Híburu

Ẹkwo-Ozhi, e Deru Nụ Ndu

HÍBURU

Chileke shi l’ọnu Nwa iya kfua okfu

¹Lẹ nteke ndụ-ichee bẹ Chileke shi l’ọnu ndu nkfuchiru iya, kfuru nụ ndụ-ichee anyi whẹ ugbo olemole l’ụzo dụ-gee l’iche l’iche. ²Ọ bya ebe ntaa bụwaa oge ikpazụ-a, ọ bụru Nwa iya b’o gude kfuru nụ anyi. Ọo Nwa iya ono b’ọ họtaru sụ l’ọo ya bẹ iwhe lile kụru ishi l’ẹka. Ọ bụru l’ẹka iya b’o shi mee mgboko-o g’ọ ha. ³Nwa ono bẹ l’egbu zaazaa, shi nno egoshi lẹ onolewho gẹ Chileke l’egbu zaazaa ndono, ọ bụleruwho gẹ Chileke dụ bụ g’ọ dụkota kpamụ. Okfu, Nwa iya ono kfuru bẹ ire dụ, dụshia ya ike. Ọ bụru ire ono, dụ l’okfu ono b’o gude sede mgboko l’owhu. Ọ safụ-geeru ndiwhe iwhe-dụ-ẹji, whẹ metagbaberu; o gbashi je anọdu anọdu l’imigwe, l’ẹka-ụtara Chileke bụ iya bụ Onye-Kakọta-Ike.

Nwa ono ka ojozhi-imigwe

⁴Nwa ono bẹ Chileke meru ọ kakọta ndu ojozhi-imigwe, ọ kwarụwho nno bụ g’ẹwha ono, Chileke gụru iya dangokwaruwho ẹwha nke ndu ojozhi-imigwe. ⁵Lẹ Chileke ta adụkwa ndu ojozhi-imigwe ono onye ọwhu ọ sụjeru:

“Ọo ghu bụ Nwa mụbe Chileke,

wata ntanụ-a bẹ mu bụakwaa Nna nwụru ghu nụ.”

Tọ hẹkwa l’ọ dụ ojozhi-imigwe, ọ sụjeru:

“Mụbe Chileke l’a-bụ Nna ghu,

gụ a-bụru Nwa mu.”

⁶Iwhe ọdo bụkwaruwho lẹ nteke Chileke dutaru Nwa iya ono, bụ ọkpara iya t’ọ bata lẹ mgboko b’ọ sụru:

“T’iwhe bụ-zhia ndu ojozhi-imigwe, shi l’ẹka Chileke

gẹ whẹ ha bakọtakwaru iya ẹja.”

⁷A bya abya l’ẹka ndu ojozhi-imigwe nọ, iwhe Chileke kfuru bụru:

“Mu meru ndu ojozhi-imigwe mu whẹ dụkota g’ọo

whẹrewhere; whẹ bụru ndu ozhi mu, mu meru

whẹ dụkota g’ọo ọku l’ere whuruwhuru.”

⁸A byakwanụ lẹ nke Nwa iya ọbu, Chileke sụ iya:

“Mu sụru ghu gụbe Chileke.

Ọo g’ị bụ eze ntaa bụ gẹ l’ịi-bụ-zhia ya whọ jeye

lẹ tututu-mịmimi.

Ii-gude ọdu chịriri achị ẹka, ị bụ eze.

⁹Iwhe kfụru nhamụnha dụ ghu ree,

Iwhe l’akfụaru nhamụnha dụkwa ghu ashị.

O noo g’o gude mụbe Chileke ono, bụ Chileke ghu

họta ghu kwabẹ ghu ugvu,

mee ẹhu l’atsọ ghu ụtso,

mbụ ugvu, mẹe ẹhu-ụtso ọwhu kwatarụ

ka nke ibe ghu whẹ shii.”

¹⁰Chileke byakwa eku iya Onye-Nwe-Ọha sụ:

“Eshi mbụlembu bẹ bụ gụbe Onye-Nwe-Ọha meru alị,

mee iwhe dụ iya nụ.

Ọ bụkwaru ghu whọ bẹ gude ẹka ghu mee igwe,

mee iwhe lile, dụ l’imigwe.

¹¹Iwhe lile ono l’ee-bekochaa bụru kpurupyata,

ọle gụbedua l’a-dụgburu g’ị dụ,

iwhe lile ono l’ee-bekochaa kashịhu g’ọo uwe.

¹²O noo nteke l’ịi-whụta iya awhụta whụfu g’ọo onye whụfuru ukpo.

A bya agbanwee ya gẹ l’aagbanweje uwe.

Ọle gụbedua bẹ bụlewho onye ị bụ bẹ l’ịi-bụgburu,

ị nọwaa gẹ l’ịi-nọ jeye lẹ tututu-mịmimi.”

¹³Ọ tọ dụkwa ndu ojozhi-imigwe onye ọwhu Chileke sụjeru:

“Nọdu mụbe Chileke l’ẹka-ụtara jeye nteke mu l’e-me

ndu ọhogu ghu, whẹ abụru ghu iwhe

l’ịi-dzọpyabe l’ọkpa.”

¹⁴Sụa, ?ọo gụnu bẹ ndu ojozhi-imigwe bụ-zhia? Whẹ tụkoru bụkotaru ndụ-ojozhi l’ẹte awhụje l’ẹnya, l’ejekaaru Chileke ozhi, bụkwaruwho ndu, Chileke ono yeru tẹ whẹ bya eyeru ndu yẹbe Chileke l’ee-bekochaa dzọo ẹka.

Ndzọta, parụ ẹka

¹O noo iwhe meru anyi je l’atuzhi ẹwa l’okfu ono, anyi nụru; a nọnyadaawho anyi kpọo gengu-gengu kpọfu. ²L’ozhi ono ndu ojozhi-imigwe zhihawaru ono bẹ meru t’a marụ l’okfu ono l’ere ire. Ndu jịkaru ozhi ọbu mẹe ndu jịkaru ome iwhe Chileke kfuru b’ọ gwarụ ọchi, gbarụ whẹ nụ. ³Sụa, ndẹe g’anyịbedua l’e-shi nahụ ikpe iya, m’ọ -bụru l’anyi te ekudu eze adzọta ono, Chileke dzọtaru anyi ọkpobe iwhe? Ọ kwa Onye-Nwe-Ọha l’onwiya vu ụzo kfulahaa nke ndzọta ono. Ndu nụru iya nụ byakwanụ bya emee t’anyi marụ l’ọo ezhi-okfu. ⁴Chileke l’onwiya goshikwawho l’ọo ezhi-okfu nteke ono, o gude ike iya meshia iwhe-awhụrulenya, dụkota biribiri; wokwaruwho iwhe ono, shigee l’ẹka Ume-Dụ-Nsọ keshiaru ndu kweru nkiya lẹge ọ dụ iya mma l’uche.

Jisọsu l’egoshi ụzo ndzọta

⁵L’o tọ bụkwa ndu ojozhi-imigwe bẹ Chileke meru tẹ whẹ bụru ishi lẹ mgboko ono, l’ee-bechaa byanụ, bụ iya bẹ anyi l’ekfu okfu iya ọbu. ⁶Iwhe Chileke mechiaru bẹ dụnua g’ọo iwhe ọbu o nweru ẹka, e kfuru l’ẹkwo-okfu iya sụ:

“Gụbe Chileke,

?o zhia gụnu bẹ madzụ bụ nke t’i rivuje iya l’ọriri?

?O zhia gụnu bẹ nwa madzụ bụ nke t’i letaje iya ẹnya?

⁷I meru iya, iwhe ojozhi-imigwe gude ka iya shii ta aha g’ọo inyi-nvọ.

Ị kwabẹru iya ugvu,

mee ya o nweru ẹnya lẹge l’eemeje onye eze.

⁸Bya emee ya,

ọ dzọpyabekota iwhe lile, i meru eme l’ọkpa.”

Sụa, eshi o meru madzụ ọ dzọpyabe iwhe lile l’ọkpa bẹ bụkwa iya-a bụ l’ọ tọ dụdu iwhe ọ gụfuru iya t’ọ ka mma l’ọo nnanụ. Ọle ntaa bẹ l’ẹteke awhụdua gẹ madzụ shi bụru ishi iwhe lile ọbu. ⁹O chia Jisọsu bẹ anyi whụru lẹ Chileke meru iya: ọ ka nwa ọlwali l’ẹka ndu ojozhi-imigwe nọ, ọle ọ tọ kadụ whẹ nwa ọlwali ọbu nọo ọdu. Mbụ iwhe mekwaru ọ ka ọlwali ono bụru t’o shi l’eze-iwhe-ọma ọwhu Chileke l’eme nwụhu l’iswi ẹhu madzụ lile. Anyi whụru iya gẹ Chileke kwabẹru iya ugvu; mee ya; o nweru ẹnya lẹge l’eemeje onye eze nkele ọo l’o jeru iwhe-ọtsulanu; nwụhu. ¹⁰Iwhe lile shikota l’ẹka Chileke, tẹmenu ọ bụru iya bụ ishi iwhe lile. Ọo yẹbedua, bụ Chileke b’ọ gbarụ t’o shi l’iwhe-ọtsulanu, Jisọsu jeru; mee t’iwhe gbarụ onye ishi, l’egoshi ndiwhe ụzo ndzọta dzukota oke l’ẹhu iya. Ọo ya bụkwanu nke ọwhu Jisọsu ono l’e-goshije ndiwhe ụzo, ya l’e-shi dzọo whẹ; ya eshikwanu l’iwhe-ọtsulanu ono, o jeru mee ndu ha l’igweligwe tẹ whẹ bụru ndu nke Chileke, mbụ ndu whẹ lẹ Chileke l’a-tụko egbu zaazaa. ¹¹Lẹ yẹbedua, bụ Jisọsu l’emeje tẹ madzụ dụkota ree l’iwhu Chileke. Mẹ ndu ọbu, o meru tẹ whẹ dụkota ree ọbu bẹ whẹ l’iya tụkokwaru shi lẹ nna lanụ. O noo iwhe meru tọ dụ Jisọsu iwhere oku whẹ ụnwunna iya. ¹²L’ọ sụkwaru:

“Mu l’e-me t’ụnwunna mu marụ gụbe Chileke.

Mu l’a-kfụru l’echi ẹka ndu nke ghu dzukoberu

gụa egvu, gude tua ghu ẹwha.”

¹³Tẹmenu ọ sụkwawho: “Ọo Chileke bẹ mu l’e-woru onwomu ye l’ẹka.” Ọ sụkwawho ọdo: “Lee mu gẹ mu nọ l’ẹka-a, mu l’ụnwegirima ono, Chileke chịru nụ mu.”

¹⁴Eshi-ọwhu ụnwegirima ono bụkota madzụ kfụ ẹka, kfụru ọkpa bẹ kwa iya meru iwhe Jisọsu ono gbashileruwho bya abụru madzụ gẹ whẹ bụ. Iwhe meru o mee ya nno bụ nke ọwhu l’oo-shi l’anwụhu ono, ọ nwụhuru mebyia ike nke Oshifutuswe ono, bụ Sétanu; eshi-ọwhu ọ bụ yẹbe Sétanu ono shizhiawho bụtaru ike, anwụhu gude eme ire. ¹⁵Ọo ya bụ, Jisọsu shi l’anwụhu ono, ọ nwụhuru tọo whẹ l’uli, mbụ ndu ono shi nkeshi whẹ fụtaru eliwhe nọduta gẹ whẹ bụ ohu nkele ọo lẹ whẹ l’atsụ egvu anwụhu. ¹⁶Sụa, iwhe ọwhu kakwanụ odo ẹnya bụ l’ọ tọ bụdu ndu ojozhi-imigwe b’ọ byarụ tẹ ya yeru ẹka; ọo o-shi-l’eri Ébirihamu b’ọ byarụ tẹ ya yeru ẹka lẹge ẹkwo-okfu Chileke kfuru. ¹⁷O noo iwhe meru ọ bụru iwhe rwuberu iya erwube l’ọobyafutaje bya abụru madzụ lẹge ụnwunna iya ono bụ l’ụzo iwhe lile. Ọo ya bụkwanu nke ọwhu l’oo-shi nno bụru onye ishi ndu l’agbajẹ ẹja nụ Chileke, bụru onye obu-imiko, bụkwaruwho onye e gude ire iya ẹka l’iwhe lile l’oomeru Chileke, nke ọwhu l’e-shi nno Chileke agụaru ndiwhe nvụ l’iwhe-dụ-ẹji, whẹ metagbaberu g’ọ ha. ¹⁸Yẹbedua l’onwiya jewaru iwhe-ọtsulanu; ọ bụkwaru iya whọ iwhe adata. O noo g’o gude l’ọoduje ike yeru ndu iwhe adata byakfutaru ẹka nta-a.

Jisọsu kakwawhọ Mósisu

¹Ọo ya bụ, ụnwunna mu, bụ ndu Chileke kukwaruwho t’unu bụru ndu nkiya, unu rịjenua ọriri nke Jisọsu ono, bụ onye-ishi-ozhi mẹe onye ishi ndu l’agbajẹ ẹja nụ Chileke mẹe a bya l’iwhe ono anyi sụru l’ọo ọkpobe-okfu ono. ²Lẹ yẹbedua goshilekwaruwho Chileke ono, bụ iya họtaru iya t’ọ bụru onye ishi ndu l’agbajẹ ẹja nụ Chileke; lẹ ya bụ onye e gude ire iya ẹka, ọ kwarụwho nno bụ gẹ Mósisu goshikwaruwho Chileke lẹ ya gbarụ t’e gude ire iya ẹka l’ozhi, o jeru ndu Ízurẹlu l’owhu, bụ whẹ bụ ọnu-ụlo Chileke. ³Ọle ọ gbakwarụ nke t’a ka ọkwabe Jisọsu ugvu amamẹ Mósisu, mbụ ẹgube ono l’aakajẹ ọkwabe onye tụru ụlo ugvu amamẹ ụlo ọbu l’onwiya. ⁴A makwarụ-a l’ọ tọ dụdu ụlo l’ẹte abụa madzụ tụru iya, ọle ọ kwa Chileke bẹ mekwanuru iwhe lile. ⁵Sụa, Mósisu bẹ bụlekwawho onye ozhi kpụ; o goshiru Chileke l’iya bụ onye gbarụ t’e gude ire iya ẹka l’ozhi, o jeru ndu Ízurẹlu l’owhu; bụ whẹ bụ ọnu-ụlo Chileke. Ọ bụru iya goshiru iwhe Chileke bechaaru mee lẹ mgbe l’iwhu. ⁶A byakwanụ lẹ Kuráyisutu; ọ bụru Nwa, l’eleta ụlo Nna iya ẹnya. Nna iya ono bụ Chileke. O goshikwawho Chileke lẹ ya gbarụ t’e gude ire iya ẹka. Ọ bụkwanuru anyịbedua bụ ọnu-ụlo Nna iya ọbu, m’ọ -kwarụ l’obu shihuru anyi ike, anyi dobe obu l’iwhe ono, anyi l’ele ẹnya iya.

Chileke l’e-me tẹ ndu nkiya tụta ume

⁷Ume-Dụ-Nsọ kfukwaru sụ:

“Nteke unu nụru olu Chileke ntanụ-ọwa,

⁸t’unu ba akpochikwa obu unu gẹ ndụ-ichee unu whẹ

shi kpochia ya nteke ono,

whẹ kwefuru mu ike l’echi-ẹgu,

mbụ nteke ono whẹ shi anọje adata Chileke.

⁹Ọo ẹka ono bẹ ndụ-ichee unu whẹ nọdu data mụbe Chileke,

lelekwaa mu who elele,

l’ẹka whẹ whụkwaru-a iwhe mu meru l’ime ụkporo ugbo awha labọ.

¹⁰Ọ bụru iwhe ono meru g’o gude whẹ mee mụbe Chileke iwhe eghughu.

Mu sụkwanu whẹ:

Lẹ whẹ l’arị-sweje ọriri nteke nteke.

Lẹ whẹ teke ekwetadua shia ụzo, mu sụru tẹ whẹ shia.

¹¹Tọ dụ iya bụ lẹ whẹ akpatsua oke-ẹhu-eghughu mu,

mu ribua ya lẹ nte sụ:

‘Whẹ ta abyadụ l’abata l’ẹka mu lẹ whẹ l’a-nọdu tụta ume.’ ”

¹²Ọo ya bụ, ụnwunna mu, unu kwabẹkwaru onwunu ẹnya t’ọ bọ dụ onye ejo obu l’a-dụ l’ime unu, tọ dụhunu onye ọwhu l’a-bụ onye l’ete ekweje iwhe Chileke l’ekfu, nke ọwhu onye ono l’a-ha otso Chileke ono, nọ ndzụ. ¹³Iwhe unu l’e-mechia bụ t’unu kfushijeeru ibe unu okfu ike mbọku-mbọku, a fụtashizhiaru ku ntanụ, tẹ whẹ sefu ẹka l’iwhe-dụ-ẹji, t’ọ bọ dụ onye iwhe-dụ-ẹji l’e-duwhu, kpochia ya obu t’ọ bọ nụ olu Chileke. ¹⁴L’anyi tụkowaru bụru ndu nke Kuráyisutu, bụ ndu whẹ lẹ Kuráyisutu l’a-tụko gba mgba l’iwhe nkiya, m’ọ -bụru l’anyi kfụshileruwho ike l’iwhe ono, anyi shi lẹ mbụ dobeta obu ono jeye l’ikpazụ-a.

¹⁵O noo l’e deru l’ẹkwo Okfu Chileke sụ:

“Nteke unu nụru olu Chileke ntanụ-ọwa,

t’unu ba akpochikwa obu unu lẹge ndụ-ichee unu whẹ shi kpochia ya nteke ono,

whẹ kwefuru mu ike ono.”

¹⁶?Ọo ndu ole bẹ nụ-gezhiaru olu Chileke ono, whẹ kwefuleru iya ike? ?Tọ bụhedu ndu onoya, Mósisu dufutaru l’alị Íjiputu? ¹⁷?Ọo ndu ole bẹ kpatsuzhiaruwho Chileke ẹhu-eghughu ụkporo awha ugbo labọ? ?Tọ dụ ndu ono meru iwhe-dụ-ẹji, e megee whẹ tụko nwụshihukota l’echi-ẹgu? ¹⁸?Ọo ndu ole b’o riburu lẹ nte sụ lẹ whẹ ta abyadụ l’abata l’ẹka whẹ l’iya l’a-nọdu tụta ume? Ọo ndu ono l’ete ekwee ome iwhe o kfuru onoya. ¹⁹Ọo ya bụ l’anyi whụwaru-a l’iwhe kpatarụ t’o kweta tẹ whẹ bata tẹ whẹ l’iya tụta ume bụ lẹ whẹ te ekwedu mee iwhe ọ sụru tẹ whẹ mee.

¹Ọo ya bụ, l’eshi Chileke kwewaru anyi ụkwa l’anyi l’a-bata l’ẹka anyi l’iya l’a-tụta ume, t’anyi tsụjekwawho egvu, kwaa ẹnya ọkwa nkashị t’ọ bọ dụ onye l’aa-sụ l’o metaru iwhe l’e-me t’o bo rwu ẹka ono. ²O noo l’ọ kwawhọ gẹ ndụ-ichee ono, Mósisu l’eduzhi ụzo l’echi-ẹgu nụru ozhi-ọma lẹ Chileke l’eme tẹ ya dzọo whẹ, bụ g’anyi nụru iya nta-a. Obenu l’okfu ono, whẹ nụru nno ta adụdu mkpa, ọ garụ whẹ. Iwhe meru tọ dụ mkpa, ọ garụ whẹ bụ lẹ whẹ nụ-gezhiaru ụkwa, Chileke kweru, whẹ mee nchị gẹ whẹ ta anụdu iya. ³Ọlekwawho nteke anyi nụru ozhi Chileke ono, anyi -kweta iya, anyi abahụ l’ẹka ono onye lẹ Chileke l’a-nọdu tụta ume ono. L’o kfuakwaru okfu ẹhu ndu l’ete ekwee ome iwhe o kfuru sụ:

“Whẹ kpatsuru oke-ẹhu-eghughu nkemu,

mu rịbua ya lẹ nte sụ:

‘Whẹ ta abyadụ l’a-bata l’ẹka mu lẹ whẹ l’a-nọdu tụta ume.’ ”

O kfua ya nno, l’ẹka ozhi iya gbee gvuhaakwaro eshi nkeshi nteke o megeeru mgboko. Anyi marụ l’o shi nkeshi nteke ono kwabẹta t’a bata l’ẹka ono. ⁴L’o nweru ẹka, o kfukutaru mbọku nke ẹsaa l’ẹkwo Okfu Chileke sụ: “O be lẹ mbọku nke ẹsaa, Chileke tụta ume iwhe lile o mekotaru.” ⁵Ọle o kfukwaruwho l’ẹka lanụ ono sụ: “Whẹ ta abyadụ l’a-bata l’ẹka ono mu lẹ whẹ l’a-nọdu tụta ume.” ⁶Sụa, ndu vu ụzo nụa ozhi-ọma ono nke lẹ Chileke l’eme t’ọ dzọo whẹ, ta abahụkwa l’ẹka ono nkele whẹ te ekwetadu mee gẹ Chileke kfuru. Ọo ya bụ l’ụzo dụkwadua l’ẹka ono nke ọwhu o nweru ndu l’a-bahụ iya. ⁷O noo iwhe meru Chileke gbashikwa bya ewota mbọku ọdo dobe, bụ iya bụ “Ntanụ”. A bya anọ-zhiakwaro ọdu shii, gẹ abahụ ono rwụhu-geeru tẹmenu Chileke shi l’ọnu onye eze whẹ lẹ ndụ-ichee, bụ Dévidi kfua okfu iya l’ẹka ono, e kfuhawaru sụ l’ọ sụru:

“Nteke unu nụru olu Chileke ntanụ-ọwa,

T’unu ba akpochikwa obu unu.”

⁸L’ọ tọ kwa alị Ízurẹlu whọ Jóshuwa du whẹ bahụ nteke ndụ-ichee whọ bẹ l’ookfu okfu iya. Lẹ nggẹ l’ọo iwhe Jóshuwa -duwaa whẹ bahụ l’ẹka ọbu, whẹ lẹ Chileke l’a-nọdu tụta ume ọbu, bụ iya bẹ Chileke l’ekfu okfu iya ọbu mẹe Chileke te ekfuhekwa nke odobe mbọku ọdo. ⁹Ọo ya bụ l’iwhe ono, Chileke kfuru l’egoshi lẹ nteke ndu nkiya l’a-bahụ l’ẹka ono onye l’iya l’a-nọdu tụta ume ono l’abyaakwa, mbụ ọtuta-ume ọwhu onye ono l’a-tụta ọkpobe atụta l’iwhu iya. ¹⁰L’iwhe bụ onye bahụru l’ẹka ono, onye lẹ Chileke l’a-tụta ume ono l’a-tụtakwa ume iwhe bụ ozhi, o shi jeta g’ọ ha, lẹge Chileke tụtakwanuru ume lẹ mbọku kwe ẹsaa, g’ọ megeeru mgboko. ¹¹Ọo ya bụ t’anyi kebe ẹhu bahụ l’ẹka ono yẹle ndu nkiya l’a-tụta ume ono. T’ọ bọ dụkwa g’anyi ha onye l’e-je okwefuru Chileke ike, lẹge ndu Ízurẹlu meru nteke ndụ-ichee ono, whẹ ta abahụhe l’ẹka ono.

¹²L’okfu Chileke bẹ nọkwa ndzụ, emekwawho ire. Ọ kakwa ogu-ịgba, l’atsụ nkọ iwhu labọ. Ọotsushi nkọ ike nke ọwhu l’ọosujaje madzụ sụ-rwua mgbakụ ọkpu yẹle ụmi, mbụ sụ-rwua ẹka obu madzụ dụ, uche iya dụ iya. Ọovofutaje iwhe madzụ l’arị mẹe-gezhia gẹ madzụ gbarụ l’ime obu iya. ¹³O to dụ-zhidua iwhe dụ lẹ mgboko-o ọwhu Chileke l’ẹte awhụkotaa. Iwhe lile, dụ lẹ mgboko gbakọta ọto, daburu l’ebedebe l’iwhu iya. Ọ bụru Chileke ono bụ onye anyi l’a-kfụru l’iwhu, kọkota iwhe anyi meru.

Jisọsu bụ ọkalibe onye ishi ndu l’agbajẹ ẹja nụ Chileke

¹⁴Ọo ya bụ, unu t’anyi kwata gudeshia iwhe ono, anyi sụru l’ọo ọkpobe-okfu ẹka ike, o noo l’anyi nweru ọkalibe onye ishi ndu l’agbajẹ ẹja nụ Chileke, mbụ onye tụkoru igwe l’owhu ghakọta je anọdu l’imigwe l’ẹka Chileke l’onwiya nọ. Onye ono bẹ bụ Jisọsu Nwa Chileke. ¹⁵Ọkalibe onye ishi ndu l’agbajẹ ẹja nụ Chileke ono, anyi nweru ono ta abụkwa ẹgube onye l’ẹte amaa ẹka l’ọotsu anyi lanụ, m’ọ -nahụ anyi. Onye anyi nweru bụ onye iwhe adata dụ-gee l’iche l’iche byakfutawaru nteke ọ nọ lẹ mgboko-o. Iwhe adata byakfutawaru iya lẹge l’ọobyakfutaje anyi, to me iwhe-dụ-ẹji. ¹⁶Ọo ya bụ t’obu shihu anyi ike t’anyi jerwua oshi-eze Chileke gẹdegede bụ iya bụ ẹka Chileke nọ, bụkwaru iya whọ bụ ẹka l’eeshije emeru anyi eze-iwhe-ọma, tẹ Chileke meeru anyi imiko, yejekwaruwho anyi ẹka mẹe mkpa byarụ anyi.

¹L’iwhe bụ-zhia onye ishi ndu l’agbajẹ ẹja nụ Chileke gẹ whẹ hakọta bẹ bụkwa ndiwhe l’edzukobeje shi l’echilabọ whẹ họta iya, mee ya onye l’anọ-chije ẹnya ọha l’iwhu Chileke. Iwhe whẹ l’ahọta-tujeru iya bụ t’ọ nụje Chileke iwhe ndiwhe nụru iya mẹe t’o gbakwaawhọ ẹja nụ Chileke lẹ nke iwhe-dụ-ẹji, ndiwhe ono metagbaberu. ²Yẹbedua l’ejije obu oyi etso ndu l’eshiswe ụzo nke l’ọo lẹ whẹ bụ ndu l’ẹte amaa iwhe, o noo lẹ yẹbedua l’onwiya bụkwawho onye l’ahajẹkwaruwho meswee mẹ l’eenwu iya eye t’o mee iwhe-dụ-ẹji. ³Eshi-ọwhu yẹbedua bụkwawho onye l’emesweje, b’ọ gbafụtajekwaru Chileke ẹja nke iwhe-dụ-ẹji ọwhu yẹbedua l’onwiya metaru bụ iya bụ lẹge l’ọogbajekwawho ẹja nke l’ọo lẹ ọha mesweru. ⁴Iwhe ọdo bụ l’ọ tọ dụdu onye, l’agbashije họta onwiya kwabẹ onwiya ugvu nke ọbu onye ishi ndu l’agbajẹ ẹja nụ Chileke. Ọo onye Chileke l’onwiya họtaru l’abụje iya, bụ iya bụ g’ọ họtaru Érọnu lẹ nteke ndụ-ichee.

⁵O nokwawho gẹ l’ọobua Kuráyisutu bẹ gbashileruwho kwabẹ onwiya ugvu nke ome onwiya onye ishi ndu l’agbajẹ ẹja nụ Chileke. Iwhe mechiaru nụ bụ l’ọo Chileke sụru iya:

“Ọo ghu bụ Nwa mu,

wata ntanụ-a bẹ mu bụakwa Nna ghu.”

⁶Ọ byakwa ekfua l’ẹka ọdo sụ:

“Ịi-bụ onye l’agbajẹ ẹja nụ Chileke jeye lẹ tututu-mịmimi;

Bụ iya bụ lẹge Melikízedeku bụ iya.”

⁷Nteke Jisọsu bu l’eliwhe ọwa b’o shi anọje arya ẹkwa, akwashị ẹnya-mini gude ekfu anụ Chileke, aryọ iya aryọ, mbụ Chileke bụ iya bụ onye sụru lẹ ya l’a-dzọfuta iya l’ẹka ọnwu. O kfua nno Chileke nụa olu iya, o noo l’ọ bụ onye l’ewozetaje onwiya alị kwabẹ Chileke ugvu. ⁸Sụ, a makwarụ-a l’ọ bụ Nwa nke Chileke, ọle ọo iwhe-ọtsulanu ono, o jekotaru b’o gude nwụta iwhe ome iwhe Chileke sụru t’e mee bụ. ⁹O bụru gẹ Jisọsu ono tụkoodaru iwhe Chileke tụberu medzuada b’ọ byarụ bya abụru onye l’adzọtaje iwhe bụ ndu l’eme iwhe o kfuru, whẹ bya abụru ndu ọ dzọtaru jeyewaro ya. ¹⁰O noo lẹ Chileke bya ahọtawa iya, mee ya ọ bụru onye ishi ndu l’agbajẹ ẹja nụ Chileke jeyewaro lẹ tututu-mịmimi gẹ Melikízedeku bụ.

Unu kwachafụru onwunu ẹnya, t’unu ba alakwa azụ

¹¹O nweru igweligwe iwhe anyi gege ekfu whota iwhe-e ya, ọle ọotsu l’ẹhu gẹ l’ee-shi kọoru iya unu; o noo l’iwhe te edojedu unu ẹnya ẹgwegwa. ¹²Ọle e kfude iya ekfu bẹ unubẹdua gbaakwarụ t’unu bụru ndu gẹge abụwaa ndu, l’ezhi ndu ọdo iwhe, obenu l’unu gbee dawhu azụ, bya abụwaru ndu kweshiru gẹ l’aa-nọ ezhi unu iwhe gbarụ nke t’unu mahawarụ iya l’okfu Chileke. Unu dụkwadu g’ọo ụnwegirima kweshiru t’e cheje whẹ ẹra. Ọ bụru unubẹ ndu ọ gbawarụ t’unu dụ g’ọo ọgurenya l’erijewaa nri. ¹³Onye l’echekwadu ẹra bẹ bụ nwata. Ọ tọko marwetaadua iwhe nke ọwhu l’ọo-ma l’iwhe ọwhu dụ ẹji mẹe l’iwhe ọwhu dụ ree. ¹⁴Obenu lẹ nri bụ nke ndu bụwaa ọgurenya. Ndu a zụwaru azụ whẹ mawarụ iwhe nke ọwhu bụ whẹ -lee iwhe ẹnya, whẹ amarụ, ọ dụ ree tọ dụ ẹji.

¹Eshi-ọwhu ọ dụ nno, unu t’anyi dochakota iwhe ono, gbarụ t’anyi vuru ụzo marụ iya l’ozhi ono, e zhiru anyi nke Kuráyisutu ono. Unu t’anyi gbechia yeru ẹhu l’ọnwu iwhe l’e-me t’anyi bụru ọgurenya, karụ ẹnya l’ozhi ono. Sụa, t’anyi ba abyashị awata ogbube ishi nke ozhi ivurụzo ono, gbarụ t’anyi mahawarụ iya ono, mbụ t’anyi wofu obu l’anọ arị l’ọo iwhe-ọma anyi metaru bẹ Chileke l’e-gude dzọo anyi; l’o noo bụkwa nke mmaanụ; t’anyi wochiaru onwanyị ye Chileke l’ẹka. ²Ọdo bụ, nke ome baputizimu mẹe nke ọbyakwase madzụ ẹka l’ishi mẹe nke lẹ madzụ lile l’ee-megee shi l’ọnwu teta nọ-duwhu ndzụ azụ, mẹe nke ikpe ono, l’a-nọwaro jeye lẹ gbururu, Chileke l’e-kpe ndiwhe. ³Unu t’anyi nwụlahaa iwhe l’e-me t’anyi bụru ọgurenya, karụ ẹnya l’ozhi ono. Ndu ọwhu bẹ anyi l’ee-bekokwaa mee, m’ọ -bụru l’ọ dụ Chileke ree t’e mee ya.

⁴?Ndẹe gẹ l’ee-shi mezhikwadua onye shi etsohawaa iwhoro nke Chileke, a nọnyaa ọ haa ya, t’ọ lwawhukwadu azụ ọdo? Onye ono bẹ shi bụwaru iwhoro nke Chileke shi edu iya. Ọ bya anatawaa iwhe-ọma ọwhu shi l’ẹka Chileke, ọ lịru lẹ ndu gbawaa mgba nweru Ume-Dụ-Nsọ. ⁵Onye ono magezhiaru-a l’okfu Chileke dụ ree, o gudeekwawho ẹhu iya whụ g’ike nke mgboko ọwhu l’a-bya nụ l’emebe ire. ⁶Ọ tụkota iwhe ono makọtaru, ọ gbẹkwaaruwho Chileke azụ. Ọ nyịru ẹka g’onye ono l’e-mebakwadua daa onwiya ụta ọdo, haa iwhe-dụ-ẹji, lwakfutakwadu Chileke eshi-ọwhu o lekebewaru ẹnya akpọpyabe Nwa Chileke l’oswebe ọdo, eme iya iwhe iwhere l’edzudzu-ọha.

⁷Sụa, l’alị, l’echeje mini, igweli l’achịjeru iya nteke nteke, gude iya eme t’iwhe a kụru iya gaarụ ndu kụru iya nụ mkpa bẹ Chileke l’a-gọkwaru ọnu-ọma nụ. ⁸Ọle alị ọwhu bụlewho ẹwu-ogvu yẹle ọgara-mbo bẹ l’ọonoje efushi bẹ bụkwa alị ụchi gbarụ. Alị ono b’o whọduwaru-a nwanshị Chileke atụ iya ọnu. Ee-bekochaa, ya abụru ọku l’a-dzụ iya. ⁹Ọle-a, ndu mu yeru obu, l’iwhe-e anyi l’ekfu ẹgube-ẹ bụkwa ezhi-okfu, ọle anyi makwarụ-a l’unu l’e-tsoru ụzo ọwhu ka ree, l’e-me tẹ Chileke dzọta unu. ¹⁰Lẹ Chileke te emejekwa iwhe l’ẹte akfụaru nhamụnha. Ọ tọo zọhakwa ozhi, unu jeru, tọo zọha g’unu gude yehawaru ụnwunna ẹka mẹe ọwhu unu l’eyekwawho ntaa. Iwhe ono bẹ tụkoru egoshi l’unu yeru iya obu. ¹¹Iwhe l’agụ anyi bụ t’onyenọnu l’echilabọ unu meje goshi lẹge nke Chileke gude awhọ-shibe iya ike l’obu, t’onyenọnu meje iya nno jeye lẹ mgbe ikpazụ, nke ọwhu iwhe ono, unu l’ele ẹnya iya l’e-rwube unu ẹka. ¹²Iwhe anyi l’ese anya iya bụkwa t’unu ba abụ ndu ẹnyiru. T’unu wọta-chia ẹka ndu ono gude ekweta, whẹ kwetaru l’okfu Chileke mẹe ọta-nshi, whẹ l’ata, gude anata iwhe ono, Chileke nọdu kwegbabe ụkwa iya.

Iwhe Chileke kweru ụkwa iya bụ ezhi-okfu

¹³Sụa, nteke ono Chileke kweru Ébirihamu ụkwa iwhe ono bẹ bụkwa onwiya b’o gude riaru iye ya nte. O gude onwiya riaru iya nte ono nkele o to nwedu onye ọdo kabaa ya shii, bụkwanu iya b’o g’o gude riaru iya nte ọbu. ¹⁴Tọ dụ iya bụ l’ọ sụ: “E -mee eli mee alị bẹ mu l’a-gọlekwaru ghu-a ọnu-ọma, mee: ụnwu ghu akwata ha l’igwe.” ¹⁵E megee Ébirihamu taa nshi. Ọ taa nshi ono, ọ nata iwhe-ọma ono, Chileke kweru iya ụkwa iya. ¹⁶Onye l’eri nte bẹ bụ ẹwha onye ka iya shii bẹ l’oogudeje ria ya, l’ọobuje e riwaa nte l’okfu bụ-zhia okfu ndiwhe l’ekfu ekfu, nke ẹgo ebuhu. ¹⁷O nokwawho gẹ Chileke shi eme t’o doo whẹ ẹnya, mbụ ndu ono, l’a-nata iwhe ono, o kweru ụkwa iya ono lẹ ya ta afụdu gbanwee iwhe ya tụberu nke ememe. Ọ bụru iya meru g’o gude o ria nte tukobe l’ụkwa iwhe ono, o kweru. ¹⁸Sụa, Chileke bẹ kweru anyi ụkwa iwhe, t’ọ bya eriru nte tukobe iya, ụzo iwhe labọ ono bụ-gekwaa iwhe l’ẹte agbanwe agbanwe, ọ bụkwaruwho iwhe Chileke l’ẹte afụa dzụru ejire ye. Ọo ya bụ, nggẹ obu eshihu anyi ike, mbụ anyịbe ndu ọwhu gbakfuru iya t’ọ dzọo anyi, t’anyi bẹ eje ọbo obu ẹbo nke woo, a marụ ?l’ọo-nụa anyi iwhe ono, anyi l’ele ẹnya iya. ¹⁹Iwhe ono, anyi l’ele ẹnya iya ono l’emeje t’obu gvuru anyi egvuru. Oosedeje anyi obu l’ẹka lanụ gẹ l’eesedeje ụgbo l’agụga mini t’ọ bọ dụ iwhe l’e-me iya nụ. Iwhe ono, anyi l’ele ẹnya iya ono bẹ wotawaru anyi lile l’ẹka Chileke nọ. Ọ bụru nggẹ e shi nno, t’anyi bahụ l’ime ime eze-ụlo iya ono bụ iya bụ ẹka Chileke l’onwiya nọ l’imigwe. ²⁰Ọo Jisọsu bẹ bụ onye vu ụzo bahụ ẹka ono l’iswi ẹhu anyi, nkele ọo ya bụwaa onye ishi ndu l’agbajẹ ẹja nụ Chileke. Ọ bụru iwhe ono bẹ l’ọo-bụ jeye lẹ tututu-mịmimi, bụ iya bụ lẹge Melikízedeku bụ iya.

Melikízedeku shi bụru eze, bụkwaruwho onye l’agbajẹ ẹja nụ Chileke

¹Melikízedeku ono, anyi l’ekfuru shi bụru eze ndu Sélẹmu lẹ nteke ndụ-ichee, bụkwaruwho onye l’agbajẹ ẹja nụ Chileke, mbụ Chileke ono, bụ Ọkalibe-Kangokotaru-Nu. Nteke ono Ébirihamu shi ọgu ono, o gbushiru ndu eze alwa bẹ Melikízedeku ono jeru iya ndzuta. Yẹ l’iya dzulewho, ọ gọru ọnu-ọma nụ Ébirihamu. ²Ébirihamu bya ewota iwhe lile, ọ lwụtaru l’ọgu tsua ụzo iri, nụ iya ụzo lanụ. A -kọkashide iwhe ẹwha Melikízedeku fụtaru, bẹ iwhe mbụ ọ bụ bụ: “Onye eze dụ chịriri”. Iwhe ọdo ẹwha iya bụfutakwaawho bụ: “Onye eze l’emeje t’ẹhu dụ guu,” eshi-ọwhu ọ bụ eze ndu Sélẹmu. Iwhe Sélẹmu futaru bụ ẹhu ọdu guu. ³Melikízedeku te enwekwa ne to nwee nna, to nwe eri ẹka o shi. A bya l’a madeshia ọ nọduwaa. A ta anwụdu iya anwụ, tọ nwụhu anwụhu. Ọo ya bụ l’ọ dụwaa g’ọo Nwa Chileke, nkele ọ bụwaa onye l’agbajẹ ẹja nụ Chileke jeye lẹ tututu-mịmimi.

⁴Sụa, unu whụwaru gẹ Melikízedeku ono bụ-be oke madzụ. Ọ bụta-be oke madzụ nke ọwhu o gbee bụ-chiaru yẹbedua bẹ Ébirihamu ono bụ iya bụ onye-ichee anyi gbee wota iwhe ọ lwụtaru l’ọgu kee ụzo iri wota ụzo lanụ nụ iya. ⁵Ọ kwa ndu l’agbajẹ ẹja nụ Chileke, shi l’ẹpa Lívayi kpụ bẹ iwu Mósisu sụru tẹ ndu Ízurẹlu nụje ụzo-lanụ-l’ụzo-iri l’iwhe whẹ nweru. Ọ bụru whẹ bẹ iwu sụru tẹ whẹ natajẹ unwune whẹ iwhe ono, mbụ l’ẹka whẹ lẹ whẹ gbẹkwa tụko bụru ụnwu Ébirihamu. ⁶Obenu lẹ Melikízedeku te eshikwa l’ẹpa Lívayi. Ọle Ébirihamu ono bẹ wotaleru-a ụzo-lanụ-l’ụzo-iri l’iwhe o nweru nụ iya, ọ nata iya. Melikízedeku gọru ọnu-ọma nụ Ébirihamu, mbụ gọru ọnu-ọma nụhukwaa Ébirihamu-a Chileke kwegbaberu ụkwa iwhe ono. ⁷A ta ajịdu nke woo a marụ ?onye l’agọ ọnu-ọma;, ọ ka onye l’ọogoru iya shii. ⁸A bya l’ẹhu nke ndu ono, l’agbajẹ ẹja nụ Chileke, shi l’ẹpa Lívayi, unu awhụ l’ọo ndu l’ee-megee nwụhu anwụhu bẹ l’anatajẹ ụzo-lanụ-l’ụzo-iri ono. Nteke a byakwanụru l’ẹhu nke Melikízedeku, unu awhụ l’ọo yẹbedua, bụ onye ẹkwo Okfu Chileke kfuhawaru l’ọ tọ nwụhudu anwụhu bẹ natarụ iya nụ. ⁹Sụa, e -jeshia ya ekfukfu a whụ lẹ nteke ono, Ébirihamu keru iwhe iya ụzo iri, nụ Melikízedeku ụzo lanụ bẹ bụwaa Lívayi ono, ụnwu iya l’anatajẹ ụtu ono ntaa bẹ shi l’ẹka Ébirihamu nụkwa iya whọ Melikízedeku. ¹⁰A makwarụ-a lẹ Lívayi bẹ l’ẹeteke anwụ-zhiduanu m’ọo nteke ono. Ọle ọ nọwaa l’ẹhu ochee-oroke iya ono bụ Ébirihamu nteke ono Ébirihamu keru iwhe iya ụzo iri, nụ Melikízedeku ụzo lanụ.

¹¹Sụa, ọ kwa gẹ ndu l’agbajẹ ẹja nụ Chileke, shi l’ẹpa Lívayi nọoda bẹ Chileke tụru iwu iya, nụ ndu Ízurẹlu. Ọle ozhi ono, ndu l’agbajẹ ẹja nụ Chileke jeru ta adụdu ike mee t’iwhe Chileke tụberu lẹ nke gẹ ndiwhe l’e-meje bata l’ẹka ya nọ, vuru ire lẹge ọ tụberu iya. Nggẹ l’ọo iwhe ozhi ono whẹ jeru dụ ike mee iwhe ono mẹ e te ejehekwa okfu okfu onye l’agbajẹ ẹja nụ Chileke ọdo, bụkwanu iya bụ Kuráyisutu, bụ onye ishi ndu l’agbajẹ ẹja nụ Chileke, ọle yẹbedua te eshidu l’eri Érọnu bụ iya bụ ẹpa Lívayi. Ọo ya bụ l’e tege ejehedu okfu okfu onye ishi ọdo l’agbajẹ ẹja nụ Chileke dụ g’ọo Melikízedeku. ¹²Ọle nteke Chileke gbanwewaru onye l’agbajẹ ẹja nụ iya, họta ndu l’agbajẹ ẹja ọdo, yẹle ndu ọwhuna l’abụhee iwhe lanụ, ọo ya bụ l’aagbanwefutaje iwu ono. ¹³Onye-nwe-anyi Kuráyisutu bụ iya bụ onye-e, l’eekfu okfu iya-a bụkwa rọ onye ikfu ọdo, tọ dụhunu onye ikfu whẹ jejeru ozhi nke ọgba ẹja Chileke l’ẹnya-mgbẹja Chileke. ¹⁴O dokotaru ẹnya l’a nwụru iya ọ bụru onye ikfu Juda, tọ hẹkwanu l’ọ dụ nteke Mósisu whotaru Juda ọnu, nteke ono l’eekfu okfu nke ndu l’agbajẹ ẹja nụ Chileke.

Onye ọdo l’agbajẹ ẹja, bụ ọ dụ g’ọ bụ Melikízedeku

¹⁵Lee l’ozhi ndu l’agbajẹ ẹja nụ Chileke, shi l’ikfu Lívayi jeru ta adụdu ike mee, t’iwhe Chileke tụberu lẹ nke gẹ ndiwhe l’emeje bata l’ẹka ya nọ, vuru ire lẹge ọ tụberu iya. O noo iwhe meru: ọ kabaa odo ẹnya g’onye ọdo l’agbajẹ ẹja nụ Chileke fụtaru bụ iya bụ onye onoya dụ g’ọo Melikízedeku. ¹⁶Abụbu ọwhu yẹbedua bụ onye l’agbajẹ ẹja nụ Chileke ta abụhekwa nsọ nsọ mẹe iwu iwu, madzụ tụshiru dobe b’o gude bụru iya. Ọ kwa ike nke ndzụ tututu-mịmimi ọwhu ọ nọ b’o gude bụru onye l’agbajẹ ẹja nụ Chileke. ¹⁷L’iwhe ono b’e dekwaru l’ẹkwo Okfu Chileke sụ:

“Ịi-bụ-zhiawho onye l’agbajẹ ẹja nụ Chileke jeye lẹ tututu-mịmimi

lẹge Melikízedeku bụ iya.”

¹⁸Iwu who, Chileke tụhawaru b’o dochaakwaru nkele o to medu ire, tẹmenu ọ bụru mkpọkoro iwhe mmaanụ. ¹⁹Iwhe meru ọ dụ nno bụ l’iwu Mósisu ono ta adụdu onye ọ dụ ike mee t’ọ dụkota ree l’iwhu Chileke. Lẹ ntaa bẹ anyi l’eleekwaa ẹnya iwhe ka ree. Ọ bụru iwhe ono, ka ree ono, anyi l’ele ẹnya iya, bẹ anyi shiwaa anọkube Chileke ntse.

²⁰Iwhe ọdo tso iya bụ lẹ Chileke bẹ rikwaruwho nte ye iya. Ndu ọwhu b’e meru ndu l’agbajẹ ẹja nụ Chileke, nke ori nte ta adụ iya. ²¹Ọle ọwhube Jisọsu bẹ Chileke meru onye l’agbajẹ ẹja nụ Chileke ribuaru iya nte nteke ono ọ sụru iya:

“Onye-Nwe-Ọha ribuwaru iya lẹ nte,

ọ tọ fụdu gbanwee iwhe, o tụberu nke ememe:

‘Ịi-bụ onye l’agbajẹ ẹja nụ Chileke jeyewaro.’ ”

²²Ọ bụru nte ono Chileke riburu bẹ meru Jisọsu: ọ bụru onye Chileke gude egoshi l’ọgbandzu ọwa-a, ya riru nte ye-e ka akahụ iya ree.

²³Iwhe ọdo bụru lẹ ndu l’agbajẹ ẹja nụ Chileke, shi l’ikfu Lívayi bẹ ha l’igweligwe. Ọobuje onye ọwhu a họtaru, ya abya ejee ozhi nke ọgba ẹja nụ Chileke ono jeye ya akata nka gwụgwohu nwụhu. Onye ọdo abyakwa anochia ẹnya iya nkele ọnwu te ekwejedu tẹ whẹ jee ozhi ono jeyewaro. ²⁴Ọle ọwhube Jisọsu bẹ bụlewho onye l’agbajẹ ẹja nụ Chileke, ọ bụ bụshia ya ike, o noo lẹ yẹbedua l’a-nọdugburu jeye lẹ tututu-mịmimi. ²⁵Ọo iwhe ono bẹ meru l’ọoduje ike dzọo ndu shi iya l’ẹka byakfuta Chileke, mbụ dzọo whẹ tẹ whẹ nọdu ndzụ tututu-mịmimi. Iwhe ono bẹ l’ọoduje ike mee nkele yẹbedua bẹ nọwaa ndzụ tututu-mịmimi, ekfuje anụ Chileke l’iswi ẹhu whẹ.

²⁶Ọo ya bụ l’ọo Jisọsu bụ onye ishi ndu l’agbajẹ ẹja nụ Chileke, bụkwanu ẹgube onye l’agbajẹ ẹja nụ Chileke ọwhu mkpa iya dụ anyi. Ọo onye dụ nsọ l’iwhu Chileke. Ụta ta adụdu iya l’ẹhu, tọ dụ ejo iwhe o mejeru. Chileke họfuru iya iche l’echilabọ ndu l’eme iwhe-dụ-ẹji, wolia ya woghakota iwhe bụ igweli l’owhu. ²⁷Ndu ishi ndu l’agbajẹ ẹja nụ Chileke ọwhuna shi l’ikfu Lívayi shi anọje eme nke ẹja ono mbọku-mbọku. Whẹ shi anọje agba ẹja ono agbaturu iwhe-dụ-ẹji ọwhu whẹbedua metagbaberu, whẹ agbatukwaru iya who ẹhu ọha l’owhu. Ọle Jisọsu bẹ l’ọogbadua nke t’ọ gbaa nkiya g’ọo whẹbedua. Ọ gbarụ nkiya ugbo lanụ sefu ẹka. Ugbo lanụ ono bụ ọwhu o gude onwiya gbaa. ²⁸Mebyi okfu, iwu Mósisu bẹ kwa madzụ mmaanụ b’ọ sụru tẹ whẹ bụru ndu ishi ndu l’agbajẹ ẹja nụ Chileke, mbụ madzụ mmaanụ l’ahajẹkwaru-a meswee. Obenu lẹge a nọnyaaru, Chileke bya eria nte whọ, shi nno docha iwu ono b’ọ họtaru Nwa Chileke, mee ya: onye ishi ndu l’agbajẹ ẹja nụ Chileke. Yẹbedua bụ Nwa Chileke ono, bẹ medzuwaru iwhe lile, dụkota lẹ nke gẹ ndiwhe l’e-meje bata l’ẹka Chileke nọ, lẹge Chileke tụberu iya. Iwhe ono b’e medzuru gẹ l’ọo-dụ jeyewaro lẹ tututu-mịmimi.

Jisọsu bụ onye ishi ndu l’agbajẹ ẹja nụ Chileke l’ẹhu nke anyi

¹Ishi iwhe ono anyi shi kfuta ono bụ: anyi nweru ẹgube onye ishi ndu l’agbajẹ ẹja nụ Chileke ono bụ iya bụ Kuráyisutu onye ọwhu nọdu anọdu l’imigwe l’ẹka-ụtara oshi-eze Ọkalibe-kangokotaru nụ. ²Yẹbedua l’eje ozhi ọgba ẹja nkiya l’ẹka Chileke nọ gẹdegede bụ iya bụ l’eze-ụlo Chileke ọwhu dụ l’imigwe. Ụlo onona ta abụdu madzụ gude ẹka iya mee ya. Ọ rọo Chileke l’onwiya meru iya.

³Iwhe Chileke họta-turu iwhe bụ-zhia ndu ishi ndu l’agbajẹ ẹja iya bụ, tẹ whẹ nụje iya iwhe ndiwhe nụru iya mẹe tẹ whẹ gbajẹkwawho ẹja nụ iya. Ọo ya bụ, l’o rwuberu erwube t’onye ono, l’agbajẹ ẹja nụ Chileke ono, bụ iya Kuráyisutu nweru iwhe l’oo-gude agba ẹja anụ Chileke ọbu. ⁴Ọo ya bụ lẹ nggẹ l’ọo iwhe Kuráyisutu ono nọ l’eliwhe-e m’e te ekwekwanu m’ọo t’ọ bụru onye l’agbajẹ ẹja nụ Chileke, eshi-ọwhu ndu l’agbajẹ ẹja nụ Chileke lẹ mgboko-o l’agba ẹja anụ Chileke lẹge a tụru iya l’iwu ndu Ju. ⁵Iwhe whẹ l’emeje l’ẹka l’agbajẹ ẹja nụ Chileke lẹ mgboko-o bẹ bụ-zhiawho iwhe shiru ọwhu onye ishi ẹja nke anyi ono l’eme l’imigwe, nke mgboko-o bụkwa inyonyo iya nkiya l’imigwe. Lẹ nteke Mósisu l’eme tẹ ya kpọbe ụlo-ẹkwa, l’aagbajẹru Chileke ẹja ono lẹ nteke ndụ-ichee bẹ Chileke sụkwaru iya: “Nyatakwa mekotalewho ụlo ono t’ọ dụlewho lẹge mu tụru ghu ọnu iya l’eli ugvu who.” ⁶Obenu lẹge ọ dụ nta-a, bụ lẹ Chileke bẹ zhiwaru Jisọsu oje ozhi nke ọgba ẹja Chileke, mbụ oje ozhi ọwhu ọnodu iya kwatarụ ka shii amamẹ nke ndu l’agbajẹ ẹja nụ Chileke ọwhua. O nokwawho g’ọgbandzu ọwhuu, shi iya l’ẹka, o gude gudegbabe madzụ yẹle Chileke kwatarụ ka akahụ iya ree, o noo l’o shi l’ọgbandzu ọwa kweta anyi ụkwa iwhe ka ree amamẹ ọwhu o shi l’ọwhuna kwewho.

⁷Sụa, ọ -bụ l’ụta ta adụ l’ọgbandzu nke mbụ whọ, m’o to jekwa iya edocha wata nke ọgbandzu ọdo. ⁸Ọle Chileke bẹ tarụ ndu nkiya ụta nteke ono ọ sụru:

“Oo-nwekwa-a mbọku l’aa-nọnyaa,

mbẹdua mẹe ndu Ízurẹlu,

mẹe ikfu Juda agbaa ọgbandzu ọwhuu.

⁹O noo ta adụhekwa g’ọo ọgbandzu ọwhu

mu lẹ ndụ-ichee whẹ gbarụ ono,

bụ iya bụ mbọku ono, mu kpụtaru whẹ l’ẹka kpụfu l’alị Íjiputu.

E megekwaaru, whẹ mebyia ọgbandzu ono,

mu lẹ whẹ gbarụ.

Ọ bụkwanuru iwhe ono meru mu te eyebaheeru whẹ ọnu,

O nokwa iwhe Onye-Nwe-Ọha l’ekfu ndono.

¹⁰Ọ waa bụ ọgbandzu mu l’ụnwu Ízurẹlu l’a-gba

m’o -rwulewho nteke ono.

Iwu mu bẹ mu l’a-tụshi ye whẹ l’ego,

mu l’e-de iya gẹ l’eedeje ẹkwo l’ime obu whẹ,

nggẹ whẹ majẹru iwhe mu sụru tẹ whẹ mee.

Mu a-bụru Chileke whẹ, whẹ abụru ndibe mu.

¹¹Ọ tọ dụhedu onye l’ejekwadu ezhilahaa ibiya,

ọdua l’ọo nwune iya asụ iya: ‘Marụ Onye-Nwe-Ọha,’

o noo lẹ whẹ lile l’a-tụkota marụ mụbe Chileke,

mbụ nwata mẹe ọgurenya.

¹²Mu meru whẹ obu-imiko l’emeswe, whẹ mesweshiru mu,

mu ta anyatahẹbaa iwhe-dụ-ẹji,

whẹ nọdu megbabe mu.”

¹³Sụa, eshi-ọwhu Chileke kwegeeru ụkwa iwhe dụ nno l’ọgbandzu ọwhu bụ nke ọwhuu bẹ iwhe ọ fụtanuru bụ lẹ nke mbụ whọ b’o wowaru docha g’ọo iwhe kahụwaru akahụ. Tẹhenu iwhe l’akahụwaa akahụ, atsụakwawho mmẹe ta adụdu gẹ l’ọ-nọ-bekwadu, ya echihu.

Ọbaru Chileke ẹja, ụzo nke akahụ mẹe nke ọwhuu

¹Sụa, ọgbandzu mbụ ono, Chileke yẹle ndu nkiya gbarụ nwekwaru nsọ nsọ l’eedobeje mẹ l’aabarụ Chileke ẹja, o nwekwaruwho ụlo, madzụ gude ẹka iya mee l’aanọduje mẹ l’aabarụ iya ẹja ono. ²Ụlo ono, l’aabajẹru Chileke ẹja ono b’e gude ẹkwa mee. Iwhe e shi edobeje l’ime mkpu nke mbụ l’ụlo ono bụ iwhe l’aatukobegejee oryọku mẹe teburu, e shi atukobeje buredi dụru Chileke nsọ. Mkpu ono b’e kuru Ẹka-dụ-nsọ. ³A bya lẹ mkpu ono nke ẹbo, iwhe e gude gebuta iya bụ ẹkwa, iwhe l’eekuje mkpu ono bụru Ẹka-kakọta-ọdu-nsọ. ⁴Iwhe l’adụje iya bụ ẹnya-mgbẹja, l’aakpọjeru Chileke isẹnsu ọku. Iwhe e gude mee ẹnya ẹka ono, l’aakpọje isẹnsu ọku ono bụ mkpọla-ododo. Igbe-ọgbandzu, Chileke yẹle ụnwu Ízurẹlu gbarụ dụkwa iya whọ. E gudekwawho mkpọla-ododo kwechishikota igbe ono mgburumgburu. Iwhe dụ l’ime igbe ono bụ ite, a kpụru lẹ mkpọla-ododo. Iwhe dụ l’ime ite ono bụ nri ono, l’eekuje mana, oshi-o-gude-l’ẹka Érọnu dụkwa iya whọ, mbụ oshi-o-gude-l’ẹka ono, e gbutaru dobe o rwulahaa irwu. Iwhe ọdo dụfua ya bụ okpekpu ẹwhuru labọ, Chileke deru iwu iri, ọ sụru t’ụnwu Ízurẹlu dobekota nteke ono whẹ l’iya gbarụ ọgbandzu ono. ⁵Iwhe dụ l’eli igbe ono bụru Cherubu labọ, l’egoshi lẹ Chileke nọ l’ẹka ono. Whẹ chịru akwẹka whẹ gbosagee, gude gbobuta okfu igbe ono, l’aanọduje kfụa ụgwo ndu iwhe-dụ-ẹji, madzụ megbaberu. Ọle ọ tọ bụdu ntaa bẹ mu l’abya eshi ishi lanụ kọlahaaru unu g’ẹka ono dụ dụ nnanụ nnanụ.

⁶Ọ bụru ẹka ono, e meru nno bẹ ndu l’agbajẹ ẹja nụ Chileke l’abahụje l’ime mkpu nke mbụ ono mbọku-mbọku, je ejee ozhi nke ọgba ẹja Chileke gbarụ whẹ nụ. ⁷A bya l’ime mkpu nke ẹbo whọ, ono bụlewho eze onye ishi ndu l’agbajẹ ẹja nụ Chileke l’abahụje iya kpụ. Abahụ ono, l’ọobahuje iya kwa ugbo lanụ kpụ l’awha. Ọ tọ fụkwa bahụ iya m’o gudee mmee, l’oo-gude gbaa ẹja ẹhu iya gbafụ iwhe-dụ-ẹji o metaru l’ọma-ama mẹkwawho mmee, ọwhu l’oo-gude gbafụ iwhe-dụ-ẹji ọwhu ndu nke Chileke metagbaberu l’ọma-ama. ⁸Iwhe Ume-Dụ-Nsọ gude iwhe ono eme t’o doo anyi ẹnya ndọwa: Lẹ nteke ono ẹka ono, madzụ gude ẹka mee, l’aagbajẹ ẹja nụ Chileke dụkwadu, bẹ l’ẹteke agụhadua ụzo, e shi abahụ l’ẹka Chileke nọ t’onyenọnu bahụ. ⁹Ẹka ono, l’aagbajẹ ẹja Chileke ono nọdukwa ọnodu ẹtu, l’egoshi iwhe l’eme ntaa bụ iya bụ l’iwhe lile, a nụru Chileke mẹe iwhe bụ ngwo-ẹja, e gworu nụ iya l’ẹka ono ta afụdu mee t’obu onye, l’abarụ Chileke ẹja nmabuhu iya ikpe. ¹⁰Iwhe lile, e gude abarụ Chileke ẹja ono bẹ bụkota iwhe nke mgboko-o b’e gude eme iya. Ọ tụko bụru nsọ nsọ, l’eemekaa ala lẹ nri mẹe iwhe l’aangụ angụ mẹe nsọ nsọ, dụ l’ọsashi iwhe e gudegee mee nke ọba ẹja ono. Ọ tụkotaru bụleruwho nsọ nsọ nke mgboko-o, Chileke sụru t’e tsoje jeye nteke ya l’e-goshi ụzo ọwhu, l’ee-shije abarụ iya ẹja.

¹¹Ọle Kuráyisutu bẹ byawarụ ntaa bya abụru onye ishi ndu l’agbajẹ ẹja nụ Chileke, mbụ onye ishi ndu l’agbajẹ ẹja nụ Chileke, l’etso ụzo ono ka ree, Chileke goshiru ntaa. Ẹka o jeru ozhi nke ọgba ẹja nkiya bẹ kakwa shii, bụkwaruwho ẹka Chileke ka o gude mee t’iwhe ya tụberu lẹ nke ọdzota ndiwhe vuru ire lẹge ya tụberu iya. Ẹka ono ta adụdu l’eli-mgboko, o noo l’ọ tọ bụdu ẹka b’e gude mee ya. ¹²Sụa, ọlekwawho ugbo lanụ kpụ bẹ Kuráyisutu bahụru lẹ Ẹka-kakọta-ọdu-nsọ ono, Chileke nọ. Ọle ọ bahụdekwaru iya t’o gude mmee eghu, t’o gude mmee eswi bahụ iya, je agbaarụ Chileke ẹja. Iwhe o meru bụ l’o gudechia mmee nkiya je agbaarụ Chileke ẹja l’iswi ẹhu anyi, shi nno gbata anyi l’iwhe-dụ-ẹji, nke ọwhu anyi l’a-bụ ndu a tọru l’uli, anyi abụru ndu nke Chileke jeyewaro lẹ tututu-mịmimi. ¹³Lẹ mbụ b’o shi abụje e -wota mmee eghu, ọbu mmee oke-eswi, obu l’ọo ntụ nwada-eswi, a kpọru ọku, e wota iya whee ndu mebyiru nsọ, ya emee ndu ono whẹ adụ ree lẹge nsọ nsọ, tso iwu whẹ gude dụ. ¹⁴Eshi-ọwhu ọ dụ nno l’ezhi, bẹ mmee nke Kuráyisutu l’a-kabakwaanụ ome ire. Kuráyisutu ono, shi l’ẹka Ume Chileke bụ Ume l’anọgbuwaruroo, wota onwiya gbaarụ Chileke ẹja, l’adụa ẹka ntụpo dụ iya. Mmee nkiya ono l’a-kabakwaanụ ọsafu obu anyi t’ọ dụ ree l’iwhu Chileke, nke ọwhu anyi l’a-hakwanụ ome iwhe Chileke l’a-nma anyi ikpe ọnwu, letachia ẹnya l’ozhi Chileke ono, bụ Chileke nọ ndzụ.

¹⁵O noo iwhe meru ọ bụru Kuráyisutu bẹ gudegbabe madzụ yẹle Chileke l’ọgbandzu ọwhuu ono. Ọo ya bụ nke ọwhu ndu Chileke họtaru l’e-shikwanu l’ẹka Kuráyisutu nọdu ndzụ ọwhuu ono, Chileke kweru ụkwa iya, whẹ anọduwa iya rọ jeyewaro lẹ tututu-mịmimi. Iwhe meru whẹ je l’a-nọdu ndzụ ono bụ lẹ Kuráyisutu nwụhuwaru, shi nno gbatawa whẹ l’iwhe-dụ-ẹji, whẹ metagbaberu nteke ọgbandzu nke mbụ whọ, shi l’ẹka Chileke shi vukwaduru ire.

¹⁶Ụkwa, Chileke tukoberu l’ọgbandzu nkiya dụkwa g’ọo onye keru ekpe. Ọobujekwa e -kee ekpe dobe, aavọchajeekwa iya t’a marụ onye keru ekpe ono nwụhuwaru tẹmenu ya adụ gẹ l’e-me iwhe iya ọbu, ¹⁷nkele ekpe madzụ keru te evujekwa ire nteke onye ono nọdukwadua ndzụ. Nteke l’oovuje ire bụ mẹ onye ono nwụhulewho. ¹⁸O noo g’o gude, ọ bụru mmee b’e gude mee ọgbandzu mbụ whọ, o relahaa ire. ¹⁹Iwhe mbụ bụ lẹ Mósisu kfuru ndu Ízurẹlu iwhe bụkota nsọ nsọ, dụ l’iwu onoya g’ọ hakọta. O gbashi ọdo bya ewota oshi ịsopu yẹle ẹji atụru, ẹji atụru ono bẹ l’eemeje ya eke uswe uswe, ọ bya ewota iya tsẹe lẹ mmee ụnwu-eswi nshịi mẹe mmee eghu, tsẹkwa iya whọ lẹ mini gude iya whedzuru l’ẹkwo iwu ono, e deru iwu ono, whedzukwaru iya who iwhe bụ ndu ono gẹ whẹ hakọta. ²⁰L’oowhe iya asụje: “Ọ waa bụ mmee, l’egoshi l’ọgbandzu unu lẹ Chileke gbarụ vuwaa ire, mbụ ọgbandzu ono, o shi goshi unu iwhe unu l’e-me nggẹ yẹbedua mekwaawho iwhe ya kfuru.” ²¹O nokwawho gẹ Mósisu meru bya ewota mmee ono whedzuru ụlo ono, e gude ẹkwa mee, mbụ ụlo ono, l’aanọduje agba ẹja Chileke, o whedzukwaru iya who l’iwhe bụkota iwhe e gude abarụ Chileke ẹja. ²²Mbụ, e -tsode iya lẹge iwu kfuru, ya ewuduwaa nwanshị mẹe iwhe lile abụkotawaru-a mmee bẹ l’eegudeje mee ya, t’ọ safụ dụ ree. Tọ hẹkwa l’aagụru madzụ nvụ l’iwhe-dụ-ẹji madzụ metagbaberu, l’ẹbe abụ l’o nweru iwhe e gburu gbashị mee ya.

Ẹja Kuráyisutu l’asafụ iwhe-dụ-ẹji

²³Ọo iwhe gbarụ l’ememe nteke ono, t’e shi lẹ nsọ nsọ gbashịada mmee ono, mee t’iwhe lile ono, tụkoru bụru iwhe shiru ọkpobe iya ọwhu dụ l’imigwe, t’iwhe lile ono tụko bụru iwhe safụru dụ ree. Ọle ọkpobe iwhe ono, dụ l’imigwe bẹ iwhe gbarụ iya nụ bẹ bụ ẹja ọwhu tụkota kakọta ọwhu l’eegbuje anụ gude gbaa ree. ²⁴L’ẹka Kuráyisutu bahụru ta abụkwa ẹka l’aagbajẹ ẹja Chileke ọwhu ọbu madzụ bẹ gude ẹka iya mee, mbụ ẹka, bụ ẹka meru iya, ọ dụ g’ọo ono, bụ ọkpobe iya whọ. Ẹka, ọ bahụru bụ l’imigwe gẹdegede, bụ iya bụ ẹka ọ nọ l’iwhu Chileke ekfu okfu ẹhu anyi. ²⁵Onye ishi ndu l’agbajẹ ẹja nụ Chileke lẹ ndu Ju l’egudeje mmee, l’ẹte abụa mmee nkiya bahụ l’ẹka ono, kakọta-ọdu-nsọ ono awha g’awha ha, je agbaa ẹja. Ọle Kuráyisutu ta abahụkwa l’ẹka ono iwhe ka ugbo lanụ. Ọo ugbo lanụ kpụ b’ọ bahụru iya, je egude onwiya gbaa ẹja. ²⁶Nggẹ l’ọo iwhe bụ l’o jeshiaru nke tẹ ya bahụ l’ẹka ono je agbaa ẹja; ọ gbagee, ya agbabaa whọ, ọ nụ iya bụ mẹ ya ejee iwhe-ọtsulanu, je ya njelaga, mbụ o jegee, ya ejebaawho, eshi nkeshi Chileke meru mgboko. Ọle g’ọ nwụru bụ l’o bedeleruwho nteke mgboko l’abyawaa agvụgvu nggẹ Chileke e -kpee ndiwhe ikpe, ọ bya bya ejee iwhe-ọtsulanu ono ugbo lanụ sefu ẹka, gude onwiya swaa anyi ẹja nwụhu, shi nno safụ iwhe-dụ-ẹji anyi metagbaberu g’ọ ha. ²⁷Iwhe dụru madzụ bụ lẹ madzụ nwụhufutaje ugbo lanụ kpụ. Ọ nwụhuwaa ugbo lanụ ono, iwhe ọdo l’e-mefua bụ lẹ Chileke l’e-kpe iya ikpe. ²⁸O nokwawho gẹ Kuráyisutu gude onwiya gbaa ẹja ugbo lanụ kpụ, nwụhu, nggẹ ya shi nno gbafụ iwhe-dụ-ẹji igwe-ọha metagbaberu. Oo-megee bya nke ugbo labọ, ọle ọ byalẹwho nke ugbo labọ ono ta abụhekwa ndu l’eme iwhe-dụ-ẹji bẹ l’ọobya-turu, iwhe l’ọobya bụkwa tẹ ya dzọo ndu nọdu ngabẹru iya.

¹Iwhe iwu ndu Ju bụ, bụ iwhe dụ g’ọo nwinyokinyoki inyonyo iwhe dụ ree, Chileke tụberu lẹ ya l’e-me lẹ mgbe l’iwhu. Iwu ono te egoshirwekwa iwhe lile ono, Chileke bekochaaru mee lẹ mgbe l’iwhu ono. Ndu l’eme iwhe a tụru l’iwu bẹ l’abyajẹ ọgba ẹja nụ Chileke awha g’awha ha. Whẹ -byagee whẹ abyabaawhọ, mbụ whẹ abyakwawhọ bya agbaa ọga ẹja lanụ ono jeyewaro. O noo iwhe meru iwu ono ta afụ dụ ike mee tẹ ndu l’etso iya nụ bụru ndu dụ chịriri l’iwhu Chileke. ?L’o mehunu aghaa mee ya gẹ whẹ gbee abyajẹ ọgba ẹja ọbu awha g’awha ha; a -gbagee ya, a gbabaa ya whọ; a -gbagee ya, agbabaa ya whọ. ²Ọ -bụ l’ọo iwhe lẹ ndu ono, l’abyajẹ ọgba ẹja ono shiwaa l’ọgba ẹja ono safụ iwhe-dụ-ẹji, whẹ metagbaberu l’ugbo lanụ, bụwaru ndu dụ chịriri l’iwhu Chileke mẹ obu whẹ anmabuhuwaa whẹ ikpe iwhe-dụ-ẹji, whẹ metagbaberu mẹ whẹ ahakwanụa ọgba ẹja anụ Chileke. ³Ọle iwhe l’emejenu bụ l’ọo ẹja ono, whẹ l’anọje agba nno, l’emeje tẹ whẹ nyatajẹ iwhe-dụ-ẹji, whẹ metagbaberu awha g’awha ha. ⁴Lẹ mmee eswi mẹe mmee eghu ta afụkwa safụ iwhe-dụ-ẹji, madzụ l’emegbabe.

⁵Ọo iwhe ono meru g’o gude nteke Kuráyisutu l’abya lẹ mgboko-o, ọ sụ Chileke:

“I tii ledu ẹnya t’e wota iwhe gbua gbaarụ ghu ẹja,

ọdua l’ọo t’e gwota ngwo-ẹja bya anụ ghu.

Ọle iwhe i mechiaru bụ l’i meru mu, mu bụru madzụ,

nweru ẹhu ọwhu mu l’e-wota,

gude gbaarụ ghu ẹja nwụhu.

⁶Ngwo-ẹja, a kpọkotaru ọku nụ ghu,

mẹe ọwhu a gbarụ l’iswi iwhe-dụ-ẹji,

e metagbaberu ta adụkwa ọwhu larụ ghu l’ẹhu.

⁷Ọo ya bụ, mu sụ: ‘Ọ waa mu Chileke,

lẹ mu l’abyawaa tẹ mu mee iwhe dụ ghu l’uche,

tẹ mu mee iwhe ono, e deru l’okfu ẹhu mu l’ẹkwo iwu.’ ”

⁸Iwhe ono, o kfuru nno b’o vu ụzo sụ: “Iwhe e wotaru gbua, gbaarụ ghu ẹja, ọdua l’ọo ngwo-ẹja e gworu nụ ghu, ọdua l’ọo ngwo-ẹja ọwhu a kpọkotaru ọku nụ ghu mẹe ọwhu a gbarụ l’iswi iwhe-dụ-ẹji, e metagbaberu ta adụkwa ọwhu l’iile ẹnya iya, tọ dụ ọwhu larụ ghu l’ẹhu.” O noo iwhe o kfuru ndono, ọle lenu l’ẹja ono g’ọ hakọta bẹ l’aagbakọtalewho lẹge a tụru iwu sụ t’a gbajẹe ya. ⁹O kfugee nno sụ: “Ọ waa mu Chileke! Mu byawarụ tẹ mu mee iwhe dụ ghu l’uche.” Tọ dụ iya bụ lẹ Chileke abya atụkota akahụ ngwo-ẹja docha, bya ewota ngwo-ẹja nke Kuráyisutu dochia ẹnya iya. ¹⁰Jisọsu Kuráyisutu bẹ wotaru onwiya gbaa ugbo ẹja lanụ nụ Chileke sefu ẹka. O shi nno safụ anyi iwhe-dụ-ẹji, anyi metagbaberu. Iwhe meru ọ dụ nno, bụ lẹ Kuráyisutu meru iwhe dụ Chileke l’uche t’o mee ya.

¹¹A bya l’ọgbandzu nke mbụ, iwhe bụ-zhia onye bụ onye l’agbajẹ ẹja nụ Chileke l’akfụjeru eme nke ẹja ono mbọku-mbọku. Ẹgube ẹja ọ gbahawarụ, ya agbakwa iya whọ nteke nteke. Ọle ẹgube ẹja g’ẹja ha ono ta afụdu safụ iwhe-dụ-ẹji. ¹²Kuráyisutu byakwanụ bya agbaa nkiya, gbaa ugbo ẹja lanụ gbafụ iwhe-dụ-ẹji. O noo bụru ẹja ọ gbarụ l’a-nọwaro ere ire jeyewaro lẹ tututu-mịmimi. Ọ gbagee ya, o je anọ-zeta l’ẹka-ụtara Chileke. ¹³Ọ bụru ẹka ono bẹ l’ọo-nọdu jeye nteke Chileke l’e-woru ndu ọhogu yẹbe Kuráyisutu ono mee, whẹ abụru iwhe l’ọo-dzọpyabe l’ọkpa. ¹⁴Ọo ya bụ, o shi nno bụru ugbo ẹja lanụ b’ọ gbarụ gude mee tẹ ndu ọ safụru iwhe-dụ-ẹji whẹ metaru bụru ndu dụ chịriri l’iwhu Chileke jeyewaro lẹ tututu-mịmimi.

¹⁵Lẹ Ume-Dụ-Nsọ goshikwaruwho anyi l’iwhe ono bụ ezhi-okfu, nkele o vuhaadaro ụzo sụ:

¹⁶“Ọ waa bụ ọgbandzu ọbu,

mu l’ụnwu Ízurẹlu l’a-gba,

mẹ mbọku ono -rwulewho.

O nokwa iwhe Onye-Nwe-Ọha l’ekfu ndono.

Iwu mu bẹ mu l’a-tụshi ye whẹ l’obu whẹ.

Mu l’e-de iya gẹ l’eedeje ẹkwo l’ego whẹ.”

¹⁷Ọ bya l’ekfu ọdo ọ sụ:

“Mu ta anyatabahẹkwaa iwhe-dụ-ẹji,

whẹ nọdu megbabe mu mẹe emeswe, whẹ mesweshiru mu.”

¹⁸Ọo ya bụ lẹ nteke ọ bụ lẹ Chileke gụwaru ndu nkiya nvụ l’iwhe lile onoya, ọ kwa iya bụ lẹ mkpa ọgba ẹja ono nke ọsafu iwhe-dụ-ẹji ta adụhedu.

Ọkpulitaru Chileke ntse

¹⁹Ntaa, ụnwunna mu, ọwhu anyi gudeshi ẹka ike bụ l’anyi ta atsụhedu egvu ọbahu l’ẹka ono, Chileke nọ ono. Ọ tọ dụhedu iwhe l’akpọshikwadu anyi abahụ iya. Iwhe anyi l’agbabẹ ọkpa bahụ iya bụ mmee ono, Jisọsu gbashịru nteke ọ nwụhuru. ²⁰Lẹ Kuráyisutu bẹ gudewaa ogwẹhu iya gụharu anyi ụzo ọwhuu, ọwhu l’anụ ndzụ. Ọ bụru ogwẹhu iya ono nọdu ọnodu ẹkwa ono, l’egbobutaje ẹka l’eeshije abahụ l’ẹka ono, kakọta-ọdu-nsọ ono. Ẹkwa ono bekochaaru gbajahụ ẹbo, shi nno goshi l’anwụhu, Kuráyisutu nwụhuru gụhawaru anyi ụzo ono t’anyi bahụ l’ẹka ono, Chileke nọ. ²¹Anyi nweru onye ishi ndu l’agbajẹ ẹja nụ Chileke, bụ iya bẹ eze-ụlo Chileke dụ l’ẹka. Eshi-ọwhu anyi nweru onye ishi ndu l’agbajẹ ẹja nụ Chileke, dụ nno, mbụ onye bụ iya bẹ ndu ọnu-ụlo Chileke dụ l’ẹka; ²²ọ kwa iya bụ t’anyi gude obu anyi g’ọ ha, mbụ obu kweru kweshia ike lẹ Chileke l’a-nata anyi, gude kpụlitaru Chileke ntse. Lẹ Jisọsu bẹ gudeekwa mmee ya, whedzuru obu anyi, nke ọwhu l’ọoto dụhee tọ ka mma l’ọo nwanteku iwhe-dụ-ẹji l’a-nmakwadụ anyi ikpe l’obu. Anyi dụakwawho g’ọo ndu e gude mini doru rịsaa sachaa. ²³Unu t’anyi kwata gudeshia iwhe ono, anyi sụru l’anyi l’ele ẹnya iya ono ẹka ike, t’anyi ba atugbekwa ẹka l’ole ẹnya-iwhe ọbu, nkele Chileke yẹbedua, bụ onye kweru anyi ụkwa iwhe ọbu bụ o-me-g’o-kfuru. ²⁴Unu t’anyi whubeje iwhu mee iwhe ono, l’a-dụru ibe anyi lẹ ree, nke ọwhu anyi l’emeje ndu ọdo tẹ whẹ yeje ibe whẹ obu, mee tẹ whẹ meje iwhe dụ ree. ²⁵Unu t’anyi ba ahakwa edzukobeje l’ẹka lanụ ono, anyi l’edzukobeje. Unu t’anyi ba ahakwa iya, wata agbakashịhu. L’o nwekwaru g’unu ha ndu ọwhu hawarụ meta iya, ọ kwọru whẹ ẹhu lẹ whẹ l’a-nọje-zhiawho agbakashịhu nteke nteke. Unu t’anyi be emeshi iwhe ono. Iwhe anyi l’a-nọjechia eme bụ t’anyi meje t’obu shihu ibe anyi ike, kelekele nta-a, unu whụwaru-a lẹ nteke Onye-Nwe-Ọha l’a-bya bẹ dụwaa ntse.

²⁶Sụa, lẹ ntaa bẹ anyi mawarụ iwhe bụ ọkpobe-okfu. Ọ -bụru l’ọo ntaa, anyi mawarụ ọkpobe-okfu ono bẹ anyi gbee bya elekebe ẹnya eme iwhe-dụ-ẹji bẹ l’ọoduhekwaa ẹja, bya l’asafụ iwhe-dụ-ẹji, anyi metaru. ²⁷O chia iwhe lanụ, dụ nụ nwẹkiya bụ ntsụ-megvu iwhe l’e-me nụ, bụ iya bụ egvu ikpe Chileke nkele ọo ejo ọku ono l’enwu igiri igiri bẹ bụ ọku l’e-mebyishi iwhe bụkota ndu kwefuru Chileke ike. ²⁸Ọobujekwa onye darụ l’iwu Mósisu, a dụwaa ẹbo, ọbu ẹto gbakọta iya ọku iya, a nma iya ikpe, kpụta onye ọbu megbua emegbu, a ta awhụjekwaru onye ono imiko. ²⁹Ọ bụru l’eemegbuje onye mebyiru iwu Mósisu emegbu, unu lewaro gẹ l’ọo-dụ onye ono ledaru Nwa nke Chileke ẹnya, onye ono bẹ Chileke l’a-kakwanụ ọnu awhụ, mbụ onye wotaru mmee Nwa Chileke gwọo l’ẹja, mbụ mmee ono, Kuráyisutu gude mee t’ọgbandzu Chileke yẹle madzụ vuru ire, ọ bụkwaruwho mmee ono b’o gude sachaa onye ọbu, t’onye ọbu bụru onye dụkota ree l’iwhu Chileke. Onye ledaru Nwa Chileke ono ẹnya bụakwa Ume-Dụ-Nsọ ono, l’emejeru anyi eze-iwhe-ọma-a bẹ l’ọogwo l’ẹja. ?Ọ dụ g’ọ bụ onye ono bẹ Chileke l’a-kabakwaanụ ọnu áwhụ. ³⁰L’anyi makwarụ onye ono, kfuru sụ: “Ọo mu l’e-melata, ọo mu bẹ ọgwata ụgwo dụ l’ẹka.” Sụkwawho: “Ọo mụbe Onye-Nwe-Ọha l’e-kpe ndibe mu ikpe.” ³¹Mbụ lẹ-a, l’onye Chileke ono, nọ ndzụ nmarụ ikpe kwa ejo iwhe jekfutaru iya.

³²Unu nyatajẹkwa g’o shi dụ unu lẹ mbụlembu nteke ono, unu whụru iwhoro Chileke ono. Unu nyatajẹkwa g’unu gude jee iwhe-ọtsulanu ha l’igwe, unu talẹe nshi, unu te ekwe t’ọ kakputa unu l’ẹnya. ³³O nwegeeruro nteke e shi anmajẹ unu ụzu nchịchochi, mee unu iwhe iwhere l’edzudzu-ọha, o nwekwaruwho nteke ọwhu l’abụje e te eme unubẹdua l’onwunu ẹgube iwhe-ọtsulanu ono, unu asụ, ?unu nọduhu nụ eme ole, l’unu lẹ ndu ọwhu l’eeme iya l’a-tụko jee iwhe-ọtsulanu ọbu. ³⁴Unu l’awhụtajewaru ndu ọwhu nọ lẹ mkpọro, ya adụwaa g’ọo unu nọ lẹ mkpọro ọbu. Aanakọtaje unu iwhe unu nwe enwe lẹ mgboko, unu egudelee ẹhu-ụtso nwugbua ya l’obu nkele ọo l’unu marụ l’unu nweruro iwhe ọdo kabaa ree, bu iwhe l’a-nọgbuwaruro jeye lẹ tututu-mịmimi. ³⁵Sụa, t’obu shihulekwawho unu ike g’o shihuru iya unu, t’unu ba abọkwa obu ẹbo, lẹ Chileke l’e-megekwaa kfụa unu ụgwo iya l’iwhe ha shii. ³⁶Iwhe mkpa iya dụ unu bụ ọta-nshi, nke ọwhu unu l’e-mejekwanu iwhe dụ Chileke l’obu, unu eshi nno nata iwhe o kweru ụkwa iya. ³⁷L’ọ dụa g’ọo iwhe e deru l’ẹkwo Okfu Chileke sụ:

“O wuduwarua nwanshịi onye ono,

byafụtaje nụ ono abya, ọ tọo nọhekwa ọdu.

³⁸Onye kwetaru nke mụbe Chileke kwobe iya,

dobe onwiya chịriri l’iwhu mu,

bẹ l’a-nọdukwa ọkpobe ndzụ.

Ọle nteke ọ bụkwanu l’onye ono tsuwhuru azụ,

ọ tọ dụkwa mụbe Chileke mma l’obu.”

³⁹Ọle anyi ta abụdu ndu ọwhu tsuwhuru azụ, l’a-la l’iyi. Anyi bụ-chia ndu kwetaru woru onwowhe ye iya l’ẹka gẹ l’ee-shi t’ọ dzọo anyi, t’anyi nweru ndzụ tututu-mịmimi.

Iwhe okwe nke Chileke bụ

¹Iwhe ono, bụ ekwekwe bụ: okeru ike yeru l’iwhe l’eele ẹnya iya, bụkwaruwho ọma-rweta l’iwhe ono, anyi l’awhụa l’ẹnya dụwho l’ezhi. ²Ndu ichee anyi whẹ bụ lẹ whẹ kwetaru nke Chileke meru iwhe whẹ bụ ndu Chileke kwetaru lẹ whẹ l’eme ree.

³Ọo ekwekwe ono, anyi kweru nke Chileke meru g’o gude o doo anyi ẹnya lẹ mgboko bẹ bụ okfu-ọnu bẹ Chileke gude mee ya, mbụ l’ọ tọ bụdu iwhe l’ele l’ẹnya b’e gude mee iwhe-e, ẹnya l’elekaa ẹgube-ẹ.

⁴Sụa, ọo ekweta Ébelu kwetaru nke Chileke meru g’o gude ọ gbaarụ Chileke ẹja, ka nke nwune iya Kenu ree. Ọ bụru ekwekwe ono meru iwhe Chileke natarụ ẹja ono, ọ gbarụ iya, gude iya goshi l’ọ bụ onye dụ chịriri l’iwhu yẹbe Chileke. Ọ bụru ekweta ono, Ébelu kwetaru nke Chileke meru iwhe Ébelu ono nwụhu-geeru, iwhe o meru l’ezhilee anyi iwhe byeye ntanụ-a.

⁵Ọo ekweta Ínọku kwetaru nke Chileke meru g’o gude Ínọku nọdukwaduro ndzụ, Chileke wolia ya, tẹ anwụhu be egbu iya egbugbu owhu, tọ dụhe onye marụ g’o meru eshi Chileke woliwaru iya. Ẹkwo okfu Chileke sụru lẹ Ínọku shi emeje iwhe larụ Chileke l’ẹhu, tẹmenu Chileke wolia ya, woba l’imigwe. ⁶Unu maanarụ-a l’o to nwedu onye l’a-dụ ike eme iwhe larụ Chileke l’ẹhu, gbahalẹwho l’onye ono kwetaadaru nke Chileke. O noo l’onye l’akpụlitaru Chileke ntse, vufutaje ụzo kweta lẹ Chileke dụ, onye ono ekwetakwawho l’oobuje ndu l’achọ iya nụ obunggo.

⁷Sụa, ọo ekweta Nowa kwetaru nke Chileke meru iwhe ọ nụru iwhe Chileke kfuru nteke Chileke nmarụ iya ọkwa iwhe l’ee-megee mee, mbụ iwhe l’ọ tọko whụa l’ẹnya. O mee iwhe Chileke kfuru, kụa eze ụgbo, Chileke gude dzọo yẹle ndibe iya. O shi nno goshi madzụ l’umere ndiwhe dụ ẹji. Ọ bụru ekweta ono meru iwhe Chileke kwoberu gụa ya l’onye dụ chịriri. O noo lẹ Chileke l’agụje ndu kwetaru nkiya lẹ ndu dụ chịriri.

⁸Ọo ekweta, Ébirihamu kwetaru nke Chileke meru g’o gude o mee iwhe Chileke kfuru nteke o kuru iya. Ọ tụgbua lụfu jeshia alị Chileke kwetaru iya ụkwa lẹ ya l’a-nụ iya, t’ọ bụru nkiya. Ébirihamu bẹ shi l’alị iya tụgbua ije l’ẹbe abụkwanu l’ọ marụ ẹka l’ooje eje. ⁹Ọo ekweta, o kwetaru nke Chileke meru g’o gude o je eburu l’alị ono, Chileke kwetaru iya ụkwa iya. O buru iya g’ọo onye lwarụ alwa. Ụlo yẹle Áyiziku mẹe Jékọpu shi ebuje bụleruwho ụlo, e gude ẹkwa mee. Whẹbedua bẹ Chileke kwekwaruwho ụkwa iwhe lanụ ono, o kweru Ébirihamu. ¹⁰L’iwhe ọwhu Ébirihamu shi ele ẹnya iya, bụ eze obodo ono, a tụru ukfu iya nke ọwhu l’ọo-nọwaro jeye lẹ tututu-mịmimi, mbụ eze obodo ọwhu ọ bụ Chileke bẹ gude ẹka iya tụa ya gẹ l’ọo-dụ, bụkwaru iya whọ gude ẹka iya tụa ya l’onwiya.

¹¹Ọ bụru ekweta, Séra l’onwiya kwetaru nke Chileke megekwaaruwho g’o gude ọ bụru yẹbe nwanyị nọru, t’ọ tsụje ime jeye ọ nọghawa nteke ọ gọgo tsụta ime bẹ Chileke meleru-a ọ tsụta ime lẹ nka. Iwhe kparụ iya bụru l’o doberu Chileke l’onye l’akfụshije ike l’iwhe o kweru ụkwa iya. ¹²Ọ bụru iwhe ono meru g’o gude ọ bụru nwoke lanụ ono, bụ Ébirihamu bẹ bekochaaru bụru nna nwụru igwe-ọha, lẹ yẹbe nwoke shi katagewaa nka bụwaru-a odzu. Ụnwu iya megee bya akụru kpataa, ha l’igweligwe g’ọo kpokponde dụ l’igwe, bụkwaruwho agụta l’ọgu g’ọo ẹja, dụ l’alị.

¹³Iwhe bụ ndu ono, a gụshiru ono bẹ kegeeru ike yeru l’iwhe ono, Chileke kweru whẹ ụkwa iya jeye whẹ nwụshikota. Iwhe ono, Chileke kwegeeru whẹ ụkwa iya te erwukwa whẹ ẹka nteke whẹ nọkwadu ndzụ. Ọle whẹ whụru iya l’ụzo otẹnya, tụkota tee ẹswa iya. Whẹ ryaa ya arya lẹ whẹ whụwaru lẹ whẹ bụ mbyambya, bụkwaruwho ndu kpafụtaru ụri lẹ mgboko-o. ¹⁴Ndu kabẹ ekfu ẹgube okfu ono, bẹ iwhe whẹ l’egoshi bụ lẹ whẹ l’achọkwadu alị nke ẹka whẹ. ¹⁵Nggẹ l’ọo alị whẹ whọ, whẹ shi fụta bẹ eghoro iya l’adụje whẹ mẹ whẹ achọlekwaa ụzo, dawhu azụ l’alị whẹ ono. ¹⁶Obenu l’ẹka ẹnya dụ whẹ bụ l’alị ọwhu ka ree bụ iya bụ obodo ọwhu, dụ l’imigwe. Ọ bụru iwhe ono meru g’o gude tọo dụje Chileke iwhere lẹ whẹ kuru iya Chileke whẹ nkele ọ kwakọberu obodo nke imigwe doberu whẹ.

¹⁷Sụa, ọ kwa ekweta ono, Ébirihamu kwetaru nke Chileke meru g’o gude o kweta duta nwa iya Áyiziku jeshia egbugbu gude gbaarụ Chileke ẹja nteke ono, Chileke mejeru tẹ ya dalee ya ono. E bekochaa Ébirihamu ono, Chileke kweshiru ụkwa dutale-e nwa lanụ iya ono kpụ gude jeshia ọgbaru Chileke ẹja. ¹⁸Ọo Ébirihamu ono bẹ Chileke kweru ụkwa sụ iya: “Ọo Áyiziku bẹ l’ii-shi nwụshia ụnwu nwanwa-nwanwa.” E bekochaa ọ bụleru-a Áyiziku ono, bụ iya nwa lanụ, bẹ Ébirihamu kwetaru duta gude jeshia eje agbaarụ Chileke ẹja. ¹⁹Ébirihamu bụleruwho iwhe o legeeru ẹnya whụa bụ lẹ Chileke l’a-dụ ike mee Áyiziku t’o shi l’ọnwu teta nọdu ndzụ, ọo ya bụ l’e kfude iya ekfu bẹ Áyiziku dụwaa g’ọo onye shi l’ọnwu teta nọdu ndzụ, eshi o megeeru tsoru Ébirihamu lwawhu azụ. ²⁰Ọ bụru ekweta, Áyiziku kwetaru nke Chileke meru g’o gude ọ gọru ọnu-ọma nụ Jékọpu yẹle Isọ, kwetakwawho l’ọnu-ọma ono ya gọru l’e-rekota lẹge ya gọru iya.

²¹Ọo ekweta, Jékọpu kwetaru nke Chileke meru g’o gude ọ gọru ọnu-ọma nụkota ụnwu Jósẹfu l’ẹhu l’ẹhu, tẹmenu ọ nwụhu. O whuru ewhuru dawhube mkpụru iya, nọdu nno baarụ Chileke ẹja gẹ l’ọogo ọnu-ọma ono.

²²Ọo ekweta, Jósẹfu kwetaru nke Chileke meru g’o gude ọ bya l’anwụhu, o vuru ụzo kfua okfu awụfu ono, ndu Ízurẹlu megee shi l’alị Íjiputu wụfu lashia alị, Chileke kweru whẹ ụkwa iya. Ọ bya egoshikwawho gẹ l’ee-me ọkpu iya mẹ whẹ wụfude.

²³Ọo ekweta ono, ne lẹ nna Mósisu kwetaru nke Chileke meru g’o gude whẹ domia Mósisu ọnwa ẹto g’a nwụ-geeru iya nkele whẹ leru iya, marụ l’ọo nwata dụ ugvu l’ẹnya, whẹ ta atsụ egvu lẹ whẹ l’emebyi iwu eze Íjiputu tụru sụ: te egbujee iwhe bụ nwa nwoke, onye Ju zedaru nke ọwhuu.

²⁴Ọo ekweta, Mósisu ono kwetaru nke Chileke meru g’o gude o vutalewho, ọ jịka t’e be ekuhe iya nwatibe nwa-nwanyị eze ndu Íjiputu. ²⁵Ọ hatarọ lẹ ya l’e-tsochia ụnwu Chileke jee iwhe-ọtsulanu amamẹ tẹ ya nọdu l’ẹka ẹhu l’a-nọ atsọ iya ụtso, meje iwhe-dụ-ẹji, mbụ ẹhu-ụtso l’adụa g’ọ bya l’a-nọ-be. ²⁶Iwhe ọ kwẹleruwho ẹka bụru, l’ọ -bụru l’aakpa iya ẹhu l’okfu ẹhu Onye Ndzọta ono, Chileke kweru ụkwa iya l’ọo-bya lẹ mgboko bẹ ono ka iya rọo mma amamẹ lẹ ya nwekotaru ẹku, dụ l’alị Íjiputu g’ọ ha. O noo nkele ẹnya dụ iya l’obunggo ọwhu dụ l’iwhu.

²⁷Ọ bụkwaruwho ekweta, Mósisu kwetaru nke Chileke meru g’o gude ọ haa alị Íjiputu tụgbua iwhu lanụ, to je ọtsu-egvu l’ẹhu l’e-ghu eze ndu Íjiputu eghu. O tsua ẹka l’obu nọ-kirishia gẹ woo lẹ ya whụru Chileke l’ẹnya, l’ẹbe abụkwanu lẹ Chileke bụ onye l’aawhụje l’ẹnya. ²⁸Ọo ekweta, Mósisu kwetaru nke Chileke meru iwhe o gbuberu ishi ori-oge O-je-ghata. Nteke ono ọ sụru ndu Ízurẹlu l’owhu tẹ whẹ wota mmee nwatụru whegbaa l’iwhe bụkota l’ọnu mgbo ụlo whẹ tẹ ojozhi-imigwe, byarụ ogbushi ọkpara ndu Íjiputu ba adụ ọkpara nke ndu Ízurẹlu ọwhu l’oo-gbu.

²⁹Ọo ekweta, ụnwu Ízurẹlu kwetaru nke Chileke meru g’o gude whẹ wụghaa l’echi Eze-ẹnyimu-uswe, ejekaa l’ọma alị ọkponku g’ọo onye l’eje l’ogborogbo echi-ụzo. Ndu Íjiputu jeshia aghata, mini rigbushikota whẹ.

³⁰Ọ bụru ekweta, ndu Ízurẹlu kwetaru nke Chileke meru g’ọ gude mgbodo, e gude tụ-wheta Jériko mgburumgburu daa gẹ whẹ jewhegeeru iya mgburumgburu abalị ẹsaa. ³¹Ọo ekweta, nwanyị ọkpara ono, bụ Réhabu kwetaru nke Chileke meru g’o gude a haa ya, ta atụko yẹle ndu ono kwefuru Chileke ike mee tẹ whẹ laa l’iyi nkele o domiru ndu Ízurẹlu ono, byarụ ngge l’obodo Jériko, shi nno dzọo whẹ.

³²?Mu lẹ ole agụ? ?Ndẹnu nteke mu l’a-nọdu gụshiwaro Gídiyọnu whẹ mẹe Béraku mẹe Sámusịnu mẹe Jéfuta, mbụwaro Dévidi whẹ mẹe Sámuwẹlu whẹ-o mẹwaro ndu nkfuchiru Chileke. ?Ndẹnu nteke mu l’a-nọdu kọkota akọ gẹ whẹ kwetaberu nke Chileke. ³³Ọo ekweta, whẹ kwetaru nke Chileke bẹ whẹ gude lwụshi mba lile ọdo ọgu, lwụ-gbukota whẹ kpamụ. Ọ bụru ekwekwe ono bẹ whẹ shi egudeje mee, ndu alị whẹ tẹ whẹ meje iwhe kfụru nhamụnha, whẹ gudekwa iya who whụa gẹ Chileke gude mewaru whẹ iwhe o kweru whẹ ụkwa iya, gudekwa iya who mekwaawho oduu gege egbu whẹ nu, tọ dụhe ọwhu dụ ike kụhaa ọnu, ³⁴gude iya dzonyia ọku l’ata chịchichi, gude iya nahụ ndu chị nkogo achị whẹ nke egbugbu. Whẹ shi bụru ndu ike l’ete eshia dụ, e megekwanua whẹ bya eshihu ike. Whẹ shi bụru ọ-karia-ẹka-l’ọgu nke ọwhu whẹ shi achịkashije ndu ojọgu ndu ọhamoha nnanụ nnanụ. ³⁵Ụnwanyi kwetaru nụ bẹ whụkotaru ndibe whẹ, nwụshihuru nụ gẹ whẹ shikota l’ọnwu, tetachaa. O nweru ndu ọwhu e metaru l’iwe jeye whẹ nwụhu. Whẹ hata l’o bezhia nke ọwhu whẹ l’ajịka Chileke nnta gẹ l’ee-shi t’a haa whẹ, tẹ whẹ gbalaa, t’e gbuchia whẹ roo tẹ whẹ nwụhu. Iwhe kparụ iya nụ bụ lẹ whẹ l’ele ẹnya lẹ Chileke l’e-megee mee: tẹ whẹ teta, nọdu ndzụ ọwhu ka ree. ³⁶O nweru ndu a harụ chịa ọchi, chia whẹ iwhe, tụshia whẹ mkpọro, nwụru whẹ ye l’ọka-mkpọro. ³⁷O nweru ndu a tugbushiru l’ẹwhuru; o nweru ndu ọwhu e kwobuhugeeru ẹbo, o nweru ndu ọwhu bụ mma b’e gude gbugbushia whẹ, whẹ shi etsojeru aghawhelewho, iwhe whẹ shi eyeje bụru akpọ eghu mẹe akpọ atụru, whẹ kparụ ụkpa nri, a kpaa whẹ ẹhu mee whẹ ome-l’iwe. ³⁸Mgboko dụtaru ẹji nke ọwhu l’ọ tọo gbaa nke lẹ whẹ l’a-nọkota iya. Whẹ shi anọje aghawhe l’echi-ẹgu mẹe ẹka ugvu dụ. Whẹ shi ebuje l’ọgba mẹe lẹ mbalị gẹ whẹ l’agba ọso ishi whẹ. ³⁹Sụa, ndu-a tụkoru bụru ndu ẹkwo-okfu Chileke l’egoshi lẹ whẹ bụ ndu Chileke sụru lẹ whẹ shi eme ree. Ọ bụru ekweta, whẹ kwetaru lẹ nke Chileke ono kparụ iya. Whẹ nọ-gezhia, iwhe ono, Chileke kweru ụkwa iya ono te erwu whẹ ẹka. ⁴⁰Ọ bụru iwhe meru g’o gude ọ dụ nno bụ lẹ Chileke l’achịru anyi idzu ka ree. Iwhe ọ tụberu bụkwanuru lẹ ya l’e-wota anyi, wota whẹbedua tụgbabe mee, anyi l’ugbo lanụ t’anyi tụko bụru ndu dzuru oke, dụkota ree.

Chileke bụ Nna anyi

¹A bya l’ẹhu nke anyịbedua, iwhe bụ ndu ono gẹ whẹ ha tụkotaru dowhe anyi mgburumgburu g’ọo onye urwukpu sọpyaberu. Whẹ tụkoru eme t’anyi marụ iwhe okweta nke Chileke ono bụ. Ọo ya bụ t’anyi docha iwhe lile, bụ iwhe l’alowhu anyi azụ, dochakota iwhe bụ-zhia iwhe-dụ-ẹji ono, l’ete ekweje anyi ọha ẹka. T’anyi gude ẹka l’obu, whee ewhewhe ọso ono, dụru anyi. ²T’anyi dazhịbelewho Jisọsu ẹnya, gba ọso ono, l’ọo ya bụ onye vutaru anyi ụzo ọso nke okweta nke Chileke, ọ bụkwaru iya whọ l’e-me t’anyi gbaa ya, gbafụ iya l’ishi. Yẹbedua mawarụ ẹhu-ụtso Chileke doberu iya, ọ bụru iwhe ono meru g’o gude, o jee iwhe-ọtsulanu jeye a kpọpyabe iya l’oswebe, ọ nwụhu, iwhere, e shi l’ẹgube anwụhu ono, ọ nwụhuru mee ya, ta adụ rọo iwhe ọ bụ iya. Ntaa b’o jewaa je anọdu anọdu l’ẹka-ụtara oshi-eze Chileke. ³Unu rịtajenu ọriri rị-vu Jisọsu ono tụkoru iwhe-ọtsulanu ono jekota. Ọ tụkoru iwhe bụ ejo ememe, ndu l’eme iwhe-dụ-ẹji meru iya mẹe ejo okfu, whẹ kfuru iya gbagbukota lẹ nkụchi. Unu nyatajẹ iya t’ike ba agvụ unu, unu ta asụhunu l’unu ta agbahẹdu ọso ono. ⁴L’ọgu unu l’iwhe-dụ-ẹji l’alwụ bẹ unu l’ẹteke alwụ-rukwaa nke ọwhu unu l’a-lwụta iya nwụhu. ⁵?Unu zọhawaru okfu, Chileke kfuru, gude mee t’obu shihu unu ike l’unu bụ ụnwu iya? Ọ sụru:

“Nwa mu, ba arịkwa l’àhụ̀hù,

Onye-Nwe-Ọha l’ahụ̀ ghu ta adụdu iwhe ọ bụ.

Be egudejekwa l’ọobaru ghu mba, gụ alalahaa azụ azụ.

⁶O noo l’ọo onye Onye-Nwe-Ọha yeru obu bẹ l’ọohuje ahụ.

Ọ bụru onye ọ natarụ t’ọ bụru nwa iya

bẹ l’oochije iwhe.”

⁷Ọo ya bụ t’unu rwuchijee obu nteke Chileke l’ahụ̀ unu àhụ̀hù, l’àhụ̀hù ono, bụkwa àhụ̀hù, nna l’àhụ̀je nwa iya t’ọ marụ iwhe. O nokwa ẹgube àhụ̀hù ọwhu Chileke l’àhụ̀ unu ndono, o noo l’unu bụ ụnwu iya. ?T’unu whụjehunuru nwa, nna iya l’àhụ̀a àhụ̀ t’ọ marụ iwhe? ⁸Nteke ọ bụ lẹ Chileke ta ahụ̀du unu àhụ̀hù t’unu marụ iwhe, lẹge l’ọohu ụnwu iya ọdo, ọo ya bụ l’unu ta abụdu ọkpobe ụnwu iya, unu bụ ndu a kpatarụ l’ụri. ⁹Ọobujekwa ndu bụ nna anyi whẹ l’eliwhe-e l’echi anyi iwhe, anyi eyeleru whẹ-e ẹso. ?O chia Nna anyi ọwhu bu l’imigwe bẹ anyi l’ẹte akabadụa eworu onwanyị nụ nggẹ anyi shi nno nweru ndzụ. ¹⁰Nna anyi l’eliwhe-e bẹ l’ahụ̀ta-bejelewho anyi àhụ̀hù nwawha olemole lẹge ọ dụ whẹ mma l’obu. Ọle Chileke l’ahụ̀je anyi àhụ̀ nke ọwhu l’ọo-dụru anyi lẹ ree nggẹ anyi dụkota ree g’ọo yẹbedua. ¹¹Ọobuje nteke l’ahụ̀ anyi àhụ̀hù t’anyi marụ iwhe, ya eme anyi ẹhuka, ẹhu ta atsọje anyi ụtso. Ndu ono, kweru a hụ̀a whẹ àhụ̀hù, hụta whẹ, whẹ marụ iwhe bẹ l’ebekochajekwaa bụru ndu l’eme ree, bụkwaruwho ndu ẹhu l’emegejee dụ guu.

Ọnma ọkwa

¹²Eshi-ọwhu ọ dụwaa nno, ọo ya bụ t’unu kfụshia ike l’ekwekwe ono, unu kweru nke Chileke, l’ekwekwe unu ono bẹ dụwaa g’ọo ẹka, tsụru mmẹe. Ọ dụkwawho g’ọo ọkpa, l’awhụ gorigori. Unu lọchia ẹka ono, tsụru unu mmẹe ono alọchi, unu emee ọkpa ono, l’awhụ unu gorigori t’o shihu unu ike. ¹³Unu tụko-gezhia iwhe bụ-zhia iwhe l’a-duchi unu ụzo wofu. Ọo ya bụ nke ọwhu unu l’ete eme g’ọo ndu ọwhu dụ g’ọo ndu ọkpa nwụshihuru anwụshihu whọ, tẹ ba aparụ okfu Chileke ono haa. L’ọ kwa l’ụzo kfụru nhamụnha bẹ ọkpa, nwụhuru anwụhu l’e-teta.

¹⁴Unu kebeje ẹhu meje iwhe l’e-me t’unu l’onyenọnu nọdu lẹ nchị-ọdu-ndoo, unu ekebekwawho ẹhu eseba t’unu bụru ndu dụkota ree l’iwhu Chileke, o noo l’onye l’adụkotaa ree l’iwhu iya ta afụkwa whụa ya. ¹⁵Iwhe unu l’a-kwabẹru ẹnya bụ t’ọ bọ dụ onye l’agbẹru eze-iwhe-ọma Chileke azụ. Unu eletakwawho ẹnya t’ọ bọ dụ onye l’a-bya adụ g’ọo ọgbaragbu-oshi, l’atsọ g’ọo age, l’akpofuta l’echilabọ unu, bya aghaswashịlahaa unu ẹhu, shi nno merwushia igwe-ọha. ¹⁶Unu letakwa ẹnya t’ọ bọ dụ onye l’a-nọ akpa lẹ nwanyị, tọ dụhunu onye l’a-nọ eleda ẹnya l’iwhe nke Chileke g’ọo Isọ. Lẹ Isọ bẹ gudekwa nke ọlolikpakpa nri kweta sụ tẹ nwune iya bụwaruro ọkpara, yẹbe Isọ shi bụru, nnta gẹ l’ee-shi tẹ ya ria ugbo nri lanụ. ¹⁷Unu maanarụ-a l’e megeeru ọ chọlahaa tẹ nna iya gọoru iya ọnu-ọma, a sụ iya l’ọgbawaru iya l’azụ ẹka, o noo l’ọ tọ dụhedu gẹ l’oo-shi mezhia iwhe o mebyihawaru. Tọ dụ iya bụ, l’o gudegee gude ẹnya-mini ẹkwa chọo ọnu-ọma ono, ụzo ta adụhe iya.

¹⁸L’ẹka unu byarụ ta abụkwa ugvu Sáyinayi, unu l’e-byi ẹka g’ọo ndu Ízurẹlu nteke ono Chileke nụru whẹ iwu ono. Ọ tọ bụkwa ọku ono, l’enwu whuruwhuru bẹ unu byarụ, tọ bụ ẹkpuroochi ono, ọdua l’ọo ẹka ono, gbarụ tsụrikiti bẹ unu batarụ, tọ bụ oke whẹrewhere ono, byarụ nụ. ¹⁹?Unu nụru iya? Ọ tọ bụkwa ụda opu ono, ọdua l’ọo olu-okfu ono, darụ g’ọo ebemu-igwe bẹ unu nụru. Lẹ nteke ndu Ízurẹlu nụru olu ono, bẹ whẹ ryọkwaru sụ t’o bo kfuhekwa ọdo. ²⁰Nkele iwu Chileke tụru bẹ whẹ sụru l’ọ kariru whẹ ẹka, mbụ iwu ono sụru: “Iwhe bụ iwhe ẹhu iya chiru l’ugvu-a, mbụkwa ebehuduru ọ bụru m’ọo anụmanu, t’e gudekwa ẹwhuru tugbua ya.” ²¹Iwhe whẹ whụru l’ẹka ono paa biribiri, nke ọwhu Mósisu sụru: “Egvu l’atsụshikwa mu ike nke ọwhu ẹhu nmadẹru mu anma.” Ọ tọ bụkwa ẹgube ẹka ono bẹ unu byarụ-o.

²²Ẹka unu gbechia bya bụ l’ugvu Záyọnu, mbụ obodo nke Chileke, mbụ Chileke ọwhu nọ ndzụ. Ẹka unu byarụ bụkwa obodo ọwhuu, ẹwha iya bụ Jerúsalẹmu ọwhu dụ l’imigwe, unu byakfuta ndu ojozhi-imigwe bụ agụta l’ọgu. ²³Ẹka unu byarụ bụkwa ẹka ono, ụnwu Chileke, o dobekotawaru l’ọnodu ọkpara dzukoru, ẹhu l’atsọ whẹ ụtso, mbụ ndu, e deru ẹwha whẹ l’ẹkwo l’imigwe. Unu byakfutaru Chileke, onye bụ iya l’e-kpe onyenọnu ikpe. Ndu unu byakfutaru bụ ndu nwụhuhawaru nụ, dụ chịriri, ndu Chileke meru whẹ dụkota ree l’iwhu iya. ²⁴Sụa, onye unu byakfutaru bụkwa Jisọsu, onye bụ iya gudegbabe madzụ yẹle Chileke l’ọgbandzu ọwhuu ono, unu byakfutakwawho mmee ono, ọ gbashịru l’oswebe, mbụ mmee ọwhu l’ekfu iwhe ka ree amamẹ nke Ébelu.

²⁵Ọo ya bụ t’unu kwachafụkwa ẹnya t’unu ba ajịka l’unu ta angadụru onye ono l’ekfu okfu ono nchị. L’eshi ọwhu ndụ-ichee anyi whẹ l’ẹte anahụa ikpe Chileke, nkele ọo lẹ whẹ te eyedu ọnu l’iwhe ono, a lọru whẹ ẹka lẹ nchị iya ono lẹ mgboko-o, bẹ anyịbedua l’ẹte anahụkwa iya mẹ ọ -bụru l’anyi jịkaru onye ono, nọ l’imigwe, alọ anyi ẹka lẹ nchị. ²⁶Lẹ nteke ndụ-ichee ono bẹ olu-okfu iya nmakọtaru eliwhe l’owhu jijiji, ọle ntaa b’o kfuwaru sụ: “Ugbo lanụ-fụa bẹ mu l’a-nmafụa eliwhe jijiji, nmagee, nmaa imigwe.” ²⁷Chileke sụru l’ọo “ugbo lanụ-fụa”. Ugbo lanụ-fụa ono, o kfuru, goshiru l’iwhe lile ono, o mekotaru g’ọ ha bẹ l’oo-mekota t’ọ nma jijiji, ya ewofu iya. Ọo ya bụ nke ọwhu, ọwhu l’ẹte anmaa jijiji l’a-nọdu.

²⁸Ọo ya bụ t’anyi tuje Chileke ẹwha nkele ọ nụwaru anyi oke t’anyi l’iya tụko bụru eze, mbụ eze ọwhu l’adụa iwhe fụru ụka nmaa ya yikayika. T’anyi tuje iya ẹwha, gudeje ọtsu-egvu akpa-jiijii iya wozeta onwanyị alị kwabẹje iya ugvu. ²⁹Lẹ Chileke anyi bẹ bụkwa ọku, l’adụa iwhe l’ookewhodoje.

Ome iwhe dụ Chileke ree

¹Unu ba ahakwa oye obu ono, unu kwoberu l’unu shiwaa l’ẹka Kuráyisutu bụru ụnwunna, ye ibe unu ono. ²Unu ba azọhakwa ọkwajeru ndu byarụ abya ẹbyii ọkpobe akwakwa, l’o nwekwaru ndu gudewaa lẹ whẹ l’akwarụ ndu byarụ abya ẹbyii jeye whẹ kwaarụ ndu ojozhi-imigwe ẹbyii whẹ ta amarọo. ³T’unu nyatajẹkwa ndu mkpọro, t’ọ dụje unu g’ọo unubẹdua nọ lẹ mkpọro ọbu. Unu nyatajẹkwawho ndu l’eje iwhe-ọtsulanu, t’ọ dụjekwawho unu g’ọo unu l’eje iwhe-ọtsulanu ọbu.

⁴T’iwhe bụ-zhia unwoke, l’alụ nwanyị mẹe ụnwanyi, l’alụ ji bụru ẹhu l’alụlu whẹ ono nke ọwhu l’ẹte anọ ama alụlu whẹ ono ejo ẹka. Tẹ nwoke yẹle nyee ya ba adụkwa onye ọwhu l’eri ogori, shi nno merwua onwowhe. Lẹ nwoke l’akpa lẹ nwanyị mẹe nwanyị l’akpa nwoke mẹe ndu l’eri ogori bẹ Chileke l’e-kpekwa ikpe.

⁵Unu be eyenukakwa ẹnya l’okpoga. T’iwhe unu nweru tsụjee unu l’ẹnya. Lẹ Chileke kfuakwaru iya l’onwiya sụ: “Mu ta agbahakwa ghu ẹka, mu ta abya l’eweha ghu.” ⁶Ọo ya bụ, unu t’anyi kfụshijenua ike kfuje okfu-a, t’anyi ba atsụje egvu ekfukfu iya. T’anyi kfuje sụ:

“Ọo Onye-Nwe-Ọha bụ onye l’eyejeru mu ẹka,

Mu ta abyadụ l’atsụ egvu.

Madzụ ta adụdu iwhe l’oo-mebata mu.”

⁷Unu nyatajẹ ndu ono bụ whẹ vu ụzo goshi unu ụzo, bụ iya bụ ndu ono, zhiru unu ozhi-ọma Chileke. Unu kpọlataada égò azụ, nyata gẹ whẹ shi anọje eme nteke ono, whẹ nọ ndzụ jeye whẹ nwụhu, tẹ ekwekwe, unu kweru nke Chileke dụkwa g’ọo nke whẹ. ⁸Jisọsu Kuráyisutu: bụ onye ono ọ bụ, b’ọ bụ ụnyawhu, bụru iya ntanụ-a, o je l’a-bụ iya jeye lẹ tututu-mịmimi. ⁹Unu be ekwekwa t’iwhe l’ezhi ezhi dụ-gee l’iche l’iche shi uswe bya akposwee unu ụzo. Ọ dụ ree t’anyi gude eze-iwhe-ọma ono, Chileke l’eme shihu obu ike. Omewhe nsọ nsọ, tso nri te emekwa t’obu shihu anyi ike, ọ tọko dụbudua onye tsojeru iya nno, o yejeru ẹka.

¹⁰Anyi nweru ẹnya-mgbẹja ẹka Kuráyisutu gbarụ ẹja nụ Chileke, mbụ ọwhu ndu l’agbakwadụru-a Chileke ẹja l’ụlo ono, e gude ẹkwa mee l’afụa ria iwhe shi iya nụ. ¹¹Onye ishi ndu l’agbajẹ ẹja nụ Chileke nke whẹbedua, bẹ l’egudeje mmee ụnwu anụ, e gburu egbu gude bahụ l’ẹka-kakọta-ọdu-nsọ l’ime eze-ụlo Chileke, tẹ ya je egude iya gbaa ẹja gbafụ iwhe-dụ-ẹji, ọle anụ, ono a whụ-gburu awhụ-gbu ono bẹ l’eewotaje lụfu je l’ẹka l’ebua ebu je akpọo ya ọku. ¹²Ọ bụkwanuru iwhe ono meru g’o gude Jisọsu nọdukwanu l’azụ obodo, jee iwhe-ọtsulanu, nwụhu, nnta gẹ l’ee-shi tẹ ya gude mmee ya safụ iwhe-dụ-ẹji ndiwhe metagbaberu. ¹³Ọo ya bụ, unu t’anyi jekfu iya l’azụ obodo t’a tụko anyi l’iya mee iwhe iwhere. ¹⁴O noo l’ọ tọ dụdu obodo, anyi nweru l’eliwhe-e, bụ obodo ọwhu l’a-dụgburu jeye lẹ tututu-mịmimi, iwhe gbechia mee nụ bụ l’anyi l’achọ obodo ọwhu l’abya nụ. ¹⁵Ọo ya bụ, tọ bọ dụkwa nteke anyi l’ahajẹ otu Chileke ẹwha. T’ẹwha ono bụru mgbẹja, anyi shi l’ẹka Kuráyisutu agba. Ọo ẹwha ono, anyi l’etu iya l’a-bụ iwhe shi anyi l’ọnu, l’egoshi l’anyi bụwaa nkiya. ¹⁶Unu ba ahakwa omeje iwhe dụ ree, unu ta ahahụnu ogudeje iwhe unu nweru eyeru ibe unu ẹka, nkele o noo ẹgube mgbẹja ọwhu dụ Chileke ree.

¹⁷Unu mejee iwhe ndu ishi unu sụru t’unu mee, mbụkwa e behuduru l’ọotsu unu m’ọo l’ẹhu ememe. L’ọ kwa ndu ono, bụ ndu ishi ono bẹ l’anọje eche ndzụ unu, eshi-ọwhu whẹ l’ee-megee kfụru l’iwhu Chileke doo gẹ whẹ jetaberu ozhi ẹhu unu. Unu l’e-mezhiwaa iwhe whẹ sụru t’unu meje bẹ whẹ l’e-gudekwa ẹhu-ụtso jee ozhi whẹ ono. Ọdumeka bẹ whẹ l’e-gbekwa eme iya atsụ ude, o noo ta adụkwa urwu, l’ọo-bẹru unu.

¹⁸Unu kfujekwaru nụru anyi Chileke. L’ọwhu doru anyi ẹnya bụ l’obu ta anmadu anyi ikpe, mbụkwa to nwezhia nteke l’ọ tọ bụlewho t’anyi mee iwhe dụ ree l’iwhe lile, anyi l’eme eme bẹ anyi l’anọje achọ ụzo iya. ¹⁹Iwhe mu kwatarụ aryọshi-zhia unu ike iya, ụnwunna mu bụ: t’unu kfuje nụ Chileke tẹ Chileke kwe tẹ mu byakfuta unu ẹgwegwa.

Okfu anụ Chileke

²⁰Tẹ Chileke ono bụ iya l’emeje t’ẹhu dụ guu yekwaru unu ẹka. Ọo ya meru tẹ Onye-nwe-anyi Jisọsu Kuráyisutu shi l’ọnwu teta, nọdu ndzụ, bụ iya bụ onye shi l’anwụhu ono, ọ nwụhuru bụru eze onye l’eche anyi gẹ l’eecheje atụru. Ọ bụru mmee, ọ gbashịru nteke ono, ọ nwụhuru b’o gude mee ụkwa iwhe ono, Chileke kweru tukobe l’ọgbandzu yẹle madzụ, o vuru ire jeyewaro lẹ tututu-mịmimi. ²¹Tẹ Chileke ono mee t’unu nweru iwhe lile, bụ iwhe dụ ree, ya emee t’unu meje iwhe bụ uche iya. Tẹ Chileke shikwawho l’ẹka Jisọsu Kuráyisutu mee iwhe bụ iwhe dụ iya ree l’obu anyi. T’ọja-ama bụru nke Kuráyisutu jeye lẹ tututu-mịmimi. O noo g’ọ dụ.

Ekele, e gude akpochi ẹkwo-ozhi-a ishi

²²Ọ kwa aryọryo bẹ mu l’aryọ unu, ụnwunna mu sụ: t’unu takwaa nshi nụa ozhi-a, l’ẹkwo-ọ, mu deru unu-a ta adụkwa ogologo. Ọo ya bụkwanu nke ọwhu l’oo-me unu t’obu shihu unu ike. ²³Iwhe mu l’eme t’unu marụ bụ lẹ nwune anyi bụ Tímoti, e shi tuchia, b’a hawarụ. Ọ -bụru l’ọ byarụ ẹgwa bẹ mu l’iya l’a-tụkokwa lịru mẹ mu -byadẹ unu agbawhe.

²⁴Unu jịaru mu iwhe bụkota ndu ishi unu mẹe iwhe bụkota ndu bụ ndu nke Chileke. Ụnwunna anyi ndu Ị́tali l’ajịkwaro unu. ²⁵Tẹ Chileke meeru unu eze-iwhe-ọma g’unu hakọta.