Hágayi

Ẹkwo

HÁGAYI

Onye Nkfuchiru Chileke

Onye-Nwe-Ọha l’eku ndu Ízurẹlu tẹ whẹ tụkwaaru iya eze-ụlo iya

¹L’awha kwe Daríyọsu awha labọ ọ watarụ ọbu eze ndu Peshiya, l’abalị mbụ l’ọnwa nke ishii, bẹ Onye-Nwe-Ọha shi l’ọnu onye nkfuchiru iya bụ Hágayi kfuru yeru ọ-chị-ọha, l’achị alị ndu Juda, bụ Zerúbabelu nwa Sheyalutiyẹlu yẹle onye ishi ndu l’agbajẹ ẹja nụ Chileke, bụ Jóshuwa nwa Jehozadaku sụ whẹ: ²Ọ waa iwhe Onye-Nwe-Ọha, bụ Onye-ishi-igwe-ọgu l’ekfu: “Ndu-a l’anọje ekfu sụ l’oge teke erwudua nteke l’aa-tụkwa eze-ụlo Onye-Nwe-Ọha.” ³Ọo ya meru Onye-Nwe-Ọha shi l’ọnu onye nkfuchiru iya ono, bụ Hágayi ezhi ozhi-a sụ: ⁴“?Oo gbechia bụru unu b’ọ gbarụ nke t’unu buru l’ụlo a tụru ọ dụ ree, l’ẹka unu l’elekwaa l’eze-ụlo yẹbe Onye-Nwe-Ọha bụ mkpọkoro ụlo?”

⁵Ọ waa iwhe Onye-Nwe-Ọha, bụ Onye-ishi-igwe-ọgu l’ekfu ndọwa: “Ngwa, unu lenua ẹnya whụ gẹ l’ọonwuru unu! ⁶Unu kọru iwhe shii l’alị, unu kpata iya iwhe l’ẹte abaa nwishi. Unu l’erije nri, ẹwho te ejidu unu, unu angụa iwhe-angụngu, unu eje angụ-ji ẹwho. Unu l’eyeje uwe, oyi atsụlee unu. Ndu l’aakfụ ụgwo ọrwu l’anatajẹ ụgwo whẹ chịru ye l’ẹkpa fuhuru ụzo.”

⁷Ọ waa iwhe Onye-Nwe-Ọha, bụ Onye-ishi-igwe-ọgu l’ekfu: “Unu lenua ẹnya whụ gẹ l’ọonwuru unu! ⁸Unu jeshia l’ugvu je egbukoo oshi bya egude mekwaa eze-ụlo Onye-Nwe-Ọha ono nke ọwhu ẹhu l’a-tsọ mu ụtso, a nọdukwa iya whọ kwabẹ mu ugvu.” O nokwa iwhe Onye-Nwe-Ọha l’ekfu ndono. ⁹“Unu leru ẹnya t’unu seta iwhe ha shii, ọ bụru iwhe l’ẹte abaa nwishi bẹ unu setaru. Unu bya ewolahu iwhe ọbu, unu setaru l’uwhu, mu whụa ya ọnu o whụkashihu. ?Ọo gụnu kparụ iya? O noo iwhe Onye-Nwe-Ọha bụ Onye-ishi-igwe-ọgu l’ajị. Iwhe kparụ iya nụ bụ l’ụlo mu bụ mkpọkoro ụlo, unu haa ya, onyenọnu whuchiru l’omezhi ụlo nkiya. ¹⁰Ọo iwhe ono meru, igweli chị-buhu mini, alị te emetajehe iwhe. ¹¹Mbụ lẹ mu kuwaru anwụ-akpọkpo oku t’ọ bya akpọbe l’alị mẹe l’eli ugvu mẹe lẹ witi mẹe lẹ mgbu vayịnu mẹe l’oshi ólivu mẹe l’iwhe bụ-zhia iwhe l’eemetaje l’alị, je akpaa lẹ madzụ mẹe l’elwu mẹe l’anya, madzụ seru esese.”

¹²Tọ dụ iya bụ, Zerúbabelu nwa Sheyalutiyẹlu yẹle onye ishi ndu l’agbajẹ ẹja nụ Chileke ono, bụ Jóshuwa nwa Jehozadaku mẹe iwhe bụ ndu whọduru lẹ ndu Ízurẹlu kweta bya emee iwhe Onye-Nwe-Ọha bụ Chileke whẹ kfuru, mbụ whẹ mee iwhe ono Hágayi, bụ onye nkfuchiru Chileke kfuru whẹ, ẹgube ono Onye-Nwe-Ọha, bụ Chileke whẹ zhiru iya t’o zhia whẹ. Ndu Ízurẹlu tsụlahaa Onye-Nwe-Ọha egvu. ¹³Nteke ono Hágayi, bụ onye ozhi Onye-Nwe-Ọha ono bya ezhia ndu Ízurẹlu ozhi, Onye-Nwe-Ọha zhiru whẹ sụ: “Mu nọkwa-a swiru unu.” O nokwa iwhe Onye-Nwe-Ọha l’ekfu ndono. ¹⁴Onye-Nwe-Ọha bya akpalia obu Zerúbabelu nwa Sheyalutiyẹlu, onye bụ iya bụ ọ-chị-ọha, l’achị alị Juda, kpalia obu Jóshuwa nwa Jehozadaku, onye bụ iya bụ onye ishi ndu l’agbajẹ ẹja nụ Chileke bya akpalia obu ndu whọduru lẹ ndu Ízurẹlu gẹ whẹ ha. Whẹ tụko bya eyeko ẹka l’ọrwu, dụ l’eze-ụlo Onye-Nwe-Ọha ono bụ Onye-ishi-igwe-ọgu, mbụ Chileke whẹ. ¹⁵Ọ bụru g’ọnwa ishii ono dụ l’ụkporo abalị l’abalị ẹno l’awha ono, kwe eze bụ Daríyọsu awha labọ ọ watarụ ọbu eze ndu Peshiya bẹ whẹ watarụ ọrwu ono.

Aatụ ọnu gẹ eze-ụlo Onye-Nwe-Ọha l’a-dụ-be biribiri

¹O be g’ọnwa nke ẹsaa gbarụ ụkporo abalị l’abalị lanụ, Onye-Nwe-Ọha shi l’ọnu onye nkfuchiru iya bụ Hágayi kfua sụ: ²“Kfuru yeru Zerúbabelu nwa Sheyalutiyẹlu onye bụ iya bụ ọ-chị-ọha, l’achị alị Juda, gụ ekfuru yeru Jóshuwa nwa Jehozadaku onye bụ iya bụ onye ishi ndu l’agbajẹ ẹja nụ Chileke mẹe iwhe bụ ndu whọduru lẹ ndu Ízurẹlu. Sụ whẹ agha: ³‘?Ọo onye l’ime unu bẹ whọduru lẹ ndu whụru gẹ eze-ụlo-ọ shi dụ-be biribiri lẹ mbụ? ?Ọo dụ unu agha l’ẹnya ntaa? ?Tọ dụdu unu g’ọo iwhe mmaanụ? ⁴Ọle t’obu shia ghu ike ntaa gụbe Zerúbabelu. O nokwa iwhe Onye-Nwe-Ọha l’ekfu ndono. T’obu shia ghu ike Jóshuwa nwa Jehozadaku, gụbe onye bụ onye ishi ndu l’agbajẹ ẹja nụ Chileke. T’obu shia unu ike g’unu ha bụru ndu alị-a l’owhu. O nokwa iwhe Onye-Nwe-Ọha l’ekfu ndono. Unu kebe ẹhu l’ọrwu ono nkele mu nọkwa-a swiru unu. O noo iwhe Onye-Nwe-Ọha, bụ Onye-ishi-igwe-ọgu l’ekfu ndono. ⁵Nteke unu shi l’alị Íjiputu fụta bẹ mu kweru unu ụkwa lẹ mu l’e-swiru unu. Ume mu nọkwa l’echilabọ unu. Unu ba atsụkwa egvu!’ ”

⁶“Ọ waa iwhe Onye-Nwe-Ọha bụ Onye-ishi-igwe-ọgu l’ekfu ndọwa: ‘Ọ bụa nwanshị ntaa, mu anmaa igweli yẹle mgboko yikayika, nmaa eze-ẹnyimu yẹle alị ọkponku yikayika. ⁷Mu anmaa mba gẹ mba ha yikayika. Iwhe ono ndu mba lile l’achọshi ike abụru pẹtee. Mu emee t’eze-ụlo-ọ l’owhu jifuta l’ọdu-biribiri. O noo iwhe Onye-Nwe-Ọha bụ Onye-ishi-igwe-ọgu l’ekfu ndono. ⁸Mkpọla-ọcha bẹ bụ mu nwe iya, mkpọla-ododo bụru mu nwe iya. O noo iwhe Onye-Nwe-Ọha bụ Onye-ishi-igwe-ọgu l’ekfu ndono. ⁹Eze-ụlo ọ̀whúú ọwa bẹ ọdu-biribiri iya l’a-kakwa shii amamẹ ọdu-biribiri nke akahụ iya. O noo iwhe Onye-Nwe-Ọha bụ Onye-ishi-igwe-ọgu l’ekfu ndono. Ọ bụru l’ẹka-a bẹ mu l’a-nụ ndibe mu ẹhu-ọdu-guu.’ ” O noo iwhe Onye-Nwe-Ọha bụ Onye-ishi-igwe-ọgu l’ekfu ndono.

Ajị, a jịru ndu l’agbajẹ ẹja nụ Chileke

¹⁰O be g’ọnwa tete gbarụ ụkporo abalị l’abalị ẹno l’ime awha kwe eze bụ Daríyọsu awha labọ ọ watarụ ọbu eze, Onye-Nwe-Ọha kfuru okfu yeru onye nkfuchiru iya, bụ Hágayi sụ iya: ¹¹“Ọ waa iwhe Onye-Nwe-Ọha bụ Onye-ishi-igwe-ọgu l’ekfu: ‘Jịadaa ndu l’agbajẹ ẹja nụ Chileke iwhe iwu kfuru l’ọnodu-a: ¹²Ọ -bụkwanuru lẹ madzụ bẹ wotaru anụ, e doberu nsọ, pyaa ogboromọnu uwe iya apyapya gude parụ anụ ono; ogboromọnu uwe iya ono jịru lẹ buredi m’ọ bụ l’owhe, e teru etete m’ọ bụ lẹ mmẹe m’ọ bụ lẹ mmanụ m’ọ bụ l’ọ jịru l’ọga nri ọdo, dụ iche. ?O meru tẹ nri ọbu dụ nsọ?’ ”

Ndu l’agbajẹ ẹja nụ Chileke ono sụ iya: “Waawa.”

¹³Hágayi jịkwa whẹ ọdo sụ: “Ọ -bụkwanuru lẹ madzụ bẹ byiru odzu ẹka, shi nno merwua onwiya; onye ọbu harụ ụnwu iwhe ono byia ẹka. ?O meru t’iwhe ono bụru iwhe e merwuru emerwu?”

Ndu l’agbajẹ ẹja nụ Chileke ono sụ iya: “Ee.”

¹⁴Hágayi bya ekfua sụ: “Ọ kwa nno bụ g’ọ dụ ndu-a, mbụ ọha-a mu l’ele ẹgube-ẹ yẹle iwhe lile, whẹ l’eme eme. Ọ bụkwaruwho nno bụ g’ẹja lile, whẹ l’egwo bụ iwhe e merwuru emerwu. O nokwa iwhe Onye-Nwe-Ọha l’ekfu ndono.

Onye-Nwe-Ọha l’a-gọru ndu Ízurẹlu ọnu-ọma

¹⁵“Sụa, unu lee ẹnya wata ntanụ tụgburu. Unu lewaro g’o shi dụ nteke l’eeteka ewota ẹwhuru kpokfube l’eli ibe iya l’eze-ụlo Onye-Nwe-Ọha. ¹⁶Nteke ono shi abụje, madzụ jee ẹka a kụberu ereshi l’ikpo l’ikpo; o lee ẹnya l’iwhe l’aa-gbata iya bụ tinu ụkporo, e megele-e ya abụru tinu iri bẹ l’aa-gbata iya. Onye jeru l’ẹka l’aadzọshi mmẹe l’akpụru vayịnu t’iya kuta mmẹe, l’e-ji itoto ụkporo labọ l’iri, iwhe l’ọo-kụta abụru itoto ụkporo. ¹⁷Iwhe lile, unu seru anya iya bẹ mu meru ọ chashịa mmanụ tsụshia evu, mu gude aka-mini nụa ya awhụ, tọ narụ unu nke t’unu daa onwunu ụta lwakfuta mu. O nokwa iwhe Onye-Nwe-Ọha l’ekfu ndono. ¹⁸Unu lee ẹnya wata ntanụ tụgburu, ntanụ-a, ọnwa tete dụ l’ụkporo abalị l’abalị ẹno. Unu lenua ẹnya g’iwhe dụ, eshi mbọku ono a tụru ukfu eze-ụlo Onye-Nwe-Ọha ono. ¹⁹?Oo nwekwaduru mebyi-iwhe, dụkwadu l’ọba? Ntaa bẹ oshi vayịnu yẹle figu, mẹe oshi itorokuma, mẹe oshi ólivu ta amịdekwaa mebyi. Ọle wata ntanụ tụgburu bẹ mu l’a-gọru ọnu-ọma nụ unu.”

Onye-Nwe-Ọha meru Zerúbabelu eze

²⁰Mbọku onokwawho, mbụ mbọku ono ọnwa ono dụ l’ụkporo abalị l’abalị ẹno ono bẹ Onye-Nwe-Ọha bya ekfuru okfu yeru Hágayi ọdokwa nke ugbo labọ iya sụ iya: ²¹“Kfuru Zerúbabelu bụ ọ-chị-ọha, l’achị alị Juda lẹ mu bya l’anma igweli yẹle mgboko yikayika. ²²Mu akwatsushia ndu bụ eze l’oshi-eze whẹ. Mu emebyishia ike ndu bụ eze, l’achị mba gẹ mba ha. Mu akwatsushia ụgbo-ịnya yẹle ndu l’agba iya agba. Ịnya yẹle ndu l’agba iya agba l’a-da ndatẹwo, onyenọnu egude ogu-ịgba gbugbua ibe iya.” ²³“O -rwua mbọku ono, o noo iwhe Onye-Nwe-Ọha bụ Onye-ishi-igwe-ọgu l’ekfu, mu eduta gụbe Zerúbabelu bụ onye ozhi mu, mbụ gụbe nwa Sheyalutiyẹlu, o noo iwhe Onye-Nwe-Ọha l’ekfu. Mu l’e-me ghu t’ị dụ g’ọo echi-ọhubama, mu gba l’ẹka nkele mu họtawaru ghu.” O noo iwhe Onye-Nwe-Ọha bụ Onye-ishi-igwe-ọgu l’ekfu ndono.