Hosíya

Ẹkwo

HOSÍYA

Onye Nkfuchiru Chileke

¹Onye-Nwe-Ọha bya ekfuru okfu yeru Hosíya nwa Beri. Nteke o kfuru iya okfu ono bẹ bụ nteke Uzáya, Jótamu, Éhazu ọwaa Hezekáya shi bụ-geeru eze l’achị ndu Juda l’ẹhu l’ẹhu, mẹkwawho nteke Jerobowamu nwa Jowashi shi bụru eze l’achị ndu Ízurẹlu.

Nyee Hosíya yẹle ụnwu iya.

²Nteke Onye-Nwe-Ọha watarụ oshi l’ọnu Hosíya ekfu okfu bẹ Onye-Nwe-Ọha sụru iya: “Je je alụta nwanyị, l’agba ọkpara, gụ anwụshia ụnwegirima, a gbatarụ l’ọkpara, nkele ndu alị-a bẹ l’agbanụka ọkpara, whẹ shiwaa nno lụfu mụbe Onye-Nwe-Ọha l’ẹka.”

³Tọ dụ iya bụ, Hosíya jenu je alụta Goma bụ nwada Dibulayimu. Ọ tsụta ime nwụaru iya nwa nwoke.

⁴Onye-Nwe-Ọha bya asụ iya: “Ẹwha, l’ịi-gụ nwata ono bụ Jezerẹlu, o noo nkele ọ tọ dụhedu gẹ l’aa-nọ-bekwadu, mu agwata ndu ọnu-ụlo Jehu ụgwo ọchi ono whẹ gburu lẹ nsụda Jezerẹlu, bya emee t’alị-eze ndu Ízurẹlu chihu. ⁵Mbọku ọbu bẹ mu l’a-nọdu lẹ nsụda Jezerẹlu nyajishia akfụ ndu Ízurẹlu wụshi.”

⁶Goma bya atsụta ime ọdo nwụa nwa nwanyị. Ọo ya bụ, Onye-Nwe-Ọha sụ Hosíya: “Ẹwha, l’ịi-gụ iya bụ Loruhama, o noo nkele mu te egoshihedu ndu Ízurẹlu n-yemobu ọdo, mu ta abya l’a-gụbaaru whẹ nvụ ọdo. ⁷Ọle ndu nke Juda bẹ mu l’e-goshi n-yemobu, dzọfuta whẹ. Adzọfuta, mu l’a-dzọfuta whẹ ta abụkwa akfụ bẹ mu l’e-gude dzọfuta whẹ, tọ bụ ogu-ịgba bẹ mu l’e-gude dzọfuta whẹ, tọ bụ ọgu bẹ mu l’a-lwụ gude dzọfuta whẹ. Tọ bụ ịnya-ọgu, m’ọ bụ ndu l’agba ịnya-ọgu bẹ mu l’e-gude dzọfuta whẹ. Onye l’ee-shi l’ẹka iya dzọo whẹ bụ Onye-Nwe-Ọha, bụ Chileke whẹ.”

⁸O noo ya, ọ nafụlewho Loruhama ọnu l’ẹra, mbụ Goma, ọ tsụta ime ọdo nwụa nwa nwoke ọdo. ⁹Ọo ya bụ Onye-Nwe-Ọha sụ: “Ẹwha, l’ịi-gụ iya bụ Lowami, o noo nkele unu ta abụhekwa ndibe mu, mu ta abụhe Chileke unu.

Ee-megee dobewhu ndu Ízurẹlu azụ l’ọnodu whẹ

¹⁰“Ọle e -megee bẹ ndu Ízurẹlu l’a-hakwa g’ọo ẹja, dụ l’agụga eze-ẹnyimu, l’ẹte abyaa l’atụ̀kota ẹrwa iya atụ̀tù, t’a bya l’agụkota iya ọgu. Ọo l’ẹka ono a sụru whẹ: ‘Unu ta abụhekwa ndibe mu,’ bẹ l’ee-megee nọdu kua whẹ ‘ụnwu Chileke ọwhu, nọ ndzụ.’ ¹¹Nteke ono bẹ l’ee-me tẹ ndu Juda mẹe ndu Ízurẹlu tụgba bụru nnanụ ọdo, whẹ ahọfuta onye lanụ, l’a-bụru whẹ ishi. Whẹ abya eshi l’alị ono lwakọta, nkele mbọku nke Jezerẹlu ono l’a-bụru oke ụboku.

¹“Unu kua unwune unu nwoke ‘ndibe mu,’ unu ekua unwune unu nwanyị ‘ndu mu yeru obu.’

Ndu Ízurẹlu whẹ lẹ Goma nọ l’oshi lanụ l’ori ogori

²“Baarụ ne ghu mba, baarụ iya mba, nkele ọ tọ bụhedu nyee mu, mu ta abụhe ji iya. Baarụ iya mba t’o wofu umere nwanyị-ọkpara ono dụ iya l’iwhu, ya ewofu umere nwanyị ogori ono dụ iya l’obu. ³Ọdua bẹ mu l’a-lafụkwa iya iwhe o ye l’ẹhu gbabẹ iya ọto, ya agbarụ ọto g’ọgba iya mbọku, a nwụru iya. Mbụ lẹ mu l’e-me iya, ya egheru jatoo g’ọo echi-ẹgu alị ọkponku, l’adụa iwhe dụ iya nụ; mu emee t’ọ bụru ẹgu mini l’e-gbu iya. ⁴Mu te egoshikwa n-yemobu l’ẹhu ụnwegirima iya, o noo lẹ whẹ bụ ụnwegirima a gbatarụ l’ọkpara. ⁵Ne nwụru whẹ nụ bẹ gbarụ ọkpara; g’o gude tsụta ime whẹ bụru iwhe iwhere iya dụ. Nkele o shi asụje lẹ ya l’a-kfụ-tsoru ndu whẹ l’iya l’eshi ọnya woru onwiya tọgboru whẹ, nke ọwhu whẹ l’a-nọ anụ iya nri, anụ iya mini, anụ iya ẹji-atụru, anụ iya ẹkwa-ọcha, anụ iya mmanụ-ehuhu, anụ iya iwhe-angụngu.

⁶“O noo iwhe meru g’o gude mu je l’e-woru ogvu-l’uke tọ-chishiaru iya echi-ụzo. Mu atụa mgbodo gude tụ-buru iya ye t’ọ bọ whụ ụzo, l’oo-shije lụfu alụfu. ⁷Ndu ono, whẹ l’iya l’eshi ọnya ono bẹ l’ọo-nọ achikfu achikfu, ọle ọ tọ byadụ l’a-chikfuta whẹ. Ya achọo ụzo l’oo-shi whụa whẹ, ọle ọ tọ byadụ l’a-whụ whẹ. O noo nteke l’ọo-ghaa rii sụ t’iya lakfuwhu ji ivurụzo, ọ lụru azụ, nkele nteke o shi alụ onye ono shi karụ iya mma karụ ntaa.

⁸“Ọ tọ madụ l’ọo mu shi anụje iya witi yẹle mmẹe vayịnu ọ̀whúú mẹe mmanụ ólivu, t’ọ ma l’ọo mu shi anụje iya mkpọla-ọcha yẹle mkpọla-ododo ono, whẹ wotaru gude eme nke agwa Bálu. ⁹O noo iwhe meru g’o gude mu je l’a-natawhu iya witi mu ono azụ, m’ọ chalẹwho; natawhu iya mmẹe ọ̀whúú mu ono azụ mẹ oge iya rwulewho. Mu anata iya ẹji-atụru mu; nata iya ẹkwa-ọcha mu ono, mu nụru iya t’o weje haa ọgba ọto. ¹⁰Ntaa bẹ mu bya l’a-gbabẹ iya ọto l’iwhu ndu ọbu, whẹ l’iya l’eshi ọnya tẹ whẹ whụta iya ejo ọrwu l’ẹhu; ya eje aadụ onye l’a-nafụta iya l’ẹka mu. ¹¹Ẹmereme lile l’ọonoje eme, mẹe oge, l’oorije l’awha g’awha ha, mẹe oori ọnwa-ọwhuu ya, mẹe ori-oge mbọku-ọtuta-ume iya, mbụ-zhia oge ono, a tụ-buru atụ-bu l’oorije, bẹ mu l’e-me ya abụru kperemu. ¹²Mu l’e-mebyishi mgbu vayịnu iya, mebyishia figu iya, bụ ọwhu ọbu ọ sụru l’ọo iwhe ndu whẹ l’iya l’eshi ọnya gude kfụa ya ụgwo. Ẹka ono bẹ mu l’e-me ya abụru ẹgbudu; anụ-ẹgbudu avụa ya l’akpaa. ¹³Ujiku olemole ono, ọ kpọru ụ̀nwù isẹnsu ọku nụ Bálu bẹ mu l’a-hụ̀kota iya àhụ̀hù iya. Je akpaa l’ujiku ole, o yeru eregede-nchị, mẹe ụnwu aka ọdo, e gude achọ mma kfụ-tsoru ndu whẹ l’iya l’eshi ọnya, shi nno nyazọo mu; ujiku olemole ono bẹ mu l’a-hụ̀kota iya àhụ̀hù iya.” O nokwa iwhe Onye-Nwe-Ọha l’ekfu ndono.

Onye-Nwe-Ọha l’egoshi n-yemobu l’ẹhu ndibe iya

¹⁴“O noo iwhe meru g’o gude mu l’eme tẹ mu ralịtaru iya ntse. Mu l’e-me tẹ mu rata iya bahụ l’echi-ẹgu, tọ nwẹhu kfuru okfu yeru iya. ¹⁵Ọo l’ẹka ono bẹ mu l’a-nọdu nụ-whu iya mgbu vayịnu iya azụ. Mu emee tẹ Nsụda Akọru bụru ẹka ẹnya iya l’a-dụ. Ọ bụru ẹka ono bẹ l’ọo-nọdu kweta nkemu g’o shi kweta iya, nteke ọ bụ nwamgbọko, mbụ g’o shi kweta iya nteke ono, o shi l’alị Íjiputu afụta.

¹⁶“O noo mbọku l’ii-beko kua mu ji, l’alụ ghu nụ. I tii kubahedua mu Bálu ghu ọdo. O nokwa iwhe Onye-Nwe-Ọha l’ekfu ndono. ¹⁷O noo nkele mu l’e-me t’ẹwha Bálu be eshihe iya l’ọnu fụta ọdo, ya eje akpọhe ẹwha mu l’ẹnwa ọdo.

¹⁸“O noo mbọku mu l’a-gbarụ gụ l’anụ-ẹgbudu, mẹe ẹnu, l’ewhe l’eli, mẹe anụ, l’awụ l’ẹwho ndzụ ndono. Mu emee t’ọgba akfụ, mẹe ogbu mma, mẹe ọlwu ọgu ba adụhe adụdu owhu l’alị ono, nke ọwhu whẹ l’azẹje azẹe, egvu eje anọ atsụ whẹ.

¹⁹“Mu l’a-lụ ghu gụ abụru nyee mu jeye lẹ tututu-mịmimi.

Mu l’a-lụ ghu goshi ghu lẹ mu bụ onye dụ chịriri,

bụru onye ikpe iya kfụru nhamụnha.

Mu l’e-ye ghu obu, awhụru ghu imiko.

²⁰Mu l’a-lụ ghu goshi ghu lẹ mu bụ onye ire-lanụ.

Ọo ya bụ, gụ marụ l’ọo Mu bụ Onye-Nwe-Ọha.”

²¹Onye-Nwe-Ọha l’ekfu sụ:

“Mbọku ono bẹ mu l’a-za akpamigwe oku.

Akpamigwe aza mgboko oku.

²²Mgboko aza iwhe e meberu l’alị oku,

za mmẹe ọ̀whúú mẹe mmanụ ólivu oku,

ndu ono aza Jezerẹlu oku.

²³Mu abya adzabẹ whẹ adzabẹ g’ọo oshi l’alị ono.

Mu l’e-goshi n-yemobu mu l’ẹhu whẹ,

mbụ l’ẹhu ndu ono, mu shi sụ lẹ mu te eyedu obu.

Ndu ono, mu shi sụ lẹ whẹ ta abụdu ndibe mu

bẹ mu l’a-sụ lẹ whẹ bụwaa ndibe mu.

Whẹbedua l’onwowhe asụkwanu lẹ mu bụwaa Chileke whẹ.”

Hosíya yẹle nyee ya doshiru

¹Tọ dụ iya bụ, Onye-Nwe-Ọha bya asụ mu: “Tụgbua je egoshi nyee ghu l’i yeru iya obu ọdo. A makwarụ-a l’onye ọdo bẹ yeru iya obu; l’oori ogori. Yee iya ro obu ẹgube ono Onye-Nwe-Ọha yeru ndu Ízurẹlu; a amakwarụ-a lẹ whẹ ghakọberu gwalahaa agwa, bya aswọbe ẹnya lẹ nri, a gwarụ l’iwhe.”

²Mu tụgbunua je agbata iya agbata. Iwhe mu gude gbata iya bụ mkpọla-ọcha, dụ shẹkelu iri l’ise yẹle ẹkpa balị l’ugvu iya. ³Ọo ya bụ, mu bya asụ iya: “Nọpyabekwa anọpyabe tẹ mu lẹ ghu buru nọo ọdu. Gụ ahaa ọgba ọkpara, haa ọkpa lẹ nwoke ọdo; mbẹdua l’a-nọdulewho nọ-turu ghu.” ⁴O noo gẹ ndu Ízurẹlu l’a-nọ ọdu, whẹ eje enwe onye l’a-bụ eze whẹ; whẹ eje enwe onye l’a-bụ onye ishi whẹ; whẹ eje agwa iwhe; whẹ eje enwe ẹwhuru dụ nsọ; whẹ eje enwe uwe ifọdu; whẹ eje agwọ ọgvu. ⁵E -megee bẹ ndu Ízurẹlu l’a-dakọbe lwawhu azụ wata ọcho Onye-Nwe-Ọha bụ Chileke whẹ, wata ọcho onye eze whẹ, bụ Dévidi. L’oge ikpazụ bẹ whẹ l’a-whụru godogodo byakfuta Onye-Nwe-Ọha bya anata ọnu-ọma shi iya l’ẹka.

Ikpe a nmarụ ndu Ízurẹlu

¹“Unu nụkwaa okfu Onye-Nwe-Ọha l’ekfu, unubẹ ụnwu Ízurẹlu, o noo nkele Onye-Nwe-Ọha l’ekukwa ndu bu l’alị-a ikpe asụje l’ọ tọ dụdu onye ọwhu, e gude ire iya ẹka; n-yemobu ta adụ iya; tọ dụ onye marụ Chileke l’alị-a kpaa-whuu. ²Iwhe dụ iya nụ bụlewho mburọnu, mẹe ọdzu ejire, mẹe ogbu ọchi, mẹe ozhi oshi, mẹe ori ogori. Ọlewho lẹ whẹ sụru onwowhe l’ẹka nahụ. A -nọdu lẹ whẹ gburu ọchi ọwa, whẹ egbukwase ọdo. ³Ọo ya meru alị-a l’owhu l’agụ áwhụ. Iwhe bụ ndu bukota iya nụ l’alakaa mii mii. Anụ-ẹgbudu, mẹe ẹnu, l’ewhe l’eli, mẹe ẹma, bu l’ẹnyimu l’anwụshihu anwụshihu l’alị-a.

Ikpe a nmarụ ndu l’agbajẹ ẹja nụ Chileke

⁴“Ọle ọbu, t’ọ bọ dụkwa onye l’e-ku ibe iya ikpe, ya eje adụkwa onye okfu l’a-dụru yẹle ibe iya. Ndu mu lẹ whẹ nwe okfu nwẹkiya lẹkwawho unubẹ ndu l’agbajẹ ẹja nụ Chileke. ⁵Unu l’anọje ada igbu-wẹewee eswe l’ẹnyashi. Ndu nkfuchiru Chileke tsokwaruwho unu ada igbu-wẹewee. Ọo ya bụ lẹ mu l’a-la ne ghu bụ Ízurẹlu l’iyi. ⁶Iwhe ndibe mu gude ala l’iyi bụ, l’ọ tọ dụdu iwhe whẹ marụ. Eshi-ọwhu unu jịkaru l’unu ta amadụ mu, o nokwawhọ gẹ mbẹdua jịkaru unu sụ l’unu ta abụhedu ndu l’agbarụ mu ẹja. Eshi-ọwhu unu l’agụbee iwu Chileke unu iwhe, o nokwawho gẹ mbẹdua l’ẹte agụbee ụnwu unu iwhe ndono.

⁷“Ọobuje ndu l’agbajẹ ẹja nụ Chileke ka shii eje eje, whẹ aka ome iwhe-dụ-ẹji eje eje l’ẹka mụbe Onye-Nwe-Ọha nọ. Mu l’a-gbanwe ugvu ono, l’aakwabẹ whẹ, dobechia whẹ l’ọnodu iwhere. ⁸Iwhe whẹ l’aga mkpa iya bụ ori iwhe ndibe mu gude gbaa ẹja iwhe-dụ-ẹji, whẹ metaru. Ọo ya meru iwhe l’anọje atsọ whẹ pyoo bụru tẹ ndibe mu meje ejo-iwhe. ⁹Ọo ya bụ l’ọo iwhe e meru ndu madzụ mmaka bẹ l’ee-me ndu l’agbajẹ ẹja nụ Chileke. Mu l’a-tụko whẹ nụa áwhụ iwhe ono whẹ l’eme; mu akfụa whẹ ụgwo iwhe whẹ l’eme. ¹⁰Whẹ l’e-ri nta ria imo ẹwho ta abyadụ l’e-ji whẹ. Whẹ agbaa ọkpara, nke ukfu mẹe nke nta, whẹ agbarụ ẹka nwa. Mkpata iya abụru lẹ whẹ lụfuru l’ẹka Onye-Nwe-Ọha.

¹¹“Ọgba ọkpara, mẹe ọngu akahụ mmẹe yẹle ọngu mmẹe ọ̀whúú bẹ mewaru égò swehu ndibe mu. ¹²Ọ bụru ntẹkpe a pyịru l’oshi bẹ whẹ l’ejeje ọkpata ishi iwhe. Mbụ l’ọo nnata ogbogoro oshi bẹ whẹ l’ejekfuje t’o kfuru whẹ iwhe whẹ l’e-me. Iwhe dusweru whẹ nụ bụ ọgba ọkpara, whẹ shiwaro nno dụ tuwhu-tuwhu-tuwhu l’iwhu Chileke. ¹³Whẹ l’etsojeru agwa iwhe l’eli ugvu, akpọ-whe ngwo-ẹja ọku lẹ mgbogidi mgbogidi, mẹe l’ukfu achị, mẹe l’ukfu oshi pọpula, mẹe l’ukfu oshi terebinti, bụ oshi aguguru iya l’adụje ree l’ẹhu. O noo g’o gude ụnwada unu wụru wụba l’ọgba ọkpara, ụnwanyi unu l’alụ alụlu wụba l’ori ogori. ¹⁴Mu ta àhụ̀kwa ụnwada unu àhụ̀hù ọkpara whẹ l’agba. Mu ta àhụ̀ ụnwanyi unu l’alụ alụlu àhụ̀hù ogori whẹ l’eri, o noo nkele unubẹdua, bụ unwoke whẹ l’anọjekwawho akpa l’ụnwanyi ọkpara gẹ dụ unu mma, mbụ l’unu l’ụnwanyi ọkpara ụlo-agwa l’anọduje agwakọ iwhe. Ndu égò sweru bẹ l’a-bụru ọla-l’iswi.

¹⁵“G’unu l’agba ọkpara g’unu l’agba iya, unubẹ ndu Ízurẹlu, tẹ ndu Juda be eyekwa iya ẹka. Unu be ejekwa mkpụkpu Gílugalu. Unu be ejekwa mkpụkpu Bẹtu-avenu je ọgwa iwhe. Unu ba agụkwa ẹnwa sụ: ‘Onye-Nwe-Ọha vuru-a ishi iya g’o vu iya!’ ¹⁶Gẹ ndu Ízurẹlu kweru kpọkponyi g’ọo nwada-eswi, ?ndẹnu gẹ Onye-Nwe-Ọha l’e-shi echehunu whẹ g’ọo onye l’eche ụnwu-atụru l’ẹka irwu ẹwu dụ? ¹⁷Ndu Ífuremu bẹ whẹ l’agwa sweekwaru onwowhe gbagbadị. Unu haa whẹ tẹ whẹ je njere whẹ. ¹⁸Ọobuje whẹ -ngụ-jigee mmẹe ishi, whẹ l’ọgba ọkpara whẹ emelahaa. Mbụ ndu bụ ọnodu iwhere bẹ whẹ hatarụ karụ ugvu. ¹⁹Ọo uburu-aga l’e-megee bya ezhikota whẹ, iwhere abụru nke whẹ l’iwhe ono, whẹ l’agwa ono.”

¹“Unu nụkwaa iwhe-e, unubẹ ndu l’agbajẹ ẹja nụ Chileke! Unu ngabẹkwa nchị, unubẹ ndu Ízurẹlu! Unu gebekwa nchị, unubẹ ndibe eze! Ikpe nmaakwarụ unu, nkele unu bụ ọnya, a gbabẹru lẹ mkpụkpu Mizupa; unu bụru ụgbu e geru l’ugvu Tebọ. ²Ndu ono, kwefuru ike ono bẹ yemiakwaru ishi eyemi l’ogbu ọchi. Ọle mu l’a-nụkwanu whẹ áwhụ gẹ whẹ hakọta. ³Ndu Ífuremu bẹ mu makọtaru gẹ whẹ dụ dụ. Ndu Ízurẹlu te edomikotadu onwowhe l’ẹka mu nọ. Unubẹ ndu Ífuremu, ntaa bẹ unu bya agbalahaa ọkpara. Ndu Ízurẹlu bẹ mebyihuakwaru emebyihu.”

Hosíya l’ekfu t’a ba agwashị agwa

⁴Ejo-iwhe, whẹ l’emegbabe te ekwedu haa whẹ tẹ whẹ lwakfuta Chileke whẹ. Ọgba ọkpara bẹ nawarụ whẹ ẹ́vu, o mee whẹ ta ama onye Onye-Nwe-Ọha bụ. ⁵Ndu Ízurẹlu bẹ ekuku whẹ l’eku onwowhe l’agba ẹka-ebe gẹ whẹ gbarụ. Iwhe-dụ-ẹji ndu Ífuremu l’emegbabe l’emeje, whẹ ada igbu-wẹewee. O nokwawho gẹ ndu Juda l’a-nọje ada igbu-wẹewee ndono. ⁶Whẹ l’e-rwuta atụru whẹ mẹe eswi whẹ jee lẹ whẹ l’a-chọ Onye-Nwe-Ọha, ọle whẹ ta awhụdu iya, nkele o selawaru azụ l’ẹka whẹ nọ. ⁷Whẹ te ekwedu tẹ Onye-Nwe-Ọha gude ire whẹ ẹka. Ụnwegirima, whẹ zụshiru ta abụdu whẹ yeshiru ime whẹ. Ọnwa ọ̀whúú, l’eje abya bẹ whẹ l’iwhe whẹ kọru l’alị whẹ l’a-tụkwa bụru kpukpuru-swoo.

Ọgu, darụ ndu Juda whẹ lẹ ndu Ízurẹlu

⁸“Unu jekwa egbua opu-ọgu lẹ mkpụkpu Gibyiya. Unu awhụa ụpyi-ọgu lẹ mkpụkpu Rema. Unu chikwaa mkpu ọgu lẹ Bẹtu-avenu. Unubẹ ndu Bénjaminu, ngwa unu wulihu jeshia. ⁹Ẹgbara l’a-kfụ l’alị ndu Ífuremu mbọku, l’aa-nụ whẹ áwhụ. Iwhe-e mu l’ekfuru ikfu g’ikfu ha lẹ Ízurẹlu bụkwa iwhe mefutaje nụ.

¹⁰“Ndu ishi ndu Juda bẹ l’eme g’ọo ndu l’anọje awhọ ékpè e gude kpaa oge-alị. Mu l’e-kpukpushi whẹ oke ẹhu-eghughu mu t’ọ sọru g’ọo mini sọpyabe whẹ. ¹¹Ndu Ífuremu bẹ nọkwa lẹ mkpamẹhu. E gudewaa l’ikpe nmarụ whẹ nụ egwe whẹ aryaka eryune. Iwhe kparụ iya nụ bụ lẹ whẹ sụru l’ẹka ishi whẹ l’a-la bụ l’iwhe-mmaanụ. ¹²Mu nọ l’ime ndu Ífuremu atapyashị whẹ g’ọo ẹka-mkpu, mu nọdu l’ime ndu Juda eme tẹ whẹ l’erwe urwe. ¹³Nteke ndu Ífuremu whụru ẹhu, l’eme whẹ nụ, ndu Juda bya awhụa ọnya, l’aba whẹ nụ, ọo ya bụ ndu Ífuremu jeshia Asiriya oku ọkalibe onye eze ẹka ono t’ọ bya eyeru whẹ ẹka. Ọle onye eze ono ta adụdu ike mee tẹ whẹ mehu. Tọ dụ ike mee t’ọnya ono l’aba whẹ nụ kpọhu. ¹⁴Sụa, mu l’a-fụru ndu Ífuremu g’ọo oduu-gburu-agụ. Mu afụaru ndu Juda g’ọo oke oduu-gburu-agụ. Mu l’a-lajashị anụ whẹ nwịrinwiri jeru hutushia. Mu menyaa emenya gụ-lia whẹ, bẹ l’ọotoo dụdua onye l’a-dụ ike anafụ whẹ l’ẹka mu. ¹⁵Mu l’a-lawhu azụ l’ọnodu mu je anọ-kirishia jeye nteke whẹ l’e-kweta l’ikpe nmarụ whẹ, whẹ awata mu achọcho. Whẹ l’a-nọdu l’iwhe-ọtsulanu chọshia mu ike.”

Ízurẹlu te ekwedu daa onwowhe ụta

¹“Unu bya t’anyi lakfuwhu Onye-Nwe-Ọha azụ, l’ọ kwa iya bẹ lajashịru anyi nwịrinwiri-a, nke ọwhu l’oo-me t’anyi mehu. O chitaru anyi tụa, o je l’e-gude iwhe kechia anyi ẹka o chibashiru anyi ọnya l’ẹhu. ²Ujiku labọ ntaa bẹ l’oo-me t’anyi gbakerehu. Abalị ẹto ntaa bẹ l’oo-dobewhu anyi azụ l’ọnodu anyi, nke ọwhu anyi l’iya l’e-buru. ³Unu t’anyi marụ Onye-Nwe-Ọha. T’anyi sebaje g’anyi l’e-shi marụ iya. Ọo ẹgube ono chi l’asahụje l’ụtsu bụ g’abyabya iya l’a-dụ. Ọ bụru ẹgube ono igweli l’abyajẹ mini lẹ mgboko l’udzumini bụ gẹ l’ọo-byakfuta anyi.”

⁴“Unubẹ ndu Ífuremu, ?ọo gụnu bẹ mụbe Onye-Nwe-Ọha gude unu eme? Unubẹ ndu Juda, ?ọo gụnu bẹ mu gude unu eme? N-yemobu unu dụkwa g’ọo ìmó ụtsu, mbụ g’ọo iji darụ lẹ geregere-ụtsu, l’adụa iwhe atahụ iya bụ. ⁵Ọo ya meru g’o gude mu gude ndu nkfuchiru gbutsua whẹ l’ukfu. Ọo okfu ọnu mu bẹ mu gude whụa whẹ awhụwhu. Ikpe, mu l’ekpe whẹ l’eke whẹ vaavaa l’ẹhu g’ọo ẹnyanwu. ⁶Iwhe l’agụ mụbe Onye-Nwe-Ọha bụ t’unu mejeeru madzụ obu-imiko, ọ tọ bụdu t’unu gwajẹ mu agwagwa. Iwhe dụ mu ree bụ t’unu marụ Chileke, ọ tọ bụdu t’unu kpọkotaje ngwo-ẹja ọku nụ iya.

⁷“Ọ kwa ẹgube Ádamu mebyiru ọgbandzu mu bẹ whẹbedua mebyiru ọgbandzu, mu lẹ whẹ gbarụ. Whẹ te ekwe tẹ mu gude ire whẹ ẹka. ⁸Giledu bụ mkpụkpu ndu ejo-iwhe jiru pyịmu. Iwhe e tekashiru lẹ mkpụkpu ono bụlewho mmee ndu e gburu ọchi whẹ. ⁹Ọo gẹ ndu abalịdegvu l’egepajeru kwabẹru madzụ bụ gẹ ndu l’agbajẹ ẹja nụ Chileke l’anọduje ege onye whẹ l’e-buta ejo ebuta. Whẹ l’anọduje l’echi-ụzo, e shi eje mkpụkpu Shékemu egbu ọchi. Ọ tọ dụdu ẹgube njọ, whẹ mewhodoru. ¹⁰Ọo l’ọzo-ụlo Ízurẹlu bẹ mu whụru iwhe l’anwụ ishi kpaa. Ọo l’ẹka ono bẹ ndu Ífuremu nọ agba ọkpara, ndu Ízurẹlu shi nno merwushia onwowhe.

¹¹“A -bya l’ẹhu unubẹ ndu Juda; a tụakwaru ọnu mbọku l’aa-kpa unu g’ọo onye l’akpa ji.

“Nteke ono bụ nteke mu l’e-dobewhu ndibe mu azụ l’ọnodu whẹ.

¹“Nteke mu shi eme tẹ mu mee

tẹ ndu Ízurẹlu mehu l’iwhe l’eme whẹ nụ,

bẹ ejo-iwhe ndu Ífuremu l’eme

shi avọ-lihuje see mu l’iwhu.

O nokwawho g’ejo-ememe ndu Samériya shi avọ-lihuje.

Whẹ l’anọje eme wuru-wuru.

Ndu oshi ono l’etsufuje ụlo madzụ bahụ.

Ndu abalịdegvu ono l’ekechije madzụ l’echi-ụzo ana nfụ.

²Uche whẹ tẹke anọnyabujedua kọoru whẹ l’ejo-iwhe ono,

whẹ l’emegbabe bẹ mu nyatakọtaru.

Iwhe-dụ-ẹji ono whẹ l’eme bẹ yebutawaru whẹ nụ.

Ntekenteke bẹ l’oogbuje teteretee nọdu mu l’iwhu.

Aagba ejo ikumu l’ibe eze

³“Ejo-ememe ono whẹ l’eme bẹ l’anọje atsọ onye eze whẹ ụtso. Ejire ono whẹ l’adzụ l’atsọ ndu ishi whẹ ụtso. ⁴Gẹ whẹ ha l’erikota ogori. Ẹgu tẹ whẹ ria ogori l’anọje enwu whẹ whuruwhuru l’ẹhu g’ọo ọku mbalị. Ọku mbalị bẹ onye gude iya eghe buredi te enwezhijedu iya ọku enwezhi, wata nteke o shi ọgwo ụtu buredi ono jeye nteke o koru eko. ⁵Mbọku onye eze anyi l’eri iwhe bẹ ndu ishi l’angụta-gejee mmẹe jeye ẹnya ekee whẹ vaa. Eze yẹle ndu njamụ-ewenu l’atụkoje emekaa irogiri. ⁶Obu whẹ l’adụje g’ọo ẹka a kpọberu ọku ụzu mẹ whẹ gbadẹwaa ejo ikumu. L’ẹnyashi mbọkumboku bẹ ẹhu l’anọje eghu whẹ damụdamu. A fụta l’ụtsu whẹ avọru ọku ghụa ẹhu.

⁷“Gẹ whẹ ha bẹ ẹhu-eghughu whẹ l’anọje evo chichichi g’ọo ọku ụzu. Whẹ l’egudeje ẹhu-eghughu gbushia ndu ishi l’achị whẹ nụ. Whẹ l’aha ndu eze whẹ nnanụ nnanụ akpamishi, tọ dụ gẹ whẹ ha ryakuru mu nụ tẹ mu gbatarụ whẹ.

Ízurẹlu yẹle ndu mba ọdo

⁸“Ndu Ífuremu bẹ whẹ lẹ ndu mba ọdo gharụ ẹghirigha. Ndu Ífuremu bẹ dụwaa g’ọo akara, gheru ibe lanụ ibe lanụ. ⁹Ndu ọha ọdo tọo nwẹhu amị ọkpehu whẹ wọowoo, whẹ ta ama. Ishi l’achakọtawaa whẹ ẹwo ẹwo, whẹ ta ama. ¹⁰Ekuku ono ndu Ízurẹlu l’eku onwowhe bụ-gekwaa iwhe l’agba whẹ ejo ẹka-ebe. Ọle whẹ ta akpadụ ishi tẹ whẹ lwakfutawhu Onye-Nwe-Ọha, bụ Chileke whẹ azụ, whẹ ta akpa ishi tẹ whẹ chọo ya. ¹¹Ífuremu bẹ l’ebewhe g’ọo ndo. Ọ bụ onye iberibe l’ete enwee uche. O bekoru ndu Íjiputu ntaa, ntaantaa ya ebekoru ọwhube ndu Asiriya. ¹²Ẹka whẹ l’eje ẹka whẹ l’eje, bẹ mu l’a-gha ụgbu mu gude nwụkoo whẹ g’ọo onye nwụkoru ẹnu, l’ewhe l’eli. Mu ahụ̀a whẹ àhụ̀hù ejo-ememe ono whẹ l’eme.

¹³“Nshọ whẹ, nkele whẹ lụfuru l’ẹka mu jewhushihu. Ọla-l’iswi bụkwaru nke whẹ, nkele whẹ kwefuru mu ike. Mu shi eme tẹ mu gbafụta whẹ. Ọle whẹ l’anọje adzụshi ejire atukobe mu. ¹⁴Akpọ-ku, whẹ l’akpọ-ku mu te erwudu whẹ ọhu ẹwho. Ọo zhiawho ẹkwa witi yẹle ẹkwa mmẹe vayịnu ọ̀whúú bẹ whẹ l’azẹje l’iwhe-azẹe whẹ aryarụ mu, egbubashi onwowhe ọnya l’ẹhu. Ọle whẹ kwefuru mu ike. ¹⁵Ọo mbẹdua bẹ zụru whẹ nu, mee t’ike dụ whẹ. Ọle ọgbee bụru ejo idzu bẹ whẹ l’anọduje achịru mu. ¹⁶Onye whẹ gharụ iwhu ta abụdu Ọkalibe-Kangokotaru-Nu. Whẹ l’atuwhu onwowhe atuwhu g’ọo akfụ, l’adụa ree. Ndu ishi whẹ bẹ l’ee-gude ogu-ịgba gbugbushia, o noo nkele ejo-okfu l’eshije whẹ l’ọnu afụshi. Ndu alị Íjiputu achịa whẹ kfịrikfiri.”

Iwhe-dụ-ẹji ndu Ízurẹlu meru

¹“Unu yekwa opyi-ọku l’ọnu, nkele ugo beekwaru lẹ mgbagbu l’ẹka ọzo-ụlo Onye-Nwe-Ọha nọ. Iwhe kparụ iya nụ bụ lẹ ndu Ízurẹlu bẹ mebyiru ọgbandzu mu, kwekafu ike lẹ whẹ te edobedu iwu mu. ²Ndu Ízurẹlu l’aryakuje mu sụ: ‘Gụbe Chileke anyi, ọ kwa ghu bẹ anyi marụ!’ ³Ndu Ízurẹlu bẹ jịkaru iwhe dụ ree; ọhogu jekwanu l’e-rwuta whẹ ọso.

⁴“Whẹ họtaru ndu l’a-bụ eze whẹ; tọ bụ mu b’o shi l’ẹka. Whẹ họta ndu l’a-bụ ishi whẹ, whẹ te eme tẹ mu marụ. Whẹ gude mkpọla-ọcha mẹe mkpọla-ododo, whẹ nweru kpụshia agwa gwalahaa, o jekwanu l’a-la whẹ l’iyi. ⁵Unubẹ ndu Samériya; agwa nweswi unu ono bẹ mu l’agọ-whukwa agọ-whu. Ẹhu-eghughu mụbe Onye-Nwe-Ọha bẹ nwuhuakwaru ọku l’ẹhu unu. ?Ọo nteke ole bẹ unu l’a-nọnyaa unu abụru ndu ẹka dụ ọcha? ⁶Ọo l’ẹka unubẹ Ízurẹlu bẹ agwa nweswi ono shi. Onye meru iya nụ bụ onye l’eme nka. Ọ tọ kwa iya bụ Chileke. Agwa nweswi Samériya ono bẹ l’ee-tsu ryaaryaa. ⁷Ọo whẹrewhere bẹ whẹ kụru g’ọo onye kụru akpụru iwhe, whẹ jekwanu l’a-wọta iya uburu-aga. Akpe whẹ ta abyadụ l’a-whọta ishi, to ye mebyi. Ọ -bụru l’o yeru mebyi eye, ndu ọha ọdo alwụchafu iya. ⁸Ndu Ízurẹlu b’e lweekwaru wọo. Whẹ tsowaa ndu mba ọdo bụru mkpọkoro iwhe. ⁹O noo lẹ whẹ tụgburu jeshia Asiriya je aghawhe ririri g’ọo nkakfụ-ịgara-ọswa. Ndu Ífuremu bẹ butaru ndu yẹle whẹ l’eshi ọnya ebuta. ¹⁰Ọo ezhi-okfu lẹ whẹ jeru mba gẹ mba ha je ebuta ndu whẹ l’iya l’eshi ọnya, ọle a ta anọhedu ọdu ntaa, mu achịkobe whẹ ọnu t’onye eze bụ ọkalibe chia whẹ ọnu l’alị.

¹¹“Ndu Ífuremu nweru ẹnya-mgbẹja l’igweligwe, whẹ l’anọduje agba ẹja iwhe-dụ-ẹji. Ọle ẹnya-mgbẹja ono bụhukwawho ẹka whẹ l’anọduje eme iwhe-dụ-ẹji. ¹²Iwu mu bẹ mu deru edede doberu whẹ ọ ha l’igweligwe. Whẹ wotale iya-a g’ọo iwhe shi mba ọdo bya. ¹³A bya abya l’iwhe ngwo-ẹja, a nụru mu; whẹ l’egbuje anụ gude gbaarụ mu ẹja, taa anụ iya. Ọle Onye-Nwe-Ọha ta anatajẹdu ngwo-ẹja ono. Ntaa bẹ l’ọo-nyata ejo-iwhe, whẹ l’emegbabe; hụ̀a whẹ àhụ̀hù iwhe-dụ-ẹji ono, whẹ l’eme. Whẹ l’e-megee lawhu azụ l’alị ndu Íjiputu.

¹⁴“Ndu Ízurẹlu bẹ nyazọwaru onye meru whẹ nụ, kwaa l’ọtushi ụlo ndu eze. Ndu Juda bẹ gudewaa mgbodo tụ-wheta mkpụkpu, ha l’igweligwe mgburumgburu. Ọle mu l’a-tọru ọku ye lẹ mkpụkpu lẹ mkpụkpu ono. Ọku ono adzụa ẹka ono whẹ tụru ọ bụru agbarara ono.”

Gẹ l’ee-gude hụ̀a ndu Ízurẹlu àhụ̀hù

¹Unu be etekwa ẹswa, unubẹ ndu Ízurẹlu! T’ẹhu ba atsọkwa unu ụtso gẹ l’ọotso ndu ọha ọdo, o noo nkele unu pawarụ Chileke unu haa gbalahaa ọkpara. Iwhe l’adụje unu ree bụ ụgwo, l’aakfụ unu l’ọkpara unu l’agba, ọ bụru iya meru unu l’anọje agba ala l’ẹka l’eechije balị. ²Balị unu ta abyadụ l’asụjekwadu unu eriri, mmẹe vayịnu unu ta asụhe unu angụngu, ụko mmẹe ọ̀whúú je l’a-dụ unu. ³Ízurẹlu ta anọgbuduru l’alị Onye-Nwe-Ọha. Ífuremu l’e-megekwaa dawhu azụ l’alị Íjiputu, mbụ l’alị ndu Asiriya je anọdu ria nri, l’aasọ nsọ. ⁴Whẹ nọdu l’ẹka ono bẹ whẹ l’ẹte agbahẹduru Onye-Nwe-Ọha ẹja mmẹe ọdo. Whẹ ta agbahẹ ẹja ọdo, l’e-me t’ẹhu tsọo ya ụtso. Ngwo-ẹja whẹ l’a-dụ g’ọo nri e shiru l’ẹka madzụ nwụhuru anwụhu. Ndu riru iya nụ l’a-bụ ndu l’aasọ nsọ. Ọ kwa whẹ l’e-ri nri ono nwẹkinyi whẹ. E te egudedu iya abata l’eze-ụlo Onye-Nwe-Ọha. ⁵?Ọo gụnu bẹ unu l’e-me m’o rwulewho l’ori oge ono, a tuburu atubu, mbụ l’ori oge Onye-Nwe-Ọha? ⁶Nkele whẹ jeshia tẹ whẹ gbalaarụ ọla-l’iyi, byarụ whẹ nụ, bẹ ndu Íjiputu l’e-rwukoo whẹ. Ndu mkpụkpu Mẹmufisu elia whẹ. Ẹwu efushia l’eli mkpọla-ọcha whẹ, vugee ọnu aswa. Amị-ogvu efuchishia ibe whẹ.

⁷Nteke l’aa-hụ̀ Ízurẹlu àhụ̀hù rwuakwaru erwu. Nteke l’aa-kfụ onyenọnu ụgwo iwhe o metaru gbabeekwaru. Tẹ ndu Ízurẹlu makwarụ ono amarụ. Onye nkfuchiru Chileke l’emekwa eswe. Onye l’awhụ awhụ l’eme ọgvu ọgvu. Ishi iya bụ lẹ njọ unu, l’eme bẹ parụ ẹka apaa, ashị unu kpọru madzụ ibe unu paa ẹka. ⁸Ọo mu bụ onye nkfuchiru Chileke, l’eche ndu Ífuremu nche, mbụ ndibe Chileke mu. Ọle ọobuje ẹka lile mu shiru, whẹ agbabẹru mu ọnya eme tẹ mu daba iya. Whẹ kpọru mu ashị lụfu-gee m’ọo l’eze-ụlo Chileke. ⁹Whẹ yeminukaru ishi l’omebyishi onwowhe, ẹgube ono whẹ meru iya lẹ mkpụkpu Gibyiya. Ọle Chileke l’a-nyatakwaa ejo-iwhe ono whẹ l’eme. Ya hụ̀a whẹ àhụ̀hù iwhe-dụ-ẹji ono whẹ l’eme ono.

Iwhe ọ nwụtaru mbụ iwhe-dụ-ẹji, ndu Ízurẹlu megbaberu

¹⁰“Nteke mu chọru ndu Ízurẹlu chọ-vu b’ọ dụle mu whọ g’ọo onye whụru akpụru vayịnu l’echi-ẹgu. Nteke mu whụru nna unu oche whẹ b’ọ dụle mu whọ g’ọo onye whụru akpụru mbụ, vu ụzo chaa l’oshi figu. Whẹ jetalewho rwua Bálu-peyọ, whẹ parụ onwowhe zhiaru agwa Bálu. Whẹ shiwaro nno bụru ndu l’aasọ oyi ẹgube ono, l’aasọ iya agwa ono whẹ yeru obu ono. ¹¹Ọ-dụ-biribiri ndu Ífuremu l’e-megekwaa bụru whaa whefu g’ọo ẹnu. A ta anwụhedu nwa l’ẹka ono ọdo, ta apahẹ iya ẹwho ime ọdo, ta atsụhe iya ime ọdo. ¹²Whẹ -nwụta anwụta hefugezhia ya whọ ree, mu eshi ishi lanụ mee tẹ whẹ nwụshihukota. Nshọbukwa whẹ nteke mu l’a-gbẹru whẹ azụ!”

¹³Ndu Ífuremu bẹ mu whụru, whẹ dụlewho g’ọo ndu Taya, bụ ndu e yeru g’ọo oshi l’ẹka dụ ree shii. Ọle ndu Ífuremu l’e-megee rwuta ụnwegirima whẹ je anụ t’e gbushia. ¹⁴Nụnu whẹ iwhe, gụbe Onye-Nwe-Ọha. ?Ọo gụnu bẹ l’ịi-nụ whẹ? Nụ whẹ ẹwho ume-nwa yẹle ẹra, mini-ẹra l’ẹte agbafụta.

Awhụ, Onye-Nwe-Ọha l’anụ ndu Ízurẹlu

¹⁵“Ejo-iwhe whẹ l’emegbabe bụ lẹ Gílugalu bẹ whẹ nọ emekobe iya. Ọ bụru ẹka ono bẹ mu nọdu wata whẹ ọkpo ashị. Mu l’e-kwobe iswi ejo-ememe whẹ l’emegbabe chịa whẹ l’ụlo mu. Mu te eyehedu whẹ obu ọdo, nkele ndu ishi whẹ gẹ whẹ ha bẹ kwefukotaru ike. ¹⁶Ndu Ífuremu b’e mewaru whẹ nwụa lwaa, ọgbaragbu whẹ kpọshihu nkụ. Whẹ te eyehedu mebyi. Whẹ -je m’ọo l’azụshi ụnwu bẹ mu l’e-gbushi ụnwegirima whẹ ọbu, bụ ndu whẹ yeru obu.”

Hosíya l’ekfu okfu ẹhu ndu Ízurẹlu

¹⁷Chileke mu l’a-jịka ndibe iya, o noo nkele whẹ ta anụduru iya okfu. Whẹ l’e-megee tsoru mba gẹ mba ha agha bedee.

¹Ndu Ízurẹlu shi dụ g’ọo vayịnu, barụ ababa, amị mebyi. Ọobuje, mebyi whẹ ka shii, whẹ aka ọtushi ẹnya-mgbẹja. Alị whẹ ka ree, whẹ aka omema ẹwhuru, dụ nsọ whẹ emema. ²Iwhe jiru whẹ obu bụ ụgho. Ejo-iwhe, whẹ l’eme jekwanu l’a-tukoru whẹ l’ishi. Onye-Nwe-Ọha l’e-nwutsushi ẹnya-mgbẹja whẹ ono mebyishia ẹwhuru ono, whẹ doberu nsọ.

³Ọ bụa ntaa whẹ ekfulahaa sụ: “Anyi te enwekwa onye eze. Ishi iya bụ l’anyi ta atsụdu Onye-Nwe-Ọha egvu. Ọle, anyi -nwehuduru nụ onye eze ?ọo gụnu bẹ l’oo-meeru anyi?” ⁴Whẹ l’ekweje ụkwa iwhoro; ria nte l’ụgho gude gbaa ọgbandzu. Ikpe, kfụru nhamụnha bẹ whẹ l’akpọje ishi akụ shi nno mee, ikpe mkpegbu fushia g’ọo ẹka ejo ẹwu fushiru l’okfu.

⁵Ndu bu lẹ Samériya l’atsụ egvu agwa nweswi ono dụ lẹ Bẹtu-avenu. Ndu nwe iya nụ bẹ l’agụwaru iya awhụ, ndu l’agwajẹ iya nụ l’agụwaru iya ọ-gụ-ẹkwa nkele ọ-dụ-biribiri iya bẹ gvụwaru. ⁶Agwa nweswi ono bẹ l’ee-megee parụ lashia alị ndu Asiriya t’ọ bụru iwhe e wotaru je anụ ọkalibe, bụ onye eze ndu alị ono. Ndu Ífuremu bẹ iwhere iya l’e-gude. Mbụ lẹ ndu Ízurẹlu bẹ iwhere agwa ono l’a-dụ. ⁷A bya lẹ ndu Samériya, onye eze whẹ bẹ ishi iya l’e-tuwhahu g’ọo otsebere-nkụ, l’ese l’eli mini. ⁸Mgbogidi ono, l’aanọdu-gejee agwa iwhe dụ lẹ Avenu bẹ l’ee-mebyishikota emebyishi. Ọo ya bụ ishi ome iwhe-dụ-ẹji, ndu Ízurẹlu l’eme. Ogvu lẹ uke l’e-fuchishi ẹnya-mgbẹja whẹ efuchishi. O noo nteke whẹ l’a-sụ ugvu g’ugvu ha t’o domia whẹ. Whẹ asụ mgbogidi gẹ mgbogidi ha t’ọ dapyabẹ whẹ.

Onye-Nwe-Ọha l’anma ndu Ízurẹlu ikpe

⁹“Unubẹ ndu Ízurẹlu, nkele unu shi l’ọwhu unu meru lẹ mkpụkpu Gibyiya fụta bẹ unu ta ahabahẹdua ẹka aha l’ome iwhe-dụ-ẹji. ?Tọo bụdunu ọgu, riru ndu ono meru ejo-iwhe lẹ mkpụkpu Gibyiya l’e-ri unubẹdua? ¹⁰Ọ kwa nteke dụ mu ree, mu abya ahụ̀a unubẹ ndu ono, l’eme ejo-iwhe ono àhụ̀hù. Ndu mba gẹ mba ha bẹ mu l’e-rwuta, whẹ abya echia unu ọnu l’alị, nkele ejo-iwhe ọbu bẹ unu mewaru nkwere nkwere.

¹¹“Ndu Ífuremu shikwa dụ g’ọo nwada-eswi, a zụru azụzu ree. Iwhe shi adụje whẹ ree bụ ochi ereshi. Ọle mu l’e-ye ndu Ífuremu odogoro l’ẹguru olu ono whẹ nweru, gude gagbabẹ whẹ agagbabẹ; ndu Juda egude whẹ akpazeshi alị akpazeshi; ẹpa Jékọpu egbukposhi alị ọbu egbukposhi. ¹²Sụa, unu sụkaa alị unu ono, darụ akataka, woru akpụru ọ-dụ-chịriri kụa ya g’ọo onye kụru akpụru iwhe. Iwhe unu l’a-kpata iya abụru akpụru n-yemobu. O rwuakwaru nteke l’aa-wata ọcho Onye-Nwe-Ọha, nke ọwhu l’ọo-bya achịa ọ-dụ-chịriri l’ẹhu unu g’ọo mini. ¹³Ọle iwhe unu kụ-chiaru bụ akpụru ejo-ememe, unu kpata iya akpụru ejo-iwhe. Iwhe unu riru ụgwo iya bụkwa ụgwo iwhe ẹregede unu nwụtaru unu.

“Eshi-ọwhu unu kpọru obu ye l’ọkpehu unu yẹle ikpoto ndu ojọgu, unu nweru, ¹⁴bẹ l’aa-kụru ùtsú ọgu kpua ndibe unu tụko ẹka lile, unu tụru ọ bụru agbarara mebyishikota. Ọo g’ọ dụ nteke Shalumanu mebyishiru mkpụkpu Betu-abẹlu l’oge ọgu bụ gẹ l’ọo-dụru unu; nteke ono bẹ ndu ne mẹe ụnwegirima whẹ b’e gweru aryaka eryune. ¹⁵O noo gẹ l’oo-be dụru unubẹ ndu Bẹtelu ndono, nkele ejo-ememe, unu l’eme panụkawaru ẹka. Chi sahụlewho bẹ eze ndu Ízurẹlu l’a-bụ kpurupyata.”

Chileke yeru ndu Ízurẹlu obu

¹“Nteke Ízurẹlu bụ nwata bẹ mu yeru iya obu.

Ọo l’alị Íjiputu bẹ nwa mu ono nọ, mu kua ya.

²Ọle ọo gẹ mu l’eku whẹ oku,

bụ gẹ whẹ l’anọje mu otẹnya.

Whẹ l’anọje agwa Bálu

akpọ ụ̀nwù isẹnsu ọku anụ ntẹkpe.

³Ọbukwaru mu nụ bẹ zhiru whẹbe ndu Ífuremu ụnwu ije.

Mu shi esetaje whẹ l’ẹka.

Ọle whẹ ta amadụ l’ọo mbẹdua

bẹ meru tẹ whẹ mehu l’ẹhu l’eme whẹ nu.

⁴Mu shi egudeje obu-imiko edu whẹ.

Ọ bụru obu, mu yeru whẹ bẹ mu gude edu whẹ.

Mu shi anyafụje whẹ odogoro, a nyabẹru whẹ l’olu

bya ewhuzeta ewhuzeta nụa whẹ nri.

⁵“Eshi-ọwhu whẹ jịkaru lẹ whẹ ta alwakfutadu mu, bẹ whẹ l’e-megekwa laa alị Íjiputu, onye eze Asiriya abụru ishi chịlahaa whẹ. ⁶Ogu-ịgba l’e-gbu iwhu mẹ azụ lẹ mkpụkpu whẹ, gbukashia mgbo-igwe e yeru l’ọnu-abata mkpụkpu whẹ, taa ishi ndibe whẹ, shi nno mebyishia iwhe lile whẹ chịru idzu iya. ⁷Iwhe ndibe mu keberu ẹka iya bụ tẹ whẹ gbakụta mu azụ. Ọ bụru iya bụ lẹ whẹ ryaku onye ono, bụ Ọkalibe-Kangokotaru-Nu, ọ tọo byadụ l’e-kuli whẹ ekuli.

⁸“Sụa, Ífuremu, ?ndẹe gẹ mu l’e-shi parụ unu haa?

Ízurẹlu, ?ndẹe gẹ mu l’e-shi buhaa unu ẹka?

?Ndẹe gẹ mu l’e-shi mee unu gẹ mu meru ndu Adama?

?Ndẹe gẹ mu l’e-shi mee unu gẹ mu meru ndu Zeboyimu?

Obu mu jizetaakwaru.

Imiko unu dụakwa mu.

⁹Mu ta atụ-koshikwa unu oke ẹhu-eghughu mu.

Mu ta alahẹkwa Ífuremu l’iyi ọdo,

o noo nkele ọo mu bụ Chileke, mu ta abụdu madzụ.

Ọo mu bụ onye dụ nsọ ono, nọ l’echilabọ unu.

Mu te egudekwa oke ẹhu-eghughu mu abyakfuta unu.

¹⁰“Whẹ l’e-megekwaa tsolahaa Onye-Nwe-Ọha nteke l’ọo-bọ ekiri g’ọo oduu-gburu-agụ. Ọ -bọlewho ekiri ono, ụnwu iya eshi l’ụzo ẹnyanwu-arịba nmarụ kpakpakpa lwatashia. ¹¹Whẹ l’a-whụru gorigori g’ọo ụnwu-ẹnu shi lẹ Íjiputu lwa. Whẹ adụ g’ọo ndo shi l’alị Asiriya lwa. Mu eduta whẹ, whẹ eburu l’ibe whẹ ọdo.” O nokwa iwhe Onye-Nwe-Ọha l’ekfu ndono.

Iwhe-dụ-ẹji ndu Ízurẹlu l’eme

¹²Ndu Ífuremu gudeekwa ụgho gbawhee mu mgburumgburu. Ọnu-ụlo Ízurẹlu l’emeru mu iwhe l’ẹregede. Ọle ọwhube ndu Juda bẹ Chileke marụ, whẹbedua bẹ goshiru lẹ whẹ gbarụ t’onye ono dụ nsọ gude ire whẹ ẹka.

¹Ndu Ífuremu bụ lẹ whẹrewhere bẹ whẹ l’eri nri. Ntekenteke bụ whẹ ọchi whẹrewhere, shi l’ụzo ẹnyanwu-awata ọso. Ome iwhe l’ụgho yẹle ome iwhe-kpanganga bẹ l’aka shii eje eje l’ẹka whẹ. Ndu Asiriya bẹ whẹ lẹ whẹ l’agbajẹ ndzụ. Whẹ l’evutaje mmanụ ólivu ala Íjiputu.

²Onye-Nwe-Ọha bẹ kukwaru ndu Juda ikpe. Oo-jekwanu l’a-hụ̀ ẹpa Jékọpu àhụ̀hù ejo-iwhe whẹ l’eme, kfụa whẹ ụgwo g’iwhe whẹ l’eme gbarụ. ³Nteke Jékọpu nọkwaduro l’ẹwho b’ọ wọru nwune iya l’ichirukfu. Ọ bya edzua ọbu nwoke yẹle Chileke gbaa mgba. ⁴Yẹle ojozhi-imigwe bẹ gbarụ mgba, ọ lwụ-gbua ojozhi-imigwe ono. Ọ ryashịa ẹkwa ryọlahaa ojozhi-imigwe ono t’o meeru iya eze-iwhe-ọma. Jékọpu byakwa awhụ Chileke lẹ mkpụkpu Bẹtelu yẹle iya kfugba okfu l’ẹka ono, ⁵mbụ Onye-Nwe-Ọha, bụ Chileke, bụ Onye-ishi-igwe-ọgu. Ọ kwa Onye-Nwe-Ọha bụ ẹwha e gude marụ iya! ⁶Ọo ya bụ, unu lwakfutawhu Chileke unu azụ! Unu eye iya obu, unu ekpe ikpe kfụru nhamụnha! Unu anmẹe anmẹe ngabẹru Chileke unu ntekenteke!

Ikpe ọdo Chileke l’eku ndu Ízurẹlu

⁷Whẹ dụ g’ọo ndu l’agba nghọ l’egudeje iwhe e gude atụ iwhe e meru l’ụgho ere aswa. Iwhe l’adụje whẹ ree bụ tẹ whẹ kputa madzụ. ⁸Ndu Ífuremu l’asụje: “Anyi nweru iwhe, ẹku kweru anyi. Anya anyi l’ese l’ekwechije madzụ ẹka l’ẹnya tọ bọ whụ ejo-iwhe yẹle iwhe-dụ-ẹji, anyi l’emegbabe.”

⁹“Ọo Mu bụ Onye-Nwe-Ọha, bụru Chileke unu. Ọo mu bẹ dufutaru unu l’alị Íjiputu. Mu l’e-me unu eburu l’ụlo, e gude ẹkwa kpua ọdo; g’unu shi buru iya nteke ono unu shi erije oge, a tụ-buru atụ-bu. ¹⁰Mu shi ekfuje okfu yeru ndu nkfuchiru; ọ bụru mbẹdua shi anọje egoshi ọwhulenya, ha l’igweligwe, shikwawhọ l’ẹka ndu nkfuchiru ono nmaa ẹtu, ha l’igweligwe.”

¹¹Mkpụkpu Giledu bẹ l’eeme ejo-iwhe, whẹ jekwanu l’a-bụru ndu l’abẹe l’iwhe. Lẹ mkpụkpu Gílugalu bẹ l’eegbuje eswi gude gwaa iwhe. Ọo ya bụ l’ẹnya-agwa whẹ ono l’e-megee dakashịhu bụru ikpo ẹwhuru kụru l’ẹka a kọru okfu.

¹²Jékọpu bẹ bụ ọso b’ọ gbarụ lashia Arámu. Yẹbe Ízurẹlu nọdu l’ẹka ono jee ozhi nnta gẹ l’ee-shi t’iya lụa nwanyị. Ọ bụru oche atụru b’o gude kwaa aswa lẹ nyee ya. ¹³Ọo onye nkfuchiru Chileke bẹ Onye-Nwe-Ọha shi l’ẹka iya dufuta ndu Ízurẹlu l’alị Íjiputu. Ọ bụru onye nkfuchiru Chileke b’o shi l’ẹka iya leta whẹ ẹnya. ¹⁴Ífuremu bẹ kpatsuru Onye-Nwe-Ọha oke iwe. Ọo ya bụ l’onye-nwe-whẹ nu l’e-me, ikpe ọchi, whẹ gburu atukoru whẹ l’ishi, ya akfụkwaa ya whọ ụgwo iwhe-iwhere, o meru iya.

Ẹhu l’eghu Onye-Nwe-Ọha eghu l’ẹka ndu Ízurẹlu nọ

¹O shi abụje Ífuremu kfua okfu, madzụ anmahụ kpakpakpa. Ífuremu shi bụru onye e kutseru ekutse l’alị Ízurẹlu. A nọnyalewho ọ wata ọbaru Bálu ẹja, ikpe nma iya ọ nwụhu. ²Ntaa bẹ ndu Ífuremu l’eme iwhe-dụ-ẹji eje l’iwhu l’iwhu. Whẹ deru ẹnya lẹ mini gude mkpọla-ọcha kpụshiaru onwowhe ntẹkpe. Ntẹkpe ono g’ọ ha bẹ bụ ndu l’eme nka gude ẹka whẹ kpụshia ya. Iwhe l’anọje ekfuru whẹ bụ ọwaa: “Whẹ l’egudeje madzụ agwa iwhe, bya etsutsua agwa nweswi ọnu.” ³Ọo ya meru whẹ je l’a-dụ g’ọo ìmó ụtsu m’ọ bụ whẹ adụ g’ọo iji ụtsu, bụ ntaantaa ya ekosashihu. Whẹ l’a-dụ g’ọo ẹswa ereshi, l’etsu buruburu l’ẹka l’eechije balị m’ọ bụ whẹ adụ g’ọo ẹnwuru ọku, shi lẹ windo ekpofu.

⁴“Obenu l’ọo Mu bụ Onye-Nwe-Ọha, bụru Chileke unu. Ọo mu dufutaru unu l’alị Íjiputu. Ọ tọ dụdu Chileke ọdo, unu marụ gbahaa mbẹdua; onye ndzọta ọdo ta adụ gbahaa mbẹdua. ⁵Ọo mbẹdua bẹ marụ unu nteke unu nọ l’echi-ẹgu alị ono, okpomọku l’enwu whuruwhuru ono. ⁶Whẹ ridelewho iwhe ẹhu whẹ chọru rijidelewho ẹwho, whẹ wata ọnya ǹdụ́ kiti kiti shi nno nyazọo mu. ⁷Ọo ya bụ lẹ mu l’a-dụ g’ọo oduu-gburu-agụ fụaru whẹ. Mu l’a-kụparu akụparu kwabẹru whẹ l’agụga echi-ụzo g’ọo agụ. ⁸Mu l’a-zụ whẹ kfụu g’ọo ejo-nkụta-ọswa ono, a kụfuru nwa l’ẹhu; mu alajashịa whẹ ikpobu alajashị. Mu l’a-vụ anụ whẹ gẹ oduu-gburu-agụ l’avụje anụ o gburu, anụ-ẹgbudu alajashịa whẹ tọgbo.

⁹“Unubẹ ndu Ízurẹlu, ọo-la unu l’iyi, nkele unu l’etso mu okfu. Onye unu l’etso okfu bụ onye ono, l’eyeru unu ẹka. ¹⁰?Ọo awe b’ọ nọ mbụ onye eze unu, t’ọ bya adzọo unu lẹ mkpụkpu lẹ mkpụkpu unu? ?Ọo awe bẹ whẹ nọ mbụ ndu l’achị unu, mbụ ndu ono, unu kfuru sụ: ‘Unu nụ anyi onye l’a-bụru anyi eze mẹe ndu ishi, l’a-nọ achị anyi?’ ¹¹Ọo ẹhu-eghughu bẹ mu gude nụ unu onye eze. Ọ bụru oke ẹhu-eghughu bẹ mu gude nafụ iya unu.

¹²“Ejo-iwhe ndu Ífuremu l’emegbabe bẹ l’eedokoberu whẹ edokobe. Iwhe-dụ-ẹji whẹ l’eme bẹ l’eedekota l’ẹkwo. ¹³Iwhe-ọtsulanu, byarụ whẹ nụ bẹ dụ g’ọo nke nwanyị ime l’eme. Ndu Ífuremu bụ nwa l’ete enwee uche, o rwuru nteke a gege ezeda iya t’o kwehe ye ishi fụta l’ẹhu ne iya.

¹⁴“?Ọo tẹ mu kfụa ụgwo gbafụta whẹ t’alị-maa ba aka whẹ ọkpehu? ?Ọo tẹ mu je agbata whẹ l’ẹka ọnwu? Gụbe ọnwu ?ndẹhunu ike ọbu, l’ii-gudeje abyakfuta madzụ ọgu? Gụbe alị-maa ?ndẹhunu ụdà ọbu, ị gbajẹ gude emebyishi madzụ? Imiko ghu ta abyakwa l’a-dụ mu ilile. ¹⁵Ífuremu zụkwaa azụzu ọzu agha l’echilabọ ụnwunna iya, bẹ uburu-aga, shi l’ẹka Onye-Nwe-Ọha l’e-shilekwaa l’ụzo ẹnyanwu-awata byakfuta whẹ. Uburu-aga ono l’e-shi l’echi-ẹgu bya amịchatakota ishi mini ndu Ífuremu ono, mee t’ẹnya-mgba-mini whẹ tashịhu. Ya emee t’ẹku lile, whẹ kpatarụ gvụkota whẹ l’ẹka. ¹⁶Ejo-iwhe ndu Samériya megbaberu bụkwa whẹ vu iya, nkele whẹ kwefuru Chileke whẹ ike. Ọo ogu-ịgba l’a-takọta ishi whẹ, e gwee ụnwegirima whẹ aryaka eryune, bọ-fushia ụnwanyi ibe whẹ, dụ ime ẹwho.”

Nzhimanụ ọlwa azụ bụ iwhe-ekweru

¹Unubẹ ndu Ízurẹlu, unu lwakfutawhu Onye-Nwe-Ọha, bụ Chileke unu azụ.

Ọo ejo-iwhe unu l’emegbabe meru

unu daa kpoo mkpofu nchị!

²Unu gude okfu njima

lwakfutawhu Onye-Nwe-Ọha azụ.

Unu sụ iya: “Gụaru anyi nvụ

l’iwhe-dụ-ẹji anyi mekotaru ghu g’ọ ha.

Gudenu ome odoo nata anyi;

nke ọwhu anyi l’e-gude ọnu anyi

jaa ghu ama shi nno gwaa ghu.

³“Ndu Asiriya ta adụkwa ike adzọ anyi. Anyi te ekeheduru ike eyeru ịnya-ọgu ọdo, anyi ta abya l’e-gudebaa ọnu anyi kpọ-kua agwa ọdo sụ l’ọo ya bụ Chileke anyi, mbụ iwhe ono, ọ bụ ẹka anyi bẹ anyi gude mee ya. Ọo ghu kpụ bẹ l’awhụjeru onye a tọru mgbe imiko.

Chileke l’ekwe ndu Ízurẹlu ụkwa ndzụ ọ̀whúú

⁴“Mu l’e-me tẹ whẹ ka mma lẹ tuwhu tuwhu tuwhu ono whẹ dụ.

“Mu l’e-gude obu mu g’ọ ha yee whẹ

obu, nkele ẹhu te eghuhedu mu eghughu l’ẹka whẹ nọ.

⁵Mu l’a-dụ g’ọo iji dashị l’ẹhu Ízurẹlu.

Yẹbedua abya ajaa dụ pulapula g’ọo nkashị-iyi.

Ọgbaragbu iya agbamia agbami

l’ime alị g’ọo oshi sida, dụ l’ugvu Libanọnu.

⁶Oo-kpofushi akpofushi jakashịhu.

Ya amalahaa ụma g’ọo oshi ólivu.

Mkpọ, l’ọo-nọ eshi adụ g’ọo mkpọ

oshi sida, dụ l’ugvu Libanọnu.

⁷Whẹ l’a-lwawhu azụ bya eburu lẹ mkpula mu ọdo.

Whẹ l’a-bakashịhu g’ọo ẹka a kụru iwhe-akụ,

whẹ asọ pulapula g’ọo vayịnu.

Ude l’ọo-nọ ede l’a-tụko ẹka lile chia kpụukpuu

g’ọo mkpọ mmẹe a kụtaru l’ugvu Libanọnu.

⁸Gụbe Ífuremu ?Ọo gụnu bẹ mu l’agwa jigba?

Ọo mbẹdua l’azajẹ ghu oku, eleta ghu ẹnya.

Mu dụ g’ọo oshi payịnu ẹkwo iya dụ oyiru-oyiru.

Mebyi unu l’amị bẹ bụ l’ẹka mu b’o shi.”

Mkpochi-ishi iya

⁹Iwhe bụ onye marụ ágụ kwekwa t’okfu-a doo ya ẹnya. Iwhe bụ onye iwhe l’edoje ẹnya ree gudekwa ẹka l’iwhe okfu-a l’egoshi. O noo nkele ụzo Onye-Nwe-Ọha bẹ kfụkwaru akfụru; ndu l’eshi iya nụ bụru ndu dụ chịriri. Ọle ndu l’eme ejo-iwhe bẹ l’anọje ada igbu-wẹewee mẹ whẹ melahaa tẹ whẹ shia ụzo ono.