1 Tesalonáyika

Ẹkwo-Ozhi Mbụ, Pọlu Deru Nụ Ndu

TESALONÁYIKA

¹Ẹkwo-ozhi-a bẹ shi l’ẹka mbẹdua, bụ Pọlu, mu lẹ Sulivánọsu, ọwaa Tímoti abyarụ chọchi Tesalonáyika, bụ ndu nke Chileke, bụ Nna; bụkwaruwho ndu nke Onye-Nwe-Ọha, bụ Jisọsu Kuráyisutu.

Tẹ Chileke meeru unu eze-iwhe-ọma, ya emekwawho t’unu buru guu.

Umere ndu Tesalonáyika yẹle ekwekwe whẹ

²Nteke bụ nteke, anyi l’ekfu anụ Chileke, bụ Nna anyi bẹ anyi l’anyatajẹ unu. Anyi l’anọje-zhiawho ekele Chileke ekele l’iswi ẹhu unu g’unu ha. ³Ọ tọ dụ-zhidua nteke, bụ nteke anyi l’ẹte anyatajẹ unu. Anyi l’anyatajẹ g’unu gudewaa ozhi, unu jeru Chileke, goshi l’unu kweshiru ike l’iwhe unu kweru mẹe g’unu gudewaa oseshi anya ike, goshi l’unu yeru iya obu mẹkwawho lẹge unu gude ọta-nshi, goshi l’ẹnya unu dụshi ike l’ẹka Onye-nwe-anyi Jisọsu Kuráyisutu nọ. ⁴Ụnwunna anyi, anyi makwarụ-a lẹ Chileke yeru unu obu, họta unu, unu bya abụru ndu nkiya. ⁵O noo l’anyi bya ezhia unu ozhi-ọma ono, tọ bụ okfu-ọnu nwẹkiya bẹ anyi gude zhia ya unu. Chileke bẹ gudekwa iya who goshi unu l’ike iya bẹ ire dụ, dụshia ya ike. Ume Chileke ono bẹ yeru anyi ẹka, anyi dụ ike mee, unu marụ ọkpobe amama l’iwhe anyi l’ezhi bụ ọkpobe-okfu. Umere anyi meru nteke anyi l’unu shi nọdukota mewaruro, unu marụ ẹgube ndu anyi bụ. Ọ kwa nggẹ ọ dụru unu lẹ mma meru g’o gude anyi mee ẹgube umere ono. ⁶Tọ dụ iya bụ, unu bya abụru ndu l’awọta ẹka anyi. Unu shiwaro nno wọta ẹka nke Onye-Nwe-Ọha. Unu te elero l’unu l’eje iwhe-ọtsulanu nteke e zhiru unu ozhi-ọma ono, unu gudelee ẹhu-ụtso, shi Ume-Dụ-Nsọ l’ẹka nata ozhi ono. ⁷O noo iwhe meru unu bya abụru ndu, ndu lile ọwhuna, woru onwowhe ye Kuráyisutu l’ẹka l’alị Masedóniya mẹe l’alị Akáya byabya awọtade ẹka unubẹdua. ⁸Ọ tọ bụlekwaa l’ozhi-ọma ono, shi l’ẹka Onye-Nwe-Ọha, unubẹdua l’ezhi bẹ dzuru Masedóniya yẹle Akáya kpụ, ọle eworu ono, unu woru onwunu ye Chileke l’ẹka bẹ ngakọtaakwaru ẹka lile, ngata iya nke ọwhu l’ọoto dụhee onye anyi bya akọderu iya akọru nke iche. ⁹Ẹka lile, anyi jeru bẹ l’aanọje ekfukaa g’unu gude nabata anyi nteke ono, anyi byajẹru ibe unu mẹe lẹge unu gudewaa sefukotawaa ẹka l’agwa; byawaa bya aghachiwaru Chileke iwhu, jelahaaru iya ozhi, mbụ ọkpobe Chileke ono, nọ ndzụ. ¹⁰Unu wataakwawhọ ole ẹnya Nwa iya ono, l’e-shi l’imigwe bya, mbụ Nwa iya ono, bụ Jisọsu, o meru o shi l’ọnwu teta nọdu ndzụ. Ọo ya bụ onye l’a-dzọ anyi l’oke-ẹhu-eghughu nke Chileke, mbụ oke-ẹhu-eghughu, Chileke l’a-tụfuru ndu l’eme iwhe-dụ-ẹji mbọku ikpe.

Ozhi, Pọlu jeru lẹ Tesalonáyika

¹Sụa, ụnwunna anyi, unubẹdua l’onwunu makwarụ-a l’akpakfuta ono, anyi kpakfutajeru unu ta abụdu anyi nke mmaanụ. ²Unu makwarụ-a ẹgube iwhe-ọtsulanu, anyi nọdu jegbabe lẹ Fílipayi mẹe g’e gude mee anyi iwhe iwhere l’ẹka ono. Ọle Chileke anyi melekwaru-a obu anyi o shihu ike, nke ọwhu anyi bya ezhia unu ozhi-ọma Chileke ono. Anyi bya ezhia ya unu; anyi te edzekwaro lẹ ndu mkpobyi dọ-wheru anyi mgburumgburu. ³O noo lẹ nteke ono, anyi l’aryọ unu t’unu bya abụru ndu nke Kuráyisutu, bẹ iwhe anyi vu l’uche aryọ unu ta abụkwa t’anyi bya eduwhua unu, tọ bụ l’ọ dụ ejo iwhe anyi vu l’obu, tọ hẹ l’ọo t’anyi bya egude ụgho harụ unu ghọta bẹ anyi byarụ.

⁴Iwhe anyi l’emejechia bụ l’anyi l’ekfuje iwhe ọwhu bụ uche Chileke t’anyi kfua. O noo lẹ yẹbedua bẹ lewaru anyi ẹnya, marụ l’anyi goshiwaru l’ọ gbarụ nke t’iya gude ire anyi ẹka; o woru ozhi-ọma ono ye anyi l’ẹka. Anyi te ekfukwa iya t’ọ tsọje madzụ ụtso lẹ nchị, gbahaa t’anyi kfuje iya gẹ l’ọo-dụ Chileke ree, mbụ onye ono l’eletaje ime obu anyi marụ iwhe anyi l’arị. ⁵Unu makwarụ-a l’onwunu l’o to nwezhidua nteke anyi gude ire-mẹchemeche kfuru yeru unu nteke ono, anyi byarụ ibe unu. Anyi te egbobe unu ẹka l’iwhu melahaa gẹ-woo l’anyi bụ iwhe anyi l’abụa, nnta gẹ l’ee-shi t’anyi rita iwhe l’ẹka unu. Ọ kwa Chileke bụ onye l’a-gbarụ anyi ẹka-ebe iwhe-e, anyi l’ekfu. ⁶Ọ tọ dụkwawho onye anyi meru nggẹ ọ jaa anyi. Anyi te emekwa nggẹ unu jaa anyi, anyi te eme nggẹ ndu ọdo jaa anyi. ⁷A makwarụ-a l’eshi ọwhu anyi bụ ndụ-ishi-ozhi Kuráyisutu b’ọ gbakwarụ nke t’anyi sụ t’unu vuta mkpa ẹhu anyi, ọle anyi dụlekwaru-a unu odoo nteke ono anyi l’unu nọ, anyi kwatarụ dụru unu odoo gẹ nwanyị l’adụjeru iya ụnwu iya. ⁸Anyi yeru unu obu shii. Ọo ya meru iwhe anyi chịru iya sụ l’ọ tọ bụledua ozhi-ọma ono kpụ, shi Chileke l’ẹka bẹ bụ iwhe anyi l’unu gba mgba, anyi sụkwaruwho l’anyi l’unu l’a-gbakwawhọ mgba lẹ ndzụ anyi. O noo l’unu lanụkaru anyi l’ẹhu. ⁹Ụnwunna anyi, unu nyatajẹkwa g’anyi gude seshibe anya ike, jeta ozhi gbubua ẹwhuru. Nteke ono, anyi l’ezhi unu ozhi-ọma ono shi l’ẹka Chileke bẹ anyi l’eje ozhi eswe, eje iya ẹnyashi, ejeta nri ẹwho anyi nggẹ t’ọ bọ dụ onye ọwhu anyi l’a-bụ ivu-ẹrwa swiru lẹge unu ha.

¹⁰Unu l’a-gbarụ anyi ẹka-ebe anyi l’o nowaa g’ọ dụ. Chileke l’onwiya je l’a-gbakwarụwho anyi ẹka-ebe. Umere, anyi shi emejeru unubẹ ndu kweru ozhi-ọma ono bẹ gukwaru egu, kfụru nhamụnha. Ọ tọ dụ-zhikwaa ẹka anyi metaru iwhe l’aa-ta anyi ụta. ¹¹Unu makọtaru-a l’ọo gẹ nna l’anọje ehe ụnwu iya bụ g’anyi shi gude ehe unu l’ẹhu l’ẹhu. ¹²Anyi mewaru unu, obu shihu unu ike; anyi dụa unu obu; anyi nakwaaru iya whọ unu lẹ nkemu sụ: t’unu meje umere, dụ Chileke ree. Ọo Chileke ono bẹ kuru unu tẹ ya bụru eze unu mẹkwawho t’unu l’iya gba mgba nweru ọdu-biribiri iya.

¹³Iwhe meru anyi ta atugbeje ẹka l’anọ ekele Chileke ekele nteke anyi l’ekfu anụ iya, bụ lẹ nteke unu nụru okfu Chileke ono, anyi bya ezhia unu, bẹ unu gbobeleruwho ẹka labọ nata iya. Unu ta anatakwa iya ku iya okfu madzụ. Unu natarụ iya ku iya okfu Chileke, mbụ ọ kwarụ okfu Chileke b’ọ bụ. O noo l’ọo Chileke ono bẹ l’eme ire l’ime unubẹ ndu natarụ ozhi-ọma ono. ¹⁴Ụnwunna anyi, ọo iwhe ono, nwụru unu bẹ bụ iwhe shi nwụaru chọchi nke Chileke, bụ ndu whẹ lẹ Kuráyisutu Jisọsu tụgbaru bụru nnanụ l’alị Judíya. Ọlewho gẹ ndu alị unu l’anụ unu áwhụ bụ gẹ ndu alị whẹ, bụ ndu Ju shi anụ iya whẹbedua. ¹⁵Ọo ndu Ju ono bẹ bụ ndu ono, gburu Onye-Nwe-Ọha, bụ Jisọsu, gbua ndu nkfuchiru Chileke, whẹ chịa anyịbedua chịfu l’alị whẹ. Whẹ shi nno meta iwhe l’adụa Chileke ree swibe onwowhe. Whẹ bụru ọgu swiru madzụ lile. ¹⁶Gẹ whẹ shi bụru ọgu ono bụ lẹ whẹ kpọshiru t’anyi be ezhi ndu l’ẹte abụa ndu Ju ozhi-ọma ono, nke ọwhu Chileke l’a-dzọ whẹbe ndu ono, l’ẹte abụa ndu Ju. Ọ tọ dụ-zhidua nteke whẹ l’ete emetaje iwhe-dụ-ẹji jeye ya awọ whẹ l’ẹkpiri. Ọle oke-ẹhu-eghughu nke Chileke bẹ bekochaaru dakfu whẹ.

Ọowho Pọlu l’obu tẹ ya kpakfu ndu Tesalonáyika

¹⁷A bya abya l’ẹhu nke anyi, ụnwunna anyi, anyi nọokwaru nwọdu; anyi l’unu ta awhụ. Iwhe mu l’ekfu bụ l’iwhu anyi l’unu ta akpọjehedu, ọwhube obu anyi dụkwaa l’ẹka unu nọ. Eghoro unu bẹ dụtaru anyi shii, nke ọwhu bụ l’anyi shiwaa nteke teru ẹnya sebata gẹ l’ee-shi t’anyi l’unu whụ ọdo. ¹⁸Anyi shikwaa chọta g’anyi l’e-shi kpakfuta unu, mbụ lẹ mbẹdu ọwa-a, bụ Pọlu l’ishi onwomu bẹ tụakwaru iya ama ugbo olemole, ọle Sétanu l’akpọshije anyi abyabya. ¹⁹G’ọ dụle-zhia, ?ọ dụhunu ọwhu l’abụhee unu kpụ bẹ bụ ndu anyi keru ike yeru; ọ bụru unu l’e-me t’ẹhu tsọo anyi ụtso. Ọ bụru unu l’a-bụ obunggo, anyi l’e-gude eku onwanyị l’atatiwhu Onye-nwe-anyi Jisọsu Kuráyisutu, m’ọ -byalẹwho ọdo. ²⁰Ọo unubẹdua bẹ bụ iwhe l’ee-gude jaa anyi, ọ bụkwaruwho unu bụ ẹhu-ụtso nke anyi.

¹O noo ya, a nọnya-zhia eghoro unu ono dụta anyi, nke ọwhu anyi l’ẹte adụhee ike nwugbukota iya l’obu, anyi chịpyaa ya l’anyịbedua l’a-nọdu lẹ Átẹnsu nkụnyi anyi, ²zhi nwanna anyi Tímoti. Yẹbedua bụkwawho onye anyi lẹ ya tụkoru ejeru Chileke ozhi, mbụ anọ ezhi ozhi-ọma nke Kuráyisutu. Anyi zhiru iya t’ọ bya eme t’unu kabaa ọkfushi ike l’iwhe unu kweru, ya emekwaawho obu unu t’o shihu ike. ³Nggẹ t’ọ bọ dụ m’ọo onye lanụ l’ime unu, l’e-kwobe ẹhu-a, l’aakpa unu kpọo laa azụ. Unubẹdua l’onwunu bẹ makwarụ-a l’ẹhu-a, l’aakpa anyi bẹ bụkota iwhe Chileke họtahawaru anyi dobe, l’o noo gẹ l’ọo-nwụru anyi. ⁴Mbụ l’anyi dụkwa mbụ kfuru iya unu, ọ ghaa unu ọhu lẹ nchị nteke ono, anyi nọ l’ibe unu sụ unu: l’aa-byakwa l’akpa anyi ẹhu, unu l’eleenaa l’ọ nwụwaru nno ọbu, bụnua iwhe unu tụkoru makọtaru. ⁵O noo iwhe kpatarụ mu nọdunyaa, to kwe tẹ mu nwugbukota iya l’obu, mu zhi Tímoti t’ọ bya amarụ g’unu kfụshi-beru ike l’ekwekwe unu kweru nke Chileke. Ọo egvu bẹ mu tsụhuru sụ l’ikekwe ya abụru l’o nweru ụzo, nwandata ono, bụ Oshifutuswe bya eshiwaa adata unu, anya ono anyi seru l’ẹhu unu abya abụru anyi nsegbu anya.

⁶Ọle ntaa bẹ Tímoti shiwaa ibe unu ono lwawaa, lwakfuta anyi bya ezhia anyi ozhi dụ ree; l’ekwekwe unu shihurua ike, woo, unu yekwawho ibe unu obu. Ọ kọkwaaruwho anyi l’ọo idzu ọma bẹ unu l’anọje achịru anyi. Kọoru anyi l’ọo gẹ eghoro unu l’adụje anyi bụ gẹ eghoro anyi dụkwawho unu. ⁷Ụnwunna anyi, ọo l’unu kfụru kfụshia ike l’ekwekwe, unu kweru bẹ l’emeje t’obu shihu anyi ike nteke l’aakpa anyi ẹhu mẹe nteke anyi l’eje iwhe-ọtsulanu lile, a pakfutaru anyi. ⁸Ọ kwa ntaa, anyi marụ l’unu kfụru kfụshia ike l’atụgba ono, unu lẹ Onye-Nwe-Ọha tụgbaru bẹ ndzụ bụ anyi ọkpobe ndzụ. ⁹Sụa, ?ndẹ-zhia g’anyi l’a-wata awata anọ ekele Chileke ekele ẹhu unu mẹe nke ẹhu-ụtso ono, o meru l’ọotso anyi l’iwhu yẹbe Chileke l’okfu ẹhu unu? ¹⁰Anyi l’egudejekwawho obu anyi g’ọ ha ekfu anụ Chileke eswe l’ẹnyashi, ekfushi iya ike sụ t’o mee t’iwhu anyi l’unu kpọgba, nggẹ anyi mekwanua ẹka ekwekwe unu l’eteke shihua ike t’o shihu iya.

¹¹Ntaa bụ tẹ Chileke anyi, bụ Nna anyi l’onwiya mẹe Onye-Nwe-Ọha, bụ Jisọsu mechaaru anyi ụzo, anyi l’e-shi abya unu agbawhe. ¹²Tẹ Onye-Nwe-Ọha mekwaawho t’unu kabaa oye ibe unu obu, mbụ t’unu kwata ye whẹ iya yeshia whẹ iya ike, ye whẹ iya nke anyịnyi. Ya abụkwaruwho nno bụ g’unu l’e-ye iya iwhe e kuru madzụ. O nokwa g’anyịbedua yeru iya unu. ¹³Ọo ya bụ nke ọwhu l’oo-me t’obu shihu unu ike, unu akfụru l’iwhu Chileke, bụ Nna anyi bụru ndu dụkota ree, ya eje adụ ẹka ụta l’a-dụ unu l’ẹhu nteke ono, Onye-nwe-anyi Jisọsu yẹle ndu nkiya l’a-lị bya.

Umere, dụ Chileke ree

¹Ụnwunna anyi, iwhe ikpazụ bụ ọwa: l’iwhe unu nwụtaru l’ẹka anyi bụkwa g’unu l’e-shi gude ndzụ unu eme iwhe dụ Chileke ree. Mbụ, ọ bụlekwaruwho iwhe ono, dụ Chileke ree bẹ unu l’anọjelewho eme. Ntaa bẹ anyi gudekwa ẹwha Onye-Nwe-Ọha, bụ Jisọsu aryọ unu, ekfuru unu ekfushiru iya unu ike sụ: t’unu kabakwaanụ anọ eme iwhe dụ Chileke ree eje eje. ²O noo l’unu mawarụ iwhe ono, anyi shi l’ẹka Onye-Nwe-Ọha, bụ Jisọsu nmageeru unu ọkwa iya lẹge unu l’e-shije eme umere. ³Sụa, iwhe dụ Chileke ree t’unu meje iya bụ, t’unu dobe onwunu nsọ l’ẹka iya nọ, mbụ t’unu sefuzhiawho ẹka l’ọkpa lẹ nwanyị l’owhu. ⁴Ọdo bụ; unubẹ unwoke, t’onyenọnu marụ gẹ l’oo-shi lụa nwanyị l’ụzo kfụru nhamụnha, bụ iya bụ lẹge ọ dụ Chileke ree mẹe l’ụzo ugvu l’e-tso iya onye ọbu. ⁵T’ọ bọ bụkwa ejo ẹgu ojekfu nwanyị l’a-lọta unu, unu eje alụa nwanyị gẹ whẹ l’alụje mbụ ndu ono, l’ẹte abụa ndu Ju, mbụ ndu l’ẹte amaa Chileke. ⁶L’iwhe meru anyi l’ekfu okfu ọolu nwanyị ẹgube-ẹ bụkwa t’ọ bọ dụ onye l’e-meswe ibe iya, tọ dụ onye l’e-megbuta ibe iya. Anyi kfuhaakwaru iya unu, rwụa ya unu arwụ lẹ nchị, l’onye l’eme ẹgube iwhe ono bẹ Onye-Nwe-Ọha l’a-gwakwa ọchi. ⁷O noo lẹ Chileke ta abụkwa t’anyi bya emerwushia onwanyị bẹ bụ iwhe o kuru anyi oku iya; iwhe o kuturu anyi kwa tẹ ndzụ anyi dụru iya nsọ. ⁸Ọo ya bụ l’onye ono, jịkaru iwhe ono ta abụkwa madzụ bẹ onye ọbu jịkaru; ọ kwa Chileke b’ọ jịkaru, mbụ Chileke ono l’anụje unu Ume-Dụ-Nsọ.

⁹A bya abya lẹ nke oye ụnwunna unu obu; o noo ta abụhekwa iwhe l’aa-bya edederu unu ede l’ẹkwo. O noo l’unubẹdua l’onwunu bẹ Chileke l’onwiya zhiwaru unu t’unu ye ibe unu obu. ¹⁰Mbụ ọ bụlekwaruwho g’o zhiru iya unu ọbu bụ g’unu shi meta iya, unu ye ụnwunna anyi lile, nọ lẹ Masedóniya l’owhu obu. Ọle iwhe anyi l’ekfushiru unu ike, ụnwunna bụ, t’unu kabakwaanụ anọ eme nno tụgburu. ¹¹T’unu jishizhiawho ike nọdu l’olu odoo, unu ejishikwaawho ike lepyabe ẹnya l’ozhi ẹhu unu, unu ejishia ike gude ẹka unu seta iwhe unu l’e-gude buru, bụnua iwhe anyi kfuhawaru unu. ¹²O noo iwhe unu l’a-nọje eme; ọ bụkwanuru iya bụ umere, gbarụ unu l’ememe l’ẹka ndu l’ẹte abụa ndu nke Kuráyisutu nọ, nke ọwhu whẹ l’a-kwabẹje unu ugvu mẹe nke ọwhu l’ẹte adụkwanua onye unu l’a-sụ l’ọo ya bụ l’unu emee mkpa, dụru unu.

Abyabya, Onye-nwe-anyi l’a-bya ọdo

¹³Ụnwunna anyi, iwhe anyi l’eme t’o doo unu ẹnya bụ okfu ẹhu ndu nwụhuru anwụhu, nke ọwhu unu l’ẹte atsọjekwanu áwhụ iya g’ọo ndu l’ete ele ẹnya lẹ whẹ lẹ Kuráyisutu l’a-nọdukota. ¹⁴Anyi kwetawaru kweshia ike lẹ Jisọsu nwụhu-geeru, ọ bya eteta nọdu ndzụ. O nokwawho g’anyi kwekwaruwho lẹ Chileke l’e-shi l’ẹka Jisọsu tụko ndu woodaru onwowhe ye Jisọsu l’ẹka tẹmenu whẹ nwụhu, mee tẹ whẹ lẹ Jisọsu tụko teta nọdu ndzụ; ya emee whẹ etsoru iya bya.

¹⁵Sụa, iwhe-e, anyi l’ekfuru unu bẹ bụkwa ozhi, shi Onye-Nwe-Ọha l’ọnu, mbụ l’anyịbe ndu ọwhu l’a-nọdukwadua ndzụ nteke ono, Onye-Nwe-Ọha l’a-bya ọdo bẹ l’ete evukwaru ndu ọwhu nwụhuhawaru nụ ụzo. ¹⁶O noo lẹ Onye-Nwe-Ọha ọbu l’onwiya l’e-shi l’imigwe alwazeta l’alị echi mkpu ọgu; eze onye ishi ojozhi-imigwe eku oku, e gudekwawho eze opyi-ọku Chileke egbu. Ọo ya bụ, ndu ono woodaru onwowhe ye Kuráyisutu l’ẹka tẹmenu whẹ nwụhu evuru ụzo teta nọdukota ndzụ. ¹⁷Whẹ tetagelewho tẹmenu anyịbedua, bụ ndu ọwhu nọkwadu ndzụ nteke ono; Chileke afụchata anyi lẹ whẹ; anyi atụko nọdu l’ime urwukpu, anyi ejeshia Onye-Nwe-Ọha, bụ Jisọsu ndzuta lẹ ewhekerewhe, nke ọwhu bụ, ẹka Onye-Nwe-Ọha nọduje-zhiawho, anyi anọdu iya. ¹⁸Ọo ya bụ t’unu gudeje okfu-a gude dụa ibe unu obu.

Nwụru ẹnya; ngabẹru abyabya Onye-Nwe-Ọha

¹Sụa, ụnwunna anyi, ọ tọ bụhekwaro iwhe l’aa-bya edederu unu l’ẹkwo sụ unu l’ọ waa oge nteke ọbu, ọdua l’ọo waa mbọku ọbu iwhe lile ono l’a-nwụ. ²O noo l’unubẹdua marụ-a ọkpobe amama lẹ mbọku ono, Onye-Nwe-Ọha l’a-bya l’e-me whẹrekete. Ọo g’onye oshi l’abyajẹ l’ẹnyashi nteke l’ẹte adụa onye l’amajẹ nteke l’ọobya bụ gẹ l’ọo-bya. ³O noo l’ọo nteke ndiwhe sụru: “Ha! Ụboku adụbukwaa guu nta-a, ọ waakwa t’onyenọnu jeje ẹka l’ooje,” o noo nteke bụ, a bya l’amadeshia, iyi abyarụ whẹ lẹ nzirizẹhu gẹ ezeda l’emeje nwanyị dụ ime. Ya eme whẹ lẹ nzirizẹhu nno, bya eyitakota whẹ; ya eje adụ m’ọo onye lanụ, bya l’a-wafụ. ⁴Ọle ọbu, ụnwunna mu, ọwhube unubẹdua ta anọdukwa l’ẹkpuroochi nke tẹ mbọku ono, Onye-Nwe-Ọha l’a-bya mee unu lẹ nzirizẹhu g’ọo onye oshi. ⁵O noo l’unu lile bẹ bu l’iwhoro mẹe l’ẹka iwhoro eswe l’echi. Anyi ta abụkwa ndu bu l’ẹka, bụ ẹnyashi; anyi ta abụ ndu bu l’ẹkpuroochi. ⁶Ọo ya bụ l’eshi ọ dụwaa nno, t’anyi be ekukwa mgbẹnya gẹ ndu ọwhu l’ekukaa. T’anyi nwụ-chiaru ẹnya, t’ẹnya doo anyi rịsaa. ⁷Lẹ ndu l’eku mgbẹnya bẹ bụ l’ẹnyashi bẹ whẹ l’ekuje iya. Ọ bụru l’ẹnyashi bẹ ndu l’angụta-gejee mmẹe akpọ kulakula l’angụtaje iya akpọ iya. ⁸Ọle eshi anyịbedua bụ ndu bu l’ẹka iwhoro eswe l’echi, t’anyi donua ẹnya ndo, te ekwekwe anyi kweru nke Chileke yẹle obu, anyi yeru ibe anyi, bụru uwe-igwe, l’egbobutaje obu, anyi l’e-ye. T’adzọta ono, anyi l’ele ẹnya lẹ Chileke l’a-dzọta anyi bụru iya bụ okpu-igwe, anyi l’e-kpu. ⁹Chileke ta atụkwa anyi ẹka t’anyi bụru ndu ya l’a-tukoshi oke-ẹhu-eghughu nkiya, iwhe ọ tụru anyi ẹka kwa t’anyi bya tẹ ya shi l’ẹka Onye-Nwe-Ọha, bụ Jisọsu Kuráyisutu dzọo anyi, ¹⁰mbụ Jisọsu ono, nwụhu-chiru anyi nke ọwhu bụ e megee anyi l’iya atụko nọdukota ndzụ, ?anyi nọ ndzụ, ?anyi nwụhuwaru anwụhu nteke l’ọo-bya. ¹¹O noo iwhe meru anyi sụ unu agha, t’unu mejee t’obu shihu ibe unu ike. Unu eyetakwaruwho ibe unu ẹka tẹ whẹ kfụshia ike l’iwhe whẹ kweru, bụnu-a iwhe unu l’emenu-a.

Iwhe unu l’e-meje

¹²Ụnwunna anyi, ọ kwa aryọryo bẹ anyi l’aryọ unu sụ t’unu yejeru whẹ ugvu mbụ ndu lile ono, l’ese anya ẹhu unu; bụ whẹ bụ ndu ono, Onye-Nwe-Ọha họtaru tẹ whẹ bụru ndu ishi unu, whẹ abụkwaruwho ndu l’akpozhiru unu ụzo. ¹³Unu ekwobekwawho ozhi ono, whẹ l’ejeru unu eyeru whẹ ẹso, unu eyeena whẹ-e obu mebyi shii. Unu l’ibe unu eburu lẹ nchị-ọdu-ndoo.

¹⁴Ụnwunna anyi, ọ kwawhọ aryọryo bẹ anyi l’aryọkwawho unu sụ: t’unu lọjee ndu ẹnyiru-ozhi ẹka lẹ nchị; ndu ọwhu obu whẹ l’egvuaru egvuru bẹ unu l’e-meje t’obu shihu ike. Unu eyejeru ndu ekwekwe whẹ l’eshihua ike ẹka, unu atajẹ nshi l’ẹka madzụ lile nọ. ¹⁵Unu akwachafụkwa ẹnya t’ọ bọ dụ g’unu ha, l’a-gwata madzụ ụgwo ejo iwhe onye ọbu meru iya, gbahaa t’iwhe unu l’anọje-zhiawho achị nta iya bụru g’unu l’e-shi mejeeru ibe unu ree, unu emekwaru iya who madzụ lile.

¹⁶T’ẹhu tsọjelekwawho unu ụtso nteke nteke. ¹⁷Unu ba atugbejekwa ẹka l’anọ ekfu anụ Chileke nteke nteke. ¹⁸Unu keleje Chileke ekele iwhe g’iwhe ha, l’anwụru unu g’ọ dụlekwaa. O noo iwhe Chileke l’achọ unu l’ẹka ndono, mbụ unubẹdua, unu lẹ Kuráyisutu Jisọsu tụgbaru bụru nnanụ.

¹⁹Unu ba akpọshikwa Ume-Dụ-Nsọ iwhe l’oome. ²⁰Unu ba akpọkwa okfu, l’egoshi ozhi, Ume-Dụ-Nsọ zhiru ẹbo ẹbo l’afụ. ²¹Ọle t’unu datajẹkwa iwhe lile, unu ahọta iwhe ọwhu dụ ree, gudepyabeshia ya ẹka ike. ²²Unu sefukota ẹka l’iwhe g’iwhe ha, bụ-zhia ejo-iwhe g’ọ dụlekwaa.

Iwhe Pọlu whẹ gude akpochi ẹkwo-ozhi-a ishi

²³Tẹ Chileke l’emeje t’anyi buru guu, mee unu t’unu bụru ndu nkiya ọkpobe abụbu. T’o dobe ndzụ unu l’owhu, mbụ uche unu, mẹe obu unu, mẹe ẹhu unu, ya edobe iya nno t’ọ bọ dụ ẹka ụta l’a-dụ iya jeye nteke Onye-nwe-anyi Jisọsu Kuráyisutu l’a-bya ọdo. ²⁴Iwhe lile ono bẹ bụ iwhe l’oo-mekota g’ọ ha, o noo l’ọo ya kuru unu, ọ bụru o-me-g’o-kfuru.

²⁵Ụnwunna anyi, unu kfujekwa nụ Chileke l’okfu ẹhu anyịbedua.

²⁶Unu kelekwa iwhe bụ ụnwunna anyi gẹ whẹ ha ekele tsutaje whẹ ọnu.

²⁷Iwhe mu l’eme tẹ mu kfuru unu bụ: unu gụbukwaa ẹkwo-ozhi-a t’o rwudzuru ụnwunna l’owhu lẹ nchị, ọ kwa ẹwha Onye-Nwe-Ọha bẹ mu gude ekfuru unu iwhe-e.

²⁸Tẹ Onye-Nwe-Ọha, bụ Jisọsu Kuráyisutu meeru unu g’unu hakọta eze-iwhe-ọma.