Fílipayi

Ẹkwo-Ozhi, Pọlu Deru Nụ Ndu

FÍLIPAYI

¹Ẹkwo-ozhi-a bẹ shi l’ẹka mbẹdua, bụ Pọlu, mu lẹ Tímoti, bụ ndu l’ejeru Kuráyisutu Jisọsu ozhi.

Ndu anyi l’ede iya anụ bụ ndu nke Chileke lẹ Fílipayi gẹ whẹ hakọta, mbụ ndu ono, whẹ lẹ Kuráyisutu tụgbaru bụru nnanụ. Anyi l’edekwa iya who anụ ndu ishi chọchi whẹ mẹe ndu l’ejeru chọchi whẹ ozhi.

²Tẹ Chileke, bụ Nna anyi mẹe Onye-Nwe-Ọha, bụ Jisọsu Kuráyisutu meeru unu eze-iwhe-ọma, mekwaawho t’unu buru guu.

Pọlu l’ekfu anụ Chileke l’iswi ẹhu ndu nke Chileke

³Mu l’anọje-zhiawho ekele Chileke ono, mu l’ejeru ozhi ekele l’iswi ẹhu unu nteke bụ nteke mu l’arị ọriri ẹhu unu. ⁴Nteke nteke mu l’ekfu anụ Chileke l’iswi ẹhu unu g’unu ha bẹ mu l’egudejekwa ẹhu-ụtso ekfu anụ iya. ⁵O noo l’eshi nkeshi mbọku mbụ ono, unu nụru ozhi-ọma nke Kuráyisutu bẹ unu shizhiawho yetataru mu ẹka l’anọ aryakashị iya t’a nụ-dzuru iya gbururu byeye ntaa. ⁶Iwhe lanụ ọwhu mu ka ogude ẹka bụ lẹ Chileke ono bụ iya bụ onye watarụ ome iwhe-ọma ono l’ime obu unu bẹ l’e-gudezhiawho nno eme, jeye nteke l’oo-mefu iya l’ishi lẹ mbọku ono, Kuráyisutu Jisọsu l’a-bya. ⁷O noo ẹgube ọriri, mu l’arịru unu nkele o noo iwhe gbarụ mu l’ememe, eshi unu dụ mu l’obu. L’unu g’unu ha bẹ mu l’unu tụkoru gba mgba l’eze-iwhe-ọma ono, Chileke l’emeru mu lẹ mkpọro-ọ, mu nọ ọwa; anyi tụkokwawho gba mgba l’eze-iwhe-ọma nke ọgbaru ozhi-ọma ono ọdzori, gbakwarụwho mgba l’eze-iwhe-ọma nke anọ eme iya t’o shihu ike. ⁸Sụa, ọ kwa Chileke bẹ bụ onye marụ l’ọo ọkpobe-okfu bẹ mu l’ekfu sụ l’eghoro unu g’unu ha gbugeekwaru mu egbu. Eghoro unu ono, dụ mu nụ ono bẹ bụkwa l’oye obu Kuráyisutu Jisọsu l’onwiya yeru anyi b’o shi.

⁹Iwhe mu l’anọje ekfu anụru unu Chileke bụ t’o mee t’obu ono, unu yeru ibe unu kajẹ shii eje eje, unu akabakwaawhọ ọma yẹbe Chileke ọkpobe amama, ya emekwawho unu t’unu dụ ike marweta iwhe gbarụ unu l’ememe l’iwhu iya, ya edokota unu ẹnya. ¹⁰Ọo ya bụ nggẹ unu dụje ike họtaje iwhe ọwhu dụ ree mee nke ọwhu bụkwanu mbọku ono, Kuráyisutu l’e-kpe ndiwhe ikpe rwulewho, ya elewaro l’unu doberu onwunu ọga, ya adụhewaro iwhe l’ọo-ta unu ụta iya. ¹¹Ya elekwawho l’umere, unu shizhiawho meta lẹ ndzụ unu l’owhu bụkota umere, dụ chịriri, mbụ umere, shi l’ẹka Jisọsu Kuráyisutu. Ọo umere ono l’e-me tẹ ndiwhe kwabẹ Chileke ugvu, jaa ya ajaja.

Ogude ndzụ onye egoshi l’a nọdu-turu Kuráyisutu

¹²A-a! Ụnwunna mu, iwhe mu l’eme t’unu marụ bụ l’iwhe-e ya dakfutaru mu nu bẹ gbee yetabaakwanu ẹka t’ozhi-ọma ono kabanụ odzuru mgboko. ¹³O noo l’iwhe bụkota ndu ojọgu lile, l’eche ibe onye eze-e nche mẹwaro ndu lile ọdo bẹ tụkookwaru makọtaru ntaa l’ọo lẹ mu l’ejeru Kuráyisutu ozhi b’e kwoberu tụa mu mkpọro. ¹⁴O wuduakwaru-a mẹe iwhe bụkota-gezhia ụnwunna, anyi lẹ whẹ kweru nke Kuráyisutu gẹ whẹ ha, abụkotawaru ndu chịru ẹka kwẹe lẹ Kuráyisutu, mbụ ọ bụkwaru mkpọro-ọ, a tụru mu-a bẹ kparụ iya nụ. Obu kabaa whẹ oshihu ike ntaa, kabaa whẹ oshihu ike ono nke ọwhu whẹ gbee kabaanụ anọ arya ozhi-ọma arya, tọ dụhe onye whẹ l’atsụ egvu.

¹⁵A makwarụ-a l’o nweru ndu gude ekwo ezhi ozhi-ọma nke Kuráyisutu ono, mbụ ndu ono l’eme iya ge-woo l’ọo iwhe l’eeme l’okfu, ọle o nwekwaru-a ndu ọwhu gude obu-iwhoro ezhi iya. ¹⁶Ndu onona gude obu-iwhoro ezhi iya l’ezhikwanu iya ele lẹ whẹ yeru Kuráyisutu obu. O noo lẹ whẹ marụ l’ọo ya bẹ kuru mu tẹ mu bya agbajẹru ozhi-ọma ono ọdzori. ¹⁷Ọle ndu ọwhuna, l’ezhi ozhi-ọma nke Kuráyisutu ọbu g’ọo iwhe l’aakpa ẹnya eme; te egudezhikwaa obu-iwhoro ezhi iya ilile. Iwhe whẹ kebeleruwho ẹhu eme bụ t’iwhe-ọtsulanu-a, mu l’eje lẹ mkpọro-ọ, mu nọdu-a kabaa shii.

¹⁸Ọle ọbu, ?mu l’eyeru whẹ ọnu? Iwhe mu l’ekfu nu bụ, ?e gude obu-iwhoro ekfu iya, ?ọ bụ l’o nweru iwhe ndu l’ekfu iya l’arị l’uche ekfu iya, iwhe ọbu iwhe obu, meru l’eekfu iya, t’e kfu iya nụ mee t’okfu ẹhu Kuráyisutu jedzuru mgboko. Ọ kwa iwhe ono l’e-me ẹhu atsọ mu ụtso. Mbụkwa ẹhu jekwa l’a-tsọgbuwaru mu rọ ụtso. ¹⁹O noo lẹ mu marụ l’eshi ọwhu unu l’anọje ekfuru anụru mu Chileke, Ume nke Jisọsu Kuráyisutu l’anọje eyeru mu ẹka bẹ mu marụ l’ee-megee haa mu. ²⁰O noo l’iwhe mu doberu ẹnya dobeshia ya ike; elekwawho ẹnya iya, bụ l’ọ tọ dụdu g’ọ dụle-zhia lẹ mu ta abyadụ l’emeru iwhere nụ onwomu l’iwhe bụ iwhe mu l’eme eme. Iwhe obu l’e-shihujechia mu ike mu eme, mbụ emekwa iya ntaa gẹ mu shi emehawa iya, bụ lẹ mu l’e-gude ndzụ mu g’ọ ha kutsee Kuráyisutu, ?ọ bụ mu lẹ ndzụ, ?ọ bụ mu l’ọnwu. ²¹L’ẹhu nke mu bụkwa, mu -nọdu ndzụ bẹ mu l’e-gudekwa ndzụ mu egoshije l’ọo Kuráyisutu bẹ mu nọduru iya, nteke bụ l’ọo anwụhu bẹ mu nwụhuru, ya abụwaruro l’ọo urwu gbee gbaarụ mu. ²²Obenu l’ọ -bụru lẹ mu nọdu ndzụ l’eli-mgboko-o, bẹ mu l’a-ka ojetaru Kuráyisutu ozhi, ọo ya bụ lẹ mu ta amadụ ọwhu mu l’a-hata. ²³Uzhi iwhe labọ ono bẹ mu kfụru l’echi, whẹ tụko alọ mu ibẹka ibẹbo. Ọle ọwhu ẹgu iya l’agụshi mu ike bụ tẹ mu laa, lakfu Kuráyisutu tẹ mu l’iya nọdu. O noo ka mu ree ugbo ụkporo l’ụnu. ²⁴Ọle ọkwataru karụ unu ree tẹ mu nọdu ndzụ swiru unu. ²⁵Eshi-ọwhu iwhe ono doru mu ẹnya bẹ mu marụ lẹ mu l’a-nọdua ndzụ, nọdu swiru unu g’unu ha yetajeru unu ẹka t’ẹhu-ụtso unu kabaa shii, bụkwanu ẹhu-ụtso shi l’eworu, unu woru onwunu ye Kuráyisutu l’ẹka. ²⁶Ọo ya bụkwanu nteke mu kpakfutaleruwho unu ọdo, unu akabaa onwe iwhe unu l’agbabẹ ọkpa gude mu anga, eshi mu l’unu tụkoru bụru ndu anyi lẹ Kuráyisutu Jisọsu tụgbaru bụru nnanụ.

²⁷G’ọ dụlee, t’unu mejelekwawho umere gbarụ ozhi-ọma Kuráyisutu ono nke ọwhu bụkwanu mu -dụ ike bya unu agbawhe, ?ọ -bụ lẹ mu ta adụhedu ike bya, mu a-nụlee ọtu ọnu unu, l’unu kfụshikwaru-a ike; uche bụru unu nnanụ, mu anụkwawho l’unu gude obu lanụ ehe onwunu, mu anụkwawho l’unu l’alwụkwaa ọgu ẹhu ekwekwe ono, unu kweru, bụ l’ozhi-ọma ono b’o shi. ²⁸Unu be ekwekwa t’ọ dụ-zhia ụzo, ndu ọhogu unu l’e-shizhia dụ-zhia iwhe whẹ l’e-gude yee unu egvu ilile. O noo iwhe l’e-goshi whẹ l’ọo whẹbedua bẹ l’ee-bechaa laa l’iyi, unubẹdua abụru ndu l’aa-dzọta. Ọo Chileke l’a-tụko iwhe ono mekota. ²⁹O noo l’unubẹdua bẹ Chileke mewaru eze-iwhe-ọma. Ọle eze-iwhe-ọma ono ta abụlekwaa t’unu woru onwunu ye Kuráyisutu l’ẹka, ọ kwawhọ t’unu kwobe okfu ẹhu iya jeje iwhe-ọtsulanu. ³⁰Ntaa bẹ unu tsowa mu alwụ ọgu ono, mu shihawaa lwụta, bụkwa iya whọ bẹ mu l’a-lwụ ntaa. Nteke ono mu shi alwụ iya bẹ unu gude ẹnya unu whụa ya, ọle ntaa bẹ unu l’anụwa iya lẹ nchị unu.

Ọnata ẹka Kuráyisutu

¹Ọo ya bụ, eworu ono, unu woru onwunu ye l’ẹka Kuráyisutu, ?o meru obu unu o shihu ike? Obu ono, o yeru unu, ?l’ọoduje unu obu? ?Unu lẹ Ume-Dụ-Nsọ tụgbaru bụru nnanụ? ?Unu l’anọje emeru ibe unu obu-ọma, emekwaru whẹ who obu-imiko? ²Ọo ya bụ, t’unu mee t’ẹhu tsọo mu ụtso tsọfu mu iya l’ishi. G’unu l’e-gude mee ya ọbu bụ, t’ọriri unu bụru nnanụ, t’oye obu unu bụru nnanụ, obu abụru unu nnanụ; uche unu abụkwaruwho nnanụ. ³T’unu ba akpajẹkwa ẹnya me iwhe unu l’eme. Unu be ekujekwa onwunu iwhe unu l’ahaa g’ọo ya l’iwhe bụ iwhe unu l’eme eme. Unu wozetaje onwunu alị l’ẹka ibe unu nọ nke ọwhu onyenọnu l’a-rịjelewho l’ibe iya gbarụ t’a ka iya ọkwabe ugvu amamẹ yẹbedua. ⁴T’ọ bọ dụkwa g’unu ha onye ọwhu bụlewho iwhe l’a-dụru iya lẹ ree bẹ l’ọo-nọ achọ kpụ, t’onye-o chọjekwawho iwhe l’a-dụru ndu ọdo lẹ ree. ⁵T’uche unu yẹle nke Kuráyisutu Jisọsu bụjeleruwho iwhe lanụ.

⁶Jisọsu bẹ shizhiewho lẹ mbụlembu dụ-zhiewho gẹ Chileke dụ.

Adụdu ono, ọ dụ gẹ Chileke dụ.

Ta adụkwa nteke ọ rịjeru l’ọo iwhe ya l’ẹte abyaa l’eswefu ẹnya.

⁷Ọle iwhe o mechiaru bụ l’ọ tụru obu iya ama,

swefuro ẹnya l’ọnodu iya,

hatachia lẹ ya l’a-nọduro ọnodu nwozhi.

A nwụa ya, ọ bụru madzụ;

Ọ bya anọo ndzụ lẹ mgboko g’ọo anyịbedua.

⁸Ọ nụaru Chileke okfu, wozeta onwiya alị.

Ọ nụta-beru iya okfu ono nke ọwhu o kwetaru nwụhu,

bụ iya bụ anwụhu ono, ọ nwụhuru l’eli oswebe.

⁹O noo g’o gude Chileke wolikwanua ya eli mebyi ewoli,

ọ kakọta iwhe lile l’eli,

tẹmenu ọ bya anụ iya ẹwha ono, kakọta shii l’iwhe bụ ẹwha l’aazajẹ aza,

¹⁰Nke ọwhu iwhe lile, dụ l’imigwe,

mẹe iwhe lile, dụ l’eli-mgboko-o,

mẹe ọwhu dụ lẹ mkpula alị,

l’a-bụ: whẹ -nụlewho ẹwha Jisọsu ono,

whẹ ebyishi ikpere baarụ iya ẹja;

¹¹mẹe nke ọwhu onyenọnu l’e-kfu l’edzudzu-ọha

l’ọo Jisọsu Kuráyisutu bụ Onye-Nwe-Ọha,

shiwaro nno kwabẹ Chileke, bụ Nna ugvu.

Iwhoro, l’echi l’ẹkpuroochi nke mgboko-o

¹²Ọo ya bụ, ndu mu yeru obu, nteke ono mu l’unu shi nọdu bẹ unu shi anọjelewho anụru mu okfu. T’ọ bọ bụlekwaa nteke mu l’unu nọkota bẹ unu l’a-nụjeru mu okfu. Unu gbẹkwanu kabaa anụru mu iya ntaa, mu nọdu unu otẹnya. Unu gudeje ọtsu-egvu mẹe ẹhu-anmanma kebe ẹhu meje t’adzọdzo ono, Chileke dzọru unu ba abụ iwhe mmaanụ. ¹³O noo l’ọo Chileke bẹ bụ onye l’ereshi ire ike l’ẹhu unu. Ọo ya l’emeje t’unu chịa idzu nke ome iwhe dụ iya mma l’obu, ọ bụkwaru iya whọ l’emeje t’unu dụ ike mekota iwhe ọ tụberu.

¹⁴Sụa, iwhe bụ iwhe unu l’eme, t’unu ba agụjekwa áwhụ me iwhe ọbu, unu ta alọjeru ẹli ye iya. ¹⁵Ọ kwa iya bụ nke ọwhu unu l’a-bụ ndu l’ẹte adụ-zhidua ẹka l’aa-whụta iwhe ụta l’ẹhu unu, unu abụru ndu obu-iwhoro, unu abụkwaruwho ụnwu Chileke, mbụ ndu l’ete emerwu-a onwowhe emerwu l’echilabọ ejo ọgbo-ọ, égò sweru-a, tẹmenu umere whẹ dụta ẹji tsọo ilu. T’ọ bụru gẹ kpokponde l’anọje echi l’ẹnyashi bụ g’unu l’a-bụ iwhoro echiru ndiwhe lẹ mgboko-o; ¹⁶mẹ unu gude okfu ono, l’anụ ndzụ ewokfu whẹ. Unu l’emewaa nno, ọo ya bụ lẹ mu nwewaa ishi iwhe mu l’e-gude eku onwomu mbọku ono, Kuráyisutu l’a-bya ọdo, eshi-ọwhu ọso ono, mu nọdu gbaa lẹ mu l’ezhi ozhi-ọma l’ẹte abụa mu ọso eswe, anya ono, mu nọdu see ta abụ mu nsegbu anya.

¹⁷Mu kfụru l’iwhu Chileke ntaa g’ọo onye l’agbajẹ ẹja nụ Chileke, mu gude eworu ono, unu woru onwunu ye Chileke l’ẹka mee t’ọ bụru ẹja, mu l’agba anụ Chileke. Ọ -bụhuduru m’ọo l’ee-wota mee mu gbashi l’eli ẹja ono bụ iya bụ, ọ -bụru lẹ mu l’a-nwụhu l’iswi ẹhu unu, bẹ ẹhu l’a-nọlekwaa atsọ mu ụtso. Mu l’unu atụko ete ẹswa. ¹⁸Tọ bụkwaruwho nno bụ g’ẹhu l’a-nọ atsọ unubẹdua ụtso. Unu tsoru mu tee ẹswa.

Tímoti mẹe Epafurodáyitọsu

¹⁹Mu l’arịkwa lẹ mu ta anọhedu ọdu ntaa mu ezhi Tímoti t’ọ bya agbawhee unu. Mu wookwaru iwhe ono ye Onye-Nwe-Ọha, bụ Jisọsu l’ẹka. Mu l’e-zhi Tímoti ono t’ọ bya nke ọwhu l’oo-je, lwakfuta mu bya akọoru mu g’unu l’eme eshi, gude dụa mu obu. ²⁰Ọ tọ dụhedu onye ọdo, mu nwe dụ g’ọo Tímoti ono, bụkwanu onye ọriri ẹhu unu l’echije ẹhu. ²¹Ndu ọdo gẹ whẹ ha bẹ bụlewho ọriri ẹhu whẹ bẹ l’echije whẹ ẹhu, whẹ ta arị-vujehekwa iwhe ọwhu bụwaa nke Kuráyisutu Jisọsu l’ọriri. ²²Ọle ọwhube Tímoti bẹ unu mawarụ-a l’o goshiwaru onwiya lẹ ya bụ onye gbarụ t’e gude ire iya ẹka. Unu mawarụ-a g’o shi tsota mu lẹ gẹ nwa l’anọje etso nna iya. O noo g’o shi tsota mu, yetataru mu ẹka l’ozhi ozhi-ọma-a. ²³Ọo ya bụ lẹ mu l’arịkwawho lẹ mu l’e-zhi Tímoti ono ibe unu ẹgwegwa mẹ mu bebelewho marụ gẹ l’oo-bekochaa nwụaru mu. ²⁴Tẹmenu mu gudekwawho Onye-Nwe-Ọha ẹka lẹ mu ta anọhedu ọdu; mu abya agbawhee unu l’ishi onwomu.

²⁵Mu byakwawhọ bya arịa l’o to nwedu gẹ mu marụ mu l’e-me iya ọdo gbahalẹwho tẹ mu zhi nwanna anyi Epafurodáyitọsu t’ọ byakwawhọ bya agbawhee unu, bụ onye mu lẹ ya tụkowaru eje ozhi, bụkwaruwho onye mu lẹ ya tụkoru alwụ ọgu ẹhu Kuráyisutu, bụkwaruwho onye unu zhiru t’o wotaru mu iwhe ono mkpa iya shi dụ mu. ²⁶Mu l’ezhikwa iya t’ọ bya ibe unu nggẹ unu l’iya jịwaro, o noo l’eghoro unu g’unu ha bẹ shiwaa dụta iya, mbụkwa o shi tsụta iya lanụ l’unu nụru l’ẹhu ta adụdu iya mma. ²⁷Iwhe shikwaa eme iya l’ezhi, mbụkwa meta iya nke ọwhu o wuduru mẹ ya anwụhu. Ọle Chileke whụru iya imiko. Ọ tọ lẹdu iya-a b’ọ whụru imiko ono, ọ whụkwaruwho mbẹdua imiko, ọdua mẹ áwhụ adụru mu nkwere labọ. ²⁸Ọo ya bụ l’ọ gbẹenu ka mbẹdua owhe uwhere tẹ mu zhikebe iya t’ọ bya t’unu l’iya jịa nke ọwhu ẹhu l’a-tsọkwanu unu ụtso l’unu gude ẹnya unu whụa ya ọdo, mbẹdua arị-buhukwanu iya l’ọriri. ²⁹Ọo ya bụ, t’unu gude ẹhu-ụtso, gbobe ẹka labọ nata iya ọkpobe anata, l’ọo nwanna, unu lẹ ya mẹe Onye-Nwe-Ọha tụkoru tụgba bụru nnanụ. Unu akwabẹje ẹgube unwoke, dụ g’ọo yẹbedua ugvu. ³⁰O noo l’o wuduru nwanshi mẹe ishi iya abaa l’ojeru Kuráyisutu ozhi. O swefu ẹnya lẹ ndzụ iya emeru mu iwhe unu gẹga a-nọ emeru mu, ọ -bụ l’unu te ebu mu otẹnya.

Ọkpobe ọdu chịriri

¹Sụa, ụnwunna mu; ẹka mu l’a-sụberu iya unu ishi bụ t’unu teje ẹswa l’unu lẹ Onye-Nwe-Ọha tụgbaru bụru nnanụ. Odewhu iwhe mu dehawaru azụ ta atsụkwa mu l’anụ. Mu l’edewhu iya azụ, o noo lẹ mu dewhu iya azụ bẹ l’oo-me t’unu kabaa ya ogude ẹka, mbụ iwhe ono, mu kfuhawaru unu. ²Unu kwachafụkwaru ndu ono, l’anọje ezhi ejo iwhe ono ẹnya, mbụ ndu ono, bụkota ejo nkụta ono. ?Unu nụwaru iya? Unu jikwaru ụba yeru whẹ, mbụ whẹbe ndu ono l’anọje ezhi t’e gude iwhe bua anụ-ẹhu, sụ l’o noo ẹgube ugvu madzụ bufutaje ndono. ³Iwhe mu kwoberu ekfu iwhe ono bụ l’ọo anyịbedua bẹ buru ọkpobe ugvu, mbụ anyịbe ndu gude Ume-Dụ-Nsọ abarụ Chileke ẹja, anyi l’anọje aja Kuráyisutu Jisọsu ajaja iwhe o meru anyi, mbụ tọ hẹkwa l’anyi l’edobeje obu anyi l’ọo ẹgube madzụ anyi bụ l’a-dzọje anyi. ⁴Nggẹ l’ọo iwhe ẹgube iwhe madzụ bụ l’adzọje iya mẹe ya abụkwaru mbẹdua gege enwe iwhe mu l’a-gbabẹ ọkpa dobe obu l’ọo ẹgube madzụ, mu bụ l’a-dzọ mu. Ọ -bụru l’o nwezhiaru onye l’arị lẹ ya nwe iwhe ya l’a-gbabẹ ọkpa, dobe obu l’ọo ẹgube madzụ ya bẹ l’a-dzọ iya bẹ mbẹdua kakwa onye ọbu enwenwe iya. ⁵O noo l’a nwụru mu, mu nọlewho abalị ẹsaa, nke ẹsato iya; e bua mu ugvu. A nwụru mu, mu bụru onye Ízurẹlu gẹdegede, ikfu, mu shi bụru ikfu nke Bénjaminu. Mu kwatarụ bụru onye Híburu, mbụ ọkpotokpo nwa, ndu Híburu nwụru. A bya bya l’ome iwhe iwu ndu Ju kfuru bẹ mu shi bụru onye Fárisii.

⁶Nteke a byarụ lẹ nke iwhe bụ iya shi kakọta anọ awhọ mu l’obu, mu asụ l’iwhe mu shi eme bụ lẹ mu shi achị nta chọchi. A bya lẹ nke iwhe ono, bụ iwhe iwu kfuru l’o noo iwhe bụ onye -meru iya nụ onye ono abụru onye dụ chịriri, o noo ta adụkwa ọwhu l’aa-ta mu ụta l’o noo ọwhu mu dosweru. ⁷G’ọ dụlee, iwhe lile ono, bụkota iwhe mu shi anọjero arị l’ọo iwhe l’a-baru mu urwu bẹ mu kwobewaru iswi ẹhu Kuráyisutu swefukota ẹnya, gụkotaru iya ye l’iwhe bụ mu iwhe ọla-l’iswi. ⁸Ọ tọ lẹkwaa iwhe lile ono nwekiya. Iwhe lile ọdo bẹ mu tụkotaakwaru gụkota l’iwhe tụkoru bụru mu iwhe ọla-l’iswi. Iwhe meru mu gụa ya l’iwhe ọla-l’iswi ono bụru l’urwu onona, nyịru gẹ l’aa-nọ atụ ọnu iya bẹ rwubewaru mu ẹka bụ iya bụ lẹ Kuráyisutu Jisọsu bụ iya bụ Onye-nwe-mu-nu bẹ mu mawarụ, majia ya ẹnya. Ọo iswi ẹhu iya bẹ mu kwoberu swefukota ẹnya l’iwhe lile, mu nwe enwe, t’ọ bụru mu iwhe iyi yitaru. Ntaa bẹ iwhe ono bụkotaakwa ntụ-ekpofu l’ẹnya mu nke ọwhu l’ọo-bụlewho Kuráyisutu bẹ bụ urwu, mu l’e-rita kpu, ⁹mẹe nke ọwhu mu l’e-goshikwanu lẹ mu l’iya kwatarụ tụgba ọkpobe atụgba bụru nnanụ. Iwhe mu l’eme ta abụkwa tẹ mu meje nggẹ a sụje lẹ mu bụ onye dụ chịriri, mbụ ẹgube ọdu chịriri ọwhu bụ l’ome iwhe iwu kfuru b’o shi. Ọdu chịriri ọwhu mu l’e-goshikwanu lẹ mu dụ ntaa bẹ bụ ọdu chịriri ọwhu shi l’eworu ono, mu woru onwomu ye Kuráyisutu l’ẹka. O nokwa ọdu chịriri ọwhu, shi Chileke l’ẹka. Ọ bụleruwho ndu woru onwowhe ye iya l’ẹka bẹ l’ọoguje gẹ whẹ dụ ẹgube chịriri ono. ¹⁰Iwhe meru mu swefukota ẹnya l’iwhe ono, mu nwe enwe; gụru iya ye l’iwhe larụ l’iswi, bụ nke ọwhu mu l’a-ma Kuráyisutu, marụ ike ono o gude shi l’ọnwu teta nọdu ndzụ mẹe nggẹ mu lẹ Kuráyisutu ọbu atụkokwanu gba mgba l’iwhe-ọtsulanu ono, o jeru mẹe nggẹ Chileke emee tẹ mu dụ g’ọo Kuráyisutu l’anwụhu ono, ọ nwụhuru; ¹¹nke ọwhu Chileke l’e-meru mu iwhe mu l’ele ẹnya iya, mbụ mee mu eshi l’ọnwu teta nọdu ndzụ.

Ọgbafu ọso l’ishi

¹²Iwhe mu l’ekfu ta abụkwa l’o rwuwaru mu ẹka erwurwu, ọdua l’ọo lẹ mu dụkotawaa ree, ọle iwhe mu l’anọje adzọba bụ tẹ mu nata obunggo ọso mu gbarụ, eshi-ọwhu Kuráyisutu Jisọsu natawaru mu mebe iwhe ẹka iya. ¹³Ụnwunna mu, mu te ekfukwa lẹ mu natawaru obunggo ọso ono. Ọle o zhiawho iwhe lanụ bẹ mu l’emeje: mu l’atụkoje iwhe ọwhu mu gbaghatawaru ye l’azụ zọhashichaa, kebezhiawho ẹhu agba agbakfu ọwhu dụ mu l’ụzo iwhu. ¹⁴Mu l’anọje adzọba tẹ mu gbafụ ọso ono l’ishi nke ọwhu mu l’a-nata obunggo. Obunggo ono bẹ bụ ndzụ tututu-mịmimi ono, Chileke shi l’ẹka Kuráyisutu Jisọsu kua mu tẹ mu bya anata l’imigwe.

¹⁵Ọo ya bụ, t’iwhe bụkota ndu l’agụ onwowhe lẹ whẹ tsefutawaru l’ẹnya nke Chileke, bụlekwaruwho ẹgube iwhe ono, mu l’arị bẹ whẹ l’a-nọje arị. Nteke bụ l’ọ bya enweru g’ọ dụderu, unu harụ arị iwhe ọdo bẹ Chileke l’e-goshikwaa iya-a unu, ya edoo unu ẹnya. ¹⁶Ọo ya bụ, unu t’anyi tsolekwaruwho ụzo ono, anyi shi tsota ono, mbụ ụzo, bụ iya bẹ anyi tsoru gbabewaa ọso ono ẹka-a, anyi gbaberu iya ntaa.

¹⁷Ụnwunna mu, unu tụko g’unu ha meje gẹ mu l’eme. Anyi l’egoshiakwa unu iwhe unu l’e-meje. Unu wọtalekwawho ẹka ndu ono, l’eme iwhe ono, anyi l’egoshi unu. ¹⁸Mu kfuhaakwaru unu iwhe-e ugbo olemole, ntaa bẹ mu gudekwa ẹnya mini ẹkwa ekfuwhuru iya unu azụ sụ, l’o nwekwaru igweligwe ndu umere whẹ l’egoshi lẹ whẹ bụ ọhogu oswebe Kuráyisutu. ¹⁹Gẹ l’ọo-nwụru whẹ bụ lẹ whẹ l’a-la l’iyi. Iwhe whẹ l’abarụ ẹja l’ọo ya bụ chi nke whẹ bụ iwhe l’a-la whẹ l’ẹwho. Ya abụru iwhe iwhere iya gẹge adụ whẹ bẹ whẹ l’egudeje anga l’ụnga. Ọ bụleruwho l’iwhe nke mgboko-o bẹ whẹ woru obu whẹ dobe. ²⁰A bya bya l’anyịbedua, ibe anyi dụ l’imigwe, ọo ẹka ono bẹ Onye Ndzọta anyi ono, anyi l’ele ẹnya iya, eleshi iya ike l’e-shi bya bụ iya bụ Onye-Nwe-Ọha, bụ Jisọsu Kuráyisutu. ²¹Ọo ya bụ onye l’a-gbanwe ẹhu anyi-a, l’ẹte adụa iwhe ọ bụ-a, mee ya, ya dụ g’ọo ẹhu nkiya, l’egbu zaazaa. Ike, l’oo-gude mee ya bụ ike ono, o gude mekota iwhe lile, ọ lwa iya lẹ mkpula.

Ọnma ọkwa

¹Ụnwunna mu, mu yeru obu, o nokwa iwhe meru mu sụ unu t’unu kfụshia ike l’atụgba ono unu lẹ Onye-Nwe-Ọha tụgbaru bụru nnanụ. Eghoro unu l’egbukwa mu egbu. Ọo unu bụ ẹhu-ụtso mu, ọ bụkwaruwho unu bụ obunggo mu l’e-gude anga. Mu yeru unu obu shii.

²Mu l’aryọ ụnwanyi labọ ono, bụ Yuwódiya yẹle Síntiki t’obu bụru whẹ nnanụ, eshi whẹ lẹ Onye-Nwe-Ọha tụkoru tụgba bụru nnanụ. ³Tẹmenu mu l’aryọkwawho gụbedua, bụ ọkpobe ọnya mu, mu lẹ ghu tụkoru ejeru Chileke ozhi, t’i yetajekwaru ụnwanyi ono ẹka tẹ whẹ meje iwhe ono, mu sụru tẹ whẹ mee. O noo lẹ mu lẹ whẹ tụkoru gba mgba see oke anya l’anọ ezhikashi ozhi-ọma ono, mẹkwawho Kelémenti mẹwaro ndu ọdo, bụkota ndu anyi lẹ whẹ tụkoru jee ozhi ono, bụkota ndu ẹwha whẹ dụkota l’ẹkwo Chileke deshiru ẹwha ndu l’a-nọ ndzụ tututu-mịmimi.

⁴T’ẹhu tsọje-zhiawho unu ụtso nkele unu lẹ Onye-Nwe-Ọha tụgbaru bụru nnanụ. Tẹ mu kfuwhukwa iya azụ ọdo. Mu sụru t’ẹhu tsọje-zhiawho unu ụtso.

⁵T’unu gudeje umere unu goshije ndiwhe l’owhu l’unu bụ ndu obu-ọma. Onye-Nwe-Ọha nọokwa ntse. ⁶T’ọ bọ dụkwa iwhe unu l’e-je ọchiru uche l’ẹka; iwhe unu l’emechia bụ t’unu gudeje ekfukfu, unu l’ekfu anụ Chileke kajẹru iya iwhe lile, mkpa iya dụ unu. Unu -medejekwa nno t’unu ba anyazọjekwa otu iya ẹwha. ⁷Ọo ya bụkwanu nke ọwhu ẹhu ọdu guu nke Chileke, bụ iwhe kwatarụ dango gẹ madzụ l’e-gude uche iya marụ iya, a-bụru iwhe l’a-kwachi obu unu mẹe uche unu l’atụgba ono, unu lẹ Kuráyisutu Jisọsu tụgbaru bụru nnanụ.

⁸Ụnwunna mu, ẹka mu l’a-sụberu iya unu ishi bụ: t’iwhe l’e-shitajelewho unu l’uche bụru ọriri iwhe ono, bụkota ọkpobe-okfu, mẹe iwhe bụ iwhe gbarụ nke t’e yeru iya ugvu, mẹe iwhe bụ iwhe dụ chịriri, mẹe iwhe l’ete emerwua emerwu, mẹe iwhe dụ ree l’ẹnya, mẹe iwhe ọnu wụkoru l’ọ dụkota ree, mẹe iwhe dụ ugvu, mẹe iwhe bụ iwhe l’aaja ama. ⁹Unu meje iwhe lile ono, unu nwụtaru lẹ ndzụ mu, mẹe ọwhu mu zhiru unu ezhi; unu emekwawho iwhe lile, unu nụru mu l’ọnu, mẹe ọwhu unu gude ẹnya unu whụa l’ẹhu mu. Ọo ya bụ nke ọwhu Chileke ono, l’emeje t’unu buru guu l’e-swiru unu.

Pọlu l’etu ndu Fílipayi ẹwha ree, whẹ meru iya

¹⁰Sụa, tẹ Onye-Nwe-Ọha lebukwaa ẹka, nkele ntaa bẹ unu byawaa emeeru mu ree, goshiru mu ọdo l’unu nyatazhikwaduru mu-a eshi nkeshi nteke who. Unu ta amadụroo iwhe ẹhu l’atsọ mu l’ọo ụtso. Iwhe mu l’ekfu ta abụkwa l’unu ta anọjedu ekfu okfu ẹhu mu. Iwhe mu l’ekfuchia kwa l’ụzo te eshidu adụje unu t’unu mee ya l’ẹka. ¹¹Iwhe mu l’ekfu ta abụkwa l’o nweru iwhe ụko iya dụru mu, lẹ mbẹdua nwụtaru l’iwhe mu nweru nwa g’ọ ha g’ọ ha bẹ l’atsụje mu l’ẹnya e -behuduru l’ọonwuru mu ọnwuru agha. ¹²Mu makwarụ-a gẹ l’aabụje onye ejo ẹka dụ, mu makwarụwho gẹ l’aabụje onye barụ eze. L’iwhe bụ ẹka mu nọ, bẹ iwhe lile ono meekwaru mu tọ dụhe iwhe l’abụjekwadu mu ẹnya-awhawha l’ẹhu nke mu, mbụ lẹ mu l’eriji ẹwho, ọdua lẹ mu kfu ẹgu, ?mu nweru iwhe mẹ mu te enwe, mu anọ-kirishilekwaa. ¹³Ọ tọ dụ-zhidua iwhe mu l’ẹte adụ ike mekota, o noo l’ọo Kuráyisutu bẹ bụ onye l’emeje ike adụ mu nke ememe iya.

¹⁴Obenu l’unu meru mu obu-ọma, yetaru mu ẹka nteke mu l’eje iwhe-ọtsulanu. ¹⁵Tẹmenu unubẹ ndu Fílipayi l’onwunu marụ lẹ nteke mu beberu wata ozhi-ọma ono lẹ mbụ, mbụ nteke ono, mu lụfutaru lẹ Masedóniya bẹ l’ooto nwedua chọchi, mu lẹ whẹ tụgbaru nnanụ, t’a gụfulewho unubẹdua kpụ. Ọo unu bụ ndu l’anụje mu iwhe, bụru ndu l’anatajẹkwawho iwhe l’ẹka mu. ¹⁶Mbụ lụfuchaa lẹ nteke mu nọ lẹ Tesalonáyika bẹ unu shi emejeru mu mkpa mu mẹe mkpa byarụ mu, unu mekwaru mu mkpa ono iwhe ka ugbo lanụ. ¹⁷Ọ tọ bụkwa iwhe ono, unu l’anụje mu ono bẹ mu l’ele ẹnya iya, iwhe mu gbechia ele ẹnya iya bụkwa t’unu rita urwu yekwa eyekwa, bụ iya bụ t’unu kabaa oshihu ike l’eworu ono, unu woru onwunu ye Kuráyisutu l’ẹka. ¹⁸Mu natawaru iwhe lile ono, unu nụru Epafurodáyitọsu o wotaru mu. Oo-dzugezhia iwhe mu l’eme iya gbẹenu tsufu etsufu. Iwhe ono, unu nụru bẹ unu nụru mu, nụru nke anyịnyi iya ye iya. Iwhe ono, unu nụru mu ono bẹ dụ g’ọo ẹja l’eshi kwẹkwekwe, mkpọ iya l’akpụ tụlaa alakfu Chileke. Mkpọ iya ono l’atsọ iya ụtso, o gbobe ẹka labọ nata iya. ¹⁹Sụa, Chileke ono, mu l’ejeru ozhi bẹ l’a-nụkotakwaa unu iwhe bụ-zhia iwhe mkpa iya dụ unu. Ọo l’ẹka Kuráyisutu Jisọsu bẹ l’ooshije hata iwhe nụ anyi, mbụ hata iwhe l’iwhe ono o nwe, ọdu-biribiri iya kariru gẹ l’aa-nọ atụ ọnu iya nụ unu. ²⁰T’ọ bụru Chileke ono bụ iya bụ Nna anyi bẹ ajaja l’a-bụ nkiya jeye lẹ tututu-mịmimi. O noo g’ọ dụ.

Ekele Pọlu gude akpochi ishi ẹkwo-ozhi-a

²¹Unu jịaru mu ndu nke Chileke l’ẹhu l’ẹhu, mbụ ndu ono, whẹ lẹ Jisọsu Kuráyisutu tụgbaru bụru nnanụ. Ụnwunna anyi, ndu mu lẹ whẹ nọ l’ẹka-a l’ajịkwaro unu. ²²Iwhe bụkota ndu nke Chileke, nọkota l’ẹka-a gẹ whẹ ha l’ajịkwawho unu, kelekele nke ndu l’ejeru Siza ozhi.

²³Tẹ Onye-Nwe-Ọha, bụ Jisọsu Kuráyisutu meeru unu g’unu ha eze-iwhe-ọma.