Habakuku

Ẹkwo

Habakuku

Onye Nkfuchiru Chileke

Habakuku l’agụ áwhụ

¹Ọ waa bụ ozhi, Onye-Nwe-Ọha goshiru Habakuku l’ọwhulenya. ²Gụbe Onye-Nwe-Ọha ?ọo nteke ole bẹ mu l’e-chiberu mkpu eyemẹka tẹmenu gụ aza mu? ?Mbụ nteke mu l’e-chiberu mkpu sụ l’iwhe-ike bẹ dụnuka l’ẹhu mu, tẹmenu gụ agbaarụ mu mkpu? ³?Ọo gụnu meru i kweta tẹ mu whụ ẹka l’eeme ejo-iwhe? ?Ọo gụnu meru l’iileje ẹnya l’iwhe l’adụa ree gụ ahaa ya? Emebyi yẹle ome iwhe-ike bẹ nọ mu l’iwhu, ọlwu ọgu yẹle ose okfu l’etse kụlakula. ⁴Ọo ya meru g’o gude iwu te erehe ire, t’e mejehe iwhe kfụru nhamụnha. Ndu l’eme ejo-ememe ripyaberu ndu dụ chịriri, ọ bụru iya meru ikpe ta akalẹjeru ndu o rwuberu.

Ọnu Onye-Nwe-Ọha yeru Habakuku

⁵Unu leeda ẹnya lẹ mba gẹ mba ha whụduwho iwhe l’a-dụ unu biribiri, tụfu unu ẹhu. O noo l’iwhe mu l’abya ememe l’oge nkunu-a bẹ bụ iwhe unu l’ẹte abya l’e-kweta l’ọo ọkpobe iya, o behuduru e kfuaru iya unu. ⁶Nkele ndu mu l’eme tẹ mu kpatsua bụ ndu Bábyilọnu, mbụ ndu mba ono, obu tarụ ivomini, whẹ l’eme igiri igiri. Whẹ l’aghajajẹ mgboko l’uswe je anata ẹka ndu ọdo bu. ⁷Whẹ bụ ndu l’aatsụ egvu bụru ndu l’eye egvu. Whẹ bụ iwu ẹka whẹ, ọ bụru iwhe whẹ sụru lẹ whẹ l’e-me bẹ whẹ l’emeje.

⁸Ịnya whẹ bẹ ọkpa l’atsụ nkọ karụ agụ; ka ome igiri amamẹ ágụ́, l’akpa l’abalị. Ndu l’agbarụ whẹ ịnya l’awụ ọso awụwu. Mbụ lẹ ndu l’agbarụ whẹ ịnya shi l’ẹka teru ẹnya awụ ọso eje abya. Whẹ l’ezhi whaa whaa g’ọo ivu agba vụgavuga achọ iwhe whẹ l’a-dzụta je eria.

⁹Iwhe whẹ kwoberu abya bụ ome iwhe-ike. Whẹ l’ezhikaa whaa whaa eje abya g’ọo whẹrewhere, shi ụzo ẹnyanwu-awata, tẹmenu whẹ l’ekpoko madzụ ekpoko akpụ lẹ ndzụ g’ọo ndu l’ekpoko ẹja. ¹⁰Ndu eze bẹ whẹ l’anọje aja ewenu, ekfubyishi ndu ishi ekfubyishi. Ẹka a tụru o shihu ike bẹ whẹ l’achịje ọchi nkele ọ bụa ẹja bẹ whẹ l’ekpokobeje gude lwụshi whẹ ọgu lwụ-gbua.

¹¹Whẹ megee, whẹ ezhia whaa g’ọo whẹrewhere ya abụru whẹ atụgbu. Ndu ikpe nmarụ bụ ndu ono, ike whẹ nweru bụ chi, whẹ l’abarụ ẹja.

Habakuku l’agụ áwhụ nke ugbo labọ

¹²Gụbe Onye-Nwe-Ọha, ọo ire-lanụ l’i shi l’edenwede. Gụbe Chileke mu, dụ nsọ, ị bụ anwụhu anwụhu. Oowaa Onye-Nwe-Ọha, ntaa b’ị họtaru ndu Bábyilọnu dobe t’i gude whẹ kpee anyi ikpe. Gụbe onye ono, bụ eze-ẹwhuru, ntaa b’ị kfụberu whẹ t’i gude whẹ hụ̀a madzụ àhụ̀hù. ¹³Ẹnya ghu donukakwaru rịsaa nke t’i gude iya ele ejo-iwhe. I tii ledu ẹnya l’iwhe l’adụa ree. ?Ọo gụnu meru l’iinọje ele ndu l’eete egudee ire whẹ ẹka gụ ahaa whẹ? ?Mbụ l’iidobeje ọnu ndoo nteke onye l’eme ejo-ememe l’elwe onye ka iya ọdu chịriri olwe wọo?

¹⁴I mewaru madzụ, whẹ dụ g’ọo ẹma, bu lẹ mini, mbụ lẹ whẹ dụ g’ọo ụnwu iwhe l’awụ l’ẹwho, l’ete enwee ndu bụ ishi, l’achị whẹ nụ. ¹⁵Ndu Bábyilọnu l’egudeje aga-ẹma whẹ anmakọ madzụ, gude ụgbu-ẹma whẹ anwụko madzụ. Whẹ l’egudeje ụgbu-aghagha whẹ anwụko madzụ, ẹhu atsọ whẹ, whẹ ete ẹswa. ¹⁶Ọo ya meru, whẹ gwalahaa ụgbu-ẹma whẹ ono agwagwa, akpọru ụgbu-aghagha whẹ ụ̀nwù isẹnsu nkele ọo ụgbu ono meru whẹ nọdu ndzụ ẹhu ọdu guu, eri ọkpobe nri.

¹⁷?Whẹ l’anọdugbuwaro l’ogbuji ụgbu whẹ ono lẹ madzụ, shi nno gbua mba gẹ mba ha, jịka lẹ whẹ ta awhụduru whẹ obu imiko?

Ọnu ọdo, Onye-Nwe-Ọha yeru Habakuku

¹Mu bya l’eje akfụru l’ụlo-nche mu chelahaa nche, mu l’e-je anọdu l’eli ẹka a tụshiru ike ele ẹnya tẹ mu marụ iwhe Onye-Nwe-Ọha l’e-kfuru nụ mu, mbụ ọnu, l’oo-yeru mu l’awhụ ono mu l’agụ.

²Ọnu, Onye-Nwe-Ọha yeru mu bụ ọwa: “Dee iwhe ị whụru l’ọwhulenya ono edede, dee ya t’o shia uryi l’eli okpekpu-ẹkwo nke ọwhu onye l’a-gba m’ọo ọso l’a-gụta iya. ³O noo l’ọwhulenya ono l’e-medzu mẹ oge iya rwulewho. Oge ono l’agbakwa kparakpara eje abya, ejire ta adụkwa iya ilile. A makwarụa l’ọ kpọnukawaru ụkfu, ọle nmẹe anmẹe l’ọobyaa. Nkele o mefutajekwa, ọ tọo nọhekwa ọdu ntaa ya emee.

⁴“Ị whụwaru iya l’onye obu l’agụa iwhoro l’a-bụru byẹkfukungu. Obenu l’onye woru onwiya ye Chileke l’ẹka, shi nno dobe onwiya chịriri l’a-nọdu ọkpobe ndzụ.

⁵“Mmẹe l’eduswe madzụ. Ndu nweru oke ẹkpiri l’anọje eku onwowhe eku ebu gadagada nteke nteke. Ẹwho l’eghejeru whẹ ọnu g’ọo alị-maa, tẹmenu whẹ bụru ẹwho eji ọnwu. Mba gẹ mba ha bẹ whẹ l’erwutaje yeru onwowhe, tẹmenu whẹ l’alwụtaje madzụ l’owhu.

⁶“Ndu ono a lwụtaru l’ọgu l’e-bechakwaa kọlahaa ndu ono, lwụtaru whẹ nụ ọnu, mbụ lẹ whẹ l’a-ja whẹ ewenu sụ: ‘Áwhụ tsọkwaru ndu ono, l’achịkoje iwhe l’abụa nkewhe, mbụ ndu ono, gude iwhe ndu ọdo aba eze. ?Ọo nteke ole bẹ unu l’e-menyaa iwhe ono meberu?’ ⁷Unu bya l’amadeshia bẹ ndu ono, ji unu ụgwo l’a-dakọbe taa unu ejo ẹru l’ẹhu. Ndu l’e-me t’ẹhu tee unu kpakpakpa l’a-fụtakwa. Unu abya abụru whẹ iwhe-eriri. ⁸Ikpoto mba bẹ unu gworu tụtua. Eshi-ọwhu ọ dụ nno bẹ ndu mba ọwhu whuduru nụ l’e-gwokwawho unubẹdua tụtua. Iwhe kparụ iya nụ bụ nke ọchi ndu ono, unu gburu mẹe nke iwhe-ike ono, unu megbaberu l’alị dụ iche iche mẹe lẹ mkpụkpu dụ iche iche mẹe ọwhu unu meru ndu bu iya nụ.

⁹“Nshọbukwa ndu l’egudeje urwu, whẹ ritaru l’ụzo l’adụa ree azụ ndibe whẹ, mbụ ndu ono, kwarụ uwhu dobe l’imeli, ẹka whẹ l’achọ ụzo whẹ l’e-shi nahụ gẹ l’ọodua! ¹⁰Ejo ẹtomu ono, unu tọru bẹ kpuwaru ndibe unu iwhu l’oguri, mbụ l’unu shiwa l’ememe ono, unu meru ikpoto mba whẹ chihu, mee tẹ ndzụ unu whugoru awhugoru. ¹¹Ẹwhuru e gude tụa mgbodo ụlo l’e-chikwa mkpu; oshi e gude mee akwa ụlo ataarụ iya ọchichi.

¹²“Nshọbukwa ndu ono, l’egudeje ogbu madzụ lwụta mkpụkpu tụkwaa, mbụ ndu ono, gude ejo-iwhe eme mkpụkpu t’o shihu ike. ¹³Sụa, ?tọ bụdu Onye-Nwe-Ọha, bụ Onye-ishi-igwe-ọgu bẹ meru, anya ndiwhe seru bụru iwhe dụ swiru ọku, l’enwu enwu; mba gẹ mba ha bụru nsegbu anya bẹ whẹ seru? ¹⁴Ọle mgboko l’owhu l’e-megee makọtaru gẹ Onye-Nwe-Ọha dụ-be biribiri, mbụ l’aa-marụ iya ramaa, ẹgube ono, mini dụ ramaa l’eze-ẹnyimu.

¹⁵“Nshọbukwa ndu ono, l’echeje ibe whẹ mmẹe, gude ntiko agbarụ whẹ iya jeye nteke l’ọo-wata whẹ ome l’ẹnya nke ọwhu whẹ l’a-whụ ẹka whẹ gbọ ọto. ¹⁶Ọ kwa iwhere l’e-megee ji unu iwhu, o beta ọwhu l’aa-kwabẹ unu ugvu. Ntaa b’o rwubewaru unu l’ọngu mmẹe nkunu! Unu ngụa ya gbarụ ọto! Ọ kwa unu bẹ omogo iwhe-ọtsulanu, shi l’ẹka-ụtara Onye-Nwe-Ọha l’abyakfuta. Iwhere, l’a-dụ unu l’a-ka shii amamẹ ugvu, e shi akwabẹ unu. ¹⁷Iwhe-kpanganga ono, unu meru l’ọswa, dụ l’ugvu ugvu Libanọnu l’a-byarụ unu ria unu ishi. Anụ-ẹgbudu, unu gburu egbu l’e-megee yee unu egvu. Iwhe kparụ iya nụ bụ nke ọchi ndu ono, unu gburu mẹe nke iwhe-ike ono, unu megbaberu l’alị, dụ iche iche mẹe lẹ mkpụkpu, dụ iche iche mẹe ọwhu unu meru ndu bu iya nụ.

¹⁸“Ọo urwu gụnu bẹ ntẹkpe, a pyịru apyị bẹru l’ẹka ọ kwaa madzụ bẹ gude ẹka iya pyịa ya? Ọo urwu gụnu bẹ ntẹkpe a kpụru akpụkpu bẹru, mbụ iwhe ono, l’ezhije iwhe l’abụa ọkpobe-okfu? ?Ọo mkpa gụnu b’ọ garụ onye meru iya nụ nke t’ọ kpọru obu yeru iya, mbụ ntẹkpe ono, l’ete ekfu okfu. ¹⁹Nshọbukwa ndu ono, l’asụje mkpụrumkpu-oshi: ‘Tehu etehu’, mbụ ndu ono, l’asụje ẹwhuru, l’ete eme ụkporo: ‘Gbalihu agbalihu.’ ?O nweru iwhe ntẹkpe l’a-dụ ike kpọ-zhiaru unu ụzo iya? Sụa, iwhe ono bụkwa iwhe a wụru mkpọla-ododo yẹle mkpọla-ọcha tọ tụ ume.

²⁰“Ọle Onye-Nwe-Ọha bẹ nọ l’eze-ụlo iya, dụ nsọ; tẹ mgboko l’owhu dakwaa kfụkfurukfu l’iwhu iya.”

Ekfukfu, Habakuku kfuru nụ Chileke

¹Ọ waa bụ ekfukfu, onye nkfuchiru Chileke, bụ Habakuku kfuru nụ Chileke. O gude olu áwhụ gụa ya.

²Gụbe Onye-Nwe-Ọha, mu nụwaru ọtu ọnu ghu,

iwhe i meru l’eyekwa mu egvu gụbe Onye-Nwe-Ọha.

Menua iwhe ono ọdo t’ọ dụ

ọwhuu ntaa, anyi nọ ndzụ.

Menua t’a marụ iya ntaa, anyi nọ ndzụ.

Ẹhu -ghutajenu ghu eghu, nyatanụ obu-imiko ghu.

³Chileke shikwa lẹ Temanu abya,

mbụ l’onye ono, dụ nsọ bẹ shi l’ugvu Paranu abya.

Ogbu-zaazaa ya bẹ tụkoru imigwe l’owhu sweta,

mgboko l’owhu l’aja iya ajaja.

⁴Ogbu-zaazaa ya dụ g’ọo ẹka ẹnyanwu warụ.

Ọbochi-ẹka l’ekekaa ya zhịizhii.

Ọ bụru l’ẹka iya b’o domiru ike iya.

⁵O zhiru ejo ẹhu-ba-dụ-mma t’o vutaru iya ụzo,

zhia mgbu-ọnwu t’o tsokebe iya l’azụ.

⁶Ọo akfụru, ọ kfụru bẹ mgboko nmahụru yikayika.

Ọ bụru ẹnya, o leru bẹ mba gẹ

mba ha nmahụru kwekwekwe.

Eze ugvu, shigee lẹ ndụ-ichee

whọkashihu nnanụ nnanụ.

Ụnwu ugvu nshịi, nọwaru ọdu zekposhihu.

Ụzo, ọ tọru bẹ shi l’edenwede.

⁷Mu whụru ndu Kushanu l’ẹka whẹ l’eje iwhe-ọtsulanu,

mu whụa ndu Midiyanu l’ẹka whẹ l’anma kwekwekwe.

⁸Gụbe Onye-Nwe-Ọha, ?ọo

ẹnyimu bẹ meru iwhe ẹhu shi eghu ghu eghu?

?Ọo eze-ẹnyimu bẹ meru iwhe

ẹhu shi eghu ghu damụdamu

nteke ono, i shi agba l’eli ịnya,

mbụ nteke ono, i shi gude ụgbo-ịnya agba eje t’i mee tẹ

ndu nkeghu lwụ-gbua?

⁹Ube ghu b’ị chịfutaru ghebe

ọnu bya eworu akfụ yejia ya eyeji.

Ị bya egude ukporo-mini kpojashia mgboko.

¹⁰Eze ugvu bẹ whụru ghu nụ nmahụ kwekwekwe.

Ukporo-mini bya ekporu ghata.

Ogbu-mini swokerehu.

Akpara-mini iya l’atulihuje imeli imeli.

¹¹Ẹnyanwu yẹle ọnwa keru

jịngujingu l’ẹka whẹ l’anọduje,

gẹ whẹ whụru akfụ ghu gẹ l’oozhi whaa whaa,

whụa gẹ l’oogbu zhịizhii mbụ

arwa ghu ono, l’enwu ọku.

¹²I gude oke ẹhu-eghughu dzọru

garamu garamu ghajaa mgboko ẹbo,

gude ẹhu-eghughu dzọo mba gẹ mba ha fụtufutu.

¹³Ị fụtaru bya t’ị dzọta ndibe ghu,

mbụ t’ị dzọta ndu ono, ị họtaru.

Onye ishi ndu ejo-ememe bẹ i gweru ryaaryaa,

gbaa ya akpọ l’ishi jeye l’ọkpa.

¹⁴Ọo mkpụru ghu b’i gude sufua ndu ishi ojọgu whẹ ishi,

mbụ ndu ono, wụfutaru bya tẹ whẹ chịkashia anyi.

Whẹ tụru okoo bya tẹ whẹ ripyabe ndu ono,

l’adụ-zhidua g’ọ harụ whẹ, bụ ndu nọ l’edomi.

¹⁵I gude ịnya nmaa eze-ẹnyimu agbịdigba ghata,

mbụ eze mini ono, tseru kụlakula.

¹⁶Nteke mu nụru iwhe ono bẹ ẹhu nmarụ mu anma,

ọnu nmakọta mu kwekwekwe l’egvu, mu l’atsụ.

Ọkpu kụkahu-gee mu akụkahu, ọkpa whụkota mu gorigori.

Mu l’a-tazhiawho nshi ngabẹru mbọku iwhe-ọtsulanu,

l’a-byakfuta ndu ono, l’anọje etso anyi ọgu.

¹⁷O behuduru figu ta atụ igu,

oshi vayịnu ta amị mebyi,

oshi ólivu te eye mebyi,

nri, e meberu l’alị te emehu emehu.

Mbụ, o behuduru atụru ta adụhe lẹ mkpu atụru;

eswi ta adụhe l’ụwoko eswi;

¹⁸mu l’a-nọlekwaa ete ẹswa l’ẹka Onye-Nwe-Ọha nọ,

ẹhu atsọ mu lẹ Chileke bụ onye ndzọta mu.

¹⁹Ọ kwa Onye-Nwe-Ọha, bụ

Chileke mu bụ agbarike mu.

Oomeje mu adụ garagara g’ọo mgbada.

Oogoshije mu gẹ mu l’ahata ọkpa l’eli ugvu.

Ọ kwa onye ishi egvu b’ọ dụru,

ọ bụru une bẹ l’aa-kpọru ye iya.