1 Tímoti

Ẹkwo-Ozhi Nke Mbụ, Pọlu Deru Nụ

TÍMOTI

¹Ẹkwo-ozhi-a bẹ shi l’ẹka mbẹdua, bụ Pọlu; mbụ mụbe onye-ishi-ozhi Kuráyisutu Jisọsu. Ọo Chileke ono, bụ onye l’adzọje anyi mẹe Kuráyisutu Jisọsu ono, bụ onye anyi l’ele ẹnya iya bẹ zhiru mu tẹ mu bụru onye-ishi-ozhi ono. ²Onye mu l’ede ẹkwo-ọ anụ bụ gụbedua, bụ Tímoti, onye bụ ọkpobe nwa mu nke l’ọo mu bẹ dutaru ghu, ị bya ekweta l’ọo Kuráyisutu Jisọsu bụ Onye-Nwe-Ọha.

Tẹ Chileke, bụ Nna mẹe Onye-nwe-anyi Kuráyisutu Jisọsu meeru ghu eze-iwhe-ọma; meeru ghu obu-imiko, mekwaawho t’i buru guu.

Tẹ ndu l’ezhi ejo nzhi sefu iya ẹka

³Sụa, nteke ono mu l’eje Masedóniya bẹ mu kfukwaru ghu sụ ghu byiko t’ị nọdulekwawho lẹ Éfesọsu. L’o nwekwaru ndu nọ l’ẹka ono ezhi ejo nzhi, tụkoru bụkotaru ejire. Ọo ya bụ iwhe ọbu mu l’ekfu sụ t’ị nọdu l’ẹka ono nmajẹeru whẹ ọkwa, sụ whẹ tẹ whẹ be ezhishi iwhe ono, l’ẹte abụa ọkpobe-okfu. ⁴Whẹ ahaa anọ akọ-whe mkpọkoro akọ-iwhe ndu Ju. Whẹ ahakwaawhọ nke anọ agụshi ndzekfu-ndzekfu ẹwha ndụ-ichee, mbụ ẹwha l’ẹte agvụje agvụ. Ẹgube iwhe ono bẹ bụlewho ntụtu-ẹgo bẹ l’ọokpa-lije. O to yetajeduru madzụ ẹka t’o mee iwhe Chileke tụberu t’o mee, mbụ iwhe ono anyi shi l’ozhi-ọma ono, anyi kwetaru marụ. ⁵Iwhe meru mu nmaarụ ghu ọkwa ono bẹ bụ nke ọwhu ndu nke Kuráyisutu l’e-ye ibe whẹ obu. Mbụ obu ono, whẹ l’e-ye ibe whẹ abụkwaru oye obu ọwhu e gude obu-iwhoro ye mẹe l’obu marwetaru iwhe gbarụ iya l’ememe mẹe l’okweta nke Chileke ọkpobe ekweta. ⁶O nweru ndu hawarụ shiswee ọkpobe ụzo ono, wotawa iya ghaa igharawhu, shiwaro nno wata anọ ekfu mkpọkoro okfu. ⁷Ndu ono bẹ l’ọogu ẹgu tẹ whẹ bụru ndu o-zhi-iwu lẹbe abụ l’okfu ono, whẹ l’ekfu doru whẹ ẹnya, tọ hẹkwanu m’ọo l’iwhe ono, whẹ l’ekfushi okfu iya ono ike doru whẹ ẹnya.

⁸Anyịbedua magezhiaru l’iwu Chileke bẹ dụ ree, m’ọ -bụru-a l’eetso iya-a lẹge ọ gbarụ t’e tsoje iya. ⁹Ọle iwhe ọwhu dokwanuru ẹnya bụ l’ọ tọ bụkwa ndu dụ chịriri l’iwhu Chileke b’e kwoberu tụa iwu. Ndu a tụru iwu doberu bẹ bụkwa ndu l’emebyi iwu mẹe ọ-karia-ẹka whẹ, tụaru iya ndu ono l’eme iwhe-dụ-ẹji, l’anọje akpọ Chileke ẹbo-ẹbo l’afụ, tụaru iya ndu l’ete etso ụzo Chileke, tụaru iya ndu l’ẹte adụa iwhe ọwhu bụ nke Chileke ọwhu whẹ doberu nsọ m’ọo nnanụ, tụaru iya ndu l’egbuje nna whẹ, tụaru iya ndu l’egbuje ne whẹ, tụaru iya ndu mgbugbu madzụ l’owhu. ¹⁰A tụa ya doberu ndu l’arwụje ụrwu-alị mẹe unwoke, l’ejekfuje nwoke ibe whẹ azẹe nwoke lẹ nwanyị mẹe ndu l’apa madzụ l’oshi. A tụa ya doberu ndu ejire mẹe ndu l’agụjeru ẹnwa tukobe onwowhe l’iwhe whẹ mechaaru-a. A tụkwaa ya whọ doberu iwhe bụkota ndu l’eme iwhe bụ-zhia iwhe ọdo, l’emerwushi ọkpobe-okfu ono, e zhiru unu emerwushi. O noo ẹgube ndu a tụru iwu ono doberu ndono. ¹¹Ọkpobe okfu ọbu, e zhiru unu bẹ shikwa l’ozhi-ọma ono, Jisọsu Kuráyisutu yeru mu l’ẹka. Ozhi-ọma ono bụkwanuru ozhi-ọma nke ọdu-biribiri nke Chileke ono, bụ Chileke dụkota ree, dzukota oke l’ime onwiya.

Pọlu l’etu Chileke ẹwha

¹²Mu l’etu Onye-nwe-anyi Kuráyisutu Jisọsu ẹwha. Ọo ya bẹ bụ onye meru: mu dụ ike eje ozhi-a, mu l’eje-e. Mu l’etu iya ẹwha nkele o lewaru ẹnya, whụa lẹ mu bụ onye gbarụ tẹ ya gude ire mu ẹka, ọ họta mu tẹ mu jeeru iya ozhi ono. ¹³A makwarụ-a lẹ mu shi anọje ekfutoshi Jisọsu Kuráyisutu lẹ mbụlembu, shi anọje achị nta iya; shikwawho anọje eme iya iwhe iwhere. Ọle Chileke bẹ whụlekwaru mu-a imiko nkele iwhe ono, mu shi eme bẹ mu shi eme lẹ ọma-ama. Mu te eshikwa kwetawaa nteke ono l’ọo Jisọsu bụ Onye-nwe-anyi. ¹⁴Tọ dụ iya bụ lẹ Onye-nwe-anyi ono, bụ Jisọsu Kuráyisutu abya awhụaru mu imiko, nyịberu gẹ l’aa-nọ atụ ọnu iya. O mee mu, mu bya ekweta l’ọo ya bụ Onye-Nwe-Ọha ọbu; mekwaa mu who, mu ye ndu ọdo obu. O noo bụru iwhe l’oomejeru iwhe bụkota ndu whẹ l’iya tụgbaru bụru nnanụ. ¹⁵Okfu-a bẹ bụkwa okfu, e gude ẹka, gbarụ nke t’e gbobe ẹka labọ nata iya ọkpobe anata. Okfu ọbu bụ lẹ: Jisọsu Kuráyisutu bẹ byarụ lẹ mgboko-o tẹ ya bya adzọfuta ndu l’eme iwhe-dụ-ẹji. Ọ bụru mbẹdua bẹ shi bụru onye tarụ ishi iwhe bụ iwhe-dụ-ẹji l’eemeje eme. ¹⁶O noo iwhe meru Jisọsu Kuráyisutu whụaru mbẹdua imiko, mee t’ọ bụru l’ẹhu mu bẹ ya l’e-shi goshi ndu ọdo gẹ ọta-nshi iya l’owhu habe shii. Ọo ya bụ lẹ Jisọsu Kuráyisutu bẹ gude ẹhu mu egoshi ndu ọdo lẹ ya l’a-gbẹenu dzọfuta whẹ, nụ whẹ ndzụ tututu-mịmimi, ebehuduru iwhe-dụ-ẹji, whẹ meru dụ-behudu ẹji ọdu agha, m’ọ -bụru-a lẹ whẹ woru onwowhe ye iya l’ẹka. ¹⁷Sụa, tẹ ndiwhe kwabẹ Chileke ugvu, whẹ ajaa ya ajaja, mbụ Chileke ono, bụ eze, ọ bụru g’ọ bụ eze ono ntaa bụ gẹ l’ọo-bụgburu eze jeyewaro. Ọo ya bụ Chileke lanụ, dụ nu kpụ, ọ bụru iya bụ Chileke ọbu, l’ẹte anwụhuje anwụhu, t’a whụje iya l’ẹnya. Sụ t’a kwabẹ iya ugvu, jaa ya ajaja jeye lẹ tututu-mịmimi. O noo g’ọ dụ.

¹⁸Sụa, Tímoti ọ kwa gụbedua, dụwaa g’ọo nwa mu bẹ mu nmarụ ọkwa-a ye l’ẹka. Iwhe meru g’o gude mu nmaarụ ghu iya nno bụ tẹ mu gude iya nyatarụ ghu iwhe ono, ndu nkfuchiru Chileke kfuru l’okfu ẹka ghu. T’iwhe ono, whẹ kfuru ono mee obu ghu t’o shihu ike nke ọwhu ọ bụ iya l’a-bụ iwhe l’ii-gude alwụ ọgu ẹhu Chileke ono, l’ịilwu ono. ¹⁹Kwetagbulekwaruwho nke Kuráyisutu; t’iwhe bụ iwhe l’ii-meje bụjelekwaruwho iwhe obu ghu marwetaru l’ọo iwhe gbarụ iya l’ememe. O nwekwaru ndu magezhiaru iwhe gbarụ whẹ l’ememe, obu whẹ sụru whẹ tẹ whẹ mee, whẹ te eme iya. Ọ bụkwanuru iwhe ono bẹ kpatarụ ekwekwe ọbu, whẹ kweru nke Kuráyisutu tụko rikashihu erikashihu g’ọo ụgbo-mini, vụru onwiya l’akpaa. ²⁰Ndu harụ tsoru lẹ ndu ono bẹ bụ Hayimeníyọsu mẹe Alẹguzánda. Ndu ono bẹ mu wookwaru ye l’ẹka Sétanu t’ọ nụa whẹ awhụ nke ọwhu whẹ l’a-nwụtakwanu l’ọ tọ dụdu ree t’e kfutoshije Chileke.

Gẹ chọchi l’e-gudeje abarụ Chileke ẹja

¹Iwhe mbụ, mu l’ekfu ekfushi iya ike bụru, t’e kfujeru nụ Chileke sụ iya t’o yeru ndu ọdo ẹka, e kfujekwaru iya whọ sụ iya: t’o mejeeru whẹ iwhe mkpa iya dụ whẹ. T’e kfujekwaruwho nụ iya l’iswi madzụ lile g’a ha, e kelejekwa iya who ekele. ²T’e kfujeru nụ Chileke l’iswi ẹhu ndu eze mẹwaro ndu lile, bụkota ndu ishi, l’achị nụ. Ọo ya bụkwanu nke ọwhu nchị l’a-dụ anyi ndoo, anyi eburu guu mẹe nke ọwhu anyi l’a-nọ anụru Chileke okfu mẹkwawho nke ọwhu anyi l’a-nọ eme umere, gbarụ anyi l’iwhe lile anyi l’eme eme. ³Sụa, o nokwa iwhe dụ ree ndono. Tẹmenu ọ bụkwaru iya whọ bụ iwhe dụ Chileke ree, mbụ Chileke ono, bụ onye ndzọta anyi ono. ⁴Ọ dụ Chileke l’uche tẹ ya tụko madzụ lile dzọo. Ọ dụkwa iya whọ ?ọ dụ g’e shi madzụ lile byakọta bya amarụ iwhe ono, bụ ọkpobe-okfu ono. ⁵O noo l’ọo Chileke lanụ kpụ bẹ dụ nụ, ọ bụkwaruwho onye lanụ kpụ bẹ bụ onye l’akfụjeru lẹ mgbakụ Chileke yẹle madzụ. Onye ọbu bụ Kuráyisutu Jisọsu, bụkwawho madzụ l’onwiya. ⁶Jisọsu ono gude onwiya, gbaa ẹja nụ Chileke l’iswi ẹhu madzụ l’owhu, t’ọ bụru iwhe ya l’e-gude gbata whẹ. Ya eshi nno goshi l’iwhe dụ iya l’uche bụ tẹ ya dzọfuta ndiwhe l’owhu. Iwhe ono bụru iwhe meru nụ; nteke Chileke l’onwiya sụru l’o noo nteke l’oo-me. ⁷O noo iwhe meru ọ họta mu, mee mu tẹ mu bụru onye-ishi-ozhi nkiya nke ọwhu mu l’e-gude ozhi-ọma ono je aryaa arya l’alị ndu l’ẹte abụa ndu Ju, mu ryaa ya arya, mu ezhia ya ezhi nke ọwhu whẹ l’e-kwetakota ọkpobe-okfu ono. Ọ kwa ezhi-okfu bẹ mu l’ekfu ẹgube-ẹ. Ọ tọ kwa ejire bẹ mu l’adzụ.

⁸Sụa, iwhe ẹnya dụ mu bụ t’unwoke kfujezhiawho nụ Chileke l’ẹka lile. Tẹ whẹ chilijee ẹka whẹ, gudeje obu-iwhoro kfuje nụ Chileke. T’ẹhu be eghujekwa whẹ eghu, tẹ whẹ ba abọjekwa obu ẹbo mẹ whẹ l’ekfu anụ Chileke.

⁹A bya abya l’ụnwanyi, iwhe ẹnya dụ mu bụ t’ụnwanyi rịkwaawho ọriri marụ ẹgube uwe whẹ l’e-yeje l’ẹhu. T’ụnwanyi yejee uwe, gbarụ whẹ nụ. T’iwhe whẹ l’e-gudeje emema onwowhe emema bụru iwhe l’e-goshi lẹ whẹ doberu onwowhe ọga, whẹ sedekwawho onwowhe. T’ọ bọ bụkwa ome ẹgbushi t’ọ bụru iya bụ ẹka ẹnya l’a-nọ eje. T’ụnwanyi be egudejekwa mkpọla-ododo yẹle aka emema onwowhe, tọ bụhunu oye uwe, vu oke aswa bẹ whẹ l’e-gude emema onwowhe ọbu. ¹⁰Iwhe ụnwanyi l’e-mejechia bụ tẹ whẹ meje iwhe-ọma, bụkwanu iya bụ iwhe gbarụ ụnwanyi, sụru lẹ Chileke dụru whẹ lẹ nsọ l’ememe. ¹¹T’ụnwanyi wozeje onwowhe alị ọkpobe ewoze, nọduje nwanggujingguji nwụje iwhe l’eezhi whẹ. ¹²Mu te ekwekwa t’ụnwanyi zhije iwhe. Mu te ekwekwawho tọ dụ nwanyị, l’a-nọ atụru unwoke iwhe whẹ l’a-nọ eme. T’ụnwanyi jipyajelekwawho onwowhe nwandoo. ¹³L’ọ kwa Ádamu bẹ Chileke vu ụzo mee, tẹmenu ọ bya eme Iifu. ¹⁴Ọ tọ bụkwa Ádamu bẹ Sétanu ghọru ụgho, ọ kwa ọwhube nwanyị b’ọ ghọru iya, mee ya: o mebyia iwu, Chileke tụru. ¹⁵Ọle iwhe Chileke l’e-gude dzọo nwanyị bụ ọnwushi ụnwu, m’ọ -bụ-zhiaru-a lẹ yẹbe nwanyị ono nọshiru ike l’ekwekwe o kweru nke Kuráyisutu, whẹ eyekwawho ndu ọdo obu, whẹ abụru ndu nke Chileke ọkpobe abụbu, whẹ edobe onwowhe ọga.

Ndu ishi chọchi

¹Okfu-a bẹ kwa okfu, e gude ẹka, kfuru sụ: “Ọ -bụru l’o nweru onye ẹnya dụ tẹ ya bụru onye ishi chọchi, onye ono bụkwa ọkpobe iwhe bẹ l’agụ iya nụ.” ²Onye ishi chọchi bẹ bụfutajekwa onye l’ẹte amarụ ejo ẹka. Ọ bụfutaje nwoke, l’alụ nwanyị lanụ kpụ, ya abụkwaruwho onye l’esedeje onwiya. Ọ bụfutaje onye nweru uche, ọ bụfutaje onye l’emeje umere, gbarụ onye ishi chọchi. Onye ono bụfutaje onye l’oowhe uwhere tẹ ya kwaarụ ndu batarụ ibe iya ẹbyii ree-ree-ree. Ọ bụfutaje onye l’a-dụ ike ezhi ndu ọdo iwhe. ³T’onye ono ba abụkwa onye l’angụtaje mmẹe, ya eme iya l’ẹnya; onye ono ta abụhunu o-chi-gbaa. T’onye ono bụ-chiaru onye l’eme odoo; onye l’ẹte aswọje ụswo; onye ọbu bụfutaje onye l’ete eyee ẹnya l’okpoga. ⁴Onye ono bụjekwa onye dụ ike eleta ibe iya ẹnya ree; ya abụru onye ụnwegirima iya l’anụru okfu; akwabẹkwa iya whọ ugvu. ⁵Lẹ nteke ọ -bụ lẹ madzụ ta adụdu ike bụru onye ishi l’ibe iya, ?ndẹhunu g’onye ọbu l’e-me dụ ike letakota chọchi Chileke ẹnya? ⁶T’onye ono ba abụkwa onye bụ-wokwadua b’ọ bya abụru onye nke Chileke nke ọwhu onye ọbu l’ẹte awata ome nwọ-ha-g’iya ọ-ha-g’iya, shi nno Chileke anma iya ikpe, g’ọ nmarụ iya Sétanu bụ iya bụ Oshifutuswe. ⁷Onye ishi chọchi l’a-bụkwawho onye l’ete evua ejo ẹwha l’ẹka ndu l’ẹte abụa ndu chọchi nọ, ọo ya bụkwanu t’ọ bọ dụ onye l’a-sụ l’ọ whụru iwhe onye ishi meru, a nọnyadaawho, Oshifutuswe gude ẹgube iwhe ono nmata onye ishi ono l’ọnya.

Ndu l’ejeru chọchi ozhi

⁸Ndu l’ejeru chọchi ozhi bẹ bụfutaje ndu l’eeyeru ugvu; whẹ abụkwaruwho ndu l’abụje whẹ kfua okfu; a marụ lẹ whẹ kfuwaru obu whẹ, tẹ whẹ ba abụkwa ndu l’angụnuka mmẹe, tẹ whẹ ba abụkwa ndu l’anọje achọ urwu l’ụzo, l’akfụaru nhamụnha. ⁹Tẹ whẹ gude obu whẹ g’ọ ha gudepyabe ọkpobe-okfu ono whẹ kwetaru ono, bụ ọkpobe-okfu, Chileke goshiru anyi, t’obu whẹ ba atajẹ whẹ ụta. ¹⁰T’e vujeekwaru ụzo letaada whẹ eleta, nteke e letageeru whẹ, tọ dụ ẹka ọnu bọru whẹ ẹbo; ọo ya bụ, e yewa whọ ro ọbu tẹ whẹ jejeru chọchi Kuráyisutu ozhi. ¹¹Tẹ nyee onye l’ejeru chọchi ozhi bụkwaru onye l’eeyeru ugvu. T’ọ bụkwaru onye l’ẹte asụ asụlasu. Ya abụkwaruwho onye l’esedeje onwiya, ya abụru onye goshiwaru lẹ ya gbarụ nke t’e gude ire iya ẹka l’iwhe lile l’oome. ¹²T’onye l’ejeru chọchi ozhi bụkwaru nwanyị lanụ kpụ bẹ l’ọo-nọ alụ. Ya abụru onye l’a-dụ ike leta ụnwu iya ree-ree-ree, eletakwawho ibe iya ẹnya ree. ¹³O noo l’ọ -bụru lẹ ndu l’ejeru chọchi ozhi bẹ l’ejerwe iya ejerwe b’ọ gbakwarụ nke t’a kwabẹ whẹ ugvu, ka l’ugvu. Whẹ akakwanụ adụ ike gude obu oshihu ike aasa iwhe ono, anyi kweru ono kaa kaa, mbụ iwhe ono, anyi kweru nke l’ọo l’anyi lẹ Jisọsu Kuráyisutu tụgbaru bụru nnanụ.

Iwhe Chileke shi domia edomi

¹⁴Mu l’elekwa ẹnya lẹ mu ta anọhedu ọdu ntaa mu abya agbawhee ghu. ¹⁵Ọle mu l’edekwaru ghu-a ẹkwo-ozhi-a; o noo lẹ mu ta amadụ gẹ l’oo-me, ya e nweru iwhe l’a-kpata mu akpọde ukfu. Iwhe meru mu l’ederu ghu iya bụ t’i gude iya marụ iwhe gbarụ ndibe Chileke l’ememe. Chọchi b’ị maanarụ-a l’ọo ya bụ ibe Chileke, mbụ Chileke ono, nọ ndzụ. Sụa, ọ kwa gẹ itso yẹle ukfu-ụlo l’egudeshije ụlo ike bụ gẹ chọchi gudeshi ọkpobe-okfu ono ike. ¹⁶A tụkoru kwetakota l’ọkpobe-okfu ono, Chileke shi domia edomi bẹ kwatarụ paa ẹka mebyi apaa. Chileke goshiru iya anyi, anyi kwetakwa iya whọ. Ọkpobe okfu ọbu bẹ kfuru sụ:

Jisọsu bẹ byarụ lẹ mgboko-o bya abụru madzụ,

Ume Chileke goshi l’ọ bụ onye dụ chịriri.

Ndu-ojozhi-imigwe gudekwa ẹnya whẹ, whụa ya.

E kfukotaru ndu mba lile, dụ lẹ mgboko-o okfu ẹhu iya.

Ndiwhe kweta nkiya,

Chileke bya ekuta iya kuba l’imigwe,

Je akwabẹ iya ugvu, ka l’ugvu.

Ndu ẹjo nzhi

¹Ume Chileke bẹ l’ekfuru iya anyi arwụ iya anyi arwụ lẹ nchị sụ l’o rwudelewho nteke Jisọsu l’a-bya b’o nweru ndu l’e-docha ọkpobe-okfu ono, anyi kwetaru ono, wata anọ anga nchị l’iwhe ndu ọgvu l’alowhu alowhu l’ekfu, whẹ etsolahaa iwhe ọgvu ono l’ezhi. ²Ndu ono, l’etso iwhe ọgvu ono l’ezhi bẹ l’ahajẹ tẹ ndu iwe-l’obu-ọchi-l’ọnu-eze whẹ ono gude ejo ejire, whẹ l’anọje adzụshi duwhushia whẹ, mbụ ndu ọbu, l’ẹte amajẹhe iwhe gbarụ whẹ l’ememe nkele Sétanu bẹ gudewaa mkpụrumkpu igwe, ọku dụ, mee iwhe-ọhubama l’ọriri whẹ, gude goshi l’ọo ya nwe whẹ. ³Ndu dụ nno bẹ iwhe whẹ l’anọje ezhi bụ l’ọ tọ dụdu ree t’a lụje nwanyị, whẹ ekfukwawho l’o nweru ọga nri ọwhu l’ẹte adụa ree tẹ madzụ rijee. Ọle ọ kwaa Chileke bẹ meru nri ono sụ t’e rijee ya eri, mbụ tẹ ndu kweru l’ọo Chileke ono bụ Chileke whẹ, rijee ya mẹ whẹ -kelewa iya ekele iya, mbụkwa ndu ono, byawaa bya amawarụ ọkpobe-okfu ono. ⁴Iwhe lile, bụ iwhe Chileke meru bẹ dụkota ree eriri. Ọ tọ dụkwa ọwhu gbarụ nke t’a jịkaje iya. Iwhe anyi l’e-mejechia bụ t’anyi rijee iwhe g’iwhe ha mẹ anyi kelewaa Chileke ekele iya. ⁵O noo l’okfu Chileke mẹe ekfukfu ono, e kfuru nụ Chileke ono bẹ mewaru: iwhe ono dụkota nsọ l’iwhu Chileke.

Onye l’ejeru Kuráyisutu Jisọsu ozhi ejerwe iya ejerwe

⁶Ọ -bụru l’i wotaru iwhe lile-e, e kfukotaru ghu g’ọ ha kfukotaru ụnwunna lile bẹ kwa iya bụ l’ị bụ onye l’ejeru Kuráyisutu Jisọsu ozhi, ejerwe iya ejerwe. Ọo ya bụ l’iigoshi l’ọo okfu Chileke ono i kwetaru mẹe ọkpobe iwhe ono, e zhiru ghu, i shizhiawho nkeshi ono tsota bẹ bụ nri, i gude azụ onwoghu. ⁷Ba angabẹjekwa nchị lẹ mkpọkoro akọ-iwhe, l’adụa iwhe bụ ọkpobe-okfu, dụ iya nụ ilile, mbụ akọ, tụkoru bụkotaru iwhe mmaanụ. Iwhe l’ii-mechia bụ t’ị hụjee onwoghu ahụhu nke ọwhu l’ii-gude nno nọdu ndzụ, dụ Chileke ree. ⁸O nweru ndu l’anọje àhụ̀ ẹhu whẹ àhụ̀hù nke ọwhu whẹ l’e-shihu ike. Àhụ̀hù ono, l’aahụ̀ ogwẹhu bẹ urwu dụkwa, ọle urwu ọbu dụ iya nụ ta abadụ nwishi. Ọle ọwhu urwu gbarụ mgburumgburu bụ lẹ madzụ bẹ hụ̀rù obu iya àhụ̀hù nke ọwhu obu iya ono l’a-nọ etso Chileke. O noo lẹ Chileke kweru ụkwa lẹ ndu l’eme nno bẹ ya l’e-meru eze-iwhe-ọma lẹ ndzụ ọwhu whẹ nọ ntaa, meru whẹ iya lẹ ndzụ, whẹ l’a-nọ lẹ mgbe l’iwhu. ⁹Okfu-a bẹ bụ okfu, e gude ẹka, mbụ okfu gbarụ tẹ madzụ lile gbobe ẹka labọ nata iya. ¹⁰O noo iwhe meru anyi l’ekebeje ẹhu ese anya eseshi iya ike nkele anyi l’ele ẹnya Chileke ono, nọ ndzụ, mbụ Chileke bụ onye ndzọta ndiwhe l’owhu, kelekele nke ndu woru onwowhe ye iya l’ẹka.

¹¹Kfuru whẹ iwhe ono kfushiaru whẹ iya ike, gụ ezhikwaa ya who ezhi. ¹²Be ekwekwa tọ dụ onye l’a-nọ eko ghu ọkpa l’ishi nkele ọo l’ị bụkwadu nwata. Iwhe l’ii-mechia bụ t’i meje umere, l’a-nọ egoshi ndu ọdo gẹ whẹ l’a-nọ eme iwhe ono, l’eezhi whẹ mẹkota iwhe ọwhu l’iime eme. Gụ emejekwawho umere, l’e-goshi ndu ọdo gẹ whẹ l’e-shi ye ibe whẹ obu lẹge gụbedua yeru whẹ iya. Umere ghu emekwaawho tẹ whẹ kweta nke Chileke lẹge gụbedua kwetaru iya. Whẹ edobekwawho onwowhe ọ̀gà lẹge gụbedua doberu onwoghu. ¹³Iwhe l’iị-nọ-zhiawho eme jeye nteke mu l’a-bya bụkwa: t’ị gụjeeru chọchi ẹkwo-okfu Chileke, gụ emejee t’obu shihu whẹ ike, gụ atụkashijeru whẹ okfu Chileke t’o doo whẹ ẹnya. ¹⁴Ba akwaswekwaru ẹnya l’iwhe ọma ono, Chileke meru ghu nteke ono, ndu nkfuchiru Chileke gude ike, Chileke nụru whẹ kfuchiaru iya, mbụ nteke ono, ndu e meru ọgurenya chọchi byabẹru ghu ẹka l’ishi. ¹⁵Kebelekwawho ẹhu meje iwhe ono, whuberu iya iwhu ewhuberu nke ọwhu madzụ lile l’a-whụ lẹge i gude ejelewho l’iwhu l’iwhu. ¹⁶Kwakwaarụ umere ghu ẹnya; gụ akwakwaa whọ ẹnya l’iwhe ono l’ịinoje ezhi ndu ọdo. Mejelekwawho iwhe ono g’ọ ha, o noo lẹ nteke l’i -mewa nno, gụ a-dzọo onwoghu ndzụ, dzọkwaawho ndu l’anọje anụ iwhe l’iikfu ndzụ.

¹Ba abajẹkwaru nwoke ọgurenya mba. Iwhe l’ii-mejechia bụ t’i kfujeeru whẹ okfu lẹ nrwe gẹ-woo l’ọo whẹ bụ nna ghu. Mejeeru unwokorọbya gẹ-woo lẹ gụ lẹ whẹ shi l’ẹwho lanụ. ²Ụnwanyi ọgurenya bẹ l’ịi-nọje emeru gẹ whẹ bụ ne ghu. Gụ emekwaruwho ụnwumgboko gẹ gụ lẹ whẹ bụ ụnwu ne. Iwhe mu l’ekfu bụ t’i bi merwukwa onwoghu l’ẹhu whẹ.

Ụnwu-mbunu

³Kwabẹjekwa ụnwu-mbunu ugvu. Gụ eletaje whẹ ẹnya m’ọ -bụru lẹ whẹ ta amadụ gẹ whẹ l’e-me ilile. ⁴Nteke bụ lẹ nwa-mbunu bẹ nweru nwa, ọdua l’o nweru nwanwa, t’ụnwegirima ono nwụta l’ọo whẹbedua l’e-vuada ụzo leta ibe whẹ ẹnya, l’o nokwa iwhe gbarụ ndu nke Chileke ndono. Ọo ya bụ, whẹ eshi nno melataru ndu nwụru whẹ nụ ree, ndu ono nwụru whẹ nụ meru whẹ. O noo iwhe dụ ree l’iwhu Chileke. ⁵Ọle tẹ nwanyị, bụwhoo nwa-mbunu, l’ẹte amaa gẹ l’oo-me ilile, to nwe onye l’eleta iya ẹnya, tẹ nwanyị ono bụkwaru Chileke bẹ l’ọo-nọje ele ẹnya l’ẹka. Tẹ nwa-mbunu ono ba atugbejekwa ẹka l’anọ ekfu anụ Chileke eswe l’ẹnyashi. Iwhe l’ọo-nọje ekfuru iya bụ t’ọ kwọo ya rọ lẹ mkpa. ⁶Ọle nwa-mbunu ọwhu, l’anọjelewho eme ejo-iwhe dụ iya ree l’obu iya bẹ nwụhuakwaru anwụhu, ọ sụ l’iya nọ ndzụ. ⁷O noo iwhe l’iikfujeru whẹ ndono, mbụ kfua ya kwata kfushiaru whẹ iya ike nke ọwhu whẹ l’a-nọ eme umere, gbarụ whẹ nụ. Ọo ya bụ t’ọ bọ dụ iwhe l’aa-ta whẹ ụta iya. ⁸Ọ -bụru l’o nweru onye harụ ndu whẹ l’iya bụ; onye ọbu te eleta whẹ ẹnya, kelekele ndu ọwhu bu ndibe whẹ gẹdegede, iwhe onye ono l’egoshi kwa lẹ ya te ekwetadu nke Kuráyisutu, mbụ mẹe onye l’ete ekwee nke Kuráyisutu bẹ gbẹkwaanu ka iya mma.

⁹Nteke l’aa-nọ edeshi ẹwha ụnwu-mbunu l’ẹkwo, be edebukwaa ẹwha nwa-mbunu, l’ẹteke anọ-rwua awha ụkporo ugbo ẹto nke ọwhu a nwụru iya. Onye l’ii-deje ẹwha iya bụkwa onye bụ nwoke lanụ kpụ b’ọ lụru. ¹⁰Tẹ nwanyị, l’ii-de ẹwha iya l’ẹkwo bụkwaru nwanyị, a tụgbaru ọnu ome ree nkiya. Tọ bụkwaru nwanyị, zụfutawaru ụnwu iya ree. Nwanyị ono abụru onye l’akwajẹru ndu byarụ ụlo iya ọkpobe ẹbyii, ya abụkwaruwho nwanyị, gudewaa mini kwọchaa ndu nke Chileke ọkpa, ya abụkwaru nwanyị, yewaru ndu l’eje iwhe-ọtsulanu ẹka, ya abụkwaruwho onye wowaru onwiya yekota l’ome iwhe-ọma mgburumgburu.

¹¹Jịkajekwa ode ẹwha ụnwu-mbunu, bụkwadua ụnwogbaga. O noo l’ọobuje nteke ẹgu iwhe ono, l’agụje whẹ gụtaleru whẹ whọ, whẹ agbẹeru Kuráyisutu azụ; chọlahaa gẹ whẹ l’e-shi je alụta ji ọdo. ¹²Whẹ -mee ya nno bẹ kwa iya bụ lẹ Chileke l’a-nma whẹ ikpe lẹ whẹ te emehedu iwhe ono, whẹ kweru Kuráyisutu ụkwa iya ono. ¹³Iwhe ọdo bụru nụ l’ụnwu-mbunu, bụkwadua ụnwogbaga bẹ l’a-nwụlahaa ẹnyiru, whẹ etsoru ekpuwhe l’ụlo. Ọwhu kabaanụ ẹji bụru lẹ whẹ l’e-tsojeru edowhe gwẹregweregwere, whẹ abụru o-jeru-okfu l’eeyeru iya whẹ. Whẹ ekfukwawho iwhe l’agbazhidua whẹ l’ekfukfu ilile. ¹⁴O nokwa iwhe meru mu l’ekfukwa sụ t’ụnwu-mbunu, bụkwadua ụnwogbaga je alụta ji ọdo, nwụshia ụnwegirima, leta ụlo whẹ ẹnya. Ọo ya bụ nke ọwhu onye ọgu anyi ono, l’ẹte adụ ọrwu l’ọo-whụta anyi l’ẹhu, l’oo-gude ekfuru anyi rororoo. ¹⁵O nwekwaru ụnwanyi-mbunu ono, ndu ọwhu hawarunụ Kuráyisutu gbee dakọbewaa tsolahaa Sétanu. ¹⁶Ọo ya bụ, o -nweru nwanyị, kweru nke Kuráyisutu, nweru abụbu; abụbu iya whẹ ono bụru ụnwu-mbunu; tẹ nwanyị ọbu letakwa abụbu iya whẹ ono ẹnya. Tẹ nwanyị ono b’a patakwa mkpa ẹhu abụbu iya whẹ ono, bụ ụnwu-mbunu bya ebo chọchi. Tọ bụlekwaruwho ụnwu-mbunu ọwhu l’ẹte amaa gẹ whẹ l’e-me bẹ chọchi l’a-nọje eleta ẹnya.

Ndu e meru ọgurenya chọchi

¹⁷Iwhe gbarụ t’e mejee ya bụ t’a kwabẹje ndu, e meru ọgurenya chọchi ugvu, ka l’ugvu, mbụkwa ndu ọwhu l’ejeru chọchi ozhi ree, kelekele nke ndu ono, keberu ẹhu arya okfu Chileke arya, ezhikwa iya who ezhi. ¹⁸O noo l’e deru iya l’ẹkwo Okfu Chileke sụ: “Unu be ekechijekwa eswi ọnu mẹ unu mee ya l’ọodzoshiru unu ẹswa lẹ balị l’ụda balị unu.” Ọ sụkwawho: “Onye l’eje ozhi gbarụ nke t’ọ natajẹ aswa ozhi, l’ooje.” ¹⁹Ọ -bụru l’o nweru onye sụru l’onye e meru ọgurenya chọchi bẹ meru ẹji, be eyekwaru onye ọbu ọnu, t’a gbahakwaa l’a dụ ẹbo ọbu ẹto agba ọku iya l’onye ono meru-a iwhe ọbu. ²⁰Ndu ọwhu bụ ndu l’eme iwhe-dụ-ẹji, gụ abajẹeru whẹ mba l’edzudzu-ọha. Ọo ya bụkwanu nke ọwhu ndu ọwhua l’a-nọwaro atsụ egvu ome iwhe-dụ-ẹji.

²¹Mu nọdu l’iwhu Chileke mẹe l’iwhu Kuráyisutu Jisọsu mẹe l’iwhu nke ndu ojozhi-imigwe ono ọ họtaru, e kfuru ghu iwhe-e ekfushiru ghu iya ike sụ ghu: t’i tsolekwawho iwhe lile ono, mu nọdu kfushikotaru ghu g’ọ ha. Ba anmajẹkwa madzụ ikpe nteke gụbedua l’ẹteke amarwetaa iwhe onye ọbu meru. T’ọ bọ dụ-zhikwaa iwhe l’ii-meje lee madzụ ẹnya l’iwhu. ²²Rịjeekwa ọriri tẹmenu gụ abyabẹ madzụ ẹka l’ishi; be emejekwa iya gburugburu. T’ẹka ghu ba adụkwa l’iwhe-dụ-ẹji ndu ọdo l’eme. Dobelekwawho onwoghu ọ̀gà.

²³T’ọ bọ bụlekwawho mini kpụ bẹ bụ iwhe l’ịi-ngụje. Ngụtajekwa mmẹe nwanshị mẹe l’ọ̀gvú ẹwho ghu ono mẹe ẹhu-ba-dụ-mma ono, bụ iwhe l’anọje eme ghu nteke nteke.

²⁴O nweru ndu ejo iwhe whẹ l’eme bụ ejo iwhe a tụkoru ele l’ẹnya, mbụ ọ gbẹekwanu dụ gẹ-woo l’iwhe ono, whẹ metaru bẹ vuwa whẹ ụzo eje tẹ Chileke nma whẹ ikpe. O nwekwanuru ndu ọwhu bụ a nọnyaada tẹmenu nke whẹ avọ-lishihu. ²⁵O nokwawho gẹ l’ọoduje iwhe e meru ree. O nweru ree, madzụ l’emee, ya abụru ree, a tụkoru ele l’ẹnya. Nteke bụ l’o nweru ree ọwhu, e meru t’a whụ iya ntaa, bẹ bụkwa a nọnyakwaawho bẹ l’ọo-tụko gbafụtachaa iwhe. ?I nụwaru iya?

Ndu bụ ohu

¹T’iwhe bụ ndu bụ ohu gụa onye-nwe-whẹ nụ lẹ ndu ọ gbarụ tẹ whẹ kwabẹje ugvu. Ọo ya bụ nggẹ t’e wota ẹwha Chileke mẹe iwhe ono, anyi l’ezhi gwọo l’ẹja. ²Tẹ ndu bụ ohu, onye-nwe-whẹ nụ bụ ndu nke Kuráyisutu ba akọ-mijekwa ndu ono, nwe whẹ nụ nkele ọo lẹ whẹ bụ ụnwunna lanụ. Iwhe whẹ l’e-mechia bụ tẹ whẹ kabaanụ anọ ejeru whẹ ozhi, ejeshi iya ike; eshi onye ono nwe ohu ono kwetakwaruwho nke Kuráyisutu, ọ makwarụwho lẹ Chileke yeru iya obu. Ọonoje emeru ohu iya ono ree gude ebu iya nggo ozhi iya ono, l’oojeshiru iya ike.

Tímoti, o noo iwhe l’ịi-nọje ezhi, gụ anmashịjekwaawho ọkwa iya ike.

Ejo nzhi mẹe ọkpobe ẹku

³Sụa, ọ -bụru l’o nweru onye ọdo, bya ezhide iwhe ọdo gbarụ iche, onye ọbu te ekwe l’okfu nke Onye-nwe-anyi Jisọsu Kuráyisutu, mbụ okfu, l’anụ ọkpobe ndzụ, mbụ onye ọbu jịkafua iwhe ono, anyi zhiru lẹ nke gẹ l’ee-shije etso Chileke, ⁴onye ono bẹ l’emekwaa nwọ-ha-g’iya ọ-ha-g’iya, l’ẹbe ọdukwanu iwhe onye ono marụ. Ẹhu, l’eme onye ono bụkwa ntụtego mẹe anọ abawhe mba okfu, l’adụa iwhe ọ patarụ, mbụ okfu, bụlewho l’ọokpataje tẹ madzụ doberu ibe iya ẹnya-kfụrukfuru mẹe anọ akpawhe ẹnya mẹe anọ ekfubyishi ibe onye mẹe anọ elewhe ibe onye ejo ẹnya, ⁵whẹ l’anọje eyeru ibe whẹ okfu. Ndu dụ nno bụ ndu égò sweru eswe, bụkwaruwho ndu l’ẹte amaa ọkpobe-okfu ono. Whẹ l’anọje arị l’a-nọ etso Chileke bẹ bụ ụzo, whẹ l’e-shi rita urwu.

⁶O noo bụkwaru ọkpobe-okfu. Madzụ l’eritaje oke urwu, m’o -tsoo Chileke. Ọle ọ kwa m’ọ -bụru l’iwhe onye ọbu nwe l’atsụje iya-a l’ẹnya g’ọ halẹkwaa. ⁷O noo l’ọ tọ dụdu iwhe anyi gude bya mgboko-o, o nokwawho gẹ l’ọoto dụa iwhe anyi l’e-gude eshi lẹ mgboko-o ala. ⁸Ọo ya bụ, ọ -bụru l’anyi nweru iwhe eriri, nweru iwhe oye l’ẹhu, t’o noo tsụjee anyi l’ẹnya. ⁹Ọle ndu l’anọje achọ gẹ whẹ l’e-shi kpaa ẹku bẹ bụ ejo-achọ ono, whẹ l’achọ l’enwujeru whẹ ye l’ome iwhe-dụ-ẹji. Ọ bụru iwhe ono l’abụje ọnya nmata whẹ. Igweligwe iwhe l’agụ whẹ nụ tụkoru bụru iwhe mmaanụ, tẹmenu ọ bụru iwhe l’ebutaje whẹ anụ hụbe l’ọku, tẹmenu l’ọolotaje whẹ lomia l’ẹka whẹ l’a-nọdu mebyihu, laa l’iyi. ¹⁰Ọ kwa oye ẹnya l’okpoga bẹ bụ ẹka iwhe lile, bụ ejo-iwhe futaru. O nwekwaru ndu bụ l’ọo lẹ whẹ l’achọ okpoga bẹ meru whẹ shiswee ụzo, parụ ekwekwe whẹ kweru nke Kuráyisutu parụ haa. Ọ bụkwaru iya whọ meru g’o gude whẹ gude ẹka whẹ wotaru onwowhe iwhe-ọtsulanu, ha l’igweligwe.

Iwhe Tímoti l’e-meje

¹¹Ọle-a, tẹ gụbedua bụ onye nke Chileke zekotajekwaaru ẹgube iwhe ono g’ọ ha, kebe ẹhu meje t’ị bụru onye dụ chịriri, gụ emekwawho t’ị bụru onye l’akwabẹ Chileke ugvu. Nọshilekwawho ike l’ekwekwe ono, i kweru nke Kuráyisutu, gụ eye ndu ọdo obu. Tajẹkwaru iwhe nshi, gụ adụkwawho odoo. ¹²Dụlekwawho g’ọo onye marụ ọso, mbụ, kebelekwawho ẹhu wheje ewhewhe ọso bụ iya bụ ọso, gbarụ onye kweru nke Kuráyisutu. Kebe ẹhu gbajẹ iya nke ọwhu l’ii-gbarwu ẹka, a kparụ oge t’a gbarwua nggẹ ị nata obunggo ọso ono bụ iya bụ ndzụ tututu-mịmimi. Ọo oku nke ndzụ ono bẹ Chileke kuru ghu sụ ghu t’ị bya enweru nteke ono, ị kfụru l’iwhu edzudzu ọha kfua, o doo ẹnya sụ l’i kwewaru ọkpobe-okfu nke Kuráyisutu ono. ¹³Ọo l’iwhu Chileke ono, bụ Chileke ọwhu l’anụje iwhe lile ndzụ mẹe l’iwhu nke Kuráyisutu Jisọsu ono, kfụru l’iwhu Páyileti gbaarụ ọkpobe-okfu ono ẹka-ebe, ọo l’iwhu whẹ bẹ mu nọdu ekfushiru ghu iya ike sụ, ¹⁴t’i tsojelekwawho iwhe lile ono, mu kfushikotaru ghu g’ọ ha. T’ọ bọ dụkwa ẹka l’ii-doswe iya m’ọo l’ẹka lanụ, ọo ya bụ t’ọ bọ dụ ọwhu l’aa-gụru byabẹ ghu jeye nteke ono, Onye-nwe-anyi Jisọsu Kuráyisutu l’a-bya ọdo. ¹⁵Ọo nteke o rwuru lẹ mgbe iya bẹ Chileke l’e-me t’a whụ-dzuru Kuráyisutu ọbu. Mbụ Chileke ono, dụkota ree, dzukota oke l’ime onwiya; ọ bụru yẹbedua kpụ bẹ bụ Nnajị-Ọha l’owhu, bụru eze, kakọta iwhe lile bụ ndu eze; bụru Onye-Nwe-Ọha ọwhu kakọta iwhe lile, bụ ndụ-nwe-ọha. ¹⁶Ọo ya kpụ bụ onye l’ẹte abyaa l’anwụhu anwụhu. Ẹka o bu bẹ iwhoro, dụ iya nụ l’ete ekwejedu tẹ madzụ byakụbe iya ntse. O to nwekwa madzụ igbalekọma, gudejewaa ẹnya iya whụa ya, tọ hẹkwanu m’ọo l’o nweru onye bya l’a-whụ iya. Sụa, t’ọ bụru iya bẹ ndiwhe l’a-kwabẹje ugvu; ike ono, bụ agvụgagvu ono abụru nkiya. O nokwa g’ọ dụ-o!

¹⁷A bya lẹ nke ndu nweru iwhe l’eli-mgboko-o, iwhe l’ii-kfuru whẹ kfushiaru whẹ iya ike bụkwa tẹ whẹ be egudekwa iya ku onwowhe, whẹ te edobehunu obu whẹ l’iwhe ono, l’adụa gẹ l’ọono-be ono. Tẹ whẹ dobechia obu whẹ lẹ Chileke ono, bụ o-me-l’uko. Chileke ono l’anụkotaje anyi iwhe lile, nụ iya nke anyịnyi nke ọwhu l’oo-me t’ẹhu tsọmahu anyi. ¹⁸Tẹ ndu ono, nweru iwhe meje iwhe dụ ree, mbụ-a; tẹ whẹ meje iwhe dụ ree ono nteke nteke, tẹ whẹ bụru o-me-l’uko, ya ewheje whẹ uwhere tẹ whẹ lẹ ndu ọdo gbaa mgba l’iwhe whẹ. ¹⁹Ọo -bụru lẹ whẹ l’eme nno, ya abụru iya bụ lẹ whẹ nweru ọkpobe iwhe, o noo lẹ whẹ l’e-shi nno kụberu onwowhe ọkpobe iwhe, mbụ ọkpobe iwhe l’a-dụru whẹ jeyewaro lẹ mgbe l’iwhu. Ọo ya bụkwanu nke ọwhu bụ nteke mgbe iya beleruwho, whẹ anata ndzụ, bụ ọkpobe ndzụ. ²⁰Sụa, byiko Tímoti, kwabẹlekwaruwho iwhe ono, e yeru ghu l’ẹka ono ẹnya. Gụ ezelajeeru anọ ekfu mkpọkoro okfu l’adụa iwhe ọ patarụ, ba anọdujekwa atụ-whe mkpọkoro ẹgo, bụ iwhe ndiwhe l’ahajẹru sụ l’ọo mmamagụ, ọle ọ tọ dụdu mmamagụ, ọ bụ. ²¹O nweru ndu l’anọje arị lẹ whẹ marụ iwhe, whẹ egude lẹ whẹ marụ iwhe, lẹ whẹ marụ iwhe, whua ụzo ekwekwe ono, anyi kweru. Tẹ Chileke meeru unu eze-iwhe-ọma.