Ndu ikpe

Ẹkwo

NDU IKPE

Ndu Ízurẹlu l’alwụshi ndu Kenanu ọwhu whọduru nụ ọgu

¹Gẹ Jóshuwa nwụhu-geeru bẹ ndu Ízurẹlu jeru njịta l’ẹka Onye-Nwe-Ọha sụ iya: “?Ọo ndu ikfu ole l’e-vutaru anyi ụzo je alwụshi ndu Kenanu ọgu?”

²Onye-Nwe-Ọha sụ: “Ọo ndu ikfu Juda bẹ l’e-vuru ụzo jee. Lekwa lẹ mu wookwaru alị ono ye whẹ l’ẹka.”

³O noo ya, ndu ikfu Juda bya asụ unwune whẹ, bụ ndu ikfu Símiyọnu: “Unu bya t’anyi lịru je l’alị ono, a wẹru anyi, t’anyi je alwụshi ndu Kenanu ọgu. E megee, anyi l’unu alịru je l’alị ọwhu a wẹru unubẹdua.” Ọo ya bụ, ndu ikfu Símiyọnu tsoru whẹ jeshia. ⁴Tọ dụ iya bụ, ndu ikfu Juda gbalihu jeshia. Onye-Nwe-Ọha woru ndu Kenanu mẹe ndu Pẹ́rezu ye whẹ l’ẹka; whẹ lwụ-gbua whẹ, gbua whẹ ụkporo ụnu madzụ l’ụnu ise lẹ mkpụkpu Bẹzeku. ⁵Whẹ whụ Adoni-bẹzeku lẹ mkpụkpu Bẹzeku ono bya etso iya ọgu. Whẹ lwụ-gbua ndu Kenanu mẹe ndu Pẹ́rezu. ⁶Adoni-bẹzeku ye ọkpa l’ọso. Whẹ chịa ya gude, bushia ya ezeke-mkpụshi-ẹka yẹle ezeke-mkpụshi-ọkpa. ⁷Adoni-bẹzeku sụ: “Ndu eze ụkporo l’iri, e bushiru ezeke-mkpụshi-ẹka yẹle ezeke-mkpụshi-ọkpa bẹ shikwa atụtuje ụnwu onu nri, dashịru lẹ mkpula teburu mu. Ọle ntaa bẹ Chileke gwatawarụ mu ụgwo iya.” Whẹ kpụru iya jeshia Jerúsalẹmu, ọ nọdu l’ẹka ono nwụhu.

Ndu Juda l’alwụta Jerúsalẹmu mẹe Hiburọnu

⁸Ndu Juda lwụkwaawho ọgu l’obodo Jerúsalẹmu lwụta iya. Whẹ gude ogu-ịgba gbuchafu ndu obodo ono, nwụru ọku ye iya. ⁹Ndu Juda megee bya ejekfushia ndu Kenanu, bu l’alị ugvu ugvu ọgu mẹe ndu ọwhu bu l’echi-ẹgu ọhuda mẹe ndu ọwhu bu l’alị ọkpa-ugvu, dụ l’ụzo ẹnyanwu-arịba. ¹⁰Ndu Juda jekfukwawho ndu Kenanu ono, bu lẹ mkpụkpu Hiburọnu ọgu. Ẹwha Hiburọnu lẹ mbụ shi bụru Kiriyatu-aruba. Whẹ lwụ-gbua ẹpa Sheshayi mẹe ẹpa Ahimanu mẹe ẹpa Talumayi.

Ọtuniyelu l’alwụta mkpụkpu Debyi

(Jósh. 15:13-19)

¹¹Whẹ shi l’ẹka ono wụfu, jekfushia ndu bu lẹ mkpụkpu Debyi ọgu. Ẹwha Debyi lẹ mbụ shi bụru Kiriyatu Sefa. ¹²O noo ya, Kálẹbu sụ: “Onye gbashiru je alwụshi mkpụkpu Kiriyatu Sefa ọgu lwụta iya, bẹ mu l’e-kee Akụsa, bụ nwa mu nwanyị t’ọ bụru nyee ya.” ¹³E megee, ọ bụru Ọtuniyelu nwa Kenazu, mbụ nwune Kálẹbu nke nwata bẹ lwụtaru mkpụkpu ono. Kálẹbu kee ya nwa iya nwanyị ono, bụ Akụsa t’ọ lụa.

¹⁴O be mbọku, e keru Ọtuniyelu Akụsa t’ọ bụru nyee ya, Akụsa sụ Ọtuniyelu t’o je ekfuru nna iya, bụ Kálẹbu t’ọ wẹe ya alị. Akụsa shi l’eli nkakfụ-ịgara iya nyizeta, Kálẹbu sụ iya: “?Ọo gụnu bẹ mu l’e-meru ghu?”

¹⁵Ọ sụ iya: “Mebanuaru mu iwhe-ọma. Eshi-ọwhu i doberu mu l’alị nọ l’echi-ẹgu ọhuda, nụfunua mu ẹnya mgba mini.” Tọ dụ iya bụ, Kálẹbu woru ẹnya mgba mini nke ụzo imeli mẹe nke ụzo alị woru nụ iya.

Ndu ikfu Juda mẹe ndu ikfu Bénjaminu lwụ-gburu

¹⁶Ẹpa nna nyee Mósisu, bụ onye Kenu, bẹ tso ndu Juda, whẹ shi lẹ mkpụkpu ẹbo-nkfụ wụru jeshia l’echi-ẹgu ndu Juda, mbụ l’ẹka ono, dụ l’echi-ẹgu ọhuda, lẹ mgboro mkpụkpu Áradu. Whẹ je whẹ lẹ whẹ buru l’ẹka ono. ¹⁷Ndu Juda wụfuta bya etsoru unwune whẹ, bụ ndu ikfu Símiyọnu, whẹ je alwụ-gbua ndu Kenanu ono, bu lẹ mkpụkpu Zéfatu; mebyishikota mkpụkpu ono kpamụ kpamụ, shi nno woru iya nụ Chileke. Ọo ya meru e kulahaa mkpụkpu ono Họruma.1:17 Iwhe Họruma fụtaru bụ emebyi.¹⁸Ndu Juda lwụtakwawho mkpụkpu Gaza mẹe alị, dụkota iya nụ, bya alwụta mkpụkpu Ashikelọnu mẹe alị, dụkota iya nụ, lwụta mkpụkpu Ẹkuronu mẹe alị dụkota iya nụ. ¹⁹Onye-Nwe-Ọha swiru ndu Juda, whẹ natakọta alị ugvu ugvu. Ọle whẹ ta adụdu ike chịfu ndu bu lẹ nsụda nsụda. O noo nkele ndu ono bẹ nweru ụgbo-ịnya ọgu, e gude igwe mee. ²⁰E woru mkpụkpu Hiburọnu nụ Kálẹbu, gẹ Mósisu kfuru iya. Kálẹbu bya achịfu ụnwu Anaku whẹ ẹto, bụ ndu bu iya nụ. ²¹Ọwhube ndu ikfu Bénjaminu ta chịfudu ndu Jebusu, bu lẹ Jerúsalẹmu. Ndu Jebusu, whẹ lẹ ndu ikfu Bénjaminu tụko bua ẹghirigha lẹ Jerúsalẹmu byeye ntanụ.

Ndu Ífuremu mẹe ndu Manáse lwụtaru Bẹtelu

²²O noo ya, ndu ọzo-ụlo Jósẹfu tụgbua jekfu mkpụkpu Bẹtelu ọgu. Onye-Nwe-Ọha swiru whẹ. ²³Ndu ọzo-ụlo Jósẹfu ono bya ezhifu ndu l’e-je egee mkpụkpu Bẹtelu ono ngge. Ẹwha mkpụkpu ono shi bụru Luzu. ²⁴Ndu ngge ono bya awhụ nwoke, shi lẹ mkpụkpu ono afụta afụta, whẹ sụ iya: “Byiko, goshinu anyi ụzo, anyi l’e-shi bahụ lẹ mkpụkpu ono nggẹ anyi meeru ghu iwhe-ọma.” ²⁵O noo ya, o goshi whẹ ụzo, e shi abahụ lẹ mkpụkpu ono. Whẹ gude ogu-ịgba mee ndu mkpụkpu ono emerekete. Obenu lẹ nwoke ono yẹle ndibe iya l’owhu nọdukota ndzụ. ²⁶Nwoke ono tụgbua jeshia alị ndu Hetu je emeta mkpụkpu, kua ya Luzu. Ọ bụru ẹwha ono bẹ mkpụkpu ono l’aza byeye ntanụ.

Ndu ọwhu ndu Ízurẹlu l’ẹte achịfua

²⁷Ndu ikfu Manáse ta chịfudu ndu bu lẹ Betu-shanu mẹe ụnwu mkpụkpu, dụ-gee ya nụ, mẹe ndu bu lẹ Tanaku mẹe ụnwu mkpụkpu, dụ-gee ya nụ, mẹe ndu bu lẹ Dọ́ru mẹe ụnwu mkpụkpu, dụ-gee ya nụ mẹe ndu bu lẹ Ibulemu mẹe ụnwu mkpụkpu, dụ-gee ya nụ, mẹe ndu bu lẹ Megido mẹe ụnwu mkpụkpu, dụ-gee ya nụ. Ndu Kenanu kwee kpọkponyi buru l’alị ono. ²⁸A nọnyaa, ndu Ízurẹlu bya akabaa onwe ọkpehu, whẹ dzuberu ndu Kenanu ozhi mkpọnwuru. Ọle whẹ ta achịfu-gedu ndu Kenanu ono kpaa-whuu.

²⁹Ndu ikfu Ífuremu ta achịfukwawho ndu Kenanu ọwhu bu lẹ mkpụkpu Gaza. Ndu Kenanu mẹe ndu Ífuremu tụko bua ẹghirigha lẹ mkpụkpu Gaza.

³⁰Ndu Zébulọnu ta achịfukwawho ndu Kenanu ọwhu bu lẹ mkpụkpu Kitirọnu mẹe ndu ọwhu bu lẹ mkpụkpu Nahalọlu. Ndu Kenanu mẹe ndu Zébulọnu tụko bua ẹghirigha. Whẹ dzuberu ndu Kenanu ozhi mkpọnwuru.

³¹Ndu ikfu Asha ta achịfukwawho ndu ọwhu bu lẹ mkpụkpu Akọ mẹe ndu ọwhu bu lẹ mkpụkpu Sáyịdonu mẹe ndu ọwhu bu lẹ mkpụkpu Ahụlabu mẹe ndu ọwhu bu lẹ mkpụkpu Akuzibu mẹe ndu ọwhu bu lẹ mkpụkpu Hẹluba mẹe ndu ọwhu bu lẹ mkpụkpu Afẹku mẹe ndu ọwhu bu lẹ mkpụkpu Rehobu. ³²Ndu ikfu Asha bua ẹghirigha whẹ lẹ ndu Kenanu, bụ ndu bu l’alị ono nkele ndu ikfu Asha ta achịfudu whẹ.

³³Ndu ikfu Náfutali ta achịfukwawho ndu ọwhu bu lẹ mkpụkpu Betu-shẹmeshi mẹe ndu ọwhu bu lẹ mkpụkpu Betu-anatụ. Ndu Náfutali bua ẹghirigha whẹ lẹ ndu Kenanu, bụ ndu bu l’alị ono. Ọle ndu Betu-shẹmeshi mẹe ndu Betu-anatụ bẹ whẹ dzuberu ozhi mkpọnwuru.

³⁴Ndu Amọru bẹ nwuru ndu Danu ẹka, whẹ je awhakfụa onwowhe l’alị ugvu ugvu. Ndu Amọru te ekwebata ekwebata tẹ whẹ wụ-kfuta whẹ lẹ nsụda. ³⁵O noo ya, ndu Amọru kwee kpọkponyi buru l’ugvu Herẹsu mẹe lẹ mkpụkpu Ayịjalonu mẹe lẹ mkpụkpu Shalubyimu. Obenu lẹ ndu ọzo-ụlo Jósẹfu bẹ ẹka whẹ kangoru nkewhe, ndu Amọru jelahaaru whẹ ozhi mkpọnwuru.

³⁶Oge alị ndu Amọru bẹ watarụ l’ugvu Akurabyimu je aghajaa Sela, mabẹwaro imeli imeli nno.

Ojozhi-imigwe, shi l’ẹka Onye-Nwe-Ọha bẹ byarụ mkpụkpu Bokimu

¹Tọ dụ iya bụ, ojozhi-imigwe, shi l’ẹka Onye-Nwe-Ọha bya atụgbua lẹ mkpụkpu Gílugalu, ọ bụru iya oje mkpụkpu Bokimu. Ọ sụ: “Mu dufutaru unu l’alị ndu Íjiputu, dubata unu l’alị ono, mu riburu lẹ nte lẹ mu l’a-nụ nna unu whẹ. Mu kfukwaru sụ lẹ mu ta abyadụ l’e-mebyi ọgbandzu mu l’unu gbarụ. ²T’unubẹdua l’onwunu ba adụkwa ndu bu l’alị-a, unu lẹ whẹ l’a-gba ndzụ. Unu mebyishikwaa ẹnya agwa whẹ emebyishi. Ọle unu ta anụduru mu okfu. ?Ọo gụnu bẹ kparụ iya nụ? ³Iwhe mu l’ekfuru unu ntaa bụ, lẹ mu ta achịfuhekwa ndu mba gẹ mba ha ono ọdo l’iwhu unu. Whẹ l’a-bụru aghamẹhu dụru unu, agwa whẹ abụru igbudu tụ unu.” ⁴Nteke Ojozhi-imigwe, shi l’ẹka Onye-Nwe-Ọha kfugeeru okfu ono nụ ndu Ízurẹlu gẹ whẹ ha, whẹ byiswee ẹkwa. ⁵O noo ya, whẹ kua ẹwha ẹka ono Bokimu2:5 Iwhe Bokimu fụtaru bụ: Nwọrya ẹkwa.. Whẹ nọdu iya gbaa ẹja nụ Onye-Nwe-Ọha.

Anwụhu Jóshuwa

⁶Jóshuwa gbasaa ndu Ízurẹlu ono, onyenọnu nyịbe, ọ bụru whẹ ọla ẹka a wẹru whẹ alị. ⁷Ndu Ízurẹlu baarụ Onye-Nwe-Ọha ẹja nteke Jóshuwa nọ ndzụ mẹe nteke whẹ nọ ndzụ mbụ ndu bụ ọgurenya ono, kaghataru Jóshuwa lẹ nka bụ iya bụ ndu ono whụgbaberu eze iwhe Onye-Nwe-Ọha megbaberu ndu Ízurẹlu. ⁸Onye ozhi Onye-Nwe-Ọha ono, bụ Jóshuwa nwa Nunu bya anwụhu g’ọ gbarụ ụkporo awha ise l’awha iri. ⁹Whẹ lia ya l’alị iya lẹ mkpụkpu Timinatu Herẹsu, dụ l’alị ugvu ugvu Ífuremu, mbụ l’ụzo isheli ugvu Gáshi. ¹⁰Gẹ ọgbo ono nwụshihuru lakfugee nna whẹ lẹ maa, bẹ ọgbo ọdo bya afụta tsota whẹ, mbụ ọgbo ọwhu l’ẹte amaa onye Onye-Nwe-Ọha bụ, whẹ ta ama iwhe o megbaberu nụ ndu Ízurẹlu.

Ndu Ízurẹlu harụ otso Onye-Nwe-Ọha

¹¹Tọ dụ iya bụ, ndu Ízurẹlu bya emee ejo-iwhe l’ẹnya Onye-Nwe-Ọha, balahaaru Bálu ẹja. ¹²Whẹ parụ Onye-Nwe-Ọha, bụ Chileke nke nna whẹ haa bụ iya bụ onye ono, dufutaru whẹ nụ l’alị ndu Íjiputu. Whẹ tsolahaa agwa ọdo l’ime agwa ndu buwheru whẹ nụ mgburumgburu, abarụ whẹ ẹja. Whẹ shi nno kpatsua Onye-Nwe-Ọha ẹhu eghughu. ¹³Whẹ parụ Onye-Nwe-Ọha haa, balahaaru Bálu mẹe Ashịtarotu ẹja. ¹⁴Ọo ya bụ, Onye-Nwe-Ọha vọru ọku ghụa ẹhu l’ẹka ndu Ízurẹlu nọ, o woru whẹ ye l’ẹka ndu ọlwua-ọlaa, whẹ gwoo whẹ tụtua. O nwuru whẹ nụ ndu ọhogu whẹ, buwheru whẹ mgburumgburu, whẹ ta adụ ike kpọo ndu ọhogu whẹ ono iwhu. ¹⁵O noo ya, l’ọobuje nteke ndu Ízurẹlu jeru ọhata ọkpa, Onye-Nwe-Ọha adaa whẹ ẹka l’ẹhu mee whẹ ejo-iwhe. Iwhe ono bụru iwhe Onye-Nwe-Ọha lọhawaru whẹ ẹka lẹ nchị iya, ribuhawaru whẹ iya lẹ nte. Whẹ nọdu l’iwhe-ọtsulanu, l’anwụ ọnu.

¹⁶Tọ dụ iya bụ, Onye-Nwe-Ọha bya ewofuta ndu ikpe, bụ ndu dzọru whẹ nụ l’ẹka ndu ono, shi egwo whẹ atụtu ono. ¹⁷Obenu lẹ whẹ ta angadụru ndu ikpe whẹ ono nchị, whẹ l’etso agwa ọdo, awha onwowhe kutukutu, abarụ whẹ ẹja. Whẹ mekebe ẹgwegwa dakọbe haa ẹka ụzo ono, nna whẹ tsoru, bụ iya bụ ụzo ome iwhe Onye-Nwe-Ọha tụru l’iwu. Whẹ jịka iya ememe. ¹⁸L’ọobuje nteke Onye-Nwe-Ọha wofutaru whẹ onye ikpe, Onye-Nwe-Ọha eswiru onye ikpe ono eswiru, adzọkwawho ndu Ízurẹlu l’ẹka ndu ọhogu whẹ jeye g’onye ikpe ono l’a-nọ-beru. Imiko whẹ bẹ l’adụje Onye-Nwe-Ọha l’ude whẹ, l’atsụ l’ẹka ndu ono, l’eme whẹ ome-l’iwe ono, akpapyashị whẹ ishi. ¹⁹Ọle ọobuje, nteke onye ikpe ono nwụhuru, whẹ adakọbe metoshilahaa onwowhe karụ gẹ nna whẹ shi emeje, etso agwa ọdo, ejeru whẹ ozhi, abakwarụ whẹ whọ ẹja. Whẹ te esefu ẹka esefu l’ome ejo-iwhe yẹle okwe kpọkponyi. ²⁰O noo ya, Onye-Nwe-Ọha vọru ọku ghụa ẹhu l’ẹka ndu Ízurẹlu nọ sụ: “Eshi-ọwhu ndu a mebyiwaru ọgbandzu ono, mu doberu nna whẹ, jịka lẹ whẹ ta anụduru mu okfu, ²¹bẹ mu ta abyadụ l’a-chịfukwaduru whẹ ndu mba gẹ mba ha ono, Jóshuwa harụ nwụhu. ²²Mu l’e-shi whẹ l’ẹka data ndu Ízurẹlu, marụ mẹ whẹ l’a-nọ etso ụzo Onye-Nwe-Ọha g’ọo nna whẹ, tọo gụnu.” ²³Ọo ya meru, Onye-Nwe-Ọha parụ mba gẹ mba ha ono haa, tọ chịfu-ge whẹ l’ugbo lanụ, to yekota whẹ l’ẹka Jóshuwa.

Mba, Onye-Nwe-Ọha harụ tẹ whẹ dalee ndu Ízurẹlu

¹Ndu ọwa, bụ mba gẹ mba ha, Onye-Nwe-Ọha harụ, tẹ ya gude whẹ dalee ndu Ízurẹlu, mbụ ndu Ízurẹlu l’owhu, bụ ndu ọwhu l’ẹte amaa nke ọgu, a lwụgbaberu l’alị Kenanu. ²Iwhe kparụ iya nwẹkiya bụ nggẹ ọgbo ụnwu Ízurẹlu amarụ ẹnya ọgu, mbụ tẹ ya shi nno zhia ndu ono, l’ẹte amahawaa nke ọgu gẹ l’aalwụje iya. ³Ọ waa mba ọbu ndọwa: Ishi obodo ise nke ndu Fílistiya mẹe ndu Kenanu l’owhu mẹe ndu Sáyịdonu mẹe ndu Hevu ono, bu l’ugvu Libanọnu; watazhiewho l’ugvu Bálu Hemọnu je akpaa l’ọnu ẹka l’eeshije abahụ lẹ Hámatu. ⁴Ahaha, Onye-Nwe-Ọha harụ whẹ bụ tẹ whẹ dalee ndu Ízurẹlu, t’a marụ, whẹ l’e-meje iwhe Onye-Nwe-Ọha tụru l’iwu, mbụ iwu ono, o shi l’ẹka Mósisu tụaru nna whẹ. ⁵Tọ dụ iya bụ, ndu Ízurẹlu bua ẹghirigha whẹ lẹ ndu Kenanu mẹe ndu Hetu mẹe ndu Amọru mẹe ndu Pẹ́rezu mẹe ndu Hevu mẹe ndu Jebusu. ⁶Ndu Ízurẹlu wata ọolushi ụnwada ndu ono, ekekwawho ụnwada nkewhe anụ ụnwu ndu ono, bya agwalahaa agwa whẹ.

Nteke Ọtuniyelu l’ekperu ndu Ízurẹlu ikpe

⁷O noo ya, ndu Ízurẹlu mee ejo-iwhe l’ẹnya Onye-Nwe-Ọha. Whẹ nyazọo Onye-Nwe-Ọha, bụ Chileke whẹ, gwalahaa Bálu mẹe Ashera. ⁸Tọ dụ iya bụ, Onye-Nwe-Ọha vọru ọku ghụa ẹhu l’ẹka ndu Ízurẹlu nọ. O woru whẹ ye l’ẹka Kushanu-rishatayimu, bụ eze ndu Arámu-naharayimu3:8 Ẹ tii kua iya Arámu-naharayimu, gụ ekua ya Mesopotémiya.. Ndu Ízurẹlu nọdu l’ẹka Kushanu-rishatayimu awha ẹsato. ⁹Ndu Ízurẹlu bya aryaku Onye-Nwe-Ọha. Onye-Nwe-Ọha bya ewofutaru whẹ onye ọgbata, bụ Ọtuniyelu nwa Kenazu, mbụ nwune Kálẹbu nke nwata, ọ bya anafụta whẹ. ¹⁰Ume Onye-Nwe-Ọha bya iya l’ẹhu, ọ bụru onye l’ekperu ndu Ízurẹlu ikpe. Ọ palihu jeshia ọgu, Onye-Nwe-Ọha woru Kushanu-rishatayimu, bụ eze ndu Arámu ye iya l’ẹka, ẹka iya kangoo nke Kushanu-rishatayimu. ¹¹Nchị bya adụ ndoo l’alị ono, ụkporo awha ugbo labọ. Ọtuniyelu nwa Kenazu bya anwụhu.

Ehudu l’ekperu ndu Ízurẹlu ikpe

¹²O noo ya, ndu Ízurẹlu byakwa emee ejo-iwhe ọdo l’ẹnya Onye-Nwe-Ọha. Onye-Nwe-Ọha bya agbẹe Ẹgulonu, bụ eze ndu Moabu ọkpu-ike, ọ bụru ọgu dụru ndu Ízurẹlu nkele ndu Ízurẹlu bẹ meru ejo-iwhe l’ẹnya Onye-Nwe-Ọha. ¹³Ọo ya bụ, Ẹgulonu je achịta ụnwu Amọnu mẹe ụnwu Amalẹ́ku, whẹ wụ-kfu ndu Ízurẹlu ọgu lwụ-gbua whẹ, nata mkpụkpu ẹbo-nkfụ. ¹⁴Ndu Ízurẹlu nọdu l’ẹka Ẹgulonu, bụ eze ndu Moabu awha iri l’ẹsato.

¹⁵Ndu Ízurẹlu bya aryaku Onye-Nwe-Ọha. Onye-Nwe-Ọha bya ewofutaru whẹ onye ọgbata, bụ Ehudu nwa Gera, onye Bénjaminu. Ehudu l’eme ẹka-ịcha. Ndu Ízurẹlu bya atụkoo iwhe nụ iya t’o wojeru Ẹgulonu, bụ eze ndu Moabu. ¹⁶Tọ dụ iya bụ, Ehudu bya emeta ogu-ịgba, l’atsụ akpata iwhu labọ, ogologo iya dụ nji-ẹka lanụ. O tube iya l’ibẹka ụtakfu ọkpa-ẹka-ụtara iya, yepyabe iya uwe. ¹⁷O woru iwhe ono, a tụkoru je anụ Ẹgulonu, bụ eze ndu Moabu ono. Ẹgulonu l’onwiya bụ onye darụ okporokpo ha rwẹkfu rwẹkfu. ¹⁸Ehudu nụ-gele iya whọ iwhe ono vudoberu ndu shi vuru iwhe ono. ¹⁹Whẹ jeta rwua l’ẹka a pyịshiru ụnwu ntẹkpe lẹ mgboro mkpụkpu Gílugalu, yẹbe Ehudu ghachi, dawhu azụ je asụ eze: “Gụbe eze, o nwekwaru ozhi, mu l’e-zhi ghu l’edomi.”

Eze sụ t’a daa jii. Ọo ya bụ, ndu ozhi iya, whẹ l’iya nọ haa ya wụkashihu.

²⁰O noo ya, Ehudu bya abyakfuta iya, g’ọ nọ nwẹkiya l’ime mkpu nke imeli, bụ ẹka jiru oyi. Ehudu sụ iya: “O nwekwaru ozhi, shi l’ẹka Chileke, mu byarụ ghu ezhizhi.” Ẹgulonu kwolihu l’oshi, ọ nọdu anọdu. ²¹Ehudu gude ẹka-ịcha mịfuta ogu-ịgba ono l’ibẹka ụtakfu ọkpa-ẹka-ụtara iya, sụa ya l’ẹwho kfụu. ²²Ishi ogu-ịgba ono tsoru ogu-ịgba ono bahụ iya l’ẹwho. Ẹba iya zachia ogu-ịgba ono, nkele Ehudu ta amịfutadu iyẹ ya l’ẹwho. Akụri-ẹwho iya tsụshia. ²³Tọ dụ iya bụ, Ehudu bya eshi l’iwhu ụlo ono mịfu tụgbua, woru ụzo gụ-chia, guburu iya ye l’ime mkpu nke imeli ono gbachia ya agbachi. ²⁴Gẹ Ehudu tụgbu-geeru bẹ ndu ozhi Ẹgulonu byarụ, bya awhụ g’a gbachiru mgbo mkpu nke imeli ono agbachi, whẹ rịa l’ọ nọ l’ime ime mkpu ẹka ono jiru oyi ono eje ụboku. ²⁵Whẹ ngataru iya jeye ọdu tsụru whẹ. Nteke whẹ whụru l’eze ta agụhadu mgbo mkpu nke imeli ono, whẹ wota irigodo tụhaa ya, bya awhụ onye nwe whẹ nụ g’ọ daburu l’ọma ụlo ono, bụwaru onye nwụhuru anwụhu.

²⁶Ehudu bẹ gbalawaru nụ nteke ono, ndu ozhi eze ono shi angarụ iya. Ọ gharụ ẹka ono, a pyịshiru ụnwu ntẹkpe ono, gbalaa lashia mkpụkpu Seyira. ²⁷O rwulewho l’alị ugvu ugvu Ífuremu, o gbua opyi-ọku. Ndu Ízurẹlu shi l’alị ugvu ugvu ono wụfuta bya etsoru iya, yẹbedua dụru whẹ l’ishi ije. ²⁸Ọ sụ whẹ: “Unu wutsoru mu, lẹ Onye-Nwe-Ọha bẹ wookwaru ndu ọhogu unu, bụ ndu Moabu ye unu l’ẹka.” Ọo ya bụ, whẹ wutsoru iya. Whẹ je anọ-chishia ẹka ono, l’eerwuje erwu l’ẹnyimu Jọ́danu tẹ ndu Moabu be eshi iya ghata. T’ọ dụ onye whẹ kweru t’ọ ghata iya. ²⁹Whẹ gbua ndu Moabu, iwhe rwuru ụkporo ụnu madzụ l’ụnu ise nteke ono, bụ ndu bụkota unwoke mkparawa, bụru ndu ọkpehu dụ, tọ dụ t’ọ ka mma l’ọo nwoke lanụ, nahụru nụ. ³⁰Ọ bụru iya bụ lẹ Moabu alwa ndu Ízurẹlu l’ẹka mbọku ono. Nchị bya adụ ndoo l’alị ono, awha ụkporo ugbo ẹno.

Shamụga l’ekperu ndu Ízurẹlu ikpe

³¹Onye ọdo, l’etsota Ehudu bẹ bụ Shamụga nwa Anatụ. Ọo ya bẹ gude mkpụru, e gude achị eswi chigbushia ndu Fílistiya, ụnu madzụ l’ụkporo iri. Yẹbedua bụkwawho onye ọgbata ndu Ízurẹlu.

Nteke Debora yẹle Béraku l’ekperu ndu Ízurẹlu ikpe

¹O noo ya, ndu Ízurẹlu byakwa emee ejo-iwhe ọdo l’ẹnya Onye-Nwe-Ọha gẹ Ehudu nwụhu-geeru. ²Onye-Nwe-Ọha woru whẹ ye l’ẹka Jabyinu, bụ eze ndu Kenanu, onye shi nọdu lẹ mkpụkpu Hazọ achị. Onye ishi ndu ojọgu iya bụ Sisera. Ẹka o bu bụ lẹ mkpụkpu Haroshetu Hagoyimu. ³Jabyinu bẹ nweru ụgbo-ịnya igwe, dụ ụnu ugbo labọ l’ụkporo ise, ọ kpaa ndu Ízurẹlu ẹhu shii ụkporo awha. Tọ dụ iya bụ, ndu Ízurẹlu aryaku Onye-Nwe-Ọha lẹ mkpu ẹkwa.

⁴Nwanyị, l’ekfuchiru Chileke, l’aza Debora, bụ nyee Lapyidọtu bẹ bụ iya shi ekperu ndu Ízurẹlu ikpe nteke ono. ⁵Ẹka o shi anọduje bụ lẹ mkpula nkfụ, l’eeku nkfụ Debora. Nkfụ ono bẹ nọ l’echilabọ mkpụkpu Rema yẹle Bẹtelu l’alị ugvu ugvu Ífuremu. Ndu Ízurẹlu l’ejekfuje iya t’o kpeshiaru whẹ okfu. ⁶Ọo ya bụ, o zhia t’e je ekua Béraku nwa Abyinowamu t’o shi lẹ mkpụkpu Kédẹshi, dụ l’alị ndu Náfutali byatashia. Debora sụ iya: “Onye-Nwe-Ọha, bụ Chileke nke Ízurẹlu bẹ zhiru ghu t’ị tụgbua je achịta unwoke ndu Náfutali mẹe unwoke ndu Zébulọnu ụkporo ụnu madzụ l’ụnu ugbo ise yeru onwoghu, t’unu jeshia ugvu Tebọ. ⁷Mu l’a-lọfuta Sisera, bụ onye ishi ndu ojọgu Jabyinu, ya achịru ụgbo-inya iya yẹle ndu ojọgu iya byakfutashia ghu l’agụga ẹnyimu Kishọnu, mu eworu Sisera ye ghu l’ẹka.”

⁸Béraku sụ iya: “Ọ -bụru l’ii-tso mu eje bẹ mu l’e-je, ọ -bụru l’i tii tsodu mu eje bẹ mu l’ete ejekwa.”

⁹Debora sụ iya: “Mu l’e-tsozhia ghu whọ eje, ọle ụzo, i gude etso iwhe ọbu bẹ ugvu iya ta abụhekwa nkeghu. Ishi iya bụ l’ọo nwanyị bẹ Onye-Nwe-Ọha l’e-megee woru Sisera ye l’ẹka.” O noo ya, Debora gbalihu tsoru Béraku, whẹ jeshia Kédẹshi. ¹⁰Béraku kukoo ndu Zébulọnu mẹe ndu Náfutali whẹ kpakọo lẹ Kédẹshi. Ụkporo ụnu unwoke l’ụnu ugbo ise tsoru iya, whẹ jeshia, Debora tsokwaru iya whọ.

¹¹Nteke ono bẹ Heba, bụ onye Kenu bọfuwaru onwiya l’ikfu Kenu, bụ eri Hobabu, bụ nwune nyee Mósisu, je akpọbe ụlo-ẹkwa iya otẹnya l’ukfu achị dụ lẹ mkpụkpu Zananimu lẹ mgboro mkpụkpu Kédẹshi. ¹²Nteke a bya ekfuru Sisera lẹ Béraku nwa Abyinowamu bẹ jeshiwaru l’ugvu Tebọ, ¹³Sisera chịta ụgbo-ịnya iya l’owhu, dụ ụkporo ụnu ụgbo-ịnya igwe ugbo labọ l’ụkporo ugbo ise mẹe ndu ojọgu iya l’owhu, whẹ shi lẹ mkpụkpu Haroshetu Hagoyimu jeshia ẹnyimu Kishọnu.

¹⁴Debora bya asụ Béraku: “Gbalihu! Nkele ọo ntanụ bẹ Onye-Nwe-Ọha l’e-me tẹ ya woru Sisera ye ghu l’ẹka. Onye-Nwe-Ọha bẹ vutaakwaru ghu ụzo.” Ọo ya bụ, Béraku yẹle ụkporo ụnu ndu ojọgu ugbo labọ l’ụkporo iri ono, l’etso iya nụ tụko shi l’ugvu Tebọ ono nyizeta. ¹⁵Onye-Nwe-Ọha yetaru whẹ ogu-ịgba, shi nno mee Sisera yẹle ụgbo-ịnya iya l’owhu mẹe ndu ojọgu iya l’owhu gbahụ yabayaba l’iwhu Béraku. Sisera nyizeta l’ụgbo-ịnya iya ye ọkpa l’ọso. ¹⁶Béraku chịkfuru ndu ojọgu Sisera mẹe ụgbo-ịnya whẹ jeye lẹ Haroshetu Hagoyimu. Ogu-ịgba takọta ishi ndu ojọgu Sisera gẹ whẹ ha, tọ dụ m’ọo onye lanụ, ọ harụ.

Eegbu Sisera

¹⁷O noo ya, Sisera ye ọkpa l’ọso gbaba l’ụlo-ẹkwa Jayelu, bụ nyee Heba onye Kenu. Nkele Jabyinu, bụ eze ndu Hazọ bẹ yẹle Heba onye Kenu nọ lẹ nchị-ọdu-ndoo. ¹⁸Jayelu bya afụta gbata Sisera ndzuta sụ iya: “Bata abata, onye-nwe-mu-nụ. Bata abata t’anyi nọdu, ba atsụshi egvu.” Ọo ya bụ, ọ bya abahụ yẹle iya nọdu l’ime ụlo-ẹkwa iya. O wota ukpo whukpua ya. ¹⁹Ọ sụ Jayelu: “Byiko, kenu mu mini nwanshị tẹ mu ngụa l’ẹkpiri kpọkwaru mu nkụ.” Ọo ya bụ, o kpuhaa iwhe l’ooyeje mini-ẹra-eswi gbata iya nụ iya t’ọ ngụa. Ọ bya ewotakwa ukpo ono whukpua ya. ²⁰Ọ sụ Jayelu: “Kfụkwaru l’ọnu ụlo-ẹkwa ono, o -nweru onye bya ajịa ghu sụ: ‘?Madzụ ọ nọ l’ẹka-a?’ Gụ asụ iya: ‘Waawa.’ ”

²¹Jayelu, bụ nyee Heba bya ewota nturu, e gude kpọbe ụlo-ẹkwa ono, bya apata ọngu, tọ nwẹhu pyaa apyapya jekfu Sisera. O rwua yẹle mgbẹnya l’emewa l’ẹka ike gvụshiru iya agvụshi. Ọ kpọbe iya nturu ono l’ishi-nchị jeye nturu ono kuru l’alị. Ọo ya bụ, ọ nwụhu. ²²A bya l’ele ẹnya Béraku l’achịwaa Sisera eje abya. Tọ dụ iya bụ, Jayelu jekfu iya ndzuta je asụ iya: “Bya tẹ mu goshi ghu nwoke ono, l’ịicho.” Ọo ya bụ, ọ bya abahụ l’ụlo-ẹkwa Jayelu, whụ Sisera g’ọ daburu l’odzu, nturu ụlo-ẹkwa ono kpọwaru iya l’ishi-nchị.

²³O noo mbọku Chileke meru Jabyinu, bụ eze ndu Kenanu lwa l’ẹka ndu Ízurẹlu. ²⁴Ẹka ndu Ízurẹlu l’aka nke Jabyinu, bụ eze ndu Kenanu shii eje eje, jeye whẹ laa ya l’iyi.

Egvu, Debora yẹle Béraku gụru

¹Mbọku ono bẹ Debora yẹle Béraku nwa Abyinowamu gụru egvu sụ:

²“Ndu bụ ishi lẹ Ízurẹlu bẹ vutaru ụzo ọgu,

ndu Ízurẹlu gude obu whẹ wofuta onwowhe.

Unu jaa Onye-Nwe-Ọha ajaja!

³Unu nụkwaa ya, unubẹ ndu eze.

Unu ngabẹkwa nchị, unubẹ ndu ishi.

Mu l’a-gụru Onye-Nwe-Ọha egvu.

Mu l’a-gụ egvu gude jaa Onye-Nwe-Ọha,

bụ Chileke nke Ízurẹlu ajaja.

⁴Onye-Nwe-Ọha, nteke i palitaru l’alị Siye,

mbụ lẹ nteke i shi l’alị ndu Edọmu lụfu

bẹ mgboko tehuru nmẹkenmeke, igweli chịa ọbaru-ugbo,

mbụ l’urwukpu yọru mini ayọyo.

⁵Ugvu bẹ nmakọtaru jijiji l’iwhu Onye-Nwe-Ọha.

Mbụ l’ugvu Sáyinayi bẹ nmakọtaru jijiji

l’iwhu Onye-Nwe-Ọha, bụ Chileke nke Ízurẹlu.

⁶Nteke Shamụga nwa Anatụ nọ ndzụ

mẹe nteke Jayelu nọ ndzụ,

b’e shibuhuru ogborogbo echi-ụzo,

ndu ije shilahaa ẹswara-ụzo.

⁷Ụnwu mkpụkpu mkpụkpu, dụ l’alị Ízurẹlu

ta adụhedu ọwhu e bu ebu.

Ọ tọ dụdu ọwhu e bu ebu jeye nteke Debora fụtaru,

mbụ jeye nteke ọ fụtaru bya abụru ne ndu Ízurẹlu.

⁸Nteke ndu Ízurẹlu hatarụ ọgwa agwa ọwhuu,

o noo nteke ọgu watarụ adada

l’ọnu-abata mkpụkpu whẹ ndono.

Tọ dụ iwhe l’eegudeje egbobuta onwonye, ọdua l’ọo arwa,

a whụru l’echilabọ ụkporo

ụnu madzụ ugbo ise l’alị Ízurẹlu.

⁹Obu mu bẹ dụkwa l’ẹka ndu bụ ishi lẹ Ízurẹlu nọ,

mbụ ndu ono, gude obu whẹ wofuta

onwowhe l’echilabọ ndu Ízurẹlu.

Unu jaa Onye-Nwe-Ọha ajaja!

¹⁰Unu kfukwaa mẹka iya,

unubẹ ndu, l’agba l’eli nkakfụ-ịgara ọcha,

mbụ unubẹ ndu ono, l’anokojeru

l’ukpo, a wukoberu l’eli nkakfụ-ịgara,

mẹe unubẹ ndu l’eje l’ụzo.

¹¹Unu gebedaa nchị l’olu-egvu ono, l’aagụ l’ẹka l’eekutaje mini.

Whẹ nọkwa l’ẹka ono agụ iwhe dụ chịriri ono,

Onye-Nwe-Ọha megbaberu l’egvu,

mbụ iwhe dụ chịriri ono, o megbaberu ndibe iya,

bu l’ụnwu mkpụkpu, dụkota l’alị Ízurẹlu.

Tọ dụ iya bụ, ndibe Onye-Nwe-Ọha wụru jeshia

l’ọnu-abata mkpụkpu ono.

¹²‘Tehu etehu! Tehu etehu Debora!

Tehu etehu! Tehu etehu, kpọ-swee egvu!

Gbalihu agbalihu, Béraku!

Chịta ndu ị kpụru lẹ ndzụ tụgbua,

gụbe nwa Abyinowamu.’

¹³Tọ dụ iya bụ, ndu whọduru nụ l’ime ndu ono,

a marụ ẹwha whẹ lẹ Ízurẹlu wụru byatashia.

Ndibe Onye-Nwe-Ọha wụru byatashia

ọlwushi ndu ọkpehu dụ ọgu.

¹⁴Ndu Ífuremu, bụ ndu gbarụ ọgbaragbu lẹ Amalẹ́ku bẹ

wụfutaru bya etsoru gụbe

Bénjaminu mẹe ndibe unu.

Ndu shi l’ẹka iya nke ụnwu

Makiru bya bẹ bụ ndu ishi-ojọgu,

ndu ọwhu shi l’ẹka iya nke ndu Zébulọnu

bya abụru ndu pa mgbọro onye ishi-ojọgu.

¹⁵Ndu ishi ndu Ísaka bẹ tso Debora bya,

ẹgube ono bẹ ndu Ísaka tsokwawho Béraku.

Whẹ wụru gidigidi tsopyabe iya bahụ lẹ nsụda.

Ndu Rúbẹnu bẹ obu ta anọdu l’ẹka lanụ.

¹⁶?Ọo gụnu meru unu kwaburu lẹ mkpu atụru?

?Unu l’eme t’unu nụa orwube ndu l’eche atụru l’akpọ?

Ndu Rúbẹnu bẹ obu ta anọdu l’ẹka lanụ.

¹⁷Ndu Giledu bẹ nọdu l’azụ ẹnyimu Jọ́danu.

A bya lẹ ndu Danu, ?ọo gụnu meru

whẹ kụkee ike nọdu l’ụgbo-mini?

Ndu Asha bẹ wụshiru l’agụga eze-ẹnyimu,

mbụ lẹ whẹ kwaburu l’agụga ọwara-mini

nke eze-ẹnyimu ono.

¹⁸Ndu Zébulọnu bẹ harụ ndzụ kweta ọnwu.

O nokwawho gẹ ndu Náfutali

hakwarụwho ndzụ kweta ọnwu l’ẹgu ọgu ono.

¹⁹Ndu eze bẹ byarụ, bya alwụa ọgu.

Ndu eze ndu Kenanu bẹ lwụru ọgu lẹ mkpụkpu Tanaku,

lẹ mgboro mini mkpụkpu Megido,

whẹ ta alwụta t’ọ ka mma l’ọo mkpọla-ọcha.

²⁰Kpokponde bẹ shi l’igweli lwụa ọgu,

mbụ lẹ whẹ shigee l’ẹnya ẹka whẹ swọru sweshihu

bya alwụshi Sisera ọgu.

²¹Ẹnyimu Kishọnu tụko whẹ kpota,

mbụ ẹnyimu ndụ-ichee ono bụ iya bụ ẹnyimu Kishọnu.

Gụbe obu mu, dzọru je l’iwhu! Gụ eshihu ike!

²²O noo ya, ịnya bẹ l’awụ ọso wugelengu wugelengu,

akakpọ-ọkpa iya l’ada kakpọmu kakpọmu l’alị.

²³Ojozhi imigwe, shi l’ẹka Onye-Nwe-Ọha bẹ sụru:

‘Unu tụa mkpụkpu Mirọzu ọnu.

Unu tụa ndu bu iya nụ ejo ọnu,

nkele whẹ ta agbatadụru Onye-Nwe-Ọha

mkpu eyemẹka l’ọgu ono,

mbụ lẹ whẹ ta agbatadụru Onye-Nwe-Ọha

mkpu eyemẹka gude lwụshi ndu ọkpehu ọgu.’

²⁴Tẹ Jayelu bụkwaru onye a kagee ọgoru ọnu-ọma nụ

l’ụnwanyi kpaa-whuu, mbụ nyee Heba, bụ onye Kenu.

T’ọ bụru iya bẹ l’aa-kagee ọgoru ọnu-ọma nụ

l’iwhe bụ ụnwanyi, bu l’ụlo-ẹkwa.

²⁵Sisera bẹ kụru iya ọku mini, ọ nụ iya mini-ẹra-eswi,

bya eye mmanụ-ẹra-eswi,

l’iwhe gbarụ ndu eze parụ nụ iya.

²⁶O wotaru nturu, e gude kpọbe ụlo-ẹkwa,

o gude ẹka-ụtara pata ọngu, e gude akụ iwhe,

bya egude ọngu ono kpọbe Sisera nturu ono,

mbụ kpọbe iyẹ ya l’ishi. Nturu ono fo iya l’ishi-nchị,

tụko iya ishi-nchị gbaa vụu vụu.

²⁷O mee nno gwọshita lẹ mgbakụ ọkpa iya,

ọ daa daburu l’ẹka ono.

Ọo lẹ mgboro ọkpa iya b’ọ gwọshitaru daa.

Ọ buru l’ẹka ono, ọ gwọshitaru b’ọ nọdu nwụhu.

²⁸Ne Sisera bẹ shi lẹ windo tụfu ẹnya.

O shi l’azụ windo ryashịa ẹkwa sụ:

‘?Ọo gụnu meru iwhe ụgbo-ịnya Sisera nọru ọdu t’ọ lwa?

?Ọo gụnu meru t’a nụ igidi

ọkpa ụgbo-ịnya iya nkeshi ono?’

²⁹Ndu mmamagụ nkewhe kagee

l’ụnwanyi, l’ejeru iya ozhi bẹ l’ekfu eyeru iya,

yẹbedua l’ekfukwawho eyeru onwiya.

³⁰Whẹ l’ekfuru iya sụ: ‘?Tọ bụdu arya bẹ whẹ l’e-vuko l’ọgu,

ekekwawho nke ekeke?

Nwoke lanụ bẹ nwamgbọko lanụ,

m’ọbu ụnwumgboko labọ l’e-rwube.

Whẹ l’e-ke uwe, l’ama ụma, tụkashiru iwhe pọopoo

gude gbata Sisera.

Whẹ l’e-ketaru mu ẹkwa, e memaru emema,

tụkashiru iwhe, mu l’a-tụkuje l’olu.

Iwhe ono g’ọ ha bụkotakwa iwhe a lwụtaru l’ọgu.’

³¹Gụbe Onye-Nwe-Ọha, t’ọ bụkwaru nno

bẹ l’ịi-lakọta ndu ọhogu ghu l’iyi.

Ọle tẹ ndu yeru ghu obu gbujekwa zaazaa

g’ọo ẹnyanwu, l’awata awata.”

Tọ dụ iya bụ, nchị dụ ndoo l’alị ono, ụkporo awha ugbo labọ.

Ndu Midiyanu l’akpa ndu Ízurẹlu ẹhu

¹Ndu Ízurẹlu bya emee ejo-iwhe l’ẹnya Onye-Nwe-Ọha. Onye-Nwe-Ọha woru whẹ ye l’ẹka ndu Midiyanu awha ẹsaa. ²Ẹka ndu Midiyanu kangoo nke ndu Ízurẹlu. Ndu Ízurẹlu kwobe iswi ndu Midiyanu gbarụ lashia l’ugvu je eburu lẹ mgbakụ ẹwhuru; ụwhodu je eburu l’ọgba; ụwhodu je eburu l’ẹka a tụru o shihu ike. ³O noo ya, l’ọobuje nteke ndu Ízurẹlu meberu iwhe l’alị, ndu Midiyanu mẹe ndu Amalẹ́ku mẹe ndu ụzo ẹnyanwu-awata abyakfutashia whẹ ọgu. ⁴Whẹ l’abyajẹ bya akwaa okpu l’alị ono, tụko iwhe e meberu l’alị mebyishikota, mbụ je akpaa lẹ mkpụkpu Gaza. Ọ tọ dụdu iwhe whẹ l’ahajẹru ndu Ízurẹlu tẹ whẹ gude buru, mbụ t’ọ ka mma l’ọo atụru, ọdua l’ọo eswi, m’ọbu nkakfụ-ịgara. ⁵Whẹ l’achịje élwù whẹ mẹe ụlo-ẹkwa whẹ, zeru gbigbigbi g’ọo igube, whẹ l’ịnya-kamẹlu whẹ, bụ agụta agụta bya eripyabe alị ono vụa ya kpatakpata. ⁶Ndu Midiyanu mee ndu Ízurẹlu, whẹ kpalahaa ụkpa mkpẹri. Whẹ bya aryaku Onye-Nwe-Ọha t’ọ gbaarụ whẹ mkpu.

⁷Nteke ndu Ízurẹlu ryakuru Onye-Nwe-Ọha l’iswi iwhe ndu Midiyanu l’eme whẹ, ⁸b’o zhitaru whẹ onye nkfuchiru, bụ onye sụru whẹ: “Ọ waa iwhe Onye-Nwe-Ọha, bụ Chileke ndu Ízurẹlu l’ekfu: Ọo mu bụ onye ono, dufutaru unu l’alị Íjiputu, mbụ l’alị ono, unu shi bụru ohu. ⁹Mu nafụtaru unu l’ẹka ndu Íjiputu mẹe l’ẹka ndu ono, shi akpa unu ẹhu, bya achịfu whẹ l’iwhu unu, woru alị whẹ nụ unu. ¹⁰Mu kfuaru unu sụ l’ọo Mu bụ Onye-Nwe-Ọha bụru Chileke unu, t’unu ba akwabẹkwa agwa ndu Amọru, bụ ndu unu bu lẹ nkewhe ugvu. Obenu l’unu ta anụduru mu okfu.”

Nteke Gídiyọnu l’ekperu ndu Ízurẹlu ikpe

¹¹O noo ya, Ojozhi-imigwe, shi l’ẹka Onye-Nwe-Ọha bya anọdu l’ukfu achị, dụ lẹ mkpụkpu Ọfura. Onye nwe achị ono bụ Jowashi, onye shi l’eri ndu Abyiyeza. Nwatibe iya, l’aza Gídiyọnu nọdu l’ẹka l’aadzọshije mmẹe l’akpụru vayịnu echishi ẹswa lẹ witi, nke ọwhu ndu Midiyanu l’ẹte awhụ iya. ¹²Ojozhi-imigwe ono, shi l’ẹka Onye-Nwe-Ọha byakfuta Gídiyọnu bya asụ iya: “Onye-Nwe-Ọha nọkwa swiru ghu, gụbe ojọgu ike dụ.”

¹³Gídiyọnu sụ iya: “Byiko Onye-nwe-mu nụ, ọ -bụru lẹ Onye-Nwe-Ọha bẹ nọ swiru anyi, ?ọo gụnu meru ẹgube iwhe-e dakfuta anyi? ?Ndẹhunu iwhe-awhụrulenya iya ọbu, nna anyi whẹ kọru anyi akọ iya sụ l’ọo Onye-Nwe-Ọha bẹ dufutaru anyi l’alị Íjiputu? O belewho ntaa, Onye-Nwe-Ọha ono buhaa anyi, woru anyi ye l’ẹka ndu Midiyanu.”

¹⁴O noo ya, Onye-Nwe-Ọha bya adakọbe sụ iya: “Gude ike ono, i nweru je anafụta ndu Ízurẹlu l’ẹka ndu Midiyanu. Ọo mbẹdua bẹ zhiru ghu iya nụ.”

¹⁵Gídiyọnu sụ iya: “Byiko Onye-Nwe-Ọha, ?mu l’e-me agha dzọfuta ndu Ízurẹlu. Sụa ọ kwa ẹnya-uwhu nke anyị bẹ ẹnya kagee alwalwa l’iwhe bụ ikfu Manáse, tẹhenu ọ bụru mbẹdua bẹ kagee ọlwa alị l’ibe anyi?”

¹⁶Onye-Nwe-Ọha sụ iya: “Mu l’a-nọdua swiru ghu, gụ atụko ndu Midiyanu gbushikota l’ugbo lanụ.”

¹⁷Gídiyọnu sụ iya: “Ọ -bụru lẹ mu dụ ghu l’obu, goshinu mu iwhe-ọhubama, l’e-goshi mu l’ọo gụbedua bẹ l’ekfu eyeru mu. ¹⁸Byiko, ba alụfukwa l’ẹka tẹ mu bya. Tẹ mu je ewota iwhe mu l’a-nụ ghu bya edoberu ghu l’iwhu.”

Ọo ya bụ, Onye-Nwe-Ọha sụ iya: “Mu l’a-nọdu-a jeye gụ adawhu azụ.”

¹⁹Tọ dụ iya bụ, Gídiyọnu bya abahụ l’ụlo iya je akpụta nwa eghu gbua shia, bya ekpota ụturutuu-iwhe, l’eegudeje eme buredi, jiru efere nkwẹka gude gheta buredi, l’eete eyee iwhe l’ekoje buredi. Ọ gụshia anụ ono ye lẹ nkata, wụta mini iya ye l’itoshi. O gwota iya wojeru Onye-Nwe-Ọha l’ukfu achị ono, rwua je anụ iyẹ ya. ²⁰Ojozhi Chileke ono bya asụ iya: “Wota anụ ono yẹle buredi ono, l’eete eyee iwhe l’ekoje buredi dobe l’eli ẹwhuru-a, gụ apata mini anụ ono wụa l’eli iya.” Gídiyọnu bya eme ya ẹgube ono. ²¹Tọ dụ iya bụ, Ojozhi-imigwe ono, shi l’ẹka Onye-Nwe-Ọha bya amachịa ọnunu mgbọro, ọ pa l’ẹka rwụa l’anụ ono yẹle buredi ono, l’eete eyee iwhe l’ekoje buredi. Ọku shi l’ẹwhuru ono bụru purumu, bya atụko anụ ono yẹle buredi ono, kepyashikota. Ojozhi-imigwe, shi l’ẹka Onye-Nwe-Ọha ono mihu t’ọ whụhe iya.

²²Gídiyọnu bya amarụ l’ọo Ojozhi-imigwe, shi l’ẹka Onye-Nwe-Ọha b’ọ bụ, o chishia sụ: “Nshọbukwa mu nshọ gụbe Nnajị-Ọha, bụ Onye-Nwe-Ọha. Ọo Ojozhi-imigwe, shi l’ẹka Onye-Nwe-Ọha bẹ mu whụru iwhu l’iwhu!”

²³Ọle Onye-Nwe-Ọha bẹ sụru iya: “T’ẹhu dụkwa ghu guu. Ba atsụshi egvu. Ị tịi nwụhudu.” ²⁴Tọ dụ iya bụ, Gídiyọnu bya atụaru Onye-Nwe-Ọha ẹnya-mgbẹja l’ẹka ono, gụbe iya: Onye-Nwe-Ọha bụ Ẹhu-guu. Ẹnya-mgbẹja ono bẹ dụ lẹ Ọfura, bụ mkpụkpu ndu Abyiyeza byeye ntanụ.

Gídiyọnu l’emebyishi ẹnya agwa Bálu

²⁵L’ẹnyashi ono bẹ Onye-Nwe-Ọha sụru Gídiyọnu: “Kpụta oke-eswi nna ghu, mbụ oke-eswi nke ẹbo, gbawarụ awha ẹsaa. Je enwutsushia ẹnya agwa Bálu ono, nna ghu shi dobe, gụ egbukwoshia itso Ashera ono, dụkube iya. ²⁶Tụaru Onye-Nwe-Ọha, bụ Chileke ghu ẹnya-mgbẹja l’elikoro mgbogidi-a. Gụ akpụta oke-eswi ono gbua, gude itso Ashera ono, i gbukwoshiru mee nkụ gude kpọo ya ọku t’ọ bụru ẹja ọkpokota-iwhe-ọku.” ²⁷Ọo ya bụ, Gídiyọnu chịta ndu ozhi iya unwoke iri, whẹ mekota lẹge Onye-Nwe-Ọha kfuru iya t’o mee. Ọle o gude ọtsu ndibe whẹ egvu yẹle ndu mkpụkpu whẹ; ọ bụru l’ẹnyashi b’o meru iwhe ono, t’o me iya l’eswe.

²⁸Ndu mkpụkpu ono lụfuta l’ụtsu iya, bya awhụ g’e mebyishiru ẹnya agwa Bálu mẹe g’e gbukwoshiru itso Ashera, dụkube iya nụ, whụkwawho g’a kpọru oke-eswi nke ẹbo whọ ọku l’eli ẹnya-mgbẹja ono, a tụru nke ọwhuu. ²⁹Whẹ jịlahaa ibe whẹ sụ: “?Oo onye meru ẹgube iwhe ọwa?” Whẹ chọkashinyaa ụzo iya, kpakashịnyaa ishi, whẹ kfulahaa l’ọo Gídiyọnu nwa Jowashi bẹ meru iya nụ. ³⁰Tọ dụ iya bụ, ndu mkpụkpu ono bya ekfuru Jowashi sụ iya: “Dufuta nwa ghu t’ọ laa l’iwhe o meru, nkele ọo ya nwutsushiru ẹnya agwa Bálu, bya egbukwoshia itso Ashera, dụkube iya nụ.”

³¹Ọnu, Jowashi yeru ndu ono, ripyaberu iya nụ ono bụ: “?Unu l’alwụ ọgu ẹhu Bálu? ?Unu l’eme t’unu dzọo ya? Iwhe bụ onye l’alwụ ọgu ẹhu Bálu bẹ l’ee-gbu tẹmenu ya erwua l’ụtsu. Ọ -bụru lẹ Bálu bụ ọkpobe agwa, t’unu haa ya t’ọ lwụa ọgu onwiya l’okfu ẹnya-mgbẹja iya ono, e nwutsushiru.” ³²O noo mbọku, a gụberu Gídiyọnu Jerubálu bụ iya bụ, tẹ Bálu lwụshi iya ọgu, nkele o nwutsushiru ẹnya agwa Bálu.

³³Tọ dụ iya bụ, ndu Midiyanu l’owhu mẹe ndu Amalẹ́ku mẹe ndu ụzo ẹnyanwu-awata gẹ whẹ ha nmagba nnanụ, je adaa ẹnyimu Jọ́danu, je akwaa okpu lẹ nsụda Jezerẹlu. ³⁴Ume Onye-Nwe-Ọha bya eji Gídiyọnu ẹhu, o gbua opyi-ọku gude kua ụnwu Abyiyeza tẹ whẹ bya etsoru iya. ³⁵O zhifukwawho ndu ozhi tẹ whẹ jedzuru alị ndu Manáse mgburumgburu, ndu Manáse ono wụfutakwawho bya etsoru iya. O zhia ndu ozhi, whẹ je ekua ndu Asha mẹe ndu Zébulọnu mẹe ndu Náfutali, whẹ wụru byakfuta whẹ.

³⁶Gídiyọnu bya asụ Chileke: “Ọ -bụruwho l’ọo l’ẹka mu bẹ l’ii-shi dzọfuta ndu Ízurẹlu lẹ g’i kfuru, ³⁷lekwa gẹ mu l’a-wụshi ẹji atụru l’ẹka-a, l’eechije ereshi-a. Ọ -bụru l’iji dashịru kpua l’ẹji atụru ono nwẹkiya, ọma alị l’owhu kpọkota nkụ, ọo ya bụ, mu amarụ l’ọo l’ẹka mu bẹ l’ii-shi dzọfuta ndu Ízurẹlu lẹ g’i kfuru.” ³⁸E megee, ọ dụ gẹ Gídiyọnu kfuru iya. Ọ gbalihu l’ọnmewa ụtsu echile iya je apyịa ẹka l’ẹji atụru ono, ọ pyịshia ya mini iji ono pyị-jia ya eze-efere. ³⁹Gídiyọnu bya sụ Chileke: “T’iwe ghu ba adụkwa ọku. Tẹ mu ryọfunua ghu iwhe lanụ. Hanụa tẹ mu gude ẹji atụru ono mefua iwhe adata ugbo lanụ. Mee t’ẹji atụru ono bụru iya l’a-kpọ nkụ nwẹkiya, iji adashịa l’ọma alị l’owhu.” ⁴⁰Chileke mee ya ẹgube ono l’ẹnyashi ono. Ẹji atụru ono kpọhu nkụ nwẹkiya, iji dashịa l’ọma alị l’owhu.

Gídiyọnu l’alwụ-gbu ndu Midiyanu

¹O rwua l’ọnmewa ụtsu, Jerubálu bụ iya bụ Gídiyọnu yẹle ndu nkiya l’owhu wụ-lihu je akwaa okpu lẹ mgboro ẹnya-mgba-mini Harọdu. Ndu Midiyanu kwaa okpu nkewhe lẹ nsụda, dụ l’ụzo isheli ẹka ndu nke Gídiyọnu nọ, mbụ lẹ mgboro ugvu More.

²Onye-Nwe-Ọha bya asụ Gídiyọnu: “Ndu nkeghu bẹ hanụkakwa l’igweligwe nke tẹ mu woru ndu Midiyanu ye whẹ l’ẹka. Nkele ọ dụ nno bẹ ndu Ízurẹlu l’a-nọkwa anyarụ mu ǹdụ́ kiti kiti, kfulahaa l’o shita ọ bụru whẹ gude ẹka whẹ dzọfuta onwowhe. ³Iwhe l’ii-mekwa bụ t’ị rya ya aryarya t’o tsua whẹ nchị etsu sụ whẹ agha: ‘Onye marụ l’egvu l’atsụ iya, ẹhu l’anma iya anma t’onye ọbu shikwa l’ugvu Giledu-a lashia.’ ” O noo ya, ụkporo ụnu madzụ ụgbo labọ l’ụnu iri l’ise hahụ lashia, ndu whuduru nụ bụru ụkporo ụnu madzụ l’ụnu ise.

⁴Onye-Nwe-Ọha sụ Gídiyọnu: “Ndu ono bẹ hanụkalekwaa l’igwe. Chịta whẹ je lẹ mini tẹ mu nọdu l’ẹka ono gude ẹka mu họo whẹ nụ ghu. Onye mu sụru ghu l’oo-tso ghu jee bẹ l’e-je nụ. Onye mu sụkwanuru ghu l’o too tsodu ghu eje, te ejedu.” ⁵Ọo ya bụ, Gídiyọnu bya achịta ndu ono jeshia lẹ mini. Onye-Nwe-Ọha sụ iya: “Ndu gude ire angụ mini g’ọo nkụta bẹ l’ii-dobe iche. Ndu byishiru ikpere angụ nkewhe bẹ l’ii-dobekwawho iche.” ⁶Ọ bụru ụkporo madzụ ugbo iri l’ise bẹ gude ẹka kwọta mini ono ye l’ọnu ngụa. Ndu ọwhua gẹ whẹ ha byishikota ikpere ngụa mini ono. ⁷Onye-Nwe-Ọha sụ Gídiyọnu: “Ọo ụkporo madzụ ugbo iri l’ise ono, kwọtaru mini l’ẹka ngụa bẹ mu l’e-gude dzọo unu, mu eworu ndu Midiyanu ye ghu l’ẹka. Tẹ ndu ọwhua lashichaa ibe whẹ l’ẹhu l’ẹhu.” ⁸Ọo ya bụ, Gídiyọnu sụ tẹ ndu Ízurẹlu ọwhua lashia ibe whẹ, ọ haa ụkporo madzụ ugbo iri l’ise whọ whẹ nọdu. Whẹ vuta nri nke ndu ọwhua mẹe opu-ọgu whẹ. Ẹka ndu Midiyanu kwarụ okpu bụ lẹ nsụda, dụ l’ụzo alị ẹka ndu nke Gídiyọnu nọ.

⁹O noo ya, ọ bụru l’ẹnyashi mbọku ono bẹ Onye-Nwe-Ọha sụru Gídiyọnu: “Gbalihu jeshia ọgu l’ọdu-ọgu ndu Midiyanu nkele mu wowaru whẹ ye ghu l’ẹka. ¹⁰Ọ -bụru l’ịitsu egvu ejeje, tẹ gụ l’onye ozhi ghu, bụ Pura lịru jeshia l’ọdu-ọgu ono. ¹¹I -rwua bẹ l’ịi-nụa iwhe whẹ l’ekfu. Iwhe whẹ l’ekfu l’e-me t’obu shihu ghu ike, nke ọwhu l’ịi-tụgburu jeshia ọgu l’ọdu-ọgu ono.” Tọ dụ iya bụ, yẹle onye ozhi iya, bụ Pura bya alịru jerwua ọnu ẹka ndu ojọgu, l’eche ọdu-ọgu ndu Midiyanu ono nche nọ. ¹²Ndu Midiyanu mẹe ndu Amalẹ́ku mẹe ndu ụzo ẹnyanwu-awata tụko nmaa ẹrukfu g’ọo igube lẹ nsụda ono. Ịnya-kamẹlu whẹ bụru agụta agụta kụru g’ọo ẹja, dụ l’ogbigbo ẹnyimu.

¹³Nteke Gídiyọnu jerwuru ẹka ono bẹ bụ nteke nwoke lanụ l’ezeru ọnya iya nrọ, ọ rọru asụje: “Mu rọru nrọ g’ishi buredi, wekoru eweko, e meru lẹ balị weru owe kperekpere webata l’ọdu-ọgu ndu Midiyanu. O weru kperekpere bya azụshi onwiya l’ụlo-ẹkwa, ụlo-ẹkwa ono daa. Ishi buredi ono mee ụlo-ẹkwa ono ọ daa kpọo ishi akụ.”

¹⁴Ọnya iya ono sụ iya: “Ọ tọ dụkwa iwhe ọdo, l’oo-kfu ama ẹka, gbahaa ogu-ịgba Gídiyọnu nwa Jowashi, bụ onye Ízurẹlu. Chileke bẹ wookwaru ndu Midiyanu mẹe ndu ojọgu whẹ l’owhu ye iya l’ẹka.”

¹⁵Gídiyọnu nụlewho nrọ ono, e zeru mẹe g’e gude kọwaa ya, ọ baarụ Chileke ẹja. Ọ bụru iya ọla ọdu-ọgu ndu Ízurẹlu je asụ whẹ: “T’unu wulihu-o lẹ Onye-Nwe-Ọha bẹ wowaru ndu ojọgu ndu Midiyanu ye unu l’ẹka.” ¹⁶Gídiyọnu bya ekee ụkporo madzụ ugbo iri l’ise ono uzhi ẹto, bya anụkota whẹ opu-ọgu l’ẹhu l’ẹhu mẹe ite-oshi iwhoro, ọku ogọwa dụkota l’ime. ¹⁷Ọ sụ whẹ: “Unu leje mu ẹnya meje iwhe mu meru. Mu byalẹwho l’ọnu ọdu-ọgu ono, iwhe mu meru unu etsoru mu mee iwhe ọbu. ¹⁸Nteke mu lẹ ndu ono, mu lẹ whẹ lị gburu opu-ọgu, t’unubẹdua nọdukwa l’ẹka lile, unu nọ l’ọdu-ọgu ono mgburumgburu gbua opu-ọgu nkunu, chishia mkpu sụ: ‘Anyi bụ nke Onye-Nwe-Ọha, bụru nke Gídiyọnu!’ ”

¹⁹O noo ya, Gídiyọnu yẹle ụkporo madzụ ugbo ise, whẹ l’iya lị bya ejerua l’ọnu ọdu-ọgu ndu Midiyanu ono g’abalị dalẹruwho ẹbo. Nteke ono bẹ ndu nche ọwhuu watawaru echeche. Whẹ gbua opu-ọgu ono, vụjashia ite-oshi ono, whẹ pagee l’ẹka. ²⁰Itsutsu ẹto ono gbukota opu-ọgu whẹ, tụjashia ite-oshi whẹ. Whẹ gude ẹka-ịcha parụ ọku ogọwa ono, gude ẹka-ụtara parụ opu-ọgu, whẹ l’a-nọ egbu, chishia sụ: “Anyi bụ nke Onye-Nwe-Ọha, bụru nke Gídiyọnu!” ²¹Onyenọnu kfụru gẹdemu l’ẹka ọ kfụru; whẹ nọ-whee ọdu-ọgu ndu Midiyanu ono mgburumgburu. Ọdu-ọgu ono l’owhu gbahụ yabayaba, ndu Midiyanu l’agba ọso echi mkpu. ²²Ụkporo madzụ ugbo iri l’ise ono gbudzulewho opu-ọgu whẹ ono, Onye-Nwe-Ọha mee t’onyenọnu lẹ ndu ojọgu nke Midiyanu ono gude ogu-ịgba wata ogbu ibe iya l’ọdu-ọgu ono l’owhu. Ndu ojọgu Midiyanu ye ọkpa l’ọso gbarụ lashia mkpụkpu Betu-shita, l’ụzo mkpụkpu Zerera, jeye whẹ gbarwua oge mkpụkpu Abẹlu-mehola, dụ lẹ mgboro mkpụkpu Tabatu.

²³E je ekua ndu Ízurẹlu, shi l’ikfu Náfutali mẹe l’ikfu Asha mẹe l’ikfu Manáse, whẹ wụfuta chịkfuru ndu Midiyanu ono. ²⁴Gídiyọnu zhia ndu ozhi, whẹ jegbakota alị ugvu ugvu ndu Ífuremu g’ọ ha je ezhia whẹ tẹ whẹ wụfuta bya etso ndu Midiyanu ọgu, whẹ eje anọ-chishia ẹka mini dụkota je akpaa lẹ Betu-bara mẹe ẹnyimu Jọ́danu l’onwiya, nke ọwhu whẹ l’ẹte eshi iya. Ndu Ífuremu bya agbadzua je anọ-chishia ẹka mini dụkota je akpaa lẹ Betu-bara mẹe ẹnyimu Jọ́danu l’onwiya. ²⁵Ẹka whẹ kparụ ndu ishi ndu Midiyanu labọ, bụ Orẹbu yẹle Zeyẹbu. Orẹbu bẹ whẹ gburu l’ẹwhuru Orẹbu, gbua Zeyẹbu l’ẹka l’eeku Zeyẹbu, bụ ẹka l’aanọje adzọshi mmẹe l’akpụru vayịnu. Whẹ chịgburu ndu Midiyanu gẹ whẹ l’achị whẹ, bya apataru Gídiyọnu ishi Orẹbu mẹe nke Zeyẹbu l’azụ ẹnyimu Jọ́danu azụ iya ọwhua.

Gídiyọnu l’alwụ-gbufua ndu Midiyanu ọwhu whọduru nụ

¹O noo ya, ndu Ífuremu sụ Gídiyọnu: “?Ọo gụnu meru i mee ya anyi ẹgube-ẹ? ?Mbụ, iwhe kpatarụ tii ku anyi nteke l’iije ọlwushi ndu Midiyanu ọgu?” Whẹ kfuaru iya okfu ọbu nke ọnwuu ọnwuu.

²Gídiyọnu sụ whẹ: “?Ọo gụnu bẹ mu meru, l’ee-gude tụberu ọwhu unubẹdua meru? ?Tọ kadụ ree mbụ ọkpa mkpakwa akpụru vayịnu ọwhu ndu Ífuremu l’akpa, amamẹ ọwo akpụru vayịnu ụnwu Abyiyeza l’awọ? ³Chileke bẹ woru ndu ishi ndu Midiyanu, bụ Orẹbu yẹle Zeyẹbu ye unu l’ẹka. ?Oo ole bẹ mu dụ ike mee, bụ ọwhu l’ee-gude tụberu ono, unu meru?” Okfu ono, o kfuru whẹ mee, obu jizeta whẹ.

⁴Nteke ono bẹ Gídiyọnu yẹle ụkporo madzụ ugbo iri l’ise ono, whẹ l’iya lị jerwuwaru ẹnyimu Jọ́danu, gbee dawa iya lụfu azụ iya ọwhua. Ume l’ebuhu whẹ ebuhu l’ẹka whẹ l’achị ndu Midiyanu ọso, whẹ l’achịkwa whẹ whọ gẹ whẹ l’achị whẹ. ⁵Whẹ rwua mkpụkpu Sukọtu, Gídiyọnu sụ ndu mkpụkpu ono: “Byiko t’unu nụnu ndu-a, mu lẹ whẹ lị buredi tẹ whẹ taa lẹ whẹ l’avẹhukwa avẹhu. Ndu mu l’achị ọso bẹ bụ Zeba yẹle Zalụmuna, bụ ndu eze ndu Midiyanu.”

⁶Ndu ishi mkpụkpu Sukọtu sụ iya: “?Ẹka ghu kfubewaru Zeba yẹle Zalụmuna ọbu ọwhu anyi l’a-nụ ndu ojọgu ghu buredi?”

⁷Tọ dụ iya bụ: Gídiyọnu sụ whẹ: “Ọ dụ ree, Onye-Nwe-Ọha yele mu whọ Zeba yẹle Zalụmuna l’ẹka, mu eje alata ogvu mẹe agarambo l’echi-ẹgu gude lajashịa anụ unu ibiribe ibiribe.” ⁸O shi l’ẹka ono jeshia mkpụkpu Penuwẹlu, bya aryọkwa whẹ whọ iwhe lanụ ono. Ọ bụru ọnu, ndu Sukọtu yeru bẹ ndu Penuwẹlu yekwaruwho. ⁹Gídiyọnu sụ ndu Penuwẹlu: “Mu lwa l’ẹhu-guu, mu enwutsushia ụlo-eli unu-a.”

¹⁰Zeba yẹle Zalụmuna bẹ nọdu lẹ mkpụkpu Kakọ whẹ lẹ ndu ojọgu whẹ, rwuru ụkporo ụnu madzụ l’ụnu iri l’ẹsaa l’ụkporo madzụ iri, bụ ndu whọduru lẹ ndu ojọgu ndu ụzo ẹnyanwu-awata. Ndu e gbuwaru egbu lẹ ndu l’apa ogu-ịgba bẹ bụ ụkporo ụnu madzụ ugbo iri l’ise. ¹¹Gídiyọnu shia echi-ụzo ndu ije l’eshije l’ụzo ẹnyanwu-awata mkpụkpu Noba mẹe mkpụkpu Jogubeha, je afụaru ndu ojọgu ono nteke whẹ nyazọru ẹhu. ¹²Zeba yẹle Zalụmuna, bụ ndu eze ndu Midiyanu tsu l’ọso; ọ chịa whẹ gude. O mee ndu ojọgu whẹ gbahụ yabayaba.

¹³Nteke Gídiyọnu nwa Jowashi l’alwa ọgu ono b’o shiru ugvu Herẹsu. ¹⁴O gude nwata nwokoro lanụ, bụ onye mkpụkpu Sukọtu jịlahaa ya ajị. Nwokoro ono deshiaru iya ẹwha ndu bụ ishi mẹe ndu bụ ọgurenya mkpụkpu Sukọtu. Iwhe o detaru bụ ụkporo madzụ ugbo ẹto l’ụmadzu iri l’ẹsaa. ¹⁵Gídiyọnu bya ejekfu ndu mkpụkpu Sukọtu ono sụ whẹ: “T’unu lekwa Zeba yẹle Zalụmuna ndọwa, mbụ ndu ọbu, unu shi ekfuru mu jolajola asụje: ‘?Ẹka ghu kfubewaru Zeba yẹle Zalụmuna ọwhu anyi l’a-nụ ndu nkeghu, ume l’ebuhu ebuhu buredi tẹ whẹ taa?’ ” ¹⁶Ọ chịta ndu bụ ọgurenya mkpụkpu Sukọtu ono, bya alọta ogvu mẹe agarambo l’echi-ẹgu gude hụ̀a whẹ àhụ̀hù. ¹⁷O je etsukposhia ụlo-eli ndu mkpụkpu Penuwẹlu, gbukwaawho ndu mkpụkpu ono.

¹⁸Tọ dụ iya bụ, Gídiyọnu sụ Zeba yẹle Zalụmuna: “?Ọo ẹgube ndu ole bẹ unu gburu l’ugvu Tebọ?”

Whẹ sụ iya: “Ọo ẹgube ono, ị dụ bẹ whẹ dụ-gee. Whẹ dụkota g’ọo ụnwu onye eze.”

¹⁹Gídiyọnu sụ whẹ: “Ndu ono bụkwa ụnwu ne mu, mbụ lẹ whẹ bụkota unwoke, ne mu nwụshiru. Eshi-ọwhu Onye-Nwe-Ọha nọ ndzụ g’ọ nọ iya-a, mu tege egbukwa unu, ọ -bụ l’unu doberu whẹ ndzụ.” ²⁰Ọ sụ ọkpara iya, bụ Jeta: “Gbalihu gbushia whẹ.” Ọle nwata ono ta adụdu ike milia ogu-ịgba iya nkele ọ bụkwadu nwata, tẹmenu l’ọotsu egvu.

²¹Zeba yẹle Zalụmuna sụ iya: “Gbalihu l’onwoghu gbua anyi. O noo nkele ọo gẹ nwoke ha bụ g’ike iya l’ahajẹ.” Gídiyọnu zhilihu gbugbua Zeba yẹle Zalụmuna. Ọ bya anyafụ-gee iwhe ọbu, e memaru emema, a nyabẹ-geeru ịnya-kamẹlu whẹ l’olu.

Gídiyọnu jịkaru ọbu eze

²²Tọ dụ iya bụ, ndu Ízurẹlu sụ Gídiyọnu: “Tẹ gụle nwa ghu mẹe nwanwa ghu wata anyi achịchi nkele ọo ghu bẹ dzọfutaru anyi l’ẹka ndu Midiyanu.”

²³Gídiyọnu sụ whẹ: “Mu ta achịkwa unu, nwa mu ta achị unu. Ọo Onye-Nwe-Ọha l’a-chị unu.” ²⁴Gídiyọnu sụ whẹ: “Tẹ mu ryọo unu iwhe. T’onyenọnu nụ mu iwhe-nchị, tso l’iwhe a natarụ l’ọgu.” Ndu Midiyanu bẹ l’eyeje iwhe-nchị, e meru lẹ mkpọla-ododo nkele whẹ bụ eri Ishimẹlu.

²⁵Whẹ sụ iya: “Anyi l’e-gude ẹhu-ụtso nụ ghu iya.” Whẹ bya atụsaa ẹkwa, onyenọnu bya atọgbo iwhe-nchị, tso l’iwhe whẹ natarụ l’ọgu ono l’eli ẹkwa ono. ²⁶Ẹrwa, dụ l’iwhe-nchị mkpọla-ododo ono, ọ sụru tẹ whẹ nụ iya bẹ dụkota ụnu shẹkelu ugbo ẹno l’ụkporo shẹkelu ugbo ise, t’a gụfukwa iwhe ọdo, e ememaru emema mẹe ịyagba-olu mẹe uwe ododo, ndu eze ndu Midiyanu l’eyeje mẹe gwọgirigwo, l’aanyabẹje ịnya-kamẹlu whẹ l’olu. ²⁷Gídiyọnu gude iwhe-nchị ono kpụa nwụkpata ifọdu,8:27 Ifọdu ọwhu l’eekfu okfu iya l’ẹka bụ nwụkpata, l’aagwa agwagwa (18.14, 18.17, 18.18, 18.20.) bya eje eworu iya edobe lẹ mkpụkpu iya, bụ Ọfura. Ọ dụ l’ẹka ono, ndu Ízurẹlu gẹ whẹ ha balahaaru iya ẹja gude iya awha onwowhe kutukutu. E bechaa ọ bụru igbudu tụ Gídiyọnu yẹle ndibe iya.

²⁸O noo gẹ ndu Ízurẹlu shi kakputa ndu Midiyanu l’ẹnya. Ndu Midiyanu te eselitahe ishi ọdo. Nchị bya adụ ndoo l’alị ono ụkporo awha ugbo labọ l’oge nke Gídiyọnu.

Anwụhu Gídiyọnu

²⁹Jerubálu bụ iya bụ Gídiyọnu nwa Jowashi tụgbua lashia je eburu l’ibe iya. ³⁰Gídiyọnu bẹ nwụtaru unwoke ụkporo ugbo ẹto l’unwoke iri nkele ọ lụru igwe nwanyị. ³¹O nwekwaruwho nwanyị, l’ọoto ọlua l’ọkpoku nwanyị, o doberu lẹ mkpụkpu Shékemu. Ọ nwụtaru iya nwa nwoke lanụ. Ọ gụa ya Ábyimelẹku. ³²Gídiyọnu nwa Jowashi bẹ nwụhuru nteke ọ kahụwaru ọkpobe akahụ, e lia ya l’ilu nna iya, bụ Jowashi lẹ Ọfura, bụ mkpụkpu ndu Abyiyeza.

³³Anwụhu, Gídiyọnu l’anwụhu, ndu Ízurẹlu dawhu azụ wata anọ awharwụshi onwowhe l’ẹka Bálu nọ, whẹ dobe Bálu-beritu t’ọ bụru chi whẹ. ³⁴Ndu Ízurẹlu ta anyatahe Onye-Nwe-Ọha, bụ Chileke whẹ, onye ono, bụ iya nafụtaru whẹ l’ẹka ndu ọhogu whẹ ono, shi nọdu whẹ ibẹka ibẹbo. ³⁵Whẹ te emejeru ndibe Jerubálu bụ iya bụ Gídiyọnu iwhe-ọma l’ọzori iwhe dụ ree, o megbaberu ndu Ízurẹlu.

Eeme Ábyimelẹku onye ishi l’achị nụ

¹Tọ dụ iya bụ, Ábyimelẹku nwa Jerubálu tụgburu jeshia ibe ndu ne iya whẹ lẹ mkpụkpu Shékemu. Ọ sụ ndu ono mẹe ndu ne iya whẹ gẹ whẹ ha: ²“Unu jịa ndu Shékemu gẹ whẹ ha sụ whẹ agha: ‘?Oo ole bẹ ka unu ree? ?Ọo ka unu ree t’ụnwu Jerubálu ụkporo madzụ ugbo ẹto l’ụmadzu iri l’achị unu? ?Tọ ka unu ree t’onye lanụ chịje unu?’ Unu nyatanụwho lẹ mu l’unu bụkwa mmee lanụ bụru ogwẹhu lanụ.” ³Ndu ne iya ono je ekfuaru ndu Shékemu iwhe lile ono, o kfuru whẹ, obu whẹ bụru tẹ whẹ tsoru Ábyimelẹku, nkele whẹ kfuru sụ: “Ọo nwune anyi b’ọ bụ.” ⁴Whẹ bya eshi l’ụlo agwa whẹ, bụ Bálu-beritu wofuta mkpọla-ọcha, ẹrwa iya dụ ụkporo shẹkelu ugbo ẹto lẹ shẹkelu iri woru nụ iya. Ábyimelẹku gude mkpọla-ọcha ono je egoo ọ-ga-lẹ-mkpa madzụ whẹ mẹe obukobuko whẹ, whẹ wata iya etsotso. ⁵Ọ tụgbua jeshia ibe nna iya lẹ Ọfura je achịta ụnwunna iya bụ iya bụ ụnwu Jerubálu, ụkporo madzụ ugbo ẹto l’ụmadzu iri je egbushia l’eli ẹwhuru lanụ. Onye nahụru nụ bụ Jótamu bụ iya bụ nke nwata l’ụnwu Jerubálu nkele o je edomia onwiya. ⁶Ndu Shékemu mẹe ndu Betu-milo zafụta gẹ whẹ ha, je emee Ábyimelẹku eze lẹ mgboro ukfu achị, dụkube itso agwa, dụ lẹ Shékemu.

Ẹtu, Jótamu nmarụ

⁷O noo ya, nteke e kfuru Jótamu nke iwhe ono meru nụ, ọ tụgburu je akfụru l’eli ugvu Gezirimu, ryaarụ whẹ iya aryarya sụ: “T’unu ngabẹru mu nchị, unubẹ ndu Shékemu, nggẹ Chileke angabẹru unubẹdua nchị. ⁸Sụa, o nweru nteke ọbu oshi wulihuru je ọhota oshi ọdo, l’a-bụru eze whẹ. Whẹ sụ oshi ólivu: ‘Bụnuru eze anyi.’

⁹“Oshi ólivu sụ whẹ: ‘?Mu l’a-parụ mmanụ mu haa, bụ iwhe l’eegudeje akwabẹ Chileke mẹe madzụ ugvu bya akụlahaa eregede lẹ mu bụ eze l’achị oshi ọdo?’ ¹⁰Oshi bya awukfu figu sụ iya: ‘Byanụ abụru eze anyi.’ ¹¹Oshi figu sụ whẹ: ‘?Mu l’a-parụ ẹguru akpụru ono, mu l’amịje l’anọje atsọ rẹngu-rẹngu ono parụ haa bya akụlahaa eregede lẹ mu bụ eze l’achị oshi ọdo?’

¹²“Tọ dụ iya bụ, oshi sụ vayịnu: ‘Byanụ abụru eze anyi.’

¹³“Vayịnu sụ whẹ: ‘?Mu l’a-parụ mmẹe mu parụ haa, bụ iwhe l’emeje t’obu tsọo Chileke mẹe madzụ rịkporikpo bya akụlahaa eregede lẹ mu bụ eze l’achị oshi ọdo?’

¹⁴“Tọ dụ iya bụ, oshi gẹ whẹ ha sụ uke: ‘Byanụ abụru eze anyi.’

¹⁵“Uke sụ whẹ: ‘Ọ -bụru l’unu gude ire-lanụ eme mu eze unu, ngwa t’unu bya anọdu mu lẹ mkpula zee ndzụ. Nteke l’ọodua t’ọku shikwa l’uke bya ekepyashia oshi sida, dụ l’ugvu Libanọnu.’

¹⁶“O noo ya, Jótamu sụ whẹ: Ọ -bụru l’iwhe unu meru bẹ unu gude ire-lanụ mee, unu mee ya l’ụzo, gbarụ t’a kwabẹ unu ugvu, mbụ nke eze ono, unu meru Ábyimelẹku; ọ -bụru l’ọo iwhe dụ ree bẹ unu meru Jerubálu yẹle ndibe iya, mbụ woo ya l’ọo iwhe o metaru bụ unu gude mee ya nno; ¹⁷nna mu bẹ lwụru ọgu ẹhu unu, tsebe ndzụ iya l’ọnu ogu, shi nno nafụta unu l’ẹka ndu Midiyanu, ¹⁸ọ bụru iya bẹ unu gbalihuru ntanụ bya atatso ibe nna mu ọgu, gbua ụnwu iya ụkporo madzụ ugbo ẹto l’ụmadzu iri l’eli ẹwhuru lanụ. Unu bya emee Ábyimelẹku eze t’ọ chịje ndu Shékemu, mbụ nwa nwanyị ono, bụ ohu nna mu nkele ọ bụ nwune unu. ¹⁹Ọ -bụru l’iwhe ono, unu meru Jerubálu yẹle ndibe iya ntanụ-a bẹ unu gude ire-lanụ mee, unu mee ya l’ụzo, ọ gbarụ t’a kwabẹ unu ugvu; ọ kwa iya bụ, tẹ Ábyimelẹku bụkwaru unu iwhe ẹhu-ụtso, unu abụkwaru iya whọ iwhe ẹhu-ụtso. ²⁰Nteke l’ọodua, t’ọku shikwa l’ẹka Ábyimelẹku bya ekegbushia unubẹ ndu Shékemu mẹe ndu Betu-milo, ọku eshikwawho l’ẹka unubẹ ndu Shékemu mẹe ndu Betu-milo bya ekegbua Ábyimelẹku.”

²¹Jótamu megee bya eye ọkpa l’ọso gbarụ lashia mkpụkpu Byiye je eburu l’ẹka ono, nkele ọotsu nwanna iya ono, bụ Ábyimelẹku egvu.

Ndu Shékemu l’ekwefuru Ábyimelẹku ike

²²Ábyimelẹku chịa ndu Ízurẹlu awha ẹto, ²³Chileke bya eworu ejo maa ye l’echilabọ Ábyimelẹku yẹle ndu Shékemu. Ndu Shékemu melahaa ọghata-ọghachi l’ẹka Ábyimelẹku nọ. ²⁴Ọ bụru gẹ l’ee-shi t’a gwata ụgwo ejo-iwhe ono, o meru ụnwu Jerubálu, dụ ụkporo madzụ ugbo ẹto l’ụmadzu iri, mbụ tẹ mmee whẹ tukoru nwanna whẹ ono, bụ Ábyimelẹku l’ishi bụ iya bụ onye gbushiru whẹ nụ, ya atukokwaruwho ndu Shékemu l’ishi, mbụ ndu ono, ẹka whẹ dụ l’egbugbu ono, o gburu ụnwunna iya ono. ²⁵O noo ya, ndu Shékemu zhia ndu madzụ, whẹ je akwaaru Ábyimelẹku l’eli ugvu l’eli ugvu. Onye ghatadẹru whẹ nụ bẹ whẹ l’egudeje naa ya nfụ. Ama je agbaarụ Ábyimelẹku.

²⁶Galu nwa Ebẹdu gbalihu chịta ụnwunna iya, whẹ jeshia Shékemu. Ndu Shékemu tụzooru whẹ ẹhu. ²⁷Whẹ jeshia l’ẹgu je ọwota akpụru vayịnu lẹ mgbabu vayịnu whẹ. Whẹ dzọshia mmẹe l’akpụru vayịnu ono, bya emelahaa oriri. Whẹ wụba l’ụlo agwa whẹ je anọdu eri l’angụ, akọ Ábyimelẹku ọnu. ²⁸Galu nwa Ebẹdu sụ: “?Oo onye bụ Ábyimelẹku ọbu? ?Ọo ẹgube ndu gụnu bẹ anyịbe ndu Shékemu bụ nke t’anyi bụru ohu iya? ?Tọ bụdu nwa Jerubálu b’ọ bụ? Mbụ ?tọ bụnua Zebulu bẹ l’etsota iya l’ishi? Unu jechiaru Hemọ, bụ nna Shékemu ozhi. ?Ọo gụnu l’a-kpata anyi abụru ohu Ábyimelẹku? ²⁹T’a sụnu l’ọo mbẹdua bẹ ndu-a nọ l’ẹka, mu gẹge ewofuhawaa Ábyimelẹku. Mu gẹge asụ Ábyimelẹku, ọ marụ ndu l’ọo-chịta yeru ndu ojọgu iya t’o yekobe whẹ iya fụta.”

³⁰Nteke Zebulu, bụ onye ishi mkpụkpu ono nụru iwhe ono, Galu nwa Ebẹdu kfuru, iwe bya iya l’ẹhu. ³¹O zhifu ndu ozhi l’edomi tẹ whẹ jekfu Ábyimelẹku je asụ iya: “Lenu lẹ Galu nwa Ebẹdu bẹ yẹle ụnwunna iya byakwarụ Shékemu. Whẹ bya akutsuta ndu mkpụkpu-a tẹ whẹ tso ghu okfu. ³²Ọo ya bụ, tẹ gụ lẹ ndu nkeghu gude ẹnyashi je edomishia onwunu l’ẹgbudu. ³³O -belewho l’ụtsu, mẹ anwụ walẹwho, unu agbalihu je afụaru mkpụkpu ono. Nteke Galu yẹle ndu nkiya fụtaru tẹ whẹ tso unu ọgu, t’unu mee whẹ iwhe ẹka unu gbakfuru nteke ono.”

³⁴O noo ya, o be l’ẹnyashi, Ábyimelẹku yẹle ndu nkiya gbalihu je edomishia onwowhe kwaarụ ndu Shékemu kẹkereke uzhi ẹno. ³⁵Galu nwa Ebẹdu tụgburu je akfụru l’ọnu ẹka l’eeshije abahụ lẹ mkpụkpu ono, Ábyimelẹku mẹe ndu nkiya shi l’ẹka ono, whẹ domishiru onwowhe ono wụfuta. ³⁶Nteke Galu whụru whẹ; ọ sụ Zebulu: “Lekwa, o nwekwaru ndu shi l’eli ugvu awụ abya.”

Zebulu sụ iya: “Ọo inyonyo ugvu ono b’ị whụru ọ dụ ghu g’ọo madzụ.”

³⁷Galu kfukwaawhọ ọdo sụ: “Ọwhu t’i leduwho ndu shi l’echilabọ alị ono awụ abya. Uzhi lanụ bẹ shi l’ụzo ukfu achị ndu jibya awụ abya.”

³⁸Zebulu sụ iya: “?Ndẹhunu ọnu ọbu, i shi gude ekfu sụ: ‘?Oo onye bụ Ábyimelẹku nke t’anyi bụru ohu iya? ?Tọ bụdu ndua b’i shi ekfutoshi?’ Ngwa tụgbunua ntaa je alwụshi whẹ ọgu!” ³⁹Galu chịta ndu Shékemu, whẹ jekfu Ábyimelẹku ọgu. ⁴⁰Ábyimelẹku rwuta Galu ọso, ọ gbaa maa maa. E meka igweligwe ndu nke Galu iwhe, whẹ dashịa gbaa gbaa jeye l’ọnu ẹka l’eeshije abahụ lẹ mkpụkpu ono. ⁴¹Ábyimelẹku megee lashia mkpụkpu Arụma je anọdu. Zebulu chịa Galu yẹle ụnwunna iya, whẹ te ebuhe lẹ Shékemu. ⁴²Ọ bya ebe echile iya, ndu Shékemu bya ejeshia l’ẹgu. E je ekfuaru iya Ábyimelẹku. ⁴³Ọ chịta ndu nkiya tsukahu whẹ uzhi ẹto. Whẹ je edomishia onwowhe l’ẹgbudu. Ọ palia ẹnya bya awhụa ndu Shékemu gẹ whẹ shi l’ime mkpụkpu awụfuta, ọ gbalihu tso whẹ ọgu, gbushia whẹ. ⁴⁴Ábyimelẹku yẹle ndu ọwhu whẹ l’iya lị bya ezehu je akfụru l’ọnu ẹka l’eeshije abahụ lẹ mkpụkpu ono. Uzhi labọ ọwhua zehu je eripyabe ndu Shékemu ọwhu nọ l’ẹgu gbugbushia whẹ. ⁴⁵Ábyimelẹku lwụkota ọgu lẹ mkpụkpu ono mbọku ono l’owhu. Ọ lwụta mkpụkpu ono, gbushia ndu nọ iya nụ, mee ya o kpua iwhu l’alị, bya agharụ únú kpua ya.

⁴⁶Gẹ ndu nwe ụlo-eli lẹ Shékemu nụru iwhe ono, bẹ whẹ wụbakotaru l’ime ẹka a tụru o shihu ike l’ụlo agwa, bụ Ẹ́lu-beritu. ⁴⁷E je ekfuaru Ábyimelẹku lẹ ndu nwe ụlo-eli lẹ Shékemu bẹ kpakọkwaru ọnu l’ẹka lanụ. ⁴⁸Ábyimelẹku mẹe ndu nkiya wụru jeshia l’ugvu Zalụmonu. Ábyimelẹku bya apata ogbunkụ gude washịa ẹkali nkụ, bya achịkoo ya wukobe l’ukuvu. Ọ sụ ndu ono, whẹ l’iya lị: “Iwhe unu whụru, mu meru, t’unu mee iwhe ọbu ẹgwegwa.” ⁴⁹Ọo ya bụ, ndu ono bya awata nkụ nkewhe l’ẹhu l’ẹhu chịta tsoru Ábyimelẹku. Whẹ je akụbe iya l’agụga ụlo ono, a tụru o shihu ike, nwụru ọku ye iya l’ẹka ndu ono nọdu iya l’ime ọ dzụa whẹ. Nke ọwhu bụ lẹ ndu lile ono, nweru ụlo-eli lẹ Shékemu bẹ nwụshihuru nụ, ndu rwuru ụnu madzụ ugbo labọ l’ụkporo madzụ ugbo iri, unwoke mẹe ụnwanyi.

Anwụhu Ábyimelẹku

⁵⁰Tọ dụ iya bụ, Ábyimelẹku bya ejeshia mkpụkpu Tebẹzu, je anọ-whee mkpụkpu ono mgburumgburu, lwụta iya. ⁵¹Ọle o nweru ụlo-eli, a tụru o shihu ike lẹ mkpụkpu ono. Ọ bụru l’ẹka ono bẹ unwoke mẹe ụnwanyi ndu mkpụkpu ono gbakọtaru laa. Whẹ gbachia onwowhe l’ime iya, bya awụru je anọshia l’okpotsu ụlo-eli ono. ⁵²Ábyimelẹku byatashia ọgu l’ụlo-eli ono, bya ejekube ọnu ụlo-eli ono ntse t’ọ tụa ya ọku. ⁵³Nwanyị lanụ halia ẹwhuru uswe tụa Ábyimelẹku l’ishi kpoo, tụpyashia ya ọkpu-ishi atụpyashi. ⁵⁴Ọo ya bụ, o kukebe nwokorọbya, l’apajẹru iya ngwọgu sụ iya: “Mịta ogu-ịgba ghu gbugbua mu, nke ọwhu ndiwhe l’ẹte asụ: ‘Ọ kwa nwanyị ụnwanyi bẹ gburu iya nụ.’ ” Nwokoro ono sụa ya ogu-ịgba ono, ọ nwụhu. ⁵⁵Nteke ndu Ízurẹlu whụru lẹ Ábyimelẹku bụwaa onye nwụhuru anwụhu, whẹ wụkashihu onyenọnu lashia ibe iya.

⁵⁶O noo gẹ Chileke shi gwata Ábyimelẹku ụgwo ejo-iwhe ono, o meru nna iya, l’egbugbu ono, o gburu ụnwunna iya whẹ ụkporo madzụ ugbo ẹto l’ụmadzu iri. ⁵⁷Chileke mekwaawho t’ejo-iwhe ono, ndu Shékemu meru dawhu azụ bya atukoru whẹ l’ishi. Ọnu ono, Jótamu nwa Jerubálu tụru whẹ bụru iwhe megeeru ree l’ẹhu whẹ.

Nteke Tola l’ekperu ndu Ízurẹlu ikpe

¹Gẹ Ábyimelẹku nwụhu-geeru bẹ nwoke, l’eeku Tola fụtaru t’ọ dzọfuta ndu Ízurẹlu. Tola bụ nwa Puwa bụru nwanwa Dodo. Ọ bụ onye shi l’ikfu Ísaka. Ẹka o bu bụ lẹ mkpụkpu Shamiru l’alị ugvu ugvu ndu Ífuremu. ²O kperu ndu Ízurẹlu ikpe ụkporo awha l’awha ẹto. Ọ nwụhu, e lia ya lẹ mkpụkpu Shamiru.

Jayi l’ekperu ndu Ízurẹlu ikpe

³Tọla nwụhulewho, onye ọdo ẹwha iya bụ Jayi onye Giledu bya afụta kpee ndu Ízurẹlu ikpe ụkporo awha l’awha labọ. ⁴Ọ nwụtaru unwoke dụ ụkporo l’iri. Ụnwu iya whẹ ụkporo l’iri ono gbagbakọta nkfakfụ-ịgara l’ẹhu l’ẹhu. Whẹ nweru ụkporo mkpụkpu lẹ mkpụkpu iri l’alị Giledu. Mkpụkpu ono g’ọ ha bẹ l’eekukota Havọtu-jayi byeye ntanụ. ⁵Jayi bya anwụhu, e lia ya lẹ mkpụkpu Kamọnu.

Jéfuta l’ekperu ndu Ízurẹlu ikpe

⁶O noo ya, ndu Ízurẹlu byakwa emee ejo-iwhe ọdo l’ẹnya Onye-Nwe-Ọha. Whẹ balahaaru Bálu ẹja mẹe Ashịtoretu mẹe agwa ndu Arámu mẹe agwa ndu Sáyịdonu mẹe agwa ndu Moabu mẹe agwa ndu Amọnu mẹe agwa ndu Fílistiya Whẹ parụ Onye-Nwe-Ọha haa, jịka iya ọbaru ẹja. ⁷Onye-Nwe-Ọha bya avọru ọku ghụa ẹhu l’ẹka ndu Ízurẹlu nọ, o woru whẹ ye l’ẹka ndu Fílistiya mẹe l’ẹka ndu Amọnu. ⁸Whẹ shi l’awha ono wata ogwe ụnwu Ízurẹlu aryaka-eryune, akpa whẹ ẹhu. Awha iri l’ẹsato bẹ whẹ kpakọtaru ndu Ízurẹlu ẹhu, mbụ ndu Ízurẹlu ono, bukota l’azụ ẹnyimu Jọ́danu azụ iya ọwhua l’alị ndu Amọru, mbụ l’alị Giledu. ⁹Ndu Amọnu daa Jọ́danu lụfu azụ iya ọwhua je alwụshi ndu Juda mẹe ndu Bénjaminu mẹe ọzo-ụlo Ífuremu ọgu. O mee nke ọwhu bụ lẹ ndu Ízurẹlu bẹ nọ l’oke iwhe-ọtsulanu.

¹⁰Tọ dụ iya bụ, ndu Ízurẹlu bya aryaku Onye-Nwe-Ọha sụ iya: “Anyi mewaru iwhe-dụ-ẹji l’ẹka ị nọ, o noo nkele anyi parụ gụbe Chileke anyi haa, balahaaru Bálu ẹja.”

¹¹Onye-Nwe-Ọha sụ ndu Ízurẹlu: “?Tọ bụnu mu-a bẹ gbafụtaru unu l’ẹka ndu Íjiputu mẹe l’ẹka ndu Amọru mẹe l’ẹka ndu Amọnu mẹe l’ẹka ndu Fílistiya? ¹²Nteke ndu Sáyịdonu mẹe ndu Amalẹ́ku mẹe ndu Mawonu shi akpa unu ẹhu bẹ unu ryakuru mu, mu nafụta unu l’ẹka whẹ. ¹³E megee, unu palẹru mu-a haa, balahaaru agwa ọdo ẹja. Eshi-ọwhu ọ dụ nno bẹ mu l’ẹte anafụtahekwa unu ọdo. ¹⁴Unu je aryarụ kpua agwa ọbu, unu hatarụ tẹ whẹ gbafụtaje unu nteke unu l’eje iwhe-ọtsulanu.” ¹⁵Ndu Ízurẹlu sụ Onye-Nwe-Ọha: “Anyi mewaru iwhe-dụ-ẹji. Mee anyi iwhe dụ ghu mma. Ọle ọbu byiko, nafụtaro anyi ntanụ.” ¹⁶Ọo ya bụ, whẹ woshia agwa ndu ọha ọdo ono, whẹ dobegeeru l’echilabọ whẹ, bya abalahaaru Onye-Nwe-Ọha ẹja. Ọ bya erwua Onye-Nwe-Ọha l’ẹhu mbụ ejo ọnodu ono ndu Ízurẹlu nọ, t’ọ dụhe ike takọtaru iya nshi.

¹⁷Ndu Amọnu bya akwakọbe nke ọgu, whẹ je akwaa okpu l’alị Giledu. Ọwhube ndu Ízurẹlu bya edzukobe, je akwaa okpu lẹ mkpụkpu Mizupa. ¹⁸Ndu ishi, l’achị alị Giledu kfulahaaru ibe whẹ sụ: “?Ọo nwoke ole bẹ l’e-vuru ụzo je alwụshi ndu Amọnu ọgu? Ọo onye ono l’e-megee bụru onye ishi ndu bu l’alị Giledu l’owhu.”

Jéfuta l’ekperu ndu Ízurẹlu ikpe

¹O noo ya, Jéfuta onye Giledu bẹ bụ ojọgu ike dụ. Ọle ọ bụ nwa nwanyị-ọkpara. Nna Jéfuta bụ Giledu. ²Nyee Giledu bẹ nwụshiru iya ụnwegirima ọdo. Ụnwegirima ono vutalewho, whẹ chịfu Jéfuta sụ iya: “I tii nwekwa oke l’ibe nna anyi, o noo nkele ị bụ nwa nwanyị ọdo.” ³Tọ dụ iya bụ, Jéfuta gbafụ l’ẹka ụnwunna iya nọ lashia alị Tobu je eburu. Ọ nọdu l’ẹka ono gbata ndu bụ ọ-ga-lẹ-mkpa, whẹ tsoru iya ebu kẹe kẹe.

⁴A nọnyaa nteke ọbu, ndu Amọnu byakfuta ndu Ízurẹlu ọgu. ⁵Nteke ndu Amọnu byakfutaru ndu Ízurẹlu ọgu bẹ ndu bụ ọgurenya alị Giledu jeru tẹ whẹ duta Jéfuta l’alị Tobu. ⁶Whẹ sụ iya: “Bya adụru anyi l’ishi ọgu nke ọwhu anyi l’e-je alwụshi ndu Amọnu ọgu.”

⁷Jéfuta yeeru ndu bụ ọgurenya Giledu ọnu sụ whẹ: “?Ọ kwa l’unu kpọru mu ashị nwufu mu l’ibe nna mu? ?Unu kwoberu gụnu byakfutashia mu ntaa, iwhe-ọtsulanu byakfutaru unu?”

⁸Ndu bụ ọgurenya Giledu ono sụ Jéfuta: “Ọo iwhe ono meru anyi ghaaru ghu iwhu ntaa, t’i tsoru anyi je alwụshi ndu Amọnu ọgu nggẹ ị bụru onye ishi anyịbe ndu lile, bu lẹ Giledu.”

⁹Jéfuta sụ ndu bụ ọgurenya Giledu ono: “Unu -duru mu lawhu azụ l’ibe anyi tẹ mu je alwụshi ndu Amọnu ọgu ?mu l’a-bụdunu onye ishi unu ọbu mẹ Onye-Nwe-Ọha melewho tẹ whẹ lwa mu l’ẹka?”

¹⁰Ndu bụ ọgurenya Giledu ono sụ Jéfuta: “Ọo Onye-Nwe-Ọha l’a-bụru anyi lẹ ghu onye ẹka-ebe, l’ọ tọ dụdu iwhe l’a-kpata t’anyi be eme lẹ g’i kfuru.” ¹¹Ọo ya bụ, Jéfuta tsoru ndu bụ ọgurenya Giledu ono. Ndu ono mee ya onye ishi whẹ mẹe onye ishi ojọgu whẹ. Jéfuta bya anọdu l’atatiwhu Onye-Nwe-Ọha lẹ Mizupa kfushikota iwhe ono, o kfuhawaru.

Jéfuta yẹle eze ndu Amọnu

¹²Tọ dụ iya bụ, Jéfuta bya ezhia ndu ozhi tẹ whẹ jekfu eze ndu Amọnu je asụ iya: “?Ọo gụnu bẹ l’ịi-gụru nụ anyi, meru iwhe ị byarụ otso alị anyi ọgu?”

¹³Eze ndu Amọnu bya ekfuru yeru ndu ozhi Jéfuta ono sụ whẹ: “Iwhe kparụ iya nụ bụ lẹ nteke ndu Ízurẹlu shi l’alị Íjiputu fụta bẹ whẹ shi l’ẹnyimu Anọnu swechita alị mu jeye l’ẹnyimu Jabọku, mbụ je akpaa l’ẹnyimu Jọ́danu. Unu nuwhukwa mu alị ọbu azụ lẹ nchị ọdu ndoo.”

¹⁴Jéfuta bya eye ndu ozhi ọdo tẹ whẹ jekfu eze ndu Amọnu ¹⁵je asụ iya agha:

“Ọ waa iwhe Jéfuta l’ekfu ndọwa: Ndu Ízurẹlu ta anatakwa ndu Moabu alị whẹ, whẹ ta anata ndu Amọnu alị whẹ. ¹⁶Iwhe mechiaru nụ bụ lẹ nteke ndu Ízurẹlu shi l’alị Íjiputu fụta bẹ whẹ shiru echi-ẹgu fụta lẹ Eze-ẹnyimu Uswe-uswe, shiwa iya rọ fụta lẹ Kádẹshi. ¹⁷Ndu Ízurẹlu ye ndu ozhi tẹ whẹ je ezhia eze ndu Edọmu sụ iya: ‘Byiko t’anyi ghatanụ l’alị ghu.’ Ọle eze ndu Edọmu ta angadụru whẹ nchị. Whẹ zhikwaawho eze ndu Moabu ẹgube ono, ọ jịka. Ọ bụru iya bụ lẹ ndu Ízurẹlu akwaburu lẹ Kádẹshi.

¹⁸“Tọ dụ iya bụ, whẹ shia echi-ẹgu jewhee alị ndu Edọmu mẹe alị ndu Moabu mgburumgburu. Whẹ bya l’afụta afụta whẹ fụta l’ụzo ẹnyanwu-awata alị ndu Moabu. Whẹ kpọbe ụlo-ẹkwa ebubu whẹ l’azụ ẹnyimu Anọnu azụ iya ọwhu, whẹ ta abahụ l’alị ndu Moabu, g’ọ bụ ẹnyimu Anọnu ono bụ oge whẹ lẹ Moabu.

¹⁹“Ndu Ízurẹlu bya ezhia ndu ozhi tẹ whẹ je ezhia Sáyihọnu onye bu lẹ mkpụkpu Hẹshibonu bụru eze ndu Amọru sụ iya: ‘Byiko t’anyi ghatanụ l’alị ghu lashia alị anyi.’ ²⁰Ọle Sáyihọnu ta anụdu ndu Ízurẹlu mgbahẹka tẹ whẹ ghata l’alị iya. Ọ chịta ndu nkiya gẹ whẹ ha, whẹ je akwaa okpu lẹ mkpụkpu Jahazu gude lwụshi ndu Ízurẹlu ọgu.

²¹“Tọ dụ iya bụ, Onye-Nwe-Ọha, bụ Chileke nke ndu Ízurẹlu woru Sáyihọnu mẹe ndu nkiya ye ndu Ízurẹlu l’ẹka. Ndu Ízurẹlu lwụ-gbua whẹ, natakọta alị ndu Amọru ono, shi buru l’alị ono kpaa-whuu. ²²Whẹ natakọta alị ndu Amọru g’ọ ha, whẹ shi iya anana l’ẹnyimu Anọnu jeye lẹ Jabọku, o shi l’echi-ẹgu nọo jeye lẹ Jọ́danu.

²³“Eshi-ọwhu ọ bụ Onye-Nwe-Ọha, bụ Chileke nke Ízurẹlu bẹ natarụ ndu Amọru alị ọbu nụ ndibe iya, bụ ndu Ízurẹlu, ?ndẹhunu g’o gude i je l’a-natawhu alị ọbu azụ? ²⁴?Tọ dụ iwhe agwa ghu, bụ Kemọshi nụru ghu bẹ l’ii-woru? O nokwawho g’ọ bụ iwhe Onye-Nwe-Ọha, bụ Chileke anyi nụru anyi bẹ anyi l’e-woru. ²⁵?Ị ka eze ndu Moabu, bụ Bélaku nwa Zipo ree? ?O tsojeru ndu Ízurẹlu okfu, t’o jekfujeru whẹ ọgu? ²⁶Ụkporo awha ugbo iri l’ise bẹ ndu Ízurẹlu buru lẹ Hẹshibonu mẹe lẹ Arowa yẹle ụnwu mkpụkpu, nọkota iya mgburumgburu, bukwaawho l’ụnwu mkpụkpu ọdo, nọkota l’agụga ẹnyimu Anọnu. ?Ọo gụnu meru t’ị nata alị ono nteke ono? ²⁷Ọ tọ dụdu ẹka mu meswewaru ghu. Ọo gụbedua gbẹ-chia achọ mu okfu l’ọgu ị byarụ mu etsotso. Tẹ Onye-Nwe-Ọha, bụ onye ikpe kpekwaa ikpe l’echilabọ ndu Ízurẹlu mẹe ndu Amọnu ntanụ.” ²⁸Ọle eze ndu Amọnu ta angadụ nchị l’ozhi ono, Jéfuta zhiru iya.

Ụkwa, Jéfuta kweru

²⁹Ume Onye-Nwe-Ọha bya eji Jéfuta ẹhu, ọ ghajaa alị Giledu mẹe alị ndu Manáse. Ọ ghaa lẹ mkpụkpu Mizupa, dụ l’alị Giledu. O shi lẹ mkpụkpu Mizupa, dụ l’alị Giledu ghaa bahụ l’alị ndu Amọnu. ³⁰Jéfuta bya ekwee Onye-Nwe-Ọha ụkwa sụ iya: “I -woru ndu Amọnu ye mu l’ẹka, ³¹ọo ya bụ, onye ivurụzo, l’e-shi l’ụlo mu gbafụta bya mu ọgbata ndzuta nteke mu l’a-lwụ-gbuwaa ndu Amọnu alwawaa alwa bẹ l’a-bụru nke Onye-Nwe-Ọha. Mu l’e-gude onye ọbu gbaa ẹja ọkpokota-iwhe-ọku.”

³²O noo ya, Jéfuta nyịghata jekfushia ndu Amọnu ọgu. Onye-Nwe-Ọha woru whẹ ye iya l’ẹka. ³³O shi lẹ Arowa gbua whẹ gẹ l’oogbu whẹ jeye l’ụzo shi lụfu lẹ mkpụkpu Minitu. Ụkporo mkpụkpu b’o meru emerekete, mbụ gbua whẹ ebee-ebee jeye lẹ mkpụkpu Abẹlu-keramimu. Ọo ya bụ, ndu Ízurẹlu lwụ-gbua ndu Amọnu.

Jéfuta nụru Onye-Nwe-Ọha nwa iya nwanyị

³⁴E megee Jéfuta latashia ibe iya lẹ Mizupa. A bya l’eledeshia ẹnya nwa iya nwanyị l’akụwa nkwa ete egvu abya iya ọgbata ndzuta. Ọ ya bụ nwa lanụ, ọ nwụtaru kpụ, a -gụfuwa yẹbedua bẹ l’ooto nwehedu nwa nwoke ọdo, ọdua l’ọo nwa nwanyị ọdo, o nweru. ³⁵Nteke Jéfuta whụru iya, o ye ẹka l’uwe iya laa tarara, ryashịa sụ: “Haa, ada mu! I wokfutanu mu iwhe-ọtsulanu ọbu! I mewaru t’eze iwhe-ọtsulanu byakfuta mu nkele mu sawarụ ọnu kwee Onye-Nwe-Ọha ụkwa, mu ta abya l’e-wowhu iya azụ.” ³⁶Ada iya sụ iya: “Nna mu, ọ -bụru l’ị sawarụ ọnu kweta Onye-Nwe-Ọha ụkwa, mekwa mu iwhe shi ghu l’ọnu fụta, eshi-ọwhu Onye-Nwe-Ọha mewaru ghu ị gwata ndu ọhogu ghu, bụ ndu Amọnu ụgwo iwhe whẹ meru ghu.” ³⁷Ọ sụ nna iya: “Iwhe l’ii-meru mu bụ t’ị haarụ mu ọnwa labọ lẹ whuu tẹ mu lẹ ndu ọnya mu je aghawhe l’ugvu, ryaa ẹkwa lẹ mu l’a-nwụhu l’ẹbe alụ ji.” ³⁸Nna iya sụ iya t’o jeshia. Ọ haa ya o je anọo ọnwa labọ l’ugvu. Yẹle ndu ọnya iya jeshia l’ugvu je aryaa ẹkwa l’ọobya anwụhu l’ẹbe alụ ji. ³⁹Ọnwa labọ ono gvụlewho, ọ lakfushia nna iya. O mee ya iwhe o kwetaru ụkwa iya. Nwamgbọko ono bẹ yẹle nwoke ta azẹjedu. E mewa iya rọ, ọ bụru omelalị ndu Ízurẹlu ⁴⁰l’ụnwumgboko ndu Ízurẹlu lụfutaje awha g’awha ha je anọo abalị ẹno ryaa ẹkwa ada Jéfuta ono, bụ onye Giledu.

Jéfuta yẹle ndu Ífuremu

¹Unwoke Ífuremu bya akwakọbe nke ọgu. Whẹ daa ẹnyimu Jọ́danu jeshia mkpụkpu Zafọnu je ajịa Jéfuta sụ iya: “?Ọo gụnu bẹ meru ị kpọghata anyi je alwụshi ndu Amọnu ọgu, t’i ku anyi t’anyi tsoru ghu jee? Anyi l’a-nwụru ọku ye l’ụlo ghu t’ọ dzụa dzụpyabe ghu.”

²Jéfuta sụ whẹ: “Nteke okfu, parụ ẹka shi adarụ ndu Amọnu whẹ lẹ ndibe anyi bẹ mu kuru unu, unu te ekwe bya anafụta mu l’ẹka whẹ. ³Nteke mu whụru l’unu ta agbatadụru mu, mu kwee tụa ya ishi mu, bya adaa ẹnyimu Jọ́danu jekfu ndu Amọnu ọgu. Onye-Nwe-Ọha megee woru whẹ ye mu l’ẹka. ?Ọo hụnu ole bụ nke abyatashia mu otso ọgu?” ⁴Tọ dụ iya bụ, Jéfuta chịta unwoke Giledu l’owhu, whẹ jekfushia ndu Ífuremu ọgu. Ndu Giledu lwụ-gbua ndu Ífuremu. Iwhe kparụ iya nụ bẹ lẹ ndu Ífuremu l’asụje whẹ: “Unubẹ ndu Giledu, unu bụ ndu gbarụ ọso ọgu l’echilabọ ndu Ífuremu mẹe ndu Manáse.” ⁵Ndu Giledu je anọ-chishia ẹka l’eerwuje erwu l’ẹnyimu Jọ́danu tẹ ndu Ífuremu be eshi iya ghata. L’ọobuje, onye Ífuremu, l’agba ọso ọgu rwua ẹka ono sụ: “Tẹ mu rwughatakwa.” Ndu Giledu ajịa ya: “?Ị bụ onye Ífuremu?” Nteke ọ sụru whẹ: “Waawa.” ⁶Whẹ asụ iya: “Ọ dụ ree, kuada: ‘Shiboletu.’ ” O -je iya ekuku t’o kuta iya ree, o kua ya: “Siboletu”, whẹ egude iya gbua l’ẹka ono, l’eeruje ẹnyimu Jọ́danu erwu. Ndu Ífuremu, e gburu egbu nteke ono bẹ dụ ụkporo ụnu madzụ ugbo ise l’ụnu ise.

⁷Jéfuta bẹ kperu ndu Ízurẹlu ikpe awha ishii. Ọ nwụhu mbụ Jéfuta, bụ onye Giledu, e lia ya lẹ mkpụkpu iya lẹ Giledu.

Nteke Ibuzanu l’ekperu ndu Ízurẹlu ikpe

⁸Jéfuta nwụhulewho, Ibuzanu, bụ onye Bẹ́tulehemu bya ekpelahaaru ndu Ízurẹlu ikpe. ⁹Ọ nwụtaru unwoke ụkporo l’iri, nwụta ụnwanyi ụkporo l’iri keshia whẹ ji l’ẹnya-uwhu ndu ọdo, je alụshairu ụnwegirima iya unwoke whẹ ụkporo l’iri ụnwanyi ẹka ọdo. Ibuzanu kpee ndu Ízurẹlu ikpe awha ẹsaa. ¹⁰Ọ nwụhu, e lia ya lẹ Bẹ́tulehemu.

Nteke Elọnu l’ekperu ndu Ízurẹlu ikpe

¹¹Ibuzanu nwụhulewho, Elọnu, bụ onye Zébulọnu kpelaharu ndu Ízurẹlu ikpe. O kperu ndu Ízurẹlu ikpe awha iri. ¹²Tọ dụ iya bụ, ọ nwụhu, mbụ Elọnu onye Zébulọnu, e lia ya lẹ mkpụkpu Ayịjalonu, dụ l’alị ndu Zébulọnu.

Nteke Abudọnu l’ekperu ndu Ízurẹlu ikpe

¹³Elọnu nwụhulewho, Abudọnu nwa Hilẹlu, bụ onye mkpụkpu Pyịratonu bya ekpelaharu ndu Ízurẹlu ikpe. ¹⁴Ọ nwụtaru ụkporo unwoke ugbo labọ, nwanwa iya dụ ụkporo unwoke l’unwoke iri. Whẹ tụko agbakọta l’eli nkakfụ-ịgara l’ẹhu l’ẹhu, mbụ whẹ ụkporo ugbo ẹto l’ụmadzu iri ono. Abudọnu kpee ndu Ízurẹlu ikpe awha ẹsato. ¹⁵Ọ nwụhu mbụ Abudọnu nwa Hilẹlu, bụ onye Pyịratonu; e lia ya lẹ mkpụkpu Pyịratonu, dụ l’alị ndu Ífuremu l’alị ugvu ugvu ndu Amalẹ́ku.

Aanwụ Sámusịnu

¹Ndu Ízurẹlu byakwa emee ejo-iwhe ọdo l’ẹnya Onye-Nwe-Ọha. Onye-Nwe-Ọha woru whẹ ye ndu Fílistiya l’ẹka ụkporo awha ugbo labọ.

²O nweru nwoke ọbu, bụ onye mkpụkpu Zora, ẹwha iya bụ Manowa. O shi l’ikfu Danu. Nyee ya bẹ ẹkpa-nwa iya chihuru echihu, tọ nwụta nwa. ³Ojozhi-imigwe, shi l’ẹka Onye-Nwe-Ọha byakfuta nwanyị ono bya asụ iya: “Ẹkpa-nwa ghu bẹ chihuru echihu, tị nwụta nwa. Ọle ịi-tsụta ime nwụa nwa nwoke. ⁴Ọo ya bụ, t’ị kwabẹkwaru onwoghu ẹnya ba angụ mmẹe, m’ọbu iwhe-angụngu ọdo, l’eme l’ẹnya. Gụ eje erikwa iwhe l’aasọ nsọ. ⁵O noo nkele ịi-tsụta ime nwụa nwa nwoke. Nwata ono bẹ akwọ l’ẹte abyakwa l’e-rwu l’ishi nkele oo-shi l’ẹwho ne iya bụru onye dụru Chileke lẹ nsọ. Ọo-nafụta ndu Ízurẹlu l’ẹka ndu Fílistiya.”

⁶Tọ dụ iya bụ, nwanyị ono je ekfuru iya ji iya sụ: “Onye nke Chileke bẹ byakfutakwaru mu, ụgbugba iya dụlewho g’ọo Ojozhi imigwe, shi l’ẹka Chileke, mbụ l’ọ dụ egvu l’ẹnya. Mu ta ajịkwa iya ẹka o shi, yẹbedua ta akarụ mu ẹwha iya. ⁷Obenu l’ọ sụru mu lẹ mu l’a-tsụta ime nwụa nwa nwoke. Sụ mu tẹ mu ba angụkwa mmẹe, m’ọbu iwhe-angụngu ọdo, l’eme ẹnya, mu eje erikwa iwhe l’aasọ nsọ, lẹ nwata ọbu l’e-shikwa l’ẹwho bụru onye dụru Chileke lẹ nsọ jeye mbọku, l’ọo-nwụhu.”

⁸Tọ dụ iya bụ, Manowa bya aryọo Onye-Nwe-Ọha sụ iya: “Byiko Onye-Nwe-Ọha, t’onye nke Chileke ono, i zhiru byakfutanu anyi ọdo bya ezhia anyi g’anyi l’e-me nwata ono, l’aa-nwụ.”

⁹Chileke nụa olu Manowa, Ojozhi imigwe, shi l’ẹka Chileke ono byakfuta nwanyị ono ọdo g’ọ nọ l’ẹgu. Ọle yẹle ji iya, bụ Manowa ta atụkodu nọdu l’ẹka ono. ¹⁰Nwanyị ono gbakebe je ekfuru iya ji iya sụ: “Nwoke whọ, byakfutaru mu mbọku whọ bẹ rwuakwaru ọdo.”

¹¹Manowa gbalihu tsoru nyee ya jekfu nwoke ono bya ajịa ya sụ: “?Ọo ghu bụ nwoke ọbu, kfujeru okfu nụ nwanyị-a?”

Ọ sụ iya: “Ọ kwa mu-a.”

¹²Manowa sụ iya: “Nteke iwhe ono, i kfuru vụru, ?ndẹnu iwhe l’a-bụ ụrwehu nwata ono. ?Ọo gụnu bẹ l’oo-meje?”

¹³Ojozhi-imigwe, shi l’ẹka Onye-Nwe-Ọha ono sụ Manowa: “Tẹ nwanyị-a kwabẹkwaru onwiya ẹnya mekota iwhe lile, mu kfuru iya. ¹⁴T’o bo rikwa iwhe shi lẹ vayịnu, ya eje angụkwa mmẹe, m’ọbu iwhe-angụngu ọdo l’eme l’ẹnya, ya eje erikwa iwhe l’aasọ nsọ. T’o dobekwa iwu lile, mu tụru iya.”

¹⁵Manowa bya asụ Ojozhi-imigwe, shi l’ẹka Onye-Nwe-Ọha ono: “Byiko kpọnuaru anyi ụkfu t’anyi gbuaru ghu nwa eghu.”

¹⁶Ojozhi-imigwe, shi l’ẹka Onye-Nwe-Ọha ono sụ Manowa: “I -mee mu kpọo ụkfu bẹ mu l’ẹte erikwa nri ghu. Ọ -bụru l’ị kwakọberu ngwo-ẹja, l’aa-kpọkota ọku, gụ agbaarụ iya Onye-Nwe-Ọha.” Manowa ta ama l’onye ono bụ Ojozhi-imigwe, shi l’ẹka Onye-Nwe-Ọha.

¹⁷Manowa sụ Ojozhi-imigwe, shi l’ẹka Onye-Nwe-Ọha ono: “?Ọo gụnu bụ ẹwha ghu nke ọwhu bụ, iwhe ono, i kfuru vụlewho, anyi akwabẹ ghu ugvu?”

¹⁸Ojozhi-imigwe, shi l’ẹka Onye-Nwe-Ọha ono sụ iya: “?Ọo gụnu meru l’ịiji mu ajị ẹwha mu? Ẹwha mu dụkwa biribiri.”

¹⁹Ọo ya bụ, Manowa kpụta nwa eghu yekobe iya ngwo-ẹja nri gbaarụ Onye-Nwe-Ọha l’eli ẹwhuru, mbụ Onye-Nwe-Ọha ono, l’emeje iwhe dụ biribiri. Manowa yẹle nyee ya nọdu ele iya l’ẹnya. ²⁰Nteke ire ọku shi l’ẹka l’aakpọ ngwo-ẹja ono ọku bulihuru imeli ala l’igwe, Ojozhi-imigwe shi l’ẹka Onye-Nwe-Ọha ono tsoru ire ọku ono bahụ l’ime igwe. Manowa yẹle nyee ya l’ele iya l’ẹnya, whẹ dashịa kpubegee iwhu l’alị. ²¹Ojozhi-imigwe, shi l’ẹka Onye-Nwe-Ọha ono ta abyakfutahe Manowa yẹle nyee ya ọdo. Manowa bya amarụ l’ọo Ojozhi-imigwe, shi l’ẹka Onye-Nwe-Ọha.

²²Manowa sụ nyee ya: “Anyi nwụhujekwa, o noo nkele anyi whụru Chileke.”

²³Obenu lẹ nyee ya sụru iya: “Ọ -bụle Onye-Nwe-Ọha chọru tẹ ya gbua anyi, ọ tọgo anatadụ anyi ngwo-ẹja ono, a kpọkotaru ọku mẹe ngwo-ẹja nri ono, shi anyi l’ẹka. Ọ tọgo egoshikwawho anyi iwhe lile ono, o goshiru anyi, tọgo ekfuru anyi iwhe lile ono, o kfuru anyi.”

²⁴O noo ya, nwanyị ono bya anwụa nwa nwoke, gụa ya Sámusịnu. Nwata ono bya evuta, Onye-Nwe-Ọha gọru ọnu-ọma nụ iya. ²⁵Ume Onye-Nwe-Ọha wata iya ome ire l’ẹhu g’ọ nọ lẹ mkpụkpu Mahane-danu, dụ l’echilabọ mkpụkpu Zora yẹle Ẹshutawolu.

Sámusịnu l’eje ọlu nwamgbọko Fílistiya

¹O be ujiku lanụ, Sámusịnu jeshia mkpụkpu Timuna. Ọ nọdu l’ẹka ono whụta nwamgbọko Fílistiya lanụ. ²Ọ lashia ibe whẹ je asụ nna iya yẹle ne iya: “O nwekwaru nwamgbọko Fílistiya, mu whụtaru lẹ mkpụkpu Timuna. Unu je alụaru mu iya t’ọ bụru nyee mu.”

³Nna iya yẹle ne iya sụ iya: “?Tọ dụ-zhidua nwanyị, dụ ghu ree l’ime ụnwada ndu gụ lẹ whẹ bụ abụbu mẹe lẹ ndibe anyi l’owhu nke t’i je alụa nwanyị l’ibe ndu Fílistiya ono, l’ete ebuje ugvu?”

Sámusịnu sụ nna iya: “Je alụaru mu iya rọo l’ọ dụ mu-a ree.”

⁴Nna iya yẹle ne iya ta ama l’ọo Onye-Nwe-Ọha bẹ iwhe ono shi l’ẹka. Nkele Onye-Nwe-Ọha l’achọ ụzo, l’oo-shi tso ndu Fílistiya ọgu. Nteke ono bẹ ndu Fílistiya bụ ishi l’achị ndu Ízurẹlu.

⁵Tọ dụ iya bụ, Sámusịnu yẹle nna iya mẹe ne iya bya alịru jeshia mkpụkpu Timuna. Whẹ jeta rwua ẹka e nweru mgbabu vayịnu lẹ Timuna, lekwa nwa oduu-gburu-agụ gẹ l’ọoba hanyị-hanyị eje abyakfuta Sámusịnu.⁶Ume Onye-Nwe-Ọha bya iya l’ẹhu l’ike l’ike, ọ zụ oduu ono l’ẹka gbamụ lajahụ ẹbo g’ọo onye lajahụru nwa-eghu nshịi ẹbo. Ọle o to kfuduru nna iya yẹle ne iya iwhe o meru.

⁷Ọo ya bụ, Sámusịnu jekfu nwamgbọko ono yẹle iya dzua idzu. Nwamgbọko ono dụ iya ree. ⁸A nọta anọta, Sámusịnu je tẹ ya lụta nwamgbọko ono. Ọ swịba l’ẹka ono, odzu oduu-gburu-agụ whọ daburu, ọ whụa g’ẹnwu yewaru nyịnwua oduu ono l’ẹhu, mmanụ-ẹnwu dụkwa iya whọ. ⁹Ọ hajia ẹnwu ono ẹka labọ tsoru echi-ụzo ogologo amị iya. Ọ byakfuta nna iya yẹle ne iya nụ whẹ, whẹ mịa. Ọle o to kfuduru whẹ l’ọo l’odzu oduu whọ b’ọ hatarụ ẹnwu ono.

Ilu, Sámusịnu tụru

¹⁰Tọ dụ iya bụ, nna iya bya ejeshia nke nwamgbọko ono. Sámusịnu bya emee nri ẹswa nwanyị l’ẹka ono, bụkwanu lẹge unwokorọbya l’emeje. ¹¹O noo ya, ndu Fílistiya whụlewho Sámusịnu, whẹ ye ụkporo madzụ l’ụmadzu iri tẹ whẹ nọduru iya l’oshi ndu ọnya. ¹²Sámusịnu sụ whẹ: “Tẹ mu tụaru unu ilu. Onye dụ-zhiwa ike kọta iya l’ime abalị ẹsaa-a, l’eeme oriri-a, mu achẹe unu ukfu ẹkwa ụkporo l’iri yẹle ụkporo uwe mkpẹelanu l’uwe iri, l’e-dzu unu nnanụ nnanụ. ¹³Nteke bụ l’unu ta adụdu ike kọta iya, unu achẹe mbẹdua ukfu ẹkwa ụkporo l’iri yẹle ụkporo uwe mkpẹelanu l’uwe iri.”

Whẹ sụ iya: “Tụada ilu ọbu t’anyi nụa.”

¹⁴Ọ sụ whẹ:

“Iwhe l’erije iwhe bẹ iwhe l’eeri eri shi l’ẹhu fụta.

Iwhe nweru ọkpehu bẹ iwhe l’atsọ rẹngu-rẹngu shi fụta.”

A nọo abalị ẹto, ndu Fílistiya ta adụ ike kọo iwhe ilu ono fụtaru.

¹⁵O be mbọku nke ẹsaa, whẹ sụ nyee Sámusịnu: “Je anwụta ji ghu ọnu t’ọ karụ anyi iwhe ilu ono fụtaru, ọdua bẹ anyi l’a-gbakwa ghu ọku, gbaa ndibe nna ghu ọku. ?Iwhe unu gude kua anyi oku bụ t’unu nachata anyi nwọwhu anyi nweru tụa anyi ụkpa?”

¹⁶Tọ dụ iya bụ, nyee Sámusịnu bya anọdu iya l’iwhu wata ẹkwa sụ iya: “Ị kpọru mu ashị. I tii yedu mu obu. Ị tụru ndibe anyi ilu, tị kọru mu iwhe ilu ono fụtaru.”

Sámusịnu sụ iya: “Mu ta akọduru iya nna mu yẹle ne mu, ?ọo gụbedua bẹ mu l’a-kọchiaru iya?” ¹⁷Nyee ya ono nọdu iya l’iwhu ryaa ẹkwa abalị ẹsaa ono, e riru oriri ono. O dowhube Sámusịnu jeye ọ kọoru iyẹ ya lẹ mbọku nke ẹsaa ya. Ọo ya bụ, nyee ya je akọoru ndibe whẹ iwhe ilu ono fụtaru. ¹⁸Lẹ mbọku nke ẹsaa ono, tẹmenu ẹnyanwu rịbade l’ishi, unwoke mkpụkpu ono je asụ Sámusịnu:

“?Ọo gụnu ka mmanụ-ẹnwu ọtso rẹngu-rẹngu?

?Ọo gụnu ka oduu-gburu-agụ ọkpehu?”

Sámusịnu sụ whẹ:

“Ọ tọ bụwa l’unu je akụlahu lẹ nwada eswi mu,

unu tege adụkwa ike kọta ilu mu ono.”

¹⁹Tọ dụ iya bụ, Ume Onye-Nwe-Ọha bya iya l’ẹhu l’ike l’ike, o jeshia mkpụkpu Ashikelọnu je egbua ụkporo madzụ l’ụmadzu iri, gwoo arya whẹ tụtua. Ọ chịta uwe mkpẹelanu nụ ndu ono, kọtaru ilu ono. O gude g’ẹhu l’eghube iya damụdamu lashia ibe nna iya. ²⁰E kuta nyee Sámusịnu kee ọnya iya, bụ onye dụru iya l’ishi ẹswa nwanyị ono.

Sámusịnu tọru ọku l’iwhe ndu Fílistiya meberu l’alị

¹A nọtalewho rwua nteke l’eebuje witi, Sámusịnu sụ tẹ ya kpafụ ibe nyee ya whẹ, o jede kpụru iya nwada eghu. O rwua ẹka ono sụ: “Mu l’e-je tẹ mu lẹ nyee mu zẹe l’ime ụlo iya.”

Nna nyee ya jịka t’o bo jeshi. ²Nna nyee ya sụ iya: “Mu gbẹkwanu sụ l’ị kpọru nyee ghu ashị jeye ẹka ọ dzọru ọkpa meru g’o gude mu kuru iya kee ọnya ghu. Nwune iya nke nwata bẹ kakwa iya ọma ụma. Dutachia yẹbedua.”

³Sámusịnu sụ whẹ: “Ntaa bẹ mu nwewaru iwhe mu l’a-gbabẹ ọkpa meshia ndu Fílistiya ike, ụta eje adụru mu iya.” ⁴Ọ tụgbua je egudeshia ụwhegu, gude iya ụkporo ugbo iri l’ise. Ọ gbaa ụwhegu ono ẹbo-ẹbo, wota iya mgbọdzu lẹ mgbọdzu ligbabe l’ibe iya. O woru ogọwa lipyabege l’echilabọ mgbọdzu whẹ ono. ⁵Ọ nwụru ọku ye l’ogọwa ono, wehaa whẹ tẹ whẹ wụba l’ẹka ndu Fílistiya kọru witi. E shi nno ọku dzụa witi ọwhu e buwaru ebu mẹe ọwhu l’ẹteke ebua ebu, dzụkwaawho mgbabu vayịnu mẹe oshi ólivu whẹ.

⁶Tọ dụ iya bụ, ndu Fílistiya sụ: “?O onye meru ẹgube iwhe ọwa?” A sụ whẹ l’ọo Sámusịnu ji nwa nwanyị onye Timuna bẹ meru iya nụ. Nkele nna nyee ya bẹ kutaru nyee ya kee ọnya yẹbe Sámusịnu.

Ọo ya bụ, ndu Fílistiya jelekwawho je egude nyee Sámusịnu mẹe nna iya kpọo ọku.

⁷Sámusịnu sụ whẹ: “Eshi-ọwhu unu meru iya ẹgube ono bẹ mu l’ẹte ahadụ unu jeye nteke mu l’e-melata unu.” ⁸O tso whẹ ọgu l’ike l’ike, gbua whẹ ebee-ebee. Ọ tụgbua je anọdu l’ọgba ẹwhuru, dụ lẹ Étamu.

Sámusịnu l’alwụ-gbu ndu Fílistiya

⁹Tọ dụ iya bụ, ndu Fílistiya je akwaa okpu lẹ Juda, lwụshi ndu Lehi ọgu. ¹⁰Ndu Juda sụ whẹ: “?Ọo gụnu meru unu bya anyi ọlwushi ọgu?”

Whẹ sụ: “Anyi byarụ t’anyi kee Sámusịnu ẹgbu melata iya ụgwo iwhe o meru anyi.” ¹¹Tọ dụ iya bụ, unwoke ndu Juda, dụ ụnu ugbo ẹsaa l’ụkporo iri wụru jekfushia Sámusịnu l’ọgba ẹwhuru ono, dụ lẹ Étamu je asụ iya: “?Ị marụ-a l’ọo ndu Fílistiya l’achị anyi? ?Ọo gụnu b’i meru anyi ẹgube-ẹ?”

Ọ sụ whẹ: “Ọo iwhe whẹ meru mu bẹ mu melataru whẹ.”

¹²Whẹ sụ iya: “Iwhe anyi byarụ bụ t’anyi kee ghu ẹgbu, kpụta je anụ ndu Fílistiya.”

Sámusịnu sụ whẹ: “Unu ribuaru mu nte l’unu ta abyadụ l’e-gude ẹka unu gbua mu.”

¹³Whẹ sụ iya: “Waawaa. Ọo ẹgbu bẹ anyi l’e-ke ghu nwẹkiya, kpụta ghu je anụ whẹ. Anyi te egbukwa ghu egbu.” Whẹ bya egude ụdo labọ, dụkota ọwhuu ọwhuu kee ya ẹgbu, kpụfuta l’ẹwhuru ono.

¹⁴O rwulewho mkpụkpu Lehi, ndu Fílistiya wata ọtu okoo eje abyakfuta iya. Ume Onye-Nwe-Ọha bya iya l’ẹhu l’ike l’ike, ụdo ono, dụ iya l’ẹka gbabushihu g’ọo eri oghu, ọku darụ. Ẹgbu ono tọfu iya l’ẹka daa. ¹⁵Ọ whụa ọkpu-agba nkakfụ-ịgara, dụ ọwhuu ọwhuu, o tụruta iya gude chigbua ụnu unwoke ugbo labọ l’ụkporo iri. ¹⁶Sámusịnu sụ:

“Ọo ọkpu-agba nkakfụ-ịgara bẹ mu gude mee,

whẹ kụa l’ikpo l’ikpo.

Ọo ọkpu-agba nkakfụ-ịgara bẹ mu gude gbua

ụnu unwoke ugbo labọ l’ụkporo iri.”

¹⁷O kfugee nno, o tuwhaa ọkpu-agba nkakfụ-ịgara ono. E kua ẹka ono Rematu-lehi bụ iya bụ ugvu ọkpu-agba.

¹⁸Ọo ya bụ, ẹgu-mini wata ọgu Sámusịnu agụshi ya ike, o ryaku Onye-Nwe-Ọha sụ iya: “Ọo ghu bẹ shi l’ẹka mụbe onye ozhi ghu dzọfuta ndu nkeghu l’ụzo parụ ẹka apaa. ?Ọo ẹgu-mini l’e-gbu mu? ?Mu l’a-daba ndu-a, l’ẹte ebua ugvu-a l’ẹka?” ¹⁹Chileke bya emee t’ẹka iduma dụ lẹ mkpụkpu Lehi gheru ọnu, mini shi iya agbashị. Sámusịnu ngụta-gee mini ono, ume bya aduwhu iya azụ, ọ jakerehu. E kua ẹka ono Enu Hakore. Ẹka ono dụkwa lẹ mkpụkpu Lehi byeye ntanụ. ²⁰Sámusịnu bẹ kperu ndu Ízurẹlu ikpe ụkporo awha nteke ndu Fílistiya shi bụru ishi l’achị whẹ.

Sámusịnu whọtaru mgbo, e yeru l’ọnu mkpụkpu Gaza

¹Tọ dụ iya bụ, Sámusịnu bya ejeshia mkpụkpu Gaza. Ọ nọdu l’ẹka ono whụa nwanyị-ọkpara ọbu, o je yẹle iya zẹe. ²E je ekfuru ndu Gaza lẹ Sámusịnu bẹ byarụ nụ. Whẹ je anọ-whee ẹka ono mgburumgburu kwabẹru iya l’ọnu ẹka l’eeshije abahụ lẹ mkpụkpu ono l’ẹnyashi ono l’owhu. Whẹ daa nwajii l’ẹnyashi ono l’owhu. Iwhe whẹ kfuru bụ: “T’anyi kwabẹ jeye tẹ chi sahụ, anyi egbua ya.” ³Sámusịnu zẹe l’ẹka ọ zẹe jeye l’echi-abalị. Ọ gbalihu l’echi abalị ono je awọ ẹka lẹ mgbo, e yeru l’ọnu abata mkpụkpu ono yẹle itso labọ, dụ iya nụ, whọ-lia ya mẹe mgbọro-igwe, l’eegudeje agbachi iya pata dẹe l’ukuvu. O vuta iya jeshia l’eli ugvu, dụ l’atatiwhu mkpụkpu Hiburọnu.

Sámusịnu yẹle Delayila

⁴Sámusịnu megee bya eye nwanyị, ẹwha iya bụ Delayila obu lẹ nsụda Sorẹku. ⁵Ndu l’achị Fílistiya byakfuta nwanyị ono sụ iya: “Nwụtanu iya ọnu t’ọ karụ ghu ẹka eze ike ọkpehu iya ono shi mẹe ụzo, anyi l’e-shi ka iya ẹkuku, nggẹ anyi ekee ya ẹgbu kapyabẹ iya l’ẹnya. Onyenọnu lẹge anyi ha l’a-nụ ghu mkpọla-ọcha, ẹrwa iya dụ ụnu shẹkelu ugbo labọ l’ụkporo shẹkelu ugbo iri l’ise.”

⁶Delayila bya eje asụ Sámusịnu: “Byiko, kanụru mu ẹka eze ike ọkpehu ghu ono shi ghu mẹe ụzo, l’ee-shi kee ghu ẹgbu kapyabẹ ghu l’ẹnya.”

⁷Sámusịnu sụ iya: “E -gude ụdo ẹsaa, dụkota ọwhuu ọwhuu, l’ẹte akpọo nkụ kee mu, mu abụru urweke-ngwọpya, mbụ mu abya adụ g’ọo ndu ọdo.”

⁸Tọ dụ iya bụ, ndu l’achị Fílistiya chịtaru Delayila ụdo ẹsaa, dụkota ọwhuu ọwhuu, l’ẹte akpọo nkụ, o gude iya kee Sámusịnu ẹgbu. ⁹O nweru ndu madzụ Delayila domiru l’ime mkpu. Ọ sụ: “Sámusịnu! Ndu Fílistiya l’abyakwa ghu abagude!” Sámusịnu gbabushia ụdo ono ẹgube-ẹ eri-oghu l’agbabuhuje m’o rwua l’ọku. Ọ bụru iya bụ l’a ta amadụ ẹka ike ọkpehu iya shi.

¹⁰Delayila sụ Sámusịnu: “Iime mu jiwhu jiwhu, adzụru mu ejire. Byiko kanụru mu gẹ l’ee-shi kee ghu ẹgbu.”

¹¹Ọ sụ iya: “E -gude eri ọwhuu, l’adụa iwhe e gudewa iya mee kee mu, mu abụru urweke-ngwọpya bya adụ g’ọo ndu ọdo.”

¹²Delayila bya achịta eri ọwhuu gude kee ya ẹgbu. O nweru whọ ndu domiru onwowhe edomi l’ime mkpu. Delayila sụ: “Sámusịnu! Ndu Fílistiya l’abyakwa ghu abagude!” Sámusịnu gbabushia eri ono, dụ iya l’ẹka g’ọo eri-oghu. ¹³Delayila sụ Sámusịnu: “Byasụ ntaa bẹ l’iijiwhukwadu mu-a ajiwhu, adzụru mu ejire. Kanụru mu gẹ l’ee-shi kee ghu ẹgbu.”

Ọ sụ iya: “Ọ -bụru l’ị jịkahuru mu ẹgbushi uzhi ẹsaa, gude eri, e gude ekwe ẹkwa kegbabe iya, bya ewota aga gbapyabẹ iya t’o shihu ike, mu abụru urweke-ngwọpya, bya adụ g’ọo ndu ọdo.”

¹⁴Ọo ya bụ, Sámusịnu kuleruwho mgbẹnya, Delayila lọta iya ukfu ẹgbushi ẹsaa ono kegbabe l’eri, e gude ekwe ẹkwa, bya egude aga gbapyabẹ iya, o shihu ike. Ọ sụ iya: “Sámusịnu! Ndu Fílistiya l’abyakwa ghu abagude!” O zhilihu lẹ mgbẹnya ono mịfu aga ono, lafụ eri ono mẹe iwhe ẹkwa ono. ¹⁵Delayila sụ iya: “?Ndẹe gẹ l’ii-shi sụ l’i yeru mu obu, lẹ gụbe onye obu ghu l’adụa l’ẹka mu nọ? Ọwaa l’ekwewaa ugbo ẹto, i meru mu jiwhu jiwhu, ti kwe kọoru mu ẹka eze ike ọkpehu ghu ono shi.” ¹⁶Mbọku mbọku bẹ l’oodowhubeje Sámusịnu; ọ kpabẹnyaa ya okfu, obu bya l’agbawahụ Sámusịnu, ọ dụ iya nke tẹ ya nwụhu. ¹⁷Ọo ya bụ, o kfukotaru iya obu iya g’ọ ha sụ iya: “Akwọ te erwujekwa mu l’ishi, o noo nkele mu shi l’ẹwho ne mu dụru Chileke lẹ nsọ. A -kpụshia mu ẹgbushi, ọkpehu adụ-buhu mu, mu abụru urweke-ngwọpya bya adụ g’ọo ndu ọdo.”

Eegude Sámusịnu

¹⁸O noo ya, Delayila marụ l’o kfuwaru iya obu iya g’ọ ha. O zhia t’e kua ndu l’achị Fílistiya sụ whẹ: “Unu byafụa ugbo lanụ-a l’ọ kfuwaru mu obu iya g’ọ ha.” Tọ dụ iya bụ, ndu l’achị Fílistiya ono gude okpoga byakfuta iya. ¹⁹Delayila gboru Sámusịnu ye lẹ mgbẹnya l’ụtakfu iya. O kua nwoke lanụ sụ iya t’ọ kpụfu Sámusịnu ukfu ẹgbushi ẹsaa ono, dụ iya l’ishi. Delayila wata omekashi Sámusịnu ẹhu, ike ọkpehu ta adụhe iya. ²⁰Ọ sụ iya: “Sámusịnu! Ndu Fílistiya l’abyakwa ghu abagude!” O tehu sụ tẹ ya jee gẹ ya l’ejejehawaa je anyaa onwiya kpurukutu gude nahụ. Tọ ma lẹ Onye-Nwe-Ọha bẹ hawarụ iya. ²¹Ndu Fílistiya gude iya swọshia ya akpụru ẹnya, kpụru iya jeshia mkpụkpu Gaza. Whẹ gude ẹgbirigba labọ, e meru l’ope kee ya ẹgbu, kpụru je edobe l’ụlo mkpọro t’o gweje iwhe egwegwe. ²²A nọnyaa ẹgbushi iya wata erwuchiwhu azụ g’a kpụshigeeru iya.

Anwụhu Sámusịnu

²³Ndu l’achị Fílistiya bya edzukobe tẹ whẹ gbaa ẹja, parụ ẹka nụ agwa whẹ, bụ Degọnu. Whẹ l’ete ẹswa asụje: “Agwa anyi bẹ yewaru anyi onye ọhogu anyi, bụ Sámusịnu l’ẹka.” ²⁴Ndu ono whụlewho Sámusịnu, whẹ tulahaa agwa whẹ ẹwha sụ: “Agwa anyi bẹ yewaru anyi onye ọhogu anyi l’ẹka, mbụ onye ono, meru alị anyi ọ bụru ochuwhu, gbua igweligwe l’ime anyi.” ²⁵Ẹmereme bya eji whẹ obu, whẹ sụ: “Unu kua Sámusịnu t’ọ bya emetaru anyi iwhe-ozhi-ọchi.” Ọo ya bụ, whẹ bya edufuta iya l’ụlo mkpọro, o melahaaru whẹ iwhe-ozhi-ọchi. Ẹka whẹ meru ọ kfụru bụ l’echilabọ itso labọ, bụ iya gude ụlo ono. ²⁶Sámusịnu sụ nwata okoro, kpụ iya l’ẹka: “Mee t’ẹka mu rwua l’itso gude ụlo ono nke ọwhu mu l’a-dawhube iya adawhube.” ²⁷Ụlo ono bẹ ụnwoke mẹe ụnwanyi jiru atsụ iya rwụkfurwukfu. Ndu l’achị Fílistiya gẹ whẹ ha nọdukotakwa iya whọ. Ndu ọwhu nọ l’eli okpotsu-ụlo ono awhụta iwhe-ozhi-ọchi ono, Sámusịnu l’eme bẹ dụ ụnu ugbo ẹsaa l’ụkporo iri, unwoke mẹe ụnwanyi.

²⁸Tọ dụ iya bụ, Sámusịnu bya akpoku Onye-Nwe-Ọha sụ iya: “Gụbe Nnajị-Ọha, bụ Onye-Nwe-Ọha, byiko nyatanụ mu. Nụfunua mu ike ọkpehu ọdo gụbe Chileke nke ọwhu mu l’a-gwata ndu Fílistiya ụgwo ẹnya labọ, whẹ swọshiru mu l’ugbo lanụ.” ²⁹Sámusịnu wọ ẹka l’itso labọ ono, gvuru l’echilabọ ụlo ono, bụ iya gude ụlo ono. O gude ẹrwa ẹhu iya g’ọ ha nwubeshia ẹka-ụtara iya ike lẹ nnanụ, nwubeshia ẹka-ịcha iya ike lẹ nnanụ ọwhu. ³⁰Sámusịnu sụ: “Tẹ mu lẹ ndu Fílistiya kpakọ nwụshihu.” O gude ọkpehu iya g’ọ ha whuzeta, ụlo ono bụru gburugudungu dapyabẹ ndu ono, l’achị Fílistiya mẹe ndu lile, nọkota l’ime ụlo ono. Ndu Sámusịnu gburu nteke l’ọonwuhu bẹ ka ndu o gburu nteke ọ nọ ndzụ.

³¹Tọ dụ iya bụ, ụnwune iya mẹe ndibe whẹ l’owhu je apata iya je elia l’echilabọ mkpụkpu Zora yẹle mkpụkpu Ẹshutawolu l’ilu nna iya, bụ Manowa. Sámusịnu bẹ kperu ndu Ízurẹlu ikpe ụkporo awha.

Ntẹkpe Mayịka

¹O nweru nwoke, bụ onye alị ugvu ugvu Ífuremu, ẹwha iya bụ Mayịka. ²Nwoke ono bẹ sụru ne iya: “Okpoga mkpọla-ọcha ghu, dụ ụnu shẹkelu ugbo labọ l’ụkporo shẹkelu ugbo iri l’ise, e wotajeru, mbụ ono, mu nụru nteke ono, l’iiburu onye wotaru iya nụ ọnu bẹ bụkwa mu gude iya. Ọo mbẹdua bẹ wotaru iya nụ.”

Ne iya sụ iya: “Tẹ Onye-Nwe-Ọha gọru ọnu-ọma nụ ghu, nwa mu.” ³O woru okpoga mkpọla-ọcha ono, dụ ụnu shẹkelu ugbo labọ l’ụkporo shẹkelu ugbo iri l’ise nụ-whu ne iya azụ. Ne iya sụ: “Mu gude ẹka mu edoberu Onye-Nwe-Ọha mkpọla-ọcha ono nsọ tẹ nwa mu gude iya pyịa ntẹkpe, ya akpụta nke akpụta. Ntaa bẹ mu l’anụ-whu ghu iya azụ.” ⁴Ọo ya bụ, o woru okpoga ono nụ-whu ne iya azụ. Ne iya shi l’iya wota mkpọla-ọcha, ẹrwa iya dụ ụkporo shẹkelu ugbo iri je anụ onye l’akpụje ụzu mkpọla-ọcha. O gude iya meta ntẹkpe, a pyịru apyị mẹe ọwhu, a kpụru akpụ. E je edobe iya l’ụlo Mayịka. ⁵Nwoke ono, bụ Mayịka bẹ nweru ụlo agwa. Ọ kpụru nwụkpata ifọdu mẹe ụnwu agwa ọdo, bya edobe nwa iya nwoke lanụ t’ọ gwajẹru iyẹ ya. ⁶Nteke ono bẹ l’ẹte enwedua eze lẹ Ízurẹlu. Onyenọnu l’anọje eme gẹ dụ iya ree. ⁷O nweru nwokorọbya, shi buru l’ẹnya-uwhu ndu Juda lẹ mkpụkpu Bẹ́tulehemu nke alị Juda. Ọ bụ onye Lívayi. ⁸Nwoke ono bya alụfu lẹ mkpụkpu Bẹ́tulehemu nke alị Juda ono jeshia ọcho ẹka ọdo, l’oo-buru. O jenyaa bya erwua alị ugvu ugvu ndu Ífuremu; ọ bahụ l’ibe Mayịka. ⁹Mayịka sụ iya: “?Ọo awe b’i shi?”

Ọ sụ iya: “Mu bụkwa onye Lívayi. Ẹka mu shi bya bụ lẹ Bẹ́tulehemu l’alị Juda, mu l’achọ ẹka mu l’e-buru.”

¹⁰Mayịka sụ iya: “Tẹ mu lẹ ghu nọdunu, t’ị bụru nna mu, bụkwaruwho onye l’agwarụ mu iwhe. Mu l’a-nụje ghu mkpọla-ọcha, ẹrwa iya dụ shẹkelu iri l’awha, anmarụ ghu uwe, anụ ghu nri.” ¹¹Onye Lívayi ono kweta yẹle Mayịka buru. Nwokorọbya ono dụ Mayịka g’ọo nwa iya nwoke lanụ. ¹²Mayịka dobe onye Lívayi ono, ọ bụru onye l’agwarụ iya iwhe. Ọ nọduwaro l’ụlo Mayịka. ¹³Tọ dụ iya bụ, Mayịka sụ: “Ntaa bẹ mu marụ lẹ Onye-Nwe-Ọha l’a-nọ eme t’iwhe dụru mu lẹ ree, eshi-ọwhu mu nweru onye Lívayi l’agwarụ mu iwhe.”

Ndu Danu l’achọ alị, whẹ l’e-buru

¹Nteke ono bẹ l’eete enwedua eze lẹ Ízurẹlu. Nteke ono bụ nteke ikfu Danu shi achọ alị, whẹ l’e-buru. Nkele nteke ono bẹ l’ẹte onwedua alị, bụwaa nkewhe l’echilabọ ikfu ndu Ízurẹlu. ²Ọo ya bụ, ndu Danu bya eshi l’ẹnya-uwhu, dụ l’ikfu whẹ họta mkparawa unwoke ise, shi lẹ mkpụkpu Zora mẹe mkpụkpu Ẹshutawolu tẹ whẹ je egee alị ono ngge, nyochaa ya marụ g’ọ dụ. A sụ whẹ: “Unu je enyochaa alị ono enyocha marụ g’ọ dụ.” Whẹ bya ejerwua alị ugvu ugvu ndu Ífuremu bahụ l’ibe Mayịka je aradụ. ³Nteke whẹ nọkube ụlo Mayịka ntse bẹ whẹ nụru olu-okfu nwokorọbya ono, bụ onye Lívayi, whẹ hụbe iya ama. Whẹ swịba l’ẹka ono jịa ya sụ: “?Oo onye du ghu bya ẹka? ?Ọo gụnu bẹ l’iime l’ẹka? ?Ọo gụnu bẹ gbabẹru ghu l’ẹka?”

⁴Ọ sụ whẹ l’o nweru iwhe yẹle Mayịka jigba. Lẹ Mayịka bẹ goru iya ego tẹ ya gwajẹru iya iwhe.

⁵Whẹ sụ iya: “Byiko jịtaadaru anyi Chileke t’anyi marụ mẹ ije-e, anyi l’eje ?oo nweru-a ishi?”

⁶Onye ono, l’agwajẹ iwhe sụ whẹ: “T’unu jee guu. Onye-Nwe-Ọha bẹ nwụberu unu ẹnya l’ije unu ono.”

⁷Tọ dụ iya bụ, unwoke ise ono lụfu. Whẹ jerwua mkpụkpu Layishi, whẹ whụa gẹ ndu bu l’ẹka ono tụsaru ẹhu g’ọo ndu Sáyịdonu. Nchị dụ whẹ ndoo, tọ dụ iwhe egvu iya l’atsụ whẹ. Tọ dụ iwhe ụko iya dụru whẹ, tọ dụ iwhe whẹ l’achọ achọ l’alị ono. Whẹ bu otẹnya lẹ Sáyịdonu, tọ dụ onye whẹ lẹ whẹ l’emegba. ⁸Whẹ megee bya alakfuwhu ụnwunna whẹ azụ lẹ Zora mẹe Ẹshutawolu. Ụnwunna whẹ jịa whẹ sụ: “?Ndẹe g’ije unu dụ?” ⁹Whẹ sụ: “Unu wulihu t’anyi je etso whẹ ọgu nkele anyi whụwaru alị ọbu, ọ bụru alị, dụ ree shii. ?Unu te emedu ụkporo? T’ọkpa ba atsụkwa unu mmẹe nke ejeje, unu tụgbukwaru je anata alị ono t’ọ bụru nkunu. ¹⁰Unu rwulewho ẹka ono, unu awhụa gẹ ndu bu iya nụ tụsaru ẹhu. Alị ono bẹ sarụ ọsa. Sụa, Chileke wookwaru iya ye unu l’ẹka, mbụ alị, l’ẹte adụa iwhe dụ lẹ mgboko-o, dụ iya ụko.”

¹¹Tọ dụ iya bụ, ụnu unwoke l’ụkporo unwoke iri, bụ ndu ikfu Danu ono bya akwaa ngwọgu shi lẹ Zora mẹe Ẹshutawolu tụgbua. ¹²Whẹ tụgbua je edobe ọdu-ọgu lẹ mkpụkpu Kiriyatu-jeyarimu, dụ l’alị Juda. Ọo ya meru iwhe l’eeku ẹka ono Mahane Danu byeye ntanụ bụ iya bụ ọdu-ọgu ndu Danu. Ẹka ọ dụ bụ l’ụzo ẹnyanwu-arịba Kiriyatu-jeyarimu. ¹³Whẹ shi l’ẹka ono jeshia alị ugvu ugvu Ífuremu, whẹ bahụ l’ụlo Mayịka.

Ndu Danu l’apata ọgvu Mayịka

¹⁴Tọ dụ iya bụ, ụmadzu ise ono, jeru ngge l’alị Layishi bya asụ ụnwunna whẹ ono: “?Unu marụ-a l’ụlo-ọ b’e nweru nwụkpata ifọdu, nweru iya ụnwu agwa ọdo mẹe ntẹkpe, a pyịru apyị mẹe ọwhu a kpụru akpụ? Unu lekwaa ẹnya marụ iwhe unu l’e-me.” ¹⁵Whẹ swịba l’ẹka ono bahụ l’ụlo nwokorọbya ono, bụ onye Lívayi, mbụ onye ono, bu l’ibe Mayịka. Whẹ l’iya bya ajịa. ¹⁶Ụnu unwoke l’ụkporo iri ono, shi l’ikfu Danu, kwaa ngwọgu kfụru l’ọnoguzo. ¹⁷Ọwhube unwoke ise ono, jeru ngge l’alị ono bahụ l’ụlo ono je apata ntẹkpe ono, a pyịru apyị mẹe nwụkpata ifọdu ono mẹe ụnwu agwa ọdowaro mẹe ntẹkpe ọwhu a kpụru akpụ, dụ iya nụ. Onye l’agwajẹ iwhe kfụru l’ọnoguzo yẹle ụnu unwoke l’ụkporo unwoke iri ono, kwarụ ngwọgu.

¹⁸Gẹ ndu ono bahụru l’ụlo Mayịka je achịkoo ntẹkpe ono, a pyịru apyị mẹe nwụkpata ifọdu ono mẹe ụnwu agwa ọdo ono mẹe ntẹkpe ono, a kpụru akpụ bẹ onye ono, l’agwajẹ iwhe ono jịru whẹ sụ: “?Ọo gụnu bẹ unu l’eme nno?”

¹⁹Whẹ sụ iya: “Mechia ọnu! Kfuchia ẹka l’ọnu. Bya etsoru anyi bụru nna anyi mẹe onye l’agwarụ anyi iwhe. ?O gbechia ka ghu ree t’ọ bụru onye lanụ bẹ l’ịi-nọ agwaru iwhe l’ibe iya, amamẹ t’ị gwajẹru ikfu ndu Ízurẹlu l’owhu mẹe ẹnya-uwhu whẹ iwhe?” ²⁰Ẹhu tsọlahaa onye ono l’agwajẹ iwhe ono ụtso. Ọ chịta nwụkpata ifọdu ono mẹe ụnwu agwa ọdo ono mẹe ntẹkpe ono, a pyịru apyị tsoru whẹ.

²¹Ọo ya bụ, whẹ dakọbe tụgbua, kparụ ụnwegirima whẹ mẹe élwù whẹ mẹe ivu whẹ vuru ụzo. ²²Nteke whẹ jemihuru nọdu ibe Mayịka otẹnya, a bya ekushia ndu ibe whẹ dụkube ibe nke Mayịka, whẹ je agbabua ndu Danu iwhu. ²³Whẹ chiru mkpu kpube ndu Danu ono. Ndu Danu ghakọbe sụ Mayịka: “?Ọo gụnu bẹ byarụ ghu nụ, meru g’o gude ị chịru eze ndu ọwa byakfuta anyi?”

²⁴Mayịka sụ whẹ: “Unu wotaru ọgvu mu, duta onye l’agwarụ mu iwhe tụgbua. ?Ọo gụnu ọdo bẹ mu tọgbokwaduru? ?Ndẹnu g’unu shi bya ajịlahaa mu iwhe byarụ mu nụ?”

²⁵Ndu Danu sụ iya: “T’anyi ba anụhekwa olu ghu ọdo, ọdua bẹ ndu obu l’enwu ọku l’a-byakwa gụ lẹ ndibe unu l’ẹhu, unu etuwhaa ndzụ unu.” ²⁶Tọ dụ iya bụ, ndu Danu tụgburu jeshia iwhe whẹ l’eje. Mayịka whụa lẹ whẹ kariru iya ẹka, ọ dakọbe dawhu azụ lashia ibe iya.

Ndu Danu l’atọ ọku lẹ mkpụkpu Layishi

²⁷Gẹ whẹ wotageeru agwa ono, Mayịka meshiru, duta onye l’agwajẹru iya iwhe ono bẹ ndu Danu tụgburu jeshia Layishi. Whẹ jekfu ndu ono, nchị dụ ndoo mẹe ndu ono, tụsaru ẹhu ono, gude ogu-ịgba gbugbushia whẹ, bya anwụru ọku ye lẹ mkpụkpu ono, ọ dzụkota iya. ²⁸Ọ tọ dụdu onye gbarụ whẹ mkpu nkele mkpụkpu ono bẹ teru ẹnya lẹ Sáyịdonu, tọ bụhe l’o nweru ndu ọdo, whẹ lẹ whẹ l’emegba. Ẹka mkpụkpu ono dụ bụ lẹ nsụda Betu-rehobu. Ndu Danu bya atụkwa-zhia mkpụkpu ono buru iya. ²⁹Iwhe whẹ gụru mkpụkpu ono bụ Danu bụ iya bụ ẹwha onye metaru whẹ nụ. Danu bụ nwa, a nwụtaru Ízurẹlu. Iwhe mkpụkpu ono shi aza lẹ mbụ bụ Layishi. ³⁰Ndu Danu bya emobe ntẹkpe ono, a pyịru apyị. Jonatanu nwa Gẹshomu, bụ nwa Mósisu mẹe ụnwu iya bẹ shi agbarụ ikfu Danu ẹja jeye nteke a kpụru ndu alị ono lẹ ndzụ. ³¹Ọo ya bụ, whẹ dobe ntẹkpe Mayịka ono, a pyịru apyị; ọ nọdu l’ẹka ono whẹ l’agwa iya jeye g’ụlo Chileke nọ-beru lẹ mkpụkpu Shilo.

Nwoke Lívayi yẹle nwanyị, l’ọoto ọlua l’ọkpoku nwanyị

¹Nteke ono, l’eete enwee eze lẹ Ízurẹlu bẹ nweru nwoke Lívayi, shi buru lẹ wuru-wuru alị ugvu ugvu Ífuremu. Nwoke ono bẹ dutaru nwanyị lẹ mkpụkpu Bẹ́tulehemu l’alị Juda, mbụ nwanyị l’ọoto ọlua l’ọkpoku nwanyị. ²Nwamgbọko ono nọnyaa wata anọ akpa lẹ nwoke ọdo, bya agbafụ lashia ibe nna iya lẹ Bẹ́tulehemu l’alị Juda. Ọ nọlewho ọnwa ẹno l’ibe nna iya, ³ji iya gbalihu jeshia tẹ ya kfuru okfu njima yeru iya t’ọ lawhu azụ. O jede duru onye ozhi iya yẹle nkakfụ-ịgara labọ. Ọ bya erwua l’ụlo nna nwamgbọko ono, nna nwamgbọko ono whụa ya gude ẹhu-ụtso byakfuta iya. ⁴Ọgo iya nwoke ono, bụ nna nwamgbọko ono sepyabe iya yẹle iya nọo abalị ẹto. Whẹ ria ngụa, radụ l’ẹka ono. ⁵Lẹ mbọku ọwhu kwe iya ẹno, whẹ nmaa ẹwa gbalihu. Nwoke Lívayi ono jịkobe nke alashị, nna nwamgbọko ono sụ nwoke Lívayi ono, bụ ọgo iya: “Kpọo ọkpuchi nke ọwhu ume l’a-dụ ghu, ị kpọ-gee ọkpuchi gụ alashiwaro.”

⁶Ọo ya bụ, whẹ labọ bya atụko ria ngụa. Nna nwamgbọko ono sụ nwoke ono: “Byiko nọfunua ẹnyashi ọwa, t’obu tsọo ghu ụtso.”

⁷Nwoke ono gbalihu t’iya lashia, ọgo iya ono byakọle iya whọ jeye ọ radụfua l’ẹnyashi mbọku ono. ⁸Lẹ mbọku ọwhu kwe iya ise, ọ nmaa ẹwa gbalihu tẹ ya lashia, nna nwamgbọko ono sụ iya: “Kpọo ọkpuchi nke ọwhu ume l’a-dụ ghu, gụ anọdu ụboku gbadalẹwho gụ alashia.” Whẹ labọ bya atụko ria nri.

⁹Nwoke ono jịkobelewho tẹ yẹle nwamgbọko ono, l’ẹte ọlua l’ọkpoku nwanyị mẹe onye ozhi iya tụgbua, ọgo iya, bụ nna nwamgbọko ono sụ iya: “Lenu, ụboku gvụakwaru, ọ bụakwa urwẹnyashi. Byiko radụfukwaa l’ẹnyashia-a. Ụboku bẹ gvụakwaru, radụ l’ẹka-a t’obu tsọo ghu ụtso. O be echile gụ anma ẹwa gbalihu lashia ibe ghu.”

¹⁰Nwoke ono jịka aradụ l’ẹnyashi ono. Ọ gbalihu, ọ bụru iya atụgbu. O jeta rwua iwhu mkpụkpu Jebusu bụ iya bụ Jerúsalẹmu. Iwhe o gude bụ nkakfụ-ịgara iya labọ, vugee ivu yẹle nwamgbọko ono, l’ẹte ọlua l’ọkpoku nwanyị ono. ¹¹Nteke whẹ nọ Jebusu ntse bẹ ụboku jemihuwaru; onye ozhi ono sụ nna-iya-ukfu: “Bya t’anyi swịba lẹ mkpụkpu Jebusu-a je aradụ.”

¹²Nna-iya-ukfu sụ iya: “Anyi ta aswịbadu lẹ mkpụkpu ndu ọha ọdo, l’ẹte abụa ndu Ízurẹlu. Anyi l’a-ghata aghata jerwua mkpụkpu Gibyiya.” ¹³Ọ sụ onye ozhi iya ono: “Bya t’anyi kebe ẹhu jerwua mkpụkpu Gibyiya m’ọbu mkpụkpu Rama je aradụ.” ¹⁴Ọo ya bụ, whẹ ghata tụgburu; whẹ rwua mkpụkpu Gibyiya, dụ l’alị Bénjaminu chi jikfu whẹ l’ẹka ono. ¹⁵Whẹ swịba bahụ lẹ mkpụkpu Gibyiya tẹ whẹ radụ. Nwoke Lívayi ono je anọdu lẹ nggamgbo mkpụkpu ono, tọ dụ onye sụru whẹ tẹ whẹ bya aradụ l’ibe iya.

¹⁶Ọ whụa nwoke ọgurenya, shi ozhi l’ẹgu alwa l’urwẹnyashi ono. Nwoke ono bụ onye alị ugvu ugvu Ífuremu, bu ebu lẹ Gibyiya. Ndu nwe ẹka ono bụ ndu Bénjaminu. ¹⁷Nwoke ọgurenya ono palia ẹnya whụa onye ije ono g’ọ nọ lẹ nggamgbo mkpụkpu. Nwoke ọgurenya ono jịa ya sụ: “?I shi awe, eje awe?”

¹⁸Ọ sụ iya: “Anyi shikwa Bẹ́tulehemu, dụ l’alị Juda ala wuru-wuru alị ugvu ugvu Ífuremu, bụ ẹka mu shi. Mu jeru Bẹ́tulehemu, dụ l’alị Juda, mu l’alawa ụlo Onye-Nwe-Ọha, ọle ọ tọ dụdu onye sụru tẹ mu bata l’ibe iya. ¹⁹Anyi gudekwaru nkakfụ-ịgara anyi ẹswa ọkponku mẹe nri, l’oo-ri, bya egudekwawho buredi mẹe iwhe-angụngu, bụ nke mu lẹ nwamgbọko-ọ, bụ onye ozhi ghu mẹe nwokoro-o, anyi l’iya lị, mbụ anyịbe ndu ozhi ghu. Ọ tọ dụdu iwhe anyi l’akọ ụko iya.”

²⁰Nwoke ọgurenya ono sụ iya: “Unu tọkwa ẹhu. Mu l’e-mekotaru unu iwhe l’akpa unu mkpa, t’unu ba aradụkwa lẹ nggamgbo.” ²¹Ọo ya bụ, o dulia ya whẹ jeshia ụlo iya. Ọ nụ nkakfụ-ịgara nwoke ono nri. Whẹ kwọo ọkpa ria nri ngụa iwhe-angụngu.

Akataka, meru lẹ mkpụkpu Gibyiya

²²Gẹ whẹ l’eme t’obu tsọo whẹ ụtso bẹ unwoke mkpụkpu ono, bụ ndu ejo obu wụbataru bya asọ-whee ụlo ono mgburumgburu, wata otsu ẹka gbaagbaa lẹ mgbo asụje nwoke ọgurenya ono, nwe ụlo ono: “Dufutaru anyi nwoke ono, byarụ ụlo ghu t’anyi l’iya zẹe azẹe nwoke lẹ nwanyị.”

²³Nwoke ono, nwe ụlo ono kpufu etezhi je asụ whẹ: “Wawakwa ndu mu, unu be emeshi ejo-ememe. Eshi-ọwhu nwoke-e batawaru l’ụlo mu, t’unu be emekwa ẹgube akataka ono. ²⁴Unu lee nwa mu nwanyị, nwoke l’ẹte akụbua ọkpa, ọwaa nwanyị, nwoke ono l’ẹte alụa l’ọkpoku nwanyị ndọwa. Tẹ mu dufuta whẹ nụ unu, t’unu whaa whẹ kutukutu mee whẹ gẹ dụ unu mma. Ọle t’unu be emekwa ẹgube akataka ono kpua nwoke-e.” ²⁵Obenu l’unwoke mkpụkpu ono ta angadụru iya nchị. Nwoke Lívayi ono tụfu ẹka sulita nwanyị ono, l’ọoto ọlua l’ọkpoku nwanyị ono tụfuru whẹ l’etezhi. Whẹ l’iya zẹe, whẹ shi l’ẹnyashi whaa ya kutukutu jeye l’ụtsu. Chi bya l’asahụ whẹ nwuhaa ya t’ọ tụgbua.

²⁶Chi sahụlewho, nwanyị ono pata onwiya chia l’ọnu ụlo nwoke ono, nna-iya-ukfu nọ, ọ daburu l’ẹka ono jeye iwhoro dụ. ²⁷Nna-iya-ukfu bya agbalihu l’ụtsu, gụhaa ụzo fụta eme t’ọ bya atụgburu, ọ whụa nwanyị ono, l’ẹte ọlua l’ọkpoku nwanyị g’ọ daburu l’ọnu mgbo ono wụshi ẹka iya lẹ mgboko ọnu-ụlo. ²⁸Ọ sụ iya: “Gbashi t’anyi la.” Ọ bụru kpii rịgbidingu. Ọ gwọ-lia ya tukobe l’eli nkakfụ-ịgara iya dzolia, ọ bụru iya alala. ²⁹Ọ larwua ibe iya, o wota mma, bya azụ nwanyị ono, l’ẹte ọlua l’ọkpoku nwanyị l’ẹka sajishia ya nkwo lẹ nkwo sata iya uzhi iri l’ẹbo. Ọ chịta anụ iya keshikota l’alị Ízurẹlu kpaa-whuu. ³⁰Iwhe bụ ndu whụru iya nụ sụ: “Ụdu iya ọwaa te emebukwa, t’a whụbua ya eshi nteke ndu Ízurẹlu fụtaru l’alị Íjiputu jeye mbọku, dụ g’ọo ntanụ. Unu rịkwa ya arị, unu achịa ya idzu, kfua gẹ l’ee-me iya.”

Ndu Ízurẹlu l’akwakọ nkwakọ ọgu

¹Tọ dụ iya bụ, ndu Ízurẹlu l’owhu wata lẹ mkpụkpu Danu jeye lẹ mkpụkpu Byiyesheba mẹe l’alị Giledu kpofuta. Edzudzu-ọha ono dzukobe nmagba g’ọo onye lanụ l’iwhu Onye-Nwe-Ọha lẹ mkpụkpu Mizupa. ²Ndu ishi ndu Ízurẹlu, bụ ndu l’achị ikfu lile, dụ lẹ Ízurẹlu dzukotaru edzu lẹ ndzuko ndu nke Chileke ono. Iwhe whẹ dụ bụ ụkporo ụnu ụkporo ugbo labọ l’ụkporo ụnu ugbo iri, bụkotaru ndu ojọgu o-je-l’ọkpa, l’egudeje ogu-ịgba. ³Ndu Bénjaminu bya anụa lẹ ndu Ízurẹlu bẹ jeru Mizupa.

Ndu Ízurẹlu sụ: “Unu karụ anyi ẹgube akpamara ono, meru nụ shi mee.” ⁴Nwoke Lívayi, bụ ji nwanyị ono, e gburu bya eyeeru whẹ ọnu sụ: “Mu lẹ nwanyị, mu l’ẹte alụa l’ọkpoku nwanyị bẹ rwuru mkpụkpu Gibyiya, dụ l’alị Bénjaminu, anyi sụ t’anyi radụ. ⁵O be l’ẹnyashi, unwoke ndu Gibyiya zeru gbigbigbi byakfuta mu, bya asọ-whee ụlo, mu nọ mgburumgburu. Iwhe whẹ tụberu bụ tẹ whẹ gbua mu. Whẹ gude nwanyị ono, mu l’ẹte alụa l’ọkpoku nwanyị l’ọkpehu whaa ya kutukutu tọgbo, ọ bụru iya anwụhu. ⁶Mu pata nwanyị ono gbukashia anụ iya egbukashi, kekota anụ iya ono l’alị Ízurẹlu gbaa mgburumgburu, nkele iwhe whẹ meru l’alị Ízurẹlu bẹ bụ akpamara yẹle ụtsuruku. ⁷Unubẹ ndu Ízurẹlu, t’unu lile kfua okfu iya, chịa idzu gẹ l’ee-me iya.”

⁸Ndu Ízurẹlu gẹ whẹ ha zelihu l’ugbo lanụ sụ: “Ọ tọ dụdu g’anyi ha bya l’a-la l’uwhu m’ọo onye lanụ, mbụ l’ọ tọ dụdu g’anyi ha bya l’a-la ibe anyi m’ọo onye lanụ. ⁹Iwhe anyi l’e-me ndu Gibyiya bụ l’anyi l’a-tụ ido gude jekfu whẹ ọgu. ¹⁰L’ikfu Ízurẹlu l’owhu bẹ anyi l’a-họta unwoke iri l’ime ndu dụ ụkporo ugbo ise, họta ụkporo ugbo ise l’ime ndu dụ ụnu labọ l’ụkporo iri, họta ụnu labọ l’ụkporo iri l’ime ndu ọwhu dụ ụkporo ụnu l’ụnu ise. Ndu ono l’a-bụru ndu l’e-wojejeru ndu ojọgu anyi nri. Nke ọwhu bụ, ndu ojọgu jerwua Gibyiya, whẹ agwata ndu Gibyiya nke alị Bénjaminu ụgwo mkpamkpa ono, whẹ kparụ l’alị Ízurẹlu.” ¹¹Ọo ya bụ, unwoke Ízurẹlu bya edzua gẹ whẹ ha nmagbabẹ dụ g’ọo onye lanụ tẹ whẹ tso mkpụkpu ono ọgu.

Ndu Bénjaminu l’akwakọ nkwakọ ọgu nkewhe

¹²O noo ya, ikfu Ízurẹlu bya ezhia ozhi t’e je ezhigbakota l’ikfu Bénjaminu sụ whẹ: “?Ejo akpamara ọwa, e meru l’echilabọ unu bụ gụnu? ¹³Ntaa bụkwa t’unu dufutaru anyi ndu, bụ ndu ejo obu lẹ mkpụkpu Gibyiya t’anyi gbushia whẹ gude hufu ejo-iwhe ono lẹ Ízurẹlu.” Ọle ndu Bénjaminu ta angadụ nchị l’iwhe ono, ụnwunna whẹ, bụ ndu Ízurẹlu kfuru. ¹⁴Ndu Bénjaminu zefuta lẹ mkpụkpu whẹ je edzukoo lẹ mkpụkpu Gibyiya tẹ whẹ wọta ndu Ízurẹlu ọgu. ¹⁵Ndu Bénjaminu, shi lẹ mkpụkpu whẹ wụfuta mbọku ono bẹ dụ ụkporo ụnu madzụ ugbo ẹto l’ụnu ise, bụkotaru ndu l’egudeje ogu-ịgba, t’a gụfukwa iya ndu ọwhu bu lẹ mkpụkpu Gibyiya, dụ ụnu unwoke l’ụkporo ugbo iri l’ise, bụ ndu a họtaru ahọta. ¹⁶L’ime ndu ono b’e nweru ụnu unwoke l’ụkporo unwoke iri l’ise, bụ ndu a họtaru ahọta, l’emekaa ẹka-ịcha. Whẹ l’a-dụ ike gude mgbẹka gbata madzụ ẹgbushi l’ishi, whẹ ta agbaswedu iya agbaswe. ¹⁷Unwoke Ízurẹlu l’ẹte abụkwaa ndu Bénjaminu bya agbadzua onwowhe ụkporo ụnu unwoke ụkporo ugbo labọ l’ụkporo ụnu ugbo iri, bụkota ndu l’egudeje ogu-ịgba. Ndu ono gẹ whẹ bụkota unwoke marụ nke ọgu.

Ndu Bénjaminu lwụ-gburu ndu Ízurẹlu

¹⁸Ndu Ízurẹlu zelihu jeshia mkpụkpu Bẹtelu je ajịta Chileke sụ: “?Ọo ndu ole l’ime anyi l’e-vuta ụzo je etso ndu Bénjaminu ọgu?”

Onye-Nwe-Ọha sụ whẹ: “Ọo ndu Juda l’e-vuru ụzo je.”

¹⁹Ndu Ízurẹlu bya agbalihu l’ụtsu iya je akwa okpu lẹ mkpụkpu Gibyiya. ²⁰Ndu Ízurẹlu wụfu jeshia otso ndu Bénjaminu ọgu. Whẹ je akwaa kẹkereke ngabẹru ndu Bénjaminu l’atatiwhu Gibyiya. ²¹Ndu Bénjaminu shi lẹ Gibyiya wụfuta bya egbutsua ndu Ízurẹlu ụkporo ụnu unwoke ugbo labọ l’ụnu iri l’ise mbọku ono. ²²Obenu lẹ ndu Ízurẹlu bẹ obu shihulerua ike; whẹ bya akwaa kẹkereke ọdo l’ẹka ono whẹ shi kwahawa iya lẹ mbọku nke mbụ whọ. ²³Ndu Ízurẹlu tụgbua je aryaa ẹkwa l’iwhu Onye-Nwe-Ọha jeye l’urwẹnyashi. Whẹ jekfu Onye-Nwe-Ọha njịta sụ iya: “?Ọo t’anyi jebaa je alwụshi ụnwunna anyi, bụ ndu Bénjaminu ọgu ọdo?”

Onye-Nwe-Ọha sụ whẹ: “Unu je alwụshi whẹ ọgu.”

²⁴Ọo ya bụ, o be mbọku nke ẹbo iya, ndu Ízurẹlu tụgbukwa jekfu ndu Bénjaminu ọgu. ²⁵Ndu Bénjaminu shi lẹ mkpụkpu Gibyiya wụfuta lẹ mbọku nke ẹbo ono tẹ whẹ lẹ ndu Ízurẹlu wọgba. Ndu Bénjaminu gbutsua ndu Ízurẹlu ụkporo ụnu unwoke ugbo labọ l’ụnu ise, bụkota ndu l’egudeje ogu-ịgba. ²⁶Tọ dụ iya bụ, ndu Ízurẹlu gẹ whẹ ha, mbụ igwe-ọha ono wụfu jeshia Bẹtelu je aryaa ẹkwa. Whẹ nọdu l’iwhu Onye-Nwe-Ọha l’ẹka ono, swịa ẹgu mbọku ono jeye l’urwẹnyashi. Whẹ gbaa ẹja ọkpokota-iwhe-ọku mẹe ẹja ẹhu-guu nụ Onye-Nwe-Ọha. ²⁷Ndu Ízurẹlu jekfu Onye-Nwe-Ọha njịta. Nkele ọ ẹka ono bẹ igbe-ọgbandzu Chileke dụ nteke ono. ²⁸Ọ bụru Fínihasu nwa Eliyéza, mbụ nwanwa Érọnu bẹ l’eje ozhi, dụ iya nụ nteke ono. Whẹ jịa Onye-Nwe-Ọha sụ: “?Ọo t’anyi jebaa je alwụshi ụnwunna anyi, bụ ndu Bénjaminu ọgu ọdo, tọo t’anyi be ejehe?”

Onye-Nwe-Ọha sụ whẹ: “Unu jeshia nkele echile bẹ mu l’e-woru whẹ ye unu l’ẹka.”

Ndu Ízurẹlu lwụ-gburu ndu Bénjaminu

²⁹Ọo ya bụ, ndu Ízurẹlu bya eye ndu madzụ, whẹ je edomishia onwowhe lẹ mkpụkpu Gibyiya mgburumgburu. ³⁰Ndu Ízurẹlu wụfu jekfushia ndu Bénjaminu ọgu lẹ mbọku nke ẹto. Whẹ doo onwowhe giriri gẹ whẹ l’a-dụ tso ndu Gibyiya ọgu gẹ whẹ mehawaru nteke ọwhua. ³¹Ndu Bénjaminu wụfuta tẹ whẹ lẹ ndu Ízurẹlu wọgba. Whẹ wụfuta lẹ mkpụkpu whẹ. Whẹ wata ochitsushi ndu Ízurẹlu, egbu whẹ gẹ whẹ l’egbujehawa whẹ l’oji ono, e shi eje Bẹtelu mẹe l’oji ono, e shi eje Gibyiya, gbukwawho m’ọo ndu nọ l’ẹgu, bụ ndu Ízurẹlu, rwuru ụkporo madzụ l’ụmadzu iri. ³²Ndu Bénjaminu kfulahaa sụ: “Anyi mewaru whẹ emerekete g’anyi mehawaru whẹ iya lẹ mbụ.”

Ndu Ízurẹlu sụ: “T’anyi ye ọkpa l’ọso gude lọfuta whẹ lẹ mkpụkpu ono fụta l’oji.” ³³O noo ya, unwoke Ízurẹlu gẹ whẹ ha shi l’ẹka whẹ nọ wulihu je akwaa kẹkereke lẹ mkpụkpu Bálu Tama. Unwoke Ízurẹlu ono, domiru onwowhe edomi shi l’ẹka whẹ nọ l’ụzo ẹnyanwu-arịba mkpụkpu Gibyiya wụfuta. ³⁴Ndu Ízurẹlu dụ ụkporo ụnu unwoke l’ụnu ise bụru ndu a họtaru ahọta, whẹ bakfu ndu Gibyiya ọgu. Ọgu ono shihu ọkpobe ike. Ndu Bénjaminu ta marọ l’ọla-l’iyi bẹ nọwa whẹ ndẹende. ³⁵Onye-Nwe-Ọha lwụ-gbua ndu Bénjaminu l’iwhu ndu Ízurẹlu. Mbọku ono bẹ ndu Ízurẹlu gburu ndu Bénjaminu ụkporo ụnu unwoke ugbo ẹto l’ụnu labọ l’ụkporo unwoke ugbo iri l’ise, bụkota ndu l’egudeje ogu-ịgba. ³⁶Ọo ya bụ, ndu Bénjaminu whụa l’a lwụ-gbuwaru whẹ.

Ndu Ízurẹlu bya akpọlaa azụ l’ẹka ndu Bénjaminu nọ nkele whẹ kpọru obu yeru ndu ono, whẹ yeru tẹ whẹ domia onwowhe lẹ mgboro Gibyiya ono. ³⁷Ndu ono, domiru onwowhe ono zhia whaa bya ezhikfuru ndu Gibyiya, tụko ndu mkpụkpu ono l’owhu gbushikota l’ogu-ịgba. ³⁸Iwhe ndu Ízurẹlu whẹ lẹ ndu ono, domiru onwowhe edomi ono chịhawaru t’ọ bụru iwhe l’a-gbarụ whẹ ama bụ lẹ ndu ono, domiru onwowhe edomi ono l’e-me t’oke ẹnwuru-ọku kpụshia lẹ mkpụkpu ono, ³⁹nteke ono bẹ ndu Ízurẹlu l’a-dakọbe lwụshi ndu Bénjaminu ọgu.

Nteke ono bẹ ndu Bénjaminu watarụ ogbu ndu Ízurẹlu, gbuwa whẹ ụkporo madzụ l’ụmadzu iri, whẹ kfulahaa sụ: “Anyi l’egbushiakwa whẹ g’anyi gburu whẹ lẹ nke mbụ.” ⁴⁰Ọle ẹnwuru-ọku ono, l’agba ama ono bẹ kpụru orogbodo wata akpụshi lẹ mkpụkpu ono. Ndu Bénjaminu ghaa ẹnya l’ụzo azụ whẹ whụa g’ẹnwuru-ọku l’akpụ tụtutu lẹ mkpụkpu ono ala l’igwe. ⁴¹Nteke ono ndu Ízurẹlu dakọbe tsota iya ndu Bénjaminu, ọwhube ndu Bénjaminu nmalahaa byiibyii, nkele whẹ marụ l’ọla-l’iyi nọwa whẹ ndẹende. ⁴²Whẹ ye ọkpa l’ọso gẹ whẹ whụru ndu Ízurẹlu, gbagbụru ụzo echi-ẹgu. Ọgu ono l’etso whẹ l’ike l’ike. Ndu Ízurẹlu, shigee l’ime mkpụkpu ono wụfuta wata whẹ egbushi l’ụzo azụ. ⁴³Whẹ yebuta ndu Bénjaminu mgburumgburu chịa whẹ ọso, dzọo whẹ pyaapyaa l’ẹka whẹ l’edzuta ike l’ụzo ẹnyanwu-awata mkpụkpu Gibyiya. ⁴⁴Ndu Bénjaminu, e gburu egbu bẹ dụ ụkporo ụnu unwoke ugbo labọ l’ụnu ise, ndu bụkota mkparawa l’ẹhu l’ẹhu. ⁴⁵Nteke whẹ dakọberu agba ala l’echi-ẹgu l’ẹka eze-ẹwhuru, bụ Rimọnu dụ bẹ ndu Ízurẹlu nọdu l’echi-ụzo gbutsua ụnu unwoke iri l’ẹbo l’ụkporo unwoke iri. Whẹ chịpyabe ndu Bénjaminu ono l’ike l’ike jeye lẹ mkpụkpu Gidọmu, gbua whẹ ụnu unwoke ugbo ise. ⁴⁶Ndu Bénjaminu, e gburu egbu mbọku ono bẹ dụkota ụkporo ụnu unwoke ugbo ẹto l’ụnu labọ l’ụkporo unwoke ugbo iri, bụ ndu l’egudeje ogu-ịgba bụru mkparawa.

⁴⁷Ọle ụnu unwoke l’ụkporo iri lẹ ndu Bénjaminu ono bẹ tsuwhuru azụ nahụ gbarụ laa l’echi-ẹgu ono l’ẹka eze-ẹwhuru, bụ Rimọnu dụ, je anọo l’ẹka ono ọnwa ẹno. ⁴⁸Ndu Ízurẹlu dawhu azụ jekfu ndu Bénjaminu je egbushia whẹ l’ogu-ịgba. Whẹ gburu madzụ, gbua élwù, mbụ je akpaa l’iwhe ẹka whẹ gbakfuru l’obodo ono. Whẹ tọkota ọku lẹ mkpụkpu, whẹ jekfuru.

Ndu Ízurẹlu tsọru áwhụ ndu Bénjaminu

¹Ndu Ízurẹlu bẹ nọhawa lẹ Mizupa ribua nte sụ: “Ọ tọ dụdu onye l’ime anyi l’e-kee onye Bénjaminu nwa iya nwanyị.” ²O noo ya, ndu Ízurẹlu bya atụgburu jeshia Bẹtelu, je anọdu l’iwhu Chileke l’ẹka ono jeye l’urwẹnyashi, ryaa ẹkwa ryashịa ya ike. ³Whẹ sụ: “Oowa gụbe Onye-Nwe-Ọha, ọo ghu bụ Chileke nke ndu Ízurẹlu. ?Ọo gụnu meru ẹgube iwhe ọwa nwụa lẹ Ízurẹlu. Ntaa bẹ ikfu anyi nnanụ l’a-bụru ndu l’aachọ achọ lẹ Ízurẹlu?”

⁴O be echile iya, ndu Ízurẹlu nmaa ẹwa gbalihu tụa ẹnya-mgbẹja l’ẹka ono. Whẹ gbaa ẹja ọkpokota-iwhe-ọku mẹe ẹja ẹhu-guu l’eli iya. ⁵Ndu Ízurẹlu sụ: “?O nweru ikfu ndu Ízurẹlu, l’ẹte abyaa ndzuko-o l’iwhu Onye-Nwe-Ọha? Nkele whẹ ribuhawaru iya lẹ nte lẹ ndu l’ẹte abyaa l’iwhu Onye-Nwe-Ọha lẹ Mizupa bẹ l’ee-gbu egbu.” ⁶O noo ya, ẹhu laa ndu Ízurẹlu ashị l’okfu ẹhu ụnwunna whẹ, bụ ndu Bénjaminu. Whẹ kfulahaa sụ: “Ikfu lanụ l’ime ndu Ízurẹlu bẹ whuduakwaru nwanshị t’o chihu. ⁷Sụ: ?Ndẹe g’anyi l’e-me lụshiaru ndu whuduru nụ nwanyị, g’anyi gbee gudewa ẹwha Onye-Nwe-Ọha ribua nte l’anyi te ekedu ndu Bénjaminu nwada anyi.”

Eeke ndu Bénjaminu ụnwada mkpụkpu Jabẹshi l’alị Giledu

⁸Whẹ byakwa ajịa sụ: “?Ọo ndu ole l’ikfu Ízurẹlu ta abyadụ l’iwhu Onye-Nwe-Ọha lẹ Mizupa?”

Whẹ bya achọfuta l’ọ tọ dụdu onye shi lẹ mkpụkpu Jabẹshi-giledu bya ọdu-ndzuko ono m’ọo onye lanụ. ⁹O noo nkele nteke agbadzuru ndu byarụ nụ b’a whụru l’ọ tọ dụdu onye shi mkpụkpu Jabẹshi-giledu nọ l’ẹka ono m’ọo onye lanụ.

¹⁰Ọo ya bụ, edzudzu-ọha ono bya ezhia ụkporo ụnu unwoke l’ụnu ugbo iri, bụ ndu kagezhia ọbu mkparawa sụ whẹ tẹ whẹ je egbukota ndu bu lẹ mkpụkpu Jabẹshi-giledu ono lẹ mma, je akpaa l’ụnwanyi mẹe ụnwegirima. ¹¹Bya asụ whẹ: “Ọ waa iwhe unu l’e-me ndọwa: Unu tụko iwhe bụ nwoke mẹe nwanyị, yẹle nwoke zẹbuwaa gbugbushikota kpamụ kpamụ, shi nno woru whẹ nụ Chileke.” ¹²Ụnwumgboko, whẹ lẹ nwoke l’ẹteke azẹbua, whẹ whụru lẹ mkpụkpu Jabẹshi-giledu bẹ dụ ụnu ụnwumgboko. Whẹ duta whẹ je l’ọdu, dụ lẹ mkpụkpu Shilo l’alị Kenanu.

¹³Tọ dụ iya bụ, edzudzu-ọha ono l’owhu bya ezhia ozhi t’e zhia ndu Bénjaminu l’eze ẹwhuru ono, bụ Rimọnu sụ tẹ nchị dụkwa whẹ ndoo. ¹⁴Ndu Bénjaminu lwatashia nteke ono, ndu Ízurẹlu bya eduta ụnwanyi ndu Jabẹshi-giledu ono, whẹ doberu ndzụ kee ndu Bénjaminu tẹ whẹ bụru nyee whẹ. Ọle whẹ te edzugbakotadu whẹ l’ẹhu l’ẹhu. ¹⁵O noo ya, imiko ndu Bénjaminu dụ ndu Ízurẹlu nkele Onye-Nwe-Ọha mewaru ikfu Ízurẹlu o kewaa ẹbo.

Ụnwanyi ọdo, a lụru ndu Bénjaminu

¹⁶Tọ dụ iya bụ, ndu bụ ọgurenya edzudzu-ọha ono sụ: “?Ndẹe g’anyi l’e-me lụshiaru ndu Bénjaminu ọwhu whuduru nụ nwanyị, g’e gbugewaru ụnwanyi ndu Bénjaminu?” ¹⁷Whẹ sụ: “E nwefutajekwa ndu l’a-hata oke-iwhe ndu Bénjaminu ono, whuduru nụ nke ọwhu l’ọoto dụ ikfu l’e-chihu echihu lẹ Ízurẹlu. ¹⁸Ọle anyi te ekekwanu whẹ ụnwada anyi.” Iwhe kparụ iya nụ bụ lẹ ndu Ízurẹlu bẹ riburu iya lẹ nte l’onye keru onye Bénjaminu nwanyị bụkwa onye atụru ọnu.

¹⁹Whẹ sụ: “E nwenuru-a oge, l’eerijeru Onye-Nwe-Ọha awha g’awha ha lẹ mkpụkpu Shilo ono, dụ l’ụzo isheli Bẹtelu, mbụ l’ụzo ẹnyanwu-awata echi-ụzo ono, shi Bẹtelu lụfu Shékemu mẹe ọhuda mkpụkpu Lebona.” ²⁰Whẹ sụ ndu Bénjaminu: “Unu je edomishia onwunu lẹ mgbabu vayịnu. ²¹Unu eleta ẹnya. Nteke ụnwumgboko Shilo ono wụfutaru bya ote egvu, unu eshi lẹ mgbabu vayịnu ono pyoshia, onyenọnu egude onye l’ọo-lụ l’ụnwumgboko Shilo ono lashia alị ndu Bénjaminu. ²²Nteke nna whẹ m’ọbu unwune whẹ byarụ lẹ whẹ l’abya anyi ochi ichi, anyi asụ whẹ tẹ whẹ meeru anyi iwhe-ọma parụ ụnwumgboko ono haarụ anyi, l’anyi ta adụdu ike lụshia nwanyị t’o dzugbaru nwoke nọnu nteke anyi lwụru ọgu; tẹmenu iswi dụkwa unu mma nkele ọ tọ dụ unu gude ẹka unu kee ya anyi.”

²³Ndu Bénjaminu mee ya ẹgube ono. Whẹ hatakọta ụnwumgboko ono, l’ete egvu ono l’ẹhu l’ẹhu gbalaa je alụlahaa. E megee whẹ lashia alị whẹ bya atụkwa-zhia mkpụkpu gẹ mkpụkpu ha, dụ iya nụ buru. ²⁴Ndu Ízurẹlu wụkashihu l’ẹka ono nteke onowho. Onyenọnu lakfu ikfu nkiya yẹle ẹnya-uwhu whẹ. Whẹ shi l’ẹka ono tụgbua, ọ bụru whẹ ọla alị whẹ l’ẹhu l’ẹhu.

²⁵Nteke ono bẹ l’ẹte enwedua eze lẹ Ízurẹlu. Onyenọnu l’anọje eme gẹ dụ iya ree.