2 Tímoti

Ẹkwo-Ozhi Nke Ẹbo, Pọlu Deru Nụ

TÍMOTI

¹Ẹkwo-ozhi-a bẹ shi l’ẹka mbẹdua, bụ Pọlu; mbụ mụbe onye Chileke kuru mee mu tẹ mu bụru onye-ishi-ozhi Kuráyisutu Jisọsu. Ọo Chileke ono bẹ zhiru mu sụ tẹ mu je ekfuru ndiwhe nke ọkpobe ndzụ ono, o kweru ụkwa lẹ ya l’e-shi l’ẹka Kuráyisutu Jisọsu nụ anyi.

²Onye mu l’ede iya anụ bụ gụbe Tímoti, bụ ẹguru nwa mu ono mu yeru obu.

Tẹ Chileke, bụ Nna mẹe Onye-nwe-anyi Kuráyisutu Jisọsu meeru ghu eze-iwhe-ọma; mekwaaru ghu who obu imiko; mekwaawho t’i buru guu.

Pọlu l’ekele Chileke; adụkwawho Tímoti obu

³Mu l’etu Chileke ẹwha, mbụ onye ono, mu gude obu mu g’ọ ha ejeru ozhi; lẹge nna mu ochee whẹ jeru iye ya; obu mu ta ata mu ụta. Iwhe bụ-zhia nteke bụ nteke mu l’ekfu anụ Chileke, mbụ eswe mẹe ẹnyashi bẹ mu l’anyatajẹ tua ya ẹwha l’okfu ẹhu ghu. ⁴Tímoti; mu nyatakwarụ-a ẹnya-mini ono, ghakahụru ghu l’ẹnya. Ọ bụru iwhe ono megeeru eghoro ghu l’egbu mu egbu. Mbụ-a; l’ọogu mu; agụshi mu ike tẹ mu lẹ ghu kpọgba iwhu ọdo nke ọwhu ẹswa l’e-ji mu obu. ⁵Mu l’anyatajẹkwaa ọkpobe ekwekwe ono, i kweru nke Onye-Nwe-Ọha. Ekwekwe ono bẹ ne ghu oche Lóyisu mẹe ne ghu Yunáyisu vuhaada ghu ro ụzo kwetadaa; o dokwaa mu whọ ẹnya l’o nokwawho gẹ gụbedua kwetaru. ⁶O noo iwhe mu kwoberu anyataru ghu iya sụ ghu; t’i mekwaa iwhe-ọma ono t’o meje ire, mbụ iwhe-ọma ono, Chileke shi l’ẹka ono, mu byabẹru ghu l’ishi nụ ghu nteke ono, mu kfuru nụ Chileke l’iswi ẹhu ghu. ⁷O noo lẹ Ume-Dụ-Nsọ ọwhu Chileke nụru anyi ta abụdu Ume l’emeje anyi t’anyi tsụje egvu. Ume-Dụ-Nsọ, ọ nụru anyi bụ ọwhu l’anụje anyi ike; bụkwaruwho Ume n-yemobu, bụkwaruwho Ume l’emekotaje t’anyi dụ ike sedekotaje onwanyị.

⁸Ọo ya bụ t’ị bị sọjekwa ẹnya nke ookfuru ndiwhe l’ị bụ onye nke Onye-nwe-anyi ono. Iwhere ẹhu mbẹdua ta adụjehunu ghu, mbụ mbẹdua ọwa, a tụru mkpọro l’okfu ẹhu Onye-nwe-anyi ono. Iwhe l’ii-mechia bụ t’i jee oke iwhe-ọtsulanu nke ghu l’iwhe-ọtsulanu ono, anyi l’eje l’iswi ẹhu ozhi-ọma ono. Chileke bẹ l’e-mekwaa t’ike ejeje iya dụ ghu. ⁹Ọo Chileke ono bẹ bụ onye dzọru anyi; kua anyi sụ t’anyi bya abụru ndu nkiya. Iwhe o kwoberu dzọfuta anyi ono ta abụkwa l’ọo nke iwhe-ọma, anyi metaru l’onwanyi. Iwhe meru o mee ya lẹkwawho l’ọ bụhawaro iwhe ọ tụbehawaru l’o noo gẹ ya l’e-me iya. O noo bụleruwho eze-iwhe-ọma; o meru anyi. Eze-iwhe-ọma ono, o meru anyi b’o shikwaroo l’ẹka Kuráyisutu Jisọsu mehaadaruro anyi tẹmenu o mee mgboko-o. ¹⁰Ọle ntaa b’ọ byaa emee, a whụ-dzuru eze-iwhe-ọma ono nkele Kuráyisutu Jisọsu ono, bụ Onye Ndzọta anyi bẹ byawaru l’eliwhe-e, bya emebyiwaa ike nke anwụhu. Ntaa b’o shiakwa l’ozhi-ọma ono, mewaa ndzụ ono t’ọ fụta iwhe, mbụ ndzụ ọwhu bụ a -nọduwa iya, eje anwụhubahee anwụhu.

¹¹Ọo Chileke ono bẹ họtaru mu tẹ mu bụru onye l’a-ryajẹ ozhi-ọma ono arya, mu abụkwaruwho onye-ishi-ozhi iya, bụru onye l’e-zhi iya ezhi. ¹²O nokwa iwhe meru mu l’ejekota iwhe-ọtsulanu-a, mu l’eje ọwa, mbụkwa tọ hẹkwa l’iwhere iya l’adụje mu. O noo lẹ mu marụ onye mu woru onwomu ye l’ẹka iya, mbụ; o dokwaa mu ẹnya ree l’ọo-dụ ike kwakọbe iwhe ono, mu yeru iya l’ẹka jeye mbọku ikpe. ¹³Tsolekwaruwho ọkpobe-okfu ono, ị nụru mu l’ọnu t’ọ bụru iya l’a-nọ akpozhiru ghu ụzo gẹ l’ịi-nọje ekfu okfu. Gudepyabelekwawho ekwekwe ono, i kweru nke Kuráyisutu yẹle oye obu ono, i yeru ndu ọdo. Iwhe ono bẹ bụkota iwhe tụkoru shikota l’atụgba ono, anyi lẹ Kuráyisutu Jisọsu tụgbaru bụru nnanụ. ¹⁴Kwabẹlekwaruwho ọkpobe-okfu ono, Chileke yeru ghu l’ẹka ẹnya. Ume-Dụ-Nsọ ono, bu l’ime anyi bẹ l’e-mee, gụ adụ ike letakota iya ẹnya.

¹⁵Mbẹ ị makwarụ-a lẹ ndu lile, nọ l’alị Éshiya, bụ ndu mu lẹ whẹ tụkoru eje ozhi-a bẹ tụkookwaru gbakashịhu, wehaa mu je akpakwaa lẹ Fáyigẹlosu mẹe Hemójinizu. ¹⁶Tẹ Onye-Nwe-Ọha meeru ndibe Onẹsíforosu obu-imiko, o noo nkele o shi anọje agba mu ume, iwhere mu ta adụje iya rọ gẹ mu nọ lẹ mkpọro-ọ. ¹⁷Lẹ nteke o beberu byarwua Romu b’ọ watalẹruwho anọ a chọ mu, achọshi mu ike jeye nteke ọ whụru mu. ¹⁸Tẹ Onye-Nwe-Ọha byiko yebukwaaru iya ẹka tẹ Chileke whụaru iya imiko mbọku ikpe ono. Gụbedua l’onwoghu bẹ marwetaru-a lẹge o yetaberu mu ẹka lẹ Éfesọsu.

Ọkpobe onye l’alwụ ọgu ẹhu Kuráyisutu

¹Ọo ya bụ, gụbedua, bụ nwa mu; tẹ Chileke mee t’i gude eze-iwhe-ọma ono, shi l’ẹka Kuráyisutu Jisọsu shihu ike. ²Ị nụwaru-a iwhe lile ono, mu kfuru l’edzudzu-ọha. Wota iya ye l’ẹka ndu goshiwaru lẹ whẹ gbarụ nke t’e gude ire whẹ ẹka, bụkwanu ndu l’a-dụ ike ezhi iya ndu ọdo.

³Jekwaa oke iwhe-ọtsulanu nke ghu l’okfu ẹhu Kuráyisutu Jisọsu, bụ iwhe gbarụ ọkpobe onye l’alwụ ọgu ẹhu Kuráyisutu. ⁴O to nwekwa onye ojọgu, nọ l’ẹka ọgu l’awhụ ẹwhu l’ekweje tẹ ọriri ẹhu iya nwuru iya ye l’ome iwhe ndu l’abụa ndu ojọgu l’emeje. Iwhe l’ọonoje eme nu bụ tẹ ya mee iwhe l’a-nọ atsọ onye-ishi, deru ẹwha iya l’ẹkwo ụtso. ⁵Ọdo bụru l’onye l’agba ọso bẹ l’eete ebujekwa obunggo onye kakọta agbagba, m’ọ -bụdua l’ọ gbarụ ọso g’a tụru iwu agbagba iya. ⁶Ọo onye l’akọ okfu, l’eseshi anya ike b’ọ gbarụ nke t’o vujeru ụzo ria iwhe e metaru l’okfu iya ọbu. ⁷Rịkwaa iwhe lile ono, mu l’ekfu arịri, lẹ Onye-Nwe-Ọha bẹ l’e-yetaru ghu-a ẹka mee t’iwhe ono dokota ghu ẹnya.

⁸Nyatakwa Jisọsu Kuráyisutu ono, Chileke meru, o shi l’ọnwu teta nọdu ndzụ. Jisọsu ono, bụ eri Dévidi, ọ bụru iwhe ono bụkota iwhe ọbu, ozhi-ọma ono mu l’ezhi l’ekfu. ⁹Ọo l’ọo lẹ mu l’ezhi ozhi-ọma ono bẹ meru iwhe mu l’eje iwhe-ọtsulanu-a, mu l’eje-e, mbụ a tụ-gee tụa mu mkpọro gẹ-woo lẹ mu bụ onye metaru ejo iwhe. Ọle ọbu, ?ọo a -tụ-gee mu mkpọro ọbu, ?a tụhunuru ozhi-ọma ono mkpọro. Tụswekwa, ọ tọ dụkwa onye ha nke ọotu ozhi-ọma ono mkpọro. ¹⁰O noo iwhe meru mu kwobe iswi ẹhu ndu ono, Chileke họtaru, anwugbukota iwhe lile-e l’obu, ọ kwa iya bụ nke ọwhu Chileke l’e-shikwanu l’ẹka Kuráyisutu Jisọsu dzọkwaa whẹ whọ, ya eshi nno nụ whẹ ndzụ, dụ biribiri, bụ ndzụ tututu-mịmimi. ¹¹Okfu-a bẹ kwa okfu e gude ẹka, kfuru sụ:

“Ọ -bụru l’anyi lẹ Kuráyisutu bẹ tụkoru

nwụhukota bẹ anyi l’iya l’a-tụkokwawho nọdukota ndzụ.

¹²Ọ -bụru l’anyi l’atajẹru iwhe lile nshi,

bẹ anyi lẹ Jisọsu l’a-tụkokwawho bụru eze.

Ọ -bụru l’anyi sụru l’anyi ta amadụ onye ọ bụ,

bẹ l’ọo-sụkwawho lẹ ya ta amadụ onye anyi bụ.

¹³Ọ -bụru l’anyi ta akfụshijedu ike l’iwhe anyi kfụru,

bẹ yẹbedua l’akfụshijekwa ike l’iwhe o kfụru,

nkele ọ tọ gbanwejedu iwhe o kfuru.”

Onye e kweru l’oojerwe ozhi ejerwe

¹⁴Nyatajẹru whẹ iwhe lile ono, gụ anọduje l’iwhu Chileke kfuaru whẹ iya kfushiaru whẹ iya ike sụ whẹ: tẹ whẹ ba anọjekwa abawhe mba okfu, l’adụa iwhe ọ patarụ. Ọ tọ dụkwa urwu dụ iya nụ, ọ lẹkwaa emebyi bẹ l’oomebyije ndu l’anụ iya nụ. ¹⁵Kebe ẹhu goshije whẹ lẹ Chileke dalewaru ghu, gụta ghu l’ị bụ onye gbarụ nke t’i jejeru iya ozhi, mbụ l’ị bụ onye ozhi iwhere ozhi, l’ooje l’ẹte adụa, tẹmenu ị bụru onye l’a-nọje ezhirwe ọkpobe-okfu ono ezhirwe, l’ewojeleru iya who tụa jalaa. ¹⁶Gụ ezelajeeru mkpọkoro okfu l’adụa iwhe ọ patarụ, o noo l’ẹgube okfu ono l’e-me ndu l’anụ iya nụ, whẹ alalahaa azụ azụ, whẹ anọhe eyeru Chileke ugvu. ¹⁷Iwhe whẹ l’ezhi l’adụje g’ọo ọnya-mgbawha, l’ababushi anụ. Ndu harụ lịru lẹ ndu ono, l’anọje ekfu ẹgube okfu ono bụ Hayimeníyọsu mẹe Filítosu. ¹⁸Whẹ hawarụ anọ etso ọkpobe-okfu ono nkele whẹ sụru lẹ ndu nwụhuru anwụhu gbee shiwanu l’ọnwu teta, nọdu ndzụ. Whẹ gude nno o nweru ndu ọwhu whẹ harụ enwunga enwunga, enwufu whẹ l’ekwekwe whẹ kweru nke Kuráyisutu. ¹⁹Ọle ukfu-ụlo ono, shihuru ike, Chileke tụru bẹ bụ enwubata enwubata. Iwhe ọhubama, Chileke deru l’ukfu-ụlo ono bụ: “Onye-Nwe-Ọha marụ-a ndu bụ ndu nkiya.” Iwhe ọdo, o defukwaaru iya whọ bụ: “T’iwhe bụ-zhia onye sụru woo lẹ ya bụ nke Onye-Nwe-Ọha sefukwawho ẹka l’ome ejo-ememe.”

²⁰L’ime eze-ụlo, ha shii ta abụlekwawho iwhe e gude mkpọla-ododo yẹle ope, vukota aswa kpụa bẹ l’adụje iya nụ kpụ. Iwhe a pyịru l’oshi mẹe ọwhu e gude ụrwa kpụa bẹ l’adụ-gejekwaa ya. Ndu bụru iwhe ọja-ama, ndu abụleruwho iwhe e gude eme iwhe. ²¹Ọo ya bụ, ọ bụru l’o nweru onye safụkotaru onwiya ejo iwhe ono, mu gụshiru ono, ọ kwa iya bụ l’onye ono dụwaa g’ọo iwhe ọja-ama ono, mbụ l’onye ono bẹ bụkotawaa nke onye nwe ụlo ono, l’agarụ onye nwe iya nụ ọkpobe mkpa, tẹmenu ọ bụru onye, e doberu kwabẹ tọ dụ ike jeeru Chileke iwhe bụ-zhia ọkpobe ozhi l’eejeru iya. ²²Ọo ya bụ t’ị gbalajẹeru ẹgu ome ejo-iwhe ono, l’anọje agụkaa unwokorọbya. Iwhe l’ii-mechia bụ t’ị kebe ẹhu meje t’ị bụru onye dụ chịriri, gụ egudepyabelekwawho ekwekwe, i kweru nke Kuráyisutu g’i gude iya. Gụ eye ndu ọdo obu, gụ lẹ ndu ọdo adụkwa l’odoo. O noo iwhe gụ lẹ ndu ono, l’egudeje obu-iwhoro akpoku Onye-Nwe-Ọha l’a-tụkoje emekota ndono. ²³Be eyejekwa ọnu l’okfu ntụtego eswe, l’ẹte adụa iwhe ọ patarụ. O noo l’ị maanarụ-a l’ẹgube iwhe ono bẹ bụlewho ụswo bẹ l’ookutsutaje. ²⁴Lẹ nwozhi nke Onye-Nwe-Ọha bụfutajekwa onye l’ẹte aswọje ụswo, ọ bụfutaje onye dụru madzụ lile odoo, onye ono bụfutajekwawho onye marụ gẹ l’eezhije iwhe, ya abụru onye l’anwụ-gbuje iwhe l’obu nteke e meru iya iwhe-dụ-ẹji. ²⁵Ọ bụfutaje onye l’ewozeje onwiya alị, akpozhiru ndu l’agbajẹ iya okfu ụzo. O noo l’o nwekwaruro gẹ l’oo-me Chileke ẹgbee yetaru whẹ ẹka, whẹ adaa onwowhe ụta haa iwhe-dụ-ẹji ono, whẹ l’emegbabe, lwakfuta Chileke, whẹ abya amakọtaru ọkpobe-okfu ono. ²⁶Ọo ya bụ ẹnya abya ekosahu whẹ, whẹ ajịfu l’ọnya ono, Oshifutuswe nmatarụ whẹ, bụ iya shi mee whẹ, whẹ l’eme iwhe bụ uche-obu Oshifutuswe ono.

Gẹ umere ndiwhe l’a-dụ l’oge ikpazụ

¹Iwhe lanụ ọwhu l’ịi-kalẹwho ogude ẹka bụ l’o -rwulewho l’oge ikpazụ ono bẹ ọkpobe iwhe-ọtsulanu l’a-byakwa. ²O noo lẹ nteke ono bẹ ndiwhe l’a-bụlewho: onyenọnu, ya abụru onwiya bẹ l’oo-ye obu kpụ, whẹ abụru ndu ẹkpiri okpoga, bụru ndu l’atụ ọnu onwowhe gẹ whẹ l’ahaa, bụru ndu l’eku onwowhe eku, bụru ndu l’anọje ewhu ndu ọdo iwhu, bụkwaruwho ndu karishiru ne lẹ nna nwụru whẹ nụ ẹka, whẹ abụru o-ria-ọmata whẹ, whẹ abụru ndu l’ẹte adụa iwhe l’adụjeru whẹ lẹ nsọ. ³Whẹ abụru ndu madzụ dụ ashị, bụru ndu iwhe l’ẹte alụfuje alụfu l’obu, bụru ndu l’atukobeje madzụ ibe whẹ iwhe l’oomee, bụru ndu l’ẹte adụje ike sedekota onwowhe, bụru ndu l’eme igiri g’ọo anụ-ẹgbudu, whẹ abụru ndu iwhe dụ ree l’adụje ashị. ⁴Whẹ abụru ndu l’enwujeru madzụ ibe whẹ ye l’ẹka ọhogu whẹ, whẹ abụru ekfu-ba-anụ whẹ, whẹ etsoru emewhe nwọ-ha-g’iya ọ-ha-g’iya, whẹ abụru ndu ka oye obu l’iwhe-ụtso amamẹ Chileke; ⁵whẹ abụru ndu l’anọje eme umere g’ọo ndu kwetaru nke Chileke, ọle whẹ te ekwetakwanu lẹ Chileke bẹ dụ ire. Byiko, kwachafụkwaru ẹgube ndu ono ẹnya. ⁶Ndu dụ nno bẹ bụ whẹ l’a-hajẹru ekpuwhe l’ụlo l’ụlo eduwhushiwhe ụnwanyi, l’ete enwee uche, mbụ ụnwanyi, metawaru ejo iwhe, ọ kwọwaru whẹ ẹhu, iwhe l’alowhu ẹgube ụnwanyi ono bụru ẹgu njọ gẹ njọ ha, dụkota iche iche l’anọje agụ whẹ. ⁷Ẹgube ụnwanyi ono bẹ l’ọonoje ewheshi uwhere ike tẹ whẹ nwụta iwhe, ọle whẹ ta abyakwanụ l’a-dụ ike takeru marwetakota ọkpobe-okfu ono. ⁸Ndu ono, l’anọje eduwhushiwhe ụnwanyi ono bẹ kwachiru ọkpobe-okfu ono ụzo lẹge Jánẹsu yẹle Jámbirisu kwachiru iya Mósisu lẹ nteke ndụ-ichee. Ndu ono, l’anọje eduwhushi ụnwanyi ono bẹ égò swewaru, ekwekwe whẹ kweru bẹ bụ ekwekwe, darụ l’ẹba l’ẹnya Chileke. ⁹Ọle ndu ono ta adụdu ẹka whẹ l’ejebebaa, madzụ lile atụko whụkota lẹ whẹ bụ ndu eswe, mbụnu-a lẹge madzụ lile whụkotaru lẹ Jánẹsu yẹle Jámbirisu bụ ndu eswe.

Iwhe Pọlu zhiru Tímoti t’o mejee

¹⁰Ọle gụbedua bẹ tsowaru iwhe mu l’ezhi, l’iitsookwawho umere mu, ọ bụkwaruwho iwhe mu tụberu lẹ ndzụ mu bẹ bụ iwhe ị wọpyaberu: ọ bụru iwhe ị tụberu lẹ ndzụ nke ghu; ọ bụru iwhe mu kweru b’ị wotaru: ọ bụkwaruwho iwhe i kweru. Ị whụakwaruwho gẹ mu l’atabejeru ndu ọdo nshi, whụakwawho gẹ mu yetaberu ndu ọdo obu mẹe lẹge mu l’anwụ-gbutabeje iwhe l’obu. ¹¹Ị makwarụ-a mkpamẹhu ono, a kparụ mu g’ọ ha mẹe iwhe-ọtsulanu lile ono, mu nọdu jegbabe, bụ iwhe tụkotaru dakfuta mu lẹ Ántiyọku mẹe lẹ Ayikóniyomu mẹe Lị́sutura. Sụa, mkpamẹhu, dakfutageeru mu l’ẹka ono ta abụkwa iwhe ekfukfu. Ọle Onye-Nwe-Ọha dzọkotalekwaru mu-a l’iwhe lile ono. ¹²Mbụkwa l’iwhe bụ ndu lile, l’ọogu ẹgu tẹ whẹ lẹ Kuráyisutu Jisọsu tụgba bụru nnanụ, tẹ whẹ shi nno nọdu ndzụ, dụ Chileke ree, bẹ l’aa-kpakọtakwawho ẹhu. ¹³Ọle ndu bụ ndu l’eme ejo-iwhe mẹe ndu l’anọje aghọ ụgho gẹ whẹ ha bẹ l’a-nọlewho aka njọ aka eje eje l’ome ejo-iwhe whẹ l’eme, whẹ egude nno duwhushia ndu ọdo, ndu ọdo eduwhushikwawho whẹbedua. ¹⁴Ọle ọbu, tẹ gụbedua l’onwoghu kfụshilekwawho ike l’ọkpobe-okfu ono e zhiru ghu, bụkwa iya whọ bụ iwhe i kwetaru; o noo l’ị makwarụ-a ndu bụ whẹ, zhiru ghu iya. ¹⁵Gụ anyatakwawhọ l’i shizhiawho lẹ dẹedeede makọtaru iwhe e deru l’ẹkwo Okfu Chileke. Ọo iwhe ono, e deru l’ẹkwo Okfu Chileke ono bẹ l’a-dụ ike mee ghu, gụ enweru mmamagụ nke ọwhu Chileke l’e-shi l’ekwekwe, i kweru nke Kuráyisutu Jisọsu dzọo ghu. ¹⁶Iwhe bụ iwhe e deru l’ẹkwo Okfu Chileke bẹ shikota l’ẹka Ume Chileke. Mkpa iya dụ t’e gude iya zhi ọkpobe-okfu ono mẹe t’e gudeje iya goshi madzụ ẹka o mesweru mẹe t’e gude iya kpozhia madzụ égò mẹe t’e gude iya hefuta madzụ t’onye ọbu bụru onye dụ chịriri l’iwhu Chileke, ¹⁷ọo ya bụ nggẹ onye nke Chileke akwakọbe-rwee ẹhu; kwabẹlewho akwabẹ ojeru Chileke ọkpobe ozhi, dụru iya nụ g’ọ dụlee.

¹Sụa, nyatakwa lẹ Kuráyisutu Jisọsu ono bụ iya bụ onye l’e-kpe ndu nọ ndzụ mẹe ndu nwụhuru anwụhu ikpe l’a-dawhu azụ ujiku lanụ, bya egoshi l’ọo ya bụ eze. Ọo ya bụ, mu nọkwa l’iwhu Chileke yẹle Kuráyisutu Jisọsu ono, ekfuru ghu iya ekfushiru ghu iya ike ²sụ ghu t’ị ryajẹkwaa ozhi-ọma Chileke ono arya, m’ọ -dụ ndu l’iikfuru iya uwhere anụnu mẹe tọ dụ whẹ iya, gụ eletalekwawho ozhi ghu ẹnya. Goshije madzụ ẹka o mesweru, gụ abajẹeru onye meru ẹji mba, gụ egudelekwawho ọta-nshi emeje t’obu shihu whẹ ike, gụ ezhijekwa whẹ whọ iwhe. ³O noo l’o nweru nteke ndiwhe l’ee-bechaa jịkalahaa ọkpobe-okfu ono anyi l’ezhi, ya abụleruwho ẹgu ejo iwhe l’agụ whẹ nụ bẹ whẹ l’a-gbatsoru. Whẹ achịkoo igweligwe ndu, l’ezhi iwhe ọdo tẹ whẹ bya ezhije whẹ iwhe l’atsọ whẹ ụtso lẹ nchị tẹ whẹ nụje. ⁴Whẹ ekwehe ngabẹ nchị l’ọkpobe-okfu ono. Ọwhu whẹ l’e-chebe nchị abụru l’akọ-iwhe. ⁵Ọle-a tẹ gụbedua l’ishi onwoghu sedekotajekwa onwoghu l’iwhe lile. Iwhe-ọtsulanu -byajẹru ghu, tajẹru iya nshi. T’ozhi, l’a-dụru ghu nụ bụru anọ arya ozhi-ọma ono arya, gụ ejekotagee ozhi, gbarụ ghu nụ, o noo l’ị bụ nwozhi Chileke. ⁶Lẹ mbẹdua bẹ ndzụ mu dụakwa g’ọo ẹja, l’a gbagewaa agbage, mbụ iwhe mu l’ekfu bụ l’ọ gbabewaru mu l’alala. ⁷Mu mewaru ike mu l’ọso ono, mu gbarụ; mu gbarwuwaru ẹka a kparụ oge. Mu kfụshiwaru ike l’ekwekwe, mu kweru nke Kuráyisutu. ⁸Iwhe wudurunu ntaa bụru tẹ Chileke nụ mu obunggo ọso ono, o doberu ngabẹru mu, mbụ lẹ Onye-Nwe-Ọha ono, l’ekpeje ikpe kfụru nhamụnha bẹ l’a-gụ mu l’onye dụ chịriri mbọku ikpe ono. Mbụ, ọ tọlekwa mu-a nwẹka mu bẹ l’oo-bu nggo ono kpụ. Oo-bukotagezhia ya iwhe bụ ndu gude obu whẹ ngabẹru abyabya iya.

Ozhi, Pọlu zhiru Tímoti nke iche

⁹Malẹkwaruwho gẹ l’ii-me byakfuta mu ẹgwegwa. ¹⁰O noo lẹ Dímasu bẹ wehawaru mu tụgburu nkele iwhe nke mgboko-o bẹ ka iya ree amamẹ Chileke. Ọ tụgbuwaa ntaa jeshia Tesalonáyika. Keresensu bẹ jeru Galéshiya. Táyitọsu jee Dalumésha. ¹¹Ntaa waakwaa Luku nwekiya bẹ nọdu swiru mu. Byiko tẹ gụ lẹ Makụ lịbukwaaru m’ị -byadẹ; lẹ mkpa iya dụkwa mu shii t’ọ bya eyetaru mu ẹka. ¹²Lẹ Tíkikọsu bẹ mu zhikwaru Éfesọsu. ¹³Ị -byata, chịtakwaru mu uwe ukpo mu whọ, mu harụ l’ibe Kápọsu lẹ Tirówasu. Gụ achịtakwaru mu whọ iwhe bụkota ẹkwo mu g’ọ ha, kelekele nke ndu onona, e gude pachimenti mee.

¹⁴Alẹguzánda ọwhu l’akpụ ụzu bẹ mekwaru mu ejo iwhe parụ ẹka. Ọle ọ kwa Onye-Nwe-Ọha bẹ l’a-kfụkota iya ụgwo iwhe o meru. ¹⁵Zelakwaaru iya gụbedua l’onwoghu, l’ọ kwatakwarụ kwachia ozhi-a, anyi l’ezhi ọwa ụzo.

¹⁶Lẹ nteke mbụ ono, mu vugezhia ụzo kfụru l’ụlo-ikpe, gọo ẹgo ishi mu; ta adụzhikwaa onye bụ onye mu, mbụkwa m’ọo onye lanụ. Onyenọnu tụkolekwaruwho wehaa mu. Byiko tẹ Chileke ba agụbukwaa ya yeru l’ọo iwhe-dụ-ẹji, whẹ mee ya. ¹⁷Ọo Onye-Nwe-Ọha bẹ bụ onye kfụkube mu agbẹe mu ọkpu-ike; ọo ya bụ nke ọwhu mu l’ezhikota ozhi-ọma ono tẹ ndiwhe l’owhu nụ-dzuru iya. Ọ kwa iya whọ bụ onye nafụtaru mu l’ọnu oduu. ¹⁸Ọ kwawhọ Onye-Nwe-Ọha ono bẹ l’a-nafụta mu l’iwhe bụ ejo-iwhe gẹ ejo-iwhe ha, dua mu gelee gelee, duru je edobe l’ẹka ọ bụ eze l’imigwe. Tẹ ọja-ama bụru nkiya jeye lẹ tututu-mịmimi. O noo g’ọ dụ.

Ekele, Pọlu gude kpọ-chia ẹkwo-ozhi iya ishi

¹⁹Jịaru mu Pyịrísuka yẹle Akwị́la mẹe ndibe Onẹsíforosu. ²⁰Ẹrásutosu bẹ kwakwarụ lẹ Kọ́rintu. Tirọ́fimosu bẹ mu hakwaru lẹ Milítọsu nkele ẹhu ta adụdu iya mma. ²¹Kebekwa ẹhu byaada tẹmenu ya ebe nteke oyi l’anọje atsụ.

Yúbulosu l’ajịkwa ghu rọ. L’ọojikwa ghu whọ mbụ Púdẹnsu mẹe Láyinọsu mẹe Kulọ́diya mẹwaro ụnwunna anyi ndu ọwhu gẹ whẹ ha.

²²Tẹ Onye-Nwe-Ọha chee ghu ndzụ.

Chileke emeeru unu g’unu ha eze-iwhe-ọma.