Izikẹlu

Ẹkwo

IZIKẸLU

Onye Nkfuchiru Chileke

Ọwhulenya nke ivurụzo, Chileke goshiru Izikẹlu

Iwhe nọ-gee ndzụ yẹle Ọdu-biribiri Onye-Nwe-Ọha

¹L’abalị ise l’ọnwa ẹno l’awha nke ụkporo l’iri, bẹ mu tso ndu Jada ono a kpụru lẹ ndzụ nọdu lẹ mgboro ẹnyimu Keba; a gụhaa imigwe ghebe ọnu, mu whụ ọwhulenya, shi l’ẹka Chileke. ²Awha ono bụ awha, kwe eze Jehoyakinu awha ise, a kpụru iya lẹ ndzụ. Lẹ mbọku nke ise l’ọnwa ono, ³bẹ Onye-Nwe-Ọha bya ekfuru okfu yeru mụbe onye l’agbajẹ ẹja nụ Chileke, bụ Izikẹlu nwa Buzi lẹ mgboro ẹnyimu Keba, dụ l’alị ndu Bábyilọnu. Mụbe Izikẹlu nọdu l’ẹka ono ike Onye-Nwe-Ọha bya mu l’ẹhu.

⁴Mu bya elee ẹnya, iwhe mu whụru bụ oke whẹrewhere, shi l’ụzo isheli ewhe abya. Urwukpu rwachia mgboko, ọku shi iya nụ l’eme pẹremu pẹremu, iwhoro l’egbu iya zaazaa. Echilabọ ọku ono l’ekezhiewho jajaja g’ọo ope. ⁵L’echilabọ urwukpu ono b’o nweru iwhe ẹno, dụ g’ọo iwhe nọ-gee ndzụ nọ iya nụ. Whẹ gbakọta ụgbugba madzụ. ⁶Whẹ nwegeeru iwhu ẹno ẹno l’ẹhu l’ẹhu, nweru akwẹka ẹno ẹno l’ẹhu l’ẹhu. ⁷Ọkpa kfụkotaru whẹ ọto, whẹ nwegeeru akọkpa g’ọo eswi, egbukaa ngerengere g’ọo ope, e teru mmanụ. ⁸Whẹ nweru ẹka dụ-gee g’ọo nke madzụ lẹ mkpula akwẹka whẹ lẹ mgburẹku whẹ ẹno. Whẹ ẹno bẹ nwekotaru iwhu mẹe akwẹka. ⁹Akwẹka whẹ ono tsugbabegee l’ibe iya. Ọ bụru ẹka whẹ cheberu iwhu bẹ whẹ l’echebegbujeru iya; whẹ ta aswị-jijedu aswị-ji mẹ whẹ tụgbuwaru.

¹⁰A bya l’ụgbugba iwhu whẹ, whẹ ẹno ono bẹ nwekotaru iwhu madzụ l’ụzo atatiwhu, nweru iwhu oduu l’ụzo ẹka-ụtara, nweru iwhu eswi l’ụzo ẹka-ịcha; nweru iwhu ugo l’ụzo azụ. ¹¹O noo g’iwhu dụ whẹ ndono. Akwẹka whẹ bẹ whẹ chilishiru imeli. Whẹ nwekotaru akwẹka ẹbo-ẹbo l’ẹhu l’ẹhu, akwẹka ono tsugbabegee lẹ nke ibe iya, akwẹka labọ ọwhu kpuchia whẹ ẹhu. ¹²Ọo Ẹka whẹ cheberu iwhu bẹ whẹ l’echebegbujeru iya; ọ bụru ẹka ume, l’edu whẹ nụ cheberu bẹ whẹ l’echebeje, whẹ ta aswị-jije aswị-ji mẹ whẹ tụgbuwaru.

¹³Iwhe ono, nọ-gee ndzụ ono bẹ gbarụ ụgbugba g’ọo icheku-ọku, l’enwu kfụkfukfu, enwu g’ọo ọku ogọwa. Ọku l’enwu l’echilabọ iwhe ono, nọ-gee ndzụ ono. O nwuru je azụ, ya enwuru je iwhu. Ọku ono l’eke zhịizhii, ebemu-igwe shi iya awa whoo whoo. ¹⁴Iwhe ono, nọ-gee ndzụ ono l’ezhikaa whaa whaa; whẹ zhiru je iwhu, whẹ ezhiru je azụ g’ọo ebemu-igwe.

¹⁵Gẹ mu l’ele iwhe ono, nọ-gee ndzụ ono ẹnya, bẹ mu whụru ọkpa ọgba-kperekpere, nọ l’alị lẹ mgboro iwhe ono, nọ ndzụ, nwegeeru iwhu ẹno ẹno ono. ¹⁶Ọ waa bụ ụgbugba ọkpa ọgba-kperekpere ono yẹle g’e gude mee ya ndọwa: Ọkpa ọgba-kperekpere ono whẹ ẹno bẹ nwekotaru ụgbugba lanụ. Oogbukaa ngerengere g’ọo ẹwhuru-egbe. E meru iya ọ dụlewho g’e woru ọkpa ọgba-kperekpere ọdo pyokafu l’ime iya. ¹⁷Ọ bụru ẹka whẹ cheberu iwhu bẹ whẹ l’echebegbujeru iya lẹ mgburẹku whẹ ẹno, whẹ ta aswị-jijedu aswị-ji mẹ whẹ tụgbuwaru.

¹⁸Ogboromọnu ọkpa ọgba-kperekpere ono b’e swiru eswiswi ọ ha l’eli; dụ egvu. A kpọ-fushia ya ụzo mgburumgburu. ¹⁹L’ọobuje iwhe ono, nọ-gee ndzụ tụgburu; ọkpa ọgba-kperekpere ono atụgburu etso whẹ l’azụ. Nteke bụ l’iwhe ono, nọ-gee ndzụ bẹ shi l’alị gbalihu; ọkpa ọgba-kperekpere ono agbalihukwawho. ²⁰Ọ bụru ẹka ume, l’edu whẹ nụ cheberu bẹ whẹ l’echebeje; ọkpa ọgba-kperekpere ono awụ-lihu tsoru whẹ nkele ume ono, l’edu iwhe ono, nọ-gee ndzụ bẹ nọ l’ime ọkpa ọgba-kperekpere ono. ²¹Iwhe ono, nọ-gee ndzụ tụgburu, ọkpa ọgba-kperekpere ono atụgburu; ọ kfụru, ọkpa ọgba-kperekpere ono akfụru; o shi l’alị gbalihu, ọkpa ọgba-kperekpere ono etsoru whẹ gbalihu nkele ume ono, l’edu iwhe ono, nọ-gee ndzụ bẹ nọ l’ime ọkpa ọgba-kperekpere ono.

²²L’eli ishi iwhe ono, nọ-gee ndzụ bẹ iwhe halẹwho gbosaa tukoru iya, achakọta pemupemu g’ọo iwhe e gude onyo mee, dụ egvu l’ẹnya. ²³Lẹ mkpula iwhe ono, ha gbosaa ono bẹ akwẹka whẹ jakashịhuru ajakashịhu kfụ-geeru ọto, whẹ l’etsukaa lẹ nke ibe whẹ. Whẹ nwekwaruwho akwẹka ẹbo-ẹbo l’ẹhu l’ẹhu, kpuchitaru whẹ ẹhu. ²⁴Nteke whẹ tụgburu bẹ mu nụru ụda akwẹka whẹ gẹ l’ọowhu gbudugbudu g’ọo eze mini, ada g’ọo olu-okfu Ọkalibe-kakọta-ike, adakwawhọ g’ọo igidi ọkpa ndu ojọgu. L’ọobuje whẹ jeta keshita l’ẹka lanụ, whẹ ewozeta akwẹka whẹ. ²⁵Whẹ jetalewho keshita l’ẹka lanụ bya ewozeta akwẹka whẹ ono, olu-okfu agbụfu l’eli iwhe ono, ha gbosaa ono, tukoru whẹ l’eli ishi.

²⁶L’eli iwhe ono, ha gbosaa ono, tukoru whẹ l’eli ishi b’o nweru iwhe dụ g’ọo oshi-eze, e gude ẹwhuru, l’eekuje safaya mee. Iwhe ọbu dụ g’ọo madzụ sụgaru l’elikoro iwhe ono, dụ g’ọo oshi-eze ono. ²⁷Wata l’ẹka dụ g’ọo ukfu iya jeye l’ishi iya bẹ mu whụru iwhe dụ iya g’ọo ope l’eke jajaja, dụlewho g’ọku gbarụ iya mgburumgburu. Wata l’ẹka dụ g’ọo ukfu iya jeye l’ụzo alị iya bẹ mu whụru iwhe dụ g’ọo ọku, iwhoro iya l’eke zhịizhii mgburumgburu. ²⁸Ọo gẹ evu-mini l’enwuje roboo l’urwukpu mbọku, mini l’achị bụ g’iwhoro ono, gbarụ iya mgburumgburu ono keru zhịi.

O noo g’ọdu-biribiri Onye-Nwe-Ọha ono gude gbaa ndono. Mu whụru iya daa kpube iwhu l’alị, mu nụa olu onye l’ekfu eyeru mu.

Onye-Nwe-Ọha l’eku Izikẹlu t’o jeeru iya ozhi

¹Ọ sụ mu “Nwa ndiwhe; gbashi agbashi kfụru akfụru. O nweru iwhe mu l’e-kfuru ghu.” ²Gẹ l’ookfu eyeru mu, bẹ Ume Chileke batarụ mu l’ime bya ekulia mu ekuli; mu kfụru l’ọkpa mu labọ. Mu nụa gẹ l’ookfu eyeru mu. ³Ọ sụ mu: “Nwa ndiwhe; mu l’ezhi ghu t’i jekfu ndu Ízurẹlu, mbụ ndu mba ono, kwefuru mu ike. Whẹ lẹ ndụ-ichee whẹ bẹ kwefuru mu ike byeye ntanụ-a. ⁴Whẹ bụ ndu obu nmarụ mkpigbi, bụru kpọkponyi. Ọo ya meru mu l’ezhi ghu t’i jekfu whẹ je asụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa. ⁵Mẹ whẹ ngabẹru iya nchị mẹ whẹ ta angabẹ iya nchị; whẹbe ndu ono, bụ ọzo-ụlo, kwefuru ike amarụ nụ l’onye-nkfuchiru Chileke bẹ whẹ l’iya nọjewaru.

⁶“Gụbedua, nwa ndiwhe; ba atsụkwa whẹ egvu; ba atsụkwa egvu l’okfu, whẹ l’a-nọ ekfu. A makwarụ-a l’ogvu l’uke bẹ nọ-wheru ghu mgburumgburu, ọ bụru l’ẹka akpị jiru eji b’i bu. Ba atsụkwa okfu, whẹ l’e-kfu egvu; t’ụgbugba whẹ be emekwa t’ẹhu nmajẹ ghu kpakpakpa; a makwarụa lẹ whẹ bụ ọzo-ụlo, kwefuru ike. ⁷Kfuaru whẹ okfu mu mẹ whẹ ngabẹru iya nchị mẹ whẹ ta angabẹ iya nchị, nkele whẹ bụ ọzo-ụlo, kwefuru ike.

⁸“Ọle ọbu, nwa ndiwhe; ngabẹ nchị l’iwhe mu l’ekfuru ghu. Be ekwefukwa ike g’ọo ọzo-ụlo ono, kwefuru ike. Saa ọnu asa, ria iwhe mu l’anụ ghu.” ⁹Mu bya elee ẹnya whụ g’a machịru mu ẹka. Iwhe dụ l’ẹka ono bụru ẹkwo, a gwọru agwọgwo. ¹⁰Ọ whụshia ẹkwo ono l’iwhu mu; e dee ya iwhe l’iwhu mẹe l’azụ. Iwhe e deru iya bụ: áwhụ atsọru mu-ee; nshọbukwa mu nshọ.

¹Ọ sụ mu: “Nwa ndiwhe; ria iwhe e doberu ghu l’iwhu; taa ẹkwo agwọgwo ono tụgburu je ekfuru yeru ọzo-ụlo ndu Ízurẹlu.”

²Mu bya asaa ọnu; o woru ẹkwo agwọgwo ono ye mu l’ọnu tẹ mu taa. ³Ọ sụ mu: “Nwa ndiwhe; taa ẹkwo agwọgwo ono, mu l’anụ ghu t’o ji ghu ẹwho.” Mu taa ya; l’ọotso mu rẹngu-rẹngu l’ọnu g’ọo mmanụ-ẹnwu.

⁴Ọ sụ mu: “Nwa ndiwhe; jeshia l’ọzo-ụlo ndu Ízurẹlu je ekfuaru whẹ iwhe mu sụru t’i kfua. ⁵Ndu mu l’ezhi ghu t’i jekfu ta abụkwa ndu ọha-ntsụ, t’ọ bụ ndu okfu whẹ l’atsụ lanụ; ọ kwa ọzo-ụlo ndu Ízurẹlu bẹ mu l’ezhi ghu t’i jekfu. ⁶Ọ tọ bụkwa igweligwe ndu ọha-ntsụ; t’ọ bụ ndu okfu whẹ l’atsụ lanụ, mbụ ndu l’ịitii nụ okfu whẹ bẹ mu l’ezhi ghu t’i jekfu. Ọle ọ -bụru ndu ono bẹ mu zhiru ghu t’i jekfu, whẹbedua gẹge angabẹkwaru ghu nchị. ⁷Obenu l’ọzo-ụlo ndu Ízurẹlu bẹ l’ẹte abyakwaa l’angabẹru ghu nchị, nkele whẹ ta angajẹduru mbẹdua nchị. Mkpata iya bụ l’ọzo-ụlo ndu Ízurẹlu gẹ whẹ ha bẹ obu nmarụ mkpigbi; whẹ bụkotaru kpọkponyi. ⁸Ọle mu l’e-me t’obu nmaa ghu mkpigbi g’ọ nmarụ whẹbedua, mee ghu t’ị bụru kpọkponyi gẹ whẹbedua bụ. ⁹Mu l’e-me t’obu ghu shihu dụngu g’ọo ekpekere, mbụ t’ọ ka ẹwhuru oshihu dụngu. Ọ bụru iya bụ t’ị ba atsụkwa whẹ egvu; t’ụgbugba whẹ be emekwa t’ẹhu anmanma gude ghu; a makwarụa lẹ whẹ bụ ọzo-ụlo ndu kwefuru ike.”

¹⁰Ọ byakwa asụ mu: “Nwa ndiwhe; ngabẹkwa nchị ree l’iwhe lile, mu l’ekfuru ghu, gụ akwakọbe iya l’ime obu ghu. ¹¹Tụgbua jekfu ndibe unu ono, a kpụru lẹ ndzụ je ekfuru whẹ sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa. Mẹ whẹ ngabẹru iya nchị mẹ whẹ ta angabẹ iya nchị.”

¹²Tọ dụ iya bụ, Ume Chileke bya apalia mu oroke-imeli-imeli, mu nụa oke ẹwhu l’a-whụ gbudugbudu l’ụzo azụ mu asụje: “T’a nọdukwa l’ẹka Onye-Nwe-Ọha bu jaa ọdu-biribiri iya ajaja!” ¹³Mu nụa ụda akwẹka iwhe whọ, nọ-gee ndzụ gẹ l’oochi puka puka l’eli ibe iya, mẹe ụda ọkpa ọgba-kperekpere whọ, nọ whẹ lẹ mgboro; ụda iya ono l’adazhiawho g’ọo oke ẹwhu l’a-whụ gbigbigbi. ¹⁴Ume Chileke bya apalia mu oroke-imeli-imeli pafụ; mu gude obu ilu mẹe ẹhu-eghughu tụgburu. Ẹka Onye-Nwe-Ọha dụ mu shii l’ẹhu. ¹⁵Mu bya ejerwua Telabibu lẹ mgboro ẹnyimu Keba, bụ ẹka ndu ono, a kpụru lẹ ndzụ bu. Mu lẹ whẹ nọo abalị ẹsaa l’ẹka ono; ọnu kpụru mu okfu.

A họtaru Izikẹlu t’ọ bụru onye nche

(Izk. 33:1-9)

¹⁶O rwua lẹ ngvụcha abalị ẹsaa ono; Onye-Nwe-Ọha bya ekfuru okfu yeru mu sụ mu: ¹⁷“Nwa ndiwhe; mu mewaru ghu t’ị bụru onye l’eche ọzo-ụlo ndu Ízurẹlu nche. Nteke ị nụjeru okfu, shi mu l’ọnu, nmajẹkwaaru whẹ ọkwa, mu nmarụ. ¹⁸Mu -sụ onye ejo-ememe l’ọo nwụhu, tị nmarụ onye ọbu ọkwa, mbụ tị sụ iya t’ọ parụ ejo ụzo l’ooshi haa, nke ọwhu l’ọo-bụru onye a dzọru ndzụ; onye ejo-ememe ono l’a-nwụhukwa l’ejo-iwhe, l’oome, ọle mmee-ọchi iya bụ l’ẹka ghu bẹ mu l’a-jị ajị iya. ¹⁹Nteke bụ l’ị nmarụ onye ejo-ememe ono ọkwa, to kwe sefu ẹka l’ejo-ememe ono parụ ejo ụzo ono l’ooshi haa, ya anwụhu l’ejo-iwhe l’oome, ọle gụbedua bẹ gbawarụ ishi onwoghu. ²⁰Ọdo bụ lẹ, onye dụ chịriri parụ ome iwhe dụ chịriri haa, melahaa ejo-iwhe; mu atochiaru iya iwhe ụzo t’o vukota daa nwụhu. Ọo-nwụhu l’iswi ejo-iwhe ono, l’oome, o noo nkele ị tị nmadụru iya ọkwa iya. Iwhe dụ chịriri ono, o shi emeje bẹ l’aata anyatahẹdu anyata owhu, ọle mmee-ọchi iya bụ l’ẹka ghu bẹ mu l’a-jị ajị iya. ²¹Ọle ọ -bụru l’ị nmarụ onye dụ chịriri ọkwa t’o bo meshi iwhe-dụ-ẹji; ọ haa ome iwhe-dụ-ẹji ọbu; ya anọdu ndzụ, nkele ọ nụru ọkwa, ị nmarụ iya, gụbedua l’onwoghu eshi nno gbaa ishi onwoghu.”

E meru Izikẹlu t’o bo kfuhe okfu

²²Ike Onye-Nwe-Ọha bya abya mu l’ẹhu gẹ mu nọdu l’ẹka ono; ọ sụ mu: “Gbalihu jeshia lẹ nsụda; ọo l’ẹka ono bẹ mu l’a-nọdu kfuru yeru ghu.”

²³Mu bya agbalihu jeshia lẹ nsụda ono; mu whụ ọdu-biribiri Onye-Nwe-Ọha g’ọ dụ l’ẹka ono, dụlewho g’ọo ọdu-biribiri ono, mu whụhawaru lẹ mgboro ẹnyimu Keba; mu daa kpube iwhu l’alị. ²⁴Ume Chileke ono bya abata mu l’ime, kulia mu kfụbe. O kfuru yeru mu sụ mu: “Tụgbua je agụ-chia onwoghu l’ụlo ghu. ²⁵Gụbe nwa ndiwhe; aa-tụ ghu eri kee ghu ẹgbu t’ị ba afụtaje afụta l’ẹka ndu ọdo nọ. ²⁶Mu l’e-me t’ire nyakụru ghu l’akpo t’i be ekfu okfu, nke ọwhu l’ịitii bajẹru ndu ono mba nkele whẹ bụ ndu ọzo-ụlo, kwefuru ike. ²⁷Ọle ọbu; mu kfuleruwho okfu nụ ghu bẹ mu l’a-kụha ghu ọnu akụha, gụ asụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa. Onye l’a-ngabẹ iya nchị t’ọ ngabẹ iya, onye l’ẹte angabẹ iya nchị, t’ọ haa ya angabẹ, nkele whẹ bụ ndu ọzo-ụlo, kwefuru ike.

Ee-goshi gẹ l’ee-shi yebuta Jerúsalẹmu mgburumgburu

¹“Gụbe nwa ndiwhe; pata ụrwa, a kpụru o chia balịbali dobe onwoghu l’iwhu; see ya obodo Jerúsalẹmu l’eli. ²See ya ẹka e yebutaru iya eyebuta, mẹe ẹka e gvuru iya ose-ọgu, mẹe mgbodo, e shi enyiba iya enyiba, mẹe ẹka a kwarụ iya okpu, mẹe ishi-okpo e gude akụkposhi mgbodo iya mgburumgburu. ³Wota gbamụgbamu igwe gvube t’ọ bụru mgbodo igwe nọkahu gụ l’obodo ono. Gụ echebe iwhu l’obodo ono; t’ọ dụ g’ọo ẹka e yebutaru eyebuta; t’ọ bụru ghu yebutaru iya. Iwhe ono l’a-bụ iwhe-ọhubama dụru ọzo-ụlo ndu Ízurẹlu.

⁴“I -megee nno; zẹe azẹe gbube mgburẹku ẹka-ịcha; vuta ọnwu iwhe-dụ-ẹji ndu ọzo-ụlo Ízurẹlu megbaberu. Iwhe-dụ-ẹji ono bẹ l’ii-vuzhiawho ọnwu iya jeye abalị ole, l’ịi-zẹkota gbube onwoghu nno. ⁵Mu dobewaru ghu ụkporo abalị ugbo iri lẹ tete l’abalị iri, l’ii-vuta ọnwu iwhe-dụ-ẹji ono ndu Ízurẹlu metagbaberu. Ujiku lanụ bẹ nọ ọnodu awha owhu, whẹ meru iwhe-dụ-ẹji. ⁶Ị nọ-dzule iya whọ; gụ aghachi mgburẹku ẹka-ụtara, vuta ọnwu iwhe-dụ-ẹji ọwhu ndu ọzo-ụlo nke Juda metagbaberu. Iwhe mu doberu ghu t’i vuta ọnwu iya ono bụ ụkporo abalị ugbo labọ. Abalị lanụ bẹ nọ ọnodu awha owhu, whẹ meru iwhe-dụ-ẹji.

⁷“Chebe iwhu l’iwhe ono, l’egoshi eyebuta ono, l’ee-yebuta Jerúsalẹmu, gụ agbarụ ẹka nkịti gude nkfuchiru kfua gẹ l’ọo-dụ obodo ono. ⁸Lekwa lẹ mu l’a-tụ ghu eri kee ghu ẹgbu, nke ọwhu l’ịitii gha aghagha jeye nteke l’ọo-gvụ mbụ eyebuta ono.

Iwhe l’egoshi mkpẹgu l’a-dụ lẹ Jerúsalẹmu

⁹“Hata witi, mẹe balị, mẹe agwa, mẹe azama, mẹe igberi, mẹe sụpelutu, wụkotaru iya ye l’iwhe lanụ, gude iya meta buredi. Ọo ya bẹ l’ii-rije l’ime ụkporo abalị ugbo iri lẹ tete l’abalị iri ono, l’ịi-zẹkota gbube mgburẹku egbube. ¹⁰Nri ono bẹ l’ịi-tụbataje atụbata; t’ẹrwa iya dụ ụkporo shẹkelu. Iwhe l’iirije iya bụ ugbo lanụ lẹ mbọku, gụ erije iya lẹ mbọku lẹ mbọku. ¹¹O nokwawho gẹ l’ịi-tatajẹ mini atata; tatajẹ iya nkere bọturu mini ishii ngụa ugbo lanụ lẹ mbọku. ¹²Taa buredi ono gẹ l’aatajẹ akara balị. Gudeje ẹkpirikpo-nshị madzụ mekwata ọku ghee ya t’ẹnya l’ọha whụ iya.”

¹³Onye-Nwe-Ọha bya asụ mu: “Iwhe iwhe ono l’egoshi bụ gẹ ndu Ízurẹlu l’e-shi ria nri, e merwuru emerwu lẹ mba ono, mu l’a-chịfu whẹ tẹ whẹ laa.”

¹⁴Tọ dụ iya bụ, mu sụ: “Haa-e! Nnajị-Ọha, bụ Onye-Nwe-Ọha; mu te emerwujekwa onwomu emerwu. Eshi mu bụ nwata byeye ntaa bẹ mu l’ete erijekwaa iwhe nwụhuru anwụhu yẹle iwhe anụ dzugburu; anụ, l’aasọ nsọ teke epyojebukwa mu l’ọnu.”

¹⁵Ọ sụ mu: “Ngwa, mu l’a-ha ghu t’i kụta nshị eswi gude mekwata ọku ọbu ghee buredi ọbu, obeta ọwhu l’ii-gude ẹkpirikpo-nshị madzụ.”

¹⁶Ọ bya asụ mu: “Nwa ndiwhe; mu l’e-me t’ẹka nri l’eshije abyarụ ndu Jerúsalẹmu chihu. Whẹ l’a-tụbataje nri atụbata chịru obu l’ẹka eri iya; whẹ atatajẹ mini atata anma kpakpakpa angụ iya. ¹⁷Ụko nri yẹle ụko mini l’a-dụru whẹ. Onye lejeru ibe iya ẹnya; ọnu akpụru iya okfu nkele whẹ l’a-jọkota ẹhu wụfu. Iwhe l’a-kpa iya nụ abụru iwhe-dụ-ẹji ono, whẹ l’emegbabe.

Iwhe l’egoshi adada Jerúsalẹmu

¹“Gụbe nwa ndiwhe; pata ogu-ịgba, l’atsụ nkọ; woru iya mee agụba, e gude akpụ ishi; gude iya kpụa ẹgbushi yẹle ẹji-agba. Wota iwhe l’eegudeje atụ ẹrwa iwhe tụa ẹrwa ẹgbushi ono yẹle ẹji ono; gụ ekekahu iya uzhi ẹto. ²Mbọku eyebuta ono, i yebutaru obodo Jerúsalẹmu ono kfụshiru, gụ ekpota ẹgbushi ono yẹle ẹji ono uzhi lanụ je akpọo ọku l’echilabọ obodo Jerúsalẹmu. Kpota uzhi lanụ ọdo gude ogu-ịgba ghubushia ya eghubushi t’o dzuru obodo ono mgburumgburu. Gụ ekpota ọwhu meru iya ẹto whekashia l’imeli. O noo gẹ mbẹdua l’a-mịta ogu-ịgba chịa ndibe mu baa whẹ ẹbaa. ³Ọle ọbu; kpotakwa ẹgbushi ono yẹle ẹji-agba ono nwanshị kekoo l’ọnumonu uwe ghu. ⁴Gụ ekpotakwa iya whọ nwanshị ọdo chịru ye l’ọku t’o kepyashia ya. Ọo ya bẹ ọku l’e-shi nwukoru l’ọzo-ụlo Ízurẹlu l’owhu.”

⁵Ọ waa iwhe Nnajị-Ọha, bụ Onye-Nwe-Ọha l’ekfu ndọwa: “Lee Jerúsalẹmu ndọwa. Mu doberu iya l’echilabọ mba gẹ mba ha; ndu alị, dụ l’iche l’iche nọ-whee ya mgburumgburu. ⁶Ọle whẹ kwefuru ike lẹ nsọ mu, mẹe l’iwhe mu tọru ọkpa iya; bya egoshi l’ejo-ememe, whẹ l’eme bẹ ka nke mba gẹ mba ha shii mẹe nke ndu alị ono, nọ-wheru whẹ mgburumgburu. Ndu Jerúsalẹmu bẹ jịkaru odobe nsọ mu jịka otso iwhe mu tọru ọkpa iya. ⁷Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Eshi-ọwhu unubẹ Jerúsalẹmu bụ ekfu-ba-anụ amamẹ ndu mba, nọ-wheru unu mgburumgburu, tọ bụhe l’unu l’etso iwhe mu tọru ọkpa iya, unu te edobe nsọ mu, ọ bụ-chiaru omelalị ndu mba gẹ mba ha ono, nọ-wheru unu mgburumgburu bẹ unu l’eme; ⁸ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mbẹdua l’onwomu bụakwa ọgu swiru unubẹ Jerúsalẹmu. Mu l’a-nụ unu chịikfuu l’ẹnya mba gẹ mba ha. ⁹Mu l’e-kwobe iswi ahụma ono, unu megbaberu mee unu iwhe mu l’eteke emebua, tọhe lẹ mu bya l’emebaa ya ọdo. ¹⁰Ndu nwụru ụnwu bẹ l’e-rije anụ ụnwu whẹ; ụnwegirima eri anụ ndu nwụru whẹ nụ l’echilabọ unu. Mu l’a-nụ unu chịikfuu, woru ndu wafụru nụ chịkashia tẹ whẹ dzuru ẹka lile.

¹¹“Mu vuru-a ishi mu gẹ mu vu iya; o nokwa iwhe Nnajị-Ọha bụ Onye-Nwe-Ọha l’ekfu ndono. Ọo ya bụ l’eshi ọwhu unu gude ntẹkpe ono, bụ iwhe l’aasọ oyi yẹle ome ahụma merwushia ụlo-nsọ mu, bẹ mu l’e-wofu ẹnya l’ẹka unu nọ; mu ta abyadụ l’ele unu ẹnya l’iwhu whụaru unu imiko, mu te edobe unu ndzụ. ¹²Nkere ẹto ndibe unu bẹ bụ ejo ẹhu-ba-dụ-mma yẹle mkpẹgu l’e-gbushi whẹ l’ime obodo unu; nkere ẹto ọdo bụru ogu-ịgba bẹ l’a-ta ishi whẹ l’azụ obodo; nkere ẹto ọdo bụru mbẹdua l’a-chịkashi whẹ tẹ whẹ dzuru ẹka lile; mu l’a-mịta ogu-ịgba mu chịa whẹ baa whẹ ẹbaa.

¹³“O noo nteke ẹhu-eghughu mu l’a-kfụshi ndono; oghu-damụdamu mu ejizeta; ẹhu abya adụ mu ree. Nteke mu megeeru whẹ iwhe lẹge l’ooghube mu, whẹ amarụ l’okfu mụbe Onye-Nwe-Ọha kfuru nụ whẹ bẹ bụ okoowhoo bẹ mu gude kfua ya. ¹⁴Mu l’e-me unu t’unu bụru kpukpuru-swoo, unu abụru ndu e gude atụ lẹ ntọnu lẹ mba gẹ mba ha, nọ-wheru unu mgburumgburu mẹe l’ẹnya ndu l’aghata aghata.

¹⁵“Unu l’a-bụru iwhe e gude atụ lẹ ntọnu mẹe ndu l’aaja ewenu; unu abụru iwhe e gude alọ ndu ọdo ẹka lẹ nchị mẹe ndu l’aakpọru tuu lẹ mba gẹ mba ha ono, nọ-wheru unu mgburumgburu; nteke ono, mu l’e-gude ẹhu-eghughu mu mẹe oghu-damụdamu mu nụa unu chịikfuu, baarụ unu mba, darụ ẹngiringaa ẹngiringaa. Mbẹdua bụ Onye-Nwe-Ọha kfuakwaru nkemu. ¹⁶Mu l’a-gba unu akfụ ono, e huru ẹvuma, bụ mkpẹgu bụ iya bụ akfụ, l’a-la unu l’iswi. Mu l’a-gba iya unu t’ọ laa unu l’iswi. Mu abya emee tẹ mkpẹgu kabaa njọ eje eje; mee t’ẹka nri l’eshije abyarụ unu chihu. ¹⁷Mu l’e-zhi mkpẹgu yẹle ejo anụ-ẹgbudu tẹ whẹ bụru ọgu swiru unu; whẹ anashịa unu ụnwegirima unu g’ọo onye l’ana nfụ. Ejo ẹhu-ba-dụ-mma yẹle mgbugbu madzụ l’a-bụru ukporo-mini kpota unu; mu edobe ogu-ịgba t’ọ taa ishi unu. Mbẹdua bụ Onye-Nwe-Ọha kfuakwaru nkemu.”

Nke omebyishi ẹka l’aagwajẹ iwhe

¹Onye-Nwe-Ọha bya ekfuru okfu yeru mu sụ: ²“Nwa ndiwhe; ghaa iwhu l’ugvu g’ugvu ha lẹ Ízurẹlu; gude nkfuchiru kfua gẹ l’ọo-dụ whẹ. ³Sụ whẹ agha: ‘Unubẹ ugvu g’ugvu ha lẹ Ízurẹlu, unu nụkwaa okfu, Nnajị-Ọha, bụ Onye-Nwe-Ọha l’ekfu. Ọ waa iwhe Nnajị-Ọha bụ Onye-Nwe-Ọha l’ekfuru eze ugvu, mẹe ụnwu ugvu nshịi, mẹe ọnu-iyi, mẹe nsụda ndọwa: Unu lekwa lẹ mu byakwa l’eworu ogu-ịgba dobe t’ọ bụru ọgu swiru unu, mu byakwa l’emebyishi ẹka unu l’agwajẹ iwhe. ⁴Ẹnya agwa unu bẹ l’ee-nwukposhi enwukposhi, gwee ẹka unu l’akpọje isẹnsu ọku ryaaryaa, mu awhụa ndibe unu tẹrii tọgbo l’iwhu agwa unu. ⁵Odzu unubẹ ndu Ízurẹlu bẹ mu l’a-pata tọgbo l’iwhu agwa unu, tụkaa ọkpu unu nnanụ nnanụ l’ẹnya agwa unu mgburumgburu. ⁶Ẹka unu bu, ẹka unu bu, bẹ mkpụkpu iya l’a-bụru ẹka ẹgbudu fuchiru. Ẹka unu l’agwajẹ iwhe bẹ mu l’e-me t’ọ dakpọshihu, mu emee ẹnya agwa unu t’ọ dakpọshihu bụru ẹka a gbarụ ọso. Mu l’e-tsupyashi agwa unu laa ya l’iyi. Ẹka unu l’akpọje ụ̀nwù-isẹnsu ọku abụru ẹka e gweru ryaaryaa, iwhe unu meru l’ẹka unu abụru iwhe yifuru eyifu. ⁷Ndu a whụru tẹrii bẹ l’a-dashị gbaagbaa l’echilabọ unu, unu amarụ l’ọo Mu bụ Onye-Nwe-Ọha.

Uwhudu l’e-whudu

⁸“ ‘Ọle o nweru ndu mu l’a-ha tẹ whẹ nọdu ndzụ, mbụ ndu l’a-nahụ ogu-ịgba; whẹbedua bẹ l’aa-chịkashi je edobe lẹ mba gẹ mba ha mẹe l’alị dụ iche iche. ⁹Ndu ono wafụru nụ l’a-nọdu lẹ mba ono, a kpụ whẹ lẹ ndzụ laa nyata mu. Whẹ l’a-bya anyata g’o dụ-be mu ẹji lẹ whẹ bụ ndu dụ ghẹle-ghẹle-ghẹle l’obu whẹ, shi nno haa mu etsotso; woru ẹnya swọbe l’agwa, gwalahaa. Whẹ l’a-dụ onwowhe ashị l’ejo-iwhe, whẹ meru mẹe ahụma, whẹ megbaberu. ¹⁰Nteke ono bẹ whẹ l’a-marụ l’ọo Mu bụ Onye-Nwe-Ọha; l’okfu ono mu kfuru sụ lẹ mu l’e-wokfuta whẹ ejo-iwhe bẹ l’abụdua nke mmaka.

¹¹“ ‘Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Kụa ẹka pyamụ, dzọo ọkpa gidimu, chia mkpu sụ: “Alịkwa mu iya!” L’iswi ejo ahụma ono, ndu ọzo-ụlo Ízurẹlu l’emegbabe. Ọ kwa ogu-ịgba, mẹe mkpẹgu, mẹe ejo ẹhu-ba-dụ-mma l’a-ta ishi whẹ. ¹²Ndu nọ otẹnya bẹ bụ ejo-ẹhu-ba-dụ-mma l’e-gbu whẹ, ndu nọ ntse abụru ogu-ịgba l’a-ta ishi whẹ, ndu wafụru nụ nọdu ndzụ abụru ẹgu l’e-gbu whẹ. O noo gẹ mu l’e-shi zụpyabe whẹ oghu-damụdamu nkemu ndono. ¹³Nteke ono, unu amarụ l’ọo Mu bụ Onye-Nwe-Ọha, mbụ nteke l’aa-whụ-gbushi ndibe unu tụkaa odzu whẹ l’ẹka agwa whẹ nọ, mẹe l’ẹnya agwa whẹ mgburumgburu, mẹe l’eli ugvu hakọta l’eli, mẹe l’ọnunu eze ugvu, mẹe lẹ mkpula oshi jakashịhuru ajakashịhu, mẹe lẹ mkpula achị nweru ẹkwo, mbụ-zhia l’ẹka lile, whẹ l’akpọje ụ̀nwù-isẹnsu, l’eshi kwẹkwekwe ọku nụ agwa whẹ. ¹⁴Mu l’a-tụchi ẹka dabẹ whẹ l’ẹhu; mee alị ono t’ọ bụru ẹka ẹgbara kfụru mẹe ẹka daburu iwhoro, watalẹwho l’echi-ẹgu byeye lẹ Ribula je akpawarọ l’ẹka whẹ bukota. Nteke ono whẹ amarụ l’ọo Mu bụ Onye-Nwe-Ọha.’ ”

Oge ikpazụ dụakwaa ntse

¹O noo ya, Onye-Nwe-Ọha bya ekfuru okfu yeru mu sụ: ²“Nwa ndiwhe; ọ wakwa iwhe Nnajị-Ọha bụ Onye-Nwe-Ọha l’ekfuru alị Ízurẹlu ndọwa: Nke unu gvụakwaru! Alị ono gbaa mgburumgburu bẹ nkiya gvụakwaru. ³Nke unu bẹ gvụakwaru. Mu l’a-gbaha ẹhu-eghughu mu ẹka t’ọ bya ekpukpushi unu. Mu l’e-kpe unu ikpe lẹge umere unu dụ dụ, kfụa unu ụgwo akpamara lile, unu l’emegbabe. ⁴Mu ta abyakwa l’ele unu ẹnya l’iwhu whụaru unu imiko, mu ta abya l’a-ha unu ẹwoma. Mu kfụjekwa unu ụgwo lẹge umere unu dụ dụ, mẹe nke akpamara ono, unu l’ete kwee sefu ẹka unu. Nteke ono unu amarụ l’ọo Mu bụ Onye-Nwe-Ọha.”

⁵Ọ waa iwhe Nnajị-Ọha bụ Onye-Nwe-Ọha bẹ l’ekfu ndọwa: “Ejo-iwhe bẹ kwawaru onwiya nkwatankwa; lekwa iya gẹ l’ooje abya. ⁶Oge ikpazụ unu rwuakwaru! Oge ikpazụ unu rwuakwaru! Oge ono l’abyapyabẹkwa unu abyapyabẹ! O rwuakwaru erwurwu! ⁷Unubẹ ndu bu l’alị-a; ọla-l’iswi byakfutaakwaru unu. Oge ono bẹ rwuakwaru erwurwu. Mbọku ọbu nọokwa ndẹende, mbụ mbọku, ùtsú l’a-da; ẹhu-ụtso ta adụhedu l’ugvu g’ugvu ha ọdo.

⁸“O to nwehedu gẹ l’aanọ-beru ntaa mu awụshi unu oke ẹhu-eghughu mu, mee t’iwe mu kpukpushi unu. Mu l’e-kpe unu ikpe lẹge umere unu dụ dụ, kfụa unu ụgwo akpamara lile, unu l’emegbabe. ⁹Mu ta abyadụ l’ele unu ẹnya l’iwhu whụaru unu imiko, mu ta abya l’a-ha unu ẹwoma. Mu kfụjekwa unu ụgwo lẹge umere unu dụ dụ, mẹe nke akpamara lile, unu l’emegbabe. Nteke ono unu amarụ l’ọo mbẹdua, bụ Onye-Nwe-Ọha bẹ kẹru unu ẹgube ọrwu ono.”

¹⁰“Ọo ntanụ bụ mbọku ọbu l’eeme unu ejo-iwhe ọbu, mbụ l’o rwuwaru erwurwu. Ọla-l’iswi ọbu bẹ gbafuhuakwaru agbafuhu, nkele iwhe-kpanganga, unu l’eme bẹ parụ ẹka; ekuku unu l’eku onwunu nọwa je etsua ishi l’igweli. ¹¹Iwhe-kpanganga bẹ bụ mkpụru, l’ee-gude nụa ndu mgbashị áwhụ. O to nwedu onye l’ime whẹ bya l’a-whọdu, mbụ l’o to nwedu onye l’a-whọdu nụ l’ikpoto ndu ono; ẹku whẹ ta awhọdu, to nwe onye bụ ọkakaa bya l’a-whọdu l’ime whẹ. ¹²Oge rwuakwaru. Mbọku bẹ nọokwa ndẹende; nteke ọzuta iwhe azụta yẹle oore iwhe ere l’ẹte enwehe ishi, nkele ọo gẹ Onye-Nwe-Ọha l’a-tukoshi onye ọwa oke ẹhu-eghughu iya bụ gẹ l’oo-tukoshi iya onye ọwhu. ¹³Onye reru iwhe ere ta abyadụ l’a-gbatakwadụ iwhe o reru l’ẹka onye o reru iya jeye gẹ whẹ labọ l’a-nọ-beru, nkele Onye-Nwe-Ọha l’a-tukoshi whẹ oke ẹhu-eghughu iya. Ejo-iwhe, whẹ l’eme bẹ mewaru to nwe onye l’ime whẹ l’a-dụ ike adzọ onwiya ndzụ. ¹⁴Whẹ gbuwaru opu-ọgu, bya akwakọbewa ẹhu, ọle o to nwedu onye l’ime whẹ dụ ike jee ọgu, nkele Onye-Nwe-Ọha bẹ tukoshiwaru whẹ oke ẹhu-eghughu iya gẹ whẹ ha.

Ee-me ndu Ízurẹlu ome-l’iwe

¹⁵“Ogu-ịgba l’egbukwa l’azụ obodo, ejo ẹhu-ba-dụ-mma yẹle mkpẹgu l’egbu l’ime iya. Onye nọ l’ẹgu bụ ogu-ịgba l’e-gbu iya. Onye nọ l’ime obodo bụru ejo ẹhu-ba-dụ-mma yẹle mkpẹgu l’a-vụ anụ iya l’akpaa. ¹⁶Ndu wafụru nụ bẹ l’a-gbarụ lashia l’ugvu je anọdu akwa ẹkwa hee hee g’ọo ndo, nọ lẹ nsụda; onyenọnu akwakaa ẹkwa hee hee nke ejo-iwhe, whẹ megbaberu. ¹⁷Onyenọnu bẹ ẹka l’a-tsụkota mmẹe, ikpere awhụkota whẹ gorigori g’ọo ẹka mini l’akpa ute. ¹⁸Whẹ l’e-ye uwe áwhụ, ẹhu anmakọta whẹ kwekwekwe. Iwhere l’e-ji whẹ iwhu, whẹ erwushia ẹgbushi l’ishi ya achahụ whẹ swarịswari. ¹⁹Whẹ l’e-tuwhashi mkpọla-ọcha whẹ l’ọma echi-ụzo; mkpọla-ododo whẹ abụru whẹ iwhe l’aasọ nsọ. Mkpọla-ọcha yẹle mkpọla-ododo bẹ l’ẹte adụdu ike adzọfuta whẹ mbọku, Onye-Nwe-Ọha l’a-wụshi oke ẹhu-eghughu iya. Ọ tọ dụdu ike eme t’iwhe l’agụ whẹ nụ gụ-buhu whẹ; tọ dụ ike anụ-ji whẹ ẹwho, o noo nkele ọo ya meru whẹ daba l’ome ejo-iwhe. ²⁰Whẹ gude nke ụma, l’ọoma whẹ mbụ ịyagba ono, whẹ l’anyajẹ gude eku onwowhe eku, bya egude ịyagba ono mee ejo agwa, whẹ l’agwajẹ yẹle iwhe ono, whẹ meru, l’aasọkaa oyi. Ọ bụru iya meru mu je l’e-me iya t’ọ bụru iwhe whẹ l’a-nọdu asọ nsọ.

²¹“Mu l’e-woru iya ye ndu ọha ọdo l’ẹka t’ọ bụru arya, whẹ vụtaru l’ọgu, mee ya t’ọ bụru iwhe ndu ejo-ememe, bu lẹ mgboko-o natarụ lẹ nfụ. Whẹ eworu iya merwushia. ²²Mu l’e-wocha iwhu ewocha tẹ ndu ono merwushia ẹka ono, mu yeru ẹnya ono, mbụ tẹ ndu l’ana nfụ tsufua ẹka ono bahụ je emerwushia ya.

²³“Meshia ẹgbirigba dobe, nkele iwhe jiru alị ono bụ ogbu-ọchi; mkpụkpu iya bụru ome iwhe-kpanganga bẹ jiru iya nụ. ²⁴Mu l’e-duta ndu mba, kagee onwe ẹnya-ọovu tẹ whẹ bya anatakọta whẹ ibe whẹ. Ekuku ono, ndu nweru ọkpehu l’eku onwowhe bẹ mu l’e-me t’ọ laa, ẹka whẹ doberu nsọ abụru ẹka e merwushiru emerwushi. ²⁵Iwhe l’eye egvu byalẹwho, whẹ achọlahaa ẹka ẹhu l’a-dụ whẹ guu, ọle ọ tọo dụdu. ²⁶Ejo iwhe-ọtsulanu l’a-kwa nkwatankwa, uruguruma ejo-iwhe ede ndepyabe, whẹ aryọje ndu nkfuchiru Chileke tẹ whẹ goshinu whẹ iwhe whẹ whụru l’ọwhulenya. Ndu l’agbajẹ ẹja nụ Chileke te enwehedu iwu, whẹ l’ezhijekwadu, ndu bụ ọgurenya te enwehe ụzo, whẹ l’a-kpọ-zhikwadu. ²⁷Onye eze whẹ l’a-nọdu agụ áwhụ, onye ishi whẹ abụru onye ụzo chiru. Ndu alị ono l’owhu bẹ ẹka l’a-nọdu awhụ kwekwekwe l’ẹka whẹ l’atsụ egvu. Mu l’e-gude g’umere whẹ dụ mee whẹ iwhe, mu egude gẹ whẹ gbarụ kpee whẹ ikpe. Nteke ono whẹ amarụ l’ọo Mu bụ Onye-Nwe-Ọha.”

Ọwhulenya nke ẹbo, Chileke goshiru Izikẹlu

Ejo akpamara ndu Ízurẹlu l’eme l’eze-ụlo Onye-Nwe-Ọha

¹L’abalị ise l’ọnwa ishii l’awha nke ishii, a kpụru anyi lẹ ndzụ bẹ mu lẹ ndu bụ ọgurenya ndu Juda nọdu l’ụlo mu; ike Nnajị-Ọha, bụ Onye-Nwe-Ọha bya abya mu l’ẹhu. ²Mu bya elee ẹnya whụ iwhe dụ g’ọo madzụ. Wata l’ẹka dụ g’ọo ukfu iya jeye l’ọkpa iya bẹ dụlewho g’ọo ọku; wata l’ukfu iya jeye l’ishi iya l’egbulewho zhịizhii g’ọo ope l’eke jajaja. ³Ọ bya amachịa iwhe dụ g’ọo ẹka lọta mu l’ẹgbushi. Ume Chileke ono lọ-lia mu alọ-li, mu keru l’imeli. Mu nọdu l’ọwhulenya ono, ọ pata mu jeshia Jerúsalẹmu je edobe mu l’ọnu ẹka ono, bahụru l’ime, l’eeshije abahụ l’ọnoguzo ono, dụ l’ụzo isheli eze-ụlo Onye-Nwe-Ọha, mbụ l’ẹka ono, e doberu agwa ọbu l’akpatsuje Chileke okoowhoo.

⁴Mu nọdu l’ẹka ono whụa ọdu-biribiri Chileke nke ndu Ízurẹlu; ọ dụ-zhiawho g’ọo ono, mu whụjeru l’ọwhulenya whọ, mu whụjeru lẹ nsụda. ⁵Tọ dụ iya bụ, ọ sụ mu: “Nwa ndiwhe; palia ẹnya apali leedaa l’ụzo isheli.” Ọo ya bụ, mu bya apalia ẹnya lee l’ụzo isheli whụa agwa ono, l’akpatsuje Chileke okoowhoo g’ọ dụ l’ọnu ẹka l’eeshije abahụ l’ụzo isheli, l’ọnoguzo ẹka l’aakpọjeru Onye-Nwe-Ọha ngwo-ẹja ọku.

⁶Chileke bya asụ mu: “Nwa ndiwhe; ?ị whụru-a iwhe ndu-a l’eme, mbụ ejo akpamara ono, ọzo-ụlo ndu Ízurẹlu nọdu l’ẹka-a eme, shi nno achịfu mu achịfu l’ụlo nsọ mu? Ọ bụru rọ ntaa bẹ l’ịi-takebe whụ ejo akpamara, whẹ l’eme.”

⁷Ẹka ọdo, o duru mu jee bụ l’ẹka l’eeshije abahụ l’ọma-ogboduwhu eze-ụlo Onye-Nwe-Ọha ono. Mu bya elee ẹnya whụ ẹnu, dụ lẹ mgbodo iya. ⁸Ọ sụ mu: “Nwa ndiwhe; tụa ẹnu lẹ mgbodo ono.” Ọo ya bụ, mu bya atụa ẹnu lẹ mgbodo ono jeye ụzo dụ iya. ⁹Ọ sụ mu: “Bahụ je awhụ ejo akpamara, whẹ nọdu l’ẹka ono eme.” ¹⁰Mu bya abahụ je awhụ g’ụnwu anụ, dụ l’iche l’iche, l’awụ l’ẹwho chipogeeru l’ẹka e seru whẹ lẹ mgbodo ono mgburumgburu, mẹe ụnwanu, l’aasọ asọ, mẹe agwa ndu Ízurẹlu. ¹¹Ndu bụ ọgurenya ndu Ízurẹlu dụ ụkporo madzụ ugbo ẹto l’ụmadzu iri abarụ agwa ono ẹja. Onye tso whẹ nụ bụ Jazanaya nwa Shefanu. Onyenọnu parụ iwhe l’oogudeje akpọ ụ̀nwù-isẹnsu ọku l’ẹka; ẹnwuru-ọku isẹnsu ono shi l’iwhe ono akpụ tụtutu.¹²Ọ sụ mu: “Nwa ndiwhe; ?ị whụwaru iwhe ndu bụ ọgurenya ndu Ízurẹlu nọdu l’ẹka ono, gbarụ ọochi eme? Onyenọnu bẹ nọdu l’ụlo agwa iya l’ẹhu l’ẹhu. Whẹ l’asụje lẹ Onye-Nwe-Ọha ta awhụjedu whẹ. Lẹ Onye-Nwe-Ọha bẹ jịkawaru alị-a.”

¹³Ọ byakwa asụ mu ọdo: “Ọ bụru rọ ntaa bẹ l’ịi-takebe whụ ejo akpamara, whẹ l’eme.” ¹⁴Ọ bya eduru mu jeshia l’ọnoguzo, dụ l’ụzo isheli ẹka l’eeshije abahụ l’eze-ụlo Onye-Nwe-Ọha; mu whụa ụnwanyi gẹ whẹ dọshiru l’ẹka ono aryakaa ẹkwa agwa whẹ, bụ Tamuzu.

¹⁵Ọ sụ mu: “?Nwa ndiwhe; i whụwaru iya? Ọ bụru rọ ntaa bẹ l’ịi-takebe whụ ejo akpamara ka ọwaa shii.” ¹⁶Ọ bya eduta mu bahụ l’ime ime ọma-ogbuduwhu eze-ụlo Onye-Nwe-Ọha. L’ọnu eze-ụlo Chileke ono bẹ iwhe rwuru unwoke ụkporo l’ise nọ, l’echilabọ nwụlo, dụ l’ọnu-abahụ ono yẹle ẹka l’aakpọjeru Onye-Nwe-Ọha ngwo-ẹja ọku. Whẹ woru azụ gbẹeru eze-ụlo Onye-Nwe-Ọha ono, ghaa iwhu l’ụzo ẹnyanwu-awata. Whẹ whuzekota iwhu l’ụzo ẹnyanwu-awata ono l’abakaarụ ẹnyanwu ẹja.

¹⁷Ọ sụ mu: “?Ị whụru ẹgube iwhe ono, nwa ndiwhe? ?Ọ dụ huswa huswa l’ẹnya, mbụ akpamara ono, ọzo-ụlo ndu Juda nọdu l’ẹka-a eme? Ọo zhiawho iwhe-kpanganga bẹ whẹ meru o ji alị-a, shi nno kpatsubaa mu ẹhu-eghughu. Leduwho gẹ whẹ l’eme mu iwhe-iwhere, ka l’iwhe-iwhere. ¹⁸Ọo ya l’a-kpata, mu egude ẹhu-eghughu mee whẹ iwhe. Mu ta abyadụ l’e-le whẹ ẹnya l’iwhu whụaru whẹ imiko, mu ta abya l’e-dobe whẹ ndzụ. Whẹ l’e-chigezhia mkpu ye mu lẹ nchị, ọle mu ta abyadụ l’angarụ whẹ nchị.”

E gbushiru ndu l’agwa agwa

¹Chileke bya echishia mkpu ike ye mu lẹ nchị sụ: “Unu bya ẹka-a, unubẹ ndu ono, e doberu t’unu nụa obodo ya nụ áwhụ. T’onyenọnu pakwarụ ngwọgu iya l’ẹka byatashia.” ²Nteke onowho, unwoke ishii shi l’ọnoguzo nke imeli, dụ l’ụzo isheli eze-ụlo Onye-Nwe-Ọha kfụfuta. Onyenọnu l’ime whẹ pageeru iwhe e gude egbu madzụ l’ẹka. O nweru nwoke ọbu whẹ lẹ whẹ lị, yeru uwe ọcha turu mkpara-ẹkwo lẹ mgburẹku. Whẹ wụbata bya akfụru lẹ mgboro ẹka ono, e meru l’ope, l’aakpọjeru Chileke ngwo-ẹja ọku.

³Nteke ono bẹ ọdu-biribiri Chileke nke Ízurẹlu shiwaa l’ẹka ono, o shi nọdu l’eli iwhe ono, nwegeeru akwẹka whọ gbalihu je anọdu l’ọnu eze-ụlo Chileke. Onye-Nwe-Ọha bya agbaku nwoke ono, yeru uwe ọcha turu mkpara-ẹkwo lẹ mgburẹku ono oku, ⁴sụ iya: “Jegbakota obodo Jerúsalẹmu g’ọ ha. Ndu l’agụ áwhụ arya ẹkwa akpamara ono, l’emegbabe l’obodo ono bẹ l’ii-me iwhe-ọhubama l’egedege ọnu iwhu.”

⁵Mu bya anụ gẹ Chileke sụru ndu ọwhua: “Unu tsoru onye ono jegbakota obodo ono gbushia ndu unu whụru. Unu be elekwa madzụ ẹnya l’iwhu whụaru iya imiko, t’unu be edobekwa whẹ ndzụ. ⁶Unu gbushikota unwoke ọgurenya, mẹe unwokorọbya, mẹe ụnwumgboko, mẹe ụnwegirima, mẹe unwurukpo, nọ iya nụ. Ọle t’ẹka unu be edenyikwa ndu e meru iwhe-ọhubama ono l’ẹhu. Ẹka unu l’a-wata whẹ egbugbu bụ l’ụlo-nsọ nkemu.” Ọo ya bụ, whẹ wata whẹ egbushi lẹ ndu bụ ọgurenya, nọ l’eze-ụlo Chileke.

⁷Chileke sụ whẹ: “Unu merwushia eze-ụlo ono emerushi; t’unu gbushia madzụ kụbe l’ọma-ogboduwhu eze-ụlo ono. Ngwa unu tụgbua!” Ọo ya bụ, whẹ tụgbua je awata ogbushi madzụ l’obodo ono.

⁸Nteke ono, whẹ l’egbushi madzụ ono bẹ bụ mu whuduru nwẹkinyi mu, mu daa kpube iwhu l’alị chishia mkpu sụ: “Oowa! Nnajị-Ọha, bụ Onye-Nwe-Ọha, ?iime t’i gude g’ẹhu l’eghube ghu eghu l’ẹka Jerúsalẹmu nọ gbushikota ndu wuduru nụ lẹ Ízurẹlu?”

⁹Ọ sụ mu: “Ejo-iwhe, ọzo-ụlo ndu Ízurẹlu mẹe ndu Juda l’eme bẹ parụ mebyi ẹka. Iwhe jiru alị ono bụ ogbu-ọchi, iwhe jiru Jerúsalẹmu bụru ome iwhe l’ụzo l’akfụaru nhamụnha. Whẹ l’anọduje ekfu lẹ Onye-Nwe-Ọha jịkawaru alị ono, mbụ lẹ Onye-Nwe-Ọha ta awhụjedu whẹ. ¹⁰Mu ta abyadụ l’e-le whẹ ẹnya l’iwhu whụaru whẹ imiko, mu ta abya l’e-dobe whẹ ndzụ. Mu l’a-kfụ whẹ ụgwo iwhe whẹ mekotaru.”

¹¹Nwoke ono, yeru uwe ọcha turu mkpara-ẹkwo lẹ mgburẹku bya abata sụ Chileke: “Mu meekwaru iwhe i sụru tẹ mu mee.”

Ọdu-biribiri Chileke lụfuru l’eze-ụlo Chileke

¹Tọ dụ iya, mu bya elee ẹnya whụ iwhe dụ g’ọo oshi-eze, e gude ẹwhuru safaya mee g’ọ tukoru l’eli iwhe whọ, hagee gbosaa gbosaa. Ọ bụru l’eli ishi iwhe whọ, nọ-gee ndzụ nweru akwẹka b’o tukoru. ²Onye-Nwe-Ọha bya asụ nwoke ono, yeru uwe ọcha ono: “Bahụ je awhakahụ onwoghu l’echilabọ ọkpa ọgba-kperekpere ono, dụ lẹ mkpula iwhe ono, nwegeeru akwẹka. Vọta ọku l’echilabọ iwhe ono, nweru akwẹka ono; vọ-jia ẹka ghu woru iya ghaa l’obodo ono.”

Mu l’ele iya ẹnya, ọ bahụ. ³Ẹka iwhe ono, nwegeeru akwẹka ono kfụru bụ l’ụzo ọhuda eze-ụlo Chileke ono nteke nwoke ono bahụru. Urwukpu bya asọ-kputa ọma-ogboduwhu eze-ụlo ono nke ime iya. ⁴Ọdu-biribiri Onye-Nwe-Ọha shi l’eli iwhe ono, nwegeeru akwẹka ono palihu je anọdu l’ọnu eze-ụlo Chileke. Urwukpu bya asọ-kputa eze-ụlo ono. Ogbu-zaazaa ọdu-biribiri Onye-Nwe-Ọha bya eji ọma-ogboduwhu eze-ụlo Chileke ono ejiji. ⁵Iwhe ono, nweru akwẹka bẹ ụda akwẹka iya rwugeeru ọma-ogboduwhu ono, dụ l’ọnu nfụta; ụda iya dụlewho g’ọo ẹka Chileke, bụ Ọkalibe-kakọta-ike l’ekfu okfu.

⁶Nteke Onye-Nwe-Ọha sụru nwoke ono, yeru uwe ọcha ono t’ọ vọta ọku l’echilabọ ọkpa ọgba-kperekpere ono, mbụ l’echilabọ iwhe ono, nwegeeru akwẹka; nwoke ono bahụ je akfụru lẹ mgboro ọkpa ọgba-kperekpere lanụ. ⁷Nnanụ l’ime iwhe ono, nwegeeru akwẹka ono bya amachịa ẹka gụta ọku, dụ l’echilabọ ẹka ono, iwhe ono, nwegeeru akwẹka ono nọ. Ọ vọta ovokọku ono nụ nwoke ono, yeru uwe ọcha ono. Nwoke ono gude iya lụfu.

⁸Iwhe ono, nwegeeru akwẹka bẹ nweru iwhe dụ g’ọo ẹka madzụ lẹ mkpula akwẹka whẹ. ⁹Mu bya elee ẹnya whụ ọkpa ọgba-kperekpere ẹno, nọkube iwhe ono, nwegeeru akwẹka. Ọkpa ọgba-kperekpere ono bẹ nọkube-gee iwhe ono, nwegeeru akwẹka ono l’ẹhu l’ẹhu. Ọkpa ọgba-kperekpere ono l’egbukaa ngerengere g’ọo ẹwhuru-egbe. ¹⁰Ọkpa ọgba-kperekpere ono whẹ ẹno bẹ nweru ụgbugba lanụ. Ọ dụlewho g’e woru ọkpa ọgba-kperekpere ọdo pyokafugee l’ime iya. ¹¹Ọo ẹka whẹ cheberu bẹ whẹ l’echebeje lẹ mgburẹku whẹ ẹno; whẹ ta aswị-jijedu aswị-ji mẹ whẹ tụgbuwaru. L’ọobuje nteke ọkpa ọgba-kperekpere ọwhu nọ l’iwhu tụgburu, whẹ atụgburu; whẹ ta aswị-jijedu aswị-ji mẹ whẹ tụgbuwaru. ¹²Ẹhu whẹ l’owhu mẹe okpurukpu whẹ, mẹe ẹka whẹ, mẹe akwẹka ọkpa ọgba-kperekpere ono whẹ ẹno b’a kpofushikotaru ụzo mgburumgburu. ¹³Mu nụa gẹ l’eekukaa ọkpa ọgba-kperekpere ono: “Ọkpa ọgba-kperekpere, l’agbawheje mgburumgburu.”

¹⁴Iwhe ono, nwegee akwẹka ono bẹ nwekotaru iwhu ẹno ẹno l’ẹhu l’ẹhu. Iwhu nke mbụ dụlewho g’ọo nke nwa oke-eswi; iwhu nke ẹbo dụlewho g’ọo nke madzụ; iwhu nke ẹto dụlewho g’ọo nke oduu; iwhu nke ẹno dụlewho g’ọo nke ugo. ¹⁵Iwhe ono, nwegeeru akwẹka ono bya angụ-lihu angụ-lihu. Iwhe ono bẹ bụ iwhe whọ, nọ-gee ndzụ, mu whụjeru lẹ mgboro ẹnyimu Keba. ¹⁶Iwhe ono, nwegeeru akwẹka ono tụgburu; ọkpa ọgba-kperekpere ono atụgburu tsoru whẹ, whẹ chilishia akwẹka whẹ tẹ whẹ whelihu l’alị; ọkpa ọgba-kperekpere ono ta alụfujedu whẹ alụfu lẹ mgboro. ¹⁷Whẹ kfụru; ọkpa ọgba-kperekpere ono akfụru. Nteke whẹ ngụ-lihuru; ọkpa ọgba-kperekpere ono angụ-lihu tsoru whẹ nkele ume, l’edu iwhe ono, nọ-gee ndzụ ono bẹ nọ l’ime ọkpa ọgba-kperekpere ono.

¹⁸Tọ dụ iya bụ, ọdu-biribiri Onye-Nwe-Ọha ono shi l’ọnu eze-ụlo Chileke ono lụfu; je anọdu l’eli iwhe ono, nwegeeru akwẹka. ¹⁹Mu l’ele whẹ ẹnya; iwhe ono chilishia akwẹka whẹ shi l’alị whelihu; ọkpa ọgba-kperekpere ono tụgburu tsoru whẹ. Whẹ je anọdu l’ọnoguzo, dụ l’ụzo ẹnyanwu-awata eze-ụlo Onye-Nwe-Ọha. Ọdu-biribiri Chileke nke Ízurẹlu nọdu whẹ l’eli. ²⁰Ọo whẹ bụ iwhe ono, nọ-gee ndzụ, mu whụru lẹ mkpula Chileke nke Ízurẹlu lẹ mgboro ẹnyimu Keba. Mu bya amarụ l’ọo iwhe ono, nwegeeru akwẹka ndono.

²¹Whẹ nwekotaru iwhu ẹno ẹno mẹe akwẹka ẹno ẹno l’ẹhu l’ẹhu; iwhe dụlewho g’ọo ẹka madzụ dụ-gee whẹ lẹ mkpula akwẹka. ²²Iwhu whẹ dụkotalewho g’ọo iwhu iwhe ono, mu whụjeru lẹ mgboro ẹnyimu Keba. Ẹka whẹ cheberu bẹ whẹ l’echebeje nhamụnha.

Ee-gbushi ndu Jerúsalẹmu

¹Ume Chileke bya apalia mu je edobe l’ọnoguzo, dụ l’ụzo ẹnyanwu-awata nke eze-ụlo Onye-Nwe-Ọha. L’ọnu ẹka l’eeshije abahụ l’ọnoguzo ono bẹ unwoke ụkporo l’ise nọ. L’ime whẹ bẹ mu whụru Jazanaya nwa Azuru mẹe Pelatiya nwa Benaya. Ọ bụru whẹ bụ ndu ishi ndu ono.

²Onye-Nwe-Ọha sụ mu: “Nwa ndiwhe, ọ kwa ndu-a l’anọduje achị ejo-idzu, ọ bụru whẹ l’anọduje lẹ mgbazhi t’e mee ejo-iwhe l’obodo-o. ³Whẹ l’asụje: ‘Nteke l’aa-tụshi ụlo tẹke agbabekwaa. Obodo-o dụkwa ụdudu ite-ọku; anyịbedua dụ ụdudu anụ dụ iya l’ime.’ ⁴Ọo ya bụ, kfua gẹ l’ọo-dụ whẹ, kfua gẹ l’ọo-dụ whẹ, nwa ndiwhe.”

⁵Ume Onye-Nwe-Ọha bya abya mu l’ẹhu. Ọ sụ mu tẹ mu sụ: “Ọ waa iwhe Onye-Nwe-Ọha l’ekfu ndọwa: Iwhe unubẹ ndu ọzo-ụlo Ízurẹlu l’anọduje ekfushi bẹ mu makọtakwaru; marụ iwhe l’agbatajẹ unu l’ọriri. ⁶Ndu unu gbuwaru l’obodo-o bẹ parụ ẹka shii; iwhe jiru ọma echi-ụzo iya bụ odzu ndu unu gburu egbu.

⁷“Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Ndu ono unu gbushiru kụbe l’obodo ono bẹ bụ anụ ono; obodo ono bụru ite-ọku ono, ọle mu l’a-chịfu unu achịfu l’obodo ono. ⁸Unu l’atsụ ogu-ịgba egvu, ọle mu l’e-wota ogu-ịgba dobe t’ọ taa ishi unu; o noo iwhe Onye-Nwe-Ọha l’ekfu ndono. ⁹Mu l’a-chịfu unu achịfu l’obodo ono woru unu ye l’ẹka ndu ọha ọdo, shi nno nụa unu chịikfuu. ¹⁰Ogu-ịgba l’a-ta ishi unu, mu je l’a-nọdu l’oge alị ndu Ízurẹlu nụa unu chịikfuu. Nteke ono unu amarụ l’ọo Mu bụ Onye-Nwe-Ọha. ¹¹Obodo-o ya nụ te ekpuchikwa unu g’ite-ọku l’ekpuchije anụ dụ iya l’ime. Mu l’a-nụkwa unu chịikfuu l’oge alị ndu Ízurẹlu. ¹²Unu l’a-marụ l’ọo Mu bụ Onye-Nwe-Ọha. Unu jịkaru odobe iwhe mu tọru ọkpa iya mẹe nsọ mu, ọ gbẹ-chia bụru omelalị ndu mba ọdo, buwheru unu mgburumgburu bẹ unu l’eme.”

¹³O noo ya, mu l’ekfukwadua nkfuchiru ono, Pelatiya nwa Benaya gbabuhu nwụhu. Mu bya adaa kpube iwhu l’alị chishia mkpu ike sụ: “Oowa; Nnajị-Ọha, bụ Onye-Nwe-Ọha! ?Iime t’i gbushikota ndu wuduru nụ lẹ Ízurẹlu tẹ whẹ gvụ kpamụ kpamụ?”

Ụkwa, Chileke kweru ndu Ízurẹlu.

¹⁴Onye-Nwe-Ọha bya ekfuru okfu yeru mu sụ: ¹⁵“Nwa ndiwhe; ndu bu lẹ Jerúsalẹmu l’ekfukwa okfu ẹhu unwune ghu bụ iya bụ ụnwune ghu ono, bụ ndu ọzo-ụlo Ízurẹlu a kpụru lẹ ndzụ asụje: ‘Ndu ono a kpụru lẹ ndzụ bẹ nọnukakwa otẹnya l’ẹka whẹ l’anọdu abarụ Onye-Nwe-Ọha ẹja. Alị-a bụ alị, a nụru anyi t’ọ bụru anyi nwe iya.’

¹⁶“Ọo ya bụ t’ị sụ whẹ l’ọ waa iwhe Nnajị-Ọha, bụ Onye-Nwe-Ọha bẹ l’ekfu ndọwa: A makwarụ-a lẹ mu woru whẹ je edobe lẹ mba ẹka tegeeru ẹnya, mbụ lẹ mu woru whẹ tụkashia l’alị, dụ l’iche l’iche, ọle mu l’a-bụlekwaru-a ụlo-nsọ dụru whẹ l’alị ono, whẹ larụ l’ime nwoge ha nwanshị.

¹⁷“Ọo ya bụ, t’ị sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-shi lẹ mba, dụ iche iche chịkobewhu unu azụ, mbụ lẹ mu l’e-shi l’alị ono, a chịkashiru unu rwukobe unu. Mu eworu alị Ízurẹlu nụ-whu unu azụ.

¹⁸“Whẹ -lwalẹwho bẹ whẹ l’e-wofukota iwhe l’aasọ oyi l’ime iya mẹe akpamara, l’eemegbabe iya. ¹⁹Mu l’e-me t’obu bụru whẹ nnanụ, mu eworu ume ọwhuu ye whẹ l’ẹhu. Mu l’e-wofu obu ẹwhuru ono, whẹ nweru, mee tẹ whẹ nweru obu dụ bẹlebele. ²⁰Ọo ya bụ, nggẹ whẹ emeje iwhe mu tọru ọkpa iya, edobe nsọ mu, eme iya ememe. Nteke ono whẹ abụru ndibe mu, mu abụru Chileke whẹ. ²¹Ọle ndu ono, kpọru obu ye l’ọbaru agwa ono, l’aasọ oyi ẹja mẹe l’akpamara ono, whẹ l’emegbabe, bẹ mu l’a-gwata ụgwo iwhe whẹ l’eme. O nokwa iwhe Nnajị-Ọha bụ Onye-Nwe-Ọha l’ekfu ndono.”

Ọdu-biribiri Onye-Nwe-Ọha lụfuru lẹ Jerúsalẹmu

²²Tọ dụ iya bụ, iwhe ono, nwegeeru akwẹka bya achilishia akwẹka iya, ọkpa ọgba-kperekpere nọ-gee whẹ lẹ mgboro tsoru whẹ tụgburu. Ọdu-biribiri Chileke nke Ízurẹlu tukoru whẹ l’eli. ²³Ọdu-biribiri Onye-Nwe-Ọha ono bya eshi l’echi obodo ono palihu je atukoru l’eli ugvu, dụ l’ụzo ẹnyanwu-awata obodo ono. ²⁴Mu nọdu l’ọwhulenya ono, Ume Chileke bya apalia mu je edobe l’ẹka ndu ono, a kpụru lẹ ndzụ nọdu lẹ Bábyilọnu. Ọo ya bụ, iwhe ono, mu l’awhụ l’ọwhulenya ono mihu. ²⁵16 Mu woru iwhe ono, Onye-Nwe-Ọha goshiru mu kọkotaru ndu ono, a kpụru lẹ ndzụ.

Onye nkfuchiru Chileke nọ ọnodu onye a kpụru lẹ ndzụ

¹Onye-Nwe-Ọha bya ekfuru okfu yeru mu sụ: ²“Nwa ndiwhe; ọ kwa l’echilabọ ndu ọzo-ụlo kwefuru ike b’i bu. Whẹ bụ onweru ẹnya awhụge ụzo; bụru onweru nchị; anụge iwhe. Iwhe kparụ iya nụ bụ lẹ whẹ bụ ndu ọzo-ụlo kwefuru ike.

³“Ọo ya bụ, nwa ndiwhe, gwokobe iwhe ghu g’ọo onye a kpụ lẹ ndzụ ala alị ọdo. T’ọ bụkwaru l’eswe nteke whẹ l’a-nọ ele ghu ẹnya, bẹ l’ii-gwota tụgbua. Tụgbua l’ibe ghu tẹ whẹ leje ghu t’ị lashia ẹka ọdo. O nweru ike iwhe ono abya edoo whẹ ẹnya, t’a gụfuro lẹ whẹ bụ ndu ọzo-ụlo kwefuru ike. ⁴O belewho l’eswe nteke whẹ l’ele ghu ẹnya, gwofutakota iwhe ghu g’ọo onye a kpụ lẹ ndzụ ala alị ọdo. L’urwẹnyashi, gụ akwalia nteke whẹ l’ele ghu ẹnya, tụgbua g’ọo ndu a kpụ lẹ ndzụ ala alị ọdo. ⁵Tẹ whẹ leje ghu ẹnya tufua ụzo lẹ mgbodo ghu shi iya vughashia iwhe ghu. ⁶Tẹ whẹ leje ghu ẹnya t’ị pata iwhe ono tukobe l’ukuvu; vuta iya vufu l’ọochi ẹnyashi. Kwechia iwhe l’iwhu ghu t’ị ba awhụ alị ẹnya nkele mu mewaru ghu t’ị bụru iwhe-ọgba-ama dụru ndu ọzo-ụlo Ízurẹlu.”

⁷Ọo ya bụ, mu bya emee ẹgube ono Onye-Nwe-Ọha sụru mu tẹ mu mee. O be l’eswe, mu bya egwofutakota iwhe mu g’ọo iwhe onye a kpụ lẹ ndzụ ala alị ọdo. O rwua l’urwẹnyashi mu gude ẹka mu gvufua ụzo lẹ mgbodo ono. Mu bya achịshia iwhe mu l’ọochi ẹnyashi, whẹ l’ele mu ẹnya, mu parụ iya tukobe l’ukuvu tụgburu.

⁸O be l’ụtsu echile iya; Onye-Nwe-Ọha bya ekfuru okfu yeru mu sụ: ⁹“Nwa ndiwhe; eshi-ọwhu ndu ọzo-ụlo Ízurẹlu, bụ ọzo-ụlo ndu ono, kwefuru ike l’ajị ghu: ‘?Ọo gụnu bẹ l’iime nno?’ ¹⁰Iwhe l’ii-kfuru whẹ bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Ozhi-a bụ onye ishi Jerúsalẹmu mẹe ndu ọzo-ụlo Ízurẹlu l’owhu, bụ ndu bu iya nụ b’ọ dụru. ¹¹Sụ whẹ lẹ gụbedua bụ iwhe-ọgba-ama dụru whẹ; l’ọo ẹgube ono, i meru bẹ l’ee-me whẹ. Whẹ l’a-bụru ndu a kpụru lẹ ndzụ lashia alị ọdo. ¹²Onye ọwhu bụ onye ishi l’ime whẹ l’a-pata iwhe iya tukobe l’ukuvu l’ọochi ẹnyashi shia ụzo, l’aa-tufuru iya lẹ mgbodo lụfu. Oo-kwechi iwhe l’iwhu t’ọ bọ whụ alị ẹnya. ¹³Mu l’e-woru ụgbu mu ghaarụ iya t’ọ daba iya, mu eduru iya je edobe lẹ Bábyilọnu, bụ alị ndu Kaludiya, ya anọdu l’ẹka ono nwụhu; ọ tọo whụdu alị ono ẹnya. ¹⁴Ndu ibe whẹ ono, nọ-wheru iya mgburumgburu bẹ mu l’a-chịkashi nnanụ nnanụ tẹ whẹ dzuru ẹka lile, mbụ ndu ono, l’ejeru iya ozhi mẹe ndu ojọgu iya. Mu amịta ogu-ịgba chịa whẹ baa whẹ ẹbaa.

¹⁵“Whẹ l’a-marụ l’ọo Mu bụ Onye-Nwe-Ọha mẹ mu chịkashile whẹ whọ; whẹ dzuru mba gẹ mba ha, whekashia whẹ, whẹ dzuru alị lile. ¹⁶Ọle mu l’e-me tẹ nwa olemole nahụ ogu-ịgba, mẹe mkpẹgu, mẹe ejo ẹhu-ba-dụ-mma. Ọo ya bụ nggẹ whẹ anọdu lẹ mba gẹ mba ha, whẹ jeru kfushikota akpamara, whẹbe ndu Ízurẹlu megbaberu. Nteke ono whẹ amarụ l’ọo Mu bụ Onye-Nwe-Ọha.”

Onye nkfuchiru Chileke, ẹhu l’awhụ kpakpakpa

¹⁷Tọ dụ iya bụ, Onye-Nwe-Ọha bya ekfuru okfu yeru mu sụ: ¹⁸“Nwa ndiwhe; gude ẹhu-anmanma ria nri ghu, gude ọnma-kpakpakpa mẹe ọtsu-egvu ngụa mini. ¹⁹Sụ ndu alị-a: ‘Ọ waa bụ iwhe Nnajị-Ọha bụ Onye-Nwe-Ọha l’ekfu l’ishi ndu bu lẹ Jerúsalẹmu, bụ alị Ízurẹlu: Whẹ l’a-chịjeru uche l’ẹka eri nri whẹ, whẹ anmajẹ kpakpakpa angụ mini. Alị whẹ l’owhu bẹ l’ee-gwoswakota iwhe lile, dụ iya nụ nkele ndu bu iya nụ l’eme iwhe-kpanganga. ²⁰Mkpụkpu, bụ ẹka madzụ bu shii bẹ l’ee-me t’ọ dakashịhu daburu chakongu, alị ono l’owhu abụru ochuwhu. Nteke ono unu amarụ l’ọo Mu bụ Onye-Nwe-Ọha.’ ”

²¹Onye-Nwe-Ọha bya ekfuru okfu yeru mu sụ: ²²“Nwa ndiwhe; ?ndẹe iwhe ọ fụtaru mbụ ẹtu ono, unu l’anmajẹ lẹ Ízurẹlu sụ: ‘Ụboku l’agvụakwa, iwhe a whụru l’ọwhulenya ta adụkwa ọwhu meru nụ.’ ²³Ọo ya bụ t’ị sụ whẹ agha: Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mu l’e-me t’ẹtu ono buhu, mbụ t’a nmabuhu ẹtu ono l’alị Ízurẹlu. Iwhe l’ii-kfuru whẹ bụ lẹ ụboku dụakwa ntse nteke iwhe a whụru l’ọwhulenya l’e-medzukota ẹgube a whụru iya. ²⁴O noo nkele ọwhulenya iwhoro bẹ l’ẹte adụhedu, nkfuchiru ụgho ta adụhe l’ọzo-ụlo Ízurẹlu. ²⁵Mbẹdua bụ Onye-Nwe-Ọha l’e-kfuje okfu, iwhe mu kfuru avụa l’ẹbe akpọ ụkfu. Ọo l’ọgbo unu bẹ mu l’e-kfuje okfu mewa iya whọ gẹ mu kfuru iya, mbụ unubẹ ndu ọzo-ụlo ono, kwefuru ike. O nokwa iwhe Onye-Nwe-Ọha bụ Onye-Nwe-Ọha l’ekfu.”

²⁶Onye-Nwe-Ọha byakwa ekfuru okfu yeru mu ọdo sụ: ²⁷“Nwa ndiwhe; ndu ọzo-ụlo Ízurẹlu bẹ l’anọjekwa ekfu l’ọwhulenya ono, ị whụru bẹ bụ iwhe l’a-nọoda ọdu tẹmenu ya emede; iwhe l’iikfuje bụru iwhe l’e-teeda ẹnya tẹmenu ya avụa. ²⁸Ọo ya bụ t’ị sụ whẹ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: A ta akpọhedu ụkfu ọdo okfu mu avụkota. Iwhe mu kfuru bẹ mu l’e-me gẹ mu kfuru iya. O noo iwhe Onye-Nwe-Ọha, bụ Chileke l’ekfu.”

Okfu e kfuru l’ishi ndu gude ụgho ekfuchiru Chileke

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe; gude nkfuchiru kfua gẹ l’ọo-dụ ndu l’ekfuchiru Chileke lẹ Ízurẹlu. Gude nkfuchiru kfua gẹ l’ọo-dụ ndu ono, bụlewho iwhe gbatarụ whẹ l’uche bẹ whẹ l’ekfuje whẹ asụ lẹ whẹ l’ekfuchiru Chileke. Sụ whẹ agha: Unu nụkwaa okfu Onye-Nwe-Ọha l’ekfu! ³Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Nshọ ndu eswe ono, bụ ndu nkfuchiru Chileke, mbụ ndu ono, l’anọduje etso iwhe obu whẹ kfuru whẹ l’ẹbe abụ l’o nweru iwhe whẹ whụru. ⁴Unubẹ Ízurẹlu, ndu nkfuchiru unu bụkwa ọ-ga-lẹ-mkpa g’ọo nkụta-ọswa, nọ l’ochuwhu. ⁵Whẹbe ndu nkfuchiru te ejejeduru ẹka mgbodo ndu Ízurẹlu gbashịru ọru, nke tẹ whẹ tụkwaa ya atụkwa t’ọ kfụru shihu ike nteke ọgu l’a-bya lẹ mbọku nke Onye-Nwe-Ọha. ⁶Ọwhulenya, whẹ l’awhụje bụ ọwhulenya iwhoro. Iwhe whẹ l’asụje l’oo-me bụru ụgho. Whẹ l’asụje lẹ Onye-Nwe-Ọha sụru l’ẹbe abụ l’ọo Onye-Nwe-Ọha bẹ zhiru whẹ nụ, whẹ nọdu whẹ ele ẹnya t’iwhe, whẹ kfuru vụa. ⁷Ọwhulenya, unu l’awhụje bụkotakwa iwhe-iwhoro, iwhe unu l’asụje l’oo-me bụru ụgho. Unu l’asụje lẹ mụbe Onye-Nwe-Ọha sụru l’ẹbe adụ iwhe mu sụru.

⁸“Ọo ya bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Eshi-ọwhu unu l’ekfuje okfu iwhoro, ọwhulenya, unu l’awhụje bụru ụgho, bẹ mu nọokwaru unu l’ejo. O nokwa iwhe Nnajị-Ọha bụ Onye-Nwe-Ọha l’ekfu ndono. ⁹Ndu nkfuchiru ono, l’awhụje ọwhulenya iwhoro mẹe ndu ono, l’anọje aghọ ụgho sụ lẹ whẹ l’ekfu iwhe l’e-me nụ bẹ mu l’a-da ẹka l’ẹhu. Whẹ ta anọdudu l’ẹka ndu nkemu l’achị idzu, ẹwha whẹ ta abahụ l’ẹkwo e deshiru ọzo-ụlo ndu Ízurẹlu, ọkpa whẹ ta abya l’a-tụ l’alị ndu Ízurẹlu. Ọo ya bụ, nggẹ unu amarụ l’ọo Mu bụ Nnajị-Ọha, bụ Onye-Nwe-Ọha.

¹⁰“Iwhe kparụ iya nụ bụ lẹ whẹ dusweru ndu nkemu ụzo sụ l’ẹhu dụ guu nteke ẹhu l’adụa guu. Ndibe mu bẹ tụru mgbodo; whẹbedua gude iwhe-ọcha chia ya echichi. ¹¹Kfuaru ndu ono, gude iwhe-ọcha chia mgbodo ono, lẹ mgbodo ono l’a-dashịkwa. Eze mini l’a-chị gbadagbada nmaa ya, aka-mini adarụ kpua ya, oke whẹrewhere ewhee l’eli iya, ¹²mgbodo ono abụru gburugudungu. Ndu madzụ ta abyadụ l’a-jị unu sụ: ‘?Ndẹnu urwu iwhe-ọcha ono, unu chiru lẹ mgbodo ono bẹru?’

¹³“Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-gude oke ẹhu-eghughu mu mee t’oke whẹrewhere whee, mu egude ẹhu iwe mee t’eze mini chịa gbadagbada, gude oghu-damụdamu mee t’aka-mini daa mebyishia iwhe. ¹⁴Mgbodo ono, unu gude iwhe-ọcha chia bẹ mu l’e-nwutsushi, mee ya t’ọ whọhu bụru gwoo l’alị nke ọwhu ẹka a tụru ukfu iya l’a-daburu kpabaa. Mgbodo ono l’e-ze tụpyabe unu tugbushia. Ọo ya bụ, unu amarụ l’ọo Mu bụ Onye-Nwe-Ọha. ¹⁵O noo gẹ mu l’e-shi kpukpushi mgbodo ono oke ẹhu-eghughu mu; kpukpushikwa iya whọ ndu ono, gude iwhe-ọcha chia ya, mu akakwanụru unu lẹ mgbodo ono mẹe ndu chiru iya echi bẹ nkewhe gvụwaru, ¹⁶bụ iya bụ ndu nkfuchiru Ízurẹlu ono, bụ ndu kfuru okfu ẹhu Jerúsalẹmu, mbụ ndu ono, l’awhụjeru iya ọwhulenya ẹhu-ọdu-guu nteke ẹhu l’adụa guu. O nokwa iwhe Nnajị-Ọha bụ Onye-Nwe-Ọha l’ekfu.

Okfu e kfuru l’ishi ụnwanyi, gude ụgho ekfuchiru Chileke

¹⁷“Nwa ndiwhe; gbanwụa iwhu agbanwụ kfuru okfu mabẹru ụnwanyi ibe unu, mbụ ndu ono, bụlewho iwhe gbatarụ whẹ l’uche bẹ whẹ l’ekfuje. Gude nkfuchiru kfua gẹ l’ọo-dụ whẹ. ¹⁸Sụ whẹ agha: Ọ waa iwhe Nnajị-Ọha bụ Onye-Nwe-Ọha bẹ l’ekfu ndọwa: Nshọ unubẹ ụnwanyi ono, l’adzụkoje ọgvu gbarụ lẹ nkwo-ẹka, mbụ unubẹ ndu ono, l’emeshije nkelishi nụ ndu dụ l’iche l’iche tẹ whẹ gude eke madzụ oswe. ?Unu l’e-ke ndibe mụbe Onye-Nwe-Ọha oswe; haa ndu nkunu dobe tẹ whẹ gaarụ unu mkpa? ¹⁹Unu ta akwabẹdu mu ugvu l’iwhu ndibe mu nkele unu l’asụje tẹ whẹ nụ unu nwọchi-l’ẹka balị yẹle ibiribe buredi. Unu fụta unu adzụaru whẹ mkpọkoro ejire; gude ejire ono egbushi ndibe mu ono, l’angabẹjeru unu nchị; ndu l’ẹte agbaa tẹ whẹ nwụhu bẹ unu l’egbuje, dobe ndu ọwhu l’ẹte agbaa tẹ whẹ nọdu ndzụ, ndzụ.

²⁰“Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Ọgvu ono, unu gba l’ẹka gude eke ndu madzụ oswe bẹ dụkwa mu ẹji. Mu l’a-gbabushi ọgvu ono l’ẹka unu; mee tẹ ndu ono, unu keru oswe nweru onwowhe g’ọo nwẹnu, e mefuru l’etse. ²¹Nkelishi unu bẹ mu l’a-lakashị alakashị; nafụta ndibe mu l’ẹka unu. Whẹ ta anọduhedu unu l’ẹka t’unu chị nta whẹ. O noo nteke unu l’a-marụ l’ọo Mu bụ Onye-Nwe-Ọha.

²²“Unu gudewa ejire mee t’obu chifu ndu dụ chịriri, bụ ndu mu l’ẹte achọo t’obu chifu, unu bya emee tẹ ndu ejo-ememe nweru mgbamume nke ọwhu whẹ l’ẹte eshi l’ejo-iwhe, whẹ l’eme lụfuta dzọo onwowhe ndzụ, ²³eshi-ọwhu ọ dụ nno, unu ta abyadụ l’a-whụkwadu ọwhulenya iwhoro ọdo, unu te ekfuhe l’ọ waa iwhe l’e-me nụ ọdo. Mu l’a-nafụta ndibe mu l’ẹka unu. Nteke ono unu amarụ l’ọo Mu bụ Onye-Nwe-Ọha.”

Chileke l’anma ndu l’agwa agwa ikpe

¹Tọ dụ iya bụ, ụwhodu lẹ ndu bụ ọgurenya Ízurẹlu byakfuta mu, bya anọdu anọdu l’atatiwhu mu. ²Onye-Nwe-Ọha kfuru okfu yeru mu sụ: ³“Nwa ndiwhe; ndu-a bẹ kpọkwaru obu ye l’agwa whẹ, tẹmenu ọ bụru agwa ono l’enwuko whẹ eye l’ome ejo-iwhe. ?Ndẹe gẹ mu l’e-shi haa whẹ tẹ whẹ bya mu njịta l’ẹka? ⁴Ọo ya bụ, kfuaru whẹ sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Iwhe bụ onye shi l’ọzo-ụlo Ízurẹlu, kpọru obu ye l’agwa, mbụ onye kwezhiwaru haa t’agwa ono nwuru iya ye l’ome ejo-iwhe; onye ọbu -byatashia njịta l’ẹka onye nkfuchiru Chileke; mbẹdua, bụ Onye-Nwe-Ọha akarụ onye ọbu gẹ l’ọo-dụ iya l’ikpoto agwa ono l’ọogwa. ⁵O noo gẹ mu l’e-me iya ndono gude kpowhu égò ọzo-ụlo ndu Ízurẹlu azụ; mee tẹ whẹ lwakfutawhu mu azụ, mbụ ndu ono, gudewa ọgwa agwa lụfu l’ẹka mu nọ.

⁶“Ọo ya bụ, kfuaru ọzo-ụlo ndu Ízurẹlu l’ọ waa iwhe Nnajị-Ọha bụ Onye-Nwe-Ọha l’ekfu ndọwa: T’unu dawhu azụ parụ agwa ono, unu l’agwa haa; t’unu wofu ẹnya l’akpamara ono, unu l’emegbabe.

⁷“O noo nkele onye shi l’ọzo-ụlo Ízurẹlu, m’ọ bụ onye shi eshishi bya eburu lẹ Ízurẹlu; onye ọbu bọfu onwiya l’ẹka mụbe Onye-Nwe-Ọha nọ, kpọru obu ye l’agwa, mbụ kweta haa ya t’o nwuru iya ye l’ome ejo-iwhe; onye ọbu -byatashia njịta l’ẹka onye nkfuchiru Chileke, mbẹdua, bụ Onye-Nwe-Ọha akarụ iya gẹ l’ọo-dụ iya. ⁸Mu l’a-tanwụberu onye ọbu iwhu, mee ya t’ọ bụru iwhe e gude alọ ndu ọdo ẹka lẹ nchị; mee ya t’ọ bụru onye l’aanma l’ejo ẹtu. Mu l’e-kefu iya l’oke l’echilabọ ndibe mu. Ọo ya bụ, unu amarụ l’ọo Mu bụ Onye-Nwe-Ọha.

⁹“Ọ -bụru l’onye-nkfuchiru Chileke b’e dusweru; o kfua ọwhu, l’ẹte abụa ya; ọ kwa mụbe Onye-Nwe-Ọha bẹ meru t’onye-nkfuchiru ono kfua ya, nke ọwhu mu l’a-machị ẹka mu daa ya l’ẹhu, mbụ gbua ya egbu t’ọ bọ nọhe l’echilabọ ndibe mu bụ ndu Ízurẹlu. ¹⁰Ọo whẹ vu ejo-iwhe ono, whẹ meru. Ọo awhụ, a nụru onye nkfuchiru Chileke ono bẹ l’aa-nụ onye ono, jeru njịta l’ẹka iya. ¹¹Ọo ya bụ nggẹ ọzo-ụlo ndu Ízurẹlu alụfu-beru mụbe Onye-Nwe-Ọha l’ẹka, whẹ egudeberu ome iwhe-dụ-ẹji emerwushi onwowhe. Nke ọwhu whẹ l’a-bya abụru ndibe mu, mu abụru Chileke whẹ. O nokwa iwhe Nnajị-Ọha bụ Onye-Nwe-Ọha l’ekfu ndono.”

Nowa, Daníyelu ọwaa Jobu

¹²Tọ dụ iya bụ, Onye-Nwe-Ọha bya ekfuru okfu yeru mu sụ: ¹³“Nwa ndiwhe; ọ -bụru lẹ mkpụkpu bẹ meru iwhe-dụ-ẹji l’ẹka mụbe Onye-Nwe-Ọha nọ l’okfu l’e te egudedu ire whẹ ẹka; mu amachịa ẹka daa whẹ l’ẹhu, mee t’ẹka nri l’eshije abyarụ whẹ chihu, shi nno wobataru whẹ mkpẹgu, gbushia madzụ mẹe anụmanu, nọ iya nụ. ¹⁴Ọ -bụru mọo l’ụmadzu ẹto ono, bụ Nowa, mẹe Daníyelu, mẹe Jobu bẹ bu l’ime mkpụkpu ono, iwhe l’a-dzọ whẹbedua bụ chịriri ono, whẹ dụ-gee. O nokwa iwhe Nnajị-Ọha bụ Onye-Nwe-Ọha l’ekfu ndono.

¹⁵“Ọ -bụru lẹ mu harụ ejo anụ-ẹgbudu t’ọ bya eswechita alị ono atagbushi ndu bu iya nụ; mee ya t’ọ bụru ochuwhu, mbụ nke ọwhu bụ l’anụ-ẹgbudu ọbu bẹ meru t’ọ dụ onye l’a-dụ ike aghata iya aghata, ¹⁶ọ -bụru mọo l’ụmadzu ẹto ono bẹ bu l’ime mkpụkpu ono, bẹ mụbe Nnajị-Ọha, bụ Onye-Nwe-Ọha vuru-a ishi mu gẹ mu vu iya, bẹ ụmadzu ẹto ono ta adụkwa ike adzọfuta ụnwu whẹ nwoke mẹe ndu nke nwanyị. Ọo whẹbedua kpụ bẹ l’aa-dzọta; alị ono adaburu bụru ochuwhu.

¹⁷“Ọ -bụru l’ọo ogu-ịgba bẹ mu yeru t’ọ bya ataa ishi ndu alị ono; sụ t’ogu-ịgba ono vọo alị ono kfurukfuru; gbukota madzụ mẹe anụmanu, nọ iya nụ; ¹⁸ọ -bụru mọo l’ụmadzu ẹto ono bẹ bu l’ime mkpụkpu ono, bẹ mụbe Nnajị-Ọha, bụ Onye-Nwe-Ọha vuru-a ishi mu gẹ mu vu iya, bẹ ụmadzu ẹto ono ta adụkwa ike adzọfuta ụnwu whẹ nwoke mẹe ndu nke nwanyị. Ọo whẹbedua kpụ bẹ l’aa-dzọta.

¹⁹“Ọ -bụru l’ọo ejo ẹhu-ba-dụ-mma bẹ mu yeru t’ọ bya l’alị ono, gude oke ẹhu-eghughu mu mee tẹ whẹ laa l’ọchi, shi nno gbushia madzụ mẹe anụmanu, nọ iya nụ; ²⁰ọ -bụru mọo l’ụmadzu ẹto ono, bụ Nowa, mẹe Daníyelu, mẹe Jobu bẹ bu l’ime mkpụkpu ono, bẹ mụbe Nnajị-Ọha, bụ Onye-Nwe-Ọha vuru-a ishi mu gẹ mu vu iya, bẹ whẹ ẹto ono ta adụkwa ike adzọfuta ụnwu whẹ nwoke mẹe ndu nke nwanyị. Ọo whẹbedua bẹ l’ee-shi lẹ chịriri, whẹ dụ dzọta.

²¹“O noo nkele ọ waa iwhe Nnajị-Ọha bụ Onye-Nwe-Ọha l’ekfu ndọwa: Ọ -bụru mọo lẹ mu yeru uzhi iwhe ẹno, l’eye egvu t’ọ bya anụa Jerúsalẹmu awhụ bụ iya bụ ogu-ịgba, mẹe mkpẹgu, mẹe ejo anụ-ẹgbudu, mẹe ejo ẹhu-ba-dụ-mma, shi nno gbushia madzụ mẹe anụmanu, nọ iya nụ. ²²Ọ dụ-gezhikwaa nno bẹ l’ee-nwelekwa-a ndu ọwhu l’a-wafụ nụ, mbụ unwoke mẹe ụnwanyi olemole, l’e-shi l’ime mkpụkpu ono fụta. Nteke whẹ l’a-byakfuta unu bẹ bụ unu whụlewho umere, whẹ l’eme yẹle agwa, whẹ l’akpa; whẹ adụa unu obu l’ejo-iwhe ono, mu wokfutaru Jerúsalẹmu, mbụ l’iwhe lile, mu meru Jerúsalẹmu. ²³Whẹ l’a-dụ unu obu nteke unu whụru umere, whẹ l’eme yẹle agwa, whẹ l’akpa, unu amarụ l’iwhe lile ono, mu meru Jerúsalẹmu bẹ mu te emedu lẹ nkịti labọ. O nokwa iwhe Nnajị-Ọha bụ Onye-Nwe-Ọha l’ekfu ndono.”

A tụru Jerúsalẹmu yeru oshi vayịnu, ọku keru

¹Onye-Nwe-Ọha bya ekfuru okfu yeru mu sụ: ²“Nwa ndiwhe; ?ndẹe iwhe oshi vayịnu gude ka ẹkali oshi ọdo, dụ l’ọswa ree? ³?O nweru iwhe oshi iya dụ nke ememe? ?Ee-gude iya pyịta mkpọ l’eekobeje iwhe? ⁴Iwhe ọ dụ ree bụ t’ọ bụru nkụ l’eeye l’ọku. Ọku ekee ya ishi labọ, kepyashia echilabọ iya ekepyashi, ?o nweru iwhe ọ dụkwadu nke ememe? ⁵Nteke ọ dụ mgburumgburu bẹ l’adụdua rọ iwhe e gude iya eme, ?ochia ntaa, ọku keru iya bẹ l’ee-gude iya mee gụnu?

⁶“Ọo ya bụ l’ọwaa iwhe Nnajị-Ọha bụ Onye-Nwe-Ọha l’ekfu ndọwa: Ọ kwa gẹ mu wotaru oshi vayịnu l’iwhe bụ oshi, dụ l’ọswa t’ọ bụru nkụ l’eeye l’ọku, bụ gẹ mu l’e-wota ndu bu lẹ Jerúsalẹmu. ⁷Mu l’a-tanwụbe iwhu mee whẹ iwhe. Ọo l’ezhi lẹ whẹ nahụru ọku, ọle ọo ọku l’e-kegbushi whẹ. Unu l’a-marụ l’ọo Mu bụ Onye-Nwe-Ọha nteke mu l’a-tanwụbe iwhu mee whẹ iwhe. ⁸Mu l’e-me alị ono t’ọ daburu iwhoro, nkele whẹ ta abụdu ndu e gude ire whẹ ẹka. O nokwa iwhe Nnajị-Ọha bụ Onye-Nwe-Ọha l’ekfu.”

Jerúsalẹmu bụ obodo, l’ete gudee ire iya ẹka

¹Onye-Nwe-Ọha bya ekfuru okfu yeru mu sụ: ²“Nwa ndiwhe; mee tẹ Jerúsalẹmu marụ akpamara l’oome. ³Sụ Jerúsalẹmu l’ọ waa iwhe Nnajị-Ọha bụ Onye-Nwe-Ọha l’ekfuru iya ndọwa: Ẹka i shi futa, bụ ẹka a nwụru ghu bẹ bụ l’alị Kenanu. Nna ghu bụ onye Amọru, ne ghu bụru onye Hetu. ⁴O to nwedu onye byibufuru eri mkpụru-otubo ghu mbọku a nwụru ghu; t’o nwe onye safụru ukpu; t’e hu ghu unu l’ẹhu; t’a whụ-kpu ghu ẹkwa. ⁵O to nwedu onye leru ghu ẹnya l’iwhu whụaru ghu imiko, mbụ l’o to nwedu onye nweru obu-imiko l’ẹka ị nọ nke t’ọ dụ iwhe ono, ọwhu l’oo-meru ghu. A nwụru ghu l’aasọ ghu oyi; a pata ghu je etuwhaa etuwha l’ọma ẹgu.

⁶“Tọ dụ iya bụ, mu l’aghata, mu whụa ghu gẹ l’iirwaswi onwoghu lẹ mmee ghu. Ọ bụru g’ị zẹe pọtoo lẹ mmee ghu ono bẹ mu sụru ghu: ‘Nọdu ndzụ!’ ⁷Mu bya emee ghu, ị wata evuvu, vua mụgamuga g’ọo oshi, gvuru l’ẹgu. I vuta dajarahụ, kaa kpurukutu, ẹra bya akfụ-geeru ghu akfụru l’obu, ẹji gbaa ghu ịyotiyoti. Ọ bụru gụbe onye shi gbarụ ọto tọgboru.

⁸“Mu ghatadẹkwa ọdo lee ghu ẹnya bya awhụ l’ị kawaru kpurukutu nke ọlaru nwoke l’ụlo. Mu woru ọnumonu uwe mu whụ-kpua ghu; gude gbochia ghu ọto. Mu bya eribuaru ghu nte; mu lẹ ghu gbaa ndzụ; ị bụru nkemu. O nokwa iwhe Nnajị-Ọha bụ Onye-Nwe-Ọha l’ekfu ndono.

⁹“Tọ dụ iya bụ, mu bya egude mini ghụa ghu ẹhu, sashịa ghu mmee ono, bya eworu mmanụ-mbeleke hua ghu; ¹⁰yebe ghu uwe, a kparụ l’ọoma ụma, bya eworu akpọkpa e gude akpọ mee yee ghu. Mu bya eworu ọkpobe ẹkwa-ọcha nmabẹ ghu, bya eworu uwe ẹji yee ghu. ¹¹Mu bya eworu ịyagba dojia ghu ẹhu, woru echi mgbalẹka gbabẹ ghu, woru iwhe-ọnya-l’olu nyabẹ ghu. ¹²Mu yee ghu eregede-imi, yee ghu eregede-nchị, woru okpu l’ama ụma kpube ghu l’ishi. ¹³O noo g’e dojiru ghu mkpọla-ododo mẹe mkpọla-ọcha l’ẹhu. Uwe, l’iiyeje bụru ọkpobe ẹkwa-ọcha mẹe uwe ẹji mẹe uwe, a kparụ l’ọoma ụma. Nri, l’iirije bụru nri, e meru l’ọkpobe ụturutuu-balị, mẹe mmanụ-ẹnwu, mẹe mmanụ-olivu. Ị bụru ụma anyịganyi, bya abụru eze-nwanyị. ¹⁴Ụma ono, l’ịima bẹ meru ẹwha ghu ngashịa mba gẹ mba ha. Ụma ono, l’ịima bẹ dzuru oke nkele mu meru ghu ị dụ ugvu l’ẹnya. O nokwa iwhe Nnajị-Ọha bụ Onye-Nwe-Ọha l’ekfu ndono.

¹⁵“Ọle ụma ono, l’ịima bẹ gbechia bya evude ghu gbadẹ, i gude l’ịima ụma wata ọgba ọkpara, gude ori ogori awha onwoghu kutukutu l’ẹhu ndu l’aghata aghata, woru ụma ghu ono ekeshiru whẹ. ¹⁶Uwe ghu b’ị harụ chịta kowhaa l’ẹka l’ịigwaje iwhe gude iya memaa ẹka ono emema, ọ bụru l’ẹka ono bẹ l’ịinoduje agba ọkpara ono. Ẹgube iwhe ono, l’iime ta adụkwa nke ememe, tọ dụroo nke ememe owhu. ¹⁷O nokwawho g’i wotaru ịyagba, e meru lẹ mkpọla-ododo mẹe lẹ mkpọla-ọcha mu ono gude iya meshia okee ntẹkpe gwalahaa shi nno awhatọshi onwoghu. ¹⁸Ị bya achịta uwe ono, ị kparụ l’ọoma ụma woru kwaa ntẹkpe ono ngwa, bya eworu mmanụ mu yẹle isẹnsu mu ono woru nụ iya. ¹⁹Nri ono, mu nụru ghu bụ iya bụ ọkpobe ụturutuu-witi, mẹe mmanụ-olivu, mẹe mmanụ-ẹnwu ono, mu gude azụ ghu b’i wotakwaruwho nụ ntẹkpe ono t’ọ bụru ngwo-ẹja, mkpọ iya dụ ree. O nokwa iwhe Nnajị-Ọha bụ Onye-Nwe-Ọha l’ekfu ndono.

²⁰“Ọwhu kagee nụ bụ l’ị chịtaru ụnwegirima unwoke mẹe ụnwanyi, ị nwụshiru mu gude gwaa ntẹkpe ono t’ọ bụru ngwo-ẹja nri, ị nụru whẹ. ?Ọkpara ono, l’ịigba ono te edzudua nke t’ị haa ya agbagba tọo? ²¹I gbushiru ụnwegirima mu, woru whẹ nụ t’a kpọoru ntẹkpe ọku. ²²Akpamara ono, l’iimegbabe mẹe ọkpara ono, l’ịigba bẹ kpuchiru ghu ẹka l’iwhu, tị nyatahẹ nteke ono i shi bụru nwata, mbụ nteke i shi gbarụ ọto tọgboru, arwaswi onwoghu lẹ mmee ghu.

²³“Iwhe Nnajị-Ọha, bụ Onye-Nwe-Ọha l’ekfu eyeru ghu l’ejo-ememe ono, l’iimegbabe bụ, nshọbukwaa ghu nshọ, nshọbukwa ghu nshọ! ²⁴Ị tụwhashiru ụlo nwanshi, tụwhashia ẹka l’ịigwaje iwhe l’agụga agụga oji. ²⁵L’ishi mbadụzo nọnu b’ị tụru ẹka l’ịigwaje iwhe, shi nno woru ụma ono, l’ịima whaa kutukutu. Onye l’aghata aghata bẹ l’iiwojeru agada tụkaaru, ogori l’iiri bụru iwhe l’aka shii mbọkumboku. ²⁶Gụ lẹ ndu Íjiputu bẹ riru ogori, mbụ ndu obutobu ghu ono, ẹgu nwanyị l’anọje enwu whuruwhuru l’ẹhu. Ogori l’iiri bụru iwhe l’aka shii mbọkumboku, shi nno akpatsu mu ẹhu-eghughu. ²⁷Ọo iwhe ono bẹ meru, mu machịwaa ẹka abya ghu adada l’ẹhu, tẹmenu mu kebotawaa iwhe l’oke alị ghu. Mu wowaru ghu nụ ndu ọhogu ghu, bụ ụnwanyi Fílistiya, ẹhu l’achị ọku, mbụ ndu ono, ụrwu-alị ono, l’ịirwu l’eme iwhere. ²⁸Ogori gụ lẹ ndu ọdo l’eri te edzuduru ghu; ị chịru ndu Asiriya jeshia; gụ lẹ whẹ whaa onwunu kutukutu; whẹ te edzukwaru ghu whọ. ²⁹Ogori ono bya aka ghu njọ l’ẹhu l’ẹka gụ lẹ ndu Bábyilọnu nọ, bụ iya bụ ndu ono, l’agba ikike nghọ, obenu lẹ whẹ te edzukwaru ghu whọ.

³⁰“Nnajị-Ọha, bụ Onye-Nwe-Ọha l’ekfu sụ: Ị bụ onye meji l’atọfuje ẹgwegwa, ọo ya meru, i tsoru emewheshi g’ọo nwanyị-ọkpara, iwhere gvụru l’iwhu! ³¹I woru ụlo nwanshi yẹle ẹka l’ịigwaje iwhe tụwhashia l’echi-ụzo. Ọle ị tịi natajẹdu okpoga g’ọo ụnwanyi ọkpara ọdo. ³²Ị bụ nwanyị, l’eri ogori, l’akajẹ ọswaru unwoke ọdo amamẹ ji l’alụ ghu alụlu! ³³Onye, l’agba ọkpara bẹ nwoke l’akfụje ụgwo tẹ yẹle iya zẹe. Obenu lẹ gụbedua l’agbẹje anụ unwoke iwhe tẹ gụ lẹ whẹ zẹe, mbụ l’ịinuje whẹ n-wọlazu tẹ whẹ shi l’ẹka dụ iche iche bya alarụ ghu l’ụlo. ³⁴Ọgba ọkpara nkeghu gbakwarụ iche l’ẹka ụnwanyi ọdo nọ. O to nwedu onye l’achịje ghu azẹe. O to nwedu onye l’akfụje ghu ụgwo tẹ gụ l’iya zẹe, ọo gụbedua l’agbẹje kfụa ndu ọdo ụgwo tẹ whẹ larụ ghu l’ụlo; nkeghu gbabụkwaru iche.

³⁵“Ngwa, gụbe nwanyị-ọkpara ono; nụa iwhe Onye-Nwe-Ọha l’ekfu: ³⁶Ọ waa bụ iwhe Nnajị-Ọha bụ Onye-Nwe-Ọha l’ekfu: Ị whụfuru onwoghu iwhe l’ẹhu gbarụ ọto, bya eworu onwoghu haarụ ndu l’abyakfutaje ghu azẹe whẹ l’awhatọshi l’ịigwa ntẹkpe, bya egbushia ụnwegirima ghu gude agwa iya. ³⁷Eshi-ọwhu ọ dụ nno bẹ mu l’e-rwukota ndu lile ono, l’abyakfutaje ghu azẹe bụ iya bụ ndu ono, l’emeje t’ẹhu kpẹneshihu ghu, mbụ ndu i yeru obu mẹe ndu ị kpọru ashị. Mu l’e-rwukota whẹ tẹ whẹ nọ-whee ghu mgburumgburu bụru ọgu dụru ghu. Mu l’a-nọdu l’iwhu whẹ whụfu ghu iwhe l’ẹhu tẹ whẹ whụ ghu l’ẹka ị gba ọto. ³⁸Mu l’e-kpe ghu ikpe, l’eekpeje nwanyị, riru ogori yẹle onye gburu ọchi. Mu l’e-gude oke ẹhu-eghughu iwhe ono yẹle okoowhoo iwhe ono wokfuta ghu ọnwu shi nno gwaa ghu maa. ³⁹Mu abya enwuru ghu haarụ ndu ono gụ lẹ whẹ l’azẹje; whẹ enwutsushia ụlo nwanshi ghu ono; nwukposhia ẹka ono, l’ịigwaje iwhe. Whẹ l’e-yefu ghu uwe ghu; nyafụ ghu ịyagba ghu; parụ ghu haa t’ị gbarụ ọto tọgboru. ⁴⁰Whẹ l’a-chịta ikpoto madzụ bya etso ghu ọgu; ndu ono egude ẹwhuru tugbua ghu; gude ogu-ịgba saa anụ ghu nwịrinwiri. ⁴¹Whẹ l’a-nwụru ọku ye l’ụlo ghu t’ọ dzụa ya; nụa ghu awhụ l’ẹka igweligwe ụnwanyi ọdo l’ele ghu ẹnya. Mu l’e-me t’ọkpara ono, l’ịigba bụru kperemu, gụ akfụ-buhu unwoke ụgwo tẹ whẹ lajẹru ghu l’ụlo. ⁴²O noo nteke ẹhu-eghughu mu l’a-dazhita; mu ekobuhuru ghu okoowhoo; mu abya ejizeta; ẹhu eghubuhu mu eghu.

⁴³“Ị tị nyatadu g’o shi dụru ghu lẹ nwata; i gude iwhe ono, l’iimegbabe akpatsu mu ẹhu-eghughu. Ọo ya meru g’o gude mu je l’a-gwata ghu ụgwo iwhe ono, i meru. O nokwa iwhe Nnajị-Ọha bụ Onye-Nwe-Ọha l’ekfu ndono. ?Ọo gụnu meru i rilahaa ogori yekobe l’akpamara ọwhu, l’iimegbabe?

⁴⁴“Sụa, ndu l’anma ẹtu l’a-nmakutajekwa ghu l’ẹtu sụ: ‘Ọo gẹ ne dụ bụ gẹ nwa iya nwanyị l’adụje.’ ⁴⁵Ọo gẹ ne ghu dụ bụ gẹ gụbedua dụkwawho, mbụ ne ghu ono, kpọru ji iya mẹe ụnwegirima iya ẹbo-ẹbo l’afụ. Ọo g’unwune ghu nwanyị dụ bụ gẹ gụbedua dụkwawho, mbụ unwune ghu nwanyị ono, kpọru ji whẹ mẹe ụnwegirima whẹ ẹbo-ẹbo l’afụ. Ne unu bụ onye Hetu, nna unu bụru onye Amọru. ⁴⁶Onye bụ nwune ghu nwanyị nke ọgurenya bụ Samériya. Ẹka yẹle ụnwada iya bu bẹ bụ l’ụzo isheli ẹka i bu. Nwune ghu nwanyị nke nwata bẹ bụ Sódomu. Ẹka yẹle ụnwada iya bu bẹ bụ l’ụzo ọhuda ẹka i bu. ⁴⁷Ị nwụtaru ẹka whẹ melahaa umere, whẹ l’eme mẹe akpamara, whẹ l’eme; o noo te edzuru ghu; umere nkeghu gbẹ bya aka njọ amamẹ nkewhe. ⁴⁸Nnajị-Ọha, bụ Onye-Nwe-Ọha bẹ l’ekfu sụ: Mu vuru-a ishi mu gẹ mu vu iya, bẹ nwune ghu nwanyị, bụ Sódomu yẹle ụnwada iya te emejekwaru ẹgube iwhe gụ l’ụnwu-ada ghu meru.

⁴⁹“Iwhe bụ ejo-iwhe, nwune ghu nwanyị ono, bụ Sódomu meru bụ ọwa: Yẹbedua yẹle ụnwada iya bẹ kunukaru onwowhe ekuku, whẹ nweru oke ẹwho, bya abụru ndu ori iwhe-nkụnyi, whẹ te eyeru ndu ụkpa mẹe ndu l’adụa g’ọ harụ whẹ ẹka. ⁵⁰Whẹ shi eku onwowhe eku; eme akpamara l’iwhu mu. Ọo ya meru mu tụfu whẹ g’ọo ẹkpu-ụtara gẹ mu whụru iya. ⁵¹Iwhe-dụ-ẹji ndu Samériya meru te ekedu ọwhu gụbedua meru ẹbo. Akpamara, i meru bẹ ka nke unwune ghu ono shii. Akpamara nkeghu bẹ meru t’ọ dụ g’ọo l’unwune ghu nwanyị bẹ dụ chịriri mẹe elede iya ẹnya. ⁵²Vukwaru iwhe-iwhere, i meru onwoghu; o noo l’i mewaru, o nweru ẹka l’aa-hata unwune ghu nwanyị ahata owhu. Iwhe-dụ-ẹji, i megbaberu bẹ ka nke whẹbedua nkajishi; ọ bụru iya meru; ọ dụ gẹ-woo lẹ whẹ ka gụbedua ọdu chịriri. T’iwhere bụkwaru nkeghu; vukwaru iwhe-iwhere, i meru onwoghu, nkele i meru ọ dụ gẹ-woo l’unwune ghu nwanyị bẹ dụ chịriri.

⁵³“Ọle g’ọ dụle-zhia bẹ mu l’e-me tẹ Sódomu yẹle ụnwada iya mẹe Samériya yẹle ụnwada nkiya lwawhukota azụ l’ọnodu ọma whẹ. Mu l’e-mekwawho gụbe Jerúsalẹmu t’i lwawhu azụ l’ọnodu ọma nkeghu g’ọo whẹbedua. ⁵⁴Ọo ya bụ l’iwhere l’a-bụlekwa-a nkeghu. Iwhe iwhere ono, i meru onwoghu bẹ unwune ghu nwanyị l’e-gude iya dụa onwowhe obu. ⁵⁵Unwune ghu ụnwanyi, mbụ Sódomu yẹle ụnwada iya mẹe Samériya yẹle ụnwada iya l’a-bya adawhu azụ l’ọnodu mbụ, whẹ shihawa nọdu. Gụbedua gụ l’ụnwu-ada nkeghu abya adawhukwawho azụ l’ọnodu mbụ, unu shihawa nọdu. ⁵⁶?Ti shidu egudeje ọnu atụ-byishi nwune ghu nwanyị ono, bụ Sódomu nteke ono, i shi ekukwadu onwoghu nwọha-gẹ-l’ọoha; ⁵⁷mbụ tẹmenu ejo-ememe ghu fụtade iwhe? Ntaa b’ọ dụwaa ghu nno nkele ụnwada Edọmu mẹe ụnwada Fílistiya gudewa ghu eme iwhe-ọchi, mbụ ndu ono, nọ-wheru ghu mgburumgburu bụ iya bụ ndu ono, l’akpọ ghu ẹbo-ẹbo l’afụ. ⁵⁸Vukwaru iwhe i ritaru l’ogori mẹe iwhe i metaru l’akpamara. O nokwa iwhe Onye-Nwe-Ọha l’ekfu ndono.

⁵⁹“Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mu l’a-kfụ ghu ụgwo iwhe i meru, o noo nkele o to nwedu iwhe ị gụberu nte ono, i riburu mu, shi nno mebyia ọgbandzu ono, mu lẹ ghu gbarụ. ⁶⁰Obenu lẹ mbẹdua l’a-nyata ọgbandzu ono, mu lẹ ghu gbarụ nteke ono, ị bụ nwata. Mu lẹ ghu l’a-gba ndzụ, l’a-nọ jeye lẹ gbururu. ⁶¹A bya lẹ gụbedua; ịi-nyata umere ono, i shi emeje; iwhere iya egude ghu nteke mu l’e-dulataru ghu unwune ghu nwanyị; nke ọgurenya mẹe nke nwata. Mu l’e-duta whẹ dulataru ghu tẹ whẹ bụru ụnwada ghu. Ọle o noo te etsokwa l’ọgbandzu mu lẹ ghu gbarụ. ⁶²Mu l’e-me t’ọgbandzu mu lẹ ghu dụ ọwhuu; gụ amarụ l’ọo Mu bụ Onye-Nwe-Ọha. ⁶³Mu l’a-gụru ghu nvụ l’ejo-iwhe ono, i megbaberu, ọle ị -nyatajẹ iya; iwhere iya egude ghu; ọnu abụru ghu kpụrukujingu l’ẹka iwhere dụ ghu. O nokwa iwhe Nnajị-Ọha bụ Onye-Nwe-Ọha l’ekfu.”

Ẹtu, e gude ugo labọ yẹle oshi vayịnu nmaa

¹Onye-Nwe-Ọha bya ekfuru okfu yeru mu sụ: ²“Nwa ndiwhe; tụa ilu; gude ẹtu kfuaru ọzo-ụlo ndu Ízurẹlu okfu. ³Sụ whẹ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Ugo, ha shii, akwẹka iya ha shii; ẹba iya hagee ogologo ogologo, tẹmenu o fua ẹba kwọtokwoto l’ẹhu dengashia ya iwhe edengashi, bẹ byarụ ugvu ugvu Libanọnu, je awọru ẹka l’ọnunu oshi sida, ⁴kakwota ọnunu oshi sida ono; gude lashia alị ẹka l’aagba ikike nghọ, o woru iya dzabẹ l’obodo ono, l’aagba ikike nghọ ono.

⁵“O nokwawho g’o wotaru mebyi iwhe shi l’alị Ízurẹlu je akụa l’alị, iwhe l’emehuje emehu. Ọ kụru iya l’agụga ẹka mini jiru ejiji nke ọwhu l’oo-vuta evuta g’ọo oshi wilo, gvuru lẹ mgboro mini. ⁶Mebyi iwhe ono bya efuta bụru oshi vayịnu, dụ nwa mkpudalị; ọ bya awata ababa; bakashịhu. Ẹkali iya tsee ogologo whobe ụzo imeli ẹka ugo ono nọ; ọgbaragbu iya gbamia agbami l’ime alị. Tọ dụ iya bụ, ọ bụru oshi vayịnu; mokashia ẹkali; ẹkwo iya kpuru gayii.

⁷“A bya enweru ugo ọdo, hakwawhọ shii, akwẹka iya hakwawhọ shii; tẹmenu o fua ẹba kwọtokwoto l’ẹhu. O noo ya, ọgbaragbu oshi vayịnu ono gojia jekfushia ya; ẹkali iya gọbe jekfushia ya nke ọwhu l’ọo-gbajẹ iya mini. ⁸Oshi vayịnu ono b’a dzabẹru l’ẹka alị dụ ree l’agụga ẹka mini jiru ejiji nke ọwhu l’oo-mokashi ẹkali; mịshia akpụru; bụru oshi vayịnu, dụ ugvu.

⁹“Sụ whẹ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: ?Ọo-wadụ nụ mbụ oshi vayịnu ono? ?Ugo mbụ whọ te ewhetadu iya nụ l’ọgbaragbu, jikoshia akpụru iya mee t’irwu, o rwutaru nke ọwhuu nwụlwashihu? Ọ tọo chọdu ọkpehu; tọ chọ t’a ha l’igwe tẹmenu e wheta iya l’ọgbaragbu. ¹⁰Ọ -bụru nụ mọo l’e whetaru iya je adzabẹ l’ẹka ọdo, ?ọo-wadụ nụ? Whẹrewhere ụzo ẹnyanwu-awata jịa ya l’ẹhu, ?tọ nwụlwashihudu nụ? ?Tọ nọdudu nụ l’ẹka a dzarụ iya nwụlwashihu?”

¹¹Tọ dụ iya bụ, Onye-Nwe-Ọha bya ekfuru okfu yeru mu sụ: ¹²“Kfuru ndu ọzo-ụlo ono, kwefuru ike sụ whẹ agha: ‘?Unu ta amadụ iwhe iwhe ono fụtaru? Kfuru whẹ l’eze ndu Bábyilọnu bẹ byarụ Jerúsalẹmu bya akpụta eze yẹle ndu ishi obodo ono kpụru lashia Bábyilọnu. ¹³O duta onye shi l’uwhu eze onye lanụ yẹle iya gbaa ndzụ, bya emee ya t’o ribuaru iya nte. Ọ chịtakwawho ndu nweru ẹnya l’alị ono chịfu, ¹⁴nke ọwhu alị-eze ono l’a-lwa alị, ya eje ewolitahe ishi ọdo, iwhe l’e-mechia whẹ awafụ bụ lẹ whẹ doberu ọgbandzu whẹ gbarụ. ¹⁵Obenu l’eze bẹ kwefulerua ike, ye ndu ozhi iya tẹ whẹ jeshia Íjiputu je achịtaru iya ịnya mẹe ikpoto ndu ojọgu. ?Oo-mekotadu iya nụ? Onye l’eme ẹgube iwhe ono, ?ọo-ladụnu ẹwoma? ?Oo-mebyi ọgbandzu ono laa ẹwoma?

¹⁶“ ‘Nnajị-Ọha, bụ Onye-Nwe-Ọha bẹ l’ekfu sụ: Mu vuru-a gẹ mu vu iya, bẹ onye eze ono l’a-nọdu lẹ Bábyilọnu nwụhu nkele o too dobedu iwhe o riiburu lẹ nte mẹe ọgbandzu ono, yẹle onye eze ndu Bábyilọnu gbarụ, bụ onye doberu iya l’oshi-eze ono. ¹⁷Fero yẹle ndu ojọgu iya, ike dụ, mẹe ikpoto ndu o nweru ta adụkwa ike eyetaru iya ẹka l’ọgu, mẹe ndu Bábyilọnu bya akọshia ogudu tụa ose-ọgu tẹ whẹ gude gbua igweligwe madzụ. ¹⁸Ọ tọo byazhidua l’a-la ẹwoma, o noo nkele o to dobedu iwhe o riburu lẹ nte yẹle ọgbandzu ono, ọ gbarụ.

¹⁹“ ‘Ọo ya bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mu vuru-a ishi mu gẹ mu vu iya, bẹ nte ono, o riburu to dobe iya mẹe ọgbandzu ono, o mebyiru bẹ mu l’e-me t’o tukoru iya l’ishi. ²⁰Mu l’a-gharụ iya ụgbu, l’a-nma iya g’ọo ọnya. Mu l’a-kpụru iya jeshia Bábyilọnu je anụa ya awhụ l’ẹka ono nkele o to kwedu tẹ mu gude ire iya ẹka. ²¹Ndu ojọgu iya, a pyịru ẹka họta bẹ l’a-gbata gbabaru ogu-ịgba, l’a-takọta ishi whẹ. Ndu ọwhu wafụru nụ bẹ l’a-chịkashi tẹ whẹ dzuru ẹka lile. Nteke ono unu amarụ lẹ mbẹdua bụ Onye-Nwe-Ọha bẹ kfuwaru nkemu.

²²“ ‘Ọ waa iwhe Nnajị-Ọha, bụ Onye-Nwe-Ọha l’ekfu ndọwa:

“ ‘Mbẹdua l’onwomu l’e-gude ẹka

mu kajita ọnunu oshi sida ono, tseru ogologo,

mbụ lẹ mu l’a-kajita ẹka dụ nonwunonwu l’oshi ono,

je eworu iya dzabẹ l’ugvu, ha l’eli ha ewhekerewhe.

²³Mu l’a-dzabẹ iya l’ugvu Ízurẹlu, kakọta l’eli.

Oshi ono emokashia ẹkali,

mịshia akpụru, bya abụru oshi sida, dụ ugvu.

Ụnwu-ẹnu l’ụdu iya l’ụdu iya abya anọdu iya akpa ẹkfunu.

Ẹkali iya abụru aguguru, ụnwu-ẹnu ono l’a-nọduje.

²⁴Oshi dụkota l’ẹgu l’a-marụ l’ọo Mụ bụ Onye-Nwe-Ọha.

Mbụ lẹ mu l’emeje oshi, ha l’eli t’ọ dụ nwa mkpudalị,

mu l’emeje oshi dụ nwa mkpudalị t’ọ ha l’eli.

Mu l’emeje oshi, dụ oyii t’ọ kpọnwua,

mu l’emeje oshi kpọnwuru akpọnwu t’ọ jakerehu.

“ ‘Mbẹdua bụ Onye-Nwe-Ọha kfuakwaru nkemu, mu je l’e-me iya gẹ mu kfuru iya.’ ”

Onye l’eme iwhe-dụ-ẹji bẹ l’a-nwụhu

¹Onye-Nwe-Ọha bya ekfuru okfu yeru mu sụ: ²“?Ọo gụnu bẹ ẹtu ono, unu l’anmajẹ l’alị Ízurẹlu fụtaru? Mbụ ẹtu ono, unu l’anmajẹ sụ:

“ ‘Ndu bụ nna bẹ riru gurepu, l’anwụ ọnu,

ọ kpọlahaa ụnwegirima eze ihu.’

³“Nnajị-Ọha, bụ Onye-Nwe-Ọha bẹ l’ekfu sụ: Mu vuru-a ishi mu gẹ mu vu iya, bẹ unu ta anmahẹdu ẹtu ono ọdo lẹ Ízurẹlu. ⁴Sụa, ndzụ madzụ l’owhu bụkwa mbẹdua nwe iya. Ndzụ ndu bụ nna mẹe ndzụ ụnwegirima bẹ bụ mu nwekota iya. Onye l’eme iwhe-dụ-ẹji bẹ l’a-nwụhu.

⁵“Madzụ -bụru onye dụ chịriri; bụru onye l’eme iwhe iwu kfuru; l’eme iwhe kfụru nhamụnha; ⁶onye ọbu bụru onye l’ẹte erije iwhe a gbarụ ẹja l’ugvu ẹka l’aagwajẹ iwhe, tọ barụ agwa ọzo-ụlo ndu Ízurẹlu ẹja; onye ọbu te ejekfuje nyee madzụ ibe azẹe; tọ lajẹru nwanyị, nsọ l’eme l’ụlo; ⁷tọ bụ onye l’akpajẹ onye ọdo ẹhu; bụru onye l’ewojeru iwhe mkpalẹka, onye ji iya ụgwo nụru iya nụ-whu onye ọbu azụ, bụru onye l’ẹte ana nfụ; l’oowojeru nri iya nụ onye ẹgu l’eme; woru uwe chẹe onye l’agba ọto, ⁸onye ọbu bụru onye l’ẹte ejeje madzụ ụgwo tukobe iya ọnwurunwa; to jeje madzụ ụgwo ele ẹnya urwu, bụru onye l’esefuje ẹka l’iwhe dụ ẹji; bụru onye l’ekpeshijeru madzụ yẹle ibe iya okfu l’ụzo kfụru nhamụnha. ⁹Ọ bụru onye l’emeje iwhe mu tọru ọkpa iya; l’oogudeje ire-lanụ dobe nsọ mu. Onye l’eme ẹgube ono bẹ bụ onye dụ chịriri. Onye ọbu bẹ l’a-nọdu ndzụ. O nokwa iwhe Nnajị-Ọha bụ Onye-Nwe-Ọha l’ekfu ndono.

¹⁰“Onye ọbu -nwụta nwa, nwa iya ono ghaa rii melahaa iwhe-ike; gbulahaa ọchi; ¹¹emewaro iwhe ọdo, nna iya l’ẹte emejebua, mbụ l’oorije iwhe a gbarụ ẹja l’ugvu ẹka l’aagwajẹ iwhe; emebyishi nyee madzụ ibe iya, ¹²bụru onye l’akpa ndu ụkpa mẹe ndu l’adụa g’ọ harụ whẹ ẹhu; bya abụru onye l’anawhe nfụ, onye l’ẹte ewojeru iwhe mkpalẹka, onye ji iya ụgwo nụru iya nụ-whu onye ọbu azụ, bụru onye l’abarụ agwa ẹja; emekashi akpamara; ¹³ọ bụru onye l’ejeje madzụ ụgwo ọnwurunwa, bụru onye l’ejeje ụgwo ele ẹnya urwu. Onye l’eme ẹgube ono ?l’ọo-nọdu-a ndzụ? Waawaa, ọ tọo nọdudu ndzụ! Onye l’eme ẹgube akpamara ono nwụhujekwa, mmee-ọchi iya atukoru iya l’ishi.

¹⁴“Ọle ọ -bụru lẹ yẹbe nwata ono l’onwiya bya anwụta nwa, nwata ono whụkota iwhe-dụ-ẹji, nna iya megbaberu, jịka ome gẹ nna iya meru, ¹⁵mbụ too rije iwhe a gbarụ ẹja l’ugvu ẹka l’aagwajẹ iwhe, tọo barụ agwa ọzo-ụlo ndu Ízurẹlu ẹja, too mebyishije nyee madzụ ibe iya, ¹⁶tọo kpa madzụ ẹhu, tọo natajẹ madzụ iwhe mkpalẹka, tọo bụ onye l’ana nfụ, bụru onye l’ewojeru nri iya nụ onye ẹgu l’eme, woru uwe chẹe onye l’agba ọto, ¹⁷bụru onye l’esefuje ẹka l’ejo-iwhe, bụru onye l’ete ejeje madzụ ụgwo ọnwurunwa, too jeje ụgwo ele ẹnya urwu, ọ bụru onye l’edobeje nsọ nke mụbe Onye-Nwe-Ọha, eme iwhe mu tọru ọkpa iya. Onye l’eme ẹgube ono ta anwụkwa ọnwu ejo-iwhe, nna iya meru. Ọo-nọdu ndzụ. ¹⁸Obenu lẹ nna iya nwụhufutaje l’ejo-iwhe, l’oome nkele ọ bụ onye l’eri madzụ urwu, bụru onye l’ana madzụ ibe iya nfụ, bụru onye l’ẹte eme iwhe dụ ree l’echilabọ ndibe whẹ.

¹⁹“Ọle ajị, unu l’agbẹje ajị bụ: ‘?Ọo gụnu meru nwa ta anwụje ọnwu iwhe-dụ-ẹji, nna iya meru?’ Ọ -bụru nwata bẹ l’eme iwhe iwu kfuru mẹe iwhe kfụru nhamụnha, bya asaa ẹnya lẹ mini eme iwhe mu tọru ọkpa iya, bẹ nwata ọbu nọdufutajekwa ndzụ. ²⁰Onye meru iwhe-dụ-ẹji bụ iya l’a-nwụhu. Nwa ta anwụdu ọnwu iwhe-dụ-ẹji, nna iya meru, nna ta anwụ ọnwu iwhe-dụ-ẹji, nwa iya meru. Ọdu-chịriri nke onye dụ chịriri bẹ l’a-laru iya, ejo-ememe nke onye l’eme ejo-ememe alaaru iya.

²¹“Onye l’eme ejo-ememe ghaa rii parụ iwhe-dụ-ẹji, l’oome haa melahaa iwhe mu tọru ọkpa iya; eme iwhe iwu kfuru mẹe iwhe kfụru nhamụnha, onye ọbu nọdufutajekwa ndzụ; ọ tọo nwụhudu. ²²Emeswe, o shi emesweje ta adụdu ọwhu l’aa-nyatakwadụ agụ atukobe iya. Ọo-nọdu ndzụ; eshi-ọwhu l’ome iwhe dụ chịriri. ²³Ọnwu onye l’eme ejo-ememe ta atsọkwa mu ụtso. Iwhe kachia mu ụtso bụ l’ọ harụ ejo ụzo, l’ooshi nọdu ndzụ. O nokwa iwhe Nnajị-Ọha bụ Onye-Nwe-Ọha l’ekfu ndono.

²⁴“Nteke bụ l’ọo onye dụ chịriri bẹ gharụ rii parụ iwhe dụ chịriri ono, l’oome haa, melahaa ejo-iwhe, melahaa ụdu akpamara, onye l’eme ejo-ememe l’emeje; ?ọo-nọdu ndzụ mbụ onye ọbu tọo? Iwhe dụ chịriri lile, o mekotaru ta adụdu ọwhu l’aa-nyatakwadụ mọo nnanụ. Ọo-nwụhufutajekwa, o noo nkele ọ bụ onye l’eete egudee ire iya ẹka, bụru onye l’eme iwhe-dụ-ẹji.

²⁵“Ọle unu l’agbẹje ekfu sụ l’iwhe Onye-Nwe-Ọha l’eme ta akfụduru nhamụnha. Unu ngabẹ nchị unubẹ ọzo-ụlo ndu Ízurẹlu! ?Unu sụru l’iwhe mu l’eme ta akfụduru nhamụnha? ?Tọ bụ-chidua unubẹdua l’eme iwhe l’ẹte akfụaru nhamụnha? ²⁶Nteke onye dụ chịriri gharụ rii parụ iwhe dụ chịriri, l’oome haa; melahaa ejo-iwhe, bẹ onye ọbu l’a-nwụhukwa. Ishi ọnwu iya bụ ejo-iwhe ono, o meru. ²⁷O nokwawho gẹ bụ onye l’eme ejo-ememe ghaa rii parụ ejo-ememe, l’oome haa, melahaa iwhe iwu kfuru mẹe iwhe kfụru nhamụnha, onye ọbu adzọta onwiya ndzụ. ²⁸Eshi-ọwhu ọ kpọ-whuru égò azụ parụ emeswe ono, o shi emeswe haa b’ọ nọdufutajekwa ndzụ, ọ tọo nwụhudu. ²⁹Ọle, unubẹ ọzo-ụlo ndu Ízurẹlu l’egbeje ekfu sụ l’iwhe Onye-Nwe-Ọha l’eme ta akfụduru nhamụnha. Unubẹ ọzo-ụlo ndu Ízurẹlu, ?unu sụru l’iwhe mu l’eme ta akfụduru nhamụnha? ?Tọ bụ-chidua unubẹdua l’eme iwhe l’ẹte akfụaru nhamụnha?

³⁰“Ọo iwhe ono meru g’o gude mu je l’e-kpe unubẹ ọzo-ụlo ndu Ízurẹlu ikpe. Onyenọnu bẹ mu l’e-kpe ikpe lẹge iwhe o meru dụ dụ. O nokwa iwhe Nnajị-Ọha bụ Onye-Nwe-Ọha l’ekfu ndono. T’unu daa onwunu ụta parụ omesweshi iwhe ono, unu l’eme haa, nke ọwhu ejo-iwhe, unu l’eme l’ẹte eme unu t’unu bụru kpurupyata. ³¹Unu jịshia onwunu mmeswe, unu l’eme l’ẹhu; meberu onwunu obu ọ̀whúú mẹe ume ọ̀whúú. ?Ọo gụnu meru unu l’a-chọru onwunu ọnwu; unubẹ ọzo-ụlo ndu Ízurẹlu? ³²Ọ tọ dụdu onye ọnwu iya l’atsọ mu ụtso. T’unu daa onwunu ụta lwawhu azụ bya anọdu ndzụ. O nokwa iwhe Nnajị-Ọha bụ Onye-Nwe-Ọha l’ekfu ndono.”

Egvu-aawhụ, a gụru ndu ishi ndu Ízurẹlu

¹“Gụaru ndu ishi ndu Ízurẹlu egvu-áwhụ, ²sụ whẹ agha:

“Ne unu shi bụru ne oduu-gburu-agụ, nọ l’echilabọ oduu.

O shi azẹje l’echi ẹka ụnwu oduu-gburu-agụ nshịi dọru.

O shi anọduje ehe ụnwu iya.

³O heru nwa iya lanụ jeye ọ

kafụta bụru oduu, shihuru ike.

Ọ nwụru gẹ l’eeshije gbuta anụ lajashịa.

Ọ bya atalahaa anụ madzụ pyaapyaa.

⁴Mba dụ iche iche bẹ nụru akọ-ẹtu iya.

Whẹ mee ya, o nwulahu l’iduma whẹ.

Whẹ gude aga kota iya, kpụa ya wuru-wuru lashia Íjiputu.

⁵Nteke ne oduu ono whụru l’iwhe

ya l’ele ẹnya iya l’ẹhu nwa iya ta

adụdu lẹge o leru ẹnya iya, o duta nwa iya ọdo, hee

jeye ọ kafụta bụru oduu, shihuru ike.

⁶Nwa oduu ono bya etsoru ibe iya ejewhe,

nkele ọ kafụtawaru bụru oduu, shihuru ike.

Ọ bya anwụa gẹ l’eeshije gbuta anụ lajashịa,

Ọ bya atalahaa anụ madzụ pyaapyaa.

⁷Ẹka whẹ tụru ọ bụru agbarike b’ọ zụpyashiru,

o mee mkpụkpu whẹ; ọ bụru ochuwhu.

Ekiri, ọ bọru bẹ meru ọtsu egvu

gude alị ono yẹle ndu bu iya nụ.

⁸Tọ dụ iya bụ, mba, dụ iche iche, shi l’alị, dụ iche iche,

gbarụ iya mgburumgburu bya iya otso ọgu.

Whẹ bya eworu ụgbu whẹ ghaaru

iya o nwulahu l’iduma whẹ.

⁹Whẹ nwuchia ya l’iwhe, gude aga kpụa ya wuru-wuru,

kpụ-jeru eze ndu Bábyilọnu.

Whẹ nwuru iya ye lẹ mkpọro.

A nụ-buhu olu iya l’ugvu ndu Ízurẹlu.

¹⁰Ne ghu bẹ dụ g’ọo oshi vayịnu, a dzarụ lẹ mgboro mini.

Ọ mịa mebyi nweru ẹkwo nkele mini, tsụru iya l’ẹhu.

¹¹Oshi iya bẹ shihuru ike dụ nke t’e gude iya meta

mkpalẹka onye eze.

Vayịnu ono bya evuta ha l’eli je etsua ishi l’igweli.

Onyenọnu bẹ whụru g’ọ habe l’eli mẹe g’o nweberu ẹkwo.

¹²Ọle ndu ẹhu l’eghu eghu

whetaru iya l’ukfu; tụa l’alị.

Whẹrewhere, shi l’ụzo

ẹnyanwu-awata bya amịkpoo mebyi iya amịkpo.

A bya ajikoshia akpụru iya.

Ẹkali iya ono, shihuru ike kpọkota nkụ;

ọku kepyashikota iya.

¹³A bya eworu iya je adzaa l’echi-ẹgu ntaa,

l’alị, kpọru gbengu, mini l’adụa.

¹⁴Ọku shi l’oshi vayịnu ono

gbanwuhu dzụa ẹkali iya yẹle mebyi iya.

Ẹkali shihuru ike ta anọhe iya

nke t’e gude iya meta mkpalẹka onye eze.”

Ọ kwa egvu áwhụ ndono; e je l’aa-gụ iya ọgu egvu-aawhụ.

Ndu Ízurẹlu l’ekwefuru Chileke ike

¹Tọ dụ iya bụ, o rwua l’abalị iri l’ọnwa ise l’awha nke ẹsaa, ụwhodu ndu bụ ọgurenya Ízurẹlu byatashia njịta l’ẹka Onye-Nwe-Ọha. Whẹ bya adọshia l’iwhu mu. ²Onye-Nwe-Ọha bya ekfuru okfu yeru mu sụ: ³“Nwa ndiwhe; kfuru yeru ndu bụ ọgurenya Ízurẹlu sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: ?Ọo njịta bẹ unu byarụ mu ajịta tọo? Mu vuru-a ishi mu gẹ mu vu iya, bẹ mu ta abyakwa l’e-kwe t’unu jịta mu iwhe. O nokwa gẹ Nnajị-Ọha, bụ Onye-Nwe-Ọha l’ekfu ndono.

⁴“Nwa ndiwhe; ?ị kwakọbewaru t’i kpee whẹ ikpe? ?Ị kwakọbewaru t’i kpee whẹ ikpe? Tụa whẹ akpamara ono, nna whẹ megbaberu l’iwhu. ⁵Sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mbọku mu họtaru Ízurẹlu bẹ mu paliru ẹka imeli ribuaru ẹpa Jékọpu nte; mu bya emee, whẹ marụ onye mu bu nteke whẹ nọ l’alị Íjiputu. Mu paliru ẹka imeli ribuaru whẹ nte sụ whẹ: Ọo Mu bụ Onye-Nwe-Ọha, bụ Chileke unu. ⁶Ọo mbọku ono bẹ mu nọdu ribuaru whẹ nte lẹ mu l’e-dufuta whẹ l’alị Íjiputu je edobe whẹ l’alị, mu chọtaru whẹ, mbụ alị mini-ẹra eswi yẹle mmanụ-ẹnwu jiru ejiji bụ iya bụ alị kagezhia ụma l’iwhe bụ alị nọnu. ⁷Mu sụru whẹ t’onyenọnu parụ agwa ono, l’asọ oyi ono, whẹ swọberu ẹnya haa, tẹ whẹ be egudekwa ọgwa agwa ndu Íjiputu merwushia onwowhe. Ọ kwa Mu bụ Onye-Nwe-Ọha, bụ Chileke unu.

⁸“Ọle whẹ kwefuleru mu-a ike, jịka lẹ whẹ ta angabẹduru mu nchị, tọ dụ gẹ whẹ ha harụ ọgwa agwa ono, l’aasọ oyi ono, whẹ swọberu ẹnya, whẹ ta aha ọgwa agwa nke ndu Íjiputu. O noo ya, mu kpebua lẹ mu l’e-kpukpushi whẹ oke ẹhu-eghughu mu, mbụ lẹ mu l’e-woru ẹhu-eghughu mu zụbe whẹ l’ẹhu l’alị Íjiputu. ⁹Obenu lẹ mu gude iswi t’ẹwha mu be emebyihu l’iwhu mba ono, ndu Ízurẹlu shi buru lẹ nkewhe parụ whẹ haa, nkele mu nọduhawa l’iwhu ndu ono, mee tẹ ndu Ízurẹlu marụ onye mu bụ, bya ekfuaru whẹ lẹ mu l’e-dufuta whẹ l’alị ndu Íjiputu. ¹⁰Tọ dụ iya bụ, mu bya edufuta whẹ l’alị Íjiputu, duru whẹ je dobe l’echi-ẹgu. ¹¹Mu bya eworu iwhe mu tọru ọkpa iya tẹ whẹ tsoje doberu whẹ, bya egoshi whẹ nsọ mu, ọwhu bụ onye doberu iya nụ onye ọbu anọdu ndzụ. ¹²Mu wokwaruwhọ mbọku-ọtuta-ume doberu whẹ t’ọ bụru iwhe-ọhubama, dụ l’echilabọ mu lẹ whẹ nke ọwhu whẹ l’a-marụ l’ọo mbẹdua, bụ Onye-Nwe-Ọha l’emeje whẹ tẹ whẹ dụ nsọ.

¹³“Ọle ọzo-ụlo ndu Ízurẹlu bẹ kwefulerua mu ike l’echi-ẹgu, jịka lẹ whẹ te emedu iwhe ono, mu tọru ọkpa iya tẹ whẹ meje, jịka lẹ whẹ te edobedu nsọ mu ono, bụ onye doberu iya nụ onye ọbu anọdu ndzụ. Whẹ woru mbọku-ọtuta-ume nkemu merwushia t’ọ dụhe nsọ. Mu rịa nke tẹ mu kpushi whẹ oke ẹhu-eghughu mu l’echi-ẹgu ono gude mee tẹ whẹ bụru kpurupyata. ¹⁴Obenu lẹ mu parụ whẹ haa l’iswi t’ẹwha mu be emebyihu l’iwhu mba ono, mu nọdu l’iwhu whẹ dufuta ndu Ízurẹlu. ¹⁵Mu nọdukwawho l’echi-ẹgu l’ẹka ono palia ẹka imeli ribuaru whẹ nte lẹ mu te eduhedu whẹ eje l’alị ono, mu nụru whẹ, mbụ alị ono mini-ẹra eswi yẹle mmanụ-ẹnwu jiru ejiji ono. ¹⁶Mkpata iya bụ lẹ whẹ jịkaru odobe nsọ mu, haa otso iwhe mu tọru whẹ ọkpa iya tẹ whẹ tsoje, bya eworu mbọku-ọtuta-ume nkemu merwushia t’ọ dụhe nsọ, nkele ẹka obu whẹ ka anọno bụ l’ọgwa agwa. ¹⁷Ọle mu whụleru whẹ-ẹ imiko, haa whẹ egbushi, haa ome tẹ whẹ chihu l’echi-ẹgu ono. ¹⁸Ọo l’echi-ẹgu ono bẹ mu nọdu sụ ụnwegirima whẹ: ‘Unu be etsokwa ọkpa nna unu whẹ, unu be edobekwa nsọ whẹ, unu be egudekwa ọgwa ntẹkpe whẹ merwushia onwunu! ¹⁹Ọ kwa Mu bụ Onye-Nwe-Ọha, bụ Chileke unu. Iwhe unu l’a-nọdu etso bụ iwhe mu tọru ọkpa iya, unu akwabẹru nsọ mu ẹnya, meje iya ememe. ²⁰Unu dobe mbọku-ọtuta-ume nkemu nsọ t’ọ bụru iwhe-ọhubama dụ l’echilabọ mu l’unu, nke ọwhu unu l’a-ma l’ọo Mu bụ Onye-Nwe-Ọha, bụ Chileke unu.’

²¹“ ‘Ọle ụnwegirima whẹ bẹ kwefuru mu ike, jịka lẹ whẹ te etsodu iwhe mu tọru whẹ ọkpa iya, mbụ lẹ whẹ ta akwabẹduru nsọ mu ẹnya mee ya ememe, mbụ nsọ mu ono, bụ onye meru iya nụ, ya nọdu ndzụ. Tẹmenu whẹ merwushikwaawho mbọku-ọtuta-ume nkemu t’ọ dụhe nsọ. O noo ya, mu rịa nke tẹ mu kpukpushi whẹ oke ẹhu-eghughu mu, mbụ tẹ mu woru ẹhu-eghughu mu byabẹ whẹ l’ishi l’echi-ẹgu ono. ²²Ọle mu sewhuru ẹka azụ, parụ whẹ haa l’iswi t’ẹwha mu be emebyihu l’ẹnya mba ono, mu nọdu l’iwhu whẹ dufuta whẹ. ²³Mu byakwa anọdu l’echi-ẹgu ono palia ẹka imeli ribua nte lẹ mu l’a-chịkashi whẹ tẹ whẹ dzuru mba gẹ mba ha, tụkaa whẹ nnanụ nnanụ l’alị, dụ iche iche, ²⁴o noo nkele whẹ jịkaru odobe nsọ mu, jịka ome iwhe mu tọru ọkpa iya, bya eworu mbọku-ọtuta-ume nkemu merwushia t’ọ dụhe nsọ. Ẹka ẹnya whẹ gbechia dụ bụ lẹ ntẹkpe ono, nna whẹ gwarụ. ²⁵Ọo ya bụ, mu kwee tọoru whẹ ọkpa iwhe l’adụa ree, bya edoberu whẹ nsọ ọwhu, l’ẹte eduba whẹ lẹ ndzụ. ²⁶Mu panụru whẹ haa, whẹ gude ẹja, whẹ l’agbajẹ merwushia onwowhe, mbụ whẹ kpọlahaa ọkpara whẹ ọku nụ agwa. Ọ bụru nnta gẹ l’ee-shi tẹ mu nụa whẹ awhụ bẹ mu gude mee iwhe ono, nke ọwhu whẹ l’a-marụ l’ọo Mu bụ Onye-Nwe-Ọha.’

²⁷“Ọo ya bụ, nwa ndiwhe, kfuru yeru ọzo-ụlo ndu Ízurẹlu sụ whẹ agha: ‘Ọ waa iwhe Nnajị-Ọha bụ Onye-Nwe-Ọha l’ekfu ndọwa: Ụzo ọdo, nna unu whẹ shi kfubyishia mu bụ lẹ whẹ te edobedu onwowhe ọga. ²⁸O noo lẹ nteke mu duru whẹ bata l’alị ono, mu riburu whẹ lẹ nte lẹ mu l’a-nụ whẹ bẹ l’abụje, ẹka whẹ whụru ugvu, m’ọ bụ oshi, nweru mkpẹekwo, whẹ anọdu l’ẹka ọbu wata ọgba ẹja. Whẹ gude ẹja ono, whẹ l’agba kpatsua mu ẹhu-eghughu. Ẹka ono bẹ whẹ nọdu kpọo isẹnsu, l’eshi kwẹkwekwe ọku, nọdu iya gbaa ẹja mmẹe. ²⁹Mu jịa whẹ sụ: ?Ẹka ono, unu l’ejeje ọgwa iwhe ono bụ gụnu?’ ” Ọo ya meru, e kulahaa ẹka ono Bama20:29 Bama bẹ fụtaru ẹka l’aagwajẹ iwhe. byeye ntanụ.

³⁰“Ọo ya bụ, kfuru ọzo-ụlo ndu Ízurẹlu sụ whẹ agha: Ọ waa iwhe Nnajị-Ọha bụ Onye-Nwe-Ọha l’ekfu ndọwa: ?Ọo gụnu meru unu hata omerwushi onwunu ẹgube ono, nna unu whẹ merwushiru onwowhe? ?Mbụ unu hata ọgwa agwa whẹ ono, bụ iwhe l’asọ oyi, shi nno eri ogori? ³¹Ẹja ono, unu l’agba ono mẹe ụnwegirima unu ono, unu l’akpọje ọku gude gbaa ẹja, mbụ l’agwa ono, unu l’agwa bẹ unu gude emerwushi onwunu byeye ntanụ. Unubẹ ndu Ízurẹlu ta abyahẹkwa mu njịta ọdo. Mbụ lẹ mu vuru-a ishi mu gẹ mu vu iya, bẹ unu l’ẹte abyadụa l’a-jịtabaa mu iwhe ọdo. O nokwa iwhe Nnajị-Ọha bụ Onye-Nwe-Ọha l’ekfu ndono.

Onye-Nwe-Ọha l’a-safụ ejo-ụdudu, dụ lẹ Ízurẹlu

³²“ ‘Unu l’asụje l’unu chọru t’unu dụ g’ọo ndu mba ọdo, mbụ t’unu dụ g’ọo ndu mgboko, bụ ndu l’abarụ mkpirikpi oshi mẹe ẹwhuru ẹja. Ọle iwhe ono, unu l’arị ta abyadụ l’a-nwụ anwụ. ³³Nnajị-Ọha, bụ Onye-Nwe-Ọha l’ekfu sụ: Mu vuru-a ishi mu gẹ mu vu iya, bẹ bụ ẹka-ike mẹe ọkpehu mẹe ẹhu-eghughu bẹ mu l’e-gude achị unu. ³⁴Mu l’e-goshi unu ẹka-ike mu mẹe ọkpehu mu mẹe ẹhu-eghughu mu mẹ mu dufutalewho unu lẹ mba ono, unu nọkota mẹe l’alị ono, a chịru unu je edobe. ³⁵Mu l’a-chịru unu bata l’echi-ẹgu ndu mba ono; mu anọdu l’ẹka ono kpee unu ikpe iwhu l’iwhu. ³⁶Ọo gẹ mu kperu nna unu whẹ ikpe l’echi-ẹgu alị Íjiputu bẹ bụ gẹ mu l’e-kpe iya unu. O nokwa iwhe Nnajị-Ọha bụ Onye-Nwe-Ọha l’ekfu ndono. ³⁷Mu l’e-doberu unu mkpụru, unu l’a-nọ awụghashi lẹ mkpula, mu agụ unu ọgu, mu emee unu t’unu dobeje ọgbandzu ono, mu l’unu gbarụ. ³⁸Iwhe bụ ndu kwefuru ike mẹe ndu mesweru mu nụ bẹ mu l’a-tụfu g’ọo ẹkpu-ụtara l’echilabọ unu. Ndu ono bẹ mu l’e-dufuta l’alị ono, whẹ larụ, ọle whẹ ta abyadụ l’a-whụ alị Ízurẹlu ẹnya ọdo. Nteke ono bẹ unu l’a-marụ l’ọo Mu bụ Onye-Nwe-Ọha.

³⁹“ ‘A bya l’unubẹ ọzo-ụlo ndu Ízurẹlu, ọ waa iwhe Nnajị-Ọha bụ Onye-Nwe-Ọha l’ekfu ndọwa: Unu g’unu ha je agwajẹ ntẹkpe unu g’ẹhu ha unu. Ọle e -megee bẹ unu ngabẹfutaje nchị l’iwhe mu l’ekfuru unu, unu ahaa omerwushi ẹwha mu l’agwa ono, unu l’agwa mẹe l’ẹja ono, unu l’agba.’ ”

Onye-Nwe-Ọha l’e-goshi obu-imiko iya l’ẹhu ndu l’anụru iya okfu

⁴⁰Nnajị-Ọha, bụ Onye-Nwe-Ọha l’ekfu sụ: “Ọo l’ugvu mu, dụ nsọ, mbụ l’eze ugvu, dụ l’alị Ízurẹlu bẹ unubẹ ọzo-ụlo ndu Ízurẹlu kpaa-whuu l’a-nọduje abarụ mu ẹja. Ọo l’ẹka ono bẹ mu l’a-nọdu nata unu. Ọ bụru l’ẹka ono bẹ mu l’a-sụ t’unu wotaru mu iwhe unu gude abya mu agwagwa mẹe iwhe kagezhia ree, unu l’anụ mu yẹle ngwo-ẹja unu, dụ nsọ. ⁴¹Mu dufutalewho unu lẹ mba ono, unu nọkota mẹe l’alị ono, a chịkashiru unu je edobe, bẹ mu l’a-nata unu g’ọo ngwo-ẹja, mkpọ iya dụ ree; mu anọdu l’iwhu mba gẹ mba ha goshi lẹ mu bụ onye dụ nsọ l’ẹka unu nọ. ⁴²Nteke mu l’e-duru unu lwata alị Ízurẹlu, bụ alị ono, mu riburu lẹ nte lẹ mu l’a-nụ nna unu whẹ bẹ unu l’a-marụ l’ọo Mu bụ Onye-Nwe-Ọha. ⁴³Unu l’a-nọdu l’ẹka ono nyatakọta umere, unu mekotaru mẹe iwhe unu meru gude merwua onwunu; ẹhu alaa unu ashị l’ejo-iwhe ono, unu megbaberu. ⁴⁴Nteke mu l’e-gude iswi ẹwha mu mee unu iwhe bẹ unu l’a-marụ l’ọo Mu bụ Onye-Nwe-Ọha. Iwhe mu l’e-me unubẹ ọzo-ụlo ndu Ízurẹlu bẹ mu l’ẹte emekwa iya unu g’ejo-iwhe unu mẹe ụrwu-alị unu habe. O nokwa iwhe Nnajị-Ọha bụ Onye-Nwe-Ọha l’ekfu ndono.”

⁴⁵Tọ dụ iya bụ, Onye-Nwe-Ọha bya ekfuru okfu yeru mu sụ: ⁴⁶“Nwa ndiwhe; ghachi iwhu l’ụzo ọhuda kfudeshia ndu ọhuda ẹhu; gude nkfuchiru kfuru mabẹru ọswa, dụ l’alị ndu ọhuda. ⁴⁷Kfuru ọswa, dụ l’ọhuda sụ iya: ‘Nụkwaa okfu Onye-Nwe-Ọha l’ekfu! Ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu byakwa l’anwụru ọku ye l’ime ghu. Ọku ono adzụkota iwhe bụ oshi, nọ ndzụ l’ime ghu mẹe ọwhu kpọru nkụ. Ire-ọku ono l’a-bụru echinyi echinyi. Shizhiawho l’ụzo ọhuda jeye l’ụzo isheli; iwhe bụ onye ọku ono whụru iwhu bẹ l’ọo-nmanwụshi anmanwụshi. ⁴⁸Iwhe bụ madzụ l’owhu l’a-marụ l’ọo mụbe Onye-Nwe-Ọha bẹ yeru ọku ono; tẹmenu t’a bya l’e-chinyi iya echinyi.’ ”

⁴⁹Tọ dụ iya bụ, mu sụ: “Haa! Nnajị-Ọha, bụ Onye-Nwe-Ọha mẹ whẹ l’a-sụkwa l’iwhe mu l’ekfu bụ okfu ẹtu.”

Onye-Nwe-Ọha l’a-mịru ndu Ízurẹlu ogu-ịgba

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe, ghachi iwhu lẹ Jerúsalẹmu, kfua gẹ l’ọo-dụa mabẹru ẹka ono, dụ nsọ. Gude nkfuchiru kfua gẹ l’ọo-dụ alị Ízurẹlu. ³Iwhe l’ii-kfuru alị Ízurẹlu bụ l’ọ waa iwhe Onye-Nwe-Ọha l’ekfu ndọwa: Lekwa, mu bụakwa ọgu swiru ghu. Mu l’a-mịta ogu-ịgba mu l’ọbo gude gbugbua ndu dụ chịriri mẹe ndu ejo-ememe, bu l’ime ghu. ⁴Eshi-ọwhu mu l’e-gbu ndu dụ chịriri mẹe ndu ejo-ememe, bu l’ime ghu egbugbu, ọo ya bụ lẹ mu l’a-mịta ogu-ịgba mu l’ọbo gude gbukota madzụ lile, mu l’e-shi iya egbugbu l’ọhuda jeye l’isheli. ⁵Nteke ono bẹ madzụ lile l’a-marụ lẹ mụbe Onye-Nwe-Ọha bẹ mịru ogu-ịgba mu l’ọbo iya; mu ta abya l’a-mịba-whu iya azụ ọdo.

⁶“Nwa ndiwhe; tsụa ude! Dọkaa obu ghu tsụa ude, nọdu whẹ l’iwhu taa kpọkpokpo. ⁷Nteke whẹ jịru ghu iwhe l’ịitsuru ude. Iwhe l’ii-kfuru whẹ bụ l’o nweru nzhi, l’eje abya nụ. Nzhi ọbu byalẹwho bẹ l’oo-me t’obu yoshihu madzụ; ẹka akụdashihu madzụ lile. Oo-me t’obu daa madzụ mba; ikpere awhụkota whẹ kwekwekwe g’ọo mini, l’akpa ute. T’unu lekwa nzhi ọbu gẹ l’oo-je abya, mbụ l’oo-mefutajekwa. O nokwa iwhe Nnajị-Ọha bụ Onye-Nwe-Ọha l’ekfu ndono.”

⁸Onye-Nwe-Ọha bya ekfuru okfu yeru mu sụ: ⁹“Nwa ndiwhe; gude nkfuchiru kfua sụ l’ọ waa iwhe Onye-Nwe-Ọha l’ekfu ndọwa:

“Ogu-ịgba, ogu-ịgba,

a bawarụ ogu-ịgba l’ọotsu nkọ,

mbụ l’e kworu iya l’igbegiri l’ọowhu onyo.

¹⁰A barụ iya t’e gude iya gbua madzụ.

E kworu iya l’igbegiri t’o gbuje zaazaa g’ọo ebemu-igwe.

“?Anyi l’a-kwawarọ tegburu ẹswa? Ụnwu mu, o to nwedu iwhe unu gụberu àhụ̀hù ono, l’aabya unu àhụ̀hù, to nwe iwhe unu gụberu ẹka ono, l’aalọ unu lẹ nchị.

¹¹“Ogu-ịgba ọbu bẹ l’eekwowa l’igbegiri,

nke ọwhu l’ọo-dụ nke egude.

A bawarụ iya ababa, kwowa iya l’igbegiri

gẹ l’ọo-dụ, e woru iya nụ onye mgbugbu madzụ.

¹²Nwa ndiwhe; ryaa ẹkwa, chia mkpu,

nkele ogu-ịgba ono bụkwa ndibe mu bẹ l’ọocho abya.

Ọo ndu bụ ishi lẹ Ízurẹlu bẹ l’ọocho abya.

E nwuwaru ndu bụ ishi lẹ Ízurẹlu

mẹe ndibe mu tụhaaru ogu-ịgba ono t’ọ takọta ishi whẹ.

Ọo ya bụ t’i tsua ẹka l’obu gụa áwhụ.

¹³“Ọ kwa iwhe adata b’ọ bụru unu. ?Ọo gụnu ọdo, l’e-me mẹ whẹ jịka lẹ nzhimanụ ta alwadụ whẹ azụ, gbahaa l’aa-hụfutaje whẹ àhụ̀hù ọbu, ẹhu whẹ chọru? O nokwa iwhe Nnajị-Ọha bụ Onye-Nwe-Ọha l’ekfu ndono.

¹⁴“Ọo ya bụ, gụbe nwa ndiwhe

kfua nkfuchiru, gụ echia ẹka pyamụ.

T’ogu-ịgba ono gbua mgbu labọ je lẹ nke ẹto.

Ọo ogu-ịgba, e gude egbu madzụ.

Mbụ l’ọo ogu-ịgba, e gude asa madzụ ọsa ẹkfu.

Oo-shi ibẹka ibẹbo bya eyechia whẹ,

¹⁵nke ọwhu meji l’a-tọfu whẹ

bụru whẹ l’ọhu ẹwho tsụrumu,

igweligwe abụru gburugudungu l’alị.

Ogu-ịgba, l’ee-gude gbushia whẹ

bẹ mu wookwaru dobegee l’ọnuzo whẹ

t’o gbuje zaazaa g’ọo ebemu-igwe.

A bawarụ iya gẹ l’ọo-dụ e gude iya gbushia madzụ.

¹⁶Gụbe ogu-ịgba, ghua zaramụ l’ẹka-ụtara mẹe l’ẹka-ịcha.

Mbụ-zhiawho ẹka a gharụ ghu iwhu t’i gbua.

¹⁷Mbẹdua l’e-chikwawho ẹka

pyamụ, iwe agvụ mu l’ẹhu.

Mbẹdua bụ Onye-Nwe-Ọha kfuakwaru nkemu.”

Ogu-ịgba nke eze ndu Bábyilọnu

¹⁸Tọ dụ iya bụ, Onye-Nwe-Ọha byakwa ekfuru okfu yeru mu ọdo sụ mu: ¹⁹“Nwa ndiwhe; mee echi-ụzo labọ ẹka eze ndu Bábyilọnu l’e-tsoru nteke l’oo-gude ogu-ịgba iya bya ọgu. T’echi-ụzo labọ ono watakọtakwa l’alị lanụ. Ẹka echi-ụzo ono l’a-gbakahu ẹbo bahụ l’ime mkpụkpu l’ime mkpụkpu bẹ l’ii-gvube iwhe-ọhubama. ²⁰Mee echi-ụzo ono nnanụ t’ọ bahụ lẹ mkpụkpu Raba, dụ l’obodo Amọnu, gụ emee nnanụ t’ọ bahụ lẹ mkpụkpu Juda, dụ lẹ Jerúsalẹmu, bụ obodo a tụshiru ike. ²¹Eze ndu Bábyilọnu ono l’e-jeta kfụru l’ẹka ono echi-ụzo ono gbakahụru ẹbo, mbụ l’ishi echi-ụzo ono whẹ labọ. Ọo-kfụru lẹ mbadụzo ono tụa ido. Ọo-nmangaa arwa iya anmanga; kpata nwọgvu iya ishi; bya elee ẹnya lẹ meji anụ, ọ gwarụ iwhe; gude marụ ẹka ọwhu l’oo-chebe echebe. ²²Ido ọwhu, l’a-daba iya l’ẹka-ụtara bụ nke Jerúsalẹmu. Ẹka ono bẹ l’oo-je edobe iwhe l’ee-gude kụkposhia Jerúsalẹmu; ya ezhia t’a wata ogbushi madzụ; ya echia mkpu ọgu; woru iwhe l’ee-gude kụkposhia Jerúsalẹmu dobe l’ọnu ẹka l’eeshije abahụ iya, a bya akọshia ogvudu lẹ mkpụkpu ono, gvushia ya ịga ọgu. ²³Ndu bu lẹ Jerúsalẹmu ta abyadụ l’e-kweta l’iwhe ono bụ iwhe l’e-me eme; nkeshi ọwhu whẹ l’eze ndu Bábyilọnu gbahawarụ ndzụ. Obenu l’ọo-nyataru whẹ lẹ whẹ meru ejo-iwhe; ya akpụkota whẹ lẹ ndzụ. ²⁴Ọo ya bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: ‘Eshi-ọwhu unu mewaru a marụ g’unu l’emebe ejo-iwhe, nkeshi ọwhu ọ bụ l’ọkpa-jaajaa bẹ unu l’anọje eme mmeswe nke unu nke ọwhu bụ l’iwhe-dụ-ẹji unu, l’emegbabe bẹ fụtakotaru iwhe l’iwhe lile, unu l’eme; eshi ọ dụ nno bẹ l’aa-kpụkota unu lẹ ndzụ.

²⁵“ ‘Gụbe onye ono, l’emerwushi onwoghu ono, mbụ gụbe onye iwe ono, bụ ishi ndu Ízurẹlu; mbọku nkeghu rwuakwaru, mbụ nteke l’aa-nụ ghu chịikfuu! ²⁶Ọ waa iwhe Nnajị-Ọha bụ Onye-Nwe-Ọha l’ekfu ndọwa: Lafụ okpu-ẹkwa ono l’ishi, kpufu okpu-eze ono, i kpu, l’iwhe ta amahẹkwa kfụru g’o shi kfụru. Ndu lwarụ alị bẹ l’ee-woli imeli; ndu e woliru imeli bẹ l’ee-me tẹ whẹ lwa alị. ²⁷Mkpọkoro-ụlo mkpọkoro-ụlo! Mu l’e-me mkpụkpu ono t’ọ bụru mkpọkoro-ụlo. A ta abyadụ l’a-tuwhu iya azụ jeye nteke onye ọ gbarụ l’a-bya; mu eworu mkpụkpu ono nụ iya.’

²⁸“Nwa ndiwhe; gude nkfuchiru sụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa l’ishi ndu Amọnu l’ọnodu iwhe-iwhere ono, whẹ l’eme ndu Ízurẹlu; sụ whẹ:

“Ogu-ịgba! Ogu-ịgba.

A mịfutawaru iya gẹ l’ọo-dụ

e gude iya gbua madzụ pyaapyaa.

A bawarụ iya gẹ l’ọo-dụ ya ataa ishi madzụ,

mbụ l’oogbuwaa zaazaa g’ọo ebemu-igwe.

²⁹“Ọwhulenya l’aawhụjeru unu bụ ọwhulenya mmaanụ, ẹja, whẹ l’agbajẹru unu bụkotaru ejire. Iwhe ono g’ọ ha bẹ l’aa-gakọ nyabẹ ndu iwe ono l’olu, mbụ ndu ono, ụboku nkewhe rwuwaru, bụ nteke l’aa-nụ whẹ chịikfuu ikpazụ. ³⁰Mịbawhu ogu-ịgba ono azụ l’ọbo iya. Ọo l’ẹka unu futaru bẹ mu l’a-nọdu kpee unu ikpe, mbụ l’alị ono, a nọdu meta unu. ³¹Mu l’e-kpukpushi unu oghu-damụdamu nkemu; mu awhụkashia oke ẹhu-eghughu mu puu t’o kpushi unu g’ọo ọku. Mu l’e-nwuru unu nụ ndu l’eme igiri, mbụ ndu bụ emebyi bẹ whẹ dụ l’ọzo iya. ³²E gude unu mee nkụ oye l’ọku; mmee unu adọru shimu-shimu l’echilabọ alị ono. Unu abụru ndu l’ẹte anyatajẹhe anyata owhu. Mbẹdua Onye-Nwe-Ọha kfuakwaru nkemu.”

Ejo-iwhe, ndu Jerúsalẹmu l’eme

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe; ?ị kwakọbewaru ikpe l’ii-kpe? ?Ị kwakọbewaru ikpe l’ii-kpe mkpụkpu mgbumọchi ono? Ngwa woru akpamara lile, l’oome tụa ya l’iwhu. ³Sụ iya l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Gụbe mkpụkpu-a, i gude ogbu ọchi lọru ọla-l’iswi tụa onwoghu, gude ọgwa agwa emerwushi onwoghu. ⁴Ọchi i gburu b’i gude wotaru onwoghu ikpe-anmanma, ọ bụru agwa, i doberu b’i gude merwushia onwoghu, shi nno mee t’ụboku nkeghu gbaa kpiridamu, mbụ t’awha, l’ịi-nọ-beru byarwukebe. Ọo ya meru mu je l’e-me tẹ ndu mba gẹ mba ha kọje ghu ọnu, mee tẹ ndu alị, dụ l’iche l’iche meje ghu iwhe-ọchi. ⁵Ndu bu l’ụkfu ntse mẹe ndu bu otẹnya l’a-nọdu aja ghu ewenu nkele ị bụ mkpụkpu, l’ẹte ekwee ejipyabe.

⁶“Leduwho gẹ ndu bụ ishi lẹ Ízurẹlu, bụ ndu nọ-gee l’ime ghu gude ike, whẹ nweru egbushi madzụ. ⁷Ndu nna mẹe ndu ne ta adụdu iwhe a gụberu whẹ l’ime ghu. Ndu byarụ abyabya bẹ l’eemekpa ẹhu l’ime ghu. Ndu nna whẹ l’anọhee mẹe ụnwanyi-mbunu bụru ndu l’eme kpakpa-wewe l’ime ghu. ⁸Ẹka, dụru mu nsọ bẹ dụ ghu nde l’ẹnya; i merwua mbọku-ọtuta-ume mu. ⁹O nweru ndu l’anọduje l’ime ghu asụ asụlasu gẹ l’ee-shi t’e gbua ọchi, o nweru ndu l’anọduje l’ime ghu eri iwhe a gwarụ iwhe l’eli ugvu, ndu ọdo l’anọduje l’ime ghu awhatọshi onwowhe. ¹⁰Ọ bụru l’ime ghu bẹ ụwhodu l’alajẹru nyee nna whẹ l’ụlo. Ọ kwawhọ l’ime ghu bẹ unwoke ụwhodu l’ejeje akwakoru l’eli nwanyị, nọ lẹ nsọ awhatọshi. ¹¹Ọo l’ime ghu bẹ nwoke l’ejeje akwakoru lẹ nyee nwoke ibe iya eme ahụma, ọ bụru l’ime ghu bẹ nwoke l’anọduje emerwushi nwune nyee ya, ọ kwa iya whọ bẹ nwoke l’anọduje merwua nwune iya nwanyị. ¹²Ọo l’ime ghu bẹ l’aanọduje kfụa ndiwhe ụgwo tẹ whẹ gbua ọchi. Unu l’ejeje ụgwo nata ntụkwase mẹe ntukobe l’eli iya; unu l’anọduje eri ibe unu urwu, nke ọwhu unu l’e-nweru iwhe. Unu nyazọwaru mu. O nokwa iwhe Nnajị-Ọha bụ Onye-Nwe-Ọha l’ekfu ndono.

¹³“Mu l’e-chi ẹka pyamụ l’urwu ụgho ono, i ritaru mẹe l’ọochi ono, e gbushiru l’ime ghu. ¹⁴?Ị dụa ike nweru obu? ?Ẹka l’e-shihudu ghu nụ ike t’i takeru mbọku ono, mu l’e-do ghu imo? Mbẹdua bụ Onye-Nwe-Ọha kfuakwaru nkemu, mu je l’e-me iya gẹ mu kfuru iya. ¹⁵Mu l’a-tụkashi unu lẹ mba gẹ mba ha. Mu l’a-chịkashi unu t’unu dzuru alị, dụ l’iche l’iche. Mu l’e-me t’emerwushi ono, unu l’emerwushi onwunu bụru getumu. ¹⁶Ịi-bụru mkpụkpu, l’ẹte akwabẹ ugvu l’ẹnya mba gẹ mba ha, nteke ono gụ amarụ l’ọo mbẹdua bẹ bụ Onye-Nwe-Ọha.”

¹⁷Tọ dụ iya bụ, Onye-Nwe-Ọha byakwa ekfuru okfu yeru mu sụ: ¹⁸“Nwa ndiwhe; ọzo-ụlo ndu Ízurẹlu bẹ dụakwa mu g’ọo ẹgbabala iwhe. Mbụ lẹ whẹ dụkota g’ọo ope, mẹe igwe, l’eegudeje eme ogbongu, mẹe iwhe-igwe mẹe tanjila, nọ l’ọku ụzu. Iwhe whẹ bụlewho bụ ẹgbabala mkpọla-ọcha. ¹⁹Ọo ya bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Eshi-ọwhu unu bụkotawaa ẹgbabala iwhe, bẹ mu l’e-kpokobe unu ọnu lẹ Jerúsalẹmu. ²⁰Mbụ l’ọo ẹgube ono, l’ee-kpotaje mkpọla-ọcha, mẹe ope mẹe iwhe-igwe mẹe tanjila, mẹe igwe, l’eegudeje eme ogbongu wụru ye l’ọku ụzu ya achaa gbarara dazehu; bụ gẹ mu l’e-gude iwe mẹe oke ẹhu-eghughu mu kpokobe unu ndono, unu adazeshihu. ²¹Mu l’e-kpokobe unu ọnu; whunwua oke ẹhu-eghughu mu g’ọo ọku l’ẹhu unu, unu anọdu l’echilabọ iya dazeshihu. ²²Ọo gẹ mkpọla-ọcha, l’adazehuje l’ọku ụzu; bụ g’unu l’a-nọdu l’echilabọ mkpụkpu ono dazehu. Nteke ono unu amarụ l’ọo mbẹdua, bụ Onye-Nwe-Ọha bẹ tukoshiru unu oke ẹhu-eghughu mu.”

²³Tọ dụ iya bụ, Onye-Nwe-Ọha bya ekfuru okfu yeru mu sụ: ²⁴“Nwa ndiwhe; kfuru yeru alị ono sụ iya l’ọ bụ alị, l’ẹte adụa ọcha, mbụ alị mini l’ẹte agbashịbua l’oge oke ẹhu-eghughu. ²⁵Ndu nkfuchiru Chileke bẹ nọ l’ime mkpụkpu ono achị ejo idzu, whẹ dụ-gee g’ọo oduu-gburu-agụ, l’aba hanyị hanyị alajashị anụ, o gburu. Whẹ ripyawaru madzụ, nakọo ẹku mẹe iwhe l’erekaa ire. Whẹ mewaru igweligwe ụnwanyi bụru mbunu l’ime mkpụkpu ono. ²⁶Ndu l’agbajẹ ẹja nụ Chileke l’ime mkpụkpu ono bẹ mebyishiwaru iwu nkemu, tụko iwhe mu, dụ nsọ merwushikota. Whẹ l’ewojeru iwhe dụ nsọ kpagbabẹ l’iwhe l’adụa nsọ. Whẹ te ezhijedu madzụ ọdu iche dụ l’iwhe l’aasọ nsọ yẹle iwhe l’aata asọ nsọ. Whẹ lesweru mbọku-ọtuta-ume nkemu ẹnya nke ọwhu bụ lẹ whẹ shi nno mebyishia ugvu whẹ gege anọ akwabẹ mu. ²⁷Ndu ishi, l’achị mkpụkpu ono bẹ dụkota g’ọo ágụ́, l’alajashị anụ, o gburu nwịrinwiri. Whẹ l’egbu ọchi, egbushi madzụ gẹ whẹ l’ee-shi nweru ẹku onye ọbu l’ụzo, l’akfụaru nhamụnha. ²⁸Ndu nkfuchiru Chileke, nọ lẹ mkpụkpu ono bẹ l’ekpuchije ejo-iwhe ono ekpuchi. Ọwhulenya, whẹ l’awhụje bụkota ụgho; nkfuchiru, whẹ l’ekfuje bụru ejire. Whẹ l’asụje l’ọ waa iwhe Nnajị-Ọha bụ Onye-Nwe-Ọha l’ekfu ndọwa; l’ẹba abụ lẹ Onye-Nwe-Ọha kfuru. ²⁹Ndu alị ono bẹ yeru ẹka l’ori onye ọdo urwu mẹe ọna nfụ. Ndu ụkpa mẹe ndu l’adụa g’ọ harụ whẹ bẹ whẹ l’akpa ẹhu, eme ndu mbyambya mmegbu, anafụ whẹ iwhe rwuberu whẹ nụ.

³⁰“Mu bya etsoru chọkashide madzụ l’echilabọ whẹ, bụ onye l’a-tụ mgbodo l’alị ono, mbụ onye l’a-kfụru bụru ugbo gbobuta alị ono tẹ mu be emebyishi iya, too nwe onye mu whụru. ³¹Ọ kwa iya bụ mu wụ-kputa whẹ oke ẹhu-eghughu mu, gude ẹhu-eghughu mu, l’enwu tawhu tawhu kegbushia whẹ g’ọo ndu ọku keru, ọ bụru iwhe ono, whẹ megbaberu bẹ mu tukoberu whẹ l’ishi.” O nokwa iwhe Nnajị-Ọha bụ Onye-Nwe-Ọha l’ekfu ndono.

Unwune labọ, l’eri ogori

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe, o nweru ụnwanyi labọ, bụ ne lanụ nwụru whẹ. ³Unwune labọ ono bẹ watarụ ọgba ọkpara lẹ Íjiputu. Whẹ watarụ ọgba ọkpara ono nteke whẹ bụkwadu ụnwumgboko nshịi. Ọo l’ẹka ono bẹ whẹ nọdu a pyịtoshia whẹ ẹra, mbụ l’ọo ẹka ono bẹ whẹ nọdu e tsushia whẹ ẹra l’obu. ⁴Onye nke ọgurenya bẹ ẹwha iya bụ Ohola, ẹwha nwune iya nwanyị ọwhua bụru Oholiba. Mu lụru whẹ alụlu, whẹ bụru unyomu mu, whẹ nwụshia ụnwegirima unwoke mẹe ụnwegirima ụnwanyi. Ohola bẹ nọdu ọnodu Samériya, Oholiba nọdu ọnodu Jerúsalẹmu.

⁵“Ohola bẹ mu nwekwadu enwe l’ẹka ọ kfụfu wata ọgba ọkpara. Ọ gụlahaa ya tẹ yẹle ndu ono, o yeru obu, bụ ndu ojọgu Asiriya wata azẹze. ⁶Ndu ono bẹ l’eyeje uwe, dụ urwukpu-urwukpu gude kwaa onwowhe ngwa, whẹ bụ-gee ndu ọ-chị-ọha, bụ-geeru ndụ-ishi. Gẹ whẹ ha bụkota akatikoro unwokorọbya, dụ-gee ugvu l’ẹnya, agbakaa ịnya. ⁷O meru onwiya nwanyị-ọkpara doberu ndu nweru ẹnya lẹ Asiriya. O gude ọlolikpakpa ono, yẹle iya l’eme wata ọgwa agwa whẹ, shi nno merwua onwiya. ⁸Ọkpara ono, o shi agbagba lẹ Íjiputu bẹ l’ooto kwedua haa ahaha. Yẹle unwoke bẹ watarụ azẹze lẹ nwata, whẹ tsushia ya ẹra l’obu, ọ bụru g’ọ gụru whẹ bẹ whẹ l’ejekfuje iya. ⁹O noo g’o gude, mu woru iya nwuhaaru ndu ono, l’alarụ iya l’ụlo bụ iya bụ ndu Asiriya, mbụ ndu ono, ẹgu tẹ whẹ l’iya zẹe l’anọje alọ iya kpakpakpa. ¹⁰Ọ bụru ndu ono bẹ gbabẹru iya ọto, chịta ụnwegirima iya unwoke mẹe ụnwanyi chịfu, gude ogu-ịgba gbugbua yẹbedua. Ụnwanyi nmalahaa ya l’ejo ẹtu nke awhụ ono, a nụru iya.

¹¹“O noo ya, nwune iya nwanyị, bụ Oholiba whụ-gezhikwaru iwhe ono, ọle ọlolikpakpa ẹgu nwoke nkiya bẹ ka shii amamẹ nke nwune iya ono; ọgba ọkpara nkiya kakwawhọ shii amamẹ nke nwune iya ono. ¹²Yẹbedua bẹ ẹgu tẹ yẹle ndu Asiriya wata azẹze lọkwaruwho kpakpakpa, mbụ ndu ọ-chị-ọha whẹ mẹe ndu ishi whẹ mẹe ndu ojọgu whẹ, l’akwajẹ onwowhe ngwa, agbakaa ịnya, mbụ akatakpo unwokorọbya, dụ-gee ugvu l’ẹnya. ¹³Mu whụa lẹ yẹbedua bẹ merwufuaru onwiya, lẹ whẹ labọ bẹ yekotaru ẹka lẹge l’ọodua.

¹⁴“Mbẹdua, bụ Oholiba bẹ kwatarụ akwata yemia ishi l’ọgba ọkpara ọbu. Ọ whụru unwoke, e seru lẹ mgbodo, ọ bụru ndu Kaludiya, e huru penti uswe-uswe, ¹⁵whẹ kegbakota akpọ l’ukfu l’ẹhu l’ẹhu, kebegee ẹkwa l’ishi l’ọoku jịlajila. Whẹ dụkota g’ọo ndu ishi l’ẹhu l’ẹhu, egoshi ụgbugba ndu Bábyilọnu bụ iya bụ ndu Kaludiya. ¹⁶Awhụwhu, ọ whụru ndu ono, e seshiru lẹ mgbodo ono, ọ gụlahaa ya tẹ whẹ l’iya zẹe. O zhia ozhi t’e je ezhia whẹ lẹ Kaludiya. ¹⁷Tọ dụ iya bụ, ndu Bábyilọnu wụru byakfuta iya tẹ whẹ l’iya zẹe ọbu. Whẹ gude g’ẹgu iya ha whẹ l’ẹhu merwua ya. Whẹ merwutabe iya nke ọwhu bụ lẹ ndu ono megeeru bya adụ iya ashị. ¹⁸Ọkpara ono b’ọ watarụ agbagba l’ọkpa jaajaa, ọ wata ọgba onwiya ọto, ọo ya bụ ọ dụlahaa mu ashị, ẹgube ono, nwune iya dụ mu ashị. ¹⁹Ọle ọkpara ọbu l’ọogba bẹ bya aka iya njọ l’ẹhu, g’ọ nyatarụ g’o shi agbabe iya nteke ọ bụ nwamgbọko nọdu lẹ Íjiputu. ²⁰L’ẹka ono bẹ ọdu-g’ọbu-iya whẹ shi anọje agụ iya tẹ whẹ l’iya zẹe, mbụ ndu nweru ẹhu ẹgbara g’ọo nkakfụ-ịgara, bụru ndu ẹhu-nwoke whẹ l’ekelihuje g’ọo nke ịnya. ²¹Ọo ya bụ l’ẹgu nwoke ono, shi anọduje enwu ghu whuruwhuru l’ẹhu nteke ị bụ nwamgbọko lẹ Íjiputu bẹ l’anọjekwadua agụ ghu, mbụ nteke ono, e shi anọje etsushi ghu ẹra l’obu, apyịtoshi ghu l’ẹra.”

²²“Ọo ya bụ, gụbe Oholiba, ọ waa iwhe Nnajị-Ọha, bụ Onye-Nwe-Ọha l’ekfu ndọwa: T’ị whụdu ndu ono, i yeru obu ono, ị megeru kpọ ashị ono bẹ mu l’a-kpatsuta tẹ whẹ wata ghu otso okfu ibẹka ibẹbo, ²³mbụ ndu Bábyilọnu, mẹe ndu Kaludiya, mẹe ndu Pekodu, mẹe ndu Showa, mẹe ndu Kowa, whẹ lẹ ndu Asiriya gẹ whẹ ha, mbụ ndu ono, bụgbaa akatikoro unwokorọbya, dụ-gee ugvu l’ẹnya bụ iya bụ ndu ono bụgbaa ọ-chị-ọha, mẹe ndụ-ishi, mẹe ndụ-ishi ụgbo-ịnya, mẹe whẹbe ndu ono, nọ-gee l’oke ọkwa, bụ ndu l’agbakaa ịnya. ²⁴Whẹ l’e-shi l’ụzo isheli gudegee ngwọgu mẹe ụgbo-ịnya mẹe ụgbo-ịnya-ivu, whẹ achịru ndu ojọgu, l’ekpo rwuturwutu byakfuta ghu ọgu. Whẹ l’a-nọ-whe ghu mgburumgburu chịru iwhe l’eegudeje ezeru ọgu nke eze iya mẹe nke nshịi, kpuru okpu-igwe. Mu l’e-seru ghu nụ whẹ tẹ whẹ nụa ghu áwhụ l’ụzo ọwhu whẹ l’anụje madzụ áwhụ. ²⁵Mu l’e-gude ẹhu-eghughu zhiberu ghu okoowhoo nke ọwhu ndu ono l’e-gude obu iwe myẹe ghu ụkpazhi-ọnwonu. Whẹ l’e-befu ghu imi mẹe nchị. Whẹ egude ogu-ịgba gbugbushia ndu ọwhu whọduru l’ime ghu. Ụnwegirima ghu unwoke mẹe ụnwanyi bẹ whẹ l’a-natakọta, ọku ekegbushia ndu ọwhu whọduru nụ. ²⁶Whẹ l’e-yetakota ghu uwe ghu, nata ghu ẹguru ákà, i nweru. ²⁷Mu l’e-me t’ụrwali ono, i shi rwụta yẹle ọkpara ono, i shi agbagba lẹ Íjiputu buhu nke ọwhu bụ l’ịitii leshihedu ẹnya ọdo l’ụdu iwhe ono, tịi rịtahe Íjiputu l’ọriri ọdo.”

²⁸O noo nkele ọ waa iwhe Nnajị-Ọha bụ Onye-Nwe-Ọha l’ekfu ndọwa: “Mu byakwa l’e-seru ghu ye l’ẹka ndu ono, ị kpọru ashị, mbụ ndu ono, rịfuwaru ghu l’ẹhu ono. ²⁹Whẹ l’e-gude mkpọmashi mee ghu iwhe, natakọta ghu iwhe lile, i setaru l’anya. Whẹ l’a-gbabẹ ghu ọto gụ adaburu iwhoro. Iwhe-iwhere ono, l’iime onwoghu bụ iya bụ ọkpara ono, l’ịigba bẹ l’aa-tụ jalaa. Ọo ụrwu-alị ono, l’ịirwu yẹle ọkpara ono, i tsoru agbawhe ³⁰bẹ bụ iya wotaru ghu gẹ l’ọodua ono, o noo nkele i woru onwoghu tọgbo ndu mba gẹ mba ha mebyishia, i woru onwoghu zhiberu agwa whẹ, shi nno merwua onwoghu. ³¹Ị nwụtaru ẹka nwune ghu nwanyị. Ọo ya l’e-me mu aparụ omogo iwhe-ọtsulanu dẹe ghu l’ẹka.”

³²“Ọ waa bụ iwhe Nnajị-Ọha bụ Onye-Nwe-Ọha l’ekfu:

“Ịi-ngụ iwhe dụ l’omogo ono,

nwune ghu nwanyị ngụru,

mbụ omogo ono, ha galagala, dụ omilomi.

Aa-chị ghu ọchi jaa ghu ewenu,

o noo nkele omogo ono bẹ iwhe jiru eji.

³³Awhụ l’e-ji ghu ọnu, ya eme ghu l’ẹnya g’ọo mmẹe.

Omogo ọbu bụkwa kpurupyata

yẹle ọla-l’swi bẹ jiru iya nụ,

bụ iya bụ omogo nwune ghu nwanyị ono, bụ Samériya.

³⁴Ịi-ngụ iya whoo ya olu.

Ịi-tụjashi iya ibiribe ibiribe,

gude iya lajashịa onwoghu ẹra alajashị.

Mu kfuakwaru nkemu. O nokwa iwhe Nnajị-Ọha bụ Onye-Nwe-Ọha l’ekfu ndono.”

³⁵“Ọo ya bụ, l’ọ waa iwhe Nnajị-Ọha bụ Onye-Nwe-Ọha l’ekfu ndọwa: ‘Eshi-ọwhu ị nyazọwaru mu, woru mu dobe l’ụzo azụ, ọ kwa iya bụ t’i vuru ejo-iwhe, ọ nwụtaru ghu mbụ ụrwu-alị ono, l’ịirwu yẹle ọkpara ono, l’ịigba.’ ”

³⁶Tọ dụ iya bụ, Onye-Nwe-Ọha bya asụ mu: “Nwa ndiwhe; ?ị kwakọbewaru ikpe, l’ii-kpe Ohola yẹle Oholiba? Tụa whẹ ahụma ono, whẹ l’emekaa l’iwhu. ³⁷Whẹ l’eri ogori, egbu ọchi. Whẹ l’agwa agwa, shi nno eri ogori. Whẹ l’ewojeru ụnwu, whẹ nwụtaru yẹbe Onye-Nwe-Ọha gude gbaarụ agwa whẹ ono ngwo-ẹja-nri. ³⁸Iwhe ọdo, whẹ mefuaru mu mbọku ono bụ lẹ whẹ merwuru ẹka dụru mu nsọ; merwua mbọku-ọtuta-ume nkemu. ³⁹Ọo mbọku, whẹ gburu ụnwegirima whẹ gude gbaarụ agwa whẹ ono ẹja bẹ whẹ bahụru l’ẹka ono, dụru mu nsọ je emerwua ya. Ọ kwa iwhe ono bẹ whẹ meru l’ụlo mu.

⁴⁰“Whẹ zhiru ndu ozhi tẹ whẹ je ekuaru whẹ ndu shi otẹnya tẹ whẹ bya. Gẹ ndu ono byarụ, b’ị sarụ onwoghu degeberu whẹ, tee uryi ẹnya, bya egude ịyagba memashia onwoghu. ⁴¹Unubẹ unwune ono l’asụgajeru l’oshi, l’enwu ẹnya demudemu. A bya edozhia teburu l’iwhu unu, unu achịta isẹnsu nkemu mẹe mmanụ mu wukobe iya l’eli. ⁴²Ikpoto ndu ono, bụ ewhereke-ngvu bẹ swọtoberu ụzu l’ẹka whẹ lẹ nwata nwanyị ono nọgbabe. Ndu ono bẹ bụ unwoke l’angụ angụruma, e shi l’echi-ẹgu dubata. Whẹ bya agbabẹ ụnwanyi ono echi l’oshi-ẹka, kpube whẹ okpu, l’ama mma l’ishi. ⁴³Tọ dụ iya bụ mu sụ ?tọ nụa ogori bẹ whẹ lẹ nwanyị-a l’eri, lẹ yẹbe nwanyị, gbatagewaru ọkpara kpọjoshihu? ⁴⁴Whẹ l’ejekfuje nwanyị ono azẹe. Ọo ẹgube ono unwoke l’anọje ekpukfu nwanyị-ọkpara azẹe, bụ gẹ whẹ l’anọje ekpukfu ụnwanyi ụrwu-alị ono, bụ Ohola yẹle Oholiba azẹe. ⁴⁵Ọle ndu l’e-kpe whẹ ikpe bẹ bụ unwoke, dụ chịriri. Whẹ l’e-kpe whẹ ikpe ogori mẹe ikpe ọchi nkele whẹ bụ ụnwanyi l’eri ogori, egbu ọchi.”

⁴⁶“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Unu kua obukobuko whẹ tẹ whẹ bya eyee whẹ egvu, gwoo whẹ tụtua. ⁴⁷Ndu ono, bụ obukobuko ono l’a-tụ whẹ ẹwhuru, gude ogu-ịgba gbuta whẹ tụa. Whẹ abya egbushikwaawho ụnwegirima whẹ unwoke mẹe ụnwanyi, tọshia ọku l’ụlo whẹ.

⁴⁸“O noo gẹ mu l’e-shi mee t’ụrwu-alị kfụshi l’alị-a, nke ọwhu l’ọo-bụru iwhe l’ee-gude a nmarụ ụnwanyi gẹ whẹ ha ọkwa, tẹ whẹ ba awọta ẹka unu. ⁴⁹Unu l’e-je tịitoo l’ụrwali ono, unu l’arwụ. Unu l’e-vuru ejo-iwhe, l’ọo-nwụtaru unu, mbụ agwa ono, unu l’agwa gude eme iwhe-dụ-ẹji. O noo nteke, unu l’a-marụ l’ọo Mu bụ Nnajị-Ọha, bụ Onye-Nwe-Ọha.”

Ẹtu e gude ite, e shiberu l’ọku anma

¹O noo ya, o rwua l’abalị iri l’ọnwa tete l’awha nke tete, Onye-Nwe-Ọha bya ekfuru okfu yeru mu sụ: ²“Nwa ndiwhe; dee iwhe ntanụ bụ l’ẹkwo, mbụ ntanụ ọwa, nkele ọo ntanụ bẹ eze ndu Bábyilọnu watarụ oyebuta Jerúsalẹmu mgburumgburu. ³Nmaarụ ọzo-ụlo ono, kwefuru ike ẹtu sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa:

“Kpokfube ite l’ọku, kpokfube iya l’ọku, kuru mini ye iya.

⁴Gụ ebushia anụ ibiribe ibiribe chịru ye iya.

Ye iya ibiribe iya ọwhu kagezhia

ree, mbụ ụtakfu iya yẹle ukfumẹka iya.

Woru ọkpu ẹka ọ kagezhia ree chị-jia ya achị-ji.

⁵T’ọ bụkwaru anụ atụru, kacha ree.

Doo nkụ l’ike ite ono.

Shia anụ ono t’o gheree-ghere.

Shia yẹle ọkpu iya eshishi.

⁶“O noo l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Nshọ obodo, l’egbu ọchi! Nshọ ite, gbarụ ẹgba, mbụ ite, ẹgba iya l’ẹte ehefu ehefu. Gụshia anụ ono nnanụ nnanụ; ba atụkwaru iya ido gude marụ m’o nweru ọwhu l’aa-ha. ⁷Ọchi ono, obodo ono gburu bẹ dụkwaa g’ọ dụ. Oogbuje madzụ gbashị mmee ya l’eli ẹwhuru; ọ tọ gbashịjedu iya l’ọma-alị nke ọwhu ivovonyi gege ekwekpuje iya. ⁸Mmee ọchi ono, o gburu bẹ mu harụ t’ọ dụ l’ẹwhuru ono; t’e be ekwekputa iya iwhe, mbụ t’ọ dụ nno akpatsu mu oke ẹhu-eghughu nke ọwhu mu l’e-gude iya gwa.

⁹“Ọo ya bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Nshọ obodo, l’egbu ọchi! Mbẹdua l’e-gude ẹka mu dokwawho nkụ edodo, kpabẹ iya ọku akpabẹ.

¹⁰“Doo nkụ edodo,

kpabẹ iya ọku akpabẹ.

Shia anụ ono t’o gheree eghere;

yekwa iya iwhe l’emeje tẹ mkpọ iwhe tsọje ụtso.

Gụ ahụa ọkpu iya ahụhu.

¹¹“Gụ apata ite iwhoro shikwase l’eli ovokọku, haa ya t’ọku ngaa ya, mbụ shia ya t’ope, e gude mee ya chaa gbarara, nke ọwhu inyi, dụ iya nụ l’a-dazehu; ọku atachashịa ẹgba, dụ iya nụ. ¹²Ẹza lile, mu sekotaru bụ mu nke mmaanụ, nkele ẹgba ono ọ gbarụ te ekwedu alụfu, o too kwedu t’ọku tachashịa ya. ¹³Ọ kwa ụrwu-alị ono, l’ịirwu bẹ bụ inyi dụ gụbe Jerúsalẹmu l’ẹhu. Mu seru eli see alị tẹ mu safụ ghu mmerwu ono l’ẹhu; t’i kwe tẹ mu safụ ghu iya. Eshi ọ dụ nno bẹ l’aataa abyadụ l’a-safụkwadu ghu iya asafụ ọdo, jeye nteke mu l’a-zụbe unu ẹhu-eghughu mu g’ọ dụ mu ree. ¹⁴Mbẹdua bụ Onye-Nwe-Ọha kfuakwaru nkemu, tẹmenu oge rwuakwaru nteke mu l’e-me t’ọ nwụa gẹ mu kfuru iya. Mu ta abyadụ l’a-kpọ laa azụ l’ememe iya, mu ta abya l’a-whụ imiko, mbụ lẹ mu ta anọnyadua sụ lẹ mu te emehedu. Ọo g’unu l’e-me bẹ mu l’e-gude nụa unu áwhụ. O nokwa iwhe Nnajị-Ọha bụ Onye-Nwe-Ọha l’ekfu ndono.”

Anwụhu Nyee Izikẹlu

¹⁵Tọ dụ iya bụ, Onye-Nwe-Ọha bya ekfuru okfu yeru mu sụ: ¹⁶“Nwa ndiwhe; mu byakwa l’egude agbẹka lanụ wota onye ono, i yeru ẹnya. Ọle-a, ba agụkwa áwhụ iya, ba aryakwa ẹkwa iya, t’ẹnya-mini ba afụtakwa ghu l’ẹnya. ¹⁷Tsụa ude, ọle ba atsụkwa iya ọwhu l’aa-marụ. Ba agụkwa áwhụ anwụhu ono. Woru ẹkwa, l’iikeje l’ishi kee, yee akpọkpa ghu. Be ekechikwa ọnu, be erikwa nri onye awhụ byarụ l’erije.”

¹⁸Iwhe ono bẹ mu kọru ndu madzụ l’ụtsu, o be l’urwẹnyashi iya, nyee mu nwụhu. O rwua l’ụtsu iya, mu bya emekotagezhia iwhe lile, a sụru tẹ mu mee. ¹⁹Ndu madzụ bya asụ mu: “?Tịi kadụru anyi iwhe iwhe ono l’a-fụtaru anyi?”

²⁰Tọ dụ iya bụ, mu sụ whẹ lẹ Onye-Nwe-Ọha kfuru okfu nụ mu, ²¹tẹ mu kfuru ọzo-ụlo ndu Ízurẹlu sụ whẹ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mu byakwa l’eme ẹka-dụ-nsọ mu t’ọ bọ dụhe nsọ, mbụ ẹka ono, bụ agbarike unu ono, unu gude eku onwunu eku, mbụ ẹka ono, unu yeru ẹnya, bụru ẹka dụ obu unu ree. Ụnwegirima unu unwoke mẹe ụnwanyi, bụ ndu unu harụ l’ụzo azụ bẹ ogu-ịgba l’a-takọta ishi whẹ. ²²Unu emee gẹ mu meru, haa okechi ọnu unu ekechi; haa ori ọga nri, ndu áwhụ byarụ l’erije. ²³Ẹkwa, unu l’ekeje l’ishi bẹ unu l’e-kebe l’ishi; woru akpọkpa unu yee. Unu ta agụdu áwhụ, unu ta arya ẹkwa. Ọle ejo-ememe, unu meru bẹ l’e-me t’unu jọo ẹhu wụfu, unu atarụ ibe unu kịkiki. ²⁴Izikẹlu l’a-bụru unu iwhe-ọhubama. Unu l’e-mekotagezhia iwhe o meru. Iwhe ono nwụdelewho unu amarụ l’ọo Mu bụ Nnajị-Ọha, bụ Onye-Nwe-Ọha.

²⁵“A bya lẹ gụbedua, nwa ndiwhe; mbọku ono, mu l’a-nafụ whẹ agbarike whẹ ono, mbụ ẹka ono, bụ ishi ẹhu-ụtso whẹ, bụru ẹka whẹ l’egudeje eku onwowhe eku, mbụ ẹka ono, whẹ yeru ẹnya ono, bya abụru ẹka dụ obu whẹ ree, mbụ mbọku ono, mu l’a-nafụ whẹ ụnwu whẹ unwoke mẹe ụnwanyi; ²⁶mbọku ono bẹ onye gbarụ ọso ọgu l’a-bya akọoru ghu nke iwhe ono. ²⁷Mbọku ono bẹ l’ịi-sa ọnu kfuru okfu yeru onye ono, gbarụ ọso ọgu ono. Ị wata okfu okfu; ị tịi bụhedu ọno-t’o-kfu-okfu. Ọo ya bụ, l’ịi-bụru whẹ iwhe-ọhubama. Whẹ amarụ l’ọo Mu bụ Onye-Nwe-Ọha.”

Okfu e kfuru l’ishi ndu Amọnu

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe; ghaa iwhu l’ẹka ndu Amọnu nọ, gude nkfuchiru kfuru gẹ l’ọo-dụa nụ whẹ. ³Kfuru whẹ sụ whẹ: Unu nụkwaa okfu Nnajị-Ọha bụ Onye-Nwe-Ọha l’ekfu. Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Nkeshi ọwhu unu kụru ụlo-nsọ mu hụu nteke ono, e merwuru iya, unu kụaru alị Ízurẹlu hụu nteke ono, e meru iya ọ bụru ochuwhu, unu kụaru ọzo-ụlo ndu Juda hụu nteke ono, a kpụru whẹ lẹ ndzụ laa alị ọdo, ⁴eshi-ọwhu ọ dụ nno, bẹ mu l’e-nwuru unu nụ ndu ụzo ẹnyanwu-awata tẹ whẹ lwụta unu t’unu bụru nkewhe. Whẹ l’e-dobe ọdu whẹ l’alị unu, whẹ akwashịa uwhu buru l’ibe unu. Ọo whẹ l’e-ri akpụru iwhe unu, ngụa mini ẹra-eswi unu. ⁵Mkpụkpu Raba bẹ mu l’e-me t’ọ bụru ọdu ịnya-kamẹlu, mu emee alị ndu Amọnu t’ọ bụru obodo, atụru l’a-dọshije. O noo nteke unu l’a-marụ l’ọo Mu bụ Onye-Nwe-Ọha.

⁶“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Nkeshi ọwhu unu chiru ẹka pyamụ, dzọo gidimu gidimu, kpọoru alị Ízurẹlu orwube l’iwhe byarụ iya nụ, t’ọ dụ iwhe unu gụberu iya, ⁷ọo ya bụ lẹ mu l’a-machị ẹka daa unu l’ẹhu. Mu l’e-nwuru unu nụ mba gẹ mba ha t’unu bụru arya whẹ vụtaru l’ụwha. Mu l’e-kefu unu l’oke mee t’unu bụ-buhu mba ẹka unu; mu emee t’unu tọhu bụ-buhu alị ẹka unu. Mu l’e-me unu abụru kpurupyata, ọo ya bụ unu amarụ l’ọo Mu bụ Onye-Nwe-Ọha.”

Okfu e kfuru l’ishi ndu Moabu

⁸Ọ waa iwhe Nnajị-Ọha bụ Onye-Nwe-Ọha l’ekfu ndọwa: “Moabu mẹe Siye bẹ sụru l’ọzo-ụlo ndu Juda te enwedu ọdu iche dụru whẹ lẹ mba gẹ mba ha ọdo. ⁹Eshi-ọwhu ọ dụ nno, bẹ mu l’e-me t’ẹka iya nke Moabu gheru karawhongu watazhiawho lẹ mkpụkpu dụ l’ọnu ẹgu, bụ ẹka alị ono gude eme ọnu, mbụ Betu-jeshimotu mẹe Bálu-meyọnu mẹe Kiriyatayimu. ¹⁰Moabu yẹle Amọnu bẹ mu l’e-nwuru nụ ndu ụzo ẹnyanwu-awata tẹ whẹ lwụta iya t’ọ bụru nkewhe nke ọwhu Amọnu l’a-bụru ẹka a zọharu azọha l’iwhe bụ mba gẹ mba ha. ¹¹Ndu Moabu bẹ mu l’a-nụ awhụ. Ọo ya bụ whẹ amarụ l’ọo Mu bụ Onye-Nwe-Ọha.”

Okfu e kfuru l’ishi ndu Edọmu

¹²Ọ waa iwhe Nnajị-Ọha bụ Onye-Nwe-Ọha l’ekfu ndọwa: “Ndu Edọmu bẹ gwatarụ ụgwo iwhe ndu Juda meru whẹ, whẹ shi l’ụgwo iwhe ono, whẹ gwatarụ whẹ mee mmeswe, parụ ẹka. ¹³Nkeshi ọwhu ọ dụ nno b’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’a-machị ẹka daa Edọmu l’ẹhu. Madzụ mẹe élwù, nọ iya nụ bẹ mu l’e-gbushikota; ẹgbara akfụa ya. Wata lẹ mkpụkpu Temanu jeye lẹ mkpụkpu Dedanu bẹ l’ee-gude ogu-ịgba mee whẹ ọzara-l’ukpo. ¹⁴Mu l’e-shi l’ẹka ndibe mu, bụ ndu Ízurẹlu gwata ndu Edọmu ụgwo iya. Whẹ l’e-gude g’iwe habe mụbe Onye-Nwe-Ọha l’ẹhu mẹe g’oghu damụdamu mu habe gwaa ndu Edọmu ọchi nke ọwhu whẹ l’a-marụ iwhe bụ lẹ Onye-Nwe-Ọha gwatarụ ụgwo iwhe. O nokwa iwhe Nnajị-Ọha bụ Onye-Nwe-Ọha l’ekfu ndono.”

Okfu e kfuru l’ishi ndu Fílistiya

¹⁵Ọ waa iwhe Nnajị-Ọha bụ Onye-Nwe-Ọha l’ekfu ndọwa: “Ndu Fílistiya bẹ gwatarụ ụgwo iwhe e meru whẹ, mbụ lẹ whẹ gude obu mgbashị gwata ụgwo iwhe e meru whẹ. Whẹ gude mkpọmashi, whẹ shi nteke l’aamaa kpọo ndu Juda achọ ụzo, whẹ l’eshi kpanyia whẹ ẹnya. ¹⁶Nkeshi ọwhu ọ dụ nno b’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’a-machị ẹka daa ndu Fílistiya l’ẹhu. Ndu Keretu bẹ mu l’e-me tẹ whẹ chihu; mee ndu bu lẹ mgboro eze-ẹnyimu, bụ ndu ọwhu whọduru nụ tẹ whẹ bụru kpurupyata. ¹⁷Mu l’a-kwata akwata gwata whẹ ụgwo, iwhe whẹ meru. Mu l’e-gude oke ẹhu-eghughu nkemu nụa whẹ awhụ. Whẹ amarụ l’ọo Mu bụ Onye-Nwe-Ọha nteke mu gwatarụ whẹ ụgwo ono.”

Okfu e kfuru l’ishi ndu Taya

¹L’awha nke iri lẹ nnanụ l’abalị mbụ l’ọnwa ono bẹ Onye-Nwe-Ọha kfuru yeru mu sụ: ²“Nwa ndiwhe; nkeshi ọwhu mkpụkpu Taya kfuru okfu ẹhu Jerúsalẹmu sụ: ‘Hụu! Ọnu-abata ono, shi bụru mkpakọ ndu ọhamoha bẹ dakpọshihuwaru nụ. Mgbo e yeru iya bẹ ghewaru karawhongu, nke ọwhu mu l’a-bahụ iya. Ntaa obodo ono dakpọshihuru bẹ mu bya l’enweru iwhe.’

³“Eshi-ọwhu ọ dụ nno b’ọ waa iwhe Nnajị-Ọha bụ Onye-Nwe-Ọha l’ekfu ndọwa: Gụbe Taya; mu nọokwaru ghu l’ejo oshi. Ọo g’eze-ẹnyimu l’a-tụje akpara gbukungu bụ gẹ mu l’e-nwuta ikpoto mba, whẹ atụru gbukungu bya azụpyabe ghu. ⁴Whẹ l’a-kutsushi mgbodo Taya, nwutsushia ụlo-eli, dụ iya nụ. Ẹja mkpọkoro-ụlo iya bẹ mu l’a-kọshikota akọshi, mee ẹka ono t’ọ bụru akpakpamara ẹwhuru. ⁵Ọo-bụru akpakpamara alị, dụ l’echi eze-ẹnyimu, bụ ẹka ndu l’egbu ẹma l’e-gebeje ụgbu whẹ. Mu kfuakwaru nkemu; o noo iwhe Nnajị-Ọha bụ Onye-Nwe-Ọha l’ekfu ndono. Ọo-bụru arya, mba gẹ mba ha vụtaru l’ọgu.” ⁶Ụnwada iya, bụ ndu bu l’ẹgu bẹ ogu-ịgba l’a-takọta ishi whẹ. Nteke ono whẹ amarụ l’ọo Mu bụ Onye-Nwe-Ọha.

⁷“Nkele ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-shi ụzo isheli duta Nebukadineza, bụ eze ndu Bábyilọnu, mbụ eze, ka eze t’ọ byakfuta Taya ọgu. Ọo-chị ịnya, mẹe ụgbo-ịnya, mẹe ịnya-ọgu, mẹe ikpoto ndu ojọgu iya byatashia. ⁸Nebukadineza l’e-gude ogu-ịgba gbugbushia ụnwada ghu, bụ ndu bu l’ẹgu. Oo-gvu ose-ọgu yebuta ghu; tụa ịga-ọgu gbawhee ghu mgburumgburu; ya anmabẹ iwhe e gude ezeru ọgu gude tsoo ghu ọgu. ⁹Ishi-okpo, l’eegudeje akụkposhi ụlo bẹ l’oo-tsu lẹ mgbodo mkpụkpu ghu kwalwumu; ya egude ngwọgu iya nwutsushia ụlo-eli, dụ l’ime ghu. ¹⁰Ịnya, l’ọo-chị l’a-bụru okpo rwuturwutu; udzu ẹja, whẹ l’a-vọkashi l’e-kpuchikota unu ekpuchi. Igidi ndu l’agbarụ iya ịnya-ọgu mẹe nke ọkpa ụgbo-ịnya iya mẹe nke ụgbo-ịnya iya l’e-me mgbodo mkpụkpu Taya anmakọta kwekwekwe nteke Nebukadineza l’a-nọ abahụ lẹ mkpụkpu ono g’ọo onye l’abahụ lẹ mkpụkpu, e tsufuru mgbodo iya etsufu. ¹¹Oo-gude akọkpa ịnya iya nmaa echi-ụzo ghu agbịdigba; gude ogu-ịgba iya gbugbushia ndibe ghu; ya akụ-tsushia ndu ono bụ oke itso ghu; whẹ abụru gburugudungu l’alị. ¹²Ẹku ghu bẹ whẹ l’a-vụkashi avụkashi; lwụa ngwa-aswa ghu alwụlwu. Whẹ l’e-nwutsushi mgbodo mkpụkpu ghu; mebyishia ụlo ghu, dụ ugvu. Ẹwhuru ghu mẹe oshi ghu mẹe mkpọkoro-ụlo ghu bẹ whẹ l’e-vuta je akụbe l’eze-ẹnyimu. ¹³Ụda egvu, shi adajẹ lẹ mkpụkpu ono l’a-bụru getumu. A nụ-buhu ụda une, e shi akpọje iya. ¹⁴Mu l’e-me ghu t’ị bụru akpakpamara ẹwhuru nkụchi. Ịi-bụru ẹka ndu l’egbu ẹma l’e-gebeje ụgbu whẹ. A ta abyadụ l’a-tụkwa ghu atụkwa ọdo, mbẹdua bụ Onye-Nwe-Ọha kfuakwaru nkemu. O nokwa iwhe Nnajị-Ọha bụ Onye-Nwe-Ọha l’ekfu ndono.

Ẹkwa-áwhụ ẹhu Taya

¹⁵“Ọ waa iwhe Nnajị-Ọha bụ Onye-Nwe-Ọha l’ekfuru mkpụkpu Taya ndọwa: Nteke l’ịi-da bẹ alị, nọ lẹ mgboro eze-ẹnyimu l’a-nmakọtakwa kwekwekwe. Whẹ l’a-nmakọta kwekwekwe l’ude, whẹ l’a-tsụ mbụ ndu e mekaru iwhe mẹe lẹ bụjibuji, whẹ l’a-lwụ mbụ ndu a nọdu l’ime ghu egbushi. ¹⁶Nteke ono bẹ ndu ishi, l’achị ndu bu lẹ mgboro eze-ẹnyimu l’e-nyizeshi l’oshi-eze whẹ; yeshia uwe-eze whẹ wụshi, yeshia uwe whẹ e memaru emema wụshi. Ẹhu-anmanma l’a-kwa whẹ ngwa l’ẹhu; whẹ agwọdoshihu l’alị anma rwuurwuu nmapyabẹ. Ọnu akpụru whẹ okfu l’ọnodu ghu. ¹⁷Whẹ l’a-rya ẹkwa áwhụ ẹhu ghu sụ:

“ ‘?Ẹgube e mekwanuru ị bụru kpurupyata,

gụbe mkpụkpu ono, a marụ ẹwha iya ono,

mbụ gụbe mkpụkpu, bụ ndu l’akpa lẹ mini bukota iya.

Gụbe mkpụkpu ono, shi bụru onye ike ka lẹ mini,

mbụ gụbedua mẹe ndu bu l’ime ghu.

Ndu lile, bu l’ẹka ono b’i shi ekopyabeje ntsụ-megvu.

¹⁸Ntaa bẹ ndu alị mgboro

eze-ẹnyimu nmakọtaru

kwekwekwe l’adada, ị darụ.

Alị, mini sọ-wheru mgburumgburu

l’eze-ẹnyimu b’ọ tujiru ẹka g’i meru daa.’

¹⁹“O waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-me ghu t’ị bụru mkpụkpu ẹgbara kfụru, mbụ t’ị dụ g’ọo mkpụkpu l’ete ebua ebu. Mu l’e-gude iswina byakfuta ghu; mee t’oke mini rikputa ghu. ²⁰O noo nteke mu l’a-tụru ghu chee l’iduma tẹ gụ lẹ ndu l’a-la lẹ wurukutu alị-maa lịru lakfu ndu ọwhu lahawaru iya nụ nteke teru ẹnya. Mu l’e-me ghu t’ị lashia mgboko azụ iya ọwhu; lakfu ndu tahawaru ẹja nteke l’aamaa. Ndu gụ lẹ whẹ l’a-lị ala bụ ndu l’a-la l’iduma nke ọwhu l’ị tịi fụtahe afụta ọdo; t’a bya l’e-wowhu ghu azụ l’alị ndu nọ ndzụ ọdo. ²¹Mu l’e-me ghu t’ị laa ejo alala. Ị tịi byadụ l’a-nọbaa ndzụ ọdo. Aa-chọ ghu achọ, eje awhụhe ghu ẹnya ọdo. O nokwa iwhe Nnajị-Ọha bụ Onye-Nwe-Ọha l’ekfu ndono.”

Ẹkwa-áwhụ nke ẹbo, a ryarụ l’ẹhu Taya

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe: ryaa ẹkwa ẹhu Taya. ³Kfuru Taya, bụ mkpụkpu ono, dụ l’ogologo ẹka ono, l’eeshije abahụ l’eze-ẹnyimu, mbụ mkpụkpu ono, whẹ lẹ ndu bu lẹ mgboro eze-ẹnyimu l’azụgbaru aswa, sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa:

“Gụbe Taya, ịinoduje eto ọnu ekfu

sụ lẹ ụma, l’ịima bẹ dzuru oke.

⁴Ọdo bụ l’ẹka i swechitaru bẹ nọ jeye l’eze-ẹnyimu.

Lẹ ndu tụru gụbe mkpụkpu ono

bẹ meru ghu ị bụru mma anyịganyi.

⁵Lẹ ndu kụru ụgbo-mini ghu bẹ bụ l’ugvu Seniru

bẹ whẹ gburu oshi payịnu gude kụa ya.

Itso ụgbo-mini ono bụ oshi sida, shi l’ugvu ugvu Libanọnu

bẹ whẹ gude pyịaru ghu iya.

⁶Ọ bụru oshi achị gvuru l’alị

Báshanu bẹ whẹ gude pyịshia eku-ụgbo ghu,

gude oshi sayịpuresu shi lẹ mgboro

eze-ẹnyimu Sayipurọsu gbaa ọma ụgbo-mini ghu ono,

bya arwụ-wheta iya ọkpu-enyi l’ọma.

⁷Ọkpobe ẹkwa-ọcha, shi lẹ

Íjiputu, a kparụ l’ọoma ụma b’e

tuberu l’eli ụgbo-mini ghu, l’ọoku pẹepee.

E tuberu iya t’ọ bụru ẹkwa-ọhubama ghu.

Iwhe e kweru l’ọma ụgbo-mini ono

tẹ mini ba abahụjeshi iya bẹ bụ

ẹkwa, dụ urwukpu-urwukpu mẹe ẹkwa ododo,

shi lẹ mgboro eze-ẹnyimu mkpụkpu Elisha.

⁸Unwoke Sáyịdonu mẹe unwoke Aruvadu

bẹ shi akpọru ghu ụgbo.

Unwoke Taya, bụ ndu marụ ome nka bụru whẹ

l’angakọtaru ghu ụgbo-mini.

⁹Ndu bụ ndu bụ ọgurenya

Gebalu, l’emeje nka bẹ l’etsoje ụgbo-mini ghu

akuchishiru ghu ẹka o fushihuru ụzo.

Iwhe bụ ụgbo-mini, nọkota l’eze-ẹnyimu,

mẹe ndu nọ l’ụgbo-mini ono bẹ

l’abyajẹ ghu ọzuta ngwa-aswa.

¹⁰“Ndu ojọgu shi Peshiya, mẹe ndu ọwhu shi Ludu, mẹe ndu ọwhu shi Putu bẹ shi tsoru bụru ndu ojọgu ghu. Ẹka whẹ koberu iwhe l’eegudeje ezeru ọgu mẹe okpu-igwe whẹ bụ l’eli mgbodo ghu. Whẹ meru ghu ị du ugvu. ¹¹Unwoke Aruvadu; whẹ lẹ ndu nke Helẹku bẹ bụ whẹ l’echeru ghu mgbodo ghu nche mgburumgburu. Unwoke Gamadụ bụru whẹ l’echeru ghu ụlo-eli ghu. Ẹka whẹ l’ekobeje iwhe l’eegudeje ezeru ọgu bụ l’eli mgbodo ghu mgburumgburu. Ọo whẹ meru, ụma, l’ịima dzua oke.

¹²“Ndu Tashishi bẹ gụ lẹ whẹ shi azụgburu aswa nkele i nweru ẹku, parụ ẹka l’ụdu iya l’ụdu iya. Whẹ shi egudeje mkpọla-ọcha, mẹe iwhe-igwe, mẹe igwe, l’eegudeje eme ogbongu mẹe tanjila zụ-nweta ghu ngwa-aswa. ¹³Ndu Jávanu, mẹe ndu Tubalu, mẹe ndu Mẹsheku bẹ gụ lẹ whẹ shi azụgburu aswa. Whẹ shi egudeje ohu mẹe arya, e meru l’ope zụ-nweta ghu ngwa-aswa. ¹⁴Ndu Betu-togarama shi akpụtaje ịnya ozhi, mẹe ịnya ọgu, mẹe ịnya-mulu, gude bya azụ-nweta ghu ngwa-aswa. ¹⁵Ndu Dedanu bẹ gụ lẹ whẹ shi azụgbaru aswa. Igweligwe ndu bu lẹ mgboro eze-ẹnyimu bẹ shi bụru ndu aswa ghu. Whẹ l’egudeje ọkpu-enyi mẹe oshi, l’eekuje eboni kfụa ụgwo iwhe whẹ zụru ghu. ¹⁶Ndu Arámu bẹ gụ lẹ whẹ shi azụgbaru aswa, o noo nkele iwhe l’iimefuta bẹ ha l’igwe. Ẹwhuru, l’ere ire, l’eekuje emeraludu, mẹe ẹkwa ododo, mẹe ẹkwa, a kparụ l’ọoma ụma, mẹe ẹkwa ọcha, mẹe ẹwhuru koralu, mẹe ẹwhuru rubyi bẹ whẹ shi egudeje bya azụ-nweta ghu ngwa-aswa. ¹⁷Ndu Juda mẹe ndu Ízurẹlu bẹ gụ lẹ whẹ shi azụgbaru aswa. Whẹ shi egudeje witi, shi lẹ Minitu, mẹe igberi, mẹe mmanụ-ẹnwu, mẹe mmanụ-olivu yẹle mmanụ, l’eehuje l’ẹka iwhe dụ bya azụ-nweta ghu ngwa-aswa.

¹⁸“Ndu Damásukọsu bẹ gụ lẹ whẹ shi azụgbaru aswa, o noo nkele iwhe l’iimefuta bẹ ha l’igwe; ọdo bụ l’i nweru ẹku, parụ ẹka l’ụdu iya l’ụdu iya. Ọ bụru mmẹe, shi lẹ Hẹlubonu mẹe ẹji-anụ ọcha bẹ whẹ shi egudeje bya azụ-nweta ghu ngwa-aswa. ¹⁹Ndu Danu mẹe ndu Jávanu, shi lẹ Uzalu bẹ l’azụje ghu ngwa-aswa. Whẹ shi egudeje igwe, gbuchafuru egbuchafu, mẹe oshi kasiya, mẹe kalamọsu bya azụ-nweta ghu ngwa-aswa. ²⁰Ndu Dedanu bẹ gụ lẹ whẹ shi azụgburu aswa ukpo, l’aawụ-kobeje l’eli ịnya nokoru agba. ²¹Ndu Arabụ mẹe ndu ishi ndu Keda l’owhu bẹ shi bụru ndu aswa ghu. Whẹ shi achịjeru atụru mẹe ebyila yẹle eghu gude bya azụ-nweta ghu ngwa-aswa. ²²Ndu Sheba mẹe ndu Raama, l’agba nghọ bẹ gụ lẹ whẹ shi azụgburu aswa. Whẹ shi egudeje ọkpobe mmanụ, l’eshi kwẹkwekwe mẹe ẹwhuru, l’ere ire mẹe mkpọla-ododo bya azụ-nweta ghu ngwa-aswa. ²³Ndu Háranu, mẹe ndu Kane, mẹe ndu Idẹnu, mẹe ndu l’agba nghọ, shi lẹ Sheba, mẹe ndu l’agba nghọ, shi lẹ Ashuru, mẹe ndu nke Kilimadu bẹ gụ lẹ whẹ shi azụgbaru aswa. ²⁴Ndu ono bẹ gụ lẹ whẹ shi azụgbaru aswa uwe, l’amakaa ụma, mẹe aswa ẹkwa, dụ urwukpu-urwukpu, mẹe aswa ẹkwa, a kparụ l’ọoma ụma, mẹe jịlajila ukpo, tụkashiru iwhe atụkashi, l’aatọje l’ọma-ụlo, mbụ ọwhu e gude eri, shihuru ike dzụa; lia ya nke kpụkpurukpu. ²⁵Ụgbo-mini Tashishi bẹ bụ gụbe Taya, bẹ whẹ l’anọduje evuru ngwa-aswa.

“Ị dụlewho g’ọo ụgbo-mini,

a tụru ivu chịmu-chịmu,

mbụ ụgbo-mini, a tụru ivu,

l’anyi dụkuu, l’oose l’eze-ẹnyimu.

²⁶Ndu l’akpọ ghu nụ bẹ kpọru

ghu je edegebe l’echi eze-ẹnyimu.

Whẹrewhere, shi ụzo ẹnyanwu-awata bya azụjashia ghu

l’echi eze-ẹnyimu ono.

²⁷Ẹku ghu g’ọ ha, mẹe ivu ghu, mẹe ngwa-aswa ghu,

mẹe ndu nọ l’ime ụgbo ghu mẹe ndu l’akpọru ghu ụgbo,

mẹe ndu l’emechijeru ghu ẹka ụgbo ghu l’eshi mini,

mẹe ndibe ghu, l’agba ikike nghọ,

mẹe ndu ojọgu ghu gẹ whẹ ha,

mẹe ndu lile, tso l’ụgbo ghu;

gẹ whẹ ha bẹ l’e-nwulahukota l’echi

eze-ẹnyimu mbọku, ụgbo l’e-kpu ghu.

²⁸Mkpu ndu l’angarụ ghu ụgbo ono l’e-chi l’e-me

ogbigbo eze-ẹnyimu anmakọta jijiji.

²⁹Ndu l’egudeje eku-ụgbo akpọ

ụgbo l’a-parụ ụgbo whẹ buhaa.

Ndu l’anga ụgbo-mini mẹe ndu l’etso ụgbo-mini ono

bẹ l’e-je akfụcha akfụcha l’agụga eze-ẹnyimu.

³⁰Whẹ l’e-chi mkpu ẹhu ghu, ryaa ẹkwa tsọo kụrukuru.

Whẹ l’e-kpota ivovonyi ghaa onwowhe l’ishi,

rwaswia onwowhe lẹ ntụ.

³¹Whẹ l’a-kpụshiru ghu ishi; woru uwe áwhụ yee.

Whẹ l’e-gude obu áwhụ jiru eji ryaa

ẹkwa ghu, gụa áwhụ tsọo kụrukuru.

³²Nteke whẹ l’a-rya ẹkwa ghu bẹ whẹ l’a-gụ áwhụ ẹhu ghu.

Whẹ l’a-gụru ghu egvu áwhụ sụ:

‘?Ọo mkpụkpu ole bẹ dụjeru g’ọo mkpụkpu Taya.

Mbụ mkpụkpu ono, e meru ọnu

bụru iya kpụrukujingu l’echi eze-ẹnyimu?’

³³Nteke e vu ngwa-aswa ghu daa eze-ẹnyimu

b’o rwuru igweligwe mba ẹka.

Ẹku ghu, parụ ẹka mẹe ngwa-aswa ghu

b’i gude mee t’ẹka jibe ndu eze nke mgboko.

³⁴Ntaa bẹ mini zụjashiwaru ghu l’ọhu eze-ẹnyimu.

Unu tụko gụ lẹ ngwa-aswa ghu

mẹe ndu tso ghu nụ bụru kpirichongu.

³⁵“Iwhe meru ghu nụ bẹ nwụkotaru ndu bu lẹ mgboro eze-ẹnyimu ishi kpaa. Ndu eze, l’achị whẹ nụ bẹ ẹhu nmakọtaru rwuurwuu l’ẹka egvu l’atsụ whẹ. Iwhu dụkota whẹ mgbanwụ mgbanwụ. ³⁶Ndu l’agba ikike nghọ lẹ mba gẹ mba ha bẹ l’awhụru ghu okpurọswa l’iwhe byarụ ghu nụ. Ntsụ-megvu l’a-kpa ghu nri l’ẹhu; o je l’e-me ghu tị ba adụhe adụdu owhu.”

Okfu e kfuru l’ishi eze ndu Taya

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe; kfuru onye ishi ndu Taya sụ iya l’ọ waa iwhe Nnajị-Ọha bụ Onye-Nwe-Ọha l’ekfu ndọwa: I gude ekuku, riru ghu obu sụ l’ọo ghu bụ Chileke; l’ị sụgaru l’oshi-eze Chileke l’echi eze-ẹnyimu. Obenu l’ọo madzụ mmaka b’ị bụ, ị tị bụdu Chileke, e gudezhiaro l’ịirije l’ị marụ iwhe g’ọo Chileke. ³Ịirije l’ị marụ ágụ karụ Daníyelu. Mbụ l’ọ tọ dụdu iwhe e domiru ghu edomi. ⁴L’ọo mmamagụ yẹle ẹnya, ị kwarụ bẹ meru i nweru ẹku. Ọ bụru iya meru i gude mkpọla-ododo mẹe mkpọla-ọcha dojia ụlo-ẹku ghu. ⁵L’ọo l’ị marụ ẹnya ọozu aswa bẹ meru ẹku ghu kabaa shi. Ẹku ọbu, i nweru mee ghu ekuku ria ghu obu.

⁶“Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Nkeshi ọwhu ị rịru l’i nweru mmamagụ g’ọo Chileke, ⁷bẹ mu l’e-rwuta ndu ọha ọdo; whẹ abya etso ghu ọgu. Ndu mu l’e-rwuta tẹ whẹ byakfuta ghu bẹ bụ ndu obu kagezhia ọta ivomini l’iwhe bụ mba gẹ mba ha. Whẹ l’a-mịta ogu-ịgba whẹ gude mebyishia ụma ono, l’ịima mẹe mmamagụ ono, i nweru. Ugvu ono, ị dụ bẹ whẹ l’a-gwọ lẹ ntụ. ⁸Whẹ l’e-nwuru ghu ye l’iduma, gụ anwụa ọnwu ike l’echi eze-ẹnyimu. ⁹?Ii-nwekwadua ọnu, l’ii-gude sụ l’ị bụ Chileke nteke ndu ono, l’e-gbu ghu nụ l’a-bya? Ndu ono, l’e-gbu ghu -byalẹwho bẹ l’ịi-marụ l’ọo madzụ mmaka b’ị bụ; l’ị tịi bụdu Chileke. ¹⁰Ịi-nwụ ọnwu gbarụ onye l’ẹte amaa Chileke l’ẹka ndu ọha ọdo ono. Nkele mbẹdua kfuakwaru nkemu. O nokwa iwhe Nnajị-Ọha bụ Onye-Nwe-Ọha l’ekfu ndono.”

Gẹ eze ndu Taya l’e-gude daa

¹¹Tọ dụ iya bụ, Onye-Nwe-Ọha byakwa ekfuru okfu yeru mu sụ: ¹²“Nwa ndiwhe; ryaa ẹkwa ẹhu eze ndu Taya. Sụ eze ono l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Ị bụ onye shi dzua oke l’ụzo fụtaru iwhe; bụru onye shi nweru mmamagụ shii; tẹmenu ị bụkwaruwho mma anyịganyi. ¹³Ẹka i shi nọdu bụ lẹ Idẹnu, bụ mgbabu Chileke. Ọo ẹwhuru, l’erekaa ire b’i shi gude chọo onwoghu mma, mbụ ẹwhuru Rubi, mẹe topazu, mẹe emeraludu, mẹe kirisolayitu, mẹe onikusu, mẹe jasupa, mẹe safaya, mẹe tọkwasu, mẹe berilu. Ọ bụru iwhe e meru lẹ mkpọla-ododo b’i gude memaa onwoghu. Ọo mbọku, e keru ghu b’e dozhiru iwhe lile ono doberu ghu. ¹⁴Ọo ghu bụ cherubu ono, a wụru mmanụ l’ishi t’o cheje nche, mbụ l’o ono iwhe ya wụru ghu mmanụ l’ishi t’ị bụru. I shi nọdu l’eli ugvu, dụ nsọ, bụ ugvu Chileke. I jeru ije l’echilabọ ẹwhuru l’ahụ ọku. ¹⁵Ẹ ta amajẹduru ghu ejo ẹka l’umere nkeshi mbọku, e keru ghu jeye nteke a whụru ejo-iwhe lẹ ndzụ ghu. ¹⁶Ikike nghọ, l’ịigba bẹ meru ghu i melahaa iwhe-kpanganga yẹle iwhe-dụ-ẹji. Ọo ya meru, mu chịfu ghu t’i gude iwhere lụfu l’ugvu Chileke; mu nwufu gụbe cherubu ono, l’eche nche t’ị lụfu l’ẹwhuru ono, l’ahụ ọku. ¹⁷Obu shiwa enyi ghu kiti kiti nkele ịima ụma. I gude l’ị bụ onye dụ ugvu mebyishia mmamagụ, i nweru. Ọo ya meru iwhe mu patarụ ghu tụa l’alị; woru ghu pafụ l’iwhu ndu eze tẹ whẹ kparụ ẹku nụ ẹnya whẹ. ¹⁸Ọo ikpoto ejo-iwhe, i megbaberu mẹe nghọ ono, i gude ụgho agba b’i gude merwushia ẹka i doberu nsọ. Ọ bụru iya meru; mu menwua ọku l’echilabọ ghu t’o kegbua ghu. Mu meru ghu; ị bụru ntụ, wụshiru l’ọma-alị l’ẹnya ndu whụru ghu nụ. ¹⁹Iwhe bụ mba, marụ ghu nụ b’ọ kpụberu ọnu mbụ iwhe meru ghu nụ. Ntsụ-megvu bẹ kwawaru ghu ngwa. O je l’e-me ghu tịi ba adụhe adụdu owhu.”

Okfu e kfuru l’ishi mkpụkpu Sáyịdonu

²⁰Tọ dụ iya bụ, Onye-Nwe-Ọha bya ekfuru okfu yeru mu sụ: ²¹“Nwa ndiwhe; ghaa iwhu lẹ mkpụkpu Sáyịdonu; gude nkfuchiru kfua gẹ l’ọo-dụ iya. ²²Sụ iya l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Lekwa lẹ mu nọokwaru ghu l’ejo oshi; gụbe Sáyịdonu. Iwhe mu l’e-me ghu bẹ ndu madzụ l’a-kwabẹ mu ugvu. Whẹ l’a-marụ l’ọo Mu bụ Onye-Nwe-Ọha nteke mu l’a-nụ mkpụkpu ono awhụ; goshi lẹ mu bụ onye dụ nsọ. ²³Mu l’e-me tẹ nchịkarehu byakfuta iya, mmee-ọchi atụko echi-ụzo iya sọgbakota. Odzu madzụ l’a-tụ gbaagbaa l’ime mkpụkpu ono, mbụ ndu e gude ogu-ịgba gbugbushia lẹ mkpụkpu ono mgburumgburu. Nteke ono bẹ whẹ l’a-marụ l’ọo Mu bụ Onye-Nwe-Ọha.

Aa-gọru ọnu-ọma nụ ndu Ízurẹlu

²⁴“Ndu mba ono, kpọru Ízurẹlu ashị, bụ ndu buwheru whẹ mgburumgburu taa abụheduru ogvu adzụkashi whẹ, whẹ ta abụheru agarambo alakashị whẹ. Whẹ l’a-marụ l’ọo Mu bụ Nnajị-Ọha, bụ Onye-Nwe-Ọha.”

²⁵Ọ waa iwhe Nnajị-Ọha bụ Onye-Nwe-Ọha l’ekfu ndọwa: “Nteke mu l’e-shi lẹ mba gẹ mba ha ono, a chịkashiru ndu Ízurẹlu dulatawhu whẹ azụ bẹ mu l’e-shi l’ẹhu whẹ goshi mba gẹ mba ha ono lẹ mu bụ onye dụ nsọ. Nteke ono bẹ ndu Ízurẹlu l’e-buru l’alị ẹka whẹ ono, mu nụru onye ozhi mu, bụ Jékọpu. ²⁶Whẹ l’e-buru tụsaru ẹhu l’ẹka ono; nọdu iya kwashịa uwhu; yeshia ya oshi vayịnu. Whẹ l’e-buru tụsaru ẹhu nteke mu l’a-nụ ndu mba ono, shi kpọo whẹ ashị awhụ, mbụ ndu ono, buwheru whẹ mgburumgburu. Whẹ amarụ l’ọo Mu bụ Onye-Nwe-Ọha bụru Chileke whẹ.”

Okfu e kfuru l’ishi ndu Íjiputu

¹O rwua l’awha nke iri, g’ọnwa iri dụ l’abalị iri l’ẹbo, Onye-Nwe-Ọha bya ekfuru okfu yeru mu sụ: ²“Nwa ndiwhe; ghazhiaru Fero, bụ eze ndu Íjiputu iwhu; gude nkfuchiru kfua gẹ l’ọo-dụ iya, kfukwawho gẹ l’ọo-dụ ndu Íjiputu gẹ whẹ ha. ³Kfua sụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Lekwa mu nọokwaru ghu l’ejo oshi; gụbe Fero, bụ eze ndu Íjiputu, mbụ gụbe oke ejo agiyi ono, zẹe l’echi ọnu-iyi ghu ono. Ị sụru l’ẹnyimu Nayịlu bẹ bụ ghu nwe iya; l’ọo gụbedua meru iya doberu onwoghu. ⁴Ọle mu l’e-gude aga-ẹma kota ghu agba; mee t’ẹma, bu l’ọnu-iyi ghu ono nyapọ-geeru ghu anyapọru l’ẹkiri. Mu l’e-kota ghu kofuta l’ọnu-iyi ghu; gụ l’ẹma ọbu, nyapọ-geeru ghu anyapọru l’ẹkiri. ⁵Mu l’e-wheta gụ l’ẹma ono, shi l’ọnu-iyi ghu tụa l’echi-ẹgu. Ẹka l’ii-je adaa bụ l’owhoroto ẹgu. Ọ tọ dụdu onye l’a-pata ghu eje elili. Mu l’a-parụ ghu haarụ anụ-ẹgbudu mẹe ụnwu-ẹnu tẹ whẹ kpaa ghu nri l’ẹhu. ⁶Nteke ono bẹ ndu lile, bu lẹ Íjiputu l’a-marụ l’ọo Mu bụ Onye-Nwe-Ọha.

“Ishi bụru oshi ikpuruma l’ẹhu ndu Ízurẹlu. ⁷O shi abụje, whẹ je tẹ whẹ kụbe ghu ẹka, gụ agbakwohu yijashia whẹ ẹka. O shi abụje whẹ je tẹ whẹ dawhube ghu, gụ agbajihu, whẹ akabarahụ daa dakwoo ọkpu-ukfu. ⁸Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-gude ogu-ịgba bya ghu l’ẹhu, gbugbushia iwhe bụ madzụ mẹe élwù, i nweru. ⁹Alị Íjiputu bẹ ẹgbara l’a-kfụ, ya abụru ochuwhu. O noo nteke whẹ l’a-marụ l’ọo Mu bụ Onye-Nwe-Ọha. Nkeshi ọwhu ị sụru l’ẹnyimu Nayịlu bẹ bụ ghu nwe iya, l’ọo gụbedua meru iya, ¹⁰ọo ya bụ lẹ mu bụwa ọgu swiru gụ l’ẹnyimu ghu ono. Alị Íjiputu l’owhu bẹ mu l’e-me t’ọ bụru okorobo-ẹgu; mee t’ẹgbara kfụa ya, watazhiawho lẹ mkpụkpu Migudolu jeye lẹ mkpụkpu Sevene, mbụ jeyewaro l’oge alị ndu Kushi. ¹¹Madzụ-igbalekọma ta abyadụ l’e-gude ọkpa iya ghaa ya; anụ-ẹgbudu ta abya l’e-gude ọkpa iya ghaa ya. E te ebudu iya ebu ụkporo awha labọ gberegedengu. ¹²Mu l’e-me t’ẹgbara kfụa l’alị Íjiputu l’iwhe bụ alị ẹgbara kfụjewaru. Ụkporo awha ugbo labọ bẹ ẹgbara, l’a-kfụ lẹ mkpụkpu dụ-gee ya nụ l’iwhe bụ mkpụkpu ẹgbara kfụjewaru. Mu l’a-chịkashi ndu Íjiputu ono lẹ mba gẹ mba ha, tụkashia whẹ nnanụ nnanụ tẹ whẹ dzuru alị, dụ l’iche l’iche.

¹³“Ọle ọ waa iwhe Nnajị-Ọha bụ Onye-Nwe-Ọha l’ekfu ndọwa: Ụkporo awha ugbo labọ ono gvụlewho bẹ mu l’e-shi l’iwhe bụ mba ẹka ono, a chịru ndu Íjiputu laa dulatawhu whẹ azụ. ¹⁴Mu l’e-dulata ndu Íjiputu ono, a kpụru lẹ ndzụ; duru whẹ dobewhu azụ l’alị Paturọsu, bụ alị ẹka whẹ futaru. Whẹ l’a-nọdu l’ẹka ono bụru alị-eze, ẹnya lwarụ. ¹⁵Ọo yẹbe Íjiputu bẹ ẹnya l’a-kagee alwalwa l’alị-eze nọnu. O too wolitahedu ishi ọdo l’ẹka mba gẹ mba ha nọ. Mu l’e-me whẹ tẹ whẹ lwaa alị shii nke ọwhu bụ l’o too nwehedu mba, whẹ bya l’a-chịbaa ọdo. ¹⁶Ọ tọ dụhedu iwhe Íjiputu bya l’a-bụbaa nke t’ọzo-ụlo ndu Ízurẹlu kpọkwaduru obu yeru iya ọdo. Ndu Ízurẹlu l’e-gudeje ọnodu Íjiputu, nọ l’iya nyata l’ọo ejo-iwhe bẹ whẹ meru nteke ono whẹ shi kpọru obu yeru whẹ achọ eyemẹka l’ẹka whẹ. O noo nteke whẹ l’a-marụ l’ọo Mu bụ Nnajị-Ọha, bụ Onye-Nwe-Ọha.”

Nebukadineza, bụ eze ndu Bábyilọnu l’a-lwụta Íjiputu

¹⁷O be l’abalị mbụ l’ọnwa mbụ l’awha nke ụkporo l’ẹsaa; Onye-Nwe-Ọha bya ekfuru okfu yeru mu sụ: ¹⁸“Nwa ndiwhe; Nebukadineza, bụ eze ndu Bábyilọnu bẹ chịtaru ndu ojọgu iya je alwụshi ndu Taya ọgu nke ike l’ike. Oke ivu, ndu ojọgu ono vuru mee ishi whẹ bụkotaru ishi-ọnma; ukuvu dakọta whẹ akịri. Ọle e megeeru Nebukadineza yẹle ndu ojọgu iya ta adụ urwu, whẹ ritaru l’ọgu ono, whẹ lwụshiru ndu Taya. ¹⁹Ọo bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-woru alị Íjiputu nụ Nebukadineza, bụ eze ndu Bábyilọnu. Nebukadineza l’e-gwo ẹku ndu Íjiputu; vụa arya whẹ avụ gwoo whẹ tụtua. Iwhe ono, o gworu l’a-bụru iwhe l’oo-gude kfụa ndu ojọgu iya ụgwo. ²⁰Mu nụwaru iya Íjiputu t’ọ bụru ụgwo ozhi iya nkele ozhi yẹle ndu ojọgu iya jeru bụ mu bẹ whẹ jeru iya. O nokwa iwhe Nnajị-Ọha bụ Onye-Nwe-Ọha l’ekfu ndono.

²¹“Mbọku ono bẹ mu l’e-me t’ike dụ ndu Ízurẹlu; mee gụbe Izikẹlu t’ị saa ọnu asa kfuaru whẹ okfu. O noo nteke whẹ l’a-marụ l’ọo Mu bụ Onye-Nwe-Ọha.”

Onye-Nwe-Ọha l’a-gwa Íjiputu ọchi

¹O noo ya, Onye-Nwe-Ọha bya ekfuru okfu yeru mu sụ: ²“Nwa ndiwhe; gude nkfuchiru kfua sụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa:

“Chia mkpu sụ

Nshọbukwa mbọku ono!”

³O noo nkele mbọku ọbu dụakwa ntse,

mbọku nke Onye-Nwe-Ọha bẹ dụakwa ntse.

Mbọku ono l’a-whụ-chi awhụ-chi g’ọo urwukpu.

Ọo-bụru oge mba nọnu l’e-je nịngaa.

⁴Ogu-ịgba l’a-dakfuta Íjiputu.

Iwhe-ọtsulanu adụ lẹ Kushi.

Nteke ono bẹ odzu ndu e gburu

egbu l’a-da gbaagbaa lẹ Íjiputu,

a tụko ẹku whẹ gwokota.

Obodo ono ezekposhihu jeye l’ukfu iya.

⁵“ ‘Ndu Kushi, mẹe ndu Putu, mẹe ndu Ludu, mẹe ndu Arabụ gẹ whẹ ha, mẹe ndu Libyiya mẹe iwhe bụ ndu alị, whẹ lẹ whẹ gbarụ ndzụ gẹ whẹ ha bẹ ogu-ịgba l’a-takọta ishi whẹ lẹ ndu Íjiputu.

⁶“ ‘Ọ waa iwhe Onye-Nwe-Ọha l’ekfu ndọwa: Ndu tụru ike yeru Íjiputu bẹ l’a-da. Ndu ono, bụ agbarike, o gude anga l’ụnga abụru swachamu. Ee-shi lẹ Migudolu gbua whẹ lẹ mma jeye lẹ Sevene. O nokwa iwhe Nnajị-Ọha bụ Onye-Nwe-Ọha l’ekfu ndono.

⁷“ ‘Íjiputu bẹ ẹgbara l’a-kfụ l’iwhe bụ alị, ẹgbara kfụjewaru. Mkpụkpu dụ-gee ya nu l’e-ze dakpọshihu l’iwhe bụ mkpụkpu ọdo, zejewarunu dakpọshihu. ⁸O noo nteke whẹ l’a-marụ l’ọo Mu bụ Onye-Nwe-Ọha, mbụ nteke mu l’a-nwụru ọku ye lẹ Íjiputu, ndu tụru ike yeru iya abụru aryaka-eryune.

⁹“ ‘Mbọku ono bẹ mu l’a-chịru ndu ozhi ye l’ụgbo-mini zhia whẹ tẹ whẹ je eyee ndu Kushi egvu, mbụ ndu ono, tsụru onwowhe l’ẹnya ono. Mbọku Íjiputu l’a-la l’iswi bẹ iwhe-ọtsulanu l’a-byakfuta ndu Kushi ono. Mbọku ọbu l’abyakebekwa abyakebe.

¹⁰“ ‘Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mu l’e-shi l’ẹka Nebukadineza bụ eze ndu Bábyilọnu mee t’ikpoto ndu Íjiputu tọhu. ¹¹Nebukadineza l’onwiya yẹle ndu ojọgu iya, bụ ndu obu kagezhia ọta ivomini lẹ mba gẹ mba ha bẹ l’ee-duru bata l’alị ono tẹ whẹ laa ya l’iyi. Whẹ l’a-mịta ogu-ịgba whẹ tso ndu Íjiputu ọgu, gbushia whẹ kụbe l’alị ono. ¹²Mu l’a-mịshikota mini, dụ l’ẹnyimu Nayịlu. Mu eworu alị ono ree ndu l’eme ejo-iwhe. Mu l’e-shi l’ẹka ndu ọha ọdo mee t’ẹgbara kfụa l’alị ono yẹle iwhe lile dụ iya nụ. Mbẹdua bụ Onye-Nwe-Ọha kfuakwaru nkemu.

¹³“ ‘Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mu l’e-mebyishikota iwhe bụ ntẹkpe. Mu atụko agwa dụ lẹ mkpụkpu Mẹmufisu wofukota. L’alị Íjiputu bẹ l’ẹte enwehedu onye ishi ọdo. Mu l’e-woru ọtsu-egvu ghaa l’alị Íjiputu. ¹⁴Mkpụkpu Paturọsu bẹ mu l’e-me t’ọ bụru ochuwhu. Mu anwụru ọku ye lẹ mkpụkpu Zowanu t’ọ dzụa ya, nụa mkpụkpu Tebẹsu awhụ. ¹⁵Mu l’e-kpukpushi mkpụkpu Sinu oke ẹhu-eghughu mu, mbụ mkpụkpu ono a tụru o shihu ike lẹ Íjiputu. Mu l’e-mekwawho t’ikpoto ndu mkpụkpu Tebẹsu tọhu. ¹⁶Mu l’a-nwụru ọku ye lẹ Íjiputu. Iwhe-ọtsulanu, parụ ẹka bẹ l’a-byakfuta ndu mkpụkpu Sinu. Mgbodo mkpụkpu Tebẹsu bẹ l’ee-tsufushi etsufushi. Mkpụkpu Mẹmufisu eburu lẹ mkpamẹhu mbọkumboku. ¹⁷Unwokorọbya mkpụkpu Ọ́nu mẹe ndu nke mkpụkpu Pyi-bẹsetu bẹ l’ee-gude ogu-ịgba gbushia. Ndu mkpụkpu ono l’owhu bẹ l’aa-kpụkota lẹ ndzụ. ¹⁸Ụboku l’a-gbakọta ọochi lẹ mkpụkpu Tehafinehesu nteke mu l’e-mebyi ike ọchichi ndu Íjiputu, mee t’ike ono whẹ gude anga l’ụnga gvụ. Urwukpu l’a-whuchi Íjiputu. Ụnwada iya l’owhu abụru ndu a kpụru lẹ ndzụ. ¹⁹O noo áwhụ mu l’a-nụ ndu Íjiputu ndono. O noo nteke whẹ l’a-marụ l’ọo Mu bụ Onye-Nwe-Ọha.’ ”

Aa-nyakwoshi eze ndu Íjiputu ọkpu-ẹka

²⁰O noo ya, o rwua l’awha nke iri lẹ nnanụ g’ọnwa mbụ dụ l’abalị ẹsaa, Onye-Nwe-Ọha bya ekfuru okfu yeru mu sụ: ²¹“Nwa ndiwhe; ya nyakwookwaru Fero bụ eze ndu Íjiputu ọkpu-ẹka. O too nwedu onye keberu iya iwhe l’ẹka ọbu, to nwe onye gbarụ iyẹ ya agbagba kpaa ya iwhe nke ọwhu l’oo-mehu, shihu iya ike; nke t’ọ dụ ike parụ ogu-ịgba. ²²Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu: Mu bụakwa ọgu swiru Fero bụ eze ndu Íjiputu. Mu l’a-nyakwoshi iya ọkpu-ẹka, mbụ lẹ mu l’a-nyakwo iya ẹka ọwhu dụ iya ree, nyakwobaa ya ẹka ọwhu a nyakwohawaru iya, mu emee t’ogu-ịgba dafụ iya l’ẹka. ²³Ndu Íjiputu bẹ mu l’a-tụkashi tẹ whẹ dzuru mba gẹ mba ha, chịkashia whẹ tẹ whẹ dzuru alị dụ iche iche. ²⁴Mu l’e-me t’ọkpu-ẹka shia eze ndu Bábyilọnu ike, mu eworu ogu-ịgba mu dẹe ya l’ẹka. Ọwhube Fero bẹ mu l’a-nyakwoshi ọkpu-ẹka anyakwoshi, ya anọdu l’iwhu eze ndu Bábyilọnu tsụa ude g’ọo onye e tsugbuwhodoru ndzụ ubele. ²⁵Mu l’e-me t’ọkpu-ẹka shia eze ndu Bábyilọnu ike, mee tẹ nke Fero kụdashihu. Nteke mu l’e-woru ogu-ịgba mu dẹe eze ndu Bábyilọnu l’ẹka, ya ewheeru iya ndu Íjiputu; o noo nteke whẹ l’a-marụ l’ọo Mu bụ Onye-Nwe-Ọha. ²⁶Mu l’a-tụkashi ndu Íjiputu nnanụ nnanụ tẹ whẹ dzuru mba gẹ mba ha, chịkashia whẹ tẹ whẹ dzuru alị dụ iche iche. Nteke ono bẹ whẹ l’a-marụ l’ọo Mu bụ Onye-Nwe-Ọha.”

Íjiputu dụ g’ọo oshi sida

¹O noo ya, o rwua l’abalị mbụ l’ọnwa ẹto l’awha nke iri lẹ nnanụ, Onye-Nwe-Ọha bya ekfuru okfu yeru mu sụ mu: ²“Nwa ndiwhe; kfuru Fero bụ eze ndu Íjiputu yẹle ụnukurunu ndu nkiya sụ whẹ:

“?Ọo onye bẹ l’aa-sụ l’ọ parụ ẹka g’ọo ghu?

³Leduwho Asiriya, ọ bụ

akparakpa oshi sida dụ l’ugvu ugvu Libanọnu,

nweru ẹkali l’amakaa ụma,

kpuru gayii sachia ọswa ọbu o gvuru.

O ngefuru engefu ha ogologo je asụ-kfuru l’urwukpu.

⁴Ọo mini bẹ meru iya o vuta evuta.

Ọ bụru mini shi l’ime alị bẹ meru iya o tsee ogologo.

Ẹnyimu mini bẹ l’asọ l’ẹka oshi ono gvuru,

ọ bụru ẹka ono bẹ mini shi asọru oshi lile dụ l’ọswa ono.

⁵Ọo iwhe ono meru o ngefu

kakọta oshi lile, dụ l’ọswa ono l’eli.

Ukfu iya bẹ ha kpigidimu, ẹkali iya tsee ogologo,

o noo nkele mini ha shii l’ẹka ono.

⁶Ọo l’ẹkali iya bẹ ẹnu lile l’akpajẹ ẹkfunu.

Anụ-ẹgbudu bụru l’ukfu iya bẹ whẹ l’azụje ụnwu.

Aguguru iya kpuchia oke mba oke mba.

⁷Oshi ono bẹ ha shii ama ụma, ẹkali iya tsekota ogologo

nkele ọ chịru ọgbaragbu iya wẹe l’ẹka mini ono ha shii.

⁸Oshi sida dụkota lẹ mgbabu Chileke ta atụduru iya.

Oshi payịnu te enwedu ukfu g’ọo nke iya.

Oshi pulenu bẹ ẹkali iya ta atụduru nkiya.

O to nwedu oshi dụ lẹ mgbabu Chileke l’atụru iya l’ụma.

⁹Ọo mbẹdua bẹ meru iya t’ọ majẹ

ụma ono, mokashia ẹkali l’igweligwe.

Oshi lile dụ lẹ Idẹnu l’awhụru iya

ụwhu ẹnya, mbụ oshi dụkota lẹ mgbabu Chileke.

¹⁰“Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu sụ: O ngefuru engefu ha l’eli vua je asụ-kfuru l’urwukpu, gude nke l’iya ha l’eli eku onwiya ekuku; nkeshi ọwhu ọ dụ nno ¹¹bẹ mu l’e-woru iya ye l’ẹka onye ọkpehu kagee lẹ mba gẹ mba ha t’ọ gwaa ya ndọgolo yẹle ejo-ememe l’oome ha. Mu jịkawaru iya ajịka. ¹²Ndu ọha ọdo bụ ndu mba, obu tarụ mini l’a-sakwoshi iya asakwoshi wụshi parụ iya haa. Ẹkali iya l’a-tọgbo-geeru l’ugvu mẹe lẹ nsụda. A nyakwoshia ụnwu ẹkali iya wụshi l’ẹka mini dụ l’alị ono. Ndu mgboko l’owhu l’e-shi lẹ mkpula aguguru iya wụfukota parụ iya haa. ¹³Ọo l’eli oshi ono ẹka iya ọwhu ọ darụ ada bẹ ụnwu-ẹnu l’e-begojeru, anụ-ẹgbudu agba ẹkali iya gorogoro. ¹⁴Ọo ya bụ, nke ọwhu t’ọ bo dụhe oshi gvuru lẹ mgboro mini l’e-vuta ha ogologo ọdo, mbụ vua je asụ-kfuru l’urwukpu. T’ọ bọ dụhekwa oshi nọ l’ẹka l’ọomita mini l’e-vuta ha l’eli ẹgube ono ọdo nkele ọnwu bẹ dụkwa swiru whẹ nụ, mbụ l’ọo alị-maa bẹ whẹ l’ala, whẹ l’alakfu ndu nwụhuru anwụhu bu l’alị-maa, whẹ lẹ ndu l’ala l’iduma.

¹⁵“Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mbọku, oshi ono l’a-la alị-maa bẹ mu l’e-me tẹ mini ime alị kpuchia ya shi nno ryaa ẹkwa iya. Mu l’e-me t’ẹnyimu haa asọso, mee tẹ ngele tashịhu. Mu l’e-gude anwụhu oshi ono nwụhuru mee t’ọochi gbakọta l’ugvu ugvu Libanọnu, mu emekwawho t’oshi dụkota l’ọswa ono lwakọta ẹkwo. ¹⁶Ụda oshi ono l’a-da bẹ mu l’e-gude mee tẹ mba gẹ mba ha nmakọta jijiji, nteke mu l’e-nwuta iya tụa l’alị-maa t’ọ lakfu ndu nọ l’iduma. Oshi lile, shi lẹ mgbabu Idẹnu mẹe ẹguru oshi kagezhia ree, shi l’ugvu ugvu Libanọnu, bụ oshi nọwaa anọno l’alị maa, mbụ oshi lile, shi amịta mini ree bẹ obu l’a-bya eguzeta. ¹⁷Ndu lile, shi nọdu lẹ mkpula aguguru iya bẹ l’e-tsoru iya lashia alị-maa lakfu ndu e gude ogu-ịgba gbushia, mbụ ndu ono shi eyeru iya ẹka.

¹⁸“?Ndẹe oshi l’atụru ghu l’ọma ụma mẹe l’ọdu biribiri l’iwhe bụ oshi Idẹnu? Obenu lẹ gụ l’oshi Idẹnu bẹ l’aa-tụko nwuta ye l’ime ime alị-maa bụ ẹka gụ lẹ ndu l’ẹte amaa Chileke mẹe ndu e gude ogu-ịgba gbushia nọdukota. Onye ọ bụ l’ẹhu bụ Fero yẹle ụnukurunu ndu nkiya. O nokwa iwhe Nnajị-Ọha bụ Onye-Nwe-Ọha l’ekfu ndono.”

Egvu-aawhụ, a gụru l’ishi Fero

¹L’abalị mbụ l’ọnwa iri l’ẹbo l’awha nke iri l’ẹbo bẹ Onye-Nwe-Ọha kfuru yeru mu sụ: ²“Nwa ndiwhe; gụa egvu-áwhụ l’ishi Fero bụ eze ndu Íjiputu. Kfuru yeru iya sụ iya: Iiwotaje onwoghu l’ị bụ oduu nke mba gẹ mba ha. Ọle ọo g’ejo oke-agiyi bu l’eze-ẹnyimu dụ bụ lẹge ị dụ. I heru gabaa hefuta l’ẹnyimu gude ọkpa swọrua mini ẹnyimu ọbu, ọ wata oshi uwuru-uwuru.

³“Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Mu l’e-gude ikpoto mba meru ụgbu nmata ghu. Whẹ l’e-gude ụgbu mu ono lọo ghu whele whele lọfuta. ⁴Mu l’a-tụ ghu l’ọma alị, mu l’a-tụ ghu owhelẹka tuwha l’ọma ẹgu. Mu l’e-me t’ụnwenu gẹ whẹ ha bya eripyabe ghu, mu emee t’anụ-ẹgbudu gẹ whẹ ha bya avụa ghu kpatakpata. ⁵Anụ ghu bẹ mu l’a-tụkashi nnanụ nnanụ l’ugvu; mu emee t’odzu ghu nọdu lẹ nsụda koo eko gbafushihu. ⁶Mmee, shi ghu l’ẹhu alwashị bẹ mu l’a-gbakọta l’alị ono jeye l’ugvu. Ẹka mini shi asọshi bẹ l’a-bụkota mmee nkụchi. ⁷Mu menyile ghu whọ ẹnya, mu eworu iwhe guchia akpamigwe mee tẹ kpokponde nọ iya nụ gbakọta tsụrikiti. Mu egude urwukpu kpuchia iwhu ẹnyanwu, mee t’ọnwa be echihe. ⁸Iwhe lile nọ l’igweli, bụ iwhe l’emeje t’iwhoro dụ bẹ mu l’e-me t’ọ gbakọtaru ghu ọochi. Mu l’e-me t’ẹkpuroochi sọ-kputa alị ghu. O nokwa iwhe Nnajị-Ọha bụ Onye-Nwe-Ọha l’ekfu ndono.

⁹“Mu l’e-me t’obu dụ ikpoto mba ẹji nteke mu l’e-me t’ọla-liswi zụpyabe ghu l’echilabọ mba dụ l’iche l’iche, mbụ l’alị ẹka l’ịitii mahaa. ¹⁰Mba dụ l’iche l’iche bẹ mu l’e-me t’ishi nwụa kpaa l’iwhe byarụ ghu nụ. Ndu-eze whẹ bẹ mu l’e-me t’ẹhu nmakọta anma l’ọnodu l’eje abyakfuta ghu, mbụ nteke ono mu l’a-nọdu l’iwhu whẹ wheeru ghu ogu-ịgba mu. Mbọku l’ịi-da bẹ bụ e gudekwadua iya l’ẹka ekfu ẹhu awata whẹ anmanma, onyenọnu awata ọtsu egvu nkele ọ tọo madụ iwhe l’e-me ndzụ iya.

¹¹“Nkele ọ waa iwhe Nnajị-Ọha bụ Onye-Nwe-Ọha l’ekfu: Ogu-ịgba eze ndu Bábyilọnu bẹ l’a-bya erwukfuta ghu iya. ¹²Mu l’e-me t’ogu-ịgba ndu ono ọkpehu dụ taa ishi ụnukurunu ndu nkeghu. Mbụ l’ọo ndu mba ono, bụ ndu akpọ-ego-lanụ bẹ unu lẹ whẹ l’e-me. Iwhe ono Íjiputu gude eku onwiya eku bẹ whẹ l’e-me t’ọ bụru iwhe kpụru ẹwho l’alị. Ụnukurunu ndu Íjiputu abụru kpurupyata gẹ whẹ ha. ¹³Eswi iya g’ọ ha bẹ mu l’e-gbushikota lẹ mgboro mini. Madzụ ta abyadụ l’e-gudebaa ọkpa iya swọrua mini ono ọdo, eswi ta abya l’e-gudebaa ọkpa iya swọrua ya ọdo. ¹⁴O noo nteke mu l’e-me tẹ mini whẹ doo rịsaa, mee t’ẹnyimu whẹ sọje gborogboro g’ọo mmanụ ólivu. O nokwa iwhe Nnajị-Ọha bụ Onye-Nwe-Ọha l’ekfu ndono. ¹⁵Ọo nteke mu l’e-me Íjiputu t’ọ bụru ẹka ẹgbara kfụru woru alị ono mee t’ọ bọ dụhe iwhe l’a-dụ iya nụ, mbụ l’ọo nteke mu l’e-gbushikota ndu lile bu l’ẹka ono, nteke ono bẹ whẹ l’a-marụ l’ọo Mu bụ Onye-Nwe-Ọha.

¹⁶“O noo bụ egvu-áwhụ ụnwada shi lẹ mba gẹ mba ha l’a-nọdu agụru iya ndono. Whẹ l’a-gụ iya l’ishi Íjiputu yẹle ụnukurunu ndu Íjiputu. O nokwa iwhe Nnajị-Ọha bụ Onye-Nwe-Ọha l’ekfu ndono.”

Egvu-áwhụ, a gụru l’ishi Íjiputu

¹⁷O noo ya, o be g’ọnwa mbụ l’awha nke iri l’ẹbo dụ l’abalị iri l’ise, Onye-Nwe-Ọha bya ekfuru okfu yeru mu sụ: ¹⁸“Nwa ndiwhe; ryaa ẹkwa ẹhu ụnukurunu ndu Íjiputu. Mee whẹ tẹ whẹ tsoru ndu mba ono a marụ ẹwha whẹ wụba l’alị-maa, lakfu ndu ọwhu nọhawa anọ lẹ nsụ. ¹⁹Sụ whẹ agha:

“?Ọo onye bẹ unu ka ọma ụma?

Unu wụba l’alị-maa t’unu lẹ ndu l’ẹte amaa Chileke tụko wụshiru.

²⁰Whẹ l’a-dashị l’ẹka ndu ono e gburu l’ogu-ịgba darụ. A mịtaakwaru ogu-ịgba ọbu, t’a kpụfuta iya yẹle ụnukurunu ndu nkiya ọbu. ²¹Ndu ọkpehu, nọkota l’alị-maa l’e-kfu okfu ẹhu Íjiputu yẹle nke ndu ono tụru ike yeru iya sụ: Whẹ wụbatawaru l’alị-maa ọbu bya awụshiru, mbụ ndu ono l’ẹte amaa Chileke bụ ndu e gburu l’ogu-ịgba.

²²“Asiriya bẹ nọ l’ẹka ono yẹle ndu ojọgu iya l’owhu. Ilu ndibe iya e gburu egbugbu bẹ nọ-wheru iya mgburumgburu, mbụ ndu ono e gude ogu-ịgba gbushia. ²³Ilu whẹ bẹ bụ l’ọkpurohu nsụ b’a tụshiru iya. Ikpoto ndu nkiya bẹ zẹ-wheru ilu iya ono mgburumgburu. Gẹ whẹ ha b’e gbukotaru egbugbu, mbụ l’ọo ogu-ịgba bẹ takọtaru ishi whẹ bụ iya bụ ndu ono, shi emeje tẹ ọtsu-egvu dụ l’alị ndu nọ ndzụ.

²⁴“Ílamu bẹ nọkwawho l’ẹka ono yẹle ụnukurunu ndu nkiya, nọ-wheru ilu iya mgburumgburu. Gẹ whẹ ha b’e gbukotaru egbugbu, mbụ l’ọo ogu-ịgba bẹ takọtaru ishi whẹ. Whẹ bahụru l’alị-maa lẹ ba ama Chileke bụ iya bụ ndu ono, shi emeje tẹ ọtsu-egvu dụ l’alị ndu nọ ndzụ. Whẹ vuru iwhere whẹ gẹ whẹ vu iya tsoru ndu ono l’ala lẹ nsụ. ²⁵A gbarụ ugbooshi doberu ndu Ílamu l’ẹka ndu ono e gburu egbugbu nọ. Ụnukurunu ndu nke whẹ bẹ ilu whẹ nọ-wheru mgburumgburu. Gẹ whẹ ha bụkota ndu l’ẹte amaa Chileke, e gude ogu-ịgba gbushia. Whẹ l’emeje t’ọtsu-egvu dụ l’alị ndu nọ ndzụ, obenu lẹ whẹ vuwa iwhere whẹ gẹ whẹ vu iya tsoru ndu l’ala lẹ nsụ. Ẹka e doberu whẹ bụ l’ẹka e doberu ndu e gburu egbu.

²⁶“Mẹsheku mẹe Tubalu bẹ nọkwawho l’ẹka ono mẹe ụnukurunu ndu nkewhe, nọ-wheru ilu whẹ mgburumgburu. Gẹ whẹ ha bẹ bụkota ndu l’ẹte amaa Chileke e gude ogu-ịgba gbushia, nkele whẹ shi emeje tẹ ọtsu-egvu dụ l’alị ndu nọ ndzụ. ²⁷?Tọ bụdu ẹka lanụ bẹ whẹ lẹ ndu ojọgu ono l’ẹte ama Chileke wụshiru, mbụ ndu chị ngwọgu whẹ l’ẹka lashia alị-maa? E swiberu whẹ ogu-ịgba whẹ l’ishi woru iwhe whẹ l’egudeje egbobuta onwowhe tukobegee whẹ l’ọkpu, nkele ndu ojọgu ono shi emeje t’ọtsu-egvu dụ l’alị ndu nọ ndzụ.

²⁸“Gụbedua l’onwoghu, bụ Fero bẹ l’aa-nyakwohu ẹbo wụshi l’ẹka ndu l’ẹte amaa Chileke wụshiru. Gụ lẹ ndu ono e gude ogu-ịgba gbushia awụshiru l’ẹka lanụ.

²⁹“Edọmu bẹ nọkwawho l’ẹka ono yẹle ndu-eze iya mẹe ndụ-ishi iya gẹ whẹ ha. Ọkpehu shi dụ whẹ, ọle whẹ wụshiwaru l’ẹka ndu ono e gude ogu-ịgba gbushia wụshiru. Ndu whẹ lẹ whẹ wụshiru l’ẹka lanụ bẹ bụ ndu l’ẹte amaa Chileke, mbụ ndu nọhawa anọ lẹ nsụ.

³⁰“Ndu ishi ndu ụzo isheli gẹ whẹ ha mẹe ndu Sáyịdonu l’owhu bẹ nọkotakwawho l’ẹka ono. Whẹ vu iwhere onwowhe gẹ whẹ vu iya tsoru ndu e gburu egbu laa, nkele whẹ shi egudeje ọkpehu dụ whẹ nụ eye madzụ egvu. Whẹ lẹ ndu e gburu egbu bẹ wụshiru l’ẹka lanụ lẹ whẹ ba ama Chileke. Whẹ vuru iwhere onwowhe gẹ whẹ vu iya tsoru ndu l’ala lẹ nsụ.

³¹“Fero yẹle ụnukurunu ndu ojọgu iya -whụle whẹ whọ, Fero egude iya dụa onwiya obu l’ụnukurunu ndu nkiya ono e gude ogu-ịgba gbugbushia. O nokwa iwhe Nnajị-Ọha bụ Onye-Nwe-Ọha l’ekfu ndono.

³²“Ọo ezhi-okfu lẹ mu meru Fero, o mee tẹ ọtsu-egvu dụ l’alị ndu nọ ndzụ, ọle Fero yẹle ụnukurunu ndu nkiya bẹ l’aa-wụshi l’ẹka ndu l’ẹte amaa Chileke wụshiru, mbụ ndu ono, e gude ogu-ịgba gbushia. O nokwa iwhe Nnajị-Ọha bụ Onye-Nwe-Ọha l’ekfu ndono.”

Izikẹlu bụ onye-nche ọzo-ụlo ndu Ízurẹlu

(Izk. 3:16-21)

¹O noo ya, Onye-Nwe-Ọha bya ekfuru okfu yeru mu sụ: ²“Nwa ndiwhe; kfuru ndibe unu sụ whẹ: Ọ bụru lẹ mu gude ogu-ịgba abyakfuta alị ono ọgu, ndu alị ono -wofuta onye lanụ lẹ ndibe whẹ t’ọ bụru onye-nche, ³onye ono -lee ẹnya whụa ogu-ịgba ọbu gẹ l’ooje abyakfuta alị ono, bya egbua opu-ọgu gude karụ ndu alị ono, ⁴onye -nụru ụda opu-ọgu ono jịka ọngabe nchị, ọgu ono bya bya eria onye ọbu, ọ kwa onye ọbu bẹ vu ọchi onwiya. ⁵Eshi-ọwhu ọ nụru ụda opu-ọgu ono jịka ọngabe nchị bẹ kwa iya l’e-vuru ọchi onwiya. Ọ bụ l’ọ -ngarụ nchị mẹe ya adzọo onwiya ndzụ. ⁶Ọle ọ -bụru l’onye-nche ọbu bẹ whụru ogu-ịgba ono gẹ l’ooje abya jịka l’iya te egbudu opu-ọgu gude karụ ndu madzụ; ọgu ono bya bya eria madzụ l’ime whẹ bẹ onye ọbu, o riru l’e-vukwaru ejo-iwhe o megbaberu nwụhu, ọle ọ kwa onye-nche ono bẹ mu l’a-jị ajị mmee ya.

⁷“Sụa nwa ndiwhe, mu meekwaru ghu onye-nche nke ọzo-ụlo ndu Ízurẹlu. Ọo ya bụ lẹ nteke ị nụjeru okfu shi mu l’ọnu, nmakwaru whẹ ọkwa mu nmarụ. ⁸Mu -sụ onye l’eme ejo-ememe: ‘Gụbe onye ejo-ememe-e, ị nwụhufutajekwa,’ tịi karụ iya t’ọ parụ iwhe l’oome haa bẹ onye ono, l’eme ejo-ememe l’e-vukwaru ejo-iwhe o megbaru nwụhu, ọle ọ kwa gụbedua bẹ mu l’a-jị ajị mmee ya. ⁹Nteke bụ l’ị nmarụ onye l’eme ejo-ememe ọkwa t’ọ parụ ejo-iwhe l’oome haa too kwe, ya evuru ejo-iwhe iya nwụhu, ọle gụbedua bẹ gbawarụ ishi onwoghu.

Okfu ẹka madzụ

¹⁰“Nwa ndiwhe; kfuru ọzo-ụlo ndu Ízurẹlu sụ whẹ agha: Ntekenteke bẹ unu l’asụje: Mmeswe anyi yẹle iwhe-dụ-ẹji, anyi megbaberu bẹ bụru anyi oke ivu. O mewaru anyi kpọjoshihu. ?Ndẹe gẹ ndzụ l’e-me dụ anyi? ¹¹Sụ whẹ lẹ mbẹdua bụ Nnajị-Ọha, bụ Onye-Nwe-Ọha l’ekfu sụ: Mu vuru-a ishi mu gẹ mu vu iya, bẹ ọnwu onye ejo-ememe nwụru ta atsọjekwa mu ụtso, ọ chia t’onye l’eme ejo-ememe parụ ejo-iwhe l’oome haa bya anọdu ndzụ. Unu ghaa umere! Unu ghaa umere parụ ejo-iwhe unu l’emegbabe haa! ?Ndẹnu g’e meru unu hatachia ọnwu, unubẹ ọzo-ụlo ndu Ízurẹlu?

¹²“Nwa ndiwhe; kfuru ndu alị unu sụ whẹ agha: Iwhe dụ chịriri, onye dụ chịriri meru ta abyakwa l’adzọ iya m’a -nọnyaa o melahaa iwhe-dụ-ẹji, ejo-ememe onye ejo-ememe meru te eme iya t’ọ laa l’iswi m’a -nọnyaa ọ ghaa umere parụ ejo-ememe l’oome haa. Onye dụ chịriri nọnyaa melahaa iwhe-dụ-ẹji bẹ l’ete gudekwa nkele o shi bụru onye dụ chịriri haa ya t’ọ nọdu ndzụ. ¹³A makwarụ-a lẹ mu sụru l’onye dụ chịriri bẹ nọdufutaje ndzụ, ọle ọ nọdu lẹ ya dụ chịriri melahaa ejo-iwhe bẹ l’ooto nwedua iwhe dụ chịriri ono o shi emeje, l’aa-nyatakwadụ ilile. Oo-vuru ejo-iwhe l’oome nwụhu. ¹⁴A makwarụ-a lẹ mu sụru l’onye ejo-ememe bẹ nwụhufutaje nụ, ọle ọ parụ iwhe-dụ-ẹji l’oome melahaa iwhe kfụru nhamụnha mẹe iwhe dụ chịriri, ¹⁵ọ -bụru l’onye ejo-ememe ono bẹ wotaru iwhe ọ natarụ ndu o jeru ụgwo lẹ mkpalẹka nụ-whuru whẹ azụ, wolahu iwhe o zhitaru l’oshi, bya edobelahaa iwu, l’anụ ndzụ, to mehe ejo-iwhe, ọo ya bụ l’ọo-nọdufutaje ndzụ, ọ tọ byadụ l’anwụhu. ¹⁶O to nwedu iwhe-dụ-ẹji o megbaberu dụ ọwhu a bya l’anyatakwadu gụru kpua ya ọdo. Eshi-ọwhu o mewaru iwhe kfụru nhamụnha mẹe iwhe dụ chịriri b’ọ nọdufutaje ndzụ.

¹⁷“Ọle ọobuje ndibe unu nọdu whẹ asụ l’iwhe Onye-Nwe-Ọha l’eme ta akfụduru nhamụnha, l’ẹka ọo bụkwanu whẹbedua gbẹ-chia eme iwhe l’ẹte akfụaru nhamụnha. ¹⁸Onye dụ chịriri nọnyaa parụ ome iwhe dụ chịriri haa melahaa ejo-iwhe bẹ l’ọo-nwụhukwa l’ejo-iwhe ọbu. ¹⁹Nteke bụ l’onye ejo-ememe bẹ nọnyaru parụ ome ejo-ememe iya haa melahaa iwhe kfụru nhamụnha mẹe iwhe dụ chịriri bẹ l’ọo-nọdukwa ndzụ l’iswi iya. ²⁰Obenu l’unubẹ ọzo-ụlo ndu Ízurẹlu l’abụje unu nọdu unu asụ l’iwhe Onye-Nwe-Ọha l’eme ta akfụduru nhamụnha. Mu l’e-kpe onyenọnu l’ime unu ikpe g’iwhe o meru dụ dụ.”

E zhiru ozhi lẹ Jerúsalẹmu darụ

²¹O be l’awha nke iri l’ẹbo a kpụru anyi lẹ ndzụ, mbụ g’ọnwa iri dụ l’abalị ise, nwoke lanụ, gbarụ ọso lẹ Jerúsalẹmu byakfuta mu bya asụ mu: “Jerúsalẹmu bẹ dakpọshihuakwaru nụ.” ²²O noo ya, l’urwẹnyashi ụnyawhu iya tẹmenu nwoke ono gbarụ ọso ono byakfuta mu bẹ ẹka Onye-Nwe-Ọha dụhawa mu l’ẹhu. Onye-Nwe-Ọha bya akụha mu ọnu, mu kfulahaa okfu, tẹmenu nwoke ono byakfutade mu l’ụtsu iya. Ọo ya bụ, ọnu kụhaa mu, mu bụ-buhu onye l’ete ekfu okfu.

Iwhe-dụ-ẹji ndu Ízurẹlu meru

²³Tọ dụ iya bụ, Onye-Nwe-Ọha bya ekfuru okfu yeru mu sụ: ²⁴“Nwa ndiwhe; ndu bu l’ẹka ono, dakpọshihuru adakpọshihu l’alị Ízurẹlu bẹ l’anọduje ekfu sụ: ‘Ébirihamu shi bụru onye lanụ; oshi nwekotaru alị-a. Obenu l’anyịbedua bẹ ha l’igweligwe; e wowaru alị ono nụ anyi t’ọ bụru oke-iwhe anyi nwe enwe.’

²⁵“Ọo ya bụ, sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: G’unu bụ ndu l’atajẹ anụ mmee, unu woru ẹnya swọbe l’agwa unu, tẹmenu unu bụru ndu l’egbu ọchi, ?unu rịru l’alị ono l’a-bụkwaduru nkunu? ²⁶G’ọ bụ l’ogu-ịgba unu bẹ unu keru ike yeru, unu l’eme mkparwụ dụ iche iche, onyenọnu l’emebyishi nyee nwoke ibe iya. ?Unu rịru l’alị ono l’a-bụkwaduru nkunu?

²⁷“Sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu: Mu vuru-a ishi mu gẹ mu vu iya, bẹ ndu ono, kwaburu l’ẹka ono, dakpọshihuru adakpọshihu ono bẹ bụ ogu-ịgba l’a-ta ishi whẹ. Ndu ọwhu nọ l’ọma ẹgu bẹ mu l’e-woru nụ anụ-ẹgbudu t’ọ vụa whẹ kpatakpata. Ndu ọwhu nọ l’ẹka a tụshiru ike mẹe ndu ọwhu nọ l’ọgba bẹ bụ ejo-ẹhu-ba-dụ-mma l’e-gbushi whẹ. ²⁸Alị ono bẹ mu l’e-me t’ọ bụru ochuwhu, ẹgbara kfụru. Ike iya ono o gude anga l’ụnga abụru iwhe gvụru agvụ. Ẹgbara l’a-kfụ l’ugvu nọkota lẹ Ízurẹlu nke ọwhu bụ l’ọ tọ dụdu onye l’a-ghakwadu agha. ²⁹O noo nteke whẹ l’a-marụ l’ọo Mu bụ Onye-Nwe-Ọha bụ iya bụ nteke mu l’e-me t’alị ono bụru ochuwhu, ẹgbara kfụru l’iswi mkparwụ dụ iche iche whẹ megbaberu.

Iwhe Onye-Nkfuchiru l’ekfu bẹ Ízurẹlu ta angabẹdu nchị

³⁰“A bya lẹ gụbedua nwa ndiwhe, ndu alị unu bẹ dọkoberu lẹ mgboro mkpọkoro mgbodo ono mẹe l’ọnu ụlo l’ọnu ụlo ekfu okfu ẹhu ghu. Onyenọnu nọdu ya asụ ibe iya: ‘Unu bya anụ okfu shi Onye-Nwe-Ọha l’ọnu!’ ³¹Tọ dụ iya bụ, whẹ zeru gbigbigbi byakfuta ghu ẹgube whẹ l’abyajẹhawaa, ndibe mu ono bya adọru ghu l’iwhu ngabẹ ghu nchị l’olu, ọle whẹ l’anụ-gejee ya whẹ ajịka iya ememe. Ọo l’ọnu bẹ whẹ l’asụje lẹ whẹ yeru mu obu, ọle ẹka obu whẹ l’adụje bụ gẹ whẹ l’e-shi ria urwu l’ụzo wuru-wuru. ³²L’ẹnya nkewhe bẹ iwhe ị dụ g’ọo ya nwẹkiya bụ onye l’agụ egvu, l’emeje ẹhu-ụtso, mbụ onye olu-egvu iya dụ ree, bụru onye marụ ọku ngwa-egvu. Nkele whẹ l’anụ-geje iwhe i kfuru whẹ ajịka iya ememe. ³³Ọo nteke iwhe ono megeeru vụa gẹ l’ọo-vụ ẹgube whọ, tẹmenu whẹ ebebe marụ l’onye-nkfuchiru Chileke bẹ shi nọduta l’echilabọ whẹ.”

Onye l’eche atụru yẹle atụru iya

¹Tọ dụ iya bụ, Onye-Nwe-Ọha bya ekfuru okfu yeru mu sụ: ²“Nwa ndiwhe; gude nkfuchiru kfua gẹ l’ọo-dụ ndu l’eche Ízurẹlu g’ọo onye l’eche atụru. Gude nkfuchiru sụ whẹ l’ọ waa iwhe Nnajị-Ọha bụ Onye-Nwe-Ọha kfuru ndọwa: Nshọ ndu l’eche Ízurẹlu g’ọo onye l’eche atụru, mbụ ndu ono, bụlewho ẹhu whẹ bẹ whẹ marụ nwẹkiya. ?Tọ gbadụ nke tẹ ndu l’eche atụru bụru atụru whẹ bẹ whẹ l’eleta ẹnya azụ-ji ẹwho? ³Unu l’agbẹje aamị whẹ ẹra, ebushi whẹ ẹji l’ẹhu gude akwashị uwe, egbushi ndu ọwhu ẹba tsụru l’ẹhu. Obenu l’unu te eletadu ẹnya azụ-ji igwe atụru ono ẹwho. ⁴Ndu ọwhu ike l’adụa bẹ unu l’ete mejedu t’ike dụ. Ndu ọwhu ẹhu l’eme bẹ unu l’ete emejedu t’ẹhu dụ whẹ mma. Ndu ọwhu mekaru iwhe bẹ unu l’ete ekechijedu iwhe l’ẹka ọbu, whẹ mekaru iwhe ọbu. Ndu ọwhu kpawhuhuru akpawhuhu bẹ unu l’ete eduwhujedu azụ, ndu ọwhu tuwhahuru etuwhahu bẹ unu l’ẹte achọjedu. Ọo ẹka ike yẹle ẹhuka bẹ unu gude achị whẹ. ⁵Ọo lẹ whẹ te enwedu onye l’eche whẹ nụ g’ọo onye l’eche atụru meru iwhe whẹ gbakashịhuru je abụru nri ụnwu anụ-ẹgbudu l’eri. ⁶Ụnwu atụru mu bẹ jekashihuru nnanụ nnanụ dzuru ugvu ugvu mẹe ugvu hagee l’eli. Ụnwu atụru mu bẹ jekashihuru nụ dzuru mgboko l’owhu, tọ dụ onye l’akpa ishi whẹ, tọ dụ onye l’achọ whẹ nụ.

⁷“Ọo ya bụ, unubẹ ndu l’eche atụru ono, unu nụa iwhe Onye-Nwe-Ọha l’ekfu. ⁸Nnajị-Ọha, bụ Onye-Nwe-Ọha l’ekfu sụ: Mu vuru-a ishi mu gẹ mu vu iya, bẹ eshi-ọwhu igwe atụru mu bẹ l’enwedua onye l’eche whẹ nụ, anụ nọdu egbushi whẹ, mbụ whẹ bya aghọo nri ụnwu anụmanu, mbụ l’eshi ọwhu ndu l’eche atụru nkemu l’ẹte akpajẹ igwe atụru mu ono ishi, whẹ bụru ọmaru ẹhu whẹ l’ẹte amaa nke igwe atụru mu ono, ⁹eshi-ọwhu ọ dụ nno bụkwa t’unubẹ ndu l’eche atụru ono nụa okfu Onye-Nwe-Ọha l’ekfu. ¹⁰Ọ waa iwhe Nnajị-Ọha bụ Onye-Nwe-Ọha l’ekfu ndọwa: Unu ledunu, mu bụakwa ọgu swiru ndụ-nche atụru ono. Mu l’a-jị whẹ ajị igwe atụru mu ono. Mu l’e-me tẹ whẹ chebuhu igwe-atụru ono, mee tẹ ndụ-nche atụru ono ba adụhe ike anụ onwowhe nri. Mu l’a-nafụta atụru mu ono l’ọnu whẹ, nke ọwhu whẹ l’ẹte abụru whẹ nri.

Onye-Nwe-Ọha bụ Onye-Nche atụru ọma

¹¹“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Ledunu, ọo mbẹdua l’e-gude ẹka mu je achọo igwe-atụru mu ono chọta whẹ. ¹²Ọo ẹgube onye l’eche atụru l’achọje atụru iya, jekashihuru ejekashihu chọta bụ gẹ mbẹdua l’a-chọ atụru nkemu chọta. Mu l’a-nafụtakota whẹ l’ẹka ono whẹ jekashihuru je anọdu mbọku ono, mgboko whuchiru awhuchi gbaa tsụkiriti. ¹³Mu l’e-dufutakota whẹ lẹ mba ẹka ono whẹ nọkota, shi l’obodo whẹ nọ rwukobe whẹ, duru whẹ dulata l’alị nkewhe. Ẹka mu l’a-nọdu eche whẹ bụ l’ọma ugvu ugvu dụ lẹ Ízurẹlu mẹe l’agụga agụga mini mẹe l’ẹka ndu madzụ bukota ebu l’alị ono. ¹⁴Ẹka mu la-nọdu eche whẹ bụ l’ẹka irwu, dụ ree dụ. Ọ bụru l’eli ugvu Ízurẹlu bẹ whẹ l’a-nọduje akpa nri. Whẹ l’a-dọshije l’alị irwu, dụ ree dụ l’ẹka ono. Whẹ l’a-tajẹ nri l’ẹka nri ha shii l’ugvu ugvu dụ lẹ Ízurẹlu. ¹⁵Ọo mbẹdua l’e-gude ẹka mu eche atụru mu, ọ bụru mu l’a-chịjeru whẹ je edobe l’ọdu. O nokwa iwhe Onye-Nwe-Ọha l’ekfu ndono.

¹⁶“Ndu ọwhu tuwhahujeru nụ mu achọo whẹ, ndu ọwhu l’akpawhuhu akpawhuhu mu eduwhu whẹ azụ. Ndu ọwhu mekaru iwhe mu ekebeje whẹ iya iwhe. Ndu ọwhu ike l’adụa mu emejee t’ike dụ whẹ. Ndu ọwhu ha okporokpo mẹe ndu ọwhu ike dụ bẹ mu l’e-mebyije emebyi. Mu l’a-nọdu eche atụru ono ẹgube ọ gbarụ t’e cheje whẹ.

¹⁷“A bya l’unubẹdua bụ atụru nkemu, ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-kperu atụru l’atụru ibe iya ikpe, kpeeru ebyila yẹle mkpi ikpe. ¹⁸Ọkpobe nri ono unu l’eri bẹ unu l’atụ ọko nke t’unu gude ọkpa dzọtoshia nri ọwhu unu riwhodoru eriwhodo. Ẹguru mini unu l’angụ bẹ unu l’atụ ọko nke t’unu gude ọkpa swọrushia ọwhu unu ngụ-whodoru. ¹⁹Ọ nụ iya bụ t’atụru mu taa nri ọwhu unu gude ọkpa dzọtoshia, ngụa mini ọwhu unu gude ọkpa swọrushia.

²⁰“Ọo ya bụ l’ọwaa iwhe Nnajị-Ọha bụ Onye-Nwe-Ọha l’ekfuru whẹ ndọwa: Mbẹdua l’onwomu l’e-kperu atụru ọwhu ha okporokpo yẹle atụru ọwhu jọru ẹhu ikpe. ²¹Eshi-ọwhu unu gude mgburẹku mẹe ukuvu unu enwungashi atụru ọwhu ike l’adụa, gude mpu unu adụkashi whẹ ẹhu jeye unu chịkashia whẹ nnanụ nnanụ, ²²bẹ mu l’a-bya adzọfuta igwe-atụru mu ono t’a ha whẹ emegbu. Mu l’e-kperu atụru l’atụru ibe iya ikpe. ²³Mu l’e-wofuta onye lanụ t’ọ bụru onye-nche atụru ono. Onye ọbu l’a-bụru onye-ozhi mu Dévidi, bụ onye l’a-nọdu eleta whẹ ẹnya. Ọo-nọdu eleta whẹ ẹnya bụru onye l’a-nọdu eche whẹ ọkpobe echeche. ²⁴Mbẹdua, bụ Onye-Nwe-Ọha bẹ l’a-bụru Chileke whẹ. Onye-ozhi mu Dévidi abụru onye-ishi whẹ. Mbẹdua bụ Onye-Nwe-Ọha kfuakwaru nkemu.

Ọgbandzu Ẹhu-guu

²⁵“Mu lẹ whẹ l’a-gba ndzụ ẹhu-guu, mu achịaru whẹ ejo anụ-ẹgbudu l’alị ono nke ọwhu whẹ l’e-buru l’echi-ẹgu kuje mgbẹnya l’ẹgbudu tụsaa ẹhu. ²⁶Mu l’a-gọru whẹ ọnu, gọru ọnu nụ ẹka nọ-whekotaru ugvu mu mgburumgburu. Mu l’e-meje tẹ mini chịaru whẹ lẹ mgbe iya. Mini ọbu l’a-bụru mini ọnu-ọma. ²⁷Oshi, gvuru l’ẹgu l’a-nọdu amịkaa mebyi, alị emehuje iwhe e meberu iya. Whẹ anọdu l’alị whẹ tụsaa ẹhu. Whẹ l’a-marụ l’ọo Mu bụ Onye-Nwe-Ọha nteke mu l’a-gbajishi odogoro igwe ono e yeru whẹ, mbụ nafụta whẹ l’ẹka ndu ono gbarụ whẹ ohu ono. ²⁸Mba gẹ mba ha ta abyadụ l’a-lwụbaa whẹ alwụlwu ọdo, anụ-ẹgbudu alị ono ta abya l’e-gbushibaa whẹ ọdo. Whẹ l’e-buru tụsaa ẹhu. O to nwedu onye bya l’e-ye whẹ egvu. ²⁹Mu l’a-nụ whẹ alị, a ma ama, l’oomehuje iwhe nke ọwhu bụ l’ẹgu ta abyadụ l’e-mebaa whẹ l’alị ono, ndu mba gẹ mba ha ta abya l’a-jabaa whẹ ewenu ọdo. ³⁰Ọo ya bụ nggẹ whẹ amarụ lẹ mbẹdua, bụ Onye-Nwe-Ọha bụru Chileke whẹ bẹ nọ swiru whẹ nụ, ọwaa lẹ whẹbedua bụ ọzo-ụlo ndu Ízurẹlu bẹ bụ ndibe mu bẹ whẹ bụ. O nokwa iwhe Nnajị-Ọha bụ Onye-Nwe-Ọha l’ekfu ndono.

³¹“Unubẹ atụru nkemu, bụ atụru mu l’azụ azụ, ọo madzụ bẹ unu bụ, mbẹdua bụru Chileke unu. O nokwa iwhe Nnajị-Ọha bụ Onye-Nwe-Ọha l’ekfu ndono.”

E kfuru iwhe l’e-me ndu Edọmu

¹O noo ya, Onye-Nwe-Ọha bya ekfuru okfu yeru mu sụ: ²“Nwa ndiwhe; ghaa iwhu l’ụzo ugvu Siye gude nkfuchiru kfua gẹ l’ọo-dụ iya. ³Iwhe l’ii-kfuru iya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu bụakwa ọgu swiru ghu gụbe ugvu Siye. Mu je l’a-tụchi ẹka mu daa ghu l’ẹhu, mee ghu t’ị bụru ochuwhu ẹgbara kfụru. ⁴Mkpụkpu ghu l’owhu bẹ mu l’e-me t’ẹgbara kfụkota, gụ abụru ochuwhu. Ọo ya bụ nggẹ ị marụ l’ọo Mu bụ Onye-Nwe-Ọha.

⁵“Eshi-ọwhu ị kpọru ndu Ízurẹlu ashị l’eshi edenwede, shi nno nwuru whẹ ye l’ogu-ịgba nteke whẹ nọ l’iwhe-ọtsulanu, mbụ nteke awhụwhu, whẹ l’ata kabaa shii. ⁶Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu vuru-a ishi mu gẹ mu vu iya, bẹ mu l’e-dobe ghu nke egbugbu, ọ bụru ndu mgbugbu madzụ l’a-nọdu achị ghu ọso. Ọo ya bụ l’eshi ọwhu ikpe ọchi nmarụ ghu bẹ bụ ọchi l’a-nọ achị ghu ọso. ⁷Ugvu Siye bẹ mu l’e-me t’ọ bụru ochuwhu ẹgbara kfụru, gbushikota ndu l’eje eje alwa alwa l’ime iya. ⁸Iwhe mu l’a-kụbe l’ugvu ghu bụ odzu ndu e gburu egbu. Ndu e gburu l’ogu-ịgba l’a-da gbaagbaa l’ugvu ghu mẹe lẹ nsụda nsụda ghu mẹe l’ọnu mini ghu. ⁹Mu l’e-me ghu t’ị bụru ochuwhu jeyewaroya, mkpụkpu ghu ta adụ onye bya l’e-bu iya ebu ọdo. O noo nteke l’ịi-marụ l’ọo Mu bụ Onye-Nwe-Ọha.

¹⁰“Eshi-ọwhu i gudewaa ọnu ghu sụ lẹ mba labọ-ọ mẹe mkpụkpu nọkota iya nụ bẹ l’a-bụru nkeghu, mbụ l’ịi-natakọta whẹ tẹ whẹ bụru nkeghu, e gudezhiaro lẹ Onye-Nwe-Ọha nọ l’ẹka ono, ¹¹ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu vuru-a ishi mu gẹ mu vu iya, bẹ mu l’e-meru goshi ghu l’ẹhu-eghughu ono yẹle ẹnya-kfụrukfuru ono i gude mkpọmashi, ị kpọru whẹ dobe whẹ l’ẹhu ono. Mu l’e-me t’unu marụ onye mu bụ nteke mu l’a-wata unu ọnu áwhụ. ¹²Nteke ono bẹ mu l’e-mekwawho t’ị marụ lẹ Mu bụ Onye-Nwe-Ọha bẹ nụkotaru ejo-okfu ono i kfuru tukobe ugvu ugvu Ízurẹlu nteke ono ị sụru: ‘E mewaru whẹ, whẹ bụru ochuwhu, e wowaru whẹ nụ anyi t’anyi lwụa alwụlwu.’ ¹³Mu nụkotaru g’i gude etokashiru mu ọnu, mbụ g’i gude ekfutoshibe mu.

¹⁴“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-me ghu t’ị bụru ochuwhu nggẹ eliwhe l’owhu etee ẹswa iya. ¹⁵Ọo g’i teru ẹswa nteke oke-iwhe ọzo-ụlo ndu Ízurẹlu shi bụru ochuwhu, o noo gẹ mu l’e-me ghu ndono. Ịi-bụru ochuwhu mbụ gụbe ugvu Siye mẹe alị ndu Edọmu l’owhu. Ọ noo nteke unu l’a-marụ l’ọo Mu bụ Onye-Nwe-Ọha.

Okfu e kfuru nụ ugvu, nọkota lẹ Ízurẹlu

¹“Gụbe nwa ndiwhe gude nkfuchiru kfuru yeru ugvu, nọkota lẹ Ízurẹlu sụ whẹ: Unubẹ ugvu Ízurẹlu, unu nụa iwhe Onye-Nwe-Ọha l’ekfu. ²Ọ waa iwhe Nnajị-Ọha, bụ Onye-Nwe-Ọha l’ekfu ndọwa: Eshi-ọwhu ndu ọhogu l’akụru unu hụu asụje: ‘Ntaa b’ọ waa anyi nwekota ugvu ugvu ono shi lẹ ndụ-ichee.’

³“Ọo ya bụ t’i gude nkfuchiru kfuru yeru whẹ sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Eshi-ọwhu whẹ meru unu, unu daburu iwhoro, mbụ mee unu emerekete, unu bụru ndu mba gẹ mba ha ọdo nwe l’ẹka mẹe ndu ụnwu eliwhe gude ekfu okfu, gude unu asụ-whe asụlasu. ⁴Ọo ya bụ, unubẹ ugvu ugvu Ízurẹlu, unu nụa iwhe Nnajị-Ọha bụ Onye-Nwe-Ọha l’ekfu. Ọ waa iwhe Nnajị-Ọha bụ Onye-Nwe-Ọha l’ekfuru eze ugvu nọnu, mẹe ụnwu-ugvu nshịi mẹe ọnu mini, mẹe nsụda nsụda, mẹe ochuwhu ẹgbara kfụkotaru, je akpaa l’iwhe bụ mkpụkpu, a gbakashịhuru agbakashịhu, mbụ onoya mba ọdo, gbakọtaru iya mgburumgburu lwụru alwụlwu, bya emee ya iwhe ọchi.

⁵“Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu: Ọ kwa okoowhoo mu, l’enwu tawhu tawhu bẹ mu gude ekfu okfu-a amabẹru mba ọdo, dụ iche iche mẹe ndu Edọmu l’owhu. Whẹ gude ẹhu-ụtso dụ whẹ l’obu gude lẹ mu dụ whẹ nde l’ẹnya woru alị mu mee iwhe ẹka whẹ, nke ọwhu whẹ l’a-lwụ ẹka élwù l’akpajẹ nri, dụ iya nụ alwụlwu.

⁶“Ọo ya bụ, gude nkfuchiru kfua nke ẹhu alị Ízurẹlu, kfuru nụ eze ugvu nọnu, mẹe nwugvu nshịi, mẹe ọnu mini, mẹe nsụda nsụda, nọkota iya nụ sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Ọ kwa okoowhoo, shi l’oke ẹhu-eghughu mu bẹ mu gude ekfu okfu-a, o noo nkele mba gẹ mba ha bẹ menukawaru unu iwhe-iwhere. ⁷Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu: Mu ribuakwaru iya lẹ nte sụ l’iwhe bụ mba ono, nọ-whekotaru unu mgburumgburu bẹ l’ee-me iwhe-iwhere nkewhe.

Alwalwa ndu Ízurẹlu

⁸“Ọle unubẹdua, bụ ugvu ugvu Ízurẹlu bẹ l’e-mokashi ẹkali, unu amịaru ndibe mu bụ Ízurẹlu mebyi, nkele o too tehedu ẹnya ntaa whẹ alwa l’uwhu. ⁹Nkele mu tụwaru ike yeru unu, mu je l’a-gharụ unu iwhu. Aa-kọ unu akọko kụa unu akụku g’ọo mebyi iwhe. ¹⁰Mu l’e-me tẹ madzụ kabaa shii l’ime unu, mbụ ọzo-ụlo ndu Ízurẹlu gẹ whẹ hakọta. Mkpụkpu unu bẹ l’ee-buchishikota ebuchishi, e woru ẹka dakpọshihuru adakpọshihu tụkwa. ¹¹Madzụ mẹe élwù bẹ mu l’e-me tẹ whẹ kabaa shii l’ime unu, whẹ azụa azụzu ka l’igwe. Mu l’e-me t’e buchia unu ẹgube ono o shi dụ lẹ mbụ. Mu l’e-me t’iwhe dụru unu lẹ ree amamẹ g’o shi dụhawaru unu. Ọo ya bụ nggẹ unu amarụ l’ọo Mu bụ Onye-Nwe-Ọha. ¹²Mu l’e-me tẹ madzụ bụ iya bụ ndu Ízurẹlu jee ije l’eli unu. Whẹ l’e-nweru unu l’ẹka, unu abụru oke-iwhe whẹ. Unu ta abyadụ l’a-gbabẹ whẹ ẹka nwa ọdo.

¹³“Ọo ya bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa: Nkeshi ndiwhe l’ekfu l’unu l’egbu madzụ bya eme alị unu ume nwa, ¹⁴ọo ya bụ l’unu ta abyadụ l’e-gbubaa madzụ ọdo, unu ta abyahẹ l’e-mebaa alị unu ume nwa ọdo. O nokwa iwhe Nnajị-Ọha bụ Onye-Nwe-Ọha l’ekfu ndono. ¹⁵Mu te ekwehedu t’unu gude nchị unu nụbaa ejo-okfu mba gẹ mba ha l’ekfuru unu ọdo, mbụ lẹ mu te ekwehedu tẹ whẹ mee unu iwhe-iwhere ọdo, tẹmenu mu te ekwehe tẹ mba unu kpokuta iwhe daa ọdo. O nokwa iwhe Nnajị-Ọha bụ Onye-Nwe-Ọha l’ekfu ndono.”

Ishi ahụhu, a hụru ndu Ízurẹlu

¹⁶O noo ya, Onye-Nwe-Ọha byakwa ekfuru okfu yeru mu sụ: ¹⁷“Nwa ndiwhe; nteke ọzo-ụlo ndu Ízurẹlu shi buru l’alị ẹka whẹ bẹ whẹ gude umere whẹ mẹe iwhe whẹ meru merwushia alị ono. Umere whẹ bẹ shi dụ mu oyi-oyi g’ọo ẹgube-ẹ nwanyị l’anọ lẹ nsọ. ¹⁸Ọo ya bụ, mu kwee tukoshi whẹ oke ẹhu-eghughu mu l’iswi ọchi, whẹ gbugbaberu l’alị ono mẹe nke ọgwa agwa ono, whẹ gude merwushia alị ono. ¹⁹Mu kwee chịkashia whẹ, whẹ dzuru mba dụ iche iche, whẹ gbakashịhu dzuru mkpụkpu lẹ mkpụkpu. Ikpe mu kperu whẹ bẹ mu kperu whẹ iya g’umere whẹ dụ mẹe g’iwhe whẹ meru gbarụ. ²⁰Whẹ bya ejerwua lẹ mba ono, iwhe bụ ẹka whẹ jeru, whẹ awata omebyishi ẹwha mu dụ nsọ, nkele ndu madzụ kfulahaaru sụ: ‘Tọ dụ ndu ọbu kuru onwowhe ndibe Onye-Nwe-Ọha dụ ẹgube-ẹ, whẹ fụtakwaro l’alị iya.’ ²¹Iwhe rwuru mu l’ẹhu bụkwa nke ẹwha mu ono dụ nsọ ono, ndu Ízurẹlu meru ọ bụru iwhe l’eekfubyishi ekfubyishi lẹ mba ono whẹ larụ alala ono.

Chileke l’a-gbanwe ọnodu ndu Ízurẹlu

²²“Ọo ya bụ t’ị sụ ọzo-ụlo ndu Ízurẹlu l’ọ waa iwhe Nnajị-Ọha bụ Onye-Nwe-Ọha l’ekfu: Ọ tọ bụkwa iswi ẹhu unubẹ ọzo-ụlo ndu Ízurẹlu bẹ mu gude abya ome iwhe-e, ọ kwa iswi ẹwha mu ono dụ nsọ, unu mebyishiru lẹ mba ono unu larụ ala. ²³Mu l’e-meru goshi l’ọ dụ nsọ mbụ oke ẹwha mu ono e mebyishiru lẹ mba gẹ mba ha, mbụ ẹwha ono unu mebyishiru l’ẹka whẹ nọ. Ọo ya bụ nggẹ mba ono amarụ l’ọo Mu bụ Onye-Nwe-Ọha mẹ mu gudelewho unu goshi l’ẹwha mu bẹ dụ nsọ. O nokwa iwhe Nnajị-Ọha bụ Onye-Nwe-Ọha l’ekfu ndono.

²⁴“ ‘Nkele mu l’e-shi lẹ mba ọdo dufuta unu, mu eshi l’alị dụ iche iche rwukobe unu, dulata unu l’alị nke ẹka unu. ²⁵Mu l’e-whe unu mini doru rịsaa l’ẹhu, unu abya abụru ndu l’aata asọ nsọ, mu atarwụa unu mmerwu, shi l’agwa unu gwarụ, nke ọwhu unu l’a-bụru ndu l’aata asọhe nsọ. ²⁶Mu l’a-nụ unu obu ọwhuu, ye unu ume ọwhuu l’ẹhu. Mu l’e-wofu unu obu ono, nmarụ unu mkpigbi g’ọo ẹwhuru nụ unu obu ọwhu dụ bẹlebele. ²⁷Mu l’e-ye unu Ume mu l’ẹhu mee unu t’unu meje iwhe mu tọru ọkpa iya mẹe t’unu leta ẹnya edobe nsọ mu. ²⁸Unu l’e-buru l’alị ono mu nụru nna unu oche whẹ, unu abya abụru ndibe mu, mu abụru Chileke unu. ²⁹Mu l’a-nafụta unu l’ẹka iwhe lile l’emerwuje unu. Mu l’e-ku nri oku mee ya t’ọ dụru unu, dụru unu nke etsutsu iya. Mu ta abyadụ l’e-wota mkpẹgu doberu unu. ³⁰Oshi-ọmi bẹ mu l’e-me t’ọ kabaa ọmi mebyi, mu emee t’iwhe e meberu l’alị ka omehu emehu nke ọwhu mba gẹ mba ha l’e-mebuhu unu iwhe-iwhere l’okfu ẹgu. ³¹Nteke ono bẹ unu l’a-nyata ejo umere unu mẹe iwhe l’adụa ree unu megbaberu, ẹhu alaa unu ashị l’ejo-iwhe ono unu megbaberu mẹe ejo-ahụma ono unu meru. ³²Tẹ mu mekwaa t’unu marụ l’ọ tọ bụdu l’iswi ẹhu unu bẹ mu kwoberu je l’e-me iwhe ono. O nokwa iwhe Nnajị-Ọha bụ Onye-Nwe-Ọha l’ekfu ndono. T’iwhere onwunu mekwaa unu, mbụ t’iwhere ji unu iwhu l’ejo umere ono unu l’eme, unubẹ ọzo-ụlo ndu Ízurẹlu!

³³“ ‘Ọ waa iwhe Nnajị-Ọha bụ Onye-Nwe-Ọha l’ekfu ndọwa: Mbọku ono mu l’a-safụ unu mmerwu l’ẹhu bẹ mu l’e-me t’a bya eburu eburu lẹ mkpụkpu unu, a tụkwaa ẹka ono dakpọshihuru adakpọshihu atụkwa. ³⁴Alị ono, shi daburu iwhoro bẹ l’aa-kọkota akọko t’ọ bọ dabuheru iwhoro g’o shi daburu iya l’ẹnya ndu l’aghatajẹ iya nụ. ³⁵Ndu madzụ l’ekfulahaa sụ: “Alị-a, shi daburu iwhoro bẹ gbẹ dụwanu g’ọo mgbabu Idẹnu. Mkpụkpu-a, shi dakpọshihu nụ-a bụru ochuwhu ẹgbara kfụru b’a gbẹ tụwa nụ o shihu ike, tẹmenu e buchishikotawa iya nụ ebuchishi.” ³⁶O noo nteke mba whọduru nụ, buwheru unu mgburumgburu l’a-marụ l’ọo mbẹdua, bụ Onye-Nwe-Ọha bẹ gude ẹka mu tụkwa-zhia ẹka ono shi dakpọshihu nụ ono, tẹmenu ọ bụru mu dzakwazhiru iwhe l’ẹka ono e shi mebyishia emebyishi. Mbẹdua bụ Onye-Nwe-Ọha bẹ kfuakwaru nkemu, mu je l’e-me iya gẹ mu kfuru iya.’

³⁷“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’a-ha ọzo-ụlo ndu Ízurẹlu tẹ whẹ ryọfua mu iwhe mu l’e-meru whẹ. Mu l’e-me tẹ whẹ zụ̀a azụ̀zù ha l’igwe g’ọo atụru. ³⁸Whẹ l’a-ha l’igwe g’ọo igwe-atụru e gude abya ọgba ẹja, mbụ g’ọo igwe-atụru a chị bya Jerúsalẹmu nteke l’eeri oge, a gbarụ agbagba. O nokwa gẹ igwe-madzụ l’e-ji mkpụkpu ono shi dakpọshihu adakpọshihu. Ọo ya bụ nggẹ whẹ amarụ l’ọo Mu bụ Onye-Nwe-Ọha.”

Nsụda, ogbogoro ọkpu jiru eji

¹Ike Onye-Nwe-Ọha bya abya mu l’ẹhu. Ume Onye-Nwe-Ọha ono pata mu pafụ je akfụbe lẹ nhamụnha echilabọ nsụda. Iwhe jiru nsụda ono bụru ọkpu. ²O duru mu jewhekota ọkpu ono mgburumgburu, nsụda ono bụru ọkpu ha l’igweligwe bẹ kụru iya nụ. Ọkpu ono kpọkotawaa jegiri-jegiri gẹ whẹ ha. ³Ọ bya ajịa mu sụ mu: “Nwa ndiwhe ?ọkpu-a l’a-dụ ike nọdukota ndzụ?”

Mu sụ iya: “Gụbe Nnajị-Ọha, bụ Onye-Nwe-Ọha, ọ kwa ghu bụ onye marụ nụ.”

⁴Ọ sụ mu: “Gude nkfuchiru kfuru nụ ọkpu ono sụ whẹ agha: Unubẹ ọkpu ọkponku-a, unu nụa okfu Onye-Nwe-Ọha l’ekfu! ⁵Ọ waa iwhe Nnajị-Ọha bụ Onye-Nwe-Ọha l’ekfuru unubẹ ọkpu-a: Mu l’e-me t’unu kuta ume nggẹ unu anọdu ndzụ. ⁶Mu l’e-ye unu akwara l’ẹhu mee t’unu rwuta anụ, mu ekwee unu akpọ l’ẹhu kuru ume ye unu l’ẹhu, unu abya anọdu ndzụ. Ọo ya bụ nggẹ unu amarụ l’ọo Mu bụ Onye-Nwe-Ọha.”

⁷Tọ dụ iya bụ, mu bya ekfua nkfuchiru ono g’a sụru tẹ mu kfua ya. Mu gudekwadua nkfuchiru ono l’ọnu ekfu, a bya l’eledeshia ẹnya ụkporo melahaa jogoro jogoro, ọkpu ono wata edzekfushi, ọkpu nọnu dzekfuru l’ọkpu ibe iya. ⁸Mu ledeshia ẹnya, akwara gbakọtawa whẹ, whẹ rwukotawa anụ, akpọ kwekotawa whẹ l’ẹhu, ọle whẹ tẹke atụdedua ume.

⁹Ọ sụ mu: “Gude nkfuchiru kfuru nụ ntụ-ume, kfuru nụ iya nwa ndiwhe. Sụ ntume l’ọ waa iwhe Nnajị-Ọha bụ Onye-Nwe-Ọha l’ekfu: Gụbe ntụ-ume shi lẹ mgburẹku ẹno, whẹrewhere l’eshije ewhe kuba ndu-a e gburu egbugbu-a l’ẹhu tẹ whẹ nọdu-whu ndzụ azụ.”

¹⁰Tọ dụ iya bụ, mu gude nkfuchiru kfua g’a sụru tẹ mu kfua ya, whẹ bya awata ọtu ume nọdu ndzụ, bya agbashi kfụru akfụru bụru oke igwe ndu ojọgu. ¹¹Ọo ya bụ ọ sụ mu: “Nwa ndiwhe; ọkpu-a gẹ whẹ ha bẹ bụkota ọzo-ụlo ndu Ízurẹlu l’owhu. Whẹ l’ekfu sụ: ‘Ọkpu anyi bẹ kpọkotawaru jegiri-jegiri tọ dụhe iwhe anyi l’ele ẹnya iya, mbụ lẹ nke anyi bẹ gvụwaru nụ.’ ¹²Ọo ya bụ, gude nkfuchiru kfuaru whẹ sụ whẹ l’ọ waa iwhe Nnajị-Ọha bụ Onye-Nwe-Ọha l’ekfu: Unubẹ ndibe mu, mu l’a-gụhashi ilu unu ghebe ọnu, mee t’unu shi l’ime iya gbalishihu, mu eduta unu dulata alị Ízurẹlu. ¹³Ọo ya bụ nggẹ unubẹ ndibe mu amarụ l’ọo Mu bụ Onye-Nwe-Ọha mẹ mu gụhashilewho ilu unu ono ghebe ọnu, bya emee t’unu shi l’ime iya gbalishihu. ¹⁴Mu l’e-ye unu Ume mu l’ẹhu unu abya anọdu ndzụ. Mu eduru unu je edobe l’alị nke ẹka unu. O noo nteke unu l’a-marụ l’ọo mbẹdua, bụ Onye-Nwe-Ọha bẹ kfuru iya ekfu bya emee ya eme. O nokwa iwhe Onye-Nwe-Ọha l’ekfu ndono.”

Ízurẹlu lẹ Juda l’a-tụgba bụru ndu lanụ, onye-eze lanụ l’achị

¹⁵Onye-Nwe-Ọha bya ekfuru okfu yeru mu sụ: ¹⁶“Nwa ndiwhe; wota oshi dee ya iwhe sụ: ‘Ọ waa bụ nke Juda yẹle ụnwu Ízurẹlu bụ ndu whẹ l’iya l’atụgba.’ Gụ ewota oshi ọdo dekwa ya whọ iwhe sụ: ‘Ọ waa bụ nke Jósẹfu bụ iya bụ oshi nke Ífuremu mẹe nke ndu Ízurẹlu l’owhu, bụ ndu whẹ l’iya l’atụgba.’ ¹⁷Woru oshi labọ ono tụgbabe t’ọ bụru oshi lanụ, mbụ tẹ whẹ ghọo nnanụ dụ ghu l’ẹka.

¹⁸“Nteke ndibe unu sụru ghu: ‘?Tịi kadụru anyi iwhe iwhe ono fụtaru?’ ¹⁹Iwhe l’ii-kfuru whẹ bụ l’ọ waa iwhe Nnajị-Ọha bu Onye-Nwe-Ọha l’ekfu: Mu bya l’ewota oshi Jósẹfu bụ ọwhu Ífuremu gude l’ẹka mẹe nke ikfu Ízurẹlu, bụ ndu whẹ l’iya l’atụgba woru iya tụgbabe l’oshi nke Juda nggẹ whẹ aghọo oshi lanụ dụ mu l’ẹka. ²⁰Nteke oshi labọ ono i deru iwhe dụ ghu l’ẹka whẹ whụa ya, ²¹gụ asụ whẹ l’ọ waa iwhe Nnajị-Ọha bụ Onye-Nwe-Ọha l’ekfu: Mu l’e-shi lẹ mba dụ iche iche ndu Ízurẹlu larụ dutakota whẹ. Mu l’e-shi l’ẹka dụ iche iche rwukobe whẹ duru whẹ dulata l’alị nke ẹka whẹ. ²²Mu abya eme whẹ tẹ whẹ kpagba bụru mba lanụ l’alị ono l’eli ugvu ugvu Ízurẹlu. Ya abụru onye-eze lanụ l’a-bụru eze whẹ gẹ whẹ ha, whẹ abụ-buhu mba labọ bụ-buhu alị-eze e kewaru ekewa. ²³Whẹ ta abyadụ l’e-gudebaa agwa whẹ yẹle iwhe l’aasọ nsọ ono, whẹ l’agwawhe merwushia onwowhe ọdo, whẹ te egudehe oome mmeswe merwushia onwowhe ọdo. Mu l’a-dzọfuta whẹ l’azụ azụ ono whẹ lwarụ gude mee iwhe-dụ-ẹji; mu abya emee t’a asọhe whẹ nsọ, whẹ abya abụru ndibe mu, mu abụru Chileke whẹ. ²⁴Ọo onye-ozhi mu Dévidi l’a-bụru eze l’achị whẹ nụ, whẹ enweru onye lanụ l’a-nọdu eche whẹ g’ọo onye l’eche atụru. Whẹ l’a-wata odobe nsọ mu bya eleta ẹnya eme iwhe mu tọru ọkpa iya. ²⁵Whẹ l’a-bya ebua l’alị ono ndụ-ichee unu whẹ buru, bụ iya bụ alị ono mu nụru onye-ozhi mu Jékọpu. Whẹbedua l’onwowhe, mẹe ụnwu whẹ, mẹe nwanwa whẹ l’e-bu l’ẹka ono jeyewaroya. Dévidi, bụ onye-ozhi mu l’a-bụru onye-ishi whẹ jeye lẹ gbururu. ²⁶Mu lẹ whẹ l’a-gba ndzụ ẹhu-guu. Ọgbandzu ọbu l’a-nọ jeye lẹ gbururu. Mu l’e-me tẹ whẹ ngụru angụru, mee whẹ tẹ whẹ zụ̀a azụ̀zù. Mu eworu ụlo-nsọ nkemu dobe l’echilabọ whẹ jeye lẹ gbururu. ²⁷Mu l’a-kwata uwhu buru l’echilabọ whẹ, mu abụru Chileke whẹ, whẹbedua abụru ndibe mu. ²⁸Nteke ono bẹ mba dụ iche iche l’a-marụ l’ọo mbẹdua, bụ Onye-Nwe-Ọha l’emeje tẹ ndu Ízurẹlu dụ nsọ, mbụ nteke ụlo-nsọ mu ono l’a-dụ l’echilabọ whẹ jeye lẹ gbururu.”

E kfuru iwhe l’e-me Gọgu

¹O noo ya, Onye-Nwe-Ọha bya ekfuru okfu yeru mu sụ: ²“Nwa ndiwhe; ghachiru Gọgu iwhu, mbụ onye ono bụ ishi lẹ Mẹsheku mẹe lẹ Tubalu dụ l’alị Mégọgu, ³sụ iya l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu bụakwa ọgu swiru ghu gụbe Gọgu, bụ onye-ishi ndu Mẹsheku mẹe nke ndu Tubalu. ⁴Mu l’a-gha ghu amaga-ewhurewhe gude aga dzụgbabe ghu agba lọfuta ghu, gụ lẹ ndu ojọgu ghu gẹ whẹ ha, mẹe ịnya-ọgu ghu, mẹe ndu l’agba ịnya-ọgu ghu bụ ndu ono, gude ngwọgu kwaa onwowhe chịchichi. Whẹ bụ ụnukurunu ndu ojọgu, l’apagejee iwhe l’eegudeje egbobuta onwonye nke eze iya mẹe nke nshịi bụru ndu l’ewhekaa ogu-ịgba ewhe. ⁵Ndu Peshiya, mẹe ndu Kushi, mẹe ndu Putu bẹ tụru ike yeru whẹ, gẹ whẹ ha bẹ pakọta iwhe l’eegudeje egbobuta onwonye, kpukotaru okpu-igwe. ⁶O nokwawhọ gẹ ndu Goma yẹle ndu ojọgu whẹ mẹe ndu Betu-togarama, bụ ndu shi l’ime ime ụzo isheli yẹle ndu ojọgu nkewhe tụru ike yeru ghu. Ndu mba ha l’igwe bẹ tụru ike yeru ghu. ⁷Kwakọbekwa ẹhu, gụ akwagebekwa akwagebe, gụ l’ụnukurunu ndu ojọgu ono, sọ-wheru ghu mgburumgburu; gụ anọduru whẹ l’ishi-ọgu. ⁸Aa-nọoda ọdu tẹmenu e kua ghu oku ọgu. L’awha ọwhu dụ l’iwhu bẹ l’ii-gude ọgu bakfu alị ono, shi l’ọgu eteta eteta, mbụ alị ono e shi l’ikpoto mba chịkobe ndu shi iya nụ l’ugvu ugvu Ízurẹlu, bụ ẹka shi bụtaru ochuwhu. E shi lẹ mba dụ iche iche dufuta ndu alị ono, ntaa bẹ whẹ buwaa l’ẹhu-guu. ⁹Gụbedua lẹ ndu ojọgu ghu gẹ whẹ ha mẹe ikpoto mba, tụru ike yeru ghu bẹ l’a-swọ-lihu g’ọo oke whẹrewhere, unu abya eswetakota alị ono g’ọo urwukpu.

¹⁰“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Mbọku ono bẹ ọriri l’a-gbabata ghu l’uche, gụ agbalahaa ejo-ikumu ¹¹sụ: ‘Mu l’e-je ọgu l’alị, l’ete egudee mgbodo gbobuta mkpụkpu, dụ iya nụ. Ndu ono, nọ l’ẹhu-guu bẹ mu l’e-tso ọgu bụ iya bụ ndu ono, bu tụsaa ẹhu. Gẹ whẹ ha bụkota ndu bu lẹ mkpụkpu, l’etee egudee mgbodo gbobuta, whẹ te enwe ọnoguzo, l’aagụ-chije agụ-chi, whẹ te enwe mgbọro-igwe e gude agbachi iya agbachi. ¹²Mu l’a-lwụ whẹ alwụlwu gwoo arya whẹ, mu aghazhia ẹka dabẹ l’ẹka ono, bụ ochuwhu e buwa ebubu ntaa mẹe ndu ono e shi lẹ mba dụ iche iche chịkobe, mbụ ndu ono, nwewaru élwù nwekotaru iwhe ọdo, bụ ndu bu lẹ nhamụnha echilabọ alị ono.’ ¹³Ndu Shiba mẹe ndu Dedanu yẹle ndu l’agba ikike nghọ, shi Tashishi yẹle ụnwu mkpụkpu dụkota iya nụ bẹ l’a-jị ghu sụ: ‘?Ị byawaru t’i gwoo tụtua? ?Ị chịkobewaru ụnukurunu ndu ojọgu ghu t’ị bya avụa arya, mbụ t’ị bya evua mkpọla-ọcha mẹe mkpọla-ododo kpụkoo élwù, mbụ kwata akwata gwoo iwhe tụtua?’

¹⁴“Ọo ya bụ nwa ndiwhe, gude nkfuchiru kfuru nụ Gọgu sụ iya l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Nteke ndibe mu ono, bụ ndu Ízurẹlu l’e-buru l’ẹhu-guu bẹ l’ii-zhilihu ¹⁵shi l’ẹka i shi l’ime ime ụzo isheli bya, mbụ gụbedua mẹe ikpoto mba ono tụru ike yeru ghu ono. Gẹ whẹ ha bẹ l’agbakọta ịnya, whẹ bụru ụnukurunu ndu ojọgu parụ ẹka mẹe ndu ojọgu ọkpehu dụ. ¹⁶Unu l’e-zelihu byakfuta ndibe iya bụ Ízurẹlu ọgu, unu eswetakota alị ono g’ọo urwukpu. Lẹ mgbe l’iwhu bẹ mu l’e-duru ghu ye t’ị bya ọgu l’alị mu nggẹ mba, dụ iche iche amarụ onye mu bụ nteke mu l’e-shi l’ẹka gụbe Gọgu goshi whẹ lẹ mu dụ nsọ.

¹⁷“Ọ waa iwhe Nnajị-Ọha bụ Onye-Nwe-Ọha l’ekfu ndọwa: ?Tọ bụnua gụbedua bẹ mu shi l’ọnu ndu ozhi mu bụ ndu nkfuchiru Chileke lẹ Ízurẹlu kfua okfu ẹhu ghu l’oge ndụ-ichee? Nteke ono bẹ whẹ kfuru iya igweligwe awha sụ lẹ mu l’e-bekochaa gude ghu bakfuta whẹ ọgu. ¹⁸Ọle nteke ono, Gọgu l’a-bya ọgu l’alị Ízurẹlu ono bẹ oke ẹhu-eghughu mu l’e-bulihukwa, o nokwa iwhe Nnajị-Ọha bụ Onye-Nwe-Ọha l’ekfu ndono. ¹⁹Mu gudewa okoowhoo mu yẹle oke ẹhu-eghughu mu ryaa ya aryarya l’oke alị-ọnma-jijiji bẹ l’a-dụ l’alị Ízurẹlu nteke ono. ²⁰Ẹma, nọkota lẹ mini mẹe ẹnu, l’ewhekota l’eli mẹe anụ-ẹgbudu mẹe iwhe lile, l’awụ l’ẹwho je akpaa lẹ madzụ lile, nọ lẹ mgboko bẹ l’a-nmakọta kwekwe l’iwhu mu. Ugvu nọnu l’e-zekota ezeze, mgbogidi ezekposhihu, mgbodo ezekota bụru gworogodongu l’alị. ²¹Mu l’e-me t’e shi l’ugvu nọnu chịru ogu-ịgba dụ l’iche l’iche byakfuta Gọgu ọgu. O nokwa iwhe Nnajị-Ọha bụ Onye-Nwe-Ọha l’ekfu ndono. Onyenọnu l’e-gude ogu-ịgba nkiya rwuchata iya ibe iya. ²²Mu l’e-gude ejo ẹhu-ba-dụ-mma mẹe mgbugbu madzụ nụa ya awhụ. Mu achịa ukporo mini, mẹe aka-mini, mẹe ọku yẹle ọku-nshegbe gude nmaa ya baabaa-mini yẹle ndu-ojọgu iya mẹe ikpoto mba ono, tụru ike yeru iya. ²³O noo gẹ mu l’e-shi goshi gẹ mu habe shii mẹe gẹ mu dụ-be nsọ, tẹmenu mu je l’e-me t’ikpoto mba marụ onye mu bụ. O noo nteke whẹ l’a-marụ l’ọo Mu bụ Onye-Nwe-Ọha.

A lwụ-gburu Gọgu

¹“Nwa ndiwhe; gude nkfuchiru kfua gẹ l’ọo-dụru Gọgu sụ iya l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu bụakwa ọgu swiru ghu gụbe Gọgu, bụ onye-ishi ndu Mẹsheku mẹe nke ndu Tubalu. ²Mu l’a-gha ghu amaga-ewhurewhe lọo ghu whelewhele. Mu l’e-shi l’ime ime ụzo isheli kpụa ghu kpụfuta t’i je alwụshi ugvu ugvu Ízurẹlu ọgu. ³Mu l’e-chichafu ghu ụta, i gude l’ẹka-ịcha, mee t’akfụ i gude l’ẹka-ụtara nahụ ghu daa. ⁴Ẹka l’ii-je adaa bụ l’eli ugvu ugvu Ízurẹlu, gụ lẹ ndu ojọgu ghu mẹe ndu mba dụ iche iche ono, tụru ike yeru ghu ono. Mu l’e-woru ghu haarụ ụnwu-ẹnu dụ iche iche mẹe anụ-ẹgbudu tẹ whẹ kpaa ghu nri l’ẹhu. ⁵Ẹka l’ii-je adaa bụ l’ọma-ẹgu. Ọo mbẹdua kfuru iya. O nokwa iwhe Nnajị-Ọha bụ Onye-Nwe-Ọha l’ekfu ndono. ⁶Mu l’e-ye ọku l’ẹhu Mégọgu mẹe l’ẹhu ndu ono bu l’ẹhu-guu l’agụga eze-ẹnyimu. Ọo ya bụ nggẹ whẹ amarụ l’ọo Mu bụ Onye-Nwe-Ọha. ⁷Ndibe mu, bụ ndu Ízurẹlu bẹ mu l’e-me tẹ whẹ marụ ẹwha mu ono dụ nsọ. Mu te ekwebahedua t’e mebyia ẹwha mu ono dụ nsọ emebyi ọdo. Mba dụ iche iche bẹ l’a-marụ l’ọo Mu bụ Onye-Nwe-Ọha, bụ Onye-Nsọ nọ lẹ Ízurẹlu.”

⁸“Lekwa ọobyaakwa abyabya! O mefutajekwa. O nokwa iwhe Nnajị-Ọha bụ Onye-Nwe-Ọha l’ekfu ndono. Ọ kwa iya bụ mbọku ọbu mu kfuru okfu iya ọbu. ⁹Nteke ono bẹ ndu bu lẹ Ízurẹlu l’awụ-lishihu je achịkoo ngwọgu whẹ gude nkụ, l’eeye l’ọku tsukota whẹ ọku, mbụ-zhia iwhe-ogbobuta onwonye nke eze iya mẹe nke nshịi mẹe ụta mẹe akfụ mẹe mkpụru-ọgu mẹe arwa whẹ. Whẹ l’e-gude ngwọgu ono menwua ọku awha ẹsaa. ¹⁰Nke ọwhu bụ lẹ whẹ te ejedu ọkpata nkụ l’ẹgbudu, whẹ te ejehe ọwa nkụ l’ọswa nkele ngwọgu ono bụwa iya rọ bẹ whẹ l’e-gude emenwu ọku. Ndu gworu whẹ tụtua bẹ whẹ l’e-gwekwawho tụtua, ndu lwụtaru iwhe whẹ l’ọgu bẹ whẹ l’a-lwụtakwawho nke whẹ l’ọgu. O nokwa iwhe Nnajị-Ọha bụ Onye-Nwe-Ọha l’ekfu ndono.

¹¹“Mbọku ono bẹ mu l’e-meta ẹka lanụ lẹ Ízurẹlu nụ Gọgu t’ọ bụru ẹka l’eeli odzu lẹ nsụda ndụ-ije, nọ l’ụzo ẹnyanwu-awata nke eze-ẹnyimu. Ẹka ono l’a-duchi ndụ-ije ụzo. Ọ bụru l’ẹka ono bẹ l’ee-li Gọgu yẹle ikpoto ndu l’awụ etso iya nụ. Iwhe l’ee-ku ẹka ono bụ Nsụda ikpoto ụnukurunu ndu ojọgu Gọgu. ¹²Nkele ọnwa ẹsaa lẹ whuu bẹ ndu Ízurẹlu l’e-likota odzu whẹ l’ẹka ono shi nno mechaa alị ono emecha. ¹³Ndu alị ono gẹ whẹ ha bẹ ẹka whẹ l’a-dụkota l’elili whẹ. Mbọku ono mu l’e-goshi ọdu-biribiri nkemu bẹ mu l’e-me t’a marụ ẹwha whẹ. O nokwa iwhe Nnajị-Ọha bụ Onye-Nwe-Ọha l’ekfu ndono. ¹⁴Whẹ l’a-gụta ndu ẹka-ọrwu whẹ bụ tẹ whẹ jewheje alị ono ntekenteke achọ odzu ndu a harụ l’alị ono pata je elia, shi nno emecha alị ono emecha. Nteke whẹ l’a-wata aghawhe achọ odzu ndu ọbu bẹ bụ mẹ ọnwa ẹsaa gvụlewho. ¹⁵Nteke whẹ l’a-nọdu ejewhe l’alị ono bẹ bụ onye -whụjee ọkpu madzụ ya eworu iwhe-ọhubama dokube lẹ mgboro ẹka ọkpu ọbu nọ jeye nteke ndu l’elije odzu l’e-wota iya je elia lẹ Nsụda Ụnukurunu Ndu ojọgu Gọgu. ¹⁶Mkpụkpu lanụ ọdo, dụ l’ẹka ono bẹ l’ee-ku Hamona. O noo gẹ l’ee-shi mechaa alị ono.

¹⁷“Nwa ndiwhe; ọ waa iwhe Nnajị-Ọha bụ Onye-Nwe-Ọha l’ekfu ndọwa: Kua ụnwu-ẹnu dụ l’iche l’iche mẹe ụnwu-anụmanu l’owhu sụ whẹ: Unu dzukobe, unu shi l’ẹka unu nọkota kpakodzua bya eria iwhe ẹja mu l’eshiru unu, ọ kwa eze iwhe ẹja bẹ mu l’eshi l’ugvu ugvu Ízurẹlu. Unu l’a-ta anụ ngụa mmee-iwhe. ¹⁸Unu l’a-ta anụ ndu ojọgu ọkpehu dụ ngụa mmee ndụ-ishi nke mgboko-o. Whẹ bụkotawaa ebyila mẹe atụru mẹe eghu mẹe oke-eswi ẹba dụ, shi l’alị Báshanu. ¹⁹Unu l’a-tata ẹ̀bà-iwhe jeye ya ebufu unu l’imi, unu angụta mmee-iwhe jeye ya awata unu ome l’ẹnya l’iwhe ẹja ọbu, mu l’eme tẹ mu shiaru unu. ²⁰Unu l’a-nọdu lẹ teburu nkemu taa anụ ịnya ya eji unu mẹe anụ ndu l’agba ịnya mẹe anụ ndu ojọgu ọkpehu dụ mẹe nke ndu ojọgu dụ l’iche l’iche. O nokwa iwhe Nnajị-Ọha bụ Onye-Nwe-Ọha l’ekfu ndono.

²¹“Mu l’e-goshi mba nọnu ọdu-biribiri nkemu. Mba gẹ mba ha bẹ l’a-whụ ẹgube awhụwhu, mu tarụ whẹ mẹe gẹ mu gude daa whẹ ẹka l’ẹhu. ²²Wata lẹ mbọku ono tụgbua bẹ ọzo-ụlo ndu Ízurẹlu l’a-marụ l’ọo Mu bụ Onye-Nwe-Ọha, bụ Chileke whẹ. ²³Mba nọnu amarụ l’iwhe e kwoberu kpụa ndu Ízurẹlu lẹ ndzụ bụ lẹ whẹ yeru ẹka l’ejo-iwhe, mbụ l’ọo lẹ whẹ dụ ghẹle-ghẹle-ghẹle l’ẹka mu nọ bẹ meru iwhe mu woharu whẹ iwhu mu, woru whẹ nụ ndụ-ọhogu whẹ, whẹ gude ogu-ịgba gbugbushia whẹ. ²⁴Mu meru whẹ iwhe yẹle emerwushi, whẹ merwushiru onwowhe mẹe emeswe, whẹ mesweru hakọ, mu wohaaru whẹ iwhu mu ewoha.

²⁵“Ọo ya bụ l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Mu l’e-shi l’ẹka a kpụru Jékọpu lẹ ndzụ laa duwhu iya azụ, meeru ọzo-ụlo ndu Ízurẹlu gẹ whẹ ha obu-imiko. Mu abya ekolahaa okoowhoo nke ẹwha mu ono dụ nsọ. ²⁶Whẹ l’a-nyazọkota iwhe-iwhere ono e meru whẹ mẹe ghẹle-ghẹle-ghẹle ono whẹ dụ l’ẹka mu nọ nteke ono, whẹ l’e-buru tụsaa ẹhu l’alị whẹ ono, to nwe onye l’eyekwadu whẹ egvu. ²⁷Nteke mu l’e-shi lẹ mba gẹ mba ha dulata whẹ, bya erwufutakota whẹ l’alị ndụ-ọhogu whẹ; mu shilewho l’ẹhu whẹ goshi ikpoto mba gẹ mu dụ-be nsọ, ²⁸o noo nteke whẹ l’a-marụ l’ọo Mu bụ Onye-Nwe-Ọha bụ Chileke whẹ ndono, o noo nkele ọo mu bẹ meru t’a kpụa whẹ lẹ ndzụ lashia mba ọdo, ọ bụru mu bẹ rwukoberu whẹ chịlata l’alị nke ẹka whẹ. Mu ta abyadụ l’a-ha m’ọo onye lanụ t’ọ kwaburu lẹ mba ọdo. ²⁹O nokwawho gẹ mu l’ẹte abya l’ewoharu whẹ iwhu mu ọdo, eshi-ọwhu mu l’a-wụru ọzo-ụlo ndu Ízurẹlu Ume nkemu. O nokwa iwhe Nnajị-Ọha bụ Onye-Nwe-Ọha l’ekfu ndono.”

Eze-ụlo ọ̀whúú, a tụru Chileke

¹O rwuleruwho l’awha kwe anyi ụkporo awha l’awha ise a kpụru anyi lẹ ndzụ, lẹ mbido awha ono, g’ọnwa dụ l’abalị iri, mbụ l’awha kwe iya awha iri l’ẹno nkele a lwụtaru obodo Jerúsalẹmu; mbọku ono gẹdegede bẹ ẹka Onye-Nwe-Ọha bya adụ mu l’ẹhu, o dulia mu l’ẹka ono. ²Mu nọdu l’ọwhulenya, Chileke l’egoshigbabe mu; o dulia mu swaa jeshia alị Ízurẹlu, ẹka o je atukobe mu bụ l’eli ugvu ọbu ha l’eli g’ọo gụnu. L’eli ugvu ono bẹ ụlo, dụ-gee ya l’ụzo ọhuda bẹ dụlewho g’ọo mkpụkpu. ³Nteke o duru mu je edobe l’ẹka ono bẹ mu nọdu l’ẹka ono whụa nwoke ọbu, ụgbugba ẹhu iya dụ g’ọo ope, ọ kfụru l’ọnoguzo gude eri oghu ọcha l’ẹka yẹle mgbọro l’eegudeje atụ iwhe. ⁴Nwoke ono sụ mu: “Nwa ndiwhe; gude ẹnya ghu whụ, gụ egude nchị ghu nụa, t’uche ghu dụkwa l’iwhe mu l’abya ghu egoshi, nkele iwhe e kwoberu duru ghu bya ẹka-a bụ nggẹ mu egoshi ghu iwhe ono. Iwhe lile ị whụru kọkotakwaru iya ọzo-ụlo ndu Ízurẹlu.”

Ọnu-abata eze-ụlo ono nke ụzo ẹnyanwu-awata

⁵Mu bya awhụa g’e gude mgbodo tụ-wheta eze-ụlo Chileke ono mgburumgburu. Mgbọro ono e gude atụ iwhe ono, nwoke ono gude l’ẹka bẹ dụ nji-ẹka ishii l’ogologo. Nji-ẹka mgbọro ono nnanụ bẹ ha g’ọo nkwo ọbochi-ẹka. Ọ bya atụa iwhe lẹ mgbodo ono igbidigbi iya yẹle ogologo mgbọro ono halẹkwawho ishi nhakọ, eli iya yẹle ogologo mgbọro ono hakwawhọ ishi nhakọ.

⁶Ọ tụgbua jeshia l’ọnu-abata ọwhu dụ chebe iwhu l’ụzo ẹnyanwu-awata. Ọ bya enyikota eli ẹka l’eeshije enyihu iya bya atụa iwhe lẹ mgboko ọnu-ụlo iya, ogologo iya yẹle mgbọro ono halẹkwawho ishi nhakọ. ⁷Nwụlo-nche dụ iya nụ bẹ ogologo iya ha g’ọo mgbọro ono, ọsa iya hakwawhọ g’ọo mgbọro ono. Ụzo, nọ lẹ mgbakụ nwụlo-nche ono bẹ dụ nji-ẹka ise. Mgboko ọnu-ụlo ẹka l’eeshije abahụ l’ime mkpu ọnu-abata, gharụ iwhu l’ụzo eze-ụlo ono bẹ ha g’ọo mgbọro ono l’ogologo.

⁸Ọ bya atụa iwhe lẹ mkpu-ọnu-abata, iwhe ọ dụ bụru nji-ẹka ẹsato. ⁹Ọ tụa ogologo ọkpa-mgbo mkpu-ọnu-abata ono, iwhe ọ dụ bụru nji-ẹka labọ. Mkpu-ọnu-abata ono b’a tụru ọ bahụ l’ime.

¹⁰E nweru nwụlo-nche ẹto ẹto lẹ mgburẹku labọ nke ọnu-abata ono, dụ l’ụzo ẹnyanwu-awata. Whẹ ẹto ono bẹ hakọta ẹnya nhamụnha; mgbodo, dubutaru ọnu-abata ono, dụ lẹ mgburẹku labọ hakọtakwawho ẹnya nhamụnha. ¹¹Ọ bya atụa ọsa ẹka e shi abahụ l’ọnu-abata ono, iwhe ọ dụ bụ nji-ẹka iri. Ọ tụa ọsa ọnu-abata ono, iwhe ọ dụ bụru nji-ẹka iri l’ẹto. ¹²L’atatiwhu nwụlo-nche ono b’a tụru mgbodo, eli iya dụ nji-ẹka lanụ. Iwhe nwụlo-nche ono dụkota bụ nji-ẹka ishii ishii l’ibẹka labọ. ¹³Ọ bya atụa iwhe l’ọnu-abata ono. Ẹka o shi iya atụtu bụ lẹ mgbodo azụ nwụlo-nche lanụ jeye lẹ mgbodo azụ nwụlo-nche ọdo, uswe iya dụ nji-ẹka ụkporo l’ise wata l’ọnu mgbo lanụ jeye l’ọnu mgbo ọdo. ¹⁴Ọ bya atụa iwhe lẹ mkpu-ọnu-abata ono, ọ dụ nji-ẹka ụkporo. L’iwhu mkpu-ọnu-abata ono bẹ ogboduwhu dụ mgburumgburu. ¹⁵Wata l’atatiwhu ọnu-abata ọwhu dụ l’e jeta akpọ-iwhu jeye l’iwhu mkpu-ọnu-abata ọwhu nọ l’ime bẹ dụ nji-ẹka ụkporo labọ l’iri. ¹⁶Nwụlo-nche ono mgburumgburu yẹle mgbodo e gude tụ-buta nwụlo-nche nke ime iya bẹ nwekotaru windo, dụ-gee wẹrere wẹrere, ọ bụru ẹgube ono b’ọ nọkota lẹ mkpu ụlo ono mgburumgburu. Windo ono g’ọ ha bẹ ghakọtaru iwhu l’ime, e seshia nkfụ lẹ mgburẹku mgbodo ono, e gude tụ-buta nwụlo-nche ono.

Ọma-ogboduwhu nke nfụta

¹⁷Ọ bya eduta mu bata l’ọma-ogboduwhu ọwhu dụ lẹ nfụta, mu whụa mkpu dụ-gee ya nụ yẹle ẹka a wụru ẹwhuru l’ọma-ogboduwhu nke nfụta ono mgburumgburu. Ẹka ono a wụru ẹwhuru ono bẹ mkpu, dụ iya nụ dụ ụkporo l’iri kpọo ya giriri. ¹⁸Ẹwhuru ono b’a wụru lẹ mgburẹku ọnu-abata ono g’ọ ha. A wụkotaru iya lẹ mgboro ọnu-abata ono ogologo ogologo yẹle uswe iya ha ẹnya nhamụnha. Ẹka ono a wụru ẹwhuru ono bụ ụzo-alị. ¹⁹Ọ bya atụa iwhe wata l’atatiwhu ọnu-abata ono nke ụzo alị jeye l’atatiwhu ọma-ogboduwhu nke ime ime, ọ dụ nji-ẹka ụkporo ugbo ise l’ẹka iya nke ụzo ẹnyanwu-awata mẹe ẹka iya nke ụzo isheli.

Ọnu-abata nke ụzo isheli

²⁰Ọ bya atụa ogologo mẹe uswe ọnu-abata nke ụzo isheli, mbụ ono, dụ l’ọma-ogboduwhu nke nfụta. ²¹O nweru nwụlo-nche ẹto l’ibẹka lanụ nweru ẹto l’ibẹka iya ọwhu. Mgbodo, dubutaru ọnu-abata ono mẹe mkpu dụ iya nụ bẹ yẹle ọnu-abata nke mbụ whọ ha ẹnya nhamụnha. Ogologo iya bẹ dụ nji-ẹka ụkporo labọ l’iri, ọsa iya dụ nji-ẹka ụkporo l’ise. ²²Windo, dụkota iya nụ mẹe mkpu dụ iya nụ mẹe nkfụ e seshiru iya bẹ yẹle ọnu-abata ono, dụ ghaa iwhu l’ụzo ẹnyanwu-awata bẹ hakọta ẹnya nhamụnha. Ẹka l’aadzọbeje ọkpa enyihu iya dụ ẹsaa. Mkpu-ọnu-abata ono dụ ghaaru iya iwhu. ²³O nweru ọnu-abata l’eeshije abahụ l’ọma-ogboduwhu nke ime. Ọnu-abata ono bẹ gharụ iwhu l’ọnu-abata nke ụzo isheli bụ iya bụ ụdu ọnu-abata, dụ l’ụzo ẹnyanwu-awata. Ọ bya atụa iwhe wata l’ọnu-abata lanụ jeye l’ọnu-abata ọdo, iwhe ọ dụ bụru nji-ẹka ụkporo ise.

Ọnu-abata nke ụzo ọhuda

²⁴Ọ bya eduta mu shia ụzo ọhuda, mu whụa ọnu-abata dụ l’ụzo ọhuda ono. Ọ bya atụa mgbodo dubutaru ọnu-abata iya mẹe mkpu dụ iya nụ iwhe, whẹ hakọta g’ọo ndu ọwhu. ²⁵Ọnu-abata ono yẹle mkpu dụ iya nụ b’e yeru windo mgburumgburu, ọ bụru gẹ windo ọwhu dụ bụ g’ọ dụkota. Ogologo ọnu-abata ono bẹ dụ nji-ẹka ụkporo labọ l’iri, ọsa iya dụ nji-ẹka ụkporo l’ise. ²⁶Ẹka l’aadzọbeje ọkpa enyihu iya dụ ẹsaa, mkpu ọnu-abata iya dụ l’atatiwhu iya. A bya eseshia nkfụ lẹ mgbodo ono dubutaru ọnu-abata ono, nnanụ nnanụ l’ibẹka labọ ono. ²⁷O nweru ọnu-abata dụ l’ogboduwhu nke ime ime l’ụzo ọhuda. Ọ bya atụa iwhe wata l’ọnu-abata lanụ jeye l’ọnu-abata ọdo l’ụzo ọhuda ono, iwhe ọ dụ bụru nji-ẹka ụkporo ugbo ise.

Ọnu-abata ẹka l’eeshije abahụ l’ọma-ogboduwhu nke ime ime

²⁸Tọ dụ iya bụ, ọ bya eduta mu shia ọnu-abata ụzo ọhuda ono bahụ l’ọma-ogboduwhu nke ime ime. Ọ bya atụa iwhe l’ọnu-abata ụzo ọhuda ono, ọ bụru gẹ ndu ọwhua ha bụ g’ọ ha. ²⁹Nwụlo-nche, dụ iya nụ mẹe mgbodo, dubutaru ọnu-abata iya mẹe mkpu dụ iya nụ bẹ hakọta g’ọo ndu ọwhu. Ọnu-abata iya mẹe mkpu dụ iya nụ b’e yekotaru windo mgburumgburu. Ogologo iya bẹ dụ nji-ẹka ụkporo labọ l’iri, ọsa iya dụ nji-ẹka ụkporo l’ise. ³⁰Mkpu-ọnu-abata bẹ dụ l’ogboduwhu ono mgburumgburu. Ogologo iya bẹ dụ nji-ẹka ụkporo l’ise, ọsa iya dụ nji-ẹka ise. ³¹Mkpu-ọnu-abata dụ iya nụ bẹ gharụ iwhu l’ọma-ogboduwhu nke nfụta. E seshia nkfụ lẹ mgbodo, dubutaru ọnu-abata iya. Ẹka l’aadzọbeje ọkpa enyikota iya dụ ndzọkpa ẹsato.

³²Tọ dụ iya bụ, ọ bya eduta mu bahụ l’ọma-ogboduwhu nke ime ono l’ụzo ẹnyanwu-awata. Ọ bya atụa iwhe l’ọnu-abata iya ọ bụru gẹ ndu ọwhu ha bụ g’ọ ha. ³³Nwụlo-nche, dụkota iya nụ mẹe mgbodo, dubutaru ọnu-abata iya mẹe mkpu-ọnu-abata dụ iya nụ bẹ hakọta g’ọo ndu ọwhu. Ọnu-abata iya mẹe mkpu-ọnu-abata dụ iya nụ b’e yekotaru windo mgburumgburu. Ogologo iya bẹ dụ nji-ẹka ụkporo labọ l’iri, ọsa iya dụ nji-ẹka ụkporo l’ise. ³⁴Mkpu-ọnu-abata dụ iya nụ bẹ gharụ iwhu l’ọma-ogboduwhu nke nfụta. E seshia nkfụ lẹ mgbodo, dubutaru ọnu-abata iya, nnanụ l’ẹka lanụ, nnanụ l’ẹka iya ọdo. Ẹka l’aadzọbeje ọkpa enyikota iya dụ ndzọkpa ẹsato.

³⁵Tọ dụ iya bụ, ọ bya eduta mu jeshia ọnu-abata nke ụzo isheli. Ọ bya atụa ya iwhe ọ bụru gẹ ndu ọwhu ha bụ g’ọ ha. ³⁶Nwụlo-nche, dụkota iya nụ mẹe mgbodo, dubutaru ọnu-abata iya mẹe mkpu-ọnu-abata dụ iya nụ bẹ hakọta g’ọo ndu ọwhu, tẹmenu e yekotakwa iya whọ windo mgburumgburu. Ogologo iya bẹ dụ nji-ẹka ụkporo labọ l’iri, ọsa iya dụ nji-ẹka ụkporo l’ise. ³⁷Mkpu-ọnu-abata dụ iya nụ bẹ gharụ iwhu l’ọma-ogboduwhu nke nfụta. E seshia nkfụ lẹ mgbodo, dubutaru ọnu-abata iya. Ẹka l’aadzọbeje ọkpa enyikota iya bẹ dụ ndzọkpa ẹsato.

Mkpu, l’aanọduje akwakọbe ngwo-ẹja

³⁸O nweru mkpu a tụru ye iya mgbo l’ime mkpu-ọnu-abata ono dụ l’ọnu-abata ọma-ogbuduwhu. Ọ bụru l’ime mkpu ono bẹ l’aasajẹ iwhe e gude agba ẹja ọkpokota-iwhe-ọku. ³⁹O nwekwaruwho teburu labọ e doberu lẹ mkpu ono ẹka labọ bụ ẹka l’eegbuje anụ e gude agba ẹja ọkpokota-iwhe-ọku mẹe nke ngwo-ẹja iwhe-dụ-ẹji mẹe nke ngwo-ẹja ikpe-anmanma. ⁴⁰L’ọnu etezhi mẹ l’aabahụ l’ọnu-abata nke ụzo isheli bẹ teburu labọ nọkwawho lẹ mkpu-ọnu-abata iya, teburu labọ nọdukwawho lẹ mkpu-ọnu-abata ọwhu nọ l’ibe iya ọwhu. ⁴¹Teburu ẹno bẹ nọ l’ibẹka lanụ, teburu ẹno nọdu l’ibẹka iya nke ọnu-abata. Iwhe ọ dụkota bụ teburu ẹsato, bụ ẹka l’eegbuje anụ e gude agba ẹja. ⁴²E nwekwaruwho teburu ẹno, e gude ẹwhuru mee, l’eegbuje anụ, e gude agba ẹja ọkpokota-iwhe-ọku. Ogologo iya dụ nji-ẹka lanụ lẹ mkpirikpi, ọsa iya dụ nji-ẹka lanụ lẹ mkpirikpi, eli iya dụ nji-ẹka lanụ. Ọo l’eli iya bẹ l’aatukobeje iwhe lile l’eegudeje egbu anụ e gude agba ẹja ọkpokota-iwhe-ọku mẹe ẹja ọdo, l’aagba agbagba. ⁴³Mgbodo mkpu-ọnu-abata ono b’a kụbekotaru mkpọ mgburumgburu, mbụ mkpọ, ogologo iya hakọta g’ọo ọbochi-ẹka. Teburu ono g’ọ ha bụkota ẹka l’aatukobeje anụ e gude agba ẹja.

Mkpu ndu l’agbajẹ ẹja nụ Chileke

⁴⁴Ọ bya eduru mu bata l’ọma-ogboduwhu nke ime. Ọma-ogboduwhu ono bẹ nweru mkpu labọ. Nnanụ bẹ dụ l’ibẹka iya nke ọnu-abata ụzo isheli, ọ ghaa iwhu l’ụzo ọhuda, nnanụ ọwhu dụ l’ibẹka iya nke ọnu-abata ụzo ọhuda, ọ dụ ghaa iwhu l’ụzo isheli. ⁴⁵Nwoke ono sụ mu: “Mkpu ọwhu gharụ iwhu l’ụzo ọhuda bụ nke ndu l’agbajẹ ẹja nụ Chileke, bụ ndu eze-ụlo Chileke kụru ishi l’ẹka. ⁴⁶Mkpu ọwhu gharụ iwhu l’ụzo isheli bụru nke ndu l’agbajẹ ẹja nụ Chileke, bụ ndu ẹnya-mgbẹja ọkpokota-iwhe-ọku kụru ishi l’ẹka. Ndu ono bụkota ụnwu Zédọku, bụ whẹ kpụu bụ o-shi-l’eri Lívayi, l’a-kpụlitajeru Onye-Nwe-Ọha ntse bya ejeeru iya ozhi.”

⁴⁷Tọ dụ iya bụ, ọ bya atụa iwhe l’ọma-ogboduwhu ono, ogologo iya dụ nji-ẹka ụkporo ugbo ise, ọsa iya dụ nji-ẹka ụkporo ugbo ise, mgburẹku iya whẹ ẹno hakọta ẹnya nhamụnha. Ẹnya-mgbẹja ọkpokota-iwhe-ọku ono bụru l’iwhu eze-ụlo Chileke ono b’ọ dụ.

Eze-ụlo Chileke

⁴⁸O noo ya, ọ bya eduru mu bahụ lẹ mkpu-ọnu-abata eze-ụlo Chileke ono bya atụa iwhe lẹ mgbodo, dubutaru ọnu-abata ono, iwhe ọ dụ bụru nji-ẹka ise ise ibẹka labọ. Ọnu-abata ono bẹ ọsa iya dụ nji-ẹka iri l’ẹno; mgbodo dubutaru ọnu-abata bụru nji-ẹka ẹto ẹto bẹ ọsa iya dụ ibẹka labọ. ⁴⁹Mkpu-ọnu-abata ono bẹ ogologo iya dụ nji-ẹka ụkporo, ọsa iya dụ nji-ẹka iri l’ẹbo. Ẹka l’aadzọbeje ọkpa enyihu iya bẹ dụ ndzọkpa iri. A kpọbe itso ẹka ẹbo-ẹbo lẹ mgbodo ono, dubutaru ọnu-abata ono.

¹Tọ dụ iya bụ, ọ bya eduru mu jeshia eze-ụlo Chileke, ọ tụa iwhe l’ọkpa-mgbo dụkota iya nụ, ọsa iya dụ nji-ẹka ishii ishii ibẹka labọ. ²Ọnu ẹka l’eeshije abahụ iya bẹ ọsa iya dụ nji-ẹka iri. Ọsa mgbodo a tụru lẹ mgburẹku labọ nke ọnu-abata iya dụ nji-ẹka ise ise ibẹka labọ. Ọ bya atụa iwhe l’eze-ụlo ono, ogologo iya dụ nji-ẹka ụkporo labọ, ọsa iya dụ nji-ẹka ụkporo. ³Ọ bya abahụ l’ime eze-ụlo ono tụa iwhe l’ọkpa-mgbo ọnu ẹka l’eeshigeje abahụ iya, iwhe whẹ dụ bụru nji-ẹka ẹbo ẹbo. Ọnu ẹka l’eeshije abahụ l’eze-ụlo ono bẹ ọsa iya dụ nji-ẹka ishii. Mgbodo a tụru lẹ mgburẹku labọ nke ọnu-abata iya dụ nji-ẹka ẹsaa ẹsaa l’ọsa. ⁴Ọ bya atụa ogologo ime eze-ụlo ono ọ dụ nji-ẹka ụkporo, ọsa iya dụ nji-ẹka ụkporo l’ụzo atatiwhu eze-ụlo Chileke ono. Ọ sụ mu: “Ẹka-a bụ Ẹka Kakọta Ọdu Nsọ.” ⁵O noo ya, ọ bya atụa iwhe lẹ mgbodo eze-ụlo ono, igbidigbi iya dụ nji-ẹka ishi, mkpu, dụ-gee lẹ mgburẹku ụlo ono dụ nji-ẹka ẹno ẹno l’ọsa. ⁶Mkpu ono bẹ nọ lẹ mkpokfu lẹ mkpokfu dụ mkpokfu ẹto. Mkpokfu ụlo ono bẹ nweru ụkporo mkpu lẹ mkpu iri l’ẹhu l’ẹhu. Mkpu ono g’ọ ha b’e meru ọ bahụ abahụ l’ime, ọ bụru mgbodo bẹ dochiru whẹ nụ, mkpu ono nọdukota mgbodo ụlo ono l’ime mgburumgburu, mgbodo ono gbagide whẹ. Ọle e te enwedu iwhe e gude gbagide mgbodo nke eze-ụlo ono l’onwiya. ⁷Mkpu ono, dụ-gee lẹ mgburẹku ụlo ono bẹ ọsa iya ka shii eje eje mẹ l’eenyiliberu mkpokfu ụlo ono. Ụlo ọwhu a tụ-wheru eze-ụlo ono mgburumgburu b’a tụru lẹ mkpokfube lẹ mkpokfube, nke ọwhu bụ e nyihu iya, mkpu dụ-gee ya nụ aka ọsa eje eje. Ẹka l’eeshije enyihu iya bẹ shi l’ụlo nke alị iya je aghajaa lẹ nke echilabọ jeshia lẹ nke imeli.

⁸Mu whụru ẹka a kpụ-litaru akpụ-lita l’eze-ụlo Chileke ono mgburumgburu, ọ bụru iya bụ ẹka a tụru ukfu mkpu ono, a tụshiru ye iya mgburumgburu. Ẹka ono a kpụ-litaru akpụ-lita ono bẹ eli iya ha g’ọo ogologo mgbọro, l’eegudeje atụ iwhe, mbụ l’ọ dụ nji-ẹka ishii l’ogologo. ⁹Igbidigbi mgbodo azụ ụlo nke mkpu ono a tụshiru lẹ mgburẹku ụlo ono bẹ dụ nji-ẹka ise. O nweru ẹka gheru karawhongu lẹ mgbaku mkpu eze-ụlo Chileke ono ¹⁰yẹle mkpu ọwhu a tụ-wheru ogboduwhu iya mgburumgburu. Ẹka ono bẹ ọsa iya dụ nji-ẹka ụkporo. ¹¹Mkpu ono, nọkota lẹ mgburẹku eze-ụlo Chileke b’e yeru ọnu o yefutakota l’ẹka ono gheru karawhongu ono. Ọnu iya nnanụ bẹ gharụ iwhu l’ụzo isheli, ọdo ghaa iwhu l’ụzo ọhuda. Ẹka ono, gheru karawhongu ono bẹ ọsa iya dụ nji-ẹka ise mgburumgburu.

¹²Ụlo ọwhu a tụru ọ ghaa iwhu l’ogboduwhu eze-ụlo Chileke ono l’ụzo ẹka iya nke ẹnyanwu-arịba bẹ ọsa iya dụ nji-ẹka ụkporo ẹto lẹ nji-ẹka iri. Igbidigbi mgbodo ụlo ọbu bẹ dụ nji-ẹka ise gbaa mgburumgburu, ogologo iya dụ nji-ẹka ụkporo ẹno lẹ nji-ẹka iri.

¹³Ọ bya atụa eze-ụlo Chileke ono atụtu, ogologo iya dụ nji-ẹka ụkporo ise. Ọ tụa ogboduwhu eze-ụlo Chileke ono mẹe ụlo ono dụ l’ẹka iya nke ụzo ẹnyanwu-arịba yẹle mgbodo iya, iwhe whẹ dụ bụ nji-ẹka ụkporo ise l’ogologo. ¹⁴Atatiwhu eze-ụlo Chileke ono mẹe ogboduwhu iya nke ụzo ẹnyanwu-awata bẹ dụ nji-ẹka ụkporo ise l’ọsa.

¹⁵Ọ bya atụa ogologo ụlo ono gharụ iwhu l’ogboduwhu eze-ụlo Chileke ono l’ụzo ẹka iya nke ẹnyanwu-arịba, tụa ọnu-ụlo iya ibẹka ibẹbo, iwhe whẹ dụ bụru nji-ẹka ụkporo ugbo ise.

Ẹka-Dụ-Nsọ l’eze-ụlo Chileke ono mẹe Mkpu-Kakọta-Ọdu-Nsọ yẹle mkpu ono, dụ ghaa iwhu l’ọma-ogboduwhu eze-ụlo ono ¹⁶mẹe mkpu ọnu-abata iya l’owhu mẹe wẹrere windo, dụkota iya nụ mẹe ọnu-ụlo iya whẹ ẹto b’e gude oshi kebushia ekebushi mgburumgburu. E kebushiru ọma-alị iya mẹe mgbodo iya mẹe windo iya. Windo iya b’e kwechishiru ekwechishi. ¹⁷Mgbodo nke ime eze-ụlo Chileke ono mẹe ẹka a kpụru tukobe l’eli mgbo iya mẹe mgbodo nke azụ iya, mbụ mgbodo eze-ụlo ono l’owhu mgburumgburu ime iya mẹe azụ iya b’a pyịshiru iwhe dụ ¹⁸g’ọo cherubu mẹe nkfụ. A pyịru iya, nkfụ lanụ nọdu l’echilabọ cherubu labọ. Cherubu ono nweru iwhu labọ l’ẹhu l’ẹhu. ¹⁹Iwhu lanụ bẹ dụ g’ọo iwhu madzụ, nnanụ dụ g’ọo iwhu nwa oduu-gburu-agụ. Nnanụ b’o cheberu lẹ nkfụ ono l’ẹka lanụ, chebe nnanụ lẹ nkfụ ono l’ẹka iya ọwhu. O noo g’a pyịkotaru iwhe ono l’eze-ụlo Chileke ono mgburumgburu. ²⁰A pyịkotaru cherubu ono yẹle nkfụ ono lẹ mgbodo eze-ụlo ono wata l’ọma-alị iya jeye l’ẹka tukoru l’eli mgbo iya.

²¹Ọkpa-mgbo eze-ụlo Chileke ono bẹ nweru mgburẹku ẹno. L’iwhu ẹka dụ nsọ b’e nweru iwhe gbarụ ụgbugba lanụ dụ iya nụ. ²²Ẹnya-mgbẹja b’e gude oshi mee, eli iya bẹ dụ nji-ẹka ẹto, ogologo iya dụ nji-ẹka labọ, ọsa iya dụ nji-ẹka labọ. Nggoji ẹnya-mgbẹja ono, mẹe ọkpa iya, mẹe mgburẹku iya bẹ bụ oshi b’e gude mekota iya. Ọ sụ mu: “Lekwa teburu e doberu l’iwhu Onye-Nwe-Ọha.” ²³Eze-ụlo Chileke yẹle Ẹka dụ nsọ bụ mgbo ẹbo ẹbo dụ iya. ²⁴Mgbo ono dụ njịgba labọ l’ẹhu l’ẹhu, nweru ẹka l’apyajije iya apyaji. ²⁵Mgbo eze-ụlo Chileke ono b’a pyịshiru cherubu mẹe nkfụ ẹgube iya ono a pyịshiru iya lẹ mgbodo iya. L’atatiwhu mkpu-ọnu-abata b’e kpuru oshi. ²⁶O nweru wẹrere wẹrere windo dụ lẹ mgburẹku mkpu-ọnu-abata ono ibẹka ibẹbo. A pyịshikwaruwho nkfụ lẹ mgburẹku mgbodo mkpu-ọnu-abata ono.

Mkpu ndu l’agbajẹ ẹja nụ Chileke

¹Tọ dụ iya bụ, nwoke ono bya edufuta mu dubata l’ọma ogboduwhu nke nfụta l’ẹka iya nke ụzo isheli. O duru mu bahụ lẹ mkpu gharụ iwhu l’ọma-ogboduwhu eze-ụlo Chileke mẹe ndu ọwhu gharụ iwhu l’ụlo, dụ l’ụzo isheli. ²Ụlo ono dụ l’ụzo isheli bẹ ogologo iya dụ nji-ẹka ụkporo ise, ọsa iya dụ nji-ẹka ụkporo labọ l’iri. ³Ibẹka iya lanụ bẹ nọ ghaa iwhu l’ẹka ọsa iya dụ nji-ẹka ụkporo bụ iya bụ ẹka ono, dụ fụta l’ọma-ogboduwhu. Ẹka iya ọwhu nọdu ghaa iwhu l’ẹka a wụru ẹwhuru, dụkwawho fụta l’ọma-ogboduwhu ono. A kpụru iya mkpokfu ụlo ẹto, nweru ọnu-ụlo. Ọnu-ụlo mkpu ono ghakọtaru ibe iya iwhu. ⁴Atatiwhu mkpu ono bẹ nweru ẹka gheru iya karawhongu l’ime iya, iwhe ọ dụ bụ nji-ẹka iri l’ọsa, dụ nji-ẹka ụkporo ugbo ise l’ogologo. Mgbo iya b’e yeru l’ẹka iya nke ụzo isheli mkpu ono. ⁵Mkpu nke imeli bẹ hakọta kpapyịi, nkele ọnu-ụlo, dụ-gee ya nụ bẹ ketaru ẹka ha shii amamẹ mkpu ndu nke ụzo alị mẹe nke echi iya. ⁶Mkpu, nọkota lẹ mkpokfu iya nke ẹto bẹ l’enwedua itso ẹgube ọ dụ nke ogboduwhu. O meru ọma-ụlo iya nke imeli ka nwanshị karia nke alị iya mẹe nke echi iya. ⁷A tụru mgbodo nke azụ iya ọ kfụru l’iwhu mkpu ono l’ụzo ẹka iya nke ọma-ogboduwhu nfụta, mgbodo ono bẹ ogologo iya dụ nji-ẹka ụkporo labọ l’iri l’atatiwhu mkpu ono. ⁸Mkpu, dụ-gee l’ogboduwhu nfụta bẹ ogologo iya dụ nji-ẹka ụkporo l’iri. Ndu ọwhu gharụ iwhu l’eze-ụlo Chileke bẹ ogologo iya dụ nji-ẹka ụkporo ugbo ise. ⁹Mkpu nke alị bẹ ọnu iya fụtaru l’ụzo ẹnyanwu-awata mẹe e shi l’ọma-ogboduwhu nke nfụta abahụ iya.

¹⁰L’ụzo ọhuda ogboduwhu nke nfụta b’e nweru mkpu, a tụ-geeru l’agụga agụga mgbodo ọma-ogboduwhu ono yẹle mgbodo nke ogboduwhu eze-ụlo Chileke. ¹¹Ẹka gheru karawhongu nọdu whẹ l’atatiwhu. Mkpu ono bẹ yẹle mkpu nke ụzo isheli bụ iwhe lanụ. Ogologo iya bẹ yẹle ogologo iya ono bụ iwhe lanụ; ọsa iya yẹle ono bụru iwhe lanụ. Ọnu ẹka l’eeshije alụfu iya bẹ yẹle iya bụkwawho iwhe lanụ. Ọ bụru g’e doberu ẹka tụa ọwhu bụ g’a tụru ọwhu. Ọ bụru ọga mgbo lanụ b’e yekotaru whẹ. ¹²Mkpu nke alị, nọ l’ụzo ọhuda bẹ ọnu iya fụtakotaru l’ụzo ẹnyanwu-awata, bụ ẹka l’eeshije abahụ iya. E nweru mgbodo l’atatiwhu mkpu ono.

¹³Tọ dụ iya bụ, nwoke ono sụ mu: “Mkpu nke isheli mẹe mkpu nke ọhuda ono, gharụ iwhu l’ọma-ogboduwhu eze-ụlo Chileke ono bẹ bụ mkpu, dụ nsọ. Ọo ya bẹ ndu l’agbajẹ ẹja nụ Chileke, bụ ndu l’akpụlitajeru Onye-Nwe-Ọha ntse l’a-nọduje eri iwhe ngwo-ẹja, kacha ọ dụ nsọ. Ọo lẹ mkpu ono bẹ whẹ l’e-dobeje iwhe ngwo-ẹja, kagee ọ dụ nsọ, mbụ iwhe ngwo-ẹja-nri mẹe iwhe ngwo-ẹja iwhe-dụ-ẹji mẹe iwhe ngwo-ẹja ikpe-anmanma nkele ẹka ono bẹ dụ nsọ. ¹⁴Ndu l’agbajẹ ẹja nụ Chileke bahụwaa l’ẹka ono dụ nsọ ono, tẹ whẹ be eshikwa iya fụta byatashia ọma-ogboduwhu nke nfụta gbahaa lẹ whẹ yefuru uwe, whẹ l’eyeje eje ozhi nkele uwe ono dụkota nsọ. Whẹ l’a-chịta uwe ọdo yee tẹhenu whẹ ejede ẹka ndu ọdo l’anọduje.”

¹⁵O noo ya, nteke ọ tụ-geru iwhe l’ime eze-ụlo Chileke ono, ọ bya eduta mu shia ọnu-abata nke ụzo ẹnyanwu-awata bya atụa iwhe l’ẹka gbarụ eze-ụlo Chileke ono mgburumgburu. ¹⁶Ọ bya egude mgbọro, e gude atụ iwhe tụa ẹka iya nke ụzo ẹnyanwu-awata, ọ dụ nji-ẹka ụkporo ise ise ugbo ise. ¹⁷Ọ bya egude mgbọro, e gude atụ iwhe ono tụa ẹka iya nke ụzo isheli, ọ dụ nji-ẹka ụkporo ise ise ugbo ise. ¹⁸Ọ bya egude mgbọro, e gude atụ iwhe ono tụa ẹka iya nke ụzo ọhuda, ọ dụ nji-ẹka ụkporo ise ise ugbo ise. ¹⁹Ọ bya aghachi gude mgbọro, e gude atụ iwhe ono tụa ẹka iya nke ụzo ẹnyanwu-arịba, ọ dụ nji-ẹka ụkporo ise ise ugbo ise. ²⁰Iwhe ono b’ọ tụru ibẹka ụlo ono whẹ ẹno. Mgbodo bẹ gbarụ iya mgburumgburu, ogologo iya dụ nji-ẹka ụkporo ise ugbo ise; ọsa iya dụ nji-ẹka ụkporo ise ugbo ise. Mgbodo ono b’e gude dobuta iwhe dụ nsọ yẹle iwhe l’adụa nsọ.

Ọdu-biribiri Onye-Nwe-Ọha batawhuru azụ l’eze-ụlo Chileke

¹O noo ya, nwoke ono bya eduru mu jeshia l’ọnu-abata ọwhu gharụ iwhu l’ụzo ẹnyanwu-awata. ²Mu whụa ọdu-biribiri Chileke nke Ízurẹlu g’o shi l’ụzo ẹnyanwu-awata abya. Ẹwhu o gude abya l’adalẹwho g’ọo ẹwhu eze mini, l’awhụ gbudugbudu. Mgboko nwukota whoo l’ọdu-biribiri Chileke ono. ³Ọwhulenya ono mu whụru dụlewho g’ọo ọwhulenya mu whụru nteke Chileke byarụ t’iya mebyishia obodo ono, dụkwawho g’ọo ọwhu mu whụru lẹ mgboro ẹnyimu Keba. Mu daa kpube iwhu l’alị. ⁴Ọdu-biribiri Onye-Nwe-Ọha bya eshi l’ọnu-abata ono, gharụ iwhu l’ụzo ẹnyanwu-awata bahụ l’eze-ụlo Chileke ono.

⁵Ume Chileke palia mu imeli je edobe l’ọma-ogboduwhu eze-ụlo ono nke ime iya. Mu whụa ọdu-biribiri Onye-Nwe-Ọha g’o jiru eze-ụlo Chileke ono kpimu. ⁶Gẹ nwoke ono kfụkube mu bẹ mu nụru olu-okfu onye nọ l’ime eze-ụlo Chileke ono ekfu eyeru mu ⁷sụ mu: “Nwa ndiwhe; ẹnyoru-a bụ ẹka oshi-eze mu dụ bụru ẹka mu l’adzọbeje ọkpa. Ẹka-a bụ ẹka mu l’e-buru eburu l’echilabọ ndu Ízurẹlu jeye lẹ gbururu. Ọzo-ụlo ndu Ízurẹlu ta abyahẹdu l’e-mebyishi ẹwha mu dụ nsọ ọdo. Whẹbedua l’onwowhe ọdua l’ọo ndu-eze whẹ ta abyahẹdu l’e-gude ogori, whẹ l’eri mẹe odzu ndu-eze whẹ mebyishia ẹwha mu ọdo. ⁸Ọnu-ụlo whẹ bẹ whẹ meru ọ dụ lẹ mgboro ọnu-ụlo nkemu, mee mgbo whẹ ọ dụ lẹ mgboro iya nkemu, ọ bụru mgbodo bụ iwhe kewaru mu lẹ whẹ nwẹkiya. Whẹ gude ejo akpamara whẹ meru mebyia ẹwha mu dụ nsọ. O noo iwhe meru iwhe mu gude ẹhu-eghughu mu mee whẹ, whẹ bụru kpurupyata. ⁹Iwhe dụ iya nụ bụ tẹ whẹ shi ntaa haa ori ogori, whẹ apashịa odzu ndu-eze whẹ ono nggẹ mu lẹ whẹ eburu jeye lẹ gbururu.

¹⁰“Nwa ndiwhe; tụaru ọzo-ụlo ndu Ízurẹlu ọnu gẹ eze-ụlo Chileke ono dụ nke ọwhu iwhere l’e-gude whẹ l’ejo-ememe whẹ meru. Tẹ whẹ seta ụgbugba ụlo ono. ¹¹Ọ -bụru l’iwhere ẹhu whẹ dụ whẹ l’iwhe whẹ megbaberu, goshi whẹ gẹ eze-ụlo ono dụ dụ mẹe ụgbugba iya mẹe ọnu ẹka l’eeshije alụfu iya mẹe ọnu-abata iya, goshi whẹ g’a tụru iya ọ dụ. Gụ agụshiaru whẹ iwhe bụ nsọ eze-ụlo ono mẹe iwu, dụ iya nụ. Dekotaru whẹ iwhe ono edede, nke ọwhu whẹ l’e-gude ẹnya ndo dobekota iwu, dụ iya nụ yẹle nsọ, dụ iya nụ g’ọ ha. ¹²Ọ waa iwu nke eze-ụlo Chileke ono: Ẹka ono, nọ-wheru elikoro ugvu ono mgburumgburu l’a-bụru ẹka kakọta ọdu nsọ. O nokwa iwu nke eze-ụlo Chileke ono.

Ẹnya-mgbẹja

¹³“Lee gẹ l’ọo-hatabe mbụ ẹnya-mgbẹja lẹ nji-ẹka lẹ nji-ẹka. Nji-ẹka ọbu bụ nji-ẹka lẹ ntụ ọbochi-ẹka lanụ. Ụzo alị iya bẹ l’ee-gvu ụwara mini mgburumgburu, l’a-dụ nji-ẹka lanụ, ọsa iya adụ nji-ẹka lanụ, ogboromọnu ụwara mini ono mgburumgburu adụ ntụ-ẹka lanụ. Lee gẹ elikoro ẹnya-mgbẹja ono l’a-ha ndọwa: ¹⁴Wata l’ụzo alị iya ẹka ono e gvuru ụwara mini jeye l’uko ụzo alị iya l’a-dụ nji-ẹka labọ, ọsa iya adụ nji-ẹka lanụ. Wata l’uko nke nshịi rwua l’uko nke eze iya l’a-dụ nji-ẹka ẹno, ọsa iya adụ nji-ẹka lanụ. ¹⁵Nhamụnha ẹnya-mgbẹja ono l’a-dụ nji-ẹka ẹno. Ee-chibe mpu ẹno lẹ nhamụnha ẹnya-mgbẹja ono, ya etsefuta etsefuta. ¹⁶Nhamụnha ẹnya-mgbẹja ono l’e-nwe mgburẹku ẹno, hakọta ẹnya nhamụnha. Ogologo iya l’a-dụ nji-ẹka iri l’ẹbo, uswe iya adụ nji-ẹka iri l’ẹbo. ¹⁷Uko iya enwekwaruwho mgburẹku ẹno, hakọta ẹnya nhamụnha, ogologo iya l’a-dụ nji-ẹka iri l’ẹno, uswe iya adụ nji-ẹka iri l’ẹno. Ogboromọnu iya mgburumgburu l’a-dụ mkpirikpi nji-ẹka. Ụzo alị iya ẹka e gvuru iya ọwara-mini adụ nji-ẹka lanụ mgburumgburu. Ẹka l’eeshije enyihu ẹnya-mgbẹja ono bẹ nọ laarụ ụzo ẹnyanwu-awata.”

Odobe ẹnya-mgbẹja nsọ

¹⁸Nwoke ono bya asụ mu: “Nwa ndiwhe; ọ waa iwhe Nnajị-Ọha bụ Onye-Nwe-Ọha l’ekfu ndọwa: Lekwa nsọ, dụru ẹnya-mgbẹja ono ndọwa. A tụ-gele iya whọ ọ dụ ree nke t’a gbaa ya ẹja ọkpokota-iwhe-ọku mẹe nke t’a gbashị iya mmee iwhe l’eli, ¹⁹gụ akpụta nwa oke-eswi nụ ndu l’agbajẹ ẹja nụ Chileke, bụ ndu Lívayi, shi l’ẹnya-uwhu nke Zédọku, mbụ ndu ono, l’akpịlitajeru mu ntse bya ejeeru mu ozhi. Nwa oke-eswi ono bẹ l’ee-gude gbaa ẹja iwhe-dụ-ẹji. O nokwa iwhe Nnajị-Ọha bụ Onye-Nwe-Ọha l’ekfu ndono. ²⁰Harụ mmee ya nata hua lẹ mpu ẹno ono e chiberu l’ẹnya-mgbẹja ono, hua ya l’iku uko ẹno ono, dụ iya nụ. Gụ ehugbaru iya l’ogboromọnu ẹnya-mgbẹja ono mgburumgburu. O noo gẹ l’ii-shi mee t’ẹnya-mgbẹja ono bụru ẹka dụ nsọ, gudekwa iya whọ safụ iwhe-dụ-ẹji, dụ iya nụ. ²¹Kpụta oke-eswi e gude gbaa ẹja iwhe-dụ-ẹji kpọo ọku l’ẹka e metaru l’eze-ụlo Chileke ono t’a kpọje ẹja ọku l’azụ ẹka dụ nsọ.

²²“O rwua mbọku nke ẹbo gụ akpụta mkpi, l’ete nwee ọrwu t’e gude gbaa ẹja iwhe-dụ-ẹji. Ẹnya-mgbẹja ono bẹ l’ee-me t’ọ dụ nsọ ẹgube ono, e gude oke-eswi whọ mee ya ọ dụ nsọ. ²³I megee ẹka ono ọ dụ nsọ, shi l’igwe élwù kpụta oke-eswi mẹe ebyila l’ete enwee ọrwu t’e gude gbaa ẹja. ²⁴Kpụru whẹ bya l’iwhu Onye-Nwe-Ọha tẹ ndu l’agbajẹ ẹja nụ Chileke pyashị whẹ únú l’ẹhu kpọo whẹ ọku t’ọ bụru ẹja a kpọkotaru ọku nụ Onye-Nwe-Ọha.

²⁵“Abalị ẹsaa bẹ l’ii-dukfube kpụta mkpi mbọkumboku t’e gude gbaa ẹja iwhe-dụ-ẹji. Ẹgube ono bẹ l’ii-shi l’igwe élwù kpụta oke-eswi mẹe ebyila l’ete enwee ọrwu. ²⁶Abalị ẹsaa bẹ ndu l’agbajẹ ẹja nụ Chileke l’a-safụkota iwhe-dụ-ẹji, dụ l’ẹnya-mgbẹja ono mee ya t’ọ dụ nsọ, shi nno doberu iya Chileke nsọ. ²⁷Whẹ medzule iya whọ nno abalị ẹsaa ono, wata lẹ mbọku nke ẹsato iya tụgburu bẹ ndu l’agbajẹ ẹja nụ Chileke l’a-nọduje agbarụ unu ẹja ọkpokota-iwhe-ọku mẹe ẹja ẹhu-guu l’eli ẹnya-mgbẹja ono. O noo nteke mu l’a-nata unu ndono. O nokwa iwhe Nnajị-Ọha bụ Onye-Nwe-Ọha l’ekfu ndono.”

Iwu, a tụru swibe ọnu-abata nke ụzo ẹnyanwu-awata

¹Tọ dụ iya bụ, nwoke ono bya eduwhu mu azụ l’ọnu-abata ụlo-nsọ ono nke nfụta bụ iya bụ ẹka ono, dụ chee iwhu l’ụzo ẹnyanwu-awata. A gụ-chia ya agụ-chi. ²Onye-Nwe-Ọha bya asụ mu: “Ọnu-abata-a bẹ l’agụ-chi agụ-chi mkpụrumkpuru. O too nwedu agụha, t’e shi iya abahụ abahụ nkele ọo ya bẹ Onye-Nwe-Ọha bụ Chileke nke Ízurẹlu shi bahụ. Ọo ya bụ l’ọo-gụ-chi g’ọ gụ-chiru mkpụrumkpuru. ³Ọo onye ishi unu kpụ bẹ l’aa-ha t’ọ nọdu l’ime ọnu-abata ono ria nri l’iwhu Onye-Nwe-Ọha. Ẹka l’oo-shi bahụ bụ l’ụzo, l’eeshije bata lẹ mkpu-ọnu-abata, shikwa iya whọ lụfu.”

Iwu nke ọnabata madzụ l’eze-ụlo Chileke

⁴Tọ dụ iya bụ, nwoke ono bya eduru mu shia ẹka iya nke ụzo isheli lụfuta l’atatiwhu eze-ụlo Chileke ono. Mu lee ẹnya whụa ọdu-biribiri Onye-Nwe-Ọha g’o jiru eze-ụlo Onye-Nwe-Ọha ono kpimu, mu daa kpube iwhu l’alị. ⁵Onye-Nwe-Ọha sụ mu: “Nwa ndiwhe; tụbe nvọ l’iwhe-e, gude ẹnya ghu whẹ ẹbo whụ, gụ asaa nchị ghu asa nụa iwhe mu l’abyarụ ghu ekfuru lẹ nke nsọ, dụ l’eze-ụlo Onye-Nwe-Ọha. Dekwa ẹnya lẹ mini marụ ẹgube onye l’aa-nabata t’ọ bahụ l’eze-ụlo Chileke mẹe ẹgube onye l’aa-chị t’ọ lụfu l’ẹka dụ nsọ. ⁶Kfuru ụnwu okwefu ike ono, bụ ọzo-ụlo ndu Ízurẹlu l’ọ waa iwhe Nnajị-Ọha bụ Onye-Nwe-Ọha l’ekfu ndọwa: Unubẹ ọzo-ụlo ndu Ízurẹlu, t’o jebekwaru unu ẹgube ono mbụ ejo akpamara ono unu l’eme, ⁷mbụ l’anabata ono, unu l’anabatajẹ ndu ọha ọdo l’ụlo-nsọ nkemu nteke unu l’anụ mu nri bụ iya bụ ẹ̀bà-iwhe mẹe mmee-iwhe, mbụ ndu ọha ọdo ono, l’ete ebua ugvu nke ime obu lẹ nke anụ-ẹhu, e shi nno eze-ụlo mu bụru ẹka e merwuru emerwuru. Unu mebyiru ọgbandzu mu yekwaru akpamara ono unu l’emegbabe. ⁸Unu harụ oleta ẹnya l’iwhe dụ nsọ nkemu ẹgube ono mu sụru t’unu meje iya, ọ bụ-chiaru ndu ọha ọdo bẹ unu yeru tẹ whẹ leta ẹnya l’ụlo-nsọ mu. ⁹Ọ waa iwhe Nnajị-Ọha bụ Onye-Nwe-Ọha l’ekfu ndọwa: ‘Ba adụkwa onye ọha ọdo, l’ete ebua ugvu nke ime obu lẹ nke anụ-ẹhu l’a-bata l’ụlo-nsọ nkemu, mbụ ndu ọha ọdo ono, bu l’echilabọ ndu Ízurẹlu. ¹⁰Ndu Lívayi, bụ ndu harụ mu etsotso; je etsoru Ízurẹlu kpawhuhu je anọdu mu otẹnya gwalahaa agwa whẹ bẹ bụ whẹ vu ejo-iwhe, tso iya nụ. ¹¹Whẹ l’a-bụru ndu l’eje ozhi l’ụlo nsọ nkemu, whẹ l’a-nọdu eche ọnu-abata eze-ụlo Chileke nche eje ozhi l’ime eze-ụlo ono. Ọo whẹ l’e-gbuje anụ e gude agba ẹja ọkpokota-iwhe-ọku, bụru whẹ l’agbajẹru ndu madzụ ẹja ejeru whẹ ozhi. ¹²Ọle eshi-ọwhu whẹ nọdu l’iwhu agwa whẹ gbaa ẹja, bya edoberu ndu Ízurẹlu ejo-iwhe tẹ whẹ kpokuta daa iko bẹ mu ribuakwaru iya lẹ nte lẹ whẹ l’e-vuru ejo-iwhe, tso iya nụ. O nokwa iwhe Nnajị-Ọha bụ Onye-Nwe-Ọha l’ekfu ndono. ¹³Tẹ whẹ ba abyakwa mu ntse lẹ whẹ l’abyarụ mu ozhi nke ndu l’agbajẹ ẹja nụ Chileke, tẹ whẹ ba akpụlitakwa ntse l’ẹka iwhe dụ nsọ nkemu dụ yẹle iwhe kakọta ọdu nsọ. Tẹ whẹ vukwaru iwhere nke akpamara ono whẹ megbaberu. ¹⁴Ọle g’ọ dụ g’ọ dụ bẹ mu l’e-ye whẹ eze-ụlo Chileke l’ẹka, tẹ whẹ jeje ozhi, dụ iya nụ, eme iwhe lile, l’eeme eme l’ime iya.’

Iwu a tụru swibe ndu l’agbajẹ ẹja nụ Chileke l’eze-ụlo ono

¹⁵“A bya lẹ ndu l’agbajẹ ẹja nụ Chileke bụ ndu Lívayi bụ iya bụ ndu ọwhu shi l’eri Zédọku, bụ ndu shi eje ozhi l’ụlo nsọ mu nteke ndu Ízurẹlu kpawhuhuru l’ẹka mu nọ, whẹbedua l’a-bya mu ntse bya ejeeru mu ozhi. Tẹ whẹ kfụjeru l’iwhu mu nụje mu ẹba anụ mẹe mmee-anụ. O nokwa iwhe Nnajị-Ọha bụ Onye-Nwe-Ọha l’ekfu ndono. ¹⁶Whẹ l’a-bahụje l’ime ụlo-nsọ nkemu, jekube teburu nkemu jeeru mu ozhi, gbarụ nụ, ọo whẹ bẹ ozhi mu dụ l’ẹka. ¹⁷Nteke whẹ bahụru l’ọnu-abata ọma-ogboduwhu nke ime tẹ whẹ chịta uwe ọcha yee, tẹ whẹ be eyejekwa uwe ẹji anụ nteke whẹ l’eje ozhi l’ọnu-abata ọma-ogboduwhu nke ime ono yẹle eze-ụlo Chileke. ¹⁸Tẹ whẹ kejee ẹkwa-ọcha l’ishi, weru ẹkwa-ọcha l’ukfu. Tẹ whẹ be eyejekwa iwhe l’a-nọ etsu whẹ ẹwhuru l’ẹhu. ¹⁹Whẹ lụfudeje jekfu ndu ọdo l’ọnu-abata ọma-ogboduwhu nke nfụta tẹ whẹ yefukwa uwe ono, whẹ shi yee eje ozhi wụshi l’ime mkpu dụ nsọ, chịta uwe ọdo yee, nke ọwhu whẹ l’ẹte egude uwe whẹ chee ndu ọdo ọdu nsọ. ²⁰Tẹ whẹ be erwushijekwa ẹgbushi l’ishi m’ọ kwanụ haa ẹgbushi whẹ t’o tsee ogologo. Ọo esebota bẹ whẹ l’e-sebotaje ẹgbushi l’ishi whẹ.

²¹“Ba adụkwa onye l’agbajẹ ẹja nụ Chileke l’a-ngụje mmẹe mẹ l’ọo-bahụ l’ọma-ogboduwhu nke ime. ²²Tẹ whẹ ba alụkwa nwanyị-mbunu m’ọ bụ nwanyị ji iya chịfuru achịfu. T’onye whẹ l’a-lụ bụkwaru nwamgbọko yẹle nwoke l’ẹte azẹbua, bụ nwa nwanyị a nwụru l’ọzo-ụlo ndu Ízurẹlu, ọ dụa whẹ alụa nwanyị-mbunu onye l’agbajẹ ẹja nụ Chileke harụ laa maa. ²³Whẹ l’e-zhije ndibe mu ọdu l’iche dụ l’iwhe dụ nsọ yẹle iwhe l’adụa nsọ, goshi whẹ gẹ whẹ l’e-shije mee t’oge kpaarụ whẹ l’iwhe l’aasọ nsọ yẹle ọwhu l’ẹte asọ nsọ. ²⁴Okfu -daa, tẹ ndu l’agbajẹ ẹja nụ Chileke bụru ndu-ikpe, tẹ whẹ leje ẹnya l’ikpe nkemu gude kpeshia okfu ọbu. Whẹ l’e-dobekota iwu nkemu mẹe iwhe lile mu tọru ọkpa iya tẹ whẹ meje l’ọnodu ori oge nkemu, bụ ọwhu a tụ-buru atụ-bu. Whẹ edobe mbọku ọtuta-ume nkemu nsọ. ²⁵T’onye l’agbajẹ ẹja nụ Chileke be ejekubejekwa onye nwụhuru anwụhu shi nno merwua onwiya. Ọle ọ bụru l’ọo nna iya m’ọ bụ ne iya m’ọ bụ nwa iya nwoke m’ọ bụ nwa iya nwanyị m’ọ bụ nwune iya nwanyị l’ẹte alụ ji bẹ nwụhuru nụ, t’onye ọbu merwua rọ onwiya. ²⁶Onye l’agbajẹ ẹja nụ Chileke merwugee onwiya l’ọnodu ono t’ọ gụta abalị ẹsaa nọduru onwiya. ²⁷Mbọku l’ọo-bahụ l’ẹka dụ nsọ l’ọma-ogboduwhu nke ime eze-ụlo Chileke t’iya jee ozhi l’ẹka dụ nsọ ono, t’onye ọbu gbakwa ẹja ẹhu iya l’iswi iwhe-dụ-ẹji o meru. O nokwa iwhe Nnajị-Ọha bụ Onye-Nwe-Ọha l’ekfu ndono. ²⁸Ndu l’agbajẹ ẹja nụ Chileke te enwedu oke-iwhe. Ọo mbẹdua bụ oke-iwhe, whẹ nwe. T’ọ bọ dụkwa oke unu l’e-keru gbata whẹ lẹ Ízurẹlu l’ọ kwa mbẹdua bụ oke whẹ ketaru. ²⁹Ọo whẹ l’e-rije iwhe e gude gbaa ẹja nri mẹe ẹja iwhe-dụ-ẹji mẹe ẹja ikpe-anmanma, iwhe lile a gọru nụ Onye-Nwe-Ọha lẹ Ízurẹlu l’a-bụkota nkewhe. ³⁰Iwhe kagezhia ree lẹ mebyi iwhe mbụ, shi l’okfu unu l’ụdu iya l’ụdu iya mẹe ngwo-ẹja l’ụdu iya l’ụdu l’iwhe bụ ngwo-ẹja, unu wotaru l’a-bụkotaru nke ndu l’agbajẹ ẹja nụ Chileke. Unu wotaje ụturutuu-nri, shi l’iwhe mbụ unu metaru l’okfu unu nụ ndu l’agbajẹ ẹja nụ Chileke ono nggẹ ọnu-ọma adụ swiru ọzo-ụlo unu. ³¹Tẹ ndu l’agbajẹ ẹja nụ Chileke be erikwa anụ iwhe nwụhuru anwụhu yẹle ọwhu iwhe dzugburu adzugbu m’ọ bụ nwẹnu m’ọ bụ anụ-ẹgbudu.

Gẹ l’ee-gude kee alị ono

¹“Unu washịde alị ono g’unu l’a-dụ nweru iya, t’unu wafụ alị ono ibẹka lanụ doberu Onye-Nwe-Ọha iche t’ọ bụru alị nsọ, mbụ ẹka ogologo iya l’a-dụ ụkporo ụnu nji-ẹka ẹto l’ụnu nji-ẹka labọ l’ụkporo nji-ẹka iri, uswe iya adụ ụkporo ụnu nji-ẹka labọ l’ụnu iri. Uswetuma ẹka ono mgburumgburu l’a-bụru ẹka dụ nsọ. ²L’alị ono bẹ l’ee-kefuta ẹka mgburẹku iya whẹ ẹno l’a-ha ẹnya nhamụnha, ogologo iya l’a-dụ ụnu nji-ẹka lanụ l’ụkporo ise, uswe iya adụ ụnu nji-ẹka lanụ l’ụkporo ise t’ọ bụru ẹka l’aa-tụ ụlo nsọ, a bya ekefuta uswetuma ẹka l’a-dụ nji-ẹka ụkporo labọ l’iri ye iya t’ọ nọ-whe ya mgburumgburu. ³L’uswetuma alị nsọ ono bẹ unu l’a-wafụta ẹka ogologo iya l’a-dụ ụkporo ụnu nji-ẹka ẹto l’ụnu nji-ẹka labọ l’ụkporo l’iri, ọsa iya adụ ụkporo ụnu nji-ẹka l’ụnu nji-ẹka ise. Ọo ẹka ono bẹ ụlo-nsọ ẹka kakọta ọdu nsọ l’a-nọ. ⁴Ọo-bụru ibẹka iya ọwhu dụ nsọ l’alị ono, bụru nke ndu l’agbajẹ ẹja nụ Chileke ono, bụ ndu l’eje ozhi l’ụlo-nsọ, mbụ ndu ono l’akpịlitajeru Onye-Nwe-Ọha ntse bya ejeeru iya ozhi. O noo ẹka ụlo ebubu whẹ l’a-dụ ndono mẹe ụlo-nsọ. ⁵Ibẹka iya ọdo, l’a-dụ ụkporo ụnu nji-ẹka ẹto l’ụnu nji-ẹka labọ l’ụkporo iri l’ogologo, uswe iya adụ ụkporo ụnu nji-ẹka l’ụnu nji-ẹka ise l’a-bụru nke ndu Lívayi ono, l’eje ozhi l’eze-ụlo Chileke, ẹka ono l’a-bụru ẹka whẹ l’e-me obodo, whẹ l’e-buru.

⁶“Unu buta alị, ọsa iya dụ ụnu nji-ẹka iri l’ẹbo l’ụkporo nji-ẹka iri, ogologo iya dụ ụkporo ụnu nji-ẹka ẹto l’ụnu nji-ẹka labọ l’ụkporo nji-ẹka iri ye t’ọ gbakfuru l’uswetuma alị nsọ ono t’ọ bụru ọzo-ụlo ndu Ízurẹlu l’owhu l’e-nweru iya.

⁷“Onye-ishi unu l’e-nweru alị l’ibẹka labọ, dụ l’alị nsọ ono mẹe ibẹka labọ, dụ l’alị nke ọha. Oo-shi l’ụzo ẹnyanwu-arịba ẹka iya lanụ nọo je akpa l’ẹka iya ọwhu, shikwawho l’ụzo ẹnyanwu-awata ẹka iya lanụ nọo je akpa l’ẹka iya ọwhu, ya eshi l’oge alị ọwhu nọ l’ụzo ẹnyanwu-arịba nọo ogologo ogologo je aghaa oge alị ọwhu nọ l’ụzo ẹnyanwu-awata, nọo ẹgube ono je ehua ẹhu l’ibẹka iya ọwhu a washịru ikfu l’ikfu. ⁸Alị ono l’a-bụru oke alị nke onye-ishi lẹ Ízurẹlu. Ọo ya bụ nggẹ ndu nkemu bụ ndụ-ishi akpabuhu ndibe mu ẹhu. Whẹ l’a-parụ ọzo-ụlo ndu Ízurẹlu haa tẹ whẹ nọdu l’alị ono l’ikfu l’ikfu.

⁹“Ọ waa iwhe Nnajị-Ọha bụ Onye-Nwe-Ọha l’ekfu ndọwa: T’o jeberu unu ẹgube ono unubẹ ndụ-ishi Ízurẹlu. Unu wofu ẹka l’ome iwhe-kpanganga yẹle ọkpapyashi ndu ọdo ishi, unu meje iwhe l’ụzo ọ dụ ree mẹe l’ụzo ọ kfụru nhamụnha, unu ahaa ọchikashi ndibe mu l’ibe whẹ. O nokwa iwhe Nnajị-Ọha bụ Onye-Nwe-Ọha l’ekfu ndono.

¹⁰“Unu nweru iwhe e gudeje atụ iwhe ọwhu bụ ọkpobe iya mẹe ọkpobe nkwẹka mẹe ọkpobe abakochi.

¹¹“Nkwẹka ọbu mẹe abakochi ọbu l’a-bụru iwhe lanụ. Iwhe l’a-lajẹ lẹ abakochi ọbu bụ nkere iri ẹkpa, iwhe l’a-lajẹ lẹ nkwẹka ọbu abụru nkere iri ẹkpa. Ẹkpa ọbu bụkwaru ọkpobe ẹkpa e gude atụ iwhe.

¹²“Shẹkelu lanụ l’a-bụjeru ụkporo gera. Ụkporo shẹkelu e yeru ụkporo shẹkelu lẹ shẹkelu ise, a bya eyeru iya shẹkelu iri l’ise l’a-bụ mina lanụ.

Ngwo-ẹja e gude abarụ Chileke ẹja

¹³“Ọ waa bụ ngwo-ẹja, unu l’a-nụje Chileke: Unu shi l’ẹkpa akpụru witi lanụ hata nkere nkwẹka ishii nụ, unu eshi l’ẹkpa balị lanụ hata nkere nkwẹka ishii nụ. ¹⁴Mmanụ ólivu, unu l’a-nụje bụ ekpemu mmanụ lanụ l’ime mmanụ jiru nkwẹka iri, m’ọ bụ l’ime mmanụ jiru ite-mkpa lanụ. Nkwẹka iri bẹ yẹle ite-mkpa lanụ hakọ nkele nkwẹka iri l’alajẹ l’ite-mkpa lanụ. ¹⁵Atụru, unu l’akpụtaje bụ atụru lanụ l’ime ụkporo atụru iri l’atụru ndu Ízurẹlu. Ọo ya bẹ l’ee-gudeje gbaa ẹja nri mẹe ẹja ọkpokota-iwhe-ọku mẹe ẹja ẹhu-guu gude iya kfụa ụgwo iwhe-dụ-ẹji ndu Ízurẹlu megbaberu. O nokwa iwhe Nnajị-Ọha bụ Onye-Nwe-Ọha l’ekfu ndono.

¹⁶“Ụtu ngwo-ẹja ono bẹ ndu alị ono gẹ whẹ ha l’a-tụjeru nụ onye bụ ishi lẹ Ízurẹlu. ¹⁷Ozhi, dụru onye-ishi ono bụ t’o wofutaje iwhe l’ee-gude gbaa ẹja ọkpokota-iwhe-ọku mẹe ẹja nri mẹe ẹja mmẹe nteke l’eeri oge, mbụ l’ori oge ọnwa ọ̀whúú mẹe mbọku ọtuta-ume mẹe oge ọzo-ụlo ndu Ízurẹlu l’eeri eri. Ọo ya l’e-wofutaje iwhe l’ee-gude gbaa ẹja iwhe-dụ-ẹji, mẹe ẹja nri, mẹe ẹja ọkpokota-iwhe-ọku, mẹe ẹja ẹhu-guu shi nno kfụa ụgwo iwhe-dụ-ẹji, ndu Ízurẹlu megbaberu.”

¹⁸Ọ waa iwhe Nnajị-Ọha bụ Onye-Nwe-Ọha l’ekfu ndọwa: Abalị mbụ l’ọnwa mbụ bẹ l’ịi-kpụtaje nwa oke-eswi l’ẹte enwee ọrwu gbaa ẹja gude mechaa ụlo-nsọ emecha. ¹⁹Onye l’agbajẹ ẹja nụ Chileke bẹ l’e-wota mmee anụ ono, e gude gbaa ẹja iwhe-dụ-ẹji ono hua l’ọkpa-mgbo eze-ụlo Chileke mẹe lẹ mgburẹku ẹno nke uko, dụ l’ẹnya-mgbẹja mẹe l’ọkpa-mgbo ọnu-abata ọma-ogboduwhu nke ime. ²⁰Ọ bụru ẹgube ono bẹ l’ii-me iya lẹ mbọku nke ẹsaa l’ime ọnwa ono l’ishi onye meru iwhe-dụ-ẹji t’ọ kwabẹ ẹnya mee ya; t’ọ ma ama. Ọ kwa nno bẹ unu l’e-shi kfụa ụgwo iwhe-dụ-ẹji, dụ l’eze-ụlo Chileke ono.

²¹“L’abalị iri l’ẹno l’ọnwa mbụ bẹ unu l’e-rije oge O-je-ghata. Abalị ẹsaa bẹ unu l’a-ta buredi, l’eete eyee iwhe l’ekoje buredi. ²²Mbọku ono bẹ onye-ishi l’a-kpụfuta nwa oke-eswi t’e gude gbaa ẹja iwhe-dụ-ẹji l’iswi ẹhu iya mẹe l’iswi ẹhu ndu alị ono l’owhu. ²³L’ime abalị ẹsaa, l’ee-ri oge ono; mbọkumboku l’ime abalị ẹsaa ono bẹ l’ọo-kpụtaje nwa oke-eswi ẹsaa mẹe ebyila ẹsaa, l’ẹte enwee ọrwu t’e gude gbaarụ Onye-Nwe-Ọha ẹja ọkpokota-iwhe-ọku. O nokwawho gẹ l’ọo-kpẹje mkpi mbọkumboku t’e gude gbaa ẹja iwhe-dụ-ẹji. ²⁴Oo-wofutaje nkwẹka balị t’ọ bụru ngwo-ẹja nri, tso l’oke-eswi ono nnanụ; ya ewofuta nkwẹka balị t’ọ bụru ngwo-ẹja nri, tso l’ebyila ono nnanụ; wofuta konggo mmanụ t’o tsoru lẹ nkwẹka balị ono.

²⁵“O rwua l’ori oge Ime-Mkpu, l’awatajẹ l’abalị iri l’ise l’ọnwa ẹsaa; l’ime abalị ẹsaa l’eerije oge ono bẹ onye-ishi ono l’e-wofutakwawho iwhe lanụ ono t’e gude gbaa ẹja ọkpokota-iwhe-ọku mẹe ẹja nri mẹe mmanụ.

Ngwo-ẹja nke onye-ishi

¹“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Ọnu-abata ọma-ogboduwhu nke ime ono, cheru iwhu l’ụzo ẹnyanwu-awata bẹ l’aa-gụ-chije agụ-chi l’ime abalị ishii, l’eejeje ozhi. Mbọku, l’aa-gụhaje iya bụ mbọku ọtuta-ume mẹe mbọku l’eeri oge ọnwa ọ̀whúú. ²Onye-ishi l’e-shi lẹ mkpu ọnu-abata ọma-ogboduwhu nke nfụta bahụ iya bya akfụru l’ọnodu iya lẹ nhamụnha ọnu-abata. Ndu l’agbajẹ ẹja nụ Chileke ewota ngwo-ẹja ọkpokota-iwhe-ọku mẹe ngwo-ẹja ẹhu-guu nke onye-ishi ono gbaarụ iya. Ya anọdu lẹ mgboko ọnu-abata ono baarụ Chileke ẹja. Ọ bagee ẹja ọbu ya alụfu, ọle t’a ba gụ-chikwa ọnu-abata ono agụ-chi jeye l’urwẹnyashi. ³Ndu alị ono bụ l’ọnu ẹka l’eeshije abahụ l’ọnu-abata ono bẹ whẹ l’a-nọduje abarụ Onye-Nwe-Ọha ẹja mbọku ọtuta-ume mẹe mbọku l’eeri oge ọnwa ọ̀whúú. ⁴Iwhe onye-ishi unu l’e-wota mbọku ọtuta-ume bya agbarụ Onye-Nwe-Ọha ẹja ọkpokota-iwhe-ọku bụ ụnwu atụru ishii, l’ẹte enwee ọrwu mẹe ebyila lanụ, l’ẹte enwee ọrwu. ⁵Ngwo-ẹja nri, l’e-tso l’ebyila ono bụ nkwẹka balị lanụ. Ngwo-ẹja nri, l’e-tso l’ụnwu atụru ono bụ iwhe ẹka iya gbakfuru ya anụ; iwhe l’e-tso l’ogbongu ereshi ono nnanụ bụ konggo mmanụ. ⁶Mbọku l’eeri oge ọnwa ọ̀whúú bẹ l’ọo-nụ nwa oke-eswi l’ẹte enwee ọrwu mẹe ụnwu atụru ishii mẹe ebyila lanụ, l’ẹte enwee ọrwu. ⁷Ngwo-ẹja nri, l’e-tso l’oke-eswi lanụ bụ nkwẹka balị; ngwo-ẹja nri, l’e-tso l’ebyila lanụ bụru nkwẹka balị. Ngwo-ẹja, l’e-tso l’ụnwu atụru ono bụ iwhe ẹka iya gbakfuru ya anụ; iwhe l’e-tso lẹ nkwẹka balị ono nnanụ bụ konggo mmanụ. ⁸Nteke onye-ishi l’abahụ, t’o shi lẹ mkpu ọnu-abata bahụ, ya eshikwawho l’ẹka ono fụta.

⁹“Nteke ndu alị ono byarụ l’iwhu Onye-Nwe-Ọha l’iwhe bụ oge l’eeri eri, t’onye -shiru ụzo isheli bahụ jee ọbaru Chileke ẹja shikwa ụzo ọhuda lụfu. Onye ọwhu -shiru ụzo ọhuda bahụ eshia ụzo isheli lụfu. T’ọ bọ dụkwa onye l’e-shi ọnu-abata ọwhu o shiru bahụ lụfu. T’onyenọnu chebekwa iwhu l’ẹka o cheberu iya shi iya lụfu. ¹⁰Whẹ l’abahụ, t’onye-ishi whẹ tsokwaru whẹ bahụ; nteke whẹ l’alụfuta alụfuta t’o tsokwaru whẹ lụfuta.

¹¹“Nteke l’eeri oge mẹe nteke l’eeri oge, a tụ-buru atụ-bu bẹ ngwo-ẹja nri, l’e-tso lẹ nwa oke-eswi l’a-bụ nkwẹka balị; ngwo-ẹja nri, l’e-tso l’ebyila abụru nkwẹka balị. Ngwo-ẹja nri, l’e-tso l’ụnwu atụru bụ iwhe ẹka gbakfuru onye bẹ l’ọo-nụ; iwhe l’e-tso lẹ nkwẹka balị ono nnanụ bụ konggo mmanụ. ¹²Nteke onye-ishi gude iwhe zụru iya nkwe l’obu bya ọnu Onye-Nwe-Ọha; o beru ọ bụru ẹja ọkpokota-iwhe-ọku m’ọ bụ ẹja ẹhu-guu bẹ zụru iya nkwe l’obu t’ọ nụ iya Onye-Nwe-Ọha t’e ghebekwaru iya ọnu-abata ọwhu cheru iwhu l’ụzo ẹnyanwu-awata ọnu. T’ọ gbakwaa ẹja ọkpokota-iwhe-ọku iya ono m’ọ bụ ẹja ẹhu-guu iya ono gẹ l’ọogbaje iya mbọku ọtuta-ume. E megee ya alụfu; ọ lụfulewho t’a gụ-chia ụzo ọnu-abata ono agụ-chi.

¹³“Mbọku, a nwụtaru anwụta bẹ l’ọo-kpụtaje nwatụru, gbarụ awha, l’ẹte enwee ọrwu nụ t’e gude gbaarụ Onye-Nwe-Ọha ẹja ọkpokota-iwhe-ọku. L’ụtsu g’ụtsu ha bẹ l’ọo-kpụtaje iya bya anụ. ¹⁴Ụtsu g’ụtsu ha bẹ l’oo-wotaje ngwo-ẹja nri, tso iya nụ, mbụ nkere nkwẹka ishii balị yẹle nkerẹto konggo mmanụ, e gude agwọ-whube ụturutuu-balị ọbu. O noo bụ nsọ dụru ngwo-ẹja nri l’aanụ Onye-Nwe-Ọha shi lẹ gbururu rwua lẹ gbururu. ¹⁵O noo ya, nwatụru ono mẹe ngwo-ẹja nri ono mẹe mmanụ ono bẹ l’ee-wofutaje l’ụtsu g’ụtsu ha t’e gude gbaa ẹja ọkpokota-iwhe-ọku.

¹⁶“Ọ waa iwhe Nnajị-Ọha bụ Onye-Nwe-Ọha l’ekfu ndọwa: Ọ -bụru l’onye-ishi bẹ keru oke-alị iya nụ onye lanụ l’ụnwu iya nwoke, bẹ oke-alị ọbu, ọ nụru iya bụakwa nke nwa iya ọbu. ¹⁷Ọle ọ -bụru l’ọo onye l’ejeru yẹbe onye-ishi ono ozhi b’o keru oke-alị iya nụ, bẹ l’ọo-bụru nke onye-ozhi iya ono jeye awha onweru-onwonye; o noo nteke oke-alị ọbu l’a-lawhuru onye-ishi ono azụ. Ọo ụnwu iya nke nwoke kpụ bụ ndu l’e-nwegburu oke-alị onye-ishi ono keru nụ whẹ. ¹⁸T’onye-ishi ono ba achịfujekwa ndu alị ono l’oke-alị whẹ shi nno nata whẹ iwhe whẹ. Ẹka l’oo-shi nụ ụnwu iya nwoke oke-alị bụkwaru lẹ nke ẹka iya nggẹ tọ dụ onye ibe mu a natarụ iwhe iya.”

Akpatankụ ẹka l’eeshije iwhe a gbarụ Chileke ẹja

¹⁹Tọ dụ iya bụ, nwoke ono bya eduru mu shia ọnuzo ọwhu nọ l’iku ọnu-abata nke ụzo isheli, mbụ ono, e shi abahụ lẹ mkpu dụ nsọ ono, a tụru doberu ndu l’agbajẹ ẹja nụ Chileke. Mu nọdu l’ẹka ono whụa ẹka ha whorokoto l’ishimishi ụzo ẹnyanwu-arịba. ²⁰Ọ sụ mu: “Ẹka-a bụ ẹka ndu l’agbajẹ ẹja nụ Chileke l’a-nọduje eshi anụ, e gburu gude gbaa ẹja ikpe-anmanma mẹe ẹja iwhe-dụ-ẹji; nọdukwa iya whọ ghee iwhe e gude gbaa ẹja nri nke ọwhu whẹ l’ete gude iya fụta ọma-ogboduwhu nke nfụta shi nno mee t’ọ dụ nsọ sweru ndu nọ l’ẹka ono.”

²¹Nteke ono ọ bya edufuta mu ọma-ogboduwhu nke nfụta, bya eduru mu jekota lẹ mgburẹku ọma-ogboduwhu ono whẹ ẹno, mgburẹku ọma-ogboduwhu ono whẹ ẹno nwekotaru ogboduwhu l’ẹhu l’ẹhu. ²²Ụnwu ogboduwhu ẹno, hagee nwanshị bẹ dụkota lẹ mgburẹku ọma-ogboduwhu ono. Iwhe ogologo iya dụ-gee bụ nji-ẹka ụkporo labọ; ọsa iya dụ-gee nji-ẹka ụkporo l’iri. Whẹ ẹno ono hakọta ẹnya nhamụnha. ²³Ime ogboduwhu ono mgburumgburu whẹ ẹno l’ẹhu l’ẹhu b’e gude ẹwhuru tụa ya mgbodo; bya akpọshia ya ekfu l’ụzo alị iya meta iya ẹka l’aa-nọ eshi ite. ²⁴Ọ bya asụ mu: “Ẹka-a bụ akpatankụ ndu l’eje ozhi l’eze-ụlo Chileke l’e-shije anụ ndu Ízurẹlu gude gbaa ẹja.”

Ẹnyimu, shi l’eze-ụlo Chileke ono asọfuta

¹Tọ dụ iya bụ, nwoke ono bya eduwhu mu azụ l’ọnu ẹka l’eeshije abahụ l’eze-ụlo Chileke ono; mu whụa mini g’o shi lẹ mkpula mgboko ọnu-ụlo eze-ụlo Chileke ono asọfuta. Ẹka l’ọoso ala bụru ụzo ẹnyanwu-awata nkele ọo ụzo ẹnyanwu-awata bẹ eze-ụlo Chileke ono cheru iwhu. Ẹka mini ono shi asọdata bụ lẹ mkpula mgboko ọnu-ụlo eze-ụlo ono l’ẹka iya ọwhu nọ l’ụzo ọhuda bụ iya bụ l’ụzo ọhuda nke ẹnya-mgbẹja. ²Ọ bya eshia ụzo ọnu-abata nke ụzo isheli dufuta mu; o duru mu jewhee mgburumgburu l’etezhi bata l’ọnu-abata nke nfụta, dụ chee iwhu l’ụzo ẹnyanwu-awata. Mini ono shi l’ụzo ọhuda asọfuta. ³Nwoke ono bya atụgbua ụzo ẹnyanwu-awata chịru eri, e gude atụ iwhe l’ẹka, ọ tụta ụnu nji-ẹka labọ lẹ nji-ẹka ụkporo iri, ọ bya eduru mu rughata lẹ mini ono. Mini ono be mu l’ọgba-echi ọkpa. ⁴Ọ byakwa atụta ụnu nji-ẹka labọ lẹ nji-ẹka ụkporo iri ọdo; bya eduru mu rughata lẹ mini ono ọdo; mini ono be mu l’ikpere ọkpa. Ọ byakwa atụta ụnu nji-ẹka labọ lẹ nji-ẹka ụkporo iri ọdo; bya eduru mu rughata lẹ mini ọdo; mini ono be mu l’ukfu. ⁵Ọ byakwa atụta ụnu nji-ẹka labọ lẹ nji-ẹka ụkporo iri ọdo; mini ono bya aghọ ẹnyimu, mu l’ẹte adụhe ike erwughata. Mini ono bẹ byarụ abya shii; bụwaru iswina nke bụ lẹ mu te erukotadu iya eruru; gbahaa lẹ mu gvuru iya egvugvu gvughata. ⁶Tọ dụ iya bụ, ọ jịa mu sụ: “Nwa ndiwhe; ?ị whụru iwhe-e?”

Nteke ono ọ bya eduwhu mu azụ l’agụga ẹnyimu ono. ⁷Mu rwulewho ẹka ono mu whụa ikpoto oshi gvugeeru l’agụga ẹnyimu ono ibẹka ibẹbo. ⁸Ọ sụ mu: “Mini-a l’asọ ala ụzo ẹnyanwu-awata, shi l’ẹka ono asọba lẹ nsụda Araba, bụ ẹka o shi asọba l’eze-ẹnyimu. Ọobuje nteke mini ono sọbaru l’eze-ẹnyimu; mini iya abya adụ ree. ⁹Iwhe bụ ẹka ẹnyimu ono sọbaru, bẹ iwhe lile nọ ndzụ, l’etsu iya kakaka l’a-nọdukota ndzụ. Ẹma l’a-zụshi ha l’igwe l’ime mini ono, o noo nkele mini-a l’asọbaje l’ẹka ono. Mini eze-ẹnyimu ono abya edoo rịsaa. Ọo ya bụ l’iwhe bụ ẹka ẹnyimu ono sọbaru bẹ iwhe nọ iya nụ l’a-nọdukota ndzụ. ¹⁰Ndu l’egbu ẹma l’a-kfụjeru l’agụga eze-ẹnyimu ono. Whẹ l’e-shi lẹ Enu-gedi gee ụgbu-ẹma whẹ jeye lẹ Enu-egulayimu. Ẹma, nọ iya nụ l’a-ha l’igwe l’ụdu iya l’ụdu iya g’ọo ẹma, nọ l’oke eze-ẹnyimu. ¹¹Ọle mini ụda yẹle mini alị mmavụ bẹ l’ẹte adụdu ree. Aa-ha iya t’ọ bụru mmaswị, l’aa-nọ eku eshi únú. ¹²L’agụga ẹnyimu ono bẹ oshi-ọmi l’ụdu iya l’ụdu iya l’e-gvukotaru ẹka ẹbo-ẹbo. Oshi ono taa abyadụ l’a-lwa ẹkwo, mebyi iya ta abya l’e-rishihu erishihu. Whẹ l’a-nọ amị mebyi ọ̀whúú l’ọnwa l’ọnwa nkele mini, whẹ l’amịta bẹ shi l’ụlo-nsọ anwụfuta. Mebyi oshi ono l’a-bụru nri, mkpẹekwo iya abụru ọgvu.”

Oge alị

¹³Ọ waa iwhe Nnajị-Ọha, bụ Onye-Nwe-Ọha l’ekfu ndọwa: “Lee g’unu l’e-shi kpaa oge alị ono, unu l’e-keshiru ikfu Ízurẹlu whẹ iri l’ẹbo t’ọ bụru oke-iwhe whẹ. Jósẹfu l’e-nwe oke-alị labọ. ¹⁴Unu l’e-ke iya ẹnya nhamụnha. Mu ribukwaru iya lẹ nte lẹ mu l’a-nụ iya nna unu oche whẹ. Alị-a bụ unu bẹ l’ọo-daru nke t’ọ bụru oke-iwhe unu.

¹⁵“Lee ẹka l’a-bụ oge-alị ono ndọwa:

“L’ụzo isheli bẹ l’ọo-wata l’oke eze-ẹnyimu l’ụzo ọwhu lụfuru Hẹtulonu je akpaa l’ọnu Hámatu lụfuta lẹ Zedadu, ¹⁶mẹe Hámatu, mẹe Berota, mẹe Sibirayimu ọwhu nọ lẹ mgbakụ oge-alị Damásukọsu yẹle nke Hámatu, je akpaa lẹ Haza Hatikonu, ọwhu nọ l’oge alị Hawụranu. ¹⁷Oge iya l’e-shi l’oke eze-ẹnyimu nọo je akpaa lẹ Haza Enanu, bụ ọwhu nọ l’oge-alị Damásukọsu nke ụzo isheli. Oge-alị Hámatu bẹ nọ l’ụzo isheli ẹka ono. O noo ẹka l’a-bụru oge-alị nke ụzo isheli.

¹⁸“L’ụzo ẹnyanwu-awata bẹ oge-alị ono l’e-shi lẹ mgbakụ Hawụranu yẹle Damásukọsu, nọo tụgburu ẹnyimu Jọ́danu ogologo ogologo lẹ mgbakụ alị Giledu yẹle alị Ízurẹlu, nọo ẹgube ono lụfuta l’eze-ẹnyimu nke ụzo ẹnyanwu-awata je akpaa lẹ Tama. O noo ẹka l’a-bụru oge-alị nke ụzo ẹnyanwu-awata.

¹⁹“L’ụzo ọhuda bẹ oge-alị ono l’e-shi lẹ Tama nọo je akpaa lẹ mini Meriba nke Kádẹshi; nọo je alụfuta l’ọnu-iyi ndu Íjiputu jeye l’oke eze-ẹnyimu. O noo ẹka l’a-bụru oge-alị nke ụzo ọhuda.

²⁰“L’ụzo ẹnyanwu-arịba bẹ bụ oke eze-ẹnyimu l’a-bụru oge iya jeye lẹ nhamụnha ẹka dụ l’atatiwhu ẹka l’eeshije abahụ Hámatu. O noo ẹka l’a-bụru oge-alị nke ụzo ẹnyanwu-arịba.

²¹“T’unu keshiaru onwunu alị-a l’ikfu g’ikfu ha lẹ Ízurẹlu. ²²Unu washịa ya t’ọ bụru oke-iwhe unu mẹe nke ndu nlwamụnlwa, unu lẹ whẹ bugee, mbụ ndu ono, nọwaa l’echilabọ unu nwụshia ụnwu. Unu dobe whẹ l’ọnodu ndu a nwụru anwụnwu lẹ Ízurẹlu. Tẹ whẹ tsoru unu wata alị l’ikfu gẹ ikfu ha lẹ Ízurẹlu. ²³Onye nlwamụnlwa l’e-tso ndu o bu l’ikfu nkewhe wata alị nkiya. O nokwa iwhe Nnajị-Ọha bụ Onye-Nwe-Ọha l’ekfu ndono.

Eeke alị ono

¹“Ọ waa bụ ẹwha ikfu ono l’ẹhu l’ẹhu: Danu l’e-nwe oke lanụ l’ụzo isheli. Oge alị iya l’a-wata l’agụga ụzo Hẹtulonu bahụ l’ọnu ẹka l’eeshije abahụ Hámatu je akpaa lẹ Hazaru-enanu, nọ l’oge-alị Damásukọsu l’ụzo isheli bya anọdu lẹ mgboro Hámatu. Oge-alị iya ono l’a-nọ rwua ụzo ẹnyanwu-awata je akpaa l’ụzo ẹnyanwu-arịba.

²“Asha l’e-nweru oke lanụ. Asha yẹle Danu l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

³“Náfutali l’e-nwe oke lanụ. Náfutali yẹle Asha l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

⁴“Manáse l’e-nwe oke lanụ. Manáse yẹle Náfutali l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

⁵“Ífuremu l’e-nwe oke lanụ. Ífuremu yẹle Manáse l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

⁶“Rúbẹnu l’e-nwe oke lanụ. Rúbẹnu yẹle Ífuremu l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

⁷“Juda l’e-nwe oke lanụ. Juda yẹle Rúbẹnu l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

⁸“Alị ọwhu yẹle nke Juda l’a-na oge l’ụzo ẹnyanwu-awata je akpaa l’ụzo ẹnyanwu-arịba bụ oke alị, unu l’e-keta dobe iche. Uswe iya l’a-dụ ụkporo ụnu nji-ẹka ẹto l’ụnu nji-ẹka labọ lẹ nji-ẹka ụkporo iri; ogologo iya l’a-bụru iwhe lanụ yẹle nke ndu ikfu ọdo; ya eshi l’ụzo ẹnyanwu-awata nọo je akpaa l’ụzo ẹnyanwu-arịba. Ụlo-nsọ l’a-kfụru iya l’echilabọ. ⁹Oke alị ọwhu unu l’e-keta doberu Onye-Nwe-Ọha iche bẹ ogologo iya l’a-dụ ụkporo ụnu nji-ẹka ẹto l’ụnu nji-ẹka labọ lẹ nji-ẹka ụkporo iri; uswe iya adụ ụkporo ụnu nji-ẹka l’ụnu nji-ẹka ise. ¹⁰Oke alị ono, e doberu nsọ l’a-bụru nke ndu l’agbajẹ ẹja nụ Chileke. Ogologo iya l’a-dụ ụkporo ụnu nji-ẹka ẹto l’ụnu nji-ẹka labọ lẹ nji-ẹka ụkporo iri l’ụzo isheli; uswe iya adụ ụkporo ụnu nji-ẹka l’ụnu nji-ẹka ise l’ụzo ẹnyanwu-arịba; bya adụ ụkporo ụnu nji-ẹka l’ụnu nji-ẹka ise l’uswe l’ụzo ẹnyanwu-awata, ogologo iya adụ ụkporo ụnu nji-ẹka ẹto l’ụnu nji-ẹka labọ lẹ nji-ẹka ụkporo iri l’ụzo ọhuda. Ụlo-nsọ Onye-Nwe-Ọha l’a-kfụru iya l’echilabọ. ¹¹Ndu l’e-nwe iya nụ bụ ndu ono, e doberu nsọ tẹ whẹ gbajẹ ẹja Chileke l’ụnwu Zédọku, mbụ ndu ono, l’ejeru iya ozhi, tẹmenu whẹ bụru ndu l’ẹte akpawhuhua akpawhuhu g’ọo ndu Lívayi nteke ono, ndu Ízurẹlu kpawhuhuru. ¹²Ọo-bụru whẹ oke alị, gbarụ iche, e kefutaru l’oke alị nsọ ono, bụ ẹka kakọta ọdu nsọ. Ọ bụru whẹ lẹ ndu Lívayi l’a-na oge.

¹³“L’ẹka iya nke ndu l’agbajẹ ẹja nụ Chileke bẹ l’aa-wẹe ndu Lívayi oke alị, ogologo iya l’a-dụ ụkporo ụnu nji-ẹka ẹto l’ụnu nji-ẹka labọ lẹ nji-ẹka l’ụkporo iri; uswe iya adụ ụkporo ụnu nji-ẹka l’ụnu nji-ẹka ise. Ogologo iya g’ọ ha l’a-dụkota ụkporo ụnu nji-ẹka ẹto l’ụnu nji-ẹka labọ lẹ nji-ẹka ụkporo iri. Uswe iya adụkota ụkporo ụnu nji-ẹka l’ụnu nji-ẹka ise. ¹⁴Tẹ whẹ be erekwa iya ere m’ọ bụ gbanwe ya agbanwe. Ọo ya bụ ẹka kakọta ree l’alị ono; tọ bọ bahụkwa onye ọdo l’ẹka nkele ọ bụ ẹka dụru Onye-Nwe-Ọha nsọ.

¹⁵“Ẹka whọduru nụ, bụ ẹka uswe iya dụ ụnu nji-ẹka iri l’ẹbo lẹ nji-ẹka ụkporo iri; ogologo iya dụ ụkporo ụnu nji-ẹka ẹto l’ụnu nji-ẹka labọ lẹ nji-ẹka ụkporo iri bẹ l’a-bụru ẹka ndu mkpụkpu l’a-nọ eme iwhe. Ọo-bụru ẹka l’aa-tụshi ụlo mẹe ẹka whẹ l’a-nọje eche élwù whẹ. L’echilabọ iya bẹ mkpụkpu ono l’a-dụ. ¹⁶Lee gẹ l’ọo-ha ndọwa: Ụzo isheli iya l’a-dụ ụnu nji-ẹka iri lẹ nnanụ lẹ nji-ẹka ụkporo ise. Ụzo ọhuda iya adụ ụnu nji-ẹka iri lẹ nnanụ lẹ nji-ẹka ụkporo ise. Ụzo ẹnyanwu-awata iya adụ ụnu nji-ẹka iri lẹ nnanụ lẹ nji-ẹka ụkporo ise. Ụzo ẹnyanwu-arịba adụ ụnu nji-ẹka iri lẹ nnanụ lẹ nji-ẹka ụkporo ise. ¹⁷Mkpụkpu ono l’e-nwe ẹka élwù l’a-nọje ata nri. Ụzo isheli iya l’a-dụ ụkporo nji-ẹka iri l’ẹbo lẹ nji-ẹka iri. Ụzo ọhuda iya adụ ụkporo nji-ẹka iri l’ẹbo lẹ nji-ẹka iri. Ụzo ẹnyanwu-awata iya adụ ụkporo nji-ẹka iri l’ẹbo lẹ nji-ẹka iri. Ụzo ẹnyanwu-arịba iya adụ ụkporo nji-ẹka iri l’ẹbo lẹ nji-ẹka iri. ¹⁸Ogologo ẹka whọduru nụ l’ẹka iya ọwhu dụ l’ụzo oge alị nsọ ono, bẹ ụzo ẹnyanwu-awata iya l’a-dụ ụkporo ụnu nji-ẹka l’ụnu nji-ẹka ise; ụzo ẹnyanwu-arịba iya adụ ụkporo ụnu nji-ẹka l’ụnu nji-ẹka ise. Ọo-nọ l’ogologo ẹka iya nke oke alị nsọ. Iwhe e metaru l’alị ono l’a-bụ nri ndu l’ejeru mkpụkpu ozhi l’e-rije. ¹⁹Ndu l’ejeru mkpụkpu ozhi, shi l’ikfu g’ikfu ha lẹ Ízurẹlu bụ whẹ l’a-kọje iwhe l’alị ono. ²⁰Iwhe bụ ẹka unu l’e-dobe iche l’alị ono bẹ l’e-nweru ibẹka ẹno, l’a-ha ẹnya nhamụnha; ogologo iya l’a-dụkota ụkporo ụnu nji-ẹka ẹto l’ụnu nji-ẹka labọ lẹ nji-ẹka ụkporo iri; uswe iya adụ ụkporo ụnu nji-ẹka ẹto l’ụnu labọ lẹ nji-ẹka ụkporo iri bụ iya bụ oke alị nsọ yẹle alị nke ndu mkpụkpu.

²¹“Ẹka whọduru nụ l’alị nsọ ono yẹle alị nke ndu mkpụkpu l’ibẹka ibẹbo l’a-bụru nke onye-ishi unu. Oo-shi l’ụzo ẹnyanwu-awata ẹka alị nsọ ono dụ ụkporo ụnu nji-ẹka ẹto l’ụnu labọ lẹ nji-ẹka ụkporo iri nọo je akpaa l’oge alị ụzo ẹnyanwu-awata. Ọ bụru ẹgube ono bẹ l’ọo-dụkwawho l’ụzo ẹnyanwu-arịba ẹka alị ono, dụ ụkporo ụnu nji-ẹka ẹto l’ụnu labọ lẹ nji-ẹka ụkporo iri je akpaa l’oge alị ụzo ẹnyanwu-arịba. Ẹka ono l’a-nọ ogologo ogologo yẹle alị nke ndu ikfu g’ikfu ha. Ọo-bụru nke onye-ishi. Oke alị nsọ ono bẹ yẹle ụlo-nsọ nke eze-ụlo Chileke ono l’a-nọdukota l’echilabọ alị ono. ²²Alị nke ndu Lívayi mẹe nke ndu mkpụkpu bẹ l’a-nọkota l’echilabọ nke onye-ishi ono. Oke alị onye-ishi ono l’a-nọdu lẹ mgbakụ alị Juda yẹle alị Bénjaminu.

²³“A bya l’ikfu ndu ọwhu whọduru nụ: Bénjaminu l’e-nweru oke lanụ l’ụzo ẹnyanwu-awata je akpaa l’ụzo ẹnyanwu-arịba.

²⁴“Símiyọnu l’e-nweru oke lanụ. Símiyọnu yẹle Bénjaminu l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

²⁵“Ísaka l’e-nweru oke lanụ. Ísaka yẹle Símiyọnu l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

²⁶“Zébulọnu l’e-nweru oke lanụ. Zébulọnu yẹle Ísaka l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

²⁷“Gadu l’e-nweru oke lanụ. Gadu yẹle Zébulọnu l’a-na oge watalẹwho l’ụzo ẹnyanwu-awata je akpaa l’ụzo ẹnyanwu-arịba.

²⁸“L’ụzo ọhuda bẹ oge iya nke Gadu l’e-shi lẹ Tama nọo je akpaa lẹ mini Meriba nke Kádẹshi, shi l’ẹka ono nọo ogologo ogologo lụfu ọnu-iyi Íjiputu je akpaa l’oke eze-ẹnyimu.

²⁹“Ọo ya bụ alị ọbu, unu l’a-washị t’ọ bụru oke-iwhe ikfu g’ikfu ha lẹ Ízurẹlu; o noo g’unu l’e-shi keshia ya tẹ ndu nọnu nweru nkewhe. O nokwa iwhe Nnajị-Ọha bụ Onye-Nwe-Ọha l’ekfu ndono.

Ọnuzo nọ-gee lẹ Jerúsalẹmu

³⁰“Lee ẹka l’a-bụru ọnuzo, e shi alụfu alụfu lẹ mkpụkpu ono ndọwa: Ụzo isheli bẹ l’aa-tụ ya dụ ụnu nji-ẹka iri lẹ nnanụ lẹ nji-ẹka ụkporo ise. ³¹Ọnuzo ẹto, l’a-dụ l’ụzo isheli bụ ọnuzo Rúbẹnu mẹe ọnuzo Juda mẹe ọnuzo Lívayi. Ọnuzo obodo ono bẹ l’aa-gụ ẹwha ikfu g’ikfu ha lẹ Ízurẹlu.

³²“Ụzo ẹnyanwu-awata bẹ l’aa-tụ ya dụ ụnu nji-ẹka iri lẹ nnanụ lẹ nji-ẹka ụkporo ise. Ọnuzo ẹto, l’a-dụ l’ụzo ẹnyanwu-awata ọbu bụ: ọnuzo Jósẹfu, mẹe ọnuzo Bénjaminu, mẹe ọnuzo Danu.

³³“Ụzo ọhuda bẹ l’aa-tụ, ya dụ ụnu nji-ẹka iri lẹ nnanụ lẹ nji-ẹka ụkporo ise. Ọnuzo ẹto, l’a-dụ l’ụzo ọhuda ono bụ ọnuzo Símiyọnu, mẹe ọnuzo Ísaka, mẹe ọnuzo Zébulọnu.

³⁴“Ụzo ẹnyanwu-arịba bẹ l’aa-tụ ya dụ ụnu nji-ẹka iri lẹ nnanụ lẹ nji-ẹka ụkporo ise. Ọnuzo, l’a-dụ l’ụzo ẹnyanwu-arịba ono bụ ọnuzo Gadu, mẹe ọnuzo Asha, mẹe ọnuzo Náfutali.

³⁵“Mgburumgburu mkpụkpu ono l’a-dụ ụkporo ụnu nji-ẹka labọ l’ụnu nji-ẹka ise.

“Watalẹwho mbọku ono jeyewaro bẹ ẹwha mkpụkpu ono l’a-bụ: Onye-Nwe-Ọha nọ l’ẹka ono.”