Jona

Ẹkwo

JONA

Onye Nkfuchiru Chileke

Jona l’agbarụ Onye-Nwe-Ọha ọso

¹O noo ya, Onye-Nwe-Ọha bya ekfuru okfu yeru Jona nwa Amịtayi sụ iya: ²“Gbalihu jeshia eze mkpụkpu Nínive je ekfuru okfu mabẹru whẹ, nkele ejo-ememe whẹ l’emegbabe bẹ rwuwaru ẹka mu nọ.”

³Ọle Jona gbalihuru vụa ọkpa iya mini ọ bụru iya ọla mkpụkpu Tashishi l’ẹka l’ọogbaru Onye-Nwe-Ọha ọso. O jeshia ọnu-ẹnyimu mkpụkpu Jọpa, ọ whụa ụgbo-mini l’ala Tashishi. Ọ tụa ntụ ụgbo bahụ t’iya tsoru whẹ jeshia mkpụkpu ono, l’ẹka l’ọogbaru Onye-Nwe-Ọha ọso.

⁴O noo ya bụ lẹ Onye-Nwe-Ọha abya eyefu uburu-aga o je aghaa l’eze-ẹnyimu ono. Oke akpara-mini wata atụtu, nke ọwhu bụ l’ụgbo ono whuduru iwhe ha nwanshị t’ọ zụkashihu. ⁵Egvu gudeshia ndu nọ l’ụgbo ono. Whẹ wata ochi oroko ekushi ọgvu whẹ l’ẹhu l’ẹhu. Whẹ l’apashi ivu dụ l’ụgbo ono eche lẹ mini nke ọwhu ụgbo ono l’akaba ọgu n-whe.

Nteke ono bẹ Jona nọroo l’alị alị ụgbo ono zẹe azẹe ekupyashiru onwiya mgbẹnya. ⁶Onye ishi ụgbo ono bya ejeta rwua ẹka ọ nọ sụ iya: “?Ọo nwụru ghu agha gụbe edzu-mgbẹnya-a. Gbalihu agbalihu, kpokua ọgvu ghu. O nweru ro gẹ l’ọo-dụ ọgvu ọbu awhụaru anyi imiko, mee t’anyi ba anwụshihu?”

⁷Ndu nọ l’ụgbo ono bya ekfuru yeru onwowhe sụ: “Unu t’anyi tụada ido marụ onye ejo-iwhe-e shi l’ẹka iya byakfuta anyi.” Whẹ bya atụa ido ọbu, ọ nma Jona.

⁸Tọ dụ iya bụ, whẹ sụ iya: “Karụ anyi onye ejo-iwhe-e shi l’ẹka iya byakfuta anyi. ?Ọo gụnu bụ ẹka-ọrwu ghu? ?I shi awe? ?Ị bụ onye alị awe? ?Ọo awe b’a nwụru ghu?”

⁹Ọ sụ whẹ: “Mu bụkwa onye Híburu, onye ya l’abarụ ẹja bụ Onye-Nwe-Ọha, bụ Chileke nke imigwe, onye ono, bụ iya meru eze-ẹnyimu mee eli-mgboko.” ¹⁰Jona bẹ kọhawaru ndu ono gẹ l’ọonwuru iya, whẹ shi nno marụ l’ọo ọso bẹ l’ọogbaru Onye-Nwe-Ọha.

Egvu bya egudeshia ndu ono ike, whẹ sụ iya: “?Ọo gụnu bẹ i mekwanuru nno?”

¹¹Akpara-mini, eze-ẹnyimu ono l’atụ l’akabaa njọ aka eje eje. Whẹ bya ajịa ya sụ: “?Ọo gụnu bẹ anyi l’e-me ghu tẹ eze-ẹnyimu-a dajia?”

¹²Ọ sụ whẹ: “Unu palia mu imeli tụba l’ime mini, ọo ya bụ, eze-ẹnyimu ono adajia. O doru mu ẹnya l’ọo mu bẹ kpatarụ iwhe oke akpara-mini-a watarụ atụtu.”

¹³Ndu nọ l’ụgbo ono mekota ikike ọkpehu whẹ tẹ whẹ ngazhia ụgbo ono t’o je akfụru l’ogbigbo ẹnyimu, ọ kpọo whẹ ẹka ememe. O noo nkele akpara, eze-ẹnyimu ono l’atụ kabaa njọ eje eje. ¹⁴Tọ dụ iya bụ, whẹ chikulahaa Onye-Nwe-Ọha lẹ mkpu ẹkwa asụje: “Jiko Onye-Nwe-Ọha, be ekwekwa t’anyi nwụhu mẹ anyi wofu ndzụ nwoke-e. Be ekwekwa tẹ ọchi onye l’adụa iwhe o meru tukoru anyi l’ishi nkele ọ kwa g’ọ dụ ghu ree bẹ gụbe Onye-Nwe-Ọha meru iya.” ¹⁵Whẹ bya anmalia Jona tụba lẹ mini ono voo, eze-ẹnyimu ono bụru shọngu lẹ gbukungu gbukungu ono, o shi atụ. ¹⁶Nteke ono, egvu Onye-Nwe-Ọha wata ọtsu ndu nọ l’ụgbo ono shii. Whẹ gworu ngwo-ẹja nụ Onye-Nwe-Ọha bya eribuaru iya nte lẹ whẹ l’a-bụru nkiya.

¹⁷Onye-Nwe-Ọha bya ewofuta owhomu-ka-azụ t’o lwee Jona. Jona nọo ujiku ẹto eswe l’ẹnyashi l’ime ẹwho ẹma ono.

Jona l’ekfu anụ Onye-Nwe-Ọha l’ime ẹwho ẹma

¹Jona nọdu l’ime ẹwho ẹma ono kfulahaa nụ Onye-Nwe-Ọha, bụ Chileke iya ²sụ:

“Nteke mu l’eje iwhe-ọtsulanu

bẹ mu ryakuru Onye-Nwe-Ọha,

ọ zaa mu.

Mu nọdu l’ime wurukutu ọhu

alị-maa chishia mkpu, i nụa olu mu.

³Ị patarụ mu tụba l’ime iswina

mbụ l’ime ime eze-ẹnyimu;

mini rikputa mu.

Akpara-mini yẹle ọchi gborogboro nkeghu wụa mu l’eli.

⁴Mu kfua sụ: ‘A chịfuwaru mu l’atatiwhu ghu.

Ọle ẹnya mu l’a-dụlekwaa l’eze-ụlo ghu ono dụ nsọ ọdo.’

⁵Mini wọru mu l’olu chịi.

Iswina l’eri mu eri.

Ẹbakala mini kwechia mu ishi ekwechi.

⁶Ẹka mu nwulahuru bụ l’ime ime alị ugvu

mbụ lẹ mu nwulahuru l’ime alị,

alị ono tụa mu mkpọro mgbe agvụ agvụ.

Ọle ị gụfutaleru mu-a l’ime iduma ono tẹ mu nọdu ndzụ

gụbe Onye-Nwe-Ọha, bụ Chileke mu.

⁷Nteke mmeji shi atọfu mu atọfu

bẹ mu nyatarụ Onye-Nwe-Ọha.

Ekfukfu, mu kfuru nụ ghu

rwulekwa ghu whọ lẹ nchị l’ime eze-ụlo ghu ono, dụ nsọ.

⁸Ndu bụ agwa, l’adụa iwhe ọ bụ bẹ whẹ l’agwa

bẹ eze-iwhe-ọma, Chileke gege

emeru whẹ te erwujekwa ẹka.

⁹Ọle mbẹdua l’e-gude olu egvu-ekele agwa ghu.

Iwhe mu riburu lẹ nte nke ememe bẹ mu l’e-medzukota.

Ndzọta bụ Onye-Nwe-Ọha b’o dụ l’ẹka!”

¹⁰O noo ya, Onye-Nwe-Ọha bya ekfuru okfu yeru ẹma ono, o je anwafụ Jona l’eli mgboko.

Jona l’ekfu okfu Onye-Nwe-Ọha l’obodo Nínive

¹Tọ dụ iya bụ, Onye-Nwe-Ọha bya ekfuru okfu yeru Jona nke ugbo labọ sụ iya: ²“Gbalihu jeshia oke obodo ono, bụ Nínive je aryakashịaru whẹ ozhi ono mu zhiru ghu.”

³Jona palihu ọ bụru iya oje obodo Nínive ono ẹgube ono Onye-Nwe-Ọha kfuru iye ya. Nínive bụ mebyi oke obodo parụ ẹka. Eejeje iya ije abalị ẹto tẹmenu a ghabua ya l’uswe. ⁴Jona bya abahụ l’ime obodo ono wata ije mbọku nke mbụ, aryajẹ sụ: “Iwhe o wuduru ntaa bụ ụkporo abalị ugbo labọ, Nínive eyifu.” ⁵Ndu Nínive bya ekweta nke Chileke. Whẹ kụa iwhe t’a swịa ẹgu ryaku Chileke, yee uwe áwhụ wata l’onye ukfu jeye l’onye nta.

⁶Nteke ozhi rwuru eze ndu Nínive lẹ nchị, o gbalihu l’oshi-eze iya, yefu uwe mkpẹelanu iya bya achịta uwe áwhụ yee je agwọru lẹ ntụ. ⁷Ọ bya ezhia a kụa ya akụku lẹ Nínive gbaa mgburumgburu sụ:

“Ọ waa bụ iwu eze yẹle ndu a marụ ẹwha whẹ tụru:

“Tẹ madzụ igbalekọma mẹe anụ-ẹgbudu mẹe élwù be ewotakwa iwhe e kuru nri kpa l’ọnu, whẹ ta angụ mini. ⁸Tẹ madzụ mẹe anụ-ẹgbudu chịta uwe áwhụ yeru. Whẹ aryashịa ẹkwa ike ryaku Chileke, onyenọnu esefu ẹka l’ome ejo-iwhe yẹle ome iwhe-kpanganga. ⁹?Oo onye marụ mẹ Chileke l’e-jizeta wofuru anyi oke ẹhu-eghughu iya nke ọwhu anyi l’ẹte anwụshihu?”

¹⁰Chileke whụlewho iwhe whẹ meru, mbụ gẹ whẹ sefuru ẹka l’ome ejo-iwhe, o jizeta parụ ejo-iwhe ono, o shi sụ l’iya l’e-me whẹ haa t’o mehe whẹ iya.

Ẹhu l’eghu Jona eghu

¹Ọle Jona bẹ yẹbe iwhe dụ-zhiawho ejo ẹji, iwe bya iya l’ẹhu. ²O kfulahaa nụ Onye-Nwe-Ọha sụ iya: “Gụbe Onye-Nwe-Ọha, ?tọ bụdu iwhe ọbu mu kfuru nteke ono, mu nọ l’ibe anyi ndọwa? Ọ kwa iya kpatarụ iwhe mu mekeberu ẹgwegwa gbarụ lashia mkpụkpu Tashishi. Nkele mu mahawarụ l’ị bụ Chileke l’emenuka eze-iwhe-ọma, ị bụru onye l’awhụnuka imiko; tẹmenu ẹhu te eghukebeje ghu eghu, n-yemobu ghu nyịbe anyịbe, ị bụru onye l’ejizetaje obu haa ome madzụ ejo-iwhe, i gege eme iya. ³Eshi ọ dụ nno kwa iya bụ tẹ gụbe Onye-Nwe-Ọha wota ndzụ mu ntaa, nkele ọ kakwarụ mu mma lẹ mu nwụhuru anwụhu karụ lẹ mu nọdu ndzụ.”

⁴Onye-Nwe-Ọha bya asụ iya: “?Ọo gbarụ nke t’ẹhu l’eghu ghu eghu?”

⁵Tọ dụ iya bụ, Jona swịkfuruhu lụfu l’obodo ono je akpogoru l’ẹka ọbu, dụ l’ụzo ẹnyanwu-awata obodo ono. Ọ tụaru onwiya mkpuumkpu l’ẹka ono je anọdu lẹ mkpula iya t’iya leberu iwhe l’e-bekochaa nwụaru obodo ono.

⁶Onye-Nwe-Ọha, bụ Chileke bya adzabẹ nwooshi ụgba-nshi l’eli mkpuumkpu ono Jona nọdu; o futa bakashịhu, bya emee t’aguguru dụ l’ẹka ono, nke ọwhu Jona l’ẹte anọhe agha gbụrugburu. Oshi ụgba-nshi ono mee ẹhu tsọo Jona pyoo. ⁷Ọle a fụtaru l’ụtsu echile iya, Chileke yee nwa-ẹhu o je atanwụa oshi ụgba-nshi ono, ọ nwụa lwaa. ⁸Anwụ chitalewho, Chileke bya eyefu o-kpo wharawhara nke whẹrewhere, shi l’ụzo ẹnyanwu-awata, anwụ keru Jona l’ishi echi gbaagbaa nke ọwhu bụ l’ume l’ebuhu iya ebuhu. Ọ dụ-gezhia ya nke t’iya nwụhu anwụhu. Ọ sụ: “Ọ kakwarụ mu mma lẹ mu nwụhuru anwụhu karụ lẹ mu nọdu ndzụ.”

⁹Onye-Nwe-Ọha bya asụ Jona: “?Ọo gbarụ nke t’ẹhu l’eghu ghu eghu l’ẹka oshi ụgba-nshi ono nọ?”

Jona sụ iya: “Ee, ọ gbarụ nke t’ẹhu l’eghu mu eghu, mbụ l’ẹhu l’eghukwa mu damụdamu nke anwụhu.”

¹⁰Onye-Nwe-Ọha sụ iya: “?Ọ wabụkwaa gẹ nke oshi ụgba-nshi ọbu rwuberu ghu l’ẹhu l’ẹbe ọbu ghu dzarụ iya, t’ọ bụ ghu meru iya o vuta? Oshi ono bẹ chi bya l’asahụ-deshiwaa o futawa, chi ọdo bya l’asahụ-deshiwaa ọ nwụwa lwaa. ¹¹?Iwhe l’iikfunu bụ, t’okfu ẹhu oke obodo ono bụ Nínive be erwushi mu l’ẹhu, mbụ ẹka ono, ndu bu iya nụ ka ụkporo ụnu madzụ ugbo iri l’ise yẹle ikpoto élwù, whẹ nweru, whẹ ta ama onwowhe ẹka-ụtara, whẹ ta ama onwowhe ẹka-ịcha?”