Kọlósi

Ẹkwo-Ozhi, Pọlu Deru Nụ Ndu

KỌLÓSI

¹Ẹkwo-ozhi-a bẹ shi l’ẹka mbẹdua, bụ Pọlu; mbụ mụbe onye Chileke họtaru, mee mu tẹ mu bụru onye-ishi-ozhi Kuráyisutu Jisọsu. Onye mu l’iya gba mgba ede iya bụ nwanna anyi Tímoti.

²Ndu anyi l’ede iya anụ bụ ndu nke Chileke, mbụ ndu ọwhu nọ lẹ Kọlósi, bụ ụnwunna ndu ọwhu woru onwowhe ye Kuráyisutu l’ẹka; whẹ l’iya tụgba bụru nnanụ.

Tẹ Chileke, bụ Nna anyi meeru unu eze-iwhe-ọma. Ya emekwaawho t’unu buru guu.

Okfu anụ Chileke tua ya ẹwha

³Nteke nteke bẹ anyi l’anọje etu Chileke ẹwha bụ iya bụ Nna nke Onye-nwe-anyi Jisọsu Kuráyisutu mẹ anyi l’ekfu anụ iya l’iswi ẹhu unu. ⁴O noo l’anyi nụwaru nke ekwekwe, unu kweru nke Kuráyisutu Jisọsu. Anyi nụkwaawho l’unu yekotaru ndu nke Chileke obu gẹ whẹ ha. ⁵Ekwekwe ono, unu kweru nke Kuráyisutu ono mẹe oye obu ono, unu yeru ndu ọdo, bẹ ẹka, o futaru bụkwa l’iwhe ono, unu l’ele ẹnya iya. Iwhe ọbu, unu l’ele ẹnya iya ọbu bẹ bụ iwhe ono, Chileke kwakọberu unu l’imigwe. Ọ bụru iwhe ono, a kwakọberu unu l’imigwe b’e meru unu marụ nteke ono, a bya bya ezhia unu ozhi-ọma ono, bụ ọkpobe-okfu. ⁶Ozhi-ọma ono l’erekwa swaswaswa l’ẹka lile; tụkookwa mgboko ejedzuru. Ọ kwarụwho nno bụ g’o jedzuru ẹka unu nọ, erekwawho ire lẹ ndzụ unu eshi nkeshi mbọku ono unu nụru iya, o doo unu ẹnya ree, mbụ iwhe eze-iwhe-ọma nke Chileke ono bụ. ⁷Ọo Epáfurasu, bụ onye anyi yeru obu, onye anyi l’iya tụkoru eje ọga ozhi lanụ bẹ bụ onye zhiru unu ozhi-ọma ono. Epáfurasu ono bẹ goshiwaru lẹ ya bụ onye e gude ire iya ẹka l’ojeru Kuráyisutu ozhi, ọ bụru iya nochiru ẹnya anyi l’ibe unu, ⁸tẹmenu ọ bụkwaru iya whọ kfuru anyi nke oye obu ono, Ume-Dụ-Nsọ meru unu, unu ye ibe unu.

⁹O noo ishi iwhe meru anyi ta atugbeje ẹka l’anọ ekfu anụ Chileke l’iswi ẹhu unu eshi nkeshi ono, anyi nụru l’unu woru onwunu ye Kuráyisutu l’ẹka. Anyi l’ekfujeru nụ Chileke sụ iya t’o mee unu, t’unu makọta-gezhia iwhe dụ iya l’uche-obu mẹe t’o shi l’ẹka Ume-Dụ-Nsọ nụkwawho unu mmamagụ ọwhu l’e-meje t’iwhe, bụ uche-obu iya ono doo unu ẹnya. ¹⁰Ọo ya bụkwanu nke ọwhu unu l’a-nọ emeje umere, l’e-mekwanu tẹ ndzụ unu l’owhu bụru iwhe unu l’e-gude kwabẹ Chileke ugvu, unu emekwaawho iwhe dụ Chileke ree l’iwhe lile, unu l’eme eme. Unu eshiwaro nno mejee iwhe bụ iwhe-ọma nteke nteke, unu akakwawhọ ọma-rweta onye Chileke bụ. ¹¹Anyi l’anọje ekfu anụ Chileke sụ t’o gude ike iya ono, dụ biribiri mee unu, t’unu shihu ike ọkpobe eshihu nke ọwhu unu l’a-dụje ike taa nshi, nwugbua iwhe lile, bụ iwhe byarụ unu l’obu, ya emee t’unu gudeje ẹhu-ụtso; ¹²tujee Chileke bụ Nna ẹwha nke iwhe lile ono. O noo l’ọo ya bụ onye meru, unu bụru ndu gbarụ nke g’unu lẹ ndu nkiya l’a-gba mgba l’iwhe ọ kwakọberu ndu nkiya ono l’ẹka ono iwhoro dụkota bụ iya bụ ẹka ono, Chileke bụ eze. ¹³O noo nkele ọ dzọfutawaru anyi l’ẹka ẹkpuroochi nwe ike nkiya, kuta anyi je ekuru dobe tẹ Nwa iya ono, o yeru obu bụru eze anyi. ¹⁴Chileke ono, shi l’ẹka Nwa iya ono gbata anyi bẹ l’a-gụkwaruwho anyi nvụ l’iwhe bụ iwhe-dụ-ẹji, anyi megbaberu.

Onye Kuráyisutu bụ mẹe iwhe l’oomeje

¹⁵Ọo Kuráyisutu bẹ goshiru anyi ẹgube onye Chileke ono bụ, mbụ Chileke ono, l’aata awhụje l’ẹnya. Ọo Kuráyisutu bụ onye Chileke doberu l’ọnodu, kakọta shii l’iwhe lile, o meru eme. Kuráyisutu ono bẹ nọhaadaro tẹmenu Chileke meshia iwhe lile. ¹⁶Ọo l’ẹka iya bẹ Chileke shi mee iwhe lile, bụ ọwhu dụ l’imigwe mẹe ọwhu dụ lẹ mgboko, ọwhu ẹnya l’awhụje mẹe ọwhu ẹnya l’ẹte awhụje, mbụ ndu eze ojozhi-imigwe mẹe ndu bụ nnajị-ọha imigwe l’owhu mẹe ndu l’achị iwhe bụ ndu ishi lile l’imigwe mẹe ndu lile, l’ekfu iwhe l’aanụ l’imigwe. Ọo yẹbe Kuráyisutu ono bẹ Chileke shi l’ẹka iya mee iwhe g’iwhe ha, tẹmenu ọ bụru iya b’o meru iya doberu. ¹⁷Yẹbedua l’onwiya vukota iwhe lile ụzo dụhaada. Ọ bụkwaruwho ike nkiya b’o gude mee, iwhe lile, Chileke meru eme dụkota l’ẹka, Chileke dobegeeru iya. ¹⁸Ọo ya bụ ishi, kpokfuru l’ogwẹhu iya ono, bụ chọchi. Ọo yẹbedua bụ ẹka ndzụ, l’owhu futaru. Ọ bụkwaru iya whọ bụ onye mbụ, Chileke vugezhia ụzo mee: o shi l’ọnwu teta nọdu ndzụ nke ọwhu ọ bụ iya l’e-wota ọnodu mbụ l’iwhe lile Chileke meru. ¹⁹Ọo Chileke bẹ chịru iya l’obu iya mee t’ọ bụru l’ẹhu Nwa iya bẹ l’aa-whụkota iwhe lile yẹbe Chileke bụ, ²⁰mẹe t’ọ bụkwaruwho l’ẹka Nwa iya ono bẹ ya l’e-shi mee tẹ yẹle iwhe g’iwhe ha dụ lẹ mma, mbụ iwhe lile, dụ l’imigwe mẹe ọwhu dụ lẹ mgboko. Chileke shi nno gude mmee ono, Nwa iya ghashịru nteke ono, ọ nwụhuru l’oswebe mee: okfu ta adụheru yẹle iwhe g’iwhe ha, o meru. Mbụ l’ọo l’ẹka Nwa iya ono bẹ l’oo-shi mee iwhe lile, dụ l’imigwe mẹe ọwhu dụ lẹ mgboko tẹ yẹle yẹbe Chileke dụ lẹ mma.

²¹Unubẹdua lịfukwaawho lẹ ndu whẹ lẹ Chileke dụwaa lẹ mma ọbu. O noo l’o nweru nteke unubẹdua shi anọje eme umere, goshiru l’unu ta amadụ Chileke. Ọ bụru ejo-iwhe unu shi anọje arị l’ọriri, eme iya eme bẹ shi mee unu, unu bụru ọhogu Chileke ono. ²²Ọle ntaa bẹ Chileke shiwaa lẹ ndzụ, Nwa iya shi nọdu l’eliwhe-e mẹe anwụhu ono, ọ nwụhuru, mee t’unu l’iya dụ lẹ mma nke ọwhu Nwa iya ono l’e-duta unu, unu abụru ndu dụ nsọ l’iwhu Chileke ono, ya a-dụ ẹka iwhe l’aa-taa unu ụta l’a-dụru unu, unu eje abụ ndu l’aama ejo ẹka jeye ya eduta unu bya akfụbe l’iwhu Chileke ono. ²³Ọle iwhe unu mefutaje bụ l’unu l’e-kweshigbuleruwho ike l’iwhe unu kweru, unu eshihu ike lẹge ukfu-ụlo l’emeje ụlo t’o shihu. Unu be ekwekwa t’ọ dụ onye l’a-bya emee unu, t’unu wofu obu l’iwhe ono, unu l’ele ẹnya iya. Mbụ iwhe unu shi l’ẹka Ozhi-ọma ono, unu nụru wata anọ ele ẹnya iya. Ozhi-ọma ono, unu nụru bẹ kwa iya-a bụ Ozhi-ọma ọbu, e zhigbaru mgboko owhu, mbụ ọ bụkwaru iya whọ bẹ Chileke zhiru mbẹdua, bụ Pọlu tẹ mu je ezhia ndu ọdo.

Ozhi, Chileke zhiru Pọlu t’o je ezhia chọchi

²⁴Ntaa bẹ ẹhu l’atsọkwa mu ụtso gẹ mu l’eje iwhe-ọtsulanu-a, mu l’eje l’iswi ẹhu unu. O noo l’ọo iwhe-ọtsulanu-a, mu l’eje ntaa bẹ mu gude eyeta ẹka eme t’o dzukota mbụ iwhe wudukwaduru l’iwhe-ọtsulanu ono, Kuráyisutu jeru l’iswi ogwẹhu iya ono, bụ chọchi. ²⁵Ọo Chileke ono, bụ onye họtaru mu tẹ mu bụru onye ozhi chọchi bẹ zhiru mu ozhi-a tẹ mu zhia unu. Ozhi ọbu, o zhiru mu ọbu bụ tẹ mu mee unu t’unu tụko iwhe ya kfuru makọtaru, ²⁶tẹ mu mekwaawho t’a marụ iwhe ono, Chileke tụberu lẹ ya l’e-me. Iwhe ono b’o shi domia edomi nke ọwhu l’ọoto dụje-zhia onye majẹru iya eshi nkeshi o meru mgboko-o. Ọle ọ bya ebe nta-a, ọ bya egoshi iya ndu ọwhu bụ ndu nkiya, whẹ marụ iya. ²⁷Chileke bẹ rịhawaru iya arị dobe l’ọo ndu bụ ndu nkiya bẹ ya l’e-goshi iwhe ono, ya shi domia edomi. L’ọo whẹ bẹ ya l’e-goshi iya tẹ whẹ marụ iya, tẹ whẹ marụ iwhe ono kpọru gẹ l’aa-nọ atụ ọnu iya, dụkwawho biribiri bụ iya bụ iwhe ọ tụberu lẹ ya l’e-meru mba lile, dụ lẹ mgboko. Iwhe ọbu, o shi domia edomi ọbu bụ lẹ: Kuráyisutu bu l’ime obu unu. Ọo Kuráyisutu ono bẹ l’emeje t’anyi chịru ẹnya ye l’anyi lẹ Chileke l’a-gba mgba l’ọdu-biribiri nkiya. ²⁸Ọo okfu ẹhu Kuráyisutu ono bẹ anyi l’anọje arya arya t’onyenọnu nụje iya. Anyi l’anọje alọ madzụ lile ẹka lẹ nchị. Anyi l’egudeje mmamagụ ezhi madzụ lile iwhe nke ọwhu anyi l’e-me onyenọnu: ya abya akfụru l’iwhu Kuráyisutu bụru onye dzuru oke, bụru onye bụ yẹle Kuráyisutu bẹ tụgbaru bụru nnanụ. ²⁹O noo iwhe meru, mu l’anọje eseshi anya ike, kebe ẹhu eme gẹ l’ee-shi tẹ mu jegee ozhi ono, Chileke zhiru mu. Ike mu gude eje ozhi-a bẹ bụ ike ono, Kuráyisutu l’eyeje mu l’ẹhu. O noo ike ọbu l’ere ire l’ẹhu mu ndono.

¹Iwhe mu l’eme t’unu marụ bụ lẹ mu l’ese anya ẹhu unu eseshi iya ike. O nokwawho gẹ mu l’ese anya ẹhu chọchi, dụ lẹ Leyodisíya mẹwaro iwhe bụ ndu ọdo, mu lẹ whẹ l’ẹteke awhụgbabua onwanyị iwhu l’iwhu. ²Iwhe mu kwoberu eme iya nno bụ nggẹ obu shihu whẹ ike mẹkwawho nke ọwhu oye obu, whẹ yeru ibe whẹ l’e-me tẹ whẹ bụru nnanụ. Ọo ya bụ, whẹ abya amakọta-gee ọkpobe-okfu ono, whẹ eshiwaro nno whụkota-gezhia ọkpobe urwu, nyịru anyị, dụ l’ọma-rweta ọkpobe-okfu ono. Ọo ya bụ, e shikwanu nno, iwhe ono Chileke shi domia edomi edokota whẹ ẹnya. Iwhe ọbu Chileke shi domia edomi ọbu bụ Kuráyisutu l’onwiya. ³Ọo yẹbedua bụ Kuráyisutu ono bẹ Chileke l’eshije l’ẹka iya mee tẹ madzụ makọta-gezhia iwhe bụ mmamagụ g’ọ ha, ya amakọta-gekwaaruwho iwhe ọbu bụ ọkpobe-okfu ọbu g’ọ ha. Iwhe ono bẹ bụkota iwhe yẹbe Chileke ono domikotaru edomi l’ime Kuráyisutu ono.

⁴Iwhe mu kwoberu ekfu iwhe-e bụ nke ọwhu l’ẹte adụa onye l’a-bya egude ire-mẹchemeche duwhua unu. ⁵A makwarụ-a lẹ mu ta anọdudu l’ẹka ono, unu nọ ntaa, ọle ọ kwa-a l’ẹka ono unu nọ bẹ obu mu dụ. Ẹhu l’atsọkwa mu whọ ụtso gẹ mu l’ele g’unu gude mekota onwunu ọnu mẹe lẹge unu gude bụru enwubata enwubata l’eworu ono, unu woru onwunu ye Kuráyisutu l’ẹka.

Jisọsu bụ Nnajị-Ọha

⁶Ọo ya bụ: eshi unu gbobewaru ẹka labọ nata Kuráyisutu Jisọsu, bụ Onye-Nwe-Ọha, t’unu lẹ ya tụgbalekwaruwho bụru nnanụ tụgburu. ⁷Tọ bụlekwaruwho gẹ oshi l’agbabẹje ọgbaragbu l’ime alị bụ g’unu l’a-gbabẹ ọgbaragbu l’ime Kuráyisutu. T’ọ bụru Kuráyisutu bẹ l’a-bụ ukfu-ụlo, unu l’a-nọ atụ ndzụ unu gẹ l’aatụje ụlo, unu akabaa okweta iwhe ono, e zhiru unu kweshia ya ike. Unu egudejelewho obu unu g’ọ ha tuje Chileke ẹwha shii, mbụ tuje iya ẹwha ono nke anyịnyi.

⁸Unu kwakwaa ẹnya t’ọ bọ dụ onye l’e-gude mmamagụ nwọmaru-ọ-machaa mẹe ụgho, l’ete enwee ishi bya eduwhua unu, unu etsoheru ọkpobe-okfu ono. Iwhe ono bụkota iwhe shi l’iwhe ndiwhe l’ezhi mẹkwawho iwhe shi l’ẹka ọgvu-imigwe, l’achịkota mgboko-o. Ọ tọ kwa Kuráyisutu b’o shi l’ẹka. ⁹O noo l’ọo l’ẹhu Kuráyisutu ono, byarụ bya abụru madzụ bẹ Chileke l’onwiya dzukotaru oke, goshikota onye ya bụ. ¹⁰Chileke bẹ shiwaa l’ẹka Kuráyisutu ono, unu l’iya tụgbaru bụru nnanụ mee ndzụ unu, o dzua oke. Ọ bụru Kuráyisutu ono bụ onye ishi, kakọta ndu lile l’achị ndu ishi lile l’imigwe, kakwawhọ ndu lile l’ekfu iwhe l’aanụ l’imigwe.

¹¹Sụa, ọ kwa nteke ono, unu l’iya bya atụgba bụru nnanụ ono b’e buru unu ugvu, mbụ ugvu ọwhu l’abụhee ẹka b’e gude bua ya unu. Ọo Kuráyisutu l’onwiya bụ onye buru iya unu. Ugvu ono, o buru unu bụkwa ogwẹhu unu b’o yefuru unu g’ọo onye yefuru uwe, mbụ ogwẹhu unu ono, iwhe-dụ-ẹji shi tụa whatọwhato. ¹²Lẹ nteke ono e meru unu baputizimu b’a tụkookwaruwho unu lẹ Kuráyisutu likota eli. Chileke tụkookwawho unu l’iya mee, unu tụko shi l’ọnwu teta nọdu ndzụ. O noo l’unu kwetaru l’ike dụ Chileke ono, unu chịkwaruwho ẹka kwẹe l’ike iya ono, mbụ ike ọwhu o gude mee Kuráyisutu, o shi l’ọnwu teta nọdu ndzụ. ¹³O nweru nteke unu shi dụ g’unu nwụhuru anwụhu nkele ọo l’unu mesweru Chileke mẹe nkele unu te eshidu buhawaa ugvu ọwhu shi l’ẹka Kuráyisutu. Ọle ntaa bẹ Chileke byawaa emee, unu lẹ Kuráyisutu tụko nọdu ndzụ; ọ gụkotaru anyi nvụ l’iwhe bụ-zhia iwhe-dụ-ẹji, anyi metaru g’ọ ha. ¹⁴Ọ tụko-gezhia iwhe bụ iwhe ono e deru l’ẹkwo, bụkwanu iwhe l’egoshi l’anyi darwụkotaru iwhe iwu, ọ tụru kfuru huchashikota. Mbụ huchashichaa iwhe ono, e deru ono, shi dụwaa g’ọo ụgwo, tọpyita anyi l’ẹkpiri lẹ g’anyi ha. Chileke megee nno, ọ bya atụko iwhe lile ono g’ọ ha je akpọpyabe l’eli oswebe, shi nno mee ya to vuhe ire. Tọ byahẹ l’e-vu ire ọdo jeyewaro. ¹⁵Ọo nteke who Kuráyisutu nwụhuru l’eli oswebe who b’o chikporu ike ndu l’achị ndu ishi lile l’imigwe mẹe ike nke ndu lile l’ekfu iwhe l’aanụ l’imigwe, kpụta whẹ lẹ ndzụ, kpụfuta whẹ l’edzudzu-ọha nteke ono, yẹbedua l’atụ okoo alwụ-gbu ono, ọ lwụ-gburu whẹ.

¹⁶Ọo ya bụ, t’ọ bọ dụkwa onye l’a-bya anọdu akpọcha-wheru unu mkpọcha lẹ nke iwhe unu l’eri mẹe lẹ nke iwhe unu l’angụ angụ. Ọdo bụ t’ọ bọ dụkwa onye l’a-bya akpọchaderu unu mkpọcha nke oge, l’eerije eri; l’ọo t’unu dobelekwawho mbọku, dụ ẹgube-ẹ rijee oge, ọdua woo: l’ọnwa fụkwaru nke ọwhuu t’a watakwa iya eriri, ọdua l’ọo nke iwhe unu l’emeje lẹ mbọku ọtuta-ume. ¹⁷Iwu ndu Ju ono g’ọ hakọta e shi tụa lẹ nke iwhe lile ono bẹ shi dụkota g’ọo inyonyo iwhe l’e-megee mee lẹ mgbe l’iwhu. Ọle ọwhu bụ ọkpobe iya bụ Kuráyisutu. ¹⁸Ọo ya bụ t’unu be ekwekwa t’ọ dụ onye l’a-bya akpọshia unu ọnata obunggo ono, Chileke l’e-bu unu. T’unu be ekwekwa tẹ ndu ono, l’ọonoje atsọ ụtso tẹ whẹ meje t’a sụje lẹ whẹ wozeru onwowhe alị ono nafụ unu obunggo Chileke. Whẹ l’anọje ekfu t’a bajẹru ndu ojozhi-imigwe ẹja, whẹ asụ l’iwhe whẹ gbabẹru ọkpa ekfu iya bụ ọwhulenya, whẹ whụru. Ẹgube ndu ono l’anọjelewho ekulewho onwowhe iwhe whẹ l’ahaa g’ọo ya. Ya abụleruwho okorobo égò, l’ete enwee ishi bẹ whẹ l’anọje agba. ¹⁹Whẹ ta anyatajẹhe-zhikwaa l’o nweru onye bụ ishi chọchi. Ọ kwa Kuráyisutu bẹ bụ ishi chọchi ọbu, chọchi buru ogwẹhu. Unu maanarụ-a l’ogwẹhu g’ọ ha bẹ dzekfuru lẹ nkwo iya lẹ nkwo iya mẹkota akwara, dụkota l’ẹhu, ọ tụko dzekfua bụru nnanụ. Ọ bụru ishi bẹ l’emeje ogwẹhu ono, ya evu ivu lẹge Chileke tụberu t’o vuje. O noo g’ọ dụ l’ẹhu Kuráyisutu yẹle chọchi ndono.

Unu lẹ Kuráyisutu tụkoru nwụhu, tụkokwawho teta nọdu ndzụ

²⁰Sụa, eshi-ọwhu unu lẹ Kuráyisutu tụkoru nwụhukota bẹ Chileke bọfuakwaru unu l’iwhe ọgvu ono, shi l’imigwe l’ezhi, mbụ ọgvu ono, bụ iya l’achịkota mgboko-o. ?Ọo gụnu kpatarụ iwhe unu l’emekwadua g’ọo ndu bụkwadua ndu mgboko-o? ?Ọo gụnu meru unu l’emekwadua iwhe o kfuru mbụ iwu ono sụru: ²¹“Be ebyikwa ẹka lẹ nri ọwa. Be edekwa ọwa-a ire mẹe t’ẹka ghu be erwukwa l’iwhe ọwhu.” ²²Iwu ono g’o ha tụkokwaru bụleru-a iwhe madzụ l’ezhilewho. O noo nkele iwhe l’eeri eri bụ: e rigewa iya b’ọ gvụwaru. ²³E -kfude iya ekfu; iwhe ono, whẹ l’ezhi ono bẹ l’abụjekwa whẹ l’e-zhi iya, ya adụ gẹ-woo l’ọo iwhe l’e-me tẹ madzụ marụ ágụ. Ọle iwhe whẹ l’anọje ezhi bụ-zhiawho iwhe shi l’uche madzụ bụ iya bụ t’a kwabẹje ndu ojozhi-imigwe ugvu mẹe ememe ono, whẹ l’anọje eme gẹ-woo lẹ whẹ wozetaru onwowhe alị mẹe áwhụ ono, whẹ l’anọje anụ ogwẹhu whẹ. Ọle iwhe lile ono ta adụkwa ọwhu l’eyetajeru whẹ ẹka tẹ whẹ sedekota onwowhe l’ẹgu ejo iwhe l’agụ whẹ nụ.

¹Sụa, eshi-ọwhu Chileke mewaru unu, unu lẹ Kuráyisutu tụko shi l’ọnwu teta nọdu ndzụ, unu nọduwaa ndzụ ọwhuu, t’unu chọjenu ụzo, unu l’e-shi t’iwhe ono dụ l’imigwe rwube unu ẹka, mbụ iwhe dụ l’imigwe ẹka ono Kuráyisutu nọ l’ẹka-ụtara Chileke. ²Unu woru uche unu dobe l’iwhe dụ l’eli, t’unu be ewoshiru iya dobe l’iwhe nke mgboko-o ọwa-a. ³O noo l’unu nwụhuwaru anwụhu. Ndzụ unu bẹ Kuráyisutu wowaru domia l’ẹka Chileke. Kuráyisutu ono nọdukwanu l’ime Chileke. ⁴Ọo Kuráyisutu bẹ bụ ọkpobe ndzụ anyi g’anyi hakọta. Lẹ nteke ono, Kuráyisutu l’a-dawhulewho azụ ọdo bẹ unu l’etsokwa iya who bya. Unu l’iya agbakwawhọ mgba nweru ọdu-biribiri.

Ndzụ, unu shihawaa nọdu yẹle ndzụ ọwhu unu nọ nta-a

⁵Ọo ya bụ, t’unu pyigbushia iwhe bụkota iwhe nke mgboko-o ọwhu nọdukwadua ndzụ l’ẹhu unu bụ iya bụ iwhe dụ g’ọo ụrwu-alị, umere, l’eshi nshi mẹe ẹgu ome ejo-iwhe, oke-ẹnya, ẹnya-kfụrukfuru; o noo l’ẹnya-kfụrukfuru dụkwawho ẹji g’ọo onye wotaru iwhe ọdo dochia ẹnya Chileke l’ime obu iya. ⁶Ọo iwhe lile ono bẹ l’e-me oke-ẹhu-eghughu nke Chileke adakfu ndu ono, bụ ekfu-ba-anụ. ⁷O nwekwaruwho nteke ọwhu unubẹdua shi emekaa iwhe lile ono. Ọo nteke ono, unu shi eme iya bẹ ejo-iwhe ono shi gudegee gude ndzụ unu eme gẹ dụ iya mma.

⁸Ọle nta-a, unu bụwaa nke Kuráyisutu-a bẹ unu l’a-ha iwhe lile ono. Unu haa ẹhu-eghughu yẹle obu-ọku. T’unu be edobejekwaru madzụ ibe unu iwhe l’obu, unu te ewhuje madzụ iwhu. T’okfu erehu be eshijekwa unu l’ọnu. ⁹T’unu ba anọjekwa adzụru ibe unu ejire, o noo l’unu hawarụ akahụ umere ono yẹle ejo ememe, tso iya nụ. ¹⁰Ọo ya bụ t’unu yee umere ọwhuu ono g’ọo onye yeru uwe. Ọ kwa Chileke ono, nụru unu umere ọwhuu bẹ l’a-nọje eme unu t’unu kabaa ọbu ndu ya keru nke ọwhuu. Ọo ya bụ nke ọwhu unu l’a-makọta onye Chileke bụ; marweeru iya amarwe nke ọwhu unu l’a-kabaa ọdu g’ọ dụ eje eje. ¹¹Eshi-ọwhu ọ dụwaa nno bẹ l’ẹte akpahẹkwa ishi woo: l’onye who bụ onye Ju, woo: onye ọwhu ta abụ onye Ju. T’a kpahẹkwawho ishi nke l’e bụru ugvu, mẹe nke l’ete ebudu. T’e kfu nke l’onye who bụ nlwamụnlwa, woo: onye ọwhu bụru onye ime ọswa. T’e kfukwawho nke l’onye who bụ ohu; onye ọwhu bụru amadụ. Ọ tọ dụhekwa iwhe ono ọwhu l’aakpakwadụ ishi iya. Ọo Kuráyisutu bụ mkpakọ-le-n-whuko. O bu ebu l’ime obu unu g’unu ha.

¹²Unu bụ ụnwu Chileke. O yeru unu obu họfuta unu t’unu bụru ndu nkiya. O noo iwhe meru unu je l’awhụjeru madzụ imiko, nwejeru obu-ọma, unu ewozeje onwunu alị, unu emeje odoo, unu atajẹru iwhe nshi. Unu tụko iwhe ono g’ọ hakọta chịta yee g’ọo uwe. ¹³Iwhe bụ iwhe-dụ-ẹji, ibe unu mejeru unu, t’unu nwugbujee ya l’obu. Nteke bụ lẹ madzụ meru unu iwhe unu l’a-ta onye ọbu ụta, t’unu gụaru iya nvụ. Lẹ Onye-Nwe-Ọha gụakwaru unubẹdua nvụ l’iwhe-dụ-ẹji, unu meru. Ọo ya bụ t’unu gụjekwaaru ndu ọdo nvụ mẹ whẹ meswee unu. ¹⁴Ọwhu bụ ukfu l’iwhe lile ono bụru t’unu ye ibe unu obu. T’ọ bụru obu ono, unu yeru ibe unu bẹ l’e-mekota unu ọnu, t’unu tụgba bụru nnanụ ọkpobe abụbu. ¹⁵T’ẹhu-guu ọwhu shi l’ẹka Kuráyisutu bụru ẹhu-guu ọwhu l’a-dụ l’obu unu, eduzhi unu ụzo. O noo l’ọo ẹhu-guu ono bẹ Chileke kwoberu kukobe unu nnanụ, t’unu bya abụru ogwẹhu lanụ. Unu tuje Chileke ẹwha iwhe ono. ¹⁶Unu kwe t’ozhi ono, shi Kuráyisutu l’ọnu bya eburu l’ime obu unu dzua ya oke. Unu yetajeru ibe unu ẹka, mee t’ozhi ono kabaa whẹ odorwe ẹnya. Unu gudeje mmamagụ Chileke nụru unu yejeru whẹ ẹka ono. Unu egudejekwa iya who alọ whẹ ẹka lẹ nchị. Unu gụjeeru Chileke egvu-ọma mẹe egvu-ekele mẹe egvu ọdo mmaanụ, shikota l’ẹka Ume-Dụ-Nsọ. Unu gude obu unu g’ọ ha meje iwhe lile ono, shi nno tujee Chileke ẹwha. ¹⁷Iwhe bụ iwhe unu l’eme eme m’ọ bụ ọwhu unu l’ekfu ekfu; t’unu gude ẹwha Onye-Nwe-Ọha, bụ Jisọsu Kuráyisutu mekota iwhe ọbu. Iwhe mu l’ekfu bụ: unu shije Kuráyisutu l’ẹka tujelewho Chileke, bu Nna ẹwha.

Umere, l’eeme l’ibe ndu nke Kuráyisutu

¹⁸Unubẹ ụnwanyi, unu wozejekwa onwunu alị l’ẹka ndu bụ ji unu nọ. O noo iwhe gbarụ onye l’etso ụzo Onye-Nwe-Ọha l’ememe.

¹⁹Unubẹ unwoke, unu yeje nyee unu obu, t’ọ bọ duzhikwaa nteke unu l’ẹte anọje emeru whẹ odoo.

²⁰Unubẹ ụnwegirima, unu nụjeeru ne lẹ nna, nwụru unu okfu l’iwhe lile, whẹ l’ekfuru unu nkele o noo iwhe dụ Onye-Nwe-Ọha ree.

²¹Unubẹ ndu ọwhu bụ nna, unu be emejekwa ụnwu unu iwhe iwe, a nọnyadaawho tọ dụhe iwhe whẹ l’a-tụjekwadu ama nke ememe.

²²Unubẹ ndu ọwhu bụ ohu, unu mejekwaa iwhe bụ iwhe ndu bụ nnajị unu zhiru unu. Tọ bọ bụlekwawho nteke whẹ l’ele unu ẹnya bẹ unu l’e-meje iya nggẹ a jaa unu. Unu gudejelewho obu-iwhoro meje iya. Iwhe unu l’e-kwobe eme iya nno bụ lẹ Onye-Nwe-Ọha dụru unu lẹ nsọ. ²³Iwhe bụ iwhe e zhijeru unu ememe, t’unu whubeje iwhu mee iwhe ọbu; marụ l’ọo Onye-Nwe-Ọha bẹ unu l’emeru iya. Unu be emejekwa iya g’ọo madzụ bẹ unu l’emeru iya. ²⁴Unu nyatajẹkwa l’ọo Onye-Nwe-Ọha bẹ l’e-bu unu obunggo iya, bụ iya bụ l’ọo-nụ unu iwhe ono, o kweru ndu nkiya ụkwa iya. O noo l’ọo Kuráyisutu bẹ bụ ọkpobe Onye-Nwe-Ọha, unu l’ejeru ozhi. ²⁵Ọle onye l’eme iwhe-dụ-ẹji bẹ Chileke l’a-kfụkwanu ụgwo ọwhu gbarụ iya nụ, e behuduru onye ọbu bụru onye. O noo l’ọ tọ dụdu onye Chileke l’ele ẹnya l’iwhu.

¹Unubẹ ndu ọwhu bụ nnajị, nweru ohu, unu mejekwaaru ohu unu iwhe kfụru nhamụnha mẹe iwhe rwuberu whẹ nụ. Unu nyatajẹkwa l’unubẹdua nwekwaruwho onye bụ Onye-nwe-unu, bu l’imigwe.

Iwhe unu l’a-nọje eme

²T’unu ba atugbejekwa ẹka l’anọ ekfu anụ Chileke. T’unu kwachafụlekwawho ẹnya t’ike ba agvụ unu mẹ unu l’ekfu anụ Chileke. Unu etujekwaa ya who ẹwha mẹ unu l’ekfu anụ iya. ³Unu kfujekwaruwho okfu ẹhu anyi nụ iya. Unu kfuru nụ iya sụ iya t’o mee t’ụzo dụ anyi t’anyi zhije ozhi-ọma ono, mbụ t’anyi zhije nke iwhe ono, Chileke shi domia edomi bụ iya bụ Kuráyisutu l’onwiya. Ọ kwa iswi ozhi-ọma ono b’e kwoberu tụa mu mkpọro-ọ, a tụru mu-a. ⁴Unu kfukwaruwho nụ iya t’o mee mu tẹ mu dụje ike kfuje iya nke ọwhu l’oo-do ndiwhe ẹnya lẹge ọ gbarụ mu l’ekfukfu iya.

⁵T’unu meje umere g’ọo ndu marụ iwhe gbarụ whẹ l’ememe l’ẹka ndu l’abụa ndu nke Kuráyisutu nọ. Nteke bụ nteke ụzo dụje unu, t’unu gudekwa iya zhia ozhi-ọma ono; t’unu ba ahajẹkwa ụzo ọbu t’ọ laa nke mmaanụ. ⁶T’okfu unu gujee egu, ya atsọje ụtso g’ọo iwhe únú tsụru nke ọwhu l’ọo-nọje ewhe ndu, unu l’ekfuru iya uwhere tẹ whẹ ngabẹ nchị l’iwhe unu l’ekfu. Unubẹdua amakwanụru gẹ unu l’e-yejeru onyenọnu ọnu l’ajị ọ jịru unu.

Ekele, Pọlu gude akpochi ishi ẹkwo-ozhi-a

⁷Nwanna anyi Tíkikọsu, bụ onye anyi yeru obu bẹ l’e-kfuru-a unu iwhe lile nke ọwhu unu l’a-ma gẹ mu l’eme eshi. Tíkikọsu ono bụ onye goshiwaru lẹ ya gbarụ t’e gude ire iya ẹka. Ọ bụkwaruwho onye mu lẹ ya tụkoru ejeru Onye-Nwe-Ọha ozhi. ⁸Mu l’ezhiwaa Tíkikọsu ono t’ọ bya ibe unu, bya akọoru unu g’anyi l’eme eshi mẹe t’ọ bya emee obu t’o shihu unu ike. ⁹Onye anyi tụkoru yẹle iya ezhi tẹ whẹ lịru bya ibe unu ono bụ Onẹ̀simosu, bụ onye anyi yeru obu, bụkwaruwho onye goshifuakwaruwho lẹ ya gbarụ t’e gude ire iya ẹka, mbụ Onẹ̀simosu nke ibe unu. Whẹ whẹ ẹbo ono bẹ l’a-kọwaruro unu gẹ iwhe dụ l’ibiya-a.

¹⁰Arisutákọsu, bụ onye mu lẹ ya tụkoru nọdu lẹ mkpọro l’ajịkwaro unu. L’ọojikwawho unu mbụ Makụ, bụ nwa nwune-nna Bánabasu. E mehaakwaru ozhi ẹhu iya, o rwua unu nchị. Nteke o shitaru ụzo iya nke unu, t’unu mekwaru goshi l’ẹhu l’atsọ unu ụtso l’ọ byarụ. ¹¹L’ọojikwawho unu mbụ Jisọsu onona, ẹwha etushi iya bụ Jọ́sutusu. Ọo ụmadzu ẹto ono bẹ bụkwadu ndu Ju, tso mu eje ozhi ono, anyi l’eje gude egoshi l’ọo Chileke bụ eze. Ọo whẹ l’anọje adụ mu obu. ¹²Ọojikwawho unu mbụ Epáfurasu nke ibe unu. Yẹbedua bẹ bụkwawho onye l’ejeru Kuráyisutu Jisọsu ozhi. Oogudeje obu iya g’ọ ha whube iwhu ekfu anụ Chileke l’iswi ẹhu unu, ekfushi iya ike sụ tẹ Chileke mee t’unu ba akpọje laa azụ, ya emekwaawho unu t’unu makọtaru umere, gbarụ onye nke Kuráyisutu l’ememe ọkpobe amarụ, ya emekwaawho t’o wheje unu uwhere ome iwhe bụ uche-obu Chileke. ¹³Mbẹdua gude ọnu mu ekfu l’onwomu sụ l’oosenuka anya ẹhu unu eseshi iya ike l’okfu anụ Chileke ono. L’ooseshinuka anya ono ike l’okfu anụ Chileke l’okfu ẹhu nke ndu Leyodisíya mẹe lẹ nke ndu Hiyerápọlisu. ¹⁴Onye dọkinta ono anyi yeru obu, bụ Luku l’ajịkwaro unu. L’ọoji unu mbụ Dímasu. ¹⁵Unu keleru anyi ụnwunna anyi whẹ ono, nọ lẹ Leyodisíya. Unu ekeleru mu Nimfa mẹe chọchi ono, l’edzukobeje l’ibe iya. ¹⁶Unu -gụ-gekwaa ẹkwo-ozhi-a l’ibiya nke unu; t’unu mekwaa ya t’o rwua ndu Leyodisíya ẹka nke ọwhu whẹbedua l’a-gụkwa iya whọ. Unu agụkwawho ẹkwo-ozhi ọwhu shi Leyodisíya. ¹⁷Unu zhia Akị́posu lẹ mu sụru t’o kebebukwaa ẹhu jekota ozhi ono, e zhiru iya t’o jee l’ozhi ono, anyi l’ejeru Onye-Nwe-Ọha.

¹⁸Ọo mbẹdua, bụ Pọlu gude ẹka mu ede ọwa ntaa gude ekele unu. T’unu ba anyazọjekwa lẹ mu nọ lẹ mkpọro.

Tẹ Chileke meeru unu eze-iwhe-ọma.