2 Tesalonáyika

Ẹkwo-Ozhi Nke Ẹbo, Pọlu Deru Nụ Ndu

TESALONÁYIKA

¹Ẹkwo-ozhi-a bẹ shi l’ẹka mbẹdua, bụ Pọlu, mu lẹ Sulivánọsu, ọwaa Tímoti abyarụ chọchi Tesalonáyika, bụ ndu nke Chileke, bụ Nna anyi; bụkwaruwho ndu nke Onye-Nwe-Ọha, bụ Jisọsu Kuráyisutu.

²Tẹ Chileke, bụ Nna mẹe Onye-Nwe-Ọha, bụ Jisọsu Kuráyisutu meeru unu eze-iwhe-ọma, mekwaawho t’unu buru guu.

Ikpe, Kuráyisutu l’e-kpe m’ọ -byalẹwho

³Ụnwunna anyi, ọ dụkakwa g’ọo ụgwo anyi jiru iya, mbụ l’anyi l’a-nọje-zhiawho ekeleru unu Chileke, nkele o noo iwhe rwuberu anyi l’ememe. O noo l’ekwekwe unu kweru nke Chileke bẹ kwatarụ akalẹwho oshihu ike aka eje eje; oye obu, unu lile l’ẹhu l’ẹhu yeru ibe unu l’akakwawhọ shii aka eje eje. ⁴O noo iwhe meru anyịbedua l’onwanyi l’egudeje unu anga l’ụnga l’iwhe bụkota chọchi Chileke. Ishishi ụnga ọbu, anyi l’anga bụru l’unu rwuchiru obu, kweshia ike l’iwhe unu kweru l’ẹhu ono, a kpakọtaru unu mẹe l’iwhe-ọtsulanu lile ono, unu jekotaru ono.

⁵O noo bụru iwhe unu l’e-gudekwanu ẹka marụ ntaa l’ọo ọkpobe-okfu lẹ Chileke l’ekpeje ikpe kfụru nhamụnha. Ọo iwhe lile ono, l’eme l’ẹhu unu l’e-me, unu abụru ndu gbarụ nke tẹ Chileke bụru eze unu, bụ iya bụ iwhe ọbu, unu l’anwụ ọnwu iya nta-a. ⁶Chileke bẹ bụ onye l’e-me iwhe dụ chịriri, mbụ l’iwhe bụ ndu ono meru, unu l’eje iwhe-ọtsulanu ono bẹ l’oo-mekwawho whẹ ejee iwhe-ọtsulanu. ⁷Unubẹdua ọbu, l’aakpa ẹhu ntaa bẹ l’oo-me, unu eworu ẹhu unu. O nokwawho gẹ l’oo-me anyịbedua. Nteke l’oo-me iwhe ono bẹ bụ nteke Onye-Nwe-Ọha l’e-shilewho l’imigwe abya yẹle ndu ojozhi-imigwe iya ono, bụ whẹ l’e-goshi g’ike iya hatabe shii. ⁸Ọo-nọdu l’ime ọku, l’enwu whuruwhuru, shi l’imigwe abya. Ọo-bya agwaa ndu l’amaa Chileke ọchi mẹe ndu l’ete eme iwhe ozhi-ọma ẹhu Onye-nwe-anyi Jisọsu kfuru. ⁹Ọchi ọbu, l’ọo-gwa whẹ bụ l’aa-bọfu whẹ l’iwhu Onye-Nwe-Ọha je edobe l’ẹka whẹ l’a-nọdu laa l’iyi jeye lẹ tututu-mịmimi. Ọo ẹka ono bẹ whẹ l’a-nọdu, whẹ ta abyahẹdu l’a-whụbaa Onye-Nwe-Ọha ẹnya, whẹ ta abya l’a-whụ ọdu-biribiri iya mẹe ike iya. ¹⁰O noo iwhe l’e-me mbọku ono l’ọo-bya. Ọo ya bụ nke owhu ndu nkiya, bụ ndu kwehawaru nkiya l’a-kwabẹ iya ugvu, jakwaa ya whọ ajaja. Unubẹdua l’onwunu bẹ l’a-nọdukwawho l’ẹka ndu nkiya ono nọ, nkele unu kwetaru ozhi ono, anyi bya bya ezhia unu.

¹¹O noo g’o gude anyi l’anọje-zhiawho ekfu anụ Chileke l’iswi ẹhu unu. Anyi l’asụje Chileke anyi ono t’o mee unu t’unu dụ nke ọnodu ndzụ ono, o kuru unu oku iya. T’o gudenu ike nkiya mee t’unu dụ ike mejee iwhe dụ ree, l’agụ unu ẹgu ememe; ya emekwaawho t’o dzua oke mbụ ndzụ ono, unu nọdu nke l’ọo l’unu kweru nkiya. ¹²Ọo ya bụkwanu e shi l’ẹka unu kwabẹ ẹwha Onye-nwe-anyi Jisọsu ugvu. Chileke eshikwanu l’ẹka Onye-nwe-anyi Jisọsu kwabẹ unubẹdua ugvu. Iwhe lile ono bẹ Chileke l’e-shikota l’eze-iwhe-ọma, l’oomeje mẹe nke Onye-Nwe-Ọha, bụ Jisọsu Kuráyisutu mekota.

Ọ-chị-nta Kuráyisutu

¹A bya abya ntaa lẹ nke abyabya Onye-nwe-anyi Jisọsu Kuráyisutu mẹe nke edzuko, l’oo-me t’anyi dzukobe t’anyi l’iya whụ, tụgba bụru nnanụ, bẹ mu l’aryọkwa unu, ụnwunna anyi sụ: ²t’ọ bọ tụfu-kebekwa unu ẹhu l’ọriri, obu te etekebehunu unu ete nkele a sụru unu lẹ mbọku ono, Onye-Nwe-Ọha l’a-bya rwuakwaru erwu. Unu be eyejekwa ọnu, mbụkwa e behuduru o -nweru onye bya asụ unu l’ọo iwhe Ume-Dụ-Nsọ kfuru bẹ ya l’ekfu, ọdua l’ọ kwa iwhe madzụ kfuru iya bẹ ya l’ekfu, ọdua l’ọo l’ẹkwo-ozhi b’e deru iya, a sụ l’ọo anyịbedua deru iya. ³Iwhe mu l’ekfulewho bụkwa t’unu be ekwekwa ekwekwe owhu t’o nweru onye l’e-duwhu unu. O noo nkele mbọku ono ta abyakwa l’abya jeye nteke l’oo-vuadaru ụzo bya, mbụ nteke ono ndiwhe l’e-kwefuru Chileke íkè ono mẹe nteke l’ọo-byaada mbụ Nwa-omebyi-iwu ono, bụ iya bụ onye ono, lafụtaje l’iyi. ⁴Nteke ọ -byalẹruwho bẹ l’ọo-sụ l’ẹgo atụaru yẹle iwhe lile, ndiwhe l’eku chi g’ọ ha m’ọbu iwhe lile, ndiwhe l’abarụ ẹja. Oo-woru onwiya dobe lẹ ya kakọta iwhe lile ono shii. Mbụ, oo-jegekwaa je asụgabe onwiya l’eze-ụlo Chileke sụ l’ọo yẹbedua bụ Chileke l’onwiya.

⁵Sụa, ?unu ta anyatahẹdu lẹ mu kfuhawaru iya unu nteke ono, mu l’unu tụkoru nọdu? ⁶Mẹ unubẹdua l’onwunu makwarụ-a iwhe l’akpọshi iya abyabya nta-a. Ọo ya bụ lẹ Nwa-omebyi-iwu ono l’a-byalẹwho lẹ nteke ọ gbarụ iya l’abyabya. ⁷Ike ono, l’ẹte awhụje l’ẹnya, bụ ike nke Nwa-omebyi-iwu ono l’emekwanu ire nta-a. Ọle yẹbedua ta abyakwa l’abya jeye nteke onye ono, sedekwaduru iya nụ l’a-tọcharu iya. ⁸Ọo ya bụ, ọ tọchaleru iya whọ ono, Nwa-omebyi-iwu ono abyatashia nteke ono, a whụ-dzuru iya. E megekwanua, Onye-Nwe-Ọha, bụ Jisọsu egude uwhere ọnu iya gbua ya. Ya abụru zaazaa ono, Onye-Nwe-Ọha l’a-nọ egbu nteke l’ọobya bụ mkpakọ iwhe l’e-me Nwa-omebyi-iwu ono, ya alaa l’iyi. ⁹Abyabya Nwa-omebyi-iwu ono l’a-bya bẹ bụkwa l’ike Sétanu bẹ l’oo-shi. Ọ -bya, ya emeshilahaa iwhe dụ biribiri, dụ-gee l’iche l’iche, bụ iwhe l’a-kpụbe ndiwhe ọnu okfu. O nokwawho gẹ l’oo-gude ụgho emekwawho iwhe a whụrulenya, dụ biribiri. ¹⁰Ya egude ejo ụgho mgbashị eduwhushi ndu ono, bụwaa ndu l’a-la l’iyi. Mbụ iwhe whẹ l’e-kwobe laa l’iyi ọbu a-bụkwaru lẹ whẹ jịkaru lẹ whẹ te eyedu ọkpobe-okfu ono obu, bụ iya gẹge adzọta whẹ. ¹¹O noo iwhe meru g’o gude Chileke buhaa whẹ, whẹ shiswee ụzo, shisweta iya nke ọwhu bụlewho iwhe l’ẹte abụa ọkpobe-okfu bẹ whẹ l’ekwetaje. ¹²Ẹka ọ wụkoru bụru lẹ ndu lile ono, l’ete ekwetaa ọkpobe-okfu ono, ọ bụ-chiaru ejo iwhe ka whẹ ụtso bẹ Chileke l’a-nmakọta ikpe.

Chileke họtaru unu tẹ ya dzọta unu

¹³Ụnwunna anyi, Onye-Nwe-Ọha yekwaru unu obu. Ọ dụakwa g’ọo ụgwo, anyi jiru iya, mbụ l’anyi l’a-nọje-zhiawho ekele Chileke ekele l’iswi ẹhu unu, nkele ọ dụhaadaro mbụ họta unu tẹmenu t’o mee mgboko, nke ọwhu ya l’a-dzọfuta unu, mbụ o jekwa l’e-shi l’ẹka Ume-Dụ-Nsọ l’eme ire l’ẹhu unu mẹe l’ekwekwe ono, unu kweru l’ọkpobe-okfu ono dzọta unu. ¹⁴O noo iwhe o shi l’ozhi-ọma ono, anyi zhiru unu ku unu oku iya, t’unu lẹ Onye-nwe-anyi Jisọsu Kuráyisutu gba mgba nweru ọdu-biribiri iya. ¹⁵Ọo ya bụ, ụnwunna anyi, unu kfụru kfụshia ike, unu egudeshia ya ike mbụ ọkpobe-okfu ono, anyi zhiru unu mẹ anyi gude ọnu zhia ya unu mẹ anyi deru iya unu ede l’ẹkwo-ozhi.

¹⁶Chileke, bụ Nna anyi bẹ goshiwaru anyi lẹ ya yeru anyi obu. O shi l’eze-iwhe-ọma ono, o meru unu dụa unu obu; shiwaro nno mee obu unu, o jewaro l’eshihu ike jeye lẹ tututu-mịmimi. Ọ bya emekwaawho, anyi marụ ọkpobe amama lẹ Chileke bẹ l’a-nụ anyi iwhe ono anyi l’ele ẹnya iya. Tẹ yẹle Onye-nwe-anyi Jisọsu Kuráyisutu ¹⁷mee t’obu unu shihu ike, mekwaawho unu t’unu shihu ike fụa nke ome iwhe dụ ree, unu l’eme eme, unu ekfujee iwhe dụ ree l’ọnu.

Unu kfuje nụ Chileke l’iswi ẹhu anyi

¹Ẹka anyi l’a-sụchi okfu anyi ono ishi, ụnwunna anyi, bụru t’unu kfuje nụ Chileke l’iswi ẹhu anyi. Unu sụ iya t’o mee t’ozhi-ọma nke Onye-Nwe-Ọha kabaa anọ ejedzuru ẹka lile ẹgwegwa, t’a kwabẹjekwawho ozhi-ọma ono ugvu l’ẹka lile, bụnua g’unu l’akwabẹje iyẹ ya. ²Unu ekfukwaruwho nụru anyi Chileke t’ọ dzọfuta anyi l’ẹka ndu ejo-ememe mẹe l’ẹka ndu njọ. O noo l’ọ tọ bụgbabedu ndiwhe l’owhu bẹ kweru ozhi-ọma ono.

³Ọle Onye-Nwe-Ọha bụ o-me-g’o-kfuru. Ọo ya bụ onye l’e-me t’unu shihu ike, ya echekwaawho unu t’ẹka onye-ejo-ụboku ono be erwu unu l’ẹhu. ⁴Anyịbedua bẹ Onye-Nwe-Ọha meekwaru, anyi ta awahẹru unu obu. O doru anyi ẹnya l’unu l’eme-e iwhe anyi sụru t’unu mejee, unu je l’e-meru iya tụgburu.

⁵Tẹ Onye-Nwe-Ọha duzhia unu ụzo, nke ọwhu unu l’a-kabaa anọ eye Chileke obu eje l’iwhu mẹe nke ọwhu ọta-nshi unu l’a-bụ ọwhu shi l’ẹka Kuráyisutu.

Madzụ jefutaje ozhi

⁶Ụnwunna anyi, iwhe anyi gude ẹwha Onye-nwe-anyi Jisọsu Kuráyisutu ekfuru unu ntaa bụ, t’unu jijeru ụba yeru iwhe bụ nwanna, ẹnyiru ozhi dụ, too meje iwhe ono, anyi zhiru unu t’unu meje. ⁷O noo l’unubẹdua bẹ marụ-a l’unu wọtafutaje ẹka anyi, mbụ eme g’anyi shi anọje eme nteke ono, anyi l’unu tụkoru nọdu. Anyi te eshikwa bụru ndu ẹnyiru ozhi nteke anyi l’unu shi nọdukota. ⁸M’ọ tọ dụkwa onye anyi rijeru nri iya nke ẹwoma. Iwhe anyi l’emejechia bụ l’anyi l’esetagejee anya eswe l’ẹnyashi jeye ike dụ ẹbo agvụ, nggẹ tọ dụ g’unu ha, onye ọwhu anyi l’a-pata mkpa ẹhu anyi je ebo t’ọ bụru iya ivu-ẹrwa. ⁹Iwhe meru anyi shi eme iya nno ta abụkwa l’ọ tọ gbadụ anyi nke t’anyi tụkwo unu mkpa ẹhu anyi. Iwhe anyi kwoberu shi eme iya kwa t’anyi gude umere anyi goshi unu iwhe unu l’e-letaje eme. ¹⁰Mbụ lụfuchakwaa lẹ nteke anyi nọ l’ibe unu bẹ anyi kfuhaakwaru unu iwhe-e kfushia ya ike sụ unu: “Onye kpọru ẹka kpọo ọkpa tọ dụ iwhe l’ọorwu, t’ẹ ba anụjekwa onye ọbu nri t’o ria.”

¹¹Iwhe anyi kwoberu ekfu iwhe-e bụ l’anyi nụwaru l’o nweru g’unu ha, ndu harụ bụru ndu ẹnyiru ozhi; ndu iwhe whẹ dụ l’ọzo iya bụ-zhiawho lẹ whẹ bụ ojeru-okfu l’eyeru whẹ; tọ dụhe iwhe ọdo, whẹ l’aga mkpa iya. ¹²Anyi gudekwa ẹwha Onye-Nwe-Ọha, bụ Jisọsu Kuráyisutu ekfuru ẹgube ndu ono, alọkwa whẹ whọ ẹka lẹ nchị sụ: tẹ whẹ nọdulewho nwandoo seje anya ẹhu whẹ; seta iwhe whẹ l’e-gude buru.

¹³Sụa, ụnwunna anyi, t’ike ba agvụkwa unu l’ome iwhe dụ ree.

¹⁴Nteke bụkwa l’o nweru onye jịkaru l’iya te emedu iwhe lile, anyi deru l’ẹkwo-ozhi-a, unu hụbelekwawho onye ọwhu ọbu ama. Unu kefu iya l’oke tọ bọ dụ-zhia iwhe unu l’iya l’e-jeje emegba, unu mee ye ya nno nke ọwhu iwhere l’a-dụ iya. ¹⁵Ọle t’unu be emekwa iya gẹ-woo l’ọo ọhogu unu; iwhe unu l’e-mechia bụ t’unu lọjee ya ẹka lẹ nchị, o noo l’ọo nwanna unu.

Iwhe Pọlu whẹ gude akpochi ẹkwo-ozhi-a ishi

¹⁶Tẹ Onye-Nwe-Ọha, bụ iya bẹ ẹhu ọdu guu l’eshije l’ẹka, mekwaa t’ẹhu dụjelewho unu guu nteke nteke, t’o mekwaawho t’ẹhu ọdu guu dụ unu l’iwhe bụ iwhe byarụ unu. Tẹ Onye-Nwe-Ọha nọdu swiru unu g’unu ha.

¹⁷Ekele-e, dụ l’ẹkwo-ozhi-a bẹ bụ mbẹdua, bụ Pọlu gude ẹka mu dee ya. Ọ waa gẹ mu l’edeje ede. O noo iwhe unu l’e-gudeje hụbekota ẹkwo-ozhi, mu deru ama.

¹⁸Tẹ Onye-Nwe-Ọha, bụ Jisọsu Kuráyisutu meeru unu g’unu hakọta eze-iwhe-ọma.