Obedaya

Ẹkwo

OBEDAYA

Onye Nkfuchiru Chileke

Onye-Nwe-Ọha l’a-nụ ndu Edọmu awhụ

¹Ọ waa ọwhulenya, Obedaya whụru.

Ọ waa iwhe Nnajị-Ọha bụ

Onye-Nwe-Ọha l’ekfu l’ishi ndu Edọmu ndọwa:

Anyi nụakwaru ozhi, Onye-Nwe-Ọha zhiru.

E zhiwaru onye ozhi t’o je lẹ mba

gẹ mba ha je asụ whẹ agha:

“Unu wulishihu! Unu t’anyi

wulihukwa jekfu ndu Edọmu ọgu!”

²“Mu l’e-me t’unu lwaa alị l’iwhe bụ mba gẹ mba ha,

mu emee t’ọ bọ dụ iwhe l’aa-gụbe unu ilile ilile.

³Ekuku ono, l’enyi unu obu kiti

kiti bụ iya dusweshiru unu ụzo,

okfu l’unu bu l’ọgba ẹwhuru.

Ẹka unu kwarụ uwhu buru bụ l’ewhekerewhe ugvu,

o noo iwhe meru g’o gude unu l’anọje ekfu sụ:

‘?Oo onye ha gẹ l’ọo-lotsuta anyi l’alị?’

⁴Unu -whegekwaa oroke-imeli-imeli g’ọo ugo,

je akpaa ẹkfunu buru lẹ kpokponde,

bẹ mu l’e-shilekwaa l’ẹka ono

dukoshia unu, unu adaa chia onwunu l’alị.”

O nokwa iwhe Onye-Nwe-Ọha l’ekfu ndono.

⁵“Ndu oshi -byakfuta unu,

m’ọ bụ l’ọo ndu l’ana nfụ bẹ byarụ ibe unu l’ẹnyashi,

?tọ dụ iwhe dụ whẹ ree bẹ whẹ l’e-zhita?

Ndu l’awọ akpụru vayịnu -byarụ unu ọworu vayịnu,

?whẹ ta awọdu wọ-whodo ọwhu

ndu l’akpa aakpa l’a-kpata?

⁶Unu leeda g’e gworu unubẹ ẹpa Ịso tụtua.

Ẹku ono, unu domiru edomi b’e vukotawaru kpamụ.

⁷Ọo ndu unu lẹ whẹ gbarụ ndzụ l’a-tụ ike ituwhu chịa unu

l’alị unu, nwuru unu je agbabẹ l’oge-alị.

Ọo ndu unu lẹ whẹ dụ lẹ mma l’e-duwhu unu,

whẹ akaria unu ẹka.

Ọo ndu unu lẹ whẹ l’eriko

l’a-gbabẹru unu ọnya t’unu daba, unu ta ama mọo.”

⁸Ọ waa iwhe Onye-Nwe-Ọha l’ekfu ndọwa:

“O -rwua mbọku ono, mu l’a-nụ ndu Edọmu awhụ,

bẹ mu l’e-me tẹ ndu marụ ágụ l’alị Edọmu bụru kpurupyata,

mee tẹ ndu iwhe l’edoje ẹnya

bụru kpukpuru-swoo l’alị ugvu ugvu Ịso.

⁹Gụbe mkpụkpu Temanu, ndu

ojọgu unu bẹ ntsụ-megvu l’e-gudeshikwa

nke ọwhu bụ lẹ ndu alị ugvu

ugvu Ịso bẹ l’ee-gbukota egbugbu whẹ atọhu.

Iwhe meru g’o gude e je l’a-nụ ndu Edọmu awhụ

¹⁰“Ee-kwobe iwhe-kpanganga

ono unu meru unwune unu, bụ ẹpa Jékọpu,

meru iwhe-iwhere nụ unu,

e mee t’unu tọhu atọhu jeye lẹ gbururu.

¹¹Nteke ono, ọgu byakfutaru unwune unu ono,

bẹ unu je akfụru gbẹkee ike eleru whẹ iya l’ẹnya,

ndu ọha ọdo bya atụko ẹku whẹ gwotakota,

mbụ nteke ono, o-shi-awe o-shi-awe whẹ bya azụkafu

ọnu-abata mkpụkpu whẹ wụba,

tụa ido gude kekashia Jerúsalẹmu.

Unu lẹ ndu ọha ọdo ono bụkwa iwhe lanụ.

¹²Unu tege anọdudu ele unwune unu nlegbu-l’ẹnya

lẹ mbọku ono, iwhe-ẹhuka byakfutaru whẹ.

Unu tege etedu ẹswa kpua ndu Juda

lẹ mbọku ono, l’aala whẹ l’iyi.

Unu tege anọdudu akparu whẹ nggangga

lẹ mbọku ono, iwhe-ọtsulanu byarụ whẹ.

¹³Unu tege abahụdu l’ime mkpụkpu ndibe mu

lẹ mbọku ono, iwhe-ẹhuka byakfutaru whẹ.

Unu tege anọdudu ele whẹ

nlegbu-l’ẹnya l’ejo-iwhe ono byakfutaru whẹ nụ

lẹ mbọku ono, ndakfu dakfutaru whẹ.

Unu tege egwodu iwhe whẹ

lẹ mbọku ono, ukpuruku kputaru whẹ.

¹⁴Unu tege akfụduru lẹ n-swịkahu

ụzo egbushi ndibe whẹ, l’agba ọso ọgu.

Unu tege akpụduru ndibe whẹ,

wafụru nụ kpẹe ndu ọhogu whẹ

lẹ mbọku ono, iwhe-ọtsulanu byakfutaru whẹ.”

Onye-Nwe-Ọha l’e-kpee mba gẹ mba ha ikpe

¹⁵“Mbọku, Onye-Nwe-Ọha

l’e-kpe ndu mba gẹ mba ha ikpe dụakwa ntse.

Ọ kwa lẹge unu meru ndu ọdo bụ gẹ l’ee-me unubẹdua.

Iwhe unu meru bẹ l’a-lawhuru unu azụ.

¹⁶Ọo ẹgube ono, unu nọ l’ugvu

mu ono dụ nsọ ngụa iwhe-ọtsulanu,

o nokwa gẹ mba lile, gbarụ unu

mgburumgburu l’a-ngụ iwhe-ọtsulanu ndono.

Whẹ l’a-ngụta-gezhia ya ngụbaa egbo gẹgege.

Whẹ l’a-tọhu gẹ-woo lẹ whẹ ta adụjedu adụdu owhu.”

Aa-dzọfuta ndu Ízurẹlu

¹⁷“Ọle ndu nọ l’ugvu Záyọnu l’a-nahụ iwhe-ọtsulanu ono.

Ẹka ono l’a-dụ nsọ.

Ọzo-ụlo Jékọpu abya enweru oke-iwhe, rwuberu whẹ nụ.

¹⁸Ọzo-ụlo Jékọpu l’a-bụru ọku, l’eke whowhowho,

ọzo-ụlo Jósẹfu abụru ọku, l’enwu jaajaa,

ọzo-ụlo Ịso abụkwanuru oshi akpe, l’aa-chịru ye l’ọku ono,

ọku ono l’e-nwu jeye ya ekepyashihu.

O to nwedu onye ọzo-ụlo Ịso, bya l’a-wafụ m’ọo onye lanụ.

Nkele mụbe Onye-Nwe-Ọha kfuakwaru nkemu.”

¹⁹Ndu l’a-bya ebuchishia alị ugvu

ugvu Ịso bụ ndu Juda, shi l’echi-ẹgu ọhuda.

Ndu ọwhu l’e-buchishi alị ndu Fílistiya abụru ndu ọwhu

shi l’alị ọkpa-ugvu, dụ l’ụzo ẹnyanwu-arịba.

Ọo whẹ l’a-bya ebuchishia alị ndu

Ífuremu yẹle alị, dụ lẹ mkpụkpu Samériya.

Ndu Bénjaminu ebuchishia alị Giledu.

²⁰Igwe-ọha ndu Ízurẹlu ono a

kpụru lẹ ndzụ l’a-nata alị Kenanu

buru je akpaa lẹ mkpụkpu Zárẹfatu.

Ndu Jerúsalẹmu a kpụru lẹ ndzụ, bụ ndu ọwhu nọ lẹ

Sefaradu anatakọta mkpụkpu dụkota l’echi-ẹgu ọhuda.

²¹Ndu ndzọfuta l’e-nyihu ugvu Záyọnu

je anọdu bụru ishi ndu bu l’alị ugvu ugvu Ịso.

Onye-Nwe-Ọha l’onwiya abụru eze.