2 Kọ́rintu

Ẹkwo-Ozhi Nke Ẹbo, Pọlu Deru Nụ Ndu

KỌ́RINTU

¹Ẹkwo-ozhi-a bẹ shi l’ẹka mbẹdua, bụ Pọlu l’ede; mbụ mụbe onye Chileke kuru mee tẹ mu bụru onye-ishi-ozhi nke Kuráyisutu Jisọsu. Onye mu l’iya l’ede ẹkwo-ọ bụ nwanna anyi Tímoti.

Ndu anyi l’ede iya anụ bụ chọchi nke Chileke lẹ Kọ́rintu mẹe iwhe bụ ndibe Chileke l’alị Akáya l’owhu.

²Tẹ Chileke, bụ Nna anyi yẹle Onye-Nwe-Ọha, bụ Jisọsu Kuráyisutu meeru unu eze-iwhe-ọma, mekwaawho t’unu buru guu.

Pọlu l’ekele Chileke

³Unu t’anyi kele onye ono, bụ Chileke, bụkwaro iya whọ bụ Nna nke Onye-nwe-anyi Jisọsu Kuráyisutu. Ọo ya bẹ bụ Nna ọwhu obu imiko nkiya nyịru gẹ l’aa-nọ atụ ọnu iya, bụru Chileke ọdu obu l’owhu shikota l’ẹka. ⁴Ọo ya bẹ bụ onye l’adụje anyi obu l’iwhe bụkota-gezhia iwhe-ọtsulanu, byakfutaru anyi nke ọwhu anyi l’a-dụkwanu ike dụa ndu ọdo, l’eje iwhe-ọtsulanu obu g’ọ dụlee. Anyi egudejekwanu ọdu obu ono, Chileke l’adụ anyi gude adụ ndu ọdo. ⁵O noo l’ọo g’anyi l’eketa oke l’iwhe-ọtsulanu ono, Kuráyisutu jeru bẹ bụ g’anyi l’e-ketakwawho oke lẹ ọdu obu ono, shi l’ẹka Kuráyisutu ọbu. ⁶Sụa, ọ -bụru l’anyi nọ lẹ mkpamẹhu; mkpamẹhu ono bụkwa gẹ l’ee-shi t’obu shihu unu ike, tẹmenu anyi nọdukwa iya whọ, nnta gẹ l’ee-shi t’a dzọfuta unu. Nteke bụ lẹ Chileke l’adụkwanu anyi obu, o noo bụru iwhe unu l’e-gude rwuchia obu, taa nshi nteke unu l’a-nọ eje ẹgube iwhe-ọtsulanu ono anyi l’eje. ⁷Ọobuje anyi -nyata unu, anyi asụ l’anyi marụ-a l’unu l’a-kfụshia ike. Iwhe meru anyi l’arịje iya nno bụ l’anyi marụ l’ọo g’unu l’eketa oke l’iwhe-ọtsulanu ono, anyi l’eje bụ g’unu l’e-ketakwawho oke l’obu ono, Kuráyisutu l’adụ anyi.

⁸Ụnwunna anyi, iwhe anyi l’eme t’unu makọtaru bụkwa nke iwhe-ọtsulanu ono, anyi nọdu jee lẹ Éshiya. Njenwu-ẹhu, anyi jeru l’ẹka ono b’e metakwaru anyi nke ọwhu ọ dụ g’ọo onye e boru ivu, l’anyị-kwo iya olu. Mbụ ẹrwa iya dọpyabetakwanu anyi nke ọwhu anyi l’ẹte arịhenu m’ọo l’anyi l’e-megee bya abụru ndu ndzụ ọdo. ⁹Mbụ sụa, anyi shi rịa l’e kpewaru anyi nkfugbu. Ọle iwhe ono bẹ tụkoru bụru iwhe l’e-me t’anyi ba arịje l’anyi l’a-dụ ike dzọo onwanyị mẹkwawho t’anyi wotachia onwanyị ye Chileke l’ẹka bụ iya bụ Chileke ono, l’adụje ike mee t’onye nwụhuru anwụhu shi l’ọnwu teta nọdu ndzụ. ¹⁰Ọ dzọtaru anyi l’ejo ọgu ono, ge ri anyi ishi ono. Mbụ ọ bụkwaru nno bụ gẹ l’ọonoje adzọ anyi adzọ. Ọo ya bụ onye anyi l’ele ẹnya l’ẹka l’ọo-dzọ anyi ọdo. ¹¹Unubẹdua l’onwunu, t’unu yekwaruwho anyi ẹka, kfuje nụru anyi Chileke. Ọo ya bụkwanu a ha l’igweligwe kele Chileke ekele ẹhu anyi. Mbụ; e kele iya nke eze-iwhe-ọma ono, o meru anyi, l’ọ nụru olu ikpoto ndu l’ekfu anụ iya.

G’ọ nwụru, meru Pọlu gbanwee iwhe ọ tụberu nke ememe

¹²Obu anyi bẹ meru iya, o doo anyi ẹnya lẹ ntụpo ta adụdu l’umere anyi, ntuwhu-ire ta adụ iya, kelekele mẹ a bya l’ẹhu anyi l’unu. Umere anyi kfụru nhamụnha l’iwhu Chileke. O noo iwhe ọbu, anyi gude anga ụnga ndono. Ọ tọ bụkwa lẹ mmamagụ nke ndiwhe b’o shi. Ọ kwa eze-iwhe-ọma, Chileke l’eme. ¹³Iwhe anyi l’ederuwho unu bụkwa iwhe bụ: unu -gụa ya, unu adụ ike makọtaru iwhe o kfuru. Mu l’elekwa ẹnya l’iwhe ono l’atụko dokota unu ẹnya ree-ree-ree; ¹⁴mbụ iwhe ono, doberu unu ẹnya ibe lanụ ibe lanụ ono nta-a. Unu marụ lẹ mbọku, Onye-nwe-anyi Jisọsu l’a-bya b’ọ bụ anyịbedua l’a-bụ iwhe unu l’e-gude anga, lẹge unubẹdua l’a-bụkwanu iwhe anyi l’e-gudekwawho anga.

¹⁵Ọ kwa l’o doru mu ẹnya l’unu marụ iwhe ono meru g’o gude mu shi sụ lẹ mu l’e-vuada ụzo bya agbawhee unu. Abyabya mu ono gege eme mẹ iwhe ekweru unu nkwere-labọ. ¹⁶Iwhe mu doberu bụ lẹ mu l’a-byaadaa bya agbawhee unu, mu eshiwaro eli eli jeshia Masedóniya. Mu -lwadẹru mẹ mu abatakwawhọ ọdo mẹ unu eduwa mu roo ije tẹ mu jeshia Judíya. ¹⁷?Ọ dụ unu gẹ mu shi agha onwomu agha nteke ono, mu shi tụa ije mu ọbu nno? ?T’unu doberu sụ lẹ mu l’ekfuje iwhe nke mu g’ọo ndiwhe, l’akwagebeje akwagebe tẹ whẹ sụ: “Ee”, sụkwawho: “Wawa” l’ugbo lanụ? ¹⁸Ọo Chileke ono, bụ Chileke gbarụ t’e gude ire iya ẹka bẹ marụ l’iwhe anyi nọdu kfukotaru unu ta abụkwa izuwhu nkwe okfu “Ee” yẹle “Wawa”. ¹⁹Lẹ Jisọsu Kuráyisutu ono, bụ Nwa Chileke ono, anyi tụkoru kfuaru unu okfu iya, mbụ Sulivánọsu kfuru unu, Tímoti kfua ya, mbẹdua bya egudekwawho ọnu mu kfua ya, ta abụkwa ẹgube onye l’abụje ọ sụnyaa: “Ee”, ya abya asụ: “Wawa” l’ugbo lanụ. G’ọ gbẹ-chia dụ kwa lẹ Kuráyisutu ono -sụwaa: “Ee” bẹ oomedzuje iwhe o kfuru. ²⁰Ọo ya bụ lẹ Chileke shi l’ẹhu yẹbe Kuráyisutu ono emedzukota iwhe lile, ọ sụru lẹ ya l’e-me. O noo g’o gude anyi l’eshije l’ẹka Kuráyisutu ono zụa mgbede sụ: Amenu, nggẹ e shi nno kwabẹ Chileke ugvu. ²¹Ọo Chileke bẹ bụ onye l’emeje t’onye l’unu kfụru kfụshia ike lẹ Kuráyisutu. Ọo Chileke meru t’onye l’unu kweta nke Kuráyisutu, ọ bụkwaru iya whọ họtaru anyi. ²²O meru anyi iwhe-ọhubama l’ẹhu, gude goshi l’anyi bụ nkiya, o wota Ume-Dụ-Nsọ iya, ye l’ime obu anyi gude goshi iwhe ono, o kweru ụkwa lẹ ya l’e-bechaa meeru anyi.

²³Ọo Chileke ono bẹ bụ onye mu l’aryaku l’ẹka-ebe mu. Ọo ya marụ l’ọo ejire, ọdua l’ọo ezhi-okfu bẹ mu l’ekfu. Iwhe kpọshiru mu, mu tẹke abyaa Kọ́rintu byeye ntaa bụkwa nggẹ mu ta abanụkaru unu mba shii. ²⁴Anyi te emekwa t’ọ bụru anyi l’a-tubujeru unu iwhe unu l’e-kweta, eshi unu kfụshiru ike l’ekwekwe, unu kweru nke Kuráyisutu. Iwhe anyi l’adzọ bụkwa t’anyi l’unu tụko gba mgba mee t’ẹhu-ụtso unu kabaa shii.

¹O noo g’o gude mu gude obu mu g’ọ ha sụ lẹ mu tẹke abyadẹdua ụzo iya nke unu, bya akpatsua unu áwhụ ọdo. ²Lẹ nteke ọ buchia l’ọo mu l’akpatsu unu áwhụ ọdo, ?ọ hụnu onye ole ọdo bẹ l’e-me t’ẹhu tsọje mu ụtso, l’abụhee ndu ọbu, mu kpatsuru áwhụ-a? ³O nokwa g’o gude mu dee iwhe ono, mu deru l’ẹkwo, t’ọ bọ bụ: mu -bya, ya abụru ndu ọbu gege eme t’ẹhu tsọo mu ụtso l’agbechia kpatsua mu áwhụ. L’iwhe doru mu ẹnya bụ l’unu -mezhiwaa, ẹhu tsọo mu ụtso bẹ ẹhu l’a-tsọhukwaa unubẹdua ụtso. ⁴Nteke mu l’ederu unu ẹkwo ono bẹ l’ọotsukwa mu l’ẹhu shii. Áwhụ jizhia mu who obu, mbụ ẹnya-mini awhụ fụkwaru mu l’ẹnya. Mu te edekwa iya tẹ mu kpatsua unu áwhụ. O chịkwaa t’ọ bụru iwhe l’e-me t’unu marụ lẹ mu yeru unu obu.

Ọguru onye a hụru ahụ nvụ

⁵Ọ -bụru l’ọ dụ onye kpatsuru onye ọdo áwhụ, ọ tọ bụkwa mbẹdua bẹ onye ọbu kpatsuru iya, ọ kwa unu g’unu ha b’ọ kpatsuru áwhụ ono, ọle tẹ mu be ejeshi iya roo ekfunuka. Iwhe mu l’ekfulewho bụ l’o wuduru mẹe ya abụkotaru unu g’unu hakọta b’ọ kpatsuru áwhụ ọbu. ⁶Onye ono bẹ mu l’ekfukwa lẹ ahụhu ono, unu ha l’igwe hụa ya bẹ duwaa ree. Unu ba ahụhekwa iya ọdo. ⁷Iwhe unu l’e-gbechia mee bụ t’unu gabẹlewho ẹka ntaa gụaru iya nvụ, unu adụa ya obu; a nọnyadaawho ọ tsọta áwhụ, obu chifu iya. ⁸Ọo ya bụ, byiko, iwhe unu l’e-me ntaa bụ t’unu natawhu iya azụ nggẹ ọ marụ l’unu yeru iya obu. ⁹Iwhe mu kwoberu deeru unu ẹkwo whọ bụkwa tẹ mu datalẹdaa unu; marụ: ?unu l’emekota iwhe lile ono, mu sụru t’unu meje. ¹⁰Iwhe bụ onye unu gụru nvụ bẹ mbẹdua l’ishi onwomu gụakwaru nvụ. Iwhe lile, mu gụru madzụ nvụ iya, mbụkwa m’ọ -bụkwaru l’o nweru iwhe mu gụru madzụ nvụ iya, bẹ bụkwa l’iswi ẹhu unu bẹ mu nọ l’iwhu Kuráyisutu gụa ya. ¹¹Ọo ya bụ nke ọwhu l’ee-shikwanu nno nọ-chia Sétanu t’o bo gbagbu anyi l’ẹregede; eshi anyi tụkoru makọtaru iwhe ọ tụberu, majia ya ẹnya.

Pọlu nọ lẹ Tirówasu

¹²Sụa, lẹ nteke ono, mu rwuru Tirówasu je ozhi ozhi-ọma nke Kuráyisutu bẹ mu rwukwaru je awhụa lẹ Kuráyisutu gụhawaru ụzo, gheberu mu ọnu ọkpobe eghebe tẹ mu jeeru iya ozhi. ¹³Ọle mu rwuru, ẹhu te egvuru mu egvuru nkele mu rwuru; mu ta awhụ nwanna anyi Táyitọsu l’ẹka ono. Tọ dụ iya bụ lẹ mu aparụ whẹ haa, tụgbua, ọ bụru mu oje Masedóniya.

Otso Kuráyisutu atụ okoo

¹⁴Ekele bụru nke Chileke l’o shiwaa l’atụgba ono, anyi lẹ Kuráyisutu tụgbaru bụru nnanụ edu anyi; anyi l’ejewhe atụ okoo nke ọwhu bụ ẹka lile anyi jeru, e shi l’ẹhu anyi marụ onye yẹbe Chileke bụ mẹe nke ọwhu ozhi-ọma ono l’a-vọ ẹka lile kfurukfuru g’ọo iwhe mkpọ iya l’eshi kwẹkwekwe. ¹⁵E -kfude iya ekfu, mu asụ l’ọo l’iwhu Chileke bẹ anyi dụ g’ọo mkpọ ozhi-ọma ono, mbụ mkpọ ono, vọru kfurukfuru rwua ẹka ndu Kuráyisutu l’adzọta adzọta nọ, vọkwaru iya whọ jekfu ndu ọwhu l’ala l’iyi. ¹⁶L’ẹhu ndu ọwhu l’ala l’iyi bẹ mkpọ ozhi-ọma ono l’eshikwa whẹ ọnwu-ọnwu, eshigbu whẹ eshigbu. Ọle l’ẹhu nke ndu ọwhu Kuráyisutu l’adzọta adzọta b’ọ bụ mkpọ iwhe l’emeje tẹ ndzụ dụ whẹ. Ọo ya bụ, ?ọo onye fụru jekota ẹgube ozhi ọwhu dụ nno? ¹⁷Anyi te egudekwa ozhi-ọma ono agba nghọ, bụ iwhe igweligwe ndu ọdo gude okfu Chileke eme. Ọle anyịbedua, Chileke zhiru-a bẹ l’egudeje obu-iwhoro ekfu okfu ono l’iwhu Chileke bụ iya bụ iwhe gbarụ ndu l’ejeru Kuráyisutu ozhi. Anyi te emedu t’anyi gude iya ria urwu.

Akahụ iwu yẹle nke ọwhuu

¹?Ọo dụ unu g’anyi watawaru anọ ajakpọshi onwanyị ọdo? Tọo woo: l’ọo tẹ ?e deedaru ẹkwo l’anyị bụ ndu ire-lanụ nụada anyi t’anyi goshi unu lẹge ndu ọdo l’anụje iya unu, ọdua ọ bụadaru l’ẹka unu bẹ anyi l’a-natadaa ẹgube ẹkwo ono parụ lẹge ndu ọdo l’apajẹ? Ọ tọ dụdu nno. ²Ọo unubẹdua l’onwunu bẹ bụ ẹgube ẹkwo ono nke anyi-o, mbụ ọwhu e deru dobe anyi l’obu t’onyenọnu gụjee ya t’o doo ya ẹnya. ³Ọo t’unu goshije l’ọo unubẹdua bẹ bụ ẹkwo ọwhu Kuráyisutu deru nụ anyi t’anyi goshije, mbụ ẹkwo ọwhu l’ẹte abụa mini-ẹkwo b’e gude dee ya. Iwhe e gude dee ya bụ Ume nke Chileke, mbụ Chileke nọ ndzụ. Ẹka, e deru iya ta abụ l’ẹwhuru, dụ g’ọo okpekpu. Ẹka e deru iya bẹ bụ l’obu madzụ.

⁴Iwhe anyi kwoberu ekfu iya nno bụ lẹ Kuráyisutu mewaru anyi t’anyi gudeje ire Chileke ẹka. ⁵Iwhe mu l’ekfu ta abụkwa l’o nweru ike, dụ anyi l’ẹhu, bụkwanu iwhe anyi l’e-kede ẹka ekfu l’anyi dzuru g’anyi l’e-me ẹgube iwhe ono. Lẹ ike, anyi nweru bẹ bụkwa Chileke b’o shi l’ẹka. ⁶Ọo yẹbedua bẹ bụ onye meru, anyi dzua nke t’anyi meje t’a marụ nke ọgbandzu ọwhuu ono shi iya l’ẹka. Ọ tọ bụhekwa iwu, e deru l’ẹkwo bẹ l’ọonu anyi nta-a. Ọ kwa Ume-Dụ-Nsọ nkiya bẹ l’ọonuje. L’iwu ọwhu e deru l’ẹkwo l’egbukwa mgbu-ọnwu, ọle Ume Chileke l’anụje ndzụ.

⁷Sụa, ọ kwa l’ẹwhuru, dụ g’ọo okpekpu b’a pyịru iwu ndụ-ichee ono l’eli iya. T’a gụfukwaro l’iwu ono bẹ Chileke tụru goshi lẹ madzụ lile nwụhuje l’ọo l’e doswewaru iya, o noo bẹ dụkwa iche, ọle a nụleruwho iwu ono, ọcha-vaa nke Chileke nwua vaa nke ọwhu ụnwu Ízurẹlu l’a-dụa ike lee Mósisu ẹnya l’iwhu. Ogbu zaazaa ono bụlekwaru-a iwhe l’e-chihu echihu. ⁸Ọ -bụru l’akahụ ụzo iwu ono bẹ shi l’ọcha-vaa ọwhu dụ nno, ?o chia ụzo ọwhuu ono bụ iya bụ ụzo nke Ume-Dụ-Nsọ bẹ l’ete egbeduanu ka ogbu zaa-zaa, mbụ ụzo ono, bụ: e -shia ya, e nweru ndzụ tututu-mịmimi. ⁹Ọo ya bụ, ọ -bụru l’ụzo nke iwu ono bẹ meru Chileke nmalẹe ndiwhe ikpe ọnwu l’egbu zaa-zaa nno, ?o chianu ụzo nke Ume-Dụ-Nsọ, l’emeje ndiwhe tẹ whẹ bụru ndu dụ chịriri l’iwhu Chileke ta akadụnu ogbu zaa-zaa? ¹⁰Ọo ya bụ l’e -kfude iya ekfu, mu asụ l’ogbu-zaazaa nke ụzo mbụ whọ ta adụhedu iwhe ọbu l’ẹka ogbu-zaazaa ono, nyịru gẹ l’aa-nọ atụ ọnu iya dụ nta-a. ¹¹Lẹ nteke ọ bụ l’ụzo nke iwu ono, l’echihu echihu ono goshiberu ogbu-zaazaa nke Chileke nno, ọo ya bụ l’ụzo nke Ume-Dụ-Nsọ ono l’a-nọgburu jeyewaro bẹ l’a-kabaarọ ogoshi ogbu-zaazaa Chileke.

¹²Ọo ya bụ l’eshi ẹnya anyi dụ l’ẹgube iwhe dụ nno bẹ anyi nwewaru ọnu-okfu. ¹³Mẹ anyi te emekwa g’ọo Mósisu, jeru je achịta ẹkwa whuchia iwhu tẹ ndu Ízurẹlu ba awhụ iya iwhu jeye nteke ogbu-zaazaa ono l’a-tọodaa nwẹhu nyihụ-geeda. ¹⁴Tọ bụkwa lẹ whẹ ta awhụdu iya. Chileke kwechishiru whẹ ẹnya nkele ọobuje whẹ l’agụ ẹkwo nke ọgbandzu Chileke lẹ ndụ-ichee ono, mbụkwa byeye ntanụ; ya adụ gẹ-woo l’ẹgube ẹkwa ono kwechikwaru whẹ whọ iwhu, tẹ whẹ ba ama iwhe whẹ l’agụ. Ọlewho atụgba onye lẹ Kuráyisutu nwẹkiya l’a-tọfu ẹkwa ono. ¹⁵Mbụ, ọobujekwa nteke l’agụ ẹkwo iwu Mósisu ono, mbụkwa byeyekwaa nta-a, ya adụ gẹ-woo l’e gude ẹgube ẹkwa ono kwechia uche whẹ. ¹⁶Ọle, ọ dụ-a g’ọo ẹgube-ẹ ẹkwo-okfu Chileke kfuru nke Mósisu sụ: “Ọobuje nteke ọ ghachiwaru Onye-Nwe-Ọha iwhu, ẹkwa ono awhụfu.” ¹⁷Ọo Onye-Nwe-Ọha bụ Ume-Dụ-Nsọ ọbu. Ọo l’ẹka ọ nọ mbụ Ume-Dụ-Nsọ nke Onye-Nwe-Ọha ono bẹ ndu nọ iya nụ l’a-bụ ndu a tọru l’uli. ¹⁸Ọle anyịbedua g’anyi ha, bụ ndu ọwhu l’adụa iwhe whuchiru anyi iwhu nteke anyi l’ele ogbu-zaazaa nke Chileke ẹnya bẹ l’ọo-gbanwe anyi nke ọwhu anyi l’a-bụ ndu dụ g’ọo onye ono, anyi l’ele ẹnya ono. Ọo ya bụ, ogbu-zaazaa nke Chileke eshi nno akabaa shi eje eje lẹ ndzụ anyi. Onye o shi l’ẹka iya bụru Onye-Nwe-Ọha ono, bụ Ume-Dụ-Nsọ l’onwiya.

Anyi dụ g’ọo ite ụrwa

¹Ọo ya bụ l’eshi Chileke whụru anyi imiko, wota ozhi ono sẹe anyi l’ẹka bẹ ike l’ẹte abyahẹkwaa l’agvụ anyi l’ejeje iya. ²Iwhe ọwhu anyi jịkaru bụ iwhe lile, l’adụa ree, l’eeme l’edomi. Anyi te egudekwa ẹregede eme iwhe anyi l’eme; anyi ta agwa okfu Chileke ọgwamogwa. Anyi l’egbechijee ekfu ọkpobe-okfu ono tụa ya jalaa. Anyi l’anọduje l’iwhu Chileke eme iya nno nke ọwhu onyenọnu l’e-shi l’obu iya marụ ẹgube ndu anyi bụ. ³Lẹ nteke ọ bụ l’ozhi-ọma ono, anyi l’ezhi bụ iwhe e gude iwhe kwechia, ọ kwa l’ẹhu nke ndu ọwhu l’ala l’iyi b’e kwechiru iya iwhe ọbu. ⁴Lẹ Sétanu, bụ iya l’achị mgboko-o bẹ wookwaru ẹka pyichia ndu ono, bụ ekwegekwe ono l’uche whẹ, tẹ ya mee nke ọwhu whẹ l’ẹte awhụ iwhoro, shi l’ozhi-ọma ono, l’echiru whẹ whorowhoro. Iwhoro ono l’egoshi ogbu-zaazaa nke Kuráyisutu. Ọ kwa lẹ Kuráyisutu ono b’e gbee whụa Chileke l’onwiya. ⁵Ọo ya bụ l’ọ tọ bụkwa onwanyị bẹ anyi l’anọje ekfu t’a marụ. Onye anyi l’anọje ekfu t’a marụ bụkwa Kuráyisutu Jisọsu, mbụ l’ọo ya bụ Onye-Nwe-Ọha. Anyịbedua l’ime onwanyị bẹ bụlekwawho ndu kwoberu iswi ẹhu Kuráyisutu ejeru unu ozhi. ⁶Ọ kwa Chileke ono, sụru t’iwhoro shi l’ẹkpuroochi nwua whoo, bẹ bụkwawho Chileke, meru t’iwhoro nkiya chije l’ime obu anyi. Ọo ya bụ tẹ ndiwhe marụ ọdu-biribiri nke Chileke, mbụ ọdu-biribiri shi l’iwhu Kuráyisutu egbu zaazaa.

⁷Mbụ sụa, anyi dụlewho g’ọo ite, e gude ụrwa kpụa, Chileke wota iwhe ono l’ereshi ire ike ono bụ iya bụ iwhoro iya woru dẹe l’ime iya. Iwhe meru ọ dẹe yẹ ya nno bụ t’a marụ l’ike iya ono, nyịberu anyịbe ono ta abụdu anyi b’o shi l’ẹka, l’ọo yẹbedua b’o shi l’ẹka. ⁸Aanọje akpa anyi ẹhu ntekenteke l’ẹka lile, ọle ọ tọ bụkwa l’aakpapyajẹ anyi ishi. A nọnyaa, iwhe harụ tsụde anyi l’ẹhu nke ọwhu anyi l’ẹte amajẹhe iwhe anyi l’eme, ọle obu l’eshijelekwaa anyi ike. ⁹Eewokfutaje anyi iwhe-ọtsulanu, ọle Chileke te ewehajedu anyi, eechitsuje anyi l’alị, ọle e te echigbujedu anyi echigbu. ¹⁰Mbọku-mbọku bẹ anyi l’ejeje iwhe-ọtsulanu ono, Kuráyisutu Jisọsu jeru nteke ono, l’ọobya anwụhu ono. Ọ kwa iya whọ bụ nggẹ a whụkwanu ndzụ ono, Chileke meru; Jisọsu teta nọdu nta-a, mbụ a whụ iya l’ẹhu anyi. ¹¹Ọ tọ dụkwa nteke anyi l’ete ebegojeru l’ọnu ọnwu l’iswi ẹhu Jisọsu. Ọo ya bụkwanu nke ọwhu l’aa-whụ ndzụ shi l’ẹka Jisọsu, dụ anyi l’ẹhu ọwa-a, bụ iwhe l’anwụhu anwụhu-a. ¹²Ọo ya bụ l’ọnwu nọdu swiru anyi, ndzụ shikwanu l’ọnwu ono swiru unu.

¹³Sụa, l’ẹkwo-okfu Chileke b’e dekwaru sụ: “Mu woru onwomu ye Chileke l’ẹka. O noo iwhe meru mu l’ekfu okfu iya.” Ọ kwawhọ l’anyi kweru nke Chileke g’ọo onye ono, kfuru iwhe ono bẹ kpatarụ iwhe anyi l’ekfukwawho okfu iya. ¹⁴Ishi iya bụru l’anyi marụ lẹ Chileke ono, meru Onye-Nwe-Ọha bụ Jisọsu Kuráyisutu, o shi l’ọnwu teta nọdu ndzụ bẹ bụkwawho g’o meru Jisọsu ono, o teta nọdu ndzụ, bụ gẹ l’oo-mekwawho anyịbedua, anyi eteta nọdu ndzụ, ya atụko anyi l’unu duta nteke ono dobe onwiya l’iwhu. ¹⁵Iwhe lile ono g’ọ ha bụkota l’iswi ẹhu unu. Ọo ya bụ nke ọwhu eze-iwhe-ọma nke Chileke l’a-kabaarọ orwube ndu ha l’igwe ẹka. Eze-iwhe-ọma ono emee t’a dụ l’igwe kabaa okele Chileke ekele, shikwawho nno kwabẹ iya ugvu.

Ibe anyi dụ l’ẹka Chileke nọ

¹⁶Ọo ya bụ l’ike ta abyakwa l’a-gvụ anyi l’oje ozhi ono. A makwarụ-a l’ẹhu anyi bụ urweke-ngwọpya, tẹmenu l’ọonwuhuwaa anwụhu, ọle ọwhube ndzụ ọwhuu ono, Chileke nụru bẹ Chileke ono l’anọje eme, ya adụ ọwhuu ọwhuu mbọku-mbọku. ¹⁷O noo lẹ nwa iwhe-ọtsulanu-a, anyi l’eje, l’ẹte abyaa l’anọ ọdu-a, bẹ l’ee-megee wotaru anyi ugvu ka l’ugvu. Mbụ ugvu ọwhu nyịberu anyịbe, l’adụa onye marụ ọtu ọnu iya, tọ hẹ l’ọ bya l’agvụ. ¹⁸Iwhe anyi keru ike yeru ta abụkwa iwhe l’eele l’ẹnya, o chia iwhe ẹnya l’ẹte awhụje. O noo l’iwhe l’eele l’ẹnya ta adụdu gẹ l’ọo-nọ-be, obenu l’ọwhube iwhe l’ẹte awhụa l’ẹnya bẹ l’anọgbujeru jeyewaro.

¹L’anyi marụ lẹ nteke a whụkafuleruwho nwa ekfuke-e, anyi bu l’eli-mgboko-o, mbụ ogwẹhu anyi-a, nteke a whụkafuru iya bẹ anyi nweru-a ogwẹhu ọwhuu bụ iya bụ uwhu ọwhuu, Chileke kwarụ doberu anyi. Ụlo onona ta abụdu ẹka b’e gude mee ya. Ọo ụlo ọwhu anyi l’a-nọdu jeyewaro lẹ tututu-mịmimi l’imigwe. ²Jeye nteke anyi l’a-nọ-gee lẹ mgboko, anyi eje anọhe iya bẹ anyi l’anọ-zhiawho atsụ ude. Mbụ iwhe l’agụshi anyi ẹgu ike bụru nteke Chileke l’e-me, anyi ewota ogwẹhu ọwhuu ono, Chileke l’e-shi l’imigwe nụ anyi yee g’ọo onye yeru uwe. ³Ọo ya bụ, nteke anyi chịtakwanuru ogwẹhu ọwhuu ono yee onwanyị g’ọo uwe, anyi ta adụhedu g’ọo ndu gba ọto l’iwhu Chileke. ⁴Lẹ nteke anyi nọkwadua l’ogwẹhu ọwa-a, anyi nweru nta-a, bẹ anyi l’anọkwaa atsụ ude g’anyi vu ivu-ẹrwa, tọ hẹkwanu m’ọo l’ọogu anyi ẹgu oyefu ogwẹhu ọwa-a, anyi nwe nta-a. Iwhe gbee agụ anyi ẹgu bụ t’e gbee yepyabe anyi ogwẹhu ọwhuu ono l’eli iya. Ọ kwanụ iya bụ mẹe ogwẹhu ono eshi nno lwemia ogwẹhu ọwa-a, l’e-megee nwụhu anwụhu-a. ⁵Ọ kwa Chileke l’onwiya bẹ bụ onye l’eme ire l’ẹhu anyi, nnta gẹ l’ee-shi t’ẹhu anyi yee ogwẹhu ọwhuu ono g’ọo uwe. Ọo Chileke ono bẹ bụ onye nụru anyi Ume-Dụ-Nsọ, gude goshi anyi iwhe ono, o kweru ụkwa lẹ ya l’e-me ono.

⁶O noo iwhe meru, obu l’eshihujezhiawho anyi ike g’o shihuru iya anyi nteke nteke. Iwhe anyi ka ogude ẹka bụ lẹ nteke anyi nọkwadu ndzụ l’ogwẹhu ọwa, bẹ anyi nọdukwadua Onye-Nwe-Ọha otẹnya. ⁷Iwhe anyi gude buru bụkwa eworu ono, anyi woru onwanyị ye Chileke l’ẹka, ọ tọ kwa l’anyi whụru iya l’ẹnya. ⁸Obu kwatarụ shihu anyi ike. Ọ gọgo kachikwaaru anyi mma l’anyi lụfuru l’ogwẹhu anyi ọwa, lakfu Onye-Nwe-Ọha l’ibe iya ono je eburu. ⁹Ọo ya bụ l’iwhe anyi l’atụbeje-zhiawho bụ t’anyi meje iwhe dụ iya ree: ?mẹ anyi nọ l’ibe iya ono, ?mẹ anyi nọ lẹ mgboko l’ẹka-a. ¹⁰Lẹ anyi g’anyi hakọta byafụtajekwa bya akfụru l’iwhu Kuráyisutu ono m’ọ byalẹwho okpe ikpe. Ọo ya bụ nke ọwhu onyenọnu l’a-nata iwhe rwuberu iya nụ, ?ọ bụ nke ọma, ?ọ bụ ẹji iya. Onyenọnu anata lẹge o meru nteke ọ nọ ndzụ l’eli-mgboko-o.

Oshi l’ẹka Kuráyisutu eshita Chileke ọnya

¹¹Ọ kwa l’anyi l’anọje atsụ Onye-Nwe-Ọha egvu nkele anyi makwanụru l’ọo ya l’e-kpe ikpe ono bẹ meru g’o gude anyi l’a-nọje eme t’anyi kfuta ndiwhe yeru iya. Ọle ọo Chileke bẹ makọtaru g’anyi dụ dụ; mu l’arịkwawho l’unu makwarụwho anyi l’obu unu. ¹²Anyi ta ajakpọshikwa onwanyị l’iwhu unu ọdo. Iwhe anyi gbechia eme bụ t’anyi goshi unu iwhe unu l’a-gbabẹ ọkpa gude anyi anga nggẹ unu majẹkwanuru ọnu, unu l’e-ye yeru ndu ono, l’egudeje gẹ whẹ gbarụ l’eli ẹhu anga ono, whẹ ahakwaa egude gẹ whẹ gbarụ l’ime obu whẹ anga. ¹³Mu ta amadụ, ?ọ dụ unu gẹ ẹnya ta adụdu anyi mma? Aa! Ọ -bụru l’ọ dụ nno bẹ iwhe anyi l’ekfu bụkwa nke iswi ẹhu Chileke. ?T’iwhu dụa anyi whoo? Iwhu -dụa anyi whoo, unu amarụ l’ọo okfu ẹhu unu bẹ anyi l’ekfu. ¹⁴L’iwhe bụ iya l’emeje anyi; anyi eme iwhe-e, anyi l’eme ọwa bụkwa oye obu ono, Kuráyisutu yeru anyi. O noo l’iwhe kwatarụ dorwee anyi ẹnya edorwe bụ l’ọo onye lanụ bẹ nwụhuru l’iswi ẹhu ọha. Ọo ya bụ l’ọo ọha nwụhuru. ¹⁵Ọ nwụ-chiru ọha l’owhu ọnwu. Ọo ya bụ nke ọwhu ndu nọ ndzụ l’ẹte anọdu ndzụ ono nọdu-turu onwowhe; o chia tẹ whẹ nọdu iya nọdu-turu onye nwụhu-chiru whẹ nụ; e megee Chileke bya emee ya, o shi l’ọnwu teta nọdu ndzụ.

¹⁶Sụ, lẹ shita ntaa tụgburu bẹ l’ẹte adụhedua onye anyi l’elekwadu ẹnya, ndiwhe l’ele amadụ tẹmenu anyi amarụ g’onye ọbu gbarụ. Ọ -bụkwaduru m’ọo l’o nweru nteke anyi shi eleje Kuráyisutu ẹnya, ndiwhe l’ele madzụ marụ g’ọ gbarụ, bẹ l’ọ tọ dụhekwaa nno nta-a. ¹⁷Ọo ya bụ l’iwhe bụ onye yẹle Kuráyisutu tụgbaru bụru nnanụ bẹ Chileke keru nke ọwhuu. Ọ tọ bụhedu onye o shi bụru b’ọ bụkwadu. Ntaa b’ọ bụwaa onye ọwhuu. ¹⁸Iwhe lile-e bẹ bụkota Chileke b’o shi l’ẹka. Lẹ Chileke ono bẹ shi l’ẹka Kuráyisutu mee yẹbe Chileke lebuhu anyi ẹnya g’ọo ọhogu iya, mechia anyi t’anyi bụru ọnya iya. Ọ bya eworu ozhi nke ome tẹ ndu ọdo bụkwaruwho ọnya iya ye anyi l’ẹka. ¹⁹Ọo ya bụ lẹ Chileke shi l’ẹka Kuráyisutu lebuhu ndiwhe mgburumgburu ẹnya g’ọo ọhogu iya. O mechia ndiwhe l’owhu tẹ whẹ bụru ọnya iya, tọ gụkoheru whẹ iwhe-dụ-ẹji whẹ l’emeje iya. Tẹmenu o zhikwawho anyi ozhi ono t’anyi wota je ezhia whẹ nggẹ whẹ shi nno bụru ọnya iya.

²⁰Ọo ya bụ l’anyi bụ ndu nochiru ẹnya Kuráyisutu. Chileke gbee shi l’ẹka anyi aryọ ndiwhe aryọryo. Anyi nochiru ẹnya Kuráyisutu aryọ unu sụ unu: t’unu kwe tẹ Chileke nata unu t’unu bụru ọnya iya. ²¹Kuráyisutu te emejeduru iwhe-dụ-ẹji. Ọo Chileke bẹ meru: o vuta iwhe-dụ-ẹji, anyi meru l’iswi ẹhu anyi nke ọwhu anyi l’e-shi Kuráyisutu ọbu l’ẹka tụko bụru ndu dụ chịriri lẹge Chileke l’onwiya dụ chịriri.

¹Anyi l’aryọkwawho unu aryọ mbụ anyịbe ndu anyi lẹ Chileke gba mgba eje ozhi-a sụ: eshi-ọwhu unu natawaru eze-iwhe-ọma ono Chileke l’eme, t’unu be emekwa iya g’ọo iwhe l’adụa iwhe ọ bụ. ²Lẹ Chileke sụkwaru.

“Ọo nteke ọ gbarụ l’ọnga nchị bẹ mu ngabẹru nchị l’olu ghu.

Mu adzọkwaa ghu whọ lẹ mbọku nke adzọta.”

Ọ kwa ntaa bẹ bụ nteke ọ gbarụ l’ọnata eze-iwhe-ọma ọwhu Chileke l’eme. Ọ kwa ntaa bẹ bụ mbọku o gbarụ t’a dzọta unu.

Oje iwhe-ọtsulanu l’iswi ozhi-ọma

³Ọ tọ dụkwa onye ọ dụ anyi nke t’a sụ l’o kfubyishiru ozhi-a, anyi l’eje. O noo g’e meru, anyi l’anọje eme t’ọ bọ dụ onye umere anyi l’e-gbee bya abụru ụkfu akpọpyashi ọkpa. ⁴Iwhe anyi l’emejechia bụ l’iwhe lile, byarụ anyi bẹ anyi l’egudeje egoshi l’anyi bụ ndu l’ejeru Chileke ozhi, anyi l’atajẹ nshi mẹe iwhe-ọtsulanu byakfuta anyi mẹe nteke oke mkpa byarụ mẹkwawho nteke anyi nọ lẹ mkpagbu, ⁵mẹe nteke l’echi anyi iwhe mẹe m’a tụa anyi mkpọro mẹe nteke a kụru ùtsú kpua anyi. Anyi ata nshi nteke anyi l’ejegbu onwanyị l’ozhi, anyi te edobeje ishi l’oshi, anyi l’azẹje ẹgu. ⁶Sụ, lẹge anyi gude egoshi l’anyi bụ ndụ-ozhi Chileke bụ anọ eme t’ọ bọ dụ ẹka ntụpo l’a-dụ lẹ ndzụ anyi mẹe anọ egoshi l’anyi marụ Chileke. Anyi l’atajẹru iwhe nshi; anyi nweru obu-ọma. Anyi l’eshije l’ike ono, Ume-Dụ-Nsọ l’anụje egoshi iya, shita l’oye ndu ọdo obu, anyi l’egudeje n-yemobu ọwhu l’abụa n-yemobu eli ọnu, gude goshi iya. ⁷Anyi eshikwawho l’okfu ire-lanụ mẹe l’ike, shi l’ẹka Chileke egoshi iya. Ngwọgu, anyi l’akwajẹ onwanyị, gude alwụ ọgu, gudekwa iya who adzọ onwanyị l’ọgu bụ anọ eme iwhe dụ chịriri l’iwhu Chileke. ⁸Anyi l’egoshijekwawho l’anyi l’ejeru Chileke ozhi mẹ l’aakwabẹ anyi ugvu, egoshi iya mẹ l’eewhu anyi iwhu, egoshi iya nteke a harụ ekfubyishi anyi, egoshikwa iya who mẹ l’eekfu l’anyi l’eme ree. Ndu aharu eme anyi gẹ-woo l’ọo ejire bẹ anyi l’adzụ, ndu ekweta l’anyi bụ ndu ire-lanụ. ⁹O nweru ndu sụru lẹ whẹ ta amadụ iwhe anyi l’arị l’obu, o nwekwanuru ndu ọwhu marụ iwhe anyi l’arị. Anyi l’anọje anwụhu anwụhu, ọle unu l’eleenaa l’anyi nọkwaa ndzụ. Eechije anyi iwhe, ọle e te echigbujedu anyi echigbu. ¹⁰Eemejeru iwhe ọtso áwhụ, l’e-ji anyi obu nụ anyi, ọle ẹhu l’anọjelee atsọ anyi ụtso nteke nteke. Anyi bụ ndu ụkpa, ọle anyi l’emejekwa igweligwe ndu ọdo, whẹ enweru iwhe. Ọoduje g’ọ tọ dụdu iwhe anyi nweru, ọle ọ tọ dụkwanu iwhe anyi l’ete enwee.

¹¹Sụa, ndu ọnya mu whẹ lẹ Kọ́rintu! Anyi tụkookwaru iwhe lile tụjashiaru unu, anyi yeru unu obu yeshia ya unu ike. ¹²Anyi ta akpochikwaru unu obu, o gbechikwaa bụru unubẹdua kpochiru anyi obu. ¹³Ntaa bẹ bụkwa okfu, nnajị l’ekfuru ụnwu iya bẹ mu l’ekfuru unu, sụ t’unu ye anyi obu yeshia ya anyi ike, lẹge anyi yeru iya unubẹdua.

Ozelaru iwhe dụ Chileke ẹji

¹⁴T’unu lẹ ndu l’ete ekwetaa nke Chileke ba atụgbakwa bụru nnanụ. O noo l’unu dụ iche, whẹ dụ iche. Mbụ ?ndẹhunu gẹ ndu dụ chịriri, whẹ lẹ ndu l’eme iwhe-dụ-ẹji l’e-shi bụru ẹhu? ?Ndẹ-zhia gẹ iwhoro yẹle ẹkpuroochi l’e-me bụru ẹhu? ¹⁵Kuráyisutu yẹle Oshifutuswe ta afụkwa chịa idzu t’olu whẹ wụko nnanụ nke tẹ whẹ megba iwhe. Ọo ya bụ, ?o zhihunua ẹgube iwhe gụnu bẹ onye kweru nke Chileke yẹle onye l’ekwee nke Chileke l’a-gba mgba? ¹⁶Sụ ?ndẹ-zhia gẹ l’ee-shi wota eze-ụlo Chileke yẹle ụlo ẹja bya edogbabe. Ọ kwa anyi bẹ bụ eze-ụlo Chileke, mbụ Chileke, nọ ndzụ. Lẹ Chileke kfukwaru iya l’onwiya sụ:

“Mu l’e-buru eburu l’ime whẹ,

tsojeru whẹ eje iwhe bụ ẹka whẹ l’eje.

Mu abụru Chileke whẹ, whẹ abụru ndibe mu.”

¹⁷O noo iwhe meru Chileke kfukwaawho sụ:

“Unu họfuta onwunu l’echilabọ whẹ fụta, bya anọdu iche.

T’unu be edenyijekwa ẹka l’iwhe e merwuru emerwu,

nggẹ mu natakwarọ unu.

¹⁸Ọo ya bụ nggẹ mu bụru Nna unu,

Unu abụru ụnwu mu nke unwoke mẹe ụnwu mu nke ụnwanyi.

O noo iwhe Onye-Nwe-Ọha ono, bụ Ọkalibe-kakọta-ike l’ekfu ndono.”

¹Sụa, ndu mu yeru obu; eshi-ọwhu Chileke kwetaru anyi ụkwa iwhe dụkota nno, unu t’anyi safụkotanu onwanyị iwhe bụ-zhia iwhe l’emerwuje ogwẹhu mẹe ọwhu l’emerwuje obu madzụ. T’anyi tsụje Chileke egvu, t’anyi kebe ẹhu bụru ndu dobekotaru onwowhe nsọ nke ọwhu anyi l’a-bụkota nke Chileke ọkpobe abụbu, meje iwhe bụ iwhe ọ sụru t’anyi meje-e.

Ẹhu-ụtso Pọlu

²Unu menua t’anyi marụ l’anyi dụkwadua unu l’obu. Ọ tọ dụkwa g’unu ha, onye ọwhu anyi duwhuru, tọ dụ onye ọwhu anyi gude ẹregede rigbua iwhe iya. ³Iwhe mu l’ekfu ta akwa woo: l’ọo atụrwushi bẹ mu l’atụrwushi unu, eshi mu kfuhawaru iya lẹ mbụ sụ unu l’unu dụ anyi l’obu shii. Anyi l’unu bụ nnanụ, anyi -nọ ndzụ; anyi -nwụhuru anwụhu. ⁴Mu ta atsụjekwa egvu okfuru unu okfu l’iwhu. Ọo unu bẹ mu l’egudeje anga. Anyi nọkwa l’iwhe-ọtsulanu, ọle unu l’adụje mu obu. Mbụ, ọobuje mu -nyata unu, ẹhu atsọ mu ụtso atsọshi mu iya ike.

⁵Lẹ nteke anyi batarụ lẹ Masedóniya, bẹ ẹhu l’egvukwaaru anyi egvuru. L’aakpalẹwho anyi ẹhu l’ẹka lile, anyi shiru. Ẹka lile bụleruwho okfu okfu; obu l’awakwawhọ anyi mini. ⁶Ọle Chileke ono, bụ onye l’adụje onye áwhụ byarụ obu bẹ gude abyabya ono, Táyitọsu byarụ dụa anyi obu. ⁷Mbụ, tọ lẹkwaa abyabya iya ono bẹ dụru anyi obu nwẹkiya; akọ, ọ nọdu kọkotaru anyi lẹge unu gude dụa ya obu bẹ lịkwawho l’iwhe dụru anyịbedua obu. O kfukwaruwho anyi sụ l’ọogushi unu ẹgu ike tẹ mu l’unu whụgba mẹe l’unu darụ onwunu ụta iwhe unu meru mẹe l’unu l’agbajẹru mu ọdzori. O noo iwhe megeeru, ẹhu kabaa mu ọtso ụtso nta-a.

⁸O noo l’ọ -bụhuduru m’ọo l’ẹkwo-ozhi-a, mu deru bẹ kpatsuru unu áwhụ, ọ tọ kụjakwa mu obu. Nteke ọ gọgo kụja mu obu kwa nteke mu bya awhụa lẹ mu gude iya kpatsua unu áwhụ, e -behuduru ọ bụru-a m’ọo nke nwanteke ono. ⁹Ọle ntaa bẹ ẹhu l’atsọwa mu ụtso. Ẹhu-ụtso mu ta abụkwa l’ọo lẹ mu meru, unu l’agụ áwhụ. Ẹhu-ụtso mu bụ l’unu gude ọgu áwhụ ono daa onwunu ụta, haa ome iwhe-dụ-ẹji unu l’emegbabe Chileke. Áwhụ onona bẹ mekwaru, unu mee iwhe dụ Chileke ree. Ọo ya bụ l’ọ tọ dụkwa ẹka anyi mekataru unu. ¹⁰L’ọ -bụru l’a tarụ madzụ ụta; ụta ono mee onye ono; o gude nggụmu áwhụ iya mee iwhe dụ Chileke ree, bẹ áwhụ ono l’emejekwa t’onye ono daa onwiya ụta, haa iwhe-dụ-ẹji l’oomegbabe, lwakfuta Chileke. Onye ono ta akwahẹkwaro nzhimanụ lẹ ya darụ onwiya ụta. E shi nno, Chileke adzọo onye ọbu. Ọle ọ -bụru lẹ madzụ b’a tarụ ụta, ẹhu ghulahaa onye ono eghu, onye ọbu eshi nno laa l’iyi. ¹¹Unu lewaro iwhe ọgu áwhụ ono, dụ Chileke ree meru. Unu lewaro g’unu yeberu ẹhu l’anọ eme t’anyi marụ l’unu dụ chịriri l’iwhu Chileke. ?Unu whụwaru g’iwhe meru nu nwụ-beru unu ọku l’ẹhu. Unu lewaro g’unu l’atsụ-be egvu iwhe l’e-me nụ. Unu lewaro gẹ eghoro mu dụta-be unu. Unu lewaro gẹ l’oolwube unu l’obu t’unu gbachiaru mu ọdzori. ?Unu whụwaru gẹ l’ọonma-be unu ẹhu t’unu hụa onye ono, mesweru unu ahụ. L’ime iwhe lile ono bẹ unu mewaru; a marụ l’ọ tọ dụdu ẹka ọ nmarụ unu.

¹²Ọo ya bụ l’edede, mu deru ẹkwo-ozhi ono ta akwatakwa bụru l’iswi onye ọwhu mesweru bẹ mu kwoberu dee ya, tọ bụkwanu l’iswi onye ọwhu ọbu, o mesweru. Iwhe mu kwoberu dee ya kwa nggẹ unu marụ gẹ unu l’a-gbaberu anyi ọdzori l’iwhu Chileke. ¹³Ọo ya bụ l’ọodukwawho anyi obu. A gbachiharo nke obu ọwhu unu dụru anyi, anyi lẹ Táyitọsu bẹ ẹhu kabakwaanụ ụtso nkele unu g’unu ha bẹ tụkoru mee obu iya, ọ nmakfuru anmakfuru l’iwhe lile. ¹⁴Lẹ mu tụkwaru Táyitọsu ọnu unu, gude unu anga ụnga; e megee, ọ bụru gẹ mu tụru iya ọnu unu bụ g’unu dụ. Unu te emechihekwa mu iwhu. Anyi l’anọje-zhiawho ekfuru unu ọkpobe-okfu nteke nteke. O nokwa g’iwhe anyi kfuru Táyitọsu l’okfu ẹhu unu bụkota ọkpobe-okfu. ¹⁵Ọo ya meru iwhe l’ọokabajee unu oyeshi obu ike nteke ọ bya anyata l’unu g’unu ha l’atụkoje eme iwhe mu sụru t’unu mee mẹe lẹge unu gude ọtsu-egvu mẹe ẹhu-anmanma nata iya l’ibe unu. ¹⁶Ntaa bẹ ẹhu kwatakwarụ atsọ mu ụtso, atsọshi mu iya ike lẹ mu gude ire unu ẹka ọkpobe egude l’iwhe lile.

Gẹ ndu nke Kuráyisutu l’a-nụje iwhe

¹Iwhe anyi l’eme t’unu marụ ụnwunna mu, kwa nke eze-iwhe-ọma ono, Chileke nọdu meshiaru chọchi lile, dụkota lẹ Masedóniya. ²O noo lẹ mkpamẹhu ono, a kparụ whẹ bẹ dataru whẹ datashịa whẹ ike. Ọle ẹhu tsọleru whẹ-ẹ ụtso tsọshia whẹ iya ike nke ọwhu whẹ sarụ ẹka ọkpobe asasa nụ Chileke iwhe, l’ẹbe abụ l’ọ dụ iwhe whẹ nweru ilile. ³Gẹ mu l’ekfubele iya who bụ lẹ whẹ nụru nwa gẹ ike beru whẹ, mbụ nụkwawho nụghata gẹ ike beru whẹ. Mbụkwa whẹ tụkwaru obu whẹ ama; ⁴aryọ anyi, aryọshi anyi ike t’anyi kwero tẹ whẹ lẹ ndu nke Kuráyisutu ọdo gba mgba nụje iwhe t’e gude gbajeru ndibe Chileke lẹ Jerúsalẹmu. ⁵Sụ, iwhe ono bụru iwhe whẹ meru tọ bụ l’anyi rị-vujeru iya l’ego. Whẹ vuada ụzo bya ewoodaru onwowhe ye Onye-Nwe-Ọha l’ẹka; tẹmenu tẹ whẹ bya ewokwaruwho onwowhe yekwawho anyi l’ẹka bụ iya bụ iwhe zụru Chileke nkwe l’obu. ⁶O noo iwhe meru anyi ryọo Táyitọsu yẹbedua, bụ iya gbuberu ishi nke oje ozhi ono, sụ t’o melekwawho iwhe l’oome, t’o yetakwaru unu ẹka t’unu jefufua ozhi ono, unu l’eje l’ishi, mbụ ozhi ono, unu l’eje lẹ nke iwhe-ọma ono. ⁷Iwhe lile, unu nweru bẹ unu nwekwaru, nweru iya nke anyịnyi: unu kweru ekwekwe kweta iya nke bya awhụduwho, unu l’ekfu okfu Chileke, ekfu iya nke anyịnyi, unu marụ nke Chileke mebyi shii, unu kebekwawho ẹhu eyetaru ndu ọdo ẹka, unu yekwawho anyi obu yeshia ya ike. Ọo ya bụ t’unu nụkwawho iwhe, nụgharu iya ẹka, t’e gude jee ozhi-ọma nke iwhe-ọma ono.

⁸Iwhe mu l’ekfu ta abụkwa l’ọo eyebuta bẹ mu l’eyebuta unu. Iwhe mu gbechia eme bụ tẹ mu goshikwanu unu gẹ l’ọowho-be ndu ọdo l’obu tẹ whẹ yeta ẹka, shiwaro nno mee unu t’unu goshi l’oye obu nke unu bẹ bụ ọkpobe iya. ⁹O noo l’unubẹdua bẹ makwarụ-a eze-iwhe-ọma ono, Onye-nwe-anyi Jisọsu Kuráyisutu meru, mbụ; a makọtaru l’ọ bụ onye nweru iwhe shii, ọle o kwobeleru-a iswi ẹhu unu mee onwiya onye ụkpa. Iwhe o meru bụkwanuru tẹ ya shi l’onye ụkpa, ya bụ mee unu t’unu nweru iwhe shii.

¹⁰Mbụ, ọnu ọwhu mbẹdua l’eye l’okfu ono bụ lẹ-a; l’ọ karụ unu mma ntaa t’unu mefufua iwhe ono, unu watarụ ememe eshi akawhụ, o noo l’ọ tọ bụledua l’ọo unubẹdua bẹ vu ụzo chịa idzu iya, ọ kwawhọ unubẹdua bẹ vu ụzo wata iya ememe. ¹¹Unu kebenu ẹhu meje iya jeye nteke unu l’e-mefu iya l’shi. T’ọ bụkwaruwho lẹge ọ whọru unu l’obu, unu wata iya ememe, bụ gẹ l’ọo-whọ unu l’obu t’unu mefu iya l’ishi. T’iwhe unu l’e-gude eme bụkwaru nwa gẹ ike beru unu. ¹²Lẹ nteke bụwho l’ọowho ghu l’obu t’ị nụ Chileke iwhe, bẹ Chileke l’a-natakwaa iwhe ị nụru iya ọkpobe anata. Chileke bẹ l’atụje iwhe madzụ nụru iya lẹge onye ọbu nwetaberu. Ọ tọo tụkwa iya lẹge onye ọbu l’enwee.

¹³Ọ tọ bụkwa l’iwhe mu l’ekfu ntaa bụ l’ọo tẹ mu pata ivu, ndu ọdo vu, bokwoo unubẹdua olu, tẹ whẹbedua gbarụ ẹka. ¹⁴Ọle eshi unu ka ndu ono onwe iwhe shii nke nwa nta-a, bẹ mu l’ekfukwa l’iwhe dụ ree bụ t’unu gbatarụ whẹ lẹ mkpa, kparụ whẹ nụ. Nteke ọwhu ọ kpakwanụru unubẹdua, whẹ agbataru unu; m’ọ -bụru lẹ whẹ nwekwaru shii. Ọo ya bụ l’unu ibẹka ibẹbo bẹ tụkoru eyeru onwunu ẹka ẹnya nhamụnha. ¹⁵Ọ kwa iya bụ iwhe ọbu, e deru l’ẹkwo Okfu Chileke sụ:

“Onye kpotaru iwhe shii te ekpotakwa iya nke etsutsu,

onye ọwhu kpotaru nwanshị, nkiya te epehuhekwanu.”

Táyitọsu mẹe ndu l’eyeru iya ẹka

¹⁶Anyi l’ekele Chileke ekele shii, o noo l’ọo gẹ l’ọowho anyi l’obu t’anyi yeru unu ẹka bụ gẹ l’ọowhokwawho Táyitọsu. ¹⁷Ọ tọ bụledua l’ọ natarụ aryọryo, anyi ryọru iya nwẹkiya, ọle ọowhokwa iya whọ l’obu tẹ ya yeta ẹka shii. O noo iwhe meru iwhe ọ tụru obu iya ama sụ lẹ ya l’a-byakfutashia unu. ¹⁸Anyi l’eye nwanna anyi nwoke tẹ yẹle iya lịru. Nwanna anyi nwoke ono bẹ bụ onye a kwatazhiaru eyeru ugvu lẹ chọchi gẹ chọchi ha, ọ bụru g’o gude ezhi ozhi-ọma ono bẹ kparụ iya nụ. ¹⁹A gụfukwaro onona; ọ kwa chọchi owhu họtaru iya, ye iya sụ t’o tsoje anyi je ozhi ono, anyi gude agbataru ụnwunna anyi ono. Anyi gude ozhi ono ekutse Onye-Nwe-Ọha, gudekwa iya who egoshi gẹ l’ọowho-be anyi l’obu t’anyi yeta ẹka.

²⁰Anyi tọokwaru nwẹhu doo ẹnya ndo eme nke ọwhu l’ọoto dụa onye l’a-ta anyi ụta lẹge anyi gude eme nke iwhe-ọma ono, nyịru ọtu ọnu iya, e yeru anyi l’ẹka. ²¹L’iwhe anyi tụberu nke ememe bụkwa t’anyi meje iwhe dụ ugvu l’ẹnya. Ọ tọ bụlekwaa iwhe ọwhu dụ ugvu l’ẹnya Onye-Nwe-Ọha kpụ; ọ kwa t’ọ bụkwaruwho iwhe ọwhu dụ ugvu l’ẹnya ndiwhe.

²²Tẹmenu anyi l’eyekwawho nwanna anyi ọdo sụ tẹ whẹ tụko lịru bya. Nwanna anyi ono bẹ anyi l’adatajẹekwaa nteke nteke; marụ l’iwhe l’awhọshi iya ike l’obu bụ gẹ ya l’e-shi eyeta ẹka. Ntaa b’ọ gbẹkwaanu kabaa anọ awhọ iya l’obu tẹ ya yeru unu ẹka nkele o gude ire unu ẹka ree-ree-ree nke ba ama gẹ l’ee-me iya. ²³A bya l’ọwhube Táyitọsu bẹ mu sụru l’ọo ya bụ onye kwe mu onye ẹbo, mbụ onye mu l’iya tụkoru eje ozhi-ọma ono, gude eyeru unu ẹka-a. Ụnwunna anyi ndu ọwhu whẹ l’iya lị bụkwa ndu nọ l’ọzori chọchi gẹ chọchi ha, whẹ bụkwawho ndu l’ekutse Kuráyisutu. ²⁴Unu goshikwa whẹ l’unu yeru anyi obu ọkpobe eyeye. Ọo ya bụ nke ọwhu chọchi gẹ chọchi ha l’a-makwanụ l’ụnga ono, unu l’egudeje anyi anga bẹ unu l’anga l’orwuberu iya.

Ome iwhe-ọma

¹Mu te ejeheduro oderu unu ẹkwo nke iche nke iwhe unu l’a-nụ ndu nke Chileke lẹ Jerúsalẹmu. ²L’o dokwaru mu ẹnya l’ọowho unu l’obu shii t’unu yeta ẹka. Ọ kwa unu bẹ mu gude anga l’iwhu ndu Masedóniya. Mu sụru whẹ l’unubẹ ụnwunna anyi whẹ ono, nọ lẹ Akáya bẹ kwakọbeekwaru nke oye ẹka ono eshi akawhụ. Awhọwho ono, l’ọowho unu l’obu nke t’unu yeta ẹka wuduakwaru nwanshị mẹe ya akpalikota whẹ gẹ whẹ ha tẹ whẹ yeta ẹka ono. ³Iwhe meru iwhe mu sụru t’ụnwunna-a bya bụ: nggẹ ụnga ono, anyi gude unu anga ta abụ anyi iwhe barụ l’alị; gbahachia tọ dụlewho lẹge mu kfuhawaru iya bụ iya bụ l’unu kwakọbewaru nke oye ẹka ono. ⁴L’ọ -bụkwaru lẹ mu lẹ ndu Masedóniya bẹ harụ lịru bya, anyi bya awhụa l’unu tẹke akwakọbedua ilile, ọ kwa iya bụ l’iwhere abụru nke anyi, o noo lẹ mu sụru whẹ l’unu kwakọbewaru ree, ọ bụru unubẹdua bẹ iwhere nke unu l’a-kabaa shii. ⁵O nokwa iwhe meru mu sụ l’ọ dụ ree t’ụnwunna-a vuru mu ụzo byaada ibe unu, bya evuru ụzo kwakọbe iwhe ono, unu kweru ụkwa l’unu l’a-nụ ono. Ọo ya bụ nke ọwhu l’aa-makwanụ l’unu tụru obu unu ama anụ iya, l’ata atụkfubedu iya unu atụkfube.

Chileke nụru anyi nggẹ anyi nụje iya

⁶Iwhe unu l’anyatajẹlewho bụ ọwa: l’onye ono, l’ẹte akụa iwhe ha l’urwu l’alị, ta akpatajẹkwa iwhe ha shii. Onye kụkwanuru iwhe l’urwu l’alị bẹ l’akpatajẹ iwhe ha shii. ⁷T’onyenọnu nụlewho lẹge ọ zụru iya nkwe l’obu. T’ọ bọ dụkwa onye l’a-nụ ọwhu bụ: ọ -nụ-gee ya, ya abya atsọlahaa nwụrunwuru, ya aadụkwa onye l’a-nọ anụ iya gẹ-woo l’ọo ụtu ya tụfutaje. O noo l’ọo onye gude ẹhu-ụtso anụ bẹ Chileke l’eyeje obu. ⁸Iwhe unu l’a-malẹwho bụ lẹ Chileke bẹ bụ onye dzuru gẹ l’oo-meru unu iwhe-ọma, meeru unu nke etsutsu iya, mbụ nke ọwhu unu l’e-nwekotaje iwhe lile, bụ iwhe mkpa iya dụ unu. Unu enwekwaruwho iwhe, nweru iya nke anyịnyi nke ọwhu unu l’e-wofutaje iya gude eme iwhe-ọma. ⁹Ọo ya-a bụ iwhe ọbu, e deru l’ẹkwo Okfu Chileke sụ:

“Ọosaje ẹka asa nụ ndu ụkpa iwhe.

Iwhe-ọma, l’ọonoje eme te enwedu agvụgvu.”

¹⁰Ọo Chileke ono, bụ iya l’anụje onye l’emebe iwhe l’alị akpụru iwhe ọbu, l’ọokuje, nụkwa iya whọ nri, l’oorije, bẹ bụkwawho onye l’a-nụ unu akpụru iwhe mkpa iya dụ unu, unu akụa. Ọo ya bụ onye l’e-me t’iwhe unu meberu l’alị mehu emehu nke ọwhu unu l’a-kabaa enwenwe, gude iya eme iwhe-ọma ono unu l’eme. ¹¹Oo-me unu t’unu nweru iwhe ọkpobe enwenwe nke ọwhu unu l’anọje eme iwhe-ọma nteke nteke, ọo ya bụkwanu nke ọwhu l’aa-ha l’igwe keleje Chileke ekele iwhe-ọma, unu shi l’ẹka anyi emeru whẹ. ¹²L’ozhi-a, unu l’eje-e ta abụlekwaa mkpa ndu nke Chileke bẹ l’oogbo nwẹkiya. Iwhe l’oomefua bụ l’aa-ha l’igwe kele Chileke ekele, kele iye ya nke anyịnyi. ¹³Ọ kwa iwhe ono, unu l’eme ono bẹ l’egoshi l’unu kweru nke Chileke kweshia ya ike. Ọ kwanụ iya bụ a ha l’igwe jaa Chileke ajaja. O noo l’ọ tọ bụledua l’unu gude iwhe ono, unu meru ono goshi l’unu kwetaru ozhi-ọma nke Kuráyisutu ono, unu goshiakwaruwho l’unu l’emeje iwhe ozhi-ọma ono kfuru. Bụ iya bụ l’unu l’asajẹ ẹka ọkpobe asasa mee iwhe-ọma lẹge nwa ike beru unu. Unu eshi nno unu lẹ whẹbedua mẹwaro ndu ọdo atụko gba mgba l’iwhe unu nwe enwe g’ọ ha. ¹⁴Ọo ya bụ lẹ whẹ l’a-nọ ekfu anụ Chileke l’iswi ẹhu unu; l’ọogukwa whẹ agụshi whẹ ike ọ dụ g’e -shi unu whụgba nkele eze-iwhe-ọma nke Chileke bẹ parụ ẹka apaa l’ẹhu unu. ¹⁵Unu t’anyi kele Chileke ekele nke iwhe-ọma iya ono, mbụ iwhe-ọma ono, kariru gẹ l’aa-nọ atụ ọnu iya.

Ọ tọ bụkwa madzụ yeru Pọlu ozhi, l’ooje l’ẹka

¹Ntaa bẹ bụakwa mbẹdua, bụ Pọlu l’ishi onwomu bẹ l’aryọ unu aryọ. A sụkwaru l’ọobuje: mu -nọdu unu l’iwhu; mu atsụ egvu gẹ mu l’e-me kfuru unu okfu; nteke mu nọdulewhoo unu otẹnya; mu ekfude okfu ikike ikike. Ọle ntaa bẹ mu gudekwa odoo yẹle obu-ọma, dụ g’ọo nke Kuráyisutu; ²aryọ unu sụ: t’unu be emetakwa iwhe mu l’e-kfuru unu okfu ikike ikike mẹ mu -byalẹwho. Ọ tọ bụkwanu ono bẹ l’aajị ajị woo: ?a marụ mu l’e-kfuru ndu ono, sụru l’anyi l’emelewho iwhe l’agụ anyi okfu ikike ikike. ³L’a makwarụ-a l’anyi bu l’eli-mgboko-o, ọle anyi ta alwụdu ọgu g’ọo ndu mgboko-o. ⁴Ngwọgu ọwhu anyi gude alwụ ọgu nke anyi ta abụkwa ngwọgu nke ndu mgboko-o. Ọo ngwọgu ọwhu shi Chileke l’ẹka, bụkwanu ngwọgu ọwhu shihuru ike shii. Ọo ya bẹ bụ ngwọgu ọwhu l’adụje ike kwakpọshia ẹka ike ọgu Oshifutuswe dụ-gee. Ọ kwa iya whọ bẹ anyi l’e-gudeje mebyia ntụmego ụgho. ⁵Ọ bụru ngwọgu ono bẹ anyi gude emebyishi oku onwonye ono, e gude tochia ụzo; tobuta t’a ba ma Chileke. Anyi l’atụkoje iwhe lile, bụ ọriri, madzụ l’arị arị lwugbukota; mee t’ọ dụ lẹge Kuráyisutu sụru t’ọ dụje. ⁶Ntaa bẹ anyi kwabẹwaru akwabẹ nke t’anyi hụa iwhe bụ-zhia ekfu-ba-anụ mẹ unu -mekotawaa iwhe lile, a sụru t’unu meje.

⁷Iwhe unu l’iya l’eme bụkwa l’unu te elerwejedu iwhe ẹnya elerwe. Onye gụtawaru onwiya lẹ ya bụ onye nke Kuráyisutu; t’onye ono nyatajẹru onwiya l’ọo gẹ ya bụ onye nke Kuráyisutu bụ gẹ anyịbedua bụ iya. ⁸Ọwhu unu l’a-tụbe nvọ bụ lọ tọ dụkwa mu iwhere m’e -behuduru; mu kwata gudenuka ike ono, Onye-Nwe-Ọha yeru anyi l’ẹka ono anga l’ụnga. Ike ono b’o yekwaru anyi l’ẹka t’anyi gude metsee unu emetse. Ọ tọ nụkwa iya anyi t’ọ bụru iwhe anyi l’e-gude alozeta unu alozeta. ⁹O noo iwhe mu l’ekfu sụ t’unu be edobekwa sụ lẹ mu gude ẹkwo-ozhi eme tẹ mu yee unu egvu. ¹⁰O nweru ndu l’ẹgbeje sụ: “Ẹkwo-ozhi, Pọlu l’ede bẹ okfu iya l’anọje adanụka kpaa kpaa lẹ nchị; bya eshihunukakwawho ike. Nteke anyi l’iya nọdulewho iwhu l’iwhu; ya agbẹe nyịhu; okfu iya eje adụhe iwhe l’ọo-bụ.” ¹¹T’o doo ẹgube onye ono ẹnya l’ọo iwhe anyi deru l’ẹkwo-ozhi nteke anyi l’unu l’ẹte anọdukota, bẹ bụkwawho iwhe anyi l’e-me l’ẹka mẹ anyi l’unu nọdukotalewho.

¹²Ọwhu anyi l’ẹte abyadụa l’a-tụ ama bụ nke t’anyi wota onwanyị je agụkobe lẹ ndu ono, l’anọje atụ ọnu onwowhe ono. Ọdua l’ọo nke t’anyi bya asụ l’ẹgo atụaru anyi lẹ whẹ. Whẹ bụ ndu eswe, mbụ whẹbedua, bụ madzụ ibe whẹ bẹ whẹ l’egudeje atụru onwowhe; gude gẹ ibe whẹ ha; eleta gẹ whẹbedua habe. ¹³Ọle anyịbedua ta atụjekwa ọnu onwanyị tụghata iya lẹge Chileke tụberu anyi t’anyi rwua. Gẹ anyi l’atụ-bejelewho ọnu onwanyị bụ lẹge ozhi, Chileke doberu anyi t’anyi jee gbarụ gba. Ozhi ono bẹ ọwhu anyi l’eje l’echilabọ unu tụkokwaru lịru iya. ¹⁴Anyi ta atụghatakwa ọnu iwhe anyi meru; eshi anyi gudewaa ozhi-ọma nke Kuráyisutu ono rwugee ẹka unu nọ gẹdegede; t’e bebenu ọ bụru anyi bẹ bụ ndu mbụ, wotaru iya unu. ¹⁵Ọo ya bụ l’anyịbedua ta atụghatajedu ọnu onwanyị gẹ Chileke tụberu t’anyi rwua. Ọo ya bụ l’anyi te egudejedu ozhi, ndu ọdo jeru anga l’ụnga. Iwhe anyi gbee ele ẹnya iya bụkwa l’unu l’a-nọ aka okweshi ike aka eje eje; anyi akabakwanụa oje ozhi, kabaa shii l’echilabọ unu; o noo l’anyi l’anọje-zhiawho eme iwhe lẹge Chileke tụberu iya anyi. ¹⁶Ọo ya bụkwanu nke ọwhu anyi l’e-zhikota ozhi-ọma ono; zhighatachaa ya mkpụkpu nke unu; zhiwaru iya ro tụgburu. Ọo ya bụkwanu nke ọwhu l’abụhee ozhi, onye ọdo jeru l’ẹka nkiya bẹ anyi l’e-gude anga l’ụnga.

¹⁷L’ẹkwo okfu Chileke kfukwaru sụ: “Onye l’anga ụnga; t’onye ọbu gudekwa iwhe Onye-Nwe-Ọha meru ngaa ya.” ¹⁸O noo l’ọ tọ bụkwa onye ono, l’atụ ọnu onwiya b’a kagee ọgube iwhe. Onye ọwhu l’aagụbeje iwhe bẹ bụkwa onye ọwhu ọ bụ Onye-Nwe-Ọha l’atụ ọnu iya.

Ndu ozhi ọwhu l’ẹte abụa ọkpobe iya

¹Byiko, unu talẹkwawho nshi tẹ mu kabẹ-zhia kfua g’ọo onye égò sweru, mu bụru ete-aja-onwiya. Mu makwarụ-a l’unu kwetawaru. ²Lẹ mu l’ekokwaru unu okoowhoo lẹge Chileke l’ekoje-e. O noo l’unu dụ mu g’ọo nwamgbọko, nwoke lẹ teke engebua ọkpa, doberu onwiya ọga, mbụ nwamgbọko, mu doberu nke oke ji, mbụkwa nke tẹ mu kee ya onye lanụ kpụ bụ iya bụ Kuráyisutu. ³Ọle mu l’anọje atsụ egvu sụ: ?mu manụru tẹke agbaghashịduanu unu obu, merwushia uche unu t’unu be egudehe obu unu g’ọ ha ye Kuráyisutu obu ọkpobe eyeye. O nokwa gẹ agwọ meru gude ejo ẹregede duwhua lifu. ⁴O noo l’unu gude ẹhu-ụtso kweta nke onye ono, byarụ bya awataru unu okfuru nke Jisọsu ọdo, l’abụhekwaa Jisọsu ọwhu anyi kfuru unu okfu iya-a, tẹmenu unu kwekwawho nata Ume ọdo, dụ iche, l’abụa Ume-Dụ-Nsọ ọwhu unu natahawarụ, unu kwekwawho nata ozhi-ọma ọdo, dụ iche, l’ẹte abụa ọwhu unu kwetahawaru.

⁵L’iwhe mbẹdua l’arịjekwa bụkwa l’ọ tọ bụdu mu bẹ ẹnya nke mu gbee bya akagee alwalwa l’ẹka nke ndu ono, l’ezhi unu ozhi-ọma ono, l’etu onwowhe nwọmaru-ọ-machaa whẹ. ⁶Ọ -bụru m’ọo lẹ mu ta amadụ gẹ l’eekfuje okfu bẹ mu mazhiaru nụ Chileke ọkpobe amama. Anyi gudeekwaa iwhe lile goshikota iya unu l’ẹka lile.

⁷?O chia njọ bẹ mu meru lẹ mu wozetaru onwomu alị nke ọwhu Chileke l’e-kuli unu eli? Mbụ mu bya ezhia unu ozhi-ọma Chileke ono ẹwoma, t’ọ dụ iwhe mu sụru t’unu kfụa mu? ⁸Mẹ nteke mu shi eje ozhi l’echilabọ unu ono, bẹ bụkwa ndu chọchi ọdo shi anọje akfụ mu ụgwo. Mbụ ọ dụ gẹ-woo lẹ mu l’ana whẹ nfụ gẹ l’ee-shi tẹ mu yeru unu ẹka. ⁹Ọ tọ dụkwawho onye mu kfuchijeru nchị l’ime unu t’o yeru mu ẹka nteke ono, mu nọ l’ibe unu mkpa l’egbu mu egbu. O noo l’ụnwunna anyi, ndu shi Masedóniya bẹ wotakotaru mu iwhe bụ iwhe mkpa iya dụ mu. Ọ kwa gẹ mu l’unu shi nọdu iya nteke ono bụ g’anyi l’a-nọdukwa iya whọ m’e megee. Ọ kwawhọ gẹ l’ọoto dụa onye mu bụ ivu-ẹrwa swiru nteke ono bụ gẹ mu l’e-dobe onwomu tẹ mu ba abụ iya. ¹⁰Mu gude ọkpobe-okfu nke Kuráyisutu, dụ mu l’ẹhu ekweta ụkwa-a sụ l’ọ tọ dụdu madzụ igbalekọma, a nwụru anwụ l’alị Akáya, fụru mee t’ụnga-a, mu l’anga bụru iwhe mmaanụ. ¹¹?Ndẹnu g’o gude mu yee ya ọnu nno? ?Ọ fụtaru lẹ mu te eyedu unu obu? Ọo Chileke marụ lẹ mu yeru unu obu.

¹²Mu ta abyakwa l’a-ha ome iwhe ono, mu gude l’ẹka eme nta-a. Ọo ya bụ nke ọwhu mu l’e-mekwanu ndụ-ozhi ọwhuna tẹ whẹ be enwehe iwhe whẹ l’a-gbabẹ ọkpa eku onwowhe; ekfu sụ l’ọ kwawhọ gẹ anyịbedua l’ese anya ozhi-ọma ono bụ gẹ whẹ l’esehukwa iya-a. ¹³Unu ta amadụ lẹ ndu onona ta abụkwa ọkpobe ndụ-ishi-ozhi nke Kuráyisutu. Whẹ bụ ndu l’eje ozhi l’ụgho. Mbụ ndu l’emeje onwowhe, e dobenu sụ lẹ whẹ bụ ọkpobe ndụ-ishi-ozhi Kuráyisutu. ¹⁴Mbụ, ọ tọ kwatakwarọ bụru iwhe tụfuru ẹhu, eshi-ọwhu Sétanu l’emeje onwiya, e dobenu sụ l’ọ bụ ojozhi-imigwe, l’egoshi iwhoro nke Chileke. ¹⁵Ọo ya bụ l’ọ tọ bụhedu iwhe dụ oke biribiri m’ọ -bụ lẹ ndu l’ejeru Sétanu ozhi wota onwowhe mee t’e dobenu sụ lẹ whẹ bụ ndu l’ejeru Chileke ozhi. Nteke o rwuru mbọku ikpazụ bẹ Chileke l’a-gwa whẹ ọchi, gude kfụa whẹ ụgwo iwhe whẹ meru.

Iwhe-ọtsulanu, Pọlu l’eje

¹⁶A lwawhukwa mu azụ l’iwhe mu kfuhawaru, t’ọ bọ dụkwa onye l’a-nọ arị lẹ mu bụ onye eswe. Nteke bụ l’o noo iwhe unu l’arị, unu haanụ tẹ mu bụru onye eswe ọbu, kfuru yeru unu nke ọwhu mu l’a-nga ụnga nwilile. ¹⁷Iwhe ọwa, mu l’abya ekfukfu ntaa bẹ mu makwarụ-a l’ọ tọ dụ Onye-Nwe-Ọha bẹ sụru tẹ mu kfua ya. Mu -ngalahaa ụnga bẹ mu l’angakwa iya g’ọo onye égò sweru. ¹⁸Ọle eshi ndiwhe l’egudeje iwhe nke mgboko-o anga l’ụnga bẹ mbẹdua l’a-ngakwawhọ ụnga nke mu. ¹⁹Tọ bụhedu l’ọo l’unu manụkaru iwhe meru g’o gude unu l’egudeje ẹhu-ụtso haa ndu égò sweru t’unu lẹ whẹ nọdu. ²⁰Unu l’atajẹlee nshi nọ-kirishia, a nọnyaa onye lanụ abya ewota unu mee nwohuta iya, ọdua onye ọbu abya anọdu rikota unu ẹka, ọdua onye ono abya ghogbua unu, ọdua onye ono abya ewolide onwiya eli l’iwhu unu; ọdua ya bya awakwasẹ unu ẹka l’iwhu nke gbaa. ²¹Ọ dụkwa mu iwhere ekfukfu. Ọ tọ dụkwa nteke ike dụ mu nke ome ẹgube iwhe dụ nno.

Ọle ọwa, mu l’abya ekfukfu ntaa bẹ bụkwa okfu onye égò sweru. Sụa, iwhe lile, bụ iwhe ndu ọdo tụru ama nke egude anga ụnga bẹ mbẹdua gudekwawho anga ụnga nke mu. ²²Ndu ono ?whẹ bụ ndu Híburu? A-a! Mbẹdua bụhukwa iya whọ. T’ọo ?ụnwu Ízurẹlu bẹ whẹ bu? Mbẹdua bụkwa iya whọ. ?Tẹ whẹ shi l’eri Ébirihamu? Mbẹdua shikwa iya whọ. ²³Sụ-a, ?whẹ bụ ndu l’ejeru Kuráyisutu ozhi? O noo bẹ mbẹdua gbee kakwa whẹ nụ abụbu. Ntaa bẹ mu l’ekfuakwa g’ọo onye iwhu swehuru. Mu sụru lẹ mu ka whẹ iya abụbu-o, gẹ mu jelaru whẹ l’ozhi nke Kuráyisutu, mu kakwaa whẹ whọ ọgba mkpọro nnaweru, a kakwa mu whọ ochita ẹchachi l’urwu karụ whẹbedua, nteke nteke bẹ mu l’ebegojeru l’ọnu ọnwu. ²⁴Ọ dụ ugbo ise gẹ ndu Ju gudewaa ẹchachi chia mu ọnu iwhe ụkporo l’iri lẹ tete whẹ ono. ²⁵Ndu nke Romu chiakwa mu who iwhe ugbo ẹto, a kwawaa ẹwhuru tugbuwhodowa mu-a ndzụ ugbo lanụ. Eze ụgbo-mini kpuwa mu ugbo ẹto, mbụ o nweru ọwhu mu nọwaru lẹ mini eswe l’ẹnyashi mgburumgburu. ²⁶L’ikpoto ije ono, mu jekotaru bẹ mu lọwaru ishi mu alọ l’utso gbarụ nụ, lọo ishi mu alọ l’ẹka ndu l’ana nfụ mẹe l’ẹka ndu Ju ibe mu mẹe l’ẹka ndu l’ẹte abụa ndu Ju. Mu jee iwhe mini wharụ mu l’eze l’ọma obodo mẹe l’echi-ẹgu mẹe l’echi eze-ẹnyimu mẹe l’ẹka ndu l’abụa ọkpobe ndu nke Kuráyisutu. ²⁷Mu jewaru ozhi shihuru ike gbubua ẹwhuru, nteke nteke bẹ mu l’ejekwawho iwhe mu l’ete ekuje mgbẹnya, ẹgu gụwaru mu, ẹkpiri kpọwa mu nkụ. Mu jewaru ọwhu mu l’eria nri, mu nọwaa l’oyi, mu te enwe iwhe tugbobe l’ẹhu. ²⁸?Mu lẹ ole agụ? Ọle o nwekwaruwho iwhe ọdo, ọriri iya l’echije mu ẹhu mbọku-mbọku. Iwhe ọbu bụ lẹ mu l’anọjelewho agba mgbamego chọchi nke Kuráyisutu g’ọ ha. ²⁹Ọle ọobuje nteke bụ l’ọ dụ onye yeru ẹka l’oome iwhe-dụ-ẹji, ya ahụkwa mu whọ ọku l’obu.

³⁰Ọ -bụru lẹ mu ngafụtaje ụnga, iwhe mu l’e-gude anga ụnga bụkwa iwhe l’egoshi gẹ ike gvụ-beru mu. ³¹Ọ kwa Chileke bụ Nna Onye-Nwe-Ọha ono, bụ Jisọsu. Sụa, tẹ ekele bụru nkiya jeye lẹ tututu-mịmimi. Ọ kwa iya bụ onye marụ l’ọ tọ dụdu ọwhu bụ mu ejire l’iwhe lile ono, mu l’ekfu. ³²Lẹ nteke mu shi nọdu lẹ Damásukọsu bẹ ọ-chị-ọha obodo ono, bụ onye nochiru ẹnya Aritasu, bụ eze ndu ono, wotakwaru ndu ojọgu l’eche nche, dochia ọnoguzo ẹka l’eeshije abahụ l’ime obodo ono tẹ whẹ gude mu. ³³Tọ dụ iya bụ l’e wota mu ye l’ime nkata, pyoo mu lẹ ntufu, dụ lẹ mgbodo, e gude kpuwhe obodo ono mgburumgburu, mu shi l’ẹka ono nahụ iya gbalaa.

Iwhe Chileke goshiru Pọlu l’ọwhulenya

¹A makwarụ-a l’urwu ta adụdu l’ụnga, ọle mu ngafụtaje ụnga ono. Ntaa bẹ mu bya l’awata okfu nke ọwhulenya mẹe iwhe Onye-Nwe-Ọha goshiru mu. ²O nweru nwoke lanụ, mu marụ, bụ onye nke Kuráyisutu, Chileke zhikotaru; o jerwua mkpokfu igweli nke ẹto. A nọokwaru awha iri l’ẹno, iwhe ono meru. Ọle mu ta amahẹkwa: ?onye ono jerwuru iya l’onwiya, tọo ọwhulenya b’o whụru iya. Ọ kwa Chileke nwẹkiya marụ g’ọ nwụru. ³Iwhe ọwhu kazhia mu whọ odo ẹnya bụ lẹ Chileke zhikotaru nwoke ono, worwua ya ogboduwhu Chileke. Ọle mu ta amahẹkwa ?o jerwuru l’onwiya, t’ọo l’ọwhulenya? Ọ kwa Chileke bụ onye marụ nụ. ⁴Nwoke ono nọdu l’ẹka ono nụ-gee iwhe ọ nụru, kpọru ọnu ekfukfu, tẹmenu Chileke te ekwe tẹ madzụ gude ọnu iya whota iya. ⁵Ọo ya bụ l’ọo nwoke ono bẹ mu l’e-gude anga ụnga, ọle mu te egudekwa onwomu anga ụnga, gbahalẹwho lẹ mu l’anga ụnga l’ike gvụru mu. ⁶Ọ -bụru lẹ mu jeshia ọnga ụnga nke onwomu bẹ l’ọoto bụkwa mu roo égò esweswe, o noo nkele iwhe lile, mu gẹge anọ ekfu g’abụkotalewho ọkpobe-okfu. Ọle mu te ejekwaro ọnga ụnga. O noo lẹ nteke mu jederu ọnga ụnga b’o nweru onye l’a-wata arịri lẹ mu kabaa shii, ya aparụ iwhe ọ whụru mu l’ẹhu mẹe iwhe ọ nụru, mu kfuru haa.

⁷Chileke goshinukaru mu iwhe dụ biribiri. Ọ bụru iya meru g’o gude Chileke bya alọru iwhe lanụ ye mu l’ẹhu. Iwhe ono bẹ dụ g’ọo ikpowhu-mkpọ; akpọ mu chẹkiriri l’ẹhu nke ọwhu mu l’ete eje oku onwomu. Iwhe ono nọdu ọnodu ojozhi Sétanu, e zhiru; ọ bya akẹe mu ọrwu, gude gọ-zeta mu nggẹ mu te eku onwomu lẹ nke iwhe ono. ⁸Iwhe ono bẹ mu ryọwaru Chileke ugbo ẹto t’o mee t’iwhe ono parụ mu haa. ⁹Iwhe Chileke l’ekfujeru mu bụ: “T’eze-iwhe-ọma, mu meru ghu tsụjee ghu l’ẹnya.” Lẹ nteke ike nke Chileke l’akajẹ mu ire l’ẹhu bụ nteke ike gvụru mu. Ọo ya bụ iwhe ọbu, ẹhu l’atsọ mu ụtso lẹ mu gude l’ike gvụru mu anga l’ụnga; nnta gẹ l’ee-shi t’ike nke Kuráyisutu meje mu ire l’ẹhu. ¹⁰O noo iwhe mu sụru l’ike ono, gvụru mu nụ ono bẹ dụwaa mu ree, iwhe iwhere, l’eeme mu mẹe iwhe-ọtsulanu mẹe mkpamẹhu mẹe oke mkpa lile ono, l’anọje emewhe mu, bẹ dụwa mu ree l’iswi ẹhu Kuráyisutu. L’ọo nteke ike gvụru mu bẹ ike nkiya l’adụje mu ire l’ẹhu.

Pọlu l’agba égò ndu Kọ́rintu

¹¹Ntaa bẹ mu meekwaru g’ọo onye égò sweru. Ọle ọ kwa unubẹdua bẹ kpatarụ iwhe mu meru nno. L’iwhe gbarụ unu l’ememe bụ l’unu gẹge anọ etu mu ẹwha. L’a makwarụ-a l’ọ tọ dụdu iwhe mu bụ, ọle ọ tọ bụkwa mu bẹ ẹnya nke mu bya akagee alwalwa l’ẹka ndu ono l’ezhi unu ozhi-ọma ono, ajakpọshi onwowhe ono nọ. ¹²Mu takwarụ nshi, meshia iwhe-awhụrulenya, dụkota biribiri, meshikwaawho iwhe tụfuru ẹhu l’echilabọ unu. Iwhe ono bụkotaru iwhe mu gude goshi unu lẹ mu bụ onye-ishi-ozhi Kuráyisutu. ¹³?O nwezhiaru ụzo ọdo, mu kabaa omeru chọchi ọdo ree, mu l’emeeru unu, t’a gụfulewho lẹ mu ta asụdu t’unu kfụa mu ụgwo. A-a! Ọ wakwawhọ ẹkalali-o! Eshi ono gbee bụwaru ẹji, mu mee ya unu.

¹⁴Ọ waa kweekwaa ugbo ẹto, mu jịkoberu nke ọbya ụzo iya nke unu. Mu -bya bẹ mu l’ẹte asụkwa t’unu kfụa mu ụgwo nkele iwhe mu l’achọ abya ta abụkwa okpoga unu. Ọo unubẹdua l’onwunu bẹ mu l’achọ abya. Ọ tọ bụkwa ụnwegirima bẹ l’akpajẹ ẹku doberu ndu nwụru whẹ nụ, ọ kwa ndu nwụru whẹ nụ bẹ l’egbechijee kpaa ẹku doberu ụnwu whẹ. ¹⁵Mu l’e-gudelewho ọkpobe ẹhu-ụtso, mewhushiaru unu iwhe mu nweru; tụa ishi mu, nnta gẹ l’ee-shi t’ọ dụru unu lẹ mma. ?Unu l’e-gbee yepeta mu obu nkele ọo lẹ mu yenukaru unu obu?

¹⁶O nwekwaru-a ndu ọwhu harụ kwe lẹ mu te eshidu bụru unu ivu-ẹrwa. Ọle o nwekwaru-a ndu ọwhu, l’a-sụ lẹ mu shi bụnukaru onye ẹregede, lẹ mu gude ụgho nmata unu. ¹⁷?Ọ bya anwụde aghaa? ?O nwezhiaru iwhe bụ ndu ono, mu zhiru tẹ whẹ byakfuta unu onye ọwhu mu gbee shi l’ẹka iya ria unu urwu? ¹⁸Mu ryọkwaru Táyitọsu sụ iya t’ọ bya; mu sụkwawho nwanna anyi ọwhuna t’o tsoru iya. ?O nweru iwhe unu l’a-sụ lẹ Táyitọsu byarụ bya erita unu? ?Tọ bụleduwho umere lanụ bẹ mu l’iya l’eme: ?tọo bụleduwho ụzo lanụ bẹ mu l’iya l’emeje iya?

¹⁹?T’unu shi eshi nkeshi-a bụnu rịta l’iwhe anyi l’eme bụ g’anyi l’e-me gọfu l’atatiwhu unu? Wawakwa-o! L’iwhe anyi l’anọjelewho ekfu bẹ anyi l’ekfu marụ l’anyi l’ekfu iya l’iwhu Chileke, tẹmenu anyi lẹ Kuráyisutu tụgba bụru nnanụ. Ọo ya bụ, ndu mu yeru obu, l’iwhe lile, anyi l’anọje eme bẹ anyi l’anọdujekwa eme t’anyi gude metsee unu. ²⁰Mu l’atsụkwa egvu sụ: ?mu marụ tọo bụdu nụ nteke mu byarụ, unu eje adụhe nụ gẹ mu rịru l’unu l’a-dụ, mu eje adụhekwawho unu g’unu rịru lẹ mu l’a-dụ. Mbụ mu ta abyadụ nụ bya awhụa l’unu l’anọje aswọ-whe ụswo, ekwowhe ekwo, bụru ndu obu-ọku, l’unu l’akpawhe ẹnya, ewhuwhe onwunu iwhu, agba ibe unu mgbamụ, ekuwhe onwunu eku, bụru ndu mkpaka. ²¹Mu l’atsụkwa egvu sụ lẹ nteke mu byarụ l’ọgiya-a, mu l’a-bya lẹ Chileke l’e-wozeta mu alị l’iwhu unu, mu awata ọrya ẹkwa ekpu igweligwe ndu ono, mehawaru iwhe-dụ-ẹji, whẹ te ekwekwawho daa onwowhe ụta haa ome iwhe-dụ-ẹji ono, whẹ l’emegbabe; lwakfuta Chileke; haa ejo umere, l’eshi nshi, haa ụrwu-alị mẹe tẹ whẹ ba abụhero ndu iwhere gvụru l’iwhu.

Ọnma ọkwa, Pọlu gude akpochi iya ishi

¹Abyabya ọwa, mu bya l’a-bya ntaa bẹ kweekwa iya ugbo ẹto, mu l’a-bya unu agbawhe. Ẹkwo okfu Chileke b’e dekwaru sụ: “Onye e kuru ikpe bẹ l’ẹte anmajẹkwa ikpe m’ọ -bụ-zhia l’a dụ ẹbo, ọbu ẹto agba iya ẹka-ebe.” ²Ndu ono, meru iwhe-dụ-ẹji bẹ mu nmaakwarụ ọkwa mẹwaro ndu ọwhu gẹ whẹ ha. Mu l’anmakwarụ whẹ iya whọ nta-a, mu l’ẹte anọdua l’ẹka ono, gẹ mu nmahawarụ whẹ iya l’ọwhu mu byajẹru nke ugbo l’abọ, lẹ mu -bya bẹ mu l’ẹte ahakwa tẹ whẹ riru iya. ³Ọo ya bụ, unu eshikwanu nno marụ lẹ Kuráyisutu gude mu-a ekfu okfu. L’unu sụkwaru t’e goshi unu iwhe l’e-me t’unu marụ l’o gude mu-a ekfu okfu. Kuráyisutu ono te emejekwa g’ọo onye ike gvụru mẹ l’oomeru unu iwhe. Iwhe l’oo-mechia bụ l’oo-goshi gẹ ọkpehu iya habe l’ẹka unu nọ. ⁴L’a makwarụ-a l’ike te eshidu dụkwadu iya nteke ono, a kpọpyaberu iya l’oswebe. Ọle ntaa bẹ bụ ike nke Chileke b’o gude nọdu ndzụ. Ọ kwawhọ g’ike l’ete eshia dụkwadu iya bụ gẹ l’ooto shia dụkwadu anyịbedua. Ọle ntaa bẹ ike nke Chileke l’e-me anyi, anyi anọdu ndzụ gẹ Kuráyisutu nọ iya, ike adụ anyi g’ọ dụ iya nke ọwhu ike l’a-dụ anyi l’iwhe bụ-zhia iwhe anyi l’emeru unu.

⁵Sụa, unu datajẹ onwunu, nyochajee obu unu enyocha nggẹ unu gudeje nno marụ: ?unu nọshikwaduru-a ike lẹ ekweta, unu kweru nke Kuráyisutu. ?Unu ta amadụ lẹ Kuráyisutu Jisọsu bẹ bu ebu l’ime unu? T’a gụfulekwawho l’unu datawarụ onwunu whụa l’unu te ekwetahedu, ya abụru iya bụ l’o to budu ebu l’ime unu. ⁶Ọwhu mu gude ẹka bụ l’unu l’e-megee marụ l’anyịbedua te edochakwa ekweta ono, anyi kwetaru nke Kuráyisutu. ⁷Iwhe anyi l’anọje ekfu anụ Chileke bụ t’o bo kwekwa t’unu mee iwhe l’ẹte adụa ree. Ọ tọ bụkwa t’e gude goshi l’anyi bụ nwọmaru-ọ-machaa, o chikwaa t’unu meje iwhe dụ chịriri, e -behuduru ?o -je m’ọo l’a-dụ gẹ-woo l’anyịbedua dochawaru ekweta ono, anyi kwetaru nke Kuráyisutu. ⁸L’ọ tọ dụkwa t’ọ kadụ mma l’ọo iwhe lanụ, anyi fụru dụ ike mee gude mebyia ọkpobe-okfu nke Chileke, gbahachia l’anyi l’anọje eme iwhe l’iswi nke ọkpobe-okfu ono. ⁹Ọo ya bụ l’ẹhu l’anọje atsọ anyi ụtso m’ọ -bụru l’ike gvụru anyi, unubẹdua shihu ike. O noo g’o gude anyi l’anọje ekfufua anụ Chileke t’o mee t’unu lwawhu azụ l’ọnodu, dụkota ree shii. ¹⁰Mu l’ede iwhe-e nta-a, mu l’unu l’ẹte anọo l’ẹka ono. Iwhe mu kwoberu edeshi iya bụ nggẹ mu te eje ogude ike ono, Onye-Nwe-Ọha nụru mu je ome ẹngiringaa mẹ mu bya. Ọo ya bụ nggẹ mu te egude ike ono, Onye-Nwe-Ọha yeru mu l’ẹka t’e gude metsee unu emetse hụlahaa unu ahụ.

Ekele

¹¹Sụa, ụnwunna mu, mu l’asụkwa unu ntaa t’unu nọo ọwhoma. Unu kpatakwa ụzo lwawhu azụ l’ọnodu, dụkota ree. Unu nụjeru mu okfu. T’onyenọnu kweje lẹ nke ibe iya bụ iya. Unu eburu l’olu odoo. Ọo ya bụ nke ọwhu Chileke ono yeru anyi obu, emejekwawho t’anyi buru l’ẹhu ọdu guu l’e-swiru unu.

¹²Unu keleje ibe unu ekele tsujee whẹ ọnu lẹge ọ gbarụ ụnwunna lanụ.

¹³Iwhe bụ-zhia ndu nke Chileke l’ibiya ọwa l’ekelekwaro unu.

¹⁴T’eze-iwhe-ọma nke Onye-Nwe-Ọha, bụ Jisọsu Kuráyisutu mẹe oye obu nke Chileke mẹe ike ono, Ume-Dụ-Nsọ meru t’anyi l’unu gba mgba nweru, dzukotaru g’unu hakọta.