Éfesọsu

Ẹkwo-Ozhi Pọlu Deru Nụ Ndu

ÉFESỌSU

¹Ẹkwo-ozhi-a bẹ shi l’ẹka mbẹdua, bụ Pọlu l’ede; mbụ mụbe onye Chileke họtaru, mee tẹ mu bụru onye-ishi-ozhi Kuráyisutu Jisọsu.

Ndu mu l’ede iya anụ bụ ndibe Chileke lẹ Éfesọsu, mbụ ndu kwetaru nke Kuráyisutu Jisọsu, whẹ l’iya tụgba bụru nnanụ.

²Tẹ Chileke, bụ Nna anyi mẹe Onye-Nwe-Ọha, bụ Jisọsu Kuráyisutu meeru unu eze-iwhe-ọma, mekwaawho t’unu buru guu.

Ọnu-ọma, shi l’ẹka Kuráyisutu

³Unu t’anyi kele onye ono, bụ Chileke; bụkwawho Nna nke Onye-nwe-anyi Jisọsu Kuráyisutu ekele. O noo l’ọo ya gọru ọnu-ọma nụ anyịbe ndu anyi lẹ Kuráyisutu tụgbaru bụru nnanụ. Ọnu-ọma ọbu, ọ gọru nụ anyi bụ lẹ Chileke ono meru anyi: anyi shi l’ẹka Kuráyisutu lịru l’ọha imigwe. Iwhe mekwanuru ọ dụ nno bụ l’o wotaru iwhe l’aanụje anụ, shi l’ẹka ono nụkota anyi. ⁴Chileke byakwa l’eme mgboko-o, ọ dụhaadaro mbụ shi l’atụgba ono, anyi lẹ Kuráyisutu tụgbaru bụru nnanụ họta anyi, t’anyi bụru ndibe iya nke ọwhu anyi l’a-dụru iya nsọ, bụkwaruwho ndu l’adụa ẹka iwhe l’aa-ta anyi ụta dụ anyi l’ẹhu l’iwhu iya.

⁵Chileke kwoberu oye obu ono, o yeru anyi dụ mbụ chịhawaa iya achị dobe l’anyi l’a-bụ ụnwu iya, l’onye ya l’e-shi l’ẹka meeru iya anyi bụ Jisọsu Kuráyisutu. O noo bụlewho iwhe dụ iya mma ememe, ọ dụkwa iya whọ l’uche-obu. ⁶T’anyi tuje Chileke ẹwha lẹ nke eze-iwhe-ọma ono, dụ biribiri, kpọkwaawho gẹ l’aa-nọ atụ ọnu iya, o meru anyi ẹwoma, mbụ anyịbe ndu anyi lẹ Nwa iya ono, o yeru obu tụgbaru bụru nnanụ.

⁷Lẹ Nwa iya ono, bụ Jisọsu bẹ gbashịkwaru mmee ya gude gbata anyi, tẹmenu ọ bụkwaru iya whọ bẹ kpatarụ Chileke gụaru anyi nvụ l’iwhe-dụ-ẹji, anyi metagbaberu. Sụa, eze-iwhe-ọma ono bẹ kwatakwarụ bụru iwhe-ọma, parụ ẹka apaa, ọ nọdu megbaberu anyi nno, ⁸mbụ eze-iwhe-ọma ọwhu o megeeru anyi, meeru iya anyi nke anyịnyi.

⁹Ọ byakwawhọ bya emee t’anyi marụ iwhe; anyi enweru ọkpobe ori-l’ichicho nke ọwhu iwhe ya l’eme eme l’e-doje anyi ẹnya. O meru: anyi bya amarụ iwhe ono, bụ iwhe o shi domia edomi, bụkwanu iwhe ọ rịhawaru l’ọo l’ẹka Kuráyisutu bẹ ya l’e-shi mee ya. ¹⁰Iwhe ono, ọ tụberu ono, bụ iwhe l’oo-me nteke oge iya beleruwho bụ l’ọo-tụko iwhe o gude ẹka iya mee chigbabe, mbụ iwhe lile, dụ l’igwe mẹe ọwhu dụ l’alị; ya abya ewota Kuráyisutu mebe ishi iwhe g’iwhe ha ono.

¹¹Ọo Kuráyisutu bẹ anyi l’iya tụgbaru, ọ bụru iya meru t’anyi lịru l’iwhe ono, yẹbe Kuráyisutu ono kweru ndu nkiya ụkwa iya. Ọ bụru iya mekwaruwho g’o gude Chileke ono, l’emekotaje iwhe lile lẹge ọ tụbehawaru iya; mekwaa ya who lẹge ọ dụ iya l’uche-obu, vuhawaro ụzo họtahawaro anyi. ¹²Ọo ya bụ nggẹ anyịbedua bụ ndu vu ụzo wata anọ ele ẹnya Kuráyisutu, egudekwanu umere anyi l’owhu egoshi gẹ ọdu-biribiri iya habe shii nggẹ a jaa ya ajaja.

¹³O nokwawho g’ọ dụ unubẹdua bụ ndu l’ẹte abụa ndu Ju; nteke ono, unu nụleruwho ọkpobe ozhi ono, bụ ozhi nke ndzọta ono, Chileke dzọtaru unu g’unu bya ekweta nke Kuráyisutu. Ọ bụru iya bụ lẹ Chileke egude Ume-Dụ-Nsọ, o kwetaru ụkwa iya mee unu iwhe-ọhubama, gude goshi l’ọo ya nwe unu. ¹⁴Ume-Dụ-Nsọ ono l’egoshi l’anyi l’a-nata iwhe ono, Chileke kwetaru ndibe iya ụkwa iya, bụ iwhe anyi l’a-nata nteke Chileke l’a-gbata ndibe iya ọkpobe agbata nke mkpochi-ishi. T’anyi jajẹ ọdu-biribiri iya.

Pọlu l’ekfu anụ Chileke

¹⁵O noo iwhe meru g’o gude t’ọ dụ-zhia nteke mu l’ẹte anọje ekele Chileke ekele eshi nkeshi nteke ono, mu beberu nụa nke eworu ono, unu woru onwunu ye Onye-nwe-anyi Jisọsu l’ẹka mẹe nke obu ono, unu yekotaru ndu nkiya. ¹⁶Mu l’anọje ekele Chileke ekele iya, ekfu anụ iya l’iswi ẹhu unu nteke nteke. ¹⁷Mu l’asụje tẹ Chileke nke Onye-nwe-anyi Jisọsu Kuráyisutu, mbụ Chileke, bụ Nna ono nwe ọdu-biribiri nụ unu Ume iya, l’e-me unu t’unu marụ ágụ, ya egoshikwawho unu onwiya nke ọwhu unu l’a-ma iya. ¹⁸Mu l’asụjekwa iya whọ t’o mee obu unu t’ọ whụa iwhoro iya nke ọwhu unu l’a-makwanụ iwhe bụ iwhe o kuru unu t’unu lee ẹnya iya, unu amakwarụwho g’eze iwhe o kweshiru ndu nkiya ụkwa iya habe l’igweligwe. ¹⁹Mẹkwawho t’unu marụ g’ike iya ono, ẹtu iya l’adụa ono, l’emebe ire l’ẹhu anyịbe ndu ọwhu kweru nke Jisọsu. Ike ono, l’eme ire l’ẹhu anyi bẹ bụkwawho iwhe lanụ yẹle eze ike ono, ²⁰bụ iya bụ ọwhu o gude mee tẹ Kuráyisutu shi l’ọnwu teta nọdu ndzụ. O kuta iya dobe l’ẹka-ụtara yẹbe Chileke ono l’imigwe, gude kwabẹ iya ugvu. ²¹Ọo Kuráyisutu bẹ bụ ishi l’ẹka ono. Ọ kakọta iwhe bụkota ndu ishi imigwe gẹ whẹ ha mẹkota iwhe bụ ndu l’ekfu iwhe l’aanụ l’imigwe gẹ whẹ ha mẹkota iwhe bụ ndu ike dụ l’ẹka l’imigwe gẹ whẹ ha mẹkota nnajị-ọha imigwe l’owhu. Ọ kakọtakwawho iwhe bụ ndụ-ukfu-l’ọha shii, mbụ ndụ-ukfu-l’ọha nke eliwhe-e mẹe nke eliwhe ọwhu l’a-byanụ. ²²Chileke meru tẹ Kuráyisutu tụko-gezhia iwhe lile dzọpyabekota l’ọkpa, ọ bya ekuta iya doberu chọchi, t’ọ bụru iya l’a-bụ ishi iwhe lile lẹ chọchi. ²³Chọchi l’owhu bụkwa ogwẹhu Kuráyisutu. Ọo l’echilabọ chọchi bẹ iwhe Kuráyisutu dzuru edzumedzu. Ọ bụkwaruwho lẹ Kuráyisutu bẹ iwhe nke Chileke dzukwanuru edzumedzu.

Chileke l’anụje ndu nkiya ndzụ ọwhuu

¹O nweru nteke unu shi bụru ndu nwụhuru anwụhu, iwhe kparụ iya nụ bụru l’unu te eshidu eyeru Chileke ọnu, unu shi anọjekwawho eme iwhe-dụ-ẹji. ²Nteke ono bẹ unu shi etso ẹka ndiwhe. Unu shi anọje eme iwhe ewhereke-ngvu kfuru, bụ iya bụ onye ọwhu l’achị l’ewhekerewhe, bụkwaruwho ejo ume ono, l’enwukotaje unu ye t’unu karia Chileke ẹka. ³Anyịbedua g’anyi ha shikwawho tụko etso ụzo ono, mbụ-a, l’anyi shi etsolewho iwhe bụ iwhe l’agụ anyi ẹgu ememe. Iwhe anyi l’emeje bụleruwho iwhe dụ anyi ree l’ẹhu mẹe iwhe dụ anyi mma l’uche-obu. Anyi shikwa lẹ mbụ bụru ndu shi kpatsuwaa oke-ẹhu-eghughu nke Chileke kpube onwanyị g’ọo ndu ọwhu.

⁴Ọle Chileke bụ onye l’emeje obu-imiko mee nke etsutsu iya. O yeru anyi obu, yeta iya anyi nke ọwhu ọ kariru gẹ l’aa-nọ atụ ọnu iya. ⁵Anyi shi l’emeswe ono, anyi mesweru Chileke bụru ndu nwụhuru anwụhu, ọle Chileke bẹ mewaru: anyi lẹ Kuráyisutu bya atụko nọdu ndzụ. T’unu ba azọhakwa l’ọo eze-iwhe-ọma Chileke l’eme b’o gude dzọo unu. ⁶Anyi lẹ Kuráyisutu Jisọsu tụgbaru bụru nnanụ, Chileke tụko anyi l’iya mee: anyi tetakota nọdu ndzụ, o mekwaawho anyi t’anyi l’iya tụko nọdu l’imigwe. ⁷Ishishi iwhe o kwoberu mee iwhe lile ono bụ nke ọwhu l’oo-bekochaa goshi ọgbo ọwhu dụ l’iwhu lẹge eze-iwhe-ọma nkiya kwatarụ bụru iwhe nyịberu ọkpobe anyịbe mẹe t’o goshi whẹ g’obu-ọma nkiya, shi l’ẹka Kuráyisutu Jisọsu habe l’ẹhu anyi. ⁸Ọo l’ọo lẹ Chileke l’emenuka eze-iwhe-ọma meru g’o gude ọ dzọo unu. Adzọta ono, a dzọtaru unu shi l’ekwekwe unu kweru. Ọ tọ dụkwa iwhe unu l’eyekwabaa ya. Adzọta ono ta abụkwa obunggo iwhe unu setaru l’anya. Ọlekwawho iwhe-ọma, Chileke meru unu ẹwoma. ⁹Tọ hẹ l’ọo nke ree, unu l’eme. Ọo ya bụ tọ bọ dụkwa onye l’e-je oku onwiya. ¹⁰Anyi tụkokwaru bụru iwhe Chileke gude ẹka iya mee. Ọo Kuráyisutu Jisọsu b’o shi l’ẹka iya kee anyi nke ọwhu anyi l’a-dụje ike jee ọkpobe ozhi, ọ dụhawaa mbụ kwakọberu anyi t’anyi bya ejee.

Ndibe Kuráyisutu bụ nnanụ

¹¹Ọo ya bụ, t’unu nyatakwa iwhe unu shi bụhawaru. Unubẹ ndu a nwụru, unu bụru ndu ọha ọdo, ndu Ju l’ekuje “ndu l’ete ebua ugvu”. Whẹbedua l’anọje eku onwowhe lẹ whẹ buru ugvu, gude goshi lẹ whẹ bụ ndu nke Chileke. Ọle ugvu whẹ ono bụlekwawho iwhe bụ ẹka bẹ madzụ l’egudeje mee ya l’eli ẹhu. ¹²Unu nyatakwa lẹ nteke ono bẹ unu l’ete eshidua nọdu Kuráyisutu l’ẹka. Unu shi bụru ndu ọha ọdo, l’ẹte agụaru yeru ndu Ízurẹlu, Chileke họtaru tẹ whẹ bụru nkiya; ẹka unu te eshi dụ l’iwhe bụkota ụkwa iwhe ono, Chileke nọdu kweshia ndu nkiya. Tọ dụ-zhia iwhe unu shi ele ẹnya iya lẹ mgboko-o. Unu te eshi marụ onye Chileke bụ. ¹³Ọle ntaa b’e shiwaa l’ẹka Kuráyisutu Jisọsu onye unu l’iya tụgbaru bụru nnanụ, Chileke kulitaru unu ntse, l’unubẹ ndu shi nọdu iya otẹnya. O noo lẹ Kuráyisutu gude mmee ya safụ iwhe-dụ-ẹji unu metagbaberu. ¹⁴Ọo Kuráyisutu ono l’onwiya bẹ bụ ẹhu ọdu guu nke anyi, mbụ yẹbedua, meru anyịbe ndu Ju mẹe ndu l’ẹte abụa ndu Ju, anyi tụko bụru ndu lanụ. Ọo ya bụ, o shi l’anwụhu ono, ọ nwụhuru nwukpofu ndụmashi ono, dụ g’ọo mgbodo, bụ iya shi bọkahu whẹ, whẹ bụru onwowhe ọhogu. ¹⁵Iwhe o meru bụ l’o meru iwu ndu Ju te erehe ire mẹwaro nsọ nsọ mẹe omelalị omelalị, dụkota iya nu. Iwhe Chileke l’eme tẹ ya mee bụ tẹ Kuráyisutu shi nno gude mba labọ ono metaru onwiya ndu lanụ whẹ l’iya tụgbaru bụru nnanụ, whẹ abụru mba ọwhuu, t’o shi nno mee tẹ nchị dụ ndoo, ¹⁶mẹe tẹ Kuráyisutu gudekwawho anwụhu ono, ọ nwụhuru l’eli oswebe gude chikpoo ndụmashi ono mẹe t’o gudekwawho ọnwu oswebe ono, mee mba labọ ono tẹ whẹ bụru nnanụ t’o duwhu whẹ azụ dukfuta Chileke. ¹⁷O noo iwhe Kuráyisutu kwoberu bya bya ezhidzuru madzụ lile ozhi-ọma nke nchị-ọdu-ndoo, zhia ya unubẹ ndu l’ẹte abụa ndu Ju, unubẹ ndu shi nọdu Chileke otẹnya; ya ezhikwaa ya whọ ndu Ju, bụ ndu shi nọdu iya ntse. ¹⁸Ọ kwa Kuráyisutu b’e shi l’ẹka iya, ọ bụru iya bụ l’anyi g’anyi ha, mbụ anyịbe ndu Ju mẹe ndu l’ẹte abụa ndu Ju, anyi bya abụru ndu l’adụje ike gude ume lanụ bya akfụru l’iwhu Nna ono.

¹⁹Ọo ya bụ, l’unubẹ ndu l’ẹte abụa ndu Ju; ta abụhekwa nlwamụnlwa, shi alị ọdo lwa, unu ta abụhe mbyambya. Ntaa bẹ unu bụwaa ndu a tụkoru whẹ lẹ ndibe Chileke nwụa l’ẹka lanụ, unu tụkokwawho bụru ndu ọnu-ụlo Chileke. ²⁰Ntaa bẹ Chileke gudeekwaa unubẹdua atụ-tse ụlo iya ọwhu, bụ ndụ-ishi-ozhi mẹe ndu shi ekfuchiru Chileke, b’o gude gbube ukfu iya. Ọ bụru Jisọsu Kuráyisutu l’onwiya bụ ẹwhuru dụ g’ọo itso, gude ụlo ọbu. ²¹Ọo ya bụ onye gude ụlo ono g’ọ ha gudeshia ya ike; ọ bụkwaru iya whọ l’eme t’o vua, bụru eze-ụlo, e doberu Onye-Nwe-Ọha nsọ. ²²O nokwawho g’unu l’iya tụgbaru ọ tụkokwawho unu atụ, unu lẹ ndu ọdo; t’a tụa unu g’ọo ụlo nggẹ unu bụru eze-ụlo ẹka Ume Chileke l’e-bu.

Ozhi, Pọlu jeru ndu l’ẹte abụa ndu Ju

¹O noo ishi iwhe meru g’o gude mu l’anọje ekfu anụ Chileke, mbụ mbẹdua, bụ Pọlu, onye nọru Kuráyisutu Jisọsu mkpọro l’iswi ẹhu unubẹ ndu l’ẹte abụa ndu Ju. ²O doru mu ẹnya l’unu nụwaru lẹ Chileke shiwaa l’eze-iwhe-ọma iya ono ye mu ozhi-a l’ẹka, sụ tẹ mu jee nggẹ ọ dụru unu lẹ mma. ³Chileke wota iwhe ono, o shi domia edomi tọkashiaru mu, mu marụ iya. Mu tsọkotahaakwaru iwhe ono ọnu lẹ mbụ, ọle mu gburu iya mkpirikpi. ⁴Nteke unu gụleruwho iwhe ono, mu dehawaru, unu eshiwaro l’ẹka ono mawarụro g’o dotaberu mu ẹnya mbụ iwhe nke Kuráyisutu ono, Chileke shi domia edomi. ⁵Lẹ nteke ndụ-ichee bẹ Chileke l’ete eshikwa emeje tẹ ndiwhe marụ iwhe nkiya ono, o domiru edomi. Ọle Chileke shiwaa l’ẹka Ume-Dụ-Nsọ nkiya tụjashia ya ntaa nke ọwhu ndu, ọ họtaru dobe iche, mbụ ndụ-ishi-ozhi mẹe ndu nkfuchiru iya l’a-ma iwhe ono. ⁶Ọ waa iwhe ọbu, o shi domia edomi ndọwa: lẹ ndu l’ẹte abụa ndu Ju bẹ whẹ lẹ ndu Ju gbawaa mgba l’ọnu-ọma ono, shi l’ẹka Chileke. Whẹ tụkowaru dzekfuru l’ẹhu onye lanụ, tụkokwawho lịru l’iwhe Chileke shi l’ẹka Kuráyisutu Jisọsu kwe ụkwa iya. Ọo ozhi-ọma ono meru t’anyi marụ iya nta-a.

⁷Ọo ozhi-ọma ono bẹ mu l’ese anya iya. Chileke họtaru mu nke tẹ mu jejee ozhi-ọma ono, o noo bụru eze-iwhe-ọma, o meru mu nke ẹwoma. O gude nno goshi mu gẹ ike iya l’emebe ire l’ẹhu mu. ⁸Iwhe bụkota ndu ẹnya lwarụ lẹ ndu nke Chileke, bụ mbẹdua bẹ ẹnya nke mu kagee alwalwa, ọ bụleru mu-a bẹ Chileke gbee meeru eze-iwhe-ọma nke tẹ mu bụru onye l’e-tsojeru ọhamoha lile kfukashiaru ndu l’ẹte abụa ndu Ju nke ozhi-ọma ono, shi l’ẹka Kuráyisutu, mbụ eze-iwhe-ọma, parụ ẹka nke bụ l’ọriri madzụ te erwudu lẹ g’ọ ha. ⁹Ọo mu b’o yeru tẹ mu mee tẹ ndiwhe je akpaa l’ẹka whẹ beru whụa gẹ Chileke l’eshije eme iwhe ọ tụberu. Chileke, onye bụ iya meru iwhe lile, chịhaakwaru iwhe ono dobe edobe tẹmenu o mee mgboko-o, ọle o shizhiawho eshi nkeshi ono domia ya edomi. ¹⁰Ọ bụru ntaa bẹ Chileke l’e-shi ndu chọchi l’ẹka mee tẹ ndu l’achị ndu ishi lile l’imigwe mẹe ndu l’ekfu iwhe l’aanụ l’imigwe marụ gẹ mmamagụ nke Chileke gbakọta-gezhiaru. ¹¹Chileke mekotagezhiaru iwhe lile ono lẹge ọ rịhawaru iya rọo eshi awha nwịnyari-ịnyari. Onye o shi l’ẹka iya medzua ya bụ Onye-nwe-anyi Kuráyisutu Jisọsu, ¹²bụ onye anyi kwetaru nkiya, ọ bya emee; anyi l’iya tụgba bụru nnanụ nke ọwhu obu l’ẹte anọhe ete anyi furafura, anyi enweru ọnu-okfu, anyi enweru iwhe anyi l’egude ẹka bya akfụru l’iwhu Chileke. ¹³O noo ishi iwhe meru mu l’ekfuru unu sụ unu; byiko byiko t’unu be ekwobekwa iswi iwhe-ọtsulanu-a, mu l’eje l’okfu ẹhu unu tugbee ẹka l’ẹhu Kuráyisutu, l’ọ kwa iwhe l’e-wotaru unu ugvu.

Oye obu Kuráyisutu yeru anyi

¹⁴Ọo iwhe ono meru g’o gude mu l’egbuje ikpere l’alị ekfu anụ Chileke, bụ Nna. ¹⁵Onye bụ iya bẹ ikfu g’ikfu ha l’imigwe mẹe l’eliwhe-e shi l’ẹka iya gbube ishi ndzụ whẹ. ¹⁶Mu l’anọjekwawho ekfu anụ Chileke t’o shi l’ọdu-biribiri iya, nyịberu anyịbe, shi l’ẹka Ume-Dụ-Nsọ iya nụ unu ike tẹ obu shihu unu ike. ¹⁷Mu l’ekfujekwaruwho nụ Chileke tẹ Kuráyisutu bata bya eburu unu eburu l’ime obu, eshi-ọwhu unu kwewaru nkiya mẹfukwaawho t’oye obu mee unu t’unu shihu ike lẹge ọgbaragbu l’emeje oshi ya eshihu ike; t’oye obu ono mekwaawho unu t’unu shihu ike gẹ ukfu-ụlo l’emeje ụlo, ya eshihu ike. ¹⁸Nggẹ unu lẹ ndibe Chileke gẹ whẹ hakọta adụje ike t’o doo unu ẹnya, mbụ gẹ ndzọta, Chileke dzọtaru unu habe ọsa shii, hakwawhọ ogologo shii mẹe g’ọ habe l’imeli mẹwaro omilomi iya, ¹⁹mẹe t’unu makwarụwho l’oye obu nke Kuráyisutu parụ ẹka. A makwarụ-a l’ọ tọ dụdu nteke dụ onye bya l’a-makọta iya nụ. Ọo ya bụkwanu a tụko-gewaro gẹ Chileke gbarụ gba whudzukota l’ẹhu unu.

²⁰T’ajaja bụru nke Chileke ono, l’adụje ike meeru anyi iwhe, meru nke anyịnyi ye iya mebyi ọkpobe eyeye, mbụ megee ya, meghata g’anyi l’adụje ike sụ t’o mee, megee mee ọwhu anyi l’arị-vua l’ọriri. Ẹgube ike ọwa, o gude eme ire ọwa l’ẹhu anyi shihubukwaaru ike. ²¹T’e shi chọchi l’ẹka tuje iya ẹwha, shikwawho l’ẹka Kuráyisutu Jisọsu tuje iya ẹwha ono jeyewaro lẹ tututu-mịmimi. O noo g’ọ dụ.

Ndu l’etso Jisọsu bụ nnanụ

¹O noo iwhe meru mbẹdua bụ onye a tụru mkpọro nkele ọo lẹ mu l’ejeru Onye-Nwe-Ọha ozhi l’aryọ unu sụ t’unubẹ ndu nke Chileke nọdukwa ndzụ meje iwhe Chileke tụberu nteke ono, ọ họtaru unu ono. ²Unu wozetaje onwunu alị, unu emeje odoo, unu atajẹru iwhe nshi, unu anwụ-gbujee iwhe ibe unu meru unu l’obu, shikwanu nno goshi l’unu yeru ibe unu obu. ³Unu kebejekwa ẹhu t’unu ba aha ọbu nnanụ ono, Ume Chileke meru t’unu bụru. Tẹ Chileke mee tẹ nchị dụ unu ndoo nggẹ unu l’ibe unu bụru nnanụ g’unu bụ iya. ⁴Sụa, eshi-ọwhu anyi tụkowaru natawaa Ume-Dụ-Nsọ lanụ bẹ anyi tụkookwaruwho bụru ogwẹhu lanụ, o nokwawho g’ọ bụ iwhe lanụ bẹ Chileke kuru anyi t’anyi bya eleje ẹnya iya. ⁵Ọo Onye-Nwe-Ọha lanụ kpụ bẹ dụ nụ, ọ bụru iwhe lanụ bẹ anyi kweru, ọ kwarụwho baputizimu lanụ bẹ dụ nụ. ⁶Ọo Chileke lanụ dụ. Ọo ya bụ onye bụ Nna anyi g’anyi ha. Ọo ya bụ onye iwhe lile kụru ishi l’ẹka, o gude madzụ lile eje ozhi iya, o bukwaruwho l’ime anyi g’anyi ha.

⁷G’anyi ha bẹ Chileke nụkotaru eze-iwhe-ọma l’ẹhu l’ẹhu. Ọ bụru lẹge Kuráyisutu gude kee ya bụ g’a nụru iya anyi. ⁸Ọ dụkwaa g’ọo iwhe ọbu, e deru l’ẹkwo Okfu Chileke sụ:

“Nteke ono, ọ lashiru l’imigwe

b’o dukotaru igweligwe ndu,

ọ kpụkoru lẹ ndzụ l’ọgu yeru onwiya.

O kekashikwaaruwho ndiwhe iwhe ẹwoma.”

⁹Ọ dụ ree, ọ -bụru l’a sụru l’ọ larụ l’imigwe, ọ kwa iya bụ l’o vuada ụzo shi l’imigwe bya mgboko, rwurwee imime alị. ¹⁰Ọ kwawhọ yẹbe onye ono, nyizetaru bẹ bụ onye nyikotaru nụ, tụko imigwe g’ọ ha ghatakọta nke ọwhu ọ tụkoru ẹka lile ghatakọta. ¹¹Ọo ya bẹ bụ onye ọbu meru ndiwhe ree ẹwoma. Ree ẹwoma ọbu, o meru whẹ bụ l’ọ tụru ẹka lẹ ndu ọwhu l’a-bụ ndụ-ishi-ozhi, ọ tụa ẹka lẹ ndu ọwhu l’a-bụ ndu nkfuchiru Chileke, ọ tụa ẹka lẹ ndu ọwhu l’a-bụ ndu l’eje ozhi-ọma, ọ tụa ẹka lẹ ndu ọwhu l’a-nọje eleta chọchi ẹnya, ọ tụkwaawho ẹka lẹ ndu ọwhu l’anọje ezhi-okfu Chileke. ¹²Iwhe meru o mee ya nno bụ tẹ ya shi whẹ l’ẹka mee ndibe Chileke nke ọwhu whẹ l’a-dụ ike jeeru Kuráyisutu ozhi iya mẹfua nke ọwhu ogwẹhu Kuráyisutu l’e-vutse. ¹³O noo gẹ l’ọo-dụ jeye nteke anyi l’a-tụko bụru ndu tụgbaru bụru nnanụ nke l’ọo l’anyi tụkowaru kweta nke Nwa Chileke mẹe nkele anyi mawarụ iya, majia ya ẹnya; o nokwa iwhe l’e-me t’anyi bụkwaruwho ndu l’e-tsefuta etsefuta bụru madzụ owhu, dzuru oke g’ọo Kuráyisutu. ¹⁴Ọ kwawhọ iwhe lile ono, meru Kuráyisutu dzua oke bẹ l’e-mekwawho t’anyịbedua dzua oke nke ọwhu anyi l’ẹte abụhe ụnwegirima uwhere-okfu ndu ejo nzhi l’a-nọje akwawhu akwawhu g’ọo ụgbo akpara-mini l’apanga l’echi ẹnyimu. Onye vutabewaru nno bẹ ndu ejo nzhi l’ete eduwhuhekwa, mbụ ndu ejo nzhi, l’egudeje ẹregede mẹe ụgho eduwhushi ndu ọdo. ¹⁵Iwhe anyịbedua gege emeje bụ t’anyi yeje ibe anyi obu kfujee ire-lanụ nggẹ anyi gudeje nno evu evu l’iwhe lile, mbụ evu evukfu Kuráyisutu yẹbedua bụ iya bụ ishi anyi. ¹⁶Ọo ya l’emeje t’ogwẹhu l’owhu dzekfua lẹ nkwo iya lẹ nkwo iya bụru nnanụ. Nteke ono, bẹ ogwẹhu l’owhu l’a-tụko evu ivu, shihu ike, eshi-ọwhu iwhe lile, e meru ọ dụkota l’ẹhu tụkoru emekaa iwhe rwuberu iya nụ. O nokwa gẹ l’ọo-dụ l’ẹhu Kuráyisutu mẹe ndu nkiya yekota ibe whẹ obu.

Kuráyisutu l’anụje ndiwhe ndzụ ọwhuu

¹⁷Ọo Onye-Nwe-Ọha bẹ zhiru mu nu tẹ mu kfua ya kfushia ya ike sụ, tẹ ndzụ unu ba adụhekwa g’ọo ndzụ nke ndu l’ẹte amaa Chileke, mbụ ndu égò sweru, ¹⁸ndu ọriri whẹ gbakọtaru ọochi. Ndu ono bẹ ndzụ ono, Chileke l’anụje l’ete erwubekwaa ẹka. Iwhe mekwaru iya bụru lẹ whẹ kpochiru obu, tọ dụ iwhe whẹ marụ lẹ nke Chileke. ¹⁹Iwhere gvụakwaru whẹ l’iwhu, whẹ tụru onwowhe tọgboru umere, l’eshi nshi. Whẹ wata ome ọ-darụ-gbaa iwhe l’ẹte adụa ree, meta iya nke ọwhu whẹ tụwaru onwowhe tọgboru ụrwu-alị dụ-gee l’iche l’iche.

²⁰Ọ tọ bụkwa ẹgube iwhe ono bẹ unu nwụtaru l’ẹka Kuráyisutu anyi ọbu. ²¹Iwhe ọwhu doru mu ẹnya bụ l’unu nụwaru okfu ẹhu iya; tẹmenu e zhikwaawho unu ọkpobe-okfu dụ l’ẹhu Jisọsu eshi-ọwhu unu l’iya tụgbaru bụru nnanụ. ²²Ọo ya bụ, t’unu haa akahụ umere ono, unu shi anọje eme nteke ono unu l’eteke eshia bụru ndu nke Kuráyisutu. Ọo akahụ umere ono bẹ ẹgu iya meru unu, unu ta ama l’ọo onwunu bẹ unu l’aghọru ụgho, ọ bụkwaru iya whọ l’emeje, unu alaa l’iyi. ²³Tẹ Chileke mee obu unu mẹe uche unu t’ọ bụru iwhe ọwhuu. ²⁴Unu yee umere ọwhuu ono g’ọo onye yeru uwe bụ iya bụ umere ọwhu Chileke meru o shia ya. Ẹgube umere ono l’egoshije onwiya lẹ ndzụ, kfụru nhamụnha mẹe lẹ ndzụ dụ nsọ.

²⁵Ọo ya bụ, unu ba adzụjehekwa ejire. T’onyenọnu kfujeeru ibe iya ire-lanụ, eshi-ọwhu anyi tụkoru bụru ndu tụgbaru nnanụ l’ẹhu Kuráyisutu. ²⁶Ẹhu ghudeje unu eghu; t’unu be ekwekwa t’ẹhu-eghughu ono kpata t’unu mee iwhe-dụ-ẹji, ọdua l’ọo t’ẹhu ghugbuwaruro unu nno jeye t’ẹnyanwu rịba. ²⁷T’unu be ekwezhikwaa tẹ Oshifutuswe kpata unu ụzo l’ẹhu. ²⁸T’onye l’ezhi oshi hakwaa ozhi oshi, gude ẹka iya wata ose anya; gude setaje iwhe l’ụzo kfụru nhamụnha, l’oo-gude aga mkpa ẹhu iya mẹe ọwhu l’oo-gudeje agbataru ndu mkpa byarụ. ²⁹T’unu be ekfujekwaru ibe unu ejo okfu. T’ọ bụ-chikwaaru okfu ọma bẹ bụ iwhe l’eshije unu l’ọnu, bụkwanu iya bụ okfu l’a-nọ ekutse madzụ ekutse, akwọkwawho ndu nụru iya nụ lẹ mkpa. ³⁰Unu be emekwa Ume-Dụ-Nsọ iwhe áwhụ. Ọo Ume-Dụ-Nsọ ono bẹ Chileke gude mee unu iwhe-ọhubama gude egoshi l’ọo ya nwe unu. Ọo ya bụ iwhe Chileke yeru unu l’ẹka gude egoshi lẹ mbọku l’a-byakwaa, bụ mbọku yẹbe Chileke l’a-gbata unu. ³¹Unu hakwaa obu-ilu mẹe obu-ọku mẹe ẹhu-eghughu. Unu ba aswọjehekwa ụswo, unu ta akpọjehe iwhu. Unu be edobejekwaru ibe unu ejo obu ebekwaru onye ọbu mee m’ọo unu gụnu. ³²Unu mejechiaru ibe unu odoo, whụjeeru whẹ imiko. Unu agụjeeru ibe unu nvụ lẹge Chileke shi l’ẹka Kuráyisutu gụaru iya unubẹdua.

Umere, gbarụ ndu nke Kuráyisutu

¹Eshi-ọwhu unu bụwaa ụnwu Chileke, o yeru obu, t’unu nata ẹka iya nggẹ unu dụ g’ọ dụ. ²T’unu gude ndzụ unu g’ọ ha goshije l’unu yeru ibe unu obu lẹge Kuráyisutu yeru iya anyi, kwobe okfu ẹhu anyi swefu ẹnya lẹ ndzụ iya, gude onwiya gbaarụ Chileke ẹja, dụ Chileke ree.

³Ọo ya bụ, eshi unu bụwaa ndibe Chileke bẹ l’ọoto dụhekwa ree t’unu ye ẹka l’ụrwali mẹe ejo umere l’eshi nshi, unu be edobekwa ẹnya-kfụrukfuru l’ẹka iwhe madzụ ibe unu dụ. T’ọ bọ dụ-zhikwaa ejo-iwhe ono g’ọ ha ọwhu l’ee-jezhia owhota ọnu ilile l’ẹka unu nọ. ⁴T’ọ bọ dụkwa nteke unu l’ekfuje okfu erehu, unu eje ekfuje rigbarigba okfu, unu eje atụje ịreche-ọnu. Iwhe unu l’e-mechia bụ t’unu gudeje ọnu unu kele Chileke ekele. ⁵Ọwhu unu l’a-tụbe nvọ bụ l’ọ tọ dụdu onye l’arwụ ụrwu-alị; ọdua l’ọo onye umere iya l’eshi nshi, ọdua l’ọo onye ẹnya-kfụrukfuru, ọ tọ dụkwa ọ dụ g’ọ bụ ndu ono l’a-bahụ l’ẹka Kuráyisutu yẹle Chileke bụ eze. Onye ẹnya-kfụrukfuru dụkwaa g’ọo onye l’agba ẹja l’iwhe.

⁶T’unu be ekwekwa t’ọ dụ onye l’e-gude mkpọkoro okfu duwhua unu. O noo l’ọo iwhe g’iwhe ha ono bẹ l’e-me tẹ Chileke tụfuru ndu l’ẹte anụru iya okfu oke-ẹhu-eghughu iya. ⁷Ọo ya bụ, t’unu lẹ whẹ ba atụkwa ọli. ⁸L’unubẹdua l’onwunu shikwa nọdukota l’ẹkpuroochi, ọle ntaa unu bụwaa ndibe nke Onye-Nwe-Ọha bẹ unu nọduwaa l’iwhoro. Ọo ya bụ, t’unu meje umere l’e-goshi l’unu nọ l’iwhoro. ⁹O noo nkele iwhe iwhoro l’akpatajẹ bụlewho umere ọma mẹe odobe onwonye chịriri mẹe ire-lanụ. ¹⁰Unu kebeje ẹhu nwụjee ome iwhe dụ Onye-Nwe-Ọha ree. ¹¹T’unu be etsokwa ndu ono, l’emekaa iwhe mkpa iya l’ẹte adụa; iwhe ono bụkota iwhe ndu bu l’ẹkpuroochi l’anọje eme. Iwhe unu l’e-mechia bụ t’unu vọshijee iwhe-dụ-ẹji, whẹ l’eme, tụa whẹ iya jalaa l’iwhu. ¹²Iwhe ono, whẹ l’anọje eme l’edomi ono bẹ dụtaru ẹji nke ọwhu iwhere iya l’ete ekwezhiduanu m’ọo t’e je iya owhota ọnu ilile. ¹³Ọle nteke e wofutaru iwhe lile iwhoro; a whụkotawa iya rọ iwhu. ¹⁴O noo nkele iwhe lile, bụ iwhe e wofutaru iwhoro bẹ bụwaro iwhoro l’onwiya. O noo g’o gude e kfua sụ:

“O-ku-mgbẹnya! Tehu nwụru ẹnya

shi l’anwụhu, ị nwụhuru teta gbalihu.

Tẹ Kuráyisutu bụru iwhoro chijeru ghu g’ọo ọnwa.”

¹⁵Ọo ya bụ, t’unu kwakwaa ẹnya l’ẹgube umere, unu l’anọje eme nta-a. Unu meje g’ọo ndu marụ iwhe, t’unu be emejehe g’ọo ndu l’amaa iwhe. ¹⁶Ọ -dụ nteke nwụzo dụje unu nke ome iwhe-ọma, unu ba ahajẹkwa t’ọo laa unu ẹwoma, o noo nkele iwhe-dụ-ẹji pakwarụ ẹka lẹ mgboko-o nta-a. ¹⁷Ọo ya bụ, t’unu ba abụkwa ndu eswe. Unu kebe ẹhu sebaje t’unu marụ iwhe dụ Onye-Nwe-Ọha ree, t’unu meeru iya.

¹⁸Unu ba angụnukajekwa mmẹe nke ọwhu l’ọo-nọ eme unu l’ẹnya. O noo nkele oodujeru madzụ ye lẹ ndzụ ọla-l’iyi. Iwhe unu l’e-mechia bụ t’unu kwe tẹ Ume-Dụ-Nsọ bya eji unu ẹhu. ¹⁹Unu gudeje egvu-ọma mẹe egvu-ekele mẹe egvu ọdowaro shikota l’ẹka Ume-Dụ-Nsọ gude kfujeru okfu yeru ibe unu, mbụkwa okfu, l’e-meje t’obu shihu whẹ ike. Unu gụjeeru Onye-Nwe-Ọha egvu-ekele, unu agụjekwaaru iya whọ egvu-ọma. Unu gudejekwa obu unu keleje iya ekele. ²⁰Unu gudeje ẹwha Onye-nwe-anyi Jisọsu Kuráyisutu keleje Chileke, bụ Nna ekele iwhe lile.

Umere, gbarụ nwoke yẹle nyee ya

²¹Unu wozejekwa onwunu alị l’ẹka ibe unu nọ; shi nno goshi l’unu l’akwabẹ Kuráyisutu ugvu.

²²Unubẹ ụnwanyi, unu wozetaje onwunu alị l’ẹka ndu bụ ji unu whẹ nọ gude goshi l’unu wozewaru onwunu alị l’ẹka Onye-nwe-anyi Kuráyisutu nọ. ²³L’ọ kwa nwoke bụ ishi lẹ nyee ya lẹge Kuráyisutu bụ ishi lẹ chọchi, o noo l’ọo Kuráyisutu ono l’onwiya bụ onye ndzọta ogwẹhu iya ono, bụ chọchi. ²⁴Ọ kwawhọ gẹ chọchi wozeru onwiya alị l’ẹka Kuráyisutu nọ bụ gẹ ụnwanyi l’e-wozeje onwowhe alị l’ẹka ji whẹ nọ l’iwhe lile.

²⁵Unubẹ unwoke, unu yeje nyee unu obu lẹge Kuráyisutu yeru iya chọchi wota ndzụ iya nụ l’iswi ẹhu chọchi. ²⁶Iwhe o kwoberu mee ya nno bụ: ya gudegezhiawho mini yẹle okfu-ọnu iya sacharwee chọchi ọ dụ ree, ya egudekwa iya who mee ya t’ọ dụru Chileke nsọ; ²⁷nke ọwhu l’oo-kulataru onwiya chọchi, ya adụ g’ọo nwanyị, l’eeje alụlu nke ọwhuu, mbụ nwanyị, l’ama ụma, l’ẹte adụa iwhe tsetaru iya l’ẹhu, iwhu te ese iya ẹli mẹwaro iwhe ọdo, dụ-gee nno, o dobechiaru Chileke onwiya nsọ; tọ dụ-zhia ẹka ụta dụ iya l’ẹhu ilile. ²⁸O nokwawho gẹ unwoke l’e-yeje nyee whẹ obu lẹge whẹ yeru onwowhe. Lẹ nwoke, yeru nyee ya obu bụakwa onwiya b’o yeru obu. ²⁹O to nwedu onye l’akpọje ẹhu iya ashị. Onye ọbu l’egbejechia azụ iya azụ, eleta iya ẹnya. O nokwawho gẹ Kuráyisutu l’anọje emeru chọchi. ³⁰Ọo anyi bụ-gee iwhe kfụkataru iya l’ẹhu. ³¹O nokwa iwhe ọbu meru e dee l’ẹkwo Okfu Chileke sụ: “O noo iwhe meru nwoke je l’a-ha nna iya, haa ne iya yẹle nyee ya atụgba. Ụmadzu labọ ono atụko bya abụru onye lanụ.” ³²Okfu ono, Chileke shi domia edomi ono, e deru l’ẹka ono dụkwa omilomi shii. Iwhe mbẹdua whụru l’ẹka ono bụ l’ọo okfu ẹhu Kuráyisutu yẹle chọchi bẹ l’ookfu ama ẹka. ³³Ọle ookfukwaruwho unu l’ẹhu l’ẹhu sụ: l’onyenọnu yefutaje nyee ya obu g’o yeru iya onwiya, tẹ nwanyị nọnu goshije lẹ ji iya dụru iya lẹ nsọ.

Umere, gbarụ ụnwegirima mẹe ndu nwụru whẹ nụ

¹Unubẹ ụnwegirima, iwhe rwuberu unu l’ememe bụ t’unu nụjeeru ndu nwụru unu okfu, o noo l’ọo uche Onye-Nwe-Ọha t’unu meje nno. ²“Kwabẹje nna ghu mẹe ne ghu ugvu.” O noo iwu mbụ, Chileke tụ-geeru kweru ụkwa iwhe tukobe iya; ụkwa iwhe ọbu bụ: ³“nggẹ ọ dụru ghu lẹ ree mẹe nke ọwhu ndzụ ghu l’a-bụ ndzụ ogologo lẹ mgboko-o.”

⁴Unubẹ ndu bụ nna, unu be emejekwa ụnwegirima unu iwhe l’eghu whẹ eghu. Iwhe unu l’e-mejechia bụ t’unu zhije whẹ iwhe, unu adụjee whẹ ọdu l’ụzo nke ndu ọwhu bụ ndibe Kuráyisutu.

Umere, gbarụ ohu yẹle onye gbarụ iya nụ

⁵Unubẹ ndu ọwhu bụ ohu, unu nụjekwaaru ndu bụ nnajị unu nke eliwhe-e okfu, unu gudejekwa ọchi uche l’ẹka mẹe ọtsu-egvu nụjeeru whẹ okfu ono. Unu egude obu-iwhoro me iya gẹ-woo l’ọo Kuráyisutu bẹ unu l’emeru iya. ⁶Ọ tọ bụlekwaa nteke whẹ l’ele unu ẹnya bẹ unu l’a-nọje eme iya nggẹ a jaa unu. Unu gudejechia obu unu meje iwhe dụ Chileke ree, bụkwanu iya bụ iwhe rwuberu ndu bụ ohu nke Kuráyisutu. ⁷Unu egudeje obu-ọma jejee ozhi e zhiru unu, l’unu bụ ohu, l’ejeru Onye-Nwe-Ọha, bụ Jisọsu ozhi, ọ tọ bụkwa madzụ mmaanụ bẹ unu l’ejeru iya. ⁸Unu amarụ l’iwhe dụ ree madzụ l’eme bẹ Onye-Nwe-Ọha, bụ Jisọsu l’e-bu onye ono obunggo iwhe dụ ree ono, o shi eme mẹe onye ọbu, ?bụ ohu, ?ọ bụ amadụ.

⁹Unubẹ ndu bụ nnajị, unu emejekwaaruwho ohu unu nno. Unu haa anọ anawheru whẹ nkemu. Unu anyatajẹkwa l’unu l’ohu unu ono bẹ tụkoru nweru Onye-Nwe-Ọha lanụ l’imigwe. Yẹbedua bẹ onyenọnu ha ẹnya nhamụnha l’iwhu iya.

Ngwọgu nke Chileke

¹⁰Iwhe mu gude akpochi iya ishi bụru, unu nọshia ike l’atụgba ono, unu lẹ Onye-Nwe-Ọha tụgbaru nke ọwhu ike iya ono, nyịberu gẹ l’aa-nọ atụ ọnu iya l’e-me unu t’unu shihu ike. ¹¹Unu tụko ngwọgu, shi l’ẹka Chileke kwaa onwunu nke ọwhu unu l’a-dụ ike kfụru, lwụ-gbua iwhe bụkota ejo ẹregede nke Oshifutuswe. ¹²L’ọ tọ bụkwa madzụ mmaanụ bẹ anyi l’iya l’alwụ ọgu. Ndu anyi lẹ whẹ l’alwụ bụkwa ndu l’achị ndu ishi lile l’imigwe mẹe ndu l’ekfu iwhe l’aanụ l’imigwe mẹe ndu imigwe, nwe mgboko-o, l’agba tsụrikiti-a mẹe igweligwe ejo ndụ-ọgu, nọkota l’imigwe. ¹³Ọo ya bụ, t’unu chilikota ngwọgu, shi l’ẹka Chileke, unu chilikota iya nta-a! Ọo ya bụkwanu nteke ejo ụboku ono rwuleruwho, unu adụ ike kfụru kfụshia ike, mbụ unu lwu-gee ọgu ono, unu akfụleru-a kfụshia ike l’ẹka unu kfụru.

¹⁴Sụa, t’unu kfụru kwabẹ akwabẹ! T’unu gude ire-lanụ kee onwunu g’ọo onye gude ajị kebuta uwe iya l’ukfu. T’unu wota ọdu chịriri mebe uwe-igwe, ndu l’eje ọgu l’egudeje gbobuta obu whẹ. ¹⁵Unu gudeshia ozhi-ọma nke ẹhu ọdu guu ono ike t’ọ bụru akpọkpa, unu l’e-ye l’ọkpa; gude kfụshia ike tẹ ẹturu ba alọkata unu. ¹⁶Unu gudefukwaawho ekwekwe, unu kweru nke Jisọsu t’ọ bụru iwhe unu l’e-gbobeje gude ezeru onwunu, gude iya anashị akfụ, Onye-Ejo-Ụboku ono, bụ Oshifutuswe l’agbarụ unu. Mbụ akfụ ono, l’enwu ọku, shi l’ẹka Sétanu. ¹⁷Unu nata ndzọta, Chileke dzọtaru unu t’ọ bụru okpu-igwe, unu l’e-kpu. Unu ewota okfu Chileke gude l’ẹka t’ọ bụru ogu-ịgba, Ume Chileke yeru unu l’ẹka. ¹⁸L’iwhe g’iwhe ha ono bẹ unu l’a-nọ ekfuru Chileke sụ; t’o yetaru unu ẹka. Unu nọdulekwawho l’ẹka Ume-Dụ-Nsọ kfuje nụ Chileke nteke nteke. O noo iwhe meru unu je l’anwụje ẹnya nteke nteke. T’unu ba ahakwa okfu anụ Chileke l’iswi ẹhu ndu nkiya. ¹⁹Unu kfujekwaruwho nụ Chileke l’iswi ẹhu mu, tẹ Chileke ye mu okfu l’ọnu nteke bụ nteke mu sarụ ọnu tẹ mu kfua okfu, tẹ mu ba atsụje egvu nke iwhe ono, dụ omilomi ono, ozhi-ọma meru t’anyi marụ. ²⁰Ọo l’iswi ozhi-ọma ono bẹ mu kwoberu bụru onye nọ; nọdu-turu Jisọsu, e gudekwaro lẹ ntaa bẹ mu nọ lẹ mkpọro. O noo iwhe meru mu l’ekfu sụ t’unu kfuje nụ Chileke tẹ mu nweru obu sajẹ ozhi-ọma lẹge ọ gbarụ mu tẹ mu sajẹ iya.

Ekele ikpazụ

²¹Mu mawarụ l’ọogu unu t’unu marụ g’anyi l’eme eshi l’ẹka-a. Nwanna anyi Tíkikọsu, bụ onye anyi yeru obu, mbụ onye e gude ire iya ẹka l’oje ozhi Kuráyisutu, l’e-kfuru-a unu iwhe lile nke ọwhu unu l’a-ma ọnodu mu. ²²O nokwa ishi iwhe mu kwoberu zhi iya, t’ọ bya agbawhee unu l’onwiya, ọo-kọwaruro unu g’anyi l’eme eshi nggẹ obu eshihukwanu unu ike.

²³Tẹ Chileke, bụ Nna anyi mẹe Onye-Nwe-Ọha, bụ Jisọsu Kuráyisutu nụ ụnwunna anyi gẹ whẹ ha ẹhu ọdu guu; mekwaawho tẹ whẹ ye ibe whẹ obu mẹe tẹ whẹ kweta nkiya. ²⁴Tẹ Chileke mekwaaruwho unu eze-iwhe-ọma; unubẹ ndu lile ono, yeru Onye-nwe-anyi Jisọsu Kuráyisutu obu; ye iye ya nke tututu-mịmimi.