Ẹtu

Ẹkwo

ẸTU

Urwu, dụ l’okfu-ẹtu

¹Ẹtu, ọ nmashịru mbụ Sólomọnu, bụ eze ndu Ízurẹlu, mbụ nwa Dévidi. Iwhe ọ nmaturu iya bụ:

²Tẹ madzụ gude iya marụ

mmamagụ, ya abụru onye a hụ̀rù àhụ̀hù.

Mẹe t’okfu, miru emi doo ẹnya.

³Tẹ madzụ gude iya nọdu ndzụ

bụru onye a hụ̀rù àhụ̀hù yẹle onye kwarụ ẹnya.

Ya egude iya bụru onye l’eme

iwhe dụ chịriri mẹe onye

ikpe-nkfụmoto, bụru onye l’eme

iwhe l’ụzo kfụru nhamụnha.

⁴T’e gude iya mee tẹ ndu l’ẹte

enwee mgbamego kwaa ẹnya, nwata okorọbya

egude iya marụ iwhe,

gudekwa iya whọ eleba ẹnya ree l’iwhe.

⁵Tẹ ndu marụ ágụ nụa okfu ẹtu ono,

yekwabaa iwhe l’iwhe whẹ nwụtaru.

Ndu iwhe l’edoje ẹnya egude iya

nwụta iwhe l’a-kpozhiru whẹ ụzo.

⁶Tẹmenu, e gude iya eme

t’okfu-ẹtu doo ẹnya, mẹe tẹ ilu,

ndu marụ ágụ l’atụ yẹle okfu whẹ l’ekfu doo ẹnya.

⁷Ọ kwa ọtsu egvu

Onye-Nwe-Ọha bụ ogbube ishi mmamagụ.

Ọle ndu eswe ta adụdu iwhe whẹ

l’agụbeje mmamagụ yẹle àhụ̀hù.

Ọkwa, l’aanmarụ ụnwu okorọbya

⁸Sụa, nwa mu; ngabẹje nchị mẹe nna ghu l’abarụ ghu mba.

Ba ajịkakwa iwhe ne ghu l’ezhi ghu.

⁹Okfu whẹ l’ekfuru ghu l’e-dozhi umere ghu,

ya adụ ree g’ọo okpulishi,

mbụ ya adụ g’ọo ịyagba,

ị nya l’olu gude mema onwoghu emema.

¹⁰Nwa mu; nteke ndu l’eme iwhe-dụ-ẹji l’ede ghu edede,

be ekwekwa tẹ whẹ deta ghu.

¹¹Ọ -bụru lẹ whẹ sụru ghu t’ị bya etsoru whẹ,

t’unu je egeparu gbua madzụ,

mbụ t’unu je edomia onwunu

kwabẹru onye l’adụa iwhe o meru.

¹²T’unu je elwee whẹ olwe lẹ ndzụ g’ọo ilu,

mbụ lwee whẹ wọo g’ọo ndu bahụru l’iduma.

¹³Oberu whẹ sụ ghu:

“Anyi l’a-natakwa iwhe vu ọnu aswa,

anyi l’e-gudekwa iwhe anyi natarụ

lẹ nfụ dojia ụlo anyi edoji.”

¹⁴Whẹ -sụ ghu: “Ngwa, tụru ike yeru anyi,

nggẹ anyi gbarụ mgba nweru okpoga, anyi natarụ.”

¹⁵Nwa mu; be etsokwa ẹgube ndu ono.

Be eshikwa l’ụzo, whẹ l’eshi.

¹⁶Nkele ọkpa l’anọje atsụ whẹ nkọ l’ome iwhe-dụ-ẹji,

ogbu madzụ ta atajẹru whẹ l’ike.

¹⁷L’onye wotaru etse je akụberu

ẹnu l’ẹka ẹnu ọbu l’ele iya ẹnya

bụkwa awhụ bẹ onye ọbu l’eri.

¹⁸Ndu ono bẹ bụ onwowhe bẹ kwabẹru tẹ whẹ gbua.

Ọ bụru iwhe l’e-ri whẹ ishi bẹ whẹ kpuru ngabẹru.

¹⁹Ọo ẹgube ono bẹ l’ọo-dụru

ndu l’ana ndu ọdo iwhe whẹ l’ẹka ike.

Urwu, e ritaru l’ụzo, dụ nno

l’egbujekwa onye ritaru iya nụ.

Ọkwa, a nmarụ ndu jịkaru mmamagụ

²⁰Mmamagụ tsoru woroworo echi-ụzo echi mkpu.

Ọ nọ l’echilabọ ọma aswa ekfu ekfurekfu, dụ iya l’ọnu.

²¹Ọ kfụru l’eli mgbodo arya iya aryarya,

ọ nọdu l’ọnu ẹka l’eeshije abahụ lẹ mkpụkpu,

aryarụ ọha okfu ono aryarya sụ:

²²“Unubẹ ndu l’ẹte enwee uche,

?ọo nteke ole bẹ unu l’e-bebezhia

kpọo ụzo ono, unu l’eshi ashị?

?Ọo zhia nteke ole bẹ ọchi ndu ọdo ọchi

l’e-bekoo tsọ-buhu ndu ono, l’anọje achị iya nụ ụtso?

Mbụ ?ọo gụnu meeda tẹhenu

amamiwhe adụ-buhu ndu eswe ashị?

²³Unu ngabẹ nchị lẹ mba, mu l’abarụ unu,

tẹ mu gude iya goshi unu iwhe bụ uche mu,

unu amarụ iwhe mu marụ.

²⁴Ọle eshi-ọwhu mu kuru unu oku,

unu jịka mu azaza,

mu machịa ẹka wheku unu,

t’ọ dụ onye ngarụ mu nchị

²⁵Eshi-ọwhu unu woru idzu, mu chị-koshiru unu

gwọo l’ẹja, unu jịka ọnata mba, mu barụ unu,

²⁶bẹ mu l’e-megekwa chịa unu ọchi

mẹ iwhe-ọtsulanu byakfutalewho unu.

Mu l’a-jakwa unu ewenu

mẹ iwhe ọotsu egvu byakfutalewho unu,

²⁷mbụ nteke iwhe ọotsu egvu l’e-zhi whaa g’ọo uburu-aga

bya unu ezhikota unu, mẹe nteke iwhe-ọtsulanu

l’a-swọ-lihu g’ọo ẹka maa l’eye

ọku bya anmakọta unu swọki-swọki,

mbụ nteke iwhe-ẹhuka yẹle iwhe áwhụ l’a-byarụ unu.

²⁸Nteke ono bẹ whẹ l’a-kpọ mu mkpọ-ku oku,

ọle mu ta azadụ whẹ.

Whẹ achọo mu kwopya imi,

ọle whẹ ta awhụdu mu.

²⁹Sụa: eshi-ọwhu whẹ kpọru amamiwhe ashị,

whẹ ta ahata ọotsu egvu Onye-Nwe-Ọha

³⁰Eshi mu chị-koshiru whẹ idzu, whẹ te ekwe nata iya.

Whẹ woru mba, mu barụ whẹ gwọo l’ẹja,

³¹eshi-ọwhu ọ dụ nno,

bẹ whẹ l’e-megee ria urwu ejo ụzo ọbu whẹ l’etso,

mbụ ria urwu ejo idzu ọbu, whẹ l’achị, rijia ya ẹwho.

³²Ụzo ono, ndu l’ẹte enwee uche

shisweru bụ iya l’e-gbu whẹ.

Atsụtsu ono, ndu eswe tsụru onwowhe l’ẹnya

l’e-mekwawho, whẹ abụru kpurupyata.

³³Ọle onye ngabẹru mu nchị bẹ ọko l’abyadụa l’akọ.

Ẹhu l’e-guzeta iya, tọ dụ iwhe ọ bya l’atsụ egvu iya.”

Urwu, dụ lẹ mmamagụ

¹Nwa mu; ọ -bụru l’i kweru nụa okfu mu,

kwakọbe iwhe mu sụru t’e meje l’ime obu ghu,

²Mbụ l’ịingabeje nchị lẹ mmamagụ,

bya eworu obu ghu zhiberu ọkwa-ẹnya,

³Ọ -bụru l’i kuru amamiwhe, dụ omilomi oku,

chiku ọkwa-ẹnya lẹ mkpu,

⁴Ọ -bụru l’ịicho mmamagụ g’ọo onye l’achọ mkpọla-ọcha,

Ịicho iya g’ọo onye l’achọ ẹku, e domiru edomi,

⁵O noo nteke, iwhe bụ ọtsu egvu

Onye-Nwe-Ọha l’edo ghu ẹnya ndono.

Gụ amakwarụwho Chileke.

⁶Nkele ọo Onye-Nwe-Ọha l’anụje mmamagụ,

Okfu ọnu iya l’emeje t’a marụ iwhe, kwaa ẹnya.

⁷Ọkpobe mmamagụ

b’ọ kwakọberu ndu obu gụru iwhoro.

Ọ bụru Onye-Nwe-Ọha

l’egbobutaje ndu ụta l’adụa lẹ ndzụ whẹ.

⁸Ndu l’eme iwhe l’ụzo dụ chịriri bẹ l’ọonoje echekwa.

L’ọonwubejeru ndu yeru iya obu ẹnya.

⁹Tọ dụ iya bụ, l’iwhe dụ chịriri

mẹe iwhe kfụru nhamụnha l’e-do ghu ẹnya.

Ome iwhe gbarụ ememe

mẹe otso ụzo, dụ ree edokwa ghu whọ ẹnya.

¹⁰O noo nkele nteke mmamagụ bahụru ghu l’ime obu,

bẹ amamiwhe l’a-tsọlaha ghu ụtso.

¹¹Ọmaru oye ọnu l’okfu l’a-nọ echekwa ghu.

Ọkwa ẹnya eduzhi ghu ụzo.

¹²Mmamagụ l’a-nafụta ghu t’i be etsoru ụzo,

ndu ejo-madzụ l’eshi.

Ọo-dzọfuta ghu l’ẹka ndu ire whẹ gbarụ ẹbo.

¹³Mbụ ndu l’ahajẹ ụzo, kfụru nhamụnha je etsoru

ụzo ọwhu gbarụ ẹkpuroochi.

¹⁴Ndu tẹ whẹ mee ejo-iwhe l’anọje atsọ pyoo.

Iwhe l’adụje whẹ ree bụru ọgho ụgho.

¹⁵Mbụ ndu ụzo whẹ l’owhu dụkota nswịko nswịko,

Ọgba ẹregede bụru ẹhu whẹ.

¹⁶Mmamagụ l’a-dzọfuta ghu l’ẹka

nwanyị, bụ o-kwe-l’ẹka-nwe-iya,

mbụ l’ẹka nwanyị-ọkpara yẹle ire mẹchemeche iya.

¹⁷Onye buharu ji, lụru iya nteke ọ bụ nwamgbọko,

nyọhaa ndzụ, whẹ gbarụ nteke whẹ lụru.

¹⁸Oje ụlo nwanyị ono bụ ọla l’ọnwu,

ụzo ọwhu l’ooshi bụru ụzo, e shi ala maa.

¹⁹Ọ tọ dụdu onye kpajẹru ụlo

nwanyị ono lwawhujeru azụ lẹ ndzụ,

Ọ dụa onye ọbu megee whụ ọkpa o gude dawhu azụ ọdo.

²⁰Ọo ya bụ, t’ị nata ẹka ndu l’eme ree,

Gụ eshije ụzo ndu dụ chịriri l’eshi.

²¹Nkele ọ kwa ndu obu gụru iwhoro l’e-bu l’alị-a,

Ọ bụru ndu ụta l’adụa lẹ ndzụ whẹ l’a-nọgburu iya.

²²Ọle ndu l’eme ejo-ememe bẹ

l’ee-mekwa tẹ whẹ tọhu l’alị-a,

Ndu l’ẹte egudee ire whẹ ẹka bẹ l’aa-vụ l’ọgbaragbu.

Idzu, l’aachị-koshi ụnwu-okorọbya

¹Nwa mu; ba anyọhakwa iwhe mu l’ezhi ghu.

Wotakwa iwhe ono, mu l’asụje t’i mee dobe l’obu ghu,

²nkele oo-me tẹ ndzụ ghu kabaa otse ogologo,

ya emekwaawho t’i buru guu.

³Be ekwekwa tẹ n-yemobu yẹle ire-lanụ nahụ ghu.

Rwụkua ya l’olu g’ọo iwhe olu,

gụ edee ya edede kfube l’ime obu ghu.

⁴Ọo ya bụ, gụ ala Chileke yẹle madzụ l’ẹhu,

gụ enweru ẹwha ọma.

⁵Gude obu ghu g’ọ ha bewhube Onye-Nwe-Ọha,

Ba achịkwaru ụkfu kwẹe l’ẹnya, ị kwarụ.

⁶Nyatajẹkwa Onye-Nwe-Ọha l’iwhe lile, l’iime,

nkele ọo ya l’e-me t’ụzo ghu kfụru nsụmini.

⁷Ba arịjekwa l’ị marụ ágụ,

Iwhe l’ii-mechia bụ, t’ị tsụje egvu Onye-Nwe-Ọha,

gbẹeru oome iwhe-dụ-ẹji azụ.

⁸O noo iwhe l’e-me t’ẹhu dụ ghu ike,

Ya emekwaawho t’ọkpu shihu ghu ike.

⁹Gude iwhe i nweru kwabẹ Onye-Nwe-Ọha ugvu,

Gụ egude iwhe mbụ,

ị kpatarụ l’okfu ghu kwabẹ iya ugvu.

¹⁰Ọo ya bụ nke ọwhu nri

l’e-ji ọba ghu ebushihu ebushihu,

Mmẹe ejikwawho itoto ghu kpaa l’ọnu.

¹¹Nwa mu; ba agwọkwa àhụ̀hù,

Onye-Nwe-Ọha l’àhụ̀ ghu l’ẹja.

Tẹ mba, l’ọobaru ghu ba adụkwa ghu ashị.

¹²Nkele ọo ndu Onye-Nwe-Ọha

yeru obu bẹ l’ọobajeru mba,

Ẹgube onye bụ nna, l’abajẹru nwa, o yeru ẹnya.

Mmamagụ l’anụ ẹhu-ụtso

¹³Ẹhu-ụtso bụ nke onye chọru mmamagụ chọta,

Mbụ onye iwhe l’edoje ẹnya.

¹⁴Urwu kakwa lẹ mmamagụ karụ mkpọla-ọcha,

Mkpa, l’ọoga ka shii amamẹ mkpọla-ododo.

¹⁵Ọnu aswa iya ka shii karụ nke ẹwhuru l’ere ire,

Iwhe lile, l’agụ ghu nụ

ta adụdu ọwhu, l’ịi-tụberu mmamagụ.

¹⁶Iwhe o gude l’ẹka-ụtara bụ ndzụ ogologo,

Iwhe o gude l’ẹka-ịcha bụru ẹku mẹe ugvu.

¹⁷Ụzo ọwhu l’oogoshi bụ ụzo ẹhu-ụtso,

Gbororo echi-ụzo iya bụkota ẹhu-guu.

¹⁸Mmamagụ bụ oshi, l’anụje ndzụ l’ẹhu ndu gbakụru iya nụ,

Ndu gude iya kpụkpurukpu bẹ ẹhu-ụtso dụru.

¹⁹Ọo mmamagụ bẹ

Onye-Nwe-Ọha gude tụa ukfu mgboko,

gude ọkwa-ẹnya mee igweli dobe.

²⁰Ọ bụru amamiwhe iya b’o gude

mee t’ẹnyimu sọje gborogboro,

mee t’igweli chịa mini gbaa l’alị.

²¹Nwa mu; gudeshikwaa

ọkpobe mmamagụ mẹe ooye ọnu l’okfu ike.

Be ekwekwa t’ọ nahụ ghu.

²²Oo-me tẹ ndzụ dụ ghu.

Ọo ya bụ aka, l’ịi-nya l’olu gude memaa onwoghu emema.

²³Nteke ono bẹ ije ghu l’abụ chịriri werere,

ụkfu ta abya l’a-kpọ ghu l’ọkpa.

²⁴Ị -zẹe azẹe, egvu ta atsụdu ghu,

Nteke bụ l’i kuru mgbẹnya, ya atsọfu ghu ụtso l’ishi.

²⁵Ị bya l’amadeshia iwhe ọotsu

egvu bya, ba atsụkwa egvu.

Ba atsụkwa egvu nteke ị whụru

iwhe l’emeje tẹ ndu ejo-ememe bụru kpurupyata.

²⁶O noo nkele Onye-Nwe-Ọha l’e-me t’obu shia ghu ike,

Ọ tọ byadụ l’e-kwe t’ị daba l’ọnya.

²⁷Ị -marụ iwhe dụ ree, l’ii-meru

onye ọ dụ lẹ mkpa, ba akpọkwa laa azụ,

kelekele m’ọ dụ ghu l’ẹka ememe iya.

²⁸Ba asụkwa madzụ ibe ghu t’o je ya adawhu azụ echile,

L’ẹka i nwekwaru-a iwhe ọ ryọru ghu nteke ono.

²⁹Ba agbakwarụ madzụ ibe ghu ejo égò,

mbụ onye ono, gụ l’iya l’akpa lẹ ntụsaru-ẹhu.

³⁰Be eseshikwa madzụ okfu l’ẹbe ọdu, iwhe o meru ghu,

Mbụ onye l’adụa ẹka o mekaru ghu.

³¹Be ekokwaru onye bụ iwhe-ike l’adụje iya ree okoowhoo.

Ba ahatakwa otso ụzo ọwhu, l’ootso.

³²Nkele onye ire iya gbarụ ẹbo

bẹ Onye-Nwe-Ọha kpọru ashị,

Ọle onye obu gụru iwhoro bẹ l’oowojeru ye l’obu.

³³Onye-Nwe-Ọha tụakwaru ọnu

swibe l’ụlo ndu ejo-ememe

Obenu l’ọonoje agọ ọnu-ọma anụ ibe ndu dụ chịriri.

³⁴Ndu l’aja ndu ọdo ewenu bẹ Onye-Nwe-Ọha l’ajalatajẹ.

Ọle ndu wozetaru onwowhe alị

bẹ l’oomejeru eze-iwhe-ọma.

³⁵Ndu marụ ágụ bẹ l’e-nweru ugvu,

Ọle ndu eswe bẹ iwhe-iwhere l’e-me.

Mmamagụ kagee ree

¹Sụa, ụnwu mu, t’unu ngabẹje nchị l’okfu nnajị unu,

t’unu gebeje nchị nwụta iwhe.

²Iwhe mu l’ezhi unu bụ ọkpobe iwhe.

Ọo ya bụ, t’unu ba apakwarụ

iwhe ono mu l’ezhi unu ha.

³Nteke mu bụ nwata nwokoro nshịi buru l’ibe nna mu,

mbụ nteke mu kabaa ọ bụ nwata,

bụru nwa lanụ ne mu nwụtaru

⁴bẹ nna mu shi ezhije mu iwhe sụ:

“T’okfu, mu l’ekfuru ghu dụkwa ghu l’obu.

Meje iwhe mu sụru t’i meje ndụge ị nọdu ndzụ.

⁵Makwarụ ágụ, iwhe edoje ghu ẹnya.

Ba anyọhakwa okfu-ọnu mu, gụ eje ahakwa iya.

⁶Ba ahakwa mmamagụ nkele ọo ya l’e-chekwa ghu.

Ye iya obu nke ọwhu l’ọo-nọ eduzhi ghu ụzo.

⁷L’ọo mmamagụ bụ ishi; ọo ya bụ t’ị marụ mmamagụ.

Oberu ọkwa-ẹnya je l’e-whu ghu gụnu, kwakwaa ẹnya.

⁸Kutsee mmamagụ ekutse nke ọwhu l’ọo-pali ghu eli.

Byia ya ọma nke ọwhu l’ọo-kwabẹ ghu ugvu.

⁹Oo-kpube ghu okpu l’ishi gude mee t’ị dụ ugvu l’ẹnya,

ya egude okpu-eze, dụ biribiri kpuchia ghu ishi.”

¹⁰Nwa mu; nụaru mu okfu,

t’iwhe mu l’ekfu gaa ghu ụzo nchị,

Nke ọwhu l’ịi-nọliberu ndzụ.

¹¹Ọ kwa ụzo mmamagụ bẹ mu zhiru ghu,

Ọ bụru ụzo, kfụru nhamụnha bẹ mu duru ghu shia.

¹²Ii -je ije, ọ tọo dụdu iwhe l’a-kpọshi ghu ọhata ọkpa,

Nteke bụ l’ọso bẹ l’ịigba,

ụkfu ta abyadụ l’a-kpọ ghu l’ọkpa.

¹³Gudeshia àhụ̀hù ono, a hụ̀rù ghu ike,

tọ bọ nahụkwa ghu.

Leta iya ẹnya reereeree nkele ọo ya bụ ishi ndzụ ghu.

¹⁴Ba atọkwa ọkpa l’ụzo ndu ejo-ememe l’eshi.

Gụ eje eshikwa ụzo ndu l’eme ejo-iwhe l’eshi.

¹⁵Gbangokwaa ya agbango; be eshikwa iya eshishi owhu.

Hakwa oshi ụzo ono; shia ụzo ọdo jeshia iwhe l’iije.

¹⁶Lẹ ndu ejo-ememe te ekujekwa mgbẹnya,

gbahaa mẹ whẹ meru ejo-iwhe.

Mgbẹnya te eshitajedu whẹ ụzo ẹnya,

gbahaa mẹ whẹ meru madzụ, ọ daa kpọo mkpofu-nchị.

¹⁷Iwhe bụ nri whẹ bụ oome ejo-iwhe,

Iwhe bụ mmẹe, whẹ l’angụ bụru ome iwhe-ike.

¹⁸Ọle umere ndu dụ chịriri l’adụje

g’ọo iwhoro chi-asahụ,

l’atọje nwẹhu asahụ jeye chi asahụ-gee ree.

¹⁹Umere nke ndu ejo-ememe gbarụ ọochi,

Whẹ ta majẹdu iwhe whẹ vukotaru daa iko.

²⁰Nwa mu; ngabẹ nchị l’okfu mu,

Tẹ nchị ghu dụ l’iwhe mu l’ekfu.

²¹Be ekwekwa t’ọ nahụ ghu.

Kwakọbe iya l’ime obu ghu.

²²Ndu nụru okfu ono l’e-gude iya

nọdu ndzụ, ẹhu adụ whẹ mma.

²³Iwhe kage nụ bụ t’i cheje obu ghu eche,

Nkele ọo ya bẹ ndzụ shi.

²⁴T’okfu, gberu egbe ba adụkwa ghu l’ọnu,

T’ire ba agbakwa ghu ẹbo.

²⁵T’ẹnya ghu dụkwa l’iwhe l’iime.

Dabẹ ẹnya ree l’iwhe nọ ghu l’iwhu.

²⁶Kwabẹkwa ẹnya l’iwhe l’iime,

Nke ọwhu l’ii-mereje iya emere.

²⁷Be ejenyakwaa lẹ nhamụnha ụzo swị-jia,

Be eyekwa ọkpa l’ejo-iwhe.

Ọnma ọkwa ori ogori

¹Nwa mu; ngabẹ nchị l’okfu

mmamagụ, mu l’ekfuru ghu.

Gebe nchị ree nụa okfu ọkwa-ẹnya, mu l’ekfu eyeru ghu,

²Nke ọwhu l’ịi-ma oye ọnu l’okfu,

okfu-ọnu ghu egoshi l’ị marụ iwhe.

³Nwanyị, bụ o-kwe-l’ẹka-nwe-iya

bẹ ogboromọnu iya l’anọje atsọ g’ọo mmanụ-ẹnwu,

Okfu-ọnu iya l’anọje akwọ tụruturu g’ọo mmanụ-ụrwazhi.

⁴Ọle ikpazụ, bẹ l’ọobuje ụkpazhi ọnwu ọnu,

bụru nkogo l’atsụ iwhu labọ.

⁵Etsotso iya bụ ọla maa,

Otso ndzọkpa iya l’edubaje madzụ l’ilu.

⁶O to shijedu ụzo ndzụ.

Ụzo, l’ooshi ntaa bẹ dụ nswịko nswịko, tọ ma.

⁷Ọo ya bụ, unubẹ ụnwu mu t’unu ngabẹru mu nchị,

Ba ahakwa iwhe mu l’ekfu wata oome iwhe ọdo.

⁸Jiru ẹgu yeru ẹgube nwanyị ono.

Ba akpakwa ụlo iya ntse,

⁹ọdua bẹ l’ii-rekwa ugvu unu,

ji nwanyị ono agbabẹ obu gbua ghu.

¹⁰Mbụ ọdua bẹ ndu ọdo l’e-ripyabekwa ẹku,

ị kpatarụ akpata vụkaa,

anya, i seru abụru iwhe onye ọdo.

¹¹L’ikpazụ, bẹ l’ịi-tsụ ude,

mbụ nteke l’ịi-bụ okorowhoo madzụ daburu.

¹²Nteke ono bẹ l’ịi-sụ:

“?Ọo nụa gụnu meru o shi abụje,

a lọ mu ẹka lẹ nchị, ya adụ mu ashị,

a barụ mu mba, ya eje erwu mu l’ẹhu?

¹³Ndu l’ezhi mu iwhe bẹ mu l’ẹte eshidua angabẹjeru nchị,

mu te egebejeru ndu l’akpọ-zhijeru mu ụzo nchị.

¹⁴Ntaa bẹ mu bụkwaa kpukpuru-swoo l’ẹnya igwe-ọha.”

¹⁵T’onye l’ịi-marụ nwẹkiya bụkwaru nyee ghu,

Ya abụru iya kpụ bẹ l’ịi-kụje ọkpa,

ẹgube ono, nwoke bụ lẹ wẹlu-mini, ọ tụru l’ẹka iya

bẹ l’ookutaje mini ngụa.

¹⁶Ọ tọ gbakwa t’i tsoru echi-ụzo

aghakashị ụnwuda, shi ghu l’ẹhu

Mbụ l’ọ to gbadụ t’i woru

onwoghu tụhaaru ụnwanyi l’ẹka i jeberu.

¹⁷T’ẹhu ghu bụru nke nyee ghu nwẹkiya,

Tẹ yẹle ndu ọdo ba agbakwa mgba nweru ghu.

¹⁸T’ẹhu-ụtso bụru nke nyee ghu.

Tẹ nwanyị ono, ị lụru lẹ

nwokoro meje ghu ẹhu-ụtso.

¹⁹T’ọ dụjekwa ghu ugvu l’ẹnya

g’ọo ne ele, ya ama ghu mma g’ọo umoro-ẹnyimu.

T’ẹra iya mejekwa t’ẹhu tsọo ghu ụtso ntekenteke.

T’obu, o yeru ghu sepyabejekwa ghu l’uwhu.

²⁰?Nwa mu; ?ndẹnu g’ọ nwụru

nwanyị ogori l’anọje agba ghu igiri?

?Ndẹnu iwhe meru g’o gude

ọ bụru l’ụtakfu nwanyị ọdo

bẹ l’ịinoduje arwaswi onwoghu?

²¹Iwhe madzụ l’eme bẹ daburu ẹba l’iwhu Onye-Nwe-Ọha.

Ẹka madzụ yeru ọkpa b’ọ whụkotaru.

²²Ejo-iwhe, onye ejo-ememe

l’eme l’anmajẹkwa iya g’ọo ọnya,

Iwhe-dụ-ẹji, l’oome l’anmatajẹ iya g’ọo ẹma nmarụ l’ụgbu.

²³Iwhe l’e-gbu iya nụ bụ àhụ̀hù ono, l’ẹte ahụ̀a ya.

Eswe, l’oome je l’e-me iya, ya ewhuhu.

Ọkwa, l’aanmarụ onye l’eme eswe

¹Nwa mu; ọ -bụru l’ị narụ madzụ ibe ghu mkpalẹka,

Ọ -bụru l’i byiru ẹka l’ẹkwo sụ t’e jee onye ọdo ụgwo,

²Ọ -bụru l’okfu, i kfuru l’ọnu ghu nmarụ ghu g’ọo ọnya,

Ọ -bụru l’ụkwa, i kweru bụ igbudu tụ ghu,

³Eshi-ọwhu ọ bụwa adaba b’ị dabarụ madzụ l’ẹka nno,

Nwa mu; lee iwhe l’ii-me ndọwa, t’i nweru onwoghu:

Jelekwawho je ewoze onwoghu alị.

Ryọ-zhia ya whọ jeye nteke l’ịi-ryọ-buta iya.

⁴Be ekwekwa tẹ mgbẹnya bya ghu l’ẹnya.

Be ekwekwa tẹ mgbẹnya rweru ghu.

⁵Kebe ẹhu dzọo ishi onwoghu

gẹ mgbada l’adzọje ishi iya l’ẹka ndu l’achị nta,

Mbụ g’ọo ẹnu, a nmataru l’etse, e megee, ọ jịfu.

⁶Jekube ndanda, gụbe onye ẹgali.

Gbua nke l’iwhe l’oome gude marụ ágụ.

⁷Lenu lẹ ndanda te enwedu onye eze,

t’o nwe onye ishi.

Ọ dụa l’ọo onye l’achị iya nụ.

⁸Ọle ọobuje, o -rwua l’ọnanwu ya akpaa nri, l’oo-ri dobe,

Mbụ l’ọobuje ndiwhe l’akpata iwhe whẹ kọru l’okfu,

yẹbedua apakọ nkiya edokobe.

⁹?Ọo nteke ole bẹ l’ịi-zẹnyaa ẹgube ono zẹ-beru,

gụbe onye ẹgali ono?

?Ọo nteke ole bẹ l’ii-tehu lẹ mgbẹnya ono, l’iiku?

¹⁰Ịisuje, l’ọ waa t’i kuta mgbẹnya nwanshị,

t’i dobe ishi l’oshi nwilile,

Mbụ l’ọ waa t’i pyakọo onwoghu tụta ume nwanshị,

Gụ agbashi je aharu ẹhu ghu mebota,

¹¹Ọle manụruwho l’ejo-ẹka l’e-gudekwa ghu

g’ọo onye ndu l’ana nfụ byakfutaru,

Mbụ, l’ụko iwhe l’a-kwa ngwọgu

byakfuta ghu g’ọo ndu ojọgu.

¹²Onye bụ mkpọkoro madzụ, mbụ ejo-madzụ,

l’anọje aghawhe adzụ-whe ejire.

¹³Ẹgube onye ono l’anọje ajị-buru ibe iya ẹnya,

mbụ l’ẹgube onye ono l’anọje akwọ ọkpa akwọkwo l’alị,

amawhe mkpụshi ẹka, gude ekfuru ibe iya okfu.

¹⁴Ẹgube onye ono l’egudeje ẹregede,

dụ iya l’obu chịa idzu ome ejo-iwhe,

Tẹmenu l’ọonoje akpawhe okfu.

¹⁵O noo g’o gude eze

iwhe-ọtsulanu je l’a-tụ iya l’ụkfu,

A -bya l’ajị ẹnya birimu bẹ l’aa-lawa iya l’iyi

nke ọwhu bụ l’ẹte emekotahedu iya emekota.

¹⁶O nweru uzhi iwhe ishii, Onye-Nwe-Ọha kpọru ashị,

mbụ uzhi iwhe ẹsaa, bụ akpamara l’iwhu iya.

¹⁷Iwhe ono bụ:

oku onwonye eku,

ntuwhu-ire,

ogbu ọchi ndu l’adụa iwhe whẹ meru,

¹⁸ọriri ome ejo-ememe,

okwo gburumu gbaba l’ome ejo-iwhe,

¹⁹ọgba ejo ẹregede,

mbụ onye okfu, l’eshije iya l’ọnu l’abụkotaje ejire,

mẹe ooye ime okfu l’echilabọ unwune.

Ọnma ọkwa ori ogori

²⁰Nwa mu; mejekwa iwhe nna ghu sụru t’i mee,

ba azọhakwa ome iwhe ne ghu zhiru ghu.

²¹Kee ya jịjiji l’obu ghu ntekenteke.

Gụ akụkua ya onwoghu akụku l’olu.

²²Ọ kwa iya l’a-nọ edu ghu mẹ l’iije ije.

-Iiku mgbẹnya, ya eche ghu nche.

Ị -nwụru ẹnya, ya ekfu eyeru ghu.

²³Nkele iwhe ono, a sụru t’i meje bụ oryọku,

Iwhe ono, e zhiru ghu bụru iwhoro,

Mba, a barụ ghu gude lọo ghu ẹka lẹ nchị bụru ụzo ndzụ.

²⁴Ọo ya l’ewowhuje ghu azụ l’ẹka ejo nwanyị ono nọ,

bụru iya l’esewhutaje ghu azụ

l’ẹka nwanyị-ọkpara ire mẹchemeche.

²⁵T’ụma, l’ọoma be emekwa t’ọ gụlahaa ghu ẹgu ejekfu.

Be ekwekwa t’o gude ẹnya ralịtaru ghu.

²⁶Nkele ọkpa lẹ nwanyị-ọkpara

l’eme ghu t’ọ bọ dụ iwhe l’ịi-bụ.

Nwanyị, l’eri ogori bụ ishi ndzụ ghu bẹ l’ọochi nta iya.

²⁷?Oo nweru onye l’a-gụru ọku ye l’ẹkpa obu iya,

T’ọku be eke uwe iya?

²⁸?Oo nweru onye l’e-je ije l’ọku icheku-ọku,

T’ọku be eke iya ọkpa?

²⁹O nokwa g’ọ dụ onye yẹle

nyee nwoke ibe iya l’azẹe ndono.

Onye l’akpabashị nyee nwoke ibe iya b’a ta ahakwa ẹwoma.

³⁰Onye bụ l’ẹgu l’agụ iya, o je ezhita iwhe ria,

bẹ ndu madzụ ta akwatakwa ekfubyishi.

³¹Ọle ẹka kparụ iya bẹ l’ọotoo kpọshikwa t’ọ bọ kfụ

ụgwo iwhe ono, o zhitaru ugbo ẹsaa,

Oberu o je l’a-tụko iwhe o

nweru l’ụlo iya rekota gude kfụa ya.

³²Ọle nwoke l’ejekfu nyee nwoke ibe iya azẹe bẹ égò sweru,

Nkele onye l’eme nno bụ onwiya bẹ l’oomebyi.

³³Urwu, l’oorita iya bụ ẹka agbagba-nchị

yẹle iwhe-iwhere, l’eemeje iya,

Ejo iwhe-iwhere, o meru onwiya

bụru iwhe l’ẹte ehufubaa ehufu.

³⁴Nkele ọo okoowhoo nwanyị

l’akpatsuje nwoke ẹhu-eghughu,

T’ọ whụje imiko, m’ọ bya

l’emelata onye jekfuru nyee ya.

³⁵Tọ dụ iwhe e gude aryọ iya dụ ọwhu ọ bya l’a-nata,

Tọ dụ m’oberu ị nụ iya gụnu t’o

woru nke mmaanụ, ọ bya l’e-byi iya ẹka.

Ọkwa, l’aanmarụ ndu l’akpa lẹ nwanyị-ọkpara

¹Nwa mu; meje okfu mu.

Woru iwhe mu sụru t’i meje

kwachia akwachi l’ime obu ghu.

²Meje iwhe mu sụru t’i meje ndụge ị nọdu ndzụ,

T’ọ bụkwaru gẹ l’iiletaje nwanggiri-ẹnya ghu ẹnya

bụ gẹ l’ii-leta iwhe mu l’ezhi ghu ẹnya.

³Rwụkua ya arwụku lẹ mkpụshi-ẹka.

Gụ edee ya edede l’ime obu ghu.

⁴Kfuru mmamagụ l’ọ ya bụ nwune ghu nke nwanyị.

Gụ ekua ọkwa-ẹnya ẹguru ọnya ghu.

⁵Ọo whẹ l’e-me t’ị ba anọ akụ

nwanyị, bụ o-kwe-l’ẹka-nwe-iya ẹhu,

Mbụ nwanyị-ọkpara yẹle ire mẹchemeche ono,

l’oogudeje eduwhu madzụ.

⁶Sụa, mu shi lẹ windo ụlo mu pyofu ẹnya,

Mbụ lẹ mu shi lẹ ntufu ụlo mu lee ẹnya l’etezhi,

⁷Whụ ẹka ndu l’ẹte ama iwhe dọru,

Mu leru ẹnya l’echilabọ ụnwu okorọbya whụ,

L’o nweru onye ọwhu égò sweru,

⁸shiru echi-ụzo ọwhu gharụ ẹka nwanyị ogori ono bu,

Mbụ l’o cheru iwhu l’ụzo ẹka ụlo nwanyị ono dụ.

⁹Nteke ono bụwa urwẹnyashi,

gẹ ụboku l’agvụwaa, ọochi l’ekpuwa ẹhu.

¹⁰Tọ dụ iya bụ, nwanyị lanụ fụta byakfutashia ya,

kwaa ngwa g’ọo nwanyị-

ọkpara, gbabẹru iya ẹregede.

¹¹Nwanyị ọbu bẹ wheru akoro,

ọnu te erwu iya l’ẹhu,

ọkpa te egvujeru iya egvuru l’ẹka lanụ.

¹²Ntaantaa bụ l’ọ nọ lẹ wororo echi-ụzo,

ntaantaa bụ l’ọ nọ lẹ nggamgbo-ọha.

Ntufu l’owere lile bẹ l’ookpujeru

achọ nwoke l’ọo-bụru yẹle iya.

¹³O noo ya, ọ bya eduta

nwokorọbya ono tsutsua ya ọnu,

bya egbua iwhu teteretee sụ iya:

¹⁴“Anụ, mu bọtaru lẹ ngwo-ẹja obunggo,

mu shi je egwogwo dụkwa l’uwhu,

ọ kwa ntanụ bẹ mu medzuru iwhe mu riburu lẹ nte iya.

¹⁵Ọo ya meru mu fụta bya tẹ mu leta ẹnya ghu.

Mu chọwaru ghu chọta.

¹⁶Iwhe azẹe mu bẹ mu gudewa ẹkwa,

tụru iwhe poopoo dozhia gẹ l’ọo-dụ,

Mbụ ẹkwa, e kweru lẹ Íjiputu.

¹⁷Iwhe azẹe mu bẹ mu gbakọtaru senti, l’eshi kwẹkwekwe,

Mu gbarụ iya senti mẹru

mẹe senti alowe mẹe senti sinamọnu.

¹⁸Bya t’anyi je azẹe fụta l’ụtsu!

T’anyi je azẹe gude mee onwanyị ẹhu-ụtso.

¹⁹O noo lẹ ji mu ta anọdu l’uwhu,

o jeru ẹka teru ẹnya.

²⁰Ẹda-okpoga iya b’o yejiru

okpoga eyeji gude jeshia ẹka l’ooje.

Nke ọwhu bụ l’ọ -lwadeshia bẹ ọnwa l’e-dzuwa edzu.”

²¹O gudelewho ọnu-ụtso jeye o dota iya,

gude ire mẹchemeche, o nweru duwhua ya.

²²Nteke ono nteke ono, o whukuru tsoru iya

g’ọo eswi, a kpụ eje egbugbu,

mbụ g’ọo ele, l’eje ọnmalahu l’ọnya,

²³Jeye akfụ abụru iya lẹ meji gụrumu.

Mbụ g’ọo ẹnu, l’ewhe eje ẹka, a kụberu etse

Tọ ma lẹ ndzụ iya tseru l’ọnu ogu.

²⁴Ntaa, unubẹ ụnwu mu, unu ngabẹru mu nchị.

Unu tọgbokwa nchị

nggẹ iwhe mu l’ekfuru unu abahụ iya.

²⁵Unu be ezhibekwaru nwanyị ono obu unu,

unu be ewhukwa ụzo, tsolahaa ya.

²⁶Nkele ikpoto madzụ b’o mewaru whẹ daa,

Igweligwe bụru ndu o gburu egbu.

²⁷Ụlo iya bụ echi-ụzo e shi eje alị-maa,

Ọ bụru iya bụ ụzo, l’eeshije eje ẹka

ọnwu gbarụ ugbooshi buru.

Mmamagụ l’eku ghu oku

¹?Tọ dụ oku bẹ mmamagụ l’ekushi ẹgube whọ?

?Tọ dụ ọkwa-ẹnya bẹ olu iya

l’aha gengu-gengu ẹgube whọ?

²Ẹka ọ nọ bụ ẹka tukoru atukoru l’agụga echi-ụzo,

ẹka ọ kfụru bụ lẹ nswịkahu-ụzo.

³Ọ kfụru l’agụga ọnu ẹka l’eeshije abahụ l’ime mkpụkpu,

Ọ nọ lẹ mkpobu ọnoguzo echi mkpu asụje:

⁴“Ọ kwa unubẹ madzụ bẹ mu l’eku,

Ọo unubẹ ndiwhe bẹ mu l’akpọru mkpu.

⁵Unubẹ ndu l’ẹte enwee uche, t’iwhe dojee unu ẹnya.

Unubẹ ndu l’eme eswe, unu kwanụa ẹnya.

⁶Unu ngabẹ nchị nkele iwhe mu l’ekfu bụkwa ọkpobe iya.

Mu saakwaru ọnu tẹ mu kfua iwhe kfụru nhamụnha.

⁷Iwhe l’eshije mu l’ọnu bụ ire-lanụ,

o noo nkele ejire l’adụje mu ashị l’ọnu.

⁸Okfu lile, shi mu l’ọnu bẹ kfụru nhamụnha,

Okfu, gberu nggọ, m’ọ bụ okfu l’akfụaru nhamụnha

te eshijedu mu l’ọnu fụta.

⁹Okfu mu bẹ kfụru akfụru l’ẹnya onye iwhe l’edoje ẹnya,

Mbụ l’okfu mu daburu adaburu l’ẹnya ndu marụ iwhe.

¹⁰Hatachikwa mba, mu l’abarụ ghu amamẹ mkpọla-ọcha.

Hatachikwa ọmaru iwhe amamẹ ọkpobe mkpọla-ododo.

¹¹Nkele mmamagụ kakwa oore

ire karụ ẹwhuru, vu oke ọnu aswa.

Ọ tọ dụdu iwhe l’agụ ghu nụ, a bya l’aa-tụberu iya.

¹²Mbẹdua, bụ mmamagụ bẹ mu lẹ

ọkwa-ẹnya bukwa l’ẹka lanụ.

Mu marụ iwhe; marụ oye ọnu ree l’okfu.

¹³Iwhe bụ l’aatsụ egvu Onye-Nwe-Ọha

bụ l’aakpọru ejo-iwhe ashị.

Iwhe dụ mu ashị bụ oku onwonye eku

mẹe otu onwonye nwọha-gẹ-l’ọoha,

mẹe oome ejo-iwhe mẹe okfu iwhe l’akfụaru nhamụnha.

¹⁴Ọkpobe idzu yẹle mmamagụ bụ nkemu,

ọkwa-ẹnya yẹle ike bụkwaruwho nkemu.

¹⁵Ọo mụbe mmamagụ bẹ ndu eze gude achị,

ndu bụ ishi gude mu aatụ iwu, kfụru nhamụnha.

¹⁶Ọ bụru mu bẹ ndu ishi gude nọdu l’oshi-eze whẹ,

mẹe iwhe bụ ndu nweru ẹnya, l’achịkaa ụnwu eliwhe

¹⁷Ndu yeru mu obu bẹ mu yekwaruwho obu,

tẹmenu whẹ l’achọ-vuje mu mbụ ndu l’achọ mu nụ achọshi mu ike.

¹⁸Onweru iwhe yẹle ọkwabe ugvu

bụkwa l’ẹka mu bẹ l’aa-whụ iya,

Mbụ l’ẹku ọwhu l’ẹte agvụ

agvụ mẹe iwhe dụ chịriri

bụkwa mu b’ọ dụkota l’ẹka.

¹⁹Urwu, l’eerita mu l’ẹka ka ree karụ ọkpobe mkpọla-ododo.

Iwhe shi mu l’ẹka ka ree karụ ọkpobe mkpọla-ọcha.

²⁰Ụzo ọwhu mu l’etso bụ ụzo, dụ chịriri,

Iwhe bụ ẹhu mu bụru t’e

mee iwhe l’ụzo, kfụru nhamụnha.

²¹Ndu yeru mu obu bẹ mu l’emeje tẹ whẹ baa ụba,

mu l’emeje t’ụlo-ẹku whẹ ji eji.

²²Ọo mụbe mmamagụ bẹ Onye-Nwe-Ọha vugezhia ụzo mee.

Ọ mu bụ ozhi ivurụzo, o jeru nteke ndụ-ichee.

²³E mehawaru mu dobe nteke l’ẹte amaa,

lẹ mbụlembu rọ, tẹmenu e mede mgboko.

²⁴Nteke oke-ẹnyimu l’ẹte adụa bẹ mu fụtawaru.

Mu nọhawaa nteke l’adụa ọgba mini nọnu.

²⁵Tẹmenu e mee ugvu dobegee l’ọnodu iya,

mbụ lẹ tẹmenu e mee ugvu,

hagee nwanshị bẹ mu fụtahawaru.

²⁶Mu fụtaadaru tẹmenu Onye-Nwe-Ọha

mee eliwhe yẹle mgboko ẹgu dụ-gee ya nụ,

mbụ lẹ mu fụtaadaru tẹmenu e mee ẹja, dụ l’alị.

²⁷Mu nọkwa l’ẹka ono nteke Onye-Nwe-Ọha meru igweli dobe,

mbụ nteke o meru akpamigwe o whuze je agẹe ọnu l’oke-ẹnyimu.

²⁸Mu nọ nteke o meru urwukpu dobe,

nọdu nteke ọ gbafuru ọgba,

mini ime alị shi asọfuta lẹ mgboko,

²⁹mẹe nteke ọ kparụ eze-ẹnyimu oge,

nke ọwhu mini iya l’ẹte asọghata l’ẹka ọ sụru t’ọ sọ-beru.

³⁰Nteke ono bụkwa mụbe

mmamagụ bụ nnajị,

shi anọje iya l’agụga

emeru iya nka.

Mu shi emeje ẹhu atsọ iya ụtso mbọkumboku,

Mu l’anọjekwawho ete ẹswa l’iwhu iya nteke nteke.

³¹Mgboko, o meru l’emeje; ẹhu atsọ mu rịkporikpo.

Madzụ l’owhu dụkota mu ree.

³²Ọo ya bụ, unubẹ ụnwu mu, unu ngabẹru mu nchị!

Ẹhu-ụtso bụ nke onye l’etso ụzo mu.

³³Unu ngabẹ nchị nụa mba,

mu l’abarụ unu nggẹ unu amarụ ágụ.

Unu agwọkwa iya lẹ ntụ.

³⁴Ẹhu-ụtso bụ nke onye ngabẹru mu nchị l’olu,

onye l’anọje l’ọnu mgbo mu eche nche mbọkumboku,

mbụ onye l’anọje l’ọnu ụlo mu ngabẹru mu.

³⁵Nkele onye chọru mụbe

mmamagụ chọta, bụkwa ndzụ b’ọ chọtaru.

Tẹmenu onye ono bụakwa onye tụbaru Onye-Nwe-Ọha l’ẹnya.

³⁶Ọle onye l’adụa ike chọ-vu mu bụ onwiya b’o butaru.

Iwhe bụ ndu kpọru mu ashị bụru ọnwu dụ whẹ ree.”

Mmamagụ l’eku oku; ome eswe l’eku

¹Mmamagụ bẹ tụwaru ụlo iya.

Ọ waru itso ẹsaa kpọbe iya.

²O gburu anụ shishia sụbe, gwaa mmẹe,

bya eshishia nri dobe,

³O zhiru ụnwumgboko, l’ejeru iya ozhi;

whẹ je akfụru eku oku.

Ẹka whẹ je akfụru bụ ẹka kagezhia l’eli lẹ mkpụkpu ono ekushi oku asụje:

⁴“T’iwhe, bụ ndu l’ẹte amarwetaa iwhe bata l’ụlo l’ẹka-a!”

A bya lẹ ndu égò sweru, ọ sụ whẹ:

⁵“Unu bya eria nri, mu shiru,

ngụa mmẹe, mu gwarụ.

⁶Unu haa be enwe égò ono,

unu l’ẹte enwee ono bya anọdu ndzụ.

T’iwhe dojee unu ẹnya.

⁷Onye l’abarụ onye ewenu mba

bụkwa onye l’e-me iya iwhe iwhere bẹ l’ọocho.

Onye l’alọ onye ejo-ememe

ẹka lẹ nchị bụru ọko ọnu bẹ l’ooku oku.

⁸Ba abajẹkwaru onye ewenu mba;

ọdua bẹ l’ọo-kpọkwa ghu ashị.

Bachiaru onye marụ ágụ mba; gụ awhụ l’oo-ye ghu obu.

⁹L’ọo onye marụ ágụ ẹka lẹ nchị; gụ awhụ l’ọo-kabaa ọma agụ.

Zhia onye-dụ-chịriri iwhe; ya akabaa ọnwuta iwhe.

¹⁰Ọ kwa ọtsu egvu Onye-Nwe-Ọha bụ ogbube ishi mmamagụ.

Ọmaru onye ono, dụ Nsọ bụru iya bụ iwhe oodo-ẹnya.

¹¹Nkele ọo mụbe mmamagụ l’e-me t’i kaa nka.

Mu l’e-me t’e yekwabaaru ghu awha lẹ nwa awha ole ị gẹge anọ lẹ mgboko.

¹²Ị -marụ ágụ; mmamagụ ghu ono ebua ghu obunggo.

Nteke ị bụ onye ewenu; ya abụru ghu nwẹka ghu l’e-je iwhe-ọtsulanu dụ iya nụ.”

¹³Olu nwanyị ono bụ iya bụ ome eswe l’anọjekwa aha gengu-gengu.

Ọ bụ onye l’ẹte ahụ̀a àhụ̀hù; t’ọ ma iwhe.

¹⁴Ẹka l’oojeje anọdu bụ lẹ mgboko ọnu ụlo iya,

Ẹka l’ọosugabeje onwiya bụ l’ẹka kakọta l’eli lẹ mkpụkpu.

¹⁵Ẹka ono b’ọ nọ eku ndu l’aghata aghata oku,

mbụ ndu cheberu ẹka whẹ cheberu, eje iwhe whẹ l’eje.

Ọ sụru whẹ:

¹⁶“Unubẹ ndu l’ẹte amarweta iwhe bata l’ụlo l’ẹka-a!”

O be lẹ ndu égò sweru; ọ sụ whẹ:

¹⁷“Mini, e zhitaru l’oshi l’adụjekwa ree.

Nri, e riru lẹ mpya bụru iya kage ụtso!”

¹⁸Ọle whẹ ta amadụ l’ụnwu-maa dọru l’ẹka ono,

lẹ ndu ono, byarụ ọza oku bẹ nọwaa l’alị-maa anọno.

Ẹtu, Sólomọnu nmashịru

¹Ọ waa bụ ẹtu, Sólomọnu nmashịru:

Nwata marụ ágụ l’emeje

t’ẹhu tsọo nna, nwụru iya nụ ụtso.

Ọle nwa, l’eme eswe bụ áwhụ tsọru ne iya.

²Ẹku, a kparụ l’ụzo l’adụa ree ta adụkwa urwu, ọ barụ.

Ọle ome iwhe l’ụzo, dụ chịriri l’adzọfutaje madzụ l’ọnwu.

³Onye-Nwe-Ọha ta ahajẹkwa onye-dụ-chịriri t’ẹgu mee ya.

Ọle onye ejo-ememe bẹ l’ooto kwejedu t’iwhe, l’agụ iya nụ rwube iya ẹka.

⁴Ẹka, l’adụa ike ozhi l’atụje madzụ ụkpa.

Ọle ẹka, l’ese anya l’emeje t’a baa ụba.

⁵Onye l’akpatajẹ iwhe ọ kọru

dokobe edokobe l’ọnanwu bụ nwa nweru uche.

Ọle onye l’eku mgbẹnya

l’ọ-kpa-ji bụ nwa l’eme onwiya iwhe-iwhere.

⁶Ọnu-ọma bụ okpu-eze, onye-dụ-chịriri kpu l’ishi.

Ọle onye ejo-ememe bụ okfu ẹhuka l’adụje iya l’ọnu.

⁷Ọobuje a nyata onye-dụ-chịriri; ẹhu atsọ ụtso.

Ọle ẹwha onye ejo-ememe bẹ

azọha iya ta adụdu iwhe l’ọobuje.

⁸Onye marụ ágụ l’ime obu iya

l’emeje iwhe a tụru l’iwu t’e mee.

Ọle onye l’ekfu jolajola l’alajẹ l’iswi.

⁹Onye ire-lanụ bẹ l’akpa lẹ ntụsaru-ẹhu.

Ọle onye ntuwhu bẹ ẹka l’a-kpanụ-a.

¹⁰Onye l’ajiburu onye ọdo ẹnya

l’eme t’onye ọbu daba lẹ nsogbu.

Tẹmenu onye l’ekfu jolajolajola l’alajẹ l’iswi.

¹¹Ọnu onye-dụ-chịriri bụ ẹnya mini, l’anụ ndzụ.

Ọle onye ejo-ememe bụ okfu ẹhuka l’adụje iya l’ọnu.

¹²Ndụmashi l’akpatsu esemokfu.

Ọle n-yemobu l’ekpuchije iwhe-dụ-ẹji g’ọ ha.

¹³Onye iwhe l’edoje ẹnya bẹ okfu mmamagụ l’eshije l’ọnu.

Ọle onye égò sweru bẹ

ẹchachi l’a-da iya

l’okpurukpu nọwa swiru.

¹⁴Ndu marụ ágụ l’akwakọbeje iwhe whẹ marụ akwakọbe.

Ọle ndu eswe bụ ọnu l’eshi whẹ eshi l’ewotajeru whẹ nsogbu.

¹⁵Ẹku bụ iya l’ekpuchije onye nweru iwhe.

Ụkpa bụru iya l’emebyije onye ụkpa-nri.

¹⁶Iwhe e gude ebu ndu-dụ-chịriri obunggo bụ ọkpobe ndzụ.

Ọle okpoga ndu ejo-ememe

l’akpata bẹ l’alọjeru whẹ ẹka ye l’ome iwhe-dụ-ẹji.

¹⁷Onye l’angabẹje nchị lẹ mba,

l’aabarụ iya bụkwa ụzo ndzụ bẹ l’ooshi.

Ọle onye l’abụje, a -hụ̀ iya

àhụ̀hù ya adụ iya ashị l’ewhu ụzo.

¹⁸Onye kpọru madzụ ashị; l’oome

t’a ba ma bụ onye ejire b’ọ bụ.

Tẹmenu onye l’asụ asụlasu bụ onye eswe.

¹⁹Okfu -paa l’igwe ẹjo iya etsoru iya.

Ọle onye kwarụ ẹnya l’akwajẹ ire iya ngga.

²⁰Okfu onye dụ chịriri l’eguje egu g’ọo ọkpobe mkpọla-ọcha.

Ọle ọriri onye ejo-ememe ta akwatadu aga lẹ mkpa.

²¹Olu-okfu onye-dụ-chịriri

l’emeje t’ẹwho ji ndu ha l’igweligwe.

Ọle ndu eswe l’anwụhuje lẹ be nwe uche.

²²Ọnu-ọma nke Onye-Nwe-Ọha l’emeje t’e nweru iwhe.

Ọ tọ dụdu iwhe-ọtsu-ude, l’ooyekobeje iya.

²³Ome ejo-iwhe bẹ bụ iwhe l’adụje onye eswe ree.

Mmamagụ bụru iwhe l’adụje onye iwhe l’edoje ẹnya ree.

²⁴Onye ejo-ememe bụ iwhe l’ọotsu

egvu iya l’e-megee byarụ iya.

Ọle onye-dụ-chịriri bụ iwhe l’agụ iya nụ bẹ l’ee-meru iya.

²⁵Ọo gẹ oke-whẹrewhere l’ewheje

whebua bụ g’onye ejo-ememe l’a-bụru nyongu.

Ọle onye-dụ-chịriri l’eshihuje dịmudimu jeye lẹ gbururu.

²⁶Ọo gẹ mmẹe, shihuru ụka l’adụje l’eze,

bụru g’ẹnwuru-ọku l’adụje l’ẹnya

o noo g’onye ẹgali l’adụje onye l’ezhi iya ozhi.

²⁷Ọtsu egvu Onye-Nwe-Ọha l’akpọlibejeru ndzụ.

Ọle onye ejo-ememe bẹ ndzụ iya l’abụje kpiridamu.

²⁸Iwhe onye-dụ-chịriri l’ele ẹnya iya bụ ẹhu-ụtso.

Ọle iwhe ẹnya dụ onye ejo-ememe

l’emegejee bụru nke mmaanụ.

²⁹Otso ụzo nke Onye-Nwe-Ọha

bụ iwhe l’edomije ndu-dụ-chịriri,

bụru iya bụ iwhe l’emeje

tẹ ndu l’eme ejo-iwhe bụru kpurupyata.

³⁰Onye-dụ-chịriri bẹ l’aa-byakwaa l’enwubata enwubata.

Ọle ndu ejo-ememe ta abyadụ l’anọgburu l’alị ono.

³¹Iwhe l’eshije l’ọnu onye-dụ-chịriri fụta bụ mmamagụ.

Ọle ire, l’akfụaru ọto bẹ l’ee-megee dọ-bufu.

³²Onye-dụ-chịriri l’amajẹ okfu l’ookfu t’ọ tsọo nchị ụtso.

Ọle onye ejo-ememe bẹ okfu iya

l’anọje agba ẹnwirinwa lẹ nchị.

¹Onye gude iwhe l’edzua edzu atụ iwhe

bẹ Onye-Nwe-Ọha kpọkwaru ashị.

Ọle iwhe l’adụje iya ree bụ iwhe a tụru, ọ dụ nhamụnha.

²Oku onwonye eku l’abya, iwhe-iwhere etsoru iya.

Ọle iwhe l’etsoje ome odoo bụ mmamagụ.

³Iwhe l’edu ndu obu gụru iwhoro bụ ire-lanụ.

Ọle iwhe l’emebyije ndu l’ete

egudee ire whẹ ẹka bụ ntuwhu-ire whẹ.

⁴Mbọku Chileke l’e-goshi oke ẹhu-eghughu iya

bẹ ẹku madzụ kparụ tee eyeduru iya ẹka.

Ọle iwhe l’a-dzọfuta madzụ l’ọnwu bụ ọdu-chịriri iya.

⁵Ọdu-chịriri nke onye ụta l’adụa

lẹ ndzụ iya l’atọgbojeru iya ụzo nhamụnha.

Ọle iwhe l’akwatsuje onye ejo-ememe

bụ iwhe-dụ-ẹji, l’oome.

⁶Ọdu-chịriri onye obu gụru iwhoro l’anafụtaje iya.

Ọle onye l’ete egude ire iya ẹka bụ ẹgu ejo-iwhe,

l’agụ iya nụ l’anmajẹ iya g’ọo ọnya.

⁷Ndu ejo-ememe -nwụhu,

iwhe whẹ l’ele ẹnya iya etsoru whẹ nwụhu.

Iwhe lile, bụ iwhe whẹ gbarụ égò iya lẹ whẹ l’e-gude ike

whẹ mee abụru iwhe mmaanụ.

⁸Onye-dụ-chịriri bẹ l’aanafụtaje l’iwhe-ọtsulanu.

Iwhe-ọtsulanu ọbu eje atukoru onye ejo-ememe l’ishi.

⁹Onye l’ete eme ele Chileke bụ okfu ọnu bẹ l’oogudeje

emebyishi madzụ ibe iya.

Ọle ndu-dụ-chịriri bụ ọkwa-ẹnya whẹ l’anafụtaje whẹ.

¹⁰Ọobuje iwhe kweru

onye-dụ-chịriri, ndu bu lẹ mkpụkpu ete ẹswa.

Nteke onye ejo-ememe nwụhuru, ndiwhe atụa okoo.

¹¹Ọnu, onye obu gụru iwhoro

gọru mkpụkpu l’akwọ-lije iya.

Ọle okfu-ọnu onye ejo-ememe l’emebyije iya emebyi.

¹²Onye l’ete enwee uche l’akpọje

madzụ ibe iya ẹbo-ẹbo l’afụ.

Ọle onye kwarụ ẹnya l’akwajẹ ire iya ngga.

¹³Onye asụlasu l’ekfuje iwhe l’eeme l’edomi.

Ọle onye e gude ire iya ẹka

l’edomije iwhe dụ nke edomi.

¹⁴Mba, l’ẹte akpọ-zhiru ụzo l’adajẹkwa.

Ọle ọha, a dụ l’igwe akpọ-zhiru ụzo, l’awafụje.

¹⁵Onye narụ onye l’ọoto maa

mkpalẹka bẹ jenwujekwa ẹhu.

Ọle onye jịkaru obyi ẹka l’ẹkwo sụ t’e jee madzụ ụgwo

ta adụkwa iwhe l’e-me iya nụ.

¹⁶Nwanyị, l’eme odoo bẹ l’enweje ùgvù.

Unwoke, l’achọ iwhe l’ike l’enweje ẹku.

¹⁷Ome-iwhe-ọma meru doberu onwiya.

Onye ẹhuka l’emetaru onwiya iwhe-ọtsulanu.

¹⁸Ndu ejo-ememe te enwedu urwu, whẹ l’erita iya.

Ọle onye l’eme iwhe dụ chịriri bẹ urwu dụru iyẹ ya.

¹⁹Onye gude obu iya sụ l’iya l’a-dụ chịriri bẹ ndzụ l’a-dụ.

Ọle onye hatarụ ome ẹji bẹ ọnwu l’e-gbu.

²⁰Ndu obu dụ ẹji bẹ Onye-Nwe-Ọha kpọru ashị.

Ọle ndu l’eme ree bẹ l’adụje iya ree shii.

²¹Makwarụ amarụ lẹ ndu

ejo-ememe bẹ l’ẹte ahadụ ẹwoma.

Ọle ndu-dụ-chịriri ta adụdu iwhe bya l’e-me whẹ nụ.

²²Nwanyị, l’amashị ụma ike; t’ọ ma oye ọnu l’okfu dụ

g’ọo echi mkpọla-ododo, e yeru ezhi l’imi.

²³Iwhe l’agụ onye-dụ-chịriri l’asụbeje ishi lẹ nke ọma.

Ọle iwhe ndu ejo-ememe l’ele ẹnya iya l’asụbeje ishi

l’oke-ẹhu-eghughu, Chileke l’a-tụfuru whẹ.

²⁴Onye l’asa ẹka asa bẹ iwhe iya l’anọje aka shii eje eje.

Ọle onye mkparaswị l’emegejee bụru onye ụkpa.

²⁵O-me-l’uko bẹ ẹka l’a-nọ atụ atụtu.

Onye l’agbajẹ ibe iya mini l’obu

bẹ l’aa-gbakwawhọ mini l’obu.

²⁶Onye l’ebuje ereshi gbachishia l’iwhe ngabẹru

nteke aswa iya l’a-ka shii bẹ ndiwhe l’anọje eburu ọnu.

Ọle onye reru nkiya l’òge iya bẹ l’aanọje aja ajaja.

²⁷Onye l’achọ ụzo iwhe ọdu ree bẹ l’atụbaje Chileke l’ẹnya.

Ọle onye l’achọ ụzo ejo-iwhe bẹ ejo-iwhe l’abyakfutaje.

²⁸Onye kpọru obu ye l’ẹku iya l’a-dakwa.

Obenu l’onye-dụ-chịriri l’a-nọ aja ajaja g’ọo ẹkwo oyii.

²⁹Nwoke l’akpa okfu edoberu ndibe iya bụ whẹrewhere

l’e-megee bụru oke-iwhe iya.

Onye l’eme eswe l’e-mege bụru

onye l’ejeru onye marụ ágụ ozhi.

³⁰Mebyi, onye-dụ-chịriri l’amị

bụkwa oshi l’emeje t’a nọdu ndzụ.

Ọdo bụ l’onye l’adụje ike kfubuta madzụ bụ onye marụ ágụ.

³¹Ọ -bụru l’aakfụje

onye-dụ-chịriri ụgwo iwhe l’oome lẹ mgboko-o;

o nokwawhọ gẹ l’aa-kfụ iya onye l’ete eme ele Chileke

yẹle onye l’eme iwhe-dụ-ẹji, kfụa whẹ iya nkfungo.

¹Onye l’aabarụ mba, ọ dụ iya ree

bụkwa amamiwhe dụ iya ree.

Ọle onye l’aahụ̀ àhụ̀hù ọ dụ iya ashị ta amadụ iwhe.

²Ọkpobe madzụ bẹ l’adụje Onye-Nwe-Ọha l’obu.

Ọle onye l’arịru madzụ gẹ l’ọodua

bẹ Onye-Nwe-Ọha l’anmajẹ ikpe.

³Madzụ ta abụdu ome ejo-ememe b’o gude echekwa onwiya.

Ọle onye-dụ-chịriri ta adụdu onye bya l’a-vụ iya l’ọgvu.

⁴Ọkpobe nwanyị bụkwa okpu-eze, ji iya kpu l’ishi.

Ọle ejo nwanyị dụ g’ọo ọkpu erehu, dụ ji iya l’ẹhu.

⁵Iwhe ndu-dụ-chịriri tụberu ememe

l’abụje iwhe kfụru nhamụnha.

Ọle idzu ndu ejo-ememe

l’achị-koshi madzụ ibe whẹ l’abụkotaje ụgho.

⁶Okfu onye ejo-ememe l’anọje achọ onye ogeta ishi.

Obenu l’olu-okfu ndu obu gụru iwhoro l’adzọje madzụ.

⁷Ndu ejo-ememe l’e-kpu iwhu l’ogiri, akọ whẹ eje adụhe.

Ọle ọzo-ụlo ndu-dụ-chịriri l’ekejeru ọkpa.

⁸Ọo gẹ madzụ mataberu iwhe bụ gẹ l’aajabejeru iya ajaja.

Ọle onye uche gbagọru agbagọ bẹ l’ẹte agụbejedu iwhe.

⁹Ọ kakwa ree l’ị bụ onye l’adụa iwhe ị bụ l’ẹnya ndu ọdo,

ị nọdu ese anya ẹhu ghu,

amamẹ l’i pagoberu onwoghu apagobe, ẹgu l’egbu ghu.

¹⁰Onye-dụ-chịriri l’eletaje élwù, o nweru ẹnya.

Ọle ndu ejo-ememe l’anọje eshiru iya mgbashị.

¹¹Onye kọru okfu l’alị iya

l’e-nweru nri nweru iya nke etsutsu.

Ọle onye l’adagbushi onwiya eme

iwhe mkpa iya l’adụa te enwedu uche.

¹²Ndu ejo-ememe bẹ bụ iwhe ndu l’eme ejo-iwhe narụ lẹ nfụ

l’anọje agụ whẹ ẹgu.

Ọle ọgbaragbu onye-dụ-chịriri l’anọje asọ nyabanyaba.

¹³Onye ejo-ememe bẹ ejo-ekfukfu,

l’oogudeje ọnu iya ekfu l’anmajẹ iya g’ọo ọnya.

Ọle onye-dụ-chịriri l’anahụje iwhe-ọtsulanu.

¹⁴Madzụ l’egudeje okfu-ọnu kfutaru onwiya iwhe-ọma.

O nokwawho gẹ l’oogudeje iwhe l’oome l’ẹka

metaru onwiya obunggo.

¹⁵Iwhe onye eswe l’eme l’adụje iya ree l’ẹnya nkiya.

Ọle onye marụ ágụ l’angabẹje

nchị l’idzu, l’aachị-koshi iya.

¹⁶Onye eswe l’abụje: iwe l’ewe iya, ya emeru goshi

l’iwe l’ewe iya nteke ono nteke ono.

Ọle onye nweru uche ta adụdu

iwhe ọ gụberu ọnu, l’aakọ iya.

¹⁷Onye ẹka-ebe, l’ọogba bụ ire-lanụ

bẹ okfu iya l’akfụjeru nhamụnha.

Ọle onye ejo ẹka-ebe bẹ ejire l’apajẹ ẹka.

¹⁸Okfu dafụru madzụ l’ọnu l’ẹbe ọ rịa iya arịri kfua

bẹ l’adzụje pụrumu g’ọo ogu-ịgba.

Ọle okfu onye marụ ágụ l’eguje ẹhu egu.

¹⁹Ire-lanụ l’anọje jeye lẹ gbururu.

Ọle ejire ta adụdu gẹ l’ọono-beje.

²⁰Ndu l’achị ejo idzu bẹ ụgho jiru obu eji.

Ọle ndu l’achị idzu ẹhu-guu

bẹ nweru ẹhu-ụtso l’ime obu nkewhe.

²¹Ọ tọ dụdu ejo-iwhe, l’emeje onye-dụ-chịriri.

Ọle ndu ejo-ememe bẹ iwhe-ọtsulanu l’ejije ẹhu.

²²Ogboromọnu, l’adzụ ejire

bẹ Onye-Nwe-Ọha kpọru ashị.

Ọle ndu l’eme gẹ whẹ kfuru l’adụje iya ree.

²³Onye nweru uche ta

aryakashịjedu iwhe ọ marụ aryakashị.

Ọle ndu eswe l’anọje avọshi okfu irogiri.

²⁴Onye gude ẹka iya eseba eseba l’e-megee bụru ishi.

Ọle onye l’eme ẹnyiru l’e-megechaa bụru ohu.

²⁵Ọku walaa l’emeje tẹ madzụ ba ama urwu ẹhu iya.

Ọle okfu ọma l’emeje tẹ l’oobu jamụ-jamụ.

²⁶Onye-dụ-chịriri l’egoshije ndu ọnya ọkpobe ụzo.

Obenu l’onye l’eshi ụzo ndu ejo-ememe l’e-whu ụzo.

²⁷Onye ẹgali ta atajẹdu nshi hụa anụ, o gburu lẹ nta ahụ.

Ọle onye l’ese ẹza l’e-nweta iwhe vu aswa shii.

²⁸Ụzo, ome iwhe dụ chịriri bụ ụzo ndzụ.

Ọnwu ta adụdu iya ilile.

¹Nwa, marụ ágụ, l’angabẹje nchị l’iwhe nna iya l’ezhi iya.

Ọle onye ewenu ta angajẹdu nchị lẹ mba, l’aabarụ iya.

²Madzụ l’egudeje okfu,

shi iya l’ọnu kfutaru onwiya iwhe-ọma.

Ọle onye l’ete egudee ire iya ẹka

bụ ome iwhe-ike l’anọje agụ iya.

³Onye l’eche ọnu iya eche bẹ bụ ndzụ iya bẹ l’ooche eche.

Ọle onye l’ekfu g’ọnu ha iya l’e-megee bụru sworyodoo.

⁴Onye ẹgali bẹ ẹkpiri l’adụnukaje,

ọle iwhe te erwujedu iya ẹka.

Ọle onye l’ese anya bẹ iwhe l’agụ iya nụ l’erwuje ẹka.

⁵Onye-dụ-chịriri bẹ ejire l’adụje ashị.

Ọle onye ejo-ememe bẹ bụ

iwhe-iwhere yẹle omechishi madzụ iwhu bụ ẹhu iya.

⁶Iwhe l’echekwa onye ụta l’adụa lẹ ndzụ iya bụ ọdu-chịriri.

Ọ bụru ome ejo-ememe bẹ l’akwatsuje onye l’eme ẹji.

⁷Ụwhodu l’anọje eme gẹ whẹ nweru iwhe,

ya eje aadụkwanu iwhe whẹ nweru.

Ụwhodu l’anọje eme gẹ whẹ bụ ndu-ụkpa,

whẹ enwekwaru nụ iwhe nweshia ya ike.

⁸Ẹku, madzụ kpatarụ l’a-dụkwa ike gbata ndzụ iya.

Obenu l’onye ụkpa te enwedu onye l’eye iya egvu.

⁹Ndu-dụ-chịriri bẹ iwhoro whẹ l’angakọtaje ẹka lile.

Ọle ndu ejo-ememe bẹ iwhoro

nkewhe l’anọje anyịhu anyịhu g’ọo ọku oryọku.

¹⁰Ọonya obu kiti kiti bẹ l’anọje azụshi ọba mba.

Ọle ndu ngabẹru nchị l’idzu,

l’aachị-koshi whẹ bụ ndu marụ ágụ.

¹¹Okpoga, a kparụ l’ụgho l’alajẹkwa miimii.

Ọle ọwhu, a tọ nwẹhu akpa l’anọje aka shii eje eje.

¹²Iwhe madzụ leru ẹnya iya nọo

ọdu l’emeje obu awa iya mini.

Ọle iwhe l’agụ madzụ, o rwua ya

ẹka bẹ l’adụje g’ọo oshi l’anụ ndzụ.

¹³Onye l’akpọha ọolo ẹka lẹ nchị

akpọha l’e-je iwhe-ọtsulanu.

Ọle onye l’emeje iwhe a sụru t’e mee bẹ obunggo iya dụru.

¹⁴Iwhe onye marụ ágụ l’ezhi dụ

g’ọo ẹka mini, l’anụje ndzụ futaru.

Oomeje tẹ madzụ ba daba l’ọnya, anwụhu kweberu.

¹⁵Onye, nweru uche l’adụje ndiwhe l’obu.

Ọle onye l’ete egudee ire iya ẹka bẹ umere iya l’adụje ẹhuka.

¹⁶Iwhe bụ onye nweru égò

l’egudeje ọkwa-ẹnya eme iwhe lile, l’oome.

Ọle onye eswe l’ewojeru ome eswe iya tụa jalaa.

¹⁷Nwozhi, l’ete egude ire iya ẹka l’adabajẹ l’iwhe-ọtsulanu.

Ọle nwozhi, e gude ire iya ẹka bẹ ẹhu l’adụje guu.

¹⁸Onye l’ewojeru mba, l’aabarụ iya agwọ l’ẹja

l’emegeje bụru onye-ụkpa mẹe onye iwhe-iwhere.

Ọle onye a hụ̀rù àhụ̀hù; ọ nụa ya bẹ l’aakwabẹje ugvu.

¹⁹Iwhe l’agụ madzụ ẹgu -mee bẹ l’ọotsoje obu ụtso.

Ọle ndu eswe te ekwejedu haa oome ejo-iwhe.

²⁰Onye l’atụ ọli lẹ ndu mmamagụ l’a-marụ ágụ.

Ọle onye l’etso ndu eswe l’e-jenwu ẹhu.

²¹Ụkparehu l’anọje etso ndu l’eme iwhe-dụ-ẹji.

Ọle nke-ọma bẹ bụ obunggo ndu-dụ-chịriri.

²²Ọkpobe madzụ l’akpajẹ ẹku

doberu ụnwu nwanwa iya.

Ọle ẹku, onye l’eme iwhe-dụ-ẹji l’akpa

bụ ndu-dụ-chịriri bẹ l’oodoberu iya.

²³Okfu onye ụkpa kọru l’emetaje nri shii.

Ọle be kpe ikpe, kfụru nhamụnha l’atụkoje iya jịpya.

²⁴Onye l’esewhu ẹchachi azụ t’iya

be echi iya nwa iya bụkwa ashị b’ọ kpọru iya.

Ọle onye yeru nwa iya obu l’edoje ẹnya ndo hụ̀a ya àhụ̀hù.

²⁵Onye-dụ-chịriri l’erije nri rijia ẹwho iya.

Ọle onye ejo-ememe be ẹgu l’anọje eme ntekenteke.

¹Nwanyị, marụ ágụ l’anọje edozhi ọzo-ụlo iya edozhi.

Ọle nwanyị l’eme eswe l’anọje alashị nkiya alashị.

²Onye obu gụru iwhoro l’iwhe

l’oome l’anọje atsụ egvu Onye-Nwe-Ọha.

Ọle onye l’aghọ ụgho ta adụdu iwhe ọ gụberu Chileke.

³Onye eswe l’ekfutaje iwhe

ẹchachi l’a-bụru iya l’okpurukpu gbaa.

Ọle ogboromọnu ndu marụ ágụ bụ iya l’anọje echekwa whẹ.

⁴Eswi, e gude eje ozhi l’ẹgu adụa; ọba adaburu karawhongu.

Ọo eswi -jeshia ozhi ike; nri akụru akụru.

⁵Onye ẹka-ebe, e gude ire iya ẹka ta adzụjedu ejire.

Ọle onye ejo ẹka-ebe bẹ ejire l’anọje afụshi l’ọnu.

⁶Onye ewenu l’achọje mmamagụ, ya eje awhụ iya.

Ọle onye iwhe l’edoje ẹnya bẹ ọma iwhe dụ ntse.

⁷Nọdukwa onye eswe otẹnya,

nkele ị tịi byadụ l’anụ iya okfu amamiwhe l’ọnu.

⁸Iwhe l’egoshi l’onye-e nweru égò

marụ ágụ bụ l’ọomaje iwhe gbarụ iya l’ememe.

Ọle iwhe l’egoshi lẹ madzụ bụ onye eswe

bụ l’oogudeje ụgho eme iwhe.

⁹Ndu l’eme eswe l’egudeje ome iwhe-dụ-ẹji atụ lẹ ntọnu.

Ọle ndu obu gụru iwhoro bẹ l’adụje Chileke l’obu.

¹⁰Onyenọnu marụ ẹka, l’ọotsu iya lanụ.

Ọ tọ dụdu onye yẹle ibe iya

gba mgba nweru ẹhu-ụtso lanụ.

¹¹Ọzo-ụlo onye ejo-ememe bẹ l’ee-mebyi.

Ọle ụlo, onye-dụ-chịriri l’a-nọ asọ ọsa eje eje.

¹²O nweru ụzo, bụ madzụ l’eshi

iya, ya abụru iya ọkpobe ụzo.

Ọle ẹka ụzo ono sụ-chiru ishi bụ l’ọnwu.

¹³Je akpagekwa l’ọchi ọchi

bẹ l’aachị-gekwaa iwe adụle l’obu.

Ẹhu-ụtso gvụ áwhụ abya.

¹⁴Onye menyaru iwhe dụ ree, ọ nọnyaa ladẹ azụ azụ

bẹ l’a-whụkwa urwu iya.

Tẹhenu, ndu bụ ọkpobe madzụ

bẹ l’a-nata obunggo iwhe whẹ meru.

¹⁵Onye mapetaru iwhe l’azụkotaje nkwe l’iwhe lile, e kfuru.

Ọle onye nweru égò l’arịjeeda ọriri

tẹhenu ya amarụ ẹka l’oo-ye ọkpa.

¹⁶Onye marụ ágụ l’atsụhuje egvu

Onye-Nwe-Ọha jịka oome ejo-iwhe.

Ọle onye eswe bẹ igiri l’anọje agbanụka,

tẹhenu irogiri l’apajẹ iya ẹka.

¹⁷Onye obu-ọku l’emeje iwhe g’ọo onye eswe.

L’aakpọje onye l’eme nwa akọ akọ ashị.

¹⁸Onye mapetaru iwhe bẹ l’anọje eme eswe eswe.

Ọle onye nweru égò bẹ l’ekpuje amamiwhe g’ọo okpu-eze.

¹⁹Ndu l’eme ejo-iwhe l’ewhuzeje l’iwhu ndu l’eme ree,

Ndu ejo-ememe l’adajẹ pẹe

l’ọnu-ọguzo ndu-dụ-chịriri aryọta iwhe.

²⁰Ndu ụkpa bẹ l’aakpọje ashị,

kpọ-gee kpọo lẹ ndu whẹ lẹ whẹ bu obutobu.

Ọle ndu nweru iwhe bẹ nweru ikpoto ọnya.

²¹Onye, l’ẹte agụbee madzụ ibe

iya iwhe l’emekwa iwhe-dụ-ẹji.

Ọle ẹhu-ụtso bụ nke onye l’emejeru onye ọ byarụ iwhe-ọma.

²²Ndu l’agbarụ madzụ ejo-égo l’ewhukwa ụzo

Ọle ndu l’agbarụ madzụ ọkpobe égò bẹ l’eeyeje obu,

o noo gẹ l’eemejeru whẹ ire-lanụ.

²³Onye l’eseshi anya ike bẹ urwu l’adụjeru.

Ọle onye bụ ọnu b’ọ marụ ekotoshi bẹ yẹle ụkpa l’e-me.

²⁴Ẹku bụ okpu-eze l’eekpubeje onye marụ ágụ.

Eswe bụru okpu onye eswe l’ekpuje l’ishi.

²⁵Onye l’agba ẹka-ebe, bụ ire-lanụ bẹ l’aadzọ ndzụ.

Ọle onye l’agba ẹka-ebe, bụ ejire bẹ l’ere madzụ.

²⁶Ọtsu egvu Onye-Nwe-Ọha bẹ bụ ọda-whube akpaa.

Ọ bụru l’akpaa ono bẹ ụnwu iya l’a-gbabajẹ je ezeeru ndzụ.

²⁷Ọtsu egvu Onye-Nwe-Ọha

bụ ẹka mini, l’anụ ndzụ futaru.

Ọo ya l’emeje tẹ madzụ ba

anmalahụ l’ọnya, anwụhu kweberu.

²⁸Ọo gidigidi bụ ugvu eze.

Ọle oke amadụ, l’ete enwee madzụ bẹ iyi yiru.

²⁹Onye l’atarụ iwhe nshi bẹ iwhe l’edoje iya ẹnya shii.

Ọle onye obu-ọku l’egoshije gẹ l’oomebe eswe.

³⁰Onye obu dụ l’ọru iya bẹ ẹhu l’adụje mma.

Obenu l’ụwhenya l’emeje t’ọkpu, dụ l’ẹhu repyahu.

³¹Onye l’akpa onye ụkpa ẹhu

bụkwa Chileke, meru iya nụ bẹ l’oome kpakpa-wewe.

Ọle onye l’emejeru onye l’adụa g’ọ harụ iya iwhe-ọma

bụ Chileke bẹ l’ọokwabe ugvu.

³²Ejo-iwhe -bya bẹ l’oonwutaje

ndu ejo-ememe kpube iwhu l’alị.

Ọle ndu-dụ-chịriri nweru ẹka whẹ nọ ezeru ndzụ

m’oberu whẹ nwụhu-gezhia anwụhu.

³³Mmamagụ l’adụje l’obu ndu iwhe l’edoje ẹnya ree.

O goshijekwa onwiya l’echilabọ ndu eswe.

³⁴Ọdu-chịriri l’ekutse mba.

Ọle ome iwhe-dụ-ẹji bẹ bụ iwhe-iwhere.

³⁵Onye ozhi, marụ ágụ bẹ l’atụbaje onye eze l’ẹnya.

Ọle onye ozhi, l’emechishi iya iwhu

bẹ l’ootukoshije ẹhu-eghughu iya.

¹Okfu nrwe l’abyanyije ọnuma.

Ọle okfu ẹhuka l’akpalije ọvuma.

²Ire onye marụ ágụ l’emeje

amamiwhe t’ọ dụ ree nke anụnu.

Ọle ọnu onye eswe bẹ bụ

okfu rororoo l’anọje alwa iya gorogoro.

³Ẹnya Onye-Nwe-Ọha dzuru ẹka lile,

onye l’eme ree mẹe onye l’eme ẹji bẹ l’ọowhukota.

⁴Okfu njima l’anụ ndzụ.

Ọle ntuwhu-ire l’etsuje ndzụ pyaapyaa.

⁵Ọo onye eswe l’abụje, nna iya

baarụ iya mba, o too yedu iya ọnu.

Ọle onye a hụ̀rù àhụ̀hù; a hụta iya bụ onye nweru égò.

⁶Ụlo onye-dụ-chịriri bẹ ẹku l’ejije eji.

Ọle onye ejo-ememe bẹ ẹku nkiya l’eyifuje.

⁷Onye marụ ágụ l’aryakajẹ ọkwa-ẹnya aryaka.

Obenu l’obu onye eswe ta adụdu nno.

⁸Ngwo-ẹja, onye ejo-ememe l’anụ

Onye-Nwe-Ọha bụ akpamara l’ẹnya iya.

Ọle ekfukfu, onye obu gụru

iwhoro l’ekfu anụ iya l’atsọje iya ụtso.

⁹Umere ndu ejo-ememe bụ

akpamara l’iwhu Onye-Nwe-Ọha.

Ọle ndu l’eseba tẹ whẹ dụ chịriri b’o yeru obu.

¹⁰Onye harụ oshi ọkpobe ụzo bẹ l’aa-nụ chịikfuu.

Ọnwu je l’a-bụ nke onye ọ dụ ashị l’aahụ̀ iya àhụ̀hù.

¹¹Alị-maa yẹle alị ọla-l’iswi

bẹ gheru karawhongu l’iwhu Onye-Nwe-Ọha.

?Oo gbechia bụru obu madzụ

te egheduru karawhongu l’iwhu iya?

¹²Onye ewenu bẹ àhụ̀hù l’aahụ̀ iya l’adụje ẹji.

O to jejedu ọkpata onye marụ ágụ ishi iwhe.

¹³Ẹhu-ụtso l’emeje t’iwhu tụsahu atụsahu.

Obu-iwe l’etsuje ndzụ pyapyapya.

¹⁴Onye iwhe l’edoje ẹnya ree

l’anọje eme tẹ ya nwụtabaa iwhe.

Ọle onye eswe bẹ bụ ome eswe bụ nri iya.

¹⁵Ndzụ ndu-ụkpa bụ iwhe oshi ike jiru iya.

Ọle ndu nweru ẹhu-ụtso l’eri lẹ gbagee.

¹⁶Ọ kakwa mma lẹ madzụ nweru

iwhe nwanshị l’atsụ egvu Onye-Nwe-Ọha

karụ lẹ madzụ bẹ nweru ẹku shii l’aghamẹhu.

¹⁷Ọ kakwa mma l’eeriru nri,

e gude ẹba shia, e nweru n-yemobu,

amamẹ l’eeriru nri, e gude

anụ, gbarụ ẹba shia, e nweru mkpọmashi.

¹⁸Onye obu-ọku l’akpatsuje esemokfu.

Ọle onye l’atarụ okfu nshi l’abyanyije ụswo.

¹⁹Ụzo, onye ẹgali l’eshi

bẹ l’eegudeje ógvú tọ-chishia atọ-chishi.

Ọle ụzo onye obu gụru iwhoro

l’eshi l’anọje akwọ tụruturu.

²⁰Nwata, marụ ágụ l’emeje t’ẹhu tsọ nna iya ụtso.

Ọle onye eswe ta adụdu iwhe

l’ọogubeje ne, nwụru iya nụ.

²¹Ome eswe l’atsọje onye l’ẹte enwee uche ụtso.

Ọle onye iwhe l’edoje ẹnya ree

bụ iwhe kfụru nhamụnha bẹ l’oomeje.

²²Onye l’ẹte enwee onye mgbazhi

te emekotajedu iwhe ọ gbarụ égò iya.

Ọle onye nweru ndu mgbazhi

l’igwe l’emekotaje iwhe ọ gbarụ égò iya.

²³Madzụ -yee ọnu l’okfu yeta iya ree bẹ ẹhu l’atsọje iya ụtso.

Okfu e kfuru lẹ mgbe iya l’adụje ree.

²⁴Onye marụ ágụ l’etsojeru

echi-ụzo ọwhu l’eduba lẹ ndzụ tututu-mịmimi.

O to shijedu echi-ụzo ọwhu l’eduba l’ọnwu.

²⁵Onye-Nwe-Ọha l’enwutsushije

ụlo onye l’eku onwiya eku.

Ọle oge alị nwanyị, ji iya l’anọhe

bẹ l’ọokpo-whetaje akpọ-wheta.

²⁶Ọgba ejo-égo bụ akpamara l’ẹka Onye-Nwe-Ọha nọ.

Okfu okfu, guru egu bụru iwhe dụ ree l’ẹnya iya.

²⁷Onye eghoro-ẹhu bụ nsogbu bẹ l’oowotajeru ndibe iya.

Onye kpọru n-wọlazu ashị bụru ndzụ l’a-dụ iya.

²⁸Onye-dụ-chịriri l’arịjedaa iwhe l’ookfu arị

tẹhenu ya eyede ọnu l’okfu.

Ọle onye ejo-ememe bẹ ejo-okfu

l’anọje alwashị gụdugudu l’ọnu.

²⁹Onye-Nwe-Ọha nọ ndu ejo-ememe otẹnya.

Ọle ọonuje iwhe ndu-dụ-chịriri l’ekfu anụ iya.

³⁰Ọnu-ọchi l’emeje obu ụtso.

Nzhi-ọma l’eshije ekiri daa enyi.

³¹Onye ngabẹru nchị lẹ mba, a barụ iya,

mbụ mba l’emeje t’a nọdu ndzụ

bẹ yẹle ndu marụ ágụ l’e-megee nọdu l’ọkpoku lanụ.

³²Onye l’adụa iwhe ọ gụberu mba, l’aabarụ iya

bụkwa onwiya bẹ l’ọogubedua iwhe.

Ọle onye bụ, -aahụ̀ iya àhụ̀hù

ya aba iya lẹ nchị l’amajẹ iwhe.

³³Ọtsu egvu Onye-Nwe-Ọha l’ezhije madzụ mmamagụ.

Owozeta onwonye alị vuta ụzo, ọkwabe ugvu etsota iya.

¹Iwhe madzụ l’e-me bẹ l’ọorịje arịri l’obu iya.

Ọle ọo Onye-Nwe-Ọha bụ iya

l’ekfuje ọwhu l’e-bekochaa mee nụ.

²Iwhe lile, madzụ l’eme

l’adụkotaje iya ree l’ẹnya nkiya.

Ọle ọo Onye-Nwe-Ọha marụ iwhe o vu l’obu eme iya.

³Woru iwhe l’iime ye Onye-Nwe-Ọha l’ẹka,

ọo ya bụ iwhe ị tụberu nke ememe,

emee lẹge ị tụberu iya.

⁴Iwhe lile Onye-Nwe-Ọha meru,

b’o nweru iwhe o vu l’obu mee ya.

Ndu ejo-ememe b’o meru doberu mbọku ejo-iwhe-ọtsulanu.

⁵Iwhe bụ onye l’etse etsetse

dụkwa Onye-Nwe-Ọha ashị.

Iwhe l’ịimaru bụ l’aa-ta abyadụ

l’aha whẹ t’a ba anụ whẹ chịikfuu.

⁶Onye yeru Onye-Nwe-Ọha obu

yẹle onye l’ekfu ire-lanụ

bẹ l’ọo-gụru nvụ l’iwhe-dụ-ẹji, o meru.

Onye l’atsụ egvu Onye-Nwe-Ọha bẹ l’ọojifujeru ejo-iwhe l’ụzo.

⁷Nteke iwhe madzụ l’eme dụ Onye-Nwe-Ọha ree

bẹ l’oomegeje, mee tẹ yẹle ndu ọhogu iya dụ lẹ mma.

⁸Ẹku ha nwanshị, a kparụ l’ụzo dụ chịriri kakwa ree,

karụ okpoga ha shii, a kparụ l’ụzo, l’akfụaru nhamụnha.

⁹Iwhe madzụ l’e-me bẹ l’ọorije l’ime obu iya.

Ọle ọo Onye-Nwe-Ọha marụ ụzo atụgburu iya.

¹⁰Okfu onye eze l’adajẹ kpaakpaa

g’ọo ẹka Chileke l’ekfu okfu.

Ọnu ta abajẹ iya mba mẹ l’ookpe ikpe.

¹¹O gude iwhe dzuru edzu atụ iwhe atụ̀tù

bẹ l’adụje Onye-Nwe-Ọha ree.

Ẹrwa iwhe a tụ̀ru ọ dụ nhamụnha bẹ dụkwa iya whọ ree.

¹²Ndu eze l’anọje asọ oome ejo-iwhe asọ.

Iwhe kparụ iya nụ bụ l’ọo oome iwhe-dụ-chịriri

bẹ l’emeje t’oshi-eze kpọru akpọru.

¹³Okfu ire-lanụ l’adụje ndu eze ree.

Onye l’ekfu ire-lanụ bẹ whẹ l’eyeje obu.

¹⁴Ẹhu-eghughu bya onye eze

l’ẹhu bẹ madzụ l’a-nwụhukwa.

Ọo ya meru, onye marụ ágụ

je l’eme iwhe ẹhu l’a-tsọ iya ụtso.

¹⁵Iwhu -tụsahu onye eze, ndzụ adụ madzụ.

Ị -laa onye eze l’ẹhu b’ọ dụ g’ọo ẹka igweli rwuru erwu

nke ọchi mini ishi awha.

¹⁶Ọma agụ kakwa ree karụ onwe mkpọla-ododo.

Ọkwa-ẹnya bụru iwhe ahata amamẹ mkpọla-ọcha.

¹⁷Ndu-dụ-chịriri l’eshije echi-ụzo,

dụ gbororo shi nno nahụ ejo-iwhe.

Onye l’eche ụzo iya eche bụ ndzụ iya bẹ l’ooche eche.

¹⁸Ekuku l’evuru ụzo, ọla-l’iyi etsoru iya.

Nteke otse etsetse vu ụzo, adada etsokwaru iya whọ.

¹⁹Ọ kakwa mma l’i wozeru

onwoghu alị, t’ọ dụ g’ọ harụ ghu,

karụ l’i tso ndu l’etse etsetse eke iwhe whẹ natarụ lẹ nfụ.

²⁰Onye nweru ụzo nchị bẹ nke-ọma l’e-tso.

Ẹhu-ụtso bụ nke onye dakoberu Onye-Nwe-Ọha.

²¹Onye nweru ori-l’ichicho bẹ iwhe l’edoje ẹnya ree.

Okfu ọma, l’ọonoje ekfu bẹ l’emeje

t’a kaba ya ọnwuta iwhe l’ẹka.

²²Mmamagụ bụ ẹnya mini,

l’anụ ndzụ l’ẹhu ndu nweru iya nụ.

Ọle onye eswe bẹ l’aanụje awhụ l’eswe l’oome.

²³Onye marụ ágụ l’agụje okfu l’oo-kfu ọgu.

Okfu, shi iya l’ọnu b’e gude anwụta iwhe.

²⁴Okfu njima dụ g’ọo ụbakala-ẹnwu.

Ooguje ẹhu egugu, mee t’ẹhu dụ madzụ mma.

²⁵O nweru ụzo bụ, madzụ l’eshi

iya ya abụru iya ọkpobe ụzo.

Ọle ẹka ụzo ono sụ-chiru ishi bụ l’ọnwu.

²⁶Ọo iwhe l’agụ onye l’arwụ ọrwu

l’emeje ya akabaa ya arwụru.

Ọ bụru ẹgu, l’agụ iya nụ l’anọje eyeru iya ọku.

²⁷Iwhe onye bụ ejo madzụ

l’eshibeje ite iya bụ ejo iwhe.

Okfu, shi iya l’ọnu l’adụje g’ọo

icheku-ọku, l’enwu kfụkfukfu.

²⁸Onye ẹregede l’anọje akpa okfu.

Onye asụlasu l’ebukahuje ndu l’eshi ọnya eshishi iya ike.

²⁹Ndu l’eme iwhe lẹ mgbashị

l’edotaje madzụ ye l’ome iwhe l’adụa ree.

³⁰Onye l’ajiburu ibe iya ẹnya bụkwa ẹregede bẹ l’ọogba.

Onye tagbabẹru ọnu bụru

ejo-iwhe b’ọ tụberu nke ememe.

³¹Ishi ẹwo bụ okpu-eze, dụ biribiri.

Onye l’oorwubeje ẹka bụ onye buru ndzụ dụ chịriri.

³²Ọ bụru madzụ l’ẹte enwee obu-ọku kakwa ree,

karụ ọ bụru madzụ ka ike l’ọgu.

Mbụ l’onye l’esedeje onwiya nteke

ẹhu l’eghu iya eghu kakwa ree

amamẹ onye l’alwụje ọgu lwụta obodo owhu.

³³Madzụ l’aatụje ido.

Obenu l’ọo Onye-Nwe-Ọha l’akajẹ onye l’ọo-dabaru.

¹Ọ kakwa mma l’a tarụ ẹcha ọkponku, nchị dụ ndoo,

karụ uwhu, l’eegbushi anụ ata

g’ọo ndu l’eri oge, ụswo l’ada iya.

²Onye ozhi l’eme ágụ madzụ

l’e-mechaa bụru ishi chịa nwa onye-nwe-iya,

mbụ nwa l’emechishi ndu nwụru iya nụ iwhu.

Onye ozhi ono l’e-tso keta iwhe

onye-nwe-iya nụ g’ọo ụnwu iya.

³Ite b’e gude eghe mkpọla-ọcha egheghe.

E gude ọku adata mkpọla-ododo adata.

Obenu lẹ Onye-Nwe-Ọha bụ iya l’adatajẹ obu madzụ.

⁴Onye l’eme ejo-ememe l’angabẹje nchị l’ejo ekfukfu.

Onye l’adzụ ejire l’angabẹje nchị l’ejire.

⁵Onye l’achị onye ụkpa ọchi,

bụkwa Chileke, meru iya nụ bẹ l’ọoko ọnu.

Onye l’ete ẹswa l’iwhe-ọtsulanu, byarụ ibe iya

bẹ l’aa-ta ahadụ ẹwoma.

⁶Ụnwu nwanwa bụ ugvu unwoke nnajị-ochee.

Ne lẹ nna bụru iwhe ụnwegirima gude eku onwowhe eku.

⁷Onye eswe te ekfujedu okfu, bukoru ishi.

O nokwawho gẹ l’ẹte ọgbaa t’onye bụ ishi tụ-whuje ire.

⁸N-wọlazu bẹ onye l’anụ iya nụ

l’arịje l’oome ire g’ọo ọgvu,

nke iya bụ l’ọo ya l’emeje

t’ụwha l’agbarụ iya l’iwhe lile l’oome.

⁹Onye l’agụje nvụ l’emeswe,

e mesweru iya bẹ yẹle ndu

ọdo l’adụje lẹ mma.

Ọle onye l’akwẹje ọnu l’emeswe,

e mesweru iya bẹ yẹle ndu

whẹ l’iya l’eshi ọnya l’ebukahuje.

¹⁰Mba l’aabarụ, onye marụ ágụ l’akajẹkwa iya orwu l’ẹhu,

amamẹ ọnu ẹchachi ụkporo ise, l’eechi onye eswe.

¹¹Onye l’eme ejo-iwhe bụ iwhe a sụru t’ọ bo meshi

bẹ l’oowhubeje iwhu eme.

Ọle ọo nwozhi nweru akirishi

bẹ l’e-megee bya anụa ya awhụ.

¹²Ọ kakwa mma l’ejo-nkụta-ọswa,

a kụtaru ụnwu iya bẹ fụru ghu l’ụzo,

amamẹ l’i jekfuru onye eswe l’ẹka l’oome eswe.

¹³Onye l’egudeje ejo-iwhe

akfụ ụgwo iwhe-ọma, e meru iya

bẹ ejo-iwhe l’ẹte abyakwaa l’agvụ agvụ l’ibe iya.

¹⁴Ọwata ọswo ụswo dụa g’ọo ogbuka iyi, a kụru akụ.

Ọo ya bụ, ba anmẹkwa ọnu

l’okfu nke ọwhu ụswo l’ẹte abata iya.

¹⁵Ọharu onye ejo-ememe enge; anma onye-dụ-chịriri ikpe

bẹ tụkokwa bụru akpamara l’iwhu Onye-Nwe-Ọha.

¹⁶?Ọo urwu gụnu b’ọ barụ l’onye

eswe kfụru ụgwo mmamagụ,

l’ẹbe abụ l’o nweru uche?

¹⁷Ndu l’eshi ọnya l’egoshije

lẹ whẹ yeru onwowhe obu nteke nteke.

Ọle iwhe l’aanwụtaje nwune swibe madzụ

bụroo m’ọgvu iwhe-ọtsulanu.

¹⁸Ọo onye égò sweru l’anajẹru ibe iya mkpalẹka,

bya eworu iwhe o nweru sụbe.

¹⁹Onye ọswo ụswo dụ ree bụkwa iwhe-dụ-ẹji bẹ dụ iya ree.

Onye l’evuli obu imeli bụkwa ọla-l’iyi bẹ l’ooku oku.

²⁰Onye obu iya gberu nko bẹ nke-ọma ta abyajẹduru.

Onye ntuwhu-ire l’adabajẹ l’iwhe-ọtsulanu.

²¹Onye nwụtaru nwa nwoke,

l’eme eswe bẹ áwhụ tsọkwaru.

Nna, égò sweru nwa iya bẹ ẹhu ta atsọjedu ụtso.

²²Obu ụtso bụ ọkpobe ọgvu.

Ọle mmeji agbabuhu l’emeje t’ọkpu tsua ngworingwo.

²³Onye ejo-ememe l’anatajẹ n-wọlazu lẹ mpya,

nke ọwhu l’oo-me t’iwhe, kfụru nhamụnha gbee nko.

²⁴Onye iwhe l’edoje ẹnya ree bụ

mmamagụ bẹ l’oodobeje l’ego.

Ọle onye eswe bẹ ẹnya iya

l’ejerwuje ẹka igwe beru alị beru.

²⁵Onye eswe l’abụje áwhụ tsọru nna iya,

bya abụru mgbilu l’ẹhu nwanyị, nwụru iya nụ.

²⁶Ọ tọ dụkwa ree t’e reta onye l’adụa iwhe o meru nre.

Ọ tọ dụkwa ree t’e chia ndu

ishi iwhe lẹ whẹ meru iwhe kfụru nhamụnha.

²⁷Onye nweru uche l’ekfuje zee ọnu.

Onye obu jiru oyi bụru onye iwhe l’edoje ẹnya.

²⁸Onye eswe, l’anọje nggujingguji

bẹ l’eewotagejekwa l’ọomaru agụ.

L’eewotaje l’ọ bụ onye iwhe doru ẹnya ree

M’o dobe ire iya ọga.

¹Onye nkụnyi bụ ẹhu iya b’ọ marụ nwẹkiya.

Tẹhenu ọkpobe okfu l’atajẹ iya ẹru lẹ nchị.

²Onye eswe ta achọjedu tẹ ya nwụta iwhe.

Iwhe ọ bụ, bụ okfu nkiya l’anụ nkiya.

³A wata ome ejo-ememe, nkomi etsochia ya azụ.

Nteke ugvu madzụ larụ, omechi iwhu etsochia ya.

⁴Okfu ọnu madzụ l’adụje g’ọo echi iswina.

Ẹka mmamagụ futaru l’adụje g’ọo ọnu-iyi, l’asọ gborogboro.

⁵Okpe ikpe t’ọ kalẹru onye iswi l’adụa mma ta adụkwa ree.

Ọnma onye iswi dụ mma ikpe ta adụkwawho ree.

⁶Iwhe onye eswe kfutaru l’ọnu bẹ yẹle iya l’emeje.

Oogudeje ọnu iya eku ẹchachi oku.

⁷Ọnu onye eswe bụ iya l’emebyije iya.

Ogboromọnu iya bụru ọnya, e gude anmata iya.

⁸Asụlasu l’anọje atsọ pyoo.

Ọotukoje iwhe bụ ẹhu vọo kfurukfuru.

⁹Onye tụ-gberu ẹka l’ozhi, l’ooje

bẹ yẹle onye l’emebyishi iwhe emebyishi bụkwa nwune.

¹⁰Ẹwha Onye-Nwe-Ọha bụ

ụlo-eli, shihuru gbagbaradịngu.

Ndu-dụ-chịriri l’agbabajẹ iya je edomia ndzụ whẹ.

¹¹Ẹku onye nweru iwhe kpatarụ

bụ mkpụkpu, a tụru mgbodo iya o shihu ike.

Ọoduje iya g’ọo mgbodo, a tụru ọ ha l’eli t’o gbobuta iya.

¹²Onye l’apali onwiya imeli bẹ l’alajẹ l’iyi.

Onye l’ewoze onwiya alị bẹ l’aakwabẹje ugvu.

¹³Onye l’anụa iwhe e kfuru, o vuru ụzo tsẹe ya ọnu,

b’ọ bụ iya ome eswe, bụkwaru iya whọ iwhe-iwhere.

¹⁴Ọ kwa obu madzụ l’esedeje

ndzụ iya mẹ iwhe l’eme iya.

Ọle obu -chifuwaa madzụ, ọ tọo nyahẹdu anya ọdo.

¹⁵Onye iwhe l’edoje ẹnya ree bụ iya l’akajẹ ọoma iwhe.

Onye marụ ágụ l’anọje anga

nchị tẹ ya kaba ọnwuta iwhe.

¹⁶Ree madzụ l’eme l’asụjeru iya ụzo.

Oomeje ya ejerwua atatiwhu oke madzụ.

¹⁷Onye lanụ -vuru ụzo doo edo ya adụ g’iswi dụ iya mma,

jeye onye nke ẹbo abya awata iya ọji njịkponu.

¹⁸A -tụa ido l’iwhe l’eese okfu; okfu ebuhu,

e shi nno gboo ndu l’eseshi okfu ike.

¹⁹Ọryo-buta nwune ghu,

i mesweru kakwa ẹhuka

amamẹ ọlwuta mkpụkpu, shihuru ike.

Okfu, gụ lẹ nwune ghu l’ese

dụkwa g’e wotaru

mkpụrumkpu-igwe kpaa

mgbo yechia ọnu-ụlo, a tụshiru ike.

²⁰Madzụ l’egudeje okfu-ọnu

kfutaru onwiya iwhe l’oo-ri rijia ẹwho.

Ọ bụru iwhe shi iya l’ogboromọnu

bẹ l’oogudeje kpajia okfuru.

²¹Ọnwu lẹ ndzụ bụ l’ire b’ọ dụ.

Ndu bụ ekfurekfu l’e-rije urwu dụ l’ekfurekfu whẹ.

²²Onye chọru nwanyị, l’ọo-lụ

chọ-vu iya bụkwa iwhe dụ ree b’ọ chọtaru.

Onye ọbu l’adụjekwa Onye-Nwe-Ọha l’obu.

²³Onye ụkpa l’anọje aryọ t’e yeru iya ẹka.

Ọle onye nweru iwhe l’anọje asa okfu gẹ ọnu ha iya.

²⁴Onye l’eshi igweligwe ọnya l’e-megekwaa laa l’iswi.

Ọle ẹguru ọnya l’akajẹ ghu ọnokube ntse karụ nwune ghu.

¹Onye bụ onye ụkpa, ụta l’adụa lẹ ndzụ iya kakwa ree

amamẹ onye bụ onye eswe, l’ẹte egudee ire iya ẹka.

²Ọ tọ dụdu ree lẹ madzụ bụ onye

uwhere iwhe l’ewhe, t’ọ ma iwhe.

Iwhe l’eme l’ọwha bẹ l’emesweje emeswe.

³Eswe, madzụ l’eme l’emebyije ndzụ iya,

e mekebe ya eworu iya bobe Onye-Nwe-Ọha.

⁴Onwe ẹku l’emeje t’e nweru ọ̀nyà l’igweligwe.

Ọle onye darụ ụkpa bẹ ndu ọ̀nyà

iya l’agbakashịhuje parụ iya haa.

⁵Onye l’agba ejo ẹka-ebe ta alakwa ẹwoma.

Onye l’adzụ ẹdzuka ta ala ẹwoma t’ọ bọ dụ iwhe l’e-me iya nụ.

⁶Igweligwe madzụ l’anọje achọkashi ụzo gẹ l’ee-shi

tẹ whẹ laa onye a marụ ẹwha iya l’ẹhu.

O nokwawho g’onyenọnu l’anọje achọ t’ọ bụru ọnya onye

l’anọje aasa ẹka emeru madzụ iwhe-ọma.

⁷Onye ụkpa bẹ l’adụkotaje ndu whẹ l’iya bụ ashị.

O nokwawhọ gẹ ndu whẹ l’iya

l’eshi ọnya l’anọje agbarụ iya ọso.

Ọonoje agba etso whẹ aryọ whẹ aryọ tẹ whẹ shiru,

ọle ọ tọ dụdu onye ọwhu l’ọowhuje.

⁸Onye letaru onwiya ẹnya bụ onye marụ ágụ.

Ọ bụru onye iwhe l’edoje ẹnya ree bẹ nke-ọma l’etsoje.

⁹Onye l’agba ẹka-ebe, l’abụa

ọkpobe okfu ta lakwa ẹwoma.

Onye l’adzụ ejire l’a-bụkwa ọla-l’iyi.

¹⁰Ọ tọ gbakwa t’onye eswe rije gwọogwoo.

O nokwawho g’ọ kabaa ẹji t’onye bụ ohu bụru onye ishi ụnwu eze.

¹¹Ndu nweru uche bẹ ẹhu te eghujedu eghu ẹgwegwa.

Onye e meru ẹji, ọ parụ haa bẹ nweru ugvu.

¹²Iwe bya eze l’ẹhu bẹ l’ọodujekwa g’ọo ẹka

oduu-gburu-agụ l’abọ erwumu.

Ọle madzụ menyaa emenya lawa iya l’ẹhu bẹ l’ọoduje

g’ọo ẹka iji dashịru l’eli ẹwu.

¹³Nwata, l’ẹte enwee uche bụkwa iyi swịru nna iya.

Nwanyị, l’aba mba ntekenteke

dụkwawho g’ọo mini, l’ala motomoto.

¹⁴Ụlo mẹe ẹku nna bụ ụnwu iya l’enweje iya.

Ọle nwanyị, nweru uche bụ Onye-Nwe-Ọha l’anụje iya.

¹⁵Ẹnyiru l’atụje ụrwekukpe mgbẹnya.

Ọ bụru onye ẹnyiru bẹ ẹgu l’emeje.

¹⁶Onye l’emeje iwhe a sụru t’e meje bẹ l’a-nọ ndzụ.

Ọle onye l’ẹte eme iya l’a-nwụhu.

¹⁷Onye l’asa ẹka asa anụ ndu ụkpa iwhe bụkwa

Onye-Nwe-Ọha bẹ l’oojee ụgwo.

Onye-Nwe-Ọha je l’a-kfụ iya ụgwo iya kfụ-dzua ya akfụ-dzu.

¹⁸Hụ̀je nwa ghu àhụ̀hù,

nteke i leru ẹnya l’ịi-hụ̀ta iya iwhe.

Be egudekwa gẹ l’ooghube ghu l’ẹhu chigbua ya.

¹⁹Onye obu-ọku bẹ obu-ọku iya ọbu l’ebutaje njọ ebuta.

Ị -nafụta iya lẹ nnanụ b’ị nafụtajenu iya whọ l’ọdo.

²⁰Nụjeru madzụ okfu,

ngabẹje nchị nata ẹka l’aalọru ghu lẹ nchị;

nke ọwhu l’oo-me gụ amarụ ágụ l’ikpazụ.

²¹Madzụ l’achịtaje uzhi iwhe olemole arị l’ugbo lanụ,

Ọle ọo uche obu Onye-Nwe-Ọha mefutaje.

²²Iwhe dụ ree l’ẹhu madzụ bụ obu-ọma, dụ iya nụ.

Ọ kakwa ree lẹ madzụ bụ onye ụkpa

amamẹ l’ọ bụ onye ntuwhu-ire.

²³Ọtsu egvu Onye-Nwe-Ọha l’ewotajeru madzụ ndzụ.

Ọ bụru nteke ọ dụ nno bẹ obu l’ezeje onye ọbu,

l’ejo-iwhe te erwudu iya l’ẹhu.

²⁴Onye ẹgali bẹ ẹka l’akwajẹ l’efere, l’oori nri,

Ya eje adụhe ike palia ya ye l’ọnu.

²⁵I -chia onye mgbacha iwhe,

onye l’amarweta iwhe egude iya nwụta iwhe.

Nteke ị barụ onye iwhe l’edoje ẹnya ree mba,

ya egude iya kabaa ọmaru iwhe.

²⁶Onye l’ana iwhe nna iya l’ọkpehu,

l’ọochifuje ne iya l’uwhu

ẹgube nwa ono bụ nwa l’eme

iwhe-iwhere bya akpatsu áwhụ.

²⁷Nwa mu; ị -haa ọngabe nchị l’iwhe l’eezhi ghu,

gụ ewhua ụzo ọmaru iwhe.

²⁸Ọgba ẹka-ebe gbagide madzụ

bẹ ikpe kfụru nhamụnha l’ẹte adụjekwa.

Tẹhenu ọnu onye ejo-ememe

bụleruwho ejo-iwhe bẹ l’ọonoje elwe gbịigbii.

²⁹Ndu l’aja ndu ọdo ewenu b’e dobewaru nke ọnma ikpe.

O noo g’e doberu ẹchachi ngabẹru okpurukpu ndu eswe.

¹Onye angụruma bụ onye ewenu.

Onye l’angụ iwhe l’atsụ atsụ l’anọje aba hanyị-hanyị.

Onye ngụtaru mmẹe jeye o mede iya l’ẹnya ta amakwa agụ.

²Ẹhu l’eghu onye eze eghu

bẹ l’ọodujekwa g’ọo ẹka oduu-gburu-agụ l’abọ erwumu.

Onye kpatsuru iya iwe tuwhawaru ndzụ iya.

³Onye l’agbarụ okfu ọzo bẹ ùgvù l’etsoje.

Obenu l’onye eswe bẹ ọba mba ta atadụru l’ike.

⁴Onye ẹgali ta akọjedu okfu iya l’ògè nteke l’aakọje iya.

O -rwua l’akpakpa iya; ọ to dụdu iwhe l’ọo-whụ akpata.

⁵Iwhe madzụ l’arịgbabe l’obu iya

dụkwa omilomi g’ọo ogbu-mini.

Onye l’a-dụ ike tụfuta iya bụ onye iwhe l’edoje ẹnya ree.

⁶Igweligwe madzụ l’asụje lẹ whẹ

bụ ndu e gude ire whẹ ẹka.

Ọle ọbu ?ọo onye b’a kwata gude ire iya ẹka?

⁷Onye dụ chịriri bẹ ụta l’ẹte adụjedu l’iwhe lile l’oome.

Ọ -nọ-gee laa; ụnwu iya abụru ndu iwhe kweru.

⁸Onye eze, l’ekpe ikpe;

l’abụje ọ whụa ejo-iwhe; ya amarụ l’ọo ejo-iwhe.

⁹?Ọo onye l’a-sụ l’obu dụkota iya sasarasaa,

l’ẹka dụ iya ọcha, ya tẹke emebua iwhe-dụ-ẹji?

¹⁰Ogude iwhe-ụgho atụ ẹrwa iwhe

yẹle ogude iwhe e meru ẹregede atụru madzụ iwhe

bụkwa akpamara l’ẹnya Onye-Nwe-Ọha.

¹¹Ọo umere nwata l’atụje ọnu iya.

Ọ ya b’e gude amarụ nwata umere iya guru egu

yẹle nwata umere iya kfụru nhamụnha.

¹²Nchị, l’anụ iwhe yẹle ẹnya, l’awhụ ụzo

bẹ bụ Onye-Nwe-Ọha mekotaru iya.

¹³Tẹ mgbẹnya ba atsọnukajekwa ghu ụtso,

ọdua bẹ l’ịi-bụkwa onye l’akpa nri.

Nwụjeru ẹnya, gụ awhụ l’ii-nweru nri nweru nke etsutsu iya.

¹⁴Onye l’azụ iwhe azụzu l’asụje l’o renukaru ire.

Ọle ọ tụgbulewho ya egude

iwhe ọbu, ọ zụru kulahaa onwiya.

¹⁵Mkpọla-ododo bẹ dụkwa,

ẹwhuru, vu oke aswa tụko ẹka lile dzuru.

Obenu l’ọnu, l’ekfu okfu, l’egoshi amamiwhe

bụ ọ-dụ-ụko lẹ mba.

¹⁶Madzụ -naa onye l’ọoto maa mkpalẹka,

natakwa iya uwe iya.

Gudekwa iya t’ọ sụberu ghu iwhe

m’ọ -bụru l’ọo onye ọha ọdo b’ọ narụ mkpalẹka ọbu.

¹⁷Nri, a kpatarụ l’ụgho l’atsọje ụtso mẹe l’eeri iya.

Ọle e -megelewho ọnu abụru onye riru iya nụ ẹja ẹja.

¹⁸Ịichi idzu iwhe l’ii-me; kpajẹdaa ishi.

Nteke bụ l’ịibya oje ọgu,

kpajẹdaa ishi t’e goshi ghu gẹ l’ii-me iya.

¹⁹Onye l’asụ asụlasu l’ekfuje iwhe l’eeme l’edomi.

Ọo ya bụ t’i jiru ẹgu yeru onye igwe okfu.

²⁰Onye l’ewhu nna iya m’ọ bụ ne iya iwhu,

bẹ ndzụ iya l’a-gbabuhu

g’ọo ẹka a whunyiru ọku l’oryọku l’echi abalishi.

²¹Ẹku, a kparụ gburugburu

ta abẹjeduru onye kparụ iya nụ l’iwhe l’ikpazụ iya.

²²Ba asụkwa l’ọo gụbedua l’a-kfụ

madzụ ụgwo iwhe-dụ-ẹji o meru ghu.

Ngabẹ tẹ Onye-Nwe-Ọha dzọo ghu.

²³Ndu gude iwhe-ụgho atụ ẹrwa iwhe

bẹ l’emekwa akpamara l’iwhu Onye-Nwe-Ọha.

Mbụ l’ogude iwhe e meru ẹregede

atụru madzụ iwhe ta adụdu iya ree.

²⁴Eshi-ọwhu ọ bụ Onye-Nwe-Ọha l’akpọ-zhiru madzụ

gẹ l’ooshi aha ọkpa,

?ndẹnu gẹ madzụ l’e-shi marụ gẹ ndzụ iya l’agba eshi?

²⁵Ogude ẹhu anmanma kweta Chileke ụkwa iwhe

l’ịi-nụ iya bụkwa ọgbaru onwonye ọnya,

nkele e -megee, bẹ l’ọo-la ghu l’ụta.

²⁶Onye eze, marụ ágụ l’awhụchaje mkpụkpu iya

g’ọo onye l’awhụshi mkpaba

l’ereshi shi nno họshia ndu ejo-ememe bu iya nụ.

Oogudeje iwhe e gude echi ereshi chia whẹ pyaapyaa.

²⁷Obu madzụ bụ oryọku Onye-Nwe-Ọha,

l’egudeje wofuta iwhe dụ iya l’ọriri.

Ọo ya bẹ l’oogudeje avọshi iwhe lile, dụ madzụ l’ime.

²⁸Onye eze, yeru ndu ọ bụ eze whẹ obu,

bya abụru onye kfụberu ire iya ọto

ta adụdu iwhe l’e-me iya nụ.

Iwhe l’emeje t’oshi-eze iya shihu

dụngudungu bụ obu o yeru ndu nkiya.

²⁹Iwhe unwokorọbya gude etu onwowhe ẹwha

bụ ọkpehu dụ whẹ nụ.

Iwhe ọgurenya gude ama ụma bụru ẹwo dụ whẹ l’ishi.

³⁰Ọ kwa ẹka agbagba-nchị yẹle

ochi madzụ iwhe l’a-fụ iya ọnya l’ẹhu bẹ l’eegudeje gọta iya

t’ọ haa oome ejo-iwhe.

Mbụ l’ọo ẹchachi b’e gude aagọ madzụ t’ọ ha ome ẹji.

¹Uche onye eze bụ iwhe

Onye-Nwe-Ọha sụru t’o mee bẹ l’oomeje,

ẹgube ono ọ bụ ẹka ọ sụru tẹ ngele sọru laa bẹ l’ọosojeru laa.

Ọo ẹka Onye-Nwe-Ọha ngagbụru iya bẹ l’ooshije.

²Iwhe lile, madzụ l’eme l’akfụjeru iya nhamụnha l’ẹnya.

Ọle ọo Onye-Nwe-Ọha bẹ marụ obu madzụ.

³Ome iwhe dụ ree yẹle iwhe kfụru nhamụnha

bẹ Onye-Nwe-Ọha kakwa anata karụ ngwo-ẹja.

⁴Ndu ejo-ememe l’elewheje madzụ elewhe,

whẹ l’eku onwowhe iwhe igweli charụ.

Ndzụ whẹ l’owhu bụ iwhe-dụ-ẹji jiru iya.

⁵Iwhe onye l’eseshi anya ike rịru arịri mee

bẹ l’oometa iya iwhe ha shii.

Ọle onye l’achịnuka iwhe ọku l’adajẹ ụkpa.

⁶Ẹku, e gude ntuwhu kpaa ta

adụdu gẹ l’ọono-beje ya ewhukashihu.

Ndu l’akpa ẹku l’ụzo dụ nno

bụ ọnwu bẹ whẹ l’achọru onwowhe.

⁷Ọo iwhe-kpanganga ndu ejo-ememe l’eme bẹ l’e-me,

whẹ abụru ntụ ekpofu.

O noo nkele whẹ jịkaru ome iwhe kfụru nhamụnha.

⁸Ndu l’eme ejo-iwhe bẹ iwhe whẹ

l’eme ta akfụjeduru nhamụnha.

Ọle umere ndu iswi dụ mma l’akfụjeru ọto.

⁹Ọ kakwa ree t’ị kwata je eburu l’azụ ụtsulo

karụ lẹ gụ lẹ nwanyị, l’ekfu ekfurekfu bu l’ụlo.

¹⁰Onye ejo-ememe bụlewho

ejo-iwhe l’anọje awhọshi iya ike l’obu.

Ọ tọ whụjeduru ibe iya imiko.

¹¹A -hụ̀a onye ewenu àhụ̀hù,

onye l’amarweta iwhe egude iya nwụta iwhe.

Nteke ị kpọ-zhiru onye marụ ágụ ụzo,

ya akabaa ọmaru iwhe.

¹²Chileke, bụ Onye ono dụ chịriri

bẹ makwarụ iwhe l’anwụ l’ụlo ndu ejo-ememe.

Ọopa-lije whẹ tụa gbaa; whẹ abụru kpurupyata.

¹³Onye swọberu akụ lẹ nchị

tẹ ya ba anụ olu-ẹkwa onye ụkpa,

bẹ l’a-ryanụa nkiya ujiku lanụ,

ọ tọ dụdu onye bya l’angarụ iya nchị.

¹⁴Iwhe a nụru madzụ lẹ mpya l’emeje t’iwe iya dajia.

N-wọlazu, a rwẹru l’uwe nụ

l’abyanyijekwawho oke ẹhu-eghughu.

¹⁵E -mee iwhe l’ụzo kfụru

nhamụnha bẹ l’ọotsoje ndu-dụ-chịriri ụtso.

Ọle ooyeje ndu l’eme ejo-iwhe egvu.

¹⁶Madzụ -jịka ọkwa-ẹnya,

bẹ ẹka l’ọo-chọta onwiya bụ l’ẹka ụnwu maa dọru.

¹⁷Onye l’eri gẹ ẹhu ha iya l’e-megee kpaa nri.

Mbụ l’onye l’angụ shaashaa

eri gwọogwoo ta abyadụ l’enweru iwhe.

¹⁸Ndu ejo-ememe l’alajẹ l’ọchi ndu-dụ-chịriri.

O nokwawhọ gẹ ndu l’ẹte egudee ire whẹ ẹka

l’alajẹ l’ọchi ndu obu gụru iwhoro.

¹⁹Ọ ka ree t’i je eburu l’echi-ẹgu

karụ l’ịilu nwanyị, l’ekfu ekfurekfu,

bya abụru agụ ọnwu.

²⁰Ụlo onye marụ ágụ bẹ ọkpobe

nri yẹle ọkpobe mmanụ l’adụje.

Ọle onye eswe l’atụkoje iwhe o nweru rifu.

²¹Onye l’achị nta ọdu-chịriri yẹle

nta n-yemobu l’a-chọta ndzụ.

Ọ-dụ-chịriri yẹle ugvu

l’anọjekwawho etso onye ọbu.

²²Onye maru ágụ bẹ l’adụje ike

tatso mkpụkpu ẹka onye ike dụ bu ọgu,

nwutsushia mgbodo mkpụkpu whẹ, whẹ keru ike yeru iya.

²³Onye l’eche ọnu iya eche, akwa ire iya nga

bẹ l’ezelajeru iwhe-ọtsulanu.

²⁴Onye l’eku onwiya iwhe igweli charụ,

bya etse etsetse bẹ ẹwha iya bụ onye ewenu.

Onye ono bẹ umere iya l’owhu bụ ekuku l’eri mgbẹka.

²⁵Onye ẹgali bẹ iwhe l’agụ iya nụ l’e-gbu iya,

nkele ọ kpọru ẹka kpọo ọkpa tọ dụ iwhe l’ọoru.

²⁶Eswe l’ẹnyashi bẹ l’ọoduje iya

t’iya nweru ọwaa nweru ọwhu.

Ọle onye-dụ-chịriri l’asajẹ ẹka nụ madzụ iwhe swee ya ẹnya.

²⁷Ngwo-ẹja, onye ejo-ememe l’egwo bụkwa akpamara,

ọwhu l’eewhoro onye ọwhu gude ejo obu bya iya egwogwo.

²⁸Onye l’agba ẹka-ebe adzụ ejire eye iya l’a-lakwa l’iyi.

Ọle onye l’angabẹjeeda nchị ree

tẹmenu ya eyede ọnu l’okfu bẹ l’a-gba ọkpobe ẹka-ebe.

²⁹Ndu ejo-ememe l’emeje iwhu t’a sụjekwa.

Ọle ndu obu gụru iwhoro bẹ iwhe whẹ l’eme l’edoje ẹnya.

³⁰Ọ tọ dụdu mmamagụ, ọ dụa l’ọo iwhe l’edo ẹnya,

ọ dụa l’ọo idzu, l’aachị achị,

l’aa-sụ l’ọo t’e gude iya mekata Onye-Nwe-Ọha.

³¹Ndu ojọgu l’akwakọbeje ịnya whẹ l’e-gude jee ọgu.

Ọle onye l’emeje t’a lwụ-gbua l’ọgu ono bụ Onye-Nwe-Ọha.

¹Ọkpobe ẹwha kakwa ree ahata amamẹ oonwe iwhe shii,

ọdu ndiwhe l’obu ka mkpọla-ọcha yẹle mkpọla-ododo ree.

²Iwhe lanụ, dụ l’ẹhu onye nweru

iwhe bya adụkwawho l’ẹhu onye l’ẹte enwee

bẹ bụ l’ọo Onye-Nwe-Ọha mekotaru whẹ labọ.

³Onye nweru uche l’awhụje iwhe

l’emekata iya, ya ezeeru iya.

Ọle onye l’amarwetaa iwhe l’ejeje

vukovukovuko je evuta ejo-ọnwu.

⁴Owoze onwonye alị yẹle ọotsu egvu Onye-Nwe-Ọha

l’emeje t’e nweru iwhe,

l’oomeje t’a kwabẹ madzụ ugvu

bya emekwawho t’e nweru ndzụ.

⁵Ụzo, onye ejo-ememe l’eshi bẹ ógvú l’uke jiru eji.

Ọle onye l’eche ndzụ iya eche bẹ l’anọje iya otẹnya.

⁶Zhia nwata ụzo, gbarụ iya l’eshishi.

O vuta bụru ọgurenya; ọ tọ byadụ l’aha iya aha.

⁷Onye nweru iwhe bẹ l’akajẹ onye ụkpa ẹkuku.

Onye ji ụgwo l’abụje nwohuta onye o jitaru iya.

⁸Onye l’akụ mmegbu g’ọo akpụru iwhe

bẹ l’a-wọta iwhe-ọtsulanu.

Tẹmenu mgbọro, l’oogudeje egoshi

ẹhu-eghughu iya bẹ l’aa-nafụ iya.

⁹Ndu bụ o-me-l’uko bẹ l’aa-gọru ọnu-ọma nụ,

o noo nkele whẹ l’ekejeru ndu ụkpa nri whẹ.

¹⁰A -chịa onye ewenu, okfu alaa.

O noo g’ụswo yẹle ọko-ọnu l’a-gvụ.

¹¹Ndu l’ọoduje ree lẹ madzụ ibe whẹ bẹ obu gụru iwhoro,

mbụ ndu ono, okfu whẹ l’adụje bẹlebele

bẹ l’e-shita onye eze ọnya.

¹²Onye-Nwe-Ọha bẹ ẹnya iya dụ l’ẹhu onye marụ iwhe.

Ọle okfu onye l’ẹte egudee ire

iya ẹka bẹ l’oomeje t’ọ bọ bẹ l’iwhe.

¹³Onye ẹgali l’asụje: “Oduu-gburu-agụ nọkwa l’etezhi.

Mu lụfu bẹ l’ee-gbukwa mu l’echi-ụzo!”

¹⁴Ọnu nwanyị, bụ o-kwe-l’ẹka-nwe-iya

bụ iduma, tụru omilomi.

Onye l’a-daba iya bụ onye kpatsuru

Onye-Nwe-Ọha ẹhu-eghughu.

¹⁵Ụnwegirima-nshịi l’anọje eme eswe eswe.

Ọle iwhe l’eegudeje hụ̀ta whẹ bụ ẹchachi.

¹⁶Onye l’akpapya onye ụkpa ishi nggẹ ya ka onweru iwhe,

yẹle onye bụlewho ndu nweru iwhe bẹ l’ọonuje iwhe iya,

bẹ l’e-mekochaa bụru onye ụkpa.

Uzhi okfu ụkporo l’iri, shi l’ọnu ndu marụ ágụ

¹⁷Ngabẹ nchị nụ olu-okfu ndu marụ ágụ.

Dobe obu ghu l’iwhe ono, mu l’ezhi.

¹⁸Nkele ọo-dụru ghu lẹ ree m’i kwakọbe iya l’ime obu ghu.

G’ị nwụkwaa ya whọ anwụ t’ọ dụje ghu l’ọnu.

¹⁹Ọo ya bụ nke ọwhu l’ịi-kpọru obu yeru Onye-Nwe-Ọha.

Ọ kwa mu l’ezhi gụbedua iwhe ntanụ.

²⁰Ẹtu ọbu, mu l’ezhi bẹ mu

dekwaru edede l’ẹkwo deta iya ụkporo l’iri,

mbụ okfu, l’agba madzụ ume,

bụru okfu, bụ: i -mee ya, ya adụru ghu lẹ ree.

²¹Ọ bụ okfu, mu gude ezhi ghu ọkpobe okfu

bụru okfu, gbarụ t’a dawhube,

nke ọwhu l’ịi-marụ ọkpobe ọnu,

l’ii-yeru onye zhiru ghu t’ị bya.

²²Ba anakwa onye ụkpa nwiwhe o nweru

nkele ọ tọ dụdu g’ọ harụ iya.

Gụ eje egwekwa onye iwhe

l’atsụ lanụ aryaka eryune l’ụlo-ikpe.

²³Nkele Onye-Nwe-Ọha

l’e-megekwaa gbaarụ whẹ ọdzori,

gude ndu ono, shi anashị whẹ iwhe whẹ nalata whẹ nkewhe.

²⁴Be eshikwa ọnya l’onye obu-ọku.

Gụ eje atụkwa ọli l’onye ẹhu l’eghuje eghu ẹgwegwa.

²⁵Ọdua bẹ l’ịi-wọtakwa ẹka iya,

gụ eje adaba l’iwhe l’ịitii gbaa ẹnya iya.

²⁶Ba abụkwa onye l’anajẹ madzụ lẹ mkpalẹka.

Ba asụbejekwa iwhe ghu l’ụgwo onye ọdo ji.

²⁷Nkele e -megee t’i nwe iwhe i gude akfụ ụgwo ono,

bẹ l’aa-pagekwa paa iwhe-azẹe ghu.

²⁸Be ewofukwa ékpè ndụ-ichee

unu whẹ gude kpaa oge-alị.

²⁹Ị -whụa onye ozhi, l’ooje doru ẹnya ree,

marụ l’oo-mege jeeru ndu eze ozhi.

O too jeduru ndu l’ẹte ama ẹwha whẹ ozhi.

¹E kua ghu tẹ gụ l’onye bụ ishi yeko ẹka lẹ nri,

makwarụ ẹgube onye gụ l’iya nọ.

²Tụkwaa ẹkpiri ghu eri m’ị bụru onye oke ẹwho.

³Ba awhụkwaru nri ono kpakpakpa,

nkele e gude iya gbabẹru ghu ẹregede.

⁴Be esekashikwa onwoghu l’ẹka l’ii-me t’i nweru iwhe.

Makwarụ agụ jetaje ghaa ẹnya.

⁵Nkele ẹku l’abụjekwa: ị -bya l’ajashị iya ẹnya,

ya abụwaru whuchakangu.

E jia ekfu b’ọ kpawarụ ẹba g’ọo ugo whekashihu.

⁶Be erikwa nri, onye ụswara.

Tẹ nri iya l’atsọ g’ọo gụnu ba agụjekwa ghu.

⁷Ẹgube onye ono bẹ iwhe l’ọorije

bụ l’i rigbuwaru iya erigbu.

Ọo-ngụkwaru ghu nri sụ ghu: “Bya eria nri. Narụ ngụa.”

Ọle angụngu l’ọonguru nri ono te eshidu iya l’obu.

⁸I -ria ya bẹ l’ịi-gbọkwa nwa iya ọwhu i riru.

Ajaja, ị jarụ iya abụru ghu nke mmaanụ.

⁹Be ekfujekwa okfu yeru onye eswe,

nkele oo-wokwaru okfu mmamagụ ono,

i kfuru iya gwọo lẹ ntụ.

¹⁰Be ewofukwa ékpè ndụ-ichee gude kpaa oge-alị.

Gụ eje akpaswetakwa bahụ l’alị onye nna iya l’anọhe,

¹¹nkele ọ kwa Onye-Nwe-Ọha,

bụ onye ono shihuru ike bụ iya l’agbatarụ whẹ.

O je l’a-gbarụ whẹ ọdzori gbagide ghu.

¹²Ngabẹje nchị ree nwụta iwhe l’eezhi ghu.

Gbobeje nchị l’okfu onye marụ iwhe.

¹³Ba ahakwa ọhù ụnwegirima ghu àhụ̀hù, gbarụ whẹ nụ.

Whẹ ta anwụhukwa m’i chia whẹ iwhe.

¹⁴Chia whẹ rọ ẹchachi dzọo whẹ ndzụ.

¹⁵Nwa mu; iwhe l’e-me t’obu tsọo mu ụtso

bụ t’ị bụru onye marụ ágụ.

¹⁶Obu l’a-nọ atsọ mu ụtso

nteke l’iikfu okfu, kfụru nhamụnha.

¹⁷Be enwekwaru ndu l’eme iwhe-dụ-ẹji ụwhenya.

Iwhe l’ii-mechia bụ t’ị tsụje egvu

Onye-Nwe-Ọha ntekenteke.

¹⁸O noo l’ọo-dụru ghu ree lẹ mgbe l’iwhu.

Iwhe ono, ẹnya dụ ghu ta abyadụ l’ala ghu nke mmaanụ.

¹⁹Ngabẹ nchị nwa mu; marụ ágụ.

Dobelekwawho obu ghu l’ome iwhe kfụru nhamụnha.

²⁰Be etsojekwa ndu angụruma; ọ dụa l’ọo ndu ọnu-orimori.

²¹Nkele ndu angụruma yẹle

ndu ọnu-orimori l’adajẹkwa ụkpa.

Onye bụlewho t’iya ria iwhe zẹe bụ

mkpa iya bẹ l’e-megekwaa anma nkịrika-ẹkwa.

²²Ngabẹjeru nna ghu nchị,

mbụ onye ono, meru ị fụta ụwa.

Gụ eje ekojekwa ne ghu ọkpa l’ishi

nteke ọ bụwaa nwanyị nnochee.

²³Zụta ire-lanụ. Be erewhukwa iya azụ.

Marụ ágụ. Bụru onye a hụ̀rù àhụ̀hù

yẹle onye iwhe l’edoje ẹnya.

²⁴Nna onye-dụ-chịriri bẹ ẹhu l’a-tsọ mebyi ụtso.

Onye nwa iya marụ ágụ bẹ l’e-nwe ẹhu-ụtso.

²⁵Mee tẹ nna ghu yẹle ne ghu nweru ẹhu-ụtso.

Mee tẹ ne, nwụru ghu nụ tee ẹswa.

²⁶Nwa mu; woru obu ghu nụ mu.

Leta ẹnya l’iwhe mu l’eme.

²⁷Lẹ nwanyị ọkpara bụkwa iduma, tụru omilomi.

Mbụ lẹ nwanyị-ogori bụ wẹlu, dụ kpaagụgurugu.

²⁸Ọo gẹ ndu abalịdegvu l’akwajẹru madzụ l’ẹgbudu

bụ gẹ yẹbedua l’akwabẹje.

Iwhe ọ nọ l’ọzo iya bụ oome

t’unwoke l’alụ nwanyị buhashia nyee whẹ.

²⁹?Ọo onye nwe mburọnu?

?Ọo onye nwe ọgu áwhụ?

?Ọo onye bụ onye esemokfu?

?Ọo onye bụ onye ngịrima?

?Ọo onye bụ onye ẹhenu ka etsotso?

?Ọo onye bẹ l’eke ẹnya vavava?

³⁰Ọo ndu l’anọje ndẹrinde lẹ mmẹe.

Ndu l’etsojeru aghawhe achọ mmẹe, a gwarweru agwarwe.

³¹Be elejekwa ẹnya lẹ mmẹe nteke l’ọovo-lishihu avọ-lishihu,

mẹe nteke l’ọotsu kpụtukputu l’ụwaka, e yeru iya,

mẹe nteke ọ tọ nwẹhu anma pyataa.

³²L’ikpazụ bẹ l’ọotaje ẹru g’ọo ejo agwọ.

Ẹru iya dụkwa ẹji g’ọo ẹru oguji-nwaka.

³³O noo nteke ẹnya ghu l’a-wata ọwhu iwhe dụ ghu ọduge.

Uche ghu awata ọgba l’iwhe gbachiru ẹnya.

³⁴O noo nteke l’ịi-dụ g’ọo onye

zẹe azẹe l’echilabọ eze-ẹnyimu,

mbụ g’ọo onye zẹe l’eli iwhe e gvuberu l’eli ụgbo-mini.

³⁵Gụ awata ọrya sụ: “Whẹ e

tsugbua mu-o! Ọle whẹ te emerukwa mu ẹhu.

Whẹ l’etsukwa mu otsu mkputu, ọle o too rwudu mu l’ẹhu.

?Ọo nteke ole bẹ mu l’a-gbalihuzhia?

Mu -menyaa emenya gbashi

bẹ mu l’a-chọkwa mmẹe ọdo, mu l’a-ngụ.”

¹Be enwekwaru ndu l’eme ejo-ememe ụwhenya.

T’ọ bọ gụkwa ghu tẹ gụ lẹ whẹ tụru ọli.

²Nkele iwhe bụ obu whẹ bụlewho ome iwhe-ike,

ejo-okfu l’ebejeru whẹ eberu l’ọnu.

³Ọo mmamagụ b’e gude atụ ụlo,

Ọ bụru ọkwa-ẹnya bẹ l’eegudeje mee ya t’o shihu ike.

⁴Ọ bụru mgbamego bẹ l’eegudeje dozhia ime-ụlo iya,

bya edojia ya ngwa-ụlo, l’erekaa ire, ama ụma.

⁵Onye marụ ágụ bẹ ike dụkwa shii.

Onye nweru mgbamego l’anọje anwụta iwhe ntekenteke.

⁶Ịi -bya l’eje ọgu, onye l’ịi-nọ ele

ẹnya iya bụ onye l’e-goshi ghu iwhe l’ii-me.

Nteke ọ dụkwanu ghu nke t’i

lwụ-gbua ndu gụ lẹ whẹ l’alwụ ọgu,

ndu l’ịi-nọ ele ẹnya whẹ bụ ndu l’a-nọ akpọ-zhiru ghu ụzo.

⁷Mmamagụ karikwaru gẹ l’oodo onye eswe ẹnya.

Onye eswe te enwejedu ọnu okfu

l’ẹka e dzukoberu ekfu lẹ nggamgbo.

⁸Onye l’agbarụ madzụ ibe iya ejo-égo

bẹ iwhe l’ee-ku iya bụ ome-njọ.

⁹Akọ onye eswe gbarụ bụ iwhe-dụ-ẹji.

Onye l’aja madzụ ewenu bẹ l’adụje ndiwhe ashị.

¹⁰Ike -gvụ ghu nteke l’iije iwhe-ọtsulanu

b’ị rwụhukwaru ọkpobe arwụhu.

¹¹Dzọfuta ndu a chị eje egbugbu.

Sewhu ndu l’akpụ galagala eje

ẹka l’aa-nọdu whụ-gbua whẹ azụ.

¹²Nteke ị sụru l’ọ tọ gbasadụru ghu,

?ọ dụ ghu g’onye ono, l’enyoje

obu madzụ ta amakọtadu iwhe lile?

?Ọ dụ ghu g’onye ono, bụ iya

l’echekwa ndzụ ghu ta amadụ iwhe l’iime?

Ọ dụ ghu gẹ tọo kfụdu onyenọnu

ụgwo g’iwhe, o meru gbarụ?

¹³Nwa mu; mịje mmanụ-ẹnwu nkele ọ dụ ree.

Mbụ lẹ mmanụ-ẹnwu, e metaru

l’ụbakala-ẹnwu l’a-tsọ ghu ụtso l’ọnu shinene shinene.

¹⁴Makwarụwho l’ọo ẹgube ono bẹ

mmamagụ dụ ree lẹ ndzụ ghu.

Ị -marụ ágụ bẹ l’ọo-dụru ghu lẹ ree lẹ mgbe l’iwhu.

Iwhe ono, ẹnya dụ ghu ta abyadụ l’ala nke mmaanụ.

¹⁵Sụa, gụbe onye ejo-ememe,

be ejekwa ibe onye-dụ-chịriri je akwachia ya ụzo.

Be ejekwa ome iwhe ike l’ibe iya.

¹⁶Nkele onye-dụ-chịriri dakwaa

m’ọ darụ ugbo ẹsaa, b’ọ gbalihujekwa.

Obenu l’onye ejo-ememe bẹ iwhe-ọtsulanu l’akwatsuje.

¹⁷T’ọ bọ tsọjekwa ghu ụtso lẹ ọhogu ghu darụ.

Be etekwa ẹswa l’ụkfu kpọru iya.

¹⁸Ọdua bẹ Onye-Nwe-Ọha

l’a-whụkwa iya, ya adụ iya ẹji,

ya parụ onye ono haa, ya adụhe iwhe l’oo-mekwadu iya.

¹⁹Tẹ ndu ejo-ememe be emejekwa t’ẹhu gbanwuhu ghu ọku.

Ba awhụjekwaru ndu l’eme ejo-iwhe ụwhenya.

²⁰Nkele onye l’eme ejo-iwhe b’ọ tọo dụduru lẹ ree.

Onye-ejo-ememe bẹ ndzụ iya l’e-me pyinyingu.

²¹Nwa mu; tsụjekwa egvu Onye-Nwe-Ọha;

gụ atsụkwawho onye eze egvu.

Be etsokwa lẹ ndu l’ekwefujeru whẹ ike.

²²O noo nkele Onye-Nwe-Ọha yẹle onye eze ono bẹ

l’e-mekwa t’ejo mkpamkpa kpaa l’ẹhu whẹ.

O to nwedu onye marụ ẹgube ejo-iwhe Onye-Nwe-Ọha

m’ọ bụ onye ono l’e-me whẹ.

²³Okfu ọwaa bụkwawho okfu, shi ndu mmamagụ l’ọnu

Ọbo madzụ ẹbo mẹe l’eekpe ikpe ta adụkwa ree.

²⁴Mbụ l’onye sarụ ọnu sụ onye

ikpe nmarụ l’ọo ya bẹ iswi dụ mma

bẹ l’aa-nọkwa akpọ l’iwhu lẹ mkpụkpu lẹ mkpụkpu,

mba gẹ mba ha ajịkakwa iya whọ.

²⁵Ọle ọo-dụru whẹ lẹ ree,

mbụ ndu l’ekpeje ikpe nma iya onye ọ nmarụ.

Ndu ono bẹ l’aa-gọru ọnu-ọma, parụ ẹka nụ.

²⁶Onye yeru ghu ọkpobe ọnu

l’okfu bẹ bụ ọkpobe ọnya ghu.

²⁷Vuadaru ụzo jegee ozhi, dụru ghu l’etezhi.

Gụ abya ejekotagezhia ozhi, dụru ghu l’ẹgu.

Tẹhenu g’ị watawarọ ọtu ụlo ghu nteke ono.

²⁸Ba agbakwarụ ibe ghu ejo ẹka-ebe l’ẹbe ọ dụ iwhe o meru.

Gụ eje egudekwa ọnu ghu ono duwhua madzụ.

²⁹Ba asụkwa l’ii-melata iya iwhe o meru ghu,

mbụ l’ịi-kfụ nwoke ono ụgwo iwhe o meru.

³⁰Mu ghatajẹru ẹka onye ẹgali kọru okfu.

Mbụ lẹ mu jeru je aghajaa lẹ

mgbu-vayịnu onye l’ẹte enwee mgbamego.

³¹Agarambo tụkole iya whọ narụ.

Ẹwu mmaanụ gbakọtalewho

whulawhula bachia ọma ẹnyoru iya.

Mgbodo-ẹwhuru, e shi gude gbaa

ya mgbabu dakashịhu-gewaa.

³²Mu bya awata ọri iwhe ono, mu whụru l’ime obu mu,

bya egude iwhe ono, mu whụru gude nwụta iwhe.

³³L’ọo, i -kua mgbẹnya nwanshị,

mgbẹnya rwee ghu nwanshị.

Mbụ, ị -chịkobe ẹka nwanshịi sụ t’ị tụta ume,

³⁴ụkpa afụru ghu g’ọo onye abalịdegvu byarụ ibe iya.

Mbụ ejo-ẹka adụle ghu whọ

g’ọo onye nwoke ibe iya chị ngwọgu byakfuta.

Ẹtu ọdo, Sólomọnu nmashịru

¹Ọ waa bụkwawho ẹtu ọdo, Sólomọnu nmashịru.

Ndu deru iya l’ẹkwo bụ ndu

l’ede ẹkwo l’ibe Hezekáya, eze ndu Juda.

²Iwhe e domiru edomi bụ ugvu dụru Chileke.

Ọvocha iwhe avọcha bụru ugvu dụru ndu eze.

³Ọo gẹ igweli habe l’eli, ọ bụru gẹ alị dụ-be omilomi

bụ gẹ obu onye eze bụ-be iwhe madzụ l’ẹte adụ ike vọo.

⁴A -kụshia ẹgba lẹ mkpọla-ọcha,

onye gude iya akpụ iwhe akpụta iya iwhe l’ama ụma.

⁵A -chịshia ndu ejo mgbazhi

l’iwhu onye eze, ya egude ọdu chịriri achị l’oshi-eze iya.

⁶Ba anọjekwa l’iwhu onye eze ekutse onwoghu.

Gụ eje asụgabejekwa onwoghu

l’ọnodu, rwuberu oke amadụ.

⁷Nkele ọ kakwa ree l’ọo ya gude

ọnu iya sụ ghu: “Bya anọ-koru l’ẹka-a.”

Amamẹ l’ọ kfụru l’iwhu onye a

marụ ẹwha iya mee ghu iwhe-iwhere.

T’iwhe i gude ẹnya ghu whẹ ẹbo ẹbo whụ,

⁸be emekwa t’ị gbarụ

gburugburu je agbaarụ madzụ ẹkwo l’ụlo-ikpe.

Sụa, okfu ono megee nma ghu

bẹ iwhere iya l’e-gudekwa ghu.

⁹Nteke gụ lẹ madzụ l’atụ ntụtu

ẹgo, unu tụlekwa iya whọ l’ishi onwunu,

be ewotakwa iwhe onye ono kfuru

ghu lẹ mpya je aryakaa aryaka.

¹⁰Ọdua bẹ onye nụru iya nụ l’e-mekwa ghu iwhe-iwhere.

Ejo ẹwha, l’ii-vuta iya ta abya l’agvụ agvụ.

¹¹Okfu e kfuru l’o rwuberu iya

dụ g’ọo akpụru mkpọla-ododo, a garụ ye lẹ mkpọla-ọcha.

¹²Mba, onye marụ ágụ l’abarụ

onye l’angabẹje nchị l’okfu, l’eekfuru iya

bẹ dụ g’ọo iwhe-nchị, e gude mkpọla-ododo mee,

bya adụ g’ọo iwhe e gude ọkpobe

mkpọla-ododo memashia ememashi.

¹³Ọo g’aka-mini l’ejije oyi gua ẹhu

egugu nteke l’aakpata iwhe a kọru l’okfu

bụ g’onye ozhi, e gude ire iya ẹka

l’emeje t’ẹhu gua ndu zhiru iya ozhi.

Oomeje t’obu guzeta ndu nwe iya nụ.

¹⁴Ọo g’igweli, kpugeeru ekpu,

bya ezhia whẹrewhere, t’ọ chịhe mini dụ,

bụ g’onye l’ekweje ụkwa iwhe ya

l’oo-meru madzụ ya eje emehe iya dụ ndono.

¹⁵Ọ kwa ọta nshi l’e-me t’onye

l’achị nụ mee iwhe l’ooshia kwe l’iya l’e-me.

Ọ bụru olu-okfu, dụ bẹlebele l’egbujije ọkpu.

¹⁶Ị -whụa mmanụ-ẹnwu, mịtakwa iya l’okelee ya.

Nkele ị -myịta iya ọwhu ọ larụ ghu ashị bẹ l’ịi-gbọshi ya.

¹⁷Jetakwa ibe madzụ ibe ghu l’okelee ya.

Nkele i -jenuka iya, ike ghu agvụ iya, ya akpọ ghu ashị.

¹⁸Ọo gẹ mkpụru l’emeje ẹhuka,

ọ bụru g’ogu-ịgba l’asajatajẹ madzụ,

bya abụru g’akfụ l’adzụje pụrumu,

bụ g’ọ dụ, mbụ onye l’agba ẹka-ebe iwhe ibe iya l’ete eme.

¹⁹Ọda-whube onye l’ẹte egudee

ire iya ẹka nteke iwhe l’atsụ madzụ l’ẹhu

dụkwa g’ọo onye l’eme tẹ ya taa iwhe l’eze arị-eze,

dụkwawho g’ọo onye l’eme tẹ

ya jee ije l’ọkpa, nwụhuru iya anwụhu.

²⁰Ọgu egvu, l’atsọ ụtso eyeru onye obu l’ẹte atsọ ụtso

bẹ dụ g’e yefuru madzụ uwe

gbabẹ iya ẹhu ọto l’ẹka oyi l’atsụ iya.

Ọ dụ g’ọo onye e wotaru mini-ágwá gbashị l’ọnya.

²¹Ọ -bụru l’ẹgu l’agụ onye gụ l’iya

dụ l’okfu, nụkwa iya nri t’o ria.

Nteke ẹgu mini l’agụ iya, kee ya mini t’ọ ngụa.

²²Nkele nteke l’iime nno bẹ bụ

iwhere bẹ l’iimeta ekpu iya l’ishi,

iwhe ono ahụ̀a ya ọku l’ẹhu.

Onye-Nwe-Ọha l’e-bu ghu obunggo.

²³Ọo gẹ whẹrewhere, shi l’ụzo isheli l’egudeje mini bya,

bụ lẹ gẹ okfu-azụ l’akpatajẹ ọdzu iwhu.

²⁴Ọ kakwa ree t’ị kwata je eburu l’azụ-ụtsulo

amamẹ lẹ gụ nwanyị, l’ekfu ekfurekfu bu l’ụlo.

²⁵Ọo gẹ mini, l’eji oyi l’eguzetaje obu onye mini l’agụ

bụ g’ozhi-ọma, e shi otẹnya bya

ezhia l’eguzetaje obu onye e zhiru iya.

²⁶Onye-dụ-chịriri -tụru onwiya tọgboru onye ejo-ememe,

b’ọ dụkwa g’ọo ẹnya-mini, a swọru

ẹrwu, bya adụ g’ọo nwogvu, a tụrwuru atụrwu.

²⁷Ọminuka mmanụ-ẹnwu ta adụdu ree,

o nokwawho gẹ l’ọodua ree tẹ

madzụ gude ẹka eme t’a kwabẹ iya ugvu.

²⁸Madzụ, l’ẹte adụje ike sede onwiya esede

dụkwa g’ọo mkpụkpu, e nwutsushiru mgbodo,

e gude tụ-wheta iya, o gheru ọnu.

¹Ọo gẹ aka-mini, l’ada l’ọnanwu l’ẹte abẹe urwu,

ọ bụru gẹ mini, l’achị l’ọkpa-ji l’ẹte abẹkwaawho l’iwhe,

bụ gẹ l’ọotoo gbaa t’a kwabẹ onye eswe ugvu.

²Ọ bụru gẹ nwogbee, l’anọje ajị pẹremu pẹremu,

bụkwaruwho gẹ nchị-arwa l’anọje erwu bẹkee

bụ g’ọnu, a tụru onye l’adụa

iwhe o meru l’ẹte abya l’ere l’ẹhu iya.

³Ẹchachi bẹ l’eechije ịnya,

l’aakpajẹ iwhe akpa ye nkakfụ-ịgara l’ọnu.

O nokwawho gẹ mgbọro l’anọje

ana nkwe l’okpurukpu onye eswe.

⁴Be yekwaru onye eswe ọnu lẹ mkpọkoro okfu, l’ookfu.

Ọdua gụ l’iya abụru iwhe lanụ.

⁵Yekwaaru onye eswe ọnu lẹ mkpọkoro okfu, o kfuru.

Ọdua bẹ l’oo-dobekwasụ lẹ ya marụ ágụ.

⁶Onye l’ezhi onye eswe ozhi bụ

ọkpa bẹ l’oogbubufu onwiya,

tẹmenu l’ọokpataru onwiya okfu.

⁷Ọo g’ọkpa l’anọje atụ nwangvụru gwẹlegwele

bụ g’ẹtu l’adụje l’ọnu onye eswe.

⁸Ọkwabe onye eswe ugvu dụkwa

g’ọo oye ẹwhuru lẹ mgbẹnu.

⁹Ẹka onye eswe l’anma ẹtu dụkwa

g’ọo ẹka onye mmẹe l’atsụ l’akpa onwiya ógvú l’ẹka.

¹⁰Ọo g’onye l’agba akfụ l’anọje agba iwhe ọ whụru,

bụ g’ọ dụ onye bụ-zhiawho onye

eswe m’ọ bụ o-shi-awe o-shi-awe bẹ l’oobuje ozhi.

¹¹Ọo gẹ nkụta l’anwajẹ ẹnwa lawhu azụ je eria ya

bụ g’onye eswe l’emegejee

rigbarigba lawhu iya azụ ọdo.

¹²Onye l’arị lẹ ya marụ ágụ l’ẹnya nkiya

bẹ onye l’eme eswe kakwa iya mma.

¹³Onye ẹgali l’asụje l’oduu-gburu-agụ bẹ nọ l’echi-ụzo,

l’oduu-gburu-agụ bẹ tsoru echi-ụzo aghawhe.

¹⁴Ọo gẹ mgbo l’anọje agbawhe l’ẹnya ọkpa iya

bụ g’onye ẹgali l’anọje aghawhu onwiya lẹ iwhe-azẹe ya.

¹⁵Onye ẹgali l’abụje: o -tsuta ụtara

l’owhe, ẹka akwaa ya l’ochi.

Ẹgali te ekwe iya t’o ye ẹka l’ọnu.

¹⁶Onye ẹgali l’arịje lẹ ya marụ ágụ

maghata ụmadzu ẹsaa, marụ oye ọnu l’okfu.

¹⁷Onye yeru onwiya l’ẹka l’aaswọ ụswo l’ẹte agbasaaru iya

dụkwa g’ọo onye whụru nkụta, l’aghata lọta iya lẹ nchị.

¹⁸Ọo g’onye ọgvu l’eme l’atụje oloko-ọku mgbahẹka,

tụa akfụ, a gụtaru l’ọku mgbahẹka,

¹⁹bụ g’ọ dụ, mbụ onye ghọ-geeru ibe iya ụgho bya asụ iya:

“Ọ kwa nganga bẹ mu l’akpashị ghu.”

²⁰Ọ -bụru lẹ nkụ ta adụdu l’ọku, ọku anyịhu.

Ọ bụru l’asụlasu ta adụdu l’okfu, ụswo ta abyadụ l’ada.

²¹Ọo gẹ icheku l’awhunwuje ọku-ụzu,

bya abụru gẹ nkụ l’awhunwuje ọku mmaanụ

bụ g’onye l’abanụka mba l’awhunwuje okfu.

²²Asụlasu l’anọje atsọ ntụmatu.

Ọotukoje iwhe bụ ẹhu vọo kfurukfuru.

²³Ọo gẹ nshị mkpọla-ọcha l’etechije ite, a kpụru l’ụrwa

bụ gẹ ire mẹchemeche l’edomije obu mgbashị.

²⁴Onye madzụ dụ ashị l’egudeje

okfu-ọnu kwachia onwiya.

Ọle o domiru ẹregede l’ime obu iya.

²⁵Oo-kfua okfu, l’atsọ ụtso, ọle be eyekwaru iya ọnu,

nkele ejo-ahụma, dụ iya l’obu rwukwaru l’ẹsaa.

²⁶Ashị, ndiwhe dụ iya bẹ l’oogudeje ẹregede domia.

Ọle ejo-ememe, l’oome bẹ l’ee-megee tụa jalaa l’edzudzu-ọha.

²⁷Onye l’atụ iduma bụ iya l’e-megee daba iya.

Ọ bụru onye l’agbụ ẹwhuru bẹ

ẹwhuru l’ewewhuje azụ bya eswipyabe.

²⁸Onye ntuwhu-ire bẹ l’akpọje ndu o melwuru ashị.

Ọnu, l’enwu okfu enwunwu l’emebyije iwhe emebyi.

¹Ba asụkwa l’ọwa-a iwhe l’ii-me echile,

nkele ị tị madụ iwhe ubọku l’e-wota.

²Haa t’onye ọdo jaa ghu ajaja,

ba abụshi ete aja onwiya.

Haa onye ọdo t’ọ jaa ghu,

t’ọ bọ bụshi gụbedua l’onwoghu l’anọ aja onwoghu.

³Ẹwhuru l’anyịkwa ẹrwa; ẹja bụru oke-ivu.

Ọle onye eswe -kpatsua ghu iwe b’ọ

kakọta iwhe labọ ono ọnyi ẹrwa.

⁴Ẹhu-eghughu te enwedu obu-imiko,

ọvuma l’agbanwuhuje ọku l’ẹhu.

Ọle ọ tọ dụdu onye l’a-dụ ike

akfụru ẹnya-kfụrukfuru l’iwhu.

⁵Mba, a barụ madzụ l’ọkpa-jaajaa

kakwa ree amamẹ obu, e yeru madzụ t’e goshifuta iya l’umere.

⁶Iwhe onye gụ l’iya l’eshi ọ̀nyà

mekaru ghu bẹ kakwa mma,

amamẹ ọma ẹregede onye ọhogu ghu byiru ghu.

⁷Onye ẹwho jiru bẹ mmanụ-ẹnwu l’adụ-gejee ẹji.

Ọle onye ẹgu l’agụ bẹ iwhe l’atsọ ilu

l’atụkoje atsọkaa mmẹe-mmẹe.

⁸Onye shi l’ibe iya tụgburu je ejewhuhu

dụkwa g’ọo ẹnu, shi l’ẹkfunu iya whefu je ewhua ụzo.

⁹Senti yẹle mmanụ, l’eshi

kwẹkwekwe l’emeje t’obu l’atsọ ụtso.

O nokwawhọ gẹ ọkpo-zhi ụzo, shi

l’ẹka ọnya madzụ l’emeje, ẹhu akpẹnehu iya.

¹⁰Ba anyazọkwa onye gụ l’iya l’eshi ọnya mẹe onye

yẹle nna ghu l’eshi ọnya.

Ba agbakwarụ jeshia ụlo nwune ghu nwoke mbọku

iwhe-ọtsulanu byarụ ghu.

L’obutobu ghu, nọ ghu ntse kakwa

ree amamẹ nwune ghu, bu ghu otẹnya.

¹¹Nwa mu; makwarụ agụ, gụ emee t’obu kpẹnehu mu,

nke ọwhu mu l’a-ma okfu,

mu l’a-sa onye mu dụ nde l’ẹnya.

¹²Onye nweru uche l’awhụje iwhe

l’e-mekata iya, ya ezeeru iya.

Obenu l’onye l’amarwetaa iwhe

l’ejeje vukovukovuko je evuta ejo-ọnwu.

¹³Madzụ -naa onye l’ọoto maa

mkpalẹka, natakwa iya uwe iya.

Gudekwa iya t’ọ sụberu ghu iwhe

m’ọ -bụru l’ọo onye ọha ọdo b’ọ narụ mkpalẹka ọbu.

¹⁴Madzụ gbeshi lẹ chi-asahụ arya

taratara l’iya l’ekele obutobu iya ekele

bẹ l’ọo-dụkwa g’ọ bụ iwhu bẹ l’oowhu whẹ.

¹⁵Onye okfu ọnu dụnuka nyee ya

dụkwa g’ọo mini, l’ala motomoto mbọku mini chịru.

¹⁶Egbogbo iya dụkwa g’ọo onye

l’egbo whẹrewhere t’o bo whehe,

m’ọ bụ onye gude ẹka egbobuta mmanụ, l’alwa tọritori.

¹⁷Ọo g’igbegiri l’abajẹ igwe bụ

g’amadụ l’abajẹru ọkwa-ẹnya nụ ibe iya.

¹⁸Ọo onye l’azụ figu l’erije akpụru, ọ mịtaru.

Ọ bụru onye l’eleta onye-nwiya-nụ ẹnya bẹ l’ọokwabeje ugvu.

¹⁹Ọo gẹ madzụ l’eleje ẹnya lẹ mini whụ inyonyo iwhu iya

bụ g’obu madzụ l’egoshije ụgbugba iya.

²⁰Ẹwho te ejijedu alị-maa; ẹwho te ejije alị ọla-l’iyi.

O nokwawho g’iwhe l’agụ madzụ l’ete edzujedu iya edzu.

²¹Ite b’e gude eghe mkpọla-ọcha egheghe.

E gude ọku adata mkpọla-ododo adata.

Obenu lẹ madzụ bụ ajaja, l’aaja iya b’e gude adata iya.

²²Ọ tọ dụdu m’oberu i tsua onye eswe l’ọtumu;

i -gude ọ́dzú tsua ya g’ọo onye l’estu owhe,

be l’iiti tsufukwa iya ome eswe l’ẹhu.

²³Makwarụ g’ọnodu élwù ghu gbarụ.

Obu ghu adụkwawho l’ẹka eswi ghu dọru.

²⁴Nkele iwhe-enweru ta anọgbujeduru jeyewaro.

Okpu-eze ta anọje shi l’ọgbo rwua l’ọgbo l’ishi onye lanụ.

²⁵E -gbua ẹwu; nke ọ̀whúú erwuta,

e je kpota nri élwù l’eli ugvu,

²⁶ụnwu-atụru ghu anụlahaa ghu uwe oye l’ẹhu,

gụ awata oore eghu ghu reta iwhe l’ii-gude zụa alị.

²⁷Ii-nwe ẹra-eghu, ha shii, l’ii-gude azụ onwoghu gụ lẹ ndibe ghu;

gude iya azụ nwata nwamgbọko, gụ l’iya bu ebu.

¹Onye ejo-ememe l’anọje agba

ọso nteke l’adụa onye l’achị iya nụ.

Ọle onye-dụ-chịriri bẹ obu

l’eshihuje ike g’ọo oduu-gburu-agụ.

²Nteke ndu bu lẹ mkpụkpu dụ kwefuru ike bẹ l’oomeje

whẹ agbanweshi ndu bụ ishi, l’achị whẹ nụ ẹka ẹka.

Ọle onye marụ iwhe, mbụ onye

iwhe l’edoje ẹnya -bụru ishi,

bẹ l’ọonoje ọdu l’ọkwa ọchichi iya.

³Onye ụkpa, l’emegbuta ndu ụkpa

dụkwa g’ọo ẹka eze mini chịru

mebyishia nri, a kọru l’okfu.

⁴Ndu l’ete eme iwhe iwu kfuru

l’anọje ajakpọshi ndu ejo-ememe.

Ọle ndu l’edobe iwu bẹ whẹ lẹ ndu ejo-ememe l’adụje l’okfu.

⁵Ndu l’eme ejo-iwhe bẹ iwhe

kfụru nhamụnha te edojedu ẹnya.

Ọle ndu l’abarụ Onye-Nwe-Ọha ẹja

bẹ l’oodoje ẹnya dorwe ya edorwe.

⁶Onye ụkpa, l’ẹte emetaje iwhe l’aa-ta iya ụta kakwa ree

amamẹ onye nweru iwhe ụzo iya gbekwanu nko.

⁷Nwa, l’emeje iwhe iwu kfuru bụkwa nwa, marụ ágụ.

Ọle onye yẹle ndu bụ ọ-ga-lẹ-mkpa madzụ l’atụ ọli l’anọje

emechi ndu nwụru iya iwhu.

⁸Onye gude ụgwo-ọnwurunwa

akpa ẹku bụkwa onye l’emeru

ndu ụkpa odoo bẹ l’ọokpa ẹku ọbu edoberu.

⁹Onye l’ẹte anga nchị l’iwhe iwu kfuru

bẹ ekfukfu, l’ookfu anụ Chileke

bụkwa akpamara bẹ l’oome.

¹⁰Onye meru onye obu gụru iwhoro whua ụzo je

eshilahaa ejo ụzo bụkwa l’iduma,

ọ tụru l’onwiya bẹ l’ọo-daba.

Ọle onye l’ẹte eme iwhe l’aata iya ụta bẹ l’e-keta nke-ọma.

¹¹Onye nweru iwhe l’ewoje lẹ ya marụ ágụ.

Ọle onye bụ onye ụkpa, iwhe l’edoje ẹnya

bẹ l’enyorwuje iya ime marụ lẹ g’ọ gbarụ.

¹²Ọobuje, onye-dụ-chịriri -bahụ l’ọkwa,

ẹhu atsọmahu onyenọnu.

Nteke onye ejo-ememe bahụru l’ọkwa,

ndiwhe achọlahaa ẹka whẹ l’e-domishi onwowhe.

¹³Onye l’edomi iwhe-dụ-ẹji o meru edomi

bẹ l’ẹte awafụjedu awafụ.

Ọle onye dụru iwhe o meru ọdu-ụji, bya esefu iya ẹka

bẹ Chileke l’a-whụru imiko.

¹⁴Ẹhu-ụtso bụ nke onye l’atsụ egvu Onye-Nwe-Ọha.

Ọle onye obu tarụ mini l’adabajẹ l’iwhe-ọtsulanu.

¹⁵Onye ejo-ememe -bụru eze achị ndu ụkpa,

b’ọ dụ g’ọo ẹka oduu-gburu-agụ l’abọ erwumu,

m’ọ bụ g’ọo ẹka l’oome ẹnu, mbụ ejo-nkụta-ọswa.

¹⁶Onye eze, l’achị l’ẹka ike te enwekwa mgbamego.

Ọle onye, ọ dụ ashị, mbụ ẹku,

l’aakpa l’ụgho bẹ l’a-nọ ndzụ ogologo.

¹⁷Onye gburu ọchi, ọchi ono gude iya bẹ l’e-jelewho tịitoo jeye ya anwụhu,

tọ dụ onye bya l’a-gbarụ iya mkpu.

¹⁸Onye ụta l’adụa lẹ ndzụ iya bẹ

l’ẹte adụkwa iwhe bya l’e-me iya nụ.

Obenu l’onye ụzo iya gberu nggọ l’agbakwohuje agbakwohu daa.

¹⁹Onye kọru alị iya bẹ nri l’adụjeru.

Obenu l’onye daburu mmaka bẹ yẹle ụkpa-mkpẹri l’e-me.

²⁰Onye e gude ire iya ẹka bẹ ọnu-ọma iya l’a-ha l’igweligwe.

Obenu l’onye l’agba gburugburu tẹ ya nweru iwhe

bẹ l’ẹte ọdukwaa iwhe l’e-me t’a ba anụ iya áwhụ.

²¹Ọbo madzụ ẹbo ta adụkwa ree.

Ọle madzụ l’ekwobeje tẹ ya ria n-wọlazu meswee.

²²Onye ẹka-kfụkfurukfu l’agbajẹ

gburugburu tẹ ya nweru iwhe,

tọ majẹ l’ụkpa-mkpẹri kfụru echeru iya.

²³Onye l’abarụ madzụ mba bẹ

l’ee-megee ka oomeru iwhe-ọma

amamẹ onye gude ọnu aja madzụ ajaja mkpẹemkpee.

²⁴Onye l’ezhi iwhe nna iya ọ dụa

l’ọo nke ne iya l’oshi asụje l’ọ tọ dụdu ẹji,

bẹ yẹle onye emebyi bụkwa iwhe lanụ.

²⁵Onye eghoro-ẹhu l’akpatsu okfu.

Ọle onye kpọru obu yeru Onye-Nwe-Ọha bẹ l’a-nọ aba ụba.

²⁶Onye kpọru obu ye l’ọriri ẹka iya bụ onye mmaanụ.

Obenu l’onye gude mmamagụ eme iwhe ta adụdu iwhe bya l’e-me iya nụ.

²⁷Onye l’anụje onye ụkpa iwhe

bẹ ụko iwhe ta abyakwa l’a-dụru.

Ọle onye l’atakụbeje ẹnya t’ọ bọ

whụ ndu ụkpa bẹ l’anatajẹ mburọnu, ha l’igweligwe.

²⁸Onye ejo-ememe -bahụ l’ọkwa,

ndiwhe achọlahaa ẹka whẹ l’e-domishi onwowhe.

Nteke ndu ejo-ememe darụ l’ọkwa,

ndu-dụ-chịriri eworu ọkwa ọchichi.

¹Onye a bawarụ mba ugboro ugboro,

o kwe kpọkponyi emero iwhe l’oome

bẹ bụ, a -bya l’ajị ẹnya birimu,

ya abụwaru onye a larụ l’iyi.

T’a abya l’e-mekota iya emekota ọdo.

²Ndu-dụ-chịriri bahụ l’ọchichi,

ẹhu atsọlahaa ndiwhe ụtso.

Obenu lẹ nteke ndu ejo-ememe bụ ishi,

ndiwhe atsụlahaa ude.

³Onye yeru mmamagụ obu

l’emeje t’ẹhu tsọ nna iya ụtso.

Ọle onye yẹle ụnwanyi ọkpara bụ

ẹhu l’anọje emebyi ẹku iya emebyi.

⁴Onye eze, gude ikpe nkfụmoto

achị l’emeje t’alị iya keru ọkpa.

Ọle onye ọwhu l’eriwhe n-wọlazu l’emebyije iya emebyi.

⁵Onye l’aja madzụ ibe iya ajaja mkpẹemkpee

bụ ọnya bẹ l’ookweru iya t’o chee ọkpa.

⁶Onye njọ bẹ iwhe-dụ-ẹji, l’oome l’anmajẹ iya g’ọo ọnya.

Obenu l’onye-dụ-chịriri l’anọje agụ egvu ete ẹswa.

⁷Ndu-dụ-chịriri bẹ l’ọonoje agba

l’obu t’e meeru ndu ụkpa iwhe rwuberu whẹ nụ.

Ọle ndu ejo-ememe ta akpadụ whẹ ishi.

⁸Ndu ewenu l’akpatajẹ ùtsù awata adada lẹ mkpụkpu.

Ọle ndu marụ ágụ l’abyanyije ẹhu-eghughu.

⁹Onye marụ ágụ -kpụru onye eswe eje kọtu

bẹ onye eswe ọbu l’a-nọje aba mba ata wowowo eye iya,

a ta anụduru iya iwhe.

¹⁰Ndu l’egbu ọchi l’akpọje onye ẹka dụ ọcha ashị,

whẹ l’anọje achọ ụzo whẹ l’e-shi

kpawhua onye obu gụru iwhoro ishi.

¹¹Onye eswe l’avụje ọvuma

vurwua ya l’ishi goshi g’ẹhu l’eghube iya eghu.

Ọle onye marụ ágụ l’esedeje onwiya

nọdu nggujingguji mẹ ẹhu l’eghu iya eghu.

¹²Onye bụ ishi ngagbabẹde nchị l’ejire,

bẹ ndu l’ejeru iya ozhi

l’a-bụkotalewho ndu ejo-ememe.

¹³Onye ụkpa yẹle onye l’akpa madzụ ẹhu

bẹ nweru iwhe lanụ, l’anwụje l’ẹhu whẹ labọ:

Iwhe ọbu bụ l’ọo Onye-Nwe-Ọha tụkoru whẹ labọ

nụ ndzụ, mee tẹ whẹ saa ẹnya.

¹⁴Onye eze -gude ire-lanụ ekpe ndu ụkpa ikpe

bẹ oshi-eze iya l’e-kelekwaruwho jịngujingu g’o keru iya.

¹⁵Ẹchachi, e gude àhụ̀ nwata l’emeje t’ọ marụ ágụ.

Ọle nwata, a harụ ẹhu, l’emeje ne iya iwhe-iwhere.

¹⁶Ndu ejo-ememe -nọdu l’ọchichi,

iwhe-dụ-ẹji akakwawhọ shii eje eje.

Obenu lẹ ndu-dụ-chịriri l’a-nọdu

whụ nteke whẹ l’a-nọ ada igbu-wẹewee.

¹⁷Hụ̀a nwa ghu àhụ̀hù nke ọwhu l’ịi-tị chị uche l’ẹka.

Oo-me t’obu tsọhu ghu rịkporikpo.

¹⁸Ẹka onye l’ekfuchiru Chileke l’adụa bẹ onyenọnu

l’ewheje akoro eme g’ọ dụ iya.

Ọle onye l’eme iwhe iwu kfuru bẹ ẹhu-ụtso dụru.

¹⁹Nwozhi ta bụledua okfu-ọnu b’e gude ahụchata iya,

nkele okfu, e kfuru iya dogezhikwa ya nụ ẹnya

bẹ l’ọotoo angadụ nchị.

²⁰?Ị whụru onye l’awọ okfu kpokokongu?

Onye ono bẹ l’eelekwa ẹnya l’onye eswe l’a-ka

ometa iwhe amamẹ yẹbedua.

²¹Nwoke shi lẹ nwata aswanụkaru onye ozhi iya aswarụ,

bẹ l’oo-megee nụa awhụ l’ikpazụ iya.

²²Onye ẹhu-eghughu l’anọje akpatsu okfu.

Onye obu-ọku l’emeje iwhe-dụ-ẹji, ha l’igweligwe.

²³Ekuku madzụ l’emeje ya adaa.

Obenu l’onye wozeru onwiya alị bẹ l’aakwabẹje ugvu shii.

²⁴Onye yẹle onye oshi l’akpa

bụkwa ndzụ iya b’ọ kpọru ashị.

Aa-nọ eburu iya ọnu, ọle ọ tọ bya l’ekfu okfu.

²⁵Ọtsu egvu madzụ bụ ọnya bẹ l’ọogbabeje.

Ọle onye bụ onye kpọru obu yeru

Onye-Nwe-Ọha ta adụdu iwhe bya l’e-me iya nụ.

²⁶Aahajẹ l’igwe achọ t’onye ishi meeru whẹ iwhe-ọma.

Ọle onye l’ekpejeru madzụ ikpe,

kfụru nhamụnha bụ Onye-Nwe-Ọha.

²⁷Onye-dụ-chịriri bẹ onye l’ẹte

akfụbe ẹka ọto l’adụje ashị.

Onye obu gụru iwhoro

l’adụjekwanu onye ejo-ememe ashị.

Okfu, Agụru l’ekfu

¹Ọ waa bụ okfu-ọnu Agụru, nwa Jake. Mbụ ozhi, Onye-Nwe-Ọha zhiru iya.

Nwoke ono kfuru iya Itiyẹlu,

mbụ l’o kfuru iya Itiyẹlu bya ekfuaru iya Ukalu sụ:

²“Ọo mu kagee ba ama iwhe l’iwhe bụ unwoke.

Agụ madzụ ta adụdu mu l’ẹhu.

³Mmamagụ bẹ mu l’ẹte anwụdua anwụ ilile.

Mu ta ama Onye ono, dụ nsọ amama owhu.

⁴?Ọo onye bahụjewaru l’imigwe; bya eshi iya lwazeta?

?Ọo onye gudejewa ẹka kpokobe whẹrewhere?

?Ọo onye gudejewa uwe iya kechia mini ekechi?

?Ọo onye meru t’ẹka mgboko beru kpọru akpọru

?Ẹwha onye ono bụ gụnu? ?Ọo gụnu bẹ nwa iya l’aza?

Kanụru mu iya m’ọ bụru l’ị marụ iya.

⁵Okfu Chileke bẹ ntụpo l’adụdua ilile.

Chileke bụ iya l’egbochitaje ndu

gbabaru l’ime iya je anọdu ezeru ndzụ.

⁶Be eyekwakwa iwhe l’okfu iya.

Ọdua bẹ l’ọo-bakwarụ ghu mba

goshi ọha-l’eze l’ị bụ onye l’adzụ ejire.

⁷Uzhi iwhe labọ bẹ mu l’aryọ ghu jiko Onye-Nwe-Ọha.

Ba ajịkakwa l’i tii meduru mu iya tẹmenu mu anwụhude.

⁸Menua tẹ ntuwhu-l’eregede yẹle

ọdzu ejire nọdu mu otẹnya.

Be ekwekwa tẹ mu kpaa nri,

gụ eje ekwekwa tẹ mu nweru iwhe.

Iwhe l’ịi-nụjele mu whọ bụ nri,

l’a-sụjeru mu eriri lẹ mbọku.

⁹Ọdua bẹ mu l’e-nwenukakwa iwhe, jịka ghu

kfulahaa sụ: ‘?Oo onye bụ Onye-Nwe-Ọha ọbu?’

m’ọ bụ mu akpanụka nri, je ezhia oshi,

shi nno mebyia ẹwha Chileke mu.

¹⁰Be ekfubyishijekwa nwozhi l’iwhu onye-nwiya-nụ.

Ọdua bẹ l’ọo-tụkwa ghu ọnu, gụ ejenwua ẹhu.

¹¹O nwekwaru ndu l’anọje ewhu nna whẹ iwhu,

whẹ ta agọta ne whẹ l’ọwho.

¹²O nwekwaru ndu rịru l’ẹkpu ta adụdu whẹ l’ẹhu ilile,

l’ẹbe ọbu l’a safụwaru whẹ ejo-ụdudu, dụ whẹ l’ẹhu.

¹³O nwekwaru ndu bụ ekuku l’eri mgbẹku,

mbụ ndu madzụ ibe whẹ dụ nde l’ẹnya.

¹⁴O nwekwaru ndu eze, dụ whẹ l’ọnu bụ ogu-ịgba,

mbụ ndu tu nkogo l’ọnu,

whẹ gude alwụ ndu ụkpa ọlwochi l’eliwhe,

gudekwa iya whọ egbushi

ndiwhe, l’adụa g’ọ harụ whẹ.

¹⁵Etu-ụda bẹ nwụtaru ụnwumgboko labọ.

Iwhe whẹ l’anọjelewho arya mkpụrudumulanu bụ:

‘Nụnu mu! Nụnu mu!’

Mbụ l’o nweru iwhe ẹto, ẹwho l’ẹte ejije eji,

mbụ iwhe ẹno, l’ẹteke asụbua l’o jiwaru iya. Iwhe ono bụ:

¹⁶Alị-maa mẹe ẹwho nwanyị, l’ẹte atsụ ime, mẹe alị,

nkele alị tẹke angụnyabudua mini sụ lẹ ya ta angụhedu,

ọwaa ọku, l’enwu enwu; ọku, l’enwu enwunwu

ta anọnyabudua sụ l’o jiwaru iya.

¹⁷Onye l’asụ nna iya ẹnya rwubukungu,

t’ọ kpa ishi ome iwhe ne iya sụru t’o mee

bẹ égbé l’e-shi lẹ nsụda bya agụta iya akpụru-ẹnya,

udele eria anụ iya.

¹⁸O nweru uzhi iwhe ẹto, dụ mu oke biribiri,

mbụ iwhe ẹno, l’ẹte edoo mu ẹnya ilile:

Iwhe ono bụ:

¹⁹Ẹka ugo whegharu l’imeli,

mẹe ẹka agwọ wụgharu l’eli ẹwhuru,

mẹe ẹka ụgbo-mini gharụ l’eze-ẹnyimu

mẹfua ọnodu nwoke lẹ nwamgbọko.

²⁰Ọ waa gẹ nwanyị l’eri ogori l’emeje:

Oorije huchaa ọnu sụ:

‘Ọ tọ dụkwa iwhe dụ ẹji, mu meru.’

²¹O nweru uzhi iwhe ẹto,

mgboko l’owhu l’anọje lẹ mkpula anma jijiji,

mbụ l’o nweru uzhi iwhe ẹno,

mgboko l’ẹte adụje ike kfụru akfụru owhu lẹ mkpula iya:

²²Mbụ lẹ nwozhi nọnyaaru bya abụru eze,

mẹe l’onye eswe wafụru bya enweru nri,

²³mẹe lẹ nwanyị, a kpọru ashị bẹ lụru ji,

ọ dua l’ọo nwamgbọko, yẹle

nuwhu bu, ọ kapyabẹ nuwhu iya ọbu l’ẹnya.

²⁴O nweru iwhe ẹno, ha nwanshịi, dụ l’eliwhe.

Ọle whẹ mashịru agụ ike:

²⁵Ndanda bụ iwhe e meru dobe

l’eliwhe, ike ta adụ iya shii.

Ọle whẹ l’apakọje nri l’ọnanwu

dobe, whẹ l’e-ri l’udzumini.

²⁶Ikpukiri-nwanụ bụ iwhe e meru

dobe l’eliwhe, ọkpehu ta adụ iya.

Ọle whẹ l’egvuje ọgba l’ẹwhuru buru.

²⁷Igube te enwedu onye eze,

ọle whẹ l’anọje awụ l’ọgbo l’ọgbo.

²⁸Ngwere ta adụdu onye l’ẹte adụ ike gude iya l’ẹka.

Ọle ọonojelee akpawhe l’oke-uwhu ibe eze.

²⁹O nweru iwhe ẹto, l’anọje agụ ije ọgu.

Mbụ l’o nweru iwhe ẹno, ije iya dụshi ree ike:

³⁰Oduu-gburu-agụ bụ iya bụ ọka-ike l’iwhe bụ anụ l’owhu,

tọ dụ anụ ọdo, l’oobuje ẹnya l’iwhu.

³¹Ọdo bụ akparakfuma ọkoku, mkpi,

yẹle eze whẹ mẹe ndu ojọgu iya,

nọ-wheru iya mgburumgburu.

³²Ọ -bụru l’i shi bụru onye eswe,

mbụ l’i shi anọje ekutse onwoghu ekutse.

Ọdua l’i shi anọje agba ejo égò,

dẹe ẹka l’agba rịa onwoghu arị.

³³Ọo gẹ l’aapyịje mini-ẹra-eswi pyịta iya mmanụ iya.

Ọ bụru gẹ l’aapyịje ẹka l’imi pyịfuta iya mee

bụ gẹ mkpatsu-iwe l’apyịfutaje ẹhu-eghughu.”

Okfu eze ono, l’eeku Limẹlu l’ekfu

¹Ọ waa okfu eze ono, ẹwha iya bụ Limẹlu kfuru. Onye zhiru iye ya nụ bụ ne iya:

²“Gụbe nwa mu, gụbe nwa ono, mu parụ ẹwho iya,

nwa mu sụru Chileke t’ọ nụ mu, ọ nụ mu iya,

³be ewotakwa ike ghu keshiaru ụnwanyi.

Be ewokwaru ọkpehu ghu hakọtaru ndu ono, bụ whẹ

l’emeje tẹ ndu eze laa l’iswi.

⁴Gụbe Limẹlu, tẹ ndu eze ba angụjekwa mmẹe.

L’ọngu mmẹe ta abụkwa iwhe rwuberu ndu eze.

Mbụ l’ọ tọ dụdu ree tẹ ndu bụ

ishi wata ọngu mmẹe, l’atsụ atsụ.

⁵Ọ dụa bẹ whẹ l’angụtakwa mmẹe zọha iwhe iwu kfuru,

whẹ eworu ikpe, rwuberu onye l’eemekpa ẹhu gbanwee.

⁶Woru mmẹe, l’atsụ atsụ nụ ndu l’ala l’iyi tẹ whẹ ngụa.

Gụ eworu mmẹe nụ ndu áwhụ tsọru.

⁷Tẹ whẹ ngụa zọha lẹ whẹ l’akpa nri,

mbụ zọha ejo ọnodu, whẹ nọ.

⁸Kfuchitaje ọnu ndu ono, l’ẹte

adụje ike kfua okfu ẹhu onwowhe.

Dzọtajeru ụnwu-ogbee iwhe rwuberu whẹ.

⁹Kfuje iwhe gbarụ ghu l’ekfukfu,

gụ ekpeje ikpe, kfụru nhamụnha.

Hajẹru ndu iwhe-ọtsulanu byarụ

yẹle ndu l’adụa g’ọ harụ whẹ enge.”

Nwanyị, umere iya dụ ree

¹⁰?Ọo onye l’a-dụ ike chọ-vu ọkpobe nwanyị?

Ẹgube nwanyị ono kakwa

ẹwhuru, vu oke ọnu aswa oore ire.

¹¹Ji, l’alụ iya nụ gude ire iya ẹka,

ọ tọ dụdu ọkpobe iwhe ụko iya bya l’a-dụru iya.

¹²Iwhe l’ọonoje emeru ji iya bụ iwhe-ọma,

o noo gẹ l’oomejeru iye ya jeye gẹ l’ọo-nọ-beru,

tọ bya l’e-me iya iwhe l’emekata iya.

¹³Ntekenteke bẹ l’ọonoje achọ ẹji

anụ yẹle ọkpobe oghu l’oogudeje eje ozhi,

Ọ tọo tugbejedu ẹka l’iwhe l’oome.

¹⁴Ọ dụ g’ọo ụgbo-mini, e gude agba nghọ,

nkele oojeje ẹka teru ẹnya je akpata nri.

¹⁵Nteke l’ootehuje lẹ mgbẹnya bụ lẹ geregere ụtsu

mee nri doberu ndibe iya,

bya ekeshiaru ụnwumgboko,

whẹ l’iya bu ọrwu, gbarụ whẹ l’arwụru.

¹⁶Ọotomitaje ẹnya zụta alị, l’oomebe iwhe.

Ọ bụru okpoga, l’erwuje iya ẹka

bẹ l’oogudeje gbaa mgbabu vayịnu.

¹⁷Ọogbakpojeru iwhe ye lẹ nka gbashi jeshia ozhi.

Ẹka l’eshihuje iya ike l’ozhi, l’ooje.

¹⁸Ọomaje urwu, l’oo-rita lẹ nghọ, l’ọogba.

Oryọku iya te enwunyajee nyịhu l’ẹnyashi.

¹⁹Oogudeje ẹka iya gbaa oghu

gude kpatarụ onwiya ẹkwa.

²⁰Ọonoje asarụ ndu ụkpa ẹka asa,

l’oomeje t’ẹka iya rwugbaru ndu l’adụa g’ọ harụ whẹ l’ẹhu.

²¹Igwe -l’atụ aka-mini,

ọ tọo tsụdu egvu nke, m’a marụ

?tọ dụdu nụ iwhe l’oo-me ndibe iya?

nkele onyenọnu lẹ gẹ ndibe iya ha bẹ yekotaru uwe-oyi.

²²Ọ ya l’egudeje ẹka iya kwee

ẹkwa, l’ọogbasaje l’iwhe whẹ l’azẹje azẹe.

Uwe iya bụru ọkpobe ẹkwa ọcha

yẹle nke ododo b’e gude mee ya.

²³Ji iya bẹ l’aakwabẹje ugvu lẹ nggamgbo-ọha

mẹ whẹ lẹ ndu bụ ọgurenya mkpụkpu dọkobe.

²⁴Oogudeje ẹka iya kwee uwe ọcha ereshi.

L’oomeje iwhe l’eekebutaje l’ukfu vujeru ndu l’agba nghọ.

²⁵Ọkpehu yẹle ọdu ugvu b’o yeru g’ọo onye yeru uwe.

O je l’a-nwụ ọnu-ọchi lẹ mgbe l’iwhu.

²⁶Oogudeje mmamagụ ekfu okfu.

Tẹmenu ire l’akfụjeru iya nhamụnha mẹ l’oozhi iwhe.

²⁷Ndibe iya bẹ l’ooswijeru eswiru eleta whẹ ẹnya.

O to rijedu nri melahaa ẹnyiru.

²⁸Ụnwegirima iya l’etehuje kua ya onye ẹhu-ụtso.

Ji iya l’ekujekwa iya whọ nno, ajakwa iya whọ ajaja sụ:

²⁹“Igweligwe ụnwanyi l’emejekwa iwhe dụ ree.

Ọle ọo ghu kakọta ememe.”

³⁰Ọdu ugvu l’ẹnya bụkwa ụgho.

Ọma ụma bụru iwhe mmaanụ.

Obenu lẹ nwanyị, l’atsụ egvu

Onye-Nwe-Ọha bẹ gbarụ t’a jaa ya ajaja.

³¹Bua ya obunggo, rwuberu iya nụ.

T’ozhi, o gude ẹka iya eje

mekwaa t’e tua ya ẹwha lẹ nggamgbo-ọha.