Egvu-Áwhụ

Ẹkwo

EGVU-ÁWHỤ

Iwhe-ọtsulanu, byakfutaru Jerúsalẹmu

¹Lewaro gẹ mkpụkpu ono daburu nkụnyi,

mbụ mkpụkpu ono, madzụ shi jifuta kpaa l’ọnu!

Lewaro g’ọ bya adụ g’ọo nwanyị-mbunu,

mbụ onye ono, e shi marụ ẹwha iya lẹ mba gẹ mba ha!

Onye ono, shi bụru eze-nwanyị

l’iwhe bụ alị-eze l’owhu bẹ bụwaa nwohuta.

²Ẹnyashi owhu bẹ l’ọoryakotaje ẹkwa tsọo kụrukuru.

Ẹnya-mini eshi iya l’ẹnya gụshihu

bya asọ-kfuru iya l’ishi asa.

Ndu lile, yẹle iya dụ lẹ mma ta

adụdu onye ọwhu l’abyajẹ bya adụa ya obu.

Iwhe bụ ndu yẹle iya l’eshi ọnya bẹ nwuwaru iya buhaa.

Ntaa bẹ whẹ bụwaa ndu ọhogu iya.

³Juda bẹ nọ lẹ mkpamẹhu,

bya egude oje ozhi mkpọnwuru,

gbarụ laa alị ọdo je eburu.

Ntaa b’o buwaa l’echilabọ ndu mba ọdo.

Ọle ọ to dụdu ẹka ọ whụru tụta ume.

Ndu l’achị iya nke egude bẹ

gbabutaru iya iwhu l’ẹka ọ nọ l’awhụ.

⁴Echi-ụzo, e shi eje Záyọnu l’agụkaa áwhụ,

o noo nkele ọ tọ dụdu onye

l’aghatajẹkwadu iya eje l’oge.

Ọnoguzo lile, bụ ẹka l’eeshije

abahụ iya nụ bẹ dachishihuwaru nụ.

Ndu l’agbajẹ ẹja lẹ Záyọnu l’atsụ ude.

Iwhe bụ ụnwumgboko Záyọnu l’eje iwhe awhụ.

Záyọnu l’onwiya l’eje

iwhe-ọtsulanu, ka l’iwhe-ọtsulanu.

⁵Ndu l’akpa iya ẹhu bụwa whẹ bẹ iwhe lile kụru ishi l’ẹka.

Ọ tọ dụdu iwhe l’atsụ ndu ọhogu iya l’anụ.

Ọo Onye-Nwe-Ọha bẹ wokfutaru iya awhụ,

nkele emeswe, o mesweru bẹ panụkaru ẹka.

Ụnwegirima iya bẹ lakọtawaru alị ọdo je eburu.

Mbụ lẹ ndu ọhogu kpụkotawaru whẹ lẹ ndzụ laa alị whẹ.

⁶Ugvu lile, nwada Záyọnu shi

nweru lụfukotawaru iya l’ẹhu.

Ndu ishi Záyọnu dụwaa g’ọo ele, l’ẹte awhụa iwhe l’oori.

Ume gvụwaru whẹ l’ẹka whẹ

l’agbarụ ndu l’achị whẹ nụ ọso.

⁷Ntaa, mkpamẹhu mẹe iwhe ọgha ririri byarụ

bẹ Jerúsalẹmu nyatarụ ẹku lile, o shi nweru,

mbụ ẹku ono, o shi nweru l’oge ndụ-ichee.

Nteke ndu nkiya dabarụ l’ẹka ndu

ọhogu, bẹ l’ọoto dụdua onye gbatarụ iya nụ.

Ndu ọhogu iya l’anọje ele iya nlegbu-l’ẹnya,

aja iya ewenu mẹe iyi byarụ iya.

⁸Jerúsalẹmu meru iwhe-dụ-ẹji, parụ ẹka.

O shiwa l’ome ẹji nno bụru onye

metoshiru onwiya emetoshi.

Ndu lile shi akwabẹ iya ugvu bẹ

l’akpọwa iya ẹbo-ẹbo l’afụ,

o noo nkele whẹ whụru iya g’ọ gba ọto.

Yẹbedua l’onwiya l’atsụ ude.

O woru iwhu ghachi l’ụzo ibe iya ọdo.

⁹Emetoshi ono, o metoshiru

onwiya bẹ rakụru l’iwhe l’o ye l’ẹhu.

Ọ tọ rịdu ọriri rị-vu ẹgube iwhe l’a-dakfuta iya l’atatiwhu.

Ntaa b’ọ dawarụ tsua ọnu l’alị, to nwe onye dụru iya obu.

“Jiko Onye-Nwe-Ọha, leeda

ẹgube iwhe-ọtsulanu mu l’eje;

ntaa bẹ ndu ọhogu l’atụ okoo ekpu mu.”

¹⁰Ndu ọhogu bẹ chịtakotawaru ẹku lile, whẹ nwe enwe.

Ọ bya awhụ ndu mba, l’ẹte amaa

Chileke gẹ whẹ wụbataru l’ụlo-nsọ iya,

mbụ ndu ono, gụbe Chileke

buchiru ọbata lẹ ndzuko ndu nkeghu.

¹¹Ndu nkiya a gẹ whẹ ha l’atsụkota ude l’okfu nri.

Whẹ l’ewojeru ẹku whẹ nụ l’okfu nri,

gẹ l’eeshi tẹ whẹ nọdunu ọwhube ndzụ.

“Jiko Onye-Nwe-Ọha lenua ẹnya nyata mu,

nkele a ta agụbedu mu iwhe.”

¹²“?Tọ dụdu iwhe ọ bụ l’ẹnya

unubẹ ndu l’aghata aghata?

Unu lewheedaa ẹnya elewhe;

marụ m’o -nweru iwhe awhụ ọdo,

ka iwhe awhụ ọwhu mu l’eje,

mbụ iwhe awhụ, e wokfutaru mu.

Ọo Onye-Nwe-Ọha bụ iya tụru iwhe awhụ ono nụ mu;

mbọku oke ẹhu-eghughu l’enwu iya whuruwhuru l’ẹhu.

¹³O shi l’imeli zhifu ọku;

o zhiru iya ọ bya atụko mu ọkpu kepyata.

O wotaru ụgbu gechia ẹka mu gege eshi gbafụ.

O nwuwhuru mu azụ.

O mewaru tẹ mu bụru onye nkụnyi.

Mbọkumboku bẹ l’oomeje t’ẹhu tsụshia mu mmẹe.

¹⁴Emeswe, mu mesweru b’ọ gakọwaru ọnu,

O gude ẹka iya kpaa ya akpakpa, o dzegbabe edzegbabe.

Ọ nyabẹwaru mu iya l’olu.

Onye-nwe-mu nụ bẹ mewaru t’ike gvụ mu,

woru mu ye l’ẹka ndu ọkpehu whẹ ka nkemu shii.

¹⁵Onye-nwe-mu nụ bẹ jịkawaru ndu ike dụ l’ọgu,

bụ ndu ono mu lẹ whẹ shi nọdu.

O kuru ndu ojọgu tẹ whẹ dzukobe bya alwụshi mu ọgu;

mbụ tẹ whẹ gwepyashia unwokorọbya mu ishi.

Onye-nwe-mu nụ dzọwaru ada Juda fụtu-fụtu,

g’ọo onye l’adzọshi mmẹe l’akpụru vayịnu.

¹⁶Ọo iwhe ono bẹ kparụ mu ọrya ẹkwa,

mbụ ẹnya-mini l’ala mu motomoto l’ẹnya.

Ọ tọ dụdu onye nọ mu ntse, l’a-dụ mu obu,

tọ dụ onye l’e-me tẹ mu budzua ume.

Ntaa bẹ ụnwegirima mu bụwa nkụnyi,

O noo nkele ọhogu bẹ lwụ-gbuwaru nụ.”

¹⁷Záyọnu machịru ẹka iya amachị,

ọle ọ tọ dụdu onye l’a-dụ iya obu.

Onye-Nwe-Ọha bẹ tụwaru iya g’ọo

iwu l’eli ishi Jékọpu tẹ ndu

buwheru iya mgburumgburu bụru ọhogu iya.

Jerúsalẹmu bụakwa onye mmerwu dụ l’ẹhu l’ẹka whẹ nọ.

¹⁸“Onye-Nwe-Ọha l’eme iwhe kfụru nhamụnha.

O noo nkele mu kwefuru ike l’okfu iya.

Ụnwu eliwhe, unu ngabẹedawho nchị,

unu leedanu ẹgube iwhe-ọtsulanu mu l’eje.

Ụnwu okorọbya mu mẹe ụnwumgboko mu

bẹ lakọtawaru alị ọdo je eburu.

¹⁹Mu ryakuru ndu mu lẹ whẹ dụ lẹ mma,

whẹ gbagbua mu l’ẹregede.

Ndu nkemu, bụ ndu l’agbajẹ ẹja mẹe ndu bụ ọgurenya

bẹ bụkotawaa kpurupyata l’ime mkpụkpu,

l’ẹka whẹ l’achọ nri, whẹ l’e-ri nọdu ndzụ.

²⁰Oowa, byiko Onye-Nwe-Ọha

leedanu g’awhụ mu habe shii.

Eze iwhe-ọtsulanu dụ lẹ ndzụ mu.

Meji l’etsu mu otsu owhe nkele mu kwefunukaru ike.

L’ime mkpụkpu b’e gude ogu-ịgba egbushi madzụ.

A bya l’ụlo, ọ bụru mgbu-ọnwu l’egbu.

²¹Ndu madzụ nụwaru ude, mu l’atsụ.

Ọle ọ tọ dụdu onye l’a-dụ mu obu.

Ndu ọhogu mu gẹ whẹ ha nụwaru nke iwhe-ọtsulanu, mu l’eje.

Ọ bụru ẹswa gbee ji whẹ obu l’ọo ghu meru mu iya.

Tẹ mbọku ono, i kfuru okfu iya byanụ,

ndụge whẹ dụ gẹ mu dụ.

²²T’ejo-ememe lile, whẹ l’emegbabe rwunua atatiwhu ghu;

menua whẹ ẹgube ono, i meru mu; iswi lẹ mu mesweru.

Ude, mu l’atsụ bẹ ha l’igweligwe, obu mu dawaa mba.”

Ikpe Onye-Nwe-Ọha

¹Lee gẹ Onye-Nwe-Ọha gude

ẹhu-eghughu iya kwekputa

ada Záyọnu urwukpu, gbarụ tsụrikiti.

Ùgvù ono, ndu Ízurẹlu shi nweru je akpaa l’igwe

b’o wotsutawaru ọ daa l’alị.

Mbọku ono, ẹhu l’eghu iya eghu

bẹ l’ọoto nyatadụa ẹka l’ọotu-kobeje ọkpa.

²Onye-Nwe-Ọha bẹ takụberu

ẹnya laa ẹka lile, Jékọpu bu l’iyi.

Ọo oke ẹhu-eghughu iya b’o gude

kutsushia ẹka ada Juda tụru o shihu ike.

Ọ kwatsuwaru alị-eze ono mẹe ndu eze, l’achị iya nụ

shi nno nafụ whẹ ugvu whẹ.

³O gude g’ẹhu l’eghube iya eghu

nafụ Ízurẹlu ike lile o nweru.

O sefuru ẹka-ụtara iya l’ẹhu whẹ

nteke ọ whụru ndu ọhogu gẹ whẹ l’eje abyakfuta whẹ.

O reru whuruwhuru g’ọo ire ọku l’ẹka Jékọpu nọ,

mbụ ire ọku, l’atụkoje iwhe o jekfuru rechafu.

⁴O kwewaru akfụ iya g’ọo onye ọhogu.

Ọ kfụwaru gude ẹka-ụtara iya

seta iya jịjiji g’ọo onye ọhogu.

Iwhe bụ ndu, dụ ugvu l’ẹnya b’ọ

tụkowaru gbukota l’ụlo-ẹkwa nwada Záyọnu.

Ẹhu-eghughu b’o kpukpushiru whẹ g’ọo ọku.

⁵Onye-Nwe-Ọha gbee dụwaa nụ g’ọo ọhogu.

Ọ lakọtawaru Ízurẹlu l’iyi.

Ọ lakọtawaru ụlo ibe-eze lile, dụ iya nụ l’iyi,

bya emewaa t’iwhe bụ ẹka a tụru, o shihu ike l’alị ono

bụkotaru kpurupyata.

Nggụmawhu yẹle ọrya ẹkwa

b’o mewaru, ọ ka shii l’ẹhu ada Juda.

⁶O gudewaa ike whọkashia mkpuumkpu iya

g’ọo onye whọkashiru mgbabu.

Ẹka l’aanọje ndzuko b’o mewaru ọ bụru kpurupyata.

Onye-Nwe-Ọha mewaru, Záyọnu

nyazọshia nteke l’oorije oge mẹe

mbọku bụ mbọku-ọtuta-ume.

O gudewa g’ẹhu-eghughu iya l’enwube whuruwhuru

jịka onye eze mẹe onye l’agbajẹ ẹja.

⁷Onye-Nwe-Ọha bẹ jịkawaru ẹnya-mgbẹja iya.

Ọ pawarụ ụlo-nsọ iya haa.

O wowaru mgbodo ibe-eze ndu Juda ye ndu ọhogu l’ẹka.

Whẹ nọdu l’ụlo Onye-Nwe-Ọha

tụa orooroo g’ọo mbọku, l’eeri oge.

⁸Onye-Nwe-Ọha chịpyawaru iya l’ime obu iya

lẹ ya l’e-nwutsushi mgbodo, e gude tụ-wheta

ada Záyọnu mgburumgburu.

Ọ kparụ iya oge mee ya gẹ l’ọo-dụ.

O to sewhu ẹka azụ jeye ọ lakọta iya l’iyi kpamụ.

O meru t’agbarara e gude

tuwheta iya mgburumgburu

yẹle mgbodo iya ryaa ẹkwa áwhụ.

Whẹ tụko gẹ whẹ ha yẹkpeshihu.

⁹Ọnu ẹka l’eeshije abahụ iya

zewaru dabagee adaba l’ime alị.

Iwhe l’eegudeje atụ-chi iya atụ-chi

b’o mebyishiwaru lakọta iya l’iyi.

Eze, l’achị iya nụ yẹle ndu ishi iya bẹ lakọtawaru mba ọdo

je akwaburu.

Ọ tọ dụhedu iwu, l’achị whẹ nụ.

Ndu nkfuchiru Chileke, nọ l’ime

iya ta awhụjehe ọwhulenya, shi Onye-Nwe-Ọha l’ẹka.

¹⁰Iwhe bụ ndu bụ ọgurenya ada

Záyọnu bẹ gwọshitawaru l’alị, ọnu ta adụ whẹ nke okfu.

Whẹ kpowaru ivovonyi wụa l’ishi, yee uwe ntsọmawhu whẹ.

Ụnwumgboko Jerúsalẹmu bẹ nọduwaa dẹe iwhu l’alị.

¹¹Mu ryatagewaru ẹkwa, ẹnya kochishigee mu ekochishi.

Meji l’etsu mu whaa-whaa; obu l’adafụ mu adafụ.

Iwhe kparụ iya nụ bụ lẹ ndu nkemu b’a lakọtawaru l’iyi.

Ụnwegirima nshịi mẹe ndu e he

l’ẹka bẹ ọ-da-mba l’atụ-tsukaa atụ-tsu l’ime mkpụkpu.

¹²Whẹ l’echi mkpu asụje ne whẹ: “?Ndẹe nri, ndẹe mmẹe?”

O bụru g’ọ-da-mba l’atụkaa

whẹ g’ọo ndu e merwuru ẹhu l’ime mkpụkpu,

bya abụru nteke ndzụ whẹ l’agvụ agvụ l’ẹka ne whẹ.

¹³?Ọo gụnu bẹ mu l’e-kfu l’ẹka ị nọ?

?Ọo gụnu bẹ mu l’e-gude tụru yeru ghu,

gụbe ada Jerúsalẹmu?

?Ọo gụnu bẹ mu l’a-sụ l’ọ dụ g’ọo ghu?

?Ọo gụnu bẹ mu l’e-me gude

dụkota ghu obu, mbụ gụbe nwamgbọko, bụ Záyọnu?

Ọnya tụkoru ghu ẹhu abakọta yoyoyo g’ọo eze-ẹnyimu,

?Ọo onye l’e-me t’ọ kpọhu ghu?

¹⁴Ọwhulenya ndu nkfuchiru

Chileke nọ l’ime ghu whụru bẹ ejire dụ, ụgho dụ iya.

Whẹ te ekpuhabudua ejo-iwhe, unu megbaberu goshi unu,

nke ọwhu l’ee-me t’a ba akpụhe unu lẹ ndzụ.

Iwhe whẹ kfuru lẹ whẹ whụru bụkota ẹdzuka.

Ọ bụru iwhe whẹ gude edusweshi ghu.

¹⁵Iwhe bụ ndu l’aghata aghata l’akụje ẹka kpua ghu.

Whẹ l’akpọ-yikaa ẹhu,

ewhuwhe ishi l’ẹka ada Jerúsalẹmu nọ asụje:

“?Tọ bụnu-a mkpụkpu-a bụ

mkpụkpu ọbu, e shi ekuje onye ụma, l’ọoma dzuru oke;

ẹhu-ụtso ụnwu eliwhe l’owhu?”

¹⁶Ndu ọhogu ghu gẹ whẹ ha

sawarụ ọnu whalaa ebukaa iwhu atụ ghu.

Whẹ l’awhụru ghu okpurọswa, anyarụ ghu eze.

Iwhe whẹ l’aryakaa bụ;

“Anyi akabẹ laa iya l’iyi ọbu!

Ọo ẹgube ntanụ bẹ anyi shi leta ẹnya iya.

Ntaa bẹ anyi nọduwaa ndzụ whụ ishi iya.”

¹⁷Onye-Nwe-Ọha bẹ mewaru iwhe ọ tụberu ememe.

O mewaru iwhe ọ sụru l’oo-me,

bụ g’o kfuru iya nteke tehawaru ẹnya.

Ọ takụbewaru ẹnya kwatsua ghu.

O mewaru t’ọhogu tụru okoo kpua ghu.

O nokwawho g’o kutseru ike ndu

ono, kpọro ghu ashị ekutse.

¹⁸T’obu ụnwu eliwhe chiku

Onye-Nwe-Ọha lẹ mkpu ẹkwa.

Gụbe mgbodo, nọ-wheru ada

Záyọnu mgburumgburu;

t’ẹnya-mini shi ghu l’ẹnya sọje

gborogboro g’ọo ẹnyimu, eswe l’ẹnyashi!

Ba atụtakwa ume ẹkwa ono l’ịirya!

Ryatakwa iya t’ẹnya kochia ghu ekochi.

¹⁹Gbalihu chia mkpu l’ẹnyashi,

l’oge nteke ono, nche abalị l’awatajẹ.

Gụhaa obu ghu wụshi l’atatiwhu

Onye-Nwe-Ọha g’ọo onye wụshiru mini.

Chilia ẹka ghu imeli kpọ-kua ya

l’iswi ndzụ ụnwegirima ghu,

bụ ndu ọ-da-mba l’atụkaa l’okfu

ẹgu l’ẹka lile l’ime mkpụkpu.

²⁰“Jiko Onye-Nwe-Ọha; lenua ẹnya whụdu nụ.

?Ọo onye b’i mejeru ẹgube-ẹ?

?Ọo t’ụnwanyi rilahaa anụ ụnwegirima whẹ,

mbụ ụnwegirima ono, whẹ heru?

?Ọo t’e gbulahaa ndu l’agbajẹ ẹja nụ

Chileke mẹe ndu nkfuchiru Chileke

l’ụlo-nsọ Onye-Nwe-Ọha?

²¹Nwata mẹe ọgurenya bẹ

tụkowaru daburu l’ivovonyi, dụ lẹ mkpụkpu ono.

Ụnwu okorọbya mẹe ụnwumgboko mu

b’e gbushigewaru lẹ mma.

Ọo mbọku iwe dụ ghu l’ẹhu b’i gbugbushiru whẹ.

I gburu whẹ, t’ị whụru imiko.

²²Ọo gẹ l’eekuje ndzuko mẹ l’eeri

oge bụ g’i kukoberu iwhe-ntsumegvu

tẹ whẹ swiwhe whẹ mgburumgburu.

Mbọku iwe dụ Onye-Nwe-Ọha

l’ẹhu bẹ l’ọotoo dụdua onye gbalarụ nụ,

ọ dụa l’ọo onye wafụru nụ.

Iwhe bụ ndu mu heru hefuta bẹ

ndu ọhogu mu whẹ lakọtawaru l’iyi.”

Egvu-áwhụ nke ẹhu onye

¹Ọo mbẹdua bụ onye takeberu jee iwhe-ọtsulanu,

Chileke shi lẹ mgbọro oke ẹhu-eghughu iya wotaru mu.

²Ọ chịfu mu, nwuru mu ye lẹ tsụrikiti ẹkpuroochi,

ẹka iwhoro l’ẹte adụa ilile.

³Nke bụ ezhi-okfu bụ l’ọonoje

ada mu ẹka l’ẹhu ndapyabẹ eswe l’ẹnyashi.

⁴Ogwẹhu mu mẹe akpọ ẹhu mu b’o mewaru l’oose ẹli.

O nokwawho g’o meru ọkpu dụ

mu l’ẹhu, o tsua ngworingwo.

⁵Iwhe o gude yebuta mu bụ iwhe ilu dụ.

Ọ bụru iwhe-ọtsulanu b’o gude

gbawhee mu mgburumgburu.

⁶O wowaru mu dobe lẹ tsụrikiti ẹkpuroochi

g’ọo ndu ono, ọnwu gburu nteke tehawaru ẹnya.

⁷O yebubutawaru mu, nyabẹ mu odogoro,

nke ọwhu bụ lẹ mu ta afụdu gbalaa.

⁸L’ọobuje mu -chia mkpu nta chia

imo, ryaa nta ryaa imo t’ọ gbatarụ mu,

ya aswọ-chia akụ lẹ nchị jịka

lẹ ya ta anụdu ekfukfu, mu l’ekfu anụ iya.

⁹O gudewaa ẹwhuru, a washịru awashị dochia mu ụzo.

O mewaru, ụzo mu dụ-gee kpọkoro kpọkoro.

¹⁰Ọo g’agụ l’akwabẹje bụ g’ọ kwabẹru mu.

Ọ bụru g’oduu-gburu-agụ l’edomije onwiya bụ

g’o domiru onwiya kwabẹru mu.

¹¹O nwufuru mu l’ụzo, mu l’eshije,

je anmabushia mu anụ nwịrinwiri.

O meru, mu daburu nkụnyi.

¹²O kwewaru akfụ iya, ọ bụru

mbẹdua bẹ l’ooge t’ọ tụa ya.

¹³O wotaru akfụ, dụ l’ẹkpa-akfụ iya tụa,

ọ bụru mu l’obu gụrumu.

¹⁴Mu bụwaa onye ndu nkemu

l’anọje anma ụzu nchịchochi.

Mu bụru onye l’aanọje agụru l’egvu, eswe l’ẹnyashi

gude aja mu ewenu.

¹⁵Ọo mgbilu b’o gude nụ-jia mu ẹwho.

Ọ bụru age b’o gude chejia mu ẹwho.

¹⁶O gudewaa ekpekere gwee mu eze ryaaryaa,

bya adzọwaa mu tọli tọli lẹ ntụ.

¹⁷E mewaru mu áwhụ ẹhu-guu.

Mu nyazọwaru iwhe ẹhu-ụtso bụ.

¹⁸Oo ya meru, mu l’ekfu sụ: “Ugvu mu bẹ gvụwaru,

yẹle iwhe mu l’ele ẹnya iya l’ẹka Onye-Nwe-Ọha nọ.”

¹⁹Mu nyatarụ iwhe-ọtsulanu yẹle ririri, mu l’aghawhe,

mbụ mgbilu yẹle age mu l’amị.

²⁰Ọobuje nteke mu nyatarụ iya, ẹhu arụruhu mu.

²¹Ọle iwhe lanụ l’ọobuje mu rịta,

ẹhu alawhu mu azụ l’ọru iya bụ:

²²Lẹ n-yemobu Onye-Nwe-Ọha ta agvụdu agvụ l’ẹhu anyi.

O noo nkele obu-imiko iya te enwedu eberu.

²³N-yemobu Onye-Nwe-Ọha yẹle

obu-imiko iya l’adụje ọwhuu ọwhuu l’ụtsu g’ụtsu ha.

Ị bụ onye gbarụ t’e gude ire ghu ẹka l’ụzo parụ ẹka.

²⁴Iwhe mu l’ekfuje l’ime obu mu

bụ l’ọo Onye-Nwe-Ọha bụ iwhe mu ketaru.

Ọo ya meru g’o gude mu je l’a-nmẹe anmẹe ngabẹru iya.

²⁵Onye-Nwe-Ọha l’anọje emeru

ndu kwabẹru iya nụ iwhe dụ ree,

mbụ ndu ono, l’achọ iya nụ.

²⁶Iwhe dụ ree bụ tẹ madzụ nọdu

nggujingguji ngabẹ tẹ Onye-Nwe-Ọha dzọo ya.

²⁷Ọ dụ ree tẹ madzụ vua iwhe ẹrwa dụ l’okorọbya.

²⁸T’onye ọbu nọdu nggujingguji vuje iya nkụnyi iya,

o noo nkele ọo Onye-Nwe-Ọha boru iye ya.

²⁹T’onye ọbu gẹe ọnu l’alị,

nkele o nweru gẹ l’ọo-dụ, ya awhụ iwhe l’oole ẹnya iya.

³⁰T’o dobe ishi nchị iya t’onye l’echi iya ẹka chita ike iya.

Ya ahaa t’e gude iwhe-iwhere nụ-jia ya ẹwho,

³¹nkele Onye-Nwe-Ọha te jịkadu madzụ jeye lẹ gbururu.

³²Oomeje t’iwhe ọtsu ude bya,

ọle oo-goshikwawho lẹ ya bụ onye obu-imiko.

O noo nkele n-yemobu iya nyịberu anyịbe.

³³Ọ tọo nọjedu atsọ iya ụtso

tẹ ya wokfuta ụnwu eliwhe iwhe-ọtsulanu,

yẹle iwhe ọtsu ude.

³⁴T’ị whụdu ọdzopyashi ndu a

tụru mkpọro lẹ mgboko ishi.

³⁵T’ị whụdu ọnafu madzụ iwhe,

rwuberu iya nụ, l’atatiwhu Ọkalibe-Kangokotaru-Nu.

³⁶T’ị whụdu ọnafu madzụ

iswi-ọdu-mma, rwuberu iya nụ.

Iwhe lile ono g’ọ ha kpamụ bẹ

Onye-Nwe-Ọha l’ẹte achọdua.

³⁷?Ọo onye l’e-kfu okfu, ya eree,

m’ọ bụa lẹ Onye-Nwe-Ọha tụru iwu t’o ree?

³⁸Ọo Ọkalibe-Kangokotaru-Nu

l’a-dụ ike kfua sụ t’iwhe-ọma mee ya eree,

mẹe t’ejo-iwhe mee ya eree.

³⁹?Ọo gụnu meru, madzụ nọ ndzụ l’agụje ngịrima

nteke l’aahụ̀ iya àhụ̀hù iwhe-dụ-ẹji o meru?

⁴⁰T’anyi gbuada ụzo anyi nke, ghachaa ya aghacha.

T’anyi lwakfuta Onye-Nwe-Ọha.

⁴¹T’anyi wolia obu anyi imeli, anyi achiliaru Chileke,

nọ l’imigwe ẹka anyi l’imeli sụ:

⁴²“Anyi meswewaru bya

ekwefuwa ike, tịki gụaru anyi nvụ.

⁴³I gude ẹhu-eghughu whukpua

onwoghu gude chịa anyi ọso.

I gburu anyi, t’i meru anyi obu-imiko.

⁴⁴I gude urwukpu whukpua onwoghu

nke ọwhu l’adụa iwhe anyi kfuru

nụ ghu, dụ ọwhu bya l’e-rwu ghu nchị.

⁴⁵I mewaru, anyi bụru ọdu-ọwhu-ọli l’ẹnya ụnwu-eliwhe,

mbụ l’i mewaru, anyi bụru ndu ụnwu-eliwhe jịkaru ajịka.

⁴⁶Ndu ọhogu anyi gẹ whẹ ha

sawarụ ọnu whalaa ekfubyishi anyi.

⁴⁷Ntsụ-megvu bẹ guderu anyi.

E gvuru anyi nsụ gude gbabẹru anyi ọnya t’anyi daba.

Kpurupyata yẹle ọla-l’iyi dakfutawaa anyi.”

⁴⁸Ẹnya-mini l’anọje agba mu gorogoro l’ẹnya

ẹgube ono, mini l’anọje asọ gborogboro l’ẹnyimu.

O noo nkele ndu nkemu b’a lakọtawaru l’iyi.

⁴⁹Ẹnya-mini ta abyadụ l’asọ-buhu mu l’ẹnya,

t’ọ bya l’akfụshi akfụshi

⁵⁰jeye nteke Onye-Nwe-Ọha

l’e-shi l’imigwe lezhita ẹnya l’alị whụdunu.

⁵¹Iwhe ẹnya mu whụru meru; mu l’atsụ ude.

Ọ bụru iswi ọnodu, ụnwada mkpụkpu mu nọdu.

⁵²Ndu ọhogu mu whẹ l’anọje achị

nta mu g’ọo onye l’achị nta nwẹnu

l’ẹbe ọdu iwhe mu meru whẹ.

⁵³Whẹ nwuru mu ye l’ime iduma tẹ whẹ kpawhua ishi mu.

Whẹ l’atụru mu ẹwhuru ntụpyabe.

⁵⁴Mini tukpuru mu ishi, mu rịa lẹ mu lawarụ maa mu l’iswi.

⁵⁵Mu nọdu l’ọkpurohu iduma ono ryaku ghu

t’ị gbatarụ mu, gụbe Onye-Nwe-Ọha.

⁵⁶Ị nụru iwhe mu kfuru ghu sụ:

“Ba agbakwa mu nkụchi l’aryaku ono,

mu ryakuru ghu t’ị gbatarụ mu.”

⁵⁷I byarụ mu ntse nteke mu ryakuru ghu,

ị sụ tẹ mu ba atsụshi egvu.

⁵⁸Gụbe Onye-Nwe-Ọha, ọ kwa ghu kfuchitaru ọnu mu,

bya agbafụta ndzụ mu.

⁵⁹Gụbe Onye-Nwe-Ọha, ị

whụwarua ejo-iwhe e meru mu;

hanụaru mu enge!

⁶⁰Ị whụwaru ụdu ọvuma, whẹ l’avụru mu,

mẹe ejo idzu, whẹ l’achịru mu.

⁶¹Gụbe Onye-Nwe-Ọha, ị nụwaru-a ụdu ekfubyi,

whẹ gude ọnu ekfubyishi mu,

yẹle ejo idzu, whẹ l’achịru mu,

⁶²mbụ whatawhata ndu ono, l’etso mu okfu l’adzụru mu,

mẹkwawho ejo idzu ono, whẹ

l’anọje achịru mu mbọkumboku.

⁶³Lee l’ọobuje, whẹ -kfụru akfụru mẹ whẹ -nọdu anọdu

whẹ agụ mu l’egvu gude aja mu ewenu.

⁶⁴Jiko Onye-Nwe-Ọha, gwatanụ whẹ ụgwo, gbarụ whẹ nụ,

lẹge iwhe whẹ meru dụ.

⁶⁵Kwechia whẹ obu ekwechi,

gụ atụ whẹ ọnu.

⁶⁶Gude iwe chịa whẹ ọso, gụ alaa whẹ l’iyi

lẹ mkpula imigwe nke Onye-Nwe-Ọha.

Ọnodu Jerúsalẹmu nteke ọ darụ

¹Lewaro gẹ mkpọla-ododo ono, shi egbu zaazaa,

bya agbachishihu.

Lewaro gẹ mkpọla-ododo ono,

rọru arọro bya enwekputa l’ẹnya.

Ẹwhuru ụlo-nsọ dakashịhuwaru nnanụ nnanụ l’echi-ụzo.

²Ụnwu Záyọnu, vugee oke ọnu aswa,

mbụ ndu ono, vu oke ọnu aswa

g’ọo ọkpobe mkpọla-ododo;

b’e mewaru, whẹ dụ g’ọo ite, e gude ụrwa kpụa,

mbụ l’e mewaru whẹ, whẹ yọkposhihu

g’ọo ite bụ ẹka nkịti bẹ onye l’akpụ ite gude kpụa ya.

³Awuru bụ-gee iwhe l’ewota ẹra chebe ụnwu iya.

Ọle ndu nkemu bẹ ejo obu dụ whẹ

nụ dụ g’ọo nke enyi-nwẹnu.

⁴Ẹgu ẹra metawaru ụnwegirima, whẹ hegee l’ẹka

jeye ire nyakụ-geeru whẹ l’akpo.

Ụnwegirima whẹ tsoru aryọ-whe aryọ nri,

ọle ọ tọ dụdu onye l’anụje whẹ iya nụ.

⁵Ndu ono, shi eri g’ẹhu ha whẹ,

bẹ wụshiwaru lẹ mbadụzo aryọkaa aryọ nri.

Ndu ono, e heru l’eli ẹku bẹ l’azẹjewaa l’ikpọzu.

⁶Awhụwhu, ndu nkemu l’ata bẹ ka shii

karụ nke ndu obodo Sódomu,

mbụ Sódomu ono, e gude njị-ẹnya lanụ mebyia,

t’ọ dụ onye gbajeru whẹ nụ.

⁷Ndu ishi whẹ shi egbu whoowhoo karụ eberugo.

Whẹ shi acha ụcha karụ mini-ẹra-eswi.

Ogwẹhu whẹ shi nee zhịrikiti karụ ẹwhuru rubyi.

Whẹ shi eke ẹhu karụ ewhuru, safaya.

⁸Ọle ntaa bẹ whẹ ka unyi ite-ọku oji uji.

Ọ tọ dụdu onye l’ahụbejekwadu whẹ ama l’ụzo.

Akpọ, dụ whẹ l’ẹhu rekuwaru l’ọkpu.

Ọ kpọhuwaru gbengu g’ọo oshi.

⁹Ndu e gburu lẹ mma kakwa

mma amamẹ ndu ẹgu gburu;

mbụ ndu ẹgu gude ogbu-lẹ-nwayọo mee ome-l’iwe

jeye whẹ nwụshihu nkele whẹ ta awhụdu nri, a kọtaru l’alị.

¹⁰Ụnwanyi, nweru obu-imiko

bẹ gudewa ẹka whẹ shia anụ ụnwegirima whẹ eshi.

Ọ bụru iya bụ nri whẹ nteke

ọla-l’iyi byakfutaru ndu nkemu.

¹¹Onye-Nwe-Ọha gude g’oke

ẹhu-eghughu iya habe vụa ọvuma.

Ọ wụshiru ẹhu-eghughu iya ono, l’enwu whuruwhuru.

Ọ tọru ọku chee lẹ Záyọnu,

o kepyashia itso, gude Záyọnu.

¹²Ndu eze, l’achị mgboko te ekwetadu,

ndu mgboko l’owhu te ekweta

lẹ ndu ndụmashi mẹe ndu ọhogu bẹ

l’a-dụ ike bata l’ọnu ẹka

l’eeshigeje abahụ Jerúsalẹmu.

¹³Iwhe kpatarụ ọ nwụa nno

bụ iwhe-dụ-ẹji, ndu nkfuchiru Chileke,

bu l’obodo ono megbaberu.

Ọdo bụ ejo-iwhe, ndu l’agbajẹ ẹja

nụ Chileke l’ime iya megbaberu;

mbụ ndu ono, nọdu l’ime obodo

ono gbua ọchi ndu dụ chịriri.

¹⁴Ntaa bẹ whẹ tsoru mbadụzo

aghawhe ririri g’ọo ndu l’atsọ ishi.

Whẹ gude mmee ọchi, whẹ gburu merwushia onwowhe;

nke owhu bụ lẹ whẹ ta adụdu nke t’ọ dụ onye l’e-byi

ẹka l’uwe, whẹ ye l’ẹhu.

¹⁵Ụnwu eliwhe l’achị whẹ

shashasha asụje:

“Sha-a; unu lụfu! L’unu vu mmerwu!

Sha-a, unu lụfu! Unu lụfu!

Ba adụkwa onye unu l’e-chiru ẹhu!”

Tọ dụ iya bụ, whẹ gbafụ wata anọ aghawhe ririri;

Ndu mba gẹ mba ha l’asụje:

“Whẹ ta abyadụ l’anọdubaa l’ẹka-a ọdo.”

¹⁶Onye-Nwe-Ọha l’onwiya bụ iya

gude ẹka iya chịkashia whẹ.

Ọ tọo byadụ l’a-kpabaa whẹ ishi ọdo.

Ndu l’agbajẹ ẹja nụ Chileke bẹ

ndu madzụ l’ẹte akwabẹhedu ugvu;

t’e meheru ndu bụ ọgurenya ree.

¹⁷Ọwhu kagezhianu bụ l’anyi lewaru ẹnya onye ọgbata,

ike dụ ẹbo gvụ anyi, ọ bụru anyi nke mmaka.

Anyi nọ l’ụlo-nche eche mba, l’ẹte adụa ike dzọta anyi.

¹⁸Ọobuje ẹka anyi dzọru ọkpa,

ụnwu eliwhe awata onyo igbiri ọkpa anyi,

o mee anyi te ejejehe l’echi-ụzo anyi.

Ndzụ anyi l’agvụakwa. A gụwaru

abalị ole, anyi l’a-nọ-beru ọgu;

o noo nkele ndzụ anyi bẹ l’agvụwaa agvụ.

¹⁹Ndu l’achị anyi ọso ka ugo,

l’ewhe l’akpamigwe owhe ewhewhe ọso.

Whẹ chịru anyi ọso l’ugvu ugvu,

whẹ geparu l’echi-ẹgu kwabẹru anyi.

²⁰Onye ono Onye-Nwe-Ọha wụru mmanụ l’ishi,

bụ iya bụ onye nọdu ọnodu ume anyi l’atụ

bẹ nwulahuru l’iduma, whẹ tụru,

mbụ onye ono, anyi rịru l’anyi l’a-nọ lẹ mkpula iya

nweru ndzụ lẹ mba gẹ mba ha.

²¹T’ẹhu tsọje ghu ụtso, gụ etee ẹswa gụbe ada Edọmu,

mbụ gụbe onye ono, bu l’alị Uzu.

Ọle omogo iwhe-ọtsulanu nke ghu l’abyaakwaa.

Ịi-ngụ mmẹe dụ iya nụ, ya atsụ ghu atsụtsu;

gụ agbabẹ onwoghu ọto.

²²Gụbe ada Záyọnu, awhụwhu,

l’ịita l’iswi ejo-iwhe ono, i meru bẹ gvụwaru nụ.

Ọ tọo hahẹdu ghu t’ị nọo ọdu l’alị ọdo.

Ọle gụbe ada Edọmu bẹ l’ọo-nụ

áwhụ ejo-iwhe ono, l’iimegbabe.

Iwhe-dụ-ẹji ono, l’iime bẹ l’oome t’ọ gbafụta iwhe.

Ndu Jerúsalẹmu l’ekfu anụ Chileke t’o meeru whẹ obu-imiko

¹Jiko Onye-Nwe-Ọha, nyatanụ eje ndakfu dakfutaru anyi.

Lenua ẹnya whụ iwhe-iwhere, anyi l’eje.

²Alị anyi bẹ lakọtawaru ndu lwarụ alwa l’ẹka.

Ibe anyi lakọtawaa ndu ọha ọdo l’ẹka.

³Anyi bụwaa ndu a tọru mgbe, bụru ndu l’ẹte enwee nna.

Ne anyi whẹ bẹ dụwaa g’ọo ụnwu-mbunu.

⁴Mini anyi l’angụ angụ bẹ anyi l’azụje azụ.

Nkụ anyi gude eshi nri bẹ anyi l’akfụje ụgwo iya.

⁵Ndu l’achị nta anyi bẹ tẹwaru anyi l’ụkfu.

Ike gvụwaru anyi, whẹ ta anụkwanu anyi nhafụ ẹka.

⁶Anyi chiliwaru ndu Íjiputu yẹle ndu Asiriya ẹka

nnta gẹ l’ee-shi t’anyi whụa nri, l’e-dzuru anyi.

⁷Nna anyi whẹ bẹ meru iwhe-dụ-ẹji nwụshihu.

Ntaa bụ anyịbedua l’evu ọnwu iwhe whẹ meru.

⁸Ndu bụ ohu bụ whẹ l’achị anyi.

Tọ dụ onye l’a-nafụta anyi l’ẹka whẹ

nggẹ anyi nweru onwanyị.

⁹Anyi l’alọje ishi anyi alọ tẹmenu anyi awhụ nri, anyi l’e-ri,

nkele mgbugbu madzụ bẹ parụ ẹka l’echi-ẹgu.

¹⁰Akpọ ẹhu anyi l’evo chichichi g’ọo ovokọku.

Iwhe kparụ iya nụ bụ ejo mkpẹgu.

¹¹Ụnwanyi b’e gudeshiru

l’ọkpehu jekfu whẹ azẹe lẹ Záyọnu,

gudeshikwaawho ụnwumgboko

l’ọkpehu jekfu whẹ azẹe l’ime obodo, dụ-gee lẹ Juda.

¹²Ndu ọhogu anyi bẹ gude ẹka

whẹ swị-gbushia ndu ishi anyi.

Whẹ te eyeru ndu bụ ọgurenya anyi whẹ ẹso.

¹³Unwokoro bẹ whẹ gudeshiru

l’ọkpehu tẹ whẹ gweje iwhe l’ẹwhuru ogwe iwhe.

Ụnwegirima unwoke l’ada bẹbeji l’ivu nkụ e boru whẹ.

¹⁴Ndu bụ ọgurenya ta anọjehedu

ndzuko l’ọnu-abata mkpụkpu.

Ụnwu okorọbya ta agụjehe egvu, whẹ shi anọje agụ.

¹⁵Ẹhu-ụtso ta adụhedu l’obu anyi.

Ote egvu anyi ghọwaru nggụmawhu.

¹⁶Okpu-eze shiwa anyi l’ishi dafụ.

Nshọ anyi nkele anyi mewaru iwhe-dụ-ẹji!

¹⁷Ọo iwhe ono kparụ g’o gude meji tọfu anyi.

Ọ bụru iya kparụ, ẹnya kochigee anyi ekochi.

¹⁸Nkele ugvu Záyọnu bẹ dachihuru adachihu

awuru l’akfụ-whekaa ya.

¹⁹Ọo gụbe Onye-Nwe-Ọha l’achị,

ọ bụru ghu l’a-nọ achị jeye lẹ gbururu.

Oshi-eze ghu l’adụje g’ọ dụ shi l’ọgbo rwua l’ọgbo.

²⁰?Ọo gụnu meru l’ịinyazoje anyi ntekenteke?

?Ọo gụnu meru, ị parụ anyi haa nọo ọdu?

²¹Wowhutanu anyi azụ l’ẹka ị nọ, jiko Onye-Nwe-Ọha,

ndụge anyi lwakfuta ghu ọdo.

Menua t’ọnodu anyi dụ ọwhuu

ọwhuu, ẹgube ọ dụhawa lẹ mbụ.

²²?Tọo woo l’ị swawaru ẹka ghu

swaa ọkpa ghu tukobe anyi tọo?

?Tọo l’ẹhu l’eghunuka ghu eghu l’ẹka anyi nọ?