Néhumu

Ẹkwo

NÉHUMU

Onye Nkfuchiru Chileke

Onye-Nwe-Ọha bẹ ẹhu l’eghu eghu l’ishi obodo Nínive

¹Ọ waa bụ ozhi e zhiru l’ishi obodo Nínive. Ẹkwo-ọ bẹ bụ ẹkwo e deru ọwhulenya ọ whụru mbụ Néhumu onye Ẹlukoshi.

²Onye-Nwe-Ọha bụ onye

okoowhoo, bụru Chileke l’agwatajẹ ụgwo iwhe.

Onye-Nwe-Ọha bụ onye ọgwata

ụgwo iwhe, bụru onye oke ẹhu eghughu.

Onye-Nwe-Ọha l’agwatajẹ ndu

kpọru iya ashị ụgwo iwhe whẹ meru,

l’oodobeje oke ẹhu-eghughu iya l’ẹhu ndu ọhogu iya.

³Onye-Nwe-Ọha bẹ ẹhu l’ẹte

eghukebejedu eghu ẹgwegwa,

ọ bụru onye ọkpehu iya parụ ẹka.

Onye-Nwe-Ọha ta ahajẹkwa

onye ikpe nmarụ t’ọ laa ẹwoma.

Ẹka l’ooshije agha bụ lẹ uburu-aga, l’akpanga akpanga

mẹe l’oke whẹrewhere, l’ezhi whukuwhuku.

Urwukpu bụru udzu ẹja l’ọonoje erwukashi l’ọkpa.

⁴Ọotujeru eze-ẹnyimu iwu t’ọ tahụ, ya atahụ.

Ẹnyimu g’ẹnyimu ha bẹ l’oomeje ya atashịhukota.

Ụnwu irwu-ẹwu, dụ l’alị Báshanu

yẹle ugvu Kamẹlu bẹ l’oomeje ya akpọnwushihu.

L’oomeje igu ooshi, dụ l’ugvu

Libanọnu ya enwekota enwe.

⁵Ugvu g’ugvu ha l’anmakọtaje

jijiji l’iwhu Onye-Nwe-Ọha,

ụnwu ugvu nshịi l’anọduje iya l’iwhu dazehu.

Mgboko l’owhu l’etekotaje furafura l’iwhu iya,

mbụ eliwhe l’owhu mẹe iwhe lile, bu iya nụ.

⁶?Oo onye l’a-dụ ike kfụru kpọ

Onye-Nwe-Ọha iwhu nteke ẹhu l’eghu iya damụdamu?

?Ọo onye l’a-dụ ike atakeru

t’o-kpo-wharawhara ẹhu-eghughu iya kposhi iya?

Oke ẹhu-eghughu iya l’adụje g’ọo onye a wụ-kpushiru ọku.

Ẹwhuru, nweru akpaa bẹ l’oomeje, ya agba yọgiri yọgiri.

⁷Onye-Nwe-Ọha bụ onye ọma, ọ ya bụ agbarara

l’egbochije ndibe iya nteke whẹ l’eje iwhe-ọtsulanu.

Ndu gbabaru iya lẹ mkpula je ezee

ndzụ bẹ l’ọonwubejeru ẹnya.

⁸Ndu ọhogu iya ono, bụ ndu Nínive bẹ l’oo-gude

utso agbagba mee tẹ whẹ tọhu.

Ndu ọhogu iya ono bẹ l’oo-rwuta

ọso chịba whẹ l’ẹkpuroochi.

⁹?Ọo ẹgube ejo idzu gụnu bẹ

unu l’achịru Onye-Nwe-Ọha?

Oo-mekwa nke unu agvụ.

Madzụ ta akpọjekwa iya iwhu ugbo labọ.

¹⁰Ọ kwa g’ọku l’adzụje

agarambo, lwụchiru alwụchi

yẹle ẹswa akpe, kpọru nkụ

bụ g’ọku l’ekegbushi unubẹ ndu ọhogu iya ono.

¹¹Ọ kwa l’ime gụbe Nínive bẹ onye lanụ fụtaru bya awata ọchiru Onye-Nwe-Ọha ejo idzu, nọdu lẹ mgbazhi t’e mee ya ejo-iwhe. ¹²Ọ waa iwhe Onye-Nwe-Ọha l’ekfuru ndibe iya ndọwa: “A makwarụ-a lẹ ndu Asiriya bẹ ike dụ, whẹ ha l’igwe, ọle ee-me whẹ, whẹ anwụshihu bụru kpurupyata. A makwarụ-a lẹ mu meru unu l’eje iwhe-ọtsulanu, ọle mu te emehedu t’unu jebaa iwhe-ọtsulanu ọdo. ¹³Ntaa bẹ mu l’a-nyakashị odogoro ono, ndu Asiriya nyabẹru unu l’olu, gbabushia mkpọro ono, whẹ tụru unu.”

¹⁴Onye-Nwe-Ọha bẹ tụwaru iwu l’ishi gụbe Asiriya sụ: “Ị tịi byadụ l’e-nwe ẹpa, l’e-me t’ẹwha ghu dụgburu. Mu l’e-mebyishi iwhe a pyịru apyị yẹle iwhe a kpụru akpụ, dụ l’ụlo agwa ghu. Mu l’a-tụ ilu ghu dobe nkele ị bụ onye mmaanụ.”

¹⁵Leedawho ẹnya l’eli ugvu, whụduwho ọkpa onye ono, gude ozhi-ọma eje abya, mbụ onye l’ezhikashi ozhi-ọma nke ẹhu ọdu guu. T’unubẹ ndu Juda rikwaa oge unu, shi nno meeru Onye-Nwe-Ọha iwhe unu kweru iya ụkwa iya. O noo nkele ndu ejo-ememe ta abyadụ l’etsobaa unu ọgu ọdo. Whẹ bụkotaakwaa kpukpuru-swoo gẹ whẹ ha.

Adada obodo Nínive

¹Unubẹ ndu Nínive, onye

nchika l’abyakfutakwa unu ọgu.

Unu chekwa ụlo-mgbochi unu nche!

Unu kwabẹkwa ẹnya l’ụzo unu, l’eshi!

Unu rwụkotakwa onwunu arwụkota!

Unu arwụkota ike unu g’ọ ha!

²Onye-Nwe-Ọha l’e-me t’ugvu

ono, ẹpa Jékọpu shi nweru lwawhuru iya azụ,

mbụ ugvu nke whẹbe Ízurẹlu.

A makwarụ-a lẹ ndu emebyi bẹ gwowaru whẹ tụtua,

mebyishikwaawho ẹkali vayịnu whẹ.

³Iwhe ndu ojọgu whẹ l’egudeje

gbobuta onwowhe l’ekekota uswe-uswe.

Ndu ojọgu whẹ yekota uwe, l’ekekaa mmee-mmee.

Mgbọro-igwe, dụ l’ụgbo-ịnya ọgu whẹ l’enwu whawhawha

gẹ whẹ kwakọberu nke ọgu ono.

Arwa whẹ l’egbukaa sweeswee.

⁴Ụgbo-ịnya bẹ tụkoru woroworo ebu fafafa,

whẹ l’awụ gbigbigbi eje eje alwa alwa l’ọma nggamgbo.

Whẹ l’ekekota jajaja g’ọo oryọku,

ezhikaa whawhawha g’ọo ebemu igwe.

⁵Ndu ojọgu whẹ bẹ whẹ kukobewaru l’ẹka lanụ,

whẹ l’eje ije evuko alị evuko.

Whẹ l’ekwokaa gburugburu ala lẹ mgbodo mkpụkpu ono,

woru iwhe e gude egbochita

ọgu gude gbobutagee onwowhe.

⁶Ugbo, gbobutaru ẹnyimu bẹ bahụwaru nụ.

Ibe eze bụru ọtsu egvu bẹ jiru iya nụ.

⁷A tụru iya ọ bụru iwu l’eze-nwanyị bẹ l’aa-kpụ

lẹ ndzụ, kpụru iya laa ẹka ọdo.

Ụnwumgboko, l’ejeru iya ozhi

awata ọkwa muu-muu g’ọo ndo,

avụkaa ẹka l’ikpobu whẹ gbiigbii.

⁸Obodo Nínive dụ g’ọo okpuru, mini iya l’awụfu awụfu.

Iwhe whẹ l’aryakaa bụ: “Unu kfụru-o! Unu kfụru-o!”

Ọle ọ tọ dụdu onye gharụ ẹnya l’azụ.

⁹Unu vukoo mkpọla-ọcha!

Unu evukoo mkpọla-ododo!

O noo nkele ẹku, vu oke aswa, dụ iya nụ ta agvụdu agvụ!

¹⁰Mkpụkpu ono bẹ ẹgbara kfụwaru.

Ọ bụwa kpurupyata, mbụ l’ọ bụwa ochuwhu.

Meji tọfuwaru ndu bu iya nụ.

Ikpere l’awhụ whẹ kwekwekwe.

Ẹhu l’anma whẹ godogodo.

Onyenọnu dobegee iwhu ọnwu ọnwu.

¹¹?Ndẹhunu ẹka ọbu shi dụ g’ọo

iduma, oduu-gburu-agụ shi buru?

Mbụ ẹka whẹ shi anọduje anụ ụnwu whẹ nri,

mbụ ẹka oke oduu yẹle nyee ya

shi anọduje akpawhe mẹe ụnwu whẹ,

ya aadụ iwhe l’akparụ whẹ nụ.

¹²Oduu ono shi egbutaje iwhe l’asụjeru ụnwu iya eriri,

swigbushia anụ vuta je akụberu nyee ya.

O shi egbuje iwhe bya edojia ọgba iya edoji,

lajashịa anụ bya akụbe lẹ iduma iya.

¹³Onye-Nwe-Ọha, bụ Onye-ishi-igwe-ọgu l’ekfu sụ: “Lekwa, mu nọkwaru ghu l’ejo oshi. Mu l’e-gude ọku kepyashia ụgbo-ịnya ghu, mu akpụkota ẹnwuru-ọku tụu. Ụnwu oduu-gburu-agụ ghu bẹ bụ ogu-ịgba l’a-takọta ishi whẹ. O to nwedu iwhe mu l’a-harụ ghu lẹ mgboko-o t’i gbutaje. T’a bya l’anụkwadu olu ndu ozhi ghu ọdo.”

Iwhe-dụ-ẹji, obodo Nínive l’emegbabe

¹Áwhụ tsọkwaru obodo ono, bụ mmee ọchi nkụchi.

Ejire yẹle ọna nfụ bẹ jiru iya eji,

ọna nfụ ta agvụ iya agvụ.

²Unu ngabẹduwho nchị nụ ụda

ẹchachi gẹ l’ọoda swoo swoo.

Ọkpa ụgbo-ịnya l’ada kpekekpeke.

Ịnya l’akfụ kwagamụ kwagamụ.

Ụgbo-ịnya l’agbakaa kwakwakwa.

³Ndu l’agba ịnya bẹ iwhu bọhuakwaru.

Ogu-ịgba l’egbukawa sweeswee,

arwa l’enwukawa whoo whoo.

Ndu e gburu l’ọgu bụ ikpoto, ndu

nwụhuru anwụhu kụru kpataa.

Odzu madzụ bụru agụta agụta,

ndu madzụ l’akpokutaka odzu ono akpokuta.

⁴Iwhe kpatarụ iwhe lile ono bụ

lẹ nwanyị ọkpara ono l’akpanụka lẹ nwoke.

Ọomashi ụma ike bụru nwanyị l’agwọshi ọgvu ike,

onye l’egudeje ori ogori ereshi mba gẹ mba ha,

gude ọgvu, l’ọogwo ereshi ikfu dụ iche iche.

⁵Onye-Nwe-Ọha, bụ Onye-ishi-igwe-ọgu l’ekfu sụ:

“Lekwa, mu nọkwaru ghu l’ejo oshi.

Mu l’a-whụ-lita uwe ghu gude whụ-chia ghu iwhu.

Mu emee tẹ mba gẹ mba ha

whụkota ghu l’ẹka ị gba ọto.

Alị-eze dụ l’iche l’iche awhụkota ghu l’ẹka iwhere dụ ghu.

⁶Mu l’a-gbarụ iwhe dụ ideyideyi kpua ghu.

Mu emee ghu t’ọ bọ dụhe iwhe l’ịi-bụ,

ndu madzụ awata anọ enyo ghu enyo.

⁷Oge l’erwuakwa nteke bụ onye

whụjẹe ghu, ya agbarụ ghu ọso

ekfuje sụ: ‘Nínive bụakwa ochuwhu.

?Oo onye l’a-gụ áwhụ iya?

?Ọo awe bẹ anyi l’a-whụ onye l’a-dụ iya obu?’ ”

⁸?I gude gụnu ka mkpụkpu Tebẹsu ree, mbụ mkpụkpu ono, dụ l’agụga ẹnyimu Nayịlu mini nọ-whee ya mgburumgburu, eze-ẹnyimu bụru ugbo gbobuta iya, tẹmenu ọ bụru mini bụ mgbodo, gbawheru iya mgburumgburu? ⁹Ndu Itiyópiya yẹle ndu Íjiputu bẹ shi bụru agbarike iya, ike ta agvụje whẹ agvụ. Ndu Putu mẹe ndu Libyiya shi eyejeru iya ẹka. ¹⁰Ọle e megeleru-a kpụa mkpụkpu ono lẹ ndzụ, whẹ je eburu l’alị ọdo. Ụnwegirima whẹ nke nshịi b’e gwekotaru ryaaryaa l’ishi mbadụzo. A tụa ido gude keshia ndibe whẹ, bụ ndu l’aakwabẹ ugvu. E gude ẹgbirigba kee ndu oke amadụ whẹ ẹgbu.

¹¹Gụbedua l’onwoghu bẹ l’a-ngụkwawho mmẹe ono, ya awata ghu ome l’ẹnya. Ịi-nọ edomi onwoghu edomi, gụ achọ ẹka l’ịi-gbaba zee ndzụ t’ọ bọ dụ iwhe ndu ọhogu ghu l’e-me ghu. ¹²Ụlo lile ị tụru o shihu ike l’a-dụkota g’ọo figu, mebyi iya chashịru l’ọnu mbụ. A -nmaa ya yikayika, mebyi iya ono adashịa dabagee l’ọnu ndu l’e-ri iya nụ. ¹³Leedawho ndu ojọgu ghu gẹ whẹ dụ-gee g’ọo ụnwanyi! Ọnoguzo alị ghu bẹ gheru ọnu whosaa tẹ ndu ọhogu ghu zebata. Mgbọro-igwe, e shi gude tụ-chia ya atụ-chi bẹ ọku kepyashiwaru. ¹⁴Kukwaa mini sụwhashia m’ọgvu nteke ndu ọhogu ghu l’a-bya eyebuta ghu! Mee ụlo ono ị tụshiru ike t’ọ kabaa oshihu ike! Dzọo ẹja yọshia bụloku, gụ emekwaa iwhe e gude ayọ bụloku emekwa! ¹⁵Ọ kwa l’ẹka ono bẹ ọku l’e-kegbu ghu, ogu-ịgba asaa ghu ọsa-ẹkfu g’ọo ẹka igube l’ata iwhe pyaapyaa. Kabaa l’igwe g’ọo nochee-ishi-okobo, kabaa l’igwe g’ọo igube!

¹⁶Ndu l’azụru ghu aswa b’i mewaru whẹ kabaa l’igwe amamẹ kpokponde, dụ l’igweli, obenu lẹ whẹbedua zebataru g’ọo igube bya atụsa akwẹka rwuchata iya iwhe dụ l’alị ono, ọ bụru whẹ ewhefu. ¹⁷Ndu ishi ghu nyịnwuru g’ọo nochee-ishi-okobo;

ndu l’ederu ghu ẹkwo dụlewho

g’ọo igube, l’etsu gbigbigbi.

Mbọku oyi l’atsụ bẹ whẹ l’anyịnwuje eli mgbodo,

anwụ ketalewho, whẹ etsukashihu,

ọ tọ dụdu onye l’a-ma ẹka whẹ tsuru laa.

¹⁸Gụbe eze ndu Asiriya, ndu l’echeru ghu atụru bẹ l’ekukaa mgbẹnya. Ndu a marụ ẹwha whẹ l’alị-eze ghu bẹ chịwaru ẹka ye l’iwhu ụtakfu zẹe. Ndu nkeghu bẹ gbawarụ nnanụ nnanụ l’eli ugvu, tọ dụ onye l’e-je achịkobe whẹ nụ.

¹⁹Ọnya, l’aba ghu nụ te enwekwa akpọhu. Ẹka e mekaru ghu iwhe l’asọ yobayoba. Onye nụru gẹ l’ọonwuru ghu l’echije ẹka pyamụ lẹ nke adada ono, ị darụ. Nkele ejo-iwhe ono l’iime nteke nteke ta adụdu onye l’ooto rwua l’ẹhu.