Jémusu

Ẹkwo-Ozhi,

JÉMUSU

Deru

¹Ẹkwo-ozhi-a bẹ shi l’ẹka mbẹdua, bụ Jémusu bụ onye ozhi Chileke, bụru onye ozhi Onye-Nwe-Ọha bụ Jisọsu Kuráyisutu. Ndu mu l’ede iya anụ bụ ikfu iri l’ẹbo ono, bụ ndu nke Kuráyisutu, dzuru mgboko. Ekele mu unu-o.

Ekwekwe yẹle mmamagụ

²Ụnwunna mu, nteke iwhe adata byakfutaru unu; g’ọ dụlee, unu wojeru iya l’ọo iwhe ẹswa byarụ unu. ³Unu makwarụ-a l’ọo nteke l’aadata unu nke ekwekwe, unu kweru bẹ unu l’e-shi nwụta ọtaru iwhe nshi. ⁴Unu talẹkwawho nshi tafụ iya l’ishi nggẹ unu dụkota ree, dzukwaawho oke; t’ọ bọ dụ iwhe l’a-whọdu l’ẹhu unu. ⁵Nteke o nweru g’unu ha onye mmamagụ iya whoduru, t’onye ono sụ Chileke t’ọ nụ iya mmamagụ. Ọo-nụ iya onye ono, eshi-ọwhu Chileke bụ o-me-l’uko, tẹmenu l’oogudeje obu iwhoro nụ onyenọnu iwhe onye ọbu sụru t’ọ nụ iya. ⁶Ọle t’onye ono kwetakwa l’iwhe ono, ya sụru tẹ Chileke nụ iya, bẹ l’ọo-nụ iya. T’onye ono ba abọkwa obu ẹbo; l’onye l’abọ obu ẹbo dụ g’ọo akpara mini eze-ẹnyimu, bụ whẹrewhere l’anọje enwunga iya. O nwungaru iya shia ọwhu, ya enwungaru iya shia ọwhu. ⁷T’ẹgube onye ono ba arịkwa l’ọ dụ iwhe ya l’a-nata l’ẹka Onye-Nwe-Ọha, ⁸o noo l’onye ọriri iya gbarụ ẹbo, ta akfụshijedu ike l’iwhe bụ-zhia iwhe l’oome eme.

Ụkpa yẹle onwe iwhe

⁹Tẹ nwanna, darụ ụkpa tuje onwiya nwoke; lẹ ya bụwaa onye Chileke kuliru. ¹⁰T’onye ọwhu nweru iwhe tukwaawho onwiya nwoke mẹe Chileke kuze iya. Onye ono l’a-jịshihu g’ọo nzịrizaa ẹswa, ¹¹o noo l’ọobuje ẹnyanwu wata, o -chishidelewho ike, ẹswa anwụa lwaa, nzịrizaa ya ajịshihu, mma nkiya agvụ. O noo g’onye nweru iwhe l’a-gbabuhukwawho nwụhu l’iwhe l’oome.

Adata yẹle onwu eye

¹²Ẹhu-ụtso bụ nke onye tarụ nshi mẹe iwhe adata byarụ iya; o noo lẹ nteke a datageeru iya ọbu, t’ọ da, bẹ l’aa-nụ iya ndzụ bụ iya bụ obunggo, Chileke sụru lẹ ya l’e-bu ndu yeru iya obu. ¹³Ọo ya bụ, t’onye l’aadata, ome ejo-iwhe gụlahaa ya, t’ọ bọ sụkwa l’ọo Chileke l’enwu iya eye tẹ ya mee ejo-iwhe ono. O noo l’ọ tọ dụkwa onye Chileke l’enwuje eye t’o mee ejo-iwhe, tọ dụkwanu onye l’enwu Chileke eye t’o mee ejo-iwhe. ¹⁴Ọo ome ejo-iwhe, l’agụ madzụ bẹ l’edotaje iya, ya adaba l’ejo-iwhe. ¹⁵Ọo ya bụ, nteke ẹgu ejo-iwhe tsụtaru ime, ya anwụa iwhe-dụ-ẹji, iwhe-dụ-ẹji kalẹwho kpurukutu, ya anwụa anwụhu.

¹⁶Ụnwunna mu, mu yeru obu, unu be eshiswekwa ụzo. ¹⁷Iwhe lile, l’aanụje anụ, dụ ree mẹe iwhe-ọma, l’ẹte adụa ẹka ntụpo dụ iya bẹ shikotagezhia l’imigwe. O shikota l’ẹka Nna, mekotaru iwhoro, dụ l’imigwe bụ iya bụ Nna ọwhu l’ete echinyajee echi, ya anyịhu g’ọo ẹnyanwu nke ọwhu l’aa-sụ l’ọ nyịhuakwaru woo ọchi gbalahaa. ¹⁸Ọ tụru obu iya ama, gude okfu ono, bụ ọkpobe-okfu nwụa anyi, t’anyi nochia ishi l’iwhe lile, o keru eke.

Ọnu iwhe lẹ nchị yẹle ememe iya

¹⁹Ụnwunna mu, mu yeru obu; lee iwhe unu l’a-malẹwho ndọwa: t’onyenọnu bụru onye l’angabẹje nchị l’iwhe l’eekfu, tẹmenu ya eyede iya ọnu, ya abụru onye ẹhu l’ete eghuje eghu ẹgwegwa. ²⁰O noo l’iwhe e gude ẹhu-eghughu eme ta abụkwa iwhe dụ chịriri l’iwhu Chileke. ²¹Ọo ya bụ, t’unu shi ishi lanụ tụfu onwunu iwhe bụ-zhia umere, l’eshi nshi mẹe iwhe bụkota ejo ọrwu, unu vu, unu ejia obu oyi nata okfu ono, a kụwaru l’ime obu unu, g’ọo onye kụru akpụru iwhe. Ọ kwa okfu ono l’a-dụ ike dzọfuta unu.

²²Ọle-a; t’unu bụkwaru ndu l’eme okfu Chileke ono eme, unu ba abụkwa ndu bụlewho anụnu bẹ whẹ l’anụje iya kpụ, l’o noo bụkwa ome onwunu eswe. ²³L’onye l’anụlewho okfu Chileke anụnu kpụ, to mehe iya eme bẹ dụa g’ọo nwoke, l’ele g’iwhu iya dụ dụ l’onyo, mbụ iwhu shi iya l’ẹwho ne iya. ²⁴Onye ono letagelewho onwiya l’onyo ono, o bebelee alụfu ọ nyazọlekwawho lẹge iwhu iya dụ dụ.

²⁵Obenu l’onye l’enyochaje iwu ono, l’ẹte adụa ẹka ntụpo dụ iya, mbụ iwu ono, l’atọje madzụ l’uli; onye ono whuberu iya iwhu, onye ono ta abụ onye l’abụje, ọ -nụ-gee ya, ya anyazọshia ya, ọ bụru onye l’eme iya eme; Chileke l’e-kwobe nke iwhe ono onye ono l’eme, gọru ọnu-ọma nụ iya.

²⁶Onye l’arị lẹ ya bụ onye nke Chileke, onye ono te esedeje ire iya, onye ono l’emekwa onwiya eswe. Ememe ọwhu onye ọbu l’eme nke Chileke kwa iya whọ nke mmaanụ. ²⁷Lẹ madzụ bụ onye nke Chileke, bụkwanu iya bụ ọwhu Chileke, bụ Nna anyi kweru l’ọo ọkpobe iya, bụkwaruwho ọwhu l’ete emerwushia emerwushi, bụ anọ akwọ ụnwu nwogbee lẹ mkpa mẹe anọ eyeru ụnwu-mbunu ẹka l’iwhe l’atsụ whẹ l’anụ mẹe osefu ẹka lẹ mkparwụ nke mgboko-o.

Ọnma ọkwa nke ọbo madzụ ẹbo

¹Ụnwunna mu, unubẹ ndu ọwhu kweru nke Onye-nwe-anyi Jisọsu Kuráyisutu, mbụ Onye-Nwe-Ọha nwe ọdu-biribiri, t’unu ba abọjekwa madzụ ẹbo. ²Sụa, ọ -bụru l’onye nweru iwhe gba echi mkpọla-ododo; kwakwaawhọ onwiya ngwa l’ama ụma batarụ ụlo-ndzuko unu, onye ụkpa yee nwankịriba iwhe batakwawhọ, ³nteke unu kwabẹru onye who kwarụ ngwa whọ ugvu sụ iya: “Byiko bya asụgabe onwoghu lẹ nggada l’ẹka-a tụsaa ẹhu,” unu sụ onye ụkpa whọ: “Kfụru l’ẹka ono,” ọdua unu sụ iya: “Bya anọdu l’alị lẹ mgboro ọkpa mu l’ẹka-a.” ⁴?Tọ dụ iya ọbu bụ l’ikpe nmarụ unu nkele unu l’abọ madzụ ẹbo l’ime onwunu, tẹmenu unu gudekwawho ejo obu ekpe ikpe? ⁵Unu ngabẹduwho nchị, ụnwunna mu, mu yeru obu, ?tọ dụ ndu bụ ndu ụkpa lẹ mgboko-o bẹ Chileke họtaru tẹ whẹ shi l’ekwekwe, whẹ kweru bụru ndu nweru iwhe l’iwhu yẹbe Chileke mẹkwawho tẹ whẹ bụru ndu l’e-nwe urwu, dụ lẹ abụbu yẹbe Chileke bụ eze whẹ bụ iya bụ iwhe o kweru ndu yeru iya obu l’ụkwa. ⁶?Unu gbechia meru iwhere nụ onye ụkpa ono? ?Tọ dụ ndu nweru iwhe l’anọje akpapyashị unu ishi-a? ?T’ọo tọ dụ whẹ l’akpụtaje unu jeshia kọtu-a? ⁷?Tọ dụ whẹ l’anọje ekfubyishi ẹguru ẹwha ono, a gụberu unu ekfubyishi-a?

⁸Ọ -bụru l’unu l’emezhiwaa iwu ono, shi l’ẹka Chileke, bụ eze bẹ unu l’emekwaa ree, mbụ iwu ono, e deru l’ẹkwo Okfu Chileke sụ: “T’i ye madzụ ibe ghu obu g’i yeru iya onwoghu.” ⁹Ọle-a, unu l’abọ-zhiwaa madzụ ẹbo bẹ unu l’emekwa iwhe-dụ-ẹji, tẹmenu iwu ono l’anmakwawhọ unu ikpe l’unu bụ ndu l’eme ẹji. ¹⁰O noo l’onye l’emekota iwhe iwu kfuru g’ọ ha, onye ọbu mewhodo iya m’ọo nnanụ bẹ ikpe nmakwaru l’o mebyikotaru iwu g’ọ ha. ¹¹O noo l’ọ kwawhọ onye ono, sụru t’i bi rishi ogori, bẹ sụru t’i bi gbushi ọchi. Ọ -bụru l’i tii ridu ogori l’iigbu ọchi; b’ị bụakwaa onye l’emebyi iwu. ¹²Ọo ya bụ, t’unu kfujee, unu emejee g’ọo ndu l’ee-gude iwu ono, l’atọje madzụ l’uli kpee ikpe. ¹³O noo l’onye l’ẹte awhụaru madzụ ibe iya imiko bẹ Chileke l’abyakwaa l’a-whụru imiko m’o -kpede ikpe. Ọle onye l’emeje obu-imiko bẹ l’ẹte atsụhedu ikpe Chileke egvu.

Iwhe bụ l’e kweru nke Chileke

¹⁴Ụnwunna mu, ?ndẹnu urwu ọ bẹru madzụ, sụru l’iya kweru nke Chileke, onye ono te egoshi iya l’umere? Ẹgube ekwekwe onona ?l’adụdunu ike dzọo ya-e? ¹⁵Nteke bụ l’o nweru nwanna ghu nke nwoke ọdua l’ọo nke nwanyị, l’agba ọto, t’ọ whụjekwawho nri ria, ¹⁶onye lanụ lẹge unu ha sụ iya: “Tọkwa ẹhu-o! Laa je anyata ọku, rijia ẹwho ghu,” l’ẹbe abụkwanu l’ị nụru iya iwhe bụ mkpa ẹhu iya, ?ndẹnu urwu, dụ l’ẹgube iwhe onona? ¹⁷O nokwa gẹ ekwekwe dụ ndono. Ekwekwe, e kweru nke Chileke t’e goshi iya l’umere bụkwa iwhe nwụhuru anwụhu l’onwiya.

¹⁸Ọle, ọ -dụ onye sụru mu: “L’onye-e kwekwaru nke Chileke, onye ọwhu l’egoshi iwhe l’oome.” Mu asụ iya: “Goshiada mu ekwekwe ọbu, i kweru nke Chileke, m’i -gudee iwhe l’iime goshi iya. Mbẹdua l’e-gudekwanu iwhe mu l’eme eme goshi ghu lẹ mu kweru nke Chileke.” ¹⁹Gụbedua l’onwoghu kweru lẹ Chileke bụ Chileke lanụ; i meru ree. O nokwawho gẹ ọgvu kwetachaaru; nmahụchaa jijiji. ²⁰Ọle iwhe l’ịi-malẹwho gụbe onye mmaanụ ono bụ l’ekwekwe, e kweru nke Chileke t’e meta iya l’umere dakwaru l’ẹba. ²¹?Ndẹnua g’onye-ichee anyi ono, bụ Ébirihamu gude bụru onye dụ chịriri l’iwhu Chileke? Ọ kwa iwhe o meru bẹ kparụ iya nụ nkele o gude nwa iya nwoke, bụ Áyiziku je tẹ ya je egbua ya, gude gbaa ẹja nụ Chileke l’ẹnya-mgbẹja Chileke. ²²?I whụwaru gẹ ekwekwe, o kweru nke Chileke yẹle iwhe o meru dagbalẹruwho. Ekwekwe, o kweru bẹ iwhe ono, o meru goshiru l’ekwekwe ono dzuru oke. ²³Iwhe e deru l’ẹkwo Okfu Chileke mekwaa lẹge e kfuru iya nkele ọ sụru: “Ébirihamu kweru nke Chileke, Chileke gụaru iyẹ ya l’ọdu chịriri, gụbe iya ọnya Chileke.” ²⁴Unu awhụwaa l’ọo iwhe madzụ l’eme b’e gude agụ iya l’onye dụ chịriri, ọ tọ lẹdua ekwekwe kpụ.

²⁵O nokwawho gẹ nke nwanyị ọkpara ono, bụ Réhabu dụ. Ọo iwhe o meru bẹ Chileke kwoberu gụa ya l’onye dụ chịriri nkele o dubataru ndu Ju, e zhiru ozhi; yeru whẹ ẹka, whẹ shia ụzo ọdo lashia.

²⁶Ọo g’ẹhu madzụ bụ iwhe nwụhuru anwụhu m’ọ tọ tụ ume bụkwawho gẹ ekwekwe, e kweru nke Chileke t’e goshi iya l’iwhe l’eme eme nwụhuru anwụhu.

Ire bụ ọgu

¹Ụnwunna mu, t’unu ba adụkwa l’igwe bụru o-zhi-iwhe; o noo l’unu marụ-a l’anyịbedua, bụ o-zhi-iwhe bẹ Chileke l’a-ka okpeshi ikpe ike. ²Anyi g’anyi ha l’eshisweje ụzo l’igweligwe. Ọ kwa onye okfu l’ẹteke elwubua l’ọnu bẹ bụ nwoke, dụ onwiya ree. O noo ẹgube onye l’a-dụkwawho ike sedekota onwiya.

³Ọle ọ -bụru l’anyi l’ewojeru mkpụrumkpu igwe gagbabẹ ịnya l’ọnu nke ọwhu l’oomeje iwhe anyi sụru t’o mee, bẹ anyi l’emeje ịnya ono l’owhu: ya eshia iwhe bụ ẹka anyi sụru t’o shia.⁴Unu leedaa ụgbo, whẹrewhere l’emeje ya agba. Unu whụwaru-a g’ọ habe shi tẹmenu ọ bụru oke whẹrewhere l’anọje anga iya, ọle ọ kwa nwagbaragbara eku-ụgbo bẹ l’eegudeje anga iya; ya eshia iwhe bụ ẹka onye ishi ụgbo l’anga iya eshi.

⁵O nokwawho gẹ ire bụ nwiwhe nshịi, dụ l’ẹhu anyi, ọle ọonoje ajakpọshi onwiya lẹ ya l’emenuka ire.

Lewaro gẹ owhoroto-ẹgu habe shii, ọle ọo icheku-ọku lanụ l’emeje owhoroto-ẹgu ono: ọku awata iya adzụdzu. ⁶Sụa, ire bụkwa icheku-ọku. Ire bẹ nochiru ẹnya iwhe bụkota ejo iwhe dụ lẹ mgboko-o l’ẹhu anyi. Ire l’ekfurwuje ogwẹhu madzụ l’owhu, l’ọolotajekwawho ọku-alị-maa tsebe lẹ ndzụ madzụ, ọku ono ekee ya kepyashikota, ya eshilewho nteke a nwụru onye ono, kee ya jeye nteke onye ono l’a-nọ-be.

⁷Ọ tọ dụdu ẹgube anụ-ẹworo, ọdua l’ọo ẹnu, ọdua l’ọo ụnwu anụ l’awụ l’ẹwho, ọdua l’ọo iwhe bụ lẹ mini, madzụ l’ẹteke agọo jeye ọ gọta iya o buru l’uwhu; ọ tọ dụkwa ọwhu l’ẹteke agọtaa o buru l’uwhu. ⁸Obenu l’ire ta adụdu madzụ-igbalekọma fụru nke agọta iya. Ire bụ ejo-iwhe l’ete egudee ẹka, ọ dụ g’ọo ézé ejo agwọ, l’egbuje onye ọ tarụ ogbuluwhọku.

⁹Ọo ya bẹ anyi l’egudeje aja Chileke ono, bụ Nna anyi, bụkwaru Onye-Nwe-Ọha, ọ bụkwaru iya whọ bẹ anyi l’egudeje atụ madzụ ibe anyi ọnu, mbụkwa-a onye-e, e meru: ọ dụ g’ọo Chileke. ¹⁰Ọ bụru l’ọnu lanụ ono bẹ ọgo ọnu yẹle ọtu ọnu shikota. Ụnwunna mu, ọ tọ gbadụ nke t’ọ dụ nno. ¹¹Ọ tọ dụkwa ẹka mini futajeru, ẹka ono l’anwụfuta mini l’atsọ ụtso, anwụkwawho mini ọwhu l’atsọ ilu. ¹²Ụnwunna mu! Ujiru ta amịtajekwa akpụru igbogo. Ube ta amịtaje ujiru. O nokwawho gẹ l’eete kutaje mini l’atsọ ụtso l’ẹnya-ụmaswi.

Mmamagụ, shi Chileke l’ẹka

¹³?O nweru onye l’arị lẹ ya marụ ágụ, ya nweru uche lẹge unu ha? T’onye-o gudekwa ome umere ọma goshi iya mẹe ome bẹlebele, shi lẹ mmamagụ. ¹⁴Nteke bụ l’ọo oke-ẹnya jiru unu obu, unu l’atsọ ilu g’ọo age, unu bụru ndu l’akpa ẹnya; ọo ya bụ, t’unu be ejekwa ọjakposhi onwunu nke mmamagụ, o noo l’ọo ejire bẹ unu gude emebyi ọkpobe-okfu ono. ¹⁵Ẹgube mmamagụ onona te eshikwa l’imigwe, ọo l’ẹka ndiwhe b’o shi. O to shikwa l’ẹka Ume Chileke. O shi l’ẹka Sétanu. ¹⁶O noo l’ẹka oke-ẹnya yẹle ọkpa ẹnya dụ bẹ mkpaka dụkwawho, tọ dụkwawho ẹgube ejo-iwhe l’ẹte adụa ya.

¹⁷Ọle mmamagụ ọwhu shi l’imigwe dụ iche. Onye nweru ẹgube mmamagụ ono bẹ dzuru oke. Onye ono l’a-nọwaro eme odoo, ya eme ọnu-ụtso, ya ekweje t’a chịa iwhe idzu. Iwhe o marụ bụ omeru ndu ọdo obu-imiko; l’ọonoje emeshi iwhe dụ ree. Ọ tọ bọjedu madzụ ẹbo; tọ bụ iwe-l’obu-ọchi-l’ọnu-eze. ¹⁸Iwhe ndu l’eme tẹ nchị dụ ndoo l’amịje g’ọo oshi-ọmi bẹ bụ ndzụ, dụ chịriri l’iwhu Chileke.

Oshita ndiwhe ọnya

¹?Ọo awee bẹ ọbawhe mba mba yẹle osewhe okfu okfu ono, dụ l’echilabọ unu shigee unu? ?Ẹka, o shi unu ta abụdu iwhe ẹkpiri iya l’alọshikaa unu? ?T’o dụ iya bụ iwhe ọbu, bụ ọgu, dụ l’ẹhu unu? ²Ọobuje iwhe -gụta unu: to rwu unu ẹka, unu ekwobe nke iwhe ono gbulahaa ọchi. Unu konyaaa okoowhoo, ọdua g’ọ dụ, unu eselahaa okfu; balahaa mba. Iwhe l’agụ unu te erwujedu unu ẹka, o noo nkele unu ta asụjedu Chileke t’ọ nụ iya unu. ³Unu l’asụ-gejee t’a nụ unu iwhe, e jee anụ iya unu nkele unu l’egudeje ọriri, l’ẹte adụa ree sụ t’a nụ unu iwhe ọbu, gẹ l’ee-shi t’unu gude iya mee nwọha-g’iya ọ-ha-g’iya.

⁴Unubẹ ndu ono, bụ ọgheleke g’ọo ụnwanyi, l’eri ogori! ?Unu ta amadụ l’onye yẹle iwhe-ụtso, dụ lẹ mgboko-o l’eshi ọnya bụwaa ọhogu Chileke? Ọo ya bụ, l’onye hatarụ l’ọo tẹ yẹle ndiwhe shije ọnya bẹ onye ono l’emekwa onwiya ọhogu Chileke, e behuduru onye ọbu bụru onye. ⁵?Tọ dụ unu g’iwhe ono, e deru l’ẹkwo Okfu Chileke bụ nke mmaanụ, sụru lẹ: “Chileke l’eko okoowhoo Ume ono, o yeru t’o buru l’ime anyi.” ⁶Ọle ndu ọwhu, e gude ire whẹ ẹka bẹ Chileke l’anụje iwhe-ọma, ka shii. O noo iwhe ọbu, e deru l’ẹkwo Okfu Chileke sụ:

“Chileke l’akwachije ndu nggangga ụzo.

Ndu ọwhu wozeru onwowhe alị bẹ l’oomejeru eze-iwhe-ọma.”

⁷Ọo ya bụ, t’unu nọdu Chileke l’ẹka. Unu kwe Oshifutuswe gagarịga, unu awhụ l’ọo-gbarụ unu ọso. ⁸Unu nọkube Chileke ntse, unu awhụ l’ọo-nọkubekwawho unu ntse. Unu kwọchaa ẹka unu t’o gbu ewheke unubẹ ndu l’eme iwhe-dụ-ẹji. Unu mekwaawho obu unu t’ọ dụ Chileke ree unubẹ ndu l’abọ obu ẹbo. ⁹T’o rwua unu l’ẹhu, t’awhụ ji unu obu, unu kwashịa ẹnya-mini. Tẹ nchịchochi bụru unu ọtso-awhụ; ẹhu-ụtso abụru unu iwhere. ¹⁰Unu wozetaje onwunu alị l’iwhu Onye-Nwe-Ọha nggẹ o kulia unu eli.

Ọnma ọkwa okfurwushi nwanna onye

¹¹Ụnwunna mu, t’unu be ekfudeshijekwa ibe unu ẹhu. Onye ono l’ekfudeshi nwanna iya ẹhu, ọdua l’ọo onye l’anma nwanna iya ikpe l’obu bẹ kwa iwu bẹ onye ono l’ekfubyishi, tẹmenu ọ kwarụwho iwu ono b’o gbee bya ekpede ikpe, ọle nteke l’iikpe iwu ono ikpe, ọo ya bụ l’i tii mehedu iwhe iwu kfuru. Ọ kwa onye ikpe b’ị bụ. ¹²Ọo onye lanụ kpụ bẹ bụ onye l’atụje iwu, ọ kwarụ iya whọ bụ onye-ikpe, mbụ onye ono, l’adụje ike dzọta, ya adụkwawho ike gbua. Ọle, ?ọo onye b’i doberu l’ị bụ gụbe onye ono, l’anma ibe ghu ikpe?

Ọnma ọkwa nke oku onwonye

¹³Unu ngabẹ nchị; unubẹ ndu l’asụje: “Ntanụ; ọbu echile bẹ anyi l’e-je mkpụkpu, dụ ẹgube whọ, je anọo awha owhu l’ẹka ono, gbaa nghọ, rita urwu.” ¹⁴Lẹ ba bụ l’unu marụ gẹ echile l’a-dụ. ?Ndzụ unu bụ gụnu? Unu dụ g’ọo ẹnwuru-ọku, l’ekpofutaje, a nọlewho nwanshị, ya ekosahu. ¹⁵O noo iwhe meru iwhe unu ge ekfujechia bụru: “Ọ -bụru l’ọo uche Chileke bẹ anyi l’a-tụkokwaa nọdu-gee ndzụ, mee ọwa, ọdua anyi emee ọwhu.” ¹⁶O be l’ọwa-a bẹ unu gbẹenu etse etsetse, eku onwunu iwhe igwe-charụ. T’ẹgube ekuku onona kpolahukwa lẹ ntụ. ¹⁷Ọo ya bụ l’onye marụ iwhe dụ ree, ọ g’eme, onye ono te emehe iya, ọ kwa iwhe-dụ-ẹji bẹ onye ono meru.

Ọkwa, l’aanmarụ ndu nweru iwhe

¹A bya abya ntaa lẹ nke unubẹ ndu nweru iwhe! Unu ngabẹ nchị! Unu kwashịa ẹnya-mini, unu echia mkpu ejo áwhụ, byakfutaru unu. ²Ẹku unu g’ọ ha reshihukotaakwaru ereshihu. Ngwa, unu l’eyeje l’ẹhu g’ọ ha bụkotaakwa iwhe ẹka-mkpu tapyashị-gewaru. ³Okpoga unu mẹe mkpọla-ododo unu bẹ gbawarụ ẹgba. Ọo ẹgba ono, ọ gbarụ l’a-kfụru agba unu ẹka-ebe. Oo-kepyashi anụ-ẹhu unu g’ọo ọku. Ntaa bẹ unu kparụ ẹku kụbe; swibe onwunu l’oge ikpazụ-a. ⁴Ndu jeru unu ozhi l’ẹgu bẹ unu gudewaa ụgho kpamia ụgwo, unu gẹge akfụ whẹ. Áwhụ, whẹ l’agụ bẹ rwuwaru Chileke lẹ nchị. Tẹmenu mkpu nke ndu ọwhu kparụ unu iwhe unu meberu l’alị rwuakwaa Chileke lẹ nchị bụ iya bụ Nnajị-Ọha l’owhu. ⁵Unu buwaa l’eli-mgboko-o tụsaa ẹhu, eri, angụ g’ẹhu ha unu; eme nwọha-g’iya ọ-ha-g’iya, unu gbatawaru ẹba g’ọo anụ-ẹ́bà; kwabẹru mbọku, l’ee-gbu unu. ⁶Unu nmawarụ madzụ ibe unu, dụ chịriri ikpe, gbua ya, to yeru unu ọnu.

Ọta nshi mẹe okfu anụ Chileke

⁷Ụnwunna mu, unu talẹkwawho nshi nọdu jeye nteke Onye-Nwe-Ọha l’a-bya. Unu whụwaru-a g’onye kọru okfu l’atajẹ nshi ngabẹru okfu iya t’o rwuta iwhe urwu dụ. Ọotajelekwawho nshi jeye igweli achịa mini mbụ, chịkota mini udzumini, ya atakwawhọ nshi ono jeye ụboku ewhekarahu. ⁸O nokwawho gẹ unubẹdua l’a-ta nshi, obu eshihu unu ike, o noo lẹ nteke Onye-Nwe-Ọha l’a-bya dụakwaa ntse.

⁹Ụnwunna mu, t’unu ba agụjekwaru ibe unu áwhụ nggẹ t’e kpe unu ikpe. Unu lekwawho l’onye-ikpe kfụakwaru l’ọnu mgbọ.

¹⁰Ụnwunna mu, unu nyatajẹ-zhiawho ndu nkfuchiru Chileke ono, shi egudeje ẹwha Onye-Nwe-Ọha ekfu okfu. Unu gude whẹ nwụta ọta-nshi mẹe iwhe-ọtsulanu byarụ unu. ¹¹Unu l’eleenaa l’ọo ndu tarụ nshi bẹ anyi l’ekuje ndu ẹhu-ụtso bụ nke whẹ. Unu nụwaru-a nke ọta-nshi nke Jobu. Unu whụkwaawho iwhe Onye-Nwe-Ọha nụru iya l’ikpazụ nkele Onye-Nwe-Ọha bụnuka onye obu-imiko, bụkwaruwho onye ọgbata.

¹²Ọle ọwhu kakọta-gezhia nu ụnwunna mu, bụru t’unu ba agụjekwa ẹnwa. Tọ bọ dụkwa iwhe unu l’e-gude gụa ẹnwa, unu be egudekwa igweli ọdua l’ọo alị. Unu sụjewaa “ee” t’ọ bụlekwaruwho: ee; nteke bụ l’ọo “waawa” bẹ unu kfuru t’ọ bụlekwaruwho: waawa, nggẹ Chileke ta anma unu ikpe.

¹³?O nweru g’unu ha onye ọwhu l’eje iwhe-ọtsulanu? T’onye ono kfuru nụ Chileke. ?O nweru onye ọwhu ẹhu l’atsọ ụtso? T’onye ọbu gụa egvu gude jaa Chileke ajaja. ¹⁴?O nweru g’unu ha onye ọwhu ẹhu l’adụa mma? T’onye ono kukoo ndu e meru ọgurenya chọchi tẹ whẹ kfuru nụ Chileke l’iswi ẹhu iya l’iwhu iya. Tẹ whẹ gudekwawho ẹwha Onye-Nwe-Ọha nyịa ya mmanụ l’ishi. ¹⁵Okfu e kfuru nụ Chileke kweta l’oo-me iya, bẹ l’a-dzọta onye ẹhu l’adụa mma. Onye-Nwe-Ọha emee onye ono: ya agbakerehu. Nteke bụ l’ọo iwhe-dụ-ẹji bẹ onye ọbu meru, a gụaru iyẹ ya nvụ.

¹⁶Ọo ya bụ, t’unu kfushijeru ibe unu iwhe-dụ-ẹji, unu metagbaberu, unu ekfujekwaruwho nụ Chileke l’iswi ẹhu ibe unu nggẹ e mee t’ẹhu dụ unu mma. Okfu onye dụ chịriri kfuru nụ Chileke bẹ ike dụtakwaru shii nke ọwhu l’oo-regejee, tachaa alị. ¹⁷Eláyija bẹ bụkwaa madzụ mmaanụ g’anyi bụ. O kfuru nụ Chileke kfushia ya ike sụ t’igweli buchia mini. A nọo awha ẹto l’ọnwa ishii, mini ta atadajẹru l’alị. ¹⁸Ọ bya ekfukwaru nụ Chileke ọdo, igweli bya mini. Iwhe e meberu l’alị yelahakwaa mebyi ọdo.

¹⁹Ụnwunna mu; o -nweru g’unu ha onye ọwhu shisweru ụzo l’ọkpobe-okfu ono, ọ -dụ onye ọdo, bya edulatawhu iya azụ l’ụzo, kfụru nhamụnha, ²⁰t’onye ono marụ l’onye dulatawhuru onye l’eme iwhe-dụ-ẹji azụ, mbụ onye l’eshi ụzo, gberu nko; onye ono bẹ l’a-dzọta obu iya l’ẹka ọnwu, tẹmenu o mekwaawho: a gụaru iya nvụ l’igweligwe iwhe-dụ-ẹji.