Ẹkwo
ÉMỌSU
Onye Nkfuchiru Chileke
11Ọ waa iwhe Émọsu kfuru ndọwa. Émọsu bụ onye lanụ l’ime ndu l’eche atụru. Ẹka o shi bụ mkpụkpu Tekowa. Ọ waa bụ iwhe ọ whụru l’ọwhulenya l’okfu ẹhu ndu Ízurẹlu. Nteke ọ whụru ọwhulenya ono bụ, nteke Uzáya bụ eze, l’achị ndu Juda, Jerobowamu nwa Jowashi bụru eze, l’achị ndu Ízurẹlu. Ọ whụru ọwhulenya ono nọodaa awha labọ tẹmenu o rwude nteke ono alị nmajẹru jijiji.
Ikpe, l’ee-kpe mba gẹ mba ha bukube alị Ízurẹlu
2Émọsu l’ekfu sụ:
“Onye-Nwe-Ọha nọokwaa l’ugvu Záyọnu abọ ekiri
ọ nọokwaa lẹ Jerúsalẹmu ede kiriri.
Ẹka ndu l’eche atụru l’echeje atụru
whẹ bẹ kpọshihuakwaru nkụ.
Elikoro ugvu Kamẹlu kpọshihuwaa nkụ tụlwahu.”
3Ọ waa iwhe Onye-Nwe-Ọha l’ekfu ndọwa:
“Ndu Damásukọsu l’anọje eme
iwhe-dụ-ẹji mmekwase.
Eshi-ọwhu ọ dụ nno
bẹ mu l’ẹte ahakwa tẹ mu ba anụ whẹ áwhụ.
Ndu Giledu bẹ whẹ l’echije kwalwumu kwalwumu
g’ọo onye gude mgbọro-igwe echishi ẹswa lẹ balị.
4Ọo ya bụ lẹ mu l’a-nwụru ọku ye l’ụlo eze Hazẹlu,
ya adzụkota agbarara, eze Benu-hadadu tụru.
5Mu l’e-nwutsu mgbo-igwe ono e
yeru l’ọnu mkpụkpu Damásukọsu.
Mu egbushia ndu bu lẹ nsụda Avenu
gbua onye eze, l’achị mkpụkpu Betu-edẹnu.
A kpụa ndu Arámu lẹ ndzụ lashia alị Kiru.”
O nokwa iwhe Onye-Nwe-Ọha l’ekfu ndono.
6Ọ waa iwhe Onye-Nwe-Ọha l’ekfu ndọwa:
“Ndu Gaza l’anọje eme iwhe-dụ-ẹji mmekwase.
Eshi-ọwhu ọ dụ nno
bẹ mu l’ẹte ahakwa tẹ mu ba anụ whẹ áwhụ.
Mba owhu bẹ whẹ kpụru lẹ ndzụ
woru whẹ ye l’ẹka ndu Edọmu.
7Ọo ya bụ lẹ mu l’a-nwụru ọku ye lẹ mgbodo Gaza,
ya adzụkota agbarara, dụ iya nụ.
8Mu l’e-gbushikota ndu bu lẹ mkpụkpu Ashịdodu,
gbua onye eze, l’achị mkpụkpu Ashikelọnu.
Ndu Ẹkuronu bẹ mu l’a-ngụfu ẹka dabẹ l’ẹhu shi nno mee tẹ
ndu whuduru lẹ Fílistiya bụru kpurupyata.”
O nokwa iwhe Nnajị-Ọha bụ Onye-Nwe-Ọha l’ekfu ndono.
9Ọ waa iwhe Onye-Nwe-Ọha l’ekfu ndọwa:
“Ndu Taya l’anọje eme iwhe-dụ-ẹji
mmekwase.
Eshi-ọwhu ọ dụ nno
bẹ mu l’ẹte ahakwa tẹ mu ba anụ whẹ áwhụ.
Mba owhu bẹ whẹ kpụru lẹ ndzụ
woru whẹ ye l’ẹka ndu Edọmu,
shi nno mebyia ọgbandzu ọtugba bụru nwune ono,
whẹ lẹ mba ono gbarụ.
10Ọo ya bụ lẹ mu l’a-nwụru ọku ye lẹ mgbodo Taya,
ya adzụkota agbarara, dụ iya nụ.”
11Ọ waa iwhe Onye-Nwe-Ọha l’ekfu ndọwa:
“Ndu Edọmu l’anọje eme
iwhe-dụ-ẹji mmekwase.
Eshi-ọwhu ọ dụ nno
bẹ mu l’ẹte ta ahakwa tẹ mu ba anụ whẹ áwhụ.
Edọmu bẹ gude ogu-ịgba chịa nwune iya ọso,
imiko iya ta adụ iya ilile.
Ntekenteke bẹ ẹhu l’anọje eghu iya
damụdamu l’ẹka nwune iya nọ,
tẹmenu obu-ọku nkiya bụru gbururu jeye lẹ gbururu.
12Ọo ya bụ lẹ mu l’a-nwụru ọku ye lẹ mkpụkpu Temanu,
ya adzụkota agbarara, dụ lẹ mkpụkpu Bozura.”
13Ọ waa iwhe Onye-Nwe-Ọha l’ekfu ndọwa:
“Ndu Amọnu l’anọje eme
iwhe-dụ-ẹji mmekwase.
Eshi-ọwhu ọ dụ nno
bẹ mu l’ẹte ahakwa tẹ mu ba anụ whẹ áwhụ.
Ụnwanyi, dụ ime l’alị Giledu bẹ whẹ bọ-fushiru ẹwho,
l’ẹka whẹ l’eme t’oge alị nkewhe kabaa ọsa.
14Ọo ya bụ lẹ mu l’a-nwụru ọku
ye lẹ mgbodo mkpụkpu Raba,
ya adzụkota agbarara, dụ iya nụ.
O noo nteke mkpu ọgu l’a-swọtabe,
ọgu awhụhu ẹwhu g’ọo ẹka oke whẹrewhere l’ewhe.
15A kpụa onye eze whẹ yẹle ndu
bụ ishi l’alị-eze whẹ lẹ ndzụ lashia alị ọdo.”
O nokwa iwhe Onye-Nwe-Ọha l’ekfu ndono.
21Ọ waa iwhe Onye-Nwe-Ọha l’ekfu ndọwa:
“Ndu Moabu l’anọje eme
iwhe-dụ-ẹji mmekwase.
Eshi-ọwhu ọ dụ nno
bẹ mu l’ẹte ahakwa tẹ mu ba anụ whẹ áwhụ.
Ọkpu onye eze ndu Edọmu bẹ whẹ
kpọru ọku jeye ọ kpọo ukfuru.
2Ọo ya bụ lẹ mu l’a-nwụru ọku ye l’alị ndu Moabu,
ya adzụkota agbarara, dụ lẹ mkpụkpu Keriyotu.
Ndu Moabu l’a-nwụshihu mẹ whẹ
nụlewho ùtsú l’aakụ ekpu whẹ.
Mbụ lẹ whẹ l’a-nwụshihu nteke
whẹ nụru mkpu-ọgu mẹe ụda opu-ọgu.
3Onye l’achị Moabu bẹ mu l’e-gbu egbugbu,
gbukota ndu bụ ishi alị ono gẹ whẹ ha.”
O nokwa iwhe Onye-Nwe-Ọha l’ekfu ndono.
4Ọ waa iwhe Onye-Nwe-Ọha l’ekfu ndọwa:
“Ndu Juda l’anọje eme iwhe-dụ-ẹji
mmekwase.
Eshi-ọwhu ọ dụ nno
bẹ mu l’ẹte ahakwa tẹ mu ba anụ whẹ áwhụ.
Iwu Onye-Nwe-Ọha bẹ whẹ huru l’alị,
jịka ome iwhe ọ tọru ọkpa iya t’e meje.
Iwhe duwhuru whẹ nụ bụ lẹ whẹ je
awata ọgwa agwa ono, bụ ụgho ono, nna whẹ gwarụ.
5Ọo ya bụ lẹ mu l’a-nwụru ọku ye l’alị ndu Juda,
ya adzụkota agbarara, dụ lẹ Jerúsalẹmu.”
Ikpe, l’ee-kpe ndu Ízurẹlu
6Ọ waa iwhe Onye-Nwe-Ọha l’ekfu ndọwa:
“Ndu Ízurẹlu l’anọje eme
iwhe-dụ-ẹji mmekwase.
Eshi-ọwhu ọ dụ nno
bẹ mu l’ẹte ahakwa tẹ mu ba anụ whẹ áwhụ.
Ndu-dụ-chịriri bẹ whẹ l’ereje
l’ụgwo mkpọla-ọcha whẹ ji,
ree ndu l’adụa g’ọ harụ whẹ l’ụgwo,
sụru aswa akpọkpa labọ, whẹ ji.
7Ndu ụkpa bẹ whẹ l’adzọje tọlitoli,
byarụ whẹ ishi ye l’ime alị.
Ndu nọ lẹ mkpamẹhu bẹ whẹ
l’ewojeru iwhe rwuberu whẹ nụ docha l’agụga.
Nna yẹle nwa l’akpakọje ekpukfu nwamgbọko lanụ azẹe,
shi nno metoshia ẹwha mụbe
Onye-Nwe-Ọha ono, dụ nsọ.
8L’agụga agụga ẹnya-mgbẹja bẹ whẹ l’azẹshije
l’eli ẹkwa, madzụ nụru whẹ gude naa onwiya mkpalẹka.
Ọ bụru l’ime ụlo Chileke bẹ whẹ
l’anọduje angụ mee, whẹ retaru madzụ lẹ nre.
9Ọo mbẹdua bẹ nọdu l’iwhu whẹ laa ndu Amọru l’iyi,
mbụ ndu Amọru ono, hagee
gbagorogodongu g’ọo oshi sida, kpọo akpaa g’ọo achị.
Mebyi, whẹ mịru, barụ l’eli bẹ mu mebyishiru,
mebyishia ọgbaragbu, whẹ chịru wụa l’alị.
10Ọo mbẹdua bẹ dufutaru unu l’alị Íjiputu,
dua unu ụkporo awha ugbo labọ l’echi-ẹgu
tẹ mu je anụ unu alị ndu Amọru.
11Ọo mbẹdua bẹ shi l’ime ụnwu unu unwoke
wofuta ndu ọwhu bụ ndu nkfuchiru Chileke,
ọ bụru mu shi l’ime ụnwu okorọbya unu wofuta
ndu ọwhu riburu nte ọduru Chileke nsọ.
Unubẹ ndu Ízurẹlu, ?iwhe mu
l’ekfu ta abụdu iwhe meru eme tọo?”
O nokwa iwhe Onye-Nwe-Ọha l’ekfu ndono.
12“Ọle unu meru whẹ ngụa
mmẹe, mbụ ndu ono riburu nte ọduru Chileke nsọ ono,
unu sụ ọwhube ndu nkfuchiru Chileke tẹ whẹ be ekfuhe
iwhe Chileke zhiru whẹ ekfukfu.
13Unu leenu, mu byakwa l’abyarụ unu ishi ye l’ime alị,
unu ataa kpọkpo-kpọroro g’ọo
ọgba-kperekpere, e doru ivu ereshi l’eli.
14Ndu ọkpa-ẹgwegwa ta abyakwa l’agbala agbala,
ndu ọkpehu dụ ta abya l’enwekwadu ụvo,
ndu-ojọgu ta adụ ike adzọ onwowhe.
15Ndu marụ ọgba akfụ ta adụkwa ike atakeru atakeru,
ndu ọkpa-ẹgwegwa ta adụ ike agbala agbala,
ndu l’agba ịnya ta adụ ike adzọ onwowhe.
16Mbọku ọbu mbọku ọbu, bẹ
onye kuru onwiya dike-ọgu
l’e-tuwhakwa ngwọgu iya gbaa ọso.”
O nokwa iwhe Onye-Nwe-Ọha l’ekfu ndono.
3Ndu l’a-gba ndu Ízurẹlu ẹka-ebe
1Unubẹ ndu Ízurẹlu, unu ngabẹkwa nchị l’okfu-a, Onye-Nwe-Ọha kfuru kfugide unu. Ndu o kfuru iya kfugide bụ mba ono, o shi l’alị Íjiputu dufuta:
2“Ọo unubẹdua kpelekengu-kpụu bẹ mu marụ
l’iwhe bụ mba, nọkota lẹ mgboko l’owhu.
O noo g’o gude mu je l’a-nụ unu
áwhụ ejo-iwhe unu l’emegbabe.”
3Ụmadzu labọ, ?whẹ l’alịje l’ije
t’a gụfu lẹ whẹ kwetaru alịli?
4Oduu-gburu-agụ, ?l’ọoboje ekiri
l’ọswa l’ẹbe abụ l’ọ whụru iwhe l’oo-gbu ria?
Nwa oduu-gburu-agụ, ?l’ọobaje
hanyị-hanyị kfụfuta l’ẹka o bu
l’ẹbe abụ l’o nweru iwhe o gudepyaberu?
5Ẹnu, ?l’ọodaje l’ọnya, nọ l’alị
l’ẹbe abụ l’aagbabẹru ọnya ọbu agbabẹ?
Ọnya a gbabẹru agbabẹ l’alị
?l’ọononyajee kposwee onwiya
l’ẹbe abụ l’ọ dụ iwhe dabarụ iya nụ?
6Opu-ọgu dalahaa lẹ mkpụkpu,
?ndu bu iya nụ ta atsụdu egvu tọo?
Ejo-iwhe, ?l’ọobyakfutaje
mkpụkpu, l’ẹbe abụ l’ọo Onye-Nwe-Ọha b’o shi l’ẹka?
7Ishi iya l’ẹmi iya bụ lẹ Nnajị-Ọha, bụ Onye-Nwe-Ọha
ta adụdu iwhe l’oomeje l’ẹbe abụ l’o vu ụzo kpuhaa iwhe o
domiru edomi goshi ndu ozhi iya, bụ ndu nkfuchiru iya.
8Oduu-gburu-agụ -bọo ekiri, ?oo onye ha nke ba atsụ egvu?
Nnajị-Ọha, bụ Onye-Nwe-Ọha -kfua okfu
?Oo onye ha nke be ezhi ozhi, o zhiru?
9Ryaa ya aryarya l’iwhe bụ
agbarara dụ lẹ mkpụkpu Ashịdodu
mẹe l’iwhe bụ agbarara, dụ l’alị Íjiputu sụ whẹ:
“Unu je edzukoo l’ugvu alị Samériya
t’unu gude ẹnya unu whụdunu eze
ùtsú, l’ada l’ẹka ono mẹe mkpamẹhu, dụ iya nụ.”
10“Whẹ ta amadụ ome iwhe kfụru nhamụnha.”
O nokwa iwhe Onye-Nwe-Ọha l’ekfu ndono.
“Iwhe whẹ kụberu l’agbarara ụlo, whẹ tụshiru bẹ bụ iwhe
whẹ nakọru madzụ l’ẹka ike mẹe iwhe whẹ narụ lẹ nfụ.”
11Ọo ya bụ l’ọ waa iwhe Nnajị-Ọha, bụ Onye-Nwe-Ọha l’ekfu ndọwa:
“Ọhogu l’a-nọ-whe alị ono mgburumgburu,
ya atụko ẹka ono, unu kpọberu ike unu nwutsushikota,
vụa arya, dụkota l’agbarara unu l’owhu.”
12Ọ waa iwhe Onye-Nwe-Ọha l’ekfu ndọwa:
“Ọ kwa g’onye l’eche atụru, jeru tẹ
ya nafụta atụru iya l’ọnu oduu-gburu-agụ,
iwhe ọ dụ ike nata iya bụru oshi ọkpa iya labọ,
m’ọ bụ ibiribe nchị lanụ.
O nokwa gẹ ndu Ízurẹlu,
l’aa-dzọfuta l’a-bụ akpụru ụmadzu olemole,
mbụ ndu ono, bu lẹ mkpụkpu Samériya,
dakashịhu l’iwhe-azẹe whẹ mẹe l’egbe-aba whẹ.”
13Ọ waa iwhe Nnajị-Ọha bụ Onye-Nwe-Ọha, mbụ Chileke bụ Onye-ishi-igwe-ọgu l’ekfu ndọwa: “Unu nụkwaa iwhe-e, mu l’ekfu, unu eje ekfukashiaru iya ndu ọnu-ụlo Jékọpu.”
14“Mbọku, mu l’a-nụ ndu Ízurẹlu
áwhụ emeswe ono, whẹ mesweru mu
bẹ mu l’e-mebyishikwa
ẹnya-mgbẹja, dụkota lẹ mkpụkpu Bẹtelu.
Mpu dụkota l’ẹnya-mgbẹja ono bẹ
l’ee-gbujishi, ya awụshiru l’alị.
15Ụlo whẹ tụru kwabẹru ọnanwu yẹle ọwhu whẹ tụru
kwabẹru udzumini bẹ mu l’e-mebyishikota.
Mu enwutsushia ụlo ono, whẹ gude
ọkpu-enyi memashia l’ọoma ụma.
Eze ụlo nọkota iya nụ bẹ mu
l’e-me ya adakọta kpube iwhu l’alị.”
O nokwa iwhe Onye-Nwe-Ọha l’ekfu ndono.
4Ndu Ízurẹlu te ekwedu lwakfuta Chileke
1Unu ngabẹ nchị l’okfu-a, unubẹ eswi alị Báshanu,
mbụ unubẹ ụnwanyi ono, bu l’ugvu Samériya.
Ndu ụkpa bẹ unu l’anọje akpa ẹhu,
egwe ndu l’adụa g’ọ harụ whẹ aryaka eryune,
unu nọdu unu asụ ji, l’alụ unu alụlu:
“Nụ anyi mmẹe t’anyi ngụa!”
2Nnajị-Ọha, bụ Onye-Nwe-Ọha,
bụ onye ono, dụ nsọ bẹ riakwaru nte sụ:
“Oge l’agbabekwaa nteke
l’ee-gude aga-nko lọo unu wuru-wuru lọfu.
Ndu ọwhu wuduru nụ l’ime unu,
e gude aga-ẹma seta whẹ sefu.
3Ẹka l’ee-shi kpụshia unu bụ ẹka ụzo dụ lẹ mgbodo unu.
Onyenọnu echee iwhu nchelanu.
Ẹka l’ee-rwuta unu je awụshi bụ lẹ Hamọnu.”
O nokwa iwhe Onye-Nwe-Ọha l’ekfu ndono.
4“Unu bya lẹ Bẹtelu lọbaru lẹ mmeswe unu.
Unu eje lẹ mkpụkpu Gílugalu kaba ya rọo ememe.
Unu lọbaru wotaje ngwo-ẹja unu l’ụtsu mbọkumboku.
Unu alọbaru wotaje ụzo-lanụ-l’ụzo-iri unu
l’ujiku ẹto, a nwụtaru anwụta.
5Unu wota buredi e yeru iwhe
l’eekoje buredi gude gbaa ẹja obunggo.
Unu -nụdeje Chileke iwhe zụru
unu nkwe l’obu, unu arya ya aryarya.
Unu kụa ya l’edzudzu-ọha, nkele
ọo ẹgube iwhe ono l’adụje
unu ree ememe, unubẹ Ízurẹlu.”
O nokwa iwhe Nnajị-Ọha bụ Onye-Nwe-Ọha l’ekfu ndono.
6“Mu kpọru unu ẹgu lẹ mkpụkpu lẹ mkpụkpu,
mbụ lẹ mu meru, unu ta awhụje nri ria l’ibe unu.
O noo ta ahụ unu nke t’unu lwakfutawhu mu azụ.”
O nokwa iwhe Onye-Nwe-Ọha l’ekfu ndono.
7“Mu meru mini ta achịjeheru
unu lẹge ọ whọduru ọnwa ẹto t’iwhe e meberu l’alị kaa.
L’ọobuje mu -chịaru mkpụkpu ọwa
mini, mu ta achịduru iya mkpụkpu ọwhu.
Mini -chịa l’okfu ọwaa, ọ tọ chịdu
l’okfu ọwhu, iwhe e meberu l’alị akpọshihu nkụ.
8O nweru ndu ọwhu shi lẹ
mkpụkpu labọ m’ọ bụ ẹto jeru mbanananaa,
jeshia mkpụkpu ọdo ọcho mini-angụngu,
whẹ ta awhụ mini, dzuru whẹ angụngu.
O noo ta ahụ unu nke t’unu lwakfutawhu mu azụ.”
O nokwa iwhe Onye-Nwe-Ọha l’ekfu ndono.
9“Mu mewaru t’iwhe unu meberu
l’alị mẹe mgbu vayịnu unu chashịa mmanụ,
bya emee t’ọ tsụshia evu.
Igube tapyashịa oshi ólivu unu yẹle figu unu.
Ọle ọ tọ hụdu unu nke t’unu lwakfutawhu mu azụ.”
O nokwa iwhe Onye-Nwe-Ọha l’ekfu ndono.
10“Mu wotaru unu ejo
ẹhu-ba-dụ-mma ẹgube ono, ọ dụru ndu Íjiputu.
Mu gude ogu-ịgba gbushia unwokorọbya unu,
bya erwutakota ịnya unu.
Mu mee tẹ nshishi odzu, rehuru
erehu l’ọdu-ọgu unu kporu laa unu l’imi.
O noo ta ahụ unu nke t’unu lwakfutawhu mu azụ.”
O nokwa iwhe Onye-Nwe-Ọha l’ekfu ndono.
11“Mkpụkpu unu bẹ mu harụ mebyishia
ẹgube ono mu mebyishiru Sódomu mẹe Gọmóra.
Unu dụa g’ọo otsebere-nkụ a
lọfutaru l’ọku t’ọ bo kege iya.
O noo ta ahụ unu nke t’unu lwakfutawhu mu azụ.”
O nokwa iwhe Onye-Nwe-Ọha l’ekfu ndono.
12“Ọo ya bụ l’ọ waa iwhe mu
l’e-me unu ndọwa, unubẹ ndu Ízurẹlu.
Eshi-ọwhu mu l’e-me unu iwhe ono,
ọ kwa iya bụ t’unu kwakọbekwa akwakọbe nke ojekfu
Chileke unu, unubẹ ndu Ízurẹlu!”
13Ọ kwa iya bụ onye ono, bụ iya
meru ugvu, mee whẹrewhere.
Ọ bụru iya bụ onye ono l’ekpuhaje
iwhe l’ọori l’ọriri goshi madzụ.
Ọ bụru iya l’emeje tẹ chi, bọru abọ megee jihu,
bya abụru iya bụ onye ono l’adzọje
kwagamụ kwagamụ l’eli mgbogidi nke mgboko.
Ẹwha iya bụkwa Onye-Nwe-Ọha,
mbụ Chileke, bụ Onye-ishi-igwe-ọgu.
5Egvu-áwhụ a gụru l’ishi ndu Ízurẹlu
1Ndu Ízurẹlu, unu ngabẹ nchị l’okfu-a, unu ngabẹ nchị l’egvu-áwhụ-a, mu l’agụ l’ishi unu:
2“Nwamgbọko, bụ Ízurẹlu bẹ daakwarụ darwua alị,
ọ tọo gbashibahedua agbashi ọdo.
A harụ iya l’alị l’ẹka ọ daburu gbakashịhu,
tọ dụ onye jeru iya apali.”
3Ọ waa iwhe Nnajị-Ọha bụ Onye-Nwe-Ọha l’ekfu ndọwa:
“O nweru mkpụkpu, dụ lẹ Ízurẹlu, zhifuru ndu ojọgu
dụ ụnu labọ l’ụkporo iri tẹ whẹ jee ọgu,
iwhe l’e-megee vuru ishi whẹ lwa
bẹ bụ ụkporo ndu ojọgu ugbo ise.
Mkpụkpu ọwhu zhiru ndu ojọgu,
dụ ụkporo ugbo ise tẹ whẹ jee ọgu,
iwhe l’e-megee vuru ishi whẹ lwa abụru ndu ojọgu iri.”
4Ọ waa iwhe Onye-Nwe-Ọha l’ekfuru ọnu-ụlo Ízurẹlu ndọwa:
“Unu chọo mu nggẹ unu anọdu ndzụ.
5Unu ba achọkwa mu lẹ Bẹtelu.
Unu be ejekwa Gílugalu.
Unu ba aghatakwa jeshia Byiyesheba.
O noo nkele ndu Gílugalu bẹ l’aa-kpụkwa lẹ ndzụ,
e mee ndu Bẹtelu, ya eje adụ iwhe whẹ l’a-bụkwadu.”
6Unu chọo Onye-Nwe-Ọha nggẹ unu anọdu ndzụ.
Ọdua bẹ l’oo-rekwa whuruwhuru
g’ọo ọku byakfuta ọnu-ụlo Jósẹfu, bya ekechafu iya,
ọ tọ dụdu onye nọ lẹ Bẹtelu l’a-dụ ike egbota iya.
7Nshọ unubẹ ndu, l’ewojeru ikpe, kfụru nhamụnha
kpọo ishi akụ, mee ya t’ọ bụru age,
mbụ unubẹ ndu l’ewojeru ọdu-chịriri gwọo l’alị.
8Ọo Onye-Nwe-Ọha bẹ meru
kpokponde ono, bụ Puleyadesu yẹle Orayọnu.
Ọ bụru iya l’emeje ẹkpuroochi, ya aghọo iwhoro chi-asahu.
L’oomeje eswe, ya ekpua ẹhu bụru ẹnyashi.
Ọo ya bụ onye l’ekuje mini, dụ l’eze-ẹnyimu oku,
woru iya kwaa eliwhe l’owhu l’ẹhu.
Ọ kwa Onye-Nwe-Ọha bụ ẹwha iya.
9Oomeje tẹ kpurupyata lọo vaa byakfuta onye ike dụ,
l’oomeje tẹ mkpụkpu a tụru ọ bụru
agbarara bụru kpurupyata.
10Onye unu l’egbejee kpọo ashị bụ onye ikpe iya kfụru
nhamụnha lẹ nggamgbo-ọha.
Ọ tọ dụdu iwhe unu l’agụbeje onye l’ekfu ire-lanụ.
11Ndu ụkpa bẹ unu l’adzọje tọlitoli,
unu l’egudeje whẹ naa whẹ ereshi whẹ l’ẹka ike.
Eshi-ọwhu ọ dụ nno,
a makwarụ-a l’unu gude ẹwhuru,
a washịru awashị tụshia ụlo unu.
Ọle unu ta abyadụ l’e-bu iya ebu.
A makwarụ-a l’unu nweru mgbu vayịnu, dụ ugvu l’ẹnya,
ọle unu ta abyadụ l’a-ngụ mmẹe shi iya nụ.
12Mu marụ gẹ emeswe, unu mesweru habe l’igweligwe
mu marụ gẹ iwhe-dụ-ẹji, unu meru habe shii.
Ndu-dụ-chịriri bẹ unu l’emekpa ẹhu, unu l’eri n-wọlazu,
unu te ekpeje ndu ụkpa ikpe kfụru
nhamụnha lẹ nggamgbo-ọha.
13O noo g’o gude onye nweru mgbamego l’edobeje
ọnu ndoo m’ọ dadẹwaa nno nkele a nọ l’ejo oge.
14Unu chọo ụzo ome iwhe dụ ree, haa ome ẹjo iya,
nggẹ unu anọdu ndzụ.
Ọo ya bụ nke ọwhu Onye-Nwe-Ọha, mbụ Chileke, bụ
Onye-ishi-igwe-ọgu l’e-swiru unu eswiru, ẹgube ono,
unu l’asụje l’o swiru unu.
15Unu kpọo ome ejo-iwhe ashị; yee ome iwhe dụ ree obu.
Unu kpeje ikpe, kfụru nhamụnha lẹ nggamgbo unu;
nkele e nwekwaru ike,
Onye-Nwe-Ọha, mbụ Chileke bụ
onye-ishi-igwe-ọgu emeeru unu eze-iwhe-ọma,
unubẹ nwa ndu ọwhu whọduru nụ lẹ ndibe Jósẹfu.
16Ọo ya bụ l’ọ waa iwhe o kfuru, mbụ Nnajị-Ọha bụ Onye-Nwe-Ọha, mbụ Chileke bụ Onye-ishi-igwe-ọgu:
“Aa-tụ ụzu-ẹkwa l’iwhe bụ echi-ụzo nọnu.
Ee-chi o-ji-l’ẹka-tọgbo-o lẹ nggamgbo lẹ nggamgbo.
Ndu l’akọ okfu bẹ l’ee-ku,
whẹ abya aryaa ẹkwa gụa áwhụ,
e kua ndu marụ ọrya ẹkwa-áwhụ, whẹ abya aryaa ya.
17Ụzu-ẹkwa l’a-tụshihu l’ẹka lile,
e nweru mgbu vayịnu,
nkele mu l’abyakwa ọgha l’echilabọ unu.”
O nokwa iwhe Onye-Nwe-Ọha l’ekfu ndono.
Mbọku nke Onye-Nwe-Ọha
18Nshọbukwa unubẹ ndu l’ọogu
ẹgu tẹ mbọku nke Onye-Nwe-Ọha byakebe!
Sụa, ?ọo gụnu kparụ iwhe mbọku
nke Onye-Nwe-Ọha l’agụ unu ẹgu?
Mbọku ono l’a-bụkwa ẹkpuroochi
nkụchi, iwhoro ta adụkwa iya.
19Ọo-dụkwa g’ọo nwoke nahụru oduu-gburu-agụ,
je agbabarụ ejo-nkụta-ọswa.
Mbụ l’ọo-dụ g’ọo onye bahụru l’ụlo
iya je anọdu anọdu woru ẹka tukobe lẹ mgbodo,
agwọ shi ẹka o shi bya ata iya.
20Mbọku nke Onye-Nwe-Ọha l’a-bụru ẹkpuroochi nkụchi,
iwhoro ta adụkwa iya.
Igweli l’a-whuchi awhuchi, nke
ọwhu bụ l’iwhoro ta adụdu ilile.
21“Ori-oge, unu l’eriru mu bẹ mu kpọkwaru ashị,
ọ t’ọ dụdu iwhe mu gụberu iya.
Edzukobe, unu l’edzukobejeru mu ta adụjekwa mu ree.
22Anụ owhu, unu l’akpọje ọku
gude gwaa mu yẹle ngwo-ẹja-nri, unu l’anụje mu
ta adụkwa ọwhu mu l’anatajẹ.
Anụ, nmachiru anmachi ono, unu
l’egudeje bya agbaarụ mu ẹja ẹhu-guu,
bẹ mu l’ete elejekwa ẹnya.
23Unu ba agụjeheru mu egvu;
o noo l’egvu unu l’anọje ada mu whutuwhutu lẹ nchị.
Mu ta angabẹjekwa nchị l’iwhe nkwa unu l’ada.
24Iwhe mu chọru bụ t’ikpe,
kfụru nhamụnha sọje gborogboro g’ọo mini!
Ọ-dụ-chịriri asọ gborogboro g’ọo ẹnyimu, l’ẹte enwee atahụ!
25Sụa, unubẹ ọnu-ụlo Ízurẹlu,
unu nọru ụkporo awha ugbo labọ l’echi-ẹgu,
?Unu shi agwajẹ mu agwagwa nteke ono?
?T’unu shi anụje mu iwhe nteke ono?
26Ọle ntaa bẹ iwhe unu kpọru
obu yeru bụ l’ọgvu onye eze unu, bụ Sakutu mẹe
l’ọgvu ibe unu, bụ Kayịwanu,
mbụ ọgvu kpokponde ono, unu gwọtaru agwọta.
27O noo g’o gude mu je l’e-me t’a
kpụa unu lẹ ndzụ chịta unu ghaa alị Damásukọsu.
O nokwa iwhe Onye-Nwe-Ọha l’ekfu ndono, mbụ onye ono ẹwha iya bụ Chileke, bụ Onye-ishi-igwe-ọgu.
6Nshọbukwa ndu l’akpa lẹ ntụsaru-ẹhu
1“Nshọbukwa ndu nọ l’ugvu
Záyọnu akpa lẹ ntụsaru-ẹhu, mẹe ndu nọ l’ugvu
Samériya eke tụhaa l’ọ tọ dụdu iwhe bya l’eme whẹ nụ,
mbụ unubẹ ndu a marụ ẹwha whẹ,
shi lẹ mba bụ ishi mba l’owhu,
bụ ndu ono, ọnu-ụlo Ízurẹlu l’abyakfutaje.
2Unu jeedawho mkpụkpu Kalune
je awhụ iwhe l’eme l’ẹka ono.
Unu -jegee ẹka ono, unu ejeshia
Hámatu, bụ oke mkpụkpu.
Unu eshi l’ẹka ono jeshia Gatu, bụ mkpụkpu ndu Fílistiya.
?Whẹ ka alị-eze unu ree?
?T’alị whẹ ka nke unu ọha shii?
3Unubẹ ndu sụru lẹ mbọku ejo-iwhe l’a-nwụ bẹ
dụkwaduro otẹnya,
unu gudekwanu umere unu eme tẹ
mbọku, iwhe-kpanganga l’e-me l’ẹhu unu kaba ọdu ntse.
4Nshọbukwa ndu l’azẹje azẹe tụkaa onwowhe
l’iwhe-azẹe, e gude ọkpu-enyi memashia,
ndu l’egudeje etsetse machịshia onwowhe l’ugbooshi,
ndu bụ anụ nwatụru yẹle anụ eswi,
nmachishiru anmachishi bẹ whẹ l’egudeje eme nri.
5Mkpọkoro egvu, unu l’anọje agụ bẹ unu l’akpọje une eye,
unu nweru ngwa-egvu ọ̀whúú, dụ l’iche l’iche g’ọo Dévidi.
6Iwhe unu l’egudeje angụ mmẹe bụ eze ntiko.
Mmanụ, unu l’ehu l’ẹhu bụru
oke mmanụ, l’eshi kwẹkwekwe.
Ọle ọla-l’iyi, byakfutaru ndibe Jósẹfu
bẹ unu l’ẹte atsọdu áwhụ iya.
7O noo g’o gude unu je l’a-bụ ivurụzo,
l’aa-kpụ lẹ ndzụ laa alị ọdo.
Oke ẹmereme ono, unu
l’amachịshije onwunu eme abụru bugemu.
Ekuku, ndu Ízurẹlu l’eku onwowhe bẹ Onye-Nwe-Ọha l’akpọha akpọha
8“Nnajị-Ọha, bụ Onye-Nwe-Ọha gudewaa onwiya ribua nte, mbụ lẹ Onye-Nwe-Ọha, bụ Chileke bụ Onye-ishi-igwe-ọgu l’ekfu sụ:
“Ekuku ono ẹpa Jékọpu l’eku
onwowhe bẹ mu l’akpọhakwa akpọha.
Agbarara ụlo ono whẹ tụshiru bẹ mu kpọru ashị.
O noo g’o gude mu je l’e-woru ishi mkpụkpu whẹ,
mẹe iwhe lile, dụ iya nụ ye l’ẹka ndu ọhogu.”
9Ọ -bụru ụmadzu iri bẹ whọduru l’uwhu lanụ, ọnwu atụko whẹ gbuchafu. 10Nteke abụbu whẹ byarụ, mbụ onye gbarụ t’ọ kpọshi odzu whẹ ẹnwa, ọ -bụru l’ọ -byarụ tẹ ya pashịa odzu whẹ l’ụlo ono; o -kua onye ọwhu nọ l’ime jịa ya sụ iya: “?Oo nwebaaru odzu ọdo whuduru nụ l’ẹka ono?” Ọ -sụ: “Waawa!” Ya asụ iya: “Taa! Dobe ọnu ndoo! T’anyi be ejekwa ọko ẹwha Onye-Nwe-Ọha!”
11Nkele Onye-Nwe-Ọha bẹ tụwaru iya ọ bụru iwu,
l’oke uwhu l’a-da gbaa vụu vụu,
nwa uwhu nshịi adaa tsua yọgiri yọgiri.
12Ịnya ?ọogbaje ọso l’ẹka bụ ekpekere nkụchi?
?Eegudeje eswi akọ ọkoro l’eze-ẹnyimu?
Ọle unu mewaru ikpe, kfụru nhamụnha,
ọ bụru iwhe l’egbu madzụ,
unu mee akpụru ọdu-chịriri l’amị, ọ bụru age.
13Unu l’ete ẹswa l’unu lwụtaru mkpụkpu Lodeba.
Unu l’etowhe ọnu asụje: “?Tọ dụ l’ike ẹka anyi
bẹ anyi gude lwụta mkpụkpu Kanemu?”
14Onye-Nwe-Ọha, mbụ Chileke,
bụ Onye-ishi-igwe-ọgu l’ekfu sụ:
“Unubẹ Ízurẹlu, mu l’e-je akpatsuta mba l’a-byakfuta unu ọgu.
Whẹ eshi lẹ mkpụkpu Lebo Hámatu kpaa unu ẹhu
jeye lẹ nsụda Araba.”
7Uzhi ọwhulenya ise, Émọsu whụru
Ọwhulenya nke mbụ: Igube
1Ọ waa iwhe Nnajị-Ọha bụ Onye-Nwe-Ọha goshiru mu ndọwa: Mu nọ l’ọwhulenya whụa ẹka Onye-Nwe-Ọha l’akwakọbe otsu-dududu igube, l’a-bya atapyashịa iwhe e meberu l’alị, l’efushikaa ome nke ọ̀whúú; g’a kpatageeru nke mbụ. Nke mbụ ono bụ ọwhu l’aanụje eze l’ọo iwhe rwuberu iya nụ. 2Igube ono tafụlewho iwhe rwutaru irwu l’alị ono kpamụ. Mu chishia mkpu sụ: “Gụbe Nnajị-Ọha, bụ Onye-Nwe-Ọha; jiko gụnuaru ndibe ghu nvụ! ?Ndẹe gẹ ndibe Jékọpu l’e-shi wafụ l’ẹgube iya ọwa, l’ẹbe abụ lẹ whẹ barụ nwishi!”
3Tọ dụ iya bụ lẹ Onye-Nwe-Ọha ejizeta,
bya ekfua sụ: “Ọ waa ta anwụhekwa ọdo.”
Ọwhulenya nke ẹbo: Ọku
4Ọ waa iwhe Nnajị-Ọha bụ Onye-Nwe-Ọha goshiru mu ndọwa: Mu nọ l’ọwhulenya whụa Nnajị-Ọha, bụ Onye-Nwe-Ọha gẹ l’ooku ndibe iya oku tẹ ya gude ọku, l’enwu enwunwu gwaa whẹ ọchi. Ọku ono bya ekezhiawho gẹ l’ooke jeye oke eze-ẹnyimu tashịhu; alị kpọshihu nkụ. 5Tọ dụ iya bụ, mu chishia mkpu sụ: “Gụbe Nnajị-Ọha, bụ Onye-Nwe-Ọha; byiko be emehenu! ?Ndẹe gẹ ndibe Jékọpu l’e-shi wafụ l’ẹgube iya ọwa, l’ẹbe abụ lẹ whẹ barụ nwishi?”
6Tọ dụ iya bụ lẹ Onye-Nwe-Ọha ejizeta,
Nnajị-Ọha ono, bụ Onye-Nwe-Ọha bya ekfua sụ: “Ọ waa ta anwụhekwawho ọdo.”
Ọwhulenya nke ẹto: Oshi, e gude atụ mgbodo t’ọ kfụru nsụmini
7Ọ waa iwhe Onye-Nwe-Ọha goshiru mu ndọwa: Mu nọ l’ọwhulenya whụa Onye-ukfu-l’ọha g’ọ kfụru lẹ mgboro mgbodo. Iwhe ọ chị l’ẹka bụru ụdo, l’eegudeje atụ mgbodo t’ọ kfụru nsụmini. Ọ bụru ụdo ono b’e gude tụa mgbodo ono ọ kfụru nsụmini.8Onye-Nwe-Ọha bya ajịa mu sụ: “Émọsu, ?ọo gụnu b’ị whụru?”
Mu sụ iya: “Ọ kwa ụdo, l’eegudeje atụ mgbodo t’ọ kfụru nsụmini.”
Tọ dụ iya bụ, Onye-Nwe-Ọha bya asụ mu: “Lekwa, mu l’e-woru ụdo ono, l’eegudeje atụ mgbodo t’ọ kfụru nsụmini ono dobe l’echilabọ ndu Ízurẹlu, gude goshi whẹ lẹ whẹ ta akfụduru nsụmini. Mu ta ahahẹdu whẹ ọdo tẹ mu ba anụ whẹ áwhụ.
9“Ẹnya ẹka ono, Áyiziku doberu bẹ l’ee-mebyishikota.
E tsukposhia ẹka ndu Ízurẹlu doberu nsọ.
Mu l’e-kwolihu palia ogu-ịgba tatso
ọnu-ụlo Jerobowamu ọgu.”
Émọsu yẹle Amazíya
10Tọ dụ iya bụ, Amazíya, bụ onye l’agbajẹ ẹja lẹ Bẹtelu bya ezhia ozhi t’e je ezhia onye eze ndu Ízurẹlu, bụ Jerobowamu sụ iya: “Émọsu bẹ nọkwa l’echillabọ ndu Ízurẹlu achịru ghu ejo idzu. Iwhe ọ nọdu kfushia sụkwaru omebyi alị-a. 11Ọ waa iwhe Émọsu nọdu kfushia ndọwa:
“ ‘Ọ kwa ogu-ịgba bẹ l’a-ta ishi Jerobowamu;
tọ dụhenu iwhe l’e-me t’a ba akpụ ndu Ízurẹlu lẹ ndzụ
chịta whẹ lụfu l’alị whẹ.’ ”
12Amazíya gbashi bya ejekfu Émọsu je asụ iya: “Gụbe nwọwhu l’awhụ ọwhulenya; lụfu l’ẹka-a! Tụgbua lawhu azụ l’alị ndu Juda. Je anọdu l’ẹka ono kpata nri, l’ii-ri; gụ anọdu l’ẹka ono kfuchijeru Chileke! 13Ba anọduhe lẹ Bẹtelu sụ l’iikfuchiru Chileke, nkele ọo ẹka dụru eze lẹ nsọ; ọ bụru iya bẹ eze-ụlo ndu Ízurẹlu l’abajẹru Chileke ẹja nọ.”
14O noo ya, Émọsu yeeru Amazíya ọnu sụ iya: “Mu ta abụkwa onye nkfuchiru Chileke, tọ bụ onye nkfuchiru Chileke bẹ nwụru mu nụ. Ọo onye l’eche atụru bẹ mu bụ, bya abụru onye l’akọ okfu sịkamo. 15Ọo ẹka mu nọdu eche atụru bẹ Onye-Nwe-Ọha bya ekua mu sụ mu tẹ tụgbua jekfu ndibe iya, bụ ndu Ízurẹlu je ekfuchita ọnu iya. 16Ngwa ngabẹkwa nchị nụ iwhe Onye-Nwe-Ọha l’ekfu:
“ ‘Ị sụru tẹ mu be ekfuchihe ọnu
Chileke l’ẹka ndu Ízurẹlu nọ,
mu ahaa ozhi ozhi, Chileke zhiru ndu ụlo Áyiziku.’
17“Ọo ya bụ l’ọ waa iwhe Onye-Nwe-Ọha l’ekfu ndọwa:
“ ‘Amazíya, nyee ghu
l’e-megekwaa bụru nwanyị-ọkpara lẹ mkpụkpu-a;
ogu-ịgba atakọta ishi ụnwu ghu nke nwoke mẹe nke nwanyị.
Alị ghu bẹ l’ee-bukashi ebukashi washịaru ndu ọdo,
gụbedua l’onwoghu bụ l’alị ndu
l’ẹte amaa Chileke bẹ l’ịi-nọdu nwụhu.
Ọdo bụ lẹ ndu Ízurẹlu te enwedu
iwhe l’e-me t’a ba kpụ whẹ lẹ ndzụ,
chịfu whẹ l’alị whẹ laa alị ọdo.’ ”
8Ọwhulenya nke ẹno: Nkata akpụru iwhe charụ acha jiru ejiji
1Ọ waa bụ iwhe Nnajị-Ọha bụ Onye-Nwe-Ọha goshiru mu ndọwa: Mu nọ l’ọwhulenya whụa nkata akpụru iwhe charụ achacha jiru ejiji. 2Onye-Nwe-Ọha bya ajịa mu sụ mu: “Émọsu; ?ọo gụnu b’ị whụru?”
Mu sụ iya: “Ọ kwa nkata akpụru iwhe charụ acha jiru ejiji.”
Tọ dụ iya bụ, Onye-Nwe-Ọha sụ mu: “Ndibe mu ono, bụ ndu Ízurẹlu bẹ oge ikpazụ whẹ rwuakwaru. Mu ta ahahẹdu whẹ ọdo tẹ mu ba anụ whẹ áwhụ.”
3Ọ waa iwhe Nnajị-Ọha bụ Onye-Nwe-Ọha l’ekfu ndọwa: “O -rwulewho mbọku ono bẹ ụzu-ẹkwa, l’a-da l’ọzori egvu, l’aagụje l’eze-ụlo Chileke. Odzu ndu nwụhuru anwụhu aha l’igwe kụru l’ẹka lile. Ẹka lile ada nyorokotongu.”
Aa-gwa ndu Ízurẹlu ọchi
4Unu ngabẹ nchị; unubẹ ndu l’anọje adzọpyashi ndu l’adụa g’ọ harụ whẹ ishi; unubẹ ndu l’anọje apyigbushi ndu ụkpa, bu l’alị-a; 5mbụ unubẹ ndu l’asụje: “?Ọo nteke ole bẹ ori oge ọnwa ọ̀whúú l’a-gvụ nke ọwhu unu l’a-wata oore witi unu? ?Ọo nteke ole bẹ mbọku-ọtuta-ume l’a-gvụ nke ọwhu unu l’e-vushi witi unu reshia?” Mbụ nke ọwhu unu l’e-bubota tinu balị unu t’ọ ka ọlwa alị; mee aswa iya t’ọ ọka shii, bya egude iwhe l’aatụ̀je iwhe e meru l’ụgho gude kputa ndiwhe. 6Unu ekpota apya witi, a gẹge awụshi awụshi yekobe l’ọkpobe iya ree oke aswa, bya achọo ndu ụkpa, ji ụgwo mkpọla-ọcha zụta, chọkwaawho ndu l’adụa g’ọ harụ whẹ zụta l’ụgwo, sụru aswa akpọkpa labọ, whẹ ji ụgwo iya.
7Onye-Nwe-Ọha, bụ onye ono, ẹpa Jékọpu gude eku onwowhe bẹ riakwaru nte sụ: “Iwhe whẹ meru bẹ mu l’ẹte abyakwaa l’azọha azọha.
8“Alị l’e-megekwaa nmaa jijiji l’iswi iwhe ono; áwhụ iya abyarụ ndu bu l’alị ono. Alị ono l’e-ko whụla whụla g’ọo ẹka ẹnyimu Nayịlu byarụ utso; a nmawoo ya anmawo; ya ebulihu; bya azụda g’ọo ẹnyimu Íjiputu.
9“Ọ waa iwhe Nnajị-Ọha bụ Onye-Nwe-Ọha l’ekfu ndọwa: O -rwua mbọku ono bẹ mu l’e-me ẹnyanwu arịba l’ishi l’echilabọ eswe, mu emee mgboko agbakọta ẹkpuroochi l’eswe. 10Oge, unu l’erije bẹ mu l’a-gbanwe t’ọ bụru unu nggụmawhu. Mu agbanwee egvu ẹhu-ụtso, unu l’agụje t’ọ bụru unu ẹkwa-áwhụ. Mu l’e-me t’unu yekota uwe-áwhụ g’unu ha, kpụshia unu ishi anwụhu l’ẹhu l’ẹhu. Mu l’e-me unu aryaa ẹkwa g’ọo onye l’agụ áwhụ nwa nwoke lanụ ọ nwụtaru, ọ zubuhu nwụhu. Mbọku ono l’owhu l’a-bụru unu ụkpazhi-ọnwu-ọnu.”
11Ọ waa iwhe Nnajị-Ọha bụ Onye-Nwe-Ọha l’ekfu ndọwa: “Oge l’erwuakwa nteke mu l’e-me tẹ mkpẹgu bya l’alị-a. Ẹgu mu l’ekfu okfu iya ta abụkwa ẹgu nri, tọ bụ ẹgu mini. Ọwhu mu l’ekfu okfu iya bụ ẹgu ọnu okfu Onye-Nwe-Ọha. 12Madzụ l’e-tsoru aghawhe, o -shi l’ẹnyimu ọwaa ya alụfu ẹnyimu ọwhuu, o -shi l’ụzo isheli ya alụfu ụzo ẹnyanwu-awata. Mbụ lẹ whẹ l’e-shi foo lụfu faa l’ẹka whẹ l’achọ ẹka whẹ l’a-nụ okfu Onye-Nwe-Ọha, ọle whẹ ta awhụdu iya.
13“Mbọku ono bẹ ụnwumgboko, l’ama g’ọo gụnu mẹe unwokoro, akwara dụ l’ẹhu l’a-vẹshihu l’ẹka ẹkpiri kpọru whẹ jegiri-jegiri. 14Ndu ono, l’egudeje ẹwha agwa Samériya ria nte, mbụ ndu ono, l’asụje: ‘Ọ -bụru whọ lẹ gụbe ọgvu Danu bẹ nọ-o ndzụ g’ị nọ iya; ọ -bụru whọ lẹ gụbe ọgvu Byiyesheba bẹ nọ-o ndzụ g’ị nọ iya’, ndu l’erije ẹgube nte ono l’a-dakọta; whẹ ta fụkwa gbalihubaa agbalihu ọdo.”
9Ọwhulenya nke ise: Ụlo-dụ-nsọ, darụ adada
1Mu nọ l’ọwhulenya whụa Onye-Nwe-Ọha gẹ ọ kfụru lẹ mgboro ẹnya-mgbẹja. Ọ sụ:
“Wota iwhe vụa l’eli ishi itso, gude eze-ụlo-ọ
nke ọwhu ukfu-ụlo ono l’a-nmakọta jijiji.
Vụa ya yọgiri-yọgiri t’o zee zepyabe onyenọnu l’ishi.
Ndu ọwhu whuduru nụ bẹ bụ ogu-ịgba bẹ mu
l’e-gude gbushia whẹ.
Ọ tọ dụdu onye bya l’a-gbala m’ọo onye lanụ,
tọ dụ onye bya l’a-nahụ.
2Whẹ -gvukwaa m’o beru whẹ gvua nsụ bahụ l’alị-maa,
mu l’e-yelekwaa ẹka l’ime ẹka ono gụta whẹ.
Whẹ -nyikwaa m’o beru whẹ nyihu eli bahụ l’imigwe,
mu eshilekwaa l’ẹka ono lọ-zeta whẹ.
3Whẹ -jekwa m’ọo l’e-domi
onwowhe l’eli ugvu Kamẹlu,
mu achịlekwaa nta whẹ je akpụfuta whẹ l’ẹka ono.
Whẹ -jekwa m’ọo l’e-domi
onwowhe l’ọhu eze-ẹnyimu tẹ mu ba awhụ whẹ,
bẹ mu l’e-zhilekwaa ejo agwọ, bu
lẹ mini t’o je angụa whẹ ẹrwu l’ẹka ono.
4O -beru ndu ọhogu whẹ kpụa whẹ lẹ ndzụ lashia alị ọdo,
mu ezhilekwaa ogu-ịgba t’o je ataa ishi whẹ l’ẹka ono.
Mu l’a-dazhịbe whẹ ẹnya mee whẹ
ejo-iwhe, mu te emekwaru whẹ iwhe dụ ree.”
5Ọ kwa Nnajị-Ọha bụ
Onye-Nwe-Ọha bụru Onye-ishi-igwe-ọgu;
onye bụ, o -denyi mgboko ẹka, ya adazeshihu;
ndu lile, bu iya nụ atsọo ejo áwhụ,
alị ekoo whụla whụla g’ọo ẹka
ẹnyimu Nayịlu byarụ utso,
ntaantaa, ya azụda g’ọo ẹnyimu Íjiputu.
6Onye-Nwe-Ọha bẹ tụru ụlo eli l’imigwe buru,
woru akpamigwe whụshia l’eli mgboko.
Mini, dụ l’eze-ẹnyimu bẹ l’ookuje oku,
woru iya chịaru eliwhe l’owhu.
Ọ kwa Onye-Nwe-Ọha bụ ẹwha iya.
7Ọ waa iwhe Onye-Nwe-Ọha l’ekfu ndọwa:
“Unubẹ ndu Ízurẹlu
?unu lẹ ndu Kushi ta abụdu iwhe lanụ l’ẹka mu nọ?
?Tọ dụ ẹgube mu shi l’alị Íjiputu dufuta ndu Ízurẹlu,
bụ gẹ mu dufutaru ndu Fílistiya l’alị Kafụto,
ọ bụru gẹ mu dufutaru ndu Arámu l’alị Kiru?
8Ọwhu bụ ezhi-okfu bụ lẹ Nnajị-Ọha, bụ Onye-Nwe-Ọha
gudekwa ẹnya iya awhụkota
alị-eze ono, l’eme iwhe-dụ-ẹji.
Iwhe mu tụberu bụ lẹ mu l’e-mebyishi whẹ,
mee tẹ whẹ tọhu lẹ mgboko.
Ọle ẹpa Jékọpu bẹ mu l’ẹte emedu tẹ whẹ tọhu-gee.”
O nokwa iwhe Onye-Nwe-Ọha l’ekfu ndono.
9“Sụa, mu l’e-me iya, ya abụru iwu
mbụ lẹ mu l’a-yọ ọzo-ụlo Ízurẹlu
ayọyo yọchafuta whẹ lẹ mba gẹ mba ha.
Mu l’e-ye whẹ lẹ n-yọ yọo whẹ gẹ l’aayọje ẹsusa,
ọle mu ta abyadụ l’ekwe t’ọ dụ akpụru whẹ l’egeda l’alị.
10Ndu l’eme iwhe-dụ-ẹji lẹ ndibe
mu bẹ ogu-ịgba l’a-takọta ishi whẹ,
mbụ ndu ono, l’asụje l’ejo-iwhe te eshitakwa ẹka whẹ nọ,
t’o chisweru whẹ ẹhu.”
11“O -rwua nteke ono bẹ mu l’a-tuwhu ụlo Dévidi ono,
zeshihuru ezeshihu azụ ọdo.
Mu l’a-tụkwa-zhi ẹka ọ
dakpọshihuru adakpọshihu
bya emekwaa ya t’ọ bọ bụhe mkpọkoro ọzo-ụlo,
mbụ tụa ya kfụbe; ya adụ g’o shihawa dụ lẹ mbụ.
12Ọo ya bụ lẹ ndu Ízurẹlu l’a-lwụtakota ndu whuduru lẹ
Edọmu mẹe iwhe lile, bụ mba,
mu kuru tẹ whẹ bụru ndu nkemu.”
O nokwa iwhe Onye-Nwe-Ọha l’ekfu ndono, mbụ onye ono, bụ iya l’e-me iwhe lile ono t’ọ dụ.
13Ọ waa iwhe Onye-Nwe-Ọha l’ekfu ndọwa:
“Oge l’abyaakwa nteke bụ; ndu
l’akpata iwhe e meberu l’alị
gudekwadu iya l’ẹka akpata, ndu l’akọ ọkoro awata akọko,
ndu l’adzọshi mmẹe l’akpụru vayịnu gudekwadu iya
l’ẹka adzọshi, akpụru vayịnu awata achashị.
Mmẹe ọ̀whúú l’e-shi l’eli ugvu alashị gorogoro,
bya eshi l’eli nwugvu asọ gborogboro.
14Ndibe mu ono, bụ ndu Ízurẹlu ono, a kpụru lẹ ndzụ
bẹ mu l’e-dulatawhu azụ.
Whẹ atụkwaa mkpụkpu whẹ ono, ẹgbara shi kfụa
bya ebuchiwhu iya azụ ọdo.
Whẹ l’a-kọ mgbu vayịnu ngụa mmẹe, shi iya nụ,
whẹ agba mgbabu ria akpụru iwhe shi iya nụ.
15Mu l’a-dzabẹ ndu Ízurẹlu l’alị whẹ gẹdegede,
t’a bya l’e-whefubaa whẹ
ewhefu ọdo l’alị ono, mu nụru whẹ.”
O nokwa iwhe Onye-Nwe-Ọha bụ Chileke unu l’ekfu ndono.