2 Pyita

Ẹkwo-Ozhi Nke Ẹbo,

PYITA

Deru

¹Ẹkwo-ozhi-a bẹ shi l’ẹka mbẹdua, bụ Sáyịmonu Pyita, mbụ mụbe onye l’ejeru Jisọsu Kuráyisutu ozhi, tẹmenu mu bụkwaruwho onye-ishi-ozhi iya.

Ndu mu l’ede iya anụ bẹ bụ unubẹ ndu ono, kwetaru woru onwunu ye Chileke l’ẹka lẹge anyịbedua l’ishi onwanyị kwetakwaruwho. Ekwekwe ono, anyi g’anyi ha kweru bẹ shi l’ẹka Jisọsu Kuráyisutu, onye bụ iya bụ Chileke anyi, ọ bụkwaru iya whọ bụ Onye Ndzọta anyi. Ọ kwa l’ọ bụnuka onye obu-ọma meru g’o gude o kweta t’anyi l’unu tụko kwetakota nkiya ishi nhamụnha.

²Mu l’ekfukwa tẹ Chileke mee t’unu kabaa ọma yẹbe Chileke ono, ya emekwaawho t’unu kabaa ọma Onye-nwe-anyi, bụ Jisọsu, marụ iya ọkpobe amama eje eje. Nggẹ eze-iwhe-ọma mẹe ẹhu ọdu guu erwube unu ẹka, rwube iya unu nke anyịnyi.

Chileke kuru unu; họta unu

³Anyi marwetaru Onye-Nwe-Ọha ono ree-ree-ree, mbụ onye ono, bụ iya kuru anyi t’anyi bya t’anyi lẹ ya gba mgba l’ọdu-biribiri iya mẹe l’iwhe ọma, l’ọonoje emegbabe. Ọo l’amama ono, anyi marụ iya bẹ Chileke shi gude eze ike nkiya, nụ anyi iwhe lile, mkpa iya dụ anyi; t’anyi gude nọduru yẹbe Chileke ndzụ; anyi emekwawho umere, l’egoshi l’anyi l’akwabẹ iya ugvu. ⁴Ọo eze ike iya ono b’o gudekwawho kweshia anyi ụkwa iwhe dụkota ree ọkpobe adụdu, mbụ iwhe ono karikwaruwho gẹ l’aa-nọ atụ ọnu iya, ọ kwanụ iya bụ nke ọwhu unu l’e-kwobekwanu iswi ụkwa iwhe ono, o kweshiru anyi gbẹe azụ l’omebyishi onwonye ono, ndu mgboko-o l’emebyishi onwowhe. Iwhe mekwaru iya bụkwaru lẹ whẹ l’etso ẹgu ejo iwhe l’anọje agụgbabe whẹ nụ. Unu kwobekwawho nke iwhe ono, o kweru unu ụkwa iya ono t’unu lẹ Chileke ono gba mgba meje umere ọma ono, l’oome.

⁵Ọo ya bụ, t’unu kebeje ẹhu sebaje t’unu meje umere ọma; yekobe l’anọdu ono, unu nọduwaa Chileke l’ẹka. Iwhe ọdo, unu l’e-mekwaruwho eyekobe l’umere ọma ono, unu l’eme abụru anọ anwụ g’unu l’e-shi kabaa ọma Chileke, unu anwụkwawho ome iwhe ọ sụru t’unu mee. ⁶Iwhe ọdo, unu l’e-yekobefua l’amama ono, unu marụ Chileke abụru esede, unu l’e-sedeje onwunu. Iwhe ọdo, unu l’e-yekwa l’osede onwunu ono abụru ọtaru iwhe nshi; iwhe l’a-nọ etso ọta-nshi ono abụru ugvu, unu l’a-nọ akwabẹ Chileke. ⁷Unu l’akwabẹ Chileke ugvu ono, t’unu hejekwa onwunu l’unu bụkwa ụnwunna, tụkoru nọdu Kuráyisutu l’ẹka. Iwhe ọdo, unu l’e-yekobe l’oye ụnwunna obu bụ eyewaro madzụ lile obu. ⁸Ọ -bụru whọ l’unu l’eme ẹgube umere ono, mbụ unu l’emezhiwa iya eje l’iwhu bẹ unu l’ẹte abụkwaa ọ-ga-lẹ-mkpa madzụ whẹ. Ọo ya bụ l’unu l’a-nọlewho akabaa ọma Onye-nwe-anyi Jisọsu Kuráyisutu aka eje eje. ⁹Ọle-a, ọ -bụkwaru l’o nweru onye woru onwiya ye Kuráyisutu l’ẹka, iwhe lile ono teke erwubee ya ẹka, onye ono dụkwa g’ọo onye l’atsọ ishi, mbụ ọlewho l’onye ono ta awhụdu ụzo ilile. Onye ono bẹ gbẹwanu nyazọwanu l’ọo Jisọsu bẹ sachafụkotaru iya iwhe-dụ-ẹji ono g’ọ ha, onye ono metakotaru kpua onwiya nteke ono, l’ooto wooru onwiya ye Kuráyisutu l’ẹka.

¹⁰Ọo ya bụ ụnwunna mu; ọ kwa unu bụ ndu Chileke kuru, họta unu t’unu bụru ụnwu iya. O noo iwhe unu l’e-kwobe kebezhiawho ẹhu eseba t’unu gude umere unu goshi l’unu bụwhoo ụnwu iya l’ezhi. Lẹ nteke unu l’emewaa iwhe dụ-gee nno bẹ unu l’ẹte abyakwaa l’e-shiswe ụzo. ¹¹Unu l’emewaa nno, ta adụhe-zhikwaa iwhe bya l’anọ-chi unu ụzo t’unu ba abahụshi l’ẹka Onye-Nwe-Ọha, bụ Jisọsu Kuráyisutu bụ eze tututu-mịmimi, mbụ Jisọsu Kuráyisutu ono bụ iya bụ Onye Ndzọta anyi.

¹²O noo iwhe meru mu je l’anọjelewho anyatajẹru unu iwhe lile ono. Mu makwarụ-a l’unu makọtahawaru iya; tẹmenu unu kfụkwaruwho kfụshia ike l’ọkpobe-okfu ono, e zhiru unu. ¹³Mu l’arị l’ọ ka mma tẹ mu nyatakọtaru unu iwhe lile ono ntaa, mu nọkwadu ndzụ; gude gbẹe unu ọkpu-ike. ¹⁴O noo lẹ mu marụ-a l’o to nwehedu gẹ mu l’anọ-bekwadu ntaa; mu alashia, o noo lẹ Onye-Nwe-Ọha, bụ Jisọsu Kuráyisutu bẹ goshiwaru mu l’o rwuwaru mu l’alala. ¹⁵Mu l’e-kebeshizhiawho ẹhu ike anyatajẹru iya unu nke ọwhu unu l’ẹte abyaa l’anyazọ iya anyazọ, mbụ lụfu-gee lụfu lẹ nteke mu l’a-lashiwaa.

Ndu gude ẹnya whụa ugvu, Chileke kwabẹru Kuráyisutu

¹⁶Lẹ nteke anyi l’ezhi unu nke ike Jisọsu Kuráyisutu ono, bụ Onye-nwe-anyi, mbụ nke ike ono, l’oo-gude bya ọdo, bẹ l’ọoto bụkwa akọ-iwhe, madzụ rịtaru l’ọriri iya bẹ anyi kọru unu. L’anyịbedua l’ishi onwanyị bẹ gudekwa ẹnya anyi whụa ọdu-biribiri iya. ^17-18Ọo nteke anyi l’iya tụkoru nọdu l’eli ugvu ono, Chileke họtaru, bẹ bụ l’ẹka ono bẹ Chileke, bụ Nna goshiru anyi ogbu-zaazaa iwhoro nkiya, bụkwanu iwhe o gude kwabẹ Jisọsu ugvu. Iwhe ono bẹ meru nteke Chileke, bụ onye ike iya mẹe biribiri iya kangokotaru iwhe lile sụru iya: “Onye ọwa bụ Nwa iya nwoke, ya yeru iya obu shii. Ọo ya bụ onye l’emeje iwhe dụ iya ree shinene.” Mbụ anyi nụkwaa olu ono, shi l’imigwe kfua iwhe ono.

¹⁹O nokwa iwhe meru anyi kabaa okweshi ike; l’iwhe lile ono, ndu nkfuchiru Chileke kfuru bẹ bụkota ọkpobe-okfu g’ọ ha. Unu ngabẹjekwa nchị mee iwhe whẹ kfuru; l’ọ kwa unu l’eme iya; bụ l’unu l’eme ree. O noo l’ozhi whẹ ono bụ iwhoro l’echi lẹ mgboko-o, iwhe-dụ-ẹji meru; ọ gbakọta tsụrikiti-a. Iwhoro ono l’a-nọ-zhiawho echi jeye chi-asahu; Kuráyisutu abya ọdo. Kuráyisutu ono l’a-dụ-zhiawho g’ọo kpokponde mbọ-muchi, l’anọje echi whorowhoro jeye chi-asahu. Oo-me iwhoro iya ono; ya angashịa l’ime obu unu. ²⁰Ọwhu kagezhia, bụ ọwhu unu l’a-mazhiadanu bụ l’ọ tọ dụkwa onye fụru nke egude uche nke ẹka iya marụ iwhe iwhe ono, ndu nkfuchiru Chileke deru l’ẹkwo Okfu Chileke bụ. ²¹Iwhe meru ọ dụ nno bụkwaru l’ozhi ono, ndu nkfuchiru Chileke shi anọje ezhi lẹ ndụ-ichee ta abụdu iwhe whẹ rịtaleruwho l’uche whẹ. Ọo Ume-Dụ-Nsọ bẹ l’edu whẹ tẹ whẹ kfua okfu, shi Chileke l’ẹka.

Ndu l’asụje lẹ whẹ bụ o-zhi-iwhe Chileke, l’ẹbe abụ lẹ whẹ bụ iya

¹Lẹ nteke ndụ-ichee b’o nwejehaakwaruro ndu sụjeru lẹ whẹ bụ ndu nkfuchiru Chileke l’echilabọ ndu Ízurẹlu; ọ bụru ejire bẹ ndu ono l’adzụshi sụ l’ọo Chileke bẹ whẹ l’ekfuchiru. O nokwawho g’ọ dụkwawho ntaa ndono. O nwekwaruwho ndu l’a-nọdu l’echilabọ unu ntaa ekfuwhe t’a sụje lẹ whẹ bụ ndu l’ezhi ọkpobe-okfu; ya abụru ejire bẹ whẹ l’a-nọ adzụshi. Iwhe whẹ l’ezhi abụru ọkpobe-okfu ono bẹ whẹ l’ewotaje gude ẹregede yekobe iya ejire ezhi. Iwhe ono, whẹ yekoberu iya bụkwanuru iwhe l’e-gbee mee t’onye kwetaru iya nu laa l’iyi. Whẹ l’a-jịka-gekwaa jịka Onye-nwe-whẹ-nụ, bụ Jisọsu, mbụ onye ono, bụ iya gbatarụ whẹ l’ẹka iwhe-dụ-ẹji, whẹ shi emegbabe. O noo iwhe meru iwhe-dụ-ẹji ono, whẹ metaru tukoru whẹ l’ishi. Ọ bụru iya l’e-me; whẹ abụru iyi ẹgwegwa. ²Ikpoto madzụ l’e-bechakwaa tsolahaa whẹ melahaa ejo ememe. Ya abụru iwhe whẹ l’a-nọ emegbabe bẹ ndu l’ẹte abụa ndu nke Chileke l’e-kwobe kfubyishide ọkpobe-okfu ono bụ iya bụ ụzo Chileke ono, anyi l’etso. ³Ndu ono, l’anọje ezhi unu iwhe ono, l’ẹte abụa ọkpobe-okfu bẹ bụ-zhiawho ẹkpiri okpoga bẹ l’eshitaje whẹ iwhu. Whẹ bya l’ekfu; whẹ atụko ejire, dụ lẹ mgboko dzụshia kụberu unu. Whẹ egude nno dowhube unu; ria unu ọkpobe urwu okpoga. Ọle a ta anọhekwa ọdu nta-a; Chileke anma ẹgube ndu ono ikpe. O noo nkele Chileke kfuhawaru iya roo lẹ ndụ-ichee dobe edobe. Mbụ l’iwhe ono, bụ iya l’e-gbu ndzụ whẹ te ekujekwa mgbẹnya.

⁴Sụa, unu nyatakwa iwhe Chileke meru lẹ nteke ndụ-ichee. Lẹ Chileke ta ahakwa ndu ojozhi-imigwe ono, meru iwhe-dụ-ẹji tẹ whẹ riru iya ẹwoma. Ọ tụkwaru whẹ chee l’ọku alị-maa. Ọ bụru ẹka ono b’a tụru whẹ mkpọro dobe; whẹ nọdu lẹ tsurikiti ẹkpuroochi ngabẹru mbọku ikpe. ⁵Ọ kwawhọ nno bụ gẹ Chileke l’ẹte ahaa ndiwhe ono, meru iya iwhe dụ iya ẹji lẹ nteke ndụ-ichee tẹ whẹ riru iya; o chikwaa eze utso ono, gbarụ ụda; gbaa mgboko b’o meru; ọ bya erigbushia ndu mgboko nkele whẹ te eyeduru yẹbe Chileke ugvu. Ndu ọ dzọru kwa nwa akpụru ụmadzu ẹsaa; Nowa kwe whẹ ẹsato. Mbụ Nowa ono, shi anọje aryarụ iya ndiwhe arya sụ whẹ; byiko ro; tẹ whẹ mejero iwhe Chileke sụru tẹ whẹ mee. ⁶Chileke bẹ nmakwarụwho mkpụkpu Sódomu yẹle Gọmóra ikpe; mee ya; ọku dzụkota iya; ọ bụru ntụ-ekpofu; mkpụkpu labọ ono chihu lẹ mgboko l’owhu. Iwhe ono, Chileke megeeru b’o meru gude goshi ndu l’ẹte akwabẹ yẹbe Chileke ugvu ẹgube iwhe ya l’e-me whẹ. ⁷Ọ lẹkwawho nwoke ono, bụ Lọtu bẹ Chileke dzọru l’alị ẹka ono, ndu ono, l’eme iwhe-dụ-ẹji bu. Lọtu ono bụkwanuru nwoke, dụ chịriri l’iwhu Chileke. Nteke ono shi abụje ndu alị ono l’eme ejo ememe ono, dụtaru ẹji tsọo ilu; ya adụ Lọtu ẹji shii; ya atsụ iya lanụ atsụshi iyẹ ya ike. ⁸O to nwezhidua oge, fụtaru afụta, nwoke ono l’ẹte anurwushije nchị; whurwushia ẹnya l’ejo ememe ndu ono, yeru ẹka l’ome ejo iwhe l’emegbabe. Iwhe lile ono, l’oogudeje ẹnya iya whụa mẹe ọwhu l’ọonu lẹ nchị bẹ l’anọje emeshi iya ẹhuka ike l’obu, mbụ obu yẹbe onye ono, l’ẹte adụa ẹka iwhe l’aa-ta iya ụta dụ iya l’ẹhu. ⁹O noo goshiru lẹ Onye-Nwe-Ọha bẹ marụ-a gẹ l’oo-me dzọo ndu woru onwowhe ye iya l’ẹka. Ọ makwarụwho gẹ l’oo-me yeru whẹ ẹka tẹ whẹ nahụ iwhe-ọtsulanu, byakfutaru whẹ nụ. Iwhe ono goshikwawho lẹ Onye-Nwe-Ọha bẹ marụ-a gẹ l’oo-shi tuchia ndu l’eme ejo iwhe l’ẹka whẹ l’a-nọdu; a nụ-zhia whẹ whọ awhụ iwhe-dụ-ẹji, whẹ metagbaberu jeye mbọku ikpe. ¹⁰Ndu ọwhu l’ọo-kagezhia njọ bụ ndu ono, l’eme ejo iwhe ono, mbụ ndu iwhe l’anọje-zhiawho agụ whẹ bụ tẹ whẹ mee iwhe g’iwhe ha ono, ẹgu iya l’enwu whẹ whuruwhuru l’ẹhu, mbụ iwhe bụ whẹ mee ya; whẹ emerwushia onwowhe, mbụ ndu l’ẹte adụa onye whẹ l’ekweje nụaru okfu.

Ndu ono, l’anọje ezhi iwhe l’ẹte abụa ọkpobe-okfu ono; ndu ono bụkwa ekfu-ba-anụ; whẹ l’anọje eku onwowhe eku; ndu ono ta atsụjekwa egvu okfubyishi ẹwha ndu ono, l’ẹte awhụje l’ẹnya l’ogbu-zaazaa l’igwe. ¹¹Lẹ ndu ojozhi-imigwe bẹ kakwa ndu ono ike ọkpobe akaka; kakwa whẹ whọ onwe ume, ọle ndu ojozhi-imigwe ono te ejejekwa je anọdu l’iwhu Onye-Nwe-Ọha, bụ Chileke ekfutoshi whẹ lẹ whẹ l’eme iwhe-dụ-ẹji. ¹²Ndu lile ono, l’anọje ezhi iwhe ono, l’ẹte abụa ọkpobe-okfu bẹ dụlewho g’ọo anụ-ẹgbudu, l’ete enwee uche ilile. A nwụru whẹ tẹ whẹ bya anọdu lẹ mgboko-o t’a nmata whẹ l’ọnya gbua. Ọo iwhe l’ete edoo whẹ ẹnya ilile bẹ whẹ l’e-gudeje ekfubyishi. Ọo gẹ l’eegbuje anụ-ẹgbudu bụ gẹ l’ee-gbu whẹbedua; whẹ alaa l’iyi. ¹³O noo urwu, whẹ l’e-rita l’ejo iwhe ono, whẹ yeru ẹka eme. O noo lẹ whẹ l’anọje eme iya; iwhere iya ta adụje whẹ. Mbụkwa je akpaa l’echi oke-eswe bẹ whẹ l’anọjelekwaa eme tẹ whẹ ria iwhe ono, ẹgu iya l’enwu whẹ whuruwhuru l’ẹhu, mbụkwa ẹhu atsọlekwa whẹ-ẹ ụtso mẹ whẹ l’eme iya. Ọo iwhe iwhere mbụ iwhe ono. O noo iwhe meru iwhe-e je l’abụkwawho iwhere nke unu mẹ unu haa whẹ, whẹ tsoru unu eri nri nteke unu dọkoberu eri nri. Whẹ l’a-nọjero ajakpọshi unu, unu eje amarọo lẹ whẹ l’aghọ unu ụgho. ¹⁴Lẹ ndu ono bụ ẹnya awhụ nwanyị. Ọobuje ẹnya whẹ whụa nwanyị; ya agụ whẹ; ọ dụ g’e shi whẹ lẹ nwanyị ono zẹe. Ọ tọ gụnyajedua whẹ mbụ ẹgu ome iwhe-dụ-ẹji; gubua whẹ agubu. Ọ tọ tajẹduru whẹ l’ẹka ike; whẹ edota ndu ọwhu ọkpa l’ete eshihua ike l’iwhe ono, whẹ kweru; nmata whẹ l’ọnya. Iwhe doru whẹ ẹnya bụlewho gẹ whẹ l’e-shi kpata okpoga; whẹ metawaa nke okpoga ono jeye ọ baa whẹ l’ụvuru. Ọle Chileke bẹ tụwaru whẹ ọnu. ¹⁵Whẹ hawarụ ọkpobe ụzo ono, kfụru nhamụnha shiswee ụzo; aghawhe ririri. Whẹ mewaru ẹgube umere ono, Bélamu, bụ onye nkfuchiru Chileke lẹ ndụ-ichee meru. Bélamu ono bụ nwa Bósoru. Iwhe Bélamu shizhiawho ye ẹnya nteke ono bụlewho okpoga. O yeta iya ẹnya nke ọwhu o shi abụje Bélamu -whụ-gee iwhe-dụ-ẹji; ọ -mazhiaru l’okpoga l’e-rwu iya ẹka; ya ejelee je eme iwhe ọbu nggẹ ya vuta okpoga ọbu. ¹⁶Chileke baarụ iya mba iwhe ono, l’oome; sụ iya l’ọ kwa iwhe-dụ-ẹji bẹ l’oome l’o to kwedu anụru iya okfu. A nọnyaa, ọ bụru nnata nkakfụ-ịgara, a machacharụ-a l’o too kfudu okfu bẹ kfulahaaru okfu g’ọo madzụ; kpọshia onye nkfuchiru Chileke ono umere onye ọgvu, l’ọocho ememe.

¹⁷Ndu ono, l’ezhi ejire ono bẹ bụ ọ-ga-lẹ-mkpa bẹ whẹ bụkota. Whẹ dụ g’ọo okpuru, mini tahụwaru. Whẹ dụ g’ọo ẹgube-ẹ igweli l’erwugee erwu nke ọchi mini; whẹrewhere abya ewhekashia mini ono. Chileke bẹ nmawarụ whẹ ikpe. Ẹka whẹ l’a-nọdugburu bụ l’ẹka gbarụ tsụrikiti. Ọo whẹ b’e doberu ẹka ono, gbarụ tsụrikiti ono ngabẹru. ¹⁸Whẹ l’anọje-zhiawho ekfu g’ọo whẹ ka; g’ọo whẹ ka; ekfuwhe mkpọkoro okfu; whẹ egude iwhe ono, ẹgu iya l’enwu whẹ whuruwhuru l’ẹhu riwaru whẹ ụvuru gude kwebe ọnya; nmata ndu ono, bụ-wokwadua bẹ whẹ nahụru ndu ono, l’eshiswe ụzo, whẹ lẹ whẹ shi tụko bụru iwhe lanụ. ¹⁹Whẹ l’ekwetaje whẹ ụkwa l’onye l’emezhiwaa iwhe whẹ l’ezhi bẹ bụ-zhiawho ẹgube umere, dụ onye ono ree bẹ l’ọo-nọ eme. Ọle whẹbedua l’ishi onwowhe te enwekwanu onwowhe. Whẹ bụ ohu umere, l’eshi nshi ono, whẹ l’eme. O noo l’ọo iwhe ka madzụ ike; mee ya eriri bẹ onye ọbu bụ ohu iya. ²⁰O nwekwaru-a nteke ndu ono shi marụ Onye-Nwe-Ọha, bụ Jisọsu Kuráyisutu ọkpobe amama, mbụ Onye Ndzọta anyi ono. Whẹ te etsohe ejo ụzo ono, l’emerwuje madzụ. Tọ dụ iya bụ l’a nọnyaa; ejo umere ono, whẹ shi emekaa dawhu azụ bya eria whẹ ụvuru ọdo; ka whẹ ike; mee whẹ eriri. Ọ kwanụru iya bụ; ọnodu ẹhu whẹ abyakwanụ aka njọ karụ g’o shihawaa dụ lẹ mbụ. ²¹Ọ gọ kakwarụ ọ dụ g’ọ bụ ndu ono mma lẹ whẹ ta amajẹdu ụzo, bụ: madzụ -shia ya; Chileke agụa ya l’onye dụ chịriri amamẹ l’onye ono mageeru-a ụzo nke Chileke t’o megee bya atsuwhu azụ lẹ ya te etsohedu iwu Chileke ono, e zhiru iya. ²²Ọ kwa iya bụ l’iwhe ono, l’aanmajẹ l’ẹtu evuru ire l’ẹhu onye ono bụ iya bụ ẹtu ono, l’aanmajẹ sụ: “Ọo nkụta l’abụje ọ -nwagee ẹnwa; ya eje eriwhu iya azụ.” Ẹtu ọdo bụru lẹ: “Ọo ezhi bẹ l’abụje a ghụ-gee ya ẹhu; ya adawhu azụ l’ẹpoto je arwaswilahaa onwiya.” O noo gẹ ndu ono dụ ndono.

Onye-Nwe-Ọha l’a-bya ọdo

¹Ndu mu yeru obu; ẹkwo-ozhi-a bẹ kweekwa ẹkwo-ozhi labọ, mu l’ederu unu ntaa. L’ime ẹkwo-ozhi labọ ono bẹ mu dewaru gude agbẹe unu ọkpu-ike nggẹ unu wata anọ arị ọriri iwhe lile ono, e zhiru unu. ²Ọo ya bụ, unu nyatakwa iwhe ono, ndu nkfuchiru Chileke kfuru lẹ nteke ndụ-ichee. Mbụ ndu ono, dụ nsọ. Unu nyatajẹkwawho iwhe ono, Onye-Nwe-Ọha ono, bụkwawho Onye Ndzọta shi l’ẹka ndụ-ishi-ozhi iya zhia unu. ³Iwhe ọwhu l’e-vuzhiada nụ ụzo doo unu ẹnya ndọwa: lẹ tẹmenu mgboko-o agvụ b’o nwekwaru ndu, l’ẹte adụje ike sede onwowhe l’ẹgu ejo iwhe l’enwu whẹ whuruwhuru l’ẹhu, l’a-dụ-gee nteke ono. Whẹ l’a-bya anọdu aja unu ewenu; ⁴asụje unu: “Mbẹ Jisọsu kwetaru unu ụkwa lẹ ya l’a-bya ọdo. ?Ndẹhunu iya ọbu ntaa? Nna anyi ochee whẹ gvụakwaru gẹ whẹ ha t’ọ bya; iwhe lile bẹ dụkwaa g’ọo dụ eshi nkeshi mbọku mgboko futaru byeye nta-a; ọ tọ dụkwa iwhe gbanwejeru. ?Ọo gụnu mehunuru tọo bya ọdo ọbu?” ⁵Ndu ono, l’ekfu nno bẹ kelekwaru-a eke jịka, jinyia ẹnya lẹ whẹ ta arịdu ọriri iwhe ono, Chileke meru nteke ndụ-ichee. L’ọo okfu, Chileke kfuru l’ọnu kpụ b’o gude mee igweli mee alị. Ọwhube alị shi lẹ mini dụ: ọ bụru mini ono meru ndzụ dụ lẹ mgboko.

⁶Mgboko ọwhu shi dụ nteke ono bẹ Chileke meru mini: ọ chịa; rigbushia iwhe shi dụ iya nụ; ọ bụru iwhe iyi yitaru. ⁷Igweli ọwa, anyi nọ lẹ mkpula iya ẹgube-ẹ ntaa mẹe alị ọwa, anyi l’adzọkaa ọkpa bẹ bụkwa Chileke bẹ gude okfu-ọnu iya sede iya t’ọ nọdu jeye mbọku ono, ọku l’a-dzụpyata iya. Ọo mbọku oke ikpe Chileke bẹ ọku ono l’e-ke iya. O noo mbọku, Chileke l’a-nma ndu l’ẹte anụru iya okfu ikpe; mee whẹ whẹ abụru iyi.

⁸Ndu mu yeru obu; o nweru iwhe lanụ, unu l’a-tụbe nvọ. Iwhe ọbu bụ lẹ Onye-Nwe-Ọha ono ta adụkwa g’ọo anyịbedua. L’ẹnya nkiya bẹ ujiku lanụ dụlekwa iya-a g’ọo ụnukurunu awha; ụnukurunu awha dụkwa iya whọ g’ọo ujiku lanụ. ⁹Iwhe ndiwhe l’ahajẹru arị bụ lẹ Onye-Nwe-Ọha l’anọnukawaa ọdu. L’abyabya ono, o kweru ụkwa lẹ ya l’a-bya bẹ l’ọoto byahẹdu, ọle ọ tọ dụdu nno. O mefutaje iwhe o kweru ụkwa iya. Iwhe kpatarụ tọko dawhua azụ nkeshi ono bụkwa l’ọotaru unu nshi. Ọ tọ dụdu iya nke t’ọ dụ onye ọwhu l’ala l’iyi. Iwhe dụ iya ree bụ tẹ madzụ lile daa onwiya ụta; tẹ madzụ lile sefu ẹka l’ome iwhe-dụ-ẹji; lwakfuta Chileke.

¹⁰Iwhe l’e-do unu ẹnya bụ lẹ mbọku Onye-Nwe-Ọha l’a-bya bẹ l’abyakwa-a. Mbọku ono l’a-bya nteke l’ẹte adụhee onye l’ele ẹnya iya. Oo-mezhiawho lẹ whẹrekete bya g’onye oshi l’abyajẹ. Onye oshi ta adụdu onye l’amajẹ nteke l’ọo-bya. Mbọku ono bẹ igweli l’e-deru gbagbagbagba mihu. Iwhe lile, dụ l’igweli, mbụ kpokponde mẹe ọnwa mẹe ẹnyanwu bẹ ọku l’a-dzụpyata. Mgboko-o, dụ ẹgube-ẹ l’owhu mẹe anya lile, madzụ seru dobe iya bẹ ọku l’a-dzụkota. ¹¹Eshi-ọwhu unu mawarụ l’iwhe lile-e, dụ lẹ mgboko-o bẹ ọku l’e-kepyata; ọ kwa iya whọ bụ t’unu kwachafụkwaruwho onwunu ẹnya; meje umere, gbarụ unu l’ememe. Unu nụjeeru Chileke okfu, unu eworu ndzụ unu g’ọ ha ye iya l’ẹka t’ọ bụkotaru nkiya. ¹²Unu chị-zhiaruwho ẹnya ye; ngabẹru mbọku ono, Chileke l’a-bya emebyia mgboko. Unu gude obu unu g’ọ ha kebe ẹhu jejeru Chileke ozhi nke ọwhu mbọku ono l’a-byakebe ẹgwegwa. Lẹ mbọku ono bẹ Chileke l’a-tọ ọku l’igweli; oke okpomọku apaa ẹka nke ọwhu iwhe bụkota kpokponde mẹe ọnwa mẹe ẹnyanwu l’a-dazeshihukota. ¹³Ọle Chileke bẹ kwekwaru anyi ụkwa igweli ọwhuu mẹe mgboko ọwhuu. O noo bụwaa ndu dụ chịriri l’ẹnya Chileke l’e-bu iya kpụ. Ọo mgboko ọwhuu ono bẹ anyi l’ele ẹnya iya.

¹⁴Ọo ya bụ, ndu mu yeru obu; ọ kwa iya bụ gẹ unu l’ele ẹnya iwhe lile ono; t’unu kebelekwawho ẹhu dobe onwunu ọga; t’ọ bọ dụ ẹka unu l’e-meta iwhe l’aa-ta unu ụta iya l’iwhu Chileke, unu lẹ Chileke adụkwawho lẹ mma. ¹⁵Unu anyatakwa l’iwhe ọbu, kpatarụ Chileke takwadụa nshi ngabẹkwadu; toko mebyia mgboko-o bụ l’oomekwadu tẹ ya habaadarụ unu ụzo t’unu bya tẹ ya dzọo unu. Ọ kwawhọ iwhe ono bẹ nwanna anyi Pọlu, anyi yeru obu dehaakwaruwho unu l’ẹkwo-ozhi ono, o detaru unu. Ọ kwa Chileke bẹ meru iya: ọ marụ ágụ; dee ya nno. ¹⁶L’iwhe bụ ẹkwo-ozhi lile, Pọlu ono deru g’ọ ha l’ẹka lile, o kfuru okfu gbaa ọkpa l’okfu-a; b’o kfukwaru-a okfu iwhe-e, l’ee-bechaa menu-a. Iwhe lile ono, Pọlu nọdu deshia ono bẹ nwekwaru ọwhu l’ookfuje; ya eje ekwe doo ẹnya. Ọ bụru iwhe ono meru iwhe ndu l’ẹte amaa iwhe, mbụ ndu ono, ọkpa l’ete eshihua ike l’ekwekwe, whẹ kweru nke Chileke l’ewotaje iya ghaa ya igharawhu; bụnua gẹ whẹ l’anọje aghawhe iya igweligwe iwhe ọdo, e deru l’ẹkwo Okfu Chileke. Ya abụru nno bụ gẹ whẹ l’emeje jeye whẹ eshi nno lọta ọla-l’iyi tukobe onwowhe l’ishi.

¹⁷Ọo ya bụ, ndu mu yeru obu; eshi unu dụhawaro mbụ makọtaru iwhe lile ono; t’unu kwachafụkwaru onwunu ẹnya tẹ ndu ejo ụboku ono be eduwhu unu; tẹ whẹ be eme unu t’unu kweta l’ejire ono, whẹ l’adzụ-whe bụ ọkpobe-okfu. T’unu be ekwekwa tẹ whẹ mee t’unu kpaswahu; haa ọkpobe ụzo ono, unu shi kfụru kfụshia ike, unu te ekwehunu tẹ whẹ mee unu t’unu nyazọo ọkpobe-okfu ono, unu kwetaru. ¹⁸Iwhe unu l’e-melewho bụ t’unu marụ Onye-nwe-anyi Jisọsu Kuráyisutu, bụkwa iya whọ bụ Onye Ndzọta anyi ọkpobe amama eje eje. Unu anata ẹka iya nke ọwhu unu l’a-dụ g’ọo ya. Ọo ya nwẹkiya kpụ bụ onye anyi l’a-nọ-zhiawho akwabẹ ugvu, akwabẹ iya mbọku-mbọku jeye lẹ tututu-mịmimi. O noo g’ọ dụ.