Ẹkwo
JOWELU
Onye Nkfuchiru Chileke
11Ọ waa bụ okfu Onye-Nwe-Ọha kfuru yeru Jowelu nwa Petuwẹlu.
Igube byarụ ọgu
2Unu nụkwa iwhe-e, unubẹ ndu bụ ọgurenya.
Unu ngabẹkwa nchị, unubẹ ndu bu l’alị-a l’owhu.
Ụdu iwhe ọwa, ?o mejebuwaru l’oge nke unu?
?T’o mejehawaru l’oge nke nna unu oche whẹ?
3Unu kọkwaaru iya ụnwu unu.
T’ụnwu unu kọoru iya ụnwu nke whẹbedua.
Ụnwu nkewhe akọoru iya ọgbo
ọwhu l’eje abya l’ụzo iwhu.
4L’iwhe igube, l’etsu dududu tawhodoru
bẹ oke igube zebataru bya ataa.
Ọwhu oke igube tawhodoru
bẹ ụnwu ọgbolanu igube zebataru bya ataa.
Ọwhu ụnwu ọgbolanu igube tawhodoru
bẹ mkpakparatsụ zebataru bya ataa.
5Unu tehu nwụru ẹnya, unubẹ
ndu angụruma ono. Unu wata ọrya ẹkwa.
Unu chia mkpu, unubẹ ndu ono
l’angụtaje mmẹe mehu eswe, nkele mmẹe ọ̀whúú,
unu gege angụ b’a nyịswotawaru unu l’ọnu.
6O nweru mba, zebataru bya ọgu l’alị mu-a.
Ndu ono bẹ ọkpehu dụ shii, whẹ bụru a gụta agụta.
Eze, dụ whẹ l’ọnu bẹ bụ eze oduu-gburu-agụ.
Ẹpyi, dụ whẹ l’ọnu bụru ẹpyi ne oduu-gburu-agụ.
7Whẹ tapyashị-gewaru vayịnu mu
bya akakwoshiwa figu mu wụshi.
Ụgbo iya bẹ whẹ swashị-gewaru tuwha,
mekota ẹkali iya l’ọocha kpalakpala.
8Unu gụa áwhụ g’ọo
nwamgbọko, yeru uwe-mkpe
agụ áwhụ ji iya, ọnwu gburu,
mbụ ji lụru iya lẹ nwamgbọko.
9Ngwo-ẹja nri yẹle ngwo-ẹja mmẹe
bẹ l’eete ewotajehedu gude bya l’ụlo Onye-Nwe-Ọha.
Ndu l’agbajẹ ẹja nụ Chileke nọ lẹ ntsọmawhu
mbụ ndu ono, l’ejeru Onye-Nwe-Ọha ozhi.
10Okfu, a kọru akọko bẹ lakọtawaru l’iyi.
Alị l’agụkawaa áwhụ nkele
akpụru iwhe a kụru iya bẹ mebyishihuru nụ.
Mmẹe ọ̀whúú bẹ l’ẹte adzọtajehedu; t’a pyịtajehe mmanụ ólivu.
11T’ọnu kpọkwa unu okfu, unubẹ ndu l’akọ okfu.
Unu ryakwa ẹkwa, unubẹ ndu l’akọ vayịnu.
Unu gụa áwhụ witi unu yẹle balị unu,
nkele iwhe e meberu l’alị bẹ yifukotawaru nụ.
12Vayịnu bẹ kpọnwushihuwaru nụ.
Oshi figu nwụkotawaa lwaa.
Oshi itorokuma yẹle nkfụ, mẹe ụdara,
mẹe oshi, dụkota l’ẹgu bẹ kpọkotawaru nkụ.
O noo ya, iwhe l’emeje madzụ
ẹhu-ụtso bẹ shiwa nno lakọta swịikpamu.
Eeku oku nzhimanụ ọlwa azụ
13Unu yee uwe áwhụ wata ọgu
áwhụ, unubẹ ndu l’agbajẹ ẹja nụ Chileke.
Unu kpọo mkpu, unubẹ ndu ono l’eje ozhi l’ẹnya-mgbẹja.
Unubẹ ndu ono, l’ejeru Chileke mu ozhi,
unu bya eyee uwe áwhụ nwụa ẹnya abalị,
nkele ngwo-ẹja-nri yẹle ngwo-ẹja-mmẹe
bẹ l’ete egudejehedu abya l’ụlo Chileke unu.
14Unu ryaa ya aryarya t’a swịaru Chileke ẹgu.
Unu atụa ndzuko dụ nsọ.
Unu kpakodzua ndu bụ ọgurenya
mẹe iwhe bụ ndu bu l’alị-a l’owhu
tẹ whẹ dzukobe l’ụlo Onye-Nwe-Ọha, bụ Chileke unu,
ryaarụ Onye-Nwe-Ọha ẹkwa.
15Ha-e! Gẹ mbọku ono l’a-dụbukwaa.
O noo nkele mbọku nke Onye-Nwe-Ọha dụakwa ntse.
Ọo-bụ mbọku Ọkalibe-kakọta-ike
l’a-tụko iwhe lile mebyishikota.
16Tọ gbadụ anyi l’iwhu nteke nri bataberu l’ụlo Chileke?
Tẹ t’ọ gbadụ anyi l’iwhu nteke
ẹhu-ụtso yẹle ote ẹswa gvụru l’ụlo Chileke anyi?
17Mebyi iwhe a kụru l’alị bẹ l’anọduje l’ime alị laa ẹhu.
Ụlo, l’aakwakọbe nri bẹ dabukotaru iwhoro.
Ọba nọnu dakashịhu adakashịhu,
nkele iwhe e meberu l’alị bẹ mebyishihuru l’ẹgu.
18Unu leenu gẹ eswi l’aryakaa muu muu.
Élwù l’arya nmaa nmaa, nkele whẹ te enwedu nri whẹ l’a-ta,
je akpaa l’ụnwu atụru bẹ iwhe-ọtsulanu ọbu rwubegeeru.
19Ọ kwa gụbe Onye-Nwe-Ọha bẹ mu l’akpoku,
nkele ọku dzụkotawaru ẹka élwù l’atajẹ nri l’echi-ẹgu;
iwhe bụ oshi, dụ l’ẹgbudu nwukotawa ọku.
20Anụ-ẹgbudu l’atụkakwaa hẹe hẹe aryaku ghu,
nkele ọnu-iyi g’ọnu-iyi ha bẹ tashịhuwaru,
ọku dzụkotawaa ẹka élwù l’atajẹ nri l’echi-ẹgu.
2Igube, l’etsu dududu
1Unu gbua opu-ọgu l’ugvu Záyọnu.
Unu echia mkpu-ọgu l’ugvu mu ono, dụ nsọ.
T’iwhe bụ ndu bu l’alị-a nmakwaa kwekwekwe,
o noo nkele mbọku nke Onye-Nwe-Ọha l’abyaakwa,
mbụ l’o rwuakwaru erwurwu.
2Mbọku ono l’a-gbakọta ẹkpuroochi,
igweli ekpukota ekpukpu.
Mbọku ono bẹ urwukpu l’a-sọ-kputa ẹka lile,
ẹka lile agbakọta tsụrikiti.
Ikpoto ndu ojọgu, ike dụ l’awụ gidigidi eje abya
g’ọo ẹka ọochi ishi-ẹnyangge l’asọkputa eli ugvu.
Ụdu iya ono ta adụjekwa eshi nteke ndu-ichee
tọ bya l’a-dụba l’ọgbo ọwhu l’eje abya l’atatiwhu.
3Ọku nọ whẹ l’ụzo iwhu adzụpyashi iwhe ọ whụru.
Ọku nọdu whẹ l’ụzo azụ ere whuruwhuru.
L’ụzo atatiwhu whẹ bẹ alị ono
dụlewho g’ọo mgbabu Idẹnu.
Ẹka whẹ gharụ azụ bụru echi-ẹgu, daburu iwhoro.
Tọ dụ iwhe l’anahụje whẹ anahụ.
4Whẹ gbarụ ụgbugba ịnya,
ọ bụru g’ịnya-ọgu l’awụje gelee gelee bụ gẹ whẹ l’awụkaa.
5Ọo gẹ igidi ụgbo-ịnya l’ahajẹ bụ gẹ igidi, whẹ l’ede ha
l’ẹka whẹ l’akfụ kidimu kidimu l’eli ugvu.
Ụkporo whẹ dụlewho g’ọo ẹka ọku
l’ata wọwowo etsu ikpuruma ọkponku.
Whẹ dụ g’ọo ndu ojọgu nweru
ọkpehu, mbụ lẹ whẹ kwakọberu nke ọgu.
6Ndu mba gẹ mba ha, whụru whẹ nụ l’erwuhugeje erwuhu.
Iwhe bụ onye whẹ kpọru iwhu l’edobeje iwhu njọ njọ.
7Whẹ l’eshigabeje eshigabe alwụ
ọgu g’ọo ndu ojọgu, ike dụ.
Whẹ l’enyije mgbodo g’ọo ndu ojọgu.
Gẹ whẹ ha l’akpọje onwowhe giriri adzọ gwamụ gwamụ.
Ọ tọ dụdu onye ọwhu l’ahajẹ ẹka
iya nke iya, kfụba l’ẹka iya ọdo.
8Whẹ ta akpajẹdu ibe whẹ hụbahuba.
Onyenọnu l’akfụbeje nhamụnha adzọ kwamụ kwamụ.
Whẹ l’akfụje jaajaa kfụda l’iwhu ọgu,
whẹ ta anọnyajee kpọlahaa l’azụ l’azụ.
9Whẹ l’ezehuje zebata lẹ mkpụkpu,
tụko mgbodo kfụghashia,
nyia enyinyi nyiba l’ime ụlo nọnu.
Ọ bụru gẹ ndu oshi l’etsufuje ụlo
bahụ bụ gẹ whẹ l’eshigejee lẹ windo abahụ.
10Mgboko l’owhu l’anmakọtaje jijiji l’iwhu whẹ.
Igweli l’anmakọtaje yikayika.
Ẹnyanwu yẹle ọnwa l’agbakọta ẹkpuroochi.
Kpokponde te ekehe papapa.
11Onye-Nwe-Ọha nọ l’iwhu ndu
ojọgu iya ede kiriri ekfu iwhe l’e-me nụ.
Ndu ojọgu iya bụ l’ọgu.
Ndu l’emeje iwhe ọ sụru t’e mee bụru agụta l’ọgu.
Mbọku nke Onye-Nwe-Ọha bụkwa
oke ụboku, bya adụ oke egvu.
?Oo onye l’a-dụkwanu ike takeru whụ ishi iya?
Lajaa obu haa uwe
12Onye-Nwe-Ọha bẹ l’ekfu sụ:
“Ntaa bụkwaa ẹgwa, unu gudero
obu unu g’ọ ha lwakfuta mu.
Unu gude ọswi ẹgu, mẹe ọrya ẹkwa mẹe ọgu áwhụ lwa.”
13Unu lajaa obu unu, haa ọlaja uwe unu.
Unu lwakfuta Onye-Nwe-Ọha bụ Chileke unu
nke l’oomeje eze-iwhe-ọma, l’ọowhuje imiko.
Ẹhu te eghujedu iya eghu ẹgwegwa,
n-yemobu iya nyịbe anyịbe.
O too bujedu farara wokfutakebe madzụ iwhe-ọtsulanu.
14?Onye marụ mẹ l’ọo-ghakọbe,
obu ejizeta iya l’ẹka unu nọ, ya agọoru unu ọnu-ọma
nke ọwhu unu l’e-shi l’iya nụ Onye-Nwe-Ọha,
bụ Chileke unu ngwo-ẹja-nri mẹe ngwo-ẹja-mmẹe.
15Unu gbua opyi-ọku lẹ Záyọnu.
Unu ryaa ya aryarya t’a swịaru Chileke ẹgu.
Unu tụa ndzuko dụ nsọ.
16Unu kpakodzua ndu Ízurẹlu l’ẹka lanụ.
Unu emee tẹ edzudzu-ọha ono dụ nsọ.
Unu kukoo ndu bụ ọgurenya.
Unu akpakodzua ụnwegirima mẹe ndu ọwhu l’angụkwadu ẹra.
T’onye lụru nwanyị nke ọ̀whúú
hakwaa ime mkpu iya fụta.
Nwanyị, a lụru nke ọ̀whúú ahaa ime ụlo iya fụta.
17Tẹ ndu l’agbajẹ ẹja nụ Chileke,
bụ ndu l’ejeru Onye-Nwe-Ọha ozhi
nọdu lẹ mgbaku nwụlo l’eeshije
abahụ l’eze-ụlo Onye-Nwe-Ọha
yẹle ẹnya-mgbẹja ryaa ẹkwa sụ:
“Byiko Onye-Nwe-Ọha, whụnuaru ndibe ghu imiko.
Be ekwekwa tẹ ndu ono,
bụ oke-iwhe ghu bụru ndu, l’ee-gude eme iwhe ọchi.
Tẹ whẹ ba abụkwa iwhe ndu ọha
ọdo l’e-gude atụ whukuku.
?Ndẹnu g’o gude e je l’anọ ekfuru ndu Ízurẹlu asụje:
‘?Ọo awe bẹ Chileke unu nọ?’ ”
Ọnu, Onye-Nwe-Ọha l’e-ye
18O noo nteke Onye-Nwe-Ọha
palihuru kolahaa okoowhoo alị ono, bụ nkiya,
bya awhụru ndibe iya imiko.
19Onye-Nwe-Ọha bya eyeru ndibe iya ọnu sụ:
“Mu byakwa l’anụ unu witi,
nụ unu mmẹe ọ̀whúú, nụ unu mmanụ ólivu.
Mu l’a-nụ iya unu nke ọwhu l’oo-ji unu ẹwho.
Ndu ọha ọdo ta abyadụ l’e-gudebaa unu eme iwhe ọchi ọdo.
20Ọhogu ono, shi ụzo isheli
byakfuta unu ọgu bẹ mu l’a-chị-whuru unu achị-whu
Mu l’a-chịru whẹ je eye l’alị ụchi, l’adụa iwhe l’eemetaje iya.
Ọgbo ivurụzo ọgu whẹ bẹ mu
l’a-chịru ye l’eze-ẹnyimu ụzo ẹnyanwu-awata.
Mu achịru ndu ikpazụ ọgu whẹ ye
l’eze-ẹnyimu ụzo ẹnyanwu-arịba.
Okpo ẹwo mẹe nshishi odzu whẹ
l’a-tụko ẹka lile chia kpụukpuu.”
Iwhe doru ẹnya bụ lẹ
Onye-Nwe-Ọha mewaru iwhe parụ ẹka.
21T’egvu ba atsụshi gụbe alị Ízurẹlu.
T’ẹhu tsọ-chia ghu ụtso, gụ ete ẹswa.
Nkele iwhe doru ẹnya bụ lẹ Onye-Nwe-Ọha
mewaru iwhe parụ ẹka.
22Unu ba atsụshi egvu, unubẹ anụ, bu l’ẹgbudu,
nkele ẹka unu l’atajẹ nri l’echi-ẹgu l’abyawaa ọgbashi irwu.
Oshi l’abyawaa ọmi mebyi.
Figu yẹle vayịnu l’abyawaa ọmi mebyi jọkfu-jọkfu.
23T’ẹhu tsọje unu ụtso, unubẹ ndu Záyọnu.
Unu tee ẹswa l’iwhe Onye-Nwe-Ọha,
bụ Chileke unu meru unu
nkele o mewaru tẹ mini ishi-awha chịaru unu lẹ g’ọ gbarụ.
Ọochiwaru unu mini achịshi iya ike.
Ọochiru unu mini ishi-awha,
achịru unu mini ngvụcha-awha
g’o shi achịhawaru iya unu.
24Ẹka l’eechije witi bẹ witi l’e-ji ejiji.
Nsụ, l’aadzọje mmẹe, pyịa mmanụ,
eji pyịmu lẹ mmẹe ọ̀whúú yẹle mmanụ ólivu.
25“Mụbe Onye-Nwe-Ọha l’a-kfụ
unu ụgwo awha olemole ono,
igube tapyashịru iwhe unu.
Mu l’a-kfụ unu ụgwo iwhe unu ono, o mebyishiru
mbụ oke igube mẹe ụnwu ọgbolanu igube
mẹe mkpakparatsụ mẹe otsu-dududu igube,
bụ iya bụ ojọgu ono ike dụ,
mu yeru whẹ byakfuta unu ọgu.
26Iwhe unu l’a-nọ eri eriji ẹwho
bẹ unu l’e-nweru nke etsutsu iya;
Unu egude ọnu unu jalahaa Onye-Nwe-Ọha
bụ Chileke unu ajaja,
mbụ onye ono, meru unu iwhe dụ biribiri.
Sụ-a, ndibe mu bẹ l’ẹte abyakwaa
l’emebaa iwhe-iwhere ọdo.
27O noo nteke unu l’a-marụ lẹ mu nọ-ọ lẹ Ízurẹlu,
unu amarụ l’ọo Mu bụ Onye-Nwe-Ọha bụru Chileke unu,
l’ọ tọ dụhedu onye ọdo, dụbaa nụ.
Ndibe mu bẹ l’aata abyakwa l’emebaa iwhe iwhere ọdo.
Mbọku nke Onye-Nwe-Ọha
28“E megee l’ikpazụ bẹ mu l’a-wụ Ume mu l’ẹhu madzụ lile.
Ụnwu unu nwoke mẹe ụnwu unu
nwanyị ekfuchilahaaru mụbe Chileke.
Ndu bụ ọgurenya unu arọ nrọ.
Ụnwu okorọbya unu awhụ ọwhulenya.
29Mbọku ono bẹ mu l’a-wụ Ume
mu ono l’ẹhu ndu bụ ụnwu ozhi;
unwoke mẹe ụnwanyi.
30Mu l’e-goshi iwhe-awhụrulenya
l’igweli mẹe lẹ mgboko l’owhu.
Aa-whụ mmee, whụ ọku, whụ ẹnwuru-ọku, l’akpụ tụlaa.
31Iwhu ẹnyanwu l’a-gbakọta ẹkpuroochi,
ọnwa ekekota mmee mmee,
tẹmenu ya erwua mbụ oke ụboku nke Onye-Nwe-Ọha ono
mbụ ụboku ono, dụ egvu.
32Iwhe bụ ndu l’akpọ-ku ẹwha
Onye-Nwe-Ọha bẹ l’aa-dzọta nteke ono,
nkele ọo l’eli ugvu Záyọnu yẹle Jerúsalẹmu
bẹ l’aa-haru dzọta ndu l’aa-dzọta,
ẹgube ono Onye-Nwe-Ọha kfuru iya.
Ndu ọbu, l’aa-dzọta bụ ndu wafụru nụ,
bụ iya bụ ndu Onye-Nwe-Ọha l’e-ku.”
3Ikpe, l’ee-kpe ndu mba gẹ mba ha
1“O -rwulewho mbọku ono,
mbụ nteke mu l’e-dobewhu ndu Juda
mẹe ndu Jerúsalẹmu azụ l’ọnodu whẹ,
2bẹ mu l’e-rwukobe ndu mba gẹ mba ha,
chịta whẹ jeshia nsụda Jehóshafatu.
Mu anọdu l’ẹka ono kpee whẹ ikpe l’okfu ẹhu ndu Ízurẹlu,
bụ ndibe mu bụru oke-iwhe mu.
O noo nkele ọo whẹ chịkashiru ndibe mu ono,
whẹ dzuru mba gẹ mba ha, bya awashịa alị mu.
3Whẹ tụru ido gude hakashịa ndibe mu,
chịta unwokorọbya je ereshia
gude kfụa nwanyị ọkpara ụgwo azẹe,
chịta ụnwumgboko je ereshia gude je agaa mmẹe ngụa.
4“Sụa ?unu l’a-garụ mu lẹ gụnu, unubẹ ndu Taya mẹe ndu Sáyịdonu mẹe unubẹ ndu lile, bu l’alị ndu Fílistiya l’owhu? ?Unu l’eme t’unu gwata mu ụgwo iwhe mu meru tọo gụnu? Ọ -bụru l’ọo ụgwo bẹ unu l’agwata mu, bẹ mu l’e-kwokwa gburumu mee ẹgwegwa woru ejo-iwhe, unu metagbaberu tukobe unu l’ishi. 5Ọo unu bẹ chịtaru mkpọla-ọcha mu mẹe mkpọla-ododo mu, vuta ẹku mu ono, kagezhia ree je dobe l’ụlo agwa unu. 6Ọ bụru unu bẹ rwutaru ndu Juda mẹe ndu Jerúsalẹmu je eree ndu Girísu shi nno wofu whẹ, whẹ nọdu alị whẹ otẹnya.
7“Unu lekwa, mu byakwa l’e-je erwufuta whẹ l’ẹka ono, unu reru whẹ je edobe. Ejo-iwhe ono unu meru bẹ l’a-lawhuru unu azụ. 8Mu l’e-rwuta ụnwu nke unu unwoke mẹe ụnwanyi je ree ndu Juda. Ndu Juda erenwe whẹ l’ẹka ndu Sabiya, mbụ ndu mba ono, bu otẹnya. Nkele mụbe Onye-Nwe-Ọha kfuakwaru nkemu.”
9Unu je aryaa ya aryarya l’ọha ọdo sụ whẹ agha:
Unu kwakọbekwa ọgu!
Unu kukwaa ndu ojọgu tẹ whẹ wụ-lishihu!
T’iwhe bụ ndu l’alwụje ọgu kpụlitakwaru ntse
bya awata ọlwu ọgu!
10Unu kpụkwaa ọgu unu t’ọ bụru ogu-ịgba!
Unu akpụkwa mma unu, l’egudeje
akọcha iwhe t’ọ bụru arwa!
T’onye ike gvụru kfukwaa sụ:
“Ike dụakwa mu!”
11Unu mekebe ẹgwegwa bya,
unubẹ mba gẹ mba ha ono!
Unu shi l’ẹka unu nọkota bya edzukobe l’ẹka ono!
Gụbe Onye-Nwe-Ọha, menua tẹ ndu ojọgu nke ghu
shi l’imigwe lwazeta l’alị!
12“Tẹ ndu ọha ọdo wụ-lihu.
Tẹ whẹ zarụ jeshia nsụda Jehóshafatu,
nkele ọo l’ẹka ono bẹ mu l’a-nọdu
kpee ndu mba gẹ mba ha ono,
buwheru iya mgburumgburu ikpe.
13Unu chilishia mma unu, o noo nkele iwhe e meberu l’alị
bẹ chashịwaru dụwaa nke akpata.
Unu bya adzọshia mmẹe l’akpụru vayịnu,
nkele ẹka l’aadzọshije mmẹe bẹ jiwaru godogodo,
iwhe l’eeyeje mmẹe jiwa ebushihu ebushihu.
O noo gẹ ejo-ememe, whẹ l’eme paberu ẹka ndono.”
14Igweligwe madzụ, nmarụ
ẹkfurekfu bẹ dọru lẹ nsụda, l’aanọduje bua ikpe.
O noo nkele mbọku nke Onye-Nwe-Ọha l’erwuwaa ntse;
o bụru lẹ nsụda ono, l’aanọduje bua ikpe bẹ l’ọo-tụko nwụa.
15Ẹnyanwu yẹle ọnwa l’a-gbakọta ẹkpuroochi.
Kpokponde ekebuhu papapa.
16Onye-Nwe-Ọha l’a-nọ lẹ Záyọnu abọ ekiri,
ọo-nọ lẹ Jerúsalẹmu ede kiriri.
Mgboko yẹle igweli anmakọta jijiji.
Ọle Onye-Nwe-Ọha bụ iya bẹ
ndibe iya l’a-gbaba lẹ mkpula je anọdu zee ndzụ.
Ọ ya bụ agbarara, kwachiru ụnwu Ízurẹlu.
Iwhe-ọma, l’e-rwube ndibe Chileke
17“O noo nteke unu l’a-ma l’ọo Mu bụ Onye-Nwe-Ọha,
bụru Chileke unu, bu ebubu l’ugvu Záyọnu,
mbụ ugvu ono, dụru mu nsọ ono.
Obodo Jerúsalẹmu bẹ l’a-dụ nsọ;
ndu ọha ọdo ta alwụtahedu iya ọdo.
18O -belewho mbọku ono bẹ
ugvu g’ugvu ha l’a-nọ atashị mmẹe ọ̀whúú.
Ụnwu ugvu nshị agbọ mini-ẹra-eswi jọjojo.
Mini atụko iwhe bụ iyi, dụkota l’alị Juda asọshi.
Ọgba-mini agbafuhu l’eze-ụlo
Onye-Nwe-Ọha wata ọgbo jọjojo
shi nno agbaa mini lẹ nsụda oshi Shitimu.
19Alị ndu Íjiputu bẹ ẹgbara l’a-kfụ.
Alị ndu Edọmu abụru echi-ẹgu, daburu whochangu.
Ishi iya bụ lẹ whẹ meru ndu Juda iwhe-kpanganga,
nọdu l’alị whẹ gbushia ndu l’adụa iwhe whẹ meru.
20Ọle alị ndu Juda bẹ l’ee-buru eburu jeye lẹ gbururu.
E bua lẹ Jerúsalẹmu shi l’ọgbo rwua l’ọgbo.
21Ọchi ndu ono, whẹ gburu bẹ
mu l’agwata whẹ ụgwo iya;
mu ta ahadụ tẹ whẹ riru ikpe ọchi ono, nmarụ whẹ ẹwoma.”
O noo nkele Onye-Nwe-Ọha bu ebu lẹ Záyọnu.