Mayịka

Ẹkwo

MAYỊKA

Onye Nkfuchiru Chileke

¹Ọ waa okfu Onye-Nwe-Ọha kfuru yeru Mayịka, onye mkpụkpu Morẹshetu. Nteke o kfuru iya okfu ono bụ nteke Jótamu, mẹe Éhazu, mẹe Hezekáya shi bụ-geeru eze, l’achị ndu Juda. Iwhe ono bụ ọwhulenya ọ whụru l’okfu ẹhu ndu Samériya yẹle nke ndu Jerúsalẹmu.

²Ụnwu eliwhe, unu nụkwa iwhe-e mu l’ekfuru unu.

Tẹ mgboko l’owhu yẹle iwhe lile

bu l’ime iya ngabẹkwa nchị.

Nnajị-Ọha, bụ Onye-Nwe-Ọha shikwa l’eze-ụlo iya,

dụ nsọ agba ẹka-ebe agbagude unu.

Ikpe, l’eekpe ndu Samériya yẹle ndu Jerúsalẹmu

³Unu leduwho. Onye-Nwe-Ọha

shiakwa l’ẹka o bu eje abya.

Oonyizetawaa t’iya bya adzọngaa

lẹ mgbogidi, dụkota lẹ mgboko-o.

⁴Ugvu g’ugvu ha

l’a-dazeshihukota lẹ mkpula ọkpa iya

g’ọo ụ̀nwù a ngabẹru lẹ mgboro ọku.

Nsụda gẹ nsụda ha l’e-kewashihu

ekewashihu sọlahaa gborogboro

g’ọo mini shi l’owe-kperekpere ugvu asọdata l’alị.

⁵Iwhe kparụ iwhe lile ono bụ emeswe ẹpa Jékọpu mesweru Chileke, mbụ iwhe-dụ-ẹji ono ọzo-ụlo Ízurẹlu meru. ?Ọo onye kparụ iwhe ẹpa Jékọpu mesweru Chileke? ?Tọ bụdu ndu Samériya bẹ kparụ iya nụ? ?Ọo onye kparụ ndu Juda ome iwhe-dụ-ẹji? ?Tọ bụdu Jerúsalẹmu? ⁶Onye-Nwe-Ọha bẹ l’ekfu sụ: “O noo g’o gude mu je l’e-me Samériya t’ọ dakpọshihu bụru mkpọkoro ọzo-ụlo, l’eebua ebu. Mu l’e-me iya t’ọ bụru ẹka l’aa-nọ eme mgbu vayịnu. Ẹwhuru mgbodo mkpụkpu ono bẹ mu l’e-nwuru zụbe lẹ nsụda, mee t’ukfu mgbodo mkpụkpu ono zeshihu gheru ọnu. ⁷Ntẹkpe lile dụ lẹ mkpụkpu ono bẹ l’ee-tsu yọgiri yọgiri. Iwhe lile, l’aanụje ụnwanyi ọkpara ụlo agwa whẹ bẹ ọku l’e-kepyashikota. Agwa mkpụkpu ono l’owhu bẹ mu l’e-mebyishikota. O noo l’ọo l’aswa, l’aakfụje nụ ụnwanyi ọkpara ụlo agwa ono bẹ whẹ shi nweru iwhe. E je l’e-vuta iwhe ono, whẹ nweru je anụ ụnwanyi ọkpara ẹka ọdo.”

Ọrya ẹkwa yẹle ọgu áwhụ

⁸Ọo iwhe ono meru g’o gude mu l’arya ẹkwa atsọ gbụda gbụda. Ọo ya meru mu gbarụ ọkpa ọto, gbarụ ẹhu ọto. Mu l’a-tsọ nwụrunwuru g’ọo nkụta-ọswa, kwaa idemini g’ọo udukufuku. ⁹Nkele ọnya, l’aba mkpụkpu Samériya bụ akpọhu akpọhu. Ọnya ọbu bẹ sweekwaru Juda. Ọ sọkashihuwaru sọba l’ọnoguzo ndibe mu bụ iya bụ Jerúsalẹmu.

¹⁰Unu be ejekwa iya ekfukashi lẹ mkpụkpu Gatu. Unu ba aryakwa ẹkwa ilile. Unubẹ ndu mkpụkpu Betu-ọfura, unu rwaswia onwunu l’ivovonyi. ¹¹Unubẹ ndu bu lẹ Shafiya, unu gbarụ ọto gude iwhere wụa awụwu ụzo wụghata. Ndu bu lẹ Zenanu, unu ba afụtakwa afụta. Ndu Betu-ezelu bẹ áwhụ byarụ, o noo nkele iwhe shi gbobuta whẹ nụ b’e wofuwaru l’alị whẹ. ¹²Iwhe ndu bu lẹ Marotu l’eleshi ẹnya iya ike bụ nteke whẹ l’e-zhi ume nkele Onye-Nwe-Ọha bẹ dobewaru iwhe-ọtsulanu ọ nọdu ntse l’ọnu mkpụkpu Jerúsalẹmu. ¹³Unubẹ ndu bu lẹ Lakishi, unu woru ịnya unu je atụgba l’ụgbo-ịnya unu. Ọo unu vu ụzo gbube ishi ome iwhe-dụ-ẹji, ụnwada Záyọnu nwụta iya l’ẹka unu. Ndu unu wọtaru ẹka whẹ l’ome iwhe-dụ-ẹji bụ ndu Ízurẹlu. ¹⁴Iwhe unu l’e-me bụ t’unu kwarụ arya nụ ndu mkpụkpu Morẹshetu Gatu gude goshi l’unu lẹ whẹ bukahuwaru. Ndu mkpụkpu Akuzibu l’e-meru goshi ndu eze ndu Ízurẹlu lẹ whẹ bụ ndu ẹregede.

¹⁵Ndu Maresha, Onye-Nwe-Ọha l’e-ye onye l’a-byakfuta unu bya alwụ-gbua unu. Ndu ono, l’aakwabẹ ugvu lẹ Ízurẹlu bẹ l’a-gbalashị je ekpuru l’ọgba Adulamu. ¹⁶Unu rwushia ẹgbushi l’ishi, unu akpụshia ẹji, dụ unu l’ẹhu goshi l’unu l’atsọ áwhụ ụnwegirima unu ono, unu yeru obu. Unu rwushia ẹgbushi t’ishi chajẹ unu swarịswari g’ọo nke udele, o noo nkele ee-megee nafụ unu ụnwegirima unu chịta lashia alị ọdo.

Iwhe l’e-me ndu l’ana alị madzụ l’ọkpehu

¹Áwhụ l’a-tsọkwaru ndu l’agba ejo-ikumu, mbụ ndu ono, l’azẹje azẹe nwụa ẹnya abalị l’ẹka whẹ l’achị idzu ejo-iwhe, whẹ l’e-me. Chi sahụlewho, whẹ emee iwhe ono, whẹ gbarụ ikumu iya ono nkele whẹ kpatarụ ụzo ememe iya. ²Whẹ l’egudeje oke-ẹnya naa alị madzụ mẹe ụlo madzụ. Nwoke bu l’uwhu bẹ whẹ l’anatajẹ ndibe iya nata oke-alị iya.

³Ọo ya bụ l’ọ waa iwhe Onye-Nwe-Ọha l’ekfu ndọwa: “Mu l’achị idzu tẹ mu wokfuta unubẹ ndu ono ejo-iwhe, mbụ ejo-iwhe, unu l’ẹte abyaa l’adụ ike whafụta ishi unu. Etsetse l’a-rụhu unu l’ẹhu, o noo nkele nteke ono l’a-dụru unu ejo ẹji. ⁴Nteke ono bẹ eliwhe l’e-kfurwushi unu ẹhu ekfurwushi, kpọru unu ye l’egvu nggụmawhu sụ:

“ ‘E meekwaru anyi ọzara-l’ukpo.

Alị ndibe anyi b’a natawaru kekashia.

Onye-Nwe-Ọha natawaru iya anyi

woru keshiaru ndu ono, lwụtaru anyi l’ọgu.’ ”

⁵Ọ tọ dụdu onye l’aa-whụ lẹ ndibe Onye-Nwe-Ọha, bụ onye l’a-nọ-chi ẹnya unu, mbụ onye l’a-tụ ido gude waaru unu alị.

Ndu l’abụa ọkpobe ndu nkfuchiru Chileke

⁶Iwhe whẹ l’ekfuje bụ: “Be edoshiru anyi nwogodorigodo ono. Be ekfushiru anyi ụdu iwhe ono; a ta abyakwa l’e-me anyi ẹgube iwhe-iwhere ono. ⁷Unubẹ ọzo-ụlo Jékọpu ?ọo dụ ree t’a sụ lẹ Ume Onye-Nwe-Ọha bẹ ẹhu l’eghu eghu ?Oomeje ẹgube iwhe ono ?Ọo l’okfu mu te emejedu iwhe dụ ree tọo?

⁸“Ụboku gbee agvụada agvụ tẹmenu ndibe mu bya aghọo ndu ọhogu. Ndu zọru ẹhu aghata ejeru onwowhẹ bẹ unu kwachiru ụzo yeshia whẹ uwe-mkpẹelanu, whẹ yeru, mbụ ndu l’abụa lẹ whẹ gbarụ ẹnya ọgu. ⁹Unyomu ndu nkemu bẹ unu l’anọje achịfu achịfu l’ụlo, whẹ bu ọ dụ whẹ ree. Unu nafụwaa ụnwegirima whẹ ugvu ono, mu kwabẹru whẹ jeye lẹ gbururu. ¹⁰Unu gbalihu lụfu, ẹka-a ta abụdu ẹka unu l’a-tụta ume nkele mmerwu, dụ iya nụ mebyishiwaru iya, to nwehe emekota ọdo.

¹¹“Nggẹ l’ọo iwhe t’onye ejire mẹe onye nduswe -fụta bya asụ: ‘Iwhe mu l’ekfu bụkwa t’a ngụje mmẹe yẹle iwhe-angụngu ọdo l’atsụ atsụtsu.’ O noo ẹgube onye nkfuchiru ndu ono gege egbobe ẹka labọ nata.

E kweru ụkwa ndzọta

¹²“Unubẹ ẹpa Jékọpu, ọwhu bụ ezhi-okfu bụ lẹ mu l’a-tụko g’unu ha chịkobe l’ẹka lanụ. Ọwhu bụ ezhi-okfu bụ lẹ mu l’a-chịkobe unubẹ ndu ono, whọduru l’ọzo-ụlo Ízurẹlu l’ẹka lanụ. Mu l’e-rwukobe unu ọnu g’ọo atụru e rwukoberu ọnu l’ọdu, mbụ g’ọo élwù e rwukoberu ọnu whẹ l’ata nri. Unu abya eji alị unu pyịtikomu atụ wọwowo nkele unu l’apa l’igwe. ¹³Onye l’e-gbusaru whẹ ụzo ọsa l’e-vutaru whẹ ụzo. Whẹ l’a-zụkafu ọnu ẹka l’eeshije abahụ lẹ mkpụkpu fụshia. Onye l’e-vutaru whẹ ụzo bụ onye eze whẹ, mbụ l’ọo Onye-Nwe-Ọha l’a-nọru whẹ l’ishi ije ono.”

Aabarụ ndu ishi whẹ lẹ ndu nkfuchiru mba

¹O noo ya, mu bya asụ: “Unubẹ ndu ishi, l’achị ẹpa Jékọpu, unu ngabẹ nchị, mbụ unubẹ ndu l’achị ndu ọzo-ụlo Ízurẹlu. ?Tọ bụdu iwhe gbarụ unu t’unu marụ oome iwhe kfụru nhamụnha tọo? ²Unu bụ ndu kpọru iwhe dụ ree ashị, yee ejo-iwhe obu. Unu l’agbajẹ ndibe mu akpọ l’ọno ndzụ, aswa whẹ anụ l’ọkpu. ³Unu l’eri anụ ndibe mu, aswa whẹ akpọ l’ẹhu, etsu ọkpu whẹ yọgiri yọgiri. Unu l’ebushije anụ whẹ g’ọo onye bushiru anụ chịru ye l’ite.”

⁴Whẹ l’e-megee ryaku Onye-Nwe-Ọha, ọle ọ tọo zadụ whẹ oku. Nteke ono bẹ l’oo-woha iwhu ewoha l’ẹka whẹ nọ nkele whẹ l’eme ejo-iwhe.

⁵Ọ waa iwhe Onye-Nwe-Ọha l’ekfu ndọwa: “A bya l’ishi ndu nkfuchiru ono, l’anọje edusweshi ndibe mu ono, whẹ asụ lẹ whẹ l’ekfuchiru Chileke, mbụ ndu ono l’abụje onye -vuta nri vee whẹ, whẹ akaa l’ẹhu l’a-dụ onye ọbu guu; onye l’adụhee iwhe ọ tsụberu whẹ l’ọnu, whẹ akaa l’ọo ejo ọgu l’a-byakfuta onye ọbu. ⁶Unubẹ ndu ono bẹ chi l’e-jikfukwa l’ụzo, unu awhụ-buhu ọwhulenya. Ẹkpuroochi l’a-byakfutakwa unu, unu agbabuhu ẹja t’unu marụ iwhe l’a-bya ememe. Ẹnyanwu l’a-nyịhuru ẹgube ndu nkfuchiru ono. Chi ejikfu whẹ l’eswe. ⁷Ndu l’awhụ ọwhulenya bẹ iwhere l’e-megee gudeshia. Ndu l’agba ẹja abụru ndu e kpuru iwhu l’oguri. Gẹ whẹ ha l’e-kfuchi ẹka l’iwhu nkele Chileke te eyedu ọnu eyeru whẹ.”

⁸Ọle mbẹdua b’a tsụru ike atsụtsu l’ẹhu. Ume nke Onye-Nwe-Ọha b’e yeru o ji mu ẹhu kpimu, tẹmenu mu nweru uche, mu gude ekpe ikpe kfụru nhamụnha yẹle ọkpehu, mu gude akarụ ẹpa Jékọpu emeswe, whẹ mesweru, akarụ Ízurẹlu iwhe-dụ-ẹji whẹ meru. ⁹Unubẹ ndu bụ ishi l’achị ọzo-ụlo Jékọpu, mbụ unubẹ ndu l’achị ọzo-ụlo Ízurẹlu, unu ngabẹru mu nchị, unubẹ ndu ono kpọru ikpe-nkfụmoto ashị agwasweshi iwhe kfụru akfụru agwasweshi. ¹⁰Ndu gude ogbu ọchi atụ obodo Záyọnu, gude ome ẹji atụ Jerúsalẹmu. ¹¹Ndu ishi l’achị whẹ bụ mẹ a -nụadaru whẹ nnuchi-ọnu tẹmenu whẹ ekpee ikpe. Ndu l’agba ẹja anụ Chileke whẹ bụru mẹ a kfụadaru whẹ ụgwo tẹmenu whẹ ezhia iwhe. Ndu nkfuchiru Chileke whẹ bụru mẹ a naụdaru whẹ okpoga tẹmenu whẹ akarụ whẹ iwhe whẹ whụru. Ọle whẹ tụkokwaru-a dawhube Onye-Nwe-Ọha asụje: “Onye-Nwe-Ọha nọkwa l’echilabọ anyi. Ọ tọ dụdu ejo-iwhe, bya l’a-byakfuta anyi.”

¹²Ọo ya bụ l’ee-gude iswi unu tụpyaa ugvu Záyọnu atụpya g’ọo ogvẹja. Jerúsalẹmu abụru mkpọkoro ọzo-ụlo. Eli ugvu ono, bụ ẹka eze-ụlo Chileke dụ abụru ẹka ẹgbudu zechiru ezechi.

Ẹhu-guu ọwhu Onye-Nwe-Ọha l’e-megee wota l’eli ugvu Záyọnu

¹Sụa, o -rwua l’oge ikpazụ bẹ l’ee-me t’ugvu ono,

a tukoberu eze-ụlo Onye-Nwe-Ọha shihu ike,

mee ya t’ọ bụru eze l’iwhe bụ ugvu ọdo, dụ nụ.

Ee-me iya t’ọ kakọta ugvu ọdo l’eli.

Ndiwhe awụlahaa gụrutuu gụrutuu eje iya.

²Mba ha l’igweligwe l’a-bya ekfulahaa sụ:

“Unu bya t’anyi je l’eli ugvu Onye-Nwe-Ọha.

Unu t’anyi je l’ụlo Chileke nke Jékọpu.

Nke ọwhu l’oo-zhi anyi ụzo nkiya,

nggẹ anyi awata otso ụzo ọwhu, ọ tọru.”

O noo nkele ọo l’ugvu Záyọnu bẹ iwu Chileke l’e-shi abya,

mbụ l’okfu Onye-Nwe-Ọha

l’e-shi l’obodo Jerúsalẹmu bya.

³Ọo ya l’e-kpeshi okfu, dụru ikpoto mba l’ibe iya.

Ọ bụru iya l’e-doshiru mba,

ọkpehu dụ-gee okfu, dụru whẹ l’ibe whẹ,

mbụ ndu bu otẹnya mẹe ndu bu l’ụkfu ntse.

Whẹ l’a-kpụkwa ogu-ịgba whẹ ya abụru ọgu,

whẹ akpụkwaa arwa whẹ ya abụru

nwa mma e gude akọcha iwhe.

Mba ta apalihedu ogu-ịgba ejekfu mba ọdo ọgu,

whẹ ta abya l’a-nwụbaa g’e shi alwụ ọgu ọdo.

⁴Ẹhu l’a-bya adụ whẹ guu, onyenọnu erilahaa iwhe

shi lẹ vayịnu iya mẹe iwhe shi lẹ figu iya.

Ọ tọ dụdu onye l’e-me t’egvu tsụa whẹ.

Nkele o noo iwhe Onye-Nwe-Ọha,

bụ Onye-ishi-igwe-ọgu gude ọnu iya kfua.

⁵Mba nọnu bụ agwa nkewhe bẹ whẹ l’abarụ ẹja.

Ọle anyịbedua bụ Onye-Nwe-Ọha, bụ Chileke anyi bẹ anyi

l’abarụ ẹja, anyi je l’a-baru iyẹ ya jeye lẹ tututu-mịmimi.

Iwhe Onye-Nwe-Ọha chịru nke ememe

⁶Onye-Nwe-Ọha l’ekfu sụ: “O -rwua nteke ono bẹ mu l’a-chịkobe ndu darụ ngvụru, chịkobe ndu ono a chịfuru achịfu l’alị whẹ mẹe ndu ono, mu meru whẹ jee iwhe-ọtsulanu. ⁷Ndu ono, bụ ngvụru bẹ mu l’e-me t’ọ bụru whẹ l’e-bekochaa whọdu. Mu emee tẹ ndu ono a chịfuru l’alị whẹ bụru mba, l’a-kpọ adịdaa. Wata nteke ono bẹ Onye-Nwe-Ọha l’a-bụru eze l’achị whẹ nụ l’eli ugvu Záyọnu, o je l’a-bụru iya jeye lẹ gbururu.

⁸“A bya lẹ gụbe nwada Záyọnu, bụ ụlo-nche nke ndọkobe atụru ono bụ Ízurẹlu, mbụ gụbe agbarara nke ndu Ízurẹlu; ii-bekochaa bụru ishi ẹgube ono i shi bụru iya lẹ mbụ. Gụbe nwada Jerúsalẹmu l’e-megee buwhu eze azụ ọdo.” ⁹?Ọo gụnu bẹ l’ịiryaru ntaye ntaye ono? ?Ọ fụtaru l’i tii nwedu onye eze, l’achị ghu nụ tọo? ?Ọ nwụhuwaru mbụ onye mgbazhi-ego ghu meru g’o gude iwhe-ọtsulanu zụ ghu kfụu g’ọo nwanyị ime l’eme nno? ¹⁰Gụbe nwada Záyọnu, nọdu ghaa gbụrugburu tsụa pụu g’ọo nwanyị ime l’eme, o noo nkele ntaa b’ị bya l’aha mkpụkpu-a je akwaburu l’echi-ẹgu. Ị bya l’a-la alị ndu Bábyilọnu. Ọo l’ẹka ono bẹ l’aa-nọdu nafụta ghu. Mbụ lẹ Onye-Nwe-Ọha l’a-nọdu l’ẹka ono gbafụta ghu l’ẹka ndu ọhogu ghu. ¹¹Ntaa bẹ ikpoto mba wulihuwaru ripyabe ghu asụje: “T’e merwua Záyọnu! T’anyi chịru ẹnya yeru iya l’ẹka l’eemebyi iya!” ¹²Ọle whẹ ta amadụ iwhe Onye-Nwe-Ọha rịru nke ememe. Iwhe ọ tụberu nke ememe te edodu whẹ ẹnya. Nkele whẹ ta amadụ lẹ Onye-Nwe-Ọha chịkobewaru whẹ g’ọo onye chịkoberu ereshi eje echichi.

¹³“Gụbe nwada Záyọnu, gbalihu chia ọhogu ghu whukuwhuku g’ọo onye l’echi ereshi, nkele mu l’e-me t’i fua mpu-igwe l’ishi, mee t’akọkpa ghu bụru ope. Gụ egude iya gwee igweligwe mba ryaaryaa. Gụ egwota urwu, whẹ ritaru l’ụzo ẹregede doberu Onye-Nwe-Ọha nsọ; gwota ẹku whẹ nụ Onye-nwe-ọha, nwe mgboko l’owhu.”

Ụkwa onye l’e-shi Bẹ́tulehemu chịa

¹Sụa, unu doo onwunu l’itsutsu l’itsutsu, gụbe mkpụkpu ono, ikpoto madzụ kụru, nkele ndu ọhogu anyi yebutawaru anyi ibẹka ibẹbo. Onye ishi ndu Ízurẹlu bẹ whẹ chị mgbọro-igwe echipyashi ishi-agbagba-nchị.

²“Ọle gụbedua, bụ Bẹ́tulehemu, dụ l’alị Ifurata. A makwarụ-a l’ị bụ nwa mkpụkpu nshịi, nọ l’echilabọ ikfu Juda. Ọle ọo l’ime ghu bẹ onye ishi Ízurẹlu l’e-shi lụfuta. Onye ono shiro eshi ndụ-ichee nọduta, mbụ l’o shi l’edenwede nọduta.”

³Ọo ya bụ lẹ Onye-Nwe-Ọha l’a-parụ ndu Ízurẹlu haa jeye nteke nwanyị ono, ime l’eme l’e-zeda. Nteke ono, ụnwunna whẹ ọwhu alwakfuta ndu Ízurẹlu ono. ⁴Onye ono byalẹwho bẹ l’ọo-kfụru l’ike ọwhu Onye-Nwe-Ọha l’a-nụ iya mẹe l’ọdu-biribiri nke Onye-Nwe-Ọha, bụ Chileke iya chee ndibe iya g’ọo onye l’eche atụru. Ndibe iya ono eburu guu nkele nteke ono bẹ ẹwha iya l’e-degbakota mgboko mgburumgburu. ⁵Oo-mee tẹ nchị dụ whẹ doo.

Ndzọfuta yẹle ọla-l’iswi

Nteke onye Asiriya ono l’a-byakfuta anyi ọgu l’alị anyi bya adzọo ẹka anyi tụshiru ike fụtu-fụtu, bẹ anyi l’e-yefu ndu ẹka shihuru ike, bụ ndu l’eche anyi g’ọo ndu l’eche atụru, mbụ ndu ishi anyi tẹ whẹ bya echia onye Asiriya ono ọnu l’alị. ⁶Whẹ l’e-gude ogu-ịgba hụa alị Asiriya ọbu lẹ mkpaba-nkụ. Whẹ amịfuta nkogo l’atsụ nteku gude saa ndu alị Nimurọdu ọsa ẹkfu. Ọo-nafụta anyi l’ẹka onye Asiriya ono mẹ ọ byalẹwho alị anyi, bya adzọlahaa ije g’ọ dụ iya ree l’oge alị anyi.

⁷Ndu whọduru nụ l’ẹpa Jékọpu l’e-me t’ẹhu jia ndiwhe l’owhu oyi g’ọo ndu iji, shi l’ẹka Onye-Nwe-Ọha dashịru l’ẹhu. Whẹ adụ g’ọo ẹgube-ẹ tẹshiteshi mini l’emeshi l’eli irwu ẹwu nkele ẹka ẹnya whẹ dụ ta abụdu l’ẹka madzụ nọ, tọ dụ iwhe whẹ l’ele ẹnya iya t’ụnwu-eliwhe meeru whẹ. ⁸Ndu whọduru nụ l’ẹpa Jékọpu l’a-tụko mba ọdo dzuru. Whẹ l’a-kparwube l’echilabọ ndiwhe. Ọ bụru gẹ ọkpehu l’anya oduu-gburu-agụ kfụukfuu l’ẹka anụ-ẹgbudu ọdo nọ bụ g’ọkpehu l’a-nọ anya whẹ kfụukfuu, mbụ lẹ whẹ l’a-dụ g’ọo nwa oduu, nọ l’echilabọ atụru, bụ: ọo -ghata, ya adzọ-gbushi iwhe ọ whụru, alajashị iya nwịrinwiri, tọ dụ onye l’anafụje iya iwhe ọ kpachịru. ⁹Ẹka nke unubẹ Ízurẹlu bẹ l’a-ka nke ndu ọhogu unu nke ọwhu bụ l’unu l’a-lwụ-gbu tụru okoo kpua whẹ, mbụ lẹ ndu ono whụru unu ẹhenu bẹ l’ee-me tẹ whẹ tọhu.

¹⁰Onye-Nwe-Ọha l’ekfu sụ: “O -rwua mbọku ono bẹ mu l’e-gbushi ịnya-ọgu unu mebyishia ụgbo-ịnya unu. ¹¹O nokwawho gẹ mu l’e-mebyishi mkpụkpu, dụkota l’alị unu nwutsushia ẹka lile, unu tụru ọ bụru agbarara unu. ¹²Mu l’e-me t’ẹnya-maa ono, unu l’eme l’alị unu rwụhu, unu ta abya l’enwebaa ndu jibya ọdo. ¹³Mu l’e-mebyishi ntẹkpe ono, unu pyịshiru agwa agwagwa, mebyishikwawho ẹwhuru alobu ono, unu doberu onwunu agwa. Nke ọwhu bụ l’ọ tọ dụdu iwhe unu gude ẹka unu mee, dụ ọwhu unu bya l’ewhuzetaru baarụ ẹja ọdo. ¹⁴Agwa Ashera ono, unu doberu agwa bẹ mu l’a-vụ l’ọgbaragbu mee tẹ mkpụkpu unu l’owhu bụru kpurupyata. ¹⁵Mu l’e-gude iwe l’ọnuma melata mba ono, jịkaru ome iwhe mu sụru tẹ whẹ meje.”

Chileke l’eku ndu Ízurẹlu ikpe

¹Unu ngabẹkwa nchị l’iwhe Onye-Nwe-Ọha l’ekfu.

Tẹ gụbe Onye-Nwe-Ọha gbashi kfụru l’iwhu eze ugvu doo iwhe ọbu, e meru ghu. T’ụnwu ugvu nshịi nụa iwhe l’iikfu. ²Unubẹ ugvu g’ugvu ha, unu nụkwa iwhe Onye-Nwe-Ọha l’abya edodo. Unubẹ itso, gude mgboko jeyewaro, unu ngabẹ nchị nụa iwhe ọbu, l’ada okfu. Nkele Onye-Nwe-Ọha bẹ whẹ lẹ ndibe iya nweru okfu. Yẹ lẹ ndu Ízurẹlu l’e-kfukahu iya l’ọwhu, l’ọo-la.

Ọnu, Onye-Nwe-Ọha yeru

³“Oowaa; ndibe mu ?Mu meru unu gụnu? ?Ọo l’ụzo, dụ agha bẹ mu shi bụru unu ivu-ẹrwa? Unu yeedaru mu ọnu. ⁴Mu dufutaru unu l’alị Íjiputu; bya agbafụta unu l’alị ono, unu shi bụru ohu; zhia Mósisu t’o dua unu; bya eyeru iya Érọnu yẹle Miriyamu. ⁵Unubẹ ndibe mu, unu nyatakwa ikumu ono, ọ gbarụ, mbụ eze ndu Moabu, bụ Bélaku. Unu anyatakwawhọ ọnu ono, nwa Beyo, bụ Bélamu yeru iya. Unu nyatakwa gẹ ije unu gbarụ wata l’ọdu, nọ lẹ nsụda oshi Shitimu jeye lẹ mkpụkpu Gílugalu. Unu nyata iya gude iya marụ iwhe Onye-Nwe-Ọha meru gude dzọta unu.”

Iwhe Onye-Nwe-Ọha l’achọ

⁶?Ọo gụnu bẹ mu l’e-gude bya l’iwhu Onye-Nwe-Ọha bya ewhuzetaru iya l’alị, mbụ Chileke ono, ha shii? ?Ọo anụ ngwo-ẹja ọkpokota-iwhe-ọku bẹ mu l’e-gude byakfuta iya, mbụ nweswi mgbarawha? ⁷?Ọo-dụ Onye-Nwe-Ọha ree mẹ mu chịta ụnukurunu ebyila bya anụ iya; nụ iya mmanụ, dọru chịriri g’ọo ẹbonyi ụnukurunu ugbo iri? ?Ọo tẹ mu wota onye bụ ọkpara mu gude gwaa Chileke shi nno kfụa ụgwo emeswe, mu mesweru iya, mbụ mu l’e-wota nwa, shi mu l’ẹhu kfụa ụgwo iwhe-dụ-ẹji, mu meru?

⁸Onye-Nwe-Ọha goshiakwaru gụbe madzụ iwhe dụ ree, l’ii-meje. ?Ndẹe iwhe ọdo, Onye-Nwe-Ọha chọru l’ẹka ghu l’abụa t’i meje iwhe kfụru nhamụnha, gụ akpọru obu ye l’ome obu-imiko yẹle t’i wozeta onwoghu alị etso Chileke.

Ikpe, nmarụ ndu Ízurẹlu yẹle iwhe l’ee-me whẹ

⁹Unu ngabẹkwa nchị! Ọ kwa olu Onye-Nwe-Ọha l’ekushi ndu mkpụkpu-a ẹgube whọ. Ọ kwa ọtsu gụbe Onye-Nwe-Ọha egvu bụ ọkpobe mmamagụ. “Unubẹ ndu ono, dọru l’ime mkpụkpu ono, unu gebe nchị l’ụda ẹchachi ono, l’ada yẹle nke onye ono, l’echi ẹchachi ono l’onwiya! ¹⁰Mu ta azọhakwa l’o nweru ẹku, a kparụ l’ụzo l’akfụaru nhamụnha, dụ l’ụlo ndu ejo-ememe. Mu ta azọha l’o nweru iwhe e bubotaru iwhe ebubota gude atụ iwhe bụ iwhe, Chileke tụru ọnu? ¹¹?Ndẹe gẹ mu l’e-shi kpefu onye gude iwhe ụgho dụ atụru madzụ iwhe, mbụ onye meru ẹregede l’iwhe dụ l’ẹkpa parụ nụ madzụ? ¹²Ndu nweru iwhe lẹ mkpụkpu unu bụlewho ọna ndu ụkpa iwhe whẹ bụ ẹhu whẹ. Ọ bụru ndu ntuwhu-ire bukota iya, tẹmenu whẹ l’egudeje ire eduwhu madzụ. ¹³O noo g’o gude mu gudewa ẹhu-ba-dụ-mma egbushi unu, eme t’unu tọhu, o noo nkele unu l’eme iwhe-dụ-ẹji. ¹⁴Unu l’e-ri nri, ọle ẹwho te ejidu unu eji. Unu -ria mẹ unu riru gụnu ye l’ẹwho, ẹgu arịle-ẹ unu ụri ẹnya. Unu l’a-bụ akpa aghaka, ọ tọ dụdu iwhe l’a-dụ unu l’ẹka. Ọwhu dụ unu adụ l’ẹka bẹ mu l’e-me t’ọgu ria. ¹⁵Unu l’a-bụ ọ-kọru-akọ-akpage-akpa. Unu l’a-pyịtaje mmanụ l’akpụru ólivu, ọle ọ tọ gadụru unu mkpa ẹhu unu. Unu adzọshijee mmẹe l’akpụru vayịnu, ọle unu ta angụdu mmẹe ya. ¹⁶Iwhe meru o je l’a-dụ nno bụ l’unu meru iwhe eze ono, bụ Omiri tọru ọkpa iya, unu yekota ẹka l’ome iwhe ono, ndibe Éhabu shi anọje eme. Unu wọtakotaru ẹka whẹ eme iwhe whẹ meru. Ọo ya meru mu je l’aha tẹ ẹgbara kfụa lẹ mkpụkpu unu, mu emee tẹ ndu bu lẹ mkpụkpu unu bụru ndu l’ee-gude eme iwhe-ọchi, ndiwhe ajalahaa unu ewenu.”

Nshọbukwa ndu Ízurẹlu

¹Nshọbukwa mu nshọ, mu dụakwa g’ọo onye ẹgu l’eme, jeru akpaa l’ọnanwu nteke a kpatagewaru iwhe e meberu l’alị ọ gvụ, tọ dụhe akpụru vayịnu whọdukwaduru l’oshi iya. Mbụ nteke ọjokfutu akpụru vayịnu l’ẹte adụhe tẹ mu wọta iya mịa, akpụru figu ọnumbu ono, l’anọje agụ mu ẹgu ta adụhe. ²Sụa, ntaa bẹ ndu yeru Chileke obu ta awhọduhedu lẹ mgboko-eliwhe-alị. Ọ tọ dụdu onye obu gụkwaduru iwhoro whọduru nụ t’ọ ka mma l’ọo onye lanụ. Iwhe onyenọnu kwageberu akwage iya bụ ogbu ọchi. Onyenọnu gudewaa ụgbu achị nta nwune iya t’ọ nmata iya. ³Ẹka l’anọje atsụ whẹ nteku l’ome ejo-iwhe. Ndu ishi l’achị nụ bụlewho iwhe l’aa-nụ whẹ bẹ ẹnya l’adụje whẹ. Ndu ikpe bụru ọnawhe nnuchi-ọnu bẹ whẹ dụ l’ọzo iya. Ọwhube ndu a marụ ẹwha whẹ bụru ejo-iwhe, l’awhọ whẹ l’obu bẹ whẹ l’anọje ekfushi l’ọnu. Ndu ono gẹ whẹ ha bẹ idzu whẹ je agbagba nnanụ. ⁴Onye e gbee sụ l’ọo ya kagezhia mma lẹ ndu ono bụ onye ọwhu l’adzụ g’ọo uke. Onye e gbee sụ l’ọo ya kagezhia ọbu onye obu gụru iwhoro bụru onye ọwhu l’akpọ ikpowhu mkpọ g’ọo amị-ogvu.

Oge ọbu, ndu nche unu shi kfuta okfu iya bẹ gbabeekwaru, mbụ nteke ọbu Chileke l’a-gwa unu ndọgolo. Ọ kwa ntaa bụ nteke ọbu, l’aa-tụ ẹyerebeke nụ unu. ⁵Unu ba adakobekwa madzụ ibe unu! Unu ta azọru onye unu l’iya l’eshi ọnya ẹhu. Unu echekwa ọnu unu l’ẹka nwanyị ono, zẹ-koru unu l’eli ẹhu nọdu. ⁶Nwa nwoke l’emechijekwa nna, nwụru iya nụ iwhu. Nwa nwanyị l’agbajẹ ne iya okfu. Nyee nwa l’agbajẹ nniko iya okfu. Ọgu, swiru madzụ bụ ndibe iya gẹdegede.

⁷Ọle mbẹdua l’onwomu bẹ bụ Onye-Nwe-Ọha bẹ mu l’a-chịru ẹnya yeru. Mu l’a-nmẹe anmẹe ngabẹru Chileke ono, bụ Onye ndzọta mu; Chileke mu ono je l’a-nụ olu mu.

Ndu Ízurẹlu l’e-mege gbashi ọdo.

⁸Unubẹ ndu ọhogu mu, unu be etekwa ẹswa kpua mu! A makwarụ-a lẹ mu darụ ada, ọle mu l’e-megekwa gbalihu ọdo. A makwarụ-a lẹ mu nọ l’ọochi, ọle Onye-Nwe-Ọha l’e-megekwaa bụru iwhoro dụru mu. ⁹Eshi-ọwhu mu meru Onye-Nwe-Ọha iwhe-dụ-ẹji bẹ mu l’e-tsu ẹka l’obu nọ-kirishia l’ẹhu-eghughu ono ọ tukoshiru mu, jeye nteke l’oo-le ẹnya l’okfu ẹhu mu, meeru mu iwhe rwuberu mu nụ. Oo-kufuta mu bya edobe l’ẹka iwhoro dụ. Mu egude ẹnya mu whụa gẹ l’oo-shi dzọfuta mu. ¹⁰Nteke ono bẹ ọhogu mu l’e-gude ẹnya iya whụ iya, iwhere eji iya iwhu. Onye ono, shi asụje mu: ?Ọo awe bẹ Onye-Nwe-Ọha ọbu, bụ Chileke ghu nọ? bẹ mu l’e-gude ẹnya mu whụ ẹka l’ọoda bẹbeji. Aa-dzọ iya tọlitoli nmatọo ya anmatọ gẹ l’aanmatọje ẹpoto, dụ l’ọma echi-ụzo.

¹¹Unubẹ ndu mkpụkpu-a, nteke ọtukwa mgbodo unu l’abyakwa. Mbọku ono bẹ l’ee-me tẹ oge alị unu kpọlibebaaru. ¹²Nteke ono bẹ l’ee-shigeje Asiriya abya nkunu, ndu eshi lẹ mkpụkpu, dụ-gee l’alị Íjiputu abya, ndu eshi l’alị Íjiputu jeye l’ẹnyimu Yufurétisu, ndu eshi l’eze-ẹnyimu ọwa jeye l’eze-ẹnyimu ọwhu, ndu eshi l’ugvu ọwa jeye l’ugvu ọwhu. ¹³Mgboko kpaa-whuu bẹ ẹgbara l’a-kfụ, ọ bụru iwhe ndu bu iya nụ kpatarụ; iwhe ono abụru iwhe, l’ọo-nwụtaru whẹ mbụ iwhe whẹ l’eme.

Okfu anụ Onye-Nwe-Ọha

¹⁴Onye-Nwe-Ọha, gudenu mkpụru ghu chee ndibe ghu g’ọo onye l’eche atụru, mbụ ndọkobe atụru ono, bụ oke-iwhe ghu ono. Ndu ono, họfuru je eburu nwẹkinyi whẹ l’ọswa, mbụ l’alị, ẹwu zeru, bụ ẹka élwù l’akpa nri. Tẹ whẹ nọdunu l’alị Báshanu yẹle alị Giledu tajẹ nri gẹ whẹ shihawa ata iya nteke ndụ-ichee.

Onye-Nwe-Ọha l’awhụru ndu Ízurẹlu imiko

¹⁵“Ọ kwa gẹ mu meru iwhe dụ biribiri nteke ono, unu shi lẹ Íjiputu fụta bụ gẹ mu l’e-me iya goshi whẹ ntaa.” ¹⁶Mba gẹ mba ha l’e-gude ẹnya whẹ whụ, iwhere egude whẹ. Ọkpehu whẹ g’ọ ha bẹ l’a-nafụkota whẹ. Whẹ eworu ẹka dẹe l’agba. Nchị echihu whẹ echihu, whẹ adalaha nkụchi. ¹⁷Whẹ egude ire mịchalahaa ẹja, dụ l’alị g’ọo agwọ, mbụ g’ọo iwhe l’awụ l’ẹwho. Whẹ egude ọnma kwekwekwe fụtakota l’ẹka whẹ tụru ọ bụru agbarara. Whẹ egude ọtsu-egvu dakọbe lwakfutashia Onye-Nwe-Ọha, bụ Chileke anyi.

¹⁸?Oo onye bẹ dụ g’ọo Chileke, onye l’agụje nvụ l’iwhe-dụ-ẹji, mbụ onye ono l’eleswetaje emeswe whẹ mesweru, mbụ ndu ono, whọduru nụ l’oke-iwhe iya? Ẹhu te eghujedu iya eghu jeyewaro. Iwhe l’adụje iya ree bụ ọwhu imiko. ¹⁹Ọo-whụru anyi imiko ọdo. Ya egude ọkpa dzogbua iwhe-dụ-ẹji, anyi meru. Woru ejo-iwhe anyi meru nwuru ye lẹ nwẹbonyi foru ẹgu. ²⁰Ẹpa Jékọpu bẹ gụbe Onye-Nwe-Ọha l’e-goshi l’ị bụ onye gbarụ t’e gude ire ghu ẹka. Mbụ l’ịi-whụru ẹpa Ébirihamu imiko ẹgube ono, i riburu iya nna anyi oche whẹ lẹ nte nteke ndụ-ichee.