Jobu

Ẹkwo

JOBU

Akọ ẹhu Jobu

¹O nweru nwoke ọbu, bụ onye alị Uzu, ẹwha iya bụ Jobu. Nwoke ono bụ onye, l’ẹte amarụ ejo ẹka, ọ bụru onye obu gụru iwhoro. Ọ bụ onye l’anọje atsụ Chileke egvu gbẹeru ome ejo-iwhe azụ. ²Iwhe a nwụtaru iya bụ unwoke ẹsaa l’ụnwanyi ẹto. ³O nweru ẹku. Atụru iya dụ ụnu iri l’ẹsaa l’ụkporo iri. Ịnya-kamẹlu iya dụ ụnu ẹsaa l’ụkporo iri. Eswi iya, a tụru njịgba ẹbo-ẹbo dụ ụnu l’ụkporo ise. Ne nkakfu-ịgara iya dụ ụnu l’ụkporo ise. O nweru igweligwe ndu, l’ejeru iya ozhi. Ọo lẹwho l’ọo ya bụ onye shi kakọta shii l’iwhe bụ madzụ, a nwụru anwụnwu l’ụzo ẹnyanwu-awata kpaa-whuu.

⁴Ụnwu Jobu unwoke l’anọje aha eriri ahaha l’ibe whẹ l’ẹhu l’ẹhu. E -jeeru onye ọwa l’ọgiya ọwa, o -rwua l’ọgiya ọdo e jeeru onye ọdo. Whẹ l’ezhije unwune whẹ ndu nke nwanyị tẹ whẹ bya etsoru whẹ ria ngụa ⁵L’ọobuje, eriri ono gbadzugele whẹ whọ, Jobu ekua whẹ mee whẹ tẹ whẹ nsọ. Ọogba-lihuje l’ọnmewa ụtsu gbaa ẹja ọkpokota-iwhe-ọku gude gwaa Chileke l’ishi ụnwu iya ono l’ẹhu l’ẹhu. Nkele ọorije sụ: “Mu marụ, ?ụnwu mu te emeduanu iwhe-dụ-ẹji? A marụ ?whẹ te egudedaunu obu whẹ whua Chileke iwhu?” Ọ bụru ẹgube ono bẹ Jobu l’emeje iya ntekenteke.

Chileke l’aha Sétanu t’ọ data Jobu

⁶Obe ujiku lanụ, ụnwu Chileke bya tẹ whẹ goshi onwowhe l’iwhu Onye-Nwe-Ọha. Sétanu tsoru whẹ bya. ⁷Onye-Nwe-Ọha sụ Sétanu: “?Ọo awe b’i shi bya?”

Sétanu sụ Onye-Nwe-Ọha: “Mu l’eje eje alwa alwa l’eliwhe. Mu tsoru ọma mgboko aghawhe ririri.”

⁸Onye-Nwe-Ọha bya asụ Sétanu: “?Ẹnya rwuwaru ghu l’ẹka onye ozhi mu Jobu nọ? O to nwedu madzụ, dụ g’ọo ya lẹ mgboko l’owhu. Ọ bụ nwoke obu gụru iwhoro, bụru onye ụta l’adụa lẹ ndzụ iya, bụru onye l’atsụ egvu mụbe Chileke gbẹeru ome ejo-iwhe azụ.”

⁹Tọ dụ iya bụ, Sétanu bya eyeeru Onye-Nwe-Ọha onu sụ iya: “Ọ byanụ; Jobu ọbu, ?ọ nọnyaaru wata ọotsu gụbe Chileke egvu? ¹⁰?Tọ dụ ghu gude agbarara tuwheta yẹle ndibe iya mẹe iwhe lile o nweru mgburumgburu ibẹka ibẹbo? Iwhe lile, l’oome eme b’i meru l’ọogbaru iya bẹrebere, nke ọwhu bụ l’ẹku iya tụkoru alị ono l’owhu dzuru. ¹¹Machịnua ẹka ntaa denyi l’iwhe lile, o nweru, gụ awhụ l’ọo-kfụru l’atatiwhu ghu whua ghu iwhu.”

¹²Tọ dụ iya bụ, Onye-Nwe-Ọha sụ Sétanu: “Ọ dụ ree. Iwhe lile o nweru dụwaa ghu l’ẹka. Ọo lẹwho t’i be edenyi yẹbedua ẹka.”

Ọo ya bụ, Sétanu tụgburu ọ bụru iya alụfu l’iwhu Onye-Nwe-Ọha.

¹³O be ujiku lanụ, ụnwu Jobu ndu nke nwoke mẹe ndu nke nwanyị dọkobe l’ibe nwune whẹ nke ọgurenya eri iwhe angụ mmẹe. ¹⁴Onye ozhi bụleruwho whẹreketeke l’iwhu Jobu bya asụ iya: “Oke-eswi, l’eegudeje eje ozhi l’ẹgu b’e gude eje ozhi l’ẹgu, nkakfụ-ịgara dọkwaruwho l’agụga ẹka ono ata nri, ¹⁵ndu Sabe bya afụru whẹ tụko whẹ rwuta. Whẹ gudekwawho mma gbugbushia ndu l’ejeru ghu ozhi. Ọ bụru mbẹdua kpụ bụ onye gbalaru nụ, mu sụ tẹ mu bya ekfuru ghu iya.”

¹⁶G’onye onona kpụkwadua okfu ono l’ọnu ekfu bẹ onye ozhi ọdo zhibataru bya asụ: “Ọku, shi l’ẹka Chileke bẹ shilewho l’imigwe bya ekegbushia atụru ghu g’ọ ha; kegee kee ndu ozhi ghu kechafu. Ọ bụru mbẹdua kpụ bụ onye gbalaru nụ; mu sụ tẹ mu bya ekfuru ghu iya.”

¹⁷G’onye onona kpụkwadua okfu ono l’ọnu ekfu bẹ onye ozhi ọdo zhibataru bya asụ: “Ndu Kaludiya buru ọgbo ẹto tụa lẹ mkpa lẹ mkpa bya awụpyabe ịnya-kamẹlu ghu g’ọ ha rwuta; gude ogu-ịgba gbugbushia ndu l’ejeru ghu ozhi. Ọ bụru mbẹdua kpụ bụ onye gbalaru nụ, mu sụ tẹ mu bya ekfuru ghu iya.”

¹⁸G’onye onona kpụkwadua okfu ono l’ọnu ekfu bẹ onye ozhi ọdo zhibataru bya asụ: “Ụnwu ghu unwoke mẹe ụnwu ghu ụnwanyi dọkwaru eri iwhe angụ mmẹe l’ibe nwune whẹ nke ọgurenya. ¹⁹A bya l’eledeshia ẹnya, oke whẹrewhere shilewho l’echi-ẹgu wheru whukuwhuku rwua bya enwungaa ụlo, whẹ nọ mgburẹku ẹno, ụlo zee zepyabe ụnwu ghu ono gẹ whẹ ha, whẹ nwụshihu. Ọ bụru mbẹdua kpụ bụ onye gbafụtaru nụ, mu sụ tẹ mu bya ekfuru ghu iya.”

²⁰Tọ dụ iya bụ, Jobu gbalihu gude iwe-l’ọnuma zhijaa uwe yẹbe Jobu tarara, bya erwushia ẹgbushi l’ishi. Nteke ono, ọ bya adaa kpupyabe iwhu l’alị baarụ Chileke ẹja ²¹sụ:

“Ọo ọto bẹ mu gba fụta l’ẹwho ne mu.

Ọ bụru ọto bẹ mu l’a-gba lashia.

Ọo Onye-Nwe-Ọha nụru, ọ bụru iya bẹ natarụ nụ.

T’a jakwaa ẹwha Onye-Nwe-Ọha ajaja.”

²²Iwhe lile ono mekotaru Jobu, t’o me iwhe-dụ-ẹji l’ẹka Chileke nọ, too gudebua ọnu iya sụ lẹ Chileke meru iya ẹji.

Sétanu l’adata Jobu nke ugbo labọ

¹O noo ya, ọ bya ebe mbọku ọdo, ụnwu Chileke byakwawhọ tẹ whẹ goshi onwowhe l’iwhu Onye-Nwe-Ọha. Sétanu tsokwaru whẹ whọ bya tẹ ya goshi onwonkiya. ²Onye-Nwe-Ọha sụ Sétanu: “?Ọo awe b’i shi bya?”

Sétanu sụ Onye-Nwe-Ọha: “Mu l’eje eje alwa alwa l’eliwhe. Mu tsoru ọma mgboko aghawhe ririri.”

³Tọ dụ iya bụ, Onye-Nwe-Ọha sụ Sétanu: “?Ẹnya rwuwaru ghu l’ẹka onye ozhi mu Jobu nọ? O to nwedu madzụ, dụ g’ọo ya lẹ mgboko l’owhu. Ọ bụ nwoke, obu gụru iwhoro, bụru onye ụta l’adụa lẹ ndzụ iya, bya abụru onye l’atsụ egvu mụbe Chileke gbẹeru ome ejo-iwhe azụ. I nwugeeru mu ye tẹ mu mekpaa ya ẹhu, mbụ tẹ mu laa ya l’iyi lẹ bọ dụ iwhe o meru. O gudelee onwiya ẹka g’o gude iya.”

⁴Sétanu sụ Onye-Nwe-Ọha: “T’akpọ-ẹhu lanụaru akpọ-ẹhu. ?Tị madụ lẹ madzụ l’e-swekota ẹnya l’iwhe lile, o nweru l’iswi ndzụ iya? ⁵Ọle machịnua ẹka ntaa denyi iya l’ọkpu mẹe l’anụ-ẹhu, gụ awhụ l’ọo-kfụru l’atatiwhu ghu whua ghu iwhu.”

⁶Onye-Nwe-Ọha sụ Sétanu: “Ọ dụ ree. Ọwa ghu b’ọ nọ l’ẹka. Ọlewho t’ị ba akpakwa ẹka lẹ ndzụ iya.”

⁷Ọo ya bụ, Sétanu tụgburu, ọ bụru iya alụfu l’iwhu Onye-Nwe-Ọha. O je emee, ebyi, l’awhụ sasasa zashịa Jobu l’ẹhu. O shi l’ọbochi-ọkpa zalẹ iya whọ jeye l’ishi. ⁸Jobu je agwọru l’ikpo ntụ, wota ibiribe mbeji gude akọbashi onwiya.

⁹O noo ya, nyee ya bya asụ iya: “?Ii-sedegburu onwoghu nno? Whua Chileke iwhu nwụhu.”

¹⁰Ọ sụ iya: “Okfu ghu dụkwa g’ọo okfu nwanyị, l’eme eswe. ?Ọo lẹwho iwhe-ọma bẹ anyi l’a-natajẹ l’ẹka Chileke, haa ọnata ẹjo iya?”

Iwhe lile ono mekota, Jobu te egude ọnu iya kfuta iwhe-dụ-ẹji.

Ụmadzu ẹto, bụ ọnya Jobu

¹¹O noo ya, ụmadzu ẹto whẹ lẹ Jobu l’eshi ọnya nụlewho nke ejo-iwhe ono, l’anwụkaaru Jobu, whẹ shi l’ẹka, whẹ shi l’ẹhu l’ẹhu byatashia. Iwhe whẹ tụru ọnu iya bụ tẹ whẹ dzuda l’ẹka ono je ayọoru iya dụa ya obu. Ẹwha whẹ bụ: Elifazu onye Temanu, mẹe Byilidadu onye Shuwa, mẹe Zofa onye Naama. ¹²Whẹ bya anọdu otẹnya palia ẹnya whụ iya. Whẹ ta ahụbehe iya ama. Whẹ tụ ụzu ẹkwa, gude iwe lajashịa uwe whẹ alajashị, kpotagee ivovonyi wụa onwowhe l’ishi. ¹³Whẹ gwọshita l’alị. Whẹ l’iya gwọru nno abalị ẹsaa, eswe l’ẹnyashi. Ọ kpọo whẹ ọnu okfu, tọ dụ onye ọwhu dụ ike saa ọnu kfuru yeru Jobu. O noo nkele whẹ whụru l’iwhe-ọtsulanu, l’ooje parụ mebyi ẹka apaa.

Okfu, shi Jobu l’ọnu

¹Tọ dụ iya bụ, e megee, Jobu saa ọnu wata okfu okfu, kpọlahaa mbọku, a nwụru iya l’iwhu. ²O kfushilahaa sụ:

³“Tẹ mbọku, a nwụru mu bụkwaru ọla-l’iswi.

T’ẹnyashi ono, a sụru l’a tsụtaru ime nwa nwoke

bụkwaru ẹnyashi, larụ l’iswi.

⁴Tẹ mbọku ono gbakwaa ọochi.

Tẹ Chileke ọwhu bu l’imeli ba agụbekwa iya iwhe.

T’iwhoro ba adụkwa lẹ mbọku ono.

⁵T’ẹkpuroochi yẹle inyonyo ọnwu

tsọ-nyikwaa mbọku ono ẹnya.

T’urwukpu sọpyabekwa iya.

T’ọochi-ọbya-l’eswe mekwaru ọtsu egvu nụ iya.

⁶Tẹ tsụrii-ẹkpuroochi nakwaa ẹnyashi ono ẹvu.

T’a ba agụkwaru iya ye lẹ mbọku, dụ l’awha.

T’a ba gụkwaru iya ye lẹ mbọku, dụ l’ọnwa.

⁷T’ẹnyashi mbọku ono

bụkwaru abalị, gba ẹka nwa.

T’a ba atụkwa ụzu ẹhu-ụtso l’ẹnyashi ono.

⁸Tẹ ndu l’atụje ụboku ọnu

tụkwaa mbọku ono ọnu,

mbụ ndu marụ gẹ l’aakpatsuje ejo-oke-agiyi.

⁹Tẹ kpokponde mbọ-muchi iya jihukwa kpaaluu.

T’iwhoro chi-asahu ono, l’oole ẹnya iya

bụkwaru iya nke mmaka.

Tọ bọ whụkwa ẹnyanwu ụtsu ẹnya.

¹⁰O noo nkele ọ jịkaru omechi ụzo,

dụ l’ẹkpa-nwa ne mu tẹ mu ba afụtashi ụwa,

bya egude ẹnya mu whụ ẹgube

iwhe-ọtsulanu-a, byakfutaru mu nu.

¹¹?Ọo nụa gụnu meru g’o gude

t’e kwo mu ekwo nteke l’aanwụ mu?

Mbụ l’ọo nteke ono, mu shi l’ẹwho ne mu afụta

bẹ mu gẹge anwụhu?

¹²?Ọo nụa gụnu meru g’o gude ụtakfu hee mu hefuta?

?Ndẹnua g’o gude ẹra dụ

ọwhu mu ngụru iya angụngu owhu?

¹³Ntaa bẹ mu gẹge anwụhuwaa nụ zẹe guu.

Mu gege ekuhawaru mgbẹnya.

Mu gege anọwaa edzuta ike,

¹⁴mu lẹ ndu eze mẹe ndu mgbazhi

nke mgboko, bụ ndu kwashịru uwhu

megee haa ya, ọ bụkotaru ochuwhu.

¹⁵Mbụ, mu lẹ ndu shi achị nụ,

bụ ndu shi nwegeeru

mkpọla-ododo, ndu shi gude mkpọla-ọcha

dojishia ụlo whẹ godogodo.

¹⁶Mbụ ?ọo nụa gụnu meru

ẹwho ta alụfu ne mu tẹ mu ba ala ụwa?

Mu gẹge anwụhu lẹ nwata haa ọwhu iwhoro.

¹⁷Ọo l’alị-maa bẹ ndu ejo-ememe

l’e-mebuhu ejo-iwhe.

Ọo l’ẹka ono bẹ ndu ike l’adụa l’a-nọdu dzuta ike.

¹⁸Ẹka ono bẹ ndu mkpọro l’e-nweru ntụsaru-ẹhu.

Whẹ ta anụhedu ọrya ono, l’anọje aryarụ whẹ,

mbụ ndu ono, l’achị whẹ g’ọo ohu.

¹⁹Onye ha nwanshị bẹ nọ l’ẹka ono,

onye ha shii nọdu iya.

Onye shi bụru ohu ta anọhedu l’ẹka

onye shi bụru nna-iya-ukfu.

²⁰?Ọo gụnu meru iwhoro l’enwujeru

ndu l’ejegbu onwowhe l’iwhe-ọtsulanu.

L’aahajẹ ndu áwhụ tsọru tẹ whẹ nọdu ndzụ?

²¹Mbụ ndu ọnwu l’agụ, t’o kwe whẹ egbugbu,

ndu l’egvu alị achọ ọnwu

amamẹ gẹ l’aachọje ẹku, e domiru edomi.

²²Ndu l’eteje ẹswa teshia ya ike,

mbụ ndu ẹhu l’akpafụje ụryi

mẹ whẹ whụ ilu, whẹ l’a-bahụ.

²³?Ndẹnua g’o gude iwhoro

l’enwujeru onye l’amaa ụzo, l’oo-shi,

mbụ onye Chileke gude

agbarara tubuta atubuta?

²⁴Ọnma-ọtsa bụwaa nri, mu l’erije.

Ude, mu l’atsụ l’asọ g’ọo mini.

²⁵Ọo iwhe mu l’atsụ egvu iya bẹ l’emegejee mee mu.

Ọ bụru iwhe mu l’anmarụ kpakpakpa

bẹ l’emegejee nwụaru mu.

²⁶Mu te enwedu ntụsaru-ẹhu.

Ẹhu ta adụ mu guu.

Mbụ l’ẹhu te egvuduru mu egvuru.

Ọo iwhe-ọtsulanu bẹ l’anọje abyarụ mu.”

Ọnu, Elifazu l’eye

¹Tọ dụ iya bụ, Elifazu onye Temanu bya eyee ọnu sụ:

²“Madzụ -sụkwanu tẹ ya kfuru okfu yeru ghu,

?too ghudu ghu nụ eghu?

Ọle ọbu ?ọo onye l’a-ha okfu okfu?

³Leduwho, gụbe onye zhiwaru ikpoto madzụ iwhe.

Ndu ẹka tsụru mmẹe b’i meru, whẹ shihu ike.

⁴Onye l’anga anganga b’i kfuru

okfu yeru, ọ gbẹe ya ọkpu ike.

Ikpere ngwọkinaki b’i meru, ọ kfụru tẹterete.

⁵Ọle ntaa bẹ iwhe-ọtsulanu

byakfutawaru gụbedua l’ishi onwoghu,

tịi dụhe ike nweru iya obu.

Mbụ l’ọonwuwaa l’ẹhu ghu,

ọ bụru iwhe tụfuru ghu ẹhu.

⁶?Tọ bụnua l’ẹja ono, l’ịibaru

Chileke b’ị chịru ụkfu kwẹe?

?Tọ bụnua abụbu, ị bụ onye ụta l’adụa lẹ ndzụ iya ono

bẹ meru ị chịru ẹnya yeru Onye-Nwe-Ọha?

⁷Rịada iya arịri ?Ọo onye bẹ ẹka iya dụ ọcha, lajẹru l’iyi?

?Ọo l’awe bẹ onye dụ chịriri

chihujeru echihu lẹ mgboko?

⁸Iwhe mu l’awhụje-chia bụ lẹ ndu l’akọ ejo-iwhe

g’ọo ndu l’akọ okfu bẹ l’akpatajẹ iya nụ,

ndu l’akụ njọ g’ọo ndu l’akụ mebyi iwhe l’akpatajẹ iya.

⁹Chileke zhia ume whururu bẹ whẹ l’a-bụ kpurupyata.

Nteke bụ l’ẹhu eghughu gbanwuhuru iya l’ẹhu,

whẹ abụru ọla-l’iswi.

¹⁰Oduu-gburu-agụ l’edejekwa kiriri, baa hanyị-hanyị.

Ọle eze oduu-gburu-agụ

bẹ l’aakukwoshijekwa ẹpyi akukwoshi.

¹¹Oduu, l’adụa iwhe ọ whụru ria l’anwụhujekwa.

Ne oduu l’azụshije ụnwu tụkaa nnanụ nnanụ.

¹²A bya atakpeeru mu okfu atakperu.

Iwhe rwuru mu lẹ nchị bụru

whatawhata, a dzụru ye iya.

¹³Ọ bụru gẹ mu l’arwọ ejo nrọ l’ẹnyashi,

mbụ nrọ, meru uche ta anọ mu l’ẹka lanụ,

l’oge nteke ono, ndiwhe

l’ekumihujewaa mgbẹnya.

¹⁴Egvu bya mu l’ẹhu, ẹhu

nmalahaa mu kpakpakpa.

O mee, ọkpu, dụ mu l’ẹhu nmakọta kwekwekwe.

¹⁵O noo ya, nwa-maa bya eseghata mu l’iwhu,

Ẹhu lakọta mu vuruvuru.

¹⁶Iwhe ọbu jeta bya akpọo beru.

Ọle mu ta adụdu ike akọwa lẹ g’ọ gbarụ ụgbugba.

Ọo lẹwho l’o nweru iwhe kfụru mu l’atatiwhu.

Ẹka lile dalẹwho nyorokotongu.

Mu bya anụa olu-okfu, sụru mu:

¹⁷‘?O nweru gẹ madzụ

mmaanụ l’e-me dụ chịriri l’iwhu Chileke?

?O nweru gẹ madzụ l’e-me dụkota ọcha l’iwhu

Onye meru iya nụ?

¹⁸Chileke ta adụdu onye o gude ire iya ẹka

je akpaa lẹ ndu ozhi iya.

Ndu ojozhi-imigwe iya

bẹ l’ọoko-gejeeru ẹka, whẹ shisweru ụzo.

¹⁹?Oo chia madzụ, bu l’ụlo ẹja, mbụ l’ụlo e gude ẹja,

gbube ukfu iya

bẹ l’oo-gude ire whẹ ẹka?

Mbụ ndu, bụ gẹ l’aadzọpyabeje mkpu l’ọkpa

bụ gẹ l’aadzọpyabeje whẹ.

²⁰Wata l’ụtsu jeye l’urwẹnyashi

bẹ l’eegwejewaa madzụ ryaaryaa.

Madzụ l’a-bụru ọla-l’iswi jeye lẹ gbururu,

tọ dụ onye l’akpa iya ishi.

²¹A -gbabufulewho eri, gude ụlo whẹ

bẹ whẹ l’a-nwụhu l’ẹbe ama ágụ.’

¹“Kuada oku ntaa t’ị marụ onye l’a-za ghu iya nụ.

Ndẹe ndu imigwe, l’ịi-gharu iwhu?

²Iwe-agvụ-l’obu l’egbujekwa onye eswe.

Ẹnya-kfụrukfuru l’awhụje

onye l’enwee uche awhụwhu.

³Mu whụwaru ẹka onye eswe l’agbabẹ ọgbaragbu.

A bya l’eledeshia ẹnya, ibe iya bụwaru ẹka a tụru ọnu.

⁴Ụnwu iya te enwedu ntụsaru-ẹhu.

Eegweje whẹ ryaaryaa l’iwhu ikpe.

Ya enwe onye l’agbarụ whẹ ọdzori.

⁵Iwhe o metaru l’alị bẹ bụ ndu

ẹgu l’agụ l’alwụkotaje iya.

Whẹ l’anagejee naa ọwhu dụ l’ẹka ẹwu-ogvu dụ.

Ndu ẹhu l’achị ọku l’egudeje

ọotu hẹe hẹe lwekota ẹku,

o nweru wọo.

⁶Iwhe-ọtsulehu te eshijedu l’ẹja fụta.

Nsogbu te eshije l’alị kpofuta.

⁷Ọle madzụ b’a nwụru ye lẹ nsogbu

ẹgube ono l’ọobuje,

ẹkiri-ọku gbaa, ya ewhelihu imeli imeli.

⁸Ọo -bụ l’ọo mu bụ gụbedua

mẹ mu edooru iya Chileke.

Mu gege eworu g’ọ dụru mu kọoru iya.

⁹Chileke l’emeje iwhe dụ

biribiri, kpọru gẹ l’aatụ ọnu iya.

Oomeje iwhe dụ egvu, bụ agụta agụta.

¹⁰Oomeje tẹ mini chịa l’eliwhe.

Oozhije mini t’ọ gbashị l’ẹgu.

¹¹Ndu lwarụ alị bẹ l’oodobeje l’ẹka ha l’eli.

Ndu l’agụ áwhụ bẹ l’ookulije

dobe l’ẹka ẹhu l’a-dụ whẹ guu.

¹²Ẹtomu, ndu ẹregede tọru bẹ l’oomeje t’ọ ghakashịhu,

nke ọwhu l’ọotoo dụa iwhe,

whẹ yeru ẹka l’agajẹru whẹ nụ.

¹³Ndu warụ ẹnya bẹ l’oogudeje

ẹregede whẹ nmata g’ọo ọnya.

Ejo ikumu, ndu ntuwhu-ire gbarụ bẹ l’ọozaje l’ẹza.

¹⁴Ọochi l’abyapyabẹje whẹ l’echi eswe.

Whẹ l’anọje atsoku atsoku

l’eswe g’ọo onye l’eje l’abalị-ishi.

¹⁵Ndu l’adụa g’ọ harụ whẹ

bẹ l’ọodzofutaje l’ejo ọnu dụ whẹ nụ.

Ọodzofutaje whẹ l’ẹka ndu ọkpehu.

¹⁶Ọo ya bụ lẹ ndu ụkpa bẹ

ẹnya whẹ dụ l’ẹka Chileke nọ.

Ọ bụru iya meru iwhe l’akfụaru

nhamụnha mee ọnu shọngu.

¹⁷Ẹhu-ụtso bụ nke onye Chileke l’abajẹru mba.

Ọo ya bụ, be elewhekwa àhụ̀hù,

Ọkalibe-kakọta-ike l’ahụ̀ ghu elewhe.

¹⁸Oogbufuje madzụ ọnya l’ẹhu, ọle oodebeje iya iwhe.

Oomekaje madzụ iwhe, ọle oomeje, ya emehu.

¹⁹Iwhe-ọtsulanu l’a-byarụ ghu ugbo ishii,

ya adzọfutakota ghu.

O rwua lẹ nke ẹsaa, o to okwedu

t’ọ dụ iwhe l’oo-me ghu nụ.

²⁰L’ụnwu bẹ l’ọo-gbafụta ghu t’ị ba anwụhu.

L’ọgu bẹ l’ọo-dzọfuta ghu t’e

be egbugbu ghu lẹ mma.

²¹Ọo-kwachita ghu t’e be egude ire jịta ghu tụa.

Ị tịi byadụ l’a-tsụ egvu mẹe ọla-l’iswi bya.

²²Ọo ọchi bẹ l’ịi-chị ọla-l’iswi yẹle ụnwu.

Ị tịi byadụ l’a-tsụ anụ-ẹgbudu nke mgboko-o egvu.

²³Gụ l’ẹwhuru, dụ l’ẹgu l’a-gba ndzụ.

Gụ l’anụ-ẹgbudu anọdu lẹ nchị-ọdu-ndoo.

²⁴Ibe ghu ta adụdu iwhe bya l’e-me iya nụ,

o noo iwhe l’ịi-marụ ndono.

Ẹku ghu bụ, ị nọtaje, gụ agbawhee ya,

ọ tọ dụdu ọwhu bya l’e-tuwhahu l’iya.

²⁵Ụnwu ghu bẹ l’a-ha l’igwe.

Ẹpa ghu abụru ẹswa l’igu lẹ mgboko.

O nokwawho iwhe l’ịi-marụ ndono.

²⁶Ee-li ghu lẹ nka.

Ịi-dụlewho g’ọo ẹgube-ẹ,

witi l’akajẹedaa aka rwua

lẹ mgbe iya, tẹhenu e bude iya.

²⁷Iwhe ono bẹ anyi

nyokotawaru ime mẹe azụ whụ l’ọo ire-lanụ.

Ngabẹkwa iya nchị mee ya ememe.”

Ọnu, Jobu l’eye

¹Tọ dụ iya bụ, Jobu bya eyee ọnu sụ:

²“Ọ dụ mu nke t’e wota áwhụ,

byarụ mu nụ tụ̀a atụ̀tù marụ g’ẹrwa iya habe.

Mbụ t’a chịru iwhe-ọtsulanu mu

ye l’iwhe l’aatụ̀je iwhe, tụ̀a atụ̀tù.

³O to nwedu gege eme t’ẹrwa iya ba aka nke nvẹja

eze-ẹnyimu shii.

Ọo ya meru, okfu mu l’ada njiji-ọnwu njiji-ọnwu.

⁴Nkele akfụ, Ọkalibe-kakọta-ike gbarụ

bẹ nọkota mu l’ime ẹhu.

Ụwhu, l’ọowhu mu l’alọ mu ẹka lẹ ishi meji.

Iwhe Chileke gude eye mu egvu

bẹ kpẹru mkpẹelanu abyakfuta mu.

⁵Nkakfụ-ịgara-ọswa ?l’ọoryaje

ọrya m’o nweru ẹwu, l’ọota?

Tẹ eswi ?l’ọoryaje ọrya mẹ nri, l’oori dụwaa?

⁶?Eerije nri, l’aata amaa ụtso iya l’ẹbe eye iya únú?

?L’aamajẹ ụtso, dụ l’ẹka ono,

l’acha ụcha l’ẹkwa-ọku, e shiru eshishi?

⁷Mu te ekwejedu denyi iya ẹka,

nkele ọga nri ono l’abyajẹ mu ọmari l’ọnu.

⁸Ọ dụ mu nke t’e meeru mu

iwhe mu l’aryọ t’e meeru mu,

mbụ tẹ Chileke meeru mu iwhe l’agụ mu nụ.

⁹Tẹ Chileke tụlewho obu iya ama gwee mu ryaaryaa,

t’ọ gbahalẹwho ẹka iya byia mu

l’ẹhu nke gbaa, mee tẹ mu tọhu lẹ mgboko.

¹⁰O noo iwhe g’adụ mu obu ndono,

mbụ l’ọ ya g’abụru ishi ẹhu ụtso mu l’ẹhu ụwhu-a,

l’ẹte ekwee haa mu ẹka,

l’ọo lẹ mu te ekwedu jịka iwhe Onye Nsọ kfuru.

¹¹?Ọo ike gụnu bẹ mu

nwekwaduru nke tẹ mu nọdu ngabẹ?

?Mu marụ iwhe bụ mkpochi-ishi ndzụ mu,

ọwhu l’abụkwa tẹ mu taa nshi?

¹²Ike nkemu ?ọ kabẹ bụru nke eze-ẹwhuru?

T’anụ-ẹhu nkemu ?ọ kabẹ bụru ope?

¹³Mu te enwehekwa ụvo, mu l’e-gude yeru onwomu ẹka,

mbụ l’ọ tọ dụhedu ike,

whọdukwaduru mu l’ime.

¹⁴Onye ụzo chiru bẹ gbarụ

t’ọnya iya whụjeru iya imiko,

a nọnyaanu ọ tsụ-buhu

Ọkalibe-kakọta-ike egvu.

¹⁵Ụnwune mu bẹ gbarụ mu

ẹregede, mee mu iwhe ọbu,

g’ọo ẹgube-ẹ ọnu-iyi l’asọnyaa asọso, a nọnyaa ya atahụ.

¹⁶Mini l’akpụkoje akpụko dụ mkpukorowhu,

aka-mini sunoo l’adazeshihuje l’ime mini.

¹⁷L’ọnanwu bẹ mini l’atashịhuje

l’ọnu-iyi, l’oge okpomọku bẹ mini ta adụjedu.

¹⁸Ndụ-ije bẹ ẹkwo-njị jịru,

whẹ whua ụzo l’ẹka whẹ l’achọ mini,

whẹ bya ejeta rwua

mgboko-anwụ-chigburu-ọku, whẹ nwụshihu.

¹⁹Ndụ-ije, shi Tema bẹ l’achọ ẹka mini dụ.

Ndụ-ije, shi Sheba l’eleshi ẹnya iya ike.

²⁰Ọle iwhe ono, whẹ kpọru obu whẹ ye ta abụdu ẹgube,

whẹ rịru iya b’o megeeru dụ,

nkele whẹ rwuru ẹka ono,

t’ọ bụhe iwhe whẹ leru ẹnya iya bẹ whẹ whụru.

²¹Ọo kwawhọ ẹgube ono

bẹ gụbedua l’onwoghu dụ l’ẹka mu nọ,

i whụru iwhe e gude eye mu egvu, ị tsụlahaa egvu.

²²?Mu sụjeru t’ị nyako mu iwhe,

tẹ mu sụjeru t’i wota

iwhe i nweru je anụru mu madzụ nnuchi-ọnu?

²³tẹ mu sụjeru t’ị bya anafụta mu l’ẹka ndu ọhogu mu,

m’ọ bụ t’ị bya agbafụta mu l’ẹka ndu mgbashị?

²⁴Karụ mu ẹka mu mesweru, tẹ mu dobe ọnu ndoo,

goshi mu ẹka ụzo kpọ-swehuru mu.

²⁵Ire-lanụ l’emejekwa ẹhuka.

Ọle okfu-a, l’iikfushi

ẹgube-ẹ, ?o goshiru gụnu?

²⁶?Ọo mba b’ị byarụ mu abarụ?

?Iikfu l’okfu, onye-ụzo-chiru

bẹ bụ okfu, larụ lẹ whẹrewhere?

²⁷O noo dụ-a g’ọo onye tụru ido gude nata aswa ishi

nwa-nwogbee, l’enwee nna,

mbụ l’ọ dụ g’ọo onye hụru ọnu-aswa l’ishi

onye yẹle iya l’eshi ọnya.

²⁸Ọle bya eleedaa mu whọ ẹnya ntaa.

Mu ta akabẹkwa nọdu ghu l’iwhu dzụa ejire.

²⁹Byiko, kpowhukwa égò azụ, be emekwa iwhe dụ ẹji.

Kpowhukwa égò azụ,

l’abụbu ono, mu bụ onye iswi dụ mma

bẹ whugokwaru awhugoru.

³⁰?O nwewaru iwhe dụ ẹji, mu gude ọnu mu kfuta?

?Ọo lẹ mu ta akabẹdu marụ

nteke mu kfuru ejo okfu?

¹“?Tọ bụdu ozhi mkpọnwuru

bẹ madzụ fụtaru afụta iya lẹ mgboko?

Ndzụ madzụ bẹ dụ g’ọo onye l’eje ozhi ebuta.

²Ọ dụ g’ọo ohu, bụ iwhe l’ọonoje ele ẹnya iya

bụ aguguru urwẹnyashi,

ọ dụkwawho g’ọo onye e buru

ozhi, bụ iwhe l’ọongabejeru bụ ụgwo, l’aa-kfụ iya.

³Ọo ẹgube ono b’e meru,

ọnwa fụtaru afụta l’abụjeru mu nke mmaanụ.

Ẹnyashi, a nwụtaru anwụta l’abụjeru mu ọtsu ude.

⁴Mu -zẹe azẹe, mu akwaa l’ọriri

asụje: ‘?Ọo nteke ole bẹ mu l’e-tehu?’

Ọle ẹnyashi l’akpụ onwiya rịgorigo.

Ọo gbụrugburu bẹ mu

l’aghakọtaje jeye chi asahụ.

⁵Mgbashiride yẹle inyi bẹ tụkowaru mu ẹhu nakọta.

Akpọ-ẹhu mu dakọtawaa akụru,

kewashihu ekewashihu.

⁶Ndzụ mu l’agba swaswaswa amamẹ aga,

e gude ekwe ẹkwa, mbụ lẹ ndzụ mu l’abyakebe akpobuhu

l’ẹbe ọ dụ iwhe mu levuru ẹnya iya.

⁷Jiko Chileke, nyatakwa lẹ ndzụ mu ta adụdu iwhe ọdo,

ọ bụ gbahaa udzu-ọnu.

Mu te egudehedu ẹnya mu awhụbaa iwhe l’e-me

t’ẹhu tsọo mu ụtso ọdo.

⁸Onye whụnyaru mu nụ ta awhụhedu mu ọdo.

E lee ẹnya mu, a ta awhụdu mu.

⁹Ọo g’igweli l’ekpugee ekpu, ya erwuhaa ya kosahu,

bụ g’onye bahụru l’alị-maa ta adawhujedu azụ ọdo.

¹⁰Ọ tọ dawhujedu azụ l’ụlo iya.

Ogboduwhu ibe iya ta amahẹ iya ọdo.

¹¹Ọo ya meru, mu ta abya l’e-dobe ọnu mu ndoo.

Mu l’a-nọdu eri chịikfuu, mu l’eri ekfu gẹ mu l’ekfu.

Mu l’e-gude g’obu dụ-be mu ẹji gụa ngịrima ẹhu mu.

¹²?Mu bụ eze-ẹnyimu?

Tẹ ?mu bụ ejo-oke-agiyi meru, unu l’eche mu nche?

¹³Mu shi rịa l’ugbooshi-azẹe mu l’a-dụ mu obu,

mu rịa l’aba mu l’e-me tẹ

nggụmawhu mu kabaa ọolwa alị.

¹⁴Ọ bụru ejo nrọ b’i gbechia gude eye mu egvu,

gude ọwhulenya eme t’egvu bya mu l’ẹhu.

¹⁵Mu hatarụ tẹ mu swị-gbua onwomu aswị-gbu.

Anwụhu bụ mu iwhe ahata

amamẹ ụdu ndzụ ọwhu mu nọ ntaa.

¹⁶Ndzụ ọwhu mu nọ bẹ laakwarụ mu ashị.

Mu ta anọgbuduru ndzụ jeye lẹ gbururu.

Parụ mu haa, lẹ ndzụ, mu nọ te enwehedu ishi.

¹⁷?Ọo gụnu bẹ madzụ bụ nke t’i mee ya t’ọ ha shii?

?Ọo gụnu b’ọ bụ nke t’ị rịtaje iya?

¹⁸?Mbụ nke t’i lejee ya ẹnya

l’ụtsu g’ụtsu ha, aghacha iya aghacha ntekenteke?

¹⁹?T’ị kabẹ-zhidua ewofu mu ẹnya?

?T’ị kabẹdu aha mu tẹ mu lwee ọnu-mini?

²⁰Ọ -bụru lẹ mu meru iwhe-dụ-ẹji,

?ọo gụnu bẹ mu meru gụbedua,

mbụ gụbe onye l’eche madzụ nche?

?Ndẹe iwhe meru g’o gude ọ bụru mu b’i lefutaru ẹnya mu?

?Mu l’anyịwaa ghu ẹrwa tọo?

²¹Kabẹnu gụaru mu nvụ l’ẹka mu hasweru ọkpa,

panụru haa l’ejo-iwhe, mu megbaberu.

O noo nkele ọ tọ dụhedu gẹ l’aa-nọ-beru, e kpochia mu ẹja,

gụ achọo mu, ị tịi whụdu mu.”

Ọnu ọwhu Byilidadu l’eye

¹Tọ dụ iya bụ, Byilidadu, onye Shuwa bya eyee ọnu nke iya sụ:

²“?Ọo nteke ole bẹ l’ii-kfubuhu ụdu okfu ono?

Okfu ghu dụkwa g’ọo whẹrewhere,

l’ezhi whukuwhuku.

³Chileke ?ọo ghajẹ iwhe kfụru nhamụnha ishi-okfuru tọo?

Ọkalibe-kakọta-ike

?ọo ghajẹ iwhe rwuberu madzụ ishi-okfuru tọo?

⁴Ọ -bụru l’ọo iwhe-dụ-ẹji bẹ ụnwu ghu meru iya

b’ọ nụwaru whẹ kpakụduu, gbarụ whẹ nụ.

⁵Ọle, ọ -bụ l’ịi-chọ Chileke,

ryọo yẹbe Ọkalibe-kakọta-ike aryọryo,

⁶ọ -bụ l’ị dụkota ree, bụru onye obu gụru iwhoro,

ọ gẹge ezhilihuwaa bya agbaarụ ghu mkpu,

dobewhu ghu azụ l’ọnodu, rwuberu ghu nụ.

⁷Lẹ mbụ b’o shi dụ g’ị ha nwanshịi,

ọle i megee l’ikpazụ bụru oke amadụ.

⁸Jịa ọgbo ọwhu, gahawarụ nụ,

tẹ whẹ kọoru ghu iwhe ndụ-ichee whụgbaberu.

⁹Anyịbedua ta abụdu-a nke ụnyawhu,

l’ẹte adụa iwhe anyi mawarụ,

tẹmenu ndzụ anyi nọ lẹ mgboko-o bụru inyonyo.

¹⁰Whẹbedua l’e-zhi ghu iwhe, kfuru okfu yeru ghu,

tẹmenu okfu, whẹ l’e-kfuru ghu abụru iwhe whẹ marụ ree.

¹¹?Eji l’evutaje ogologo l’ẹka l’ẹte agbaa ẹhu ụda?

?Ikpo l’efuje dụ yilayila l’ẹka mini l’adụa?

¹²Ọ -bụru l’ete egbudu iya nteke ọ dụkwadu oyii,

bẹ l’oovujeru ẹwu ọdo ụzo kpọnwushihu.

¹³O noo gẹ l’ọoduje onye nyazọru Chileke ndono.

Onye l’amaa Chileke bẹ iwhe

l’oole ẹnya iya l’a-bụru ọlwa-l’iswi.

¹⁴Iwhe ọ kpọru obu ye l’adụje whugewhuge.

Iwhe ọ chịru ụkfu kwẹe bụru ụgbu-ẹlwuwelwu.

¹⁵O -bewhube ụgbu-ẹlwuwelwu ono, ya eribuhu.

Ọ -gbakụa ya onwiya, njọ aka njọ.

¹⁶Ọ dụ g’ọo iwhe a kụru l’anwụ agba iya mini,

o fushia dzuru mgbabu ono,

¹⁷akwara iya gbakụa l’oke-ẹwhuru,

mbụ ọ bụru l’ẹwhuru b’ọ chịru akwara iya wẹe.

¹⁸E -whefu iya ewhefu l’ẹka ono ọ nọ,

ẹka ono ajịka iya sụ: ‘Mu tẹke awhụbukwaa ya.’

¹⁹Anwụlwashihu te enwedu iwhe ọ bụ iya,

ọ kwarụwho l’alị ono bẹ ẹwu ọdo l’e-shi fushia.

²⁰Chileke ta ajịkajekwa onye ụta l’adụa lẹ ndzụ iya.

T’ọ bụje agbarike onye l’eme ejo-iwhe.

²¹Oo-megee mee, t’ọnu bụru ghu ọchi,

ya emee t’ẹswa eria ẹfonu.

²²Ndu kpọru ghu ashị bẹ

l’ee-gude iwhere kwaa whẹ ngwa.

Ụlo-ẹkwa, ndu ejo-ememe

bẹ l’aa-whọta awhọta whọfu.”

Ọnu, Jobu l’eye

¹Tọ dụ iya bụ, Jobu bya eyee ọnu sụ:

²“Hoo haa, mu makwarụa l’iwhe i kfuru bụ ire-lanụ.

Ọle ọbu, ?ndẹe gẹ madzụ mmaanụ l’e-me

bụru onye iswi dụ mma l’iwhu Chileke?

³Onye chọru tẹ yẹle Chileke tụa ekwege,

bẹ l’ọo-jịkwa ịkweekwee,

onye ọbu eje adụ ike saa ya m’ọo nnanụ.

⁴Chileke bẹ mmamagụ iya hakwa shii,

ọkpehu dụ iya nụ paa ẹka.

?Ọo onye kpọjeru iya iwhu,

e megee, onye ọbu te evuta iya tukuku?

⁵Oonwulibejeru ugvu, ugvu ta amadụ l’e nwuliberu iya.

Oogudeje ẹhu-eghughu kpọo ya ishi akụ.

⁶Mgboko bẹ l’ọonma-woje anmawo,

mee t’itso, gude iya nụ nmakọta yikayika.

⁷Ẹnyanwu bẹ l’ookfujeru okfu nụ, ya ahaa emeta.

Iwhoro kpokponde bẹ l’ọo-pyichije

t’o bo nwufuta enwufuta.

⁸Ọo yẹbedua kpụ bẹ tụsaru akpamigwe.

Ọ bụru iya l’adzọbeje ọkpa l’eli akpara mini,

l’atụ l’echi eze-ẹnyimu.

⁹Ọo ya mekotaru kpokponde ono,

bụ Beya mẹe Orayọnu,

mẹe Puleyadesu, mẹe

kpokponde, nọkota l’ọhuda.

¹⁰Oomeje iwhe dụ biribiri, akọ ẹtu iya l’adụa,

mee iwhe-awhụrulenya, bụ agụta agụta.

¹¹Ọoghataje mu lẹ mgboro ọkpa; mu ta awhụdu iya.

Ọobuje ẹ l’ooje aghata, mu ta amadụ.

¹²Ọ -bya tẹ ya nyịchata madzụ iwhe,

?ọo onye l’a-kpọshi iyẹ ya?

?Ọo onye l’a-sụ iya: ‘?Ọo gụnu bẹ l’iime nno?’

¹³Chileke te esewhujedu ẹhu-eghughu iya azụ.

Ndu n-yemẹka Réhabu,

bụ ejo oke anụ ono, bụ lẹ mini

bẹ darụ wụshi onwowhe lẹ mgboro ọkpa iya.

¹⁴?Ndẹe gẹ mu l’e-shi asa iya okfu?

?Ndẹe mu adẹe nke tẹ mu l’iya bya atụbe ẹgo okfu?

¹⁵Ọ -bụru m’ọo l’iswi dụ mu mma,

bẹ mu te ejekwa iya ọsa okfu.

Iwhe mu l’e-me bụkwa tẹ mu

ryọo yẹbe onye ikpe mu ono t’ọ whụaru mu imiko.

¹⁶Mu -kua ya m’ọo oku, ọ -za mu

bẹ mu l’ẹte ekwetakwanu l’oo-yeru mu ọnu.

¹⁷O gude oke whẹrewhere gwee mu ryaaryaa,

mee t’ọnya, kabaa mu ababa l’ẹbe ọdu iwhe mu meru.

¹⁸O too kwedu tẹ mu tụfu ume l’ishi.

Ọo ụkpazhi-ọnwu-ọnu bẹ l’ọo-myẹe mu.

¹⁹Ọ -bụru l’ọo iwhe l’eeme l’ike,

bẹ yẹbedua bụ onye ọkpehu.

Nteke bụ l’ọo iwhe ikpe, ?oo onye l’e-ku iya ikpe?

²⁰Ọ -bụru m’ọo l’iswi dụ mu mma,

bẹ bụ okfu, shi mu l’ọnu l’e-me t’ikpe nma mu.

Ọ -bụru m’ọo l’ụta ta adụdu lẹ ndzụ mu,

bẹ l’oo-me goshi lẹ mu bụ onye gberu nggọ.

²¹A makwarụ-a l’ụta ta adụdu lẹ ndzụ mu,

mu ta akpa ishi onwomu,

ọle ndzụ, mu nọ bẹ lawarụ mu ashị.

²²Ọo iwhe lanụ b’a tụkoru bụru.

Ọo ya meru g’o gude mu sụ:

‘Ọotukoje ndu ụta l’adụa lẹ ndzụ whẹ

mẹe ndu ejo-ememe mebyikota.’

²³Ọobuje mgbu-ọnwu gbulahaa ndu ụta l’adụa lẹ ndzụ whẹ,

ya abụru nchịchi-ọchi

bẹ l’ooribeje whẹbe ndu ono, ụzo chiru.

²⁴E wowaru mgboko ye l’ẹka onye ejo-ememe,

o kfuchishia ndu ikpe ẹka l’iwhu.

Ọ -bụru l’ọ tọ dụ Chileke bẹ meru iya,

?ọo onye bẹ meru iya?

²⁵Ndzụ mu l’agba kparakpara

amamẹ nwa-ọgba-ọso.

Oowhe whụwhuwhu ewheghata ewheghata,

tọ dụkwanu m’ọo ụwabu ẹhu-ụtso dụ iya nụ.

²⁶Ọogba swaswaswa g’ọo nwekpereke-ụgbo,

ewhe papapa g’ọo ugo l’ezhije je ezhikfuru iwhe l’oo-ri.

²⁷Mu sụ lẹ mu l’a-zọha nggụrima ono, mu l’agụ,

swaa ẹka l’iwhu nwụa ọnu-ọchi.

²⁸Ọle mu l’atsụlekwaa egvu iwhe-ọtsulanu ono, mu l’eje,

nkele mu marụ l’ị tịi byadụ l’e-kwe

l’ụta ta adụdu lẹ ndzụ mu.

²⁹Eshi-ọwhu ikpe nmawarụ mu,

?ndẹhunu iwhe mu l’esekashiru onwomu?

³⁰Ọ tọ dụkwa m’o beru,

mu saa onwomu gbuchafu g’ọo eberugo,

bya egude ncha kwọo ẹka mu,

³¹Chileke l’a-patalẹkwa mu-a chee wuu l’ime nsụ,

nke ọwhu bụ l’uwe, mu yeru l’ẹhu

bẹ l’a-nọ asọkaa mu oyi.

³²Chileke ta abụdu madzụ gẹ mu bụ iya,

ọwhu l’abụkwanu tẹ mu saa ya okfu,

m’ọ bụ tẹ mu l’iya nangalahaa okfu l’ụlo-ikpe.

³³Ọ tọ dụdu onye egbogbo, nọ l’echilabọ anyi,

bụkwanu onye l’a-wọ anyi l’ẹka sekahu,

³⁴mbụ onye l’a-nafụ Chileke mgbọro iya l’ẹhu mu,

mee tẹ mu nmabuhu

kpakpakpa l’egvu ono, l’ooye mu.

³⁵O noo nteke mu l’e-kfu okfu g’ọnu ha mu,

mu eje atsụhe iya egvu.

Ọle ntaa bẹ mu l’ẹte adụdu ike ekfu iya.

¹“Ndzụ ọwhu, mu nọ bẹ ike iya gvụakwaru mu.

Mu l’a-gụ-zhiawho nggụrima ẹhu mu g’ọ dụ mu ree.

Mu l’e-gude lẹge obu dụ-be mu ẹji kfua okfu.

²Mu l’a-sụ Chileke t’ọ bọ nmashị mu ikpe.

T’ọ gụshiaru mu iwhe mu meru.

³Sụ iya: ?Ọo dụ ghu ree t’ị kpajẹ mu ẹhu,

mbụ t’ị jịka mụbe onye, i gude ẹka ghu mee,

gbẹ-chia bụru l’ẹtomu, ndu ejo-ememe tọru

bẹ ọnu-ọchi l’anwụje ghu?

⁴?Ọo ẹnya madzụ b’i nwe?

?Ọo gẹ madzụ l’awhụje iwhe bụ gẹ gụbedua l’awhụje?

⁵?Ọo ujiku ole, madzụ l’a-nọ-beru

bụ ujiku ole, gụbedua l’a-nọ-beru?

?Ọo awha ole, madzụ l’a-nọ-beru

bụ awha ole, gụbedua l’a-nọ-beru,

⁶meru g’o gude l’ịi-chọkashi t’ị marụ ẹka ikpe nmarụ mu,

enyokashi t’ị marụ ẹka mu meru iwhe-dụ-ẹji.

⁷Ị marụ-a l’ikpe ta anmadu mu,

ọdo bụ l’ọ tọ dụdu onye l’a-nafụ mu l’ẹka ghu.

⁸Ọo ghu bẹ gude ẹka ghu kpụa mu, mee mu gẹ mu dụ.

Ị bya ntaa bya aghakọbe t’ị laa mu l’iyi.

⁹Nyatakwa l’ị kpụru mu l’ụrwa.

?Ịi-bya akụpyashia mu tẹ mu bụru ẹja?

¹⁰I meru, a gbọo ụnwuda yee ime mu,

mu nọdu l’ẹwho kpụkobe.

¹¹I kweru mu akpọ-ẹhu yẹle anụ-ẹhu,

bya egude ọkpu yẹle ụmi-ọkpu dzegbabe mu nnanụ.

¹²Ị nụru mu ndzụ; bya egoshi l’i yeru mu obu.

Ọ bụru g’i gude nwụberu mu ẹnya

bẹ meru, mu nọdukwadu ndzụ.

¹³Iwhe ono l’owhu b’i woru

kwachia akwachi l’obu ghu.

Mu makwarụ-a l’ọo iwhe ono b’ị tụberu nke ememe.

¹⁴Ọobuje, mu l’eme iwhe-dụ-ẹji, gụ eleru mu iya l’ẹnya,

shi nno jịka l’ị tịi gụduru mu nvụ l’ẹka mu mesweru.

¹⁵Ọ -bụru lẹ mu metaru iwhe

ikpe nmarụ mu, bẹ áwhụ tsọkwaru mu.

Ọ -bụru m’ọo l’iswi dụ mu mma,

bẹ mu ta adụkwa ike apali ishi apali,

nkele iwhere onwomu dụshi mu ike, iwhe-ọtsulanu,

byarụ mu nụ l’eriwaa ishi mu eriri.

¹⁶Ọobuje, mu jeshia ọpali ishi imeli,

gụ achịlahaa nta mu g’ọo oduu-gburu-agụ.

Iimeje iwhe dụ biribiri shi nno mekata mu.

¹⁷Iimeje iwhe ọ̀whúú gude agba ẹka-ebe agbagude mu.

Iimeje t’ẹhu-eghughu ghu kabaa shii l’ẹka mu nọ.

Iimeje tẹ ndu ojọgu ghu

l’abyakfuta mu ọgu l’ọgbo l’ọgbo.

¹⁸?Ọo nụa gụnu meru, i wofuta mu l’ẹwho ne mu?

Ọ gẹge akarụ mu mma lẹ mu nwụhuru anwụhu

tẹhenu a whụde mu ẹnya.

¹⁹Ọ gẹge akarụ mu mma,

ngẹle mu ta afụta afụta owhu,

m’ọ bụ ngẹle e shi l’ẹwho ne mu

paa mu ipawhu paba mu l’ilu.

²⁰?Ọo haa agha, ujiku olemole, mu l’a-nọ-beru agvụ?

Parụ mu rọo haa, t’ẹhu tsọo mu ụtso nwanshịi,

²¹tẹhenu mu aladẹwaro ẹka ono,

l’enwee t’a adawhu azụ ọdo,

mbụ ẹka gbarụ tsụrikiti, bụru ẹkpuroochi nkụchi.

²²Ẹka ono bụ ẹkpuroochi nkụchi, bụru inyonyo,

mbụ ẹka iwhe ghalashịhuru aghalashịhu.

Ẹka ono bẹ iwhoro, dụ iya nụ bụ ẹkpuroochi.”

Zofa l’akụ iya ekpu Jobu

¹Tọ dụ iya bụ, Zofa onye Naama bya eyee ọnu sụ:

²“?Aaha oye ọnu l’igwe okfu ono, l’iikfu?

?Ndẹe gẹ l’ee-shi aharu gụbe nwoke igwe-okfu enge?

³?Ọo bẹebeebee ono, l’iikfu l’e-me tẹ madzụ dobe ọnu ndoo?

?Ọo okfu-ewenu ono, l’iikfu bẹ l’aa-taa gbọduru ghu ụja?

⁴Ị sụru woo lẹ nzhi, l’iizhi bẹ ntụpo l’adụdua,

ị sụ woo l’ị bụ onye dụkota ree l’ẹnya Chileke.

⁵Ọle nggẹ l’ọ dụ g’e shi Chileke kfua l’onwiya,

mbụ saa ọnu kfuru mabẹru ghu.

⁶Nggẹ l’ọ dụ g’e shi; o goshi ghu iwhe dụ lẹ mmamagụ,

bụ iwhe e domiru edomi.

Nkele ọkpobe mmamagụ bẹ nweru iwhu labọ.

Marụ amarụ, l’ọnodu, Chileke doberu ghu

kakwa nwanshịi amamẹ ejo-iwhe, i meru.

⁷?Ịi-dụ ike marụ iwhe dụ omilomi, dụ lẹ Chileke?

?Ịi-dụ ike chọfuta gẹ Ọkalibe-kakọta-ike beru?

⁸Ọ kakwa akpamigwe l’eli

?Ndẹe gẹ l’ii-me iya?

Ọ kakwa alị-maa omilomi ?Ndẹe gẹ l’ii-me iya?

⁹Ogologo iya kakwa mgboko-o l’owhu.

Ọsa iya ka eze-ẹnyimu l’owhu.

¹⁰Ọ -ghatadẹ kpụta ghu tụ-chia, bya ekua ghu ikpe,

?ọo onye sụru iya akpọshi?

¹¹Ọ marụ ndu l’aghọ ụgho.

Ọobuje, ọ whụa ejo-iwhe ya ahụbe iya ama?

¹²Gẹ l’ee-shi t’onye l’enwee uche marụ ágụ dụkwa ẹhuka

amamẹ ọzuta adaka t’o meje g’ọo madzụ.

¹³I -doberu Chileke obu ghu chịriri,

bya amachịaru iya ẹka ghu,

¹⁴Ị -haa oome iwhe-dụ-ẹji ono, i yeru ẹka ghu,

t’i kweje t’ejo-iwhe nọdu l’ibe ghu,

¹⁵ọo ya bụ, gụ apalilahaa iwhu

apali, iwhere te emehedu ghu.

Gụ akpọru akpọru, egvu ta atsụdu ghu.

¹⁶Nsogbu ghu l’owhu bẹ l’ịi-nyazọshi.

Ya abụwaru-a anyata bẹ l’ịi-nyatajẹ iya

g’ọo ẹgube-ẹ mini l’abyagejee, ya alaa.

¹⁷Ndzụ ghu abya egbuchafu ka iwhoro echi eswe.

Ẹkpuroochi, shi gbaa lẹ ndzụ ghu

l’a-bya enwua whoo g’ọo iwhoro ụtsu.

¹⁸Ẹnya l’a-dụ ghu l’ẹka Chileke nọ,

shi nno mee t’obu shihu ghu ike.

Chileke l’e-kpuchi ghu, mee t’ị tụta ume ree.

¹⁹Ịi-zẹe azẹe, ya eje adụ onye l’e-ye ghu egvu.

Igweligwe madzụ l’a-nọ

awukfuta ghu t’i meeru whẹ ree.

²⁰Ọle ndu ejo-ememe bẹ ẹnya l’a-nyịhu.

Whẹ ta awhụdu ụzo, whẹ l’e-shi gbalaa.

Iwhe l’a-whọduru whẹ nụ nwẹkiya bụ

tẹ whẹ tụa ume ikpazụ.”

Ọnu Jobu l’eyeru Zofa

¹Tọ dụ iya bụ, Jobu bya eyeeru iya ọnu sụ:

²“Ọo unubẹdua bụ ọnu, l’ekfuru ọha;

ọ tọ dụdu onye l’atụ iya ẹgu.

Unu nwụshihu, mmamagụ etsoru unu nwụhu.

³Ọle ọ kwa g’unu nweru uche bụ gẹ mbẹdua nweru.

Mu te enwekwa ẹnya ọolwa l’ẹka unu nọ.

Ọ tọ dụdu onye l’amaa iwhe ono, unu l’ekfushi.

⁴Ndu ọnya mu l’achị mu ọchi,

lẹ mụbe onye shi akpọ-kuje Chileke, ya aza mu.

Whẹ l’achị mu ọchi, lẹ mụbe onye dụ chịriri,

bụru onye ụta l’adụa lẹ ndzụ mu.

⁵Ndu ẹhu dụ guu ta amadụ iwhe

bụ l’iwhe-ọtsulanu byarụ madzụ,

nke whẹ bụ l’o noo gẹ l’ọo-dụ onye ọkpa chiru ẹturu.

⁶Ibe ndu abalịdegvu bẹ dụ guu,

ndu l’akpatsu Chileke iwe l’akpa lẹ ntụsaru-ẹhu,

mbụ ndu ono, l’anọje apawhe ọgvu whẹ l’ẹka ono.

⁷Unu kpata ụnwu anụmanu ishi tẹ whẹ kuzhiaru unu iwhe.

Ọ dụa unu akpata ụnwu ẹnu,

l’ewhe l’eli ishi tẹ whẹ karụ unu iwhe.

⁸Ọ dụa unu akpata iwhe nọgbabe ndzụ lẹ mgboko ishi

tẹ whẹ kuzhiaru unu iwhe,

ọdumeka unu akpata ụnwu ẹma, nọ lẹ mini ishi

tẹ whẹ karụ unu g’iwhe dụ.

⁹Ọ tọ dụdu iwhe ono, mu gụshiru l’ẹte amaa

l’ọo Onye-Nwe-Ọha bẹ iwhe-e, shikota l’ẹka?

¹⁰Ọo Chileke bẹ ndzụ iwhe lile, nọ ndzụ dụkota l’ẹka.

Ọo ya bẹ gude ume madzụ kpaa-whuu l’atụ.

¹¹Nchị l’egeje okfu egege, ẹgube ono,

ire l’adaleje nri adale?

¹²Ọ kwa ndu bụ ọgurenya bẹ l’amajẹ mmamagụ.

Ọ bụru nteke madzụ nọru ogologo ndzụ

bẹ iwhe l’edoje iya ẹnya.

¹³Mmamagụ yẹle ọkpehu bẹ dụ Chileke l’ẹka.

Mgbazhi yẹle iwhe-odo-ẹnya bụru nkiya.

¹⁴Iwhe o tsukposhiru etsukposhi

ta adụkwa onye sụru iya atụkwa-zhi.

Onye ọ tụru mkpọro ta adụkwa onye sụru iya atụfu.

¹⁵Ọobuje Chileke -sewhu mini azụ t’ọ bọ chị, anwụ akpọbe.

Ọ tụhaa mini ẹka t’ọ chịa; alị l’owhu abụru utso nkụchi.

¹⁶Ike yẹle mmamagụ bẹ dụ iya l’ẹka.

Onye a ghọru ụgho yẹle onye ghọru ụgho

bẹ tụko nọdu Chileke l’ẹka.

¹⁷Ndu mgbazhi bẹ l’ọogbabeje ọkpa ọto duta whẹ dufu.

Ndu ikpe bẹ l’oomeje, whẹ abụru ndu-eswe.

¹⁸Iwhe onye eze gude bụru eze bẹ Chileke l’anafụje iya;

woru nkịriba-ẹkwa whebe iya l’ukfu g’ọo ọhu.

¹⁹Ndu l’agbajẹ ẹja bẹ l’ọogbabeje ọkpa ọto duta whẹ dufu.

Ndu ọkpehu dụ bẹ l’ọokwa-tsuje ọkpehu, dụ whẹ nụ.

²⁰Ndu e gude ire whẹ ẹka bẹ

l’oomeje ọnu abụru whẹ shọngu.

Ndu bụ ọgurenya bẹ l’ọonafuje amamiwhe,

whẹ l’egudeje ele ẹnya l’iwhe.

²¹Ndu a marụ ẹwha whẹ bẹ l’oomeje kpakpa-wewe.

Ndu ike dụ bẹ l’ọonashije ike, whẹ nweru.

²²Oogoshije iwhe dụ omilomi, nọ l’ọochi.

L’oomeje t’iwhe, dụ omilomi l’ẹkpuroochi gbafụta iwhe

²³Ookutseje mba ekutse, l’oomebyije mba emebyi.

Oomeje tẹ mba zụ̀a azụ̀zù saa ọsa,

l’oomeje tẹ mba gbaa nnanụ nnanụ.

²⁴Oomeje tẹ ndu l’achị mgboko be enwe uche,

mee tẹ whẹ tsoru ọma-ẹgu,

echi-ụzo l’adụa ghajẹ amaga-ewhurewhe.

²⁵Whẹ l’anọje atsoku atsoku l’ọochi ẹka iwhoro l’adụa.

L’oomeje whẹ, whẹ akpọ kulakula

g’ọo onye mmẹe l’atsụ.

¹“Mu gudewaa ẹnya mu whụ iwhe ono g’ọ ha.

Mu gudewaa nchị mu nụkota iya, o doo mu ẹnya.

²Iwhe ono, unu marụ bẹ mbẹdua makwarụwho.

Mu te enwekwa ẹnya ọolwa l’ẹka unu nọ.

³Ochikwaa l’ọ dụ mu nke tẹ mu

kfuru yeru Ọkalibe-kakọta-ike,

mbụ tẹ mu lẹ Chileke tụa ya.

⁴Unubẹdua l’onwunu bụ ejire bẹ unu gude echigbobe mu.

G’unu ha l’ẹhu l’ẹhu bụ

ọga-lẹ-mkpa madzụ bẹ unu bụkota,

unu sụ l’unu l’eme ọgvu.

⁵Iwhe g’aka mma bụ, t’unu dobe ọnu unu ndoo,

mbụ l’o noo g’abụru unu ọoma ágụ.

⁶T’unu ngabẹ nchị l’oke ọnu ọwhu mbẹdua l’eye.

T’unu ngabẹ nchị nụa okfu ọwhu, shi mu l’ọnu.

⁷?Unu l’e-gude ejire ono, unu

l’adzụshi ekfuchita ọnu Chileke tọo?

?Unu l’e-gude okfu ẹregede ono,

unu l’ekfukaa ekfuchita ọnu iya?

⁸?Unu l’e-gude ọbo madzụ ẹbo agbarụ iya ọdzori?

?Unu l’agọ-chitaru Chileke tọo?

⁹?Ọo dụduru nụ unu lẹ ree

mẹ Chileke -nyochalahaa unubẹdua?

?Unu l’a-dụ ike ghọ-gbua ya ẹgube ono,

unu l’aghọ-gbuje madzụ mmaanụ?

¹⁰Chileke bafụtajekwaru unu mba

mẹ unu bọnyaa madzụ ẹbo l’edomi.

¹¹?Ọ-dụ-biribiri iya te eyedu unu egvu?

?Egvu iya te egudeshidu unu?

¹²Nkọroshi nkọroshi ono, unu l’ekfukaa

bụkwa okfu-ẹtu, wụlahuru lẹ ntụ.

Ekfufu ono, unu l’ekfufu iya onwunu l’ẹhu

bụru iwhe wụlahuru l’ẹpoto.

¹³Tẹ mu nụru unu iwhe.

T’unu haa mu rọo tẹ mu kfua okfu.

Iwhe l’e-me nụ, t’o mee.

¹⁴Mu l’e-tsebe ndzụ mu etsebe l’ọnu ogu,

mbụ lẹ mu l’a-tụta ndzụ mu atụta l’ọnu nvọ.

¹⁵A makwarụa l’ọowhu mu awhụwhu.

Ụzo chiakwaru mu echichi.

Ọle mu l’a-kfụlekwaru iya-a l’iwhu gbaa onwomu.

¹⁶O noo iwhe l’a-dzọ mu ndono,

nkele ọ tọ dụdu onye l’ẹte atsụ

egvu Chileke l’a-dụ ike kpọ iya iwhu.

¹⁷Unu ngabẹ nchị ree l’okfu mu.

T’iwhe, mu l’ekfu tsua unu etsu lẹ nchị.

¹⁸Mu kwakọbewaru okfu ẹhu mu gẹ l’ọo-dụ,

iwhe mu marụ bụ l’aa-gbarụ mu ọdzori.

¹⁹?Ọo onye l’a-fụta sụ l’ọ waa iwhe mu meru ndọwa?

O -nwezhiwaru, mu emechia ọnu nwụhu.

²⁰Sụa, gụbe Chileke, uzhi iwhe labọ kpụ

bẹ mu l’aryọ t’i meeru mu, i -mewa iya,

bẹ mu te edomiduru ghu onwomu edomi:

²¹Haa mu ọda ẹka l’ẹhu,

gụ ahaa mu oye egvu ono, l’iiye mu.

²²Ọo ya bụ: i -kua mu oku, mu aza ghu,

ọdua, gụ ahaa tẹ mu kfuje ekfukfu,

t’i yejeru mu ọnu.

²³?Ọo mmeswe ole bẹ mu meru,

mbụ ?ọo iwhe-dụ-ẹji ole bẹ mu metaru?

Goshi mu ẹka mu mesweru yẹle iwhe-dụ-ẹji, mu metaru.

²⁴?Ndẹnu g’o gude l’iiwocha iwhu

ghu ewocha l’ẹka mu nọ, agụ mu l’onye ọhogu ghu?

²⁵?Ọo mụbe mkpẹekwo,

whẹrewhere l’apa apapa bẹ l’ii-ye egvu?

?Ọo mụbe mkpaba, a whụfuru awhụfu bẹ l’ịichi ọso?

²⁶Iwhe i deshiru kpua mu l’ishi, bẹ bụ iwhe dụ ejo ẹji,

mbụ l’i wotaru ejo-iwhe,

mu metagbaberu l’okorọbya tukobe mu l’ishi.

²⁷Ị chịru mu ọkpa ye l’ẹgbirigba,

enyowhe t’ị marụ gẹ mu harụ ọkpa ha iya,

egewhe igbiri-ọkpa mu ngge

t’ị marụ ẹka mu dzọgbaberu ọkpa.

²⁸Ọ kwa ẹgube ono bẹ madzụ

l’eshije mebyihu g’ọo iwhe rehuru erehu,

mbụ g’ọo uwe, mkpu tapyashịru.

¹“Madzụ, nwanyị nwụru bẹ ndzụ iya dụ mkpirikpi,

ọ bụru nsogbu bẹ jiru iya nụ.

²Ookpofutaje jaa g’ọo fụlawa, ntaa ntaa ya atụgboshihu.

Ọo g’inyonyo l’emihukebeje ẹgwegwa

bụ gẹ madzụ l’emekebeje ngwa nwụhu.

³Chileke ?Ọ bụru ẹgube onye dụ nno b’ị swọberu ẹnya?

?Ọ bụru onye dụ nno b’i gude

bya t’i kpee mu ikpe l’atatiwhu ghu?

⁴?Oo onye l’a-dụ ike shi l’iwhe l’aasọ nsọ

wofuta iwhe l’ẹte asọ nsọ? Ọ tọ dụdu!

⁵Eshi-ọwhu ị gụwaru ujiku ole,

madzụ l’a-nọ-beru ndzụ ọgu chịru l’ẹka.

Eshi-ọwhu ọnwa ole, madzụ l’a-nọ bụ ghu b’ọ nọ l’ẹka,

ị kabuwaa nteke madzụ l’ẹte anọghata,

⁶ọ nụ iya bụ, t’i wofu ẹnya l’ẹka madzụ nọ, parụ iya haa,

t’o jee ozhi, ọ lwarụ ụwa ejeje

g’ọo onye e buru ozhi ebubu.

⁷Oshi, gvuru egvuru bẹ ụzo te echidu.

Nkele e -gbutsua ya egbutsu; ya amịta ọdo l’ukfu iya,

ọwhu, ọ mịtaru nke ọ̀whúú adzụhu nọdu ndzụ.

⁸O behuduru ọgbaragbu oshi ono rehu erehu l’ime alị,

o behuduru ukfu iya nọdu l’alị nwụhu,

⁹ọ nụa ẹgburu mini, ya akpọ-futa,

bya erwua irwu g’ọo oshi ọ̀whúú.

¹⁰Ọle madzụ l’abụje, ọ -nwụhuwaa, b’ọ nwụhuwaru.

Ọ -tụwaa ume ikpazụ, bẹ nkiya gvụwaru.

¹¹Ọo gẹ mini l’anọje ekoshi udzu l’eze-ẹnyimu,

ọ bụru gẹ mini ọnu-iyi l’asọ-buhuje asọso tahụ,

¹²bụ gẹ l’ọobuje; madzụ zẹwaa l’ọnwu,

ọ tọo gbalihuhedu agbalihu ọdo.

Madzụ ta abyadụ l’etehu etehu jeye g’igwe l’anọ-beru,

t’a bya l’eteta iya eteta lẹ mgbẹnya.

¹³Iwhe gẹge adụ mu ree bụ,

t’i je edomia mu edomi l’alị-maa.

Ọ gẹge adụ mu ree t’i kpuchia mu l’iwhe

jeye nteke ẹhu-eghughu ghu l’a-gvụ.

Ọ gẹge adụ mu ree t’ị tụ-bua

nteke bụ, a nọ-beru, gụ anyata mu.

¹⁴Madzụ -nwụhuwaa ?ọo-nọdubaa ndzụ ọdo?

L’abalị olemole, mu l’e-je ozhi mkpọnwuru-a, mu l’eje,

bẹ mu l’a-nọdu ngabẹ jeye

nteke l’aa-tọfu mu l’ẹgbu ono.

¹⁵I -kua mu oku nteke ono, mu aza ghu.

Eghoro mụbe onye ono, i gude

ẹka ghu mee abya adụlahaa ghu.

¹⁶Nteke ono bẹ l’ịi-gụje ndzọkpa mu ọgu,

i tii nyowhehedu t’ị marụ ẹka mu meru iwhe-dụ-ẹji.

¹⁷Emeswe, mu mesweru ghu bẹ l’ii-woru lichia l’ẹda,

woru iwhe kpube l’ejo-iwhe, mu metagbaberu.

¹⁸Ọo g’ugvu l’ekpojashihuje zekposhihu,

ọ bụru gẹ l’aawhọfuje eze-ẹwhuru l’ẹka ọ dụ,

¹⁹mbụ l’ọo gẹ mini l’anọje asashị ẹwhuru asashị,

ọ bụru gẹ ukporo-mini l’ekpojashije alị ekpojashi,

bụ gẹ l’iimebyije iwhe madzụ l’ele ẹnya iya.

²⁰Madzụ b’ị ka ẹkuku, shi lẹ gbururu jeye lẹ gbururu.

I mee kparamụ, ya atọhu

Ii-meje t’iwhu gbanwee madzụ m’ị chịfu iya t’ọ la maa.

²¹Ọ -bụru l’aakwabẹ ụnwu, onye nwụhuru anwụhu ugvu,

bẹ l’ọo tọo mahẹdua ono.

Nteke bụ l’eme ụnwu iya iwhe-iwhere,

bẹ l’ọo tọo whụjedu iya.

²²Iwhe ọ marụ nwẹkiya bụ iwhe l’eme iya ẹhuka l’ẹhu.

Áwhụ, l’ọogu bụru áwhụ onwiya.”

Elifazu l’ekfu lẹ Jobu nmawarụ onwiya ikpe

¹Tọ dụ iya bụ, Elifazu onye Temanu bya eyee ọnu sụ:

²“Onye marụ ágụ, ?ookfuje okfu, l’enwee ishi?

?too gudeje mkpọkoro okfu eri nri?

³?Oogudeje okfu l’abẹe urwu eme t’o kpefu onwiya?

?too gudeje okfu, l’abẹe l’iwhe eme t’o kpefu onwiya?

⁴Ọle onye tsoberu ọnu gụbe Jobu,

bẹ l’e-woru ọtsu egvu Chileke dobe l’okotazụ,

mbụ l’onye ọbu bẹ l’ịi-kpọshi okfu anụ Chileke.

⁵Ọo ẹji, l’iime meru i gude ọnu ghu ekfu ụdu okfu ono.

Ọ bụru iya meru ị bụru ire nto.

⁶Ọ kwa ọnu ghu b’i gude anma onwoghu ikpe.

Ọ tọ kwa mbẹdua l’anma ghu ikpe.

Ọ kwa iwhe l’iikfu l’ọnu ghu

l’agba ẹka-ebe agbagude ghu.

⁷?Ọo ghu bụ onye mbụ, e

vugezhia ụzo nwụa lẹ mgboko-o?

?Ọo dụ g’i vu ugvu ụzo nọdu?

⁸?Ị ngabẹbuwaru nchị l’idzu, Chileke l’achị?

?Tọo l’ọo ghu marụ ágụ nwẹkinyi ghu?

⁹?Ọo gụnu b’ị marụ, anyịbedua l’amaa?

?Ọo gụnu bẹ doru ghu ẹnya, l’ẹte edoo anyịbedua?

¹⁰Ndu anyi nwụtaru mmamagụ l’ẹka whẹ bụ

ndu ishi-ẹwo mẹe ndu bụ ọgurenya,

ndu ono bụkotakwa nna ghu ọgurenya.

¹¹Obu, Chileke l’adụ ghu ?o pehuru ghu l’ẹnya,

tọo okfu ono, anyi tọ nwẹhu ekfuru ghu?

¹²?Ọo gụnu meru égò swee ghu?

?Ọo gụnu meru ẹnya l’eke ghu vavava,

¹³nke t’i doberu Chileke ẹhu-eghughu,

tẹmenu okfu, dụ ẹgube ono l’afụshikaa ghu l’ọnu?

¹⁴?Madzụ bụ gụnu nke t’ẹgbazhi ba adụ iya l’ẹhu?

Madzụ, nwanyị nwụru ?ọo bụ gụnu nke t’ọ dụ chịriri?

¹⁵Ọ -bụru lẹ Chileke te egudedu ire ndu dụru iya nsọ ẹka,

ndu-ojozhi-imigwe ta adụkota ọcha l’ẹnya nkiya,

¹⁶?oo chia madzụ bẹ l’oo-gude ire iya ẹka,

mbụ madzụ ono, l’eme ahụma; arwụ alị akpa ntụ l’ẹnya,

angụ ejo-iwhe g’ọo onye l’angụ mini?

¹⁷Ngabẹru mu nchị, tẹ mu mee t’iwhe doo ghu ẹnya,

tẹ mu kọoru ghu iwhe mu gude ẹnya mu whụ.

¹⁸Ọo iwhe ndu mmamagụ kfuru tọgbo iya ẹba.

Ọ bụru ndụ-ichee whẹ bẹ kọru whẹ iya nụ,

tọ dụ ọwhu whẹ domiru whẹ edomi.

¹⁹Ọo ndụ-ichee whẹ ono gẹdegede b’a nụru alị-a,

tọ dụ onye shi eshishi, ghajaru l’echilabọ whẹ.

²⁰Sụa, onye ejo-ememe bẹ l’atajẹ

kpọkpokpo l’ẹhu-ụwhu jeye ndzụ iya agvụ.

Ọ bụru ẹgube ono b’ọ dụ onye akirishi

l’ime awha ole, e doberu iya t’ọ nọo l’eliwhe-e.

²¹Iwhe l’anọje awhụ iya ẹwhu lẹ nchị bụ n-yemegvu.

Iwhe mee g’ọ dụru iya lẹ ree,

o noo nteke ndu emebyi l’abakfutaje iya.

²²O to kwejedu lẹ ya l’e-shi l’ẹkpuroochi ono wafụ,

nke iya bụ l’ọo ogu-ịgba bẹ ya l’e-shi laa.

²³Ootsojeru aghawhe, mbụ yẹbe

onye ono, udele l’e-megee kpaa nri l’ẹhu.

Ọ marụ lẹ mbọku, ẹkpuroochi l’a-gba bẹ tẹwaru l’ụkfu.

²⁴Iwhe-ẹhuka yẹle awhụ l’eye iya egvu.

Ọ kariru iya ẹka g’ọo onye eze, kwakọru nke ọgu.

²⁵Iwhe kpatarụ iya nụ bụ l’ootsuru Chileke ẹka l’ikpobu,

anawheru Ọkalibe-kakọta-ike nkemu.

²⁶Ookwejeru iya kpọkponyi,

parụ igbidigbi iwhe shihuru ike,

l’oo-gudeje ezeru ọgu, sụ tẹ yẹle iya lwụa ọgu.

²⁷A makwarụ-a l’iwhu l’aha iya dzụladzula,

anụ l’atsụ iya yọkfuyokfu l’ukfu.

²⁸Ẹka l’oo-megee buru bụ l’okorobo mkpụkpu,

o megee buru l’ụlo, l’adụa onye bu iya nụ,

l’ụlo, a harụ, ọ bụru mkpọkoro ụlo.

²⁹Ọ tọo byadụ l’e-nweru iwhe,

ẹku iya ta abya l’a-nọliberu.

Iwhe o setaru eseta ta abya l’e-jegbakota mgboko.

³⁰Ọ tọo byadụ l’a-nafụ ẹkpuroochi.

Ọo ire-ọku l’e-kepyashi ome, o futaru,

Chileke egude udzu-ọnu iya zhikashia igu, ọ tụru.

³¹T’ọ bọ jekwa ome onwiya eswe

sụ lẹ ya l’akpọru obu eye l’iwhe-iwhoro

nkele ọo iwhe-iwhoro l’a-bụ urwu iya.

³²Ụgwo iwhe l’oome bẹ l’akfụ-dzu iya akfụ-dzu,

tẹmenu ndzụ iya agvụ.

Ẹkali iya ta abya l’a-ja ajaja kpuru gayii.

³³Ọo-dụ g’ọo vayịnu, a jikoshiru akpụru iya l’okurutuu,

mbụ l’ọo-dụ g’ọo oshi ólivu, tụ-geeru igu rishihu.

³⁴Ọgbo, l’ẹte amaa Chileke l’a-gbarụ ẹka nwa,

ọku etsua ibe ndu l’eri n-wọlazu.

³⁵Ẹgube ndu ono l’anọje eyewhe ime okfu,

emewhe ejo-iwhe, iwhe jiru whẹ obu bụru ẹregede”.

Jobu l’ekfu lẹ ndu ọnya iya dụru iya ẹhuka

¹Tọ dụ iya bụ, Jobu bya eyee ọnu sụ:

²“Mu l’anụjehaakwaa ẹgube okfu ono, unu l’ekfukaa.

Ọshi ọwhu, unu l’ayọru mu bụkwa mkpatsu áwhụ.

³?Ọ fụtaru l’unu l’a-kwawarọo

kfugburu okfu, l’enwee ishi?

?Ọo gụnu bẹ kpaliru unu ooye ụdu ọnu ono, unu l’eye?

⁴Ọ bụ l’ọo unubẹdua b’ọ dụru g’ọ

dụru mu mẹ ya abụkwaru

g’unu l’ekfu bẹ mu gẹge anọ ekfu.

Mu gẹge agakọbeje okfu agakọbe

gude atụ unu ọnu l’ẹhu; akụru unu hụu.

⁵Ọle olu okfu mu gẹge agba unu ume,

okfu njima, mu gẹge anọ ekfuru unu

g’e-mekwa t’ẹhu gụa unu n-whe.

⁶Ọle ọoburu, mu -kfua okfu,

iwhe l’eme mu nụ emele mu-a l’ẹka l’oome mu.

Nteke bụ lẹ mu doberu ọnu ndoo, tọ ka mu mma.

⁷Chileke mewaru, ike gvụ mu.

Ndibe mu l’owhu b’o meru, whẹ bụru kpurupyata.

⁸O mewaru mu, mu ghajọshihu aghajọshihu.

O noo bụru iwhe l’agba ẹka-ebe agbagude mu.

Ẹhu, mu jọru bụkwaruwho iwhe

l’agba ẹka-ebe agbagude mu.

⁹Chileke bẹ gude ẹhu-eghughu

iya lajashịa mu nwịrinwiri.

Ọ kpọru mu ashị, atarụ mu kpọkpo-kpọroro.

Onye ọhogu mu ono l’akọ mu ẹnya akọko.

¹⁰Ndiwhe l’anọje atụ mu ọnu l’ẹhu,

echi mu ẹka l’ishi

agbagba-nchị gude eme mu iwhe-iwhere.

Whẹ kpakọru mu akpakọ etso mu okfu.

¹¹Chileke bẹ nwuru mu nụ ndu l’amaa Chileke,

ọ tụru mu mgbahẹka,

mu je adaba l’ẹka ndu ejo-ememe.

¹²Ẹhu shikwa dụ mu guu, ọ bya

akụa mu gwogwogwo wụshi.

Ọ pyịtaru mu l’ẹkpiri gwee mu ogwe uswe.

O doberu mu, ege mu ishi tẹ ya meka mu iwhe.

¹³Ndu l’agbarụ iya akfụ

bẹ gbarụ mu mgburumgburu.

Ọonoje asụjashi mu meji,

ọtso-ilu mu awụshi l’alị,

imiko mu ta adụje iya.

¹⁴A nọdu l’ọ kẹru mu ọru, ya akẹkwase mu ọdo.

Oozhije whaa zhikfuru mu g’ọo ojọgu.

¹⁵Mu chịtaru uwe áwhụ kpube

l’akpọ-ẹhu mu, woru iwhu dẹe l’alị.

¹⁶Mu ryatawaru ẹkwa, ẹnya kekota mu uswe-uswe,

ẹnya kochia mu ekochi, gbakọta mu ọochi.

¹⁷Obenu lẹ mu tẹke eyebudua ẹka l’oome iwhe ike,

ekfukfu, mu l’anọje ekfu anụ Chileke l’edoje rịsaa.

¹⁸Gụbe alị, be ekwechikwa iwhe lẹ mee mu!

T’ẹkwa, mu l’arya ba adamihukwa adamihu!

¹⁹Mbụ lẹ ntaa bẹ onye ẹka-ebe mu nọkwa l’ime igwe.

Onye l’agbarụ mu ọdzori nọkwa l’imeli.

²⁰Ndu mu lẹ whẹ l’eshi ọnya bẹ l’akọ mu ọnu,

onye mu l’akwashịru ẹnya-mini bụ Chileke.

²¹T’onye ọdo ryọnuaru mu Chileke,

ẹgube ono, madzụ l’aryọ-chijeru ọnya iya iwhe.

²²Nkele o whuduwaru mu-a awha olemole, mu anwụhu,

mbụ lẹ mu l’abyawaa ooje

l’ụzo ono, bụ mu jewa iya,

mu eje alwawhuhe azụ ọdo.

¹“Ume l’ebuhukwa mu ebuhu.

Ndzụ mu l’atọhukwa atọhu.

Ilu saakwaru ọnu ngabẹru mu.

²Ndu ewenu bẹ nọ-wheru mu mgburumgburu.

Ẹhuka, whẹ dụru mu l’emeje, mu awhụ-rwushi ẹnya.

³Jiko Chileke, nanụa mu mkpalẹka,

l’ọ tọ dụkwa onye ọdo, l’a-dụ ike asụbe onwiya

l’itumu gude gbata mu.

⁴Ẹkpa mgbamego whẹ b’i mechiru emechi,

t’ọ bọ dụ iwhe l’edoje whẹ ẹnya.

Ọo ya bụ, be ekwekwa tẹ whẹ tụa okoo kpua mu.

⁵Onye jịkaru ndu ọnya iya gẹ

l’eeshi t’iwhe rwube iya ẹka,

bẹ ẹnya l’e-megee nyịhu ụnwu iya.

⁶Chileke meru mu, mu bụru onye ndu ọdo l’atụ lẹ ntọnu,

bya abụru onye ndu madzụ l’avụru ọnu-mini.

⁷Mu gụwaru áwhụ jeye mu l’awhụ inyoki-inyoki,

ẹka l’ọkpa kakfụ-geeru mu akakfụru,

mee mu, mu l’atụ sẹesee g’ọo inyonyo.

⁸Ndu obu whẹ gụru iwhoro bẹ

ishi nwụru kpaa l’iwhe ono.

Ndu ụta l’adụa lẹ ndzụ whẹ vọru ọku ghụa ẹhu

l’ẹka ndu l’amaa Chileke nọ.

⁹Ọle mee eli mee alị, bẹ onye dụ

chịriri bụlekwaa iwhe ọ bụ,

onye ẹka iya dụ ọcha je l’a-nọ aka ike aka eje eje.

¹⁰Unubẹdua g’unu ha; t’unu byadaa g’unu l’abyajẹ.

Ọ tọ dụdu onye marụ ágụ,

mu l’a-whụ l’ime unu m’ọo onye lanụ.

¹¹Mbọku, mu l’a-nọ-beru ndzụ ghatakwaru,

iwhe mu tụberu nke ememe ta adụdu ọwhu nweru ishi.

O nokwawho g’ọ dụ iwhe l’agụ obu mu.

¹²Unubẹdua bẹ meru ẹnyashi ọ bụru eswe.

Unu -whụa ẹkpuroochi, bẹ unu l’asụje

l’iwhoro l’abyawaa adụdu.

¹³Ọ -bụru l’ọo alị-maa bụ mkpakọ uwhu, mu l’ele ẹnya iya.

Ọ -bụru l’ọo ẹkpuroochi bẹ mu l’a-gba ugbooshi mu zẹe.

¹⁴Ọ -bụru lẹ mu sụru ilu l’ọ bụ nna mu,

bya ekua mgbashiride ne mu, m’ọ bụ kua ya nwune mu,

¹⁵?ọo gụnu bẹ mu l’e-lehunu ẹnya iya?

?Ọo onye l’a-sụbaa mu l’ọwaa iwhe mu

l’a-nọ ele ẹnya iya ndọwa?

¹⁶?Oo-tsoru mu bahụ l’alị-maa tọo gụnu?

?Anyi l’iya l’a-tụko bụru wuu l’ime alị tọo gụnu?”

Byilidadu l’abarụ Jobu mba

¹Tọ dụ iya bụ, Byilidadu, bụ onye Shuwa bya eyeeru iya onu sụ iya:

²“?Ọo nteke ole bẹ l’ii-donyaa chọchocho ono dobuhu?

Bụru onye nweru uche, gụ ahaa t’anyi kfua okfu.

³?Ọo gụnu meru ị gụa anyi l’anụmanu?

?Ọo gụnu meru i kua anyi ndu mmaanụ?

⁴Gụbe onye ẹhu ghutaru eghu;

ị lajashịa onwoghu nwịrinwiri.

?Aa-gbakashịhu haarụ ghu mgboko-o nwẹka ghu?

?Aa-whọfu eze-ẹwhuru pafụru ghu l’ẹka o shi dụ?

⁵Oryọku onye ejo-ememe b’a whụ-nyiakwaru.

Ọku, ọ kpọberu te enwuhedu enwu.

⁶Iwhoro, shi ngashịa ụlo iya bụwaa ọochi.

Oryọku, o shi dokube onwiya bẹ nyịhuwaru nụ.

⁷Ọkpa ono, o shi egudeje adzọjashi alị

bẹ kụgbabe-gewaru iya akụgbabe.

Iwhe ọ gbarụ ikumu iya bẹ iya chitaru iya tụa gbaa l’alị.

⁸O gude ọkpa iya kpọru

gẹngu-gẹngu-gẹngu je adaba l’ụgbu.

Ọ bụru l’eli igbudu bẹ l’oo-je ije.

⁹Ọnya bẹ nmatarụ iya

l’ichirukfu-ọkpa, igbudu tụa ya sede.

¹⁰E liberu iya ọnya l’alị,

gbabẹru iya igbudu l’echi-ụzo.

¹¹Iwhe l’eye egvu l’emeje, egvu atsụ iya ibẹka ibẹbo.

Ẹka ọ dzọru ọkpa, ya etsokfuru iya.

¹²Ẹgu bẹ mewaru iya, ike ta adụhe iya,

eze iwhe-ọtsulanu kfụwaru

ngabẹ t’o fụaru iya nteke ọ darụ.

¹³Ẹhu-ba-dụ-mma bẹ ripyashiwaru iya akpọ-ẹhu.

Oke ẹhu-ba-dụ-mma tụkowa iya ẹka l’ọkpa tajishia.

¹⁴A kpụru iya wuru-wuru kpụfu l’ụlo iya ono,

bụ ẹka o shi kpọru obu ye,

dụ-be iya ẹka l’ishi je enwuru nụ onye eze n-yemegvu.

¹⁵Iwhe nọ l’ụlo iya ta adụdu ọwhu ẹka iya dụkwadu,

iwhe e woru kpua l’ụlo iya bụ ọku nshị-egbe.

¹⁶Ọgbaragbu iya bẹ nọdu l’ime alị kpọo nkụ,

ẹkali iya nọdu l’imeli nwụa lwaa.

¹⁷Ọ bụwaa onye a nyọharu anyọha lẹ mgboko-o,

bụru onye l’ẹte enwehee ẹwha l’alị-a.

¹⁸A chịfuru iya l’ẹka iwhoro dụ,

chịba iya l’ẹka ọochi gbarụ,

bya achịfu iya achịfu lẹ mgboko.

¹⁹O to nwedu nwa, t’o nwe ẹpa l’ibe whẹ l’owhu,

t’o nwe onye whọduru nụ l’ẹka o shi buru.

²⁰Ọnodu ono, ọ nọ bẹ nwụru ndu ụzo ẹnyanwu-arịba

akpata oyi l’ẹhu, bya alaa ndu

ụzo ẹnyanwu-awata ẹhu vuruvuru.

²¹Sụa, ọ kwa nno bẹ l’ọoduje

l’ibe onye l’eme ejo-iwhe.

Ọ bụru ẹgube ono bẹ l’ọoduje l’ibe onye l’amaa Chileke.”

Ọnu Jobu l’eyeru Byilidadu

¹Tọ dụ iya bụ, Jobu bya eyee ọnu sụ:

²“?Ọo nteke ole bẹ unu

l’akpanyaa mu ẹhu ọwa kpaberu?

?Ọo nteke ole bẹ unu l’a-ha ogude

okfu egwe mu ryaaryaa ọwa, unu l’egwe mu?

³Ntekenteke bẹ unu l’anọje akọ mu ọnu,

iwhere ta adụ unu l’ẹka unu l’abya mu l’iwhu.

⁴Ọ -bụru nụ m’ọo ire-lanụ lẹ mu shiswewaru ụzo bẹ,

emeswe, mu mesweru bụkwa mu b’ọ dụ swiru.

⁵Unu -sụ m’ọo l’unu ka mu mma,

sụ lẹ nsogbu, byarụ mu nụ bẹ shi l’iwhe mu metaru,

⁶Ọ kwa iya bụ t’unu marụ l’ọo Chileke bẹ meru mu ẹji,

woru ụgbu iya gebuta mu.

⁷Mu chiru mkpu sụ l’eemekwa mu ẹji,

tọ dụ onye yeru mu ọnu.

Mu kushia oku sụ t’a gbaarụ mu mkpu,

tọ dụ onye harụ mu enge.

⁸Ọo Chileke bẹ gude mgbodo gbabuta mu ụzo

gẹ l’ee-shi tẹ mu ba ghata,

woru ẹkpuroochi gbachia ụzo ẹka mu l’eeshije.

⁹Ugvu, mu shi nweru b’ọ

gabẹleruwho ẹka nafụ mu,

bya eye ẹka kputa mu okpu-eze, mu shi kpuru.

¹⁰Ọ kụru mu gwoogwoo ibẹka ibẹbo wụshi,

mee mu, mu gvụ gẹ mu gvụru ẹgube-ẹ.

Iwhe ẹnya iya dụ mu b’o

whefuru g’ọo onye whefuru oshi.

¹¹Ọ vọru ọku ghụa ẹhu l’ẹka mu nọ, gụa mu l’ọhogu iya.

¹²Ndu ojọgu iya l’abya l’ike l’ike abyakfuta mu ọgu.

Whẹ buwaru ose-ọgu gude kewhe mu ekewhe,

tụwaa ọdu-ọgu gude dọ-whee mu mgburumgburu.

¹³Ụnwunna mu b’o mewaru whẹ l’agba mu nkupe,

mee ndu marụ mu nụ; whẹ jiru ụba yeru mu.

¹⁴Abụbu mu whẹ bẹ gbakọtawaru mu ọso.

Ndu mu lẹ whẹ l’eshi ọnya zọhashiwaa mu.

¹⁵Ndu ẹbyii, byarụ ibe mu bẹ zọhashiwaru mu nụ.

Ụnwumgboko, l’ejeru mu ozhi wota mu

g’ọo onye byarụ abyabya.

L’ẹnya nke whẹ, bẹ whẹ woru

mu lẹ mu bụ onye ọha ọdo.

¹⁶Ọobuje mu kua onye ozhi mu oku, ọ tọ zajẹdu mu.

Mu l’egudeje ọnu mu yeru iya ẹkalali.

¹⁷Udzu ọnu mu l’eshigejee nyee mu nshi.

Unwune mu l’asọkaa mu oyi.

¹⁸Jee akpaa l’ụnwegirima nshịi ta adụdu

iwhe whẹ gụberu mu.

Mu gbalihu agbalihu; whẹ ekfuru mu sukusuku.

¹⁹Ndu bụ ẹguru ọnya whẹ bẹ l’akpọru mu tuu,

ndu mu yeru obu ghakọbe eetso mu okfu.

²⁰Akpọ, dụ mu l’ẹhu yẹle anụ, dụ mu l’ẹhu

bẹ takụta-gewaru mu atakụta l’ọkpu.

Iwhe bụ eze, whọduru mu l’ọnu ntaa bụ ẹnyiru.

²¹Byiko, ndu ọnya mu, t’imiko mu dụnu unu,

t’imiko kabẹnu mu dụnu unu,

l’ọ kwa Chileke bẹ darụ mu ẹka l’ẹhu.

²²?Ọo gụnu meru unu l’achị nta mu

ẹgube ono, Chileke l’achị mu?

?Mkpamẹhu ọwhu unu l’anụ mu te ejidu unu ẹwho?

²³Ọ gẹge adụ mu ree t’e dee okfu mu edede,

ọ gẹge adụ mu ree t’e dee ya l’ẹkwo.

²⁴Ọ gẹge adụ mu ree t’e gude mkpara-igwe dee ya,

kaa ya akaka l’eli eze-ẹwhuru

l’ẹka l’ọo-dụwaro jeye lẹ gbururu.

²⁵Mu marụ lẹ Onye-Ọgbata mu bẹ nọo ndzụ,

l’e megee l’ikpazụ bẹ l’ọo-gbalihu

kfụru l’eli mgboko-o gbaarụ mu ọdzori.

²⁶E mebyishigee mu akpọ-ẹhu,

bẹ mu l’e-gudelekwaa anụ-ẹhu mu whụ Chileke.

²⁷Mu l’e-gude ẹnya mu gẹdegede

whụ iya, ọ tọ bụdu onye ọdo.

Ọowhoshi mu ike l’obu.

²⁸Unu -je m’ọo l’a-sụ woo l’unu ta akpadụ mu ẹhu,

l’ọo mbẹdua bẹ iwhe l’eme mu nụ shi l’ẹka.

²⁹T’unu tsụkwa ogu-ịgba ono egvu, nkele ọ kwa iya

bẹ Chileke l’egudeje atụ-koshi madzụ ẹhu-eghughu iya.

Ọo ya bụ, t’unu marụ l’ikpe dụ.”

Ọnu, Zofa l’eye

¹Tọ dụ iya bụ, Zofa, bụ onye Naama bya eyee ọnu sụ:

²“Iwhe ono, l’iikfu bẹ je

akpakashịa mu ọriri akpakashị.

Mu ta adụdu ike aanwụ-gbu

iya l’obu tẹ mu be eyeru ghu ọnu.

³Mba ono, mu l’anụ gẹ l’ịibashi bẹ l’eme mu iwhere.

Ọo gẹ mu mataberu bẹ mu l’eyeru ghu ọnu.

⁴?Tịi madụ lẹ wata l’oge ndụ-ichee,

mbụ l’eshi ọwhu e meru madzụ dobe lẹ mgboko,

⁵bẹ ẹhu-ụtso, onye ejo-ememe nweru l’adụje mkpirikpi,

ẹswa onye l’amaa Chileke l’ete te enwe gẹ l’ọono-bejeru?

⁶Onye ọbu vuta ha m’ọo l’eli je etsu ishi l’igweli,

ishi iya l’etsu l’urwukpu,

⁷bẹ bụ gẹ l’aa-gwọje nshị, ọ nyịru anyịnyi

bụ gẹ l’aa-gwọta iya je etuwha jeye lẹ gbururu.

Ndu shihawa awhụje iya nụ asụ:

‘?Ndẹhunu iya?’

⁸Oo-mee whaa whukahu g’ọo nrọ,

t’a abyadụ l’a-whụbaa ya ẹnya ọdo.

Aa-chịfu iya achịfu ya abụru wheremu

g’ọo ọwhulenya ẹnyashi.

⁹Ẹnya, shi whụhawa iya; ta awhụhedu iya ọdo,

ogboduwhu ibe iya ta awhụhe iya ẹnya ọdo.

¹⁰Ụnwu iya bụ whẹ l’e-megee kfụa

ụgwo iwhe o meru ndu ụkpa.

Oo-gude ẹka iya nụ-whukota ẹku iya azụ.

¹¹Ọkpu gbashịru iya ike goshi l’ọ bụkwadu okorọbya;

ọle ọo-zubuhu l’okurutuu bụru wuu l’alị.

¹²Ejo-iwhe l’atsọje iya ụtso l’ọnu,

mbụ l’ọokpujeru iya l’ọnu gude ire domia ya edomi.

¹³Ọ tọo dụjedu ike haa ejo-iwhe t’o jee njere iya,

ọokpujeru iya akpụru l’ọnu.

¹⁴Ọle iwhe ono, bụ nri iya ono bẹ

nọduwa iya l’ẹwho shihu ụka,

ọ dụ g’ọo onye agwọ tarụ ẹvuma ye l’ẹhu.

¹⁵Onye ejo-ememe l’elweje ẹku wọo, gbọshia ya yaa.

Chileke l’emeje, ya anwashịa ọwhu bahụru iya l’ẹwho.

¹⁶Ẹvuma agwọ bẹ l’ọo-mị amịmi,

mbụ l’óghù l’a-tsọ iya ọnu, ya anwụhu.

¹⁷Ọ tọo byadụ l’a-nọdu ndzụ whụ

ẹnyimu mmanụ ólivu ẹnya,

tọo bya l’e-gude ẹnya iya whụ

ngele ono, mmanụ-ẹnwu

yẹle mini ẹra-eswi, l’asọ gborogboro.

¹⁸Anya, o setaru eseta bẹ

l’ọo-nụ-whukota azụ, o to ridu iya l’ọnu.

Urwu, o ritaru l’aswa, ọ zụru ta abya l’atsọ iya ụtso.

¹⁹Mkpata iya bụ l’ọ kparụ ndu ụkpa ẹhu,

mee whẹ, whẹ daburu mgbegere,

bya anashịa ndiwhe ụlo, l’abụa ya tụru.

²⁰Eshi-ọwhu oke-ẹnya, dụ iya nụ

l’ete ekweje t’iwhe dzuaru iya edzu,

ọ tọo byakwa l’e-riwhodo iwhe ono,

o yeru ẹnya ono eriwhodo.

²¹O rikotaru iwhe o nweru eriri,

tọ dụ iwhe whọkwaduru iya.

Iwhe o nweru ta adụkwa gẹ l’ọo-nọ-beru.

²²Ọo nteke iwhe dụ iya l’ẹka,

dụ iya nke etsutsu iya,

bẹ iwhe-ọtsulanu l’a-byakfuta iya.

Ọ bụru nteke ono bẹ iwhe-nnaakwaa

l’a-bya azụ iya gburumu.

²³Ẹwho -jile iya whọ, Chileke ekpukpushi iya

oke ẹhu-eghughu iya l’ẹhu,

gude iya chia ya whukuwhuku.

²⁴Ọ -vụta ọso je t’iya gbalaarụ mgbọ-igwe,

arwa-ope abụru iya kurumu l’ẹhu.

²⁵Arwa ono l’e-shi iya l’okpurukpu fo iya l’ẹhu.

Ọnunu ẹka ono, ọ tụpyiru

atụpyi, ẹka iya ọwhu l’egbu

ngerengere aghajaa ya lẹ meji.

Ntsụ-megvu l’a-byarụ iya ishi ye.

²⁶Tsụrikiti ẹkpuroochi bẹ nọwaa kwabẹru ẹku iya l’owhu.

Ọku, l’adụa onye whunwuru iya awhunwu

l’e-kepyashi iya ekepyashi.

Ọku adzụpyashikota iwhe whọduru l’ụlo iya.

²⁷Igwe l’a-tụko njọ, o megbaberu kpuhaa ghebe ọnu,

alị agbalihu gbaa ya ẹka-ebe.

²⁸Iwhe lile o nwe l’ụlo bẹ ukporo-mini l’e-kpotakota,

lẹ mbọku, Chileke l’a-tụ-koshi iya oke ẹhu-eghughu iya.

²⁹O noo oke, Chileke l’a-nụ onye ejo-ememe ndono,

mbụ l’o noo oke-iwhe, Chileke l’a-hẹe ya ndono.”

Jobu l’ekfu gẹ ndu ejo-ememe l’ababeje ụba

¹Jobu bya eyee ọnu sụ:

²“Unu gebekwa nchị ree l’okfu mu,

t’ọ bụru obu, unu dụa mu iya.

³Unu talẹkwawho nshi haa tẹ mu kfua nkemu.

Mu -kfugezhiawho, unu ajawa mu rọ ewenu.

⁴Áwhụ, mu l’agụ; ?ọo madzụ bẹ mu l’agụru iya?

?Ndẹnu ishi iwhe mu l’e-kwobe taa nshi?

⁵Unu leeda mu whọ ẹnya.

Ọnu l’a-kpụkwaru unu okfu; unu adẹe ẹka l’ọnu.

⁶Ọobuje, mu -rịta iwhe ono,

meru mu nụ l’ọriri, egvu atsụhu mu,

ẹhu anmakọta mu godogodo.

⁷?Ọo gụnu meru ndu ejo-ememe

l’anọduje ndzụ, kaa nka,

ọkpehu aka whẹ shii eje eje?

⁸Whẹ l’anọduje ndzụ, whụ ụnwu whẹ gẹ whẹ

kofutageeru kfụru l’onwowhe.

Whẹ l’anọduje ndzụ whụ

nwanwa nwanwa whẹ gẹ whẹ l’ekoshikaa.

⁹Ibe whẹ l’adụkotaje nwajii,

to nwe iwhe ọotsu egvu, l’adụje iya nụ.

Chileke te echije whẹ mgbọro iya.

¹⁰Oke-eswi whẹ l’anọje eye ime, eyebu eyebu.

Ada-eswi whẹ l’anọje atsụ ime, t’o wheje nwa.

¹¹Ụnwegirima whẹ l’etsojeru agbawhe,

akpọ-whe ẹnwuda g’ọo ụnwu atụru.

¹²Whẹ l’anọje akpọ ogumogu yẹle une, agụ egvu eye iya,

whẹ egbu opu eme ẹmereme eye iya.

¹³Whẹ l’erije g’ẹhu ha whẹ l’ọno ndzụ,

whẹ bya l’anwụhu, whẹ anwụhu l’ẹhu-guu.

¹⁴Ọle ọ kwa whẹ nụ l’abụje,

whẹ bya l’ekfu, whẹ asụ tẹ Chileke parụ whẹ haa,

l’ọ tọ gụdu whẹ ọmaru ụzo iya.

¹⁵Whẹ nọdu whẹ asụ: ‘?Ọo gụnu bụ ishi iwhe

anyi l’e-kwobe ejeru Ọkalibe-kakọta-ike ozhi?

?Ọo urwu gụnu bẹ anyi l’erita l’anyi l’ekfu anụ iya?’

¹⁶Whẹ l’asụje l’ẹka atụtu ono,

whẹ nweru bụ l’ike ẹka whẹ b’o shi.

Ọo iwhe ono meru, mu l’anọje

otẹnya l’idzu, ndu ejo-ememe l’achị.

¹⁷Obenu ?ọo ugbo ole b’a

whunyijeru oryọku ndu ejo-ememe?

?Ọo ugbo ole bẹ eze iwhe-ọtsulanu

byakfutajeru whẹ, bụ iya bụ

iwhe Chileke l’egudeje ẹhu-eghughu iya wota?

¹⁸?Ọo ugbo ole b’a whụfujewaru

whẹ g’ọo ẹswa ọkponku,

a kụberu l’ẹka whẹrewhere l’ezhi?

?Ọo ugbo ole b’a whụfujewaru whẹ g’ọo ẹswa balị, oke whẹrewhere l’ezhikashi?

¹⁹Unu l’asụje woo lẹ Chileke l’ewojeru ahụhu iwhe

nna metaru doberu ụnwu iya.

Wawa, t’ọ kfụjechia ndu ejo-ememe ụgwo iwhe

whẹ meru l’onwowhe,

nke ọwhu whẹ l’a-marụ l’iwhe

whẹ l’anwụ ọnwu iya bụ iwhe whẹ meru.

²⁰Tẹ whẹ gudeje ẹnya whẹ whụ

ọla-l’iswi, l’eje abyakfuta whẹ,

whẹ angụa oke ẹhu-eghughu

Ọkalibe-kakọta-ike t’ọ tụfu whẹ ọnu.

²¹Mkpata iya bụ lẹ whẹ ta

akpabahẹdua ishi iwhe l’eme l’ezhi-l’ụlo whẹ,

mẹ whẹ nwụhuwaa anwụhu.

²²Sụa, ?o nweru onye sụru gẹ

l’oo-zhi Chileke ọmaru iwhe,

g’o gbechia bụru iya l’ekpeje ndu nọ l’oke ọkwa ikpe?

²³O nweru onye ẹhu l’adụje mma,

ya agbabuhu nwụhu,

mbụ onye ẹhu dụ guu; tọ dụ iwhe l’eme iya,

²⁴mbụ onye ẹhu dụ pokopoko, ụmi tsụa ya l’ọkpu.

²⁵O nweru onye l’atajẹ kpọkpokpo

nwụhu, mbụ onye ẹhu l’ẹte atsọbua ụtso.

²⁶Whẹ labọ ono bẹ l’aa-tụko lia l’alị,

mgbashiride atụko whẹ ripyabe.

²⁷Sụa, iwhe unu, l’arị bẹ mu makọtakwaru,

makọtaru ikumu, unu l’agbarụ mu.

²⁸Unu sụru: ‘?Ndẹe ụlo oke amadụ ono?

Ndẹe ụlo onye ejo-ememe ono bu?’

²⁹?Ọ kwa l’unu jịbuwaru ndu ije

ajị; unu kweta iwhe whẹ kọru unu sụ:

³⁰l’onye ejo-ememe l’abụje, eze iwhe-ọtsulanu bya,

o to nwedu iwhe l’oo-me iya.

Lẹ mbọku oke ẹhu-eghughu Chileke

rwuru bẹ l’aanafụta iya.

³¹O to nwedu onye l’akfụjeru onye

ejo-ememe l’iwhu gbaa ya iwhe l’oome,

to nwe onye l’akfụje iya ụgwo iwhe o meru.

³²O rwua nteke l’ee-li iya, a pata iya je elia,

wata oche ilu iya nche.

³³Ndu madzụ awụru gidigidi etso odzu iya l’azụ.

Ndu bụ agụta agụta evuta ụzo

dzebe edzebe eje ẹka l’ee-li iya.

E -rwua ẹka ono, aa-tụa ya ẹja lia.

³⁴Sụa ?ndẹe ishi ndụmu-obu ọwhu,

unu gude okfu, l’enwee ishii adụ mu?

Ọnu, unu l’eyekaa te enwedu iwhe

dụ iya nụ, gbahaa ejire!”

Elifazu l’agba iya ekobe Jobu

¹Tọ dụ iya bụ, Elifazu onye Temanu bya eyee ọnu sụ:

²“?Ọo Chileke bẹ madzụ l’abarụ urwu?

Onye marụ ágụ, ?ọo-barụ Chileke urwu?

³?Ọo ẹhu-ụtso gụnu b’ọ bụru

Ọkalibe-kakọta-ike l’ị bụ onye dụ chịriri?

?Ọo urwu gụnu bẹ l’oo-rita l’ị bụ

onye ụta l’adụa l’ẹhu?

⁴?Ọo l’ọ bụ onye dụru ghu lẹ nsọ b’o gude abarụ ghu mba?

?Ọo ya b’o gude ekpe ghu ikpe?

⁵Wawa; ọo ejo-ememe, l’iime bẹ panụkaru ẹka.

Iwhe-dụ-ẹji, l’iimegbabe te enwedu agvụgvu.

⁶Unwune ghu b’i kebutaru, whẹ naa onwowhe mkpalẹka;

l’ẹbo dụ iwhe whẹ meru,

tọta ndiwhe ẹkwa, whẹ nma l’ukfu gbabẹ whẹ ọto.

⁷Ndu ike gvụru bẹ l’iitii kedua mini tẹ whẹ ngụa.

Ị pata nri wohaaru ndu ẹgu l’agụ.

⁸Ọle ị bụkwanu oke amadụ, nweru alị ẹka ghu,

bya abụru onye l’aakwabẹ ugvu, bu l’alị ono.

⁹Ụnwanyi-mbunu b’ị gbabẹwaru ẹka ọto chịfu,

mee ndu l’enwee nna mmegbu.

¹⁰Ọo iwhe ono meru g’o gude e kwewhee ghu

ọnya mgburumgburu,

Iwhe l’eye egvu l’azụje ghu kfụu.

¹¹Iwhoro g’anọ enwuru ghu l’agbakọtajeru ghu ọochi,

mee ghu, tọ dụdu iwhe l’ịiwhuje.

Ọ bụru utso l’eri ghu eri.

¹²Tọ bụdu ẹka ha l’imeli imeli l’imigwe bẹ Chileke bu?

Ọ nọdu l’ẹka ono awhụkota

kpokponde ono, hagee l’eli!

¹³Unu nọdu, unu asụ woo: Chileke ?ọ marụ gụnu?

?Oo-shi l’urwukpu ono, gbarụ ọochi ono kpee ikpe?

¹⁴Ọ kwa urwukpu, l’eji hụnyihunyi kwekputaru iya

nke ọwhu bụ l’ọ tọ whụjedu anyi ẹnya,

mẹe l’ọokpawhe l’ọma imigwe.

¹⁵?Ọo akahụ ụzo ono,

ndu ejo-ememe tsoru

bẹ gụbedua l’e-tsofuaru?

¹⁶Ndu ejo-ememe ono b’a

gbakwotakwaru agbakwota;

whẹ laa nteke l’ẹte agbaa whẹ alala.

Ntọlali, whẹ tọru bẹ ukporo-mini kpotaru.

¹⁷Whẹ sụru Chileke t’ọ parụ whẹ haa, bya ajịa ajị sụ:

?Ọo gụnu bẹ Ọkalibe-kakọta-ike l’e-me whẹ?

¹⁸Ọle ọ kwa iya nụ bẹ gude iwhe

dụ ree wụ-jia ụlo whẹ awụ-ji.

Ọo ya meru g’o gude mu l’anọduje

otẹnya l’idzu, ndu ejo-ememe l’achị.

¹⁹Ndu dụ chịriri l’abụje, whẹ whụa ẹgube iyi,

byarụ whẹ nụ; whẹ etee ẹswa.

Ndu iswi dụ mma l’achịje whẹ ọchi sụ:

²⁰‘Hẹe; ndu ọhogu anyi b’e mewaru,

whẹ bụru kpurupyata.

Ọku tsupyashiakwaru iwhe whẹ, whọduru nụ.’

²¹Kweta nke Chileke, tẹ gụ l’iya nọdu lẹ nchị-ọdu-ndoo,

nke ọwhu nke-ọma l’e-kweru ghu.

²²Nabata ọkwa, shi iya l’ọnu.

Gụ eworu okfu iya kwachia l’ime obu ghu.

²³Ọ -bụru l’ị lwawhuru azụ lwakfuta

Ọkalibe-kakọta-ike, bya ewozeta onwoghu alị,

bẹ l’ee-dobewhu ghu azụ l’ọnodu ghu.

Ọ -bụru l’i wofuru ejo-ememe, ọ nọdu otẹnya l’ibe ghu,

²⁴Ọ -bụru l’i woru mkpọla-ododo ghu lia lẹ ntụ,

woru mkpọla-ododo ghu, shi lẹ Ofi je enwuru ye lẹ

mgbakụ ẹwhuru, dụ lẹ nsọkoro-mini,

²⁵Ọkalibe-kakọta-ike abụru mkpọla-ododo ghu,

bụru mkpọla-ọcha, rọru arọ, i nweru.

²⁶Nteke ono bẹ Ọkalibe-kakọta-ike l’a-bya adụ ghu ree,

gụ apalilahaa iwhu apali lee Chileke.

²⁷Ii-kfujeru nụ Chileke,

ya anụa iwhe i kfuru iya.

Gụ emejekwawho iwhe i kweru ụkwa iya.

²⁸Ii-kpebuje iwhe l’e-me nụ, ya adụ g’i kpeburu iya,

Iwhoro enwu l’ụzo ghu.

²⁹Chileke -mee madzụ ọ lwaa alị,

ị -kfua sụ t’e wolia onye ọbu imeli,

bẹ Chileke l’a-dzọfuta onye ọbu, lwarụ alị ọbu,

³⁰nafụta m’ọo ndu iswi l’adụa mma.

Iwhe l’oo-gude nafụta whẹ

bụ l’ị bụ onye ẹka iya dụ ọcha.”

¹Tọ dụ iya bụ, Jobu bya eyee ọnu sụ:

²“Ntanụ bẹ mu gụ-gbuakwaru onwomu l’awhụ,

nkele Chileke bẹ ẹka iya

l’anyịnuka mu dụkuu l’ẹhu,

lẹ mụbe onye l’atsụ ude.

³Ọ -bụ lẹ mu mazhiaru ẹka mu l’a-chọ-vu Chileke.

Ọ -bụ lẹ mu l’a-dụ ike jerwua ẹka o bu,

⁴mẹ mu eje ekfushiaru iya ẹka l’ooghu mu eghu,

mu l’iya atụwa iya rọ jeye okfu eji mu ọnu.

⁵Mẹ mu amawarụro ẹgube ọnu, ọ gege eyeru mu,

mẹe ụdu okfu, ọ gege ekfuru nụ mu.

⁶?O nweru gẹ Chileke g’eshi gude eze ike,

o nweru bya tẹ mu l’iya tụtaru ẹgo?

Wawakwa; ọo nchị b’ọ gẹge angabẹru mu.

⁷Ọo l’ẹka ono bẹ mụbe onye ụta l’adụa lẹ ndzụ iya

g’anọdu tẹ mu lẹ Chileke kfusaa ya ọsa,

mẹ yẹbe onye-ikpe mu ono

asụ mu tẹ laa l’iswi dụ mu

mma shi lẹ gbururu jeye lẹ gbururu.

⁸Ọle ọobuje; mu -chọo ya l’ụzo

ẹnyanwu-awata, mu ta awhụdu iya.

Nteke mu chọru iya l’ụzo ẹnyanwu-arịba,

mu ta awhụkwa iya whọ.

⁹Ọ -nọdu l’ụzo isheli eje ozhi; mu ta awhụ iya.

Nteke o shiru ụzo ọhuda; mu ta awhụkwa iya whọ.

¹⁰Ọle yẹbedua makọtaru ẹka mu dzọru ọkpa.

O noo ya, ọ datagele mu whọ,

mu egbuchafu g’ọo mkpọla-ododo.

¹¹Ẹka mu l’eyeje ọkpa bụlewho ẹka yẹbedua dzọru ọkpa.

Ọ bụru ụzo, l’ooshi bẹ mu

l’eshi, mu ta aswịfuje l’iya aswịfu.

¹²Mu ta ahajẹkwa ome iwhe ọ sụru t’e mee.

Okfu, shi iya l’ọnu bẹ mu kakwa

ọgube iwhe amamẹ nri, mu l’erije mbọkumboku.

¹³Ọ tọo ghajẹdu agha, ta anyabata iya anyabata.

Ọo iwhe dụ iya ree bẹ l’oomeje.

¹⁴Iwhe ọ tụ-buru l’iya l’e-me mu bẹ l’oo-mekota.

Ẹgube idzu ono b’ọ chịwaru

igweligwe kwakọbe l’obu iya.

¹⁵O noo iwhe meru l’ọobuje,

mu nọdu l’iwhu iya mu atsụ egvu,

l’ọoburu mu rịta iya, egvu iya egude mu.

¹⁶Chileke mewaru meji tọfu mu.

Ọkalibe-kakọta-ike yewaru mu egvu.

¹⁷Ọ tọ bụkwa tsụrikiti ẹkpuroochi

ono, gbachiru mu iwhu meru

iwhe mu doberu ọnu ndoo.

Umere ndu ejo-ememe

¹“?Ọo gụnu meru Ọkalibe-kakọta-ike

te eyeje oge, l’oo-kpe ikpe?

?ọo gụnu meru ndu marụ iya nụ l’abụje,

whẹ legee ẹnya mbọku, l’ọo-gwa ndu ejo-ememe ọchi,

ya abụru nke mmaanụ?

²Ẹwhuru oge alị bẹ ndu ejo-ememe l’awhọfuje.

Whẹ l’ezhitaje atụru l’oshi; wata echeche.

³Nkakfụ-ịgara nwa nwogbee bẹ whẹ l’achịfuje,

nata nwanyị-mbunu oke-eswi iya lẹ mkpalẹka.

⁴Ndu ụkpa bẹ whẹ l’enwulibejeru l’ụzo,

mee ndu ejo-ẹka, dụ l’alị whẹ,

whẹ l’edomije onwowhe edomi.

⁵Ọo gẹ nkakfụ-ịgara-ọswa l’etsojeru echi-ẹgu aghawhe

bụ gẹ ndu ụkpa

l’etsojeru aghawhe ese anya nri.

Whẹ l’etsojeru ọma echi-ẹgu

achọ-whe ẹka whẹ l’a-whụ nri nụ ụnwu whẹ.

⁶Nri, whẹ l’eri bụ l’ẹgu onye ọdo,

l’abụa nkewhe bẹ whẹ l’emetaje iya,

whẹ l’ejeje ọokpa akpa

lẹ mgbu vayịnu ndu ejo-ememe.

⁷Ẹnyashi owhu bẹ whẹ l’agbajẹru

ẹhu ọto zẹe nkele whẹ te enwedu uwe,

whẹ te enwe iwhe whẹ

l’egudeje kpuchia onwowhe l’oyi.

⁸Mini, l’achị l’ugvu l’anmajẹ whẹ, whẹ adụ shọloo.

Ẹka whẹ l’anmakpujeru bụ

l’eze ẹwhuru nkele whẹ te enwedu ụlo.

⁹Nwa, nna iya l’anọhee bẹ

l’aanyịswotaje ne iya nteke l’ọongukwadu ẹra.

L’aanatajẹ ndu ụkpa ụnwu whẹ lẹ mkpalẹka.

¹⁰Whẹ l’agbajẹru ọto ejewhe nkele whẹ te enwedu uwe.

Whẹ l’anọje evuwhe ivu akpe, ẹgu emekwa whẹ nụ.

¹¹Whẹ l’apyịje akpụru ólivu pyịta mmanụ,

dzọo akpụru vayịnu; dzọta mmẹe,

ẹgu iya agụa whẹ, whẹ ele iya sọ l’ẹnya.

¹²Ndu l’anwụhu anwụhu l’atsụkaa ude lẹ mkpụkpu,

ndu e mekaru iwhe l’echikaa mkpu t’a gbatarụ whẹ,

obenu lẹ Chileke te eyedu ọnu

yeru whẹ l’ekfukfu, whẹ l’ekfu anụ iya.

¹³O nweru ndu jịkaru iwhoro,

mbụ ndu l’ẹte amaa ụzo iya amama owhu,

whẹ te eshije echi-ụzo iya ilile ilile.

¹⁴Mgbugbu madzụ l’abụje; ọochi byalẹwho, ya agbalihu

tẹ ya je egbua onye-ụkpa yẹle onye l’adụa g’ọ harụ iya.

O rwua l’ẹnyashi, ya aghọo

onye oshi zhilahaa iwhuru.

¹⁵Onye l’eri ogori bẹ ẹnya l’adụje t’ọochi byakebe.

Oowotaje iwhe whuchia iwhu

sụ l’ọ tọ dụdu onye l’a-whụ iya.

¹⁶Ọo l’ọochi bẹ ndu iwhuru l’ejeje etsufushia ụlo.

O rwua l’eswe, whẹ aguchishia onwowhe l’ụlo,

nkele o to nwedu iwhe whẹ l’iwhoro jigba.

¹⁷Ọo tsụrikiti ẹkpuroochi l’abụjeru whẹbedua ụtsu.

Iwhe l’eye egvu l’ẹkpuroochi bẹ whẹ lẹ whẹ l’eshi ọnya.

¹⁸Obenu lẹ whẹ bụ ụwhu-mini, l’ese l’eli mini.

Oke-alị whẹ b’a tụru ọnu,

nke bụ l’ọ tọ dụdu onye l’agbajẹ ọkpa lẹ mgbu vayịnu whẹ.

¹⁹Anwụ-akpọkpo yẹle okpomọku

l’amịchatajekwa mini sunoo,

o nokwawho gẹ alị-maa

l’amịkoje ndu meru iwhe-dụ-ẹji.

²⁰Ndu ejo-ememe bẹ onye parụ

ẹwho ime whẹ zọhakwaru azọha.

Mgbashiride l’akpa whẹ nri l’ẹhu.

Whẹbe ndu ome ejo-iwhe ono bẹ

l’aata anyatahẹdu ẹwha whẹ anyata ọdo.

Aa-gbakwofu whẹ g’ọo onye gbakwofuru oshi.

²¹Ụnwanyi, ẹkpa-nwa whẹ chihuru echihu

mẹe ndu l’ẹte anwụta nwa bẹ whẹ l’alwụje alwụlwu.

Whẹ te emejeru nwanyị-mbunu odoo.

²²Ọle Chileke l’egudeje ike iya lọo ndu ọkpehu whelewhele.

A makwarụ-a lẹ whẹ kfụru kfụshia ike,

ọle whẹ ta amadụ ishi ndzụ whẹ.

²³Chileke l’emeje whẹ, whẹ atụsaru ẹhu,

ọle ẹnya iya l’adụje l’iwhe whẹ l’eme.

²⁴Ndu ejo-ememe l’abajẹ

gburugburu, laa gburugburu.

Whẹ l’anwụje lwaa g’ọo ẹwu,

l’eegbutsushije whẹ g’ọo onye l’egbutsu ishi akpe.

²⁵Ọ bụru l’iwhe mu l’ekfu

ta abụdu iya, t’onye l’a-fụta

bya asụ l’ọo ẹdzuka fụta

bya agbaa mu iya,

T’onye l’a-bya asụ l’iwhe ono, mu

l’ekfu ta adụdu iwhe ọ bụ fụta bya ekfua ya.”

Ọnu, Byilidadu l’eye

¹Tọ dụ iya bụ, Byilidadu, bụ onye Shuwa bya eyee ọnu sụ:

²“Ọo Chileke bụ iya nwe

ike ọchichi, bya abụru onye dụru madzụ lẹ nsọ.

Oomeje tẹ nchị dụ ndoo l’oroke imeli-imeli imigwe.

³?Ọo onye l’adụ ike agụta ojọgu iya l’ọgu?

?Ọo onye bẹ iwhoro Chileke ono l’ete enwujeduru?

⁴?Ndẹe gẹ madzụ l’eshi bụru onye dụ chịriri l’iwhu Chileke?

?Ndẹe g’onye nwanyị nwụru l’eshi

bụru onye ntụpo l’adụa l’ẹhu?

⁵L’ẹnya nkiya, bẹ ọnwa l’ete echikwa whoowhoo,

kpokponde te egbu zhịizhii.

⁶O chia madzụ, bụ ikpiri-ẹhonwu b’ọ gụberu iwhe,

mbụ madzụ, bụ madzụ mmaanụ nwụru iya.

?Ọo onye b’ọ bụ, mbụ mgbashiride ono?”

Jobu l’atụ ọnu gẹ Chileke habe shii

¹Tọ dụ iya bụ, Jobu bya eyee ọnu sụ:

²“Lewaro ẹgube ẹka, l’iiyejeru onye ike l’adụa!

Lewaro gẹ l’iigudeje adzọ onye ẹka tsụru mmẹe!

³Lewaro ẹgube ọkpobe idzu,

l’iichikoshije onye l’amaa agụ,

mee t’ọ nwụta ọkwa-ẹnya ọkpobe anwụta.

⁴?Ọo onye yeru ghu ẹka; i kfua okfu ono, i kfukotaru?

?Ọo ume onye shi ghu l’ọnu kfua ya?

⁵Ụnwu-maa l’anmakaa kwekwekwe,

mbụ ụnwu-maa, bu lẹ mkpula mini

mẹe ndu ọwhu bu iya l’ime.

⁶Alị-maa gbakwa ọto l’iwhu Chileke.

Emebyi ta adụ iwhe o gude kwechia onwiya.

⁷Ọo yẹbedua bẹ tụsaru akpamigwe nke ụzo isheli

lẹ whosaa ẹka daburu iwhoro.

O mee mgboko; t’ọ dụ iwhe o tukoru l’eli.

⁸O kechiru mini dobe l’urwukpu,

ẹrwa mini ono ta alafuje urwukpu ono alafu.

⁹Iwhu oshi-eze iya b’o kpuchiru ekpuchi,

woru urwukpu nkiya whụa ya l’eli.

¹⁰Ọ kparụ oge l’eli mini,

gude dokahu iwhoro yẹle ọochi.

¹¹Ọobuje, ọ baa mba, itso,

gude igweli anmakọta jijiji; tsụhu egvu.

¹²Ọ kwa ike iya b’o gude mee t’eze-ẹnyimu deru gẹe.

Ọ bụru nka, l’oome b’o gude chia Réhabu pyaapyaa,

mbụ ejo anụ ono, bu lẹ mini.

¹³Ume, ọ tụru bẹ meru, igweli l’egbu ewheke.

O gude ẹka iya nmafua ejo-agwọ, l’amị amịmi ẹwho.

¹⁴Ọ kwa ọnu b’a tsọshikwaduru l’iwhe l’oomegbabe.

Ọo rifu-rifu iya bẹ anyi nụkwaduru ẹgube ono.

A bya l’ike iya ono, l’adajẹ g’ọo egbe-igwe,

?ọo onye bẹ l’oo-dokota ẹnya?”

Jobu l’eyebaa ọnu

¹Jobu kfulashia iwhe l’ookfu; sụ:

²“Chileke vuru-a ishi iya g’o vu iya,

mbụ onye ono, nafụru mu iwhe rwuberu mu nụ,

bụ iya bụ Ọkalibe-kakọta-ike

ono meru, ndzụ l’atsọ mu ilu,

³mu l’atụ-a ume gẹ mu l’atụ iya,

ume, Chileke kuru nụ mu

l’eshijekwadu mu-a l’imi ekushi,

⁴bẹ mu ta abyakwa l’e-gude ọnu mu kfua ejo-okfu,

mu ta abya l’e-gude ire mu dzụa ejire.

⁵Tẹ njọ gbakwa ẹgbudu! Mu ta

abyakwa l’a-sụ l’unu kfụru nhamụnha.

Mu ta abya l’e-kweta l’iswi ta adụdu mu mma

jeye nteke mu l’a-nwụhu.

⁶Chịriri ono, mu dụ, bẹ mu l’a-dụ iya gẹ mu dụ iya,

mu ta abyakwa l’a-ha iya ahaha,

obu ta abya l’a-nma mu

ikpe jeye gẹ mu l’a-nọ-beru.

⁷Sụa, t’ọ dụkwaru ndu ọhogu mu g’ọ dụru ndu ejo-ememe,

ya adụru ndu l’etso mu okfu g’ọ dụru ndu l’adụa chịriri.

⁸?Onye l’amaa Chileke bẹ

l’elekwadu ẹnya gụnu mẹ

Chileke mewaa ọ tọhu, mbụ mẹ Chileke wota ndzụ iya?

⁹Chileke, ?l’ọo-nụ ẹkwa iya mẹ nsogbu byarụ iya?

¹⁰Ọkalibe-kakọta-ike ta adụjekwa iya ree,

tọ ryakuje Chileke ntekenteke.

¹¹Ngabẹ tẹ mu bya ezhia unu nke ike Chileke.

Iwhe Ọkalibe-kakọta-ike tụberu nke ememe

bẹ mu ta abyakwa l’edomiru unu edomi.

¹²Iwhe ono bẹ unu

whụkotahaakwaru l’onwunu,

?ndẹhunu g’unu shi ekfu okfu, l’ẹte enwee ishi?

¹³Unu lekwa oke, Chileke l’a-nụ

onye ejo-ememe ndọwa,

mbụ oke-iwhe, onye obu-mgbashi l’e-keta l’ẹka

Ọkalibe-kakọta-ike:

¹⁴Ụnwu iya ha m’ọo l’igwe ọha agha,

iwhe l’a-ta ishi whẹ bụ mma.

Ẹpa iya ta abya l’awhụje nri, l’a-sụru whẹ eriri.

¹⁵Ndibe iya whọduru nụ bụ

ẹhu-ba-dụ-mma l’e-gbu whẹ.

Unyomu iya, bụ ụnwu-mbunu

ta abya l’anọru iya lẹ mkpe.

¹⁶Ọ kpakwaa m’ọo okpoga ọ kụru g’ọo ẹja,

nmashịa uwe ọ kụru g’ọo ẹja-ụrwa,

¹⁷iwhe ono bẹ l’ọo-kụbekotakwa,

ọle ọo ndu dụ chịriri

l’e-megee eye uwe ono.

Ọ bụru ndu iswi dụ mma

l’e-megee keshia okpoga ono.

¹⁸Ụlo, ọ tụru dụ g’ọo ụgbu-ẹlwuwelwu,

bya adụ g’ọo mkpu, onye nche tụru.

¹⁹Ọozeje azẹe onye nweru iwhe, ọle ọ tọo zẹhedu iya ọdo,

ọ saa ẹnya, ya awhụ l’ẹku iya lawarụ.

²⁰Iwhe l’eye egvu l’asọpyabeje iya g’ọo utso,

oke whẹrewhere l’apakatajẹ iya l’ẹnyashi.

²¹Whẹrewhere, shi ụzo ẹnyanwu-awata l’apajẹ iya

egbe galagala pawhua apawhu.

Ọobyaje ezhikota iya l’ibe iya tụgburu.

²²Whẹrewhere ono l’ezhitaje iwhe

bya atụa ya l’ẹhu gbaa, imiko iya ta adụje iya.

Ọogbataje ọso je akpọo okpofu-nchị l’ẹka l’oome

tẹ ya gbalaarụ ike, whẹrewhere ono l’akpa.

²³Whẹrewhere ono l’echi ẹka pyamụ ekpu iya,

ọ bụru whukuwhuku, l’oozhi

b’o gude achịfu iya achịfu l’ibe iya.

Mmamagụ dụ oke ọnu aswa

¹“Sụa, ẹka l’eegvutaje mkpọla-ọcha dụkwa.

Ẹka l’aanụchaje mkpọla-ododo dụ.

²Mgbọro-igwe bụkwa l’alị bẹ l’eeshije wofuta iya.

Ope bụru lẹ nshị-ụzu, a

dazeru adaze bẹ l’eegudeje meta iya.

³Ndu l’egvu alị l’egvurwuje

omilomi ẹka gbarụ ẹkpuroochi.

Whẹ l’egvurwuje ẹka alị kagezhia omilomi,

achọ ope l’ime ime ẹka ono, alị gbarụ tsụrikiti.

⁴Ndu ono, l’egvu alị bẹ l’awajẹ ụzo l’ime ime alị,

bụ ẹka whẹ l’eshije abahụ l’ime alị ono.

Whẹ l’awajẹ iya; ya anọdu

otẹnya l’ẹka madzụ bu ebubu.

Ẹka ono bẹ ọkpa madzụ l’ẹte atụjedu atụtu owhu.

Ọ bụru l’ime ẹka ono, dụ madzụ l’ẹka-ịcha ono,

bẹ whẹ l’anọduje akụ eregede; akụ akpara.

⁵Nri bẹ l’aakọtaje l’elikoro alị,

ọwhube ime mkpula alị bẹ

ọku l’avọje kfurukfuru gbazee.

⁶Ẹwhuru, l’aavọfutaje l’ime alị ono bụ safaya,

udzu-ẹja iya bụru nshị mkpọla-ododo.

⁷Ụzo ẹka ono, l’eegvu alị ono bẹ udele l’ẹte amadụa.

Egbe ta awhụbua ya ẹnya.

⁸Anụ-ẹgbudu, l’eku onwiya eku ta agbabụdua ọkpa l’ẹka ono,

mbụ l’oduu-gburu-agụ ta aghatabụdua ya.

⁹Ọo ẹka bẹ whẹ l’egudeje avọ

ẹwhuru ono, l’atsụkaa nkọ ono avọvo.

Ugvu bẹ whẹ l’egvulitaje egvulita,

ya aghaa igharawhu.

¹⁰Whẹ l’aswofuje ụzo l’ẹwhuru,

gude ẹnya whụkota ẹka ọ dụ

mbụ iwhe vugee ọnu aswa.

¹¹Whẹ l’agbajẹ ugbo lẹ mini gude gbobuta iya

t’ọ bọ nwuru laa l’ẹka ono, l’eegvu alị ono.

Iwhe domiru edomi bẹ whẹ

l’ewofutaje, ya afụta iwhe.

¹²Ọle-a; ?ọo awe bẹ l’aa-chọ-vu mmamagụ?

?Ọo awe bẹ ọkwa-ẹnya bu?

¹³Madzụ ta amakwa gẹ

mmamagụ dụ-be ọnu aswa,

tọ bụhe l’aachọ-vu iya l’ẹka

madzụ mgboko-o, nọ ndzụ nọ.

¹⁴Wurukutu iduma bẹ sụru l’ọ tọ nọdu l’ime iya.

Eze-ẹnyimu sụ lẹ yẹ l’iya ta anọdu.

¹⁵A ta azụdu iya lẹ mkpọla-ododo,

mkpọla-ọcha ta akfụ aswa iya.

¹⁶A taa azụ-butadu iya l’ọnu

aswa mkpọla-ododo shi Ofi,

mẹe l’ọnu aswa ẹwhuru

onikusu m’ọ bụ nke safaya.

¹⁷Mkpọla-ododo m’ọ bụ

ẹwhuru l’awhụ-onyo ta atụduru iya.

T’e gude ụnwu-aka, e meru lẹ

ọkpobe mkpọla-ododo agbanweta iya.

¹⁸Ẹwhuru koralu mẹe jasupa bẹ l’ete ewhotadu ọnu,

nkele aswa mmamagụ bẹ ka

iya shii, ka nke ẹwhuru rubyi.

¹⁹Ẹwhuru topazu, shi Itiyópiya bẹ l’ẹte atụkwa eyeru iya.

Aswa mkpọla-ododo, rọru arọ ta azụ iya.

²⁰?Ọo kwanụ awe bẹ mmamagụ shi?

?Ọo awe bẹ ọkwa-ẹnya bu?

²¹E domiru iya edomi l’ẹnya iwhegiwhe ha, nọ ndzụ,

bya ekpuchia ya ekpuchi

t’ẹnu, l’ewhe l’eli ba awhụ iya.

²²Emebyi yẹle Ọnwu bẹ sụru,

l’ọo l’ẹka l’aadzụ iya g’ọo

ndzụdzuka bẹ whẹ gude nchị whẹ nụa ya.

²³Ọo Chileke bụ iya marụ ụzo ẹka ọ nọ,

bụru iya kpụ bẹ marụ ẹka o bu.

²⁴Nkele ọ yẹbedua bẹ ẹnya iya

l’erwuje l’ẹka mgboko jeberu,

ọ bụru iya l’atụkoje iwhe nọ

lẹ mkpula igweli whụkota.

²⁵Nteke o woru ike ye lẹ whẹrewhere,

bya atụa mini atụtu, mee ya, o jebegee g’o jeberu,

²⁶nteke ọ tọru ọkpa mini achịchi,

bya atọoru ire egbe-igwe ụzo,

²⁷ọo nteke ono b’ọ whụru

mmamagụ, tụa ọnu iya,

mee ya, o shihu ike, bya adale ya adale.

²⁸Ọ bya asụ madzụ:

Ọ kwa l’atsụ Onye-Nwe-Ọha

egvu bụ iya bụ ọma ágụ.

Ọ bụru l’esefuru ẹka l’ome ejo-iwhe bụ ọkwa-ẹnya.”

Jobu l’atụ ọnu onwiya

¹Jobu bya awata okfu okfu ọdo sụ:

²“Ọ gẹge akarụ mu mma, tẹ

mu dụ gẹ mu dụhawaa

l’ọnwa, gahawarụ aga,

dụ gẹ mu dụhawaa nteke

Chileke shi eche mu nche,

³bụ iya bụ nteke oryọku iya

shi anọduje enwu mu l’ụzo ishi.

Ọ bụru iwhoro iya bẹ mu shi

egudeje agha l’ẹka gbarụ ẹkpuroochi.

⁴Sụa, nteke ono, ẹka shi atụ mu atụtu,

Nteke ono, ọnya ono, mu lẹ

Chileke l’eshi shi bụru iya kpuchiru ibe mu.

⁵Nteke Ọkalibe-kakọta-ike shi swiru mu eswiru.

Nteke ụnwu mu shi nọ-whee mu mgburumgburu.

⁶Nteke ọkpa shi edejeru mu

ederu lẹ mini-ẹra-eswi, l’eshije l’elwu mu,

mmanụ anwụshiru mu l’oshi

ólivu mu, gvuru l’ẹka bụ ẹwhuru nkụchi.

⁷Nteke mu shi ejeje ndzuko

ndu bụ ọgurenya l’ọnu-abata mkpụkpu,

tsoru nweru oshi-anọdu lẹ nggamgbo-ọha.

⁸Ụnwu-okorọbya shi awhụje mu sọlaaru mu,

ndu bụ ọgurenya shi

awulishihuje kfụru akfụru gude yeru mu ẹso.

⁹Ndu bụ ishi shi adajẹ gbẹe,

woru ẹka dẹe l’ọnu.

¹⁰Ndu a marụ ẹwha whẹ b’e shi

agbọ-bujeru okfu ye l’ọnu,

ire anyakụ-geeru whẹ l’akpo.

¹¹O shi abụje, a nụa okfu mu, a gọoru mu ọnu,

madzụ whụa mu, ya asụ t’ejeje jejekwaro.

¹²Mkpata iya bụ lẹ mu shi

agbafụtaje ndu ụkpa, l’arya t’a gbaarụ whẹ mkpu,

dzọfuta ndu l’ẹte enwee nna,

whẹ te enwe onye l’agbarụ whẹ mkpu.

¹³Onye l’anwụhu anwụhu shi agọjeru mu ọnu,

mu shi emeje nwanyị-mbunu

iwhe obu l’akpẹnehu iya akpẹnehu.

¹⁴Mu shi yee ọ-dụ-chịriri g’ọo onye yeru uwe,

ikpe, kfụru nhamụnha shi

bụru mu uwe mkpẹelanu yẹle okpulishi.

¹⁵Mu shi bụru ẹnya, ndu l’atsọ ishi gude awhụ ụzo,

bụru ọkpa, ndu ngvụru shi gude eje ije.

¹⁶Mu shi bụru nna ndu ụkpa,

mu shi agbajẹ ọdzori onye mu l’amaa.

¹⁷Mu shi akụ-kwoshije ndu ejo-ememe ẹpyi,

nashịa whẹ ndu whẹ keberu eze eme tẹ whẹ tagbua.

¹⁸Nteke ono bẹ mu shi arịje lẹ

mu l’a-zẹe guu l’ụlo mu nwụhu,

lẹ mu l’a-ka ọkpobe nka.

¹⁹L’ọgbaragbu mu l’a-ba je agẹe ọnu lẹ mini,

mbụ l’iji l’a-da kpua l’ẹkali mu, ẹnyashi owhu.

²⁰L’ugvu mu nweru l’a-dụlewho ọ̀whúú ọ̀whúú,

ọkpehu mu adụkwawho ọ̀whúú ọ̀whúú.

²¹Ndu madzụ shi anọje akpa

hụbahuba tẹ whẹ nụta iwhe mu l’ekfu.

Whẹ shi adajẹ gbẹe ngabẹ nchị

l’idzu, mu l’achị-koshi whẹ.

²²Ọo okfu mu shi ebuje okfu ndu madzụ,

mbụ l’okfu nkemu shi atụbaje whẹ atụba lẹ nchị.

²³Whẹ shi angabẹjeru mu g’ọo

ndu ngabẹru mini t’ọ chịa,

jatoo ọnu ngabẹ g’ọo ndu

ngabẹru mini ishi awha.

²⁴Ọnu shi anwụje mu ọchi

l’ẹka whẹ nọ mẹe obu l’echifu whẹ echifu,

ọ bụru agụsahu, atatiwhu mu

l’agụsahuje shi emeje t’obu

nmakfuru whẹ anmakfuru.

²⁵Ọo mu shi bụru onye ishi,

l’akajẹru whẹ ẹka bụ ụzo.

Mu shi asụgajeru g’ọo onye eze

l’echilabọ ojọgu whẹ,

adụ whẹ obu nteke awhụ byarụ whẹ.

Jobu l’agụshi g’ọ dụru iya

¹“Ọle ntaa bẹ ndu mu tsageeru atsa

l’achịkawa mu kfịrikfiri,

mbụ ẹgube ndu nna, nwụru

whẹ nụ l’ẹte adụkwaa nke tẹ

mu gụru whẹ ye lẹ nkụta, l’echeru mu élwù.

²Ọkpu ẹka ta adụ whẹ, ọwhu

l’abụkwa tẹ whẹ baarụ mu urwu,

mbụ l’ụvo ta adụdu whẹ.

³Ụkpa-mkpẹri mẹe ẹgu bẹ meru whẹ, whẹ kpọo gbengu.

O meru whẹ, whẹ l’egudeje eze

whẹ ekwo emeeree l’ẹnyashi l’alị-ọkponku,

⁴Whẹ l’awakajẹ ẹgbudu je

akpakọo mkpẹekwo, l’atsọ únú-únú taa.

Ọ bụru egbenwabyị bẹ whẹ l’avụtaje ria l’ụgwo nri.

⁵Whẹ bụ ndu a chịfuru achịfu.

Ọ bụru gẹ l’anmajẹ ndu oshi

ụzu bụ gẹ l’aanmajẹ whẹbedua.

⁶Ẹka whẹ je eburu bụ l’ọwa mini, tahụru atahụ,

mẹe l’iduma iduma, dụ l’alị

mẹe lẹ mgbawara ẹwhuru.

⁷Whẹ l’anọduje l’ime ẹgbudu arya mịmimi g’ọo ịnya,

nọdu l’ime ẹtsukala kpọkfua onwowhe akpọkfu.

⁸Whẹ bụ ndu l’ẹte enwee uche, bụru eri l’ẹte enwee ẹwha,

bya abụru ndu a chịru achịchi l’alị-a.

⁹Ọo ẹgube ndu ono bụ whẹ gude mu agụ l’egvu.

Mu bụ iwhe whẹ gude atụ lẹ ntọnu.

¹⁰Whẹ l’asọ mu oyi, akpọru mu tuu,

ọgbu ọnu-mini ta adụ iwhe

l’ọobuje whẹ mẹ whẹ whụa mu.

¹¹Iwhe kparụ iya nụ bụ lẹ Chileke tọfuru ụdo,

shi gude mu nụ; bya emee mu, mu lwaa alị.

Ọ bụru iya meru, tọ dụ iwhe whẹ

l’asọjekwadu nsọ ememe l’iwhu mu.

¹²Ejo ọgbo-elenu ono shi mu l’ẹka-ụtara abya mu otso ọgu.

Whẹ kweshiru ọnya dobe t’ọkpa mu dzọta iya,

gvushia ose-ọgu gude yebuta mu.

¹³Whẹ nọ-chishiru ụzo, mu gege eshi gbalaa,

akpa ụzo tẹ whẹ laa mu l’iyi.

Tọ dụ onye l’abyanyi whẹ abyanyi.

¹⁴Whẹ shi l’owere, ha ọsa wụbata,

bya etsu mu kputukputu l’eli mkpọkoro ụlo.

¹⁵Iwhe l’eye egvu bẹ byakfutaru mu nụ,

bya achịa ugvu ono, e shi akwabẹ mu ọso,

o whekashihu g’ọo iwhe whẹrewhere patarụ,

mee ẹhu-guu, mu shi nweru kosahu g’ọo urwukpu.

¹⁶Ntaa bẹ mu l’abyawaa atọhu.

Iwhe-ọtsulanu bẹ wọwaru mu l’ẹka chịi.

¹⁷Ọkpu l’anọje amị mu wọo l’ẹnyashi.

Ẹhu l’anọje ata mu kwaa kwaa, t’ọ tanyajẹ mu kfụshi.

¹⁸Chileke gude ọkpehu iya alọ mu l’uwe jịkfu jịkfu.

Ọ kpọtaru mu l’olu uwe

kpọpyia mu ẹkpiri akpọpyi.

¹⁹Chileke bẹ tụru mu ye l’ime ẹpoto.

O meru mu, mu bụru udzu-ẹja mẹe ntụ.

²⁰Mu l’aryakuje gụbe Chileke,

ti yejeru mu ọnu.

Mu l’agbalihuje kfụru akfụru,

tị ngajẹru mu nchị.

²¹Ị ghakọberu bya adụru mu ẹhuka,

gude ọkpehu ghu akpa mu ẹhu.

²²I paliru mu oroke imeli-imeli,

mee mu, mu nọdu

lẹ whẹrewhere echiko ẹka echiko ọkpa.

I meru oke whẹrewhere l’apanga mu apanga.

²³Mu marụ l’ị kpụwaa mu ala maa,

mbụ l’ị kpụwaa mu ala ẹka ono,

a kwakọberu iwhe bụ madzụ nọ ndzụ.

²⁴Sụa, ?ọo lẹ onye nọ l’ikpo ntụ ta amachịjedu ẹka amachị,

mbụ ?onye ọbu te echijedu

oji-l’ẹka tọgbo l’iwhe l’atsụ iya lanụ?

²⁵?Mu ta aryajẹdu ẹkwa ẹhu onye

iwhe l’atsụ lanụ, ọwhu l’abụkwa?

?Tẹ mu ta agụjedu áwhụ ẹhu onye ụkpa, ọwhu l’abụkwa?

²⁶Nteke mu leru ẹnya l’iwhe l’a-dụ ree,

gbẹ-chia bụru ejo-iwhe byarụ.

Nteke mu leru ẹnya iwhoro, ọ bụru ẹkpuroochi gbarụ.

²⁷Ime ẹhu l’atsụ mu kpụtukputu, t’ọ tsụ-buhuje atsụ-buhu.

Iwhe-ọtsulanu l’agbajẹ mu ndzuta mbọku mbọku.

²⁸Mu gbachihuru agbachihu aghawhe,

tọ bụ anwụ meru, mu gbachihu.

Mu kfụru l’echilabọ edzudzu-ọha chia ‘oji-l’ẹka tọgbo.’

²⁹Mu bụwaa nwune nkụta-ọswa,

mu l’udukufuku l’atụwaa ọli.

³⁰Akpọ, dụ mu l’ẹhu bẹ

jikputawaru, aswashịhu aswashịhu.

Ẹwhoku l’enwu mu whuruwhuru l’ẹhu.

³¹Áwhụ bụwa iya bụ une mu l’akpọje.

Ẹkwa bụwaru iya bụ opu, mu l’awhụje.

¹“Mu l’ẹnya mu gbarụ ndzụ

lẹ mu ta abyadụ l’e-le nwamgbọko ẹnya

nke t’ọ gụa mu ẹgu tẹ mu l’iya zẹe.

²?Ọo gụnu bụ oke, madzụ l’e-keta l’ẹka Chileke, bu l’igwe?

?Ọo gụnu bụ oke-iwhe, madzụ l’e-keta l’ẹka

Ọkalibe-kakọta-ike, bụ onye nọ l’imeli?

³?Tọ dụ ndu ejo-ememe bẹ ọla-l’iyi gbarụ t’ọ byakfuta,

ọ bụru ndu l’eme njọ b’ọ gbarụ

t’eze iwhe-ọtsulanu byakfuta?

⁴?Chileke ta awhụjedu gẹ umere mu dụ?

?Tọo gụjedu ndzọkpa mu ọgu?

⁵Ọ -bụru lẹ mu yejeru ẹka l’iwhe iwhoro,

ọdua lẹ mu hatakebejeru ọkpa je ekputa madzụ iwhe iya,

⁶tẹ Chileke tụa mu l’iwhe dụ nhamụnha ono,

l’oogudeje atụ iwhe, ya awhụ l’iswi dụ mu mma.

⁷Sụa, ọ -bụru lẹ mu shiswejeru

ụzo, m’ọ bụ l’ẹnya mu

kpatajẹbuwaru, mu gude obu mu meswee,

m’ọ bụ l’ẹka mu tẹke adụbua ọcha,

⁸ọo ya bụ, t’anya, mu seru ese

bụkwaru ndu ọdo l’e-ri iya.

Iwhe mu meberu l’alị abụru

iwhe l’ee-wheshi ewheshi.

⁹Ọ -bụru lẹ mu wojeru ẹnya swọbe lẹ nyee onye ọdo,

ọdua lẹ mu kụpajeru akụparu l’ọnu-ụlo madzụ ibe mu,

¹⁰ọo ya bụ; tẹ nyee mu bụkwaru nwohuta onye ọdo,

t’unwoke ọdo jekfukwa iya azẹe.

¹¹Nkele oori ogori bụ ejo ụrwu-alị,

ọ bụ njọ, gbarụ t’a nụa onye meru iya nụ áwhụ,

¹²Ọ -bụ lẹ mu meru iya mẹ ya

abụru ọku kee mu jeye lẹ Emebyi,

kegee kee iwhe mu nweru.

¹³Sụa, Ọ -bụ l’ohu mu gụbuwaru mu áwhụ,

lẹ mu jịkaru iya omeru iwhe rwuberu iya nụ.

¹⁴?Ọo gụnu bẹ mu l’e-me mẹ

Chileke gbalihu bya iya ekpe ekpe?

?Ọo gụnu bẹ mu l’e-kfu, m’ọ jịa mu iya?

¹⁵?Tọ dụ Chileke ono, bụ iya keru mu ye ne mu l’ẹwho,

bẹ bụ iya keru ohu mu ono?

?Tọ dụ iya tụkoru anyi kpụa ye ne anyi l’ẹwho?

¹⁶Sụa, onye ụkpa -ryọjewaa mu iwhe, mu jịka,

ọdua lẹ mu mejeru t’ụzo chi nwa-mbunu,

¹⁷Mu ribuakwa nri nkụnyi,

lẹ mu ba anụ nwa nwogbee t’o ria,

¹⁸nkele nkeshi mu fụtaru bụru madzụ,

mbụ lẹ nkeshi a nwụru mu,

bẹ mu l’ehe ụnwu ogbee g’ọo nna whẹ,

eleta ụnwanyi-mbunu ẹnya.

¹⁹Mu -whụbuakwa onye l’ẹte enwee iwhe oowe l’ukfu,

m’ọ bụ onye mkpa byarụ; to nwe uwe, l’ooye l’ẹhu,

²⁰mu ta achẹe ya iwhe oowe l’ukfu,

shi nno mee; t’o gude obu iya tua mu ẹwha,

lẹ mu gude ukpo, e meru l’ẹji

atụru mu mee t’ẹhu voje iya ọku.

²¹Mu -halibuwaa ẹka ahali chia onye l’ete enwee nna,

okfu lẹ mu bụ onye ọnu l’erwu l’okfu l’ụlo-ikpe,

²²ọo ya bụ, t’akwẹka kwafụkwa mu akwafụ,

t’ẹka gbụfukwa mu agbụfu.

²³Sụa, mu shi atsụ egvu áwhụ, Chileke l’a-nụ mu,

mu shi atsụ ọ-dụ-biribiri iya egvu.

Ọo ya meru, mu te eme ụdu iwhe ono.

²⁴Mu -dakobebuakwa mkpọla-ododo,

kpọru obu ye lẹ mkpọla-ododo rọru arọ,

²⁵mu -tejebuakwa ẹswa lẹ mu nweru iwhe shii,

mbụ lẹ mu setaru iwhe ọkpobe eseta,

²⁶mu -bajẹbuakwaru ẹnyanwu, l’eke zhịizhii,

m’ọ bụ ọnwa, l’echi whoowhoo ẹja,

²⁷nke ọwhu bụ l’obu mu bẹ tụbaru iya l’edomi,

shi nno mee mu, mu yelahaaru iya ugvu,

²⁸o noo g’abụkwawho njọ, gbarụ t’a nụa mu awhụ iya,

nkele o noo bụ ọjika Chileke, bu l’imigwe.

²⁹Mu -tejebuakwa ẹswa kpua

ọhogu mu l’iyi yiru iya nụ,

ọdua l’ẹhu tsọjeru mu ụtso

l’ejo-iwhe byakfutaru iya nụ.

³⁰Mu ta atụbudua onye ọhogu mu ọnu sụ t’ọ nwụhu,

shi nno gude ọnu mu kfuta iwhe-dụ-ẹji.

³¹Ndu bu l’ibe mu l’eritaje nri jịa

sụ: ‘?Ọo onye bẹ ẹwho l’ejidua l’ibe Jobu?’

³²Ndu shi eshishi bya,

tẹka aradụbudua lẹ woroworo.

Mu l’agụhaje mgbo ụlo mu ghebe

ọnu tẹ ndu l’eje iwhe bata.

³³Mu te emebudua iwhe-dụ-ẹji

kwachia ya gẹ ndu ọdo l’akwachije,

mbụ lẹ mu te ewojeduru njọ domia l’ime obu mu.

³⁴Mu te egudejedu ọtsu egvu iwhe ndu madzụ l’ekfu,

m’ọ bụ ọtsu egvu lẹ ndibe anyi

ta agụbedu mu iwhe,

mee ọnu shọngu, kwaburu l’ụlo.

³⁵Ọ dụ g’e shi o nweru onye ngabẹru mu nchị!

Mu gọokwaru ẹgo ẹhu mu byia ẹka l’ẹkwo.

Tẹ Ọkalibe-kakọta-ike yewaru mu rọ ọnu.

Ọ dụ g’e shi ndu l’etso mu okfu,

dee iwhe whẹ sụru lẹ mu meru edede l’ẹkwo.

³⁶Mu gẹge anyajẹru iya anyarụ l’ukuvu,

woru iya kee l’ishi g’ọo onye kpu okpu-eze.

³⁷Mu gẹge eshi ishi lanụ dooru Chileke edo ẹhu mu,

kovube g’ọo nwa eze jekfu iya.

³⁸Ọ -bụru l’alị, mu l’akọje iwhe bẹ l’echi mkpu ekpu mu,

ntufu l’owere, dụ iya nụ l’arya ẹkwa,

³⁹ọ -bụru lẹ mu riru iwhe shi l’alị ono

lẹ mu ba akfụ ndu ụgwo ozhi iya,

ọ -bụru lẹ mu meru ndu nwe iya nụ, whẹ nwụshihu,

⁴⁰t’ọ bụkwaru ẹwu-ogvu l’e-fu iya, l’ọzori akpụru witi,

ẹwu ezee ya l’ọzori balị.”

Ọ gvụakwaru Jobu l’ọnu.

Elihu l’ekfu g’ọ mataberu

¹Tọ dụ iya bụ, ụmadzu ẹto ono yebuhu ọnu yeru Jobu, nkele o leru onwiya ẹnya lẹ ya dụ chịriri. ²O noo ya, Elihu bya avọru ọku ghụa ẹhu l’ẹka Jobu nọ, o noo lẹ Jobu bẹ harụ ome Chileke onye dụ chịriri mee ya onwiya. Elihu bụ nwa Barakẹlu onye Buzu, bụru ẹpa Ramu. ³Ọ vọkwaruwho ọku ghụa ẹhu l’ẹka ndu ọnya Jobu whọ whẹ ẹto nọ, nkele whẹ ta adụdu ike saa Jobu okfu, ọle whẹ nmakwaru iya nụ ikpe. ⁴Iwhe kparụ iwhe Elihu nọdu nggujingguji gude tẹ ndu ọwhu kfugedaa lẹ g’ọ dụ whẹ, tẹmenu o yederu Jobu ọnu, bụ lẹ whẹ bụkota iya ọgurenya. ⁵Nteke Elihu whụru l’ụmadzu ẹto ono ta amahẹdu ọnu ọdo, whẹ l’e-yebaa, ẹhu ghulahaa ya eghu.

⁶Tọ dụ iya bụ, Elihu, bụ nwa Barakẹlu, onye Buzu bya eyee ọnu nkiya sụ:

“Mbẹdua bụkwa nwata, unubẹdua bụru ọgurenya.

Ọo ya meru, mu shi asọ ẹnya,

atsụ egvu gẹ mu l’e-me

kfuru unu gẹ mu mataberu.

⁷Mu sụru l’ọ ka mma t’ọgurenya kfua,

tẹ ndu nọwaru igweligwe awha zhia mmamagụ.

⁸Ọle, iwhe l’emeje t’iwhe doo

madzụ ẹnya bụ maa, nọ onye ọbu l’ime,

mbụ ume Ọkalibe-kakọta-ike kuru nụ iya.

⁹Ọ tọ bụkwa l’a bụ ọgurenya bụ l’a marụ ágụ,

tọ bụ l’a nọru igweligwe awha bụ l’iwhe l’edo ẹnya.

¹⁰Ọo ya meru, mu l’ekfu sụ t’unu geberu mu nchị,

tẹ mu kfuaru unu gẹ mu mataberu.

¹¹Mu shi ngabẹ unu nchị l’olu.

Mu shi ngabẹ nchị l’ọnu, unu shi eyekashi,

nteke unu shi ahakashị okfu unu ahakashị.

¹²Mu shi ngabẹ nchị ree-ree-ree,

ọle ọ tọ dụdu g’unu ha onye

ọwhu dụ ike nma iya Jobu.

Tọ dụ g’unu ha onye ọwhu dụ ike saa ya okfu.

¹³T’unu ba asụjekwa l’unu mawarụ mmamagụ.

Tẹ Chileke saa Jobu okfu,

lẹ madzụ ta amadụ iwhe l’ọo-sa iya.

¹⁴Sụa, Jobu ta abụkwa mbẹdua bẹ l’ookfuru.

Ọ tọ bụkwa g’unu yeru iya ọnu bụ gẹ mu l’e-yeru iya.

¹⁵Ee, ọ kpọru whẹ ọnu okfu.

Whẹ ta amahẹ ọnu, whẹ l’e-ye.

¹⁶?Ọo tẹ mu ngabẹhunuru gụnu

ntaa gẹ whẹ nọshiwaa

nggujingguji, nmawogeeru,

whẹ ta amahẹ ọnu ọdo, whẹ l’e-yebaa?

¹⁷Mbẹdua l’e-yekwa ọnu nkemu.

Mu l’e-kfukwa gẹ mu mataberu.

¹⁸Nkele iwhe mu l’e-kfu bẹ jiru mu ọnu eji,

ọonma mu whụka whụka l’ẹhu tẹ mu kfukebe iya.

¹⁹L’ime onwomu bẹ mu dụlewho g’ọo mmẹe,

a gbarụ ye l’ekpemu swọ-chia.

Mu dụlewho g’ọo ite ọ̀whúú,

e yeru mmẹe, l’ọobya agbawahụ.

²⁰Mu l’e-kfu okfu nggẹ ẹhu agụa mu n-whe.

Mu l’a-kụha ọnu akụha yee ọnu.

²¹Ọ tọ dụ-zhidua onye mu bya l’agbachiru,

tọ dụ onye mu bya l’aja ajaja l’aaja ntsụrekfu,

²²nkele e bebezhiada nụ,

mu ta ama gẹ l’aajajẹ madzụ

ajaja l’aaja ntsụrekfu,

ọdua mẹ Chileke, bụ Onye keru mu nụ emehaakwa

tẹ mu tufu g’ọo agọ ẹnwuru.

¹“Ngwa Jobu, ngabẹ nchị ree l’okfu mu.

Gebe nchị l’okfu lile, mu l’abya ekfukfu.

²Mu byakwa l’asa ọnu kfua okfu,

iwhe mu l’e-kfu bekwaru mu eberu l’ọnu.

³Obu gụru mu iwhoro l’okfu-a, mu l’abya ekfukfu.

Ọo ire-lanụ, mu marụ bẹ mu l’e-kfu.

⁴Ọ kwa Ume Chileke bẹ meru mu

nụ, mbụ l’ọo Ume

Ọkalibe-kakọta-ike bẹ meru mu nọdu ndzụ.

⁵Yeru mu ọnu m’i je l’a-dụ ike.

Kwakọbe ẹhu tẹ mu lẹ ghu kfuta iya.

⁶L’ẹnya nke Chileke bẹ mu lẹ ghu bụkwa iwhe lanụ.

A kpakọru mu lẹ ghu kpụa l’ụrwa.

⁷Ọ tọo gbakwa t’ị tsụ mu egvu.

Mu ta ahalinukakwa rọ ẹka.

⁸I kfuru iya ye mu lẹ nchị,

mbụ lẹ mu nụru okfu, i kfushiru sụ:

⁹L’ị bụ onye ẹka iya dụ ọcha, iwhe-dụ-ẹji l’adụa l’ẹhu.

L’ị bụ onye iswi dụ mma, njọ l’adụa l’ẹhu.

¹⁰Sụ; lẹ Chileke bẹ tsoru

achọkashi ẹka l’ọo-sụ l’ọ nmarụ ghu,

bya agụru ghu ye l’onye ọhogu iya.

¹¹L’ọ chịru ghu ọkpa ye lẹ mkpọro,

ele t’ọ marụ gẹ l’ịiha ọkpa ha iya.

¹²Ọle ọnu, mu l’eyekwanu bụ l’i ti kfudu ree.

Chileke bẹ kakwa madzụ nkajishi.

¹³?Ọo gụnu meru l’ịita-tso iya okfu,

sụ l’o too yejedu ọnu l’okfu ẹhu ụnwu madzụ?

¹⁴Chileke l’ekfuje okfu l’ụzo lanụ.

Ookfuje okfu, ya ekfubaa,

ọle madzụ ta amajẹdu.

¹⁵Ooshije lẹ nrọ kfua okfu, shi

l’ọwhulenya ẹnyashi kfua okfu,

ookfuje okfu nteke mgbẹnya tsụru madzụ,

kfua okfu nteke madzụ zẹe

l’iwhe-azẹe ya eku mgbẹnya.

¹⁶Ọorweje madzụ okfu arwẹe lẹ nchị,

gude ọkwa, l’ọonmaru whẹ eye whẹ egvu.

¹⁷Iwhe ono bụ gẹ l’ee-shi t’ọ lọ-whu madzụ azụ

t’ọ haa ome iwhe dụ ẹji,

bụru gẹ l’ee-shi wofu madzụ ekuku l’ẹhu,

¹⁸bụru gẹ l’ee-shi sede iya t’ọ bọ daba l’iduma,

dzọta ndzụ iya t’e be egbu iya lẹ mma.

¹⁹Chileke l’ahajẹru gude ẹhu-ba-dụ-mma

hụ̀a madzụ àhụ̀hù,

gburu iya ye l’iwhe-azẹe ya, ọkpu amị iya wọo.

²⁰Onye ọ dụ nno bẹ nri l’adụje ashị,

nri, kagezhia ụtso l’abyajẹ iya ọmari l’ọnu.

²¹Anụ ẹhu iya l’eretoshihuje mebyishihu.

Ọkpu iya ono, e shi t’a whụ ẹnya l’awụshije jarịkiti.

²²Ọokpo gẹngu-gẹngu-gẹngu ala l’iduma.

Ndzụ iya l’eje ejekfu ndu l’ejeru ọnwu ozhi.

²³Ọ -bụ l’o nweru ojozhi-imigwe,

kfụru madzụ l’agụga akọwashiru iya iwhe,

mbụ onye lanụ l’ime ụnu ụnwu ojozhi labọ l’ụnu iri,

g’anọ anyataru iya iwhe gbarụ iya l’ememe.

²⁴Ojozhi-imigwe ono bẹ

l’e-meru iya eze-iwhe-ọma

sụ: ‘T’a nafụta iya t’ọ bọ bahụ l’iduma,

lẹ mu whụwaru iwhe l’ee-gude

kfụa aswa iya gude gbata iya.’

²⁵Anụ, dụ iya l’ẹhu l’a-bya egbuchafu

dụ pokopoko g’ọo nke nwata nshịi.

Ya abya alawhu azụ dụ

g’o shi dụ nteke ọ bụ nwokorọbya.

²⁶Nteke ono bẹ bụ, madzụ -kfuru

nụ Chileke, ya emeeru iya iwhe ọbu.

Ọ bụru nteke ono bẹ l’oo-gudeje

ẹhu-ụtso abya l’atatiwhu Chileke.

Chileke abya emee ya, ya anọdu l’ọnodu onye dụ chịriri.

²⁷Ọo nteke ono bẹ l’ọo-kfụru

l’edzudzu-ọha gụa ya l’egvu sụ:

‘Mu shi bụru onye l’eme iwhe-dụ-ẹji

mẹe onye l’aghajẹ iwhe kfụru nhamụnha ishi-okfuru,

ọle Chileke ta agwatadu mu ụgwo iya.

²⁸Ọ gbafụtaru ndzụ mu tẹ mu ba abahụ l’iduma.

Mu l’a-nọdu ndzụ whụ iwhoro.’

²⁹Leenu, o nokwa gẹ Chileke

l’emejeru iya madzụ ndono, o mee, ya emebaa.

³⁰Iwhe ono, l’ọonoje eme nno bụ,

gẹ l’ee-shi t’ọ lọ-whu ndzụ

madzụ azụ, t’ọ bọ dalahụ l’iduma,

nke ọwhu iwhoro nke ndzụ l’a-nọ enwuru onye ọbu.

³¹Sụa, Jobu; nmẹlekwawho anmẹe, ngabẹru mu nchị.

Dalẹkwawho jii tẹ mu kfu iwhe mu l’ekfu.

³²Nteke bụ l’o nweru ọnu l’ii-ye, yeru mu iya.

Kfujaa ya ekfuja nkele iwhe dụ mu ree bụ

t’e kpefu ghu iya l’ẹhu.

³³Nteke l’ọodua; gụ angabẹru mu nchị.

Daa jii tẹ mu zhia ghu mmamagụ.”

¹Tọ dụ iya bụ, Elihu bya sụ:

²“Unu ngabẹ nchị l’iwhe

mu l’ekfu, unubẹ nwa mmamagụ whẹ.

Unu geberu mu nchị, unubẹ

nwọmaru-ọ-machaa whẹ,

³nkele ọ kwa g’ire l’adaleje nri

adale, bụ gẹ nchị l’egeje okfu egege.

⁴T’anyi hata iwhe kfụru nhamụnha.

T’anyi tụko kpebua iwhe dụ ree.

⁵Jobu bẹ sụru lẹ ya bụ onye iswi dụ mma,

lẹ Chileke bẹ nafụru iya iwhe rwuberu iya nụ.

⁶Mbụ lẹ ya bụ onye kfụru nhamụnha,

a gụa ya l’onye l’adzụ ejire.

L’ọrwu, a kẹru iya bẹ bụ agwọta agwọta,

l’ẹbe ọdu ẹka ya mesweru.

⁷?Unu whụjeru onye ọwhu dụ g’ọo Jobu,

onye l’anọje angụ ọko ọnu g’ọo onye l’angụ mini.

⁸Onye ọ bụ whẹ lẹ ndu l’eme ejo-iwhe gba l’ọgbo.

Ọ bụru whẹ lẹ ndu ejo-ememe l’atụ ọli.

⁹Ọ ya bẹ sụru l’ọ tọ dụdu urwu,

madzụ l’erita l’ome iwhe dụ Chileke ree.

¹⁰Sụa, unu ngabẹru mu nchị,

unubẹ ndu iwhe doru ẹnya.

Tụswekwa, Chileke ta abyakwa l’eme ejo-iwhe.

Ọkalibe-kakọta-ike ta abyakwa l’eme iwhe l’adụa ree.

¹¹Ọ kwa g’iwhe, madzụ meru

gbarụ bẹ l’ọokfuje iya ụgwo iya.

Ọ bụru g’umere iya dụ bẹ l’oomejeru yeru iya.

¹²Ọwhu bụ ezhi-okfu bụ lẹ

Chileke te emejedu iwhe l’adụa ree.

Ọkalibe-kakọta-ike ta

akpọbeje iwhe kfụru nhamụnha ishi akụ.

¹³?Ọo onye bẹ yeru Chileke mgboko l’ẹka?

?Ọo onye bẹ sụru iya t’o letaje eliwhe l’owhu ẹnya?

¹⁴Ọ -bụru tẹ Chileke natawhu ume,

o kuru ye madzụ l’ẹhu azụ,

ọ -bụru t’ọ nata madzụ ume, l’ọotu ye onwiya l’ẹhu,

¹⁵bẹ madzụ l’owhu l’a-bụkwaru kpurupyata l’ugbo lanụ,

mbụ lẹ madzụ l’a-lawhu azụ l’ẹja.

¹⁶Ọ -bụru l’ị bụ onye iwhe l’edoje ẹnya, ngabẹkwa nchị,

gebe nchị nụ iwhe mu l’ekfu.

¹⁷?Ọ bụ iwhe kweru ememe l’onye

kpọru iwhe kfụru nhamụnha ashị l’a-nọdu achị?

?Ị ha nke ọonma Onye-kfụru-nhamụnha,

bya abụru onye, bụ Ọkalibe-kakọta-ike ikpe?

¹⁸Ọ ya bụ onye l’asụje ndu eze lẹ whẹ bụ Ọga-lẹ-mkpa,

sụ ndu nweru ẹnya lẹ whẹ bụ ndu Ejo-ememe.

¹⁹Ọ ya bụ onye, l’ẹte ebuje ndu ishi ẹnya l’iwhu,

tọ ọbokahuje ndu nweru iwhe mẹe ndu ụkpa ẹbo,

nkele ọo ya bẹ tụkoru whẹ mee.

²⁰Whẹ l’atụkoje nwụhu lẹ njị-ẹnya lanụ.

Chileke l’anmajẹ madzụ

yikayika l’echi abalị, whẹ anwụshihu.

Oowofuje ndu bụ oke madzụ; o too seduru iya ẹza.

²¹Sụa, ẹnya Chileke bẹ dụkotakwa l’iwhe madzụ l’eme.

Ọkpa, madzụ hatarụ bẹ l’ọowhukotajekwa.

²²Ọ tọ dụdu ẹka gbarụ ẹkpuroochi, tọ dụ ẹka gbarụ tsụrikiti,

bụ ẹka ndu l’eme ejo-iwhe l’e-domikota onwowhe.

²³Chileke tẹke atụ-bukwaa nteke

madzụ l’a-bya l’iwhu iya t’e kpee ya ikpe.

²⁴O too jejedu ọkpata ishi tẹmenu ya ewofu ndu oke madzụ,

woru ndu ọdo dochia ẹnya whẹ.

²⁵Ọo nkele ọ makọtaru iwhe whẹ l’eme,

meru l’oogudeje ẹnyashi kpua whẹ iwhu l’alị,

gwee whẹ aryaka eryune.

²⁶Ọohùje whẹ àhụ̀hù l’ejo-ememe whẹ l’eme,

l’ẹka ẹnya l’ọha l’a-whụ whẹ.

²⁷Mkpata iya bụ lẹ whẹ harụ otso Chileke,

tọ dụ iwhe whẹ gụberu ụzo iya,

²⁸shi nno mee, ẹkwa ndu ụkpa

ryarụ rwua Chileke lẹ nchị,

ọ nụa ẹkwa ndu l’adụa g’ọ harụ whẹ ryakuru iya.

²⁹Chileke -sụ lẹ ya te eyedu ọnu,

?ọo onye ha gẹ l’ọonma iya ikpe?

O -domia iwhu iya, ?ọo onye l’adụ ike awhụ iya?

Ọo ya nwe madzụ, nweru mba l’owhu.

³⁰Oomeje t’onye l’amaa Chileke ba anọdushi l’ọchichi,

nke ọwhu l’ooto gude ọnya nmata madzụ.

³¹Madzụ sụ Chileke lẹ ya bụ onye ikpe nmarụ,

lẹ ya ta abyakwa l’e-me iwhe-dụ-ẹji ọdo,

³²bya asụ iya t’o zhinua ya iwhe ya l’ẹte awhụje.

Lẹ ya -mee ẹji, bẹ ya l’ẹte emehekwa iya ọdo.

³³?Ị rịru lẹ Chileke l’a-kfụ ghu ụgwo m’ọ bụru

lẹ nzhimanụ ta alwawhudu ghu azụ?

Ọ kwa ghu l’e-kfu l’onwoghu,

ọ tọ bụkwa mbẹdua, kfukwaa iwhe ị marụ.

³⁴Ndu iwhe l’edoje ẹnya,

mẹe ndu marụ ágụ, l’anụ iwhe

mu l’ekfu bẹ l’a-sụkwa mu-a lẹ:

³⁵‘Jobu l’ekfu okfu onye l’adụa iwhe ọ marụ,

mbụ l’okfu iya te enwedu ishi.’

³⁶Ọ dụ nke t’a data Jobu datarwua ya l’ishi,

nkele ooye ọnu g’ọo onye ejo-ememe.

³⁷O kwefuru ike, yekoberu iya iwhe-dụ-ẹji o meru.

Ọonoje akụ ẹka ekpu anyi,

aja anyi ewenu,

ekfu ejo okfu ekfugide Chileke.”

¹Elihu l’ekfu iwhe l’ookfu, sụ Jobu:

²“?Ị rịru l’ọ gbarụ

t’ị sụ l’ị ka Chileke ọdu chịriri?

³Ọ tọ gbakwa nke t’ị sụ woo: ‘?Ọo gụnu bẹ l’iirita iya,

?ọo urwu gụnu b’ọ bẹru ghu

l’ị harụ ome iwhe-dụ-ẹji?’

⁴Ngabẹ tẹ mu bya eyeru ghu ọnu,

gụ lẹ ndu ọnya ghu.

⁵Leedaa ẹnya l’igweli,

tọmitadaa ẹnya whụ g’urwukpu

habe oroke-imeli-imeli l’eli ishi ghu.

⁶I -mee iwhe-dụ-ẹji, ?ọo Chileke b’i mekataru?

Iwhe-dụ-ẹji, l’iime -ha m’ọo igweligwe ọha agha;

?oo-mebata iya gụnu?

⁷Nteke bụ l’ị dụ chịriri,

?ị nụru iya gụnu?

?Tọo gụnu bẹ l’ọonata l’ẹka ghu?

⁸Ejo-ememe, l’iime bụkwa madzụ ibe ghu bẹ l’oomekata.

Chịriri, ị dụ bụru ụnwu eliwhe l’eri urwu iya.

⁹Ọobuje, a -kpanụka ndu madzụ ẹhu, whẹ eye mkpu l’ọnu.

Whẹ l’echije: Oji-l’ẹka tọgbo,

mẹ ndu nwe ọkpehu dabẹ whẹ ẹka l’ẹhu.

¹⁰Ọle ọ tọ dụdu onye l’asụje:

‘?Ọo awe bẹ Chileke ono, meru mu nụ nọ,

onye l’emeje tẹ madzụ gụa egvu ẹhu-ụtso l’ẹnyashi.

¹¹Mbụ onye ono, meru anyi ka

anụmanu nke mgboko ọoma iwhe,

bya emee; anyi ka ẹnu, l’ewhe l’eli ọma ágụ.’

¹²O too yejedu ọnu yeru ndu

madzụ mẹ whẹ l’echi mkpu.

Iwhe kparụ iya nụ bụ lẹ whẹ bụ

ndu l’eku onwowhe eku, eme ejo-iwhe.

¹³Ishi iya bụ lẹ Chileke te eyejedu ọnu lẹ mkpu iwhoro.

Ọkalibe-kakọta-ike ta angajẹdu iya nchị.

¹⁴?Ọo chia gụbe onye ọwhu sụru

l’ị tị whụdu iya bẹ l’ọongaru nchị,

mbụ gụbe onye sụru l’okfu

ẹhu ghu bẹ dụ l’atatiwhu iya,

i je l’a-nọdu ngabẹru iya?

¹⁵Eshi-ọwhu ị sụru lẹ Chileke te egudejedu

ẹhu-eghughu iya hụa madzụ ahụhu,

tọ kpajẹ onye l’eme ejo-iwhe ishi,

¹⁶bẹ gụbe Jobu l’ekfukwa mkpọkoro okfu.

Okfu, l’iikfu bụ igwe okfu, l’enwee ishi.”

Elihu l’ekfu iwhe nsogbu Jobu fụtaru

¹Elihu l’ekfukwawho iwhe l’ookfu sụ:

²“Tabakwaa nshi nwanshị,

nkele mu nwebakwaaru iwhe

mu l’eme tẹ mu kfuchitaru Chileke.

³Mmamiwhe mu bẹ shikwa l’ẹka teru ẹnya.

Mu l’e-goshi ghu lẹ Onye ono, meru mu nụ bẹ dụ chịriri.

⁴Iwhe l’ịi-tụbe nvọ bụ l’okfu mu bẹ ejire l’adụdua.

L’onye makọtaru iwhe lile bẹ nọkwa swiru ghu.

⁵Chileke bẹ ọkpehu dụ. Ọle ọ tọ

dụdu onye l’ọokpoje ẹbo-ẹbo l’afụ.

Ọkpehu dụ iya, tẹmenu ọ bụru

onye iwhe lile doru ẹnya.

⁶Ndu ejo-ememe bẹ l’ooto dobejedu ndzụ.

Ọle ndu l’aakpa ẹhu bẹ

l’ọonuje iwhe rwuberu whẹ nụ.

⁷Ẹnya iya ta alụfujedu alụfu l’ẹka ndu dụ chịriri nọ.

Oomeje; whẹ lẹ ndu eze atụko bụru eze.

Ookutseje whẹ ekutse jeye lẹ gbururu.

⁸A -tụa ndu madzụ mkpọro,

bya eworu ụdo iwhe-ọtsulanu kee whẹ gbagbadị,

⁹iwhe Chileke l’emeje bụ

l’oogoshije whẹ iwhe whẹ meru.

Oogoshije lẹ whẹ l’eku

onwowhe eku, shi nno emeswe iya.

¹⁰Ọoloje whẹ ẹka lẹ nchị,

sụ tẹ nzhimanụ lwa whẹ azụ l’ejo-iwhe, whẹ l’eme.

¹¹Whẹ -nụaru iya okfu, jelahaaru iya ozhi,

whẹ anọfu ndzụ l’ishi, ẹhu adụ

whẹ guu, whẹ enweru ẹhu-ụtso.

¹²Nteke bụ lẹ whẹ te ekwedu nụaru iya okfu,

whẹ alaa l’ogu-ịgba,

gude ba ama iwhe nwụhu.

¹³Ndu l’amaa Chileke l’ime obu whẹ bẹ iwe l’adụje l’obu.

Whẹ ta aryakujedu iya mẹe, o -kee whẹ m’ọo ẹgbu.

¹⁴Whẹ l’agbakwohuje nwụhu l’okorọbya.

Whẹ l’anwụje ọnwu iwhere.

¹⁵Chileke l’egudeje iwhe-ọtsulanu

nafụta onye iwhe-ọtsulanu byakfutaru.

Oogudeje mkpamẹhu mee t’ụzo nchị dụ whẹ.

¹⁶Ọ kwa ẹgube ono bẹ

l’oome tẹ ya nafụta gụbedua lẹ mkpamẹhu,

dobe ghu l’ẹka ha whosaa, okfukfu l’ẹte egbu ghu,

nụ ghu ọkpobe nri, l’e-me t’ẹhu dụ ghu mma.

¹⁷Ọle ntaa, a hụru ghu ahụhu, gbarụ onye ejo-ememe,

g’ahụhu yẹle ikpe, kfụru

nhamụnha zụwaru ghu gidimu,

¹⁸kwabẹkwaru onwoghu ẹnya

t’okpoga ba akpawhu ghu ishi.

Be ekwekwa t’a nụ ghu nnuchi-ọnu,

l’e-me t’ị gbakụta Chileke azụ.

¹⁹Ẹku, i nweru ?oo-me t’ị ba anọhe lẹ mkpamẹhu?

?T’ii-gude ọkpehu ghu l’owhu gude nahụ iya?

²⁰Ba akpọtakwa t’ẹnyashi bya,

bụ nteke ndu madzụ l’alajẹ l’iyi.

²¹Kwachafụkwa ẹnya t’ị ba agharụ ejo-iwhe iwhu,

nkele mu l’ele ẹnya l’ị ka iya ahata karia iwhe-ọtsulanu.

²²Chileke bẹ ike iya parụ ẹka.

Ọo ya bụ o-zhi-iwhe, kagee shii lẹ ndu o-zhi-iwhe.

²³Ọ tọ dụdu onye l’atụjeru Chileke ọnu ụzo.

Tọ dụ onye sụjeru iya l’o mekwaru ẹji.

²⁴Nyatakwa kutsee ozhi, Chileke jeru ekutse,

mbụ ozhi iya ono, ndiwhe gụru l’egvu gude jaa ya ajaja.

²⁵Madzụ l’owhu bẹ whụkotawaru ozhi Chileke jeru.

Aanọduje otẹnya ele iya ẹnya.

²⁶Chileke bẹ pakwarụ ẹka shii.

Anyi ta amarwudu iya l’ishi.

Madzụ ta agụtadu awha ole, ọ nọwaru agụta.

²⁷Ọomikobeje mini l’urwukpu,

ya achịa laa l’ọnu-iyi.

²⁸Igweli l’achịje mini,

ọochije eze mini wụshiru ụnwu eliwhe.

²⁹Gẹ Chileke gude tụsaa urwukpu

ta adụkwa onye o doru ẹnya.

Tọ dụ onye marụ gẹ l’oomeje shi

l’ọkpoku iya agba egbe-igwe gbarara.

³⁰Lee g’o gude ebemu-igwe iya

doo onwiya mgburumgburu.

Oogudeje iya ekpuha ẹka

kagezhia omilomi l’eze-ẹnyimu.

³¹O nokwa g’o shi achị madzụ l’owhu,

anụ whẹ nri nke etsutsu iya.

³²Iwhe jiru iya ẹka bụ egbe-igwe.

Ọ bụru ẹka ọ tụberu iya bẹ l’ọogbaje iya.

³³Ụda egbe-igwe l’emeje, a marụ lẹ mini l’abyawa achịchi.

Eswi, l’eeche eche l’emegejee,

a marụ lẹ mini l’abya achịchi.

Elihu l’atụ ọnu Chileke

¹“Sụa, ọ kwa iwhe ono meru; obu l’etsu mu kpuu-kpuu,

mbụ lẹ meji l’akụfu mu akụfu.

²Unu ngabẹ nchị, unu ngabẹ nchị

nụ g’olu Chileke l’aha gengu-gengu.

Unu nụduwho kiriri, o gude ọnu iya ede.

³Oomeje ebemu alọo whaa l’igweli.

Ọowaje l’ẹka igwe beru; alị beru.

⁴Ebemu ono wagee; olu iya abya edee kiriri.

Olu iya l’edeje gbarara g’ọo egbe-igwe.

Ọobuje olu iya l’ede; ebemu-igwe awa whoo.

⁵G’olu Chileke l’egudeje edebe kiriri bẹ dụ oke egvu.

Oke iwhe l’oomegbabe bẹ anyịbe madzụ l’amadụa.

⁶Aka-sunoo bẹ l’ọosuje t’ọ dashịa

lẹ mgboko, sụ mini t’ọ chịa, chịshia ike.

⁷Oomeje tẹ madzụ rwụ-buhu ọrwu,

nke ọwhu madzụ l’owhu l’a-marụ ọrwu iya.

⁸Ụnwu-anụmanu l’abahụje l’ọgba ẹka whẹ bu,

whẹ l’anọduje l’ime ẹnu whẹ.

⁹Oke whẹrewhere l’eshije l’ụzo ọhuda,

oyi l’eshije l’ụzo isheli.

¹⁰Chileke l’abụje, ọ tụa ume, mini akpụkoo akpụko,

mini, ha ọsa, dọru nyịmu-nyịmu akpọo ikikoyi.

¹¹O meru mini dọru l’urwukpu nyịmu-nyịmu,

o mee ebemu-igwe l’alọje l’urwukpu ono whaa.

¹²Ọkpa ebemu-igwe ono bụ yẹbedua l’egudeje ẹka iya

aswọ iya mgburumgburu.

Ọ bụru iwhe ọ sụru t’o mee lẹ mgboko bẹ l’oomeje.

¹³Mini l’ahajẹru chịa; gude hụ̀a madzụ àhụ̀hù,

harụ chịa gbashị l’alị; gude goshi n-yemobu Chileke.

¹⁴Ngabẹkwa nchị Jobu.

Kfụru, leedawho ẹnya l’iwhe

dụ biribiri Chileke l’emegbabe.

¹⁵?Ị marụ gẹ Chileke l’emeje tụa iwu,

ebemu-igwe awa whoo l’urwukpu?

¹⁶?Ị marụ g’urwukpu l’eshije awụ awụwu l’akpamigwe?

Iwhe ono bụkwa ọrwu, dụ biribiri,

Chileke, bụ onye tụkoru iwhe lile marụ rwụru.

¹⁷Nteke whẹrewhere ụzo ọhuda

watarụ ezhizhi, mgboko -deru gbẹe,

bẹ uwe, i ye l’ẹhu l’anọje ekpo ghu okpomọku.

¹⁸?Ịi-dụ ike mee gẹ Chileke meru,

woru akpamigwe whụshia,

mbụ mee ya t’ọ bụru kpọo-gbịngu

g’ọo onyo, a wụru awụwu?

¹⁹Zhia anyi iwhe anyi l’e-kfuru iya.

Ọ tọ dụkwa iwhe anyi marụ anyi l’e-kfu,

nkele ọ tọ dụdu ọwhu anyi marụ.

²⁰Mu ta atụkwa ama asụ Chileke

lẹ mu chọru tẹ mu kfuru okfu yeru iya.

?Ị whụru onye l’e-je aparụ onwiya nụ t’a laa ya l’iyi?

²¹Madzụ ta adụdu ike apali ẹnya ele l’akpamigwe,

nteke ẹnyanwu l’eke zhịizhii,

mbụ nteke whẹrewhere

zacharu akpamigwe o doo rịsaa.

²²Chileke bẹ shi l’ụzo isheli eje

abya, gude mkpọla-ododo,

l’egbu zaazaa kwaa onwiya ngwa.

Ọ kwarụ onwiya ọdu-biribiri l’ụzo, dụ egvu.

²³Ọ bụ Ọkalibe-kakọta-ike,

anyi ta adụdu ike abya iya ntse.

Ọkpehu, dụ iya nụ parụ ẹka,

tẹmenu ọ bụru onye ikpe nkfụmoto.

Ọ-dụ-chịriri iya parụ ẹka,

nke ọwhu bụ l’ọ tọo kpajẹdu madzụ ẹhu.

²⁴E kfubua mu, madzụ l’atsụ iya egvu.

Ndu marụ ágụ l’ẹnya nkewhe bẹ l’ọ tọo gụbejedu iwhe.”

Onye-Nwe-Ọha l’eyewaa ọnu nkiya

¹Tọ dụ iya bụ, Onye-Nwe-Ọha bya eshi l’oke whẹrewhere yeru Jobu ọnu sụ:

²“?Ọo onye l’ekfu iwhe l’edoo ya ẹnya ono,

gude arwachishi idzu ono, mu chịru?

³Rwụkota onwoghu g’ọo nwoke, tẹ mu bya ajịa ghu ajị.

Ọ kwa t’ị zabụa mu iya.

⁴?Ọo awe b’ị nọ nteke ono, mu tụru ukfu mgboko?

Yeru mu ọnu m’ị sụ l’ị manụkaru iwhe.

⁵?Ị marụ onye kpeburu gẹ l’ọo-ha?

?Ọo onye lọchiru eri, e gude tụa uswe iya?

⁶?Ọo lẹ gụnu b’a kpọberu ọkpa iya, ọ kfụ-geeru?

?Ọo onye bẹ gbuberu ishi ẹwhuru, gude mgboko,

⁷lẹge kpokponde mbọ-muchi tụkoru agụ egvu,

ụnwu ojozhi-imigwe l’owhu l’atụ ụzu ẹhu-ụtso.

⁸?Ọo onye bẹ gụru ụzo gburumu gụ-buru eze-ẹnyimu ye,

nteke ono, o shi l’ẹwho ne iya gbafuhu yọo?

⁹Mbụ nteke ono, mu yeru iya

urwukpu g’ọo onye yeru uwe,

gude ẹkpuroochi, gbarụ

tsụrikiti whụ-kpua ya

g’ọo onye whụ-kpuru ẹkwa.

¹⁰Mbụ nteke ono, mu kparụ oge eze-ẹnyimu ono,

bya eye iya mgbo mẹe iwhe

igwe, l’ee-gudeje atụ-chi iya.

¹¹Nteke ono, mu sụru: ‘T’oge kpaarụ iya l’ẹka-a,

t’ọ bọ kpọghatakwa ẹka-a akpọghata.

T’oke akpara ono, l’ọotu jebekwa l’ẹka.’

¹²Jobu ?ị tụjewaru iwu sụ t’ụtsu bya?

?Ị tụjewaru iwu sụ tẹ chi sahụ nọdu l’ọnodu iya?

¹³?Ị sụjewaru tẹ chi-asahu je

alọta ẹka l’ọnumonu mgboko

jịa ya pulangu jịshia ndu ejo-ememe, nọ l’ime iya?

¹⁴Mgboko kpụru orogbodo g’ọo

ụrwa, e gude eme iwhe-ọhubama,

e dengashia ya iwhe g’ọo uwe.

¹⁵E te ekwejedu t’iwhoro nwuaru

ndu ejo-ememe, o nokwawho

gẹ l’aanyakwoshije whẹ

ẹka ono, whẹ l’ahalije gude eme iwhe ike.

¹⁶?I jebuwaru ẹka eze-ẹnyimu futaru?

?I jebuwaru ije l’ogbu ẹnyimu?

¹⁷?E kpuhabuwaru ọnuzo alị-maa goshi ghu?

?Ị whụbuwaru ọnu ẹka l’eeshije abahụ l’inyonyo ọnwu?

¹⁸?Ị rị-vujewaru gẹ mgboko-o habe whorokotoko?

Ọ -bụru l’ị makọtaru iwhe ono g’ọ ha; kfuru mu iya.

¹⁹?Ndẹe ụzo, e shi eje ibe iwhoro?

?Ndẹe ẹka ọochi bu?

²⁰?Ị dụ ike duta iya lashia ẹka o shi?

?Ị marụ ụzo ẹka, l’eeshije eje ibe iya?

²¹O doru mu ẹnya l’ị marụ iya,

nkele a nwụadaru ghu tẹmenu iwhe ono dụde.

Ị nọwaru igweligwe awha.

²²?Ị bahụbuwaru l’ụlo ẹka a kụberu aka-mini sunoo?

?Ị whụbuwaru ụlo, a kụberu aka-mini?

²³Mu doberu iya kwabẹru nteke iwhe-ọtsulanu l’a-bya,

mẹe mbọku ọgu yẹle agha l’e-tsu.

²⁴?Ndẹe ụzo ẹka, l’eeshije eje ẹka,

iwhoro l’eshije kekashia onwiya ekekashi,

m’ọ bụ ẹka whẹrewhere ụzo ẹnyanwu-awata

l’eshije whedzuru mgboko?

²⁵?Ọo onye warụ ụzo dobe t’ọ

bụru ẹka mini l’eshije achị gbudugbudu,

bya emee ụzo ẹka egbe-igwe l’eshije adada?

²⁶?Ọo onye l’emeje tẹ mini chịa l’alị, madzụ l’ebua ebubu,

mbụ l’echi-ẹgu, l’adụa onye bu iya nụ?

²⁷?Ọo onye l’agbajẹ mini l’okorobo

alị, l’adụa iwhe dụ iya nụ,

mee t’ẹwu fushia l’alị?

²⁸Mini, l’achị achịchi, ?o nweru nna?

?Ọo onye bẹ nwụru iji, l’ada adada?

²⁹?Ọo l’ẹkpa-nwa nke onye bẹ

mkpukorowhu mini oyi l’eshije afụta?

?Ọo onye bẹ nwụru

mkpukorowhu iji mini ono, l’eshije l’igweli adashị?

³⁰Mini ono l’akpụkoje ọnu dụ g’ọo ẹwhuru,

ọma ogbu-mini l’ahụkoje ahụko?

³¹?Ịi-dụ ike swekoo kpokponde,

l’aza Puleyadesu ọnu?

?Ịi-dụ ike tọshia kpokponde,

l’aza Orayọnu t’ọ nọdu-gee iche iche?

³²?Ịi-dụ ike mee kpokponde gẹ kpokponde ha

t’ọ fụtaje l’oge, gbarụ iya nụ?

?Ịi-dụ ike edu kpokponde ono, bụ Beya yẹle ụnwu iya?

³³?Ị marụ nsọ, l’achịgbabe iwhe bu l’imigwe?

?Ịi-dụ ike mee t’ọ bụru g’ọ dụ

l’imigwe bụ gẹ l’ọo-dụ lẹ mgboko?

³⁴?Ịi-dụ ike ryaa ọrya t’o rwua urwukpu,

sụ tẹ mini chịa wụ-kputa ghu?

³⁵?Ịi-dụ ike sụ ebemu-igwe t’ọ waa,

ya awaa byakfuta ghu sụ: Lekwa mu ndọwa?

³⁶?Ọo onye l’emeje tẹ madzụ nweru mmamagụ,

bya emee t’iwhe doje madzụ ẹnya?

³⁷?Ọo onye bẹ nweru mmamagụ,

l’oo-gude gụa urwukpu ọgu?

?Ọo onye l’a-dụ ike mee

t’ite-mini, sụru l’igweli gbee egbegbe wụshihu,

³⁸nke ọwhu ivovonyi l’a-nma anmanma shihu ike,

ẹka alị gbarụ ọrwu arwapyabẹ-gee arwapyabẹ?

³⁹?Ịi-dụ ike je akpata nri bya anụ nyee oduu yẹle ụnwu iya,

gude bua whẹ ẹgu nri,

⁴⁰l’ẹka whẹ nọdu l’ime ọgba whẹ,

m’ọ bụ l’ẹka whẹ gepageeru egeparu l’ẹtsukala?

⁴¹?Ọo onye l’anụje egbe-nwọku nri, l’oorije,

nteke ụnwu iya ryarụ Chileke ẹkwa nri,

mbụ mẹ whẹ tsoru aghawhe achọ nri, whẹ l’e-ri?”

¹“?Ịimaje nteke eghu-ọswa, bu l’ugvu l’anwụ nwa?

?Ị whụbuwaru ne ele l’ẹka ime l’eme iya?

²?Ịiguje ọnwa ole, whẹ l’apajẹ ẹwho ime ọgu?

?Ị marụ nteke whẹ l’anwụje nwa whẹ gẹdegede?

³Whẹ l’egbedaje egbeda nwụa nwa.

Whẹ nwụ-gee ya; ẹhu abụru whẹ wheremu.

⁴Ụnwu whẹ l’eshihuje ike.

Whẹ l’anọduje l’ime ẹgbudu vushia.

Whẹ l’ahajẹ ne whẹ gbakashịhu,

whẹ ta alwakfutajedu iya ọdo.

⁵?Ọo onye meru nkakfụ-ịgara-ọswa, l’ọokpa l’onwiya?

?Ọo onye tọshiru nkakfụ-ịgara-ọswa wehaa?

⁶Mu nụru iya echi-ẹgu alị

ọkponku t’ọ bụru ibe iya,

bya anụ iya alị,

bụlewho únú-únú t’ọ bụru ẹka, l’oo-buru eburu.

⁷Ụzu, l’ada l’ime mkpụkpu l’anọje ezhi iya ọchi.

Ọ tọ dụdu onye l’aryachi iya nchị sụ l’ooche iya eche.

⁸Ẹka l’ọokpa nri bụ l’ugvu, irwu ẹwu, ọ whụru

bẹ l’ọolwukotaje alwụlwu.

⁹?Atsụ l’e-kwe-e jee ozhi, i zhiru iya?

?Oo-kwe-e radụ l’ẹka l’iiyejeru anụ nri?

¹⁰?Ịi-dụ ike tụa ya eri kpụta t’o jeeru ghu ozhi l’ẹgu?

?Ịi-dụ ike gude iya kọo ọkoro lẹ nsụda?

¹¹?Ii-gude l’ọkpehu, parụ iya ẹka, kpọru obu yeru iya?

?Ịi-harụ iya ozhi ghu, shihuru ike, t’o jee?

¹²?Ịi-kpọru obu yeru iya t’o je evulataru ghu witi,

bya akụberu ghu l’ụlo, l’aanọje echiru ghu witi?

¹³Enyi-nwẹnu l’anọje echi akwẹka puka puka

mẹ l’oowhe ewhewhe.

Ọle ị tịi tụduru iya eyeru ẹba torotoro.

¹⁴Enyi-nwẹnu l’atụje ẹkwa haa ya l’alị,

ẹja emee ya; ya evo ọku.

¹⁵Ọ tọo madụ lẹ madzụ nweru ike ijeta bya adzọ ya ọkpa,

m’ọ bụ anụ-ẹgbudu ejeta bya egwepyashia ya.

¹⁶Ọonoje eshiru ụnwu iya mgbashị,

gẹ woo lẹ whẹ ta abụdu ụnwu iya.

Ọ tọ kpajẹdu ishi l’anya, o seru l’a-bụru iya iwhe mmaka.

¹⁷Ishi iya bụ lẹ Chileke ta anụdu

iya mmamagụ, tọ nụ iya uche.

¹⁸Ọ nmawaa onwiya yikayika gbagbụa,

ya agbaghata ịnya mẹe onye

l’agba iya agba ribe whẹ nchịchochi.

¹⁹Sụa, ?Ọo ghu bẹ nụru ịnya ike?

?Ọo ghu bẹ gbarụ iya nza l’olu, ọ dụ yigayiga?

²⁰?Ọo ghu bẹ meru iya, l’ọonoje

akfụ gidimu gidimu g’ọo igube?

Ume l’oozhije nke whururu bẹ l’eyeje egvu.

²¹Oogudeje ẹhu-ụtso ike, dụ iya nụ,

aadzọ alị kakpọmu kakpọmu.

Ọonoje eme ẹnu eje l’iwhu ọgu.

²²Ọtsu-egvu l’anọje ezhi iya ọchi.

Mbụ l’ọ tọ dụdu iwhe l’ọotsu egvu.

Tọo tsụ-whuje azụ m’ọ whụa ogu-ịgba.

²³O-gbu-ngerengere arwa yẹle akfụ,

ndu l’agba ịnya ono vu l’ẹkpa akfụ l’anọje azụ iya

yọgoro yọgoro lẹ mgburẹku.

²⁴Mbịriko l’adụje iya nụ bẹ

l’oowhuduje mẹ ya elwe alị elwelwe.

A ta abyazhitajedu iya t’ọ kfụru

l’ẹka lanụ m’e gbua opu-ọgu.

²⁵Nteke ọ nụru ụda opu-ọgu;

iwhe l’oochije bụ: Ugeru-ugeru!

Ọonoduje otẹnya nụa ẹgburu ọgu.

Mbụ l’ọonoduje otẹnya nụa olu

ndu ishi ojọgu mẹe mkpu-ọgu, l’ada nụ.

²⁶Sụa, ?ọo ghu nụru ivu mmamagụ, o gude ewhe ewhewhe?

?Ọo ghu meru iya; l’ọojabeje akwẹka iya l’ụzo ọhuda?

²⁷?Ọo ghu zhiru ugo t’o wheje oroke-imeli-imeli,

mẹe t’ọ kpajẹ ẹkfunu iya l’imeli?

²⁸Ẹka o bu bụ elikoro eze-ẹwhuru ha l’eli,

ọo l’ẹka ono bẹ l’ọoraduje.

Ọ bụru l’ọnunu eze-ẹwhuru bẹ l’ọokwaje okpu.

²⁹Ọo l’eli ẹka ono bẹ l’ọonoduje

ele ẹnya iwhe l’oo-gbu ria.

Ọonoduje otẹnya geta iya.

³⁰Ụnwu iya l’angụje mee.

Ọ bụru l’ẹka odzu daburu bẹ l’ọonoduje.”

¹Onye-Nwe-Ọha sụ Jobu:

²“Onye l’ete ekweje l’onye ọdo l’eme ree,

o dzuru gẹ yẹle Ọkalibe-kakọta-ike l’a-tụ iya.

Tẹ gụbe onye ono, l’ebo Chileke ibo yeedaa ọnu.”

³Tọ dụ iya bụ, Jobu bya eyeeru Onye-Nwe-Ọha ọnu sụ iya:

⁴“?Mu l’e-ye ọnu sụ lẹ gụnu meru,

lẹ mụbe onye l’adụa iwhe mu bụ?

Mu l’e-kfuchi ẹka kfuchia l’ọnu.

⁵Mu kfuwaru okfu ugbo lanụ, mu te eyehe ọnu ọdo.

Mbụ lẹ mu kfuwaru ugbo okfu labọ, mu te ekfuhe ọdo.”

⁶O noo ya, Onye-Nwe-Ọha bya eshi l’oke whẹrewhere kfuru yeru Jobu sụ iya:

⁷“Rwụkota onwoghu g’ọo nwoke, tẹ mu bya ajịa ghu ajị.

Ọ kwa t’ị zabụa mu iya.

⁸?Ii-me t’ị sụ l’iswi ta adụdu mu mma tọo,

?Ii-me t’ị nmaa mu ikpe,

t’ọ bụru l’ọo gụbedua bẹ iswi dụ mma tọo?

⁹Ọtsu-ẹka ghu, ?ọo ha g’ọo nke Chileke?

?Olu ghu l’a-dụ ike dee gbigbigbi g’ọo nkiya?

¹⁰Ngwanụ, gude o-gbu-zaazaa

yẹle ọ-dụ-biribiri kwaa onwoghu ngwa.

Yeedaa ugvu yẹle biribiri g’ọo onye yeru uwe.

¹¹Vụa ọvuma gude goshi l’ẹhu l’eghu ghu damụdamu.

Lee ndu l’eku onwowhe eku ẹnya gude komia whẹ.

¹²Lee iwhe bụ ndu l’eku onwowhe eku ẹnya,

mee whẹ tẹ whẹ darwehu adarwehu l’ẹnya.

Gwee ndu ejo-ememe ryaaryaa l’ẹka whẹ kfụru.

¹³Tụko gẹ whẹ ha kpochia whẹ ẹja.

Kechia whẹ iwhu ekechi kpochia whẹ l’ilu.

¹⁴I mezhiwaa iwhe ono; ọo mu

l’a-bụru onye ivurụzo, l’a-ja ghu ajaja.

O noo nteke mu l’e-kweta l’ịi-dụ

ike gude ẹka-ụtara ghu dzọfuta onwoghu.

¹⁵Leedaa Enyi-mini,

ọo gẹ mu meru iya bụ gẹ mu meru ghu,

yẹbedua l’ata ẹwu g’ọo eswi.

¹⁶Ẹka ọkpehu dụ iya bụ l’ukfu!

Ike iya bụru l’akwara ẹwho iya b’o je awụshiru!

¹⁷Ọdzu iya l’ekelibeje kfụru gbarara g’ọo oshi sida.

Ọtsu ụtakfu iya bẹ likfugeeru l’ibe iya.

¹⁸Ọkpu, dụ iya l’ẹhu bụ akịri-ẹwho ope.

Oshi-ọkpa iya bụru mkpụrumkpu-igwe.

¹⁹Ọo ya bẹ gbarụ onye nke mbụ l’iwhe Chileke meshiru.

Ọo onye ono, meru iya nụ

l’a-dụ ike gude ogu-ịgba jekfu iya ntse.

²⁰Nri, l’oorije bụ l’ugvu bẹ l’ooshije,

bụ ẹka ụnwu anụ-ẹgbudu l’anọduje egvukaa egvu.

²¹Ọozeje lẹ mkpula oshi amị-ogvu,

domia onwiya lẹ mkpula ikpo furu l’ụda.

²²Aguguru oshi amị-ogvu ono l’ekpuchije iya.

Oshi wilo, gvuru l’agụga

ọnu-iyi l’anọ-wheje iya mgburumgburu.

²³Mini -tụa akpara ọtu agha, ọ tọo tsụjedu egvu.

O behuduru utso bya l’ẹnyimu

Jọ́danu dukfube iya l’ọnu, obu ta akụjajedu iya akụja.

²⁴?Ọo onye l’a-dụ ike kfuchia ya ẹka l’ẹnya gude iya,

m’ọ bụ gude ọnya nmafua ya imi?

¹“?Ịi-dụ ike gude aga-ẹma kpụfuta ejo-oke-agiyi,

m’ọ bụ tụa ya eri l’ire?

²?Ịi-dụ ike tụa ya eri l’imi,

m’ọ bụ gude aga dzụ-fua ya agba?

³?Ịi-dụ ike mee ya ọwhu l’ọo-ryọ ghu t’ị whụaru iya imiko?

?Ịi-dụ ike mee ya ọwhu

l’oo-guzeta olu eguzeta kfuru okfu nụ ghu?

⁴?Ịi-dụ ike mee ya ọwhu gụ l’iya l’a-gba ndzụ

t’ọ bụru ohu ghu jeye lẹ gbururu?

⁵?Ịi-dụ ike gvukoshi ya egvu

ẹgube l’ii-gvukoshi nwẹnu?

?Ịi-dụ ike libe iya elibe

t’ụnwumgboko ibe ghu gude iya eme iwhe ọchi?

⁶?Ịi-dụ ike mee ọwhu ndu l’agba nghọ l’e-kwe ghu iya ọnu?

?Ịi-dụ ike mee ọwhu ndu l’agba

ikike nghọ l’e-re iya lẹ nreka?

⁷?Ịi-dụ ike gude mkpirikpi mkpirikpi igwe

sụjashia ya akpọ ẹhu?

?Ịi-dụ ike sụa ya arwa, l’eegudeje

atụ-gbu ẹma gude sufua ya ishi?

⁸Kebe ẹhu byia ya ẹka ebyibyi,

oo-me g’ị nyata mgba, gụ l’iya gbarụ.

I tii mehedu iya ọdo.

⁹Onye doberu ẹnya lẹ ya l’a-kapyabẹ

ejo-oke-agiyi ono l’ẹnya bụkwa ejire bẹ l’ọodzu.

Ẹnya nkịti l’ii-le iya bẹ ẹhu jishihuwaru ghu oyi.

¹⁰Ejo-oke-agiyi ono l’emeje igiri mẹ a kpatsuta iya,

nke ọwhu bụ l’ọ tọ dụdu onye l’adụje ike akpọ iya iwhu.

¹¹?Ọo onye nụjeru mu iwhe, ọwhu l’abụ l’onye ọbu

l’a-sụ tẹ mu jekwa akfụa ya ụgwo iya?

Iwhe lile, dụkota lẹ mgboko-o bẹ bụ mu nwe iya.

¹²?Ọo ole bẹ mu l’e-kfu haa ibe iya?

Mu ta atụ-petakwa ọnu ọkpa iya,

mu ta atụ-peta ọnu ọkpehu dụ iya nụ,

mu ta atụ-peta ọnu ugvu ọ dụ l’ẹnya.

¹³?Ọo onye l’a-dụ ike swaa ya akpọ?

?Ọo onye l’a-dụ ike wota iwhe je iya okechi ọnu?

¹⁴?Ọo onye l’a-dụ ike jahaa ya ọnu.

Eze, dụ iya l’ọnu l’eyekakwaa egvu.

¹⁵Iwhe kpẹru iya mkpẹelanu l’azụ bụ iwhe e gude ezeru ọgu.

Iwhe ono bẹ dzegbaberu ọnu, shihu ike.

¹⁶Ọ nọkota ntsentse shinene,

nke ọwhu bụ l’o to nwedu ẹka

whẹrewhere l’e-shi mgbakụ iya abahụ iya l’ẹhu.

¹⁷Ọ rapyabẹ-geeru arapyabẹ l’ibe iya, dzekfuru edzekfuru,

nke ọwhu bụ l’ẹte ewokahudu iya ewokahu.

¹⁸Ọobuje o zee uze, ya achaa ọku.

Ẹnya iya l’ekeje zhịi g’ọo ẹnyanwu ụtso.

¹⁹Ọku l’anọje enwu iya whowhowho l’ọnu.

Ẹkiri-ọku l’eshije iya l’ọnu agba kpịrikiti kpịrikiti.

²⁰Ẹnwuru-ọku l’eshije iya l’imi akpụ tụlatula,

g’ọo ite, e shiberu l’ọku l’achị ẹnwuru.

²¹Ọobuje ọ tụa ume; icheku-ọku evojashihu.

Ọku, l’enwu tawhutawhu l’eshije iya l’ọnu agụshihu.

²²Ẹka ọkpehu, dọru iya bụ l’olu.

Onye kpọru iya iwhu bẹ egvu l’egudeje.

²³Ọ tọ dụdu ẹka akpọ ẹhu iya dụ whugewhuge.

O shihuru ike, bụru atabata atabata.

²⁴Obu shihuru iya dụngu g’ọo ẹwhuru.

O shihuru ike g’ọo ẹwhuru, l’eegweje iwhe.

²⁵Ọobuje ọ gbalihu agbalihu,

egvu egudeshia eze agwa, nweru ọkpehu,

akpara-mini eze-ẹnyimu atụ-buhu.

²⁶E -gbuhudua ya mma,

m’ọ bụ a nmaa ya arwa,

m’ọ bụ akfụ, l’enwu ọku, m’ọ bụ arwa ope,

ọ tọo fụdu iya ọnya l’ẹhu.

²⁷Mgbọro-igwe l’adụje iya g’ọo oshi akpe.

Ọwhube ope l’adụje iya g’ọo

mkpirikpi nkụ, rehuru erehu.

²⁸Akfụ te emejedu iya t’o ye ọkpa l’ọso.

Aatụru iya ẹwhuru bẹ l’ọoduje

iya g’ọo udzu, l’etsushi ekpu iya.

²⁹Mkpụru l’adụje iya g’ọo oshi akpe.

Yọgiri yọgiri ono, arwa l’anọje azụ l’agbẹje ezhia iya ọchi.

³⁰Ẹkiri, dụ iya l’ẹwho l’atsụ nkọ g’ọo ibiribe mbeji.

Ọ -tụshia onwiya l’ẹpoto gbalihu,

ya adụ g’ọo igbiri oshi,

l’eegudeje echishi ẹswa lẹ balị.

³¹Ogbu-mini bẹ l’oomeje, ya

awhụhu ụwhu g’ọo ite, e shiberu l’ọku.

Eze-ẹnyimu bẹ l’oomeje, ya atsụ

kpụtukputu g’ọo ite, e shiberu mmanụ ụrwazhi.

³²Ẹka ọ gharụ bẹ mini iya l’achakọtaje pemupemu,

oomeje mini ọbu, ya etsekota ụwhu.

³³Lẹ mgboko-o ta adụdu iwhe l’atụru iya nụ.

Ọo ya bụ iwhe nọ ndzụ, egvu l’ẹte atsụ.

³⁴Iwhe bụ anụ, vutaru tsụa onwiya l’ẹnya

bẹ l’oolewheje elewhe.

Ọo ya bụ eze l’iwhe bụ anụmanu,

l’eku onwiya ekuku.”

¹Tọ dụ iya bụ, Jobu bya eyeeru Onye-Nwe-Ọha ọnu sụ iya:

²“Mu marụ l’ọo ghu nwe ike lile.

Ọ tọ dụdu iwhe ị tụberu nke

ememe, l’aa-gbanwe agbanwe.

³Ị jịru sụ: ‘?Ọo onye l’ekfu iwhe l’edoo ya ẹnya ono,

gude arwachishi idzu, ị chịru?’

Iwhe mu shi ekfu bụ iwhe l’ẹte edoo mu ẹnya,

iwhe dụ biribiri, mu l’ẹte amaa.

⁴I kfuru sụ tẹ mu ngabẹ nchị,

t’ị jịa mu ajị, mu aza ghu iya.

⁵Ọ kwa lẹ nchị bẹ mu shi anọje anụ ọtu-ọnu ghu.

Ọle ntaa bẹ mu gudewaa ẹnya mu whụa ghu.

⁶Ọo ya meru, mu l’ekfu sụ, l’iwhe

lile, mu shi kfua bẹ mu te ekfuhedu.

Mu nọwaa l’ivovonyi mẹe lẹ ntụ,

gude egoshi lẹ nzhimanụ bẹ lwawarụ mu azụ.”

Okfu mkpochi-ishi

⁷O noo ya, Onye-Nwe-Ọha kfugelewho okfu yeru Jobu, ọ ghachi sụ Elifazu onye Temanu sụ iya: “Ẹhu l’eghukwa mu eghughu l’ẹka gụ lẹ ndu ọnya ghu labọ ọwhu nọ. O noo nkele; iwhe gbarụ t’unu kfua ya l’iswi mu bẹ unu te ekfudu, ẹgube ono, onye ozhi mu Jobu kfuru iya. ⁸Iwhe unu l’e-me ntaa bụ, t’unu kpụta oke-eswi ẹsaa yẹle ebyila ẹsaa, tụgbua jekfu onye ozhi mu ono, bu Jobu. Unu kpọkota iya ọku l’owhu, gude iya gbaa ẹja ẹhu unu. Tẹ Jobu kfuru nụ mụbe Chileke l’iswi ẹhu unu. Mu l’a-nụ iwhe o kfuru, parụ unu haa l’eswe ono, unu meru, l’iwhe gbarụ t’unu kfua ya l’iswi mu bẹ unu l’ete ekfudua, ẹgube ono, onye ozhi mu Jobu kfuru iya.” ⁹Ọo ya bụ, Elifazu, bụ onye Temanu, mẹe Byilidadu, bụ onye Shuwa, mẹe Zofa, bụ onye Naama je emee iwhe ono, Onye-Nwe-Ọha sụru tẹ whẹ mee. Jobu bya ekfuru nụ Onye-Nwe-Ọha; ọ nụa iwhe o kfuru.

¹⁰Tọ dụ iya bụ, Jobu bya ekfugelewho nụ Chileke l’iswi ẹhu ndu ọnya iya ono, Onye-Nwe-Ọha bya edobewhu iya azụ l’ọnodu, ọ dụhawaa mbụ nọdu. O mee ya, ọ bya enweru iwhe lile o shihawaa nweru; ọwhu ha nno ugbo labọ. ¹¹Unwune iya unwoke, l’ụnwanyi gẹ whẹ ha mẹe ndu whẹ l’iya shihawaa eshi ọnya lẹ mbụ, byalahaa tẹ whẹ l’iya rigbalahaa nri ọdo. Whẹ whụlahaaru iya imiko, dụlahaa ya obu l’ejo-iwhe ono, Onye-Nwe-Ọha shi wokfuta iya. Onyenọnu lẹ ndu ono nyako iya okpoga mẹe echi, e meru lẹ mkpọla-ododo.

¹²Onye-Nwe-Ọha bya aka ọgoru Jobu ọnu-ọma, mee ụzo atatiwhu iya bya aka ree amamẹ okotazụ iya. Atụru, o megeeru nweru dụ ụkporo ụnu atụru l’ụnu iri l’ise. Ịnya-kamẹlu iya dụ ụnu ugbo iri l’ise. Eswi iya, a tụru njịgba ẹbo-ẹbo dụ ụnu ugbo ise. Nkakfụ-ịgara iya dụ ụnu ugbo labọ l’ụkporo iri. ¹³O megee bya anwụta unwoke ẹsaa l’ụnwanyi ẹto. ¹⁴Ada iya nwanyị b’ọ gụru Jimayima, gụa otsota iya Kezaya bya agụa nke ẹto Kerenu-hapuku. ¹⁵L’alị ono l’owhu, bẹ l’ọoto dụdua onye nwanyị ọdo, l’amabe ụma g’ọo ụnwu ada Jobu. Nna whẹ, bụ Jobu bẹ keru iwhe o nweru gbabẹ whẹ lẹge o keru nụ ụnwu iya unwoke.

¹⁶Gẹ Jobu jegeeru iwhe-ọtsulanu ono b’ọ nọfuaru ụkporo awha ugbo ẹsaa. Ọ nọdu ndzụ gude ẹnya iya whụ nwa iya, mẹe nwanwa iya, mẹe nwanwa-nwanwa iya, mẹe nwanwa-nwaranwa iya. ¹⁷Jobu bya akaa nka bụru nwoke nnajị-ochee tẹmenu ọ nwụhu.