Ayizáya

Ẹkwo

AYIZÁYA

Onye Nkfuchiru Chileke

¹Ọ waa bụ ọwhulenya, Ayizáya nwa Émọzu whụru l’okfu ẹhu ndu Juda mẹe l’ẹhu ndu Jerúsalẹmu. Nteke ọ whụru iya bụ nteke Uzáya, Jótamu, Éhazu mẹe Hezekáya bụ eze, chịru ndu Juda.

Chileke l’abarụ ndibe iya mba

²Tẹ gụbe igwe nụa ya, gụbe alị angabẹ nchị l’iwhe Onye-Nwe-Ọha l’ekfu. Ọ sụru agha: “Mu hewaru unu gẹ l’eeheje ụnwegirima hefuta, unu watarụ mu okwefuru ike. ³Eswi l’amajẹkwa onye-nwe-iya nụ. Nkakfụ-ịgara l’amajẹ iwhe onye-nwe-iya nụ l’eyejeru iya nri. Ọle ndu Ízurẹlu bụ ọmata. Ndibe mu bẹ iwhe l’ete edojedu ẹnya.”

⁴Áwhụ tsọokwaru unubẹ mba ono, iwhe-dụ-ẹji tsụru ẹkpa l’ẹhu! Ndu ejo-ememe l’anyị-gbu anyị-gbu! Eri ndu l’eme ejo-iwhe! Mbụ unubẹ ndu ono l’arụ alị akpa ntụ l’ẹnya! Whẹ pawarụ Onye-Nwe-Ọha haa. Whẹ ta agụbedu Onye nsọ nke Ízurẹlu iwhe, tẹmenu whẹ gbẹwaru iya azụ. ⁵?Ọo awe ọdo bẹ mu l’e-chibaa unu iwhe g’unu l’ete kwee ha okwefu ike? Ishi bụkotawaa unu ọnya ọnya, meji l’ebuhuwa unu ebuhu. ⁶Wata l’ọbochi-ọkpa unu jeye l’ishi unu ta adụdu ẹka ẹhu dụkwadu unu mma. Iwhe jiru iya bụ igbiri-ẹchachi mẹe ọnya ọnya mẹe ọnya, l’ebukaa unu mmee gụdu gụdu. T’a sa iya unu asasa, t’e kechi iya unu iwhe, t’e mebe iya unu ọgvu.

⁷Ẹgbara kfụwaru l’alị unu. Mkpụkpu unu bụru ẹka ọku dzụru. Okfu, unu kọru bẹ ndu mbyambya nọdu l’iwhu unu lwụchafu. Ọ daburu karawhongu g’ọo ẹka ndu ọha ọdo vụru l’akpaa. ⁸Nwada Záyọnu b’a harụ ọ nọdu nkụnyi g’ọo mkpuumkpu, a tụru lẹ mgbabu vayịnu, mbụ g’ọo nwụlo-ẹgu, a tụru l’ẹgu ẹka a kụru ụgboma-mini mẹe mkpụkpu, ndu ọhogu yebutaru eyebuta. ⁹Ọ tọ bụ lẹ Onye-Nwe-Ọha, bụ Onye-ishi-igwe-ọgu te ekwedu tẹ ndu nke anyi tọhu-gee mẹ anyi agvụakwa g’ọo ndu Sódomu, mbụ l’ọ gẹge adụ anyi g’ọ dụ ndu Gọmóra.

¹⁰Unu nụkwaa okfu Onye-Nwe-Ọha l’ekfu, unubẹ ndu l’achị Sódomu! Unu ngabẹ nchị l’iwu, Chileke anyi l’ezhi, unubẹ ndu Gọmóra! ¹¹Onye-Nwe-Ọha l’ekfu sụ: “?Ọo gụnu bẹ ikpoto ngwo-ẹja ono, unu l’agba bụru mu. Ebyila ono, unu l’akpọje ọku gbaarụ mu ẹja yẹle ẹba anụ ono, unu l’akpọjeru mu ọku bẹ lawarụ mu ashị. Mmee eswi yẹle nke nwatụru mẹe nke eghu bẹ ike iya gvụwaru mu. ¹²Abyabya, unu l’abyajẹ l’iwhu mu; ?oo onye l’asụje t’unu gude iwhe ono bya? ?Ọo onye l’ezhije unu t’unu byarụ mu ọnmatoshiru ọma ogboduwhu? ¹³Unu ba abyajẹhekwa mu ọnu iwhe ono, l’adụa iwhe ọ bụ ọdo! Ụ̀nwù-isẹnsu ono, unu l’anọje akpọ ọku bụakwa mu akpamara. Ori-oge ọnwa ọ̀whúú mẹe ori-oge mbọku-ọtuta-ume unu mẹe ndzuko ono, unu l’ekuje onwunu, mbụ lẹ ndzuko ono, unu l’atụje bẹ mu l’ẹte adụhedu ike anwụ-gbukota l’obu, o noo nkele ejo-iwhe ono, unu l’eme bẹ meru iya ọ dụ ẹji. ¹⁴Ori-oge ọnwa-ọwhuu ono, unu l’erije mẹwaro oge lile, unu tụ-buru atụ-bu eriri bẹ mu kpọkotawaru ashị. Iwhe ono bụwaa ivu-ẹrwa dụru mu. Ike iya bẹ gvụwaru mu. ¹⁵Unu -chilia ẹka unu ekfu anụ mu, bẹ mu l’e-wofu iwhu l’ẹka unu nọ. O bekwaru unu je m’ọo l’ekfuru nụ mu okfu agha, bẹ mu l’ẹte angakwa nchị. Nkele iwhe jiru ẹka unu bụ mmee ọchi. ¹⁶Unu sachaa onwunu asacha, mee onwunu t’unu gbuchafu egbuchafu! Unu haa mu omechishi ẹnya! Unu esefu ẹka l’ome ejo-iwhe! ¹⁷Unu nwụta ome iwhe dụ ree! Unu achọo ụzo ikpe, kfụru nhamụnha. Unu hụ̀a ndu l’akpa ndu ọdo ẹhu àhụ̀hù. Unu hajẹru onye nna iya l’ẹte anọhee enge! Unu agbarụ nwa-mbunu ọdzori.”

¹⁸Onye-Nwe-Ọha l’ekfu sụ: “Unu bya t’anyi doshia. O -behuduru iwhe-dụ-ẹji, unu megbaberu dụta-be ẹji eke gbogbogbo, e megee bẹ l’ọo-chalahaa pelepele g’ọo eberugo. O behuduru o dụta-be ẹji eke g’ọo uswe, e megee bẹ l’ọo-chalahaa ụcha gọo oghu. ¹⁹Ọ -bụru l’ọo uche obu unu t’unu wata ome iwhe mu sụru t’unu mee, bẹ unu l’e-megee ria nke ọma, shi l’alị ono. ²⁰Ọle ọ -bụru l’unu jịkaru bya ekwefu ike, ogu-ịgba asakashịa unu asakashị. Nkele mụbe Onye-Nwe-Ọha kfukwaru nkemu.”

Jerúsalẹmu bụ mkpụkpu, l’eme iwhe-dụ-ẹji

²¹Lewaro mkpụkpu ono, e shi gude ẹka g’ọ bụwaa nwanyị-ọkpara! Mkpụkpu, bụ ikpe, kfụru nhamụnha b’e shi ekpekota iya, mbụ mkpụkpu ono, ọ-dụ-chịriri shi tụa ụlo buru. Ntaa waa ndu mgbugbu madzụ bẹ kụru iya nụ. ²²Mkpọla-ọcha, shi dụ l’ime ghu ghọkotawaru ẹgbabala mkpọla. Ẹguru mmẹe, e shi akụ l’ime ghu bụru mini b’e gude gwarwụshia ya. ²³Ndu bụ ishi l’ime ghu bụkota ndu kwefuru Onye-Nwe-Ọha ike, tẹmenu whẹ bụru ndu whẹ l’ọgbo-iwhuru l’atụ ọli. Gẹ whẹ ha l’ẹhu l’ẹhu yeru ẹnya l’ori n-wọlazu. Ọ bụru t’a nụ whẹ iwhe bẹ ẹkpiri iya l’akajẹ whẹ alọlo. Ndu nna whẹ l’anọhee bẹ whẹ ta ahajẹduru enge, whẹ ta angajẹ nchị l’okfu ẹhu nwa-mbunu.

²⁴Ọo ya bụ l’ọ waa iwhe Onye-ukfu-l’ọha, bụ Onye-Nwe-Ọha, mbụ Onye-ishi-igwe-ọgu, bụ iya bụ Ọkalibe nke Ízurẹlu l’ekfu ndọwa: “Ẹhee, tẹ mu byanụ emeru goshi ndu ọhogu mu, gude dụa onwomu obu. Mu bya l’emelata ndu mu lẹ whẹ dụ l’okfu iwhe whẹ meru mu. ²⁵Mu l’a-tụfu ẹka daa unu l’ẹhu. Mu akụshia ẹgbabala, dụ unu l’ẹhu g’ọo igwe, a hụru l’ọku, tụko ẹbakala kweru rẹkpee l’ẹhu unu kweshikota. ²⁶Mu l’e-dobewhu ndu ikpe unu azụ l’ọnodu mbụ, whẹ shi nọdu. Mu emee tẹ ndu l’akpọ-zhiru unu ụzo dụ gẹ whẹ shi dụ l’oge mbụ. Iwhe l’ee-megee eku ghu bụ, ‘Mkpụkpu dụ chịriri’; e kua ghu: ‘Mkpụkpu e gude ẹka.’ ”

²⁷Mkpụkpu ono, nọ l’eli ugvu Záyọnu bẹ l’ee-gude ikpe, kfụru nhamụnha gbata. Ọ bụru ọ-dụ-chịriri bẹ l’ee-gude gbata ndu nzhimanụ lwarụ azụ l’ime iya. ²⁸Ọle ndu kwefuru Onye-Nwe-Ọha ike mẹe ndu l’eme iwhe-dụ-ẹji bẹ l’aa-tụko lakọta l’iyi. Ndu harụ otso Onye-Nwe-Ọha abụru ọzara-l’ukpo.

²⁹Achị ono, unu doberu nsọ agwa l’ee-megee kpua unu iwhu lẹ ntụ, g’ọ bụ iya bẹ unu hatarụ l’ọ dụ unu ree. Mgbabu ngwo-ẹja ono, unu metaru l’e-megee tụ unu ẹyerebeke, ³⁰nkele unu l’e-megee dụ g’ọo achị, jịru ẹkwo, unu adụ g’ọo mgbabu, l’aata gba mini. ³¹Ndu ọkpehu dụ l’e-megee bụru ngwọkinaki. Ejo ozhi ono, whẹ l’eje l’a-tụta ẹkiri-ọku kpua whẹ, kepyashihu whẹ. Tọ dụ onye l’a-dụ ike echinyi iya echinyi.

Ẹhu-guu, l’a-nọ jeye lẹ tututu-mịmimi

¹Ọ waa ọwhulenya,

Chileke goshiru Ayizáya nwa Émọzu

l’ishi ndu Juda yẹle mkpụkpu Jerúsalẹmu.

²Sụa, o -rwua l’oge ikpazụ,

bẹ l’ee-me t’ugvu ono, a tukoberu

eze-ụlo Onye-Nwe-Ọha shihu ike,

mee ya t’ọ bụru eze l’iwhe bụ ugvu nọnu.

Ee-me iya t’ọ kakọta ugvu ọdo l’eli.

Mba dụ iche iche awụlahaa

gụrutuu gụrutuu eje iya.

³Mba ha l’igweligwe l’a-bya ekfulahaa sụ:

“Unu bya t’anyi je l’eli ugvu Onye-Nwe-Ọha.

Unu t’anyi je l’ụlo Chileke nke Jékọpu,

nke ọwhu l’oo-zhi anyi ụzo nkiya,

nggẹ anyi awata otso ụzo ọwhu, ọ tọru.

O noo nkele ọo l’ugvu Záyọnu bẹ iwu Chileke l’e-shi abya,

mbụ l’okfu Onye-Nwe-Ọha l’e-shi l’obodo Jerúsalẹmu bya.”

⁴Ọo ya l’e-kpeshi okfu, dụru mba l’ibe iya.

Ọ bụru iya l’e-doshiru ikpoto madzụ okfu,

dụru whẹ l’ibe whẹ.

Whẹ akpụkwaa ogu-ịgba whẹ ya abụru ọgu.

Whẹ akpụkwaa arwa whẹ ya abụru nwa mma,

e gude akọcha iwhe.

Mba ta apalihedu ogu-ịgba ejekfu mba ọdo ọgu.

Whẹ ta abya l’a-nwụbaa g’e shi alwụ ọgu ọdo.

⁵Unubẹ ọzo-ụlo Jékọpu,

unu bya t’anyi tsoru iwhoro ono,

Onye-Nwe-Ọha nwụberu anyi.

Mbọku nke Onye-Nwe-Ọha

⁶Ị jịkawaru ndibe ghu ono, bụ ọzo-ụlo Jékọpu, nkele iwhe jiru whẹ ẹhu eshi nkeshi bụ ọda lẹ mgbashị, whẹ nwụtaru l’ẹka ndu ụzo ẹnyanwu-awata. Whẹ bụru ndu l’agba ẹja g’ọo ndu Fílistiya Whẹ lẹ ndu ọha ọdo tụkua ẹka eme iwhe lanụ. ⁷Iwhe jiru alị whẹ bụ mkpọla-ọcha yẹle mkpọla-ododo. Ẹku whẹ bẹ l’ete enwedua agvụgvu. Iwhe jiru alị whẹ bụ ịnya; ụgbo-ịnya whẹ te enwe agvụgvu. ⁸Iwhe jiru alị whẹ bụ agwa; ọ bụru iya bẹ whẹ l’abarụ ẹja, mbụ iwhe ono, bụ ẹka-ọrwu whẹ; mbụ l’iwhe whẹ l’abarụ ẹja bụ iwhe whẹ meru l’ẹka whẹ gẹdegede.

⁹Ọo ya meru, e jee l’e-wozeta madzụ alị. Madzụ bẹ l’ee-me t’ọ lwaa alị. Ba agụkwaru whẹ nvụ!

¹⁰Bahụ l’ime eze-ẹwhuru! Je edomia onwoghu l’ime ime alị; l’ẹka l’ịitsu Onye-Nwe-Ọha egvu; ọdu-biribiri iya l’eye ghu egvu! ¹¹Oku onwonye nke madzụ bẹ l’ee-me t’ọ laa. Etsetse nke madzụ abụru iwhe iyi yitaru. Onye-Nwe-Ọha abụru onye l’ee-kutse ekutse kpụ. ¹²Nkele o nweru ujiku lanụ, Onye-Nwe-Ọha, bụ Onye-ishi-igwe-ọgu doberu swibe iwhe bụ ndu l’eku onwowhe eku mẹe ndu bụ nwọgaga l’ẹnya nkewhe, mbụ mbọku, o doberu swibe ndu l’apali onwowhe imeli. Mbọku ono bẹ l’ee-me tẹ whẹ lwaa alị. ¹³Mbọku ono b’e doberu swibe ndu ono, bụ akparakpa oshi sida, dụ l’ugvu ugvu Libanọnu, mbụ nwọha l’eli whẹ; dobe mbọku ono swibe iwhe bụ achị gvuru l’alị Báshanu; ¹⁴dobe iya swibe ugvu, hakọta oroke-imeli-imeli mẹe mgbogidi mgbogidi. ¹⁵Mbọku onokwawho b’e doberu swibe iwhe bụ ụlo, hagee oroke-imeli-imeli mẹe mgbodo, a tụshiru ike; ¹⁶mẹe ụgbo-mini ndu Tashishi g’ọ ha mẹe iwhe lile, e memashiru ememashi l’ọma ụma. ¹⁷Oku onwonye nke madzụ bẹ l’ee-me t’ọ laa. Etsetse nke madzụ abụru iwhe iyi yitaru. Onye-Nwe-Ọha abụru onye l’ee-kutse ekutse kpụ. ¹⁸Nteke ono bẹ agwa l’ẹte adụhedu adụdu owhu.

¹⁹Nteke Onye-Nwe-Ọha l’a-gbalihu tẹ ya nmaa mgboko yikayika bẹ madzụ l’a-gbarụ laa l’ọgba ẹwhuru; whẹ atụa nsụ gbaba l’ime alị; ẹka whẹ l’atsụ egvu Onye-Nwe-Ọha; ọ-dụ-biribiri iya l’eye whẹ egvu. ²⁰Mbọku ono bẹ ntẹkpe ono, whẹ meru lẹ mkpọla-ọcha mẹe ono, whẹ meru lẹ mkpọla-ododo agwawhe bẹ whẹ l’a-chịta tụaru okerekfu mẹe ụtsu-nwankụta. ²¹Whẹ agbarụ laa l’ẹka eze-ẹwhuru gbarụ ụwa mẹe l’ime ọgba, dụ-gee l’eli ugvu; ọ bụru ẹka whẹ l’atsụ egvu Onye-Nwe-Ọha; ọdu-biribiri iya l’eye whẹ egvu, mbụ nteke ono, l’ọo-gbalihu t’ọ nmaa mgboko yikayika.

²²Haa ọkporu obu eyeru madzụ, nkele mkpakọ iwhe o nweru bụ ume ono, l’ọotu. ?Ọo gụnu ọdo b’ọ bẹru?

Mkpaka, dụ lẹ Jerúsalẹmu

¹Lekwa lẹ Onye-ukfu-l’ọha, mbụ Onye-Nwe-Ọha, bụ Onye-ishi-igwe-ọgu l’abyawaa ọnashi ndu Jerúsalẹmu mẹe ndu Juda ẹka iwhe shi erwu whẹ ẹka mẹe ẹka n-yemẹka shi abyarụ whẹ. Ọobya tẹ ya nafụ whẹ ẹka nri shi erwu whẹ ẹka mẹe ẹka whẹ shi eku mini, ²mẹe tẹ ya nafụ whẹ ndu ike dụ mẹe ndu ojọgu, ya anafụ whẹ ndu ikpe mẹe ndu nkfuchiru whẹ, nafụ whẹ ndu l’agbajẹru whẹ ẹja mẹe ndu bụ ọgurenya whẹ, ³nafụ whẹ ndu bụ ishi ndu ojọgu mẹe ndu gude ọkwa; nafụ whẹ ndu mgbazhi mẹe ndu l’eme nka l’amamanshi mẹe ndu ọgwo ọgvu dorwu ẹnya. ⁴Mu l’e-me t’ọ bụru unwokorọbya, l’a-bụru ndu ishi whẹ, ya abụru ụnwegirima nshịi l’a-nọ achị whẹ. ⁵Ndu madzụ l’a-nọ akpa ibe whẹ ẹhu. Madzụ -fụta ya egude okfu tsokfuru ibe iya. Onye -fụta ya etsokfuru obutobu iya. Nwata-uke ekfulahaaru onye bụ ọgurenya gbawhu gbawhu. Onye l’adụa iwhe ọ bụ eetso onye l’aakwabẹ ugvu okfu.

⁶Nteke ono bẹ madzụ l’a-zụ-gude nwanna iya, mbụ onye yẹle iya shi l’uwhu lanụ sụ iya: “Eshi-ọwhu i nweru-a uwe, bẹ bụ ghu l’a-bụru onye ishi anyi. Ọo ghu marụ gẹ l’ii-me mekota ọla-l’iyi-a, dakfutaru anyi ẹgube-ẹ.”

⁷Onye ono aryaswerehu sụ: “Waawakwa-o! Mu te emekotakwa iya. Ọ tọ dụdu nri, dụ l’ụlo mu; tọ dụ uwe, l’eeye l’ẹhu dụ iya nụ. Unu be emekwa mu ishi ndibe anyi-o!”

⁸Ntaa bẹ Jerúsalẹmu dakpọshihuwaru. Juda dawaa tsua ọnu l’alị. O noo nkele okfu ọnu whẹ yẹle iwhe whẹ l’emegbabe tụkoru bụru omeswe Onye-Nwe-Ọha. Whẹ merwuwaru atatiwhu iya ono, l’egbu zaa-zaa. ⁹G’iwhu gbarụ whẹ ụgbugba bẹ bụ-zhiada nụ iwhe l’agba whẹ ẹka-ebe. Whẹ l’anọduje l’ọkpa jaajaa eme iwhe-dụ-ẹji g’ọo ndu Sódomu. Whẹ te edomijedu iya edomi. Nshọro whẹbedua! O noo nkele whẹ gudewaa ẹka whẹ kụtaru onwowhe gẹ l’ọodua.

¹⁰Karụ onye dụ chịriri l’ọo-dụru iya lẹ ree, nkele oo-ri akpụru, umere-ọma iya mịtaru. ¹¹Nshọbukwa ndu ejo obu! Whẹbedua bẹ l’ọo-dụru ẹji. Aa-kfụ whẹ ụgwo iwhe whẹ gude ẹka whẹ meta.

¹²Ndibe mu bụ unwokorọbya l’akpa whẹ ẹhu. Ọ bụru ụnwanyi bụ ndu ishi whẹ.

Ndu mu! Ọ kwa ndu l’edu unu ụzo bẹ duwhuru unu. Whẹ harụ ẹka ụzo, unu gege etsoru, duru unu je eshilahaa ẹka ụzo l’adụa.

Ikpe, Onye-Nwe-Ọha kperu ndu nkiya

¹³Onye-Nwe-Ọha nọokwa l’ẹka l’ọo-nọdu kpee ikpe l’ụlo-ikpe. Ọ gbalihuwaru t’o kpee ndiwhe ikpe. ¹⁴Onye-Nwe-Ọha l’ekpewaa ndu bụ ọgurenya mẹe ndu bụ ishi ndu nkiya ikpe. Ọ sụru agha: “Ọo unu lwụru vayịnu, l’abụa nkunu alwụlwu. Arya, unu gwotaru l’ibe ndu ụkpa bẹ kụkwaru-a l’ibe unu. ¹⁵?Ọo fụtaru unu gụnu mbụ aryaka eryune ono, unu l’egwe ndibe mu? ?Ọo gụnu b’ọ fụtaru unu mbụ kputukputu ono, unu l’avụ ndu ụkpa l’egedege iwhu?” O noo iwhe l’ookfu, mbụ Nnajị-Ọha, mbụ Onye-Nwe-Ọha, bụ Onye-ishi-igwe-ọgu.

Ọkwa, a nmarụ ye ụnwanyi Jerúsalẹmu l’ẹka

¹⁶Onye-Nwe-Ọha sụru agha: “Ụnwanyi, bu l’ugvu Záyọnu bẹ l’ekunuka onwowhe eku. Ọobuje whẹ l’eje l’ụzo, whẹ angalibegee olu angalibe, eme ẹnya arwụ aarwụ, eje segelengu segelengu, adzọ ịjokfulaka, whẹ yeru l’ọkpa jẹgengu-jẹgengu. ¹⁷O noo g’o gude Onye-Nwe-Ọha je l’eworu ẹkpa-ebyi ghaa ụnwanyi, bu l’ugvu Záyọnu l’ishi. Ishi achahụ whẹ swarịswari.”

¹⁸Mbọku ono bẹ Onye-Nwe-Ọha l’a-nashị whẹ ịjokfulaka ono, whẹ l’eyeje l’ọkpa gude memaa onwowhe emema, mẹe mgbịrigba-ishi, whẹ l’ekebutaje l’ẹgbushi, mẹe iyagba, whẹ l’anyajẹ l’olu, ¹⁹mẹe iwhe-nchị whẹ, mẹe echi-ẹka whẹ, mẹe ẹkwa whẹ l’ekwechije l’iwhu, ²⁰mẹe nkelishi whẹ, mẹe idze, whẹ l’agbajẹ l’ọkpa, mẹe ọlokpu, whẹ l’eweje l’ukfu, mẹe akpamụ mmanụ whẹ, l’eshi kwẹkwekwe, mẹe nwanshi whẹ, ²¹mẹe echi mkpụshi-ẹka whẹ, mẹe echi imi whẹ, ²²mẹe uwe ooye eje l’oge whẹ, mẹe ukpo whẹ, mẹe ẹkwa achịchi whẹ, mẹe nwẹkpa o-gude-l’ẹka whẹ, ²³mẹe uwe whẹ, l’awhụ onyo, mẹe ẹguru uwe ọcha whẹ, mẹe ẹkwa oke l’ishi whẹ, mẹe ọwhu whẹ l’awukobeje l’ukuvu.

²⁴O be nke tẹ whẹ hua mmanụ, l’eshi kwẹkwekwe, whẹ agbẹe eshi roo. O be nke tẹ whẹ weru ọlokpu, whẹ agbẹe weru izhi-ẹgburu. O be nke tẹ whẹ memaa ẹgbushi whẹ emema, ishi agbẹe acha whẹ swarịswari. O be nke tẹ whẹ yee uwe, l’ama ụma, whẹ agbẹe yee uwe-áwhụ. O be nke tẹ whẹ maa ụma, whẹ agbẹe dụ g’ọo iwhe ọku kebashiru ekebashi.

²⁵Unwoke unu bụ ogu-ịgba bẹ l’ee-gude gbushia whẹ. Ọ bụru l’ọgu bẹ ndu ojọgu unu l’a-lakọta. ²⁶Ọnu ẹka l’eeshije abahụ lẹ Jerúsalẹmu l’e-chi mkpu gụa áwhụ. Mkpụkpu ono l’a-dụ g’ọo nwanyị, gba ẹka nwa gwọshita l’alị.

¹O -rwua nteke ono bẹ ụnwanyi ẹsaa l’a-bya awọru nwoke lanụ sụ iya: “Haarọ t’anyi nụje onwanyi nri, nmajẹru onwanyi iwhe o ye l’ẹhu, t’ọ bụru-a l’eeku ẹwha anyi ala lẹ nkeghu, nke ọwhu l’ii-wofu anyi iwhere l’iwhu!”

Onye ono, bụ Ẹkali Onye-Nwe-Ọha

²O -rwua nteke ono bẹ onye ono, bụ ẹkali Onye-Nwe-Ọha l’a-bụru nwọmarima, bụru ọ-dụ-ugvu. Iwhe shi l’alị ono fụta bẹ ndu ono, whọduru l’alị Ízurẹlu l’e-gude eku onwowhe eku, bụru iya bẹ whẹ l’e-gude dụ ugvu l’ẹnya. ³Ndu ono, a harụ l’ugvu Záyọnu, mbụ ndu ono, kwarụ lẹ Jerúsalẹmu bẹ l’aa-nọ eku ndu dụ nsọ, bụ iya bụ ndu ono, e deru ẹwha whẹ lẹ whẹ l’a-nọ ndzụ lẹ Jerúsalẹmu. ⁴Onye-Nwe-Ọha safụlewho mmerwu ono, dụ nwada Záyọnu l’ẹhu, bya egude ume nkiya safụ mmee ọchi ono, dụ ndu Jerúsalẹmu l’ẹhu, mbụ ume ono, o gude ekpe ikpe mẹe ume, l’enwu enwunwu. ⁵Nteke ono bẹ Onye-Nwe-Ọha l’abya l’ugvu Záyọnu l’owhu mẹe l’ẹhu ndu ono, l’edzukobeje l’ẹka ono, bya emeta urwukpu, l’akpụ tụtutu doberu whẹ l’eswe; meta ọku, l’enwu whowhowho doberu whẹ l’ẹnyashi, nkele mkpụkpu ono l’owhu bẹ l’ee-gude ọ-dụ-biribiri Onye-Nwe-Ọha kpuchita. ⁶Ọ-dụ-biribiri iya ono l’a-bụru mkpuumkpu, l’anụ ndu mkpụkpu ono aguguru t’okpomọku be ekpo whẹ l’eswe, bụkwaruwho ẹka whẹ l’a-gbabajẹ je ezeeru ndzụ yẹle ẹka whẹ l’e-domije onwowhe mẹ igweli l’achị eze mini yẹle nteke l’ọoyo mini ayọyo.

Egvu mgbabu vayịnu

¹Mu l’a-gụru egvu nụ onye mu yeru obu.

Mu l’e-gude mgbabu vayịnu iya gụa ya.

Onye mu yeru obu bẹ gbarụ mgbabu vayịnu l’alị,

mehuru emehu lẹ mgboro ugvu.

²Ọ tụpyaru alị iya atụpya hashịa ya ẹwhuru.

Ọ kụru iya akpụru vayịnu, kakọta ree.

Ọ tụa ụlo-nche dobe l’echi mgbabu ono,

bya egvuta ẹka l’aanọje apyịshi mmẹe lẹ vayịnu ọbu.

Ọ chịru ẹnya yeru iya t’ọ mịta mmebyi, dụ ree.

Ọ bụru ejo mmebyi b’o megeeru mịta.

³“Unubẹ ndu bu lẹ Jerúsalẹmu mẹe unwoke ndu Juda, unu kpeeda ikpe ẹhu mu lẹ mgbabu vayịnu mu ono. ⁴?O nweru iwhe mu gege emeru mgbabu vayịnu mu ono, mu l’ẹte emeeru iya? ?Ndẹe g’o gude, mu lee ẹnya nteke l’ọo-mịru mu ọkpobe mmebyi, ọ bụru ejo mmebyi b’ọ mịru? ⁵Tẹ mu bya akarụ unu iwhe mu l’e-me mgbabu vayịnu mu ono ntaa. Mu l’a-whọshikota ụwho, a gbarụ iya, nke ọwhu l’aa-bya alwụa ya ọlwochi. Mu l’e-nwutsushi mgbodo ono, e gude tụ-whe iya mgburumgburu, nke ọwhu l’aa-dzọ iya fụtu-fụtu. ⁶Mu l’a-ha iya t’o yifu. Mu l’a-ha ọkocha vayịnu ono akọcha, mu ahaa ya ọkpa ẹja. Mu l’a-ha iya t’ogvu l’uke fuchia ya. Mu emee igweli t’ọ bọ chịhe mini wụshi iya ọdo.”

⁷Ọ kwa ọzo-ụlo ndu Ízurẹlu bụ mgbabu vayịnu ọbu,

Onye-Nwe-Ọha, bụ Onye-ishi-igwe-ọgu nwe.

Ọ bụru ndu Juda bụ ọkpobe

akpụru vayịnu, ọ kụru iya.

O leru ẹnya tẹ whẹ mee iwhe kfụru nhamụnha,

iwhe ọ whụru bụru ogbu ọchi.

O leru ẹnya tẹ whẹ dụ chịriri,

iwhe ọ whụru bụru ndu l’arya whẹ ẹkwa l’ẹka.

Áwhụ tsọru Ízurẹlu

⁸Áwhụ tsọokwaru unu! Unu l’azụje ụlo yekwa l’ụlo ọwhu unu nwe enwe. Unu azụa alị yekwa l’alị ọwhu unu nwe enwe. Unu l’a-kwawarọ megburu ẹgube ono jeye, ya adụhe ẹka ọdo, l’a-whọdu, unu ekemoru l’alị ono nwẹkinyi unu. ⁹Onye-Nwe-Ọha, bụ Onye-ishi-igwe-ọgu kfuakwaru iya ye mu lẹ nchị sụ lẹ: “Igweligwe ụlo l’e-be bụru mkpọkoro ụlo. Oke ụlo oke ụlo ono yẹle ụlo-ọ, l’amaka ụma l’e-bekwa bụru okorobo ụlo, l’adụa onye bu iya ebu. ¹⁰Ẹka l’ee-gude eswi iri, a jịgbaberu ẹbo-ẹbo kọo ujiku lanụ bẹ nwa mmẹe vayịnu, l’aa-pyịta iya bụa itoto ẹto bẹ l’oo-ji. Onye kụru mebyi iwhe jiru abakochi abụru iwhe jiru efere-nkwẹka bẹ l’ọo-wọta iya.”

¹¹Nshọ ndu l’agbalihuje l’ishi-ẹnya-ngge ụtsu tsoru angụ-whe mmẹe, mbụ ndu ono, l’angụtaje mmẹe rwua l’echi abalị, jeye ẹnya ekekota whẹ vaavaa. ¹²Ẹgube ndu ono l’anọje akpọ une, akụ ogele l’ẹka whẹ l’eri iwhe. Whẹ l’awhụje opu, egbu opyi-ọku, dọ-whee onwowhe mmẹe l’ẹka whẹ l’eri iwhe. Ọle o to nwedu iwhe Onye-Nwe-Ọha l’eme, whẹ gụberu iwhe m’ọo nwannanụ, tọ dụ ẹka-ọrwu iya, whẹ l’eleshije ẹnya ilile. ¹³Ọo ya meru, e je l’a-kpụ ndu nkiya lẹ ndzụ, nkele ọ tọ dụdu iwhe whẹ marụ. Ndu nkewhe, bụ ndu l’eeyeru ẹso bụwaa ndu ẹgu l’ese egbugbu. Igweligwe whẹ bụru ndu ẹkpiri kpọru gbengu l’ẹgu mini. ¹⁴Ẹwho ghewaru alị-maa ọnu, ọ jawaa ọnu whalaa; ndu ono, a marụ ẹwha whẹ lẹ Jerúsalẹmu mẹe igweligwe whẹ je l’a-wụ-laje iya. Ndu yawuyawu mẹe ndu ẹmereme jekwawho l’a-wụ-laje iya.

¹⁵O noo nteke l’ee-wozeta madzụ alị. Madzụ l’onwiya bẹ l’ee-me t’ọ lwa alị. Ndu l’etse etsetse abụkwaruwho ndu e wozetaru alị. ¹⁶Onye-Nwe-Ọha, bụ Onye-ishi-igwe-ọgu bẹ l’ee-gude nke ikpe, kfụru nhamụnha, l’ookpeje kutsee ekutse. Chileke ono, dụ nsọ bẹ shi l’iwhe dụ chịriri l’oome egoshi lẹ ya dụ nsọ. ¹⁷O noo nteke atụru l’e-megee taa nri lẹ mkpụkpu ono, l’a-dakpọshihu adakpọshihu. Eswi yẹle eghu atakwaa ya whọ nri.

¹⁸Nshọ ndu l’atụje ejo-iwhe eri l’ukfu alọkpu, mbụ ndu l’anọje alọkpu iwhe-dụ-ẹji g’ọo onye l’alọkpu eswi. ¹⁹Whẹ l’asụje woo: “Tẹ Onye-Nwe-Ọha meeda iwhe ọbu, l’oo-me ẹgwegwa t’anyi whụ iya iwhu! T’iwhe ọbu, onye nsọ nke Ízurẹlu tụberu ememe kabẹ-zhinua mee t’anyi marụ iwhe ọbu!”

²⁰Nshọ ndu ono, l’ewotaje ejo-iwhe ku iya iwhe-ọma; wota iwhe-ọma ku iya ejo-iwhe, mbụ ndu l’ewotaje abalị ku iya iwhoro; wota iwhoro ku iya abalị. Unu l’ewotaje iwhe l’atsọ ilu ku iya iwhe l’atsọ ụtso; wota iwhe l’atsọ ụtso ku iya iwhe l’atsọ ilu.

²¹Nshọbukwa-a ndu bụ nwọmaru-ọ-machaa l’ẹnya nkewhe, mbụ ndu marụ iwhe l’ẹnya nkewhe.

²²Nshọbukwa-a ndu ono, bụ ẹnwu mmẹe, mbụ ndu l’aachiliru ẹka l’ọngu ngwaragwa mmẹe; ²³mbụ ndu l’ekwobeje nke n-wọlazu, onye ikpe nmarụ nụru whẹ, whẹ ahaa ya ẹwoma. Whẹ l’anafụje onye iswi dụ mma iswi ọdu mma iya. ²⁴Ọo g’ire-ọku l’erepyaje ikpuruma ọkponku; ọ bụru g’ẹwu ọkponku l’anmajẹ pyataa l’ọku l’enwu enwu, o nokwa g’ọgbaragbu whẹ l’e-reshihu; igu whẹ, tụru etsua duu g’ọo ivovonyi, o noo nkele whẹ jịkaru odobe iwu, ọ tụru, mbụ Onye-Nwe-Ọha, bụ Onye-ishi-igwe-ọgu; tọ dụ iwhe whẹ gụberu okfu onye nsọ nke Ízurẹlu. ²⁵Ọo ya meru, ẹhu l’eghu Onye-Nwe-Ọha eghu l’ẹka ndibe iya nọ. Ọ tụfu ẹka daa whẹ l’ẹhu gbaa; chita whẹ tụa. Ugvu l’anma jijiji. Odzu whẹ kụleruwho kpataa g’ọo ẹka a ghakashịru ọzu l’echi-ụzo. Ọle iwhe ono nwụkotaru, Onye-Nwe-Ọha dobele-e ẹhu eghughu iya g’o doberu iya l’ẹhu ndibe iya, ọ tụfule-ẹ ẹka iya g’ọ tụfuru iya dabẹ whẹ l’ẹhu.

²⁶Onye-Nwe-Ọha paliru iwhe-ọhubama iya cheberu mba, bu otẹnya, nke ọwhu whẹ l’a-whụ iya byatashia. Ọowhuru whẹ okpurọswa tẹ whẹ shi l’ẹka mgboko beru byatashia. Whẹ tụtubeekwaru ọso ekwo gbaragbara eje abya. ²⁷Ọ tọ dụdu onye l’ime whẹ, ike ọso gvụru, tọ dụ onye ọwhu darụ iko. Tọ dụ onye mgbẹnya rweru, tọ dụ onye kuru mgbẹnya, tọ dụ onye iwhe o we l’ukfu toworu atowo, tọ dụ onye eri akpọkpa iya gbabuhuru. ²⁸Akfụ whẹ tụpyi-geeru zhịnguzhingu. Ube whẹ l’owhu gọdobe-gee agọdobe. Akọkpa ịnya whẹ l’ebunwutagee ọku ebunwuta. Ọkpa ụgbo-ịnya whẹ l’ezhika whawhawha g’ọo uburu-aga. ²⁹Ẹngiringaa, whẹ l’eme dụ g’ọo ẹka oduu-gburu-agụ l’agbọ ụja. Whẹ l’ekwoji g’ọo ẹka nwada oduu-gburu-agụ l’abọ ekiri, gude ọbo erwumu gụbata iwhe l’oo-ri tụgbua; tọ dụ onye je anafụ iye ya.

³⁰Mbọku ono bẹ whẹ l’a-bọ erwumu kpua ya g’ọo ẹka mini l’achị kporokporo. Onye -paliru ẹnya lee l’alị ono, iwhe l’ọo-whụ abụru ẹkpuroochi yẹle iwhe-ọtsulanu. Iwhoro bẹ urwukpu l’e-me, ya agbakọta ọochi.

Chileke kuru Ayizáya t’o jeru iya ozhi

¹L’awha eze bụ Uzáya nwụhuru bẹ mu whụru Onye-Nwe-Ọha g’ọ nọdu l’oshi-eze ọbu, halẹwho kpokfuu dụ l’eli. Ogboromọnu uwe-mkpẹelanu, o ye l’ẹhu bakashịhu dzuru eze-ụlo iya l’owhu. ²Ndu nọ-wheru iya mgburumgburu l’ẹka ono bụ ụnwu ojozhi-imigwe ọbu, l’enwukaa ẹnya demudemu, bụ Serafu. Whẹ nweru akwẹka ishii ishii l’ẹhu l’ẹhu. Akwẹka labọ bẹ whẹ l’egudeje kpuchia iwhu whẹ, gude ẹbo kpuchia ọkpa whẹ, gude ẹbo ọwhu ewhe ewhe. ³Whẹ nọdu whẹ agbakushi ibe whẹ oku asụje:

“Nsọ, nsọ, nsọ

bẹ Onye-Nwe-Ọha,

bụ Onye-ishi-igwe-ọgu dụ.

Ọdu-biribiri iya jifutaru mgboko l’owhu.”

⁴Olu okfu whẹ l’abụje, ọ -daa, ọnu eze-ụlo Chileke l’owhu anmakọta yikayika. Ẹnwuru ọku ekposhilewho ji ụlo ono kpimu.

⁵Mu bya asụ: “Nshọbukwa mu nshọ! Ewhuhubukwa mu, nkele mu gudewa ẹnya mu whụa onye eze, mbụ Onye-Nwe-Ọha, bụ Onye-ishi-igwe-ọgu lẹ mụbe onye okfu urwe jiru ọnu eji, tẹmenu ndu mu lẹ whẹ bu bụru ndu okfu urwe jiru ọnu eji!”

⁶Nteke ono, ojozhi-imigwe ono, bụ serafu ono nnanụ wheru pẹe whekfuta mu. Iwhe o gude l’ẹka bụ icheku-ọku, l’enwu kfụu. Ọ bụru akpa b’o gude kpata iya l’ẹnya-mgbẹja Chileke. ⁷O woru icheku-ọku ono daa mu l’ọnu, sụ mu: “Lee ọku-a, a darụ ghu l’ọnu-a; ọo ya b’e gude hụchafu ejo-iwhe, i meru. Iwhe-dụ-ẹji, i metagbaberu b’a kfụwaru ụgwo iya.”

⁸Mu bya anụa olu-okfu Onye-Nwe-Ọha l’ẹka l’ookfu sụ: “?Ọo onye bẹ mu l’e-zhi? ?Ọo onye bẹ l’e-jeru anyi ozhi?”

Mu sụ: “Lee mu ndọwa! Zhia mu iya!”

⁹Ọ sụ mu: “Ngwa, tụgburu je ezhia ndu-a sụ whẹ agha: ‘Unu l’a-nụ nta nụa imo, ọle iwhe te edodu unu ẹnya. Unu elee ẹnya nta lee imo, ọle ọ tọ dụdu iwhe unu bya l’a-whụ.’ ¹⁰Mee ndu-a t’obu nmaa whẹ mkpigbi. Whẹ aswochishichaa nchị aswochi, takụbechaa ẹnya atakụbe. Ọdua bẹ whẹ l’e-gudekwa ẹnya whẹ whụ, gude nchị whẹ nụ; obu whẹ emee t’o doo whẹ ẹnya, nke ọwhu whẹ l’a-dakọbe lwakfuta mụbe Chileke tẹ mu mee whẹ, tẹ whẹ mehu.”

¹¹Tọ dụ iya bụ, mu jịa sụ: “Byiko Onye-Nwe-Ọha, ?ọo nteke ole bẹ l’oo-beru ya abụru?”

Ọ sụ mu: “Ọo nno gẹ l’ọo-dụ-zhiawho jeye mkpụkpu ono adakpọshihu. Mbụ nteke l’adụhee onye bu iya nụ. Ụlo atụko bụru okorobo ụlo, l’adụa onye bu iya ebu. Ẹgbara akfụa l’alị ono l’owhu. ¹²Mbụ l’ọo-dụ nno jeye nteke Onye-Nwe-Ọha l’e-wofu onyenọnu l’alị ono je edobe otẹnya. Nteke l’aa-parụ alị ono l’owhu haa t’ọ daburu iwhoro. ¹³Onye lanụ l’ime ụmadzu iri je m’ọo l’a-whọdu l’alị ono, bẹ l’ọo-bụ onye a larụ l’iyi. Ọle, ọo gẹ l’eebujije oshi achị, ọdua l’ọo oshi akpụrataa, ukfu iya akwaa l’alị, bụ gẹ l’oo-bekochaa nweru ọgbo, l’a-whọdu l’ẹpa Ízurẹlu, bụ ndu l’a-dụru mụbe Onye-Nwe-Ọha nsọ.”

Ozhi, Ayizáya zhiru eze bụ Éhazu

¹Nteke Éhazu shi bụru eze ndu Juda, mbụ Éhazu ono, bụ nwa Jótamu, Jótamu bụru nwa Uzáya; nteke ono bẹhunu eze bụ Rezinu, bụ eze ndu Arámu yẹle Peka nwa Remalaya, bụ eze ndu Ízurẹlu wulihuru jeshia ọgu lẹ Jerúsalẹmu, ọle whẹ ta alwụ-gbudu whẹ.

²A bya ekfuaru ndu ọzo-ụlo Dévidi lẹ ndu Arámu bẹ whẹ lẹ ndu Ífuremu tụgbaakwaru nnanụ. Okfu ono mee, obu wata ote Éhazu yẹle ndu nkiya nmẹkenmeke, g’ọo ẹka whẹrewhere l’enwunga oshi, gvuru l’ẹgbudu enwunga. ³Tọ dụ iya bụ, Onye-Nwe-Ọha sụ Ayizáya: “Tẹ gụ lẹ nwa ghu, bụ Shiya-jashubu lịru jekfushia Éhazu l’ishi mgba-mini Okpuru ụzo Imeli, mbụ ono, dụ l’echi-ụzo ono e shi eje l’ẹgu Ọsa-iwhe. ⁴Unu kfuru iya sụ iya: Gube nwẹhu-a, dobe onwoghu nwandoo. Ba atsụkwa egvu, be ekwekwa tẹ meji tọfu ghu lẹ nwa otsebere-nkụ labọ ono, l’ada ibe ada ono, mbụ hanyị-hanyị ono, Rezinu yẹle ndu Arámu mẹe nwatibe Remalaya l’aba. ⁵Ndu Arámu whẹ lẹ ndu Ífuremu mẹe nwatibe Remalaya bẹ gbaakwarụ ghu ejo ikumu. Whẹ sụru: ⁶‘Unu t’anyi bakfu ndu Juda ọgu je emee whẹ l’iwe. T’anyi je alwụta whẹ yeru onwanyi. Anyi eworu nwatibe Tabelu dobe t’ọ bụru eze l’ẹka ono.’ ⁷Obekwanu l’ọ waa iwhe, Nnajị-Ọha bụ Onye-Nwe-Ọha l’ekfu ndọwa: Ejo-ikumu ono ta abyadụ l’e-keru ọkpa. Tọ byadụ l’e-nweru ishi. ⁸O noo nkele ishi mkpụkpu ndu Arámu bụ Damásukọsu, onye bụ ishi ndu Damásukọsu bụru Rezinu. L’ime ụkporo awha ugbo ẹto l’awha ise bẹ l’ee-gwe Ífuremu aryaka-eryune, whẹ abubuhu mba ẹka whẹ.

⁹Sụa, ishi mkpụkpu ndu Ífuremu bụ Samériya, onye bụ ishi ndu Samériya bụru nwatibe Remalaya. Ọ -bụru l’ị tịi bụdu akwaa akfụru l’ẹka mu nọ bẹ ọkpa l’e-megee chifu ghu.”

Iwhe abyabya Imánuwẹlu l’egoshi

¹⁰Onye-Nwe-Ọha byakwa bya ekfuru Éhazu ọdo sụ: ¹¹“Ryọo Onye-Nwe-Ọha, bụ Chileke ghu t’o goshi ghu iwhe-ọhubama, oberu o je l’a-bụru l’omilomi alị-maa, m’ọ bụ l’oroke imeli-imeli ẹka kagezhia l’imeli.”

¹²Éhazu sụkwanu: “Mu ta aryọkwa. Mu te ejekwa ọodata Onye-Nwe-Ọha.”

¹³O noo ya bụ lẹ Ayizáya asụ: “Unu ngabẹkwa nchị, unubẹ ndu ọzo-ụlo Dévidi! ?Ọ dụ unu gẹ-woo l’ọ tọ dụdu ẹji mbụ ọghaswashi madzụ ẹhu, meeru unu l’aghaswashị Chileke mu ẹhu? ¹⁴Ọo ya meru, Onye-Nwe-Ọha l’onwiya je l’e-meru iwhe-ọhubama goshi unu. Lekwa lẹ nwamgbọko l’a-tsụta ime, nwụa nwa nwoke. Iwhe l’aa-gụ iya bụ Imánuwẹlu.7:14 Imánuwẹlu fụtaru lẹ Chileke nọ swiru anyi.¹⁵Ọo-wata ori mmanụ, e meru l’ẹra-eswi yẹle mmanụ-ẹnwu m’ọ malẹruwho iwhe ree, nke ọwhu l’ọo-majẹ tẹ ya jịka ejo-iwhe hata iwhe-ọma. ¹⁶Ọle o -rwudeshia nteke nwata ono l’a-marụ tẹ ya jịka ejo-iwhe hata iwhe-ọma bẹ, alị ndu eze labọ ono, l’ịi-tsụ egvu l’a-bụkotawaa ẹka a gbarụ ọso. ¹⁷Onye-Nwe-Ọha l’e-wota mbọku eze iwhe-ọtsulanu bya edoberu unu, mẹe ndibe unu, mẹe ndu ọzo-ụlo nna unu whẹ, mbụ mbọku eze iwhe-ọtsulanu ọwhu, akọ ẹtu iya l’adụjee, eshi ndu Ífuremu shi lẹ ndu Juda kefu onwowhe. Onye l’oo-gude bya bụ eze ndu Asiriya.”

¹⁸O -rwua nteke ono bẹ Onye-Nwe-Ọha l’a-whụ okpurọswa gude kukoo ndu Íjiputu tẹ whẹ tsụru whanyịwhanyi g’ọo ijiji, shi l’ọhu ẹnyimu Nayịlu byatashia, ya ekukwaawho ndu Asiriya tẹ whẹ wheru g’ọo ẹnwu shi l’alị whẹ bya. ¹⁹Whẹ l’a-bya akụru lẹ kpọkoro kpọkoro nsụunsu mẹe l’ẹka ẹwhuru gbarụ ụwa, whẹ adanwụshia ẹgbudu lile, ogvu dụ mẹe iwhe bụ iduma mini, dụkota.

²⁰O -rwua nteke ono bẹ Onye-Nwe-Ọha l’e-gude akwọ, ọ natarụ l’azụ ẹnyimu Yufurétisu, mbụ nke eze ndu Asiriya, gude kpụa unu edege mini; kpụa unu ẹji ọkpa mẹe ẹji agba unu.

²¹O -rwua nteke ono, madzụ -dụ m’ọo ike dobe nweswi lanụ, m’ọ bụ eghu labọ; ²²mini-ẹra iya agbọru iya jọjojo, nke ọwhu l’oo-me t’onye ọbu nweru mmanụ shii, l’ọo-nọ eri, mbụ mmanụ, e meru l’ẹra-eswi. Iwhe bụ ndu whuduru l’alị ono l’a-nọ eri mmanụ, e meru l’ẹra-eswi yẹle mmanụ-ẹnwu.

²³O -rwua nteke ono, iwhe bụ ẹka, e shi akpatajẹ ụnu vayịnu labọ l’ụkporo iri, aswa iya l’e-rwu mkpọla-ọcha, dụ ụnu shẹkelu ugbo labọ l’ụkporo shẹkelu iri bụ bẹ ogvu l’uke l’adanwụshi iya adanwụshi. ²⁴Madzụ l’e-gude akfụ l’ube bahụ l’ẹka ono. Alị ono l’owhu abụru ogvu l’uke l’a-narụ iya. ²⁵A -bya l’ugvu ugvu ono, e shi egudeje ọgu akọ, madzụ ta abyadụ l’e-ye iya ọkpa, nkele ogvu l’uke l’atụko iya nata. Ẹka ono abya aghọo ẹka eswi l’akpa l’onwiya yẹle ẹka atụru l’awụ-whe.

Ndu Asiriya l’a-bụru ngwọgu Onye-Nwe-Ọha

¹Tọ dụ iya bụ, Onye-Nwe-Ọha bya asụ mu: “Wota okpekpu-ẹkwo, ha ọsa dee iwhe l’eli iya t’o shifuta ree. Iwhe l’ii-de iya bụ Maharu Shalalu-hashi-bazu.8:1 Iwhe okfu Híburu ono fụtaru bụ ‘O-me-kọrokoro l’ogwo arya’ yẹle ‘o-zhi-wharamu l’iwhe onye ọdo.’²Gụ eduta onye l’agbajẹ ẹja nụ Chileke, bụ Yuriya yẹle Zakaráya nwa Jeberekiya, bụ ndu e gude ire whẹ ẹka tẹ whẹ bụru ndu ẹka-ebe.”

³O noo ya, mu bya ejekfu nyee mu azẹe, ọ tsụta ime nwụa nwa nwoke. Onye-Nwe-Ọha sụ mu: “Iwhe l’ịi-gụ nwata ono bụ ‘Maharu-shalalu-hashi-bazu.’ ⁴O noo nkele, nwata ono bya l’amadeshia oku nna iya yẹle ne iya bẹ eze ndu Asiriya byawarụ bya egwokoo ẹku ndu Damásukọsu yẹle iwhe lile, ndu Samériya nweru.”

⁵Onye-Nwe-Ọha byakwa ekfuru yeru mu ọdo sụ: ⁶“Eshi-ọwhu ndu-a jịkaru mini ono, l’agba gịrigiri ono, bụ mini Shilowa, bya atụru okoo kpua eze Rezinu yẹle nwatibe Remalaya, ⁷bẹ Onye-Nwe-Ọha bya l’eme t’eze utso, shi l’ẹnyimu Yufurétisu bya erigbushia whẹ. Utso ono bụ eze ndu Asiriya yẹle ndu ojọgu iya gẹ whẹ ha. Utso ono l’a-byazhiawho kụlakula gbamikota ọgba ẹnyimu ono l’owhu, tụko ọnu ẹnyimu ono g’ọ ha gbakọta. ⁸Ọo-sọru gborogboro sọba l’alị ndu Juda, gbaa utso l’ẹka ono wụ̀chaa ya awụ̀wù. Ọo-wọkota iya l’ẹkpiri chọngu. Akwẹka iya ono, ọ tụsaru atụsa bẹ l’a-tụko uswetuma alị ghu dzuru, gụbe Imánuwẹlu!”

⁹Unu chia mkpu ọgu, unubẹ mba gẹ mba ha! T’e gwekwaa unu aryaka-eryune! Unu ngabẹkwa nchị, unubẹ ndu bu otẹnya! Unu jịkobekwa nke ọgu, ọle ee-gwekwanu unu aryaka-eryune. Sụ-a, unu jịkobekwa nke ọgu, ọle ee-gwekwanu unu aryaka-eryune. ¹⁰Unu bukobe ishi gbaa idzu g’unu l’e-me iya. Ọle idzu unu ta adụdu iwhe l’ọo-pata. Unu kfua g’unu l’e-me iya. Ọle ọ tọo dụdu iwhe unu kfuru bya l’e-keru ọkpa. O noo nkele Chileke bẹ nọ swiru anyi.

Tsụje Chileke egvu

¹¹Onye-Nwe-Ọha bya egude ike ọkpehu iya zụ mu gwamụ, bya ekfuru yeru mu, lọo mu ẹka lẹ nchị sụ mu tẹ mu haa ọwota ẹka ndu-a. Ọ sụru mu agha: ¹²“T’ọ bọ bụgbabekwa iwhe ndu-a kuru ejo-idzu bẹ unu l’e-kugbabeje ejo-idzu. T’iwhe, whẹ l’atsụ egvu ba atsụjekwa unubẹdua egvu, t’obu be etejekwa unu ete. ¹³Iwhe unu l’e-mechia bụ t’unu wota Onye-Nwe-Ọha, bụ Onye-ishi-igwe-ọgu l’ọ bụ onye dụ nsọ. T’ọ bụru iya bẹ unu l’a-tsụje egvu, ya abụru onye unu l’a-nmajẹ kwekwekwe l’ẹka ọ nọ. ¹⁴Ọo ya l’a-bụru ẹka e doberu nsọ. A bya lẹ Juda yẹle Ízurẹlu, bụ iya bụ ọzo-ụlo labọ, e nweru lẹ Ízurẹlu bẹ l’ọo-bụru ẹwhuru, l’anọje akpọpyashi whẹ ụkfu, bụkwaruwho ekpekere, whẹ l’e-vukotaje daa gbii. A -byakwanụ l’ẹhu nke ndu Jerúsalẹmu bẹ l’ọo-bụru ọnya yẹle igbudu, l’ee-kweberu whẹ. ¹⁵Igweligwe l’ime whẹ l’a-kpọpyashi iya ụkfu, whẹ adaa gwee onwowhe ryaaryaa. O nokwawho gẹ l’aa-nmata whẹ, bya akpụkoo whẹ.”

¹⁶Unubẹ ndu l’etso ụzo nkemu, t’unu woru ozhi-a chekwaa echekwa, unu akwachia ya akwachi. ¹⁷Onye-Nwe-Ọha woharu iwhu iya ewoha l’ẹka ndibe Jékọpu nọ. Ọle mbẹdua l’a-nọdu kwabẹru iya, mu achịru ẹnya yeru iya.

¹⁸Lee mu gẹ mu nọ l’ẹka-a, mu l’ụnwegirima ono, Onye-Nwe-Ọha chịru nụ mu. Onye-Nwe-Ọha, bụ Onye-ishi-igwe-ọgu, mbụ onye ono, bu ebubu l’ugvu Záyọnu bẹ zhiru anyi t’anyi bya abụru iwhe-awhụrulenya yẹle iwhe-ọhubama lẹ Ízurẹlu.

¹⁹A sụje t’i je njịta l’ẹka ndu l’awhụ awhụ mẹe l’ẹka ndu l’eme amamanshi, mbụ ndu ono, l’anọje awhụ okpurọswa, eze họnyihonyi mẹ whẹ l’agba ẹja. ?Tọ gbechidua bụru Chileke bẹ unu l’ejeje njịta? ?Ọo gụnu meru ọ bụru ndu nwụhuru anwụhu bẹ ndu nọ ndzụ l’ejejechia njịta?

²⁰A bya l’iwu ono yẹle ozhi ono, Onye-Nwe-Ọha zhiru. Ọ -bụru lẹ whẹ te ekfudu akụbe iya; ọo ya bụ lẹ whẹ ta awhụdu iwhoro chi-asahu.

Oge Iwhe-ọtsulanu

²¹Awhụ l’a-tsụru whẹ l’ọnu, ẹgu amyẹe whẹ ụkpazhi-ọnwonu l’ẹka whẹ tsoru alị ono aghawhe bedee. Whẹ dashịlewho mba, ẹhu agbangahụ whẹ agbangahụ. Nteke ono, whẹ apalia ẹnya imeli wata owhu onye eze whẹ iwhu yẹle Chileke whẹ. ²²Whẹ pazeta iwhu l’alị, iwhe whẹ l’a-whụ abụru iwhe ọnuka yẹle ẹkpuroochi mẹe inyoki-inyoki iwhe l’eko ishi ravụu. A bya achịta whẹ nwuru chee lẹ tsụrikiti ẹkpuroochi.

¹Ọle e megee bẹ igweli ta adụhedu ekpukpu ekpukpu l’ẹnya ndu l’eje iwhe-ọtsulanu. Nteke gahawarụ nụ b’e shi mee t’alị Zébulọnu yẹle alị Náfutali lwa alị. Ọle mgbe l’iwhu bẹ l’aa-kwabẹ ndu ono, bu l’ụzo eze-ẹnyimu ùgvù ha shii; mbụ ndu ono bu l’azụ ẹnyimu Jọ́danu azụ iya ọwhu, bụ iya bụ ndu Gálili, bụ ẹka ndu mba ọdo bu.

A nwụru anyi nwata

²Ndu ono, nọ l’ime ẹkpuroochi

bẹ whụakwaru iwhoro, parụ ẹka.

Ndu onona, bu l’alị ono,

gbakọtaru tsụkiriti ono

bẹ iwhoro nwuwaru whoo.

³Ọha ono b’i mewaru, whẹ ha l’igwe.

I mewaru, ẹhu l’atsọ whẹ ụtso.

Whẹ l’ete ẹswa l’iwhu ghu,

g’ọo ndu ẹhu l’atsọ ụtso nke

iwhe whẹ metaru l’okfu whẹ,

g’ọo ndu l’ete ẹswa l’ẹka whẹ

l’eke iwhe whẹ vụtaru l’ụwha.

⁴Ọo g’i meru lwụ-gbua ndu Midiyanu nteke ono,

i lwugbujeru whẹ, bụ g’i meru

mebyishia ivu ẹrwa ono, e shi bo ndibe ghu.

Ọ bụru nno b’i meru nyakwoshia mgbọro-igwe ono,

e shi avụje whẹ l’ukuvu kwalwuu,

yẹle oshi ono, ndu l’akpa whẹ

ẹhu shi egudeje echi whẹ o-chi-gbii.

⁵Akpọkpa ndu ojọgu, gude lwụa ọgu g’ọ ha,

mẹe uwe lile, whẹ gude tekaa mmee ọchi

bẹ l’e-rekota whuruwhuru l’ọku g’ọo mmanụ ụkutuku.

⁶O noo nkele a nwụru anyi nwata,

mbụ l’a nụru anyi nwa nwoke.

Ọo l’ẹka iya bẹ ọchichi l’a-dụ.

Ẹwha, l’aa-nọ eku iya bụ Onye mkpozhi-ụzo, dụ biribiri

yẹle Chileke, bụ Ọkalibe-kakọta-ike,

mẹe Nna-tututu-mịmimi,

mẹe Onye ishi nchị-ọdu-ndoo.

⁷Achịchi ono, l’ọo-nọ achị

mẹe nchị-ọdu-ndoo ono,

l’e-shi iya l’ẹka l’a-nọ aka shii eje eje,

tọ bya l’e-nwe agvụgvu.

Ọo-nọdu l’oshi-eze Dévidi bụru eze l’achị nụ.

Oo-gude ikpe, kfụru nhamụnha

mẹe ọ-dụ-chịriri mee ya t’ọ kfụru jịngu.

Ya emee ya t’o shihu dịngu

watalẹwho nteke ono jeye lẹ gbururu.

Onye-Nwe-Ọha, bụ Onye-ishi-igwe-ọgu

l’e-gude gẹ l’ọowho-be iya l’obu mee t’ọ dụ nno.

Ndu Ízurẹlu l’akpatsu Onye-Nwe-Ọha ẹhu-eghughu

⁸Onye-Nwe-Ọha kfuwaru gẹ l’ọo-dụa mabẹru ọnu-ụlo Jékọpu. Okfu ono tukowaru Ízurẹlu l’ẹhu. ⁹Ízurẹlu l’owhu l’a-marụ iya, mbụ ndu Ífuremu mẹe ndu bu lẹ mkpụkpu Samériya; ndu ono, l’egudeje oku onwowhe eku yẹle etsetse, shi whẹ l’obu sụ: ¹⁰“Ụlo ono, e gude ẹja tụa bẹ zeshihuwaru. Tẹ anyi bya egude ẹwhuru, a kwacharu ree tuwhu iya azụ. Oshi figu ono b’e gbutsushiwaru. Tẹ anyi bya adzaa oshi sida l’ọzori iya.”

¹¹Ọle Onye-Nwe-Ọha bẹ yewaru whẹ onye ọhogu ono, bụ Rezinu gbẹe ya ọkpu-ike t’o je awata whẹ otso l’ẹhenu. O kutsutaru ndu ọhogu whẹ tẹ whẹ byakfuta whẹ. ¹²Ndu Arámu nọduakwa whẹ l’ụzo ẹnyanwu-awata, ndu Fílistiya nọdu whẹ l’ụzo ẹnyanwu-arịba;whẹ jawarụ ọnu boo tẹ whẹ lwee ndu Ízurẹlu wọtokomu. Iwhe lile ono nwụkotaru, ọle Onye-Nwe-Ọha bẹ ẹhu l’eghukwaa gẹ l’ooghu iya l’ẹka Ízurẹlu nọ. Ọ dabẹ whẹ ẹka l’ẹhu g’ọ dabẹru whẹ iya.

¹³Ọle ndu Ízurẹlu ta ghadu umere whẹ lwakfuta Onye-Nwe-Ọha, bụ onye ono, chiru whẹ gbiigbii ono, whẹ ta chọ Onye-Nwe-Ọha ono, bụ Onye-ishi-igwe-ọgu. ¹⁴Ọo ya bụ lẹ Onye-Nwe-Ọha l’a-kọfu ishi ndu Ízurẹlu; kọfu mgbọdzu whẹ; saa whẹ ọsa ẹkfu; nmashịa whẹ g’ọo ẹwu l’akpụru ẹnyanwu lanụ. ¹⁵Ọo ndu bụ ọgurenya mẹe ndu nweru ẹnya bẹ bụ whẹ bụ ishi ọbu. Ndu ọwhu bụ mgbọdzu bụru ndu ono, l’anọje adzụ ejire sụ lẹ whẹ bụ ndu l’ekfuchiru Chileke. ¹⁶Ndu l’edu ndu Ízurẹlu duwhuwaru whẹ eduwhu. Whẹbe ndu ọbu l’eedu edu b’e duwhuwaru. ¹⁷Ọo ya bụ lẹ Onye-Nwe-Ọha bẹ ẹhu l’ẹte atsọdu ụtso l’ẹka ụnwu-okorọbya alị ono nọ. Ọ tọ byadụ l’e-mekwaduru ndu nna whẹ l’ẹte anọhee mẹe ụnwu-mbunu obu-imiko ọdo. Nkele whẹ bụkota ndu l’ete eme ele Chileke, bụru ndu ejo-iwhe tsụru ẹkpa l’ẹhu. Whẹ l’egudeje ọnu ekfu okfu, l’abẹe l’iwhe. Iwhe lile ono l’a-nwụkota, ọle Onye-Nwe-Ọha ta abyadụ l’e-wofu ẹhu-eghughu iya l’ẹka ndu Ízurẹlu nọ. Ẹka iya l’a-dabẹlewho l’ẹhu whẹ g’ọ dabẹru iya.

¹⁸Ejo-iwhe, whẹ l’eme l’enwu whuruwhuru gọo ọku, ekepyashi ogvu l’uke. Ọota wọwowo g’ọo ọku l’adzụ ẹtsukala, ẹnwuru iya kpọchibe ala l’imeli imeli. ¹⁹Onye-Nwe-Ọha, bụ Onye-ishi-igwe-ọgu l’e-gude oke ẹhu-eghughu iya nmaswọshịa alị ono anmaswọshị. Ndu Ízurẹlu l’a-bụru mmanụ-ọku, l’aa-nọ ekpu l’ọku ono t’o bulihuje ebulihu. Ọ tọ dụdu onye l’adzọ ibe iya. ²⁰Whẹ l’e-gbu l’ụzo ẹka-ụtara ria, ẹgu amyẹle whẹ-ẹ ụkpazhi-ọnwonu. Whẹ abya egbuta l’ụzo ẹka-ịcha ria, ọhu ẹwho emele whẹ-e. Whẹ l’e-rigee ria anụ ụnwegirima whẹ. ²¹Ndu Manáse l’a-nọ eri anụ ndu Ífuremu. Ndu Ífuremu eri nke ndu Manáse. Ndu labọ ono atụko ripyabe ndu Juda. Iwhe lile ono l’a-nwụkota, ọle Onye-Nwe-Ọha ta abyadụ l’e-wofu ẹhu-eghughu iya l’ẹka ndu Ízurẹlu nọ. Ẹka iya l’a-dabẹlewho l’ẹhu whẹ g’ọ dabẹru iya.

¹Nshọ unubẹ ndu bụlewho iwu, l’ẹte akfụaru nhamụnha bẹ unu l’anọje atụ, mbụ unubẹ ndu l’edeje ẹkwo degude madzụ ibe unu. ²Unu l’anafụje ndu l’adụa g’ọ harụ whẹ iswi ọdu mma, rwuberu whẹ, unu l’anafụje ndibe Chileke, bụ ndu ọwhu ẹnya lwarụ alị iwhe rwuberu whẹ nụ. Unu l’anọje akpa ụnwu-mbunu abọ l’ẹhu, ana ndu nna whẹ l’ẹte anọhee iwhe whẹ l’ike. ³?Unu l’e-me gụnu m’o -rwua mbọku, Chileke l’a-nụ unu kpakụduu, mbụ mbọku kpurupyata l’e-shi otẹnya byakfuta unu? ?Ọo onye bẹ unu l’a-gbakfu t’ọ dzọo unu? ?Ọo awe bẹ unu l’a-chịru ẹku unu dobe? ⁴Ọ tọ dụkwa iwhe l’a-whọdu awhọdu. Aa-kpụ unu lẹ ndzụ lọo unu wuruwuru, ọdua e gbua unu egbu. Iwhe lile ono l’a-nwụkota, ọle Onye-Nwe-Ọha ta abyadụ l’e-wofu ẹhu-eghughu iya l’ẹka unu nọ. Ẹka iya l’adabẹlewho l’ẹhu unu g’ọ dabẹru iya.

Ikpe Chileke dụ l’ẹhu ndu Asiriya

⁵“Áwhụ tsọokwaru gụbe Asiriya, mbụ gụbe mba ono, bụ mgbọro, mu l’egudeje egoshi ẹhu-eghughu mu. Mkpụru oke ẹhu-eghughu mu bụ ghu b’ọ dụ l’ẹka. ⁶Mu yeru Asiriya t’o je anụa mba, l’ẹte amaa mụbe Chileke awhụ. Mu zhiru iya t’ọ bakfu mba ono, l’akpatsuje mu ẹhu-eghughu ọgu, nke ọwhu l’ọo-vụ arya whẹ avụ, gwokoo ẹku whẹ. Ya ehua whẹ dụruru l’alị, nmaa whẹ agbịdigba g’ọo ẹpoto, dụ l’echi-ụzo.”

⁷Ọle ọ tọ dụ iwhe ono b’ọ gbarụ ẹnya iya. Tọ bụ iya b’ọ rịru l’ọriri. Iwhe ọ tụberu bụ tẹ ya laa iwhe l’iyi, mee ikpoto mba t’o chihu. ⁸Ọonoduje ekebashi sụ: “?Ọ kwarọ lẹ ndu ishi ojọgu mu l’owhu bụkota eze l’ẹhu l’ẹhu? ⁹Ọo gẹ mu larụ mkpụkpu Kaluno l’iyi bụ gẹ mu larụ iya mkpụkpu Kakemishi. Ọ bụru nno bẹ mu larụ iya mkpụkpu Hámatu, mẹe mkpụkpu Arapadụ, mẹe mkpụkpu Samériya, mẹkwawho mkpụkpu Damásukọsu. ¹⁰Ẹka mu kpakọtaro alị-eze ndu ono, l’agwashị agwa ike ono, mbụ alị-eze ndu ono, ntẹkpe nkewhe ka ọwhu dụ lẹ Jerúsalẹmu yẹle Samériya nkajishi. ¹¹Ọ gabụroo Jerúsalẹmu yẹle agwa, dụ iya nụ bẹ mu l’ẹte anụ-chidua áwhụ ẹgube ono, mu nụru Samériya yẹle ntẹkpe, dụ iya nụ?”

¹²Onye-Nwe-Ọha -rwụ-gelewho ọrwu, o gude l’ẹka arwụ l’ugvu Záyọnu yẹle Jerúsalẹmu bẹ l’ọo-hụ̀ eze ndu Asiriya àhụ̀hù l’obu ono, l’enyi iya kiti kiti ono mẹe l’ekuku ono, l’ooku onwiya.

¹³“Nkele ọ sụru: ‘Ọo ike ọkpu mu bẹ mu gude mekota iwhe ono g’ọ ha. Ọo mmamagụ nkemu bẹ mu gude mee ya, nkele mu bụ onye iwhe l’edoje ẹnya. Oge-alị mba l’ibe iya bẹ mu kpachishiwaru. Mu vụa ẹku whẹ avụ, hua ndu bu iya nụ dụruru l’alị goshi whẹ lẹ mu bụ mkparawa nwoke. ¹⁴Ọo gẹ l’aachịtaje ẹkfunu ẹnu bụ gẹ mu gude ẹka chịta ẹku mba gẹ mba ha. Ọ bụru gẹ l’aachịtaje ẹkwa ẹnu harụ, bụ gẹ mu chịtaru mgboko l’owhu chịkobe. Tọ dụ onye jịru mu akwẹka pulapula; tọ dụ onye gvuru mu ọnu l’ẹhu; tọ dụ onye ryarụ mu deshi.’ ”

¹⁵Ọle Onye-Nwe-Ọha l’ekfu sụ: “?O nweru g’ogbunkụ l’e-shi halia onwiya ghata onye gude iya awa nkụ? ?T’o nweru gẹ mma, l’eegudeje ekwo oshi l’e-shi wata oku onwiya eku l’ẹka onye gude iya ekwo oshi nọ? Tọ dụdu gẹ-woo lẹ mgbọro l’a-dụ ike ngalia onye l’apa iya, m’ọo lẹ mkpụru l’a-nọnyaa kpụkwaa onwiya ghọo iwhe ọdo, l’abụa oshi.”

¹⁶Ọo ya bụ lẹ Onye-ukfu-l’ọha, mbụ Onye-Nwe-Ọha ono, bụ Onye-ishi-igwe-ọgu l’a-chịru ejo ẹhu-ba-dụ-mma, l’amịje madzụ mini l’ẹhu yeru ndu ono, bụ ọbolo. Ọo-kparu ọku chee whẹ l’ẹhu whẹ ono dụ ugvu, whẹ enwua whuruwhuru. ¹⁷Chileke, bụ iwhoro nke ndu Ízurẹlu l’a-bụru ọku, mbụ l’onye nsọ nke Ízurẹlu l’a-bụru o-nwu-whowhowho. Oo-nwu kekota iwhe lile je akpaa l’ogvu l’uke, dụ l’alị ono l’akpụru ẹnyanwu lanụ. ¹⁸Ọswa iya ono, dụ ugvu yẹle alị iya ono, dụ ree nke ẹtu bẹ Onye-Nwe-Ọha l’e-mebyishikota, ya anwụa pyalaa g’ọo onye ejo ẹhu gburu. ¹⁹Ọswa ono bẹ oshi l’a-whọdu iya nụ l’a-habelewho nwa ahabe, nke ọwhu bụ lẹ nwatanshịi l’a-dụ ike dee ole, whẹ dụ l’ẹkwo.

²⁰O rwulewho nteke ono bẹ ndu l’a-whọdu lẹ ndu Ízurẹlu, mbụ ndu l’a-wafụ l’ọzo-ụlo Jékọpu l’a-kpọfu obu whẹ l’ẹka ndu ono, l’anọje echi whẹ gbiigbii ono nọ. Onye whẹ l’a-kpọ-chiaru obu yeru bụ Onye-Nwe-Ọha, mbụ Onye nsọ nke Ízurẹlu. Whẹ l’e-gude ire-lanụ kpọru obu ono yeru iya. ²¹Nwa ndu ono, whọduru lẹ ndu Ízurẹlu l’e-bekochaa lwawhu azụ, mbụ lẹ ndu ono, whọduru l’ọzo-ụlo Jékọpu l’a-lwakfuta Ọkalibe-kakọta-ike, bụ Chileke. ²²Sụa, a amakwarụ-a l’unubẹ ndu Ízurẹlu bẹ kụru g’ọo ẹja, dụ l’ogbigbo ẹnyimu. Ọle ọ kwa nwa ndu ọwhu l’ẹte abaa nwishi l’e-bekoo lwa l’ime unu. A kụwaru ọla-l’iswi doberu unu. Iwhe ono bụru iwhe gbarụ nụ. ²³Ọ kwa Nnajị-Ọha, mbụ Chileke, bụ Onye-ishi-igwe-ọgu l’e-gude ẹka iya wobata ọla-l’iswi l’alị ono kpaa-whuu, ẹgube o kfuhawaru l’oo-me iya.

Gẹ Onye-Nwe-Ọha l’e-shi nụa ndu Asiriya awhụ

²⁴Ọo ya bụ l’ọ waa iwhe Nnajị-Ọha, bụ Onye-Nwe-Ọha, bụ Onye-ishi-igwe-ọgu l’ekfu ndọwa: “Unubẹ ndibe mu ono, bu l’ugvu Záyọnu, unu ba atsụkwa ndu Asiriya egvu, mbụ ndu ono, l’anọje echi unu mgbọro. Mbụ ndu ono, l’ahalije mkpụru ebyiru unu gẹ ndu Íjiputu shi anọje ebyiru iya unu kwalwuu. ²⁵A ta nọhekwa ọdu ntaa, ẹhu-eghughu mu abụru bugemu l’ẹhu unu. Mu avọru ọku ghụa ẹhu l’ẹka whẹbedua nọ laa whẹ l’iyi.” ²⁶Onye-Nwe-Ọha, bụ Onye-ishi-igwe-ọgu l’e-gude ẹchachi myẹe whẹ igele ẹgube ono, ọ dụru ndu Midiyanu l’ẹwhuru Orẹbu nteke ono, o chigbushiru whẹ. Mgbọro iya bẹ l’ọo-hali ẹka byia whẹ gbaa ẹgube ono, ọ haliru iya byia l’ẹnyimu gude mee ndu Íjiputu ívú l’ẹhu. ²⁷Ọo mbọku ono bẹ l’ee-zhi unu ivu ono, whẹ tukoberu unu l’ukuvu. A nyafụta unu odogoro ono, whẹ nyabẹru unu l’olu. Odogoro ono l’a-tsụ-bushihu unu atsụ-bushihu l’ẹhu, nkele unu hawaa bọliboli.

Gẹ ndu Asiriya l’e-gude zebata

²⁸Ndu ọhogu ono bahụakwaru lẹ mkpụkpu Ayatu; whẹ ghatawaru mkpụkpu Migurọnu. Ọ bụru lẹ mkpụkpu Mikumashi bẹ whẹ je akụbe ivu whẹ. ²⁹Whẹ ghatawaru n-whakata ugvu asụje: “Ẹka anyi l’a-radụ l’ẹnyashi-a bụ lẹ mkpụkpu Geba.” Ndu mkpụkpu Rema bẹ ẹhu l’anmakọta kwekwekwe. Ndu mkpụkpu Gibyiya, bụ ẹka Sọlu shi buru yewa ọkpa l’ọso gbalaa. ³⁰Unu tụa mkpu, unubẹ ndu mkpụkpu Galimu! Unu ngabẹ nchị, unubẹ ndu mkpụkpu Layisha! Kaa unubẹ ndu mkpụkpu Anatotu! ³¹Ndu mkpụkpu Madumena bẹ vụru ọkpa whẹ mini. Ndu bu lẹ Gebimu l’agba ọso ndzụ whẹ. ³²Ntanụ ọwa bẹ ndu ọhogu ono l’e-jeta kfụshi lẹ mkpụkpu Nobu. Whẹ l’a-kfụkfube ẹka maarụ ugvu Záyọnu, bụ iya bụ mkpụkpu Jerúsalẹmu sụ iya t’ọ bya tẹ whẹ l’iya mee.

³³Lee lẹ Onye-ukfu-l’ọha, mbụ Onye-Nwe-Ọha, bụ Onye-ishi-igwe-ọgu l’e-gude ọkpehu, parụ ẹka lọkwafu ẹkali-oshi ono. Oshi ono, tsefuru etsefu bẹ l’ee-gbutsu egbutsu. Onona, tseru rigorigo bẹ l’ee-nwutsu enwutsu. ³⁴Ẹtsukala ono, dụ l’ọswa ono bẹ l’oo-gude ogbunkụ sụkaa. Oke ọswa ono, dụ l’ugvu ugvu Libanọnu abụru wuu l’iwhu onye ono, bụ Onye-ishi-igwe-ọgu.

Ẹkali Jesi

¹Ukfu oshi ono, bụ Jesi l’a-gba irwu.

Ẹkali eshi l’ọgbaragbu iya nyịkata.

²Ume Onye-Nwe-Ọha l’a-dụ iya l’ẹhu,

mbụ Ume, l’emeje t’a marụ ágụ,

bụru Ume, l’emeje t’ẹnya rwua l’iwhe,

mbụ Ume mgbazhi;

bụkwaruwho Ume, l’emeje t’ike dụ;

Ume, l’emeje t’a marụ iwhe,

bụru Ume, l’emeje t’a tsụ Onye-Nwe-Ọha egvu.

³Iwhe l’a-bụ ẹhu iya bụ t’a tsụje egvu Onye-Nwe-Ọha.

Ọ tọ bụkwa iwhe ọ whụru

l’ẹnya bẹ l’oo-gude kpee ikpe,

tọ bụ iwhe ọ nụru lẹ nchị bẹ l’oo-gude bua ikpe.

⁴Ndu l’adụa g’ọ harụ whẹ bẹ

l’oo-kpe ikpe l’ụzo, dụ chịriri,

kpee ndu ụkpa nke mgboko-o ikpe-nkfụmoto.

Ndu mgboko bẹ l’oo-gude

mgbọro, dụ iya l’ọnu chia whukuwhuku.

Ya egude uwhere ọnu iya gbua ejo-madzụ ono.

⁵Ọ-dụ-chịriri bẹ l’oo-ke g’ọo onye keru ajị l’ukfu.

Ọkfushi ike, l’iwhe o kfuru

abụru iwhe o gude ekebuta uwe iya.

⁶Ejo-nkụta-ọswa bẹ yẹle ụnwu atụru l’e-bu ẹghirigha.

Agụ yẹle eghu adọgbabe l’ẹka lanụ.

Nwa eswi mẹe nwa oduu mẹe anụ,

ẹ̀bà dụ atụko akpa ẹghirigha.

Ya abụru nwata nshịi l’a-nọ eche whẹ.

⁷Ne-eswi yẹle ejo-nkụta-ọswa l’a-nọdu ata nri ẹghirigha.

Ụnwu whẹ atụko adọ l’ẹka lanụ.

Oduu ata ẹwu g’ọo oke-eswi.

⁸Nwa l’angụ ẹra l’a-nọduje lẹ

mgboro ẹka óghù tụru ẹnu egvu egvu.

Nwata a nafụwaru ọnu l’ẹra atsẹjee ẹka l’ẹnu oguji-nwaka.

⁹Iwhe lile ono ta adụdu ọwhu bya l’e-meka madzụ iwhe,

t’ọ dụro ọwhu l’e-gbu madzụ egbu l’ugvu e doberu mu nsọ,

nkele ọo gẹ mini jiru ẹnyimu pyịmu bụ g’eliwhe l’owhu

l’a-makọtaru Onye-Nwe-Ọha.

Alwalwa ndu a kpụru lẹ ndzụ

¹⁰Nteke ono bẹ ẹpa Jesi l’a-gbalihu bụru ẹkwa-ọhubama nke mba gẹ mba ha. Ndu mba ọdo achikfu iya achikfu; tẹmenu ọkpoku iya egbu zaazaa l’ẹnya. ¹¹O -rwua nteke ono bẹ Onye-Nwe-Ọha l’a-tụfu ẹka iya nke ugbo labọ dufuta ndibe iya ono, bụ ndu whọduru l’alị ndu Asiriya mẹe l’alị ndu Íjiputu mẹe l’alị ndu Paturọsu mẹe l’alị ndu Itiyópiya mẹe l’alị ndu Ílamu mẹe l’alị ndu Shịna mẹe lẹ mkpụkpu Hámatu mẹe lẹ mkpụkpu ono, nọ-gee lẹ mgboro eze-ẹnyimu mẹe ndu ọwhu bu l’ẹka ẹnyimu gbawheru whẹ mgburumgburu. ¹²Onye-Nwe-Ọha l’e-doberu mba gẹ mba ha ẹkwa-ọhubama; gude goshi lẹ ya bya l’akpakodzu ndu Ízurẹlu ono, e shi chịkashia achịkashi mẹe lẹ ya bya l’eshi lẹ mgburẹku ẹno nke eliwhe chịkobe ndu Juda ono, shi gbakashịhu agbakashịhu. ¹³Okoowhoo ono, ndu Ífuremu l’eko l’e-koshihu g’ọo udzu. Ndu l’etso ndu Juda ẹhenu bẹ l’ee-me tẹ whẹ tọhu. Ífuremu l’e-kobuhuru Juda okoowhoo; Juda etsobuhu Ífuremu ẹhenu. ¹⁴Whẹ l’a-tụgba zhiru whaa je avụkushi iya ndu Fílistiya l’ụzo ẹnyanwu-arịba. Whẹ atụgba je akwa ndu bu l’ụzo ẹnyanwu-awata ọkwata. Whẹ atụfu ẹka daa ndu Edọmu mẹe ndu Moabu l’ẹhu. Ndu Amọnu awata ome iwhe whẹ kfuru. ¹⁵Onye-Nwe-Ọha l’e-me tẹ mini, dụ l’oke ósé ono nọkahuru ẹnyimu Íjiputu tahụkota kpamụ. Ya egude whẹrewhere, l’ekpo wharawhara bya ewhe ẹka l’eli ẹnyimu Yufurétisu, mee ya t’ọ kfụkata ọnu-iyi ẹsaa, nke ọwhu ndiwhe l’e-gude ọkpa ghajaa ya dafụta azụ iya ọwa. ¹⁶E shi l’alị ndu Asiriya kpaa oji, l’adaburu whorokoto, ndibe iya, bụ ndu whọduru nụ, l’e-shi lwa; ẹgube ono, a kparụ iya ndu Ízurẹlu nteke ono, whẹ shi l’alị Íjiputu alwa.

Egvu ekele

¹Sụa, mbọku ono bẹ l’ịi-sụ:

“Mu l’a-ja ghu ajaja gụbe Onye-Nwe-Ọha.

Ẹhu shi eghu ghu eghu l’ẹka mu nọ,

ọle ntaa bẹ ẹhu-eghughu ono dabọtawaru.

Ọ bụru obu bẹ l’ịidu mu.

²Leenu, ọ kwa iya bụ Chileke l’adzọje mu nụ.

Mu l’e-nweru ekweta, egvu ta tsụdu mu,

nkele ọo Nnajị-Ọha, bụ Onye-Nwe-Ọha bụ agbarike mu,

bụru iya bụ olu egvu mu.

Ọo ya shi eshi ono dzọta mu.

³Ọo ẹhu-ụtso bẹ l’ii-gude kuta mini lẹ wẹlu ndzọta.”

⁴Mbọku ono bẹ l’ii-kfu sụ:

“Unu jaa Onye-Nwe-Ọha ajaja, unu kpokua ẹwha iya.

Unu mee tẹ mba nọnu makọtaru iwhe l’oomegbabe.

Unu arya ya aryarya l’ẹwha iya parụ ẹka.

⁵Unu gụa egvu nụ Onye-Nwe-Ọha,

nkele iwhe o megbaberu nyịberu anyịbe.

Unu mekwaa tẹ mgboko l’owhu

makọtaru iwhe ọbu, o megbaberu.

⁶Unubẹ ndu bu l’ugvu Záyọnu, unu tụa ụzu ẹhu-ụtso,

nkele onye Nsọ nke Ízurẹlu parụ ẹka l’echilabọ unu.”

Okfu ẹhu ndu Bábyilọnu

¹Ọ waa okfu, Chileke kfuru l’ishi ndu Bábyilọnu. O kfuru iya nụ Ayizáya nwa Émọzu.

²Nọdu l’elikoro ugvu ono, daburu whochangu wolia ẹkwa-ọhubama l’agba ama l’ọgu l’eje abya. Gụ echiaru ndu ojọgu mkpu. Wheeru whẹ ẹka tẹ whẹ shia ọnu ẹka l’eeshije abahụ lẹ mkpụkpu ndu a marụ ẹwha whẹ bahụ. ³Mbẹdua, bụ Onye-Nwe-Ọha bẹ tụwaru iwu l’onwomu nụ ndibe mu, bụ ndu ono, mu doberu nsọ. Mu chịkobewaru ndu ojọgu mu tẹ whẹ je egoshi l’ẹhu l’eghu mu eghu, mbụ ndu ojọgu mu ono, ẹhu l’anọje atsọ ụtso lẹ mu ha shii.

⁴Gbebedawho nchị l’ụzu whọ, l’aatụ l’eli ugvu. Ọo ikpoto madzụ l’atụ ụzu ono. Gbebedawho nchị lẹ wọwowo whọ, ọhamoha l’atụ. Ọo ọhamoha, l’eme ndzuko l’atụ wọwowo ono. Ọ kwa Onye-Nwe-Ọha, bụ Onye-ishi-igwe-ọgu l’agbazhi ndu ojọgu iya nke ọgu. ⁵Whẹ shi otẹnya abya, mbụ l’ẹka igwe beru alị beru. Onye-Nwe-Ọha bẹ yẹle ndu bụ ngwọgu, o gude egoshi l’ẹhu l’eghu iya eghu l’abya tẹ whẹ mee alị ono l’owhu t’ọ bụru kpukpuru-swoo.

⁶Ryaa ẹkwa ryashịa ya ike, nkele mbọku nke Onye-Nwe-Ọha tẹwaru l’ụkfu! Mbọku ono bẹ Ọkalibe-Kakọta-Ike l’a-la iwhe l’iyi. ⁷Ọo ya meru, ẹka je l’a-kụda onyenọnu akụda. Obu edudehu onyenọnu edudehu. ⁸Egvu l’e-gudeshi whẹ; eze ẹhu-ụwhu yẹle oke-áwhụ abya azụ whẹ gidimu. Iwhe-ọtsulanu l’a-byarụ whẹ g’ọo nwanyị ime l’eme. Onyenọnu adụ-gee ibe iya biribiri. Iwhu adụ whẹ ọnwu ọnwu. ⁹Leenu lẹ mbọku nke Onye-Nwe-Ọha l’abyaakwa. Mbọku ono l’e-gude ome-l’iwe mẹe oke ẹhu-eghughu bya eme tẹ mgboko l’owhu bụru ochuwhu mẹe tẹ ndu l’eme iwhe-dụ-ẹji l’ime iya bụru kpurupyata. ¹⁰Kpokponde, dụ l’igwe g’ọ ha l’e-kebuhu zhịizhii. Ẹnyanwu agbakọta ọchi l’awata iya. Ọnwa echibuhu echi.

¹¹Mu l’a-nụ eliwhe l’owhu áwhụ ejo-iwhe, dụ iya nụ. Mu anụa ndu l’eme ejo-iwhe áwhụ iwhe-dụ-ẹji, whẹ l’eme. Mu emee tẹ ndu l’etse etsetse kubuhu onwowhe eku, mu akpụa ekuku ndu mgbashị l’eku onwowhe wuruwuru l’alị. ¹²Mu l’e-me tẹ madzụ dụ ụko l’ẹnya karụ ọkpobe mkpọla-ododo. Mbụ lẹ madzụ-igbalekọma l’a-dụ ụko karụ mkpọla-ododo alị Ofi. ¹³Mu l’e-me t’igwe l’owhu nmawokota anmawo. Eliwhe anmakọta jijiji gbụfu l’ukfu iya nteke ono, Onye-Nwe-Ọha, bụ Onye-ishi-igwe-ọgu l’e-goshi l’oke ẹhu-eghughu dụ iya l’ẹhu, bụ iya bụ mbọku ono, ẹhu-eghughu iya l’a-ta chịchichi.

¹⁴Ọ bụru gẹ mgbada, l’aachị ọso l’agbajẹ mẹe gẹ atụru, l’ete enwe onye l’eche iya nụ l’agbakashịhuje bụ g’onyenọnu l’a-nọ agba agbakfu ndibe whẹ. Onyenọnu avụta ọso agba ala ẹka a nwụru iya. ¹⁵Onye a whụru bẹ l’aa-nmafu ẹwho. Onye ẹka kparụ bẹ l’ee-gude ogu-ịgba gbua. ¹⁶Ụnwegirima whẹ bẹ l’aa-nọdu l’iwhu whẹ bọo anụ whẹ abọbo bọo ya nwịrinwiri, a vụa arya ụlo whẹ avụvu, whaa unyomu whẹ kutukutu.

¹⁷Leenu, ọ kwa ndu Midiya bẹ mu l’a-kutsuta tẹ whẹ jekfu Bábyilọnu ọgu. Mbụ ndu l’ẹte akpa ishi mkpọla-ọcha; whẹ te eye ẹnya lẹ mkpọla-ododo. ¹⁸Whẹ l’e-gude akfụ gbagbushia unwokorọbya ndu Bábyilọnu ono. Ụnwu whẹ, e he l’ẹka bẹ whẹ ta whụduru imiko. Whẹ ta abya l’emeta ụnwegirima whẹ iwhe ghaa ẹnya l’azụ. ¹⁹Bábyilọnu bụ ọ-dụ-ugvu alị-eze l’owhu. Ọ ya bụ iwhe ndu alị ono gude dụ ugvu, bụru iya bẹ whẹ gude eku onwowhe. Ọle Chileke l’e-mee t’ọ bụru kpukpuru-swoo g’o meru iya Sódomu yẹle Gọmóra. ²⁰A ta abyadụ l’e-bu iya ebu ọdo. E shi l’ọgbo rwua l’ọgbo ta adụdu onye bya l’e-buru l’ime iya ọdo. Ndu Arabu ta abya l’a-kpọbe iya ụlo-ẹkwa. Ndu l’eche atụru ta abya l’a-ha atụru whẹ t’ọ dọkobe l’ẹka ono. ²¹Iwhe l’e-bu l’ẹka ono bụ anụ-ẹgbudu. Mkpọkoro-ụlo whẹ bụ nkụta-ọswa l’eji iya. Udukufuku akwaa ya okpu buru. Eghu-ọswa akpọ iya ẹnwuda l’ime. ²²Achị-anmabu l’a-nọduje l’okorobo ụlo whẹ ebe kororo. Nkụta-ọswa anọdu l’ẹguru ụlo whẹ aba hanyị hanyị. Nteke l’aa-nụ Bábyilọnu awhụ dụakwa ntse. Ọ tọo nọhedu ọdu a nụa whẹ áwhụ ọbu.

Alwalwa ndu a kpụru lẹ ndzụ

¹Onye-Nwe-Ọha l’e-megee whụaru ẹpa Jékọpu imiko. Oo-megee họta-whu Ízurẹlu azụ, mee tẹ whẹ bya eburu l’alị whẹ ọdo. Ndu lwarụ alwa l’a-byakfuta whẹ tẹ whẹ gbarụ mgba buru. Whẹ l’ọnu-ụlo Jékọpu atụgba bụru ndu lanụ. ²Mba gẹ mba ha l’e-duta ndu Ízurẹlu dulata l’alị ono, bụ alị nke ẹka whẹ. Mba gẹ mba ha ono ejelahaaru ndu Ízurẹlu ozhi l’alị ono, Onye-Nwe-Ọha nụru whẹ, mbụ nwoke mẹe nwanyị. Ndu shi kpụa whẹ lẹ ndzụ bẹ ndu Ízurẹlu l’a-gha rii kpụa lẹ ndzụ, whẹ abụru ishi, chịlahaa ndu shi akpa whẹ ẹhu.

Adada eze ndu Bábyilọnu

³Onye-Nwe-Ọha l’e-me t’unubẹ ndu Ízurẹlu tukfuru ume l’awhụ ono, byarụ unu mẹe l’iwhe-ọtsulanu ono, unu l’ejegbabe mẹe l’ozhi mkpọnwehu ono, e dzuberu unu. ⁴Nteke ono bẹ unu l’e-kfudeshi eze ndu Bábyilọnu ẹhu sụ: Onye-e, bụ onye ejo obu-a bẹ waa onye nkiya gvụru! Ọnuma iya bẹ gvụwaru nụ! ⁵Ndu ono, nwe obu mgbashị bẹ Onye-Nwe-Ọha nyajishiwaru mgbọro-igwe whẹ. Ọ nyakwoshiwaru oshi ndu ono, l’achị l’ẹka ike l’apajẹ, ⁶mbụ ndu ono, l’egudeje ẹhu-eghughu echi madzụ gbigbigbi. Whẹ te echinyajedua iwhe l’eechi echi dobe ẹka ndoo. Whẹ l’egudeje iwe achị mba, whẹ lwụtaru l’ọgu nchị-gbu; ọchichi nchị-gbu ta agvụje whẹ agvụ l’ẹhu. ⁷Meji nmakfuwaru eliwhe l’owhu ntaa; nchị dụwa whẹ doo. Egvu ẹhu-ụtso l’afụshikawaa whẹ l’ọnu. ⁸Oshi payịnu yẹle oshi sida, dụ l’ugvu ugvu Libanọnu bẹ l’atụwa okoo ekpu gụbe eze ono, bụ onye darụ ada asụje: “Eshi-ọwhu e mewaru ị lwaa alị bẹ l’ọoto dụdua onye l’e-gbutsukwadu anyi.”

⁹Alị-maa bẹ kwagebewaru akwagebe t’ọ gbata gụbe eze ndu Bábyilọnu ndzuta. O yefuwaru ụnwu-maa tẹ whẹ bya ghu eduta, bụ iya bụ maa ndu ono, shi bụru ishi l’eliwhe l’owhu. Maa ndu ono, shi bụru eze, l’achị mba gẹ mba ha b’ọ chilishiwaru l’oshi-eze whẹ. ¹⁰Ụnwu-maa ono gẹ whẹ ha l’a-bya eripyabe ghu sụ: “Ike gvụanaru ghu g’ọ gvụru anyịbedua; ị dụana g’anyi dụ?” ¹¹Oke-amadụ ono, i shi bụru yẹle egvu ono, e shi egudeje une akpọ etso ghu l’azụ bẹ bụwa iwhe e nwukotaru ye l’alị-maa. Ikpiri-ẹhonwu bụwaru ugbooshi, ị zẹe azẹe. Mgbashiride rikputawa ghu ẹhu atsụ ghu whanyịwhanyi.

¹²Lewaro g’i shi l’imigwe bya abụru gbii l’alị, gụbe kpokponde mbọ-muchi, mbụ gụbe nwatibe ọnma-ẹwa-ụtsu! A tụfuwaru ghu ị bụru gbii l’eli mgboko, mbụ gụbe onye ono, shi lwụta mba l’owhu! ¹³L’ime obu ghu b’i kfuru sụ: “Mu l’e-kuli onwomu kuba l’imigwe. Mu l’a-pali oshi-eze ghu imeli t’ọ kakọta kpokponde Chileke l’eli. Mu l’e-je adụ-goru l’eli ugvu ndzuko ono, dụ l’ụzo isheli. ¹⁴Akpamigwe l’owhu bẹ mu l’e-nyighakota enyigha je anọdu. Mu l’e-mee onwomu tẹ mu haa g’ọo Ọkalibe-Kangokotaru-Nu.” ¹⁵Ọle a gbẹenu kwarụ ghu kwadarwua alị-maa, mbụ l’akwawaru ghu kwaba lẹ wurukutu iduma maa.

¹⁶Ndu whụru ghu nụ l’a-wata ghu obu ẹnya l’iwhu whẹ elelahaa ghu hango hango sụ: “?Tọ nụa onye-e bẹ meru mgboko ọ nmakọta jijiji; mbụ onye-e, bụ iya nmaworu alị-eze l’owhu anmawo? ¹⁷?Tọ nụ iya-a bụ onye meru mgboko l’owhu ọ dụ g’ọo echi-ẹgu; mbụ onye-e meru mkpụkpu, dụkota lẹ mgboko ọ bụru kpukpuru-swoo; ndu ọ kpụru lẹ ndzụ bẹ l’ọoto nọnyajekwa haa tẹ whẹ lashia ibe whẹ?”

¹⁸Iwhe bụ ndu eze, shi achị mba gẹ mba ha b’e likotaru l’ụzo, dụ biribiri. Onyenọnu zẹe l’ilu nkiya. ¹⁹Ọle gụbedua b’e tuwharu etuwha g’ọo ẹkali oshi l’adụa iwhe e gude iya eme, t’e li ghu eli. Ọ bụru odzu ndu e gburu egbu b’a tụpyaberu ghu l’eli, mbụ ndu e gude ogu-ịgba nmagbushia, unu bụru wutukungu l’ẹwhuru alị-maa. Ọo gẹ l’eetuwhaje odzu, onye e gburu l’ọgu; gude ọkpa hua ya dụruru; bụ gẹ l’ee-hu gụbedua. ²⁰E tee elidu ghu g’e liru ndu eze ọdo, nkele ị tụkowaru alị unu mebyishikota; gbushia ndibe unu. Eri unubẹ ndu ejo-iwhe bẹ l’ẹte abyakwa l’e-who ẹwha ọdo. ²¹T’e dozhia ẹka l’aa-nọdu gbushia ụnwegirima onye ejo-iwhe ono l’iswi iwhe-dụ-ẹji ono, onye ichee whẹ megbaberu. Whẹ ta abyadụ l’a-fụta chịa mgboko ọdo, whẹ ta abya l’emeta ndu l’a-bụ mkpụkpu onwowhe l’eliwhe ọdo.

Onye-Nwe-Ọha l’e-mebyi alị ndu Bábyilọnu

²²Lẹ Onye-Nwe-Ọha, bụ Onye-ishi-igwe-ọgu bẹ sụkwaru agha: “Mu l’e-zhikfuru Bábyilọnu ọgu, mee t’ẹwha iya chihu. Ndu whuduru iya nụ mẹe o-shi-l’ẹpa ndu Bábyilọnu yẹle ụnwegirima whẹ ta awhọdudu m’ọo onye lanụ.” ²³“Alị ono g’ọ ha bẹ mu l’e-me t’ọ bụru ẹka ebyi kwarụ okpu buru. Mu l’e-me iya t’ọ bụru alị ụda. Mu egude ọzara-l’ukpo zaa ya l’ẹza.” O nokwa iwhe Onye-Nwe-Ọha, bụ Onye-ishi-igwe-ọgu l’ekfu ndono.

Onye-Nwe-Ọha l’e-mebyi Asiriya

²⁴Onye-Nwe-Ọha, bụ Onye-ishi-igwe-ọgu ribuwaru iya lẹ nte kfua sụ: “Hoo haa, ọo gẹ mu tụberu t’iwhe dụ bụ gẹ l’ọo-dụ. Ọ bụru iwhe mu chịru dobe bẹ l’e-me. ²⁵Ndu Asiriya bẹ mu l’e-gwe kụta, mbụ ndu Asiriya ono, nọ l’alị mu ono. Mu l’e-hu whẹ dụruru l’ugvu nkemu, shi nno nyafụ ndibe mu odogoro ono, whẹ nyabẹru whẹ, zhia whẹ ivu-ẹrwa ono, whẹ tukoberu whẹ l’ukuvu.” ²⁶O noo gẹ mu chịru idzu iya l’ọo-dụru mgboko kpaa-whuu ndono. O noo ẹka mu l’a-dabẹ mba gẹ mba ha l’ẹhu ndono. ²⁷Eshi-ọwhu ọ bụ Onye-Nwe-Ọha, bụ Onye-ishi-igwe-ọgu chịpyaru l’onoo gẹ l’ọo-dụ, bẹ l’ọotoo dụkwaa onye l’a-dụ ike akagbu iya. Eshi-ọwhu ọ bụ iya tụfuru ẹka tẹ ya daa whẹ l’ẹhu bẹ l’ọotoo dụkwaa onye l’a-dụ ike esewhu iya ẹka ọbu azụ.

Onye-Nwe-Ọha l’e-mebyi Fílistiya

²⁸Ozhi-a bụ l’awha ono, eze Éhazu nwụhuru bẹ mu natarụ iya. Ozhi ọbu bẹ sụru agha: ²⁹Unubẹ ndu Fílistiya g’unu ha, t’ẹhu ba atsọkwa unu ụtso l’ọo lẹ mkpụru ono, e shi anọje echi unu bẹ gbakwohuru nụ. Unu makwarụ l’agwọ ono l’e-megee nwụa oguji-nwaka. Ụnwu, l’ọo-vụshi l’a-bụru ejo-agwọ, l’ewhe ewhe. ³⁰Nteke ono bẹ ndibe Onye-Nwe-Ọha, bụ ndu l’akpa ụkpa mkpẹri l’a-nọ eriji ẹwho. Ndu l’adụa g’ọ harụ whẹ bẹ Onye-Nwe-Ọha l’e-me tẹ whẹ buru guu, ya eje aadụ iwhe bya l’eme whẹ. Ọle o-shi-l’eri nke unubẹ ndu Fílistiya bẹ mụbe Onye-Nwe-Ọha l’e-gude mkpẹgu bya egbushia, tụko ndu ọwhu o gbuwhodoru gbufua yeru whẹ.

³¹Tsọo gbụdagbuda gụbe ọnuzo! Unu ryaa ẹkwa unubẹ mkpụkpu Fílistiya! Unubẹ ndu Fílistiya, t’unu gude ọotsu egvu zaa nza g’unu ha, o noo l’ọgbo-ọgu shikwa l’ụzo isheli ekpo rwuturwutu g’ọo ẹnwuru-ọku, l’akpụ tụtutu eje abya, tọ dụ onye l’akpọ ala azụ l’ime whẹ.

³²?Ọo ụdu ọnu gụnu bẹ l’ee-yeru ndu gude ozhi shi lẹ mba gẹ mba ha bya? Ọnu, l’ee-yeru whẹ bụ lẹ Onye-Nwe-Ọha mewaru Záyọnu ọ kfụru gamụ gamụ. L’ọo l’ime iya bẹ ndibe iya, l’eje iwhe-ọtsulanu l’ejeje anọdu ezeru ndzụ.

Onye-Nwe-Ọha l’e-mebyi ndu Moabu

¹Ọ waa okfu, e kfuru l’ishi ndu Moabu.

Mkpụkpu Áru, dụ l’alị ndu Moabu bẹ waa kpukpuru-swoo. Ọ bụru ẹnyashi b’e gude mebyishia ya. Mkpụkpu Kiru, dụ l’alị ndu Moabu bẹ waa kpukpuru-swoo. Ọ bụru ẹnyashi b’e gudekwawho mebyishia ya. ²Ndu mkpụkpu Dibọnu bẹ nyihuwaru elikoro ẹka whẹ l’agwajẹ iwhe jee ọryaru agwa whẹ ẹkwa. Ndu Moabu l’atsọ gbụdagbuda l’okfu ẹhu ndu mkpụkpu Nebo yẹle ndu Medeba. Whẹ gude áwhụ rwushia ẹgbushi whẹ mẹe ẹji-agba whẹ l’ẹhu l’ẹhu. ³Whẹ yee uwe-áwhụ tsoru mbadụzo aghawhe. Ndu nọdu l’okpotsu ụlo, ndu wụshiru lẹ nggamgbo akpọ mkpu l’ọnu, akwa idemini. ⁴Ndu mkpụkpu Hẹshibonu mẹe ndu mkpụkpu Eleyale l’echi mkpu. Mkpu, whẹ l’echi bẹ rwugeeru mkpụkpu Jahazu. O noo g’o gude ndu ojọgu ndu Moabu ye mkpu l’ọnu; meji l’atọfu whẹ atọfu. ⁵Ẹkwa jiru mu obu l’iswi ẹhu mkpụkpu Moabu. Ndu shi lẹ mkpụkpu ono gbaa ọso bẹ nọwa lẹ mkpụkpu Zowa, whẹ nọru jeye lẹ mkpụkpu Ẹgulatu Shelishiya. Nteke whẹ nyihuru mgbogidi, e shi eje mkpụkpu Luhitu bẹ whẹ kwarụ ntụmatu. Whẹ batalẹwho l’oji, l’ala mkpụkpu Horonayimu whẹ ryalahaa lẹ whẹ lawarụ l’iyi. ⁶Mini, dụ l’ọnu-iyi Nimurimu bẹ tahụwaru, ẹwu kpọnwushihu. Ẹwu te erwuhedu irwu, tọ dụhe iwhe dụ oyii, dụkwadu nụ. ⁷Ọo ya meru, whẹ vuta ẹku, whẹ kparụ akpa, mbụ iwhe whẹ setaru je adaa ọnu-iyi oshi wilo. ⁸Oji-l’ẹka tọgbo, whẹ l’echi bẹ ngakọtaru oge alị ndu Moabu. Mkpu, whẹ l’akpọ rwukota mkpụkpu Egulayimu. Ẹkwa áwhụ, whẹ l’arya rwukota mkpụkpu Byiye Elimu. ⁹Nkele mini, dụ lẹ mkpụkpu Dibọnu bụkota mmee nkụchi. Ọle mu l’e-mebaa ọka-njọ lẹ mkpụkpu Dibọnu ọbu. Mu l’e-zhifu oduu, l’e-je alaa anụ ndu ono, gbarụ ọso lẹ mkpụkpu Moabu nwirinwiri, mbụ anụ ndu ono, whọduru nụ l’alị ono.

Gẹ ọnodu gude dụru ndu Moabu

¹Ndu Moabu kpụtaru ụnwu atụru je akpẹe eze, l’achị alị-a t’ọ bụru iwhe oku. Ọo mkpụkpu Sela l’ụzo, gharụ echi-ẹgu jeshia l’ugvu Záyọnu bẹ whẹ shiru je akpẹe ya ụnwu atụru ọbu. ²Ọ kwa g’ụnwu-ẹnu, a chịkaru achịka l’ẹkfunu l’ewheje nnanụ nnanụ bụ g’ụnwanyi Moabu l’agba nnanụ nnanụ lẹ mgboro ọnu-iyi Anọnu l’ẹka iya ọwhu l’eerwuje erwu.

³Whẹ sụru agha: “Unu kpozhinuaru anyi ụzo. Unu kfunuaru anyi iwhe l’e-me. T’aguguru unu kpuchinua anyi g’ọo nteke urwukpu ẹnyashi kwechiru ọnwa. Unu domiaro anyịbe ndu ọgu l’achị, unu ba agbakwarụ anyịbe ndu ono, l’agba ọso ndzụ ye lẹ gẹ l’ọo-dụa. ⁴Unu hanụa tẹ anyịbe ndu ono, ọgu l’achị l’alị ndu Moabu lwakfuta unu. Unu gbobutanu anyi t’onye emebyi ono be emebyi anyi.

“Nteke onye mkpamẹhu l’ẹte anọhee, emebyi buhulewho, ndu l’adzọ madzụ pyaapyaa l’alị-a chihulewho, ⁵nteke ono bẹ Chileke l’e-gude n-yemobu iya, woru onye ono bọ o-me-g’o-kfuru, shi l’eri Dévidi mee t’ọ bụru eze. Onye ọbu bụ onye ikpe, bụru onye l’anọje achọ ụzo ikpe kfụru nhamụnha. Ome iwhe dụ chịriri ta atarụ iya l’ike.”

⁶Anyi nụwaru nke ekuku ono ndu Moabu l’eku onwowhe. Mbụ lẹ whẹ l’eku onwowhe iwhe igweli charụ. Etsetse whẹ l’etse, mẹe ekuku whẹ l’eku onwowhe, mẹe sukusuku dụ whẹ l’ẹhu bẹ parụ ẹka. Ọle ụnga ono whẹ l’anga bụ ọnu bẹ whẹ l’ekotoshi.

⁷Ọo ya bụ, tẹ ndu Moabu kpọo mkpu. T’onyenọnu ryaa ẹkwa ẹhu Moabu. Unu tsọo áwhụ ndu mkpụkpu Kiru-harẹsetu, mbụ t’unu tsọo kụrukuru. ⁸Iwhe a kọru l’ẹgu, dụ lẹ mkpụkpu Hẹshibonu bẹ nwụkotawaru lwaa. Vayịnu, a kọru lẹ mkpụkpu Sibuma nwụkotakwawho lwaa. Oshi vayịnu, dụ iya nụ bẹ ndu nwe ọhamoha gbutsushiwaru, mbụ vayịnu ono, shi jaa ajaja jarwua mkpụkpu Jaza mẹe ụzo echi-ẹgu. Ẹkali iya bẹ jakashịru; ghata eze-ẹnyimu. ⁹Ọo ya meru, mbẹdua ryalahaa ẹkwa ẹgube ono, ndu Jaza l’arya. Ẹkwa, mu l’arya bụ nke oshi vayịnu ndu Sibuma. Mu gudewa ẹnya-mini mu tsutsua unu etsutsu, unubẹ ndu Hẹshibonu mẹe ndu Eliyela, nkele orwube, e shi akpọje mẹe iwhe unu meberu l’alị chashịa yẹle ọwhu e shi akpọje mẹ unu kpatadẹ iwhe l’okfu unu bẹ buhuwaru. ¹⁰Ẹhu-ụtso yẹle obu-ụtso b’e wofuwaru l’ẹgu ono, e yeshiru oshi-ọmi. Egvu ta adajẹhedu lẹ mgbabu vayịnu, t’a nọdujehe iya akpọ orwube. Ndu l’akụ mmẹe ta akụtajehedu mmẹe l’ẹka l’aakụje mmẹe. Mu mewaru t’ụzu ẹhu-ụtso ono, e shi anọduje atụ buhu. ¹¹Obu l’azụwa mu yọo g’ọo ogumogu l’iswi ẹhu ndu Moabu. Áwhụ jiwa mu obu l’iswi ẹhu ndu Kiru-harẹsetu. ¹²Ọobuje ndu Moabu -jee ẹka whẹ l’agwajẹ iwhe; ike agvụ whẹ. Nteke bụ lẹ whẹ jeru l’ụlo agwa whẹ, ọ tọ dụdu iwhe whẹ l’ejetaje iya.

¹³O noo bụ okfu, Onye-Nwe-Ọha dụhawa mbụ kfua l’ishi ndu Moabu. ¹⁴Ọle ntaa bẹ Onye-Nwe-Ọha l’ekfu sụ: “Ndu Moabu b’a gụwaru awha g’ọo onye eburu ozhi ebu. L’awha ẹto ntaa bẹ ùgvù ono, alị ndu Moabu dụ mẹe ikpoto igwe-ọha ono, bu iya nụ l’a-bụkotaru iwhe a rwụrwu lẹ ntụ. Ndu l’a-whọdu l’alị ono l’a-habe nwahabe, bụru urweke-ngwọpya.”

Okfu e kfuru l’ishi ndu Damásukọsu mẹe ndu Ízurẹlu

¹Ọ waa bụ okfu, Onye-Nwe-Ọha l’ekfu l’ishi ndu Damásukọsu: “Leenu; Damásukọsu l’abyakwa ọbu-buhu mkpụkpu, kfụru l’onwiya. Ọobyawa ọburu kpukpuru-swoo. ²Mkpụkpu lẹ mkpụkpu, dụ iya nụ g’ọ ha bẹ l’e-bechaa bụru ẹka l’ete ebua ebu. Ọo-bụru ẹka élwù l’a-dọjeru ata nri, madzụ ta abya l’a-chịfu whẹ achịfu. ³Mkpụkpu lẹ mkpụkpu ono, a tụ-geeru o shihu ike l’alị ndu Ífuremu l’e-megekwaa chịhu. O nokwawho gẹ Damásukọsu l’e-be bụ-buhu alị-eze ẹka iya. Ọo g’ugvu ndu Ízurẹlu gvụru bụ gẹ ndu whọduru l’alị Arámu l’a-gvụ. O nokwa iwhe Onye-Nwe-Ọha, bụ Onye-ishi-igwe-ọgu l’ekfu ndono.”

⁴“O rwulewho nteke ono bẹ ùgvù ono, ẹpa Jékọpu nweru l’a-nwahụ anwahụ. Okporokpo ono, ọ darụ agbapyahụ agbapyahụ. ⁵Ízurẹlu l’a-dụ g’ọo ẹgube-ẹ, ndu l’akpata iwhe l’ẹgu ẹka a kọru akpe l’anọje egbushi oshi akpe, kfụru akfụru, gude ẹka akashị iya ishi. Ya atọgboru iwhoro g’ọo ẹgube-ẹ, l’aakpageje mkpakwa akpe l’ẹgu dụ lẹ nsụda Refayimu. ⁶Ọle nwa mkpakwa iya l’a-whọdulekwa iya. Ízurẹlu l’a-dụ g’ọo ẹgube-ẹ, l’aajikoshigee akpụru ólivu, e megele-e akpụru labọ, m’ọ bụ ẹto akakfụru l’ọnunu swọngu-swọngu oshi iya, akpụru ẹno m’ọ bụ ise akakfụru l’eze ẹkali iya, mịshiru ike. O noo iwhe Onye-Nwe-Ọha, bụ Chileke nke ndu Ízurẹlu l’ekfu ndono.”

⁷Nteke ono bẹ madzụ l’a-gbarụ ẹnya yeru onye keru iya. Ẹnya whẹ adụ l’ẹka Onye Nsọ nke Ízurẹlu nọ. ⁸Whẹ ta agbahẹduru ẹnya eyeru ẹnya agwa whẹ ọdo, mbụ iwhe ono, ọ bụ whẹ gude ẹka whẹ mobe. Whẹ ta agụbehe itso Ashera iwhe ọdo mẹe ẹnya ẹka ono, whẹ l’akpọje ụ̀nwù-isẹnsu ọku, bụ iya bụ ẹka ono, whẹ gude ẹka whẹ dobe.

⁹O rwulewho mbọku ono bẹ mkpụkpu whẹ ono, kpọ-geeru adịdaa l’a-dụ g’ọo ẹka a gbarụ ọso, ẹwu zechia ya, ẹtsukala nata iya. Mbụ l’ọo-dụ g’ọo mkpụkpu ono, ndu Amọru mẹe ndu Hevu harụ gbaa ọso l’okfu ẹhu ndu Ízurẹlu. Ẹka ono g’ọ ha abụru okorobo ẹgu nkụchi.

¹⁰O noo nkele unu zọhawaru Chileke ono, dzọfutaru unu. Unu ta anyata onye ono, bụ Ọgba-Ẹwhuru unu; bụru onye unu, l’agbabajẹ l’ime je ezeeru ndzụ. Ọ bụru iwhe ono meru g’o gude, unu -kụa m’oberu unu kụa akpụru oshi kagezhia ree, m’ọ bụ yee oshi vayịnu, unu dzetaru l’alị ọdo. ¹¹O -behuduru unu mee t’ọ wata ababa mbọku ono, unu kụru iya; ọ -bụru l’ụtsu mbọku ono, unu kụru iya b’ọ watarụ ọtu igu, unu ta awọtakwa iya mebyi, nkele mbọku ono l’a-bụleruwho unu nrimawhụ yẹle iwhe-ọtsulanu, l’ẹte enwee ọgvu.

Aa-lwụta mba ọdo

¹²Oowaa! G’igweligwe mba l’abakwanụ hanyị-hanyị. Hanyị-hanyị ono, whẹ l’aba dụ g’ọo ẹka eze-ẹnyimu l’awhụ gbudugbudu. Oowaa! Gẹ ndiwhe l’aswọ-jibukwaa. Aswọ-ji, whẹ l’aswọ-ji dụ g’ọo ẹka eze mini l’asọ gbudugbudu! ¹³Mba gẹ mba ha l’aswọ-ji g’ọo ọchoku-mini, ọle ọo mba bẹ Chileke l’a-baru whẹ, whẹ eye ọkpa l’ọso gbamia agbami. Ee-me whẹ, whẹ abụru yaa g’ọo mkpaba, whẹrewhere whekashiru l’eli ugvu. Whẹ l’e-tsukashihu g’ọo, udzu-ẹja, oke whẹrewhere whekashiru. ¹⁴L’urwẹnyashi, nggiri abya ehee whẹ gabaa l’iwhu. Chi bya l’asahụ-deshia, whẹ abụwaru whuchakangu. O noo iwhe l’a-bụ ọnodu ndu ono, l’egwo ivu anyi l’a-nọdu. Ọo ya bụ iwhe ndu ono, l’avụ arya anyi avụ l’e-keta.

Okfu Onye-Nwe-Ọha l’ekfu l’ishi ndu Kushi

¹Nshọ gụbe alị ono, l’aanụ ẹwhu l’ọowhu mbụ iwhe ono, l’ajị akwẹka pukapuka l’ogologo agụga ẹnyimu Kushi, ²mbụ gụbe alị ono l’ezhije ndu nnọ-chi ẹnya, whẹ etsoru ụgbo, e gude eji kpaa ese l’eli mini. Sụa, unubẹ ndu ozhi ọkpa-ẹgwa, unu jekfu ndu ono ha gbaswereketengu, mbụ ndu ono akpọ-ẹhu whẹ l’akwọ tẹretere! Unu jekfu ndu ono, ndu bu otẹnya mẹe ndu bu l’ụkfu ntse l’atsụkaa egvu ono, mbụ mba ono, ọkpehu l’anya kfụu kfụu; ndu ono l’akpa ike, bụru ndu ẹnyimu kebushiru alị whẹ ekebushi!

³Unubẹ ụnwu eliwhe l’owhu; unubẹ ndu bu lẹ mgboko-o; a palilewho iwhe-ọhubama imeli l’eli ugvu, unu lekwaa ẹnya. E gbulewho opu-ọgu, unu nụkwa-a ya. ⁴Nkele ọ waa iwhe Onye-Nwe-Ọha kfuru nụ mu ndọwa: “Mu l’e-shi l’ẹka ono, mu bu tụfu ẹnya dazhiawho nwajii ele, g’ọo ẹgube-ẹ okpomọku l’adụ mẹe anwụ kaa ose, mbụ ẹgube-ẹ iji ọnanwu l’adụje mẹ l’ọoda.” ⁵O noo nkele, ọ bya l’erwudeshia l’ọkpa-ji, nteke nzịrizaa iwhe dụ l’alị l’erishihuwaa, mebyi iya achashịwaa dụ nke awọta, nteke ono bẹ onye l’emeta iwhe ono l’e-gude mma kọshia ẹkali iya, lọshia ọwhu bakoru l’iwhe. ⁶O noo nteke l’aa-parụ odzu ndu ojọgu ndu Kushi haarụ udele, l’akpa l’ugvu yẹle ejo anụ-ẹgbudu ọdo. Udele l’a-kpa whẹ nri l’ẹhu l’ọnanwu. Anụ-ẹgbudu akpaa whẹ nri l’ẹhu l’udzumini.

⁷Nteke ono bẹ l’ee-wota iwhe dụ l’iche l’iche bya anụ Onye-Nwe-Ọha, bụ Onye-ishi-igwe-ọgu. Ndu l’e-wotaru iya iwhe ono bụ ndu ono, ha gbaswereketengu ono, mbụ ndu ono akpọ-ẹhu whẹ l’akwọ tẹretere; mbụ ndu ono, ndu bu otẹnya mẹe ndu bu l’ụkfu ntse l’atsụ egvu, bụ iya bụ mba ono, ọkpehu l’anya kfụu kfụu. Mẹ ndu ono, l’akpa ike, bụru ndu ẹnyimu kebushiru alị whẹ ekebushi. Ẹka whẹ l’e-gude iwhe ono bya anụ iya bụ l’ugvu Záyọnu, bụ ẹka l’aanọduje akpoku ẹwha Onye-Nwe-Ọha, bụ Onye-ishi-igwe-ọgu.

Chileke l’a-nụ ndu Íjiputu awhụ

¹Ọ waa bụ okfu, Onye-Nwe-Ọha l’ekfu l’ishi ndu Íjiputu.

Unu leenu; Onye-Nwe-Ọha nọkwa l’urwukpu, l’ezhi whawhawha agba abya Íjiputu. Agwa ndu Íjiputu l’a-nmakọta kpakpakpa l’iwhu iya. Meji abụru ndu Íjiputu tsụrumu l’ọhu ẹwho. ²“Mu l’a-kụ-tsuta ndu Íjiputu tẹ whẹ tatso ndu Íjiputu ibe whẹ ọgu; nwune awata ọlwushi nwune iya ọgu. Madzụ gbalihu ya etsokfuru ibe iya ọgu. Mkpụkpu agbalihu tsokfuru mkpụkpu ọdo ọgu. Alị-eze agbalihu tsokfuru alị-eze ọdo ọgu. ³Ume l’e-buhu ndu Íjiputu. Iwhe whẹ chịru idzu ememe bẹ mu l’a-ghasweshi aghasweshi. Whẹ ejeshia l’ọgvu whẹ, jee l’ẹja, jee l’ẹka ndu l’awhụ awhụ, mẹe l’ẹka ndu l’eme amamanshi je ọokpata ishi iwhe whẹ l’e-me. ⁴Mu l’e-woru ndu Íjiputu ye l’ẹka onye l’a-nọ ewe whẹ ishi l’ekpekere. Eze, l’a-nọ achị whẹ l’a-bụru onye obu tarụ ivomini.” O noo iwhe l’ookfu, mbụ Onye-ukfu-l’ọha, mbụ Onye-Nwe-Ọha, bụ Onye-ishi-igwe-ọgu.

⁵Mini ẹnyimu Nayịlu l’a-tahụkota. Ọnu-iyi, dụkota iya nụ atabushihu atabushihu kpọkota dagee. ⁶Iwhe bụ ụnwu ngịri, dụ iya nụ eshikota uwuru-uwuru. Ọnu-iyi, dụkota l’alị Íjiputu awata ọlwa miimii, shi nno tahụ. Ikpo yẹle epete atụko nwụshihu. ⁷Iwhe a kụru l’agụga ẹnyimu Nayịlu, mbụ l’iku ẹnyimu ono mẹe iwhe a dzarụ l’okporo, e meru iya l’a-nwụlwashihu. Whẹrewhere atụko iya whetsushia pakaa nnanụ nnanụ; ya adụhe. ⁸Ndu l’egbu ẹma l’a-tsụ ude ryaa ẹkwa. Iwhe bụ ndu l’ede aga l’ẹnyimu Nayịlu mẹe ndu l’agha ụgbu lẹ mini l’a-nwụkota riworiwo. ⁹Ndu l’egudeje oghu ọcha, l’ama mma akpa iwhe bẹ mgboko l’a-tụfu ẹhu. Ndu l’ekwe ọkpobe ẹkwa ọcha abụru ndu ụwa larụ n-ghọgeka. ¹⁰Ndu bụ itso, gude alị ndu Íjiputu bẹ l’ee-gwekota ryaaryaa. Iwhe bụ ndu l’eri ụgwo abụru ndu áwhụ tsọru.

¹¹Ndu bụ ishi lẹ mkpụkpu Zowanu bụkota ndu eswe l’ẹhu l’ẹhu. Ndu mmamagụ, l’akpọ-zhiru Fero ụzo bụru mkpọkoro mkpọ-zhi bẹ whẹ l’akpọ-zhiru iya. ?Ndẹnu ghu adẹe l’ẹka l’ịi-sụ Fero: “I tsokwa bụru onye mmamagụ. Ị bụ nwa onye eze, shi lẹ ndụ-ichee?” ¹²Sụa, ?ọo awe bẹ ndu mmamagụ ọbu, i nweru nọ ntaa? Tẹ whẹ kanụru ghu iwhe Onye-Nwe-Ọha, bụ Onye-ishi-igwe-ọgu doberu nke ome ndu Íjiputu, ndụge ị marụ iya. ¹³Ndu bụ ishi lẹ Zowanu bụkotawaa ndu eswe l’ẹhu l’ẹhu. Ndu bụ ishi lẹ mkpụkpu Mẹmufisu b’e duswewaru ụzo. Ndu ono, bụ ẹwhuru gude ụlo l’ikfu whẹ bẹ dutawaru ndu Íjiputu je eduwhua. ¹⁴Onye-Nwe-Ọha woru ume, l’emeje t’a ghajẹ amaga-ewhurewhe ghaa l’echilabọ whẹ. O mee, iwhe lile ndu Íjiputu jeru ememe, whẹ akpọ shịgashiga ẹgube ono, onye ngụru mmẹe l’akpọje shịashiga arwaswi onwiya l’ẹgbo ọ gbọru. ¹⁵Ọ tọ dụdu iwhe ndu Íjiputu l’a-dụkwadu ike emefu ọnya ọdo. Ndu bụ ishi mẹe ndu bụ madzụ mmaanụ ta adụdu ike eyeru whẹ ẹka. Ndu kfụru lẹ nke onwowhe lẹ ndu beru eberu ta adụ ike eyeru whẹ ẹka.

Gẹ ndu Íjiputu l’e-shi baarụ Onye-Nwe-Ọha ẹja

¹⁶O noo nteke ndu Íjiputu l’a-dụ g’ọo ụnwanyi. Whẹ erwuhugee erwuhu; tsụhu egvu, nkele Onye-Nwe-Ọha, bụ Onye-ishi-igwe-ọgu haliru ẹka egbe whẹ igbengvụ. ¹⁷Alị ndu Juda l’a-bụru ẹka l’a-nọ eye ndu Íjiputu egvu. Onye e whotaru Juda l’ẹka ọ nọ, egvu atsụhu iya. Iwhe kparụ o je l’a-dụ nno bu iwhe Onye-Nwe-Ọha, bụ Onye-ishi-igwe-ọgu tụberu tẹ ya mee whẹ.

¹⁸Nteke ono bẹ mkpụkpu ise l’alị Íjiputu l’a-wata okfu okfu alị ndu Kenanu. Whẹ eribua nte lẹ whẹ l’a-nọdu l’ẹka Onye-Nwe-Ọha, bụ Onye-ishi-igwe-ọgu. Mkpụkpu ono nnanụ bẹ l’a-za “Mkpụkpu Ọla-l’iswi”.

¹⁹Nteke ono bẹ l’ee-mobe ẹnya ẹka l’aa-gwajẹ Onye-Nwe-Ọha l’echilabọ alị Íjiputu. A kpụa itso, l’e-gude anyata Onye-Nwe-Ọha l’oge alị ono. ²⁰Ọo-bụru iwhe-ọhubama mẹe iwhe l’agba ẹka-ebe lẹ Onye-Nwe-Ọha, bụ Onye-ishi-igwe-ọgu nwụ ẹnya l’alị ndu Íjiputu. Nke ọwhu bụ, e wede whẹ ishi l’ekpekere, whẹ ryakua Onye-Nwe-Ọha, ya ezhia onye l’a-bya adzọta whẹ. Onye ono l’a-nafụta whẹ. ²¹Onye-Nwe-Ọha eshi nno mee tẹ ndu Íjiputu hụbe iya ama. Whẹ l’a-hụbe Onye-Nwe-Ọha ama nteke ono, whẹ egude anụ yẹle nri bya agwaa ya. Whẹ eribuaru Onye-Nwe-Ọha nte, mee iwhe ọbu, whẹ riburu nte iya. ²²Onye-Nwe-Ọha l’a-kẹe ndu Íjiputu ọru. Ọ -kẹ-gee whẹ iya, ya emee tẹ whẹ mehu. Whẹ aghaa rii lwakfuta yẹbe Onye-Nwe-Ọha; ya angabẹ nchị l’aryọ, whẹ l’aryọ iya; mee tẹ whẹ mehu.

²³O rwua nteke ono bẹ oji l’e-shi l’alị ndu Íjiputu tọgboru jeye l’alị ndu Asiriya. Ndu Asiriya ejelahaa Íjiputu; ndu Íjiputu ejelahaa Asiriya. Ndu Íjiputu whẹ lẹ ndu Asiriya agha ẹghirigha abarụ Onye-Nwe-Ọha ẹja. ²⁴Nteke ono bẹ ndu Ízurẹlu l’e-kwe ndu Íjiputu yẹle ndu Asiriya ndu ẹto lẹ ndu l’ee-shi l’ẹka whẹ agọru eliwhe l’owhu ọnu-ọma. ²⁵Onye-Nwe-Ọha, bụ Onye-ishi-igwe-ọgu l’a-gọru whẹ ọnu sụ: “Tẹ ndu Íjiputu, bụ ndibe mu bụkwaru ndu a gọru ọnu-ọma nụ, mẹe ndu Asiriya, bụ ndu ọ bụ mu gude ẹka mu mee, mẹe ndu Ízurẹlu, bụ oke-iwhe mu whẹ.”

Iwhe e gude onye nkfuchiru, gba ọto ezhi

¹L’awha ọbu bẹ eze ndu Asiriya, bụ Sagọnu zhiru onye ishi l’achị ndu ojọgu ndu Asiriya, ọ chịta ndu ojọgu iya whẹ jekfu ndu Ashịdodu ọgu naa mkpụkpu whẹ. ²Nteke ono bẹ Onye-Nwe-Ọha kfuhawaru okfu yeru Ayizáya nwa Émọzu sụ iya: “Tụgbua je eyefu uwe-áwhụ ono i yeru, yefu akpọkpa ono i ye l’ọkpa.” O mee ya nno, gbarụ ọto, gbakwarụwho ọkpa ọto ejewhe. ³Tọ dụ iya bụ, Onye-Nwe-Ọha sụ: “Ọo ẹgube ono, onye ozhi mu, bụ Ayizáya shi gbarụ ẹhu ọto gbarụ ọkpa ọto ghawhee awha ẹto, gude goshi iwhe-ọhubama yẹle iwhe l’a-dakfu ndu Íjiputu mẹe ndu Kushi, ⁴o noo g’eze ndu Asiriya l’a-kpụ ndu Íjiputu yẹle ndu Kushi lẹ ndzụ, gbabẹ whẹ ẹhu ọto, gbabẹ whẹ ọkpa ọto chịta whẹ lashia alị ndu Asiriya, mbụ nwata mẹe ọgurenya, ike egheru whẹ ọnu shii nno bụru iwhe-iwhere dụru ndu Íjiputu. ⁵Ndu ono, gbarụ ẹnya yeru ndu Kushi; gude ndu Íjiputu anga l’ụnga bẹ ẹhu l’a-rwụrwuhu-gee arwụrwuhu, iwhere egudeshia whẹ. ⁶Nteke ono bẹ ndu bukube eze-ẹnyimu Fílistiya l’a-sụ: ‘Unu leenu iwhe nwụru ndu ono, anyi shi gbarụ ẹnya yeru, mbụ ndu ono, anyi shi agbakfu tẹ whẹ gbaarụ anyi mkpu nafụta anyi l’ẹka eze ndu Asiriya. Lewaro g’ọ dụru ndu ono, ?anyịbedua l’e-mezhia agha nahụ?’ ”

Adada Bábyilọnu

¹Ọ waa bụ okfu, Onye-Nwe-Ọha l’ekfu l’ishi Bábyilọnu, bụ iya bụ echi-ẹgu alị-ivovonyi ono, dụ lẹ mgboro eze ẹnyimu:

Ọo g’oke-whẹrewhere echi-ẹgu ụzo ọhuda l’ezhije whawhawha ghata bụ gẹ l’oo-shi l’echi-ẹgu ono bya. Oo-shi l’alị ono, l’eye egvu zhiru whaa bya. ²Ọwhulenya, e goshiru mu bẹ akpa-jiijii iya parụ ẹka. Mu whụru nwodoru-oye gẹ l’oodo eye; mu whụa onye emebyi gẹ l’oomebyi iwhe.

Unubẹ ndu Ílamu, unu wulihu jeshia ọgu! Unubẹ ndu Midiya, unu yebuta ndu ọhogu unu mgburumgburu! Lẹ mụbe Onye-Nwe-Ọha l’e-mekwa tẹ ndiwhe tsụ-buhu ude ono whẹ meru, whẹ l’atsụ. ³Ọwhulenya ono, mu whụru bẹ meru, ukfu l’amịkota mu wọo. Ẹhu l’emekota mu ẹhuka g’ọo nwanyị, ime l’eme. Iwhe mu nụru bẹ meru mu, mu kpọhu kulakula. Iwhe mu whụru mekota ẹhu rwụrwuhu mu arwụrwuhu. ⁴Ishi gbakọta mu gharaghara. Egvu bya mu shii l’ẹhu. Chi-ejihu ono, mu shi anọje akpọ t’ọ byakebe bya abụru iwhe mu l’atsụkota egvu.

⁵L’ọwhulenya ono b’a kwashịru nri, tụsaa ute, ndu ẹbyii nọdu-gee anọdu. Whẹ l’eri angụ. E jia ekfu, ọ bụru: “Unu wulihu-o! Unubẹ ndu ishi-ojọgu, unu tụa mmanụ l’iwhe unu gude ezeru mgbọ!”

⁶Onye-Nwe-Ọha bya asụ mu: “Je edobe onye lanụ t’ọ kfụru leje ẹnya marụ iwhe l’abya ememe. Iwhe onye ọbu whụru ya abya akọo ya. ⁷Ọ whụlewho ndu l’agba l’eli ịnya, mbụ ndu l’agba l’ịnya, a gbarụ ẹbo-ẹbo, mẹe ndu l’agba l’eli nkakfụ-ịgara, mẹe ndu l’agba l’eli ịnya-kamẹlu, t’ọ rụkota ẹhu ree, mbụ t’ọ kwata rụkota ẹhu arụkota.”

⁸Onye ono, e zhiru t’ọ kfụru leje ẹnya iwhe l’abya ememe ono chia mkpu sụ: “Onye-nwe-mu nụ; mbọkumboku bẹ mu l’a-kfukojeru l’eli ụlo-nche-e eche nche. L’ẹnyashi fụtaru nụ bẹ mu l’anọduje l’ẹka ono, e doberu mu tẹ mu nọduje eche nche. ⁹Lekwa lẹ ndu chị ịnya l’awụkwa gidigidi eje abya. Mbụ ndu l’agbakaa ịnya, a gbarụ ẹbo-ẹbo. Ọnu o yeru bụ ọwa: Ike gvụakwaru Bábyilọnu! Ike gvụakwaru Bábyilọnu! Iwhe bụ ntẹkpe, whẹ l’agwa lẹ mkpụkpu ono tsuakwaru yọgiri-yọgiri l’alị.”

¹⁰Sụa, unubẹ ndu Ízurẹlu, bụ ndu nkemu; e chiwaru unu g’ọo onye l’echi ereshi, gwewaa unu kụta g’ọo onye l’egwe igberi, ọle iwhe mu l’ekfuru unu ntaa bụkwa iwhe mu nụru l’ọnu Onye-Nwe-Ọha, bụ Onye-ishi-igwe-ọgu, mbụ l’ọnu Chileke nke Ízurẹlu.

Okfu Onye-Nwe-Ọha l’ekfu l’ishi ndu Edọmu

¹¹Ọ waa bụ okfu, Onye-Nwe-Ọha l’ekfu l’ishi ndu Duma:

O nweru onye shi l’alị Siye ekushi mu oku asụje: “Onye nche; ?abalị jeberu agha? Onye nche, ?abalị jeberu agha?”

¹²Onye nche bya eyee ọnu sụ: “Chi l’asahụakwa, ẹnyashi jekwawho l’abyabaa. O -nweru iwhe ọdo, unu l’akpata ishi iya, unu adawhu azụ bya akpata ishi iwhe ọbu.”

Okfu Onye-Nwe-Ọha l’ekfu l’ishi ndu Arabu

¹³Ọ waa bụ okfu, Onye-Nwe-Ọha l’ekfu l’ishi ndu Arabu.

Sụa, unubẹ ndu ije ono, shi l’alị ndu Dedanu, mbụ unubẹ ndu ono, l’aradụje l’ọswa, dụ l’echi-ẹgu alị ndu Arabu. ¹⁴Unu gudekwa mini, unu l’a-nụ ndu ẹgu mini l’agụ. Unubẹ ndu bu l’alị Tema! Unu wotakwa nri, unu l’a-nụ ndu l’agba ọso ndzụ whẹ! ¹⁵L’ọkwa ọso t’ogu-ịgba ba ata ishi whẹ bẹ whẹ l’agba. Whẹ l’agba ọso t’a aba mịta nkogo saa whẹ ọsa ẹkfu. Whẹ l’agba ọso l’ẹka e setaru akfụ abya whẹ agbagba. Whẹ whụru l’ọgu bẹ karụ ose, whẹ rịa mbọmbo ọso gbalaa t’ọ bọ ta ishi whẹ.

¹⁶Ọ wakwa iwhe Onye-Nwe-Ọha l’ekfu anụ mu ndọwa: “A gụakwaru ndu Keda awha ọgu g’ọo onye e buru ozhi ebu. Ọ whọduru awha lanụ ntaa; iwhe bụ ùgvù ono, ndu Keda shi nweru agvụkota. ¹⁷Ndu l’agba akfụ bẹ bụ whẹ kagezhia ike l’ụnwu Keda. Ọle ndu l’a-whọdu l’ime whẹ taa badụ nwishi, nkele mụbe Onye-Nwe-Ọha, bụ Chileke nke Ízurẹlu kfuakwaru nkemu.”

Okfu Onye-Nwe-Ọha l’ekfu l’ishi ndu Jerúsalẹmu

¹Ọ waa bụ okfu, Onye-Nwe-Ọha l’ekfu l’ishi Nsụda Ọwhulenya.

?Ọo gụnu bẹ unu gude zarụ jeshia l’okpotsu ụlo? ²Mkpụkpu-a l’owhu bẹ gbahụru yabayaba lẹ yọyoyo, l’aatụ iya. Ùtsú l’ada lẹ mkpụkpu-a meru ọ dangarahụ adangarahụ. Ome rigbarigba bụru iwhe jiru iya eji.

Ndu e gburu egbu l’ime ghu ta abụkwa ogu-ịgba b’e gude gbua whẹ; tọ bụ ọgu bẹ tarụ ishi whẹ. ³Ndu bụ ishi l’ime ghu bẹ yekotaru ọkpa l’ọso gbalaa. Whẹ gbaa eli gbaa alị, e gudele whẹ-e lẹ ba gba akfụ. Ndu lile, ẹka kparụ b’a kpụkotaru lẹ ndzụ l’ugbo lanụ, t’a gụfuro lẹ whẹ vụru ọkpa whẹ mini nteke ndu ọhogu whẹ nọkwadu otẹnya. ⁴Ọo ya meru, mu sụ: “Unu parụ mu haa, tẹ mu ryaa ẹkwa ndu nkemu ono, ọla-l’iswi byakfutaru. Ba adụkwa onye l’a-tụ ama bya mu egbogbo.” ⁵Nkele Nnajị-Ọha, bụ Onye-Nwe-Ọha, mbụ Onye-ishi-igwe-ọgu bẹ mewaru ntanụ ọ bụru mbọku ùtsú l’ada, bụru mbọku l’aadzọ madzụ pyaapyaa, mẹe mbọku iwhe lwarụ madzụ nghọgeka lẹ Nsụda Ọwhulenya. Mgbodo mkpụkpu anyi b’a kutsushiwaru. Ugvu l’owhu dekota gbigbigbi lẹ mkpu eyemẹka, l’eechi l’ime mkpụkpu anyi ono.

⁶Ndu Ílamu bẹ chị ụgbo-ịnya whẹ mẹe ndu gude ịnya alwụru whẹ ọgu bya evuta ẹkpa akfụ whẹ jeshia ọgu. Ndu Kiru gude iwhe whẹ gude ezeru mgbọ. ⁷Iwhe jiru ẹka ono, kagezhia ree lẹ nsụda alị Juda bẹ bụ ụgbo-ịnya. Ndu gude ịnya alwụ ọgu gbugee teteretee l’ọnu ẹka ono, l’eeshije abahụ lẹ mkpụkpu ono. ⁸Iwhe shi gbochita alị Juda b’a nafụwaru iya.

Lẹ mbọku ono bẹ unu watarụ ole ẹnya ngwọgu, dụ l’ụlo ibe eze ono, bụ oshi sida, shi l’ọswa, dụ l’ugvu ugvu Libanọnu b’e gude tụa ya. ⁹Unu whụru igweligwe ẹka mgbodo mkpụkpu Dévidi gbarụ ụwa. Unu kua mini l’okpuru ụzo ọhali sụwhashia. ¹⁰Ụlo dụ lẹ Jerúsalẹmu bẹ unu gụru ọgu, harụ whẹ kụkposhia gude mee agbarike mgbodo Jerúsalẹmu. ¹¹Unu tụru iduma mini lẹ mgbakụ mgbodo labọ ono, t’ọ nakọbeje mini shi l’akahụ okpuru. Ọle onye bụ iya meru iwhe ono dụ ire bẹ unu l’ete leshijedu ẹnya, mbụ l’o to nwedu iwhe unu gụberu onye ono, bụ iya chịhawaru idzu iwhe ono nteke teru ẹnya.

¹²Nteke ono bẹ Onye-Nwe-Ọha, mbụ Onye-Nwe-Ọha, bụ Onye-ishi-igwe-ọgu kuru unu t’unu bya arya ẹkwa gụa áwhụ, unu akpụshia ishi; chịta uwe-áwhụ yee. ¹³Ọle o gbẹenu bụru ẹhu-ụtso mẹe ome rigbarigba b’ọ lọru unu ẹka ye. Unu l’egbushi eswi, egbushi atụru, ata anụ, angụ mmẹe! Iwhe ọnu dụ unu nke ekfukfu bụ: “T’unu ria, ngụa g’ẹhu ha unu nwantanụ, unu nọdu ndzụ; o -bewaro echile unu anwụhuwaro!”

¹⁴Onye-Nwe-Ọha, bụ Onye-ishi-igwe-ọgu kfuakwaru iya rwụa mu iya arwụ lẹ nchị sụ: “Hoo haa, iwhe-dụ-ẹji-a unu l’eme bẹ l’aataa abyakwaa l’a-safụ asafụ jeye unu anwụshihu. O noo iwhe l’ookfu, mbụ Onye-Nwe-Ọha, bụ Onye-Nwe-Ọha, mbụ Onye-ishi-igwe-ọgu.”

Ẹka a lọru Shebuna lẹ nchị

¹⁵Onye-Nwe-Ọha, mbụ Onye-Nwe-Ọha ono, bụ Onye-ishi-igwe-ọgu bẹ sụru mu-a: “Tụgburu jekfu onye ono, e yeru iwhe l’ẹka t’o leta ẹnya, mbụ Shebuna, bụ iya bẹ ọdu l’ẹka mbụ ibe eze; je asụ iya: ¹⁶?Ọo gụnu bẹ gbasaru ghu l’ẹka-a? ?Oo onye bẹ nụru ghu ike meru g’o gude ị tụa ilu, l’ee-li ghu l’ẹka-a? Gụbe nwọwhu tụru ilu doberu onwoghu l’elikoro ẹka-a, gụbe nwọwhu metaru ẹka l’ịi-nọdu tụta ume l’ime ọgba ẹwhuru. ¹⁷Manụruwho lẹ Onye-Nwe-Ọha bya l’awọ ghu chịi, gbawhua ghu agbawhu, mbụ gụbe onye ono, bụ nwọkpehu. ¹⁸Oo-kwo ghu karakara l’alị, gwọo ghu ọgwo ẹji tuwhaa l’ẹka alị dụ whorokoto. Gụ anọdu l’ẹka ono nwụhu. Ụgbo-ịnya ghu ono, dụ-gee ugvu akwakọta l’ẹka ono, mbụ gụbe onye ono, l’eme iwhe-iwhere ekpu ndibe nnajị ghu! ¹⁹Onye-Nwe-Ọha l’e-wofu ghu l’ọkwa ghu, nafụ ghu ọnodu i gude.

²⁰“O -belewho nteke ono bẹ mu l’e-ku onye ozhi Elíyakimu nwa Hilikaya. ²¹Mu l’a-chịta uwe mkpẹelanu ghu yebe iya, wota akpọ, l’iikebutaje l’uwe kebuta lẹ nkiya, mu eworu ike shi dụ ghu l’ẹka ye iya l’ẹka. Ya abụru nna ndu bu lẹ Jerúsalẹmu mẹe ndu ọnu-ụlo Juda. ²²Ọo l’ẹka iya bẹ mu l’e-ye irigodo ọnu-ụlo eze ono, bụ Dévidi. Ọ -gụhawaa ụzo, bẹ l’ọoto dụhedua onye ọdo fụru guchia ya. Nteke bụ l’ọo aguchi b’ọ guchiru iya, bẹ l’ọoto dụhedua onye ọdo fụru gụhaa ya. ²³Mu l’e-me iya t’ọ kpọ-mia akpọ-mi g’ọo abara. Ee-shi l’ẹka iya kwabẹ ndibe nna iya ugvu.

²⁴“Mkpa, dụkota l’ibe nna iya l’owhu bụ iya l’e-vutakota iya l’shi, mbụ mkpa ẹhu nke o-shi-l’ẹpa nna iya mẹe nke ụnwunna iya. Iwhe bụ arya, dụ l’uwhu ono, kagee ọlwa alị, mbụ omogo, mbụ itoshi bẹ bụ iya b’ọ dụkota l’ẹka.” ²⁵Onye-Nwe-Ọha, bụ Onye-ishi-igwe-ọgu l’ekfu: “Nteke ono bẹ abara ono e shi kpọ-mia akpọ-mi l’a-gbụfu, e gbutsua ya, ya adaa. Mkpa ono, dụ l’uwhu unu abụru whuchakangu. Nkele mụbe Onye-Nwe-Ọha kfuakwaru nkemu.”

Okfu Onye-Nwe-Ọha l’ekfu l’ishi mkpụkpu Taya

¹Ọ waa bụ okfu Onye-Nwe-Ọha l’ekfu l’ishi mkpụkpu Taya.

Unu kpọo mkpu ẹkwa; unubẹ ụgbo-mini shi Tashishi, nkele mkpụkpu unu, bụ Taya bụwaa kpukpuru-swoo. Ụlo dụ iya nụ gvụwaru. Ọdu ụgbo-mini, dụ iya nụ chihuwaa. Ẹka ozhi ono shi rwua whẹ nchị bụ l’alị ndu Sayịpurosu. ²Unu daa nwajii unubẹ ndu bukube eze-ẹnyimu, mẹe unubẹ ndu l’agba ikike nghọ bụ ndu Sáyịdonu; unubẹ ndu shi ezhije ndu ozhi unu tẹ whẹ daa eze-ẹnyimu jeshia alị ọdo.

³Unu l’adajẹ mini ukfu eje ọgba nghọ. Ẹka okpoga shi erwu unu ẹka bụ l’akpụru iwhe a kọru l’agụga ẹnyimu Shihọ, mbụ ọwhu, a kpatarụ l’agụga ẹnyimu Nayịlu. Alị unu bụ ẹka mba nọnu l’abyajẹ ọzu aswa.

⁴T’iwhere bụkwaru nke gụbe mkpụkpu Sáyịdonu, mbụ gụbedua bụ onye ike, bu l’eze-ẹnyimu, nkele eze-ẹnyimu yẹle ogbulogbu eze-ẹnyimu bẹ jịkawaru ghu bya ekfua sụ: “Ime te emejekwa mu nke ewhoro-o lẹ mu nwụjeru nwa. Mu te ehejekwa nwa nwoke, ọwhu l’eewhoro-o nwa nwanyị.”

⁵Ishi l’a-nwụ ndu Íjiputu kpaa mẹ whẹ natalẹwho ozhi lẹ mkpụkpu Taya bẹ waa kpukpuru-swoo.

⁶Unu daa eze-ẹnyimu jeshia Tashishi, unu akpọo mkpu; unubẹ ndu ono, bu lẹ mgboro eze-ẹnyimu! ⁷?Ọo kwadụa mkpụkpu-a bụ ẹka ọbu, unu shi anọduje eme rigbarigba? Mbụ mkpụkpu ono, shi nteke ndụ-ichee nọduta, ọ bụru mkpụkpu ndu shi iya nụ lwageeru otẹnya je eburu. ⁸?Oo onye kabẹ tụberu Taya ejo ụdudu ọwa? Mbụ mkpụkpu ono, l’ekpubeje ndu ọdo okpu-eze. Ndu l’agba oke nghọ l’ime iya bụkota ndu ishi l’ẹhu l’ẹhu. Ndu bụ whẹ -zụta whẹ akpọbe l’ime iya bụru ndu l’aakwabẹ ugvu lẹ mgboko l’owhu. ⁹Onye tụberu t’ọ dụ nno bụ Onye-Nwe-Ọha, bụ Onye-ishi-igwe-ọgu, nke ọwhu l’oo-me t’ekuku ono, nwọdu-ugvu l’eku onwiya nmaa ẹwho l’alị, mẹe nke ọwhu l’oo-me tẹ ndu ono, l’aakwabẹ ugvu lẹ mgboko l’owhu bụru ndu e wozetaru l’alị.

¹⁰Unu kọshia ọkoro l’alị unu t’ọ dụ g’ọo ẹka ẹnyimu Nayịlu byarụ utso, unubẹ ndu Tashishi. O to nwedu onye l’alowhu unu ẹka azụ. ¹¹Onye-Nwe-Ọha machịwaru ẹka daa l’eze-ẹnyimu gbaa. Alị-eze nọnu b’o meru o tekota nmẹke nmẹke. O kfua okfu ẹhu Kenanu sụ t’a lakọta ẹka bụ agbarike iya l’iyi. ¹²Ọ sụru woo agha: “Unubẹ ndu e gweru ryaaryaa, mbụ unubẹ ụnwada Sáyịdonu, rigbarigba ono, unu shi eme buhuakwaru. O beru unu gbarụ laa Sayipurọsu bẹ unu ta abyakwa l’a-tukfuru ume.”

¹³Unu leeda ẹnya l’alị ndu Bábyilọnu. Whẹ te eshidu dụ adụdu owhu. Ndu Asiriya bụ whẹ meru iya, ọ bụru ẹka anụ-ẹgbudu kwarụ uwhu buru. Ọo whẹ tụru ịga-ọgu gude yebuta whẹ. Ọ bụru whẹ nwutsushiru ụlo, shihuru ike, a tụru l’ẹka ono, mee mkpụkpu ono emerekete.

¹⁴Unu kpọo mkpu, unubẹ ụgbo-mini ndu Tashishi, nkele ẹka ono shi bụru agbarike unu b’e mebyiwaru emebyi!

¹⁵O -rwua nteke ono bẹ l’aa-zọha mkpụkpu ono, bụ Taya ụkporo awha ugbo ẹto l’awha iri, bụ iya bụ awha, onye eze lanụ nọ-bejeru. Ụkporo awha ugbo ẹto l’awha iri ono gvụlewho, mkpụkpu Taya abya adụ g’ọo egvu nwanyị-ọkpara gụru sụ:

¹⁶“Wota ogumogu jewhee

ọma mkpụkpu mgburumgburu,

gụbe nwanyị-ọkpara, a zọharu azọha.

Kpọ-rwee ogumogu ọbu akpọ-rwe,

gụa egvu, ha l’igwe ye iya,

nke ọwhu l’aa-nyata ghu ọdo.”

¹⁷Ụkporo awha ugbo ẹto l’awha iri ono -gvụlewho, Onye-Nwe-Ọha akpakfuta ndu Taya. Taya adawhu azụ l’iwhe ono, riwaru iya ishi ono bụ iya bụ ọgba ọkpara. Ya eworu onwiya reshi alị-eze, dụkota l’eliwhe-e tẹ whẹ wharwụshije iya. ¹⁸Iwhe l’erwu iya ẹka yẹle ụgwo, l’aa-kfụ iya bẹ l’ee-doberu Onye-Nwe-Ọha nsọ. O too nwedu ọwhu l’ọo-kwakọbe akwakọbe, tọ dụ ọwhu l’ọo-kwachi akwachi. Iwhe shi iya l’ẹka l’a-nọ alarụ ndu bu l’iwhu Onye-Nwe-Ọha, whẹ l’e-gude akpa nri gude iya anma uwe nke etsutsu.

Onye-Nwe-Ọha l’e-kpe eliwhe l’owhu ikpe

¹Leenu, Onye-Nwe-Ọha bya l’eme t’eliwhe daburu karawhongu, mbụ l’oo-me t’ẹgbara kfụa ya. Oo-kpu eliwhe iwhu l’oguri, chịkashia ndu bu iya nụ. ²Ọo g’e meru onye lanụ bụ gẹ l’ee-me onye ọdo. G’e meru madzụ mmaka bụ gẹ l’ee-me onye l’agba ẹja anụ Chileke. Ọ bụru g’e meru onye bụ ohu bụ gẹ l’ee-me nnajị iya. Ọo g’e meru nwamgbọko, l’eje ozhi l’ụlo bụ gẹ l’ee-me ne-uwhu iya. Ọ bụru g’e meru onye l’agba nghọ bụ gẹ l’ee-me onye l’azụ azụ. G’e meru onye jeru ụgwo bụ gẹ l’ee-me onye jitaru ụgwo ejita. Ọ bụru g’e meru onye e ji ụgwo bụ gẹ l’ee-me onye ji ụgwo eji. ³Eliwhe l’owhu bẹ l’ee-me t’ọ gheru karawhongu, e mebyishikota iya g’ọ ha. Ọ kwa Onye-Nwe-Ọha kfuru okfu-a l’onwiya.

⁴Eliwhe bẹ l’akpọkwa nkụ akpọ, atụgboshihu atụgboshihu. Mgboko bẹ l’echihu echihu aghakashịhu aghakashịhu. Ndu bụ oke amadụ l’eliwhe l’echihu echihu. ⁵Ọ kwa ndu bu lẹ mgboko bẹ whatọshiru mgboko, nkele whẹ jịkaru oome iwhe iwu Chileke kfuru; ọo whẹ mebyiru iwhe ọ sụru t’e meje, bya emebyia ọgbandzu ono, ọ gbarụ t’ọ dụ jeye lẹ tututu-mịmimi. ⁶O noo g’o gude ọnu, Chileke tụru l’ere swarịswari lẹ mgboko. Ndu bu iya nụ bụru whẹ l’anwụ ọnwu iya. Ọo ya bụ lẹ ndu bu lẹ mgboko bẹ oku ẹhu-eghughu Chileke nmaswọshiwaru anmaswọshị. Ndu whọduru nụ bụru nggụrogu madzụ. ⁷Mmẹe ọ̀whúú l’atahụ atahụ. Oshi vayịnu l’atụgboshihu atụgboshihu. Ndu ẹswa shi jifuta obu bẹ waa áwhụ jiru whẹ obu. ⁸Ụda nkwa ono, shi atsọ g’ọo gụnu bẹ waa nyọnyoronyongu. Ụzu ono, whẹ shi atụ mbụ ndu ono, l’angụ-sweshi iwhu ono bụru bugemu. Ogumogu ono, shi atsọ ntụmatu ono bụwaru rịgbidingu. ⁹Ntaa bẹ whẹ ta agụjehedu egvu-mmẹe mẹ whẹ ngụa mmẹe. Mmẹe, l’eme l’ẹnya bụwaru iwhe l’atsọ ilu l’ọnu ndu l’angụ iya nụ. ¹⁰Mkpụkpu ono b’a lawarụ l’iyi, tẹmenu ọ gbahụwaa yabayaba. Onyenọnu swochishia iwhe l’ụzo iya t’ọ bọ dụ onye l’eje iya abahụ. ¹¹Ndu madzụ bẹ tsoru echi-ụzo aryawhe ẹkwa mmẹe. Ẹhu-ụtso l’owhu bụru whuchakangu. Tẹmenu obu-ụtso bụru iwhe chihuru echihu l’alị ono. ¹²Mkpụkpu ono b’e mewaru; ọ dakpọshihu. Ọnoguzo mkpụkpu ono bụru gworogodongu l’alị gbaa vụuvuu. ¹³O noo gẹ l’ọo-dụ l’eliwhe mgburumgburu ndono, mbụ l’o noo gẹ l’ọo-dụ lẹ mba gẹ mba ha. Ọo-dụ g’ọo ẹka a nmarụ oshi ólivu yikayika nmakoshia akpụru iya, ya adụ g’ọo ẹka a kparụ mkpakwa akpụru vayịnu l’oshi vayịnu, a wọru awọ.

¹⁴Ndu ọwhu whọduru nụ l’e-megee wolia olu tụa ụzu, mbụ lẹ whẹ l’a-tụ ụzu ẹhu-ụtso. Ndu nke ụzo ẹnyanwu-arịba eshi l’ẹka ono ekfu gẹ Onye-Nwe-Ọha bụ-be onye parụ ẹka. ¹⁵Ọo ya bụ, tẹ ndu ọwhu nọ l’ụzo ẹnyanwu-awata jaa Onye-Nwe-Ọha ajaja. Tẹ ndu ọwhu bukube eze-ẹnyimu tua Onye-Nwe-Ọha ẹwha, mbụ Chileke nke Ízurẹlu! ¹⁶Anyi l’anụ ụda egvu, e shi l’ẹka mgboko beru agụ asụje: “T’ajaja bụru nke onye ono, dụ chịriri.”

Mbẹdua sụkwanu: “Mu jọokwaru wụfu! Mu jọokwaru wụfu. Nshọbukwa mu nshọ! Nwa o-nwuru-oye whẹ nwuakwaru ndu whẹ nwuru ye! Whẹ gude ẹregede enwu madzụ eye!” ¹⁷N-yemegvu yẹle nsukutu mẹe igbudu bẹ nọwa kwabẹ t’ọ zụkota unubẹ ụnwu eliwhe! ¹⁸Onye nahụru n-yemegvu; ya adalahụ lẹ nsukutu. Onye nyifutaru lẹ nsụ-kutu, ọnya anmata iya. Ẹnya-mini, dụ l’igweli l’owhu ghekotaru ọnu. Ukfu mgboko l’owhu tekota kpakpakpa. ¹⁹Mgboko l’owhu gbawashịhuwaru agbawashịhu. Mbụ lẹ mgboko gbawahụru ẹbo tarakata. Mgboko l’ete yikayika eteshi iya ike. ²⁰Mgboko l’owhu l’akpọ shịgashiga g’ọo onye mmẹe l’atsụ. Ọotu kpekengu kpekengu g’ọo nwụlo, gvuru l’ẹka whẹrewhere l’apa iya apa. Ejo-iwhe, o megbaberu bẹ ẹrwa iya l’anyị-tsuta iya anyị-tsuta, nke ọwhu bụ l’oo-kpobuhu daa, ọ tọo byadụ l’a-gbalihubaa agbalihu ọdo.

²¹O belewho nteke ono bẹ Onye-Nwe-Ọha l’a-hụ̀ ndu ọkpehu imigwe àhụ̀hù nke iwhe-dụ-ẹji, whẹ nọ l’imigwe mee, hụ̀kwawho ndu eze eliwhe àhụ̀hù nkewhe. ²²Ee-rwukobe whẹ l’ẹka lanụ g’ọo ndu a tụru mkpọro chịru ye l’iduma. Aa-tuchi whẹ l’ọka-mkpọro haa whẹ tẹ whẹ nọo igweligwe mbọku tẹmenu a hụ̀a whẹ àhụ̀hù ọbu. ²³Nteke ono bẹ ọnwa l’e-chibuhu, iwhu ẹnyanwu agbakọta tsụrikiti. O noo nkele Onye-Nwe-Ọha, bụ Onye-ishi-igwe-ọgu l’a-bụru eze l’eli ugvu Záyọnu mẹe lẹ Jerúsalẹmu. Ndu bụ ọgurenya lẹ mkpụkpu awhụa ogbu-zaazaa ya.

Egvu okele Onye-Nwe-Ọha

¹Gụbe Onye-Nwe-Ọha, ọo ghu bụ Chileke mu.

Mu l’a-nọ ekutse ghu ekutse, aja ẹwha ghu ajaja.

O noo nkele i meru iwhe dụ biribiri.

Ịikfushije ike l’iwhe ị chịru idzu iya

eshi nteke l’edenwede.

²Nkele i mewaru mkpụkpu ono, ọ bụru ikpo ẹwhuru,

mkpụkpu ono, a tụ-wheru mgbodo mgburumgburu

b’i meru, ọ bụru kpukpuru-swoo.

Ẹka ndu ọha ọdo tụru agbarara

b’i mewaru, t’ọ bụhe mkpụkpu.

A ta abyadụ l’a-tụkwa iya atụkwa ọdo jeyewaro.

³Ọo ya meru g’o gude,

ndu kpọru adịdaa je l’a-kwabẹ ghu ugvu.

Mkpụkpu ono, ndu bu iya nụ bụ

ndu obu tarụ ivomini atụko eyeru ghu ẹso.

⁴I shi eshi bụ gụnu bụtaru agbarike ndu ụkpa,

mbụ agbarike ndu l’adụa g’ọ harụ whẹ,

bụ ndu iwhe l’atsụ l’anụ.

Ọ bụru ghu bụ mkpuumkpu, l’egbobutaje

ndu oke whẹrewhere l’apa apa,

ị bụru aguguru ndu okpomọku l’ekpo,

nkele mkpamẹhu ndu obu tarụ ivomini dụ

g’ọo ẹka oke whẹrewhere

l’enwutsu mgbodo enwutsu.

⁵Ọo g’ẹhu l’ejije gbẹe mẹ anwụ

daa l’ẹka okpomọku l’ekpo l’alị kpọru gbengu dụ;

bụ gẹ l’ii-me t’orwube,

ndu ọha-ọdo l’akpọ bụru shịikfuu.

Ọ bụru gẹ aguguru l’emeje t’okpomọku tuzeta

bụ g’egvu ndu obu tarụ ivomini

l’a-bụru nyonyoronyongu.

Onye-Nwe-Ọha l’e-shiru ndu nkiya nri

⁶Ọo l’eli ugvu Zayọnu-a bẹ Onye-Nwe-Ọha, bụ Onye-ishi-igwe-ọgu l’a-nọdu meeru ndiwhe l’owhu eze oriri. Oo-shiru whẹ ọkpobe nri, dọoru whẹ mmẹe doru edo. Ya eshiaru whẹ anụ, ụmi jiru eji, doberu whẹ mmẹe, doru edo, mbụ mmẹe, e meru ọ dụ ree. ⁷Ọo l’eli ugvu-a bẹ l’ọo-nọdu kwefu eliwhe awhụ ono, kweru whẹ l’ẹhu g’ọo urwukpu, mbụ ukpo ono, whukpuru mba gẹ mba ha ẹhu ono. ⁸Oo-mebyi ọnwu, ya eje erehe ire ọdo jeye lẹ tututu-mịmimi. Onye-Nwe-Ọha, bụ Chileke l’e-huchagezhia onyenọnu ẹnya-mini ẹkwa l’ẹnya. Ya emee t’iwhe-iwhere ono, e shi eme ndibe iya gvụkota l’eliwhe l’owhu. Nkele mụbe Onye-Nwe-Ọha kfuakwaru nkemu.

⁹Nteke ono bẹ iwhe l’aa-nọ ekfu bụ: “Lekwa Chileke anyi ọbu ndọwa. Mbụ onye ọbu, anyi shi leta ẹnya iya t’ọ bya adzọfuta anyi. Lekwa Onye-Nwe-Ọha ọbu, anyi shi leta ẹnya iya ndọwa. T’ẹhu tsọo anyi ụtso, anyi etee ẹswa l’ọ dzọru anyi.”

Onye-Nwe-Ọha l’a-nụ ndu Moabu awhụ

¹⁰Ẹka Onye-Nwe-Ọha l’a-dụ l’eli ugvu-a, a dzọo ndu Moabu tọlitoli l’alị whẹ ẹgube ono, l’aadzọje mkpaba tọlitoli l’ikpọzu. ¹¹Whẹ egbogabe ẹka egbogabe ẹgube ono, onye l’egvu mini l’egbogabeje ẹka l’eli mini eegvu iya. Ọle Chileke l’e-me tẹ whẹ kubuhu onwowhe eku, ya emee t’ẹka tsụa whẹ mmẹe. ¹²Mgbodo ono, ha l’eli, ndu Moabu tụru o shihu ike bẹ Onye-Nwe-Ọha l’e-nwutsu enwutsu. Oo-me iya t’o zeshihu bụru gwoo l’alị.

Egvu Ajaja

¹Oge l’abyawa nteke l’aa-gụ egvu-a l’alị ndu Juda sụ:

Anyi nweru mkpụkpu, kpọru akpaa.

Chileke bẹ gude ndzọta

tụ-whee ya mgburumgburu g’ọo mgbodo.

²Unu gụhakota ọnuzo mkpụkpu ono ghebe ọnu,

tẹ mba ono, dụ chịriri bahụ,

bụ iya bụ mba ono, e gude ire whẹ ẹka.

³Onye ono, doberu uche l’ẹka ị nọ dobeshia ya ike,

bẹ l’ii-me t’o buru guu ọkpobe eburu,

nkele ọ kpọru obu yeru ghu.

⁴Unu kpọru obu yeru

Onye-Nwe-Ọha jeye lẹ tututu-mịmimi,

nkele ọo Nnajị-Ọha ono, bụ Onye-Nwe-Ọha

bụ Eze Ẹwhuru, l’a-nọ jeye lẹ tututu-mịmimi.

⁵Ndu woru onwowhe je etsegebe l’imeli b’o wozetaru alị,

mee tẹ mkpụkpu, dụ whengarangu lwazeta alị.

Mkpụkpu ono b’o nwutsuru, ọ bụru gwoo l’alị.

O gwee ya ryaaryaa, ọ bụru ntụ.

⁶E gude ọkpa anma iya agbịdigba.

Ndu e shi akpa ẹhu l’anma iya agbịdigba aghata,

ndu l’adụa g’ọ harụ whẹ l’adzọ iya ọkpa aghata.

⁷Ụzo ndu dụ chịriri l’eshi bẹ kfụru mkpomoro.

Gụbe onye obu gụru iwhoro, ọo ghu meru t’ụzo

ndu dụ chịriri kwọje tẹretere.

⁸Ọ kwa echi-ụzo ono, e shi eme

iwu ghu bẹ anyi tsogburu.

Gụbe Onye-Nwe-Ọha; ọ kwa ghu

bẹ anyi nmẹru anmẹe ngabẹru.

Iwhe l’adụje anyi ree l’obu bụ

ẹwha ghu yẹle ude ono, l’iide.

⁹Eghoro ghu l’adụje mu shii l’ẹnyashi.

Mu l’egudeje obu mu achọshi ghu ike.

Ọo nteke i kperu eliwhe ikpe,

bẹ ndu bu iya nụ l’a-nwụta iwhe bụ ọ-dụ-chịriri.

¹⁰Ndu l’eme ejo-iwhe l’abụje,

i -megeeru whẹ eze-iwhe-ọma,

whẹ ajịka ọnwuta ome iwhe dụ chịriri.

L’alị ndu obu gụru iwhoro bẹ whẹ

l’a-nọdugejekwa eme iwhe l’adụa ree.

Whẹ ta akpa ishi nke lẹ Onye-Nwe-Ọha bẹ parụ ẹka.

¹¹Gụbe Onye-Nwe-Ọha, ị haliru ẹka ghu imeli,

ọle whẹ ta whụdu iya.

Tẹ whẹ whụnu g’i yeberu ndibe ghu obu

nke ọwhu iwhere l’e-gude whẹ.

T’ọku ono ị kwakọberu

ndu ọhogu ghu kepyashia whẹ.

¹²Onye-Nwe-Ọha,

ọo ghu l’e-me tẹ nchị dụ anyi ndoo.

Iwhe lile, anyi meru bụ ghu mekotaru iya nụ anyi.

¹³Gụbe Onye-Nwe-Ọha, bụ Chileke anyi,

ndu ọdo, bụ ndu nwe madzụ,

t’a gụfu gụbedua, shikwa chịa anyi.

Ọle ọo gụbedua kpụ bẹ bụ onye anyi marụ ẹwha iya.

¹⁴Ndu ono nwụshihuwaru, whẹ ta anọhedu ndzụ ọdo.

Whẹ waa maa,

whẹ ta alụfutahedu ọdo bya anọdu ndzụ.

Ị hụ̀rù whẹ àhụ̀hù, mee whẹ, whẹ bụru ọla-l’iswi,

i meru tẹ akọ whẹ ba adụhe ọdo.

¹⁵I mewaru tẹ mba anyi kabaa shii lẹ madzụ,

gụbe Onye-Nwe-Ọha.

I mewaru tẹ mba anyi kaba shii.

I meru t’oge-alị anyi kpọliberu akpọliberu,

shi nno meru ugvu nụ onwoghu.

¹⁶Onye-Nwe-Ọha, ọ kwa ghu

bẹ whẹ gude ẹwhuru-ọku gbakfuta.

Whẹ wụshihuru ekfu anụ ghu

nteke l’ịigwa whẹ ndọgolo ono.

¹⁷Ọo gẹ nwanyị, dụ ime l’anọje agha gbụrugburu,

echi mkpu l’ẹhuka, l’oome iya

m’ọ gbabede iya l’ọnwu nwa,

bụ g’anyi shi dụ l’ẹnya ghu, gụbe Onye-Nwe-Ọha.

¹⁸Anyi shi dụ ime, anyi l’agha

gbụrugburu l’ẹhuka l’oome anyi.

E megee, ọ bụru whẹrewhere bẹ anyi nwụru.

Anyi ta adụdu ike dzọta alị anyi, t’ọ dụ iwhe anyi dụ ike

mebafu ọnya lẹ mgboko.

¹⁹Ndibe ghu nwụhuru anwụhu

l’e-megee nọdukota ndzụ.

Odzu whẹ l’e-tetawhu azụ.

Unubẹ ndu tawarụ ẹja,

unu gbalihu gụa egvu ẹhu-ụtso.

Iigudeje iji ụtsu mee t’alị gua egu.

Ndu nwụhuru anwụhu bẹ l’iimeje t’iwhoro dụru.

Gẹ l’ee-shi dzọfuta ndu Ízurẹlu

²⁰Ndu mu, unu tụgburu bahụ l’ụlo unu, unu aguburu onwunu ye! Unu domia onwunu kpọo ụkfu gude t’oke ẹhu-eghughu iya ghata, ²¹lẹ Onye-Nwe-Ọha bẹ shikwa l’ẹka, o bu eje abya, t’ọ hụ̀a ndiwhe àhụ̀hù iwhe-dụ-ẹji, whẹ megbaberu. Mgboko l’a-chịfutakota ndu e gburu egbu l’ime iya. Ẹ too domihedu ndu a nọ l’ime iya whụa awhụ.

¹O -belewho mbọku ono bẹ Onye-Nwe-Ọha l’e-wota ogu-ịgba, l’anyị dụdudu, mbụ eze ogu-ịgba, bụru ogu-ịgba, shihuru ike. Oo-gude iya nụa ejo-oke-agiyi ono chịikfuu, mbụ agwọ ono l’awụ awụwu. Mbụ l’oo-gude iya nụa ejo-oke-agiyi ono chịikfuu, mbụ agwọ ono l’agwọkushije onwiya agwọkushi. Ya egude iya gbugbushia ejo anụ, bukota lẹ mini.

²O -belewho mbọku ono bẹ Onye-Nwe-Ọha l’a-sụ: “Unu gụa egvu nụ vayịnu ono l’eye mebyi ree. ³Ọ kwa mụbe Onye-Nwe-Ọha l’eleta iya ẹnya. Mu l’agbajẹ iya mini ntekenteke. Mu l’eche iya nche eswe l’ẹnyashi; t’ọ bọ dụ onye l’e-mebyi iya. ⁴Ẹhu te eghuhedu mu eghu l’ẹka vayịnu ono nọ. Ọle a -nọnyaa o fulahaa ogvu l’uke; mu alwụshi iya ọgu, dzọo ya ọkpa ghata. Iwhe ọdo mu l’eme bụ lẹ mu l’a-chịru iya ye l’ọku t’o kepyashia. ⁵Nteke bụ lẹ whẹ chọru tẹ whẹ gbabata mu lẹ mkpula bya ezee ndzụ; whẹ abya t’anyi kpeshia okfu, dụru mu lẹ whẹ. Mu sụru tẹ whẹ bya t’anyi kpeshia okfu, dụru mu lẹ whẹ.”

⁶Oge l’a-bya nteke ẹpa Jékọpu l’a-gbabẹ ọgbaragbu. Ndu Ízurẹlu l’e-megee tụa igu, whọo ishi, mịa amị mijia mgboko l’owhu.

⁷Iwhe Onye-Nwe-Ọha chiru whẹ, ?ọ ha g’ọo ọwhu o chiru ndu chiru whẹ iwhe? ?E gbuberu whẹ g’e gburu ndu gburu whẹ nụ? ⁸Iwhe o gude baarụ whẹ mba bụ l’ọ harụ; a lwụshi whẹ ọgu kpụa whẹ lẹ ndzụ. Ọ bụru whẹrewhere, shi l’ụzo ẹnyanwu-awata ewhe igiri igiri b’o gude bya apakata whẹ. ⁹Ọ wakwa gẹ l’ee-shi huchafu ejo-iwhe, ẹpa Jékọpu meru. Mbụ l’ọ waa iwhe l’ọo-nwụta m’e wofu iwhe-dụ-ẹji ono o meru: Nteke whẹ l’e-gwepyashi ẹwhuru alobu, dụ l’ẹnya agwa irigiri irigiri g’ọo ndzu. Whẹ avụa itso Ashera mẹe ẹnya ẹka l’aakpọje ụ̀nwù isẹnsu ọku l’ọgvu tẹ whẹ ba adụhe.

¹⁰Mkpụkpu ono, a tụru mgbodo mgburumgburu bẹ dabuwaru mgbegere. A gbakashịhuwaru parụ iya haa g’ọo echi-ẹgu, l’ebua ebu. Ọ bụwa ẹka eswi l’anọje akpa nri. Ọ bụru ẹka eswi l’adọkobeje ekpebashi ụgbo l’ẹkali oshi ata. ¹¹Obogiribo ẹkali iya ọwhu kpọru nkụ, e gbufu iya. Ụnwanyi abya awaa ya nkụ je eye l’ọku. Iwhe kparụ iya nụ bụ lẹ whẹ bụ ndu iwhe l’ete edoje ẹnya. Ọ bụru iya meru g’o gude imiko whẹ ta abya l’adụ onye meru whẹ nụ. Mbụ l’onye ono, meru whẹ nụ ta abyadụ l’emeru whẹ iwhe-ọma ilile.

¹²O -rwua mbọku ono bẹ Onye-Nwe-Ọha l’e-shilewho l’ọnu ẹnyimu Yufurétisu jeye l’ọnu-iyi Íjiputu tụtua unubẹ ndu Ízurẹlu nnanụ nnanụ; g’ọo onye l’ahọshi ọkpobe ereshi lẹ ndu ọwhu bụ iya apya. ¹³Mbọku onokwawho bẹ l’ee-gbu eze opyi-ọku. Ndu ono, shi yifu l’alị ndu Asiriya mẹe ndu ono a chịfuru, whẹ lashia alị Íjiputu atụko byakọta bya abaarụ Onye-Nwe-Ọha ẹja l’ugvu ono dụ nsọ, dụ lẹ Jerúsalẹmu.

Ọkwa, a nmarụ ndu Ífuremu

¹Nshọ mkpụkpu Samériya, bụ okpu-eze nke ndu bụ nwọngu-mmẹe l’alị Ífuremu, mbụ ọwhu whẹ gude eku onwowhe eku. Nshọ ndu ono, ụma, whẹ l’ama bụ nzịrizaa l’erishihu erishihu. Mbụ ụma ono l’ọoma, mbụ ishi nsụda, l’emeje t’iwhe e meberu iya mehu. Nshọ mkpụkpu ono whẹ l’egudeje eku onwowhe eku, mbụ ndu ono, mmẹe tụru ntuji-ukfu. ²Lee lẹ Onye-Nwe-Ọha bẹ nweru onye ọkpehu dụ, mbụ onye shihuru ike. Ọo g’aka-mini l’atụje, mbụ l’ọo g’oke whẹrewhere l’ewheje mebyishia iwhe; ọ bụru g’oke mini l’eshije l’igweli achị gbụdugbudu, bụ gẹ l’ọo-pali whẹ oroke-imeli-imeli byia l’alị gbaa. ³Okpu-eze ono, ndu bụ nwọngu-mmẹe l’alị Ífuremu gude eku onwowhe eku l’a-bụru iwhe a dzọru fụtu-fụtu l’alị. ⁴Ụma ono l’ọoma mbụ ishi nsụda ono, l’emeje t’iwhe e meberu iya mehu abụru nzịrizaa, l’erishihu erishihu. Ọo-dụ g’ọo akpụru figu charụ l’ọnu mbụ. Awhụwhu, madzụ l’awhụ iya bụwa t’ọ wọta iya taa.

⁵Oorwuwaa mbọku Onye-Nwe-Ọha, bụ Onye-ishi-igwe-ọgu l’a-bụru okpu-eze, l’egburu ndibe iya zaazaa, bụru okpu l’e-me whẹ tẹ whẹ bụru mma-anyịganyi, mbụ ndibe iya ono, whọduru nụ. ⁶Sụa, Chileke l’a-nụ onye l’ekpe ikpe ọkpobe uche l’oo-gude ekpe ikpe, kfụru nhamụnha. Ya agbẹe ndu kfụru l’ọnuzo egbochi ọgu, l’a-byakfuta mkpụkpu whẹ ọkpu-ike tẹ whẹ dụ ike nwuwhu ndu ọhogu whẹ azụ.

Ndu l’agbajẹ ẹja nụ Chileke mẹe ndu nkfuchiru Chileke, l’angụnuka mmẹe

⁷O nokwawho gẹ ndu-a ngụta-geeru mmẹe akpọ kulakula; whẹ ngụtawaru mmẹe, l’atsụ atsụ kpọhu galagala. Ndu l’agbajẹ ẹja nụ Chileke mẹe ndu nkfuchiru Chileke ngụakwaru mmẹe, l’atsụ atsụ kpọhu kulakula. Whẹ ngụtawaru mmẹe, o ria whẹ ishi. Mmẹe l’atsụ atsụ bẹ mewaru whẹ, whẹ kpọhu galagala. Ọwhulenya whẹ bụru raba raba, okfu whẹ bụru ntako ntako. ⁸Iwhe bụ teburu, whẹ l’anọje bẹ whẹ gbọ-jishiwaru l’ẹgbo, nke ọwhu bụ l’ọ tọ dụdu ẹka whẹ metoshiwhodoru.

⁹Iwhe l’eshije whẹ l’ọnu afụshikaa bụ: “?Oo onye bẹ nwoke ọwa l’abya t’o zhia iwhe? ?Oo onye bẹ l’ọobya t’ọ kọowaru iwhe l’oozhi? ?Whẹ bụkwadu ụnwegirima, a nafụru ọnu l’ẹra, mbụ ndu buwoo bẹ whẹ harụ ọngu ẹra? ¹⁰?O nweru iwhe ọdo, l’ọobya ezhizhi gbahaa, l’iwu sụru iwu ta asụ, l’ọkpa okfu ọwa kfuru ẹgube-ẹ kfua ẹgube whọ. Nwanshị l’ẹka-a, nwanshị l’ẹka ọwhu.”

¹¹Chileke l’e-gude ndu l’ekfu okfu-alị ọdo mẹe okfu ndu ọha-ntsụ kfuru yeru ndu ono. ¹²Mbụ ndu ono, ọ sụru: “Ọ waa ẹka unu l’anọdu atụta ume ndọwa. Tẹ ndu ike gvụru nọdukwa iya tụta ume. Ọ waa bụ ẹka unu l’a-nọdu budzua ume.” Ọle whẹ ta angadụru iya nchị. ¹³Ọo ya meru, okfu, Onye-Nwe-Ọha l’ekfuru whẹ je l’a-bụru whẹ, l’iwu sụru iwu ta asụ; l’ọkpa okfu kfuru ẹgube-ẹ kfua ẹgube whọ. Nwanshị l’ẹka-a, nwanshị l’ẹka ọwhu. Ọo ya bụ, nke ọwhu whẹ l’e-je adaa kpọo mkpofu-nchị, meka iwhe, daba l’ọnya, a nmata whẹ.

Ẹwhuru, gude ụlo, a tọgboru l’ugvu Záyọnu

¹⁴Ngwa unu nụa okfu, Onye-Nwe-Ọha l’ekfu, unubẹ ndu ewenu ono. Mbụ unubẹ ndu ono l’achị ndu Jerúsalẹmu. ¹⁵Eshi-ọwhu unu sawarụ ọnu sụ l’unu l’anwụhu gbarụ ndzụ, mbụ l’unu l’alị-maa kwetawaru iwhe unu l’e-me. Unu bya ekfua sụ l’ochi-gbaagbaa l’a-vọru kfurukfuru ghata, ọle ọ tọ dụdu iwhe l’oo-me unu, nkele unu gude ọdzu ejire ezeru ishi unu, unu gude ụgho akwachi onwunu. ¹⁶Ọo ya bụ l’ọwaa iwhe Nnajị-Ọha bụ Onye-Nwe-Ọha l’ekfu: “Lekwa lẹ mu tọgbokwaru ẹwhuru l’ugvu Záyọnu. Ẹwhuru, a daleru adale; bụru ẹwhuru, vu oke ọnu aswa. Ẹwhuru ono nọdu ọnodu itso, gude ụlo. Iwhe bụ onye dawhuberu iya nụ ta abyadụ l’enwe mgbakashị ẹhu. ¹⁷Mu l’e-me t’ikpe, kfụru nhamụnha bụru ụdo, e gude atụ ukfu-ụlo ono. Ọdu-chịriri abụru iwhe e gude eme t’ọ kfụru nsụmini.”

Ọdzu-ejire ono, unu gude ezeru ishi unu bẹ aka-mini l’a-za aza zafụ. Ukporo-mini ekpota ẹka ono, unu l’akwachije onwunu. ¹⁸Ọgbandzu ono, unu l’anwụhu gbarụ l’a-bụru iwhe a kachafụru akachafụ. Iwhe unu l’alị-maa kwetaru onwunu te ekeheru g’unu kwetaru iya. Nteke o-chi-gbaagbaa l’a-vọru kfurukfuru eje aghata; ya echita unu tụa. ¹⁹Ọo ugbo ole, ọ ghataru bụ ugbo ole l’ọozu-gude unu. Ụtsu g’ụtsu ha bụ iya aghata, eswe l’ẹnyashi bụru iya aghata. Onye ozhi-a doru ẹnya bụkwa ọtsu egvu bẹ yẹle iya l’e-me. ²⁰Oshi-azẹe l’a-hanụka mkpirishi, nke ọwhu bụ l’ọ tọo sụdu madzụ ọzee azẹe machịa onwiya amachị. Ukpo ahanụka wẹrere, nke ọwhu bụ l’ọ tọo sụdu madzụ awhukpu l’ẹhu. ²¹O noo nkele Onye-Nwe-Ọha l’a-kabẹ zhilihu mee ụngara g’o meru iya l’eli ugvu Perazimu. Iwe l’a-bya iya l’ẹhu g’ọ byarụ iya lẹ nsụda Gibyiyọnu. Ya arwụa ọrwu iya l’ụzo l’ọotoko rwụbua ya, mee iwhe l’ụzo, l’ootoko mebua ya.

²²Ọo ya bụ, t’ọja ewenu jebe unu nno l’ẹhu ntaa, ọdua bẹ l’ee-mekwa t’ẹgbirigba a tụru unu gbụpyibaa unu agbụpyi. Nkele Nnajị-Ọha, bụ Onye-Nwe-Ọha, bụ Onye-ishi-igwe-ọgu bẹ kfuwaru mu l’a tubuwaru iya sụ l’alị-a l’owhu bẹ l’ee-mebyishi emebyishi.

Mmamagụ Chileke

²³Unu ngabẹru mu nchị l’olu. Unu gebe nchị nụ iwhe mu l’ekfu. ²⁴Onye l’akọ okfu, l’oo-mebe nri, ?ọokogbujewaru iya rọ? ?Ọokwagbujewaro l’o gbukposhi alị egbujashi iya egbujashi? ²⁵?Tọ bụjedu onye l’akọ iwhe rwakagee igbo, ya aghaa ya akpụru iwhe l’eekuje dilu mẹe akpụru iwhe l’eekuje kọminu, bya akụa ya witi ya akpẹe giriri, kụa ya balị l’ẹka gbarụ iya nụ. Ya ghaa ya akpụru supelutu l’ogboromọnu alị ono mgburumgburu gude kpaa ya oge? ²⁶Iwhe l’oome bẹ doru iya ẹnya, nkele ọo Chileke iya zhiru iya ọkpobe ụzo. ²⁷E te egudejedu mgbọro-igwe, eegudeje echi ereshi echishi akpụru dilu. T’e weje ọkpa ọgba-kperekpere l’eli akpụru kọminu echishi ya. Akpụru dilu bụ mkpụru bẹ l’eegudeje echishi iya. Akpụru kọminu bụru mgbọro bẹ l’eegudeje echishi iya. ²⁸?Eegwepyashije akpụru witi egwepyashi? Waawakwa. Ẹ ta kwagbụjeduru l’ochi witi ono jeyewaro. Ọo ọgba-kperekpere bẹ l’eelibeje l’ịnya ewe iya l’eli, ọle ẹ te egwepyashijedu iya egwepyashi. ²⁹Iwhe ono g’ọ ha bụ Onye-Nwe-Ọha, bụ Onye-ishi-igwe-ọgu b’o shi l’ẹka. Idzu, ọ chịru dụ biribiri, mmamagụ iya bụru iwhe parụ ẹka.

Nshọ mkpụkpu Jerúsalẹmu

¹Nshọ gụbe Ariyẹlu. Gụbe Ariyẹlu bụ mkpụkpu ono, Dévidi shi buru eburu! Unu je m’ọo l’a-gụru awha tukobe l’awha. Ori oge unu je m’ọo l’a-gba mgburumgburu. ²Ọ tọo kpọshidu tẹ mu be eme Ariyẹlu t’o jee iwhe-ọtsulanu. Ọo-gụ áwhụ ryaa ẹkwa. Ọo-dụlewho mụbe Chileke g’ọo ẹnya-agwa, l’eegbuje mmee iwhe. ³Mu l’a-kwaru ghu okpu mgburumgburu lwụshi ghu ọgu. Mu atụa mkpochi yebuta ghu; buaru ghu ose-ọgu mgburumgburu. ⁴Mu l’e-mee t’ị lwaa alị. Gụ anọdu l’ime ime alị, doo l’ọnu ghu. Ẹka ono bẹ l’ịi-nọdu whụa l’ẹkpiri. Mbụ l’ịi-nọdu l’ime alị edee họnyihonyi g’ọo nwamaa. Gụ anọdu l’ime ẹja adzụ whatawhata.

⁵Ọle ikpoto ndu ọha-ọdo, bụ ndu ọhogu ghu bẹ l’ee-gwe ryaaryaa, whẹ etsua buruburu g’ọo udzu ẹja. E chia ikpoto ndu obu tarụ ivomini pyaapyaa; whẹ etsukashihu g’ọo mkpaba. E jia ekfu, mbụ a bya l’eledeshia ẹnya, ⁶Onye-Nwe-Ọha, bụ Onye-ishi-igwe-ọgu abụru whẹrekete bya anafụta unu. Iwhe l’oo-gude bya bụ ebemu-igwe mẹe alị-ọnma-jijiji, mẹe oke ẹwhu, mẹe eze whẹrewhere, mẹe oke mini-achịchi, ọ waa ire-ọku l’erepya erepya. ⁷Ọo ya bụ, ikpoto mba, l’alwụshi mkpụkpu Ariyẹlu ọgu, mbụ ndu ono l’alwụshi iya ọgu, eme tẹ whẹ mebyia ẹka a tụru o shihu ike l’ime iya, ndu ono l’akpa iya ẹhu ono l’a-bụru whuchakangu g’ọo iwhe l’eeme lẹ nrọ. Whẹ l’a-bụru pyitikongu g’ọo iwhe l’eeme l’ọwhulenya ẹnyashi. ⁸Ọo g’onye ẹgu l’agụ l’arọo nrọ l’ẹka l’oori nri; o tehu, ẹgu l’agụ iya nụ agụle iya-a. Mbụ l’ọo g’onye ẹgu mini l’agụ l’arọo nrọ l’ẹka l’ọongu mini; o tehu ẹkpiri akpọo ya nkụ g’ọ kpọru iya l’ẹgu mini ono. O nokwa gẹ l’oo-be dụ ikpoto mba ono, l’alwụshi ugvu Záyọnu ọgu.

Iwhe l’e-me ndu l’ẹte angarụ Chileke nchị

⁹T’ọ tụfukwa unu ẹhu! T’ọ nmakwaa unu nswi! T’ishi kpukwaa unu! T’unu ba awhụhe ụzo! Tẹ mmẹe, unu l’ete etsua ọnu watakwa unu ome l’ẹnya! Tẹ mmẹe, l’atsụ atsụ, unu l’ẹte angụa mejekwa t’unu wata ọkpo kulakula! ¹⁰Onye-Nwe-Ọha bẹ tụwaru unu ye l’ole-ụrekukpe mgbẹnya. Ẹnya ono, unu nweru, bụ iya bụ ndu nkfuchiru Chileke b’ọ pyichiwaru ẹka. O kpubewa iwhe l’ishi unu, bụ iya bụ ndu l’awhụ awhụ. ¹¹Ọwhulenya l’owhu dụwa unu g’ọo iwhe e deru l’ẹkwo nyachia anyachi. Nteke e wotaru ẹkwo ono wokfu onye marụ agụgu sụ iya t’ọ narụ gụa, iwhe l’oo-kfu abụru lẹ ya ta agụkotadu iya, nkele a nyachiru iya anyachi. ¹²E woru ẹkwo ọbu wokfu onye l’ẹte amaa agụgu sụ iya t’ọ narụ gụa, iwhe l’oo-kfu abụru lẹ ya ta amakwa agụgu.

¹³Onye-Nwe-Ọha bẹ sụkwaru-a: “Eshi-ọwhu ndu-a bụlewho eli ọnu bẹ whẹ gude abya mu ntse. Ọ bụru ogboromọnu bẹ whẹ gude akwabẹ mu ugvu. Obu whẹ tee ẹnya l’ẹka mu nọ. Whẹ l’abarụ mu ẹja nggonggo. Ọ bụru iwu, madzụ tụru bẹ whẹ l’ezhi gẹ-woo l’ọo iwu nkemu. ¹⁴Eshi-ọwhu ọ dụ nno bẹ mu l’e-mefua ndu-a iwhe l’a-dụ whẹ biribiri. A nọdu lẹ mu meru iwhe dụ biribiri; mu emefua ọdo tukobe iya. Mmamagụ nke ndu marụ ágụ bẹ l’a-bụru swachamu. Ọkwa-ẹnya ndu kwarụ ẹnya abụru whuchakangu.”

Mgbe l’iwhu ndibe Chileke

¹⁵Nshọ unubẹ ndu l’anọje ewoharu Onye-Nwe-Ọha idzu, unu chịru ewoha l’ẹka dụ omilomi. Ndu l’anọduje l’ẹkpuroochi eme iwhe whẹ l’eme, whẹ asụ: “?Ọo onye whụru anyi? ?Ọo onye marụ anyi?” ¹⁶Unu l’ewojeru iwhe ghaa igharawhu. Ọ-kpụ-ite, ?t’ọ kadụ mkpa amamẹ ụrwa o gude akpụ ite ọbu? ?O nweru g’iwhe, madzụ meru l’ẹka iya l’e-shi sụ onye meru iya nụ: “Ọ tọ kwa ghu meru mu?” ?T’o nweru g’ite l’e-shi sụ ọ-kpụ-ite: “Ọ tọ dụkwa iwhe doru ghu ẹnya?”

¹⁷Ọ tọ dụkwa gẹ l’aa-nọ-beru, ọswa dụ l’ugvu ugvu Libanọnu aghọo alị, l’emehuje iwhe. Alị, l’emehuje iwhe abya abụru ọswa.

¹⁸O -rwulewho mbọku ono bẹ ndu nchị chiru l’a-nụchaa okfu, e deru l’ẹkwo ono ya nụ. Ndu ọwhu l’ẹte awhụ ụzo abụru ndu ẹnya l’e-kosahugee ekosahu, whẹ awhubuhu inyoki-inyoki, ẹnya agbabuhu whẹ ọochi. ¹⁹Ndu wozeru onwowhe alị l’e-nweru ẹhu-ụtso, ha shii l’ẹka Onye-Nwe-Ọha nọ. Ndu ụkpa etee ẹswa l’ẹka onye nsọ nke Ízurẹlu nọ. ²⁰Ndu obu tarụ ivomini l’e-chihu, ndu ewenu abụru bugemu. Iwhe bụ ndu bụ ome ejo-iwhe bụlewho iwhe whẹ l’agbajẹ ẹnya iya agba abụru kpukpuru-swoo; ²¹mbụ ndu l’egudeje ọnu kfuta iwhe ikpe l’anma madzụ, bụru ndu l’ewojeru ọnya kweberu onye l’edoshiru madzụ l’ibe iya okfu. Ndu l’ebobeje madzụ ibo iwhe l’ooto mee gude nafụ iya iswi-ọdu-mma.

²²Ọo ya bụ l’ọ waa iwhe Onye-Nwe-Ọha, bụ onye ono, gbafụtaru Ébirihamu l’ekfu l’okfu ẹhu ẹpa Jékọpu ndọwa. Ọ sụru agha: “Iwhere ta abyadụ l’e-me ẹpa Jékọpu ọdo. Iwhu ta abya l’adụ whẹ ọnwu ọnwu ọdo. ²³Whẹ whụlewho ụnwegirima, mu l’a-nụ whẹ, whẹ amarụ l’ẹwha mu dụ nsọ. Whẹ l’a-marụ l’onye nsọ nke Jékọpu bẹ dụ nsọ. Ẹhu anmahụ whẹ kpakpakpa l’iwhu Chileke nke Ízurẹlu. ²⁴Ndu l’ẹte egweje egwee l’iwhe Chileke abụru ndu iwhe doru ẹnya. Ndu nggụmawhu ekweta iwhe e kfuru whẹ wata iya ememe.”

Atụgba onye lẹ Íjiputu te enwedu ishi

¹Onye-Nwe-Ọha l’ekfu sụ: “Nshọ unubẹ ụnwegirima ono, bụ kpọkponyi. Mbụ unubẹ ndu l’emeje iwhe l’ẹte abụa idzu, mu chịru. Ndu l’atụjeru ike yeru ndu ọdo tọ hẹ l’ooshi l’ẹka Ume mụbe Onye-Nwe-Ọha; ndu l’emeko iwhe-dụ-ẹji akụbe l’eli iwhe-dụ-ẹji. ²Ndu l’awulihuje jeshia ọcho n-yemẹka l’alị Íjiputu l’ẹbe akpata mu ishi. Whẹ -gbalihu whẹ ejekfu Fero t’o gbochita whẹ t’ọ bọ dụ iwhe l’e-me whẹ nụ. Whẹ l’ejeje ekpuru l’idziri, dụ l’alị Íjiputu ezeru ndzụ. ³Ọle egbochita ono, Fero gbochitaru unu l’e-megee bụru unu ejo iwhe iwhere. Mkpula idziri ono, dụ l’alị Íjiputu ono, unu je ekpuru, emegee kpua unu iwhu lẹ ntụ. ⁴A makwarụ-a lẹ ndu bụ ishi whẹ nọwa lẹ mkpụkpu Zowanu, mbụ lẹ ndu unu zhiru ozhi rwuwaru mkpụkpu Hanẹsu. ⁵Ọle iwhere l’e-megee bụru nkunu l’ẹhu l’ẹhu, l’iswi ndu ono, l’adụa mkpa, whẹ garụ unu. Mbụ l’iswi ndu ono, l’adụa ẹka whẹ yeru unu; tọ dụ mkpa, whẹ garụ unu, gbahaa iwhere bẹ whẹ meru nụ unu, kpua unu iwhu lẹ ntụ.”

⁶Ọ waa ozhi, Chileke zhiru l’ishi ụnwu-anụmanu, bu l’echi-ẹgu ọhuda: Alị, ndu ono, e zhiru ozhi gharụ bẹ bụ alị iwhe-ọtsulanu, bụru alị mkpamẹhu. Alị ọbu bụ ẹka oke oduu yẹle ne oduu bukota. Ọ bụru ẹka oguji-nwaka yẹle ejo agwọ ọdo bukwawho. Whẹ chị ẹku whẹ byaa l’okpurukpu nkakfụ-ịgara; chịru iwhe vu oke ọnu aswa byaa l’okpurukpu ịnya-kamẹlu, evujeru mba, l’adụa mkpa l’ọogaru whẹ. ⁷Whẹ l’evu iya evujeru ndu Íjiputu. N-yemẹka ndu Íjiputu ta abụ l’ọ dụ iwhe ọ lị, tẹmenu ọ bụru iwhe mmaanụ. Ọo ya meru g’o gude mu kua Íjiputu Réhabu, Ọ-nọ-l’ọonwu.

Ndu kwefuru ike

⁸Jekwa ntaa je anọdu whẹ l’iwhu dee iwhe-e, mụbe Onye-Nwe-Ọha l’ekfu edede l’okpekpu. Gụ edee ya l’ẹkwo-agwọgwo, nke ọwhu bụ, o -rwua mgbe l’iwhu, ya abụru iwhe l’a-nọ agba whẹ ẹka-ebe shi lẹ gbururu jeye lẹ gbururu. ⁹O noo nkele ndu ono bụ ndu kwefuru ike, bụru ụnwu l’adzụ ore-whuruwhuru, mbụ ụnwu, l’ẹte angajẹ nchị l’ọkwa, Onye-Nwe-Ọha l’anmarụ whẹ. ¹⁰Iwhe whẹ l’ekfujeru ndu l’awhụ ọwhulenya bụ: “Unu haa anọ awhụ awhụ!” Ndu nkfuchiru Chileke bẹ whẹ l’asụje: “Unu haa anọ ekfuru anyi iwhe gbarụ nke ekfukfu! Unu kfujeeru anyi iwhe l’atsọ ụtso lẹ nchị! Unu gbebeje okfu ọbu egbebe kfuaru anyi! ¹¹Unu gbashi l’ụzo. Unu lụfu l’ụzo. Unu haa anọ ekfuru anyi nke onye nsọ nke ndu Ízurẹlu ono!”

¹²Ọo ya bụ l’ọ waa iwhe Onye Nsọ nke ndu Ízurẹlu ono l’ekfu ndọwa: “Eshi-ọwhu unu jịkaru okfu, mu l’ekfuru unu, ọ bụru mkpamẹhu yẹle ẹregede bẹ unu chịru ẹka wẹe, bụru iya bẹ unu dakoberu; ¹³b’ọ bụ unu ome ẹji. Unu shi l’ome ẹji ono dụwaa g’ọo mgbodo ha l’eli, gbarụ ụwa, adada iya tẹwaa l’ụkfu. A bya l’eledeshia ẹnya, unu abụwaru l’alị gworogodongu. ¹⁴Unu l’e-tsu onwunu yọgiri-yọgiri g’ọo ite-ụrwa, a gbaharụ ẹka byia l’alị, ọ gbaa vụuvuu, nke ọwhu bụ l’ibiribe iya ta adụdu t’ọ ka mma l’ọo mpebala iya, t’e gude gụta ọku l’ovokọku m’ọ bụ kuta mini lẹ nwogvu.”

¹⁵Ọle ọ waa iwhe l’ookfu, mbụ Nnajị-Ọha, bụ Onye-Nwe-Ọha, bụru onye nsọ nke ndu Ízurẹlu: “Unu -daa onwunu ụta lwakfuta mu, bya akpọru akpọru l’ẹka mu nọ, a dzọfuta unu. Unu -dobe onwunu jii; dawhube mu, mu agbẹe unu ọkpu-ike. Ọle iwhe ono ta adụdu ọwhu unu meru. ¹⁶Iwhe unu gbechia kfua bụ waawa; l’unu l’a-nokoru l’eli ịnya unu ewhe jẹrijeri, ya abụru unu agbala. Unu sụkwawho l’unu l’a-nokoru l’ịnya, l’eme kọrokoro gbalaa. Ọo ya bụ lẹ ndu l’achị unu ọso l’e-mekwawho kọrokoro. ¹⁷Ụnu ụmadzu labọ l’ụkporo iri l’ime unu l’e-tsu yaa tsukashihu mẹe onye lanụ lẹ ndu ọhogu unu ono kpọ whẹ iwhu. Ụmadzu ise kpọ unu iwhu, unu atụko g’unu ha bụru yaa, jeye ndu l’a-whọdu l’echilabọ unu adụwa g’ọo mgbọro ẹkwa-ọhubama e tuberu l’elikoro ugvu, mbụ g’ọo ẹkwa, l’akụ pẹepee l’eli ugvu.”

¹⁸Ọle Onye-Nwe-Ọha ngabẹru nteke l’oo-meru unu eze-iwhe-ọma. Ọo-gbalihu whụaru unu imiko. Nkele Onye-Nwe-Ọha bụ Chileke l’ekpeje ikpe kfụru nhamụnha. Ẹhu-ụtso bụ nke ndu nmẹru anmẹe ngabẹru iya.

Ụkwa Chileke kweru ndu nzhimanụ lwarụ azụ

¹⁹Sụa, unubẹ ndu Záyọnu, mbụ unubẹ ndu ono, bu lẹ Jerúsalẹmu, unu taa ryahẹdu ẹkwa ọdo. Unu -chiku Onye-Nwe-Ọha mkpu n-yemẹka bẹ l’oo-meru unu eze-iwhe-ọma! Anụnu, ọ nụru mkpu ẹkwa unu bẹ l’ọo-za unu. ²⁰Onye-Nwe-Ọha jehudu m’ọo l’a-nụ unu nri mkpamẹhu, o je l’e-chee unu mini oje iwhe-ọtsulanu, yẹbe onye ono, bụ O-zhi-iwhe unu te edomiheduru unu onwiya edomi ọdo, ẹnya unu whẹ ẹbo-ẹbo l’a-whụ O-zhi-iwhe unu ono. ²¹Unu -shia ụzo ẹka-ụtara m’ọ bụ ụzo ẹka-ịcha; iwhe l’e-shi l’azụ ada unu lẹ nchị bụ: “Unu lekwa ụzo ndọwa! Unu tsogbukwaru iya!” ²²Nteke ono bẹ unu l’e-merwu agwa unu ono, a rwụ-wheru mkpọla-ọcha. Unu emerwukwaawho ntẹkpe unu ono, a rwụ-wheru mkpọla-ododo. Unu eworu whẹ gbawhua agbawhu g’ọo onye gbawhuru nkịriba-ẹkwa sụ whẹ: “Unu je njere unu-o!” ²³Chileke abya achịlahaaru unu mini, l’e-me t’iwhe, unu meberu l’alị dụ ree. Nri, unu l’akpata l’alị adụlahaa okeru l’ẹnya; tẹmenu ya ahakwawhọ shii. Nteke ono élwù unu atalahaa nri g’ẹhu ha iya. ²⁴Eswi unu mẹe nkakfụ-ịgara, l’ejeru unu ozhi l’ẹgu l’a-nọ ata ọkpobe nri e gude agọ, nweru njakata yẹle shọvelu kpakaaru whẹ iya akpaka. ²⁵Mbọku, l’ee-gbu madzụ pyaapyaa rwulewho, mbụ mbọku, ụlo-eli ndu ọhogu unu l’e-ze, bẹ mini l’e-shi l’eli eze-ugvu mẹe lẹ nke nshịi gbafushihu asọ gborogboro g’ọo ọnu-iyi. ²⁶Iwhoro ọnwa awata oke zhịizhii g’ọo ẹnyanwu, anwụ akabaa ochishi ike ugbo ẹsaa amamẹ gẹ l’oochijehawa, mbụ l’ọo-dụ g’ọo anwụ chiru gbaagbaa abalị ẹsaa. Nteke ono l’a-bụ nteke Onye-Nwe-Ọha l’e-kfube ndibe iya iwhe l’ẹka o mekaru whẹ iwhe; mee t’ọnya, o gberu whẹ kpọhu.

Gẹ Chileke l’e-shi nụa ndu Asiriya awhụ

²⁷Unu lenu, Onye-Nwe-Ọha shikwa l’ẹka teru ẹnya eje abya. Ẹhu-eghughu iya l’enwu whuruwhuru g’ọo ọku; tẹmenu l’ọokpu tụlatula g’ọo ẹnwuru-ọku. Iwhe jiru iya l’ọnu bụ oke ẹhu-eghughu. Ire iya bụru ọku, l’erepya erepya. ²⁸Ntụ-ume iya dụ g’ọo utso-mini, l’awọ l’ẹkpiri. Mba gẹ mba ha b’ọ chịru ye lẹ n-yọ ọla-l’iswi mee whẹ ọzara-l’ukpo. Ọ bya eworu aga-nko ye ndiwhe l’agba t’o gude duwhua whẹ. ²⁹Ọle unubẹ ndibe Chileke l’a-gụ egvu ẹgube ono, unu l’aagụje iya l’ẹnyashi mbọku, unu l’eri oge, dụ nsọ. Ẹswa eji unu obu g’ọo ndu l’awhụ opu eje l’ugvu Onye-Nwe-Ọha, ejekfu eze-ẹwhuru nke ndu Ízurẹlu.

³⁰Onye-Nwe-Ọha l’e-me t’onyenọnu nụa g’olu iya l’asụ-be kiriri. Oo-goshi g’ẹka iya l’anyị-be dụkuu nteke l’oo-gude ẹhu-eghughu l’enwu iya whuruwhuru l’ẹhu pazeta ẹka swia ndu ọhogu iya l’ẹhu gbaa. Ọku, l’enwu whowhowho, mẹe ebemu-igwe, mẹe aka-mini, mẹe ọchoku-mini bẹ l’oo-gude nụa whẹ chịikfuu. ³¹Egvu l’a-ba ndu Asiriya mẹ whẹ nụa olu-okfu Onye-Nwe-Ọha. Oo-gude mgbọro iya nụa whẹ kpakụduu. ³²Ọo gẹ Onye-Nwe-Ọha chiru whẹ mgbọro ono, o gude anụ whẹ kpakụduu ono bụ gẹ ndibe iya l’adabarashịhu l’ọku nkwa mẹe ọkpo ogumogu. Chileke l’onwiya alwụshi whẹ ọgu tsua whẹ gbiigbii. ³³O noo nkele ẹka ọku l’enwu tawhutawhu b’e shihawa nteke teru ẹnya dobeta. Onye e dobeturu iya bụ eze Asiriya. Iduma ọku ono b’a tụru; ọ dụ omilomi hakwawhọ ọsa. Ọku, dụ iya nụ yẹle nkụ, dụ iya nụ nyịberu anyịbe. Onye-Nwe-Ọha l’a-tụ ume tụfuta ọku nshị-egbe gude mee t’ọku ọbu bulihu ebulihu.

Nshọ ndu kpọru obu yeru Íjiputu

¹Nshọ ndu l’ejeje ọcho n-yemẹka l’alị ndu Íjiputu, ndu bụ ịnya-ọgu bẹ whẹ dakoberu, kpọru obu whẹ ye l’ikpoto ụgbo-ịnya yẹle ndu ojọgu, ike dụ, l’egudeje ịnya alwụ ọgu. Mbụ ndu ẹnya whẹ l’ẹte adụa l’ẹka Onye nsọ nke Ízurẹlu nọ, whẹ te ejekfuje Onye-Nwe-Ọha t’o yeru whẹ ẹka. ²Ọle yẹbedua l’onwiya makwaarụ-a agụ; tẹmenu l’oomeje t’ọla-liswi byakfuta madzụ. O to kfujedu okfu laa azụ. Oo-zhilihu lwụshi ọnu-ụlo ndu l’eme ejo-iwhe ọgu mẹe ndu l’atụjeru ike yeru ndu l’eme ẹji. ³Ndu Íjiputu bụ madzụ mmaanụ bẹ whẹ bụ, whẹ ta abụdu Chileke. Ịnya-ọgu whẹ bụ anụ mmaanụ b’ọ bụ; ọ tọ bụdu maa. Onye-Nwe-Ọha tụfu ẹka bẹ ụkfu l’a-kpọkwa onye n-yemẹka ono. Onye ọwhu l’eeyeru ẹka ebefu daa gbii. Whẹ labọ atụko bụru kpurupyata.

⁴Lekwaa iwhe Onye-Nwe-Ọha kfuru mu ndọwa: “Ọo gẹ l’ọobuje oduu-gburu-agụ, m’ọ bụ oke-oduu-gburu-agụ whụa iwhe l’oori ya aba hanyị hanyị; o beru e kukobe ikpoto ndu l’eche atụru tẹ whẹ bya achịa ya, oduu-gburu-agụ ono ta atsụdu egvu lẹ mkpu whẹ l’echi, ụzu whẹ l’atụ ta awa iya obu mini. O noo gẹ Onye-Nwe-Ọha, bụ Onye-ishi-igwe-ọgu l’a-bya ọgu l’eli ugvu Záyọnu mẹe lẹ mgbogidi ugvu ono.

Chileke l’e-kpuchita ndu Jerúsalẹmu

⁵“Ọo g’ẹnu l’anọje ebewhe l’ẹkfunu iya, o noo gẹ Onye-Nwe-Ọha, bụ Onye-ishi-igwe-ọgu l’e-kpuchita Jerúsalẹmu. Oo-kpuchita iya; nafụtakwa iya whọ. Oo-dobe iya ndzụ, dzọfuta iya.”

⁶Sụa, unubẹ ndu Ízurẹlu, unu lwakfutawhunu onye ono, unu kweru nkalụkwa ono, ⁷nkele mbọku l’agbabeekwa, nteke onyenọnu l’ime unu l’e-tuwha agwa mkpọla-ọcha mẹe nke mkpọla-ododo ono, unu shi l’iwhe-dụ-ẹji, unu l’eme metaru onwunu. ⁸“Ndu Asiriya bẹ l’ee-gude ogu-ịgba, l’ẹte abụa nke madzụ gbugbushia. Ọo ogu-ịgba, l’abụkwa-a nke madzụ mmaanụ l’a-takọta ishi whẹ. Ogu-ịgba ono bụ iya l’a-chị whẹ ọso, a chịta ụnwu-okorọbya whẹ ye l’ozhi mkpọnwuru. ⁹Agbarike whẹ l’e-gude ọtsu egvu daa. Ndu bụ ishi ndu ojọgu ndu Asiriya -whụa ẹkwa-ọgu ndu Ízurẹlu; whẹ egude ẹhu-anmanma ye ọkpa l’ọso.” O nokwa iwhe Onye-Nwe-Ọha l’ekfu ndono, mbụ onye ono, ọku iya l’enwu l’ugvu Záyọnu, tẹmenu onwu kfụukfuu ọku iya vojashihu lẹ Jerúsalẹmu.

Onye eze dụ chịriri

¹Leenu, o nweru eze, l’abya tẹ ya gude ẹka dụ chịriri chịa. Ndu ishi iya l’a-nọ ekpe ikpe kfụru nhamụnha. ²Gẹ whẹ ha l’ẹhu l’ẹhu l’a-dụ g’ọo ẹka madzụ l’edomije onwiya tẹ whẹrewhere ba pakata iya; dụkwawho g’ọo ẹka l’aagbabajẹ je ekpuru mẹe eze-mini l’achị, dụkwawho g’ọo mini, dọru shimu-shimu l’alị echi-ẹgu, tẹmenu whẹ dụkwawho g’ọo aguguru, shi l’eze ẹwhuru, gvuru l’alị iwhoro. ³Nteke ono bẹ l’ete ekwechidu ndu l’awhụ ụzo iwhe l’ẹnya. Ndu l’anụ iwhe lẹ nchị angalahaa nchị ree. ⁴Ndu iwhe l’adụje ọku ọku l’e-nweru ori-l’ichicho. Ndu l’atsụ ọbogolobo ekfulahaa okfu gbororo, kfulahaa iwhe l’edo ẹnya. ⁵Onye eswe bẹ l’ete kuhedu onye a marụ ẹwha iya. T’a sụhe l’onye ejo-ikogiri bụ onye l’aakwabẹ ugvu. ⁶O noo nkele onye eswe bẹ okfu iya l’abụkotaje okfu eswe. Iwhe l’ejije iya ẹkpa ọriri bụ ejo-iwhe. Ọonoje eme umere onye l’ẹte amaa Chileke. L’ọonoje ekfulwu Onye-Nwe-Ọha lẹge l’ọodua. Ndu ẹgu l’agụ bẹ l’ọokpoje ẹgu. To keje ndu ẹgu-mini l’agụ mini. ⁷Iwhe onye ejo-ikogiri l’emeje bụkota ejo-iwhe. Ọogbaje ikumu gẹ ya l’e-shi gude ntuwhu-ire mebyia ndu ụkpa, oberu ndu ono, bụ ndu l’adụa g’ọ harụ whẹ l’ekfu iwhe gbarụ nke ekfukfu. ⁸Ọle onye a marụ ẹwha iya bụ iwhe a marụ ẹwha iya bẹ l’ọotuje ẹtutu iya. Ọ bụru l’iwhe a marụ ẹwha iya, l’oome b’o gude kfụru.

Ụnwanyi Jerúsalẹmu

⁹Unubẹ ụnwanyi ono, nwe ntụsaru-ẹhu, unu gbalihu ngabẹru mu nchị! Unubẹ ụnwada ono, tsụru onwunu l’ẹnya, unu nụa iwhe mu l’ekfu! ¹⁰A -nọlewho awha owhu, tukobe iya iwhe ha nwanshị bẹ unubẹ ụnwanyi ono, tsụru onwunu l’ẹnya l’a-wata ọnma kwekwekwe. Vayịnu ta adụdu iwhe l’ọomita. Tọ dụ iwhe l’aawọta l’oshi-ọmi ilile. ¹¹T’ẹhu nmakwaa unu anma, unubẹ ụnwanyi ono, nwe ntụsaru-ẹhu! T’ẹhu whụkwaa unu kwekwekwe, unubẹ ndu ọwhu tsụru onwunu l’ẹnya! Unu lashia iwhe unu we l’ẹhu wụshi, unu achịta ẹkwa áwhụ wegeeru l’ukfu! ¹²Unu tsua ẹka l’obu, nkele ẹgu ono, l’emeje iwhe a kọru iya ree yẹle vayịnu ono, l’amịje ntụmatu ono bẹ waakwaa ụchi, ¹³mẹe iswi alị ndibe mu ono, ogvu l’uke zechiru. Ee-e! T’awhụ tsọo unu l’iswi ụlo lile, l’aanọduje eme rẹmuremu mẹe iswi mkpụkpu-a, ẹhu-ụtso l’adụje! ¹⁴Nkele ibe eze ono bẹ l’ee-megee parụ haa. Mkpụkpu-a, madzụ l’atsụ whanyịwhanyi-a abụru ẹka daburu iwhoro. Ugvu Ofẹlu yẹle ụlo, a tụru o shihu ike l’e-bechaa bụru ọgba ụnwu-anụmanu l’e-bu jeyewaro, bụru ẹka l’a-dụ nkakfụ-ịgara-ọswa ree akpawhe, ya abụru ẹka élwù l’ata nri. ¹⁵Ọo nteke Chileke l’e-shi l’imeli wụa anyi ume l’ẹhu; echi-ẹgu abụru alị, l’emehuje iwhe, alị l’emehuje iwhe abya abụru ọswa. ¹⁶O noo nteke ikpe, kfụru nhamụnha l’a-kwata uwhu je eburu l’echi-ẹgu ndono, ọ-dụ-chịriri eje anọdu l’alị, l’emehuje iwhe. ¹⁷Iwhe ọ-dụ-chịriri ono l’a-nwụfuta bụ nchị-ọdu-ndoo. Iwhe ọdo, ọ-dụ-chịriri ono l’e-me bụ l’oo-me t’ẹka lile daa gbẹe; ya emee tẹ madzụ zọhaa ẹhu jeye lẹ gbururu. ¹⁸Ndibe mu l’e-buru l’ẹka nchị l’a-dụ whẹ ndoo, mbụ l’uwhu, l’adụa iwhe bya l’eme whẹ; l’ẹka whẹ l’a-tụta ume, ume erwua whẹ alị. ¹⁹Aka-mini l’a-tụpyashi ọswa, mkpụkpu l’owhu abụru ẹka a rwazeru arwaze. ²⁰Ẹhu-ụtso bụ nke unubẹ ndu ono, kụru iwhe l’ẹka mini dụ, mbụ unubẹ ndu harụ eswi unu yẹle nkakfụ-ịgara unu ẹka, whẹ l’akpa l’onwowhe.

¹Nshọ gụbe onye emebyi, l’ẹba abụ l’ọ dụ onye mebyiru gụbedua! Nshọ nwa-odoru-oye; l’ẹba abụ l’ọ dụ onye doru gụbedua ye! I sefulewho ẹka l’emebyi, e mebyia gụbedua. Ị halẹwho odoru eye, e doru gụbedua ye.

²Gụbe Onye-Nwe-Ọha, menuaru anyi eze-iwhe-ọma. Anyi ngabẹkwaru ghu-a. Bụjenuru ike anyi l’ụtsu g’ụtsu ha. Gụ abụru onye ndzọta anyi l’oge, iwhe-ọtsulanu byakfutaru anyi. ³Olu ghu l’abụje, o -dee edede g’ọo egbe-igwe; ndiwhe etsukashihu. Nteke i ngụ-lihuru angụ-lihu, mba gẹ mba ha agbakashịhu. ⁴Aa-vụ arya whẹ g’ọo ẹka ọ́vù jeru ọgu, mbụ lẹ ndu madzụ l’e-zeru gbigbigbi je eripyabe iya vụa g’ọo ẹka igube bahụru.

⁵Onye-Nwe-Ọha bẹ parụ ẹka shii, tẹmenu o buru l’ẹka ha l’eli. Ikpe, kfụru nhamụnha yẹle ọ-dụ-chịriri bẹ l’oo-me t’o ji ugvu Záyọnu eji. ⁶Ọo ya l’a-bụru onye l’e-me t’unu kpọru akpọru l’oge nke unu. Ọo-dzọta unu mebyi adzọta; mee t’unu marụ ágụ mẹe t’unu marụ iwhe. Ọtsu egvu Onye-Nwe-Ọha abụru ẹku unu nweru.

⁷Leedanu ndu bụ mkparawa gẹ whẹ l’echi mkpu-ẹkwa tsoru echi-ụzo ogologo. Ndu whẹ zhiru ozhi tẹ whẹ bya emee tẹ nchị dụ ndoo l’arya ẹkwa atsọ gbụdagbuda. ⁸Eze echi-ụzo, whẹ l’eshije bẹ chihuakwaru echihu. Ndu ije te eshijehe oji whẹ. Ọgbandzu, whẹ gbarụ b’e mebyishiwaru. Ndu ẹka-ebe ta adụhe iwhe a gụberu whẹ. Tọ dụhe iwhe madzụ bụkwadu ilile. ⁹Alị-a gụtaakwaru áwhụ jọo wụfu. Iwhere metaakwaru ọswa, dụ l’ugvu ugvu Libanọnu ọ tụgboshihu. Nsụda Sharọnu dụlewho g’ọo echi-ẹgu alị ọkponku. Oshi, dụ l’alị Báshanu mẹe l’ugvu Kamẹlu tụko ala ẹkwo vuruvuru.

Onye-Nwe-Ọha l’anmarụ ndu ọhogu iya ọkwa

¹⁰Onye-Nwe-Ọha bya eyee ọnu sụ: “Mu bya l’agbalihu. Mu bya l’egoshi lẹ mu parụ ẹka. ¹¹Unu dụ ime ẹswa ọkponku, ọ bụru oshi akpe ọkponku bẹ unu l’a-nwụ. Ume unu l’atụ bụ ọku, l’e-ke unu. ¹²Unu l’e-gwe yọgiri-yọgiri g’ọo ẹwhuru, a kụjashiru akụjashi hụa l’ọku t’ọ ghọo ẹwhuru layịmu, mbụ l’ọo gẹ l’eegbuje ẹwu ogvu chịru ye l’ọku bụ g’ọku l’e-ke unu kefu. ¹³Unubẹ ndu bu otẹnya, unu nụkwa iwhe mu meru! Unubẹ ndu bu ntse, unu makwarụ l’ọkpehu dụ mu!”

¹⁴Ndu l’eme iwhe-dụ-ẹji, bu l’eli ugvu Záyọnu bẹ egvu l’atsụkwa. Ẹhu-anmanma bẹ guderu ndu l’ẹte amaa Chileke; whẹ l’ekfu sụ: “?Oo onye l’ime anyi l’a-dụ ike wafụ l’ọku ono, l’eke eke? ?Oo onye l’ime anyi l’a-dụ ike wafụ l’ọku ono, l’e-nwu jeye lẹ tututu-mịmimi?” ¹⁵Ọo onye l’emeje iwhe dụ chịriri, tẹmenu l’ookfuje iwhe kfụru nhamụnha, bụru onye l’ajịkaje urwu, e shi l’iwhe l’eeme l’ike erita mẹe onye l’esefuje ẹka l’ori n-wọlazu; tẹmenu ọ bụru onye l’ajịkaje ọnga nchị l’idzu, l’aachị t’e gbua ọchi, l’ọotakubeje ẹnya tẹ ya ba awhụ ejo-iwhe. ¹⁶O noo ẹgube onye l’e-buru l’ẹka ha l’eli ndono. Ẹka l’ọo-nọ eze ndzụ bụ l’ọgba ẹwhuru. Nri bẹ l’aa-nọ anụ iya. Mini ta abya l’agvụ iya agvụ.

Iwhe l’a-dụ ree l’atatiwhu

¹⁷Gụbedua l’e-gude ẹnya ghu whụ onye eze ono g’ọ dụ-be ugvu l’ẹnya; gụ elee ẹnya whụkota alị ono, mabẹru ogologo ono jeyewaro. ¹⁸Ii-gude ọriri gbarwukota l’iwhe shi eye ghu egvu, bụ iwhe ghatawaru aghata. Gụ asụ: “?Ọo awe bẹ onye ono, shi edeje ẹkwo akịriko kfụru ntaa? ?Ọo awe bẹ onye e shi akfụjeru akịriko ọbu nụ kfụru ntaa? Mbụ ?Ọo awe bẹ onye shi agụje ụlo-mgbochita anyi ọgu kfụru?” ¹⁹Ị tịi whụhedu ndu ono, shi eku onwowhe eku ẹnya ọdo; ndu ono, okfu whẹ l’ẹte akfụjeru nhamụnha ọwhu l’oodo ẹnya; ndu ono, l’atsụ ntsụ, l’ete ekfuje iwhe l’aanụ. ²⁰Gbaadawhọ ẹnya agbagba lẹ Záyọnu, mbụ mkpụkpu ono, anyi l’anọduje eri oge anyi! Ii-gudewaro ẹnya ghu whụ Jerúsalẹmu; mkpụkpu, nchị dụ ndu bu iya nụ doo, mbụ mkpụkpu ono, dụ g’ọo ụlo, e meru l’ẹkwa, l’adụa onye bya l’a-whọliberu iya awhọliberu; tọo dụ onye l’adụ ike awhọ-lita abara iya awhọ-lita. Eri iya ta abya l’atsubuhu atsubuhu. ²¹Ẹka ono bẹ Onye-Nwe-Ọha l’a-bụru Ọnyibe nke anyi. Ẹka ono l’a-dụ g’ọo ẹka ẹnyimu mẹe ẹbonyi ha ọsa. Nwekpereke-ụgbo-mini ta aghadu iya agha. Eze ụgbo-mini ta aghakwa iya whọ. ²²Nkele ọo Onye-Nwe-Ọha bụ onye ikpe anyi. Mbụ l’ọo Onye-Nwe-Ọha l’atụru anyi iwhe anyi l’eme. Onye-Nwe-Ọha bụ eze anyi. Ọo-dzọfuta anyi. ²³Eri, e keru lẹ gụbe ụgbo tọshihuakwaru. Oshi, gụbe ụgbo gude shihu ike l’amiwokotawa amiwo. Ẹkwa-ụgbo ghu ta tụsahekwa atụsa. Ọo ya bụ l’aa-vụ arya, parụ ẹka kee. Ụnwu-ngvụru l’a-vụta-gekwa arya ọbu. ²⁴Ọ tọ dụdu onye bu l’eli ugvu Záyọnu l’a-sụ woo l’ẹhu ta adụdu iya mma. Iwhe-dụ-ẹji ndu bu l’ẹka ono meru bẹ l’aa-gụkotaru whẹ nvụ iya.

Chileke l’a-gwa ndu ọhogu iya ọchi

¹Unu kpụlitaru bya anụ iwhe mu l’ekfu, unubẹ mba gẹ mba ha! Unu gebe nchị; unubẹ ụnwu-eliwhe! T’eliwhe yẹle iwhe lile, dụ iya nụ nụa iwhe mu l’ekfu! Tẹ mgboko nụa ya, iwhe lile, shi iya nụ anụa ya! ²Onye-Nwe-Ọha bẹ vọokwaru ọku ghụa ẹhu l’ẹka mba gẹ mba nọ. Ẹhu l’eghu iya damụdamu l’ishi ndu ojọgu whẹ. Oo-gbugbushikota whẹ kpamụ kpamụ shi nno woru whẹ nụ Chileke, mbụ l’oo-woru whẹ nụ t’e gbushia. ³Ndu nkewhe, e gburu egbu bẹ l’aa-pata tuwhaa etuwha. Nshishi odzu whẹ atụko ẹka lile vọo kfurukfuru. Ugvu g’ugvu ha l’e-deru ederu lẹ mmee ọchi whẹ. ⁴Anwụ, mẹe ọnwa, mẹe kpokponde, dụ l’igweli l’a-dazeshihukota adazeshihu. A gwọo igweli gẹ l’aagwọje ute gwọfu. Kpokponde, dụ l’igwe adashịa l’alị g’ọo ẹgube-ẹ oshi vayịnu, l’alwajẹ ẹkwo, mbụ g’ọo ẹgube-ẹ figu, l’alwajẹ ẹkwo.

⁵Mu nọokwa l’imigwe baa ogu-ịgba mu l’ọotsu nteku. Lekwa gẹ l’ọolwazeta l’ẹhu ndu Edọmu t’ọ sakashịa whẹ asakashị, mbụ ndu ono, mu kụwaru kpurupyata doberu. ⁶Ogu-ịgba Onye-Nwe-Ọha bẹ mmee ngụgoru angụgo. Ẹ̀bà-iwhe nyakụru iya anyakụru. Mmee ụnwu atụru yẹle mmee eghu mẹe ẹ̀bà-iwhe, shi lẹ akụru anụ ebyila bẹ meru iya odehu pụnaa. O noo lẹ Onye-Nwe-Ọha l’abya ọgba ngwo-ẹja lẹ mkpụkpu Bozura; iwhe l’oo-gbu egbu l’alị ndu Edọmu paa ẹka. ⁷Aa-tụko whẹ l’atsụ gbukota; tụko whẹ lẹ oke-eswi nshịi mẹe eze oke-eswi gbukota. Alị whẹ l’e-deru ederu lẹ mmee. E gude ẹ̀bà-iwhe gwọo ẹja, dụ l’alị; ya abụru ẹpoto. ⁸Nkele mbọku ono bụru Onye-Nwe-Ọha mbọku ọgwata ụgwo iwhe, awha, ejo-iwhe onye meru l’a-vọ iya l’ẹhu, shi nno gbaarụ ndu bu lẹ Záyọnu ọdzori.

⁹Ọnu-iyi, dụkota l’alị ndu Edọmu l’a-bụkotaru mmanụ korota. Ẹja, dụ l’alị ono aghọkota ọku-nshegbe. Alị ono l’owhu abụkotaru mmanụ korota l’enwu tawhutawhu. ¹⁰Ọku iya ta anyịhudu anyịhu eswe l’ẹnyashi, ẹnwuru-ọku iya l’a-nọlewho ekpo tụlaa jeye lẹ tututu-mịmimi. Shi l’ọgbo rwua l’ọgbo bẹ ẹka ono l’a-bụru ochuwhu. Ọ tọ dụdu onye bya l’eshibaa ya ghata aghata ọdo. ¹¹Mgbashị-ujiku yẹle ebyi l’a-na alị ono nnakọta, mbụ lẹ udukufuku yẹle ụwhegu l’akwa iya okpu buru. Onye-Nwe-Ọha l’e-me alị ndu Edọmu t’ọ daburu chakomu; tọ bọ dụhe iwhe l’a-dụ iya nụ. ¹²Ndu oke amadụ, nọ l’ẹka ono te enwedu iwhe whẹ l’a-tọgbokwadu l’alị ono gude kua ya alị-eze. Ndu ishi whẹ l’owhu l’a-tọhukota atọhu. ¹³Agarambo l’e-fuchikota oke ụlo, dụ iya nụ. Ole-sarara mẹe ẹgbara atụko ụlo agbarara, dụ iya nụ fuchia. Ẹka ono abụru ẹka nkụta-ọswa l’a-kpajẹ ụri je anọdu; ya abụkwaruwho ẹka udukufuku l’e-buru. ¹⁴Ụnwu anụ-ẹgbudu, bu l’echi-ẹgu whẹ l’achị-anmabu l’a-tụje ndzuko l’ẹka ono. Eghu-ọswa aryaku eghu-ọswa ibe iya. Ọo l’ẹka ono bẹ udukufuku l’a-nọdujekwawho edzuta ike. Ọ bụru l’ẹka ono bẹ whẹ l’a-chọtaru onwowhe ẹka whẹ l’a-nọje atụta ume. ¹⁵Mgbashị-ujiku l’a-nọdu l’ẹka ono kpaa ẹkfunu, tụshia ẹkwa, kpua ya ekpukpu, bya ehee ụnwu iya chịfuta. Ọ bụkwaruwho ẹka ono bẹ egbe l’e-dzukobe, okee lẹ nyee.

¹⁶Unu je avọkashia ẹkwo okfu Onye-Nwe-Ọha, unu agụa ya agụ. Ẹnu ono ta adụkwa ọwhu l’ẹte adụ iya. Tọ dụ ọwhu l’ẹte anọ okee lẹ nyee, nkele ọo Onye-Nwe-Ọha gude ọnu iya sụ t’ọ dụ nno. Ume Onye-Nwe-Ọha bụru iya l’e-rwukobe whẹ l’ẹka lanụ. ¹⁷Ọo Onye-Nwe-Ọha bẹ tụru ido washịaru whẹ alị ono. O gude ẹka iya tụa ya atụtu keshiaru whẹ. Whẹ l’e-nweru ẹka ono jeye lẹ tututu-mịmimi. Shi l’ọgbo rwua l’ọgbo bẹ whẹ l’e-buru l’ẹka ono.

Ẹhu-ụtso nke ndu a gbafụtaru

¹Echi-ẹgu yẹle alị ọkponku bẹ ẹhu l’a-nọ atsọ pyoo.

Echi-ẹgu alị-ivovonyi awata ote ẹswa,

rwulahaa irwu g’ọo oshi.

²Oo-rwu irwu rwushia ya ike.

Ya egude ẹhu-ụtso tee ẹswa, kpọo orwube.

Ee-me t’ọ dụ biribiri g’ọo ugvu ugvu Libanọnu.

E mee t’o gbuje zaazaa g’ọo ugvu Kamẹlu

yẹle nsụda Sharọnu.

Whẹ l’e-gude ẹnya whẹ whụ

ọ-dụ-biribiri Onye-Nwe-Ọha,

mbụ ogbu-zaazaa nke Chileke anyi.

³Unu lọchia ẹka ono tsụru unu mmẹe alọchi.

Unu mee ọkpa ono, l’awhụ unu gorigori t’o shihu ike.

⁴Unu kfuaru ndu meji l’akụ whẹriwheri sụ whẹ:

“Obu shihu unu ike, t’unu ba atsụshi egvu.

Unu lekwa Chileke unu

gẹ l’ọobya t’ọ gwata ụgwo iwhe e meru unu,

mbụ t’o melata ndu ọhogu unu iwhe whẹ meru unu.

Ọobya tẹ ya dzọo unu.”

⁵Nteke ono bẹ ẹnya l’a-bụru onye l’atsọ ishi sarịkiti.

Nchị onye l’ada nkụchi emee whosangu.

⁶Nteke onokwawho bẹ nwangvụru

l’a-wata ọkfu garamu garamu g’ọo ele.

Ire akụkahu onye l’ete ekfu okfu,

ya awata ochi mkpu ẹhu-ụtso.

Mini l’a-gbafuhu l’echi-ẹgu sọlahaa gborogboro.

Ọnu-iyi agbafuhu l’alị ọkponku sọlahaa gborogboro.

⁷Alị ivovonyi ono, l’ekpo wharawhara

l’a-bụkotaru okpuru.

Alị, kpọru gbengu abụru ẹka mini l’e-shije anwụshi.

Ẹka ono, nkụta-ọswa shi buru bẹ ẹwu l’e-fushi.

Eji efushia ya; ẹchara amịshia ya.

⁸Echi-ụzo daburu adaburu l’a-ghaja l’ẹka ono;

iwhe l’ee-ku iya bụ echi-ụzo, dụ nsọ.

Ndu l’aasọ nsọ bẹ l’ete ekwedu tẹ whẹ shia ya.

Ndu l’e-shi iya nụ kpụ bụ ndu l’etso ụzo Chileke.

Ndu l’eme eswe ta abya l’etsoru ẹka ono ejewhe.

⁹Oduu-gburu-agụ te eshitadu ụzo ono.

Tọ dụ anụ-ẹgbudu, l’eme ẹnu

ọkpa iya bya l’a-gba iya.

Ọ tọ dụdu iwhe dụ nno, a bya l’a-whụ l’ẹka ono.

Gbahalẹwho ndu a gbafụtaru

agbafụta bụ ndu l’a-nọ agha l’ụzo ono.

¹⁰Ndu ono Onye-Nwe-Ọha

kfụru aswa ishi whẹ l’a-lwa Jerúsalẹmu.

Whẹ l’a-zụru egvu bata lẹ Záyọnu.

Ẹhu-ụtso, l’ẹte agvụ agvụ

bẹ whẹ l’e-kpu l’ishi g’ọo okpu-eze.

Ẹhu-ụtso yẹle ote-ẹswa l’e-rikputa whẹ ẹhu.

Áwhụ yẹle ọtsu ude eye ọkpa l’ọso gbafụ l’ẹhu whẹ.

Senakeribu l’eye Jerúsalẹmu egvu

(2 Eze. 18:13-37; 2 Iwhe. 32:1-19)

¹Tọ dụ iya bụ, o be l’awha kwe eze Hezekáya awha iri l’ẹno ọ watarụ achịchi, Senakeribu, bụ eze ndu Asiriya byatashia ọgu l’alị ndu Juda; bya anatakọta iwhe bụ mkpụkpu, a tụru o shihu ike l’alị ono. ²O noo ya, eze ndu Asiriya bya anọdu lẹ mkpụkpu Lakishi zhia onye ishi ndu ojọgu iya, yeru iya igweligwe ndu ojọgu tẹ whẹ jee nke eze Hezekáya lẹ Jerúsalẹmu. Onye ishi ndu ojọgu ono jeta bya akfụru l’ishi mgba-mini okpuru ụzo imeli, dụ l’ụzo ono, l’eeshije eje ẹka l’aasajẹ uwe. ³Elíyakimu nwa Hilikaya, bụ onye ishi l’ibe eze mẹe Shebuna, bụ o-de-ẹkwo mẹe Jowa nwa Asafu, bụ onye nkwakọbe, bya awụru jekfu onye ishi ndu ojọgu ono l’ẹka ono.

⁴Onye ishi ndu ojọgu ono sụ whẹ: “Unu je akarụ Hezekáya lẹ-a: Ọkalibe eze, mbụ eze ndu Asiriya bẹ sụru agha: ?Ọo lẹ gụnu b’ị dakoberu zọhaa ẹhu g’ị zọharu iya? ⁵Ị sụru woo l’ị marụ akọ, e gude alwụ ọgu, tẹmenu i nweru ọkpehu, e gude alwụ ọgu. Ọle okfu, l’iikfu bụ mkpọkoro okfu. ?Oo onye b’i dakoberu ekwefuru mụbe eze ndu Asiriya ike? ⁶Leenu; ọ kwa ndu Íjiputu b’i dakoberu, mbụ Íjiputu ono bụ mgbawa-ẹchara, bụ: onye dakoberu iya nụ, ya eyijashia ya ẹka meka iya iwhe. Ọ kwa ẹgube ono bẹ Fero, bụ eze ndu Íjiputu dụ l’ẹhu ndu dakoberu iya nụ. ⁷Nteke bụ l’ị sụru mu l’ọo Onye-Nwe-Ọha, bụ Chileke unu bẹ unu dakoberu; ?tọ bụdu Onye-Nwe-Ọha ọbu bụ onye ọwhu Hezekáya wofuru ẹka l’aagwajẹ iya; bya emebyishia ẹnya ẹka l’aakpọjeru iya ngwo-ẹja ọku, bya asụ ndu Juda mẹe ndu Jerúsalẹmu: ‘Unu byajẹ abaa ẹja l’ẹnya-mgbẹja-a.’

⁸“Bya ntaa tẹ gụ l’onye-nwe-mu nu nmaa ẹka, mbụ gụ l’eze ndu Asiriya. Mu l’a-kpụru ụnu ịnya ise kpẹe ghu m’i je l’a-dụ ike ye iya ndu l’a-nọdu agba iya. ⁹?Ndẹe g’ọ dụ ghu gẹ l’ịi-dụ ike kerabe l’iwhu onye ishi ndu ojọgu, ẹnya kagee alwalwa lẹ ndu ishi ndu ojọgu onye-nwe-mu nụ, a makwarụ-a l’unu dakoberu ndu Íjiputu tẹ whẹ nụ unu ụgbo-ịnya mẹe ndu l’agba ịnya-ọgu? ¹⁰Ọdo bụ; ?i doberu sụ lẹ mu gba ẹka Onye-Nwe-Ọha byatashia ọgu l’alị-a tẹ mu laa ya l’iswi? Ọ kwa Onye-Nwe-Ọha l’onwiya bẹ sụru mu tẹ mu bya ọgu l’alị-a bya alaa ya l’iyi.”

¹¹Tọ dụ iya bụ, Elíyakimu mẹe Shebuna mẹe Jowa bya asụ onye ishi ndu ojọgu ono: “Byiko gudenu okfu Arámayiku kfuru yeru anyịbe ndu ozhi ghu, nkele oodoje anyi ẹnya. Be egudeshinu okfu ndu Juda kfuru yeru anyi, nkele ndu nọ l’eli mgbodo bẹ l’a-nọ anụ iya.”

¹²Onye ishi ndu ojọgu ono sụ whẹ: “?Ọ dụ unu g’ọo unu l’onye nwe unu kpụ bẹ onye-nwe-mu nụ sụru tẹ mu bya ezhia ozhi-a? Ọ kwa unu lẹ ndu ono, nọ l’eli mgbodo ono, mbụ ndu unu lẹ whẹ l’e-megee ria nshị unu l’ọnu, ngụa nwamịni, unu gbọru bẹ mu l’ekfu okfu-a eyeru.” ¹³Nteke ono onye ishi ndu ojọgu ono bya akfụru gude okfu ndu Juda ryashịa ya ike sụ: “Unu nụa iwhe o kfuru, mbụ ọkalibe eze, mbụ eze ndu Asiriya! ¹⁴Eze bẹ sụru agha: Ọwhu t’unu ba ahashị Hezekáya ẹka t’o dusweshi unu. Ọ tọ dụkwa ike adzọ unu! ¹⁵Unu ba ahashị Hezekáya ẹka t’o doru unu ye t’unu bewhube Onye-Nwe-Ọha, l’ẹka l’ookfuru unu sụ lẹ Onye-Nwe-Ọha ta adụdu iwhe l’e-me t’ọ bọ dzọta unu; tẹmenu lẹ mkpụkpu-a ta aladụ l’ẹka eze ndu Asiriya.

¹⁶“Unu ba angakwarụ Hezekáya nchị, nkele eze ndu Asiriya bẹ sụkwaru agha: Unu wụfuta wụ-kfuta mu tẹ mu l’unu kpeshia, nke ọwhu onyenọnu lẹge unu ha l’e-ri iwhe shi lẹ vayịnu iya, ria akpụru shi l’oshi figu iya, ngụa mini dụ lẹ wẹlu iya, ¹⁷jeye nteke mu l’a-bya eduta unu lashia alị, dụ g’ọo nkunu; alị witi lẹ balị dụ; mmẹe ọwhuu dụ iya, mbụ alị nri dụ; mgbabu vayịnu dụkwawho iya whọ.

¹⁸“Unu be ekwebukwaa tẹ Hezekáya duwhua unu, l’ẹka l’ookfu lẹ Onye-Nwe-Ọha l’a-dzọfuta unu. ?O nwejeru ndu mba ọwhu agwa alị whẹ dzọtajewaru l’ẹka eze ndu Asiriya? ¹⁹?Ọo awe bẹ agwa ndu Hámatu yẹle nke ndu Apadu nọ? ?Ọo awe bẹ agwa ndu Sefavemu nọ? ?Whẹ dụ-a ike dzọfuta ndu Samériya l’ẹka mụbe eze ndu Asiriya? ²⁰?Ọo agwa ole l’ime agwa ndu alị ono bẹ dụ ike dzọta ndu alị iya l’ẹka mu? ?Ndẹe gẹ Onye-Nwe-Ọha l’e-me dụ ike dzọta ndu Jerúsalẹmu l’ẹka mu?”

²¹Ndu Juda ono, l’ookfu eyeru nọdulewho nggujingguji, t’ọ dụ iwhe whẹ kfuru yeru iya, nkele eze Hezekáya tụru iwu sụ t’ọ bọ dụkwa onye l’e-yeru iya ọnu.

²²Tọ dụ iya bụ, Elíyakimu nwa Hilikaya, bụ onye ishi l’ibe eze, mẹe Shebuna, bụ onye o-de-ẹkwo, mẹe Jowa nwa Asafu, bụ onye nkwakọbe tụgbua jekfu Hezekáya. Whẹ lajashịa uwe whẹ alajashị, bya akọoru iya iwhe onye ishi ndu ojọgu ono kfuru.

Eekfu l’aa-dzọfuta Jerúsalẹmu

¹Nteke eze Hezekáya nụru iwhe ono, ọ lajashịa uwe iya, bya achịta uwe-áwhụ yee, ọ bụru iya oje l’eze-ụlo Onye-Nwe-Ọha. ²O zhia Elíyakimu, bụ onye ishi l’ibe eze, mẹe Shebuna, bụ o-de-ẹkwo, mẹe ndu bụ ishi lẹ ndu l’agbajẹ ẹja nụ Chileke, tẹ whẹ jeshia ibe onye nkfuchiru Chileke ono, bụ Ayizáya nwa Émọzu. Whẹ tụko yee uwe-áwhụ jeshia. ³Whẹ rwua je asụ iya: “Lekwa iwhe Hezekáya kfuru: Ọ sụru lẹ ntanụ bẹ bụ mbọku iwhe-ọtsulanu, bụru mbọku ọoba mba, bya abụru mbọku, l’eeme madzụ iwhe-iwhere. Ọ dụa g’ọo nwanyị, ọ gbarụ l’ezeda, t’ọ dụ ike nyịa ọnyi zeda nwata ọbu. ⁴E nweru ike, ya abụru lẹ Onye-Nwe-Ọha bụ Chileke ghu bẹ nụru iwhe ono, onye ishi ndu ojọgu ono kfuru, mbụ onye ono, onye-nwe-mu nụ, bụ eze ndu Asiriya yeru t’ọ bya ekfuru sukusuku nụ Chileke, nọ ndzụ. Tẹ Onye-Nwe-Ọha, bụ Chileke ghu nụkwaa ya, baarụ iya mba iya. Ọo ya bụ t’i kfuru nụ Chileke l’iswi ndu ọwhu whuduru nu.”

⁵O be nteke ndu ono, eze Hezekáya zhiru byakfutaru Ayizáya; ⁶Ayizáya sụ whẹ: “Unu je asụ onye-nwe-unu l’ọ waa iwhe Onye-Nwe-Ọha l’ekfu ndọwa: Ba atsụshi egvu l’iwhe ono, ị nụru, mbụ okfu ono ndu ozhi eze ndu Asiriya gude bya ekfubyishia mu ono. ⁷Sụa, mu l’e-me iya, ya awata ọnu tafu tafu, tafu tafu ono, l’ọo-nọ anụ emee ya t’ọ lashia alị iya. Mu emee t’e gude ogu-ịgba sakashịa ya asakashị l’alị whẹ ono.”

⁸O be nteke onye ishi ndu ojọgu ndu Asiriya ono nụru l’eze ndu Asiriya bẹ lụfuwaru lẹ mkpụkpu Lakishi; ọ tsuwhu azụ jekfu eze ndu Asiriya ono l’ẹka yẹle ndu mkpụkpu Libyina l’alwụ ọgu.

⁹O noo ya, Senakeribu, bụ eze ndu Asiriya nata ozhi lẹ Tirihaka, bụ eze ndu Itiyópiya, bẹ chị ndu ojọgu iya; whẹ dzebewaa abyakfuta iya ọgu. Ọ nụa ya bya ezhia ndu ozhi tẹ whẹ je ezhia Hezekáya sụ iya: ¹⁰“Ọ waa iwhe unu l’e-kfuru Hezekáya, bụ eze ndu Juda: Be ekwebukwaa tẹ Chileke ghu ono, bụ onye i dawhuberu duwhua ghu, l’ẹka l’ookfu lẹ Jerúsalẹmu ta abyadụ l’a-lwa l’ẹka mụbe eze ndu Asiriya. ¹¹Ị nụwaru gẹ ndu eze ndu Asiriya gude mee ndu alị ọdo ívú l’ẹhu, mbụ l’iyi ono ọ lakọtaru whẹ. ?Aa-nafụtadu nụ gụbedua? ¹²Ndu mba gẹ mba ha ono, nna mu oche whẹ mebyishiru, ?ọo nafụtaru whẹ-ẹ, mbụ agwa whẹ? Mbụ agwa ndu Gozanu, mẹe nke ndu Háranu, mẹe nke ndu Rezefu, mẹe nke ndu Idẹnu, bụ ndu shi nọdu lẹ Telasa. ¹³?Ọo awe bẹ eze ndu Hámatu nọ ntaa, mẹe eze ndu Apadu, mẹe eze ndu mkpụkpu Sefavemu, mẹe eze ndu Hena, mẹe eze ndu Iva?”

Hezekáya kfuru nụ Onye-Nwe-Ọha

¹⁴Hezekáya bya anata ẹkwo-ozhi ono l’ẹka ndu ozhi ono bya agụa ya. Ọ bahụ l’eze-ụlo Onye-Nwe-Ọha je atụsaa ẹkwo-ozhi ono l’iwhu Onye-Nwe-Ọha. ¹⁵Hezekáya bya ekfuru nụ Onye-Nwe-Ọha sụ: ¹⁶“Gụbe Onye-Nwe-Ọha, bụ Onye-ishi-igwe-ọgu, mbụ Chileke nke Ízurẹlu, onye sụgaru l’oshi-eze iya l’echilabọ cherubu. Ọo ghu kpelekengu-kpụu bụ Chileke, bụ iya nwekota alị-eze, dụ lẹ mgboko l’owhu. Ọo ghu meru igwe mee mgboko. ¹⁷Ngabẹnu nchị gụbe Onye-Nwe-Ọha, nụa iwhe mu l’ekfu. Sanụa ẹnya ghu whụduwho, gụbe Onye-Nwe-Ọha. Ngabẹduwho nchị l’okfu sukusuku ono, Senakeribu zhiru t’a bya ekfuru nụ gụbe Chileke, nọ ndzụ.

¹⁸“Gụbe Onye-Nwe-Ọha; ọ kwa ire lanụ lẹ ndu eze ndu Asiriya bẹ mewaru mba gẹ mba ha whẹle alị whẹ ọ bụru ọzara-l’ukpo, ¹⁹bya achịta agwa whẹ nwuru ye l’ọku mebyishia, nkele agwa whẹ ono ta adụdu iwhe ọdo ọ bụ, gbahaa oshi mẹe ẹwhuru, madzụ gude ẹka dobe agwa. ²⁰Ọo ya bụ tẹ gụbe Onye-Nwe-Ọha, bụ Chileke anyi dzọfuta nụ anyi l’ẹka eze ndu Asiriya ono, nke ọwhu alị-eze lile, dụkota lẹ mgboko l’owhu l’a-marụ l’ọo gụbedua kpụ, mbụ gụbe Onye-Nwe-Ọha bẹ bụ Chileke.”

Adada Senakeribu

²¹Tọ dụ iya bụ, Ayizáya nwa Émọzu zhia ozhi t’e je ezhia Hezekáya sụ: “Ọ waa iwhe Onye-Nwe-Ọha, bụ Chileke nke Ízurẹlu l’ekfu ndọwa: Iwhe i kfuru nụ mu l’okfu ẹhu Senakeribu, bụ eze ndu Asiriya bẹ mu nụwaru. ²²Ọ waa bụ okfu Onye-Nwe-Ọha l’ekfu l’ishi Senakeribu:

“Nwamgbọko ono, bụ Záyọnu ta adụdu iwhe ọ gụberu ghu, tẹmenu l’ọoja ghu ewenu. Nwada Jerúsalẹmu ono l’ewhuwhe ishi ewhuwhe l’ẹka l’ịigba ọso agbala agbala. ²³?Oo onye b’i shi aja ewenu ekfubyishi? ?Oo onye b’i shi atụ ụzu ekpu, gude etsetse akọ iya ẹnya? Ọ kwa onye nsọ nke Ízurẹlu! ²⁴I zhiru ndu ozhi ghu, whẹ bya ajaa Onye-Nwe-Ọha ewenu. Ị sụru l’i gude ikpoto ụgbo-ịnya-ọgu ghu nyihu ọnunu-swọngu-swọngu ugvu. Mbụ l’i nyihuru ọnunu-swọngu-swọngu ẹka ugvu ugvu Libanọnu jeberu. Tẹmenu i gbutsuwaa oshi sida, dụ iya nụ, mbụ ono, kagezhia otse ogologo mẹe oshi payịnu iya ọwhu kagezhia ọdu ugvu l’ẹnya. Mbụ l’i jeru ẹka kakọta l’eli l’ẹka ono mẹe ẹka kagezhia ya ọbu ẹtsukala, bụ iya bụ ẹka ọswa iya kagezhia ree. ²⁵Mbụ l’ị tụwaru wẹlu l’alị ndu ọdo, ngụa ya mini. Ọ waa l’i gude ọbochi-ọkpa ghu dzọtachaa mini, dụ l’ọnu-iyi, dụ l’alị Íjiputu, ọ tahụkota.

²⁶“Sụa, ?ọo dụ g’i t’ị nụhadua, lẹ mu tụbehawaru t’ọ dụ nno nteke tehawaru ẹnya. Ọ bụru l’oge ndụ-ichee bẹ mu chịru iya dobe. O be ntaa, mu mee ya ememe, mbụ mee nke ọwhu bụ l’ị larụ mkpụkpu, a tụru o shihu ike l’iyi, ọ bụru ikpo ẹwhuru. ²⁷Ndu bu iya nụ, bụ ndu ike l’adụa, b’i meru, whẹ tsụhu egvu, meru iwhere kpua whẹ. Whẹ bya adụ g’ọo ụnwu pomini pomini oshi, dụ l’ẹgbudu, mbụ g’ọo ẹwu, rwuru irwu ọ̀whúú, bya adụ g’ọo ẹwu, furu l’okpotsu ụlo, anwụ chigbushiru l’ẹbe ovutaa evuta.

²⁸“Ọle gụbedua bẹ mụbe Chileke makọtaru ọnodu ghu. Nteke ị nọdu anọdu mẹe nteke ị tụgburu atụgburu mẹe nteke ị batarụ abata bẹ mu makọtaru. Mu marụ g’i gude ababe hanyị hanyị. ²⁹Eshi-ọwhu ọ bụ mu bẹ l’ịibaru hanyị hanyị, eshi-ọwhu sukusuku, l’iikfu rwuwaru mu lẹ nchị bẹ mu l’e-woru aga mu dzụpyabe ghu imi, ye ghu mkpụrumkpu igwe l’ọnu g’ọo ịnya. Mu alọo ghu ilowhu, mee ghu gụ echebe iwhu l’ẹka i shi bya.

³⁰“A bya l’ẹka gụbedua, bụ Hezekáya nọ, ọ waa iwhe l’a-bụru ghu iwhe-ọhubama ndọwa: Awha-a bẹ l’ii-ri iwhe darụ ẹda. Awha nke ẹbo, gụ eria iwhe shi l’ono futa. O -be l’awha nke ẹto iya, gụ akọo okfu kpata iwhe ị kọru iya. Mee mgbabu vayịnu, ria akpụru, l’e-shi iya fụta. ³¹Sụa, nwa ndu ono, l’a-whọdu l’ọzo-ụlo Juda bẹ l’a-gbawhu akwara azụ l’ime alị, mịa mebyi l’elikoru, ³²O noo nkele o nweru whọ nwa ndu l’a-whọdu lẹ Jerúsalẹmu. Ndu wafụru l’ọgu l’e-whudu l’ugvu Záyọnu. Ọ bụru Onye-Nwe-Ọha, bụ Onye-ishi-igwe-ọgu l’e-gude gẹ l’ọowho-be iya l’ẹhu mee t’ọ dụ nno.

³³“Ọo ya bụ l’ọ waa iwhe Onye-Nwe-Ọha l’ekfu l’ishi eze ndu Asiriya ndọwa:

“Ọ tọ byadụ l’e-kpu ishi lẹ mkpụkpu-a. T’ọ bya l’a-gba t’ọ ka mma l’ọo akfụ l’ẹka-a. O too gudedu iwhe ogbobuta onwonye abya l’iwhu ẹka-a. Tọ bya l’egvu ịga-ọgu lẹ mkpụkpu-a. ³⁴Ọo ụzo, o shi bya bẹ l’oo-shi laa. Ọ tọo batadu lẹ mkpụkpu ọwaa abata owhu. O nokwa iwhe Onye-Nwe-Ọha l’ekfu ndono. ³⁵Sụa, mu l’e-kwobe iswi ẹwha mu mẹe iswi Dévidi, bụ onye ozhi mu gbochita mkpụkpu-a dzọfuta iya!”

³⁶Tọ dụ iya bụ, ojozhi, shi l’ẹka Onye-Nwe-Ọha tụgbulekwaruwho jeshia l’ọdu-ọgu ndu Asiriya je egbua ụkporo ụnu madzụ ugbo ụkporo l’ẹto l’ụnu madzụ labọ l’ụkporo iri. A fụta-deshia l’ụtsu, odzu zẹshiwaa gbaa gbaa. ³⁷O noo ya, Senakeribu bụ eze ndu Asiriya whọkashia ụlo-ẹkwa whẹ, ọ bụru iya alashị. Ọ lawhushia azụ lẹ mkpụkpu Nínive je anọdu. ³⁸O be ujiku lanụ, ọ nọdu l’ụlo agwa iya l’aza Nịsuroku l’agwa agwa ono, ụnwu iya bụ Adụrameleku yẹle Shareza jekfu iya, gude ogu-ịgba gbuta iya tụa, mbụ gbugbua ya egbugbu, whẹ gbalaa lashia alị Araratu. Ọo ya bụ, Esahadọnu, bụ nwa iya bya abụru eze l’ọzori iya.

Ẹhu-ba-dụ-mma guderu Hezekáya

¹Ọ bụru nteke ono bẹ ẹhu-ba-dụ-mma guderu Hezekáya, nke ọwhu bụ l’ọ nọdu l’ọnu ọnwu. Onye nkfuchiru Chileke, bụ Ayizáya nwa Émọzu jekfu iya je asụ iya: “Ọ waa iwhe Onye-Nwe-Ọha l’ekfu ndọwa: Dozhia ibe ghu gẹ l’ọo-dụ, nkele ị bya l’anwụhu; ị tịi kadụ mma l’ẹhu ono l’eme ghu nụ.”

²O noo ya, Hezekáya bya echebe iwhu l’ụzo mgbodo kfuru nụ Onye-Nwe-Ọha sụ: ³“Byiko Onye-Nwe-Ọha, iwhe mu l’aryọ ghu bụkwa t’ị nyatanụ gẹ mu bụ-be onye gude ire-lanụ, gude obu mu g’ọ ha etso ụzo nkeghu, mu bụru onye meru iwhe dụ ree l’ẹnya ghu.” Hezekáya ryaa ẹkwa tsọo gbụdagbuda.

⁴Tọ dụ iya bụ, Onye-Nwe-Ọha kfuru okfu nụ Ayizáya sụ iya: ⁵“Je je asụ Hezekáya l’ọ waa Onye-Nwe-Ọha bụ Chileke nke nna ghu, bụ Dévidi l’ekfu ndọwa: Mu nụwaru ekfukfu, i kfuru nụ mu, whụwaa ẹnya-mini, shi ghu l’ẹnya. Mu l’e-yekwafua awha iri l’ise lẹ ndzụ ghu. ⁶Mu l’a-nafụta ghu, nafụta mkpụkpu-a l’ẹka eze ndu Asiriya, mu egbochita mkpụkpu-a.

⁷“Ọ waa bụ iwhe-ọhubama mụbe Onye-Nwe-Ọha l’e-goshi ghu, t’i gude marụ lẹ mbẹdua, bụ Onye-Nwe-Ọha l’e-me iwhe ono, mu kweru ụkwa iya ono. ⁸L’eli ndzọkpa ono a kpụshiru, e shi enyihu ụlo-eli Éhazu, bẹ mu l’e-me tẹ inyonyo, tseru ogologo tsụa itsuwhu dụ ndzọkpa iri.” O noo ya, inyonyo ono bya atsụa itsuwhu azụ dụ ndzọkpa iri amamẹ gẹ ogologo iya shi habe.

⁹Ọ waa iwhe Hezekáya, bụ eze ndu Juda deshiru nteke ẹhu ono megeeru iya, mbụ nteke ọ kagee mma l’ẹhu ono:

¹⁰Mu shikwa aarị l’ọo nteke mu

karụ kajiru akaji kaa kpurukutu

bẹ l’a-nwụhu jeshia ọnoguzo alị-maa.

Nteke ono l’a nafụwa mu rọo

awha, mu gẹge anọfua ndzụ.

¹¹Mu shikwa aarị lẹ mu ta

awhụhedu Onye-Nwe-Ọha ọdo l’alị ndu nọ ndzụ.

Lẹ mu ta awhụhedu madzụ ẹnya ọdo,

mbụ lẹ mu ta awhụhedu ndu bu l’eliwhe-e.

¹²A lashịru ndzụ mu g’ọo onye lashịru ụlo ụnwu-eswi;

mbụ l’ọo g’onye l’akpa iwhe

akpakpa l’agwọje iwhe ọ kparụ

bụ gẹ mu gwọru ndzụ mu agwọgwo.

Ọo gẹ l’ee-byibufuje ẹkwa, l’iwhe e gude akpa ẹkwa

bụ g’o byibufuru ndzụ mu tọgbo.

Wata l’eswe rwua l’ẹnyashi

b’o meru tẹ ndzụ mu bụru whuchakangu.

¹³Mu l’atajẹ nshi nọdu jeye chi asahụ.

Ọle ọ dụlewho g’ọo oduu-gburu-agụ bẹ l’azụpyashi mu

ọkpu l’ẹka l’oogwe mu ọkpu ryaaryaa.

Wata l’eswe rwua l’ẹnyashi

b’o meru tẹ ndzụ mu bụru whuchakangu.

¹⁴Mu ryalahaa g’ọo onye a pyịberu ẹka l’ẹkpiri,

ẹgube ono, apyarube mẹe ẹsa l’anọje arya.

Mu ryalahaa g’ọo ndo.

Mu lenyawaa ẹnya l’imigwe, ẹnya mekota mu ẹhuka.

Mu sụ: Byiko Onye-Nwe-Ọha,

mu l’ejekwa iwhe-ọtsulanu, gbatanụru mu!

¹⁵Ọle ọbu; ?mu l’e-kfu gụnu?

L’ẹka o kfuwaru okfu nụ mu,

tẹmenu ọ bụru yẹbedua bẹ meru iwhe ono.

Mu l’a-nọ eje ije egopa egopa jeye gẹ mu l’a-nọ-beru,

nkele obu bụ mu mgbilu.

¹⁶“Gụbe Onye-Nwe-Ọha,

ọ kwa ụdu iwhe dụ ẹgube-ẹ bẹ madzụ gude buru.

Ọ bụru iya bẹ mu gude nọdu ndzụ.

Byiko, menua tẹ mu gbakerehu

mẹe tẹ mu nọdu ndzụ.

¹⁷Ọ kwa gẹ l’ee-shi t’ọ dụru mu lẹ ree

bẹ mu jeru iwhe-ọtsulanu ono.

Ọ bụru obu, i yeru mu

b’i gude ti kwe tẹ mu nwulahu lẹ nsukutu ọla-l’iswi.

Ị tụko iwhe-dụ-ẹji mu,

megbaberu chịru ghaa l’ụzo azụ ghu.

¹⁸Nkele ndu nọwaa l’alị-maa tee tudu ghu ẹwha.

Ndu nwụhuwaru anwụhu

ta abya l’a-gụ egvu-ajaja nụ ghu.

Ndu ọwhu e liwaru eli

bẹ l’ete elehedu ẹnya ire-lanụ nkeghu.

¹⁹Ọ kwa ndu nọ ndzụ, mbụ l’ọo ndu nọ ndzụ

bẹ l’etu ghu ẹwha gẹ mu l’etu ghu iya ntanụ-a.

Ọ bụru ndu bụ nna l’akọjeru

ụnwu whẹ nke ire-lanụ ghu ono.

²⁰Onye-Nwe-Ọha bẹ l’a-dzọfuta mu.

Anyi l’a-nọ akpọ une gude agụru iya egvu

jeye g’anyi l’a-nọ-beru ndzụ.

Ọ bụru l’eze-ụlo Onye-Nwe-Ọha

bẹ anyi l’a-nọdu agụ iya.”

²¹Ayizáya bẹ kfuhawaru sụ t’e meta akpụru figu tsua etsu debegee Hezekáya l’ezonwu ono, tsekashiru iya l’ẹhu nke ọwhu l’oo-mehu.

²²Hezekáya bya ajịa sụ: “?Ọo gụnu bụ iwhe-ọhubama, l’e-goshi lẹ mu l’e-megee bahụbaa l’eze-ụlo Onye-Nwe-Ọha ọdo?”

Ndu ozhi, shi Bábyilọnu

¹Ọ bụru nteke ono bẹ Merodaku-baladanu, nwa Baladanu bụ eze ndu Bábyilọnu deshiru ẹkwo-ozhi bya ezhifu ndu ozhi tẹ whẹ je anụ iya Hezekáya; o ye iya iwhe whẹ l’a-nụ iya gude jịa ya l’ẹhu ono, shi eme iya nụ, nkele ọ nụru l’ẹhu shi tọ dụ iya mma, ọle ọ kawa iya mma. ²Hezekáya nabata ndu ono, e zhiru ozhi ono ree-ree-ree. Ọ bya egoshi whẹ iwhe nọkota l’ụlo-ẹku iya; goshi whẹ mkpọla-ọcha mẹe mkpọla-ododo mẹe mmanụ, l’eshi mkpọ mẹe mmanụ, l’ere ire mẹe ngwọgu iya l’owhu, tụko iwhe dụkota l’ụlo-ẹku iya goshikota whẹ. Ọ tọ dụdu iwhe dụ l’ibe iya mẹe ọwhu dụ l’alị-eze iya l’owhu, l’ooto goshia ndu ono, mbụ Hezekáya.

³Tọ dụ iya bụ, Ayizáya, onye nkfuchiru Chileke bya ejekfu eze bụ Hezekáya jị iya sụ: “?Ọo gụnu bẹ ndu ono kfuru? ?Ọo awe bẹ whẹ shi bya nkeghu?”

Hezekáya sụ iya: “Whẹ shikwa ẹka teru ẹnya bya. Ọ kwa Bábyilọnu bẹ whẹ shi bya.”

⁴Ayizáya jị iya sụ: “?Whẹ whụgbaberu gụnu l’ibe ghu?”

Hezekáya sụ iya: “Whẹ whụkotaru iwhe lile, dụ l’ibe mu. Ọ tọ dụdu ẹku, mu nweru enwe, mu l’ete egoshia whẹ.”

⁵O noo ya, Ayizáya bya asụ Hezekáya: “Nụkwaa okfu Onye-Nwe-Ọha, bụ Onye-ishi-igwe-ọgu l’ekfu. ⁶Ọ sụru agha: Oge l’abyawaa; nteke iwhe lile, dụ l’ibe ghu mẹe iwhe lile, nna ghu whẹ setaru dobe, ọ dụ byeye ntaa l’a-bụru iwhe e vutaru lashia Bábyilọnu. Ọ tọ dụdu iwhe a bya l’e-wowhodo ewowhodo. O nokwa iwhe Onye-Nwe-Ọha l’ekfu ndono. ⁷Ụnwu ghu nwoke, bụ ndu ọ bụ ghu nwụru bẹ l’aa-harụ kpụta, whẹ eje abụru ndu a harụ aha nọdu l’ibe eze ndu Bábyilọnu.”

⁸Hezekáya sụ Ayizáya: “Okfu Onye-Nwe-Ọha ono, i kfuru bẹ dụkwa ree.” Iwhe ọ rịru kfua nno bụ lẹ nchị l’a-dụ yẹbedua ndoo, l’ọ tọ dụdu iwhe bya l’e-me nteke ọ nọkwadu ndzụ.

Ọdu ndu nke Chileke obu

¹Unu dụa ndibe mu obu. Unu dụa whẹ obu.

O nokwa iwhe Chileke unu l’ekfu ndono.

²Unu kfuru okfu njima nụ Jerúsalẹmu.

Unu ryaa ya aryarya t’ọ marụ

l’ozhi ọkpehu ono, l’ooje bẹ gvụwaru.

Mbụ l’a kfụwaru ụgwo iwhe-dụ-ẹji o metagbaberu.

Tẹhenu ọ natawaa iwhe shi l’ẹka Onye-Nwe-Ọha

ọwhu ha g’ọo ya ugbo labọ;

l’iswi iwhe-dụ-ẹji ono, o metagbaberu.

³O nweru onye l’echi mkpu asụje:

“Unu mechaaru Onye-Nwe-Ọha ụzo l’echi-ẹgu.

Unu mee ogborogbo ụzo Chileke anyi

t’ọ kfụ-geeru nhamụnha l’echi-ẹgu alị-ivovonyi.

⁴Ẹka dụ nsụda nsụda bẹ l’ee-nwuchikota enwuchi.

Iwhe lile, bụ ugvu mẹe mgbogidi

bẹ l’aa-rwazekota arwaze.

Ẹka dụ nswịko nswịko bẹ l’ee-me, ya akfụru nsụmini.

Ẹka dụ kpọkoro kpọkoro bẹ l’aa-rwaze arwaze,

ya akwọhu mụrumuru.

⁵O noo nteke ọdu-biribiri nke

Onye-Nwe-Ọha l’a-fụta iwhe.

Iwhe bụkota madzụ swịikpamu awhụkota iya,

nkele mụbe Onye-Nwe-Ọha kfuakwaru nkemu.”

⁶O nweru olu-okfu l’ekfu sụ: “Chia mkpu!”

Mu sụ: “?Ọo gụnu bẹ mu l’e-chi lẹ mkpu?”

Ọ sụ: “Chia mkpu sụ lẹ madzụ lile dụ g’ọo ẹwu.

Ụma madzụ l’ama dụkwawho

g’ọo ụma nzịrizaa ẹwu, dụ l’ẹgbudu.

⁷Ẹwu l’akpọje nkụ; nzịrizaa ẹwu l’erishihuje dashịa

mẹ Onye-Nwe-Ọha -kushi iya ume.

Ishi iya bụlewho lẹ madzụ bụ ẹwu.

⁸Ẹwu l’akpọjekwa nkụ bụ l’ezhi,

nzịrizaa ẹwu l’erishihuje erishihu dashịa,

ọle Chileke anyi bẹ okfu iya

l’adụjekwa lẹge o kfuru iya jeye lẹ tututu-mịmimi.”

⁹Je akfukoru l’eli ugvu ha shii, gụbe Záyọnu,

bụ onye wolataru ozhi-ọma.

Wolia olu ewoli chia ya ochi mkpu,

t’egvu ba atsụshi ghu,

mbụ gụbe Jerúsalẹmu ono, wolataru ozhi-ọma!

Kfuru mkpụkpu dụkota l’alị ndu Juda sụ whẹ agha:

“Unu lee Chileke unu ndọwa!”

¹⁰Unu lekwa Nnajị-Ọha, bụ Onye-Nwe-Ọha

g’o gude ike iya eje abya.

Ọobya tẹ ya gude ọkpehu iya chịa.

Lekwa; o gudekwa obunggo eje abya,

mbụ l’o gude ụgwo, l’ọo-kfụ ndibe iya l’ẹka.

¹¹Nwa ndọkobe atụru iya bẹ l’ọonoje eche

g’ọo onye l’eche atụru.

Ụnwu atụru iya bẹ l’oohejeru l’ẹka;

l’ookutaje whẹ tukobe onwiya l’ikpobu.

O nokwawho gẹ l’oogubeje

nwẹhu erwu ndu ọwhu he nwa l’ẹka.

¹²?Oo nweru onye gwajẹru ẹka

okoroko gude tụ̀a mini, dụ l’ẹnyimu atụ̀tù?

?T’o nweru onye gudeje

ntụ-ẹka tụa akpamigwe l’owhu?

?Oo nweru onye gudeje nkata

kpota ivovonyi, dụkota lẹ mgboko?

?Oo nweru onye wotajeru

iwhe-atụ̀tù tụ̀kota ẹrwa ugvu?

?T’o nweru onye wotajeru

iwhe-atụ̀tù gude tụ̀a nhamụnha mgbogidi?

¹³?Oo onye tụjeru Ume

Onye-Nwe-Ọha iwhe l’oo-me?

?Oo onye kpọ-zhijeru iya ụzo

sụ iya l’ọ waa iwhe l’oo-me?

¹⁴?Ọo onye bẹ Onye-Nwe-Ọha

jejeru ọkpata ishi iwhe l’oo-me?

?Ọo onye zhijeru iya ụzo ọwhu bụ ọkpobe iya?

?Ọo onye zhiru iya ọ marụ iwhe?

?Ọo onye goshiru iya ụzo,

l’oo-shi, iwhe edojee ya ẹnya?

¹⁵Ishi iya bụ lẹ mba nọnu bẹ dụlewho g’ọo mini,

tadarụ pọmu lẹ pokiti.

E wotaru whẹ g’ọo ivovonyi, dụ l’iwhe e gude atụ iwhe.

Alị, dụkube eze-ẹnyimu bẹ l’oogudeje iwhe-atụ̀tù atụ

g’ọo onye l’atụ ivovonyi.

¹⁶Ọswa, dụ l’ugvu ugvu Libanọnu ta asụkwa gẹ

l’ọo-bụru nkụ l’ee-gude shia

iwhe e gude agbarụ Onye-Nwe-Ọha ẹja.

Anụ dụkota l’ọswa ono ta asụ gẹ l’ee-gbukota iya

gude gbaarụ Onye-Nwe-Ọha ẹja ọkpokota-iwhe-ọku.

¹⁷Mba gẹ mba ha dụkota

g’ọo iwhe mmaanụ l’iwhu iya.

Iwhe o wotaru whẹ bụ lẹ whẹ bụ iwhe mmaanụ,

bụru iwhe iwhoro.

¹⁸?Oo onye bẹ unu l’e-wota tụberu Chileke?

?Oo nweru ntẹkpe, unu l’a-sụ lẹ yẹle iya bụ iwhe lanụ?

¹⁹A bya abya lẹ ntẹkpe, a kpụru akpụ,

onye kpụru iya nụ bụ onye l’eme nka.

Onye l’eme nka lẹ mkpọla-ododo

l’arwụ-wheje iya mkpọla-ododo,

bya emeru ẹgbirigba mkpọla-ọcha ye iya.

²⁰Onye darụ ụkpa databe iya

nke ọwhu bụ l’ọ tọ dụdu ike

anụ Chileke ẹgube iwhe ono

bẹ l’ahọtaje oshi, l’ẹte erehu erehu,

chọo onye l’eme nka shii, t’ọ bya emetaru iya ntẹkpe,

l’ẹte abya l’anọnyaa halịberu ọkpa.

²¹?Unu ta amahadụa? ?Unu ta anụbudua?

?T’e kfuhaduaru iya unu eshi mbụlembu?

?Mbụ too dodua unu ẹnya g’e shi tụa ukfu mgboko?

²²Onye meru iya nụ bụkwa onye ono,

nọdu l’oshi-eze iya l’ewhekerewhe nọghata

eliwhe kpaa mgburumgburu.

Ndu bu l’eliwhe ono bẹ dụkota iya g’ọo ụnwu ogu.

Igweli l’owhu b’ọ tụsaru atụsa g’ọo onye tụsaru ukpo,

bya ekwesaa ya, o kpuru

g’ọo ụlo e gude ẹkwa kwee nke ebubu.

²³Oomeje tẹ ndu bu ishi ba adụhe iwhe whẹ l’a-bụ.

L’oomeje ndu l’achị mgboko-o,

whẹ abụru iwhe mmaanụ.

²⁴Ọbua akụku, l’aakụkwadu whẹ l’alị,

mẹe adzabẹ, l’aadzabẹkwadu whẹ l’alị,

whẹ jee tẹ whẹ gbabẹ akwara l’alị,

ya awhụa whẹ ọnu, whẹ anwụa lwaa,

uburu-aga abya ezhikota whẹ g’ọo ẹswa ereshi.

²⁵“?Ọo onye bẹ unu l’e-wota tụberu mu?

?Ọo onye bẹ mu l’iya bụ iwhe lanụ?”

O noo ajị, onye nsọ l’ajị ndono.

²⁶Palia ẹnya l’igweli.

?Oo onye meru iwhe lile ono g’ọ ha?

Ọ kwa onye ono,

l’emeje tẹ kpokponde l’afụshi nnanụ nnanụ,

mbụ onye ono, l’anọje eku whẹ ẹwha l’ẹhu l’ẹhu.

Ike o nweru bẹ haa shii, ọkpehu dụ iya nụ paa ẹka;

ọo ya meru, kpokponde ono

ta adụ ọwhu l’aachọ achọ m’ọo nnanụ.

²⁷Unubẹ ndibe Jékọpu,

?ndẹe g’o gude unu kfua ụdu okfu ọwa?

Unubẹ ndibe Ízurẹlu, ?ọo gụnu meru g’o gude unu

l’agụ ngịrima ono, unu l’agụ

asụje lẹ Onye-Nwe-Ọha

ta amadụ iwhe-ọtsulanu, unu l’eje,

mbụ lẹ Chileke unu ta akpajẹdu ishi tẹ ya

meeru unu iwhe gbarụ unu?

²⁸?Unu ta amahadụa? ?Unu ta anụbudua woo lẹ

Onye-Nwe-Ọha bụ Chileke,

l’a-nọ jeye lẹ tututu-mịmimi?

Onye ono, meru eliwhe l’owhu jeye ẹka o jeberu.

Ike ta agvụjedu iya agvụ, ẹhu ta atsụje iya mmẹe,

ọ tọ dụdu onye makọtaru g’o gude kwabẹ ẹnya.

²⁹Onye ike gvụru bẹ l’oomeje t’ike dụ.

Onye ụvo l’adụa bẹ l’oomeje t’ụvo dụ iya.

³⁰Unwokorọbya l’anọnyajee, ike agvụshia whẹ,

ẹhu atsụshia whẹ mmẹe.

Unwoke ọgbo uke l’anọnyajee kpokuta iwhe daa iko.

³¹Ọle ndu ẹnya whẹ dụ l’ẹka Onye-Nwe-Ọha nọ

bẹ ike l’a-kabaa adụdu.

Whẹ l’e-gude akwẹka whee l’eli g’ọo ugo.

Whẹ l’e-whe ewhewhe ọso,

ike ta abya l’a-gvụ whẹ agvụ.

Whẹ alọo nlọba ije, ẹhu ta abya l’a-tsụ whẹ mmẹe.

Onye l’e-yeru Ízurẹlu ẹka

¹“Unubẹ ndu bukube ẹnyimu,

unu daa gbẹe, ngabẹru mu nchị!

T’ike kabakwaa ọdu ọhamoha!

Tẹ whẹ kpịlitaru akpịlitaru bya eyee oke ọnu whẹ.

T’anyi tụko g’anyi ha dzua edzudzu l’ụlo-ikpe.

²?Oo onye kpatsutaru onye dụ chịriri ono,

shi ụzo ẹnyanwu-awata,

mbụ onye ono l’abụje, ọ -hata ọkpa,

ya alwụa lwụ-gbua.

Onye-Nwe-Ọha l’ewojeru ọhamoha ye iya l’ẹka,

mee t’iwhe bụ ndu eze lwakọta iya lẹ mkpula ọkpa.

Oogudeje ogu-ịgba iya egwe whẹ uji,

gude akfụ iya achịkashi whẹ

g’ọo ẹswa whẹrewhere l’ewhekashi.

³Ọochije whẹ ọso, chị-whua whẹ achị-whu,

ya aghata ejeru onwiya g’ẹhu ha iya.

Ọogha-geje ghaa l’ụzo, l’ọotoo ghabua.

⁴?Ọo onye meru iwhe dụ nno, mee ya mekota?

Mbụ onye ono shi lẹ mbụ mee,

ọgbo ọwaa gbagee, ya ekua ọgbo ọdo,

whẹ afụta bya agbaa.

Ọo Mu bụ Onye-Nwe-Ọha meru iwhe ono.

Iwhe vugezhia ụzo gbaa bụ mbẹdua meru iya,

iwhe l’agba l’ikpazụ-a bụru mbẹdua l’eme iya.”

⁵Ndu bukube eze-ẹnyimu

bẹ whụru iwhe ono mu meru, whẹ tsụhu egvu.

Ndu bu l’ẹka igwe beru alị beru bẹ l’anmakọta jijiji.

Whẹ dzukobewaru eje abya.

⁶Onyenọnu l’eyeru ibe iya ẹka.

Whẹ kpakọ ekfuru ibe whẹ sụ:

“T’obu shihukwa ghu ike!”

⁷Onye l’eme nka l’oshi l’asụje

onye l’akpụ mkpọla-ododo l’ọ dụkwawho ike.

Onye gude ọngu eme t’iwhe kwọhu tẹretere

l’asụje onye l’akụgbabe iya akụgbabe t’o jishia ike.

Ọ fụta, ya asụ onye ọwhu gude

ọku edzegbabe iya edzegbabe: “Ọ dụ ree.”

Whẹ abya akụa ntẹkpe ono aga t’o shihu ike,

nke ọwhu l’ọotoo yọkashihu.

Ízurẹlu bụ ndu Chileke họtaru

⁸“A byakwanụ lẹ gụbedua,

bụ Ízurẹlu, bụ onye ozhi nkemu,

mbụ Jékọpu, bụ onye mu họtaru,

gụbe ẹpa Ébirihamu, bụ ọnya mu;

⁹gụbe onye ono, mu dutaru

l’ẹka igwe beru alị beru,

mbụ gụbe onye mu shi l’ẹka kagezhia otẹnya kua,

bya asụ ghu l’ị bụ onye ozhi nkemu,

lẹ mu họtawaru ghu, mu ta abya l’ajịka ghu ajịka ọdo.

¹⁰Ba atsụshi egvu, o noo nkele mu nọdu swiru ghu eswiru.

T’obu be echifushi ghu echifu,

o noo nkele ọo mu bụ Chileke ghu.

Mu l’e-me t’i shihu ike; mu l’e-yeru ghu ẹka.

Mu l’e-gude ẹka-ụtara mu ono, mu l’egudeje

eme iwhe dụ chịriri gudeshia ghu ike.

Ízurẹlu l’a-lwụ-gbu ndu ọhogu iya

¹¹“Iwhe bụ ndu l’abarụ ghu hanyị hanyị

bẹ l’ee-kpu iwhu l’oguri tụru ẹyerebeke nụ whẹ.

Ndu l’etso ghu okfu te enwedu iwhe whẹ bya l’a-bụru,

gbahaa kpurupyata.

¹²Ịi-chịka ẹnya t’ị marụ mẹ

ndu ọhogu ghu ono whẹ l’erwuwaa,

ị tịi whụdu whẹ.

Ndu l’alwụshi ghu ọgu ta adụdu iwhe whẹ bya l’a-bụru.

¹³O noo nkele ọo Mu bụ Onye-Nwe-Ọha,

bụru Chileke ghu,

onye gude ghu l’ẹka-ụtara ghu.

Ọo mbẹdua bẹ sụru ghu t’ị ba atsụshi egvu,

lẹ mu l’e-yeru ghu ẹka.

¹⁴Ba atsụshi egvu,

gụbe nworishi ono, bụ Jékọpu,

mbụ gụbe nwẹpyara-une ono, bụ Ízurẹlu,

nkele mu l’e-yeru ghu ẹka.”

O nokwa iwhe Onye-Nwe-Ọha l’ekfu ndono.

Ọo ya bụ Onye nsọ nke Ízurẹlu,

bụ onye gbafụtaru ghu nụ.

¹⁵“Leenu, mu l’e-me ghu

t’ị bụru iwhe e gude echi ereshi,

mbụ iwhe dụ ọ̀whúú, l’atsụ nkọ, bya enweru ézé.

Ugvu g’ugvu ha bẹ l’ii-chi tọlitoli,

gwee ya aryaka-eryune.

Mbụ gwepyashia ya, ya etsu

buruburu g’ọo mkpaba ereshi.

¹⁶Ịi-whụchashi whẹ awhụchashi,

whẹrewhere ewhekashia whẹ.

Oke-whẹrewhere apakashịa whẹ nnanụ nnanụ.

Gụbedua l’onwoghu l’e-gude

Onye-Nwe-Ọha ete ẹswa.

Onye nsọ nke Ízurẹlu abụru

onye l’ii-gude eku onwoghu eku.

Chileke l’e-me t’iwhe l’ejeru ndu Ízurẹlu l’iwhu l’iwhu

¹⁷“Nteke ndu ụkpa mẹe ndu

l’adụa g’ọ harụ whẹ l’achọ mini,

whẹ l’a-ngụ, whẹ ta awhụ iya,

ire kpọhu whẹ nkụ l’ẹka ẹgu mini l’eme whẹ,

mbẹdua bụ Onye-Nwe-Ọha aza whẹ oku.

Mbẹdua, bụ Chileke nke Ízurẹlu ta ahadụ whẹ.

¹⁸Mu l’a-gbafu ẹnyimu mini,

ya awata asọso l’alị ọkponku.

Mu agbafua ẹnya ẹka mini l’eshi asọ lẹ nsụda.

Mu l’e-me tẹ echi-ẹgu

alị-ivovonyi bụru okpuru, mini jiru kpimu.

Alị ọkponku abụru ẹka mini l’e-shi asọshi.

¹⁹L’echi-ẹgu bẹ mu l’e-ye oshi sida, mẹe oshi akeshiya

mẹe oshi mịyituru, mẹe oshi ólivu.

Mu eworu oshi payịnu, mẹe

oshi fịru, mẹe oshi sayịpuresu dzaa l’alị-ụchi.

²⁰Nke ọwhu ndu madzụ l’a-whụ iya hụbe iya ama,

whẹ egbua iya nke, ya edoo whẹ ẹnya

l’ọo Onye-Nwe-Ọha bẹ gude ẹka iya mee iwhe ono,

mbụ l’ọo Onye nsọ nke Ízurẹlu

bẹ mekotaru iwhe lile ono dobe.

Onye-Nwe-Ọha l’ama agwa ẹka l’iwhu

²¹“Unu bya edoodaa edo unu.”

O nokwa iwhe Onye-Nwe-Ọha l’ekfu ndono.

Onye ono, bụ eze nke ndibe Jékọpu sụru agha:

“Unu bya ekfua g’unu marụ.”

²²“Unu je eduta agwa unu

t’ọ fụta bya akarụ anyi iwhe l’e-me nụ.

Tẹ whẹ bya akarụ anyi iwhe gbahawarụ nụ.

Tẹ whẹ bya akarụ iya anyi, t’anyi rịa ya arịri,

nke ọwhu anyi l’a-marụ iwhe l’oomegee nwụfuta.

Ọdua t’unu kfuru anyi iwhe l’e-bekoo mee.

²³Unu karụ anyi iwhe l’e-me l’atatiwhu

nke ọwhu anyi l’a-marụ l’unu bụ agwa, l’eme ire.

Unu mee nnanụ goshi anyi; m’ọ dụ ree m’ọ dụ ẹji,

nke ọwhu anyi l’a-nmahụ

kwekwekwe tsụhu egvu.

²⁴Lenu l’ọ tọ dụdu iwhe unu bụ.

Iwhe unu l’eme bụru iwhe

mmaanụ, l’adụa iwhe ọ lị.

Onye hatarụ unu bụkwa ahụma bẹ onye ọbu meru.

²⁵O nweru onye mu kpaliru l’ụzo isheli; l’ọobyawa.

O shi l’ụzo ẹka ẹnyanwu l’awatajẹ eku ẹwha mu.

Ndu bu ishi bẹ l’ọo-dzọ

pyaapyaa g’ọo onye l’atsụ nri l’ọtumu,

mbụ g’ọo ẹka onye l’akpụ ite

l’adzọ ụrwa, o gude akpụ ite.

²⁶?Oo onye bẹ kfuru iwhe-e eshi mbụlembu

nke ọwhu anyi l’a-marụ iya?

?Oo onye bẹ nmahawarụ iya ọnma ọkwa,

nke ọwhu anyi l’a-sụ l’iwhe o kfuru bẹ ntụpo l’adụdua?

O to nwedu onye kfujeru iya.

Tọ dụ onye nmajẹru iya ọ-nma ọkwa.

Ọ tọ dụdu onye nụjeru okfu unu.

²⁷Ọo mbẹdua bẹ vu ụzo kfuaru Záyọnu sụ iya:

‘Lekwa whẹ ndọwa!’

Ọ bụru mu bẹ yeru onye je ezhia

Jerúsalẹmu ozhi-ọma ono.

²⁸Ọle mu leru ẹnya, tọ dụ onye mu levuru.

Ọ tọ dụdu onye mu whụru l’echilabọ whẹ,

l’adụ ike bụru onye mgbazhi.

Mbụ onye bụ mu jịa ajị; ya asaa mu iya.

²⁹Lewaro, whẹ tụko bụru iwhe mmaanụ.

Iwhe whẹ l’eme bụru iwhe mmaanụ.

Agwa whẹ bẹ bụkota

whẹrewhere yẹle iwhe-iwhoro.

Onye ozhi nke Onye-Nwe-Ọha

¹“Onye ọwaa bụ onye l’ejeru mu ozhi, mbụ onye mu gude ẹka mu gudeshia ike.

Onye mu gude ẹka mu họta,

bụru onye l’emeje t’obu jizeta mu.

Mu l’e-ye iya Ume mu l’ẹhu,

T’o wobata ikpe, kfụru nhamụnha bya edobe

lẹ mba gẹ mba ha, dụ lẹ mgboko-o.

²O too jekwa ọrya ọrya; too jehunu ochi mkpu.

Tọ dụhunu onye bya l’a-nụ olu iya l’echi-ụzo.

³Ọ whụa ikpuruma, gọru agọgo

bẹ l’ọo-tọ nyajidu iya.

Tọo whụ-nyi oryọku, l’enwu ẹreswe ẹreswe.

Oo-gudelewho ẹka iya g’o gude iya wobata

ikpe, kfụru nhamụnha.

⁴Ike ta abyakwa l’a-gvụ iya,

ume ta abya l’e-buhu iya

jeye nteke l’oo-me t’ikpe,

kfụru nhamụnha keru ọkpa l’eliwhe.

Ndu bukube eze-ẹnyimu elelahaa ẹnya iwu iya.”

⁵Ọ waa iwhe Chileke, bụ

Onye-Nwe-Ọha l’ekfu ndọwa,

mbụ onye ono, meru igwe, bya alọchia ya alọchi;

onye ono, tụsaru mgboko atụsa

mẹe iwhe lile, dụ iya nụ;

mbụ onye l’anụje ndu bu

lẹ mgboko ume, whẹ l’atụ,

nụ ndu l’eje ije l’eli iya ndzụ.

Ọ sụru agha:

⁶“Ọo Mu bụ Onye-Nwe-Ọha

gude ọ-dụ-chịriri mu kua ghu.

Mu je l’e-seta ghu l’ẹka gudeshia ghu ike.

Mu l’a-kwakọbe ghu, mee ghu

t’ị bụru onye l’ee-shi l’ẹka iya,

mu lẹ ndiwhe agbaa ndzụ.

Gụ abụru iwhoro, dụru mba lile,

⁷shi nno mee t’ẹnya saa ndu l’atsọ ishi,

mee tẹ ndu a kpụru lẹ ndzụ nweru onwowhe,

mekwaawho t’a haa ndu nọ

lẹ mkpọro ẹka gbarụ tsụkiriti.

⁸Sụa, ọ kwa Mu bụ Onye-Nwe-Ọha.

O noo ẹwha mu gẹdegede.

Ugvu rwuberu mu nụ bẹ mu

l’ete ewokwaru anụ iwhe ọdo.

Mu te eworu ama, l’aaja mu haarụ agwa.

⁹Leeda, akahụ iwhe mu sụru

l’oo-me bẹ meekwaru ghata.

Mu l’ekfuwaa nke ọ̀whúú ntaa.

Mu l’ekfujeeda iwhe ọbu tẹmenu ya awata ememe.”

Egvu, e gude aja Onye-Nwe-Ọha

¹⁰Unu gụa egvu ọ̀whúú nụ Onye-Nwe-Ọha.

Unu shi l’ẹka mgboko beru jajẹ iya ajaja.

Unubẹ ndu l’agha l’eze-ẹnyimu jajẹ iya ajaja;

iwhe lile, bu l’eze-ẹnyimu aja iya ajaja.

Unu jaa ya, unubẹ alị ono, dụkube eze-ẹnyimu

mẹe unubẹ ndu bu iya nụ.

¹¹T’echi-ẹgu yẹle ndu bukota iya nụ kpọo orwube!

T’ụnwu mkpụkpu ẹka ndu Keda bu tekota ẹswa.

Tẹ ndu Sela gụa egvu ẹhu-ụtso.

Tẹ whẹ je anọdu

l’ọnunu-swọngu-swọngu ugvu kpọo orwube.

¹²Tẹ whẹ kwabẹkwa Onye-Nwe-Ọha ugvu.

Whẹ anọdu l’alị ẹka ẹnyimu

sọ-wheru mgburumgburu jaa ya ajaja.

¹³Onye-Nwe-Ọha l’a-dzọru kwagangụ kwagangụ

lụfuta g’ọo ojọgu.

Ọo g’onye ojọgu l’a-vọjeru ọku ghụa ẹhu bụ

gẹ l’ọo-vọru ọku ghụa ẹhu,

ya aryaa ọrya gude chia mkpu ọgu,

ya emeru goshi ndu ọhogu iya l’ọ ka whẹ ẹkuku.

Chileke l’ekwe ndibe iya ụkwa n-yemẹka

¹⁴“Mu shiwaa eshi bụ gụnu nọduta nggujingguji.

Mu shi data shịikfuu, sedeta onwomu.

Ọle ntaa bẹ mu bya l’aryangịrihu g’ọo nwanyị, ime l’eme.

Mu bya l’awata ọtsu ude atụ hẹehee.

¹⁵Mu l’e-me t’ugvu lile daburu whochangu.

Mu amịkota mini l’irwu, dụ iya nụ t’ọ kpọshihu nkụ.

Mu l’e-me t’ẹnyimu ghọkota alị ọkponku.

Mu emee t’okpuru tahụkota.

¹⁶Mu l’e-duru ndu kpuru ishi shia ụzo, whẹ l’ẹte amahaa.

Mu l’a-kpọ-zhiru whẹ ụzo l’echi-ụzo, whẹ l’ẹte amahaa.

Mu l’e-me t’ọochi bụru whẹ iwhoro.

Mu arwazeeru whẹ ẹka dụ kpọkoro kpọkoro

t’ọ kwọjeru whẹ mụrumuru.

Iwhe lile ono bẹ mu l’e-mekotagezhia,

ọ tọ dụdu ọwhu mu bya l’aha ememe.

¹⁷Ọle ndu kpọru obu ye l’agwa,

mbụ ndu l’asụje l’ọo iwhe a

kpụru akpụ gude ndzụ whẹ,

bẹ mu l’a-gha iwhu igharawhu,

mee whẹ iwhe-iwhere, ka l’iwhe-iwhere.

Ndu Ízurẹlu l’atsọ ishi ada nkụchi

¹⁸“Unubẹ ndu l’ada nkụchi, unu nụaro iwhe lẹ nchị.

Unubẹ ndu l’atsọ ishi, unu paliaro ẹnya whụ ụzo.

¹⁹?Oo onye bụ onye ọbu, l’atsọ ishi,

gbahaa onye ozhi mu?

?Oo onye l’ada nkụchi g’ọo onye ono, mu zhiru ozhi?

?Oo onye l’atsọ ishi g’ọo onye ono, nọ mu l’ẹka?

?Oo onye l’atsọ ishi g’ọo onye ozhi Onye-Nwe-Ọha?

²⁰Ị whụwaru igweligwe iwhe,

tọ dụro ọwhu l’ịingabeje nchị.

Nchị gheru ghu ọnu, tọ dụ iwhe l’ịinuje.”

²¹Onye-Nwe-Ọha bụ onye dụ chịriri.

Ọo ya meru g’o gude ọ nụ iwu nkiya

t’ọ bụru iwhe l’ereshi ire ike,

bụru iwhe l’aakwabẹ ugvu.

²²Ọle whẹ bụ ndu a natarụ iwhe whẹ lẹ nfụ,

bụru ndu a vụru arya whẹ l’ọgu.

Gẹ whẹ ha bẹ nmarụ l’ẹto l’ime nsukutu.

Whẹ bụ ndu a tụ-chiru atụ-chi lẹ mkpọro domia edomi.

Whẹ bụwaa ndu a lwụtaru alwụta,

tọ dụ onye l’agbatarụ whẹ.

Whẹ bụwaa arya, a vụtaru l’ọgu,

tọ dụ onye l’a-sụ: “Unu duwhu whẹ azụ.”

²³?Oo onye l’ime unu l’a-ngabẹ nchị l’okfu-a;

m’ọ kwanụ gebe nchị ree l’ụzo atatiwhu?

²⁴?Oo onye harụ ndibe Jékọpu

tẹ whẹ bụru arya, a vụtaru l’ọgu?

?Oo onye harụ ndu Ízurẹlu

tẹ whẹ bụru ndu a lwụtaru l’ọgu?

?Tọ dụ Onye-Nwe-Ọha bẹ meru iya,

mbụ onye ono, anyi mesweru?

Nkele whẹ harụ otso ụzo iya.

Whẹ jịka ome iwhe iwu iya kfuru.

²⁵Ọo iwhe ono meru,

ọ wụ-kpushi whẹ oke ẹhu-eghughu iya,

mee t’ejo ọgu dakfu whẹ.

Ọo g’ọku l’anọje enwu whuruwhuru bụ gẹ

ẹhu-eghughu iya ono gbarụ

whẹ mgburumgburu obenu l’o to dodu whẹ ẹnya.

O kepyashiru whẹ ekepyashi,

ọle whẹ te egudedu iya nwụta iwhe.

Onye bụ iya kpụ l’a-dzọ ndu Ízurẹlu

¹Ọ waa iwhe Onye-Nwe-Ọha l’ekfu ntaa,

mbụ onye ono bụ iya meru gụbe Jékọpu,

ọ bụru iya kpụru gụbe Ízurẹlu. Ọ sụru agha:

“Ba atsụshi egvu, nkele mu gbafụtawaru ghu.

Mu kuwaru ghu l’ẹwha, ị bụru nkemu.

²Ị ghadẹ lẹ mini bẹ mu l’e-swiru ghu eswiru.

Nteke bụ l’ọo ẹnyimu bẹ l’ịigha, ọ tọ byadụ l’e-ri ghu.

I -gude ọkpa jee ije l’eli ọku,

bẹ l’ọoto byadụa l’a-hụ ghu.

Ire ọku iya ta abya l’e-kebata ghu ekebata.

³O noo nkele ọo Mu bụ

Onye-Nwe-Ọha, bụ Chileke ghu.

Ọo mu bụ Onye nsọ nke Ízurẹlu,

bụru onye ndzọfuta ghu.

Ọo ndu Íjiputu bẹ mu nụru gude gbata ghu.

Ọ bụru ndu Itiyópiya yẹle ndu Seba

bẹ mu nụru l’ọzori ghu.

⁴Eshi-ọwhu ị bụ onye dụnuka mu mkpa,

bụru onye l’aakwabẹ ugvu l’ẹnya nkemu,

mbụ l’eshi ọwhu mu yeru ghu obu

bẹ mu l’e-woru ndiwhe nụ gude gbanweta ghu,

mu eworu ndu madzụ nụ l’ụgwo ndzụ ghu.

⁵Ba atsụshi egvu, nkele mu swiru ghu eswiru.

Ẹpa ghu bẹ mu l’e-shi l’ụzo ẹnyanwu-awata chịlata,

shi l’ụzo ẹnyanwu-arịba chịlatakota ndibe ghu.

⁶Mu l’e-je asụ isheli: ‘Pakwarụ whẹ haa tẹ whẹ lwa!’

Mu eje asụ ọhuda: ‘Be esedekwa whẹ!’

Unu shi l’alị otẹnya ono chịlataru mu ụnwu mu unwoke.

Unu eshi l’ẹka mgboko beru

chịlataru mu ụnwu mu ụnwanyi,

⁷Mbụ iwhe bụ onye l’eekuje ẹwha ala l’ẹwha nkemu.

Ndu mu meru t’e gude tua mu ẹwha.

Ndu mu gude ẹka mu kpụa; bya emee whẹ dobe.”

Ízurẹlu bụ ndu ẹka-ebe Onye-Nwe-Ọha

⁸Unu dufuta ndu ono, bụ

o-nweru ẹnya, l’ẹte awhụ ụzo ono,

mbụ ndu ono, bụ o-nweru nchị, l’ẹte anụ iwhe.

⁹Tẹ mba gẹ mba ha gbakodzua.

Iwhe bụ madzụ l’owhu edzukota.

?Ọo onye l’ime whẹ bẹ kfuru iwhe l’e-me ntaa?

?Ọo ndu ole bẹ kfuru ọwhu mehawaru nụ?

Tẹ whẹ kunua ndu ẹka-ebe whẹ

tẹ whẹ bya egoshi l’iwhe whẹ kfuru bụ ọkpobe iya,

nke ọwhu ndu ọdo l’a-nụ iya sụ l’ọ waa ezhi-okfu.

¹⁰“Ọ kwa unu bụ ndu ẹka-ebe mu.”

O nokwa iwhe Onye-Nwe-Ọha l’ekfu ndono.

“Ọ bụru unu bẹ mu họtaru t’unu l’ejeru mu ozhi,

nke ọwhu unu l’a-hụbe mu ama, kweta nkemu.

Ya edokwawho unu ẹnya l’ọo mu bụ onye ọbu.

Ọ tọ dụdu Chileke ọdo, a kpụru dobe, t’a gụfu mbẹdua.

Chileke ọdo ta abya l’a-dụ, gbahaa mbẹdua.

¹¹Ọo mu, mbụ mbẹdu-ọwa

gẹdegede bụ Onye-Nwe-Ọha.

Onye ndzọta ọdo ta adụhedu, t’a gụfu mbẹdua.

¹²Mu kfuru iwhe l’e-bekochaa mee,

mu bya adzọo unu,

mu chia ya o-chi mkpu l’ọo mbẹdua bụ Chileke.

Ọ tọ dụdu agwa ndu ọha-ọdo mejeru iya nụ.

Iwhe ono g’ọ ha bẹ unu l’a-gbarụ mu ẹka-ebe iya.”

O nokwa iwhe Onye-Nwe-Ọha l’ekfu ndono.

¹³“Ọo mu bụ Chileke shi eshi mbụlembu nọduta.

Ọ tọ dụdu onye l’a-dụ ike anafụ mu onye nọ mu l’ẹka.

Ọ tọ dụdu onye sụru gẹ

l’ọo-gbanwe iwhe mu l’eme.”

Chileke l’eme tẹ ndibe iya lwawhu azụ l’ọnodu whẹ

¹⁴Ọ waa iwhe Onye-Nwe-Ọha l’ekfu ndọwa,

mbụ onye ono gbafụtaru unu,

bụru onye nsọ nke Ízurẹlu.

Ọ sụru agha: “Mu l’e-kwobe iswi ẹhu unu

zhia ndu l’e-je ọgu lẹ Bábyilọnu,

je emebyishia ọnu ẹka e shi abahụ lẹ mkpụkpu ono,

bụ igwe b’e yekotaru iya.

Ụzu ẹhu-ụtso ono, ndu Bábyilọnu l’atụ

aghọoru whẹ ọgu-ẹkwa.

¹⁵Ọo Mu bụ Onye-Nwe-Ọha, bụ onye nsọ unu.

Ọo mu meru unubẹ ndu Ízurẹlu dobe.

Ọ bụru mu bụ eze unu.”

¹⁶Ọ waa bụ iwhe Onye-Nwe-Ọha l’ekfu,

mbụ onye ono, tọru ụzo, ọ ghajaa eze-ẹnyimu,

bya atọgbo ogborogbo echi-ụzo l’eze mini,

¹⁷bụ iya bụ onye ono,

chịtaru ụgbo-ịnya mẹe ịnya-ọgu,

bya achịta ndu ojọgu mẹe

ndu gbarụ mkparawa, mee whẹ,

whẹ zẹshia l’ẹka whẹ l’ẹte afụa gbalihu agbalihu ọdo.

A gbanyiru whẹ agbanyi,

whunyia whẹ awhunyi g’ọo ọku oryọku.

¹⁸“Unu zọhaa iwhe garụ aga.

Unu be eligabeshi onwunu l’iwhe gbahawarụ nụ.

¹⁹Unu lekwa lẹ mu l’emewaa iwhe ọ̀whúú!

Mbụ l’ọobyawaa t’ọ fụta iwhe. ?Unu ta awhụdu iya?

Mu l’atọ ụzo l’echi-ẹgu.

Mu l’eme tẹ iyi-mini dụkota l’alị, daburu mgbegere.

²⁰Anụ-ẹgbudu l’a-kwabẹ mu ugvu,

yẹle nkụta-ọswa mẹe mgbashị,

nkele mu meru tẹ mini dụ l’echi-ẹgu,

mee tẹ iyi-mini dụ l’alị, daburu mgbegere,

nke ọwhu ndibe mu l’a-ngụ mini,

mbụ ndu ono, mu họtaru.

²¹Ndu mu gude ẹka mu kpụaru onwomu

tẹ whẹ ryaa ya aryarya sụ l’ọ gbarụ t’a jaa mu ajaja.

Ízurẹlu ta amadụ iwhe-ọma

²²“Ọle gụbe Jékọpu te enwedu nteke i kpokuru mu.

Gụbe Ízurẹlu bẹ ike gvụwaru l’ẹka mu nọ.

²³Ị tị kpụtadu atụru bya anụ

t’e gude gbaarụ mu ẹja ọkpokota-iwhe-ọku.

Ti wotaru mu ngwo-ẹja gude bya akwabẹ mu ugvu.

O to nwedu nteke mu gudeje okfu t’i gwooru mu

ngwo-ẹja nri bo ghu ivu-ẹrwa.

To nwe nteke mu gudeje okfu t’ị kpọoru mu

ụ̀nwù isẹnsu ọku mee t’ike gvụ ghu.

²⁴I ti gudejedu okpoga ghu je azụtaru mu

oshi ẹchara-mbeke, l’eshi mkpọ.

Ti gwojeru mu ngwo-ẹja ẹba anụ jiru mu ẹwho.

Iwhe i mechiaru bụ l’i gudewaa

ome iwhe-dụ-ẹji bo mu ivu-ẹrwa.

I gudewaa ome ejo-ememe mewa ike gvụ mu.

²⁵Ọo mu, mbụ l’ọo mbẹdu-ọwa

bụ onye l’e-huchafu ghu mmeswe ghu ono,

nke ọwhu ẹwha mu l’a-kfụru.

Mu ta abyadụ l’a-nyatakwadụ

iwhe-dụ-ẹji ono, i megbaberu ọdo.

²⁶Sụa, nyatarụ mu iwhe gahawarụ aga.

T’anyi tụko tụkahu iya.

Doo nke ghu t’a marụ ?iswi ọ dụ ghu mma?

²⁷Ochee-oroke ghu bẹ meru iwhe-dụ-ẹji.

Ndu l’ekfuchitaru ghu kwefuru mu ike.

²⁸Ọo ya meru g’o gude mu wofu ndu bụ ishi

l’ụlo-nsọ nkemu tẹ whẹ ba abụhe ishi.

Ọ bụru iya meru mu woru

Jékọpu nụ t’a lakọta iya l’iyi,

mee tẹ Ízurẹlu bụru onye e meru iwhe-iwhere.

Ízurẹlu bụ ndu Chileke họtaru

¹“Ọle, ngabẹ nchị ntaa,

gụbe Jékọpu, bụ onye ozhi nkemu,

mbụ gụbe Ízurẹlu, bụ onye mu họtaru.

²Ọ waa iwhe Onye-Nwe-Ọha l’ekfu nọwa,

mbụ onye ono, bụ iya meru ghu,

bụru iya kpụru ghu l’ẹwho ne ghu.

Ọ bụru iya bụ onye l’eyeru ghu ẹka.

Ọ sụru agha: Ba atsụkwa egvu,

gụbe Jékọpu, bụ onye ozhi nkemu,

mbụ gụbe Jeshurunu, bụ onye mu họtaru.

³Mu l’a-wụshi mini l’alị, ẹgu mini l’agụ.

Mu emee ọ-sọ-gborogboro mini

t’ọ dụ l’alị kpọru gbengu.

Mu l’a-wụ Ume mu l’ẹhu ụnwu ghu.

Mu awụa iwhe-ọma, shi mu l’ẹka l’ẹhu ẹpa ghu whẹ.

⁴Whẹ l’e-fushi g’ọo ẹwu, a gbarụ mini,

jaa ajaja g’ọo oshi wilo, gvuru l’agụga mini, l’asọ asọ.

⁵Onye ọwa l’a-fụta sụ: ‘Mu bụkwa nke Onye-Nwe-Ọha’

Onye ọdo afụta kua onwiya ẹwha laarụ Jékọpu.

Onye ọdo afụta dee uryi l’ẹka

sụ: ‘Mu bụkwa nke Onye-Nwe-Ọha’

mbụ ya azaa Ízurẹlu l’ẹwha.

Ọo Chileke lanụ dụ kpụ

⁶“Ọ waa iwhe Onye-Nwe-Ọha l’ekfu ndọwa,

mbụ onye ono, bụ eze ndu Ízurẹlu,

bụru onye gbafụtaru whẹ nụ;

bụ iya bụ Onye-Nwe-Ọha, bụ Onye-ishi-igwe-ọgu:

Ọ sụru agha: Ọ kwa mbẹdua bụ onye ivurụzo,

ọ bụru mu bụ onye ikpazụ.

E wofuwaa mbẹdua bẹ Chileke ọdo ta adụhekwa.

⁷?O nweru onye dụ g’ọo mu,

t’onye ọbu fụta bya aryaa ya arya?

T’onye ọbu kfua ya, mee mu,

nke ọwhu mu l’e-kweta.

T’onye ọbu kọo iwhe

mehawaru nụ, wata l’oge ndụ-ichee.

Onye ọbu akọo iwhe l’abya ememe.

T’ọ kọo iwhe l’abya anwụnwu.

⁸T’ẹhu ba anmakwa unu anmanma,

t’egvu ba atsụkwa unu.

Mu kfuhaakwaru iya unu nteke teru ẹnya,

bya aryaa ya aryarya.

Unu bụkwa ndu ẹka-ebe mu.

?O nweru Chileke ọdo, dụ nụ, t’a gụfu mbẹdua?

Waawakwa, Oke-ẹwhuru ọdo ta adụhekwa.

Ọ tọ dụhekwa onye ọdo, mu marụ ọdo.”

Ntẹkpe bụ iwhe mmaanụ

⁹Ndu lile, l’eme nke ntẹkpe ta adụdu iwhe whẹ bụ. Iwhe ọbu, whẹ sụru l’ọ bụ whẹ ọkpobe iwhe ta abẹdu l’iwhe ilile. Ndu l’ekfuchitaru ntẹkpe ono ọnu l’atsọkwa ishi. Ishi iwhe whẹ l’ekfu bẹ whẹ l’ẹte amadụa, e je l’e-kpu whẹ iwhu lẹ ntụ. ¹⁰Ometa agwa yẹle ọkpu ntẹkpe ta adụkwa urwu, l’ọoberu madzụ. ¹¹Iwhe bụ ndu yeru ẹka l’agwagwa iya bẹ l’ee-kpukota iwhu l’oguri. Ndu l’akpụ agwa bẹ bụ madzụ mmaanụ. Tẹ whẹ dzukobe l’ẹka lanụ; kfụru l’ọkpa whẹ whụ ẹgube n-yemegvu l’a-byakfuta whẹ nụ mẹe iwhe-iwhere, e meru whẹ.

¹²Onye l’akpụ ụzu l’ewotaje awata hụa l’ọku ụzu. Ọ -chalẹwho gbarara, ya etsua ya ọngu kpụta ntẹkpe. Oogudeje ọkpu-ẹka iya halia ọngu ono. O -menyaa ya, ẹgu abya iya l’ẹhu, ike agvụshia ya. Ẹgu mini agụkwa iya whọ, ẹhu atsụshia ya ụwomini.

¹³Onye kapịnta l’abụje; ọ bya; ya egude iwhe tụ̀ta oshi; gude ndzu see iwhe l’ọobya arụru ese. Ya egude nwamma-ntụpyi-ọnu pyịa ya gẹ l’ọo-dụ; wota iwhe kawheta iya mgburumgburu. Ọopyije iya, ya adụ g’ọo madzụ, dụ ugvu gẹ madzụ l’aadụje, woru iya je edobe l’ụlo iya. ¹⁴E nweru ike, ya egbuta oshi sida m’ọ bụ ya ahọta oshi sayịpuresu, m’ọ bụ achị o yeru l’ẹka iya, yẹle oshi ọdo, dụ l’ọswa tụkoru vua l’ugbo lanụ gude mee ya. E nweru ike, ya adzaa oshi payịnu kwabẹ nteke mini l’a-chị t’o vuta. ¹⁵Oshi ọwhu, e mewhodoru iwhe l’emegejee bụru nkụ. Madzụ l’ahajẹru họta iya gude nyaa ọku. L’oogude iya menwua ọku ghee buredi. L’oogudejekwa iya whọ meta agwa balahaaru iya ẹja. Gude iya pyịa ntẹkpe ewhuzeru iya ishi l’alị. ¹⁶E kee oshi ono ẹbo bẹ uzhi lanụ l’abụjeru iya nkụ. Oogudeje iya shia nri, gude iya hụa anụ, rijia ẹwho. O nokwawho gẹ l’oogudeje iya nyaa ọku sụ: “Mhụu! Ntaa bẹ mu nyagbawarụ ẹhu. Mu whụwaru ọku nyata.” ¹⁷Oshi ọwhu whọduru nụ bẹ l’oogude mee agwa. Oogudeje iya pyịa ntẹkpe, ewhuzeru iya ishi l’alị, abarụ iya ẹja. Ọ fụta, ya ekfu anụ iya sụ iya: “Dzọfutanu mu, ọ kwa ghu bụ Chileke nkemu.”

¹⁸Ndu l’eme nno ta adụkwa iwhe whẹ marụ, tọ dụ iwhe doru whẹ ẹnya. E kfuchiru whẹ ẹka l’ẹnya tẹ whẹ ba awhụ ụzo. E mechia whẹ ẹkpa-ọriri t’ọ bọ dụ iwhe l’e-do whẹ ẹnya. ¹⁹Ọ tọ dụdu gẹ whẹ ha l’anọnyajee rịa ọriri. Tọ dụ onye marụ iwhe l’ime whẹ, iwhe te edoje whẹ ẹnya nke asụ: “Nkerẹbo oshi-a bẹ mu meru nkụ oye l’ọku, mu gude ovokọku iya ghee buredi. Mu hụa ya anụ taa. ?Ọo tẹ mu gude oshi ọwhu whọduru nụ mee ahụma? ?Mu l’abya ewhuzeru nwụkpata ishi l’alị?”

²⁰Iwhe bụ nri iya bụ ńtụ́. Akọ, dụ iya l’obu bụru iya duwhuru iya ụzo, nke ọwhu bụ l’ọ tọ dụdu ike anafụta onwiya. Tọ dụ ike asụ: “?Ọ kwa l’iwhe-e, mu gude l’ẹka-ụtara-a ta abụdu ọkpobe iwhe?”

Onye-Nwe-Ọha bụ onye mgbafụta nke ndu Ízurẹlu

²¹“Nyatakwa iwhe-e,

gụbe Jékọpu, mbụ gụbe Ízurẹlu,

o noo nkele ọ kwa ghu l’ejeru mu ozhi.

Ọo mu kpụru ghu t’ị bụru onye l’ejeru mu ozhi.

Gụbe Ízurẹlu, mu ta abyakwa l’a-zọha ghu azọha.

²²Emeswe i mesweru mu bẹ mu zafụwaru l’ẹza

g’ọo ẹka igweli kpugeeru ekpu megee kosahu.

Mu huchafuwaru iwhe-dụ-ẹji, i metagbaberu

g’ọo ẹka imo darụ tahụ.

Lwakfutawhu mu azụ, nkele mu gbafụtawaru ghu.”

²³Gụbe imigwe, tụa ụzu ẹhu-ụtso,

nkele ọo Onye-Nwe-Ọha bẹ meru iwhe ono.

Chia mkpu, gụbe mgboko, nọ igweli lẹ mkpula.

Unu wata ọgu egvu, unubẹ ugvu g’ugvu ha mẹe unubẹ ọswa g’ọswa ha,

unu l’iwhe bụ oshi, dụ l’ime unu.

O noo nkele Onye-Nwe-Ọha gbafụtawaru Jékọpu.

O gudewaa Ízurẹlu goshi ọ-dụ-biribiri iya.

Onye-Nwe-Ọha bụ iya meru iwhe lile

²⁴“Ọ waa iwhe Onye-Nwe-Ọha l’ekfu ndọwa,

mbụ onye ono, bụ iya gbafụtaru ghu,

bụru onye kpụru ghu l’ẹwho ne ghu:

Ọo Mu bụ Onye-Nwe-Ọha, onye meru iwhe lile dobe.

Ọo mu lọchiru igweli nwẹkinyi mu,

ọ bụkwaru mu whọ tụsaru eliwhe,

ọ daburu whosaa.

Mu lẹ madzụ ta agbadụ mgba mee ya.

²⁵Ọ kwa mu l’emebyije iwhe-ọhubama, whẹ l’egoshi,

mbụ ndu ono, l’anọje adzụ ore-whuruwhuru

whẹ asụ lẹ whẹ l’ekfu iwhe l’e-me.

Ọ bụru mu l’emeje ndu l’agba ẹja,

whẹ abụru ndu eswe.

Ndu marụ iwhe bẹ mu l’emeje t’iwhe,

whẹ l’ekfu be enwe ishi,

mee mmamagụ whẹ, ya abụru iwhe eswe.

²⁶Okfu onye l’ejeru mu ozhi kfuru bẹ mu l’emeje

t’ọ dụ g’o kfuru iya.

L’ọobuje, ndu l’ekfuchiru mu nụ kfua iwhe,

mu emee ya gẹ whẹ kfuru iya.

Ọo mu bẹ sụru Jerúsalẹmu

l’ee-bekochakwaa buru iya eburu ọdo.

Mu sụkwawho mkpụkpu gẹ mkpụkpu ha

l’alị ndu Juda l’aa-tụkwa-whu whẹ azụ.

Lẹ mu l’e-me iya t’o shi l’emebyi ono, e shi mebyia ya

duwhu azụ g’o shi dụ.

²⁷Ọo mu bẹ sụru ogbu-mini: ‘Tahụ.

Mini, i nweru bẹ mu l’e-me t’ọ tahu.’

²⁸Ọo mu kfuru okfu ẹhu Sayirọsu sụ:

‘Ọ ya bụ onye l’eche atụru mu.

Iwhe lile, bụ obu mu bẹ l’oo-mekota.’

Mu kfua okfu ẹhu Jerúsalẹmu sụ:

‘T’a tuwhu Jerúsalẹmu azụ.’

Mu bya ekfua okfu ẹhu eze-ụlo Chileke sụ:

‘T’a tụa ukfu iya.’

Ọ tọ dụdu Chileke ọdo, dụ nụ gbahaa Onye-Nwe-Ọha

¹“Ọ waa iwhe Onye-Nwe-Ọha

l’ekfuru Sayirọsu ndọwa,

mbụ onye ono ọ họtaru t’ọ bụru eze,

mbụ onye ono ọ wọru l’ẹka-ụtara

gude lwụ-gbua mba gẹ mba ha l’iwhu iya,

bya anashịa ndu eze ngwọgu, whẹ kwarụ onwowhe,

gụhashia ọnuzo gheberu iya ọnu,

nke ọwhu l’ẹte agụ-chihe iya agụ-chi ọdo.

²Ọ sụru iya: Mu l’e-vutaru ghu

ụzo je arwazeshikota ugvu ugvu arwazeshi.

Mu l’a-tụko iwhe bụ mgbo,

e meru l’ope vụa yọgiri yọgiri,

gbukashia mgbọro-igwe,

e gude gbachishia ụzo nwịrinwiri.

³Mu l’a-nụ ghu ẹku, e domiru edomi l’ẹkpuroochi.

Mu anụ ghu iwhe-enwenwe, dụ l’ẹka domiru edomi.

Ọo ya bụkwanu ndụge ị marụ l’ọo Mu bụ Onye-Nwe-Ọha,

bụru Chileke nke Ízurẹlu,

onye l’ekuje ghu l’ẹwha.

⁴Ọo l’iswi onye l’ejeru mu ozhi, bụ Jékọpu,

mbụ l’iswi onye ono, mu họtaru, bụ Ízurẹlu,

bẹ mu gude kua ghu l’ẹwha,

bya eworu ọnodu, l’aakwabẹ ugvu nụ ghu

l’ẹbe abụ l’ị marụ onye mu bụ.

⁵Ọo Mu bụ Onye-Nwe-Ọha,

ọ tọ dụdu onye ọdo, gbahaa mbẹdua.

Ọ tọ dụdu Chileke ọdo dụ nụ, t’a gụfu mbẹdu ọwa.

Ọo mu l’e-me t’ike dụ ghu,

a makwarụ-a l’ị tị madụ onye mu bụ.

⁶Ọo ya bụ nke ọwhu,

l’ee-shi l’ụzo ẹnyanwu-awata jeye l’ụzo ẹnyanwu-arịba

marụ l’ọ tọ dụdu onye ọdo,

bụ Chileke, ghahaa mbẹdua.

Ọo Mu bụ Onye-Nwe-Ọha, ọ tọ dụhedu onye ọdo.

⁷Ọo mu doberu iwhoro, ọ bụru mu keru ọochi.

Ọo mu l’ewotaje ọga-l’iwhu; ọ bụru mu keru iyi eyita.

Ọo mbẹdua, bụ Onye-Nwe-Ọha

tụkoru iwhe ono g’ọ ha emekota.

⁸Gụbe imigwe, chịa ọ-dụ-chịriri g’ọo mini.

T’urwukpu yọo ya ayọyo.

Tẹ mgboko l’owhu ghebe onwiya ọnu whalaa.

Nke ọwhu ndzọfuta l’a-tụko ẹka lile rwachikota!

Ọ-dụ-chịriri etsoru iya sweta ẹka lile.

Ọo mbẹdua, bụ Onye-Nwe-Ọha keru iya.

⁹Áwhụ tsọkwaru onye l’anọje aswọru onye kpụru iya nụ ụswo.

Mbụ onye l’adụa iwhe ọdo,

ọ bụ gbahaa ite, a kpụru l’ụrwa.

Ite, a kpụru l’ụrwa ta ajịjekwa onye l’akpụ iya sụ iya:

‘?Ọo gụnu bẹ l’ịikpu?’

Ite ta asụje onye kpụru iya nụ: ‘O to nwedu ẹkali.’

¹⁰Áwhụ tsọkwaru onye sụru nna iya:

‘?Ọo gụnu meru ị nwụa mu?’

Ọdua l’ọo onye sụru ne iya:

‘?Ọo gụnu meru ị nwụfuta mu?’

¹¹Ọ waa bụ iwhe Onye-Nwe-Ọha l’ekfu,

mbụ onye nsọ nke Ízurẹlu,

bụ onye meru Ízurẹlu dobe.

Ọ sụru agha: Ọ tọ dụ unu b’ọ

dụru nke ajị mu ajị ẹhu ụnwegirima mu.

Tọ bụ unu b’ọ dụru nke atụru mu iwu gẹ mu

l’e-shi mee iwhe mu l’eme.

¹²Ọo mbẹdua meru mgboko.

Ọ bụru mu keru madzụ ye iya.

Ọo ẹka mu bẹ mu gude tụsaa igweli,

bya eworu kpokponde ghakọta iya.

¹³Ọo mbẹdua bẹ meru tẹ Sayirọsu lwutehu elwutehu,

shi nno goshi lẹ mu bụ onye dụ chịriri.

Mu je l’e-me t’ụzo, l’ooshi kfụkotaru nsụmini.

Ọo ya l’a-tụ-whu mkpụkpu mu azụ,

ya emee tẹ ndibe mu ono,

a kpụru lẹ ndzụ laa je enweru onwowhe.

O too mekwa iya t’a bya akfụa ya ụgwo,

ọdua l’ọo t’e bua ya obunggo.

O nokwa iwhe Onye-Nwe-Ọha,

bụ Onye-ishi-igwe-ọgu l’ekfu ndono.”

¹⁴Ọ waa iwhe Onye-Nwe-Ọha l’ekfu ndọwa:

“Iwhe e metaru l’alị Íjiputu,

mẹe ngwa-aswa, shi l’alị Itiyópiya,

mẹe iwhe bụ ogologo ndu ono, shi l’alị Seba,

g’ọ ha l’a-lwakọtaru ghu, whẹ atụko bụru nkeghu.

Whẹ l’a-tụko awụ etso ghu l’azụ,

whẹ edzebe l’odzere l’odzere abyakfuta ghu.

Whẹ l’e-whuzeta l’iwhu ghu kfulahaa sụ:

‘Chileke bẹ swiru ghu eswiru, o noo bụru ire-lanụ.

Ọo Chileke ono kpụ bẹ dụ nụ, ọ tọ dụhedu onye ọdo.

Ọ tọ dụhedu onye ọdo, dụ nụ gbahaa yẹbedua.’ ”

¹⁵Ọ kwa ezhi-okfu b’ọ bụ, l’ị bụ Chileke,

l’anọduje akwachi onwoghu akwachi,

gụbe Chileke, bụ onye ndzọfuta nke ndu Ízurẹlu.

¹⁶Iwhe bụ ndu l’eme ntẹkpe

bẹ l’ee-meru iwhe-iwhere nu, kpua whẹ iwhu lẹ ntụ.

Whẹ l’a-tụko gẹ whẹ ha mehu whurii.

¹⁷Ọle ndu Ízurẹlu bẹ Onye-Nwe-Ọha l’a-dzọta.

Adzọdzo, l’ọo-dzọ whẹ l’a-nọ tututu-mịmimi.

A ta abyadụ l’e-me unu iwhe-iwhere,

unu ta abya l’e-me whurii

gbururu jeye lẹ gbururu.

¹⁸Nkele ọ waa iwhe Onye-Nwe-Ọha l’ekfu ndọwa,

mbụ onye keru igwe.

Ọo ya bụ Chileke,

onye ono, bụ iya kpụru mgboko, mee ya dobe.

O meru iya ọ kfụru jịngu.

O to medu iya t’ọ bụru ẹka l’a-daburu iwhoro.

O meru iya t’ọ bụru ẹka l’ee-buru eburu.

Ọo ya l’ekfu sụ: “Ọo Mu bụ Onye-Nwe-Ọha,

ọ tọ dụkwa onye ọdo.

¹⁹Iwhe mu kfuru bẹ mu l’ete kfudua l’edomi.

Mu ta anọdu l’alị ẹka gbarụ ọochi kfua ya.

Mu ta asụkwa ẹpa Jékọpu tẹ whẹ chọo mu nke mmaka.

Mụbe Onye-Nwe-Ọha l’ekfuje okfu l’ụzo, dụ chịriri,

mu l’ekfuje iwhe gbarụ nke ekfukfu.

²⁰Unu dzukobe bya.

Unu chịkobe onwunu ọnu l’ẹka lanụ,

unubẹ ndu ono, wafụru lẹ mba gẹ mba ha.

Ọ tọ dụdu iwhe whẹ marụ,

mbụ ndu ono, l’apajẹru agwa,

a pyịru apyị gude aghawhe,

ndu l’anọje ekfu anụ iwhe l’ẹte adzọ ndzụ.

²¹Unu kfua iwhe g’ọ dụ,

unu bya edoo g’ọ nwụru unu.

Tẹ whẹ tụko je achịa idzu.

?Oo onye bẹ shihawaa nteke teru

ẹnya kfua iwhe l’e-me nụ?

?Oo onye bẹ meru t’a marụ iya l’oge ndụ-ichee?

?Tọ dụ mbẹdua, bụ Onye-Nwe-Ọha?

Ọ tọ dụdu Chileke ọdo, dụ nụ gbahaa mbẹdua.

Ọo mbẹdua bụ Chileke, dụ chịriri,

ọ bụru mu bụ onye ndzọta.

Ọ tọ dụhedu onye ọdo, t’a gụfu mbẹdua.

²²Unu ghachiru mu iwhu

nke ọwhu mu l’a-dzọfuta unu,

unubẹ ndu bu lẹ mgboko jeye l’ẹka o jeberu,

l’ọ kwa mbẹdua bụ Chileke, ọ tọ dụdu onye ọdo.

²³Mu gudewaa onwomu ribua nte.

Mu gudewaa ọnu mu kfua okfu onye dụ chịriri.

Mbụ okfu l’ẹte enwee agbanwe.

Onyenọnu l’e-bekochaa byishi ikpere l’alị, baarụ mu ẹja.

Onyenọnu l’e-bekochaa ria nte

lẹ ya l’a-nọ eme iwhe mu kfuru.

²⁴Whẹ l’a-nọ ekfu okfu ẹhu mu asụje:

‘Ọo l’ime Onye-Nwe-Ọha kpụ bẹ ọ-dụ-chịriri dụ,

ọ bụru iya bẹ ike dụ.’ ”

Iwhe bụ ndu ono, shi abarụ mu hanyị hanyị

l’e-gude iwhere byakfuta mu.

²⁵Iwhe bụ ẹpa Ízurẹlu l’owhu

bẹ l’e-shi l’ẹka Onye-Nwe-Ọha bụru ndu dụ chịriri,

ọ bụru l’ime Onye-Nwe-Ọha

bẹ whẹ l’a-nọ eku onwowhe eku.

Agwa ndu Bábyilọnu

¹Belu whookwaru olu l’alị,

Nebo nmakpuru anmakpuru.

Ntẹkpe whẹ ono bẹ bụ ịnya-ivu bẹ vu iya.

Mbụ l’agwa ono, whẹ l’apajẹ

aghawhe bẹ bụwaa ivu-ẹrwa.

Ọ bụ ivu l’ẹhu nwanụ, ike gvụru.

²Agwa ono bẹ tụkoru

nmakpuru anmakpuru, tụko whoo olu l’alị.

Whẹ ta adụ ike dzọo onwowhe.

A chịta whẹ lẹ ndzụ achịfu achịfu.

³“Unu ngabẹru mu nchị, unubẹ ọzo-ụlo Jékọpu,

mbụ g’ụnu ha bụru ndu

whọduru l’ọzo-ụlo Ízurẹlu,

unubẹ ndu ono, mu shi nteke a

dụ ime unu l’ẹwho gudeta,

mbụ unubẹ ndu mu shi eshi a nwụru unu heta.

⁴Mu l’a-bụru Chileke unu gẹ mu bu iya.

Mu edobe unu ndzụ jeye nteke unu l’a-kahụ,

ẹwo edzua unu edzu l’ishi.

Ọo mu meru unu, mu je l’a-nọ apa unu mini-ishọba.

Mu l’e-kuta unu heru eheru; mu adzọfuta unu.

⁵?Oo onye bẹ unu l’e-wota tụberu mu?

?Oo onye bẹ unu l’a-sụ lẹ mu l’iya ha?

?Oo onye bẹ unu l’a-sụ l’ọ dụ g’ọo mu,

mbụ onye unu l’e-wota tụberu mu?

⁶O nweru ndu l’eshije l’ẹkpa

whẹ wụfuta mkpọla-ododo,

chịkoo mkpọla-ọcha tụa atụtu l’iwhe l’aatụje iwhe.

Whẹ eje egoo ọ-kpụ-ụzu mkpọla-ododo

t’ọ kpụaru whẹ ntẹkpe.

A -kpụ-gee ya, whẹ ewhuzeru

iya ishi l’alị, baarụ iya ẹja.

⁷Whẹ apata iya tụa jaa l’ukuvu, parụ tụgbua,

je edobe iya l’ọru iya.

Ọ bụru ẹka ono, e doberu iya bẹ l’ọo-nọdu.

Ọ tọ byadụ l’eme ụkporo l’ẹka ono, e doberu iya.

Madzụ -bya akpoku iya; ọ tọo zadụ.

Tọo dzọfuta onye ọbu l’iwhe-ọtsulanu, byarụ iya nụ.

⁸Sụa, unubẹ ndu ono, l’ekwefuje ike

mee iwhe Chileke sụru t’e be emeshi,

unu nyatakwa iwhe-e. Unu rịkwaa ya l’ọriri.

Unu edobe iya l’obu unu.

⁹Unu nyatakwa iwhe

gbahawarụ nteke teru ẹnya.

Ọ kwa mu bụ Chileke. Ọ tọ dụdu onye ọdo.

Ọo mu bụ Chileke, ọ tọ dụdu onye dụ g’ọo mu.

¹⁰Mu l’eshijelewho lẹ mbụ mee

t’a marụ iwhe l’a-bụru ikpazụ iwhe.

Mu shi l’edenwede mee t’a marụ iwhe l’e-bekochaa mee.

Mu kfuru sụ: Iwhe mu tụberu nke ememe

bẹ mu mefutajekwa.

Ọ bụru iwhe dụ mu ree bẹ mu l’e-me.

¹¹Mu shi l’ụzo ẹnyanwu-awata

kua nwẹnu, l’erije odzu,

mu shi l’alị, teru mebyi ẹnya

kua onye l’a-bya emee iwhe mu tụberu.

Iwhe mu kfuru bụ iwhe mu l’e-me.

Iwhe mu tụberu bụru iwhe mu l’e-mekwawho.

¹²Unu ngabẹru mu nchị,

unubẹ ndu ono, bụ obu-kpụu ono.

Mbụ unubẹ ndu ono, nọdu ọ-dụ-chịriri otẹnya ono.

¹³Ọ-dụ-chịriri nkemu bẹ mu l’ewolitakwaru ntse.

Ọ tọ dụhekwa otẹnya.

Ndzọta ọwhu shi mu l’ẹka

ta akpọhekwa ụkfu ya erwua.

Mu l’a-dzọfuta ndu bu l’eli ugvu Záyọnu.

Mu eworu ọ-dụ-biribiri mu nụ ndu Ízurẹlu.

Adada Bábyilọnu

¹“Nyizeta enyizeta gwọru l’ẹja, gụbe nwada Bábyilọnu

Nyizeta l’oshi-eze ghu, gwọshita l’alị,

gụbe nwada Bábyilọnu.

A ta abyadụ l’e-kukwadu ghu

nwanyị dụ nonwu-nonwu, dụ pyagọ-pyagọ ọdo.

²Pata ẹwhuru, l’eegweje iwhe gude gwee nri.

Whụfu ẹkwa, i kwechiru l’iwhu.

Whụliberu uwe ghu awhụliberu,

gụ agbarụ ọkpa ọto rwughata mini.

³Aa-gbabẹkwa ghu ọto, mee t’a whụ iwhe-iwhere ghu.

Mu l’e-melatakwa nke ọwhu

bụ l’ọ tọ dụdu onye mu l’a-ha.”

⁴Ẹwha Onye Mgbafụta anyi bụ Onye-Nwe-Ọha,

bụ Onye-ishi-igwe-ọgu.

Ọ ya bụ Onye nsọ nke Ízurẹlu.

⁵Daa shịikfuu.

Je anọdu l’ẹka gbarụ tsụrikiti, gụbe nwada Bábyilọnu.

Nkele a ta abyadụ l’e-kubaa ghu

eze-nwanyị nke alị-eze, dụ l’iche l’iche ọdo.

⁶Nteke ẹhu-eghughu ghuru mu l’ẹka ndibe mu nọ,

bẹ mu jịkaru ndu ono, bụ oke-iwhe mu ono.

Mu woru whẹ ye ghu l’ẹka, tịi whụaru whẹ imiko.

Lụfu lẹ ndu bụ ọgurenya whẹ

b’i bokotaru ivu, l’anyị mebyi ẹrwa.

⁷Ị sụru: Mu l’a-bụgbuwaruroo

eze-nwanyị jeye lẹ tututu-mịmimi.

O mee t’o nwe nteke iwhe ono rwujeru ghu l’ẹhu,

nke t’ị rịa iwhe l’e-bekochaa bụru ikpazụ iya.

⁸Ngwa gebe nchị, gụbe ọwhu yeru ẹnya l’iwhe-ụtso,

mbụ gụbe ọwhu l’akpa lẹ ntụsaru-ẹhu.

Ịinoduje ekfu l’obu ghu sụ:

“Ọo mu bụ o-jechaa-ọgvu,

ọ tọ dụhedu onye ọdo m’a gụfu mbẹdua.”

Ị fụta gụ asụ: “Mu ta abyadụ l’a-bụru nwa-mbunu;

ume-nwa ta abya l’e-me mu.”

⁹Ọ kwa iwhe labọ-ọ

l’a-nwụru ghu lẹ njị-ẹnya lanụ, mbụ l’ujiku lanụ:

Ụnwegirima ghu l’a-nwụshihu, ji ghu anwụhu.

Iwhe anwụka labọ ono

l’a-byakfuta ghu bya adaa ghu ejo ẹka.

Ị tịi gwọtadu iya l’ọgvu; tịi meta iya l’amamanshi.

¹⁰Ejo-iwhe, l’iime bẹ l’iime lẹ ntụsaru-ẹhu.

Ị rịa sụ: “Ọ tọ dụdu onye l’awhụ mu nụ.”

Mmamagụ ghu yẹle ọkwa-ẹnya

ghu bụ iya meru, i whua ụzo,

i kfulahaa l’ime obu ghu sụ:

“Ọo mu bụ ojechaa-ọgvu,

ọ tọ dụhedu onye ọdo m’a gụfu mbẹdua.

¹¹Ọle ejo-iwhe l’a-dakfuta ghu,

tọ dụ iwhe ị bya l’e-me iya t’ọ dabọta.

Iwhe-ọtsulanu l’a-byakfuta ghu,

tịi bya l’e-me iya t’ọ kfụshi.

Ọla-l’iswi, l’ịiti maa l’ọo-bya l’a-tụ ghu l’ụkfu.

¹²Sụa, kemolekwaruwho meje

amamanshi ọwhu l’iimewhe.

Kwẹlekwawho ẹka l’ọgwo-whe ọgvu.

Ọo iwhe ono bụ anya, i shi seta eshi nteke ị bụ nwata.

?A marụ, ọo i -menyaa ya, ya agbọhuru ghu?

Tọo ?i -menyaa ya, gụ akpatsua ntsụ-megvu?

¹³Iwhe bụ idzu, a chị-koshiru

ghu meru ike gvụshia ghu!

Ngwanụ, tẹ ndu ọbu l’awhụjeru

ghu ọwhulenya fụtanu ntaa.

Mbụ ndu ono l’anọje ele ẹnya

l’ẹnyanwu yẹle kpokponde,

akọru ghu iwhe l’e-me ghu l’ọnwa l’ọnwa.

Tẹ whẹ byanụ adzọo ghu

l’iwhe l’abya tẹ ya nwụaru ghu.

¹⁴Whẹ dụ-zhiawho g’ọo ẹswa akpe, kpọru nkụ.

Ọku je l’e-megee kechafu whẹ.

Whẹ ta adụkwa m’ọo ike adzọo onwowhe;

tẹ ire-ọku ono be ekegbushi whẹ.

Ụdudu ọku ono ta abụdu icheku-ọku,

e gude anyagba ẹhu,

tọ bụ ọku, l’aanọdu lẹ mgboro iya.

¹⁵O nokwa mkpakọ iwhe whẹ l’e-meru ghu ndono;

mbụ ndu ono, gụ lẹ whẹ shi eshi ị bụ nwata

tụko ese anya, azụgba aswa.

Onyenọnu l’a-swịha ije ye ishi l’ẹka dụ iya ree,

whẹ ta abyadụ l’a-dụ ike dzọo ghu.

Iwhe Chileke kfuru l’emeje

¹“Unu ngabẹ nchị l’okfu-a, unubẹ ọzo-ụlo Jékọpu,

unubẹ ndu ono, l’eekuje ẹwha alarụ Ízurẹlu,

mbụ unubẹ eri Juda.

Unu l’egudeje ẹwha Onye-Nwe-Ọha ria nte.

Unu l’akpokuje Chileke nke Ízurẹlu,

ọle unu te egudejedu ire-lanụ kpokua ya,

tẹhenu unu ta akpokuje iya l’ụzo kfụru ọto.

²Mbụ unubẹ ndu ono,

kuru onwunu ndu shi lẹ mkpụkpu, dụ nsọ,

etu onwunu ẹwha l’unu

dakoberu Chileke nke Ízurẹlu.

Ọ kwa Onye-Nwe-Ọha,

bụ Onye-ishi-igwe-ọgu bụ ẹwha iya.

³Nteke tehawaru ẹnya bẹ mu kfuru iwhe mewaru nụ.

O shi mu l’ọnu fụta,

mu bya emekwaawho t’a marụ iya.

E jia ekfu, mu mee ya, ọ nwụa gẹ mu kfuru iya.

⁴Ọo lẹ mu marụ l’ị bụ kpọkponyi,

mbụ l’ị bụ anyabata anyabata g’ọo mgbọro-igwe,

tẹmenu ị bụru ekwegekwe.

⁵Ọo ya meru, mu kfuhawaru ghu

iwhe-e nteke teru mebyi ẹnya.

Tẹhenu ọ nwụa bẹ mu vu ụzo ryaarụ ghu iya aryarya,

nke ọwhu l’ịiti sụkwanu

l’ọo ọgvu ghu bẹ meru iwhe lile ono,

mbụ l’ọo agwa ono, ị pyịru apyị,

ọdua l’ọo ono, ị kpụru akpụ b’o shi l’ẹka ọ dụ nno.

⁶Iwhe lile ono, mu sụru

l’oo-me b’ị nụkotawaru lẹ nchị ghu.

Whụwa iya rọ ntaa.

?Tii kwetadu lẹ nkemu bụ iya?

Wata ntaa tụgburu bẹ mu bya

l’a-nọ egoshi ghu iwhe ọ̀whúú,

mbụ iwhe e domiru edomi, l’ịiti maa.

⁷Ọo buwoo ntaa b’e keru iwhe ọbu,

o too tehadua ẹnya, e keru iya.

Iwhe ọbu bẹ l’ịiti nụbudua lẹ nchị t’a gụfu ntanụ.

Nke ọwhu l’ịiti sụkwanu woo l’ọo iwhe ị mahawarụ.

⁸Ị tịi nụbukwaa ya, tịi mahaa ya,

nkele i shi eshi nteke teru

mebyi ẹnya bụru arakpara nchị.

O doru mu ẹnya l’ị bụ mebyi onye ẹregede,

iwhe i shi l’ẹwho ne ghu zata bụru Okwerike.

⁹Ọ kwa gẹ l’ee-shi t’ẹwha mu kfụru

meru g’o gude mu sedekwadu ẹhu-eghughu mu.

Ọ bụru gẹ l’ee-shi t’a jajẹ ẹwha mu ama

meru g’o gude mu sewhu ẹhu-eghughu mu azụ,

nke ọwhu mu l’ete emee ghu t’ị bụru kpurupyata.

¹⁰Tii ledu, lẹ mu hụshiwaru ghu ẹgbabala;

l’ẹbe ọbu l’ị bụ mkpọla-ọcha.

Mu hụru ghu l’ovokọku nke iwhe-ọtsulanu.

¹¹Iwhe mu l’eme bẹ mu l’eme iya l’iswi onwomu.

Ọo l’iswi onwomu bẹ mu gude eme iya.

Nkele mu ta ahakwa t’e merwua ẹwha mu.

Mu te eworu ugvu, rwuberu mu nụ haarụ onye ọdo.

Ízurẹlu b’e meru t’o nweru onwiya

¹²“Ngabẹru mu nchị gụbe Jékọpu,

mbụ gụbe Ízurẹlu, bu onye mu kuru oku:

Ọo mbẹdua bụ onye ọbu.

Ọo mu bụ onye ivurụzo bụru onye ikpazụ.

¹³Ọ kwa mbẹdua gude ẹka mu

tụa ukfu mgboko-o l’owhu.

Ọ bụru mu gude ẹka-ụtara mu tụsaa igweli l’owhu.

Ọo oku, mu gbakushiru whẹ

bẹ whẹ tụkoru kfụfutakota bya adụ.

¹⁴Unu tụko g’unu ha byakọta bya angabẹ nchị.

L’ime agwa unu l’owhu,

?ndẹe ọwhu dụje ike kfuaru unu sụ

l’onye ono, mụbe Onye-Nwe-Ọha họtaru

bẹ l’e-me ndu Bábyilọnu iwhe mu tụberu l’ẹhu whẹ,

mbụ l’ọo-da ndu Bábyilọnu ono ejo ẹka l’ẹhu.

¹⁵Mbẹdua, mbụ lẹ mbẹdua bẹ kfuakwaru nkemu.

Ọ kwa g’ọ dụ ndono, ọo mu kuru iya oku.

Mu duwa iya bya, o je l’e-me

iwhe ọ byarụ ememe, mee ya mekota.

¹⁶Unu kpụlitaru mu ntse bya

angabẹ nchị l’iwhe-e, mu l’ekfu,

E shi mbụlembu, mu shi kfuta okfu

bẹ mu l’ẹte ekfubudua okfu lẹ mpya.

Mu l’anọduje ya eree gẹ mu kfuru iya.”

Ntaa bẹ Nnajị-Ọha, bụ Onye-Nwe-Ọha yẹle Ume iya

zhiwaru mu tẹ mu bya.

¹⁷Ọ waa bụ iwhe Onye-Nwe-Ọha l’ekfu,

mbụ onye Ọ-gbata ghu ono,

bụ onye nsọ nke Ízurẹlu.

Ọ sụru: “Ọo Mu bụ Onye-Nwe-Ọha, bụ Chileke ghu.

Mu l’ezhije ghu ụzo iwhe l’e-shi dụru ghu ree.

Mu l’akpọ-zhijeru ghu ụzo, l’ii-tsoru.

¹⁸Ọ -bụle ị ngabẹru nchị mee iwhe mu sụru t’i mee,

mẹe ẹhu-guu asọleru ghu whọ g’ọo ẹnyimu.

Ọ-dụ-chịriri ghu atụ kpekeke-kpeke

g’ọo akpara-mini l’eze-ẹnyimu.

¹⁹Ẹpa ghu gege aha

l’igweligwe g’ọo ẹja, dụ l’alị.

Ụnwegirima ghu abụru agụta agụta g’ọo ẹjagiri.

Ẹwha whẹ tege echihudu echihu,

tege eme tẹ whẹ bụru kpurupyata l’iwhu mu.”

²⁰Unu kwafụkwa lẹ Bábyilọnu.

Unu yelekwawho ọkpa l’ọso gbafụru ndu Bábyilọnu.

Unu tụa orooroo gude ryakashịa ya aryakashị.

Unu mee t’a makọtaru iya jeye ẹka mgboko beru.

Iwhe unu l’a-nọ ekfu bụ ọwaa:

“Onye-Nwe-Ọha gbatawarụ

onye ozhi iya ono, bụ Jékọpu.”

²¹Ẹgu mini ta agụdu whẹ nteke Onye-Nwe-Ọha

du whẹ shia echi-ẹgu alị ọkponku.

O meru tẹ mini shi l’eze ẹwhuru sọshihuru whẹ.

Ẹwhuru ono b’o meru o kewahu ẹbo, mini sọshihu iya.

²²“Ndu ejo-ememe bẹ ẹhu l’ẹte adụjekwa guu.”

O nokwa iwhe Onye-Nwe-Ọha l’ekfu ndono.

Onye ozhi nke Onye-Nwe-Ọha

¹Unu ngabẹru mu nchị unubẹ ndu bukube eze-ẹnyimu.

Unu nụa iwhe-e mu l’ekfu,

unubẹ mba ono, bu otẹnya.

Onye-Nwe-Ọha vukwa ụzo kua mu tẹmenu a nwụa mu.

Ọo rọ nteke mu nọkwadu l’ẹwho

ne mu b’o kuru mu ẹwha.

²Okfu-ọnu mu b’o meru l’ọotsu

nkọ g’ọo ogu-ịgba, a barụ ababa.

O domiru mu lẹ mkpula ọbochi-ẹka iya.

O meru mu, mu dụ g’ọo akfụ, e hucharu ehucha,

o woru mu kwachia l’ẹkpa-akfụ iya.

³Ọ sụ mu: “Ízurẹlu, ị bụ onye l’ejeru mu ozhi.

Ọo ghu bẹ mu l’e-gude goshi gẹ mu dụ-be biribiri.”

⁴Mbẹdua sụkwanu: “Anya mu

seru bụkota mu nke mmaka.

Ọkpehu, mu swịshiru onwomu

bụru mu nke mmaka, bụru mu iwhe iwhoro.

Ọle iwhe rwuberu Mu bụ Onye-Nwe-Ọha b’ọ dụ l’ẹka.

Obunggo mu bụru Chileke mu gude iya.”

⁵Ntaa bẹ Onye-Nwe-Ọha l’ekfu sụ;

mbụ onye ono, shiro nteke mu nọ l’ẹwho ne mu

mee mu tẹ mu bụru onye l’e-jeru iya ozhi,

tẹ mu dutawhuru iya ụnwu Jékọpu azụ,

chịkobe ụnwu Ízurẹlu tẹ whẹ lwakfutawhu iya azụ.

Mu bụ onye Onye-Nwe-Ọha meru ugvu nụ,

ọ bụru Chileke mu shi bụtaru ike mu.

⁶Onye-Nwe-Ọha l’ekfu sụ:

“Ọ tọ bụlekwaa t’ị bụru onye l’ejeru mu ozhi,

mbụ t’i dobe ikfu Jékọpu l’ọnodu whẹ ọdo,

mẹe t’i dulataru mu ndu Ízurẹlu,

bụ nwa ndu ọwhu mu doberu.

Mu l’e-mekwa ghu whọ,

gụ abụru iwhoro dụru ndu l’ẹte abụa ndu Ju,

nke ọwhu l’ee-shi l’ẹka ghu,

ndzọfuta nkemu erwua ẹka mgboko beru.”

⁷Ọ waa iwhe Onye-Nwe-Ọha l’ekfu ndọwa,

mbụ onye ono, bụ onye Mgbafụta,

bụru onye nsọ nke Ízurẹlu.

Ookfu iya anụ onye ono,

mba lile jịkaru jị-nyia ẹnya akpọ-yiru ukuvu,

onye ono, bụ onye ozhi nke ndu l’achị nụ.

Ọ sụru iya:

“Ndu eze l’e-megekwa whụa ghu wụ-lishihuru ghu.

Ndu bụ ishi awhụa ghu daarụ ghu pẹe l’alị.

Onye l’e-me iya bụ Onye-Nwe-Ọha,

mbụ onye ono bụ o-me-g’o-kfuru;

onye bụ onye nsọ nke Ízurẹlu,

ọ bụru iya bụ onye họtaru ghu.”

Odobe Ízurẹlu l’ọnodu iya

⁸Ọ waa bụ iwhe Onye-Nwe-Ọha l’ekfu:

“Ọo nteke ọ gbarụ l’ome iwhe-ọma bẹ mu l’a-za ghu oku.

Mu adzọkwaa ghu whọ lẹ mbọku nke adzọdzo.

Mu l’a-kwakọbe ghu, mee ghu t’ị bụru onye,

yẹle ndiwhe l’e-gude gbaa ndzụ,

t’i dobewhu alị ono azụ l’ọnodu iya,

mee tẹ whẹ lwawhu azụ l’alị whẹ ono, ẹgbara shiwaa kfụa,

⁹mẹe nke ọwhu l’ịi-sụ ndu nọ

l’ọka-mkpọro tẹ whẹ shi lẹ mkpọro ono fụta,

gụ asụkwawho ndu nọ

l’ẹkpuroochi t’ẹhu bụru whẹ whororo.

Whẹ l’a-dụ g’ọo ụnwu-atụru, tsoru echi-ụzo ata nri,

nri abọsaaru whẹ lẹ chakịri chakịri ugvu g’ugvu ha.

¹⁰Ẹgu ta abyadụ l’a-gụ whẹ,

ẹgu mini ta abya l’a-gụ whẹ.

Okpomọku, shi l’echi-ẹgu yẹle o-chi-gbaagbaa anwụ

ta abyadụ l’e-rwu whẹ l’ẹhu.

O noo nkele onye ono,

nweru obu-imiko l’ẹka whẹ nọ l’e-du whẹ.

Oo-duru whẹ shia mgboro ẹka mini, shi anwụfuta.

¹¹Mu l’e-me t’echi-ụzo ghakọta

l’ugvu g’ugvu ha, bụ nkemu.

Echi-ụzo nkemu abụru ẹka e meru t’ọ ha l’eli.

¹²Whẹ l’e-shikakwaa l’ẹka teru ẹnya lwa.

Ndu l’a-harụ shi l’ụzo isheli;

ndu aharu shi l’ụzo ẹnyanwu-arịba.

O nwekwaruwho ndu ọwhu l’e-shi alị Sinimu lwa.”

¹³Unubẹ imigwe l’owhu, unu gụa egvu ẹhu-ụtso!

Gụbe mgboko, gụ etee ẹswa!

Unubẹ ugvu g’ugvu ha, unu dabarahụ l’ọgu egvu!

Nkele Onye-Nwe-Ọha l’adụwaa ndibe iya obu.

O je l’a-whụru ndibe iya ono, nọ l’iwhe-ọtsulanu imiko.

Chileke yeru Záyọnu obu

¹⁴Obenu lẹ Záyọnu sụru:

“Onye-Nwe-Ọha bẹ buhawaru mu ẹka.

Onye-nwe-mu nụ bẹ nyazọwaru mu.”

¹⁵“Ne, ?l’ọozohaje nwa, l’angụ iya ẹra l’obu tọo,

nke t’o bo nwe obu-imiko l’ẹka nwa, ọ nwụru nọ?

O -je l’azọha bẹ l’ọo-zọhakwa,

ọle mbẹdua ta azọhakwanu ghu!

¹⁶Lekwa, mu meekwaru t’ẹwha

ghu shia uryi l’ọbochi-ẹka mu.

Mgbodo, e gude tụ-wheta

gụbe Záyọnu bẹ l’ẹte alụfudu mu alụfu l’atatiwhu.

¹⁷Ụnwu ghu l’awụakwa alwa ntaantaa.

Ndu bụ whẹ meru ghu, ị bụru

ochuwhu l’atụgbuwaru alụfu.

¹⁸Palia ẹnya apali lewhee

mgburumgburu, whụdunu.

Ụnwu ghu kpaa-whuu

l’edzukookwa tẹ whẹ lwakfuta ghu.

Iwhe mụbe Onye-Nwe-Ọha l’ekfu ndọwa:

Mu vuru-a ishi mu gẹ mu vu iya,

bẹ l’ii-megee yee whẹ g’ọo onye yeru uwe.

Ii-gude whẹ kwaa ngwa g’ọo

nwanyị, l’eekee ji nke ọ̀whúú.”

¹⁹“A makwarụ-a l’e shi

mebyishia ghu, ị bụru ochuwhu,

alị ghu daburu karawhongu.

Ọle wata ntaa bẹ l’iitii dzuhedu ndibe ghu eburu.

Ndu ono, shi mebyishia ghu bẹ l’a-nọdu ghu otẹnya.

²⁰Ụnwegirima ono, a nwụshiru ghu nteke ono,

iwhe nwụkaru ghu

l’e-bekochakwaa kfuru iya ye ghu lẹ nchị sụ:

‘Alị-a bẹ mkpa dụnukawa anyi,

sụtabanuaru anyi ẹka anyi l’e-buru.’

²¹Nteke ono bẹ l’ịi-sụ l’ime obu ghu:

‘?Oo onye ole nwụshiru mu ndu ọwaa?

Lẹ mụbe onye iwhe shi

nwụkaaru, mu ta atsụhe ime.

Lẹ mụbe onye shi bụru onye larụ alị ọdo,

tẹhenu mu shi bụru onye a chịfuru achịfu.

?Ọ kwanụ onye hefutaru ndu ọwa?

Lẹ mụbe onye a harụ, mu daburu nkụnyi mu.

Ndu ọwa-a shikwanu awe?’ ”

²²Ọ waa iwhe Nnajị-Ọha bụ

Onye-Nwe-Ọha l’ekfu ndọwa:

“Leenu, mu l’e-wheru mba lile ẹka.

Mu l’e-woli ẹkwa-ọhubama mu

gboberu mba gẹ mba ha.

Whẹ l’e-gude ẹka whẹ kulataru ghu ụnwu ghu nwoke,

whẹ akwọru ụnwada ghu akwọkwo kwọlataru ghu.

²³Ndu eze l’a-bụru nna, l’ehe ghu nụ.

Ndu eze-nwanyị abụru ne, l’ehe ghu nụ.

Whẹ l’a-nọ adarụ ghu bẹe

ewhuzeru ghu iwhu l’alị.

Whẹ amịchashi udzu ẹja, dụ ghu l’ọkpa.

Nteke ono bẹ l’ịi-marụ l’ọo Mu bụ Onye-Nwe-Ọha,

lẹ ndu ẹnya whẹ dụ l’ẹka mu nọ bẹ iwhere l’ete emejedu.”

²⁴?Aanatajẹ ndu ojọgu iwhe whẹ kwatarụ l’ọgu?

?Aanafụje ndu obu-mgbashi ndu whẹ kpụru lẹ ndzụ?

²⁵Ọle ọ waa iwhe Onye-Nwe-Ọha bẹ l’ekfu ndọwa:

“Ndu ojọgu kpụru lẹ ndzụ bẹ l’aa-nafụkwa l’ẹka whẹ.

Ndu obu-mgbashi bẹ l’aa-nata iwhe whẹ kwatarụ l’ọgu.

Ndu l’alwụshi ghu ọgu bẹ mu l’a-lwụshi ọgu.

Mu je l’a-dzọfuta ụnwegirima ghu.

²⁶Ndu l’akpa ghu ẹhu bẹ mu l’e-me tẹ whẹ taa anụ onwowhe.

Whẹ l’a-ngụta mmee onwowhe

jeye ya atsụlahaa whẹ atsụtsu g’ọo mmẹe.

Nteke ono bẹ madzụ l’owhu

l’a-marụ l’ọo Mu bụ Onye-Nwe-Ọha,

bụru onye ndzọta nkeghu.

Mu bụ onye mgbafụta ghu; bụru Ọkalibe nke Jékọpu.”

¹Ọ waa iwhe Onye-Nwe-Ọha l’ekfu ndọwa:

“?Ọo dụ unu g’ọo gẹ nwoke l’achịfuje nyee ya lẹ ya

ta alụhedu bụ gẹ mu chịfuru ndibe mu?

Ọ -bụru l’ọ dụ nno, ?ndẹhunu ẹkwo, mu deru nụ whẹ

gude chịfu whẹ ọbu?

?Ọo dụ unu gẹ-woo lẹ mu woru unu ree ndu alị ọdo

g’ọo nwoke woru ụnwu iya ree ndu l’agba ohu?

Ọ kwa iwhe-dụ-ẹji unu kpatarụ a kpụa unu lẹ ndzụ.

Ọo ejo-ememe, unu l’eme meru

g’o gude a chịfu ne unu.

²?Ọo gụnu meru t’ọ dụ onye mu whụru

nteke mu byarụ tẹ mu dzọo unu?

?Ọo gụnu meru t’ọ dụ onye zarụ

mu oku nteke mu kuru oku?

Ẹka mu, ?ọ dụnuka tsụpee nke tẹ mu ba agbata unu?

?Ọo ike ta adụdu mu nke tẹ mu dzọfuta unu?

Mu l’a-dụkwa ike baa mba

mmaanụ, mini atahụ l’eze-ẹnyimu.

Mu adụ ike mee t’ẹnyimu bụru echi-ẹgu alị-ivovonyi.

Ẹma, dụ iya nụ erwetoshihu,

nkele mini ta adụdu iya.

Ẹgu mini egbushia whẹ.

³Ọo mu meru t’akpamigwe

gbakọta ọochi jihu kpaaluu.

Ọo mu meru t’o yee uwe-áwhụ

g’ọo onye iwhe nwụkaru.”

Onye ozhi Chileke rwuberu ishi

⁴Nnajị-Ọha, bụ Onye-Nwe-Ọha mewaru

tẹ mu marụ ágụ olu-okfu g’ọo ndu e zhiru iwhe,

nke ọwhu mu l’a-marụ gẹ ya l’e-shije dobe ọnu

kfuru okfu, guru egu nụ onye ike gvụru.

L’ụtsu g’ụtsu ha bẹ l’ooteje mu.

Oomeje tẹ mu chilishia nchị

ngabẹ l’iwhe l’ọobya mu ezhizhi.

⁵Nnajị-Ọha, bụ Onye-Nwe-Ọha bẹ mewaru,

mu saa nchị mu ghebe ọnu.

Tọ bụ lẹ mu kwefuru iya ike; mu ta agbakụta iya azụ.

⁶Okpurukpu-azụ mu bẹ mu

woru doberu ndu l’echi mu iwhe,

woru agbagba-nchị mu dobe,

whẹ l’ewheshi mu ẹji-agba.

Mu ta apafụdu iwhu mu apafụ l’ẹka whẹ l’eme mu

iwhe-iwhere avụ mu ọnu-mini.

⁷Iwhere te emedu mu,

o noo nkele Nnajị-Ọha,

bụ Onye-Nwe-Ọha l’eyeru mu ẹka.

Ọo ya meru, mu gbungobe iwhu

egbungobe g’ọo ẹwhuru,

tẹmenu o doru mu ẹnya l’iwhere te emedu mu.

⁸Onye l’aharụ mu enge nọ mu ntse.

?Ndẹe onye ha nke asụ lẹ ya l’eku mu ikpe?

T’anyi whụnu iya awhụ l’ụlo-ikpe.

?Ọo onye ha nke asụ lẹ mu lẹ ya nwe okfu?

T’onye ọbu byanụ akfụru mu l’iwhu kfua ya.

⁹Nnajị-Ọha, bụ Onye-Nwe-Ọha

bẹ bụ iya l’eyeru mu ẹka.

?Ọo onye ha nke ọnma mu ikpe?

Whẹ l’a-tụko kahụ g’ọo uwe,

mkpu ataa whẹ pyaapyaa.

¹⁰?Ọo onye l’ime unu l’atsụ egvu Onye-Nwe-Ọha?

?Ọo onye l’emeje iwhe

onye ozhi Onye-Nwe-Ọha sụru t’e mee?

T’onye l’eje ije l’ẹkpuroochi,

mbụ onye l’ete enwee iwhoro, e gude awhụ ụzo,

t’onye ọbu kpọru obu ye l’ẹwha Onye-Nwe-Ọha,

ya dakobe Chileke iya.

¹¹Unubẹ ndu ọwhu l’ewojeru

ọku tọo, ya awata adzụdzu,

mbụ unubẹ ndu l’anwụjeru ọku ye l’oryọku parụ,

unu gude iwhoro ọku unu jee ije.

Unu gude iwhoro oryọku, unu nwụru ọku ye jee ije.

Iwhe unu l’a-nata l’ẹka mu bụ

l’ọo ejo mkpamẹhu bẹ unu l’a-zẹ-koru l’eli.

Okfu mgbamume e kfuru nụ Záyọnu

¹“Unu ngabẹru mu nchị,

unubẹ ndu l’achọ ụzo ndzọfuta,

mbụ unubẹ ndu l’achọ n-yemẹka Onye-Nwe-Ọha.

T’unu rịtakwa eze-ẹwhuru ono, e shi wafụta unu,

mbụ iduma ono, e gvutaru unu.

²Unu rịtakwa onye ichee unu bụ Ébirihamu.

Unu arịtakwawho Séra,

bụ nwanyị ono parụ ẹwho unu.

Nteke mu kuru iya bẹ bụ nteke ọ bụkwadu nkụnyi.

Ọle mu gọru ọnu-ọma nụ iya mee ya, ọ bụru ikpoto.

³Onye-Nwe-Ọha l’a-dụ Záyọnu obu.

Ọo-whụru iya imiko l’iyi ono, yiru iya nụ.

Alị iya ono, bụ echi-ẹgu bẹ l’oo-me, ya adụ g’ọo Idẹnu.

Oo-me t’iwhe, bụ alị-ọkponku,

dụ iya nụ dụkota g’ọo mgbabu Onye-Nwe-Ọha.

Ẹhu-ụtso mẹe oke ẹswa l’a-dụ l’ẹka ono,

egvu-ekele mẹe egvu-ajaja abụru iwhe l’e-ji iya eji.

⁴Ndibe mu, unu ngabẹru mu nchị.

Unubẹ ndu mba nkemu, unu nụa iwhe mu l’ekfu.

Mu l’a-tụru unu iwu.

Ikpe, kfụru nhamụnha ono,

mu l’ekpeje abụru iwhoro dụru mba lile.

⁵Nteke mu l’a-nafụta unu

tẹekwaru l’ụkfu ọkpobe iya.

Ndzọfuta nkemu nọokwaa l’ụkfu ntse.

Ọo mu l’e-gude ẹka mu chịa mba gẹ mba ha.

Ndu bukube eze-ẹnyimu l’elewaa ẹnya mu.

Whẹ l’elewaa ẹnya mu tẹ mu bya

egude ẹka mu dzọo whẹ.

⁶Unu palia ẹnya lee l’igweli.

Unu apazhita ẹnya lee lẹ mgboko.

Ọo g’ẹnwuru-ọku l’achịhuje bụ

g’igweli l’e-megee mihu.

Ọ bụru g’uwe l’akahụje bụ

gẹ mgboko l’e-megee kahụ.

Ndu bu iya nụ anwụshihu g’ọo ijiji.

Ọle ndzọta nkemu l’a-nọ jeye lẹ tututu-mịmimi.

Ụzo mgbafụta nkemu ta abya l’a-chịhu achịhu.

⁷Unu ngabẹru mu nchị,

unubẹ ndu marụ iwhe kfụru nhamụnha,

mbụ unubẹ ndu ono, iwu mu dụ l’obu whẹ.

Unu ba atsụkwa egvu l’ọnu, ndu madzụ l’akọ unu.

T’iwhu whẹ l’akpọru unu

be emekwa t’egvu tsụa unu.

⁸Ọ kwa gẹ mkpu l’atakashịje uwe bụ gẹ l’oo-megee

takashịa ndu ono.

Ọ bụru gẹ mgbashiride

l’atakashịje ukpo bụ gẹ l’ọo-takashị whẹ.

Ọle ọ-dụ-chịriri nkemu l’a-nọ jeye lẹ tututu-mịmimi.

Ndzọta nkemu eshi l’ọgbo rwua l’ọgbo.”

⁹Tehu etehu! Tehu etehu!

Kwaa onwoghu ike g’ọo onye kwarụ ngwa,

gụbe Onye-Nwe-Ọha.

Gudenu ike ọkpehu ghu nụ dzọo whẹ.

Tehunu lẹge i tehuru nteke ndụ-ichee,

mbụ l’ọgbo, garụ aga.

?Tọ nụ ghu-a bẹ gbubushiru

Réhabu mkpirikpi mkpirikpi,

mbụ ejo oke anụ ono, bụ lẹ mini?

¹⁰?Tọ nụ ghu-a bẹ meru eze-ẹnyimu, ọ tahụ,

mbụ mini ono, bụ oke iswina nkụchi?

?Ọo kwa ghu bẹ kparụ oji

l’ogbulogbu ẹnyimu ono,

tẹ ndu ono, ị gbafụtaru wụghata?

¹¹Ndu ono, Onye-Nwe-Ọha gbatarụ l’a-lwa.

Whẹ l’a-zụru egvu bata lẹ Záyọnu.

Ẹhu-ụtso, l’ẹte enwee eberu

l’a-bụru okpulishi, whẹ kpu.

Ẹhu-ụtso mẹe ẹswa l’e-ji whẹ ẹhu.

Nggụmawhu mẹe ọtsu ude

bẹ l’e-gude ọso ghafụ whẹ l’ẹhu.

¹²“Ọ kwa mbẹdua, mbụ l’ọo mu l’adụ unu obu.

?Ọo gụnu meru, ọ bụru madzụ, l’a-nwụhu anwụhu

bẹ unu l’atsụ egvu iya?

mbụ madzụ mmaanụ, l’adụa iwhe ọ bụ

gbahaa ẹswa, l’adụa gẹ l’ọo-nọ-beru.

¹³Unu nyazọru Onye-Nwe-Ọha,

bụ onye meru unu;

mbụ onye ono bụ iya gbachiru igweli,

bụru iya tụru ukfu mgboko l’owhu.

Ọo bụ-chiaru egvu l’anọje atsụ unu ntekenteke,

l’iswi ẹhu-eghughu, l’eghu onye l’akpa unu ẹhu,

mbụ onye ono, kparụ oshishi shiberu unu gẹ l’ee-shi

tẹ ya kpawhua unu ishi.

?Ndẹnu ẹhu eghughu ọbu,

l’eghu onye ono, l’akpa unu ẹhu ono?

¹⁴Ndu ono a tụru mkpọro bẹ l’ee-me tẹ whẹ nweru

onwowhe ẹgwegwa.

Whẹ ta abyadụ l’a-nwụhu l’ọka-mkpọro ono,

nri ta abya l’a-gvụ whẹ agvụ.

¹⁵Ọo Mu bụ Onye-Nwe-Ọha, bụ Chileke unu.

Ọo mu l’echije egbe mini l’ẹnyimu,

akpara iya atụa gbukungu gbukungu.

Ẹwha Mu bụ Onye-Nwe-Ọha, bụ Onye-ishi-igwe-ọgu.

¹⁶Okfu mu bẹ mu yewaru unu l’ọnu,

mu gudewaa ọbochi-ẹka mu kpuchia unu.

Ọo mu bẹ tụsaru igweli dobe,

ọ bụru mu bẹ tụru ukfu mgboko l’owhu,

ọ bụru mu sụru Zayọnu-a: ‘Unu bụakwa ndibe mu.’ ”

Omogo nke oke ẹhu-eghughu Onye-Nwe-Ọha

¹⁷Tehu etehu! Tehu etehu!

Gbalihu kfụru akfụru, gụbe Jerúsalẹmu.

I shiwaa l’ẹka Onye-Nwe-Ọha ngụa iwhe dụ l’omogo

nke oke ẹhu-eghughu iya.

Ị ngụru ngụa ike iya, o mee l’ịikpo kulakula.

¹⁸Ụnwegirima lile, ọ nwụshiru

ta adụdu onye ọwhu l’akpozhiru iya ụzo.

Ọ tọ dụdu onye l’esekputaje iya

l’ẹka l’ụnwegirima lile, o hekotaru.

¹⁹L’uzhi iwhe-ọtsulanu labọ ono, byakfutaru ghu,

?ọo onye l’e-tsu ghu ẹka l’obu?

Ọla-liswi-a yẹle mgbu-ọnwu-a,

mẹe mkpẹgu-a mẹe ejo-ọgu-a, dakfutaru ghu nụ,

?ọo onye l’e-tsu ghu ẹka l’obu?

²⁰Ụnwu ghu bẹ ẹhu vẹhukotawaru.

Whẹ dageeru gbaagbaa l’ishi ụzo g’ụzo ha

g’ọo mgbada, nmarụ l’ọnya.

Iwhe rikputaru whẹ ẹhu bụ oke

ẹhu-eghughu Onye-Nwe-Ọha,

mba, l’ọobaru whẹ ngawaa whẹ ẹhu.

²¹Ọo ya bụ, t’unu nụa iwhe-e, mu l’ekfu,

unubẹ ndu ono, l’eje iwhe-ọtsulanu,

mbụ unubẹ ndu ono,

l’akpọ kulakula l’ẹbe ọbu l’unu ngụru mmẹe.

²²Ọ waa iwhe Nnajị-Ọha bụ

Onye-Nwe-Ọha l’ekfu ndọwa,

mbụ Chileke unu, bụ onye

l’agbajẹru ndibe iya ọdzori.

Ọ sụru agha: “Lekwa, mu

nafụakwaru unu omogo ono,

unu ngụru akpọ kulakula ono l’ẹka.

Unu ta angụhedu oke ẹhu-eghughu mu ọdo.

²³Mu l’e-woru iya dẹe ndu

ono, l’anụ unu awhụ ono l’ẹka,

mbụ ndu ono, shi asụje unu:

‘Unu zẹshia l’alị t’anyi goo unu o-go akwa ghata.’

Azụ unu bẹ unu mewaru ọ bụru

ọma alị, whẹ l’adzọ fụtu-fụtu.

Unu meru iya, ọ bụru

ogborogbo echi-ụzo ẹka whẹ l’awụghashi.”

Chileke l’a-nafụta ndu Jerúsalẹmu

¹Tehu etehu. Tehu etehu, gụbe Záyọnu.

Kwaa onwoghu ike g’ọo onye kwarụ ngwa.

Yee uwe ono, l’emeje ghu gụ egbu zaazaa,

gụbe Jerúsalẹmu, bụ mkpụkpu, dụ nsọ.

Ndu l’ete ebua ugvu mẹe ndu l’aasọ nsọ

ta abyakwa l’a-bata l’ime ghu ọdo.

²Jịshia onwoghu ẹja l’ẹhu. Gbalihu agbalihu.

Nọdu anọdu l’oshi-eze ghu, gụbe Jerúsalẹmu.

Tụfu onwoghu ẹgbirigba a tụru ghu l’olu,

gụbe nwada Záyọnu ono a kpụru lẹ ndzụ.

³Ọ waa iwhe Onye-Nwe-Ọha l’ekfu ndọwa: “E reru unu ere, t’ọ dụ aswa, a natarụ l’ishi unu. O nokwawho gẹ l’aa-gbata unu, ya eje adụ okpoga l’aa-kfụ gude gbata unu.” ⁴Nkele ọ waa iwhe Nnajị-Ọha bụ Onye-Nwe-Ọha l’ekfu ndọwa: “Ndibe mu vu ụzo laa alị Íjiputu je eburu. L’ikpazụ, ndu Asiriya kpalahaa whẹ ẹhu.

⁵“?Ọ waa bụhunu ole ntaa?” O nokwa iwhe Onye-Nwe-Ọha l’ekfu ndono. “Ndibe mu b’a chịtaru nke mmaanụ. Ndu l’achị whẹ gude whẹ eme kpakpa-wewe.” O nokwa iwhe Onye-Nwe-Ọha l’ekfu ndono. “Mbọkumboku bẹ l’aanọje ekfurwushi ẹwha mu. ⁶Ọo ya l’e-me ndibe mu amarụ ẹwha mu. Mgbe iya rwulewho bẹ whẹ l’a-marụ l’ọo mbẹdua dụhawaa mbụ kfua ya tẹhenu ọ nwụde. Lee mu ndọwa.”

⁷G’ẹhu l’anọbukwaa atsọ whẹ

lẹ nke ndu ono, nọ l’eli ugvu ezhi ozhi-ọma ono.

Mbụ ndu ono, l’ezhikashi ozhi-ọma ẹhu-ọdu-guu,

ndu gude ozhi-ọma bya,

tẹmenu iwhe whẹ l’ekfukashi bụru okfu ndzọta.

Mbụ ndu l’asụje Záyọnu:

“Ọo Chileke ghu bụ eze!”

⁸Gebeedaa nchị! Ọ kwa olu ndu l’eche mkpụkpu-a l’ada.

Whẹ tụkoru atụ ụzu ẹhu-ụtso,

nkele whẹ l’e-gude ẹnya whẹ whụ Onye-Nwe-Ọha

nteke l’ọo-nọdu alwata Záyọnu.

⁹Unu tụko dabarashịhu l’ọgu egvu ẹhu-ụtso,

unubẹ ẹka ono, dakpọshihuru

adakpọshihu lẹ Jerúsalẹmu.

Onye-Nwe-Ọha bẹ tsuwaru ndibe iya ẹka l’obu.

Ọ gbafụtawaru Jerúsalẹmu.

¹⁰Onye-Nwe-Ọha l’e-meru

ọkpehu iya goshi mba gẹ mba ha,

mbụ ọkpehu iya ono, dụ nsọ.

Iwhe bụ mgboko l’owhu jeye ẹka o jeberu

l’a-whụkota gẹ

Onye-Nwe-Ọha l’e-gude dzọo ndibe iya.

¹¹Unu lụfu! Unu lụfu! Unu tụgburu lụfu l’ẹka ono!

Unu be ebyikwa ẹka l’iwhe l’aasọ nsọ!

Unu shi l’ime iya tụgburu lụfu!

Unu mechaa onwunu emecha,

unubẹ ndu ono, l’apajẹ arya Onye-Nwe-Ọha.

¹²Ọle t’unu ba alakwa gburugburu,

unu ta agbahụnu whuku whuku ala.

O noo lẹ Onye-Nwe-Ọha l’e-vutaru unu ụzo,

mbụ lẹ Chileke nke Ízurẹlu l’a-nọdu unu l’azụ.

Ọ-dụ-biribiri nke onye ozhi Onye-Nwe-Ọha ono

¹³Leenu, l’onye ozhi mu

l’e-mekwa iwhe l’oome mekota.

Ọo-bụru onye e woliru eli,

l’a palia ya imeli, ya abụru onye e kutseru ekutse.

¹⁴G’ụgbugba iya dụ meru,

ẹkpa-oyi nwụa igweligwe

madzụ l’ẹhu nteke whẹ whụru iya.

O meru onwiya, nke ọwhu bụ lẹ

yẹle madzụ ta agbadụ ụgbugba lanụ.

Ụdudu, ọ dụ ta abụ gẹ madzụ l’adụje.

¹⁵O nokwawho gẹ l’ọo-dụ

mba, ha l’igweligwe biribiri.

Ndu eze bẹ ọnu l’a-bụru

kpụrukujingu l’iswi iya.

Whẹ l’e-gude ẹnya whẹ whụa

iwhe l’ete ekfubuaru whẹ,

ya edoo whẹ ẹnya mbụ iwhe

whẹ l’ẹte anụbua lẹ nchị whẹ.

Iwhe-ọtsulanu nke onye ozhi ono

¹?Ọo onye kwetaru l’iwhe anyi kfuru?

?Ọo onye bẹ Onye-Nwe-Ọha

goshiru l’ẹka iya dụ l’iwhe ono?

²Ọ nọdu l’iwhu iya vua ivu

g’ọo oshi, futaru nke ọ̀whúú,

mbụ g’ọo ọgbaragbu oshi,

gbafụtaru iwhe l’alị ọkponku.

Ọ tọ madụ ụma, tọ dụ ugvu nke ole ẹnya.

Ọ tọ dụdu iwhe dụ iya l’ẹhu

nke t’ọ gụa anyi ẹgu nke iche.

³Ndiwhe bẹ kpọru iya ẹbo-ẹbo l’afụ, jịka iya.

Ọ bụ nwoke áwhụ byarụ, o jee iwhe ọ tsụru ude.

Ndu madzụ l’abụje: whẹ -whụa ya, whẹ ewocha iwhu.

A kpọru iya ẹbo-ẹbo l’afụ,

tọ dụ iwhe anyi gụberu iya.

⁴Obenu l’ọo ya bẹ vutaru

ẹhu-ba-dụ-mma anyi l’onwiya,

vutakwawho áwhụ, anyi l’atsọ.

Iwhe anyi l’anọje ekfuchia bụ

l’iwhe-ọtsulanu, byarụ iya nụ

bẹ bụ Chileke wotaru iye ya,

mbụ l’ọo Chileke bẹ l’anụ iya awhụ.

⁵Ọle ọkwanu l’iswi emeswe,

anyi mesweru b’e gude kẹe ya ọrwu l’ẹhu.

Ọ bụru l’iswi iwhe-dụ-ẹji, anyi

meru b’e gude tsua ya pyaapyaa.

Áwhụ a nụru iya megee mee,

anyi nọdu ndzụ ẹhu ọdu guu.

Ọ bụkwaruwho ọnya ẹchachi,

e chiru iya b’e gude mee t’anyi mehu l’iwhe l’eme anyi.

⁶Anyi g’anyi ha l’aghakọta

ririri g’ọo atụru, whuru ụzo.

Onyenọnu cheberu iwhu l’ẹka dụ iya ree.

Ọle Onye-Nwe-Ọha boru iya

ejo-iwhe, anyi metaru l’ishi.

⁷A kparụ iya ẹhu shii, e mekpaa ya ẹhu,

ọle o to kfudu m’ọo akpụru okfu lanụ.

Ọ dụ g’ọo atụru, a kpụ eje egbugbu.

Ọ nọlewho nwandoo g’ọo atụru, l’eebushi ẹji.

To kfu m’ọo akpụru okfu lanụ.

⁸A kparụ iya ẹhu, kpee ya

nkfụ-gbu, kpụru iya je egbua.

Ọ tọ dụdu m’ọo onye lanụ lẹ ndu

nteke ono, kparụ iya ishi,

l’egbugbu, e gburu iya wofu iya l’alị ndu nọ ndzụ.

Ọ bụru emmeswe ndibe mu

mesweru b’e gude chia ya iwhe.

⁹E doberu iya ilu l’ẹka ilu ndu meru ejo-iwhe dụ.

Ọ nwụhu, e lia ya l’ilu ndu oke amadụ.

O to mejedu iwhe-kpanganga, tọ dzụje ejire.

¹⁰Ọle ọ bụkwanu uche Onye-Nwe-Ọha tẹ ya gwee ya

aryaka-eryune, mee ya t’o jee

iwhe-ọtsulanu ono, o jeru.

Ọ nụru ndzụ iya t’ọ bụru

ngwo-ẹja, e gude akfụ ụgwo iwhe-dụ-ẹji.

Oo-bekochaa whụ ụnwu nwanwa iya,

ya emee tẹ ndzụ iya kpọlibebaaru.

Ee-shi iya l’ẹka eme uche

Onye-Nwe-Ọha eje l’iwhu l’iwhu.

¹¹O -jegee iwhe-ọtsulanu ono

bẹ l’ọo-whụ iwhoro nke ndzụ, ẹwho eji iya.

Onye ono, dụ chịriri, l’ejeru mu ozhi l’e-gude

nke iwhe ono, ọ marụ mee

t’ikpoto madzụ bụru ndu a gụru lẹ ndu dụ chịriri,

Yẹbedua evuru ejo-iwhe, whẹ meru.

¹²O noo g’o gude mu je l’a-nụ

iya oke l’echilabọ ndu oke amadụ.

Yẹle ndu ike dụ l’a-nọ ahakọ oke,

nkele ọ tụru ndzụ iya tọgboru anwụhu,

a gụru iya yeru ndu l’eme ejo-iwhe.

Obekwanu l’o vutaru iwhe-dụ-ẹji ikpoto madzụ.

Ọ gọchitaru ọnu ndu l’eme mmeswe.

Onye-Nwe-Ọha yeru Jerúsalẹmu obu

¹“Gụa egvu, gụbe nwanyị, l’ẹte atsụ ime.

Mbụ gụbe onye ono, gba ẹka nwa.

Dabarahụ l’ọgu egvu, gụ echia mkpu ẹhu-ụtso.

Mbụ gụbe onye ono, ime l’ete emebua.

Ụnwu nke gụbe onye ono, bụ

nwanyị, daburu mgbegere l’a-kakwa shii

amamẹ ụnwu nke nwanyị, l’alụ ji.”

O nokwa iwhe Onye-Nwe-Ọha l’ekfu ndono.

²“Mekwaa t’ụlo-ẹkwa ẹka, i bu kabaa ọsa!

Mee t’ẹkwa, e gude mee ụlo ghu ọbu lọchibaa alọchi.

Be emebotakwa iya emebota.

Mekwaa t’eri iya kabaa esechi!

Mekwaa t’abara iya kabaa oshihu ike!

³Ii-megee saa ọsa, bua larụ

ẹka-ụtara, bya ebua larụ ẹka-ịcha.

Ẹpa ghu l’a-natawhu alị ono azụ,

bụ iya bụ ẹka ono ndu mba gẹ mba ha bya eburu.

Mkpụkpu ono, ẹgbara kfụru bẹ whẹ l’e-buchikota.

⁴T’egvu ba atsụshi ghu, o noo

l’a ta abyadụ l’eme ghu iwhe-iwhere ọdo.

Ba ayọkwa ọshi nke l’ị tị madụ

t’e kpudu ghu nụ iwhu lẹ ntụ.

Nkele a ta abyadụ l’e-me ghu iwhe-iwhere.

Ii-megee nyazọkota iwhere ono,

meru ghu nteke ị bụ nwọgbaga.

O nokwawho gẹ l’ịitii nyatahẹ

áwhụ ono, l’aakpatsu ghu l’ọo l’ị bụ nwa-mbunu.

⁵Onye nọ ọnodu ji ghu bụ

onye ono, meru ghu nụ.

Onye-Nwe-Ọha, bụ Onye-ishi-igwe-ọgu bụ ẹwha iya.

Ọo Onye nsọ nke Ízurẹlu ono bụ onye gbafụtaru ghu nụ.

Iwhe l’eekuje iya bụ Chileke nke mgboko l’owhu.

⁶Onye-Nwe-Ọha bẹ kuwhuwaru ghu azụ.

Ị dụ g’ọo nwanyị, ji iya harụ, ọ daburu mgbegere,

obu l’atsọ iya ilu.

Ị dụ g’ọo nwanyị, a lụru nteke ọ

bụ nwata, ji ghu jịka iya.

O noo iwhe Chileke ghu l’ekfu ndono.

⁷“Mu harụ ghu kpọo ụkfu nwanshị,

ọle mu l’e-gude obu-imiko,

parụ ẹka duwhu ghu azụ.

⁸Mu gude ẹhu-eghughu, ghuru

mu nụ, pafụru ghu iwhu, kpọo ụkfu nwanshị.

Ọle mu l’a-whụru ghu imiko

shi nno goshi ghu n-yemobu

l’a-nọ rwua tututu-mịmimi.”

O noo iwhe l’ookfu, mbụ Onye-Nwe-Ọha, bụ onye mgbafụta ghu.

⁹“L’ẹka mu nọ b’ọ dụa g’ọo oge nke Nowa;

nteke ono mu riru nte sụ l’ụdu

utso, gbarụ l’oge nke Nowa

ta abyakwa l’a-gba lẹ mgboko ọdo.

Ọ kwawhọ nno bụ gẹ mu riwaru nte sụ

l’ẹhu ta abyadụ l’e-ghu mu eghu ọdo l’ẹka ị nọ,

mu ta abya l’a-baru ghu mba ọdo.

¹⁰Ugvu g’ugvu ha je m’ọo l’a-whọfu l’ọnodu iya,

mbụ e je m’ọo l’e-wofu ụnwu

ugvu nshịi l’ẹka whẹ dụ,

bẹ n-yemobu mu ono, l’ẹte agvụ agvụ ta abyakwa

l’a-lụfu l’ẹhu ghu.

T’a bya l’e-wofu ọgbandzu ẹhu

ọdu guu nkemu ono l’ẹhu ghu.”

O noo iwhe l’ookfu, mbụ Onye-Nwe-Ọha ono, nweru obu-imiko l’ẹka ị nọ.

Jerúsalẹmu ọ̀whúú

¹¹“Gụbe mkpụkpu, iwhe-ọtsulanu byarụ,

mbụ gụbe mkpụkpu oke

whẹrewhere l’apanga apanga,

tọ dụ onye l’adụ ghu obu.

Mu l’e-gude ẹwhuru, l’ereshi ire ike tụ-whu ghu azụ.

Ọo ẹwhuru ono, bụ safaya

bẹ mu l’e-gude tụa ukfu mgbodo ghu.

¹²Mu l’e-gude ẹwhuru ono,

bụ rubyi nmakọta eli mgbodo ghu ono g’ọ hakọta.

Mu l’e-gude ẹwhuru, l’egbukaa

ngerengere tụa ọnuzo ghu.

Mu egude ẹwhuru, l’erekaa ire

tụkota mgbodo ghu l’owhu.

¹³Ụnwegirima ghu l’owhu bẹ

bụ mụbe Onye-Nwe-Ọha l’e-zhi whẹ iwhe.

Mu l’e-me t’ẹhu dụ ụnwu ghu ono guu mebyi adụdu.

¹⁴Ee-me t’ị kpọru g’ọo abara l’ụzo, kfụru nhamụnha.

Ọ tọ dụdu onye bya l’a-kpa ghu ẹhu,

tọ dụ iwhe egvu iya l’atsụkwadu ghu.

N-yemegvu l’a-nọdu ghu otẹnya;

tọ bya l’e-shita ụzo ẹka ị nọ.

¹⁵Onye -nọnyaaru tsolahaa ghu okfu,

bẹ onye ọbu l’emekwa iya l’ike ẹka iya,

ọ tọ kwa mu zhiru iye ya.

Iwhe bụkwanu onye l’etso

ghu okfu l’e-bechakwaa daa.

¹⁶Tii ledu, ọ kwa mbẹdua meru ọ-kpụ-ụzu,

l’anmajẹ eko l’icheku jeye ya evojashihu,

ya abya egude iya kpụta

ogbuligwe, e gude alwụ ọgu.

Ọ kwa mu whọ meru onye

emebyi t’o mebyishia iwhe.

¹⁷Ọ tọ dụkwa ngwọgu,

a kpụru t’e gude lwụshi ghu ọgu bya l’e-re ire.

Iwhe bụ onye boru ghu ibo bẹ ire l’a-gwọ ẹji.

O noo bụ oke-iwhe nke ndu ozhi mụbe Onye-Nwe-Ọha;

bụkwaru iya whọ bụ ọdzori, mu l’agbarụ whẹ.”

O nokwa iwhe Onye-Nwe-Ọha l’ekfu ndono.

Oku, l’eeku ndu ẹgu mini l’agụ

¹“Unu gebekwa-o. T’iwhe,

bụ-zhia onye ẹgu mini l’agụ byakwa lẹ mini.

T’onye okpoga l’ẹte adụa byakwa azụta iwhe ria.

T’onye ọbu byakwa agata mmẹe, zụta mini-ẹra-eswi,

l’ọotoo kfụ okpoga,

tọ dụ ụgwo ọdo l’ọo-kfụ nke iche.

²?Ọo gụnu meru unu

l’erewhushi okpoga unu l’iwhe l’abụa nri,

emewhushi iwhe unu setaru eseta l’iwhe l’ete eji ẹwho?

Unu tọgbo nchị unu l’alị nụa iwhe mu l’ekfu,

ndụge unu eria iwhe dụ ree, ria ọkpobe nri.

³Unu ngabẹ nchị. Unu abya mu ntse.

Unu nụaro iwhe mu l’ekfu,

ndụge unu anọdu ndzụ.

Mu l’unu l’a-gba ndzụ, l’a-nọ jeye lẹ tututu-mịmimi.

O noo bụ iwhe-ọma,

mu kweru Dévidi ụkwa iya,

mu je l’a-bụru o-me-g’o-kfuru l’iwhe ọbu,

mu kweru ụkwa iya ọbu.

⁴Mu meru iya, ọ bụru onye

l’agba ndiwhe ẹka-ebe,

mee ya, ọ bụru onye ishi mẹe

onye l’atụru ndiwhe iwhe whẹ l’e-me.

⁵Lekwa lẹ ndu mba, l’ịitii

mahaa bẹ l’ii-kukwa oku.

Ndu mba, l’ẹte amaa ndu unu bụ

egude ntụtu-ọso gbakfuta unu t’unu lẹ whẹ tụgba.

Onye l’e-me t’ọ dụ nno bụ Onye-Nwe-Ọha ono,

bụ Chileke ghu, mbụ onye nsọ nke Ízurẹlu,

nkele o mewaru ghu, ị dụ biribiri.”

⁶Chọkwaa Onye-Nwe-Ọha ntaa l’ịicho-vu iya.

Kua ya oku ntaa ọ nọ ntse.

⁷T’onye ejo-ememe haa lẹge o gude,

onye l’eme ejo-iwhe ahaa ọri ejo ọriri.

T’ọ lwakfutachia Onye-Nwe-Ọha,

nke ọwhu l’oo-meru iya obu-imiko.

T’ọ lwakfuta Chileke anyi, nke

ọwhu l’ọo-gụru iya nvụ,

gụaru iyẹ ya nke etsutsu iya.

⁸“Ọriri mu ta abụkwa ọriri unu,

G’unu l’eme ta abụ gẹ mu l’eme.”

O nokwa iwhe Onye-Nwe-Ọha l’ekfu ndono.

⁹“Ọ kwa g’igweli nọ-be alị otẹnya;

bụ g’ụzo mu l’eshije eme iwhe nọ-be ụzo ọwhu unu

l’eshije eme iwhe otẹnya.

Ọ bụkwaruwho nno bụ gẹ ọriri

mu nọ-be ọriri unu otẹnya.

¹⁰Ọ kwa gẹ mini yẹle aka-mini l’eshije l’igweli achị,

ọ tọo lawhujedu azụ l’igweli

mẹ ọ tọko gbaa mini l’alị,

mee alị ọ gọo agọgo rwushia irwu,

mịtaru ndu l’akọ iwhe l’alị

akpụru-iwhe, whẹ l’a-kụ,

mee tẹ ndu l’eri eriri nweru nri, whẹ l’e-ri.

¹¹O nokwawho g’okfu, shi

mu l’ọnu fụta dụ ndonoya.

Ọ bụ ishi-ẹkfu l’ẹte adajẹ l’alị

gbarụ ẹka lwawhuru mu azụ.

Iwhe l’oo-mechia bụ l’oo-medzu

iwhe mu tụberu iya nke ememe,

ya emekotagezhia iwhe lile, mu zhiru iya t’o mee.

¹²Unu l’e-gude ẹhu-ụtso lụfu,

e duta unu dufu l’ẹhu-guu.

Ugvu g’ugvu ha l’a-tụko

dabarashịhu l’ọgu egvu l’ụzo atatiwhu unu.

Iwhe bụkota oshi, nọkota l’ẹgu

atụko gude ẹhu-ụtso akụkaa ẹka pyamụ pyamụ.

¹³Oshi payịnu l’a-wata efufu l’ọzori amị-ogvu.

Oshi mịyituru awata efufu l’ọzori ogvu l’uke.

O noo l’a-bụru iwhe Onye-Nwe-Ọha l’e-gude zaa ẹwha,

nkele ọo-bụru iwhe-ọhubama, l’a-dụ jeye lẹ gbururu,

t’a bya l’e-mebyi iya emebyi.”

Ndzọfuta l’e-rwube ndu ọha ọdo

¹Ọ waa bụ iwhe Onye-Nwe-Ọha l’ekfu: “Unu kpejee ikpe, kfụru nhamụnha, unu emejee iwhe dụ chịriri, nkele nteke mu l’a-dzọ madzụ dụakwa ntse; nteke mu l’e-goshi lẹ mu dụ chịriri ta adụhekwa gẹ l’ọo-nọ-beru. ²Ẹhu-ụtso bụ nke onye l’eme iwhe ono. Mbụ onye gudeshi iya ike, onye l’edobeje mbọku-ọtuta-ume nsọ, t’o merwuje iya emerwu, bụru onye swaru ẹka iya swaa ọkpa iya tukobe ome ejo-iwhe.”

³Ba adụkwa onye shi eshishi, bụ onye woru onwiya tụgbabe l’ẹhu Onye-Nwe-Ọha l’a-sụ woo lẹ, Onye-Nwe-Ọha l’a-gụfu iya lẹ ndibe iya.

T’onye l’ete eye ime nwa ba asụjekwa woo lẹ, ya bụ oshi ọkponku gvugaru. ⁴O noo nkele ọ waa iwhe Onye-Nwe-Ọha l’ekfu ndọwa: “Onye l’ete eye ime nwa; onye ọbu l’edobeje mbọku-ọtuta-ume mu nsọ, hata tẹ ya meje iwhe dụ mụbe Onye-Nwe-Ọha ree, tẹmenu ọ kfụkfubeshia ọgbandzu mu ẹka ike: ⁵L’onye ọbu bẹ mu l’e-me t’a nyatajẹ, mee ya t’o nweru ẹwha l’ime eze-ụlo mu mẹe l’echilabọ ndibe mu, ọwhu l’a-ka l’ọ nwụshiru ụnwegirima. Ẹwha, mu l’a-gụ whẹ bụ ẹwha, l’a-nọ jeye lẹ tututu-mịmimi, mbụ ẹwha l’ẹte enwee echihu.”

⁶A bya lẹ ndu ono, shi eshishi, bụ ndu woru onwowhe tụgbabe l’ẹhu Onye-Nwe-Ọha, shi nno whẹ l’ejeru iya ozhi; whẹ yee ẹwha Onye-Nwe-Ọha obu, bụru ndu l’abarụ iya ẹja. Iwhe bụ-zhia ndu, l’edobeje mbọku-ọtuta-ume nsọ, whẹ te emerwuje iya emerwu, bụru ndu kfụkfubeshi ẹka ike l’ọgbandzu Onye-Nwe-Ọha ono, bẹ Onye-Nwe-Ọha l’ekfu sụ: ⁷“Ndu ono bẹ mu l’e-duru bya Záyọnu, bụ eli ugvu mu ono, dụ nsọ. Mu l’e-me t’ẹhu tsọo whẹ ụtso l’ụlo ẹka l’aanọduje ekfu anụ mu. Ngwo-ẹja, whẹ kpọkotaru ọku yẹle ngwo-ẹja ọdo, whẹ gude abyakfuta mu bẹ l’aa-natakọta l’ẹnya-mgbẹja mu. Nkele ụlo mu bẹ l’ee-kuje ụlo ẹka mba lile l’a-nọduje ekfu anụ mu.”

⁸Ọ waa iwhe Nnajị-Ọha, bụ Onye-Nwe-Ọha l’ekfu ndọwa, mbụ onye ono bụ iya l’achịlata-whu ndu Ízurẹlu ono, a chịkashiru laa alị ọdo azụ: “Mu l’a-chịlatabakwaa ndu ọdo bya eyeru whẹ; t’a gụfukwaro ndu ọwhu mu chịlatahawaru.”

Aanma ndu l’edu ndu Ízurẹlu ikpe

⁹Unu bya; unubẹ anụ lile, bu l’ẹgbudu! Unu bya adzugbua iwhe; unubẹ anụ lile bu l’ọswa! ¹⁰Ndu l’eche ndu Ízurẹlu nche l’atsọkakwaa ishi. Whẹ ta amadụ onwowhe ilile. Whẹ bụkota nkụta, e doberu t’o cheje nche, whẹ te ekfu okfu, whẹ ta agbọ ụja. Ẹka whẹ jeberu whẹ azẹshita arọ-whe nrọ. Iwhe bụ-zhiawho ẹhu whẹ bụ okuwhe mgbẹnya. ¹¹Whẹ bụ nkụta uwuruba ẹwho; ndu ẹwho l’ete ejije eji. Whẹ bụ ndu l’eche atụru, iwhe l’ete edoje ẹnya. Whẹ lile tụkowaru chebe iwhu l’ụzo nke ẹka whẹ. Onyenọnu l’ime whẹ bụru urwu ẹka iya bẹ l’ọocho. ¹²Whẹ fụta whẹ asụ ibe whẹ: “Unu bya tẹ whẹ je agata mmẹe ngụa! Tẹ whẹ ngụ-jia ẹwho whẹ lẹ mmẹe, l’atsụ atsụtsu! Echile l’a-dụlekwaa g’ọo ntanụ. Mbụ l’oo-gbẹnu kabaa ree.”

Aanma ndu Ízurẹlu ikpe lẹ whẹ bụ ndu l’agwa iwhe

¹Onye dụ chịriri l’abụje ọ nwụhu, ọ tọ dụdu onye l’a-kpa ishi. L’ọobuje e wofu onye e gude ire iya ẹka, ya eje dụ onye l’oorwu l’ẹhu. Ọle ewofu ono, e wofuru onye dụ chịriri bụ t’ejo-iwhe be erwube iya ẹka. ²Iwhe bụ onye l’eme iwhe l’ụzo kfụru ọto l’abụje ọ nwụhu, ya azẹe guu dzuta ike.

³T’unubẹdua kpụlitaadaru ẹka-a, unubẹ ụnwu-a ndu l’agba ẹja nwụshiru! Unubẹ eri ndu l’eri ogori mẹe ndu l’agba ọkpara-a! ⁴?Ọo onye bẹ unu l’aja ewenu? ?Ọo onye bẹ unu l’ajarụ ọnu boo, eburu ire gẹgege? Unu bụkwa ụnwu ndu mmeswe nwụshiru, bụru ẹpa ndu l’adzụ ejire. ⁵Unubẹ ndu ẹhu l’anashịhuje anashịhu l’ẹka unu l’agwa agwa unu lẹ mkpula achị mẹe lẹ mkpula oshi ọdo, jakashịhuru ajakashịhu. Unubẹ ndu l’achịtaje ụnwegirima unu je egbushia lẹ nsụda nsụda gude gwaa iwhe lẹ mgbaku ọgba ẹwhuru. ⁶Agwa ono, dụ l’echilabọ ẹwhuru ono l’akwọ mụrumuru, dụ lẹ nsụda ono bẹ unu l’anọje agwa l’ọo ya bụ chi unu. Unu l’agbajẹru iya ẹja mmẹe gbaarụ iya ẹja nri gude gwaa ya. ?Ọo iime nno, gụ asụ t’obu mu jizeta? ⁷Ẹka ị gbarụ ugbooshi-azẹe ghu bụ l’eli ugvu, ha l’eli. L’iinyihuje ẹka ono je agwaa iwhe ghu. ⁸L’azụ mgbo ọnu-ụlo ghu b’i dobegeeru ọgvu, l’ịigwa agwa. I jiru ụba yeru mu, yeshia uwe ghu gbarụ ọto, nyiba l’iwhe-azẹe ghu, ha whalaa mẹe ndu gụ lẹ whẹ l’eshi ọnya. Unu wata achịkfu shi nno kweta onwunu azẹe. Unu nọdu l’ẹka ono awhatọshi onwunu g’ọ dụ unu ree. ⁹I huru mmanụ l’eshi kwẹkwekwe, gude mmanụ ólivu wojeru Molẹku. I zhia ndu nọ-chiru ẹnya ghu, whẹ jekotagezhia ẹka teru ẹnya, mbụ jerwugee alị-maa l’ẹka whẹ l’achọ ọgvu whẹ l’e-jeta bya edobe agwa. ¹⁰I jetagewaru ije l’ẹka l’ịicho ọgvu l’ii-jeta bya edobe agwa ike dụ ẹbo gvụ ghu. Tọ bụhenu t’ị sụ l’iwhe ono ta adụdu iwhe ọ bụ. Uche ghu l’abụje woo l’agwa ono l’ịigwa ono l’anụ ghu-a ike, ọ bụru iya meru ike ta agvụje ghu agvụ.

¹¹“?Ọo zhia onye bẹ egvu iya shi atsụ ghu? ?Ọo onye b’i shi atsụ egvu meru g’o gude ị dzụaru mu ejire, bya anyazọwa mu rọo kpamụ-kpamụ; mu ta agbatajẹhe ghu l’uche ilile? ?Tọ dụ l’ọo lẹ mu shi eshi bụ gụnu gbata nkụchi meru g’o gude tịi tsụ mu egvu? ¹²Sụa, chịriri ọbu ị rịru l’ịidu mẹe iwhe-ọma ọbu ị rịru l’iime bẹ l’a-tụ jalaa goshi ghu l’iwhe lile ono, ị sụru l’ọ bụ ọkpobe iwhe ta adụdu ọwhu bya l’e-yetaru ghu ẹka. ¹³Tẹ nwa nchịkobe agwa ono, i nweru gbataadaru ghu m’i chilewho mkpu eyemẹka. Whẹrewhere l’a-pata whẹ rọ pawhua apawhu. Mbụ l’udzu ọnu l’a-pakata whẹ je etuwhaa etuwha. Ọle onye gbabataru l’ime mu zeeru ndzụ bẹ alị-a l’a-bụru oke-iwhe iya, ya abụru iya l’e-nweru ugvu mu ono, dụ nsọ.”

Aadụ ndu nzhimanụ lwarụ azụ obu

¹⁴Ee-bekochaa kfua sụ: “Unu kpaa echi-ụzo, unu kpaa ya akpakpa, unu dozhia ụzo t’ọ dụ ree. Unu wofugezhia iwhe l’a-duchi ndibe mu ụzo.” ¹⁵L’onye ono ha shii ono, mbụ onye ono bụ onye e kutseru ekutse, bụru onye l’a-nọ ndzụ jeye lẹ tututu-mịmimi; ọ waa iwhe onye ono ẹwha iya dụ nsọ l’ekfu ndọwa: “Ẹka mu bu bụ l’ẹka ha l’imeli, bụru ẹka dụ nsọ. Ọle onye nzhimanụ lwarụ azụ l’iwhe-dụ-ẹji o meru, bya ewozeta onwiya alị bẹ mu l’e-buru l’ẹka o bu, nke ọwhu mu l’e-me t’ume onye wozetaru onwiya alị jakerehu, mu emekwaawho t’obu jakerehu onye nzhimanụ iwhe dụ ẹji o meru lwarụ azụ. ¹⁶Mu ta akwẹgbukwaru ọnu l’odo iwhe e meru mu jeyewaroya, mu ta akwagbụru l’ẹhu eghughu ntekenteke, ọdumeka bẹ madzụ l’a-tubuhukwa ume, mbụ ndu ono, mu gude ẹka mu mee. ¹⁷Iwhe shi ghua mu eghu l’ẹka whẹ nọ bụ oke ẹnya ono, whẹ nweru, shi nno bụru ndu l’eme iwhe-dụ-ẹji. Mu gude ẹhu-eghughu hụ̀a whẹ àhụ̀hù, woru iwhu tuwhaaru whẹ. Ọle whẹ bụle-ẹ kpọkponyi, whẹ bụ, emele-e iwhe dụ whẹ ree.

¹⁸“Mu whụkotawaru gẹ whẹ l’anọje eme eshi. Ọle mu l’e-mele-e tẹ whẹ mehu. Mu l’e-du whẹ mee tẹ meji nmakfuru whẹ anmakfuru. ¹⁹Mu l’e-me t’ọ bụru ajaja l’e-ji ọnu ndu l’agụ áwhụ lẹ Ízurẹlu. Tẹ nchị-ọdu-ndoo dụkwaru ndu nọdu otẹnya mẹe ndu nọdu ntse. Mu l’e-me tẹ whẹ mehukota.” O nokwa iwhe Onye-Nwe-Ọha l’ekfu ndono. ²⁰“Ọle ndu ejo-ememe dụa g’ọo akpara-mini, l’atụ l’eze-ẹnyimu, to nwe ndzumike. Mini iya l’avọ-litaje ụrwa yẹle ẹpoto. ²¹Ndu ejo-ememe bẹ ẹhu l’ẹte adụjekwa guu.” O nokwa iwhe Chileke mu l’ekfu ndono.

Ọkpobe ọswiru Chileke ẹgu

¹“Chia mkpu chishia ya ike. Ba ahakwa iya aha. T’olu ghu hajẹ gengu-gengu g’ọo opyi-ọku. Karụ ndibe mu lẹ whẹ l’ekwefuru mu ike. Karụ ọzo-ụlo Jékọpu iwhe-dụ-ẹji, whẹ l’emegbabe. ²Mbọkumboku bẹ whẹ l’anọduje achọ ụzo mu. Whẹ fụta whẹ eme gẹ-woo l’ọogu whẹ ẹgu tẹ whẹ marụ ụzo mu. Whẹ eme gẹ-woo lẹ whẹ bụ mba, l’eme iwhe kfụru nhamụnha, mbụ gẹ-woo l’ọ tọ dụdu iwhe dụru Chileke whẹ lẹ nsọ, whẹ l’ahajẹ ememe. Iwhe whẹ l’anọje akpa mu ishi iya bụ ishi iwu, kfụru nhamụnha, ekfu l’ọ dụ whẹ nke tẹ whẹ nọdu Chileke ntse. ³Whẹ -nọdu whẹ asụ: ‘?Anyi l’aswịhunuru ẹgu ekfu anụ Chileke nke gụnu, gẹ l’ọobuje anyi swị-gee ya, ị tịi whụdu anyi? ?Anyi l’atahụnuru onwanyi awhụwhu nke gụnu, gẹ l’ọobuje e megee, ị tịi kpadụ anyi ishi?’

“Ọle ọo g’unu l’aswị ẹgu ono ekfu anụ mu bụ g’unu l’achọ ọdu lẹ mma nkunu, ọ bụru nno bụ g’unu l’eme ndu l’ejeru unu ozhi eriri. ⁴Ẹka ọswi ẹgu nkunu l’asụ-chije ishi bụ l’ọba mba mẹe ose okfu mẹe ogude obu mgbashị echi ibe unu gbiigbii. Ụdu ọswi ẹgu ono, unu l’aswị ono te emekwa tẹ mu nọdu l’igwe nụa olu unu. ⁵Ọ tọ bụkwa ụdu ọswi ẹgu ono l’adụje mu ree. Mbụ ụdu iya ọwhu bụ t’ọ bụlerua lẹ madzụ wotaru ujiku lanụ taa onwiya awhụwhu. Onye ọbu nọdu; ya akụda ishi g’ọo ẹwu, kụlwashihuru akụlwashihu; zẹe azẹe l’ẹkwa-mkpe mẹe lẹ ntụ. ?O noo iwhe ọbu, unu l’eku ọswi ẹgu ekfu anụ Chileke, bụ iya bụ mbọku, dụ Onye-Nwe-Ọha ree?

⁶“Ụdu ọswi ẹgu dụ mu ree bụkwa; t’unu tọfu ẹgbirigba ome-l’iwe. Unu akụkufu eri odogoro ikpe, l’akfụaru nhamụnha, nke ọwhu ndu l’aakpa ẹhu l’e-nweru onwowhe. A tụko iwhe bụ-zhia odogoro mebyishia. ⁷Iwhe ọdo, bụfua ọswi ẹgu ekfu anụ mu bụ t’i woru nri ghu keeru ndu ẹgu l’agụ, mẹe t’ị dubata ndu ụkpa-nri, l’ete enwee ụlo l’ibe ghu. Nteke ị whụru onye gba ọto, gụ ewebe iya iwhe. Yẹle t’i be ewofujekwa iwhu ghu l’ẹka abụbu ghu nọ. ⁸Ọ kwa iya bụ, nke ọwhu iwhoro l’e-nwuru ghu whoo g’ọo iwhoro chi-asahu, gụ agbakerehu l’ugbo lanụ. Ọdu chịriri ghu l’e-vutaru ghu ụzo, gụbedua etso iya etso. Ọdu-biribiri nke Onye-Nwe-Ọha anọdu ghu l’ụzo azụ. ⁹O noo nteke bụ, i -kua oku, Onye-Nwe-Ọha aza ghu. I -chia mkpu eyemẹka, ya asụ ghu lẹ ya nọkwa-a.

“Ọ -bụru l’ii-wofu odogoro nke ome-l’iwe l’ẹka ị nọ, i je l’a-ha ọmaru madzụ ejo ẹka, hakwaawhọ okfu okfu erehu. ¹⁰Ọ -bụru l’ii-sweje ẹnya lẹ nri ghu nụ ndu ẹgu l’agụ tẹ whẹ ria, i je l’a-nọ akwọ ndu l’akpa ẹhu lẹ mkpa, ọ kwa iya bụ l’iwhoro l’e-nwuru ghu whoo l’ẹkpuroochi, tsụrikiti ẹkpuroochi adụ ghu g’ọo echi eswe. ¹¹Onye-Nwe-Ọha l’a-nọ edu ghu ntekenteke. Ọo-nọdu emeru ghu iwhe mkpa iya dụru ghu l’alị ẹka kpọru gbengu, emekwawho t’ọkpu gbashịa ghu ike. Ịi-dụ g’ọo mgbabu, a gbarụ mini ree, gụ adụ g’ọo ẹnya nwogvu, mini l’ẹte atahụje atahụ. ¹²Ndibe ghu bụ whẹ l’a-tụkwa-zhi ẹka ono, shi eshi ndụ-ichee dakashịhu adakashịhu l’ime ghu. Ii-tụ-li ukfu-ụlo ono a tụru eshi ọgbo ndụ-ichee atụ-li. Iwhe l’ee-bekochaa eku ghu bụ: Onye ntụkwa mgbodo yẹle Onye ntụkwa ụlo-ebubu, dụ l’agụga oji.

Obunggo, l’ee-bu onye doberu mbọku-ọtuta-ume

¹³“Ị -chịcha-zhiakwa ọkpa ghu l’omebyi mbọku-ọtuta-ume, tii me g’ọ dụ ghu ree lẹ mbọku ono, dụru mu lẹ nsọ ono. Ị -kpọ-zhiakwa mbọku-ọtuta-ume mkpa, kua mbọku ono, dụru Onye-Nwe-Ọha lẹ nsọ ono l’ọo mbọku, l’aakwabẹ ugvu. Ị -kwabẹ-zhiwa iya ugvu, tọ dụ ẹka l’iijeje, tịi chọje ọdu-lẹ-mma nkeghu, tii kfuje okfu, l’abẹe l’iwhe, ¹⁴ọ kwa iya bụ l’ii-nweru ọkpobe ẹhu-ụtso l’ẹka Onye-Nwe-Ọha nọ. Mu l’e-me t’i kfukoru l’ẹka kakọta l’eli lẹ mgboko nọdu tụa okoo. Mu egude oke-iwhe ono, shi lẹ nna ghu, bụ Jékọpu azụ ghu. Nkele mụbe Onye-Nwe-Ọha kfuakwaru nkemu.”

Ọo iwhe-dụ-ẹji ndu Ízurẹlu kpọshiru t’a nafụta whẹ

¹Lekwa lẹ Onye-Nwe-Ọha bẹ ẹka iya l’ẹte adụkwaa tsụpee nke t’ọ bọ dzọfuta unu. Nchị te echihu iya echihu nke t’ọ bọ nụ oku, unu l’eku iya. ²Ọo gbechia bụru ejo-ememe unu kewafuru unu lẹ Chileke unu nọ. Ọ bụru iwhe-dụ-ẹji unu bẹ meru, o wofu iwhu iya l’ẹka unu nọ, tẹ ya ba anụshi iwhe unu l’ekfu. ³Nkele ozhiawho mmee ọchi ngụgoru unu ẹka angụgo. Ejo-ememe paa unu ẹka l’ẹhu. Ọ bụru ejire l’anọjelewho afụshi unu l’ọnu, ejo okfu l’anọje awhụ unu purupuru l’ọnu.

⁴O to nwedu onye l’ime unu l’agbajẹru ibe iya ẹkwo l’iswi ọdu-mma. Tọ dụhunu onye l’ekfuje ire-lanụ mẹe l’eekpe ikpe. Whẹ l’agbabẹje ọkpa l’edo, l’ete enwee ishi, adzụ-whe mkpọkoro ejire. Whẹ l’atsụtaje ime okfu nwụa ejo-iwhe. ⁵Whẹ l’ekpuje ẹkwa oguji kputa iya nwa. Ọ bụru ụgbu-ẹlwuwelwu bẹ whẹ l’anọduje ekwe. Iwhe bụ-zhia onye tarụ ẹkwa, whẹ tụru l’a-nwụhu anwụhu. Ẹkwa ọwhu a kụpyaru akụpya bụru oguji-nwaka l’e-shije iya fụta. ⁶Ụgbu-ẹlwuwelwu, whẹ kweru ta adụdu ree nke ome uwe. Ọ tọ dụdu iwhe whẹ meru, madzụ l’e-ye l’ẹhu. Iwhe lile, whẹ l’eme bụkota ejo-iwhe. Ọ bụleruwho iwhe ike iwhe ike l’ekwejeru whẹ l’ẹka. ⁷Ọkpa l’anọje atsụ whẹ nkọ tẹ whẹ je emee ejo-iwhe. Whẹ l’anọje anma whakawhaka tẹ whẹ gbua onye l’adụa iwhe o meru. Ọriri whẹ l’abụkotaje ejo ọriri. Ẹka whẹ yeru ọkpa bụru emebyi yẹle kpurupyata l’adụje iya. ⁸Ụzo nchị-ọdu-ndoo bẹ lwarụ whẹ l’ẹka-ịcha. Ikpe, kfụru nhamụnha ta adụ l’ụzo, whẹ l’eshi. Whẹ mewaru ụzo whẹ ọ dụ nswịko nswịko. Tọ dụhunu onye l’eshi iya bya l’a-hụbe nchị-ọdu-ndoo ama.

Ízurẹlu l’adụshi iwhe-dụ-ẹji, whẹ meru

⁹Ọo iwhe ono meru, e woru ikpe kfụru nhamụnha dobe whẹ otẹnya. Ọdu-chịriri te erwu whẹ ẹka. Whẹ leru ẹnya t’iwhoro nwuaru whẹ, ọ bụru ẹkpuroochi sọ-chiru. Whẹ lee ẹnya nteke ẹka lile l’a-bụru whoo; ọ bụru tsụrikiti. ¹⁰Ọ bụru gẹ ndu l’atsọ ishi l’anọje arwadawhe ẹka bụ gẹ whẹbedua l’arwadawhe ẹka lẹ mgbodo achọ ụzo. Whẹ l’arwadawhe ẹka g’ọo ndu ẹnya l’adụa. L’ọobuje whẹ l’eje ije l’echilabọ eswe, whẹ eje nvuko nvuko g’ọo ndu l’eje l’ọochi. Whẹ l’adụ-gejee g’ọo ndu nwụhuru anwụhu mẹ whẹ nọdu l’echilabọ ndu mkparawa. ¹¹Whẹ l’atụkoje agbọkaa ụja g’ọo nkụta-ọswa; atsọkaa kụrukuru g’ọo ndo. Whẹ leru ẹnya nteke iwhe kfụru nhamụnha l’e-rwube whẹ tọ dụ. Whẹ lee ẹnya nteke ndzọta l’e-rwube whẹ, ọ nọdu whẹ otẹnya.

¹²Iwhe kparụ iya nụ bụru lẹ mmeswe whẹ l’anwụshi anwụshi l’iwhu gụbe Onye-Nwe-Ọha. Iwhe-dụ-ẹji whẹ, l’eme l’agba whẹ ejo ẹka-ebe. Emeswe, whẹ mesweru ghu bẹ whẹ l’iya nọpyabe. Tẹmenu whẹ hụbekwawho ejo-ememe, whẹ meru ama ree. ¹³Whẹ l’eme mmeswe, agọlahu Onye-Nwe-Ọha. Whẹ bụru ndu gbẹru Chileke whẹ azụ. Iwhe whẹ l’anọje eye ọku iya bụ t’a kpajẹ ndu ọdo ẹhu yẹle t’e kwefuje ike. Whẹ l’anọje adzụshi ejire, bụ iwhe jiru whẹ obu kpimu. ¹⁴Ikpe, kfụru nhamụnha b’a chịru ọso chị-whua achị-whu. Ọ-dụ-chịriri kfụcha akfụcha je anọdu otẹnya. Ire-lanụ dawaa iko kpọo mkpofu-nchị lẹ gbororo ụzo. Iwhe kfụru nhamụnha ta awhụhe ụzo, l’oo-shi bata l’ẹka ono. ¹⁵Ire-lanụ ta adụhedu. L’ọobuje onye l’ezeru ome ejo-iwhe; onye ọbu aghọo anụ eriri.

Onye-Nwe-Ọha l’eme t’ọ gbafụta ndibe iya

Onye-Nwe-Ọha leru ẹnya, ọ dụ iya ẹji l’ikpe kfụru nhamụnha ta adụhedu. ¹⁶Ọ dụ iya ejo biribiri g’ọ whụru l’ọ tọ dụdu onye l’agbarụ ndibe iya mkpu. O kwee, gude ẹka iya lwụaru whẹ ọgu lwụ-gbua. O gude ọ-dụ-chịriri iya sedeshia whẹ ike. ¹⁷Ọ-dụ-chịriri b’o woru mebe uwe-igwe, o ye l’ẹhu t’o gbobuta iya obu iya. O woru ndzọta mebe okpu-igwe, o kpu l’ishi, woru ọgwata ụgwo iwhe yee l’ẹhu g’ọo uwe, bya awhukpua okoowhoo l’ẹhu g’ọo onye whukpuru onwiya ẹkwa. ¹⁸Ọo gẹ iwhe whẹ meru dụ, bụ gẹ l’ọo-kfụ whẹ ụgwo iya. Ndu ọhogu iya bẹ l’oo-tukoshi oke ẹhu-eghughu iya. Ya agwata ndu l’etso iya okfu ụgwo iwhe whẹ meru iya, kfụa ndu bukube eze-ẹnyimu iwhe gbarụ whẹ nụ. ¹⁹Ee-shi l’ụzo ẹnyanwu-arịba atsụ ẹwha Onye-Nwe-Ọha egvu. E shikwawho l’ụzo ẹnyanwu-awata eyeru ọ-dụ-biribiri iya ẹso. O noo lẹ nteke ọhogu l’a-tụru kperekengu kpekengu bya g’ọo utso bẹ Ume Onye-Nwe-Ọha l’a-chị iya baa ẹbaa.

²⁰“Onye mgbafụta l’a-bya ugvu Záyọnu. Ọo-byakfuta ẹpa Jékọpu, bụ ndu sefuru ẹka whẹ l’ome mmeswe.” O nokwa iwhe Onye-Nwe-Ọha l’ekfu ndono.

²¹“A -bya l’ẹka mbẹdua, bụ Onye-Nwe-Ọha nọ, lekwaa ọgbandzu mu lẹ whẹ ndọwa: Ume mu ono, dụ ghu l’ẹhu yẹle okfu mu ono, mu yeru ghu l’ọnu bẹ l’ẹte abyakwaa l’a-lụfu ghu alụfu l’ọnu, tọ bya l’a-lụfu alụfu l’ọnu ụnwu ghu, tọ bya l’a-lụfu alụfu l’ọnu ụnwu-nwanwa ghu whẹ wata ntaa jeye lẹ gbururu.” O nokwa iwhe Onye-Nwe-Ọha l’ekfu ndono.

Ọ-dụ-biribiri nke Záyọnu

¹“Gbalihu, chia echichi,

o noo nkele iwhoro nkeghu byawaru.

Mbụ lẹ Onye-Nwe-Ọha

l’egbuwaa zaazaa l’ẹhu ghu.

²Lekwa g’ọochi gbakọtaru lẹ mgboko l’owhu,

tsụrikiti ẹkpuroochi tụko ndiwhe sọ-kputa.

Ọle Onye-Nwe-Ọha l’a-wa g’ọo ẹnyanwu l’ẹhu ghu.

A whụa o-gbu-zaazaa ya l’ẹhu ghu.

³Ndu mba ọdo l’a-tụko wụru bya l’iwhoro ghu ono.

Ndu eze atụkokwawho bya l’o-nwu-whoo ono,

l’a-nọ enwuru ghu g’ọo chi-asahu ono.

⁴Paliadawho ẹnya apali lewhee mgburumgburu;

whụ gẹ ndibe ghu dzukoberu awụ abyakfuta ghu.

Ụnwu ghu unwoke shi otẹnya awụ alwa.

E heru ndu nke nwanyị ehe

l’ẹka g’ọo ụnwegirima, whẹ l’eje alwa.

⁵O noo nteke l’ịi-whụ iwhe ono, gụ anwụa gaa.

Obu akpẹnehu ghu akpẹnehu;

gụ emelahaa kovukovu.

O noo nkele iwhe lile,

dụ l’eze-ẹnyimu bẹ l’ee-me t’ọ ghọkota iwhe ghu.

Iwhe bụ-zhia ẹku, shi lẹ mba gẹ

mba ha alwatakọtaru ghu.

⁶Ọ-dọru-nyịmunyimu

ịnya-kamẹlu l’a-tụko alị ghu sweta.

Mbụ ụnwu ịnya-kamẹlu nshịi ono,

shigee alị ndu Midiyanu mẹe nke ndu Ifa.

Ndu ọwhu shi alị Sheba azarụ byakwawhọ.

Whẹ l’e-gude mkpọla-ododo

yẹle ụ̀nwù isẹnsu mẹ whẹ byadẹlewho.

Whẹ aryakwa iya whọ arya t’a

jaa Onye-Nwe-Ọha ajaja.

⁷Élwù ndu Keda l’owhu bẹ l’ee-rwulatakotaru ghu.

Mbụ-a, ebyila ndu Nebayotu

l’e-megee jeeru ghu ozhi.

A nata whẹ gude whẹ gwaa mu l’ẹnya-mgbẹja mu.

Mu eworu ẹguru ụlo mu ono mee t’ọ bụru ẹka

l’a-dụ ugvu l’ẹnya.

⁸?Ọo ndu ole l’awụ rinaa g’ọo urwukpu whọ?

Mbụ, ?ọo ndu ole l’ewhe ẹgube whọ g’ọo ẹka

ndo l’ewhe pẹrere ala l’ẹkfunu whẹ?

⁹Ndu bukube eze-ẹnyimu bẹ bụ mu bẹ whẹ gbarụ ẹnya yeru.

Ụgbo-mini, shi lẹ mkpụkpu

Tashishi l’eje abya l’ụzo iwhu.

Ọ bụru ụnwegirima ghu bẹ whẹ shi otẹnya achịlata.

Vukwaruwho mkpọla-ọcha

whẹ mẹe mkpọla-ododo alwa.

Nke ọwhu l’ọo-bụ ugvu

dụru Onye-Nwe-Ọha, bụ Chileke ghu,

mbụ onye ono, bụ onye nsọ nke Ízurẹlu,

onye meru ghu, ị dụ biribiri.

¹⁰Ọo ndu shi eshishi

l’a-tụ-whuru ghu mgbodo ghu azụ.

Ọ bụru ndu eze whẹ l’a-nọdu ejeru ghu ozhi.

Ọ kwa ẹhu-eghughu bẹ mu

gude chia ghu o-chi-gbii,

mu je l’e-gude n-yemobu meeru ghu obu-imiko.

¹¹Ọnuzo ẹka l’eeshije abata

l’ime ghu l’e-ghekotajeru ọnu ntekenteke.

A ta abyadụ l’agụ-chije iya agụ-chi, eswe l’ẹnyashi.

Nke ọwhu mba nọnu l’a-tụko

ẹku, whẹ nwe enwe vukoo bya akụberu ghu.

Ya abụru ndu eze whẹ l’a-chịjeru whẹ bya.

¹²O noo l’iwhe bụ mba nọnu,

ọdua l’ọo alị-eze nọnu,

jịkaru lẹ whẹ te ejeduru ghu ozhi l’a-la l’iyi.

Mba ọbu bẹ l’ee-me t’ọ bụru kpurupyata.

¹³Ọ-dụ-ugvu nke alị ugvu

ugvu Libanọnu l’e-rwube ghu,

mbụ oshi payịnu mẹe oshi fịru mẹe

oshi sayịpuresu, bụkota oshi, dụ iya nụ.

Whẹ lile bẹ l’ee-gude memaa

ụlo ẹka ono, dụru mu lẹ nsọ emema.

Mu emekwaawho t’ẹka mu

l’adzọje ọkpa bụru ẹka dụ ugvu.

¹⁴Ụnwu ndu ono, shi akpa

ghu ẹhu ono l’a-tụko bya abẹdeshihuru ghu l’alị.

Iwhe bụ-zhia ndu ono, l’ete

eshia gụbe ghu iwhe l’a-tụko bya adaarụ ghu

l’alị bẹe lẹ mgboro ọkpa.

Iwhe whẹ l’a-wata ghu ekuku

bụ Mkpụkpu nke Onye-Nwe-Ọha;

Ugvu Záyọnu nke onye nsọ nke Ízurẹlu.

¹⁵A makwarụ-a l’a jịkaru ghu, bya akpọo ghu ashị,

onyenọnu jiru ẹgu yeru ghu.

Ọle mu l’e-me ghu t’ị bụru

mkpụkpu, ọgbo g’ọgbo ha

l’e-gude eku onwowhe eku, gude iya ete ẹswa.

O noo bụru gẹ l’ọo-dụ jeyewaroya.

¹⁶Ndu mba gẹ mba ha bẹ l’ịi-ngụ ẹra whẹ.

Ii-kfube ndu eze ọnu l’ẹra ngụa.

Ndụge ị marụ l’ọo mụbe

Onye-Nwe-Ọha bụ onye l’adzọ ghu,

bụru onye mgbata nkeghu.

Ọ bụru mu bụ Ọkalibe nke Jékọpu.

¹⁷Mu l’e-wotaru ghu mkpọla-ododo l’ọzori ope.

Mu ewotaru ghu mkpọla-ọcha l’ọzori mgbọro-igwe.

Mu ewotaru ghu ope l’ọzori oshi.

Mu ewotaru ghu mgbọro-igwe l’ọzori ẹwhuru.

Ẹhu-ọdu-guu bẹ mu l’e-me t’ọ

bụru iwhe l’a-nọdu achị ghu;

ọ-dụ-chịriri abụru onye ishi ghu.

¹⁸A ta abyadụ l’a-nụbaa akọ

iwhe-kpanganga ọdo l’alị ghu, ta abya l’a-nụbaa

akọ ọla-l’iyi, ọdua l’ọo

nke mgbuka l’alị ghu kpaa-whuu.

Mgbodo mkpụkpu ghu bẹ l’ii-ku Ndzọta;

kua ọnoguzo ghu Ajaja.

¹⁹Mkpa iwhoro anwụ ta

adụhedu ghu ọdo l’eswe,

mkpa ọnwa, l’echi azacha alị

ta adụhe ghu l’ẹnyashi ọdo.

Ọo Onye-Nwe-Ọha l’a-bụru

iwhoro, l’a-nọ echiru ghu jeye lẹ tututu-mịmimi.

Ọ bụru Chileke ghu l’a-bụru ogbu-zaazaa nkeghu.

²⁰Anwụ ta abyadụ l’echinyaaru ghu rịba;

ọnwa ta abya l’echinyaaru ghu rịba.

O noo nkele ọo Onye-Nwe-Ọha

l’a-bụru iwhoro, l’a-nọ echiru

ghu jeye lẹ tututu-mịmimi.

Ntsọmawhu ghu abụru bugemu.

²¹Ndibe ghu gẹ whẹ ha

l’a-tụko bụru ndu dụ chịriri.

Whẹ enweru alị ono jeye lẹ tututu-mịmimi.

Ọ kwa whẹ bụ oshi, mu dzarụ adza.

Whẹ bụru ndu mu gude ẹka mu mee;

shi nno egoshi gẹ mu dụ-be biribiri.

²²Ndu kagezhia ọlwa alị l’ime

ghu l’e-bekochaa bụru ezhi-anma ẹka iya.

Ndu kagee nwanshị l’ime ghu abụru mba, ike dụ.

Ọ kwa Mu bụ Onye-Nwe-Ọha.

Iwhe lile ono bẹ mu l’e-mekwa ẹgwegwa

mẹ oge iya rwulewho.”

Awha, Onye-Nwe-Ọha l’a-dzọ ndu nkiya

¹Ume Nnajị-Ọha, bụ Onye-Nwe-Ọha dụ mu l’ẹhu,

o noo l’ọ họtawaru mu tẹ mu

je ezhia ndu ụkpa ozhi-ọma.

O zhiru mu tẹ mu je emee ndu

obu whẹ tsuru yọgiri yọgiri tẹ whẹ mehu.

Mu eje ezhia ndu a kpụtaru lẹ

ndzụ l’aa-ha whẹ tẹ whẹ nweru onwowhe.

Mu ezhikwaawho ndu nọ l’ọka-mkpọro l’aa-ha whẹ.

²Yẹle tẹ mu bya aryakaa

l’awha, Onye-Nwe-Ọha

l’a-dzọ ndu nkiya rwuakwaru,

ọwaa lẹ mbọku, Chileke anyi

l’a-gbarụ ndibe iya ọdzori rwuwaru.

Mu adụa ndu áwhụ byarụ obu gẹ whẹ ha.

³O zhiru mu tẹ mu-a byakfuta ndu áwhụ byarụ

lẹ Záyọnu bya etsua whẹ ẹka l’obu.

Mu eworu ọkpu-eze, l’ama ụma

kpube whẹ l’ishi l’ọzori ntụ,

whẹ shi ghụa onwowhe;

wụa whẹ mmanụ ẹhu-ụtso l’ọzori nggụmawhu;

yebe whẹ uwe ọja Chileke

ajaja l’ọzori ọnodu tsụyoo.

Iwhe l’ee-ku whẹ bụ ukfu achị nke ọ-dụ-chịriri.

Whẹ l’a-bụ oshi, Onye-Nwe-Ọha dzabẹru l’ẹka iya;

whẹ abụru ndu dụ chịriri, shi

nno goshi gẹ Chileke dụ-be ugvu.

⁴Whẹ l’a-tụkwa-zhi ẹka ono,

dakpọshịhuru adakpọshịhu eshi nteke ndụ-ichee,

dozhigee ẹka ono, dachihuru

adachihu eshi nteke tehawaru ẹnya.

Whẹ l’a-tụkwakota mkpụkpu

ono, dakashịhuru adakashịhu,

mẹe ẹka lile, shi nkeshi ọgbo ọwhu lahawaru ala

dachihu adachihu.

⁵Ndu alị ọdo l’a-wụfutakwa

byarụ unu ocheru élwù.

Ndu ọha ọdo abụru ndu l’a-nọdu akọru unu ọkoro,

ejeru unu ozhi lẹ mgbabu vayịnu.

⁶Unubẹdua bẹ l’ee-kuje ndu

l’agbajẹ ẹja nụ Onye-Nwe-Ọha.

Iwhe l’aa-gụbe unu abụru ndu

l’ejeru Chileke anyi ozhi.

Unu l’a-nọdu eri ẹku ọhamoha;

unu egude iwhe whẹ nweru eku onwunu.

⁷Unu l’a-nata oke-iwhe whẹ

nkwere labọ l’ọzori iwhe-iwhere,

whẹ gege eme unu.

Unu atụa ụzu ẹhu-ụtso l’oke-iwhe, unu ketaru

l’ọzori iwhu, e gege ekpu unu lẹ ntụ.

Ẹhu-ụtso, l’a-nọ jeye lẹ

tututu-mịmimi l’a-bụru nkunu.

⁸“O noo nkele ọo Mu bụ Onye-Nwe-Ọha.

Iwhe l’adụje mu ree bụru

ikpe, kfụru nhamụnha.

Ọ dụkwa mu ashị mbụ ọna nfụ yẹle ome ejo-ememe.

Mu l’e-gude ire-lanụ bua ndibe mu obunggo.

Mu lẹ whẹ agbakwaawhọ ndzụ,

l’a-nọ jeye lẹ tututu-mịmimi.

⁹Ẹpa whẹ l’a-bụru ndu a ma

ama lẹ mba lile gbaa mgburumgburu.

Ndiwhe l’owhu amakwarụwho ụnwu whẹ.

Iwhe bụ-zhia onye whụjeru whẹ nụ l’a-malẹruwho

lẹ whẹ bụ o-shi-l’ẹpa,

Onye-Nwe-Ọha gọru ọnu-ọma nụ.”

¹⁰Ẹhu l’atsọ mu ụtso shii

l’iwhe Onye-Nwe-Ọha meru.

Obu mu l’ete ẹswa l’iwhe Chileke mu meru.

O yeberu mu ndzọta g’ọo uwe, woru ọdu-chịriri

whukpua mu g’ọo onye yeru uwe mkpẹelanu.

O meru mu, mu dụ g’ọo nwoke l’abya ọlu nwanyị,

nke ọwhuu, kpuchiru ishi

g’ọo onye l’agbajẹ ẹja nụ Chileke,

memagezhia mu, mu l’ama g’ọo

nwanyị, a bya l’ekee ji nke ọwhuu,

mbụ nwanyị, e gude ọla kwaa ngwa ree.

¹¹Ọ kwa g’alị l’achịfutaje iwhe fushiru iya l’eli;

mgbabu l’emeje t’iwhe, a kụru iya kpofuta;

o nokwawho gẹ Nnajị-Ọha, bụ Onye-Nwe-Ọha l’e-me

t’ọ-dụ-chịriri mẹe ọja Onye-Nwe-Ọha ama

kpofuta l’ẹnya ọhamoha.

Ẹwha ọ̀whúú nke Záyọnu

¹Ọnu ta abyadụ l’a-dụ mu

ndoo l’iswi ẹhu Záyọnu.

Ẹhu ta abya l’e-gvuru mu

egvuru l’iswi ẹhu Jerúsalẹmu.

Jeye nteke ọdu-chịriri iya l’a-cha

swee g’ọo iwhoro chi-asahu.

Ndzọta iya enwua whoo g’ọo

oryọku, l’enwu whowhowho.

²Mba gẹ mba ha l’a-whụ ọdu-chịriri gụbe Záyọnu.

Ndu eze, dụ iche iche awhụa ọdu-biribiri ghu.

E kulahaa ghu ẹwha ọ̀whúú,

Onye-Nwe-Ọha l’e-gude ọnu iya gụa ghu.

³Ịi-bụru okpu-eze, dụ ugvu

l’ẹnya nọdu l’ẹka Onye-Nwe-Ọha.

Ịi-bụru okpu, ndu eze l’ekpuje

l’ishi nọdu l’ẹka Chileke ghu.

⁴Ẹ te ekuhedu ghu onye a

gbagharu agbagha ọdo.

T’e kuhe alị ghu ẹka ẹgbara kfụru ọdo.

Ẹwha, l’ee-kuchia ghu bụ Ọtsomahu Chileke.

E kua alị ghu Nwanyị a lụru nke ọ̀whúú,

nkele ẹhu l’a-tsọ Onye-Nwe-Ọha ụtso l’ẹka ị nọ,

alị unu abụru nwanyị ọ lụru alụ.

⁵Ọ kwa gẹ nwokorọbya

l’edobeje ẹka alụ nwamgbọko iya;

bụ g’ụnwu ghu l’e-dobe ẹka alụ gụbedua, bụ Záyọnu.

Ọ bụru gẹ nwoke l’emeje ẹswa nyee ya,

bụ gẹ Chileke ghu l’e-me ẹswa ghu.

⁶Mu yeekwaru ndu nche tẹ

whẹ l’eche mgbodo ono, e gude tuwheta

gụbe Jerúsalẹmu mgburumgburu.

Ọnu ta abyakwa l’a-dụje whẹ ndoo eswe l’ẹnyashi.

Unubẹ ndu l’eku ẹwha Onye-Nwe-Ọha bẹ l’ẹte

abyadụa l’e-gvuru egvuru.

⁷Unu be ekwekwa t’o gvuru egvuru jeye nteke

l’oo-me tẹ Jerúsalẹmu lwata l’ọnodu iya,

mbụ mee ya t’ọ bụru mkpụkpu,

eliwhe l’owhu l’a-nọ aja ama.

⁸Onye-Nwe-Ọha paliakwaru

ẹka-ụtara iya yẹle oshi-ẹka iya imeli ria nte sụ:

“Ọ tọ dụkwa iwhe bya l’e-me tẹ

mu habaa ndu ọhogu ghu tẹ whẹ tụko nri, ị kọru

l’okfu ghu ripyakota ọdo.

Tọ dụ iwhe bya l’e-me t’o

nweru ndu l’e-shi eshi bya

angụbaa mmẹe ọ̀whúú ghu

ọdo, bụ iwhe i seru anya iya ese.

⁹Waawakwa, ọo ndu metaru nri ọbu l’okfu bẹ

l’e-ri iya jaa Onye-Nwe-Ọha ajaja iya.

Ọ bụru ndu wọru akpụru

vayịnu l’a-ngụ mmẹe ya l’ogboduwhu ibe mu

ono, dụ nsọ.”

¹⁰Unu ghajaa ya aghaja, unu

ghajaa l’ọnu ẹka l’eeshije abata lẹ mkpụkpu ono!

Unu dozhiaru ndu ono ụzo t’ọ dụ ree!

Unu kpaa echi-ụzo iya akpakpa,

unu kpaa eze oji ono akpakpa!

Unu atụtufuchaa ya ẹwhuru, dụ iya nụ!

Unu ewolia ẹkwa-ọhubama

gboberu mba gẹ mba ha!

¹¹Ọ waa bụ iwhe Onye-Nwe-Ọha ryarụ aryarya,

ryadzuru iya jeye ẹka mgboko beru.

Ọ sụru agha: “Unu sụ nwada

Záyọnu t’o lee l’onye bụ

onye-ndzọta iya l’abyaakwa.

Iwhe o gude abya bụ iwhe obunggo iya;

mbụ l’o gude iwhe o gude

kfụa onyenọnu ụgwo.”

¹²Iwhe l’ee-ku ndu ono bụ Ndu dụ nsọ,

mẹkwawho Ndu Onye-Nwe-Ọha gbatarụ.

Gụbedua bẹ l’ee-ku Mkpụkpu, a chọru chọ-vu,

mẹkwawho mkpụkpu, l’ẹte

agbakashịhua agbakashịhu.

Mbọku Onye-Nwe-Ọha l’agwata ụgwo iwhe

¹?Ọo onye ole bẹ shi l’alị Edọmu eje abya ẹgube whọ, mbụ onye ono, shi lẹ mkpụkpu Bozura agabafụta, yeru uwe l’eke mmee-mmee? ?Ọo onye bẹ kwarụ onwiya ngwa dụ biribiri whọ, ehe gakfụgakfu, gude ọkpehu iya adzọ gamụ-gamụ eje abya ẹgube whọ?

“Ọ kwa mbẹdua, bụ Onye-Nwe-Ọha b’ọ bụ. Mu dụkwa chịriri ekfu iwhe mu l’ekfu, tẹhenu ike ndzọta dụkwa mu whọ.”

²?Ọo gụnu meru uwe ghu l’eke mmee-mmee, g’ọo nke onye l’adzọshi mmẹe l’akpụru vayịnu?

³“Ọo mu dzọshiru mmẹe ono nwẹka mu. Ọ tọ dụdu onye shi ọhamoha kwe mu ẹbo. Mu kwee gude ẹhu-eghughu mu dzọo whẹ fụtu-fụtu, mbụ gude oke ẹhu-eghughu mu dzọo whẹ tọlitoli. Mmee whẹ kfụkashihu kpua mu l’uwe; uwe mu l’owhu tetoshihu. ⁴Iwhe kparụ iya nụ bụru lẹ mbọku, mu l’a-gwata ụgwo iwhe bẹ dụ mbụ nọdu mu l’obu. Awha, mu l’a-gbata ndibe mu rwuakwaru. ⁵Mu leru ẹnya, tọ dụ onye l’agbarụ whẹ mkpu. Ọ bụru iwhe dụ mu ejo biribiri l’ọ tọ dụdu onye dụru mu l’ukfu. Mu kwee gude ẹka mu lwụaru whẹ ọgu lwụ-gbua. Oke ẹhu-eghughu mu bụru iya bẹ dụru mu l’ukfu iya. ⁶Mu gude ẹhu-eghughu mu dzọo ọhamoha tọlitoli, gude oke ẹhu-eghughu mu chia whẹ pyaapyaa. Mu woru mmee whẹ wụa l’alị.”

Ọ-dụ-ree Chileke l’ẹhu ndu Ízurẹlu

⁷Mu l’e-kfu nke obu,

Onye-Nwe-Ọha yeru ndibe iya.

Mu l’a-ja Onye-Nwe-Ọha ajaja

l’iwhe o megbaberu whẹ.

Mbụ iwhe dụ ree, parụ ẹka ono,

o meru ọzo-ụlo Ízurẹlu.

Mbụ nke iwhe lile ono, o gude obu-imiko iya mekota,

mẹe nke n-yemobu iya ono, l’ẹte agvụ agvụ.

⁸Ọ sụru: “Ezhi-okfu ezhi-okfu, ndu-a bụkwa ndibe mu; whẹ bụ ụnwegirima mu, l’ẹte abyaa l’a-dzụru mu ejire.” Ọo iwhe ono bụ iya meru ọ dzọfuta whẹ. ⁹Iwhe-ọtsulanu whẹ shi bụru iwhe-ọtsulanu nkiya. Ọ bụru ojozhi-imigwe shi l’ẹka ọ nọ dzọfutaru whẹ. Ọo n-yemobu mẹe obu-imiko, o nweru b’o gude gbata whẹ. Ọ paliru whẹ imeli; heru whẹ eheru nteke ndụ-ichee ono l’owhu. ¹⁰Obenu lẹ whẹ kwefuleru iya-a ike, mee t’ẹhu ghua Ume-Dụ-Nsọ iya eghu. O noo iwhe meru g’o gude yẹbedua l’onwiya dakọbe bụru onye okfu whẹ, tsolahaa whẹ ọgu.

¹¹Ọle a nọnyaaru; whẹ nyata iwhe meru l’oge ndụ-ichee, whẹ nyata iwhe meru l’oge nke Mósisu, bụ onye ozhi Onye-Nwe-Ọha ono. Whẹ sụ: “?Ọo awe b’ọ nọ, mbụ onye ono, dughataru ndu nche atụru iya ono l’eze-ẹnyimu? ?Ọo awe b’ọ nọ, mbụ onye ono, yeru Ume-Dụ-Nsọ iya; ọ bya anọdu l’echilabọ whẹ? ¹²Onye ono, shi l’ẹka-ụtara Mósisu gude ọkpehu iya mee iwhe dụ biribiri; onye ono, kekahuru mini ẹbo l’iwhu ndibe iya, nke ọwhu ẹwha iya l’a-nọ ede ude jeye lẹ tututu-mịmimi. ¹³Mbụ onye ono dugharu whẹ l’iswina, tọ dụ ẹka okfu kpọru whẹ, ọ dụa g’ọo ẹgube-ẹ l’aakpụje ịnya ghaa echi-ẹgu. ¹⁴Ume Onye-Nwe-Ọha rwuzhia whẹ whọ je edobe whẹ l’ẹka whẹ l’atụta ume, g’ọo ẹgube-ẹ l’eerwuje eswi je edobe lẹ nsụda ugvu t’ọ taa nri. Ọo ẹgube ono b’i shi dua ndibe ghu, nke ọwhu bụ l’ẹwha ghu l’a-bụru iwhe dụ biribiri.”

Okfu anụ Chileke

¹⁵Onye-Nwe-Ọha; shinu l’ime igwe leeda ẹnya, mbụ t’i shi l’ẹka ono, i bu, dụ nsọ ono, dụ biribiri leedawho anyi ẹnya. ?N-yemobu ghu yẹle ọkpehu ghu jehunuru awe? Ntaa bẹ l’iitii kwedua t’ome odoo ghu yẹle obu-imiko ghu chiru anyi ẹhu. ¹⁶Ọle ọwhu ọbu, ọwhu ọbu, b’ị bụlekwaa nna anyi. A makwarụ-a lẹ Ébirihamu ta ahụbedu anyi ama. Ízurẹlu ta ama onye anyi bụ. Ọle ọo ghu bụ nna anyi gụbe Onye-Nwe-Ọha. Ọo gụbedua bụ onye mgbata anyi, e shi nteke ndụ-ichee. ¹⁷Sụ-a, gụbe Onye-Nwe-Ọha, ?ndẹnu iwhe meru, i kwe t’anyi haa ụzo nkeghu; ị haa anyi, obu nmaa anyi mkpigbi nke t’anyi ba anọ atsụ egvu ghu? Dawhunu azụ l’iswi ndu ono, l’ejeru ghu ozhi, mbụ l’iswi ikfu ono, bụ ndu nkeghu.

¹⁸Anyịbe ndibe ghu ono, dụ nsọ bẹ bụa nwanshị bẹ ẹka anyi shi dụ l’ẹka ono dụru ghu lẹ nsọ ono, ndu ọhogu anyi bya anata iya anyi dzọo gbụdugbudu. ¹⁹O tewaru ẹnya anyi shi nọduta g’anyi te etsodu lẹ ndu l’ịichi. Anyi dụwaa g’ọo ndu l’ẹte aza ẹwha anyi ala l’ẹwha ghu.

¹Ọ gẹge adụ mma m’ọ -bụru l’ị dajarụ igweli ẹbo tarakata nyizeta, nke ọwhu ugvu l’a-nmakọta jijiji l’iwhu ghu. ²Whẹ l’a-nmakọta kwekwekwe g’ọo ẹgube-ẹ ọku l’anọje eke oshi, mbụ g’ọo ẹgube-ẹ mini l’anọje atụ vaavaa mẹe e shibe iya l’ọku. Nyizeta bya emee tẹ ndu ọhogu ghu marụ onye ị bụ. Bya nke ọwhu ọhamoha l’a-nma kwekwekwe l’iwhu ghu, ³mẹ whẹ whụlewho iwhe dụ biribiri ono, whẹ l’ẹte agbaa ẹnya l’ii-me. Nyizetaroya, t’ugvu nmaa jijiji l’iwhu ghu. ⁴Eshi mbụlembu bẹ madzụ tẹke anụbukwaa, nchị ta nụje, ẹnya tẹke awhụbua Chileke dụ g’ọo gụbedua, onye l’emejeru ndu nmẹru anmẹe ngabẹru iya iwhe whẹ l’ele ẹnya iya. ⁵Ndu ẹhu l’atsọje ụtso lẹ whẹ l’eme iwhe dụ chịriri bẹ l’ịigbataje ndzuta. Mbụ ndu ono l’abụje; whẹ l’eme iwhe ị sụru t’e mee, whẹ anyata ghu. Ẹhu shi eghu ghu eghu l’ẹka whẹ nọ, whẹ kwaa l’ome iwhe-dụ-ẹji. Eshi bụ gụnu bẹ whẹ shi meta iwhe-dụ-ẹji. ?Aa-dzọ whẹ-ẹ adzọdzo owhu? ⁶Anyi lile dụwaa g’ọo iwhe l’aasọ nsọ. Tẹhenu iwhe dụ chịriri, anyi l’eme dụkota g’ọo nkịriba-ẹkwa, l’aasọ oyi. Anyi lile tụkoru alwa ẹkwo g’ọo oshi. Ejo-iwhe, anyi meru l’apawhewaa anyi g’ọo whẹrewhere. ⁷Ọ tọ dụdu onye l’akpokujekwadu ẹwha ghu. Tọ dụhe onye l’esebakwadu nke tẹ ya kụbeshia ghu ẹka ike. Nkele i wofuru iwhu ghu l’ẹka anyi nọ, bya eworu anyi nwuaru ejo-ememe anyi l’eme.

⁸Ọle-a, gụbe Onye-Nwe-Ọha; ọ kwa ghu bụ nna anyi. Anyịbedua bụ ụrwa; gụbedua bụru ọ-kpụ-ite, kpụru anyi. Anyi lile bụkota ọrwu ẹka ghu. ⁹Be ekwekwa t’ẹhu-eghughu ghu panụka ẹka, gụbe Onye-Nwe-Ọha. Ba arịtagbukwaru ejo-iwhe anyi meru jeye lẹ gbururu. Jikonu; lenua ẹnya nyata l’anyi tụkokwaru bụru ndibe ghu! ¹⁰Mkpụkpu ghu ono, dụkota nsọ tụkookwaru bụru echi-ẹgu nkụchi. Záyọnu bụakwa echi-ẹgu nkụchi. Mbụ lẹ Jerúsalẹmu bụwa ẹka ẹgbara kfụru. ¹¹Eze-ụlo anyi ono dụ nsọ, dụ biribiri, bụ ẹka ono nna anyi whẹ nọdu jaa ghu ajaja bụkotakwa ẹka ọku dzụru, dzụfu iya l’ishi. Ẹka ono anyi yeru obu ono g’ọ ha bụkotawaa kpukpuru-swoo. ¹²Gụbe Onye-Nwe-Ọha, ?ịi-dụ ike kpaa onwoghu sede l’ọnodu ono? ?Ịi-nọ-kirishiwaro nwandoo ahụ anyi lẹ mkpaba nkụ-a, mbụ l’ụzo anyi l’ẹte adụ ike anwụ-gbukota iya l’obu?

Chileke l’ahụ ndu kwefuru ike ahụhu

¹“Mu kpuharu onwomu goshi ndu ono l’ẹte ajịje ajị mu. Ọ bụru ndu l’ẹte achọ mu bẹ mu harụ, whẹ whụa mu. Ndu ọhamoha ono, l’ete eshia ekuje ẹwha mu bẹ mu sụru: ‘Lekwaa mu ndọwa. Lekwaa mu ndọwa.’ ²Mbọku fụtaru nụ bẹ mu l’amachịje ẹka cheberu ndu ono, kwefuru ike ono. Mbụ ndu ono l’etso ejo ụzo, bụlewho iwhe gbatarụ whẹ l’ọriri bẹ whẹ l’emeje. ³Ndu ono bụ ntekenteke, whẹ akpatsuwhe mu iwe; emechishi mu iwhu, whẹ l’ejeje anọdu lẹ mgbabu agba ẹja, kpọkobe ẹwhuru akpọ ụ̀nwù-isẹnsu ọku. ⁴Ndu l’ejeje anọdu l’ọnu ilu, radụ aradụ l’ọgba l’ẹka whẹ byarụ ọkpata ndu maa ishi iwhe, whẹ bụru ndu l’eri anụ ezhi, angụ mini anụ l’aasọ nsọ. ⁵Whẹ nọdu whẹ arya: ‘Ọ-nọ-l’ụzo gbala-o! Ba adụkwa onye l’abyakụbe mu ntse lẹ mu dụkwa nsọ!’ Ẹgube ndu ono dụ g’ọo ẹnwuru ọku, l’akpụ tụlaa ala mu l’imi, dụ g’ọo ọku, l’enwu enwu ntekenteke.

⁶“Leenu; e deekwaru iya ede dobe mu l’iwhu. Mu ta abyakwa l’ada jii l’abụa lẹ mu kfụru whẹ ụgwo, gbarụ whẹ nụ, kfụ-dzua whẹ iya akfụ-dzu, ⁷mbụ hụa whẹ ahụhu nke ejo-iwhe whẹ meru yẹle ọwhu ochee-oroke whẹ meru.” O nokwa iwhe Onye-Nwe-Ọha l’ekfu ndono. “Lẹ nke ụ̀nwù-isẹnsu ono, whẹ kpọru ọku l’eli eze ugvu mẹe nke atụrwushi ono, whẹ nọdu l’ụnwu ugvu nshịi atụrwushi mu. Mu l’a-kfụ whẹ ụgwo iwhe whẹ meru, kfụ-dzua whẹ iya akfụ-dzu.”

⁸Ọ waa iwhe Onye-Nwe-Ọha l’ekfu ndọwa: “Ọ kwa gẹ l’ọobuje mmẹe dụkwadu l’ọjokfutu akpụru vayịnu, a sụ t’e be mebyikwa iya lẹ iwhe dụ ree dụkwa iya; ọ kwawhọ nno bụ gẹ mu l’e-me l’iswi ndu l’ejeru mu ozhi, mu te emebyikwa whẹ emebyi. ⁹Mu l’e-shi l’ẹhu Jékọpu wofuta ẹpa. Mu eshi lẹ Juda wofuta ndu bụ whẹ l’e-nwe ugvu nkemu. Ọo ndu ono, mu họtaru l’e-nwe iya. Ọ bụru ndu ono l’ejeru mu ozhi l’e-buru l’ẹka ono. ¹⁰Whorokoto alị Sharọnu l’a-bụru ẹka élwù l’ata nri. Nsụda Akọru abụru ẹka eswi ndibe mu l’ejetaje zẹ-zhita, mbụ ndu ono l’achọ ụzo mu.

¹¹“A byakwanụ lẹ nke unubẹ ndu ono, harụ Onye-Nwe-Ọha, mbụ ndu ono nyazọru Záyọnu, bụ ugvu mu ono, dụ nsọ; unubẹ ndu ono, bụ agwa O-me-l’onwiya, yẹle agwa Ọkpu-l’ụwa bẹ unu l’agwa. ¹²Mu l’e-me t’ọ bụru ogu-ịgba l’a-ta ishi unu. Mbụ l’unu l’a-tụko g’unu ha whuzeta t’a whụa unu awhụwhu. O noo nkele mu kuru unu oku, unu ta aza mu. Mu kfuru okfu yeru unu, unu ta angarụ mu nchị. Iwhe unu mechiaru bụ l’unu meru ejo-iwhe l’ẹnya mu, ọ bụru iwhe l’adụa mu ree l’obu bẹ unu hatarụ ememe.” ¹³Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: “Unu l’a-whụ ndu l’ejeru mu ozhi gẹ whẹ l’eri nri; unubẹdua aswị ẹgu. Unu l’a-whụ ndu l’ejeru mu ozhi gẹ whẹ l’angụ mini, unubẹdua abụru ndu ẹgu mini l’agụ. Unu l’a-whụ ndu l’ejeru mu ozhi g’ẹhu l’atsọ whẹ ụtso, unubẹdua abụru ndu e meru iwhe-iwhere kpua. ¹⁴Unu l’a-nụ gẹ ndu l’ejeru mu ozhi gude obu-ụtso agụ egvu; unubẹdua anọdu arya ẹkwa áwhụ jiru unu l’obu; unu akpọ mkpu l’ẹka obu l’agbawahụ unu agbawahụ. ¹⁵Ẹwha unu l’a-bụru iwhe ndu ono, mu họtaru l’a-nọ akpọ l’iwhu. Ọo mbẹdua, bụ Nnajị-Ọha, bụ Onye-Nwe-Ọha l’e-gbu unu. Mu agbanwee ẹwha ndu ono, l’ejeru mu ozhi gụa whẹ ẹwha ọ̀whúú. ¹⁶Iwhe bụ-zhia onye l’akpọ ẹnwa ọnu-ọma l’alị ono bẹ l’ee-shi l’ẹka Chileke, bụ onye ire-lanụ gọoru iyẹ ya. Iwhe bụ onye l’eri nte l’alị ono egudekwawho ẹwha Chileke, bụ onye ire-lanụ ria yẹbe nte, nkele iwhe-ọtsulanu, shihawa dụ bẹ l’aa-nyazọkota anyazọ; woru iya domia edomi tẹ mu ba awhụjehe iya.

Iwhe e keru nke ọ̀whúú

¹⁷“Lekwa lẹ mu l’abyakwa oke igweli ọ̀whúú yẹle alị ọ̀whúú. Akahụ iwhe bẹ l’aa-nyazọ anyazọ. Ọ tọ gbatahẹdu madzụ l’uche ọdo. ¹⁸Iwhe unu l’e-mechia bụ t’ẹhu tsọo unu ụtso, unu etee ẹswa jeye lẹ tututu-mịmimi lẹ nke iwhe ono, mu l’eke ono. Lẹ Jerúsalẹmu ọ̀whúú ono, mu l’eke bẹ kwa ẹhu-ụtso l’e-ji iya eji. Ndu nọ iya l’ime bụru ndu ẹhu l’atsọkaa ụtso. ¹⁹Mu l’e-te ẹswa ẹhu Jerúsalẹmu. Ẹhu atsọo mu ụtso l’ẹka ndibe mu nọ. Mkpu ẹkwa ta adụhedu l’ẹka ono ọdo; ọrya ẹkwa ta adụhe iya.

²⁰“Nke tẹ nwata nọo ujiku olemole l’ẹka ono zubuhu nwụhu ta adụhedu ọdo; ọdua l’ọo t’onye bụ ọgurenya ba anọ-dzuje awha, gbarụ iya l’anọno. Onye nọru ụkporo awha ugbo ise nwụhu bẹ l’aa-sụje l’ọ gbakwohuru agbakwohu. Onye l’ẹte anọ-rwua ụkporo awha ugbo ise nwụhu bẹ l’aa-sụje l’ọo onye a tụru ọnu l’iwhe-dụ-ẹji, l’oo-me. ²¹Whẹ l’a-tụ ụlo, buru iya eburu. Whẹ l’e-me mgbabu vayịnu ria iwhe shi iya fụta. ²²Whẹ ta atụhedu ụlo; ndu ọdo ebuchia ya. Whẹ ta akọhe okfu; ndu ọdo eria ya, nkele ọo gẹ oshi l’akajẹ nka bụ gẹ ndibe mu ono l’a-ka nka kagbịrihu akagbịrihu. Ndu ono, mu họtaru ono l’e-ri iwhe whẹ seru anya iya ria ya nọo ọdu. ²³Whẹ ta abyadụ l’e-se nsegbu anya. Whẹ ta anwụhe ụnwegirima, ẹhenu l’a-nọ etso. O noo nkele whẹ l’a-bụru o-shi-l’ẹpa ndu Onye-Nwe-Ọha gọru ọnu-ọma, whẹbedua l’onwowhe mẹe ẹpa whẹ. ²⁴Whẹ -bya l’ekudeshia oku, bẹ mu zawaru whẹ. Whẹ -bya l’ekfugedeshia okfu, bẹ mu nụwaru iwhe whẹ l’ekfu. ²⁵Ejo-nkụta-ọswa yẹle ụnwu atụru l’a-tụkoje akpa nri l’ẹka lanụ. Oduu-gburu-agụ ata ẹwu g’ọo eswi. Ẹja abụru nri, agwọ l’e-rije. Iwhe l’emeka iwhe mẹe iwhe l’egbu egbu ta adụhedu lẹ Záyọnu, bụ ugvu nsọ mu.” O nokwa iwhe Onye-Nwe-Ọha l’ekfu ndono.

Onye-Nwe-Ọha l’ekpe ikpe

¹Ọ waa bụ iwhe Onye-Nwe-Ọha l’ekfu: “Igweli bụ oshi-eze mu, eliwhe bụru oshi-ọdzobe-ọkpa mu. ?Ọo ẹgube ụlo gụnu bẹ unu l’a-tụru mu? ?O zhia ẹgube awee-ya bẹ mu l’a-nọduje iya atụta ume? ²?Tọ dụ mbẹdua tụkoru iwhe ono g’ọ ha mekota, whẹ dụ?” O nokwa iwhe Onye-Nwe-Ọha l’ekfu ndono. “Ẹgube madzụ, mu l’anọje eleshi ẹnya bụ, onye wozetaru onwiya alị yẹle onye obu iya dudehuru edudehu; onye l’abụje ọ -nụa okfu mu, ya anmahụ kwekwekwe.

³“Onye bụ eswi bẹ l’oogbuje gude gbaa ẹja, bẹ yẹle onye l’egbuje madzụ gude gbaa nkiya bụkwa iwhe lanụ. Onye bụ nwatụru bẹ l’oogudeje gbaa ẹja nkiya bụru iwhe lanụ yẹle onye ọwhu bụ nkụta bẹ l’ọoswi-gbuje. Onye bụ ụturutuu-iwhe bẹ l’oogudeje agba ẹja nkiya, bụru iwhe lanụ yẹle onye ọwhu l’egudeje mmee ezhi agba nkiya. Onye ọwhu l’akpọje ụ̀nwù-isẹnsu ọku, bụru iwhe lanụ yẹle onye ọwhu bụlewho agwa bẹ l’ọonoje-zhiawho agwa. Ndu ono gẹ whẹ ha l’ẹhu l’ẹhu bẹ hatawaru ụzo ọwhu karụ whẹ mma. Iwhe l’adụje whẹ ree l’obu bụru ome ejo ahụma. ⁴Mbẹdua l’onwomu jekwanu l’a-nụ whẹ awhụ. Mu l’e-me t’ọ bụru iwhe whẹ l’akagejee ọtsu egvu iya l’a-zụ-gude whẹ. O noo nkele mu shi kua oku; tọ dụ onye zarụ mu nụ. Mu shi kfua okfu, tọ dụro onye ngarụ mu nchị. Whẹ meru ejo-iwhe l’ẹnya nkemu. Ọ bụru iwhe dụ mu ẹji bẹ whẹ hatarụ eme.”

⁵Unu nụkwaa okfu Onye-Nwe-Ọha l’ekfu, unubẹ ndu ono l’abụje, unu nụa okfu iya unu anmahụ kwekwekwe: “Ọo l’iswi ẹwha mu bẹ ụnwunna unu gude kpọo unu ashị; kefu unu l’oke. Whẹ l’anọje aja unu ewenu asụje: ‘Tẹ Onye-Nwe-Ọha goshinu l’ọ bụ onye l’aakwabẹ ugvu dzọfuta unu, nke ọwhu anyi l’a-whụ ẹhu-ụtso unu!’ Ọle ee-bechaa kpua ndu ono iwhu lẹ ntụ. ⁶Unu nụduwho ụsworoko l’aswọ l’ime mkpụkpu ono! Unu nụduwho olu-okfu shi l’eze-ụlo Chileke ada, mbụ olu-okfu Onye-Nwe-Ọha l’ẹka l’ọokfu ndu ọhogu iya ụgwo.

⁷“Záyọnu bẹ ime bya l’emedeshi ọ nwụwa nụ nwa iya. Ukfu bya l’emedeshia ya ẹhuka o zedawaa nwa nwoke. ⁸?Ọo onye gudejebuwaa nchị iya nụa ọ-dụ-g’ọbu-iya? ?Ọo onye gudejebuwaa ẹnya iya whụa ọ-dụ-g’ọbu-iya? ?Eemetaje mkpụkpu l’ujiku lanụ? ?Eezedaje ndu l’a-bụru mba ẹka whẹ l’ugbo lanụ? Obenu lẹ Záyọnu bụkwadu-a t’ime wata iya ememe, o zedawanụ ụnwegirima iya. ⁹?Ndẹe gẹ mu l’eshi megee t’ime gbabe l’anwụnwu iya, mu eje emehe t’a nwụa ya anwụ?” O nokwa iwhe Onye-Nwe-Ọha l’ekfu ndono. “Sụ-a, ?ndẹe gẹ mu l’e-shi sụ-chia ẹkpa-nwa l’ẹka mu gbee mewa t’o rwua l’anwụnwu iya?” O noo iwhe Chileke unu l’ekfu.

¹⁰T’unu lẹ Jerúsalẹmu tụko nwụa ọnochi.

T’ẹhu tsọo unu ụtso l’iswi ẹhu Jerúsalẹmu,

unubẹ ndu yeru iya obu.

T’unu l’iya tụko nwụa ọnochi,

mbụ unubẹ ndu gụru áwhụ ẹhu iya.

¹¹Unu l’a-ngụ ẹra iya ngụ-jia

ẹwho, mbụ ẹra iya ono, bụ ẹra ndụmu-obu.

Unu l’a-ngụ iya mịa ya pyọmupyomu

l’ẹka l’ọoku unu mmẹe l’azụ ekwo

nkele ọo-nọ agbọ jọjojo.

¹²Nkele ọ waa iwhe Onye-Nwe-Ọha l’ekfu ndọwa: “Mu l’e-me t’ẹhu-ọdu-guu rwube iya ẹka g’ọo ẹka mini rufuru nchi. Mu emee t’ẹku shi mba gẹ mba ha sọje gborogboro sọbataru iya g’ọo mini. Unu l’a-dụ g’ọo nwata, ne l’eche ẹra; ya eheru unu, kfụa unu egvu l’ụtakfu. ¹³Ọo gẹ ne l’adụje nwa iya obu bụ gẹ mu l’a-dụ unubẹdua obu. Mu l’a-dụ iya unu l’ime Jerúsalẹmu. ¹⁴Unu whụlewho iwhe ono bẹ obu l’a-tsọ unu rịkporikpo. Nteke ono, unu agbashịa ike, dụ pokopoko. Ndu l’ejeru Onye-Nwe-Ọha ozhi bẹ l’oo-me tẹ whẹ marụ l’ẹka iya dụ l’ẹhu whẹ. Ya egoshi oke ẹhu-eghughu iya l’ẹhu ndu ọhogu iya.”

¹⁵Unu lekwa lẹ Onye-Nwe-Ọha nọdukwa l’ime ọku eje abya. O gude ụgbo-ịnya l’ewhe g’ọo uburu-aga agba abya tẹ ya gude ẹhu-eghughu iya tukoshi whẹ oghu-damụdamu l’ẹhu. Mẹe tẹ ya gude ọku, l’enwu whuruwhuru baarụ whẹ mba. ¹⁶Ọo ọku yẹle ogu-ịgba bẹ Onye-Nwe-Ọha l’ee-gude gwaa ndu ikpe nmarụ ọchi. Ndu Onye-Nwe-Ọha l’a-whụ awhụwhu l’a-bụ ikpoto.

¹⁷“A bya lẹ nke ndu ono, l’edobeje onwowhe nsọ, mechaa onwowhe emecha, dzebe awụ eje lẹ mgbabu ẹja. Mbụ ndu ono l’anọje ata anụ ezhi, ata anụ okerekfu mẹwaro anụ ọdo, l’aasọkaa nsọ; ndu ono gẹ whẹ ha l’a-tụko tabuhu ọnu l’ugbo lanụ.” O nokwa iwhe Onye-Nwe-Ọha l’ekfu ndono. ¹⁸“Eshi-ọwhu whẹ l’eme ẹgube umere ono, whẹ l’arị ẹgube ọriri ono, bẹ mu byakwa l’abya achịta ndu shi lẹ mba, dụ l’iche l’iche mẹe ndu l’ekfu okfu-alị, dụ l’iche l’iche tẹ whẹ bya awhụ ọdu biribiri mu.

¹⁹“Mu l’e-me iwhe-awhụrulenya l’echilabọ whẹ. Mu l’e-shi l’ime whẹ wofuta ndu ọwhu wafụru nụ, l’e-je ọhamoha, l’ẹte anụbua ọtu ọnu mu, whẹ ta awhụbua ọdu-biribiri mu, mbụ lẹ whẹ l’e-je alị Tashishi, jee alị Putu, jee alị Ludu, bụ iya bụ alị ndu ono, l’agbajẹ akfụ. Whẹ ejee alị ndu Tubalu mẹe alị ndu Jávanu; jekota alị ndu bu lẹ mgboro eze-ẹnyimu. Whẹ l’e-je aryaa gẹ mu dụ-be biribiri l’ọhamoha ono. ²⁰Whẹ eshikwawho l’ọhamoha ono dulata ụnwunna unu tẹ whẹ bụru iwhe e gude agbarụ Onye-Nwe-Ọha ẹja. Whẹ l’a-nọdu l’eli ịnya mẹe l’ụgbo-ịnya mẹe l’ụgbo-alị, l’aakpụ akpụ. Whẹ anọdu l’eli ịnya-mulu mẹe l’eli ịnya-kamẹlu wụbata l’ugvu iya ono, dụ nsọ, bụ Jerúsalẹmu.” O nokwa iwhe Onye-Nwe-Ọha l’ekfu ndono. “Sụ-a; aa-chịru whẹ bya ẹgube ono, ndu Ízurẹlu l’eyeje ngwo-ẹja-nri l’arya, e mecharu emecha gude bya mu anụnu l’eze-ụlo mụbe Onye-Nwe-Ọha. ²¹Mu l’a-harụ ụwhodu l’ime whẹ mee tẹ whẹ bụru ndu l’agbajẹ ẹja nụ Chileke mẹe ndu Lívayi.” O nokwa iwhe Onye-Nwe-Ọha l’ekfu ndono.

²²“Sụ-a; ọo g’igweli ọ̀whúú yẹle alị ọ̀whúú ono, mu l’eme l’a-nọwaroya jeye l’iwhu mu; o nokwa g’ẹpa unu yẹle ẹwha unu l’a-nọwaro jeye.” O nokwa iwhe Onye-Nwe-Ọha l’ekfu ndono. ²³“Wata l’ori oge ọnwa ọwhuu jeye l’ori oge ọnwa ọwhuu l’etso iya nụ mẹe wata lẹ mbọku-ọtuta-ume jeye lẹ mbọku-ọtuta-ume l’etso iya nụ bẹ madzụ l’owhu l’a-byajẹ bya abaarụ mu ẹja.” O nokwa iwhe Onye-Nwe-Ọha l’ekfu ndono. ²⁴“Ọo gẹ whẹ l’eje bụ gẹ whẹ l’a-nọ awhụ odzu ndu kwefuru mu ike. Mgbashiride, l’a-nọ ata ndu ono ta anwụhujekwa anwụhu. Ọku, l’eke whẹ ta anyịhuje anyịhu. Madzụ -whụa whẹ; ẹhu alakọta iya vuruvuru.”