Malakayi

Ẹkwo

MALAKAYI

Onye Nkfuchiru Chileke

Chileke yeru ndibe iya obu

¹Ọ waa bụ ozhi Onye-Nwe-Ọha zhiru Malakayi t’o zhia ndu Ízurẹlu.

²Onye-Nwe-Ọha l’ekfu sụ: “Mu yekwaru unu obu.”

“Iwhe unu gbee ekfu bụ: ‘?Ọo gụnu bẹ goshiru l’i yeru anyi obu?’ ”

Onye-Nwe-Ọha sụ: “?Ọo kwa lẹ Ịso yẹle Jékọpu bụ nwune? Onye ọwhu mu yeru obu bụ Jékọpu. ³Ọwhube Ịso bẹ dụ mu ashị. Ugvu ugvu alị Ịso bẹ mu meru ọ bụru ẹka ẹgbara kfụru, mu woru alị iya haarụ nkụta-ọswa, bu l’echi-ẹgu.”

⁴Ọ -bụru l’ẹpa Ịso, bụ iya bụ ndu Edọmu bẹ l’ekfu sụ: “Mkpụkpu anyi bẹ zekposhihuru ezekposhihu, ọle anyi l’a-tụkwa iya t’ọ kfụru ọdo.”

Ọle iwhe Onye-Nwe-Ọha, bụ Onye-ishi-igwe-ọgu l’ekfu bụ: “Tẹ whẹ tụnua ya gẹ whẹ l’a-tụ iya, tẹ mu nwutsushia ya. Ndu madzụ l’e-ku whẹ ejo mba, ndu Onye-Nwe-Ọha doberu ẹhu-eghughu iya jeye lẹ gbururu. ⁵Unu l’e-gude ẹnya unu whụa iwhe ono, unu asụ: ‘Onye-Nwe-Ọha bẹ ike iya pakwarụ ẹka je akpaa l’ẹka l’abụa alị ndu Ízurẹlu.’

Aabarụ ndu l’agbajẹ ẹja nụ Chileke mba

⁶“Sụa, nwa l’akwabẹjekwa nna iya ugvu, nwozhi l’akwabẹje onye-nwe-iya nụ ugvu. Ọ -bụruwho lẹ mu bụ nna unu ?ọo awe bẹ unu doberu ugvu, rwuberu mu nụ? Ọ -bụruwho lẹ mu bụ Onye-nwe-unu ?ọo awe bẹ unu doberu ẹso, gbarụ t’unu yeru mu?” O noo iwhe Onye-Nwe-Ọha bụ Onye-ishi-igwe-ọgu l’ekfuru unubẹ ndu ono, l’agbajẹ ẹja nụ Chileke, bụ ndu l’akpọ ẹwha mu ẹbo-ẹbo l’afụ.

“Unu l’a-jịkwaro sụ: ‘?Ndẹe g’anyi shi akpọ ẹwha ghu ẹbo-ẹbo l’afụ?’

⁷“Ụzo unu shi akpọ ẹwha mu ẹbo-ẹbo l’afụ bụ l’unu l’egudeje nri, l’aasọ nsọ bya atụshi l’ẹnya-mgbẹja mu.

“Unu l’a-jịkwaro ọdo sụ: ‘?Ndẹe ụzo, anyi shi emerwushi ghu?’

“Ụzo unu shi emerwushi mu bụ l’unu l’asụje l’ẹnya-mgbẹja nke mụbe Onye-Nwe-Ọha ta agbadụ t’a gụbe iya iwhe. ⁸Nteke unu gude anụ, l’atsọ ishi bya agbaarụ mu ẹja ?tọ bụdu unu ome ejo-iwhe? Nteke unu gude anụ, l’ete ọkpa mẹe anụ, ẹhu l’eme bya agbaarụ mu ẹja ?tọ bụdu unu ome ejo-iwhe? Unu kpụtanu anụ, dụ nno je akpẹe onye bụ ọ-chị-ọha alị unu, t’unu marụ mẹ ẹhu l’a-tsọ iya ụtso, ya emeeru unu iwhe-ọma.” O noo iwhe Onye-Nwe-Ọha, bụ Onye-ishi-igwe-ọgu l’ekfu ndono.

⁹“Sụa, unubẹ ndu ono, l’agbajẹ ẹja nụ Chileke, unu gudedaa ẹgube ngwo-ẹja ono je aryọo Chileke t’o meeru unu eze-iwhe-ọma, t’unu marụ ?ọo-nata iya unu? O nokwa iwhe Onye-Nwe-Ọha, bụ Onye-ishi-igwe-ọgu l’ekfu ndono.

¹⁰“Nggẹ l’ọ dụ g’e shi onye lanụ l’ime unu gụ-chia mgbo eze-ụlo mu ono agụ-chi, t’unu haa anọ akpọ ọku, l’adụa iwhe ọ bụ l’ẹnya-mgbẹja mu. Ẹhu ta atsọhekwa mu ụtso l’ẹka unu nọ. Ọ tọ dụkwa ngwo-ẹja, unu gude bya, mu l’a-nata l’ẹka unu ilile. O noo iwhe Onye-Nwe-Ọha bụ Onye-ishi-igwe-ọgu l’ekfu ndono. ¹¹Lẹ mba gẹ mba ha, shizhiawho l’ẹnyanwu-awata jeye l’ẹnyanwu-arịba bẹ ẹwha mu hakwa shii. Ẹka lile bẹ l’aakpọru mu ụ̀nwù isẹnsu ọku, agbarụ mu ẹja guru egu, nkele ẹwha mu bẹ ha shii lẹ mba gẹ mba ha.” O noo iwhe Onye-Nwe-Ọha, bụ Onye-ishi-igwe-ọgu l’ekfu ndono.

¹²“Ọle unubẹdua l’anọje emetoshi ẹwha mu. Ụzo unu shi emetoshi ẹwha mu bụ agha; l’unu l’arịje l’ẹnya-mgbẹja mụbe Onye-Nwe-Ọha ta adụdu iwhe ọ bụ, unu l’arịjekwaawho l’ọo ẹka l’aa-bya atụshi nri, l’aasọ nsọ. ¹³Unu l’asụje: ‘Ẹgube iwhe ọwaa gvụakwaru anyi ike.’ Unu kfugee nno, unu anyaarụ mu eze.” O noo iwhe Onye-Nwe-Ọha bụ Onye-ishi-igwe-ọgu l’ekfu ndono.

“Unu l’egudeje anụ e zhitaru l’oshi mẹe anụ, l’ete ọkpa mẹe anụ, ẹhu l’eme bya l’unu l’agbarụ mu ẹja. ?Unu l’arị lẹ mu l’a-nata unu ẹgube ẹja ono? O nokwa iwhe Onye-Nwe-Ọha l’ekfu ndono. ¹⁴Onye l’aghọ ụgho bụkwa onye a tụru ọnu, mbụ onye nweru anụ bụ okee ya, o ribua nte lẹ ya l’a-kpẹe ya Onye-Nwe-Ọha, e megee ọ bụru anụ, ọrwu dụ l’ẹhu b’o gude gbaarụ mụbe Onye-Nwe-Ọha ẹja. Unu marụ amarụ lẹ mu bụkwa onye eze, parụ ẹka. Mba lile l’atsụkota mu egvu.” O noo iwhe Onye-Nwe-Ọha bụ Onye-ishi-igwe-ọgu l’ekfu ndono.

Aalọ ndu l’agbajẹ ẹja nụ Chileke ẹka lẹ nchị

¹“Unubẹ ndu l’agbajẹ ẹja nụ Chileke; ọ waa bụkwa ẹka mu l’alọ iya unu lẹ nchị. ²Unu -jịka l’unu ta angadụ nchị l’iwhe mu l’ekfu, jịka l’unu te egudedu obu unu akwabẹ mu ugvu, bẹ mu l’a-tụkwa unu ọnu, tụa iwhe ndiwhe l’ewotaje bya anụ unu ọnu. Mu gbekwaa tụwaa ọnu ọbu atụtu dobe, o noo nkele unu te egudedu obu unu akwabẹ mu ugvu. O nokwa iwhe Onye-Nwe-Ọha, bụ Onye-ishi-igwe-ọgu l’ekfu ndono.

³“Leenu, mu l’a-nụ ẹpa unu kpakụduu. Mu l’e-woru nshị anụ ọbu, unu gburu gude gbaa ẹja hua unu l’iwhu. A tụko unu lẹ nshị anụ ọbu mee ntụ ekpofu. ⁴O noo nteke unu l’a-marụ l’ẹka ono, mu lọru unu lẹ nchị ono bụ ndụge ọgbandzu mu lẹ ndu Lívayi ekeru. O noo iwhe Onye-Nwe-Ọha bụ Onye-ishi-igwe-ọgu l’ekfu ndono.

⁵“Ọgbandzu mu lẹ ndu Lívayi gbarụ bụ lẹ mu l’a-nụ whẹ ndzụ, nụ whẹ ẹhu-ọdu-guu. Mu mechakwaa nụ whẹ iya gẹ mu kfuru nke ọwhu whẹbedua l’a-kwabẹ mu ugvu. Whẹ kwabẹkwa mu ugvu ọbu bya eyeru mu ẹso. ⁶Iwhe whẹ shi ezhi bụ ọkpobe okfu. Okfu, bụ okfu urwe ta adụdu whẹ l’ọnu. Mu lẹ ndu Lívayi ono shi tụgba bụru nnanụ, ẹhu dụ whẹ guu, ọ bụru iwhe kfụru nhamụnha bẹ whẹ shi emeje. Igweligwe madzụ bẹ whẹ meru, whẹ sefu ẹka l’ome iwhe-dụ-ẹji.

⁷“Iwhe gbarụ onye l’agbajẹ ẹja nụ Chileke l’ememe bụ; t’o zhije madzụ t’ọ marụ Chileke ọkpobe amama. Iwhe gbakwanụru madzụ l’ememe bụru; t’ọ chọru onye l’agbajẹ ẹja nụ Chileke jee, je eshi l’ọnu iya nwụta iwhe iwu Chileke kfuru. O noo l’onye l’agbajẹ ẹja nụ Chileke bụ onye ozhi Onye-Nwe-Ọha bụ Onye-ishi-igwe-ọgu. ⁸Ọle unubẹ ndu ọbu, l’agbajẹ ẹja nụ Chileke bẹ harụ ẹka ụzo ọwhu unu gege anọ eshi shilahaa ụzo ọwhu l’ẹte agbaa unu l’eshishi. Unu gudewaa iwhe unu l’ezhi mee igweligwe madzụ, whẹ ye ẹka l’ome iwhe-dụ-ẹji. Unu mebyiwaru ọgbandzu ono mu lẹ ndu Lívayi gbarụ.” O noo iwhe Onye-Nwe-Ọha bụ Onye-ishi-igwe-ọgu l’ekfu ndono. ⁹“Ọo ya meru, mu je l’a-gha rii mee unu t’ọ bọ dụ iwhe ndu Ízurẹlu l’a-gụbe unu, unu ta abụdu akụ unu ta abụ ẹkfu l’ẹnya whẹ mẹ unu -nọdu iya-a g’unu nọ iya, haa ome iwhe mu sụru t’unu mee; ọ bụru madzụ bẹ unu l’anọje abọ ẹbo nteke unu l’ezhi iwu mu.”

Ndu Juda te ekwedu t’e gude ire whẹ ẹka

¹⁰?Tọ dụ nna lanụ bẹ anyi tụkoru nweru? ?Tọ dụ Chileke lanụ tụkoru anyi kee? ?Ndẹhunu g’ọ nwụru l’ọobuje, anyi kwechaa madzụ ibe anyi ụkwa, anyi te emehedu iwhe ọbu anyi kweru ụkwa iya, e shi nno, anyi emerwua ọgbandzu ono, shi l’ẹka ndụ-ichee anyi whẹ?

¹¹Ndu Juda te emehekwa iwhe whẹ kweru Chileke ụkwa ememe. Ọ bụru ahụma bẹ whẹ l’eme lẹ Jerúsalẹmu mẹe l’alị Ízurẹlu kpaa-whuu. Mbụ lẹ ndu Juda bẹ merwuwaru ụlo-nsọ ono Onye-Nwe-Ọha yeru obu, okfu lẹ whẹ je alwụshia ụnwanyi ndu ọha ọdo, l’aagwa iwhe. ¹²Sụa, tẹ Onye-Nwe-Ọha mekwaa t’onye meru ẹgube iwhe ono tọhu l’ibe Jékọpu, o beru ọ bụru onye. Mbụ onye l’abụje, o megee ẹgube iwhe ono, ya egudele-e iwhe bya lẹ ya l’agbarụ Onye-Nwe-Ọha, bụ Onye-ishi-igwe-ọgu ẹja.

¹³Ejo-iwhe ọdo unu l’emeje bụ lẹ unu l’anọje akwashị ẹnya-mini, ẹnya-mini, shi unu l’ẹnya l’anọje asọ gborogboro l’eli ẹnya-mgbẹja Onye-Nwe-Ọha. Unu l’anọje arya ẹkwa echi mkpu, l’iswi lẹ Onye-Nwe-Ọha te elejedu ẹnya lẹ ngwo-ẹja unu l’anụ iya, tọ natajẹ unu ngwo-ẹja unu. ¹⁴Ịi-jịkwaro sụ: “?Ishi iya-e?” Ishi iya bụ lẹ Onye-Nwe-Ọha nọdu nteke gụ lẹ nwanyị ono, ị lụru l’okorọbya gbarụ ndzụ lẹ mbọku ono, unu lụru. Yẹbe nwanyị bẹ nọ-turu ghu nụ, ọo nwanyị l’edobeje ọgbandzu gụ l’iya gbarụ gude lụa, ọle gụbedua te emejedu ụkwa ono, i kweru iya.

¹⁵?Ọ kwa lẹ Onye-Nwe-Ọha meru unu ẹbo, unu bụru onye lanụ, obu unu bụru nnanụ? ?Ọo gụnu bẹ Onye-Nwe-Ọha kwoberu mee t’unu bụru nnanụ? Iwhe o kwoberu mee ya bụ t’unu nwụshia ụnwegirima, l’a-bụ nke Chileke. Ọo ya bụ, t’unu kwabẹru onwunu ẹnya, t’ọ bọ dụkwa onye l’a-hajẹ ome iwhe o kweru nyee ya l’ụkwa, mbụ nwanyị ono, unu lụru l’okorọbya.

¹⁶Onye-Nwe-Ọha, bụ Chileke nke Ízurẹlu l’ekfu sụ: “Ọ dụkwa mu ashị lẹ nwoke chịfuru nyee ya l’iya ta alụhedu. Nwoke, meru nyee ya ẹgube ome-l’iwe ono bẹ dụkwa mu ashị.” O noo iwhe Onye-Nwe-Ọha, bụ Onye-ishi-igwe-ọgu l’ekfu ndono.

Ọo ya bụ, unu kwabẹru onwunu ẹnya, t’unu ba abụ ndu nyee unu l’ẹte egudee ire unu ẹka.

Mbọku ikpe dụakwa ntse

¹⁷Unu l’ekfuchinukaakwa Onye-Nwe-Ọha nchị.

Unu l’a-jịkwaro sụ: “?Ndẹhunu ụzo, anyi shi ekfuchi Onye-Nwe-Ọha nchị?”

“G’unu shi ekfuchi iya nchị bụ l’unu l’asụje lẹ ndu l’eme ejo-iwhe bẹ dụkota ree l’ẹnya Onye-Nwe-Ọha, mbụ l’iwhe whẹ l’eme l’atsọ iya ụtso.” Ọdo bụ l’unu l’ajịje sụ: “?Ndẹhunu Chileke ọbu l’ekpeje ikpe kfụru nhamụnha?”

Onye-Nwe-Ọha l’ezhi onye l’e-vu ụzo bya emechaaru iya ụzo

¹Onye-Nwe-Ọha, bụ Onye-ishi-igwe-ọgu bẹ l’ekfu sụ: “Unu lekwa, mu l’e-zhi onye ozhi mu t’o vuru mu ụzo je emechaaru mu ụzo. O noo nteke bụ ejia ekfu, Onye-Nwe-Ọha ono, unu shi leta ẹnya iya ono abụru whẹrekete l’eze-ụlo iya. Onye ozhi ono, ẹnya dụ unu t’unu whụa l’a-bya aryaa nke ọgbandzu mu aryarya. Leenu, ọobyakwaa.”

²Ọle ọbu ?Ọo onye l’a-dụ ike atakeru tẹ yẹle iya mee mbọku ono? ?Ọo onye l’a-dụ ike kfụru kpọ iya iwhu mẹ ọ byalẹwho? Nkele ọ byalẹwho bẹ l’ọo-dụ g’ọo ọku, dụ l’iwhu otiti, ọ-kpụ-ụzu gude anụcha igwe, dụkwawho g’ọo ọkpobe ncha ọ-sa-uwe, l’egudeje asa uwe. ³Ẹpa Lívayi bẹ l’ọo-nụcha anụcha, mee whẹ tẹ whẹ gbuchafu dụ g’ọo mkpọla-ododo mẹe mkpọla-ọcha, a hụru l’ọku nke ọwhu whẹ l’a-nọ agbarụ Onye-Nwe-Ọha ọkpobe ẹja, gbarụ iya nụ. ⁴O noo nteke, ngwo-ẹja ndu Juda mẹe ọwhu ndu Jerúsalẹmu l’anụ Onye-Nwe-Ọha l’a-bya atsọlahaa Onye-Nwe-Ọha ụtso g’o shihawaa atsọje iya lẹ mbụ l’oge ndụ-ichee.

⁵“Mu l’a-kpịlitakwaru unu ntse bya ekpee unu ikpe. Mu l’e-me kọrokoro tụa unu jalaa, mbụ unubẹ ndu ono, l’agwọ ọgvu mẹe ndu l’eri ogori mẹe ndu l’akpapyabẹje iwhe whẹ meru gụa ẹnwa mẹe ndu l’esebofuje iwhe l’aswa ozhi ndu jeru whẹ ozhi mẹe ndu l’anọje akpa ụnwanyi-mbunu mẹe ụnwu-ogbee ẹhu mẹe ndu l’anafụje ndu mbyambya iwhe rwuberu whẹ nụ, mbụ unubẹ ndu ono, l’ẹte atsụ Onye-Nwe-Ọha egvu. O noo iwhe Onye-Nwe-Ọha bụ Onye-ishi-igwe-ọgu l’ekfu ndono.

Ụzo lanụ l’ụzo iri

⁶“Sụa, mụbe Onye-Nwe-Ọha ta agbanwejekwa agbanwe. Ọ kwa iya meru unubẹ ẹpa Jékọpu tẹke echihua. ⁷Unu shi l’oge nke nna unu oche whẹ gbakụta mu azụ jịka ome iwhe mu tọru ọkpa iya t’e meje. Unu lwakfutawhu mu azụ nke ọwhu mu l’a-lwakfuta unubẹdua.” O noo iwhe Onye-Nwe-Ọha bụ Onye-ishi-igwe-ọgu l’ekfu ndono.

“Unu l’a-jịkwa sụ: ‘?Ndẹe ụzo anyi l’e-shi lwakfutawhu ghu azụ?’

⁸“?Ọo dụ ree lẹ madzụ gude ụgho ezhi Chileke oshi? Unubẹdua l’ezhikwa mu rọo oshi.

“Unu l’a-jịkwa sụ: ‘?Ndẹe ụzo anyi shi ezhi ghu oshi?’

“Oshi unu l’ezhi mụbe Onye-Nwe-Ọha bụ l’unu te ekejedu iwhe unu nweru ụzo iri nụ mu ụzo lanụ, unu ta anụje mu iwhe. ⁹Sụa, unu bụakwa ndu a tụru ọnu nkele unubẹ mba owhu tụkoru ezhi mụbe Onye-Nwe-Ọha oshi. ¹⁰Unu tụko ụzo-lanụ-l’ụzo-iri unu g’ọ ha wobata l’ụlo, l’aakwakọbeje ẹku mu nke ọwhu nri l’a-dụ l’eze-ụlo mụbe Chileke. Unu mee ya nno gude dalee mu, unu awhụ lẹ mu l’a-gụharu unu ụzo l’imigwe wụaru unu iwhe-ọma, wụa ya nke etsutsu iya. O noo iwhe Onye-Nwe-Ọha bụ Onye-ishi-igwe-ọgu l’ekfu ndono. ¹¹Mu l’a-dachi ụnwehu tẹ whẹ ba atapyashịshi iwhe unu kọberu l’alị, mu emee tẹ mebyi vayịnu unu ba anọ erishihu l’okurutu. O noo iwhe Onye-Nwe-Ọha bụ Onye-ishi-igwe-ọgu l’ekfu ndono. ¹²Nteke ono bẹ mba nọnu l’e-ku unu ndu Chileke gọru ọnu-ọma nụ nkele alị unu l’a-nọ atsọ ụtso ebubu.” O noo iwhe Onye-Nwe-Ọha bụ Onye-ishi-igwe-ọgu l’ekfu ndono.

Ọdu l’iche dụru ndu dụ chịriri mẹe ndu l’eme ejo-ememe

¹³Onye-Nwe-Ọha bẹ l’ekfu sụ: “Unu kfuakwaru mu ejo okfu shii.

“Unu l’a-jịkwaro sụ: ‘?Ọo ẹgube ejo okfu gụnu bẹ anyi kfuru ghu?’

¹⁴“Iwhe unu kfuru bụ l’ojeru mụbe Chileke ozhi bụ iwhe mmaanụ. Unu kfua sụ: ‘?Ọo gụnu bẹ anyi l’erita l’anyi l’eme iwhe Onye-Nwe-Ọha kfuru yẹle anọno, anyi l’anọduje tsụyoo l’iwhu Onye-Nwe-Ọha, bụ Onye-ishi-igwe-ọgu, goshi l’iwhe-dụ-ẹji, anyi meru l’atsụ anyi lanụ? ¹⁵Ụzo anyi whụtaru iya ntaa bẹ bụ l’ọo ndu l’eku onwowhe eku bụ ndu ẹhu l’atsọ ụtso. Mbụ l’ọo ndu l’eme ejo-iwhe bẹ iwhe l’ejeru ree, ọ tọ bụlekwaa ono, whẹ l’egudeje ome ejo-iwhe data Chileke, ya eje adụ iwhe l’oo-me whẹ.’ ”

¹⁶Tọ dụ iya bụ lẹ ndu ọwhu l’atsụkwanu Onye-Nwe-Ọha egvu bya ekfuru okfu yeru ibe whẹ. Onye-Nwe-Ọha gebelekwawho nchị nụ iwhe whẹ l’ekfu. A bya edee ẹkwo l’iwhu Onye-Nwe-Ọha, dee iwhe l’ee-gudeje nyata ndu ono, l’atsụ egvu Onye-Nwe-Ọha akwabẹ iya ugvu ono.

¹⁷Onye-Nwe-Ọha, bụ Onye-ishi-igwe-ọgu l’ekfu sụ: “Whẹ l’a-bụru ndu nkemu. Mbọku mu l’a-bya ọgba-zhi ẹku mu bẹ mu l’a-gụkwaru whẹ ye lẹ ndu bụ nkemu. Mu l’e-meru whẹ obu-imiko ẹgube ono, nna l’emejeru nwa, kweru nkiya. ¹⁸Nteke ono bẹ unu l’a-whụ ọdu iche dụ lẹ ndu dụ chịriri mẹe lẹ ndu l’eme ejo-ememe. Unu awhụkwawho ọdu iche dụ lẹ ndu l’ejeru Chileke ozhi yẹle ndu l’ete ejeru Chileke ozhi.

Mbọku, Onye-Nwe-Ọha l’e-kpe ikpe l’agbabeekwa

¹“Mbọku l’agbabeekwa. Iwhe-ọtsulanu, l’a-dụ mbọku ono l’evokwa chichichi g’ọo ovokọku. Ndu l’eku onwowhe eku mẹe ndu l’eme ejo-iwhe l’a-dụ g’ọo ẹwu ọkponku. Mbọku ono bẹ ọku l’e-ke whẹ kee m’ọo ọgbaragbu whẹ mẹe ẹkali whẹ, ọ tọ dụdu ọwhu l’oo-kewhodo m’ọo nnanụ. O nokwa iwhe Onye-Nwe-Ọha, bụ Onye-ishi-igwe-ọgu bẹ l’ekfu ndono. ²A bya l’unubẹdua, bụ ndu l’eyeru ẹwha mu ugvu; ọdu-chịriri nke mụbe Onye-Nwe-Ọha l’awarụ g’ọo ẹnyanwu bya emee t’ẹhu dụ unu mma. Unu akpọlahaa ẹnwuda g’ọo nweswi nshịi, shi l’ụwoko fụta. ³Mbọku ono, mu l’e-me ẹngiringaa bẹ unu l’a-dzọpyabe ndu ejo-ememe l’ọkpa. Ya abụru gẹ l’eerwuje ntụ bụ g’unu l’e-gude ọbochi-ọkpa unu rwua whẹ.” O nokwa iwhe Onye-Nwe-Ọha bụ Onye-ishi-igwe-ọgu l’ekfu ndono.

⁴“Unu nyatakwa iwu ono, mu tụru nụ onye ozhi mu Mósisu, mbụ iwhe ono, mu tọru ọkpa iya mẹe nsọ ono, mu nụru iya l’ugvu Horẹbu t’ọ bya anụ ndu Ízurẹlu l’owhu.

⁵“Unu lee lẹ mu l’e-zhiada onye nkfuchiru ono, bụ Eláyija t’ọ bya tẹmenu ya erwude l’oke mbọku ono dụ egvu, bụ mbọku nke Onye-Nwe-Ọha ono. ⁶Eláyija ọbu byalẹwho bẹ l’oo-gozhitaru ụnwegirima obu nna whẹ. Ya agozhitaru ndu bụ nna obu ụnwegirima whẹ. Ọdumeka bẹ mbẹdua l’abyakwa bya emee alị unu ọzara-l’ukpo.”