Ẹsuta

Ẹkwo

ẸSUTA

Vashiti, bụ eze-nwanyị, kwefuru ike

¹Ọ waa iwhe nwụru nụ nteke Áhazerusu shi bụru eze, l’achị ụkporo obodo ugbo ishii l’obodo ẹsaa, watazhiawho l’alị Indiya jeye l’alị Itiyópiya. ²Nteke ono bẹ eze bụ Áhazerusu shi nọdu l’oshi-eze iya lẹ Susa, bụ ishi alị-eze ono.

³O rwua awha, kwe iya awha ẹto, ọ watarụ ọbu eze, o shishia nri kua ndu bụ ishi ozhi l’alị-eze iya mẹe ndu ozhi iya tẹ whẹ bya eria ngụa. Ndu ishi ndu ojọgu ndu Peshiya mẹe nke ndu Midiya mẹe ndu a marụ ẹwha whẹ mẹe ndu ọchi-ọha obodo, dụ l’iche l’iche, l’ọochi tsoru bya lẹ nri ono. ⁴O meru oriri ono ụkporo abalị ugbo tete kperegedemu. O gude nteke ono goshi gẹ ya bụ-be eze, nwenukaru iwhe mẹe gẹ ya bụ-be oke-madzụ bụru onye dụ biribiri.

⁵A nọ-gelewho abalị olemole ono, o meru oriri ono, eze byakwa eshishia nri ọdo; kua ndu bu lẹ mkpụkpu Susa, bụ ishi alị-eze iya ono tẹ whẹ bya eria ngụa, ndu ukfu lẹ ndu nta. Whẹ nọo lẹ nri ono abalị ẹsaa. Ẹka whẹ nọdu mee oriri ono bụ ẹka dụ g’ọo ọma-ogboduwhu l’ime mgbabu ibe-eze. ⁶Iwhe e gude memashia ẹka ono bụ ẹkwa ọcha mẹe ẹkwa, dụ urwukpu-urwukpu, e yegeeru oghu ọcha mẹe nke urwukpu urwukpu l’ishishi iya. Oghu ono b’e liberu l’échì mkpọla-ọcha, a kụpyaberu l’itso, e meru l’ogbu-ngerengere ẹwhuru, a kpọbe-geeru l’ẹka ono. E gude ẹwhuru, l’erekaa ire mẹe ẹwhuru, l’egbukaa ngerengere chia ọma alị ẹka ono; doo ya iwhe-azẹe, e meru lẹ mkpọla-ododo mẹe lẹ mkpọla-ọcha. ⁷Ụpyi, e gude gbaarụ whẹ mmẹe bụ ụpyi, e meru lẹ mkpọla-ọcha, tẹmenu whẹ gbagee iche iche. Mmẹe ndu eze l’angụje sụwhaa l’ẹka ono nkele eze bẹ sarụ ẹka ọkpobe asasa mee oriri ono. ⁸A ta atụdu iwu l’ọwa gẹ bụ madzụ ngụta-be mmẹe ono ya akfụshi. Eze sụhawaru ndu ozhi iya tẹ whẹ nụje onyenọnu iwhe gụru iya nụ.

⁹Nteke ono bẹ Vashiti, bụ eze-nwanyị shishikwaruwho nri, kua ụnwanyi tẹ whẹ bya eria ngụa l’ibe eze Áhazerusu. ¹⁰O be mbọku nke ẹsaa; eze bụ Áhazerusu ngụta mmẹe, ẹmereme ji iya ẹhu. O zhia ụmadzu ẹsaa, a hárụ aháhá, bụ ndu l’ejeru iya ozhi, ẹwha whẹ bụ Mehumanu mẹe Byizuta mẹe Habona mẹe Byiguta mẹe Abagụta mẹe Zeta mẹe Kakasu, ¹¹sụ tẹ whẹ je ekuaru iya eze-nwanyị, bụ Vashiti t’o kpuru okpu eze-nwanyị iya byakfuta yẹbe eze. Eze-nwanyị ono bẹ dụ ugvu l’ẹnya. Eze l’eme tẹ ya goshi ndu ẹbyii ya mẹe ndu bụ ishi l’alị-eze iya lẹge eze-nwanyị l’amabe ụma. ¹²Ndu ozhi ono je ezhia eze-nwanyị ono, bụ Vashiti iwhe eze zhiru iya, ọ jịka lẹ ya tee ejedu. Tọ dụ iya bụ, ẹhu ghulahaa eze eghu; ọ vọru ọku ghụa ẹhu.

¹³O noo ya, iwhe bụ nsọ eze bụ lẹ tẹmenu ya emede iwhe ọ chọru ememe bẹ l’ọokpatajeeda ishi l’ẹka ndu iwu-alị mẹe ndu ikpe, kfụru nhamụnha doru ẹnya. Ọo ya bụ, eze bya ejekfushia ndu mmamagụ idzu, bụ iya bụ ndu marụ iwhe gbarụ l’ememe, ¹⁴bụru ndu l’akajẹ iya ọno ntse. Ndu ọbu, o jekfuru idzu bụ Kashena mẹe Sheta mẹe Adụmata mẹe Tashishi mẹe Merẹsu mẹe Masena mẹe Memukanu. Ụmadzu ẹsaa ono bụ ndu ishi alị Peshiya mẹe alị Midiya; whẹ bụru ndu ẹka whẹ l’erwu eze l’ẹhu, tẹmenu ọ bụru whẹ bẹ ọkwa whẹ kagezhia shii l’alị-eze ono l’owhu. ¹⁵Eze jịa whẹ sụ: “E lee ẹnya lẹ gẹ iwu-alị gbarụ, ?ọo gụnu bẹ l’ee-me Vashiti, bụ eze-nwanyị? Nkele ọ jịkaru ome iwhe mụbe eze bụ Áhazerusu zhiru ndu ozhi mu tẹ whẹ je ezhia ya.”

¹⁶Tọ dụ iya bụ, Memukanu nọdu l’iwhu eze yẹle iwhu ndu ishi ono yee ọnu sụ: “Ọ tọ bụlekwaa eze kpụ bẹ Vashiti, bụ eze-nwanyị mesweru. O meswekotaru iwhe bụ ndu ishi mẹe ndu bukota l’obodo, dụ l’alị-eze Áhazerusu. ¹⁷O noo nkele agwa ono Vashiti, bụ eze-nwanyị kparụ bẹ ụnwanyi l’a-wọkwa ẹka, e shi nno ji whẹ adụlahaa whẹ nde l’ẹnya, whẹ ekfulahaa l’eze, bụ Áhazerusu bẹ zhiru t’e je kuaru iya Vashiti, bụ eze-nwanyị ọ jịka lẹ ya te ejedu. ¹⁸Sụa, ntanụ ọwa bẹ unyomu ndu ishi ndu Peshiya mẹe ndu nke Midiya, bụ ndu nụru ẹgube umere ono, eze-nwanyị meru l’a-wata ọsa-kwoshiru ji whẹ okfu. E shi nno ji whẹ adụ whẹ nde l’ẹnya, ẹhu eghulahaa ji whẹ eghu l’ẹka unyomu whẹ nọ. ¹⁹Ọ -bụru l’ọ dụ gụbe eze ree, tụnua iwu sụ Vashiti, bụ eze-nwanyị t’ọ bọ fụtahe afụta ọdo l’iwhu gụbe eze Áhazerusu. E dee ya ede l’ẹkwo-iwu ndu Peshiya mẹe ndu Midiya, nke ọwhu l’ẹte agbanwe iya agbanwe. Gụbe eze eworu ọkwa eze-nwanyị ono, ọ bụ nụ nwanyị ọdo, ka iya ree. ²⁰Nteke iwu ono, gụbe eze l’a-tụ l’e-jegba alị-eze ghu l’owhu, bụ alị-eze, parụ ẹka bẹ ụnwanyi l’a-wata ọkwabe ji whẹ ugvu mẹe ndu ha shii mẹe ndu ha nwanshị.”

²¹Idzu ono, Memukanu wofutaru dụ eze ree yẹle ndu ishi iya. Ọo ya bụ, eze mee lẹ g’o kfuru. ²²Eze bya edee ẹkwo-ozhi kekotagezhia l’iwhe bụ obodo, dụ l’alị-eze iya. Obodo nọnu b’o deru nkewhe l’ụzo, whẹ l’edeje ẹkwo, bya egude okfu alị ndu nọnu deeru whẹ iya. Ẹkwo-ozhi ono b’o deru sụ tẹ nwoke nọnu bụru ishi l’ibe iya; ya asajẹ okfu asa.

E meru Ẹsuta eze-nwanyị

¹Ọ bya ebe nteke ọbu, g’ẹhu-eghughu ono jizetaru eze Áhazerusu, ọ rịlahaa nke Vashiti mẹe nke iwhe ono, o meru yẹle nke iwu ono, a tụru l’okfu ẹhu Vashiti. ²Tọ dụ iya bụ, ndu l’ejeru eze ozhi bya asụ iya: “T’e leeru gụbe eze ẹnya ụnwumgboko, l’ama ụma, whẹ lẹ nwoke l’ẹteke azẹbua. ³Tẹ gụbe eze shi l’obodo lile, dụ l’alị-eze ghu-a tụa ẹka lẹ ndu ishi l’e-je eduta ụnwumgboko, l’ama ụma, whẹ lẹ nwoke l’ẹteke azẹbua ono bya edobe l’ụlo ụnwanyi, dụ lẹ Susa, bụ ishi alị-eze-e. T’e duru whẹ yeru Hegayi onye a hárụ aháhá, mbụ onye ono, bụ iya l’eletaru eze ụnwanyi ibe iya ẹnya. Tẹ Hegayi nụ whẹ iwhe whẹ l’e-gude achọ mma. ⁴Tẹ nwamgbọko ọwhu kagezhia eze ree l’ime ụnwumgboko ono gẹ whẹ ha bụru eze-nwanyị l’ọzori Vashiti.” Okfu ono dụ eze ree, omee ya ẹgube ono.

⁵O nweru nwoke ọbu, bụ onye Juda, shi l’ikfu Bénjaminu, bu lẹ mkpụkpu Susa, bụ ishi alị-eze ono. Ẹwha nwoke ọbu bụ Mọdekayi nwa Jayi. Ọ bụ nwanwa Shimeyi, bụru nwanwa-nwanwa Kishu. ⁶Nwoke ono tso lẹ ndu a kpụru lẹ ndzụ lẹ Jerúsalẹmu nteke ono, Nebukadineza, bụ eze ndu Bábyilọnu kpụru Jehoyakinu, bụ eze ndu Juda lẹ ndzụ. ⁷Mọdekayi bẹ yẹle nwa nwune nna iya, l’aza Hadasa bu. Ọ bụru yẹbedua hefutaru iya, nkele ne iya lẹ nna iya bẹ tọru iya mgbe. Ẹwha ọdo l’eekuje Hadasa bụ Ẹsuta. Ọ bụ nwamgbọko, l’ama ụma, dụ ugvu l’ẹnya. Gẹ ne iya lẹ nna iya nwụhu-geeru bẹ Mọdekayi kutaru iya dobe g’ọo nwa iya, ọ nwụru l’onwiya.

⁸O noo ya, nteke iwu ono eze tụru, mbụ iwhe ono, eze kfuru ngakọtaru alị-eze ono, e je eduta igweligwe ụnwumgboko bya Susa, bụ ishi alị-eze ono. E duru whẹ yeru Hegayi t’o letaje whẹ ẹnya. Ẹsuta bẹ tsokwawho lẹ ndu ono, e dutaru bya ibe eze; e duru iya yeru Hegayi, bụ onye l’eleta ụlo ụnwanyi ẹnya t’o leta iya ẹnya. ⁹Nwamgbọko ono, bụ Ẹsuta dụ Hegayi ree l’obu, tẹmenu ọ tụbakwa iya whọ l’ẹnya. Hegayi mekebe ẹgwegwa chọoru iya iwhe l’oo-gude achọ onwiya mma, bya anụ iya ọga nri, ẹhu iya chọru. Ọ họta ụnwumgboko ẹsaa, bụ-gee ụma anyịganyi l’ibe eze duru whẹ yeru iya tẹ whẹ l’ejeru iya ozhi, bya eduta yẹle ụnwumgboko ono je eye l’ụlo, kakọta-gezhia ree l’ụlo ụnwanyi ono.

¹⁰Ẹsuta te enwedu nteke ọ kọru onye ẹka ya bụ, t’ọ kọ eri, o shi, o noo nkele Mọdekayi buchiru iya t’ọ bọ kọshi. ¹¹Mbọkumboku bẹ Mọdekayi l’anọje akpawhe l’atatiwhu ọma ogboduwhu ụlo ụnwanyi ono t’ọ marụ gẹ Ẹsuta meru mẹe t’ọ marụ gẹ l’oome eshi.

¹²Ụnwumgboko ono bụ, tẹmenu whẹ ejeshia l’iwhu eze Áhazerusu bẹ whẹ l’anọjeeda ọnwa iri l’ẹbo chọo onwowhe mma, bụ iya bụ nteke e doberu ụnwanyi tẹ whẹ nọ-dzuje. Whẹ l’anọje aha oje l’iwhu eze ahaha;; onye ọwhu o rwuberu ejeje ya anọo ọnwa iri l’ẹbo ono gude chọo onwiya mma. Ọnwa ishi bẹ whẹ l’ehuje mmanụ mẹru, gude ọnwa ishii ọwhu hua mmanụ mbeleke mẹe mmanụ apyịpyi, l’eshi kwẹkwekwe gude chọo onwowhe mma. ¹³Nwamgbọko ọwhu o rwuberu oje l’iwhu eze bẹ bụ-zhiawho iwhe ọ sụru l’ọ dụ iya ree bẹ l’aanụje iya l’ụlo ụnwanyi ono, ya egude jeshia. ¹⁴Onye ọbu l’ejeje l’urwẹnyashi lwa l’ụtsu iya. Ọ lwa ya eje anọdu l’ụlo ọdo, bụkwawho ụlo ụnwanyi. Onye l’eleta ụlo ọwhu ọbu ẹnya bụ onye a harụ aháhá, l’ejeru eze ozhi, ẹwha iya bụ Shashụgazu. Ọo ya bụ onye ọ nọ l’ẹka, mbụ ụnwanyi ono, eze l’ẹte alụa l’ọkpoku nwanyị. Nwamgbọko, bahụwaru l’ụlo ono te ejejedu ọwhu eze ọdo gbahaa lẹ nwamgbọko ọbu bẹ dụ eze ree, o kua ya eku.

¹⁵Ọ bya erwube Ẹsuta oje l’iwhu eze. Mbụ Ẹsuta ono, Mọdekayi kutaru hee bụ iya bụ nwamgbọko ono, ọ nwụru mbụ nwune nna Mọdekayi ono, l’aza Abyihelu. Ọ tọ dụdu iwhe ọ sụru t’a nụ iya tẹ ya gude jee l’iwhu eze ono gbahaa iwhe Hegayi sụru t’o gude, mbụ onye ono, a harụ aháhá, l’ejeru eze ozhi, bụru onye l’eleta ụnwanyi ibe eze ẹnya. Ẹsuta tụbakotaru ndu whụru iya nụ l’ẹnya. ¹⁶Mbọku e dutaru Ẹsuta jekfu eze Áhazerusu l’ibe iya bụ l’ọnwa iri, bụ iya bụ ọnwa Tebẹtu l’awha nke ẹsaa, ọ watarụ ọbu eze. ¹⁷Eze bya eye Ẹsuta obu amamẹ ụnwanyi ọdo. Ẹsuta ka iya ọtuba l’ẹnya amamẹ ụnwumgboko ọdo. Ọ bụru yẹbedua bẹ obu eze natarụ. O kpube iya okpu eze-nwanyị l’ọzori Vashiti. ¹⁸Eze bya eshishia eze nri, ha g’ọo gụnu, kua ndu bụ ishi alị-eze iya mẹe ndu ozhi iya tẹ whẹ bya eria ngụa. Onye o shituru nri ono bụ Ẹsuta. Ọ tụa ndzumike l’obodo lile, dụ l’alị-eze iya. O woru iwhe gbarụ onye eze keshiaru ndu ono.

Mọdekayi mebyiru ejo-ikumu, a gbarụ eze

¹⁹Nteke e kukoberu ụnwumgboko ono nke ugbo labọ iya bẹ Mọdekayi nọwaa l’ọkwa l’ibe eze. ²⁰Nteke ono bẹ Ẹsuta l’ete emedua t’a marụ onye ẹka ọ bụ mẹe eri, o shi ẹgube ono, Mọdekayi sụru iya t’ọ bọ kọshi. Nkele Ẹsuta l’anụjeru Mọdekayi okfu lẹ g’o shi anụhawaru iyẹ ya nteke, l’oohefuta iya.

²¹Nteke ono, Mọdekayi shi nọdu l’ọkwa l’ibe eze bẹ Byigutanu mẹe Tẹreshi, bụ ndu ozhi eze labọ, l’eche ọnuzo ibe eze nche bẹ ẹhu nọnyaaru wata oghu eghughu, whẹ gbaa ikumu gẹ whẹ l’e-shi gbua eze Áhazerusu. ²²Mọdekayi bya achọfuta ikumu ono whẹ gbarụ, o je akọoru iya eze-nwanyị ono, bụ Ẹsuta. Ẹsuta kọoru iya eze l’o noo iwhe Mọdekayi kọru iya. ²³A bya enyoo okfu ono chọfuta l’ọo ire-lanụ, a chịta ụmadzu labọ ono je aswị-gbua l’eli oshi. A nọdu l’iwhu eze dee ya ede l’ẹkwo-akọ, l’eedeje iwhe meru nụ l’alị-eze ono.

Ejo-ikumu, Hemanu gbarụ ndu Ju

¹Iwhe ono nwụ-gelewho, eze Áhazerusu bya akpolia ọkwa Hemanu. Ọ bya edobe iya l’ọnodu, ka nke ndu ọdo, whẹ l’iya bụ ishi alị-eze ono. Hemanu bụ nwa Hamedata onye shi l’eri Agagu. ²Eze tụa iwu t’iwhe bụ ndu ozhi eze gẹ whẹ ha, bụ ndu gude ọkwa l’ibe eze, whuzejeru Hemanu ishi l’alị, whẹ abarụ iya ẹja gude akwabẹ iya ugvu. Ndu ozhi eze wata ome ẹgube ono eze tụru whẹ l’iwu. Ọle Mọdekayi te ekwedu whuzeru iya ishi l’alị, t’o kwe abarụ iya ẹja gude akwabẹ ụdudu ugvu ono. ³Tọ dụ iya bụ, ndu ozhi eze ono, bụ ndu gude l’ọkwa l’ibe eze bya ajịa Mọdekayi sụ: “?Ọo gụnu meru g’o gude l’iimebyi iwu, eze tụru?” ⁴Mbọkumboku bẹ whẹ l’anọje ekfu eyeru Mọdekayi, ọle ọ tọo ngajẹduru whẹ nchị. Whẹ kwee je edooru iya Hemanu t’a marụ ?a ha iya t’o megburu ẹgube ono. Nkele o kfuwaru whẹ lẹ ya bụ onye Ju. ⁵Nteke Hemanu chọfutaru lẹ Mọdekayi te ewhuzejeduru iya ishi l’alị mẹe l’ọ tọ badụru iya ẹja gude akwabẹ iya ugvu, iwe bya iya l’ẹhu. ⁶Nteke Hemanu bya amarụ lẹ Mọdekayi bụ onye Ju, o wocha nke l’ọo Mọdekayi bẹ l’ee-gbu nwẹkiya. Iwhe o meru bụ l’ọ watarụ ọchokashi ụzo, l’oo-shi lakọta ndu nke Mọdekayi l’iyi, bụ iya bụ ndu Ju, bukota l’alị-eze Áhazerusu.

⁷O be l’awha kwe eze Áhazerusu awha iri l’ẹbo, ọ watarụ ọbu eze, l’ọnwa Nisanu,3:7 Nisanu bụ ọnwa mbụ l’ọgu awha ndu Ju. a nọdu l’iwhu Hemanu tụa ido ono, bụ Puru. Ishi iwhe a tụ-turu ido ono bụ t’e gude họta ujiku lanụ yẹle ọnwa lanụ, whẹ l’e-gude medzua ikumu ono, Hemanu gbarụ. Whẹ tụa ido ono, ọ daba l’ọnwa iri l’ẹbo bụ iya bụ ọnwa Ada.

⁸O noo ya, Hemanu sụ eze Áhazerusu: “O nweru ndu lanụ ọbu, tụkaru onwowhe atụka buru l’echilabọ ndu alị-a. Whẹ bukota l’obodo lile, dụ l’alị-eze-e ya nụ. Nsọ alị whẹ bẹ gbarụ iche lẹ nsọ alị ndu ọdo, tẹmenu whẹ te edobeje iwu, eze tụru. Ụdudu ndu ono bẹ a -haa whẹ ẹka bẹ whẹ ta abyakwa l’a-bẹru eze l’iwhe. ⁹Ọ -bụru l’ọ dụ eze ree, t’eze tụa iwu t’e gbushia whẹ. Mu l’a-kfụ ndu l’e-jeru eze ozhi mkpọla-ọcha, ẹrwa iya dụ ụnu talẹntu mkpọla-ọcha ugbo ụkporo l’ise, nke ọwhu l’ee-yekobe iya l’ụlo-ẹku eze.”

¹⁰Ọo ya bụ, eze gbata echi, l’oogudeje eme iwhe-ọhubama gbẹe Hemanu nwa Hamedata, bụ eri Agagu. Hemanu l’onwiya bẹ bụ ọhogu ndu Ju. ¹¹Eze sụ Hemanu: “Dobero okpoga ghu je emee ndu ono g’ọ dụ ghu ree.”

¹²Ọo ya bụ, o rwua g’ọnwa mbụ ono gbarụ abalị iri l’ẹto, e kukota ndu l’ederu eze ẹkwo whẹ byadzukota. Whẹ tụko iwhe lile ono, Hemanu sụru tẹ whẹ dee dekota l’ẹkwo, a nụ iya ndu nnọ-chi ẹnya eze mẹe ndu ọchi-ọha obodo, dụ iche iche l’alị-eze ono, nụkwa iya whọ ndu bụ ishi l’alị ono. Obodo nọnu b’e deru nkewhe l’ụzo, whẹ l’edeje ẹkwo, gude okfu-alị whẹ dee ya. Ẹkwo ono b’e deru l’ẹwha eze Áhazerusu bya egude echi mkpụshi-ẹka iya mee ya iwhe-ọhubama. ¹³E woru ẹkwo-ozhi ono nụ ndu ọkpa-ẹgwa tẹ whẹ je ekeshia l’obodo lile, dụ l’alị-eze Áhazerusu. Iwhe e deru iya bụ, t’a lakọta ndu Ju l’iyi gbushia whẹ tẹ whẹ tọhu l’akpụru ẹnyanwu lanụ, mbụ nwata mẹe ọgurenya mẹe ụnwanyi mẹe ụnwegirima mẹ ọnwa iri l’ẹbo bụ iya bụ ọnwa Ada gbaa abalị iri l’ẹto. Iwu ono sụkwawho, e gbugee whẹ t’a vụa arya whẹ nnanụ. ¹⁴Iwhe dụ l’ẹkwo ono b’a sụru t’a tụa t’ọ bụru iwu l’obodo lile, e mee t’a madzuru iya nke ọwhu whẹ l’a-kwakọbe ẹhu m’ọgvu mbọku ono.

¹⁵Eze kfua t’e je ekeshia ẹkwo-ozhi ono, ndu ọkpa-ẹgwa ono tụtube iya jeshia ya ekeke. Ẹka e vu ụzo tụa iwu ono ryaa ya aryarya bụ lẹ Susa, bụ ishi alị-eze ono. Eze yẹle Hemanu bahụ l’eriri l’angụngu, ẹhu rwụrwushihu ndu bu lẹ Susa gẹ whẹ nụru ozhi ono.

Mọdekayi l’ekfuru Ẹsuta t’o yeru whẹ ẹka

¹Nteke Mọdekayi bya amarụ iwhe l’anwụ nụ, ọ lajashịa uwe iya chịta uwe áwhụ yee, kpota ntụ wụa onwiya, lụfu ọma mkpụkpu echi mkpu ẹkwa, atsọ gbụdagbuda. ²O jetabe rwua ọnoguzo ibe eze, ọ kfụru, o noo nkele ọ tọ dụdu onye yeru uwe áwhụ, l’eekweje t’ọ bata. ³Obodo ọbule, o rwuru, mbụ ẹkwo ono, e deru iwu whọ, eze tụru bẹ áwhụ l’atsọjeru ndu Ju bu iya nụ. Whẹ awata ọswi ẹgu, agụ áwhụ, arya ẹkwa. Igweligwe l’eyeje uwe áwhụ gwọru lẹ ntụ.

⁴Ọo ya bụ, ụnwumgboko mẹe unwoke, a harụ aháhá, l’ejeru Ẹsuta ozhi bya edooru iya nke Mọdekayi ono, iwhe ono tsụa ya l’anụ shii. Ọ chịta uwe chẹe t’a chijeru Mọdekayi t’o yee, yefu uwe áwhụ ono. Ọle Mọdekayi bẹ jịkaru iya anata. ⁵Ẹsuta bya ekua Hataku, bụ onye a harụ aháhá l’ejeru eze ozhi, mbụ onye e yeru t’o jejeru yẹbe Ẹsuta ozhi. O zhia ya t’o je amarụ iwhe l’anwụru Mọdekayi mẹe iwhe kpatarụ g’o gude l’ọ nwụru iya nno. ⁶Tọ dụ iya bụ, Hataku bya ejekfu Mọdekayi l’ẹka ọ nọdu lẹ nggamgbo mkpụkpu ono, dụ lẹ nhamụnha ọnoguzo ibe eze. ⁷Mọdekayi kọkotaru iya iwhe lile nwụru iya nụ, bya akọoru iya igbudu okpoga, Hemanu kweru ụkwa lẹ ya l’a-nụ t’e ye l’ụlo-ẹku eze, nke ọwhu l’oo-kwe t’e gbushia ndu Ju. ⁸O wota ẹkwo, e deru iwu whọ, eze tụru sụ t’e gbushia ndu Ju, mbụ ẹkwo ono eze nọdu lẹ mkpụkpu Susa dee keshia, o woru yẹbe ẹkwo nụ Hataku t’o goshi Ẹsuta, ya akọwaaru iya ọnodu t’o doo ya ẹnya. Ọ sụkwawho t’e zhia Ẹsuta t’o jekfu eze je aryọo ya t’ọ whụaru ndu Ju imiko. ⁹Hataku dawhu azụ je akọoru Ẹsuta iwhe Mọdekayi kfuru iya. ¹⁰Ẹsuta zhiwhu iya ozhi azụ t’o je ezhia Mọdekayi sụ iya: ¹¹“Iwhe bụ ndu ozhi eze je akpaa lẹ ndu lile, bu l’obodo, dụkota l’alị-eze iya g’ọ ha, bẹ makọtaru l’o to nwedu nwoke m’ọ bụ nwanyị bya l’atụgburu jekfu eze nteke ọ nọ l’ogboduwhu ibe-eze nke ime ime m’ọ bụa yẹbe eze l’onwiya bẹ kuru onye ọbu eku. Onye tụru iya ama bẹ iwu sụru t’e gbua onye ọbu egbu, gbahaa l’onye ọbu bẹ eze tụru obu iya ama machịaru mgbọro mkpọla-ododo iya, shi nno sụ t’ọ nọdu ndzụ. Eshi ụkporo abalị l’abalị iri ntaa bẹ eze l’eteke ekukwaa mu tẹ mu bya.”

¹²A bya ezhia Mọdekayi ozhi Ẹsuta zhiru, ¹³o zhiwhu ozhi azụ t’e je ezhia Ẹsuta lẹ ya sụru agha: “Ba arịnuwho l’eshi ọwhu ị nọwaa l’ibe eze bẹ bụ gụbedua bụ onye Ju l’a-wafụ nwẹkiya. ¹⁴Nkele ọ -bụru l’ị nọdu nggujingguji ntaa, t’i ye ọnu, bẹ l’ee-shikwa l’ụzo ọdo dzọfuta ndu Ju. Ọle gụbedua mẹe ndibe nna ghu l’a-bụru kpurupyata. ?Oo onye marụ mẹ iwhe meru g’o gude e mee ghu ị nọdu l’ọkwa eze-nwanyị bụ ndụge i yeta ẹka l’iwhe l’anwụ ntaa?”

¹⁵Ẹsuta zhiwhukwa ozhi azụ t’e je ezhia Mọdekayi sụ iya: ¹⁶“Tụgbua je akpakọo ndu Ju, bu lẹ Susa l’ẹka lanụ, unu aswịa ẹgu kfuru nụ Chileke l’iswi ẹhu mụbe Ẹsuta. T’unu be erikwa nri, unu eje angụ iwhe-angụngu ujiku ẹto eswe l’ẹnyashi. Mbẹdua mẹe ụnwumgboko, l’ejeru mu ozhi l’a-swịkwawho ẹgu nke anyi g’unu l’aswị. E -megee bẹ mu l’e-jekfu eze. A makwarụ-a l’o megideru iwu. Ọle mu l’e-jele-e; mu je l’a-nwụhu tẹ mu nwụhu.”

¹⁷Ọo ya bụ, Mọdekayi tụgbua je emekota iwhe Ẹsuta zhiru iya t’o mee g’ọ ha.

Ẹsuta jekfuru eze aryọ

¹O rwulewho l’abalị ẹto, whẹ l’aswị ẹgu ono, Ẹsuta chịta uwe eze-nwanyị iya yee, o je akfụru l’ogboduwhu ibe eze nke ime ime l’atatiwhu ụlo ẹka oshi-eze nọ. Eze nọduwho l’oshi-eze iya chebe iwhu l’ụzo ọnuzo. ²Ọ bya atụfu ẹnya whụ eze-nwanyị ono, bụ Ẹsuta g’ọ kfụru l’ọma ogboduwhu ono, ọ tụbalekwa iya whọ l’ẹnya. Eze bya machịaru iya mgbọro mkpọla-ododo, ọ pa l’ẹka. Ẹsuta jekube iya ntse je akpaa ẹka l’ishishi mgbọro ono. ³Eze jị iya sụ: “Eze-nwanyị Ẹsuta, ?ọo gụnu bẹ l’ee-meru ghu? O behuduru ọ bụru tẹ mu kee alị-eze mu ẹbo nụ ghu uzhi lanụ bẹ mu l’e-meru ghu iya.”

⁴Ẹsuta sụ iya: “Ọ -bụru l’ọ dụ eze ree, tẹ gụbe eze gụ lẹ Hemanu lịnuru byarụ mu lẹ nri ntanụ-a, t’unu bya eria nri, mu shiru gụbe eze.”

⁵Eze zhia ozhi sụ t’onye ya bya l’awhụ bụkwaru Hemanu, nke ọwhu whẹ l’iya l’e-je aza Ẹsuta oku. Ọo ya bụ, eze yẹle Hemanu jeshia lẹ nri ono, o kuru whẹ. ⁶Whẹ ngụnyaa mmẹe eze jịa Ẹsuta sụ: “?Ọo gụnu bụ mkpa ghu tẹ mu gbooru ghu iya? ?Ọo gụnu b’ọ dụ ghu tẹ mu meeru ghu? O behuduru ọ bụru tẹ mu kee alị-eze mu ẹbo nụ ghu uzhi lanụ bẹ mu l’e-meru ghu iya.”

⁷Ẹsuta sụ: “Iwhe bụ mkpa mu, bụru iwhe ọ dụ mu t’e meeru mu bụ: ⁸Ọ -bụru lẹ mu dụ gụbe eze l’obu, tẹmenu ọ dụ gụbe eze ree t’i meeru mu iwhe mu l’aryọ ghu, ọo ya bụ tẹ gụbe eze gụ lẹ Hemanu bya lẹ nri, mu l’e-shiru unu echile. Echile ono bẹ mu l’e-ye ọnu l’ajị ono, gụbe eze jịru mu.”

Hemanu l’achị idzu tẹ ya gbua Mọdekayi

⁹Mbọku ono bẹ Hemanu gude ẹhu-ụtso yẹle ẹswa jiru iya obu ala. Obenu lẹ nteke ọ whụru Mọdekayi l’ọnoguzo ibe eze, bya awhụa l’ọ tọ gbeshiduru iya agbeshi, to goshi l’ọokwabe iya ugvu, oke iwe ji Hemanu obu l’ẹka Mọdekayi nọ. ¹⁰Hemanu jishia ike kpaa onwiya sede lashia ibe iya. Ọ lwarwua bya ezhia t’e je ekuaru iya ndu ọnya iya whẹ mẹe nyee ya bụ Zẹreshi. ¹¹Ọ bya awata oto ọnu kọlahaaru whẹ gẹ ya nweberu iwhe mẹe gẹ ya nwụ-beru ụnwu l’igwe mẹe g’eze gude vulibe iya l’ọkwa, shi nno kwabẹ iya ugvu, ha shii, bya emee tẹ ya bụru onye kagezhia shii lẹ ndu, eze meru ishi mẹe ndu l’ejeru eze ozhi. ¹²Ọ sụ: “Ọ tọ dụdu onye ọdo, eze-nwanyị, bụ Ẹsuta kweru t’o tsoru eze bya lẹ nri, o shiru, gbahaa mbẹdua kpụ. Echile ọwa, dụ ẹgube-ẹ b’o kukwaru mu whọ lẹ nri ọdo mu l’eze. ¹³Ọle iwhe lile ono ta adụdu iwhe ọ bụ mu jeye mu awhụ-beru onye Ju whọ, bụ Mọdekayi l’ọnoguzo ibe eze.”

¹⁴O noo ya, Zẹreshi, bụ nyee ya mẹe ndu ọnya iya whẹ ono gẹ whẹ ha sụ iya: “Zhia t’e je arwụtaru ghu oswebe, l’aaswị-gbuje madzụ, t’a rwụa ya t’ọ dụ nji-ẹka ụkporo ugbo labọ l’iri l’eli. O -be l’ụtsu echile gụ ekfuru eze t’a kpụta Mọdekayi je aswị-gbua l’eli oswebe ono. Ọo ya bụ, gụ egude ẹhu-ụtso tsoru eze jeshia lẹ nri ọbu e kuru unu.”

Idzu ono dụ Hemanu ree shii, o zhia ndu je arwụta oswebe ono, l’aaswị-gbuje madzụ dobe.

Eze l’akwabẹ Mọdekayi ugvu

¹O rwua l’ẹnyashi mbọku ono, mgbẹnya te ekwe shita eze ụzo ẹnya. Ọ bya ezhia t’e wotaru iya ẹkwo-akọ, e deshiru iwhe l’eme l’alị-eze iya. E je wota iya bya agụa l’iwhu iya. ²L’ẹkwo ono b’a gụ-vuru lẹ Mọdekayi bụ iya gbarụ ama ejo-ikumu whọ, whẹ gbajẹru mbụ Byigutana yẹle Tẹreshi, bụ unwoke labọ ono, a harụ aháhá, shi eche nche l’ọnoguzo ibe eze, nteke ono, whẹ chịjeru idzu tẹ whẹ kpanyia eze Áhazerusu ẹnya. ³Eze jịa sụ: “?Oo nweru ugvu, a kwabẹjeru Mọdekayi? ?E mejewaru a marụ ẹwha iya l’iwhe ono, o meru?”

Ndu l’ejeru eze ozhi sụ: “Ẹ tẹke ọdukwa-a iwhe e meru iya.”

⁴Eze sụ: “?Oo onye nọ l’ọma ogboduwhu mu?”

Ọ bụlekwaruwho nteke ono bẹ Hemanu l’abata l’ọma ogboduwhu, dụ l’azụ ụlo eze tẹ ya bya ekfuru eze t’a swị-gbua Mọdekayi l’eli oswebe ono, ọ kwakọberu, l’aa-swị-gbu iya. ⁵Ndu ozhi eze sụ iya: “Ọ kwa Hemanu kfụru l’ọma ogboduwhu ono.”

Eze sụ t’e kua ya t’ọ bata.

⁶Hemanu bya abata, eze jị iya sụ: “?Ọo gụnu bẹ l’ee-meru onye ọ dụ eze nke tẹ ya kwabẹ ugvu?”

Iwhe gbatarụ Hemanu l’ọriri nteke ono bụ l’ọ tọ dụdu onye ọdo, eze l’a-nọ achọ tẹ ya kwabẹ ugvu gbahaa yẹbedua.

⁷Tọ dụ iya bụ, Hemanu sụ eze: “Iwhe l’ee-meru onye ọ dụ eze tẹ ya kwabẹ ugvu ⁸bụ t’a chịta uwe, eze yewaru eye, a kpụta ịnya, eze gbawarụ agba, mbụ ịnya, e kpuberu okpu-eze l’ishi. ⁹T’a chịta uwe ono kpụta ịnya ono ye onye lanụ l’ẹka lẹ ndu ishi, a kagezhia ọmaru ẹwha whẹ l’alị-eze ghu-a. T’o woru uwe ono yee onye ọbu, ọ dụ eze nke tẹ ya kwabẹ ugvu ono. T’onye ọbu nọkoru l’eli ịnya ono t’e duru iya je angụ-whekota lẹ nggamgbo mkpụkpu-a, ryaarụ iya ọha aryarya sụ: ‘Ọo ẹgube-ẹ bẹ l’eemejeru iya onye ọ dụ eze nke tẹ ya kwabẹ ugvu.’ ”

¹⁰Nteke ono eze sụ Hemanu: “Ngwa je achịta uwe ono yẹle ịnya ono je emekotaru Mọdekayi, bụ onye Ju ono, l’anọduje l’ọnoguzo ibe eze iwhe lile ono, i kfuru. T’ọ bọ dụkwa ọwhu l’ii-mewhodo emewhodo ilile lẹ g’i kfuru iya.”

¹¹O noo ya, Hemanu je achịta uwe ono, kpụta ịnya ono, bya eworu uwe ono yee Mọdekayi, bya edoberu iya ịnya ono o nọ-koru iya l’eli, Hemanu duru iya je angụ-whekota lẹ nggamgbo mkpụkpu ono, aryarụ iya ọha aryarya asụje: “Ọo ẹgube-ẹ bẹ l’eemejeru iya onye ọ dụ eze nke tẹ ya kwabẹ ugvu.”

¹²E megee, Mọdekayi lawhu azụ l’ọnoguzo ibe eze. Ọwhube Hemanu nyịgobe gụru áwhụ, chịru ẹka bebe l’ishi gbagbụ-kebe, ọ bụru iya ọla ibe iya. ¹³Ọ larwua je akọkotaru nyee ya, bụ Zẹreshi mẹe ndu lile whẹ l’iya l’eshi ọnya g’ọ nwụru iya. Ọnya iya whẹ ono, bụ ndu marụ ágụ mẹe nyee ya ono, bụ Zẹreshi sụ iya: “Ọ bụruwho lẹ Mọdekayi bẹ shi l’eri ndu Ju bẹ l’ịi-tịi chịtakwa ẹja ilile; ọ kwa adada bẹ l’ịi-da tsua ọnu l’alị.”

¹⁴Whẹ kpụkwaduru-a iwhe ono l’ọnu ekfu, ndu a harụ aháhá, l’ejeru eze ozhi bata bya iya ekuku. Whẹ dulia Hemanu l’ọku l’ọku jeshia lẹ nri ono Ẹsuta kwakọberu.

A swị-gburu Hemanu

¹Ọo ya bụ, eze yẹle Hemanu jeshia nke Ẹsuta, bụ eze-nwanyị tẹ whẹ yeko ẹka lẹ nri. ²Whẹ watalẹwho ọngu mmẹe lẹ mbọku nke ẹbo ono, eze jịa Ẹsuta gẹ l’ọojije iya sụ: “Eze-nwanyị, bụ Ẹsuta, ?ọo gụnu bụ mkpa ghu? Kfua ya tẹ mu meeru ghu iya. ?Ọo gụnu b’ọ dụ ghu nke tẹ mu meeru ghu? O behuduru ọ bụru tẹ mu kee alị-eze mu uzhi ẹbo nụ ghu uzhi lanụ bẹ mu l’e-meru ghu iya.”

³Eze-nwanyị, bụ Ẹsuta sụ iya: “Gụbe eze, ọ -bụruwho lẹ mu dụ ghu l’obu l’ezhi, ọ -bụru l’ọ dụ ghu ree, iwhe mu l’aryọ ghu bụ t’ị hanụ-a tẹ mu nọdu ndzụ. Gụ ahakwaawhọ tẹ ndu nkemu nọdu ndzụ; o noo iwhe ọ dụ mu nke t’i meeru mu ndono. ⁴O noo lẹ mu lẹ ndu nkemu b’e rewaru t’e gbushikota anyi g’anyi ha. Mbụ l’e rewaru anyi t’a laa anyi l’iyi. Nggẹ l’erere, e reru anyi bụ t’anyi gbajẹ ohu mẹ mu anọ-kirishikwaa, nkele ẹgube iwhe-ọtsulanu ono ta agbadụ t’a pakfuta iya eze bya ekfuchilahaa ya nchị.”

⁵Eze Áhazerusu bya ajịa eze-nwanyị, bụ Ẹsuta sụ iya: “?Oo onye ole b’ọ bụ? ?Ndẹe onye tụru ama tẹ ya mee ụdu iwhe dụ nno?”

⁶Ẹsuta sụ iya: “Ọo Hemanu-a bụ onye ọbu, bụ ọhogu anyi, bụru iya l’etso anyi l’ẹhenu ọbu!”

Egvu ba Hemanu l’iwhu eze yẹle eze-nwanyị. ⁷Eze vọru ọku ghua ẹhu gbalihu haa mmẹe ono, jeshia lẹ mgbabu ibe eze. Hemanu nọpyabe eze-nwanyị, bụ Ẹsuta ryọlahaa ya t’ọ haa ya rọo tẹ ya nọdu ndzụ, nkele ọ whụwaru l’eze bẹ chịpyawaru l’iya l’e-me iya ejo-iwhe.

⁸Ọ bụlekwaruwho nteke ono Hemanu darụ wụshihu l’oshi eze-nwanyị nọdu dawhube adawhube aryọ iya bẹ eze shi lẹ mgbabu ono bụru whẹrekete. Eze bua mkpu sụ: “Waa! ?Oomefua tẹ ya gude eze-nwanyị l’ọkpehu jekfu iya azẹe l’iwhu mu, mbụ l’ibe mu?”

Ekfufuta, eze l’ekfufuta iwhe ono, e gude Hemanu kechia ya iwhu. ⁹Onye lanụ lẹ ndu a harụ aháhá, l’ejeru eze ozhi, bụ Habona bya asụ: “O nwekwaru oswebe, l’aaswị-gbuje madzụ, dụ nji-ẹka ụkporo ugbo labọ l’iri l’eli, Hemanu meru dobe l’ibe iya. Onye o meru iya doberu bụ Mọdekayi, onye ono, gbajẹru ama ejo-ikumu whọ, a gbajẹru gụbe eze, shi nno dzọo ghu ndzụ.”

Eze sụ: “Unu je aswị-gbua ya l’oswebe ono.”

¹⁰O noo ya, e je aswị-gbua Hemanu l’eli oswebe ono, l’aaswị-gbuje madzụ, o shi mee doberu Mọdekayi. Nteke ono obu bya ejizeta eze.

Iwu, eze tụru l’iswi ndu Ju

¹Mbọku onokwawho bẹ eze bụ Áhazerusu woru ụlo Hemanu, bụ onye ọhogu ndu Ju nụ eze-nwanyị, bụ Ẹsuta. Ẹsuta bya akọoru eze gẹ yẹle Mọdekayi dụ iya dụ iya. Watazhiewho nteke ono, Mọdekayi bebe jelahaa l’iwhu eze. ²Eze bya agbata echi-mkpụshi-ẹka iya, o natarụ Hemanu nụ Mọdekayi. Ẹsuta dobe Mọdekayi t’ọ bụru ishi l’ụlo ono, Hemanu shi nweru.

³Ẹsuta bya ekfuru yeru eze ọdo, bya adaa l’alị wụshihuru eze lẹ mgboro ọkpa akwa idemini l’ẹka l’ọoryo iya t’o mebyia ejo-idzu ono, Hemanu bụ o-shi-l’eri Agagu chịru ndu Ju. ⁴Eze machịaru Ẹsuta mgbọro mkpọla-ododo iya, ọ gbeshi kfụru iya l’iwhu ⁵bya asụ iya: “Ọ -bụru l’ọ dụ gụbe eze ree, ọ -bụruwho lẹ mu dụ gụbe eze l’obu, mbụ l’ị rịru l’ọo iwhe kfụru nhamụnha, tẹmenu mu dụ ghu ree l’ẹnya, tẹ gụbe eze tụnua iwu dee ya edede gude kagbua iwhe ono, Hemanu nwa Hamedata, bụ o-shi-l’eri Agagu deru l’ẹkwo sụ t’a tụko ndu Ju, bu l’obodo lile, dụ l’alị-eze ghu lakọta l’iswi. ⁶?Ndẹe gẹ mu l’e-shi gbabẹ obu whụ ejo-iwhe, l’abyakfuta ndu nkemu? ?Tẹmenu ndẹe gẹ mu l’e-shi gbabẹ obu whụ ẹka ndu mu lẹ whẹ bụ abụbu l’ala l’iswi?”

⁷Eze Áhazerusu bya asụ eze-nwanyị, bụ Ẹsuta yẹle Mọdekayi, bụ onye Ju: “Iwhe meru mu woru ụlo Hemanu nụ Ẹsuta, mbụ l’iwhe meru a swị-gbua Hemanu l’oswebe bẹ bụ l’o shi eme tẹ ya gbushia ndu Ju. ⁸Ntaa bụ t’unu gude ẹwha eze tụa iwu ọdo l’iswi ẹhu ndu Ju, dee ya edede g’ọ dụ-zhiawho unu ree, gude echi-mkpụshi-ẹka eze mee ya iwhe-ọhubama, o noo nkele ọ tọ dụdu iwhe e gude ẹwha eze dee l’ẹkwo woru echi-mkpụshi-ẹka iya mee ya iwhe-ọhubama, a bya l’agbanwe agbanwe.”

⁹Nteke ono who b’e je ekua ndu l’ederu eze ẹkwo, whẹ byakọta. Mbọku ono bẹ ọnwa ẹto, bụ iya bụ ọnwa Sivanu gbarụ ụkporo abalị l’abalị ẹto. Mọdekayi bụru iya l’akpọru ndu o-de-ẹkwo ono iwhe whẹ l’ede l’ẹkwo, l’aa-nụ ndu Ju mẹe ndu nnọ-chi ẹnya eze mẹe ndu ọchi-ọha mẹe ndu bụ ishi l’ụkporo obodo ishii l’obodo ẹsaa ono, dụ l’alị-eze Áhazerusu; watazhiewho l’alị Indiya je akpaa l’alị Itiyópiya. Iwu ono b’e dekotaru nụ obodo nọnu lẹge obodo nọnu l’egudeje ede ẹkwo nkewhe, e dee ya l’okfu alị ndu nọnu nụ whẹ. E dee ya nụ ndu Ju lẹge whẹ l’eshije ede ẹkwo, dee ya l’okfu alị whẹ nụ whẹ. ¹⁰Ẹkwo ono bụ l’ẹwha eze Áhazerusu bẹ Mọdekayi deru iya, gude echi-mkpụshi-ẹka eze mee ya iwhe-ọhubama. A nụ iya ndu ọkpa-ẹgwa, whẹ gude ịnya l’agbashị ọso ike wolahukota iya; mbụ ịnya a nọdu l’ẹka l’aazụru eze ịnya zụa.

¹¹L’ime ẹkwo ono bẹ eze nụru ndu Ju, bu lẹ mkpụkpu nọnu ọkpu-ike tẹ whẹ dzukobe dzọo ishi onwowhe. Nke ọwhu bụ l’o -nwezhiaru ọha m’ọ bụ obodo, byarụ whẹ ọlwushi ọgu, tẹ whẹ kerabe laa ndu ọbu l’iyi gbugbushia whẹ, mbụ nwanyị, mbụ nwata, mee whẹ emerekete, vụa arya whẹ avụ. ¹²Mbọku, a tụ-buru tẹ ndu Ju mee iwhe ono l’obodo lile, dụ l’alị-eze Áhazerusu bẹ bụ mbọku ọnwa iri l’ẹbo, bụ iya bụ ọnwa Ada gbarụ abalị iri l’ẹto. ¹³Iwu ono b’e zhiru t’e dee ya l’ẹkwo keshikota l’obodo lile, bya atụa ya, ọ bụru iwu t’e mee ya tẹ ndu nọnu madzuru iya, nke ọwhu ndu Ju l’a-kwakọbe ẹhu melata ndu ọhogu whẹ mbọku ono. ¹⁴Ndu ọkpa-ẹgwa ono nyikota eli ịnya whẹ ono, l’ewhe ewhewhe ọso, l’eegudeje ejeru eze ozhi, whẹ gbagbụ-kebe je ezhikashia ozhi ono lẹge eze tụru whẹ l’iwu. Ẹka a nọdu tụa iwu ono bụ lẹ Susa, bụ ishi alị-eze Áhazerusu.

¹⁵Mọdekayi bya eshi l’iwhu eze lụfuta, o yee uwe onye eze, dụ urwukpu-urwukpu mẹe ọwhu l’acha ụcha, o kpuru okpu-eze, e gude mkpọla-ododo mee mẹe uwe, l’ekpo wụlawula, l’eke mmee-mmee, e gude ọkpobe oghu ọcha kpaa. Ndu bu lẹ Susa l’atụkaa orooroo, ẹhu l’atsọ whẹ ụtso shii. ¹⁶Obu bya akpẹneshihu ndu Ju, ẹhu l’atsọkaa whẹ ụtso, ẹswa ria whẹ ẹfonu, tẹmenu l’aakwabẹ whẹ ugvu. ¹⁷L’obodo lile mẹe lẹ mkpụkpu lile, bụ ẹka iwu ono, eze tụru rwuru bẹ ndu Ju, bu iya nụ tekotaru ẹswa, ẹhu l’atsọkaa whẹ ụtso. Mbọku ono bụru whẹ eriri eriri mẹe ẹhu-ụtso ẹhu-ụtso. Igweligwe ndu shi ẹka ọdo bya aghọo ndu Ju, nkele egvu ndu Ju byarụ whẹ l’ẹhu.

Ndu Ju l’alwụ-gbu ndu ọhogu whẹ

¹O be l’ọnwa nke iri l’ẹbo, bụ iya bụ ọnwa Ada, lẹ mbọku ọnwa ono gbarụ abalị iri l’ẹto, bụ mbọku, e doberu nke ome iwhe ono, eze tụru l’iwu ono. Mbọku ono bụ mbọku, ndu ọhogu ndu Ju shi gbaa ẹnya lẹ whẹ l’a-kakputa ndu Ju ono l’ẹnya. E megee, ọ ghaa ịgharawhu, ndu Ju kakputachia ndu ono, kpọru whẹ ashị ono l’ẹnya. ²Ndu Ju bya edzukobe lẹ mkpụkpu gẹ mkpụkpu ha, whẹ bu l’obodo lile, eze Áhazerusu l’achịkota, tẹ whẹ lwụshi ndu ono, l’achọ ụzo whẹ l’eshi kpanyia whẹ ẹnya ọgu. Ọle ọ tọ dụdu onye dụ ike kpọ ndu Ju ono iwhu, nkele egvu whẹ byarụ ndiwhe l’ẹhu. ³Ndu bụ ishi l’obodo ono l’owhu mẹe ndu nnọ-chi ẹnya eze mẹe ndu ọchi-ọha mẹe ndu l’ejeru eze ozhi bẹ yetaru ndu Ju ẹka nkele whẹ l’atsụkota Mọdekayi egvu. ⁴O noo lẹ Mọdekayi b’a ma ama g’ọo oke madzụ l’ibe eze. Ude iya ngakọta obodo ono l’owhu. Ọkpehu l’aka iya shii eje eje.

⁵Ndu Ju gbugbushia ndu ọhogu whẹ gẹ whẹ ha lakọta whẹ l’iyi. Mbụ lẹ whẹ meru ndu ono, kpọru whẹ ashị ono g’ọ dụ whẹ ree.

⁶Lẹ Susa, bụ ishi mkpụkpu alị-eze ono bẹ ndu Ju gburu ụnu madzụ l’ụkporo ise. ⁷Ndu tso lẹ ndu whẹ gburu bụ Pashandata, Dalụfonu, Asụpata, ⁸Porata, Adalaya, Aridata, ⁹Pamashụta, Arisayi, Aridayi ọwaa Vayịzata. ¹⁰Ụmadzu iri ono bụ ụnwegirima ibe Hemanu nwa Hamedata, onye ono, bụ ọhogu ndu Ju. Ọle whẹ te egwotadu arya whẹ.

¹¹Mbọku ono gẹdegede b’e je edooru eze ụmadzu ole, e gburu lẹ Susa, bụ ishi alị-eze ono. ¹²Eze sụ eze-nwanyị, bụ Ẹsuta: “Ndu Ju bẹ nọdukwa l’ishi mkpụkpu alị-eze-e, bụ Susa gbua ụnu madzụ l’ụkporo ise, ọwaa ụnwegirima ibe Hemanu whẹ iri. ?Oo onye marụ gẹ whẹ meberu l’obodo ọwhu? ?Ọo gụnu bụ mkpa ghu tẹ mu meeru ghu iya? ?Ọo gụnu b’ọ dụ ghu nke tẹ mu meeru ghu? Mu l’e-meru ghu iwhe ọbu.”

¹³Ẹsuta sụ iya: “Ọ -bụru l’ọ dụ gụbe eze ree, nụnu ndu Ju, nọ lẹ Susa ike tẹ whẹ woru iwhe ono, whẹ meru ntanụ mefua echile. T’e woru odzu ụnwu Hemanu ono whẹ iri je ekobe l’eli oswebe ono, l’aaswị-gbuje madzụ.” ¹⁴Ọo ya bụ, eze tụa iwu t’e mee ya nno. A tụa ya, ọ bụru iwu lẹ Susa. A pata odzu ụnwu Hemanu ono whẹ iri je ekobe l’eli oswebe ono. ¹⁵Ndu Ju, nọ lẹ Susa dzukobe l’abalị iri l’ẹno l’ọnwa Ada. Whẹ gbua ụkporo unwoke ugbo iri l’ise lẹ Susa. Ọle whẹ te edenyidu ẹka l’iwhe whẹ nke a sụ lẹ whẹ jeru iya egwota.

¹⁶A bya bya lẹ ndu Ju ọwhu bugee l’obodo ọwhu dụ l’alị-eze Áhazerusu, whẹbedua bẹ dzukobekwaruwho tẹ whẹ dzọo ishi onwowhe, nke ọwhu whẹ l’a-kparụ nkụ hụbe ogu l’ẹka ndu ọhogu whẹ nọ. Ndu whẹ gburu egbu bẹ dụ ụkporo ụnu madzụ ugbo tete l’ụnu madzụ ẹsaa l’ụkporo iri. Ọle whẹ te edenyidu ẹka l’iwhe whẹ nke a sụ lẹ whẹ jeru iya egwota. ¹⁷Mbọku, iwhe ono nwụru bụ g’ọnwa Ada gbarụ abalị iri l’ẹto. O be mbọku nke iri l’ẹno iya, whẹ tụta ume. Whẹ mee mbọku ono t’ọ bụru mbọku eriri mẹe mbọku ẹhu-ụtso. ¹⁸Ọle ndu Ju ọwhu bu lẹ Susa bẹ dzukoberu lẹ mbọku, ọnwa Ada gbarụ abalị iri l’ẹto mẹe l’abalị iri l’ẹno. Ọ bụru l’abalị iri l’ise iya bẹ whẹ tụtaru ume, mee mbọku ono t’ọ bụru mbọku eriri mẹe mbọku ẹhu-ụtso nkewhe. ¹⁹Ọo iwhe ono meru iwhe ndu Ju ọwhu bu l’ime ime obodo meru abalị iri l’ẹno l’ọnwa Ada t’ọ bụru mbọku ẹhu-ụtso mẹe mbọku eriri mẹe mbọku onyenọnu l’eshije nri jeeru ibe iya ẹbyii.

Ori-oge Purimu

²⁰Mọdekayi tụko iwhe ono nwụru nụ g’ọ ha dekota l’ẹkwo. Ọ bya edee ẹkwo-ozhi keshiaru iwhe bụ ndu Ju, bu l’obodo lile, dụ l’alị-eze Áhazerusu, ndu bu otẹnya mẹe ndu bu l’ụkfu ntse ²¹sụ whẹ tẹ whẹ rijee oge mẹ ọnwa Ada gbaa abalị iri l’ẹno mẹe abalị iri l’ise, awha g’awha ha. ²²Ishi oge ono bụ l’o noo mbọku, ndu Ju kparụ nkụ hụbe ogu l’ẹka ndu ọhogu whẹ nọ, ọ bụru ọnwa ono bẹ áwhụ whẹ ghọru whẹ ẹhu-ụtso, ẹkwa whẹ ghọoru whẹ eriri. O deeru whẹ ẹkwo sụ tẹ whẹ mee mbọku ono t’ọ bụru eriri l’ẹhu-ụtso mẹe t’ọ bụru mbọku, onyenọnu l’eshije nri jeeru ibe iya ẹbyii, bụru mbọku, whẹ l’emejeru ndu l’adụa g’ọ harụ whẹ iwhe-ọma. ²³Ọo ya bụ, ndu Ju kweta lẹ whẹ l’a-nọ eri oge ono gẹ whẹ watawaru iya, ẹgube ono Mọdekayi deru whẹ iya l’ẹkwo tẹ whẹ rije iya. ²⁴O noo nkele Hemanu nwa Hamedata, onye shi l’eri Agagu, bụ ọhogu ndu Ju l’owhu gbajẹru ejo-ikumu gẹ l’oo-shi lakọta ndu Ju l’iyi. Ọo mbọku ono b’ọ tụru puru, bụ iya bụ l’ọoturu ido gude marụ mbọku ọbu, l’ee-gwe whẹbe ndu Ju aryaka eryune tẹ whẹ bụru kpurupyata. ²⁵Obenu lẹ nteke ejo idzu ono rwuru eze lẹ nchị b’ọ tụru iwu dee ya l’ẹkwo sụ t’e wota iwhe ono, Hemanu chịru idzu iya t’e mee ndu Ju, mechia Hemanu ọbu l’onwiya. T’a chịta yẹle ụnwu iya je ekobe l’eli oswebe, l’aaswị-gbuje madzụ.

²⁶Ọ bụru iya meru whẹ kua ujiku labọ ono Purimu. Ẹka okfu ono futaru bụ l’ishi-okfu ono, bụ Puru. Ọ bụru iwhe ono, Mọdekayi deru l’ẹkwo-ozhi whọ mẹe iwhe whẹ gudewaa ẹnya whẹ whụ, bụ iwhe nwụru whẹ nụ, ²⁷bẹ ndu Ju gude mee ya, ọ bụru omelalị, dụru whẹ nụ, dụru ẹpa whẹ mẹe ndu lwakfutaru whẹ nụ, mbụ l’ujiku labọ ono bẹ whẹ l’e-dobekota t’ọ bụru mbọku, whẹ l’eri oge g’e deru iya l’ẹkwo nụ whẹ, ọ bụru mbọku, a tụ-buru whẹ atụ-bu. ²⁸Shi l’ọgbo rwua l’ọgbo bẹ l’aa-nyatajẹ ori oge ono l’ime ujiku labọ ono. Ee-rije iya l’uwhu l’uwhu mẹe l’obodo l’obodo mẹe lẹ mkpụkpu lẹ mkpụkpu. T’ọ bọ dụkwa iwhe l’a-kpọshi ndu Ju ori oge Purimu ono gude nyatajẹ ujiku labọ ono.

²⁹Tọ dụ iya bụ, eze-nwanyị, bụ Ẹsuta nwada Abyihelu yẹle Mọdekayi onye Ju bya edee ẹkwo nke ẹbo gude mee t’ori oge purimu ono kabaa oshihu ike. ³⁰Whẹ dee ẹkwo-ozhi ono kekotaru ndu Ju l’owhu, bụ ndu bukota l’ụkporo obodo ugbo ishii l’obodo ẹsaa, dụ l’alị-eze Áhazerusu. L’ẹkwo-ozhi ono bẹ whẹ kfuru whẹ okfu ọma, karụ whẹ t’ọ bọ dụ iwhe whẹ l’e-je ọtsu egvu iya, ³¹tẹ whẹ dobeje mbọku purimu ono lẹ mgbe iya, ẹgube ono, Mọdekayi, bụ onye Ju mẹe eze-nwanyị, bụ Ẹsuta tụru whẹ l’iwu, mbụ ẹgube ono whẹbedua mẹe ẹpa whẹ dobewaru mbọku, l’a-bụjeru whẹ mbọku ọswi ẹgu mẹe mbọku ọgu áwhụ. ³²Iwu, Ẹsuta tụru bya emee t’ori oge purimu ono kabaa oshihu ike, e dee ya ede l’ẹkwo.

Ike, Mọdekayi nweru

¹Eze Áhazerusu bya atụa iwu tẹ ndu bukota l’alị-eze iya gẹ whẹ ha tụje akịriko, je akpaa lẹ ndu ọwhu bukube eze-ẹnyimu. ²Iwhe lile o mekotaru gude goshi g’ike iya habe mẹe g’ọkpehu iya habe shii mẹe lẹ g’o shi mee tẹ Mọdekayi bụru oke madzụ b’e dekotaru l’ẹkwo-akọ ndu eze ndu Peshiya mẹe nke ndu Midiya. ³Mọdekayi, bụ onye Ju bẹ ọkwa iya l’etsota nke eze Áhazerusu. Ọ bụ onye parụ ẹka l’ẹka ndu Ju ọdo nọ, ikpoto ndu Ju bụ ụnwunna iya dobe iya l’ọnodu, whẹ l’aakwabẹ iya ugvu. Nkele ọonoje achọ ọdu lẹ mma nke ndu Ju ibe iya mẹe gẹ l’ee-shi t’ẹhu dụ whẹ guu.