudu, l’atajẹ anụ madzụ.
Ndu ézé whẹ dụ g’ọo arwa, dụ g’ọo akfụ,
ire whẹ l’atsụ nkọ g’ọo ogu-ịgba.
5Goshinu ndiwhe lẹ g’ị paberu
ẹka, mbụ l’ị nọghataru akpamigwe anọghata,
tẹ ndiwhe l’owhu whụnu lẹ g’ị dụ-be biribiri.
6Whẹ geru ụgbu kwabẹru mu l’ụzo, mu l’eshi.
Ọo ya bụ, ẹhu rwụrwuhule mu whọ arwụrwuhu.
Whẹ gbashi je ebua nsụ dobe mu l’atatiwhu.
Ọle whẹ megeeru daba lẹ nsụ ọbu l’onwowhe.
7Sụa, gụbe Chileke; obu shihukwaru mu ike,
obu shihukwaru mu ike,
mu je l’a-gụ egvu gude tua ghu ẹwha.
8Obu mu, tehu nwụru ẹnya,
Unu tehu nwụru ẹnya, unubẹ ogele mẹe une,
nkele mbẹdua l’e-gudekwa egvu
kutee gẹregere chi-asahu lẹ mgbẹnya.
9Mu l’a-nọdu l’echilabọ ndiwhe
kele ghu ekele gụbe Onye-Nwe-Ọha.
Mu l’a-nọdukwawho l’echilabọ mba
lile gụa egvu gude jaa ghu ajaja.
10O noo nkele n-yemobu ghu parụ ẹka.
Ọ tụkoru imigwe l’owhu vọo kfurukfuru.
Ire-lanụ nkeghu dzuru akpamigwe.
11Goshinu ndiwhe lẹ g’ị paberu
ẹka, mbụ l’ị nọghataru akpamigwe anọghata,
tẹ ndiwhe l’owhu whụnu lẹ g’i dụ-be biribiri.
58Egvu-ọma, Dévidi deru nụ onye ishi egvu; ishi egvu iya bụ “Be emekwa tẹ mu laa l’iyi”
1Unubẹ ọgbo-ikpe, ?o nweru-a
nteke okfu, kfụru ọto l’eshije unu l’ọnu fụta?
?Unu kfụbejeru-a ẹka ọto kpee ụnwu eliwhe ikpe?
2Waawakwa, iwhe unu l’arịje l’ime obu unu bụlewho
g’unu l’e-shi mee iwhe l’akfụaru nhamụnha.
Ọ bụru iwhe-kpanganga bẹ unu l’anọje ekeru ụnwu eliwhe.
3Ndu ejo-ememe l’eshije lẹ
nteke whẹ nọkwadu l’ẹwho ne whẹ shiswee ụzo.
Nteke a dụkwaduroo ime whẹ bẹ whẹ l’akpawhuhuje.
Ọdzu ejire shi whẹ lẹ dẹedeede.
4Ẹru, whẹ l’atajẹ l’egbu egbugbu g’ọo ẹru ejo agwọ.
Whẹ swọ-chishigeeru iwhe lẹ
nchị dahụ nkụchi g’ọo oghu,
5g’ọo oghu, l’ẹte anụhe opu, onye
rwaru iya ẹka l’iwhu l’egbu,
gude ekfuru iya okfu, m’o beru
onye l’egbu opu ọbu marụ iya ọma-agha.
6Kpaa whẹ eze, dụ whẹ l’ọnu byiko Chileke.
Jiko Onye-Nwe-Ọha, swọshinua
oduu ono ẹpyi ono, nọ-gee whẹ l’ọnu ono.
7Tẹ whẹ tashịhukwa g’ọo ẹka
mini sọru asọso sọghata.
Nteke whẹ setaru ụta whẹ tẹ whẹ
gbaa, mekwaa t’akfụ whẹ bụru adụrugba.
8Tẹ whẹ dụ g’ọo eji,
rwubashihuru erwubashihu.
Tẹ whẹ be egudekwa ẹnya whẹ
whụa ẹnyanwu g’ọo ẹwho alụfu.
9Nke ọwhu bụ, ẹswa, a tsụberu
l’ite -bya l’eme t’ọku ngaa ike ite ono,
Chileke egudewaa oke ẹhu-eghughu iya zhikota ite ono g’ọo
oke whẹrewhere, o beru iwhe e
shiberu l’ite ono dụkwadu oyii, ọdua l’ọobyawa egheghe.
10Ndu dụ chịriri bẹ ẹhu l’a-tsọ ụtso, mẹ whẹ whụlewho
lẹ Chileke l’akfụwaa
ndu ejo-ememe ụgwo iwhe-dụ-ẹji, whẹ meru,
mbụ mẹ whẹ gbudelewho ndu ejo-ememe pyaapyaa.
11Ọo ya bụ, ndiwhe awata okfu
sụ: “Nke bụ ezhi-okfu bụ lẹ ndu-dụ-chịriri
bẹ obunggo dụru.
Nke bụ ezhi-okfu bụ l’o nweru
Chileke, l’ekpeje eliwhe-e ikpe.”
59Egvu-ọma, Dévidi deru nụ onye ishi egvu; ishi egvu iya bụ “Be emekwa tẹ mu laa l’iyi”
Nteke ọ gụru iya bụ nteke Sọlu yeru ndu nche, l’e-je anọdu eche ụlo, ọ nọ nche t’e gbua ya
1Nafụta mu l’ẹka ọhogu mu, byiko Chileke mu.
Gbochitakwa mu l’ẹka ndu ono
wulihuru wụpyabe mu.
2Nafụta mu l’ẹka ndu ono l’eme ejo-iwhe.
Dzọo mu l’ẹka ndu mgbugbu madzụ ono.
3Gụbe Onye-Nwe-Ọha, lewaro
gẹ whẹ domishiru onwowhe kwabẹru ndzụ mu.
Ndu nweru ọkpehu wulihuru etso mu okfu, l’ẹbe ọbu
l’o nweru iwu, whẹ tụru dụ ọwhu, mu mebyijeru,
tọ dụ gẹ whẹ ha, mu meswejeru.
4Whẹ gbarụ je edozhia onwowhe
tẹ whẹ tsoo mu ọgu, l’ẹbe ọdu ejo-iwhe, mu meru whẹ.
Byiko gbalihunu, bya eyeru mu ẹka.
Whụnu ẹgube ejo ọnodu, mu nọ l’iya.
5Jiko Onye-Nwe-Ọha, bụ Chileke,
bụ Ọkalibe-kakọta-ike,
bya abụru Chileke nke ndu Ízurẹlu,
tehu etehu, je anụa ndu mba gẹ mba ha awhụ.
Ba adụkwa onye l’ime ndu
ejo-ememe ono, l’akwabẹje ẹnya eme iwhe l’a-tsụru
ibe whẹ, l’ịi-whụru imiko.
6Ọobuje, whẹ -lwa l’urwẹnyashi,
whẹ aba hanyị-hanyị g’ọo nkụta,
tsoru mkpụkpu ejewhe.
7Lewaro ẹnya, whẹ -saa ọnu whẹ edua nkọ g’ọo
ẹgube-ẹ nkụta l’abọo erwumu.
Ogu-ịgba l’eshije whẹ l’ire agụshi.
Whẹ l’anọje arị l’ọ tọ dụdu
onye nụru iwhe whẹ l’ekfu.
8Ọle ọo ọchi bẹ gụbe
Onye-Nwe-Ọha l’anọjelee achị whẹ.
Ọo ọchi bẹ ndu mba gẹ mba ha ono l’anọje ezhi ghu.
9Ọo gụbe Chileke bụ agbarike mu.
Mu wowaru ẹnya dobe l’ẹka ị nọ.
Ọo l’ime ghu bẹ mu gbabaru je ezeeru ndzụ.
10Chileke, bụ onye yeru mu obu bẹ l’a-gba mu ndzuta.
Chileke l’e-me tẹ mu gude ẹnya mu whụ gẹ ya l’e-shi
lwụ-gbua ndu ọhogu mu.
11Be egbukwa whẹ egbugbu
gụbe Onye-Nwe-Ọha, bụ onye mgbochita anyi.
Ọdua bẹ ndibe anyi l’a-nyazọkwa iya.
Gudechia ike nkeghu chịkashia whẹ.
Gụ emee whẹ, t’ọ bọ dụ iwhe whẹ l’a-bụ.
12Ọo mkpọkoro okfu l’eshije whẹ l’ọnu afụshi.
Mbụ l’okfu, l’eshije whẹ l’ogboromọnu fụta
l’abụkotaje iwhe-dụ-ẹji.
Whẹ l’egudeje ọnu whẹ adzụ ejire,
gude iya atụ ibe whẹ ọnu.
Ọo ya bụ, t’ekuku ono, whẹ l’eku onwowhe ono
nmakwa whẹ g’ọo ọnya.
13Gudenu oke ẹhu-eghughu ghu kee whẹ g’ọo ọku.
Kegbushia whẹ jeye nteke whẹ l’a-gvụkota.
Ọo ya bụ, ụnwu eliwhe l’owhu amarụ l’ọo Chileke bụ
Eze, l’achị Jékọpu, ọ bụru iya
bụ eze l’achị eliwhe kpaa-whuu.
14Ọobuje, whẹ lwa l’urwẹnyashi,
whẹ aba hanyị-hanyị g’ọo nkụta,
tsoru mkpụkpu ejewhe.
15Whẹ l’anọje awuwhe achọ ẹka whẹ l’e-ri nri.
Ọ -bụru lẹ whẹ te rijidu ẹwho, whẹ agbọlahaa ụja g’ọo nkụta.
16Ọle mbẹdua l’a-gụ egvu gude
tụa ọnu g’ọkpehu ghu habe shii.
Ụtsu mbọku mbọku bẹ mu l’a-gụje
egvu ẹhu-ụtso gude goshi g’oye obu ghu habe.
O noo nkele ọo l’ime ghu bẹ mu
l’agbabajẹ je edomia onwomu.
Ọ bụru ghu bẹ mu l’agbabajẹ l’ime je ezeeru ndzụ,
mẹ mu l’eje iwhe-ọtsulanu.
17Gụbe ike, dụ mu nụ; mu l’a-gụ egvu tua ghu ẹwha.
O noo nkele ọo l’ime ghu bẹ mu gbabaru je
edomia onwomu, gụbe Chileke, bụ onye yeru mu obu.
60Egvu-ọma, Dévidi deru nụ onye ishi egvu; t’e gude olu egvu, l’eekuje “Nkashị-iyi Ọgbandzu” gụa ya
Nteke o deru iya bụ nteke whẹ lẹ ndu Arámu-naharayimu60:0 Ẹ tii kua iya Arámu-naharayimu; gụ ekua ya Mesopotémiya. mẹe ndu Arámu Zoba lwụru ọgu, mbụ nteke ono, Jowabu lwarụ bya alwụshi ndu Edọmu ọgu lwụ-gbua whẹ; gbua ụnu ojọgu ụkporo l’iri lẹ nsụda Únú
1Gụbe Chileke, ị jịkawaru anyi
woru anyi tụkaa nnanụ nnanụ.
I shi avụru anyi ọvuma. Ọle ntaa bẹ anyi l’aryọ ghu sụ:
T’i chebenuru anyi iwhu ọdo byiko.
2I meru alị-a, ọ nmaa jijiji, bya emee ya, o kfuwashihu ekfuwashihu.
Mekwanua ẹka ọ gbarụ ọru nkele oozekwa ezeze.
3I hawarụ ndibe ghu, whẹ jee tịitoo, mbụ l’iichewaru
anyi mmẹe, anyi ngụta iya akpọ galagala.
4Ndu l’atsụ egvu ghu bẹ
l’iipalijeru ẹkwa-ọhubama nkeghu,
nke ọwhu whẹ l’a-whụ iya wukfuta ghu,
shi nno zeeru ọnu akfụ.
5Gudenu ẹka-ụtara ghu dzọfuta anyi.
Nụnua ekfukfu, anyi l’ekfu anụ ghu,
nke ọwhu l’ee-shi nno dzọo ndu i yeru obu.
6Chileke nọwaa l’ụlo iya, dụ nsọ kfua okfu sụ:
“Mu l’a-nọ atụ orooroo eke alị ndu Shékemu,
woru nsụda Sukọtu washịa.
7Giledu bụ nkemu, Manáse bụru nkemu.
Ífuremu bụ okpu, mu kpu l’ishi.
Juda bụru oshi-ọpa-l’ẹka-eze, mu l’apajẹ l’ẹka.
8Moabu bụ ochi, mu l’akwọje ọkpa.
Ọ bụkwanuru lẹ Edọmu bẹ
mu l’eyeshije akpọkpa mu dobe.
Obodo Fílistiya bẹ mu tụwaru okoo kpua.”
9?Ọo onye l’e-du mu chịriri werere duba lẹ
mkpụkpu ono, a tụru tụshia ike?
Mbụ, ?ọo onye l’e-duru mu duba lẹ Edọmu?
10Ọ kwa gụbe Chileke bụ onye ọbu.
Ọle ị gbẹ jịka anyi.
Ti kwejehe tsoru ndu ojọgu anyi eje ọgu.
11Yeru anyi ẹka byiko, t’anyi
lwụ-gbua ndu ọhogu anyi,
nkele ẹka ọwhu madzụ l’eye bụ iwhe-iwhoro.
12Ọle Chileke nọduwaa swiru anyi bẹ anyi l’a-lwụ
ọgu mkparawa lwụ-gbua whẹ.
Chileke l’e-hu ndu ọhogu anyi dụruru l’alị.
61Egvu, Dévidi deru nụ onye ishi egvu; t’a kpọru une ye iya
1Nụnu ẹkwa, mu l’arya byiko Chileke.
Ngabẹ nchị l’ekfukfu, mu l’ekfu anụ ghu.
2Mu nọ l’ẹka mgboko beru aryaku ghu.
O noo nkele meji l’atọfu mu atọfu.
Dunuru mu je edobe l’oke-ẹwhuru, ka mu l’eli.
3Nkele mu gbabawarụ l’ime
ghu bya edomia onwomu.
Ọ bụkwaru ghu whọ bụ
ụlo-mgbochita,
mu nyihuru gude nahụ ndu ọhogu mu.
4Ọogukwa mu ẹgu tẹ mu buru l’ibe ghu
jeye lẹ tututu-mịmimi,
mbụ tẹ mu nọdujewaro lẹ mkpula
eze akwẹka ghu ezeru ndzụ.
5Nkele gụbe Chileke nụwaru
iwhe mu riburu lẹ nte lẹ mu l’e-meru ghu.
I mewaru tẹ mu tsoru ndu
l’akwabẹ ẹwha ghu ugvu, keta
oke iwhe-ọma ono, l’iimejeru whẹ.
6Menua tẹ ndzụ eze tsee ogologo.
T’ọ nọdu ndzụ shi l’ọgbo rwua l’ọgbo.
7T’oshi-eze iya nọdunu l’atatiwhu Chileke jeye lẹ gbururu.
Byiko t’iwhe, l’ii-gude eche iya
nche bụkwaru n-yemobu ghu, yẹle ọkfushi ike ono,
l’ịikfushije l’iwhe i kfuru.
8Ọo ya bụ ndụge mu agụa egvu gude tua ghu
ẹwha jeye lẹ gbururu,
bya emekota iwhe lile, mu riburu lẹ nte nke
ememe mbọku mbọku.
62Egvu-ọma, Dévidi deru nụ onye ishi egvu, bụ Jedutunu
1Ọo lẹwho Chileke kpụ bẹ mu nọdu ngabẹru.
Nkele ọo ya bụ onye l’a-dzọfuta mu.
2Ọo yẹbedua nwẹkiya bẹ bụ eze-ẹwhuru nkemu.
Ọ bụru iya bụ Chileke, l’adzọfutaje mu nụ,
bụru onye mu l’agbabajẹ l’ime iya, ya edomia mu.
Ọo ya bụ l’ọ tọ dụdu onye
bya l’e-nwubata mu enwubata.
3?Ọo nteke ole bẹ unu l’e-tsube
madzụ otsu kputukputu?
G’unu hakọta bẹ l’e-bechaa bụru kpurupyata,
g’ọo ẹka mgbodo, ọdua l’ọo
ụwho zeru tugbushia ndu nọ iya l’ime.
4Iwhe unu l’eshibeje ite iya bụ
g’unu l’e-shi nwufu iya l’oshi-eze iya ono.
Ọdzu ejire l’atsọ unu ụtso shii.
Unu l’egudeje ogboromọnu unu
agọru madzụ ibe unu ọnu.
Ọle ime obu unu bẹ unu l’anọje atụ whẹ ejo ọnu.
5Ọo lẹwho Chileke kpụ bẹ obu mu darụ ngabẹru.
Nkele ọo ya nwẹkiya bẹ mu l’ele ẹnya l’ẹka.
6Ọo yẹbedua nwẹkiya bẹ bụ eze-ẹwhuru nkemu.
Ọ bụru iya bụ Chileke, l’adzọfutaje mu nụ,
bụru onye mu l’agbabajẹ l’ime iya, ya edomia mu.
Ọo ya bụ l’ọ tọ dụdu onye bya
l’e-nwubata mu enwubata.
7Adzọfuta, l’aa-dzọfuta mu bụ l’ẹka Chileke b’ọ nọ,
Ugvu, l’’aa-kwabẹ mu bụkwaru iya whọ b’ọ nọ l’ẹka.
Ọo Chileke bụ eze-ẹwhuru mu,
ọ bụkwaru iya whọ bẹ mu nọ l’ẹka ezeru ndzụ.
8Unu dakobe iya ntekenteke unubẹ ụnwu eliwhe.
Unu gheberu iya obu unu ọnu.
L’ọ kwa Chileke bụ onye anyi nọ l’ime iya ezeru ndzụ.
9Amadụ bụ udzu-ọnu.
Ohu bụru iwhe l’adụa iwhe ọ bụ.
Ọ -bụru t’e doo whẹ lẹ nkata
marụ gẹ whẹ l’anyị-be ẹrwa
bẹ whẹ tụkoru bụru iwhe-iwhoro.
10Unu ba akpọkwaru obu ye l’ọkpa ndu ọdo ẹhu.
Unu eje egudekwa ọna nfụ eku onwunu eku.
O -beru ẹku l’abyarụ unu nyịmu-nyịmu,
unu ba akpọkwaru obu ye iya.
11Chileke kfuakwaru iwhe-e ugbo lanụ,
mbẹdua gudewaa nchị mu nụa ya ugbo labọ,
l’ọo Chileke bẹ nwekota ike lile.
12L’ọo gụbe Onye-Nwe-Ọha bẹ
n-yemobu kụru ishi l’ẹka.
O noo nkele iibuje onyenọnu obunggo,
rwuberu iwhe o meru.
63Egvu-ọma, Dévidi deru nteke ọ nọ l’echi-ẹgu alị Juda
1Gụbe Chileke, ọo ghu bụ Chileke mu.
Ọo ghu bụ onye mu l’anọje
ele ẹnya iya eleshi iya ike.
Ẹkpiri gụbe Chileke l’anọje akpọ obu mu nkụ.
Eghoro ghu l’adụje mu l’echi-ẹgu,
l’alị ọkponku, mini l’adụa.
2Gẹ mu l’e-mebukwaa whụ ike ghu
mẹe ọ-dụ-biribiri ghu,
ẹgube mu shi awhụje iya l’ụlo ghu ono, dụ nsọ.
3Mu l’e-gude ọnu mu jaa ghu ajaja,
o noo nkele n-yemobu ghu ka ndzụ ree.
4Mu l’a-nọje ekele ghu ekele jeye gẹ mu l’a-nọ-be.
Mu je l’e-gudeje ẹwha ghu
achili ẹka imeli ekfu anụ ghu.
5Obu mu bẹ ẹwho l’e-ji g’ọo onye riru nri,
e gude ẹba anụ mẹe ụmi ọkpu shia.
Ọnu mu agụa egvu gude tua ghu ẹwha.
6Ọobuje, mu -zẹe l’ugbooshi mu,
mu anyata ghu.
Ẹnyashi owhu bẹ mu l’arịkotaje nkeghu.
7Mu nọ lẹ mkpula oke akwẹka ghu agụ egvu ẹhu-ụtso.
O noo nkele ọo ghu bụ onye l’eyejeru mu ẹka.
8Mu l’anọduje ghu ntse ntekenteke.
Ọ bụru ẹka-ụtara ghu bẹ gudeshi mu ike.
9Ndu l’achọ ụzo, whẹ l’e-shi kpawhua mu ishi
bẹ l’aa-chịru ye l’alị-maa.
10Ee-gude ogu-ịgba gbua whẹ pyaapyaa.
Whẹ abụru nri, a kpatarụ doberu awuru.
11Ọle Chileke l’e-me t’ẹhu tsọo eze ụtso.
Iwhe bụ-zhia ndu l’egudeje ẹwha Chileke
ribua nte iwhe whẹ l’e-me bẹ l’e-tu iya ẹwha.
Ọnu abụru ndu ntuwhu-ire whẹ kpụrukujingu.
64Egvu-ọma, Dévidi deru nụ onye ishi egvu
1Byiko Chileke, ngabẹnu mu nchị l’olu,
mbụ l’ẹyo ẹhu mu.
Mu l’atsụkwa ndu ọhogu mu egvu.
Gbochitanu mu l’ẹka whẹ nọ.
2Dominua mu t’ejo-idzu, ndu ejo-ememe l’achịru mu
be erwu mu l’ẹhu,
mbụ hanyịnyi, whẹ l’abarụ mu,
mbụ ndu ono l’eme ejo-iwhe.
3Whẹ l’abajẹ ire whẹ aba g’ọo onye l’aba mma.
Whẹ l’atụfuje ejo okfu g’ọo onye l’agba akfụ.
4Whẹ l’edomije onwowhe
kwabẹru onye l’adụa iwhe o meru.
Onye ono -bya l’amadeshiwaa,
akfụ abụwaru iya nụ l’ẹhu gụrumu.
O to nwedu iwhe egvu iya l’atsụ whẹ m’ọo nnanụ.
5Whẹ l’agbẹje ibe whẹ ọkpu ike
tẹ whẹ kebe ẹhu l’ome ejo-iwhe.
Whẹ l’ekfuje sụ lẹ whẹ l’e-je
agbabẹ-gee ọnya whẹ lẹ mpya.
Whẹ kfugee nno, whẹ asụ:
“?Ọo kwanụ onye bya l’a-whụ whẹ?”
6Whẹ l’achịje ejo-idzu sụ:
“Idzu, anyi chịru ntaa dụ ree dụshia ya ike.”
Uche madzụ mẹe obu iya bẹ pakwarụ ẹregede.
7Ọle Chileke l’e-seta akfụ iya gbaa whẹ.
Whẹ -bya l’amadeshiwaa, ya agbata whẹ tụa l’alị.
8Whẹ l’e-gude ọnu whẹ kfuta
ọla-l’iyi doberu onwowhe.
Iwhe bụ ndu whụru whẹ nụ l’e-whuwhe ishi ewhuwhe.
9Ndiwhe kpaa-whuu l’a-wata ọtsu egvu.
Whẹ awata okfukashi iwhe ono, Chileke meru,
whẹ abya arịa ya arịri.
10T’ẹhu tsọo ndu dụ chịriri ụtso l’ime Onye-Nwe-Ọha.
Tẹ whẹ gbabakwa l’ime iya je domia onwowhe.
T’iwhe bụ ndu obu whẹ gụru iwhoro
tukwaa ya ẹwha.
65Egvu-ọma, Dévidi deru nụ onye ishi egvu
1Gụbe Chileke, ọ dụ ree t’anyi
nọdu lẹ Záyọnu tua ghu ẹwha.
Anyi l’e-medzukotaru ghu iwhe anyi riburu ghu lẹ nte.
2Ọo gụbe onye ono, l’anụje
ekfukfu anyi l’ekfu anụ ghu
ọo ghu bẹ madzụ lile l’a-wụ-kfuta.
3Nteke iwhe-dụ-ẹji shi kapyabẹ anyi l’ẹnya
bẹ l’ịigujeleru-a anyi nvụ l’ejo-iwhe anyi meru.
4Ẹhu-ụtso bụ nke onye ono, ị
họtaru dokube onwoghu
Tẹ gụ l’iya buru eburu l’ibe ghu.
Iwhe ọma, dụ l’ibe ghu l’ejije anyi ẹwho,
mbụ iwhe ọma, dụ l’eze-ụlo nsọ ghu ono.
5Gụbe Chileke, bụ onye ndzọta anyi,
iwhe l’iigudeje za anyi oku bụ iwhe dụ egvu,
l’egoshi ọ-dụ-chịriri nkeghu.
Ndu bu l’ẹka igwe beru alị beru,
mẹe ndu, bu lẹ mgboro ẹnyimu, kakọta otẹnya
bẹ bụ ghu bẹ whẹ chịru ụkfu kwẹkota,
6mbụ gụbe onye ono, bụ ọkpehu ghu b’i gude
dobegee ugvu l’ẹka whẹ nọ,
whẹ kpọ-geeru akpọru l’ẹka whẹ nọ-gee.
I keru onwoghu ọkpehu g’ọo onye keru akpọ l’ukfu.
7Ẹnyimu, l’asọ gborogboro bẹ l’iimeje, ya ederu gẹe,
shi nno tụ-buhu akpara.
Ùtsú, l’ada lẹ mba gẹ mba ha bẹ
l’iimeje t’ọ daa gbẹe.
8Ndu bu otẹnya bẹ l’anọje anma kpakpakpa
Mẹ whẹ nụa nke iwhe dụ biribiri, l’iimegbabe.
Ndu shi l’ụzo ẹnyanwu-awata
mẹe ndu ụzo ẹnyanwu-arịba
bẹ l’iimeje tẹ whẹ tụa ụzu-ẹhu-ụtso.
9Mgboko b’i letaru ẹnya, agba iya mini,
shi nno mee ya, ọ bụru alị l’emehuje iwhe.
Ẹnyimu gụbe Chileke b’i meru tẹ mini ji ejiji.
Iigudeje iya mee t’iwhe ụnwu-eliwhe
kọberu l’alị mehu ọkpobe emehu,
ọ bụru ẹgube ono bụ g’i meru iya t’ọ dụ.
10Ẹnyoru okfu bẹ l’ịigbaje mini ya atsụru iya atsụru.
Ọwhube okporo bẹ l’iimeje tẹ mini ngụgoo angụgoo.
Iigudeje mini mee igbo iya, ya adụ bẹlebele,
shi nno gọru ọnu-ọma nụ alị ono,
mee t’iwhe, a kọberu iya fua efufu mịa amịmi.
11Iimeje tẹ nri dụ shii l’awha, shi nno tube awha ọbu ugo.
Iwhe bụ ẹka ị gharụ bẹ nri l’adụje nyakfụnyakfu.
12Echi-ẹgu bẹ ẹwu furu nyịnwua anyịnwu.
Ugvu bẹ ẹhu-ụtso jiru eji.
13Ẹka l’eeche élwù bẹ atụru kụru kpataa ata nri.
Nsụda bẹ iwhe jiru iya nụ bụ iwhe-akụku, a kụru iya.
Iwhe lile ono l’atụkaa ụzu, agụ egvu ẹhu-ụtso.
66Egvu-ọma, e deru nụ onye ishi egvu
1Unu tụaru Chileke ụzu ẹhu-ụtso,
unubẹ ụnwu eliwhe l’owhu!
2Unu gụa egvu gude kutsee ẹwha iya.
Unu etua ya ẹwha, jaa ya ajaja.
3Unu sụ Chileke: “Ha, iwhe lile, l’iime dụkwa egvu-o!
Ike ghu bẹ parụ ẹka apaa,
paa ya nke bụ lẹ ndu ọhogu ghu
l’adajẹ kpurumu l’iwhu ghu, ẹka egvu l’atsụ whẹ.
4Ndu mgboko kpaa-whuu
l’adajẹ kpurumu l’iwhu ghu baarụ ghu ẹja,
gụa egvu gude jaa ghu,
mbụ lẹ whẹ l’agụje egvu gude jaa ẹwha ghu ama.”
5Unu bya awhụ iwhe Chileke meru.
Chileke dụkwa egvu l’iwhe l’oomeru ụnwu eliwhe.
6O meru ẹnyimu; ọ bụru alị, ọkponku.
Ndu madzụ gude ọkpa ghajaa l’ẹnyimu ono.
Ẹhu-ụtso iwhe o meru tsọru
anyi nteke anyi nọ l’ẹka ono.
7Oo ike nkiya b’ọ gude bụru eze l’a-nọ achị achịchi
jeye lẹ tututu-mịmimi.
Ẹnya iya bẹ dzuru mba gẹ mba ha,
Ọo ya bụ tẹ ndu ono, kwefuru ike be ejekwa
lẹ whẹ l’etso iya okfu,
8Unu tua Chileke anyi ẹwha, unubẹ ụnwu eliwhe.
T’a nụnu ajaja, unu l’a-ja iya.
9Ọo yẹbedua bẹ doberu anyi ndzụ,
ọ bụru iya meru t’ọkpa be echifu anyi.
10O noo nkele gụbe Chileke dalewaru anyi adale,
bya emee anyi, anyi dụ ree
g’ọo mkpọla-ọcha, a nụcharu anụcha.
11I dutaru anyi je eye l’ọnya,
bya ebokwase anyi oke ivu l’okpurukpu.
12I meru t’ụnwu eliwhe wee
anyi ishi owe kperekpere.
Anyi jeru iwhe anwụ chiru anyi, mini nmaa anyi.
Ọle i megeeru duta anyi bya
edobe l’ẹka anyi tụsaru ẹhu.
13Mu l’e-gude mgbẹja
ọkpokota-iwhe-ọku bya l’ụlo ghu.
Mu emedzukotaru ghu iwhe mu
riburu ghu lẹ nte.
14Mbụ iwhe mu gude
ogboromọnu mu kweta ụkwa iya,
gude ọnu mu kfua lẹ mu l’e-meru ghu,
nteke ono mu l’eje iwhe-ọtsulanu.
15Mu l’a-kpụta ebyila, gbarụ ẹba gude gbaarụ ghu
ẹja ọkpokota-iwhe-ọku,
ẹnwuru-ọku iya akpụa tụlaa.
Mu egbushiaru ghu oke-eswi, gbushiaru ghu eghu.
16Unubẹ ndu l’atsụ egvu Chileke g’unu ha,
unu byadụwho bya angabẹ nchị,
tẹ mu kọoru unu iwhe o meru lẹ ndzụ mu.
17Ọo ọnu mu ọwa-a bẹ mu gude ryaku iya t’ọ gbatarụ mu.
Ọo ire mu ọwa-a bẹ mu gude tua ya ẹwha.
18Ọ -bụ lẹ mu meru iwhe-dụ-ẹji kwachia l’obu mu,
mẹe Onye-Nwe-Ọha tege angabẹkwaru mu nchị.
19Ọle Chileke bẹ ngabẹru nchị,
mbụ l’ọ nụru olu mu ọkpobe
anụnu nteke mu l’ekfu anụ iya.
20T’a jakwaa Chileke ajaja,
mbụ onye ono l’ẹte ajịkaa iwhe mu l’ekfu anụ iya,
tọ ha ogoshi lẹ ya yeru mu obu.
67Egvu-ọma, e deru nụ onye ishi egvu; t’a kpọru une ye iya
1Tẹ Chileke meeru anyi eze-iwhe-ọma,
gọru ọnu-ọma nụ anyi,
mee t’atatiwhu iya nwujeeru anyi.
2Nke ọwhu ụnwu eliwhe l’a-marụ ụzo ghu,
ndu mba lile amakwarụwho l’ịidzofutaje madzụ.
3T’ụnwu eliwhe jakwaa gụbe Chileke ajaja.
T’iwhe bụ madzụ l’owhu jaa ghu ajaja.
4T’ẹhu tsọnua ndu mba nọnu ụtso,
tẹ whẹ tụnua ụzu ẹhu-ụtso.
Nkele ndiwhe l’owhu bẹ l’iikpeje ikpe kfụru ọto,
ọ bụru ghu l’akpozhijeru
ndu mba lile, dụ l’eliwhe ụzo.
5T’ụnwu eliwhe jakwaa gụbe Chileke ajaja.
T’iwhe bụ madzụ l’owhu jaa ghu ajaja.
6L’iwhe, a kọberu l’alị bẹ
mehunukaru ọkpobe emehu.
Mbụ lẹ Onye-Nwe-Ọha, bụ Chileke anyi
bẹ gọwaru ọnu-ọma nụ anyi.
7Chileke bẹ gọwaru ọnu-ọma nụ anyi.
Ọo ya bụ tẹ ndiwhe l’owhu
jeye l’ẹka igwe beru alị beru tsụje iya egvu.
68Egvu-ọma, Dévidi deru nụ onye ishi egvu
1Tẹ Chileke zhilihunu, tẹ ndu ọhogu iya gbaa nnanụ nnanụ.
Tẹ ndu ono, kpọru iya ashị vụa ọkpa whẹ mini l’iwhu iya.
2Tọ bụkwaru gẹ whẹrewhere l’ewhekashije ẹnwuru-ọku
bụ gẹ l’ii-whekashi whẹ nnanụ nnanụ.
T’o bụkwaru gẹ ụ̀nwù l’adazeshihuje lẹ mgboro ọku
bụ gẹ ndu ejo-ememe l’a-lakọta l’iyi l’iwhu Chileke.
3Ọle menua tẹ ndu dụ chịriri nweru ẹhu-ụtso.
Tẹ whẹ nọdunu l’iwhu Chileke tee ẹswa.
Tẹ whẹ gudenu ẹhu-ụtso tee ẹswa teshia ya ike.
4Unu gụa egvu nụ Chileke,
unu gụa egvu gude tua ya ẹwha.
Unu dozhiaru onye ono, l’anọje l’ụgbo-ịnya iya agba
l’urwukpu ono ụzo t’ọ dụ ree.
Ẹwha iya bụ Onye-Nwe-Ọha,
unu nọdukwa iya l’iwhu tee ẹswa.
5Chileke bẹ nọ l’ibe iya, dụ nsọ
bụru Nna ndu l’ẹte enwee nna,
bya abụru onye l’agbajẹru
ụnwanyi-mbunu ọdzori.
6Chileke l’akwatajẹ uwhu nụ ndu bụ nkụnyi.
Oodufutaje ndu a tụru mkpọro mee
tẹ whẹ nweru ẹka atụtu.
Ọle ndu kwefuru iya ike bẹ
bụ l’alị, ejo anwụ l’echi bẹ whẹ l’ebuje.
7Gụbe Chileke, nteke i palitaru
vutaru ndu nkeghu ụzo,
bya eduru whẹ ghaa alị ono, daburu mgbegere
8bẹ mgboko tehuru nmẹke nmẹke.
Igweli chịa ọbaru-ugbo l’iwhu gụbe Chileke.
Ugvu Sáyinayi nmakọta jijiji l’iwhu Chileke,
mbụ gụbe Chileke nke Ízurẹlu.
9Gụbe Chileke, ọo ghu meru t’ukporoko mini chịa,
gude mee t’alị ghu nweru ume
ọdo nteke ike gvụ-gewaru iya.
10Ndu nkeghu bya alaa l’ime
iya je eburu, nọ-zhia ọkpobe anọ-zhi.
Gụbe Chileke, ọo l’iwhe ono, i nweru;
nweru iya nke etsutsu ono bẹ l’iishije nụ ndu mkpa
byarụ, iwhe mkpa iya dụru whẹ.
11Ọ bụ-a okfu bẹ Onye-Nwe-Ọha kfuru,
ikpoto ụnwanyi gude iya lụfu
je aryakashịa ya t’a marụ iwhe o kfuru.
12Ọ sụru agha: “Ndu eze; lẹ ndu ojọgu
bẹ yeekwaru ọkpa l’ọso, whẹ yeekwaru ọkpa l’ọso.”
Ndu ọwhu bụ ụnwanyi, kụru l’uwhu
l’ekeshiakwaa iwhe a vụtaru l’ọgu.
13Ndu ono zẹe swiru ọdu-atụru whẹ
bẹ dụa g’ọo ndo, a wụkotaru
akwẹka iya mkpọla-ọcha,
bya egude mkpọla-ododo mekota ẹba iya, l’oogbu zaazaa.
14Nteke Ọkalibe-kakọta-ike chịkashiru ndu eze l’alị ono
b’ọ dụlewho g’ọo ẹka aka-mini,
dashịru l’eli ugvu Zalụmonu.
15Ugvu ugvu, nọkota lẹ Báshanu bụ-gee
oke ugvu parụ ẹka,
ugvu Báshanu bụ ugvu, nwegeeru nkfụkashi.
16Unubẹ eze ugvu, nwegeeru nkfụkashi,
?Ndẹnu iwhe meru g’o gude
unu l’awhụru ugvu Chileke ụwhenya?
Mbụ ugvu ono, Onye-Nwe-Ọha, bụ Chileke họtaru
lẹ ya l’e-buru chịa ndu nkiya jeye lẹ tututu-mịmimi.
17Ụgbo-ịnya nke Chileke bụkwa ụnukurunu.
Onye-Nwe-Ọha shi lẹ Sáyinayi
bya ẹka o doberu nsọ, bụ ugvu Záyọnu.
18Nteke ono, i lashiru imigwe
b’i dutaru igweligwe ndu ị kpụkoru
lẹ ndzụ l’ọgu yeru onwoghu.
Ndiwhe gworu iwhe nụ ghu nke ẹwoma,
mbụ je akpaa lẹ ndu shi ekwefujeru ghu ike,
nke ọwhu gụbe Onye-Nwe-Ọha bụ Chileke
l’a-nọdu l’echilabọ whẹ.
19T’ajaja bụru nke Onye-Nwe-Ọha,
mbụ Chileke ọwhu bụ onye ndzọfuta anyi,
onye l’evuje ivu ẹhu anyi mbọku mbọku.
20Chileke anyi bụ Chileke, l’adzọje ndzụ.
Ọ bụru l’ẹka Nnajị-Ọha, bụ Onye-Nwe-Ọha ono
bẹ l’eeshije nahụ anwụhu.
21Chileke l’e-chikposhi ndu ọhogu iya ishi,
mbụ okpokoro-ishi, ndu l’emekwadu iwhe-dụ-ẹji.
22Onye-Nwe-Ọha sụru:
“Mu l’e-shi lẹ Báshanu duta unu duwhuta azụ.
Mu l’e-je l’ọhu eze-ẹnyimu je agụta unu gude lwa,
23nke ọwhu unu l’a-bya egbua ndu ọhogu pyaapyaa.
Nkụta unu eketakwawho oke ọwhu rwuberu whẹ nụ.”
24Gụbe Chileke, onyenọnu shiwaa ntaa whụ
gẹ ndu nkeghu dzeberu awụ alwa,
mbụ lẹ ndu nke Chileke, bụ
eze mu dzebewaru awụ alwa l’ẹka o doberu nsọ.
25Ndu nọ l’iwhu bụ ndu l’agụru whẹ egvu.
Ndu l’etso ndu ono bụru ndu l’akpọ une eye iya.
Akatikoro ụnwumgboko, l’akụkwawho nkwa etso whẹ.
26Janụa Chileke ajaja l’edzudzu-ọha.
Jaa Onye-Nwe-Ọha ajaja l’echi
ẹka ndu Ízurẹlu dzukoberu.
27Sụa, ndu l’edu whẹ nụ bụ ikfu Bénjaminu,
bụ iya bụ ikfu kagezhia ọbu nwata.
Ndu bụ ishi l’ikfu Juda mẹe nke Zébulọnu,
mẹe nke Náfutali l’eze gbigbigbi
awụ etso whẹ.
28Gụbe Chileke, rụkotanu ike ghu.
Goshinu anyi ọkpehu ghu Chileke.
Mbụ ike ono, i shi gudehawaa eme ire l’okfu ẹhu anyi.
29Ndu eze l’e-gude iswi eze-ụlo ghu ono,
dụ lẹ Jerúsalẹmu
bya anụ ghu iwhe.
30Baarụ ejo-oke-agiyi ono, nọ l’eji ono mba,
mbụ mba ono, l’achị ndiwhe
g’ọo onye l’achị oke-eswi mẹe nwa-eswi ono.
Baarụ whẹ mba jeye nteke whẹ l’ewozeta onwowhe alị,
gude mkpọla-ọcha whẹ bya anụ.
Chịkashia ndu ono, ọlwu ọgu l’anọje agụ g’ọo ẹgu nri.
31Ndu ishi Íjiputu mẹe ndu Itiyópiya
bẹ l’a-bya achiliaru Chileke ẹka.
32Unu gụa egvu nụ Chileke,
unubẹ alị-eze ụnwu eliwhe l’owhu.
Unu gụa egvu gude tua Onye-Nwe-Ọha ẹwha.
33Unu gụa ya nụ onye ono, l’anọduje l’ụgbo-ịnya
iya agba l’urwukpu ndụ-ichee ono,
mbụ onye ono, l’egudeje oke olu tụa ebemu-igwe.
34Unu tụa ọnu gẹ ike Chileke habe shii,
mbụ onye ono, ọ-dụ-biribiri iya tụkoru Ízurẹlu narụ,
onye bụ akpamigwe l’egoshije ẹgube ike iya ha.
35Gụbe Chileke; ị dụ egvu l’ẹka ono, i doberu nsọ.
Ọo gụbe Chileke nke Ízurẹlu
l’anụje ndu nkeghu ike mẹe ọkpehu.
T’ajaja bụru nke Chileke.
69Egvu, Dévidi deru nụ onye ishi egvu; t’e gude olu egvu, l’eekuje “Nkashị-iyi” gụa ya
1Dzọo mu rọo byiko Chileke,
nkele mini wọwaru mu l’ẹkpuri.
2Mu l’emiwaa emimi l’ẹpoto,
ẹka l’adụa iwhe mu l’agbabẹ ọkpa.
Mu dawarụ darwua ọhu-mini, utso l’eriwaa mu eriri.
3Mu ryawaru ẹkwa jeye ike dụ ẹbo gvụ mu.
Ẹkpiri gọwaru mu agọgo.
Ẹnya l’apyahụwaa mu apyahu
l’ẹka mu l’ele ẹnya tẹ Chileke mu bya adzọo mu.
4Ndu kpọru mu ashị lẹ b’ọ dụ iwhe mu meru whẹ
kakwa l’igwe amamẹ ẹgbushi, dụ mu l’ishi.
Ndu ọhogu mu parụ mebyi ẹka,
bụ iya bụ ndu ono, l’eme tẹ whẹ gbua mu l’owhọku
lẹ ba adụ iwhe mu meru whẹ.
Whẹ l’ekechije mu, mu akfụa
ụgwo iwhe mu l’ezhitaa.
5Gụbe Chileke, i mawarụ gẹ mu l’emebe eswe.
Ọ tọ dụdu ejo-iwhe, mu l’eme l’ịitii maa.
6Gụbe Nnajị-Ọha, bụ Onye-Nwe-Ọha,
bụru Ọkalibe-kakọta-ike,
be ekwekwa t’e gude iswi ẹhu mu
mee ndu ẹnya whẹ dụ l’ẹka ị nọ iwhe-iwhere.
Be ekwekwa t’e gude iswi ẹhu mu
mechia ndu l’achọ ghu nụ iwhu,
byiko, Chileke nke Ízurẹlu.
7O noo nkele ọo iswi ẹhu ghu b’e gude akọ mu ọnu,
e mechishi mu iwhu.
8Ndibe anyi bẹ dobewaru mu
l’ọzori onye byarụ abya,
mbụ l’unwune mu gẹdegede
bẹ gụbewaru mu onye ọha ọdo.
9Nkele obu, mu yeru ụlo ghu riwaru mu ishi.
Iwhe bụ ejo iwhe lile, e kfuru ghu
bẹ mbẹdua vutakotaru ọnwu iya.
10Nteke mu ryarụ ẹkwa swịa ẹgu l’iwhu Chileke,
oshigboma egude iya akọ mu ọnu.
11Mu yee uwe-áwhụ, whẹ gude iya atụ mu lẹ ntọnu.
12Ọo mu bụ okfu, whẹ kpụ l’ọnu,
mbụ ndu dọru l’iwhu ẹka
l’eeshije abata lẹ mkpụkpu.
Ọ bụru mu bẹ ndu l’angụ mmẹe gude agụ l’egvu-mmẹe.
13Ọle ọo gụbe Onye-Nwe-Ọha bẹ mu l’anọje ekfu anụ.
Gụbe Chileke, gude n-yemobu
ghu ono za mu oku nteke dụ ghu ree,
bya adzọo mu ọkpobe adzọdzo.
14Lọfuta mu l’ẹpoto ono, be ekwekwa t’o ria mu.
Nafụtanu mu l’ẹka ndu kpọru mu ashị.
Gụfuta mu l’echi ogbu-mini ono.
15Be ekwekwa t’utso ono ria mu.
Be ekwekwa t’iswina ono ria mu.
Be ekwekwa t’e kpochia mu ẹja l’ọno ndzụ.
16Zanụ mu oku gụbe Onye-Nwe-Ọha
nkele n-yemobu ghu dụ ree.
Chileke, gudenu nke l’ị bụnuka
onye obu-imiko cheberu mu iwhu.
17Be edomikwaru mụbe onye l’ejeru ghu ozhi iwhu.
Zanụ mu oku ẹgwegwa nkele mu nọ l’iwhe-ọtsulanu.
18Kpịlitanuru mu ntse bya adzọo mu.
Gbafụta mu rọ m’ọgvu ndu mu lẹ whẹ dụ l’okfu.
19Ị marụ gẹ whẹ gude akọ-be mu ọnu,
ị marụ gẹ whẹ gude emebe mu iwhe-iwhere
mẹe gẹ whẹ gude emechibe mu iwhu.
Ndu bụ ọhogu mu b’ị makọtaru ree.
20E kfutagewaru mu ejo iwhe jeye obu l’agbajahụ mu agbajahụ.
Mu dụwaa g’ọo onye ụzo chiru.
Mu leru ẹnya onye l’a-whụru mu imiko, tọ dụ.
Mu bya elee ẹnya onye l’a-dụ mu obu,
tọ dụ onye mu whụru.
21Whẹ nụru mu iwhe l’egbu
egbugbu tẹ mu ria l’ụgwo nri,
bya anụ mu mmẹe, shihuru ụka
tẹ mu ngụa g’ẹgu mini l’agụ mu.
22T’oge ono, whẹ l’eri bụkwaru etse l’ee-gude nmata
whẹ gẹ l’aanmatajẹ ẹnu.
T’anụ ono, whẹ gburu gude gwaa
Chileke bụkwaru ọnya nmata whẹ.
23T’ẹnya gbakwaa whẹ ẹkpuroochi
tẹ whẹ ba anọhe awhụ ụzo.
Tẹ whẹ họkwaa akfụ jeyewaroo.
24Tukoshinu whẹ ẹhu-eghughu ghu.
Gudenu oke ẹhu-eghughu ghu kparụ whẹ.
25T’ẹgbara kfụa l’ibe whẹ.
T’ọ bọ dụkwa onye l’e-bu
l’ẹka whẹ kwatarụ uwhu.
26Nkele ndu whẹ l’akpa ẹhu bụ ndu ọ bu ghu
gude ẹka ghu nụa áwhụ.
Ọ bụru ndu i mekaru iwhe bẹ whẹ l’ekfubyishi.
27Dokoberu whẹ ejo-iwhe, whẹ l’emegbabe edokobe.
Ba ahakwa whẹ ẹwoma.
28T’e hufukwa ẹwha whẹ l’ẹkwo,
e deru ẹwha ndu nọ ndzụ.
T’e be dekwa ẹwha whẹ
l’ẹka e deru ẹwha ndu dụ chịriri.
29Mu l’eje iwhe ẹhuka, áwhụ tsụwaru mu l’ọnu.
Gụbe Chileke, tẹ ndzọta nkeghu dobenu mu
l’ẹka l’ẹte adụa iwhe l’e-me mu nụ.
30Mu l’a-gụ egvu gude tua Chileke ẹwha.
Mu l’e-gude egvu-ekele kutsee ya ọkpobe ekutse.
31O noo bẹ l’a-ka Onye-Nwe-Ọha ọtso ụtso
karụ l’a nụru iya eswi,
ọdua l’ọo l’a nụru iya oke-eswi mpu iya hagee
whengarangu whengarangu,
ụpyi ọkpa iya wheshihugee ewheshihu.
32Ndu l’aakpa ẹhu -whụle iya whọ,
ẹhu atsọo whẹ ụtso.
T’obu unubẹ ndu l’achọ Chileke nọdukwa ndzụ.
33Onye-Nwe-Ọha l’anụje olu
ndu l’ẹte adụa g’ọ harụ whẹ.
Ndu nkiya, a tụru mkpọro bẹ l’ọoto gbakụtajedu azụ.
34T’igwe mẹe alị jaa ya ama.
T’ẹnyimu mẹe iwhe bu l’ime iya jakwaa ya whọ ama.
35Nkele Chileke l’a-dzọfuta Záyọnu,
bya atụkwaa mkpụkpu, dụ lẹ Juda.
Ndu nkiya alaa l’iya je eburu, mee ya,
ya abụru alị nke ẹka whẹ.
36Ọo ẹpa ndu l’ejeru iya ozhi l’e-nweru alị ono.
Iwhe bụ ndu yeru ẹwha iya obu
bụ whẹ l’e-buru iya.
70Egvu, Dévidi deru nụ onye ishi egvu gude nyatarụ Onye-Nwe-Ọha iwhe
1Gụbe Chileke, t’ọ bụnuru uche ghu t’ị dzọo mu.
Gbatanụru mu ẹgwegwa, jiko Onye-Nwe-Ọha.
2T’iwhe bụ ndu l’achọ ishi ndzụ mu
bụkwaru ndu l’ee-me iwhe-iwhere,
t’a tụkwaa whẹ ẹyerebeke.
Chịkwaa ndu l’agbarụ mu ejo égò ichiwhu,
T’iwhere ji whẹ iwhu.
3T’e meru iwhe-iwhere nụ ndu l’akụru mu hụu,
t’ẹhu daa whẹ kọo.
4T’iwhe bụ ndu l’achọ ghu nụ
bụru ndu ẹhu l’a-tsọ ụtso.
Whẹ anọdu ghu l’ẹka tee ẹswa.
T’iwhe whẹ l’a-kpụru l’ọnu ekfu ntekenteke,
mbụ ndu ọ dụ nke t’ị dzọfuta whẹ bụru lẹ
“Chileke bẹ parụ ẹka!”
5Ọle mbẹdua bụ onye ụkpa,
bụkwaruwho onye l’adụa g’ọ harụ iya.
Byiko Chileke, byanụ ẹgwegwa bya agbataru mu,
l’ọ kwa ghu bụ onye l’eyejeru mu ẹka,
ọ bụru ghu l’adzọje mu.
Jiko Onye-Nwe-Ọha, ba akpọkwa ụkfu.
711Ọo l’ime gụbe Onye-Nwe-Ọha
bẹ mu gbabaru je ezeru ndzụ.
Be ekwekwa t’e kpua mu iwhu lẹ ntụ.
2Gudenu nke l’ị bụ onye-dụ-chịriri, nafụta mu.
Yeru mu ẹka tẹ mu nahụ.
Gbebenuru mu nchị, bya adzọo mu.
3Bụnuru mu eze-ẹwhuru, mu
l’a-gbabajẹ je ezeeru ndzụ.
Tụnua iwu sụ t’a dzọta mu.
Nkele ọo ghu bụ eze-ẹwhuru nkemu,
bụru ụlo-ozeru-ndzụ nkemu.
4Byiko Chileke mu, gbafụta nụ
mu l’ẹka ndu ejo-ememe,
mbụ l’ẹka ndu l’adụa chịriri mẹe ndu akpa-ego-lanụ.
5L’ọ kwa ghu bụ onye mu l’ele ẹnya iya,
gụbe Onye-Nwe-Ọha, bụ Chileke.
Ọ bụru ghu bẹ mu dakoberu
nkeshi ọwhu mu bụ nwata.
6Nkeshi ọwhu a nwụru mu bụ lẹ ghu whọ
bẹ mu dawhuberu.
Ọo ghu bẹ kufutaru mu l’ẹwho ne mu,
mu je l’a-nọ aja ghu ama ntekenteke.
7Ndu ha l’igweligwe bẹ gude ndzụ mu aanwụta iwhe,
o noo l’ọo ghu bụ ẹka shihuru ike,
mu l’anọduje ezeru ndzụ.
8Mbọku mbọku bẹ mu l’anọje aja ghu ama,
mu l’asụje l’ị dụ biribiri.
9Byiko, ba ajịkakwa mu ntaa,
mu bụwaa nwoke akahụ.
Ba agbẹkwaru mu azụ ntaa, ike l’adụhee mu,
10O noo lẹ ndu ọhogu mu l’ekfulwu mu,
Ndu ono l’ege mu ishi ono
l’agbadzuje achịru mu ejo idzu.
11Whẹ l’asụje: “Chileke jịkaakwaru iya.
Unu chịa ya gude, nkele ọ tọ
dụdu onye l’a-gbarụ iya mkpu.”
12Ba anọdukwa mu otẹnya byiko Chileke.
Bya ẹgwegwa bya eyeru mu ẹka,
gụbe Chileke nkemu.
13T’iwhe bụ ndu l’ebo mu ibo
bụkwaru ndu l’ee-me iwhe-iwhere,
mee tẹ whẹ tọhu.
T’ewenu mẹe iwhere jikwa whẹ iwhu, mbụ ndu ono,
l’eme tẹ whẹ meka mu iwhe.
14Ọle mbẹdua bụlewho l’ẹka ị nọ
bẹ ẹnya mu l’a-dụ.
Mu l’a-nọlewho aja ghu ama eje eje.
15Mkpụrudumulanu bẹ mu
l’e-gude ọnu mu kfua l’ị dụ chịriri,
mu ekfua l’ịidzofutaje madzụ.
Ọ-dụ-chịriri ghu ono yẹle ndzọta ghu ono hatabe shii
nke ọwhu bụ lẹ mu ta atụkotadu ọnu iya.
16Mu l’e-gude ike gụbe Onye-Nwe-Ọha, bụ Chileke
je ekfua l’ọo ghu kpụ bụ onye dụ chịriri.
17Gụbe Chileke, i shiwaa eshi
nteke mu bụ nwata zhita mu iwhe.
Iwhe dụ biribiri, l’iimeje bẹ mu
shizhiawho nteke ono tụta ọnu iya byeye ntaa.
18Ntaa, mu bụwaa ọgurenya, ẹwo jiru ishi-a,
byiko Chileke, ba agbakụtakwa mu azụ,
jeye mu akọkotaru ọgbo ọwhu l’abya nụ
lẹ gẹ ike ghu habe shii,
kọoru iwhe bụ ndu ọwhu l’ee-bekochaa nwụa
l’ọkpehu ghu bẹ parụ ẹka.
19Ọ-dụ-chịriri ghu rwuru akpamigwe,
gụbe Chileke,
mbụ gụbe onye ono, meru iwhe parụ ẹka,
?Oo onye l’atụru ghu, gụbe Chileke?
20A makwarụ-a l’i mewaru mu, mu jee iwhe-ọtsulanu,
ha l’igweligwe, nwụru mu ọnu,
ọle mu marụ-a l’ii-me tẹ mu nọduwhu ndzụ azụ ọdo,
mbụ l’ii-kufutawhu mu azụ l’ime ime alị mma.
21Ii-me t’a ka mu ọkwabe ugvu,
gụ abya adụa mu obu ọdo.
22Gụbe Chileke mu, mu l’a-kpọ une gude jaa ghu ajaja
l’ị bụ onye l’akfụshije ike l’iwhe i kfuru.
Mu l’e-gude ogelenda gụa egvu jaa ghu ajaja,
gụbe Onye dụ Nsọ nke Ízurẹlu.
23Ogboromọnu mu l’a-tụ ụzu ẹhu-ụtso nụ ghu,
nteke mu l’a-gụ egvu gude aja ghu ajaja,
mbụ mụbe onye ị gbafụtaru.
24Eswe l’ẹnyashi bẹ mu l’e-gudeje ire mu ekfushi
iwhe i meshiru gude goshi l’ị dụ chịriri,
nkele ndu ono, shi eme tẹ whẹ meka mu iwhe ono
b’e kpuwaru iwhu l’oguri,
mee whẹ iwhe iwhere.
72Egvu, Sólomọnu deru
1Byiko Chileke, goshinu eze anyi
gẹ l’iikpeje ikpe kfụru nhamụnha.
Goshinu nwa eze gẹ l’iishije eme iwhe dụ chịriri.
2Ọo ya bụ nke ọwhu l’ọo-nọ
achị ndu nkeghu l’ụzo dụ chịriri,
ya egude ikpe nkfụmoto aharụ
ndu nkeghu ono, l’aakpa ẹhu enge.
3T’iwhe l’e-shigee l’eze ugvu abyarụ ndu alị-a
bụkwaru ẹhu-guu.
T’ọ bụkwaruwho ẹhu-guu ono
l’e-shigee l’ụnwu ugvu nshịi abyarụ whẹ.
Iwhe l’a-kpa iya nụ bụ lẹ ndu alị-a bẹ dụ chịriri.
4Mekwaa t’ọ hajẹeru ndu l’aakpa ẹhu,
bu l’echilabọ whẹ enge,
ya adzọfutaje ndu l’adụa g’ọ harụ whẹ.
T’ọ dzọpyashia ndu ono,
l’akpa whẹ ẹhu ono ishi.
5Tẹ ndibe ghu baarụ ghu ẹja
jeye g’ẹnyanwu mẹe ọnwa l’a-nọ-beru,
shi l’ọgbo rwua l’ọgbo.
6T’ọchichi eze dụkwa ree g’ọo ẹgube-ẹ mini l’achịa,
ya agba l’eli ọosu, a sụru asụsu, mbụ g’ọo ẹgube-ẹ igweli
l’anọje eme yẹshiyeshi mini ekpu lẹ mgboko.
7T’ọdu-chịriri kabakwaa shii
eje eje jeye nteke l’ọo-nọ-beru.
T’ẹhu-ọdu-guu dụkwa iya nke etsutsu iya,
t’ọ nọkwaa jeye nteke ọnwa l’a-fụ-buhu lẹ mgboko.
8T’ọchichi iya shikwa
l’eze-ẹnyimu ọwa-a lụfu l’eze-ẹnyimu ọwhu,
t’o shikwa l’ẹnyimu Yufurétisu
chịa jeye l’ẹka mgboko beru.
9Tẹ ndu bu l’echi-ẹgu
whuzejekwaru iya iwhu l’alị,
tẹ ndu ọhogu iya huaru iya ọnu l’alị.
10Tẹ ndu eze ndu Tashishi mẹe
ndu bukube eze-ẹnyimu tụje akịriko nụ iya.
Tẹ ndu eze ndu Sheba mẹe nke ndu Seba wotaje
iwhe bya anụ iya.
11Tẹ ndu eze nọnu dajẹe l’alị whuzeru iya.
Mba gẹ mba ha ejekotaru iya ozhi.
12O noo nkele ọodzofutaje ndu l’adụa g’ọ harụ whẹ
nteke whẹ ryakuru iya,
mbụ ndu iwhe-ẹhuka byarụ
mẹe ndu l’ete enwee onye l’agbarụ whẹ mkpu.
13Ọowhujeru ndu ike l’ẹte adụa
mẹe ndu l’adụa g’ọ harụ whẹ imiko,
l’ọodzoje ndu l’adụa g’ọ harụ whẹ ndzụ.
14Ọo-gbafụta ndzụ whẹ l’ẹka ndu l’emekpa whẹ ẹhu
mẹe l’ẹka ndu l’eme whẹ iwhe-kpanganga,
o noo nkele ndzụ whẹ bẹ dụ
oke ọnu aswa l’ẹnya nkiya.
15Tẹ ndzụ eze bụkwaru ndzụ ogologo.
T’a nụkwa iya mkpọla-ododo ndu Sheba.
Tẹ ndiwhe kfujekwaru nụ Chileke l’iswi ẹhu iya ntekenteke.
Tẹ whẹ gọjekwaru iya ọnu-ọma mbọku mbọku.
16Tẹ nri dụkwa shii l’alị-a dụ iya nke etsutsu iya.
T’iwhe akụru l’eli ugvu sọkwa pulapula,
t’o yekwaa mebyi shii
g’ọo iwhe a kụru l’ugvu Libanọnu.
Tẹ ndu mkpụkpu ono zụshikwaa bụru ẹswa l’igu.
17T’ẹwha eze ono nọdukwa jeye lẹ gbururu,
t’ẹwha iya dejekwa gẹ l’oode
jeye g’ẹnyanwu l’a-nọ-beru.
Tẹ ndu mba lile ryọo Chileke t’ọ gọoru whẹ ọnu-ọma,
ẹgube ọ gọru eze ono.
Tẹ whẹ kfuru nụ Chileke t’eze ono nweru ẹhu-ụtso.
18T’ajaja bụru nke Onye-Nwe-Ọha, bụ Chileke,
mbụ Chileke nke ndu Ízurẹlu,
onye bụ l’iya whọ kpụ l’emeje iwhe dụ biribiri.
19T’ajaja bụkwaru nke ẹwha iya ono, dụ biribiri
jeye lẹ tututu-mịmimi.
T’ogbu-zaazaa ya tụkokwa mgboko l’owhu dzuru.
O noo g’ọ dụ. T’ọ dụ nno.
20O nokwa mkpochi-ishi ekfukfu,
Dévidi nwa Jesi kfuru nụ Chileke.
73Egvu-ọma, Asafu deru
1Ọwhu bụ ezhi-okfu bụ lẹ
Chileke dụru ndu Ízurẹlu lẹ ree,
mbụ ndu ono, obu whẹ gụru iwhoro.
2Ọle mbẹdua b’ọ whọduru nwanshị
mẹ ọkpa echifu mu.
Ọ whọduru nwanshị mẹ mu ta
adụhe ike kfụru kfụshia ike,
3nkele mu nweru ẹnya-kfụrukfuru l’ẹka
ndu l’etu onwowhe ẹwha nọ,
nteke mu whụru lẹ ndu ejo-ememe
bẹ iwhe darụ lẹ ree.
4Ọ tọ dụdu iwhe l’atsụ whẹ l’ẹhu,
o noo l’ẹhu dụ whẹ mma,
tẹhenu whẹ shihukwawho ike.
5Iwhe ta atsụdu whẹ l’ẹhu gẹ l’ọotsu ndu ọdo.
Ẹhu te eme whẹ gẹ l’oome ndiwhe.
6Ọ bụru iwhe ono meru g’o gude oku onwonye eku
bụru iwhe-ọnya-l’olu whẹ.
Ome madzụ iwhe-kpanganga
bụru uwe, whẹ l’eye l’ẹhu.
7Okporokpo, whẹ darụ meru
ẹnya hụshi-gee whẹ ahụshi.
Iwhe jiru whẹ obu bụru ejo ọriri.
8Whẹ l’ajajẹ madzụ ewenu, vuru iwhe l’obu
ekfuru iya ejo okfu.
Whẹ l’anọje eku onwowhe iwhe whẹ l’ahaa g’ọo ya,
gude eye madzụ egvu lẹ whẹ l’e-mekpa iya ẹhu.
9Whẹ l’asajẹ ọnu ekfulwu Chileke, bu l’imigwe.
Ire l’anọje akụ whẹ nmalanmala
l’ẹka ndiwhe nọ.
10O noo iwhe meru g’o gude ndu nkemu ghakọbe
tsoru whẹ, iwhe lile, whẹ kfuru bẹ whẹ l’angụjeru
ye l’ẹwho nke wọtokomu.
11Whẹ l’asụje: “?Ndẹnu gẹ Chileke l’e-shi marụ?
Ọkalibe-Kangokotaru-Nu, ?ọ dụ ọwhu ọ marụ?”
12Ọ waa gẹ ndu ejo-ememe dụ ndọwa:
Ọ tọ dụdu iwhe l’erwuje whẹ l’ẹhu,
ẹku l’abyajẹru whẹ tamatama.
13Mbẹdua, obu mu gụru iwhoro
b’ọ bụnu mu nke mmaanụ.
Ẹka mu kwọru l’iswi-ọdu-mma
bụnu mu iwhe mmaanụ.
14O noo l’ọ tọ dụdu mbọku fụtaru nụ ẹhu l’ẹte emeje mu,
tọ dụ ụtsu, mu nọ-gejeeru t’a nụ mu awhụ.
15Ọ -bụ lẹ mu kfulwuru Chileke g’ọo ndu ọwhu,
mẹ ya abụkwaru mu ọdzu ejire l’ẹhu ụnwu Chileke.
16Ọle ọobuje, mu l’eme t’iwhe ono doo mu ẹnya ilile,
ya adụ mu kojikoji,
17jeye mu bya ejeshia l’ụlo-nsọ Chileke.
Ọ bụru nteke ono bẹ mu bya amarụ,
iwhe l’e-megee nwụaru ndu ejo-ememe.
18Ọwhu bụ ezhi-okfu bụ l’ẹka i
doberu whẹ bẹ l’echi ẹturu.
Whẹ je l’a-da bụru ọla-l’iswi.
19Ọla-l’iswi l’a-tụ whẹ l’ụkfu.
Ọnwu azaa whẹ l’ẹza zachafu.
20Whẹ dụ g’ọo nrọ, a rwọru
tehu l’ụtsu a anyazọo ya.
O nokwawhọ gẹ whẹ l’echihuje
l’iwhu gụbe Onye-Nwe-Ọha m’ị gbalihu.
21Nteke ono, mu shi agụ áwhụ,
nteke ono, obu shi tọfu mu,
22bẹ mu shi eme iberibe; tọ dụ iwhe mu marụ,
mbụ lẹ nteke ono bẹ mu shi
emeru Chileke umere anụ-ẹgbudu.
23Ọle ntekenteke bẹ mu l’anọjele ghu-a ntse.
I setaru mu l’ẹka-ụtara gudeshia ike.
24Ọo iwhe l’iizhi mu bẹ l’akpọ-zhiru mu ụzo,
e megee, bẹ l’ịi-kwabẹ mu ugvu gude nabata mu.
25?Oo onye bẹ mu nweru
l’imigwe gbahaa gụbedua?
Ọ tọ dụdu iwhe nọ lẹ mgboko-o,
ẹgu iya l’agụ mu t’a gụfu gụbedua.
26Ike l’agvụje mu l’ogwẹhu gvụ mu l’obu,
ọle ọo Chileke l’emeje t’ike dụ mu.
Ọo ya bụ oke-iwhe mu jeye lẹ gbururu.
27T’e kfua ya hoo haa, lẹ ndu
nọ ghu otẹnya l’a-nwụshihu.
Ndu l’i tii gudee ire whẹ ẹka bẹ l’ịi-la l’iyi.
28Ọle mbẹdua b’ọ karụ mma
tẹ mu nọdu Chileke ntse.
Mbẹdua wowaru Nnajị-Ọha, bụ Onye-Nwe-Ọha t’ọ
bụru mu a-gbaba-e-zeeru-ndzụ.
Ọo ya bụ lẹ mu l’e-gude ọnu mu kọkota iwhe dụ ree,
l’iime l’ẹhu mu.
74Ẹ́vù, Asafu kwarụ
1Gụbe Chileke, ?ndẹnu g’o gude ị jịka anyi?
?Ọo dụwaro nno jeye lẹ gbururu?
?Ndẹnu g’o gude oke ẹhu-eghughu ghu
l’ekpo tụtutu l’iwhu igwe atụru ono, l’iiche eche?
2Nyatakwa igwe-ọha ono, ị kfụru
aswa ishi whẹ gbata nteke ono tehawaru ẹnya,
mbụ ikfu ono, ị gbatarụ mee
whẹ, whẹ bụru oke-iwhe ghu ono.
Gụ anyatakwawhọ ugvu Záyọnu ono, bụ ẹka i bu ebubu.
3Shitaadawho ụzo ono bya awhụ
lẹ g’e mebyishiberu iya ọ dụ.
Ndu ọhogu ghu bẹ
mebyishigeekwaru iwhe dụ
l’ụlo ghu ono, dụ nsọ kpamụ-kpamụ.
4Ndu ọhogu ghu bẹ
wụbataakwaru l’ụlo-ndzuko ghu bya atụa orooroo.
Whẹ woru ẹkwa-ọhubama nkewhe
kpọbe gude goshi l’ọ kalẹru whẹ.
5Whẹ l’eme g’ọo ndu pa ogbunkụ tsoru ẹgbudu ẹgbudu,
egbutsushi iwhe bụ oshi, whẹ whụru.
6Iwhe bụ iwhe a pyịru apyịpyi
bẹ whẹ gude ogbunkụ
gude ọngu tsupyashikota etsupyashi.
7Ụlo ghu, dụ nsọ bẹ whẹ nwụru ọku ye ọ dzụa dzụfu l’ishi.
Whẹ merwushiwaru ẹka ono,
ị họtaru t’ẹwha ghu reje ire ono emerwushi.
8Iwhe whẹ l’anọje ekfu l’ime obu whẹ bụ:
“Anyi l’e-me whẹ emerekete!”
Ẹka lile, e shi anọduje abarụ Chileke ẹja
bẹ whẹ yekotaru ọku o tsua tsufu l’ishi.
9Ọ tọ dụdu iwhe-ọhubama,
dụ biribiri, l’eemejekwaduru anyi,
tọ dụhe ndu nkfuchiru Chileke whọdukwaduru nụ.
Ọ tọ dụdu onye l’ime anyi, marụ gẹ iwhe ọwa-a l’a-nọ-beru.
10?Ọo nteke ole bẹ ndu ị dụ ashị
l’a-chị ghu ọchi chị-beru, gụbe Chileke?
?Ndu ọhogu ghu l’anọwaro
ekfubyishi ẹwha ghu jeye lẹ gbururu tọo?
11?Ọo gụnu meru i jikoo ẹka ejiko,
?Ọo gụnu meru i jikoo ẹka-ụtara ghu eleru iya anyi l’ẹnya?
12Ọle ọo gụbe Chileke bụ eze mu eshi nteke ndụ-ichee.
I mewaru anyi lwụ-gbua
ndu ọhogu anyi igweligwe oge l’alị-a.
13Ọo gụbedua bẹ gude ike ghu kekahu eze-ẹnyimu ẹbo.
Ọ bụru ghu bẹ chikposhiru
ejo-anụ, bu lẹ mini ishi; ọ gbaa vụuvuu.
14Ọo gụbedua bẹ dzọpyashiru ejo-oke-agiyi ishi,
mee ya ọ bụru nri anụ-ẹworo, bu l’echi-ẹgu.
15Ọo gụbedua gbafushiru ọgba
mẹe ngele, mini shi iya sọshihu.
Ọ bụru ghu bẹ meru ẹnyimu, l’asọ
nke gborogboro tashịhu mini.
16Ọo ghu nwe eswe; nweru ẹnyashi.
Ọ bụru ghu meru ẹnyanwu
mẹe ọnwa dobe, whẹ keru jịngujingu.
17Ọo gụbedua bẹ kparụ oge alị, dụ lẹ mgboko dobekota.
Ọ bụru ghu doberu ọnanwu, dobe udzumini.
18Gụbe Onye-Nwe-Ọha,
nyatakwa lẹ ndu ọhogu ghu l’achị ghu ọchi;
Nyatakwa lẹ ndu eswe
l’ekfubyishikwa ẹwha ghu.
19Be ewokwaru ndzụ ndo ghu ye l’ẹka ejo anụ-ẹgbudu.
Ba anyazọkwa ndu nkeghu, bụ ndu l’eje iwhe-ọtsulanu,
Ba ahakwa whẹ t’ọ dụ whẹ nno jeye lẹ gbururu.
20Nyatakwa ọgbandzu anyi lẹ ghu gbarụ,
o noo nkele iwhe-ike
dụnukakwa l’ẹka gbarụ ẹkpuroochi lẹ mgboko-o.
21Be ekwekwa tẹ ndu l’aakpa ẹhu gude iwhere tsuwhu azụ.
Tẹ ndu ụkpa mẹe ndu l’adụa
g’ọ harụ whẹ jaa ẹwha ghu ajaja.
22Gbalihunu gụbe Chileke kfua l’ọnu onwoghu.
Nyatakwa gẹ ndu eswe l’eshije l’ụtsu
chịa ghu ọchi jeye lẹ chi ejihu.
23Ba anyazọkwa hanyị-hanyị ono, ndu ị dụ ashị l’aba,
mbụ wọwowo ono, ndu wulihuru
etso ghu okfu l’atụ ekpu ghu ntekenteke.
75Egvu-ọma, Asafu deru nụ onye ishi egvu; ishi egvu iya bụ “Be ekwekwa tẹ mu laa l’iyi”
1Anyi l’ekele ghu ekele gụbe Chileke,
anyi l’ekele ghu ekele.
Anyịbe ndu l’eku ẹwha ghu l’atụ
ọnu iwhe dụ biribiri, l’iimeje.
2Ọo gụbedua, bụ Chileke sụru:
“I dobewaru nteke l’ii-kpe ikpe, kpee ya nhamụnha.
3Nteke mgboko mẹe iwhe bụ ndu bu iya nụ l’anma jijiji,
ọo ghu l’egudeje itso iya gudeshia ya ike.
4Ndu l’eku onwowhe eku bẹ mu
l’asụje: ‘Unu be ekuhe onwunu eku.’
Bya asụ ndu ejo-ememe: ‘Unu be
egudehe ọkpehu, dụ unu anawhe nkemu.
5Unu be egudehe ọkpehu, dụ unu eke tụhaa ono, unu l’eke.
Unu ba angalibehe ishi aasa kaakaa.’ ”
6Ọpali madzụ imeli te eshijekwa l’uzo ẹnyanwu-awata,
T’o shije l’ụzo ẹnyanwu-arịba,
T’o shije l’ụzo echi-ẹgu.
7Ọo Chileke bụ onye l’ekpeje ikpe.
Ọo ya l’ewozetaje madzụ alị,
ọ bụru iya l’ewolije madzụ imeli.
8Onye-Nwe-Ọha pa omogo l’ẹka.
Iwhe jiru iya nụ bụru mmẹe, l’atsụ kpụtukputu,
e yekoberu iwhe l’eme iya t’o shihu ike.
Ọobuje, a -nọnyaa ya agbafụta iya.
Iwhe bụ ndu ejo-ememe,
kụru lẹ mgboko angụa ya, ngụa ẹru iya.
9Ọle mbẹdua l’e-te ẹswa jeye lẹ gbururu.
Mu l’a-gụ egvu gude aja Chileke nke Jékọpu ajaja.
10Ndu ejo-ememe bẹ mu l’a-nya ọkpehu whẹ kfụukfuu,
mee t’ọkpehu nke ndu dụ chịriri ka shii.
76Egvu-ọma, Asafu deru nụ onye ishi egvu, t’a kpọru une ye iya
1Chileke b’a marụ ama lẹ Juda.
Ẹwha iya ngakọtaru alị Ízurẹlu kpaa-whuu.
2Ẹka ụlo iya dụ bụ lẹ Sélẹmu.
Ẹka o bu ebubu bụ l’ugvu Záyọnu.
3Ọo l’ẹka ono b’ọ nọdu nyakwoshia akfụ
ndu ọhogu ono, l’enwu ẹnya demudemu,
bya anyakwoshia ogu-ịgba whẹ,
mẹe iwhe whẹ shi egbobeje gude zeeru onwowhe,
mẹwaro iwhe lile, whẹ shi egudeje alwụ ọgu.
4Ị dụ biribiri, dụ ugvu,
karia ugvu ono, anụ ẹgbudu jiru ejiji.
5Ndu gbarụ mkparawa b’a vụwaru arya whẹ avụ.
Mgbẹnya anwụhu bẹ tsụwaru whẹ.
Ndu ojọgu whẹ ta adụdu onye
ọwhu, dụ ike mee ẹka ụkporo.
6Gụbe Chileke nke Jékọpu, ọo mba, ị barụ whẹ,
bẹ ịnya whẹ mẹe ụgbo-ịnya whẹ
l’owhu keshitaru l’ẹka lanụ.
7Ọo ghu nwẹkinyi ghu b’ọ gbarụ t’a tsụje egvu.
?Ọo onye l’a-dụ ike kfụru kpọo ghu iwhu
mẹ ẹhu wata ghu ooghu eghughu?
8-9Gụbe Chileke, nteke i gbalihuru t’i kpee ikpe,
shi nno dzọfuta ndu l’aakpa ẹhu l’eliwhe,
b’ị nọ l’imigwe bua ikpe ono.
Alị tsụhu ghu egvu daa rịgbidingu.
10Ndu ẹhu l’eghu eghughu bẹ
l’ii-meje, whẹ agbẹnu ka ghu ọja ajaja.
Nwa ndu ọwhu nahụru ẹhu-eghughu ono
bẹ l’abajẹru ghu ẹja.
11Unu medzukwaa ụkwa unu
kweru Onye-Nwe-Ọha bụ Chileke unu.
T’ọhamoha, buwheru unu mgburumgburu wotakwa
iwhe bya anụ yẹbe onye ono, gbarụ t’a tsụje iya egvu ono.
12Oogwerishije obu ndu ishi egwerishi.
Ndu bụ eze lẹ mgboko-o l’atsụ iya egvu.
77Egvu-ọma, Asafu deru nụ onye ishi egvu, bụ Jedutunu
1Mu chikuru Chileke lẹ mkpu t’o yeru mu ẹka.
Mu chikuru Chileke lẹ mkpu ẹkwa, ọ nụa olu mu.
2Nteke mu l’eje iwhe-ọtsulanu
bẹ mu chọru Onye-Nwe-Ọha.
Ẹnyashi owhu bẹ mu chilikotaru
ẹka imeli ekfu anụ Chileke, ike ta agvụ mu.
Obu mu te ekwe t’a dụta iya adụta.
3Mu nyatarụ gụbe Chileke bya atsụa ude.
Mu bya arịa ọriri jeye ume buhu mu.
4I meru mgbẹnya te erweru mu.
Iwhe ono tsụta-be mu l’ẹhu nke ọwhu ọ kpụberu mu ọnu okfu.
5Mu bya egude ọriri lee ẹnya lẹ nteke ndụ-ichee,
mbụ awha, tehawaru ẹnya.
6Mu bya anyata ẹgube egvu, mu shi anọje agụ l’ẹnyashi.
Mu rịkota ọriri mkpụrudumulanu.
A nọnyaa; mu jịa obu mu sụ:
7“Onye-Nwe-Ọha ?l’ọo-jịkawaro anyi jeye lẹ gbururu tọo?
?Tọ dụhedu nteke l’ọo-nọnyaa,
ya egoshi l’anyi dụ iya-a l’obu?
8?Ọo lẹ n-yemobu iya ono l’ẹte agvụje agvụgvu
te erwubahedu anyi ẹka jeye lẹ gbururu?
?Ọ dụ g’ọ tọ byahẹdu l’emebaaru
anyi iwhe o kweru ụkwa lẹ ya l’e-meru anyi?
9?Ọo lẹ Chileke nyazọwaru obu-imiko nkiya tọo?
?Ọ dụ g’o gudewaa
ẹhu-eghughu iya wowhu obu-imiko iya azụ?”
10Tọ dụ iya bụ, mu sụ: “Iwhe kagezhia mu ọtsu l’ẹhu
bụ lẹ Ọkalibe-Kangokotaru-Nu
bẹ ike ememe ta adụhedu iya.”
11Mu l’a-nyata iwhe-kpaakpaa, Onye-Nwe-Ọha shi emeje,
mu l’a-nyatakọta iwhe dụ biribiri, i shi emeje nteke mbụ.
12Mu l’a-nọdu rịa ọriri l’iwhe i mekotaru nteke ono.
Eze iwhe ono, i shi emeje nteke
ndụ-ichee bẹ mu l’a-rivugezhia l’ọriri.
13Gụbe Chileke, ụzo ghu dụ nsọ.
?Ndẹnu agwa, habe shii g’ọo Chileke anyi?
14Ọo ghu bụ Chileke, l’emeje iwhe a whụrulenya.
Iimeje tẹ ndiwhe whụ g’ike dụ-be ghu.
15I gude ọkpehu ghu gbafụta ndu nkeghu,
mbụ gbafụta eri Jékọpu mẹe eri Jósẹfu.
16Sụa, mini whụru gụbe Chileke,
mbụ l’ẹnyimu, l’asọ gborogboro whụru ghu; egvu ba iya,
ogbu-mini nmahụkota kpakpakpa.
17Igweli bẹ chịru mini; akpamigwe dee gbarara,
ebemu-igwe l’awa whoowhoo ibẹka ibẹbo.
18A nụru ụda egbe-igwe, l’ịitu l’echi uburu-aga.
Ebemu, l’ịiwa whoowhoo bụru
iwhoro, e gude áwhụ ụzo lẹ mgboko.
Alị l’owhu tsụhu egvu; nmahụ jijiji.
19Gbororo echi-ụzo ghu bẹ ghajaru l’eze-ẹnyimu ẹbo.
Ọ bụru l’ogbu-mini ẹnyimu, parụ ẹka bẹ l’iishije aghaa.
Tọ bụ l’aawhụje igbiri ọkpa ghu.
20I shi l’ẹka Mósisu yẹle Érọnu
dua ndu nkeghu g’ọo onye l’edu atụru.
78Ẹ́vù, Asafu kwarụ
1Unubẹ ndu nkemu, unu nụa iwhe mu l’ezhi.
Unu ngabẹ nchị nụ okfu, shi mu l’ọnu.
2Mu l’e-gude ẹtu ekfuru unu okfu.
Mu l’e-kfuru unu iwhe ono,
e domiru edomi eshi nteke ndụ-ichee.
3Iwhe ono bụ iwhe anyi nụhawaru,
bụru iwhe anyi mahawarụ.
Iwhe ono bụ iwhe nna anyi ochee whẹ shi akọjehawaru anyi.
4Anyi te edomiduru iya ụnwegirima anyi edomi.
Ọgbo ọwhu l’eje abya l’ụzo iwhu
bẹ anyi l’a-kọkotaru
iwhe dụ biribiri Onye-Nwe-Ọha megbaberu,
kọkotaru whẹ g’ike iya habe shii
mẹe iwhe awhụrulenya, o megbaberu.
5O doberu ụnwu Jékọpu nsọ, whẹ l’e-tsoje,
tụa iwu dobe, ọ kfụru chịmu l’alị Ízurẹlu,
bya asụ nna anyi ochee whẹ tẹ whẹ
zhikwaa ya ụnwegirima whẹ.
6Nke ọwhu ọgbo ọwhu l’eje abya l’atatiwhu l’a-marụ iya.
Ụnwegirima ọwhu l’ẹte anwụa amakwaru iya whọ.
Whẹbedua egudekwa iya whọ zhia ụnwu nkewhe.
7Ọo ya bụ nke ọwhu whẹ l’a-kpọru obu ye lẹ Chileke;
whẹ eje azọha iwhe o megbaberu azọha,
whẹ edobedzua iwu iya g’ọ ha.
8Whẹ ta adụdu g’ọo nna whẹ oche whẹ.
Ndu-ichee whẹ ono shi bụru ọgbo ejo obu,
bụru ọgbo, kwefuru Chileke ike,
mbụ ọgbo, l’adụa nteke obu whẹ
kpọjeru akpọru l’ẹka Chileke nọ,
tọ dụ nteke whẹ kfụshijeru ike l’iwhu iya.
9Ụnwu Ífuremu gude akfụ kwaa onwowhe ngwọgu,
ọgu dadẹlewho, whẹ ye ọkpa l’ọso gbalashịa.
10Ọgbandzu whẹ lẹ Chileke bẹ whẹ mebyiru,
jịka ome iwhe ọ tụru l’iwu.
11Whẹ zọharu iwhe Chileke meshiru,
mbụ iwhe dụ biribiri ono, o meshiru goshi whẹ.
12O meshiru iwhe dụ biribiri l’iwhu nna whẹ oche
l’alị Íjiputu l’ọma Zowanu.
13Eze-ẹnyimu b’o kekahuru ẹbo, dua whẹ dughata.
O mee mini ono, ọ kpụa orogbodo kfụru l’ẹka lanụ.
14Iwhe o gude dua whẹ l’eswe bụ urwukpu,
gude iwhoro ọku dua whẹ l’ẹnyashi.
15Oke-ẹwhuru b’o kejahuru ẹbo l’echi-ẹgu alị ọkponku
mini angụngu shi iya nwufuta g’ọo mini shi l’eze-ẹnyimu.
16Ọ bụru ẹka ẹwhuru gbarụ ọru b’o meru,
mini wata asọshi sọlahaa gborogboro g’ọo ọnu-iyi.
17Ọle whẹ melerua iwhe-dụ-ẹji
gẹ whẹ l’eme iya melwu Chileke.
Whẹ kwefuru Ọkalibe-Kangokotaru-Nu ike
gẹ whẹ kwefuru iya l’echi-ẹgu.
18Whẹ tụru obu whẹ ama data Chileke,
kebezhiawho l’ọ nụfutaje whẹ ọga nri, l’agụ whẹ nụ.
19Whẹ kfulwuru Chileke sụ:
“?Chileke, ọo-dụ ike zụa whẹ l’echi-ẹgu?
20Nteke o chiru iwhe
l’eze-ẹwhuru bẹ mini shi iya gbalahaa,
ngele shi iya sọlahaa gborogboro.
Ọle ọbu, ?ọo-dụ ike nụ whẹ nri?
Tọo ?ọo-dụfukwaawho ike nụ whẹ anụ?”
21Nteke Onye-Nwe-Ọha nụru iya,
bẹ ẹhu ghuru iya eghu shii.
Iwe iya talahaa kfụkfukfu l’ẹhu Jékọpu,
oke ẹhu-eghughu iya tukoru l’ẹhu ndu Ízurẹlu.
22Nkele whẹ te ekwetadu nke Chileke,
whẹ te ekwetakwawho l’ọo-dụ ike dzọfuta whẹ.
23Ọle ọo okfu b’o kfuru nụ akpamigwe,
ụzo imigwe gụhashia gheru ọnu.
24Ọ chịaru ndu Ízurẹlu nri ono, bụ mana g’ọo mini,
shi nno nụ whẹ akpụru iwhe shi l’imigwe tẹ whẹ ria.
25Madzụ bẹ riru nri ụnwu ojozhi-imigwe l’erije.
Chileke nụru whẹ nri, sụru whẹ eriri.
26Whẹrewhere, l’eshije l’ụzo
ẹnyanwu-awata bẹ bụ yẹbedua
gụharu iya ụzo imigwe, ọ wata ewhewhe.
O nokwawhọ g’o gude ike iya nwuhaa ọwhu l’eshije
l’ụzo ọhuda, ọ wata ewhewhe.
27Anụ, l’aata atata b’ọ chịru whẹ,
ọ nọdu etsu kakaka g’ọo ivovonyi.
Ẹnu, l’ewhe l’eli b’o nwuru haarụ whẹ, whẹ kụru g’ọo ẹja,
dụ l’ogbigbo eze-ẹnyimu.
28O meru whẹ, whẹ whebatagee l’ọma ẹka whẹ bu ebu.
Ụlo-ẹkwa whẹ b’o shi anọje
ewhewhe mgburumgburu.
29Whẹ riru nri ono rijishia ẹwho,
nkele ọ nụru whẹ iwhe l’agụ whẹ nụ.
30Ọle whẹ bya l’erigedeshia nri ono, shi agụ whẹ nụ ono,
mbụ lẹ whẹ kpụkwadu iya-a l’ọnu eri,
31Chileke watawaa whẹ otukoshi oke ẹhu-eghughu nkiya.
Ọ tụkolewho ndu ike ka l’ime whẹ gbushia,
tụko ụnwu okorọbya Ízurẹlu gbuchafu.
32O megee whẹ ẹgube ono, whẹ
l’emele-e iwhe-dụ-ẹji, whẹ l’eme.
O megezhia iwhe-awhụrulenya, o meru nụ whẹ,
whẹ te ekwetakwawho nke yẹbe Chileke.
33O noo iwhe meru g’o gude o
mee ndzụ whẹ, o kofu g’ọo udzu ọnu,
bya egude iwhe l’eye egvu kpokwofu ndzụ whẹ.
34Ọobuje ọ harụ whẹ gbushia,
ndu ọwhu whuduru nụ achọlahaa ya,
gude obu whẹ dakọbe lwakfutawhu iya azụ.
35O noo nteke whẹ l’anyatajẹ
lẹ Chileke bụ oke-ẹwhuru whẹ,
l’ọo Chileke ono, bụ Ọkalibe-Kangokotaru-Nu
bụ onye gbafụtaru whẹ nụ.
36Ọle ajaja whẹ l’aja iya bụ ajaja eli-ọnu,
ire-lanụ ta adụdu whẹ l’ọnu ilile.
37Whẹ te egudedu obu whẹ nabata iya.
Whẹ ta akfụshi ike l’ọgbandzu whẹ l’iya gbarụ.
38Ọle Chileke l’anọjelee awhụru whẹ imiko.
Ọogujeru whẹ nvụ l’ejo-iwhe ono, whẹ l’emegbabe,
haa whẹ emebyishi.
Ugbo olemole b’o sewhugezhiwaru ẹhu-eghughu iya azụ,
t’ọ tụko oke ẹhu-eghughu iya ono g’ọ ha wụa whẹ l’ishi.
39Ọonyataje lẹ whẹ bụ anụ ẹhu,
lẹ whẹ bụ whẹrewhere,
l’ewhe ewhewhe, l’ẹte ewhewhujehe azụ m’o wheghatawaa.
40Ugbo olemole bẹ whẹ kwefuwaru iya ike
nteke whẹ nọkwadu l’echi-ẹgu,
mbụ kpatsua ya iwe l’alị, daburu mgbegere.
41Nteke nteke bẹ whẹ shi adatajẹ Chileke.
Whẹ shi akpatsuje Onye Nsọ nke Ízurẹlu ẹhu-eghughu.
42Whẹ ta arịtajedu ọkpehu iya, whẹ ta arịtaje mbọku ono,
ọ gbafụtaru whẹ l’ẹka ndu shi emekpa whẹ ẹhu,
43mbụ mbọku, o meru, ẹnya l’ọha
whụkota iwhe dụ biribiri, o meru lẹ Íjiputu,
mẹe iwhe a whụrulenya, o meshiru l’ọma Zowanu.
44Ẹnyimu nọnu b’o meru; ọ ghọkota mee.
Ndu Íjiputu ta adụ ọnu-iyi, whẹ whụru kuta mini ngụa.
45Ọ chịru ijiji, l’etsu dududu ye, ọ bya anụa whẹ chịikfuu,
bya achịru ẹwo ye, o mebyishia alị whẹ.
46Iwhe whẹ kọru l’alị b’ọ chịru ọvu ye, ọ danwụshia,
bya achịru igube yeru ndu ọwhu mịru amịmi, ọ tafụ iya.
47Oshi sikamo whẹ b’o gude aka-mini tụpyashia,
bya egude iji ụguru mebyishia akpụru vayịnu whẹ.
48Eswi whẹ b’o gude eze aka-mini tugbushia,
bya egude ire ebemu-igwe
tugbushia élwù whẹ g’ọ ha.
49Ẹhu-eghughu ono, l’ata iya
kfụkfukfu l’ẹhu b’o kpukpushiru whẹ.
Ọ bụru iya bụ ojozhi-imigwe,
o dụru ye tẹ whẹ je alaa whẹ l’iyi.
50Ọ tọru ẹhu-eghughu iya ono owere t’ọ bakfu whẹ,
mbụ l’ọ chịru ndibe iya wehaaru ọnwu,
ọ haa nchịkarehu t’o mee whẹ ndzụ emee.
51Ndu bụ ọkpara l’alị Íjiputu b’o gbukotaru egbu,
mbụ ndu, vu ụzo waa ẹkpa-nwa l’uwhu nọnu l’alị Hamu.
52Ọle ndibe nkiya b’ọ rwutaru
g’ọo onye l’erwu atụru rwufuta l’alị ono,
bya eduzhia whẹ ụzo g’ọo onye
l’eduzhi atụru ụzo, shi nno dughata whẹ l’echi-ẹgu.
53O duru whẹ chịriri werere, t’egvu ba atsụ whẹ,
ọle ndu ọhogu whẹ bẹ eze-ẹnyimu rigbushiru.
54O noo g’o shi dua whẹ jeye o
durwua whẹ alị iya ono, bụ alị dụ nsọ,
o durwuru whẹ ugvu ono, o gude ike ẹka iya lwụta.
55Ọ chịfuru whẹ ndu ọha ọdo,
washịaru ndu Ízurẹlu alị whẹ, whẹ hakaa.
Ikfu Ízurẹlu b’o doberu, whẹ
buchishia ibe whẹ l’ẹhu l’ẹhu.
56Ọle whẹ megeleru-a data Chileke,
bya ekwefuru Ọkalibe-Kangokotaru-Nu ike,
jịka odobe nsọ iya.
57Whẹ wọtaru ẹka nna whẹ ochee whẹ, haa ootso Chileke,
bụru ndu l’egudee ire whẹ ẹka.
Onye dawhuberu whẹ nụ dụ g’ọo onye dawhuberu opete.
58Whẹ gude elikoro ẹka ono,
whẹ l’agwajẹ iwhe kpatsua Chileke iwe,
whẹ meru, o kolahaaru ntẹkpe, whẹ pyịshiru okoowhoo.
59Nteke Chileke whụru iya bẹ ẹhu ghushiru iya eghu ike,
shi nno jịka ndu Ízurẹlu lẹ whuruwhuru.
60Ọ haa ụlo-ẹkwa iya ono, dụ lẹ Sháyilo lụfu,
mbụ ụlo-ẹkwa ono, o doberu l’echilabọ ndiwhe.
61Igbe-ọgbandzu iya b’ọ harụ, ndu ọhogu iya lwụta iya l’ọgu,
mbụ igbe-ọgbandzu ono, bụ iya l’egoshije gẹ ike iya habe shii,
egoshi g’ọ dube biribiri.
62Ọ harụ ndibe iya, e gbushia whẹ lẹ mma,
ndu ono, bụ oke-iwhe iya ono b’o kpukpushiru ẹhu-eghughu iya.
63Unwokorọbya whẹ bẹ ọku kegbushikotaru,
o mee, ụnwumgboko whẹ tọkota l’ẹka.
64Ndu l’agbajẹru whẹ ẹja Chileke b’e gude mma gbugbushia.
Unyomu whẹ ta arya ẹkwa whẹ aryarya owhu.
65A -nọnyaa, Onye-Nwe-Ọha tehu
nwụru ẹnya gẹ-woo l’o shi eku mgbẹnya,
mbụ g’ọo ẹgube-ẹ mmẹe l’emenyaa madzụ l’ẹnya; ya ekorohu iya.
66Ndu ọhogu iya b’ọ chịru baa whẹ ẹbaa,
dobe whẹ l’ọnodu iwhere, whẹ l’a-nọdu jeye lẹ gbururu.
67Ndu shi l’ẹpa Jósẹfu b’ọ jịkakotaru,
mbụ l’ọ tọ họtadu ikfu Ífuremu.
68Ndu ọ gbechia họta bụ ikfu nke Juda,
họta ugvu Záyọnu, bụ ẹka o yeru obu.
69Ọo ẹka ono b’ọ tụru ụlo iya, dụ nsọ,
ọ halẹwho gagvu gagvu g’ọo eze ugvu.
Ọ tụru iya, o shihu ike g’ọo
akpakpamara alị, mbụ alị ono,
o meru ọ bụru chịmu gẹ l’ọo-bụ iya jeye lẹ gbururu.
70Ọ họtaru onye ozhi iya, bụ Dévidi,
bya edufuta iya l’ọdu atụru.
71Ọo ẹka Dévidi l’eche atụru b’o je eduta iya,
t’ọ bya echelahaa ndibe nkiya, bụ ụnwu Jékọpu yẹle
ndu Ízurẹlu ono, bụ oke-iwhe iya g’ọo onye l’eche atụru.
72Dévidi gudezhiawho obu,
gụru iwhoro l’eche whẹ g’ọo onye l’eche atụru,
gude ẹka dụ ree l’eduzhi whẹ.
79Egvu-ọma, Asafu deru
1Gụbe Chileke, leedaa lẹ ndu mba, l’ẹte amaa Chileke
wụbatawaru tẹ whẹ bya anata anyi alị ono, bụ nke ghu.
Whẹ merwuwaru eze-ụlo ghu ono dụ nsọ,
whẹ mewaa Jerúsalẹmu, ọ bụru ikpọzu.
2Odzu ndu l’ejeru ghu ozhi bẹ
whẹ wowaru tọgboru ẹnu, l’ewhe l’eli t’o ria,
mbụ l’odzu ndibe ghu bẹ whẹ
tụwaru anụ-ẹgbudu t’ọ bụru nri whẹ.
3Jerúsalẹmu l’owhu bẹ whẹ
ghakashịru mee madzụ g’ọo mini.
Ọ tọ dụhedu onye
whọdukwaduru nụ,
bụ onye l’e-li ndu ono, e gbushiru egbushi.
4Ndu buwheru anyi
mgburumgburu bẹ l’akọ anyi ajịcha,
aja anyi ewenu, l’aachịkwawho anyi ọchi.
5?Ọo nteke ole bẹ ẹhu l’e-ghuberu
ghu eghu gụbe Onye-Nwe-Ọha?
?Ooghugbuwaru ghu rọo jeye lẹ gbururu?
?Ọo nteke ole bẹ okoowhoo ghu
l’e-nwuberu whuruwhuru g’ọo ọku?
6Wonuru ẹhu-eghughu ghu
tukoshi ndu ọha ọdo ono, l’ẹte amaa ghu nụ.
Tukoshikwa iya whọ alị-eze ono, l’ẹte ekuje ẹwha ghu.
7O noo lẹ whẹ gbuwaru ndu shi l’ẹpa Jékọpu pyaapyaa,
bya emebyishiwaa ibe whẹ.
8Be emekwa t’anyi nwụa ọnwu
iwhe-dụ-ẹji, nna anyi ochee whẹ meru.
Whụaru anyi imiko ẹgwegwa,
nkele anyi dabuwaru mgbegere.
9Yeru anyi ẹka byiko Chileke,
mbụ gụbedua, bụ onye ndzọfuta anyi,
nke ọwhu l’ee-shi nno kwabẹ ẹwha ghu ugvu.
Gụaru anyi nvụ l’iwhe-dụ-ẹji anyi megbaberu,
gụ anafụta anyi nggẹ ẹwha ghu akfụru.
10?Ndẹnu iwhe meru g’o gude ndu ọha ọdo je l’a-nọ ajị
sụ: “?Ndẹnu ẹka Chileke whẹ ọbu nọ?”
Nọdunu l’iwhu anyi mee tẹ ndu ọha ọdo ono madzuru
l’ị gwatarụ ụgwo ọchi mee ndu
l’ejeru ghu ozhi ono, a wụshiru ono.
11T’ude, ndu nọ l’ọka mkpọro l’atsụ rwunua ghu nchị.
Gudenu ọkpehu ghu mee tẹ
ndu e kperu nkfugbu nweru onwowhe.
12Kfụa ndu ono buwheru anyi mgburumgburu
ụgwo iwhe whẹ meru ghu akpọo ẹsaa,
mbụ iwhe-iwhere, whẹ
mekotaru kpua gụbe Onye-Nwe-Ọha.
13Ọo ya bụ nke ọwhu anyịbe
ndibe ghu l’e-tu ghu ẹwha jeye lẹ gbururu,
mbụ anyịbe atụru ono, l’iiche echeche,
mbụ l’anyi l’e-tu ghu ẹwha shi l’ọgbo rwua l’ọgbo.
80Egvu-ọma, Asafu deru nụ onye ishi egvu, t’e gude olu egvu, l’eekuje “Nkashị-iyi Ọgbandzu” gụa ya
1Ngabẹnuru anyi nchị l’olu,
gụbe onye l’eche Ízurẹlu g’ọo onye l’eche atụru,
mbụ gụbe onye l’anọje erwu
ẹpa Jósẹfu g’ọo onye l’erwu igwe atụru eje lẹ nri.
Tẹ gụbe onye ono, sụgaru
l’echilabọ cherubu ono chinua g’ọo anwụ
2l’iwhu ndu Ífuremu mẹe ndu
Bénjaminu mẹe ndu Manáse.
Kpatsutanu onwoghu ike gude bya adzọfuta anyi.
3Dobewhunu anyi azụ l’ọnodu anyi byiko Chileke.
T’atatiwhu ghu nwunuaru anyi nke ọwhu l’aa-dzọfuta anyi.
4Gụbe Onye-Nwe-Ọha bụ Chileke, bụ Ọkalibe-kakọta-ike,
?ọo zhia nteke ole bẹ ẹhu
l’e-ghuberu ghu eghu,
mbụ nke t’ị ba anụje ekfukfu, ndibe ghu l’ekfu anụ ghu?
5Ntaa b’i mewaru whẹ, ẹnya-mini bụru whẹ nri eriri,
bya emee whẹ, whẹ ngụa ẹnya-mini, jiru ochi njaka-ọnu.
6I mewaru tẹ ndu buwheru anyi
mgburumgburu gude alị anyi ese okfu,
i mee ndu ọhogu anyi l’aachị anyi ọchi.
7Dobewhunu anyi azụ l’ọnodu anyi, byiko Chileke,
bụ Ọkalibe-kakọta-ike.
Menua t’iwhu ghu nwuaru anyi
whoo nke ọwhu l’aa-dzọfuta anyi.
8Ọo ghu shi l’alị Íjiputu gbuta vayịnu,
ị bya achịshikota ndu ọha ọdo l’alị whẹ, dzabẹ iya.
9Ọo ghu gude ẹka ghu sụchashia
ẹka ị dzabẹru iya asụchashi.
Ọ bya agbaa ọgbaragbu l’ime ime
alị, tụko alị ono l’owhu sweta.
10Ọ bakashịhuru dzuru ugvu l’owhu,
ẹkali iya bakọta l’eli eze oshi sida.
11Ẹkali iya mabẹru ogologo lụfu eze-ẹnyimu.
Ọ tụko ẹka lile kpofushia jeye l’ẹnyimu Yufurétisu.
12?Ndẹnu g’ọ nwụru ị whọkashiru ụwho, e gude gbabuta iya,
o mee l’ọobuje onye l’aghata nụ,
ya eje awọta akpụru iya lẹ g’ọ dụ iya?
13Ezhi-ọswa l’anọje azụ-kwoshi iya,
ụnwu anụ-ẹgbudu bụru iya bẹ whẹ l’egudeje eme nri.
14Lwakfutawhu nụ anyi azụ,
byiko Chileke, bụ Ọkalibe-kakọta-ike.
Shinu l’imigwe lefu ẹnya
whụduwho gẹ l’ọonwuru anyi.
Byiko letanu vayịnu ghu-a ẹnya.
15Ọ kwa iya bụ ọgbaragbu ọbu, i gude ẹka-ụtara ghu dzabẹ,
ọ bụru iya bụ nwa nwoke ọbu,
i gude ẹka ghu zụa jeye ị zụfuta iya.
16Vayịnu ghu ono b’e gbutsuakwaru.
E gudekwa ọku ketsua ya, ọ daa.
Ọ kwa mba, ị gbanwụberu iwhu
baarụ ndibe ghu meru iwhe whẹ watarụ ọla l’iswi.
17Wonuru ẹka tukobe nwoke ono, nọ ghu l’ẹka-ụtara,
mbụ nwa nwoke ono, i gude ẹka ghu zụa jeye ị zụfuta ono.
18Ọo ya bụ nke ọwhu anyi l’ẹte
abyaa l’a-gbẹbaaru ghu azụ ọdo.
Byiko kpanụa ẹka lẹ ndzụ anyi
nke ọwhu anyi l’a-wata ghu oku ẹwha ọdo.
19Dobewhunu anyi azụ l’ọnodu
anyi, jiko Onye-Nwe-Ọha, bụ Chileke,
bụ Ọkalibe-kakọta-ike.
Menua t’atatiwhu ghu nwuaru
anyi whoo nke ọwhu l’aa-dzọfuta anyi.
81Egvu-ọma, Asafu deru nụ onye ishi egvu; t’e gude ngwa egvu, l’eekuje gítitu gụa ya
1Unu gụa egvu ẹhu-ụtso nụ
Chileke, onye bụ iya bụ ike anyi.
Unu gude ẹhu-ụtso tụa oke ụzu
l’iwhu Chileke nke Jékọpu.
2Unu wata ọgu egvu, unu kụru nkwa ye iya.
Unu akpọoru iya ogumogu mẹe une, l’atsọ ụtso.
3Unu gbua opyi-ọku m’ọnwa fụlewho nke ọwhuu.
Unu egbukwaa ya whọ
m’ọnwa dzulewho edzudzu, a wata ori-oge.
4L’iwhe ono bụkwa nsọ, a tụru doberu ndu Ízurẹlu,
mbụ l’ọo iwhe Chileke nke Jékọpu tọru ọkpa iya sụ t’e tsoje.
5Ọo iwu, o meru o shihu ike; bya asụ tẹ Jósẹfu meje iya,
nteke ono, o jekfuru ndu Íjiputu ọgu onoya, o jejeru.
Olu, mu l’anụ te edokwa mu ẹnya.
6Olu ono sụru: “Ọo mbẹdua
pafụru whẹ oke ivu ono, shi nọdu whẹ l’ukuvu,
bya ezhia whẹ nkata ivu ono, whẹ shi vuru.
7Nteke unu l’eje iwhe-ẹhuka bẹ unu kuru mu oku.
Mu nọdu l’urwukpu gude
egbe-igwe za unu oku ono bya adzọfuta unu.
Mu gude mini Meriba dalee unu.
8Unubẹ ndu nkemu, unu
ngabẹedawho, tẹ mu lọo unu ẹka lẹ nchị!
Unubẹ ndu Ízurẹlu, unu ngabẹdaaru mu whọ nchị!
9T’ọ bọ dụkwa iwhe ọdo, unu
l’e-dobe, bụ agwa, l’aagwa agwagwa l’echilabọ unu.
Ya eje adụkwa iwhe ọdo, unu l’a-bajẹru ẹja.
10O noo nkele ọo Mu bụ Onye-Nwe-Ọha,
bya abụru Chileke unu.
Ọo mbẹdua bụ onye dufutaru unu l’alị Íjiputu.
Unu saa ọnu ree tẹ mu nụ-jia unu ẹwho.
11Ọle ndu nkemu ono te eyeduru mu ọnu,
mbụ lẹ Ízurẹlu te ekwedu nọdu mu l’ẹka.
12Ọo ya bụ, mu woru whẹ haarụ ejo obu whẹ.
Tẹ whẹ tsowaruro iwhe whẹ rịtaru l’obu whẹ.
13Sụ; ọ -bụ lẹ ndu nkemu ngabẹru mu nchị,
ọ -bụ lẹ ndu Ízurẹlu tsoru ụzo ọwhu mu tọru whẹ,
14ọolwu-gbu ndu ọhogu whẹ tẹge atadụru mu l’ike,
tẹhenu mu gẹge ada ndu kpọru whẹ ashị ejo ẹka l’ẹhu.
15O noo gege eme tẹ ndu kpọru
mụbe Onye-Nwe-Ọha ashị whuzeru mu iwhu l’alị,
ọdumeka mu ahụ̀a whẹ àhụ̀hù jeye lẹ gbururu.
16Ọle unubẹdua bẹ mu gege egude ọkpobe witi zụa,
bya egude mmanụ-ẹnwu,
shi l’oke-ẹwhuru nụ-jia unu ẹwho.”
82Egvu-ọma, Asafu deru
1Chileke bataakwarụ bya anọdu l’ishi ndzuko ndu imigwe.
Ọ nọ l’ẹka ono t’o bua ikpe.
2Sụa: “?Ọo nteke ole bẹ unu
l’e-kpeberu ikpe, l’akfụaru nhamụnha?
?Ọo zhia nteke ole bẹ unu l’e-leberu
ndu ejo-ememe ẹnya l’iwhu mẹ unu l’ekpe ikpe?
3Unu hajẹeru ndu ụkpa mẹe ndu nna whẹ l’anọhee enge.
Unu kpejee ndu l’aakpa ẹhu
mẹe ndu l’akpa nri ikpe, kfụru nhamụnha.
4Unu gbafụta ndu ụkpa mẹe ndu l’adụa g’ọ harụ whẹ,
shi nno nafụta whẹ l’ẹka ndu ejo-ememe.”
5Ọ tọ dụdu iwhe whẹ marụ,
tọ dụ iwhe l’edoje whẹ ẹnya.
Whẹ l’anọje aghawhe ririri l’ẹkpuroochi.
Ukfu mgboko l’angakọtakwaa anganga.
6Mu sụru: “Unu bụkota chi l’ẹhu l’ẹhu,
g’unu ha bụkota ụnwu Ọkalibe-Kangokotaru-Nu.
7Ọle unu l’e-megee nwụhu g’ọo madzụ mmaanụ.
Unu l’e-megee daa gẹ ndu ishi ọdo l’adajẹ.”
8Gbalihunu gụbe Chileke; kpee ndiwhe ikpe.
Nkele mba gẹ mba ha bụkota iwhe i nwe enwenwe.
83Egvu-ọma, Asafu deru
1Gụbe Chileke, ba agbashịnu nkụchi.
Gụbe Chileke, ba anọdushinu nggujingguji.
Byiko ba adashịnu shịikfuu.
2Leedanu gẹ ndu ọhogu ghu l’awhụ temutemu.
Leedanu gẹ ndu kpọru ghu ashị
l’eseli ishi tẹ whẹ kwefuru ghu ike.
3Whẹ l’achịru ndibe ghu ejo idzu l’ẹregede.
Whẹ l’etsukoje ishi ọnu agbarụ
ndu ono, dụ ghu l’obu ejo ikumu.
4Whẹ l’ekfu sụ: “Unu bya t’anyi
tụko mba ono l’owhu lwụpyata.
T’anyi mee t’ẹwha Ízurẹlu chihu echihu.”
5Obu bụ whẹ nnanụ l’ikumu whẹ gbarụ.
Whẹ riwaru nte lẹ whẹ l’atụgba mee ghu ejo-iwhe.
6Ndu ọnu-ụlo Edọmu mẹe ndu nke Ishimẹlu,
mẹe ẹpa Hega mẹe ndu Moabu.
7Mẹ ndu Gebalu mẹe ndu Amọnu mẹe ndu Amalẹ́ku.
Ndu Fílistiya tsokwa iya whọ; ndu Taya tsoru iya.
8Ndu Asiriya tsokwaru iya whọ.
Whẹ chịkoberu onwowhe tẹ whẹ bụru agbarike ụnwu Lọtu.
9Menua whẹ iwhe ono, i meru Midiyanu.
Mee whẹ g’i meru Sisera yẹle
Jabyinu l’ọkpa ẹnyimu Kishọnu,
10mbụ ndu ono, i meru whẹ bụru kpurupyata lẹ Ẹndo,
bya emee, whẹ wụshiru l’alị,
bụwaruro ọzu, l’emekwa alị.
11Menua ndu eze whẹ iwhe i meru
Orẹbu mẹe iwhe i meru Zeyẹbu.
Mekwaawho ndu ishi whẹ iwhe i
meru Zeba mẹe Zalụmuna.
12Mbụ ndu ono, sụjeru: “Unu
t’anyi lwụa alị Chileke lwụta woru.”
13Jiko Chileke nkemu, menua tẹ whẹ dụ g’ọo ntụ ekpofu,
mbụ tẹ whẹ dụ g’ọo ẹswa ereshi, whẹrewhere whekashiru.
14T’ọ bụru g’ọku l’anọje ata wọwowo l’ọswa,
ọdua l’ọo g’ọku l’etsuje ugvu
15bụ gẹ l’ii-nwuru whuruwhuru
g’ọo oke whẹrewhere chịa whẹ ọso,
gụ egude oke whẹrewhere ghu ono mee t’egvu gudeshia whẹ.
16Menua t’iwhere ji whẹ iwhu,
nke ọwhu ndiwhe l’a-wata ọcho
ụzo, whẹ l’e-shi marụ ẹwha gụbe Onye-Nwe-Ọha.
17T’e meje whẹ iwhe-iwhere, meru ọtsu egvu nụ whẹ ntekenteke.
Tẹ whẹ gudekwa iwhere laa maa.
18Whẹ eshi nno marụ l’ọo gụbe onye ono, ẹwha ghu bụ
Onye-Nwe-Ọha ono
bẹ bụ Ọkalibe-Kangokotaru-Nu
lẹ mgboko-o gbaa mgburumgburu.
L’ọ tọ dụdu onye ọdo.
84Egvu-ọma, e deru nụ onye ishi egvu t’ụnwu Kora gụa, t’e gude ngwa egvu, l’eekuje gítitu gụa ya
1Gụbe Onye-Nwe-Ọha, bụ Onye-ishi-igwe-ọgu,
Iwhe ẹka i bu l’amakwanụ.
2Ọogushi obu mu ike, mbụ lẹ meji l’atọfuakwa mu atọfu
ẹka l’ọogu mu ẹgu tẹ mu nọdu l’eze-ụlo Onye-Nwe-Ọha.
Obu mu mẹe ogwẹhu mu l’agụ
egvu anụ Chileke l’anụ ndzụ, o noo l’ẹhu l’atsọ mu ụtso.
3Lenu lẹ nwogbee nwegeeru ẹka o bu l’eze-ụlo ghu ono.
Ẹsa nwekwaruwho ẹka l’ọokpaje
ẹkfunu, nọdu iya azụshi ụnwu.
Ẹka ono bụ lẹ mgboro ẹnya-mgbẹja
gụbe Onye-Nwe-Ọha, bụ Onye-ishi-igwe-ọgu,
mbụ gụbe onye ono, bụ eze mu bụru Chileke mu.
4Ẹhu-ụtso bụ nke ndu bu ebubu l’eze-ụlo ghu,
o noo nkele whẹ l’anọduje l’ẹka ono aja ghu ajaja ntekenteke.
5Ẹhu-ụtso bụ nke ndu bụ ghu bụ agbarike whẹ,
mbụ ndu bụ gẹ whẹ l’e-me jerwua
ugvu Záyọnu bẹ uche iya chiru whẹ ẹhu.
6Ọobuje, whẹ l’awụghata lẹ nsụda Baka
ya adụ whẹ g’ọo ẹka mini l’asọ nke gborogboro,
dụkwa whẹ whọ g’ọo ẹka mini udzumini chịshiru ike,
mee ẹka lile ọ bụru okpuru.
7Whẹ l’anọje aka ike eje eje jeye
nteke whẹ l’e-je akfụru l’iwhu Chileke l’ugvu Záyọnu.
8Gụbe Onye-Nwe-Ọha, bụ
Chileke, bụ Ọkalibe-kakọta-ike,
nụnu ekfukfu, mu l’ekfu anụ ghu.
Ngabẹru mu nchị, gụbe Chileke nke Jékọpu.
9Lenua ẹnya whụ onye ono,
l’egbochitaje anyi ono gụbe Chileke.
Lenua onye ono ẹnya, mbụ onye ono, ị wụru mmanụ l’ishi,
gude mee ya, ọ bụru eze.
Meeru iya eze-iwhe-ọma.
10Ọno ujiku owhu l’ọkpoku Chileke kakwa ree
amamẹ ọno ụnu awha labọ l’ụkporo awha iri l’ẹka ọdo.
Ọ kakwa mu ree tẹ mu bụru onye
l’agụharu ndu l’abata l’eze-ụlo
Chileke ụzo amamẹ lẹ mu je eburu l’ibe ndu ejo-ememe.
11Nkele Onye-Nwe-Ọha, bụ Chileke dụ g’ọo ẹnyanwu,
bụru iya l’egbochitaje anyi.
Onye-Nwe-Ọha l’emejeru ndiwhe eze-iwhe-ọma,
l’oomeje t’a kwabẹ madzụ ugvu.
Ọ tọ dụdu iwhe dụ ree, l’ookeje
ẹka ngvu l’ọ tọo nụdu iya ndu ụta l’adụa lẹ ndzụ whẹ.
12Gụbe Onye-Nwe-Ọha, bụ Onye-ishi-igwe-ọgu,
ẹhu-ụtso bụ nke onye dakoberu ghu nụ.
85Egvu-ọma, e deru nụ onye ishi egvu t’ụnwu Kora gụa
1Gụbe Onye-Nwe-Ọha, i goshiru l’alị ghu dụ ghu l’obu.
Ọ bụru iwhe ono meru g’o gude
i dulatawhu ndibe Jékọpu azụ l’alị whẹ,
mbụ ndu ono, e shi kpụa lẹ ndzụ.
2Ejo-iwhe, ndibe ghu megbaberu b’ị gụru whẹ nvụ,
bya asafu iwhe-dụ-ẹji, whẹ mekotaru.
3I sewhuru oke ẹhu-eghughu ghu g’ọ ha azụ,
bya aparụ ẹhu-eghughu ghu
ono, l’evo chichichi ono haa.
4Dobewhunu anyi azụ l’ọnodu
anyi, jiko Chileke, bụ onye ndzọta anyi.
Gụ ahanụa odoberu anyi ẹhu-eghughu ghu.
5?Ẹhu l’eghugbuwaru ghu rọ
eghu l’ẹka anyi nọ jeye lẹ gbururu tọo?
Mbụ, ?ịi-hawarọ ẹhu-eghughu
ghu ono t’o shi l’ọgbo rwua l’ọgbo?
6?Tịi kabẹ-zhidua mee t’anyi tuwerehu ọdo,
shi nno mee t’ẹhu kabẹ tsọo ndu nkeghu ụtso?
7Goshinu l’i yeru anyi obu jiko Onye-Nwe-Ọha.
Gụ adzọfutanu anyi.
8Mu l’a-ngabẹ nchị l’iwhe Chileke, bụ Onye-Nwe-Ọha l’ekfu.
O kweru ụkwa sụ l’iya l’e-me t’ẹhu
dụ ndu nkiya guu, mbụ ndu yeru iya obu.
Ọle iwhe whẹ l’a-kwabẹ ẹnya iya
bụ tẹ whẹ ba alawhuhe azụ l’ome eswe.
9Iwhe doru ẹnya bụ lẹ ndu l’atsụ egvu Onye-Nwe-Ọha
bẹ l’ọobyaakwa adzọfuta,
nke ọwhu o-gbu-zaazaa ya l’a-dụ l’alị anyi.
10N-yemobu yẹle ire-lanụ l’a-gba onwowhe ndzuta.
Ọ-dụ-chịriri yẹle ẹhu-guu ebyia onwowhe ọma.
11Ire-lanụ l’e-shi l’eliwhe mifutagee.
Ọ-dụ-chịriri eshi l’imigwe lee ẹnya l’eliwhe.
12Onye-Nwe-Ọha l’a-nụ iwhe dụ ree.
Ya emee t’iwhe, anyi meberu l’alị anyi mehu emehu.
13Ọ-dụ-chịriri l’e-vutajeru iya ụzo,
je atọoru iya ụzo, l’ọo-nọ eshi.
86Ekfukfu, Dévidi kfuru nụ Chileke
1Ngabẹnu nchị, gụbe Onye-Nwe-Ọha, zanụ mu oku.
Nkele mbẹdua bụ onye ụkpa,
mu bụru onye l’adụa g’ọ harụ iya.
2Letanu mu ẹnya nkele mu yeru ghu obu.
Ọo ghu bụ Chileke mu,
dzọfutanu mụbe onye ozhi ghu, dakoberu ghu nụ.
3Whụaru mu imiko; jiko Onye-Nwe-Ọha,
nkele mu l’eku ghu oku mbọku mbọku.
4Menua t’ẹhu tsọo obu mụbe onye ozhi ghu ụtso,
Nkele ọo gụbe Onye-Nwe-Ọha
bẹ obu mu l’owhu l’akpoku.
5Gụbe Onye-Nwe-Ọha bụ onye ọma,
bụru onye l’agụjeru madzụ nvụ.
Iwhe bụ ndu l’aryaku ghu nụ bẹ
l’iiyeje obu ye iya nke etsutsu iya.
6Nụnu ekfukfu, mu l’ekfu anụ
ghu jiko Onye-Nwe-Ọha.
Ngabẹnu nchị nụa mkpu,
mu l’echiku ghu t’i meeru mu eze-iwhe-ọma.
7Nteke iwhe l’atsụ mu l’ẹhu bẹ mu l’a-kpokuje ghu,
nkele mu marụ l’ịi-nụ olu mu.
8Agwa nọnu ta adụdu ọwhu
l’atụru gụbe Onye-Nwe-Ọha.
Tọ dụ iwhe whẹ l’eme, dụ ọwhu
l’aatụ eyeru ọwhu gụbedua l’eme.
9Mba gẹ mba ha ono, i gude ẹka ghu mee l’e-megee
byakọta, bya abaarụ gụbe Onye-Nwe-Ọha ẹja,
whẹ l’a-bya etua ghu ẹwha.
10O noo nkele ị parụ ẹka, tẹmenu l’iimeje iwhe dụ biribiri.
Ọo ghu kpụ bẹ bụ Chileke.
11Jiko Onye-Nwe-Ọha, zhinua mu ụzo ghu,
nke ọwhu mu l’a-nọ etso ụzo ire-lanụ ghu ono.
Menua t’ọriri mu bụru nnanụ l’ẹka ị nọ,
nke ọwhu mu l’a-nọ atsụ ẹwha ghu egvu.
12Mu gude obu mu g’ọ ha ekele,
ghu ekele, gụbe Onye-Nwe-Ọha, bụ Chileke mu.
Mu l’e-tu ghu ẹwha jeye lẹ gbururu.
13Nkele n-yemobu ghu parụ ẹka l’ẹka mu nọ.
O noo nkele ị nafụtaru ndzụ mu l’alị-maa.
14Ndu l’eku onwowhe eku
wulihuakwaru etso mu ọgu Chileke.
Ndu nweru akirishi dzukobe l’ẹka whẹ l’achọ ndzụ mu,
mbụ ndu ono, l’ẹte arị nke gụbe Chileke.
15Ọle gụbe Onye-Nwe-Ọha bụ Chileke, l’awhụje imiko,
bụru onye l’emeje eze-iwhe-ọma.
Ẹhu te eghujedu ghu eghu ẹgwegwa,
tẹhenu l’iiyeje obu ye iya nke etsutsu iya,
bya abụru onye l’akfụshije ike l’iwhe i kfuru.
16Ghanụaru mu iwhu, meeru mu eze-iwhe-ọma.
Yenu mụbe onye ozhi ghu ike ghu l’ẹhu.
Dzọfutanu mụbe nwa nwanyị ono, l’ejeru ghu ozhi nwụru.
17Goshinu mu iwhe-ọhubama,
l’e-me tẹ mu marụ l’ị bụ onye ọma,
nke ọwhu ndu ọhogu mu l’a-whụ iya, iwhere egude whẹ,
o noo nkele gụbe Onye-Nwe-Ọha
gbarụ mu mkpu bya adụa mu obu.
87Egvu-ọma, ụnwu Kora gụru
1Onye-Nwe-Ọha tụru ukfu-ụlo iya l’eli ugvu, dụ nsọ.
2Ẹnya, o yeru Záyọnu
ka shii amamẹ ọwhu o yeru
ẹka ọdo, ụnwu Jékọpu bugbabe.
3Eekfu iwhe dụ biribiri l’ẹhu
gụbe eze mkpụkpu nke Chileke:
4“Ndu Réhabu mẹe ndu Bábyilọnu
bẹ mu gụakwaru ye lẹ ndu marụ mu nụ.
Ndu Fílistiya mẹe ndu Taya yẹle ndu Kushi
bẹ mu gụkwaruwho ye iya.
Ndu ono gẹ whẹ ha bẹ l’aa-tụko
gụru ye lẹ ndu a nwụru lẹ Záyọnu.”
5Mbụ l’ee-kfuje whota Záyọnu ọnu sụ:
“Onye ọwa-a mẹe onye ọwhuna b’a nwụkwaru l’ime iya.
Ọ bụru Ọkalibe-Kangokotaru-Nu
l’onwiya l’e-me iya t’ọ kpọru akpọru.”
6Onye-Nwe-Ọha l’e-de l’ẹkwo, o deru ẹwha ndiwhe sụ:
“Onye ọwa-a b’a nwụru lẹ Záyọnu.”
7Ndu l’agụ egvu mẹe ndu l’ete iya etete l’a-tụko gụa egvu sụ:
“Ọo lẹ Záyọnu bẹ mini l’a-nụ ndzụ shi asọshiru mu.”
88Egvu-ọma, ẹ́vù, Hemanu, bụ o-shi-l’ẹpa Zera kwarụ nụ onye ishi egvu tẹ Ụnwu Kora gụa, t’e gude olu áwhụ gụa ya
1Jiko Onye-Nwe-Ọha, bụ Chileke l’adzọje mu nụ,
mu l’anọje ghu l’iwhu ryaa ẹkwa ẹhu mu eswe l’ẹnyashi.
2T’iwhe, mu l’ekfu anụ ghu rwunua ẹka ị nọ.
Ngabẹnu nchị nụ ẹkwa, mu l’arya.
3Nkele ndzụ mu l’owhu bụ iwhe-ẹhuka jiru iya,
ọnwu nọduwaa mu ndẹende.
4A gụwaru mu ye lẹ ndu l’a-nwụhu anwụhu.
Ike ta dụhe-zhidua mu adụdu owhu.
5E buwaru mu haarụ ndu nwụhuru anwụhu.
Mu dụwaa g’ọo onye e gburu tọgbo l’ime ilu,
mbụ g’ọo onye l’ịi tịi nyatajẹhe anyata owhu,
mbụ lẹ mu dụwaa g’ọo onye i
kefuru l’oke, tị kpajẹhe mu ishi.
6Ị pawarụ mu dẹe l’ike ilu,
l’ẹka ono gbarụ tsụrikiti, dụ omilomi.
7Oke ẹhu-eghughu ghu bẹ zụpyabeshiru mu ike.
I gudewaa akpara-mini nkeghu byarụ mu ishi ye.
8Ndu mu lẹ whẹ l’eshi ọkpobe
ọnya b’i mewaru whẹ l’agbango mu agbango.
I mewaa, whẹ l’ejijeru ẹgu yeru mu.
I gubuwaru mu ye l’ẹka mu l’ẹte abya l’agbala agbala.
9Mu jetawaru iwhe-ẹhuka jeye ẹnya kochigee mu ekochi.
Mbọku mbọku bẹ mu l’anọje eku gụbe Onye-Nwe-Ọha.
Lekwa ẹka mu whẹ labọ gẹ mu chiliru ghu iya.
10?Iimeje iwhe dụ biribiri goshi ndu nwụhuru anwụhu?
Ndu nwụhuru anwụhu, ?whẹ l’a-gbashi jaa ghu ajaja tọo?
11?Aanọduje l’ime ilu atụ ọnu g’i yeberu madzụ obu?
?T’a nọduje l’ẹka l’eegwe madzụ aryaka-eryune kfua l’ị bụ o-me-g’o-kfuru?
12?Aanọduje l’ẹka gbarụ ẹkpuroochi marụ iwhe dụ biribiri, l’iimeshi?
?T’a nọduje l’alị ẹka l’ẹete anyatajẹhe onye larụ iya nụ kfua l’ị bụ onye dụ chịriri?
13Ọle mu l’eku ghu t’ị gbatarụ mu gụbe Onye-Nwe-Ọha.
Ụtsu g’ụtsu ha bẹ mu l’ekfuje nụ ghu.
14?Ndẹnu iwhe meru g’o gude gụbe Onye-Nwe-Ọha jịka mu?
?Ọ hụnu gụnu meru i wocharu mu iwhu ghu?
15Eshi nteke mu bụ nwata bẹ ẹhu-ba-dụ-mma shi kpata mu ẹhu,
mu nọwaa ọnwu ntse.
Iwhe-ọtsulanu, shi ghu l’ẹka bẹ mewaru,
mu ta amahẹ ụzo atụgburu iya.
16Oke ẹhu-eghughu ghu bẹ rikputawaru mu ẹhu,
i yetawaru mu egvu, mu bụru ọla-l’iswi.
17Mbọku mbọku bẹ iwhe oye egvu ono l’asọ-wheje mu mgburumgburu g’ọo onye utso gbaburu ye.
O rikputawaru mu erikputa.
18Ndu mu lẹ whẹ l’atụ ọli mẹe ndu yeru mu obu b’i mewaru whẹ l’agbango mu agbango.
Ntaa bụwaa ẹkpuroochi bụ onye ẹbo mu nweru.
89Ẹ́vù, Etanu, bụ o-shi-l’ẹpa Zera kwarụ
1Mu l’a-gụ egvu gude kfua gẹ n-yemobu Onye-Nwe-Ọha habe shii.
Mu l’a-gụ iya jeye lẹ gbururu.
Mu l’e-gude ọnu mu kfua t’ọgbo l’ọgbo marụ l’ị bụ onye l’akfụshije ike l’iwhe i kfuru.
2N-yemobu ghu l’a-dụ g’ọ dụ jeye lẹ gbururu.
Ọo g’akpamigwe keru jịmu jịmu
bụ g’ọkfushi ike l’iwhe i kfuru l’ekejeru.
3Ị sụru l’onye ị họtaru bẹ gụ l’iya gbawarụ ndzụ,
mbụ l’i ribuwaru Dévidi, bụ onye ozhi ghu nte sụ:
4“Eri iya bẹ l’ii-me t’ọ kpọru akpọru nọo jeye lẹ gbururu,
mee t’oshi-eze iya shihu ike shi l’ọgbo rwua l’ọgbo.”
5Imigwe l’owhu l’atụ ọnu g’i dụ-be biribiri gụbe Onye-Nwe-Ọha,
tẹmenu l’oogoshikwawho l’ị bụ onye l’akfụshije ike l’iwhe i kfuru l’echilabọ ndu dụru ghu nsọ.
6Sụa, ?Ọo onye l’ime ụnwu imigwe l’aa-tụ eyeru Onye-Nwe-Ọha?
?Ndẹnu onye imigwe ọwhu l’aa-nọ atụ eyeru Onye-Nwe-Ọha?
7Ẹka ndu dụ nsọ nke imigwe dzukoberu bẹ l’aanọjekwa atsụ Chileke egvu.
Ọ kakọta ndu nọ-wheru iya mgburumgburu ọdu egvu.
8Gụbe Onye-Nwe-Ọha, bụ Chileke, bụru Ọkalibe-kakọta-ike, ?ọo onye dụ g’ọo ghu?
Ọkpehu parụ ghu ẹka gụbe Onye-Nwe-Ọha,
tẹmenu ọkfushi ike l’iwhe lile, i kfuru nọ-whee ghu mgburumgburu.
9Ọo ghu l’anọje eleta oke akpara-mini eze-ẹnyimu ẹnya,
l’ọobuje: akpara-mini -sọru nke kpukumu; gụ emee, ya adaa gbẹe.
10Réhabu b’i chiru pyaapyaa.
Ọ daburu g’ọo onye e gburu l’ọgu.
I gude ike ọkpehu ghu chịa ndu ọhogu ghu, whẹ gbaa nnanụ nnanụ.
11Igwe l’owhu bụ nkeghu.
Eliwhe l’owhu bụkwaruwho nkeghu.
Ọo gụbedua tụru ukfu mgboko l’owhu mẹe iwhe lile, dụ iya nụ.
12Isheli iya mẹe ọhuda iya bụkota gụbedua meru whẹ dobe.
Ugvu Tebọ yẹle ugvu Hemọnu l’agụje egvu ẹhu-ụtso mẹ whẹ nụa ẹwha ghu.
13Oshi-ẹka ghu bẹ bụ ọkpehu jiru iya ejiji.
Ẹka ghu shihuru ike; ẹka-ụtara ghu kangoo.
14Oshi-eze ghu bẹ bụ ọ-dụ-chịriri yẹle ikpe nkfụmoto b’e gude tụa ukfu iya.
Ọ bụru n-yemobu ghu yẹle ọkfushi ike l’iwhe i kfuru bẹ l’ịikpajeru vuru ụzo l’iwhe lile, l’iime ememe.
15Ẹhu-ụtso bụ nke ndu marụ gẹ l’eetuje ghu ẹwha,
mbụ ndu ono bụ iwhoro, shi l’ẹka gụbe Onye-Nwe-Ọha nọ bẹ whẹ l’egudeje eje ẹka lile, whẹ l’eje.
16Whẹ l’egudeje iswi ẹwha ghu ete ẹswa mbọku mbọku.
Whẹ l’ekutseje ghu l’ị bụ onye dụ chịriri.
17Nkele ọo ghu bụ ike, dụ biribiri, whẹ nweru.
Iwhe meru g’o gude, l’iimeje t’ike anyi kangoo bụ l’anyi dụ ghu l’obu.
18Ọo Onye-Nwe-Ọha bẹ nụru anyi onye mgbochita anyi,
Mbụ l’ọo yẹbe Onye Nsọ nke ndu Ízurẹlu bẹ nụru anyi onye eze anyi.
19O nweru nteke i kfuru okfu l’ọwhulenya yeru
ndu nkeghu ono, gbaru t’e gude ire whẹ ẹka.
I kfuru sụ whẹ agha:
“Mu yetawaru onye ojọgu lanụ ẹka.
Nwokorọbya ono bẹ mu shi
l’ime ndibe whẹ họta t’ọ bụru onye eze.
20Onye ozhi mu ono, bụ Dévidi bẹ mu chọwaru chọta,
bya eworu mmanụ mu, dụ nsọ wụa ya l’ishi.
21Ẹka mu l’a-dụ iya l’ẹhu ntekenteke shi nno sedeshia ya ike,
oshi-ẹka mu emee t’ike dụ iya.
22Ọhogu ta abyadụ l’a-dụ ike kakputa iya l’ẹnya.
Ndu ejo-ememe ta abya l’a-fụ ụka mekputa iya.
23Mu l’a-nọdu l’iwhu iya gwee ndu ọhogu iya aryaka-eryune,
mu echita ndu kpọru iya ashị tụa.
24Mu l’a-bụru O-me-g’o-kfuru l’ẹhu iya, n-yemobu mu adụ iya l’ẹhu.
Ọo l’ẹwha mu bẹ l’ee-gude wolia ọkpehu iya imeli.
25Alị-eze iya bẹ mu l’e-me t’ọ saa ọsa,
shi l’eze-ẹnyimu tụshia onwiya jeye l’ẹnyimu Yufurétisu.
26Ọo ryakuje mu sụ: ‘Ọo ghu bụ nna mu, bụru Chileke mu,
bụru oke-ẹwhuru l’adzọje mu nụ.’
27Mu l’e-me iya t’ọ bụru ọkpara mu,
mbụ t’ọ bụru iya l’a-kagezhia l’iwhe bụ ndu eze, l’achị mgboko.
28Obu ono, mu yeru iya l’a-nọ jeye lẹ gbururu.
Ọgbandzu mu l’iya l’a-kfụru kfụshia ike.
29Eri iya bẹ mu l’e-me, whẹ abụru echihu echihu jeye lẹ gbururu.
Ọ bụru g’igweli nọ-beru bụ g’oshi-eze iya l’a-nọ-beru.
30Ọ -bụru l’ụnwu iya jịka ome iwhe iwu mu kfuru,
whẹ te ekwe tsoru iwhe mu tọru ọkpa iya,
31whẹ -mebyia nsọ, mu doberu,
whẹ jịka ome iwhe mu sụru tẹ whẹ meje,
32o noo nteke mu l’e-gude mkpụru chia whẹ pyaapyaa,
gude hụ̀a whẹ àhụ̀hù,
mbụ chia whẹ ẹchachi gude hụ̀a whẹ àhụ̀hù ejo-iwhe, whẹ l’eme.
33Ọle ọ tọo kpọshidu tẹ mu be eyehe iya obu gẹ mu yeru iye ya,
tọ kpọshi tẹ mu ba abụhe O-me-g’o-kfuru l’ẹhu iya.
34Mu ta abyadụ l’e-mebyi ọgbandzu mu emebyi,
mu ta abya l’a-gbanwe okfu shi mu l’ọnu fụta.
35Mu gude lẹ mu dụ nsọ ria nte ugbo lanụ sefu ẹka;
mu ta abyadụ l’a-dzụru Dévidi ejire
36Eri iya l’a-nọ jeye lẹ gbururu.
Ọ bụru g’ẹnyanwu keru mu l’iwhu bụ g’oshi-eze iya l’e-keru jịngujingu.
37Oo-keru jịngujingu g’ọo ọnwa jeye lẹ gbururu,
bụ iwhe l’agba ẹka-ebe l’akpamigwe, l’e gude ire mu ẹka.”
38Ọle onye ono, ị wụru mmanụ l’ishi ono b’ị jịkawaru,
bya edoberu iya oke ẹhu-eghughu ghu.
39Ị jịkawaru ọgbandzu, gụ l’onye ozhi ghu gbarụ,
woru okpu-eze iya gwọo l’alị.
40I tsukposhigewaru mgbodo iya l’owhu etsukposhi.
Ị bya eworu ụlo-mgbochita iya tsua yọgiri-yọgiri.
41Iwhe bụ ndu l’aghata aghata gwoo ya tụtua.
Ndu obutobu iya gude iya eme iwhe-ọchi.
42I tuliru ndu kpọru iya ashị ẹka l’eli.
Ị bya emee ndu ọhogu iya; whẹ l’ete ẹswa.
43Atatiwhu ogu-ịgba iya b’ị ghageeru ịgharawhu,
bya emee; tọ dụjehe ike kfụru l’iwhu ọgu.
44I meru; tọ dụhe biribiri,
tẹmenu i wowaru oshi-eze iya gwọo lẹ ntụ.
45I meru iya ọ kahụ lẹ nwokoro,
bya eworu iwhere yee ya g’ọo onye yeru uwe-mkpẹelanu.
46?Ọo-dụ ẹgube ọwa-a jeye nteke ole gụbe Onye-Nwe-Ọha?
?Ii-wohawaroo onwoghu jeye lẹ gbururu tọo?
?Ọo nteke ole bẹ ẹhu-eghughu ghu
l’e-nwuberu whuruwhuru g’ọo ọku?
47Byiko, nyatakwa gẹ ndzụ mu dụ-be mkpirikpi,
nkele madzụ, i meru bụlewho udzu ọnu mmaanụ.
48?Ndẹnu madzụ, l’a-nọ ndzụ t’ọ bọ nwụhu anwụhu?
Onye l’a-dụ ike dzọo ndzụ iya t’ọ bọ la l’alị-maa?
49Gụbe Onye-Nwe-Ọha, ?ọo awe b’i doberu eze n-yemobu
ghu ono, i shi egoshije mu ono,
mbụ n-yemobu ono, i gude ọkfushi
ike l’iwhe i kfuru ribuaru Dévidi lẹ nte l’ịi-nụ iya?
50Onye-Nwe-Ọha, nyatanụ g’a
jaberu onye ozhi ghu ewenu,
mẹe gẹ mu tabewaru nshi l’ọchi, ndiwhe nọdu chịa mu;
51mbụ ọchi ono, ndu ọhogu gụbe Onye-Nwe-Ọha l’anọje a
chị onye ono, ị wụru mmanụ l’ishi l’ẹka lile, ọ dzọru ọkpa.
52T’ajaja bụru nke Onye-Nwe-Ọha jeye lẹ gbururu.
O noo g’ọ dụ. T’ọ dụ nno.
90Ekfukfu, Mósisu onye nke Chileke kfuru nụ Chileke
1Gụbe Onye-Nwe-Ọha, ọ kwa
ghu bụ onye anyi bu ebubu l’ime shi l’ọgbo rwua l’ọgbo.
2Tẹmenu oke ugvu bya l’a-dụ-deshiwaa,
tẹmenu ị bya l’e-medeshiwaa
mgboko mẹe ụwa kpaa mgburumgburu,
bẹ gụbedua l’onwoghu nọhawaa bụru Chileke,
i je l’a-nọgburu bụru Chileke jeye lẹ tututu-mịmimi.
3Madzụ bẹ l’iimeje, ya anwụhu lawhu azụ l’ẹja.
Ịisuje: “Unu lawhu azụ l’ẹja, unubẹ madzụ.”
4L’ẹnya nkeghu bẹ ụnukurunu
awha dụkwa g’ọo ujiku lanụ,
mbụ l’ọodu ghu-a g’ọo ẹgube-ẹ
madzụ l’atakụbe ẹnya chi asahụ.
5Iigudeje anwụhu zafụ madzụ g’ọo onye zafụru mkpaba,
Madzụ bẹ dụa g’ọo irwu ẹwu futaru l’ụtsu.
6L’ụtsu bẹ l’ọoduje pulapula, dụ nonwu-nonwu.
O -rwudeshia l’urwẹnyashi, ya
anwụlwashihuwaa kpọshia nkụ.
7Oke ẹhu-eghughu ghu
kegbushiakwaru anyi ekegbushi,
Ẹhu-eghughu, l’eghu ghu
damụdamu mee, meji gbalahu anyi l’ọhu ẹwho.
8Ejo-iwhe, anyi meshiru b’i gburu giriri l’atatiwhu ghu.
Iwhe-dụ-ẹji, anyi megbaberu lẹ mpya b’i meru,
ọ dabukotaru ẹba l’atatiwhu ghu.
9Mbọku mbọku bẹ l’iitukoshije
anyi oke ẹhu-eghughu nkeghu.
Ndzụ anyi bụa ẹgube-ẹ madzụ
l’ezhije ume whaa bẹ l’oomejewaa nno gvụ.
10Iwhe anyi l’anọ-beru bụ ụkporo awha ugbo ẹto l’awha iri.
Onye nọnukaru nụ bụ ụkporo awha ugbo ẹno bẹ l’ọo-nọ-be.
Ọle ọozhiawho nrimawhụ yẹle
iwhe-ọtsulanu bẹ l’aanọduje l’ime iya.
Ndzụ madzụ l’anọjelewho agba swaswaswa,
ntaantaa ya emee swamụ.
11?Ọo onye marụ g’ẹhu-eghughu ghu l’akpabe ike?
?Ọo onye b’o doru ẹnya mbụ ẹgube oke ẹhu-eghughu
ghu habe shii, nke ọwhu l’ọo-tsụ ghu egvu, gbarụ ghu nụ?
12Zhinua anyi t’anyi marụ l’ọ tọ
dụdu g’anyi l’a-nọ-be lẹ mgboko
nke ọwhu l’oo-me t’anyi marụ ágụ.
13Palia pazeta, jiko Onye-Nwe-Ọha.
?Ọo nteke ole bẹ ẹgube iwhe ọwaa l’a-nọnyaa gvụ?
T’imiko anyịbe ndu ozhi ghu kabẹnu dụ ghu.
14Tẹ n-yemobu ghu jijenu anyi ẹwho l’ụtsu,
nke ọwhu anyi l’a-nọje agụ egvu ete ẹswa mbọku mbọku.
15Menua t’ẹhu tsọo anyi ụtso tsọfu iya l’ishi
karụ g’ẹhu shi dụ-be anyi ẹji.
Menua t’ẹhu-ụtso anyi yẹle awha,
anyi jeru iwhe-ọtsulanu ha ẹnya nhamụnha.
16Menua t’anyịbe ndu ozhi ghu whụ iwhe l’iimegbabe.
Mekwaawho t’ẹpa anyi whụ g’ike ghu dụ-be biribiri.
17Gụbe Onye-Nwe-Ọha, bụ Chileke, t’eze-iwhe-ọma
nkeghu nọdunu swiru anyi eswiru.
Menua t’iwhe lile, anyi l’eme bụru akpụto-l’ọboroto.
Oowaa Onye-Nwe-Ọha,
menua t’iwhe lile anyi l’eme bụru akpụto-l’ọboroto.
911Onye nọ lẹ mkpula
Ọkalibe-Kangokotaru-Nu
l’e-buru eburu lẹ mkpula aguguru Ọkalibe-kakọta-ike.
2Gẹ mu l’e-kfuberu nke Onye-Nwe-Ọha bẹ bụ, l’ọo ya
bụ onye mu nọdu lẹ mkpula iya ezeru ndzụ,
ọ bụru iya bụ agbarara, mu domiru ndzụ mu.
Ọ ya bụ Chileke mu, onye mu dakoberu.
3Ọ kwa yẹbedua l’a-dzọfuta ghu
t’ị ba adaba l’ọnya, ndu l’achị nta ghu gbabẹru ghu.
Ọ bụru iya l’a-dzọ ghu l’ejo
ẹhu-ba-dụ-mma, l’etsu kakaka lẹ mgboko.
4Ọo akwẹka iya bẹ l’oo-gude kpuchia ghu.
Ọ bụru lẹ mkpula akwẹka iya
bẹ l’ịi-gbaba je edomia onwoghu.
Ọ bụru o-me-g’o-kfuru ono,
ọ bụ bẹ bụ iwhe l’egbochita ghu nụ,
bya abụru iwhe i gude ezeru onwoghu.
5Iwhe l’eye egvu l’ẹnyashi bẹ l’ịitii tsụdu egvu.
Tịi tsụkwawho akfụ, l’ezhi whawhawha l’eswe egvu.
6Ejo ẹhu-ba-dụ-mma, l’etsu
kakaka l’ẹkpuroochi ta adụkwa ọwhu l’ịi-tsụ egvu,
je akpaa lẹ nchịkarehu l’egbushi madzụ l’echi-eswe.
7Ụnu labọ l’ụkporo ugbo iri l’a-da ghu lẹ mgburẹku,
ụnu-kpụku adaa ghu l’ụzo ẹka-ụtara,
ọle ọ tọ dụdu iwhe bya l’e-me ghu nụ.
8Ọo ẹnya bẹ l’ii-gudeje whụ
ẹgube áwhụ, l’aanụ ndu ejo-ememe,
ọle gụbedua bẹ l’ọ tọo jịdu m’ọo mgbọdzu.
9Ọ kwa gụbe Onye-Nwe-Ọha bụ
onye mu nọ lẹ mkpula ezeru ndzụ.
Eshi-ọwhu ị nọ lẹ mkpula Ọkalibe-Kangokotaru-Nu,
10bẹ l’ọotoo dụdua ejo-iwhe, bya l’e-me ghu nụ.
Tọ dụ mgbuka, bya l’e-shita ụzo ibe ghu.
11Onoo nkele ọo-nụ ndu ojozhi-imigwe iya iwu
tẹ whẹ leta ghu ẹnya,
chekwaa ghu l’iwhe bụ ụzo, l’iishi.
12Whẹ l’e-gbobe ẹka pata ghu apata,
nggẹ t’ị kpọpyashi ọkpa l’ẹwhuru.
13Oduu-gburu-agụ yẹle oguji-nwaka
bẹ l’ịi-dzọpyabeje l’ọkpa,
mbụ l’oke oduu-gburu-agụ yẹle
ejo-agwọ bẹ l’ii-gudeje ọkpa dzọ-gbua adzọ-gbu.
14Onye-Nwe-Ọha sụkwaru:
“Eshi-ọwhu o yeru mu obu
bẹ mụbe Onye-Nwe-Ọha l’a-nọlewho anafụtaje iya.
Mu l’a-nọlewho egbochitaje iya t’ọ bọ dụ iwhe l’e-me iya nụ,
nkele ọ gụberu ẹwha mu iwhe.
15Oo-ku mu oku, mu aza iya.
O -je iwhe-ẹhuka, mu anọdu swiru iya eswiru.
Mu l’a-nafụta iya, kwabẹ iya ugvu.
16Mu l’e-gude ndzụ ogologo zụ-jia ya ẹwho,
goshi iya gẹ mu l’egudeje adzọ madzụ.”
92Egvu-ọma mbọku-ọtuta-ume
1Ọ dụ ree t’e tuje Onye-Nwe-Ọha ẹwha.
Ọ dụ ree t’a gụje egvu jaa gụbe
Ọkalibe-Kangokotaru-Nu ajaja,
2mbụ t’a gbashije l’ụtsu kfua l’i yeru anyi obu ntekenteke.
O be l’ẹnyashi, e kfua l’ị bụ o-me-g’o-kfuru.
3Iwhe l’ee-gude akụ iya lẹ nkwa bụ une, a kparụ l’ụdo iri,
yẹle ogelenda, l’aha gengu-gengu,
4nkele gụbe Onye-Nwe-Ọha
gudewaa iwhe dụ ree, l’iimeje mee t’ẹhu tsọo mu ụtso.
Mu l’agụje egvu ẹhu-ụtso mẹ mu
whụlewho iwhe i gude ẹka meshigbabe dobe.
5Gụbe Onye-Nwe-Ọha; lewaro g’iwhe, l’iime habe shii.
Tẹmenu ọriri ghu dụ omilomi.
6Onye égò sweru ta amadụ l’ọo ẹgube ono b’ọ dụ.
Toko odokwaawho onye eswe ẹnya,
7lẹ ndu ejo-ememe futagekwaa aba g’ọo ẹwu,
mbụ iwhe l’agbarụ m’ọo ndu l’eme ejo-iwhe l’ụwha,
bẹ ishi iya l’ẹmi iya bụ lẹ
Chileke l’a-la whẹ l’iyi gbururu jeye lẹ gbururu.
8Ọle ọo gụbe Onye-Nwe-Ọha bẹ
iwhe lile kụru ishi l’ẹka jeye lẹ tututu-mịmimi.
9Gụbe Onye-Nwe-Ọha, ndu
ọhogu ghu l’e-megekwaa bụru kpurupyata,
ndu l’eme ejo-iwhe bẹ
l’ee-megekwaa chịkashia nnanụ nnanụ gẹ whẹ ha.
10Ọle i meru, ọkpehu dụ mu g’ọo atsụ.
Ị bya awụa mu mmanụ, l’eshi mkpọ l’ishi.
11Mu gudewaa ẹnya mu whụ gẹ
Chileke gude lwụ-gbua ndu ọhogu mu,
gudewaa nchị mu nụa lẹ ndu
ejo-ememe ono, l’etso mu okfu b’a vụwaru l’ọgbaragbu.
12Ndu dụ chịriri l’a-nọ aja ajaja g’ọo nkfụ.
Whẹ l’a-nọ evu evuvu g’ọo oshi
sida, nọ l’ugvu ugvu Libanọnu.
13Whẹ dụ g’ọo oshi e yeru l’ụlo Onye-Nwe-Ọha.
Whẹ l’a-nọdu l’ọkpoku Chileke anyi asọ pulapula.
14Whẹ -kahụ-gee m’ọo akahụ, whẹ amịlee mebyi,
Whẹ adụle-ẹ nwata nwata, dụlee pokopoko,
15Nke ọwhu whẹ l’e-shi nno goshi
lẹ Onye-Nwe-Ọha bụ onye-dụ-chịriri,
bụru eze-ẹwhuru nkemu,
tọ dụ iwhe l’adụa chịriri, l’oomeje.
931Onye-Nwe-Ọha bụ eze.
O ye ọ-dụ-biribiri g’ọo onye yeru uwe,
yeru ọkpehu g’ọo onye yeru uwe.
Mgboko b’o meru; o shihu ike,
nke ọwhu bụ l’ọ tọ dụdu onye fụru ụka nwubata iya.
2Oshi-eze ghu bẹ kfụhawaru
chịmu chịmu tẹhenu a wata ọogu oge.
Gụbedua l’onwoghu bẹ shiroo lẹ gbururu nọduta.
3Gụbe Onye-Nwe-Ọha, eze-ẹnyimu l’awhụkwa ẹwhu,
eze-ẹnyimu l’awhụakwa gbudugbudu,
eze-ẹnyimu l’atụakwa oke akpara gbukungu gbukungu.
4Ọle Onye-Nwe-Ọha, bu l’imigwe bẹ parụ ẹka shii,
olu nkiya daghatarụ gbudugbudu ono,
eze-ẹnyimu l’awhụ.
Ọkpehu nkiya ka akpara-mini ono, eze-ẹnyimu l’atụ shii.
5Gụbe Onye-Nwe-Ọha, iwhe ị tọru ọkpa iya t’e tsoje
b’i meru, ọ kfụru kfụshia ike.
Iwhe meru ụlo ghu dụ ugvu l’ẹnya bụ l’ọ dụ nsọ,
o je l’a-dụ iya nno jeye lẹ tututu-mịmimi.
941Gụbe Onye-Nwe-Ọha, ọ kwa
ghu bụ Chileke, l’agwatajẹ ụgwo iwhe,
gụbe Chileke ono, l’agwatajẹ
ụgwo iwhe; wanụa whoo g’ọo ẹnyanwu.
2Zhilihunu gụbe onye l’ekpeje mgboko ikpe.
Kfụa ndu l’eku onwowhe eku ụgwo, gbarụ whẹ nụ.
3Gụbe Onye-Nwe-Ọha, ?ọo nteke
ole bẹ ndu-ejo-ememe l’a-tụnyaa okoo tụ-beru?
?Ọo nteke ole?
4Whẹ l’anọje eto ọnu
Whẹbe ndu ono, l’eme ejo-iwhe l’ekfuje okfu, ka ọnu whẹ.
5Gụbe Onye-Nwe-Ọha, ndu
nkeghu bẹ whẹ l’egweje aryaka eryune.
Ndu ono, bụ oke-iwhe ghu bẹ whẹ l’anọje akpa ẹhu.
6Ụnwanyi-mbunu mẹe ndu lwarụ
alwa bẹ whẹ l’awhụje awhụwhu.
Ndu nna whẹ l’anọhee bẹ whẹ l’egbuje egbugbu.
7Whẹ nọdu, whẹ ekfu sụ lẹ:
“Onye-Nwe-Ọha ta awhụjekwa iwhe anyi l’eme,
mbụ lẹ Chileke nke Jékọpu ta akpajẹdu anyi ishi.”
8Unu kwabẹkwaru onwunu ẹnya; unubẹ ụnwu eliwhe ono, égò swehuru,
unubẹ ndu ono, l’eme eswe,
?ọo nteke ole bẹ unu l’a-marụ agụ?
9?Ọo chia onye ono, bụ iya
kfuberu madzụ nchị ta anụdu iwhe lẹ nchị?
?Tọ chia onye ono, moberu
madzụ ẹnya ta awhụdu ụzo?
10?Ọo chia onye ono, l’egbẹjee àhụ̀ ndu mba l’amaa ya nụ
àhụ̀hù te gbechidua hụ̀a unubẹdua àhụ̀hù,
mbụ ?ọo chia yẹbedua, l’ezhije
madzụ iwhe gbẹ-chia t’ọ dụ iwhe ọ marụ?
11Onye-Nwe-Ọha makọtaru iwhe madzụ l’arị l’ọriri.
Ọ marụ l’ọriri madzụ bụkota mkpọkoro iwhe.
12Sụ-a, ẹhu-ụtso bụ nke onye
gụbe Onye-Nwe-Ọha l’ahụ̀je àhụ̀hù;
mbụ onye l’iigudeje iwu ghu ezhi iwhe.
13Onye ono bẹ l’iimeje tẹ meji
nmakfuru anmakfuru mẹe l’ooje iwhe-ọtsulanu,
jeye mbọku, l’ee-bu nsụ tẹ ndu ejo-ememe nwulahu iya.
14O noo nkele Onye-Nwe-Ọha ta abyadụ l’aha ndu nkiya.
Ọ tọ byadụ l’e-buha ndu ono, bụ oke-iwhe iya ẹka.
15O noo lẹ ndu ikpe bya l’a-nọ
ekpee ikpe, kfụru nhamụnha.
Ndu obu whẹ gụru iwhoro azụru nkwe nabata iya.
16?Ọo onye l’a-gbalihu l’ọzori mu
je alwụshi ndu ejo-ememe ọgu?
?Ọo onye l’a-tụru ike yeru mu je
alwụshi ndu l’eme ejo-iwhe ọgu?
17Ọ -bụ lẹ Onye-Nwe-Ọha ta agbataru mu ọso eyemẹka,
mu gẹge atabuhuhawaa ọnu nteke l’aamaa.
18Nteke mu rịru l’ọkpa bẹ chifuwaru mu nụ
bẹ bụ n-yemobu gụbe Onye-Nwe-Ọha wọkotaru mu.
19Nteke ọriri chiru mu ẹhu
b’ị gbarụ mu ume, ẹhu tsọlahaa mu ụtso.
20?Ii-kwe tẹ gụ lẹ ndu ono bụ
ọ-marụ-iwu-ada-iwu whẹ megba iwhe,
mbụ ndu ono l’atụ-gejee iwu, whẹ adaa ya?
21Whẹ l’edzukobeje tẹ whẹ laa ndzụ ndu dụ chịriri l’iyi.
Whẹ l’ekpeje onye l’adụa iwhe o meru nkfugbu.
22Ọle ọo Onye-Nwe-Ọha bụ onye l’egbochitaje mu nụ.
Ọo Chileke mu bụ eze-ẹwhuru
ono, mu l’agbabajẹ je edomia onwomu.
23Ọo ya l’a-kfụ whẹ ụgwo iwhe-dụ-ẹji whẹ l’eme,
ọ bụru iya l’a-la whẹ l’iyi l’ejo-iwhe ono, whẹ l’eme.
Ọo Onye-Nwe-Ọha, bụ Chileke anyi l’a-la whẹ l’iyi.
951Unu bya t’anyi gụa egvu ẹhu-ụtso gude jaa Onye-Nwe-Ọha.
Unu t’anyi tụa ụzu ẹhu-ụtso gude kwabẹ iya ugvu,
mbụ onye ono, bụ eze-ẹwhuru, l’adzọje anyi ono.
2Unu t’anyi bya l’iwhu iya bya ekele iya ekele.
Unu t’anyi gude egvu-ọma tụa
ụzu ẹhu-ụtso gude kwabẹ iya ugvu.
3O noo lẹ Onye-Nwe-Ọha bụ Chileke, parụ ẹka.
Ọ bụru iya bụ onye eze, parụ ẹka,
onye kakọta agwa, ndu mgboko l’owhu shii.
4Ẹka omilomi alị jeberu gvụ bụ iya b’ọ dụ l’ẹka.
Ọnunu swọngu-swọngu oke ugvu bụru iya nwe iya.
5Eze-ẹnyimu bụ nkiya nkele ọo ya meru iya,
ọ bụru iya gude ẹka iya meta alị-ọkponku dobe.
6Unu bya t’anyi tụko whuzeta baarụ iya ẹja.
T’anyi tụko byishi ikpere l’atatiwhu
Onye-Nwe-Ọha ono, bụ iya meru anyi.
7Nkele ọo ya bụ Chileke anyi.
Anyi bụru ndu l’ooche g’ọo onye l’eche atụru,
bụru ụnwu atụru, nọ iya l’ẹka.
Ọo ya bụ, nteke unu nụru olu iya ntanụ ọwa,
8T’unu ba akpochikwa obu unu gẹ ndụ-ichee unu whẹ
kpochiru iya lẹ Meriba,
mẹe gẹ whẹ kpochiru iya lẹ Masa l’echi-ẹgu,
9mbụ ẹka ono, ndụ-ichee unu whẹ nọdu dalee yẹbe
Chileke adale, lekwaa ya whọ ule,
l’ẹka whẹ gudekwa ẹnya whẹ whụkota iwhe ya meru.
10Ụkporo awha ugbo labọ kperegedemu bẹ ọgbo
ono lakọtaru yẹbe Chileke ashị.
Mu sụru agha: “Uche whẹ jewhuhuwaru ejewhuhu
l’ome iwhe-dụ-ẹji.
Whẹ te ekwe lwawhuta azụ bya
eshia ụzo, mu goshiru whẹ.”
11Ọo ya bụ, mu gude
ẹhu-eghughu ribua ya lẹ nte sụ:
“Whẹ ta abyadụ l’a-bata l’ẹka mu lẹ whẹ l’a-nọdu tụta ume.”
961Unu gụa egvu ọwhuu nụ Onye-Nwe-Ọha.
Unu gụa egvu nụ Onye-Nwe-Ọha, unubẹ eliwhe l’owhu.
2Unu gụa egvu nụ Onye-Nwe-Ọha, unu tua ya ẹwha.
Unu kfuje g’ọ bụ-be onye
l’adzọ ndzụ mbọku mbọku.
3Unu tụaru ndu ọha ọdo ọnu lẹ g’ọ dụ-be biribiri.
Unu akọoru mba gẹ mba ha lẹ g’ọru iya dụ-be biribiri.
4Nkele Onye-Nwe-Ọha bẹ parụ
ẹka, bya abụru onye gbarụ t’a jaa ya oke ajaja.
Ọ gbakwarụwho t’a tsụje iya egvu amamẹ agwa lile.
5Nkele agwa ndu mgboko l’owhu
bụkota iwhe e gude ẹka mee.
Ọle ọo Onye-Nwe-Ọha bẹ gude
ẹka iya mee igwe l’onwiya.
6Ọ-dụ-ugvu mẹe ogbu-zaazaa bẹ nọdu iya l’atatiwhu.
Ọkpehu mẹe ọ-dụ-biribiri tụko ụlo iya, dụ nsọ sweta.
7Unubẹ ikfu g’ikfu ha lẹ
mgboko-o, unu kwabẹ Onye-Nwe-Ọha ugvu.
Unu kfua g’ọ dụ-be biribiri mẹe g’ọkpehu iya habe shii.
8Unu kwabẹ Onye-Nwe-Ọha ugvu, gbarụ ẹwha iya.
Unu gude iwhe bya l’iwhu iya.
9Unu yee uwe dụ nsọ baarụ Onye-Nwe-Ọha ẹja.
Unu nmaa kpakpakpa l’iwhu iya, unubẹ eliwhe l’owhu.
10Unu karụ mba gẹ mba ha lẹ Onye-Nwe-Ọha bụ eze.
Mgboko l’owhu bẹ kfụru
chịmu, tọ dụ iwhe sụru iya enwubata.
Ọo Onye-Nwe-Ọha l’e-kpe ụnwu eliwhe ikpe nkfụmoto.
11T’igweli tee ẹswa; alị enweru ẹhu-ụtso.
T’eze-ẹnyimu mẹe iwhe lile, nọ iya nụ tụkokwa tụa akpara.
12T’ẹgu tụa okoo mẹe iwhe lile, dụ iya nụ.
Ọwhube oshi, dụ l’ọswa agụa egvu ẹhu-ụtso.
13Tẹ whẹ gụa egvu ono l’atatiwhu Onye-Nwe-Ọha, o noo
nkele ọobyawa okpe ụnwu eliwhe ikpe.
Ndu mgboko bẹ l’oo-kpe ikpe l’ụzo dụ chịriri,
mbụ lẹ ndiwhe bẹ l’oo-kpe ikpe, kfụru nhamụnha.
971Ọo Onye-Nwe-Ọha bụ eze, l’achị nụ,
t’ẹhu tsọo ndiwhe l’owhu ụtso.
T’iwhe bụ ndu mba gẹ mba ha ono,
bukube eze-ẹnyimu tekota ẹswa.
2Urwukpu mẹe ọochi nọ-wheru iya mgburumgburu.
Ọ bụru ọdu-chịriri yẹle ikpe, kfụru ọto b’e gude
tụa ukfu oshi-eze iya.
3Ọku l’evuje ụzo je atụko ndu ọhogu iya, nọ-wheru iya
mgburumgburu kepyashia.
4Ebemu, l’ọolo whaa-whaa bụru
iwhoro, e gude awhụ ụzo l’eliwhe.
Ndiwhe l’owhu -whụa ya, whẹ anmahụ jijiji.
5Ugvu l’owhu l’azashịhuje g’ọo
ụ̀nwù mẹ whẹ nọdu l’iwhu Onye-Nwe-Ọha,
mbụ mẹ whẹ nọdu l’iwhu
Onye-Nwe-Ọha ọwhu nwe mgboko l’owhu.
6Akpamigwe l’owhu l’atụ ọnu l’ọ bụ onye-dụ-chịriri,
ndiwhe l’owhu l’awhụanaa g’ọ dụ-be biribiri.
7Iwhe bụ ndu l’abarụ iwhe a pyịru apyịpyi ẹja,
mbụ ndu gude agwa eku onwowhe eku
b’e mekotaru iwhe-iwhere nụ.
Unubẹ agwa l’owhu, unu bya abaarụ Chileke ẹja.
8Ndu bu lẹ Záyọnu nụru iya, whẹ wata ote ẹswa.
Ndu Juda bẹ ẹhu l’atsọ ụtso gẹ
gụbe Onye-Nwe-Ọha l’egudeje ekpe ikpe.
9Nkele gụbe Onye-Nwe-Ọha bụ
Ọkalibe-Kangokotaru-Nu lẹ
mgboko kpaa mgburumgburu.
I kangokotaru agwa, dụ lẹ mgboko-o l’owhu.
10Tẹ ndu yeru Onye-Nwe-Ọha
obu kpọkwaa ejo-iwhe ashị,
nkele ọ kwa ndu yeru iya obu bẹ l’ọonoje eleta ẹnya.
Ọ bụru whẹ bẹ l’ọonafutaje l’ẹka ndu ejo-ememe.
11Iwhoro b’e meru t’ọ dụru ndu dụ chịriri.
Ndu obu gụru iwhoro b’e meru t’ẹhu-ụtso ji whẹ ẹhu.
12Unu nọdu l’ẹka Onye-Nwe-Ọha
tee ẹswa, unubẹ ndu dụ chịriri!
Unu tua ya ẹwha, l’ẹwha iya dụ nsọ.
98Egvu-ọma
1Unu gụa egvu ọwhuu nụ Onye-Nwe-Ọha,
nkele o meru iwhe dụ biribiri.
Ọo ẹka-ụtara iya yẹle ogwẹka iya ono, dụ nsọ b’o gude
lwụ-gbua ọkpobe alwụ-gbu.
2Onye-Nwe-Ọha mewaru t’a marụ l’ọodzofutaje,
mewaa tẹ ndu mba lile marụ l’ọ bụ onye dụ chịriri.
3Ọ nyatawarụ n-yemobu, o yeru
ọnu-ụlo Ízurẹlu yẹle ire-lanụ, l’oomeru whẹ.
Je akpaa l’ẹka igwe beru alị beru
b’a whụkotawaru gẹ Chileke
anyi l’egudeje adzọ madzụ.
4Unu tụa ụzu ẹhu-ụtso gude
kwabẹ Onye-Nwe-Ọha ugvu,
unubẹ ụnwu eliwhe l’owhu.
Unu gụa egvu-ọma gụshia ya ike gude jaa Onye-Nwe-Ọha.
5Unu gude une gụa egvu-ọma
gude tua Onye-Nwe-Ọha ẹwha.
Unu egudekwawho une mẹe egvu-ekwekwe jaa ya ajaja.
6Unu gburu opyi-ọku ye iya; whụa ụpyi ye iya.
Unu tụa ụzu ẹhu-ụtso gude
kwabẹ Onye-Nwe-Ọha, bụ eze ugvu.
7T’eze ẹnyimu yẹle iwhe lile, dụ iya l’ime tụkokwa
tụa oke akpara-mini.
Mgboko l’owhu atụa ụzu yẹle iwhe lile, bu l’ime iya.
8T’ẹnyimu ẹnyimu, nọnu tụko kụa ẹka.
Ugvu g’ugvu ha anọkobe gụa egvu l’ẹhu l’atsọ whẹ ụtso.
9Tẹ whẹ tụko nọdu l’iwhu Onye-Nwe-Ọha gụa egvu,
nkele ọobyawa okpe ụnwu eliwhe ikpe.
Ndu mgboko l’owhu bẹ l’oo-kpe ikpe kfụru ọto,
ya ahakwarụwho ndiwhe l’owhu enge, kfụru nhamụnha.
991Ọo Onye-Nwe-Ọha bụ Eze, l’achị nụ.
Tẹ ndiwhe nmakwaa kpakpakpa.
Oshi-eze iya dụ l’echilabọ cherubu.
Tẹ mgboko l’owhu nmakọta yikayika.
2Onye-Nwe-Ọha pakwarụ ẹka,
mbụ onye ono, bu lẹ Záyọnu.
E woliru iya eli, ọ kakọta mba lile shii.
3Tẹ whẹ jaa ẹwha ghu, bụ ọkalibe ajaja,
mbụ ẹwha ghu ono, ndiwhe l’atsụ egvu.
Ọ dụ nsọ!
4Eze ọbu bẹ parụ ẹka.
Iwhe l’adụje iya ree bụ ikpe, kfụru nhamụnha.
Ome iwhe ẹnya-nhamụnha b’i meru dobe, ọ kfụru kfụshia ike.
L’ẹhu ụnwu Jékọpu b’i meru
iwhe kfụru ọto mẹe umere, kfụru nhamụnha.
5Unu kutsee Onye-Nwe-Ọha, bụ Chileke anyi.
Unu bya ewhuzeta lẹ mgboro ọkpa iya baarụ iya ẹja.
Ọ dụ nsọ!
6Mósisu yẹle Érọnu shi lịru lẹ
ndu bụ ndu l’agbajẹ ẹja nụ Chileke.
Sámuwẹlu shi lịru lẹ ndu shi akpọ-kuje ẹwha iya.
Ndu ono shi ekuje ẹwha Onye-Nwe-Ọha, ya aza whẹ oku.
7O shi anọduje l’urwukpu, kpụru
orogbodo kfuru okfu nụ whẹ.
Whẹ shi edobeje iwu iya, eme nsọ ọ tọru whẹ ọkpa iya.
8Gụbe Onye-Nwe-Ọha, bụ
Chileke anyi, i shi azajẹ whẹ oku.
A makwarụ-a l’i shi àhụ̀je ndu
Ízurẹlu àhụ̀hù nteke whẹ shisweru ụzo,
ọle i shi bụru whẹ Chileke,
l’agụjeru onye meru iwhe-dụ-ẹji nvụ.
9Unu kutsee Onye-Nwe-Ọha, bụ Chileke anyi.
Unu baarụ iya ẹja l’ugvu iya dụ nsọ,
nkele Onye-Nwe-Ọha, bụ Chileke anyi dụkwa nsọ.
100Egvu-ọma, e gude ekele Onye-Nwe-Ọha ekele
1Unu tụa ụzu ẹhu-ụtso gude
kwabẹ Onye-Nwe-Ọha ugvu,
unubẹ ụnwu eliwhe l’owhu.
2Unu gude ẹhu-ụtso baarụ Onye-Nwe-Ọha ẹja.
Unu gude egvu ẹhu-ụtso bya l’iwhu iya.
3Unu makwarụ l’ọo Onye-Nwe-Ọha bụ Chileke.
Ọo ya meru anyi; anyi bụru nkiya.
Anyi bụ ndibe iya; bụru atụru, l’ooche eche.
4Unu gude egvu-ekele bahụ l’ibe iya.
Unu egude egvu-ajaja jerwua l’ọkpoku iya.
Unu kele iya ekele tua ya ẹwha.
5O noo nkele Onye-Nwe-Ọha bụ onye ọma,
n-yemobu nkiya l’anọje jeye lẹ gbururu.
Ọokfushije ike l’iwhe o kfuru shi l’ọgbo rwua l’ọgbo.
101Egvu-ọma, Dévidi deru
1Mu l’a-gụ egvu gude goshi lẹ mu yeru Chileke obu,
gụa ya goshikwawhọ lẹ mu l’ekpe ikpe kfụru nhamụnha.
Mu l’a-gụ egvu gude jaa gụbe Onye-Nwe-Ọha ama.
2Ndzụ mu bẹ mu l’a-tọ nwẹhu
mee t’ọ bọ dụ ẹka ụta l’a-dụ iya.
?Ọo nteke ole bẹ l’ịi-byakfuta mu?
Mu l’e-gude obu, gụru samụ buru l’ibe mu.
3Iwhe l’abẹe l’iwhe bẹ mu ta
abyadụ l’e-kwe t’o shita mu l’iwhu.
Ndu tsonyaaru Chileke tsuwhu azụ
bẹ umere whẹ l’adụje mu ashị.
Mu lẹ whẹ ta abụkwa ẹhu.
4Ndu ụzo whẹ gberu nggọ bẹ mu l’edobeje otẹnya.
Ọ tọ dụdu iwhe mu l’ejo-iwhe jigba.
5Ndu l’anọje ekfuru ndu ọdo
okfu-azụ bẹ mu l’e-me whẹ eyifu.
Ndu l’eku onwowhe iwhe whẹ
l’ahaa g’ọo ya mẹe ndu obu l’enyi kiti kiti
bẹ mu l’ẹte atakwarụ nshi.
6Ndu l’akfụshije ike l’iwhe whẹ kfuru l’alị-a
bẹ ẹnya mu l’a-dụ l’ẹhu whẹ;
nke ọwhu mu lẹ whẹ l’a-tụko buru,
Ọ kwa onye ụta l’adụa lẹ ndzụ iya
bẹ l’e-megee ejeru mu ozhi.
7Ọ tọ dụdu onye l’eme iwhe
l’ẹregede, mu bya l’e-kwe t’o buru l’ụlo mu.
Tọ dụ onye l’adzụ erekfube,
mu bya l’e-kwe t’ọ kfụru mu l’iwhu.
8Ụtsu mbọku mbọku bẹ mu
l’e-meje tẹ ndu l’eme ejo-ememe,
nọ l’alị-a bụru kpukpuru-swoo.
Ndu l’eme ejo-iwhe bẹ mu l’e-kefu
l’oke lẹ mkpụkpu nke Onye-Nwe-Ọha.
102Ekfukfu, onye l’eje iwhe-ẹhuka l’ekfu anụ Chileke Okfu, o kfuru nteke ike l’agvụ iya agvụgvu, gụru áwhụ, dụ iya l’obu nụ Onye-Nwe-Ọha
1Nụnu ekfukfu, mu l’ekfu anụ ghu jiko Onye-Nwe-Ọha.
Tẹ mkpu, mu l’echi rwunua ghu nchị.
2Be edomikwaru mu iwhu ghu
ntaa, mu l’eje iwhe-ẹhuka-a.
Ngabẹnuru mu nchị.
Zanụ mu oku ẹgwegwa ntaa, mu l’eku ghu oku.
3Nkele ndzụ mu whukahuwaru g’ọo ẹnwuru ọku.
Ọkpu mu l’eke whuruwhuru g’ọo icheku-ọku.
4Obu mu b’e gburu pyaapyaa, ọ nwụa lwaa g’ọo ẹwu,
nke ọwhu o meru mu, mu nyazọo ori nri.
5Mu tsụwaru oke ude jeye mu wụfu koru g’ọo ẹda,
bụru ọkpu wụshiru.
6Mu dụ g’ọo udukufuku, bu l’echi-ẹgu,
mbụ lẹ mu dụ g’ọo udukufuku, bu l’okorobo ụlo.
7Mu zẹe azẹe nwụru ẹnya.
Mu dụwaa g’ọo nwẹnu,
beru nkụnyi iya l’eli okpotsu-ụlo.
8Ndu ọhogu mu l’anọje eme
mu iwhe-iwhere mbọku mbọku.
Ndu mu dụ ashị gudewaa ẹwha mu ewhu iwhu.
9Ọo ntụ bẹ mu l’erije, ya abụru mu nri.
Mu l’ewojeru ẹnya-mini
gwakọbe l’iwhe mu l’angụ angụngu.
10Iwhe kparụ iya nụ bụru l’ẹhu l’eghushi ghu eghu ike,
nkele i woliwaru mu tuwhaa etuwha.
11Nwujiku ole, mu l’a-nọ
l’eliwhe-e dụwaa g’ọo inyonyo urwẹnyashi.
Mu l’anọjelewho anwụ lwaalwaa g’ọo ẹwu.
12Ọle gụbe Onye-Nwe-Ọha sụgaru l’oshi-eze ghu
gẹ l’ịi-sụgaru iya jeye lẹ gbururu.
A ta abyadụ l’anyazọ ẹwha ghu
anyazọ shi l’ọgbo rwua l’ọgbo.
13Ii-gbalihu whụaru Záyọnu imiko,
nkele o rwuwaru nteke l’ii-meru iya eze-iwhe-ọma,
mbụ l’oge nteke ono, a tụ-buru atụ-bu bẹ rwuwaru,
14o noo nkele ẹwhuru iya dụ ndu l’ejeru ghu ozhi mkpa.
Ọobuje, ọ -kpụa udzu tụu, imiko iya adụshia whẹ ike.
15Ndu mba gẹ mba ha l’a-tsụ
ẹwha gụbe Onye-Nwe-Ọha egvu.
Ndu eze, nọkota lẹ mgboko l’owhu
l’a-kwabẹ o-gbu-zaazaa ghu ugvu,
16nkele Onye-Nwe-Ọha l’e-gude ẹka iya tụkwaa Záyọnu,
gude o-gbu-zaazaa ya lụfuta.
17Ọo-nụ ekfukfu, ndu l’adụa g’ọ harụ whẹ l’ekfu anụ iya.
O too lewhudu aryọryo, whẹ l’aryọ iya l’ẹnya.
18T’e dee ọwa-a l’ẹkwo doberu ọgbo ọwhu l’abya l’iwhu,
nke ọwhu ndu ọwhu, l’ẹte
anwụa l’a-ja Onye-Nwe-Ọha ajaja.
19Lẹ Onye-Nwe-Ọha shikwa l’eze-ụlo iya,
dụ l’ewhekerewhe lezeta ẹnya l’alị,
mbụ l’o shi l’imigwe lee ẹnya whụ iwhe l’agba lẹ mgboko,
20tẹ ya nụa ude, ndu a tụru mkpọro l’atsụ,
shi nno mee tẹ ndu e kperu
nkfugbu nweru onwowhe.
21Ọo ya bụ nke ọwhu l’aa-rya
ẹwha Onye-Nwe-Ọha aryarya lẹ Záyọnu,
jaa ya ajaja lẹ Jerúsalẹmu,
22mẹe ọha yẹle alị-eze ndiwhe l’owhu dzukobelewho tẹ
whẹ baarụ Onye-Nwe-Ọha ẹja.
23Lẹ mu byakwa l’ejejahu ụzo ndzụ mu ẹbo,
ọ tụkowaa ike, shi dụ mu nụ nashịkota mu,
bya ebubota iwhe lẹ ndzụ mu.
24Ọo ya bụ, mu sụ: Be ekutashinu mu, byiko Chileke mu,
l’ẹbe ọ dụ gẹ mu nọ-bewaru lẹ mgboko,
lẹ gụbedua bẹ l’a-nọdukwa ndzụ
awha g’awha ha shi l’ọgbo rwua l’ọgbo.
25Eshi mbụlembu bẹ bụ ghu tụru ukfu mgboko l’owhu.
Ọ bụkwaru ghu whọ bẹ gude ẹka ghu mee igweli.
26Iwhe lile ono l’e-bechaa whushihukota,
ọle gụbedua l’a-dụgburu g’ị dụ,
mbụ l’iwhe lile ono l’e-megee kashịhu g’ọo uwe.
Ọo gẹ l’aagbanweje uwe bụ gẹ
l’ii-megee gbanwee whẹ, whẹ eje adụhe.
27Ọle gụbedua bụlewho onye ị bụ bẹ l’ịi-bụgburu.
Ị nọwaa ndzụ gẹ l’ịi-nọ iya jeye lẹ tututu-mịmimi.
28Ụnwu, ndu l’ejeru ghu ozhi nwụtaru l’e-buru tụgburu.
Ee-mekwawho t’ẹpa whẹ kpọru akpọru l’iwhu ghu.
103Egvu, Dévidi deru
1Gụbe obu mu, jaa Onye-Nwe-Ọha ajaja.
T’iwhe, dụ mu l’ime ẹhu, jaa
onye ono, ẹwha iya dụ nsọ ajaja.
2Obu mu, byiko jaa Onye-Nwe-Ọha ajaja.
Tọ bọ dụkwa urwu, l’eeritaje iya
l’ẹka m’ọo nnanụ, l’ịi-nyazọ anyazọ.
3Ọogujeru mu nvụ l’iwhe-dụ-ẹji, mu meru g’ọ ha.
Oomeje tẹ mu ka mma l’iwhe l’eme mu nụ.
4Ọogbafutaje ndzụ mu t’ọ bọ la l’ilu,
kpube mu n-yemobu mẹe obu-imiko g’ọo okpu-eze.
5Oogudeje iwhe dụ ree zụ-jia mu ẹwho.
Oomeje tẹ mu dawhu azụ bụru nwẹpa g’ọo ugo.
6Onye-Nwe-Ọha l’emeje iwhe dụ chịriri,
l’ookpeje ndu l’aakpa l’ẹhu ikpe, kfụru nhamụnha.
7O meru tẹ Mósisu marụ ụzo iya,
mee tẹ ndu Ízurẹlu marụ iwhe lile, l’oome.
8Onye-Nwe-Ọha bụ onye l’awhụje imiko,
bụru onye l’emeje eze-iwhe-ọma.
Ẹhu te eghukebejedu iya eghu
ẹgwegwa, tẹmenu l’ooyeje obu ye iya nke etsutsu iya.
9Ọ tọo bajẹdu mba ntekenteke.
Tọo vụje ọvuma jeyewaroya.
10O too mejedu eyeru anyi lẹge iwhe-dụ-ẹji anyi gbarụ.
Tọo kfụje anyi ụgwo ejo-iwhe, anyi l’emegbabe.
11Nkele ọo g’igwe nọ-be alị
oroke-imeli-imeli bụ g’ọ habe;
mbụ oye obu, o yeru ndu l’atsụ iya egvu.
12Ọ bụru g’ụzo ẹnyanwu-awata
teberu ẹnya l’ụzo ẹnyanwu-arịba,
bụ g’ẹka o wofuru emeswe, anyi mesweru iya je edobe
teberu ẹnya l’ẹka anyi nọ.
13Ọ bụru gẹ nna l’awhụjeru nwa iya imiko,
bụkwawho gẹ Onye-Nwe-Ọha l’awhụjeru ndu l’atsụ egvu iya imiko.
14Nkele ọo ya marụ g’e gude mee anyi.
Ọonyataje l’ọo udzu-ẹja mmaanụ bẹ anyi bụ.
15L’a -bya l’ẹka madzụ nọ bẹ ndzụ iya dụ g’ọo ẹwu.
Ọonoje aba pulapula g’ọo fụlawa, dụ l’ẹgu.
16Whẹrewhere -wheshi iya nwanshị, ya ewhukashihu.
Ogboduwhu ibe iya ta abya l’anyata iya ọdo.
17Ọle shi lẹ gbururu jeye lẹ gbururu bẹ n-yemobu
Onye-Nwe-Ọha l’adụje l’ẹhu ndu l’atsụ iya egvu,
o wokwaruwho ọ-dụ-chịriri nkiya
doberu ụnwu nwanwa-nwara-nwa ndu ono,
18mbụ l’ẹhu ndu ọwhu l’edobeje ọgbandzu iya,
ndu l’anyatajẹ dobe iwu, ọ tụru nụ whẹ.
19Onye-Nwe-Ọha mewaru
t’oshi-eze iya kpọru akpọru l’imigwe,
abụbu, ọ bụ eze dzuru onyenọnu ẹhu.
20Unubẹ ụnwu ojozhi-imigwe shi l’ẹka Onye-Nwe-Ọha,
unu jaa ya ajaja,
mbụ unubẹ ndu ike dụ, bya abụru ndu l’eme okfu iya.
21Unu jaa Onye-Nwe-Ọha ajaja,
unubẹ ụnwu imigwe l’owhu,
mbụ unubẹ ndu ozhi iya, l’eme iwhe bụ uche iya.
22Unu jaa Onye-Nwe-Ọha ajaja,
unubẹ iwhe o meru dobe l’ẹka ọ bụ eze.
Gụbe obu mu, jaa Onye-Nwe-Ọha ajaja.
1041Gụbe obu mu, jaa Onye-Nwe-Ọha ajaja.
Gụbe Onye-Nwe-Ọha, bụ Chileke mu, ị parụ ẹka apaa.
Ọ-dụ-ugvu mẹe ọ-dụ-biribiri b’i we g’ọo onye we ẹkwa.
2Iwhoro b’i yeru g’ọo onye yeru uwe.
Imigwe bụ gụbedua gude ẹka ghu whụshia ya
g’ọo onye whụshiru ụlo-ẹkwa,
3bya eworu uko ụlo ghu gbaa
agbagba l’eli mini akpamigwe.
I meru urwukpu, ọ bụru ụgbo-ịnya ghu,
l’iinokojeru whẹrewhere l’akwẹka agba agbagba.
4I meru whẹrewhere, ọ bụru onye ozhi ghu,
mee onwu-tawhutawhu-ọku, ọ bụru onye l’iizhije ozhi.
5Ọo ghu tụru ukfu mgboko,
nke ọwhu bụ l’aata byadụ
l’enwubata iya enwubata jeye lẹ gbururu.
6Ị bya eworu eze-ẹnyimu kpua
mgboko g’ọo onye kpuru uwe,
shi nno mee tẹ mini rikputa ugvu g’ugvu ha.
7Ọle ọo mba b’ị barụ mini ono, o tsu l’ọso gbaa mgbalanụ,
mbụ l’ọo ọrya, i shi l’imigwe
ryaa, b’ọ vụru ọkpa iya mini.
8Ọoso gborogboro awụ oke-ugvu awụwu, sọru sọba
lẹ nsụda nsụda ugvu ono.
Ọ sọru sọgburu ụzo, ị tọru iya ọkpa iya.
9Mini ono b’ị kpawarụ oge ẹka l’ọ tọo sọghata asọghata,
Nke ọwhu l’ọ tọo byaa l’erimibaa mgboko ọdo.
10I gbafuru ẹnya ẹka mini shi asọ lẹ nsụda.
Mini ono l’asọ lẹ mgbaku ugvu.
11Ọ bụru iya bẹ ụnwu anụ, bu
l’ẹgbudu gẹ whẹ ha l’anọje angụ.
Ọ kwa iya whọ bẹ nkakfụ-ịgara-ọswa
l’egudeje bua ẹgu mini.
12Ẹnu, l’ewhe l’eli l’anọje l’agụga mini ono akpa ẹkfunu.
Whẹ l’anọje ebewhe l’ẹkali oshi agụ egvu.
13Iishije l’akpamigwe ẹka i bu agba mini l’eli ugvu.
Iwhe l’iime meru iwhe dụ ree jifuta mgboko l’owhu.
14I meru ẹwu; l’oorwuje irwu nke ọwhu élwù l’a-tajẹ nri.
I mee iwhe-akọko dobe tẹ
madzụ gudeje kọbe iwhe l’alị, shi nno nweru nri.
15I mee mmẹe t’a ngụje iya gude nweru obu ụtso,
mee mmanụ t’e huje iya gude
mee t’iwhu nwuje demudemu,
mee nri t’e rije iya gude nọdu ndzụ.
16Oshi Onye-Nwe-Ọha bẹ l’ọogbaje mini ree,
mbụ oshi sida dụ l’ugvu ugvu
Libanọnu, bụ oshi ọwhu o yeru l’onwiya.
17Ọ bụru l’eli iya bẹ ẹnu l’akpajẹ ẹkfunu.
Eze-ọku-eswi-ụda bụru l’oshi
payịnu b’ọ kwarụ uwhu buru.
18Oke-ugvu oke-ugvu bẹ bụ eghu-ọswa bu iya.
Ọgba bụru ẹka nchi-ọ̀gbà l’anọduje ezeru ndzụ.
19I meru ọnwa dobe t’e gude gụje oge.
Ẹnyanwu l’amajẹ nteke l’ọo-rịba.
20I meru ọochi-agbagba, ọ bụru ẹnyashi;
nteke iwhe bụ anụ, bu l’ọswa l’awụfutaje jee ọkpa nri.
21Oduu-gburu-agụ l’abọje ekiri achọ nri, l’oo-ri,
mbụ nri, Chileke l’anụ iya.
22Nteke ẹnyanwu warụ bẹ whẹ l’anyịgobeje lashia,
je edomia onwowhe l’ọgba whẹ.
23Madzụ l’agbajẹ jeshia ozhi, dụru iya nụ,
je esekota anya jeye l’urwẹnyashi.
24Gụbe Onye-Nwe-Ọha,
iwhe i meshiru bẹ hanụkakwa l’igwe.
Iwhe lile ono bụ mmamagụ nkeghu b’i gude mekota iya.
Iwhe jiru mgboko bẹ bụ iwhe i meshiru.
25Ọwhu bụ eze-ẹnyimu, parụ mebyi ẹka ha ọsa.
L’ime iya bẹ agụta agụta iwhe nọ ndzụ bu,
ndu ọwhu ha shii mẹe ndu ọwhu ha nwanshịi.
26Ọ bụru l’eli iya bẹ ụgbo-mini l’aghajẹ.
Ọ bụru l’ime iya b’o bu, mbụ ejo-oke-agiyi ono,
i meru tẹ gụ l’iya l’eme ẹmereme.
27Iwhe lile ono bẹ bụ ghu bẹ whẹ l’eleta ẹnya l’ẹka
t’ị nụje whẹ nri l’oge iya.
28Nteke ị nụru whẹ iya; whẹ achịkobe iya ọnu.
Nteke ị sarụ ẹka, iwhe dụ ree enwushihuru whẹ,
whẹ egude iya rijia ẹwho.
29Nteke i domiru whẹ iwhu ghu, egvu aba whẹ.
Nteke bụ l’ị natarụ whẹ ume, whẹ l’atụ,
whẹ anwụhu, laarụ ẹja.
30Nteke bụ l’i kuru Ume ghu ye whẹ l’ẹhu,
whẹ abụru iwhe e meru nke ọwhuu.
Iimeje iwhu mgboko l’owhu t’ọ dụ ọwhuu ọwhuu.
31T’ogbu-zaazaa Onye-Nwe-Ọha
dụkwa g’ọ dụ jeye lẹ gbururu.
T’ozhi, Onye-Nwe-Ọha gude ẹka
iya jee mekwaa t’ẹhu tsọo ya ụtso,
32mbụ onye l’abụje, o -lee mgboko ẹnya,
ya etehu nmẹkenmeke.
Nteke ọ byarụ ẹka l’eli ugvu, ugvu ọbu akpụlahaa ẹnwuru.
33Mu l’a-nọ agụ egvu anụ Onye-Nwe-Ọha
jeye gẹ mu l’anọ-beru ndzụ.
Mu l’a-gụje egvu gude aja Chileke mu ajaja l’ọno ndzụ.
34Byiko t’iwhe mu l’arị lẹ nke Chileke tsọkwaa ya ụtso,
nkele iwhe Onye-Nwe-Ọha
l’eme l’emeje t’ẹhu tsọo mu ụtso.
35Tẹ ndu l’eme iwhe-dụ-ẹji chihukwa l’eliwhe,
ndu ejo-ememe adụhe adụdu owhu.
Gụbe obu mu, byiko jaa Onye-Nwe-Ọha ajaja.
T’ajaja bụru nke Onye-Nwe-Ọha.
1051Unu kele Onye-Nwe-Ọha ekele, unu kpọ-kua ẹwha iya.
Unu mee tẹ mba gẹ mba ha
madzuru iwhe o megbaberu.
2Unu gụa egvu nụ iya, unu agụa egvu gude jaa ya ajaja.
Unu kfukashikwaawho iwhe dụ biribiri, l’oomeje.
3Unu gude ẹwha iya ono, dụ nsọ ngajẹ l’ụnga.
T’obu tsọje ndu l’achọ Onye-Nwe-Ọha ụtso.
4Unu chọo Onye-Nwe-Ọha, unu achọo ọkpehu iya.
Unu achọ iwhu iya ntekenteke.
5Unu nyatakwa iwhe dụ biribiri, o mekotaru,
mẹe iwhe-awhụrulenya, o
megbaberu, unu anyata ikpe, o kpejeru,
6unubẹ ẹpa Ébirihamu, bụ onye ozhi iya,
unubẹ ụnwu Jékọpu, bụ ndu ọ họtaru l’ẹka iya.
7Ọ kwa iya bụ Onye-Nwe-Ọha; bụru Chileke anyi.
Ikpe iya tụkoru mgboko vọo kfurukfuru.
8Ọgbandzu iya bẹ l’ọonyataje shi
lẹ gbururu jeye lẹ gbururu.
Ụkwa iwhe o kweru bẹ
l’oomedzuje shi l’ọgbo rwua l’ọgbo.
9Ọgbandzu ono, yẹle Ébirihamu gbarụ,
mẹe nte ono, o riburu Áyiziku
10b’o meru, ọ bụru iwu l’ẹhu Jékọpu,
ọ bụru ọgbandzu, l’a-dụru ndu Ízurẹlu jeye lẹ gbururu.
11Ọ sụ whẹ: “Ọo unu bẹ mu
l’a-nụ alị Kenanu t’ọ bụru oke-iwhe, unu ketaru.”
12Nteke ono bẹ whẹ shi habe nwahabe.
Whẹ shi dụ nchakata, bụru ndu lwarụ alwa l’alị ono.
13Whẹ -shi lẹ mba ọwa, whẹ alụfu lẹ mba ọwhu.
Whẹ -shi l’alị-eze ọwa-a, whẹ alụfu l’alị-eze ọwhu.
14Tọ dụ onye o kweru t’ọ kpaa whẹ ẹhu.
Ọ bụru l’okfu ẹhu whẹ b’o gude baarụ ndu eze mba,
15sụ whẹ tẹ whẹ be edenyikwa
whẹ ẹka, mbụ ndu nkiya ono, ya họtaru ono.
T’ọ bọ dụkwa ndu l’ekfuchiru iya nụ, whẹ l’e-meka iwhe.
16O kua mkpẹgu oku, ọ bya l’eliwhe,
shi nno mebyishikota nri, whẹ nweru.
17O ye nwoke lanụ t’o vuru whẹ ụzo,
mbụ Jósẹfu, onye ono, e reru g’ọo ohu.
18Whẹ tụa ya mkpọro l’ọkpa, kwobashia ya ọkpa,
bya eworu mkpụrumkpu igwe ye iya l’olu,
19jeye mbọku, o kfuru okfu, ọ vụa g’o kfuru iya,
mbụ jeye okfu, Onye-Nwe-Ọha
kfuru mee t’a marụ l’ọ bụ onye ire-lanụ.
20O noo ya bụ; eze bya ezhia sụ t’e je ewehaa ya.
Onye bụ ishi ọha wehaa ya; o nweru onwiya.
21O mee ya onye ishi l’ibe iya l’owhu;
mbụ onye l’eleta iwhe lile o nweru;
22sụ iya t’ọ hụ̀je ndu ishi àhụ̀hù nteke dụ iya ree.
Ya ezhije ndu bụ ọgurenya l’alị-eze iya mmamagụ.
23Ọo ya bụ, ndu Ízurẹlu laa Íjiputu.
Ndibe Jékọpu jenu je abụru ndu lwarụ alwa l’alị Hamu.
24Onye-Nwe-Ọha mee ndu nke
iya ono, whẹ l’azụ̀ azụ̀zù shii.
O mee whẹ, whẹ haa l’igweligwe,
shi nno ka ndu ọhogu whẹ ọkpehu.
25O mee t’obu ghaa ndu Íjiputu ono igharawhu,
ndu nke Onye-Nwe-Ọha ono bya adụ ndu ono ashị.
Whẹ wata ọchiru ndu ozhi iya ono ejo idzu.
26Ọ bya ahọta Mósisu, bụ onye ozhi iya,
họta Érọnu bya ezhia whẹ,
27whẹ je emeshia iwhe-awhụrulenya nkiya
l’echilabọ whẹ,
goshi whẹ iwhe dụ biribiri nke
Onye-Nwe-Ọha l’alị Hamu.
28O zhiru ẹkpuroochi, o je emee
alị ono, ọ gbakọta nke tsụrikiti;
o noo nkele ndu Íjiputu kwefuru okfu Chileke ike.
29Ọ bya emee mini, dụ l’alị whẹ t’ọ ghọkota mee.
Ẹma, dụ iya nụ tụko nwụshihukota.
30Mbara tụko alị whẹ jikota atsụ rụkfurukfu,
bahụ-gee l’ime mkpu ẹka ndu
ishi alị whẹ l’ekuje mgbẹnya.
31Ọ bụa okfu b’o kfuru, ijiji tsulahaa dududu,
mkpụrumkpu tụko alị ono narụ.
32Igwe haa ọchi mini wata ọtu aka-mini,
tụlahaa egbe-igwe gbaagbaa l’alị whẹ l’owhu.
33Ọ tụpyashia vayịnu whẹ mẹe figu whẹ,
bya atụko oshi, dụ l’alị whẹ l’owhu gbajashịkota.
34O bya ekfua okfu ọdo, igube wata etsutsu,
mbụ ogu, l’etsu dududu bụru agụta agụta.
35Whẹ tụko iwhe nweru irwu
tapyashịkota l’alị whẹ l’owhu,
mbụ tụko iwhe whẹ meberu l’alị g’ọ ha tapyashịa.
36Nteke ono, ọ bya atụko ndu bụ ọkpara l’alị whẹ gbushia;
mbụ tụko iwhe bụ nwa, vu ụzo
goshi lẹ whẹ dụ l’iwhe mee ome-l’iwe.
37Ọ bya edufuta ndu Ízurẹlu, kporu mkpọla-ododo yẹle
mkpọla-ọcha kpojia whẹ ẹka.
Tọ dụ ụnwu Ízurẹlu ono t’ọ ka
mma l’ọo onye lanụ, okfu kpọru.
38Ẹhu tsọo ndu Íjiputu ntụmatu gẹ whẹ tụgbuleruwho,
nkele whẹ shiwaa atsụ ndu Ízurẹlu egvu shinene.
39Ọ whụshiaru whẹ urwukpu gude kpuchia whẹ,
nwụberu whẹ ọku tẹ whẹ gude whụ iwhoro l’ẹnyashi.
40Whẹ sụru t’a nụ whẹ nri,
Onye-Nwe-Ọha bya achịru ọkwà nụ whẹ,
gude nri, shi l’igwe zụ-jia whẹ ẹwho.
41Eze ẹwhuru b’ọ tụharu ụzo, mini shi iya sọshihu,
ọ sọlahaa gborogboro g’ọo ngele l’echi-ẹgu ono,
42o noo nkele ọ nyatarụ ụkwa, dụ nsọ ono,
o kweru nụ onye ozhi iya, bụ Ébirihamu.
43O dufuta ndu nkiya, ẹhu l’atsọ whẹ ụtso.
Whẹ l’atụ ụzu ẹhu-ụtso gude eje afụta,
mbụ ndu ono, ọ họtaru ono.
44O woru alị ndu mba ọdo woru nụ whẹ.
Ọ bụru ẹka ndu ọdo riru awhụ
iya bẹ whẹ wotaru, ọ bụru oke-iwhe whẹ,
45nke ọwhu whẹ l’a-wata ome iwhe ọ tọru ọkpa iya,
dobelahaa iwu, shi iya l’ẹka.
T’ajaja bụru nke Onye-Nwe-Ọha.
1061T’ajaja bụru nke Onye-Nwe-Ọha.
Unu kele Onye-Nwe-Ọha ekele; l’ọ bụ onye ọma.
N-yemobu iya l’anọje jeye lẹ gbururu.
2?Ọo onye l’a-dụ ike tụkota ọnu
g’iwhe, Onye-Nwe-Ọha l’eme habe shii?
?Ọo onye l’a-dụ ike jagbabẹ
Onye-Nwe-Ọha ama l’iwhe l’oomegbabe?
3Ẹhu-ụtso bụ nke ndu l’anọje eme iwhe kfụru nhamụnha,
mbụ ndu ono, l’anọje eme iwhe dụ chịriri ntekenteke.
4Nyatakwa mu jiko
Onye-Nwe-Ọha, nteke l’ịi-wata
ogoshi lẹ ndu nkeghu dụ ghu l’obu.
Gbakwaarụ mu mkpu nteke ono, l’ịi-bya whẹ adzọfuta.
5Nke ọwhu mu l’a-whụ g’iwhe
gude agaru ndu ono, ị họtaru werewere,
mbụ nke ọwhu mu l’e-tsoru ndu
mba ono, bụ nkeghu tee ẹswa,
mu etsoru ndu ono, bụ oke-iwhe ghu kua onwomu eku.
6Anyi mekwaru iwhe-dụ-ẹji
ẹgube nna anyi ochee whẹ meru.
Anyi mekwaru ejo-iwhe,
mbụ l’anyi mewaru iwhe l’adụa ree.
7Nteke nna anyi ochee whẹ nọ lẹ Íjiputu
bẹ l’ooto shidua edoje whẹ ẹnya,
mbụ iwhe dụ biribiri, i shi emeje.
Whẹ ta anyatajẹ ikpoto iwhe-ọma, i megbaberu.
Whẹ kwefuru ghu ike l’agụga Eze-ẹnyimu Uswe.
8Ọle o gude nggẹ ẹwha iya ekeru dzọfuta whẹ,
nke ọwhu l’aa-marụ l’ẹwha iya parụ ẹka apaa.
9Ọ barụ Eze-ẹnyimu Uswe mba; mini, dụ iya nụ tashịhu.
O dua whẹ ghaa echi ogbu-mini g’ọo onye l’agha echi-ẹgu.
10Ọ dzọfutaru whẹ l’ẹka ndu ọhogu whẹ,
gbafụta whẹ l’ẹka ndu kpọru whẹ ashị.
11Mini rigbushia ndu ọhogu whẹ.
Tọ dụ t’ọ ka mma l’ọo onye lanụ, wafụru.
12O noo nteke whẹ kwetaru
l’iwhe o kweru ụkwa ememe bẹ l’oomeje,
bya agụa egvu gude jaa ya ajaja.
13Ọle ọ tọ dụdu g’a nọ-beru, whẹ zọhaa iwhe ono, o meru;
whẹ ta angabẹhe t’ọ chịa idzu ẹhu whẹ.
14Whẹ rwua l’echi-ẹgu ono,
whẹ wata oome iwhe l’agụ whẹ nụ, ọ bụru l’alị ono,
daburu mgbegere ono bẹ whẹ dataru Chileke.
15Ọo ya bụ, ọ nụ whẹ iwhe whẹ sụru t’a nụ whẹ.
Ọ nụ-gee whẹ iya, o vuru ejo
ẹhu-ba-dụ-mma ye lẹ ndzụ whẹ.
16Nteke whẹ kpọberu ụlo-ẹkwa whẹ l’echi-ẹgu bẹ,
o nweru ndu ọwhu watarụ odoberu Mósisu yẹle
Érọnu ẹnya-kfụrukfuru,
mbụ ụmadzu labọ ono, Onye-Nwe-Ọha họtaru dobe nsọ.
17O noo ya, alị saa ọnu lwee Detanu,
bya elia Abyiramu yẹle ndu otu iya lẹ ndzụ.
18Ọku bya enwulihu whowhowho dzụkota
ndu l’etsoje whẹ nụ.
Ọku ono tụko ndu ejo-ememe ono dzụkota.
19Whẹ rwua l’ugvu Horẹbu, whẹ je edobe agwa,
whẹ gude mkpọla-ododo wụa
nweswi dobe balahaaru iya ẹja.
20Whẹ wota ugvu a gẹge akwabẹ Chileke
woru ye l’azụ balahaaru iwhe a
kpụru, ọ dụ g’ọo nweswi, l’ata ẹwu ẹja.
21Whẹ nyazọo Chileke ono, dzọfutaru whẹ nụ,
mbụ onye ono, meru iwhe parụ ẹka l’alị Íjiputu,
22bya emee iwhe dụ biribiri l’alị Hamu,
mekwaawho iwhe dụ egvu
l’agụga Eze-ẹnyimu Uswe.
23Ọo ya bụ, ọ sụ lẹ ya l’a-lakọta whẹ l’iyi,
ọle Mósisu, bụ onye ono, ọ
họtaru, je akfụ-chia ụwara, o shi abya,
t’o bo gude oke ẹhu-eghughu iya lakọta l’iyi gẹ whẹ ha.
24E megee, whẹ woru ẹguru alị ono tụa whukuwhuku.
Whẹ te ekweta lẹ Chileke
l’a-dụkwadu ike mee iwhe o kweru ụkwa iya.
25Whẹ nọdu-gee l’ime ụlo-ẹkwa whẹ agụkaa áwhụ,
jịka ome iwhe Onye-Nwe-Ọha sụru tẹ whẹ mee.
26Ọo ya bụ, ọ chilia ẹka imeli ribuaru whẹ nte
sụ l’iya l’e-me tẹ whẹ nwụshihu l’echi-ẹgu,
27ya abya erwukoo ẹpa whẹ je eye ndu ọhogu whẹ l’ẹka,
tụkashia whẹ nnanụ nnanụ, whẹ edzuru mgboko l’owhu.
28Whẹ je asẹe onwowhe l’ẹka Bálu ndu Peyọ,
wata ori iwhe e gburu l’agwa ono, l’ẹte anọo ndzụ.
29Whẹ menua, Onye-Nwe-Ọha
vụlahaa ọvuma l’ejo-ememe, whẹ megbaberu.
Nchịkarehu tsubatanu l’echilabọ whẹ.
30Ọle Fínihasu gbashiru gboo
ọgu ono sụ l’ọ tọ byadụ l’anwụ anwụnwu,
shi nno mee nchịkarehu ono haa ememe.
31A gụaru iye ya l’ọ-dụ-chịriri,
l’e-shiwaro l’ẹhu iya sweru ẹpa iya jeye lẹ gbururu.
32Whẹ bya erwua l’agụga mini
Meriba, whẹ kpatsukwaa Onye-Nwe-Ọha iwe.
Mósisu shi whẹ l’ẹka meta kpua onwiya.
33Ọo lẹ whẹ kwefuru Ume Chileke ike meru iwhe
Mósisu gude kfua iwhe ọ tọge ekfu.
34Whẹ ta alwụchafudu ndu ono, whẹ jekfuru l’alị ono,
gẹ Onye-Nwe-Ọha tụru whẹ
iwu sụ tẹ whẹ lwụchafu whẹ,
35Iwhe whẹ meru bụ lẹ whẹ lẹ
ndu ono bya alụgbalahaa nwanyị,
whẹ bya aghaa ẹghirigha wata ome omelalị whẹ.
36Whẹ wata ọbaru agwa whẹ ẹja.
O megee bụru ọnya nmata whẹ.
37Whẹ gude ụnwu whẹ nwoke
ụnwu whẹ nwanyị gwaa ejo ọgvu.
38Whẹ wata ogbushi ụnwu whẹ,
l’adụa iwhe whẹ meru, gude agwa ọgvu ndu Kenanu.
Whẹ gude mee ụnwu whẹ ono merwushia alị ono.
39Whẹ shikwawhọ nno merwushia onwowhe,
shi nno bụru ndu l’agba ọkpara.
40O noo iwhe meru g’o gude
Onye-Nwe-Ọha doberu ndu nkiya ẹhu-eghughu,
mbụ kpọlahaaru ndu ono, bụ oke-iwhe iya ono tee.
41Ọ chịru whẹ ye l’ẹka ndu mba ọdo.
Ndu whẹ dụ ashị bya abụru eze chịlahaa whẹ.
42Ndu ọhogu whẹ kpalahaa whẹ ẹhu.
Ndu nke Chileke bya anọdu whẹ lẹ mkpula.
43Ọ dzọfutaru whẹ igweligwe oge,
ọle ẹka uche l’adụjele whẹ whọ
bụ l’ome iwhe a sụru tẹ whẹ be emeshi.
Whẹ kwazhiawho l’ome iwhe-dụ-ẹji jeye whẹ yifu.
44Ọle ọobuje, iwhe-ẹhuka
byakfuta whẹ, whẹ -ryaku Chileke,
ya erwua Chileke l’ẹhu
ẹgwegwa, ya anụa olu whẹ.
45Ya egude okfu ẹhu whẹ nyata ọgbandzu iya,
gude nke l’o yeru whẹ obu sewhu ẹka azụ.
46O mee t’iwhe bụ ndu kpụru
whẹ lẹ ndzụ whụaru whẹ imiko.
47Dzọfutanu anyi, gụbe Onye-Nwe-Ọha, bụ Chileke anyi.
Shinu lẹ mba gẹ mba ha rwukobe anyi,
nke ọwhu anyi l’e-tu ghu ẹwha,
gụbe onye ono, ẹwha ghu dụ nsọ ono.
48T’ajaja bụru nke Onye-Nwe-Ọha, bụ Chileke nke ndu
Ízurẹlu shi lẹ gbururu jeye lẹ gbururu.
T’onyenọnu sụkwa: “O noo g’ọ dụ!”
T’ajaja bụru nke Onye-Nwe-Ọha.
1071Unu kele Onye-Nwe-Ọha ekele, l’ọ bụ onye ọma.
N-yemobu iya l’anọje jeye lẹ gbururu.
2Tẹ ndu Onye-Nwe-Ọha
gbafụtaru kfua ẹgube ono,
mbụ ndu ọ gbatarụ l’ẹka ndu whẹ dụ ashị,
3ndu ono, o shi lẹ mba gẹ mba ha rwukoo,
mbụ ndu o jeru l’ụzo
ẹnyanwu-awata, bya eje l’ụzo ẹnyanwu-arịba,
je l’ụzo isheli bya ejee l’ụzo ọhuda je erwukoo.
4O nweru ndu ọwhu bụ
l’echi-ẹgu bẹ whẹ tsoru aghawhe,
mbụ l’alị, daburu mgbegere, l’adụa iwhe dụ iya nụ.
Whẹ ta ama ụzo, whẹ l’e-shi jerwua mkpụkpu, whẹ l’e-buru.
5Ẹgu-nri gụru whẹ, ẹgu-mini gụa whẹ.
Ndzụ whẹ nọdu ala pyala pyala.
6Tọ dụ iya bụ, whẹ ryaku
Onye-Nwe-Ọha gẹ whẹ nọ l’iwhe-ẹhuka ono.
Ọ bya anafụta whẹ l’iwhe-ẹhuka ọbu, whẹ l’eje.
7Ọ bya edua whẹ shia ụzo, kfụru nsụmini,
durwua whẹ mkpụkpu, whẹ l’e-buru.
8Tẹ whẹ kele Onye-Nwe-Ọha
ekele l’o yenukaru whẹ obu,
l’oomeru ụnwu eliwhe iwhe dụ biribiri.
9O noo lẹ, onye mini l’agụ bẹ l’ọonuje mini t’ọ ngụa,
gude iwhe dụ ree zụ-jia onye ẹgu l’agụ ẹwho.
10O nweru ndu ọwhu shi nọdu
l’ẹka gbarụ ẹkpuroochi bya agbaa tsụkiriti,
mbụ ndu nọ lẹ mkpọro eje iwhe-ẹhuka l’ẹka e gude
ẹgbirigba tụgbabe whẹ ọkpa.
11Iwhe kparụ iya bụ lẹ whẹ
kwefuru ike lẹ whẹ te emedu okfu Chileke,
whẹ woru ẹguru idzu,
Ọkalibe-Kangokotaru-Nu chịru doberu whẹ kpụa l’alị.
12Tọ dụ iya bụ, ọ parụ whẹ haa,
whẹ jelahaa ozhi mkpọnwuru.
Whẹ jee ya jeye whẹ l’awhọhuje daa.
Tọ dụ onye gbarụ whẹ mkpu.
13O noo ya, whẹ ryaku
Onye-Nwe-Ọha lẹ nsogbu ono, whẹ nọ,
ọ bya adzọfuta whẹ l’iwhe-ẹhuka, whẹ l’eje.
14O dufuta whẹ l’ẹka ono,
gbarụ ẹkpuroochi bya agbaa tsụkiriti,
bya agbabushia ẹgbirigba ono,
e shi gude tụgbabe whẹ ọkpa.
15Tẹ whẹ kele Onye-Nwe-Ọha
ekele l’o yenukaru whẹ obu,
l’oomeru ụnwu eliwhe iwhe dụ biribiri.
16O noo lẹ, ọonyakashije ọnoguzo, a kparụ l’igwe,
gbubushia mkpụrumkpu-igwe, e gude gbachishia ụzo.
17O nweru ndu ọwhu bụ ndu eswe,
bụlewho awhụwhu iwhe-dụ-ẹji, whẹ meru bẹ whẹ l’ata,
mẹe awhụwhu ejo-iwhe, whẹ meru.
18Nri dụkota whẹ ashị,
whẹ nọdu anwụhu ndẹende.
19Tọ dụ iya bụ, whẹ ryaku Onye-Nwe-Ọha lẹ nsogbu ono, whẹ nọ,
ọ bya adzọfuta whẹ l’iwhe-ẹhuka, whẹ l’eje.
20Ọo okfu ọnu b’o kfuru o mee,
whẹ mehukota l’ẹhu l’eme whẹ nụ,
shi nno dzọfuta whẹ l’ilu.
21Tẹ whẹ kele Onye-Nwe-Ọha
ekele l’o yenukaru whẹ obu,
l’oomeru ụnwu eliwhe iwhe dụ biribiri.
22Tẹ whẹ gworu ngwo-ẹja ekele nụ iya.
Whẹ agụa egvu ẹhu-ụtso gude
mee t’a marụ g’iwhe, l’oome dụ dụ.
23O nweru ndu ọwhu gude ụgbo-mini tsoru eze-ẹnyimu.
Whẹ bụ ndu tsoru eze-mini agba nghọ.
24Ndu ono whụru ozhi, Onye-Nwe-Ọha jeru,
ozhi, dụ biribiri, o jeru l’echi ogbu-mini,
25nkele ọ bụ-a okfu b’o kfuru
l’ọnu, oke whẹrewhere wata ewhewhe.
O shi nno mee, oke akpara-mini tụshilahaa.
26Ụgbo-mini whẹ l’atulihuje oroke-imeli-imeli,
bya atụba l’ọhu alị mini.
Oke iwhe-ẹhuka ono, whẹ l’eje
mee, obu whẹ zashịhu azashịhu.
27Whẹ l’anga anganga, akpọ
kulakula g’ọo ndu l’angụ angụruma.
Mmamiwhe whẹ l’owhu bụru whẹ iwhe ọla-l’iswi.
28Tọ dụ iya bụ, whẹ ryaku
Onye-Nwe-Ọha lẹ nsogbu ono whẹ nọ,
ọ bya anafụta whẹ l’iwhe-ẹhuka, whẹ l’eje.
29Ẹnyimu l’awhụ gbudugbudu b’o meru, o deru yẹkete,
ọ baarụ oke akpara-mini mba, ọ daa nyọnyoronyongu.
30Ẹhu tsọlahaa whẹ ụtso g’ọ darụ nyọnyoronyongu ono.
O dua whẹ jeye whẹ jerwua ọdu ụgbo-mini ẹka whẹ l’eje.
31Tẹ whẹ kele Onye-Nwe-Ọha
ekele l’o yenukaru whẹ obu,
l’oomeru ụnwu eliwhe iwhe dụ biribiri.
32Tẹ whẹ kutsee ya l’ẹka edzudzu-ọha dọru,
tua ya ẹwha l’ẹka ndu bụ ọgurenya dọru achị idzu.
33O meru ẹnyimu, ọ ghọo echi-ẹgu.
O mee ẹnya ẹka mini shi asọshi, ọ bụru alị, mini tahụru.
34O meru alị, bụ ọsu, ọ bụru chakịri chakịri alị-únú,
o noo lẹ ndu shi buru l’ẹka ono l’emenuka ejo-ememe.
35O meru echi-ẹgu, ọ ghọo ẹka mini dọru shimu shimu,
mee alị ọkponku, ọ ghọo ẹnya ẹka mini shi asọshi.
36Ọo ẹka ono b’o duru ndu ẹgu
l’agụ je edobe tẹ whẹ buru.
Whẹ tụa ya mkpụkpu whẹ buru.
37Whẹ bya akọshia okfu, gbashịa
mgbabu vayịnu, whẹ meta iya iwhe shii.
38Ọ gọru whẹ ọnu-ọma, whẹ
zụshilahaa ụnwu ọkpobe azụshi.
Élwù whẹ bya akabakwaawhọ azụzu.
39Ọle e bekochaaru, Onye-Nwe-Ọha haa ndu ọhogu tẹ
whẹ gude mkpamẹhu mẹe nsogbu mẹe áwhụ mee
tẹ whẹ wata ọlwa alị.
40Mbụ onye ono, wozeru ndu a
marụ ẹwha whẹ alị, mee whẹ,
whẹ ghawhelahaa l’echi-ẹgu
iwhoro, l’adụa echi-ụzo, dụ iya nụ.
41Ọle ndu l’adụa g’ọ harụ whẹ b’o
setaru l’ẹka selita whẹ l’iwhe-ẹhuka, whẹ l’eje,
bya emee, ndibe whẹ zụshilahaa g’ọo atụru.
42Ndu obu whẹ gụru iwhoro
l’abụje, whẹ -whụa iwhe ono, whẹ etee ẹswa,
ọle ndu ejo-ememe gẹ whẹ ha bẹ l’ọokpoje ọnu okfu.
43Tẹ ndu marụ ágụ wokwaru
iwhe-e je akwakọbe l’ime obu whẹ.
Whẹ arịje gẹ n-yemobu Onye-Nwe-Ọha habe shii.
108Egvu-ọma, Dévidi deru
1Sụa gụbe Chileke, obu shihukwaru mu ike.
Obu shihukwaru mu ike,
mu je l’a-gụ egvu gude tua ghu ẹwha.
Obu mu tehu nwụru ẹnya.
2Unu tehu nwụru ẹnya, unubẹ ogele mẹe une,
nkele mbẹdua l’e-gudekwa egvu
kutee gẹregere chi-asahu lẹ mgbẹnya.
3Mu l’a-nọdu l’echilabọ ndiwhe
kele ghu ekele gụbe Onye-Nwe-Ọha.
Mu l’a-nọdukwawho l’echilabọ
mba lile gụa egvu gude jaa ghu ajaja.
4O noo nkele n-yemobu ghu parụ ẹka.
Ọ tụkoru imigwe l’owhu vọo kfurukfuru.
Ire-lanụ nkeghu dzuru akpamigwe.
5Goshinu ndiwhe lẹ g’ị paberu ẹka,
mbụ l’ị nọghataru akpamigwe anọghata,
tẹ ndiwhe l’owhu whụnu lẹ g’i dụ-be biribiri.
6Gudenu ọkpehu ghu dzọfuta anyi.
Nụnu ekfukfu, anyi l’ekfu anụ ghu,
nke ọwhu l’ee-shi nno dzọo ndu i yeru obu.
7Chileke nọwaa l’ụlo iya, dụ nsọ kfua okfu sụ:
“Mu l’a-nọ akpọ orwube eke alị ndu Shékemu,
woru nsụda Sukọtu washịa.
8Giledu bụ nkemu; Manáse bụru nkemu.
Ífuremu bụ okpu, mu kpu l’ishi.
Juda bụru oshi-ọpa-l’ẹka-eze, mu l’apajẹ l’ẹka.
9Moabu bụ ochi, mu l’akwọje ọkpa.
Ọ bụkwanuru lẹ Edọmu bẹ mu
l’eyeshije akpọkpa mu dobe.
Ndu Fílistiya bẹ mu tụwaru okoo kpua.”
10?Ọo onye l’e-du mu chịriri
werere duba lẹ mkpụkpu ono, a tụru tụshia ike?
Mbụ, ?ọo onye l’e-duru mu duba lẹ Edọmu?
11Ọ kwa gụbe Chileke bụ onye ọbu.
Ọle i gbee jịka anyi.
Tii kwejehe tsoru ndu ojọgu anyi eje ọgu.
12Yeru anyi ẹka byiko, t’anyi
lwụ-gbua ndu ọhogu anyi,
nkele oye ẹka nke ụnwu eliwhe bụ iwhe-iwhoro.
13Ọle anyi -nọduwaa Chileke
l’ẹka bẹ anyi l’a-lwụ-gbu whẹ g’ọo mkparawa.
Ọ bụru iya l’e-hu ndu ọhogu anyi agbagba-nchị l’alị.
109Egvu-ọma, Dévidi deru nụ onye ishi egvu
1Gụbe Chileke, bụ onye mu l’aja ama,
ba anọdushinu nwanggujingguji,
2nkele ndu ejo-ememe mẹe
ndu ẹregede sawarụ ọnu ekfuru mu ejo okfu,
adzụshi erekfube ekpu mu.
3Whẹ gudewaa okfu ndụmashi gbaa mu mgburumgburu.
Whẹ l’etso mu okfu l’ẹbe ọdu iwhe mu meru whẹ.
4Mu l’anọje egoshi whẹ lẹ mu
yeru whẹ obu; whẹbedua agbẹenu ebo mu ibo,
lẹ mụbe onye l’agbẹjee ekfu anụ Chileke l’iswi ẹhu whẹ.
5Whẹ l’egudeje ejo-iwhe kfụa mu
ụgwo iwhe-ọma, mu meru whẹ.
Whẹ kpọo mu ashị l’ụgwo obu mu yeru whẹ.
6Yenu onye akirishi t’o kpee ya ejo ikpe.
Gụ ezhinu onye mgbamụ t’o boo ya ejo ibe.
7Chileke; kpekwaa ya ikpe, nma iyẹ ya.
Gụkwaa ekfukfu, l’ookfu anụ ghu l’iwhe-dụ-ẹji, o meru.
8Tẹ ndzụ iya gbakwaa mkpirikpi.
T’onye ọdo nọ-chikwaa ẹnya iya jeje ozhi, o shi eje.
9T’ọ tọkwaa ụnwegirima ibe iya mgbee,
nyee ya abụru nwa-mbunu.
10T’ụnwegirima iya ghawhejekwa bụru ndu aryọ.
T’a chịfukwa whẹ achịfu tẹ whẹ
be buhe l’okorobo uwhu ono, whẹ bu.
11Tẹ ndu o ji ụgwo tụkokwa
iwhe o nweru nyịswota iya.
Tẹ ndu l’aama ẹka whẹ shi tụkokwa
iwhe o seru anya iya gwota.
12T’ọ bọ dụkwa onye l’e-mejeru iya iwhe-ọma,
ya adụkwa onye l’a-whụjeru
ụnwegirima ono, ọ tọru mgbee ono imiko.
13T’ẹpa iya tọhukwa atọhu.
T’ẹwha whẹ chịhukwa achịhu l’ọgbo ọwhu l’abya nụ.
14Tẹ Onye-Nwe-Ọha ba
azọhakwa ejo-iwhe, nna iya oche whẹ megbaberu.
T’e be ehufukwa iwhe-dụ-ẹji, ne iya meru ehufu.
15T’iwhe-dụ-ẹji ono, whẹ meru
gbukwaa teteretee l’iwhu Onye-Nwe-Ọha,
nke ọwhu l’oo-me tẹ whẹ tọhu lẹ
mgboko, t’a ba nyatahẹ whẹ anyata owhu.
16Nkele ọ tọ rịjedu nke t’o meeru madzụ iwhe-ọma.
Iwhe l’ooshibeje ite iya bụ gẹ
l’oo-me dulaa ndu ụkpa maa, mẹe
ndu l’adụa g’ọ harụ whẹ mẹe
ndu obu whẹ tsuru yọgiri-yọgiri.
17Eshi-ọwhu ọ bụ ọtu madzụ ọnu
bụ iwhe l’adụje iya ree; t’ọ bụkwaru onye a tụru ọnu.
Eshi-ọwhu ọgoru madzụ ọnu
l’adụje iya ẹji; t’ọnu-ọma nọdukwa iya otẹnya.
18Eshi-ọwhu ọ bụ ẹgube ono,
oye uwe l’adụa iwhe ọbu iya bụ
g’oburu madzụ ọnu l’adụa iwhe ọbu iya,
tẹ mburọnu tsokwaru iya
ngụgoo ya angụgo bahụ iya l’ẹhu g’ọo mini,
mbụ t’ọ sọkwaa g’ọo mmanụ bahụ iya l’ọkpu.
19T’a whụ-kpukwaa ya mburọnu
ono g’ọo onye a whụ-kpuru ukpo.
E kee ye ya g’ọo onye keru ajị l’ukfu jeye lẹ gbururu.
20T’iwhe ono, mu gụshiru
bụkwaru ụgwo, Onye-Nwe-Ọha
l’a-kfụ ndu ono, l’anọje agba mu mgbamụ,
mbụ ndu ono, l’anọje ekfu ejo-okfu ekpu mu.
21Ọle gụbe Onye-Nwe-Ọha mu, bụ Onye-Nwe-Ọha,
menuaru mu ree nggẹ ẹwha ghu ekeru.
Gudenu n-yemobu ghu ono,
dụnuka ree ono nafụta mu,
22nkele mu bụ onye ụkpa bụru onye l’adụa g’ọ harụ iya,
tẹhenu e mewaa mu iwhe rwuru mu lẹ meji.
23Mu l’esewaa gẹrere g’ọo inyonyo urwẹnyashi,
a nmakofuwaa mu g’ọo onye nmakofuru igube.
24Ikpere tsụshiwaru mu mmẹe l’ẹgu mu l’aswị,
mu jọwaa ẹhu bụru ọkpu nkụchi.
25Ndu ono, l’agba mu mgbamụ l’akụwaru mu hụu.
Whẹ l’awhụje mu ekwe l’ishi l’ishi akụru mu hụu.
26Yenuru mu ẹka jiko
Onye-Nwe-Ọha, bụ Chileke mu.
Eshi-ọwhu ị bụ onye n-yemobu; dzọfutanu mu.
27Menua tẹ whẹ marụ l’o ghu b’o shi l’ẹka,
mbụ tẹ whẹ marụ l’ọo gụbe
Onye-Nwe-Ọha bẹ meru iya nụ.
28Whẹ l’eburu mu ọnu,
tẹ gụbedua gọkwaaru mu ọnu.
Tẹ whẹbe ndu ono wulihuru alwụshi mu ọgu,
bụkwaru ndu iwhere guderu,
tẹ mbẹdua bụ onye ozhi ghu tejekwa ẹswa.
29Ndu ono, l’agba mu mgbamụ
bẹ l’ee-ye iwhere g’ọo onye yeru uwe.
A whụ-kpua whẹ iwhere g’ọo onye whụ-kpuru ukpo.
30Mu l’e-gude ọnu mu kele Onye-Nwe-Ọha ọkpobe ekele.
Mu l’a-nọdu l’edzudzu-ọha jaa ya ajaja,
31o noo lẹ, ọokfujeru l’ẹka-ụtara onye l’adụa g’ọ harụ iya,
t’ọ dzọfuta ndzụ iya l’ẹka ndu l’ekpe iya nkfugbu.
110Egvu-ọma, Dévidi deru
1Onye-Nwe-Ọha bẹ sụru
Onye-Nwe-mu nụ:
“Nọdu anọdu l’ẹka-ụtara mu,
jeye nteke mu l’e-me t’ị
dzọpyabekota ndu ọhogu ghu l’ọkpa.”
2Onye-Nwe-Ọha l’e-shi lẹ Záyọnu nụ ghu mkpalẹka,
l’egoshi g’ike ghu habe shii,
Ọo-sụ ghu: “Bụru Eze chịa ndu ọhogu ghu.”
3Ndu ojọgu ghu bẹ l’ọo-nọ ewhe uwhere oje ọgu l’oge ọgu.
Ọo g’iji chi-asahu l’anọje ada bụ g’ụnwu okorọbya ghu
l’a-wụ-kfuta ghu l’ugvu ono, dụ nsọ.
4Onye-Nwe-Ọha ribuwaru iya lẹ
nte, tọ bya l’a-gbanwe iwhe o kfuru.
Ọ sụru: “Ịi-bụ onye l’agbajẹ ẹja nụ
Chileke jeye lẹ tututu-mịmimi,
Bụ iya bụ lẹ gẹ Melikízedeku bụ iya.”
5Onye-Nwe-Ọha nọ l’ẹka-ụtara gụbe Onye-Nwe-Ọha.
Ndu eze bẹ l’oo-gwe ryaaryaa
mbọku, ẹhu l’e-ghu iya eghu.
6Oo-kpe ndu mba ọdo ikpe,
woru ndu nwụhuru anwụhu kụbe l’ikpo l’ikpo,
bya atụko ndu l’achị mgboko
l’owhu gwee aryaka-eryune.
7Ọo l’ọnu-iyi, dụ l’agụga echi-ụzo bẹ l’ọo-ngụta mini.
Ọo ya bụ ya emee ya, t’ọ palia ishi apali.
1111T’ajaja bụru nke Onye-Nwe-Ọha.
Mu l’e-gude obu mu g’ọ ha kele Onye-Nwe-Ọha ekele.
Mu l’e-kele iya l’ẹka ndu obu gụru iwhoro nọ l’idzu,
mu ekele iya l’ẹka whẹ nọ ndzuko.
2Iwhe lile Onye-Nwe-Ọha l’eme parụ ẹka.
Iwhe bụ ndu ọ dụ ree l’anọje arị iya l’ọriri.
3Iwhe Onye-Nwe-Ọha l’eme dụ ugvu dụ biribiri.
Ọ-dụ-chịriri iya l’anọje jeye lẹ gbururu.
4O mewaru t’a nyata iwhe dụ biribiri, l’oomeje.
Onye-Nwe-Ọha l’emeje eze-iwhe-ọma,
bya abụru onye l’awhụje imiko.
5Ndu l’atsụ egvu iya bẹ l’ọonuje nri.
Ọgbandzu iya bẹ l’ọonyataje jeye lẹ tututu-mịmimi.
6Ndu nkiya b’o goshiwaru ike, dụ l’ozhi, l’ooje,
nkele ọ natarụ ndu ọha ọdo alị whẹ woru nụ whẹ.
7Iwhe o gude ẹka iya eme bụ ire-lanụ,
bụru iwhe kfụru nhamụnha.
Iwhe, ọ tụru iwu iya atụtu bẹ gbarụ t’e gude iya ẹka.
8Iwu ono ọ tụru bẹ dụwaa g’ọo l’ọo-dụ jeye lẹ gbururu.
Ọ tụru iwu ono t’e gude obu, gụru
iwhoro mẹe ire-lanụ eme iya.
9Ndu nkiya b’ọ gbafụtaru,
bya atụa iwu sụ t’ọgbandzu iya dụkwa jeye lẹ gbururu.
Ẹwha iya dụ nsọ dụ egvu.
10Ọ kwa ọtsu egvu Onye-Nwe-Ọha
bụ ogbube ishi mmamagụ.
Ndu l’edobe iwu iya bẹ iwhe l’edoje ẹnya ree.
T’a jaa ya ajaja jeye lẹ gbururu.
1121T’ajaja bụru nke Onye-Nwe-Ọha.
Ẹhu-ụtso bụ nke onye l’atsụ egvu Onye-Nwe-Ọha,
mbụ onye l’ọonoje atsọ ụtso
tẹ ya dobe iwu Onye-Nwe-Ọha.
2Ụnwu iya l’a-bụ ndu ọkpehu dụ l’alị-a.
Ndu obu whẹ gụru iwhoro
bẹ ẹpa whẹ l’a-bụru ndu a gọru ọnu-ọma nụ.
3Ẹku l’ụba l’a-dụ l’ibe iya,
ọ-dụ-chịriri iya je l’a-nọ jeye lẹ gbururu.
4Ẹka gbarụ ẹkpuroochi bẹ
iwhoro l’awajẹ g’ọo ẹnyanwu
l’ẹhu onye obu iya gụru iwhoro.
Onye-Nwe-Ọha bụ onye l’eme eze-iwhe-ọma,
bụru onye obu-imiko,
bụkwaruwho onye dụ chịriri.
5Nke ọma l’a-nọ etso onye l’asa ẹka asasa,
bya abụru onye l’ejeje madzụ ụgwo,
mbụ onye gude ire-lanụ eme iwhe.
6Sụa, a ta abyadụ l’e-nwubata onye dụ chịriri enwubata.
A ta abyadụ l’anyazọ iya anyazọ jeye lẹ gbururu.
7E -zhia ya ejo nzhi bẹ egvu ta abyadụ l’a-tsụ iya.
Obu shiru iya ike,
o noo l’onye ọ dakoberu bụ Onye-Nwe-Ọha.
8Obu te etedu iya ete,
ọ tọ byadụ l’a-tsụ egvu,
jeye nteke l’oo-gude ẹnya iya whụ
lẹ ndu ọhogu iya b’e mekputawaru.
9Ọosaje ẹka asasa nụ ndu l’adụa lẹ g’ọ harụ whẹ iwhe.
Ọ-dụ-chịriri iya je l’a-nọ jeye lẹ gbururu.
Ee-me t’o nweru ike, nweru ugvu.
10Onye ejo-ememe -whụa ya, ẹhu awata iya oghu eghu.
Oo-gude ẹhu-eghughu ono ta
kpọkpokpo jeye ya ajọo ẹhu wụfu.
Iwhe l’agụ onye ejo-ememe ta abyakwa l’e-rwu iya ẹka.
1131T’ajaja bụru nke Onye-Nwe-Ọha.
Unubẹ ndu l’ejeru Onye-Nwe-Ọha ozhi,
unu jaa Onye-Nwe-Ọha ajaja.
2Unu watazhiawho ntaa jaa
Onye-Nwe-Ọha ajaja jeye lẹ mgbe agvụ agvụ.
3T’e shi l’ẹka ẹnyanwu l’awajẹ jaa
Onye-Nwe-Ọha ajaja jeye l’ẹka l’ọoribaje.
4Onye-Nwe-Ọha bẹ parụ ẹka,
ọ kakọta mba gẹ mba ha shii.
O-gbu-zaazaa ya nọghakota imigwe l’owhu.
5?Oo onye bẹ l’aatụ yeru Onye-Nwe-Ọha, bụ Chileke anyi,
mbụ onye sụgaru l’oshi-eze iya l’imigwe?
6Onye l’ewhuzeje ewhuze tẹ ya
whụ iwhe dụ l’igwe mẹe lẹ mgboko.
7Ookulije onye ụkpa l’ẹka ọ gwọru.
L’ooshije l’ikpọzu palia onye l’adụa g’ọ harụ iya imeli,
8bya edobe iya tẹ yẹle ndu ishi hakọ ẹnya nhamụnha,
mbụ ndu ishi ndu nke Onye-Nwe-Ọha.
9Nwanyị, l’ẹte atsụ ime bẹ l’ọonuje oke l’ibe ji iya,
oomeje t’ọ bụru ne ọha, shi nno nụ iya ẹhu-ụtso.
T’ajaja bụru nke Onye-Nwe-Ọha.
1141Nteke ono, ndu Ízurẹlu shi lẹ Íjiputu fụta,
nteke ono, ọnu-ụlo Jékọpu shi l’ọha ntsụ,
2bẹ Juda bya abụru onye dụru Chileke nsọ,
Ízurẹlu bya abụru onye o nwe l’ẹka.
3Eze ẹnyimu bẹ whụru iya gbaa maa maa,
ẹnyimu Jọ́danu dakọbe lawhushia azụ.
4Eze ugvu l’akfụkaa shọoshoo g’ọo ebyila.
Ụnwu ugvu nshịi l’akfụ
karagadangu karagadangu g’ọo nwatụru.
5Gụbe eze ẹnyimu, ?ịigbahunuru gụnu?
Gụbe Jọ́danu, ?Ọo gụnu bẹ l’ịikpohunuru l’azụ l’azụ?
6Unubẹ eze ugvu, ?Ọo gụnu bẹ unu gude akfụkaa shọoshoo g’ọo ebyila?
Unubẹ ụnwu ugvu nshịi, ?ọo hụnu ole bẹ unu l’akfụ
karagadangu karagadangu g’ọo nwatụru?
7Unubẹ eliwhe l’owhu,
unu nmakwaa jijiji l’iwhu Onye-Nwe-Ọha,
mbụ l’iwhu Chileke nke Jékọpu.
8Onye gbazeru eze-ẹwhuru,
ọ ghọo ẹka mini dọru shimu shimu,
bya emee alị, bụ ekpekere nkụchi,
ọ bụru ẹnya ẹka mini shi asọfuta.
1151Ọ tọ bụkwa anyi,
gụbe Onye-Nwe-Ọha, ọ tọ bụkwa anyi.
Ọ kwa ẹwha ghu bẹ l’aa-kwabẹ ugvu,
o noo l’i yenukaru anyi obu,
ị bụru o-me-g’o-kfuru.
2?Ndẹnu g’o gude ndu ọha ọdo l’asụje anyi:
“?Ndẹhunu Chileke unu ọbu?”
3Chileke anyi bẹ nọkwa l’imigwe.
Ọ bụru iwhe dụ iya ree bẹ l’oomeje.
4Ọle ọgvu whẹ bụ mkpọla-ododo yẹle mkpọla-ọcha,
bụ madzụ bẹ gude ẹka iya mee ya.
5Whẹ nweru ọnu, ọle whẹ te ekfudu iya okfu.
Whẹ nweru ẹnya, ọle whẹ ta awhụdu iya ụzo.
6Whẹ nweru nchị, ọle whẹ ta anụdu iya iwhe.
Whẹ nweru imi, ọle whẹ te
egudedu iya anụ nshishi iwhe.
7Whẹ nweru ẹka, ọle whẹ te emedu iya ụkporo.
Whẹ nweru ọkpa, ọle whẹ te ejedu ije,
whẹ te egude ẹkpiri whẹ ekfufuta okfu.
8Ndu l’agwa whẹ nụ mẹe
ndu dakoberu whẹ nụ l’a-dụ g’ọo ọgvu ono.
9Unubẹ ọnu-ụlo Ízurẹlu,
unu bewhube Onye-Nwe-Ọha,
nkele ọo ya l’eyejeru unu ẹka,
ọ bụru iya l’egbochitaje unu.
10Unubẹ ọnu-ụlo Érọnu, unu bewhube Onye-Nwe-Ọha,
nkele ọo ya l’eyejeru unu ẹka,
ọ bụru iya l’egbochitaje unu.
11Unubẹ ndu l’atsụ egvu Onye-Nwe-Ọha,
unu bewhube Onye-Nwe-Ọha,
nkele ọo ya l’eyejeru unu ẹka,
ọ bụru iya l’egbochitaje unu.
12Onye-Nwe-Ọha l’anyatajẹ anyi,
o je l’a-gọru ọnu-ọma nụ anyi.
Ọo-gọru ọnu-ọma nụ ọnu-ụlo Ízurẹlu,
gọru ọnu-ọma nụ ọnu-ụlo Érọnu.
13Ọo-gọru ọnu-ọma nụ ndu
l’atsụ egvu yẹbe Onye-Nwe-Ọha,
ndu ukfu mẹe ndu nta.
14Tẹ Onye-Nwe-Ọha mekwaa t’unu saa ọsa kabaa l’igwe,
mbụ unubẹdua l’onwunu mẹe ụnwegirima unu.
15Tẹ Onye-Nwe-Ọha gọkwaru ọnu-ọma nụ unu,
mbụ onye ono, bụ iya meru igwe mee mgboko.
16Imigwe l’owhu bụkota nke Onye-Nwe-Ọha,
ọwhube mgboko b’ọ nụwaru madzụ.
17Ndu nwụhuru anwụhu ta
ajajẹkwa Onye-Nwe-Ọha ajaja,
mbụ ndu larwuwaru alị kpọkpo-nggujingguji.
18Ọ kwa anyịbedua l’a-nọ etu Onye-Nwe-Ọha ẹwha.
Anyi l’a-nọ etu iya ẹwha ntaa, etu iye ya jeye lẹ gbururu.
T’ajaja bụru nke Onye-Nwe-Ọha.
1161Mu yeru Onye-Nwe-Ọha obu, o noo l’ọ nụwaru olu mu.
Ọ nụru mkpu, mu chikuru iya
sụ t’o meeru mu eze-iwhe-ọma.
2Eshi-ọwhu ọ ngabẹru mu nchị
bẹ mu l’a-nọdu akpọ-ku iya jeye gẹ mu l’a-nọ-beru.
3Anwụhu shiwaa kee mu oswe.
Ẹkpa oyi alị-maa swishia mu gbụlaa l’ẹhu.
Iwhe-ẹhuka mẹe áwhụ shi
nọ-whee mu mgburumgburu.
4Tọ dụ iya bụ, mu bya aryaku Onye-Nwe-Ọha sụ iya:
“Gụbe Onye-Nwe-Ọha, dzọnua mu ndzụ!”
5Onye-Nwe-Ọha bụkwa onye l’emeje eze-iwhe-ọma,
bụru onye dụ chịriri,
mbụ lẹ Chileke anyi bụ onye l’awhụje imiko.
6Ndu l’ẹte amarwetaa iwhe
bẹ bụkwa Onye-Nwe-Ọha l’akwakọbeje whẹ.
Nteke mu shi nọdu l’oke mkpa bẹ bụ iya dzọfutaru mu.
7Obu mu, jiko kabẹ nmakfuru anmakfuru ọdo,
nkele Onye-Nwe-Ọha dụnukaru ghu lẹ mma.
8Ọo gụbe Onye-Nwe-Ọha
nafụtaru ndzụ mu l’ẹka anwụhu,
ọ bụru ghu hucharu mu ẹnya-mini,
bụru ghu gbochiru tẹ mu be evukota iwhe daa iko,
9nke ọwhu mu l’a-nọ ejewhe
g’ọ dụ mu l’iwhu Onye-Nwe-Ọha l’alị ndu nọ ndzụ.
10Mu woru onwomu ye Chileke l’ẹka.
O noo iwhe meru mu l’ekfu sụ:
“Iwhe-ẹhuka kpaakwarụ mu ẹhu shii.”
11Mu kfubulihukwawhọ sụ:
“Ndiwhe l’owhu bụkotakwaa ndu ntuwhu-ire.”
12?Ndẹ-zhia gẹ mu l’e-shi kfụa Onye-Nwe-Ọha ụgwo
iwhe-ọma, o megbaberu mu g’ọ ha?
13Mu l’e-wota ngwo-ẹja mmẹe bya anụ Onye-Nwe-Ọha,
gude kpọ-kua ẹwha iya nke adzọdzo, ọ dzọru mu.
14Iwhe mu riburu lẹ nte lẹ mu l’e-meru Onye-Nwe-Ọha,
bẹ mu l’a-nọdu l’iwhu ndu nkiya meeru iya.
15Onye-Nwe-Ọha bẹ anwụhu ndu nkiya l’erwuje l’anụ ojii.
16Gụbe Onye-Nwe-Ọha, ọ kwa onye ozhi ghu bẹ mu bụ.
Ọ kwa onye ozhi ghu bẹ mu bụ,
bụru nwa nwanyị ono, l’ejeru ghu ozhi.
I tọfuwaru mu l’ẹgbu ono, anwụhu shi kee mu.
17Mu l’a-nụ ghu ngwo-ẹja gude kele ghu ekele,
mu akpọ-kua ẹwha gụbe Onye-Nwe-Ọha.
18Iwhe mu riburu lẹ nte
lẹ mu l’e-meru Onye-Nwe-Ọha
bẹ mu l’a-nọdu l’iwhu ndu nkiya meeru iya.
19Ẹka mu l’a-nọdu mee ya bụ l’ọma ogboduwhu eze-ụlo
Onye-Nwe-Ọha l’echilabọ Jerúsalẹmu.
T’ajaja bụru nke Onye-Nwe-Ọha.
1171Unu jaa Onye-Nwe-Ọha ajaja unubẹ mba lile.
Unu jaa ya ajaja unubẹ ndiwhe l’owhu,
2nkele o yenukaru anyi obu,
Onye-Nwe-Ọha bụ o-me-g’o-kfuru
jeye lẹ tututu-mịmimi.
T’ajaja bụru nke Onye-Nwe-Ọha.
1181Unu kele Onye-Nwe-Ọha ekele l’ọ bụ onye ọma.
N-yemobu iya l’anọje jeye lẹ gbururu.
2Tẹ ndu Ízurẹlu tụko sụ:
“N-yemobu iya l’anọje jeye lẹ gbururu.”
3T’ọnu-ụlo Érọnu tụko sụ:
“N-yemobu iya l’anọje jeye lẹ gbururu.”
4Tẹ ndu l’atsụ egvu Onye-Nwe-Ọha tụko sụ:
“N-yemobu iya l’anọje jeye lẹ gbururu.”
5Nteke mu l’eje iwhe-ọtsulanu
bẹ mu ryakuru Onye-Nwe-Ọha.
Ọ zaa mu oku, bya atọo mu l’uli.
6Onye-Nwe-Ọha swiru mu eswiru,
mu ta abyadụ l’a-tsụ egvu.
?Ọo gụnu bẹ madzụ l’a-dụ ike mee mu?
7Onye-Nwe-Ọha swiru mu eswiru,
ọ yẹbedua l’eyejeru mu ẹka.
Mu je l’e-gude ẹnya mu whụ gẹ
Chileke l’e-shi lwụ-gbua ndu mu dụ ashị.
8Ọnodu l’ime Onye-Nwe-Ọha ezeru ndzụ kakwa ree
amamẹ ọda-whube madzụ.
9Ọnodu l’ime Onye-Nwe-Ọha ezeru ndzụ kakwa ree
amamẹ ọda-whube ndu ishi.
10Iwhe bụ mba gẹ mba ha
bẹ gbarụ mu mgburumgburu,
ọle mu gude ẹwha Onye-Nwe-Ọha
lwụ-gbukota whẹ gẹ whẹ ha.
11Whẹ nọ-wheru mu ibẹka ibẹbo,
ọle mu gude ẹwha Onye-Nwe-Ọha
lwụ-gbukota whẹ gẹ whẹ ha.
12Whẹ ripyaberu mu g’ọo ẹnwu,
ọle whẹ keru gburugburu nyịhu
g’ọo ọku dzụru ikpuruma ọkponku.
Ọ bụru l’ẹwha Onye-Nwe-Ọha
bẹ mu gude lwụ-gbukota whẹ gẹ whẹ ha.
13E nwuru mu daawhuu, mu bya l’ada iko,
ọle Onye-Nwe-Ọha yeru mu ẹka.
14Ọo Onye-Nwe-Ọha bụ ike mu,
bụru iya bụ ishi egvu mu l’agụ.
Ọo ya bụ onye l’adzọfutaje mu nụ.
15Olu ẹhu-ụtso yẹle ọtu okoo
l’ada wọwowo l’ibe ndu-dụ-chịriri.
Whẹ tụko ekfu sụ:
“Ọkpehu Onye-Nwe-Ọha meekwaru iwhe parụ ẹka.
16Ọkpehu Onye-Nwe-Ọha bẹ kangoru nụ.
Ọkpehu iya bẹ meekwaru iwhe parụ ẹka.”
17Mu ta anwụhudu, mu l’a-nọdu ndzụ
kfukashia iwhe Onye-Nwe-Ọha meru mu t’a nụ-dzuru.
18Onye-Nwe-Ọha bẹ hụ̀waru mu àhụ̀hù hụ̀shia mu ike,
ọle o to kwedu t’ọnwu gbua mu.
19Gụhanuaru mu ọnoguzo ọ-dụ-chịriri,
tẹ mu shi iya bahụ je etua Onye-Nwe-Ọha ẹwha.
20Ọwa-a bụ ọnoguzo Onye-Nwe-Ọha.
Ọ bụ ẹka ndu dụ chịriri l’eshije abahụ.
21Mu l’ekele ghu ekele l’ị zarụ mu oku.
Ntaa b’ị bụwaa onye l’adzọfutaje mu nụ.
22Ẹwhuru ono, ndu l’atụ ụlo jịkaru,
l’ọo ọ-ga-lẹ-mkpa,
bẹ bekochaaru bya abụru ẹwhuru, gude ụlo.
23O noo bụru iwhe Onye-Nwe-Ọha meru.
Ọ dụ anyi biribiri l’ẹnya.
24Ntanụ bụ mbọku, Onye-Nwe-Ọha meru.
T’ẹhu tsọo anyi ụtso l’ime iya, anyi etekwaawho ẹswa.
25Jiko Onye-Nwe-Ọha, dzọfutanu anyi.
Mekwaa t’iwhe lile, anyi l’eme
bụru anyi akpụto-l’ọboroto, gụbe Onye-Nwe-Ọha.
26Onye a gọru ọnu-ọma b’ọ bụ
mbụ onye ono, Onye-Nwe-Ọha zhiru t’ọ bya.
Anyi shi l’ụlo Onye-Nwe-Ọha agọru ghu ọnu-ọma.
27Ọ kwa Onye-Nwe-Ọha bụ Chileke.
O meekwaru t’iwhoro, shi iya l’ẹka nwuaru anyi.
Unu tụa eri l’anụ, unu gude abya
t’unu gbaarụ Onye-Nwe-Ọha ẹja,
unu kpụta iya bya lẹ mgboro
mpu, a nmabẹ-geeru l’ẹnya-mgbẹja.
28Ọo ghu bụ Chileke mu, ọ bụru ghu bẹ mu l’e-kele ekele.
Ọo ghu bụ Chileke mu,
ọo ya bụ l’ọo ghu bẹ mu l’a-nọ ekutse.
29Byiko unu kele Onye-Nwe-Ọha ekele l’ọ bụ onye ọma.
N-yemobu iya l’a-nọ jeye lẹ gbururu.
1191Ẹhu-ụtso bụ nke ndu l’ẹte amarụ ejo ẹka,
mbụ ndu l’eme iwhe iwu, Onye-Nwe-Ọha kfuru.
2Ẹhu-ụtso bụ nke ndu l’eme iwhe ọ tụru l’iwu,
mbụ ndu gude obu whẹ g’ọ ha achọshi iya ike.
3Ndu ono te eyejekwa ẹka l’ome ẹji,
ochikwaa ndzụ dụ Onye-Nwe-Ọha ree bẹ whẹ l’ebu.
4Ị tụwaru iwu dobe
sụ t’anyi lete ẹnya meje iwhe o kfuru.
5Ọ dụ mu nke tẹ mu kfụru kfụshia ike,
l’ome iwhe i tọru ọkpa iya,
6Mu letazhiwaa ẹnya eme iwhe i kfuru,
bẹ iwhere ta abyadụ l’eme mu.
7Mu l’e-gude obu, gụru iwhoro jaa ghu ajaja,
eshi-ọwhu mu l’anwụ nsọ ghu ono, dụ chịriri.
8Mu l’e-tso iwhe ị tọru ọkpa iya sụ t’e tsoje.
Byiko ba ajịkakwa mu lẹ whuruwhuru.
9?Ndẹe gẹ nwokorọbya l’e-shi dobe onwiya ọga?
Gẹ l’oo-me iya bụ t’o meje iwhe e deru l’okfu ghu.
10Mu gude obu mu g’ọ ha achọ ghu.
Be ekwekwa tẹ mu whua ụzo ome iwhe ị tụru l’iwu.
11Okfu ghu bẹ mu kwachiwaru l’ime obu mu,
nke ọwhu mu l’ete eme ghu iwhe-dụ-ẹji.
12T’ajaja bụru nkeghu gụbe Onye-Nwe-Ọha.
Byiko zhinua mu iwhe ono, ị tọru ọkpa iya.
13Mu l’egudeje ọnu mu gụkota iwu lile, ị tụru.
14Ome iwhe i kfuru l’anọje atsọ mu rịkporikpo,
ẹgube ono, o nwe iwhe l’anọje atsọ onye nwe iya nụ.
15Mu l’egudeje ọrilichicho anwụ iwhe ị sụru t’e meje.
Mu l’eletaje ẹnya etso ụzo nkeghu.
16Iwhe ị tọru ọkpa iya bẹ l’adụje mu ree ememe.
Mu ta abyadụ l’a-zọha okfu ghu azọha.
17Menuaru mụbe onye ozhi nkeghu ree,
nke ọwhu mu l’a-nọdu ndzụ eme okfu ghu.
18Menua t’ẹnya mu saa asasa,
nke ọwhu mu l’a-whụ iwhe dụ biribiri,
dụgbabe l’iwu ghu.
19Ọ kwa abyabya bẹ mu byarụ mgboko-o.
Byiko ba adụkwa iwhe ono, ị sụru t’e meje ọwhu
l’ii-domiru mu edomi.
20Nteke nteke bẹ l’ọonoje agụ mu ẹgu l’obu,
tẹ mu marụ iwhe bụ nsọ ghu.
21Ndu l’eku onwowhe
iwhe whẹ l’ahaa g’ọ ya bẹ l’ịibajeru mba,
whẹ vu ọnu, mbụ ndu ono,
l’ahajẹ iwhe ị sụru t’e meje wata ome iwhe ọdo.
22Be ekwekwa tẹ whẹ jaa mu ewenu,
gụ eje ekwekwa tẹ whẹ koo mu ọkpa l’ishi,
o noo nkele iwhe ono, ị tọru
ọkpa iya ono bẹ mu l’emekotaje.
23A makwarụ-a lẹ ndu bụ ishi
l’anọkobeje l’ẹka lanụ achịru mu ejo idzu,
ọle mbẹdua bụ onye ozhi ghu
l’e-gudejelewho ọri-lichicho anwụ iwhe ono,
ị tọru ọkpa iya sụ t’e tsoje.
24Ome iwhe ị tụru l’iwu bụ iwhe l’adụje mu ree.
Ọ bụru iya l’akpọ-zhijeru mu ụzo iwhe mu l’e-me.
25E metawaru mu iwhe ọbu jeye ishi miru mu l’ẹja.
Menua tẹ ndzụ mu lwawhuta azụ,
ẹgube ono, i kweru iya l’ụkwa.
26Mu kọwashiru ghu gẹ ndzụ mu dụ, ị ngabẹru mu nchị.
Zhinua mu iwhe ono, ị tọru ọkpa iya.
27Menua t’iwhe, ị tụru l’iwu doo mu ẹnya,
nke ọwhu mu l’a-tọ nwẹhu aarị
iwhe ono, dụ biribiri, l’iimegbabe.
28Mu gụwaru áwhụ jeye ike gvụ mu.
Jiko gbẹnua mu ọkpu-ike ẹgube ono,
i kweru iya l’ụkwa.
29Be ekwekwa tẹ mu ye ẹka l’ẹregede.
Zhinua mu iwu ghu, shi nno meeru mu eze-iwhe-ọma.
30Mu hatawaru ome ire-lanụ,
bya ewowaru obu mu zhibe l’ome nsọ ghu.
31Iwhe ono, gụbe Onye-Nwe-Ọha tụru l’iwu
bẹ mu l’emekwa emeshi iya ike.
Ọo ya bụ, be ekwekwa t’e mee mu iwhe-iwhere.
32Ụzo, mu l’anọje agba eshi
bụ ụzo ome iwhe ị sụru t’e meje,
nkele i mewaru t’iwhe kabaa mu odo ẹnya.
33Jiko Onye-Nwe-Ọha, zhinua mu
gẹ mu l’e-shije eme iwhe ị tọru ọkpa iya,
nke ọwhu mu l’e-me iya jeye l’ikpazụ.
34Menua t’iwhe doje mu ẹnya
nke ọwhu mu l’a-nọ edobe iwu ghu ono,
gude obu mu g’ọ ha eme iya ememe.
35Goshi mu ụzo, mu l’e-shije eme iwhe ị sụru t’e meje,
nke l’ọonoje atsọ mu ụtso ememe.
36Gọnua mu obu t’ọ ghaa iwhu l’ome iwhe ị tụru l’iwu.
T’ọ bọ ghakwa iwhu l’ori ndu ọdo urwu.
37Mee tẹ mu wofu ẹnya l’iwhe l’adụa iwhe ọ bụ.
Dobenu mu ndzụ, ẹgube ono, i kweru iya l’ụkwa.
38Menuaru mu iwhe ono, i kweru ụkwa
l’ii-meru mụbe onye ozhi ghu,
nke ọwhu l’aa-wata ghu ọtsu egvu.
39Wofunuru mu iwhe-iwhere
ono, mu l’atsụ egvu iya ono,
nkele iwu ghu dụ ree.
40Ọogushi mu ike tẹ mu mee iwhe ono, ị sụru t’e meje.
Gudenu nke l’ị bụ onye dụ chịriri dobe mu ndzụ.
41Goshinu mu n-yemobu ghu ono jiko Onye-Nwe-Ọha.
Dzọfutanu mu, o noo nkele
ọo iwhe i kweru ụkwa l’ii-meru mu.
42O noo nteke mu l’a-sa ndu l’ekfubyishi mu okfu,
nkele ọo okfu ghu bẹ mu kpọru obu ye.
43Ba anafụkwa mu ire-lanụ, dụ mu l’ọnu,
nkele ọo iwu nkeghu bẹ ẹnya mu dụ.
44Ọo iwhe iwu ghu kfuru bẹ mu l’e-meje ntekenteke
shi lẹ gbururu jeye lẹ gbururu.
45Ẹka mu chọru ejeje bẹ mu l’e-je lẹ ntụsaru-ẹhu,
nkele ọo iwhe ị sụru t’e meje bẹ mu l’emeje.
46Mu l’a-kfụru l’iwhu ndu eze kfua
nke iwu ono, ị tụru kfuja ya ekfuja.
Iwhere ta abyadụ l’e-me mu.
47Iwhe l’adụje mu ree bụ ome iwhe ị sụru t’e meje,
o noo nkele mu yeru iya obu.
48Mu gboberu ẹka mu whẹ labọ
anabata iwhe ị sụru t’e meje,
bụ iya bụ iwhe ono, mu yeru obu.
Mu l’anọduje nggujingguji arị iwhe ono,
ị tọru ọkpa iya sụ t’e tsoje.
49Nyatakwa okfu, i kfuru yeru mụbe onye ozhi ghu.
Okfu ono bẹ mewaru, ẹnya dụ mu l’ụzo.
50Iwhe l’adụje mu obu nteke
iwhe-ọtsulanu byarụ mu bụ:
l’ụkwa iwhe i kweru mu bụ iya l’edobe mu ndzụ.
51Ndu l’etse etsetse l’ajajẹ mu ewenu g’ọnu ha whẹ.
Ọle o too mejedu mu tẹ mu haa ome iwhe iwu ghu kfuru.
52Gụbe Onye-Nwe-Ọha; ọobuje,
nteke mu nyatarụ nsọ ghu ono, shi l’oge ndụ-ichee,
ya adụa mu obu.
53Ẹhu-eghughu l’azụje mu kfụu,
ọ bụru ndu ejo-ememe l’akpatajẹ iya,
mbụ ndu ono, jịkaru odobe iwu ghu.
54Iwhe ị tọru ọkpa iya sụ t’e tsoje l’abụje ishi egvu mu
l’iwhe bụ ụlo, mu radụru l’ụzo ije mu-a.
55L’ẹnyashi bẹ mu l’anyatajẹ ẹwha gụbe Onye-Nwe-Ọha.
L’oomeje mu tẹ mu dobe iwu ghu.
56Iwhe mu l’aghajẹ iwhu eme nteke bụ nteke mu nọ
bụ ome iwhe ị sụru t’e meje.
57Ọo ghu bụ oke-iwhe nkemu gụbe Onye-Nwe-Ọha.
Mu kwewaru ghu ụkwa lẹ mu l’a-nọ eme okfu ghu.
58Mu gudewaa obu mu g’ọ ha chọo iwhu ghu.
Menuaru mu eze-iwhe-ọma, bụ iwhe i kweru ụkwa iya.
59Mu lewaru ụzo mu ẹnya uswe lee ya ogologo,
shiwa iya fụta bya awata ome iwhe ị tụru l’iwu.
60Mu l’e-me ẹgwegwa; mu ta akpọdu ụkfu
ome iwhe ị sụru t’e meje.
61O -behuduru ndu ejo-ememe kee mu ẹgbu,
mu ta abyadụ l’a-nyazọ iwu ghu.
62Ọobuje, a -nọnyaa l’echi abalị,
mu agbalihu kele ghu ekele nke nsọ ghu ono, dụ chịriri.
63Iwhe bụ ndu l’atsụ ugvu ghu
bẹ mu lẹ whẹ l’eshikota ọnya,
mbụ ndu ono, l’eme iwhe ono, ị sụru t’e meje.
64Eliwhe l’owhu bẹ n-yemobu
gụbe Onye-Nwe-Ọha jiru pyịmupyimu.
Byiko, zhinua mu iwhe ono, ị tọru ọkpa iya sụ t’e tsoje.
65Menuaru mụbe onye ozhi ghu iwhe-ọma,
eshi-ọwhu ọ bụ iwhe okfu ghu
kfuru gụbe Onye-Nwe-Ọha.
66Zhinua mu mmamagụ yẹle
okpe ikpe, kfụru nhamụnha,
nkele mu kwekwaru ome iwhe i sụru t’e meje.
67A byadeshiwaa l’anụ mu chịikfuu,
mu gbee shiswehawanu ụzo,
ọle ntaa bẹ mu kwewaru ome okfu ghu.
68Ị bụ onye ọma, bya l’emekwawho iwhe-ọma.
Zhinua mu ome iwhe ị tọru ọkpa iya t’e tsoje.
69A makwarụ-a lẹ ndu l’eku onwowhe eku
l’anọje adzụshi ejire atukobe mu,
ọle mu gudelewho obu mu
g’ọ ha emekota iwhe ị sụru t’e meje.
70Ndu ono bẹ imiko madzụ l’ẹte adụjedu.
Ọle mbẹdua bụ ome iwhe iwu ghu kfuru l’adụje mu ree.
71Chịikfuu ono, a nụru mu dụkwa-a ree,
nke ọwhu mu l’a-nwụta otso iwhe ị tọru ọkpa iya.
72Iwu, shi ghu l’ọnu bẹ mu kakwa ọgube iwhe
amamẹ ụnukurunu mkpọla-ododo mẹe mkpọla-ọcha.
73Ọo ẹka ghu b’i gude kpụa mu,
mee mu, mu kfụru shihu ike.
Byiko, menua tẹ mu marụ ágụ
nke ọwhu mu l’a-nwụ oome iwhe ị sụru t’e meje.
74Tẹ ndu l’atsụ egvu ghu tekwaa ẹswa mẹ whẹ whụa mu,
o noo l’ẹka obu mu dụ bụ l’okfu ghu.
75Gụbe Onye-Nwe-Ọha,
mu makwarụ-a l’ikpe ghu kfụru nhamụnha,
mẹe l’ị kfụshiru ike l’iwhe i kfuru nụa mu chịikfuu.
76Tẹ n-yemobu ghu bụnuru iwhe
l’a-nọje adụ mụbe onye ozhi ghu obu,
eshi-ọwhu ọ bụ iwhe i kweru iya ụkwa iya.
77Whụnuaru mu imiko nke ọwhu mu l’a-nọdu ndzụ,
nkele iwhe l’adụje mu ree bụ iwu nkeghu.
78T’e menuru iwhe-iwhere kpua ndu l’eku onwowhe eku
nkele whẹ mesweru mu; lẹ bọ dụ iwhe mu meru whẹ.
Ọle mbẹdua bụ iwhe ono, ị sụru t’e meje
bẹ mu l’anọje arị l’ọriri.
79Tẹ ndu l’atsụ egvu ghu byakfutajekwa mu,
mbụ ndu ono, iwu ghu doru ẹnya.
80Meenua tẹ mu meje iwhe ị tọru ọkpa iya,
tọ bọ nwe ẹka l’aa-ta mu iya ụta,
ọwhu l’ee-shi nno mee mu iwhe-iwhere.
81Meji l’atọfuakwa mu atọfu l’ẹka l’ọogu mu t’ị dzọfuta mu;
ọle ẹka obu mu dụ bụ l’okfu ghu.
82Ẹnya l’apyahụakwa mu l’ẹka mu l’ele ẹnya
nteke l’ii-me iwhe i kweru ụkwa iya.
Mu l’asụje: “?Ọo zhihunua nteke ole bẹ l’ịi-dụ mu obu?”
83A makwarụ-a lẹ mu dụ g’ọo akpọ,
a mịberu l’ẹnwuru-ọku, mbụ akpọ, l’eeyeje mmẹe.
Ọle mu ta anyazọjedu iwhe ị tọru ọkpa iya.
84?Ọo nteke ole bẹ mụbe onye ozhi ghu l’a-taberu nshi?
Kọoru mu nteke l’ii-bebe hụ̀a ndu l’akpa mu ẹhu àhụ̀hù.
85Ndu l’eku onwowhe eku l’egvuje nsụ tẹ mu daba,
mbụ ndu ono l’ete edobe iwu ghu.
86Iwhe lile, ị sụru t’e meje bẹ kfụkotaru nhamụnha.
Yenuru mu ẹka nkele ndiwhe
l’akpa mu ẹhu l’ẹbe ọdu iwhe mu meru whẹ.
87Ọ whọdu-zhiawho nwanshịi
mẹ whẹ emee tẹ mu tọhu lẹ mgboko-o,
ọle mu ta ahadụ ome iwhe ị sụru t’e meje.
88Eshi-ọwhu i yeru mu obu;
kwachinua ndzụ mu t’ọ bọ dụ iwhe l’e-me iya nụ,
nke ọwhu mu l’e-meje iwhe ono, ị tụru l’iwu.
89Okfu gụbe Onye-Nwe-Ọha l’ere ire jeye lẹ tututu-mịmimi.
Ọ dụ g’i kfuru iya l’imigwe.
90Ịikfushije ike l’iwhe i kfuru shi l’ọgbo rwua l’ọgbo.
I meru mgboko dobe l’ọnodu iya, ọ kfụru chịmu.
91Iwhe lile i meru dụkota g’i meru iya byeye ntanụ,
nkele iwhe lile l’ejeru ghu ozhi.
92Ọ tọ bụwaa l’iwu ghu l’adụje mu ree eshi bụ gụnu,
mẹ mu anwụhuhaakwaa nteke ono,
mu shi eje iwhe-ọtsulanu.
93Mu ta abyakwa l’a-nyazọ ome iwhe ị sụru t’e meje,
nkele ọo ya b’i gude dobe mu ndzụ.
94Dzọfutanu mu; lẹ mu bụkwa nkeghu,
o noo lẹ mu l’emeje iwhe ị sụru t’e mee.
95Ndu ejo-ememe kwarụ okpu ngabẹru mu tẹ whẹ gbua mu,
ọle mu l’a-tụko-gezhia iwhe ị tụru l’iwu
kwakọbe l’ime obu mu arị iya l’ọriri.
96Iwhe mu whụru bụ l’iwhe lile
bẹ nweru ẹka o jetaru kfụshi,
ọle iwu ghu t’e nwedu ẹka o jetaru kfụshi.
97Iwu ghu bẹ mu yekwaru obu shii.
Mu l’anọje arị iya l’ọriri ntekenteke.
98Iwu, ị tụru bẹ mu l’iya nọ ntekenteke,
oomeje, mu amarụ ágụ karia ndu ọhogu mu.
99Ẹnya kakwa mu orwu l’iwhe
amamẹ ndu l’ezhi mu iwhe,
nkele iwu ghu l’adụje mu l’ọriri.
100Mu ka ndu bụ ọgurenya ọmaru ágụ,
nkele mu l’emeje iwhe ị sụru t’e mee.
101Mu jịkakwaru obu ejo ndzụ,
nke ọwhu mu l’a-nọ eme okfu ghu.
102Mu ta ahajẹkwa odobe nsọ ghu ahaha,
nkele ọo gụbedua bẹ zhiru mu iya.
103Leduwho g’iwu, ị tụru l’atsọ-bekwanu ụtso.
Ọ kakwa mu mmanụ-ẹnwu ọtso ụtso.
104Urwu, mu l’erita l’ome iwhe ị sụru t’e meje
bẹ bụ l’oomeje t’iwhe doo mu ẹnya.
Ọo ya meru g’o gude obu ndzụ l’ẹregede dụ mu ashị.
105Okfu ghu bụ oryọku,
mu gude awhụ ẹka mu l’a-dzọ ọkpa,
bya abụru iwhoro, dụ l’ụzo mu.
106Mu ribuwaru nte kfua ya hoo haa
lẹ mu l’a-nọlewho edobe nsọ ghu ono dụ chịriri.
107Mu jewaru iwhe-ọtsulanu shii.
Jiko Onye-Nwe-Ọha, dobenu mu ndzụ,
ẹgube ono, i kweru l’ụkwa.
108Jiko Onye-Nwe-Ọha, natanụ
ajaja ọwa-a, mu gude obu mu aja ghu.
Zhinua mu nsọ nkeghu.
109A makwarụ-a lẹ mu l’atụje iya ishi mu ntekenteke,
ọle mu ta abyakwa l’a-nyazọ iwu ghu anyazọ.
110Ndu ejo-ememe bẹ gbabẹru mu ọnya,
ọle mu tẹke eshiswebudua ụzo
l’ome iwhe ono, ị sụru t’e meje.
111Iwhe ị tụru l’iwu bụ oke-iwhe mu jeye lẹ tututu-mịmimi.
Ọo ya l’emeje t’obu l’atsọ mu ụtso.
112Iwhe mu kpeburu l’ime obu mu bụ lẹ mu l’a-nọ
etso iwhe ị tọru ọkpa iya t’e tsoje
jeye gẹ mu l’a-nọ-beru.
113Ndu l’anọje abọ obu ẹbo l’ẹka
Onye-Nwe-Ọha nọ bẹ dụ mu ashị,
ọle iwu nkeghu bẹ mu yeru obu.
114Ọo ghu bụ ẹka mu l’edomije onwomu,
ọ bụru ghu bụ onye mu nọ l’ẹka iya ezeru ndzụ.
Ẹka obu mu dụ bụ l’okfu ghu.
115Unu jekwa njere unu, unubẹ ndu ono, l’eme ejo-iwhe,
nke ọwhu mu l’a-nọje eme iwhe Chileke tụru l’iwu.
116Sedeshinua mu ike; ẹgube ono, i kweru l’ụkwa
nke ọwhu mu l’a-nọdu ndzụ.
Be ekwekwa t’iwhe ono, mu l’ele ẹnya iya nahụ mu.
117Gudeshikwaa mu ike nke ọwhu l’aa-dzọfuta mu.
Mu l’a-nọlewho eme iwhe ono, ị tọru ọkpa iya ntekenteke.
118Ndu harụ iwhe ono,
ị tọru ọkpa iya wata oshiswe ụzo
bẹ l’ịijikaje jinyia ẹnya,
nkele nwa akọ akọ ono, whẹ l’emewhe ta bẹdu l’iwhe.
119Ndu l’eme ejo-ememe l’eliwhe bẹ l’iikpoje g’ọo ntụ.
O noo iwhe meru g’o gude mu yee iwhe ị tụru l’iwu obu.
120Ogwẹhu l’anmakọta mu kwekwekwe
l’ẹka mu l’atsụ egvu ghu,
atsụkwawho ikpe ghu egvu.
121Mu mewaru iwhe kfụru nhamụnha,
mewaa iwhe dụ ree.
Jiko, be enwukwaru mu buhaaru ndu ono, l’akpa mu ẹhu.
122Jiko, kwenua onye ozhi ghu ụkwa
l’ịi-nọ-ọ eleta iya ẹnya.
Be ekwekwa tẹ ndu l’eku
onwowhe eku kpaa mu ẹhu.
123Ẹnya l’apyahụakwa mu l’ẹka mu l’ele ẹnya
nteke l’ịi-bya adzọfuta mu,
bụ iya bụ iwhe gụbe onye ono, dụ chịriri kweru mu ụkwa iya.
124Menuaru mụbe onye ozhi ghu iwhe dụ ree,
eshi-ọwhu i yeru mu obu.
Zhinua mu iwhe ị tọru ọkpa iya sụ t’e tsoje.
125Mbẹdu-ọwa bụ onye l’ejeru ghu ozhi,
jiko menua t’iwhe doje mu ẹnya,
nke ọwhu mu l’a-marụ iwhe ị tụru l’iwu.
126Gụbe Onye-Nwe-Ọha,
o rwuakwaru nteke l’ii-me ire,
nkele iwu ghu bẹ ndiwhe mebyiwaru.
127Ọo lẹ mu yeru iwu ị tụru obu,
amamẹ gẹ mu yeru ọkpobe mkpọla-ododo,
128ọ bụru lẹ mu kwetaru l’iwhe ị sụru t’e meje
bẹ kfụkotaru nhamụnha,
bẹ meru g’o gude ome iwhe l’ụgho dụ mu ashị.
129Iwhe ị tụru l’iwu dụ biribiri.
Ọo ya meru g’o gude mu l’eme iya l’o rwuberu iya.
130Ẹka okfu ghu bahụru bẹ iwhoro l’abahụje.
Oomeje tẹ ndu l’ẹte amarwetaa iwhe kabaa ọmaru iwhe.
131Mu sarụ ọnu atụ hẹehee,
l’ẹka ọogu mu tẹ mu meje iwhe ị sụru t’e meje.
132Ghanụaru mu iwhu, jiko meeru mu eze-iwhe-ọma,
gẹ l’iimejeru iya iwhe bụ ndu yeru ẹwha ghu obu.
133Menua tẹ mu hajẹ ọkpa lẹ g’ị sụru t’a hajẹ iya.
Be ekwekwa t’iwhe-dụ-ẹji bụru eze, l’achị mu nụ.
134Gbafụta mu l’ẹka ndu l’akpa mu ẹhu,
nke ọwhu mu l’a-nọ eme iwhe ị sụru t’e meje.
135Menua t’atatiwhu ghu nwuaru mụbe onye ozhi ghu.
Zhinua mu iwhe ị tọru ọkpa iya sụ t’e tsoje.
136Ẹnya-mini l’asọ mu gborogboro l’ẹnya,
nkele ndiwhe te emedu iwhe iwu ghu kfuru.
137Ị bụ onye dụ chịriri gụbe Onye-Nwe-Ọha,
ikpe ghu kfụru nhamụnha.
138Iwhe ị tụshiru l’iwu dobe kfụkotaru nhamụnha,
tẹhenu whẹ bụkotaru ire-lanụ.
139Obu, mu yeru ghu rimiwaru mu ishi,
nkele ndu ọhogu mu ta agụbedu okfu ghu iwhe.
140Ụkwa, i kweru b’a tọwaa nwẹhu dalekota adale.
Mbẹdua bụ onye ozhi ghu bẹ yeru iya obu shii.
141A marụ-a l’ọ tọ dụdu iwhe mu bụ;
tọ dụ iwhe a gụberu mu,
ọle mu ta anyazọdu ome iwhe ị sụru t’e meje.
142Ọ-dụ-chịriri nkeghu bẹ l’a-dụ jeye lẹ gbururu,
iwu ghu bụru ire-lanụ.
143Ejo iwhe-ọtsulanu bẹ byarụ mu, awhụ byarụ mu,
ọle mu yeleru-a iwhe ị sụru t’e meje obu.
144Iwhe ị tụru l’iwu dobe
bẹ kfụru nhamụnha jeye lẹ tututu-mịmimi.
Menua t’iwhe doje mu ẹnya nke ọwhu mu l’a-nọdu ndzụ.
145Mu gude obu mu g’ọ ha ryaku ghu,
zanụ mu jiko Onye-Nwe-Ọha,
nke ọwhu mu l’a-nọ eme iwhe ị tọru ọkpa iya t’e tsoje.
146Ọo ghu bẹ mu l’aryaku, dzọnua mu,
nke ọwhu mu l’a-nọ edobe iwu ghu.
147Mu l’agbashije tẹmenu chi asahụ bya aryaku ghu
t’ị bya eyeru mu ẹka,
ẹka ẹnya mu dụ bụ l’okfu ghu.
148Ẹnyashi owhu bẹ mgbẹnya te eshitajedu mu l’ẹnya ilile,
l’ẹka mu l’arị nke ụkwa iwhe i kweshiru.
149Gudenu lẹ n-yemobu ghu ta agvụdu agvụ nụa olu mu.
Jiko Onye-Nwe-Ọha,
gudenu nke l’ị bụ onye l’ekpeje
ikpe kfụru nhamụnha chekwaa ndzụ mu.
150Ndu ono, l’akpa mu ẹhu nke ịnyigirinyi nọokwa ntse.
Ọ tọ dụdu iwhe whẹ gude iwu ghu eme.
151Ọle gụbe Onye-Nwe-Ọha nọkwa mu-a ntse,
iwhe ị tụru l’iwu bẹ bụkota ire-lanụ.
152Nteke tehawaru ẹnya bẹ mu marụ iwhe ị tụru l’iwu,
ị tụru iya dobe t’ọ bụru iwhe l’a-nọ jeye lẹ gbururu.
153Lenua ẹnya whụ
iwhe-ọtsulanu, mu l’eje, dzọo mu,
nkele mu ta anyazọjedu iwu ghu anyazọ.
154Hanụaru mu enge, gbafụta mu,
Dobenu mu ndzụ, ẹgube ono, i kweru ụkwa iya.
155Ndu l’eme ejo-ememe bẹ gụbe Chileke l’ẹte adzọfutadu,
o noo nkele iwhe ị tọru ọkpa iya bẹ whẹ ta akpadụ ishi iya.
156Gụbe Onye-Nwe-Ọha,
obu-imiko i nweru bẹ pakwarụ ẹka.
Gudenu nke l’ị bụ onye l’ekpeje
ikpe kfụru nhamụnha dobe mu ndzụ.
157Ndu l’akpa mu ẹhu mẹe
ndu mu dụ ashị bẹ hakwa l’igwe,
ọle ọ tọo kpọshidu mu ome iwhe ị tụru l’iwu.
158Ẹhu l’arwụrwuhuje mu arwụrwuhu
nteke whẹ whụru ndu l’ẹte egudee ire,
o noo lẹ whẹ te emejedu iwhe okfu ghu kfuru.
159Whụwaro gẹ mu yeberu obu l’ome iwhe ị sụru t’e meje.
Gudenu l’ị bụ onye nweru n-yemobu
chekwaa ndzụ mu jiko Onye-Nwe-Ọha.
160Okfu ghu g’ọ ha bụkota ọkpobe okfu.
Ikpe ono, kfụru nhamụnha,
l’iikpeje bẹ l’a-nọ jeye lẹ gbururu.
161Ndu ishi l’akpa mu ẹhu l’ẹbe ọdu iwhe mu meru whẹ,
ọle iwhe mu l’atsụ egvu nwẹkiya bụ okfu ghu.
162Okfu ghu ono bụ iya l’emeje t’ẹhu tsọo mu ụtso,
g’ọo onye vụtaru eze ụwha.
163Mu kpọru ụgho ashị, mu l’akpọ-yiru iya ẹhu,
ọle iwu ghu bẹ mu yeru obu.
164Ugbo ẹsaa lẹ mbọku bẹ mu l’ajajẹ ghu ajaja
O noo lẹ nsọ ghu bẹ dụ chịriri.
165Ndu yeru iwu ghu obu bẹ ẹhu dụ guu dụshia ya ike.
Ọ tọ dụdu iwhe bya l’a-kpọ whẹ okfu l’ọkpa.
166Mu l’angarụ gụbe Onye-Nwe-Ọha t’ị bya adzọfuta mu,
iwu, ị tụru bẹ mu l’emeje.
167Iwhe ị tụru l’iwu bẹ mu l’emeje,
mu yeru iya obu shinene shinene.
168Iwhe ị sụru t’e meje mẹe
iwhe ị tụru l’iwu bẹ mu l’emekotaje,
iwhe lile, mu l’eme b’ị makọtaru.
169Tẹ mkpu, mu l’echi rwunua ghu
lẹ nchị jiko Onye-Nwe-Ọha.
Menua t’iwhe doje mu ẹnya,
bụ iya bụ iwhe okfu ghu kfuru.
170Byiko tẹ nryọ, mu l’aryọ ghu rwunua ẹka ị nọ.
Nafụtanu mu, ẹgube ono, i kweru l’ụkwa.
171T’ajaja nkeghu bụnuru iwhe
l’eji mu ọnu ebushihu ebushihu,
nkele i zhiru mu iwhe ị tọru ọkpa iya sụ t’e emeje.
172Mu l’e-gude ọnu mu gụa okfu nkeghu l’egvu,
nkele iwhe lile, ị sụru t’e meje bẹ kfụru nhamụnha.
173Byiko machịnua ẹka ghu t’i yeru mu ẹka,
o noo lẹ mu hatawaru ome iwhe ị sụru t’e meje.
174Iwhe l’agụ mu nụ bụ t’ị dzọfuta mu jiko Onye-Nwe-Ọha.
Iwu ghu l’adụje mu ree ememe.
175Hanụa mu tẹ mu nọdu ndzụ jajẹ ghu ajaja.
Byiko tẹ nsọ ghu sedenu ndzụ mu.
176Mu kpawhuhuwaru g’ọo atụru, tuwhahuru etuwhahu.
Byiko, chọnua mụbe onye ozhi ghu,
o noo lẹ mu ta anyazọjedu iwhe ị sụru t’e meje.
120Egvu, l’aagụje mẹ l’eeje Jerúsalẹmu
1Nteke mu l’eje iwhe-ọtsulanu
bẹ mu ryakuru Onye-Nwe-Ọha,
ọ za mu bya agbaarụ mu mkpu.
2Jiko Onye-Nwe-Ọha,
dzọfutanu ndzụ mu l’ẹka ndu ejire ono,
mẹe l’ẹka ndu ẹregede ono.
3Unubẹ ndu ejire ono, Chileke l’e-me unu ivu l’ẹhu,
mbụ l’ọo-nụ unu awhụ.
4Oo-gude akfụ, tụpyiru ọnu hụ̀a unu àhụ̀hù,
gude ọku, l’ata kfụkfukfu kegbushia unu.
5Ebubu, mu l’unu bu dụta-be ẹji
g’ọo onye bu l’alị ndu Mẹsheku,
mbụ l’ọ dụ ẹji g’ọo onye bu l’ụlo-ẹkwa ndu Keda.120:5 Mẹsheku yẹle Keda bụ uzhi ẹka labọ, nọkahuru anọkahu; tegee mebyi ẹnya. Ndu alị ono l’iche l’iche bẹ nweru akpa meji; bụru ndu ẹhuka pageeru ẹka l’ẹhu.
6Ndu kpọru nchị-ọdu-ndoo ashị
bẹ mu lẹ whẹ shi nteke tehawaru ẹnya butaru.
7Mbẹdua l’achọ ụzo nchị l’e-shi dụ ndoo,
mu l’ekfu tẹ nchị dụ ndoo,
ẹnya adụ whẹbedua l’ọgu.
121Egvu, l’aagụje mẹ l’eeje Jerúsalẹmu
1Mu paliru ẹnya lee l’eli ugvu ugvu ono sụ:
“?Ọo awe bẹ eyemẹka mu l’eshije?”
2Eyemẹka mu l’eshije l’ẹka Onye-Nwe-Ọha,
onye meru igwe mee mgboko.
3Ọ tọ byadụ l’e-kwe t’ọkpa chiswahu ghu.
Onye ono, l’eche ghu nche
bẹ mgbẹnya ta abyadụ l’erekota.
4Mbụ l’onye ono, l’eche ndu Ízurẹlu nche
bẹ mgbẹnya ta abyadụ l’e-rekota,
tọ bya l’ekuru mgbẹnya.
5Onye-Nwe-Ọha bụ iya l’eche ghu nche,
ọo ya bụ aguguru, l’eche ghu ẹhu.
Ọ nọ ghu lẹ mgboro egbochita ghu.
6Anwụ, l’echi l’eswe ta adụdu iwhe l’oo-me ghu,
ọwhu l’eewhoro ọnwa, l’echi l’ẹnyashi.
7Ọo Onye-Nwe-Ọha l’ewofuje
ghu l’ẹka ejo-iwhe nọkota.
Ọo yẹbedua l’eche ndzụ ghu eche.
8Ọo Onye-Nwe-Ọha l’a-nọ edu ghu l’ejeje mẹe l’alwalwa,
watazhiawho ntaa jeye lẹ gbururu.
122Egvu, l’aagụje mẹ l’eeje Jerúsalẹmu; onye deru iya nụ bụ Dévidi
1Ẹhu tsọru mu ụtso nteke whẹ sụru mu:
“T’anyi je l’eze-ụlo Onye-Nwe-Ọha.”
2Anyi dzọbekwaru ọkpa
l’ọnu ẹka l’eeshije abahụ gụbe Jerúsalẹmu.
3Jerúsalẹmu bụ eze obodo, a tụru,
ọ nọkobe l’ẹka lanụ ama ụma.
4Ọo ẹka ono bẹ ikfu nọnu l’anọje awụ eje,
mbụ ikfu ụnwu Onye-Nwe-Ọha,
eje tẹ whẹ kele Onye-Nwe-Ọha ekele,
bụ iya bụ iwhe ị tụru l’iwu doberu ndu Ízurẹlu.
5Ọo l’ẹka ono bẹ oshi-eze, a nọ ekpe ikpe dụ,
mbụ oshi-eze, shi l’ọzo-ụlo Dévidi.
6Kfuru nụ Chileke tẹ nchị dụ ndoo lẹ Jerúsalẹmu:
“T’ẹhu ndu yeru ghu obu bụru akpụto-lẹ-ọboroto.
7Tẹ nchị dụkwa ndu mgbodo gụbe Jerúsalẹmu
nọ-wheru mgburumgburu ndoo.
T’ẹhu-guu bụkwaru nke ndu
bu l’ime ụlo-mgbochita ghu.”
8Mu gude iswi ẹhu unwune mu
mẹe ndu ọnya mu whẹ asụ:
“Tẹ nchị dụkwa ndoo l’ime gụbe Jerúsalẹmu.”
9Mu gude iswi ẹhu eze-ụlo
Onye-Nwe-Ọha, bụ Chileke anyi
achọ t’iwhe lile bụru akpụto-l’ọboroto lẹ Jerúsalẹmu.
123Egvu, l’aagụje mẹ l’eeje Jerúsalẹmu
1Mu paliru ẹnya imeli kfuru nụ ghu,
mbụ gụbe onye ono, sụgaru l’oshi-eze ghu l’imigwe.
2Ọo ẹgube ono, nwoke bụ ohu
l’anọje ele nnajị, nwe iya nụ ẹnya l’ẹka,
ọ bụru ẹgube ono, nwanyị
bụ ohu l’anọje ele nwanyị, nwe iya nụ ẹnya l’ẹka,
bụkwawho g’anyịbedua l’ele
Onye-Nwe-Ọha, bụ Chileke anyi ẹnya l’ẹka
jeye nteke l’ọo-whụru anyi imiko.
3Whụnuaru anyi imiko jiko Onye-Nwe-Ọha,
Jiko whụnuaru anyi imiko,
lẹ ndiwhe menukawaru anyi
g’ọo l’ọ tọ dụdu iwhe anyi bụ.
4Mbụ lẹ ndu ono, vutaru tsụa onwowhe l’ẹnya
menukawaru anyi kpakpa-wewe,
whẹbe ndu ono, l’eku onwowhe eku menukawaa anyi
g’ọo l’ọ tọ dụdu iwhe anyi bụ.
124Egvu, l’aagụje mẹ l’eeje Jerúsalẹmu; onye deru iya nụ bụ Dévidi
1Ọ tọ bụwaa lẹ Onye-Nwe-Ọha nọkube anyi.
Ngwa, t’unubẹ ndu Ízurẹlu tụko kfua sụ:
2Ọ tọ bụwaa lẹ Onye-Nwe-Ọha nọkube anyi,
nteke ono, ndiwhe shi etso anyi ọgu,
3whẹ gege elweshikwa anyi lẹ ndzụ,
nteke ono, ẹhu shi eghu whẹ damụdamu l’ẹka anyi nọ.
4Whẹ gẹge erigbushikwa anyi g’ọo utso,
bụru ọchoku-mini vuta anyi,
5mbụ lẹ whẹ gẹge aghọ ukporo-mini kpota anyi,
anyi eje abụru ọla-l’iswi.
6T’ajaja bụru nke Onye-Nwe-Ọha onye ono, l’ẹte ekwee
tẹ whẹ gude eze takashịa anyi atakashị.
7Anahụ, anyi nahụru whẹ dụ
g’ọo ẹnu, nahụru onye l’agba ọnya ẹnu.
Ọnya ọbu b’a kposweru; anyi tsukashihu gbalaa.
8Eyemẹka anyi l’eshije l’ẹka Onye-Nwe-Ọha,
onye meru igwe mee mgboko.
125Egvu, l’aagụje mẹ l’eeje Jerúsalẹmu
1Ndu dakoberu Onye-Nwe-Ọha
bẹ dụ g’ọo ugvu Záyọnu, bụ enwubata enwubata
bya abụru ugvu, l’a-nọwaro jeye lẹ gbururu.
2Ọo g’ugvu nọ-wheru Jerúsalẹmu mgburumgburu,
bụ gẹ Onye-Nwe-Ọha nọ-wheru
ndu nkiya mgburumgburu,
watazhiawho ntaa jeye lẹ gbururu.
3Ndu ejo-ememe ta achịgbukwaru alị ono,
mbụ alị ono, a wẹru ndu dụ chịriri.
Ọdua bẹ ndu ono, dụ chịriri
l’e-yekwa ẹka l’ome ejo-iwhe.
4Jiko Onye-Nwe-Ọha, menuaru ndu dụ ree iwhe dụ ree,
mbụ ndu ono, obu whẹ gụru iwhoro.
5Ọle iwhe bụ ndu harụ ụzo nkeghu
shilahaa ụzo ọwhu, l’ẹte akfụaru nhamụnha,
bẹ Onye-Nwe-Ọha l’a-tụko whẹ lẹ ndu l’eme
ejo-iwhe l’alị-a wofukota.
T’ẹhu-guu bụkwaru nke ndu Ízurẹlu.
126Egvu, l’aagụje mẹ l’eeje Jerúsalẹmu
1Nteke ono Onye-Nwe-Ọha dulatawhuru ndu ono,
e shi kpụa lẹ ndzụ azụ lẹ Záyọnu,
b’ọ dụ-zhiawho anyi g’ọo lẹ nrọ bẹ anyi l’arọ iya.
2Ọnu bụru anyi ọchi ọchi,
anyi gụa egvu ẹhu-ụtso.
Tọ dụ iya lẹ ndu ọha ọdo ekfulahaa sụ:
“Onye-Nwe-Ọha meekwaru whẹ oke iwhe parụ ẹka.”
3Onye-Nwe-Ọha bẹ mewaru anyi oke iwhe parụ ẹka.
Ọ bụru iya meru, ẹhu l’atsọ anyi ụtso.
4Jiko Onye-Nwe-Ọha,
dobewhunu anyi azụ l’ọnodu anyi,
ẹgube ono, i meru, mini doru rịsaa
sọlahaa gborogboro l’echi-ẹgu ọhuda,
5Tẹ ndu gude ẹnya-mini mebe iwhe l’alị
gude egvu ẹhu-ụtso kpata iya akpata.
6Onye gude ẹnya-mini vuru iwhe eje akụku l’alị,
bụ ẹhu-ụtso bẹ l’oo-gude agụ egvu,
vuru jọkfu-jọkfu iwhe o metaru l’okfu iya eje alwa.
127Egvu, l’aagụje mẹ l’eeje Jerúsalẹmu; onye deru iya nụ bụ Sólomọnu
1Ọ -bụa lẹ Onye-Nwe-Ọha tụru ụlo l’onwiya
bẹ ndu l’atụ iya nụ l’atụkwa iya nke mmaanụ.
Ọ -bụa lẹ Onye-Nwe-Ọha cheru mkpụkpu nche l’onwiya
bẹ ndu nche nọkwa nche nke mmaanụ.
2Ọo nke mmaanụ bẹ l’iitehuje l’ọnma-ẹwa ụtsu,
kworu gbaragbara lụfu;
ọla l’ụlo ghu abụru l’echi-abalị-ishi,
ẹka l’iise lịkalika gẹ l’ii-shi whụa nri ria,
nkele ndu Onye-Nwe-Ọha yeru obu l’azẹjero lẹ mgbẹnya,
ya ewotaru whẹ iwhe whẹ l’e-ri.
3Ụnwegirima bụ oke-iwhe, shi lẹ Onye-Nwe-Ọha.
Ọtsu ime bụru obunggo, shi lẹ Onye-Nwe-Ọha.
4Ụnwegirima, a nwụru l’okorọbya
bẹ dụ g’ọo akfụ, onye ojọgu chị l’ẹka.
5Ẹhu-ụtso bụ nke onye chị iya chị-jia ẹkpa iya.
Iwhere ta abyadụ l’eme iya
mẹ yẹle ndu ọhogu iya l’aba mba l’ọnu mkpụkpu.
128Egvu, l’aagụje mẹ l’eeje Jerúsalẹmu
1Ẹhu-ụtso bụ nke ndu l’atsụ egvu Onye-Nwe-Ọha,
mbụ ndu l’eme iwhe o kfuru.
2Ịi-nọdu ndzụ ria iwhe i seru anya iya ese.
Ii-nweru ẹhu-ụtso, ẹhu ghu abụru akpụto-lẹ-ọboroto.
3Nyee ghu l’a-nọdu l’ibe ghu
zụ-jia ụlo g’ọo vayịnu, l’eye mebyi.
Ụnwu ghu l’a-nọ ekpo
rwuturwutu dụ-gee okeru l’ẹnya
dọ-whee arya nri ghu mgburumgburu
g’ọo ẹka oshi ólivu kpọ-fushiru ome.
4O noo gẹ Onye-Nwe-Ọha l’a-gọru ọnu-ọma nụ;
onye l’atsụ egvu iya ndono.
5Tẹ Onye-Nwe-Ọha shikwa lẹ Záyọnu
gọru ọnu-ọma nụ ghu,
gụ anọdu ndzụ whụ iwhe ọma
l’emeru Jerúsalẹmu jeye gẹ l’ịi-nọ-beru.
6Ịi-nọdu ndzụ whụ ụnwu nwanwa-nwara-nwa ghu.
T’ẹhu-guu bụkwaru nke ndu Ízurẹlu.
129Egvu, l’aagụje mẹ l’eeje Jerúsalẹmu
1Whẹ kpawarụ mu ẹhu shinene, eshi mu bụ nwata.
Ngwa, t’unubẹ ndu Ízurẹlu tụko kfua sụ:
2Whẹ kpawarụ mu ẹhu shinene, eshi mu bụ nwata.
Ọle whẹ ta akakputajedu mu l’ẹnya.
3Whẹ gbubashiwaru mu azụ, ọ bụru mu ọnya ọnya.
Ọnya, whẹ gbubashiru mu l’azụ bẹ ghegeeru ọnu
g’ọo ẹka onye l’akọ okfu gburu ọgu.
4Onye-Nwe-Ọha bẹ dụ chịriri.
Ọ tọwaru mu l’ẹgbu, ndu ejo-ememe shi kee mu,
mu nweru onwomu.
5T’iwhe bụ ndu kpọru Záyọnu ashị bụkwaru
ndu l’ee-me iwhe-iwhere, chịa whẹ ọkpa balịbali.
6Tẹ whẹ dụkwa g’ọo ẹwu furu l’eli ikfu-ụlo, bụ:
ọ -bya l’evuta, anwụ echigbua ya.
7Ẹgube ẹwu ono bẹ ndu l’ajị ọnma ta ajịtajedu,
ndu l’eswe ọnma te eswetaje iya.
8Tẹ ndu l’aghata aghata be ekelejekwa whẹ ekele.
Tẹ whẹ be ekelejekwa whẹ sụ:
“Tẹ Onye-Nwe-Ọha gọoru unu ọnu.
Anyi gude ẹwha Onye-Nwe-Ọha agọru unu ọnu.”
130Egvu, l’aagụje mẹ l’eeje Jerúsalẹmu
1Mu nọ l’ogbu-mini iwhe-ọtsulanu aryaku ghu,
gụbe Onye-Nwe-Ọha,
2Jiko Onye-Nwe-Ọha, nụnu olu mu.
Ngabẹnuru mu nchị lẹ mkpu, mu l’echi
t’i meeru mu eze-iwhe-ọma.
3Ọ -bụ lẹ gụbe Onye-Nwe-Ọha
l’agụkoje iwhe-dụ-ẹji, onyenọnu l’eme,
?ọo onye gẹge adụ ike kfụru
l’atatiwhu gụbe Onye-Nwe-Ọha?
4Ọle ịiguje nvụ.
Ọ bụru iya meru g’o gude l’eeyeru ghu ẹso.
5Mu l’elewaa ẹnya Onye-Nwe-Ọha eleshi iya ike.
Obu mu nọwaa ngabẹru iya.
Ẹka obu mu dụ bụ l’okfu iya.
6Obu mu l’ele Onye-Nwe-Ọha
karụ gẹ ndu nche l’anọje atụ ẹnya chi-asahu,
mbụ l’obu mu ka ole ẹnya Onye-Nwe-Ọha
karụ gẹ ndu nche l’anọje atụ ẹnya chi-asahu.
7Unubẹ Ízurẹlu, t’ẹnya unu dụkwa lẹ Onye-Nwe-Ọha,
o noo lẹ Onye-Nwe-Ọha bẹ
n-yemobu iya l’ẹte enwekwaa agvụgvu,
tẹhenu l’ọonoje awhọ iya l’obu
t’ọ gbafụta madzụ l’iwhe-dụ-ẹji iya g’ọ ha.
8Ọo yẹbedua l’a-gbafụta ndu Ízurẹlu
l’iwhe-dụ-ẹji, whẹ megbaberu.
131Egvu, l’aagụje mẹ l’eeje Jerúsalẹmu; onye deru iya nụ bụ Dévidi
1Jiko Onye-Nwe-Ọha
mẹ mu ta abụkwa ekuku, l’eri mgbẹka,
mu ta abụ ẹnya ka l’iwhe dụ oko.
Mẹ mu te ejejekwa ooye ẹka l’iwhe ka mu nụ,
mu te ejeje ome iwhe mu l’ẹte emekota.
2Ọlekwawho lẹ mu pyakọru onwomu nọdu nwayọo,
g’ọo ẹgube-ẹ, nwata l’ewofu ọnu l’ẹra
pyakọo onwiya nọdu nwayọo ne iya eheru iya.
Ọo gẹ nwata l’ewofuje ọnu l’ẹra
pyakọo onwiya nọdu nwayọo,
bụ g’obu mu nọ nwayọo.
3Unubẹ ndu Ízurẹlu,
t’unu lekwaa ẹnya Onye-Nwe-Ọha,
watazhiawho ntaa jeye lẹ gbururu.
132Egvu, l’aagụje mẹ l’eeje Jerúsalẹmu
1Gụbe Onye-Nwe-Ọha,
nyatanụ Dévidi mẹe iwhe-ọtsulanu, o jekotaru.
2O kweru ụkwa l’iwhu Onye-Nwe-Ọha,
bya eribua nte l’iwhu Ọkalibe nke Jékọpu sụ:
3“Mu ta abyakwa l’e-kpu ishi l’ụlo mu.
Mu ta abya l’a-zẹe azẹe l’iwhe-azẹe mu.
4Mu ta abyakwa l’e-kwe
tẹ mgbẹnya shita mu ụzo ẹnya.
Mu ta abya l’e-kwe tẹ mgbẹnya rweru mu,
5jeye nteke mu l’e-meta ẹka Onye-Nwe-Ọha l’e-buru,
mbụ ẹka Ọkalibe nke Jékọpu l’e-buru.”
6Anyi nụru ozhi nke
Igbe-Ọgbandzu Chileke lẹ Ifurata.
Ẹka anyi je awhụa ya bụ l’ẹgu Kiriyatu-jeyarimu.
7Unu t’anyi je l’eze-ụlo Chileke.
Unu t’anyi je anọdu lẹ
mgboro ọkpa oshi-eze iya baarụ iya ẹja.
8Gbalihunu jiko Onye-Nwe-Ọha,
jeshia l’ọkpoku ghu,
gụbedua mẹe igbe-ọgbandzu ghu ono,
l’egoshi l’ị bụ onye ọkpehu dụ.
9Tẹ ndu l’agbajẹru ghu ẹja yee ọ-dụ-chịriri
g’ọo onye yeru uwe.
Tẹ ndu yeru ghu obu gụa egvu ẹhu-ụtso.
10Kwobenu iswi ẹhu Dévidi, bụ onye ozhi ghu
ba ajịka onye ono, ị wụru mmanụ l’ishi t’ọ bụru eze.
11Onye-Nwe-Ọha bẹ riburu Dévidi nte
mbụ nte l’ọotoo byaa l’e-mebyi emebyi,
Ọ sụru iya: “Onye lanụ shi l’ẹpa ghu bẹ mu l’a-họta
t’ọ bya abụru eze nọ-chia ẹnya ghu.
12Ọ -bụruwho l’ụnwu ghu bẹ l’edobe ọgbandzu mu,
eme iwhe mu tụru l’iwu nụ whẹ,
ọo ya bụ, ụnwu nke whẹbedua abụkwaruwho eze chịa.
Whẹ ta abya l’a-bubuhu eze abubuhu
jeye lẹ tututu-mịmimi.”
13Onye-Nwe-Ọha bẹ họtawaru Záyọnu,
ẹka ono dụ iya ree ebubu, o noo nkele ọ sụru:
14“Ọo ẹka-a bẹ mu l’e-me
ọkpoku mu jeye lẹ tututu-mịmimi.
Mbụ l’ọo ẹka-a bẹ mu l’e-buru achị,
nkele o noo g’ọ dụ mu ree ndono.
15Mu l’a-gọru Záyọnu ọnu-ọma,
mee t’o nweru iwhe nweru iya nke etsutsu iya.
Ndu Záyọnu, bụ ndu l’akpa ụkpa
bẹ mu l’a-nụje iwhe whẹ l’e-ri.
16Ndu l’agbajẹ ẹja nụ Chileke l’ẹka ono
bẹ mu l’e-ye ndzọfuta g’ọo onye yeru uwe.
Ndu ọwhu yeru Onye-Nwe-Ọha obu l’ẹka ono
bẹ l’a-gụ egvu ẹhu-ụtso.
17Ọo l’ẹka ono bẹ mu l’e-shi mee
t’onye ike dụ fụta l’ọzo-ụlo Dévidi.
Mu l’e-me t’onye ono, mu wụru mmanụ l’ishi
t’ọ bụru eze nweru ẹpa, l’a-bụ eze chịgbuwaruro.
18Mu l’e-ye ndu ọhogu onye eze ono iwhere
g’ọo onye yeru uwe,
ọle onye eze ono l’onwiya bẹ mu l’e-kpube okpu-eze,
l’e-nwu ẹnya demudemu.”
133Egvu, l’aagụje mẹ l’eeje Jerúsalẹmu; onye deru iya nụ bụ Dévidi
1Lewaro g’ọ dụ-be ree bya abụru iwhe l’atsọ ụtso,
l’ụnwunna bẹ tụgbaru nnanụ marụ onwowhe ẹhu.
2Ọ dụlewho g’ọo ọkpobe mmanụ,
l’eshi kwẹkwekwe, a wụru Érọnu l’ishi,
o shi iya l’ishi sọba iya l’ẹji-agba,
gbaa ya gororo sọba l’ogboromọnu uwe iya.
3Ọ dụkwawho g’ọo ẹka iji, shi
l’ugvu Hemọnu adashị l’eli ugvu Záyọnu.
Ọo lẹ Záyọnu bẹ Onye-Nwe-Ọha nọdu gọo ọnu-ọma,
mbụ ọnu-ọma ọwhu bụ ndzụ tututu-mịmimi.
134Egvu, l’aagụje mẹ l’eeje Jerúsalẹmu
1Unu jaa Onye-Nwe-Ọha ajaja
unubẹ ndu ozhi Onye-Nwe-Ọha g’unu ha,
unubẹ ndu l’anọje l’ụlo Onye-Nwe-Ọha
ejeru iya ozhi l’ẹnyashi.
2Unu chilia ẹka unu imeli kfuru nụ
Onye-Nwe-Ọha l’ụlo-nsọ iya,
unu jaa ya ajaja.
3Tẹ Onye-Nwe-Ọha, bụ onye
meru igwe mee mgboko shi lẹ Záyọnu
gọru ọnu-ọma nụ ghu.
1351Unu jaa Onye-Nwe-Ọha ajaja.
Unu tua Onye-Nwe-Ọha ẹwha.
Unu jaa ya ajaja, unubẹ ndu l’ejeru iya ozhi,
2mbụ unubẹ ndu l’eje ozhi l’ụlo Onye-Nwe-Ọha,
mẹe l’ọma ogboduwhu Chileke anyi.
3Unu jaa Onye-Nwe-Ọha ajaja
o noo nkele Onye-Nwe-Ọha bụ onye ọma.
Unu gụa egvu gude tua ya ẹwha
nkele ọo iwhe dụ ree b’ọ bụ,
4O noo lẹ Onye-Nwe-Ọha họtawaru Jékọpu
t’ọ bụru onye nkiya,
mbụ l’ọ họtawaru ndu Ízurẹlu
tẹ whẹ bụru ndu o nwe enwenwe l’ẹka iya.
5Mu marụ lẹ Onye-Nwe-Ọha parụ ẹka,
mbụ lẹ Onye-Nwe-Ọha anyi
bẹ kakọta iwhe bụ agwa shii.
6Ọo iwhe dụ Onye-Nwe-Ọha ree l’obu
bẹ l’oomeje l’imigwe mẹe l’eliwhe,
mẹe l’ime eze-ẹnyimu
mẹe l’ime ogbu-mini, dụ iya nụ.
7Oomeje t’igweli shi l’ẹka
mgboko beru wata ekpukpu.
Oomeje t’egbe-igwe daa mẹ mini l’achị,
l’oomeje tẹ whẹrewhere shi lẹ
mkpu ẹka ọ gbachiru iya wata ewhewhe.
8Ndu bụ ọkpara lẹ Íjiputu b’o chigbushiru,
mbụ ndu bụ ọkpara lẹ madzụ mẹe l’anụmanu.
9Iwhe-awhụrulenya mẹe iwhe dụ biribiri
b’o mekotaru unubẹ ndu Íjiputu.
O noo bụru iwhe o gude hụ̀a
Fero yẹle ndu ozhi iya àhụ̀hù.
10Ndu mba, dụ igweligwe b’o mebyishiru,
gbushikwaawho ndu eze, ọkpehu dụ.
11O gburu Sáyihọnu, bụ eze ndu Amọru,
gbua Ọgu, bụ eze ndu Báshanu,
gbushikwaawho ndu eze ndu Kenanu gẹ whẹ hakọta.
12O woru alị whẹ washịaru ndu nkiya, bụ Ízurẹlu,
t’ọ bụru oke-iwhe whẹ.
13Ẹwha gụbe Onye-Nwe-Ọha
l’anọje jeye lẹ tututu-mịmimi.
A ta abyadụ l’a-nyazọ ghu
anyazọ shi l’ọgbo rwua l’ọgbo,
14nkele Onye-Nwe-Ọha l’a-harụ ndu nkiya enge;
shi nno dụa ndu l’ejeru iya ozhi obu.
15Ọgvu ndu ọha ọdo bẹ bụ
mkpọla-ododo mẹe mkpọla-ọcha b’e gude mee ya,
mbụ l’ọo madzụ gude ẹka iya mee ya.
16Whẹ nweru ọnu, ọle whẹ te ekfudu iya okfu.
Whẹ nweru ẹnya, ọle whẹ ta awhụdu iya ụzo.
17Whẹ nweru nchị, ọle whẹ ta anụdu iya iwhe,
whẹ ta atụ ume atụtu owhu.
18Ndu l’agwa ọgvu ono mẹe
ndu dakoberu iya nụ l’a-dụ g’ọo ya.
19Unubẹ ndibe Ízurẹlu, unu jaa Onye-Nwe-Ọha ajaja.
Unubẹ ndibe Érọnu, unu jaa Onye-Nwe-Ọha ajaja.
20Unubẹ ndibe Lívayi, unu jaa Onye-Nwe-Ọha ajaja.
Unubẹ ndu l’atsụ egvu Onye-Nwe-Ọha,
unu jaa Onye-Nwe-Ọha ajaja.
21T’e shikwa lẹ Záyọnu jaa Onye-Nwe-Ọha ajaja,
mbụ onye ono, bu lẹ Jerúsalẹmu.
Unu jaa Onye-Nwe-Ọha ajaja.
1361Unu kele Onye-Nwe-Ọha ekele, l’ọ bụ onye ọma.
N-yemobu iya l’anọje jeye lẹ gbururu.
2Unu kele Onye-Nwe-Ọha ono,
bụ iya kakọta iwhe lile, bụ agwa shii.
N-yemobu iya l’anọje jeye lẹ gbururu.
3Unu kele Onye-Nwe-Ọha ono,
bụ iya kakọta iwhe lile, bụ ndụ-nwe-ọha shii.
N-yemobu iya l’anọje jeye lẹ gbururu.
4Ọo yẹbedua kpụ l’emeje iwhe-awhụrulenya, parụ ẹka.
N-yemobu iya l’anọje jeye lẹ gbururu.
5Onye ono, bụ mmamagụ iya b’o gude mee eligwe.
N-yemobu iya l’anọje jeye lẹ gbururu.
6Mbụ onye ono, woru
mgboko-o l’owhu tụsaa l’eli mini.
N-yemobu iya l’anọje jeye lẹ gbururu.
7Mbụ onye ono, meshiru eze iwhoro, dụ-gee biribiri.
N-yemobu iya l’anọje jeye lẹ gbururu.
8O meru ẹnyanwu t’o chije l’eswe.
N-yemobu iya l’anọje jeye lẹ gbururu.
9O mee ọnwa mẹe kpokponde tẹ whẹ chije l’ẹnyashi.
N-yemobu iya l’anọje jeye lẹ gbururu.
10Unu kele onye ono, chigbushiru ndu shi
bụru ọkpara lẹ Íjiputu.
N-yemobu iya l’anọje jeye lẹ gbururu.
11Onye bụ iya dufutaru ụnwu Ízurẹlu l’echilabọ whẹ.
N-yemobu iya l’anọje jeye lẹ gbururu.
12Ọ bụru l’ike ọkpu iya b’o gude dufuta whẹ.
N-yemobu iya l’anọje jeye lẹ gbururu.
13Unu kele onye ono, bụ iya
kekahuru Eze-ẹnyimu Uswe ẹbo.
N-yemobu iya l’anọje jeye lẹ gbururu.
14Bya emee tẹ ndu Ízurẹlu ghajaa ya l’echi.
N-yemobu iya l’anọje jeye lẹ gbururu.
15Ọwhube Fero yẹle ndu ojọgu iya
b’o meru Eze-ẹnyimu Uswe ono rigbushia.
N-yemobu iya l’anọje jeye lẹ gbururu.
16Unu kele onye ono, bụ iya duru
ndu ndibe iya ije l’echi-ẹgu.
N-yemobu iya l’anọje jeye lẹ gbururu.
17Mbụ onye ono, chigbushiru
ndu eze, ọkpehu dụ-gee.
N-yemobu iya l’anọje jeye lẹ gbururu.
18Bya egbushia ndu eze, a marụ ẹwha whẹ.
N-yemobu iya l’anọje jeye lẹ gbururu.
19O gburu Sáyihọnu, bụ eze ndu Amọru.
N-yemobu iya l’anọje jeye lẹ gbururu.
20O gbua Ọgu, bụ eze ndu Báshanu.
N-yemobu iya l’anọje jeye lẹ gbururu.
21Ọ bya eworu alị whẹ nụ onye
ọdo t’ọ bụru oke-iwhe iya.
N-yemobu iya l’anọje jeye lẹ gbururu.
22Ọo onye ozhi iya ono, bụ
Ízurẹlu b’ọ nụru alị ono.
N-yemobu iya l’anọje jeye lẹ gbururu.
23Ọo ya nyatarụ anyịbe ndu l’adụa iwhe anyi bụ.
N-yemobu iya l’anọje jeye lẹ gbururu.
24Ọ bụru iya nafụtaru anyi l’ẹka ndu ọhogu anyi.
N-yemobu iya l’anọje jeye lẹ gbururu.
25Ọ bụkwaru iya whọ l’azụkota
iwhe lile, nọ ndzụ lẹ nri.
N-yemobu iya l’anọje jeye lẹ gbururu.
26Unu kele Chileke nke imigwe ekele.
N-yemobu iya l’anọje jeye lẹ gbururu.
1371Anyi rwuru lẹ mgboro ẹnyimu Bábyilọnu,
anyi dọshia l’ẹka ono ryaa ẹkwa, g’anyi nyatarụ Záyọnu.
2Anyi kobegee une anyi l’ẹkali
oshi wilo gvugeeru l’ẹka ono.
3O noo nkele anyi rwuru ẹka ono,
ndu kpụru anyi lẹ ndzụ sụ t’anyi gụtaru whẹ egvu.
Ndu ono, l’eme anyi ome-l’iwe ono sụ
t’anyi metaru whẹ ẹmereme.
Whẹ sụru t’anyi gụaru whẹ egvu lanụ,
anyi shi agụje lẹ Záyọnu!
4Ọle, ?ndẹhunu g’anyi l’e-shi woru egvu,
e gude ekutse Onye-Nwe-Ọha
bya awata agụgu l’alị ndu ọha ọdo?
5Ọ -bụru lẹ mu nyazọru gụbe Jerúsalẹmu,
t’ẹka-ụtara, mu gude akpọ une gwọkwaa mu ẹji.
6T’ire nyakụkwaru mu l’akpo
tẹ mu ba adụhe ike gụbaa egvu ọdo,
m’ọ -bụru lẹ mu ta anyatadụ ghu,
m’ọ bụa gụbe Jerúsalẹmu
bẹ mu wotaru l’ọo ghu bụ obodo
kagezhia oome t’ẹhu tsọo mu ụtso.
7Gụbe Onye-Nwe-Ọha, nyatakwa
iwhe ndu Edọmu meru mbọku,
a kpụru Jerúsalẹmu lẹ ndzụ.
Whẹ tụru ụzu sụ: “Unu tsukposhia obodo ono!
Unu whọo ya l’ukfu!”
8Gụbe nwada Bábyilọnu,
iwhe swiru ghu nụ bụkwa ọla-l’iswi.
Ẹhu-ụtso bụ nke onye l’e-melata ghu
ụgwo iwhe i meru anyi.
9Ẹhu-ụtso bụ nke onye l’a-nata ghu
ụnwegirima, i he l’ẹka je
egwee whẹ ishi ryaaryaa l’ẹwhuru.
138Egvu, Dévidi deru
1Gụbe Onye-Nwe-Ọha,
mu gude obu mu g’ọ ha aja ghu ajaja.
Mu nọdu l’iwhu agwa agụ egvu
gude aja ghu ajaja.
2Mu cheberu iwhu l’eze-ụlo ghu,
dụ nsọ abarụ ghu ẹja.
Mu l’etu ghu ẹwha nkele n-yemobu ghu
te enwedu agvụgvu,
Ị bụ o-me-g’oo-kfuru,
ẹwha ghu yẹle okfu ghu b’i meru,
whẹ kakọta iwhe ọdo l’eli.
3Nteke mu ryakuru ghu b’ị zarụ mu oku.
I meru ọkpehu nụ mu,
i mee mu, mu nyalahaa ǹdụ́.
4Iwhe bụ eze, l’achị eliwhe l’owhu
l’a-ja ghu ajaja gụbe Onye-Nwe-Ọha,
o noo lẹ whẹ nụwaru okfu, shi ghu l’ọnu.
5Whẹ l’e-gude iwhe Onye-Nwe-Ọha meru gụa egvu,
whẹ agụa egvu goshi
l’ogbu-zaazaa nke Onye-Nwe-Ọha bẹ parụ ẹka.
6A makwarụ-a lẹ Onye-Nwe-Ọha
bẹ nọ l’ẹka ha l’imeli.
Ọle ẹnya iya l’adụjelekwaa
l’ẹka ndu lwarụ alị nọ.
Ọle ndu l’eku onwowhe iwhe igweli charụ
bẹ l’anọdujero otẹnya, Onye-Nwe-Ọha amarụ
gẹ whẹ gbarụ.
7Ọ tọ dụdu m’o beru iwhe-ọtsulanu
gbaa mu mgburumgburu,
ịikwakobejelekwaa ndzụ mu,
ya eje adụ iwhe l’e-me mu nụ.
Ịimachije ẹka nwuwhu ẹhu-eghughu,
ndu kpọru mu ashị azụ.
Ọo ẹka-ụtara ghu bẹ l’iigudeje dzọfuta mu.
8Iwhe bụ iwhe Onye-Nwe-Ọha kweru ụkwa lẹ ya l’e-me
bẹ l’oo-mekotaru mu.
Gụbe Onye-Nwe-Ọha,
n-yemobu ghu l’anọje jeye lẹ gbururu.
Jiko, be buhakwa ozhi ono, i gude l’ẹka eje.
139Egvu-ọma, Dévidi deru nụ onye ishi egvu
1Gụbe Onye-Nwe-Ọha,
i nyochawaru mu ime mẹe azụ,
ị marụ ẹgube madzụ mu bụ.
2Ị marụ nteke mu nọdu anọdu,
marụ nteke mu gbalihuru agbalihu.
Ị nọdu otẹnya nke bụ ezhi-okfu, ọle ị marụ iwhe
mu l’arị l’ime obu mu.
3Ị marụ nteke mu gbalihuru eje iwhe,
ị marụ nteke mu zẹe azẹe.
Iwhe lile, mu l’eme b’ị makọtaru.
4Tẹmenu mu ekfua okfu,
b’ị makọtawaru
iwhe mu l’abya ekfukfu gụbe Onye-Nwe-Ọha.
5Ị bụ mgbabu gbabuta mu; iwhu mẹ azụ.
I gude ẹka ghu gbobuta mu.
6G’i gude matabe mu bẹ dụkwa mu biribiri,
ọ dụkwa omilomi karia gẹ l’oo-do mu ẹnya.
7?Ọo awe bẹ mu l’e-je t’ị ba anọ iya?
?Ọo awe bẹ mu l’a-gbarụ laa t’ị ba awhụ mu?
8Mu -nyihu eli bahụ l’imigwe b’ị nọ l’ẹka ono.
Nteke bụ lẹ mu gbarụ ugbooshi mu zẹe azẹe
l’alị-maa b’ị nọkwawho l’ẹka ono.
9Ọ -bụru tẹ mu bya akpaa ẹba
wherwua ẹka ẹnyanwu l’awatajẹ,
m’ọ -bụ tẹ mu bya eburu l’ẹka
ẹnyimu sọtaru kfụshi l’ụzo ẹnyanwu-arịba,
10mu -rwua ẹka ono bẹ l’ịi-nọlekwa-a edu mu.
Ẹka-ụtara ghu esedelekwa mu-a sedeshia mu ike.
11Nteke bụ lẹ mu sụru t’ẹkpuroochi domia mu,
m’ọ bụ t’iwhoro-o, mu l’awhụ bya aghọo ẹnyashi,
12ọ dụ m’ọo ẹkpuroochi ọbu bya l’agba ghu ọochi l’ẹnya,
t’ọ dụ m’ọo ẹnyashi ọbu, iwhoro l’ẹte angashị
g’ọo echi-eswe l’ẹnya nkeghu,
nkele gụbedua bẹ ọochi dụlekwaa g’ọo iwhoro.
13O noo l’iwhe lile, dụ mu l’ime ẹhu
bẹ bụ ghu meru iya
ọo ghu dzekfuru mu nnanụ
nteke mu nọ l’ẹwho ne mu.
14Mu l’aja ghu ajaja, o noo l’i meru mu l’ụzo,
dụ egvu dụ biribiri.
Iwhe mu hụberu ama ree bụ l’ẹka-ọru ghu
bẹ dụ biribiri.
15Nteke ọkpu l’edzekfu mu l’ẹhu b’ị makọtaru,
nteke ono, mu l’akpụko l’ẹwho ne mu,
l’ẹka ono, woharu onwiya ewoha b’ị marụ lẹ mu nọ iya.
16Tẹhenu a nwụa mu b’ị whụhawaru mu.
Tẹhenu mu nọo ujiku owhu
bẹ ujiku ole, a tuburu lẹ mu l’a-nọ-be l’eliwhe-e
b’e dekotahawaru l’ẹkwo ghu.
17G’ọ dụ-bekwanu mu ree,
mbụ ọriri, l’ịirigbaberu mu, gụbe Chileke.
A -chịkobe iya ọnu b’ọ pakwarụ ẹka apaa.
18Mu -gụde iya ọgu b’ọ kakwa ẹja, dụ l’alị l’igwe.
Mu -kuru mgbẹnya tehu,
bẹ mu lẹ ghu nọkwaa g’anyi nọ.
19Gụbe Chileke nggẹ l’ọobunu
i gbushikota ndu ejo-ememe.
Unu jekwa njere unu, unubẹ ndu ono, l’egbu ọchi.
20Whẹ l’anọje ekfu ejo okfu atuku gụbe Chileke.
Ndu ọhogu ghu ono l’ekuje ẹwha ghu
l’ụzo l’akfụaru nhamụnha.
21Ndu kpọru gụbe Onye-Nwe-Ọha ashị
bẹ mu kpọkwaruwho ashị,
Ndu zhilihuru etso ghu okfu
bẹ l’adụkwaa iwhe mu gụberu whẹ.
22Mu kpọ-gezhiaru whẹ ashị ẹgube-ẹ kpọba,
mu gụru whẹ ye lẹ ndu ọhogu mu.
23Nyochanua mu byiko Chileke,
marụ iwhe dụ mu l’obu.
Lelenua mu marụ iwhe mu l’arị l’ọriri.
24Lenua mu ẹnya marụ,
m’o nweru ẹka ejo-iwhe dụ mu l’ẹhu.
Ọ -bụru l’o nweru, jiko duwhunu mu azụ
l’ụzo ndzụ tututu-mịmimi.
140Egvu-ọma, Dévidi deru nụ onye ishi egvu
1Nafụtanu mu l’ẹka ndu l’eme ejo-iwhe
jiko Onye-Nwe-Ọha.
Chekwanua mu tẹ mu ba adaba
l’ẹka ndu l’eme madzụ iwhe-kpanganga.
2Ndu bụlewho ejo-iwhe
bẹ whẹ l’achịje idzu iya l’ime obu whẹ.
Whẹ l’anọje eyewhe nke ọgu ntekenteke.
3Ire whẹ l’atsụ nkọ g’ọo ire ejo agwọ.
Okfu, l’eshije whẹ l’ọnu l’egbu egbugbu
g’ọo ẹrwu oguji.
4Gudeshinua mu ike jiko Onye-Nwe-Ọha,
tẹ mu ba adaba l’ẹka ndu ejo-ememe.
Chekwanua mu tẹ mu ba adaba
l’ẹka ndu l’eme madzụ iwhe-kpanganga,
mbụ ndu l’achọ ụzo, whẹ l’e-shi gbukota mu ọkpa.
5Ndu l’eku onwowhe eku gbabẹwaru mu ọnya.
Whẹ gebegeeru ụgbu whẹ ngabẹru mu,
tụa igbudu dobegeeru mu l’ụzo.
6Gụbe Onye-Nwe-Ọha, iwhe mu l’ekfuje
bụ l’ọo ghu bụ Chileke mu.
Jiko Onye-Nwe-Ọha, nụnu mkpu ono,
mu l’echi sụ t’i meeru mu eze-iwhe-ọma.
7Gụbe Nnajị-Ọha, bụ Onye-Nwe-Ọha anyi,
gụbe onye ike dụ, bụru onye l’adzọfutaje mu nu,
gụbe onye l’egbobutaje mu ishi l’iwhu ọgu,
8be mekwaru ndu ejo-ememe iwhe ono, l’agụ whẹ nụ,
jiko Onye-Nwe-Ọha.
Be ekwekwa t’idzu, whẹ l’achị
reeru whẹ lẹge whẹ chịru iya.
Ọdua bẹ whẹ l’a-watakwa oku onwowhe eku.
9T’ọ bụkwaru ejo-iwhe ono,
ndu ọhogu mu tụberu mu l’e-gbu whẹ.
10T’icheku-ọku, l’ata chịchichi zụbekwa whẹ l’ishi.
T’a pakwarụ whẹ chee l’ọku,
l’enwu nke tawhutawhu,
m’ọ bụ l’ime iduma, whẹ l’ẹte abya l’a-fụtabaa afụta.
11Tẹ ndu ejo-okfu ba
akpọkwaru akpọru l’alị-a.
T’ejo-iwhe chịkwaa nta ndu ono, l’eme iwhe-kpanganga.
12Mu makwarụa lẹ Onye-Nwe-Ọha
l’ahajẹru onye ụkpa enge,
l’oomeje t’ikpe kalẹru onye l’adụa g’ọ harụ iya.
13Iwhe doru mu ẹnya bụ lẹ ndu dụ chịriri
l’e-kelekwa ghu ekele,
ọ bụru l’iwhu ghu bẹ ndu
obu whẹ gụru iwhoro l’e-buru eburu.
141Egvu-ọma, Dévidi deru
1Gụbe Onye-Nwe-Ọha; mu l’akpọ-ku ghu.
Gbatanụru mu ẹgwegwa.
Nụkwaa olu mu nteke mu kpọ-kuru ghu.
2T’ekfukfu, mu l’ekfu anụ ghu shikwa ghu mkpọ
g’ọo ụ̀nwù isẹnsu.
T’ẹka, mu chiliru imeli ekfu anụ ghu dụkwa ghu
g’ọo anụ, e gburu wotaru ghu l’urwẹnyashi.
3Menua tẹ mu kweta ọnu mu ọku, jiko Onye-Nwe-Ọha.
Byiko, menua tẹ mu kwaa ire mu ngga.
4Be ekwekwa t’obu gbata mu l’ome ejo-iwhe,
be ekwekwa tẹ mu tụru onwomu yeru
ndu ejo-ememe wata ome ẹji.
Be ekwekwa tẹ mu tsoru whẹ l’ori ejo-ori.
5T’onye dụ chịriri chia mu rọ iwhe.
Ọo-dụ mu rọ g’ọo iwhe-ọma l’oomeru mu iya.
T’ọ baarụ mu rọ mba.
O noo l’oo-gbẹero dụ mu g’ọo mmanụ l’eshi mkpọ
bẹ l’ọowu mu l’ishi.
Ishi mu ta ajịkadu iya.
T’a gbachiro lẹ whẹ l’eme mu ejo-iwhe,
mu l’anọlekwaa ekfu anụ Chileke gẹ mu l’ekfu iya.
6Ndu ishi whẹ bẹ l’ee-shi l’eli mgbawara ẹwhuru tụfu,
nke ọwhu ndu ejo-ememe l’a-marụ
l’iwhe mu kfuru bẹ bụ ire-lanụ.
7Whẹ l’a-sụ: “Ọo gẹ l’aakọje ọkoro gbujashia alị,
bụ g’a tụkashiru ọkpu whẹ nnanụ nnanụ l’ọnu ilu.”
8Ọle mbẹdua bẹ bụ l’ẹka ị nọ bẹ mu dazhịberu
ẹnya gụbe Nnajị-Ọha, bụ Onye-Nwe-Ọha anyi.
Ọo l’ime ghu bẹ mu gbabaru je anọdu ezeru ndzụ.
Byiko, be enwuhakwa mu t’ọnwu gbua mu.
9Be ekwekwa tẹ mu daba l’ọnya, whẹ gbabẹru mu,
be ekwekwa tẹ mu daba l’igbudu ono,
ndu l’eme ejo-iwhe kweberu.
10Tẹ ndu ejo-ememe nwulahukwa l’ụgbu, whẹ geberu.
Tẹ mbẹdua ghata jeru onwomu iwhe mu l’eje.
142Ẹ́vù, Dévidi kwarụ nteke ọ nọ l’ọgba ekfu anụ Chileke
1Mu woliru olu chiku Onye-Nwe-Ọha lẹ mkpu.
Mu woliru olu ryaku Onye-Nwe-Ọha
t’o meeru mu eze-iwhe-ọma.
2Mu wotaru iwhe l’atsụ mu l’ẹhu dooru iya,
mu kọkotaru iya nsogbu, mu nweru.
3Nteke ume l’ebuhu mu ebuhu
bẹ bụ ghu l’e-goshi mu ụzo, mu l’e-shi.
Ụzo, mu l’eshije agha bẹ ndiwhe
je agbabẹru mu ọnya.
4Lewa mu rọo ẹnya, gụ awhụ
l’ọ tọ dụdu onye l’akpa mu ishi.
Mu te enwedu ẹka bụ, mu -gbaba iya,
mu anọdu iya zee ndzụ,
ọ tọ dụdu onye l’akpa ishi mu mẹ mu nọ ndzụ.
5Ọ kwa gụbe Onye-Nwe-Ọha bẹ mu l’aryaku.
Iwhe mu kfuru bụ l’ọo l’ime ghu
bẹ mu gbabaru nọdu iya ezeru ndzụ.
Ọ bụru ghu bụ mkpakọ iwhe mu
nweru l’alị ndu nọ ndzụ.
6Ngabẹnu nchị l’ẹkwa, mu l’aryaru ghu;
nkele mu ta amahẹdu ụzo eshishi iya ọdo.
Nafụtanu mu l’ẹka ndu l’akpa mu ẹhu,
nkele whẹ kariru mu ẹka mebyi akari.
7Gbafụtanu mu l’ime mkpọro-ọ, mu nọ,
nke ọwhu mu l’e-kele ghu ekele iya.
Ndu dụ chịriri l’a-dọ-whe mu mgburumgburu,
o noo nkele ị dụnukaru mu lẹ ree.
143Egvu-ọma, Dévidi deru
1Gụbe Onye-Nwe-Ọha,
nụnu ekfukfu, mu l’ekfu anụ ghu.
Ngabẹnu nchị nụa mkpu,
mu l’echi sụ t’ị whụaru mu imiko.
Eshi-ọwhu ị bụ onye dụ chịriri
bụru onye l’akfụshije ike l’iwhe i kfuru,
byiko, zanụ mu oku.
2Jiko, be ekpeshinu mụbe onye ozhi ghu ikpe,
o noo nkele ọ tọ dụdu madzụ igbalekọma,
nọ ndzụ, dụ chịriri l’iwhu ghu.
3Onye ọhogu mu bẹ chịru mu gude,
bya echita mu tụa l’alị,
mee mu, mu nọdu l’ẹka gbarụ ẹkpuroochi
g’ọo akahụ maa, nwụhuru l’oge ndụ-ichee.
4O noo g’o gude ume l’ebuhu mu ebuhu.
Obu wata mu ọku whotowhoto.
5Mu nyata g’o shi adụje nteke ndụ-ichee.
Mu nọdu nggujingguji rịlahaa
iwhe bụ iwhe i mekotaru anyi,
bya elerwetabaa ẹnya ree
l’iwhe lile, i gude ẹka ghu mee.
6Mu chiliaru ghu ẹka mu labọ imeli.
Ẹgu ghu gụlahaa obu mu
g’ẹgu-mini l’anọje agụ alị-ọkponku.
7Zanụ mu oku ẹgwegwa jiko Onye-Nwe-Ọha;
nkele ike l’agvụwaa mu.
Be edomikwaru mu iwhu ghu edomi,
ọdua bẹ mu lẹ ndu a tụwaru ẹja l’a-bụkwa iwhe lanụ.
8L’ụtsu g’ụtsu ha, kfujenuru mu okfu l’e-goshi mu
l’i yeru mu obu,
o noo nkele ọo ghu bẹ mu dakoberu.
Jiko, goshinu mu ụzo, mu l’e-tso etso,
nkele ọo l’ẹka ị nọ bẹ obu mu nọ.
9Nafụtanu mu l’ẹka ndu ọhogu mu whẹ jiko Onye-Nwe-Ọha,
nkele ọo l’ime ghu bẹ mu domiru onwomu.
10Zhia mu iwhe bụ uche ghu tẹ mu meje,
nkele ọo ghu bụ Chileke mu.
Jiko tẹ Ume nkeghu ono, bụ ọkpobe Ume
dunua mu shia ụzo, kfụru nhamụnha.
11Chekwanua ndzụ mu jiko Onye-Nwe-Ọha
nke ọwhu ẹwha ghu l’a-kfụru.
Gudenu ọ-dụ-chịriri nkeghu nafụta mu
l’iwhe-ọtsulanu-a, mu l’eje.
12Gudenu iswi n-yemobu ghu ono
mee t’ọnu bụru ndu ọhogu mu shọngu.
Tụko ndu mu dụ ashị gẹ whẹ ha
mee tẹ whẹ bụru kpurupyata,
o noo nkele mu bụ onye l’ejeru ghu ozhi.
144Egvu, Dévidi deru
1T’ajaja bụru nke Onye-Nwe-Ọha,
bụ oke-ẹwhuru, mu nweru.
Ọo ya zụru mu, mu marụ ẹnya ọgu,
mbụ l’ọo ya zhiru mu gẹ l’aalwụje ọgu.
2Ọo ya bụ Chileke, yeru mu obu,
ọ bụru iya bụ ụlo-ozeru-ndzụ mu.
Ọo ya bụ ụlo-mgbochi mu,
ọ bụru iya bụ onye l’adzọfutaje mu nụ,
mbụ onye l’egbobutaje mu nụ,
bụkwaruwho onye
mu l’agbabajẹ l’ime iya je ezeeru ndzụ.
Ọ bụru iya l’emeje ụnwu eliwhe
tẹ whẹ nọdu mu lẹ mkpula.
3Gụbe Onye-Nwe-Ọha,
?ọo gụnu bẹ madzụ bụ nke t’i leshi iya ẹnya
?Ọo gụnu bẹ madzụ nkịti bụ nke t’i rivuje iya l’ọriri?
4Madzụ dụa g’ọo udzu ọnu.
Ndzụ iya l’agbajẹ kparakpara g’ọo ẹgube-ẹ inyonyo
l’emejewaa nno mihu.
5Jiko Onye-Nwe-Ọha, chijanua igwe tarara
nyizeta bya akfụru l’eli ugvu,
nke ọwhu ugvu l’a-wata okpo ẹnwuru-ọku nke tụlaa.
6Tụnua egbe-igwe gude chịkashia ndu ọhogu mu.
Gbaa whẹ akfụ ghu gude rwuliberu whẹ.
7Shinu l’imeli machịa ẹka dzọfuta mu.
Nafụta mu l’echilabọ asọgaso-ẹnyimu,
nafụta mu l’ẹka ndu ọha ọdo.
8Ndu bụ ejire bẹ jiru whẹ ọnu ebushihu ebushihu,
ndu l’agụ ẹnwa eme ụgho.
9Mu l’a-gụ egvu ọ̀whúú nụ ghu gụbe Chileke.
Ọo ogele, a kparụ l’ụdo iri bẹ mu l’a-kpọ
gude gụaru ghu egvu ọbu,
10mbụ gụbe onye l’emeje t’eze lwụa ọgu lwụ-gbua;
bụru onye l’anafụtaje onye ozhi iya, bụ Dévidi
t’e be egude, ogu-ịgba, l’atsụ nteku gbugbua ya.
11Jiko dzọfutanu mu.
Nafụtanu mu l’ẹka ndu ọha ọdo,
mbụ ndu ono, ejire jiru ọnu ebushihu ebushihu,
ndu l’agụ ẹnwa eme ụgho.
12Mee t’ụnwu anyi unwoke
tsefuta shihu ike l’okorọbya
g’ọo oshi tsefuru kfụru l’onwiya.
Gụ emee t’ụnwu ada anyi dụ
g’ọo itso gvuru lẹ mgburẹku ụlo,
mbụ ndu e gude chọo ibe-eze mma.
13Gụ emekwaawho t’ọga nri,
dụ iche iche ji ọba anyi ejiji.
Gụ emekwaawho t’atụru anyi kwata zụshia azụzu ike,
nke ọwhu l’oogudeje ụnukurunu atụru
ka shii awha g’awha ha l’ẹgu l’eedobeje iya.
14Mekwaawho t’eswi anyi tụjee ivu
chịmu chịmu l’okpurukpu.
Mekwaawho tẹ ndu ọhogu anyi
ba abya etsukposhia mgbodo mkpụkpu anyi,
gụ emee tẹ whẹ ba akpụhe anyi lẹ ndzụ ọdo.
Gụ emekwaawho t’anyi
be etsoheru mbadụzo anyi ryawhe ẹkwa.
15Ẹhu-ụtso bụ nke ndu ọ dụ nno l’ibe whẹ.
Ẹhu-ụtso bụ nke ndu Chileke whẹ bụ Onye-Nwe-Ọha.
145Egvu-ekele, Dévidi deru
1Mu l’e-kutse ghu ekutse gụbe Chileke mu, bụ eze.
Mu l’a-ja ghu ajaja jeye lẹ tututu-mịmimi.
2Mu l’a-nọ aja ghu ajaja mbọku mbọku.
Mu l’a-nọ aja ghu ajaja jeye lẹ tututu-mịmimi.
3Onye-Nwe-Ọha parụ ẹka,
bụru onye ọ gbarụ t’a kagezhia ọja ajaja.
G’o gude habe shii ta adụdu onye sụru gẹ l’ọo-marụ iya.
4Ọgbo nọnu l’a-tụje ọnu iwhe l’iimegbabe nụ ọgbo
ọwhu l’etsota whẹ nụ.
Whẹ l’a-kọjeru whẹ iwhe dụ biribiri, l’iimeje.
5Whẹ l’a-tụ ọnu gẹ l’iigbube zaazaa
mẹe g’ugvu, l’aakwabẹ ghu habe shii.
Mbẹdua l’a-nọdu nggujingguji
rịa iwhe dụ biribiri, l’iimegbabe.
6Ndu madzụ l’a-tụ ọnu oke iwhe dụ biribiri, l’iime.
Mbẹdua etsoru aryakashị nke iwhe parụ ẹka, l’iime.
7Gẹ whẹ ha l’a-tụko kfukashia g’ị dụ-be ree.
Whẹ abya egude ẹhu-ụtso gụa ọ-dụ-chịriri ghu l’egvu.
8Onye-Nwe-Ọha bụ onye l’emeje eze-iwhe-ọma
bụru onye l’awhụje imiko.
Ẹhu te eghujedu iya eghu ẹgwegwa,
tẹhenu l’ooyeje obu ye iya nke etsutsu iya.
9Onye-Nwe-Ọha dụ ree l’ẹhu onyemonye.
Iwhe lile o meru bẹ l’ọowhujeru imiko.
10Iwhe lile, i meru ememe l’a-nọ aja ghu ajaja
gụbe Onye-Nwe-Ọha.
Ndu yeru ghu obu l’a-nọ ekutse ghu ekutse.
11Whẹ l’a-tụ ọnu g’ẹka ị bụ eze dụ-be biribiri;
tụa ọnu g’ọkpehu ghu habe shii,
12nke ọwhu onyenọnu
l’a-makọtaru iwhe parụ ẹka, l’iimeje,
makwarụwho g’ẹka, ị bụ eze dụ-be ugvu.
13Ịi-bụru eze jeye lẹ tututu-mịmimi.
Gụ eshi l’ọgbo chịa rwua l’ọgbo.
Onye-Nwe-Ọha bụ onye l’akfụshije ike
l’iwhe lile, o kweru ụkwa iya,
o nokwawho g’o yekota iwhe lile o meru ememe obu.
14Iwhe bụ ndu l’ada adada bẹ
Onye-Nwe-Ọha l’esedeshije ike.
O nokwawho gẹ l’ọo-palije ndu e wozeru alị imeli.
15Onyenọnu bẹ ẹnya iya dụ linel’ẹka ị nọ,
tẹhenu l’ịinuje whẹ nri l’oge nri.
16Iwhe lile, nọ ndzụ bẹ l’ịisaje ẹka asasa
nụ iwhe ẹhu whẹ chọru.
17Onye-Nwe-Ọha dụ chịriri l’iwhe lile, l’oome,
iwhe lile o meru ememe b’o yeru obu.
18Onye-Nwe-Ọha l’anọduje ndu l’akpọ-ku iya nụ ntse,
mbụ ndu gude ire-lanụ akpọ-ku iya.
19Ndu l’atsụ egvu iya
bẹ l’oomejeru iwhe l’agụ whẹ nụ.
Ọonuje mkpu, whẹ l’echi dzọfuta whẹ.
20Iwhe bụ onye yeru Onye-Nwe-Ọha obu
bẹ l’ọonoduje eche nche,
ọle ndu ejo-ememe bẹ l’oo-me, whẹ abụkotaru kpurupyata.
21Ọnu mu bẹ mu l’e-gude aja Onye-Nwe-Ọha ajaja.
T’iwhe lile, o meru dobe lẹ mgboko
jajẹ ẹwha iya ajaja jeye lẹ tututu-mịmimi.
1461Unu jaa Onye-Nwe-Ọha ajaja.
Obu mu, byiko jaa Onye-Nwe-Ọha ajaja.
2Mu l’a-ja Onye-Nwe-Ọha ajaja
jeye gẹ mu l’a-nọ-beru.
Mu l’a-gụ egvu gude jaa Chileke mu ajaja lẹ ndzụ-a.
3Be akpọkwaru obu yeru ndu bụ ishi,
mbụ madzụ mmaanụ, l’ẹte adụ ike adzọta ndzụ madzụ.
4Ndu bụ, whẹ kubua ume; e lia whẹ, whẹ ataa ẹja.
Mbọku, whẹ nwụhuru bẹ
iwhe whẹ gbarụ égò iya l’agvụje.
5Ẹhu-ụtso bụ nke onye bụ Chileke nke Jékọpu
bẹ l’eyejeru iya ẹka,
mbụ onye bụ lẹ Onye-Nwe-Ọha, bụ Chileke iya
bẹ obu iya l’adụje,
6lẹ Chileke ono, bụ iya meru igwe mee alị;
mee eze-ẹnyimu mẹe iwhe lile, dụ iya nụ,
bya abụru onye l’akfụshije ike l’ire-lanụ jeye lẹ gbururu.
7Ndu l’eemekpa ẹhu bẹ l’ọohajeru enge,
ndu ẹgu l’agụ bẹ l’ọonuje nri.
Onye-Nwe-Ọha l’emeje tẹ
ndu a tụru mkpọro nweru onwowhe.
8Onye-Nwe-Ọha l’emeje
tẹ ndu l’atsọ ishi wata ọwhu ụzo.
Onye-Nwe-Ọha l’ekulije ndu e wozeru alị imeli,
Onye-Nwe-Ọha l’eyeje ndu dụ chịriri obu.
9Onye-Nwe-Ọha l’eche ndu bụ mbyambya nche.
Oogudeje ndzụ ụnwu-mbunu
mẹe nke ndu nna whẹ l’anọhee,
ọle ụzo ndu ejo-ememe bẹ l’oogbuchije.
10Onye-Nwe-Ọha bụ eze jeye lẹ tututu-mịmimi;
Chileke nke gụbe Záyọnu
l’a-bụ eze chịa shi l’ọgbo rwua l’ọgbo.
Unu jaa Onye-Nwe-Ọha ajaja.
1471Unu jaa Onye-Nwe-Ọha ajaja.
Ọdunuka ree t’a gụje egvu gude
ekele Chileke anyi ekele.
Ọja Onye-Nwe-Ọha ajaja bụ iwhe ẹhu-ụtso,
bụru iwhe rwuberu iya nụ.
2Ọo Onye-Nwe-Ọha gude ẹka iya atụ Jerúsalẹmu.
Ntaa b’o rwutawaru ndu Ízurẹlu,
a kpụru lẹ ndzụ alwawhu azụ.
3Ọ bụ onye l’emeje tẹ ndu obu whẹ
tsuru yọgiri-yọgiri nọdu ndzụ.
Ọosachaje whẹ ọnya ẹka e mekaru whẹ iwhe.
4Ọo ya gụru kpokponde ọgu marụ ole, ọ gbarụ t’ọ dụ,
bya agụkota whẹ ẹwha l’ẹhu l’ẹhu.
5Onye-Nwe-Ọha anyi parụ ẹka,
ike iya bụru ike, nyịberu anyịbe.
Ọkwa-ẹnya nkiya ta adụdu onye
sụru ọtu ọnu g’ọ habe shii.
6Ọo Onye-Nwe-Ọha gude ndzụ
ndu wozeru onwowhe alị,
ọle ndu ejo-ememe bẹ l’oochitaje tụa l’alị.
7Unu gụnua egvu gude kele Onye-Nwe-Ọha ekele.
Unu gudenu une kụaru Chileke anyi nkwa.
8Ọo ya gude urwukpu kwechia akpamigwe l’owhu.
Ọochijeru eliwhe mini, bya
emee t’ẹwu rwushia l’eli ugvu.
9Ọo ya l’anụje iwhe-edobe nri.
Ọ bụru iya l’anụje ụnwu egbe-nwọku nri
mẹ whẹ ryaa ọrya iya.
10Ọ tọ dụ ike, dụ l’ịnya l’emeje t’ẹhu tsọo ya ụtso.
Tọ bụ apata-ọkpa madzụ l’emeje t’ẹhu tsọo ya ụtso,
11Ndu l’emeje t’ẹhu tsọo Onye-Nwe-Ọha ụtso
bụ ndu l’atsụ iya egvu,
mbụ ndu bụ lẹ n-yemobu
Chileke bẹ ẹnya whẹ l’adụje.
12Gụbe Jerúsalẹmu, kutsenua Onye-Nwe-Ọha ekutse.
Janụa Chileke ghu ajaja gụbe Záyọnu.
13Nkele ọo ya l’emeje tẹ mgbo,
e yeru l’ọnoguzo ghu shihu ike,
l’ọogojeru ọnu nụ ndu nọ ghu l’ime.
14Oomeje tẹ nchị dụ ndoo l’oge-alị ghu l’owhu,
oogudeje ọkpobe nri azụ-ji ghu ẹwho.
15Ookfuje iwhe l’e-me lẹ mgboko.
Okfu iya l’eregejee tachaa alị.
16Ọ bụ onye l’ewojeru aka-mini sunoo whụshia
g’ọo onye whụshiru ukpo,
woru iji-mini whekaa, t’o dzuru ẹka lile
g’ọo onye whekaru ntụ.
17Ookpotaje aka-mini ghaa g’ọo onye gharụ ẹja.
?Ọo onye l’a-dụ ike kfụru t’oyi aka-mini ono tsụa ya?
18Ọle ọ bụ-a okfu-ọnu bẹ l’ookfuje,
aka-mini ono adazehu.
Oomeje tẹ whẹrewhere wata ewhewhe.
Whẹrewhere ono -whedelewho,
aka-mini ono adazehu wata ọso asọso.
19Okfu iya b’o kpuhawaru goshi Jékọpu,
mbụ l’iwu iya mẹe iwhe ọ tọru ọkpa iya t’e tsoje
b’o kpuhawaru goshi Ízurẹlu.
20Ọ tọ dụdu ndu mba ọdo,
o mejewaru ẹgube iwhe ono.
Ndu mba ọdo ta amadụ iwu, ọ tụru.
Unu jaa Onye-Nwe-Ọha ajaja.
1481Unu jaa Onye-Nwe-Ọha ajaja.
Unu shi l’imigwe jaa Onye-Nwe-Ọha ajaja.
Ndu nọ l’ẹka bụ mgbogidi jaa ya ajaja.
2Tẹ ndu ojozhi iya l’owhu; jaa ya ajaja.
T’iwhe bụ ojọgu imigwe l’owhu jaa ya ajaja.
3T’ẹnyanwu mẹe ọnwa jaa ya ajaja.
T’unubẹ kpokponde, l’egbu zaazaa jaa ya ajaja.
4Unubẹ akpamigwe jaa ya ajaja,
unubẹ mini, nọ-ngoru akpamigwe ajaa ya ajaja.
5T’unubẹ iwhe ono tụko jaa Onye-Nwe-Ọha ajaja,
nkele ọo ya sụru t’unu dụ, unu dụ.
6Ọo ya bẹ doberu unu l’ẹka unu l’a-nọdu jeyewaroya.
Ọ bụru ẹka ọ sụru t’unu nọdu bẹ unu nọdu-gee.
Ọ bụru ẹgube ono, o kfuru iya b’ọ dụ,
o to nwedu echihu.
7Unu nọdu l’eliwhe jaa Onye-Nwe-Ọha ajaja,
unubẹ iwhe dụ-gee biribiri, o meshiru dobe l’eze-ẹnyimu,
mẹe ọwhu nọ-gee lẹ mini-ime-alị.
8Unu jaa Onye-Nwe-Ọha ajaja, unubẹ ebemu-igwe mẹe aka-mini,
mẹe urwukpu mẹe oke whẹrewhere,
l’emeje iwhe o kfuru.
9Unubẹ ugvu ukfu mẹe ugvu nta mẹe oshi-ọmi,
mẹe oshi sida, unu jaa ya ajaja.
10T’anụ-ẹgbudu mẹe élwù mẹe ụnwehu,
mẹe ẹnu, l’ewhe l’eli tụkokwawho jaa ya ajaja.
11Unubẹ ndu eze, l’achị mgboko mẹe ndu mba lile,
mẹe ndu bụ ishi mẹe iwhe bụ ndu l’achị mgboko l’owhu,
12mẹe unubẹ ụnwu okorọbya mẹe ụnwumgboko,
mẹe ndu bụ ọgurenya mẹe ụnwegirima,
unu tụkokwawho jaa ya ajaja.
13Unu tụko g’unu ha jaa Onye-Nwe-Ọha ajaja,
nkele ọo ẹwha iya kpụ bụ ẹwha, kakọta l’eli.
Ọ-dụ-biribiri iya bẹ ghataru mgboko l’owhu ghata imigwe.
14O meru tẹ ndibe iya nweru onye ike dụ.
Ọ bụru onye ono bẹ ndu ono,
o doberu nsọ, bụ ndu Ízurẹlu l’a-nọje aja ajaja,
mbụ ndu ono, dụ iya l’obu.
Unu jaa Onye-Nwe-Ọha ajaja.
149Egvu, e gude aja Chileke
1Unu jaa Onye-Nwe-Ọha ajaja.
Unu gụa egvu ọwhuu nụ Onye-Nwe-Ọha.
Unu gụa egvu gude jaa ya ajaja
l’ẹka ndu nkiya dzukoberu.
2Tẹ ndu Ízurẹlu tee ẹswa l’ẹka onye meru whẹ nụ nọ.
T’ẹhu tsọo ndu Záyọnu ụtso l’ẹka onye eze whẹ ono nọ.
3Tẹ whẹ tụko gude ote egvu jaa ẹwha iya ajaja.
Whẹ egude nkwa mẹe une gụa egvu nụ iya,
4o noo lẹ Onye-Nwe-Ọha bẹ ndu nkiya dụ l’obu.
Ndu wozeru onwowhe alị
bẹ l’ookpubeje ndzọta g’ọo okpu-eze.
5Tẹ ndu nke Chileke teje ẹswa
l’ẹgube ugvu ọwa-a, a kwabẹru whẹ.
Whẹ agụkwawho egvu ẹhu-ụtso
mẹ whẹ zẹe azẹe l’iwhe-azẹe whẹ.
6T’ọja Chileke ajaja bụru iwhe whẹ l’a-kpụru l’ọnu.
Tẹ whẹ pakwarụ ogu-ịgba, l’atsụ iwhu labọ l’ẹka,
7gude iya je agwata ndu ọha ọdo
ụgwo iwhe whẹ meru whẹ,
gudekwa iya whọ nụa ụnwu eliwhe awhụ.
8Whẹ egudekwa iya whọ tụa ndu eze whẹ ẹgbirigba,
mbụ tụa ndu nweru ẹnya mkpọro.
9Ọo ya bụ nke ọwhu whẹ l’e-shi
nno medzua iwhe onye ikpe
deru l’ẹkwo sụ tẹ whẹ mee ndu ọhogu whẹ.
O noo bụ iwhe o gude kwabẹ ndu nkiya ono ugvu.
Unu jaa Onye-Nwe-Ọha ajaja.
150Unu jaa Chileke ajaja
1Unu jaa Onye-Nwe-Ọha ajaja.
Unu nọdu l’ụlo Chileke, dụ nsọ jaa ya ajaja.
Unu nọdu l’imigwe,
bụ ọwhu o gude ọkpehu iya mee jaa ya ajaja.
2Unu jaa ya ajaja nke iwhe parụ ẹka, o megbaberu.
Unu jaa ya ajaja nkele ọopa ẹka nkiya nyịberu anyịbe.
3Unu gbua opyi-ọku gude jaa ya ajaja.
Unu akpọo une mẹe ogelenda gude jaa ya ajaja.
4Unu kụa nkwa tee egvu gude jaa ya ajaja.
Unu kụa ogele whụa opu gude jaa ya ajaja.
5Unu kụa eze ogele gude jaa ya ajaja.
Unu egude ogele, l’aha gengu-gengu jaa ya ajaja.
6T’iwhe lile, bụ iwhe l’atụ ume
tụko jaa Onye-Nwe-Ọha ajaja.
Unu jaa Onye-Nwe-Ọha ajaja.