Fayilímọnu

Ẹkwo-Ozhi, Pọlu Deru Nụ

FAYILÍMỌNU

¹Ọo mbẹdua, bụ Pọlu, bụ onye e kwoberu iswi ẹhu Kuráyisutu Jisọsu tụa mkpọro bẹ mu lẹ nwanna anyi Tímoti tụkoru ede ẹkwo-ozhi-a.

Onye anyi l’ede iya anụ bụ gụbe onye ono, anyi yeru obu, bụ Fayilímọnu, anyi lẹ ghu tụkoru ejeru Kuráyisutu ozhi. ²Anyi l’edekwa iya who anụ gụ lẹ Ápufiya, bụ nwanna anyi nke nwanyị, mẹe Akị́posu onye anyi l’iya tụkoru alwụ ọgu ẹhu Kuráyisutu; edekwa iya who anụ iwhe bụkota ndu chọchi ono, l’edzukobeje l’ụlo ghu.

³Tẹ Chileke, bụ Nna anyi yẹle Onye-Nwe-Ọha, bụ Jisọsu Kuráyisutu meeru unu eze-iwhe-ọma; mekwaawho t’unu bụru guu.

Pọlu l’ekele Chileke ekele ẹhu Fayilímọnu

⁴Mu l’anọje ekele Chileke ono, mu l’ejeru ozhi ekele; iwhe bụ-zhia nteke bụ nteke mu l’ekfu anụ iya l’iswi ẹhu ghu. ⁵O noo l’i yekotaru ndu nke Chileke obu gẹ whẹ ha, anyi l’anụkwawho l’ị nọ l’ẹka Onye-Nwe-Ọha, bụ Jisọsu nọshia ya ike. ⁶Iwhe mu l’anọje ekfu anụ Chileke bụ t’o mee t’i gude anọno ono, ị nọ l’ẹka Onye-Nwe-Ọha mee tẹ gụ lẹ ndu ọdo tụgba bụru nnanụ ọkpobe abụru. Mbụ iwhe bụkota ndu lile ono, wowaru onwowhe ye Onye-Nwe-Ọha, bụ Jisọsu l’ẹka. Ọo ya bụ, unu eshikwanu nno kabaa anọ amarweta iwhe lile, bụ iwhe bụkota iwhe-ọma, gbarụ anyi l’ememe nke ọwhu l’aa-nọ akwabẹ Kuráyisutu ugvu. ⁷Sụa, nwanna mu; obu ono, i yeru ndu nke Chileke bẹ kwa iya kagezhia ome t’ẹhu tsọo mu ụtso. O meekwaruwho; obu ka mu oshihu ike. Iwhe ọbu, meru ọ dụ nno bụkwaru l’ọo oye obu ono, i yeru ndu nke Chileke ono, bẹ meru obu tukfuru whẹ ume.

Pọlu l’aryọ Fayilímọnu aryọ ẹhu Onẹ̀simosu

⁸Sụa, o noo iwhe meru mu l’aryọ ghu aryọ; a makwarụ-a l’ọ gbarụ nke tẹ mu kfuje gẹ ọnu ha mu nkele mu bụ nke Kuráyisutu; iwhe mu l’ekfu bụ: a makwarụ-a l’ọ gbarụ nke tẹ mu gude olu ike kajẹru ghu iwhe gbarụ ghu l’ememe. ⁹Ọle ọ nụwho n-yemobu ono bẹ kparụ iwhe mu l’anọnuwho aryọ-chia ghu aryọ. Ọ kwa mbẹdua, bụ Pọlu bụwaa nwoke ọgurenya, bụkwaruwho onye nọ lẹ mkpọro ntaa bẹ l’aryọ ghu iwhe ono. Mkpọro ono, mu nọ bụkwaa nkele ọo lẹ mu l’ejeru Jisọsu Kuráyisutu ozhi meru mu nọdu iya. ¹⁰Ọ kwa aryọ ẹhu Onẹ̀simosu bẹ mu l’aryọ ghu ọbu. Onẹ̀simosu ono bẹ dụwaa g’ọo nwa mu; o noo l’ọo mu bẹ kfutaru iya yeru Kuráyisutu. Ọo l’ọka-mkpọro l’ẹka-a bẹ mu nọdu kfuta iya yeru Kuráyisutu ọbu. ¹¹Lẹ mbụ b’o shi tọ dụ mkpa, l’ọogaru ghu, ọle ntaa bẹ l’ọogawaru ghu mkpa, agakwarụwho mbẹdua.

¹²Ntaa bẹ mu l’edufuakwa iya t’ọ lwawhu ibe ghu azụ. Yẹbedua bụ onye dụ mu l’obu shii; dụta-be mu l’obu ono nke ọwhu o gbee dụwa mu nụ g’ọo mbẹdua l’alwakfuta ghu. ¹³Mu shikwa rịa lẹ mu l’a-ha iya tẹ mu l’iya nọdu l’ẹka-a nke ọwhu l’ọo-nọ emeru mu iwhe ị gịgi nọ emeru mu lẹ mkpọro-ọ, mu nọ nkele ọo lẹ mu l’ezhi ozhi-ọma Chileke. ¹⁴Mu rịa ya nno; mu sụ waawa; lẹ mu te esededu iya tẹ mu l’iya nọdu l’ẹbe abụ lẹ mu kfuru ghu iya; i kweta; t’ọ bọ dụ gẹ-woo l’e guderu ghu egude; i meeru mu ree, gụ l’ẹhu ghu l’a-dụ l’okfu. Ọ -bụ-chiaru gụbedua tụru obu ghu ama emeru mu ree; o noo akalẹwho mma l’ọo l’obu ghu b’o shi fụta.

¹⁵Mu -jeshia ekfukfu; mu asụkwa l’o gbee dụ gẹ agbafụ, ọ gbafụru l’ibe ghu nke nwa nteke ono bụ nke ọwhu gụ l’iya l’e-megee buwaruro jeyewaro. ¹⁶A makwarụ-a l’ọ bụ ohu, ọle ọ tọ bụhekwaro ohu nke nno nta-a; ọ kaakwa ohu mma. Ntaa b’ọ bụwaa nwanna anyi, anyi yeru obu; kelekele nke mbẹdua. Gụbedua l’a-kakwa iya nụ oye obu; eshi ọ bụ ohu ghu; bụkwaruwho onye yẹle Onye-Nwe-Ọha tụgbawaru bụru nnanụ.

¹⁷O noo iwhe meru mu sụ ghu: ọ -bụruwho l’ị gụtaru mu-a lẹ mu bụ onye gụ l’iya tụkoru ejeru Kuráyisutu ozhi; nata iya ọkpobe anata lẹ gịgi nata mu ọ -bụ l’ọo mu byarụ. ¹⁸Ọ -bụru l’o nweru iwhe-dụ-ẹji o meru ghu; ọ bụ l’o -nweru ụgwo, o ji ghu; gbarụ iya bo mu. ¹⁹Ọo mbẹdua l’a-kfụ ghu iwhe ọbu, o ji ghu ụgwo iya. Ọ kwa mbẹdua, bụ Pọlu bẹ gude ẹka mu ede iwhe-e l’ẹkwo. Mu te ejekwaru ghu ro ekfuru l’ị bụ onye ụgwo mu, mbụ l’iiji mu ụgwo ndzụ ghu l’owhu. ²⁰Ee-o! Nwanna mu; iwhe mu l’ekfu; byiko; bụ t’i yeru mu ẹka-o; eshi anyi tụkoru bụru ndu kweru nke Onye-Nwe-Ọha; gụ emee tẹ obu mu tukfuru ume; eshi anyi lẹ Kuráyisutu tụkoru tụgba bụru nnanụ.

²¹Iwhe mu kwoberu ederu ghu ẹkwo-ozhi-a bụkwa lẹ mu marụ l’ii-meru mu-a iwhe mu sụru t’i meeru mu, mbụ mee ya meru etsutsu iya ye iya. ²²Iwhe ọdo, mu l’ekfu bụ t’i dozhikwaaru mu ẹka, mu l’a-nọdu mẹ mu bya. Lẹ mu l’arịkwa lẹ Chileke l’e-mekwaru-a unu iwhe ono, unu shihawa kfutaru iya okfu iya. Oo-mekwaa tẹ mu bya nke ọwhu mu l’unu l’a-whụ. ²³Epáfurasu l’ajịkwa ghu rọ. Mu l’iya bẹ tụkokwaru nọdu lẹ mkpọro l’ẹka-a l’iswi ẹhu Kuráyisutu Jisọsu. ²⁴Whẹ l’ajịkwa ghu whọ mbụ Makụ yẹle Arisutákọsu mẹe Dímasu mẹe Luku, bụ ndu mu lẹ whẹ tụkoru nọdu l’ẹka-a ejeru Chileke ozhi.

²⁵Tẹ Onye-Nwe-Ọha, bụ Jisọsu Kuráyisutu mejeeru unu eze-iwhe-ọma. O noo g’ọ dụ.