O-zhi-iwhe

Ẹkwo

O-ZHI-IWHE

¹Ọ waa bụ olu-okfu O-zhi-iwhe, mbụ nwa Dévidi, onye bụ eze lẹ Jerúsalẹmu.

²O-zhi-iwhe bẹ sụru agha: “Iwhe mmaanụ yẹle iwhe mmaanụ bụ iwhe mmaanụ. Iwhe g’iwhe ha bụkota iwhe mmaanụ.”

³?Ọo gụnu bụ urwu, madzụ l’erita l’iwhe bụ anya, l’oosegbu onwiya lẹ mkpula ẹnyanwu-a? ⁴Ọgbo l’afụtaje tsee laa. Ọgbo ọdo afụta bya etse laa, mgboko adụle-ẹ g’ọ dụ. ⁵Ẹnyanwu l’awajẹ, bya echia rịba, ya agbarụ kparakpara je anọdu l’ẹka l’ooshije wata. ⁶Whẹrewhere l’abụje, ọ -wata ewhewhe ya ewheru laa ụzo ọhuda, wheru laa ụzo isheli, ya ewhee mgburumgburu mgburumgburu, whewhu azụ l’ẹka o shi wata ewhewhe. ⁷Ẹnyimu l’owhu bụ l’eze-ẹnyimu bẹ l’ọoso ala. Ọle eze-ẹnyimu te ejijedu eji. Ọo ẹka ẹnyimu shi asọfuta bẹ l’ọoso-whuje azụ. ⁸Iwhe lile bẹ tụfukotaru ẹhu, nke ọwhu bụ l’ọ kpọru gẹ madzụ l’a-tụ ọnu iya. Ẹnya ta awhụnyajedua ụzo ya asụ lẹ ya ta awhụhedu. Nchị ta anụnyaa iwhe ya asụ lẹ ya nụ-jiwaru. ⁹Iwhe shihawaa dụ nụ bụ iwhe l’e-bekochaa dụ nụ. Ọ bụru iwhe e mehawaru bụ iwhe l’ee-bekochaa emewhu azụ, nke ọwhu bụ l’ọ tọ dụdu iwhe bụ iwhe ọ̀whúú lẹ mkpula ẹnyanwu-a. ¹⁰?O nweru iwhe dụ nụ, madzụ l’a-sụ t’e leenu, l’iwhe ọwa-a bụkwa iwhe ọ̀whúú? Ọ tọ dụdu. Iwhe ono dụhaakwaa. O tewaru ẹnya o shi dụta. Ọ dụhawaa tẹhenu o rwua l’ọgbo nke anyi. ¹¹Iwhe gbahawarụ nụ bẹ l’ẹte anyatajẹdu, tẹhenu iwhe l’e-megee dụ nụ bẹ ọgbo ọwhu l’e-megee tsota iya nụ ta anyatakwawhọ.

Mmamagụ bụ iwhe mmaanụ

¹²Sụa, mbẹdua, bụ o-zhi-iwhe shikwa buru lẹ Jerúsalẹmu bụru eze ndu Ízurẹlu. ¹³Mu bya ezhia obu l’alị, bya egude mmamagụ chọkashia, bya anwụa iwhe lile, l’eeme lẹ mkpula igwe-e. Ọo zhiawho l’ọo anya awhụ bẹ Chileke meru t’ụnwu eliwhe seje. ¹⁴Mu lewaru ẹnya l’iwhe lile, l’eeme lẹ mkpula ẹnyanwu-a bya awhụ l’ọo iwhe mmaanụ, bụru ọochi whẹrewhere ọso. ¹⁵Iwhe gbewaru nko bẹ l’ẹte emekotadu t’ọ kfụru nsụmini. T’a gụkotaje iwhe l’adụa adụdu owhu l’ọgu.

¹⁶Mu kfua l’ime obu mu sụ lẹ mu marụ ágụ shii, mbụ lẹ mmamagụ, mu nweru bẹ ka nke ndu vu mu ụzo chịa Jerúsalẹmu. Ọ tọ dụdu gẹ mmamagụ yẹle ọkwa-ẹnya jeru iya, mu l’ẹte amafushichaa amafushi. ¹⁷Mu bya ezhia obu l’alị melahaa tẹ mmamagụ doo mu ẹnya, bya emekwawho t’ome dakịridakiri doo mu ẹnya yẹle ome eswe. Ọle iwhe mu nwụtaru bụ l’iwhe ono bụkwawho ọochi whẹrewhere ọso. ¹⁸Nkele oke mmamagụ bẹ oke nggụmawhu tso l’azụ, o noo lẹ madzụ l’ama iwhe aka shii eje eje, iwhe l’a-nọdu akpatsu iya áwhụ aka shii eje eje.

Ẹhu-ụtso bụ iwhe mmaanụ

¹Mu bya ekfua l’ime obu mu sụ: “Tẹ mu bya adataadaa iwhe l’atsọ ụtso, maadarụ iwhe ọ fụtaru mbụ ẹhu-ụtso.” Ọle e megeeru, mu bya awhụ l’ọ bụhukwawho iwhe mmaanụ. ²Ọochi ọchi bẹ mu whụtaru l’ọo ome eswe b’ọ bụ, tẹhenu ?ndẹe urwu, madzụ l’e-rita l’iwhe-ụtso? ³Mu kpebua lẹ mu l’e-yemi ishi l’ọngu mmẹe gude eme t’ẹhu tsọo mu ụtso mẹe lẹ mu l’e-me t’ome eswe kwọru mu ẹhu. Ọle mmamagụ mu meleru-a, mu marụ iwhe mu l’eme. Iwhe ono bụru iwhe mu l’e-me tẹ mu marụ iwhe gbarụ madzụ l’ememe lẹ nwa ujiku olemole, l’ọo-nọ lẹ mkpula igwe-e.

⁴Mu bya wata ọrwu eze ọrwu, parụ ẹka. Mu tụshiaru onwomu ụlo, gbashịaru onwomu mgbabu vayịnu. ⁵Mu gbashịa mgbabu, bya emeta ẹka l’aa-nọje atụta ume ye iya, bya eshi ishi lanụ yekota iya oshi-ọmi, dụ l’iche l’iche. ⁶Mu tụshia okpuru, l’ee-gudeje agba mini l’oshi, mu yeshiru. ⁷Mu bya agbashịa ohu, unwoke l’ụnwanyi, l’aanwụshikwaru mu whọ ohu l’uwhu. Mu nwekwaruwho eswi, nweru atụru mẹe eghu, mbụ nweru élwù, ka ọwhu ndu eze, vu mu ụzo chịa Jerúsalẹmu nweru shii. ⁸Mu bya akpaa ẹku mkpọla-ọcha mẹe mkpọla-ododo kụberu onwomu mẹkwawho ẹku, shi l’ẹka ndu eze ndu alị ọdo. Mu bya ahọo ọgbo egvu, ụnwanyi l’unwoke, gude ụnwanyi, mu l’ẹte alụa l’ọkpoku nwanyị, bụ ndu l’emeje t’ẹhu tsọo unwoke ụtso swiwhee onwomu mgburumgburu.

⁹Tọ dụ iya bụ, mu bya enweru iwhe kakọta iwhe ndu eze, vu mu ụzo chịa Jerúsalẹmu shi nweru. Mu parụ ẹka ẹgube ono, ọle mu gudelekwa-a mmamagụ mu gẹ mu gude iya. ¹⁰Ọ tọ dụdu iwhe mu lejeru ẹnya ọ gụa mu ẹgu, mu l’ahajẹ; tọ dụkwawho iwhe l’emeje t’ẹhu tsọo obu mu ụtso, mu hajẹru ememe. Anya, mu l’ese ese bẹ l’emeje t’obu l’atsọ mu ụtso, ọ bụru iwhe ono bụ urwu, mu ritaru l’iwhe bụ anya, mu seru. ¹¹O noo ya, mu bya atọ nwẹhu lee ẹnya l’iwhe lile ono, mu gude ẹka mu mekota mẹe iwhe ono, mu sekotaru anya iya ono. Mu bya awhụta l’iwhe lile ono bụkota iwhe mmaanụ bụru ọochi whẹrewhere ọso, l’ọ tọ dụdu urwu madzụ ritaru lẹ mkpula ẹnyanwu-a.

¹²Tọ dụ iya bụ, mu bya aghazhia mgbamego mu rịlahaa nke mmamagụ yẹle ome dakịridakiri mẹe ome eswe. ?O nweru iwhe onye l’a-nọ-chi ẹnya eze l’e-mebaa, l’a-ka ọwhu onye ọdo mehawaru? ¹³Mu bya awhụta lẹ mmamagụ ka ome eswe ree, ẹgube ono iwhoro ka ẹkpuroochi ree. ¹⁴L’onye marụ mmamagụ gude ẹnya awhụ ụzo, ọle onye eswe l’anọje erwu ije orwu l’ishi. Ọle mu whụru lẹ whẹ labọ ono l’a-lakọta l’ite lanụ. L’ọo iwhe meru onye mmamagụ bụkwawho iwhe l’e-me onye eswe.

¹⁵Mu bya ekfua l’ime obu mu sụ: “Iwhe meru onye eswe l’e-megekwaa mee mbẹdua. ?Ndẹhunu urwu, mu ritaru lẹ mu bụ onye marụ ágụ?” Mu bya ekfukwaawho l’ime obu mu sụ: “Iwhe ono bụkwawho iwhe mmaanụ.” ¹⁶O noo l’ọo gẹ l’ọo-dụ onye marụ ágụ bụ gẹ l’ọo-dụ onye eswe. Ọ tọ dụdu gẹ l’aa-nọ-beru, a zọhaa onye marụ ágụ, tọ dụkwawho gẹ l’aa-nọ-beru, a zọhaa onye eswe. Whẹ labọ bẹ l’ee-megee zọhakota azọha lẹ mgbe l’iwhu. Ọo g’anwụhu l’e-gbu onye marụ ágụ bụ gẹ l’oo-gbu onye eswe. ¹⁷O noo g’o gude ndzụ dụ mu ashị, nkele iwhe l’eeme eme lẹ mkpula ẹnyanwu-a bụkota mkpatsu áwhụ l’ẹka mu nọ. G’ọ ha bụkota iwhe mmaanụ mẹe ọochi whẹrewhere ọso.

¹⁸Anya lile, mu seru l’eliwhe-e bẹ dụkota mu ashị, eshi-ọwhu mu l’e-megee haarụ iya onye l’e-tsota mu nụ, ¹⁹l’ẹbe ọdu onye marụ ?ọo-bụ onye marụ ágụ t’ọ ọbu onye eswe? Ọle ọo onye ono, l’e-tsota mu nụ ono l’e-be nweru iwhe lile ono, mu deru ẹnya lẹ mini see anya iya l’eliwhe-e. Iwhe ono bụkotakwawho iwhe mmaanụ. ²⁰Mu bya adakọbe talahaa onwomu ụta sụ: ?Ọo nụa gụnu meru iwhe mu seru anya esese owhu lẹ mkpula ẹnyanwu-a? ²¹Lẹ madzụ l’e-gudegee mmamagụ yẹle ọkwa-ẹnya sekota anya, meru nka ye iya; e megee ya aparụ iwhe ono, o setaru haarụ onye l’ẹte eria awhụ iya t’o ria. Iwhe ono bẹ mu leru ẹnya, ọ bụru iwhe mmaanụ, bụru ejo-iwhe parụ ẹka. ²²?Ọo gụnu bẹ madzụ l’eseta l’anya, l’oose yẹle kparakpara, l’ọolwu gude erigbu onwiya l’awhụ ozhi, l’ooje lẹ mkpula ẹnyanwu-a? ²³Jeye gẹ madzụ l’a-nọ-beru, iwhe jiru ndzụ iya bụ iwhe-ọtsulanu, ọ bụru ozhi áwhụ bẹ l’oojekotaje. L’ẹnyashi bẹ obu ta adụjedu iya l’ọru iya. Sụa, iwhe ono bụkwawho iwhe mmaanụ.

²⁴Ọo ya bụ l’iwhe ka ree bụ tẹ madzụ rije g’ọ dụ iya, ngụje g’ọ dụ iya; anya l’oose ese eji iya ẹwho, nkele ono bẹ mu whụtaru l’o shi l’ẹka Chileke. ²⁵Nkele ọ -bụle Chileke ta adụ, ?ọo onye gege erije nri? ?Tọo ọo onye bẹ ẹhu gege atsọje ụtso? ²⁶Nkele Chileke l’emeje t’onye l’eme iwhe dụ iya ree bụru onye marụ ágụ, bụru onye kwarụ ẹnya, bya abụru onye ẹhu l’atsọje ụtso. Ọle onye l’eme iwhe-dụ-ẹji bẹ l’ọolojeru ẹka ye l’ọkpa ẹku kụberu onye l’eme iwhe dụ Chileke ree. Iwhe ono bụkwaruwho iwhe mmaanụ, bụru ọochi whẹrewhere ọso.

Iwhe lile nweru ògè

¹Iwhe lile nweru ògè,

mbụ l’iwhe lile, l’eeme eme bẹ

nweru ògè nteke l’eemeje iya lẹ mkpula igwe-e.

²Nteke ọonwu nwa dụ,

nteke l’aanwụhu anwụhu dụkwawho.

Nteke omebe iwhe l’alị dụ,

nteke ọokpata iwhe e meberu l’alị dụkwawho.

³Nteke ogbu madzụ dụ,

nteke l’eeme t’e mehu l’ẹhu l’eme nụ dụkwawho.

Nteke etsukposhi dụ, nteke atụkwa-zhi dụkwawho.

⁴Nteke ọrya ẹkwa dụ, nteke ọochi ọchi dụkwawho.

Nteke ọgu áwhụ dụ, nteke ote egvu dụkwawho.

⁵Nteke otuwhashi ẹwhuru etuwhashi dụ,

nteke ọtutukobe ẹwhuru atụtukobe dụkwawho.

Nteke obyita ọma dụ,

nteke osela onwonye azụ l’obyita ọma dụkwawho.

⁶Nteke ọcho iwhe achọ dụ,

nteke oswe ẹnya l’iwhe dụkwawho.

Nteke ọkwakobe iwhe akwakọbe dụ,

nteke otuwha iwhe etuwha dụkwawho.

⁷Nteke ọlakashi iwhe alakashị dụ,

nteke ọgbakwa iwhe agbakwa dụkwawho.

Nteke ọno nggujingguji dụ,

nteke oye ọnu l’okfu dụkwawho.

⁸Nteke oye obu dụ, nteke ọkpo ashị dụkwawho.

Nteke ọlwu ọgu dụ, nteke nchị ọdu ndoo dụkwawho.

⁹?Ọo gụnu bẹ onye l’ese anya l’e-rita l’anya l’oose? ¹⁰Mu whụwaru ẹgube ozhi ebuta, Chileke dzuberu madzụ t’o jeje. ¹¹Chileke bẹ doru ẹnya ndo mee iwhe lile, ọ nọdu l’ògè iya. O mekwawho tẹ madzụ rịtaje l’e nweru mgbe agvụ agvụ. Ọle madzụ ta amakọtadu iwhe Chileke meru wata l’ishi jeye lẹ ngvụcha. ¹²Ọwhu mu marụ bụ l’ọ tọ dụdu iwhe karụ madzụ ree, gbahaa t’ẹhu tsọje iya ụtso, ya eme iwhe dụ ree nteke ọ nọ ndzụ. ¹³T’onyenọnu rije g’ẹhu ha iya ngụje g’ẹhu ha iya, anya l’oose eji iya ẹwho. O noo bụ iwhe-ọma shi l’ẹka Chileke.

¹⁴Iwhe mu marụ bụ l’iwhe lile, Chileke l’eme l’a-dụ jeyewaro lẹ tututu-mịmimi. Ọ tọ dụdu iwhe l’eeyekwa iya eyekwa, t’ọ dụ iwhe l’eewofu iya ewofu. Chileke mewaru iya ọ dụ ẹgube ono. Iwhe o kwoberu mee ya nno bụ tẹ madzụ gude iya tsụje egvu yẹbe Chileke. ¹⁵Iwhe lile, dụ nụ bẹ dụhawaa nụ. Iwhe l’e-bekochaa dụ nụ dụhaakwawho. Ọ bụru Chileke l’e-me t’a nyata iwhe a zọharu azọha.

Ejo-ememe, jiru mgboko

¹⁶Mu bya awhụa iwhe ọdo lẹ mkpula ẹnyanwu-a: L’ẹka a gẹge anọdu ekpee ikpe kfụru nhamụnha b’e gbee nọdu eme ejo-iwhe, ẹka a gẹge anọdu eme iwhe dụ chịriri bụru ejo-iwhe b’a nọdukwawho eme iya. ¹⁷Mu bya ekfua l’ime obu mu sụ: “Chileke l’e-megekwaa kpee ndu dụ chịriri mẹe ndu ejo-ememe ikpe, nkele iwhe lile nweru ògè, mbụ l’iwhe lile, l’eeme eme bẹ nweru ògè nteke l’eemeje iya.” ¹⁸Mu byakwa ekfua ọdo sụ: “A bya l’ẹka madzụ nọ, Chileke l’adatajẹ madzụ gude goshi whẹ lẹ whẹ lẹ anụ-ẹgbudu bụ iwhe lanụ. ¹⁹Nkele ọo iwhe l’eme madzụ l’emekwawho anụ-ẹgbudu, g’ọ dụ anụ-ẹgbudu bụ g’ọ dụ madzụ. Ọo g’ọnwu l’egbu ọwhu bụ gẹ l’oogbu ọwhu, ọ bụru g’ọwhu l’atụ ume bụ g’ọwhu l’atụ. Ọ tọ dụdu iwhe madzụ gude ka anụ-ẹgbudu. Nkele iwhe lile bụkota iwhe mmaanụ. ²⁰Gẹ whẹ ha bụ ẹka lanụ bẹ whẹ l’alakọta. Gẹ whẹ ha shikota l’ẹja, ọ bụru l’ẹja bẹ whẹ l’alakọta. ²¹?Ọo onye marụ mẹ maa madzụ l’ọolaje l’eli, nke anụ-ẹgbudu l’alajẹ l’alị?” ²²O noo ya, mu whụru l’ọ tọ dụdu iwhe karụ madzụ ree, gbahaa t’anya, l’oose tsọje iya ụtso, nkele ọo ya bụ oke-iwhe iya. Nkele ọ tọ dụdu onye sụru gẹ l’oo-duwhu iya azụ t’ọ bya amarụ iwhe l’e-bekochaa nwụa l’okotazụ iya.

¹Mu bya elekwaawho ẹnya whụ mmegbu, dụ lẹ mkpula ẹnyanwu-a: Mu bya awhụ ẹnya-mini ndu l’eeme mmegbu, whẹ te enwe onye l’a-sụ whẹ gbeluma. Ike ka l’ẹka iya nke ndu ono, l’eme whẹ mmegbu ono, ọle whẹbedua te enwedu onye l’asụ whẹ gbeluma. ²Mu sụ lẹ ndu ọnwu gburu, bụ iya bụ ndu ọwhu nwụhawaru anwụhu bẹ ẹhu ka ụtso karụ ndu ọwhu nọkwadu ndzụ ntaa. ³Ọle onye ọwhu ẹhu-ụtso nkiya ka nke ụmadzu labọ ono shii bụ onye ọwhu l’ẹte anwụa anwụnwu owhu, mbụ onye ọwhu l’ẹte awhụa ejo-iwhe, l’eemegbabe lẹ mkpula ẹnyanwu-a awhụwhu owhu.

⁴Tọ dụ iya bụ, mu bya awhụ l’anya, l’eese ese mẹe ọwhu e setawaru eseta bẹ shi l’ekworu ibe onye ekwo. O noo bụkwawho iwhe mmaanụ, bụru ọochi whẹrewhere ọso. ⁵Onye eswe l’achịjeru ẹka ye l’iwhu ụtakfu ria íishi iya l’ọnu. ⁶Ọle ọbu, ọ kakwa ree lẹ madzụ bẹ nweru iwhe jiru mkpoji-ẹka lanụ, ẹhu dụ iya guu, karụ lẹ madzụ bẹ chịru ẹka ye l’ose anya t’ẹka iya labọ ji, bụ ọochi whẹrewhere ọso.

⁷Mu bya awhụkwaawho iwhe mmaanụ ọdo, dụ lẹ mkpula ẹnyanwu-a: ⁸O nweru nwoke, bụ nkụnyi, l’ẹte enwee nwa nwoke, t’o nwe nwune nwoke. Ọle o to senyajedua anya dzua ike. Ẹku ọ kpatarụ ta anọnyaje-ẹ tsụa ya l’ẹnya. T’ọ jịbua onwiya sụ: “?Ọo nụa onye bẹ mu l’eseru anya-a? ?Ọo nụa gụnu bẹ mu l’anashị onwomu ẹhu-ụtso ẹgube-ẹ?” Iwhe ono bụkwawho iwhe mmaanụ, bụru nsegbu anya.

⁹Ọdu ẹbo kakwa ree karụ ọbu nkụnyi, nkele ụmadzu labọ l’a-kakwa onye lanụ oseta anya. ¹⁰O noo nkele onye lanụ daa, onye ọwhu akwalita iya. Ọle onye darụ nụ, t’o nwe onye l’a-kwalita iya dụkwa nke t’a yọoru iya ọshi. ¹¹Ọdo bụ l’ụmadzu labọ -zẹe l’oshi bẹ oyi l’ẹte atsụdu whẹ. Ọle ọ -bụru onye lanụ, ?ndẹnu gẹ l’ee-me t’oyi ba atsụ iya? ¹²Onye lanụ bẹ l’aalwụ-gbujekwa. Ọle a -dụ ẹbo, inyi atsụru onye. Ụdo, a chịru ẹto ẹto swịa bẹ agbabu iya ta adụdu ntse.

¹³Nwokorọbya l’ete enwee iwhe marụ ágụ kakwa ree karụ onye eze bụ ọgurenya bụru onye eswe, bụru okfu nkiya anụ nkiya, ¹⁴m’oberu nwokorọbya ono shi l’ọka-mkpọro, ọdua l’o shi l’uwhu ndu l’akpa nri fụta bya abahụ l’ọkwa onye eze. ¹⁵Mu bya elee ẹnya whụ g’iwhe, bụ ndu nọ ndzụ lẹ mkpula ẹnyanwu-a wụfutaru etso nwokorọbya ono, mbụ onye l’eeme t’ọ nọ-chia ẹnya nwoke ọgurenya whọ. ¹⁶Ndu wụ-lihuru tsoru nwokorọbya ono bụkwa agụta agụta. Ọle ọgbo ọwhu l’e-bekochaa bya nụ ta abyadụ l’e-kwe l’o nweru iwhe nwokorọbya ono meru ree ilile. O noo bụkwa iwhe mmaanụ, bụru ọochi whẹrewhere ọso.

Okwe ụkwa bụ iwhe mmaanụ

¹Makwarụ g’i shi eje ije mẹ l’ịibahu l’eze-ụlo Chileke. Ọ kakwa ree t’i je angabẹ nchị l’iwhe l’eekfu karụ t’i je egwoo ẹja onye eswe nkele ndu eswe ta amajẹdu lẹ whẹ l’eme ejo-iwhe. ²T’ire ba atsụnukakwa ghu nkọ, obu eje awhụnuka ghu sasasa t’i kfukebe okfu l’iwhu Chileke, nkele Chileke nọkwa l’igwe, gụbedua nọdu l’alị; o noo g’o gude okfu je l’alwa ghu alị l’ọnu. ³Ọo gẹ l’aarọje nrọ mẹ ọriri paa l’ọtu bụ gẹ mkpọkoro okfu l’apajẹ ẹka m’e kfunuka igwe okfu. ⁴I -kwee ụkwa l’ii-meru Chileke iwhe, ba anọkwa ọdu omedzu ụkwa ọbu, i kweru iya. Medzukwaa iwhe i kweru ụkwa l’ii-me, nkele umere ndu eswe ta adụjekwa Chileke ree. ⁵Ọ kakwa mma l’i ti kwedu ụkwa ekwekwe owhu, karụ l’i kweru ụkwa, e megee t’i medzuhe iya. ⁶Be ekwekwa t’iwhe, i kfutaru l’ọnu ghu duba ghu l’ome iwhe-dụ-ẹji. Gụ eje asụkwa onye l’eje ozhi l’eze-ụlo Chileke l’iwhe ono, i kweru ụkwa iya ono bẹ l’ịitii madụa nteke i kweru iya. Ọdua bẹ l’ii-gudekwa ọnu kfuta iwhe l’e-ghu Chileke eghu, ya emebyishia ẹguru iwhe i shihawaa mee. ⁷Sụa, ọoro ikpoto nrọ yẹle okfu igwe okfu bụkotakwa iwhe mmaanụ. Ọo zhiawho t’ị tsụjelewho egvu Chileke.

Ẹku bụ iwhe mmaanụ

⁸Ị -nọdu l’obodo, ị whụa gẹ l’aakpa ndu ụkpa ẹhu, bya awhụ l’ete ekpejedu ikpe kfụru nhamụnha, mẹe l’ete emejeduru madzụ iwhe rwuberu iya nụ, t’ọ bọ dụkwa ghu biribiri, nkele onye lanụ, bụ eze onye-ishi bẹ eze onye-ishi ọdo, ka iya l’ọkwa l’anọje eleshi ẹnya, tẹmenu o nwekwaruwho ndu ọdo, kagee ndu labọ ono l’ọkwa.

⁹Iwhe e meberu l’ẹgu bẹ onyenọnu l’atụkojekwa ria urwu, dụ iya nụ, tẹhenu onye eze l’eritajekwawho urwu l’iwhe a kpatarụ l’ẹgu.

¹⁰Onye yeru ẹnya l’okpoga bẹ okpoga te ejijedu ẹwho. Urwu te ejije onye yeru ẹnya l’ọkpa ẹku eji. O noo bụkwawho iwhe mmaanụ. ¹¹Ẹku l’abya, ndu l’e-ri iya nụ abyakwawhọ. ?Ọo urwu gụnu bẹ onye nwe iya nụ l’erita iya, l’abụa t’o leje iya l’ẹnya? ¹²Onye l’ese anya bẹ mgbẹnya l’atsọjekwa ụtso m’o riru nri shii m’o riru nwanshị. Ọle oke ẹku, onye nweru iwhe kparụ l’akpọje iya mgbẹnya.

¹³O nweru akpamara, mu whụru lẹ mkpula ẹnyanwu-a: L’ẹku bẹ onye nwe iya nụ kparụ kụbe ọ bụru iya aghamẹhu. ¹⁴A nọnyaa, iyi byarụ nwoke ono, ẹku iya ono laa, tọ dụ ẹku iya ono ọwhu o doberu nwa iya, nkele ọ gvụkotaru. ¹⁵Ọ kwa g’ọ dụ nteke o shi l’ẹwho ne iya bụ gẹ l’ọo-dụ laa, mbụ l’ọ gba ẹka nteke ọ byarụ. Ọ tọ dụdu anya ono l’oose ono, dụ ọwhu l’oo-gude ala. ¹⁶O noo bụkwawho akpamara: Mbụ l’ọo g’ọ dụ nteke ọ byarụ bụ gẹ l’ọo-dụ laa. ?Ọo urwu gụnu bẹ l’oo-rita l’anya, o seru doberu whẹrewhere. ¹⁷Ndzụ ọ nọru b’ọ nọkotaru l’ishirishi l’eliwhe-e mgburumgburu. Ọ nọdu taa kpọkpororo, bekota ude zhịmuzhimu, bya anọkota l’ẹhu-ba-dụ-mma mẹe l’iwe.

¹⁸Tọ dụ iya bụ l’iwhe mbẹdua whụru l’ọ dụ ree, bụru iwhe gbarụ l’ememe bụ tẹ madzụ rije g’ẹhu ha iya ngụje g’ẹhu ha iya, tụsaru ẹhu l’anya, l’oose lẹ mkpula ẹnyanwu-a lẹ nwujiku olemole, Chileke nụru iya l’eliwhe-e, nkele ọo ono bụ oke-iwhe nkiya. ¹⁹Iwhe bụ onye Chileke nụru ẹku, bya emee t’o nweru iwhe, bya anụ iya ike, l’oo-gude ria ya, mbụ onye dụ ike nata oke ọwhu o keru nụ iya; t’onye ọbu gudekwa ẹhu-ụtso see anya, l’oose, l’ono bụkwa iwhe-ọma, shi l’ẹka Chileke. ²⁰Ẹgube onye ono ta adụdu nteke l’ọorita abalị olemole, l’ọo-nọ lẹ mgboko-o, o noo nkele Chileke meru, ẹhu-ụtso ji iya obu, nke ọwhu bụ l’ụzo ọri ụdu ọriri ono ta adụdu iya.

¹O nwekwaruwho ejo-iwhe ọdo, mu whụru lẹ mkpula ẹnyanwu-a. Iwhe ono bụru oke ivu, ẹrwa iya l’anyị-tsuta madzụ anyị-tsuta. ²Mbụ lẹ Chileke l’emeje madzụ t’o nweru ẹku, nweru iwhe, bya emee ya t’ọ bụru onye l’aakwabẹ ugvu, nke ọwhu bụ l’ọ tọ dụdu iwhe l’agụ iya nụ, l’ete erwuje iya ẹka. Ọle e megeeru Chileke te ekwe t’o ria ya, ọ bụru onye ọha ọdo riru iya. Iwhe ono bụru iwhe mmaanụ bụru akpamara.

³Madzụ -nwụta ụnwegirima nwụ-rwua m’ọo ụkporo ugbo ise, kaa nka shii; ọ kahụdua nka ọka agha, to ri ẹku ono, o seru anya iya ono, t’e li iya ọkpobe elili bẹ mbẹdua sụkwaru lẹ nwa, nọdu l’ẹwho nwụhu tẹhenu a nwụa ya ka iya mma. ⁴L’ẹgube nwa ono bẹ iwhe ọ byarụ ije iya bụkwa nke mmaanụ, nkele ọ tsẹru ishi l’abalị lashia; ẹwha nwata ono yẹle ọochi swekua onwowhe. ⁵A makwarụ-a l’ọ tọo whụbudua ẹnyanwu, tọ dụ iwhe ọ marụ, ọle ọ ka nwoke whọ oonwe ẹhu-guu, ⁶m’obehuduru nwoke ono je l’anọ ndzụ nọghata ụnu awha ise, t’o ri ẹku ono, o setaru. ?Tọ dụ ẹka lanụ bẹ whẹ l’alakọta?

⁷Anya, madzụ l’ese ese bụ l’ọnu bẹ l’ọolwakota, ọle ọnu ta asụbudua lẹ ya ritawaru o ji iya. ⁸?Ọo gụnu bẹ onye marụ ágụ gude ka onye eswe? ?Ọo urwu gụnu bẹ onye ụkpa ritaru l’ọmaru g’e shi eme umere, dụ ree l’iwhu ndiwhe? ⁹Iwhe madzụ nwewaa enwe kakwa ree amamẹ ọwhu l’agụ iya t’o nweru, t’o rwu iya ẹka. O noo bụkwawho iwhe mmaanụ bụru ọochi whẹrewhere ọso.

¹⁰Iwhe lile, dụ adụ nwehawaru ẹwha, tẹmenu iwhe madzụ bụ b’a mahawarụ l’o noo iwhe l’ọo-bụru, madzụ te ejejedu ọbaru onye ka iya ike mba. ¹¹Okfu -paa l’igwe, mkpọkoro iya aka shii. Goshinu mu urwu, ẹgube iwhe ono l’abarụ madzụ. ¹²?Ọo onye marụ iwhe dụ madzụ ree lẹ nwa abalị olemole-e, ọ nọ mkpọkoro ndzụ-a, mbụ ndzụ-a l’ala miimii g’ọo inyonyo? ?Oo onye l’a-dụ ike karụ madzụ iwhe l’e-bekochaa mee lẹ mkpula ẹnyanwu-a m’ọ nwụhu-gee?

Mmamagụ

¹Ezhigbo ẹwha kakwa mmanụ-mbeleke, l’eshi mkpọ ree, tẹmenu mbọku anwụhu madzụ ka ree karụ mbọku anwụnwu iya.

²Oje ibe ndu, iwhe nwụkaru kakwa ree amamẹ oje ibe ndu l’eeri eri angụ angụ. O noo nkele anwụhu bụ iwhe swiru madzụ l’owhu. Tẹ ndu ọwhu nọ ndzụ nyatajẹkwa l’ọ dụkwawho nno l’ẹhu nkewhe.

³Áwhụ kakwa ree karụ ọochi ọchi, nke l’eeshije l’iwhu agbanwụbe mee t’obu dụ tụsahu.

⁴Ẹka obu onye marụ ágụ l’adụje bụ l’uwhu, iwhe nwụkaru, ọle ẹka obu onye eswe l’adụje bụ l’ẹka l’eeri eri angụ angụ.

⁵Ọngabe nchị lẹ mba, onye marụ ágụ l’aba kakwa ree karụ ọonga nchị l’egvu, ndu eswe l’agụ.

⁶Ọo gẹ nkụ-agbagba l’anọje agba kpọrokpoto l’ọku, e shiberu ite bụ g’ọchi, onye eswe l’achị l’adụje. O noo bụkwawho iwhe mmaanụ.

⁷Onye marụ ágụ, l’eme madzụ ome-l’iwe bụ onye eswe, ọ bụru nno bụ g’ori n-wọlazu l’emebyi obu madzụ.

⁸Iwhe gvụru agvụ kakwa ree karụ iwhe l’ebyido ebyido.

Onye nweru nshiruma ka ree karụ onye l’eku onwiya eku.

⁹Ba abụkwa onye obu ọku, nkele ọo onye eswe l’evuje iwhe l’obu.

¹⁰Ba asụkwa: “?Ọo gụnu meru g’o gude nteke ndụ-ichee ka ntaa ree?” Nkele ụdu ajị ono te erwubedu onye marụ ágụ.

¹¹Ọ kwa g’onwe iwhe dụ ree bụ gẹ mmamagụ dụkwawho, nkele onye marụ ágụ bẹ iwhe kwewaru lẹ mkpula ẹnyanwu-a. ¹²Ọo g’okpoga l’akwachije onye nweru iya nụ bụ gẹ mmamagụ l’akwachijekwawho onye marụ ágụ. Ọle ẹka ọomaru iwhe gude kangoo bụ l’onye marụ ágụ l’akajẹ nka shii.

¹³Leeda ẹnya l’ozhi, Chileke jeru: ?ọo onye sụru gẹ l’oome iwhe Chileke meru, o gbee nggọ t’ọ kfụru nhamụnha? ¹⁴Ụboku -dụru ghu ree gụ etee ẹswa, nteke ụboku dụru ghu ẹji gụ anyatajẹ l’ọo Chileke bẹ meru ụboku ọma, bụru iya meru ejo ụboku. Ọo ya bụ l’ọ tọ dụdu onye marụ iwhe l’a-nwụru iya lẹ mgbe l’iwhu.

¹⁵Lẹ mkpọkoro ndzụ-a, mu nọ bẹ mu whụkwaru iwhe labọ-ọ: Mbụ lẹ mu whụru onye dụ chịriri ẹka l’ọola l’iwhe dụ chịriri, mu whụa onye ejo-ememe ẹka l’ọoka nka eme ejo-ememe, l’oome. ¹⁶Ba adụnukakwa chịriri, gụ eje amanụkakwa agụ, o noo bụkwa oyi onwoghu kwẹbee. ¹⁷Ba abụnukakwa onye ejo obu, gụ eje abụkwa onye eswe. O noo l’e-mekwa gụ anwụhu nteke abya ghu l’ẹteke abyaa. ¹⁸Iwhe ka ree bụ t’i gudeshia nnanụ ẹka ike, gụ eje ahakwa ọwhua ẹka, l’onye l’atsụ egvu Chileke ta adụkwa iwhe o byiru ẹka, l’ete ekeru.

¹⁹Mmamagụ l’emeje onye nweru iya nụ t’ọ ka ụmadzu iri, bụ ishi mkpụkpu ọkpehu.

²⁰Ọ tọ dụdu onye dụ chịriri l’eliwhe-e, l’a-sụ lẹ ya te emebudua iwhe-dụ-ẹji.

²¹Ba angagbabẹjekwa nchị l’iwhe ndiwhe l’ekfu, ọdua bẹ l’ịi-nụkwa ẹka onye ozhi ghu l’akọ ghu ajịcha. ²²Ị manụaru-a lẹ gụbedua kọwaru ndu ọdo ọnu ugbo olemole.

²³Iwhe lile ono bẹ bụ mmamagụ bẹ mu gude lelekota iya elele. Mu sụru tẹ mu bụ-zhiadaru onye marụ ágụ. Ọle mu jeru iya ememe, ọ kpọ mu ẹka. ²⁴Iwhe ono, l’eeku mmamagụ bẹ mu marụ l’ọ nọ otẹnya, dụ omilomi shii, nke ọwhu bụ l’ọ tọ dụdu onye sụru gẹ l’ọocho-vu iya. ²⁵Mu bya eguzeta obu melahaa t’iwhe doo mu ẹnya, bya edoo ẹnya ndo nyokashide tẹ mu marụ: ?Mu l’a-chọ-vu mmamagụ yẹle g’iwhe shi anwụgbabe lẹ mgboko-o? Mẹkwawho tẹ mu mata g’ome ejo-ememe yẹle ome dakịridakiri bụ-be iwhe-eswe.

²⁶Mu whụa iwhe ka anwụhu ọotso ilu, mbụ nwanyị, obu iya bụ ọ́nyà, bụru ụgbu, e gude a nmata ndiwhe; g’ọ chị mkpọro l’ẹka labọ achọ onye l’ọo-bụru nke yẹle iya. Ọo zhiawho onye l’eme iwhe dụ Chileke ree bẹ l’a-dụ ike nahụ iya. Ọle onye l’eme iwhe-dụ-ẹji bẹ l’ọo-nmata. ²⁷O-zhi-iwhe sụru agha: “Unu leedawho, ọ waa iwhe mu chọfutaru ndọwa: O shi abụje, mu -wota ọwa, mu eyekobe iya ọdo, nke ọwhu mu l’eshi nno marụ g’iwhe lile gude anwụ. ²⁸Ọ bụru nteke ono, mu l’achọ iya, mu ta awhụ iya, bẹ mu whụru ndu dụ ụnu labọ l’ụkporo iri, ọ bụru nwoke lanụ kpụ bẹ obu gụru iwhoro l’ime ndu ono. Ọle ọ tọ dụdu t’ọ ka mma l’ọo nwanyị lanụ, mu whụru, bụ onye obu gụru iwhoro l’ime whẹ. ²⁹Iwhe mu chọfutaru nwẹkiya bụ lẹ Chileke meru madzụ t’ọ bụru onye obu gụru iwhoro. Ọle madzụ watarụ ọcho ẹjo ụzo.”

¹?O onye l’a-sụ lẹ ya marụ ágụ? ?O onye bẹ iwhe lile dokotaru ẹnya? Ọ kwa mmamagụ l’emeje t’iwhu tụsahu madzụ, mbụ l’oomeje onye iwhu gbanwụberu agbanwụbe t’ọ gbanwe.

Mejekwa iwhe eze kfuru

²Mejekwa iwhe eze sụru t’i mee. Iwhe mu gude kfua nno bụ lẹ i riburu nte l’iwhu Chileke l’ii-meje iya. ³Ba avụjekwa ẹhu l’iwhu eze, gụ eje akfụkwaru l’ejo-iwhe, o noo l’ọo iwhe dụ eze ree bẹ l’oomeje. ⁴Iwhe lile, eze kfuru bụ ojechaa-ọgvu; ?ọo onye bẹ ọnu dụkwanu nke tẹ ya sụ iya: “?Ọo gụnu bẹ l’iime nno?” ⁵Iwhe bụ onye l’eme iwhe eze kfuru ta adụkwa iwhe bya l’e-me iya nụ. Ọ bụkwanuru onye marụ ágụ bẹ l’a-ma nteke l’oo-me iwhe o kfuru, marụ gẹ l’oo-shi mee ya. ⁶A makwarụ-a l’iwhe-ọtsulanu, madzụ l’eje bụwaa ivu ẹrwa, o vu. Ọle iwhe lile nwekwaru ògè, nweru gẹ l’eeshije eme iya. ⁷Eshi-ọwhu l’ọdua onye marụ iwhe l’e-me lẹ mgbe l’iwhu, ?ọo onye l’a-sụ iya l’ọwa-a iwhe l’e-bekochaa mee nụ ndọwa? ⁸Ọ tọ dụdu onye sụru osede whẹrewhere, o nokwawho gẹ l’ọodua onye sụru osede ndzụ iya mẹ anwụhu iya belewho. Ọo gẹ l’ọ tọ dụa onye l’aagụfuje t’o bo jeshi ọgu m’a lwụde ọgu, bụ g’ome ejo-ememe l’ẹte abyaa l’aha ndu l’eme iya nụ.

Ndu l’eme ejo-ememe yẹle ndu dụ chịriri

⁹Iwhe lile ono bẹ mu whụru gẹ mu bya ezhia obu l’alị l’iwhe lile, l’eeme eme lẹ mkpula ẹnyanwu-a. Mbụ nteke ndu bụ ishi l’anọje emekpa ndu nọ whẹ l’ẹka ẹhu. ¹⁰Mu bya awhụa ẹka l’eeli ndu ejo-ememe. Mbụ ndu ono, bụ whẹ shi eje eje alwa alwa l’eze-ụlo Chileke, mbụ ndu ono, e shi anọje aja ajaja lẹ mkpụkpu ono, whẹ shi nọdu eme ejo-ememe ono. Ẹgube iwhe ono bụkwawho iwhe mmaanụ.

¹¹Ọo l’ọo lẹ; a ta ahụ̀-kebejedu ndu l’eme ejo-iwhe àhụ̀hù ẹgwegwa meru g’o gude ọ bụru ejo-iwhe jiru ndiwhe obu ejiji. ¹²O behuduru onye l’eme iwhe-dụ-ẹji mee ejo-iwhe ugbo ụkporo ise megee kaa nka nọo ọdu; ọwhu mu marụ bụ l’onye l’atsụ egvu Chileke bẹ l’ọo-dụru lẹ mma, mbụ ndu l’akwabẹ Chileke ugvu. ¹³Ọ tọ dụduru ndu ejo-ememe lẹ mma, ndzụ whẹ te etse ogologo g’ọo inyonyo. O noo lẹ whẹ ta atsụdu egvu Chileke. ¹⁴O nwekwaruwho iwhe ọdo, bụ iwhe mmaanụ, dụ l’eliwhe-e. Iwhe ọbu bụ l’o nweru ndu dụ chịriri, l’anatajẹ ụgwo, gbarụ ndu ejo-ememe, nweru ndu ejo-ememe, l’anatajẹ ụgwo, gbarụ ndu dụ chịriri. O noo bẹ mu sụkwaruwho l’ọo iwhe mmaanụ.

¹⁵Ọo ya bụ l’iwhe mbẹdua l’arị l’ọ ka ree tẹ madzụ meje iya bụ t’ẹhu tsọje iya ụtso. Nkele ọ tọ dụdu iwhe kabaarụ madzụ ree lẹ mkpula ẹnyanwu-a, l’abụa t’o rije g’ẹhu ha iya ngụje g’ẹhu ha iya bụru onye ẹhu l’atsọ utso. Ọo ya bụ ẹhu-ụtso adụkwanu iya mẹ l’oose anya iya lẹ ndzụ-a, Chileke nụru iya lẹ mkpula ẹnyanwu-a.

¹⁶Nteke ono, mu shi dee obu mu lẹ mini tẹ mu marụ iwhe bụ mmamagụ mẹe tẹ mu chọfuta iwhe anya, madzụ l’ese l’eliwhe-e fụtaru; mbụ anya ono, l’oosekotaje eswe l’ẹnyashi, mgbẹnya eje eshita iya ụzo ẹnya, ¹⁷mu bya awhụkota iwhe lile, Chileke meru, bya amarụ l’ọ tọ dụdu onye iwhe l’eme lẹ mkpula ẹnyanwu-a bya l’edo ẹnya. O behuduru madzụ mee ike iya oome agha t’o doo ya ẹnya bẹ l’ọoto byadụa l’a-chọfuta iya. Onye mmamagụ -sụ-gezhia lẹ ya marụ iya, bẹ l’ẹte ododu iya ẹnya ọkpobe edodo.

¹Mu wata ọori ọriri iwhe ono g’ọ ha, mu legee ya ẹnya bya ekfua sụ l’onye dụ chịriri, mẹe onye marụ ágụ, mẹe iwhe whẹ l’eme bẹ bụ l’ẹka Chileke b’ọ dụkota. Ọ tọ dụdu onye l’amajẹ ọwhu dụ swiru iya nụ, ?ọo n-yemobu tọo ndụmashi? ²Gẹ whẹ ha bụ iwhe lanụ l’anwụkota l’ẹhu whẹ, mbụ onye dụ chịriri mẹe onye ejo-ememe; onye l’eme ree mẹe onye l’eme ẹji; onye l’aasọ nsọ, mẹe onye l’ẹte asọ nsọ, mẹe ndu l’agwa iwhe, mẹe ndu l’ẹte agwa. Ọo g’ọ dụ l’ẹhu onye l’eme ree bụ g’ọ dụ l’ẹhu onye l’eme iwhe-dụ-ẹji. Ọ bụru g’ọ dụ l’ẹhu onye gụru ẹnwa bụ g’ọ dụ l’ẹhu onye l’atsụ egvu ọgu ẹnwa. ³O waa bụ ejo-iwhe, dụ l’iwhe lile l’anwụkota lẹ mkpula ẹnyanwu-a ndọwa. Iwhe ọbu bụ l’ọo iwhe nwụru l’ẹhu onye ọwa l’a-nwụ l’ẹhu onye ọwhu. Ọwhu ka njọ bụru l’obu madzụ bụlewho ejo-iwhe jiru iya kpimu, tẹmenu ome dakịridakiri l’adụje whẹ l’obu nteke whẹ nọ ndzụ, ọle e -megee onye ono alashia maa. ⁴Ọle iwhe bụ onye nọ ndzụ bẹ nwekwaru iwhe l’oole ẹnya iya, nkele nkụta nọ ndzụ kakwa oduu-gburu-agụ, nwụhuru anwụhu mma. ⁵O noo lẹ ndu nọ ndzụ marụ lẹ whẹ l’e-megee nwụhu anwụhu. Ọle ndu nwụhuru anwụhu ta adụhedu ọwhu whẹ marụ. Ndu nwụhuru anwụhu te enwehedu obunggo, t’a nyatahẹ whẹ ilile. ⁶N-yemobu ndu ono, mẹe ndụmashi whẹ, mẹe ekwo, whẹ l’ẹkwo bẹ whuhuwaru nụ. Ọ tọ dụdu iwhe l’eeme lẹ mkpula ẹnyanwu-a, dụ ọwhu whẹ l’eketakwadu oke l’iya.

⁷Ọo ya bụ, t’i rije nri ghu l’ẹhu ụtso. Gụ angụje mmẹe ghu l’obu ụtso, nkele ọ kwa ntaa bẹ iwhe l’iime dụ Chileke ree. ⁸Yejekwa uwe, l’acha pelepele ntekenteke; tẹ mmanụ, l’eshi mkpọ ba agvụjekwa ghu agvụ l’ishi. ⁹T’ẹhu tsọje ghu ụtso gụ lẹ nyee ghu ono, i yeru obu jeye g’unu l’a-nọ-beru ndzụ lẹ mkpọkoro ndzụ-a, Chileke nụru ghu lẹ mkpula ẹnyanwu-a. Ọ kwa ẹhu-ụtso ono bụ oke-iwhe, i ketaru lẹ mkpọkoro ndzụ ono, Chileke nụru ghu mẹe l’anya ono, l’iisegbu onwoghu lẹ mkpula ẹnyanwu-a. ¹⁰Ọo ya bụ, iwhe ẹka rwuru ghu l’ememe, gude ike ghu l’owhu mee ya, nkele alị-maa, bụ ẹka l’iije bẹ ozhi ta adụdu, ọchi idzu iwhe l’ee-me ta adụ iya, mmamagụ yẹle ọkwa-ẹnya ta adụkwa iya whọ.

¹¹Sụa, mu whụkwaru iwhe ọdo lẹ mkpula ẹnyanwu-a. Ọ tọ dụ onye ka ọso l’agbatajẹ ọso; tọ bụ onye ka ike l’alwụ-gbuje l’ọgu; tọ bụ onye marụ ẹkwo kachaa onweru nri; tọ bụ onye marụ ágụ kacha onweru iwhe; tọ bụ onye kachaa ome nka bẹ l’eemejeru iwhe-ọma. Gẹ whẹ ha bẹ nke-ọma mẹe ẹhenu l’etsokota. ¹²Iwhe ọdo bụ l’ọ tọ dụdu onye l’amajẹ nteke oge iya l’e-rwu. Ọo gẹ l’eegudeje ejo ụgbu nmata ẹma, ọ bụru gẹ l’aagbajẹ ọnya hata nwẹnu bụ g’ejo ụboku l’adakfuje ndiwhe, mbụ l’ọozuje whẹ gburumu nteke whẹ l’ẹte elee ẹnya iya.

Mmamagụ kakwa ome eswe ree

¹³Mu nọdukwawho lẹ mkpula ẹnyanwu-a whụ iwhe mmamagụ meru, ọ dụ mu biribiri. ¹⁴L’o nweru mkpụkpu ọbu ha nwanshị, ọ bụru ụmadzu olemole bu iya. Eze ọbu, ọkpehu l’anya kfụukfuu bya afụru nwa mkpụkpu ono, gude ojọgu iya yebuta iya, bya atụ-whee ya ịga-ọgu gubuta whẹ. ¹⁵O nwekwanuru nwoke lanụ ọbu, bu lẹ mkpụkpu ono. Nwoke ono l’akpa ụkpa, ọle ọ bụ onye marụ ágụ. Ọ bụru iya mekochaaru gude mmamagụ iya dzọo mkpụkpu ono. Ọle ọ tọ dụdu onye nyatajẹru nwoke ono, l’akpa ụkpa ono. ¹⁶Ọo iwhe ono meru g’o gude mu sụ lẹ mmamagụ ka ọkpehu ree. Ọle onye ụkpa bẹ l’ẹte agụbejedu mmamagụ nkiya iwhe, tọ dụ onye l’angajẹ nchị l’okfu iya. ¹⁷Onye marụ ágụ -tọo nwẹhu kfua okfu b’ọ kakwa ree t’ị ngabẹ iya nchị amamẹ whorowhoro, onye ishi ndu eswe l’arya. ¹⁸Mmamagụ kakwa ngwọgu ree, obenu l’onye lanụ, l’eme iwhe-dụ-ẹji l’emebyijekwa iwhe dụ ree, ha shii.

¹Ijiji, nwụhuru anwụhu -daba lẹ mmanụ-mbeleke bẹ l’oomeje ya eshi wurubangu. O noo g’umere onye eswe, o behuduru ọ ha nwanshị l’emeje mmamagụ yẹle ugvu t’ọ bọ dụ iwhe l’ọo-bụ.

²Uche onye marụ ágụ l’emeje iya t’o mee iwhe kfụru nhamụnha, ọle onye eswe bẹ uche iya l’emeje ya eme ẹka-ịcha ẹka-ịcha. ³Ọ tọ dụdu m’oberu ọ bụru lẹ gbororo echi-ụzo bẹ onye eswe l’eje, bẹ l’oogoshije lẹ ya te enwedu uche. Oomeje umere l’egoshi onyenọnu lẹ ya bụ onye eswe.

⁴Ọ -bụru l’onye ishi bẹ ẹhu l’eghu eghu l’ẹka ị nọ, ba ahalịbekwaru je alụfu. Iwhe l’ii-mechia bụ t’i jia obu oyi, o noo nkele ooji obu oyi l’emeje t’a palia pazhita.

⁵O nweru ejo-iwhe ọdo, mu whụru lẹ mkpula ẹnyanwu-a. Iwhe ono bụ emeswe, shi l’ẹka onye bụ ishi. ⁶Eewojeru onye l’eme eswe je edobe l’ọnodu ha shii, woru onye nweru iwhe dobe l’ọnodu ha nwanshị. ⁷Mu whụru ẹka o gbee bụru ndu bụ ohu l’agba l’eli ịnya, ndu bụ ụnwu eze gbechia gude ọkpa eje g’ọo ndu bụ ohu.

⁸Sụa, ọ kwa onye tụru nsụ l’e-bekoo daba lẹ nsụ ọbu. Ọ bụru onye l’epyo mgbawara ẹja bẹ agwọ l’atajẹ. ⁹Ọ kwa onye l’akụpyashi ẹwhuru bẹ ẹwhuru l’emekaje iwhe. Ọ bụru onye l’awa nkụ l’anọje ezeru ẹgbabala iya. ¹⁰Ọ -bụru l’ogbunkụ ta atsụdu nkọ, onye l’awa nkụ ta aba ogbunkụ ọbu ababa bẹ l’oo-gude ikike ọkpehu iya egbu iya, tẹmenu ya egbufu nkụ ono ọnya; ọle ọo mmamagụ l’emeje t’iwhe, madzụ l’eme nweru ishi. ¹¹Ọgvu madzụ gwọru t’agwọ ba ata iya ẹru te enwedu ishi m’ọ -bụru l’agwọ ọbu taadaru iya tẹhenu o je agwọta iya. ¹²Okfu shi onye mmamagụ l’ọnu l’emeje t’a kwabẹ iya ugvu. Ọle onye eswe bụ iwhe shi iya l’ọnu l’e-gbu iya. ¹³Onye eswe l’abụje, ọ -bya l’ekfu okfu, ya evuru ụzo tụru okfu, l’ẹte abẹe l’iwhe ye. Lẹ mkpochi-ishi iya bẹ okfu iya l’adajẹ mgbanwụ mgbanwụ g’ọo onye iwhu l’aya. ¹⁴Okfu onye eswe l’anọje anwụshi anwụshi. Ọ tọ dụdu onye marụ iwhe l’e-bekochaa mee lẹ mgbe l’iwhu. Tọ dụ onye l’adụ ike akarụ iya iwhe l’e-bekocha mee m’ọ tẹlewho azụ.

¹⁵Nsegbu anya, onye eswe l’ese l’emeje ike agvụ iya, ya eje arịtahe uwhu.

¹⁶Sụa, nshọ obodo ọwhu bụ nwatanshịi bụ eze whẹ, tẹmenu ndu bụ ishi l’obodo ọbu bụru eriri l’angụngu bẹ whẹ l’awụfutaje bya adọru l’ụtsu. ¹⁷Ẹhu-ụtso bụ nke obodo ọwhu eze whẹ shi l’oke uwhu, tẹmenu ndu bụ ishi l’obodo ono bụru ndu l’eri iwhe lẹ mgbe iya, mbụ ndu l’eri iwhe t’ẹhu shihu whẹ ike; ndu l’ẹte abụa ọngu-sweshi iwhu bẹ whẹ nọ l’ọzo iya.

¹⁸Onye ẹgali bẹ ụlo iya l’ezejekwa. Ọ bụru onye ẹnyiru bẹ ụlo iya l’anọje eshi eshishi.

¹⁹Iwhe l’aanọje eme oriri bụ tẹ madzụ nwụgaje anwụga. Mmẹe bụru ẹhu-ụtso bẹ l’oomeje. Obekwanu l’ọo okpoga bụ ẹka iwhe lile sụ-chiru ishi.

²⁰Sụa, ba adụkwa nteke l’ịi-nọnyaa gụ ewhulahaa onye eze iwhu je akpa l’ime obu ghu. Ya eje adụkwa nteke l’ịi-nọnyaa gụ anọdu l’ime ụlo ghu wata oowhu onye nweru iwhe iwhu. O noo nkele ụnwu-ẹnu, l’ewhe ewhe mẹe iwhe ọdo, nweru akwẹka bẹ l’a-tụrutakwa iya je edooru iya.

Iwhe onye marụ ágụ l’emeje

¹Kporu nri ghu ghaa lẹ mini, nkele a -nọlewho ujiku olemole bẹ l’ọo-lwawhuru ghu azụ. ²Hata iwhe ghu keeru ụmadzu ẹsaa, m’ọ bụ gụ ekeeru iya ụmadzu ẹsato, nkele ị tị madụ ejo-iwhe, l’e-bechaa nwụa l’eliwhe-e.

³Igwe -chaa gbarara bẹ l’ọochijeru eliwhe mini. Oshi, darụ ada; m’ọ -darụ laa l’ụzo ọhuda-o; m’ọ -darụ laa l’ụzo isheli-o; ọo zhiawho ẹka iya ọwhu ọ darụ laa bẹ l’ọo-zẹe. ⁴Onye l’ele gẹ whẹrewhere gude ewhe ta akọbekwa iwhe l’alị. Onye l’ele g’igwe doberu iwhu ta adụ iwhe l’oo-meta l’okfu iya. ⁵Ọo gẹ l’ị tị maa ụzo, whẹrewhere l’eshije, tị ma gẹ nwa l’eshije kpụa l’ẹwho ne iya; o nokwawho g’iwhe, Chileke l’eme l’ete edoo ghu ẹnya, mbụ Chileke, meru iwhe lile. ⁶Kụa akpụru iwhe l’ịiku akụ l’ụtsu. Be edobekwa ẹka ndoo m’o rwua l’urwẹnyashi, nkele ị tị madụ ọwhu l’e-megee nweru ishi. Ị tị madụ, ?ọwaa tọo ọwhu, tọo whẹ labọ l’e-megee nweru ishi?

⁷Ìwhóró dụ ree, ẹnyanwu l’adụje ree oole ẹnya. ⁸Madzụ -nọo igweligwe awha, o beru ọ nọo ya agha, t’ẹhu tsọje onye ọbu ụtso l’awha ono g’ọ ha. Ọle t’ọ nyatajẹkwa nteke chi l’e-jihuru iya, nkele nteke ono l’a-hakwawhọ l’igweligwe. Iwhe lile, l’abya nụ bụkota iwhe mmaanụ.

Nyatakwa onye meru ghu nụ nteke ị bụ okorọbya

⁹T’ẹhu tsọje ghu ụtso, gụbe nwokorọbya, ntaa ị bụkwadu okorọbya. T’obu tsọje ghu ụtso nteke ị dụkwadu nwata nwata. Iwhe l’ịi-nọ etso bụ iwhe obu ghu kfuru ghu yẹle iwhe i gude ẹnya ghu whụ. Ọle makwarụ l’iwhe lile ono bẹ Chileke l’e-megekwaa kpee ghu ikpe iya.

¹⁰Ọo ya bụ, haa ọochi uche l’ẹka. Tụko iwhe l’aghaswashị ghu ẹhu g’ọ ha wofukota, nkele etsetse yẹle ọgbirihu ẹhu bẹ bụkota iwhe mmaanụ.

¹Sụa, nyatakwa onye meru ghu nụ nteke ị bụkwadu okorọbya tẹhenu ejo ụboku ono erwua, mbụ awha ono, l’ịi-wata okfu sụ: “Iwhe-e ta adụhekwa ọwhu l’atsọ mu ụtso.” ²Nteke ono bẹ ẹnyanwu l’e-jikputa ghu l’ẹnya. Ìwhóró, mẹe ọnwa, mẹe kpokponde ejikputakwa ghu whọ l’ẹnya. Nteke ono bẹ mgboko l’a-dụ g’ọo ẹka igweli chị-geeru mini, urwukpu gbakahụ. ³Nteke ono bẹ ndu l’eche uwhu nche l’a-wata ọwhu kpẹkpekpe. Unwoke, ike dụ awata oje l’ewhuwhu l’ewhuwhu. Ndu l’egwe iwhe egwegwe egwebuhu iya, nkele whẹ whọduru olemole. Ndu ono, l’eshije lẹ windo pyofu ẹnya awhụlahaa inyoki-inyoki. ⁴Nteke ono bẹ l’aa-gụ-chishi ọkpakiri ọnoguzo mkpụkpu. Iwhe l’eegwe egwe adalahaa ghu ẹnyii-ẹnyii. Nteke ono bẹ madzụ l’e-tehuje mẹ okọku haa ẹnu. Ọle olu egvu whẹ l’a-nọje ada iya otẹnya otẹnya lẹ nchị. ⁵Nteke ono bụ nteke madzụ l’atsụwaa iwhe ha l’eli egvu, atsụkwawho egvu iwhe-ọtsulanu, nọ l’ụzo, mbụ nteke oshi alụmondu l’atụ igu, tẹmenu igube l’akpụwaa gọrigori, tẹmenu ẹgu ojekfu nwanyị azẹe ta agụhe. O noo nteke madzụ l’a-lashi ẹka l’ọo-nọ jeyewaro lẹ tututu-mịmimi, ndu l’akwa iya nụ etsoru woroworo agụru iya ọgu ẹkwa. ⁶Nyatakwa onye meru ghu nụ, tẹhenu a gbabua ụdo, e gude mkpọla-ọcha swịa, mbụ tẹhenu a tụkpo ochi, e meru lẹ mkpọla-ododo. Nyatakwa iya tẹhenu e tsujashia ite-mini, l’eesejeru mini ye, mbụ tẹhenu e mebyishia igwe, l’eekobeje eri ono, e gude ese mini lẹ wẹlu. ⁷O noo nteke ogwẹhu, bụ ẹja l’a-lawhu azụ l’ẹja ẹka o shi, ume ndzụ alakfu Chileke, onye kuru iya ye.

⁸“Sụa, iwhe mmaanụ yẹle iwhe mmaanụ bụ iwhe mmaanụ. Iwhe g’iwhe ha bụkota iwhe mmaanụ.” O noo olu-okfu mụbe o-zhi-iwhe ndono.

Mkpochi-ishi iya

⁹Sụa, onye zhiru iwhe-e ta abụlekwaa l’ọ marụ ágụ nwẹkiya; obenu l’o meru ndu ọdo whẹ nwụta iwhe. Ọ rịru ọriri bya avọo iwhe avọvo, ọ nmashịa ẹtu doo giriri. ¹⁰O-zhi-iwhe ono tọ nwẹhu họo okfu, gbarụ l’ekfukfu ahọho, nke ọwhu bụ l’iwhe o deru kfụru nhamụnha bụru ọkpobe okfu. ¹¹Okfu onye marụ ágụ l’adụjekwa g’ọo mkpụru, ụnwu eswi l’egudeje achị eswi. Tẹmenu ẹtu, Onye l’eche Atụru ono nmashịru kụbe l’ekujeleruwho ekuru g’ọo nturu, a kpọberu kpọpyabeshia ya ike.

¹²Ọo ya bụ, nwa mu; t’iwhe-e, mu l’abya ekfukfu-a bụkwaru iwhe l’a-nọ alọ ghu ẹka lẹ nchị. Ee-dekwa ẹkwo, ha l’igweligwe, ọle e te edebudu iya edebu. Ọle ọnwunuka ẹkwo l’emejekwa tẹ madzụ kpọjohu.

¹³Ntaa b’a nụkotawaru iwhe lile. Ọ waa iwhe bụ mkpochi-ishi iya ndọwa: Tsụje egvu Chileke meje iwhe ọ sụru t’i mee; nkele ọo ya bụ iwhe rwuberu madzụ l’ememe. ¹⁴Nkele iwhe lile, madzụ l’eme bẹ Chileke l’e-bekochaa kpee ya ikpe iya, mẹe iwhe lile, madzụ mekotaru l’edomi, mẹe ọwhu dụ ree, mẹe ọwhu dụ ẹji.